2019ꈎꇩꂱꎆꏣꌋꆀꐧꋦꀻꎆꎖꄎꃄꌬꐨꌋꆀ
2020ꈎꇩꂱꎆꏣꌋꆀꐧꋦꀻꎆꎖꄎꄐꄉꌠꃆꂮꅇꄜ
——2020ꈎ5ꆪ22ꑍꊯꌕꈭꇩꏤꑭꊂꏓꂱꁧꎁꃀꀉꒉꌕꃢꌠꈿꅉꇬ
ꇩꏤꀻꎆꌋꆀꄺꀱꊈꑼꉼ
ꁧꎁꊈ:
ꇩꃷꑼꇱꁠꄀꄉ,ꀋꃋꆏ2019ꈎꇩꂱꎆꏣꌋꆀꐧꋦꀻꎆꎖꄎꃄꌬꐨꌋꆀ2020ꈎꇩꂱꎆꏣꌋꆀꐧꋦꀻꎆꎖꄎꄐꄉꌠꄜꌊꊯꌕꈭꇩꏤꑭꊂꏓꄊꃀꌕꃢꌠꈿꅉꁳꍤꇖꎻ,ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋍ、2019ꈎꇩꂱꎆꏣꌋꆀꐧꋦꀻꎆꎖꄎꃄꌬꐨ
2019ꈎ,ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ,ꃅꄷꈁꐥꌠꌤꏲꅉꈁꐥꌠꆏꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,ꃹꅼꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꉌꊈꃅꈴꌬꈴ,“ꇖꑵꉪꐨ”ꀉꇨꇱ、“ꇖꑵꑴꑇ”ꌠꏟꈯꀕ、“ꑍꑵꀧꌋꃅ”ꌠꃅꇫꑟ,ꐊꑷꃅꄈꍏꑷ、ꇩꃷꑼꁈꏤꄐꁆꌠꃄꌬꇫꑟ,ꎔꎗꃅꊯꌕꈭꇩꏤꑭꊂꏓꄊꃀꑍꃢꌠꍤꇖꈌꁧꄉꌠ《ꍔꃚꌤꃅꅇꄜ》、2019ꈎꇩꂱꎆꏣꌋꆀꐧꋦꀻꎆꎖꄎꃄꌬ,ꇩꏤꑭꊂꏓꄊꎆꏲꎆꏣꊈꑼꉼꍤꄻꉜꐨꃄꌬꇫꑟ,ꎍꐽꌠꇬꄉꁨꆹꌠꌤꃅꀑꐱꅉꃀꉉꈌꌭꈬ,ꃹꅼꃅꀻꎆꉪꉻꀊꏀꌠꃅꈴꌬꈴ,ꇲꁵꁁꏯꐛꉻꐨꐥꃅꄺꀱꌠꌌꀨꑟꃅꄉꇬꎷ,ꊇꁧꀊꂥꃅꀻꎆꌠꄹꇙ,ꏟꈯꃅ“ꃘꑵꎍꐽ”ꌠꌤꃅꋒ, ꏓꇲꃅꉀꎆꌠꎍꐽ、ꄺꀱꌠꊥꎆ、ꐛꉻꋊꄻ、ꉹꁌꐥꐨꈲꁵ、ꐔꈔꉆꐨꄴꏮ、ꎍꐽꌠꄉꀧꌠꄹꎆ,ꋋꈓꌠꎆꏣꐧꋦꀻꎆꁻꌐꂿꃆꀋꉬꀋꉆꌠꊼꇅꉾꃪꃅꃅꌐ,“ꊯꌕꉬ”ꄐꎖꌐꁧꀋꉬꀋꉆꌠꃅꌐꐨꂴꄐꄉꌠꇬꄉꄐ,ꐊꑷꃅꊼꇅꌣꈚꌠꐧꋦꋉꐛꌠꎁꃅꐰꏤꃅꐙꌠꅉꃀꌆꄻꄉꀐ。
(ꋍ)ꈆꑪꃅꉻꒉꋊꄻꌠꃄꌬ,ꎆꏣꏮꈴꌠꄝꏦꀋꊰꃅꄻꋭꋽꅉꇬꐕꄉ。ꊋꀥꇱꄉꊭꈐꋊꄻ、ꍝꄎꐥꃅꋊꄻ、ꊜꋽꄮꉜꄉꋊꄻ、ꊒꌸꃅꋊꄻ,ꏱꁈꋮꄮꐮꐊꌠꊋꀥꇱ,ꂴꉘꇉꄉꌠꏲꂠꌠꀥꇱ,ꊋꀥꇱꄉꂴꄐꄉꌠꏲꂠ，ꎆꏣꎍꐽꉾꃪꃅꀻꎆꌠꊥꎆ。
ꋍꆏꉻꒉꌐꁧꀋꉬꀋꉆꌠꃅꌐꐨꉾꃪ。ꇩꈐꒃꅐꈁꉬꁌꐨ99.1ꃪꂡꂷꇬꑟ,6.1%ꉀꎆ,ꂴꄐꄉꌠꑞꅉꁻꌐꇬꄉꄐ。ꇓꈓꏦꎫꃅꅍꊌꌠꊿ1352ꃪꑻꀊꏀꃅꁦꎆ,ꈎꂫꇓꈓꏦꎫꍤꄻꇬꃅꅍꀋꊌꐨ、ꇓꈓꏦꎫꃅꅍꀋꊌꐨꁱꄀꄉꌠꂱꑱꅉꄉꇬ5.2%ꌋꆀ3.62%ꇬꑟ。ꀀꊿꌬꈧꁌꏤꀱꊛꃷꁨ2.9%ꉀꄓ。ꇩꏹꊌꐨꌬꐨꀑꐱꃅꐮꆽꏣ,ꉇꎆꊭꊎꌠ3ꃪꂡꂰꑼꈋꉐꇬꎍ。
ꑍꆏꉻꒉꏱꁈꌋꈭꏮꋊꄻꌠꊋꑌꇿꋌꐥ。ꇗꏸꊨꁌꊰꌠꌌꀋꉬꀋꉆꌠꃅꄉ,ꏣꀋꑌꌠꏱꎆꏱꁈꊋꃤꁦꎆꇿꋌꉀꐕ,ꏱꎆꌬꐨꐛꉻꐪꊛꄉꉾꃪꇁ,ꉹꁌꐥꐨꑠꀋꉬꀋꉆꁁꏯꎆꃀꈉꐨꊌꌌꊋꑌꃅꏦꀧꄉ。ꇩꏤꑭꊂꎃꐚꄉꉻꄐꌗꊌꐨ19.04ꃪꂡꂷ,3.8%ꉀꎆ;ꇩꏤꑭꊂꎃꐚꄉꉻꄐꌗꌬꐨ23.89ꃪꂡꂷ,8.1%ꉀꎆ;ꏱꎆ2.76ꃪꂡꂷꌫꁏꇔ,ꄐꌗꄉꌠꌋꆀꐮꆌ。ꋋꈓꌠꇗꏸꊨꁌꊰꌠ2.36ꃪꂡꂷ，ꄉꄐꃅꌐꐘꎝꊫꌐꌫꄻꈍꈐꍔꐯ,ꐳꃅꌐꐘꎝꊫꌐꃑꄻꌫꄻ。ꎍꐽꉾꃪꌠꎆꃀꏱꁈꄝꃛꄉꄐꇬꎷ,ꌋꈭꏮꋊꄻꇿꋌꐪꊛꄉꄇꇖꀕꃅꇫꅐꇁ,ꉌꒊꎆꉛꐛꉻꀋꆏꃅꃪꇁ,ꐥꄜꎆꏣꈜꀕꇈꀄꊭꐭꎆꏂꑘ、ꉹꁌꀰꏢꎆꏂꑘꏭꉌꒊꎆꉛꊋꃤꀒꁨꋍꁘꃅꁦꎆꇱ。ꈎꂫꇬꄜꐯꎆꃀ(M2)ꋒꃷꁨ8.7%ꉀꎆ,ꐧꋦꎆꏓꄉꈁꊭꊎꃷꁨ10.7%ꉀꎆ。ꊋꃤꀉꒉꃅꇱꄉꃅꅍꊌꌠꌌꂴꄉꌠꏱꁈꃄꌬ,ꎆꏂꑘꇇꀨꃅꈉꎍꐽꌠꇬꊋꀒꁨꋍꁘꃅꀉꒉꃅꇱ,ꃅꅍꀋꊌꄜꏂꀧꎆꀨꃅꈉꎍꐽꀱꁵꏱꁈꐊꑷꃅꃄꌬꇫꑟ，ꒉꌶꅉꌶꅐꌶꌺ、ꂿꑘꊿꊋꃅꌠ、ꂽꄻꀱꇁꌠꊿꑠꊿꁥꀋꉬꀋꉆꌠꃅꅍꊌꌠꀑꐱꃅꇬꎍꐽ。
(ꑍ)ꃹꅼꃅꇲꁵꁁꏯꐛꉻꐨꐥꃅꄺꀱꌠꄹꎆ,ꇩꈐꃷꎏꀉꇨꌠꏓꐛꌠꊥꎆ。“ꈫꈈ、ꇨꇱ、ꊐꐕ、ꀋꑴ”ꌠꁱꂷꉆꂷꌐꏦꌭꈬ,ꐪꊛꄉꅐꑘꐛꉻꋊꄻꌠꄹꎆ,ꊋꏂꄉꇲꈉꀰꏮꌠꄻꁣꀋꐥꃅꄉ。
ꋍꆏꂿꑘꇲꁵꁁꏯꐛꉻꐨꐥꃅꄺꀱꌠꃹꅼꃅꄹꎆ。ꋍꍈꑌꄝꀋꏯꃅꋚꂷꒃꅐꌠꒃꉇꋒ,ꋚꂷꈁꊌꃷꁨꐪꊛꄉ5ꈎ1.3ꃪꂡꏣꈋꉐꎍꇬꎷ。ꂿꑘꅐꇐꀋꉬꀋꉆꌠꏦꀧꌠꄐꇐꏤꁈꃄꌬꌠꃄꇬ,ꆖꂷꄖꄑꎖꄏꌠꃄꌬ。ꋚꂷꒃꅐꂿꄐꃄꁕ、ꀋꉬꀋꉆꌠꂿꑘꅐꇐꒃꅐꀧꌋꃅꃄꁕꀑꐱꃅꁸꏤꄉꀐ。ꐪꊛꄉꋠꃅꈲꒉꋈꄻꌠꊋꀥꇱ,ꎕꏦꀊꂥꌠꋠꃅ8000ꃪꂿꌋꆀꇿꋌꀊꂥꒉꏏꒉꊐꌠ2000ꃪꂿꂿꃆꃅꌐ。ꊋꀥꇱꄉꃏꍏꃮꆅꄴꏮꋎꍅ,ꐳꃅꃮꉘꒃꅐꌠꀱꐛꅉꐛ,ꀒꁨꋍꁘꃅꉐꀖꃱꁧꒃꅐꇲꁵꊭꊎꉻꑫꄻꃪ。ꋚꂷꁌꏤꀁꂥꐯꀁꂥꃅꎴꃼꌠꏱꁈꌋꆀꌑꇌꁻꌐꁌꏤꏱꁈꄻꃪ,ꂿꑘꅐꇐꀋꉬꀋꉆꌠꎴꊐꄹꏦꌋꆀꀋꉬꀋꉆꌠꂿꑘꌬꇐꊭꊎꄹꏦꄺꀱꌠꃹꅼꃅꄹꎆ。ꂿꑘꅐꇐꈻꐻꎊꈴꊸꑳꊭꊐꉁꈾꌋꆀꈻꐻꎞꎭꌠꊼꇅꐳꃅꀻꎆ。ꂿꑘꁡꇤꅐꑘꐮꉔꀻꎆꌠꐪꊛꄉꄹꎆ,ꏓꌗꎼꇁꇬꐛꏀꂿꑘꅐꑘꅉꁍ107ꂷ、ꂿꑘꁡꇤꅐꑘꐮꉔꀻꎆꌡꀠꐛꅉ210ꂷꀹꄻ。ꀊꏀꉹꌠꂿꑘꊋꁈꄏꀧꌋꃅꏱꁈꉻꑫꐳꃅꄻꐛꄻꐛꒆ。
ꑍꆏꄺꑣꑘꉹꏮꊐꐕꑭꁘꐕꐳ。ꄺꂡꑘꊇꁧꀊꂥꃅꀻꎆꌠꄹꇙꌠꏱꁈꏁꁈꏤꅐꇁ,ꅐꑘꐛꉻꋊꄻꄐꇺꎹꀨ(2019ꈎꋐꌠ)ꄜꃑ。ꃷꎏꈴ、ꏦꏲꈴꌠꏡꁈꌫꄻꄉꉈꑴꊖꌋꊁꊰꅏꊋ1ꂡꄓꀑꂪꀜꋊꇧꎭ,ꏟꈯꋭꋽꃅꇤꎸꅍꎆꏂꑘꐅꄻꏓꀱꌠꄹꎆ，ꇓꋌꐈꇐꇮꑘꐘꃆꀉꒉꀊꂾꌠꋈꄻꌠꄹꇙ。ꀊꏀꈭꌠꇮꇐꄺꀱꋉꃆꃄꌬ,ꍏꇩꎕꏦꅉꃴꎸꈜAꉹꍯꑠꇩꈐꒃꅐꇫꇬꇷ（ꋬ）ꇮꇐꉁꈾꌡꀠꌫꄻꌠꄹꇙ。
ꌕꆏꁧꃤꃅꑘꊇꁧꀊꂥꃅꀻꎆꌠꏟꈯꃅꄹꎆ。ꁧꃤꃅꑘꊇꁧꀊꂥꃅꀻꎆꌠ、ꋊꃅꐥꌠꁧꃤꃅꑘꄺꀱꊐꐕꌠꇬꊋꁈꄏꑠꏱꁈꏡꁈꏤꅐꇁ,ꊋꀉꒉꃅꃅꑘꐛꄟꀊꏀꌠꈁꏦꀊꏀꌠꉘꉚ,ꁧꃤꃅꑘꐛꄟꀉꑌꑵꃅꐮꉔꄉꀻꎆꌠꄹꇙ，ꐯꐊꐨꐥꌠꇮꇐꎥꃪꀖꁉ、ꇮꑘꄐꄻ、ꇮꑘꐯꏑꈄꏍꑠꐽꈉꋈꄻꌠꊋꁈꄏ。
ꇖꆏꐥꄜꎆꏣꀨꊰꊨꒊꌠꇬꊋꁈꄏꌠꊋꃤꁦꎆꃅꇱ。ꄺꑣꑘꑠꉹꑘꁌꎆꇗꏸꇗꏸꏮꐨ16%ꇬꄉꀁꋌꊰꌊ13%ꇬꑟ,ꈭꈜꎞꎭꑘ、ꋈꄻꑘꑠꉹꑘꆏ10%ꇬꄉꀁꋌꊰꌊ9%ꇬꑟ,ꎆꏂꑘꀄꊭꐭꌠꁊꈲꐨꐥꃅꇗꏸꊨꏆꌠꃄꌬ,ꄉꈁꀄꊭꌠꇗꏸꏮꊿꁌꎆꇗꏸꎳꄻꅉꆏꆪꃷꄻꃷꁨ3ꃪꂷꌠꇬꄉꉀꐕꅷ10ꃪꂷꃅꄉ。ꎆꏂꑘꌤꃅꊿꅉꀨꃀꌠꀨꎹꄜꏂꀧꌤꃅꅉꁌꏮꍆꐪ16%ꄩꐂꌠꌜꆏꉬꇮꃅꀁꋌꊰꌊ16%ꇬꄉ,ꋍꊭꃅꐙꌠꃅꅍꀋꊌ、ꌤꃅꂷꊂꌸꄜꏂꀧꁌꎴꐨꏱꁈꋍꈓꄯꎴ。ꃹꅼꃅꇔꊰꃷꎏꈴꌠꄺꀱ,ꐧꋦꏓꇱꎆꏓꀨꊰꄇꇖꀕꃅꀁꋌꊰ。ꍔꃚꌤꏲꅉꌋꆀꇩꁨꎆꏂꑘꉹꁌꀰꏢꎆꏂꑘ、ꐧꐭꎆꏂꑘꃤꎝꐪ6647ꂡꂷꁯꌠꋊꎵ。ꀒꁨꋍꁘꃅꍔꃚꁌꏤꏤꌠꀰꏢꌤꑘꃅꐙꌠꁌꎴꎹꀨꍅꊨ,ꏲꑘꌤꑘꄹꁆꁌꎴꌠꊨꏆꄷꀋꁧꁌꎴꎕꏦꊨꀁꂥ。ꎃꐚꇮꃅꃼꇇꑘꐽꏡꄆꁌꉈꑴ10%ꊨꒊ,ꋋꈓꇬꎆꏂꑘꄆꌬꀨꊰ846ꂡꂷꀁꋌꊰ。ꄆꊋꈛꎂꃅꀠꆦꌠꄉꈁꍔꒉ，ꎆꏂꑘꄆꃼꀨꊰ790ꂡꂷꀑꂪꊨꒊ。ꌬꉆꇓꋌ、ꋌꐛꐞꌗꃷꅉꍉꁌꏤꌋꆀꌜꐂꁠꐤꎞꎭꁌꏤꀁꋌꊰ,ꌫꄻꑱꁯꀵꃤ650ꂡꂷꀑꂪꊨꑾꌙ。ꎸꈜ、ꈴꀸ、ꉹꁌꌬꃏꏸꐛꅉꄹꁆꁌꎴꌠꇤꇧꎭꌋꆀꊨꒊ，ꎆꏂꑘꀵꃤ100ꎖꂡꂷꊨꑾꌙ。
ꉬꆏꌬꈧꉹꁌꈲꌠꉀꎆꅉꀊꏀꌠꀋꆏꃅꍔꐯ。ꐳꃅꏮꈴꀻꎆꌠꌌꃼꇇꑘꌬꈧꌠꊥꎆ、ꑱꈐꌤꃅꁧꃤꃅꑘꊇꁧꊐꐕꅓꄽꐨꍔꐯꌠꊥꎆ、ꁱꀕꌋꆀꈩꆫꌬꈧꊋꂫꋊꃑ、ꉹꁌꃅꈯꎟꌠꌋꆀꈯꎟꌬꈧꌠꊥꎆ、“ꐯꏑꈄꏍ+ꐧꋦꁧꃤꃅ”ꀻꎆꌠꊥꎆꑠꏱꁈꏁꁈꏤꅐꇁ,ꈊ꒜ꌬꈧꌠꏭꊋꁈꄏꌠꊋꃤꁦꎆꃅꇱ,ꐕꍯ、ꑱꈐꄆꉁꈾ、ꄆꌅꅐꇐꏀꆦꌬꈧꌠꊋꊡ。ꄆꌅꃼꇇꂿꑘꁡꇤꃹꌠꏓꇱꌶꀠꃹꅼꃅꃄꌬ,ꂿꑘꁡꇤꃅꄷꐳꎭꈄꏍꐛꅉ3ꃪꂷꄩꐂ,ꑣꍔꉱꑷꐨ96.6%ꇬꑟ。ꋋꈓꌠꐧꋦꌬꈧꅍꈘꆽꃅꃷꌠꈁꉬꃷꁨ40ꃪꂡꂷꇬꂵꅐ,8.0%ꉀꎆ。ꇩꏤꑭꊂꈄꏍꇬꈴꄉꈘꆽꃅꃷꌠꃷꁨ10.6ꃪꂡꂷꇬꑟ,16.5%ꉀꎆ,ꄚꈐꏭꐥꇐꃷꇐꈄꏍꇬꈴꄉꈘꆽꃅꃷꌠꃷꁨ19.5%ꉀꎆ,ꐧꋦꌬꈧꎊꇐꈘꆽꃅꃷꌠꈁꉬꃷꁨꇬ20.7%ꍆ。2019ꈎꍏꇩꂓꁦꋩꑍꃅꈧꈨꊋꐛꃅꀞꄻ。
ꃘꆏꀋꉬꀋꉆꁁꏯꇿꋌꐥꃅꎆꇱꌠꋭꋽꃅꍔꒉ。《ꍔꃚꎆꇱꃷꋪ》ꄜꃑꃄꌬ,ꄉꄐꃅꀋꉬꀋꉆꁁꏯꐘꃆꎆꀨꍆꁧꊨꒊ。ꐘꃆꀉꒉꀊꂾꌠꊭꊎꉺꏦꄻꐛꒆ,ꏣꀋꑌꃅꌐꐘꎝꃆꊫꌐꋈꄻꌠꄹꎆ。ꏦꐛꊱꁨꐥꃅꍔꃚꌋꆀꐧꋦꎆꀨꇷꃅ(PPP)ꌠꄹꎆ,ꉹꁌꎆꀨꊋꊡꌊꀋꇎꅉꅋꑣꌠꀋꉬꀋꉆꁁꏯꋈꄻꌠꇬꃅꈽ。172ꐘꈲꒉꋉꃆꀉꒉꀊꂾꌠꏓꌗꐯꇯꇬ144ꐘꃄꇬ。ꈭꈜꇩꏤꀉꇨꌠꋈꄻꐱꀨꍑꃑꃄꌬ。ꇩꏤꎊꈴꏍꊨ23ꂷꋈꄻꌠꎍꐽꃅꄹꎆ。ꍧꊗꎸꈜꂴꊬꌠꌤꃅꌠꏟꈯꃅꄹꎆ，ꀙꏢꄊꑭꇩꏹꃏꏸꐛꅉꄻꐛꄉꌌꌬ,ꃴꄏꄓ、ꀙꉿꄣꑠꒉꄆꍉꀉꒉꉹꌠꐳꃅꋈꄻ。2019ꈎꈎꂫꇬ,ꎸꈜꀰꏢꆏꈉ13.9ꃪꉻꆏꑟ,ꄚꈐꏭꐳꈴꎸꈜ3.5ꃪꉻꆏ,ꉹꁌꌬꃏꏸꐛꅉ235ꂷꇬꑟ,ꀊꏀꃅꁦꎆꌠ220ꄙꃛꌋꆀꈋꉐꄆꈄꏍꆏꈉ3.4ꃪꉻꆏꐥ,ꋌꌗꈜꀦꆏꈉ0.4ꃪꉻꆏꐥ。ꋋꈓꌠꀋꇙꁨꎆꎆꇱ(ꂿꑘꑱꁯꇫꀋꐊ)ꌠ5.4%ꉀꎆ,ꄚꈐꏭꉹꁌꎆꇱꌠ4.7%ꉀꎆ;ꎆꇱꐛꉻꐪꊛꄉꄻꃪ,ꇮꇐꀊꂥꅐꑘꎆꇱꌠꌋꆀꐧꋦꁁꏯꎆꇱꌠꂱꑱꅉꃅ17.3%ꌋꆀ13.2%ꉀꎆ。
(ꌕ)ꊋꈁꑌꃅꇤꄉꀋꉬꀋꉆꌠꒃꉇꀋꇎꅉꅋꑣꊋꋠꅉꂥꀘ,ꈢꇓꀖꀉꒉꌕꐘꌠꁨꎆꐨꀉꒉꀊꂾꃅꊌꅜ。ꊒꌸꃅꎭꑆꇔꌠꊌꐨꄇꇖꀕ,ꒆꉻꋦꈭꊇꁧꀑꐱꃅꄻꃪ，ꎆꒉꎆꇁꃨꆰꐨꇿꋌꐥꃅꊌꌌꄴꏮꄉ。
ꋍꆏꎭꑆꇔꈢꇓꀖꌤꃅꌠꏟꈯꃅꄹꎆ。ꀉꇨꃅꅐꑘ、ꃅꅍꊌ、ꌬꈧꑠꌢꎭꄏꐓꌠꃅ,ꊋꃤꏓꋧꄉ“ꌕꐎꌕꍏ”ꑠꌢꎭꅼꇨꃅꄷ“ꑍꀋꐒꌕꏦꀧ”ꌤꃆꑓꅐꎑꌠꈢꇓꀖ。ꏓꌗꇬꄉꉣꄻꄉꈁꄻꄉꌠꌢꎭꑱꁯ733ꁯꊋꁈꄏꄉꂿꑘꁡꇤꑲꁘꇣꆹꄺꀱꌠꃄꌬ。ꏓꌗꇬꌢꎭꄏꐓꎞꀀꁆꄻꅉ3.5ꃪꂷ、ꀀꑳ260ꃪꎖꂷꋈꄻ,ꄉꉣꄻꈁꄻꄉꌠꌢꎭꄏꐓꎞꀀꊻꂷ947ꃪꑼꁆꏀꄎ,ꋍꈓꏜꃅ“ꊯꌕꉬ”ꄐꎖꋈꄻꂿꃆꀑꐱꃅꃅꌐ。ꀋꆏꃅꊁꊛꅐꑘꄏꐓꌠꌋꆀꃅꅍꊌꇇꀨꊋꃤꁦꎆꃅꇱ，ꏤꄉꇇꀨꄏꐓꑠꌤꃅꌠꊋꑌꃅꄹꎆ。ꋋꈓꌠꂿꑘꁡꇤꌢꎭꊻꂷꉈꑴ1109ꃪꑻꊨꒊ,ꌢꎭꑤꌢꎭꀎꇓꇔꇧꎭꌠ344ꂷ,ꌢꎭꇫꅐꐨꀁꋌꊰꌊ0.6%ꇬꄉ。ꅑ2019ꈎꈎꂫꑟꌠ，ꀋꃋꌬꌠꎕꏦꇬꑟꌠꌢꎭꊻꂷ97%ꆏꎭꑆꇔꌠꃅꇫꑟ,ꌢꎭꑤ94%ꆏꌢꎭꀎꇓꇔꌠꃅꇫꑟ,ꃄꁕꃅꐙꌠꉻꄜꌢꎭꌠꀑꐱꃅꊌꌌꂥꀘꄉꀐ。
ꑍꆏꒆꉻꋦꈭꀧꌋꃅꌋꆀꍍꆀꄴꏮꌠꊋꑌꃅꄹꎆ。ꏟꈯꃅꃅꑆꀊꃴ、ꒉꀊꃴ、ꃄꅉꁦꎴꌠꐏꁇꋒ,ꈑꋧꐥꇐ(PM2.5)ꎕꏦꇬꀋꑟꌠꄃꊐꌠꌋꆀꈋꉐꇓꈓꃅꈎꐽꏡꐊꐨ2.4%ꀁꋌꊰ,ꅉꄩꒉꊇꁧⅢꉹꌠꒉꄜꇬꑟꅀꏭꀋꋌꃅꉾꌠꍆꁧꆏ74.9%ꉬ。ꐈꇓꊋꀦꀋꉬꌠꊋꀦꌬꈧꍆꁧ15.3%ꇬꑟ,ꋍꈓꏛꃅ“ꊯꌕꉬ”ꄐꎖꁻꌐꃅꇫꑟ。ꑍꈭꌠꍏꑷꒆꉻꋦꈭꀧꌋꃅꏦꈴꍞꊟꍤꎖꌠꃄꇬ。ꒊꃀꍈꄹꏦꎿꃀꍈꄹꏦꃅꑞꅉꑟ。ꑤꊐꌠꒉꇁꀦꃅꄷꒆꉻꋦꈭꌤꃆꏱꄻꌠꀑꐱꃅꃅꌐ,ꄃꊐꌠꌋꆀꈋꉐꇓꈓꒉꊈꀉꆈꍹꅿꌠ87%ꀋꇈꋊꄻꇧꎭ。ꀋꇙꀋꑐꃅꉇꄅꀉꀜꀉꇁꈏꃹꇁꌠꏢꇋꌠꄹꎆ,ꇩꏤꑭꊂꇴꄜꀉꀜꈏꃹꃷꁨ40.4%ꊨꒊ。“ꀉꀜꀋꐥꇓꈓ”ꋈꄻꃅꉚꌠꃄꇬ。ꐳꃅꍍꋊꈌꁧꄹꏦꃄꌬ。ꀊꃴꅐꑘꄐꇺꎹꀨ(2019ꈎꅐꌠ)ꄜꃑ。ꊋꀦꃸꅐꈁꉬꃷꁨꌋꆀꇨꐨ“ꑍꋏ”ꃅꐨ、ꇩꏤꒉꏏꃅꐨ、ꀊꃴꐥꐨꀹꄻꃅꐨꃅ。ꌗꂓꇩꈐꒃꅐꈁꉬꁌꐨꊋꃹꐨ2.6%ꀁꋌꊰ,ꃪꂷꇩꈐꒃꅐꈁꉬꁌꐨꒉꌬꃷꁨ6.1%ꀁꋌꊰ。ꋌꐛꌩꏪꀧꌋꃅꄹꏦꄻꃪ,ꋠꃅꀱꌩꊪꏜꏿꌠꍔꒉ,ꃅꈣꂤꏂꐛ、ꇓꊈꂤꏂꐛꌠꏓꇱꏱꄻꌠꃄꌬ。ꒆꉻꏓꇱꁵꊒꃅꉚꌠꃄꇬ。ꌗꂓꇩꈐꒃꅐꈁꊌꁌꐨꑍꀑꐊꌋꋊꃑꃷꁨ4.1%ꀁꋌꊰ。
ꌕꆏꎆꒉꎆꇁꑠꁁꏯꐔꈔꉆꐨꀉꒉꀊꂾꌠꌌꇿꋌꐥꃅꄴꏮ。ꃅꄷꍔꃚꂁꀀꃅꐙꌠꎝꃆꌋꆀꎆꏂꑘꎝꃆꃨꆰꐨꀞꄻꌠꋭꋽꃅꄹꎆ,ꉻꒉꆷꄿꐨꐳꃅꉀꐕꆸꄟꏢꑲꄉꀐ。ꀉꒌꑴꉴꊱꁨꀋꐥꃅꀻꎆꌠꌌꇿꋌꐥꃅꏱꄻ,ꃨꆰꐨꀉꒉꌠꎆꒉꎆꇁꏲꉻꈜꀕꇈꐧꐭꑴꉴꄹꁆ“ꊒꌸꃅꍉꄊꋊꑣ”ꌠꊌꐨꋍꊭꃅꐙꌠꊌꅜ,ꐯꏑꈄꏍꑠꋍꏅꇬꃆꂮꐥꌠꃨꆰꐨꌌꏱꄻ。ꎆꒉꎆꇁꃷꎏꏮꈴꌠꎍꐽꊱꁨ,ꉇꎆꃷꎏꌋꆀꏓꂱꀙꎆꃀꉇꎆꀟꄻꁌꐨꀑꐱꃅꎍꐽ。ꎆꒉꎆꇁꍞꏲꄹꏦꀒꁨꋍꁘꃅꄻꐛꒆ。
(ꇖ)ꃹꅼꃅꏀꀺꄹꇙꀻꎆꄐꇐꃄꌬ,ꈆꑪꇮꇐꏀꀺꄐꊋꀒꁨꋍꁘꃅꉀꐕ。ꀋꆏꃅꃹꅼꃅꈆꑪꇮꇐꏦꉻꄺꀱ,ꊋꀉꒉꃅꅐꄉꅉꃀꎥꃪꌠꌋꆀꌫꄻꅉꃀꎥꃪꌠꇬꊋꁈꄏ，ꇩꏤꑭꊂꎥꃪꌋꆀꋒꃯꉜꀻꎆꌫꎆꎆꇱꇨꐨ2.19%ꇬꑟ,ꈆꑪꇮꇐꀻꎆꌠꅐꌞꐨꉀꐕꌊ59.5%ꇬꑟ。
ꋍꆏꑴꌅꏀꀺꑭꁘꐕꐳ。ꀉꒉꀊꂾꌠꈆꑪꇮꇐꊌꐨꊛꄉꇫꅐꇁ,ꍤꊉꇖꉸꊋꐛꃅꆧꁨꇱꄓꊁꆈꄉꀏꅞ,ꀙꄏꌕꉸꅉꆺꑭꊂꈯꄜꏸꋉꄐꁆꌠꐊꑷꃅꃅꌐ,5Gꃼꇇꇬꌬꌠꐳꃅꄹꅐ,ꎴꆹꏷꉬꉸꇙꌕꎞꊐꄔꉈꊋꐛꃅꃑ,ꇬꂾꇷꌠꇩꏤꒃꅐꌠꉴꃅ“ꎭꄏꇉ”ꑌꐚꃅꌌꇬꊎꌬ。ꈆꑪꇮꇐꏀꀺ2030—ꐘꃆꀉꒉꀊꂾꌠꌋꆀꇩꏤꈆꑪꇮꇐꌐꐘꀉꒉꀊꂾꌠꃹꅼꃅꃄꄻ,ꄐꊋꀊꂥꋍꋓꃅꁊꁻꁨꑭꌬꀦꑠꇩꏤꈆꑪꇮꇐꅉꃀꉁꈾꀉꒉꀊꂾꈨꋈꄻꇬ。ꐊꑷꃅꏀꀺꄺꀱꃅꉚꌠꎍꐽꃅꄹꎆ, ꂴꌬꂴꎖꄺꀱꏁꁈ169ꐘꀑꐱꃅꃅꌐ。ꀙꏢ、ꎮꉰꈆꑪꇮꇐꏀꀺꈯꄜꋈꄻꌠꁨꎆꐨꀋꂿꑘꌠꊌꅜ,ꒀꇤꀎꄊꊅꐎꇩꏹꈆꑪꇮꇐꏀꀺꈯꄜꋈꄻꌠꁣꀋꐥꃅꑭꄑꆹ。ꀙꏢꉸꏐ、ꎮꉰꍈꏦ、ꉢꉻꉼꃐꑠꏓꇱꃅꐙꌠꇩꏤꈆꑪꈯꄜꋈꄻꌠꐊꑷꃅꐳꀥꇱ,ꄊꊅꐎꏓꇱꃅꐙꌠꇩꏤꈆꑪꈯꄜꐳꃅꄐꎖꋈꄻ。
ꑍꆏꇙꊋꀊꏀꌠꐳꃅꉘꉚ。ꇩꏤꃷꁨꎆꏣꏀꀺꃅꉚꅉꋈꄻꇬ。ꏓꇲꃅꀉꒉꀊꂾꈴꌗꈴꋉꃆꋈꄻꌠꄹꎆ,“ꊯꌕꉬ”ꀉꒉꀊꂾꌠꏲꃆꈴꌗꈴꋉꃆꈨꃄꌬ。ꄐꇐꏤꁈꃅꐙꌠꏀꄓꅐꑘꁥꏓꃅꀻꎆꌠꋉꃆꃹꅼꃅꃄꌬ。
ꌕꆏꏀꀺꑘꀺꀹꄻꍄꑐꊋꃤꐪꊛꄉꀉꇨꇁ。ꈆꑪꎥꃪꐘꃆꌫꎆꌫꄻ“ꀧꃅꄹꏦ”ꌋꆀ“ꀊꃴꈴꈜ”ꄺꀱꃅꉚꌠꃅ。ꊋꐛꃅ2019ꈎꇩꏤꑭꊂꋓꀺꃅꈧꆏꄡꀞꄻ。ꅑ2019ꈎꈎꂫꑟꌠ,ꇩꏤꑭꊂꇮꇐꀊꏀꀊꂥꌠꎆꏂꑘ22.5ꃪꁯꄩꐂ,ꈆꑪꇮꇐꉹꌠꐧꀠꀄꊭꎆꏂꑘ15.1ꃪꁯꄩꐂ,ꂱꑱꅉꃅ24%ꌋꆀ15%ꅶꍯꉀꎆ。ꉪꇩꏤꏀꀺꀱꊛꃷꁨꊐꐕꅷꋧꃅꑭꊂꃅꇬꉆꈉ14ꂷꂶꌠꇬꑟ,ꎆꏂꑘꋍꑍꌠ1ꃪꁯꈋꉐꀊꌃꃅꁦꎆ。
(ꉬ)ꀉꒉꀊꂾꌠꄐꇐꃅꌊꑞꅉꑟꑭꋧꅉꑟ,ꇓꈓꇓꉈꃄꁕꀻꎆꌠꋮꄮꐨꀋꆏꃅꀉꇨ。ꑣꋂꄖꄑꌄꆣꌋꆀꃄꁕꀻꎆꄐꇐꀉꒉꀊꂾꌠꃅꑞꅉꑟꌠꄹꇙꄉꇿꋌꊌꂿ,ꊋꏂꄉꀊꏀꉹꌠꇓꈓꏦꎫꐛꈴꌠꊇꁧꉀꐕ,ꊋꇤꄉꇓꈓꇓꉈꃄꁕꀻꎆꍣꐨꊨꒊ。
ꋍꆏꑣꋂꄖꄑꌄꆣꄐꇐꐳꃅꃄꌬ。ꑣꋂꄖꄑꄐꇐꏤꁈꄐꎖꏤꄻꄉꌠꋉꃆꀉꒉꀊꂾꌠ、ꎖꄎꀉꒉꀊꂾꌠꌋꆀꃅꐨꀉꒉꀊꂾꌠꃄꌬꇬ。ꑣꋂꈩꆫ、ꑬꆏꇬꈧꂿꑘꑠꃅꑘꐛꄟꀊꏀꌠꀋꆏꃅꇫꅐꇁ。ꐪꊛꄉꂿ꒧ꁬꋌꐈꑭꃷꁨꊨꒊꇿꋌꉀꎆꌠꄹꎆ,ꐳꃅꂿ꒧ꊪꁧꋚꁧ、ꎇꃀꍅꑓꅐꅑꑭꀖꅐꀦꈴꃅꌫꄻꌠꄹꎆ。ꂿꑘꁡꇤꒉꄆꈜꑠꇎꏦꄇꇖꀕꃅꄻꃪ,ꂿꑘꂿꑘꁡꇤꍍꆀꏱꄻꈢꇓꀖꌠꐊꑷꃅꃅ,ꂿꑘꁡꇤꊿꀀꋦꈭꏱꄻꌠꐳꃅꄹꎆ。ꑣꋂꁱꀕꋈꄻꌠꌋꆀꑣꋂꏱꄻꌠꃹꅼꃅꄹꎆ。
ꑍꆏꇓꈓꏦꎫꐛꈴꀊꏀꉹꌠꊇꁧꎍꐽꃅꉀꐕ。ꇓꈓꇓꉈꐮꉔꀻꎆꏦꉻꉺꏦꄻꐛꄻꐛꒆꌠꏱꁈꏡꁈꍑꃑꃄꌬ。ꂿꑘꆹꏮꊻꂷ1000ꎖꃪꑼꇓꈓꏦꎫꀀꇁ,ꑱꐴꀋꉬꌠꊻꂷ1ꂡꇓꈓꑱꈿꄉꌤꃅꌠꁨꎆꐨꀉꒉꀊꂾꃅꊌꅜ，ꇩꏤꑭꊂꅉꀕꀀꋦꊻꂷꇓꈓꏦꎫꊿꐛꐨ60.60%ꇬꑟ,ꑱꐴꊻꂷꇓꈓꏦꎫꊿꐛꐨ44.38%ꇬꑟ。ꈯꄜꇓꈓꌋꆀꇓꈓꁥꊻꂷꏓꋧꊋꃤꋍꁘꋍꁘꃅꊐꐕ,ꇓꈓꏓꈌꈭꋈꄻꌠꊱꁨꃅꄹꎆ,ꍔꀉꒉꐯꀉꒉꌠꌌꏃꄻꄉꌠꂵꅐ,ꐛꋲꍔꀄꊭꌠꀻꎆꌠꀒꁨꋍꁘꃅꐛꏦꈴꇁ。
ꌕꆏꃄꁕꋮꄮꃅꀻꎆꌠꉺꏦꀊꏀꌠꐳꃅꏓꄻ。ꁮꐚꁁꏯꀖꁉ、ꑛꌋꈤꁁꏯꄖꄑꌄꆣ、ꈯꄔꃅꄷꉀꄓ、ꁭꅐꁆꏯꂴꅑꌠꇬꊋꁈꄏꌠꏱꁈꉻꑫꀊꅰꃅꄻꃪ。ꏢꏸꏹꋯꐊꀻꎆꌠꊋꑌꃅꊱꁨꃅꄹꎆ,ꑪꉢꑟꐎꆹꏮꌊꋈꄻꊬꌠꇬꃹꆹ。ꍤꏦꎆꏣꐛꁕꒆꉻꋦꈭꌤꃆꑓꅐꎑꌠꋊꄻꌠꌋꆀꒆꉻꋦꈭꍍꆀꏱꄻꊌꐨꈲꁧꄇꇖꀕ。ꒀꇤꀎꄊꊅꐎꋈꄻꄐꎖꏱꁈꉻꑫꀒꁨꋍꁘꃅꄻꃪ。ꍤꏦꒊꃀꌕꎏꃄꁕꋍꉻꃅꀻꎆꌠꄐꎖꐱꀨꍑꃑꃄꌬ,ꒆꉻꀊꃴꋍꉻꈴꃅꀻꎆꌠꌡꀠꐛꅉꋈꄻꇬ。ꉸꉼꒊ꒜ꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆꌠꄐꎖꐱꀨꁰꄻꇬ。ꇝꂱꀉꆹꀁꑌꊿꋅꃅꋮꆹꏮꌢꎭꑠꐋꀋꌡꉹꌠꃅꄷꐳꃅꄖꄑꀻꎆ,ꐮꊒꄉꇇꀨꌠꊋꑌꃅꄹꎆ。ꎿꃀꎆꏣꀻꎆꌡꀠꃄꅉꋈꄻꌠꐊꑷꃅꃄꇬ。
（ꃘ）ꐊꑷꃅꃷꎏꈴꃅꄺꀱꌠꄹꎆ,ꃷꎏꀨꄜꍄꑐꊋꃤꀒꁨꋍꁘꃅꋊꃑ。ꐧꋦꉪꏦꅉꀨꎆꏣꄹꏦꌭꈬꌋꆀꄻꃪ,ꀋꉬꀋꉆꁁꏯ、ꀋꉬꀋꉆꈭꊭꄺꀱꌠꐊꑷꃅꄹꎆ。
ꋍꆏꃼꇇꀰꏢꋦꈭꐪꊛꄉꃪꈴ。“ꃑꏲꃅ”ꄺꀱꌠꅼꅉꉜꄉꄹꎆ，《ꃼꇇꀰꏢꋦꈭꃷꋪ》ꄜꃑ,ꍏꇩꃼꇇꀰꏢꋦꈭꈋꍣꉻꑫꏓꄻ,ꇩꏤꑭꊂꇓꈓ41ꂷꇬꄉꃼꇇꀰꏢꋦꈭꈋꍣꌠꃅ。ꃷꎏꃹꉆꃷꁨꋏꄯꒉ(2019ꈎꅐꌠ)ꍑꃑꃄꌬ,ꃷꁨꋏꄯꒉꌤꐘꊨꒊꌊ131ꐘꇬꑟ。ꎆꇱꍤꄻꈌꁧꃅꐨꋊꍬ,ꎆꇱꍤꄻꈌꁧꇬ“ꈄꏍꈴꄉꀞꌐ”ꌠꑟꐨꀋꆏꃅꉀꐕ。ꋉꃆꋈꄻꐘꃆꍤꄻꈌꁧꈭꊭꐪꊛꄉꅧꊨ。ꌤꏲꅉꐯꏑꄉ“ꑍꈀꏾ、ꋍꄇꄜꋊ”ꍞꏲꌠꋍꁘꋍꁘꃅꄹꌬ,“ꐯꏑꈄꏍ+ꍞꏲ”ꌤꐘꃷꁨꄯꒉꐳꃅꏤꄻ,ꇩꏤꑭꊂꉌꒊꈴꌗꐯꇯꌬꐽꈉꂿꄐꌋꆀꁧꃤꃅꌠꀋꆏꃅꄻꃪ,ꉌꒊꌠꌌꅉꃀꃅꄉꌠꀊꏀꉹꌠꍞꏲꉺꏦꐳꃅꏓꄻ。ꇩꏤꑭꊂꋍꉻꈴꍔꃆꁧꃤꃅꐽꈉꌌꈄꏍꇬꄉꌬꉚ,ꎆꒉꎆꇁꉌꒊꈴꌗꃷꁨꊫꌐꈄꁧꃤꃅꈄꏍꇩꏤꑭꊂꇬꉱꑷꈴ。
ꑍꆏꌼꐊꁨꏦꄺꀱ、ꅐꇐꌅꈌꀧꌋꃅ、ꎆꏂꑘꑱꈐꉌꊈꋊꃑꀧꌋꃅꑠꄺꌠꀱꏓꇙꃅꄹꎆ。ꇖꈭꌠꌼꐊꁨꏦꄺꀱꃅꉚꌠ160ꁯꃄꌬꇬ。ꊋꀥꇱꄉꁨꇐꌅꈌꌋꆀꌧꇐꅏꄻꌅꈌꀧꌋꃅ,ꁨꇐꌅꈌꇬꃆꂮꐥꌠꀋꐯꀞꑽꌠꃣꈌꋊꍬꄺꀱꌠꂵꅐꐨꀋꂿꑘꃅꊌꅜ,ꍔꃚꁨꇐꌅꈌꇬꃆꂮꐥꌠꏟꃆꏈꑘꌤꃆꌐꄉꏱꄻꌠꃅꐨꊱꁨꃅꃄꄻ。ꉹꁌꀰꏢꎆꏂꑘꄺꀱꀻꎆꊋꁈꄏ、ꐧꐭꎆꏂꑘꉾꃪꃅꀻꎆꌠꊥꎆꌠꏱꁈꏡꁈꏤꄻꅐꇁ,ꎆꏂꑘꌋꎆꏂꑘꃆꂮꐥꌠꏱꁈꏤꄻꌠꇬꐊꈽꌠꉺꏦꄻꐛꄻꐛꒆ。
ꌕꆏꐊꊈꃷꎏꈴꃅꄺꀱꌠꐳꃅꃅꇫꑟ。ꑘꃅꊋꃤꌋꆀꌧꊿꐧꋦꐨꐥꃅꏭꇙꏦꉻꉺꏦꊥꎆꌠꄺꀱꉜꐨꏤꄻ。ꁌꁦꊫꌐꏦꃤꄺꀱ,ꈆꑪꇮꇐꏀꀺꀻꄻꄉꄷꀋꁧꁱꄀꄹꏦꃅꉚ,ꎆꉛꃷꎏꁌꄜꇔꊰꄺꀱꐛꒆ(LPR)ꄺꀱꄻꃪꄉꉺꏦꏓꐛ。ꒉꌶꅉꌋꆀꈆꑪꎥꃪꑼꌙꈆꑪꎥꃪꃆꂮꐥꌠꑴꌅꌅꈌꍔꒉ,ꈆꑪꇮꇐꎥꃪꊿꄉꅍꈆꑪꇮꇐꊌꐨꁨꌅꈌꅀꀊꉗꃅꌫꄻꌅꈌꄻꇬꁳ,ꇮꇐꆹꏮꁧꃤꃅꉻꑫꏓꄻ。ꃄꅉꏲꂠꏦꃤ、ꇓꈓꑲꅉꇤꂷꁨꇐꏲꂠꏦꃤꌌꄺꀱ,ꋈꄻꌬꃅꃄꌬꌅꈌꏮꏆ、ꊤꅐ、ꄂꄇꑍꊐꃷꎏꀒꁨꋍꁘꃅꄻꃪ,ꇮꑘꌬꃄꅉꃄꄟꀉꑌꑵꃅꏆꁵꌠꌋꆀꃷꎏꇲꁵꉻꑫꀊꅰꃅꄻꐛꒆ。
ꇖꆏꀋꉬꀋꉆꁁꏯꄺꀱꌠꃹꅼꃅꄹꎆ。ꇩꏤꇓꋌꋌꐛꐞꌗꁠꐤꈄꏍꉻꏑꑞꅉꐥꇬꌦꏓꄻꄻꐛ。ꐊꑷꃅꇓꋌꋌꐛꐞꌗꉎꐕꌋꍤꅤꀖꉆꌠꄝꃑ。ꂘꑘ、ꈆꑪꇮꇐ、ꈭꈜꎞꎭꑠꁁꏯꍏꑷꌋꆀꃅꄷꏱꎆꌤꃆꌅꈌꌋꆀꌫꅐꆽꎍꐨꁷꄻꄺꀱꄐꉻꄻꅐꇁ。ꄆꊋꃼꇇꃷꎏꈴꐨꀒꁨꋍꁘꃅꉀꐕ,ꁦꎆꃷꁨꄆꁵꑘꃆꄺꀱꌠꌋꆀꄆꊋꇫꎍꌠꎊꈬꃷꎏꋈꄻꃅꉚꅉꎍꐽꃅꄹꎆ。ꃹꅼꃅꊖꌋꏦꄉꄆꃑꈄꏍꃹꌠꄆꁌꏤꏓꐛꉺꏦꄺꀱ,ꆳꄆꌋꆀꇨꃛꈄꏍꃹꄆꁌꏤꄺꀱ、ꂿꑘꒉꁌꏓꇱꄺꀱ、ꈭꈜꎞꎭꁌꏤꄺꀱꌠꊱꁨꃅꄹꎆ。ꍏꇩꇩꏤꎸꈜꉻꏑꑞꅉꐥꇬꌦꌋꆀꍏꇩꒀꍔꉻꏑꑞꅉꐥꇬꌦꏓꄻꄻꐛ。ꉹꑘꑠꉼꃼꇇꉼꌋꆀꏲꑘꌤꏲꅉꐮꐞꄺꀱꌠꐊꑷꃅꃅ。
(ꏃ)ꐪꊛꄉꃹꅼꃅꑞꅉꀊꂥꃅꁉꃑ,ꁉꃑꉹꌠꎆꏣꐛꉻꀊꏀꌠꐳꃅꏓꄻ。ꉇꉻꏭꁉꃑꌠꆏꈍꈐꀊꅰꀉꒉ、ꀊꅰꀊꐯꁁꏯ、ꀊꅰꃹꅼꌠꇬꉜꄉꐊꑷꃅꄹꎆ,ꇩꏹꎆꏣꇷꃅꌠꌋꆀꋓꅔꂱꎆꅑꀊꏀꌠꐳꃅꉗꄻ。
ꋍꆏꐯꇯ“ꋍꁕꋍꈜ”ꋈꄻꌠꏟꈯꃅꄹꎆ。ꑍꈭꌠ“ꋍꁕꋍꈜ”ꇩꏹꇷꃅꀊꋾꉉꎥꈉꊋꐛꃅꀞꄻ。ꏓꌗꇬꇩꏤ138ꂷꌋꆀꇩꏹꎀꍹ30ꂷꌋꆀꐯꇯ“ꋍꁕꋍꈜ”ꇷꃅꁱꐘ200ꁬꏤꁱ。ꍏꀠꎆꏣꈴꈜꑠꋈꄻꌠꁨꎆꐨꁣꀋꐥ。ꑷꊆꐳꈴꎸꈜ、ꍏꇅꎸꈜ、ꇨꄊꇙꈴꀸꑠꐘꃆꀉꒉꀊꂾꌠꁨꎆꐨꏣꀋꑌꌠꊌꅜ,ꍏꊉꁭꅐꁁꏯꋌꐛꐞꌗꁠꐤꈴꌌꌬꄉꌗꈴ。ꃔꇩ、ꑱꇩ、ꏝꀪꑠꇩꏤ14ꂷꌋꆀꌕꁁꏯꌠꃷꎏꇷꃅꉺꏦꄻꄉ。“ꋍꁕꋍꈜ”ꀊꃴꀻꎆꇩꏹꏓꐊꌠꑌꐚꃅꃄꇬ，“ꃷꁨꏦꍠꈝꃀ”“ꏦꍠꈝꃀꄆꃼꇇ”ꋈꄻꇷꃅꌠꊱꁨꐥꃅꄹꎆ。ꍏꉩꉺꍯꏓꌗꐯꇯꇬ2ꃪꇷꇬꂵꅐ,ꉩꍏꇩꏤ18ꂷꇬꇓꈓ57ꂷꇬꈴ,ꏓꇱꈄꁨꀉꇖꐨꆏ94%ꇬꑟ。ꁮꐚꁁꏯꅔꎿꈴꈜꀊꏀꉻꄜꄐꎖꍑꃑꄉꃄꌬ。
ꑍꆏꉇꉻꃼꇇꀻꎆꌠꎍꐽꅉꇬꄉꊇꁧꉀꐕ。ꃼꇇꊇꁧꀊꂥꃅꀻꎆꌠꄹꎆꌠꄐꇺꉜꐨꍑꃑꄉꃄꌬ。ꑍꈭꌠꍏꇩꇩꏹꈏꃹꀊꐯꈭꃅꄉꀨꌠꊋꐛꃅꀞꄻ。ꃄꁕꐊꑷꃅꎆꏣꐋꀨꐮꃆꂮꋯꏤ(RCEP)ꐯꉇꌠꁨꎆꐨꀉꒉꀊꂾꃅꊌꅜ。ꉩ꒜、ꄏ꒜ꌋꆀ“ꋍꁕꋍꈜ”ꈛꁧꇩꏤꏭꈏꃹꉇꅐꌠꊼꇅꐳꃅꉀꎆꌠꄝꏦꀋꊰ,ꏓꋧꄆꈜꑠꁥꇱꁌꐨꀊꂥꌠꅐꇐꌋꆀꌧꇐꏓꋧꉹꌠꁧꃤꃅꉇꅐꌠꐳꃅꉀꎆꇬꎷ。ꋯꐂꄆꌅꃼꇇꏓꇱꋒꃯꉜꅉ24ꂷꀊꏀꃅꋈꄻꄉ,ꃷꎏꃻꄻꃼꇇꃅꉚꅉ、ꁧꃤꃅꃼꇇꏀꀺꀻꎆꃅꉚꅉꏟꈯꃅꄹꎆ,ꏓꇱꇗꏸꀧꅉꑠꎿꀸꐋꀋꌡꍞꏲꃄꁕꀻꎆꊇꁧꀒꁨꋍꁘꃅꊐꐕ。
ꌕꆏꉇꎆꌫꄻꑟꐨꐪꊛꄉꊐꐕ。ꉇꉻꃼꇇꎆꇱꏦꃤꌋꆀꃄꌬꃷꋪꏤꄻꄉꃄꌬ。ꀒꁨꋍꁘꃅꉇꉻꃼꇇꃅꊿꎆꇱꈍꈐꍔꒉꌠꊋꊡ,ꉇꎆꊋꊡꌊꄺꑣꑘꌋꆀꒃꅐꃅꐙꌠꁧꃤꃅꑘꇬꎆꇱ,ꈯꄔꁮꐚꃅꄷꉇꎆꅐꑘꆹꏮꌠꊪꊛꌠꊋꁈꄏ。ꇩꏤꑭꊂꌋꆀꄿꐨꃼꇇꃅꉚꅉꉇꎆꈏꃹꌠꃷꁨꋏꄯꒉꂱꑱꅉꃅꊨꒊꅷ40ꏢ、37ꏢꇬꑟ。ꍏꇩꐛꌠꉇꎆꎆꒉꎆꇁꏲꉻꇴꍆꍆꁧꌋꆀꃅꑘꈍꈐꋎꏢꌠꄝꃑ,ꎆꒉꎆꇁꃷꎏꑍꁁꏯꁉꃑꌠꍔꒉ。ꇩꏤꊐꌠꎆꏣꇮꇐꀖꁉꐎꏀꀺꊐꐕꌠꄹꎆ。ꎆꏂꑘꉇꎝꅺꇰꁱꄀꏲꂠꌠꄻꃪ,ꊋꀥꇱꄉꀋꉬꀋꉆꉹꑘꉈꎝꃨꆰꐨꄴꏮ。ꋋꈓꇬꃶꐚꃅꉇꉻꃼꇇꈛꎂꃅꎆꇱꌠ1381ꂡꂰꑼꌌꌬ。
ꇖꆏꄿꐨꃼꇇꃅꉚꅉꋈꄻꌠꊌꐨꇿꋌꏣꀋꑌꌠꊌꅜ。ꎮꉰꄿꐨꃼꇇꃅꉚꅉꈴꀸꊫꅉꃄꁕꀊꏀꌠꁦꎆꃅꄻꄉ,ꎭꄏꑠꄿꐨꃼꇇꃅꉚꅉ6ꈚꀊꏀꃅꄻꄉ,꒺ꋮꌜꈧꌠꃅꉱꑷꌐꌠꃅꇫꑟ,ꄷꀋꁧꉘꃀꃢꌠꃅꋮꆹꏮꃅꄷꇬꄐꄻꄉ。ꄿꐨꃼꇇꃄꅉꇬꄹꏦꏀꀺꊌꐨ49ꐘꌌꇩꏤꑭꊂꄉꌡꄻꄹꌬ,ꏓꌗꐯꇯꇬ223ꐘꌌꌡꄻꄹꌬ。ꉰꇂꄿꐨꃼꇇꈴꀸꋈꄻꌠꐳꃅꄹꎆ。
ꉬꆏꋯꉈꎆꇱꌠꎍꐽꃅꀻꎆ。ꎆꏂꑘꋯꉈꀰꏢꏦꋪꄐꊒꏲꂠꄐꏁꌠꃄꌬ,ꍏꇩꉁꈾ、ꇮꇐ、ꎕꏦꌋꆀꁧꃤꃅꌠꄔꐽꃅ“ꉇꅐꁧ”,ꋋꈓꇬꎆꒉꎆꇁꀋꉬꉹꌠꋯꉈꈛꎂꃅꎆꇱꌠ1106ꂡꂰꑼ。ꏓꂱꀙꎆꃀꋯꐂꎆꏓꈴꈜꋍꁘꋍꁘꃅꍔꐯ,ꏓꂱꀙꎆꃀꇩꏹꈴꌠꊱꁨꃅꄹꎆ。
(ꉆ)ꊋꏂꄉꉹꁌꐥꐨꏦꀧꌋꆀꄻꃪ,ꏓꂱꉹꁌꊌꐨꐥꌒꐨꋬꂻꐨꀋꆏꃅꊐꐕ。ꏓꂱꌌꈯꄜꃅꄉꌠꀻꎆꉪꇐꌭꈬ,ꏓꂱꉹꁌꈜꀕꇈꊋꋠꌠꉹꁌꅉꀨꐥꐨꏦꀧ,ꋍꑞꋍꐘꉹꁌꈲꌠꏡꁈꃅꌊꑞꅉꇬꑟ。
ꋍꆏꃅꅍꊌꌠꎍꐽꊌꐨꁦꎆꌠꊥꎆꌠꇬꊋꃤꁦꎆꃅꇱ。ꃅꅍꊌꌠꌌꂴꄉꌠꏱꁈꃄꌬꑞꅉꑟ,ꀒꁨꋍꁘꃅꃅꅍꊌꌤꃅꌊꎍꐽꌠꃅꋒꌠꉜꐨꏤꄻꃄꌬ。ꀉꇨꃅꁥꏓꊿꀋꉬꀋꉆꌠꌋꆀꃅꅍꎹꊋꌠꊿꏭꇇꀨꊋꄏ，ꋍꑞꋍꁁꏯꃅꄉꉻꃅꅍꊌꁧꃤꃅꌠꄻꃪ,ꑘꃅꊿꏭꇙꄉꃅꅍꊌꌠꈥꈉꍔꐯ。ꋋꈓꌠꃅꅍꀋꊌꄜꏂꀧꎆꀨꌌꌬꄉꎆꏂꑘ115ꃪꁯꏭ552ꂡꂷꀱꉈꁵꄉ,ꌤꃅꊿ7290ꃪꑼꈲꊌ;ꊿ126ꃪꑻꃢꃅꅍꀋꊌꄜꏂꀧꇬꐊꈽꌠꌤꃅꊿꏭꃅꅍꀋꊌꄜꏂꀧꇮꇐꊐꐕꁥꁵꌠ20ꂡꂷꃑꁵ，ꃅꅍꀋꊌꄜꏂꀧꎆꀨꋒꎆꈐꏭꇬ1000ꂡꂷꇬꐂꌠꒃꌊꃅꑘꇮꇐꄐꊋꊐꐕꃅꐨꇬꊋꁈꄏ，ꃷꁨꐂꄉꁥꁵꃅꑘꇮꇐꁰꍋꌠ1500ꃪꑼꃢꈋꉐꌠꁻꌐꂿꃆꃅꌐ。ꃹꅼꃅꐥꍂꃅꃅꑘꇮꇐꄐꊋꁱꂘꄹꏦꄹꌬ,ꃅꑘꇮꇐꄐꊋꄉꉻꁰꍋꅉꁍꋈꄻꌠꐪꊛꄉꊋꀥꇱ。ꏁꁈꀉꑌꑵꃅꌬꄉꀀꊿꊌꐨꁦꎆꌠꊥꎆ,ꊋꇤꄉꑘꃅꊿꈜꀕꇈꂴꇬꂾꊐꌠꑘꃅꊿꑘꃅꃄꎆꌌꁦꎆ,ꀀꊿꊾꂷꌠꐽꏡꃅꇬꌫꄻꉆꌠꊌꐨ3ꃪꂷꄩꐂ。
ꑍꆏꐧꋦꏦꀧꉻꑫꀒꁨꋍꁘꃅꄻꃪ。ꅉꀨꃀꌠꀨꎹꄜꏂꀧꉱꑷꊻꂷꃷꁨ9.68ꂡꑼꇬꑟ,ꎆꏂꑘꌤꃅꊿꅉꀨꃀꌠꀨꎹꄜꏂꀧꎆꀨꍏꑷꋊꄻꍆꁧꆏ3%ꇬꄉꉀꐕꅷ3.5%ꇬꑟ,ꎆꏂꑘꎞꆏꊿꅉꀨꃀꌠꀨꎹꎆꎍꐽꃅꉀꐕ。ꇩꁨꎆꀨꄹꁆꁸꏮꌊꐧꋦꄜꏂꀧꎆꀨꇬꇎꇱꌤꃅꌠꐊꑷꃅꄹꌬ。ꇓꈓꇓꉈꀀꊿꆅꉁꄜꏂꀧꌋꆀꆄꒉꈺꒉꄜꏂꀧꄹꏦꀊꅰꃅꄻꃪ,ꆅꉁꏦꀧꄉꌢꎭꄏꐓ、ꆅꉁꄜꏂꀧꁬꋌꎹꀨꋊꄻꑠꌤꃅꌠꏟꈯꃅꄹꎆ。ꌤꃅꂷꊂꌸꄜꏂꀧꇬꈴꄉꌤꃅꂷꊂꌸꊿ194ꃪꑼꌋꆀꇨꊨꊿꉘꉚꌠꎁꃅꊌꐨꏦꀧꅍꇲꁵ。ꋋꈓꇬꊿꃅꅍꀋꊌꌠ461.2ꃪꑼꆏꏤꈉꐯꀋꌡꌠꃅꅍꀋꊌꄜꏂꀧꎆꃀꒃꊊ,ꊾꂷꌠꐽꏡꃅꇬꋍꁮꆪꌠ1393ꂷꊌ，ꏦꀧꑟꐨꄔꐽꃅꉀꐕ。ꄔꐽꃅꀁꂥꀧꄹꏦꇓꈓꇓꉈꏓꃅꄹꎆ,ꀁꂥꀧꎕꏦꇙꐨꐥꃅꋊꄻꌠꉺꏦꄻꐛꒆ,ꐊꑷꃅꐋꀋꌡꃅꊋꋠꌠꊿꈭꋏꇇꀨꇲꉘꄹꏦꃄꌬ。ꇓꈓꏦꎫꀀꁕꀉꆹꄺꀱꌠꄹꎆ,ꇓꈓꏦꎫꑲꆹꇣꆹꐛꅉꄺꀱꌠ316ꃪꂷꋈꇬ,ꇓꈓꀉꒉꐧꀠꌠꀀꑳꊣꄻꃷꎏꐳꃅꉘꉚ。
ꌕꆏꄉꉻꁧꃤꃅꇬꀋꇎꅋꑣꊋꁧꄻꀉꇨꊇꁧꉀꐕꌠꃹꅼꃅꄹꎆ。ꇩꏤꏱꎆꃅꐙꌠꂘꑘꌫꎆꌬꐨꇩꈐꒃꅐꈁꉬꁌꐨꇬꍆꐪꐪꊛꄉ4%ꄩꐂ,ꊋꋠꃅꄷꌋꆀꊋꁧꈭꊭꇬꂘꑘꎆꇱꌠꀋꆏꃅꁦꎆꇱ,ꈬꈎꋭꑘꂘꑘꈫꈈꐨ94.8%ꇬꑟ,ꇨꍏꊬꌠꂘꑘꀑꐱꌶꅉꃹꐨ89.5%ꇬꑟ,ꀊꂥꊐꌠꂘꑘꀑꐱꌶꅉꃹꐨ50%ꄩꐂ,ꀊꂥꊐꌠꃅꑘꌶꅉꌶꌺ100ꃪꑼꁦꎆꃅꎹꌠꁻꌐꁣꀋꐥꃅꃅꌐ,ꊐꁸꉹꁸꄉꇩꏤꒃꅐꂘꑘꐮꉔꋈꄻꃅꉚꌠꃅ。ꋬꂻꍏꇩꃅꐨꑭꄑꄉꃄꌬ,ꃄꁕꆅꉁꆄꄻꈯꄜꋈꄻꃅꉚꌠꎍꐽꃅꃅ,ꁬꋌꏓꋧꄉꃻꄻꌠꌋꆀꌫꄻꃅꉚꌠꏣꀋꑌꃅꄹꎆ，ꍏꑱꁬꋌꊪꊛꏀꀺꀻꎆꌠꊥꎆꌠꉜꐨꍑꃑꄉꃄꌬ。ꃀꌠꀨꎹꁧꃤꃅꀻꎆꌠꄹꎆꏱꁈꉻꑫꀊꅰꃅꄻꃪ。ꌋꅪꀊꉘꌅꈌꈲꁧꏦꀧꌤꃅꌠꀋꆏꃅꊋꀥꇱ,ꁠꉘꏲꉻꄻꌠꌋꆀꏲꂠꌠꋊꍬ，3ꈎꈍꐯꀉꑳꀿꏅꀨꎹꁧꃤꃅꀻꎆꌠꊥꎆ。ꋠꇐ、ꁬꋌꑠꀋꂿꑘꁁꏯꍞꏲꌠꀋꆏꃅꊋꀥꇱ。ꅉꀨꄉꉻꁱꀕꁧꃤꃅꐽꏡꈴꌠꑟꐨꀋꆏꃅꉀꐕ。ꍤꍰ、ꄊꒀꉼꒊꃀ、ꎴꆹꏷꇩꏤꁱꀕꋍꏅꈩꅉꋈꄻꌠꏓꈴꇲꈴꃅꄹꎆ。ꉹꁌꃅꈯꎟꈯꄜꑠꐘꃆꋈꄻꌠꇬꊋꁈꄏꌠꊋꃤꀉꒉꃅꇱ,ꃅꋆꀎꒀꉼꈩꅉꋈꄻꌠꊱꁨꐥꃅꄹꎆ。ꇩꏤꏣꀋꑌꃅꊻꂷꃀꌠꐛꈴꇁꌠꏭꊝꌠꐧꀠꀊꉗꊭꄐꎖꍑꃑꄉꃄꌬ。ꈎꂫꇬꊻꂷꏓꇱꃷꁨ14.0005ꂡꑹꇬꑟ,ꊻꂷꋌꐛꉀꎆꐨ3.34‰ꇬꑟ。
2019ꈎꎆꏣꐧꋦꀻꎆꐛꐪꇬꈴꄉꉜꇬ,ꎆꏣꉀꎆ、ꃅꅍꊌ、ꎊꈬꁌꏤ、ꇩꏹꊌꐨꌬꐨꑠꌐꁧꀋꉬꀋꉆꌠꌋꆀꏀꀺꅸꇙ、ꅐꀦꏎꏸ、ꋦꈭꀧꌋꃅ、ꉹꁌꐥꐨꏦꀧꑠꁁꏯꌐꁧꃅꌐꐨꉾꃪ。ꏢꑲꐨꐥꌠꌐꁧꇬ,ꇤꎸꅍ、ꋈꄻꌬꇐ、ꐛꑊꐥ、ꐈꇐꇮꑘꑠꉹꑘꒃꅐꌠꌋꆀꁧꃤꃅꑘꊼꇅꐳꃅꉀꎆꇬꎷꑠꐊꊈꀉꑌꑵꇱꁧꏖꄉ，ꌗꂓꇩꈐꒃꅐꈁꉬꁌꐨꊋꃹꀁꋌꊰꌐꁧꃶꐚꃅꇬꆏ2.6%ꀁꋌꊰ,3％ꀑꂪꉬꌠꎖꄎꁻꌐꇂꃴꊰ,ꄚꌐꁧꋋꏢ2016—2019ꈎꇬꏓꌗꀁꋌꊰꐨꆏ“ꊯꌕꉬ”ꄐꎖꁻꌐꂿꃆ87.1％ꃅꌐꀐ，ꁨꆹꇖꐨꇬꄐꊒ。ꂴꄐꄉꐨꐥꌠꌐꁧꇬ,ꅐꑘꋍꉹꀕꌠꁦꎆꁌꐨ、ꐧꋦꌬꈧꅍꈘꆽꃅꃷꌠꈁꉬꃷꁨ、ꎃꐚꄉꉻꄐꌗꊌꐨꌋꆀꇓꈓꏦꎫꀀꊿꊾꂷꐽꏡꃅꁆꄻꉆꌠꊌꐨꌐꁧꃤꃶꐚꏮꈴꃷꁨꌋꆀꂴꄐꄉꌠꁌꐨꆏꍣꐨꈨꐥꑴꌦ。ꅐꑘꋍꉹꌠꁦꎆꁌꐨꂴꉘꇉꄉꌠꁻꌐꆏ“3.5%ꀑꂪꉀꎆ”,ꃶꐚꃅꇬꆏ3.1%ꉀꎆ,ꀋꉬꀋꉆꌠꒉꄸꆏꃮꎸꑠꂿꑘꅐꇐꈨꅐꐨꃷꁨꊼꇅꀉꒉꃅꀁꋌꊰ,ꃮꎸꅐꐨ21.3%ꀁꋌꊰ。ꐧꋦꌬꈧꅍꈘꆽꃅꃷꌠꈁꉬꃷꁨꂴꉘꇉꄉꌠꁻꌐꆏ“9.0%ꀑꂪꉀꎆ”,ꃶꐚꃅꇬꆏ8.0%ꉀꎆ,ꀋꉬꀋꉆꌠꒉꄸꆏꐕꍯ、ꑱꈐꄆꉁꈾꑠꋊꃅꐥꌠꉀꎆꐳꐨꆣꄯ,ꀉꁁꌬꈧꉀꎆꅉꀊꏀꌠꄡꇗꉘꉚꇰꑴꌦ。ꎃꐚꄉꉻꄐꌗꊌꐨꂴꉘꇉꄉꌠꁻꌐꆏ“5.0%ꉀꎆ”,ꃶꐚꃅꇬꆏ3.8%ꉀꎆ,ꀋꉬꀋꉆꌠꒉꄸꆏꐥꄜꎆꏣꀻꎆꌠꊋꁈꄏꂿꄷꄉ,ꇗꏸꊨꁌꊰꌠꄉꈁꂴꄐꄉꌠꄩꐂ。ꇓꈓꏦꎫꀀꊿꊾꂷꐽꏡꃅꌬꉆꌠꊌꐨꉀꎆꐳꐨꂴꉘꇉꄉꌠꁻꌐꆏ“ꎆꏣꉀꎆꐨꌋꆀꀑꐱꃅꐮꐊ”,ꃶꐚꃅꇬꆏ5.0%ꉀꎆ,ꇩꈐꒃꅐꈁꉬꁌꐨ6.1％ꉀꎆꐳꐨꇂꃴꊰ，ꀋꉬꀋꉆꌠꒉꄸꆏꇓꈓꏦꎫꀀꊿꀰꏢꀊꌃꊌꐨꌋꆀꁨꇐꀊꌃꊌꐨꉀꎆꐳꐨꊼꇅꀋꐳ、ꎊꈬꁌꏤꉀꄓꐨꀒꄹꈎꄩꁦꎆꑠꐊꊈꇱꁧꏖꌠꉬ。
ꁧꎁꊈ：
ꎼꈎꅑꅸꇁꌠ,ꋋꇅꃅꅐꇁꌠꏀꉹꌀꌡꋍꃀꆅꇵꆅꆹꉪꇩꏤꎆꏣꐧꋦꀻꎆꌠꏭꀉꒉꃅꄜꎟ。ꋌꃢꇵꆅꆹꍏꇩꀊꏀꄻꐛꊂꅑꅸꇁꌠꉪꇩꏤꊝꌠꁊꌊꐳꐯꐳ、ꇵꅽꈍꈐꀊꐯꐯꀊꐯ、ꄴꏮꊋꋠꐨꀉꒉꐯꀉꒉꌠꄉꉻꁦꎴꆄꄻꌤꀉꒉꀊꂾꑠꐘꉬ。ꇵꆅꇬꐊꇁꌠꎟꎖꀉꇨꌠꏭꊝꇬ,ꑮꏣꀻꊝꎻꏹꊨꏦꑭꄑꄉꄐꁆ、ꑭꄑꄉꇹꄣ,ꐳꃅꍏꑷꇵꆅꏭꊜꄻꌤꃅꑦꊤꄻꐛꄷꀋꁧꍏꑷꄐꇺꊤꁆꌊꃛꀙꒉ,ꋒꐯꋒꃅꇩꃷꑼꏓꄵꏓꍅꉺꏦꋮꄮꂿꄐꋊꇤꅐꇁ,ꈍꄮꑌꏓꂱꉹꁌꀑꇬꋬꂻꌋꆀꇭꀧꋬꂻꌠꌌꀨꇬꄉ。ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ,ꃅꄷꈁꐥꌠ、ꌤꏲꅉꈁꐥꌠꆏꎔꎗꃅꄈꍏꑷ、ꇩꃷꑼꁈꏤꄐꁆꌠꃄꌬꈴ,ꇩꏤꑭꊂꐰꉎꃅꋯꑌꊋꒉ、ꊫꑌꐮꇇꀨꇇꄻ,ꏟꈯꃅꉌꊋꑌꈬ、ꆲꁏꉐꐙꃅꐮꐊ、ꈆꑪꃅꄴꏮ、ꊒꌸꃅꊜꁈꏂꌠꉻꄜꇖꐨꇬꈴꄉ,ꐳꃅꇵꆅꄴꏮꌠꏓꂱꌉꈿ、ꉻꄜꌉꈿ、ꈛꋩꌉꈿꌠꃅꀐ。
ꊋꈀꑌꃅꇤꄉꇵꆅꄴꏮꈭꋏꉃꄻꌤꃅꋒ。ꇩꏤꑭꊂꊋꃤꃅꇤꄉꃛꇂꀙꌜ、ꃶꉴꏃꌉꈿꅉꀋꉬꀋꉆꌠꇬꇇꀨ,ꆅꉁꀨꎹꊿ4ꃪꎖꑹꊥꇬꌊꐳꃅꇇꀨ,ꐳꃅꉻꎹꎭ、ꇊꎹꎭꑠꏓꋧꄉꎴꏲꆅꉚꅉꌋꆀꃓꊸꆅꉚꅉꄻꐛ,ꊋꏂꄉꎴꏲꐨꌋꆀꉃꌒꐨꉀꐕ、ꇵꆅꐨꌋꆀꆅꌦꐨꊨꒊ。ꏓꄵꏓꋏꌠꌋꆀꋍꏅꃅꄵꋍꏅꃅꋏꌠꃅ,ꌜ(ꐎ、ꏃ)ꈁꐥꌠꐮꊂꊛꄉꋋꇅꃅꅐꌠꁦꎴꆄꄻꌤꆿꀉꒉꀊꂾꌠꋍꊐꅇꃅꌠꃅ,ꇥꀯꊋꃤꊥꇬꌊꀁꋌꒉꄉꋥꁕꄴꏮꋎꍅꌠꒃꉇꋒ,ꋍꑞꋍꉹꐧꋦꎀꍹ、ꌐꑘꐧꋦꌤꃅꊿꌋꆀꉌꇗꁧꃤꃅꊋꃤꄐꏁꌊꏦꃤꇬꈴꄉꊱꁨꐥꃅꇵꆅꄴꏮꋎꍅꌠꌋꆀꐧꋦꁧꃤꃅꌠꃅꈽ。ꏟꈯꃅꆅꉁꎊꈬꏦꀧꌠꌋꆀꐥꐨꈉꐨꀋꌬꀋꉆꌠꎊꈬꇲꁵꄉꀧꁌꏤꎍꐽꌠꌤꃅꋒ,ꐳꃅꈂꀸꉱꅍꑠꆅꉁꄴꏮꌋꃅꎊꈬ、ꆅꉁꈭꋏꉁꈾ、ꆅꉁꀀꈤꆏꀉꇨꃅꀋꇎꇬꄉꀑꐱꃅꇵꆅꄴꏮꋎꍅꌠꈉꐨꇬꇎꈴꌠꇬꑟꌠꃅꇫꑟ;ꁈꏂꁈꇭꄉꋚꋌꌋꆀꎸꏿꉐꀖꑍꑠꋠꇐꃷꅉꇲꁵꌠꌋꆀꁌꏤꀑꐱꃅꎍꐽꌠꏦꀧ。ꀉꇨꃅꇵꆅꄴꏮꈆꑪꇮꇐꈢꇓꀖ,ꄮꈉꀁꎴꈍꈐꃅꐳꃅꎖꉚꁬꋌꎥꃪꀖꁉꄷꀋꁧꄉꈁꀉꒉꃅꌫꄻ,ꍏꑱꑭꑱꏓꐊꌠꌭꈬ,“ꇖꑵꏓꋧ”ꌠꌭꈬ，ꄾꌦꋩꃅꇵꆅꊿꀑꇬꀊꅰꀉꑌꃅꈭꋏ。ꋯꉈꇵꆅꍔꐯꁭꁘꌠꇬꉜꄉ,ꈏꃹꇁꌠꃨꆰꐨꄴꏮꋎꍅꌠꊋꀥꇱ,ꋯꉈꉪꇩꏤꉻꊿꏭꉈꇬꉁꅉꌠꌤꃅꋒ,ꋍꇅꇬꈴꈜꀹꄻꄉꊱꁨꐥꃅꉪꇩꏤꉈꏭꐥꊿꊋꋠꌠꋩꌊꀱꇁ,ꏣꀋꑌꃅꇵꆅꄴꏮꋎꍅꇩꏹꇷꃅꌠꄹꎆ,ꊋꀥꇱꄉꋧꃅꁦꎴꆄꄻꎀꍹꌋꆀꇷꃅ,ꇵꆅꍔꁘꌠꇩꏤꌋꆀꃅꄷꏭꇇꀨꄎꌠꇲꁵ。
ꏓꇲꃅꇵꆅꄴꏮꋎꍅꌠꌋꆀꎆꏣꐧꋦꀻꎆꌤꃅꌠꄹꎆ。ꃅꄷꊐꁸꄉꊱꁨꃅꉈꑴꑘꃅꉈꑴꒃꅐꃷꎏꀱꐛꅉꐛꃅꑘꀱꐛꅉꐛꌠꄹꇙ。ꇿꋌꐥꃅꇵꆅꄴꏮꋎꍅꌠꇎꏦꇂꃴꄉ,ꏣꀋꑌꃅꎆꏂꑘꇇꀨꄉꇮꃅꇬꌬ、ꎊꈬꎞꎭ、ꎆꀨꌋꆀꇬꀦꌬꇐ、ꎸꇺꎸꂷꇲꁵꌤꃆꂥꀘ,ꊋꈁꑌꃅꇤꄉꇓꈓꇓꉈꈝꃀ、ꋍꏅꈭꈜꁣꀋꐥꌠꏦꀧ,ꊋꀥꇱꄉꐧꐭꎆꏂꑘꌋꆀꑱꄂꇮꃅꃼꇇꑱꁯꏭꃛꊸꊝꊋꋠꆣꄯꁧꃤꃅ,ꅐꑘꊛꏣꉎꐰꐕꌠ、ꎆꏂꑘꀉꒉꐧꀠꀄꊭꌠꋮꄮꃅꉈꑴꑘꃅꉈꑴꒃꅐꌠꄹꇙ。ꅑꅸ4ꆪꂫꇬꑟꌠ,ꄉꈁꈋꉐꇮꑘꎆꏂꑘꉈꑴꑘꃅꐨ、ꌤꃅꊿꃅꈉꑟꐨꂱꑱꅉꃅ99.4%ꌋꆀ94.3%ꇬꑟ。ꊋꀥꇱꄉꎆꇱꐘꃆꈜꎴꃅꍤꄻꈌꁧꁧꃤꃅ,ꇮꃅꇬꌬ、ꃄꅉ、ꎆꀨ、ꊋꌬ、ꋦꈭꈋꍣꑠꁁꏯꏦꀧꌠꃅꋒ,ꐳꃅꐘꃆꀉꒉꀊꂾꌠꉈꑴꑘꃅꇬꊝꇁꌠꋍꇈꊋꋠꅉꌤꃆꂥꀘꌠꇇꀨ。ꐳꃅꄯꆏꊋꋠꋊꑣꌠꏱꁈꋍꋬꈭꏤꄻꅐꇁ。ꀋꉊꄻꈎꏛꃅ2020ꈎꃅꄷꍔꃚꌐꐘꎝꃆꊫꌐꃷꁨ1.29ꃪꂡꂷꁆꄻꀁꋌꎭꌠꅉꃀꀂꏽꄉ,ꀒꁨꋍꁘꃅꏛꃅꏢꑲꃷꁨ1ꃪꂡꂷꁦꎆꃅꁆꄻꀁꋌꎭ。ꇗꏸꊨꁌꊰꌠꊋꀉꒉꃅꇱ,ꋍꊭꐨꐥꃅꄉꈁꀄꊭꌠꇗꏸꏮꊿꁌꎆꇗꏸꊨꏆ,ꋍꊭꐨꐥꃅꎆꏂꑘꐧꋦꄜꏂꀧꁌꊨꏆ、ꀀꑳꉻꊭꎆꆣꄯꄉꏮ,ꎆꏂꑘꄆꌬꌗꌬꀨꊰꊨꒊ,ꋍꄮꐰꇗꏸꊨꁌꊰꄉꈁ7000ꂡꂷꇬꐂ。ꁊꈴꃅꅉꃀꀁꋌꊰ、ꌐꍝꏤꄉꀁꋌꊰꌠ3ꃢꃄꌬ,ꉈꑴꎆꉛꉈꑴꎆꃀꃷꁨꁥꁵꌠ1.8ꃪꂡꂷꀊꏀꃅꁦꎆ，ꀒꁨꋍꁘꃅꐧꐭꎆꏂꑘꁊꈲꐨꐥꌠꎆꒉꎆꇁꄏꐓꏡꁈꄻꀉꇨ。ꐧꀠꀄꊭꐭꎆꏂꑘꎆꉛꌠꏭꄯꊁꄉꀨꊰꇔꊰꌣꌠꃅ。ꌬꈧꍔꒉꊇꁧꉀꐕꌠꊥꎆꄉꐳꃅꀉꇨꌠꇩꈐꃷꎏꏓꐛꌠꏱꁈꏁꁈꏤꄻꅐꇁ,ꊋꀦꀊꏀꐕꍯꃻꄻꁥꇱꌠꌋꆀꐕꍯꃻꄻꇗꏸꀋꎴꌠꏱꁈꏤꈉꁦꎆꇱ。ꋍꈭꐨ,ꐳꃅꃅꒊꃅꇁꌋꆀꏱꁈꎥꀘ,ꏣꀋꑌꃅꐧꋦꉈꇬꌠꏭꅇꏮ,ꃷꎏꀨꄜꀻꎆꉌꊋꎍꐽ。ꑋꈌꄮꐰꂿꑘꒃꅐꌠꒃꉇꋒ。ꇗꂷ、ꐈꑭ、ꂿꑘꁬꋌ、ꂿꑘꏸꐕꑠꒃꅐꇲꁵꌠꏦꀧ,ꃅꑌꆫꃅꂿꏿꌠꁣꀋꐥꃅꁨꆹ,ꎳꏜꌠꍯꊪꏽꃅꊂꂴꄐꌗꄉꇬ7100ꃪꂿꇬꑟ，ꃅꋆꎭ、ꃅꋆꊮꊫꒆꐨꉾꃪ,ꊋꏂꄉꎇꃀꒉꅐꇐꉗꄻꎆꉘꅍꇲꁵꌠꌋꆀꂿꑘꅐꇐꄹꁆꃷꅐꁧꀋꄐꑠꊋꋠꌠꂥꀘ。ꉌꏓꊋꋧꄉꎭꑆꇔꈢꇓꀖꌠꄹꎆ。ꐳꃅꀀꅉꆦꄉꌢꎭꄏꐓꎞꀀꁆꄻꇱꄻꈭꉁꈾ、ꌢꎭꄏꐓꇮꃅꅉ、ꂿꑘꁡꇤꅝꒉꉮꀋꐥ、ꊋꃅꌠꌌꇇꀨꌠꎃꊐꑠꎭꑆꇔꈢꇓꀖꐘꃆꃄꄻꉈꑴꃄꄻꌠꄹꎆ,ꏣꀋꑌꃅꉻꈲꃅꈉꊋꂫꅤꀖ,ꌢꎭꊻꂷꈛꑌꅉꄉꃅꅍꊌꌠꊥꎆ,ꌢꎭꑘꃅꊋꃤꀱꇓꈓꆹꀱꃅꈉꆹꌠꌋꆀꉈꏭꄉꑘꃅꆹꌠꌌꂴꄉꊥꇬ,ꇵꆅꒉꄸꃅꀱꌣꎭꌠꊿꏭꄏꐓꏡꁈꃅꑞꅉꑟ。ꀀꊿꃅꅍꊌꌠꄉꀧꌋꆀꉹꁌꐥꐨꉱꄏꌠꄻꀉꇨꃅꄉ。ꋒꐯꋒꃅꃅꅍꀋꊌꄜꏂꀧꎆꀨꎆꏂꑘꇇꀨꃅꈉꎍꐽꌠꂿꄐꋊꇤꅐꇁ,ꇩꁨꎆꏂꑘꌤꃅꊿꊙꎹ、ꎵꌧꎥꃪꌶꌺꎹꌠ、ꍋꈈꌶꌺꐕꀪꈈꌶꌺꐛꌠ、ꒉꌶꌺꂽꄻꌠꃷꁨꄉꈁꍔꒉ,“ꑍꈚꐮꊒ”ꎞꎭꑠꃄꄟꃅꄉꂿꑘꊿꊋꃅꄐꏁꌌꊱꁨꐥꃅꀱꃅꈉꄉꉈꑴꑘꃅ。ꇩꏤꑭꊂꒉꐧꐭꌶꅉꊥꇬꄉꊱꁨꐥꃅꈄꏍꈴꄉꂘꌷꌠꃅ。ꇵꆅꇱꁧꏖꌠꉹꁌꊋꋠꌠꏭꈭꋏꄏꐓꌠꃄꌬ,ꐳꃅꐧꋦꈭꋏꇇꀨꌠꌋꆀꏦꀧꎕꏦꆏꎊꈬꁌꏤꉀꄓꌠꌋꆀꐯꎏꏓꇙꌠꉺꏦꃄꌬ,ꋍꊭꐨꐥꃅꁥꁵꎕꏦꉀꐕ、ꉱꑷꈍꈐꍔꒉ。
ꄈꑭꊂꇩꏤꑭꊂꐰꉎꃅꎬꅧꃅꊋꇤꇈ,ꃷꉴꐏꁇꉈꈽꌠ、ꃛꀙꐏꁇꉈꈽꌠꆏꋍꊭꃅꐙꌠꊌꐨꊌꅜꀐ，ꇵꆅꈛꋩꄘꑣꉈꈽꌠꄐꇐꊌꐨꀉꒉꀊꂾꌠꊌꅜ，ꏓꇲꃅꇵꆅꄴꏮꌋꆀꎆꏣꐧꋦꀻꎆꌤꃅꌠꄹꎆꌠꇿꋌꊌꐨꏣꀋꑌꌠꊌꅜ。ꃄꄻꌠꉈꑴꊩꀽꇬ，ꍏꇩꇭꍣꄈꏃꂠꌠꌋꆀꉪꇩꏤꐧꋦꉪꏦꄹꏦ、ꉪꇩꏤꇩꏤꏱꄻꉻꑫꆹꀑꇬꊋꃤꀉꇨꐯꀉꇨꌠꌋꆀꂱꎆꅑꐨꄇꇖꀕꌠꐥ，ꎬꅧꊋꋠꈍꃅꐙꌠꑌꅥꊋꄎ，ꐧꇁꃰꊿꌧꑳꀻꎆꌠꎁꃅꑆꊋꀉꒉꀊꂾꌠꅐꌞꄎ。
ꋍꈭꐨ,ꉪꊇꉈꑴꏸꐚꃅꉪꐚꇬ,ꉪꇩꏤꇵꆅꇿꋌꐥꃅꋎꍅꄉꀐꑴꇬ,ꄚꇩꉈꇵꆅꐳꃅꍔꐯꁭꁘꇁ,ꋧꃅꎆꏣꀉꇨꃅꀁꋌꊰꌠꇫꅐꇁ,ꊨꀋꄅꎍꀋꐽꌠꐊꊈꄇꇖꀕꃅꁦꎆ,ꉪꇩꏤꎆꏣꒈꇁꌠꊋꋠꐨꀉꒉꐯꀉꒉꌠꊝꇁ。ꇩꏹꇬꈴꄉꉜꇬ,ꇵꆅꅉꆺꑭꊂꅐꑘꇲꁵꃬꏣꏭꊼꇅꀉꒉꃅꄜꎟꇁ,ꇩꏹꎆꒉꎆꇁꃷꎏꀉꇨꃅꇙꈧ,ꋍꁁꏯꉪꏦ、ꃼꇇꀧꌋꃅꉪꏦꄓꇁ,ꇩꏹꃼꇇꏦꋪꋓꎭꌠꊝ,ꃄꁕꍔꍞꃨꆰꐨꄡꇗꊼꇅꀊꂥ,ꋋꈨꐯꇯꉪꇩꏤꀻꎆꌠꉇꉻꃨꆰꐨꋌꌌꀉꒉꇁꌠꉬ。ꇩꈐꈴꄉꉜꇬ,ꋯꉈꇵꆅꈏꃹꍅꊋꁦꎆꃅꀉꒉꇁ,ꎆꏣꀻꎆꈜꀕꇈꒃꅐꇲꁵꃬꏣꀱꐛꀕꇁꌠꋓꎭꀊꏀꌠꊝꇁ。ꋍꆏꈏꉈꈉꐨꀁꋌꊰꄉꎆꏣꀰꏮꌠꋌꎼꋍꇈꌠꊝ。ꀀꊿꄻꅐꈉꐨꀋꉬꌠꌬꇐꌬꈧꑠꇵꆅꄜꎟꒉꄸꃅꀉꆈꃅꋎꏢꌠꊝ,ꐕꍯꑠꋊꃅꐥꌠꃷꇐꀉꒉꌠꌬꈧꌠꀉꒉꃅꀁꋌꊰ,ꌬꈧꉀꎆꌠꏢꑲꌠꊝ。ꎆꏂꑘꀰꏢꊋꋠꐨꁦꎆ、ꏤꃼꌠꊨꒊ，ꃅꄷꎆꇱꄐꊋꌠꇱꏢꑲꌠꄻꇬꇯꇬꆏ，ꎆꇱꉀꎆꌠꊋꋠꐨꊼꇅꀉꒉꌠꊜꎍ。ꉇꉻꈉꐨꐪꊛꄉꀋꄿꌋꆀꅉꆺꑭꊂꇲꁵꃬꏣꆼꈘꄉ,ꉇꉻꃼꇇꎍꐽꉇꎆꎍꐽꌠꍅꊋꄇꇖꀕꃅꀉꒉꇁ。ꑍꆏꉹꑘꎆꏂꑘꏮꈴꇬꊋꋠꐨꊼꇅꀉꑌꃅꐥ。ꎆꏂꑘꍍꊱꀉꒉꃅꀁꋌꊰ,ꈜꀕꇈꐥꐨꃅꐙꌠꁧꃤꃅꑘꇵꆅꇱꄜꎟꐨꀉꒉꐯꀉꒉ,ꎆꏂꑘꐧꀠꀄꊭꌠꀉꑌꈨꎆꀨꃬꏣꆼꈘ、ꒃꅐꆏꈢꇧꎭꑠꐛꐨꇫꅐꇁ,ꃅꄷꄹꁆ、ꉹꑘꄹꁆꇬꀄꊭꐭꌠꎆꏂꑘꑱꐢꌠꁦꎆꇁꇬꐥ。ꌕꆏꄉꉻꁦꎴꆄꄻꌋꆀꃛꊸꊝꉻꑫꀋꇎꅉꄇꇖꀕꃅꇫꅐꇁ。ꆅꈻꄴꏮꋎꍅꏲꂠꉻꑫꐛꀋꒆ，ꀊꏀꃅꇫꅐꌠꇵꆅꍞꎖꌗꋏꌠꌋꆀꊜꄻꄐꊋꀋꇎ,ꑤꍔꋂꄉꉻꁦꎴꆄꄻꅉꃀꉁꈾꊼꇅꊋꁧ，ꀋꂿꑘꌠꎊꈬꇩꏤꊭꊎꉻꑫꄻꐛꀋꒆꑴꌦ。ꇖꆏꈆꑪꇮꇐꏀꀺꄐꊋꀋꇎꅉꄡꇗꊼꇅꑓꅐꎑ。ꎥꃪꀖꁉꎆꇱꇨꐨꌌꏀꀺꉹꌠꇩꏤꋈꄻꌠꇖꐨꏭꌡꉚꇬꉀꐕꄻꅐꑴꌦ,ꈆꑪꇮꇐꏀꀺꌠꇬꈲꁧꐥꌠꃹꅼꌠꏦꉻꇬꏢꑲꅍꐆꇧꀋꎭꑴꌦ,ꀋꉬꀋꉆꌠꈯꄜꇮꁈꌞꏯꉘꇉꌠꐛꐪꊇꅉꃅꄺꀋꀱꑴꌦ。ꉬꆏꀋꉬꀋꉆꁁꏯꄺꀱꌠꄡꇗꊋꀥꇱꄻꅐ。ꃷꎏꁳꐊꊈꁌꏤꏤꄻꌠꉺꏦꄡꇗꄻꐛꒆꄻꅐꑴꌦ。ꐪꊛꄉꇩꁨꎆꏂꑘꇩꁨꎆꀨ、ꏱꎆꎆꒉꎆꇁ、ꃼꇇꀰꏢꋦꈭ、ꉹꁌꀰꏢꎆꏣ、ꈒꇓꈉꐨꍔꒉ、ꇓꈓꇓꉈꐮꉔꑠꀋꉬꀋꉆꌠꄺꀱꁁꏯꇬꇨꀖꊋꑣꄻꅐꑴꌦ。ꃘꆏꀋꉬꀋꉆꁁꏯꐔꈔꉆꐨꊼꇅꏓꋧ。ꉇꉻꈏꃹꃅꐙꌠꃨꆰꐨꁦꎆꇱꇁ,ꉌꒊꏤꐆꃨꆰꐨꀉꒉꇁꇬꐥ,ꐧꐭꎆꒉꎆꇁꏲꉻꄹꁆꃨꆰꐨꊼꇅꀊꂥ。ꇵꆅꇱꁧꏖꄉ，ꈁꐥꊐꌠꏱꎆꄴꏮꌬꐨꁦꎆ、ꇗꏸꎴꊌꐨꊨꒊ,ꃅꄷꈨꇬꅉꂫꊐꌠꏱꎆꏮꈴꇬꊋꋠꌠꇫꅐꇁ。ꏃꆏꐧꋦꉹꁌꐥꐨꁁꏯꋓꎭꐨꊼꇅꀉꒉꌠꊝꇁ。ꃅꈉꎍꐽꃅꅍꊌꎍꐽꌠꊋꋠꐨꁦꎆꇁ，ꒉꌶꅉꌶꅐꌶꌺꑠꀋꉬꀋꉆꁥꌠꃅꅍꊌꍅꊋꄇꇖꀕꃅꉀꎆ,ꃅꄷꋍꈨꇬꃅꅍꀋꊌꌠꀱꉈꑴꃅꅍꊌꇬꊋꋠꐨꀉꒉ。ꑘꃅꊿꄹꁆꃄꎆꊌꐨꀁꋌꊰ，ꀀꊿꊌꐨꁦꎆꌠꊋꋠꐨꁦꎆ。ꋒꇈꌠꌢꎭꊻꂷꎭꑆꇔꂿꃆꊋꋠ,ꌢꎭꅼꇨꃅꄷ“ꌕꑵꏦꀧ”ꌠꃅꇫꑟꌠꋓꎭꀊꏀꌠꀉꑌꃅꊝꇁ。ꒆꉻꋦꈭꏱꄻꌠꄡꇗꀋꇎꅉꌋꆀꊋꁧꈭꊭꇫꐥꑴꌦ。ꃀꌠꀨꎹ、ꁠꉘ、ꂘꑘꑠꄉꉻꁧꃤꃅꉻꑫꆏꏓꂱꉹꁌꉘꇉꐨꌋꆀꐯꌟꉜꇬꄡꇗꍣꐨꄇꇖꀕꃅꐥꑴꌦ。ꋍꈭꐨ,ꉪꊇꌤꃅꅉꇬꑌꄡꇗꀋꇎꀋꂪꈨꐥꑴꌦ,ꅺꌡꇬ，ꇵꆅꄴꏮꋎꍅꌠꏱꁈꋮꄮꌠꀋꇎꑴꌦ,ꏱꁈꋍꈨꆏꎄꌺꃅꐙ、ꄂꐘꃅꐙꌠꌤꃆꇫꐥ,ꏱꁈꏡꁈꋍꈨꆏꃅꌊꑞꅉꇬꀋꑟꑴꌦ,ꋍꈨꋋꈨꁁꏯꇬꏱꄻꇇꁈꌋꆀꏱꄻꄐꊋꄻꃪꌋꆀꊋꀥꇱꄻꅐꑴꌦ，ꌤꃅꅉꇬꇶꏦꉪꏦ、ꇛꌺꉪꏦꑠꌤꃆꇫꐥꑴꌦ。
ꊋꋠꐨꌋꆀꋓꎭꌠꉜꐚꈭꐨ,ꉪꊇꀊꅰꃅꂿꐚꌶꌠꆏ,ꇵꆅꄜꎟꌠꌋꆀꁧꏖꌠꆏꐯꇯꋍꊭꇬꃅꐙꌠ、ꀑꐱꃅꇬꆏꋎꍅꉆꌠꉬ,ꉪꇩꏤꀻꎆꊋꂫꀉꒉ、ꐕꄽꐨꀉꇨ、ꎆꏣꀊꉗꃅꉾꃪꇁꌠꅉꀨꐛꄟꇬꄺꀱꀋꄐꌠꉬ。ꃨꆰꌋꆀꊜꋽꄮꐯꇯꒆꐯꇯꐥ,ꃨꆰꌠꄘꑣꇧꎭꄷꆏꊜꋽꄮꐛꌠꉬ。ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ,ꍏꇩꐛꐨꐧꋦꉪꏦꄹꏦꂱꎆꅑꐨꄇꇖꀕꌠꐥ,ꄖꄑꊋꃤꀉꇨꌠꌋꆀꏓꇱꊋꃤꀊꅼꌠꐥ,ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꌠꐥ,ꉪꊇꆹꀋꎪꃅꇵꆅꋌꃢꄩꊋꄎ,ꀋꎪꃅꉪꇩꏤꎆꏣꐧꋦꉾꃪꃅꀻꎆꆸꄟꑌꄝꏦꀋꊰꄎꄉ,ꎭꑆꇔꈢꇓꀖꂫꋓꊋꐛꌠꁻꌐꂿꃆꃅꌐꌠꄉꀧ,ꐊꑷꃅꊼꇅꌣꈚꌠꐧꋦꋈꄻꐛ。
ꑍ、2020ꈎꎆꏣꐧꋦꀻꎆꀑꐱꇖꐨ、ꁻꌐꀋꉬꀋꉆꌠꌋꆀꏱꁈꃅꍜ
2020ꈎꆹꐊꑷꃅꊼꇅꌣꈚꌠꐧꋦꋉꐛꌠꌋꆀ“ꊯꌕꉬ”ꄐꎖꂫꍅꈒꌠꉬ,ꉐꈎꉈꈽꁻꌐꉘ꒜ꊭꌠꃅꇫꑟꄉ,“ꊯꇖꉬ”ꀻꎆꌠꌋꆀꉐꈎꉈꈽꁻꌐꑍꊭꌠꃅꇫꑟꌠꎁꃅꅉꃀꌆꃪꃅꄉꂿꄷꇬ,ꎆꏣꐧꋦꀻꎆꌤꃅꌊꉾꃪꌠꆹꀋꉬꀋꉆꐯꀋꉬꀋꉆꌠꉬ。
(ꋍ)ꀑꐱꇖꐨ。
ꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢꌠ、ꌕꃢꌠ、ꇖꃢꌠꐊꈴꃀꉌꊈꃅꈴꌬꈴ,ꐊꑷꃅꄈꅿꅉꀨꌧꇗ、ꅉꀨꈛꏦ、ꅉꀨꄐꁈꃄꌬꈴ,“ꇖꑵꉪꐨ”ꀉꇨꇱ、ꀋꎪꃅ“ꇖꑵꑴꑇ”、“ꑍꑵꀧꌋꃅ”ꌠꃅꇫꑟ,ꏟꈯꀕꃅꐊꑷꃅꊼꇅꌣꈚꌠꐧꋦꋉꐛꌠꁻꌐꂿꃆꇬꆼꒆꄉ,ꏓꇲꃅꇵꆅꄴꏮꌠꌋꆀꎆꏣꐧꋦꀻꎆꌤꃅꌠꄹꎆ,ꇵꆅꄴꏮꅉꀕꐛꄟꈴꌠꇎꏦꇂꃴꄉ,ꎍꐽꌠꇬꄉꁨꆹꌠꌤꃅꈁꉬꅉꃀꉉꈌꌭꈬ,ꀻꎆꉪꉻꀊꏀꌠꌭꈬ,ꇲꁵꁁꏯꐛꉻꐨꐥꃅꄺꀱꌠꌌꀨꑟꃅꄉꇬꎷ,ꄺꀱꁉꃑꌠꌌꇘꊋꃅꄉꊇꁧꀊꂥꃅꀻꎆꌠꄹꇙꌠꌭꈬ,ꏟꈯꃅꈢꇓꀖꀉꒉꌕꐘꌠꃅꋒ,“ꃘꑵꎍꐽ”ꌤꃅꌠꊋꀉꒉꃅꇱ,ꀀꊿꃅꑘꊌꌠꄉꀧ、ꅉꀨꉹꁌꐥꐨꄉꀧ、ꃷꎏꀨꄜꄉꀧ、ꋛꂷꊋꀦꉮꀋꐥꌠꄉꀧ、ꅐꑘꃬꏣꇲꁵꃬꏣꎍꐽꌠꄉꀧ、ꅉꂫꊐꌠꏮꌬꌠꄉꀧ，ꏟꈯꃅꈏꇓꈉꐨꍔꒉꄐꁈꃄꌬ,ꎆꏣꀻꎆꌠꌋꆀꐧꋦꎍꐽꌠꃅꇴꄉꉻꀉꒉꌠꀧꌋꃅ,ꎭꑆꇔꈢꇓꀖꂫꋓꊋꐛꌠꁻꌐꂿꃆꃅꌐꌠꄉꀧ,ꐊꑷꃅꊼꇅꌣꈚꌠꐧꋦꋈꄻꐛ。
ꑭꋧꌤꃅꅉꇬ,ꀋꎪꃅꂫꑟꉪꏣꄻꀉꇨ,ꋍꑞꋍꑵꐛꐨꌼꇪꌠꏭꊝꌠꉪꇐꊭꄎꌠꌋꆀꌤꃅꊭꄎꌠꃅꋒ,ꃹꅼꃅ“ꃘꑵꎍꐽ”ꌋꆀ“ꃘꑵꏦꀧ”ꌠꆹꈏꇓꋍꃱꃅꐙꌠꌧꐚ,“ꃘꑵꏦꀧ”ꌠꆏ“ꃘꑵꎍꐽ”ꌤꃅꌠꊋꒃꅉꉬ，“ꏦꀧ”ꌠꂫꑟꐏꈬ，ꎆꏣꅉꀨꃅꍜꒃꌫ，ꑠꃅꄉꏦꀧꌠꌌꎍꐽꌠꇬꊥꎆ、ꎍꐽꅉꇬꄉꁨꆹꌠꎹꇬꆏ，ꐊꑷꃅꊼꇅꌣꈚꌠꐧꋦꋈꄻꐛꌠꎁꃅꅉꃀꌆꈫꈈꄎ。“ꃘꑵꏦꀧ”ꌠꇬꆼꒆꄉꉻꒉꏱꁈꃄꌬꌠꊋꃤꁦꎆꃅꇱ,ꏤꄻꅐꇁꀐꌠꃛꊸꊜꄻꊋꋠꆣꄯꌠꏱꁈꃅꇫꑟꋒ,ꃅꒊꃅꇁꐛꐈꌠꇬꈴꄉꐳꃅꀊꏀꌠꆣꄯꏱꁈꏤꄻꅐꇁ,ꉹꁌꐥꐨꂫꑟꄏꈬꃅꄉ。ꋍꈭꐨ,ꀋꎪꃅꑓꏮꀋꉬꀋꉆꌠꁻꌐꇬꉜꄉ,ꊜꁈꏡꁈꉉ,ꉇꉻꃨꆰꐨꏭꊝꌠꌋꆀꈏꇓꋓꎭꌠꆼꑣꌠꐮꐊꐙ、ꀋꃋꋋꇅꇬꌤꃆꂥꀘꌠꌋꆀꀊꉗꃅꐮꄙꐨꂥꀘꌠꐮꐊꐙ、ꇿꋌꐥꌠꃷꎏꌋꆀꃅꊌꐨꐥꌠꍔꃚꐮꐊꐙ、ꊋꈀꑌꃅꇤꄉꃅꌠꌋꆀꊋꎖꄉꃤꀳꌠꏓꐮꐊꐙꌠꃅꇫꑟ,ꃨꆰꐨꐈꌌꊜꋽꄮꐛꌠꃅꑲꌧ，ꄈꍏꑷ、ꇩꃷꑼꁈꏤꄐꁆꌠꃅꇫꑟ、ꃶꐚꇿꋌꊌꂿꌠꄉꀧ。
(ꑍ)ꂴꄐꄉꌠꁻꌐꀋꉬꀋꉆꌠ。
ꄚꉎꉉꌠꉻꄜꇖꐨꌋꆀꌤꃅꉪꈜꇬꈴꄉ，ꎆꏣꈳꏦꌋꆀꑞꉬꌠꑞꃅꄉꌠꏥꏦꍬꄉ，ꏓꇱꃅꇩꏹꌋꆀꇩꈐ、ꀋꃅꋋꄮꌋꆀꈜꎴꅉ、ꈉꐨꌋꆀꉆꐨꇬꉪꏡꄉ，2020ꈎꎆꏣꐧꋦꀻꎆꂴꄐꄉꌠꁻꌐꀋꉬꀋꉆꌠꄜꎼꇁ：
——ꃅꅍꊌꌠꎍꐽꉹꁌꐥꐨꏦꀧꌠꌌꂴꄉ,ꏟꈯꃅꎭꑆꇔꈢꇓꀖꌠꃅꊋꐛ,ꊋꇤꄉꐊꑷꃅꊼꇅꌣꈚꌠꐧꋦꋈꄻꐛꌠꁻꌐꂿꃆꃅꇫꑟ。ꀋꉬꀋꉆꃅꉪꏡꌠꆏ:ꅉꆺꑭꊂꇵꆅꌋꆀꎆꏣꃼꇇꃅꒊꃅꇁꊨꀋꄅꐨꀉꒉꐯꀉꒉꃅꐥꄉ,ꉪꇩꏤꀻꎆꌠꆏꂴꉪꇫꑟꊋꌠꁧꏖꐊꊈꈨꊜꎍ,ꎆꏣꉀꎆꁻꌐꏭꃷꁨꈴꌠꇖꐨꀋꃅꇬ,꒔ꑞ꒔ꁆꏯꄐꏁꌊꐪꊛꄉꎔꎗꃅꄈꍏꑷ、ꇩꃷꑼꁈꏤꄐꁆꌠꃅꈴꌬꈴꌠꇬꈲꁧꐥ,ꀋꃅꋋꇅꇬꊝꌠꀋꉬꀋꉆꌠꐮꄙꐨ、ꊋꋠꐨ、ꌤꃆꇬꉜꄉ,ꌤꃅꈯꄜꌌ“ꃘꑵꏦꀧ”ꌠꃅꇫꑟꌠꂿꃆꌋꆀꎆꏣꊇꁧꀊꂥꃅꀻꎆꌠꄹꇙꌠꀂꏽꄉ。ꋍꈭꐨ,ꎼꈎꎆꏣꉀꎆꐳꐨꃷꁨꈴꌐꁧꄜꎼꀋꇁꇬ,ꎆꏣꉀꎆꌠꀋꈁꄷꌠꀋꉬ,ꀀꊿꃅꅍꊌꌠꏦꀧ、ꅉꀨꉹꁌꐥꐨꏦꀧ，ꎭꑆꇔꈢꇓꀖꌠꏤꄉꀐꌠꁻꌐꂿꃆꃅꌐ、ꐊꑷꃅꊼꇅꌣꈚꌠꐧꋦꋈꄻꐛꌠꃅꇫꑟꇬ,ꉈꑴꋍꑞꋍꉹꃨꆰꐨꄴꏮꋊꑣꇬ，ꐯꇯꎆꏣꉀꎆꌠꌌꄘꄏꅍꃅꄉꄻꅐꌠꉬ。
——ꇓꈓꏦꎫꀊꏀꃅꁦꎆꌠꃅꅍꊌꊿ900ꃪꑼꈋꉐꐥ,ꇩꏤꑭꊂꇓꈓꏦꎫꍤꄻꃅꅍꀋꊌꐨꌋꆀꇓꈓꏦꎫꁱꄀꄉꌠꃅꅍꀋꊌꐨꂱꑱꅉꄉꇬ6%ꀑꂪꌋꆀ5.5%ꀑꂪꐥ。ꀋꉬꀋꉆꃅꉪꏡꌠꆏ:ꇓꈓꏦꎫꀊꏀꃅꁦꎆꌠꃅꅍꊌꈁꉬꃷꁨꃆꂮꆏ,ꇵꆅꇱꄜꎟꌠꌋꆀꎆꏣꀁꋌꒉꍅꊋꁦꎆꇁꌠꇱꁧꏖꄉ,ꇓꈓꏦꎫꀊꏀꃅꁦꎆꌠꃅꅍꊌꍅꊋꄇꇖꀕꃅꉀꎆ,ꄚꀊꏀꃅꒆꅐꇁꌠꑘꃅꊋꃤꇓꈓꏦꎫꄉꃅꅍꊌꌠꈉꐨꃷꁨꇬꉪꏡꇬꆏ,ꄉꈁꊼꇅꀉꒉꌠꃅꅍꊌꌠꃷꁨꁦꎆꇬꎷꌠꆹꄻꅐꌠ、ꉈꑴꀋꎪꃅꐥꌶꌠꑌꉬ，ꃅꅍꊌꌠꄻꂴꄉꌠꏱꁈꄐꏁꌐꍝꄛꑣꌠꑌꉬ。ꃅꅍꀋꊌꐨꃆꂮꆏ,ꇵꆅꃅꅍꊌꌠꏭꁧꏖꌠꄮꈉꋍꊭꐪꊛꑴꌦꑴꇬ,ꄚꉪꊇꆹꄉꈁꀉꒉꃅꃅꅍꀋꊌꌠꃨꆰꐨꄴꏮꂥꀘꇧꎭ,ꃅꅍꊌꎍꐽꌤꃅꋒꌠꉌꊋꑓꊋꑌ。
——ꀀꊿꌬꈧꁌꏤꉀꄓꐨꆏ3.5%ꀑꂪꉬ。ꀋꉬꀋꉆꃅꉪꏡꌠꆏ:2019ꈎꀀꊿꌬꈧꁌꏤꉀꄓꌠꂪꄓꁧꏖꐨꊼꇅꀉꒉ,ꇵꆅꇱꁧꏖꄉ,2020ꈎꉈꑴꁌꄓꐊꊈꀊꏀꈨꐥꑴꌦ,ꁌꏤꉻꄜꉀꄓꍅꊋꄡꇗꊼꇅꀉꒉꑴꌦ；ꋍꈭꐨ，ꂴꄐꄉꌠꁻꌐ3.5%ꀑꂪꆏꃷꎏꎍꐽꄉꌠꂴꄐꄉꌠꈉꐨꇬꑌꋓꃅꀐꌠꉬ。
——ꀀꊿꊌꐨꁦꎆꌠꌋꆀꎆꏣꉀꎆꌠꀑꐱꃅꐮꐊ。ꀋꉬꀋꉆꃅꉪꏡꌠꆏ:ꐊꑷꃅꊼꇅꌣꈚꌠꐧꋦꋈꄻꐛꌠꁻꌐꇖꐨꌋꆀꐯꊛ,ꀊꅰꉾꃅꏓꂱꋍꑍꋍꉙꃅꉀꎆꌠꐥꐨꉾꃪꌠꈉꐨꇬꇎꈴ,ꀊꅰꉾꃪꃅꏓꂱꌌꈯꄜꃅꄉꌠꀻꎆꉪꇐꄛꑣ。ꋍꈭꐨ,ꑣꋂꉀꄓꄐꇐꏤꁈꃹꅼꃅꃄꌬ、ꀀꊿꊌꐨꁦꎆꌠꊥꎆꌠꏱꁈꏡꁈ꒔ꁘ꒔ꁘꃅꃅꇫꑟꌠꇬꐊꄉ,2020ꈎꀀꊿꊌꐨꉀꎆꂴꄐꄉꌠꁻꌐꃅꇫꑟꌠꆹꄘꄏꅍꐥꌠꉬ。
——ꈏꃹꉇꅐꌠꎍꐽꊥꎆꊇꁧꉀꐕ,ꇩꏹꊌꐨꌬꐨꀑꐱꃅꐮꆽꏣ。ꀋꉬꀋꉆꃅꉪꏡꌠꆏ:2020ꈎꉇꉻꃼꇇꉀꎆꇬꊋꋠꐨꊼꇅꀉꒉ,ꊋꇤꄉꉇꉻꃼꇇꎍꐽꃅꀻꎆꌠꊥꎆ、ꃷꎏꂴꄐꄉꌠꌋꆀꎆꏂꑘꉌꊋꌌꎍꐽꄉꇈ，ꉈꑴꐳꃅꉇꉻꃼꇇꋓꅔꂱꎆꅑꐨꀊꏀꌠꑌꉘꉚꄉ,ꉇꉻꃼꇇꊇꁧꀊꂥꃅꀻꎆꌠꄹꇙ。
——ꌗꂓꇩꈐꒃꅐꈁꉬꁌꐨꊋꃹꌠꌋꆀꍍꆀꎊꇐꀋꉬꀋꉆꌠꋊꃑꃷꁨꐪꊛꄉꀁꋌꊰ,ꊋꇤꄉ“ꊯꌕꉬ”ꄐꎖꁻꌐꂿꃆꃅꌐ。ꀋꉬꀋꉆꃅꉪꏡꌠꆏ:ꅑꅸ2019ꈎꈎꂫꑟꇬ“ꊯꌕꉬ”ꄐꎖꏤꄻꄉꌠꌗꂓꇩꈐꒃꅐꈁꉬꁌꐨꊋꃹꐨ15%ꀁꋌꊰꌠꁻꌐꂿꃆꇬ87.1%ꃅꌐꀐꑴꇬ,ꄚꎼꈎꂿꃆꄡꇗꀉꇖꐯꀉꇖ,ꈜꀕꇈꇵꆅꎆꏣꉀꎆꐳꐨꏭꁧꏖꌠꆏꊋꀦꌬꈧꈁꉬꃷꁨꉀꎆꐳꐨꏭꁧꏖꌠꒊꀋꋌꏭꐛꄉ,ꄐꎖꁻꌐꂿꃆꃅꌐꇬꎬꅧꃅꊋꇤꄻꅐ。
(ꌕ)ꏱꁈꃅꍜꀋꉬꀋꉆꌠ。
ꄚꂴꉉꌠꁻꌐꃅꇫꑟꂿꄷꇬ,ꋒꐯꋒꃅꇵꆅꋧꃅꎆꏣꏭꄜꎟꁧꏖꌠꄤꎖꄻꅐ,ꊒꌸꃅꏱꁈꃄꌬꌠꇂꃴꄉ,ꉻꒉꏱꁈꋊꄻꌠꌋꆀꃄꌬꊋꃤꁦꎆꃅꇱ,ꉻꒉꏱꁈꋮꄮꐮꐊꌠꊋꀥꇱ,ꊋꏂꄉꎆꏣꎍꐽꉹꁌꐥꐨꏦꀧ,ꀁꎴꊭꌠꄜꎟꌠꐈꌌꆸꄟꐨꃅꐛꐈꌠꐛꌠꄴꏮ。
——ꏣꀋꑌꌠꏱꎆꏱꁈꆏꀊꅰꃅꏣꀋꑌꌠꂿꄐꐥꌶ。2020ꈎꏱꎆꌫꁏꇔꐨꆏ3.6%ꈋꉐꇬꈴꄉꄐꁆ，ꏱꎆꌬꁏꇔꄉꈁꀋꉊꄻꈎꄩ1ꃪꂡꂷꁦꎆ；ꍏꑷꏱꎆꆏꇵꆅꄘꑣꌠꌐꄉꌠꇩꎝ1ꃪꂡꂷꃑꌬ,ꌗꏱꎆꌫꁏꇔꌠꇬꀋꇱ。ꂴꉉꌠꏡꁈꋋꑍꏢꀊꏀꃅꁦꎆꌠꎆꀨꆏꉬꇮꃅꄻꃅꄷꁵꌐ，ꀋꉬꀋꉆꌠꆏꌌꀀꊿꃅꅍꊌꌠꏦꀧ、ꅉꀨꉹꁌꐥꐨꏦꀧ、ꃷꎏꀨꄜꌋꆀꇗꏸꊨꁌꊰ、ꊣꁌꊨꇔꊰꊨ、ꌬꈧꌠꌋꆀꎆꇱꌠꍔꒉꌠꇬꌬ。ꊋꀉꒉꃅꇤꄉꏱꎆꌬꐨꐛꉻꄻꃪ,ꏟꈯꃅꑵꎃꐚꃅꐙꌠꌬꐨꍅꊨ,ꏦꇨꃅꑷꂿꎖꃨꅑꌠꋉꀋꉆ，ꏦꇨꃅꂄꈿꆿꈿꌠꃅꀋꉆ，ꋍꈭꐨꌢꎭꄏꐓ、ꋭꑘꉙꂘ、ꅉꀨ꒜ꌠꀨꎹ、ꅉꀨꆅꉁꆄꄻ、ꇓꈓꇓꉈꀁꂥꀧꑠꉹꁌꐥꐨꌬꐨꁧꀉꄂꁦꎆꇈꊨꀋꒊꇬꎷ。ꍏꑷꏱꎆꋌꃀꃅꈎꂫꏮꎆꀨꏓꇲꃅꌬꋒ,ꌌꐊꑷꃅꊼꇅꌣꈚꌠꐧꋦꋈꄻꐛꌠꂿꃆꃅꌐ、ꇵꆅꐩꇳꐨꎆꏣꏭꁧꏖꌠꄘꑣ、“ꊯꇖꉬ”ꄐꎖꐘꃆꀋꉬꀋꉆꑠꇬꌬ。ꏱꎆꇵꆅꇱꊼꇅꀉꒉꃅꁧꏖꌠꃅꄷꏭꆏ,ꆹꏮꁵꄻꌠꊋꃤꀉꒉꃅꇱ,ꅉꀨꉹꁌꐥꐨꏦꀧ、ꃄꎆꏦꀧ、ꏮꈴꏦꀧ。
——ꎍꐽꊋꑌꌠꎆꃀꏱꁈꆹꀊꅰꃅꊜꋽꄉꄐꌶ。ꐊꐯꎆꃀ(M2)ꇲꁵꃷꁨꌋꆀꐧꋦꎆꏓꄉꈁꊭꊎꃷꁨꄐꏁꌊꉀꎆꐳꐨꄇꇖꀕꃅꀋꉊꄻꈎꂦꀋꋌ。ꏓꇱꄉꄇꄜꋊꄉꃷꎏꃄꄻ、ꇔꊰꀁꋌꊰ、ꎕꏦꀁꋌꊰ、ꉈꑴꎝꉛ、ꉈꑴꎆꃀꁥꁵꑠꌬꅍꌬꄉ,ꏭꇙꐨꇗꊒꇎꋒꌠꏦꀧ，ꉚꎆꇔꊰꄐꏁꌊꀒꁨꋍꁘꃅꀁꋌꊰ,ꎆꏂꑘꏓꇱꎆꏓꀨꊰꄇꇖꀕꃅꀁꋌꊰꌠꈺꇙ。ꎆꏂꑘꐧꐭꀄꊭꌠꉚꎆꄯꊁꄉꀨꊰꇔꊰꌣꌠꏱꁈꄯꈉꎙꄉ，ꁊꈲꀄꊭꐭꎆꏂꑘꉚꎆꏭꆏꊋꇤꄉꄯꈉꎙꄉꄡꑟꆏꄯꈉꎙꌠꃅꇫꑟ,ꊋꋠꐨꊼꇅꀉꒉꌠꎆꏂꑘꀉꒉꐧꀠꌠꏭꆏꋮꇖꄉꄯꈉꎙꄉ。ꈛꎂꃅꐥꄜꎆꏣꇬꑟꌠꎆꃀꏱꁈꌬꅍꏀꀺ，ꃛꊸꊜꄻꎆꏓꊋꁈꄏꌠꇲꁵ。ꎆꒉꎆꇁꏲꉻꄐꏁꌊꐧꐭꎆꏂꑘꏭꉌꒊꎆꉛꃑꊐꌠꊋꃤꁦꎆꃅꇱ，ꁊꈲꀄꊭꐭꉌꒊꉚꎆꃑꄻꌠꊋꊡ。ꏓꂱꀙꎆꃀꉇꎆꀟꄻꁌꐨꋭꋽꐮꆽꏣꌠꑟꐨꇬꄉꀑꐱꃅꎍꐽꌠꄝꏦꀋꊰ,ꉇꎆꊭꊎꄉꈁꄉꄐꋭꋽꌠꄉꀧ。ꎆꒉꎆꇁꎍꐽꌠꌋꆀꃨꆰꐨꀞꄻꌠꌤꃅꋒ,ꉻꑫꃅꐙꌠꐔꈔꉆꐨꇫꀋꅐꌠꂫꑟꐏꈬꃅꄉ。
——ꃅꅍꊌꌠꄻꂴꄉꌠꏱꁈꆏꐊꑷꃅꄻꀉꇨꌶ。ꀀꊿꃅꅍꊌꌠꏦꀧꌠꄻꉆꈉꀊꂥꅉꇬꄉ，ꃅꅍꊌꃅꒊꃅꇁꐛꐈꌠꇬꈴꄉꏱꁈꊋꃤꋊꄻ,ꃅꅍꊌꌠꈁꉬꃷꁨꎍꐽ,ꃅꅍꊌꐛꉻꄻꃪ,ꃅꅍꊌꊇꁧꊐꐕ。ꎆꏂꑘꇇꀨꃅꈉꎍꐽꌠꇬꊋꃤꁦꎆꃅꇱ,ꃅꄷꇬꎆꏂꑘꇬꊿꇬꈴꄉꉹꁸꄉꇇꀨꄏꐓ,ꊋꏂꄉꄉꈁꃅꃅꅍꀋꊌꃨꆰꐨꄴꏮꋊꑣ。ꀊꅰꉾꃪꃅꋍꏅꑘꀺꋍꉻꏀꀺꌠꀀꊿꃅꅍꊌꌠꄉꀧꌠꏭꄘꄏꂿꄐꋊꇤꅐꇁ,ꄚꃆꂮꐥꌠꊋꁈꄏꏱꁈꎹꎥꄉꌶꅉꀊꂥꊐꌠꇬꌶꅐꌶꌺꏀꀺꑘꀺꌠꊋꊡ。ꋭꋽꃅꃅꅍꊌ、ꃅꅍꊌꌠꐛꄟꀊꏀꌠꄐꏁꌊꁣꀋꐥꃅꀻꎆ。ꀉꇨꃅꌶꅉꀊꂥꊐꌠꌶꅐꌶꌺ、ꂿ꒧ꊿꊋꃅꌠ、ꂽꄻꀱꇁꌠꑠꀋꉬꀋꉆꊿꁥꌠꏭꇇꀨꄏꐓ,ꃅꑘꇎꏦꊫꌐꄹꁆ“ꂴꃅꈉꉆ、ꊁꊫꌐꎖꊊ”ꌠꋍꊭꃅꐙꌠꏡꁈꃄꌬ，ꃅꑘꇮꇐꄐꊋꊐꐕꃅꐨꌐꌬꎆꀨꌬꋒ,ꊋꀥꇱꄉꃅꅍꎹꊋꊿꈜꀕꇈꌢꎭꑘꃅꊋꃤꃅꅍꊌꇇꀨꌠꃅ,ꃅꅍꀋꊌꄉꑱꈐꇙꈧꌠꋊꑣꇧꎭꌠꄉꀧ。
——ꉻꒉꏱꁈꏓꇲꋮꄮꌠꊋꀥꇱ。ꏱꁈꂴꎥꃪꊭꊐꌠꊋꀥꇱ,ꏱꎆ、ꎆꃀ、ꃅꅍꊌꏱꁈ、ꌬꈧ、ꎆꇱ、ꅐꑘ、ꃄꁕꑠꏱꁈꋯꐊꊋꏂ、ꏓꊋꏓꐛꌠꊥꎆ。ꏟꈯꃅꈏꇓꈉꐨꍔꐯꌠꄐꇐꏤꁈꃄꌬ,ꋒꐯꋒꃅꄉꈁꀉꒉꐯꀉꒉꌠꃷꎏꊋꂫꅤꀖ,ꌬꈧꌠꅉꃀꂿꄐꌋꆀꎆꇱꀋꉬꀋꉆꂿꄐꋊꇤ,ꎆꀨꄐꏁꌌꇲꈉꐯꇯꈲ、ꁧꃷꁨꇿꋌꐥꁁꏯꇬꊐ,ꇩꈐꈉꐨꎍꐽꃅꍔꒉꌠꄹꇙ。ꅐꑘꏱꁈꆏꄺꂡꑘꊇꁧꀊꂥꃅꀻꎆꌠꄹꇙꌠꇬꆼꒆꄉ,ꍔꃚꄐꏁꌠꌋꆀꃷꎏꉺꏦꐯꐊꌠꌭꈬ,ꄂꋦꑴꌅꌋꆀꁉꃑꇷꃅꐮꐊꌠꊥꎆꌠꌭꈬ,ꊋꏂꄉꅐꑘꅉ꒜ꀊꂥꊐꌠꈴ、ꅐꑘꃬꏣꐛꏀꈴꌠꊥꎆ。ꋓꅔꏱꁈꅉꃀꃅꐙꌠꉆꈉꄻꀉꇨꃅꄉ,ꀋꈐꀋꉈꃅꋓꅔꌠꄹꏦꋦꈭꀹꄻ,ꀒꁨꋍꁘꃅꃷꎏꍄꑐꊋꃤꋊꃑ。ꃄꁕꏱꁈꆏꋒꐯꋒꃅꃅꄷꈧꌠꇬꊼꇅꂱꎆꅑꌠꋊꇤꄉ,ꐘꃆꀉꒉꀊꂾꌠ、ꏱꁈꀉꒉꀊꂾꌠꌌꃄꁕꄐꇐꏤꇐꀉꒉꀊꂾꌠꃅꑞꅉꑟꌠꄹꇙ,ꐳꃅꇩꏤꑭꊂꊇꁧꀊꂥꃅꀻꎆꌠꈺꇙꌠꊋꀦꀊꏀꌠꏓꐛꌶ。
ꌕ、2020ꈎꇩꂱꎆꏣꌋꆀꐧꋦꀻꎆꎖꄎꂿꃆꀋꉬꀋꉆꌠ
2020ꈎ,ꄈꍏꑷ、ꇩꃷꑼꁈꏤꄐꁆꌠꇬꈴꄉ，ꏓꇲꃅꇵꆅꄴꏮꋎꍅꌠꌋꆀꎆꏣꐧꋦꀻꎆꌠꄹꎆ，ꊋꇤꄉꈬꁁꏯꌤꃅꋒꌶ。
（ꋍ）ꐪꊛꄉꇵꆅꄴꏮꋎꍅꌠꋍꊭꃅꐙꌠꊌꐨꄻꈫꈈꌋꆀꍔꐯ,ꏟꈯꃅꇵꆅꅉꀕꐛꄟꈴꃅꄴꏮꋎꍅ。ꐊꑷꃅ“ꉇꉻꈏꃹꌠꄴꏮ、ꈒꇓꀱꄓꇁꌠꄴꏮ”ꌠꉻꄜꄴꏮꋎꍅꊜꁈꃅꑞꅉꑟ,ꐳꃅꄐꌐꐨꌋꆀꃶꐚꇿꋌꐨꐥꌠꄴꏮꋎꍅꏡꁈꏁꌬ,ꐪꊛꄉꋍꑞꋍꐘꄴꏮꋎꍅꌤꃅꌠꒃꉇꏟꈯꒃꉇꃶꐚꒃꉇꑭꋧ。
ꋍꆏꏟꈯꃅꇩꈐꄴꏮꋎꍅꊌꐨꄻꈫꈈ。ꐳꃅꌋꅜ、ꐳꃅꀞꄻ、ꊒꌸꃅꏲꂠ、ꇿꋌꐥꃅꈭꋏꉃꄻꌠꅉꀕꐛꄟꈴꌠꄴꏮꋎꍅꉺꏦꄻꐛꒆ,ꄚꃆꂮꐥꌠꄴꏮꋏꍅꄐꁈꄻꃪꄷꀋꁧꐳꃅꃄꇬ,ꈆꑪꃅꄴꏮ，ꐛꀋꒆꅉꅋꑣꋍꇈ。ꐊꑷꃅꋥꁕꄴꏮꋎꍅꈄꏍꉱꎀꈬ,ꈴꌗꈴ、ꀑꊋꈴꌠꄴꏮꋎꍅꄐꊋꄻꀉꇨ。ꐪꊛꄉꊋꈁꑌꃅꇤꄉꆅꏭꐛꌠꌋꆀꆅꉚꊨꄅꄉꀐꌠꊿꆅꈭꋏꉃꄻꌤꃅꌠꃅꋒ,ꐪꊛꄉꊿꆅꌒꌠ、ꑴꄉꌠꉹꁌꌋꆀꂴꄉꇵꆅꄘꑣꌠꆅꉁꊿꉌꇗꎵꂘꌠꃅꋒ。ꐳꃅꆅꁿꋌꎥꃪꀖꁉꌠꄹꎆ。
ꑍꆏꉇꉻꈏꃹꄴꏮꌠꏡꁈꊋꀥꇱꌋꆀꄻꃪ。ꐪꊛꄉꊋꀥꇱꄉꇩꉈꉪꇩꏤꉻꊿꏭꉈꇬꉁꅉ。ꏟꈯꃅꈴꀸꇓꈓꐏꈜꐏꋒ,ꆅꉁꅐꀦꌋꆀꉮꌸꈭꋏꊋꃤꄐꉻꄻꃪ,ꃅꋮꃅꄷꄉꉻꁦꎴꆄꄻꉁꈾꋈꄻꌠꊋꁈꄏ,ꊋꀥꇱꄉꇵꆅꍤꎖꄐꊋꁰꍋ,ꐳꃅꊒꌸꃅꃨꆰꇁꀦꃨꆰꅉꊨꃏꌋꆀꏱꍅ。ꊋꀥꇱꄉꏓꋍꈚꄉꑴꄉꌠꊿꋬꂻꁧꃤꃅꌠꏦꀧ,ꋬꂻꍞꎖꌠꌋꆀꊿꊇꏭꉈꇬꌠꃅꋒ。
ꌕꆏꃹꅼꃅꇵꆅꄴꏮꋎꍅꌠꇩꏹꇷꃅꌠꄹꎆ。ꋧꃅꁦꎴꆄꄻꎀꍹꌋꆀꃹꅼꃅꐮꈴꇷꃅ,ꃄꁕꄉꉻꁦꎴꆄꄻꃛꊸꑌꑲꉺꏦꄻꐛꌠꎹꎥ,ꐪꊛꄉꄚꃆꂮꐥꌠꇩꏤꏭꄾꌦꋩꃅꇇꀨꄎꌠꇲꁵ,ꉾꃪꌠꏦꍠꈝꃀꋈꄻꌠꄹꎆ,ꃄꄟꀉꑌꑵꃅꌌꇩꏹꇵꆅꄴꏮꇷꃅꌠꎁꃅꊋꃤꅐꌞ。ꏦꇨꃅꇵꆅꄴꏮꎊꈬꉇꅐꊇꁧꒃꌫ。ꊋꀥꇱꄉꈆꑪꎥꃪꈢꇓꀖꇩꏹꇷꃅ,ꅔꈿꄉꐋꀋꌡꇿꋌꐥꌠꁬꋌꎥꃪꀖꁉꌋꆀꆅꁿꋌꎥꃪꄺꑣꑠꁆꏯꏛꃅꂵꅐꌠꊌꅜ。
（ꑍ）ꏟꈯꃅꈢꇓꀖꀉꒉꌕꐘꌠꃅꋒ,ꏤꈉꈐꃅꋍꑞꋍꐘꁻꌐꂿꃆꃅꌐꌠꄉꀧ。ꎭꑆꇔꈢꇓꀖꂿꃆꏤꄮꈐꃅꐊꑷꃅꃅꌐꌠꄉꀧ,ꍍꆀꄴꏮꈢꇓꀖꋍꊭꃅꐙꌠꁻꌐꃅꇫꑟꌠꄉꀧ，ꉻꑫꃅꐙꌠꎆꒉꎆꇁꐔꈔꉆꐨꄝꇫꀋꅐꌠꄉꀧ。
ꋍꆏꎭꑆꇔꈢꇓꀖꌠꂫꋓꊋꐛ。ꍏꑷꏓꇲ、ꌜꈁꉬꃅꆽꎍ、ꏃꑤꃅꇫꑟꌠꒃꉇꌠꌤꃅꉺꏦꃅꇫꑟ,ꐪꊛꄉ“ꌕꐎꌕꍏ”ꑠꌢꎭꅼꇨꃅꄷꇬꉜꄉ,ꌢꎭꀎꇓꇔꇨꀋꎭꌦꌠꑤꌋꆀꌢꎭꋂꏭꂓꄀꄉꍞꊟ,ꀋꃅꌬꌠꎕꏦꇂꃴꂿꑘꁡꇤꌢꎭꊻꂷꉬꇮꃅꎭꑆꇔꌐ、ꌢꎭꑤꉬꇮꃅꌢꎭꀎꇓꇔꌠꄉꀧ。ꃅꅍꊌꌢꎭꄏꐓꌠꊋꀉꒉꃅꇱ,ꌢꎭꑘꃅꊋꃤꀱꃅꈉꇬꄉꑘꃅꌠꌌꂴꄉꊥꇬ。ꎭꑆꇔꈢꇓꀖꐘꃆꃄꄻꉈꑴꃄꄻꌠꁨꎆꐨꐳꀥꇱ,ꎆꏂꑘꊋꊡꄉꀊꅰꀉꑌꃅꌢꎭꃅꄷꈜꀕꇈꄊꉣꄻꈁꄻꄉꌠꌢꎭꑱꁯꊿꊙꌬ,ꌢꎭꄏꐓꂴꅑꎆꏂꑘ、ꌢꎭꄏꐓꇮꑳꀊꄶꇬꊿꈻꏁꌊꃅꅍꊌꌠꊋꁈꄏ。ꃹꅼꃅꌬꈧꌢꎭꄏꐓꌠꃅ,ꒃꅐꃷꄻꐯꊛꌠꊥꇬꋒ,ꇵꆅꃅꄉꇫꅐꌠꌢꎭꃅꄷꂿꑘꅐꇐꃷꄻꊋꌠꌤꃆꂥꀘ。ꅐꑘꌢꎭꄏꐓꌠꊋꀉꒉꃅꇱ,ꅐꑘꇇꀨꄏꐓꎆꀨꌋꆀꌢꎭꄏꐓꃷꁨꀄꊭꃅꉌꒊꎆꉛꌠꏱꁈꌬꋒ,ꃅꄷꁳꎼꈎꐛꐪꉜꄉꏱꎆꌐꐘꌢꎭꄏꐓꎆꀨꏱꁈꋊꄻꉾꃪꎻꉆ,ꅐꑘꌢꎭꄏꐓꐘꃆꈁꁠꁥꇱꊋꃤꀉꒉꃅꇱ。ꐳꃅꀀꆦꌢꎭꄏꐓꎞꀀ、ꂿꑘꁡꇤꅝꒉꉮꀋꐥꎭꑆꇔꈢꇓꀖ“ꂫꍅ”ꋉꃆꉈꑴꑘꃅꌋꆀꋈꄻ,ꂴꈎꁂꂶꌠꀑꐱꃅꂫꍅꌤꃅꈁꐥꌠꃅꌐꌠꄉꀧ,ꀀꅉꆦꄉꌢꎭꄏꐓꎞꀀꊁꊛꄏꐓꏡꁈꑭꋧꈴꃅꃄꌬꇫꑟ,ꀉꒉꉹꌠꁆꏀꅉꇱꄻꂘꑘ、ꆅꉁꆄꄻꉁꈾꑠꁁꏯꇬꀋꇎꅉꅋꑣꐯꊯ。ꊋꀥꇱꄉꌢꎭꃅꄷꄉꉻꁧꃤꃅꅉꃀꉁꈾꋈꄻ。ꃹꅼꃅꂘꑘꌢꎭꄏꐓꈢꇓꀖ，ꃹꅼꃅꌷꆏꋎꍅꌶꄻꄉꀧꌤꃅꊌꐨꄻꈫꈈ。ꐪꊛꄉꂿꑘꁡꇤꑲꎓꇣꐡꄺꀱꌠꄹꎆ,ꌢꎭꑱꁯꀀꑳꋬꂻꏦꀧꅍꐥꌠꁻꌐꂿꃆꃅꌐ。ꊋꃅꌠꌌꇇꀨꌠꎃꊐꌠꋈꄻꁁꏯ、ꃄꄻꈍꈐꌋꆀꈲꊌꊜꀠꍔꒉ。ꇵꆅꒉꄸꃅꌢꎭꐛꀱꌢꎭꐛꌠꊻꂷꇇꀨꄏꐓꌠꃅꋒ,ꅉꀨꐥꐨꇬꁧꀋꏖꌠꄉꀧ。ꑘꃅꀋꄐꌠꐋꀋꌡꌢꎭꊻꂷꏭꆏꐧꋦꏦꀧꉱꄏꌠꄻꀉꇨꌶ,ꀧꋭꌠꀧꌐꌠꃅꇫꑟ。ꏤꄉꅉꌢꎭꄏꐓꌠꌌꃹꅼꈴ。ꇝꂱꀉꆹꃅꄷꎭꇔꈢꇓꀖꌠꌋꆀꄖꄑꀻꎆꌠꊋꁈꄏ。ꐪꊛꄉꌢꎭꀎꇓꇔꌠꑤꏭꀋꉬꀋꉆꌠꄏꐓꏱꁈꃄꌬ。ꊼꇅꌢꎭꌠꂥꀘꌠꎴꈲꉺꏦꎥꃪꄉꄻꐛ。
ꑍꆏꐪꊛꄉꍍꆀꄴꏮꏱꄻꌠꊋꀥꇱ。ꀋꎪꃅꃅꍜꐛꀋꐈ、ꊋꃤꀋꊨꌠꌭꈬ,ꇁꀦꇬꄉꄴꏮꋎꍅꌠꒃꉇꋒ,ꒆꉻꋦꈭꊇꁧꐪꊛꄉꆹꏮꌊꉾꇁꌠꄹꇙ,ꐳꃅꀋꃅꋋꄮꋦꈭꏱꄻꉻꑫꏓꄻ。ꃅꑆꃴꇉꀕ、ꒉꎔꐝꍠꀕ、ꃄꅉꁦꎴꌠꐏꁇꊌꐨꄻꈫꈈ。ꊱꁨꃅꒈꀑꃅꄷꃅꋆꄮꐰꁦꎴꊸꎹꎴꈲꉺꏦꋈꄻꌠꄹꎆ,ꇤꎸꅍꉹꑘꀁꂥꐯꀁꂥꃅꋊꃑꌠꄉꈁꍔꒉ,ꊋꀥꇱꄉꊵꒀꎊꈬꈻꍯꍍꆀꌠꏱꄻ,ꎸꈜꌐꌬꈜꋈꄻꌠꇬꊋꃤꀉꒉꃅꇱ,ꐪꊛꄉꎊꈬꎞꌠ“ꉻꏮꎸꈜ”ꄹꎆ。ꄃꊐꌠꌋꆀꈋꉐꇓꈓꃅꌗꊇꁧꉾꃪꌠꃅꑍꃷꁨꍆꐨꆏ“ꊯꌕꉬ”ꄐꎖꁻꌐꃅꌐꌠꄉꀧ。ꀒꁨꋍꁘꃅꊋꀥꇱꄉꇓꈓꍍꒉꀞꄻ、ꇓꈓꀉꆈꍹꅿꒉꊈꏱꄻ、ꀨꉰꎿꏓꇱꏱꄻ、ꂿꑘꂿꑘꁡꇤꍍꆀꏱꄻ、ꒉꇁꀦꀧꌋꃅ,ꍤꏦ、ꉸꉼꒆꉻꋦꈭꀧꌋꃅꌠꋉꃆꀉꒉꀊꂾꈨꃄꌬꌠꄹꇙ。ꏟꈯꃅꊖꍍꆀꄴꏮꏱꄻꌠꄹꎆ,ꍍꆀꌠꋠꃅꌋꆀꍍꆀꃄꅉꉮꀋꐥꃅꌫꄻꌠꄹꎆ。ꇩꏤꑭꊂꀋꉬꀋꉆꌠꒆꉻꉻꑫꀧꌋꃅꌋꆀꋉꃆꀉꒉꀊꂾꌠꄻꐛꅉꐛꌠꌐꐘꋈꄻꄐꎖꌠꁰꄻ,ꒊꃀꍈꎿꃀꍈꄹꏦꄻꐛꒆ,ꐳꃅꌩꏪꍈꄹꏦꃅꑞꅉꑟꌠꄹꇙ，ꐪꊛꄉꁧꒉꌩꏪꋠꃅꎾꃝꏜꉻꑫꃅꏱꄻꌠꄹꇙ,ꅉꃴꒉꀉꇨꃅꅣꄻꌠꏓꇱꏱꄻꌠꄹꎆ。ꃪꂡꇩꈐꒃꅐꈁꉬꁌꐨꒉꌬꃷꁨ1.2％ꀁꋌꊰ。ꀉꇨꃅꒆꉻꀧꌋꃅꍞꏲ，ꒆꉻꀧꌋꃅꑟꅪꍞꏲꎕꏦꉻꑫꌋꆀꇱꄻꏱꁈꄻꐛꒆꌠꄹꇙ。ꒆꉻꁵꊒꉺꏦꄻꐛꒆ,ꒆꉻꀧꌋꃅꁵꊒꃷꋪꄐꁱ,ꒆꉻꏓꇱꁵꊒꃅꉚꌠꄹꎆ。ꃹꅼꃅꇩꏤꒆꉻꌧꑳꃅꉚꅉꋈꄻ。ꏣꀋꑌꃅꅉꆺꑭꊂꃅꑩꃅꌗꐛꐈꌠꏭꊜꄻ，ꐳꃅꇩꏤꑭꊂꌋꃷꎏꋈꄻ。ꀊꃴꅐꑘꀻꎆ,ꀊꃴꇮꇐꄹꌬꎹꀨꄜꃑ,ꉻꈫꋦꈭꍍꆀꌕꁁꏯꌠꏱꄻꌠꊋꁈꄏ。ꐳꃅꇓꈓꏦꎫꍍꒉꑬꍸꀖꑘꀞꄻꌠꌋꆀꆅꉁꆄꄻꀜꅐꎊꇐ、ꃨꆰꀜꅐꎊꇐꎴꏑꀞꄻꑠꋦꈭꅉꃀꉁꈾꀋꇎꅉꅋꑣꐯꊯ。ꐊꑷꃅꑬꍸꀖꑘꉹꁸꌠꄹꎆ,ꊋꀥꇱꄉꐳꎭꄞꀧꍍꆀꌠꌋꆀꃷꇐꎖꃨꅑꃅꄞꀧꌠꏱꄻꌠꎥꃪ,ꇓꈓꐥꐨꑬꍸꀖꑘꉮꀋꐥꃅꀞꄻꐨꉀꐕ。
ꌕꆏꉻꑫꃅꐙꌠꐔꈔꉆꐨꇫꀋꅐꌠꂫꑟꐏꈬꃅꄉ。ꑖꑟꃅꅉꆺꑭꊂꎆꒉꎆꇁꃷꎏꌋꆀꃷꇐꀉꒉꃷꎏꇙꈧꄉꇫꐊꇁꉆꌠꈏꃹꃅꐙꌠꃨꆰꐨꉜꁨ,ꋯꐂꎆꀨꏭꇙꌠꌗꋏꇫꊝꉺꏦꄻꃪ。ꊁꈹꄉꆷꄿꐨꊼꇅꀊꂥ、ꍍꊵꊋꃤꊼꇅꊋꁧꌠꉹꑘꎆꏂ꒧ꇘꑐꃅꐙꌠꃨꆰꐨꍞꎖ,ꎆꃀꃬꏣꆼꈘꄉꊛꄉꐛꁏꌠꇫꅐꇁꌠꄴꏮ。ꐪꊛꄉꊱꁨꐥꃅꃨꆰꐨꀊꂥꌠꎆꒉꎆꇁꏲꉻꃨꆰꐨꀞꄻ。ꏣꀋꑌꃅꎝꊫꌐꃷꎏꎍꐽꌠꀧꌋꃅ,ꐳꃅꃷꎏꈴ、ꏦꏲꈴꌠꎝꃆꊫꄳꏤꐆꀞꄻꉺꏦꄻꐛꒆ,ꏛꃅꊨꄅ、ꏛꃅꌗꋏ、ꏛꃅꌋꅜ、ꏛꃅꀞꄻꌠꃨꆰꐨꄴꏮꋎꍅꉻꑫꄻꐛ。ꑴꉴꎆꉛꀋꉾꌠꍤꋊꏱꁈꃅꇫꑟ,ꃷꎏꈯꀨꊋꊡꄉꎆꉛꀋꉾꌠꀞꄻꌠꇬꃅꈽ。ꎆꒉꎆꇁꏲꉻꀱꐛꅉꐛꌠꌋꆀꀞꄻꉺꏦꄻꃪ,ꑴꉴꈜꀉꑌꏢꃅꈴꄉꎆꀨꄻꇬꇯꌠꊋꁈꄏ。ꏟꈯꋭꋽꃅꃅꄷꍔꃚꊭꊐꃷꁨꂁꐥꎝꃆꋊꑣ。ꀋꎪꃅ“ꑲꆹꌌꀀꌠ、ꌌꀱꈧꌠꀋꉬ”ꌠꅉꏤꉆꈉꌭꈬ,ꄔꐽꃅꇓꈓꉜꄉꊜꁈꌬꌠꑲꅉꇤꂷꃷꎏꎍꐽꉾꃪꃅꀻꎆꌠꊥꎆꌠꎴꈲꉺꏦꄻꐛꄻꐛꒆ,ꊋꏂꄉꃄꅉꁌꏤꎍꐽ、ꑳꇤꁌꏤꎍꐽ、ꂴꄐꄉꌠꎍꐽꎻ。
（ꌕ）ꀋꇙꀋꑐꃅꈏꇓꈉꐨꍔꒉꌠꄐꇐꏤꁈꃄꌬ,ꊋꏂꄉꇩꈐꃷꎏꀉꇨꌠꏓꐛꌠꊥꎆ。ꏓꇵꆅꐊꇁꌠꄜꎟꌠꌋꆀꁧꏖꌠꇬꉜꄉ,ꃹꅼꃅꇩꈐꃷꎏꇲꁵꌋꆀꈉꐨꊋꂫꅤꀖꌋꆀꋊꃑ,ꈏꇓꈉꐨꎆꏣꉀꎆꌠꏭꈺꇙꊋꃤꀉꇨꇱ。
ꋍꆏꌬꈧꊋꂫꄝꃑ。ꄴꏮꋎꍅꏡꁈꃅꑞꅉꑟꌠꇎꏦꇂꃴꄉ,ꊱꁨꐥꃅꋍꑞꋍꉹꎊꈬꃷꅉ、ꃷꎏꀱꃼꇇꃅꑘꉈꑴꃅꌠꄹꇙ,ꈄꏍꉈꌬꈧꌠꊥꎆꄉꐳꀥꇱꃅꁥꇱ。ꈄꏍꇬꈴꄉꌬꈧꌠꉘꉚꀉꒉ，ꐯꏑꈄꏍꌋꆀꋍꑞꋍꉹꌬꈧꃅꑘꐛꄟꃹꅼꃅꐮꉔꌠꄹꎆ。ꂘꑘ、ꆅꉁ、ꃀꌠꀨꎹ、ꑱꈐꏲꑘ、ꁱꀕꈩꆫ、ꈯꎟꑠꁧꃤꃅꌬꈧꌠꈄꏍꈐꈄꏍꉈꐮꉔꄉꀻꎆꌠꊥꎆ,ꀒꁨꋍꁘꃅꐯꏑꈄꏍꇬꊫꁱꌠꉈꏭꃷꌠꁆꌞ、ꈄꏍꈴꄉꍮꊪꐰꏤꑠꃅꑘꐛꄟꀊꏀꌠꇬꊋꁈꄏ。ꉾꃪꐨꀉꇨꌠꅐꑘꀻꎆ。ꈄꏍꃼꇇ、ꐳꎭꂿꑘꁡꇤꃹꌠꉱꑷꐨꍔꒉ,ꇮꑘꅐꇐꂿꑘꁡꇤꃹ、ꂿꑘꅐꇐꇓꈓꃹꌠꈴꈜꄻꑴꀋꐥꃅꄉ。ꐳꃅ5Gꈄꏍꋈꄻꌋꆀꐛꐨꌫꄻ,ꀊꏀꉹꌠꅉꃀꉁꈾꄐꉻꄻꃪ,ꂿꐚꐯꂿꐚꌠꁱꆚ、ꉪꄐꃶꐚꐛꐪꑠꅐꏀꌬꈧꌠꄹꇙ。ꏣꀋꑌꃅꐕꍯꌬꈧꌠꍔꒉ，ꈏꃹꂫꌗꋊꃑꃶꐚꎕꄻꄽꂫꐛꐪꇩꃘꎕꏦꇬꑟꌠꐽꋓꃅꐕꍯꈏꃹꉆ。ꏢꏸꏹꑠꀋꉬꀋꉆꌠꃅꄷꇩꌕꌋꆀꋍꈍꐮꋊꃑꎕꏦꌩꋌꎊꈬꈻꍯꇤꇧꎭꌠꏭꄉꄐꈁꁠꁥꁵꌠꁵ。ꐕꍯ、ꀊꃴꀑꁮꑱꈐꄆꉁꈾꑠꌬꈧꌠꎆꒉꎆꇁꊋꁈꄏꌠꀥꇱ。ꇎꏦꐥꌠꃅꄷꊋꊡꄉꑱꈐꄆꉁꈾꀉꆹꀊꏀꀠꌠꁥꁵꏱꁈꃄꌬ。ꐳꃅꑱꈐꄆꉁꈾꀉꆹꀜꅐꌠꀱꎴꉻꑫꋈꄻ。ꀑꊋꅐꇐ、ꄺꑣꏤꃼꅐꇐꌋꆀꀊꃴꅐꇐꇲꁵꌠꍔꒉ,ꀊꃴꌬꈧꀻꎆꌠꊥꎆ。ꇩꏹꌬꈧꈯꄜꇓꈓꉘꉚꋈꄻ,ꈍꃅꋭꅉꈍꃅꃅꄉꃄꁕꈍꑋꈚꌬꈧꈯꄜꏓꐛ。ꏣꀋꑌꃅ“ꀑꁮꃼꇇꈭꊂ”ꀻꎆ,ꐳꃅꀊꏀꉹꌠꁱꀕꈩꆫꃼꇇꑘꌬꈧꏓꋧꅉꋈꄻ。ꐳꃅꑘꃅꁡꇤꈩꆫꌋꆀꑬꆏꈩꂿꑘꀱꐛꅉꐛ。ꈊꃀꎆꏣꀻꎆꌠꊋꊡ。ꊱꁨꐥꃅꃅꈯꀁꂥꏢꑲꌠꄝꃑ,ꐳꃅꌬꈴꃅꈯꈴꈄꏍꋈꄻ,ꌬꈴꃅꈯꈴꀻꎆꌠꄹꇙ。ꊋꀥꇱꄉꇩꏤꎊꈴꏍꊨ、ꇩꏤꈯꌬꈻꐻꃬꏣꎊꈴꅉꁍꌋꆀꃷꇐꏮꈴꈄꏍꋈꄻ,ꈻꐻꃬꏣꎊꈴ、ꀑꁮꎊꈴ、ꇩꏹꎊꈴ、ꇲꁵꃬꏣꀻꎆꌠꄹꇙ。ꐪꊛꄉꄆꌅꃼꇇꌋꆀꐳꎭꎊꈴꋮꄮꃅꀻꎆꌠꄹꎆ。ꃹꅼꃅꈛꎼꏦꈜꄺꀱꊐꐕꌠꄹꎆ。ꀉꇨꃅꌬꈧꉌꒊꉻꑫꋈꄻ,ꊋꀉꒉꃅꇤꄉꃷꇐꀊꆠ、ꌅꈌꉄꌎꌡꄻꑠꌤꃆꏱꄻ,ꂿꑘꁡꇤꃷꇐꐮꈴꃷꎏꐥꀹꍞꏲꌠꇬꊋꃤꁦꎆꃅꇱ，ꌬꈧꌅꈌꀧꌋꃅꏦꃤꄹꏦꌋꆀꏱꁈꉻꑫꄻꐛꒆ,ꉮꀋꐥꉌꒊꃅꌬꈧꌠꋦꈭꋈꄻ。
ꑍꆏꏣꀋꑌꃅꇿꋌꐥꃅꎆꇱꌠꍔꐯ。ꍏꑷꄐꌗꈐꎆꇱꌠ6000ꂡꂷꄐꁆ,ꀒꄹꈎꄩ224ꂡꂷꁦꎆ。ꋋꈓꌠꃅꄷꍔꃚꌐꐘꎝꊫꌐ3.75ꃪꂡꂷꄐꁆ,ꀒꄹꈎꄩ1.6ꃪꂡꂷꁦꎆ。“ꎆꀨꆏꐘꃆꊂꈹ”ꌠꇖꐨꇬꈴꄉ,ꃅꄷꍔꃚꌐꐘꎝꃆꊫꌐꐘꃆꄐꁆꌊꉾ,ꏓꋧꄉꊌꐨꈨꐥꌠꅉꃀꉁꈾꌋꆀꄉꉻꁧꃤꃅꐘꃆꇬꊋꁈꄏ。ꊋꀥꇱꄉꄉꉻꁦꎴꆄꄻ、ꒆꇐꋬꂻ、ꃛꊸꊜꄻꎊꈬꏦꀧ、ꎊꇐꌋꆀꊋꀦꊭꊎ、ꎊꈴꉁꈾ、ꂿꑘꌩꑘꈲꒉ、ꇓꈓꇓꉈꅉꃀꉁꈾꑠꁁꏯꀋꇎꅉꅋꑣ。ꀊꏀꉹꌠꅉꃀꉁꈾꋈꄻꌠꄹꇙꌠꇬꃆꂮꐥꌠꏲꁈꁱꐘꏤꄻꅐꇁ,5G、ꎊꈴꈄꏍ、ꐕꍯꈄꏍ、ꇮꑘꐯꏑꈄꏍ、ꊿꄻꀑꊋ、ꋍꉻꈴꃷꁨꀉꒉꈯꄜꑠꀊꏀꉹꌠꅉꃀꋈꄻꎆꇱꌠꄹꎆ。ꇓꈓꏦꎫꋥꁕꀉꆹꅉꄺꀱꌠꃅꋒ,ꀋꉬꀋꉆꌠꆏꋥꁕꒉꄆꐞꌗꈴꈜꅇꈴꑠꋍꋬꈭꌠꉹꁌꃅꌒꉁꈾꄺꀱ,ꇎꏦꐥꌠꆏꄆꅂꊐꄻꇬꇯ、ꍮꊪꄈꅉꉁꈾꄻꇬꇯ。ꇓꈓꍮꊪꄈꅉꌋꆀꄆꊐꉁꈾ、ꇓꈓꇓꉈꍍꒉꑬꍸꀖꑘꀞꄻꉁꈾ、ꊖꌋꅤꄉꀁꋌ꒿ꅉꏓꇱꏱꄻ、ꀉꄂꃅꇑꅤꅉꌋꆀꇓꈓꇮꑘꀉꆹꐛꅉꎞꇙꄺꀱꑠꋈꄻꊋꃤꀉꒉꃅꇱ。ꄔꐽꃅꑲꁘꇣꆹꄺꀱꌠꄹꎆ。“ꊯꌕꉬ”ꄐꎖꌠꋉꃆꐘꃆꀉꒉꀊꂾꌠ165ꐘꌋꆀꇩꏤꀉꒉꀊꂾꌠꃄꁕꄐꇐꏤꁈꐘꃆꀉꒉꀊꂾꌠꃄꌬꋒ。ꒊꃀꂱꋮꐳꈴꎸꈜ、ꎿꃀꋮꐳꈴꎸꈜꐘꃆꋈꄻꌠꊋꃤꁦꎆꃅꇱ。ꏣꀋꑌꃅꍧꊗꎸꈜꋈꄻꌠꄹꇙ,ꐳꃅꇓꈓꀋꉬꀋꉆꈧꌠ、ꇓꈓꏓꈌꈭꊂꇓꈓꇢꊭꌋꆀꇓꈓꐛꁕ(ꇓꈓꈭꇍ)ꎸꈜꄐꎖꋈꄻ。ꐳꃅꋈꄻꇰꌠꈲꒉꋉꃆꀉꒉꀊꂾꋈꄻꁨꎆꐨꄹꎆ,ꈲꒉꋉꃆꀉꒉꀊꂾꈨꀊꏀꃅꋈꇬ。ꐳꃅꏍꊨꃏꏸꐛꅉꀊꏀꌠꋈꄻ、ꎞꄻꋈꌋꆀꄺꀱꍔꒉꃅꋈꄻꌠꄹꎆ,ꊱꁨꐥꃅꈛꌺꃏꏸꐛꅉꌋꆀꌬꈴꃏꏸꐛꅉꋈꄻꌠꄹꎆ。ꐳꃅꇩꏤꐳꈴꄇꈜ、ꎃꐚꇩꌜꈜꀦ、ꂿꑘꁡꇤꄇꈜꌋꆀꅔꈐꒊꃀꎞꎭꑠꐘꃆꋈꄻꌠꄹꎆ。“ꐊꊈꆏꐘꃆꊂꐊ”ꌠꌭꈬ，ꊋꀥꇱꄉꐘꃆꃄꅉꌬꎿꌬꄐꊋꌬꑠꐊꊈꏦꀧ,ꀉꒉꀊꂾꌠꎆꇱꐘꃆꇬꀊꃴꈴꈜꀹꄻ。ꐪꊛꄉꎆꒉꎆꇁꊋꁈꄏꌠꌌꁦꎆ,ꍔꃚꎆꀨꄐꏁꂿꄐꋊꇤꋒ,ꍔꃚꌋꆀꐧꋦꎆꀨꇷꃅ(PPP)ꈁꏦꋊꍬꏀꀺ,ꉹꁌꎆꀨꊋꁈꄏꄉꀋꇎꅉꅋꑣꌠꌋꆀꀊꏀꉹꌠꅉꃀꉁꈾꋈꄻꌠꇬꃅꈽ。ꎍꐽꃅꅉꃀꉁꈾꁁꏯꀋꇙꁨꎆꎆꇱꉌꒊꁠꃅꎆꀨ（REITs）ꃅꉚꌠꄹꎆ，ꋒꐯꋒꃅꉹꁌꈬꇬꎆꇱꌠꇫꐊꌠꋍꑞꋍꉹꐧꋦꎆꀨꏣꀋꑌꐨꄀꇙ，ꊭꊐꃷꁨꁨꇐꀰꏢꐛꀕ。
ꌕꆏꊋꏂꄉꐧꋦꂴꄐꄉꌠꌌꎍꐽ。ꇵꆅꈴꌗꄜꃑꉺꏦꄻꃪ,ꐪꊛꄉꏦꃤꇬꈴ、ꄇꄜꋊ、ꂿꉆ、ꐲꄻ、ꎃꊒꌠꃅꇫꑟ。ꇵꆅꄴꏮꉃꄻꏦꃤꄜꉺꉙꂘꌠꊋꃤꁦꎆꃅꇱ,ꏠꊐꀉꑌ、ꌤꐨꀊꂥꃅꋦꒉꈴꌗꄜꃑ,ꀊꅰꃅꉾꃪꃅꐧꋦꃅꇴꄉꉻꎍꐽꌠꀧꌋꃅ。ꏱꁈꎍꐽꐨꌋꆀꂴꄐꄉꉆꐨꉀꐕ,ꏱꁈꁻꌐꏲꂠꌋꆀꁈꏤꀉꒉꀊꂾꌠꄇꄜꋊꉺꏦꄻꐛꒆ,ꀋꆏꃅꏱꁈꂿꉆꐨꉀꐕ。ꌤꏲꅉꇢꊭ、ꍏꑷꌋꆀꃅꄷꇢꊭꇬꏱꁈꐮꇙꌠꊥꎆ,ꏱꁈꃅꍜ、ꁻꌐ、ꂴꊂ、ꄹꊨꋮꄮꌠꊋꀥꇱ。ꀒꁨꋍꁘꃅꂴꄐꄉꌠꏲꂠꌠꊋꀥꇱ,ꄜꉺꇇꁈꏀꀺ,ꈴꌗꄜꃑꌠꌋꆀꏱꁈꉉꀽꌠꃅꋒ,ꐳꃅꐧꋦꇫꉈꇬꌠꏭꅇꏮ,ꃷꎏꈯꀨꉌꊋꎍꐽ。
（ꇖ）ꃹꅼꃅꇲꁵꁁꏯꐛꉻꐨꐥꃅꄺꀱꌠꄹꎆ,ꎍꐽꃅꅐꑘꃬꏣꇲꁵꃬꏣꑟꐨꊐꐕ。ꊋꀉꒉꃅꇤꄉꐥꄜꎆꏣꄖꄑ,ꐪꊛꄉꅐꑘꅉ꒜ꄐꊋꌋꆀꒃꅐꃬꏣꐛꏀꈴꑟꐨꊐꐕ,ꉪꇩꏤꅐꑘꃬꏣꇲꁵꃬꏣꎍꐽꐨꌋꆀꋓꅔꊋꃤꄝꏦꀋꊰ。
ꋍꆏꋍꑞꋍꉹꎆꏂꑘꈜꀕꇈꐧꀠꀄꊭꐭꌠꎆꏂꑘꌋꆀꑱꄂꇮꃼꇇꑱꁯꇬꊋꁈꄏꌠꊋꃤꁦꎆꃅꇱ。ꋍꑞꋍꑵꎆꏂꑘꇇꀨꊋꋠꐨꋊꑣꏱꁈꇇꈴꌠꄻꈝꐮꃅꄉ,ꍔꃚꎆꏂꑘꃆꂮꐥꌠꌤꆿꄾꌦꋩꃅꈄꏍꇬꄉꀞꄻ。ꇢꈴꁧꃤꃅꁌꎴꌠꋊꎵꋊꍬꊋꃤꁦꎆꃅꇱ，ꏟꈯꃅꋍꑞꋍꉹꋍꑵꎆꏂꑘꃆꂮꐥꌠꇗꐆꏦꐆꄉꁌꎴꌠꏢꇋ。ꎆꏂꑘꊋꌬ、ꈄꏍꌬ、ꎊꈬꎞꎭ、ꑳꊣꄻꑠꀨꊰꊨꒊꌠꄹꇙ，ꊋꃹꇨꌠꉇꄉꌠꇮꑘꀉꒉꌠꌋꆀꎃꐚꇮꑘꃼꇇꑘꄆꁌ5%ꊨꒊꌠꏱꁈꄯꎴꌊꎼꈎꈎꂫꇬꑟ,ꐳꏣꈄꏍꌋꆀꌐꌬꑟꐽꏡꌫꎆ15%ꊨꒊ。ꇩꁨꑳꇤꅐꇐꊣꁌꊨꏆ，ꋍꑞꋍꉹꑘꌋꊋꊡꄉꑳꊣꁌꊨꏆꅀꄯꄉꏮ。ꏤꈉꏤꄉꍔꃚꏲꉻ、ꇩꁨꎆꏂꑘꉹꁌꀰꏢꎆꏂꑘꐧꀠꀄꊭꎆꏂꑘꎝꁯꌠꌗꏢꉱꋃꌠꂿꃆꃅꌐ。ꑴꉴꄐꏁꌊꐥꄜꎆꏣꏭꇔꊰꏆ，ꃼꇇꑘꑴꉴꊋꊡꄉꇵꆅꇱꊼꇅꀉꒉꃅꄜꎟꌠꃅꄷꇬꎆꏂꑘꌋꆀꏶꃷꈘꆽꃅꃷ、ꀀꅉꋙꋠꒉꅝꅉ、ꎊꈬꎞꎭ、ꁱꀕꈩꀜꈩꆫꌋꆀꉈꉻꃼꇇꑠꉹꑘꎆꏂꑘꏭꋍꊭꃅꐙꌠꉚꎆꇔꊰꍆꁧꈨꊨꏆ。ꑘꀺꄉꀧꎆꉛꇔꊰꁥꁵꏱꁈꄻꃪ,ꀄꊭꐭꌠꎆꏂꑘꉌꒊꎆꉛ、ꊛꄉꎆꉛꑘꃆꃑꄻꍆꐪꉀꐕ，ꇬꂾꃢꌠꎆꉛꊋꁈꄏꌠꊋꃤꁦꎆꃅꇱ，ꀉꒉꉹꌠꃼꇇꑘꑴꉴꁊꈴꉹꌠꀄꊭꐭꎆꏂꑘꎆꉛꉀꎆꐳꐨꆏ40％ꄩꐂꌶ。ꎆꒉꎆꇁꏲꉻꊋꁈꄏꄉꀄꊭꐭꎆꒉꎆꇁꎝꃆꊫꌐ3000ꂡꂷꃑꌬꄉꌌꀄꊭꐭꎆꉛꌠꇬꃑꄻ。ꇬꌦꉌꒊꉹꌠꎝꊫꌐꄐꏁꌊꀊꌃꎆꏓꌠꆏꀒꄹꈎꄩ1ꃪꂡꂷꁦꎆ。ꐭꌺꎆꏂ꒧ꋋꈓꇬꎴꋭꌠꎝꐪ8000ꂡꂷꏓꌠꊥꎆ。ꎆꀨꃷꎏꊋꊡꄉꇵꆅꊜꄻꌠꈆꑪꇮꇐꉹꌠꐧꐭꎆꏂꑘꏭꎆꏓꊋꁈꄏꌠꊋꃤꀉꒉꃅꇱ。ꎆꏂꑘꀉꒉꌠꊋꊡꄉꎆꏓꊌꀐꌠꌌꌬꄉ,ꂴꁵꄻꌠꇶꏦꃅꄉꌌꐰꉎꐧꐭꎆꏂꑘꏭꎆꃀꀊꌃꃅꁵꄻ。ꄺꂡꑘꉹꁌꀰꏢꎆꏂꑘꉀꎆꎍꐽꌠꌋꆀꉹꏮꊐꐕꌠꇬꊋꁈꄏꌠꉜꐨꏤꄻꅐꇁ,ꃅꄷꊋꊡꄉꃷꎏꈴꌠꇇꁈꌌꊋꋠꇫꎍꌠꊈꂄꉹꁌꀰꏢꎆꏂꑘꏭꊋꋠꋊꑣꈭꋏꇇꀨꌠꃅ。
ꑍꆏꄺꂡꑘꊇꁧꀊꂥꃅꀻꎆꌠꄹꇙ。ꄺꂡꑘꐧꀠꀊꉗꃅꎆꉛꌠꇬꊋꁈꄏꌠꊋꃤꀉꒉꃅꇱ,ꀋꉬꀋꉆꌠꆏꀊꂥꉁꈾꄺꂡ、ꋊꃅꐥꌠꅐꑘꄺꀱꊐꐕ、ꄆꌅꈴꌗꄺꂡꑠꀋꉬꀋꉆꁁꏯꇬꊋꁈꄏ。ꄺꂡꑘꈯꄜꋓꅔꊋꃤꊐꐕꋉꃆꃄꌬꋒ,ꇮꇐꄺꀱꁧꃤꃅꉻꑫꄻꃪ。ꀑꊋꄺꑣꋉꃆꃄꌬ,ꄺꂡꑘꀑꁮꈴꃅꄺꀱꌠꄹꎆꌠꄐꇺꉜꐨꎥꃪꏤꄻꅐꇁ。ꏣꀋꑌꃅꇤꎸꅍꎆꏂꑘ“ꏓꄻꐯꇯꀱꌠꄹꎆ、ꉹꏮꌠꊥꎆ”ꌠꄹꎆ,ꐪꊛꄉꇓꋌꐈꇐꇮꑘꅐꑘꄐꉻꄻꃪ,ꐪꊛꄉꊻꂷꏓꋧꅉꇬꃨꆰꐈꇐꅐꇐꒃꅐꎆꏂꑘꎞꄻꄺꀱꌠꃄꌬ。ꀊꃴꄺꑣꋉꃆꃄꌬ。ꎸꅍꇤꐛꉻꄻꇱꉹꌠꋉꃆꄹꌬ,ꀑꁮꄺꑣꌠꌋꆀꋉꃆꄻꇐꇮꑘꐮꉔꀻꎆꌠꄹꇙ。ꇮꑘꇓꈓꀉꆹꌠꌋꆀꅐꀦꉹꌠꇓꈓꅐꑘꉹꏮꊐꐕꌡꀠꐛꅉꋈꄻꌠꊋꁈꄏ。ꂴꅑꄺꑣꑘꁥꏓꉘꉚꃅꉚꌡꀠꃄꄻ。
ꌕꆏꅐꑘꃬꏣꇲꁵꃬꏣꎍꐽꌠꄉꀧ。ꊋꏂꄉꎊꈴꎞꎭꈄꏍꄻꃪꌋꆀꄻꁣꀋꐥꃅꄉ,ꎆꏂꑘꊋꁈꄏꄉꀋꉬꀋꉆꌠꎊꈬꊭꄎꄉꌠꄻꁦꎆ。ꅐꑘꅉꃀꉈꑴꋈꄻꋉꃆꃄꌬ。ꊋꀉꒉꃅꅐꄉꅐꑘꒆꉻꀨꄐꏁꉹꌠꎆꏂꑘꉘꉚ,ꇩꏹꋓꅔꊋꃤꐥꌠꄺꑣꑘꂴꅑꁥꉘꉚ，ꅐꑘꃬꏣꃤꏓꋧꐛꐨꅐ。“ꌐꌃꋲꏀ”ꌠꐧꐭꎆꏂꑘꈨꉘꉚ。ꇲꁵꃬꏣꋬꂻꃨꆰꐨꄤꎖꌠꎥꃪꄉꃅ,ꒃꅐꊋꃤꄐꉻꄻꃪ,ꃛꊸꊜꄻꊭꊎꌠꁦꎆꇱ,ꀒꁨꋍꁘꃅꇲꁵꃬꏣꐕꄽꐨꌋꆀꎍꐽꐨꄻꀉꇨ。ꃹꅼꃅꇮꑘꐯꏑꈄꏍꏀꀺꀻꎆꋉꃆꃄꌬ，ꇮꑘꐯꏑꈄꏍꐽꈉꉻꑫꄺꑣ,ꇮꑘꐯꏑꈄꏍꐽꈉꇢꊭꇬꎕꏦꐯꊛꌠꄻꀉꇨ。ꂴꅑꄺꂡꑘꌋꆀꐛꏀꁧꃤꃅꑘꐮꉔꀻꎆꌠꄹꇙ,ꊋꀉꒉꃅꇤꄉꁧꃤꃅꉹꄻꑣꌠꀻꎆ。ꐳꃅꒃꅐꃅꐙꌠꁧꃤꃅꑘꄉꉻꁧꃤꃅꐽꈉꋈꄻꌠꄹꇙ，ꎥꃪꀖꁉ、ꐛꏀꎊꈴ、ꍤꄻꍤꎖꏚꍆꑠꒃꅐꃅꐙꌠꁧꃤꃅꑘꀻꎆ。
ꇖꆏꊋꏂꄉꇙꊋꀊꏀꌠꉘꉚꀉꒉ。ꃹꅼꃅꇩꏤꄐꇐꃅꐙꌠꏀꄓꅐꑘꁥꏓꀻꎆꋉꃆꄹꎆ,ꏀꀺꌋꆀꄉꉻꁧꃤꃅꏓꇱꄜꋈꄻꌠꊋꀥꇱ。ꄐꇐꃅꐙꌠꏀꄓꅐꑘꎆꒉꎆꇁꅐꇐꌋꆀꁧꃤꃅꇲꁵꌠꏀꀺ。ꃹꅼꃅ“ꉎꄂꌬꃷꁨꊋꁵ”ꌠꄹꎆ,ꃷꁨꈴꃅꉹꏮꌠꐋꀨꃅꐨ、ꐧꐭꎆꏂꑘꃷꂷꈴꊋꁵꌐꐘꃅꐨꌋꆀꃷꁨꎆꏣꑘꄟꀊꏀꌠꉘꉚꃅꐨꃄꌬ,ꃹꅼꃅꃷꁨꎆꏣꏀꀺꀻꎆꃅꉚꅉꋈꄻꌠꄹꎆ,ꄺꂡ、ꃼꇇꏮꈴꑠꎆꏣꐧꋦꀋꉬꀋꉆꁁꏯꃷꁨꈴꃅꉹꏮꌠꄹꇙ,ꃷꁨꃼꇇꃆꀻꎆ，ꃷꁨꇲꁵꃬꏣꋈꄻꌠꄘꄏ。ꃹꅼꃅꇩꏤꃷꁨꀉꒉꄐꇐꏤꁈ、“ꐯꏑꈄꏍ+”ꃅꐨꃄꌬ,ꀊꏀꉹꌠꀑꁮꇓꈓꋈꄻꌠꄹꇙ,5Gꃹꅼꃅꌫꄻꌠꄹꎆ。ꊋꀉꒉꃅꇤꄉꒆꇐꎆꏣꀻꎆ,ꊋꀥꇱꄉꒆꇐꅐꀦꀖꁉꌋꆀꌫꄻ,ꒆꇐꏓꋧꀻꎆꀊꂥꅉꈍꑋꈚꉘꉚ。ꐳꃅꀑꁮꄺꂡ、ꊿꀋꈁꃅꁆꌞ、ꈄꏍꇬꄉꌬꈧ、ꆅꉁꆄꄻꋬꂻ、ꏸꐕꊿꑠꏀꄓꅐꑘꀻꎆ。ꃼꇇꑘꃅꈯꐚꀻꎆꌠꊋꁈꄏ,ꃅꈯꅐꑘꃬꏣꁨꎆ，ꅇꈴ、ꈜꏁ、ꎴꌋꑠꊿꄻꃅꏸꌬꈧꌠꍔꐯ。ꇩꏤꏾꊋꅐꑘꀻꎆꄐꇐꏤꁈꄐꎖꌠꏤꄻ。ꊋꀦꀊꏀꐕꍯ、ꊋꊭꊎꅐꑘꀻꎆꌠꊋꁈꄏ,ꀑꁮꐕꍯꏀꀺꀻꎆꄐꇐꏤꁈꃄꌬꌠꄹꇙ。ꐳꃅꎴꅼꎿꃀꈹꄻꉗꄻꉁꈾꏀꀺꀻꎆ。
ꉬꆏꊋꏂꄉꋚꂷꉮꀋꐥꌠꌋꆀꂿꑘꁥꅐꇐꃷꎏꇲꃷꌠꏦꀧ。ꃹꅼꃅꂿꑘꇲꁵꁁꏯꐛꉻꐨꐥꃅꄺꀱ，ꋚꂷꉮꀋꐥꌠꌜꍈꃅꎁꄹꏦ、“ꋂꄮꆿꂷ”ꏃꍈꃅꎁꄹꏦꃶꐚꃅꃅ。ꀊꏀꈭꌠꇩꏤꋚꂷꉮꀋꐥꐧꀠꀁꎴꊬꌠꄐꎖꐱꀨ、ꃅꋊꀊꏀꋎꌠꂿꑘꒃꅐꊋꃤꄐꉻꌋꆀꐛꉻꋊꄻꄐꎖꌠꁰꄻ,ꅉꆺꑭꊂꇵꆅꁧꏖꌠꇂꃴꉪꇩꏤꋚꂷꉮꀋꐥꌠꄉꀧꌠꏭꊝꌠꄐꉻꏤꄻꄉꃅꇫꑟ,ꐳꃅꋚꂷꉮꀋꐥꏦꀧꏦꃤꏤꁱꅐꇁꌠꄹꇙ,ꃹꅼꃅꊈꂄꋚꂷꋉꃆꄹꎆ，ꐪꊛꄉꆖꂷꄖꄑꌄꆣꎖꄎꌠꃄꌬ，ꀊꃴꊈꂄꋚꋌꅐꇐꇲꁵꌠꁦꎆ，ꂿꑘꊿꊌꐨꁦꎆ、ꎆꏂꑘꅐꐨꁦꎆ、ꌬꈧꊿꈲꊌꌠꊥꎆ。ꏟꈯꃅꎕꏦꀊꂥꌠꋠꃅꋈꄻꌠꃅ,ꑛꌋꈤꊖꆈꀧꌋꃅꃅꐙꌠꃄꀱꃄꏢꃅꐨꄐꎖꌠꃄꌬ,ꀋꃅꋋꄮꇗꂷꑘꌋꆀꇙꀕꋦꁧꀧꌋꃅꄐꊋꊐꐕꋉꃆꃄꌬ,ꊋꀥꇱꄉꆅꁮꉮꄻꌠꍞꎖꌋꆀꄴꏮ。ꂿꑘꏸꐕꁥꁵꏱꁈꄻꃪ。ꃹꅼꃅꂿꑘꁡꇤꈆꑪꇮꇐꏀꀺꌠꄹꎆ，ꊋꀥꇱꄉꂿꑘꈆꑪꇮꇐꌧꊿꉘꉚ，ꋍꑞꋍꉹꂿꑘꈆꑪꎥꃪꑼꌙꌋꆀꒉꌶꅉꐯꏑꐊꃅꄉꐳꃅꀊꂥꏠꊐꌠꂿꑘꌧꊿꉘꉚꌠꄹꇙ，ꋚꂷꉮꀋꐥꈆꑪꇮꇐꄘꄏꌠꄻꀉꇨ。ꋚꂷ“ꅐꃼꊭꄻꃷ”ꌠꋮꐊꏓꇙꉻꑫꄻꃪꏀꀺ,ꋚꂷꃷꎏꍞꎖꂴꌗꋏꌋꆀꍞꏲꌠꊋꀥꇱ,ꋚꂷꊭꊎꉮꀋꐥꏲꂠꏦꉻꄻꃪ,ꏣꀋꑌꃅꃅꎸꋚꂷꊸꑳꅓꐨꃛꊸꐮꄙꐨꂥꀘ。ꂿꑘꄜꏂꀧꀧꁌꁥꁵꏱꁈꃅꑞꅉꑟꌠꒃꉇꋒ。ꎭ、ꍮꌦꀁꂥꐯꀁꂥꃅꎳꃼꌠꁌꏤꏱꁈꃅꇫꑟ,ꀀꃆ、ꆖꂷꃷꎏꈴꃅꎳꃼꌠꎆꁥꇱꉺꏦꄻꃪ，ꌑꇌꁻꌐꁌꏤꏱꁈꃅꇫꑟ。ꐪꊛꄉꃮꒃꅐꌠꒃꉇꋒ,ꐪꊛꄉꊋꀥꇱꄉꃏꍏꃮꆅ、ꆅꊌꐨꀉꇨꃅꐥꌠꅐꅑꇙꀕꆅꑠꇙꀕꆅꐨꀉꒉꀊꂾꌠꄴꏮꋎꍅ,ꆫꑘꒉꅐꇐꉗꄻꑘꊇꁧꉀꐕꄉꀻꎆꌠꊥꎆ,ꐳꃅꑍꑘꉀꄓꌄꆣꌠꄹꎆ。ꂿꑘꅐꇐꊸꑳꈻꐻꃬꏣꎊꈴꉁꈾꋈꄻꋉꃆꃄꌬ,ꂿꑘꁡꇤꄆꃼꇇꀻꎆꌠꊋꁈꄏ。ꂿꑘꅐꇐꀋꉬꀋꉆꌠꈏꃹꀉꑌꑵꌠꄐꉻꄹꎆ，ꀀꊿꐥꐨꇬꀋꌬꀋꉆꌠꅐꇐꇲꁵꄉꀧꋊꄻꌠꃅꋒ,ꋚꋌꎸꏿꌩꋚꇓꂷꉐꀖꃱꁧꑠꂿꑘꅐꇐꀋꉬꀋꉆꌠꊇꁧꉮꀋꐥ、ꇲꁵꎍꐽꌠꏦꀧ。
ꃘꆏꊋꏂꄉꊋꀦꋬꂻꌠꏦꀧ。ꄔꐽꃅꊖꌋ、ꇓꋌ、ꋌꐛꐞꌗꌋꆀꄆꊋꒃꅐꇲꁵꊭꊎꃷꄻꉻꑫꌋꆀꇓꋌꊭꊎꅉꁍꋈꄻꌠꄹꎆ,ꊋꀥꇱꄉꊖꌋꄆꇓꋌꐞꌗꏮꌬꌠꋊꄻ。ꇩꈐꇩꉈꇲꈉꃅꒊꃅꇁꀉꒉꀊꂾꃅꐛꐈꌠꅐꇁꌠꏭꊜꄻꌠꂴꄐꄉꌠꄐꉻꄻꐛꒆ,ꇲꈉꀑꐱꐮꆽꏣꌠꌋꆀꃷꎏꎍꐽꃅꏮꈴꌠꄉꀧ。ꐪꊛꄉꇓꋌꐞꌗꎹꄻꀖꁉꌤꃅꌠꃅꋒ,ꐳꃅꇓꋌꐞꌗꇑꑘꌅꈌꃄꁕꋓꅔꏆꅐꌠꄹꎆ。ꐳꃅꇓꋌꐞꌗꁠꐤꌋꆀꊭꊎꋉꃆꋈꄻ,ꇓꋌꐞꌗꁠꐤꀰꏢꉺꏦꄻꐛꒆ,ꁠꐤꉁꈾꐽꊯꃅꁉꃑꌠꄹꇙ。ꊋꏂꄉꊖꌋꄆꄺꀱꊐꐕꌠꄹꇙ,ꏣꀋꑌꎍꐽꃅꒉꄆꀻꎆ,ꉮꀋꐥꂴꅑꌠꉿꄆꀻꎆ,ꆳꄆꇨꃛꄆꃑꌠꋭꋽꃅꀻꎆꌠꄝꏦꀋꊰ,ꐈꇓꀋꉬꌠꊋꀦꁦꎆꃷꁨꈯꀨꐛꌠꄹꇙ。ꉈꑴꒆꉆꊋꀦꄆꊋꌬꇱꌫꄻꎴꈲꉺꏦꄻꐛꒆ，ꏣꀋꑌꃅꀊꄶꄉꈛꑌꅉꄉꌬꇱꈁꏦꀊꏀꌠꄹꎆ。ꊱꁨꃅꌜꐂꃄꁕꐂꌠꄆꎭꈴꈜꋈꄻ,ꊋꀦꉻꑫꌞꎭꌋꆀꋊꄻꄐꊋꊐꐕ。ꐪꊛꄉꄆꊋꃛꊸꊜꄻꉻꑫꋈꄻꌠꄹꎆ,ꐲꄻꊜꄻꄐꊋꉀꐕ。ꄆꊋꃼꇇꃅꏲꉻꄂꋦꏦꐛꃅꏮꈴꌠꄹꇙ,ꇩꏤꑭꊂꋍꃱꃅꌠꄆꊋꃷꎏꋈꄻ,ꐊꑷꃅꀰꏢꃅꐙꌠꄆꊋꌬꌠꄆꃑꄆꌬꎖꄎꄝꃑ,ꃷꁨꁦꎆꄉꄆꇱꄻꄺꀱꃅꉚꌠꃅꑞꅉꑟꄉꇿꋌꊌꐨꐥꌠꄹꇙ。ꃹꅼꃅꄆꈄꏍꎆꏂꑘꉁꈾꄺꑣ、ꄐꎖꃄꄻꑠꋓꅔꃅꐙꌠꃅꑘꄺꀱ。
（ꉬ）ꀋꎪꃅꏀꀺꅸꇙꀻꎆꄐꇐꃄꌬ，ꈆꑪꇮꇐꏀꀺꌠꎆꏣꀻꎆꌠꇬꄘꄏꂿꄐꄻꀉꇨ。ꋒꐯꋒꃅꏀꀺꉘꃀꇙꊋ、ꌧꊿꉘꃀꅐꀦꂿꄐꋊꇤꅐꇁ,ꊋꀉꒉꃅꅐꄉꈆꑪꉌꊈꌋꆀꇔꇷꉌꊈꍔꆙ,ꑘꃅꌠꀑꑊꁤꇅꀕꌠꐧꋦꑌꀹꌋꆀꉾꉎꉾꎹꌠꃅꑘꁌꒉꊿꀹꄺꑣ，ꐳꃅꏀꀺꉹꌠꇩꏤꋈꄻ。
ꋍꆏꐳꃅꀋꉬꀋꉆꌠꈯꄜꇮꇐꈢꇓꀖ。ꐧꋦꉪꏦꃷꎏꎆꏣꇎꏦꇂꃴꀋꉬꀋꉆꌠꈯꄜꇮꇐꈢꇓꀖꀊꏀꉹꌠꇩꑭꊂꏦꉻꏓꄻ。ꈆꑪꇮꇐꌐꐘꀉꒉꀊꂾꌠꋍꊐꋍꊐꃅꐯꊛꌠꇬꃆꂮꐥꌤꃅꌠꍔꆙ,ꐳꃅꈆꑪꇮꇐꏀꀺ2030—ꐘꃆꀉꒉꀊꂾꌠꊥꇬꄉꃄꌬ。ꉹꑘꈁꐥꌠꇩꏤꒃꅐꈴꃅꌫꄻꌠꏭꉜꄉꌠꅉꃀꄘꄏꐽꈉꏓꄻꌠꊋꁈꄏ。ꅉꃀꎥꃪ、ꇬꀦꏀꀺꌠꇬꊋꊡꊋꁈꄏꌠꏦꉻꉺꏦꄻꐛꒆ,ꃷꎏꈴꌠꀊꏀꉹꌠꎥꃪꀖꁉꏲꉻꀻꎆ,ꎆꏂꑘꑠꐧꋦꊋꃤꊋꊡꄉꁦꎆꃅꎆꇱ。ꐳꃅꎆꏂꑘꇮꇐꏀꀺꄐꊋꊐꐕ,ꇩꁨꎆꏂ꒧ꇮꇐꏀꀺꐛꐪꌌꍤꎖꉺꏦꇬꇱꌠꎥꃪ。ꐳꃅꉘꃀꇶ(ꋬ)ꌠꇮꇐꉁꈾꀉꒉꀊꂾꌠ、ꌬꇐꀊꏀꀋꇎꇨꌠꎥꃪꄺꑣꌋꆀꀋꉬꀋꉆꐮꐊꃅꐙꌠꇮꇐꐽꈉꋈꄻꌠꄹꎆ。ꏀꀺꅐꇐꌫꄻꌠꇬꊋꁈꄏꌠꍔꃚꃻꄻꏱꁈꄻꃪ。ꌷꑫꀉꑌꊋꃤꏓꇱꄉꈆꑪꎥꃪꈢꇓꀖꌠꃅ,ꊋꀥꇱꄉꏀꉹꌀꌡꋍ꒜ꆅꇵꅽꇁꀦ、ꄜꁊꆅꌸꈳꏦꑠꎥꃪ,ꁬꋌ、ꆅꁿꋌꎥꃪꊋꃤꌋꆀꃛꊸꊜꄻꒃꅐꄐꊋꋈꄻ。ꒆꇐꉮꀋꐥꅉꃀꉁꈾꋈꄻꌠꌆꈬ,ꏓꇲꃅꒆꇐꉮꀋꐥꈆꑪꇮꇐꈢꇓꀖꎖꄎꌤꃅꌠꃅꋒ。ꐳꃅꇩꏤꇮꇐꉮꀋꐥꏲꂠꃷꁨꋏꄯꒉꄹꏦꄻꃪ。
ꑍꆏꊋꀥꇱꄉꏀꀺꄐꊋꋈꄻ。ꀊꏀꈭꌠꇩꏤꐧꀠꀊꉗꌠꈆꑪꇮꇐꀻꎆꄐꎖꌋꆀꇩꏤꈆꑪꇮꇐꅉꃀꉁꈾꀉꒉꀊꂾꌠꋈꄻꄐꎖꁰꄻ。ꅉꃀꎥꃪꌠꌋꆀꇬꀦꏀꀺ、ꁏꆷꃅꐙꌠꇮꇐꏀꀺꌠꊋꀥꇱ,ꐳꃅꇩꏤꃅꉚꅉꏓꄻ,ꇩꏤꀋꉬꀋꉆꌠꃅꉚꅉꉻꑫꋊꍬꐯꇯꀱ,ꐳꃅꌷꑫꐂ、ꀉꒉꃅꇷꃅ、ꇨꐨꀊꂥꌠꋯꐊꏀꀺꅉꃀꐽꈉꋈꄻ。ꈆꑪꇮꇐꏀꀺꈯꄜꌋꆀꏓꇱꃅꐙꌠꇩꏤꈆꑪꈯꄜꋈꄻꌠꄹꇙ,ꈆꑪꃅꈆꑪꇮꇐꅉꃀꉁꈾꀉꒉꀊꂾꌠ、ꈆꑪꂘꑘꅉꃀꉁꈾꌋꆀꇩꏤꅐꑘꏀꀺꈯꄜ、ꋉꃆꎥꃪꈯꄜ、ꇮꇐꏀꀺꈯꄜ、ꄺꑣꑘꏀꀺꈯꄜ、ꇲꁵꃬꏣꈆꑪꀹꄻꈯꄜꄐꄻꋈꄻ。ꀋꉬꀋꉆꌠꐘꃆꈢꇓꀖꇬ“ꊾꂓꄜꊥꃀꄀ”ꌠꃄꌬ。ꈆꑪꇮꇐꊌꐨꆹꏮꉻꏦꄺꀱ，ꏀꀺꃬꏣꄻꁣꀋꐥꃅꄉ，ꏀꀺꌠꊋꊡꊋꀋꐛꌠꏭꏆꌠꈆꑪꎥꃪꋦꈭꄺꑣ。ꌐꐘꀉꒉꀊꂾꊌꐨꅐꑘꈴꌠꇬꊋꁈꄏꌠꇱꄻꏱꁈꏤꄻ,ꏀꀺꌧꊿꉘꉚꊋꁈꄏꌠꉺꏦꌋꆀꏱꁈꄻꃪ，ꌧꊿꉹꁸꈋꍣꉻꑫꄻꐛꒆ。ꇩꏤꑴꌅꏀꀺꌡꀠꃅꄷꌋꆀꀊꂥꀊꏀꐎꏀꀺꀻꎆꑟꐨꊐꐕ。
ꌕꆏꏀꀺꑘꀺꀹꄻꊇꁧꀊꂥꃅꀻꎆꌠꄹꎆ。ꀊꏀꈭꌠꐊꑷꃅꏀꀺꄺꀱꃅꉚꌠꃄꌬ。ꎆꏂꑘꌌꈯꀨꃅꄉ、ꃷꎏꌌꄐꏁꌐꍝꃅꄉ、ꅐꌷꎥꃹꅼꃅꏓꐊꌠꇮꇐꏀꀺꉻꑫꄻꐛꄻꐛꒆ,ꎆꏂꑘꀉꒉꐧꀠꀄꊭꌠꌋꆀꋍꑞꋍꉹꀨꄜꐮꈴꏀꀺꌠꊋꁈꄏ。ꋓꀺꌡꀠꅉꁍꈨꋈꄻ,ꋓꀺꄘꄏꐽꈉꐘꃆꈨꃄꌬ。ꌡꀠꅉꁍ“ꌶꅉꎆꏂꑘꃄꄻ”ꌠꌐꐘꃅꐨꃄꌬ。ꐳꃅꑘꀺꎆꇱꁁꏯꇬꏦꉻꉺꏦꄺꀱꌠꄹꎆ。ꃹꀿꅍ、ꋍꏅꁦꄻꈥꈉꑠꏀꀺꑘꀺꁧꃤꃅꏲꉻꏭꏱꁈꊋꁈꄏꌠꊋꃤꀉꒉꃅꇱꌠꎥꃪ。ꇵꆅꇱꁧꏖꌠꎆꏂꑘꏭꇇꀨꄏꐓꌠꊋꃤꀉꒉꃅꇱ,ꑘꀺꄉꀧꎆꉛꊜꀠꈍꈐꍔꒉ,ꊈꂄꐘꃆꏭꄉꀧꁏꇖꐨꏆꇤꇧꎭ,ꀋꉬꀋꉆꊿꁥꌠꑘꀺꅉꇬꊋꁈꄏꌠꊋꀥꇱ。
（ꃘ）ꐪꊛꄉꃷꎏꈴꃅꄺꀱꌠꄹꎆ,ꀒꁨꋍꁘꃅꎆꏣꀻꎆꇙꊋꋊꃑ。ꃛꊸꃅꀒꁨꋍꁘꃅꃹꅼꃅꄺꀱꌠꏡꁈꏤꄻꅐꇁ,ꊋꏂꄉꀻꎆꌠꇬꏢꑲꌠꏦꉻꉺꏦꇊꑴꀖꀺ,ꐧꋦꉪꏦꅉꀨꎆꏣꄹꏦꌭꈬꌋꆀꄻꃪ。
ꋍꆏꃹꅼꃅ“ꄝꏲꃅ”ꌠꄺꀱ。ꐊꑷꃅ《ꃼꇇꀰꏢꋦꈭꄻꃪꃷꋪ》ꃅꇫꑟ,ꇵꆅꄴꏮꋎꍅꊬꌠꇬꃅꄷꋍꑞꋍꈚꇬꇿꋌꀉꇨꃅꎆꏂꑘꁧꃤꃅꌠꎖꋪꃄꄟꏓꈹꄹꌬ。ꃼꇇꀰꏢꋦꈭꈋꍣꌐꁧꉻꑫꌋꆀꈋꍣꏡꁈꄻꃪ,ꇩꏤꑭꊂꄃꊐꌠꌋꆀꈋꉐꇓꈓ、ꇩꏤꊐꌠꑟꐎꇬꄉꏤꈉꐥꃅꍏꇩꃼꇇꀰꏢꋦꈭꈋꍣꌠꃅ。ꃅꄷꋍꑞꋍꈚꌠꎆꏂꑘ“ꈄꏍꇬꈴꄉꀞꌐ”ꌠꐽꈉꄻꄉꌠꄹꇙ,ꀒꁨꋍꁘꃅꍤꄻꈌꁧꌠꌋꆀꁱꄀꇇꈴꌠꄻꈝꐮꃅꄉ,ꎆꏂꑘꈴꎁꉬꇮꃅꈄꏍꇬꄉꀞꄻꌠꄻꄉꌠꃅꇫꑟ。ꀄꊭꐭꌠꎆꏂꑘ、ꑱꄜꃼꇇꃅꑱꁯꀰꏢꃼꅉꁱꄀꏢꑲꌠꄝꏯ，ꋍꑞꋍꉹꑘꀺꊿꀰꏢꁱꄀꌠꃅꌒꎻꄉ，ꐳꃅꄏꐓꏱꁈꇬꈴꊌꎻ。ꃹꅼꃅ“ꊪꄳꊫꌐꁷꐞ”ꄺꀱꌠꄹꎆ。ꀒꁨꋍꁘꃅꍏꑷꌋꆀꃅꄷꊐꇬꏤꄻꄉꌠꏲꑘꃅꉆꌠꌋꆀꅺꇰ、ꁱꄀ、ꈎꍤ、ꏚꍆꑠꌤꐘꍅꊨ。ꃹꅼꃅꎆꇱꍤꄻꈌꁧꄹꏦꄺꀱꌠꃅ,ꎆꇱꍤꄻꈌꁧꃷꁨꋏꄯꒉꄹꏦꄻꐛꄻꐛꒆ,ꎆꇱꐘꃆꋍꃱꃅꌠꎃꊐꌐꂷꄹꏦꄻꃪ。ꏓꇱꍤꄻꈌꁧꌠꄹꌬ,ꅇꏤꒃꄹꏦꄺꀱꌠꏁꇬ,ꀒꁨꋍꁘꃅꐘꃆꃅꑞꅉꑟꑘꅐꐨꉀꐕ。“ꇗꏦꀉꑌꑵꏓꋍꏢꃅ”ꌠꌌꅉꃀꃅꄉ,ꃹꅼꃅꄐꎖꃄꅉꌬꌠ“ꀉꑌꃢꃅꍤꄻꌠꏓꋍꃢꃅꌠ”“ꊫꌐꀉꑌꑵꏓꋍꏢꃅꌠ”ꄺꀱ,“ꀉꑌꃢꃅꍤꎖꌠꏓꋍꃢꃅꌠ”“ꀉꑌꃢꃅꎖꎴꌠꏓꋍꃢꃅꌠ”ꄹꎆ。ꐳꃅꍔꃚꃻꄻꏦꃤꌋꆀꃄꊙꊙꃅꏦꃤꄺꀱꌤꃅꌠꄹꎆ。ꃷꎏꍞꏲꁁꏯꄚꃆꂮꐥꌠꌤꏲꅉ“ꑍꈁꏾ、ꋍꄇꄜꋊ”ꍞꏲꌠꉱꑷꈴꌠꃅꇫꑟ。ꄉꉻꅐꀦꃼꇇꃷꎏꉾꃪꊱꁨꃅꀻꎆꌠꊥꎆ,ꐊꑷꃅꄆꌅꈴꃅꃼꇇꃅꌠꃄꌬ。ꃹꅼꃅ“ꐯꏑꈄꏍ+ꏲꃆꁧꃤꃅ”ꌠꄹꎆ,ꐳꃅꇩꏤꑭꊂꏲꃆꁧꃤꃅ“ꈄꏍꋍꈚ”ꌠꄺꑣ,ꀒꁨꋍꁘꃅꇗꏸꀞꄻꌤꐘ、ꇗꏸꏮꄮꈉꍅꊨ,ꋍꑞꋍꉹꇙꉆꁨꇐꁱꄀꌠꌋꆀꌅꈌꈲꁧꄉꀧꁱꄀꉻꑫꋊꍬꐯꇯꀱ,ꀋꆏꃅꏲꃆꁧꃤꃅꇿꋌꊐꐕ。ꊋꀉꒉꃅꇤꄉꉌꒊꅇꏤꒃꄹꏦꄹꌬ,ꃹꅼꃅ“ꉌꒊꎆꉛꈝꐮ”ꌤꃅꌠꃅ,ꐧꋦꉌꒊꉻꑫꋈꄻꌠꏦꏲꈴ、ꋊꍬꈴꌠꑟꐨꊐꐕ。ꉹꑘꑠꉼꃼꇇꉼꌋꆀꏲꑘꌤꏲꅉꐮꐞꄺꀱꌠꀑꐱꃅꃅꌐ。
ꑍꆏꎕꏦꀊꂥꌠꃷꎏꉻꑫꋈꄻ。ꃅꋊꀊꏀꋎꌠꐳꃅꐧꋦꉪꏦꃷꎏꎆꏣꏦꉻꄻꃪꌠꉜꐨꃄꌬ。ꎕꏦꀊꂥꌠꃷꎏꉻꑫꋈꄻꃅꐨꄐꉻꏤꄻꃄꌬ。ꀊꅰꃅꉾꃪꌠꐊꊈꃷꎏꈴꃅꁆꄻꌠꏦꉻꉺꏦꏓꄻ,ꐊꊈꃷꎏꈴꃅꁆꄻꌠꏓꇱꄺꀱꃅꉚꌠꃅ。ꐊꑷꃅꃷꎏꃹꉆꃷꁨꋏꄯꒉꄹꏦꃄꌬ,ꁧꃤꃅꑘꌌꀋꉬꀋꉆꌠꃅꄉꃷꎏꃹꉆꐨꄝꏯꃅꉚꌠꃅ,ꃷꎏꃹꃷꁨꋏꄯꒉꃅꉆꌤꐘꍤꄻꈌꁧꌠꈄꏍꇬꄉꍞꏲꌋꆀꏓꇱꄤꎖꌠꃄꌬꌠꎹꎥ。ꃅꄷꃷꎏꇬꃹꉆꌠꂁꐥꃅꐙꌠꁿꇓꁱꄀꄯꒉꄻꐛꌠꄹꇙ,ꀋꉬꀋꉆꌠꉹꁌꀰꏢꎆꏂꑘꈜꀕꇈꐧꐭꎆꏂꑘꈏꃹꉆꌠꋍꇈꌠꋊꑣꇧꎭ。ꋓꅔꏱꁈꄐꇺꉜꐨꎥꃪꏤꄻ,ꀋꈐꀋꉈꃅꋓꅔꌠꍤꄻꄹꏦꃄꌬꏦꋧꄺꀱꄻꃪ。ꋍꑞꋍꉹꁨꇐꌅꈌꐥꊯꀧꌋꃅꌠꏦꃤꏤꐪꄻꀉꇨꃅꄉ。ꉹꁌꀰꏢꎆꏣꀻꎆꌠꊋꁈꄏꌠꏦꏲꋦꈭꄻꐛꒆ,ꉹꁌꀰꏢꌠꎆꏂꑘ、ꉹꁌꀰꏢꎆꏂꑘꌋꏦꊒꃅꁨꇐꌅꈌꌋꆀꀰꏢꌅꈌꀧꌋꃅ。ꇂꇎꌠꏭꁏꌠꌋꆀꀋꎃꀋꊒꃅꋓꅔꌠꏭꁏꌠꏦꌬꌠꊋꀥꇱꌋꆀꄻꃪ,ꀉꇨꃅꎆꏂꑘꃼꇇꑘꂁꇐꀧꌋꃅ。ꌧꇐꅏꄻꌅꈌꉄꌎꌠꅓꀞꐨꐥꌠꀵꊒꄹꏦꄻꐛꄻꐛꒆ,ꌧꇐꅐꇐꌅꈌꏦꌬꊋꃤꁦꎆꇱ,ꊋꀥꇱꄉꌐꈲꆹꏮꌋꆀꌫꄻ。
ꌕꆏꐳꃅꇩꏤꁨꇐꇩꁨꎆꏂꑘꌋꆀꀋꉬꀋꉆꌠꉹꑘꄺꀱ。ꇩꁨꎆꏂꑘꄺꀱꌕꈎꃅꐨꄐꉻꏤꄻꃄꌬ,ꐳꃅꇩꁨꎆꏣꄐꉻꄻꃪꌋꆀꐛꉻꋊꄻꌠꄹꇙ,ꐛꏀꎆꏂꑘꄹꏦꄻꐛꒆ，ꊋꏂꄉꎆꀨꏲꌠꌌꀨꄜꃅꄉꌠꇩꁨꁨꇐꍞꏲꏦꉻꏓꐛ。ꏣꀋꑌꃅꃹꅼꃅꌼꐊꁨꏦꄺꀱ,ꇖꁥꃅꉚꌠꃅꃹꅼꃅꃶꐚ,ꃹꅼꃅꇩꁨꎆꏂꑘꌼꐊꁨꏦꄺꀱꌠꃄꌬꉜꐨꏤꄻꅐꇁ。ꃷꎏꈴꃅꎝꃆꏮꇴꍆꐛꌠꃷꁨꁦꎆꇱꑊꍔꒉꊇꁧꉀꐕꌠꄹꇙ,ꎆꒉꎆꇁꁨꇐꎆꇱꇬꌦꄐꏁꌊꋊꃅꐥꌠꅐꑘꃷꎏꈴꃅꄺꀱꌠꄹꎆꌠꇬꃅꈽ。ꐳꃅꇩꁨꎆꏂꑘꇬꎞꆏꊿꐧꋦꈴꃅꏲꂠꌠꄹꎆ，ꀑꐱꃅꐧꋦꌅꊋꀞꌠꐒꇽꌠꌋꆀꐩꋊꊏꄉꇈꌠꌤꃆꂥꀘꌠꃅꌐ。
ꇖꆏꃹꅼꃅꏱꎆꇗꏸ、ꎆꒉꎆꇁ、ꁌꏤꏦꉻꄺꀱ。ꏟꈯꃅꍏꑷꌋꆀꃅꄷꏱꎆꌤꌅꈌꌋꆀꌬꐨꆽꎍꐨꁷꄻꄺꀱꌠꄹꎆ,ꃅꄷꇗꏸꉻꑫꄻꐛꒆ,ꋍꁘꋍꁘꃅꌬꈧꇗꏸꎳꄻꈭꊭꊁꎞꄷꀋꁧꄔꐽꃅꁆꁸꃅꄷꁵ。ꀋꐥꅉꃀꄐꌗꉪꉻꌫꄻꌠꎹꎥ,ꌬꐨꄃꐛꐛꊂꅥꁖ。ꀒꁨꋍꁘꃅꇩꁨꎆꀨꊌꐨꄀꎃꐚꄉꉻꄐꌗꌠꇬꇱꌠꍆꁧꉀ。ꃹꅼꃅꎆꒉꎆꇁꇲꁵꁁꏯꐛꉻꐨꐥꃅꄺꀱ,ꎆꏓꐛꉻꌋꆀꎆꒉꎆꇁꏲꉻꉻꑫ、ꃷꎏꉻꑫ、ꅐꇐꉻꑫꄻꃪ,ꊱꁨꐥꃅꊭꊎꃷꁨꇙꈧꇔꊰꎆꉛꁌꏤꄻꅉꃀꎕꏦꏭꆦꌠꄹꎆ。ꑘꀺꉹꌠꄺꀱꄷꀋꁧꃅꉚꁱꄀꄹꏦꉻꄜꃄꌬꄐꉻꏤꄻꅐꇁ,ꐪꊛꄉꈛꎂꃅꎆꏓꈜꀕꇈꇴꍆꌅꈌꎆꏓꍆꁧꉀꐕ。ꍞꏲꀱꏮꑍꊬꌠꎭꇱꄆꁌꄺꀱꌠꃅꌐ,ꃹꅼꃅꉻꌬꌤꑘꁌꏤꄺꀱ,ꇓꈓꏦꎫꒉꇲꁵ、ꄆꇲꁵ、ꐞꌗꇲꁵ、ꊸꇲꁵꉹꑘꁌꎴꌠꋊꎵꋊꍬ,ꊖꌋꄆꃑꁌꏤꏓꐛꉺꏦꄺꀱꌠꃅꇫꑟ,ꇓꈓꏦꎫꐥꐨꑬꍸꀖꑘꀞꄻꍣꐨꐥꃅꁌꎴꌠꏱꁈꄹꌬ,ꐪꊛꄉꃹꅼꃅꄆꁌ、ꀆꐒꁌ、ꍍꒉꀞꄻꁌꄺꀱ。ꇓꋌꐞꌗꁠꐤꈄꏍꏓꐛꉺꏦꄻꃪ。
（ꏃ）ꏓꇲꃅꇓꈓꇓꉈꃄꁕꋮꄮꃅꀻꎆꌠꄹꎆ,ꊇꁧꀊꂥꃅꀻꎆꌠꇙꊋꇁꀦꉗꄻꀉꇨ。ꃅꄷꋍꑞꋍꈚꇬꊼꇅꂱꎆꅑꐨꋊꇤ,ꑣꋂꄖꄑꌄꆣꄐꇐꏤꁈꌋꆀꀊꏀꉹꌠꇓꈓꏦꎫꐛꈴꌠꄐꇐꏤꁈꃅꑞꅉꑟꄉꇿꋌꐥꌠꄹꇙ。
ꋍꆏꀉꒉꀊꂾꌠꃄꁕꀻꎆꄐꇐꏤꁈꃅꑞꅉꑟꃅꑭꋧ。ꃄꁕꋮꄮꃅꀻꎆꌠꉺꏦꀊꏀꌠꃅꑞꅉꑟ,ꐪꊛꄉꁮꐚꁁꏯꀉꒉꃅꀖꁉꌠꄹꎆꄉꐛꉻꀊꏀꌠꏓꐛ,ꑛꌋꈤꃅꄷꐊꑷꃅꉀꄓꌄꆣꈁꉬꁁꏯꃅꉀꄓꌄꆣꌠꇬꊋꁈꄏ,ꈯꄔꃅꄷꉀꄓꇁꌠꏱꁈꉻꑫꌋꆀꌤꃅꉺꏦꄻꐛꒆ,ꐪꊛꄉꁭꅐꃅꄷꂴꅑꄉꀻꎆꌠꄹꇙ。ꅼꅉꉜꄉꏢꏸꏹꋮꄮꃅꀻꎆꌠꄹꎆ,ꐳꃅꑪꉢꑟꐎꋈꄻꐘꃆꀋꉬꀋꉆꌠꃄꌬ,ꀙꏢꇩꏤꏓꈌꂿꄐꀋꉬꌠꎵꃪꏱꁈꉻꑫꄻꃪ。ꊋꀉꒉꃅꇤꄉꍤꏦꎆꏣꁕꒆꉻꋦꈭꌤꃆꑓꅐꎑꌠꋊꄻꌠꌋꆀꉻꑫꐨꐥꃅꀧꌋꃅꄻꐛꅉꐛꌠꄹꎆ,ꐳꃅꏓꇱꈭꈜꎞꎭꉻꑫꄻꐛ,ꅔꈐꒊꃀꇉꄺꀱꌠꊥꎆ。ꒀꇤꀎꄊꊅꐎꅉꃀꉁꈾꐮꇙꐮꈴꌠꄹꇙ,ꊱꁨꃅꇩꏹꈆꑪꇮꇐꏀꀺꈯꄜꋈꄻꌠꃅ,ꐳꃅꉿꏿ、ꉸꄨꑠꀉꒉꀊꂾꌠꇷꃅꐽꈉꋈꄻ。ꎕꏦꀊꂥꍤꏦꌕꎏꒆꉻꀊꃴꋍꉻꈴꌶꀠꐛꅉꋈꄻ,ꍤꏦꌕꎐꈭꈜꋍꉻꈴꃅꊇꁧꀊꅰꀊꂥꃅꀻꎆꌠꄹꇙ,ꉼꐇꇩꏹꁉꃑꏍꊨꋈꄻ。ꉸꉼꒊ꒜ꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆꌠꄐꎖꐱꀨꁰꄻꌋꆀꏤꄻꃄꌬꌤꃅꌠꃅꋒꌠꒃꉇ。ꊋꀉꒉꃅꇤꄉꍰꒄꃅꄷꑍꇓꈓꎆꏣꈭꊂꋈꄻꌠꇬꊋꁈꄏ,ꇩꏤꑭꊂꊇꁧꀊꂥꃅꀻꎆꌠꉀꎆꊧꀋꉬꀋꉆꌠꄺꑣ。ꏣꀋꑌꃅꁮꐚꁁꏯꅔꎿꈴꈜꀊꏀꌠꋈꄻꌠꄹꎆ。ꐮꊒꄉꇇꀨꌠꌌꃹꅼꈴ。ꀁꑌꊿꋅꌋꆀꊿꋆꃅꄷꐳꃅꀻꎆꌠꇬꊋꁈꄏ。ꇩꏤꊐꌠꑭꐎ、ꀖꁉꅉꑠꂿꄐꐽꈉꏀꀺꊐꐕꀻꎆꌠꄹꇙ,ꐳꃅꅐꀦꉹꌠꃅꄷꎆꏣꉹꏮꌠꌋꆀꇮꑘꀉꆹꇓꈓꄺꀱꌠꄹꎆ。ꎭꑭꊋꀦꇝꂱꏓꇱꄺꀱꃅꉚꌠꄹꇙ。ꐪꊛꄉꊪꊛꅐꑘꆹꏮꌶꀠꐛꅉꋈꄻꌠꄹꎆ,ꇎꏦꐥꌠꅔꈐꇓꈓꇬꀊꂥꊐꌠꄺꂡꑘꅉꁍꈨꄺꑣ。ꎿꃀꎆꏣꀻꎆꄉꐳꃅꎿꃀꇩꏤꀉꇨꌠꋈꄻꌠꉜꐨꏤꄻ。ꀨꄜꂿꄐꃅꄷꄐꇐꏤꁈꌋꆀꄹꏦꄻꃪ,《ꇩꏤꑭꊂꇩꏤꃄꅉꈥꈉꄐꎖꐱꀨ(2021—2035)》ꁰꄻ。
ꃛꀙꌜꎆꏣꐧꋦꀻꎆꌠꇬꊋꁈꄏꌠꋍꋬꈭꏱꁈꃄꌬꋒ，ꃅꅍꊌꌠꀧ、ꉹꁌꐨꐥꀧ、ꏮꈴꌠꌋꆀꅐꑘꃬꏣꇲꁵꃬꏣꎍꐽꃅꏭꌬꌠꀧꄉ，ꃛꀙꎆꏣꐧꋦꏮꌬꎃꐚꐥꀹꐊꑷꃅꀱꐛꅉꐛꌠꊥꎆ。
ꑍꆏꊿꌌꈯꄜꃅꄉꌠꀊꏀꉹꌠꇓꈓꏦꎫꐛꈴꋈꄻꌠꄹꎆ。ꂿꑘꆹꏮꊻꂷꇓꈓꀀꊿꐛꌠꊇꁧꉀꐕ,ꀒꁨꋍꁘꃅꇱꄻꏱꁈꄻꃪ,ꊻꂷꀀꐴꀋꉬꌠ1ꂡꇓꈓꇬꑱꈿꌠꁻꌐꄹꇙꄉꃅꌐ。ꇓꈓꀉꒉꐯꀉꒉꌠꄐꏁꌊꐊꊈꀉꇨꀊꂥꌠꁆꄻꄐꊋꌋꆀꇩꏹꋓꅔꊋꃤꊐꐕ,ꐳꃅꉈꏭꉜꄉꈯꄜꂿꄐꀋꉬꌠꎵꃪ。ꌜꉼꌋꆀꄃꊐꌠꏃꑠꇓꈓꀉꒉꐧꀠꌠꇓꈓꂿꄐꄻꃪꌠꄹꇙ,ꀋꇎꅉꅋꑣꊋꁧꈭꊭꄻꀉꇨ,ꄉꉻꁧꃤꃅꊇꁧꄻꃪ,ꀀꌒꃅꌒꑟꐨꊐꐕ。ꐳꃅꑤꇓꈓꀊꏀꉹꌠꇓꈓꏦꎫꐛꈴꋈꄻꌠꄹꎆ,ꋦꈭꁦꎴꆄꄻ、ꏃꍔꉻꌬ、ꄉꉻꁧꃤꃅ、ꅐꑘꇱꄻꑠꁁꏯꀋꇎꅉꊋꁧꅉꅋꐯꊯ，ꂿꑘꊿꋍꑍꋍꉙꃅꁦꎆꌠꑟꇬꄉꃅꅍꊌꀀꑭꒃꆹꌠꈉꐨꇬꄉꄐ。ꍤꏦꒊ꒜ꐧꐕꌠ、ꍏꑼ、ꇨꍏꐦꃀ、ꎭꄏꁁꎿꅔ、ꀙꀯꊅꑠꇓꈓꋇꀋꉬꀋꉆꁁꏯꀻꎆꌠꄹꇙ,ꇓꈓꏓꈌꀋꉬꀋꉆꌠꈭꈜꉁꈾꐮꇙꐮꈴꐘꃆꈨꄹꇙꄉꃄꇬ,ꇓꈓꋇꌋꆀꈯꄜꇓꈓꏓꇱꐕꄽꌋꆀꅐꀦꉾꃪꃅꁆꇱꌠꄐꊋꉀꐕꌠꇬꊋꁈꄏ。ꇓꈓꏱꄻꐛꏀꈴꑟꐨꉀꐕ,ꇓꈓꐕꄽꐨꄻꀉꇨ,ꀊꏀꉹꌠꀑꁮꇓꈓꋈꄻꌠꄹꎆ,ꇓꈓꃷꁨꀑꊋꄺꑣ。ꇓꈓꇓꉈꐮꉔꄉꀻꎆꌠꏦꉻꉺꏦꌋꆀꏱꁈꉻꑫꃅꑞꅉꑟꌠꄹꇙ,ꇩꏤꇓꈓꇓꉈꐮꉔꀻꎆꃅꉚꅉꄐꏁꌊꄺꀱꎹꎥꌠꃅ。
ꌕꆏꍅꄁꃅꑣꋂꄖꄑꌄꆣꄐꇐꏤꁈꄹꎆꄉꎭꑆꇔꊌꐨꄻꈫꈈ。ꃹꅼꃅꂿꑘꁡꇤꋍꑍꌕꉹꌠꅐꑘꐮꉔꄉꀻꎆꌠꄹꎆ,ꂿꑘꅐꇐꄺꑣꅉꁍꋈꄻꌠꊋꁈꄏ,ꐳꃅꐛꏀꂿꑘꅐꑘꅉꁍꋈꄻ,ꂿꑘꁡꇤꅐꑘꐮꉔꀻꎆꌶꀠꐛꅉ、ꂿꑘꅐꑘꀉꇨꍔꌋꆀꍏꇩꐛꐨꂿꑘꅐꇐꂱꎆꅑꐛꅉꈨꋈꄻ,ꂿꑘꁡꇤꈩꆫꋂꀋꉬꀋꉆꈨꉘꉚ,ꊿꋅꌋꆀꃄꁕꐛꋲꐨꐥꌠꑣꋂꑬꆏꈩꆫꑘ、ꇇꃅꇇꑘꑠꐛꋲꅐꑘꏀꀺꀻꎆ,ꐳꃅꑣꋂꀊꏀꉹꌠꁧꃤꃅꑘꀻꎆ,ꂿꑘꂓꁦꌠꄻꀉꒉꄻꀉꇨ。ꑣꋂꅐꑘꀻꎆꌬꃅꏦꀧꏱꁈꄻꃪ。ꋍꏅꎆꏣꊋꃤꄻꀉꇨ。ꊋꀥꇱꄉꐛꏀꂿꑘꉁꈾꋈꄻ，ꏤꈉꊒꃅꀉꒉꐧꀠꉹꌠꒉꎭꁕꐪꊛꄉꋈꄻꌠꇱꄻꌠꌋꆀꒉꏏꄺꀱꌠꃅꌐ。ꐪꊛꄉꂿꑘꁡꇤꄆꈄꏍꊐꐕꄺꀱꌋꆀꂿꑘꁡꇤꈝꃀꋈꄻꌠꄹꎆ,ꐳꃅꂿꑘꁡꇤꃅꄷꐳꏣꈄꏍꌋꆀꇙꊈꅇꈴꈄꏍꉱꑷꈴ。ꇵꆅꄴꏮꋎꍅꌠꌌꃸꈌꃅꄉ,ꃹꅼꃅꁊꈴꃅꐙꌠꁡꇤꁦꎴꃅꐨꃅ。ꈍꃅꋭꅉꈍꃅꀕꄉꂿꑘꁡꇤꅊꁧꒈꅉꄺꀱꌠꄹꎆ,ꀉꇨꃅꐥꐨꑬꍸꀖꑘꌋꆀꍍꒉꀞꄻ,ꂿꑘꁡꇤꊿꀀꋦꈭꏱꄻꌕꈎꃅꐨꂿꃆꃅꌐ。ꂿꑘꀊꃴꀻꎆꄘꉻꑫꄻꐛꌠꎹꎥ,ꊋꀥꇱꄉꂿꑘꑊꊧꍍꌠꆀꏱꄻ。ꑤꏱꁕꁡꇤꈥꈉꄐꉻꄐꎖꌠꃅꋒ,ꐳꃅꏦꋪꀉꑌꑵꏓꋍꏢꃅꌠꌬꍩꐨꐥꌠꁡꇤꄐꎖꌠꁰꄻ。ꂿꑘꁡꇤꒉꑫꏓꇱꏱꄻꃅꉚꑤꋈꄻꌠꃄꇬ。ꂿꑘꁡꇤꊋꀦꀻꎆꌠꄹꇙ,ꐳꃅꂿꑘꀜꅐꅐꇐꊋꀦꈴꅐꀦꈴꃅꌫꄻꌠꄹꎆ。ꃹꅼꃅꑣꋂꏱꄻꉻꑫꋈꄻꃅꉚꌡꀠꃄꄻ。
（ꉆ）ꐳꃅꑟꐨꀊꅰꀊꂥꌠꁉꃑꉹꌠꎆꏣꏦꉻꀊꏀꌠꋈꄻ,ꉇꉻꁉꃑꌠꄹꇙꄉꁨꎆꐨꀊꏀꌠꊌꅜ。ꏣꀋꑌꃅꇵꆅꅉꆺꑭꊂꃅꁭꁘꇁꌠꁧꏖꐨꀋꉾꌠꏭꊜꄻ,ꊇꁧꀊꂥꃅꐯꇯ“ꋍꁕꋍꈜ”ꋈꄻꌠꄹꎆ,ꉇꉻꃼꇇꉇꎆꅉꀨꃅꍜꒃꌫꈬ。
ꋍꆏꈏꃹꉇꅐꌠꀑꐱꃅꎍꐽꌠꄝꏦꀋꊰ。ꊋꀉꒉꃅꇤꄉꀉꑌꑵꃅꐙꌠꃷꎏꀹꄻ,ꎆꏂꑘꊋꁈꄏꄉꈄꏍꇬꄉꐯꉇ、ꈄꏍꇬꄉꀨꀞꑠꃄꄟꇬꈴꄉ,ꇷꃅꌠꊥꎆ、ꃷꎏꍔꐯ。ꉇꅐꎆꏂꑘꏣꀋꑌꃅꇩꈐꃷꎏꀹꄻꌠꇬꊋꁈꄏꌋꆀꊋꊡ，ꏣꀋꑌꃅꉇꉻꈉꐨꍕꒊꌠꌌꆣꄯ。ꋯꐂꈄꏍꃼꇇ、ꃷꎏꃻꄻꃼꇇꑠꉇꉻꃼꇇꐛꄟꀊꏀꌠꈁꏦꀊꏀꌠꐳꃅꀻꎆꌠꊋꁈꄏ。ꀒꁨꋍꁘꃅꏓꇱꇗꏸꀧꃄꁕꑟꐨꀊꂥꃅꁉꃑꊇꁧꀊꂥꃅꀻꎆꌠꄹꇙ。ꀊꏀꈭꌠꁧꃤꃅꃼꇇꏀꀺꀻꎆꃅꉚꌠꄹꇙ。ꄺꑣꃼꇇꀻꎆꌠꄻꎍꐽꃅꄉ。ꐔꈔꉆꐨꋎꍅꉆꌠꇎꏦꇂꃴꄉ,ꄮꈉꀁꎴꊭꇬꉇꅐꉌꒊꄜꏂꀧꃅꑘꍔꒉꄷꀋꁧꌫꎆꀁꋌꍅꌠꊋꁈꄏ,ꄮꈉꐧꀠꀊꉗꌠꏱꁈꃅꐙꌠꉌꒊꄜꏂꀧꌐꐘꄐꁆꌠꄻꐛ。ꏣꀋꑌꃅꌕꈭꌠꍏꇩꇩꏹꈏꃹꀊꐯꈭꃅꄉꀨꌠꊭꄎꀞꄻ。ꏣꀋꑌꃅꇩꏹꎊꈴꇲꁵꃬꏣꋈꄻꌠꇬꃅꈽ,ꇩꏹꎊꈬꎞꎭꑴꀋꐥꌠꏦꀧ。
ꑍꆏꏣꀋꑌꃅꉇꎆꌌꌬ。ꐊꑷꃅꉇꉻꃼꇇꎆꇱꏦꃤꌋꆀꋬꈭꏦꇗꃄꌬ。ꀉꒉꃅꉇꎆꈏꃹꉆꃷꁨꋏꒉꊨꒊ,ꃹꅼꃅꁧꃤꃅꑘ、ꎆꒉꎆꇁꑘ、ꄺꑣꑘ、ꂿꑘꉇꉻꏭꁉꃑ。ꃼꇇꎹ、ꃼꇇꑘꒃ、ꃼꇇꎍꐽꌤꃅꌠꃅꋒ,ꉇꉻꃼꇇꎆꇱꅐꑘꎹꀨꈍꈐꍔꐯꌠꊋꊡ,ꐪꊛꄉꉇꉻꎆꀨꐘꃆꀉꒉꀊꂾꈨꃅꑞꅉꑟꌠꄹꇙ。ꁧꃤꃅꑘꃅꉚꌠꍔꒉꁉꃑꌠꎖꋪꄹꌬ。ꊋꀥꇱꄉꉇꎆꎆꏂꑘꁧꃤꃅ,ꈐꉈꎆꀨꎆꏂꑘꐯꌟꃅꎆꏂꑘꇇꀨꊋꋠꆣꄯꌠꏱꁈꇬꈲꊌꌠꄉꀧ。ꊋꀉꒉꃅꇤꄉꉪꎆꇱꋦꈭꌋꆀꏱꁈꄜꉺ,ꇩꏹꅐꀦꐊꊈꊱꁨꃅꈏꃹꇁꌠꏶꈻ。ꀒꁨꋍꁘꃅꇩꉈꎆꉛ、ꐧꀠꀊꉗꌠꉇꎝꑠꀨꊰꀁꂥꌠꎆꀨꂿꄐꋊꇤꅐꇁ,ꉇꎝꃨꆰꐨꄴꏮ。
ꌕꆏꐯꇯ“ꋍꁕꋍꈜ”ꋈꄻꌠꊇꁧꀊꂥꃅꀻꎆꌠꄹꇙ。ꑍꈭꌠ“ꋍꁕꋍꈜ”ꇩꏹꇷꃅꀑꋾꉉꎥꈉꊌꐨꃅꑞꅉꑟ。ꃹꅼꃅꀋꉬꀋꉆꌠꇩꏤꉈꑴꇩꏹꎀꍹꌋꆀꃶꐚꃅꇷꃅꌠꄹꎆ,ꃨꆰꐨꄴꏮꋎꍅꌋꆀꀞꄻꄐꊋꉀꐕ。ꏟꈯꃅꈭꇍꇩꏤꌋꆀꐯꅑꐮꈴꌠꄹꎆ,ꄔꐽꃅꍏ꒜ꊉ、ꍏꀠ、ꍏꇩ—ꍏꇂꁁꎿꅔꎆꏣꈴꈜꑠꋈꄻꌠꄹꎆ。ꐪꊛꄉꍏꉩꉻꍯꈴꊇꁧꀊꂥꃅꀻꎆꌠꄹꇙ,ꃹꅼꃅꃷꁨꏦꍠꈝꃀꋈꄻꇷꃅ。ꃰꊿꁱꀕꐮꈴꌠꃅꌠꊋꊡ,ꐯꇯ“ꋍꁕꋍꈜ”ꋈꄻꌠꉹꁌꉪꐨꅉꃀꌆꈬ。ꀒꁨꋍꁘꃅꇩꏹꊁꏠꃄꁕꇷꃅꌠꄻꀉꇨ。
ꇖꆏꐳꃅꉇꉻꏭꁉꃑꀊꂥꅉꋈꄻ。ꃹꅼꃅꎆꏣꇣꋲꐎꄺꀱꁉꃑ。ꐳꃅꄿꐨꃼꇇꃅꉚꅉꄺꀱꃅꉚꌠꂿꃆꃅꑞꅉꑟ,ꀊꅰꃅꀉꒉꌠꄺꀱꑴꌅꌅꈌꄻꄿꐨꃼꇇꃅꉚꅉꁵ,ꊇꁧꀊꅰꀊꂥꌠꌡꄻꉆꄹꌬꉆꌠꄹꏦꏀꀺꊌꐨꏓꐛ。ꉰꇂꄿꐨꃼꇇꎿꀸꋈꄻꉻꄜꄐꉻꄜꃑꃄꌬ，ꃶꐚꃅꏜꊬꌠꏱꁈꄐꁆꃅꑞꅉꑟꌠꒃꉇꋒ。ꉰꇂꄿꐨꃼꇇꎿꀸꋯꐂꌠꁧꃤꃅꃼꇇꃷꁨꋏꄯꒉꏤꄻꅐꇁ。ꈯꄔꁮꐚꃅꄷꇬꄿꐨꃼꇇꃅꉚꅉ、ꏓꇱꇗꏸꀧꅉꁦꎆꃅꄻꄉ。ꃅꋮꀖꁉꁉꃑꑟꐨꉀꐕ，ꃅꋮꀖꁉꁉꃑꃅꉚꅉꀋꉬꀋꉆꌠꋈꄻꌠꇬꊋꁈꄏ。
ꉬꆏꋯꉈꎆꇱꌠꎍꐽꉾꃪꃅꀻꎆꌠꄹꇙ。ꀋꎪꃅꎆꏂꑘꀨꄜꉬꌠꌭꈬ,ꉹꁸꄉꄐꇺꌠꄻꃪ,ꋯꉈꎆꇱꐛꉻꉾꄻꃪ。ꄔꐽꃅꇩꏹꅐꊋꇷꃅꌠꃅ,ꀉꑌꑵꃅꐙꌠꃷꎏꀹꄻ,ꉁꈾ、ꇮꇐ、ꁧꃤꃅ、ꂓꁦ、ꎕꏦ“ꉇꅐꁧ”ꌠꈺꇙ。ꋮꉈꎆꇱꏱꁈꌋꆀꁧꃤꃅꉻꑫꄻꐛꒆ,ꄐꄻ、ꅲꇫ、ꈅꏹ、ꏚꍆ、ꏦꃤꑠꒃꅐꃅꐙꌠꁧꃤꃅꑘꐳꃅꇩꏹꈴꃅꀻꎆꌠꎁꃅꋦꈭꉾꃪꌠꄺꑣ,ꎆꏂꑘꈍꃅꋭꆏꈍꃅꃅꄉꎿꉈꊸꑳꋈꄻꌒꎻ。ꏣꀋꑌꃅꌕꁁꏯꌠꃷꎏꇷꃅꌠꍔꐯ。ꎆꏂꑘꄐꏁꄉꋯꉈꏦꊒꌠꏲꂠꉻꑫꄻꐛꒆ,ꎆꏂꑘꋯꉈꀰꏢꃅꐨꋊꍬ，ꊋꀥꇱꄉꋯꉈꃨꆰꐨꄴꏮ。
ꃘꆏꏣꀋꑌꃅꇩꏹꎆꏣꏱꄻꌠꇬꃅꈽ。ꏟꈯꃅꀉꑌꁁꏯꃼꇇꏦꉻꀧꌋꃅ,ꏣꀋꑌꃅꋧꃼꇇꎀꍹ(WTO)ꑠꀉꑌꁁꏯꏲꉻꄺꀱꌠꇬꃅꈽ。ꑟꐨꀊꅰꃅꀊꂥꌠꄿꐨꃼꇇꃅꅉꄐꇐꃄꌬꌠꄹꇙ,ꅔꈿꄉꃄꁕꐊꑷꎆꏣꐋꀨꐮꃆꂮꋯꏤ(RCEP)ꏤꈉꈐꃅꏤꁱ,ꐳꃅꍏꏝꉴꑠꄿꐨꃼꇇꃅꅉꐯꉇꌠꄹꎆ。
（ꈬ）ꃶꐚꃅꉹꁌꐥꐨꉱꄏꌤꃅꌠꃅꋒ,ꏓꂱꉹꁌꅉꀨꐥꐨꈉꐨꏦꀧ。ꇵꆅꇬꐊꇁꌠꉹꁌꐥꐨꌤꃆꇬꉜꄉ,ꁦꎆꃅꎆꇱ、ꏱꁈꃅꇫꑟꌠꏦꀧꌠꇬꈴꄉꌌꇿꋌꐥꃅꂥꀘꇧꎭ。
ꋍꆏꁈꏂꁈꇭꄉꃅꅍꊌꌠꌌꎍꐽ。ꇵꆅꇱꁧꏖꌠꐧꀠꀄꊭꎆꏂꑘꏭꄏꐓꌠꊋꃤꁦꎆꃅꇱ，ꎆꏂꑘꃅꈉꎍꐽꌠꊋꁈꄏ，ꎆꏂꑘꌤꃅꊿꊨꌠꃅꐨꋊꍬ。ꄉꉻꃅꅍꊌꁧꃤꃅꌠꇓꈓꇓꉈꅉꀕꀀꊻꂷꇬꉱꑷꌠꄹꎆ,ꃅꅍꀋꊌꁱꄀꈭꈜꄻꁣꀋꐥꃅꄉ，ꐯꇯꇮꃅꊿꌬ、ꃅꅍꊌꏦꀧꑠꁧꃤꃅꐽꈉꄻꐛꌠꊋꁈꄏ,ꋒꐯꋒꃅꀰꏢꃅꐙꌠꊿꊋꅐꀦꏲꉻꑠꃷꎏꈴꃅꁧꃤꌠꊋꃤꋊꇤꅐꇁ。ꐳꃅꋍꑞꋍꐘꏤꄻꅐꇁꀐꌠꌶꌺꎹ、ꂽꄻꎹꐨꍔꒉꎖꄎꌠꃅꑞꅉꑟ,ꇩꁨꎆꏂꑘꎼꈎꑎꄹꈎꐪꊛꄉꌶꅉꀊꂥꊐꌠꌶꅐꌶꌺꎹꌬꄉꈁꍔꒉ。ꒉꌶꅉꌶꅐꌶꌺꅉꂫꊐꌠꇬꄉꃅꅍꃅꌠꊋꊡ,“ꌕꁥꋍꄏꐓ”ꎖꄎꑠꅉꂫꊐꌠꁧꃤꃅꐘꃆꌋꆀꉜꌷꃄꌬꄉꈁꍔꒉ。ꑘꀺꌠꃅꅍꊌꌠꇬꈺꇙꇿꋌꁧꁦꎆꌠꋊꇤ，ꂿꑘꁡꇤꏀꀺꑘꀺꂴꅑꊿꉘꉚꃅꐨꃄꌬ，ꂿꑘꊿꊋꃅꌠ、ꀊꂥꊐꌠꌶꅉꇬꌶꅐꌶꌺꌋꆀꂽꄻꀱꇁꌠꂽꑠꊿꀱꑘꃅꁡꇤꆹꑘꃅꁡꇤꃹꄉꑘꀺꌠꊋꁈꄏ,ꈝꃀꀉꑌꃅꎹꄉꊜꋽꃅꃅꅍꊌꌠꊥꎆ，ꋭꋽꃅꇙꐺꎊꈬꃷꅉꀰꏢꅉꄐꄻ。ꄉꉻꅉꃀꉁꈾꋈꄻꅉꇬ,ꄾꌦꋩꃅꂿꑘꁡꇤꑘꃅꊿꏶꈻꌊꀊꄶꇬꈛꑌꅉꄉꃅꅍꊌ。ꄉꉻꃅꑘꇮꇐꄐꊋꁱꂘꅉꃀꐽꈉꐯꇯꋈꄻꐯꇯꁨꌬꌠꄹꎆ,ꃅꑘꇮꇐꄐꊋꁰꍋꌠꇬꊋꁈꄏꌠꊋꃤꁦꎆꃅꇱ,ꐪꊛꄉꌷꐕꀋꆹꌠꋌꃢꋆꍏ、ꇨꍏꌶꅐꌶꌺꌋꆀꌠꏀꁱꄀꃅꅍꀋꊌꊿꏭꆏ，ꄕꊪꌊꑘꃅꊭꄎꄹꏦꁰꍋꌠꇬꐊꈽ。ꎼꈎꑎꄹꈎꑍꈓꌠꃅꑘꇮꇐꁰꍋꌠꊿ3500ꃪꑹꃢꈋꉐꐥ,ꌕꈎꇬꊿ5000ꃪꑼꃢꁰꍋꌠꁻꌐꂿꃆꃅꌐ。ꀊꂥꊐꌠꃅꑘꌶꅉꆏꌶꌺ200ꃪꑼꁦꎆꃅꎹ。
ꑍꆏꐳꃅꄉꉻꁦꎴꆄꄻꀋꇎꅉꅋꑣꐯꊯ。ꄉꉻꁦꎴꆄꄻꁧꃤꃅꉻꑫꄻꐛꒆ,ꏦꃤꄹꏦꏦꀧꌠꌋꆀꌫꎆꏦꀧꌠꄻꀉꇨꃅꄉ,ꄉꄐꃅꅉꀨꄉꉻꁦꎴꆄꄻꁧꃤꃅꌫꎆꏱꎆꁥꁵꎕꏦꉀꐕ,ꊋꀥꇱꄉꄉꉻꁦꎴꆄꄻꌧꊿꊿꁥꌠꁱꂘꌋꆀꅉꂫꊐꌠꄴꏮꄐꊋꁱꂘ。ꆅꈻꄴꏮꋎꍅꏦꉻꄺꀱ。ꇵꆅꀉꒉꀊꂾꌠꄴꏮꋎꍅꏦꉻꉺꏦꄻꃪ,ꇩꏤꄉꉻꁦꎴꆄꄻꃛꊸꊜꄻꏲꂠꉻꑫꄻꐛꒆ，ꐊꑷꃅꊋꀥꇱꄉꆄꈻꋎꍅꈯꄜꄐꊋꋈꄻ,ꅔꈿꄉꌜꈁꐥꌠꐯꇯꒆꇐꉮꀋꐥꌕꊐꑟꐨꑟꌠꋒꃯꉜꅉꐥꎻ,ꇵꆅꌐꄉꉃꆅꉚꅉꌋꆀꏓꇱꆅꉚꅉꇵꆅꉜꅉ、ꌗꋏꌗꈻꉜꅉꑠꌌꈯꌬꃅꄉ、ꀉꁁꆅꉁꏲꉻꌌꊭꄎꁥꃅꄉꌠꄕꊪꉺꏦꏓꄻ,ꇩꏤꇵꆅꀉꒉꀊꂾꌠꈭꋏꅉꁍꄐꎖꄐꄻꄉ。ꃹꅼꃅꉻꀞꆅꉚꅉꏓꇱꄺꀱ。“ꐯꏑꈄꏍ＋ꆅꉁꇭꀧꉾꃪ”ꌠꀻꎆ。ꇓꈓꇓꉈꋥꁕꆅꉁꁧꃤꃅꄐꊋꉀꐕ。ꊐꁸꆅꍜꇠꆅꉃꄻꌠꄹꎆ。ꐮꄮꉃꌠꆅꌠꐮꃆꂮꏓꄻ。ꍏꑳꁬꋌꄖꄑꌄꆣꀻꎆꌠꊥꎆ，ꍏꑳꆅꉁꁧꃤꃅꉻꑫꄻꃪ。ꀒꁨꋍꁘꃅꉹꁌꃅꄴꏮꈯꀧꌠꄹꎆ。ꃹꅼꃅꋬꂻꍏꇩꃅꐨꃄꄻ。
ꌕꆏꐳꃅꐧꋦꏦꀧꉻꑫꋈꄻ。ꄔꐽꃅꅉꀨꆅꉁꆄꄻꄜꏂꀧꎆꀨꏓꇲꏠꊐꉀꐕ,ꃶꐚꃅꆅꉁꄜꏂꀧꄃꏃꊐꌠꏓꇲꌠꄹꎆ,ꇎꏦꐥꌠꃅꄷꊋꊡꄉꌜꊐꌠꏓꇲꌠꄹꎆ。ꇩꏤꆅꉁꄜꏂꀧꁬꋌꎹꀨꇘꄟꃅꋊꄻꌠꉺꏦꄻꐛ。ꆅꉁꄜꏂꀧꎆꀨꌫꄻꅐꐨꉀꐕ,ꈁꉬꃷꁨꄐꌗꏲꂠꌠꄻꃪ,ꆅꉁꁧꃤꃅꐛꄟꐯꀋꌡꌠꇬꄐꊒꌠꆅꉁꄜꏂꀧꎆꁵꄟꄹꌬ,ꊋꀥꇱꄉꏤꄉꌠꆅꉁꏲꉻꊌꐨꈲꁧꍤꎖ,ꃹꅼꃅꌞꃅꄷꄉꆅꉚꌠꈛꎂꃅꌗꂫꇽꌠꃅ。ꀀꊿꆅꉁꄜꏂꀧꊾꂷꌠꐽꏡꃅꏱꎆꁥꁵꌠꎕꏦꎆꃀ30ꂷꉀꐕ。ꀋꇎꁬꋌꇲꁵꏦꀧꌠꄻꃪ,ꀒꁨꋍꁘꃅꃹꅼꃅꆅꉁ、ꆅꉁꄜꏂꀧ、ꆅꉁꁬꋌꐮꇙꄺꀱ。ꊱꁨꐥꃅꇩꏤꊥꇬꄉꁬꋌꏓꋧꃅꃻꄻꌠꌋꆀꌌꌬꌠꁬꋌꉹꑫꈍꈐꍔꒉ,ꇩꏤꊥꇫꄉꁌꀊꂥꆅꉁꌬꇐꃸꅐꌬꇐꏓꋧꃅꃻꄻꃅꉚꌠꃅ。ꃅꅍꀋꊌꄜꏂꀧꌜꊐꏓꇲꌠꄹꎆ，ꐊꑷꃅꇮꃅꂷꊂꌸꄜꏂꀧꌜꊐꏓꇲꌠꃅꇫꑟ。ꐳꃅꃀꌠꀨꎹꄜꏂꀧꇩꏤꏓꇲꌠꄹꎆ，ꎆꏂꑘꌤꃅꊿꅉꀨꃀꌠꀨꎹꄜꏂꀧꎆꀨꌜꊐꋍꃱꃅꎴꋍꃱꃅꌬꌠꃅꇫꑟ,ꄉꄐꃅꇓꈓꇓꉈꀀꊿꅉꃀꃀꌠꀨꎹꎆꎕꏦꀁꂥꐯꀁꂥꌠꉀꐕ。꒔ꑞ꒔ꐘꐧꋦꄜꏂꀧꋍꊭꐨꐥꃅꊨꏆ、ꄯꏮꌋꆀꀁꋌꊰꌠꏱꁈꃅꑞꅉꑟ,ꐧꋦꄜꏂꀧꊌꐨꄮꈉꈴꄉꇎꃅꃑꁵꌠꄉꀧ。ꐳꃅꇩꁨꎆꀨꄹꁆꁆꌌꐧꋦꄜꏂꀧꎆꀨꇬꇎꇱ。ꐳꃅꀉꑌꊐꌠꐧꋦꏦꀧꉻꑫꋈꄻ,ꊋꒉꃅꇤꄉꎆꏂꑘ（ꃅꑘ）ꃅꈎꎆ、ꀥꇱꆅꉁꆄꄻꄜꏂꀧꀻꎆ，꒜ꌠꀨꎹꄜꏂꀧꄙꌬꌕꏢꀻꎆꌠꄻꐛꄷꀋꁧꄹꇙ。ꃅꅍꀋꊌꄜꏂꀧꏦꀧꈍꈐꍔꒉ，ꄜꏂꀧꇬꐊꈽꌠ1ꈓꀋꐛꌦꌠꂿꑘꊿꊋꃅꌠꑠꃅꅍꀋꊌꌠꊿꐯꇯꌌꅉꀕꀀꅉꇬꄉꏦꀧ。ꀁꂥꀧꏦꀧꈍꈐꍔꒉ，ꇓꈓꇓꉈꊋꋠꑱꈐꏭꀧꄡꑟꆏꄾꌦꋩꃅꀧ，ꇎꏦꑟꌠꇓꈓꇓꉈꃅꅍꀋꊌꌠꌋꆀꀱꑘꃅꁡꇤꇁꌠꊿꐳꃅꌌꀁꂥꀧꑠꈭꋏꇇꀨꈍꈐꇬꇱꄉ。ꉻꃆꃅꄉꀑꇬꆺꌠꊿꅲꇫꇲꄻꌤꃅꌠꃅꋒ。ꌋꅪ、ꀉꑳ、ꃀꌠ、ꊾꄣꏦꊒꌠꌅꈌꈲꁧꏦꀧ，ꂿꑘꁡꇤꑳꐍꀉꑳꌋꆀꌋꅪ、ꃀꌠꉈꇬꁧꃤꃅꉻꑫꄻꐛꒆ。ꏦꀧꐨꐥꌠꀀꌒꋉꃆꋈꄻꌠꄹꎆ,ꊋꀉꒉꃅꇤꄉꊣꄻꀀꑳꉘꉚꌋꆀꀻꎆ，ꇓꈓꇬꊋꋠꉹꁌꀀꑳꏦꀧꌤꃅꌠꊋꃤꁦꎆꃅꇱ。
ꇖꆏꀀꊿꊌꐨꉀꎆꌠꌌꎍꐽꄉꀋꉬꀋꉆꌠꊿꁥꌠꅉꀨꐥꐨꏦꀧꄉ。ꀒꁨꋍꁘꃅꀀꊿꁨꇐꃅꐙꌠꊌꐨꉀꎆꂴꄐꄉꌠꌌꎍꐽ,ꄉꄐꃅꇩꎝ、ꃅꄷꍔꃚꎝꃆꊫꌐꏡꄜꎆꇱꊿꏭꉜꄉꃑꌬꌠꃷꁨꍔꒉ。ꇎꏦꐥꌠꃅꄷꊋꊡꄉꀒꁨꋍꁘꃅꀀꊿꆹꏮꃅꐙꌠꊌꐨꉀꐕ。ꏓꇲꃅꊌꐨꁷꄻꀋꉬꀋꉆꁁꏯꄺꀱꌠꄹꎆ,ꃄꎆꄐꇺꑟꌋꆀꎆꏂꑘꃄꎆꍤꄻꄹꏦꄻꐛꒆ。ꉈꏭꅐꒉꌠꂿꑘꊿꊋꃅꌠꅉꀕꀀꅉꇬꄉꇓꈓꏦꎫꑱꐴꊻꂷꌋꆀꐯꌟꌠꃅꅍꊌꑘꀺꌠꏱꁈꊌꌠꏦꀧ,ꏦꃤꇬꈴꄉꂿꑘꊿꊋꃅꌠꑘꃅꃄꎆꌅꈌꈲꁧꏦꀧ，ꇁꀦꇬꄉꂿꑘꊿꊋꃅꌠꃄꎆꁯꌠꀊꏀꃅꇫꅐꌠꄴꏮ，ꇓꈓꃹꌠꂿꑘꊿꊋꃅꌠꀊꅰꉾꃪꃅꇓꈓꇬꃹꌠꄹꇙ。ꂿꑘꅐꇐꀋꉬꀋꉆꌠ、ꄮꈉꊨꊭꀋꉬꀋꉆꊭꌠꁌꏤꋊꄻꌤꃅꌠꃅꋒ,ꐧꋦꈭꋏꇇꀨꌠꌋꆀꏦꀧꎕꏦꆏꎊꈬꁌꏤꉀꄓꌠꌋꆀꐯꎏꌠꏓꇙꉺꏦꃅꑞꅉꑟꋒ,ꀉꇨꃅꉹꁌꊋꋠꌠꏭꉱꄏꏦꀧ。ꀒꁨꋍꁘꃅꇓꈓꇓꉈꐧꋦꈭꋏꇇꀨꄹꏦꏓꇲꄻꃪ,ꄔꐽꃅꇓꈓꇓꉈꀁꂥꀧꎕꏦꉀꐕ,ꐪꊛꄉꀁꂥꀧꑠꈭꋏꇇꀨꏱꁈꌋꆀꌢꎭꄏꐓꏱꁈꐯꊛꌠꃅꑞꅉꑟꌠꄹꎆ。
ꉬꆏꐪꊛꄉꄉꉻꁧꃤꃅꑟꐨꉀꐕ。ꇩꏤꅉꀨꄉꉻꁧꃤꃅꎕꏦꏤꁱꅐꇁꌠꄹꇙ,ꅉꂫꊐꌠꁧꃤꃅꏲꉻꎕꏦꈴꃅꃅꉚꌠꄹꎆ。ꂘꑘꎆꇱꌠꎍꐽ，ꎆꇱꐛꉻꄻꃪ，ꇓꈓꇓꉈ、ꃄꁕ、ꌶꅉꇢꊭꍣꐨꊨꒊ。ꇓꈓꇓꉈꋭꑘꂘ꒧ꌫꎆꏦꀧꉺꏦꄻꈫꈈ,ꏣꀋꑌꃅꇓꈓꏦꎫꋭꑘꂘꑘꌶꅉꃷꁨꀉꑌꁥꋊꑣ,ꊋꀥꇱꄉꑣꍔꍆꌷꄹꏦꌶꅉꌋꆀꑣꋂꄉꈁꀄꊭꌠꌶꅉ、ꑤꇓꈓꌶꅉꋈꄻ，ꇫꐊꌳꃈꅮꋭꑘꂘꑘꌶꅉꃹꏱꁈꄻꃪ。ꐋꀋꌡꉙꂘ、ꐪꊛꉙꂘꌠꀞꋒ。ꈴꈜꀉꑌꃅꁊꈲꃅꐙꌠꌷꂾꉙꂘꅐꀦꍔꒉ,ꌢꎭꅼꇨꃅꄷꊈꂄꁊꈲꌷꂾꉙꂘꅐꀦꍔꐯꋈꄻꌠꊋꁈꄏ，ꉹꁌꀞꀉꑳꌷꈩꅉꇇꀨꄉꊋꋠꐨꆣꄯ。ꐳꃅꇨꍏꊬꌠꂘꑘꁊꈴꈢꇓꀖꌠꃄꌬ,ꐪꊛꄉꌢꎭꃅꄷꌶꅉꅉꀨꌶꅉꀞꇎꏦꄻꃪ。ꄔꐽꃅꎃꐚꀪꈆꂘꑘꌋꆀꎥꃪꌶꌺꂘꑘꀻꎆ。ꈯꄔꁮꐚꃅꄷꒉꌶꅉꀻꎆꌠꇬꊋꁈꄏ。ꒉꌶꅉꂿꑘꁡꇤꌋꆀꌢꎭꃅꄷꌶꌺꎖꎹꌠꄉꈁꍔꒉ。ꎃꐚꀊꂥꊐꌠꉙꂘꌠꀪꍋꈈꌶꌺ920ꃪꑼꎹ，ꎥꃪꌶꌺ111.4ꃪꑼꎹ。ꊋꀉꒉꃅꇤꄉꇩꏤꅐꑘꂘꑘꐮꉔꋈꄻꃅꉚꌠꄹꎆ。ꊋꀥꇱꄉꂘꃀꊿꁥꌠꁰꍋ。ꂘꑘꈴꌗꈴꌠꄹꎆ。ꏣꀋꑌꃅꊻꂷꃀꌠꐛꌠꏭꊜꄻ,ꐧꋦꊋꃤꁊꈲꃀꌠꀨꎹ、ꁊꈲꁠꉘꁧꃤꃅꌠꀻꎆꌠꊋꁈꄏ。ꍔꑪꐧꋦꈆꑪꌄꆣꀻꎆ。ꊋꀥꇱꄉꁱꀕꏂꀨꍸꇐꀧꌋꃅꌋꆀꐥꇐꀋꉬꌠꁱꀕꍸꇐꊪꊛ。ꐪꊛꄉꁱꀕꈩꆫꊐꐕꋉꃆꃄꌬ,ꏣꀋꑌꃅꉸꉼꒊ꒜ꁱꀕꀧꌋꃅꊪꊛꍔꆙꌠꄹꇙ,ꐳꃅꁱꀕꉁꈾꐘꃆꀉꒉꀊꂾꌠꋈꄻꌠꄹꎆ,ꋋꁕꃅꈩꆫ、ꑣꋂꈩꆫꌋꆀꇝꂱꈩꆫꀻꎆꌠꄹꇙ。ꏣꀋꑌꃅꉰꇂꇩꏹꈩꆫꌬꈧꈯꄜ、ꉿꏿꇩꏹꑬꆏꈩꆫꎿꅔ、ꀻꄤꇩꏹꈩꆫꎿꅔꑠꋈꄻꌠꄹꎆ。ꐳꃅ“ꐯꏑꈄꏍ+ꈩꆫ”ꀻꎆꌠꄹꎆ。ꃹꅼꃅ“ꂴꀥꌠ”ꃅꐨꃅ,ꐊꑷꃅꑱꈐꁧꃤꃅꑘꊇꁧꉀꐕꅓꐨꍔꒉꌠꄹꎆ。ꃅꋆꀎꒀꉼꈩꅉꋈꄻꌠꄹꎆ。ꃛꊸꊜꄻꏲꂠꄐꊋꎕꏦꈴꃅꋈꄻꌠꃄꌬ,ꐳꃅꄐꇐꃛꊸꊜꄻꎊꈬꊭꊎꉮꀋꐥꃅꏲꂠꌠꉺꏦꏦꉻꄺꀱꌠꄹꇙ。ꊋꀥꇱꄉꋌꐛꉮꌸꍞꎖꌗꋏ,ꐳꃅꋌꐛꉮꌸꄴꏮꋉꃆꀉꒉꀊꂾꌠꃄꌬ，ꉮꄵꉮꊨꌋꆀꉮꌸꈭꋏꌤꃅꌠꃅꋒ。ꐧꋦꏱꄻꌠꊋꀥꇱꌋꆀꏀꀺ，ꋥꁕꏲꂠꌋꆀꁧꃤꃅꉺꏦꄻꐛꒆ，ꅉꂫꊐꌠꃛꊸꊜꄻꄐꊋꊐꐕ。ꃹꅼꃅꄉꉻꏦꃤꁧꃤꃅꉻꑫꋈꄻ。ꋠꇐ、ꁬꋌꉮꀋꐥꍞꏲꌠꊋꀥꇱꌋꆀꄻꃪ。ꏦꇨꃅꋬꂻꒃꅐꆽꎍꄹꏦꃄꌬꇫꑟ,ꋬꂻꒃꅐꌠꌋꆀꉮꐴꍤꄻꌠꃅꋒ,ꏟꈯꃅꋍꑞꋍꑵꀉꒉꀊꂾꃅꌤꅐꉮꌸꌠꄴꏮ。
ꐊꑷꎃꊒꃅ“ꋍꇩꑍꏦ”、“ꑣꇤꊿꑣꇤꏲ”、“ꀎꂱꊿꀎꂱꏲ”、ꀊꂥꃅꊨꏦꏲꌠꌐꏦꌬꈴ,ꈍꄮꑌꏟꈯꃅꑣꇤ、ꀎꂱꇩꏤꀻꎆꃅꇴꄉꉻꇬꃹꌠꊋꁈꄏꌋꆀꄹꇙ。ꑣꇤꆏꇩꏹꎆꒉꎆꇁ、ꒉꇬꎞꎭ、ꃼꇇꈯꄜꃅꄉꌠꂱꎆꅑꐨꇬꈴꄉ,ꅔꈐꌋꆀꑣꇤꀊꅰꑖꑟꌠꎆꏣꃼꇇꐮꃆꂮꄻꐛꌠꄐꁆ(CEPA)ꌠꋍꋬꈭꋯꏤꄉꌠꃅꇫꑟꋒ。ꀎꂱꋧꃅꈩꆫꑬꆏꈯꄜ、ꍏꇩꌋꆀꁍꄨꑸꉙꌬꌠꇩꏤꃼꇇꇷꃅꁧꃤꃅꐽꈉꑠꋈꄻꌠꄹꎆꌠꇬꊋꁈꄏ。ꎿꋮꑍꁁꏯꎆꏣꁱꀕꐮꈴꇷꃅꌠꍔꐯ,ꄠꃪꃺꑌꄠꃪꎆꏂꑘꎁꃅꀻꎆꊜꋽꄮꀊꅰꀉꑌꌠ、ꐯꌟꃅꈲꊌꌠꇲꁵ。
ꎼꈎꉈꑴꂿꃆꀋꂿꑘꐘꐥꑴꌦ,ꋋꆹꄈꍏꑷ、ꇩꃷꑼꁈꏤꄐꁆꌠꇬꈴꄉ,ꐊꑷꃅ“ꊯꌕꉬ”ꄐꎖꃄꌬꐛꐨꄤꎖꌠꅉꃀꀂꏽꄉ,ꀊꐯꈭꃅꉜꐨꅱꄻ,ꉹꁌꀑꁮꐨꏓꋧ,ꇩꂱꎆꏣꌋꆀꐧꋦꀻꎆꊯꇖꊬꌠꉬꈎꄐꎖ《ꐱꀨ》ꁰꄻꄉ,ꏓꇲꃅ“ꊯꇖꉬ”ꇩꏤꊐꌠꌐꐘꄐꎖ、ꃄꁕꄐꎖ、ꈥꈉꄐꎖ、ꃅꄷꄐꎖꁰꄻꌤꃅꌠꄹꎆ,“ꊯꇖꉬ”ꄐꎖ《ꐱꀨꄐꄉꌠ》ꏮꌊꊯꌕꈭꇩꏤꑭꊂꏓꄊꇖꃢꃀꈿꅉꁳꍤꇖꎻꌠꊭꄎꋒꃅꄉꌶ。
ꁧꎁꊈ：
ꏓꇲꃅ2020ꈎꇵꆅꄴꏮꋎꍅꌠꌋꆀꎆꏣꐧꋦꀻꎆꌤꃅꌠꃅꋒꇬꈻꇐꀉꒉꀊꂾꃅꐥ,ꂿꃆꊋꋠ。ꉪꊇꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ,ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ,ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,“ꇖꑵꉪꐨ”ꀉꇨꇱ、ꀋꎪꃅ“ꇖꑵꑴꑇ”、“ꑍꑵꀧꌋꃅ”ꌠꃅꇫꑟ,ꄈꍏꑷ、ꇩꃷꑼꁈꏤꄐꁆꌠꇬꈴꄉ,ꑴꐚꃅꇩꏤꑭꊂꏓꄊꁳꍞꊟꎻ,ꎔꎗꃅꇩꏤꑭꊂꍔꑠꉜꐨꌋꆀꇖꐨꅱꄻ,ꊋꋠꌠꉜꄉꀒꁨꆹ、ꇯꍝꌠꎹꃶꐚꌠꃅ,ꑴꇙꃅꆹꄜꄉꃅ、ꈢꇓꀖꊋꋠꌠꑣ,ꅉꀕꃅꐙꌠꇵꆅꄴꏮꋎꍅꅉꇬꄉꊋꏂꄉꎆꏣꒃꉇ、ꒃꅐꊥꎆ、ꈉꐨꀺꐯ,ꊋꇤꄉꋋꈓꌠꎆꏣꐧꋦꀻꎆꁻꌐꂿꃆꃅꌐ,ꐊꑷꃅꊼꇅꌣꈚꌠꐧꋦꋉꐛ,ꐊꑷꃅꐧꋦꉪꏦꐛꏀꈴꇩꏤꋈꄻꌠꈭꈜꀊꏀꌠꇬꄉꑭꄑꌠꎁꃅꈫꈈꌠꅉ꒜ꌆꄉ。
（ꑝꉸꎹꀙꏢ5ꆪ30ꑍꈨꇁꇬ）
