ꋍꊱꌠ ꏓ ꏦ
ꋍꏢꌠ ꇵꆅꁖꅐꇁꌠꌋꆀꐥꈴꇁꌠꏭꄴꏮ、ꋎꍅ、ꋊꑍꄉ，ꃰꊿꇭꀧꈯꄿꃪꌠꌋꆀꋍꉻꁦꎴꌠꏭꏦꀧꂿꄷꄉ，ꏦꃤꋌꋐꏤꄻ。
ꑍꏢꌠ ꇩꏤꇵꆅꉃꑲꌠꄴꏮꌠꌌꀨꃅꄉꌠꌐꏦꌬ，ꉃꌠꄵꌠꐮꐊ、ꉹꁸꄉꏲꂠ、ꈆꑪꉈꊪ、ꉹꁌꉈꊪ。
ꌕꏢꌠ ꏦꃤꋌꋐꇬꏤꄉꌠꇵꆅꆹꁸꌊꋍꑵꀕꌠ、ꑍꑵꀕꌠꌋꆀꌕꑵꀕꌠꃅꄉ。
ꇵꆅꋍꑵꀕꌠꆹ：ꉌꆅ、ꆅꏂꏢꈢꄜ。
ꇵꆅꑍꑵꀕꌠꆹ： ꊿꇳꐨꎃꀋꐚꋍꃀꆅ、ꉟꊪꆅ、ꆅꅋꌌꆅ、ꐧꊭꊈꏵꆅ、ꊿꇵꅽꆅꊌꅲꅐꅑꋃꒉ、ꃬꈿ、ꐥꈴꌦꅐꆅ、ꈌꃶꆅ、ꐥꈴꀂꏾꆅꑴꉹꌠ、ꄒꇱꊸꆅ、ꄤꏳꆅ、ꋧꁮꊈꌋꆀꀊꂱꀠꊈꃺꒌ、ꊿꏑ、ꆅꏂꌋꆀꆅꏂꁥꆅ、ꐥꈴꌠꀑꆊꆅ、ꊫꌉ、ꆺꄝꆅ、ꀊꑳꀿꏂꁈꎭꃖꆅ、ꃬꂡ、ꀯꇐꏃꁮꋧꆅ、ꍂꆅ、ꀏꆅ、ꇬꄌꇊꑪꄜꆅ、ꌦꅝꁯꄸꆅ、ꀽꑠꄜ。
ꇵꆅꌕꑵꀕꌠꆹ：ꐥꈴꌠꋃꒉ、ꐥꈴꌠꁦꏦꊌ、ꃖꍓꑅꇷꆅ、ꋋꇅꃅꊌꌠꑓꒉ、ꊿꆓ、ꐥꈴꌠꌋꆀꐥꀋꈴꌠꀠꍓꆅꏂ、ꆄꆈ、ꀣꁯꄸꆅ、ꑟꁯꄸꆅ，ꃺꒌ、ꋧꁮꊈꌋꆀꀊꂰꀠꃺꒌ、ꆅꏂꌋꆀꆅꏂꁥꆅꑠꉇꄉꈭꐨꇵꅽꌠꀃꃀꄸꑠꄜ。
ꇩꃷꑼꁦꎴꆄꄻꏲꑘꌤꏲꅉꆏꇵꆅꁖꅐ、ꐥꈴꐨꌋꆀꃗꉮꐨꇬꈴꄉ，ꇵꆅꑍꑵꀕꌠ、ꌕꑵꀕꌠꆅꑫꁦꎆ、ꊨꒊꅀꋊꄻꌠꏤꇽꄷꀋꁧꌌꄜꀦꉆ。
ꇖꏢꌠ ꇵꆅꑍꑵꀕꌠꈐꏭꇵꆅꎃꀋꐚꋍꃀꆅ、ꄤꏳꆅꈐꏭꄤꏳꋍꃀꆅꌠꌋꆀꊿꇵꅽꆅꊌꅐꅑꋃꒉꆹ，ꏦꃤꋌꋐꇬꉉꌠꇵꆅꋍꑵꀕꌠꇬꄴꏮ、ꋎꍅꌠꏁꁈꌬ。ꀉꁁꇵꆅꑍꑵꀕꌠꌋꆀꋋꇅꃅꁖꇁꁢꊧꐞꀋꉅꌠꇵꆅꆹꏦꃤꋌꋐꈁꉉꌠꇵꆅꋍꑵꀕꌠꄴꏮ、ꋎꍅꌠꏁꁈꌬꄻꅐꇬꆏ，ꇩꃷꑼꁦꎴꆄꄻꏲꑘꌤꏲꅉꁳꋋꇅꃅꇩꃷꑼꏭꄛꇰꇈꈌꁧꄉꈭꐨꆏꌌꄜꀦ、ꌫꄻ。
ꂴꐕꌠꇬꏤꄉꌠꇬꈴꄉꇵꆅꋍꑵꀕꌠꇬꄴꏮ、ꋎꍅꌠꏁꁈꌬꌠꀜꋊꇧꎭꄻꅐꌠꆏ,ꇩꃷꑼꁦꎴꆄꄻꏲꑘꌤꏲꅉꁳꇩꃷꑼꏭꄛꇰꇈꈌꁧꄉꈭꐨꆏꌌꄜꀦ。
ꌜ、ꊨꏦꏱꅉꐎ、ꎂꏲꏃꏓꂱꍔꃚꆏꂱꑱꏲꄸꈐꇬꅉꀕꃅ、ꀉꑌꃢꃅꅐꇁꌠꃅꄷꇵꆅꀉꁁꁖꇁꇬꆏ，ꐛꐪꇬꈴꄉꏤꌌꑍꑵꀕꌠꅀꌕꑵꀕꌠꇵꆅꃅꄉꏲꂠꄷꀋꁧꌌꄜꀦꇈ，ꄜꌊꇩꃷꑼꁦꎴꆄꄻꏲꑘꌤꏲꅉꁳꅺꇰꎻ。
ꉬꏢꌠ ꈁꐥꊐꌠꏓꂱꍔꃚꆏꇵꆅꉃꑲꌤꃅꌠꏲꂠ。
ꑤꊐꌠꈍꉐꏓꂱꍔꃚꆏꇵꆅꉃꑲꄐꎖꏤꄻꄷꀋꁧꊥꇬꄉꌫꄻ，ꇵꆅꉃꑲꅿꆅꌠꄴꏮꋎꍅ、ꆅꉁꆄꄻꌋꆀꍞꊟꏲꂠꉻꑫꄻꐛꒆ。
ꃘꏢꌠ ꇩꃷꑼꁦꎴꆄꄻꏲꑘꌤꏲꅉꆏꇩꏤꑭꊂꇵꆅꉃꑲꌋꆀꍞꊟꏲꂠꌤꃅꌠꌅꇤ。ꑤꊐꌠꈋꉐꏓꂱꍔꃚꁦꎴꆄꄻꌤꏲꅉꆏꋌꏲꄸꑭꊂꇵꆅꉃꑲꌋꆀꍞꊟꏲꂠꌤꃅꌠꌅꇤ。
ꑤꊐꌠꈋꉐꏓꂱꍔꃚꌤꃅꅉꀉꁁꈧꌠꆏꊨꏦꃅꋭꌠꇬꈴꄉꇵꆅꉃꑲꌠꌤꋍꆹꎍꌠꃅ。
ꂽꇬꇵꆅꉃꑲꌤꃅꌠꆏ，ꏦꃤꋌꋐꌋꆀꇩꏤꄚꃆꂮꐥꌠꏤꐪꇬꈴꄉꀞꄻ，ꍏꇩꏓꂱꁌꄝꂽꁦꎴꆄꄻꀨꏲꌤꃅꅉꁳꍞꊟꏲꂠꎻ。
ꏃꏢꌠ ꈁꐥꊐꌠꆄꈻꄵꏮꋎꍅꏲꉻꆏꇵꆅꍤꎖ、ꂴꎖ、ꐥꈴꆅꌷꇐꍤꄻ、ꆄꈻꃆꂮꄛꇰꌋꆀꀉꁁꄴꏮꋎꍅꌤꃅꌠꆹꄜ。
ꆅꉁꆄꄻꏲꉻꆏꆄꄻꈭꋏꌋꆀꃆꂮꐥꌠꇵꆅꉃꑲꌤꃅꌠꌋꆀꋌꆹꎍꌠꃄꁕꇵꆅꄴꏮꌤꃅꌠꆹꄜ。ꇓꈓꋥꁕꌋꆀꂿꑘꁡꇤꅉꂫꊐꌠꆅꉁꆄꄻꏲꉻꆏꆄꈻꄴꏮꋎꍅꏲꉻꄐꇺꌠꇂꃴꄉ，ꇓꈓꋥꁕ、ꂿꑘꁡꇤꅉꂫꊐꌠꌋꆀꐯꊒꌠꇵꆅꉃꑲꌤꃅꌠꆹꄜ。
ꉆꏢꌠ ꇩꏤꆏꀋꃅꋋꄮꉃꄻꌷꇐꌋꆀꍏꇩꁬꋌꋊꃅꉃꄻꌷꇐꀻꎆ，ꇵꆅꉃꑲꌠꈆꑪꃅꎥꃪꌠꊋꁈꄏꌋꆀꊋꊡ，ꇵꆅꉃꑲꌠꈆꑪꇮꇐꑞꅉꉀꐕ。
ꇩꏤꆏꇵꆅꉃꑲꇩꏹꇷꃅꌠꊋꁈꄏꌋꆀꊋꊡ。
ꈬꏢꌠ ꇩꏤꆏꌤꃅꅉꌋꆀꂱꑱꊨꏦꇵꆅꉃꑲꌤꃅꈽꌠꊋꁈꄏꌋꆀꊋꊡ。ꈁꐥꊐꌠꏓꂱꍔꃚꆏꄚꃆꂮꐥꌠꄹꏦꄻꐛꒆꃅꄉ, ꌤꃅꅉꌋꆀꂱꑱꊨꏦꁳꈝꐮꃅꇵꆅꉃꑲꌠꄛꉻꉙꂘ、ꇵꆅꃆꂮꄛꇰ、ꉌꇗꁧꃤꃅꌠꌋꆀꌞꁵꃄꄻꌠꇬꐊꆹꄡꑟ。
ꀀꊿꊈꑼꉼ、ꋂꂱꊈꑼꉼꆏꀀꊿ、ꑘꃅꊿꊥꇬꄉꋥꁕꌋꆀꂿꑘꁡꇤꇵꆅꄴꏮꌋꆀꋎꍅꌠꇬꐊꆹꄡꑟ。
ꊰꏢꌠ ꇩꏤꆏꇵꆅꄴꏮꇭꀧꂄꉙꂘꌠꍔꆙ。ꈨꏀꇢꈴꄜꆏꁌꀋꈁꃅꇵꆅꉃꑲꌋꆀꄉꉻꁦꎴꆄꄻꉙꂘꌠꉻꈲꄛꉻꌠꃅꄡꑟ。
ꌶꅉꈁꐥꌠꃅꂱꑱꌶꌺꏭꇭꀧꂄꌠꌋꆀꇵꆅꄴꏮꌠꌧꇐꉙꂘꄡꑟ。
ꉃꄻꌷꇐꌶꅉꆏꄴꏮꉃꄻꌷꇐꉙꂘꌋꆀꈆꑪꎥꃪꌠꊋꀥꇱꄡꑟ， ꌶꅉꇬꐥꌠꌶꌺꌋꆀꀉꁁꇵꆅꉃꑲꃆꂮꐥꌠꊿꏭꇵꆅꄴꏮꉃꄻꌧꇐ꒿ꂘꌋꆀꁰꍋ， ꇵꆅꉃꑲꌤꃅꌠꎁꃅꇮꇐꊋꁈꄏꌠꇲꁵ。
ꆄꈻꄴꏮꋎꍅꏲꉻ、ꆅꉁꆄꄻꏲꉻꆏꏤꄮꐥꃅꌤꃅꊿꏭꇵꆅꉃꑲꌧꇐ、ꇮꇐ꒿ꂘꄡꑟ。
ꊯꊪꏢꌠ ꇵꆅꉃꑲꌤꃅꇬꊌꐨꌋꆀꅐꌞꄇꇖꀕꌠꌤꃅꅉꌋꆀꊿꏭꆏ,ꀮꄑꌋꆀꈁꁠꁵ。
ꇵꆅꉃꑲꌤꃅꂿꄷꄉꆅꊌ、ꄣꅐ、ꌦꆘꅝꌠꊿꏭꆏ,ꄚꃆꂮꐥꌠꏤꐪꇬꈴꄉꀥꋍꅞ、ꅲꇫꇲꄻ。
ꊰꑋꏢꌠ ꍏꉸꏓꂱꇭꉼꇩꏲꄸꇬꈁꐥꌠꌤꃅꅉꌋꆀꂱꑱꊨꏦꆏ，ꀋꎪꃅꆄꈻꄴꏮꋎꍅꏲꉻ、ꆅꉁꆄꄻꏲꉻꁳꄚꃆꂮꐥꌠꇵꆅꍤꄻ、ꍤꉚ、ꐛꉻꏓꈹ、ꑴꄉꉃꄻꑠꄴꏮ、ꋎꍅꏂꁈꌬꄉ，ꀋꎪꀋꑴꃅꄚꃆꂮꐥꌠꐛꐪꉉꎼꇁ。ꆄꈻꄴꏮꋎꍅꏲꉻ、ꆅꉁꆄꄻꏲꉻꆏꊨꏦꈒꂁꌤꃆꂮꐥꌠꈴꌗ、ꌬꇐꑠꌌꁖꅐꀋꉆ。
ꁦꎴꆄꄻꏲꑘꌤꏲꅉꌋꆀꀉꁁꄚꃆꂮꐥꌠꌤꏲꅉ、ꆄꈻꄴꏮꋎꍅꏲꉻ、ꆅꉁꆄꄻꏲꉻꏦꃤꀋꊒꃅꏲꑘꏲꂠꅀꄴꏮ、ꋎꍅꏂꁈꌬꄉ，ꌤꃅꅉꌋꆀꂱꑱꊨꏦꌅꈌꈲꁧꉄꌎꇬꆹ，ꄚꃆꂮꐥꌠꌤꃅꅉꌋꆀꂱꑱꊨꏦꆏꏦꃤꇬꈴꄉꏲꑘꇕꀱꅀꅇꎹꌠꇖꂟꉆ。
ꑍꊱꌠ ꇵꆅꄴꏮ
ꊯꌕꏢꌠ ꈁꐥꊐꌠꏓꂱꍔꃚꉹꁌꃅꐙꌠꁦꎴꆄꄻꃅꈧꌠꊥꇬꄉꃅ，ꇵꆅꄴꏮꇭꀧꉾꃪꌠꉙꂘꌠꃅ，ꌧꑳꉾꃪꌠꐥꐨꐤꄟꄕꊪ，ꉹꁌꇵꆅꌠꏭꉃꑲꉪꇐꌋꆀꇫꊝꄐꊋꉀꐕ，ꋦꈭꁦꎴꋈꄻꌠꊋꀥꇱ，ꀉꉌꌋꆀꁮꌺ、ꑿꃅꑠꆅꁮꆅꀿꇁꄉꃨꆰꐨꐥꌠꋊꑣꇧꎭ。
ꈁꐥꊐꌠꏓꂱꍔꃚꂿꑘ、ꒉꑘ、ꌩꑘꏲꑘꌤꏲꅉꆏꃅꎁꁸꃅꌠꇬꈴꄉꍯꃅ、ꎾꃝ、ꒊꃀ、ꆫꁍ、ꌩꏪꇬꀊꉌꉮꐪꌋꆀꌦꅝꁯꄸꉮꐪ，ꉈꑴꀉꁁꇵꆅꁊꁘꌠꇙꀕꌋꆀꆅꁮꀿꇁꌠꉮꐪꑠꄐꇺꌋꆀꊥꇫꄉꋊꑣꈯꊈꇧꎭ。
ꎸꈜ、ꈭꈜ、ꉹꁌꌬꌠꃅꈯꃏꏸꏲꑘꌤꏲꅉꆏꏟꈯꃅꈭꎞꈛꎭꅍꌋꆀꄚꃆꂮꐥꅉꇬꀉꉌꉮꐪꌋꆀꁮꌺ、ꑿꃅꆅꀿꇁꉆꑠꉮꐪꋊꑣꇧꎭ。
ꊯꇖꏢꌠ ꃅꄷꈁꐥꊐꌠꏓꂱꍔꃚꆏꄐꎖꐨꐥꃅꄉꉻꁦꎴꆄꄻꉁꈾꋉꄻꌋꆀꀱꄻ，ꅝꒉꁦꎴꇎꏦꄻꃪꃅꄉ，ꍍꒉ、ꐥꇐꁧꀋꎴꌠ、ꐓꍂꑠꌌꉮꐪꀋꐥꈴꌠꀞꄻꄡꑟ。
ꊯꉬꏢꌠ ꇩꏤꆏꄐꎖꐨꐥꃅꇵꆅꄴꏮꁿꋌꊐꄹꏦꌫꄻ。ꇩꃷꑼꁦꎴꆄꄻꌤꏲꅉꌋꆀꌜ、ꊨꏦꏱꅉꐎ、ꎂꏲꏃꏓꂱꍔꃚꁦꎴꆄꄻꌤꏲꅉꆏ，ꇵꆅꄴꏮ、ꋎꍅꈉꐨꇬꈴꄉ，ꇵꆅꄴꏮꁿꋌꊐꌠꄐꎖꄷꀋꁧꊥꇬꄉꌫꄻ。ꌌꇵꆅꄴꏮꁿꋌꊐꌠꆅꁿꋌꆏꀋꎪꃅꇩꏤꊇꁧꌐꏦꇬꄉꄐꌶ。
ꇩꏤꆏꀊꉘꏭꇵꆅꄴꏮꁿꋌꊐꊫꄳꄹꏦꃄꌬ。ꇩꏤꆄꁿꄐꎖꐘꃆꇵꆅꄴꏮꁿꑭꊐꌠꏭꆏꎆꃀꀋꁵ。ꁦꎴꆄꄻꏲꉻ、ꆄꈻꄴꏮꋎꍅꏲꉻꌋꆀꀉꑳꀨꎹꊿꐯꇯꐮꐊꄉ，ꀋꎪꃅꀉꑳꁳꋋꇅꃅꇵꆅꄴꏮꁿꋌꊐꄉꎻ。ꑭꋧꏡꁈꆏꇩꃷꑼꁳꏤꄻꎻ。
ꊰꃘꏢꌠ ꇩꏤꌋꆀꐧꋦꆏꇵꆅꆅꊿ、ꆅꀦꌌꊿꌋꆀꇵꆅꊌꏭꐛꌠꊿꏭꉈꇬ、ꇇꀨꄉ,ꋀꊇꏭꋋꇅꃅꉃꄻꄡꑟ。ꌤꃅꅉꌋꆀꊿꈁꄸꉬꂿꇵꆅꊿ、ꆅꀦꌌꊿꌋꆀꆅꊌꏭꐛꌠꊿꇬꉜꄸꀋꉆ。
ꇵꆅꆅꊿ、ꆅꀦꌌꊿꌋꆀꇵꆅꊿꉬꏭꐛꌠꉃꌒꂾꅀꇵꆅꊿꉬꀋꉬꌠꊨꀋꄅꌠꂾꆏ，ꏦꃤ、ꏲꑘꏦꇗꌋꆀꇩꃷꑼꁦꎴꆄꄻꌤꏲꅉꏤꄉꌠꇵꆅꌠꌌꁷꐞꈝꐮꌠꌤꃅꀋꉆ。
ꊰꏁꏢꌠ ꇩꏤꆏꇵꆅꍞꎖꄹꏦꄻꄉ。
ꇩꃷꑼꁦꎴꆄꄻꌤꏲꅉꆏꇩꏤꇵꆅꍞꎖꄐꎖꌋꆀꉻꏤꄻ。ꌜ、ꊨꏦꏱꅉꐎ、ꎂꏲꏃꏓꂱꍔꃚꁦꎴꆄꄻꌤꏲꅉꆏꇩꏤꇵꆅꍞꎖꄐꎖꌋꆀꄐꉻꇬꈴꄉ，ꂱꑱꏲꑘꏲꄸꈐꃤꇵꆅꍞꎖꄐꎖꌋꆀꄐꉻꏤꄻ。
ꈁꐥꊐꌠꆄꈻꄴꏮꋎꍅꏲꉹꉻꆏꇵꆅꅐꇁ、ꐥꈴꌠꌋꆀꅐꇁ、ꐥꈴꐊꊈꏭꆏ,ꍞꎖꌶ；ꇩꉈꅐꇁꇈ、ꇩꈐꅐꀋꇁꑴꌦꌠꇵꆅꅀꇩꈐꀊꏀꃅꅐꇁꌠꇵꆅꏭꆏ,ꍞꎖꌶ。
ꊰꉆꏢꌠ ꈁꐥꊐꌠꆄꈻꄴꏮꋎꍅꏲꉻꆏꇵꆅꄴꏮꋎꌠꆏꍅꄚꐰꃅꎁꋋꈨꃅ：
（ꋍ）ꇵꆅꄴꏮꋎꄐꎖ、ꎖꄎꌋꆀꄐꉻꌫꄻ；
（ꑍ）ꇵꆅꍞꎖꈴꌗꏣꏑ、ꎥꃪꌋꆀꄛꇰ，ꇵꆅꅐꇁꐥꈴꆸꄟꂴꎖꄉ；
（ꌕ）ꇵꆅꆄꈻꃆꂮꌋꆀꋋꇅꃅꅐꇁꋍꉻꁦꎴꌤꐘꐥꈴꆅꌷꇐꌠꍤꄻ、ꅏꅉꂥꀘꉈꑴꇿꋌꈋꍣꌠꍔꆙ；
（ꇖ）ꇵꆅꎖꉚꑳꍤꎖ、ꆅꉚꆄꇠ、ꆅꀦꌷꇐꍜꇠꌠꍔꆙ；
（ꉬ）ꆅꁿꋌꊐꄐꎖꌫꄻ，ꏟꈯꃅꄵꏮꊈꐥꌠꒆꇐꄻꇐꌬꈧꏲꂠ；
（ꃘ）ꇭꀧꂄꉙꂘ、ꅲꇖꌠꍔꆙ, ꇵꆅꉃꑲꌧꇐꁊꈴ；
（ꏃ）ꀏꊐꌠꆄꈻꄴꏮꋎꍅꏲꉻꌋꆀꌤꃅꊿꄐꂘ、ꁰꍋꄉꇵꆅꍞꎖꌤꃅꌠꍔꆙ；
（ꉆ）ꇵꆅꉃꑲꎁꌬꊈꎥꃪꌋꆀꁦꎴꆄꄻꈋꍣꌠꍔꆙ，ꇮꇐꅲꇖꌠꇲꁵ。
ꇩꏤ、ꌜꊐꌠꆄꈻꄴꏮꋎꍅꏲꉻꆏꇵꆅꅐꇁ、ꐥꈴꌋꆀꁊꈴꌠꏭꌄꇤꄉꍞꎖ， ꇵꆅꐥꈴꆸꄟꂴꎖꄉ，ꄴꏮꋎꍅꏡꁈꄜꎼꇁ，ꇫꐊꄷꀋꁧꄐꇺꄉꁖꅐꌠꆅꃆꆅꂮꍤꄻꂥꀘꌠ，ꇵꆅꆅꀦꍜꇠꌠꍔꆙ，ꍤꎖꊈꁧꋎꍅꄜꉻꑫꄻꐛ，ꎁꌬꊈꎥꃪꌋꆀꁦꎴꆄꄻꈋꍣꌠꍔꆙ。
ꐎꄻꄉꌠꏃꌋꆀꑤꊐꌠꆄꈻꄴꏮꋎꍅꏲꉻꆏꌄꇤꄉꇵꆅꋎꍅꄐꎖ、ꄐꉻꃅꇬꑟ，ꆅꁿꋌꊐ、ꅋꋊ、ꆅꀿꒆꇐꋎꍅꇬꉮꐪꊥꇬꌫꄻ，ꇵꆅꉃꑲꌧꇐꁊꈴ， ꂱꑱꃅꄷꆅꃆꆅꂮꌋꆀꋋꇅꃅꅐꇁꌠꋍꉻꁦꎴꆄꄻꌤꐘꍞꎖ、ꄛꇰ，ꐥꈴꆅꌷꇐꍤꄻꌋꆀꅉꀕꂿꌠꆅꀦꋧꒆꇐꍤꎖꌠꍔꆙ。
ꊯꈬꏢꌠ ꇩꏤꆏꇵꆅꂴꌗꋏꄹꏦꄻꄉ。
ꇩꃷꑼꁦꎴꆄꄻꏲꑘꌤꏲꅉꌋꆀꌜ、ꊨꏦꏱꅉꐎ、ꎂꏲꏃꏓꂱꍔꃚꆏꇵꆅꅐꇁ、ꐥꈴꆸꄟꈴꄉꂴꎖ，ꐳꃅꇵꆅꂴꌗꋏ，ꐛꃆꐛꂮꈴꄉꌌꄜꀦ。
ꑍꊏꏢꌠ ꑤꊐꌠꈋꉐꃅꄷꏓꂱꍔꃚꆏꇵꆅꄴꏮ、ꋎꍅꂴꄐꁈꏤꄻꄡꑟ，ꄜꌊꉎꊐꌠꏓꂱꍔꃚꁳꅺꇰꁱꄀꄉꎻ。
ꇵꆅꄴꏮ、ꋎꍅꄐꁈꆏꄚꐰꀋꉬꀋꉆꌠꐊꇐꋋꈨꐊꄡꑟ：
（ꋍ）ꇵꆅꄴꏮꋎꍅꄐꇺꀯꅿꏓꐛꌋꆀꐮꃆꂮꐥꌠꃅꎁ；
（ꑍ）ꇵꆅꅿꍞꎖ、ꈴꌗꏣꏑ、ꎥꃪ、ꄛꇰ、ꅇꇰꄹꏦ；
（ꌕ）ꆄꈻꄴꏮꋎꍅꏲꉻ、ꆅꉁꆄꄻꏲꉻꇵꆅꅐꇁꄮꇬꂿꃆꌋꆀꃅꎁ；
（ꇖ）ꇵꆅꁖꅐ、ꐥꈴꐛꐪꊐꁸꌋꆀꐮꄉꄐꌠꃛꊸꊝꌠꌤꃅꄐꉻ；
（ꉬ）ꇵꆅꄴꏮ、ꆄꅉꇬꋎꍅ，ꃛꊸꊝꌠꈾꌬꅍ、ꉁꈾ、ꆅꉁꁬꋌꌋꆀꆅꉁꆄꄻꎊꈬꌋꆀꀉꁁꎊꈬꌋꇮꇐꊭꄎꌋꆀꄀꌌꌬꌠ。
ꃄꄸꏓꂱꍔꃚꌋꆀꆄꈻꄴꏮꋎꍅꌤꃅꅉꆏꇩꃷꑼꁦꎴꆄꄻꏲꑘꌤꏲꅉꅀꌜ、ꊨꏦꏱꅉꐎ、ꎂꏲꏃꏓꂱꍔꃚꃑꎼꇁꌠꇵꆅꂴꌗꋏꌠꊪꊊꄉꄷꆏ，ꇵꆅꄴꏮ、ꋎꍅꂴꆽꄐꁈꇬꈴꄉ,ꐮꄉꄐꌠꄴꏮ、ꋎꍅꏁꁈꌌꌬꄡꑟ。
ꑍꊏꋋꏢꌠ ꆅꉁꆄꄻꏲꉻꆏꀋꎪꃅꏟꈯꃅꇩꃷꁦꎴꆄꄻꏲꑘꌤꏲꅉꏤꄉꌠꏲꂠꄹꏦ、ꃅꑽꍬꏦꈴꌠꃄꌬꄉ，ꇵꆅꅿꉃꅉꀨꀦꇵꅽꌋꆀꆅꉚꅉꇵꅽꌠꄴꏮꌶ。
ꁦꎴꆄꄻꏲꉻꆏꌐꄉꌤꏲꅉꅀꌤꃅꊿꈨꁳꇵꆅꃆꂮꄛꇰ、ꑷꑱꌤꃅꅉꇬꇵꆅꄴꏮ、ꋎꍅꉈꃅꎁꈐꇬꇵꆅꄴꏮꌤꃅꄡꌠꆹꄜ；ꁦꎴꆄꄻꃅꈧꇬꌋꆀꆅꉚꅉꇵꅽꃆꂮꐥꌠꃨꐨꍞꎖ、ꋬꂻꀧꌋꃅ、ꅋꋊ、ꑴꄉꌋꆀꆄꄻꀜꅐꌠꀞꄻꌤꃅꌠꆹꄜ。
ꆄꈻꄴꏮꋎꍅꏲꉻꆏꌐꄉꌤꃅꊿꁳꁦꎴꆄꄻꏲꉻꈐꇬꇵꆅꄴꏮꌤꃅꌠꏭꄐꂘ、ꍤꎖꎻ，ꐥꈴꆅꇐꍤꄻꌠꍔꆗ。
ꑍꊏꑋꏢꌠ ꆄꈻꄴꏮꋎꍅꏲꉻ、ꁦꎴꆄꄻꏲꉻꋒꃯꉜꑳꌋꆀꆅꁧꆅꀿꋧꒆꇐꋒꃯꃅꌤꃅꅉꆹ，ꇩꏤꐰꏤꄉꌠꇎꏦꌋꆀꇮꇐꌐꏦꇬꄉꄐꄡꑟ，ꏦꇨꌠꍞꊟꏲꂠꄹꏦꄻꐛ，ꇵꆅꆅꁧꆅꀿꌡꀠꏭꆏꏤꄉꌠꏂꁈꇬꈴꄉꏦꇨꃅꍞꊟꏲꂠ，ꇵꆅꆅꁧꆅꀿꋒꃯꑳꇵꅽꌋꆀꆅꁧꆅꀿꋧꒆꇐꁭꁘꌠꏭꏦꇨꃅꄴꏮ。
ꑍꊎꌕꏢꌠ ꌦꋊꌦꁵꏲꉻ、ꒆꇐꎊꈬꒆꅐꌤꃅꅉꆏꀋꎪꃅꏦꇨꃅꇩꏤꏤꐪꃄꌬ，ꌦ、ꌦꄻꎊꈬꊇꁧꄉꀧꌶ。ꏦꃤꀋꈴꃅꌦꋊꅀꌞꊿꊥꇬꄉꌦꃷꌠꏢꇋ。
ꆄꈻꄴꏮꋎꍅꏲꉻ、ꁦꎴꆄꄻꏲꉻꌦꌋꆀꌦꄻꎊꈬꌬꇬ,ꀋꎪꃅꇩꏤꄚꃆꂮꐥꌠꏤꐪꇬꍬꌶ，ꌦꊐ、ꌦꄻꎊꈬꌬꄉꌦꁊꈴꆄꈻꅐꇁꌠꏢꇋ。
ꑍꊎꇖꏢꌠ ꈁꐥꊐꌠꏓꂱꍔꃚꆏꊋꀥꇱꄉꉟꊪꆅꉃꑲꌠꌤꃅꄡꑟ，ꄴꏮ、ꋎꍅꏂꁈꌬꄉ，ꉟꊪꆅꁊꈴꌠꏢꇋ。ꑭꋧꏡꁈꆏꇩꃷꑼꁳꏤꄻꎻ。
ꑍꊎꉬꏢꌠ ꑤꊐꌠꈋꉐꏓꂱꍔꃚꂿꑘ、ꌩꑘꏲꑘꌤꏲꅉꌋꆀꀉꁁꄚꃆꂮꐥꌠꌤꏲꅉꆏ，ꂱꑱꃅꎁꇬꈴꄉꊿꎆꐯꇯꊌꌠꇵꆅꃆꂮꐥꌠꇙꀕꇵꆅꉃꑲꏲꂠꌤꃅꌠꌄꇤ。
ꊿꎆꐯꇯꊌꌠꇵꆅꃆꂮꐥꌠꇈꐥꇙꀕ、ꀁꇬꐥꌠꃮꃬꎇꃀꍅꑓꑠꆏ，ꇵꆅꃆꂮꍤꄻꈭꐨꇎꏦꇬꑟꑲꆀꌌꃷ、ꎞꎭꃅꉆ。
ꑍꊏꃘꏢꌠ ꇩꏤꆏꇵꆅꆄꁮ、ꆅꅋꊐꅉꄻꄉ。
ꇵꆅꆄꁮꋧ、ꆅꅋꌋꆀꇵꆅꍤꎖꌡꀠꏭꎹꈹ、ꀨꎹ、ꌌꐺ、ꎞꎭꌋꆀꌬꈧꌠꌌꉹꁸꄉꏲꂠ，ꏦꇨꌠꏲꂠꄹꏦꄻꐛꒆ。
ꇵꆅꋍꑵꀕꌠꋌꎼꁊꈴꉆꉈꑴꇩꃷꑼꁦꎴꆄꄻꏲꑘꌤꏲꅉꏤꄉꌠꆄꁮ、ꆅꅋꌋꆀꇵꆅꍤꎖꌡꀠ，ꇰꍝꃅꎹꈹ、ꀨꎹ、ꌌꐺ、ꎞꎭꌋꆀꌬꈧꄻꅐꌠꆏ,ꀋꎪꃅꌜꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꈌꁧꎻꌶ。ꑭꋧꏡꁈꆏꇩꃷꑼꁳꏤꄻꎻ。
ꑍꊏꏁꏢꌠ ꇵꆅꆅꁧꆅꀿꇱꍍꆀꄉꌠꍍꒉ、ꍍꇐ、ꃄꅉꌋꆀꎊꇐꆏ，ꄚꃆꂮꐥꌠꌤꃅꅉꌋꆀꂱꑱꊨꏦꀋꎪꃅꆄꈻꄴꏮꋎꍅꏲꉻꄐꇺꌠꇂꃴꄉꅀꋍꉉꎼꇁꌠꁦꎴꇖꐨꇬꈴꄉ，ꏟꈯꃅꅋꋊꀞꄻ；ꅋꋊꀞꄻꀋꅲꌠꆏ，ꃅꄷꁦꎴꆄꄻꏲꑘꏲꉻꌋꆀꆄꈻꄴꏮꋎꍅꏲꉻꁳꄀꇗꇱꄉꅋꋊꀞꄻꎻ。
ꑍꊏꉆꏢꌠ ꇩꏤꏚꍆꌠꋌꐛꆅꁧꆅꀿꅉꇬꎖꑞꄉꈲꒉ、ꈭꈜ、ꈩꆫ、ꊋꀦꑠꀉꒉꉹꌠꋈꄻꐘꃆꇬꆹ，ꂴꆽꆏꌜꊐꌠꈋꉐꆄꈻꄴꏮꋎꍅꏲꉻꁳꋉꄻꋦꈭꇬꁦꎴꍤꄻꎻꄡꑟ。ꋈꄻꌤꃅꅉꆏꆄꈻꄴꏮꋎꍅꏲꉻꉜꐨꇬꈴꄉ，ꀋꉬꀋꉆꌠꇵꆅꄴꏮ、ꋎꍅꏁꁈꌬꄡꑟ。ꋈꄻꄮꇬ，ꋈꄻꌤꃅꅉꆏꌐꄉꊾꈨꁳꋈꄻꃄꅉꇬꁦꎴꇵꆅꄴꏮꌠꌤꃅꄡꑟ。ꋈꄻꌐꊂ，ꆄꈻꄴꏮꋎꍅꏲꉻꆏꇵꆅꅐꇁꉆꌠꏭꍞꎖꄡꑟ。
ꑍꊎꈬꏢꌠ ꌌꇵꆅꉃꑲꌠꅋꋊꅐꇐ、ꅝꒉꇲꁵꌤꃅꅉꇲꁵꌠꅝꒉꌋꆀꅝꒉꁦꎴꃆꂮꐥꌠꅐꇐꆏ，ꇩꏤꁦꎴꌐꏦꌋꆀꁦꎴꎕꏦꌋꆀꁦꎴꋊꏦꇬꄉꄐꄡꑟ。
ꅝꒉꇲꁵꌤꃅꅉꒆꅐꅀꇲꁵꃅꈧꇬꆹ，ꏦꃤꈴꄉꁦꎴꈌꁧꊫꄳꐥꄡꑟ。
ꌌꇵꆅꉃꑲꇬꌬꌠꅋꋊꅐꇐꒃꅐꌤꃅꅉꌋꆀꌌꇵꆅꉃꑲꇬꌬꌠꅋꋊꅐꇐꒃꅐꇬꆹ，ꌜꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꍤꄻꈌꁧꎻꄡꑟ。ꑭꋧꏡꁈꆏꇩꃷꑼꁳꏤꄻꎻ。
ꌕꊱꌠ ꇵꆅꃆꂮꄛꇰ、ꅇꇰꌋꆀꄜꀦ
ꌕꊰꏢꌠ ꆄꈻꄴꏮꋎꍅꌤꏲꉻ、ꆅꉁꆄꄻꏲꉻꌋꆀꌦꇲꏲꉻꌋꆀꋍꃅꎁꃅꑠꊿꏦꃤꋌꋐꇬꏤꄉꌠꇵꆅꃆꂮꅀꀉꁁꇵꆅꋋꇅꃅꅐꇁꌠ、ꐥꈴꌠꉈꑴꋋꇅꃅꅐꇁꌠꒉꄸꂥꀋꀘꌠꇵꆅꌋꅜꄮꇬꆏ，ꇵꆅꃆꂮꄛꇰꏱꅉꏲꂠꏥꏦꍬꌬꄡꑟ，ꇩꃷꑼꏤꄉꌠꅀꇩꃷꑼꁦꎴꆄꄻꏲꑘꌤꏲꅉꏤꄉꌠꐊꇐ、ꈭꎁ、ꃄꄟꌋꆀꏤꈉꈴꄉꄛꇰ。
ꂽꇬꆅꉁꆄꄻꏲꉻꆏꐧꋦꉹꁌꏭꆅꉁꆄꄻꁧꃤꃅꌠꇲꁵ，ꂴꏡꌠꇬꏤꄉꌠꇵꆅꃆꂮꌋꅜꄮꇬꆏ，ꇩꃷꑼꁦꎴꆄꄻꏲꑘꌤꏲꅉꏤꐪꇬꈴꄉꄛꇰꄡꑟ。
ꌕꊰꋋꏢꌠ ꌤꃅꅉꌋꆀꂱꑱꊨꏦꈀꄸꉬꂿꇵꆅꊌꊿꅀꇵꆅꊌꏭꐛꊿꌋꅜꄮꇬꆏ，ꋋꇅꃅꈛꑌꅉꇬꐛꌠꆄꈻꄴꏮꋎꍅꏲꉻꅀꆅꉁꆄꄻꏲꉻꏭꄛꇰꄡꑟ。
ꌕꊰꑋꏢꌠ ꎿꀸ、ꃏꏸꐛꅉ、ꎸꈜꆄꈻꄴꏮꋎꍅꏲꉻꉈꑴꇩꏤꏲꄸꁦꎴꆄꄻꃆꂮꍤꄻꌤꏲꅉꋍꑵꀕꌠꇵꆅꊌꊿ、ꆅꁧꆅꀿꌌꊿ、ꇵꆅꊌꏭꐛꌠꊿꌋꅜꄮꇬꆏ，ꇩꏤꄚꃆꂮꐥꌠꏤꐪꇬꈴꄉꋋꇅꃅꇩꏤꏲꄸꈜꀸꐛꅉꄉꆄꈻꄴꏮꋎꍅꏲꉻꅀꋍꐛꅉꑤꊐꌠꈋꉐꃅꄷꏓꂱꍔꃚꁦꎴꆄꄻꏲꑘꌤꏲꅉꏭꄛꇰꄷꀋꁧꐮꇬꅇꇰꄡꑟ。
ꌕꊯꌕꏢꌠ ꆄꈻꄴꏮꋎꍅꏲꉻꆏꑴꇙꃅꇵꆅꃆꂮꈴꌗꏣꏑ、ꎥꃪ、ꍤꄻ、ꍤꐚꄡꑟ。ꋍꑵꀕꌠ、ꑍꑵꀕꌠꇵꆅꃆꂮꄜꇯꊪꅜꅀꇵꆅꁖꅐ、ꐥꈴꌠꌋꅜꄮꇬꆏ，ꋋꇅꃅꃅꄷꁦꎴꆄꄻꏲꑘꌤꏲꅉꏭꄛꇰꄉ，ꃅꄷꁦꎴꆄꄻꏲꑘꌤꏲꅉꁳꋋꇅꃅꃅꄷꏓꂱꍔꃚꏭꄛꇰꇈ，ꋍꈭꐨꄜꌊꉎꊐꌠꁦꎴꆄꄻꏲꑘꌤꏲꅉꌋꆀꇩꃷꑼꁦꎴꆄꄻꏲꑘꌤꏲꅉꇰꄡꑟ。
ꆄꈻꄴꏮꋎꍅꏲꉻꆏꌐꄉꊿꌋꆀꌐꄉꌤꃅꅉꁳꌄꇤꄉꇵꆅꃆꂮꈴꌗꏲꂠꌤꃅ，ꋋꇅꃅꇵꆅꃆꂮꄛꇰꌠꏭꍤꐚ、ꎥꃪꄡꑟ。
ꌕꊯꇖꏢꌠ ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꆏꋋꇅꃅꋍꏲꑘꏲꄸꈐꇬꆄꈻꄴꏮꋎꍅꏲꉻꌋꆀꆅꉁꆄꄻꏲꉻꏭꇵꆅꃆꂮꅇꇰꉈꑴꍞꎖ、ꌗꋏꌠꄚꃆꂮꐥꌠꈴꌗꄛꇰ。ꆄꈻꄴꏮꋎꍅꏲꉻꌋꆅꉁꆄꄻꏲꉻꅇꇰꊪꊊꄮꇬꆏꋋꇅꃅꊨꏦꌤꃅꅉꇬꄚꃆꂮꐥꌠꊿꏭꅇꀠꌶ。
ꌕꊯꉬꏢꌠ ꇩꃷꑼꁦꎴꆄꄻꏲꑘꌤꏲꅉꆏꋋꇅꃅꇩꃷꑼꀉꁁꄚꃆꂮꐥꌠꌤꏲꅉꌋꆀꌜ、ꊨꏦꏲꅉꐎ、ꎂꏲꏃꏓꂱꍔꃚꁦꎴꆄꄻꏲꑘꌤꏲꅉꈁꐥꌠꏭꇩꏤꑭꊂꇵꆅꃆꂮꌋꆀꍞꎖ、ꌗꋏꌠꄚꃆꂮꐥꌠꈴꌗꄛꇰ。
ꏢꁮꐛꌠꌋꆀꄚꃆꂮꐥꌠꃅꄷꏓꂱꍔꃚꁦꎴꆄꄻꏲꑘꌤꏲꅉꆏ，ꋋꇅꃅꂱꑱꏲꄸꇬꇵꆅꃆꂮꌋꆀꍞꎖ、ꌗꋏꌠꄚꃆꂮꐥꌠꈴꌗꄜꐮꇰꄡꑟ。
ꑤꊐꌠꈋꉐꏓꂱꍔꃚꄚꃆꂮꐥꌠꌤꃅꅉꇵꆅꃆꂮꌋꅜꄮꇬꆏ，ꋋꇅꃅꋍꊐꌠꏓꂱꍔꃚꁦꎴꆄꄻꏲꑘꌤꏲꅉꏭꄛꇰꄡꑟ。
ꍏꇩꏓꂱꁌꄝꂽꁦꎴꆄꄻꀨꏲꌤꏲꅉꇵꆅꃆꂮꌋꅜꄮꇬꆏ，ꋋꇅꃅꇩꃷꑼꁦꎴꆄꄻꏲꑘꌤꏲꅉꏭꄛꇰꄡꑟ。
ꌕꊯꃘꏢꌠ ꇙꀕꇵꆅꃆꂮꄴꏮꏲꉻꌋꆀꆄꈻꄴꏮꋎꍅꏲꉻꆏ，ꋋꇅꃅꇙꀕꇢꊭꌋꆀꊿꇢꊭꄉꊿꎆꐯꇯꊌꌠꇵꆅꃆꂮꌋꆀꃆꄚꂮꐥꌠꈴꌗꄜꐮꇰꄡꑟ。
ꌕꊰꏁꏢꌠ ꏦꃤꋌꋐꏤꐪꇬꈴꄉꇵꆅꃆꂮꄛꇰꋖꋦꌠꏓꂱꍔꃚꄚꃆꂮꐥꌠꌤꏲꅉ、ꆄꈻꄴꏮꋎꍅꏲꉻ、ꆄꄻꏲꉻ、ꌦꋊꌦꊐꏲꉻꌋꆀꋍꌤꃅꊿꆹ，ꇵꆅꃆꂮꂁꉱ、ꈱꄜ、ꑎꄜꀋꉆ。
ꌕꊰꉆꏢꌠ ꇩꏤꆹꇵꆅꃆꂮꈨꇐꄜꀦꄹꏦꄻꄉ。
ꇩꃷꑼꁦꎴꆄꄻꏲꑘꌤꏲꅉꆹꄮꈉꏤꄉꇩꏤꑭꊂꇵꆅꃆꂮꈨꇐꄜꉺ。ꌜ、ꊨꏦꏱꅉꐎ、ꎂꏲꏃꏓꂱꍔꃚꁦꎴꆄꄻꏲꑘꌤꏲꅉꆹꄮꈉꏤꄉꂱꑱꏲꑘꏱꁕꈐꇬꇵꆅꃆꂮꈨꇐꄜꉺ。
ꇵꆅꁖꅐ、ꐥꈴꄮꇬ，ꇩꃷꑼꁦꎴꆄꄻꏲꑘꌤꏲꅉꂴꅑꄉꐧꋦꏭꇵꆅꃆꂮꄜꉺ，ꄷꀋꁧꌅꈌꄸꌜ、ꊨꏦꏱꅉꐎ、ꎂꏲꏃꏓꂱꍔꃚꁦꎴꆄꄻꏲꑘꌤꏲꅉꁵꄉꏲꑘꏱꁕꋋꂷꈐꇬꇵꆅꃆꂮꈨꇐꄜꐧꋦꏭꇰ。
ꇵꆅꃆꂮꈨꇐꄜꉺꇬꇇꈤ、ꊒꌸꄡꑟ。
ꇖꊱꌠ ꇵꆅꃆꂮꋎꍅ
ꌕꊯꈬꏢꌠ ꆄꄻꏲꉻꆹꇵꆅꋍꑵꀕꌠꌋꅜꄮꇬꆏ，ꋋꇅꃅꄚꐰꏁꁈꌌꌬꄡꑟ：
（ꋍ）ꊾꆅ、ꆅꀦꌌꌠꊿꏭꆏ，ꑴꄉꌌꉃꄻ，ꑴꄉꌠꄮꈉꆏꆄꄻꌷꇐꍤꄻꄽꂫꐛꐨꇬꈴꄉꏤꄻ；
（ꑍ）ꆅꏭꐛꌠꊿꏭꆏ，ꆅꉚꂾꆏꌌꏤꄉꅉꈚꇬꄉꑴꄉꉃꄻ；
（ꌕ）ꆄꉂꆄꄻꏲꉻꈐꇬꆄꊿ、ꆅꀦꌌꊿ、ꆅꏭꐛꌠꊿꌋꆀꐮꋑꈌꋺꌠꆏ，ꏤꄉꅉꈚꇬꄉꌌꆅꌷꇐꉜꎖꌋꆀꀉꁁꄺꅐꌠꄴꏮꏁꁈꌌꌬ。
ꑴꄉꉃꄻꀋꅲꅀꑴꄉꄮꈉꀋꇎꃅꋧꁧꃅꑴꄉꉃꄻꀋꅲꃅꁧꌠꆏ，ꇬꉢꌤꏲꅉꁳꆄꉂꆄꄻꏲꉻꇇꀨꄉꄀꇗꇱꄉꑴꄉꉃꄻꏁꁈꌬ。
ꆄꉂꆄꄻꏲꉻꆹꑍꑵꀕꌠꌋꆀꌕꑵꀕꌠꇵꆅꊿꌋꅜꇬꆏ，ꇵꆅꃆꂮꇬꈴꄉꄺꅐꌠꉃꄻꌋꆀꁭꁘꋎꍅꏁꁈꌬꄡꑟ。
ꆄꉂꆄꄻꏲꉻꆏꋍꌤꃅꅉꈐꇵꆅꆅꀦꇱꍍꆀꄉꅉ、ꎊꇐꌋꆀꆅꉁꆄꄻꀉꀜꏭꆏ，ꀋꎪꃅꏦꃤ、ꏦꇗꏤꐪꇬꈴꄉꅋꋊꌋꆀꉮꐪꀋꐥꃅꀞꄻꇧꎭꌶ。
ꇖꊰꏢꌠ ꆄꈻꄴꏮꋎꍅꏲꉻꆹꇵꆅꃆꂮꌋꅜꅀꇵꆅꃆꂮꄛꇰꊪꊊꄮꇬꆏ，ꋋꇅꃅꄚꐰꏁꁈꌌꌬꄡꑟ：
（ꋍ）ꇵꆅꃆꂮꌌꐥꈴꆅꌷꇐꍤꄻ，ꍤꄻꐛꐨꇬꈴꄉꇵꆅꐤꅉ、ꇵꆅꊌꅉꎖꏤꄉꉉꎼꇁ，ꇵꆅꇱꇵꅽꄉꅉꇬꆏꁦꎴꌠꃅ，ꋍꈚꄉꐮꋑꈌꌠꊿꏭꆏ，ꏤꄉꅉꈚꇬꄉꆅꌷꇐꉜꎖꌋꆀꀉꁁꄺꅐꌠꏁꁈꌌꌬ，ꄷꀋꁧꁦꎴꆄꄻꏲꑘꌤꏲꅉꏭꇵꆅꋎꍅꃆꂮꄐꉻꄜꎼꇁ；
（ꑍ）ꇵꆅꅐꁖꏿ、ꐥꈴꄮꇬꆏ，ꇵꆅꐤꅉ、ꇵꆅꊌꅉꇬꆏꁦꎴꌠꃅ，ꁦꎴꆄꄻꏲꑘꌤꏲꅉꏭꇵꆅꋎꍅꃆꂮꄐꉻꄜꎼꇁ；
（ꌕ）ꐰꊐꌠꆄꈻꄴꏮꋎꍅꏲꉻꄐꂘꄉꇵꆅꄴꏮ、ꋎꍅꏁꁈꌬ，ꄚꃆꂮꐥꌠꌤꃅꅉꊥꇬ、ꄐꂘꄉꇵꆅꃆꂮꎼꂥꀘ。
ꇖꊰꋋꏢꌠ ꋍꑵꀕꌠꇵꆅꇫꅐꅉꇬꅀꋌꈚꈐꇬꌐꏤꄉꌠꊿꏭꆏ，ꃅꄷꋌꈚꑤꊐꌠꈋꉐꏓꂱꍔꃚꆹꑴꄉꏁꁈꌌꌬ，ꄷꀋꁧꋍꋓꃅꉎꊐꌠꏓꂱꍔꃚꏭꄛꇰ；ꄛꇰꊪꊊꀐꌠꉎꊐꌠꏓꂱꍔꃚꆹꋋꇅꃅꈌꁧꅀꈌꀋꁧꌠꏤꄉꄡꑟ。ꉎꊐꌠꏓꂱꍔꃚꈌꀋꁧꄷꏤꄉꌠꆏ，ꑴꄉꏁꁈꌌꌬꌠꏓꂱꍔꃚꆹꋋꇅꃅꑴꄉꏁꁈꇔꇧꎭꄡꑟ。
ꑴꄉꊬꌠꇬ，ꑴꄉꏁꁈꌌꌬꌠꏓꂱꍔꃚꆹꌌꑴꄉꌠꊿꏭꐥꐨꏦꀧꇲꁵꄡꑟ；ꑴꄉꌠꊿꌤꃅꅉꐥꌠꆏ，ꌤꃅꅉꆹꑴꄉꊬꌠꋍꃄꎆꆏꇧꎭꀋꉆ。
ꑴꄉꏁꁈꇔꇧꎭꇬꆏ，ꂴꏤꄉꌠꌤꏲꅉꁳꏤꄉꄷꀋꁧꄜꉺꎻ。
ꇖꊰꑋꏢꌠ ꇵꆅꁖꅐ、ꐥꈴꄮꇬꆏ，ꑤꊐꌠꈋꉐꏓꂱꍔꃚꆹꋋꇅꃅꊋꃤꊥꇬꄉ，ꄴꏮ、ꋎꍅꂴꄐꉻꇬꈴꄉꄴꏮꉃꄻ，ꇵꆅꐯꇳꈴꈜꆼꇽꇧꎭꄡꑟ，ꄺꅐꄮꇬꆏ，ꄜꌊꉎꊐꌠꏓꂱꍔꃚꇰꄉꏤꄻꎻ，ꄚꐰꃛꊸꏁꁈꌌꌬꄷꀋꁧꄛꇰ：
（ꋍ）ꏦꎫꇤꍤ、ꄆꒌꃑꅉꄆꒌꃑꌠꌋꆀꀉꁁꊿꋍꁥꃅꏓꈩꌠꏢꇈꅀꆏꄉ；
（ꑍ）ꇮꑘꆏꄉ、ꃅꑘꆏꄉ、ꌶꅉꆏꄉ；
（ꌕ）ꇵꆅꆅꀦꇱꇵꅽꄉꌠꋍꏅꅝꌠꀀꈥꇁꀦ、ꋠꅍꌋꆀꄚꃆꂮꐥꌠꎊꇐꈢꄉꅀꏢꇬꐓꄉ；
（ꇖ）ꇵꆅꊌꌠꇈꈬꇙꀕ、ꀁꇬꐥꌠꎇꃀꍅꑓꋎꍅꅀꌉꇧꎭ；
（ꉬ）ꇵꅽꁘꁊꇁꉆꅉꇬꋍꇈꄉ。
ꉎꊐꌠꏓꂱꍔꃚꆹꐰꊐꌠꏓꂱꍔꃚꂴꐕꌠꏤꄉꌠꃛꊸꏁꁈꄛꇰꌠꊪꊊꄮꇬꆏ，ꋋꇅꃅꏤꐪꏤꎼꇁꄡꑟ。
ꃛꊸꏁꁈꇔꇧꎭꇬꆏ，ꂴꏤꄉꌠꌤꏲꅉꁳꏤꄉꄛꉻꎻ。
ꇖꊯꌕꏢꌠ ꇵꆅꋍꑵꀕꌠ、ꑍꑵꀕꌠꁖꅐ、ꐥꈴꄮꇬꆏ，ꑤꊐꌠꈋꉐꃅꄷꏓꂱꍔꃚꁳꄜꌊꉎꊐꌠꏓꂱꍔꃚꁳꏤꄻꎻ，ꂱꑱꏲꑘꏱꁕꈐꄹꁆꅀꉬꇮꃅꄜꉺꌊꇵꆄꅉꃅꄉꉆ；ꇩꃷꑼꆏꌜ、ꊨꏦꏱꅉꐎ、ꎂꏲꏃꇬꐂꄉꄛꉻꌊꇵꆄꅉꃅꄉꉆ。ꑤꊐꌠꈋꉐꃅꄷꏓꂱꍔꃚꆏꇵꆄꅉꈐꄉꏦꃤꋌꋐꇖꊰꑋꏢꌠꇬꏤꄉꌠꃛꊸꏁꁈꌬꉆ，ꄷꀋꁧꇵꆄꅉꄉꈏꃹꉇꅐꁧꌠꊿ、ꎊꈬꌋꆀꈭꈜꌫꉂꌫꈾꏭꁦꎴꇵꆅꍤꄻꌠꌬ。
ꌜ、ꊨꏦꏲꅉꐎ、ꎂꏲꏃꏓꂱꍔꃚꆹꋍꏲꄸꈐꇬꇵꆅꋍꑵꀕꌠꆄꅉꇬꋍꇈꏁꁈꌌꌬꉆ；ꄚ，ꇓꈓꀄꊭ、ꐧꀠꌠꇬꇵꆄꅉꋍꇈꅀꌜ、ꊨꏦꏲꅉꐎ、ꎂꏲꏃꇬꐂꄉꋍꇈ，ꄷꀋꁧꇵꆅꅉꋍꇈꄉꈭꈜꀋꉬꀋꉆꌠꆼꈘꅀꇩꏤꃅꋮꋍꇈꄉꌠꆏ，ꇩꃷꑼꁳꌌꏤꄻꎻ。
ꇵꆄꅉꇬꋍꇈꌠꇔꇧꎭꇬꆏ，ꂴꏭꏤꄻꌤꏲꅉꁳꏤꄻꄉꄜꉺꎻ。
ꇖꊯꇖꏢꌠ ꇵꆅꋍꑵꀕꌠꅐꇁꄮꇬꆏ，ꇵꆅꋌꑵꈭꈜꌫꉂꌫꈾꌋꆀꋍꎞꎭꊿ、ꎊꈬꇬꈴꄉꐯꇳꌠꄴꏮꂿꄷꄉ，ꈭꈜꁦꎴꇵꆅꍤꄻꌠꃄꌬꉆ。ꑭꋧꏡꁈꆏꇩꃷꑼꁳꏤꄻꎻ。
ꇖꊯꉬꏢꌠ ꇵꆅꌠꀉꇨꃛꇁ、ꐥꈴꄮꇬꆏ，ꇵꆅꃆꂮꋎꍅꈉꐨꇬꈴꄉ，ꇩꃷꑼꆹꇩꏤꑭꊂꅀꌜ、ꊨꏦꏲꅉꐎ、ꎂꏲꏃꄩꐂꌠꏲꄸꈐꇬꄉ，ꑤꊐꌠꈋꉐꏓꂱꍔꃚꆹꋍꏲꄸꈐꇬꄉꃛꊸꃅꊿꁆꄻꅀꊭꄎꄉꌠꎊꈬꁆꌬ，ꋍꇅꇬꑳꇤ、ꈭꈜꌫꉂꌫꈾꌋꆀꄚꃆꂮꐥꌠꉁꈾ、ꌬꇐꎹꄻꄉꌬꌠꌅꈌꐥ。
ꃛꊸꃅꊿꁆꄻꇬꆏ，ꏤꐪꇬꈴꄉꋭꋽꃅꃄꎆꍈꄻꇬꁳꄡꑟ。ꋍꇅꇬꑳꇤ、ꈭꈜꌫꉂꌫꈾꌋꆀꄚꃆꂮꐥꌠꉁꈾ、ꌬꇐꎹꄻꄉꌬꌠꆏ，ꏦꃤꇬꈴꄉꁥꇱꎆꄻꇬꁳꄡꑟ；ꀱꉈꑴꁵꉆꌠꆏ，ꋋꇅꃅꀱꉈꑴꁵꄡꑟ。
ꇖꊰꃘꏢꌠ ꇵꆅꋍꑵꀕꌠ、ꄤꏳꆅꊌꄉꌦꆘꅝꌠꆏ，ꋋꇅꃅꊿꂿꌌꁦꎴꃅꀞꄻ，ꈛꑌꅉꇬꄉꐗꇧꎭꄡꑟ。ꀉꁁꇵꆅꊌꄉꌦꆘꅝꌠꆏ，ꄻꅐꄮꇬꆏ，ꊿꂿꌌꁦꎴꃅꀞꄻꈭꐨꆏꌌꐗꇧꎭꅀꏤꐪꇬꈴꄉꄃꇧꎭꌶ。
ꇵꆅꁢꊧꍤꂿꄷꄉ，ꆄꉂꆄꄻꏲꉻꆹꄺꅐꄮꇬꆏꇩꃷꑼꁦꎴꆄꄻꏲꑘꌤꏲꅉꏤꐪꇬꈴꄉ，ꇵꆅꄉꌦꌠꊿꂿꅀꇵꆅꏭꐛꄉꌦꌠꊿꂿꌌꀺꎸꄉꍤꉚꉆ，ꄷꀋꁧꉉꊿꌦꂶꌠꀁꇬꊿꏭꇰꄡꑟ。
ꇖꊰꏁꏢꌠ ꇵꆅꐤꅉꇬꇵꆅꆅꀦꇱꇵꅽꅀꇵꆅꆅꀦꇱꇵꅽꏭꐛꌠꎊꇐꆹ，ꅋꋊꄉꈭꐨꌌꌬꉆꌠꆏ，ꃅꄷꋌꈚꇬꆄꈻꄴꏮꋎꍅꏲꉻꄐꂘꌠꇂꃴꄉꌌꅋꋊꂥꀘꈭꐨꆏ，ꌌꌫꄻ、ꃷꇧꎭꌋꆀꎞꎭꉆꄡꑟ。
ꇖꊰꉆꏢꌠ ꇵꆅꃆꂮꅐꇁꄮꇬꆏ，ꆄꈻꄴꏮꋎꍅꏲꉻꌋꆀꌜꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꄐꁆꄉꌠꀉꁁꇵꆅꌋꆀꐮꃆꂮꐥꌠꌐꑘꇮꁈꏲꉻꆹ，ꇵꆅꐤꅉ、ꇵꆅꊌꅉꇬꄉꍰꆗ、ꉻꌡꏓꈹ、ꇮꇐꎥꃪꌋꆀꍤꉚꌠꃅꉆ。
ꇖꊯꈬꏢꌠ ꇵꆅꁖꅐ、ꐥꈴꄮꇬꆏ，ꁬꋌꌋꆀꆅꉁꆄꄻꉁꈾꒃꅐ、ꇲꁵꌤꃅꅉꆹꋋꇅꃅꇵꆅꄴꏮꉃꄻꌠꁬꋌꌋꆀꆅꉁꆄꄻꉁꈾꒃꅐ、ꇲꁵꄡꑟ。ꎸꈜ、ꈭꈜ、ꉹꁌꌬꃅꈯꈴꀰꏢꌤꃅꅉꆏꀋꎪꃅꂴꆽꇵꆅꃆꂮꊿꉈꑴꇵꆅꄴꏮꉃꄻꌠꁬꋌꌋꆀꆅꉁꆄꄻꉁꈾꎞꎭꌠꃅꌶ。ꑤꊐꌠꈋꉐꏓꂱꍔꃚꄚꃆꂮꐥꌠꌤꏲꅉꆹꊥꇬꐮꄮꄉꌤꃅꄡꑟ。
ꉬꊱꌠ ꆅꉁꆄꄻꈭꋏ
ꉬꊰꏢꌠ ꑤꊐꌠꈋꉐꏓꂱꍔꃚꆏꊋꀥꇱꄉꇵꆅꉁꆄꄻꈭꋏꁧꃤꃅꇅꏍꋈꄻꐛꒆ，ꇵꆅꈭꋏꄎꌠꇎꏦꐥꌠꌋꆀꄐꅍꐥꌠꆅꉁꆄꄻꏲꉻꁳꇵꆅꈭꋏꂿꃆꆹꄜꄉꃅꎻ，ꀋꉬꀐꇬꇵꆅꈭꋏꈉꐨꇬꈴꄉꇵꆅꆅꉚꅉꄻꄉꄡꑟ。
ꉬꊰꋋꏢꌠ ꆅꉁꆄꄻꏲꉻꅉꀨꌐꏦ、ꋈꄻꄐꏤꌋꆀꁧꃤꃅꈴꈜꆹ，ꇵꆅꆅꉚꅉꇵꅽꄴꏮꇖꂟꌠꇬꄉꄐꄡꑟ。
ꆅꉁꆄꄻꏲꉻꆹꏤꐪꇬꈴꄉꌌꌫꄻꌠꆅꉁꆄꄻꉁꈾꌌꅋꋊꄡꑟ；ꏤꐪꇬꈴꄉꋍꃢꌬꌠꆅꉁꆄꄻꉁꈾꏭꆏ，ꌫꄻꈭꐨꆏꌌꐗꇧꎭꄡꑟ。
ꆅꉁꆄꄻꏲꉻꆹꇩꃷꑼꁦꎴꆄꄻꏲꑘꌤꏲꅉꏤꄉꌠꇵꆅꆅꉚꆄꇠꎕꏦꌋꆀꆅꉁꆄꄻꇖꂟꌠꇬꈴꄉ，ꐮꄉꄐꌠꏁꁈꌌꌬꄉ，ꇵꆅꆅꉁꆄꄻꈭꋏꄐꅍꉀꐕꄡꑟ。
ꉬꊰꑋꏢꌠ ꆅꉁꆄꄻꏲꉻꆹꇵꆅꆅꊿꌋꆀꇵꆅꏭꐛꌠꊿꏭꆅꉁꈭꋏ、ꆅꅉꇬꄉꈭꋏꌋꆀꆅꉚꆅꉃꇬꆏ，ꆅꃆꆅꂮꌋꆀꀉꁁꄚꃆꂮꐥꌠꌬꇐꎺꁱꄉ，ꄷꀋꁧꎔꃅꀨꎹꄉꄡꑟ。
ꆅꉁꆄꄻꏲꉻꆹꇵꆅꂴꍤꎖ、ꇵꆅꁸꄉꉜꄹꏦꈴꄉꃅꄡꑟ；ꇵꆅꆅꊿꌋꆀꇵꆅꏭꐛꌠꊿꏭꆏ，ꏃꌊꑴꄉꆅꉚꅉꈚꌠꇬꄉꏛꃅꉚꆄꇠꎻꄡꑟ。ꆅꉁꆄꄻꏲꉻꄚꄉꄐꌠꆅꉃꄐꅍꀋꐥꌠꆏ，ꆅꊿꌋꆀꋍꆅꃆꂮꎺꁱꄯꒉꌡꍑꄉꌠꐯꇯꏮꌊꆅꉃꄎꌠꆅꉁꆄꄻꏲꉻꁵꄡꑟ。ꑭꋧꏡꁈꆏꇩꃷꑼꁦꎴꆄꄻꏲꑘꌤꏲꅉꁳꏤꄻꎻ。
ꃘꊱꌠ ꍞꊟꏲꂠ
ꉬꊯꌕꏢꌠ ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꆏꇵꆅꄴꏮꌤꃅꇬꆏꄚꐰꍞꊟꍤꄻꃅꎁꃅꌶ：
（ꋍ）ꐰꊐꌠꏓꂱꍔꃚꁦꎴꆄꄻꏲꑘꌤꏲꅉꏦꃤꋌꋐꏤꄉꌠꇵꆅꄴꏮꃅꎁꃅꌠꏭꍞꊟꍤꄻ；
（ꑍ）ꆄꈻꄴꏮꋎꍅꏲꉻ、ꆅꉁꆄꄻꏲꉻꇵꆅꄴꏮꌤꃅꌠꏭꍞꊟꍤꄻ；
（ꌕ）ꌦꇲꌦꎹꏲꉻꇬꌦꇲꌦꎹꌤꃅꌠꏭꍞꊟꍤꄻ；
（ꇖ）ꌌꇵꆅꄴꏮꉃꄻꌠꇬꌬꌠꅋꋊꅐꇐꌋꆀꋍꒃꅐꌤꃅꅉꏭꍞꊟꍤꄻ，ꄷꀋꁧꅝꌠꀆꐒꇲꁵꌤꃅꅉꒃꅐꅀꇲꁵꃅꈧꉈꑴꅝꌠꀆꐒꁦꎴꋬꂻꅐꇐꏭꍞꊟꍤꄻ；
（ꉬ）ꇵꆅꆄꁮꌺ、ꅋꇗꌺꌋꆀꇵꆅꍤꎖꌡꉻꎹꈹ、ꀨꎹ、ꌌꐺ、ꎞꎭ、ꌫꄻꌠꏭꍞꊟꍤꄻ；
（ꃘ）ꋍꏅꐺꅉꌋꆀꄚꃆꐥꌠꌤꃅꅉꅿꁦꎴꇎꏦꌋꆀꇵꆅꄴꏮ、ꋎꍅꏁꁡꏭꍞꊟꍤꄻ。
ꌜꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꆏꊥꇬꄉꇵꆅꄴꏮꉃꑲꌤꆿꀉꒉꀊꂾꌠꀞꄻ。
ꉬꊯꇖꏢꌠ ꑤꊐꌠꈋꉐꏓꂱꍔꃚꁦꎴꏲꑘꌤꏲꅉꆹꍞꊟꍤꄻꃅꎁꃅꄮꇬꆏ，ꌌꍤꄻꌠꌤꃅꅉꌋꆀꇵꆅꃆꂮꅐꇁꅉꇬꄉꍤꄻꊫꌐꒃ，ꄚꃆꂮꐥꌠꌬꇐꌋꆀꌡꉻꎹꈹꌠꌅꈌꐥ。ꌌꍤꄻꌠꌤꃅꅉꆹꍤꄻꌠꐊꄉꍤꄻ，ꍤꄻꌠꏭꄘꑣ、ꋍꇈꀋꉆ。
ꉬꊯꉬꏢꌠ ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꆹꍞꊟꍤꄻꃅꎁꃅꄮꇬ，ꇵꆅꆅꀦꇱꇵꅽꌠꋍꏅꅝꌠꀆꐒ、ꋠꇐꌋꆀꄚꃆꂮꐥꌠꎊꇐꌋꅜꇬꆏ，ꀋꄸꄷꉆꐥꃅꋎꍅꏁꁈꌌꀋꌬꃅꇵꆅꁊꈴ、ꐥꈴꇁꉆꌠꆏ，ꋍꏅꅝꌠꀆꐒꅐꀦꋍꄉ、ꋠꇐꌋꆀꄚꃆꂮꐥꌠꎊꇐꏢꄉꅀꊼꇅꇬꃷꆏꄉꌠꋍꇅꇬꋎꍅꏁꁈꌌꌬ，ꄷꀋꁧꌌꍤꉚꅀꅋꋊꌠꃅꉆ。ꌌꍤꉚꇬ，ꇵꅽꀐꌠꋠꇐꆏ，ꌌꐗꇧꎭꄡꑟ；ꇵꀋꅽꑴꌦꌠꋠꇐꅀꌌꅋꋊꄉꈭꐨꌫꄻꉆꌠꎊꇐꆏ，ꋎꍅꏁꁈꇔꇧꎭꄡꑟ。
ꉬꊰꃘꏢꌠ ꁦꎴꆄꄻꏲꑘꌤꏲꅉꌤꃅꊿꏦꃤꇬꈴꄉꄉꅍꃅꄮꇬꆏ，ꊿꑍꂷꈋꐯꇁꀋꉆ，ꄷꀋꁧꏦꌬꊫꄳꀖꎼꇁ，ꁦꎴꏦꌬꌤꃅꄯꒉꇬꁱꄉ。
ꁦꎴꏦꌬꌤꃅꄯꒉꌌꍤꎖꇈꆹꑽꅍꀋꐥꈭꐨꆏ，ꁦꎴꏦꌬꊿꌋꆀꌟꆈꁳꂓꁱꎻ。ꌟꆈꂓꁱꀋꅲꌠꆏ，ꁦꎴꏦꌬꊿꆹꐛꐨꉉꀽꇬꄀꄉꄡꑟ。
ꉬꊰꏁꏢꌠ ꁦꎴꆄꄻꏲꑘꌤꏲꅉꆏꏦꃤꇬꈴꄉꈒꇓꍞꊟꄹꏦꄻꐛꄻꐛꒆꄉ，ꋍꌤꃅꊿꏦꃤꏤꄉꌠꄉꅍꌅꈌꌋꆀꈭꎁꇬꈴꄉꃅꎁꃅꌠꐛꐨꏭꍞꊟꄡꑟ。
ꉎꊐꌠꁦꎴꆄꄻꏲꑘꌤꏲꅉꆹꐰꊐꌠꁦꎴꆄꄻꏲꑘꌤꏲꅉꋋꇅꃅꋍꃅꎁꈐꇬꌤꆿꀋꀞꅀꃅꎁꀋꃅꌠꌋꅜꇬꆏ，ꅑꀵꅇꁵꄉꄺꀱꎻꅀꈛꎂꃅꌌꅓꀞꄡꑟ。
ꉬꊰꉆꏢꌠ ꁦꎴꆄꄻꏲꑘꌤꏲꅉꌋꆀꋍꌤꃅꊿꃅꎁꃅꇬꆏ，ꉉꄻꀋꅐꃅꐧꋦꌋꆀꉻꊿꁳꍞꊟꎻꄡꑟ。ꌤꃅꅉꌋꆀꑴꅉꆹꉎꊐꌠꏓꂱꍔꃚꉈꑴꋍꁦꎴꆄꄻꏲꑘꌤꏲꅉꏭꏦꃤꋌꋐꇬꏦꐆꌠꃅꐨꏭꐴꀖꌅꈌꐥ。ꄚꃆꂮꐥꌠꏓꂱꍔꃚꅀꋍꁦꎴꆄꄻꏲꑘꌤꏲꅉꆹꐴꀖꌠꊪꊊꇬꆏ，ꋋꇅꃅꍤꄻꂥꀘꄡꑟ。
ꏃꊱꌠ ꏁꁈꏦꀧ
ꉬꊯꈬꏢꌠ ꇩꏤꆹꇵꆅꄴꏮꉃꑲꌤꃅꌠꌌꇩꂱꎆꏣꌋꆀꐧꋦꀻꎆꎖꄎꌠꇬꇱꄉ，ꑤꊐꌠꈋꉐꏓꂱꍔꃚꆹꇵꆅꄴꏮꉃꑲꌤꃅꌠꌌꂱꑱꏲꄸꈐꇩꂱꎆꏣꌋꆀꐧꋦꀻꎆꎖꄎꌠꇬꇱꄉ。
ꃘꊰꏢꌠ ꑤꊐꌠꈋꉐꏓꂱꍔꃚꆹꋋꊐꌠꍔꃚꃅꎁꇬꈴꄉꏲꑘꏱꁕꋌꈚꇬꇵꆅꄴꏮ、ꋎꍅ、ꍞꊟꌤꃅꌠꑍꃀꑍꌫꎆꆽꎍꄉꃅ。
ꇩꃷꑼꁦꎴꆄꄻꏲꑘꌤꏲꅉꆹꇩꃷꑼꄚꃆꂮꐥꌠꌤꃅꅉꐊꄉ，ꇵꆅꐥꈴꐛꐨꇬꈴꄉ，ꇩꏤꑭꊂꇵꆅꄴꏮ、ꋎꍅ、ꈭꋏꉃꄻ、ꍞꎖ、ꂴꎖ、ꂴꌗꋏ、ꍞꊟꍤꄻꑠꐘꃆꏤꄻ。ꍏꑷꏱꎆꆹꊋꋠꃅꄷꏭꆏꇵꆅꄴꏮꉃꑲꐘꃆꀉꒉꀊꂾꌠꏭꁥꇱꎆꁵ。
ꌜ、ꊨꏦꏱꅉꐎ、ꎂꏲꏃꏓꂱꍔꃚꆏꂱꑱꏲꑘꏱꁕꇵꆅꐛꐨꇬꈴꄉ，ꇩꃷꑼꁦꎴꆄꄻꏲꑘꌤꏲꅉꏤꄉꌠꐘꃆꈐꇬꄉ，ꇵꆅꄴꏮ、ꋎꍅ、ꍞꊟꑠꐘꏳꏤꄻ，ꄷꀋꁧꐘꃆꌫꄻꌠꌫꎆꏦꀧꄉ。
ꃘꊰꋋꏢꌠ ꇩꏤꆹꊋꀥꇱꄉꅉꂫꊐꌠꇵꆅꄴꏮꉃꑲꉹꁌꋈꄻ，ꌢꎭꃅꄷꌋꆀꀁꑌꊿꋅꃅꄷꇵꆅꄴꏮꉃꑲꌤꃅꌠꊋꁈꄏ。
ꃅꄷꈁꐥꊐꌠꏓꂱꍔꃚꆹꇓꈓꀀꇽ、ꂿꑘꁡꇤꅉꂫꊐꌠꇵꆅꄴꏮꌤꃅꌫꎆꏦꀧꄡꑟ。
ꃘꊰꑋꏢꌠ ꇩꏤꆹꌐꏤꄉꌠꇵꆅꊋꋠꊿꈧꌠꏭꆅꉁꈭꋏꇇꀨꌠꃄꌬ，ꆅꉁꌫꎆꊨꑵꇧꎭ。ꑭꋧꏡꁈꆹꇩꃷꑼꁦꎴꆄꄻꏲꑘꌤꏲꅉꌋꆀꇩꃷꑼꏱꎆꌤꏲꅉꈧꌠꐮꐊꄉꏤꄻꎻ。
ꃘꊰꌕꏢꌠ ꑤꊐꌠꈋꉐꏓꂱꍔꃚꆹꇵꆅꄴꏮꉃꑲꁬꋌ、ꆅꉁꆄꄻꉁꈾꌋꆀꀉꁁꎊꈬꑠꊭꄎꄉ，ꌌꄐꄉꁆꌬ。
ꃘꊰꇖꏢꌠ ꇵꆅꄴꏮ、ꆅꉁꆄꄻ、ꈆꑪꎥꃪ、ꂘꇐ、ꆄꅉꇬꇵꆅꃆꂮꀞꄻꌠꊿ，ꉈꑴꒃꅐ、ꌤꃅꅉꇬꄉꇵꆅꆅꀦꌋꆀꐮꋑꈌꌠꀉꁁꊿꏭꆏ，ꄚꃆꂮꐥꌠꌤꃅꅉꆏꇩꏤꏤꐪꇬꈴꄉ，ꇿꋌꐥꌠꁦꎴꑴꃅꏁꁈꌋꆀꆅꉁꆄꄻꇭꀧꌋꃅꏁꁈꌌꌬ，ꄷꀋꁧꄉꄐꃅꁥꇱꎆꁵꄡꑟ。
ꉆꊱꌠ ꏦꃤꃅꎁ
ꃘꊰꉬꏢꌠ ꃅꄷꈁꐥꊐꌠꏓꂱꍔꃚꆹꏦꃤꋌꋐꏤꐪꇬꀋꈴꃅꄛꇰꃅꎁꃅ，ꀋꉬꀐꇬꇵꆅꃆꂮꂁꉱ、ꈱꄜ、ꑎꄜ，ꀋꉬꀐꇬꇵꆅꁖꅐ、ꐥꈴꄮꇬ，ꋋꇅꃅꊥꇬꄉꈭꋏꉃꄻꌠꀋꃅ、ꋎꍅꏁꁈꌌꀋꌬꌠꆏ，ꉎꊐꌠꏓꂱꍔꃚꁳꅑꀵꅇꁵꄉꄺꀱ，ꅇꇰꀠꂘꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꌠꅐꇁꌠꆏ，ꆽꎍꐨꐥꌠꀨꏲꊿꏭꆏ，ꏦꃤꇬꈴꄉꌌꏲꑘꅓꀞ；ꑽꃤꐛꌠꆏ，ꏦꃤꇬꈴꄉꅑꑘꑽꃤꎹ。
ꃘꊰꃘꏢꌠ ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꆹꏦꃤꋌꋐꏤꐪꇬꆼꁏꄉꄚꐰꐛꐪꇬꋍꑵꐥꌠꆏ，ꋋꊐꌠꏓꂱꍔꃚ、ꉎꊐꌠꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꅇꇰꀠꂘꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꃅꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꏦꃤꇬꈴꄉꌌꏲꑘꅓꀞ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ：
（ꋍ）ꏦꃤꇬꀋꈴꃅꇵꆅꃆꂮꅇꇰ、ꄛꇰꅀꃅꎁꄜꉺ，ꀋꉬꀐꇬꇵꆅꃆꂮꂁꉱ、ꈱꄜ、ꑎꄜꌠ；
（ꑍ）ꇵꆅꁊꈴꌠꅐꇁꅀꅐꇁꏭꐛꄮꇬꋋꇅꃅꄴꏮ、ꋎꍅꏁꁈꌌꀋꌬꌠ；
（ꌕ）ꏦꃤꇬꀋꈴꃅꍞꊟꍤꄻꃅꎁꃅ，ꀋꉬꀐꇬꏦꐆꃅꐨꌋꅜꇬꋋꇅꃅꌌꀋꍤꀋꄻꌠ；
（ꇖ）ꋋꇅꃅꌤꃅꅉꌋꆀꑴꅉꆹꐰꊐꌠꁦꎴꆄꄻꏲꑘꌤꏲꅉꇵꆅꄴꏮꉃꑲꄉꅍꃅꎁꀋꃅꌠꏭꐴꀖꌠꍤꄻ、ꀞꄻꌠꀋꃅꌠ；
（ꉬ）ꏦꃤꋌꋐꇬꆼꁏꄉꀉꁁꄉꅍꀋꃅ、ꃅꎁꀋꃅꌠ。
ꃘꊰꏁꏢꌠ ꑤꊐꌠꈋꉐꏓꂱꍔꃚꄚꃆꂮꐥꌠꌤꃅꅉꆹꏦꃤꋌꋐꏤꐪꇬꀋꈴꃅꇵꆅꄴꏮꉃꑲꌋꆀꏦꀧꃅꎁꀋꃅꌠꆏ，ꋋꊐꌠꏓꂱꍔꃚꅀꉎꊐꌠꏓꂱꍔꃚꄚꃆꂮꐥꌠꌤꏲꅉꁳꅑꀵꅇꁵꄉꄺꀱ，ꅇꇰꀠꂘꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꃅꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꌌꏦꃤꇬꈴꄉꏲꑘꅓꀞ；ꑽꃤꐛꌠꆏ，ꌌꏦꃤꇬꈴꄉꅑꑘꑽꃤꎹ。
ꃘꊰꉆꏢꌠ ꆄꈻꄴꏮꋏꍅꏲꉻꆹꏦꃤꋌꋐꏤꐪꇬꆼꁏꄉ，ꄚꐰꐛꐪꇬꋍꑵꐥꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꅇꇰꀠꂘ，ꇬꏭꅓꈪꊐꎻ；ꆽꎍꐨꐥꌠꀨꏲꊿꌋꆀꀉꁁꈛꎂꆽꎍꊿꏭꆏ，ꏦꃤꇬꈴꄉꌅꈌꀁꋌꊰ、ꄉꅍꇔꇧꎭ、ꋍꌤꃅꅍꀜꋊꇧꎭ，ꄷꀋꁧꏦꃤꇬꈴꄉꄚꃆꂮꐥꌠꆽꎍꊿꌤꃅꊫꄳꄯꒉꈪꌌꁧ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ：
（ꋍ）ꏦꃤꇬꈴꄉꇵꆅꍞꎖꃅꎁꀋꃅꌠ；
（ꑍ）ꏦꃤꇬꈴꄉꇵꆅꃆꂮꄛꇰ、ꅇꇰꃅꎁꀋꃅꌠ，ꇵꆅꃆꂮꂁꉱ、ꈱꄜ、ꑎꄜꌠ；
（ꌕ）ꑴꇙꃅꇵꆅꃆꂮꈨꇐꏓꈹ，ꀋꉬꀐꇬꇵꆅꃆꂮꈨꇐꌋꆀꇵꆅꃆꂮꄛꇰꌠꌌꋋꇅꃅꎥꃪ、ꍤꄻ、ꃶꐚꐛꐪꍤꌠꀋꃅꌠ；
（ꇖ）ꇵꆅꃆꂮꌋꅜꄮꇬ，ꃅꎁꇬꈴꄉꋋꇅꃅꏦꃤꋌꋐꏤꐪꏁꁈꌌꀋꌬꌠ；
（ꉬ）ꇵꆅꊿ、ꆅꀦꌌꊿ、ꇵꆅꏭꐛꌠꊿ、ꋍꈚꄉꐮꋑꈌꌠꊿꃆꂮꐥꌠꂁꄉꄡꑟꌠꑴꅉꃆꂮꈨꇐ、ꌬꇐꉇꉈꃅꌌꅔꁖꇧꎭꌠ。
ꃘꊰꈬꏢꌠ ꆅꉁꆄꄻꏲꉻꆹꏦꃤꋌꋐꇬꏤꐪꆼꁏꄉ，ꄚꐰꐛꐪꇬꋍꑵꐥꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꅇꇰꀠꂘ，ꇬꏭꅇꈪꊐꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꌠꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꏦꃤꇬꈴꄉꌅꈌꀁꋌꊰ、ꄉꅍꇔꇧꎭ、ꋍꌤꃅꅍꀜꋊꇧꎭ，ꄷꀋꁧꏦꃤꇬꈴꄉꄚꃆꂮꐥꌠꆽꎍꊿꃅꑘꊫꄳꄯꒉꀜꋊꇧꎭ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ：
（ꋍ）ꏤꐪꇬꀋꈴꃅꂱꑱꌤꃅꅉꇬꇵꆅꄴꏮ、ꋎꍅꌤꃅ、ꆅꉚꅉꇵꅽꋎꍅꂿꃆꌋꆀꆽꎍꈍꈐꇬꄉꇵꆅꄴꏮꌤꃅꌠ；
（ꑍ）ꏤꐪꇬꀋꈴꃅꇵꆅꃆꂮꄛꇰꌠ，ꀋꉬꀐꇬꇵꆅꃆꂮꂁꉱ、ꈱꄜ、ꑎꄜꌠ；
（ꌕ）ꇵꆅꃆꂮꌋꅜꇬ，ꏤꐪꇬꀋꈴꃅꇵꆅꊿ、ꇵꆅꏭꐛꌠꊿꏭꆅꉁꆄꄻꈭꋏ、ꆅꅉꇬꄉꇇꀨꈭꋏ、ꆅꉚ、ꏮꌊꀉꁁꆅꉚꁧꌠ，ꀋꉬꀐꇬꏮꌊꀉꁁꆅꉚꁧꌠꄘꑣꌠ；
（ꇖ）ꏤꐪꇬꀋꈴꃅꂱꑱꌤꃅꅉꈐꇬꇵꆅꆅꀦꇱꇵꅽꅉꇬ、ꎊꇐꌋꆀꆅꉁꆄꄻꀊꀜꌌꅋꋊꅀꉮꐪꀋꐥꃅꀞꄻꌠ；
（ꉬ）ꏤꐪꇬꀋꈴꃅꆅꉁꆄꄻꉁꈾꌌꅋꌠ，ꁁꉬꀐꇬꏤꄉꇬꋍꃢꀉꄂꌬꌠꆅꉁꆄꄻꉁꈾꌌꐗꇨꀋꎭꃅꊛꄉꌬꌠ；
（ꃘ）ꆅꉁꆄꄻꈭꋏꈴꎁꇬꏤꐪꇬꀋꈴꃅꆅꌷꇐꎺꁱꌬꇐꀨꎹꌠ；
（ꏃ）ꉇꉈꃅꇵꆅꊿ、ꆅꀦꌌꊿ、ꇵꆅꏭꐛꌠꊿ、ꋍꈚꄉꐮꋑꈌꌠꊿꑴꅉꂁꇐꃆꂮꐥꌠꈨꇐ、ꌬꇐꌌꅔꁖꇧꎭꌠ。
ꏃꊰꏢꌠ ꌦꎹꌦꇲꏲꉻꆹꏤꐪꇬꀋꈴꃅꇵꆅꃆꂮꄛꇰ，ꀋꉬꀐꇬꇵꆅꃆꂮꂁꉱ、ꈱꄜ、ꑎꄜ，ꀋꉬꀐꇬꇩꏤꄚꃆꂮꐥꌠꏤꐪꇬꈴꄉꀋꃅꄉ，ꌦꊐꒉꄸꃅꌦꇬꈴꄉꆄꈻꁭꁘꌠꅐꇁꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꅇꇰꀠꂘ，ꇬꏭꅇꈪꊐꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꌠꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꏦꃤꇬꈴꄉꌅꈌꀁꋌꊰ、ꄉꅍꇔꇧꎭ、ꋍꌤꃅꅍꀜꋊꇧꎭ，ꄷꀋꁧꏦꃤꇬꈴꄉꄚꃆꂮꐥꌠꆽꎍꊿꃅꑘꊫꄳꄯꒉꀜꋊꇧꎭ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ。
ꏦꃤꀋꈴꃅꌦꋊꅀꌞꊿꊥꇬꌊꌦꃷꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅇꁵꄉꏢꇧꎭ，ꏦꐆꄉꌠꊌꌠꎆꎴꌊꇁ，ꄷꀋꁧꐯꇯꄉꎆꃀꊰꃪꂷꈍꐰꀵꎻ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ。
ꏃꊰꋋꏢꌠ ꇩꋯꁦꎴꆄꄻꍤꄻꌤꏲꅉ、ꇙꀕꇵꆅꄴꏮꏲꉻꆹꏦꃤꇬꀋꈴꃅꇵꆅꃆꂮꄛꇰꃅꎁꃅꌠꆏ，ꄚꃆꂮꐥꌠꌤꏲꅉꁳꂱꑱꃅꎁꈍꈐꄉꅑꀵꅇꁵꄉꄺꀱ，ꅇꇰꀠꂘꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꌠꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꏦꃤꇬꈴꄉꌅꈌꀁꋌꊰ、ꄉꅍꇔꇧꎭ、ꋍꌤꃅꅍꀜꋊꇧꎭ； ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ。
ꏃꊰꑋꏢꌠ ꎸꈜ、ꈭꈜ、ꉹꁌꌬꃅꃴꃏꏸꀰꏢꌤꃅꅉꆹꏦꃤꋋꏢꏤꐪꇬꈴꄉꂴꏭꇵꆅꃆꂮꀞꄻꌠꊿꉈꑴꇵꆅꄴꏮꉃꑲꌠꁬꋌꌋꆀꆅꉁꆄꄻꉁꈾꌞꎭꌠꀋꃅꌠꆏ，ꄚꃆꂮꐥꌠꌤꏲꅉꁳꅑꀵꅇꁵꏤꈉꈴꄉꄺꀱ，ꇬꏭꅇꈪꊐꎻ；ꄽꂫꐛꐨꀉꆈꌠꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꏦꃤꇬꈴꄉꌅꈌꀁꋌꊰ、ꄉꅍꇔꇧꎭ、ꋍꌤꃅꅍꀜꋊꇧꎭ。
ꏃꊯꌕꏢꌠ ꏦꃤꋌꋐꏤꐪꇬꆼꁏꄉ，ꄚꐰꐛꐪꇬꋍꑵꐥꄉ，ꇵꆅꋋꎼꁊꈴ、ꐥꈴꇁꏭꐛꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꏦꐆꄉꊌꌠꎆꎴꌊꇁ，ꐯꇯꄉꎆꃀꉬꃪꂷꈍꐰꀵꎻꉆ；ꈌꁧꊫꄳꄯꒉꐥꀐꌠꆏ，ꇬꀦꊫꄳꃑꅉꁳꏦꃤꇬꈴꄉꊼꇅꇬꊫꄳꄯꒉꎴꄉꅀꀜꋊꇧꎭꎻ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ：
（ꋍ）ꅝꌠꀆꐒꇲꄻꌤꃅꅉꇲꄻꌠꀆꐒꆹꇩꏤꁦꎴꎕꏦꌋꆀꁦꎴꈳꏦꌠꇬꄉꀋꄐꌠ；
（ꑍ）ꅝꌠꀆꐒꁦꎴꋬꂻꅐꇐꆹꇩꏤꁦꎴꎕꏦꌋꆀꁦꎴꈳꏦꇬꄉꀋꄐꌠ；
（ꌕ）ꌌꇵꆅꄴꏮꉃꑲꇬꌬꌠꅋꋊꅐꇐꆹꇩꏤꁦꎴꎕꏦꌋꆀꁦꎴꈳꏦꇬꄉꀋꄐꌠ；
（ꇖ）ꇵꆅꅉꇬꄉꇵꆅꆅꀦꇱꇵꅽꄉꌠꅀꇵꆅꆅꀦꇱꇵꅽꄉꀐꏭꐛꌠꎊꈬꃷꄻ、ꎞꎭꇬ，ꅋꀋꋊꃅꀞꄻꌠ；
（ꉬ）ꒆꇐꄻꇐꒃꅐꄻꌤꃅꅉꒃꅐꌠꌦꄻꇐꇩꏤꊇꁧꎕꏦꇬꄉꀋꄐꌠ。
ꏃꊯꇖꏢꌠ ꏦꃤꋌꋐꏤꐪꇬꆼꁏꄉ，ꄚꐰꐛꐪꇬꋍꑵꐥꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꅇꇰꀠꂘ，ꇬꏭꅇꈪꊐꎻ，ꈌꁧꊫꄳꄯꒉꐥꀐꌠꆏ， ꏦꃤꇬꈴꄉꊼꇅꇬꊫꄳꄯꒉꎴꄉꅀꀜꋊꇧꎭꎻ；ꇵꆅꋋꎼꁊꈴ、ꐥꈴꅀꀉꁁꄽꂫꐛꐨꀉꆈꌠꅐꇁꌠꆏ，ꆽꎍꐨꐥꌠꀨꏲꊿꌋꆀꀉꁁꈛꎂꃅꆽꎍꌠꊿꏭꆏ，ꏦꃤꇬꈴꄉꌅꈌꀁꋌꊰ、ꄉꅍꇔꇧꎭ、ꋍꌤꃅꅍꀜꋊꇧꎭ，ꄷꀋꁧꏦꃤꇬꈴꄉꄚꃆꂮꐥꌠꆽꎍꊿꃅꑘꊫꄳꄯꒉꀜꋊꇧꎭ；ꑽꃤꐛꌠꆏ，ꏦꃤꇬꈴꄉꌌꅑꑘꑽꃤꎹ：
（ꋍ）ꆄꈻꄴꏮꋎꍅꏲꉻ、ꆄꉂꆄꄻꏲꉻꌋꆀꆅꀦꐭꒆꇐꋒꃯꉜꌤꃅꌠꌤꃅꅉꆹ，ꇩꏤꏤꄻꄉꌠꇎꏦꌋꆀꇮꇐꎕꏦꇬꄉꀋꄐꃅ，ꇵꆅꆅꀦꌡꉻꌌꏤꐪꇬꈴꄉꏟꈯꃅꏲꀋꂠꄉ，ꋒꃯꉜꅉꋌꎼꇵꅽꌋꆀꆅꀦꒆꇐꋌꎼꁭꁘꁧꌠ；
（ꑍ）ꇩꏤꄚꃆꂮꐥꌠꏤꐪꇬꆼꁏꄉ，ꇵꆅꋧꁮ、ꅋꌺꌋꆀꇵꆅꍤꎖꌡꉻꎹꈹ、ꀨꎹ、ꌌꐺ、ꎞꎭꌋꆀꌬꈧꌠ；
（ꌕ）ꆄꈻꄴꏮꋎꍅꏲꉻ、ꆄꉂꆄꄻꏲꉻꆹꇩꏤꏤꄻꄉꌠꀋꈴꃅ，ꌦꊐꂿꄷꄉ、ꌦꄻꌬꇐꌫꄻꇈꌦꒉꇬꈴꄉꆄꈻꁭꁘꌠꇫꅐꇁꌠ。
ꏃꊯꉬꏢꌠ ꇵꆅꍤꎖꌠꇬꀋꈴꃅꊿꌋꆀꇙꀕꐯꇯꊌꌠꇵꆅꃆꂮꐥꌠꇈꈬꇙꀕ、ꀁꇬꉘꄉꌠꎇꃀꍅꑓꌌꃷꐺ、ꎞꎭꌠꆏ，ꑤꊐꌠꈋꉐꃅꄷꏓꂱꍔꃚꎇꃀꍅꑓꆅꉚꏲꑘꌤꏲꅉꁳꅑꀵꅇꁵꄉꏦꐆꃅꐨꆏꄉꎻ，ꄷꀋꁧꏦꃤꇬꈴꄉꌌꏲꑘꅓꀞ。
ꏃꊰꃘꏢꌠ ꇩꏤꏤꄻꄉꌠꋌꐛꇵꆅꅐꇁꅉꇬꄉꈲꒉ、ꈭꈜ、ꆫꈩ、ꄐꊋꇁꀦꑠꋈꄻꐘꃆꀉꒉꀊꂾꌠꋈꄻꌠꆏ，ꁦꎴꍤꄻꌠꀋꃅꃅꋈꄻꌠ，ꀋꉬꀐꇬꆄꈻꄴꏮꋎꍅꏲꉻꉜꐨꇬꈴꄉꇵꆅꄴꏮ、ꋎꍅꏁꁈꌌꌬꄻꅐꌠꇬꀋꌬꌠꆏ，ꑤꊐꌠꈋꉐꏓꂱꍔꃚꁦꎴꆄꄻꏲꑘꌤꏲꅉꁳꅑꀵꅇꁵꄉꄺꀱ，ꅇꇰꀠꂘ，ꇬꏭꅇꈪꊐ，ꌌꎆꃀꉬꄙꂷꈋꉐꌕꃪꂷꈍꐯꀵꎻ；ꏤꄮꎪꄉꄻꀋꀱꌠꆏ，ꌌꎆꃀꌕꃪꂷꈋꉐꊰꃪꂷꈍꐯꀵꎻ，ꄷꀋꁧꄜꌊꄚꃆꂮꐥꌠꏓꂱꍔꃚꁳꃅꄉꅍꌅꈐꇬꈴꄉ，ꅑꀵꅇꁵꄉꋈꄻꌠꆏꇧꎭ、ꈢꇧꎭꎻ。
ꏃꊰꏁꏢꌠ ꌤꃅꅉꌋꆀꑴꅉꆹꏦꃤꋌꋐꏤꐪꇬꆼꁏꄉ，ꇵꆅꋋꎼꁊꈴ、ꐥꈴ，ꌞꊿꋌꎼꈯꄿ、ꇇꇐꏭꉮꐪꐥꌠꆏ，ꏦꃤꇬꈴꄉꉹꁌꃆꑘꅑꃤꀵꄜꄡꑟ。
ꈬꊱꌠ ꁥ ꏦ
ꏃꊰꉆꏢꌠ ꏦꃤꋌꋐꇬꄚꐰꌬꅇꈧꌠꄜꇐ：
（ꋍ）ꇵꆅꊌꊿ、ꇵꆅꊌꏭꐛꌠꊿ：ꋋꆹꇩꃷꑼꁦꎴꆄꄻꌤꏲꅉꄜꃑꌠ《ꍏꉸꏓꂱꇭꉼꇩꇵꆅꄴꏮꉃꑲꏦꃤꏤꄻꏲꂠꌠꇵꆅꆅꉚꆄꇠꎕꏦ》ꇬꈴꄉ，ꇵꆅꊌꊿꌋꆀꇵꆅꏭꐛꌠꊿꅿꆅꉚꆄꇠꎕꏦꇬꄉꄐꌠꊿꄜ。
（ꑍ）ꆅꁧꆅꀿꌌꊿ：ꋋꆹꆅꁧꆅꀿꇱꇵꅽꇈꆅꉚꐪꀋꁮꄚꆅꁧꆅꀿꁖꇁꄎꌠꊿꄜ。
（ꌕ）ꐥꈴꆅꌷꇐꍤꄻ：ꋋꆹꊿꈬꇬꆄꈻꅀꇭꀧꂄꐨꁷꄟꌋꆀꋍꐰꏤꐊꊈꌌꍤꄻꎥꃪꄉ，ꆄꈻꄴꏮꋎꍅꏁꁈꌋꆀꇭꀧꌋꃅꊜꁈꄜꎼꇁꌠꄜ。
（ꇖ）ꇵꆅꊌꅉ：ꋋꆹꆅꁧꆅꀿꇵꅽꇁꅉꇬꄉꈭꇍꏭꁭꁘꁧꌠꈍꈐꀄꊭꅉꅀꇵꆅꇀꅉꋍꈚꀉꄂꄜ。
（ꉬ）ꇵꆅꐤꅉ：ꋋꆹꇵꆅꊿꆹꊾꈬꇬꄉꁖꅐ、ꐥꈴꄉ，ꋍꆅꁧꆅꀿꁭꁘꌊꇫꅉꈧꌠꄜ。
（ꃘ）ꊿꌋꆀꎆꐯꇯꊌꌠꇵꆅ：ꋋꆹꊿꌋꆀꐧꊭꊈꇙꀕꐯꇯꊌꌠꇵꆅꑵꄜ，ꅺꌡꇬꀉꉌꆅ、ꈌꃶꆅ、ꁯꄸꌦꅝꆅꑠ。
（ꏃ）ꋌꐛꇵꆅꇁꀦꅐꅉ：ꋋꆹꊿꋌꎼꇵꆅꊌꉆꌠꆅꁧꆅꀿꋍꈨꋋꈨꆹꋌꐛꋌꐙꇈꈬꇙꀕꈬꇬꀊꉗꃅꐥꌠꌋꆀꀰꏮꃅꐥꅉꇬꄜ。
（ꉆ）ꇢꆣꈴꆅꒆꇐ：ꋋꆹꊿꇭꀧꇬꅀꀉꁁꇙꀕꇬꄉꆅꁧꆅꀿꋌꌌꊿꇳꌠꒆꇐꄜ，ꅺꌡꇬꁭꌺ、ꑿꃅ、ꈌꎸꑠ。
（ꈬ）ꆅꉃꄉꇵꅽ：ꋋꆹꆅꉁꌷꇐꁧꃤꃄꅉꇬꄉ，ꆅꁧꆅꀿꁭꁘꄉꋌꎼꇵꅽꌠꄜ。
（ꊰ）ꆅꉚꄉꇵꅽ：ꋋꆹꆅꉚꅉꀀꄉꆅꉁꌠꊿꆅꉚꄉꇵꅽꌠꄜ，ꆅꉚꅉꀀꄉꆅꉁꄮꇬꇵꅽꌠꌋꆀꆅꉚꅉꄉꅐꁧꈭꐨꇵꅽꌠꄚꐊ，ꄚꆅꉚꅉꀀꄉꆅꉚꂾꅀꆅꉚꀀꄉꆅꉽꇁꄮꇬꈯꑌꀐꌠꇵꅽꆏꄚꇬꀋꐊ。ꆅꉚꅉꇬꌤꃅꊿꆹꆅꉚꅉꇬꄉꆅꇵꅽꌠꑌꆅꉚꅉꄉꇵꅽꌠꇬꐊ。
（ꊯꊪ）ꋒꃯꉜꄉꇵꅽ：ꋋꆹꋒꃯꉜꌤꃅꄮꇬ，ꆅꁧꆅꀿꋑꈌꄉꇵꅽꌠꄜ。
（ꊰꑋ）ꁮꋧꌺ、ꆅꅋꌺ：ꋋꆹꏦꃤꋌꋐꇬꏤꄉꌠꇵꆅꅐꇁꉆꌠꁮꋧꌺ、ꆅꅋꌺꑠꄜ。
（ꊯꌕ）ꅋꋊ：ꋋꆹꐈꇐ、ꎊꇗ、ꒆꇐꏡꁈꌌꌬꄉꋦꈭꇬꆅꁧꆅꀿꐭꒆꇐꈔꋏꅀꋊꑣꇧꎭꌠꄜ。
（ꊯꇖ）ꆄꈻꄴꏮꋎꍅꏲꉻ：ꋋꆹꆄꈻꄴꏮꋎꍅꌤꃅꌠꆄꈻꄴꏮꋎꍅꌤꃅꈯꄜꌋꆀꄚꉎꏯꉉꌠꏲꉻꃅꑘꃅꌠꌋꆀꐯꌟꌠꌤꃅꅉꄜ。
（ꊯꉬ）ꆄꉂꆄꄻꏲꉻ：ꋋꆹ《ꆄꉂꆄꄻꏲꉻꏲꂠꃷꋪ》ꇬꈴꄉꆄꉂꆄꄻꏲꉻꌤꃅꈌꁧꊫꄳꒃꊊꄉ，ꆄꈻꆅꉚꆄꇠ、ꆅꉁꌤꃅꌠꏲꉻꄜ。
ꏃꊯꈬꏢꌠ ꇵꆅꉃꑲꇬꃆꂮꐥꌠꋠꇐ、ꁬꋌ、ꌦ、ꀆꐒ、ꆅꉁꆄꄻꀉꀜꌋꆀꆅꁧꆅꀿꐭꒆꇐꏲꂠꉈꑴꇙꀕꇵꆅꄴꏮꌋꆀꇩꏤꃅꋮꁦꎴꇵꆅꍤꄻꇬ，ꏦꃤꋌꋐꇬꏤꀋꄉꌠꆏ，ꂱꑱꃅꀉꁁꄚꃆꂮꐥꌠꏦꃤ、ꏲꑘꏦꇗꇬꏤꐪꌌꌬ。
ꉆꊰꏢꌠ ꏦꃤꋌꋐꆹ2004ꈎ12ꆪ1ꑍꄑꌌꃄꌬ。
由中国民族语文翻译局提供
