ꏓꂱꏦꍤꑼꀊꂥꇊꀊꂥꊐꌠꌤꃅꅇꄜ
——2020ꈎ5ꆪ25ꑍꊯꌕꈭꌠꇩꏤꑭꊂꏓꂱꁧꎁ꒜ꀉꒉꌕꃢꌠꈿꅉꇬ
ꏓꂱꏦꍤꑼꀊꂥꇊꀊꂥꊐꌠꏦꍤꍈ ꍈ ꏮ
ꁧꎁꊈ：
ꀋꃋ,ꉢꏓꂱꏦꍤꑼꀊꂥꇊꀊꂥꊐꌠꎁꃅ,ꃀꀉꒉꈿꅉꏭꃅꐨꌌꅇꄜꂿ,ꌌꍤꇖꅊꇈ,ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꀋꉊꄻꈎꅑꅸꇁꌠ,ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏲꂠꌠꇂꃴꄉ,ꇩꏤꑭꊂꏓꄊꌋꆀꋍꎮꊈꉼꊋꑌꃅꍞꊟꌠꇂꃴꄉ,ꏓꂱꏦꍤꑼꀊꂥꇊꀊꂥꊐꌠꆏꏟꈯꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꃅꈴꌬꈴ,ꎔꎗꃅꊯꌕꈭꇩꏤꑭꊂꏓꄊꃀꑍꃢꌠꈿꇬꏤꐪꃄꌬꇫꑟ,ꏟꈯꀕꃅꏓꇲꄉ“ꉬꑵꋍꉻ”ꌠꀑꐱꄐꉻꄹꎆ、ꋮꄮꃅ“ꇖꑵꐊꑷ”ꌠꄐꇐꄐꉻꄹꎆꌠꆼꒆꄉ，“ꇖꑵꉪꉻ”ꀉꇨꃅꑌꇁ、“ꇖꑵꑴꑇ”ꌠꑌꈬ、“ꑍꑵꀧꌋꃅ”ꌠꃅꇫꑟꌠꌌꄉꅍꃅꎁꃄꄻꌠꀂꏽꄉꄛꑣꅐꇁ,ꍏꇩꀊꏀꄻ70ꈎꈭꏝꐛꌠꋨꏦ、ꄜꀨꉙꂘꍔꆙꌠꌋꆀꏀꉹꌀꌡꆅꅋꋍꃀꆅꇵꆅꐯꇳꐨꄴꏮꋎꍅꌠꉈꈽꌠꁖꅐꇁꌠꉪꐨꆹꏮꌊꇬꂾꉪꐨꃅ、ꂿꃆꆹꄜꌠꏟꈯꃅꃄꄻꌠꃅ,ꍔꍞꉉ、ꃅꇴꄉꉻꉪ、ꀻꎆꌠꏂ、ꑴꇨꌠꉜꁨ,ꋍꑞꋍꐘꏦꍤꌤꃅꌠꊌꐨꀊꏀꃅꐥ。
ꏦꍤꃅꎁꃅꇵꆅꐯꇳꐨꅸꍅꌠꃆꂮ
ꏓꂱꏦꍤꑼꀊꂥꇊꀊꂥꊐꌠꆏꏟꈯꃅꑮꏣꀻꊝꎻꏹꀋꂿꑘꃅꄐꌐꎼꇁꌠꌋꆀꄈꍏꑷꏤꁈꄐꁆꌠꃅꈴꌬꈴ,ꍏꑷꍔꃔꊈꏲꂠꌠꇂꃴꄉ，ꏦꍤꌤꏲꅉꈁꐥꊐꌠꏃꂠꌊꑴꇙꃅꇵꆅꐯꇳꐨꄴꏮꋎꍅꌠꃅꇴꄉꉻꀉꒉꌠꁧꃤꃅ,ꏦꃤꈴꄉꇵꆅꐯꇳꐨꅸꍅꌠꇬꇬꂾꉪꐨꐏ、ꂿꃆꆹꄜ。2020ꈎ2ꆪꅑ4ꆪꑟꌠ,ꈌꁧꄉꇵꆅꐯꇳꐨꅓꑘꑽꃤꐆꌠꊿꐯꇯ3751ꑼꒃꈢ、ꊿ2521ꑼꌌꅇꎹ，ꈌꃓꅍꑠꃆꂮꐥꌠꇵꆅꄴꏮꌋꃅꌬꇐꍞꏲ、ꆅꉁꇤꇧꎭꅍꀞꄻ、ꇉꐥꇙꀕꀧꌋꃅꑠꁁꏯꉻꈲꅇꎹꌠꃣꈌ2829ꐘꀞꄻ。ꋍꆏꐳꃅꃣꈌꀞꄻꈁꏦꄻꅐꇁ。ꇵꆅꐯꇳꌠꆹꎆꏣꐧꋦꇬꊼꇅꀉꒉꃅꎟꑣꅍꐥ,ꏦꃤꈴꄉꄴꏮꋎꍅꌠꆏꀊꅰꃅꀋꂿꑘꌠꐛ。ꃣꈌꀞꄻꈉꐨꇬꄉꄐꂿꄷꄉ,ꏓꂱꏦꍤꑼꀊꂥꇊꀊꂥꊐꌠ1ꆪ30ꑋꌐꄉꋊꍬꅐꇁ。ꋍꊂꆏ,ꄚꃆꂮꐥꌠꍔꃔꌤꏲꅉꌋꆀꐯꇯꄉꄐꌐꉜꐨꄜꃑ,ꏦꃤꈴꄉꇵꆅꐯꇳꐨꉮꄻꌠꄴꏮꋎꍅꑽꃤꅓꀞ;ꇩꏤꁦꎴꆄꄻꄚꄿꊈꑼꉼꑠꌋꆀꐮꐊꄉꄐꁆꄉ,ꆅꉁꌠꇬꉮꄻꃸꆽꑽꃤꐆꌠꏭꐯꇯꏦꃤꈴꄉꏦꇨꃅꊂꈹꅇꎹ;ꎿꀸꊝꎼꑠꌋꆀꐯꇯꄉꇩꏤꋥꁕꁦꎴꇵꆅꅋꇐꍤꄻꌠꇬꉮꄻꌠꄴꏮ，ꏦꇨꃅꇵꆅꐯꇳꐨꋯꉈꄉꈏꃹꇁꐨꐥꃨꆰꐨꄴꏮ；ꄚꃆꂮꐥꌠꏲꂠꌤꏲꅉ、ꍔꃔꌤꏲꅉꌋꆀꐯꇯꄉꄐꇺꉜꐨꄜꃑ,ꇇꀨꄉꃄꀱꄺꀱ, ꏓꇲꄉꇵꆅꄴꋏꌠꅉꀕꐛꄟꈴꌠꌋꆀꎆꏣꐧꋦꀻꎆꌠꎁꃅꏦꌬꏦꀧꅍꁵꄻ。ꑍꆏꃣꈌꌌꄉꏦꃤꉉꀽꌠꏀꀺ。ꋋꇅꃅꅐꇁꌠꄉꉻꁦꎴꆄꄻꌤꆿꀉꒉꀊꂾꌠꊝꇬꆏꃄꄟꀉꆹꌠꇬꈴꄉꃅꌐꀋꉆ。2ꆪ11ꑍꄑ,ꏓꂱꏦꍤꑼꀊꂥꇊꀊꂥꊐꌠꉘꃀꃢꌠꀞꄻꇰꄉꌠꒃꈢꊂꈹꅇꎹꌠꃣꈌꌌꏦꃤꉉꀽ,ꉘꃀꃢꌠꇬꉢꀯꌋꆀꐮꐊꄉꊥꋦꃆꑘꄜꃑ,ꉘꃀꃢꌠꆏꄡꂷꌠꋍꃢꄜꅐꃅꄉ,ꇵꆅꐯꇳꐨꄴꏮꋎꍅꐯꀋꌡꐋꀋꌡꊬꌠꇬꈴꄉ，ꁸꌐꄉꃣꈌꊥꋦꌠ10ꃢ55ꐘꌌꄜꃑ,ꆅꉁꐥꀹ、ꇵꆅꄴꏮꐥꀹ、ꃷꎏꐥꀹ、ꐧꋦꐥꀹꀧꌋꃅꌠꌌꑓꅐꎑꃅꄉ,ꏦꌬꌠꋊꍬ、ꑽꃤꐆꌠꅇꈪꊐ、ꐧꋦꉙꂘꌠꏣꀋꑌꌠꊌꐨꐥꀐ。ꌕꆏꃣꈌꃆꂮꐥꌠꊿꏦꊒꌠꌅꈌꈲꁧꏦꀧ。ꇫꇬꇯꆐꋓꉪꁨꄉꎃꊒꃅꏦꃤꏱꁈꌬꋒ,ꏦꃤꄩꐂꄉ“ꀉꆈꃅꀞ”“ꏦꇨꃅꀞ”“ꐳꃅꀞ”ꌠꊋꇤꄉꄴꏮ。ꑽꃤꐆꏭꐛꌠꊿꆹꇵꆅꐥꌠꉜꊨꄅꅀꃨꆰꐨꐥꌠꌡꌠꆏ,ꂴꌌꈭꋏꏦꀧꄉ,ꏦꌬꃰꊿꉈꇬꌠꄜꅐꇁ。ꐛꐪꀊꐎꌠꇵꆅꃆꂮꐥꌠꑽꃤꏭꀊꐎꃅꀞꌠꏱꁈꌬ,ꏦꃤꈴꄉꒃꀋꈢꌠꊿ576ꑼ、ꊿ117ꑼꌌꅇꀋꎹ。ꋌꃢꇵꆅꐯꇳꐨꄘꍅꌠꇨꃅꉈꈽꌠꇬꄉ，ꃅꄷꈧꌠꀊꅰꃅꃛꀙꏦꍤꌤꏲꅉꆏꍝꅇꈧꆏꄓ，ꏟꈯꃅꂱꑱꑴꅉꇵꆅꄴꏮꌠꌋꆀꏦꃤꈴꄉꃅꎁꃅꌠꇇꑍꁆꐯꇯꒃ，ꒉꋥꁕꇬꄉꐯꇯꄴꏮꐯꇯꋎꍅꌠꃅꈽ，ꏦꃤꌋꆀꉂꐪꌌꄉꍏꇩꇵꆅꄴꏮꁮꅉꇬꏦꍤꁬꌠꁰꄻꄉꀐ。ꋌꃢꀉꒉꃅꎖꎟꇬ,ꉪꊇꀊꅰꃹꅼꃅꍏꇩꇭꍣꄈꏲꂠꄉꌠꌋꆀꉪꇩꏤꐧꋦꉪꏦꄹꏦꄇꇖꀕꃅꂱꎆꅑꐨꐥꌠꌧꐚ,ꀊꅰꃅꃹꅼꃅꏦꏲꌠꆹꇩꏤꏱꄻꌠꇬꂿꄐꀋꂿꑘꌠꌧꐚ。
ꀱ2019ꈎꃅꐨꉪꏡ
2019ꈎꆹ,ꇩꏤꑭꊂꏦꍤꌤꏲꅉꆏꏟꈯꀕꃅꄈꌋꆀꇩꏤꌤꃅꃅꇴꄉꉻꇬꆼꒆꄉ,ꀋꎪꃅꏦꃀꏦꃤꏤꁵꄉꌠꏦꃤꍞꊟꃅꎁꍬꌬ。ꋋꈓꃅꐯꇯꋍꑞꋍꑵꃣꈌꀞꄻꌠ3146292ꐘ,ꌌꐯꌟꉜꇬ9.7%ꉀꎆ。ꄚꈐꏭ,ꌌꍤꄻꌠꒃꈢꃣꈌ935432ꐘ,ꌌꍤꄻꌠꅇꎹꃣꈌ1413742ꐘ,ꅓꑘ、ꉹꁌꃆꑘ、ꏲꑘꑗꇖꃣꈌ258520ꐘ,ꉻꈲꅇꎹꃣꈌ126912ꐘ,ꅇꎹꃄꄻꇬꏦꐆꍞꊟꃣꈌ411686ꐘ。
ꋍ、ꏣꀋꑌꃅꇩꏤꏱꄻꌠꃅꈽꄉ,ꎆꏣꐧꋦꀻꎆꃅꇴꄉꉻꎁꃅꁧꃤꃅ
ꊋꈀꑌꃅꇤꋬꂻꍏꇩ、ꏦꏲꍏꇩꋈꄻꌠꇬꇱ,ꏦꃤꈴꄉꏱꄻꌠꄹꇙꅉꇬꄉꇬꂾꉪꐨꐏ、ꂿꃆꆹꄜ。ꈌꁧꄉꒃꈢꌠꋍꑞꋍꑵꑽꃤꐆꏭꐛꌠꊿ1088490ꑹ、ꊿ1818808ꑼꌌꉻꅇꎹ,ꌌꐯꌟꉜꇬꂱꑱꅉꃅ3%ꌋꆀ7.4%ꉀꎆ。
ꏟꈯꃅꇩꏤꍔꍞꋬꂻꌠꌋꆀꐧꋦꎍꐽꌠꀧꌋꃅ。ꉻꄜꇩꏤꋬꂻꉜꐨꃅꈴꌬꈴ,ꏦꃤꈴꄉꏦꇨꃅꇩꏤꁷꐞ、ꁮꐚꂴꊙꃅꐺꑠꑽꃤꐆꌠꅓꀞ。ꑟꏦꑠꃅꄷꏦꍤꌤꏲꅉꊋꁈꄏꄉꇶꌾꌠꁏꎍꐽꌠꀧꌋꃅꌠꅉꀕꐛꄟꉺꏦꄻꐛꒆ。ꏟꈯꃅ“ꃔꇍꇬ”ꑠꎎꂘꑇꇐꑽꃤꐆꌠꅓꀞ。ꏦꇨꃅꑠꀉꆈꃅꊋꆍꏿꑽꃤꐆꌠꅓꀞ, ꊿ60654ꑻꌌꅇꎹ,ꌌꐯꌟꉜꇬ1.6%ꉀꎆ。ꏦꃤꈴꄉꊾꈐꊾꋠꑠꀉꑌꃅꅐꌠꎆꋚꉄꌎꑽꃤꐆꌠꅓꀞ, ꊿ393587ꑼꌌꅇꎹ,ꌌꐯꌟꉜꇬ5.1%ꉀꎆ。ꅑꃤꌤꅐꌠꑠꋬꂻꒃꅐꁁꏯꑽꃤꀉꒉꀊꂾꌠꌌꂴꄉꅓꀞ, ꊿ3543ꑻꌌꅇꎹ,ꌌꐯꌟꉜꇬ5.9%ꉀꎆ。ꄆꑠꈄꏍꈴꄉꊏꀸꌠꌋꆀꈄꏍꈴꄉꄊꁉ、ꊿꈴꌗꀉꑌꃅꀖꋊꌠꀦꑠꑽꃤꐆꌠꅓꀞꐨꊋꀉꒉꃅꇱ, ꊿ71765ꑹꌌꅇꎹ,ꌌꐯꌟꉜꇬ33.3%ꉀꎆ,ꈄꏍꈥꈉꇬꄉꑽꃤꐆꌠꄝꇬꂁꄉꎻꀋꉆ。
ꏦꇨꃅꏦꃤꈴꄉꀋꂄꌠꌩꄷꅠꌠꋊꌠꌐꄉꉈꈽꌠꄹꎆ。ꄚꃆꂮꐥꌠꌤꏲꅉꌋꆀꐯꇯꄉꄐꇺꐨꐥꌠꁱꐘ8ꏢꏤꄻꄉ,ꃣꈌꀉꒉꀊꂾꌠ107ꐘꈛꎂꃅꁱꄀꄉꍞꀞ,ꌐꑘꌧ꒜ꊤꁆꌌꌜꑦꇬꃣꈌ、ꄗꎱꀻꐦꀞꊿꂿꂁꃣꈌ、ꉸꉼꃔꋊꃤꃣꈌꑠꃣꈌꀉꒉꀊꂾꌠꍞꊟꏱꇺ。ꀋꂄꃆꂮꐥꌠꑽꃤꐆꌠꊿ30547ꑻ、ꄷꅠꃆꂮꐥꌠꑽꃤꐆꌠꊿ67689ꑻꌌꅇꎹ,ꌌꐯꌟꉜꇬꂱꑱꅉꃅ194.8%ꌋꆀ33.2%ꉀꎆ。ꀋꎪꃅ“ꀋꂄꄷꅠꑽꃤꐆꌠꊿꋍꂷꄝꇬꀋꎭ、ꀋꂄꄷꅠꑽꃤꐆꌠꀋꉬꄷꆏꌌꃷꁨꄂꀋꌐ”ꌠꌭꈬꇬꎷ,ꌜꊐꌠꏦꍤꑼꀋꂄꃆꂮꐥꌠꌋꆀꀉꒉꀊꂾꃅꄷꅠꌠꇬꃆꂮꐥꌠꃣꈌꏭꋍꃱꃅꋏꌫꄉ。ꍤꌋꌤꏲꅉꀋꂄꃆꂮꄷꅠꃆꂮꑽꃤꐆꌠꃣꈌꃅꄉꏮꁵꍤꄻꅇꎹ,ꏦꍤꌤꏲꅉꏦꃤꈴꄉꊨꄅꌊꃣꈌꃅꀋꄉꌠ9007ꐘ;ꀋꂄꃆꂮꄷꅠꃆꂮꃣꈌꃅꀋꄉꃅꏮꁵꌠꆏ,ꏦꃤꈴꄉꌌꃣꈌꃅꄉꌠ2148ꐘ。ꃹꅼꃅꅤꐴꇬꄉꀖꌠꊥꎆ,“ꀧꌋꃅꆫꁯ”1385ꑻꌌꅇꎹ,ꌌꐯꌟꉜꇬ295.7%ꉀꎆ。
ꏟꈯꃅꈢꇓꀖꀉꒉꌕꐘꌠꃅꋒ。ꎆꒉꎆꇁꋬꂻꌠꎁꃅꈴꈜꀧꌋꃅ。ꎆꒉꎆꇁꊏꀸ、ꎆꒉꎆꇁꏲꂠꐥꀹꀜꐆꑽꃤꐆꌠꊿ40178ꑼꌌꅇꎹ,ꌌꐯꌟꉜꇬ25.3%ꉀꎆ。ꏓꂱꏦꍤꑼꀊꂥꇊꀊꂥꊐꌠꆏꍏꑷꄚꃆꂮꐥꌠꌤꏲꅉꏭꏦꍤꇖꐨꌕꉹꌠꃑꄻ,ꍞꏲ、ꁢꊧꄴꏮꋎꍅꌠꄻꀉꇨꃅꄉꌠꄹꇙ。ꎭꑆꇔꈢꇓꀖꌠꎁꃅꊋꅐ。ꌢꎭꄏꐓꁁꏯ“ꑾꃅꎆꂁꋠ”ꌠ877ꑼꌌꅇꎹ,ꌢꎭꄏꐓꎆꋚꇬꇇꎇꌠꌌꀋꎪꃅꏦꇨꃅꅓꀞ。ꃣꈌꒉꄸꃅꌢꎭꀱꌢꎭꁧꌠꉮꌸꑱꈐ6000ꁯꏭꏦꌬꈭꋏꎆ7589ꃪꂷꃑꁵ,ꌌꐯꌟꉜꇬꂱꑱꅉꃅ42.4%ꌋꆀ54.7%ꉀꎆ。ꂿꑘꇮꃅꊿꃄꎆꁯꌠꌤꃆꉜꄉ,ꉇꉈꃅꃄꎆꄯꎝꑽꃤꐆꌠꊿ902ꑹꌌꅇꎹ,ꂿꑘꇮꃅꊿꇇꀨꄉꅇꎹꌠ10322ꐘ。ꎔꃨꌠꍏꇩꎁꃅꋽꇁꎔꇱ。ꋦꈭꍍꆀ、ꉇꄅꎊꈬꀉꀜꀊꇁꂁꃼꂁꃷ、ꏦꀋꊒꃅꇑꅤꑠꑽꃤꐆꌠꌌꏦꇨꃅꅓꀞ,ꊿ50800ꑹꌌꅇꎹ,ꌌꐯꌟꉜꇬ20.4%ꉀꎆ。ꒆꉻꋦꈭꁁꏯꉻꈲꅇꎹꌠꃣꈌ69236ꐘꀞꄻ,ꌌꐯꌟꉜꇬ16.7%ꉀꎆ。ꎭꑭꉻꑼꇑꅤꎆꏂꑘ32ꁯꆏꊨꏦꃄꈌꄐꃅꅣꄻꄉ,ꏓꂱꏦꍤꑼꀊꂥꇊꀊꂥꊐꌠꆹꁱꄀꄉꍞꀞ,ꌜꊈꌋꆀꌜꍔꃚꇫꉜꁨ、ꊋꁈꄏ,ꌕꊐꌠꏦꍤꑼꏓꇙꄉ,ꉻꈲꅇꎹꌠꌌꒆꉻꏱꄻꌠ4ꃪꎖꂿꄹꇙ。
ꀊꅰꃶꐚꃅꎆꏂꑘꀰꏢꀻꎆꌠꊋꁈꄏ。ꏦꏲꌠꆹꀰꏢꃼꇇꋦꈭꉾꐯꉾꌠꉬ。ꏦꃤꈴꄉꎆꏂꑘꌅꈌꈲꁧꏦꀧꌠꌋꆀꏦꍬꇗꊒꃅꀰꏢꊥꎆꌠꐯꇯꉜꁨꌠꌭꈬꇬꎷ,ꇩꁨꎆꏂꑘꑴꃅꎆꏂꑘ、ꈏꎆꉇꎆ、ꎆꏂꑘꀉꒉꐧꀠꀄꊭꐭꌺꌠꌋꆀꐯꌟꃅꉜ、ꐥꊯꃅꀧꌋꃅ。ꏟꈯꃅꇩꁨꎆꏂꑘꄺꀱꀻꎆꌠꊋꁈꄏ,ꏦꃤꈴꄉꇩꁨꁨꇐꋬꂻꌠꀧꌋꃅ。ꐪꊛꄉꑴꃅꎆꏣꇬꁧꃤꃅꌠꏦꍤꏱꁈ11ꐘꌠꃄꌬꇫꑟ,ꃶꐚꃅꋓꉪꁨꄉꒃꈢ、ꋓꉪꁨꄉꅇꎹꌠꃅꇫꑟ，ꄷꀋꁧꊥꋦꅺꌡꃣꈌꌌꊋꀥꇱꄉꄐꇺꌠꄜꃑ；ꏦꃤꈴꄉꊛꄉꈢꄉꄻꀋꅐꌠꑴꃅꎆꏂꑘꌄꇤꊿ1971ꑼꏭꆏꃣꈌꀞꄻꌤꏲꅉꏭꇖꀧꄉꋊꌌꍤꇽꌠꇁꉚꎽ；ꃣꈌꇔꇨꀋꎭꉈꑴꏮꌊꍤꄻꅇꎹꌠꑌꀋꃅ、ꀊꉗꃅꄻꇬꐓꄉꌠ“ꃣꆹꈌꆹ”ꌠꊥꇬꄉꌐꄉꋊꎵꇧꎭ,2687ꐘꋊꎵꍤꄻꇧꎭ,ꃣꈌ1181ꐘꍤꂫꇽꇧꎭ。ꃛꇂꑣꄤꑴꃅꎆꏂꑘ57ꁯꁌꎆꇗꏸꌐꌬꊫꌐꈱꄉꇽꄉꑽꃤꐆꌠꌌꃣꈌꃅꄉꍤꌋ，ꐛꐨꊨꀋꄅ、ꊫꌐꇬꀋꇎꄉ，6ꈎꐛꇬꃣꈌꀞꀋꌐ，ꃣꈌꃆꂮꐥꌠꎆꏂꑘꎆꏓꊋ、ꀰꏢꊋ。ꏦꍤꌤꏲꅉꆏꍞꊟꉜꐨꃑꎼꒉ，ꃣꈌ57ꐘꌠꉬꇮꃅꃣꈌꈪꄷꀋꁧꈎꍅꄉꌠꎆꋚꉬꇮꈪꉈꁵ。ꎮꉰꏦꌠꍔꏦꉢꉻꏦꍤꌤꏲꅉꌋꆀꏦꌬꏲꑘꌤꏲꅉꆏꏱꁈꏤꄻꅐꇁꄉ,ꋥꁕꇬꄉꈎꍬꊬꌠꇬꎍꌠꎆꏂꑘꊿꌞꃅꄷꄉꒃꅐꀰꏢꃅꈧꉆꎻ。
ꏣꀋꑌꃅꏀꀺꌠꊥꎆꌠꃅ。ꌧꇐꅐꐨꌅꈌꏦꌬꀧꌋꃅꌠꊋꀉꒉꃅꇱ，ꃷꇐꌐꂷꌅꈌ、ꌐꈲꌅꈌ、ꁰꄻꌅꈌꌋꆀꇮꇐꈴꌗ、ꀰꏢꈴꌗꉄꌎꑠꑽꃤꐆꌠꊿ11003ꑻꌌꅇꎹ,ꌌꐯꌟꉜꇬ32.2%ꉀꎆ。ꌐꄉꍤꀞꌠꌧꇐꅐꐨꌅꈌꉄꌎꃣꈌꇬ,ꌅꈌꉄꌎꌠꎆꏂꑘꋍꈨꆹꃣꈌꈴꌗꅉꀋꐚ、ꈭꋏꇇꀨꌅꈌꃄꌬꀋꄐꌠꌤꃆꆏ,ꎮꉰꎖꋪꄹꌬꄉ,ꌜꏃꃅꉚꅉ6ꂷꇬꄉꍤꄻꅇꎹꄮꇬꋧꁧꃅꌅꈌꉄꌎꎆꏂꑘꅇꎹꌅꈌꈲꁧꉉꇫꇰ,ꅓꑘꊂꈹꅇꎹꌠꌋꆀꉹꁌꃆꑘꌅꈌꀧꌋꃅꌠꐯꇯꉜꁨ。ꋭꋽꃅꇮꇐꏀꀺꃆꂮꐥꌠꃣꈌꀞꄻ。ꍔꏦꎆꏂꑘꂷꇬꏀꀺꎥꃑꌠ“ꐽꀻꈛꎼꏸꐕ”ꆹꇩꏤꎕꏦꀋꊌꑴꌦꌠꒉꄸꃅ,ꅐꇐꀊꆠꌠꒃꅐ、ꃷꄻꑽꃤꐆꌠꃅꀞꑽꄉꌌꃣꈌꃅꄉ。ꏦꍤꌤꏲꅉꆏꑴꇙꃅꅐꇐꊇꁧꍞꏲꌤꏲꅉꁳꎥꃪꎻꄉ,ꇩꏤꃷꎏꍞꏲꊝꏳꆏꄚꄉꈛꎼꏸꐕꇩꏤꎕꏦꄻꄉ。ꃣꈌꋌꐘꏦꈴꄉꅇꀋꎹꄉ，ꉹꑘꏀꀺꀻꎆꌠꄹꇙꀐ。
ꏟꈯꃅꍹꈔꌠꏭꁏꌠꄹꎆ。ꍞꊟꍤꄻꃣꈌꀞꌠꐮꐊꄉꃅ、ꐮꇬꏢꑲꌠꆹ,ꍔꍞꇖꐨꑌꉬꏦꏤꃅꎁꑌꉬ。ꍞꊟꊈꑼꉼꈁꐥꊐꌠꏮꌞꎼꇁꌠꄉꅍꑽꃤꐆꌠꊿ24234ꑻꊪꀞ,ꌌꐯꌟꉜꇬ50.6%ꉀꎆ。ꊿ18585ꑻꌌꅇꎹꀐ,ꌌꐯꌟꉜꇬ89.6%ꉀꎆ;ꊿ704ꑻꌌꅇꀋꎹ,ꈪꉈꑴꁵꀥꇱꍤꄻꌠ7806ꑼꃢꐥ,ꅇꀋꎹꐨ、ꈪꉈꑴꁵꐨꌌꐯꌟꉜꇬꂱꑱꅉꃅꉐꊮꌺ1.1ꌋꆀ16.3ꂷꁦꎆ。ꏿꇨꏐ、ꍰꇤꏤꌜꀯꊐꌠꇥꀯ16ꑼꌌꉻꅇꎹ。ꎆꂁꋠꃴꎆꍈꑽꃤꐆꏭꐛꌠꊿꆶꂁ、ꌦꈔꃣꈌ13ꐘꏭꏦꐆꄉꈁꊌꌠꎴꏮꄷꇖꌠꄜꎼꇁ。ꏦꌬꌤꃅꊿꉻꊿꌅꈌꈲꁧꉄꌎ、ꏦꌬꎃꊒꌠꇬꉮꄻꑽꃤꐆꌠꌌꃣꈌꃅꄉꍤꌋꌠꊿ871ꑼꌠꏭꆏ,ꏟꈯꃅꏦꌬꊿꁥꌠꇬꋍꏅꉮꊿꌩꎳꇧꎭ。
ꐪꊛꄉ“ꏦꍤꇖꐨꋍꉹ”ꃄꌬꇫꑟꌠꄹꎆ。ꏓꂱꏦꍤꑼꀊꂥꇊꀊꂥꊐꌠꆹ2018ꈓꌶꅉꇬꎼꃅꃏꑽꌠꄴꏮꂿꄷꄉꏦꍤꇖꐨꉘꃀꉹꌠꄜꎼꇁꊂ,ꀋꉊꄻꈎꆏꉈꑴꂘꑘꀯꌋꆀꐯꇯꄉꌜꐎꏃ8ꂷꇬꍞꇺꄉ,ꉼꀙ、ꉼꇂ、ꎮꑭꑠꃅꄷꌜꏲꌋꌋꆀꐯꇯꄉꈊ꒜ꌶꅉꋬꂻꏲꂠꌠꍤꄻ；ꃅꄷꏦꍤꌤꏲꅉꌋꆀꂘꑘꌤꏲꅉꐯꇯꐧꐭꌶꅉ、ꀊꉘꂘꈩꅉ3.8ꃪꎖꈚꍤꅲ，ꋬꂻꌶꅉꋈꄻꌠꄹꇙ。ꎮꉰ、ꃛꀙ、ꍬꏿꑠꇬꎖꋪꄹꌬꄉ,ꇬꉢꀯ、ꂘꑘꀯꌋꆀꐯꇯꂘꃀꄉꅍꃅꂾꄚꃆꂮꐥꌠꏦꐆꎺꁱꍤꅲꄹꏦꄻꄉ;ꂘꑘꀯ、ꇩꏤꁦꎴꆄꄻꄚꄿꊈꑼꉼꑠꀯꊈ8ꈚꌋꆀꐯꇯꄉꊿꒆꆹꀋꑟꌦꌠꄀꇗꇱꄉꅇꄜꄹꏦꄻꄉ,ꀉꑳꏭꀧꌋꃅꌠꃅꌊꀊꅰꃅꏟꈯ、ꀊꅰꃅꑭꋧꌶ。ꎲꃆꎲꂮꉄꌎ、ꊏꃷ、ꇧꊋꑠꊿꒆꆹꀋꑟꌦꌠꏭꉮꄻꑽꃤꐆꌠꊿ62948ꑼꌌꅇꎹ,ꌌꐯꌟꉜꇬ24.1%ꉀꎆ。ꌐꁨꃅꍤꄻꏱꁈꄜꃑꇬ:ꊿꒆꆹꀋꑟꌦꌠꈻꅰ、ꊎꄻꄀꇗꇱꄉꎀꍹꐥꃅꑽꃤꐆꌠꇬꐊꈽꌠꉬꄷꆏ,ꐯꇯꏦꃤꈴꄉꏦꇨꃅꊂꈹꅇꎹ、ꀉꆈꃅꅓꃤꎖꇖꐨꄜꎼꇁ。ꏦꃤꈴꄉꊿꒆꆹꀋꑟꌦꌠꑽꃤꐆꌠꅓꀞ,ꈏꉻꄷꅠꐨꀊꅼ、ꑽꃤꐆꇇꁈꀋꂄꃴꍚꀕ、ꄽꂫꐛꐨꀉꆈꌠꏭꆏꈍꃅꑌꄝꆙꀋꉆ;ꅓꑘꅑꃤꀵꈎꄜꇬꀋꑟꄉꊂꈹꅇꀋꎹꌠꆏ,ꏦꃤꈴꄉꌞꌌꉙꂘꅉꇬꅀꌐꁨꌶꅉꁳꏟꈯꃅꋊꍬꄺꀱꎻ。ꏦꍤꍈ3ꃪꎖꑹꌌꐧꐭꌶꅉꏦꏲꃛꑦꍈꃅꄉ,ꏦꏲꉙꂘꌠꆹꀉꑳꃅꇬꄉꃅꅷꁧꌠꃅꇫꑟ。
ꐛꃆꐛꂮꃶꐚꌠꌌꉹꁌꅇꊪꄯꒉꋍꁬꋑꀋꋒꏭꅇꀱꌠꄹꏦꃄꌬꇫꑟ。ꏓꂱꉹꁌꇫꉈꇬꌠꌤꆿꆏ,ꈍꃅꀋꆷꇬꑌꃅꇫꑟꌶ,ꌤꃅꇬꈍꃅꊋꋠꑌꄡꇗꃅꋒꌶ。ꇩꏤꑭꊂꏦꍤꌤꏲꅉꀊꏀꃅꉹꁌꁱꌊꇁꌠꄯꒉ491829ꐘꎴꊌ,ꐽꏡꃅ7ꑍꈍꈐꃅ“ꊪꊊꀐ、ꈀꄸꀞ”ꌠꌌꅇꇰ;3ꁮꆪꈋꈐꃅꀞꄻꈴꎁꅀꄽꂫꐛꐨꅇꏮꐨ99.2%ꇬꑟ。ꋍꐘꋑꀋꋒꅇꏮꌠꆹꀋꉬꀋꉆꌠꀋꉬ,ꃣꈌꂥꀘꇧꎭꌠꑲꆀꊇꅉꉬ。ꇖꊐꌠꏦꍤꍈꆹꉹꁌꄯꒉꁱꌊꅲꇫꇁꌠ16135ꃢꋨꏦ。ꏓꄊꁧꎁ、ꍔꑠꊈꑼ、ꏓꂱꍞꊟꊿ、ꋥꁕꁧꎁꑠꁨꌊꃣꈌꀉꑌꈎꃅꉉꍣꇬꊋꋠꌠ1244ꐘꏭꄇꄜꋊꄉꅇꊪꅲ,ꌤꃶꐚꌠꉉ、ꊫꌐꀖ、ꏦꃤꇗꅉꉉꀽꌠꃅ。ꀋꉊꄻꈎꈎꂫꇬꆏꉈꑴꈄꏍꇬꄉꄯꒉꅇꅲꌠꀞꄻꌠꀺꄉꀐ,ꏮꈴ、ꍤꅲ、ꅇꏮꇬꈁꉬꈴꎁꀊꅰꃅꐳ。
ꃣꈌꀞꄻꌠꇬꉆꄉꐧꋦꏦꏲꉪꉻꄐꏁ、ꐧꋦꉪꏦꈯꄜꁌꐨꉜꐨꍔꆙ。ꃅꄷꏦꍤꌤꏲꅉꄐꇺꌊꆾꑼꁏꌉꃣꈌ、ꑠꄠꄏꂱꇤꃣꈌ、ꉴꍏꎹꍫꀻꃣꈌ、ꆀꏦꄤꑪꃣꈌꑠꁧꏖꐨꐥꌠꃣꈌꄴꏮꌠꌤꃶꐚꌠꍤꊨꄅ,ꏦꃤꈴꄉꎃꊒꃅꉈꈁꁏꌠꊨꄅꄉ,ꎃꊒꃅꄴꏮꌠꉪꉻꄐꏁ、ꄺꀱ，“ꏦꃤꆹꏦꃤꇬꀋꈴꌠꏭꏆꀋꉆ”ꌠꃹꅼꃅꊽꉌꂵꇬꃹ。ꏦꑭ、ꇨꑭꑠꃅꄷꏦꍤꌤꏲꅉꆏꃓꍞꂰ、ꆺꃖꏤꌳꈄꀑꇬꆺꌠꌅꈌꈲꁧꇬꉮꄻꌠꃅꐨꏭꉹꁌꃆꑘꉻꈲꅇꎹꌠ48ꐘꄜꎼꇁ;ꎭꑭ、ꎮꑭꑠꃅꄷꏦꍤꌤꏲꅉꆏꂽꌤꏦꍤꌤꏲꅉꐊꄉ,ꌳꈄꀑꇬꆺꌠꎺꄅꉁꈾꏲꂠꄻꃪꌠꏦꍤꇖꐨ1047ꐘꄜꎼꇁ。ꋠꇐꁬꋌꉮꀋꐥꌠꄽꂫꑞꅉꄝꏆꀋꉆ,ꋠꇐꁬꋌꁁꏯꉻꈲꅇꎹꌠ35778ꐘꀞꄻ;ꋠꇐꉮꀋꐥꌠꇬꉮꄻꉹꁌꃆꑘꉻꈲꅇꎹꅓꀞꐨꀵꊒꌠꎹꎥ，ꅓꀞꄷꆏꀱꉈꑴꑽꃤꃅꀋꀬꌶ。ꄚꃆꂮꐥꌠꌤꏲꅉꌋꆀꐮꐊꄉꏢꍤꏭꈐꏿꏦꐆꑽꃤꃅꌠꅓꀞꌠꄐꇺꉜꐨꄜꃑ,ꏢꍤꏦꌬꋬꂻꀧꌋꃅꌠꆹꇩꏤꏦꏲꋦꒉꐨꀧꌋꃅꌠꉬ。
ꇩꏤꄐꇐꏤꁈꃄꌬꌠꇬꁧꃤꃅ。ꒀꇤꀎꄊꊅꐎꋈꄻꏦꀧꏦꌬꏱꁈꏤꄻ。ꃶꐚꃅꏦꍤꐮꊒꄉꇇꀨꌠꄹꎆ,ꑟꏦ、ꑭꊗ、ꏾꉰ、ꇥꂰꒀꂴꍏꑷꌠꐎꏦꍤꌤꃅꌠꀊꅰꉾꃅꀻꎆꌠꊥꎆ。ꆾꏣꉿꏦꍤꌤꏲꅉꋯꐊꄉꑌꌋꈤꐊꑷꃅꉀꄓꌠꁧꃤꃅ。ꏢꏸꏹꏦꍤꌤꏲꅉꏓꇙꄉꑴꃅꎆꏣꁧꃤꃅ、ꐮꐊꄉꐮꃆꂮꐥꌠꃣꈌꀞꄻ、ꏦꃤꈴꄉꑗꅒꊿꃅꄷꐂꄉꃅꑘꃅꌠꏦꀧ。ꃹꅼꃅꍤꏦꎆꏣꐛꁕꌜꏃ11ꂷꏦꍤꐊꃅꄉ,“ꐰꉎꐕꌠꑭꁘꐯꀋꋓ、ꃼꏯꑳꏯꐯꀋꐊ”ꌠꋦꈭꏱꄻꊋꋠꅍꂥꀘꌠꊥꎆ。ꄿꐨꃼꇇꃅꉚꅉꐛꌠꏦꍤꌤꏲꅉꋍꋬꈭꈴꋯꃅꉺꏦꄻꃹꅼ，ꉰꇂꄿꐨꃼꇇꎿꀸꋈꄻꌠꊋꁈꄏ，ꄟꏢꏦꍤꌤꏲꅉꄿꐨꃼꇇꏦꍤꌧꇐꊐꅉꄻꄉ。
ꑍ、ꑴꇙꃅꃅꋊꀻꎆꌠꇬꄉꄐ,ꏟꈯꃅꏦꃤꏤꄉꌠꏦꍤꃅꎁꍬꌬ
ꊯꌕꈭꇩꏤꑭꊂꏓꄊꃀꀉꒉꑍꃢꌠꈿꅉꏤꐪ“ꀊꅰꉾꃅꏓꂱꏦꍤꑼꅓꑘ、ꉹꁌꃆꑘ、ꏲꑘ、ꉻꈲꅇꎹꌠꋍꑞꋍꐘꏦꍤꌅꊋꋊꇤ”ꌠꇖꐨꀊꏀꌠꃅꈴꌬꈴ,ꏓꂱꏦꍤꑼꎀꍹꏦꃤꏤꐪꀊꏀꌠꃄꌬꇫꑟ,ꃅꎁꃅꃣꈌꀞꄻꌠꇬꂾꉪꐨꐏ、ꂿꃆꆹꄜ。
ꊋꇤꄉꅓꑘꏦꍤꃅꌊꉾ。ꍏꇩꀊꏀꄻ70ꈎꐛꊂꅑꅸꇁꌠ,ꍏꇩꇭꍣꄈꆹꏓꂱꋌꏲꂠꌊꎆꏣꐳꃅꀻꎆꌠꊿꋌꇰꌠꀹꄻꎼꇁꀐ,ꀊꅰꃅꐧꋦꀊꉗꃅꎍꐽꇬꎷꌠꀹꄻꎼꇁꀐ。1999ꈎꅑ2019ꈎꑟꌠ,ꏦꍤꌤꏲꅉꀉꆈꃅꊋꆍꏿꑽꃤꐆꅇꎹꌠꆏ16.2ꃪꑼꇬꄉꀁꋌꒊꅷ6ꃪꑼꇬꑟ,ꋍꈓꌠꐽꏡꃅ4.8%ꀁꋌꊰ;ꍞꇽꌊꌕꈎꈋꉐꅓꃤꀵꅓꎻꌠꍆꐪꆏ45.4%ꇬꄉꀁꋌꊰꅷ21.3%ꇬꑟ。ꋍꄮꇬ,ꀊꏀꉹꌠꑽꃤꐆꌠꁦꎆꇁ,“ꎧꑱꄉꍮꊪꇽ”ꌠꆹꈏꈱꌠꑍꀋꋌꄉꅓꑘꊂꈹꄉꅇꎹꌠꀨꏠꌠꑽꃤꐆꌠꐛ,ꃷꎏꐥꀹꇬꃸꆽꑽꃤꐆꌠ19.4ꁧꉀꎆ，ꃷꇐꀊꆠꊈꄸꌠꒃꅐ、ꃷꄻꑽꃤꐆꌠ34.6ꁧꉀꎆ，ꌧꇐꅐꐨꌅꈌꉄꌎꑽꃤꐆꌠ56.6ꁧꉀꎆ。ꀉꆈꃅꊋꆍꏿꑽꃤꐆꌠꌋꆀꅓꑘꃣꈌꀉꆈꐨꀁꋌꊰꌠꆹ,ꐧꋦꋬꂻꃅꒊꃅꇁꐪꊛꄉꆹꏮꌊꉾꃪꇁ,ꏓꂱꉹꁌꊌꐨꆹꃶꐚꃅꋬꂻꃅꐙꌠꄛꑣꀐ;ꀊꏀꉹꌠꎆꏣꐧꋦꏲꂠꐥꀹꇬꉮꄻꑽꃤꐆꌠꉀꎆꌠꆹ,ꐧꋦꏱꄻꌠꀊꏀꑠꊭꇬꃹꆹꌠꄜꅐꇁ,ꏓꂱꉹꁌꆹꐧꋦꀻꎆꌠꐊꇐꏭꉘꇉꐨꀊꏀꌠꐥ。ꅓꑘꑽꃤꐆꌠꆹꏦꃤꏤꄻꋊꍬꌠꇬꄉꏦꌬꊂꈹꅇꎹꌠꇬꑟꌠꃹꅼꃅꐛꐈ,ꅓꑘꍤꄻꉪꉻꌋꆀꏱꁈꆹꀋꎪꃅꐊꑷꃅꄉꄐ、ꊋꇤꄉꊁꈹꄉꃅꌶ。ꃶꐚꎃꊒꑗꐥꌠꉆꈉꌭꈬ。ꏦꍤꇜꆏꏦꃤꈴꄉꑽꃤꐆꊥꌋꆽꎍꅑꃤꎹꌠꃅꎁꃅꌠꆹ,ꑽꃤꐆꌠꊂꈹꅇꎹꊾꑌꉬꉈꑴꀙꀋꐥꃅꀧꌋꊿꑌꉬ。2019ꈎ，ꇩꏤꑭꊂꏦꍤꌤꏲꅉꑽꃤꀋꐛꌠꅀꊫꌐꀋꇎꌠꐰꏤꄉꒃꀋꈢꌠꊿ191290ꑻ、ꌌꅇꀋꎹꌠꊿ41409ꑻ,5ꈎꂾꌡꉚꇬꂱꄷꃅ62.8%ꌋꆀ74.6%ꉀꎆ。ꍤꌋ、ꍤꇽꌠꇬꐪꊛꄉꈢꄉꄻꀋꅐꌠꆏ,ꋊꀧꄉꍤꇽꇁꉚꌠꊿ75457ꑼ,5ꈎꂾꌡꉚꇬ279%ꉀꎆ。ꏓꂱꏦꍤꑼꀊꂥꇊꀊꂥꊐꌠꏦꍤꊈꑼꉼꆏ“ꍈꍞꍧꆹꍑꃣꈌ”ꌌꇕꄟꇈ,ꉜꇬꇬꂾꅇꎹ、ꍞꇽꊫꌐꀋꇎ,ꉪꄅꑽꃤꆏꏥꏦꀋꐥꌠꇬꈴꄉ,ꎭꄏꏦꍤꌤꏲꅉꏭꊋꁈꄏꄉꄺꀱꌊꑽꃤꀋꐥꌠꉜꐨꄜꎼꇁ。ꐊꑷꃅꇨꆓꐯꇯꌬꌠꅓꑘꏱꁈꃅꈴꌬꈴ。ꅓꑘꅇꎹꏦꃤꇬꏤꄻꄉꌠꑽꃤꏚꍆꅓꐨꏚꍆꀊꐎꃅꅒꀞꌠꄹꏦꆏꏦꍤꌤꏲꅉꏭꃣꈌꌤꃶꐚꌠ、ꊫꌐꌌꄉꑽꃤꐆꏭꐛꌠꊿꊨꏦꑽꐪꏚꍆꌠꊥꎆ、ꅓꃤꎖꁵꇖꐨꏚꍆ,ꋍꈭꐨꑗꅒꊿꉜꐨꅲ、ꑭꋧꃅꉮꌸꊿꌤꃅꋒ,ꃣꈌꀞꇬꊋꋠꐨꀊꅰꃅꁦꎆ、ꏦꍤꃅꎁꀊꅰꃅꀉꇖ。ꏓꂱꏦꍤꑼꀊꂥꇊꀊꂥꊐꌠꌋꆀꄚꃆꂮꐥꌠꌤꏲꅉꌋꆀꐯꇯꃄꌬꉜꐨꏤꄻꄉ,ꊋꀉꒉꃅꅐꄉꃅꇫꑟꌠꄹꎆ。ꀋꉊꄻꈎ12ꆪꌬꉆꐨ83.1%ꇬꑟ,ꅓꃤꎕꑣꇖꐨꊩꌬꐨ79.8%ꇬꑟ;ꋍꃢꃅꍤꇽꐨ96.2%ꇬꑟ,ꀉꁁꅓꑘꃣꈌꇬꉐꊮꌺ10.9ꂷꄩꐂ,ꊋꑌꃅꐮꄙꐨꋊꑣ、ꐧꋦꐮꄮꌠꊥꎆꀐ。ꅓꑘꅇꎹꍞꊟꌠꇿꋌꃶꐚꌠꊌꅜ。ꀙꏢ、ꎭꑭ、ꇨꄏꎖꋪꄹꌬ,ꇬꉢꌤꏲꅉꏦꌬꃣꈌꀞꏲꂠꈯꄜ、ꏦꄹꌤꏲꅉꅀꀾꍳꌙꇬꏦꍤꌤꀞꅉꁆꍆꄉ,ꊋꀥꇱꄉꌌꃣꈌꃅꄉꌠꌋꆀꍤꌋꃄꄻꌠꋍꋓꃅꍞꊟ。ꉜꇬꃶꐚꃅꆹꑽꌠꅓꑘꍤꇽꌠꏭꄙꅇꎹꌠ8302ꐘꄜꎼꇁ,ꃔꑼꌌꍞꇽꄺꀱꄉꌠ、ꀱꉈꁵꄉꍤꀞꀱꎻꀐꌠ4364ꐘꐥ。ꅉꀕꃅꐙꌠꀊꉗꃅꈢꄉꍞꀋꇽꌠꃣꈌꍤꄻ，ꍤꌋ、ꍤꇽꈭꊭꇬ5ꈎꈋꉐꈢꄉꃣꈌꂫꇽꀋꄉꌠꊿ367ꑼꌌꋍꐘꋍꐘꃅꍤꄻꇈ,ꏦꃤꈴꄉꊿ189ꑻꌌꋊꍬꄺꀱꎼꇁꀐ。ꅓꃤꊨ、ꃑꉚ、ꋋꇅꇬꌌꏦꑳꉈꄉꃄꌬꀋꋭꌠ38035ꑹꃢꋊꍬꄺꀱ。ꏟꈯꃅꑮꏣꀻꍗꑮꉈꃅꅓꃤꇔꅇꁵꌠꌋꆀꇩꏤꑭꊂꏓꄊꎮꊈꉼꉈꃅꅓꃤꇔꏤꐪꃅꈴꌬꈴ，ꈁꉬꈴꎁꇬꋍꋓꃅꉈꃅꅓꃤꇔꃄꌬꌠꍞꊟ,ꊒꌸꆹꀋꑽꃅꃄꌬꑞꅉꑟꌠꄉꀧ。
ꊋꇤꄉꉹꁌꃆꑘꍤꄻꌠꄻꀉꇨꃅꄉ。ꏦꍤꌤꏲꅉꆏꉹꁌꃆꑘꑗꇖꊪꀞꌠꐪꊛꄉꀊꂥꅉꄉꃄꌬ,ꀋꉊꄻꈎ142203ꐘꊪꀞ,ꌌꐯꌟꉜꇬ23.9%ꉀꎆ。ꊒꌸꃅꍞꊟꌠꉜꁨ。ꊋꇤꄉꎆꏣꐧꋦꀻꎆꌠꏭꄐꏁꁌꐨꐥꌠꊥꋦꃣꈌꀞꋒ,ꋍꉹꌠꃣꈌꏭꄐꇺꂿꄐꋊꇤ。ꉹꁌꃆꑘꄙꅇꎹꌠ5103ꐘꄜꎼꇁ,ꌌꐯꌟꉜꇬ29.8%ꉀꎆ;ꃔꑼꌌꄺꀱꍞꇽꄉꌠ、ꀱꉈꁵꄉꍤꀞ、ꉉꋊꈺꑣ、ꉉꐛꅇꀋꎹꀐꌠ3172ꐘ,ꄺꀱꐨꂴꌡꉚꇬꉐꊮꌺ1.9ꂷꁦꎆ。ꀱꉈꍤꇽꍤꄻꄷꄜꎼꇁꌠ7972ꐘ,ꌌꐯꌟꉜꇬ95.1%ꉀꎆ;ꃔꑼꏤꇽꄉꇈꌌꍤꀞꀱꀐꌠ4583ꐘ,ꊩꌬꐨꂴꌡꉚꇬꉐꊮꌺ5.3ꂷꁦꎆ。ꊋꀉꒉꃅꇤꄉꅇꎹꃶꀋꐚꈰꏅꌠꏱꄻ。ꏓꂱꏦꍤꑼꀊꂥꇊꀊꂥꊐꌠꊥꇫꄉꌐꄉꍞꊟ,ꈱꄉꅇꎹꌠ3300ꐘꄺꀱꎼꇁ,ꑽꃤꐆꏭꐛꌠꊿ1270ꑹꌌꅇꎹ,ꌌꐯꌟꉜꇬꂱꑱꅉꃅ122.4%ꌋꆀ154%ꉀꎆ。ꍔꏦꎱꑟꏦꍤꌤꏲꅉꆹꌢꆈꂷꀋꆏꃅꅇꎹꇬꎷꌠꌋꅜ,ꃔꑼꂷꆹꋋꐛꅹꃅꍝꐥꍞꇽ50ꐘꏤꅐꇁ。ꃣꈌꃆꂮꐥꌠꉛꄻꊫꌐꄯꒉꇬꉛꊿꂓꑫꀋꅑ、ꇔꊰꀋꐥꃅꏤꄻꄉ,ꎆꁵꊫꌐꀋꐥ,ꌌꅇꎹꊿꃔꄝꇬꑟꀋꇁꃅꍤꀞ,ꃶꐚꃅ“ꊏꄉꎆꉛ”ꊿꁥꌠꌌꏦꀋꊒꈲꁧꊌꅜꂿꄷꄉ“ꈱꄉꅇꎹ”ꌠꃅ。ꍞꊟꄉꂴꍞꇽꌠꇤꇧꎭꄷꀋꁧꀋꂄꌠꃆꂮꐥꌠꆹꏮꇬꉢꌤꏲꅉꁵꄉ,ꏦꐆꊿꋌꁥ14ꑻꒃꇬꈢ。ꐯꇯꃄꌬꊋꋠꌠꂵꅐꇧꎭ。ꃄꌬꃄꄻꌠꇬꏦꐆꐛꐪꏭꍤꄻꇖꐨꄜꎼꇁꌠ23437ꐘ,ꍞꇽ、ꏤꇽꃄꌬꀋꅲꈌꁧꒃꈢꌠꊿ2318ꑼ,ꌌꐯꌟꉜꇬꂱꑱꅉꃅ1.6%ꌋꆀ2.4%ꀁꋌꊰ。
ꊋꇤꄉꏲꑘꏦꍤꃅꋒ。ꉜꇬꃶꐚꃅꆹꑽꌠꏲꑘꍞꇽ、ꏤꇽꌠꏭꄙꅇꎹꌠ156ꐘꄜꎼꇁ,ꌌꐯꌟꉜꇬ33.3%ꉀꎆ。ꀱꉈꑴꍤꄻꀱꄷꌠ83ꐘꄜꎼꇁ,ꌌꐯꌟꉜꇬ7.8%ꀁꋌꊰ。ꏲꑘꅇꎹꃣꈌꋍꈨꆹꃣꈌꅇꎹꇎꏦꇬꀋꊒꌠꆏꄘꏈꉇꎭ,ꅇꎹꐯꀥꌠꌤꃆꂥꀋꀘ，ꃣꈌꆹꀞꂫꇽꄉꀐꑴꇬꌤꆹꊋꋠꇫꎍꌠꇬꉜꄉ,ꀋꉊꄻꈎ10ꆨꄑꌐꄉꍞꊟꌠꃅ,ꄮꇱꌠꊥꎆ、ꍞꊥꄉꏦꐆꌠꋊꍬ、ꏦꌬꈭꋏꇇꀨꑠꃄꄟꇬꈴꄉ,ꏲꑘꅔꀥꌠ378ꐘꎵꄻꀐ,ꊋꇤꄉꃣꈌꀞꂫꇽꌤꀞꌐꌠꃅꇫꑟꀐ。ꌢꆈꂷꉜꇬꋍꃀꌠꀨꎹꄜꏂꀧꎆꆏꏲꑘꌤꏲꅉꍤꊨꄅꄮꃑꆹꑽꅉꐥꄷꄉ,ꎞꆏꇬꄑꃑꇬꁵꄷꇖ,ꅇꎹꏤꈉꈳꅐꁧꄉꄘꏈꉇꎭ。ꏦꍤꌤꏲꅉꍤꄻꄉꉜꇬꃣꈌꆹꌢꆈꌅꈌꈲꁧꃆꂮꇬꀉꒉꀊꂾꃅꐥ,ꅇꎹꏤꈉꇫꈴꁧꀐꑴꇬ,ꄚꏲꑘꃅꐨꇯꍝꃅꄉꀋꄐ,ꀥꇱꎆꃑꄷꇖ，ꌤꃆꆹꈍꄮꑌꂥꀘꌶ。
ꊋꇤꄉꉻꈲꅇꎹꏦꍤꌠꃅꋒ。ꏦꍤꇜꄉꉻꈲꁧꁧꎁꋍꉎꀋꐥꌠꃅꎁꎺꄉ,ꃹꅼꃅꑍꈲꋓꊋꀉꑌꃅꊋꐯꇯꊋꌠꉪꉻꑌꈬꃅꄉ,ꉹꁌꃆꑘꉻꈲꅇꎹꌠ7125ꐘ、ꏲꑘꉻꈲꅇꎹꌠ119787ꐘꀞꄻ,ꌌꐯꌟꉜꇬꂱꑱꅉꃅ62.2%ꌋꆀ10.1%ꉀꎆ。ꅇꎹꂾꉻꈲꀧꌋꃅꌠꑞꅉꃅꇫꑟꌠꌌꏦꌬꐛꄟꉾꐯꉾꌠꃅꄉꇬꎷ。ꏦꍤꌤꏲꅉꌋꆀꍔꃚꌤꏲꅉꆹꁸꃅꌠꐯꀋꌡꑴꇬ,ꄚꏓꂱꁧꃤꃅ、ꏦꏲꎹꈹꌠꑞꅉꁻꌐꆹꋍꏢꃅꐙꌠꉬ,ꉻꈲꅇꎹꌠꆹ“ꐯꀋꄮꃅꐮꊝꇬꎷ”ꌠꀋꉬ。ꃛꏧ、ꎭꄏꑠꃅꄷꈭꑌꃀꈿꌠꌋꆀꄇꄜꋊꄉꎭꇫꑟꉺꏦꄹꌬꄉ,ꋊꄻꏓꊋꏓꐛ。2018ꈓꀞꄻꌠꎆꃀ10ꃪꎖꐘꅇꎹꂾꍤꄻꇖꐨꃄꌬꐛꐨ“ꀱꉈꉜ”ꌠꏭꆏ,ꏤꄮꎪꀐꇬꅇꀋꏮ、ꃶꐚꐛꐪꌌꄻꀋꀱ、ꄺꀱꉱꋃꃅꀋꐛꌠ8751ꐘꌋꅜ,ꃅꎁꃅꌠꍞꊥꈽ。2019ꈎꃑꎼꁧꌠꅇꎹꂾꍤꄻꇖꐨ103076ꐘ，ꌌꐯꌟꉜꇬ1.8％ꉀꎆ；ꄺꀱꐨꅇꏮꌠ87.5%ꇬꑟ,ꌌꐯꌟꉜꇬꉐꊮꌺ15.8ꂷꉀꎆ，ꌤꃆꀉꑌꌠꆏꅇꎹꂾꂥꀘꇧꎭꄉ,ꏦꌬꊋꀄꊭꍈꀉꄂꅐꄉꐧꋦꇿꋌꉾꐯꉾꌠꊌꅜ。ꉿꇊꏦꌜꏓꂱꏦꍤꑼꌐꄉꑍꃢꒉꇲꋬꂻꐛꐪꍤꄻꄉ,ꌜꍔꃚꏭꍤꄻꇖꐨꃑꎼꁧꈭꐨꀊꂥꃅꇫꉜꁨ,ꋊꄻꃅꇫꑟꌠꊥꎆꀐ。ꉻꇰꌋꆀꍤꄻꇖꐨꃑꎼꒉꈭꐨꉻꈲꉮꄻꐨꂥꀘꀋꄐꌠꆏ,ꌌꉻꈲꅇꎹꌠ4778ꐘꄜꎼꇁ,ꌌꐯꌟꉜꇬ48%ꉀꎆ。ꃔꑼꆏ3238ꐘꍤꀞꂫꇽꀐ,ꅇꎹꉜꐨ3225ꐘꄏꐓ。ꏣꀋꑌ、ꋭꋽꃅꃣꈌꀞꄻꈍꈐꍔꐯ。ꏦꃤꊨꄅꃅꌅꈌꁵꁁꏯꉈꏓꂱꉹꁌꀉꇨꃅꇫꊂꉉꄜꌠꉻꈲꉮꌸꌠꌤꃆꆏ,ꌌꃣꈌꃅꄉꌠ7950ꐘꎹꎥ。ꀙꏢꉰꄆ、ꃛꀙꏢꂱꑠꃅꄷꏦꍤꌤꏲꅉꆏꌶꅉꈭꇍꃼꇇꃅꊿꑳꌌꀉꑳꃷꌠꌤꃆꃑꌌꍤꄻꇕꄟꄉ,ꌅꊋꌤꏲꅉꍞꊟꄉꃅꎁꃅꎻ;ꇩꏤꁦꎴꆄꄻꄚꄿꊈꑼꉼꑠꀯꊈ8ꂷꆹꑴꇙꃅꃹꅼꃅꀊꉘꌠꏀꑳꅝꋎꍅꌠꄐꁆ。ꉻꈲꅇꎹꏦꍤꌤꃅꌠꆹꈁꐥꊐꌠꏓꄊꉜꁨꊋꁈꄏꌠꊌꀐ。ꇩꏤꑭꊂꏓꄊꎮꊈꉼꌐꄉꅇꄜꍤꇖꅱꄻꄷꀋꁧꌐꄉꅱꄻꌠꃅ,ꇩꏤꑭꊂꏓꄊꁧꎁ435ꑻꉜꐨꇖꐨꄜꎼꇁ;ꌜꊐꌠꏓꄊꎮꊈꉼ15ꂷꆏꌐꄉꅇꄜꌠꅲ,ꌜꊐꌠꏓꄊꎮꊈꉼ11ꂷꆏꌐꄉꐰꏤꄉ,ꊋꑌꃅꍞꊟꊋꁈꄏꀐ。
ꌕ、ꏟꈯꃅꑴꅉꋈꄻꌠꒃꉇ,ꊋꇤꄉꏦꍤꄉꅍꃅꄐꐨꉀꐕ
ꎔꎗꃅꑮꏣꀻꊝꎻꏹ“ꎸꅍꌡꌠꇖꑵ”ꃆꂮꇖꐨꀋꂿꑘꌠꃅꇫꑟ,ꃹꅼꃅꏦꍤꇜꏦꃤꃄꌬ,ꀉꇨꌠꄐꅍꌌꄉꇬꂾꉪꐨꐏ、ꂿꃆꆹꄜ。
ꄈꅿꍔꍞꋈꄻꌠꄻꀨꇬꐕꄉ。ꃹꅼꃅꑮꏣꀻꊝꎻꏹꐊꑷꃅꏦꃤꈴꄉꇩꏲꌠꉪꉻꀊꏀꉪꇐꀊꏀꄐꇐꀊꏀꌠꉪꐛ,ꄈꏦꍤꌤꃅꌠꏭꀋꎪꃅꏲꂠꌠꌭꈬꇬꎷ。ꑴꐚꃅꍏꑷꏮꉜꌠꅇꃅ,ꏦꇨꃅꍔꍞꃅꎁꋊꄻꌠꃅꇫꑟ。ꏟꈯꃅ“ꇬꂾꉪꐨꎺꄉ、ꂿꃆꎺꈬꃅꄉ”ꌠꄜꀨꉙꂘꌠꃅ,“ꋍꉎꀋꐥꃅꉾꌠꊋꇤꊿ”ꍈꀜ、ꃓꇬꏭꌶꄻ,ꁁꍞꏐ、ꏂꏣꇂ、ꊆꑿꏤꃅꋊꀊꏀꋎꌠꏦꍤꇜꉻꑊꃹꅼꃅꊽꉌꂵꇬꃹ。ꏦꍤꌤꃅꊿ12ꑼꆏꄈꌋꆀꏓꂱꎁꃅꁌꇐꈤꌠꀑꇬꆺꀐ,ꇨꑭꑴꑸꀻꆹꋌꇫꉌꃹꌠꉻꅇꎹꉆꈉꇬꄉꃀꐚ,ꃛꀙꑪꍰꊈ、ꃛꏧꅿꊆꑤꀑꇬꆺꇵꆅꐯꇳꐨꄴꏮꋎꍅꌠꂴꏭꅞ,ꉰꇂꊆꊵꄏꐚꂴꌢꎭꄏꐓꅉꇬꅞꀐ，ꇬꂾꉪꐨꐏ、ꂿꃆꆹꄜꄉꌠꆹꋀꊇꏭꋍꉎꀋꐥꃅꎺꄅꌠꉬ。
ꏦꌬꏦꉻꄺꀱꌠꆏꈫꈈꅉꇬꄉꃹꅼꃅꈴ。ꎔꎗꃅꄈꅿꊯꈬꈭꌕꃢꌠꐊꈴꃀꈿꉌꊈꃄꌬꈴ,ꐊꑷꃅꌜꏃꑤꌕꊐꌠꏦꍤꑼꈏꇓꄻꄉꌠꏲꉻꎵꀱꐨꄺꀱꌠꃅꌐ,ꌐꑘꈴꋈꄻꌠꉈꑴꊋꀥꇱꐨꐥ。ꃹꅼꃅꏦꌬꃅꎁꄹꏦꏓꇱꋬꈭꄺꀱ,ꏦꍤꇜꃷꁨꎞꅐꏡꁈꏤꄻ,ꃷꁨꌜꊐꌠꏓꇲ、ꇘꄟꋊꄻꉺꏦꄻꐛ。ꏲꂠꄉꅍꃅꄉꌠꏦꍤꇜꂴꅑꄉꃣꈌꀉꒉꀊꂾꊋꋠꌼꇪꌠꀞꄻ,ꇖꊐꌠꏦꍤꍈꃣꈌ57636ꐘꀞꄻ、ꍤꀞꊈꑼꉼꃀ5682ꃢꈿꈽꇁ,ꌌꐯꌟꉜꇬꂱꑱꅉꃅ57.2%ꌋꆀ56.4%ꉀꎆ。ꏦꍤꇜꃣꈌꀞꀨꄜꉆꈉꌌꀨꇬꄉ,ꋍꋓꃅꏦꍤꍈ、ꃅꑘꌤꏲꅉꌄꇤꊿꍞꊟꆽꎍꐨꀉꇨꇁ。
“ꃣꈌ—ꐘꍆꁧ”ꊇꁧꇿꋌꈋꍣꎕꏦꄻꄉ。ꌢꆈꃣꈌꋍꐘ,ꃣꈌꀞꄻꌤꏲꅉꈭꎁꈍꑋꏢꈴꈭꐨꆏ,ꏓꌗꌊ“ꃣꈌ”ꈍꑋꐘꃅꄉ,ꄚꌢꆈꌊꉉꇁꇬꆏ“ꃣꈌ”ꋍꐘꉬꑴꌦ。“ꃣꈌ”ꌤꃔꈭꎁꀊꅰꀉꑌ、ꏓꌗꌠ“ꃣꈌ”ꀊꅰꀉꑌꆏ,ꏦꌬꅐꀦꀊꅰꃅꀉꑌꃅꃹ,ꌢꆈꅇꎹꐙꄏꄅꌠꑌꀊꅰꃅꀉꇖ。“ꃣꈌ—ꐘꍆꁧ”ꉾꐯꉾꆏ1:1ꉬ,ꌢꆈꃤ“ꃣꈌ”ꋍꐘ,ꏦꍤꈭꎁꇬꃹꇁꈭꐨꋍꃢꀉꄂꃅꊈꂄꃅꀞꂫꇽꇬꆏ,ꏦꌬꅐꀦꃹꐨꀁꑌꐯꀁꑌ,ꌢꆈꌌꉪꐨꃪꐯꃪ。ꈋꍣꎕꏦꋋꏢꀹꄻꄉꌠꉪꐨꆹꏦꍤꇜꍞꇺꄉꃅꎁꉪꐪꀉꇨ、ꏦꌬꄐꐨꉀꐕ,ꊋꇤꄉꌤꃅꌊꉎꀋꐥ，ꄡꀋꑟꌠꈭꎁꈥꏮꏿꌠꋒꏆꇧꎭꂿꄷꌠꉬ。2019ꈎꅓꑘꏦꍤ“ꃣꈌ—ꐘꍆꁧ”ꆹ1:1.87ꉬ,“ꐘ”ꌌꐯꌟꉜꇬ0.02ꀁꋌꒊ,ꄻꀋꅐꌠꃣꈌꀞꄻꈭꊭ3ꃪꂷꀋꇈꀁꋌꊨꀐ。
ꏦꍤꃅꑘꏀꀺꌠꋈꄻ。ꏓꂱꏦꍤꑼꅓꑘꅇꎹꏦꋪꌌꄺꀱ。ꏓꂱꃔꑼꀊꂥꇊꀊꂥꊐꌠꌋꆀꐯꇯꄉꎥꃪꌶꄻꀠ10ꃢꀞꄻ,ꏦꇜ、ꏦꍤꇜꐯꇯꄉꁱꂘ,ꐯꇯꏦꌬꉪꉻꄻꐛꌠꊥꎆ;ꒆꉻꋦꈭꀯ、ꇗꏸꌤꃅꊝꏳ、ꃷꎏꍞꏲꊝꏳ、ꇩꏤꌧꇐꅐꐨꌅꈌꏳꑠꌋꆀꐮꇬꇥꀯꁆꄻꌊꄉꅍꐮꆦꄉꃅ;ꇊꃀꇴ、ꉰꇂꋮꄮꄉꀉꁁꌜꇬꅉꂫꊐꌠꏦꍤꇜꌋꆀꐮꇬꁆꄻꐮꇬꁥꇱ。ꏣꀋꑌꃅ“ꍏꇩꍔꃔꃶꐚꉉꂘꅉ”ꇬꐊꈽ,ꏦꍤꃶꐚꌤꃆꌌꏦꃤꉙꂘꅉꇬꇱꄉ,ꐧꋦꉪꏦꏦꏲꌧꊿꂘꄻꌠꇬꇇꀨ。
ꐊꑷꃅꏦꇨꃅꏦꍤꏱꄻꌠꌭꈬꇬꎷ。ꏦꌬꃣꈌꀞꄻꌠꇬꉜꅲꅀꈌꄀꇇꏿ、ꇇꃹꑠꌤꆿꀉꒉꀊꂾꌠꆏꎺꁱꄜꇰꄻꅐ,ꍏꑷꌋꆀꄚꃆꂮꐥꌠꌤꏲꅉꆏꏛꃅꇯꆐ“ꏤꐪꌕꏢ”ꐥꀐ。“ꉜꅲ”ꌠꀋꉬꀋꉆꌠꆏꐛꐪꉉꈻ、ꁨꆹꐨꅉꐚ,ꀉꑌꌠꀋꈐꀋꉈꃅꏦꌬꌠꍞꊟ;“ꎺꁱ、ꅇꄜ”ꌠꆹꏦꍤꇜꏢꑲꌠꇬꇿꋌꐥ,ꀑꑊꎹꃣꈌ、ꐯꌥꐮꂿꃣꈌ、ꎆꋚꃣꈌꄴꏮ。ꀉꑌꌠꈱꌠ“ꅇꇰꌠꀋꐥꌠ”ꊝꇬ，ꏓꂱꏦꍤꑼꀊꂥꇊꀊꂥꊐꌠꄩꃅꀏꀨ,“ꅲꆏꍑꈢꄉ”ꄷꇖ，“ꅇꇰꌠꀋꐥ”ꌠꁳꏤꐪꉾꃪꌠꋌꄙꀈꈥꀕꇧꎭꀋꎽ。ꇖꊐꌠꏦꍤꑼꊿꈁꐥꌠꃅꁊꈴ、ꋍꆪꋍꆪꃅꅇꄜ,ꐯꇯ2018ꈓꅑꅸꇁꌠꄚꃆꂮꐥꌠꌤꆿ18751ꐘꎺꁱꄉ。ꑴꐚꃅꈁꐥꊐꌠꍬꏦꍤꄻꊈꑼꉼꍞꊟꍤꄻꊈꑼꉼꌋꆀꁆꍆꌠꍬꏦꍤꄻꍞꍤꊤꁳꍞꊟꎻ,ꃷꅍꇷꄉꆅꅋꉃꌠꀬꅑꐨꌊꃷꁨꊨ、ꁦꎆꌠꍅ,ꄚꈐꏭꏓꂱꏦꍤꑼꀊꂥꇊꀊꂥꊐꌤꏲꅉꌋꆀꌤꑘꌤꃅꅉꇬꊿ6ꑼꇫꐊꌠꏦꍤꊿ1290ꑹꆏꇗꐆꏦꐆꄉꌌꃣꈌꃅꄉꍤꀞ,ꌌꐯꌟꉜꇬ66.7%ꉀꎆ,ꊿ54ꑻꆏꌌꅓꑘꅑꃤꎹ。ꅅꃅꈂꀸꏮꈐꉜ，ꏦꇨꃅꀋꂄꄷꅠꊋꃤꎁꃅꂴꉆꊋꄙꌠꏦꍤꊿ42ꑼꌌꍤꅓ。ꑞꉬꌠꑞꃅꄉꌠꌭꈬꇬꎷ,ꏦꇨꃅꒃꉇꏦꇨꃅꏲꂠꄉꃣꈌꀉꑌꐯꀉꑌꃅꍤꀞꌠꌌꀮꄑ,ꏛꃅꒃꉇꀄꊭꃅꒃꉇꌠꇬꊋꊡ,ꄈꏲꄈꄻꌠꀨꄜꃅꎁꃅꇫꑟ。
ꇖ、ꑴꐚꃅꏓꂱꁳꍞꊟꎻ,ꏦꍤꌅꈌꁳꈨꑭꇂꃴꄉꃄꌬꎻ
ꎷꋩꇬꆹꀋꎪꃅꊨꏦꀉꇨꌶꌠꎺꈬꃅꄉ,ꏓꂱꁳꍞꊟꎻꌠꇂꃴꄉꉘꃀꉪꐨꐏ、ꂿꃆꆹꄜ。
ꑴꐚꃅꏓꄊꁳꍞꊟꎻ。ꇖꊐꌠꏦꍤꑼꆏꋍꋓꃅꊯꌕꈭꇩꏤꑭꊂꏓꄊꃀꑍꃢꌠꈿꌠꉌꊈꌶꄻ;ꎔꎗꃅꇩꏤꑭꊂꏓꄊꎮꊈꉼꍤꇖꉜꐨꃄꌬꇫꑟ;ꐊꑷꃅꇩꏤꑭꊂꏓꄊꁧꎁꍤꇖꅇꄜ、ꍤꆫꑋꇖꃀꈿꇬꄜꎼꇁꌠꉜꐨꇖꐨ5836ꏢꎵꄻ,ꑍꃀꑍꌤꃅꌠꇬꄉꋊꍬꃅꇫꑟ。ꎔꎗꃅꇩꏤꑭꊂꏓꄊꁧꎁꄯꒉꃅꄜꎼꇁꌠꇖꐨ150ꐘꀞꄻ,ꁨꎆꐨꀊꏀꃅꐥꌠꋌꃀꇖꐨ36ꐘꌌꊁꈹꄉꅇꏮ。ꇩꏤꑭꊂꏓꄊꁧꎁ376ꑼꁨꌊꏦꍤꌤꃅꌠꇬꍤꆫ、ꃣꈌꄇꄜꋊꄉꍤꄻꅉꐊꈽ,ꍞꊟꌠꊌ、ꊋꁈꄏꌠꊌꅜ。
ꑴꐚꃅꋯꁦꍞꊟꌠꅇꃅ。ꏣꀋꑌꃅꇩꏤꑭꊂꍔꑠꀑꊝꆏꄡꋮꒉꑋꇖꃀꇬꐊꈽ,ꉻꈲꅇꎹꏦꍤꌤꃅꅉꇬꌤꃆꌋꆀꊋꋠꐨꅇꄜ。ꎔꎗꃅꇩꏤꑭꊂꍔꑠꊈꑼꄜꎼꇁꌠꄜꑘ56ꐘꀞꄻ。ꐪꊛꄉꋯꁦꄈꀾꍏꑷꈁꐥꌠꏭꐮꃀꄉꃅꐨꀋꂿ꒧ꌠꄛꇰ,ꇬꀖꌌꀖꄉꉪꐨꅲ。ꇩꏤꑭꊂꇬꎭꆃꌋꆀꐮꑌꑲꉺꏦꄻꐛꒆꄉ,ꌜꏃꑍꊐꌠꏦꍤꑼꄹꇙꌊꃅꄷꀊꋨꈚꇬꇬꎭꆃꌋꆀꐮꇷꃅ,ꐯꇯꑴꃅꎆꏂꑘꎁꃅꐒꐨꋊꎵꊋꐨꀞꄻ。
ꑴꐚꃅꃅꎁꃅꇬꏢꑲꌠꅇꃅ。ꍞꊟꍤꄻꌤꏲꅉꄜꌊꇕꀱꄷꌠꃣꈌꌋꆀꇬꉢꌤꏲꅉꄜꌊꇕꀱꍤꀱꌠꒃꀋꈢ、ꅇꀋꎹꌠꃣꈌꆏ,ꏦꇨꃅꏦꃤꈴꄉꌌꀊꏀꃅꍤꄻ,ꂴꐰꏤꄉꌠ740ꑹꄺꀱ,ꌌꐯꌟꉜꇬ4.8%ꀁꋌꊰ。ꃔꑼꌌꑽꃤꀋꐥꃅꍞꇽꌠꆏ,ꋍꐘꋍꐘꃅꎖꑞꍤꄻ、ꌦꃔꆽꎍꐨꃅꇫꑟ。ꌦꃔꀯꌋꆀꋍꈜꑌꄉ꒜ꈿꉺꏦꄻꄉ,ꐯꇯꄉꅓꀞꃄꌬꌠꏦꇨꀋꈐꀋꉈꌠꊥꎆ。
ꑴꐚꃅꐧꋦꁳꍞꊟꎻ。ꅉꀕꐛꄟꈴꃅꏦꍤꁉꃑꑍꍔꆙꄉꃅ,ꋍꑞꋍꁆꏯꊿꂒꋦꌠꁨꌊꏦꍤꌤꏲꅉꇬꃹꇁ。ꋍꃱꃅ12309ꍏꇩꏦꍤꈄꏍ、ꏦꍤꁧꃤꃅꃛꊸꄆꅇꌋꆀꏦꍤꁧꃤꃅꈯꄜꋈꄻ,ꇖꊐꌠꏦꍤꑼꆏꉹꁌꁧꃤꃅꌍꑓꐮꐊ、ꐽꈉꋍꂷꃅꄉꌐ。ꏓꂱꍞꊟꊿꄹꏦꄻꐛꒆ,ꍤꄻꃅꑘꉬꇮꃅꌌꍞꊟꈍꈐꇬꇱꄉꌐ。ꑴꇙꃅꇢꈴꄜꌋꆀꐮꇙ,ꈋꍣꌠꁳꍞꊟꎻ,ꀱꆽꃅꏦꍤꃣꈌꀞꊇꁧꀊꅰꃅꉾ、ꑘꅐꐨꀊꅰꃅꀊꂥ、ꇿꋌꀊꅰꃅꉾꃪꇁꎻ。
ꀋꎪꃅꑗꅒꊿꃅꑘꃄꌬꌠꌅꈌꈲꁧꁌꒉ、ꏦꃤꈴꄉꀧꌋꃅ。ꇩꏤꑭꊂꏓꄊꁧꎁꇖꐨꃅꇫꑟ,ꌐꄉꍞꊟꃅꏦꌬꏦꏲꌤꏲꅉꑗꅒꊿꅇꎹꌅꈌꈲꁧꃄꌬꌠꇬꈭꋍꈜꇈꌠ734ꐘꄺꀱ。ꌜꊐꌠꏦꍤꑗꅒꊿꏓꇖꉺꏦꄻꐛꌠꄹꇙ;ꁊꈴꃅꑗꅒꊿꈴꈜ、ꑗꅒꊿꉉꍣꑳꄻꄉ;ꃣꈌꀞꄻꌠꇬꎔꎗꃅꑗꅒꊿꉜꐨꅱꄻ,ꐯꇯꄉꏦꌬꀋꈐꀋꉈꌠꀧꌋꃅ。ꑗꅒꊿ2.9ꃪꎖꑹꁨꌊꏦꍤꑼꇬꍆꄉꅇꅲꇁꌠꋩꈽ。ꏦꍤꌤꏲꅉ ꇯꍝꃅꏓꂱꑗꅒꊿꏭꉌꃹ、ꀋꎪꃅꉌꒊ。
ꋍꈓꅑꅸꇁꌠ,ꉪꊇꆏꏦꃤꈴꄉꇤꉪꄠꃺꑌ、ꎿꉈꀀꌠꃺꑌꌋꆀꀱꁍꇩꇁꌠꃺꑌꑱꈐꊿꏦꊒꌅꈌꈲꁧꀧꌋꃅ。ꃛꏧꑤꂱꑠꃅꄷꆏꄠꃪꃆꂮꐥꌠꏦꍤꑌꑲꅉꄻꄉ,ꄠꃪꃺꑌꁨꌊꑌꑲꊿꄻ。ꈍꄮꑌꊿꐋꀋꌡꈧꌠꌅꈌꈲꁧꏦꀧꌠꀊꂥꃅꉜꁨ。ꇩꏤꑭꊂꌋꅪꏓꉻꌋꆀꇷꃅꉺꏦꄻꐛ,ꏓꇱꄉꑱꈐꊋꅸꏿ、ꎼꃅꃏꑽꑠꏦꐆꑽꃤꃅꌠꏱꄻ。ꏦꌠ、ꌧꍧꎖꋪꏓꈹ,ꂱꍔꀯꑠꀯꊈ11ꂷꐊꄉꅓꑘꅓꌠꌋꆀꊿꈢꇬꊎꄉꌠꌳꃈꅮꒆꆹꀋꑟꑴꌦꌠꌌꇇꀨꄏꐓꈭꋏꈍꈐꇬꇱꄉ。ꊾꄣꌅꈌꈲꁧꉮꄻꑽꃤꐆꌠꊿ5928ꑼꌌꅇꎹ,ꌌꐯꌟꉜꇬ9%ꉀꎆ。ꃀꌠꌅꈌꈲꁧꉮꄻꑽꃤꐆꌠꊿ46610ꑻꌌꅇꎹ,ꌌꐯꌟꉜꇬ12.4%ꉀꎆ。ꏟꈯꃅꉇꉈꃅꂘꃀꉮꄻꑽꃤꐆꌠꌌꅓꀞ，ꂄꄸꊨꄅ、ꂫꑟꐝꉅ，ꂘꃀꉁꅉꉙꂘꁌꒉꌠꋊꃅꃅꇏꍔꆙ。ꐪꊛꄉꋬꂻꆅꉚꅉꋈꄻꌠꄹꇙ。ꆅꉁꊿꉮꄻ、ꊿꏑꄉꆅꉁꌠꇬꉄꌎꑠꆅꉚꃆꂮꑽꃤꐆꊿ1637ꑼꌌꅇꎹ,ꌌꐯꌟꉜꇬ48.9%ꀁꋌꊰ。ꆅꉚꌠꉮꄻꃸꆽꑽꃤꐆꌠꏭꀋꎪꃅ“ꄝꀋꏆ”，ꀙꏢꏦꍤꌤꏲꅉꆏꌜꊉꀘꇁꑱꌜꌉꌠꃣꈌꏦꃤꈴꄉꐳꃅꒃꈢꐳꃅꅇꎹꄉ，ꌌꅇꎹꊿꌉꃤꃅꍞꇽ。ꏟꈯꃅꇩꐏꈲꁧꌋꆀꂽꄻꌠꂽꑱꈐꊿꏦꊒꌅꈌꈲꁧꀧꌋꃅ。ꂽꌤꉁꈾꀜꐆ、ꂽꃝꐨꀜꐆꑠꂽꃆꂮꐥꌠꑽꃤꐆꊿ510ꑹꌌꅇꎹ,ꌌꐯꌟꉜꇬ25.3%ꉀꎆ。ꏦꃤꀋꍬꌠꊝꄉꋌꎼꐥꐨꊋꋠꌠꂽꄻꌠꂽꑱꈐꊿ、ꂽꄻꇈꀱꇁꌠꊿ126ꑼꏭꏦꌬꈭꋏꇇꀨꌠꃅ,ꌌꐯꌟꉜꇬ38.5%ꉀꎆ。ꍏꑷꏮꊈꍔꃔꊈꌋꆀꐮꐊꄉꂽꃅꄷꏦꍤꇷꃅꌠꄹꇙ。ꂽꄻꄉꎞꆏꌠꂽꑼꄯꒉꁱꌊꅱꄻꇁꌠ“ꑴꀋꐥꈴꈜ”ꀞꄻꄉ,ꉌꊢꉂꑟꅑꏦꃤꈴꄉ“ꊿꋋꉂꐯꋋꉂꌠ”ꏭꁧꃤꃅ。ꊋꇤꄉꉇꉻꏭꁉꃑꀻꎆꌠꏦꀧ。ꏦꌬꌅꀨꀧꌋꃅ,ꀉꑌꁁꏯꑍꁁꏯꇷꃅꉺꏦꐯꇯꋈꄻꐯꇯꌬ,ꏦꌬꇇꀨ、ꃣꄜꍤꄻꌠ190ꐘꀞꄻ,ꊋꑌꃅ“ꋍꁕꋍꈜ”ꊇꁧꀊꂥꃅꀻꎆꌠꁧꃤꃅ。ꇤꌡꑠꈌꄸꉻꌜꐎꉬꂷꏦꍤꌤꏲꅉꆏꐯꇯꄉꏦꍠꈝꃀꎆꏣꃄꁕꋈꄻꌠꇬꇇꀨ。ꇨꑭꏦꍤꌤꏲꅉꃅꋮꐂꄉꒆꉻꋦꈭꀧꌋꃅꇷꃅꉺꏦꋈꄻꌠꄹꇙ，ꄏ꒜ꇩꏤꏦꍤꇜꏦꇜꎥꌷꀠ3ꃢꊪꀞ。
ꁧꎁꊈ,ꋍꈓꅑꅸꇁꌠ,ꉪꊇꄈꌋꆀꏓꂱꇖꎼꇁꌠꃄꌬ,ꋒꐯꋒꃅꏦꍤꌅꊋꂿꄐꋊꇤꅐꇁ,ꀊꅰꉾꃪꃅꎆꏣꐧꋦꀻꎆꌠꁧꃤꃅꀊꏀꃅꀻꎆꀐ。ꋋꆹꊇꅉꃅꇬꆏꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏲꂠꄉꅐꇁꌠꉬ,ꊇꅉꃅꇬꆏꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꈆꑪꃅꄐꂘꌠꉬ;ꇩꏤꑭꊂꏓꄊꌋꆀꋍꎮꊈꉼꊋꑌꃅꍞꊟ、ꇩꃷꑼꊋꀉꒉꃅꄏꐓ、ꇩꏤꑭꊂꍔꑠꋯꁦꍞꊟ,ꇩꏤꍞꊟꍤꄻꊈꑼꉼ、ꏓꂱꃔꑼꀊꂥꇊꀊꂥꊐꌠꐊꈽꌋꆀꏢꑲ,ꋯꁦꄈꀾꈁꐥꌠ、ꇬꎭꆃꌋꆀꄈꀾꀋꐊꊿꂒꋦꌠ、ꏓꂱꏓꉻꈁꐥꌠꌋꆀꃅꄷꈁꐥꊐꌠꄈꍔꌤꏲꅉ、ꁧꎁꊈ、ꊈꑼꊈꌋꆀꐧꋦꋍꑞꋍꁁꏯꉌꈯꑓꈜꃅꇫꇇꀨꌠꇬꐞꀋꉆ。ꉡꆏꏓꂱꏦꍤꑼꀊꂥꇊꀊꂥꊐꌠꁧꎁꃅꄸꈐꇬꄉꈀꎭꀕ!
ꉪꊇꃱꐚꃅꅉꐚꇬ,ꃅꋊꀊꏀꋎꌠꏦꍤꌤꃅꌠꆹꌤꃆꌋꆀꀋꇎꀋꂪꅉꀉꑌꈨꐥꑴꌦ。ꋍꆏꏦꍤꉪꉻꀋꎪꃅꏀꆦ、ꃄꌬꇫꑟꄻꅐꑴꌦ,ꇩꏤꏱꄻꉻꑫꇬꃹ、ꎆꏣꐧꋦꀻꎆꌠꊥꎆꌠꇬꐮꍣꐨꀉꒉꃅꐥꑴꌦ。ꑍꆏꏦꃤꍞꊟꃅꎁꃅꌊꑞꅉꀋꑟ,ꐊꃅꋮꄮꌠꉜꁨꍞꊟꏢꑲꌠꉜꀋꁨ。ꌕꆏꏦꍤꃅꑘꊋꁧꈭꊭꇬꇿꋌꐥꃅꄻꀊꀋꇨꑴꌦ,ꏲꑘꏦꍤ、ꉹꁌꃆꑘꏦꍤꆹꄡꇗꀋꇎꀋꂪꐨꄇꇖꀕꃅꐙꑴꌦ。ꇖꆏꇲꈴꃅꏦꌬꏦꉻꄺꀱꄹꎆꌠꀋꇎ,ꇱꄻꏡꁈꐛꀋꒆ。ꉬꆏꏦꍤꇜꌐꑘꊇꁧꆹꃅꋊꀊꏀꋎꌠꇖꐨꀊꅰꃅꀊꂥꌠꇬꄉꀋꄐ,ꉹꁌꃼꇇꌤꃆ、ꎆꒉꎆꇁ、ꈄꏍꑠꃣꈌꀞꄻꄐꐨꀊꅰꃅꄇꇖꀕꃅꀋꇎ。ꃘꆏꏦꍤꌅꈌꍞꊟꏢꑲꉺꏦꄻꐛꒆꄻꅐꑴꌦ,ꇗꐆꄉꃣꈌꀞꄻ、ꃣꈌꌊꊨꏦꈲꏂꌠꇫꅐꇁꑴꌦ,ꑸꇻꏿꏤꀉꆈꃅꍬꏦꐆꏦꃤꐆꌠꃣꈌꁧꏖꐨꄷꅠ、ꑗꉘꃹꅼꃅꐙ。ꏃꆏꅉꂫꊐꌠꅉꃀꌤꃅꌠꄡꇗꀉꒉꃅꊋꀥꇱꄻꅐꑴꌦ,ꄐꁆꈨꆹꃄꌬꌊꑞꅉꀋꑟ。ꌦꀳꏿꇬꎷꃅꎥꅍꀊꏀꌠꂥꀘ、ꌤꃆꊋꋠꌠꅇꀱꌠꆹ,ꉪꊇꆽꎍꐨꆹꄜꃅꎁꃅꌠꏭꀉꒉꀊꂾꃅꎕꑣꌠꉬ。
ꊁꊬꌠꌤꃅꄐꁆꌠ
ꎼꈎꆹꐊꑷꃅꊼꇅꌣꈚꌠꐧꋦꋉꐛꌠꂫꋓꊋꐛ、ꎭꇔꈢꇓꀖꌠꂫꌉꊋꐛꈒꌠꉬ，ꏀꉹꌀꌡꆅꅋꋍꃀꆅꇵꆅꐯꇳꐨꆹꋓꎭꀊꏀꌠꇫꐊꇁ,ꏦꍤꌤꏲꅉꆹꀋꎪꃅꆹꄜꄉꃅꐨꃅꌶ。ꈍꄮꑌꄈꁳꏦꍤꌤꃅꌠꇬꀋꎪꃅꏲꂠꌠꌭꈬꇬꎷ,ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,ꃹꅼꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꌶꄻꃄꌬ,“ꉪꐨꇖꑵ”ꀉꇨꇁ、“ꇖꑵꑴꑇ”ꌠꑌꈬ、“ꑍꑵꀧꌋꃅ”ꌠꃅꇫꑟꌠꌌꋍꑞꋍꐘꏦꍤꌤꃅꌠꇬꇱꌶ;ꈍꄮꑌ“ꇬꂾꉪꐨꐏ、ꂿꃆꆹꄜꃅ”ꌠꌭꈬꇬꎷ,ꏓꂱꌌꈯꄜꃅꄉꌠꀻꎆꉪꇐꃄꌬꇫꑟ,ꏓꂱꉹꁌꉌꐒꇁꎭꌠꌤ、ꉌꂵꌼꌠꌤ、ꉌꂅꑓꑣꌠꌤꂥꀘꌠꄹꇙꌶ;ꈍꄮꑌ“ꎍꐽꃅꁨꆹ、ꃅꇫꑟ、ꉀꐕ”ꌠꌭꈬꇬꎷ,ꀊꂥꌠꍔꍞꑴꐚ、ꏦꏲꑴꐚ、ꏦꍤꑴꐚꃅꄉ,ꄈꍏꑷꏤꁈꄐꁆꌠꌋꆀꏦꃀꏦꃤꄻꁵꌠꃅꎁꃄꌬꑞꅉꑟꄉ,ꇩꏤꏱꄻꉻꑫꌋꆀꏱꄻꄐꐨꐛꏀꈴꌠꄹꎆꌠꎁꃅꀊꅰꃅꊋꑌꌠꏦꏲꏦꀧꌠꇲꁵꌶ。
ꋍꏢꌠ,“ꎍꐽꃅꁨꆹ”ꌠꌭꈬꇬꎷ,ꃅꇴꄉꉻꁧꃤꃅꌠꌌꏦꍤꃅꎁꍬꌬꂿꃆꀋꂿꑘꐯꀋꂿꑘꌠꃅꄉ。ꐊꑷꃅꊼꇅꌣꈚꌠꐧꋦꋉꐛꌠꁻꌐꂿꃆꇬꉜꄉ,ꑴꇙꃅ“ꃘꎍꐽ”“ꃘꄉꀧ”ꌠꁧꃤꃅ,ꇵꆅꐯꇳꐨꃅꄉꎆꏣꐧꋦꀻꎆꌠꇬꁧꏖꐨꊨꒊꌊꀁꂥꐯꀁꂥꌠꇬꑟꌠꊥꎆ。ꏟꈯꃅꇩꏤꋬꂻꌠꇬꉮꄻꑽꃤꐆꌠꅓꀞ。ꊋꃤꏓꋧꄉꌌꅇꎹꃛꐯꃛꅉꇬꃹꆹꌠꀋꂄꃆꂮꐥꌠꄷꅠꃆꂮꐥꌠꃣꈌꀞꄻ,ꀊꉗꃅꇿꋌꐥꀊꉗꃅꏱꄻꌠꇇꀨꄹꆷ。ꏦꇨꃅꌢꎭꄏꐓꎆꋚꂁꍆꋠꌠꑽꃤꐆꌠꅓꀞ,ꌢꎭꄏꐓꁁꏯꃣꈌꃆꂮꐥꌠꎆꋚꐳꃅꀱꉈꑴꁵꌠꉺꏦꄻꐛꌠꄹꇙ;ꒆꉻꋦꈭꌋꆀꋠꇐꁬꋌꁁꏯꉻꈲꏭꉮꄻꌠꃣꈌꌌꂴꄉꀞꋒ;ꏦꇨꃅꎆꒉꎆꇁꑽꃤꐆꌠꅓꀞ。ꏟꈯꃅꌧꇐꅐꐨꌅꈌꉄꌎꑽꃤꐆꌠꌌꅓꀞ。ꊋꇤꄉꑴꃅꎆꏣꀊꅰꉾꃪꃅꀻꎆꌠꁧꃤꃅ，ꐯꌟꃅꏦꃤꌌꀧꌋꃅꌠꌋꆀꏢꑲꌠꃷꎏꋦꈭꄻꄉ，ꀻꎆꌠꊥꎆꃅꅍꊌꌠꏦꀧꉹꁌꐥꐨꏦꀧ。ꃹꅼꃅꍞꍤꐯꊛ,ꏦꃤꈴꄉꄉꅍꑽꃤꐆꌠꅓꀞ。ꀉꆈꃅꇵꆅꄴꏮꌠꇬꉮꄻ、ꏦꀋꊒꃅꇈꐥꇙꀕꒃꌉꌋꆀꃼꇇꃅꑠꑽꃤꐆꌠꅓꀞ。ꃅꋊꀊꏀꋎꌠ“ꃖꐆꎖꋪ”ꌭꈬꇬꎷ，ꏣꀋꑌꃅꇓꈓꐛꁕꐧꋦꏱꄻꌠꇬꄹꎆ；“ꈀꄸꏦꌬꆏꈀꄸꏦꃤꌌꁊꈴ”ꌠꃅꎁꄹꏦꃄꌬꇫꑟ，ꏦꍤꇜꃣꈌꌌꄉꏦꃤꉉꀽꌠꃅꋒ，ꀊꐯꈭꃅꏦꏲꌶꅉꃹ、ꋥꁕꃹ、ꑣꋂꃹ、ꎆꏂꑘꃹꑠꃅ，ꊋꀥꇱꄉꏦꏲꌠꄜꉺ；ꇵꆅꃆꂮꐥꌠꏟꃆꏈꑘꍤꄻꎵꃪꌠꃅꈽ,ꊋꑌꃅꇵꆅꐥꊂꐧꋦꏱꄻꌠꊥꎆ。ꏟꈯꃅꂽꃆꂮꐥꌠꃣꈌꌌꅓꀞ，ꏟꈯꃅꇩꐏꈲꁧꌋꆀꂽꄻꌠꂽꑱꈐꊿ、ꎞꆏꂽꄻꌠꏦꊒꌅꈌꈲꁧꀧꌋꃅ。
ꑍꏢꌠ,ꃹꅼꃅ“ꃅꇫꑟ”,ꀊꅰꃅꑴꐚꃅꏦꃀꏦꃤꏤꁵꄉꌠꃅꎁꃄꄻ。ꃹꅼꃅꑽꐪꏚꍆꅓꃤꏚꍆꀊꐎꃅꅓꀞꌠꄹꏦꃄꌬ。ꉹꁌꏦꃤꀋꃀꌌꍤꇖꉌꃹꈴꄉꈭꐨ，ꉪꊇꆏꎔꎗꃅꌤꃅꊿꉬꇮꃅꊥꇬꌊꌶꄻꁱꂘ，ꏦꍤꃅꑘꋍꑞꋍꐘꌠꌤꃅꅉꇬꄉꒃꉇꋒꃄꌬꈴ,ꃣꈌꌢꆈꉹꁌꃆꑘꌅꈌꈲꁧꏦꀧ，ꎃꊒꑗꐥꌠꀧꌋꃅ。ꃹꅼꃅꏲꑘꐯꀥꌠꃶꐚꐛꐨꋊꑣꌠꄹꎆ,ꏦꌬꎃꊒꌠꀧꌋꃅ、ꏦꃤꈴꄉꏲꑘꃅꌠꊥꎆ。ꉻꈲꅇꎹꏦꍤꌤꃅꌠꋊꍬ,ꃣꈌꀞꈍꈐꍔꐯ，ꏣꀋꑌ、ꋭꋽꃅꋬꂻꒃꅐ、ꄉꉻꁦꎴꆄꄻ、ꒆꇐꋬꂻ、ꌋꅪꀊꉘꌋꆀꊾꄣꌅꈌꈲꁧꀧꌋꃅ、ꈄꏍꉮꄻ、ꌢꎭꄏꐓ、ꐩꋊꍸꇐꌋꆀꁱꀕꍸꇐꀧꌋꃅꑠꁁꏯꉻꈲꉮꄻꌠꃣꈌꀞꄻ。ꉹꁌꄯꒉꁱꌊꅇꅲꇁꌠꋍꐘꋑꀋꋒꅇꀱꋒ,ꃣꈌꀞꂫꇽꌤꆿꂥꀘꊿꐮꄮꌠꇬꊋꇤꄉꊥꎆ。ꊿꒆꆹꀋꑟꌦꌠꏭꎲꌠꎼꃅꃏꑽꑽꃤꐆꌠꏭꏦꇨꃅꅓꀞ,“ꏦꍤꇖꐨꋍꉹꌠ”ꍞꊟꄉꃅꇫꑟꉈꑴꃅꇫꑟꎻ。ꀒꁨꋍꁘꃅꏦꍤꇜꏦꏲꃛꑪꍈꃅꌠꃅꋒ。
ꌕꏢꌠ,ꐪꊛꄉ“ꉀꐕ”,ꃅꋊꀊꏀꋎꌠꏓꂱꉹꁌꀊꏀꌠꀊꅰꀊꂥꌠꇖꐨꇬꉜꄉꊋꀥꇱꄉꏦꍤꑴꅉꋈꄻ。ꏦꌬꏦꉻꄺꀱꊇꁧꇿꋌꉀꐕ。ꏦꍤꌤꆿꈆꑪꃅꏲꂠꑟꐨꉀꐕ,ꀑꁮꏦꍤꌤꆿꋈꄻꌠꊐꐕ,ꐊꑷꃅꃅꋊꀊꏀꋎꌠꅉꂫꊐꌠꏦꍤꌤꃅꏀꀺꀻꎆꌠꄹꎆ。ꐊꑷꃅꏦꇨꃅꄈꏲꌠꀨꄜꃅꎁꌋꆀꍞꊟꃅꎁꃅꇫꑟ,ꃹꅼꃅꍏꑷꏮꆫꉜꐨꅇꀱꎼꇁꌠꋊꄻꃅꇫꑟ,“ꏦꇨ”ꌠꅉꃀꉉꈌꇂꃴꄉꃶꐚꃅꑭꊂꈁꐥꌠꄈꃅꇏꎴꏲꋈꄻꌠꒃꉇ，ꃹꅼꃅꏦꍤꊿꁥꌠꉙꂘꋊꄻꌠꃅ,ꀋꎪꁦꎴꆹꄜꌠꏦꍤꂽꀉꇨꎸꅍꌡꌠꂘꄻ。
ꁧꎁꊈ,70ꈎꅑꅸꇁꌠ,ꇭꉼꇩꒈꂃꒊꆱꄓꃅꄓꌠꐩꋊꈴꈜꇬꐊꄉ,ꏓꂱꏦꍤꑼꈍꄮꑌ“ꃅꇴꄉꉻꁧꃤꃅ、ꏓꂱꎁꃅꏦꌬ”ꌠꉘꃀꉪꐨꌋꆀꂿꃆꃄꄻꇬꎷ。ꍏꉸꊿꋅꇰꀋ꒜ꃅꀱꌄꆣꇁꌠꄐꇐꏤꁈꃅꇴꄉꉻꌋꆀꋧꃅꉐꈎꇫꅐꀋꋻꃅꐛꐈꌠꐛꐨꐛꊂꇬꐥꐺꇬ,ꉪꊇꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ,ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,ꎔꎗꃅꀋꃋꋌꃢꇩꏤꑭꊂꏓꄊꃀꈿꌠꇖꐨꃅꇫꑟ,ꑴꐚꃅꏓꂱꁳꍞꊟꎻ,ꇬꂾꉪꐨꈐꊟꊋꊡ、ꀋꎪꃅꄉꅍꃅꎁꃅ,ꐊꑷꃅꊼꇅꌣꈚꌠꐧꋦꋉꐛ、ꉐꈎꉈꈽꑞꅉꁻꌐꋍꊭꌠꃅꇫꑟꌠꎁꃅꑆꊋꀊꏀꌠꅐꌞꂿ!
（ꑝꉸꎹꀙꏢ6ꆪ1ꑍꈨꇁꇬ）
