（1988ꈓ11ꆪ8ꑍꏃꈭꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꃀꇖꃢꌠꈿꅉꇬꉌꃹꈴꄉꌠ 2004ꈎ8ꆪ28ꑍꊰꈭꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꃀꊯꊪꃢꌠꈿꅉ《〈ꍏꉸꏓꂱꇭꉼꇩꇈꐥꇙꀕꀧꌋꃅꏦꃤ〉ꄺꀱꃆꂮꏤꐪ》ꇬꈴꋍꃢꌠꌌꄺꀱ 2009ꈎ8ꆪ27ꑍꊯꊪꈭꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꃀꊰꃢꌠꈿꅉ《ꏦꃤꄹꁆꄺꀱꌠꃆꂮꏤꐪ》ꇬꈴꑍꃢꌠꌌꄺꀱ 2016ꈓ7ꆪ2ꑍꊰꑋꈭꇩꏤꑭꊂꏓꂱꁧꎁꃀꀉꒉꈿꅉꀕꌤꏲꊈꑼꉼꃀꑍꊏꋋꃢꌠꈿꅉꌌꄺꀱ 2018ꈓ10ꆨ26ꑍꊯꌕꈭꇩꏤꑭꊂꏓꂱꁧꎁꃀꀉꒉꈿꅉꀕꌤꏲꊈꑼꉼꃀꃘꃢꌠꈿꅉ《〈ꍏꉸꏓꂱꇭꉼꇩꇈꐥꇙꀕꀧꌋꃅꏦꃤ〉ꑠꊯꉬꋐꌠꏦꃤꄺꀱꃆꂮꏤꐪ》ꇬꈴꌕꃢꌠꌌꄺꀱ）
ꎹ ꀨ
ꋍꊱꌠ ꏓ ꏦ
ꑍꊱꌠ ꇈꐥꇙꀕꌋꆀꋍꐤꅉꀧꌋꃅ
ꌕꊱꌠ ꇈꐥꇙꀕꏲꂠ
ꇖꊱꌠ ꏦꃤꃅꎁ
ꉬꊱꌠ ꁥ ꏦ
ꋍꊱꌠ ꏓ ꏦ
ꋍꏢꌠ ꇈꐥꇙꀕꀧꌋꃅ，ꇈꐥꇙꀕꁌꇐꈤ、ꈔꑍꒉꂯꌠꈭꋏ，ꒆꉻꀉꑌꑵꃅꐙꌠꌋꆀꒆꉻꐮꆽꏣꌠꏦꀧ，ꒆꉻꌧꑳꋈꄻꌠꄹꎆꂿꄷ，ꏦꃤꋌꋐꏤꄻ。
ꑍꏢꌠ ꍏꉸꏓꂱꇭꉼꇩꃄꁕꌋꆀꏲꌠꀉꁁꎾꁕꇬꄉ，ꇈꐥꇙꀕꀧꌋꃅꌋꆀꄚꃆꂮꃅꈧꌠꆏ，ꏦꃤꋌꋐꌬꇬꄉꄐ。
ꏦꃤꋌꋐꇬꏤꄻꄉꀧꌋꃅꌠꇈꐥꇙꀕꆹ，ꁌꇐꈤ、ꈔꑍꒉꂯꌠꅔꇬꐥ、ꒉꇬꐥꌠꇈꐥꇙꀕꌋꆀꒆꉻ、ꈆꑪ、ꐧꋦꁌꐨꀋꂿꑘꌠꅔꇬꐥꇈꐥꇙꀕꄜ。
ꏦꃤꋌꋐꏤꄻꄉꌠꇈꐥꇙꀕꌋꆀꋍꄻꇐꆹ，ꇈꐥꇙꀕꃤꈬꆸ（ꏿꌅ、ꏿꄚꐊ）、ꄹꁆꌋꆀꋍꇬꁥꒆꇐꄜ。
ꁌꇐꈤ、ꈔꑍꒉꂯꌠꒉꇬꐥꌠꇈꐥꇙꀕꈋꉈꀉꁁꒉꇬꐥꌠꇈꐥꇙꀕꏭꀧꌋꃅꌠꆹ，《ꍏꉸꏓꂱꇭꉼꇩꉛꑘꏦꃤ》ꑠꄚꃆꂮꏦꃤꏤꄻꄉꌠꌌꌬꇬꄉꄐ。
ꌕꏢꌠ ꇈꐥꇙꀕꌬꇐꅐꀦꆹꇩꏤꃤꉬꌠ。
ꇩꏤꆏꏦꃤꇬꈴꄉꇈꐥꇙꀕꈆꑪꎥꃪ、ꊿꇫꁰꉘꍔꄅꑠꀧꌋꃅꌋꆀꄚꃆꂮꐥꌠꎀꍹꌋꆀꑱꄜꏦꊒꌅꈌꈲꁧꏦꀧ。
ꇖꏢꌠ ꇩꏤꆏꇈꐥꇙꀕꏭꌌꂴꄉꀧꌋꃅ、ꏦꈴꌫꄻ、ꏦꇨꃅꍞꏲꌠꏥꏦꌬ，ꇈꐥꇙꀕꌌꈆꑪꃅꎥꃪꌠꏭꈐꊟꊋꊡ，ꉻꊿꇈꐥꇙꀕꉘꉚꉪꉻꀧꌋꃅ，ꊿꌋꆀꋌꐛꄮꐽꃅꀻꎆꌠꊥꎆ。
ꉬꏢꌠ ꇩꏤꆏꇈꐥꇙꀕꌋꆀꋍꐤꅉꋦꈭꀧꌋꃅ。ꑤꊐꌠꈋꉐꏓꂱꍔꃚꆏꇈꐥꇙꀕꌋꆀꋍꐤꅉꃆꂮꀧꌋꃅꄐꎖꐨꌋꆀꏁꁈꏤꄻ，ꄷꀋꁧꇈꐥꇙꀕꀧꌋꃅꎆꃀꌌꄐꌗꄉꌠꇬꇱꄉꄡꑟ。
ꇩꏤꆏꉻꊿ、ꏦꊿꌋꆀꀉꁁꎀꍹꏦꃤꇬꈴꄉꄖꁵ、ꎆꌌꇇꀨ、ꉌꇗꃅꁧꃤꃅꑠꃄꄟꇬꈴꄉꇈꐥꇙꀕꀧꌋꃅꈽ，ꇈꐥꇙꀕꀧꌋꃅꉻꈲꌤꑘꇬꊋꁈꄏꌠꏭꈐꊟꊋꊡ。
ꏦꃤꋌꋐꏤꄻꄉꌠꇈꐥꇙꀕꐤꅉꆹ，ꇈꐥꇙꀕꇈꈬꐥꄉꍔꄅꌠꃄꁕꀋꂿꑘꅉꄜ。
ꃘꏢꌠ ꎀꍹꌋꆀꑱꄜꈀꄸꑌꇈꐥꇙꀕꌋꆀꋍꐤꅉꀧꌋꃅꌠꋭꑘꐥ。ꏦꀋꈴꃅꇈꐥꇙꀕꒃꈹ、ꇈꐥꇙꀕꐤꅉꀜꐆꌠꃅꀋꉆ。
ꎀꍹꌋꆀꑱꄜꈀꄸꑌꐯꇯꄚꃆꂮꐥꌠꌤꃅꅉꌋꆀꌤꏲꅉꏭꏦꃤꋌꋐꇬꐆꌠꃅꐨꇬꏭꐴꀖꅀꅇꎹꌠꌅꈌꐥ。ꇈꐥꇙꀕꀧꌋꃅꀨꏲꌤꏲꅉꌋꆀꀉꁁꄚꃆꂮꐥꌠꌤꃅꅉ、ꌤꏲꅉꆏꐴꀖꅀꅇꎹꌠꃆꂮꏭ，ꇇꈤꃅꏦꃤꇬꈴꄉꀞꄻꄡꑟ。
ꏃꏢꌠ ꇩꃷꑼꌩꑘꏜꅔ、ꉛꑘꀨꏲꌤꏲꅉꆏꂱꄷꃅꇩꏤꑭꊂꅔꇬꐥꌠ、ꒉꇬꐥꌠꇈꐥꇙꀕꀧꌋꃅꌤꃅꌠꏭꀨꏲ。
ꑤꊐꌠꈋꉐꃅꄷꏓꂱꍔꃚꌩꑘꏜꅔ、ꉛꑘꀨꏲꌤꃅꅉꆏꂱꄷꃅꂱꑱꏲꑘꃄꁕꈐꅔꇬꐥꌠ、ꒉꇬꐥꌠꇈꐥꇙꀕꀧꌋꃅꌤꃅꌠꏭꀨꏲ。
ꉆꏢꌠ ꈁꐥꊐꌠꏓꂱꍔꃚꆏꊋꀥꇱꄉꇈꐥꇙꀕꀧꌋꃅꌠꄜꉺꉙꂘꌋꆀꈆꑪꌧꇐꁊꈴꌠꌤꃅ，ꅉꂫꊐꌠꉹꁌꐨꐥꌠꊨꏦꏱꄻꎀꍹ、ꐧꋦꎀꍹ、ꎆꏂꑘꌤꑘꌤꃅꅉ、ꉌꇗꃅꊿꈐꊟꊋꊡꌋꆀꊋꁈꄏꌊꇈꐥꇙꀕꀧꌋꃅꏦꃤꏦꇗꌋꆀꀧꌋꃅꌧꇐꄜꉺꌠꃅꄡꑟ。
ꂘꑘꏲꑘꌤꃅꅉ、ꌶꅉꆏꌶꌺꏭꇈꐥꇙꀕꀧꌋꃅꌧꇐꉙꂘꌠꃅꄡꑟ。
ꈨꏀꇢꈴꄜꆏꇈꐥꇙꀕꀧꌋꃅꏦꃤꏦꇗꌋꆀꀧꌋꃅꌧꇐꄜꉺꄉ，ꏦꐆꌠꃅꐨꏭꈋꍣꍞꏲꌠꃅꄡꑟ。
ꈬꏢꌠ ꇈꐥꇙꀕꀧꌋꃅꌋꆀꈆꑪꎥꃪꁁꏯꊌꐨꄇꇖꀕꌠꎀꍹꌋꆀꊿꆏ，ꑤꊐꌠꈋꉐꏓꂱꍔꃚꁳꇬꏭꈁꁠꁵꎻ。
ꑍꊱꌠ ꇈꐥꇙꀕꌋꆀꋍꐤꅉꀧꌋꃅ
ꊰꏢꌠ ꇩꏤꆏꇈꐥꇙꀕꏭꑵꁸꊐꁸꄉꀧꌋꃅ。
ꇩꏤꆏꇈꐥꇙꀕꁌꇐꈤ、ꈔꑍꒉꂯꌠꌌꀨꇬꄉꀧꌋꃅ。ꇩꏤꀨꇬꄉꇫꀧꌋꃅꌠꇈꐥꇙꀕꆏꁸꌊꋍꊐꌠꀧꌋꃅꌠꇈꐥꇙꀕꌋꆀꑍꊐꌠꀧꌋꃅꌠꇈꐥꇙꀕꃅꄉ。ꇩꏤꀨꇬꄉꀧꌋꃅꌠꇈꐥꇙꀕꂓꁱꄀꄉꌠꆏ，ꇩꃷꑼꇈꐥꇙꀕꏲꑘꀨꏲꌤꃅꅉꁳꊥꇫꄉꈆꑪꃅꄤꎖꈭꐨꏤꄻꄉ，ꄷꀋꁧꃅꐎꉬꈎꐛꄷꆏꄤꎖꃆꂮꇬꈴꂓꁱꄀꄉꌠꋊꐽꃅ。ꇩꏤꀨꇬꄉꀧꌋꃅꌠꇈꐥꇙꀕꂓꁱꄀꄉꌠꆏꄜꌊꇩꃷꑼꁳꈌꁧꄉꉻꄜꎻ。
ꃅꄷꀨꇬꄉꀧꌋꃅꌠꇈꐥꇙꀕꆹ，ꇩꏤꀨꇬꄉꀧꌋꃅꌠꇈꐥꇙꀕꉇꄉꈭꐨ，ꌜ、ꊨꏦꏱꅉꐎ、ꎂꏲꏃꀨꇬꄉꀧꌋꃅꌠꇈꐥꇙꀕꄜ。ꃅꄷꀨꇬꄉꀧꌋꃅꌠꇈꐥꇙꀕꂓꁱꄀꌠꆏ，ꌜ、ꊨꏦꏱꅉꐎ、ꎂꏲꏃꏓꂱꍔꃚꊥꇫꄉꈆꑪꃅꄤꎖꈭꐨꏤꄻ、ꋊꐽꇈꉻꄜ。
ꒆꉻ、ꈆꑪ、ꐧꋦꁌꐨꀋꂿꑘꃅꐥꌠꅔꇬꐥꇈꐥꇙꀕꂓꁱꄀꌠꆹ，ꇩꃷꑼꇈꐥꇙꀕꀨꏲꌤꃅꅉꁳꊥꇫꄉꈆꑪꃅꄤꎖꈭꐨꏤꄻ、ꋊꐽꇈꉻꄜ。
ꊯꊪꏢꌠ ꑤꊐꌠꈋꉐꃅꄷꏓꂱꍔꃚꇈꐥꇙꀕꀧꌋꃅꀨꏲꌤꃅꅉꆏ，ꄚꃆꂮꐥꌠꈆꑪꎥꃪꏲꉻꏤꄮꁨꃅꊥꇫꅀꊂꎭꄉꇈꐥꇙꀕꌋꆀꋍꐤꅉꃆꂮꍤꄻ、ꍞꎖꌋꆀꄤꎖꄉ，ꇈꐥꇙꀕꌋꆀꋍꐤꅉꄊꉣꋈꄻꐛꒆꄡꑟ。
ꇈꐥꇙꀕꌋꆀꋍꐤꅉꃆꂮꍤꄻ、ꍞꎖꌋꆀꄤꎖꌠꆏꄚꐰꐊꇐꋋꈨꇫꐊꄡꑟ：
（ꋍ）ꇈꐥꇙꀕꇈꈬꐤꅉ、ꑵꑫꃷꁨꌋꆀꐛꉻ；
（ꑍ）ꇈꐥꇙꀕꐤꅉꃅꊂ、ꒆꉻꐛꐪ；
（ꌕ）ꇈꐥꇙꀕꌋꆀꋍꐤꅉꇬꏭꁦꏖꅍꀋꉬꀋꉆꌠ；
（ꇖ）ꇈꐥꇙꀕꊿꁳꌌꍔꄅꃆꂮꑠꀉꁁꌌꍤꄻ、ꍞꎖꌋꆀꄤꎖꈉꌠꐊꇐ。
ꊰꑋꏢꌠ ꇩꃷꑼꇈꐥꇙꀕꀨꏲꌤꃅꅉꆏꇩꃷꑼꄚꃆꂮꐥꌠꌤꃅꅉꌋꆀꐮꐊꄉ，ꇈꐥꇙꀕꌋꆀꋍꐤꅉꃆꂮꍤꄻ、ꍞꎖꌋꆀꄤꎖꌠꊌꐨꃆꂮꇬꈴ，ꇈꐥꇙꀕꐤꅉꀋꂿꑘꌠꂓꁱꄀꌠꐰꏤꄷꀋꁧꄜꃑꄡꑟ。
ꌜꊐꌠꈋꉐꏓꂱꍔꃚꆏꏦꃤꇬꈴꄉꄚꃆꂮꐥꌠꋌꐛꀧꌋꃅꃄꁕꏤꄻ，ꇈꐥꇙꀕꌋꆀꋍꐤꅉꀋꂿꑘꌠꀧꌋꃅ，ꇈꐥꇙꀕꐤꅉꋦꈭꀧꌋꃅ、ꀱꐛꅉꐛꌋꆀꄻꃪ。ꄚꃆꂮꐥꌠꋌꐛꀧꌋꃅꃄꁕꏤꄻꇎꏦꀋꐥꑴꌦꌠꆏ，ꑤꊐꌠꈋꉐꏓꂱꍔꃚꆏꑋꁮꉆꁮ（ꉛ）ꒃꈹꀋꉆꅉꏤꄻꄉ、ꑋꁮꉆꁮ（ꉛ）ꒃꈹꀋꉆꊬꌠꏤꄻꄉꑠꀉꁁꐛꇷꌬꄉꇫꀧꌋꃅꉆ。
ꄚꃆꂮꐥꌠꋌꐛꀧꌋꃅꅉꈐꀉꁁꐥꇐꊙꌊꇁ、ꌩꀉꄂꊪꏽ、ꂿꑘꁬꋌꇱꇨꑠꃅꄉꊿꇈꐥꇙꀕꐥꐨꇬꃸꆽ、ꇷꇋꑠꏢꄉꅀꃅꀋꉆ。
ꄚꃆꂮꐥꌠꋌꐛꀧꌋꃅꅉꆏ，ꄚꃆꂮꐥꌠꏦꃤꏦꇗꏤꐪꇬꈴꄉꏤꄻꌋꆀꏲꂠ。
ꊯꌕꏢꌠ ꑤꊐꌠꈋꉐꏓꂱꍔꃚꌋꆀꋍꄚꃆꂮꐥꌠꌤꃅꅉꄚꃆꂮꐥꌠꀖꁉꌫꄻꄐꎖꌠꁰꄻꄮꇬ，ꇈꐥꇙꀕꌋꆀꋍꐤꅉꀧꌋꃅꈉꐨꋒꐯꋒꃅꉪꏡꄉ，ꄤꎖꄐꎖꌠꃄꌬꇬꇈꐥꇙꀕꌋꆀꋍꀀꅉꀧꌋꃅꌠꉻꄜꇬꁧꏖꇁꏭꐛꌠꎥꃪ、ꂴꄐꎖꌋꆀꄤꎖ，ꄐꎖꃄꌬꇬꁧꏖꐨꀋꉾꌠꐥꇁꉆꌠꋒꇧꎭꅀꊨꒊꄡꑟ。
ꄚꃆꂮꐥꌠꋌꐛꀧꌋꃅꅉꋈꄻꌠꏦꃤꏦꇗꏤꄻꄉꇬꋈꄻꀋꉆꌠꐘꃆꏢꇋ。ꃏꏸꐛꅉ、ꎸꈜ、ꄇꈜ、ꈲꒉꒉꄆ、ꇊꑴꎿ、ꇊꊐꎿꑠꋈꄻꐘꑘꌊꄻꅉꁁꏯꌋꇬꆏ，ꄚꃆꂮꐥꌠꋌꐛꀧꌋꃅꅉ、ꇈꐥꇙꀕꈴꈜꋒꏆꇧꎭꄡꑟ；ꏆꀋꄐꌠꆏ，ꇈꐥꇙꀕꈴꈜ、ꉛꈴꉁꈾꋈꄻꑠꏁꁈꏁꌬꄉ，ꇈꐥꇙꀕꏭꁧꏖꐨꀋꐥꌠꋊꇧꎭꅀꊨꒊꄡꑟ。
ꋈꄻꐘꃆꄚꃆꂮꐥꌠꋌꐛꀧꌋꃅꅉ、ꇈꐥꇙꀕꏮꈴꉆꌠꈴꈜꇬꁧꏖꇁꏭꐛꌠꆏ，ꋦꈭꁦꏖꈋꍣꁱꐘꍤꄻꈌꁧꌤꃅꅉꆏꋦꈭꁦꏖꐨꈋꍣꁱꐘꍤꄻꈌꁧꄮꇬ，ꇩꏤꃤꀨꇬꄉꀧꌋꃅꌠꇈꐥꇙꀕꇬꃆꂮꐥꌠꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꉜꐨꅱꄻꄡꑟ；ꃅꄷꀨꇬꄉꀧꌋꃅꌠꇈꐥꇙꀕꃆꂮꐥꌠꆏ，ꌜ、ꊨꏦꏱꅉꐎ、ꎂꏲꏃꏓꂱꍔꃚꇈꐥꇙꀕꀧꌋꃅꀨꏲꌤꏲꅉꉜꐨꅱꄻꄡꑟ。
ꊯꇖꏢꌠ ꇈꐥꇙꀕꀧꌋꃅꀨꏲꌤꃅꅉꈁꐥꊐꌠꆏꋦꈭꇈꐥꇙꀕꏭꁧꏖꌠꍞꆫ、ꍞꎖꄡꑟ。ꋦꈭꁧꏖꒉꄸꃅꇈꐥꇙꀕꏭꉮꐪꐤꄮꇬ，ꇈꐥꇙꀕꀧꌋꃅꀨꏲꌤꏲꅉꆏꄚꃆꂮꐥꌠꌤꏲꅉꌋꆀꐯꇯꄉꌌꍤꄻꂥꀘꄡꑟ。
ꊯꉬꏢꌠ ꇩꏤꅀꃅꄷꀨꇬꄉꀧꌋꃅꌠꇈꐥꇙꀕꋌꐛꃗꉮ、ꀉꒉꀊꂾꌠꋦꈭꍍꆀꌤꑠꉘꀋꇉꃅꇫꅐꌠꊝꇁꄮꇬꆏ，ꃅꄷꏓꂱꍔꃚꆏꋋꇅꃅꃛꊸꊜꄻꈭꋏꇇꀨꏁꁈꏁꌬꄡꑟ。
ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꆏꇩꏤꄚꃆꂮꐥꌠꏤꄻꄉꌠꇬꈴꄉꊥꇫꄉꇈꐥꇙꀕꌌꏣꏑꈭꋏꌠꌤꃅꄡꑟ。
ꇈꐥꇙꀕꊩꎴꈭꋏꌠꎴꄉꇈꐥꇙꀕꌋꆀꋍꄻꇐꃼꃷꌠꏢꇋ。
ꊰꃘꏢꌠ ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉ、ꎇꃀꆅꉁꆄꄻꀨꏲꌤꏲꅉꆏ，ꄉꅍꃅꎁꁸꄉꇈꐥꇙꀕꆅꀦꏭꍞꎖ，ꊥꇫꄉꄐꎖ、ꂴꄜꑠꌤꃅ，ꄷꀋꁧꏤꐪꇬꈴꄉꇈꐥꇙꀕꆅꐨꃛꊸꌠꊝꌠꃅꐨꏤꄻꄉ，ꄜꌊꋋꊐꌠꏓꂱꍔꃚꁳꈌꁧꅀꅺꇰꄉꄡꑟ。
ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉ、ꎇꃀꍅꑓꆅꉚꀨꏲꌤꏲꅉ、ꁦꎴꀨꏲꌤꃅꅉꆏ，ꄉꅍꃅꎁꁸꄉꌄꇤꌠꇬꈴꄉꊿꎇꃀꍅꑓꐯꇯꊌꌠꇵꆅꃆꂮꐥꌠꇙꀕꇵꆅꉃꄻꄴꏮꏲꂠꌤꃅꄡꑟ。
ꊰꏁꏢꌠ ꇩꏤꆏꊋꀥꇱꄉꇈꐥꇙꀕꍔꅐꅐꀦꏭꀧꌋꃅ，ꇈꐥꇙꀕꈔꑍꒉꂯꌠꏭꈭꋏꐨꐥꃅꀧꌋꃅ。
ꇩꃷꑼꇈꐥꇙꀕꀧꌋꃅꀨꏲꌤꏲꅉꆏꇩꃷꑼꄚꃆꂮꐥꌠꌤꏲꅉꌋꆀꐯꇯꄉꇈꐥꇙꀕꍔꅐꅐꀦꀧꌋꃅꌠꌋꆀꌫꄻꄐꎖꄉꌠꏤꄻꄉ，ꇩꏤꇈꐥꇙꀕꍔꅐꅐꀦꍔꊧꅉꋈꄻꄉ，ꉪꇩꏤꅐꇐꁌꇐꈤꌠ、ꈔꑍꒉꂯꄉꀐꌠꇙꀕꍔꅐꅐꀦꆏꌌꀨꇬꄉꀧꌋꃅꄉꄡꑟ。
ꊰꉆꏢꌠ ꄚꃆꂮꐥꌠꃅꄷꏓꂱꍔꃚꆏꏁꁈꏁꌬꄉ，ꇈꐥꇙꀕꃗꉮꇁꏭꐛꌠꄴꏮ、ꋎꍅ，ꊿꎇꃀꍅꑓꋬꂻꌋꆀꂿꑘ、ꌩꑘꒃꅐꌠꏦꀧꄡꑟ。
ꊯꈬꏢꌠ ꏦꃤꋋꏢꇬꏤꄻꄉꌠꀧꌋꃅꌠꇈꐥꇙꀕꀧꌋꃅꌠꒉꄸꃅ，ꊿꌦꈔ、ꂿꑘꋦꁧꅀꀉꁁꎆꋚꋌꎼꁮꑋꌠꆏ，ꃅꄷꋌꈚꇬꏓꂱꍔꃚꁳꀵꊒꇬꁳꎻ。ꑭꋧꌠꏡꁈꆏꌜ、ꊨꏦꏱꅉꐎ、ꎂꏲꏃꏓꂱꍔꃚꁳꏤꄻꎻ。ꄚꃆꂮꐥꌠꃅꄷꏓꂱꍔꃚꆏꄜꏂꀧꏲꉻꄹꇙꄉꇈꐥꇙꀕꉮꄻꄉꀵꊒꄜꏂꀧꃅꑘꃅꉆ。
ꄚꃆꂮꐥꌠꃅꄷꏓꂱꍔꃚꆏꇩꏤꀨꇬꄉꀧꌋꃅꌠꇈꐥꇙꀕꇱꉮꄻꌠꏁꁈꌋꆀꀵꊒꈁꈉꌠꌫꎆꄴꏮ、ꋎꍅꄉ，ꍏꑷꏱꎆꌌꇩꏤꄚꃆꂮꐥꌠꏤꄻꄉꌠꇬꈴꄉꇬꏭꇇꀨꎻ。
ꌕꊱꌠ ꇈꐥꇙꀕꏲꂠ
ꑍꊏꏢꌠ ꄚꃆꂮꐥꌠꋌꐛꀧꌋꃅꅉꌋꆀꑋꁮꉆꁮ(ꉛ)ꒃꈹꀋꉆꅉ、ꑋꁮꉆꁮ（ꉛ）ꒃꈹꀋꉆꈍꈐꇬ，ꇈꐥꇙꀕꒃꈹꌋꆀꀉꁁꇈꐥꇙꀕꐤꄻꍔꄅꌠꇬꈭꋍꈜꇈꌠꃅꀋꉆ，ꄚꏦꃤꏦꇗꐚꀕꃅꏤꄻꄉꌠꆏꉇꄉ。
ꇈꐥꇙꀕꀀꇙꄉꎞꏮꄮꇬ，ꄚꂴꐕꌠꏤꄻꄉꌠꃄꁕꉇꄉꄓꇙꏮꈧꈴꈜꈐꇬ，ꇈꐥꇙꀕꒃꈹꀋꉆꄷꀋꁧꏦꇨꃅꀉꁁꇈꐥꇙꀕꐤꄻꍔꄅꌠꇬꈭꑴꈜꑲꌠꃅꀋꉆ。ꀀꇙꈴꈜꈍꈐꌋꆀꇈꐥꇙꀕꐤꄻꍔꄅꃅꈧꌠꇬꄉꇤꌠꐊꇐꆏ，ꑤꊐꌠꈋꉐꏓꂱꍔꃚꅀꋍꇈꐥꇙꀕꀧꌋꃅꀨꏲꌤꏲꅉꁳꏤꄻꄉꌌꄜꃑꎻ。
ꑍꊏꋋꏢꌠ ꇩꏤꀨꇬꄉꀧꌋꃅꌠꇈꐥꇙꀕꒃꈹ、ꌉꄻꌠꃅꀋꉆ。
ꈆꑪꃅꎥꃪ、ꋍꁥꃅꋎꍅ、ꆅꁧꆅꀦꆅꊌꐨꍞꎖꅀꀉꁁꐛꐨꐋꀋꌡꌠꐛꅹꃅ，ꇩꏤꋍꊐꌠꀧꌋꃅꌠꇈꐥꇙꀕꒃꈹꄻꅐꌠꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꏭꐋꀋꌡꃅꒃꈹꉆꊫꄳꇖꂟꄡꑟ；ꇩꏤꑍꊐꌠꀧꌋꃅꌠꇈꐥꇙꀕꈹꒃꄻꅐꌠꆏ，ꌜ、ꊨꏦꏱꅉꐎ、ꎂꏲꏃꏓꂱꍔꃚꇈꐥꇙꀕꀧꌋꃅꀨꏲꌤꏲꅉꏭꐋꀋꌡꃅꒃꈹꉆꌠꈌꁧꊫꄳꇖꂟꄡꑟ。
ꑍꊏꑋꏢꌠ ꇩꏤꀨꄉꀧꌋꃅꌠꀋꉬꌠꇈꐥꇙꀕꒃꈹꌠꆏ，ꏦꃤꇬꈴꄉꑤꊐꌠꈋꉐꃅꄷꏓꂱꍔꃚꇈꐥꇙꀕꀧꌋꃅꀨꏲꌤꏲꅉꍤꄻꈌꁧꌠꒃꈹꊫꄳꊌꅜ，ꄷꀋꁧꒃꈹꃷꁨꏤꄉꌠꇬꈴꄉꃅꄡꑟ。
ꑍꊎꌕꏢꌠ ꒃꈹꊿꆏꐋꀋꌡꃅꈌꁧꄉꌠꒃꈹꉆꊫꄳ、ꒃꈹꊫꄳꏤꄻꄉꌠꉹꑫ、ꃷꁨ、ꃅꅉ、ꌬꅍ、ꏡꁈꌋꆀꄮꈉꇬꈴꄉꒃꈹꄡꑟ。
ꅳꍩꌌꅥꈹꌠꆏ，ꏦꃤꇬꈴꄉꇬꉢꌤꃅꅉꃑꁵꌠꅳꍩꌌꊫꄳꒃꊊꎻꄡꑟ。
ꑍꊎꇖꏢꌠ ꅋꑱꁬꋌ、ꂨꍉꎊꈬ、ꄆꍉꅥꅍꅀꄆꌅꊏꅰꉁꈾꉈꑴꉆꑎꅍ、ꉆꄵꅍ、ꁿꇓ、ꄔꀖꃅꉁꈾꑠꌌꄉꒃꈹꀋꉆ，ꈊ꒜ꄆꄔꌌꒃꈹ、ꈔꋏꐨꐥꃅꒃꈹ、ꀀꅉꐆ、ꃆꄔꌌꇉ、ꃅꇴꌌꌤ、ꉛꂦꈄꏍꌌꐱꃬꑠꏡꁈꌌꄉꈹꀋꉆ，ꄚꈆꑪꎥꃪꇬꃶꐚꃅꉛꂦꈄꏍꌌꐱꃬꄉꒃꈢ、ꄆꌅꌌꊏꅰꄉꒃꅜꄻꅐꌠꆏꉇꄉ。
ꂴꐕꌠꏤꄻꄉꌠꉇꄉꈭꐨꌬꀋꉆꌠꒃꈹꉁꈾꌋꆀꏡꁈꆏ，ꑤꊐꌠꈋꉐꃅꄷꏓꂱꍔꃚꁳꏤꄻꄉꄷꀋꁧꌌꉻꄜꎻ。
ꑍꊎꉬꏢꌠ ꇩꏤꆏꄚꃆꂮꐥꌠꈆꑪꃅꎥꃪꏲꉻꊋꁈꄏꄉꐥꇐꀧꌋꃅꂿꄷꊿꇫꁰꉘꍔꄅꄉꇩꏤꀨꄉꌠꇈꐥꇙꀕꀧꌋꃅ。
ꂴꐕꌠꏤꄻꄉꌠꇬꀋꐊꌠꊿꇫꁰꉘꍔꄅꄉꇩꏤꀨꇬꄉꌠꇈꐥꇙꀕꀧꌋꃅꌠꆏꈌꁧꄹꏦꌬ。ꊿꇫꁰꉘꍔꄅꄉꇩꏤꀨꇬꄉꌠꇈꐥꇙꀕꀧꌋꃅꌠꆏ，ꌜ、ꊨꏦꏱꅉꐎ、ꎂꏲꏃꏓꂱꍔꃚꇈꐥꇙꀕꀧꌋꃅꀨꏲꌤꏲꅉꁳꈌꁧꎻꄉ，ꊿꇫꁰꉘꍔꄅꄉꉆꌠꊌꅜꄡꑟ，ꄚꇩꃷꑼꈌꁧꌤꏲꅉꐚꀕꃅꏤꄻꄉꌠꆏꉇꄉ。
ꊿꇫꁰꉘꍔꄅꄉꇩꏤꀨꄉꀧꌋꃅꌠꇈꐥꇙꀕꆏꊿꇫꉘꉚꄉꌺꇗꃅ，ꐥꇐꑫꏓꋏ、ꉘꉚꄉꉣꌋꆀꑱꄂꊫꌐꃷꁨꄻꄉꄡꑟ。ꐥꑫꀧꌋꃅꂿꄷꇈꈬꐥꌠꅐꀦꌌꌫꄻꈇꌠꆏ，ꏦꃤꋌꋐꏤꐪꑍꊏꋋꏢꌠꌋꆀꑍꊎꌕꏢꌠꏤꐪꌌꌬꇬꄉꄐ。
ꏦꃤꋌꋐꇬꈁꉉꌠꊿꇫꁰꉘꍔꄅꄉꌺꋊꄷꌠꆏ，ꋋꆹꊿꇫꁰꉘꍔꄅꌠꋎꍅꇎꏦꇂꃴꄉꒆꎼꇁꌠꑱꄂꄷꀋꁧꋍꑴꅉꊿꇫꁰꉘꍔꄅꄉꌠꋎꍅꇎꏦꇂꃴꄉꒆꐛꌠꄜ。
ꑍꊏꃘꏢꌠ ꊿꇫꁰꉘꍔꄅꄉꇩꏤꌌꀨꇬꄉꀧꌋꃅꌠꇈꐥꇙꀕꆏꐥꑫꀧꌋꃅꌠꌋꆀꋍꈆꑪꎥꃪꌠꇬꈲꁧꐥ，ꇈꐥꇙꀕꈧꌠꅐꀦꀜꐆꀋꉆ，ꄷꀋꁧꇈꐥꇙꀕꐥꐨꇬꈴꄉꋍꐹꄻꌶꅉꌋꆀꐤꄻꍔꄅ、ꁦꎴꋬꂻꇎꏦꐥꄉꎻ，ꋍꉘꉚꑞꅉ、ꉹꑫ、ꀻꎆꄉꈁꌋꆀꐮꄉꄐꌠꌤꃅꅉ、ꉁꈾ、ꇮꇐꐥꌠꆏ，ꄚꃆꂮꐥꌠꇮꇐꎕꏦꌋꆀꇵꆅꄴꏮꈉꐨꇬꄐꊒ，ꇈꐥꇙꀕꏭꇧꊋꀋꉆꄡꑟ。
ꌜꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꆏꇩꏤꀨꇬꄉꀧꌋꃅꌠꇈꐥꇙꀕꀧꌋꃅꌠꈉꐨꇬꈴꄉ，ꇩꏤꀨꇬꄉꀧꌋꃅꌠꇈꐥꇙꀕꄝꃑꇈꈬꐥꇧꎭꌠꌤꃅꌠꊥꇫꄉꃅꉆ。
ꑍꊏꏁꏢꌠ ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꐛꅐꇐꃷꄻ、ꃻꄻ、ꌌꌬꀋꉆ。
ꈆꑪꎥꃪ、ꊿꇫꁰꉘꍔꄅ、ꉹꁌꄉꀦꌡꈩ、ꁱꀕꍸꇐꀧꌋꃅꅀꀉꁁꐋꀋꌡꃆꂮꃅꄉ，ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐꃷꄻ、ꃻꄻ、ꌫꄻꈇꌠꆏ，ꌜ、ꊨꏦꏱꅉꐎ、ꎂꏲꏃꏓꂱꍔꃚꇈꐥꇙꀕꀧꌋꃅꀨꏲꌤꏲꅉꁳꈌꁧꎻ，ꄷꀋꁧꏤꐪꇬꈴꄉꌐꌬꌐꂷꊌꅜꌋꆀꌫꄻ，ꎹꈹꉆꌠꄉꀧ，ꄚꇩꃷꑼꈌꁧꌤꏲꅉꏭꀉꁁꏤꐪꐥꌠꆏꉇꄉ。
ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꐛꅐꇐꌐꌬꌐꂷꌬꌠꈍꈐꌋꆀꏲꂠꏡꁈꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꁳꏤꄻꎻ。
ꇩꏤꀨꇬꄉꀧꌋꃅꌠꇈꐥꇙꀕꀋꉬꌠꃷꄻ、ꌫꄻꌠꆏ，ꒃꈹ、ꈏꃹꉇꅐꌠꑠꏦꊒꇁꀦꊩꀽꌠꇲꁵꄡꑟ。
ꏦꃤꋋꏢꑍꐕꌠ、ꇖꐕꌠꏤꄻꄉꌠꇈꐥꇙꀕꃷꄻꌠꆏ，ꉈꑴꏦꃤꇬꈴꄉꆅꍤꆅꑲꊫꌐꄸꇬꇯꄉꄡꑟ。
ꑍꊏꉆꏢꌠ ꊿꇫꁰꉘꍔꄅꇮꇐꐛꒆꎍꐽꌠꇩꏤꀨꇬꄉꌠꇈꐥꇙꀕꏭꀧꌋꃅ，ꈆꑪꇬꈴꄉꉉꈻꇈ，ꌌꇩꃷꑼꇈꐥꇙꀕꀧꌋꃅꀨꏲꌤꏲꅉꏤꄻꄉꌠꊿꇫꁰꉘꍔꄅꌠꇩꏤꀨꇬꄉꀧꌋꃅꌠꇈꐥꇙꀕꂓꁱꄀꄯꒉꇬꇱꄉ。ꌌꂓꁱꄀꄯꒉꇬꇱꄉꌠꇈꐥꇙꀕꌋꆀꋍꄻꇐꆏ，ꊿꇫꁰꉘꍔꄅꉆꊫꌐꌌꄉ，ꌜ、ꊨꏦꏱꅉꐎ、ꎂꏲꏃꏓꂱꍔꃚꇈꐥꇙꀕꀧꌋꃅꀨꏲꌤꏲꅉꎕꄻꌠꃅꈎꒃꅐꃷꁨꇬꈴꄉꈛꎂꃅꌐꌬꌐꂷꊌꅜ，ꌐꌬꌐꂷꇬꈴꌌꃷꄻꌋꆀꌫꄻꃅꇬꆏ，ꐪꎹꀦꎹꉆ。
ꏦꃤꋌꋐꊰꏢꌠꏤꄻꄉꌠꇩꏤꀨꇬꄉꀧꌋꃅꌠꇈꐥꇙꀕꂓꁱꄀꄯꒉꀧꌋꃅꌠꌌꋊꄻꄮꇬ，ꇈꈬꐥꌠꉹꑫꏭꀧꌋꃅꃆꂮꇬꈴꄉ，ꂴꐕꌠꏤꄻꄉꌠꄚꃆꂮꐥꌠꊿꇫꁰꉘꍔꄅꇮꁈꐛꀕꎍꐽꌠꇈꐥꇙꀕꏭꆏ，ꌌꇩꏤꀨꇬꄉꀧꌋꃅꌠꇈꐥꇙꀕꂓꁱꄀꄯꒉꁱꄉꌠꇬꀋꇱꃅ，ꇈꈬꐥꌠꌋꆀꐯꀋꌡꌠꏱꄻꏁꁈꃄꌬꉆ，ꄚꏦꃤꋌꋐꇬꑍꊎꉬꏢꌠꑍꐕꌠꌋꆀꏦꃤꋋꏢꋍꐕꌠꇬꏤꄻꄉꌠꇬꈴꄉꊿꇫꁰꉘꍔꄅꊫꌐꌋꆀꌐꌬꌐꂷꊌꅜꄡꑟ。
ꑍꊎꈬꏢꌠ ꇈꐥꇙꀕꌋꆀꋍꄻꇐꌌꌬꇬꆏ，ꊿꇫꁰꉘꍔꄅꌠꌌꇗꉘꉚꌠꌌꀨꇬꄉ，ꇈꈬꐥꌠꉹꑫꀧꌋꃅꇬꈲꐪꐥ，ꒆꉻꌧꑳꋈꄻꌠꇖꐨꇬꄉꄐ，ꐧꋦꄉꉻꑌꇐꉜꁨ，ꏦꃤꏦꇗꌋꆀꇩꏤꄚꃆꂮꐥꌠꏤꐪꇬꍬꄡꑟ。
ꇈꐥꇙꀕꌋꆀꋍꄻꇐꌌꁬꋌꃅꀰꏢꌋꆀꌬꈧꌠꆏ，ꉈꑴꄚꃆꂮꐥꌠꁬꋌꏲꂠꏦꃤꏦꇗꇬꍬꄡꑟ。
ꌕꊰꏢꌠ ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꐛꅐꇐꌌꄻꄉꌠꋠꇐ，ꀋꉬꀐꇬꏦꊒꇁꀦꊩꀽꀋꄉꌠꇩꏤꀨꇬꄉꀧꌋꃅꌠꇈꐥꇙꀕꀋꉬꌠꌋꆀꋍꄻꐛꅐꇐꌌꄻꄉꌠꋠꇐꒃꅐ、ꀰꏢꌬꈧꀋꉆ。
ꌌꋟꅝꂿꄷꏦꃤꇬꀋꈴꃅꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐꃻꄻꀋꉆ。
ꌕꊰꋋꏢꌠ ꇈꐥꇙꀕꌌꃷꄻ、ꃻꄻ、ꌌꌬꀋꉆꌠꅀꌬꀋꉆꌠꒃꈹꌫꉂꌫꈾꌌꀊꐯꈭꃅꄛꇰꌠꃅꀋꉆ。ꏦꐆꄉꇈꐥꇙꀕꄻꇐꃷꄻ、ꃻꄻ、ꌌꌬꌠꎁꃅꀊꐯꈭꃅꄛꇰꌠꃅꀋꉆ。
ꌕꊰꑋꏢꌠ ꈄꏍꃷꄻꅉ、ꃷꇐꃼꇇꃷꎏꑠꃼꇇꃄꅉꆏ，ꏦꐆꄉꇈꐥꇙꀕꌋꆀꋍꄻꇐꃷꄻ、ꃻꄻ、ꌫꄻꅀꌬꀋꉆꌠꒃꈹꉁꈾꎁꃅꃼꇇꃅꁧꃤꃅꌠꇲꁵꀋꉆ。
ꌕꊯꌕꏢꌠ ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐ、ꏦꃤꋌꋐꑍꊏꉆꏢꌠꑍꐕꌠꇬꏤꄻꄉꌠꇈꐥꇙꀕꌋꆀꋍꄻꇐꎞ、ꌌ、ꌞꑤꈋꉈꎭꌠꆏ，ꏦꃤꋌꋐꑍꊏꋋꏢꌠ、ꑍꊎꉬꏢꌠ、ꑍꊏꏁꏢꌠꅀꑍꊏꉆꏢꌠꏤꄻꄉꌠꃅꉆꊫꌐ、ꈌꁧꁱꐘꐒꄉꋐꌠꅀꌐꌬꌐꂷ，ꉈꑴꆅꍤꆅꑲꊩꀽꄯꒉꌌꄉꅀꇱꄉꄡꑟ。
ꇩꏤꀨꇬꄉꀧꌋꃅꌠꇈꐥꇙꀕꀋꉬꌠꎞꎭꌊꑤꉈꅐꁧꌠꆏ，ꒃꈹ、ꈏꃹꉇꅐꑠꏦꊒꇁꀦꊩꀽꌠ，ꉈꑴꆅꍤꆅꑲꊩꀽꌠꌌꄡꑟ。
ꌕꊯꇖꏢꌠ ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꆏꈆꑪꎥꃪ、ꊿꇫꁰꉘꍔꄅ、ꉹꁌꍔꀦꌡꈩꑠꇈꐥꇙꀕꌋꆀꋍꄻꇐꌌꌬꈧꌠꏭꍞꊟꏲꂠꄡꑟ。
ꑤꊐꌠꈋꉐꏓꂱꍔꃚꀉꁁꄚꃆꂮꐥꌠꌤꏲꅉꆏ，ꃅꎁꁸꃅꌠꇬꈴꄉꇈꐥꇙꀕꌋꆀꋍꄻꇐꃷꄻ、ꃻꄻ、ꌌꌬ、ꎞꎭ、ꌞꎭꑠꃅꈧꌠꏭꍞꊟꍤꄻꄡꑟ。
ꌕꊯꉬꏢꌠ ꍏꉸꏓꂱꇭꉼꇩꏤꄻꅀꇫꐊꈽꌠꇩꏹꉻꏤꄉꌠꇬꃅꀋꉆꅀꏢꑲꄉꌠꃼꇇꇬꇈꐥꇙꀕꅀꋍꄻꇐꂓꁱꄀꄉꌠꆹ，ꇩꏤꈔꑍꒉꂯꄉꌠꐥꇐꈏꃹꉇꅐꏲꂠꏲꉻꁳꏤꄻ、ꋊꐽꄷꀋꁧꄛꇰꎻ。
ꈏꃹꉇꅐꌠꆏꄚꂴꐕꌠꂓꁱꄀꄯꒉꇬꇱꄉꌠꇈꐥꇙꀕꅀꋍꄻꇐ，ꉇꅐꇩꏤꀨꇬꄉꀧꌋꃅꌠꇈꐥꇙꀕꅀꋍꄻꇐꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꅀꇩꃷꑼꁳꈌꁧ，ꄷꀋꁧꇩꏤꈔꑍꒉꂯꌠꐥꇐꈏꃹꉇꅐꏲꂠꏲꉻꍤꃑꌠꈏꃹꉇꅐꉆꌠꊫꄳꄯꒉꊌꅜꄡꑟ。ꎿꀸꆏꏦꃤꇬꈴꄉꈏꃹꉇꅐꇬꆅꍤꆅꑲꌠꃅ，ꈏꃹꉇꅐꉆꌠꊫꄳꄯꒉ、ꆅꍤꆅꑲꌠꊫꄳꄯꒉꌌꏤꐪꇬꈴꄉꈜꀸꇬꈴꌠꇇꈴꅍꀞꄻ。
ꈆꑪꇮꇐꂁꇐꃆꂮꐥꌠꇈꐥꇙꀕꐥꑫꌌꉇꅐꇬꆏ，ꇩꃷꑼꄚꃆꂮꐥꌠꏤꐪꇬꈴꄉꀞꄻ。
ꌌꏦꃤꋋꏢꋍꐕꌠꂓꁱꄀꄉꌠꇬꇱꄉꌠꇈꐥꇙꀕꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꍤꄻꈌꁧꇈ，ꏦꃤꋌꋐꌠꌬꇬꄉꄐꌠꈍꈐꆏꇩꏤꀨꇬꄉꀧꌋꃅꌠꇈꐥꇙꀕꃅꄉꏲꂠꉆ。
ꌕꊰꃘꏢꌠ ꇩꏤꆏꇈꐥꇙꀕꀧꌋꃅꌋꆀꄚꃆꂮꐥꌠꏦꌬꃅꈧꌠꇩꏹꇷꃅꌋꆀꐮꈴꌠꊥꇫꄉꃅ；ꇈꐥꇙꀕꌋꆀꋍꄻꇐꂁꃼꂁꃷꌠꌋꆀꏦꀋꊒꃅꃼꇇꃅꌠꄴꏮ、ꇇꇩꍈꌠꌤꃅꅉꋮꄮꉺꏦꄻꐛ，ꂁꃼꂁꃷꌠꌋꆀꏦꀋꊒꃅꃼꇇꃅꌠꄴꏮ、ꇇꇩꍈꌠꃅ。
ꌕꊰꏁꏢꌠ ꇩꉈꄉꇈꐥꇙꀕꐥꇐꐥꑫꊙꌊꇁꌠꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꁳꈌꁧꎻꄡꑟ。ꇩꉈꄉꏦꃤꋌꋐꌕꊯꉬꏢꌠꋍꐕꌠꂓꁱꄀꄉꌠꄯꒉꇬꐊꌠꇈꐥꇙꀕꊙꌊꇁꇬꆏ，ꉈꑴꏦꃤꇬꈴꄉꈏꃹꉇꅐꉆꌠꊫꌐꄯꒉꊌꅜꄡꑟ。ꎿꀸꆏꏦꃤꇬꈴꄉꇩꈐꃹꇬꆅꍤꆅꑲꌠꃅ，ꌌꇩꈐꃹꉆꌠꈌꁧꁱꐘꅀꈏꃹꉇꅐꉆꌠꊪꄳꄯꒉꌋꆀꆅꍤꆅꑲꌠꊫꌐꄯꒉꌌꏤꐪꇬꈴꄉꎿꀸꈴꌠꇇꈴꅍꀞꄻ。
ꇩꉈꄉꇈꐥꇙꀕꐥꇐꐥꑫꊙꌊꇁꌠꆏ，ꋬꂻꉈꊪꉆꌠꄴꏮꏁꁈꏁꌬꄉ，ꋌꄛꇈꈬꋦꈭꇬꃹꆹꄡꎽꃅ，ꒆꉻꉻꑫꏭꉮꐪꐥꇁꌠꋒꇧꎭꄡꑟ。ꇯꍝꃅꄝꃑꇈꈬꎭꄻꅐꌠꆏ，ꇩꏤꄚꃆꂮꐥꌠꏤꐪꇬꈴꄉꃄꌬ。
ꌕꊰꉆꏢꌠ ꎀꍹꌋꆀꊿꑞꂷꉬꂿꇈꐥꇙꀕꃑꇧꎭꄷꀋꁧꄻꇈꈬꋦꈭꇬꐥꎻꌠꆏ，ꐥꎻꅉꐥꉆꌠꃅꄷꐥꇐꐥꑫꑵꌠꌊꄻ，ꃅꄷꀀꊿꎃꐚꐥꐨ、ꒃꅐꌠꇬꁁꀕꉈꄡꎽꃅ，ꒆꉻꉻꑫꏭꉮꐪꐥꇁꌠꋒꇧꎭꄡꑟ。ꈁꏾꃅꇈꐥꇙꀕꄝꃑꄉ，ꌞꊿꇭꀧ、ꁨꇐꉮꄻꅀꒆꉻꉻꑫꇬꃗꉮꌠꇫꅐꌠꆏ，ꏦꃤꇬꈴꄉꏦꃤꆽꎍꐨꆹꄜ。
ꌕꊯꈬꏢꌠ ꐋꀋꌡꃅꈌꁧꄉꌠꒃꈹꊫꄳ、ꅥꈹꊫꄳ、ꊿꇫꁰꉘꍔꄅꌠꃅꉆꊫꌐꌋꆀꌐꌬꌐꂷꃶꀋꐚꌠꄺꑣ、ꐈꄻ、ꃼꃷ、ꏮꏆ、ꊣꉛ，ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐꈌꁧꄯꒉ，ꀋꉬꀐꇬꈏꃹꉇꅐꉆꌠꊪꄳꄯꒉ、ꈏꃹꉇꅐꑠꈌꁧꁱꐘꃷꄻ、ꃻꄻ、ꌫꄻꌠꃅꀋꉆ。
ꂴꐕꌠꏤꄻꄉꌠꄚꃆꂮꐥꌠꃅꉆꊫꌐꄯꒉ、ꌐꌬꌐꂷ、ꈌꁧꁱꐘꃑꁵꃆꂮꆏ，ꏦꃤꇬꈴꄇꄜꋊꄉꃅꄡꑟ。
ꇖꊰꏢꌠ ꉇꄅꇩꏤꊿꉪꇩꏤꄉꇩꏤꀨꇬꄉꀧꌋꃅꌠꇈꐥꇙꀕꌌꉈꏭꄉꍤꆫꅀꇈꈬꄉꄆꒌꍑ、ꒌꍑꃅꇬꆏ，ꌜ、ꊨꏦꏱꅉꐎ、ꎂꏲꏃꏓꂱꍔꃚꇈꐥꇙꀕꀧꌋꃅꀨꏲꌤꏲꅉꅀꋍꌅꈌꁵꄉꌠꌤꃅꅉꁳꈌꁧꎻ，ꄷꀋꁧꄚꃆꂮꐥꌠꏦꃤꏦꇗꏤꐪꇬꍬꃅꄡꑟ。
ꇖꊰꋋꏢꌠ ꃅꄷꀨꇬꄉꀧꌋꃅꌠꇈꐥꇙꀕꌋꆀꀉꁁꇩꏤꀨꇬꄉꀧꌋꃅꌠꇈꐥꇙꀕꀋꉬꌠꏲꂠꏡꁈꆏ，ꌜ、ꊨꏦꏱꅉꐎ、ꎂꏲꏃꏓꂱꁧꎁꃀꀉꒉꈿꅉꅀꋍꅉꀕꌤꏲꊈꑼꉼꁳꏤꄻꎻ。
ꇖꊱꌠ ꏦꃤꃅꎁ
ꇖꊰꑋꏢꌠ ꇈꐥꇙꀕꀧꌋꃅꀨꏲꌤꏲꅉꅀꀉꁁꄚꃆꂮꐥꌠꌤꏲꅉ、ꌤꃅꅉꆏꏦꃤꇬꈴꄉꌌꏲꑘꈌꁧꏤꄻꌠꀋꃅꀕ，ꏦꐆꃅꐨꌋꅜꅀꀉꁁꏦꀋꊒꃅꐨꏭꐴꀖꌠꍤꀋꀞꅀꏦꃤꇬꈴꄉꍤꀞꌠꀋꃅ，ꀋꉬꀐꇬꃄꈌꄐꃅꌅꈌꌬꌠꑠꀉꁁꏦꃤꇬꈴꄉꃅꎁꀋꃅꌠꃅꐨꐥꌠꆏ，ꋋꊐꌠꏓꂱꍔꃚꅀꉎꊐꌠꏓꂱꍔꃚꄚꃆꂮꐥꌠꌤꏲꅉ、ꌤꃅꅉꁳꇬꏭꄺꀱꎻꄷ，ꃅꎁꆽꎍꌠꏲꌋꊿꌋꆀꀉꁁꈛꎂꃅꆽꎍꊿꏭꆏꏦꃤꇬꈴꄉꑽꁱ、ꀉꒉꌠꑽꁱꅀꏠꊐꌌꀁꋌꊰꄉꅓꀞꎻ；ꐛꐨꀉꆈꌠꅐꌠꆏ，ꄉꅍꇔꇧꎭꅀꈹꇧꎭꃅꀞꄻ，ꋍꏲꌋꀋꉬꀋꉆꌠꆏꄉꅍꇔꇧꎭꄡꑟ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꇖꊯꌕꏢꌠ ꏦꃤꋌꋐꇬꊰꑋꏢꌠꌕꐕꌠ、ꊯꌕꏢꌠꑍꐕꌠꇬꏤꄻꄉꌠꇬꐆꌠꆏ，ꄚꃆꂮꐥꌠꏦꃤꏦꇗꏤꐪꇬꈴꄉꅓꀞ。
ꇖꊯꇖꏢꌠ ꏦꃤꋌꋐꊯꉬꏢꌕꐕꌠꇬꏤꄻꄉꌠꇬꐆꄉ，ꈭꋏꌠꎴꄉꇈꐥꇙꀕꌋꆀꋍꄻꇐꃼꃷꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꁳꇈꐥꇙꀕꌋꆀꋍꄻꇐ、ꏦꐆꄉꊌꌠꎳꄻ，ꄷꀋꁧꌌꇈꐥꇙꀕꌋꆀꋍꄻꇐꁌꐨꇬꑍꁧꈋꉐꊰꁧꈋꐯꀵꎻ，ꄚꃆꂮꐥꌠꏦꐆꈴꌗꁱꌊꐧꋦꉌꒊꄉꉣꇬꇱꄉ，ꌌꐧꋦꏭꉻꄜꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꇖꊯꉬꏢꌠ ꏦꃤꋌꋐꑍꊏꏢꌠ、ꑍꊏꋋꏢꌠ、ꑍꊎꌕꏢꌠꋍꐕꌠ、ꑍꊎꇖꏢꌠꋍꐕꌠꇬꏤꄻꄉꌠꇬꐆꄉ，ꄚꃆꂮꐥꌠꋌꐛꀧꌋꃅꅉ、ꑋꁮꉆꁮ（ꉛ）ꒃꈹꀋꉆꅉ、ꑋꁮꉆꁮ（ꉛ）ꒃꈹꀋꉆꊬꌠꇩꏤꀨꇬꄉꀧꌋꃅꌠꇈꐥꇙꀕꒃꈹ，ꐋꀋꌡꃅꈌꁧꌠꒃꈹꊫꄳꀋꊌ、ꐋꀋꌡꃅꈌꁧꌠꒃꈹꊫꄳꏤꄻꄉꌠꇬꈴꄉꒃꈹꌠꀋꃅ、ꇩꏤꀨꇬꄉꀧꌋꃅꌠꇈꐥꇙꀕꌉꄻ、ꀋꉬꀐꇬꌬꅍ、ꏡꁈꌬꀋꉆꌠꌬꄉꇩꏤꀨꇬꄉꀧꌋꃅꌠꇈꐥꇙꀕꒃꈹꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉ、ꎿꃀꏦꌬꌤꏲꅉꅀꄚꃆꂮꐥꌠꃄꁕꏲꂠꏲꉻꁳꃅꎁꁸꄉꒃꈹꊌꌠ、ꒃꈹꉁꈾꌋꆀꏦꐆꄉꈁꊌꌠꎴꇧꎭ，ꐋꀋꌡꃅꈌꁧꄉꌠꒃꈹꊫꄳꎴꇧꎭ，ꄷꀋꁧꌌꒃꈹꅜꅍꁌꐨꇬꑍꁧꈋꉐꊰꁧꈋꐯꀵꎻ；ꒃꈹꊌꅍꀋꐥꌠꆏ，ꌌꎆꃀꋍꃪꂷꈋꉐꉬꃪꂷꈋꐯꀵꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꇖꊰꃘꏢꌠ ꏦꃤꋌꋐꑍꊏꏢꌠ、ꑍꊏꑋꏢꌠ、ꑍꊎꌕꏢꌠꋍꐕꌠ、ꑍꊎꇖꏢꌠꋍꐕꌠꇬꏤꄻꄉꌠꇬꐆꄉ，ꄚꃆꂮꐥꌠꋌꐛꀧꌋꃅꅉ、ꑋꁮꉆꁮ（ꉛ）ꒃꈹꀋꉆꅉ、ꑋꁮꉆꁮ（ꉛ）ꒃꈹꀋꉆꊬꌠꇩꏤꀨꇬꄉꀧꌋꃅꌠꇈꐥꇙꀕꀋꉬꌠꒃꈹ，ꒃꈹꊫꄳꀋꊌ、ꒃꈹꊫꄳꏤꄻꄉꌠꇬꈴꄉꇩꏤꀨꇬꄉꀧꌋꃅꌠꇈꐥꇙꀕꒃꈹꌠꀋꃅ，ꀋꉬꀐꇬꌬꅍ、ꏡꁈꌬꀋꉆꌠꌬꄉꇩꏤꀨꇬꄉꀧꌋꃅꌠꇈꐥꇙꀕꒃꈹꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꅀꄚꃆꂮꐥꌠꃄꁕꏲꂠꏲꉻꁳꃅꎁꁸꄉꌠꇬꈴꒃꈹꊌꌠ、ꒃꈹꉁꈾꌋꆀꏦꐆꄉꊌꅜꌠꎴꇧꎭ，ꒃꈹꊫꄳꎴꇧꎭ，ꄷꀋꁧꌌꒃꈹꅜꅍꁌꐨꇬꋍꁧꈋꉐꉬꁧꈋꐯꀵꎻ；ꒃꈹꊌꅍꀋꐥꌠꆏ，ꌌꎆꃀꑍꄙꂷꈋꉐꋍꃪꂷꈋꐯꀵꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꏦꃤꋌꋐꑍꊎꌕꏢꌠꑍꐕꌠꏤꐪꇬꐆꄉ，ꅳꍩꌌꊫꌐꀋꐥꃅꅳꍩꌌꇈꐥꇙꀕꅥꈹꌠ，ꋬꂻꏲꂠꃅꐨꇬꐆꌠꐛꌠꆏ，ꇬꉢꌤꃅꅉꁳꏦꃤꇬꈴꄉꌌꋬꂻꏲꂠꅓꀞꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꇖꊰꏁꏢꌠ ꏦꃤꋌꋐꑍꊎꉬꏢꌠꑍꐕꌠꏤꄻꄉꌠꇬꐆꄉ，ꊿꇫꁰꉘꍔꄅꉆꌠꊫꌐꀋꊌꃅꇩꏤꀨꇬꄉꀧꌋꃅꌠꇈꐥꇙꀕꅀꏦꃤꋌꋐꑍꊏꉆꏢꌠꑍꐕꌠꇬꏤꄻꄉꌠꇈꐥꇙꀕꉘꉚꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꁳꇈꐥꇙꀕꌋꆀꋍꄻꇐꎴꌊꁧꎻ，ꄷꀋꁧꌌꇈꐥꇙꀕꌋꆀꋍꄻꇐꁌꐨꇬꋍꁧꈋꉐꉬꁧꈋꐯꀵꎻ。
ꇖꊰꉆꏢꌠ ꏦꃤꋌꋐꑍꊏꏁꏢꌠꋍꐕꌠꌋꆀꑍꐕꌠ、ꑍꊏꉆꏢꌠꋍꐕꌠ、ꌕꊯꌕꏢꌠꋍꐕꌠꇬꏤꄻꄉꌠꇬꐆꄉ，ꌐꌬꌐꂷꈌꁧꀋꄉ、ꊌꀋꅜꅀꏤꐪꇬꀋꈴꃅꌌꌬ，ꀋꉬꀐꇬꊿꇫꁰꉘꍔꄅꉆꌠꄯꒉꊫꌐꀋꐥ、ꈌꁧꁱꐘꄻꇬꄀꀋꄉꅀꌐꌬꌐꂷꀋꌌꃅꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐꅀꏦꃤꋌꋐꑍꊏꉆꏢꌠꑍꐕꌠꏤꄻꄉꌠꇈꐥꇙꀕꌋꆀꋍꄻꇐꀧꌋꃅꄉꌠꌌꃷꄻ、ꃻꄻ、ꌌꌬ、ꎞꎭ、ꌌꐺ、ꌞꎭꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀨꏲꌤꏲꅉꅀꃷꎏꍞꊟꏲꂠꌤꏲꅉꁳꃅꎁꁸꃅꌠꇬꈴꄉꇈꐥꇙꀕꌋꆀꋍꄻꇐꌋꆀꏦꃤꀋꈴꃅꊌꅜꌠꎴꇧꎭ，ꄷꀋꁧꌌꇈꐥꇙꀕꌋꆀꋍꄻꇐꁌꐨꑍꁧꈋꉐꊯꁧꈋꐯꀵꎻ；ꐛꐨꀉꆈꌠꆏ，ꊿꇫꁰꉘꍔꄅꉆꌠꄯꒉꊫꌐꇔꇧꎭ、ꈌꁧꁱꐘꇔꇧꎭ、ꌐꌬꌐꂷꎴꌊꀱꇁ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꏦꃤꋌꋐꑍꊏꏁꏢꌠꇖꐕꌠ、ꌕꊯꌕꏢꌠꑍꐕꌠꇬꏤꄻꄉꌠꇬꐆꄉ，ꏦꊒꇁꀦꊫꌐꀋꌌꃅꇩꏤꀨꇬꄉꀧꌋꃅꌠꇈꐥꇙꀕꀋꉬꌠꌌꃷꄻ、ꌌꌬ、ꎞꎭꌠꆏ，ꑤꊐꌠꈋꉐꃅꄷꏓꂱꍔꃚꇈꐥꇙꀕꀨꏲꌤꏲꅉꅀꃷꎏꍞꊟꏲꂠꌤꏲꅉꁳꃅꎁꁸꃅꌠꇬꈴꄉꇈꐥꇙꀕꎴꇧꎭ，ꄷꀋꁧꌌꇈꐥꇙꀕꁌꐨꋍꁧꈋꉐꉬꁧꈋꐯꀵꎻ。
ꏦꃤꋌꋐꑍꊏꏁꏢꌠꉬꐕꌠ、ꌕꊯꌕꏢꌠꏤꄻꄉꌠꇬꐆꄉ，ꄚꃆꂮꐥꌠꇈꐥꇙꀕꌋꆀꋍꄻꇐꌌꃷꄻ、ꎞꎭ、ꌌꐺ、ꌞꎭꅀꆅꍤꆅꑲꊪꄳꀋꌌꅀꀋꐊꌠꆏ，ꌌ《ꍏꉸꏓꂱꇭꉼꇩꇙꀕꆄꄵꏦꃤ》ꏤꐪꇬꈴꄉꀞꅓ。
ꇖꊯꈬꏢꌠ ꏦꃤꋌꋐꌕꊰꏢꌠꏤꐪꇬꐆꄉ，ꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐꅀꏦꊒꇁꀦꊩꀽꀋꄉꃅꇩꏤꀨꇬꄉꀧꌋꃅꌠꇈꐥꇙꀕꀋꉬꌠꌋꆀꋍꄻꇐꌌꄻꄉꌠꋠꇐꒃꅐ、ꀰꏢꌬꈧꌠ，ꀋꉬꀐꇬꏦꃤꇬꀋꈴꃅꇩꏤꀨꇬꄉꀧꌋꃅꌠꇈꐥꇙꀕꌋꆀꋍꄻꇐꎳꃼꋠꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀨꏲꌤꏲꅉꅀꃷꎏꍞꊟꏲꂠꌤꏲꅉꁳꃅꎁꁸꃅꌠꇬꈴꄉꇬꏭꏦꐆꃅꐨꆏꄉꄷ，ꇈꐥꇙꀕꉈꑴꋍꄻꇐꌋꆀꏦꃤꀋꈴꃅꊌꅜꌠꎴꇧꎭ，ꄷꀋꁧꌌꇈꐥꇙꀕꌋꆀꋍꄻꇐꁌꐨꑍꁧꈋꉐꊯꁧꈋꐯꀵꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꉬꊯꏢꌠ ꏦꃤꋌꋐꌕꊰꋋꏢꌠꏤꄻꄉꌠꇬꐆꄉ，ꇈꐥꇙꀕꌋꆀꋍꄻꇐꅀꏢꄉꌬꀋꉆꌠꒃꈹꉁꈾꌌꃷꄻ、ꃻꄻ、ꌌꐺꌠꎁꃅꄛꇰꌠꃑꄻꌠꆏ，ꌌ《ꍏꉸꏓꂱꇭꉼꇩꄛꇰꏦꃤ》ꏤꐪꇬꈴꄉꀞꅓ。
ꉬꊰꋋꏢꌠ ꏦꃤꋌꋐꌕꊰꑋꏢꌠꏤꐪꇬꐆꄉ，ꏦꐆꄉꇈꐥꇙꀕꌋꆀꋍꄻꇐꃷꄻ、ꃻꄻ、ꌌꌬꅀꌌꌬꀋꉆꌠꒃꈹꉁꈾꎁꃅꃼꇇꃅꁧꃤꃅꌠꇲꁵꌠꆏ，ꑤꊐꌠꈋꉐꏓꂱꍔꃚꃷꎏꍞꊟꏲꂠꌤꏲꅉꁳꇬꏭꏦꐆꃅꐨꆏꇧꎭꎻꄷ，ꏤꈉꏤꄉꄺꀱꎻ，ꏦꐆꄉꊌꌠꎳꄻꇧꎭ，ꄷꀋꁧꌌꏦꐆꄉꊌꌠꇬꁌꐨꑍꁧꈋꉐꉬꁧꈋꐯꀵꎻ；ꏦꐆꄉꊌꅍꀋꐥꌠꆏ，ꌌꎆꃀꋍꃪꂷꈋꉐꉬꃪꂷꈋꐯꀵꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꉬꊰꑋꏢꌠ ꏦꃤꋌꋐꌕꊯꉬꏢꌠꏤꐪꇬꐆꄉ，ꇈꐥꇙꀕꅀꋍꄻꇐꌌꈏꃹꉇꅐꌠꆏ，ꎿꀸ、ꇬꉢꌤꃅꅉ、ꎿꃀꏦꌬꌤꃅꅉꁳꏦꃤ、ꏲꑘꏦꇗꌋꆀꇩꏤꄚꃆꂮꐥꌠꏤꐪꇬꈴꄉꅓꀞ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꉬꊯꌕꏢꌠ ꏦꃤꋌꋐꌕꊰꏁꏢꌠꋍꐕꌠꇬꏤꄻꄉꌠꇬꐆꄉ，ꇩꉈꄉꇈꐥꇙꀕꐥꇐꐥꑫꊙꌊꇁꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꁳꊙꌊꈏꃹꇁꌠꇈꐥꇙꀕꎴꌊꁧꎻ，ꄷꀋꁧꌌꎆꃀꉬꃪꂷꈋꉐꑍꊎꉬꃪꂷꈋꐯꀵꎻ；ꏦꃤꈴꄉꇩꈐꃹꌠꆅꍤꆅꑲꌠꀋꃅꌠꆏ，ꌌ《ꍏꉸꏓꂱꇭꉼꇩꈏꃹꉇꅐꇙꀕꋦꁧꆅꍤꆅꑲꏦꃤ》ꏤꐪꇬꈴꄉꅓꀞ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꉬꊯꇖꏢꌠ ꏦꃤꋌꋐꌕꊰꏁꏢꌠꑍꐕꌠꏤꄻꄉꌠꇬꐆꄉ，ꇩꉈꄉꊙꌊꇁꌠꇈꐥꇙꀕꌌꇈꈬꋦꈭꇬꐥꇫꎭꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꁳꇬꏭꄮꈉꏤꄉꒃꌊꉇꇁꎻꇈ，ꌌꎆꃀꋍꃪꂷꈋꉐꉬꃪꂷꈋꐯꀵꅓꎻ；ꏤꈉꎪꀐꇬꒃꌊꉇꀋꇁꌠꆏ，ꄚꃆꂮꐥꌠꇈꐥꇙꀕꀧꌋꃅꌤꏲꅉꁳꋍꎁꃅꒃꌊꉇꇁꅀꁧꏖꐨꀁꋌꒊꌠꏁꁈꌬꎻ，ꈁꈉꌠꌫꁌꆏꌌꅇꁵꄉꏤꈉꏤꄉꒃꌊꉈꑴꇁꎻꌠꊿꁳꁵꎻ。
ꉬꊯꉬꏢꌠ ꏦꃤꋌꋐꌕꊯꈬꏢꌠꋍꐕꌠꇬꏤꄻꄉꌠꇬꐆꄉ，ꄚꃆꂮꐥꌠꊪꄳꄯꒉ、ꌐꌬꌐꂷꅀꄚꃆꂮꐥꌠꈌꁧꁱꐘꃶꀋꐚꌠꄻ、ꐈꄻ、ꃷꃼ、ꏮꏆ、ꊣꉛꌠꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꃅꅉꁳꏦꐆꄉꊌꌠꊫꌐ、ꌐꌬꌐꂷ、ꄚꃆꂮꐥꌠꈌꁧꁱꐘꌋꆀꏦꐆꄉꈁꊌꌠꎴꇧꎭ，ꄷꀋꁧꌌꎆꃀꉬꃪꂷꈋꉐꑍꊎꉬꃪꂷꈋꐯꀵꎻ；ꋬꂻꏲꂠꃅꐨꇬꐆꌠꐛꌠꆏ，ꇬꉢꌤꃅꅉꁳꌌꏦꃤꈴꄉꋬꂻꏲꂠꌠꅓꀞꎻ；ꑽꃤꐆꀐꌠꆏ，ꏦꃤꇬꈴꄉꌌꅓꑘꅑꃤꎹ。
ꉬꊰꃘꏢꌠ ꏦꃤꋌꋐꏤꐪꇬꈴꄉꎴꌊꁧꌠꐥꇐꆏ，ꑤꊐꌠꈋꉐꏓꂱꍔꃚꇈꐥꇙꀕꀧꌋꃅꀨꏲꌤꏲꅉꅀꋍꌅꈌꁵꄉꌠꌤꃅꅉꁳꏤꄻꄉꌠꇬꈴꄉꀞꄻꎻ。
ꉬꊰꏁꏢꌠ ꏦꃤꋌꋐꇬꏤꄻꄉꌠꒃꈹꊌꌠꁌꐨ、ꇈꐥꇙꀕꌋꆀꋍꄻꇐꁌꐨꄤꎖꎕꏦꌋꆀꏡꁈꆏ，ꇩꃷꑼꇈꐥꇙꀕꀧꌋꃅꀨꏲꌤꏲꅉꁳꏤꄻꎻ。
ꉬꊱꌠ ꁥ ꏦ
ꉬꊰꉆꏢꌠ ꏦꃤꋌꋐꆹ2017ꈓ1ꆪ1ꑍꄑꌌꃄꌬ。
由中国民族语文翻译局提供
