ꍔꃚꌤꃅꅇꄜ
——2017ꈓ3ꆪ5ꑍꊰꑋꈭꇩꏤꑭꊂꏓꂱꁧꎁꃀꀉꒉꉬꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꍔꃚꌤꃅꐨꅇꄜꂿ，ꆍꑴꌠꌌꍤꇖ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋍ、2016ꈓꌤꃅꐨꉪꀱ
ꋌꃀꋋꈓꆹ，ꉪꇩꏤꀻꎆꌠꂾꇩꈐꇩꉈꐮꄙꐨꀉꑌꃅꐮꄅꎍ、ꃨꆰꉮꐴꐯꏍꐮꃬꇰꌠꆼꇨꃅꋓꎭꌠꊝ。ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꇩꏤꑭꊂꊿꋅꈁꐥꌠꏓꂱꊋꋠꌠꇔꑣꄉꀒꁨꆹ，ꈐꊟꊋꊡꄉꀒꁨꆹ，ꎆꏣꐧꋦꄹꇙꌊꐪꊛꄉꉾꃅꀻꎆꆹ。ꄈꅿꊰꉆꈭꃘꃢꐊꈴꃀꇬꆏꑌꐚꃅꑮꏣꀻꊝꎻꏹꃤꈯꄜꉆꈉꊨꄅꄉ，ꄈꌋꆀꏓꂱꃤꁧꀦꈲꁧꄛꑣꎼꇁꀐ，ꄈꌋꆀꇩꏤꌄꆣꐞꄿ、ꎴꏲꑘꒃꌠꏭ，ꈻꇐꀉꒉꀊꂾꇈꎴꅼꃅꐥ。ꃅꄷꈁꐥꌠ、ꌤꏲꅉꈁꐥꌠꀋꆏꃅꍔꍞꉪꐨ、ꃅꇴꄉꉻꉪꐨ、ꈯꄜꉪꐨ、ꉜꊒꉪꐨꀉꇨꆹ，ꐊꑷꃅꊼꇅꌣꈚꌠꐧꋦꋈꄻꐛꌠꄹꇙꄉꀊꏀꌠꁨꎆꐨꀋꂿꑘꌠꊌꅜ，ꐊꑷꃅꃹꅼꃅꄺꀱꌠꑭꁘꀉꒉꀊꂾꃅꐕꎼꆹ，ꐊꑷꃅꏦꈴꇩꏲꌠꃹꅼꃅꃄꄻ，ꐊꑷꃅꏦꇨꃅꄈꏲꌠꀊꅼꅉꇬꉜꄉꄹꎆ，ꋋꈓꇬꎆꏣꐧꋦꀻꎆꌠꀋꉬꀋꉆꌠꑞꅉꁻꌐꂿꃆꐛꒆꃅꃅꌐ，“ꊯꌕꉬ”ꇬꂂꌠꃅꇬꅜꀐ。
——ꎆꏣꏮꈴꌠꊼꇅꎍꐽꆹ、ꎍꐽꄉꉾꇁ。ꇩꈐꒃꅐꈁꉬꁌꐨ74.4ꃪꂡꂷꇬꑟ，6.7％ꉀꎆ，ꋧꃅꂴꇬꂾꇬꐊꐺ，ꅉꆺꑭꊂꎆꏣꉀꎆꌠꇬꅐꌞꐨ30％ꄩꐂ。ꀀꊿꌬꈧꁌꏤ2％ꉀꄓ。ꇮꇐꎆꏂꑘꍍꊱꂴꈒꌠ2.3％ꀁꋌꊰꌠꇬꄉꆹꏮꌊ8.5％ꉀꎆ，ꌗꂓꇩꈐꒃꅐꈁꉬꁌꐨꄐꊋꃹꐨ5％ꀁꋌꊰ，ꎆꏣꀻꎆꊇꁧꌋꆀꊌꐨꈲꁧꄇꇖꀕꃅꉀꐕ。
——ꃅꑘꊌꃅꌠꉀꎆꐨꂴꉘꇉꄉꌠꄩꐂ。ꋋꈓꌠꇓꈓꏦꎫꃅꑘꊌꌠꊿ1314ꃪꑻꀊꏀꃅꁦꎆ。ꒉꌶꅉꌶꅐꌠꌶꌺꃅꑘꊌꃅꑘꀺꊿꃷꁨꉈꑴꀊꏀꃅꀊꂥꅉꑟ。ꈎꂫꇬꇓꈓꏦꎫꁱꄀꄉꌠꃅꑘꀋꊌꐨ4.02％ꐥ，ꋋꆹꈍꑋꈓꅑꅸꇁꌠꀁꂥꇊꀁꂥꌠꐛ。ꊻꂷ13ꂡꎖꐥꌠꀻꎆꇰꌠꇩꏤꀉꒉꂷꃅꄉꇬ，ꃅꑘꊌꃅꌠꊼꇅꇎꋒꌠꆹ，ꈝꐮꌠꀋꉬ。
——ꄺꀱꁉꃑꌠꃹꅼꃅꄹꎆ。ꀋꂿꑘꁁꏯꌋꆀꀋꉬꀋꉆꈭꊭꇬꄺꀱꌠꂵꅐꐨꐥꃅꀒꁨꎆꌠꊌꅜ，ꇲꁵꁁꏯꐛꉻꃅꐙꌠꄺꀱꌠꊌꐨꈲꁧꈨꊌꂿꉆ。ꉇꉻꁉꃑꌠꏡꁈꀊꏀꌠꄻꅐꇁ，“ꋍꁕꋍꈜ”ꋈꄻꁨꎆꐨꐳ，ꋉꃆꀉꒉꀊꂾꌠꌋꆀꇩꏹꅏꊋꇷꃅꐘꃆꈨꂥꀘ。
——ꎆꏣꐛꉻꐳꃅꋊꄻ。ꌬꈧꌠꎆꏣꉀꎆꌠꇬꀋꉬꀋꉆꌠꈺꇙꂿꄐꋊꇤ。ꁧꃤꃅꑘꁦꎆꁌꐨꆹꇩꈐꒃꅐꈁꊌꁌꐨꇬꍆꐪꉀꐕꌊ51.6％ꇬꑟ。ꇮꇐꀊꂥꌠꅐꑘ、ꉁꈾꄺꂡꑘꊼꇅꐳꃅꉀꎆ。ꂿꑘꎍꐽꌠꇬꄉꋊꄻꌊꉾꆹ，ꋚꉈꑴꀉꑌꃅꊌꅜꌦ。
——ꀻꎆꇙꊋꀊꏀꌠꀋꆏꃅꀉꇨꇁ。ꏀꀺꈺꇙꀻꎆꄐꇐꃹꅼꃅꃄꄻ。ꈆꑪꇮꇐꁁꏯꇩꏹꇬꂴꅑꌠꊌꐨꀉꒉꀊꂾꈨꊌꅜ。ꏀꄓꅐꑘꐳꃅꉀꎆ，ꋊꃅꅐꑘꐳꃅꉹꏮꊐꐕ。ꉹꁌꑘꀺ、ꋍꏅꏀꀺꌠꀊꐯꈭꃅꀕ，ꋋꈓꌠꀊꏀꃅꁱꄀꄉꌠꎆꏂꑘ24.5％ꉀꎆ，ꐽꏡꃅꋍꑍꌠꀊꏀꃅ1.5ꃪꁯꉀꎆ，ꑱꄜꇮꃅꃼꇇꃅꑠꇱꄉꑲꆏ，ꋍꑞꋍꉹꃷꎏꀨꄜꋍꑍꌠꀊꏀꃅ4.5ꃪꁯꁦꎆ。ꇙꊋꀊꏀꌠꇬꊎꀻꎆꐨꀊꏀꌠꋌꄘꄏꇬꐓꄉ。
——ꅉꃀꌬꇐꄘꄏꊋꃤꐪꊛꄉꉀꐕ。ꀊꏀꃅꋈꄻꄉꌠꐳꈴꎸꈜꄻꌊꌬꌠ1900ꉻꆏꄩꐂ，ꀊꏀꃅꄻꄺꀱꀱꌠꐳꈴꄇꈜ6700ꎖꉻꆏ、ꂿꑘꁡꇤꄇꈜ29ꃪꉻꆏꐥ。ꇓꈓꍬꈜꈭꈜ、ꅉꃴꏓꇱꁠꐤꈴꑳꋈꄻꐳ。ꈲꒉꋉꃆꀉꒉꀊꂾꌠ21ꐘꀊꏀꃅꋈꄻꇬ。ꇖꋊꌠꊇꇙꅇꈴꌬꊿ3.4ꂡ、ꁨꑭꈭꑟꏣꈜ550ꎖꃪꉻꆏꀊꏀꃅꁦꎆ。
——ꏓꂱꐥꐨꐪꊛꄉꄻꃪ。ꇩꏤꑭꊂꀀꊿꊾꂷꌠꐽꏡꃅꇬꌫꄻꉆꌠꊌꐨꃶꐚꃅꇬ6.3％ꉀꎆ。ꂿꑘꁡꇤꌢꎭꊻꂷ1240ꃪꑻꊨꒊ，ꋦꀀꅉꎞꆦꄉꌢꎭꄏꐓꌠꊻꂷ240ꃪꄩꐂ。ꑲꁘꇣꆹꐛꅉꀀꑳꋈꄻꀱꌠ600ꎖꃪꂷꐥ，ꂿꑘꁡꇤꑲꁘꇣꆹꄺꀱꌠ380ꎖꃪꁯꐥ。ꇩꈐꈩꆫꌠꐳꃅꉀꎆ，ꋯꉈꈩꆫꌠꊿ1.2ꂡꑻꃢꄩꐂ，ꇓꈓꇓꉈꀀꊿꐥꐨꉾꐨꉀꐕꐨꀊꏀꃅꐥ。
ꉪꇩꏤꊋꐛꃅꇩꏤꑍꊏꂷꉻꏑꏲꌋꊿꉴꍏꈣꒉꃀꀞꄻꄉ，ꀹꄻꐨꐥ、ꏃꂠꐨꐥ、ꉺꏦꃅꐙꌠꊌꐨꀋꂿꑘꑠꈨꄹꇙꄉꊌꅜ，ꅉꆺꑭꊂꎆꏣꏱꄻꌠꇬꍏꇩꐪꊂꃹꅼꌠꇫꁮꇈꀐ。
ꋌꃀꋋꈓꉪꀱꇬꆹ，ꈴꋺꌠꈜꆹꐋꀋꌡꐯꐋꀋꌡꌠꉬ。ꉪꊇꆏꋧꃅꎆꏣꌋꆀꃼꇇꉀꎆꐳꐨ7ꈓꅑꅸꇁꌠꀁꂥꐯꀁꂥ、ꇩꏹꎆꒉꎆꇁꃷꎏꇙꈧꌠꀥꇱ、ꃅꄷꌋꆀꅉꆺꑭꊂꃅꋓꎭꌠꉘꀋꇉꃅꅐꇁꌠꀉꑌꃅꅐꇁꌠꉇꉻꋦꈭꏭꊝ，ꇩꈐꐛꉻꃅꐙꌠꌤꃆꑓꅐꎑ、ꃨꆰꉮꐴꄇꇖꀕ、ꎆꏣꀁꋌꊰꌠꍅꊋꁦꎆꇱꌠꀉꑌꑵꃅꊋꋠꌠꏭꊝ，ꄺꀱꌠꈢꇓꀖꊬꌠꇬꃹ、ꈲꁧꐮꃆꂮꃹꅼꃅꋊꄻ、ꐧꋦꎍꐽꌠꇬꁧꏖꌠꐊꊈꀉꑌꃅꁦꎆꌠꌼꇪꌠꐛꊂꏭꊝ。ꐛꐨꑠꃅꐙꌠꇬꄉ，ꎆꏣꎍꐽꄎꌠꆹꈝꐮꌠꀋꉬ，ꀉꑌꑵꃅꆹꏮꉾꆹꌠꆹꀊꅰꃅꊌꀋꉆꌠꉬ。ꋋꆹꉈꑴꋍꃢꄛꑣꎼꇁꇬ，ꍏꇩꏓꂱꆏꃅꀬ、ꀑꁮ、ꑞꊋꋠꊜꊋꌠꄩꑌꄘꊋꄎ，ꍏꇩꎆꏣꊋꂫꑌ、ꉀꎆꐨꎑ、ꂱꎆꅑ，ꍏꇩꀻꎆꊫꂫꆹꀋꎪꃅꀊꅰꃅꉾꇁꌠꉬ。
ꋍꈓꅑꅸꇁꌠ，ꉪꊇꀋꉬꀋꉆꌠꄚꊁꌤꑠꈨꃅꀐ。
ꋍꆏꐪꊛꄉꏀꀺꌋꆀꊋꀥꇱꄉꉻꒉꋊꐽ，ꎆꏣꏮꈴꌠꄝꀋꊰꃅꄻꄉꄐꅉꇬꐕꄉꇬꎷ。ꀋꉊꄻꈎꉻꒉꋊꐽꌠꃄꊋꇨ，ꉪꊇꆏ“ꒉꀉꒉꃅꃑꃅꊐ”ꇶꏦꌌꇨꃅꋣꌉꌠꀋꃅꀕ，ꄺꀱꏀꀺꌠꊫꁱꄉꎍꐽꃅꉀꎆ、ꐛꉻꋊꐽ、ꃨꆰꌠꄴꏮ，ꇢꊭꇬꋎꍅꅉꃀꀂꏽꄉ，ꊋꀥꇱꄉꍜꐥꃅꋎꍅ、ꋌꉚꄉꋋꍅꌠꃅ。ꏣꀋꑌꌠꎆꏲꏱꁈꊋꃤꁦꎆꇱ，ꁦꎆꌠꏱꎆꌫꁏꇔꌠꀋꉬꀋꉆꌠꌌꇗꏸꊨꌫꁌꀁꋌꊰꌠꇬꌬ。ꐊꑷꃅꀰꏢꇗꏸꄺꀱꌊꁌꎆꇗꏸꐛꌠꃅꉚ，ꋋꈓꌠꎆꏂꑘꇗꏸꀵꃤ5700ꎖꂡꂷꀁꋌꊰ，ꉹꑘꈁꐥꌠꇗꏸꀵꃤꀁꋌꀉꄂꊰꀑꉀꀋꎆꌠꃅꇫꑟ。ꍏꑷꌋꆀꃅꄷꁌꎆꇗꏸꊌꐨꁷꄻꌠꈳꅐꄐꉻꏤꄻꌊꌬꄉ，ꃅꄷꐥꀐꌠꎆꊋꀋꐈꌠꏦꀧ。ꃅꄷꍔꃚꊭꊎꄉꌠꎝꃆꄉꈁꍔꐯ，ꇔꊰꀵꃤ4000ꂡꂷꀋꇈꀁꋌꊰ。ꎍꐽꉾꃪꌠꎆꃀꏱꁈꆹꋭꋽꄉꄐ，ꐊꐯꎆꃀM2ꆹ11.3％ꉀꎆ，13％ꀑꂪꄐꄉꌠꁻꌐꇬꀋꑟ。ꏓꇱꄉꎆꃀꏱꁈꉁꈾꀉꑌꑵꌫꄻꄉ，ꐥꄜꎆꏣꀻꎆꌠꏭꄏꐓ。ꌬꈧꊐꐕꊥꎆꌠꏡꁈꃄꌬ。ꉹꁌꎆꇱꌠꊋꊡꑠꏱꁈꄻꅐꇁ，ꎆꇱꌠꎍꐽꃅꐙꇁ。ꑵꁸꄉꑲꅉꇤꂷꃷꎏꋎꍅꄉ。ꊋꀥꇱꄉꎆꒉꎆꇁꃨꆰꐨꄴꏮ，ꏓꂱꀙꎆꃀꉇꎆꀟꆦꐨꏓꐛꉺꏦꀒꁨꋍꁘꃅꄻꐛꒆ，ꄉꄐꐽꏡꑟꐨꇬꄉꀑꐱꃅꎍꐽꌠꄝꀋꊰꃅꄉꀐ，ꇩꏤꎆꏣꎆꒉꎆꇁꋬꂻꌠꀧꌋꃅꄉꀐ。
ꑍꆏꊋꏂꄉ“ꌕꊨꋍꍅꋍꅋ”ꌠꒃꉇꋒ，ꇲꁵꐛꉻꊼꇅꄻꃪ。ꇤꎸꅍ、ꊖꌋꉹꑘꌌꀨꄉꅏꊋꊨꄉ，ꋋꈓꇬꎞꉈꑴꎭꌠꇤꎸꅍꅏꊋ6500ꃪꄓꄩꐂ、ꊖꌋꅏꊋ2.9ꂡꄓꄩꐂ，ꃅꈎꁻꌐꂿꃆꁦꎆꃅꃅꌐ，ꌤꃅꊿꁷꃅꎻꌠꌌꊼꇅꉾꃅꃅꅍꁵ。ꂿꑘꊿꇮꃅꌠꑠꇓꈓꏦꎫꑳꃼꌠꏭꄏꐓꄉ，ꑲꁘꇣꆹꐛꅉꄺꀱꌠꎆꃀꃅꁵꇧꎭꌠꍆꐪꉀꐕ，ꑲꅉꇤꂷꊭꊎꄉꌠꊨꄻꌠꏣꀋꑌꌠꊌꐨꈲꁧꊌꅜ。ꎆꏂꑘꏓꇱꄺꀱꌠꄹꇙ，ꈛꎂꃅꎆꏓꌠꀻꎆ，ꃷꎏꈴꏦꏲꈴꎝꏮꇴꍆꌠꃅꄉ，ꇮꑘꎆꏂꑘꎝꁯꐨꊼꇅꀁꋌꊰ。ꎆꏂꑘꀨꊰꊨꄻꌠꊥꎆꌠꇬꉜꄉ，ꇗꏸꊨꄻꌫꁌꀁꋌꊰ、“ꉬꄜꏂꀧꋍꎆꃀ”ꁌꏮꍆꐪꀁꋌꊰ、ꄆꌬꁌꏤꀁꋌꊰꑠꏡꁈꄻꅐꇁ。ꊋꀥꇱꄉꀋꇎꀋꂪꅉꅋ，ꀋꃋꋋꄮꇬꈉꊸꉈꑴꀊꉗꃅꈲꁧꐥꌠꌤꀉꒉꈨꀞꄻꀐ。
ꌕꆏꊋꏂꄉꃹꅼꃅꄺꀱꁉꃑ，ꀻꎆꍄꑐꊋꃤꀒꁨꋍꁘꃅꁦꎆꃅꀉꇨꇁ。ꐊꑷꃅꃹꅼꃅꄺꀱ，ꌐꁧꐨꐥ、ꈯꌬꐨꐥꌠꄺꀱꏡꁈꈨꄻꌊꌬ。ꍔꃚꌋꆀꃷꎏꐮꃆꂮꂥꀘꋒꌠꎆꏣꏦꉻꄺꀱꌠꈯꄜꌤꃆꋋꏢꇬꆼꒆꄉ，ꐪꊛꄉꏲꑘꅧꊨꌅꈌꄝꃑ、ꃑꏲꐮꐊꌠ、ꁧꃤꃅꄺꀱꌠꄻꃪꌠꄹꎆ。ꈏꅐꃅꋋꈭꍔꃚꏲꑘꍤꄻꈌꁧꌤꐘꌕꁧꋊꋍꁧꁻꌐꊨꒊꌠꃅꌐꌠꅉꃀꇬꄉ，ꀋꉊꄻꈎꉈꑴꇩꃷꑼꌤꏲꅉꌋꆀꋍꌐꋉꃅꄷꁳꃄꌬꎻꌠꍤꄻꈌꁧꌤꐘ165ꐘꀜꋊꇧꎭꌦ，ꇢꈴꁧꃤꃅꍤꄻꈌꁧꌤꐘ192ꐘ、ꃅꑘꇎꏦꊨꄅꏚꍆꌤꃆ220ꐘꋊꄻꇧꎭꀐ。ꃹꅼꃅꃼꇇꌤꑘꄹꏦꄺꀱ。ꐊꑷꃅ“ꑍꏸꐕꈴ、ꋍꄇꄜꋊ”ꌠꌬ，ꌤꃅꇬꌤꃅꊂꍞꏲꌠꇿꋌꐥꐨꌌꀉꇨ，“ꐯꏑꈄꏍ＋ꏲꃆꁧꃤꃅ”ꌠꄹꎆ。ꇩꁨꎆꏂꑘꋊꄻꐯꇯꀱꌋꆀꌼꉔꁨꏦꄺꀱꌠꄹꇙ。ꀋꈐꀋꉈꃅꋓꅔꌠꍤꄻꄹꏦꋈꄻ。ꃹꅼꃅꌬꇐꅐꀦꇗꏸꄺꀱ。ꂿꑘꁡꇤꃄꅉ“ꌕꌅꁷꄻ”ꏡꁈꄻꐛꒆ，ꌢꎭꎞꅐꉺꏦꄻꄉ。ꈆꑪꇮꇐꏲꂠꏦꉻꄺꀱꌠꄹꎆ，ꒉꌶꅉꌋꆀꈆꑪꎥꃪꅉꑴꌅꌅꈌꍔꒉ，ꌧꇐꁌꐨꁦꎆꌠꌌꍝꄎꃅꄉꌠꁷꄻꏱꁈꄻꅐꇁ。ꃀꌠꀨꎹꁧꃤꃅꃷꎏꄝꃑ。ꉻꀞꆅꉚꅉꏓꇱꄺꀱꉚꌠꍔꐯ，ꃹꅼꃅꁬꋌꆰꋌꆅꉁꆅꄻꅍꍤꄻꈌꁧꄹꏦꄺꀱ。ꋌꐛꌬꇐꅐꀦꋍꃱꃅꊨꄅꁱꄀꏡꁈꏤꄻ，ꌜꈍꐯꋦꈭꀧꌋꃅꏲꉻꍤꎖꏦꌬꎂꏲ、ꋠꃅꊪꑭꆦꄺꀱꑠꃅꉚꌠꃅ，ꐊꑷꃅꉼꍈꄹꏦꌌꌬ，ꒆꉻꀧꌋꃅꁵꊒꉺꏦꄻꐛꒆ。ꄺꀱꌠꆹꎆꏣꐧꋦꀻꎆꌠꎁꃅꇙꊋꀊꏀꌠꁦꎆꇱꄉꀐ。
ꏣꀋꑌꃅꉇꉻꏭꁉꃑꌠꍔꐯ。“ꋍꁕꋍꈜ”ꋈꄻꌠꄹꎆ，ꈛꁧꇩꏤꌋꆀꊋꀥꇱꄉꄐꇐꐯꊛ、ꃶꐚꃅꇷꃅꌠꃅ。ꏓꂱꀙꎆꃀꑌꐚꃅꇩꏹꎆꃀꎆꀨꎀꍹꇣꋲꎆꋊꌅꈌꎆꃀꊐꅉꇬꐉꃹ。“ꎸꇤꈴ”ꀹꄻ。ꉇꉻꃼꇇꀻꎆꊥꎆꏁꁈꄻꐛꒆ，ꀊꏀꃅꋯꉈꐂꄆꌅꃼꇇꌤꃆꏓꇱꃅꉚꅉ12ꈚꄻꄉ，ꈏꃹꉇꅐꌠꀅꌳꀅꌳꃅꀱꎍꐽꇁ。ꎮꉰꑠꄿꐨꃼꇇꃅꉚꅉꄺꀱꏀꀺꊌꐨꌌꌬꈴꃅꌬ，ꀊꏀꃅꄿꐨꃼꇇꃅꉚꅉ7ꈚꄻꄉ。ꈏꃹꉆꐋꀋꌡꃅꏲꂠꏁꁈꌫꁁꏯꀁꑌꈨꉇꄉꈭꐨ，ꉇꎆꎆꏂꑘꀞꄻꌋꆀꆥꄻꌠꆏꐯꇯꃅꍤꄻꈌꁧꌠꄺꀱꌊꅺꇰꄉꏲꂠꌠꃅ。ꃶꐚꃅꇬꉇꎆ1300ꎖꂡꂰꑼꌬ，ꐪꊛꄉꀻꎆꇰꌠꇩꏤꇬꂴꇬꂾꉆꈉꇬꉆꎍ。
ꇖꆏꀉꇨꃅꏀꀺꄐꏁ，ꇙꊋꀊꏀꌠꐳꃅꉀꒆ。ꃹꅼꃅ“ꐯꏑꈄꏍ＋”ꃅꐨꌋꆀꇩꏤꃷꁨꊫꌐꀉꒉꌠꄐꇐꄹꎆ，ꐊꑷꃅ《ꍏꇩꄺꑣ2025》ꃄꌬ，“ꑍꀺ”ꏱꁈꏁꁈꃄꌬꌋꆀꄻꐛꒆ。2030ꈎꏭꉜꄉꃅꌠꈆꑪꇮꇐꏀꀺꐘꃆꀉꒉꀊꂾꌠꃅꌠꄐꇺ，ꀙꏢ、ꎮꉰꅉꆺꑭꊂꃅꁧꏖꐨꐥꌠꈆꑪꇮꇐꏀꀺꈯꄜꋈꄻꌠꄏꐓ，ꇩꏤꑴꌅꏀꀺꌡꀠꃄꅉ6ꈚꀊꏀꃅꄻ。ꐧꋦꑭꊂꎥꃪꀖꁉꌫꎆꌋꆀꇩꈐꒃꅐꈁꉬꁌꐨꍆꐪ2.08％ꇬꑟ。ꇩꈐꌬꍝꌠꁧꀿꌐꈲꐥꌠꃷꁨ100ꃪꐘꂵꅐ，ꇮꇐꃷꄻꎆ1ꃪꂡꂷꄩꐂ。ꈆꑪꇮꇐꀻꎆꅐꌞꐨꉀꐕꌊ56.2％ꇬꑟ，ꏀꀺꌠꆹꀻꎆꇬꄘꄏꂿꄐꐪꊛꄉꀉꇨꇁ。
ꉬꆏꃄꁕꇓꈓꇓꉈꋮꄮꃅꀻꎆꌠꊥꎆ，ꀊꏀꉹꌠꉀꎆꊧꉀꎆꁕꐳꃅꏓꐛ。ꃹꅼꃅ“ꋍꁕꋍꈜ”ꋈꄻ、ꏢꏸꏹꋯꐊꃅꀻꎆ、ꍤꏦꒊ꒜ꎆꏣꐛꁕꀻꎆꄐꇐꀉꒉꌕꐘꌠꃄꌬ，ꋉꃆꀉꒉꀊꂾꈨꑭꄑꄉꃄꄻ。ꁮꐚꁆꏯꌠꀉꒉꃅꀖꁉ“ꊯꌕꉬ”ꄐꎖꁰꄻꄉ，ꀊꏀꈭꌠꑛꌋꈤꄖꄑꌄꆣꄐꇐꌫꄻ，ꈯꄔꏯꃅꄷꄓꌄꆣꆹꌠꄹꇙ，ꁭꅐꏯꃅꄷꊋꄏꌊꂴꅑꄉꀻꎆ。ꐳꃅꀊꏀꉹꌠꇓꈓꏦꎫꐛꈴꌠꄹꎆ，ꃹꅼꃅꑱꁯꊫꌐꄹꏦꄺꀱ，ꐊꑷꃅꀀꌠꊫꌐꄹꏦꃄꌬ，ꉈꑴꊿ1600ꃪꑻꇓꈓꈿꇁꌦꀐ。ꀻꎆꌠꋮꐊꄅꇱꊌꐨꈲꁧꀋꆏꃅꄇꇖꀕꇁ。
ꃘꆏꊋꀥꇱꄉꒆꉻꋦꈭꋈꄻ，ꀊꃴꃅꀻꎆꌠꁨꎆꐨꀊꏀꌠꊌꅜ。ꒆꉻꌧꑳꋈꄻꌠꁻꌐꉉꍣꎖꉚꏡꁈꏤꄻꌊꌬ，ꇩꏤꒆꉻꌧꑳꃅꉚꅉꋈꄻ。ꊋꀥꇱꄉꃅꌗꍍꆀꏱꄻ，ꑍꀑꐊꑘ、ꄊꀑꐈꇐꋊꃑꃷꁨꂱꑱꅉꇬꄉ5.6％ꌋꆀ4％ꀁꋌꊰ，ꀋꂿꑘꌠꇓꈓ74ꂷꌠꈑꋧꐥꇐ（PM2.5）ꃅꈎꐽꏡꐊꐨꆏ9.1％ꀁꋌꊰ。ꊋꀦꐛꉻꄻꃪ，ꁦꎴꊋꀦꌬꈧꍆꐪꉐꊮꌺ1.7ꂷꉀꐕ，ꊖꌋꌬꈧꍆꐪꉐꊮꌺ2ꂷꀁꋌꊰ。ꒉꍍꆀꄴꏮꌠꄹꎆ，ꊖꆊꍍꆀꄴꏮꃅꐨꎖꄎꌠꄻꅐꇁ。ꍏꑷꋦꈭꀧꌋꃅꍞꌋꌠꃅꄉ，ꏦꇨꃅꋦꈭꏦꐆꃣꈌꈨꍤꀞ，ꋦꈭꀧꌋꃅꌤꃅꌠꄹꇙꌊꃹꅼꃅꃅꀐ。
ꏃꆏꉹꁌꐥꐨꏦꀧꌋꆀꄻꃪꌠꉜꁨ，ꏓꂱꉹꁌꊌꐨꐥꐨꁦꎆꇱ。ꏱꎆꊌꌬꐨꍅꊋꀉꒉꌠꇬꄉ，ꉹꁌꐥꐨꎆꇱꌠꐪꊛꄉꁦꎆ。ꃅꑘꊌꑘꀺꏱꁈꀊꏀꌠꄻꅐꇁ，ꏟꈯꃅꀋꂿꑘꌠꊿꁥꌠ、ꀋꂿꑘꌠꃅꄷꃅꑘꊌꌠꌤꃅꋒ。ꐊꑷꃅꎭꇔꈢꇓꀖꌠꄹꎆ，ꇩꏤꑭꊂꏱꎆꌢꎭꄏꐓꌐꐘꎆꀨꎆꇱꌠ1000ꂡꂷꄩꐂ。ꐥꐨꀁꂥꀧ、ꌌꂴꄉꀨꎹ、ꎞꆏꊿꅉꀨꃀꌠꀨꎹꎆꑠꎕꏦꉀꐕ，ꐥꐨꅀꀨꎹꁥꎆꃑꄻꊋꋠꌠꌋꆀꊿꄢꇨꌠ1700ꎖꃪꑹꁵ。ꏱꎆꃅꐙꌠꂘꑘꌫꎆꌬꐨꆹꇩꈐꒃꅐꈁꉬꁌꐨꍆꐪꐪꊛꄉ4％ꄩꐂ。ꀋꂿꑘꌠꒉꌶꅉꌢꎭꃅꄷꂿꑘꁡꇤꌶꌺꎹꄻꊻꂷꃷꁨꆹ21.3％ꉀꎆ。ꂿꑘꁡꇤꌢꎭꑱꈐꌶꌺꎃꐚꇨꍏꌶꄻꁌꀋꏮꃅꏆꇧꎭ。ꋋꈓꃅꎆꌌꋍꑞꋍꉹꌠꌶꅉꑱꈐꊋꋠꌶꌺ8400ꎖꃪꑻꃢꇇꀨ。ꇓꈓꇓꉈꀀꊿꅉꀨꆅꉁꏦꀧꄹꏦꋊꄻ，ꏱꎆꇇꀨꎕꏦꉀꐕ。ꅉꀨꄉꉻꁦꎴꁧꃤꃅꌫꎆꁦꎆꇱ。ꆄꁘꈺꁘꀉꒉꌠꄜꏂꀧꌠꉱꑷꌠꃅꇫꑟ，ꏤꐪꇬꊒꌠꌜꈐꀉꁁꃅꄷꄉꆅꉚꀀꁌꈛꎂꃅꌗꄻꉆ。ꊋꀥꇱꄉꅉꂫꊐꌠꄉꉻꁱꀕꁧꃤꃅ。ꉹꁌꃅꇭꀧꂄꌠꎖꄎꌠꃄꌬ，ꈯꎟꈩꊿꅿꒄꉪꒀꉼ、ꊹꉪꉼꇬꄉꉈꑴꊌꐨꉾꌠꀹꄻꎼꇁꌦ。ꀋꉊꄻꈎꃅꄷꈨꇬꈜꀕꇈꍤꏦꒊꃀꒈꁕꀉꇨꃅꒈꅐꑠꉮꌸꌠꅐ，ꋋꇅꃅꊋꇤꄉꉮꌸꈭꋏꌠꃅꄉ，ꃛꊸꃅꊿ900ꎖꃪꑻꃢꆹꏮꎞꄻ，ꄾꌦꋩꃅꉮꌸꁮꑋꐨꌌꀁꋌꊰ，ꋈꄻꀱꌠꊱꁨꃅꀕ。
ꉆꆏꍔꃚꋈꄻꌋꆀꏱꄻꏀꀺꌠꄹꎆ，ꐧꋦꁳꐮꄮꎍꐽꇬꎷꎻ。ꇩꃷꑼꄜꌊꇩꏤꑭꊂꏓꄊꎮꊈꉼꁳꍤꇖꎻꌠꏦꃤꇖꑘ13ꐘꐥ，ꏲꑘꏦꇗ8ꐘꏤꄻꄺꀱꀕ。ꄉꉻꁈꏤꇬꉹꁌꉪꐨꈺꌬꉺꏦꄻꐛꒆ，ꎔꎗꃅꏓꄊꁧꎁꇖꐨꌋꆀꍔꑠꊈꑼꄜꑘꀞꄻ。ꏲꃆꄇꄜꋊꌠꄹꎆ，ꌜꊐꌠꍔꃚꌤꏲꅉꌅꈌꌋꆀꃅꎁꃷꁨꋏꄯꒉꐊꑷꃅꄜꀦ。ꊋꃤꁦꎆꃅꄻꍞꍤꅑꃤꎹꌠꇬꇱ，ꌕꃢꌠꇩꃷꑼꀉꇨꃅꍞꍤꌠꊥꇬꄉꃅ，ꅏꊋꊨ、ꉹꁌꎆꇱꑠꏱꁈꃅꑞꅉꑟꐨꏭꌐꄉꍞꍤꌋꆀꌕꁁꏯꁳꄤꎖꎻꌠꃅ，ꏦꇨꃅꃅꄷꈨꏦꐆꄉꇤꎸꅍꐘꃆꀊꏀꌠꋈꄻ、“ꇤꎸꅍꀉꁘꌠ”ꒃꅐꃷꄻꑠꃅꐨꍤꀞ。ꊋꀥꇱꄉꋬꂻꒃꅐꌤꃅ，ꌤꈁꅐꃷꁨꌋꆀꌤꀉꒉꀊꂾꃅꅐꌠꃷꁨꐪꊛꄉꀁꋌꊰ。ꀉꇨꃅꐧꋦꋬꂻꐥꀹꏓꇱꏱꄻ，ꏦꃤꇬꈴꄉꏦꐆꑽꃤꃅꌠꇇꇩꍈ，ꊋꑌꃅꇩꏤꋬꂻꌋꆀꄉꉻꋬꂻꌠꀧꌋꃅꀐ。
ꏟꈯꃅ“ꑍꌷꋍꄻ”ꌶꄻꉙꂘꌠꃅ，ꎔꎗꃅꄈꍏꑷꏤꐪꉆꐘꉌꊈꃅꑞꅉꑟ，ꏟꈯꃅ“ꃅꇏꇖꑵꌠ”ꋊꍬ，ꏦꇨꃅꇩꃷꑼ“ꅇꏤꌕꐘꌠ”ꃄꌬ。ꏦꃤꈴꄉꍹꈔꊿꈨꌌꅓꀞ，ꍹꈔꏭꁎꉈꈽꌠꇫꍅꄎꀐ。
ꋌꃀꋋꈓ，ꍏꇩꐛꐨꇩꏤꀉꒉꌠꉇꉻꑌꑲꌠꊌꐨꀉꇨꃅꐥ。ꑮꏣꀻꍗꑮꏤꇩꏤꏲꌋꊿꇩꏤꀉꑌꂷꏭꅲꇫꁧ，ꑸꄠꎆꏣꇷꃅꎀꍹꏲꌋꊿꑌꀋꐚꃀ、ꎮꉰꇷꃅꎀꍹꀑꋾꃀ、ꏂꏪꇩꏤꏲꌋꊿꐮꂿꃀ、ꉿꉮꀋꐥꀑꋾꃀ、ꏓꐊꇩꃀꀉꒉꋬꈭꏠꊐꀊꂥꃀ、ꑸꉩꀑꋾꃀ、ꄏꑸꇷꃅꏲꌋꊿꋬꈭꃀꑠꀉꒉꀊꂾꌠꈿꈽ。ꊋꐛꃅꇂꊸꏦꆂꒉ—ꂱꇬꉼꒊꃀꇷꃅꇫꇬꃢꌠꏲꌋꊿꃀꈿꌠꀞ。ꀋꉬꀋꉆꌠꇩꏤꀉꒉꌠꌋꆀꋮꄮꃅꇷꃅꌠꊋꀥꇱꄉꀐ，ꈭꇍꇩꏤꌋꆀꐊꑷꃅꇷꃅꌠꐪꊛꄉꄹꎆ，ꀻꎆꇰꌠꇩꏤꌋꆀꉁꅉꃅꇷꃅꌠꀋꆏꃅꃹꅼꈴ，ꏓꐊꇩꑠꇩꏹꎀꍹꌋꆀꐮꑌꑲꌠꀊꅰꃅꑖꑟ。ꏣꀋꑌꃅꅉꆺꑭꊂꏱꄻꉻꑫꄺꀱꌋꆀꄻꃪꌠꊥꎆ。《ꀠꆀꉼꏤ》ꍝꊋꐥꎻꌠꄹꇙ。ꎆꏣꉇꉻꑌꑲ、ꃰꊿꁱꀕꐮꈴꌠꊌꐨꉾꐯꉾ。ꏟꈯꃅꇩꏤꏲꄸꌅꀨꌋꆀꎿꃀꌅꈌꈲꁧꀧꌋꃅ。ꍏꇩꆹꃅꎁꆸꄜꌠꇩꏤꀉꒉꂷꃅꄉꇬ，ꇩꏹꌋꆀꃅꄷꌤꃆꇬꋈꄻꐨꐥꌠꂿꄐꋊꇤꀐ，ꋧꃅꄮꐽꌋꆀꀻꎆꌠꎁꃅꅐꌞꐨꀋꂿꑘꃅꐥꀐ。
ꈣꒉꃅꍏꇩꇭꍣꄈꄻꐛ95ꈎꈭꏝꐛꌠꋨꏦ，ꈣꒉꃅꍏꇩꇬꇊꉼꏮꂽꎴꆹꏷꊋꐛ80ꈎꈭꏝꐛꌠꎺꄅ，ꉪꊇꇬꂾꉪꐨꎺ、ꐪꊛꄉꀒꁨꆹ、ꊋꈁꋠꐨꇔꑣꄎꌠꉌꊈꀉꇨꌠꄛꇰꀐ，ꇩꏤꑭꊂꏓꂱꎴꆹꏷꈜꀊꏀꌠꈴꋒ、ꀋꆏꃅꊋꐛꀊꏀꌠꅔꅜꌠꉌꊋꀉꇨꌠꄜꅐꇁꀐ！
ꁧꎁꊈ！
ꋌꃀꋋꈓꊌꅜꌠꊌꐨꆏ，ꐋꀨꑮꏣꀻꈯꄜꃅꄉꌠꄈꍏꑷꎃꊒꃅꏃꂠꌠꊌꐨꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꌠꊌꐨꉬ。ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀꋍꑞꋍꁁꏯꊿꂒꋦꌠꏭ，ꇬꀖꌌꀖꄉꈀꎭꀕ！ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꎿꉈꃺꑌꏭ，ꇬꀖꌌꀖꄉꈀꎭꀕ！ꍏꇩꐛꏀꈴꋈꄻꌤꑘꉈꇬꌋꆀꊋꄏꌠꈁꐥꌠꇩꏤꍔꃚ、ꇩꏹꎀꍹꌋꆀꈁꐥꌠꇩꏤꐋꀨꏭ，ꇬꀖꌌꀖꄉꈀꎭꀕ！
ꉪꊇꑌꏸꐚꃅꊌꂿꇬ，ꎆꏣꐧꋦꀻꎆꅉꇬꊋꋠꌠꌋꆀꌤꃆꄡꇗꀉꑌꈨꐥꑴꌦ。ꎆꏣꉀꎆꈏꒆꇙꊋꄡꇗꌌꀉꇨꌶꑴꌦ，ꉹꑘꄹꁆꅏꊋꁦꎆꇨ，ꎆꏂꑘꈨꒃꅐꀰꏢꊋꋠꐨꊼꇅꀉꑌ，ꃅꄷꎆꏣꆸꄟꁷꐞ，ꏱꎆꊌꐨꌬꐨꐮꄙꐨꊼꇅꀉꒉ，ꎆꏣꎆꒉꎆꇁꐔꈔꇁꉆꐨꉜꀋꁨꀋꉆ。ꋦꈭꍍꆀꃅꒊꃅꇁꄡꇗꆼꇨ，ꈜꀕꇈꃅꄷꋍꈨꇬꈑꉒꀉꇨꀕꌠꀋꆏꃅꇫꅐ，ꏱꄻꏡꁈꀒꁨꋍꁘꃅꊋꀥꇱꌶꑴꌦ。ꀀꑳ、ꂘꑘ、ꆅꉁꆅꄻ、ꃀꌠꀨꎹ、ꋠꇐꁬꋌꉮꀋꐥ、ꊌꐨꁆꁸꑠꁁꏯꇬ，ꏓꂱꉹꁌꉌꀋꃹꅉꀉꑌꃅꐥꑴꌦ。ꊖꌋꅣꅉ、ꋉꃆꄻꇐ、ꈭꈜꑠꁁꏯꇬꌤꆿꀉꒉꀊꂾꈨꅐꀐ，ꊽꉌꂵꆅ。ꍔꃚꌤꃅꌠꀋꇎꅉꐥ，ꄺꀱꏡꁈꌋꆀꏱꁈꋍꈨꋋꈨꃅꑞꅉꀋꑟ，ꎆꏂꑘꇬꃆꂮꐥꌠꁌꎴꌠꀉꑌ、ꉹꁌꌤꀞꊋꑠꌤꃆꄡꇗꊼꇅꑓꅐꎑꎍ，ꏲꑘꏦꌬꅉꇬꏦꀋꈴꀋꎃꀋꊒꌧꑳꃅꀋꐛꌠꐛꐨꐥ，ꇥꀯꀁꑌꈨꆏꏲꐵꃅꐵ、ꄹꇔꇖꅒ，ꋍꈨꋋꈨꁁꏯꇬꍹꈔꌤꃆꅉꀕꃅꇫꅐ。ꉪꊇꆏꀋꎪꃅꊒꀕꃅꋓꎭꇁꌠꏭꊝ，ꃣꁧꆸꄜꀬ，ꊋꈁꑌꃅꇤꄉꍔꃚꌤꃅꌠꃅꋒ，ꐩꋊꂿꃆꃅꌊꑊꊌ，ꏓꂱꀉꇨꃅꏮꄀꄉꌠꇬꇢꄡꏿꌶ。
ꑍ、2017ꈓꌤꃅꉻꄜꄐꁆ
ꎼꈎꆏꍏꇩꇭꍣꄈꇩꏤꑭꊂꁧꎁꃀꀉꒉꊯꈬꃢꌠꈿꌠꉬ，ꄈꌋꆀꇩꏤꌤꑘꀻꎆꅉꇬꈻꇐꀋꂿꑘꃅꐥꑠꋍꈓꉬ。ꍔꃚꌤꃅꌠꃅꋒꂿꄷꇬꆏ，ꐋꀨꑮꏣꀻꈯꄜꃅꄉꌠꄈꍏꑷꏃꂠꌠꇂꃴꄉ，ꀊꂥꃅꍏꇩꐛꐨꐧꋦꉪꏦꁈꁧꇰꀋꃀꌠꐕꄉ，ꐊꑷꃅꄈꅿꃀꀉꒉꊰꉆꃢꌠꌋꆀꊰꉆꈭꌕꃢ、ꇖꃢ、ꉬꃢ、ꃘꃢꐊꈴꃀꈿꌠꉌꊈꃅꈴꌬꈴ，ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌌꄐꇺꅍꃅꄉ，ꃹꅼꃅꑮꏣꀻꊝꎻꏹꉉꅇꀋꂿꑘꈧꌠꉌꊈꌋꆀꇩꏲꍔꄻꉪꉻꀊꏀꉪꇐꀊꏀꄐꇐꏤꁈꀊꏀꌠꃅꈴꌬꈴ，ꏓꇲꃅ“ꉬꑵꋍꉻ”ꉻꄜꄐꄻꌠꄹꎆꌋꆀꋮꄮꃅ“ꇖꑵꐊꑷ”ꌠꄐꇐꏤꁈꄐꄻꌠꄹꎆ，ꎍꐽꅉꄉꀒꁨꆹꌠꌤꃅꏓꇱꃄꄟꌭꈬꇬꎷ，ꈬꐯꈬꃅꀻꎆꉪꉻꀊꏀꌠꄻꉌꂵꇬꊐꄉꌋꆀꃄꌬꇫꑟ，ꎆꏣꀻꎆꅉꀕꐛꄟꀊꏀꌠꄐꏁꒃꇇꈐꊐꌠꇬꄉꄐ，ꀻꎆꊇꁧꌋꆀꑘꅐꐨꉀꐕꌠꌌꈯꄜꃅꄉꌠꌭꈬꇬꎷ，ꉻꒉꏱꁈꆏꎍꐽꌶ、ꅐꑘꏱꁈꆏꊒꌸꌶ、ꉻꐭꏱꁈꆏꊝꇮꌶ、ꄺꀱꏱꁈꆏꃶꐚꌶ、ꐧꋦꏱꁈꆏꉱꄏꌶꌠꏱꁈꉪꈜꌭꈬꇬꎷ，ꇲꁵꁁꏯꐛꉻꐨꐥꃅꄺꀱꄹꎆꌠꌌꀨꑟꃅꄉꌠꌭꈬꇬꎷ，ꄉꄐꃅꀑꐱꈉꐨꍔꒉ，ꊋꀥꇱꄉꂴꄐꄉꌠꄐꏁ，ꃹꅼꃅꏀꀺꅸꇙ，ꐊꑷꃅꉀꎆꌠꎍꐽ、ꄺꀱꌠꊥꎆ、ꐛꉻꋊꄻ、ꉹꁌꐥꐨꇬꈲ、ꐔꈔꉆꌠꄴꏮꌠꋍꑞꋍꐘꌤꃅꌠꃅꋒ，ꎆꏣꎍꐽꉾꃪꃅꀻꎆꌠꌋꆀꐧꋦꐮꄮꑘꒃꌠꏦꀧ，ꊌꐨꉾꃪꌠꌌꄈꅿꃀꀉꒉꊯꈬꃢꌠꊋꐛꃅꈿꌠꋨꏦ。
ꏓꇱꄉꇩꈐꇩꉈꃅꒊꃅꇁꎥꃪ，ꉪꊇꆏꐛꊂꀊꅰꌼꇪꇨꌠꏭꊝꌠꇎꋒꃅꊭꄎꋒꄉꌶ。ꋧꃅꎆꏣꉀꎆꀋꄿꌠꃅꒊꃅꇁꄡꇗꐪꊛꇰ，“ꅉꆺꈴꌠꏭꁏꄙ”ꌠꉪꐨꌋꆀꀧꌋꃅꉪꏦꆸꄟꄓꇁ，ꀋꉬꀋꉆꌠꎆꏣꐥꄜꏱꁈꆸꄟꌋꆀꉇꅐꈲꐨꐈꉆꐨꐥꊼꇅꀉꒉꑴꌦ，ꐊꊈꎍꀋꐽꊨꀋꄅꌠꄇꇖꀕꃅꁦꎆ。ꉪꇩꏤꀻꎆꌠꁦꅂꄹꐂꌠꀋꉬꀋꉆꊭꇬꎍ，ꎆꏣꏮꈴꌠꐮꄙꐨꌋꆀꌤꃆꑓꅐꎑꌠꀉꑌꃅꐥ。ꊋꋠꌠꉜꐭꀋꉆ，ꉌꊋꇘꑐꀋꉆ。ꉪꇩꏤꐥꇐꅉꃀꀉꄖ、ꊿꊋꅐꀦꇎꋒ、ꃷꎏꄉꈁꀉꒉ、ꅐꑘꇱꄻꌠꐊꑷ、ꈆꑪꇮꇐꀻꎆꐳ、ꅉꃀꉁꈾꊼꇅꐛꒆ，ꎆꏣꀻꎆꌠꄘꄏꇎꏦꉾꃪꃅꐥ，ꉻꒉꋊꄻꌠꏀꀺꇇꁈꌋꆀꏱꁈꊭꊐꌠꀉꑌꃅꐥꑴꌦ。ꉪꊇꑇꌠꆏ，ꄈꏟꈯꃅꏃꂠ，ꄈꅿꅉꀨꈛꏦꍬꇬꎷ，ꀋꎪꀋꑴꃅꍏꇩꐛꐨꐧꋦꉪꏦꈝꃀꍬ，ꏓꂱꉹꁌꀹꄻꊋꃤꌐꇁꈤꀋꉆꌠꊫꁱ，ꏃꊰꉌꋍꂷꃅ、ꊋꇤꉈꈽꇬꆏ，ꉪꇩꏤꀻꎆꌠꆹꀋꎪꃅꊌꐨꀉꇨꀊꏀꌠꀹꄻꅐꇁꄎꌠꉬ。
ꎼꈎꀻꎆꌠꂴꄐꄉꌠꁻꌐꀋꉬꀋꉆꌠꆏ：ꇩꈐꒃꅐꈁꊌꁌꐨ6.5％ꀑꂪꉀꎆ，ꃶꐚꌤꃅꅉꇬꄉꊌꐨꀊꅰꉾꃪꌠꅔꊊꅞ；ꀀꊿꌬꈧꁌꏤꉀꎆꐨ3％ꀑꂪꐥ；ꇓꈓꏦꎫꊿꀊꏀꃅꃅꑘꊌꌠ1100ꃪꑼꈋꉐꐥ，ꇓꈓꏦꎫꁱꄀꄉꌠꃅꑘꀋꊌꐨ4.5％ꈍꈐꎍ；ꈏꃹꉇꅐꐨꀱꎍꐽꃅꉾꃪꇁ，ꇩꏹꊌꐨꌬꐨꀑꐱꃅꐮꆽꏣ；ꀀꊿꊌꐨꌋꆀꎆꏣꉀꎆꌠꀑꐱꃅꇬꐮꐊꐙ；ꌗꂓꇩꈐꒃꅐꈁꊌꁌꐨꊋꃹꌠ3.4％ꈋꉐꀁꋌꊰ，ꀋꉬꀋꉆꌠꍍꆀꎊꇐꋊꃑꃷꁨꐪꊛꄉꀁꋌꊰ。
ꎼꈎꎆꏣꉀꎆꂴꄐꄉꌠꁻꌐꆏ，ꎆꏣꈳꏦꌋꆀꋌꐛꃶꐚꌠꇬꄉꄐ，ꃷꎏꂴꄐꄉꌠꄐꏁꌋꆀꌌꎍꐽ、ꐛꉻꋊꄻꌠꇬꈲꁧꐥ，ꐊꑷꃅꊼꇅꌣꈚꌠꐧꋦꋈꄻꐛꌠꇖꐨꌋꆀꐮꊒꐯꊛꌠꑌꉬ。ꉀꎆꌠꎍꐽꄉꌠꁻꌐꀋꉬꀋꉆꌠꆏꃅꑘꊌꌠꀧ、ꉹꁌꐥꐨꇬꈲꂿꄷꌠꉬ。ꎼꈎꃅꑘꊌꌠꍅꊋꁦꎆꃅꀉꒉ，ꃅꑘꊌꌠꄻꂴꄉꌠꄐꇐꏤꁈꌭꈬꇬꎷ，ꀊꅰꏣꀋꑌꌠꃅꑘꊌꏱꁈꃄꌬꌶ。ꇓꈓꏦꎫꀊꏀꃅꁦꎆꌠꃅꑘꊌꁻꌐꆏꀋꉊꄻꈎꄩ100ꃪꑼꁦꎆ，ꀊꅰꃅꃅꑘꊌꌠꏭꉜꁨꍝꄎꌠꄻꑓꅐꎑꄉꀐ。ꎆꏣꀑꐱꐛꐨꌋꆀꃅꑘꁵꄻꄐꊋꇬꈴꄉꉜꇬ，ꁻꌐꋋꏢꆏꊋꇤꇬꆏꃅꇫꑟꄎꌠꉬ。
ꎼꈎꆏꐪꊛꄉꏣꀋꑌꌠꏱꎆꏱꁈꌋꆀꎍꐽꌠꎆꃀꏱꁈꃄꌬ，ꄹꈐꋊꄻꌠꅉꃀꀂꏽꄉꍝꐥꃅꋊꄻ、ꋌꉚꄉꋌꋊꄻꌠꊋꀥꇱ，ꂴꂿꐨ、ꊒꌸꐨꌋꆀꇿꋌꐥꐨꉀꐕ。ꌬꈧ、ꎆꇱ、ꃄꁕ、ꅐꑘ、ꋦꈭꀧꌋꃅꑠꏱꁈꋮꄮꃅꐮꐊꌠꉜꁨ，ꎆꏣꏮꈴꌠꏦꀧꌊꋭꋽꅉꐕꄉ。
ꏱꎆꏱꁈꆏꀊꅰꃅꏣꀋꑌꇿꋌꐥ。ꎼꈎꌫꁏꇔꐨꆏ3％ꇬꈴꄉꄐꁆꃅꄐꄉ，ꏱꎆꌫꁏꇔꌠ2.38ꃪꂡꂷ，ꀒꄹꈎꄩ2000ꂡꂷꁦꎆ。ꄚꈐꏭ，ꍏꑷꏱꎆꌫꁏꇔꌠꆏ1.55ꃪꂡꂷ，ꃅꄷꏱꎆꌫꁏꇔꌠꆏ8300ꂡꂷ。ꃅꄷꌐꐘꎝꊫꌐ8000ꂡꂷꄐꁆꄉ，ꐪꊛꄉꃅꄷꍔꃚꀟꆦꎝꊫꌐꃑꌬ。ꎼꈎꌫꁏꇔꐨꀋꐈꃅꄉꌠꆏ，ꀋꉬꀋꉆꌠꆏꀒꁨꋍꁘꃅꇗꏸꊨꁌꀁꋌꊰ，ꋋꈓꃅꇬꉈꑴꎆꏂꑘꇗꏸꀵꃤ3500ꂡꂷꀑꂪ、ꎆꏂꑘꃆꂮꐥꌠꎳꁌ2000ꂡꂷꀋꇈꊨꇧꎭꂿꄷꌠꉬ，ꀋꎪꃅꃷꎏꀨꄜꑴꅉꁳꌌꉪꐨꐥꎻ。ꏱꎆꄐꌗꁆꄻꇬꀋꉬꀋꉆꌠꌌꑓꅐꎑꄉ、ꏦꀧꌠꐥꍅꌠꐥꌶ，ꀋꇎꅉꅋꑣ、ꉹꁌꐥꐨꈲꁧꐥꌠꊋꃤꀉꒉꃅꇱ。ꃅꄷꏭꎂꀕꐨꐥꃅꆹꏮꁵꄻꄉꈁꆏ9.5％ꉀꎆ，ꀋꉬꀋꉆꌠꆏꐮꆽꏣꐨꐥꃅꆹꏮꁵꄻꌋꆀꊋꋠꃅꄷꎆꊋꇇꀨꁵꌠꁦꎆꎻ。ꀋꂿꑘꌠꀋꉬꌠꌬꐨꊨꍅ，ꃅꊌꐨꀊꀋꂥꌠꐘꃆꏭꄐꌗꁆꄻꌠꊨꒊ。ꈁꐥꊐꌠꍔꃚꆏꏎꏸꄉꐥ，ꍏꑷꌤꏲꅉꆏꂴꅑꄉꃅ，ꉬꇮꃅ5％ꇬꀋꊰꌠꇬꈴꄉꌬꐨꎂꀕꐨꐥꌠꊨꍅ，ꈍꃅꑌ“ꌕꉻ”ꌫꁌꁦꎆꀋꉆ，ꎆꀨꀊꅰꀉꑌꌠꑣꌊꇗꏸꊨꁌꊨꌠꇬꌬꇁ，ꏎꏸꄉꉹꁌꁳꌣꈚꇁꎻꌠꈜꀦꇬꍬ。
ꎆꃀꏱꁈꆏꊋꑌꎃꐛꃅꐙꌠꄝꏦꀋꊰ。ꎼꈎꐊꐯꎆꃀM2ꌋꆀꐧꋦꎆꏓꄉꈁꋒꃷꁨꂴꄐꄉꌠꉀꎆꐨꆏꐯꇯ12％ꀑꂪꉬ。ꏓꇱꃅꎆꃀꏱꁈꌬꅍꌫꄻ，ꇘꊈꃅꐙꌠꀑꐱꃅꎍꐽꌠꀧꌋꃅ，ꄉꄐꃅꃷꎏꇔꊰꍆꁧꑟꐨꄐꏁ，ꊪꈴꉺꏦꎵꃪ，ꎆꒉꎆꇁꅐꀦꀊꅰꀉꑌꃅꐥꄜꎆꏣꇬꃹꒉꌠꊥꎆ，ꈜꀕꇈ“ꌕꂿꑘ”ꌋꆀꀄꊭꐭꎆꏂꑘꊋꄏ。ꉇꎆꀟꄻꃷꎏꈴꄺꀱꃅꍜꍬꄉ，ꏓꂱꀙꎆꃀꅉꆺꑭꊂꎆꃀꉻꑫꈐꏭꇬꉆꈉꉆꈬꄉꇬꎷ。
ꎼꈎꍔꃚꌤꃅꌠꃅꌊꉾꂿꄷꇬ，ꄚꐰꈍꑋꏢꌠꉾꃅꒃꇇꈐꊐꄉꌶ。ꋍꆏꎍꐽꅉꇬꄉꀒꁨꆹꌠꌤꃅꀑꐱꃄꄟꉾꃅꃄꌬꈴ，ꄐꇐꏤꊋꄝꏦꀋꊰꃅꄉꇬꎷ。ꎍꐽꌠꆏꃅꇴꄉꉻꉬ，ꊋꏂꄉꎍꐽꃅꉀꎆ、ꃅꑘꊌꌠꄉꀧ、ꐔꈔꉆꌠꄴꏮꌠꃅ，ꎆꒉꎆꇁꋬꂻ、ꉹꁌꐥꐨꏦꀧ、ꋦꈭꀧꌋꃅꑠꁁꏯꇬꄽꂫꑞꅉꋏꌫꄉ，ꎆꏣꐧꋦꃅꇴꄉꉻꎍꐽꎻ。ꎍꐽꌠꇎꏦꇂꃴꄉꀬꅑꃅꀒꁨꂵ，ꃹꅼꃅꄺꀱꌠꄹꎆ，ꐳꃅꐛꉻꋊꄻ，“ꃷꅍꀉꇨꌠ”ꑝꀬ，ꊋꇤꄉꀋꉬꀋꉆꁁꏯꇬꀊꏀꃅꁨꎆꐨꊌꅜ。ꑍꆏꇲꁵꁁꏯꐛꉻꐨꐥꃅꄺꀱꄹꎆꌠꌌꀨꑟꃅꄉꌠꌭꈬꇬꎷ。ꀋꎪꃅꇲꁵꁁꏯꐛꉻꄻꃪꌠꌌꀨꇬꄉꒃꉇꌠꃅꄉꇬꎷ，ꏲꑘꅧꊨꇗꏸꊨ、ꈏꃹꉆꌠꄝꐯ、ꏀꀺꊋꊡꌠꇬꃅꄉ，ꀋꆏꃅꉻꐭꀨꄜꍄꑐꊋꃤꄖꄑ，ꇲꁵꀋꍝꌠꊌꐨꈲꁧꀄꊭꌠꊨꒊ、ꇲꁵꇿꋌꐥꌠꍔꒉ，ꀊꅰꃪꃅꈉꐨꄐꇺꌋꆀꇫꄉꄐ。ꋋꆹꁯꄸꐈꁯꆮꐛꌠꉹꏮꊐꐕꈴꎁꏢꉬ，ꉘꇉꐨꐥꇈꋍꄲꋍꄲꃅꆅꌠꑌꇫꐊ，ꃛꊸꐯꃛꊸꇈꊋꋠꌼꇪꑴꌦ。ꈄꃅꀒꁨꆹꄉ，ꏟꈯꃅꈜꀸꋋꏢꈴꁖꌶ。ꌕꆏꄉꄐꃅꀑꐱꈉꐨꍔꒉꇈꇿꋌꐥꐨꉀꐕ。ꉪꇩꏤꈐꈉꊋꂫꀉꒉꐯꀉꒉ，ꈐꈉꍔꒉꌠꆹꄻꅐꌠꑌꉬꉈꑴꃅꇫꑟꄎꉆꌠꑌꉬ，ꀋꉬꀋꉆꌠꆏꊋꏁꅉꎹꊒ。ꉹꁌꐥꐨꄻꃪꌠꇬꆼꒆꄉꌬꈧꌠꍔꒉ，ꀋꇎꀋꂪꅉꅋꑣ、ꊋꂫꁦꎆꇱꌠꉜꄉꁦꎆꃅꎆꇱ，ꈐꈉꍔꒉꌠꁳꀊꅰꃅꇿꋌꐥ、ꀊꅰꃅꐪꊛꉆ，ꇲꁵꁁꏯꄺꀱꌋꆀꈉꄻꁁꏯꏲꂠꁳꐯꁥꐮꄏ、ꑍꇮꑍꏯꋽꎻ。ꇖꆏꏀꀺꉈꊪꄉꇙꊋꀊꏀꀉꆹꐮꆹꏮꌠꌋꆀꐛꉻꄻꃪꊐꐕꌠꄹꇙ。ꉪꇩꏤꀻꎆꅷꀋꃋꋋꊭꑟꇬ，ꄺꀱꏀꀺꌠꉘꀋꇉꄷꆏꐥꈜꀋꁮꌠꉬ。ꉪꊇꆹꋧꃅꃅꇬꑘꁨꊋꃤꃷꁨꀉꑌꐯꀉꑌꌠ、ꊇꁧꊼꇅꀊꂥꌠꐥ，ꈆꑪꇮꇐꌋꆀꌐꑘꇮꁈꌧꊿꀉꑌꐯꀉꑌꃅꐥ，ꏀꀺꊋꂫꀉꒉꀊꂾꌠꉬ。ꀋꎪꃅꄺꀱꁉꃑꌌꇙꊋꃅꄉ、ꊾꊋꌧꊿꅐꀦꌌꄘꄏꅍꃅꄉꇬꎷ，ꐳꃅꏀꀺꀻꎆ，ꇙꊋꀊꏀꌠꉘꉚꌊꀉꇨꆹ、ꇙꊋꋊꃅꐥꌠꄺꀱꉀꐕ，ꐊꊈꈁꐥꒃꅐꐨꉀꐕ，ꎆꏣꉀꎆꐳꐨꐧꀠꀊꂥꃅꆹꌠꄝꏦꀋꊰ、ꅐꑘꑟꐨꐧꀠꀊꂥꌠꇬꉜꄉꐕꌠꄹꇙ。ꉬꆏꊋꏂꄉꉹꁌꋍꏅꃅꇫꉜꁨꌠꌤꃆꑓꅐꎑꌠꂥꀘꇧꎭ。ꍔꃚꌤꈀꃅꌠꐯꇯꏓꂱꁧꎁꃅꃅꌠꉬ。ꏓꂱꌌꈯꄜꃅꄉꌠꀻꎆꉪꇐꃄꄻ，ꉪꇩꏤꐧꋦꉪꏦꇫꇬꊬꌠꃸꎍꌠꅉꀨꇩꃆꇩꂮꂥꀘꋒꌶ。ꉹꁌꇫꈌꐛ、ꇫꉘꇉꋒꌠꌤꃆꏭꆏ，ꇎꏦꐥꌠꆏꃛꄉꂥꀘ，ꌤꃪꌠꀞꄻꋒꌶ；ꋍꇅꇬꂥꀘꊋꌠꆏ，ꊋꇤꄉꇎꏦꄻꌊꀒꁨꋍꁘꃅꌌꂥꀘꌶ。ꉪꊇꆏꌦꀳꏿꄉꃅ，ꑠꃅꉹꁌꎁꃅꌤꃶꐚꌠꀞ、ꌤꊋꋠꌠꂥꀘ，ꐧꋦꐽꊯꑗꐥꌠꊥꎆ，ꀻꎆꑲꆀꇨꌠꉬꌠꀊꅰꀉꑌꃅꄛꑣꌊꏓꂱꐥꌒꎻꌠꇬꐕꄉ。
ꌕ、2017ꈓꌤꃅꂿꃆꀋꉬꀋꉆꌠ
ꎼꈎꄺꀱꀻꎆꎍꐽꂿꃆꊋꋠꀉꇖꌠꊝꇬ，ꉪꊇꆹꐊꑷꃅꃅꇴꄉꉻꉜ、ꋍꃱꃅꄐꏤ，ꀋꂿꑘꌠꌌꑓꅐꎑꃅꄉ、ꀋꉬꀋꉆꌠꒂꌬ，ꎃꊒꃅꋍꑞꋍꁁꏯꐮꃆꂮꂥꀘꋒ，ꀋꉬꀋꉆꌠꆏꄚꐰꋋꈍꑋꁁꏯꌤꃅꌠꒃꉇꋒꌶ。
（ꋍ）ꄺꀱꌠꏡꁈꌌꃹꅼꃅ“ꌕꊨꋍꍅꋍꅋ”ꌠꄹꎆ。ꊌꐨꄻꈫꈈꌠꅉꃀꀂꏽꄉ，ꐛꐨꀊꏀꌠꌤꃆꀊꏀꌠꇬꉜꄉ，ꏱꁈꏁꁈꄻꐛꒆ，ꊋꇤꄉꊌꐨꈲꁧꀊꅰꀉꒉꌠꊌꅜ。
ꏟꈯꃅꇿꋌꐥꃅꅏꊋꀜꋊꇧꎭ。ꎼꈎꆏꉈꑴꇤꎸꅍꅏꊋ5000ꃪꄓꀑꂪꊨꒊꇧꎭ，ꊖꌋꅏꊋ1.5ꂡꄓꈋꉐꎞꅐ。ꋍꈭꐨ，ꊖꌋꄆꅏꊋ5000ꃪꄙꊅꈋꉐꀜꋊ、ꋈꆏ、ꄯꄉꋈꄻꄉ，ꊖꌋꌋꆀꄆꅏꊋꁦꎆꇨꌠꃨꆰꐨꄴꏮꋊꑣ，ꊖꌋꄆꉹꑘꑘꅐꐨꉀꐕ，ꊋꀦꐛꉻꄻꃪ，ꁦꎴꊋꀦꀻꎆꌠꎁꃅꈥꈉꎞꎼꇁ。ꏦꇨꃅꋦꈭꀧꌋꃅ、ꊋꀦꃸꅐ、ꊇꁧ、ꋬꂻꑠꄚꃆꂮꐥꌠꏦꃤꏦꇗꌋꆀꎕꏦꃄꌬ，ꃷꎏꈴꏦꏲꈴꇇꁈꀊꅰꀉꑌꃅꌬꄉ，ꇿꋌꐥꃅ“ꂾꈠꎆꏂꑘ”ꀞꄻ，ꎆꏂꑘꐅꄻꏓꇱꀱ、ꑱꐢꌗꄻꌠꄹꇙ，ꏟꈯꃅꎕꏦꀋꑟꌠꊁꊰꅏꊋꀜꋊꇧꎭ，ꏦꇨꃅꉹꑘꁦꎆꇨꌠꅏꊋꀊꏀꌠꅐꌠꋎꍅ。ꅏꊋꊨꌠꀋꉬꀋꉆꌠꆏꌤꃅꊿꉾꃪꃅꁆꄻ，ꍏꑷꏱꎆꌐꐘꈁꁠꁥꁵꎆꃀꐳꃅꃑꁵ，ꃅꄷꌋꆀꎆꏂꑘꆏꇱꄻꎆꃀꌋꆀꄚꃆꂮꐥꌠꏡꁈꃅꑞꅉꑟ，ꁸꈴꌤꃅꊿꃅꑘꊌꌠꈝꃀꁮ、ꐥꐨꏦꀧꅍꐥꌠꄉꀧ。
ꇓꈓꉜꄉꏡꁈꌬꄉꊭꊎꄉꌠꊨꄻ。ꀋꃋꋋꇅꇬꇓꈓꌕꇖꊐꌠꑳꇤꁨꇐꊭꊎꄉꌠꄡꇗꊼꇅꀉꑌꑴꌦ，ꀀꊿꊨꏦꀀꌠꌋꆀꇓꈓꃹꊻꂷꑳꃼꈉꐨꊋꄏ。ꀋꎪꃅꀀꑳꀀꌬꊇꅉꐝꉅ，ꃅꄷꍔꃚꀨꄜꆽꎍꌠꃅꇫꑟ，ꐳꃅꑲꅉꇤꂷꃷꎏꎍꐽꉾꃅꀻꎆꌠꎴꈲꉺꏦꋈꄻꌋꆀꋈꄻꐛꒆ，ꃼꊤꐮꐊꌠꀀꑳꄹꏦꄻꐛꒆ，ꃷꎏꌌꀨꇬꄉꀉꑌꏠꊐꈉꐨꇬꑟ，ꍔꃚꌌꀨꇬꄉꅉꀨꏦꀧꌠꇲꁵ。ꑲꅉꇤꂷꃷꎏꉹꁸꄉꋎꐽ，ꑲꁌꉀꄓꌠꍅꊋꀉꒉꌠꇓꈓꆏꄉꄐꃅꀀꑳꌬꃅꁦꎆ，ꏦꈴꀖꁉ、ꃷꄻ、ꇢꈴꑠꃅ，ꇓꈓꀋꉬꀋꉆꌠꑲꁌꐳꃅꁌꄓꌠꏡꍅ。ꀋꃋꋋꇅꇬꇓꈓꏦꎫꇬꉈꑴꊿꈍꑋꄙꃪꑼꇎꏦꀋꉾꌠꑲꁘꇣꆹꐛꅉꇬꀀꎍꑴꌦ，ꐪꊛꄉꌌꄺꀱꌶ。ꎼꈎꉈꑴꑲꁘꇣꆹ600ꃪꂷꋈꀱꄺꀱꌠꂿꃆꃅꌐ，ꐪꊛꄉꉻꊤꑳꑠꏦꀧꐨꐥꌠꀀꑳꀻꎆ，ꂱꑱꃅꄷꐛꐨꉜ、ꃄꄟꀉꑌꑵꃅꄉꎆꃀꃅꁵꄻꌠꍆꁧꉀꐕ，ꊋꀥꇱꄉꋬꈭꉁꈾꋈꄻꌋꆀꄉꉻꁧꃤꃅ，ꀊꅰꀉꑌꌠꀀꑳꊋꋠꌠꑱꈐꁳꑲꁘꇣꁘꐛꅉꀋꀀꃅ，ꏓꂱꉹꁌꋍꏅꁳꇫꋦꆏꀀꑳꊌꅉꇬꄉꐥꐨꀊꏀꌠꀹꄻꎻꌶ。
ꏣꀋꑌꋭꋽꃅꆷꄿꊨꄻ。ꉪꇩꏤꎆꒉꎆꇁꀋꉬꌠꎆꏂꑘꆷꄿꍆꐨꊼꇅꀊꂥ，ꋋꆹꊭꊎꐨꀊꂥ、ꉌꒊꎆꉛꌠꌌꀨꇬꄉꌠꎆꊙꎆꏓꐛꉻꌋꆀꐮꃆꂮꐥꌠꉬ。ꀑꐱꆷꄿꍆꐨꋏꌫꌠꇎꏦꇂꃴꄉ，ꎆꏂꑘꆷꄿꍆꐨꊨꒊꌠꌌꀋꂿꑘꐯꀋꂿꑘꌠꃅꄉ。ꎆꏂꑘꁨꇐꊭꊎꄉꌠꀰꏢꐛꀕꌠꊥꎆ，ꁨꇐꁌꁦꊫꌐꐛꈴꌠꄹꎆ，ꃷꎏꈴꏦꏲꈴꎝꃆꆹꏮꇴꍆꐛꌠꊋꄏ，ꀉꑌꏠꊐꌠꎆꀨꃷꎏꀻꎆ，ꇴꍆꌅꈌꎆꏓꎆꊙꊋꃤꀉꒉꃅꇱ，ꎆꏂꑘꈜꀕꇈꇩꁨꎆꏂꑘꎆꃆꆷꄿꏢꑲꌠꄻꀉꇨ，ꋍꁘꋍꁘꃅꎆꏂꑘꎝꁭꑟꐨꊨꍅꌊꋭꋽꅉꇬꐕꄉ。
ꏁꁈꀉꑌꑵꋓꃅꌬꄉꀨꊰꊨꒊ。ꀄꊭꐭꌠꎆꏂꑘꊌꐨꇗꏸꈮꁁꊨꄉꎳꄻꈲꊌꈍꈐꍔꐯ，ꃅꈎꇗꏸꏮꄡꑟꌠꊌꐨꃷꁨꑞꅉ30ꃪꂷꇬꄉꉀꐕꌊ50ꃪꂷꇬꑟ；ꈆꑪꇮꇐꉹꌠꐧꀠꀄꊭꉹꌠꎆꏂꑘꎥꃪꀖꁉꌫꎆꏓꌗꈎꄻꍆꁧꆏ50％ꇬꄉꉀꐕꌊ75％ꇬꑟ，ꁈꏂꁈꇭꌊꐛꉻꐨꐥꌠꇗꏸꊨꐨꌋꆀꊌꐨꈲꁧꀒꁨꋍꁘꃅꄇꇖꀕꇁ。ꂓꌼꂓꁙꌠꎳꎆꆏꎆꏂꑘꀉꑌꃅꋌꎼꃣꇖꀵꀋꄐ，ꇗꏸꀋꉬꌠꃣꁧꀉꒉꃅꊨꒊ。ꋍꆏꐊꑷꃅꍔꃚꃅꐙꌠꎆꀨꌊꄻ，ꇓꈓꏦꎫꉻꌬꌤꑘꁥꇱꑠꎆꀨꇤꇧꎭ，ꌅꈌꄻꃅꄷꍔꃚꁵꄉꑴꌅꃅꎆꀨꄹꁆꊨꏆ。ꑍꆏꍏꑷꎆꏂꑘꃆꂮꐥꌠꏲꑘꌤꑘꉹꌠꎳꎆ35ꐘꇤꇧꎭꅀꆏꄉ，ꎆꎴꐘꃆꉈꑴꈮꁁꈋꉐꊨꒊꌦ，ꊏꄉꇈꌠꐘꃆꆏꄾꌦꋩꃅꁌꎴꎕꏦꊨꒊ。ꃅꄷꈧꌠꑌꎆꏂꑘꃆꂮꐥꌠꏲꑘꌤꑘꉹꌠꎳꎆꊨꄻ。ꌕꆏꍔꃚꁌꏤꄻꄉꌠꎆꏂꑘꃆꂮꐥꀰꏢꉹꌠꎳꎆꊨꒊ，ꏲꑘꈌꁧꇢꈴꁧꃤꃅꏦꐆꄉꁌꎴꌠꋊꄻꇧꎭ，ꎆꒉꎆꇁ、ꎸꈜꎊꈬꎞꎭꑠꁁꏯꎆꏂꑘꃆꂮꐥꀰꏢꉹꌠꎳꎆꊨꒊꌠꄹꇙ，ꊋꀥꇱꄉꃷꎏꋊꄻꉹꌠꀰꏢꁧꃤꃅꉹꌠꎳꎆꍞꏲ。ꇖꆏꐪꊛꄉꄉꄐꃅ“ꉬꄜꏂꀧꋍꎆꀨ”ꇬꃆꂮꐥꌠꏭꁌꍆꁧꊨꒊ。ꉬꆏꃹꅼꃅꄺꀱ、ꏱꁈꄻꐛꒆꄉ，ꎆꏂꑘꄹꏦꃅꐙꌠꃼꇇꀨꊰꀁꋌꊰ，ꊋꌬ、ꎊꈴꑠꀨꊰꀁꋌꊰ。ꄚꃆꂮꐥꌠꌤꏲꅉꌋꆀꌤꃅꅉꐯꇯꐭꁮꒉꇲꄉ，ꎆꏂꑘꁳꑾꌙꀕꃅ，ꇎꏦꀹꄻꄉꉪꇩꏤꋓꅔꊋꂫꀊꏀꌠꐛꎻ。
ꊒꌸꃅꊋꀥꇱꄉꀋꇎꀋꂪꅉꅋꑣ。ꀉꆈꃅꎆꏣꐧꋦꀻꎆꌋꆀꉹꁌꐥꐨꄻꃪꌠꇬꏢꑲꌠꌤꃆꑓꅐꎑꌠꏭꉜꄉ，“ꊯꌕꉬ”ꄐꎖꃄꌬꇬꊨꄅꄉꌠꐘꃆꀉꒉꀊꂾꌠꏓꇱꄉ，ꀋꇎꀋꂪꅉꅋꑣꊋꃤꀉꒉꃅꇱ，ꐳꃅꄉꉻꁧꃤꃅ、ꅉꃀꉁꈾ、ꏀꀺꀻꎆ、ꅐꀦꋦꈭꑠꄘꄏꄐꊋꉀꐕ。
ꌢꎭꃅꄷꌋꆀꌢꎭꊻꂷꆹꐊꑷꃅꊼꇅꌣꈚꌠꐧꋦꋈꄻꐛꇬꀋꇎꀋꂪꅉꀉꒉꇊꀉꒉꌠꉬ。ꃹꅼꃅꊒꌸꃅꌢꎭꄏꐓꊒꌸꃅꎭꑆꇔꌠꃄꌬꄉ，ꎼꈎꉈꑴꂿꑘꁡꇤꌢꎭꊻꂷ1000ꃪꈋꉐꊨꒊ，ꃅꄷꆦꄉꌢꎭꄏꐓꑱꎞꌠꊿ340ꃪꑼꐥ。ꍏꑷꏱꎆꌐꐘꌢꎭꄏꐓꎆ30％ꈋꉐꉀꎆ。ꊋꀥꇱꄉꐯꇯꐯꅑꀊꅰꃅꊋꋠꃅꄷ、ꇝꂱꀉꆹꃅꄷ、ꃅꋮꌋꆀꊿꋅꃅꄷꀖꁉ，ꅉꃀꉁꈾꌋꆀꄉꉻꁧꃤꃅꌠꄻꃪ，ꐛꋲꅐꑘꀻꎆ、ꑘꃆꎭꅐ、ꂘꑘꌋꆀꋬꂻꌢꎭꄏꐓꌠꄹꇙ，ꆄꈻꑠꃅꄉꌢꎭꀱꌢꎭꌠꉹꁌꇇꀨꇇꄻꌠꃅꋒ，ꌢꎭꋂꉻꄜꃅꉀꐕꌠꋉꃆꃄꄻ，ꌢꎭꃅꄷꌋꆀꌢꎭꉹꁌꑴꅉꀻꎆꄐꊋꌌꀉꇨ。ꌢꎭꑤꂿꑘꃆꂮꎆꀨꋊꍬꐯꇯꀱꌠꄹꎆ，ꎆꀨꌋꆀꐘꃆꍞꏲꌠꊋꇨꇱ。ꌢꎭꄏꐓꐊꃅꉺꏦꏀꀺ，ꐧꋦꊋꃤꌢꎭꄏꐓꌠꇬꐊꈽꌠꊋꄏꌋꆀꄐꏁ。ꃶꐚꃅꎭꇔꈢꇓꀖꆽꎍꄹꏦꃄꌬꇫꑟ，ꏦꇨꐯꏦꇨꌠꄤꎖꍤꎖꌠꃄꌬ，ꏦꇨꃅꎭꑆꇔꃶꀋꐚꌠ、“ꌠꌌꎭꑆꇔ”ꌠ、ꃷꁨꎭꑆꇔꌠꍤꄻꄉ，ꎭꑆꇔꌠꁳꉹꁌꇬꏚꍆ、ꐩꋊꁳꎕꄻꄎꎻ。
（ꑍ）ꀋꂿꑘꁁꏯꌋꆀꀋꉬꀋꉆꈭꊭꄺꀱꌠꃹꅼꈴ。ꐊꑷꃹꅼꃅꋍꑞꋍꁁꏯꄺꀱꄉ，ꐳꃅꅉꃀꃅꐙꌠ、ꀋꉬꀋꉆꃅꐙꌠꄺꀱꌠꄹꎆ，ꈏꒆꀻꎆꇙꊋꁳꁦꎆꀉꇨꇁꎻ。
ꐪꊛꄉꍔꃚꌅꊋꏭꆦꌠꄹꎆ。ꃷꎏꁳꅐꀦꁆꄻꌠꇬꏤꇽꐨꐥꌠꂿꄐꐥꌋꆀꀊꅰꉾꃅꍔꃚꂿꄐꋊꇤꎻ，ꀋꎪꃅꃹꅼꃅꏲꑘꅧꊨꌅꈌꄝꃑ、ꃑꏲꐮꐊꌠ、ꁧꃤꃅꃪꄺꀱꌠꃅꌶ。ꋋꆹꍔꃚꑴꅉꃹꅼꃅꄺꀱꑠꋍꃢꉬ，ꐪꊛꄉꌳꈄꇇꈘꀬꃅ，ꏟꈯꃅꈭꀺꈛꀺꄉꀒꁨꆹ。ꐊꑷꃅꃷꁨꋏꏲꂠꄹꏦꄹꌬ，ꇩꃷꑼꌤꏲꅉꌅꈌꌋꆀꆽꎍꃷꁨꋏꄯꒉꏤꄻ，ꐳꃅꃷꎏꃹꉆꀋꉾꁁꏯꃷꁨꋏꉚꌠꍔꐯ，ꍔꃚꃤꄿꐨꃅꊨꄻꌅꈌꊨꒊ，ꃷꎏꃤꑴꌅꌊꄻꌅꈌꁦꎆ。ꒃꅐꌋꆀꁧꃤꃅꈌꁧꊫꄳꈨꌊꄻꇧꎭ。ꃹꅼꃅꃼꃆꄹꏦꄺꀱ，ꊫꄳꀉꑌꑵꏓꋍꑵꐛꌠꃄꌬ，“ꊫꄳꊫꌐꁷꐞ”ꃅꉚꅉꍔꐯ。ꌤꃅꇬꌤꃅꊂꍞꏲꄹꏦꄻꐛꒆ，“ꑍꏸꐕꈴ、ꋍꄇꄜꋊ”ꌠꍞꏲꌠꉱꑷꈴꌠꃅꇫꑟ，ꏓꇱꏲꑘꏦꌬꌠꄹꎆ。ꇩꃷꑼꌤꏲꅉꌋꆀꃅꄷꍔꃚꈴꌗꉻꑫꐯꏡꐮꈴꌠꐳꀥꇱ，ꇩꏤꑭꊂꏲꃆꁧꃤꃅꐽꈉꋍꃱꃅꌠꏓꐛ。ꉪꊇꆏꎆꏂꑘꌋꆀꉹꁌꁳꀊꅰꀉꑌꃅ“ꃑꏲꃅ”ꄺꀱꊌꐨꊌꄉ，ꊋꏂꄉ“ꄽꂫꋍꉻꆏ”ꌠꄻꈴꄉ，ꏟꈯꃅꀋꉾꀋꃪꌠꋊꄻ、ꀋꈐꀋꉈꌠꏱꁈꌬ、ꈝꐮꈲꐥꌠꀃꈈꁉ。
ꐪꊛꄉꏱꎆꇗꏸꏦꉻꄺꀱꌠꄹꎆ。ꐊꑷꃅꃼꇇꇗꏸꄺꀱꌊꁌꎆꇗꏸꃅꌠꏱꁈꃄꌬꇫꑟꌋꆀꄻꃪ。ꁌꎆꇗꏸꇗꏸꍆꐪꐛꉻꄻꈝꐮꃅꄉ，ꎼꈎꆏꇗꏸꍆꐪꇖꊐꌠꏓꄻꌊꌕꊐꌠꇱ，ꈝꐮꂿꉆ、ꀊꅰꀋꈐꀋꉈꌠꇗꏸꎴꋦꈭꄺꂡ，ꀒꁨꋍꁘꃅꎆꏂꑘꇗꏸꎴꃣꁧꊨꑾꌙ。ꐳꃅꍏꑷꌋꆀꃅꄷꏱꎆꌤꌅꈌꌋꆀꌬꈧꆽꎍꐨꁷꄻꄺꀱꌠꄹꎆ，ꊌꐨꁷꄻꉻꄜꄐꉻꏤꄻ，ꃅꄷꇗꏸꉻꑫꄻꐛꒆ，ꃅꄷꍔꃚꎆꉛꃅꐨꋊꍬ。ꃹꅼꃅꍔꃚꄐꌗꌗꂫꇽꄇꄜꋊꌠꄹꎆ，ꉱꑘꎆꀨꀱꅸꌊꀰꏢꐛꀕ，ꎆꀨꌫꄻꑘꅐꐨꉀꐕ，ꎆꐘꈁꐥꃅꌌꑓꂿꅉꌬ、ꌌꌫꅉꌬꌶ。
ꎆꒉꎆꇁꏦꉻꄺꀱꌠꒃꉇꋒ。ꎆꒉꎆꇁꏲꉻꃅꑘꀋꉬꀋꉆꌠꃅ、ꌤꃅꊋꃤꌌꀏꒉꌠꊥꎆ，ꐥꄜꎆꏣꁧꃤꃅꄐꊋꄻꀉꇨ，ꏟꈯꃅꃅꌊꃶꐚꇬꐞꀊꆠꌠꃅꌠꄴꏮ。ꀉꒉꐧꀠꉹꌠꃼꇇꑘꑴꉴꊋꊡꌊꁊꈲꎆꒉꎆꇁꌤꑘꀯꄻꄉ，ꇩꁨꑴꉴꀉꒉꉹꌠꂴꅑꃅꇫꑟ，ꐮꍣꐨꍤꎖꈋꍣꏡꁈꌋꆀꊋꄏꏱꁈꃄꌬ，ꇿꋌꐥꃅꐧꀠꀄꊭꐭꌠꎆꏂꑘꎆꏓꊋꋠ、ꎆꏓꇔꊰꀉꒉꌠꌤꃆꋊꄻ。ꏱꁈꃅꐙꀖꁉꃅꐙꌠꎆꒉꎆꇁꂿꄐꋊꇤꋒ。ꂿꑘꁡꇤꉌꒊꎆꊐꅉꄺꀱꌠꄹꎆ，“ꌕꂿꑘ”ꁧꃤꃅꂿꄐꄻꀉꇨ。ꃹꅼꃅꏠꊐꀉꑌꌠꎆꀨꃷꎏꄺꀱ，ꀨꎍꃷꎏꅉꃀꃅꐙꌠꄹꏦꄻꐛꒆ，ꏣꀋꑌꃅꑘꀺꁁꏯꌠ、ꀊꏀꌕꁁꏯꌠꀻꎆ，ꀻꎆꃄꁕꃅꐙꌠꇴꍆꌅꈌꃷꎏꋊꍬ。ꄜꏂꀧꎆꀨꐥꄜꎆꏣꊋꄏꈴꈜꀺꐯ。ꊋꀉꒉꃅꇤꄉꀊꃴꎆꒉꎆꇁꀻꎆ。ꎆꏓꊣꄻꑘꉾꃅꀻꎆꌠꄹꇙ。ꀋꃋꋋꇅꇬꉻꑫꃅꐙꌠꐔꈔꉆꐨꀑꐱꃅꇬꋏꌫꄎ，ꄚꁨꇐꀋꉾ、ꎝꃆꏤꐆ、ꒋꒌꑴꉴ、ꐮꈴꈄꏍꎆꒉꎆꇁꑠꏓꄅꎍꌠꐔꈔꉆꐨꏭꆏꋓꉪꁨꋒꌶ。ꏣꀋꑌꋭꋽꃅꎆꒉꎆꇁꍞꏲꏦꉻꄺꀱꌠꄹꎆꄉ，ꊱꁨꃅꑓꅐꎑꌠꐕꈔꉆꅉꋊꄻ，ꎆꒉꎆꇁꐥꀹꋊꍬ，ꈬꐯꈬꃅꎆꒉꎆꇁꐔꈔꉆꐨ“ꁿꑲꅍ”ꋈꄻꌶ。ꉪꇩꏤꎆꏣꅉꀨꉻꑊꉾꃪ，ꃼꇇꑘꑴꉴꎆꀨꇎꋒꐨ、ꃑꁵꊭꄎꉱꑷꐨꊼꇅꀊꂥ，ꌌꌬꉆꌠꌫꉂꌫꈾꌋꆀꇇꁈꀉꑌ。ꉻꑫꃅꐙꌠꐔꈔꉆꐨꇫꀋꅐꌠꋮꑟꏭꋎꍅꄉꇬ，ꉪꊇꆹꉜꑍꌋꆀꉌꊈꐥ、ꄐꊋꌋꆀꏡꁈꐥ。
ꃹꅼꃅꇩꁨꎆꏂꑘꇩꁨꁨꇐꄺꀱꌠꄹꎆ。ꈯꄜꋓꅔꊋꃤꌋꆀꅐꀦꁆꄻꊌꐨꉀꐕꌠꌌꑞꅉꁻꌐꃅꄉ，ꇿꋌꐥꃅꐮꏢꄉꌠꇬꌦꏦꊿꏱꄻꐛꉻ、ꍄꑐꇿꋌꀊꂥꌠꃷꎏꈴꀰꏢꉺꏦꏓꐛꌶ。ꎼꈎꆏꇬꌦꄹꏦꄺꀱꌠꀑꐱꃅꃅꌐ。ꐮꌼꐮꉔꁨꏦꄺꀱꌠꃹꅼꈴ，ꄆꊋ、ꇓꋌ、ꋌꐛꐞꌗ、ꎸꈜ、ꂱꉴ、ꄆꎭ、ꂽꃆꋉꃆꑠꁁꏯꇬꄉꊇꅉꃅꐙꌠꑭꁘꐕꎼꆹ。ꄆꊋꌋꆀꇓꋌꋌꐛꐞꌗꏦꉻꄺꀱꌠꒃꉇꋒ，ꋓꅔꉹꌠꃅꑘꁉꃑ。ꐪꊛꄉꇩꁨꎆꏂꑘꋆꋊꇭꀧꂄ、ꊇꁧꉀꐕꅐꐨꉀꎆꌠꄹꎆ，ꐳꃅꇔꑣꄉꐧꋦꂿꄐꀞꄻ，ꐩꋊꍸꇈꌠꌤꃆꂥꀘ。ꇩꁨꎆꀨꎆꇱ、ꎞꎭꀰꏢꇬꌦꄺꀱꃅꉚꌠꄹꎆ。ꇩꁨꁨꇐꍞꏲꌠꄻꃪꌋꆀꊋꀥꇱ，ꁨꇐꁌꐨꏦꀧꁌꐨꉀꎆꌠꄉꀧ，ꏓꂱꃤꋍꉻꇇꇐꀧꌋꃅꋒ、ꀻꎆꋒꌶ。
ꀊꅰꉾꃅꉻꁨꏦꀋꉬꌠꎆꏣꍄꑐꊋꃤꄕꊪ。ꃹꅼꃅꉻꁨꏦꀋꉬꌠꎆꏣꀻꎆꌠꏱꁈꊋꄏꏁꁈꃄꌬꇫꑟ。ꏣꀋꑌꃅꀊꏀꉹꌠꍔꃚꃼꇇꐮꃆꂮꋈꄻ。ꉻꁨꏦꀋꉬꌠꎆꏂꑘꇩꁨꎆꏂꑘꄺꀱꌠꇬꐊꈽꌠꊋꊡ。ꌅꈌꈲꁧꐥꊯ、ꊜꋽꄮꐥꊯ、ꏦꋪꐥꊯꌠꌭꈬꇬꎷ，ꀒꁨꋍꁘꃅꉻꁨꏦꀋꉬꌠꎆꏣꃷꎏꃹꉆꌠꄝꃑ。ꏦꃤꏦꋪꊨꄅꃅꃹꀋꉆꄷꀋꄉꌠꉹꑘꌋꆀꁁꏯꉬꄷꆏ，ꐯꇯꋍꑞꋍꉹꃷꎏꀨꄜꇬꃹꉆ；ꉇꎆꏭꁉꃑꌠꉹꑘꌋꆀꁁꏯꉬꄷꆏ，ꐯꇯꉹꁌꎆꇱꌠꏭꁉꃑ；ꃷꎏꀋꈐꀋꉈꃅꋓꅔꌠꁧꏖꌠꇗꀋꊒꃅꐨꉬꄷꆏ，ꐯꇯꏟꈯꃅꏢꇋ。
ꊋꀥꇱꄉꁨꇐꌅꈌꀧꌋꃅꄹꏦꋈꄻ。ꁨꇐꌅꈌꀧꌋꃅꌠꆹꑘꃅꌠꀧꌋꃅ、ꁧꀿꁦꄻꌠꀧꌋꃅ、ꒃꅏꊋꃤꀧꌋꃅꌋꆀꀻꎆꌠꉬ。ꐳꃅꁨꇐꌅꈌꀧꌋꃅꄹꏦꄻꐛꒆꄉ，ꏦꃤꇬꈴꄉꋍꑞꋍꑵꁨꏦꎆꏣꎀꍹꌋꆀꉻꊿꁨꇐꌅꈌꏦꀧ，ꊿꑘꀺꏀꀺꌣꈚꄻꌠꊋꊡ，ꎆꏂꑘꌧꃀꉌꊈꄖꄑꌋꆀꀧꌋꃅꄉ，ꎆꏂꑘꌧꃀꁳꉌꊢꃅꀰꏢ、ꉌꒊꃅꎆꇱꎻ。ꎆꏂꑘꌋꆀꉻꊿꁨꇐꌅꈌꉄꌎꌠꃅꐨꏭꆏ，ꀋꎪꃅꏦꇨꃅꍤꀞ、ꑽꅉꐥꄷꆏꀋꎪꃅꄺꀱ。
ꊋꀉꒉꃅꇤꄉꐧꋦꏦꉻꄺꀱꌠꄹꎆ。ꃹꅼꃅꊌꐨꁷꄻꄹꏦꋬꈭꄺꀱ。ꄔꐽꃅꃀꌠꀨꎹꄜꏂꀧꄹꏦꄺꀱꌠꄹꇙ，ꇩꁨꎆꀨꄹꁆꁷꏮꌊꐧꋦꏦꀧꎆꀨꇬꋍꎙ。ꆅꉁꆅꄻ、ꆅꉁꄜꏂꀧ、ꆅꉁꁬꋌꐮꇙꄺꀱꌠꃹꅼꈴ。ꐊꑷꃅꉻꀞꆅꉚꅉꏓꇱꄺꀱꌠꄹꌬ，ꁬꋌꁌꁦꎆꇱꌠꉬꇮꃅꇤꇧꎭ，ꋮꄮꃅꆅꉁꆅꄻꁌꏤ、ꊿꌤꃄꎆ、ꁬꋌꐮꈴ、ꆅꉁꄜꏂꀧꁵꄻꄟꑠꄺꀱꌠꄹꎆ。ꃹꅼꃅꂘꑘ、ꁱꀕꌋꆀꌤꑘꌤꃅꅉꑠꄺꀱꌠꄹꎆ，ꐧꋦꁁꏯꊋꂫꀋꇰꀋꉈꌠꋒꐯꋒꃅꋊꃑꎼꇁ。
ꃹꅼꃅꒆꉻꌧꑳꏦꉻꄺꀱ。ꀨꄜꂿꄐꐛꁕꄹꏦꌋꆀꒆꉻꁵꊒꉺꏦꄻꐛꒆ，ꅐꀦꋦꈭꍞꎖꂴꌗꋏꉺꏦꄻꄉ，ꇩꏤꋌꐛꅐꀦꁨꇐꏲꂠꄹꏦꃅꉚꅉꋈꄻꐛꒆꌠꃅ，ꇩꏤꋍꏅꈩꀜꅉꏦꉻꀑꐱꄐꉻꁰꄻꅐꇁꄉ，ꒆꉻꌧꑳꋈꄻꌠꎁꃅꊋꑌꏡꑌꌠꄹꏦꏦꀧꌠꇲꁵ。
（ꌕ）ꀒꁨꋍꁘꃅꇩꈐꈉꐨꊋꂫꋊꃑ。ꇲꁵꁁꏯꐛꉻꌋꆀꈉꐨꐛꉻꐮꄉꄐ、ꌬꈧꊐꐕꌠꌋꆀꇿꋌꐥꃅꎆꇱꌠꐮꊥꎆ、ꋥꁕꇓꈓꇓꉈꀻꎆꌠꐮꄮꌠꄹꇙ，ꈐꈉꌠꎆꏣꉀꎆꌠꏭꀊꉗꃅꈺꇙꂿꄐꄻꀉꇨ。
ꌬꈧꎍꐽꃅꉀꎆꌠꊥꎆ。ꌬꈧꈉꐨꐛꐈꌠꇬꄉꄐ，ꏱꁈꏁꁈꄻꐛꒆ，ꌬꈧꋦꈭꄻꃪ。ꋍꆏꐳꃅꁧꃤꃅꌬꈧꌠꀻꎆ。ꀊꏀꈭꌠꁧꃤꃅꏓꇱꄺꀱꃅꉚꌠꃅ，ꐧꋦꊋꃤꂘꑘ、ꁱꀕ、ꃀꌠꀨꎹ、ꆅꉁꆅꄻꑠꁧꃤꃅꌠꇲꁵꌠꊋꄏ。ꁧꃤꃅꑘꈁꏦꏀꀺꌋꆀꁆꏯꐂꄉꐮꐊꐯꈽꌠꄹꇙ，ꉃꉘꄻꐯꇯ、ꁱꀕꁧꀿꉪꐨꑠꅐꏀꌬꈧꌠꀻꎆ。ꃄꎆꒃꄉꑬꆏꄹꏦꃄꌬꇫꑟ，ꈩꆫꉁꈾꌋꆀꁧꃤꃅꌠꄻꐛꒆ，ꊋꀉꒉꃅꅐꄉꑣꋂ、ꆷꈩ、ꈩꈴꈩꆫꌠꀻꎆ。ꃷꂷꑱꈐ、ꈄꏍꉙꂘꑠꈴꌗꌬꈧꌠꍔꐯ。ꄆꃼꇇ、ꐳꎭꋥꁕꃹꂿꑘꁡꇤꃹꌠꊥꎆ，ꐥꄜꃼꇇꃄꅉꃷꄻꌋꆀꈄꏍꈴꃼꐮꐊꀻꎆꌠꄹꇙ。ꑍꆏꊇꁧꀊꂥꌠꅐꇐꌬꈧꌠꁦꎆꇱ。ꎆꏂꑘꄐꏁꄉꅐꑫꁦꎆ、ꅐꇐꊇꁧꉀꐕ、ꂓꁦꅐꇐꀹꄻ，ꈏꉈꃷꄻꅐꇐ“ꈄꏍꐯꌟꎕꏦꐯꌟꊇꁧꐯꌟ”ꌠꃄꌬꈍꈐꍔꐯ，ꀊꅰꉾꃅꌬꈧꊐꐕꈉꄻꐨꇬꑟꋒꌶ。ꌕꆏꃷꎏꐥꀹꋊꄻꌋꆀꋊꍬ。ꏦꇨꃅꈰꄻꀊꆠꄷꅠ、ꈥꈱꄜꁊ、ꁌꏤꊏꀸꑠꃅꐨꍤꀞ，ꊋꀥꇱꄉꌬꈧꊿꌅꈌꈲꁧꀧꌋꃅ，ꉹꁌꁳꎆꌌꌬꈧꇬꉌꐒꅍꀁꑌ、ꉌꌒꌠꀉꑌꎻ。
ꏣꀋꑌꃅꇿꋌꐥꃅꎆꇱꌠꍔꐯ。ꎆꃀꀉꑌꃅꄐꏁꌌꀋꇎꀋꂪꅉꅋꑣ、ꐛꉻꋊꄻ、ꏀꀺꌠꊥꎆ、ꉹꁌꐥꐨꈲꌠꁁꏯꇬꇱ。ꎼꈎꎸꈜꋈꄻꎆꇱꌠ8000ꂡꂷ、ꄇꈜꇬꒉꇬꄉꎞꎭꎆꇱꌠ18ꃪꂡꂷꃅꌐ，ꉈꑴꈲꒉꋉꃆꀉꒉꀊꂾꌠ15ꐘꋈꄻ，ꐪꊛꄉꊋꀥꇱꄉꎸꈜꈭꈜ、ꉹꁌꌬꌋꆀꌬꈴꃅꈯꈜ、ꄆꑠꅉꃀꉁꈾꑠꐘꑘꀉꒉꀊꂾꌠꋈꄻ。ꍏꑷꄐꌗꈐꎆꇱꌠ5076ꂡꂷꄐꁆ。ꉹꁌꈬꇬꎆꇱꌠꏱꁈꏁꁈꊥꎆꃄꌬꇫꑟꌋꆀꄻꐛꒆ。ꍔꃚꌋꆀꐧꋦꎆꀨꇷꃅꌠꄹꎆ，ꄚꃆꂮꐥꌠꁌꏤ、ꇗꏸꁌꑠꒇꏣꁵꏱꁈꄻꐛꒆ，ꍔꃚꆏꂴꐊꏤꐪꍬꌶ，ꈍꃅꑌꈁꏾꃅꏤꐪꄺꀱꀋꉆ，ꈍꃅꑌ“ꇛꌺꀊꏀꆏꎝꃆꀉꆹꀋꅲꌠ”ꃅꀋꉆ。
ꃄꁕꀻꎆꐛꊂꄻꃪ。ꇲꈴꃅꄐꇐꀉꒉꌕꏢꌠꌋꆀ“ꅉꁕꀉꒉꇖꂷ”ꀻꎆꌠꏓꇲꄹꎆ，ꄚꃆꂮꐥꌠꄐꎖꃄꌬꋒ，ꏁꁈꀊꏀꌠꎥꃪꏤꄻ。ꇩꏤꊐꌠꐎꀊꏀꌠ、ꀖꁉꅉ、ꅐꑘꅏꄻꅉꑠꏀꀺꀻꎆꌠꄹꇙ。ꅐꀦꈤ、ꒆꉻꀉꆈꃅꉈꎞꑠꃅꄷꎆꏣꉹꏮꀻꎆꌠꊋꄏ。ꃅꈯꏱꂡꅐꀦꁆꄻꌠꄻꃪ。ꎿꃀꎆꏣꌡꀠꐛꁕꋈꄻꌠꄹꎆ，ꐳꃅꎿꃀꇩꏤꀉꇨꌠꋈꄻ，ꏟꈯꃅꇩꏤꎿꃀꌅꈌꈲꁧꀧꌋꃅ。
ꏟꈯꃅꇓꈓꏦꎫꐛꈴꀊꏀꉹꌠꄹꎆ。ꃹꅼꃅꑱꐴꄹꏦꄺꀱ，ꎼꈎꆹꇓꈓꃹꑱꐴꁱꇱꄉꌠ1300ꃪꑼꈋꉐꃅꇫꑟ，ꐳꃅꀀꐥꊫꌐꄹꏦꉱꑷꈴ。ꐧꐭꇓꈓꌋꆀꐛꋲꇓꈓꏦꎫꀄꊭꌠꀻꎆꌠꊋꄏ，ꇎꏦꐥꌠꑤꈨꌋꆀꐛꋲꇓꈓꏦꎫꀉꒉꌠꊱꁨꃅꌌꏃꄻꌠꄹꇙ，ꇓꈓꁥꏓꁊꁻꈺꇙꂿꄐꋊꇤꅐꇁ。“ꄐꎖꀉꑌꃅꏓꋍꏢꃅꌠ”ꊥꎆ，ꇓꈓꄐꎖꄐꄻꐨꉀꐕ。ꑲꋉꑘꄺꀱꀻꎆꌠꄹꎆ，ꋉꃆꊇꁧꉀꐕ。ꏓꇲꄉꇓꈓꅉꄩꅉꃴꋈꄻ，ꊋꀥꇱꄉꇓꈓꃄꊈꍤꄻ，ꉈꑴꇓꈓꅉꃴꏓꇱꁠꐤꈴꈜ2000ꉻꆏꈋꉐꋈꄻ，ꇓꈓꇬꀋꉬꀋꉆꌠꒉꇉꈝꐮꅉꋊꄻꇧꎭꌠꌕꈎꃅꐨꑭꄑꄉꃅ，ꀨꁮꇓꈓꋈꄻꌠꄹꎆꇈ，ꇿꋌꐥꃅꈭꈜꋍꇈꑠ“ꇓꈓꀋꉾꐨ”ꏱꄻ，ꇓꈓꁳ“ꉇꇷ”ꑌꐥ、“ꈏꇷ”ꑌꐥꎻ。
（ꇖ）ꏀꀺꌠꌌꐥꄜꎆꏣꉹꏮꊐꐕꌠꄐꏁ。ꐥꄜꎆꏣꆹꋌꃀꇯꆐꉪꇩꏤꀻꎆꌠꅉꃀꉬ，ꀋꃋꋋꇅꇬꃛꊸꌠꆏꐳꃅꉹꏮꊐꐕ。ꃹꅼꃅꏀꀺꄹꇙꀻꎆꄐꇐꃄꌬꌶ，ꐥꄜꎆꏣꐛꉻꄻꃪ，ꀋꆏꃅꊇꁧ、ꊌꐨꈲꁧꌋꆀꋓꂅꊋꃤꉀꐕꌠꄹꇙ。
ꈆꑪꇮꇐꏀꀺꊋꃤꉀꐕ。ꅉꃀꎥꃪꌠꌋꆀꂴꁧꀿꃅꐙꌠꎥꃪꌠꀊꉗꃅꎍꐽꌠꏭꊋꄏꉺꏦꄻꐛꒆ，ꇩꏤꈆꑪꇮꇐꅉꃀꉁꈾꌋꆀꇮꇐꏀꀺꈯꄜꀉꒉꀊꂾꌠꋈꄻ，ꈆꑪꇮꇐꅐꀦꁉꃑꇷꌬꐽꈉꄺꂡ。ꐊꑷꃅꏀꀺꌠꄺꀱꃅꉚꌠꄹꎆ。ꈆꑪꇮꇐꉉꍣꄹꏦꄺꀱ。ꃶꐚꃅꒉꌶꅉꌋꆀꈆꑪꎥꃪꑼꌙꑴꌅꌅꈌꃅꇫꑟ，ꇴꍆꌅꈌꏤꄮꈴꎊꈬꃻꄻꌅꈌꌋꆀꍍꊱꁸꑠꊡꀮꏱꁈꃄꌬꇫꑟ，ꈆꑪꎥꃪꌫꎆꌋꆀꐘꑘꏱꄻꄹꏦꄺꀱꌠꃄꌬꇫꑟꄉ，ꈆꑪꎥꃪꊿꁳꉈꑴꌤꌺꌤꇖꏭꀋꐒꀋꊀꎻ。ꌧꇐꅏꄻꌅꈌꏓꇱꏱꄻꄺꀱꉚꌠꃅ，ꌧꇐꅏꄻꌅꈌꀹꄻ、ꀧꌋꃅꌠꌋꆀꃄꌬꉻꑫꄻꐛꒆ。ꃹꅼꃅꌧꊿꀻꎆꏦꉻꄺꀱ，ꀊꅰꃅꌧꊿꊙꈏꃹꇿꋌꐥꌠꏱꁈꃄꌬ，ꀊꐯꈭꃅꋧꃅꌧꊿꏓꌊ，ꋒꐯꋒꃅꈆꑪꎥꃪꊿꏣꀋꑌꐨꄕꊪꎼꇁꇬꆏ，ꀋꎪꃅꏀꀺꃅꑘꀉꒉꌠꃅꊌꄎꌠꉬ。
ꐳꃅꏀꄓꅐꑘꉘꉚꀉꇨꇁ。ꐊꑷꃅꄐꇐꃅꐙꌠꏀꄓꅐꑘꀻꎆꄐꎖꃄꌬ，ꐳꃅꌬꇐꀊꏀ、ꊋꀦꀊꏀꌠ、ꊿꄻꀑꊋ、ꏓꐛꄆꈜ、ꒆꇐꁬꋌꄻꌠ、ꉬꋊꌠꊇꇙꅇꈴꑠꇮꇐꎥꀖꌋꆀꏭꆦ，ꅐꑘꁥꏓꄻꀉꒉꄻꀉꇨ。ꎆꏣꀻꎆꇷꈲꌠꊋꄏꌋꆀꄐꏁ，ꐧꋦꌬꇐꅐꀦꌫꄻꊌꐨꈲꁧꉀꐕꄉ，ꏓꂱꉹꁌꐥꌒꎻ。ꏀꀺꌠꊋꊡ、ꅔꆙꉪꋧꌠꏥꏦꈴꄉ，ꏀꄓꅐꑘꍞꏲꇗꏦꏤꄻ，ꏀꄓꅐꑘꉾꃅꀻꎆꌠꄐꏁꌋꆀꊥꎆ。ꃹꅼꃅꏓꌗꏱꄻꏦꉻꄺꀱ，ꏀꄓꅐꑘꏓꌗꌠꄻꐛꒆ。ꐯꏑꈄꏍꐤꄮ，ꋍꑞꋍꁆꏯꀻꎆꇬꐯꇯꐳꐨꀊꅰꃅꐳ、ꀨꊰꀊꅰꃅꀄꊭ、ꋬꂻꐨꀊꅰꀊꂥꌠꈴꌗꈄꏍꈉꄻ。ꎼꈎꈄꏍꐳꐨꉀꐕꌫꎆꀁꋌꍅꌠꆹꑭꁘꀊꅰꀉꒉꃅꐕꎼꆹ，ꃅꈎꋋꈓꈐꃅꇇꌌꄆꅇꇩꈐꈜꎴꃅꅥꌠꌋꆀꉈꏭꈩꆫꄆꅇꁌꉬꇮꇤꇧꎭꌐ，ꀉꒉꃅꐧꐭꎆꏂꑘꐮꈴꈄꏍꌐꑟꊪꃹꁌꀁꋌꊰ，ꇩꏹꈜꎴꄆꅇꁌꀁꋌꊰ，“ꐯꏑꈄꏍ＋”ꃹꅼꃅꀻꎆꄹꇙ、ꃷꁨꎆꏣꐳꃅꉀꎆꌠꊥꎆ，ꎆꏂꑘꁳꀊꐯꃅꈲꏣꊌ、ꉹꁌꁳꁊꈴꃅꒇꏣꊌꎻ。
ꊋꀉꒉꃅꇤꄉꋊꃅꅐꑘꊐꐕꌠꄺꀱ。ꃹꅼꃅ《ꍏꇩꄺꑣ2025》ꃄꌬ，ꐳꃅꃷꁨꊫꌐꀉꒉ、ꄂꄐꌗ、ꎊꈴꈄꏍꌫꄻ，ꇮꇐꀊꏀꌠꃅꑘꀊꏀꌠꈁꏦꀊꏀꌠꌌ，ꋊꃅꅐꑘꒃꅐ、ꏲꂠꌋꆀꀰꏢꃷꄻꌠꈁꏦꄺꀱꌠꄹꇙ。ꀑꁮꀻꎆꄺꑣꌠꌌꀨꇬꄉꒃꉇꌠꃅꄉ，ꇩꏤꀑꁮꄺꑣꌡꀠꐛꅉ、ꄺꑣꑘꏀꀺꈯꄜꋈꄻꌠꄹꎆ，ꃹꅼꃅꇮꑘꅉꀨꀉꇨ、ꀉꒉꀊꂾꌠꉁꈾꌐꐘꋉꃆꃄꌬ，ꊋꏂꄉꂴꅑꌠꄺꑣꑘꀻꎆ，ꍏꇩꄺꑣꌠꆹꐧꀠꀊꂥꌠꇬꉜꄉꃅꌠꄹꇙ。ꇩꏤꀉꇨꌠꄺꑣꋈꄻꌠꏱꁈꉻꑫꄻꐛꒆ，ꃄꄟꀉꑌꑵꃅꌌꇮꇐꄺꀱꌠꊋꄏ，ꋊꃅꅐꑘꏀꆦꌠꍅꁍꀕꃅꐙꌠꊥꎆ。
ꐪꊛꄉꉹꁌꑘꀺ、ꋍꏅꏀꀺꌠꄹꎆ。“ꑍꀺ”ꌠꆹꑘꀺꌠꌌꃅꅍꊌꌠꈺꇙꌠꃄꄟꇿꋌꐥꌠꉬ，ꀊꏀꀉꆹꇙꊋꏭꆦꌠꌋꆀꎆꏣꐛꉻꊐꐕꌠꀋꂿꑘꊋꃤꄹꇙꌠꉬ，ꊜꋽꄮꀋꈐꀋꉈꌋꆀꐧꋦꑭꊂꇙꈧꌠꊥꎆꌠꃶꐚꈴꈜꉬ，ꀋꆏꃅꄐꈻꌊꃹꅼꅉꆹꌶ。“ꑍꀺ”ꌡꀠꐛꅉꈨꀊꏀꃅꋈꄻꄉ，ꎆꏂꑘꀉꒉꌠꌋꆀꈆꑪꎥꃪꑼꌙ、ꒉꌶꅉꌐꑘꈴꌠꉹꁌꃅꀹꄻꌠꈥꈉꄻꄉ，ꊋꀥꇱꄉꐧꐭꎆꏂꑘꏀꀺꉹꌠꊋꄏ，ꋍꏅꏭꉜꄉꌠ“ꑍꀺ”ꈴꎁꇬꃅꁧꃤꃅꌠꉻꑫꄺꂡꄉ，ꋍꑞꋍꑵꀨꄜꂱꑱꊋꋊ、ꈄꏍꇬꈄꏍꉈꉾꃪꃅꐮꇙ，ꐭꎆꏂꑘꃅꃴꁿꃄꅉꉱ、ꒉꎆꏂꑘꃅꃴꑟꃄꅉꋦꃅꎻ，ꃷꎏꁳꍄꑐꊋꃤꌋꆀꐧꋦꀹꄻꊋꃤꐯꋑꁨꆹꎻ。
ꐊꑷꃅꊇꁧꑟꐨꉀꐕ。ꀊꐯꈭꃅꊇꁧꉀꐕꌠꃅ，ꊋꀥꇱꄉꐊꑷꃅꊇꁧꏱꄻ，ꊇꁧꇮꇐꅉꃀꌆꈬ，ꊇꁧꍞꊟꌠꌌꀉꇨ，ꉾꊋꁘꋊꌠꊇꁧꋓꅔꉺꏦꄻꐛꒆ。ꊇꁧꒌꆠ，ꇔꇷꉌꂵꇬꑌ。ꊋꀉꒉꃅꇤꄉꇔꇷꉌꊈꍔꆙ，ꇔꇷꁱꀕꀊꅼꃅꄻ，ꊋꇤꃅꑘꃅ，ꉾꉎꉾꎹ，ꊋꊡꉺꏦꄻꐛꒆ，“ꍏꇩꇔꇷ”ꀉꑌꃅꂘꄻ，“ꍏꇩꂓꁦꅐꇐ”ꋧꃅꈨꌠꀊꅰꀉꑌꃅꄺꑣꄉ，ꍏꇩꎆꏣꀻꎆꌠꊇꁧꃅꋊꇬꃹꆹꌠꄹꇙ。
（ꉬ）ꂿꑘꎍꐽꃅꀻꎆꌠꌋꆀꂿꑘꊿꐪꊛꄉꁦꎆꃅꊌꌠꊥꎆ。ꃹꅼꃅꂿꑘꇲꁵꁁꏯꐛꉻꐨꐥꃅꄺꀱꌠꄹꎆ，ꂿꑘꀉꇨꂿꑘꈲꊌꌠꏱꁈꄻꐛꒆ，ꂿꑘꊿꃅꑘꊌꁦꎆꃅꊌꌠꈭꈜꀺꐯ，ꇩꏤꋚꂷꋬꂻꌠꏦꀧ，ꂿꑘꐛꏀꈴꌠꌋꆀꀊꏀꉹꌠꇓꈓꏦꎫꐛꈴꌠꐮꏯꊥꎆꀒꁨꆹꌠꄹꇙ，ꐳꃅꂿꑘꂿꑘꁡꇤꀻꎆꇙꊋꀊꏀꌠꉘꉚ。
ꂿꑘꐛꉻꋊꄻꌠꄹꎆ。ꂿꑘꊿꃷꎏꈉꐨꈴꄉꒃꅐꀻꎆꌠꄐꏁ，ꊈꂄꀊꃴꌠꂿꑘꅐꇐꇲꁵꌠꁦꎆꇱ，ꊈꂄꌠꍯ、ꎭꒃꅐꌠꍔꐯ，ꄉꄐꃅꀀꃆꊪꏽꃅꊂꋊꒊ，ꋙꊪꌠꄺꀱꌊꏜꏿꌠꃅꉚꃅꊂꍔꐯꌊ1000ꃪꂿꈋꉐꑟ。ꈜꀉꑌꃅꈴꄉꀀꃆꊸꑳꇬꊭꊐꄉꌠꃷꌬꌠꊋꊡ。ꋚꀨꅏꅉꊋꄏꄉꂿꑘꅐꇐꉾꃪꃅꄻꇱꌠꀻꎆ，ꉜꆫꂿꑘ、ꆷꈩꂿꑘꀻꎆ，ꅐꑘꊛꏣꁌꏤꊛꏣꀺꐯ，ꂿꑘꁡꇤꋍꑍꌕꉹꌠꅐꑘꏓꇱꀻꎆꐛꊂꀊꏀꌠꋈꄻ。
ꊋꀥꇱꄉꐛꏀꂿꑘꋈꄻ。ꐳꃅꂿꑘꅐꇐꎕꏦꈴꒃꅐ、ꂓꁦꅐꇐꄻꌠꌋꆀꀧꌋꃅꌠꄹꎆ，ꋚꊪꏽꇬꋚꅏꅉ、ꀋꂿꑘꌠꂿꑘꅐꇐꒃꅐꀧꌋꃅꅉ、ꐛꋲꂿꑘꅐꇐꂱꎆꅑꅉꌋꆀꐛꏀꂿꑘꅐꑘꃄꅉꋈꄻ。ꃄꅉꋊꄻꌠꄹꎆ，ꊋꏂꄉꍯꃅꅐꐨꐧꀠꀁꑌꌠꄺꀱ，ꅔꃅꊪꏽꇮꇐꄹꌬ，ꇿꋌꀊꂥꒉꏏꊐꃅꊂ2000ꃪꂿꀊꏀꃅꁦꎆꇬꇯ。ꊋꀥꇱꄉꋠꃅꀧꌋꃅ，ꍆꅋꐮꆽꏣꌠꄻꃪ。ꇶꏦꀉꑌꑵꃅꄉꈁꄉꄐꃅꀰꏢꌠꀻꎆꌠꆹ，ꍏꇩꐛꐨꂿꑘꐛꏀꈴꌠꀋꈴꀋꉆꌠꈜꉬ，ꂿꑘꄜꏂꀧꊋꑌꃅꏦꀧꌠꇬꐞꇁꀋꉆꌠꉬ。ꎼꈎꋚꀉꑌꃅꅐꌠꌜ13ꂷꇬꑤꏃꋍꈨꌋꌊꄉ，ꄉꈁꄉꄐꌠꀰꏢꂿꑘꑱꁯꏭꀉꒉꃅꉮꌸꄜꏂꀧꌠꃅ，ꏱꎆꇬꉮꌸꈭꋏꎆꃀꈨꋊꄻꌊꇫꊋꄏ，ꄜꏂꀧꉱꑷꐨꌋꆀꀵꊒꎕꏦꉀꐕ，ꂿꑘꀱꉈꑴꄜꏂꀧꉻꑫꄻꃪ，ꐪꊛꄉꎍꐽꌠꂿꑘꄜꏂꀧꌠꌌꐛꏀꂿꑘꀻꎆꌠꇇꀨ。
ꃹꅼꃅꂿꑘꁡꇤꄺꀱ。ꎍꐽꃅꂿꑘꁡꇤꋍꉻꅐꇐꌅꈌꄹꏦꄺꀱꌠꄹꎆ，ꃹꅼꃅꂿꑘꁡꇤꃄꅉꄹꏦꄺꀱꉚ，ꂿꑘꊿꁨꇐꌅꈌꀊꅰꀉꑌꃅꐥꎻ。ꋚꂷꑠꀋꂿꑘꌠꂿꑘꅐꇐꁌꏤꏓꐛꉺꏦꌋꆀꎴꊐꄹꏦꄻꃪ，ꂿꑘꒉꁌꏓꇱꄺꀱꌠꄹꎆ。ꃹꅼꃅꋍꉻꌩꏪꌅꈌ、ꇩꁨꌩꁍꌩꏲꅉ、ꂿꑘꊪꏽꅉ、ꇲꃷꎹꑠꄺꀱ。ꊋꀥꇱꄉꂿꑘꁡꇤꅉꂫꊐꌠꎀꍹꋈꄻ。ꂿꑘꁡꇤ“ꑍꀺ”ꊥꎆꉺꏦꄻꐛꒆ，ꀊꅰꃅꀉꑌꌠꀊꏀꉹꌠꃅꑘꂿꑘꊿꉘꉚ，ꂿꑘꇮꃅꊿꀱꂱꑱꃅꄷꄉꑘꀺꌠꊋꄏ，ꀒꁨꋍꁘꃅꏡꁈꏂꄉꒉꌶꅉꇬꌷꅐꌶꌺ、ꂽꑼꀱꇁꌠ、ꈆꑪꇮꇐꌤꃅꊿꊋꊡꌊꂿꑘꁡꇤꄉꌧꇐꂿꇐꍔꆙꄉꃅꎻ。
ꊋꀥꇱꄉꂿꑘꁡꇤꄉꉻꉁꈾꋈꄻ。ꂿꑘꁡꇤꄇꈜ20ꃪꉻꆏꀊꏀꃅꋈꄻꋈꀱ。ꂿꑘꁡꇤꎍꐽꉈꊪꉆꌠꄆꇲꁧꃤꃅꌠꌋꆀꐦꀞꃅꄷꏸꈻꒉꐬꄆꈴꉱꑷꌐꌠꃅꇫꑟ。ꏲꑘꋂ3ꃪꂷꇬꁨꑟꌬꈴꌠꄹꇙ。ꂿꑘꁡꇤꅝꒉꉮꀋꐥꌠꒉꇲꄉꀧꐨꉀꐕ。ꊋꀉꒉꃅꂿꑘꁡꇤꑲꁘꇣꆹꌠꄺꀱ。ꃹꅼꃅꂿꑘꁡꇤꊿꀀꋦꈭꏱꄻꌠꄹꎆ，ꐛꏀꌧꑳꇈ、ꉈꑴꃅꈋꃄꏦꋽꎔꌠꑣꋂꋈꄻ。
（ꃘ）ꏣꀋꑌꃅꑴꇙꃅꉇꉻꏭꁉꃑꌠꍔꐯ。ꇩꏹꋦꈭꀊꏀꃅꐛꐈꌠꌋꆀꇩꈐꀻꎆꇖꐨꀊꏀꌠꊝꇬ，ꀒꁨꋍꁘꃅꉇꉻꏭꁉꃑꌠꄐꇐꄐꉻꄻꃪꌶ，ꐳꃅꁉꃑꉹꌠꎆꏣꏦꉻꀊꏀꌠꄻꄉ，ꀊꅰꀊꂥꏠꊐꃹꀊꅰꀊꂥꅉꑟꌠꉇꉻꏭꁉꃑꌠꄹꇙ。
ꏟꈯꃅ“ꋍꁕꋍꈜ”ꋈꄻꌠꄹꎆ。ꀋꎪꃅꐯꇯꋮꒉꐯꇯꋈꄻꐯꇯꊌꄻꌠꌬꄉ，ꐳꃅꅔꃀꇬꎆꏣꈴꈜꌋꆀꎿꄩꇷꃅꅉꋈꄻ，ꈝꃀꑍꋮꈳꈌꀉꒉꌠꇷꃅꉺꏦꄻꄉ。ꃹꅼꃅꇩꏹꅏꊋꇷꃅ，ꉪꇩꏤꉁꈾ、ꇮꇐ、ꎕꏦ、ꁧꃤꃅꌠꈺꇙꌊꉇꅐꁧ，ꂱꎆꅑꐨꐯꅋꌠꃅꇬꅜ。ꊋꀥꇱꄉꂘꑘ、ꈆꑪꇮꇐ、ꁱꀕ、ꁦꎴꆄꄻ、ꈩꆫꑠꃰꊿꁱꀕꐮꈴꌠꇷꃅ。ꊇꁧꀊꂥꃅ“ꋍꁕꋍꈜ”ꇩꏹꇷꃅꀑꋾꉉꍣꌠꀞꄻꋒ，ꐯꇯꇷꃅꐯꈲꂢꇐꈷꇐꀊꏀꌠꂢꈷ。
ꉇꉻꃼꇇꐪꊛꄉꀱꎍꐽꉾꇁꌠꊥꎆ。ꈏꃹꉇꅐꏱꁈꌬꇫꑟꌋꆀꄻꐛꒆ，ꉾꃪꃅꈏꃹꉾꃪꃅꉇꅐꌠꄹꇙ。ꉇꅐꉌꒊꄜꏂꀧꉱꑷꐨꍔꒉ，ꋬꈭꉁꈾꉇꅐꎆꏓꌠꀧꄡꑟꌠꆏꄾꌦꋩꃅꀧꌐ。ꁧꃤꃅꃼꇇꏀꀺꀻꎆꉚꅉꄹꎆ，ꁧꃤꃅꃼꇇꏀꀺꀻꎆꄐꇺꎆꀨꎹꄻꄉ。ꃷꎏꃻꄻꃼꇇ、ꉇꉻꃼꇇꏓꇱꁧꃤꃅꎆꏂꑘꃅꉚꀻꎆꌠꊋꄏ。ꐳꃅꉇꉻꃼꇇꉹꏮꊐꐕꌡꀠꐛꅉꋈꄻ。ꄺꑣꃼꇇꆏꐯꅑꅐꑘꐧꀠꀊꂥꊐꌠꇬꉜꄉꎇꈻ、ꈯꄔꁮꐚꏭꃅꄷꉜꄉꐯꀋꌡꃅꆹꏮꌠꊥꎆ。ꇩꏹꃼꇇ“ꏡꄜꈳꈌ”ꄹꌬ，ꇩꏤꑭꊂꃅꈜꀸꈴꇬꋍꉻꃅꐙꌠꃅꇫꑟ。ꂴꅑꌠꇮꇐ、ꉁꈾꌋꆀꀋꉬꀋꉆꌠꎸꇺꎸꂷꌌꈏꃹꇁꌠꁦꎆꇱ，ꃼꇇꐮꆽꏣꃅꀻꎆꌋꆀꇩꈐꅐꑘꐳꃅꊐꐕꌠꊥꎆ。
ꊋꏂꄉꇩꉈꃼꇇꃅꊿꎆꇱꋦꈭꄻꃪ。ꇩꉈꃼꇇꃅꊿꎆꇱꅐꑘꄐꇺꎹꀨꄺꂡꀱ，ꀒꁨꋍꁘꃅꁧꃤꃅꑘ、ꄺꑣꑘ、ꇑꅤꑘꉇꎆꈏꃹꉆꌠꄝꃑ。ꇩꉈꃼꇇꃅꊿꎆꇱꎆꏂꑘꌌꇩꈐꃷꎏꇬꆹ、ꎝꃑꌠꊋꄏ，ꇩꏤꈆꑪꇮꇐꎖꄎꐘꃆꃅꈽꉆꎽ。ꇎꏦꄐꐨꃅꎻ、ꎕꏦꏤꄻ、ꍔꃚꃻꄻ、《ꍏꇩꄺꑣ2025》ꈲꊌꏱꁈꑠꁆꏯꇬ，ꈏꉈꎆꇱꎆꏂꑘꌌꋍꏠꃅꉜ。ꃅꄷꍔꃚꆏꏦꃤꏤꄻꌅꈌꈐꇬꄉ，ꃼꇇꎹꎆꀨꊙꈲꐨꏱꁈꏤꄻꅐꇁꉆ。ꎕꏦꀊꂥꑞꅉꀊꂥꃅꄿꐨꃼꇇꃅꉚꅉ11ꈚꋈꄻ，ꐊꑷꃅꎖꋪꐛꒆꌠꄹꌬ。ꇩꉈꏭꎆꇱꌠꄐꇺꌊꉾꃪꏦꈴꃅꀻꎆ，ꈔꉆꐨꄴꏮꄐꊋꊐꐕ。ꍏꇩꁉꃑꄇꂿꆹꀊꅰꁉꀊꅰꀊꐯꇁ，ꀋꎪꃅꐪꊛꄉꈺꄻꊋꃤꐥꐯꐥꌠꇩꉈꃼꇇꃅꊿꎆꇱꅉꐛꇁꌠꉬ。
ꇩꏹꃼꇇꌋꆀꎆꇱꄿꐨꈴꈝꐮꈴꌠꄹꎆ。ꎆꏣꋧꃅꈴꌠꆹꋧꃅꇩꏤꈁꐥꌠꁧꀦꈲꁧꇬꊒ。ꍏꇩꀋꎪꀋꑴꃅꄹꆺꑭꊂꎆꏣꇷꃅꌠꄹꇙ，ꀉꑌꁁꏯꃅꃼꇇꃅꏦꉻꈜꀦꏡꌠꇬꎍꌠꀧꌋꃅ，ꏣꀋꑌꃅꀉꑌꁁꏯꃼꇇꐯꉇꌠꃅꈽ。ꉪꊇꆹꄚꃆꂮꐥꌠꇩꏤꌋꆀꐯꇯꄉ，ꍏꇩ—ꄏꃀꄿꐨꃼꇇꃅꅉꊐꐕꋯꏤꄯꒉꐊꑷꃅꇿꋌꐥꃅꃄꌬꌠꄹꇙ，ꏛꃅꃄꁕꐊꑷꃅꎆꏣꐋꀨꃆꂮꋯꏤꐯꉇꌠꃅꌐꄉ，ꑸꄠꄿꐨꃼꇇꃅꅉꋈꄻꄹꎆ。ꐪꊛꄉꄚꃆꂮꐥꌠꇩꏤ、ꃅꄷꌋꆀꎆꇱꃼꇇꃅꋯꏤꌠꉉꋯ。ꍏꇩꆹꃅꎁꆸꄜꌠꃅꇩꏤꂷꉬ，ꉬꐮꄉꌠꎔꃅꃅꅷꇁꇬꎷ，ꐥꄡꑟꌠꌅꈌꈲꁧꆹꏟꈯꃅꇫꀧꌋꃅꇬꎷ。
（ꏃ）ꒆꉻꋦꈭꀧꌋꃅꏱꄻꊋꃤꁦꎆꇱ。ꐳꃅꒆꉻꋦꈭꀊꅰꃅꃅꌗꊇꁧꄻꉾꌠꆹ，ꏓꂱꉹꁌꃛꊸꌠꉪꐨꉬ，ꐪꊛꄉꀻꎆꉆꌠꈏꐥꇖꐨꉬ。ꀋꎪꃅꈆꑪꃅꁈꏂ、ꈏꇷꉇꇷꃅꉃꄻ、ꇨꃅꏱꄻꌶ，ꊋꇤꄉꎖꉚꄯꒉꎕꏦꑟꌠꏮꏓꂱꉹꁌꁵ。
ꏟꈯꃅꋒꃅꃅꃴꀕꇉꀕꌠꀧꌋꃅꌠꃅ。ꎼꈎꑍꀑꑘꐊ、ꄊꀑꐊꐥꇐꋊꃑꃷꁨꂱꑱꅉꄉꇬ３％ꀁꋌꊰ，ꀋꉬꀋꉆꅉꈑꋧꐥꇐ（PM2.5）ꐊꐨꄇꇖꀕꃅꀁꋌꊰꌶ。ꋍꆏꐳꃅꐞꌋꍍꆀꌤꃆꂥꀘꌶ。ꐊꑷꃅꊖꌋꁗꏒꌠꏓꇱꏱꄻ，ꒈꀑꃅꄷꃅꋆꄮꐰꁦꎴꊸꌬꌠꄹꎆ，ꄆꌊꊖꌋꎃꊐ、ꌗꌌꊖꌋꎃꊐꌠ300ꃪꁯꈋꉐꐥ，ꄃꊐꌠꈋꉐꇓꈓꄻꐛꐎꐞꌋꒉꈾꄷꇉꀄꊭꌠꉬꇮꃅꀜꋊꇧꎭꌠꃅꌐ。ꊋꀥꇱꄉꐞꌋꄆꍣꀁꂥꐯꀁꂥꃅꋊꃑꌋꆀꊋꏏꄺꀱꌠꃅ，ꁭꅐꈯꄔꏯꃅꄷꂱꑱꅉꃅꎼꈎꑎꄹꈎꑍꈓꃅꀕꌐ，ꁮꐚꏯꃅꄷꆏ2020ꈎꃅꌐ。ꃛꊸꃅꉺꏦꌋꆀꇮꇐꌤꃆꂥꀘ，ꂴꄉꁦꎴꊋꀦꌌꄆꃑꈄꏍꈩꌠꄉꀧ，ꇿꋌꐥꃅꒉꇤꇧꎭ、ꃅꆳꇤꇧꎭ、ꁨꑭꇤꇧꎭꌠꃆꂮꄯꆏꄉ。ꋬꂻꇿꋌꀊꂥꃅꉿꄆꀻꎆ。ꐳꃅꋙꏜꌌꏓꇱꄉꌬ。ꑍꆏꐊꑷꃅꍍꆀꇁꀦꎕꏦꏱꄻ。ꀋꉬꀋꉆꉹꑘꍍꆀꏱꄻꌐꐘꃅꌠꃅ。ꀋꉬꀋꉆꌠꇮꑘꍍꆀꇁꀦꈁꐥꌠꄮꈉ24ꂷꌠꃅꋍꈴꎁꇬꄉꍞꋏꌠꃅ，ꊇꁧꍞꊟꋎꍅꌠꏦꀧ。ꋊꃑꎕꏦꀋꑟꌠꎆꏂꑘꄽꂫꎕꏦꑟꄮꈉꊨꄅ，ꄮꈉꑟꇬꎕꏦꀋꑟꌠꆏꏟꈯꃅꏦꃤꇬꈴꄉꈢꆏꇧꎭ。ꌕꆏꀉꇨꃅꏸꐕꇙꊋꍯꂫꌗꏱꄻꌶ。ꀑꐱꃅꌐꏂꍯꇤꇧꎭ，ꐳꃅꏸꇙꍯꀉꆹꌠꇤꇧꎭ，ꋊꃑꀊꂥꌠꏸꇙꍯꌌꌐꄉꏱꄻ，ꁦꎴꊋꀦꐕꍯꌬꌠꊋꊡ。ꐞꋌꊇꁧꉀꐕ，ꀋꉬꀋꉆꃄꁕꇬꐳꃅꇩꃘꎕꏦꐞꋌꌬꌠꄹꌬ。ꇖꆏꇿꋌꐥꃅꀉꇨꃅꍍꆀꌠꃅꌗꏭꊝꌶ。ꊋꀥꇱꄉꃅꌗꍍꆀꇁꀦꎥꃪꌋꆀꈑꉒꐛꋧꐛꈳꏦꎥꃪ，ꇫꊝꌠꈆꑪꃅꐙꐨꌋꆀꌸꊒꃅꐙꐨꉀꐕ。ꃄꁕꀋꉬꀋꉆꅉꇬꏓꐏꏓꋏꏓꄵꈍꈐꍔꐯ，ꌗꋏꌋꆀꃛꊸꏡꁈꄻꀉꇨꃅꄉ。ꉬꆏꏦꇨꃅꋦꈭꏦꌬꌋꆀꍞꍤꅑꎹꌠꃅꌶ。ꈐꄉꋊꃑ、ꀊꆠꌠꄻꌠꏭꆏ，ꀋꎪꃅꏦꃤꈴꅓꀞ；ꏦꌬꀋꋒ、ꇫꏣꅔꃅꌠꆏ，ꀋꎪꃅꏦꇨꃅꅑꃤꎹꌶ；ꃅꌗꊇꁧꐤꅉꄷꅉꑟ、ꇫꊝꇬꊋꀋꑌꌠꆏ，ꀋꎪꃅꀉꆈꃅꅑꃤꎹꌶ。ꈑꉒꏱꄻꇬꈀꄸꀂꏽꑌꆽꎍ，ꀋꉬꀋꉆꌠꆏꃄꄻ、ꌭꈬꇬꎷꑲꆀꃅꐛꄎ。ꐧꋦꑭꊂꃅꀋꆏꃅꊋꇤꑲꆏ，ꃅꃴꀕꇉꀕꌠꆹꈍꃄꑌꋍꈓꀱꋍꈓꏭꀋꋌꃅꀊꑌꇁꌠꉬ。
ꀉꇨꃅꒉ、ꊖꍍꆀꌠꄴꏮ。ꎼꈎꐈꇐꆏꀑꈉꃷꁨ、ꉢꄊꋊꃑꃷꁨꂱꑱꅉꃅꄉꇬ2％ꀁꋌꊰꌶ。ꋒꃅꈳꁕꀋꉬꀋꉆꅉ、ꃄꁕ、ꎾꁕꒉꍍꆀꌠꌋꆀꂿꑘꑊꊧꍍꆀꄴꏮꌠꒃꉇ。ꊖꍍꆀꌠꑭꋧꃅꍤꄻꌠꃅ，ꉹꁸꄉꏱꄻꏡꁈꏤꄻꃄꌬ。ꊋꀥꇱꄉꇓꈓꇓꉈꋦꈭꏓꇱꏱꄻ，ꀊꃴꐥꐨꐤꄟꄕꊪ，ꁊꈴꃅꑲꌩꀖꑘꉹꁸꌠꄹꏦꄹꌬ。ꊋꏏꋦꈭꀧꌋꃅꅐꑘꉘꉚꀉꒉꄉ，ꀊꃴꄺꂡꀱꌠꌋꆀꅐꀦꀰꏮꌬꅐꑘꀻꎆ，ꋦꈭꄻꃪꌋꆀꎆꏣꀻꎆꑍꑵꐯꇯꊌꐨꈲꁧꐥꌠꃅꇫꑟꎻ。
ꒆꉻꀧꌋꃅꌠꌋꆀꋈꄻꌠꄹꎆ。ꐳꃅꒆꉻꀧꌋꃅꑟꅪꏤꄻꌋꆀꐏꈬꃅꄉ。ꏣꀋꑌꃅꃅꌗꐛꐈꌠꏭꊝ。ꌩꏪꊇꁧꉀꐕ、ꍤꏦꒊꃀꎆꏣꐛꁕꀉꒉꀊꂾꌠꒆꉻꄻꐛꅉꐛ、ꌩꏪꒉꌩꁧꍯꃅꎿꉻꒆꉻꀧꌋꃅꋉꃆꑍꃢꌠꃅꉚꌠꃄꇬ，ꋠꃅꀱꌩꊪꋠꃅꀱꏜꏿꌠ1200ꃪꂿꈋꉐꃅꌐ，ꊋꀥꇱꄉꃅꈣꂤꏂꅔ、ꇓꊈꂤꏂꅔꐛꌠꏱꄻ，ꒆꉻꁨꇐꀊꅰꀉꑌꃅꏓꊭꄉ，ꐪꊛꄉꀻꎆꉆꌠꀊꃴꇓꇰꀋꃀꏮꌠꋉꄉ。
（ꉆ）ꉹꁌꐥꐨꏦꀧꌋꆀꄻꃪꌠꌌꀋꉬꀋꉆꌠꃅꄉꌠꐧꋦꋈꄻꌠꄹꎆ。ꉹꁌꐥꐨꆹꏲꑘꃅꌠꀋꉬꀋꉆꌠ，ꀋꎪꃅꈍꄮꑌꄻꉌꂵꊐꄉ、ꇤꆸꄜꄉꌶ。ꀋꃋꋋꄮꇩꈐꇩꉈꃅꒊꃅꇁꌼꇪꇨꌠꃆꂮꇂꃴꆏ，ꉹꁌꐥꐨꀊꅰꃅꌌꂴꄉꏦꀧꌋꆀꄻꃪ，ꀞꄡꑟꀞꄐꌠꌤꆏꊋꇤꄉꀞꄻꋒ，ꉹꁌꐥꐨꅉꀨꂫꑟꏟꈯꃅꋏꄉꌶ。
ꊋꀉꒉꃅꅐꄉꃅꑘꊌꑘꀺꌠꊥꎆ。ꃅꑘꊌꏱꁈꄻꐛꒆ，ꊋꀥꇱꄉꃅꑘꊌꁰꍋꌠꃅ，ꁱꂘꊋꃤꁦꎆꇱ，ꊋꀥꇱꄉꊝꇮꃅꃅꑘꊌꌠ、ꀊꏀꃅꃅꑘꊌꌠꐛꄟꏭꊋꄏ。ꎼꈎꒉꌶꅉꇬꌷꅐꌶꌺ795ꃪꑼꐥ，ꉈꑴꐩꋊꀊꂥꑞꅉꀊꏀꌠꇬꑞꌦ，ꋒꃅꃅꑘꊌꌠꊥꎆ、ꑘꀺꏃꂠ、ꅉꂫꊐꌠꒆꎆꑠꎖꄎꌠꃄꌬ，ꈭꈜꀉꑌꏢꃅꃅꑘꊌꑘꀺꌠꊥꎆ。ꏱꁈꃄꌬꇫꑟꌋꆀꄻꐛꒆ，ꃶꐚꃅꋒꃅꎞꆏꂽꑼꃅꑘꁵꌠꌤꃅ。ꃅꑘꊌꇇꀨꊋꃤꁦꎆꇱ，ꇓꈓꏦꎫꊿꌢꎭ、ꊿꄢꅐꌠꃅꑘꊌꃅꌠꇬꇇꀨ，ꃅꑘꀋꊌꌠꑱꈐꈍꃅꑌꊿꋍꂷꎍꐽꃅꃅꑘꊌꎻꌠꄉꀧ。ꉪꊇꆏꏟꈯꃅꃅꑘꊌꌠꆹꉹꁌꇫꐥꌠꅉꀨꉬꌠꋋꏢꌠꒃꌫꄉ，ꊿꈧꌠꁳꑘꃅꅉꇬꄉꇇꇐꎹꄻ，ꉈꈽꅉꇬꄉꊿꐥꁌꐨꃅꇫꑟꎻ。
ꋒꃅꀋꈐꀋꉈꉾꃪꌠꂘꑘꀞꄻ。ꇓꈓꇓꉈꋭꑘꉙꂘꌶꌺ“ꑍꏆꋍꁥꇱ”ꏱꁈꏓꋍꃱꃅꄉ，ꐳꃅꇓꈓꇓꉈꋭꑘꉙꂘꋍꏅꁧꃤꃅꌠꅉꀕꀀꊿꊻꂷꃅꉱꑷꌐꌠꃅꇫꑟ，ꐪꊛꄉꊋꁧꌶꅉꌶꅉꀞꇎꏦꄻꉾ，ꉾꃪꃅꉙꂘꌬꇐꉱꑷꅉꍔꒉ，ꀋꆏꃅꇓꈓꇓꉈ、ꃄꁕ、ꌶꅉꇢꊭꌶꅉꀞꄻꍣꐨꍕꒊ。ꐪꊛꄉꀋꂿꑘꌠꒉꌶꅉꌢꎭꃅꄷꑘꃅꁡꇤꌶꌺꎹꌠꄉꈁꍔꒉ。ꀨꌧꎥꃪꌶꌺꇩꏤꌶꄻꇇꀨꎆꁥꇱꎕꏦꉀꐕ。ꋧꃅꇣꄧꄊꑪꋍꉎꀋꐥꌠꌋꆀꌷꑫꋍꉎꀋꐥꌠꋈꄻꌠꄹꎆ。ꐪꊛꄉꀪꈆꒉꌶꅉꈨꌫꄻꉹꌠꉜꄉꆹꏮꌠꄹꇙ。ꃹꅼꃅꒉꌶꅉꌷꎖꏓꇱꄺꀱꌠꃅꉚ。ꐳꃅꀋꃋꋋꄮꃅꑘꂘꑘꀻꎆ。ꊿꋅꂘꑘꊋꀥꇱ，ꋒꃅꐋꀋꌡꂘꑘ、ꐪꊛꂘꑘ、ꌷꂾꂘꑘꌋꆀꃀꌠꂘꑘꀞꄻ。ꉹꁌꀞꄻꂘꑘꀻꎆꌠꊋꄏꌋꆀꋊꍬ。ꊋꀥꇱꄉꂘꃀꁥꌠꁱꂘ。《ꍏꇩꂘꑘꐛꏀꈴ2030》ꏤꄻꃄꌬ。ꉪꊇꆏꏓꂱꄸꈴꌠꂘꑘꀻꎆ，ꂘꑘꐛꏀꈴꌠꌌꇩꏤꐛꏀꈴꌠꄘꄏꄉ，ꀊꅰꃅꀉꑌꌠꀉꑳꁳꉪꅉꐛ、ꀊꅰꃅꀉꑌꌠꑱꈐꁳꉘꇉꌠꃅꇫꑟꎻ。
ꋬꂻꍏꇩꋈꄻꌠꄹꎆ。ꇓꈓꇓꉈꀀꊿꆅꉁꄜꏂꀧꏱꎆꁥꇱꌠꊾꂷꌠꋍꈓꌠ420ꂷꇬꄉꉀꐕꌊ450ꂷꇬꑟ，ꋍꋓꃅꊿꑴꅉꁌꏮꎕꏦꉀꐕ，ꌬꁬꋌꏦꀧꈍꈐꍔꒉ。ꇩꏤꑭꊂꃅꆅꉁꆅꄻꄜꏂꀧꈴꌗꈄꏍꏓꇱꌠꄹꎆ，ꀉꁁꃅꄷꄉꆅꉚꑱꑼꀀꄉꆅꉚꌠꌫꁌꈛꎂꃅꌗꂫꇽꌠꃅꇫꑟ。ꆄꒉꈺꒉꄜꏂꀧꌠꄻꐛꒆ，ꏦꀧꑟꐨꉀꐕ。ꐊꑷꃅꇶꏦꀉꑌꑵꃅꉃꄻꏓꐊꄜꋈꄻꃅꉚꌠꃄꇬ，ꌕꊐꌠꉻꄻꆅꉚꅉꆏꉬꇮꃅꇫꐊꈽꌐꄷꀋꁧꏃꂠꂿꄐꋊꇤ，ꊈꂄꆅꉃꌬꇐꐰꉎꃅꐮꈴꌠꎖꉚꌋꆀꊋꊡꉺꏦꄻꄉꌠꊥꎆ，ꅉꃀꊐꌠꁧꃤꃅꄐꊋꉀꐕ，ꉹꁌꁳꈝꐮꃅꈛꑌꅉꄉꆅꉚꎻ。ꊐꁸꄉꉃꄻꃅꉚꌠꌋꆀꑱꈐꏤꁱꄉꁧꃤꃅꌠꍔꒉꌊꄃꏃ85％ꈋꉐꇬꑟ。ꒉꄚꇁꄿꊥꎆꌠꃅꋒ，ꐪꊛꄉꅉꀨꋍꏅꁦꎴꆄꄻꁧꃤꃅꌫꁌꁥꁵꎆꎕꏦꉀꐕ，ꊋꀥꇱꄉꆄꈻꄴꏮꉻꑫꌋꆀꏓꆅꄴꏮꉻꑫꋈꄻ。ꋋꇅꃅꇿꋌꐥꃅꄉꉻꁦꎴꆄꄻꌤꅐꌠꏭꊝꌠꌌꄇꄜꋊ。ꆅꉃꌤꃅꊿꏣꀋꑌꐨꀧꌋꃅꌋꆀꄖꄑ。ꆅꉁꌠꆅꉚꌠꐮꄮꃆꂮꄻ。ꐊꑷꃅꀉꑳꑍꂷꉘꏱꁈꃄꌬꌠꇬꄐꋭ，ꊋꀥꇱꄉꒆꉘꉃꄻꇭꀧꌋꃅꌠꁧꃤꃅ。ꏦꃤꈴꄉꍏꇩꆅꉁꁬꋌꌤꑘꀻꎆꌠꊋꄏ。ꋠꇐꁬꋌꋬꂻꌤꆹꏓꂱꇭꀧꂄꌠꇬꑌꑲꎍꌠꉬ，ꀋꎪꃅꏲꌊꏦꇨꇈꀊꅰꃅꏦꇨꃅꄉ。ꍞꏲꏦꉻꉺꏦꄻꐛꒆ，ꅉꂫꊐꌠꍞꏲꊋꃤꇱꇎꃅꄉ，ꋍꑞꋍꁁꏯꆽꎍꐨꄻꈬꃅꄉ，ꇁꀦꇬꄉꏡꍅ、ꒃꅐꏲꂠꌠꐯꇯꄻꀋꂿꑘꌠꃅꄉ、ꏦꇨꃅꌼꇪꌠꏲꇬꎷ，ꏟꈯꃅꏓꂱꉹꁌꋠꇐꅝꒉꁬꋌꌬꋬꂻꌠꊨꊭꈁꐥꌠꒃꉇꋒꌶ。
ꉹꁌꐥꐨꄉꀧꈄꏍꎀꌤꎀꈬ。ꐪꊛꄉꎞꆏꊿꅉꀨꃀꌠꀨꎹꎆꉀꐕ，ꄉꀧꄉꏤꄮꀋꎪꃅꃷꁨꇎꃅꃑꎼꒉ。ꄔꐽꃅꈲꁵ、ꐧꋦꇇꀨꎕꏦꉀꐕ，ꋒꃅꋋꇅꇬꇇꀨꄹꏦꃄꌬ。ꋌꐛꉮꌸꌠꐥꐨꁥꇱꉺꏦꋊꍬꐛꒆ，ꀋꉊꄻꈎꒈꅐꄉꉹꁌꀀꑳꐡꉮꌸꌠꀱꋉꐛꅉꐛꌠꉬꇮꃅꃅꌐ。ꊋꀥꇱꄉꑘꃅꁡꇤꑳꐍꀉꑳꉈꇬꀧꌋꃅꌋꆀꇓꈓꇓꉈꊋꋠꀉꑳꄉꀧ。ꂽꄻꄉꀑꇬꁮꌠꂽꑱꈐꊿꌋꆀꃀꌠꀞꄂꏭꇇꀨꉌꇬ。ꐊꑷꃅꊿꄢꅐ“ꑍꐘꁥꇱ”ꄹꏦꃅꇫꑟ。ꑤꊐꌠꍔꃚꆏꅉꀨꐥꐨꄉꀧꋮꄮꉺꏦꄻꐛ，ꃶꐚꃅꋒꃅꅉꂫꊐꌠꌤꃅꄉ，ꊋꋠꌠꉹꁌꊷꆣꀕꄉ、ꐥꏾꄻꏾꃅꐙꎻ。ꏓꇱꄉꏦꃤ、ꏲꑘ、ꎆꏣꑠꇇꁈꌬ，ꀋꆏꃅꋥꑣꄉꋒꃅꂿꑘꊿꇮꃅꌠꃄꎆꄯꎝꃆꂮꂥꀘ，ꈍꃅꑌꋀꊇꎬꅧꃅꀕꌠꁳꊌꋭꌠꀋꊌꎻꀋꉆ。
ꁱꀕꌤꑘꌋꆀꁱꀕꅐꑘꀻꎆ。ꊋꀥꇱꄉꐧꋦꉪꏦꉌꊈꌧꑳꋈꄻ，ꀋꎪꃅꍏꇩꉪꐨꌋꆀꐧꋦꉪꏦꈯꄜꁌꐨꉪꉻꌌꉜꐨꐮꐊꌠꏓꋧ、ꊋꃤꏓꋧꇬꎷ，ꀋꎪꃅꁱꀕꑴꑇ。ꋧꇐꐧꋦꈆꑪꌋꆀꁱꀕꋽꇐꁰꄻꌠꀻꎆꌄꆣ，ꈨꏀꍑꅐ、ꁊꈴꄆꒌꄆꁱ、ꄉꉣꑠꌤꑘꀻꎆ。ꍏꇩꐛꐨꀊꏀꉹꌠꀑꁮꃆꂮꊭꊐꌠꋈꄻ。ꍏꉸꋊꃅꁱꀕꉾꃪꌠꊪꊛꀻꎆꋉꃆꃄꌬ，ꊋꀥꇱꄉꁱꀕꏂꀨꍸꇐꌋꆀꐥꇐꁱꀕꀋꉬꌠꍸꇐꀧꌋꃅꌊꌬ。ꊋꀉꒉꃅꅐꄉꉹꁌꃅꄯꒉꉜꌠꄹꇙ，ꊋꀥꇱꄉꈆꑪꁊꈴꌠꃅ。ꅉꀨꄉꉻꁱꀕꁧꃤꃅꐽꏡꈴꌠꑟꐨꉀꐕ。ꐳꃅꁱꀕꅐꑘꉘꉚ，ꊋꀥꇱꄉꁱꀕꃷꎏꍞꏲ，ꈄꏍꋦꈭꌃꎴ。ꃹꅼꃅꍏꇩꌋꆀꉇꄅꃰꊿꁱꀕꐮꈴꌠꃅ，ꍏꉸꁱꀕꅐꉇꁧꌠꄹꇙ。ꋒꃅꃅꋆꄮꐰꀎꒀꉼ、ꃅꋆꄮꐰꄣꅐꊿꀎꒀꉼꊭꄎꌤꃅ，ꏓꈿꄉꉹꁌꈯꎟ、ꎟꋓꈯꎟ、ꈯꎟꅐꑘꀻꎆ，ꀊꐯꈭꃅꉹꁌꃅꈯꄿꎟꌠꃅ，ꊿꀊꅰꀉꑌꌠꁳꈯꎟꃅꄉꇿꌒ、ꇷꄙꊋꌬꌠꇭꀧꈯꄿꐥꇁꃅꎻ。ꏓꂱꒉꄚꇁꄿ、ꉌꇿꐥꌒꑲꆏ，ꇩꏤꆹꌄꆣꍅꁍꀕꇁꎂꀕ。
ꐧꋦꏱꄻꏀꀺꌠꄹꇙ。ꅉꂫꊐꌠꉹꁌꊨꏦꏱꄻꄹꏦꄻꐛꒆ，ꊋꀥꇱꄉꇓꈓꇓꉈꋥꁕꏱꄻ。ꋒꐯꋒꃅꇬꉼ、ꇭꏾꄨ、ꃛꆃꑠꉹꁌꎀꍹꇬꂿꄐꋊꇤ。ꐧꋦꎀꍹꏲꂠꄹꏦꄺꀱꄻꐛꒆ，ꏦꃤꇬꈴꄉꉻꈲꌠꌋꆀꂄꃅꎔꏿꌤꑘꐛꒆꃅꀻꎆꌠꄹꆷ，ꌐꑘꐧꋦꌤꃅ、ꉌꇗꁧꃤꃅꀻꎆꌠꊥꎆ。ꃶꐚꃅꌋꅪ、ꀉꑳ、ꃀꌠ、ꊾꄣꌠꏦꊒꌠꌅꈌꈲꁧꏦꀧ。ꐳꃅꐧꋦꉌꒊꉻꑫꋈꄻ。ꊋꀥꇱꄉꏦꏲꄜꉺꉙꂘꌋꆀꏦꃤꁧꃤꃅ。ꄯꒉꁱꌊꅇꅲꇁꌠꑭꄑꅇꅲꇁꌠꌤꃅꆽꎍꄹꏦꃄꌬꇫꑟ，ꏦꃤꇬꈴꄉꐳꃅꋋꃅꄷꄉꉹꁌꅇꎹꇖꐨꋭꋽꌠꀞꄻ。ꃹꅼꃅꋬꂻꍏꇩꋈꄻ，ꆺꄜꈴꈴꌗꈴꐧꋦꋬꂻꏱꄻꄴꏮꋎꍅꉻꑫꄻꐛꒆ，ꏦꇨꃅꊋꆍꏿꇶꌾꃅꈧꌠꇇꇩꍈ，ꏦꃤꇬꈴꄉꀉꆈꄷꅠꊋꃤꑽꃤꐆꌠ、ꅋꇐꑽꃤꃅꌠꌋꆀꈏꈱ、ꇑꑣ、ꄆꑠꈄꏍꈴꊏꀸ、ꑴꅉꈴꌗꇑꉮꑠꀉꑌꃅꇫꅐꌠꑽꃤꐆꌠꀞꅓ，ꇩꏤꋬꂻꌠꌋꆀꐧꋦꎍꐽꌠꀧꌋꃅ。ꏦꇨꃅꀋꈐꀋꉈꌧꑳꃅꏦꌬꌠꋊꍬ，ꊋꀉꒉꃅꇤꄉꐧꋦꋬꂻꏱꄻꌠꇬꌤꃆꑓꅐꎑꌠꏱꄻ，ꈁꉬꁁꏯꃅꏓꂱꉹꁌꋬꂻꃅꐙꐨꉀꐕ。
ꊿꀑꇬꂿꃋꒈꀋꋌ，ꋬꂻꌠꋍꉎꀋꐥ。ꀋꎪꃅꌦꀳꏿꄉꋒꃅꋬꂻꃅꒃꅐꌠꒃꉇꇬꎷꌶ。ꊋꀥꇱꄉꋬꂻꅉꃀꌫꉂꌫꈾꋈꄻ，ꋒꃅꃄꇙ、ꃅꌗ、ꎖꑴ、ꃄꊈꑠꌤꃅ。ꋬꂻꒃꅐꆽꎍꄹꏦꄻꏦꇨꃅꄉ，ꐊꑷꃅꎆꏂꑘꀨꄜꃅꎁ、ꃅꄷꐛꅉꏲꂠꃅꎁ、ꌤꃅꅉꍞꊟꏲꂠꃅꎁꃄꄻꇫꑟ，ꏟꈯꃅꀉꒉꀊꂾꐯꀉꒉꀊꂾꃅꌤꅐꆿꅐꌠꋎꍅ，ꅱꈯꃅꏓꂱꉹꁌꀑꇬꇇꇐꋬꂻꌠꏦꀧ。
（ꈬ）ꐊꑷꃅꊋꀥꇱꄉꍔꃚꑴꅉꋈꄻ。ꄈꁳꏃꂠꇬꎷꌶ，ꈬꐯꈬꃅ“ꉪꐨꇖꑵ”ꄻꉌꂵꇬꊐꄉ，ꏟꈯꃅꐋꀨꑮꏣꀻꈯꄜꃅꄉꌠꄈꍏꑷꀉꇨꐨꀧꌋꃅ，ꑴꐚꃅꉪꇐꀂꏽꍔꍞꀂꏽꃅꐨꀂꏽꃅꄈꍏꑷꌋꆀꀊꂥꃅꐮꐊꇬꎷꌶ，ꐳꃅꍔꃚꌅꊋꏭꄻ、ꏲꑘꇿꋌꄐꅍꉀꐕ，ꀊꅰꃅꉾꃪꃅꏓꂱꏭꁧꃤꃅ。
ꀋꎪꃅꏦꃤꇬꈴꄉꐊꑷꃅꄉꅍꃄꄻꇬꎷ。ꍔꃚꋍꊐꋑꀋꋒꌠꌋꆀꋍꃤꌤꃅꊿꆏꃹꅼꃅꐊꑷꃅꏦꃤꇬꈴꄉꇩꏲꌠꇖꐨꃄꌬ，ꏦꇨꃅꏦꃀꍬꌬ，ꏦꏲꌠꁌꒉ、ꏦꃤꉁꏦ、ꏦꃤꇬꈴꄉꏲꑘꃅ，ꏦꏲꍔꃚꋈꄻ。ꏲꃆꄇꄜꋊꊋꃤꁦꎆꇱ。ꈆꑪꃅꁈꏤ、ꋯꁦꃅꁈꏤ、ꏦꃤꇬꈴꄉꁈꏤꇬꎷ，ꀊꐯꈭꃅꋍꑞꋍꑵꉜꐨꀠꂘꌠꉜꐨꑌꇫꐊꌠꅱꄻ。ꍔꃚꋍꊐꋑꀋꋒꏦꃤꇬꈴꄉꋋꊐꇬꏓꄊꌋꆀꋍꎮꊈꉼꁳꍞꊟꎻ，ꑴꐚꃅꏓꂱꍔꑠꁳꋯꁦꍞꊟꎻ，ꑴꇙꃅꐧꋦꌋꆀꈋꍣꌠꁳꍞꊟꎻ，ꎔꎗꃅꏓꄊꁧꎁ、ꍔꑠꊈꑼ、ꋯꁦꄈꀾ、ꇬꎭꆃ、ꄈꀾꀋꐥꊿꂒꋦꌠꌋꆀꏓꂱꉻꏑꈧꌠꉜꐨꅱꄻ。ꏓꂱꍔꃚꃅꄉꇬ，ꌤꈁꃅꌠꃅꐯꇯꏓꂱꉪꐨꄛꑣ、ꏓꂱꈲꁧꀧꌋꃅ、ꏓꂱꁳꍞꊟꎻ。
ꈍꄮꇬꑌꐙꎴꌠꐛꊈꄝꀋꊰꃅꄉꇬꎷ。ꎔꎗꃅꐊꑷꃅꄈꏲꌠꇖꐨꃄꄻꇫꑟꌶ，ꄈꃅꇏꐙꎴꋈꄻꌠꌋꆀꍹꈔꆼꁏꌤꃅꌠꀋꆏꃅꄐꈻꌊꃹꅼꒉ。ꏟꈯꃅꄈꍏꑷꏤꐪꉆꐘꌠꉌꊈꌫꄻꇬꎷ，ꄝꀋꏯꃅꀋꆏꃅ“ꇖꃅꇏ”ꋊꍬ。ꊋꀥꇱꄉꏲꑘꍞꍤꌋꆀꍤꌗꍞꊟ。ꍹꈔꅓꀞꀊꂥꃅꆼꍅꐨꄝꀋꊰ，ꀋꂿꑘꁁꏯꏭꉜꄉ，ꏦꇨꃅꉹꁌꈲꁧꉮꄻꉄꌎꌠꃅꇏꀋꎃꀋꊒꌠꌋꆀꍹꈔꌤꃆꍤꀞ。ꉻꃆꃅꊿꋍꏅꌠꆏꐙꎴꌠꌭꎃꊒꌠꃅ，ꁦꎴꇤꌃꃅꏓꂱꎁꃅꌤꃅ。
ꈪꑌꃅꊋꇤꄉꌤꃅꑘꀺ。ꍏꇩꄺꀱꀻꎆꌠꊌꐨꀉꒉꀊꂾꌠꆹꇥꀯꉹꁌꋍꏅꃶꐚꃅꃄꄻꅐꇁꌠ，ꉈꑴꃅꊌꐨꀊꏀꌠꀹꄻꇬꆹꃶꐚꃅꃄꄻꌠꉘꇉꑴꌦ。ꍔꃚꋍꊐꋑꀋꋒꌠꌋꆀꋍꌤꃅꊿꆏꃅꌠꌌꂴꄉ，ꇯꍝꃅꒃꉇꃶꐚꃅꀕ、ꀂꏾꈎꄉꎬꅧꃅꀕ、ꃶꐚꐛꐨꇬꐊꄉꁧꀿꐨꐥꃅꀕ，ꈝꐮꃅꃀꈿꌠꌌꄉꃀꈿꌠꃄꄻ、ꁱꐘꌌꄉꁱꐘꃄꄻꀋꉆ，ꈌꈥꀉꄂꌧ、ꉉꇈꀋꃅꀕꀋꉆ。ꋒꐯꋒꃅꍏꑷꌋꆀꃅꄷꑍꂷꌠꏣꀋꑌꐨꋊꇤ，ꃅꄷꊋꊡꌊꂱꑱꐛꐨꉜꄉ、ꉌꂵꀉꒉꃅꌥꉩ，ꋓꈿꄉꈆꑪꀻꎆꌠꄹꇙ。ꏦꇨꃅꌤꃅꆽꎍꄹꏦꌬ，ꈜꀕꇈꀋꉬꀋꉆꌠꂿꃆꏭꆏ，ꂱꑱꃅꎁꏀꈬꋯꈬꃅꄉ、ꋍꊐꋍꊐꃅꍅꊋꊪꁳ，ꀋꐔꀋꊰꃅꃄꌬꇫꑟꌶ。ꍞꊟꍤꄻꅑꑘꎹꌠꌌꀉꇨ，ꏦꇨꃅꏲꄸꏲꐵꃅꐵꌠꃅꐨꍤꀞ，ꏟꈯꃅꏲꃆꉌꀋꒊꌠꏱꄻ。ꊋꊡꉻꏦꌋꆀꑽꄽꑽꍬꉺꏦꄻꐛꒆꃅꄉ，ꌤꃅꌠꏭꊋꊡ，ꆸꄜꌠꎁꃅꄘꄏ。ꇥꀯꋍꏅꌠꆏꑴꇙꃅꀕ、ꇯꍝꃅꀕꄉ，ꏓꂱꉹꁌꌋꆀꉌꋧꊋꏓꌊ，ꃶꐚꃅꀕꄉꀻꎆꌠꄹꇙ，ꃶꐚꃅꀕꄉꊫꂫꃰꇌꐥꇁꎻ。
ꁧꎁꊈ！
ꉪꇩꏤꆹꏓꋍꃱꃅꌠꊿꋅꀉꑌꌠꇩꏤꉬ。 ꊿꋅꃄꁕꊨꏦꏲꄹꏦꌭꈬꌋꆀꄻꐛꒆꌶ，ꎔꎗꃅꄈꅿꊿꋅꏱꁈꌫꄻꇫꑟ，ꃹꅼꃅꊿꋅꋯꑌꀻꎆꄺꑣꃅꈧꌠꃄꄻ。ꋒꃅꇊꃀꇴꊨꏦꏲꅉꐎꄻꐛ70ꈎꈭꏝꐛꋨꏦꃅꈧꌠꊥꇫ。ꊿꋅꃅꄷꀻꎆꌠꏭꊋꄏꌠꊋꃤꁦꎆꇱ，ꃹꅼꃅꃅꋮꌄꆣꉹꁌꌣꈚꃅꐨꃄꄻ，ꀁꑌꊿꋅꉾꃪꋊꃅꁱꀕꀧꌋꃅꌋꆀꀻꎆ，ꊻꂷꊼꇅꀁꑌꌠꊿꋅꄏꐓꄉꀻꎆ，ꊿꋅꈁꐥꌠꏓꂱꐊꑷꃅꊼꇅꌣꈚꌠꐧꋦꋈꄻꐛꈴꎁꇬꐯꇯꀻꎆꌄꆣꌠꄹꇙ。ꊿꋅꈁꐥꌠꐮꉂꃅꐯꇯꐥ、ꉌꋧꊋꋓ、ꐮꄮꃅꀻꎆ，ꍏꉸꊿꋅꑱꈐꀉꒉꋋꁯꆹꈍꃅꑌꀊꅰꃅꋬꂻꐥꌒꇁꌠꉬ。
ꉪꊇꐊꑷꃅꄈꅿꑇꇐꌤꃅꌠꅉꀨꌐꏦꃄꌬ，ꏦꃤꇬꈴꑇꇐꌤꃆꏲꂠ，ꑇꇐꃆꂮꄮꐽꌠꊥꎆ，ꑇꇐꁆꏯꊿꂒꋦꌠꌋꆀꑇꇐꑇꌠꉹꁌꎆꏣꐧꋦꀻꎆꌠꇬꏣꀋꑌꂿꄐꋊꇤ。
ꉪꊇꆏꎔꎗꃅꇩꉈꀀꌠꊿꌤꃆꏱꁈꃄꌬꇫꑟ，ꎿꉈꀀꌠꃺꑌꌋꆀꀱꉇꇁꌠꇩꉈꀀꊿꑱꈐꊿꏦꊒꌠꌅꈌꈲꁧꏦꀧ，ꋒꐯꋒꃅꋀꊇꃤꐋꀋꌡꌠꂱꎆꅑꐨꌋꆀꀋꂿꑘꌠꂿꄐꋊꇤ，ꎿꈐꎿꉈꍏꉸꌺꇖꏓꊭꊋꃤꌋꆀꉌꇱꊋꃤꆹꀋꆏꃅꁦꎆꀉꇨꇁꌠꉬ。
ꁧꎁꊈ！
ꋌꃀꋋꈓꆹ，ꇩꐏꌠꌋꆀꂽꏂꄺꀱꌠꀉꒉꀊꂾꃅꂵꅐꌠꊌꅜ，ꂽꏂꇝꂱꈴꐛꏀꈴꑌꐚꈴꋈꄻꌠꁨꆹꐨꀊꏀꌠꊌꐨꀊꏀꌠꊌꅜ。ꀊꏀꋋꈓꆹ，ꉪꊇꆏꐪꊛꄉꄈꃅꒊꃅꇁꀊꏀꌠꇂꃴꂽꏂꄻꀉꇨꇁꌠꑞꅉꁻꌐꌌꈻꏁꅍꃅꄉꇬꎷꌶ，ꍔꍞꌌꂽꏂꋈꄻ、ꄺꀱꄉꂽꏂꄻꀉꇨ、ꏦꃤꇬꈴꄉꂽꏂꏱꄻꌠꄹꎆ，ꀉꇨꃅꂽꁰꍋꌉꊭꌉꄐ，ꏟꈯꃅꇿꋌꐥꃅꇩꏤꌅꀨ、ꋬꂻ、ꀻꎆꈲꁧꀧꌋꃅ。ꄈꂽꏂꏭꀋꎪꃅꏃꂠꇬꎷ，ꏮꊈꍗꑮꆽꎍꄹꏦꀧꌋꃅꌋꆀꃄꄻꇫꑟ。ꐪꊛꄉꃹꅼꃅꇩꐏꌋꆀꂽꏂꄺꀱ。ꀉꇨꃅꎿꃅꈯꃅꋮꐏꁇꏱꄻꋎꍅ，ꑭꋧꃅꇶꌾꌠꁏꎍꐽꌠꀧꌋꃅ、ꇩꏹꄮꐽꌠꀧꌋꃅ、ꈜꎴꃅꄷꎿꇬꄇꇉꐏꁇꑠꀋꂿꑘꌠꃅꐨꊥꇫ。ꇩꐏꈆꑪꇮꇐꑴꌅꏀꀺꄐꊋꉀꐕ，ꐳꃅꀋꃋꋋꄮꊂꇲꋈꄻꌋꆀꇇꌭꉁꈾꀻꎆ。ꊋꀥꇱꄉꉹꁌꃅꇩꐏꉙꂘ、ꇩꐏꄕꊪꌋꆀꊁꄐꌠꊋꃤꋈꄻ。ꎆꏣꋈꄻꌠꌋꆀꇩꐏꋈꄻꌠꋮꄮ、ꐮꆽꏣ、ꀉꑌꑵꃅꏓꐊꄉꀻꎆꌠꊥꎆ，ꃹꅼꃅꇩꐏꈆꑪꇮꇐꇮꑘꏦꉻꄺꀱ，ꂽꌋꆀꏓꂱꐮꐊꐯꈽꃹꅼꃅꀻꎆꌠꄹꇙ。ꍔꃚꋍꊐꋑꀋꋒꌠꀊꅰꏟꈯꃅꊋꑌꌠꏡꁈꌌꇩꐏꌋꆀꂽꏂꄺꀱꋈꄻꌠꊋꄏ，ꂽꍔꂽꂱꐮꋯꑌꌠꌩꁧꁳꐴꁘꋦꅼ、ꇪꇇꄵꋓꀕ、ꏽꀕꆈꄅꀕꎻ！
ꁧꎁꊈ！
ꉪꊇꆏꐪꊛꄉꐊꑷꃅꎃꊒꃅ“ꋍꇩꑍꏦ”、“ꑣꇤꊿꑣꇤꏲ”、“ꉪꂱꊿꉪꂱꏲ”、ꀊꂥꃅꊨꏦꏱꄻꌠꌐꏦꃄꌬꇫꑟ，ꏦꇨꃅꏦꃀꌋꆀꅉꀨꏦꃤꇬꉜꄉꌤꀞ，“ꋍꇩꑍꏦ”ꌌꑣꇤ、ꉪꂱꄉꃶꐚꃅꃄꄻꌠꀋꇙꀋꑐ、ꀉꁁꃅꐙꀋꁧ、ꐛꐈꀋꁧꌠꏦꀧ。ꊋꈁꑌꃅꇤꄉꑣꇤ、ꉪꂱꏲꑘꇣꋲꏱꅉꐎꏲꑘꇛꌺꌋꆀꍔꃚꏦꃤꇬꈴꄉꏱꄻꌠꊋꄏ，ꎆꏣꀻꎆ、ꉹꁌꐥꐨꄻꉾ、ꋯꁦꄹꎆ、ꄮꐽꌠꊥꎆ。“ꑣꇤꄁꋦ”ꌠꆹꈜꀋꁮꌠꉬ。ꅔꈐꌋꆀꇤꉪꃹꅼꃅꇷꃅꌠꄹꇙ，ꒀꇤꉪꎿꈪꀉꒉꁔꌠꇓꈓꈧꌠꀻꎆꄐꎖꌠꎥꃪꏤꄻ，ꇤꉪꐋꀋꌡꌠꂱꎆꅑꐨꋊꇤ，ꇩꏤꎆꏣꀻꎆꌠꌋꆀꉇꉻꏭꁉꃑꌠꇬꑋꅉꉆꈉꌋꆀꄐꊋꉀꐕ。ꉪꊇꆹꑣꇤ、ꉪꂱꀊꉗꃅꌄꆣꎍꐽꌠꏯꈍꄮꑌꉌꊋꑌꋒꇬꎷꌠꉬ！
ꉪꊇꆏꃹꅼꃅꄠꃪꏭꌤꃅꌠꏱꁈꌐꏦꀉꒉꌠꃄꌬꇫꑟ，ꍏꇩꋍꂷꀉꄂꐥꌠꏥꏦꌭꈬ，“ꈬꑍꉜꐊ”ꐯꇯꃤꍔꍞꅉꃀꀧꌋꃅ，ꇩꏤꌅꀨꌋꆀꇩꃅꐛꒆꌠꀧꌋꃅ，꒺ꋮꑍꁁꏯꐮꃆꂮꄮꐽꃅꀻꎆꌠꌋꆀꄠꃪꄮꐽꎍꐽꌠꀧꌋꃅ。ꏟꈯꃅ“ꄠꃪꄁꋦ”ꁷꐞꃅꈧꌠꏭꆼꁏꌋꆀꏡꍅ，ꈍꃅꑌꊿꑞꂷꁳꇶꏦꑞꑵ、ꂒꉻꑞꂷꇬꈴꄉꄠꃪꁳꁍꇩꇬꄉꁷꐞꁧꀋꎽꌠ。ꐪꊛꄉꎿꋮꑍꁁꏯꎆꏣꐧꋦꐮꐊꐯꈽꀻꎆꌠꄹꎆ，ꄠꃪꃺꑌꈜꀕꇈꌠꏀꅔꈐꇬꄉꌶꄻ、ꃅꑘꊌ、ꑘꀺ、ꇫꐥꌠꎁꃅꀊꅰꃅꃅꌒꌠꇲꁵ。ꎿꋮꑍꁁꏯꃺꑌꆏꐯꇯꊿꋅꇗꒉꆸꄜ，ꀋꎪꀋꑴꃅꁍꇩꄮꐽꏓꋍꃱꃅꌠꈴꎁꄹꇙꄉ，ꐯꇯꄉꍏꇩꊿꈁꐥꌠꃅꐥꌒꌠꐥꐨꌋꆀꉾꃪꌠꊫꂫꄺꑣ。
ꁧꎁꊈ！
ꋧꃅꇣꄧꍔꍞꎆꏣꐛꄟꃹꅼꃅꐛꐈꌠꇬꉜꄉ，ꍏꇩꆹꈍꄮꇬꑌꄮꐽꎍꐽꁀꌠꏯꉆ，ꋭꋽꑗꐥꁀꌠꏯꉆꄉ，ꋧꃅꄮꐽꌠꋈꄻꊿ、ꅉꆺꑭꊂꀻꎆꌠꇬꑆꊋꅐꌞꊿ、ꇩꏹꐥꀹꇬꀧꌋꃅꊿꄻ。ꉪꊇꆏꀋꎪꀋꑴꃅꄮꐽꀻꎆꌠꈜꇬꍬꌶ，ꏟꈯꃅꀉꑌꁁꏯꏦꉻꃤꋦꒉꐨꌋꆀꌬꍝꐨꀧꌋꃅ，ꀧꌋꃅꉪꏦꇶꏦꈁꐥꌠꏭꁏ，ꃹꅼꃅꅉꆺꑭꊂꏱꄻꈴꎁꇬꐊꈽꃅ，ꅉꆺꃅꐙꌠꄐꇺꌊꀊꅰꃅꐯꏆꐯꈲ、ꎃꊒꋭꋽꌠꃅꍜꏯꉜꄉꀻꎆꆹ。ꀑꐱꇬꎍꐽ、ꐮꆽꏣꃅꀻꎆꌠꇩꏤꀉꒉꐮꃆꂮꈭꏦꏓꄻꌠꄹꎆ，ꊋꏂꄉꃷꇎꐮꉌꒊ、ꐯꇯꀻꎆꌠꈭꇍꋦꈭꄺꑣ，ꐊꑷꃅꀻꎆꇰꌠꇩꏤꇷꃅꌠꑞꅉꉀꐕ，ꏣꀋꑌꃅꅉꆺꃅꐥꌠꌋꆀꃅꄷꇬꃛꊸꌠꌤꃆꀞꄻꌠꋈꄻꐨꐥꌠꄐꉻꇲꁵ。ꐳꃅꎿꉈꌅꈌꈲꁧꀧꌋꃅꉺꏦꄻꐛꒆꌋꆀꄐꊋꋈꄻ。ꉪꊇꆏꇩꏹꐧꋦꌋꆀꐮꐊꄉ，ꊋꇤꄉꇷꃅꐯꇯꊌꄻꌠꌌꈯꄜꃅꄉꌠꀊꏀꉹꌠꇩꏹꐮꃆꂮꋈꄻꄉ，ꃰꊿꊫꂫꐮꐊꄜꋈꄻꌠꎁꃅꑆꊋꀊꏀꌠꅐꌞꏾ。
ꁧꎁꊈ！
ꂿꃆꆹꀋꉬꀋꉆꌠꆏꆸꄜꃅꌶꌠꉬ，ꈏꇤꊋꇤꑲꆏꊌꐨꀉꇨꌠꃅꅐꇁ。ꉪꊇꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꉌꂵꋍꂷꃅ，ꀺꂵꁨꆹ，ꊋꇤꄉꎼꈎꎆꏣꐧꋦꀻꎆꁻꌐꂿꃆꃅꌐ，“ꋍꉐꈎꑍꂷ”ꌠꉻꒉꁻꌐꃅꇫꑟ、ꌣꈚꐞꄿꋯꁦꌧꑳꐮꄮꌠꐧꋦꉪꏦꐛꏀꈴꌠꇩꏤꋈꄻ、ꍏꉸꊿꋅꇰꀋꃀꃅꀱꉈꑴꌄꆣꇁꌠꍏꇩꉪꐨꃅꇫꑟꌠꎁꃅꀋꆏꃅꉈꈽꌶ！
