ꀋꎪꀋꑴꃅꍏꇩꐛꐨꐧꋦꉪꏦꈝꃀꍬꄉꀒꁨꆹ
ꐊꑷꃅꊼꇅꌣꈚꌠꐧꋦꄻꐛꌠꎁꃅꈏꇤꊋꇤ
——ꍏꇩꇭꍣꄈꃀꀉꒉꊰꉆꃢꌠꇩꏤꑭꊂꁧꎁꃀꈿꅉꇬꄉꅇꄜꌠ
(2012ꈓ11ꆪ8ꑍ)
ꃛꏢꄧ
ꐋꀨꊈ:
ꀋꃋ，ꉢꊰꏁꈭꌠꍏꑷꊈꑼꉼꎁꃅꃀꀉꒉꈿꌠꏭꅇꄜꂿ。
ꍏꇩꇭꍣꄈꊰꉆꃢꌠꇩꏤꑭꊂꁧꎁꃀꀉꒉꈿꌠꆹ，ꉪꇩꏤꐊꑷꃅꊼꇅꌣꈚꌠꐧꋦꄻꐛꌠꀋꉬꀋꉆꊬꌠꇬꃹꆹꄮꇬꈿꌠꀋꂿꑘꐯꀋꂿꑘꌠꃀꀉꒉꑠꃢꉬ。ꃀꀉꒉꈿꌠꅇꀨꆏ：ꀊꂥꃅꍏꇩꐛꐨꐧꋦꉪꏦꁈꁧꇰꀋꃀꌠꐕꄉ，ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌌꄐꏁꅍꃅꄉ，ꉪꇐꁌꄝ，ꄺꀱꁉꃑ，ꊋꃤꏓꊭ，ꈢꇓꀖꊋꋠꌠꆼꑣ，ꀋꎪꀋꑴꃅꍏꇩꐛꐨꐧꋦꉪꏦꈝꃀꍬꄉꀒꁨꆹ，ꐊꑷꃅꊼꇅꌣꈚꌠꐧꋦꄻꐛꌠꎁꃅꈏꇤꊋꇤ。
ꀋꃋꋋꇅꇬꆏ，ꉪꊇꈀꄸꑌꉜꐨꐯꌟꏢꐥ：ꃅꐎꈬꊰꈎꎖꎬꅧꃅꊋꇤꏡꇤꇈ，ꉪꄈꆏꇩꏤꑭꊂꊿꋅꈁꐥꌠꏓꂱꋯꑌꏃꂠꌊꄉ，ꌢꎭꊁꊰꌠꍏꇩꀉꆹꌠꄺꀱꌊꋍꑍꋍꉙꃅꌄꆣꌣꈚꐞꄿꇁꌠꍏꇩꀊꏀꂷꐛ，ꍏꉸꊿꋅꇰꀋꃀꃅꀱꌄꆣꇁꌠꊫꂫꁤꇅꀕꌠꄛꑣꇫꅐꇁꀐ。ꉪꊇꆏꄈꌋꆀꏓꂱꀹꄻꅐꇁꌠꐩꋊꌤꑘꇰꀋꃀꌠꏭꀊꅰꃅꉌꊌꑊꒉ，ꄈꌋꆀꏓꂱꄻꄉꌠꑞꅉꉪꐨꏭꀊꅰꃅꉌꊋꑓꊋꑌꇁ，ꄈꆽꎍꌠꐩꋊꃅꎁꏭꀊꅰꃅꏸꐚꃯꐚ。
ꀋꃋꋋꇅꇬ，ꋧꃅꐛꐨ、ꇩꏤꐛꐨ、ꄈꐛꐨꆏꐪꊛꄉꃹꅼꃅꐛꐈꇰ，ꉪꊇꂾꎍꌠꀻꎆꊜꋽꄮꌋꆀꃨꆰꋓꎭꌠꑌꋌꃀꑠꐥꀋꋻ。ꄈꑭꊂꃅꀋꎪꃅꏓꂱꉌꒊꐨꌋꆀꏮꄀꁵꄉꌠꃣꇖꏟꈯꀕꃅꎺꄉ，ꀊꅰꃅꊋꇤꏡꇤ、ꀋꎪꀋꑴꃅꌤꃅ，ꐪꊛꄉꈆꑪꃅꀻꎆꌠꄹꇙ、ꐧꋦꐮꄮꌠꊥꎆ，ꐪꊛꄉꏓꂱꐥꐨꄻꃪ、ꏓꂱꐥꌒꐨꁦꎆꇁ，ꃅꋊꁵꄻꄉꌠꀑꑊꁤꇅꀕꇈꊋꋠꏢꋠꌠꂿꃆꃅꌐꌶ。
ꋍ、ꋌꃀꉬꈎꌠꃅꐨꌋꆀꊰꈎꌠꀑꐱꏓꇱ
ꃀꀉꒉꊰꏁꃢꌠꈿꊂꅑꅸꇁꌠꋋꉬꈎꆹ，ꍏꇩꐛꐨꐧꋦꉪꏦꈝꃀꇬꄉꊋꇤꄉꀒꁨꆹꌠꉬꈎꉬ，ꉪꊇꆏꋍꑞꋍꑵꊋꋠꌠꌋꆀꃨꆰꌠꎖꎟꎖꅐꇈ、ꐊꑷꃅꊼꇅꌣꈚꌠꐧꋦꋈꄻꌠꀊꏀꃅꊋꐛꌠꊌꅜꌠꑠꉬꈎꉬ。
ꃀꀉꒉꊰꏁꃢꌠꆏꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꄹꎆ、ꐊꑷꃅꊼꇅꌣꈚꌠꐧꋦꋈꄻꌠꑞꅉꁻꌐꇰꀋꃀꌠꃅꇫꑟꌠꏭꐊꑷꃅꄐꇺꄉꀐ。ꃀꀉꒉꊰꏁꃢꌠꉌꊈꃄꌬꂿꄷꄉ，ꍏꑷꆏꂴꊁꃅꐊꈴꃀꏃꃢꈿꄉ，ꁸꄉꃹꅼꃅꏲꑘꏲꂠꏦꉻꄺꀱ、ꂿꑘꁡꇤꄺꀱꀻꎆꌠꄹꎆ、ꃅꒊꃅꇁꀊꏀꇂꃴꄈꋈꄻꌠꊋꀥꇱꌋꆀꄻꃪ、“ꊰꑋꉬ”ꄐꎖꏤꄻ、ꁱꀕꄺꀱꀻꎆꄹꎆꋍꑠꃅꇴꄉꉻꃆꂮꐥꌠꌤꃆꀉꒉꀊꂾꌠꀂꏽꐰꏤꌋꆀꄐꇺꌠꏤꄻꅐꇁꀐ。ꉬꈎꅑꅸꇁꌠ，ꉪꊇꆏꊋꐛꃅ“ꊯꊪꉬ”ꄐꎖꌠꃅꌐ，ꁣꀋꐥꃅ“ꊰꑋꉬ”ꄐꎖꌠꌌꃄꄻ，ꋍꑞꋍꁁꏯꌤꃅꌠꐯꇯꀊꏀꌠꊌꐨꀉꒉꃅꐥꀐ。
ꎆꏣꎍꐽꃅꊼꇅꐳꃅꀻꎆ。ꏓꇱꇩꊋꀉꒉꐯꀉꒉꃅꉀꐕ，ꑍꄙꆀꊯꊪꈎꇩꈐꒃꅐꈁꉬꁌꐨꆏꇖꊰꏁꃪꂡꌕꄙꂡꂷꇬꑟ。ꏱꎆꊌꐨꀉꒉꐯꀉꒉꃅꁦꎆ。ꂿꑘꏓꇱꒃꅐꄐꊋꉀꐕ，ꋚꂷꋍꈓꋑꀋꋒꅐꐨꁦꎆ。ꅐꑘꐛꉻꋊꄻꌠꊌꐨꀊꏀꃅꀻꎆꐨꐥ，ꅉꃀꉁꈾꐊꑷꃅꌌꊋꀥꇱ。ꇓꈓꏦꎫꐛꈴꐨꄇꇖꀕꃅꉀꐕ，ꇓꈓꇓꉈꃄꁕꀻꎆꐮꄮꐨꀉꇨꇁ。ꏀꀺꃅꐙꌠꇩꏤꋈꄻꌠꊌꐨꄇꇖꀕꃅꐥ，ꊿꎭꃅꈯꑟ、ꆪꎖꋉꃆ、ꊿꎭꎿꃴꃹ、ꊐꐂꌗꁈꏸ、ꐳꈴꎸꈜꋍꑠꀉꒉꀊꂾꃅꂵꅐꌠꃅꇫꑟꀐ。ꒆꉻꌧꑳꋈꄻꌠꏟꈯꃅꃅ，ꅐꀦꏎꏸꌠꌋꆀꋦꈭꀧꌋꃅꌠꐊꑷꃅꄹꎆ。
ꄺꀱꁉꃑꌠꁨꎆꐨꀉꒉꃅꊌꅜ。ꂿꑘꁡꇤꏓꇱꄺꀱ、ꋍꉻꌩꑘꌅꈌꄹꏦꄺꀱ、ꇩꁨꎆꏂꑘꄺꀱꌠꀋꆏꃅꃹꅼꈴ，ꉻꁨꏦꀋꉬꌠꎆꏣꁣꀋꐥꃅꀻꎆ。ꐛꏀꃷꎏꉻꑫꌋꆀꉻꒉꋊꄻꉻꑫꀋꆏꃅꄻꐛꒆ，ꏱꎆꇗꏸ、ꎆꒉꎆꇁ、ꁌꏤ、ꈆꑪꇮꇐ、ꂘꑘ、ꐧꋦꏦꀧ、ꆅꉁꁬꋌꁦꎴꆄꄻ、ꌤꑘꌤꃅꅉꋍꑠꄺꀱꌠꎍꐽꃅꄹꎆꀐ。ꁉꃑꃅꐙꌠꎆꏣꑟꐨꀊꏀꌠꇬꑟ，ꈏꃹꉇꅐꈁꉬꃷꁨꋧꃅꉆꈉꑍꂷꂶꌠꇬꃹꆹ。
ꏓꂱꐥꐨꐥꌒꐨꄇꇖꀕꃅꉀꐕ。ꉹꁌꐥꐨꄻꃪꐨꊋꃤꀋꆏꃅꀉꒉꇁ，ꇓꈓꇓꉈꃅꑘꊌꐨꊛꄉꍔꐯ，ꀀꊿꊌꐨꊼꇅꐳꃅꉀꎆ，ꑱꈐꁨꇐꎍꐽꃅꁦꎆꇱ，ꈚꅍꋠꅍꀀꅍꈴꅍꌬꅍꇎꏦꄇꇖꀕꃅꄻꃪ，ꇓꈓꇓꉈꐥꐨꀁꂥꇊꀁꂥꌠꏦꀧꎕꏦꌋꆀꂿꑘꁡꇤꌢꎭꊋꁈꄏꎕꏦꀉꒉꐯꀉꒉꃅꉀꐕ，ꎆꏂꑘꎞꆏꊿꅉꀨꃀꌠꀨꎹꎆꊛꄉꉀꐕ。
ꋯꁦꏦꃤꄹꏦꋈꄻꌠꑭꁘꀊꏀꃅꐕꎼꆹ。ꍔꍞꏦꉻꄺꀱꌠꐪꊛꄉꄹꎆ。ꇓꈓꇓꉈꊻꂷꍆꐪꐯꌟꌠꇬꈴꄉꏓꂱꁧꎁꌊꄻꌠꃅ。ꅉꂫꊐꌠꋯꁦꀋꆏꃅꀻꎆ。ꍏꇩꐛꐨꐧꋦꉪꏦꏦꃤꉻꑫꏓꐛ，ꐧꋦꉪꏦꏦꏲꇩꏤꋈꄻꌠꊌꐨꄇꇖꀕꃅꐥ。ꇩꉂꊋꏓꋍꃱꃅꌠꁁꏯꄻꈫꈈꄻꀉꇨ。ꃹꅼꃅꏲꑘꏦꉻꄺꀱ，ꏦꌬꏦꉻꌋꆀꌤꃅꉺꏦꄺꀱꌠꀻꎆꐨꀊꏀꌠꊌꅜ。
ꁱꀕꋈꄻꌠꐂꀊꏀꊐꇬꑟ。ꐧꋦꉪꏦꈯꄜꁌꐨꉻꑫꋈꄻꌠꃹꅼꃅꃅ，ꁱꀕꏦꉻꄺꀱꌠꐊꑷꃅꄹꎆ，ꄉꉻꁱꀕꁧꃤꃅꉻꑫꋈꄻꌠꀒꁨꀻꎆꐨꀉꒉꃅꊌꅜ，ꁱꀕꅐꑘꐳꃅꀻꎆ，ꁱꀕꁰꄻꒃꅐꌠꀊꅰꃅꌄꆣ，ꏓꂱꉌꊈꁱꀕꐥꐨꀊꅰꃅꀉꑌꇁ。ꉹꁌꃅꈯꒆꄿꎟꌠꌋꆀꋓꅔꈯꎟꌠꊌꐨꀊꏀꌠꐥ。
ꐧꋦꋈꄻꌠꀻꎆꐨꀊꏀꌠꊌꅜ。ꅉꀨꄉꉻꁧꃤꃅꌠꑟꐨꌋꆀꐽꏡꈴꐨꄇꇖꀕꃅꉀꐕ。ꉙꂘꌤꑘꐳꐯꐳꃅꀻꎆ，ꇓꈓꇓꉈꁌꀋꁵꌠꋭꑘꂘꑘꐊꑷꃅꃅꇫꑟ。ꐧꋦꏦꀧꉻꑫꋈꄻꌠꊌꐨꄇꇖꀕꃅꐥ，ꇓꈓꇓꉈꅉꀨꃀꌠꀨꎹꄜꏂꀧꄹꏦꐊꑷꃅꋈꄻꄉ，ꀊꏀꉹꌠꐧꋦꈭꋏꉻꑫꀑꐱꃅꏓꐛ。ꉹꁌꃅꆅꉁꄜꏂꀧꌠꀑꐱꃅꃅꇫꑟ，ꇓꈓꇓꉈꅉꀨꁦꎴꆄꄻꄹꏦꀑꐱꃅꄻꄉ。ꏦꀧꃅꐙꌠꀀꑳꋈꄻꌠꐳꃅꄹꎆ。ꐧꋦꏲꂠꌠꇬꊋꀥꇱꌋꆀꏀꀺ，ꐧꋦꐮꄮꎍꐽꇬꎷ。
ꇩꐏꌋꆀꂽꋈꄻꌠꐛꐨꀊꏀꌠꀹꄻꄉ。ꍏꇩꐛꐨꂽꌤꄺꀱꌠꊌꐨꀉꒉꀊꂾꃅꊌꅜ，ꂽꇝꂱꈴꐛꏀꈴꑌꐚꈴꃅꋈꄻꌠꋮꄮꃅꄹꎆ、ꐊꑷꃅꌌꊋꀥꇱ，ꂽꌤꉈꈽꊭꄎꌠꀋꆏꃅꃹꅼꈴ，ꃅꋊꀊꏀꋎꌠꀊꏀꊬꌠꇬꐩꋊꂿꃆꃄꄻꄐꊋꄇꇖꀕꃅꀉꇨꇁ，ꄞꅐꃅꃛꊸꊋꋠꃨꆰꌠꂿꃆꋍꑞꋍꑵꃅꌐ。
ꇤꉪꄠꌤꃅꌠꀒꁨꋍꁘꃅꊋꀥꇱ。ꑣꇤ、ꉪꂱꌄꆣꎍꐽꇬꎷ，ꅔꈐꌋꆀꐮꎻꈴꇷꃅꌠꉀꐕꌊꑞꅉꀊꏀꌠꇬꑟ。ꎿꑍꋮꐮꃆꂮꄹꇙꄉꀉꒉꃅꆹꏮꌠꃅꇫꑟ，ꎿꑍꋮꐊꑷꃅꈛꎂꃅꑍꁁꏯ“ꌕꈴ”ꌠꃅꇫꑟ，ꎿꑍꋮꎆꏣꇷꃅꇶꏦꋯꏤꁰꄻꄉꌌꃄꌬ，ꎿꑍꋮꋍꑞꋍꁁꏯꃅꐮꎻꈴꌠꐛꄟꏓꐛ，ꎿꑍꋮꐮꃆꂮꄮꐽꃅꀻꎆꌠꐛꊂꀊꏀꌠꀹꄻ。
ꉇꉻꑌꑲꌤꃅꌠꊌꐨꀊꏀꌠꊌꅜ。ꏟꈯꃅꇩꏤꈲꁧꌋꆀꉪꇩꏤꉻꊿ、ꏦꊿꃤꎿꉈꏦꊒꌠꌅꈌꈲꁧꀧꌋꃅ，ꊋꀥꇱꄉꋧꃅꇩꏤꈧꌠꌋꆀꐮꎻꈴꐮꇷꃅ，ꋧꃅꇣꄧꏱꄻꉺꏦꄺꀱꌠꄹꇙ，ꏣꀋꑌꃅꋧꃅꄮꐽꌠꌋꆀꀻꎆꌠꊥꎆ，ꇩꏹꌤꃆꇬꁧꎁꃅꐙꌠꌋꆀꅇꂷꉐꂷꉉꌅꈌꀒꁨꋍꁘꃅꌌꀉꇨꇁ，ꄺꀱꀻꎆꌠꎁꃅꈲꁧꐥꌠꇩꏹꋦꈭꅔꎷꄉꀐ。
ꄈꋈꄻꌠꐊꑷꃅꌌꊋꀥꇱ。ꄈꌅꈌꌬꄐꊋꋈꄻꌠꌋꆀꂴꅑꐨꋈꄻꌠꐪꊛꄉꄹꎆ，ꉪꇐꌧꇗꋈꄻꌠꊌꐨꄇꇖꀕꃅꐥ，ꈆꑪꃅꀻꎆꌠꉜꐨꌶꄻꃄꄻꌠꊌꐨꀋꂿꑘꌠꊌꅜ，ꄈꋈꄻꄺꀱꏀꀺꌠꑭꁘꀋꂿꑘꌠꐕꎼꆹ。ꄈꈐꋯꁦꌠꀒꁨꋍꁘꃅꍔꐯ。ꇥꀯꁥꌠꏭꂘꄻꌠꁨꎆꐨꀋꂿꑘꃅꐥ，ꌧꊿꌤꃅꌠꐛꊂꀊꏀꌠꀹꄻꄉ。ꂴꅑꌠꄻꉾꃪꌠꐛꌠꃅꈧꌠꌋꆀꌶꄻꃅꐙꌠꄈꎀꍹꋈꄻꌠꃹꅼꃅꅷꁨꆹ，ꅉꂫꊐꌠꄈꎀꍹꀋꆏꃅꌌꊋꀥꇱ。ꄈꃅꇏꐙꎴꃅꏲꌠꋈꄻꌠꌋꆀꍹꈔꌠꏭꁏꉈꈽꌠꊌꐨꀊꏀꃅꐥ。
ꋍꈭꐨ，ꀋꎪꃅꏸꐚꃅꉜꇫꄉꌶꌠꆏ，ꉪꊇꌤꃅꌠꇬꉈꑴꀋꇎꀋꂪꅉꀉꑌꃅꐥꑴꌦ，ꀒꁨꆹꌠꈝꃀꇬꊋꋠꌠꌋꆀꌤꃆꀉꑌꃅꐥꑴꌦ。ꀋꉬꀋꉆꌠꆏ：ꀻꎆꌠꇬꐮꆽꀋꏣ、ꐮꀋꄮ、ꐪꊛꄉꀻꎆꆹꀋꉆꌠꌤꃆꆏꄡꇗꑓꅐꎑꑴꌦ，ꈆꑪꇮꇐꏀꀺꄐꊋꀉꀋꇨ，ꅐꑘꐛꉻꀋꋭꀋꋽ，ꂿꑘꅉꃀꄡꇗꊋꁧ，ꅐꀦꋦꈭꏢꑲꐨꀉꑌꇁ，ꈆꑪꃅꀻꎆꌠꇬꏢꑲꌠꏦꉻꉺꏦꇊꅍꑴꅍꊼꇅꀉꑌꃅꐥ，ꃹꅼꃅꄺꀱꁉꃑꌠꌋꆀꎆꏣꀻꎆꃄꄟꆹꏮꌠꂿꃆꊋꋠꐯꊋꋠ；ꇓꈓꇓꉈꃄꁕꀻꎆꐮꍣꐨꌋꆀꀀꊿꊌꐨꁷꑣꐮꍣꐨꄡꇗꊼꇅꀉꒉ；ꐧꋦꐮꄙꐨꄇꇖꀕꃅꁦꎆ，ꂘꑘ、ꃅꑘꎹꃅ、ꐧꋦꏦꀧ、ꆅꉁꁬꋌ、ꀀꑳ、ꒆꉻꋦꈭ、ꋠꇐꁬꋌꉮꀋꐥꐨ、ꒃꅐꋬꂻꐨ、ꐧꋦꋬꂻꏱꄻ、ꏦꌬꏦꏲꑠꉹꁌꑴꅉꈲꁧꃆꂮꐥꌠꌤꃆꊼꇅꀉꑌ，ꉹꁌꄹꁆꐥꐨꊼꇅꊋꋠ；ꋍꈨꋋꈨꁁꏯꇬꑌꇐꄐꀕ、ꉌꒊꐨꀋꐥꇁ；ꇥꀯꋍꈨꋋꈨꈆꑪꃅꀻꎆꌠꏲꂠꊋꃤꀉꇨꃅꀋꐛ，ꅉꂫꊐꌠꄈꎀꍹꋍꈨꋋꈨꏃꅍꁁꐚꃅꐙ，ꄈꑼꇥꀯꀁꑌꄹꁆꉪꐨꑇꐨꇘꑐ、ꉪꃆꁢꊧꉪꉻꑌꀋꋒ，ꇶꏦꉪꏦ、ꇛꌺꉪꏦꌤꃆꑓꅐꎑꇨ，ꁋꀘꌑꀽꐛꐨꃛꇨ；ꏱꁕꋍꈨꋋꈨꁁꏯꇬꏣꑌꍹꈔꃅꐺꌠꅐꈝꐮꀉꑌꃅꅐꇁ，ꍹꈔꁏꉈꈽꌠꃅꒊꃅꇁꄡꇗꊋꋠꐯꊋꋠ。ꊋꋠꐨꌋꆀꌤꃆꋋꈨ，ꉪꊇꆏꀋꎪꃅꀉꇨꃅꇫꉜꁨꄉ，ꀒꁨꋍꁘꃅꌌꎔꎗꃅꂥꀘꌶ。
ꋌꃀꋋꉬꈎꌠꇬꌤꃅꐨꆹ，ꃀꀉꒉꊰꃘꃢꌠꈿꊂꅑꅸꇁꌠꐊꑷꃅꊼꇅꌣꈚꌠꐧꋦꋈꄻꌠꊰꈎꃅꐨꇬꐊꇐꀋꂿꑘꌠꉬ。
ꋋꊰꈎꇬ，ꉪꊇꆏꏟꈯꀕꃅꉪꇩꏤꀻꎆꌠꇬꀋꂿꑘꌠꄐꇐꏤꁈꊜꋽꄮꒃꉇꌋꆀꌬꋒꃅꄉ，ꋍꑞꋍꑵꀉꒉꀊꂾꃅꋓꎭꇁꌠꄩꊋꇈ，ꊋꇤꄉꍏꇩꐛꐨꐧꋦꉪꏦꄹꎆꅷꀊꏀꌠꀻꎆꊭꇬꑟꀐ。ꃅꋊꀊꏀꋎꌠꀊꏀꊬꌠꇬꃹꇁꇬ，ꇩꏹꐛꄟꆲꁏꄂꈧ，ꏓꇱꇩꊋꋓꅔꌠꋌꃀꑠꃅꃛꊸꀋꋻ，ꉪꊇꃹꅼꃅꄺꀱꁉꃑ，ꐳꃅꀻꎆꑭꁘꐕ，ꋧꃅꃼꇇꎀꍹꇬꐊꆹꌠꌌꊜꋽꄮꃅꄉ，ꍅꊋꆹꏮꌊꇙꊋꃅꄉ，ꋓꎭꌠꌌꊜꋽꄮꃅꄉ，ꀋꎪꀋꑴꃅꐊꑷꃅꊼꇅꌣꈚꌠꐧꋦꋈꄻꌠꈴꎁꄹꎆ。ꀒꁨꆹꌠꈴꎁꇬ，ꉪꊇꆏꉘꀋꇉꃅꋋꇅꃅꇫꅐꇁꌠꃏꄅꆄꁮꄩꊋ，ꎔꎗꃅꉪꇩꏤꀻꎆꃅꐨꏓꇱ，ꎃꊒꃅꉪꇩꏤꀻꎆꌠꇬꊬꊐꇬꐋꀋꌡꐨꒃꌫꄉ，ꋋꇅꃅꈆꑪꃅꀻꎆꌠꉜꐨꑠꄐꇐꏤꁈꉪꇐꀉꒉꀊꂾꌠꄜꅐꇁꌋꆀꐊꑷꃅꌌꃄꌬ，ꎆꏣꐧꋦꀻꎆꈥꈉꀊꐯꌠꄹꀺꄉꀐ。ꑍꄙꆀꉆꈎꈭꐨꆏ，ꇩꏹꎆꒉꎆꇁꎒꐡꄉꉪꇩꏤꀻꎆꌠꆏꋌꎼꊋꋠꐯꊋꋠꌠꊝ，ꉪꊇꈆꑪꃅꊨꇽ、ꁰꈘꃅꏤꄻ，ꏡꁈꀉꒉꑠꋬꈭꏂꌊꌬꄉ，ꋧꃅꇣꄧꄉꂴꅑꄉꎆꏣꎍꐽꇈꀱꉀꐕꇁꌠꃅꇫꑟ，ꇿꋌꐥꃅꉇꉻꎆꏣꐔꈔꉆꌠꄜꎟꌠꊝꌠ、ꎆꏣꎍꐽꃅꊼꇅꐳꃅꀻꎆꇬꎷꎻꌠꎖꋪꀋꂿꑘꌠꏓꊭꄉꀐ。ꉪꊇꆏꊋꐛꃅꀙꏢꉪꒀꉼ、ꊾꄣꉪꒀꉼꌋꆀꎮꉰꋧꃅꄉꀦꉼꀞꄻ，ꊉꍧꀉꇨꐯꀉꇨꃅꃄꇙꑠꀉꆈꃅꋌꐛꋌꐙꉮꌸꌠꄘꑣꌠꌋꆀꉮꌸꈭꐨꋈꀱꄺꀱꌠꀉꒉꐯꀉꒉꃅꊋꐛꌠꊌꅜ，ꋭꋽꃅꋋꇅꃅꇫꅐꇁꌠꌤꆿꋍꑞꋍꑵꀉꒉꀊꂾꌠꀞꄻꇧꎭ。ꇩꈐꇩꉈꃅꒊꃅꇁꌼꇪꐯꌼꇪꌠꇂꃴꄉ，ꄈꌋꆀꏓꂱꆏꎟꎖꊋꋠꌠꄽꄜꄉ，ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꃅꇴꄉꉻꀉꒉꌠꄻꈫꈈꌋꆀꌌꀻꎆꀐ，ꉪꇩꏤꋧꃅꑋꅉꉆꈉꐕꀊꂥꀐ，ꍏꇩꐛꐨꐧꋦꉪꏦꉾꃪꐨꀉꒉꐯꀉꒉꌠꌋꆀꐥꏡꊋꃤꀉꇨꐯꀉꇨꌠꄛꑣꅐꇁꀐ，ꍏꇩꏓꂱꌋꆀꍏꉸꊿꋅꑊꒉꐨꌋꆀꏓꋧꊋꃤꌌꀉꇨꆹꀐ。
ꊰꈎꅑꅸꇁꌠ，ꉪꊇꐩꋊꃅꐙꌠꊌꐨꋍꑞꋍꑵꀊꏀꌠꊌꅜ，ꐊꑷꃅꊼꇅꌣꈚꌠꐧꋦꋈꄻꐛꌠꎁꃅꅉꃀꀉꇨꐯꀉꇨꌠꌆꄻꄉꀐ。ꉪꇩꏤꎆꏣꈁꉬꃷꁨꆏꋧꃅꉆꈉꃘꂷꂶꌠꇬꄉꐂꌊꉆꈉꑍꂷꂶꌠꇬꑟ，ꐧꋦꒃꅐꊋꃤ、ꎆꏣꊋꃤ、ꈆꑪꇮꇐꊋꃤꆏꐂꀉꒉꊐꇬꑟ，ꏓꂱꐥꐨꐤꄟ、ꀀꊿꊌꐨꑞꅉ、ꐧꋦꏦꀧꐨꆏꐂꀉꒉꊐꇬꑟ，ꏓꇱꇩꊋ、ꇩꏹꋓꅔꊋꃤ、ꇩꏹꑌꑲꊋꃤꆏꐂꀉꒉꊐꇬꑟ，ꇩꏤꐛꃆꐛꂮꐩꋊꐛꐨꐥꃅꀊꏀꃅꐛꐈ。ꏓꂱꋍꏅꉜꇬ，ꋋꆏꉪꇩꏤꎆꏣꊛꄉꀻꎆ、ꋯꁦꀋꆏꃅꄻꐛꒆ、ꁱꀕꋍꑍꋍꉙꃅꌄꆣꇁ、ꐧꋦꎍꐽꇬꎷꊭꉬ，ꋋꆏꊋꇤꄉꉹꁌꐥꐨꏦꀧꌋꆀꄻꌊꃪ、ꏓꂱꒇꏣꀊꅰꀉꑌꃅꊌꅜꊭꉬ。ꉪꊇꐩꋊꐛꐨꐥꌠꊌꐨꑠꃅꐙꌠꊌꅜꌠꆹ，ꄈꃤꌧꇗꁧꀦ、ꈛꏦꁧꀦ、ꐱꀨꁧꀦ、ꎖꋪꁧꀦꎃꊒꃅꄐꌐꌠꉘꇉ，ꍏꇩꀊꏀꄻꐛꊂꅑꅸꇁꌠꈜꀕꇈꄺꀱꁉꃑꊂꅑꅸꇁꌠꌆꄻꄉꌠꅉꃀꈫꈈꌠꉘꇉ，ꄈꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꌠꉘꇉꌠꉬ。
ꄚꇬꄉ，ꉢꍏꇭꍏꑷꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈧꌠꏭ、ꏓꂱꏓꉻꈧꌠꌋꆀꋍꑞꋍꁁꏯꇩꉂꂒꋦꊿꏭ，ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌꌋꆀꄠꃪꃺꑌꉈꑴꍏꇩꊿꇩꉈꀀꌠꋍꏅꌠꏭ，ꍏꇩꐛꏀꈴꋈꄻꌠꇬꉈꇬꌠꌋꆀꊋꁈꄏꌠꇩꏤꈁꐥꌠꐋꀨꈧꌠꏭ，ꇬꀖꌌꀖꄉꈀꎭꀕ！
ꊰꈎꉈꈽꈴꎁꏓꇱꎼꇁꇬ，ꀋꉬꀋꉆꐯꀋꉬꀋꉆꌠꆏꉪꊇꀋꎪꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉꇬꎷ，ꀬꅑꃅꃄꄻꌠꅉꃀꀂꏽꇬꄉꌧꇗꏀꀺꌠꄹꎆ，ꏟꈯꃅꍏꇩꐛꐨꐧꋦꉪꏦꌭꈬꌠꌋꆀꀻꎆꌠꇬꆼꒆꄉꑖꑟꃅꐮꑌꑲ、ꐮꌧꈴꌠꉪꇐꀊꏀꌠ、ꉜꐨꀊꏀꌠ、ꍆꇽꐨꀊꏀꌠꑠꋍꋬꈭꄜꎼꇁꇈ，ꈆꑪꃅꀻꎆꌠꉜꐨꏓꐛꌋꆀꌌꌫꄻꀐ。ꈆꑪꃅꀻꎆꌠꉜꐨꆹꂷꇻꌦꉪꏦꀋꃋꋋꄮꍏꇩꃶꐚꐛꐨꌋꆀꃅꋊꐋꀋꌡꐨꄻꐯꇯꎼꇁꄉꅐꇁꌠꉬ，ꂷꇻꌦꉪꏦꀻꎆꃆꂮꇬꋧꃅꉜꐨꌋꆀꏡꁈꉉꇐꀂꏽꏓꐯꇯꄉꄛꑣꅐꇁꌠꉬ，ꃅꒊꃅꇁꀊꏀꌠꇂꃴꀻꎆꐨꈍꃅꐙꌠꃅꇫꑟ、ꈍꃅꄉꀻꎆꂯꌠꑠꌤꃆꀉꒉꀊꂾꌠꏭꀊꏀꌠꈆꑪꃅꅇꀱꀐ，ꉪꊇꍏꇩꐛꐨꐧꋦꉪꏦꈳꏦꌧꐚꐨꉀꐕꅷꑞꅉꀊꏀꅉꇬꑟꀐ，ꀋꃋꋋꄮꍏꇩꂷꇻꌦꉪꏦꀻꎆꌠꑞꅉꀊꏀꌠꀹꄻꎼꇁꀐ。ꈆꑪꃅꀻꎆꌠꉜꐨꆹꍏꇩꐛꐨꐧꋦꉪꏦꌧꇗꉻꑫꇬꊌꐨꀊꏀꐯꀊꏀꌠꉬ，ꋋꆏꍏꇩꇭꍣꄈꋍꉻꀑꁮꐨꏓꋧꅧꂷꉬ，ꋋꆏꄈꌋꆀꇩꏤꌤꃅꐨꈁꐥꌠꇬꄐꌐꌠꉪꇐꇇꌭꀉꇨꐯꀉꇨꌠꉬ。ꈆꑪꃅꀻꎆꌠꉜꐨꆏꂷꇻꌦꆺꆀꉪꏦ、ꃀꊱꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠꌋꆀꐯꇯ，ꄈꀋꎪꃅꀊꉗꃅꌭꈬꇬꎷꌶꌠꄐꇺꉪꇐꉬ。
ꑓꏮꃆꏂꊂꑋꉜꄉ，ꃹꅼꃅꈆꑪꃅꀻꎆꌠꉜꐨꃄꌬꇫꑟꌠꆹ，ꀋꎪꃅꍏꇩꐛꐨꐧꋦꉪꏦꌭꈬꌋꆀꀻꎆꌠꏭꃶꐚꈻꇐꀋꂿꑘꌠꌋꆀꐩꋊꈻꇐꎴꅼꌠꐥ，ꀋꎪꃅꈆꑪꃅꀻꎆꌠꉜꐨꌌꉪꇩꏤꐛꏀꈴꋈꄻꌠꈁꉬꈭꎁꇬꃄꌬꇫꑟ、ꄜꋊꌊꄈꃤꋈꄻꌠꋍꑞꋍꁁꏯꇬꑟꌶ。ꄈꑭꊂꆏꀋꎪꃅꀊꅰꃅꉉꄻꀋꅐꃅꎆꏣꐧꋦꀻꎆꄹꆷꌠꌌꄉꃹꅼꃅꈆꑪꃅꀻꎆꌠꉜꐨꃄꌬꇫꑟꌠꈻꇐꀨꏡꌠꃅꄉ，ꈬꐯꈬꃅꎆꏣꋈꄻꈯꄜꋋꂷꇬꆼꒆꄉ，ꀋꎪꃅꉌꊢꑓꊢꃅꋈꄻꌠꃅ、ꉌꂵꋍꂷꃅꉪꐨꋍꏢꃅꀻꎆꌠꏂꇫꇬꎷ，ꊋꇤꄉꀻꎆꈳꏦꌭꇇꈐꊐ、ꀻꎆꉪꉻꏀꀺ、ꀻꎆꊋꋠꅍꂥꀘꇧꎭ，ꃹꅼꃅꈆꑪꂘꑘꌌꇩꄖꌠꄐꇐꏤꁈ、ꌧꊿꌌꇩꄻꇨꎻꌠꄐꇐꏤꁈ、ꐪꊛꄉꀻꎆꉆꌠꄐꇐꏤꁈꃄꌬ，ꐳꃅꈆꑪꃅꀻꎆꌠꈉꐨꇬꊒꌠꀻꎆꃄꄟꌋꆀꏦꉻꉺꏦꄻꐛ，ꀋꆏꃅꐧꋦꒃꅐꊋꃤꁌꄝꌋꆀꀻꎆ，ꀋꆏꃅꈆꑪꃅꀻꎆ、ꐮꄮꃅꀻꎆ、ꄮꐽꃅꀻꎆꌠꃅꇫꑟ，ꍏꇩꐛꐨꐧꋦꉪꏦꌭꈬꌋꆀꀻꎆꌠꎁꃅꅉꃀꈬꐯꈬꌠꌆꄻꄉ。ꀋꎪꃅꀊꅰꃅꉉꄻꀋꅐꃅꊿꌌꀨꇬꄉꌠꌌꃹꅼꃅꈆꑪꃅꀻꎆꌠꉜꐨꃄꌬꇫꑟꌠꈯꄜꉆꈉꃅꄉ，ꈍꄮꑌꏓꂱꋍꏅꇊꋍꏅꃤꈲꏣꁧꀦꃅꇫꑟꋒ、ꀧꌋꃅꋒ、ꀻꎆꋒꌠꌌꄈꌋꆀꇩꏤꌤꃅꐨꈁꐥꌠꇬꄓꈌꌋꆀꑞꅉꃅꄉ，ꏓꂱꂴꁧꂴꀿꉌꊈꁌꒉ，ꏓꂱꌅꈌꈲꁧꋍꑞꋍꑵꌠꏦꀧ，ꀋꆏꃅꀻꎆꊌꐨꌌꏓꂱꐯꇯꊌꎻ、ꊥꎆꄉꃰꊿꐊꑷꃅꀻꎆꌠꊌꐨꀊꏀꌠꊌꅜꌠꃅꇫꑟ。ꀋꎪꃅꀊꅰꃅꑴꐚꃅꐊꑷꃅꋮꄮꊛꄉꀻꎆꉆꌠꌌꃹꅼꃅꈆꑪꃅꀻꎆꌠꉜꐨꃄꌬꇫꑟꌠꅉꀨꇖꐨꃅꄉ，ꐊꑷꃅꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻ、ꒆꉻꌧꑳꋈꄻꌠꉬꑵꏓꐯꇯꌠꉻꄜꄐꉻꃄꌬꇫꑟ，ꐛꏀꈴꋈꄻꌠꋍꑞꋍꁁꏯꐮꋮꄮꌠꊥꎆ，ꒃꅐꐮꃆꂮꌋꆀꒃꅐꊋꃤ、ꄩꇴꄩꉻꌋꆀꎆꏣꅉ꒜ꐮꋮꄮꌠꊥꎆ，ꀋꆏꃅꒃꅐꀻꎆ、ꐥꐨꌣꈚ、ꒆꉻꉾꃪꌠꌧꑳꃅꀻꎆꌠꈝꃀꀹꄻ。ꀋꎪꃅꀊꅰꃅꑴꐚꃅꏓꇱꇲꈴꌠꌌꃹꅼꃅꈆꑪꃅꀻꎆꌠꉜꐨꃄꌬꇫꑟꌠꏡꁈꁧꀦꃅꄉ，ꑞꑌꃶꐚꐛꐨꇬꈴꄉꃅꌠꌭꈬꇬꎷ，ꍏꇩꐛꐨꐧꋦꉪꏦꌤꑘꇬꐮꃆꂮꀉꒉꀊꂾꌠꎃꐚꃅꌧꐚꌋꆀꋭꋽꃅꀞꄻ，ꄺꀱꀻꎆꎍꐽ、ꈏꇓꏲꑘꉇꉻꑌꑲꇩꏤꐏꁇ、ꄈꏲꇩꏲꂽꏲꑠꋍꑞꋍꁁꏯꌤꃅꌠꏓꇲ，ꇓꈓꇓꉈꀻꎆ、ꃄꁕꀻꎆ、ꎆꏣꐧꋦꀻꎆ、ꊿꌋꆀꋌꐛꋌꐙꐮꄮꃅꀻꎆ、ꇩꈐꀻꎆꌋꆀꉇꉻꁉꃑꌠꏓꇲ，ꋍꑞꋍꁁꏯꈲꏣꃆꂮꏓꇲ，ꋒꐯꋒꃅꋍꑞꋍꁁꏯꏣꀋꑌꐨꄕꊪꎼꇁ，ꊋꇤꄉꏓꂱꈁꐥꌠꑞꄐꆏꑞꃅ、ꂱꑱꊌꎁꂱꑱꊌꇈꉈꑴꋮꄮꃅꐮꐊꌠꐛꊂꏓꐛꎻ。
ꉪꇐꁌꄝ、ꑞꉬꌠꑞꃅꄉ、ꃅꋊꐊꄉꀒꁨꆹ、ꇯꍝꌠꎹꃶꐚꌠꃅꌠꆹ，ꈆꑪꃅꀻꎆꌠꉜꐨꊨꄅꐯꊨꄅꌠꉌꊈꊇꅉꉬ。ꃄꄻꀻꎆꌠꆹꈍꄮꑌꑞꅉꀋꐥ，ꇗꊈꌧꐚꌠꆹꈍꄮꑌꑞꅉꀋꐥ，ꌧꇗꏀꀺꌠꆹꈍꄮꑌꑞꅉꀋꐥ。ꄈꑭꊂꃅꀋꎪꃅꀬꅑꃅꃄꄻ、ꀬꅑꃅꄺꀱ、ꀬꅑꃅꏀꀺ，ꃅꋊꀻꎆꈉꐨꌭꇇꈐꊐꄉ，ꏓꂱꉌꉪꐨꇬꊒꄉ，ꀋꆏꃅꍏꇩꐛꐨꐧꋦꉪꏦꈳꏦꎹꈹꌋꆀꒃꌫ，ꈍꄮꑌꄈꃤꐥꏡꊋꃤꌭꈬꃅꄉꇬꎷ，ꈍꄮꑌꇩꏤꀻꎆꇘꊋꌭꈬꃅꄉꇬꎷ，ꄈꌋꆀꏓꂱꁧꀿꃅꐙꌠꃅꐨꇬꄉꊋꇤꄉꍏꇩꐛꐨꐧꋦꉪꏦꀊꅰꃅꀊꐯꌠꀻꎆꊫꂫꀹꄻꌶ。
ꑍ、ꍏꇩꐛꐨꐧꋦꉪꏦꀊꏀꃅꊋꐛꌠꃅꅜ
ꀱꀋꉊꊂꋋꋏꅑꅸꇁꌠꍏꇩꒈꂃꒊꆱꄓꃅꐙꌠꐩꋊꉜꇈ，ꏮꍏꉸꊿꋅꉘꇉꊂꁠꐨꇎꐯꇎꃅꐥꌠꃆꏂꊂꑋꉜꇬ，ꉪꊇꂫꇽꅇꀋꎪꏢꊌꅜ：ꐊꑷꃅꊼꇅꌣꈚꌠꐧꋦꄻꐛ，ꐳꃅꐧꋦꉪꏦꐛꏀꈴꌠꄹꎆ，ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꇬꆹ，ꀋꎪꃅꀋꇙꀋꑐꃅꍏꇩꐛꐨꐧꋦꉪꏦꈝꃀꇬꍬꇬꎷꌶ。
ꈝꃀꆹꄈꀑꇬꌋꆀꐮꃆꂮꐥ，ꇩꏤꊫꂫ、ꊿꋅꐛꐨꐛꊂ、ꏓꂱꐥꐨꐥꌒꌠꌋꆀꐮꃆꂮꐥ。ꍏꇩꎆꏣꁱꀕꊁꊰꐯꊁꊰꌠꇩꏤꑠꂷꇬꄉꊿꋅꀱꌄꆣꇁꌠꈝꃀꎹꈹꇬꆹ，ꂿꃆꊋꋠꐯꊋꋠꌠꉬ。ꃅꐎꈬꊰꎖꈎꅑꅸꇁꌠ，ꉪꄈꆏꑖꑟꃅꏓꂱꉘꇉꄉ，ꂷꇻꌦꉪꏦꅉꀨꇗꀨꌌꍏꇩꃶꐚꐛꐨꌋꆀꃅꋊꐋꀋꌡꐨꇬꇱꎼꇁꇈ，ꄂꋦꑴꌅꃅꊨꏦꈝꃀꍬꇬꎷ，ꎭꅗꅧꅗꇈ，ꀑꇬꁮꌠꑌꀋꑴꃅ，ꇝꂱꋈꄻꄺꀱꌠꇰꀋꃀꃅꊋꐛꌠꊌꅜ，ꍏꇩꐛꐨꐧꋦꉪꏦꀹꄻꌋꆀꀻꎆꀐ，ꊇꅉꇬꄉꍏꇩꏓꂱꌋꆀꍏꉸꊿꋅꊫꂫꃰꇌꄺꀱꎼꇁꀐ。
ꐋꀨꃀꊱꄏꈯꄜꃅꄉꌠꄈꃤꋍꋏꋎꌠꍏꑷꏲꌋꁥꌠꆏꄈꑭꊂꇩꏤꑭꊂꊿꋅꈁꐥꌠꏓꂱꏃꂠꄉꀊꏀꋯꁦꉪꏦꇝꂱꌠꃅꇫꑟꌐꇈ，ꐧꋦꉪꏦꄺꀱꌠꃅꀐ，ꐧꋦꉪꏦꁧꀦꄹꏦꏤꄻꄉꀐ，ꊋꐛꃅꍏꇩꐩꋊꇬꃹꅼꐯꃹꅼꇰꀋꃀꐯꇰꀋꃀꌠꐧꋦꆴꄻꌠꃅꇫꑟꀐ，ꀋꃋꋋꋏꍏꇩꀻꎆꂴꅑꌠꈁꐥꌠꎁꃅꁧꀦꍔꍞꇎꏦꌋꆀꄹꏦꅉꃀꌆꄻꄉꀐ。ꎹꈹꈴꎁꇬꆏ，ꈜꈪꈜꍣꈁꄽꈴꀐꑴꇬ，ꄚꄈꐧꋦꉪꏦꋈꄻꌠꇬꄉꊌꅜꌠꄂꃅꀹꄻꎼꇁꌠꌧꇗꊌꐨꌋꆀꃅꐛꐨꀉꒉꐯꀉꒉꌠꆏ，ꐩꋊꀊꏀꊬꌠꍏꇩꐛꐨꐧꋦꉪꏦꀹꄻꌠꎁꃅꎖꋪꁌꇐꈤꌠ、ꌧꇗꊭꄎꌠ、ꐥꇐꅉꃀꇲꄻꄉꀐ。
ꐋꀨꄓꑦꀻꈯꄜꃅꄉꌠꄈꃤꑍꋏꋎꌠꍏꑷꏲꌋꁥꌠꆏꄈꑭꊂꇩꏤꑭꊂꊿꋅꈁꐥꌠꏓꂱꏃꂠꄉꃹꅼꃅꉪꇩꏤꐧꋦꉪꏦꋈꄻꌠꎃꑽꑍꁁꏯꌠꎖꋪꏓꈹꐯꇯꇈ，ꋧꃅꐧꋦꉪꏦꐩꋊꎖꋪꇬꉜꄻꄉ，ꄈꌋꆀꇩꏤꌤꃅꈯꄜꆹꏮꌊꎆꏣꋈꄻꌠꀂꏽꇁ、ꄺꀱꁉꃑꌠꃄꄻꌠꐩꋊꐛꐨꐥꌠꏤꁈꏤꄻꎼꇁ，ꃹꅼꃅꐧꋦꉪꏦꐛꊈꄜꋊ，ꐧꋦꉪꏦꇫꇬꊬꌠꅉꀨꈛꏦꏤꄻꄉ，ꊨꄅꃅꊨꏦꈝꃀꍬꇬꎷ、ꍏꇩꐛꐨꐧꋦꉪꏦꋈꄻꄷꌠꄜꎼꇁ，ꈆꑪꃅꍏꇩꐛꐨꐧꋦꉪꏦꋈꄻꌠꅉꀨꌤꃆꋍꋬꈭꌠꅇꀱꇈ，ꊋꐛꃅꍏꇩꐛꐨꐧꋦꉪꏦꀹꄻꎼꇁꀐ。
ꐋꀨꏦꊱꂱꈯꄜꃅꄉꌠꄈꃤꌕꋏꋎꌠꍏꑷꏲꌋꁥꌠꆏꄈꑭꊂꇩꏤꑭꊂꊿꋅꈁꐥꌠꏓꂱꏃꂠꄉꀋꎪꃅꄈꃤꅉꀨꌧꇗ、ꅉꀨꈛꏦꌭꈬꃅꄉꇬꎷ，ꇩꈐꇩꉈꃅꒊꃅꇁꌼꇪꐯꌼꇪ、ꋧꃅꇣꄧꐧꋦꉪꏦꐛꃆꐛꂮꌼꇪꌠꇫꅐꇁꌠꎟꎖꊋꋠꌠꂾꄉꍏꇩꐛꐨꐧꋦꉪꏦꀧꌋꃅꄉꀐ，ꃄꄻꐨꀊꏀꌠꇬꈴꄉꄈꃤꅉꀨꐱꀨ、ꅉꀨꎖꋪꏤꄻꎼꇁꀐ，ꐧꋦꉪꏦꃷꎏꎆꏣꏦꉻꄺꀱꌠꑞꅉꁻꌐꌋꆀꅉꀨꇶꏦꊨꄅꄉꀐ，ꐧꋦꉪꏦꇫꇬꊬꌠꅉꀨꎆꏣꄹꏦꌋꆀꁷꎸꄹꏦꊨꄅꄉꀐ，ꐊꑷꃅꄺꀱꁉꃑꌠꐛꊂꀊꏀꌠꀹꄻꎼꇁ，ꄈꃤꋈꄻꋉꃆꀊꏀꇰꀋꃀꌠꄹꎆ，ꊋꐛꃅꍏꇩꐛꐨꐧꋦꉪꏦꄹꅷꃅꋊꑍꊏꋋꋏꇬꃹꆹꀐ。
ꃅꋊꀊꏀꋎꌠꀊꏀꊬꌠꇬ，ꄈꍏꑷꆏꄐꇐꏤꁈꊜꋽꄮꀋꂿꑘꌠꒃꄉ，ꐊꑷꃅꊼꇅꌣꈚꌠꐧꋦꋈꄻꈴꎁꇬꄉꃄꄻꏀꀺ、ꌧꇗꏀꀺ、ꄹꏦꏀꀺꌠꄹꎆ，ꀋꎪꃅꊿꌌꀨꇬꄉꇬꎷ、ꐊꑷꋮꄮꊛꄉꀻꎆꉆꌠꊡꀱ，ꐧꋦꉪꏦꐮꄮꐧꋦꋈꄻ、ꐳꃅꒆꉻꌧꑳꋈꄻꄷꄜꎼꇁ，ꍏꇩꐛꐨꐧꋦꉪꏦꌤꑘꉻꄜꄐꉻꄻꄉ，ꊋꇤꄉꉹꁌꐥꐨꏦꀧꌋꆀꄺꀱꌊꉾꃪ，ꐧꋦꎃꊒꑗꐥꌠꊥꎆ，ꐮꄮꋧꃅꋈꄻꌠꄹꇙ，ꄈꃤꏱꌅꄐꊋꋈꄻꌠꌋꆀꂴꅑꐨꋈꄻꌠꄹꎆ，ꊋꐛꃅꐩꋊꄓꈌꀊꏀꌠꇬꄉꍏꇩꐛꐨꐧꋦꉪꏦꌭꈬꌋꆀꀻꎆꀐ。
ꄺꀱꁉꃑꌕꊰꎖꈎꅑꅸꇁꌠꋍꃅꃅꅷꇁꇬꎷꌠꀋꆏꃅꊛꄉꎹꈹꌠꇬꄉ，ꉪꊇꀋꎪꀋꑴꃅꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ，ꋍꎤꇰꇗꌬꌠꈛꆹꇬꑌꀋꍬ、ꉈꑴꁈꁧꆥꄻꌠꑽꈜꇬꑌꀋꈴ。ꍏꇩꐛꐨꐧꋦꉪꏦꈝꃀ，ꍏꇩꐛꐨꐧꋦꉪꏦꌧꇗꉻꑫ，ꍏꇩꐛꐨꐧꋦꉪꏦꄹꏦꆹ，ꄈꌋꆀꏓꂱꃅꐎꈬꊰꎖꈎꉈꈽ、ꀹꄻ、ꏓꊭꎼꇁꌠꁧꀦꊌꐨꉬ，ꀋꎪꃅꀊꅰꃅꇫꁌꒉ、ꈍꄮꑌꌭꈬ、ꀋꆏꃅꀻꎆꇬꎷꌶ。
ꍏꇩꐛꐨꐧꋦꉪꏦꈝꃀꆹ，ꍏꇩꇭꍣꄈꏃꂠꌠꇂꃴ，ꅉꀨꇩꃆꇩꂮꇬꉆꄉ，ꎆꏣꋈꄻꌠꌌꈯꄜꃅꄉ，ꀋꎪꃅꏥꏦꁧꀦꇖꏢꌠꌭꈬꇬꎷ，ꀋꎪꃅꄺꀱꁉꃑ，ꐧꋦꒃꅐꊋꃤꁌꄝꌋꆀꀻꎆ，ꐧꋦꉪꏦꃷꎏꎆꏣ、ꐧꋦꉪꏦꋯꁦꍔꍞ、ꐧꋦꉪꏦꂴꅑꁱꀕ、ꐧꋦꉪꏦꐮꄮꐧꋦ、ꐧꋦꉪꏦꒆꉻꌧꑳꋈꄻ，ꊿꐊꑷꃅꀻꎆꌠꊥꎆ，ꋍꁘꋍꁘꃅꏓꂱꈁꐥꌠꃅꐯꇯꌣꈚꇁꌠꃅꇫꑟ，ꌣꈚꐞꄿꋯꁦꌧꑳꐮꄮꌠꐧꋦꉪꏦꐛꏀꈴꇩꏤꋈꄻ。ꍏꇩꐛꐨꐧꋦꉪꏦꌧꇗꉻꑫꆹ，ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꇫꐊꌠꈆꑪꌧꇗꉻꑫꉬ，ꋋꆹꂷꇻꌦꆺꆀꉪꏦ、ꃀꊱꄏꉪꇐꌭꈬꌠꌋꆀꀻꎆꌠꉬ。ꍏꇩꐛꐨꐧꋦꉪꏦꄹꏦꆹ，ꏓꂱꁧꎁꃀꀉꒉꈿꄹꏦꇬꊇꅉꍔꍞꄹꏦꉬ，ꍏꇩꇭꍣꄈꏃꂠꌠꄈꀉꑌꂷꃅꇷꃅꌠꌋꆀꍔꍞꋮꒉꄹꏦ、ꊿꋅꃄꁕꊨꏦꏲꄹꏦꉈꑴꅉꂫꊐꌠꉹꁌꊨꏦꏲꄹꏦꑠꅉꀨꍔꍞꄹꏦꉬ，ꍏꇩꐛꐨꐧꋦꉪꏦꏦꃤꉻꑫ，ꉻꁨꏦꌌꀨꄜꃅꄉꌠ、ꁨꏦꀉꑌꑵꃅꐙꌠꎆꏣꐯꇯꀻꎆꌠꅉꀨꎆꏣꄹꏦꉬ，ꉈꑴꄻꄹꏦꋋꈨꅉꃀꀂꏽꐕꄉꌠꎆꏣꏦꉻ、ꍔꍞꏦꉻ、ꁱꀕꏦꉻ、ꐧꋦꏦꉻꑠꋍꑞꋍꑵꑭꋧꄹꏦꉬ。ꍏꇩꐛꐨꐧꋦꉪꏦꈝꃀꆹꃅꇫꑟꌠꈴꈜꉬ，ꍏꇩꐛꐨꐧꋦꉪꏦꌧꇗꉻꑫꆹꃅꐨꇬꄐꌐꅍꉬ，ꍏꇩꐛꐨꐧꋦꉪꏦꆹꅉꀨꏦꀧꅍꉬ，ꋋꌕꑵꆏꏓꋍꃱꃅꍏꇩꐛꐨꐧꋦꉪꏦꇰꀋꃀꃅꐨꇬꐊꌐ，ꋋꆹꄈꏓꂱꋌꏃꂠꄉꐧꋦꉪꏦꋈꄻꌠꀊꉗꃅꃄꄻꅉꇬꄉꏓꐛꌠꊨꄅꐯꊨꄅꌠꐛꐨꉬ。
ꍏꇩꐛꐨꐧꋦꉪꏦꋈꄻꌠ，ꀑꐱꁢꊧꆹꐧꋦꉪꏦꇫꇬꊬꌠꉬ，ꀑꐱꄐꉻꆏꉬꑵꋍꏢꃅꐙꌠꉬ，ꀑꐱꂿꃆꆏꐧꋦꉪꏦꐛꏀꈴꌠꌋꆀꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꉬ。ꍏꇩꐛꐨꐧꋦꉪꏦꆹ，ꈆꑪꐧꋦꉪꏦꅉꀨꏥꏦꑌꌭꈬꃅꄉ，ꉈꑴꃅꋊꇎꏦꄻꇬꁳꌠꊨꄅꌠꍏꇩꐛꐨꇬꑌꈴꄉ，ꀊꏀꏃꌠꉜꄟꌌꄉꇭꍣꄈꏱꌅꈳꏦ、ꐧꋦꉪꏦꋈꄻꈳꏦ、ꃰꊿꐧꋦꀻꎆꈳꏦꏭꌧꄻ，ꌧꇗꌋꆀꃅꐨꄻꐯꇯꌠꀂꏽꄉꋬꈭꃅꍏꇩꌟꃅꊻꂷꀉꑌꅉꃀꀁꁧꌠꁭꅐꏭꇩꏤꀉꒉꌠꇬꄉꈍꃅꐙꌠꐧꋦꉪꏦꋈꄻ、ꈍꃅꐧꋦꉪꏦꋈꄻꌠꊇꅉꌤꃆꋋꏢꏭꅇꀱꇈ，ꉪꇩꏤꁳꐳꃅꀻꎆꎼꇁꎻ，ꉪꇩꏤꏓꂱꐥꐨꑞꅉꁳꐳꃅꉀꐕꎻꀐ。ꃅꐨꆏꋒꐯꋒꃅꊩꀽꇬ，ꍏꇩꐛꐨꐧꋦꉪꏦꆹꀋꃋꋋꄮꍏꇩꀻꎆꌠꊇꅉꃅꍜꉬ，ꍏꇩꐛꐨꐧꋦꉪꏦꑲꆀꍏꇩꀻꎆꄎꌠꉬ。
ꍏꇩꐛꐨꐧꋦꉪꏦꀻꎆꌠꆹꀊꉗꃅꃅꌶꌠꊋꋠꌠꐩꋊꂿꃆꐘꉬ，ꀋꎪꃅꊭꄎꄉꐩꋊꐋꀋꌡꐨꀊꑌꃅꐥꌠꇰꀋꃀꃅꉈꈽꌶ。ꉪꊇꆏꀋꎪꃅꋍꍈꑌꀋꇙꀋꑐꃅꌭꈬ、ꃅꋊꐊꄉꁨꆹꄉꍏꇩꐛꐨꐧꋦꉪꏦꀻꎆ，ꀋꆏꃅꍏꇩꐛꐨꐧꋦꉪꏦꃅꐨꐛꐨ、ꌧꇗꐛꐨ、ꊿꋅꐛꐨ、ꃅꋊꐛꐨꀉꑌꃅꁦꎆꇬꇯ。
ꐩꋊꇎꏦꀊꏀꌠꇂꃴꍏꇩꐛꐨꐧꋦꉪꏦꀊꏀꃅꊋꐛꌠꃅꅜꂿꄷꇬ，ꀋꎪꃅꏟꈯꀕꃅꄚꊁꅉꀨꇖꐨꋋꈨꒃꌫꋒꃅꄉ，ꄷꀋꁧꋌꁳꄈꑭꊂꇩꏤꑭꊂꊿꋅꈁꐥꌠꏓꂱꐯꇯꃤꉌꑇꐨꐛꎻ。
——ꀋꎪꃅꏓꂱꀨꄜꑋꅉꉆꈉꌭꈬꇬꎷ。ꍏꇩꐛꐨꐧꋦꉪꏦꆹꄙꇁꃪꌠꏓꂱꃤꊨꏦꌤꑘꉬ。ꏓꂱꑱꏲꃥꌋꉌꊈꋊꇤꌶ，ꀋꎪꃅꏦꃤꇬꈴꄉꇩꏤꏱꄻꌠꄈꏓꂱꋋꏃꂠꄉꇩꏤꏱꄻꌠꅉꀨꄐꉻꏤꁈꋋꏢꌭꈬ，ꋍꉎꀋꐥꌠꀊꐯꈭꃅꏓꂱꄕꊪ、ꊥꇬꌊꏦꃤꇬꈴꄉꇩꏤꌤꃆꌋꆀꐧꋦꌤꃆꏱꄻ、ꎆꏣꌋꆀꁱꀕꌤꑘꏱꄻ、ꏣꀋꑌꃅꐧꋦꉪꏦꐛꏀꈴꋈꄻꌠꃅꈽ，ꀊꅰꉾꃪꃅꏓꂱꌅꈌꈲꁧꏦꀧ，ꀊꅰꉾꃪꃅꏓꂱꑱꏲꃥꌋꄻꌠꄉꀧꄉ。
——ꀋꎪꃅꐧꋦꒃꅐꊋꃤꁌꄝ、ꀻꎆꇬꎷ。ꐧꋦꒃꅐꊋꃤꁌꄝꌠꌋꆀꀻꎆꌠꆹꍏꇩꐛꐨꐧꋦꉪꏦꃤꊇꅉꂿꃆꉬ。ꀋꎪꃅꎆꏣꋈꄻꌠꌌꈯꄜꃅꄉ，ꈆꑪꀻꎆꌠꌌꅇꀨꃅꄉ，ꐊꑷꃅꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻ、ꒆꉻꌧꑳꋈꄻꌠꄹꎆ，ꊿꌌꀨꇬꄉ、ꐊꑷꋮꄮꐪꊛꉆꌠꈆꑪꃅꀻꎆꌠꃅꇫꑟ。
——ꀋꎪꃅꄺꀱꁉꃑꌠꄹꎆꇬꎷ。ꄺꀱꁉꃑꌠꆹꍏꇩꐛꐨꐧꋦꉪꏦꌭꈬꌠꌋꆀꀻꎆꌠꈜꀋꈴꀋꉆꌠꉬ。ꈍꄮꇬꑌꄺꀱꏀꀺꉌꊈꌌꄉꇩꏤꏱꄻꍔꃚꏲꂠꌠꋍꑞꋍꑵꈭꊭꇬꌬꈴꌶ，ꀋꎪꃅꐧꋦꉪꏦꃷꎏꎆꏣꄺꀱꃅꍜꌭꈬ，ꀋꎪꃅꉇꉻꏭꁉꃑꌠꅉꀨꇩꁈꌭꈬ，ꀋꆏꃅꌧꇗꏀꀺ、ꄹꏦꏀꀺ、ꈆꑪꇮꇐꏀꀺ、ꁱꀕꏀꀺꌠꌋꆀꀉꁁꋍꑞꋍꑵꁁꏯꏀꀺꌠꄹꎆ，ꀋꆏꃅꉪꇩꏤꐧꋦꉪꏦꄹꏦꊨꏦꑴꅉꌌꄉꄻꐛꒆꌠꌋꆀꀻꎆꌠꄹꎆ。
——ꀋꎪꃅꐧꋦꎃꊒꑗꐥꌠꀧꌋꃅꇬꎷ。ꎃꊒꑗꐥꌠꆹꍏꇩꐛꐨꐧꋦꉪꏦꇬꈏꐊꇖꐨꉬ。ꏓꂱꈁꐥꌠꐯꇯꉈꈽ、ꎆꏣꐧꋦꀻꎆꌠꅉꃀꀂꏽꄉ，ꐳꃅꐧꋦꎃꊒꑗꐥꏦꀧꌠꏭꂿꄐꀉꒉꀊꂾꃅꐥꌠꄹꏦꋈꄻ，ꋍꁘꋍꁘꃅꌅꈌꈲꁧꎃꊒ、ꊜꋽꄮꎃꊒ、ꇗꏦꎃꊒꌠꌌꐊꇐꀋꉬꀋꉆꌠꃅꄉꌠꐧꋦꎃꊒꌠꏦꀧꉻꑫꄺꑣꄉ，ꊋꇤꄉꎃꊒꃅꊝꌠꐧꋦꋦꈭꄺꑣ，ꏓꂱꐽꊯꃅꇫꃅꈽ、ꐽꊯꃅꀻꎆꌠꌅꈌꈲꁧꄉꀧ。
——ꀋꎪꃅꐯꇯꌣꈚꌠꈝꃀꍬꇬꎷ。ꐯꇯꌣꈚꌠꆹꍏꇩꐛꐨꐧꋦꉪꏦꁧꀦꏥꏦꉬ。ꐧꋦꉪꏦꅉꀨꎆꏣꄹꏦꌋꆀꁷꑣꄹꏦꌭꈬꃅꄉꇬꎷꌶ，ꇩꂱꊌꐨꁷꑣꐛꄟꋊꄻ，ꉈꑴꁷꑣꋊꐽꌠꊋꃤꁦꎆꇱ，ꊋꇤꄉꊌꐨꁷꑣꐮꍣꐨꊼꇅꀉꒉꌠꌤꃆꂥꀘꄉ，ꀻꎆꊌꐨꁳꀊꅰꀉꑌꃅꀊꅰꐽꊯꃅꏓꂱꉹꁌꋍꏅꌠꃅꊌꎻ，ꐯꇯꌣꈚꌠꃅꍜꇬꉜꄉꎍꐽꃅꀒꁨꆹ。
——ꀋꎪꃅꐧꋦꐮꄮꌠꊥꎆꇬꎷ。ꐧꋦꐮꄮꌠꆹꍏꇩꐛꐨꐧꋦꉪꏦꐛꊈꊇꅉꉬ。ꉹꁌꐥꐨꏦꀧꌠꌋꆀꄻꃪꌠꌌꀊꅰꑓꅐꎑꌠꉆꈉꇬꐕꄉ，ꐧꋦꏲꂠꌠꊋꀥꇱꌋꆀꏀꀺ，ꎃꊒꃅꄺꀱꀻꎆꎍꐽꌠꐮꃆꂮꂥꀘ，ꋯꑌꉆꌠꊋꃤꈀꐥꌠꃅꋯꑌꌊꄉ，ꑞꅉꋍꉎꀋꐥꃅꐮꄮꐊꊈꁦꎆꇱ，ꐧꋦꀹꄻꍄꑐꊋꃤꄻꀉꇨ，ꏓꂱꀀꌒꃅꏾ、ꐧꋦꑘꒃꊱꁨ、ꇩꏤꎴꏲꑘꒃꌠꄉꀧ。
——ꀋꎪꃅꄮꐽꀻꎆꌠꃅꇬꎷ。ꄮꐽꀻꎆꌠꆹꍏꇩꐛꐨꐧꋦꉪꏦꉉꄻꀋꅐꃅꌊꄻꄉꃅꌠꉬ。ꀋꎪꃅꁉꃑꄉꀻꎆ、ꇷꃅꄉꀻꎆ、ꐯꇯꈲꄉꀻꎆꌠꌭꈬꇬꎷꌶ，ꄮꐽꌠꇩꏹꋦꈭꅔꈽꊌꅜꌠꇬꈴꄉꊨꏦꀻꎆꌠꃅ，ꉈꑴꑴꑳꀻꎆꌠꌊꋧꃅꄮꐽꌠꇬꐏꁇ、ꊥꎆ，ꋍꑞꋋꁁꏯꈲꏣꏓꐊꅉꍔꒉ，ꀊꉗꃅꄮꐽ、ꐯꇯꌅꆣꌠꐮꄮꋧꃅꋈꄻꌠꄹꇙ。
——ꀋꎪꃅꄈꁳꏲꂠꎻꌠꌭꈬꇬꎷ。ꍏꇩꇭꍣꄈꆹꍏꇩꐛꐨꐧꋦꉪꏦꌤꑘꏲꂠꌠꈯꄜꉬ。ꄈꄻꋍꏅꎁꃅ、ꉹꁌꎁꃅꌅꈌꌬꌠꌭꈬꃅꄉꇬꎷ，ꄈꏲꂠꌠꊋꀥꇱꌋꆀꄻꃪ，ꄈꃅꇴꄉꉻꏓꏲ、ꋍꑞꋋꁁꏯꋮꄮꏲꂠꌠꈯꄜꂿꄐꌭꈬꃅꄉꇬꎷ，ꄈꂴꅑꐨꌋꆀꊈꎴꐨꄝꀋꊰ，ꄈꁧꀿꊋꃤ、ꏓꋧꊌꃤ、ꉈꈽꊋꃤꁦꎆꇱ，ꄈꈆꑪꃅꏱꌅ、ꋯꁦꃅꏱꌅ、ꏦꃤꈴꄉꌅꈌꌬꌠꑟꐨꉀꐕ。
ꉪꊇꀋꎪꃅꏸꐚꃅꌧꐚꌶꌠꆏ，ꉪꇩꏤꆹꄡꇗꄷꀋꁧꀊꉗꃅꐧꋦꉪꏦꉘꃀꊬꌠꇬꎍꑴꌦꌠꇩꏤꅉꀨꐛꐨꐛꀋꐈꑴꌦ，ꏓꂱꋍꑍꋍꉙꃅꉀꎆꇁꌠꐥꇐꁱꀕꈉꐨꌋꆀꊁꊰꌠꐧꋦꒃꅐꐮꇢꊭꇬꐮꄙꐨꐧꋦꐮꄙꐨꀋꉬꀋꉆꋋꏢꆏꐛꀋꐈꑴꌦ，ꉪꇩꏤꆏꋧꃅꃅꇬꀻꎆꇰꌠꀉꒉꐯꀉꒉꌠꇩꏤꉬꌠꇩꏹꉆꈉꐛꀋꐈꑴꌦ。ꐛꐨꑞꑵꌠꇂꃴꉬꄿꂿꐯꇯꏟꈯꀕꃅꐧꋦꉪꏦꉘꃀꊬꌠꇩꏤꐛꐨꀉꒉꐯꀉꒉꋋꏢꒃꌫꄉꌶ，ꑞꁁꏯꄺꀱꀻꎆꌠꄹꎆꇬꑌꐯꇯꏟꈯꀕꃅꐧꋦꉪꏦꉘꃀꊬꌠꃶꐚꐨꀉꒉꐯꀉꒉꋋꏢꇬꉆꄉꌶ。ꄈꃤꈛꏦꁧꀦꆹꄈꌋꆀꇩꏤꐥꏡꊋꃤꉬ，ꀋꎪꃅꎆꏣꋈꄻꌠꌌꈯꄜꃅꄉꌠꌋꆀꏥꏦꁧꀦꇖꏢꌠ、ꄺꀱꁉꃑꌠꅉꀨꋋꑍꍈꏓꋍꃱꃅꌊꍏꇩꐛꐨꐧꋦꉪꏦꇰꀋꃀꌠꃄꄻꅉꇬꇁꌠꌭꈬꃅꄉꇬꎷ，ꀀꑴꀂꉜꑌꄡꐭ，ꉈꑴꀀꑴꀂꉜꑌꄡꒉ，ꏟꈯꀕꃅꍏꇩꐛꐨꐧꋦꉪꏦꀊꏀꃅꊋꐛꌠꇑꅜꌶ。
ꉪꊇꉌꂵꉪꐨꐥ、ꑇꐨꏟꈯꀕ，ꀋꇙꀋꑐ、ꀋꄝꀋꏯ、ꀋꁏꀋꆽ，ꀉꇨꃅꉈꈽ、ꎬꅧꃅꉈꈽ、ꀋꆏꃅꉈꈽꑲꆏ，ꀋꎪꃅꍏꇩꇭꍣꄈꄻꋍꉐꈎꐛꄮꇬꆏꐊꑷꃅꊼꇅꌣꈚꌠꐧꋦꋉꐛꄻꐛꄎꌠꉬ，ꀋꎪꃅꍏꇩꀊꏀꄻꋍꉐꈎꐛꄮꇬꆏꌣꈚꐞꄿꋯꁦꌧꑳꐮꄮꌠꐧꋦꉪꏦꐛꏀꈴꇩꏤꋉꐛꄎꌠꉬ。ꄈꑭꊂꃅꏟꈯꀕꃅꋍꃅꐙꌠꈝꃀꉌꑇ、ꌧꇗꉌꑇ、ꄹꏦꉌꑇꌶ！
ꌕ、ꐊꑷꃅꊼꇅꌣꈚꌠꐧꋦꋉꐛꄻꐛꌠꌋꆀꐊꑷꃅꄺꀱꁉꃑꌠꑞꅉꁻꌐꃹꈴꅼꈴ
ꇩꈐꇩꉈꃅꒊꃅꇁꀉꒉꌠꏓꄉꉜꇬ，ꉪꇩꏤꀻꎆꌠꆹꄡꇗꃅꐨꀉꇨꃅꐥꉆꌠꄐꇐꏤꁈꊜꋽꄮꀋꂿꑘꊭꇬꎍꑴꌦ。ꉪꊇꆏꎃꊒꃅꄐꇐꏤꁈꊜꋽꄮꀋꂿꑘꊬꌠꈐꊈꐊꇐꌋꆀꇎꏦꐛꐈꌠꊨꇽꄉ，ꐊꑷꃅꊜꋽꄮꒃꌫꄉ，ꇗꄃꃅꋓꎭꌠꊝꄉ，ꑴꇙꌠꊌꅜ，ꂱꎆꅑꌠꊌꅜ，ꋌꊂꊌꅜ，ꑍꄙꆀꑍꊏꈎꑟꇬꆏꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꇰꀋꃀꌠꃅꇫꑟꌠꄉꀧ。
ꉪꇩꏤꎆꏣꐧꋦꀻꎆꌠꃶꐚꐛꐨꇬꈴꄉ，ꃀꀉꒉꊰꃘꃢꌠ、ꃀꀉꒉꊰꏁꃢꌠꈿꇬꏤꄻꄉꌠꐊꑷꃅꊼꇅꌣꈚꌠꐧꋦꋈꄻꌠꑞꅉꁻꌐꅉꃀꀂꏽꄉꊋꇤꄉꀊꏀꌠꇖꐨꃅꇫꑟꌶ。
——ꎆꏣꐪꊛꄉꉾꃅꀻꎆ。ꎆꏣꀻꎆꃄꄟꆹꏮꌠꊌꐨꀉꒉꃅꐥ，ꀻꎆꌠꐮꆽꏣꐨ、ꋮꄮꐨ、ꐪꊛꉆꐨꄇꇖꀕꃅꀉꇨꇁꌠꅉꃀꀂꏽꄉ，ꇩꈐꒃꅐꈁꊌꁌꐨꌋꆀꇓꈓꇓꉈꀀꊿꊾꂷꐽꏡꃅꇬꊌꐨꆏꑍꄙꆀꊰꈎꄩꋍꁊꀱꌠꃅꇫꑟ。ꈆꑪꇮꇐꀻꎆꌠꆹꎆꏣꉀꎆꌠꇬꑆꊋꅐꌞꐨꀉꒉꃅꉀꐕꎼꆹꄉ，ꏀꀺꉹꌠꇩꏤꇬꐊꆹꀐ。ꇮꑘꈴꌠꀑꐱꃅꃅꇫꑟ，ꈴꌗꈴꌠꑟꐨꀉꒉꃅꉀꐕ，ꇓꈓꏦꎫꐛꈴꊇꁧꄇꇖꀕꃅꉀꐕ，ꂿꑘꐛꏀꈴꌠꌋꆀꐧꋦꉪꏦꂿꑘꁡꇤꀊꏀꋈꄻꌠꊌꐨꄇꇖꀕꃅꐥ，ꃄꁕꋮꄮꃅꀻꎆꌠꉺꏦꀑꐱꃅꄻꐛ。ꉇꉻꏭꁉꃑꌠꑟꐨꀒꁨꋍꁘꃅꉀꐕ，ꇩꏹꋓꅔꊋꃤꄇꇖꀕꃅꁦꎆꇁꀐ。
——ꏓꂱꋯꁦꀋꆏꃅꍔꒉ。ꋯꁦꄹꏦꀉꅰꃅꄻꐛꒆ，ꋯꁦꇶꏦꀊꅰꃅꀉꑌꇁ，ꏓꂱꏣꀋꑌꐨ、ꑴꇙꐨ、ꀹꄻꐨꀒꁨꋍꁘꃅꋊꇤꅐꇁ。ꏦꃤꇬꈴꄉꇩꏲꌠꅉꀨꄐꁈꐊꑷꃅꌌꃄꌬ，ꏦꏲꍔꃚꀑꐱꃅꄻꐛ，ꏦꌬꄉꉻꉌꒊꊋꃤꀋꆏꃅꉀꐕ，ꊿꐥꌅꈌꃶꐚꃅꌌꁌꒉꌋꆀꏦꀧꄉ。
——ꁱꀕꀁꆓꊋꃤꄇꇖꀕꁦꎆꇁ。ꐧꋦꉪꏦꈯꄜꁌꐨꉻꑫꃹꅼꃅꊽꉌꂵꇬꃹ，ꉻꊿꌧꑳꊇꁧꌋꆀꐧꋦꌧꑳꑞꅉꄇꇖꀕꃅꉀꐕ。ꁱꀕꅐꇐꀊꅰꃅꀉꑌꇁ，ꄉꉻꁱꀕꁧꃤꃅꉻꑫꀑꐱꃅꄻꐛ，ꁱꀕꅐꑘꆏꇩꂱꎆꏣꈯꌬꃅꐙꌠꅐꑘꐛꀐ，ꍏꉸꁱꀕꅐꉇꁧꌠꑭꁘꀊꅰꃅꀉꐯꃅꐕꎼꆹ，ꐧꋦꉪꏦꁱꀕꇩꏤꀉꇨꌠꋈꄻꌠꅉꃀꀊꅰꃅꈫꈈ。
——ꏓꂱꐥꐨꐥꌒꐨꐊꑷꃅꉀꐕ。ꅉꀨꄉꉻꁧꃤꃅꌠꐮꆌꈴꐨꀑꐱꃅꃅꇫꑟ。ꉹꁌꋍꏅꌠꌌꉙꂘꌠꑞꅉꌋꆀꏀꀺꌧꊿꁱꂘꌠꌧꐨꄇꇖꀕꃅꉀꐕ，ꌧꊿꌌꇩꏤꄻꀉꇨꇁꌠꌋꆀꊿꊋꅐꀦꌌꇩꏤꄻꀉꇨꇁꌠꇬꐊꆹ，ꂘꑘꐛꏀꈴꌠꀑꐱꃅꃅꇫꑟ。ꃅꅍꎹꌠꀊꅰꃅꎹꌒ。ꊌꐨꁷꑣꐮꍣꐨꀄꊭꇁ，ꊌꐨꐧꀠꏠꌠꊿꁥꌠꊛꄉꍔꀉꑌꇁ，ꌢꎭꊋꄏꊜꀠꀉꒉꃅꀁꑌꇁ。ꐧꋦꏦꀧꌠꉹꁌꇬꃅꉱꑷ，ꊿꃅꅉꀨꁦꎴꆄꄻꁧꃤꃅꌠꊌꌐ，ꀀꑳꏦꀧꉻꑫꀑꐱꃅꄻꐛ，ꐧꋦꐮꄮꎍꐽ。
——ꅐꀦꏎꏸꉹꌠ、ꋦꈭꐮꄮꉹꌠꐧꋦꋈꄻꌠꁨꎆꐨꀉꒉꀊꂾꃅꊌꅜ。ꀨꄜꂿꄐꐤꅉꄐꉻꀑꐱꃅꄻꐛ，ꅐꀦꀰꏮꌫꄻꉻꑫꀑꐱꃅꄻꐛ。ꌗꂓꇩꈐꒃꅐꈁꊌꁌꐨꊋꀦꃸꄻꌠꌋꆀꑍꀑꐊꌋꋊꃑꌠꀉꒉꃅꀁꋌꊰ，ꀋꉬꀋꉆꌠꍍꇐꋊꃑꈁꉬꃷꁨꄇꇖꀕꃅꀁꋌꊨ。ꌩꏪꉱꑷꐨꉀꐕ，ꒆꉻꉻꑫꎍꐽꐨꀉꇨꇁ，ꊿꀀꋦꈭꄇꇖꀕꃅꄻꃪ。
ꐊꑷꃅꊼꇅꌣꈚꌠꐧꋦꋉꐛꇬ，ꀋꎪꃅꀊꅰꀉꒉꌠꍔꍞꀬꅑꐨꌋꆀꀑꁮꅺꐚꐨꌌꄉ，ꊜꋽꄮꎹꈹꄉꃹꅼꃅꀋꉬꀋꉆꁁꏯꄺꀱ，ꏟꈯꃅꈆꑪꃅꀻꎆꌠꇬꄉꇤꌠꉪꇐꉪꉻꌋꆀꏦꉻꉺꏦꀋꉾꀋꃪꈧꌠꃅꀜꋊꇧꎭꇈ，ꉻꑫꐛꒆ、ꈆꑪꃅꋊꍬ、ꏮꈴꇿꋌꐥꌠꄹꏦꉻꑫꋉꐛꄉ，ꋍꑞꋋꁁꏯꄹꏦꁳꀊꅰꃅꐛꒆꀊꅰꃅꐛꄟꎍꒃꃅꐙꎻ。ꐳꃅꐧꋦꉪꏦꃷꎏꎆꏣꏦꉻꄻꐛꒆ，ꉻꁨꏦꌌꀨꄜꃅꄉ、ꁨꏦꀉꑌꑵꃅꐙꌠꎆꏣꐯꇯꀻꎆꌠꅉꀨꎆꏣꄹꏦꄻꐛꒆ，ꃅꐨꉜꄉꁸꌠꌌꀨꄜꃅꄉ、ꁷꏦꀉꑌꑵꃅꐯꇯꐥꌠꁷꑣꄹꏦꄻꐛꒆ，ꉻꒉꋊꄻꉻꑫꄻꐛꒆ，ꑟꐨꀊꅰꀉꒉꈍꈐꀊꅰꀊꐯꃅꃷꎏꆏꅐꀦꇱꄻꅉꇬꅉꃀꃅꐙꌠꂿꄐꋊꇤꅐꇁ，ꁉꃑꉹꌠꎆꏣꉻꑫꄻꐛꒆ，ꎆꏣꀊꅰꃅꇿꋌꐥ、ꀊꅰꃅꀋꈐꀋꉈ、ꀊꅰꃅꐪꊛꄉꀻꎆꉆꌠꄹꇙ。ꐳꃅꐧꋦꉪꏦꋯꁦꍔꍞꄹꏦꈴ、ꋊꍬꈴ、ꈭꎁꈴꌠꄹꎆ，ꋍꑞꋍꊐꋍꑞꋋꁁꏯꇬꄉꉻꊿꊱꁨꃅꍔꍞꇬꃅꈽꌠꍔꒉ，ꇩꏤꋍꑞꋍꐘꌤꃅꌠꏦꏲꈴꌠꃅꇫꑟ。ꐳꃅꁱꀕꏲꂠꏦꉻꌋꆀꁱꀕꒃꅐꀰꏢꉺꏦꄻꐛꒆ，ꀑꐱꃅꀋꃋꋋꄮꁱꀕꃷꎏꉻꑫꄻꐛ，ꇩꁨꁱꀕꁨꇐꏲꂠꏦꉻꄻꐛꒆ，ꏀꀺꁧꀿꁱꀕꀻꎆꌠꇬꈲꏣꐥꌠꋦꈭꄻꐛ。ꐳꃅꈆꑪꇿꋌꐥꌠꐧꋦꏲꂠꏦꉻꄻꐛ，ꐧꋦꏦꀧꉹꑫꄻꐛꒆ，ꅉꂫꊐꌠꄉꉻꁧꃤꃅꌠꌋꆀꐧꋦꏲꂠꈄꏍꄻꐛꒆ，ꐧꋦꍄꑐꊋꃤꇎꃅꐥꇈꉈꑴꐮꄮꊱꁨꌠꄉꀧꌠꏦꉻꉺꏦꄻꐛ。ꐳꃅꒆꉻꌧꑳꄹꏦꄻꐛ，ꇩꃅꈥꈉꀖꁉ、ꅐꀦꏎꏸ、ꒆꉻꋦꈭꀧꌋꃅꌠꏦꉻꉺꏦꄻꐛꒆ，ꊿꌋꆀꋌꐛꐮꄮꃅꀻꎆꌠꐛꏀꈴꋈꄻꌠꐛꄟꀊꏀꄻꐛꌠꄹꇙ。
ꏤꄮꀋꎪꃅꐊꑷꃅꊼꇅꌣꈚꌠꐧꋦꋉꐛꌠꂿꃆꆹꊋꋠꐯꊋꋠꌠꉬ，ꄈꑭꊂꐋꀨꆏꀋꎪꃅꀂꏾꈎꄉꃅ、ꊋꇤꏡꇤꄉꃅꌶ。ꇩꏤꆏꂿꑘꁡꇤꌋꆀꈯꄔꁮꐚꃅꄷꏭꊋꁈꄏꌠꊋꃤꁦꎆꇱ，ꃅꄷꋋꈨꄏꐓꄉꐳꃅꄺꀱꁉꃑ、ꀻꎆꄐꊋꄻꀉꇨ、ꏓꂱꐥꐨꄻꃪꎻ。ꇎꏦꐥꌠꃅꄷꊋꊡꄉꐛꏀꈴꋈꄻꅉꇬꐪꊛꄉꂴꐊꆹꎻ，ꇩꏤꑭꊂꄺꀱꀻꎆꌠꎁꃅꑆꊋꀊꅰꀉꒉꌠꅐꌞ。
ꇖ、ꐳꃅꐧꋦꉪꏦꃷꎏꎆꏣꏦꉻꄻꐛꒆꌋꆀꐳꃅꎆꏣꀻꎆꃄꄟꆹꏮ
ꎆꏣꋈꄻꌠꌌꈯꄜꃅꄉꌠꆹꇩꏤꄖꄑꌄꆣꇁꌠꇬꀋꂿꑘꌠꉬ，ꀻꎆꌠꆹꄡꇗꉪꇩꏤꌤꃆꈁꐥꌠꂥꀘꌠꊨꊭꉬ。ꎆꏣꀋꆏꃅꉾꃅꀻꎆꌠꄹꇙꑲꆀ，ꇩꏤꌄꆣꌣꈚꐞꄿ、ꏓꂱꐥꌒꑘꒃꋬꂻ、ꐧꋦꐮꄮꎍꐽꌠꐥꇐꅉꃀꄻꈫꈈꃅꄉꄎꌠꉬ。ꀋꎪꃅꀻꎆꌠꆹꇗꅉꀉꇨꌠꉬꌠꄐꇐꏤꁈꉪꇐꌭꈬꃅꄉꇬꎷ，ꈍꃅꑌꋍꍈꑌꄝꇘꑐꀋꉆꌠꉬ。
ꀋꃋꋋꇅꍏꇩꆏ，ꀻꎆꌠꆹꇗꅉꀉꇨꌠꉬꌠꐛꊈꇖꐨꌭꈬꃅꄉꇬꎷꌠꆏꈆꑪꃅꀻꎆꌠꌭꈬꃅꄉꇬꎷꄷꌠꉬ。ꈆꑪꃅꀻꎆꌠꌌꅇꀨꃅꄉ，ꐳꃅꎆꏣꀻꎆꃄꄟꆹꏮꌠꌌꈜꀦꃅꄉꌠꆹ，ꉪꇩꏤꀻꎆꃅꇴꄉꉻꇬꃆꂮꐥꌠꄐꇐꏤꁈꈴꄉꌊꄻꄉꌠꉬ。ꇩꈐꇩꉈꎆꏣꃅꒊꃅꇁꀊꏀꃅꐛꐈꌠꇬꄉꄐꃅꄉ，ꐳꃅꎆꏣꀻꎆꃄꄟꀊꏀꌠꄻꐛ，ꀻꎆꌠꄹꇙꌠꉆꈉꆹꏮꌊꊇꁧꌋꆀꇿꋌꉀꐕꌠꀂꏽꇁ，ꊋꇤꄉꋍꑞꋍꑵꃷꎏꀨꄜꀻꎆꌠꇙꊋꀊꏀꌠꄖꄑ，ꊋꇤꄉꏀꀺꄹꇙꀻꎆꇙꊋꀊꏀꌠꁦꎆꇱ，ꊋꇤꄉꐛꏀꅐꑘꀻꎆꉻꑫꀊꏀꌠꋉꐛ，ꊋꇤꄉꁉꃑꉹꌠꎆꏣꀻꎆꂱꎆꅑꐨꀊꏀꌠꉗꄻꄉ，ꎆꏣꀻꎆꌠꁳꀊꅰꃅꈏꇓꈉꐨꈜꀕꇈꌬꈧꈉꐨꈺꇙꌠꇬꉘꇉ，ꀊꅰꃅꐛꏀꁧꃤꃅꑘꌋꆀꄐꇐꏤꁈꃅꐙꉹꌠꏀꄓꅐꑘꈺꇙꌠꉘꇉ，ꀊꅰꃅꈆꑪꇮꇐꀻꎆ、ꑘꃅꊿꊇꁧꉀꐕ、ꏲꂠꏀꀺꄹꇙꌠꉘꇉ，ꀊꅰꃅꅐꀦꏎꏸꌋꆀꀰꏮꎆꏣꄹꇙꌠꉘꇉ，ꀊꅰꃅꇓꈓꇓꉈꃄꁕꀻꎆꋮꄮꐮꇙꌠꉘꇉꄉ，ꀋꆏꃅꀊꉗꃅꀻꎆꌠꊋꂫꁦꎆꇱ。
ꍏꇩꐛꐨꀊꏀꉹꌠꇮꑘꈴ、ꈴꌗꈴ、ꇓꈓꐛꈴ、ꂿꑘꐛꏀꈴꌠꈝꃀꇬꍬꌠꌭꈬꇬꎷ，ꈴꌗꈴꌠꌋꆀꇮꑘꈴꌠꅼꃅꏓꐮꐊ、ꇮꑘꈴꌠꌋꆀꇓꈓꐛꈴꌠꉾꃅꐮꇙ、ꇓꈓꐛꈴꌠꌋꆀꂿꑘꐛꏀꈴꌠꐮꋮꄮꌠꄹꇙ，ꇮꑘꈴ、ꈴꌗꈴ、ꇓꈓꐛꈴ、ꂿꑘꐛꏀꈴꌠꋍꋓꃅꀻꎆꌠꊥꎆ。
（ꋍ）ꐊꑷꃅꃹꅼꃅꎆꏣꏦꉻꄺꀱ。ꃹꅼꃅꄺꀱꌠꆹꐳꃅꎆꏣꀻꎆꃄꄟꆹꏮꌠꊨꊭꉬ。ꎆꏣꏦꉻꄺꀱꌠꈯꄜꌤꃆꆏꍔꃚꌋꆀꃷꎏꐮꃆꂮꂥꀘꋒ，ꀋꎪꃅꀊꅰꃅꃷꎏꈳꏦꉜꁨ，ꀊꅰꃅꉾꃪꃅꍔꃚꂿꄐꋊꇤꅐꇁ。ꀋꇙꀋꑐꃅꉻꁨꏦꎆꏣꄻꈫꈈꌋꆀꀻꎆꌶ，ꉻꁨꏦꀉꑌꑵꃅꃅꇫꑟꌠꇶꏦꄹꌬ，ꃹꅼꃅꇩꁨꎆꏂꑘꄺꀱ，ꋍꑞꋍꉹꇩꁨꁨꇐꏲꂠꏦꉻꄻꃪ，ꇩꁨꁨꇐꀊꅰꀉꑌꃅꌌꇩꏤꋬꂻꌠꌋꆀꇩꂱꎆꏣꀑꇬꐥꏣꇬꃆꂮꐥꌠꉹꑘꌋꆀꀋꉬꀋꉆꁁꏯꇬꊐꎻ，ꀋꆏꃅꇩꁨꎆꏣꍄꑐꊋꃤ、ꋎꍅꊋꃤ、ꑌꑲꊋꃤꁦꎆꇱ。ꀋꇙꀋꑐꃅꉻꁨꏦꀋꉬꌠꎆꏣꀻꎆꌠꇬꊋꊡ、ꊋꁈꄏ、ꄐꏁ，ꋍꑞꋍꑵꁨꏦꎆꏣꏦꃤꇬꈴꄉꐽꊯꃅꒃꅐꐊꊈꌌꌫꄻ、ꎃꊒꃅꃷꎏꋓꅔꈽ、ꐯꌟꃅꏦꃤꁳꀧꌋꃅꄉꎻꌠꄉꀧ。ꐛꏀꃷꎏꉻꑫꄻꐛꒆ，ꊋꀥꇱꄉꉻꒉꋊꐽꁻꌐꌋꆀꏱꁈꇇꁈꉺꏦꈴꌠꋈꄻ。ꐳꃅꏱꎆꇗꏸꏦꉻꄺꀱ，ꍏꑷꌋꆀꃅꄷꎆꊋꆏꌤꃆꌅꈌꌋꆀꐮꄉꄐꌠꏦꉻꄻꐛꒆ，ꅉꀨꄉꉻꁧꃤꃅꌠꐽꏡꈴꌠꌋꆀꀨꄜꂿꄐꃄꁕꋈꄻꌠꇬꊥꎆꌠꄉꉻꏱꎆꉻꑫꄻꃪ，ꃅꄷꇗꏸꉻꑫꋈꄻ，ꐛꉻꃪꈴ、ꐧꋦꎃꊒꌠꇬꈲꁧꐥꌠꇗꏸꎴꄹꏦꏓꐛ。ꄉꉻꅐꀦꏆꅐꈲꁧꊌꐨꋭꋽꃅꐯꇯꈲꊌꌠꉺꏦꄻꐛ。ꃹꅼꃅꎆꒉꎆꇁꏦꉻꄺꀱ，ꉻꒉꎆꏣꎍꐽꌠꇬꊥꎆ、ꐥꄜꎆꏣꀻꎆꌠꇬꊋꁈꄏꌠꐛꏀꎆꒉꎆꇁꉻꑫꄻꐛꒆ，ꀉꑌꏠꊐꃅꐙꌠꎆꀨꃷꎏꀻꎆ，ꎍꐽꃅꇔꊰꍆꐨꌋꆀꉇꎆꀠꐨꃷꎏꈴꄺꀱꌠꄹꎆ，ꋍꁘꋍꁘꃅꏓꂱꀙꎆꀨꐘꃆꀟꆦꉆꌠꃅꇫꑟ。ꐳꃅꉹꁌꀰꏢꌠꎆꒉꎆꇁꏲꉻꀻꎆ。ꎆꒉꎆꇁꍞꏲꌠꄻꃪ，ꎆꒉꎆꇁꏀꀺꌠꄹꎆ，ꎆꒉꎆꇁꎍꐽꌠꀧꌋꃅ。
（ꑍ）ꏀꀺꄉꀻꎆꄹꇙꌠꄐꁈꃄꌬ。ꈆꑪꇮꇐꏀꀺꌠꆏꐧꋦꒃꅐꊋꃤꌋꆀꏓꇱꇩꊋꉀꐕꌠꄐꁈꈯꌬꉬ，ꀋꎪꃅꄻꇩꏤꀻꎆꌠꃅꇴꄉꉻꈯꄜꉆꈉꇬꄉꌶ。ꏟꈯꃅꍏꇩꐛꐨꑴꌅꏀꀺꌠꈝꃀꇬꍬꇬꎷ，ꋧꃅꉜꐨꇬꄉꏀꀺꌠꏂꇫ、ꄹꇙ，ꇬꀦꏀꀺ、ꏓꐛꏀꀺꌠꌋꆀꊘꌬꌬꈧꌠꉈꑴꏀꀺꌠꄐꊋꉀꐕ，ꀊꅰꃅꐯꇯꏀꀺꌠꉜꁨ。ꃹꅼꃅꈆꑪꇮꇐꏦꉻꄺꀱ，ꈆꑪꇮꇐꌋꆀꎆꏣꑖꑟꃅꐮꐊꌠꄹꇙ，ꐳꃅꇩꏤꏀꀺꉻꑫꋈꄻ，ꊋꇤꄉꎆꏂꑘꌌꀨꄜꃅꄉ、ꃷꎏꌌꄐꍜꅍꃅꄉ、ꒃꅐꌠꌶꄻꌠꎥꃪꌠꐮꐊꃅꌠꇮꇐꏀꀺꉻꑫꋈꄻ。ꌧꇐꏀꀺꉻꑫꄻꃪ，ꅉꃀꎥꃪ、ꂴꎍꇮꇐꎥꃪ、ꐧꋦꉻꈲꇮꇐꎥꃪꌠꄻꀉꇨꃅꄉ，ꈆꑪꎥꃪꑟꐨꌋꆀꊌꐨꆹꏮꄐꊋꉀꐕ，ꈆꑪꇮꇐꀻꎆꄐꁈꀊꂥꅉꇑꍆ。ꇩꏤꈆꑪꇮꇐꀉꒉꀊꂾꌠꌐꐘꃄꌬ，ꀉꒉꀊꂾꌠꇮꇐꊋꋠꅉꅸꁖ。ꐳꃅꇮꇐꀊꏀꌠꅐꇐꀊꏀꌠꇮꁈꀊꏀꌠꎥꃪꀖꁉꌊꌬ，ꇮꇐꏓꐛꌠꌋꆀꃼꇇꑘꈁꏦꏀꀺꌠꊋꀥꇱ。ꈆꑪꇮꇐꏀꀺꌠꈋꍣꎕꏦ、ꊡꀮꉺꏦ、ꆹꏮꉺꏦꄻꃪ。ꌧꇐꅏꄻꌅꈌꄐꁈꃄꌬ，ꊋꀥꇱꄉꌧꇐꅏꄻꌅꈌꀧꌋꃅ。ꅐꀦꇿꋌꀉꇨꃅꇱꄻꌠꌋꆀꏓꇱꏓꐛꏀꀺꌠꊥꎆ，ꐧꋦꑭꊂꀑꁮꐨꌋꆀꊋꃤꏓꋧꌊꏀꀺꀻꎆꌠꀂꏽꇁ。
（ꌕ）ꎆꏣꐛꉻꄐꇐꏤꁈꐥꃅꋊꐽꌠꄹꎆ。ꋋꆹꐳꃅꎆꏣꀻꎆꄟꆹꏮꌠꀋꉬꀋꉆꃅꂵꅉꃅꍜꉬ。ꀋꎪꃅꈉꐨꐛꉻꄻꃪ、ꅐꑘꐛꉻꃪꈴ、ꃄꁕꋮꄮꃅꀻꎆꌠꊥꎆ、ꇓꈓꐛꈴꌠꄹꎆꌠꌌꀋꉬꀋꉆꌠꃅꄉ，ꊋꇤꄉꎆꏣꐪꊛꄉꁣꀋꐥꃅꀻꎆꌠꇬꏢꑲꌠꐛꉻꃅꐙꌠꌤꃆꀉꒉꀊꂾꌠꂥꀘꇧꎭꌶ。ꏟꈯꀕꃅꈒꇓꈉꐨꍔꒉꌠꅉꀨꄐꁈꋋꍈꒃꇇꈐꊐꄉ，ꐳꃅꌬꈧꈉꐨꍔꒉꌠꎴꈲꉺꏦꄻꐛꄉ，ꀀꊿꌬꈧꈏꊋꃑꅐꇁ，ꎆꊐꌠꋭꋽꃅꉀꎆꌠꄝꀋꊰ，ꇩꈐꃷꎏꄉꈁꍔꒉꌶ。ꏟꈯꀕꃅꐥꄜꎆꏣꀻꎆꌠꅉꃀꈫꈈꋋꏢꒃꇇꈐꊐꄉ，ꀊꅰꃅꐥꄜꎆꏣꀻꎆꌠꇬꈲꁧꐥꌠꏱꁈꏁꁈꃄꌬ，ꈉꐨꄐꌐꌠꄻꀉꇨꃅꄉ，ꄐꇐꏤꁈꃅꐙꌠꏀꄓꅐꑘ、ꂴꅑꌠꄺꑣꑘꁣꀋꐥꃅꀻꎆꌠꄹꇙ，ꐳꃅꋊꃅꐥꌠꅐꑘꆹꏮꊐꐕꎻ，ꁧꃤꃅꑘꈜꀕꇈꐛꏀꁧꃤꃅꑘꀻꎆꀉꇨꇁꌠꄹꇙ，ꋭꋽꃅꅉꃀꉁꈾꌋꆀꅉꃀꅐꑘꄐꄻꋈꄻꌶ。ꊁꋏꌠꈴꌗꅉꃀꉁꈾꋈꄻ，ꐛꏀꈴꌗꇮꇐꅐꑘꉻꑫꀻꎆ，ꈴꌗꋬꂻꏦꀧꉻꑫꄻꐛꒆ，ꈴꌗꈄꏍꇮꇐꀊꐯꈭꃅꌌꌬꌠꄹꎆ。ꎆꏂꑘꀉꒉꐧꀠꉹꌠꈯꄜꋓꅔꊋꃤꉀꐕ，ꎆꏂꑘꀄꊭꌠꈜꀕꇈꈆꑪꇮꇐꉹꌠꀄꊭꌠꎆꏂꑘꀻꎆꌠꇬꊋꁈꄏ。ꐪꊛꄉꃄꁕꀻꎆꉻꄜꄐꁈꃄꌬ，ꋒꐯꋒꃅꃅꄷꈧꌠꊼꇅꂱꎆꅑꐨꋊꇤꅐꇁ，ꂴꄉꁮꐚꁁꏯꀉꒉꃅꀖꁉꌠꄹꎆ，ꐊꑷꃅꑛꌋꈤꃅꄷꑠꇮꑘꅉꁍꀉꆹꐛꅉꉀꄖꌄꆣ，ꊋꀉꒉꃅꇤꄉꈯꄔꃅꄷꁳꉀꄓꇁ，ꏣꀋꑌꃅꁭꅐꃅꄷꂴꅑꄉꀻꎆꌠꇬꊋꁈꄏ。ꌐꋉꄉꇇꀨꑠꇶꏦꀉꑌꑵꃅꌊꌬꄉ，ꇝꂱꀉꆹꃅꄷ、ꀁꑌꊿꋅꃅꄷ、ꃅꋮꃅꄷ、ꌢꎭꃅꄷꏭꊋꁈꄏꌠꊋꃤꁦꎆꇱ。ꈆꑪꃅꇓꈓꈧꌠꄉꈁꌋꆀꄐꉻꄐꎖ，ꇓꈓꐧꀠꀄꊭꌠꌋꆀꇓꈓꏦꎫꀄꊭꌠꅐꑘꀻꎆꌠ、ꄉꉻꁧꃤꃅꌠ、ꃅꅍꃅꌠꈻꎷꌠ、ꊻꂷꏓꋧꌠꄐꅍꂿꄐꁦꎆꇱ。ꐳꃅꑱꁯꐥꑭꊫꌐꄹꏦꄺꀱ，ꊱꁨꃅꂿꑘꊿꆹꏮꌊꇓꈓꀀꊿꐛꌠꄹꎆ，ꊋꇤꄉꇓꈓꏦꎫꅉꀨꄉꉻꁧꃤꃅꌠꌌꅉꀕꃅꇬꀀꌠꊻꂷꇬꉱꑷꌐꌠꃅꇫꑟ。
（ꇖ）ꇓꈓꇓꉈꀻꎆꋍꉻꈴꌠꄹꇙ。ꋒꃅꂿꑘꂿꑘꁡꇤꂿꑘꊿꌤꃆꂥꀘꌠꆏꄈꑭꊂꌤꃅꀋꉬꀋꉆꌠꈐꏭꀋꉬꀋꉆꌠꉬ，ꇓꈓꇓꉈꀻꎆꋍꉻꈴꌠꆏ“ꌕꂿꑘ”ꌤꃆꂥꀘꌠꁧꀦꈝꃀꉬ。ꇓꈓꇓꉈꏓꇱꇲꄻꃅꀻꎆꌠꊋꃤꁦꎆꇱ，ꂿꑘꁡꇤꀻꎆꌠꍄꑐꊋꃤꁦꎆꇱ，ꋍꁘꋍꁘꃅꇓꈓꇓꉈꐮꍣꐨꀁꋌꊨ，ꇓꈓꇓꉈꐯꇯꌄꆣꌠꊥꎆꌶ。ꇮꑘꀱꂿꑘꉗꄻ、ꇓꈓꂿꑘꁡꇤꊋꁈꄏꌠꌋꆀꀉꑌꃅꁵꀁꑌꃅꎹꄝꍄꑐꎻꌠꌐꏦꌭꈬꇬꎷ，ꂿꑘꄻꀉꇨꂿꑘꁡꇤꒇꏣꁵꂿꑘꊿꌣꈚꇁꎻꌠꏱꁈꊋꃤꁦꎆꇱ，ꂿꑘꊿꋍꏅꌠꁳꐥꊯꃅꐛꏀꈴꆹꎁꇬꐊꈽ、ꐯꇯꐛꏀꈴꌠꊌꐨꊌꎻ。ꐳꃅꐛꏀꂿꑘꀻꎆ，ꂿꑘꏓꇱꒃꅐꄐꊋꁦꎆꇱ，ꇩꏤꋚꂷꋬꂻꌠꌋꆀꂿꑘꅐꇐꀋꉬꀋꉆꌠꇿꋌꐥꃅꇲꁵꌠꄉꀧ。ꇩꏤꅉꃀꉁꈾꋈꄻꌠꌋꆀꐧꋦꌤꑘꀻꎆꌠꀋꂿꑘꅉꄻꂿꑘꁡꇤꄉꌠꌭꈬꃅꄉꇬꎷ，ꃹꅼꃅꂿꑘꁡꇤꀊꏀꋈꄻꌠꌋꆀꌢꎭꄏꐓꀖꁉꌠꄹꎆ，ꐊꑷꃅꂿꑘꁡꇤꒃꅐꐥꐨꇎꏦꄻꃪ。ꊋꇤꄉꂿꑘꊿꊌꐨꁦꎆꌠꊥꎆ，ꂿꑘꊿꊌꐨꐪꊛꄉꊼꇅꐳꃅꉀꎆꌠꄝꏦꀋꊰ。ꀋꎪꃅꂿꑘꁡꇤꅉꀨꀰꏢꄹꏦꌭꈬꌋꆀꄻꃪ，ꏦꃤꇬꈴꄉꂿꑘꊿꃄꅉꀧꃅꀰꏢꌅꈌ、ꑲꅉꇤꂷꌫꄻꌅꈌ、ꋍꉻꊌꐨꁷꑣꌅꈌꀧꌋꃅ，ꋍꉻꎆꏣꊋꃤꄻꀉꇨ，ꂿꑘꊿꌐꑘꇷꃅꌠꌋꆀꇴꍆꇷꃅꌠꀻꎆ，ꀊꏀꉹꌠꀰꏢꀨꄜꉘꉚ，ꄉꈁꐥꃅꀰꏢꌠꇶꏦꀉꑌꑵꃅꐥꌠꀻꎆ，ꏓꋧꈴ、ꌐꑘꈴ、ꎀꍹꈴ、ꐧꋦꈴꌠꐮꐊꐙꌠꀊꏀꉹꌠꂿꑘꀰꏢꉻꑫꋈꄻ。ꃄꅉꎳꌬꄹꏦꄺꀱ，ꂿꑘꊿꃄꅉꁌꎆꊌꐨꇬꁷꑣꍆꁧꉀꐕ。ꐳꃅꇓꈓꇓꉈꀻꎆꋍꉻꈴꌠꏦꉻꉺꏦꄻꃪ，ꊋꇤꄉꇓꈓꇓꉈꄐꎖ、ꅉꃀꉁꈾ、ꄉꉻꁧꃤꃅꑠꁁꏯꇬꋍꉻꈴꌠꄹꎆ，ꇓꈓꇓꉈꐊꊈꐽꊯꃅꀟꆦꌠꌋꆀꄉꉻꅐꀦꐮꆽꏣꃅꇱꄻꌠꊥꎆ，ꇮꑘꌌꂿꑘꊥꎆꌠ、ꇓꈓꌌꇓꉈꈻꏁꌠ、ꇮꑘꂿꑘꐯꈲꌠ、ꇓꈓꇓꉈꋍꉻꃅꐙꌠꀊꏀꉹꌠꇮꑘꂿꑘ、ꇓꈓꇓꉈꐮꃆꂮꄻꐛ。
（ꉬ）ꐊꑷꃅꁉꃑꉹꌠꎆꏣꑟꐨꉀꐕ。ꎆꏣꋧꃅꈴꌠꃅꒊꃅꇁꀊꏀꌠꇬꄉꄐꂿꄷꇬꆏ，ꀋꎪꃅꀊꅰꃅꏣꀋꑌꑴꇙꌠꁉꃑꄐꁈꌌꃄꌬꄻꅐ，ꐯꈲꋓꊋ、ꀉꑌꑵꐮꆽꏣ、ꋬꂻꇿꋌꀊꂥꌠꁉꃑꉹꌠꎆꏣꉻꑫꄻꃪ。ꐳꃅꉇꉻꏭꎆꏣꀻꎆꌠꃄꄟꆹꏮ，ꁉꃑꌠꄹꇙꌊꐛꉻꃪꈴ、ꅼꐨꍔꐯꌠ、ꅐꐨꉀꐕꌠꏭꉜꄉꆹꏮꌶ。ꁉꃑꈁꏦꏀꀺ，ꎿꋮꅔꈐꃅꋮꁉꃑꌠꂱꎆꅑꐨꌌꐯꅋꐮꑣꌠꊥꎆ，ꇩꏹꎆꏣꇷꃅꌠꌋꆀꋓꅔꌠꇬꄐꏁꌠꁉꃑꃄꁕꄻꐛ，ꃄꁕꀻꎆꌠꇬꈺꇙꌠꁉꃑꀊꂥꅉꉘꉚ。ꀋꎪꃅꃷꇐꉇꅐꌠꌋꆀꈏꃹꌠꐯꇯꉜꁨꌠꌭꈬ，ꃼꇇꏱꁈꌋꆀꅐꑘꏱꁈꋮꄮꌠꄻꀉꇨꃅꄉ，ꇮꇐ、ꂓꁦ、ꊇꁧ、ꁧꃤꃅꌠꌌꈯꄜꃅꄉꌠꉇꅐꋓꅔꂱꎆꅑꐨꀊꏀꌠꄻꐛ，ꄺꑣꃼꇇꐛꉻꉹꏮꊐꐕꌠꊥꎆ，ꁧꃤꃅꃼꇇꀻꎆ，ꉇꉻꏭꃼꇇꐮꆽꏣꃅꀻꎆꌠꄹꇙ。ꉇꎆꏓꇱꂱꎆꅑꐨꌋꆀꉻꄜꅐꐨꌫꄻꌠꉀꐕ，ꎆꊙ、ꇮꇐꊙ、ꌧꇐꊙꌠꑖꑟꃅꐮꐊꐙꌠꄹꇙ。ꐳꃅꉇꅐꁧꌠꑭꁘꐕ，ꎆꏂꑘꇩꏹꈴꃅꀰꏢꌠꄐꊋꁦꎆꇱ，ꋧꃅꑟꐨꇬꑟꌠꇩꐂꇬꌦꈨꉘꉚ。ꑍꁁꏯ、ꀉꑌꁁꏯ、ꃄꁕꃄꁕꉇꊐꌠꁉꃑꇷꃅꌠꏓꇱꇲꄻ，ꐳꃅꄿꐨꃼꇇꃅꃅꄷꄐꁈꃄꌬ，ꈭꇍꇩꏤꌋꆀꐮꑌꑲꐮꈴꌠꄹꇙ。ꇩꏹꎆꏣꐔꈔꉆꌠꄘꑣꌠꄐꊋꉀꐕ。
ꉪꊇꀋꎪꃅꉌꊋꏟꈯꃅꄉ，ꐊꑷꃅꃹꅼꃅꎆꏣꏦꉻꄺꀱꌠꌋꆀꐳꃅꎆꏣꀻꎆꄟꆹꏮꌠꉈꈽꋌꃢꂵꊋꐛꄉ，ꉪꇩꏤꎆꏣꀻꎆꍄꑐꊋꃤꌋꆀꋓꅔꊋꃤꐕꌊꑞꅉꀊꏀꌠꇬꑟꌶ。
ꉬ、ꀋꎪꃅꍏꇩꐛꐨꐧꋦꉪꏦꍔꍞꀻꎆꈝꃀꇬꍬꇬꎷꌠꌋꆀꍔꍞꏦꉻꄺꀱꌠꄹꎆ
ꏓꂱꋯꁦꌠꆏꉪꄈꈍꄮꑌꀉꇨꃅꐕꀊꂥꃅꄉꌠꏁꇅꁤꇅꌠꁈꁧꉬ。ꄺꀱꁉꃑꊂꅑꅸꇁꌠ，ꉪꊇꆏꐧꋦꉪꏦꋯꁦꀻꎆꌠꎃꑽꑍꁁꏯꎖꋪꏓꈹ，ꏓꂱꋯꁦꆹꐧꋦꉪꏦꀑꇬꉬꌠꊡꀱ，ꇩꏤꌅꈌꈁꐥꌠꃅꏓꂱꃤꉬꌠꌭꈬꃅꄉꇬꎷ，ꀋꆏꃅꍔꍞꏦꉻꄺꀱꌠꄹꎆ，ꐧꋦꉪꏦꋯꁦꍔꍞꋈꄻꌠꁨꎆꐨꀉꒉꀊꂾꃅꊌꅜ，ꊋꐛꃅꍏꇩꐛꐨꐧꋦꉪꏦꍔꍞꀻꎆꈝꃀꀹꄻꌋꆀꌭꈬꃅꄉꇬꎷ，ꀊꐯꇊꀊꐯꌠꏓꂱꋯꁦꃅꇫꑟꌠꎁꃅꎃꊒꌠꃅꍜꏤꄻꄉꀐ。
ꍔꍞꏦꉻꄺꀱꌠꆏꉪꇩꏤꐊꑷꃅꄺꀱꌠꇬꐊꌠꀋꂿꑘꈨꉬ。ꀋꎪꃅꐪꊛꄉꏣꀋꑌꃅꎍꐽꃅꍔꍞꏦꉻꄺꀱꌠꄹꎆꌶ，ꀊꅰꃅꀊꐯꌠ、ꀊꅰꃅꋒꌠ、ꀊꅰꃅꐛꒆꌠꏓꂱꋯꁦꀻꎆ。ꀋꎪꃅꄈꏃꂠꄉꌠ、ꏓꂱꑱꏲꃥꌋꐛꌠ、ꏦꈴꇩꏲꌠꋭꋽꃅꏓꋍꃱꃅꌠꌭꈬꇬꎷꌶ，ꏓꂱꑱꏲꃥꌋꐛꌠꄉꀧꌠꌌꁧꀦꃅꄉ，ꄈꌋꆀꇩꏤꍄꑐꊋꃤꄻꀉꇨꇁꌠ、ꏓꂱꏣꀋꑌꐨꄕꊪꎼꇁꌠꌌꁻꌐꃅꄉ，ꐧꋦꉪꏦꋯꁦꍔꒉ，ꐳꃅꐧꋦꉪꏦꏦꏲꇩꏤꋈꄻ，ꐧꋦꉪꏦꍔꍞꌧꑳꀻꎆ。ꀊꅰꃅꄈꏲꂠꄟꌋꆀꌅꈌꌬꄟꉜꁨꃅꄉꇈ，ꄈꏓꂱꏲꂠꌊꇿꋌꐥꃅꇩꏤꏱꄻꌠꏦꀧ；ꀊꅰꃅꋯꁦꄹꏦꌭꈬꌋꆀꄻꐛꒆ、ꋯꁦꇶꏦꀉꑌꇁꎻꌠꉜꁨꃅꄉꇈ，ꏓꂱꏦꃤꇬꈴꄉꋯꁦꃅꌊꄻ、ꋯꁦꃅꁈꏤ、ꋯꁦꃅꏲꂠ、ꋯꁦꃅꍞꊟꌠꃅꌠꏦꀧ；ꀊꅰꃅꏦꏲꌠꆏꇩꏤꏱꄻꌠꌋꆀꐧꋦꏲꂠꅉꇬꂿꄐꀋꂿꑘꌠꋊꇤꅐꇁꌠꉜꁨꃅꄉ，ꇩꏤꏦꃤꄹꏦꋍꃱꃅꐙꌠ、ꑊꒉꐨ、ꋦꒉꐨꀧꌋꃅꄉ，ꏓꂱꏦꃤꇬꈴꄉꀊꐯꈭꃅꌅꈌꈲꁧꌋꆀꄿꐨꌠꇬꈲꊌꌠꄉꀧꌶ。ꄹꏦꋈꄻꌠꄻꀋꂿꑘꅉꇬꄉ，ꋒꐯꋒꃅꉪꇩꏤꐧꋦꉪꏦꍔꍞꄹꏦꉾꃪꐨꋊꇤꅐꇁ，ꏣꀋꑌꃅꃰꊿꍔꍞꌧꑳꈲꁧꐥꌠꊌꐨꉜꌷ，ꈍꃅꑌꁮꐚꁁꏯꍔꍞꄹꏦꈁꏦꀊꈫꈭꃅꄌꌊꀋꌬ。
（ꋍ）ꏓꂱꁳꏓꂱꁧꎁꃀꀉꒉꈿꌠꇬꈴꄉꇩꏤꌅꈌꌫꄻꎻꌠꊋꁈꄏꌋꆀꄉꀧꄉ。ꏓꂱꁧꎁꃀꀉꒉꈿꄹꏦꆹꏓꂱꑱꏲꃥꌋꐛꌠꄉꀧꌠꁧꀦꍔꍞꄹꏦꉬ。ꄈꃤꉉꐨꁳꏦꏤꈭꎁꇬꈴꄉꇩꏤꉌꊋꉪꐨꐛꌠꃅꑲꌧꌶ，ꏓꄊꌋꆀꋍꃤꎮꊈꉼꋒꐯꋒꃅꇩꏤꌅꈌꌤꏲꅉꂿꄐꋊꇤꅐꇁꌠꇬꊋꁈꄏ，ꏦꃤꇬꈴꄉꏦꄻ、ꍞꊟ、ꐰꏤ、ꄉꅍꁵꇔꑠꌅꊋꃄꌬ，ꊋꀥꇱꄉꏦꄻꌤꃅꌠꊥꇫꋮꄮ，ꊋꀥꇱꄉ“ꋍꃚꑍꑼ”ꏭꍞꊟ，ꊋꀥꇱꄉꍔꃚꈁꉬꈍꈐꄐꌗꌗꂫꇽꌠꏭꍤꄻ、ꍞꊟ。ꅉꂫꊐꌠꏓꂱꁧꎁꈜꀕꇈꂴꇬꂾꊐꌠꇬꇮꃅꊿ、ꂿꑘꊿ、ꌧꇐꐥꊿꁧꎁꍆꁧꉀꐕ，ꄈꍔꏲꌋꇥꀯꁧꎁꍆꁧꊨꒊ。ꏓꄊꇬꄉꁧꎁꑌꑲꏲꉻꄻꄉ，ꁧꎁꉹꁌꏭꑌꑲꌠꄹꏦꄻꃪ。ꇩꏤꌅꈌꌤꏲꅉꎀꍹꄹꏦꄻꐛꒆ，ꎮꊈꉼ、ꌐꊈꉼꇬꐊꊿꌧꇐꌋꆀꈎꄜꐛꉻꄻꃪꈴ，ꌐꃅꊈꑼꍆꁧꉀꐕ，ꏦꃤꇬꈴꄉꄉꅍꃅꌠꄐꊋꀉꇨꇁꎻ。
（ꑍ）ꐧꋦꉪꏦꋮꇖꋯꁦꄹꏦꄻꐛꒆ。ꐧꋦꉪꏦꋮꇖꋯꁦꌠꆹꉪꇩꏤꏓꂱꋯꁦꇶꏦꀋꂿꑘꌠꉬ。ꋮꇖꋯꁦꄹꏦꌋꆀꌤꃅꉺꏦꄻꐛꒆ，ꋮꇖꋯꁦꀊꐯꈭꃅ、ꀉꑌꊐꃅ、ꄹꏦꈴꃅꀻꎆꌠꄹꎆꌶ。ꇩꏤꌅꈌꌬꌤꃅꅉ、ꍔꑠꎀꍹ、ꄈꀾꏓꉻꑠꈴꈜꇬꈴꄉ，ꎆꏣꐧꋦꀻꎆꌠꌤꃆꀉꒉꀊꂾꌠꌋꆀꉹꁌꊇꅉꈲꏣꇬꃆꂮꐥꌠꌤꃆꃶꐚꌠꌌꀊꐯꈭꃅꋮꇖ，ꉹꁌꅇꀉꑌꃅꅲ、ꉹꁌꌧꐨꀊꐯꃅꏓ，ꉜꐊꐨꁦꎆꇁ、ꏓꊋꁦꎆꇁ。ꏟꈯꃅꍏꇩꇭꍣꄈꏃꂠꌠꄈꀉꑌꂷꃅꇷꃅꌠꌋꆀꍔꍞꋮꇖꄹꏦꌭꈬꌋꆀꄻꐛꒆ，ꋒꐯꋒꃅꏓꂱꍔꑠꆹꋮꇖꋯꁦꈳꅉꇬꂿꄐꀋꂿꑘꌠꋊꇤꅐꇁ，ꋯꑌꌠꌋꆀꋯꁦꌠꀨꄜꀉꒉꑍꏢꌠꇬꆼꒆꄉ，ꍔꍞꋮꇖ、ꋯꁦꍞꊟ、ꏲꈽꇖꈽꄹꏦꋈꄻꌠꄹꎆ，ꐮꃆꂮꋮꄮ、ꊋꃤꏓꋧ、ꅇꉉꁈꏂ、ꃅꇴꄉꉻꇬꁧꃤꃅꌠꃅꌊꀊꅰꃅꉾꃪ。ꊋꀥꇱꄉꋯꁦꄈꀾꌋꆀꍔꍞꋮꇖ。ꍔꍞꋮꇖꌠꌌꁈꏤꈭꎁꇬꇱꄉ，ꁈꏤꂾꌋꆀꁈꏤꄮꇬꋮꇖꌠꏟꈯꃅꃅ，ꋯꁦꋮꇖꌠꃶꐚꇿꋌꁦꎆꇱ。ꃹꅼꃅꌐꄝꋮꇖ、ꐮꊒꋮꇖ、ꁁꏯꋮꇖ、ꄜꑘꀞꄻꋮꇖꌠꃅ。ꏣꀋꑌꃅꅉꂫꊐꌠꋯꁦꋮꇖꌠꃅ。
（ꌕ）ꅉꂫꊐꌠꋯꁦꄹꏦꄻꐛꒆ。ꇓꈓꇓꉈꋥꁕꏱꄻ、ꅉꂫꊐꌠꄉꉻꌤꃆꌋꆀꉻꈲꌤꑘꇬꄉꉹꁌꊨꏦꏱꄻ、ꊨꏦꎁꃅ、ꊨꏦꉙꂘ、ꊨꏦꍞꊟꌠꃅꌠꆹ，ꏓꂱꏦꃤꇬꈴꄉꈛꎂꃅꋯꁦꌅꈌꈲꁧꃄꄻꌠꇬꀋꂿꑘꌠꃄꄟꉬ。ꅉꂫꊐꌠꄈꎀꍹꏲꂠꌠꍄꑐꊋꃤꐥꌠꅉꂫꊐꌠꉹꁌꊨꏦꏲꌠꉺꏦꄻꐛꒆꃅꄉ，ꊱꁨꐥꌠꃅꈽꌠꍔꒉ、ꈴꌗꄇꄜꋊꌠꄹꎆ、ꊋꀥꇱꄉꌤꇖꋮꇖ、ꌅꈌꍞꊟꌠꊋꀥꇱꌠꌌꀋꉬꀋꉆꌠꃅꄉ，ꈍꈐꌋꆀꈴꈜꍔꐯ，ꐊꇐꌋꆀꇶꏦꀉꑌꃅꄉ，ꏓꂱꁳꋯꁦꌅꈌꈲꁧꀊꅰꃅꀉꑌꀊꅰꃅꃶꐚꌠꐥꎻꌠꏦꀧꌶ。ꋍꃀꁨꀋꑌꉌꂵꄅꀋꑌꃅꇮꃅꊿꏠꌠꉘꇉꄉ，ꌤꃅꊿꁧꎁ꒜ꀉꒉꈿꌠꌌꅉꀨꇶꏦꃅꄉꌠꎆꏂꑘꌤꑘꌤꃅꅉꋯꁦꏱꄻꄹꏦꄻꐛꒆ，ꌤꃅꊿꁳꏲꂠꌠꌋꆀꍞꊟꈽꎻꌠꋯꁦꌅꈌꈲꁧꏦꀧ。ꅉꂫꊐꌠꋍꑞꋍꑵꎀꍹꐮꐊꃅꌠꂿꄐꋊꇤꅐꇁ，ꍔꃚꏲꂠꌠꌋꆀꅉꂫꊐꌠꋯꁦꌠꋭꋽꃅꄻꐯꇯꎼꇁꌠꃅꇫꑟ。
（ꇖ）ꐊꑷꃅꏦꈴꇩꏲꌠꄹꎆ。ꏦꏲꌠꆹꇩꏲꌤꏲꌠꅉꀨꃄꄟꉬ。ꈆꑪꃅꏦꃤꏤꄻ、ꏦꇨꃅꏦꌬ、ꎃꊒꃅꏦꌬ、ꉹꁌꃅꏦꍬꌠꄹꎆ，ꏦꃤꂴꆽꈀꄸꑌꐥꊯꌠꌭꈬꇬꎷ，ꏦꐥꆏꏦꍬ、ꏦꌬꆏꏦꇨ、ꏦꐆꆏꅓꁵꌠꄉꀧꌶ。ꍏꇩꐛꐨꐧꋦꉪꏦꏦꃤꉻꑫꄻꐛꒆ，ꀋꉬꀋꉆꁁꏯꏦꃤꏤꄻꌠꊋꀥꇱ，ꏓꂱꁳꊱꁨꃅꏦꃤꏤꄻꈽꌠꈭꈜꍔꐯ。ꏦꃤꈴꄉꏲꑘꃅꌠꄹꎆ，ꏦꇨꃅꋊꍬꀋꈐꀋꉈꃅꌧꑳꃅꏦꌬꌠꃅꇫꑟ。ꀒꁨꋍꁘꃅꃹꅼꃅꏦꌬꏦꉻꄺꀱ，ꍏꇩꐛꐨꐧꋦꉪꏦꏦꌬꄹꏦꌭꈬꌋꆀꄻꐛꒆ，ꍤꇽꌤꏲꅉ、ꏦꍤꌤꏲꅉꆏꏦꃤꈴꄉꄁꋦꃅꀋꈐꀋꉈꃅꍤꇽꌅꈌ、ꏦꍤꌅꈌꌫꄻꌠꄉꀧ。ꃹꅼꃅꏦꃤꄹꏦꄜꉺꉙꂘꌠꃅ，ꐧꋦꉪꏦꏦꏲꉌꊈꍔꆙ，ꐧꋦꉪꏦꏦꏲꉪꉻꑌ，ꐧꋦꑭꊂꃅꏦꃤꌷꏦꃤꁌꒉꏦꃤꍬꏦꃤꌬꌠꉪꐨꀉꇨꃅꑌꇁ。ꏲꌋꇥꀯꆏꏦꏲꉪꈜꌋꆀꏦꏲꃄꄟꌌꃹꅼꃅꄺꀱ、ꀻꎆꄹꇙ、ꐮꄙꐨꋊꎵ、ꎍꐽꌠꀧꌋꃅꌠꄐꊋꉀꐕ。ꄈꆏꏓꂱꏃꂠꄉꏦ꒜ꌋꆀꏦꃤꏤꄻ，ꄈꀋꎪꃅꏦ꒜ꌋꆀꏦꃤꈍꈐꇬꄉꃅꈧ。ꎀꍹꅀꊿꑞꂷꉬꄿꂿꏦ꒜ꌋꆀꏦꃤꄩꐂꌠꐋꀋꌡꌠꌅꈌꐥꀋꉆ，ꈍꃅꑌꄝꅇꂷꌌꏦꃤꎃꊐ、ꌅꈌꌌꏦꃤꆼꍅ、ꈲꏂꏦꐆꎻꀋꉆ。
(ꉬ)ꃹꅼꃅꏲꑘꏦꉻꄺꀱ。ꏲꑘꏦꉻꄺꀱꌠꆹꄩꇴꄩꉻꄹꆷꌊꎆꏣꅉꃀꄉꄐꌠꇖꐨꐥꌶꌠꉬ。ꍏꇩꐛꐨꐧꋦꉪꏦꏲꑘꏦꉻꑞꅉꁻꌐꋈꄻꌠꇬꈴꄉ，ꃹꅼꃅꏲꑘꌋꆀꎆꏂꑘꁸꄉ、ꏲꑘꌋꆀꎆꀨꁸꄉ、ꏲꑘꌋꆀꌤꑘꁸꄉ、ꏲꑘꌋꆀꐧꋦꎀꍹꁸꄉꌠꄹꎆ，ꌅꊋꈆꑪ、ꐛꉻꄻꃪ、ꐙꎴꑘꅐ、ꏓꂱꉌꃹꌠꁧꃤꃅꐙꌠꍔꃚꋈꄻ。ꃹꅼꃅꏲꑘꈌꁧꄹꏦꄺꀱ，ꐪꊛꄉꏲꑘꊨꌅꈌꃑ，ꍔꃚꌅꊋꄹꆷꌌꀻꎆꋦꈭꉾꃪꌠꀹꄻ、ꄉꉻꁧꃤꃅꉾꃪꌠꁵꄻ、ꐧꋦꎃꊒꑗꐥꌠꀧꌋꃅꌠꉜꄉꆹꏮ。ꎍꐽꃅꌤꏲꅉꀉꒉꃅꄉꌠꄹꏦꄺꀱꌠꄹꎆ，ꌤꏲꅉꃅꎁꉻꑫꄻꐛꒆ。ꏲꑘꊐꏠꌋꆀꏲꑘꏲꄸꄻꌊꉾꃪ，ꇎꏦꐤꅉꇬꆏꌜꈛꎂꃅꑤ（ꏃ）ꏲꌠꃅꉚꎥꉜ，ꃹꅼꃅꑣꍔꏲꑘꏦꉻꄺꀱ。ꏲꑘꏱꄻꄟꏀꀺ，ꍔꃚꉻꑇꊋꃤꌋꆀꃄꌬꊋꃤꉀꐕ。ꏦꇨꃅꏲꉻꌤꃅꊿꃷꁨꋎꍅ，ꏲꌋꑋꅉꃷꁨꊨꀁꑌ。ꌤꑘꌤꃅꅉꉹꁸꄺꀱꌠꄹꎆ，ꏲꑘꀨꊰꊨꀁꂥ。ꏦꉻꄺꀱꇬꋮꄮꉺꏦꄻꐛꒆ，ꀉꒉꀊꂾꃅꄺꀱꌠꋍꃱꃅꄐꎖꌠꌋꆀꋮꄮꌠꃅ。
（ꃘ）ꌅꈌꌫꄻꌠꇬꏢꑲꌠꌋꆀꍞꊟꉻꑫꄻꄉꄷꀋꁧꄻꐛꒆ。ꏟꈯꃅꄹꏦꌌꌅꈌꏲꌤꏲꊾꏲ，ꏓꂱꌤꐚꌅꈌ、ꐊꈽꌅꈌ、ꉉꁱꌅꈌ、ꍞꊟꌅꈌꏦꀧꄉꌠꆹ，ꌅꈌꎃꊒꃅꃄꌬꌠꄉꀧꅍꀋꉬꀋꉆꌠꉬ。ꏤꇽꌅꈌ、ꃄꌬꌅꈌ、ꍞꊟꌅꈌꋋꈨꐮꏢꑲꃄꑌꐛꐮꋮꄮꃄꑌꐛꌠꄉꀧ，ꇩꏤꌤꏲꅉꏦꃤꈴꄉꏤꄉꌠꌅꈌꈐꇬꌋꆀꈭꎁꇬꈴꄉꌅꈌꃄꌬꌠꀧꄉꌶ。ꏟꈯꃅꈆꑪꃅꏤꇽ、ꋯꁦꃅꏤꇽ、ꏦꈴꄉꏤꇽꌠꌭꈬꇬꎷ，ꏤꇽꉺꏦꌋꆀꈭꎁꄻꐛꒆ，ꉪꇐꏓꈉꂿꄐꋊꇤꅐꇁ，ꏤꇽꅑꎹꌠꌋꆀꑽꌠꋊꍬꄹꏦꄻꄉ。ꉹꁌꑴꅉꈲꏣꃆꂮꐥꌠꏤꁈꉬꄷꆏꉬꇮꉹꁌꉉꐨꎔꎗꃅꅲꌶ，ꉹꁌꈲꁧꇬꉮꅍꐥꌠꃄꄟꉬꄷꆏꉬꇮꏟꈯꃅꄴꏮ、ꋊꍬꎼꇁ。ꌅꈌꌫꄻꇬꄇꄜꋊꈴ、ꐛꏦꈴꌠꄹꎆ，ꄈꌤꄇꄜꋊ、ꏲꃆꄇꄜꋊ、ꏦꌬꄇꄜꋊꌠꌋꆀꋍꑞꋍꁆꏯꌤꀞꄇꄜꋊꌠꄹꏦꄻꐛꒆ，ꅱꄻ、ꅑꁧꎹ、ꎆꏣꆹꎍꐨꍤꌗ、ꑽꃤꀵꄉꅍꇔ、ꄉꅍꇔꑠꄹꏦꄻꐛꒆ，ꊋꀥꇱꄉꄈꈏꇓꍞꊟ、ꋯꁦꍞꊟ、ꏦꃤꍞꊟ、ꈋꍣꍞꊟ，ꏓꂱꁳꌅꈌꍞꊟꎻ，ꌅꈌꁳꈨꑭꇂꃴꄉꌫꄻꎻ。
（ꏃ）ꋍꉎꀋꐥꃅꀊꐯꈭꃅꐥꌠꇩꉂꊋꏓꋍꃱꃅꌠꄻꈬꌋꆀꀻꎆ。ꇩꉂꊋꏓꋍꃱꃅꌠꆹꋍꑞꋍꁆꏯꊋꃤꏓꋧꐯꇯꄉ，ꄈꍔꇢꊭꇬ、ꊿꋅꇢꊭꇬ、ꑇꇐꇢꊭꇬ、ꏠꊐꇢꊭꇬ、ꎿꈐꎿꉈꃺꑌꇢꊭꇬꐮꄮꌠꊥꎆ，ꍏꇩꐛꐨꐧꋦꉪꏦꀊꏀꃅꊋꐛꌠꁌꇐꈤꌠꃄꄟꉬ。ꇩꉂꉪꏦ、ꐧꋦꉪꏦꁈꁧꀊꂥꃅꐕꄉ，ꇩꉂꊋꏓꋍꃱꃅꌠꉪꇐꍔꍞꅉꃀꄻꈫꈈ，ꎃꊒꃅꋍꏢꃅꐙꌠꌋꆀꀉꑌꑵꃅꐙꌠꃆꂮꀞꄻ。ꀊꉗꃅꐮꐊꐥ、ꐮꇬꍞꊟ、ꋍꃀꉌꂵꋍꋬꃅ、ꂄꄸꋍꏢꃅꌠꌐꏦꌭꈬꇬꎷ，ꊋꀥꇱꄉꋯꁦꄈꀾꌋꆀꄈꀾꀋꐊꊿꂒꋦꌠꋯꑌꇷꃅ，ꉪꇐꇬꉌꂵꋍꂷꑌꇐꋍꏢ、ꑞꅉꁻꌐꇬꉌꂵꋍꂷꃅꍜꋍꈚ、ꃅꇏꇬꉌꂵꋍꂷꃅꐨꋍꏢꃅꐙꌠꊥꎆ，ꊋꀥꇱꄉꄈꉈꁧꎁꊿꂒꋦꁥꌠꂘꄻ，ꄈꉈꉾꃪꌠꊿꂒꋦꌠꀊꅰꀉꑌꃅꎹꈹ、ꌊꄻꌊꇩꏤꌤꏲꅉꈁꐥꊐꌠꏲꂠꄉꅍꄉꎻ。ꐊꑷꃅꎃꊒꃅꄈꃤꊿꋅꏱꁈꌫꄻꃄꌬꇬꑟ，ꊿꋅꃄꁕꊨꏦꏲꄹꏦꌭꈬꌋꆀꄻꐛꒆ，ꏟꈯꀕꃅꊿꋅꈁꐥꌠꃅꐯꇯꋯꑌꄉꉈꈽ、ꐯꇯꌄꆣꀻꎆꌠꄜꀨꌭꈬꇬꎷ，ꃹꅼꃅꊿꋅꋯꑌꀻꎆꌠꃆꂮꉙꂘꌠꃅ，ꊿꋅꃅꄷꀻꎆꌠꐳꀥꇱ，ꀁꑌꊿꋅꏦꊒꌅꈌꈲꁧꏦꀧ，ꐥꊯꋯꑌꐮꇇꀨꐮꄮꌠꐧꋦꉪꏦꊿꋅꃆꂮꄻꈫꈈ、ꀻꎆ，ꊿꋅꈁꐥꌠꐮꄮꐮꐊ、ꂄꄸꐯꇯꊝ、ꐮꄮꃅꀻꎆꌠꊥꎆ。ꐊꑷꃅꄈꃤꑇꇐꌤꃅꅉꀨꌐꏦꌬ，ꑇꇐꁆꏯꊿꂒꋦꌠꌋꆀꉹꁌꑇꇐꑇꌠꁳꎆꏣꐧꋦꀻꎆꌠꇬꏣꀋꑌꂿꄐꋊꇤꅐꇁ。ꀊꏀꌠꐧꋦꏠꊐꊿꂒꋦꌠꊋꊡ、ꄐꇺꌊꍏꇩꐛꐨꐧꋦꉪꏦꌤꑘꎁꃅꑆꊋꀊꅰꀉꒉꌠꃅꅐꇁ。ꄈꃤꉸꐆꌤꆿꏱꁈꃄꌬꇫꑟ，ꎿꉈꃺꑌ、ꎿꉈꀱꇁꑱꈐꊿꁍꇩꐛꏀꈴꋈꄻꌠꌋꆀꄮꐽꋍꃱꃅꌠꌤꑘꀉꒉꋌꐘꉈꇬ、ꃅꈽꌠꊋꁈꄏ。
ꍏꇩꐛꐨꐧꋦꉪꏦꍔꍞꀻꎆꈝꃀꆹꏓꂱꋍꏅꌠꋯꑌꄉꐯꇯꉈꈽꌠꈝꃀꎃꊒꏢꉬ。ꉪꊇꈍꃅꑌꀋꎪꀋꑴꃅꈝꃀꋋꏢꍬꄉꀒꁨꆹꌶ，ꋍꃅꄉꉪꇩꏤꐧꋦꉪꏦꋯꁦꍔꍞꁳꀊꅰꃅꍄꑐꌠꐥꎴꊋꃤꄜꅐꇁꎻ。
ꃘ、ꏟꈯꃅꐧꋦꉪꏦꁱꀕꀉꇨꇩꏤꋈꄻꌠꄹꎆ
ꁱꀕꆹꊿꋅꌦꏣꐥꏡꉬ，ꏓꂱꉌꊈꐥꁍꉬ。ꐊꑷꃅꊼꇅꌣꈚꌠꐧꋦꋈꄻꐛ，ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꇬ，ꀋꎪꃅꐧꋦꉪꏦꁱꀕꀉꒉꃅꀻꎆꀉꒉꃅꌄꆣꌠꄹꇙ，ꐧꋦꉪꏦꁱꀕꋈꄻꌠꒈꂃꀊꏀꑠꊭꄖꄑꎼꇁ，ꇩꏤꁱꀕꆓꊋꃤꐕꀊꂥ，ꁱꀕꌌꐥꀹꄐꏁ、ꏓꂱꉙꂘ、ꐧꋦꁧꃤꃅ、ꀻꎆꄹꇙꌠꂿꄐꋊꇤꅐꇁ。
ꐧꋦꉪꏦꁱꀕꀉꇨꌠꇩꏤꋈꄻꇬ，ꀋꎪꃅꍏꇩꐛꐨꐧꋦꉪꏦꁱꀕꀻꎆꌠꈝꃀꍬ，ꏟꈯꃅꏓꂱꁧꎁꃅ、ꐧꋦꉪꏦꁧꎁꃅꌠꃅꍜꌭꈬꇬꎷ，ꏟꈯꃅꉏꃨꋓꃅꃨ、ꉐꁭꋓꃅꀥꌠꌐꏦꌭꈬꇬꎷ，ꏟꈯꃅꐛꐨꇬꊫꊒ、ꐥꐨꇬꊫꊒ、ꉹꁌꇬꊫꊒꌠꏥꏦꌭꈬꇬꎷ，ꐧꋦꉪꏦꉌꊈꌧꑳꌋꆀꐥꇐꌧꑳꐊꑷꃅꀻꎆꌠꄹꇙ，ꏮꐛꏀꈴꌠꉜ、ꏮꋧꃅꉜ、ꏮꋌꊂꉜꌠ，ꊿꋅꃤꈆꑪꌠꉹꁌꃤꐧꋦꉪꏦꁱꀕꋈꄻ。
ꐧꋦꉪꏦꁱꀕꀉꇨꌠꇩꏤꋈꄻꇬ，ꀋꉬꀋꉆꌠꆏꊿꋅꈁꐥꌠꃅꁱꀕꀹꄻꍄꑐꊋꃤꀉꇨꇁꎻꌠꉬ。ꃹꅼꃅꁱꀕꏦꉻꄺꀱ，ꁱꀕꒃꅐꊋꃤꁌꄝ、ꀻꎆ，ꌷꇐꎥꇐꋯꁦ、ꋽꇐꑴꇐꋯꁦꌠꍔꆙ，ꏓꂱꎁꃅꁱꀕꃄꅉꈩꅉꀊꐯꌠꁵꄻ，ꁱꀕꀹꄻꅐꀦꈁꐥꌠꁳꋒꐯꋒꃅꅐꁖꇁꎻ，ꊿꋅꈁꐥꌠꁱꀕꀹꄻꍄꑐꊋꃤꊛꄉꅐꁖ、ꐧꋦꁱꀕꐥꐨꀊꅰꃅꇣꋲꇤꑞ、ꏓꂱꅉꀨꁱꀕꌅꈌꈲꁧꀊꅰꃅꌌꏦꀧꄉ、ꏓꂱꉪꇐꑌꇐꊇꁧꌋꆀꈆꑪꁱꀕꊇꁧꐊꑷꃅꐕꀊꂥ、ꍏꉸꁱꀕꋧꃅꇣꄧꇬꑌꑲꊋꃤꀋꆏꃅꀉꇨꇁꌠꐛꇴꀊꏀꌠꀹꄻꎼꇁ。
（ꋍ）ꊋꀥꇱꄉꐧꋦꉪꏦꈯꄜꁌꐨꉻꑫꋈꄻ。ꐧꋦꉪꏦꈯꄜꁌꐨꉻꑫꆹꇩꏤꌄꆣꌠꀑꇬꉬ，ꍏꇩꐛꐨꐧꋦꉪꏦꀻꎆꃅꍜꄚꅑꎍꌠꉬ。ꃹꅼꃅꐧꋦꉪꏦꈯꄜꁌꐨꉻꑫꌶꄻꉙꂘꌠꃅ，ꐧꋦꉪꏦꈯꄜꁌꐨꉻꑫꌌꐧꋦꉪꐨꄐꏁ、ꐧꋦꉜꐨꏓꄻ。ꂷꇻꌦꉪꏦꍏꇩꃤꐛꌠꃅꋊꈴꉹꁌꈴꌠꄹꎆ，ꀋꄝꀋꏯꃅꍏꇩꐛꐨꐧꋦꉪꏦꌧꇐꉻꑫꌌꄈꑭꊂꉌꊐ、ꏓꂱꉙꂘ，ꃹꅼꃅꂷꇻꌦꉪꏦꌧꇗꎥꃪꌠꌋꆀꋈꄻꌠꋉꃆꃄꌬ，ꍔꑪꐧꋦꈆꑪꏀꀺꉻꑫꋈꄻ，ꍏꇩꐛꐨꐧꋦꉪꏦꌧꇗꉻꑫꂘꅍꄯꒉꇬꃹꌶꅉꇬꃹꀂꏾꇬꃹꌠꄹꇙ。ꀊꐯꈭꃅꉪꅉꑇꅉꉙꂘꌠꃅ，ꏓꂱꋍꏅꌠꋯꑌꏓꋧꌌꍏꇩꐛꐨꐧꋦꉪꏦꁈꁧꇰꀋꃀꌠꇂꃴꐥꄉꎻ。ꊋꀉꒉꃅꇤꄉꊿꋅꉌꊈꌋꆀꃅꋊꉌꊈꍔꂵ，ꃹꅼꃅꇩꉂꉪꏦ、ꋍꉻꉪꏦ、ꐧꋦꉪꏦꌌꉙꂘ，ꏓꂱꉌꊈꉪꅉꇣꋲꇤꑞꇁꎻ，ꏓꂱꉌꊈꊋꃤꀉꇨꇁꎻ。ꋦꈚ、ꋯꁦ、ꌧꑳ、ꐮꄮꌠꄖꄑ，ꄿꐨ、ꐥꊯ、ꎃꊒ、ꏦꏲꌠꄖꄑ，ꇩꉂ、ꑘꋦ、ꅇꉉꅇꌗ、ꉁꅉꌠꄖꄑ，ꏣꀋꑌꃅꐧꋦꉪꏦꈯꄜꁌꐨꉜꐨꂘꄻ。ꏟꈯꀕꃅꉪꐨꐛꄟꌤꃅꌠꏲꂠꌅꈌꌋꆀꏱꇺꌅꈌꌭꇇꈐꊐꄉ，ꏟꈯꃅꄐꇺꃅꍜꎃꊒꌠꌭꈬꇬꎷ，ꄐꇺꊋꃤꉀꐕ，ꀨꎍꉪꇐꈋꍣꌠꀉꇨꇁꎻ。
（ꑍ）ꐊꑷꃅꉻꊿꑌꇐꊇꁧꐕꀊꂥ。ꋋꆹꐧꋦꉪꏦꑌꇐꋈꄻꌠꅉꀨꂿꃆꉬ。ꏟꈯꃅꏦꈴꇩꏲꌠꌋꆀꑌꇐꌌꇩꏲꌠꐯꇯꎼꇁ，ꊋꀥꇱꄉꐧꋦꋍꏅꑌꇐ、ꃅꑘꑌꇐ、ꑱꈐꑌꇐ、ꂱꑱꑌꇐꌌꉙꂘ，ꍏꉸꋊꃅꑌꇐꍔꂵ，ꃅꋊꑌꇐꀊꏀꌠꍔꂵ。ꉻꊿꑌꇐꋈꄻꋉꃆꄹꎆ，ꃶꐚꂄꎔꌠꍔꆙ，ꈱꄸꃠꌠꁒꐀ，ꃰꊿꄐꏁꌌꑴꐚꃅꏦꏤꃅꎁ、ꐧꋦꆽꎍꌠ、ꑱꈐꆽꎍꌠꃅ，ꑘꃅꀑꑊꐥ、ꏀꀺꇰꀋꃀꌠꐧꋦꐥꀹꄻꄉ，ꂄꄸꌧ、ꑗꉬꉉ、ꅐꌞꌠꃅ、ꐮꄮꊥꎆꌠꃅꇏꉾꃪꌠꂘꄻ。ꃹꅼꃅꑌꇐꁆꏯꌤꃆꑓꅐꎑꌠꌐꄉꉙꂘꌠꌋꆀꋊꄻꌠꃅ，ꊋꀥꇱꄉꏲꃆꅇꌗ、ꃼꇇꅇꉉꅇꌗ、ꐧꋦꅇꉉꅇꌗꌠꌋꆀꏦꌬꋍꏅꇬꑅꌠꋈꄻ。ꉪꇐꍔꍞꌤꃅꌠꊋꀥꇱꌋꆀꄺꀱ，ꃰꊿꐮꉈꇬꌠꌋꆀꉌꂵꂘꑴꌠꉜꁨ，ꎲꁨꑴꁨ、ꉪꐚꌗꄮ、ꏣꀋꑌꉀꆹꌠꐧꋦꉪꄟꂘꄻ。ꃹꅼꃅꉹꁌꃅꐙꌠꉌꊈꌧꑳꀹꄻꌠꃅꈧ，ꀊꐯꈭꃅꉌꇗꃅꁧꃤꃅꌠꍔꂵ，ꆺꃗꌶꄻꌠꃅ、ꑌꇐꌶꀠꅉꀕꃅꌌꌶꄻꄜꉺꌠꄹꇙ。
（ꌕ）ꏓꂱꉌꊈꁱꀕꐥꐨꌌꇣꋲꇤꑞ。ꏓꂱꁳꉾꃪꋲꑞꌠꉌꊈꁱꀕꐥꐨꈲꊌꎻꌠꆹ，ꐊꑷꃅꊼꇅꌣꈚꌠꐧꋦꄻꐛꌠꐊꇐꀋꉬꀋꉆꌠꉬ。ꏟꈯꃅꏓꂱꌌꈯꄜꃅꄉꌠꁰꄻꄐꌐꃅꍜꌭꈬꇬꎷ，ꁱꀕꅐꇐꊇꁧꉀꐕ，ꏓꂱꎁꃅꀊꅰꃅꉾꀊꅰꃅꀉꑌꌠꉌꊈꅐꇐꄻꇬꁳꎻ。ꏟꈯꃅꏮꅉꂫꊐꌠꉜꄉꃅ、ꉹꁌꎁꃅꃅꌠꌭꈬꇬꎷ，ꐳꃅꁱꀕꉹꁌꈲꁵꋉꃆꀋꂿꑘꌠꄹꎆ，ꂿꑘꁡꇤꌋꆀꐞꀋꄿꃅꈋꁱꀕꋈꄻꌠꇇꀨꊋꃤꀉꒉꃅꇱ，ꐪꊛꄉꄉꉻꁱꀕꁧꃤꃅꉁꈾꌌꐧꋦꏭꁌꀋꈁꃅꁉꃑꌠꄹꇙ。ꋊꃅꁱꀕꉾꃪꌠꊪꊛꉻꑫꋈꄻ，ꍏꉸꋊꃅꁱꀕꉾꃪꌠꍔꆙ。ꇩꏤꌬꈴꌠꅇꂷꁱꂷꌬꌠꌌꁊꈴꌋꆀꋊꍬ。ꀁꑌꊿꋅꁱꀕꌤꑘꄻꌄꆣꀻꎆ。ꉹꁌꃅꐙꌠꁱꀕꃅꈧꌠꍔꆙ，ꉹꁌꄐꏁꌌꁱꀕꋈꄻꅉꇬꂱꑱꈩꀜ、ꂱꑱꉙꂘ、ꂱꑱꎁꃅ。ꉹꁌꋍꏅꃅꄯꒉꀘꌠꃅꈧ。ꈄꏍꐊꇐꋈꄻꌠꊋꀥꇱꌠꌋꆀꄻꃪꌠꃅ，ꈄꏍꇬꄉꃚꀨꉙꀨꌯꃅꍡ。ꊋꀥꇱꄉꈄꏍꐧꋦꏲꂠ，ꈄꏍꋊꍬꏦꈴꄉꃄꄻꌠꄹꎆ，“ꎲꌩꄸꅥ”ꌠꃅ，ꄷꅠꐨꅥꍅ。ꈆꑪꌧꇐꌌꁊꈴ，ꈆꑪꉌꊈꌌꍔꂵ，ꉹꁌꋍꏅꌠꈆꑪꌧꐨꐕꀊꂥ。ꀊꐯꈭꃅꉹꁌꋍꏅꈯꒆꄿꎟꌠꃅ，ꉹꁌꈯꎟꌋꆀꋓꈿꈯꎟꐊꑷꃅꀻꎆꌠꊥꎆ。
（ꇖ）ꁱꀕꉻꄜꊋꃤꌋꆀꋓꅔꊋꃤꌌꀉꇨꇁ。ꁱꀕꊋꃤꌋꆀꋓꅔꊋꃤꆹꇩꏤꌣꈚꐞꄿ、ꊿꋅꄖꄑꌄꆣꌠꌐꂷꀋꉬꀋꉆꌠꉬ。ꐧꋦꈲꁧꌌꀨꇬꄉ、ꐧꋦꈲꁧꌋꆀꎆꏣꈲꁧꐮꐊꐙꌠꌭꈬꇬꎷ，ꁱꀕꌤꑘꐊꑷꃅꌄꆣ、ꁱꀕꅐꑘꐳꃅꀻꎆꌠꄹꇙ。ꍔꑪꐧꋦꈆꑪ、ꈨꏀꄯꒉꅐ、ꅇꁊꄆꒌꄆꁱ、ꁱꇐꋽꇐꌤꑘꀻꎆ。ꊋꀥꇱꄉꄉꉻꁱꀕꋉꃆꌋꆀꁱꀕꐘꑘꀉꒉꀊꂾꌠꋈꄻ，ꄉꉻꁱꀕꁧꃤꃅꉻꑫꄻꐛꒆ，ꁧꃤꃅꌠꇿꋌꐕꀊꂥ。ꁱꀕꌋꆀꈆꑪꇮꇐꐯꇯꃅꌠꊥꎆ，ꁱꀕꃅꑘꐛꄟꀊꏀꉹꌠꀻꎆ，ꁱꀕꅐꑘꄉꈁꈴ、ꏓꋧꈴ、ꌐꑘꈴꌠꑞꅉꐕꀊꂥ。ꐛꏀꌠꄜꁊꉻꑫꄻꄉ、ꀻꎆ，ꄜꁊꊋꃤꐕꀊꂥ。ꇩꁨꉻꈲꃅꐙꌠꁱꀕꌤꃅꅉꍄꑐꊋꃤꀉꇨꇁꎻ，ꀰꏢꃅꐙꌠꁱꀕꌤꃅꅉꏦꊿꏱꄻꐛꉻꄻꐛꒆ，ꁱꀕꃷꎏꌄꆣ。ꁱꀕꁁꏯꉇꉻꁉꃑꌠꍔꐯ，ꏣꀋꑌꃅꇩꉈꁱꀕꉾꃪꌠꉜꐨꌶꌬ。ꁱꀕꌧꊿꊇꁧꀉꇨꌠꀉꑌꃅꍻꄑꅐꇁ、ꁣꀋꐥꃅꉀꒆꌠꇬꈲꏣꐥꌠꋥꁕꉾꃪꌠꄺꂡ，ꌧꃀꂓꅑꂒꋦꌠꌋꆀꊿꋅꁱꀕꁧꎁꊿꂓꅑꈨꂘꄻꅐꇁ，ꁱꀕꌤꃅꊿꑆꊋꄞꅐꃅꐥꌠꌌꀭꄒ。
ꉪꊇꀋꎪꃅꐧꋦꉪꏦꂴꅑꁱꀕꁨꆹꌠꃅꍜꌭꈬ，ꁱꀕꑴꐚꌠꌋꆀꁱꀕꑴꑇꌠꀉꇨꃅꐥꌶ，ꐧꋦꉪꏦꁱꀕꇩꏤꀉꇨꌠꋈꄻꁻꌐꇰꀋꃀꌠꉜꄉꁨꆹ。
ꏃ、ꉹꁌꐥꐨꄻꃪꌠꌋꆀꏀꀺꏲꂠꌠꇬꄉꐧꋦꋈꄻꌠꊋꀥꇱ
ꐧꋦꋈꄻꌠꊋꀥꇱꌠꆹ，ꐧꋦꐮꄮꎍꐽꌠꄉꀧꅍꀋꂿꑘꌠꉬ。ꀋꎪꃅꏓꂱꋍꉎꀋꐥꃅꀉꑌꌠꁧꀦꈲꁧꀧꌋꃅꌠꀊꂥꐨꇬꈴꄉ，ꐳꃅꅉꀨꋍꏅꁧꃤꃅꉻꑫꄻꐛꒆ，ꐧꋦꏱꄻꌠꊋꀥꇱꌋꆀꏀꀺ，ꐧꋦꉪꏦꐮꄮꐧꋦꋈꄻꌠꄹꇙ。
ꐧꋦꋈꄻꌠꊋꀥꇱꇬ，ꀋꎪꃅꉹꁌꐥꐨꏦꀧꌠꌋꆀꄻꃪꌠꌌꀋꉬꀋꉆꅉꃅꄉ。ꏓꂱꐥꇐꁱꀕꐥꐨꑟꐨꐕꀊꂥꌠꆹ，ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꁧꀦꑞꅉꉬ。ꉹꁌꐥꐨꇬꈲꏣꀉꑌꃅꏂꇫ，ꉹꁌꐥꐨꇬꎭꐨꀉꑌꃅꂥꀘ，ꏓꂱꉇꇬꐯꉇꇬꈛꎂꐯꈛꎂꃶꐚꐯꃶꐚꌠꈲꏣꌤꃆꂥꀘꋒ，ꌷꇬꂘꌠꐥ、ꃅꇬꊌꐨꐥ、ꆅꇬꉃꅉꐥ、ꃀꇬꀨꎹꌠꐥ、ꀀꇬꀀꅉꐥꌠꀂꏽꊛꄉꊌꐨꀊꏀꌠꐥꀐ，ꊋꇤꄉꏓꂱꁳꀊꅰꃅꐥꌒꄻꌒꇁꎻ。
ꐧꋦꋈꄻꌠꊋꀥꇱꇬ，ꀋꎪꃅꐳꃅꐧꋦꏦꉻꄺꀱꌠꄹꎆ。ꍏꇩꐛꐨꐧꋦꉪꏦꐧꋦꏲꂠꉻꑫꋈꄻ，ꐳꃅꄈꊈꏲꂠ、ꍔꃚꆽꎍ、ꐧꋦꋮꐊ、ꋍꏅꐊꈽ、ꏦꏲꏦꀧꌠꐧꋦꏲꂠꏦꉻꄻꐛ，ꐳꃅꍔꃚꄐꏁ、ꇓꈓꇓꉈꐥꈴ、ꊛꄉꃅꉆꌠꅉꀨꋍꏅꁧꃤꃅꉻꑫꄻꐛ，ꐳꃅꏲꌠꌋꆀꐧꋦꁸꄉ、ꌅꈌꌋꆀꃅꎁꊨꄅ、ꏦꃤꈴꄉꊨꏦꏱꄻꌠꐛꏀꈴꐧꋦꎀꍹꏦꉻꄻꐛ，ꐳꃅꀨꇬꄉꏱꄻ、ꇘꄟꏲꂠ、ꃛꊝꂥꀘꐮꐊꐙꌠꐧꋦꏲꂠꉺꏦꄻꐛꌶ。
（ꋍ）ꊋꇤꄉꏓꂱꉌꃹꑓꐛꌠꂘꑘꀞꄻ。ꂘꑘꆹꊿꋅꄖꄑꌄꆣꌠꌋꆀꐧꋦꀻꎆꌠꅉꃀꈑꇓꉬ。ꂘꑘꌌꂴꄉꀻꎆꌠꌭꈬꌶ，ꐊꑷꃅꄈꃤꂘꑘꌐꏦꌫꄻꇫꑟ，ꂘꑘꆏꐧꋦꉪꏦꐛꏀꈴꋈꄻꁧꃤꃅ、ꏓꂱꁧꃤꃅꌠꌭꈬ，ꊿꑌꇐꐥꌧꇐꐥꌠꉙꂘꅐꇁꌠꌌꂘꑘꁧꀦꂿꃆꃅꄉ，ꑌꇐꌧꇐꈯꄿꋽꇐꐊꑷꃅꀻꎆꌠꐧꋦꉪꏦꋈꄻꊿꌋꆀꎃꉆꊿꂘꄻ。ꐊꑷꃅꊇꁧꂘꄻꌠꃄꄻ，ꃹꅼꃅꂘꑘꀂꏽꏓꇱꄺꀱ，ꊋꇤꄉꂘꑘꊇꁧꐕꀊꂥ，ꌶꌺꏀꀺꉌꊈꉘꉚ。ꌷꂾꂘꑘꀞꋒ，ꐽꏡꃅꈬꈎꋭꑘꂘꑘꀻꎆ，ꐧꊐꂥꌷꊬꌠꂘꑘꀑꐱꃅꁊꈴ，ꐳꃅꐛꏀꃅꑘꂘꑘꀻꎆ，ꀊꂥꊐꌠꂘꑘꈐꐛꊈꐛꄟꀻꎆꌠꄹꇙ，ꏣꀋꑌꃅꐪꊛꂘꑘꀻꎆ，ꐥꍂꂘꑘꉻꑫꄻꐛꒆ，ꌶꄻꃅꐙꉹꌠꐧꋦꋈꄻ。ꊋꀉꒉꃅꇤꄉꂘꑘꀋꈐꀋꉈꌠꊥꎆ，ꋭꋽꃅꂘꑘꅐꀦꁆꄻ，ꀋꉬꀋꉆꌠꂿꑘꁡꇤ、ꃅꋮꆹꏮ、ꌢꎭꃅꈋ、ꊿꋅꃅꄷꏭꉜꄉꎎ，ꐋꀋꌡꌠꂘꑘꊋꁈꄏ，ꑱꈐꎆꏣꊋꋠꌠꌶꌺꇇꀨꐨꐕꀊꂥ，ꏣꀋꑌꃅꂿꑘꇮꃅꊿꀉꑳꐥꊯꃅꂘꊌꌠꄹꇙ，ꀉꑳꋍꂷꋑꀋꋒꌠꁳꄐꅍꐥꌠꊿꐛꎻ。ꐧꋦꊋꃤꏃꈻꌊꂘꑘꄖꀞꌠꊋꊡ。ꂘꃀꊿꁥꌠꂘꄻꌠꊋꀥꇱ，ꂘꃀꑌꇐꌧꐨꌋꆀꂘꄻꄐꐨꐕꀊꂥ，ꂘꃀꊿꂘꊿꉘꉚꌠꑊꐥꐨꌋꆀꆽꎍꐨꀥꇱ。
（ꑍ）ꊇꁧꀊꅰꀊꂥꌠꃅꑘꊌꌠꃅꇫꑟꌠꄹꇙ。ꃅꑘꊌꌠꆹꉹꁌꐥꐨꁧꀦꉬ。ꑘꃅꊿꑴꌅꃅꑘꊌ、ꃷꎏꋊꄻꃅꑘꊌ、ꍔꃚꊥꎆꄉꃅꑘꊌꌠꌋꆀꉹꑘꀹꄻꊋꊡꌠꌐꏦꌫꄻꇫꑟ，ꃅꑘꀨꄉꄐꇐꌋꆀꀊꅰꏣꀋꑌꌠꃅꑘꊌꏱꁈꃄꌬ。ꑘꃅꊿꏃꈻꌊꃅꑘꊌꉜꐨꄺꀱ，ꈳꅉꀉꑌꈚꇶꏦꀉꑌꑵꃅꃅꑘꊌꌠꊋꊡ，ꑘꀺꌠꈴꄉꃅꑘꊌꌠꄹꇙꌠꊥꎆ，ꒉꌶꅉꌷꅐꇁꌶꌺꀨꄉꌠꌠꏀꃅꑘꊌꌤꃅꌠꌋꆀꂿꑘꁡꇤꑘꃅꊋꃤꆹꏮꌠ、ꇓꈓꏦꎫꊋꋠꌠꊿ、ꂽꄻꄉꀱꇁꌠꊿꃅꑘꊌꌤꃅꌠꃅꋒ。ꃅꅍꊌꇮꇐꁰꍋꌠꊋꀥꇱ，ꑘꃅꊿꃅꑘꊌꑘꀺꄐꐨꉀꐕ，ꃅꑘꊌꎍꐽꐨꀥꇱ。ꊿꊋꅐꀦꃷꎏꄻꐛꒆ，ꃅꑘꊌꁧꃤꃅꉻꑫꄻꐛꒆ，ꃅꅍꀋꊌꄜꏂꀧꌠꃅꑘꊌꏭꊥꎆꌠꂿꄐꀥꇱ。ꑘꃅꎕꏦꉻꑫꌋꆀꑘꃅꑌꑲꋮꄮꉺꏦꄻꐛꒆ，ꑘꃅꏦꀧꍞꊟꍤꆫꌠꌋꆀꅔꀥꉉꈻꋊꇽꌠꊋꀥꇱ，ꑘꃅꌠꐮꃆꂮꐮꄮꌠꋈꄻ。
（ꌕ）ꁈꏂꁈꇭꄉꀀꊿꊌꐨꁦꎆ。ꀻꎆꊌꐨꆏꏓꂱꐯꇯꈲꏣꊌꌠꃅꇫꑟ，ꀋꎪꃅꃹꅼꃅꊌꐨꁷꑣꄹꏦꄺꀱ，ꊋꇤꄉꀀꊿꊌꐨꉀꎆꌠꌋꆀꎆꏣꀻꎆꌠꐮꐊ、ꑘꃅꊌꐨꉀꎆꌠꌋꆀꑘꃅꒃꅐꐨꉀꐕꌠꐮꐊꌠꃅꇫꑟ，ꇩꂱꊌꐨꁷꑣꅉꇬꀀꊿꊌꐨꍆꁧꐕꀊꂥ，ꑘꃅꊌꐨꉘꃀꃢꌠꁷꑣꅉꇬꍆꁧꐕꀊꂥ。ꉘꃀꃢꌠꁷꑣꌠꌋꆀꉈꑴꋍꃢꁷꑣꌠꐯꇯꑘꅐꐨꌋꆀꀋꈐꀋꉈꐨꇲꄻ，ꉈꑴꋍꃢꁷꑣꇬꀊꅰꃅꀋꈐꀋꉈꌠꋓꉪꁨ。ꑘꃅ、ꎆꀨ、ꇮꇐ、ꏲꂠꑠꐊꊈꆏꅐꌞꌠꇬꈴꄉꁷꑣꈽꌠꉘꃀꃢꌠꁷꑣꉺꏦꄻꐛꒆ，ꐳꃅꇗꏸꎴ、ꐧꋦꏦꀧ、ꆹꏮꎆꁵꌌꇇꁈꀋꉬꀋꉆꌠꃅꄉꌠꉈꑴꋍꃢꁷꑣꋊꄻꉺꏦꄻꐛꒆ。ꃹꅼꃅꎆꏂꑘꌋꆀꌤꏲꅉꌤꑘꌤꃅꅉꃄꎆꄹꏦꄺꀱ，ꎆꏂꑘꃄꎆꋍꉻꋮꇖꄹꏦꄹꌬ，ꑘꃅꈁꊌꌠꀧꌋꃅ。ꈳꅉꀉꑌꃅꀀꊿꁨꇐꐨꊌꐨꁦꎆ。ꊌꐨꁷꑣꐥꀹꋊꍬ，ꏦꊒꊌꐨꀧꌋꃅ，ꊌꐨꀁꂥꌠꊌꐨꁦꎆꎻ，ꊌꐨꀊꂥꇨꌠꋊꐽꎼꇁ，ꏦꀋꊒꊌꐨꆼꑣꇧꎭ。
（ꇖ）ꏓꈴꇲꈴꃅꇓꈓꇓꉈꐧꋦꏦꀧꉻꑫꋈꄻꌠꄹꎆ。ꐧꋦꏦꀧꌠꆹꏓꂱꐥꐨꏦꀧ、ꐧꋦꁷꑣꋊꄻꌠꅉꀨꄹꏦꐘꉬ。ꐥꈴꌐ、ꅉꀨꏦꀧ、ꊐꄅꀉꑌ、ꊛꄉꃅꉆꌠꌐꏦꌭꈬꌶ，ꀋꈐꀋꉈꐨ、ꏭꇙꐨꄉꄐ、ꐪꊛꃅꉆꐨꄉꀧꌠꌌꀋꉬꀋꉆꌠꃅꄉ，ꐊꑷꃅꇓꈓꇓꉈꀀꊿꃅꐊꈴꌠꐧꋦꏦꀧꉻꑫꄻꐛ。ꎆꏂꑘꌋꆀꌤꏲꅉꌤꑘꌤꃅꅉꐧꋦꄜꏂꀧꄹꏦꄺꀱꌋꆀꄻꐛꒆ，ꇓꈓꇓꉈꀀꊿꅉꀨꃀꌠꀨꎹꄜꏂꀧꌋꆀꅉꀨꆅꉚꄜꏂꀧꄹꏦꄻꇱ，ꋍꁘꋍꁘꃅꃶꐚꃅꃀꌠꀨꎹꄜꏂꀧꎆꄻꊨꏦꎆꃆꂒꉻꇬꊐꌠꃅꇫꑟ，ꅉꃀꃀꌠꀨꎹꎆꇩꏤꑭꊂꋍꃱꃅꄐꏤꌠꃅꇫꑟ，ꋍꑞꋍꉹꊿꃅꉜꄻꈴꌠꐧꋦꏦꀧꊌꐨꊨꄅꉺꏦꌋꆀꎃꐚꃅꋊꄻꌠꉺꏦꀞꄻ。ꐧꋦꏦꀧꎆꀨꎆꏓꇀꅉꍔꒉ，ꐧꋦꏦꀧꎆꀨꎆꇱꀰꏢꄹꏦꄻ，ꎆꀨꀋꁮꀋꑍꌠꌋꆀꁌꀧꁌꎆꌠꄉꀧ。ꐧꋦꈭꋏꇇꀨꉻꑫꄻꐛꒆ，ꐧꋦꈲꏣꄹꏦꄻꐛꒆ，ꂄꃅꎔꏿꌤꑘꀻꎆꌠꊋꁈꄏ，ꀨꎹꃅꅍꁆꄻꌤꃅꋒ。ꃷꎏꄻꇱꌠꌋꆀꍔꃚꏦꀧꌠꐮꐊꐙꌠꀀꑳꄹꏦꄻ，ꏦꀧꐨꀀꑳꋈꄻꌋꆀꏲꂠꌠꊋꀥꇱ，ꑱꈐꊋꋠꌠꅉꀨꈉꇖꌠꇎꈴ。ꀋꎪꃅꌺꃰꌋꅪꐥꊯꌠꇩꏤꅉꀨꏱꁈꌭꈬꇬꎷ，ꌋꅪꀊꉘꏦꊒꌅꈌꈲꁧꏦꀧ。ꏣꀋꑌꃅꊻꂷꈎꄜꀉꆹꈴꌠꊜꄻ，ꊋꀉꒉꃅꇤꄉꈎꄜꀉꆹꌠꁧꃤꃅꌤꑘꌋꆀꅐꑘꀻꎆ。ꊾꄣꐧꋦꏦꀧꌋꆀꁧꃤꃅꉻꑫꄻꐛꒆ，ꃶꐚꃅꊾꄣꌅꈌꈲꁧꏦꀧ。ꐧꋦꏦꀧꀞꄻꏲꂠꏦꉻꄻꐛꒆ，ꀊꅰꃅꉹꁌꃅꌒꐳꌠꁧꃤꃅꉻꑫꀞꄻ。
（ꉬ）ꏓꂱꇭꀧꂄꐨꐕꀊꂥ。ꇭꀧꂄꌠꆹꃰꊿꐊꑷꃅꀻꎆꌠꊥꎆꌠꎂꀕꇖꐨꉬ。ꏓꂱꇭꀧꂄꐨꁧꃤꃅꌠꃅꍜꌭꈬꌶ，ꄴꏮꌠꌌꀨꄉ、ꂿꑘꁡꇤꌌꀨꄉ、ꍏꑱꑭꑱꋓꄉꉃꌠꃅ，ꅉꀨꄉꀧ、ꅉꂫꊐꌠꇨꈴ、ꉺꏦꋈꄻꈉꐨꇬꈴꄉ，ꀨꄉꆅꉚꏦꀧ、ꆅꉚꁧꃤꃅ、ꋍꏅꁦꎴꆄꄻ、ꁬꋌꆰꋌꇲꁵ、ꍞꊟꏲꂠꏦꀧꏓꇱꄺꀱꌠꄹꎆ，ꇩꏤꃰꊿꇭꀧꂄꐨꏱꁈꄻꐛꒆ，ꉹꁌꎁꃅꋬꂻꇿꋌꐥꈝꐮꁌꆓꌠꋍꏅꁦꎴꆄꄻꌋꆀꅉꀨꆅꉚꁧꃤꃅꌠꇲꄻ。ꏓꂱꋍꏅꃅꆅꉚꄉꀧꉻꑫꄻꐛꒆ，ꆄꈻꀉꒉꌠꏦꀧꌠꌋꆀꈭꋏꇇꀨꉺꏦꄻ，ꋋꇅꃅꅐꇁꌠꋍꏅꁦꎴꆄꄻꌤꅐꌠꃛꊝꌋꆀꆄꈻꀉꒉꌠꄴꏮꉺꏦꄻꐛꒆ。ꅉꀨꁬꋌꆰꋌꐥꇐꄹꏦꈫꈈ。ꂿꑘꁡꇤꌕꊐꆅꉚꁦꎴꆄꄻꁧꃤꃅꈄꏍꌋꆀꇓꈓꋥꁕꄻꐛꒆ，ꃹꅼꃅꇩꏤꀞꄻꌠꑱꑼꄺꀱ，ꐧꋦꇬꑱꑼꀞꄻꌠꊋꊡ。ꍏꒀꆅꉁꁬꋌꌋꆀꊿꋅꆅꉁꁬꋌꌤꑘꊋꄏꄉꀻꎆ。ꆅꉚꁦꎴꆄꄻꊿꁥꌠꁧꃤꃅꄐꐨꐕꀊꂥ，ꆅꉃꆄꄻꑌꇐꑲꇐꂘꄻꌠꊋꀥꇱ。ꋠꇐꅝꒉꁬꋌꆰꋌꉮꀋꐥꌠꍞꊟꏲꂠꏦꉻꉺꏦꄺꀱꌋꆀꄻꐛꒆ。ꇩꉂꁦꎴꆄꄻꃅꈧꌠꍔꂵ，ꏓꂱꇭꀧꉌꂵꉾꃪꌠꊥꎆ。ꎖꁨꒆꉘꌠꇩꏤꏱꁈꅉꀨꌭꈬꇬꎷ，ꊻꂷꒆꅐꊇꁧꐕꀊꂥ，ꋍꁘꋍꁘꃅꏱꁈꄻꐛꒆ，ꊻꂷꀊꉗꃅꐽꊯꃅꀻꎆꌠꊥꎆ。
（ꃘ）ꐧꋦꏲꂠꌠꊋꀥꇱꌋꆀꏀꀺ。ꐧꋦꏲꂠꇬꈆꑪꈴꐨꐕꀊꂥ，ꀋꎪꃅꐧꋦꏲꂠꏦꃤ、ꏦꉻꉺꏦ、ꄐꐨ、ꌧꊿꁥꌠꌋꆀꈴꌗꈴꋈꄻꌠꊋꀥꇱ。ꍔꃚꃄꄻꌠꋍꏅꁧꃤꃅꌠꃄꄟꄻꃪ，ꅉꂫꊐꌠꐧꋦꏲꂠꌠꌋꆀꁧꃤꃅꉻꑫꋈꄻꌠꊋꀥꇱ，ꇓꈓꇓꉈꋥꁕꁧꃤꃅꄐꐨꀥꇱ，ꎆꏂꑘꌤꑘꌤꃅꅉ、ꏓꂱꏓꉻꐧꋦꏲꂠꌠꌋꆀꁧꃤꃅꌠꃅꎁꀉꇨꈴ，ꐧꋦꎀꍹꄐꇺꌊꑴꀋꅑꃅꊱꁨꃅꀻꎆ，ꋒꐯꋒꃅꉹꁌꐧꋦꏲꂠꈽꌠꅉꃀꂿꄐꇤꅐꇁ。ꒈꇁꊻꂷꌋꆀꐋꀋꌡꊿꁥꌠꏲꂠꁧꃤꃅꌠꄻꐛꒆꌋꆀꏀꀺ。ꎃꊒꃅꏓꂱꈏꇓꐮꄙꐨꂥꀘ，ꄈꑭꊂꌋꆀꍔꃚꀨꏲꌠꉹꁌꌅꐨꈲꏣꀧꌋꃅꌠꉺꏦꄻꄉꄷꀋꁧꄻꐛꒆ，ꅲꇫꅇꎹꄹꏦꄻꐛꒆ，ꏓꂱꉉꄮ、ꏲꑘꉉꄮ、ꏦꌬꉉꄮꐊꇙꌤꃅꉻꑫꄻꐛꒆ，ꉹꁌꑗꇖꉉꈻ、ꈲꏣꋮꄮ、ꌅꐨꈲꏣꏦꀧꈜꋊꍬꑴꀋꅑꎻ。ꀉꒉꀊꂾꏱꁈꏤꇽꐧꋦꎍꐽꃨꆰꄤꎖꉺꏦꄻꄉꄷꀋꁧꄻꐛꒆ。ꋍꏅꋬꂻꉻꑫꌋꆀꎆꏂꑘꋬꂻꒃꅐꅉꃀꋈꄻꌠꇨꈴ，ꋬꂻꌤꀉꒉꀊꂾꌠꅐꌠꏢꇈ。ꄈꆹꍔꃔꌤꃅꌠꏭꏲꂠꌠꊋꀥꇱꌋꆀꄻꉾ，ꍔꃔꊿꁥꌠꂘꄻꌠꊋꀥꇱ，ꃶꐚꃅꍏꇩꐛꐨꐧꋦꉪꏦꌤꑘꋈꄻꊿ、ꐏꁇꊿꐩꋊꃅꎁꄻꆹꅜꄉꃅꎼꇁ。ꃹꅼꃅꋬꂻꋈꄻ，ꏓꄜꃅꐙꌠꐧꋦꋬꂻꏱꂡꄴꍅꉻꑫꄻꐛꒆ，ꏦꌬꅉꀨꏦꀧꌠꀉꇨꈴ，ꏦꃤꈴꄉꏦꐆꑽꃤꃅꈧꌠꄴꏮꌋꆀꅓꀞ，ꏓꂱꀑꇬꁨꇐꋬꂻꌠꏦꀧ。ꇩꏤꋬꂻꄐꇐꏤꁈꌋꆀꌤꃅꉺꏦꄻꐛꒆ，ꁮꐚꊋꃤꁷꐞ、ꃸꆽ、ꁏꆷꃅꈧꇁꌠꏭꀊꂥꃅꋓꉪꁨꌋꆀꀉꇨꃅꄴꏮ，ꇩꏤꋬꂻꐨꄉꀧ。
ꄈꑭꊂꇩꏤꑭꊂꏓꂱꐯꇯꄓꄉꃄꄻꑲꆏ，ꀋꎪꃅꐧꋦꐮꄮꌠꊿꃅꐯꇯꆽꎍꐨꐥ、ꐧꋦꐮꄮꌠꊿꃅꐯꇯꈲꌠꐛꉻꀉꇙꀕꌠꀹꄻꅐꇁꄎꌠꉬ。
ꉆ、ꊋꀉꒉꃅꇤꄉꒆꉻꌧꑳꋈꄻꌠꄹꎆ
ꒆꉻꌧꑳꋈꄻꌠꆹ，ꏓꂱꐥꌒꄻꌒꌠꇬꑌꑲꎍ、ꊿꋅꋌꊂꀊꉗꃅꄐꎖꌠꇬꃆꂮꐥꌠꉬ。ꅐꀦꏢꑲꐨꀊꅰꃅꃛꇁ、ꋦꈭꍍꆀꃙꇨ、ꒆꉻꉻꑫꎞꐈꌠꃅꒊꃅꇁꆼꇨꌠꊝꇬ，ꀋꎪꃅꋌꐛꋌꐙꁌꒉ、ꋌꐛꋌꐙꇬꐊ、ꋌꐛꋌꐙꀧꌋꃅꌠꒆꉻꌧꑳꉪꉻꑌꄉ，ꒆꉻꌧꑳꋈꄻꌠꄸꉆꈉꄞꅐꅉꇬꄉ，ꌌꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠ꒔ꑞ꒔ꁆꏯꌋꆀꈴꎁꈧꌠꇬꇱꄉ，ꊋꇤꄉꎔꃨꌠꍏꇩꋈꄻ，ꍏꉸꊿꋅꀋꆏꃅꀻꎆꌠꃅꇫꑟ。
ꀋꎪꃅꅐꀦꏎꏸꌠꌋꆀꋦꈭꀧꌋꃅꌠꅉꀨꇩꏤꏱꁈꌭꈬꇬꎷ，ꀋꎪꃅꏎꏸꌠꌌꂴꄉ、ꀧꌋꃅꌠꌌꂴꄉ、ꋌꐛꃅꀱꐛꅉꐛꌠꌌꀨꇬꄉꌠꌐꏦꌭꈬꇬꎷ，ꊋꇤꄉꀊꃴꃅꀻꎆ、ꀰꏮꏿꃅꀻꎆ、ꌋꀁꂥꃅꀻꎆꌠꄹꎆ，ꅐꀦꏎꏸꌠꌋꆀꋦꈭꀧꌋꃅꌠꈥꈉꐛꄟ、ꅐꑘꐛꉻ、ꒃꅐꄟ、ꐤꄟꐛꇁ，ꇁꀦꇬꄉꒆꉻꋦꈭꋍꑍꋍꉙꃅꄸꇁꌠꐛꄟꆹꏮ，ꏓꂱꎁꃅꒃꅐꐥꐨꋦꈭꉾꃪꌠꀹꄻ，ꋧꃅꑭꊂꒆꉻꋬꂻꌠꎁꃅꑆꊋꅐꌞ。
（ꋍ）ꇩꏤꃄꅉꈥꈉꀖꁉꐛꉻꄻꃪ。ꇩꏤꃄꅉꆹꒆꉻꌧꑳꋈꄻꌠꈥꈉꊐꄜꉬ，ꀋꎪꃅꇩꏤꃄꅉꋍꍈꋑꀋꋒꁌꒉꌶ。ꊻꂷꅐꀦꋦꈭꐮꆽꏣ、ꎆꏣꐧꋦꒆꉻꇿꋌꈲꏣꐮꐊꐙꌠꏥꏦꇬꈴꄉ，ꀉꇨꃅꀖꁉꐨꋎꍅ，ꈥꈉꐛꉻꋊꍬ，ꒃꅐꈥꈉꏓꋧꇿꋌꀉꒉ、ꐥꐨꈥꈉꀀꌒꄉꄐ、ꒆꉻꈥꈉꁧꎔꒉꎔꌠꊥꎆ，ꋌꐛꋌꐙꄺꀱꅉꀉꒉꃅꊏꄉ，ꂿ꒧ꃄꅉꁨꌠꀉꑌꃅꊏꄉ，ꃅꑆꃴꇉꀕ、ꃄꅉꃴꆚꀕ、ꒉꎔꐝꇅꀕꌠꋦꁍꊏꌺꇖꊂꋊꁵꇈ。ꐳꃅꀨꄜꄐꊋꐛꅉꄐꁈꃄꌬ，ꃅꄷꈁꐥꌠꏦꇨꃅꀨꄜꄐꊋꐛꅉꇬꈴꄉꀻꎆꊨꄅꌠꄹꇙ，ꈆꑪꋭꋽꃅꐙꌠꇓꈓꈴꐛꉻ、ꂿꑘꀻꎆꐛꉻ、ꒆꉻꋬꂻꐛꉻꋈꄻ。ꎿꃀꅐꀦꀖꁉꊋꃤꉀꐕ，ꎿꃀꎆꏣꀻꎆ，ꎿꃀꒆꉻꋦꈭꀧꌋꃅ，ꀉꇨꃅꇩꏤꎿꃀꌅꈌꈲꁧꐏꁇ，ꎿꃀꇩꏤꀉꇨꌠꋈꄻ。
（ꑍ）ꐊꑷꃅꅐꀦꏎꏸꌠꊥꎆ。ꅐꀦꏎꏸꌠꆹꒆꉻꋦꈭꀧꌋꃅꌠꊇꅉꏱꁈꉬ。ꅐꀦꏎꏸꏓꋧꄉꌫꄻ，ꅐꀦꌫꄟꊇꅉꃅꆹꏮꌠꄹꇙ，ꊋꀥꇱꄉꏎꏸꈴꌠꏱꄻ，ꀉꒉꃅꅐꀦ、ꀆꐒ、ꃄꅉꃸꅐꐨꊨꒊ，ꌫꄻꅐꐨꌋꆀꇿꋌꈲꁧꉀꐕ。ꅐꀦꒃꅐꌠꌋꆀꌬꈧꇝꂱꌠꄹꇙ，ꅐꀦꌬꈧꌠꈁꉬꃷꁨꋎꍅ，ꊋꀥꇱꄉꊋꏏꃹꊨ，ꊋꏏꌋꀁꂥꌠꅐꑘꌋꆀꅐꀦꀊꏀ、ꀱꅐꇁꉆꌠꊋꀦꀻꎆꌠꊋꁈꄏ，ꇩꏤꊋꀦꋬꂻꌠꄉꀧ。ꒉꇁꀦꃅꄷꀧꌋꃅꌠꌋꆀꒉꌬꈁꉬꃷꁨꏲꂠꌠꊋꀥꇱ，ꒉꌫꀱꌠꄹꎆ，ꒉꏏꉹꌠꐧꋦꋈꄻ。ꏦꇨꃅꋠꃅꀧꌋꃅꌠꑟꅪꐏꀧ，ꏦꇨꃅꃄꅉꌬꍩꏱꏢ。ꊋꀥꇱꄉꇑꇐꅐꀦꎹꎖ、ꀧꌋꃅ、ꋭꋽꃅꀖꁉ。ꀰꏮꎆꏣꀻꎆ，ꒃꅐ、ꒈꇁ、ꌬꈧꈴꎁꃷꁨꊨꒊꈴ、ꌫꀱ、ꅐꀦꈴꌠꊥꎆ。
（ꌕ）ꊋꀥꇱꄉꋌꐛꒆꉻꉻꑫꌋꆀꋦꈭꀧꌋꃅ。ꒆꉻꋦꈭꉾꃪꌠꆹꊿꌋꆀꐧꋦꐪꊛꄉꀻꎆꌠꊇꅉꅉꃀꉬ。ꒆꉻꄺꀱꋉꃆꀉꒉꀊꂾꌠꃄꌬ，ꒆꉻꅐꇐꒃꅐꊋꃤꀉꇨꇱ，ꃅꈣꂤꏂꐛꈴ、ꇓꎓꐛꈴꒈꇷꃪꇷꌠꏓꇱꏱꄻꌠꄹꎆ，ꌩꏪ、ꎿ、ꒉꊩꃅꊂꍔꒉ，ꒆꇐꀉꑌꐨꀧꌋꃅ。ꐳꃅꈲꒉꋈꄻ，ꇓꈓꇓꉈꒈꅐꄴꏮꃅꇨꄙꃅꆓꎵꊋꃤꀉꇨꇱ。ꊋꀥꇱꄉꉮꄵꉮꊨꉻꑫꋈꄻ，ꃅꑊ、ꃄꊈ、ꃄꇙꉮꄻꄴꏮꊋꃤꉀꐕ。ꄴꏮꌠꌌꀨꇬꄉ、ꏓꇱꃅꏱꄻꌠꌭꈬꇬꎷ，ꉹꁌꇭꀧꂄꌠꏭꉮꄻꌠꋦꈭꌤꃆꑓꅐꎑꌠꂥꀘꌠꌌꀨꇬꄉ，ꀆꐒ、ꃅꌗ、ꊗꑗꑠꍍꆀꌠꄴꏲꌠꀉꇨꈴ。ꀋꎪꃅꐮꐊꐙꑴꇬꐯꀋꌡꌠꆽꎍꏥꏦ、ꀋꈐꀋꉈꏥꏦ、ꂱꑱꊨꏦꊋꃤꏥꏦꌭꈬꇬꎷꃅꄉ，ꇩꏹꐧꋦꐊꄉꏣꀋꑌꃅꋧꃅꑭꊂꃄꀑꃅꌗꐛꐈꌠꏭꊝ。
（ꇖ）ꊋꀥꇱꄉꒆꉻꌧꑳꄹꏦꋈꄻ。ꒆꉻꋦꈭꀧꌋꃅꇬꀋꎪꃅꄹꏦꇬꊫꁱꄻꅐ。ꅐꀦꌫꃹ、ꋦꈭꉮꄻ、ꒆꉻꈲꊌꐨꌌꎆꏣꐧꋦꀻꎆꉉꍣꉻꑫꇬꇱ，ꒆꉻꌧꑳꇖꐨꄜꅐꇁꌠꑞꅉꁻꌐꉻꑫ、ꍤꎖꏡꁈ、ꈁꁠꁵꅓꀞꉺꏦꄻꐛ。ꇩꏤꃄꅉꈥꈉꀖꁉꀧꌋꃅꄹꏦꄻꐛ，ꏦꇨꇊꏦꇨꌠꋠꃅꀧꌋꃅꄹꏦ、ꒉꅐꀦꏱꄻꄹꏦ、ꋦꈭꀧꌋꃅꄹꏦꄻꐛꒆ。ꃹꅼꃅꅐꀦꃅꐙꌠꅐꇐꁌꏤꌋꆀꇗꏸꁌꄺꀱ，ꃷꎏꇲꈉꌠꌋꆀꅐꀦꀋꇎꐨꉜꅐꇁ、ꒆꉻꁌꐨꌋꆀꋊꇢꎆꁵꌠꄜꅐꇁꌠꅐꀦꁌꁵꄉꌬꌠꄹꏦꌋꆀꒆꉻꁵꊒꄹꏦꄻꐛ。ꏣꀋꑌꃅꊋꏏꃷꁨ、ꌋꋊꃑꌅꈌ、ꍍꇐꋊꃑꌅꈌ、ꒉꌅꈌꃼꇇꃅꉚꅉꍔꆙ。ꊋꀥꇱꄉꋦꈭꍞꏲ，ꒆꉻꋦꈭꀧꌋꃅꅑꑘꎹꄹꏦꌋꆀꋦꈭꉮꄻꀵꊒꄹꏦꄻꐛꒆ。ꊋꀥꇱꄉꒆꉻꌧꑳꄜꉺꉙꂘ，ꉹꁌꐯꇯꏎꏸꉪꉻ、ꋦꈭꀧꌋꃅꉪꉻ、ꒆꉻꉪꉻꀉꇨꇱ，ꋭꋽꃅꌬꈧꌠꐧꋦꃅꀹꄻꐛꄉ，ꒆꉻꋦꈭꉁꅉꌋꃅꌠꃅꀹꉾꃪꌠꄻ。
ꉪꊇꆹꀋꎪꃅꀊꅰꃅꑴꐚꃅꋌꐛꋌꐙꁌꒉ，ꀊꅰꃅꏣꀋꑌꃅꒆꉻꀧꌋꃅꄉ，ꊋꇤꄉꐧꋦꉪꏦꒆꉻꌧꑳꃅꋊꀊꏀꌠꉜꄉꆹꌶ。
ꈬ、ꐳꃅꇩꐏꌋꆀꂽꐛꏀꈴꌠꄹꎆ
ꉪꇩꏤꇩꏹꉆꈉꌋꆀꐯꋭ、ꇩꏤꋬꂻꌋꆀꀻꎆꈲꏣꇬꄉꄐꌠꇩꐏꈫꈈꌠꌋꆀꂽꀉꇨꌠꋈꄻꌠꆹ，ꉪꇩꏤꐛꏀꈴꋈꄻꌠꂿꃆꀋꉬꀋꉆꌠꉬ。ꉪꇩꏤꂾꎍꌠꐥꐨꋬꂻꌤꃆꌋꆀꀻꎆꋬꂻꌤꃆ、ꋊꃅꋬꂻꇷꇋꌠꌋꆀꋊꃅꌠꀋꉬꌠꋬꂻꇷꇋꌠꐯꏍꄉꐥꎍ，ꇩꐏꌋꆀꂽꐛꏀꈴꋈꄻꌠꏭꀉꒉꃅꀻꎆꌠꇖꐨꐥ。ꀋꎪꃅꇩꏤꈯꄜꋬꂻꈉꐨꌌꄐꇺꅍꃅꄉ，ꎆꏣꋈꄻꌠꌋꆀꇩꐏꋈꄻꌠꏓꈴꇲꈴ，ꇩꐏꌋꆀꂽꐛꏀꈴꋈꄻꌠ“ꌕꁘꈴ”ꄐꇐꏤꁈꉪꉻꇬꈴꄉ，ꃛꊸꃅꏸꏧꈴꌋꆀꈴꌗꈴꋈꄻꌠꐩꋊꂿꃆꑍꐘꌠꃅꐛ，ꄾꌦꋩꃅꑍꄙꆀꑍꊏꈎꑟꇬꆏꀑꐱꃅꏸꏧꈴꌠꃅꇫꑟ，ꈴꌗꈴꋈꄻꌠꁨꎆꐨꀉꒉꃅꊌꎻ。
ꇩꐏꌋꆀꂽꐛꏀꈴꋈꄻꇬ，ꀋꎪꃅꃀꊱꄏꂽꌤꉪꇐ、ꄓꑦꀻꃅꋊꀊꏀꊬꌠꇬꂽꋈꄻꉪꇐ、ꏦꊱꂱꇩꐏꌋꆀꂽꋈꄻꉪꇐ、ꄈꃅꒊꃅꇁꀊꏀꌠꇂꃴꇩꐏꌋꆀꂽꋈꄻꌠꉪꇐꌌꄐꇺꅍꃅꄉꌶ。ꇩꏤꀻꎆꌠꄐꇐꏤꁈꌋꆀꋬꂻꄐꇐꏤꁈꇖꐨꀊꏀꌠꇬꄉꄐ，ꑓꏮꐊꑷꃅꃅꋊꀊꏀꋎꌠꇬꀊꏀꊬꌠꂽꐩꋊꂿꃆꉜ，ꃅꋊꀊꏀꊬꌠꇬꏣꀋꑌꃅꂽꌤꄐꇐꏤꁈꐏꄙꌠꃄꌬ，ꃅꋊꐊꄉꁨꆹꄉꂽꌤꄐꇐꏤꁈꄐꇺꌠꊋꀥꇱ，ꀊꂥꃅꎿꃀ、ꃅꈯ、ꈄꏍꈥꈉꋬꂻꏭꉈꇬ，ꏣꀋꑌꃅꄮꐽꄮꂽꌤꊋꃤꌬꌠꄐꏤ，ꀋꆏꃅꂽꌤꉈꈽꄐꏤꌠꍔꆙꌋꆀꌌꃹꅼꈴ，ꈴꌗꈴꇎꏦꇂꃴ꒔ꈨꇬꌉꈿꇬꌉꊋꄎꌠꌉꈿꊋꃤꌌꈯꄜꃅꄉꀉꑌꑵꃅꐙꌠꂽꌤꂿꃆꊋꃤꉀꐕ。
ꀋꎪꃅꇩꐏꌋꆀꂽꋈꄻꌠꈆꑪꃅꀻꎆꌠꌌꀨꄜꃅꄉꇬꎷ，ꐳꃅꌉꈿꊋꃤꐛꇁꇶꏦꆹꏮꌠꌌꑟꀨꃅꄉ，ꐊꑷꃅꂽꇝꂱꈴꐛꏀꈴꑌꐚꈴꋈꄻꌠꊋꀥꇱ。ꋍꍈꑌꀋꇙꃅꄈꂽꏭꀋꎪꃅꏲꂠꌠꌭꈬꇬꎷ，ꀋꄝꀋꏯꃅꍏꇩꐛꐨꐧꋦꉪꏦꌧꇗꉻꑫꌊꂽꊭꄎꌠꌭꈬꇬꎷ，ꀋꆏꃅꀋꃋꋋꄮꇝꂱꂽꈯꄜꁌꐨꉜꐨꁰꍋꇬꎷ，ꊋꇤꄉꂽꌤꁱꀕꂴꅑꌠꀻꎆ，ꐥꍂꃅꏓꂱꂽ、ꊇꅉ、ꐛꐨ、ꃅꀹꐥꎻꄉꇬꎷ。ꀋꇙꀋꑐꃅꈴꌗꈴꌠꌌꂽꐛꏀꈴꋈꄻꌠꀻꎆꃅꍜꃅꄉꇬꎷ，ꈴꌗꈴꋈꄻꌠꐳꃅꀻꎆꌠꄹꇙ。ꊋꀥꇱꄉꇮꇐꀊꏀꀊꂥꌠꇇꌭꉁꈾꋈꄻ，ꐊꑷꃅꐛꏀꊂꇲꋈꄻꌠꐳꀥꇱ，ꂽꌤꌧꊿꊇꁧꀊꂥꌠꀉꒉꁥꂘꄻꅐꇁ，ꃹꅼꃅꈴꌗꈴꌠꇎꏦꇂꃴꂽꌤꁰꍋꌠꍔꆙ，ꈴꌗꉻꑫꌌꅉꀨꃅꄉꌠꉻꑫꌉꈿꊋꃤꀥꇱ。ꊋꀉꒉꃅꏦꃤꈴꄉꂽꏲ、ꏦꇨꃅꂽꏲꊋꃤꀥꇱ，ꑌꐚꈴꋈꄻꌠꑞꅉꀊꅰꀊꂥꃅꀻꎆꌠꄹꇙ。
ꃛꊸꃅꋧꃅꂽꌤꀊꏀꇝꂱꌠꐳꃅꀻꎆꌠꒈꂃꇬꐊꄉ，ꏣꀋꑌꃅꋭꋽꃅꇩꐏꌋꆀꂽꄺꀱꌠꃅ，ꍏꇩꐛꐨꂽꌤꐛꐈꌠꃹꅼꃅꀻꎆꌠꄹꇙ。ꀋꎪꃅꂽꌤꌧꇗꏀꀺꀻꎆꌠꌌꂴꅑꄉꄐꇺꇬꎷ，ꊋꇤꄉꇩꐏꈆꑪꇮꇐꇮꑘꑴꌅꃅꏀꀺꌠꊋꃤꉀꐕ，ꃹꅼꃅꂽꎀꍹꐛꄟꐛꏀꈴꌠꄹꎆ，ꍏꇩꐛꐨꐛꏀꂽꌤꊋꃤꉻꑫꄻꐛ。
ꀋꎪꃅꍏꇩꐛꐨꂽꌋꆀꏓꂱꏓꐊꇶꏦꀻꎆꈝꃀꍬꇬꎷ，ꀋꎪꃅꇩꏤꌣꈚꌠꌋꆀꂽꇨꌠꏓꋍꃱꃅꇬꎷ，ꂽꌋꆀꏓꂱꏓꐊꇶꏦꀻꎆꄐꇐꏤꁈꄐꎖ、ꏦꉻꉺꏦꋈꄻ、ꏦꇗꋈꄻꌠꊋꀥꇱ。ꐳꃅꇇꌭꌌꌠꏢꍤꊋꃤꐛꏀꈴꌠꋈꄻ。ꇩꐏꄖꄑꌠꌋꆀꊭꄎꊋꃤꋈꄻꊇꁧꉀꐕ。ꂽꌋꆀꍔꃚꂽꌋꆀꏓꂱꐮꋯꑌꌠꄻꈫꈈꌋꆀꀻꎆ。
ꍏꇩꆹꐏꄙꃅꐙꌠꇩꐏꏱꁈꌬ，ꊋꀥꇱꄉꇩꐏꋈꄻꌠꁻꌐꆹꇩꏤꌅꀨ、ꋬꂻ、ꏲꄸꐛꒆꌠꐏꁇ，ꇩꏤꄮꐽꃅꀻꎆꌠꏦꀧꂿꄷꌠꉬ。ꍏꇩꂽꆹꈍꄮꑌꋧꃅꄮꐽꌠꀧꌋꃅꌠꊋꃤꀉꇨꀋꎪꌠꉬ，ꂴꌟꃅꇩꏤꈁꐥꌠꌋꆀꐯꇯꊋꀥꇱꄉꂽꌤꇷꃅ、ꂽꌤꐮꉌꒊꌠꌌꁨꎆ，ꃅꄷꌋꆀꇩꏹꋬꂻꌤꃆꇬꐊꈽ，ꇩꏹꍔꍞꌋꆀꋬꂻꁁꏯꏣꀋꑌꂿꄐꋊꇤꅐꇁ。
ꊰ、ꀉꇨꃅ“ꋍꇩꑍꏦ”ꃄꄻꌋꆀꁍꇩꏓꋍꃱꃅꌠꄹꆷ
ꑣꇤ、ꉪꂱꀱꁍꇩꐊꇁꈭꐨ，ꁍꇩꅔꈐꂱꎆꅑꐨꌋꆀꐮꁥꇱ、ꐯꇯꀻꎆꌠꈝꃀꀊꐯꑠꏢꈴꇁꀐ，“ꋍꇩꑍꏦ”ꃄꄻꌠꆹꋧꃅꃅꇫꉜꂂꌠꊋꐛꐨꐥꀐ。ꍏꑷꍔꃚꑣꇤ、ꉪꂱꏭꃄꌬꌠꋍꑞꋍꐘꌐꏦꏱꁈꆹ，ꁧꀦꉪꃆꁢꊧꆏꇩꏤꌅꀨ、ꋬꂻ、ꀻꎆꌠꈲꁧꀧꌋꃅ，ꑣꇤ、ꉪꂱꀊꉗꃅꌄꆣꑘꒃꌠꄉꀧꌠ。ꐊꑷꃅꊨꄅꃅ“ꋍꇩꑍꏦ”、“ꑣꇤꊿꑣꇤꏲ”、“ꉪꂱꊿꉪꂱꏲ”、ꀊꂥꃅꊨꏦꏲꌠꌐꏦꃄꌬ，ꀋꎪꃅꋍꇩꏥꏦꌋꆀꄹꏦꑍꏢꌠꐯꀋꌡꅉꁌꒉ、ꍏꑷꌅꈌꀧꌋꃅꌠꌋꆀꇣꋲꏱꅉꐎꀊꂥꃅꊨꏦꏲꌠꌅꈌꏦꀧ、ꁍꇩꅔꈐꀉꇨꌠꊁꊫꅉꂿꄐꌋꆀꇤꉪꑴꅉꋓꅔꊋꃤꊜꋽꃅꏓꐮꐊꎼꇁꌠꐕꀊꂥꇬꎷ，ꈍꄮꇬꑌꎎꒉꀋꉆ。
ꍏꑷꍔꃚꅱꈯꃅꅉꀨꏦꃤꇬꈴꄉꌤꀞ，ꅉꀨꏦꃤꃄꌬꌠꌋꆀꐮꃆꂮꐥꌠꄹꏦꌋꆀꉺꏦꄻꐛꒆ，ꀋꎪꃅꇣꋲꏱꅉꐎꏲꑘꏲꌋꌋꆀꍔꃚꏦꃤꇬꈴꄉꏲꂠꌠꄏꐓ，ꑣꇤ、ꉪꂱꋍꑞꋋꁁꏯꊿꂒꋦꌠꄐꇺꌊꊋꃤꏓꋧꄉꎆꏣꀻꎆ、ꃶꐚꇿꋌꐥꃅꉹꁌꐥꐨꄻꃪ、ꋍꁘꋍꁘꃅꋯꁦꌠꄹꎆ、ꐯꏆꐯꈲꐮꄮꌠꊥꎆ，ꅔꈐꌋꆀꑣꇤ、ꉪꂱꎆꏣꃼꇇꐮꃆꂮꃹꅼꈴ，ꋍꑞꋋꁁꏯꐮꑌꑲꇷꃅꌠꄹꎆ，ꑣꇤꃺꑌ、ꉪꂱꃺꑌꇩꉂꑣꇤꉂ、ꇩꉂꉪꂱꉂꌠꁈꁧꇂꃴꄉꀉꇨꃅꐮꋯꑌꌠꊥꎆ，ꉇꉻꊋꃤꑣꇤꉪꂱꌤꃆꇬꈌꄀꇇꏿꌠꄴꏮꌋꆀꏢꇋ。
ꉪꊇꑇꃅꑇꌠꆏ，ꑣꇤꃺꑌ、ꉪꂱꃺꑌꆹꀑꁮꃅ、ꄐꅍꐥꃅ、ꏡꁈꐥꃅꇣꋲꏱꅉꐎꏲꂠꋒ、ꋈꄻꉾꄎꌠꀉꄂꀋꉬꃅ，ꀋꎪꃅꇩꏤꌤꃆꇬꑌꏣꀋꑌꂿꄐꇤꅐꇁꄎꌠꉬ，ꇩꏤꑭꊂꊿꋅꈁꐥꌠꏓꂱꌋꆀꐯꇯꍏꇩꊿꐥꒉꑊꋦꌠꌋꆀꀑꑊꁤꇅꀕꌠꃅꐥꎂꀕ。
ꄠꃪꌤꃆꂥꀘ、ꁍꇩꐛꒆꃅꏓꋍꃱꃅꌠꃅꇬꅜꌠꆹ，ꈭꋍꈜꇈꀋꉆꌠꐩꋊꈴꎁꉬ。ꄮꐽꋍꃱꃅꌠꆹꄠꃪꃺꑌꄚꈏꐊꌠꍏꉸꊿꋅꁧꀦꈲꁧꇬꄐꊒꐯꄐꊒꌠ。ꄮꐽꋍꃱꃅꌠꃅꇫꑟꂿꄷꇬꆹꂴꉘꃀꆏꎿꋮꑍꁁꏯꐮꃆꂮꄮꐽꃅꀻꎆꎻꌶ。ꀋꎪꃅ“ꄮꐽꋍꃱꃅ、ꋍꇩꑍꏦ”ꌐꏦꌭꈬꇬꎷ，ꎿꋮꑍꁁꏯꐮꃆꂮꀻꎆꌠꌭꈬꇬꎷ、ꁍꇩꄮꐽꋍꃱꃅꈴꎁꉆꐘꌠꉪꐨꄹꎆ，ꐊꑷꃅꎿꋮꑍꁁꏯꐮꃆꂮꄮꐽꀻꎆꉪꇐꀋꂿꑘꌠꃄꌬ，ꎿꋮꑍꁁꏯꐮꃆꂮꄮꐽꀻꎆꌠꍔꍞ、ꎆꏣ、ꁱꀕ、ꐧꋦꅉꃀꈫꈈꌋꆀꃹꅼꈴ，ꄮꐽꋍꃱꃅꌠꎁꃅꀊꅰꇎꋒꌠꇎꏦꀹꄻꎼꇁ。
ꉪꊇꆹꈍꄮꑌꍏꇩꋍꂷꌠꏥꏦꌭꈬꇬꎷ。ꅔꈐꌋꆀꄠꃪꏓꋍꃱꀋꃅꑴꌦꑴꇬ，ꄚꎿꋮꑍꁁꏯꆹꍏꇩꋍꂷꉬꌠꌤꃶꐚꌠꄺꀱꀋꋻ，ꇩꏤꏲꄸꌋꆀꌅꀨꁷꇽꀋꋻ、ꄝꁷꇽꎽꑌꀋꉆꌠꉬ。ꎿꋮꑍꁁꏯꐯꇯꏤꁨꐥꃅ“ꄠꃪꄂꋦ”ꌠꏭꁏ、“ꈬꑍꉜꐨꐮꐊ”ꌠꐯꇯꐥꌠꉆꈉꌭꈬ，ꍏꇩꋍꂷꉬꌠꇳꏦꀧꌋꃅꌠꐯꇯꅉꐚꌠꌌꁨꎆ，ꅉꃀꋋꍈꀂꏽꄉꐊꎹꋲꊏꄡꑟ。ꄠꃪꍔꄈꑞꂷꉬꄿꂿ，“ꄠꃪꄂꋦ”ꄷꀋꉉ、ꍏꇩꋍꂷꉬꌠꏚꍆꄷꑲꆏ，ꉪꊇꆹꐯꇯꋀꊇꌋꆀꐯꎻꈴ、ꐯꉇ、ꐮꇷꃅꏾꌠ。
ꉪꊇꆹꐪꊛꄉꎿꋮꑍꁁꏯꐮꑌꑲꇷꃅꌠꄹꎆ。ꎆꏣꇷꃅꌠꃹꅼꈴ，ꐯꇯꈲꁧꊌꌠꃄꄻꋒ。ꁱꀕꐮꑌꑲꌠꍔꐯ，ꊿꋅꉜꐨꐮꐊꌠꌌꀉꇨꇁ。ꑖꑟꃅꏓꂱꌋꆀꐯꎻꈴ，ꃺꑌꉂꏣꃹꅼꇱ。ꐥꊯꋮꒉꌠꊥꎆ，ꄹꏦꋈꄻꌠꊋꀥꇱ。ꉘꇉꌠꆏꑍꁁꏯꐯꇯꊋꇤꄉ，ꇩꏤꏓꋍꃱꀋꃅꑴꌦꌠꐋꀋꌡꌠꐛꐪꇂꃴꎿꋮꑍꁁꏯꍔꍞꐮꃆꂮꎥꇖꄉ，ꄉꄐꋭꋽꃅꄐꁆꌠꃅ；ꎿꋮꑍꁁꏯꂽꌤꋬꂻꐮꉌꒊꉺꏦꋈꄻꌠꋮꇖꄉ，ꄠꃪꎿꅔꐛꐨꎍꐽꎻ；ꎿꋮꑍꁁꏯꄮꐽꌠꋯꏤꐛꄉ，ꎿꋮꑍꁁꏯꐮꃆꂮꄮꐽꀻꎆꌠꐛꊂꀊꏀꌠꀹꄻ。
ꉪꊇꆹꊋꇤꄉꎿꋮꑍꁁꏯꃺꑌꐮꋯꑌꄉꉈꈽꌠꊥꎆ。ꎿꋮꑍꁁꏯꃺꑌꆹꐯꇯꍏꉸꊿꋅꉬ，ꈬꏣꑳꏡꐯꏡꎍꌠꀑꇬꐮꐊꎍꌠꉬ，ꐮꉂꐮꅉꐮꉌꒊꄡꑟ，ꐯꇯꄉꎿꋮꑍꁁꏯꐮꃆꂮꄹꆷ，ꐯꇯꄉꀻꎆꊌꐨꊌꅜ。ꎿꋮꑍꁁꏯꃺꑌꐯꇯꈲꏣꐥꌠꇬꄹꎆꌠꌤꆿꉬꀐꄷꆏ，ꉪꊇꆹꐯꇯꊋꈀꑌꃅꇤꄉꃅꌊꃪꌶ。ꉪꊇꆹꃶꐚꃅꄠꃪꃺꑌꌅꈌꈲꁧꀧꌋꃅꋒꌶ，ꄠꃪꃺꑌꋯꑌꄉꍏꉸꊿꋅꐯꇯꐥꌠꋦꁍꀧꌋꃅꋒ、ꋈꄻꋒꌶ。
ꉪꊇꆹꏟꈯꃅ“ꄠꃪꄂꋦ”ꁷꐞꏢꉨꌠꏭꁏ。ꍏꇩꏓꂱꆹꈍꃅꑌꊿꑞꂷꉬꄿꂿꊋꃤꑞꑵꉬꄿꂿꃄꄟꑞꑵꌌꄉꄠꃪꁳꁍꇩꇬꄉꁷꐞꎼꁧꀋꉆ。“ꄠꃪꄂꋦ”ꁷꐞꌠꃄꄟꆹꎿꋮꑍꁁꏯꃺꑌꐯꇯꐥꌠꈲꁧꇬꉮꄻꌠ，ꉱꋃꃅꈔꑍꌠꇬꉜꄉꆹꎂꀕ。
ꍏꉸꌺꇖꈁꐥꌠꃅꐯꇯꊋꇤꑲꆏ，ꀋꎪꃅꉌꋍꂷꃅꍏꉸꊿꋅꇰꀋꃀꃅꀱꌄꆣꇁꌠꈴꎁꇬꄉꁍꇩꏓꋍꃱꃅꌠꃅꇫꑟꄎꌠꉬ。
ꊯꊪ、ꐪꊛꄉꃰꊿꄮꐽꌠꌋꆀꀻꎆꌠꌤꑘꋍꉎꀋꐥꌠꄹꎆ
ꀋꃋꋋꄮꋧꃅꆹꇫꄉꃹꅼꃅꌼꇪꃅꐛꐈꇰ，ꄮꐽꌠꌋꆀꀻꎆꌠꆹꄡꇗꃅꋊꄜꀨꉬꇬꎷ。ꋧꃅꀉꑌꑵꃅꐙ、ꎆꏣꅉꆺꈴꃅꃹꅼꃅꀻꎆ，ꁱꀕꀉꑌꑵꃅꐙ、ꐧꋦꈴꌗꈴꌠꐪꊛꄉꄹꎆ，ꈆꑪꇮꇐꇝꂱꌠꀊꏀꃅꂵꅐ，ꅉꆺꑭꊂꇷꃅꌠꀉꑌꏠꊐꃅꋍꑞꋋꁁꏯꃅꍔꐯꆹ，ꏀꄓꃷꎏꇩꏤꌋꆀꀻꎆꇰꌠꇩꏤꉻꄜꊋꃤꀉꇨꇁ，ꇩꏹꊋꃤꍆꁧꆹꋧꃅꄮꐽꌠꇬꈲꏣꐥꁁꏯꉜꄉꀻꎆ，ꇩꏹꃅꒊꃅꇁꀑꐱꎍꐽꄉꀧꌠꇬꈲꁧꇎꏦꀉꑌꃅꐥ。
ꋍꈭꐨ，ꋧꃅꆹꄡꇗꑘꀋꒃꐯꑘꀋꒃꑴꌦ。ꇩꏹꎆꒉꎆꇁꎒꐡꁧꏖꐨꎴꅼ，ꋧꃅꎆꏣꉀꎆꌠꎍꀋꐽꌠꊨꀋꄅꌠꐊꊈꁦꎆ，ꅉꆺꑭꊂꀻꎆꐮꆽꀋꏣꌠꁦꎆꇱ，ꊋꏗꉪꏦ、ꊋꃷꇱꍔꍞꌋꆀꀊꏀꃅꁁꀕꉈꌠꉪꏦꊼꇅꉀꐕ，ꋍꈨꋋꈨꇬꇙꈧꌠꀋꆏꃅꇫꅐ，ꋛꂷꉮꀋꐥ、ꊋꀦꅐꀦꋬꂻ、ꈄꏍꋬꂻꑠꅉꆺꑭꊂꃅꐙꌠꌤꃆꀊꅰꃅꑓꅐꎑ。
ꃰꊿꆹꅉꆺꋍꂷꀉꄂꐥ，ꇩꏤꈁꐥꌠꐯꇯꋧꃅꋍꂷꇬꐥꌐ。ꐩꋊꉪꊇꏭꄜꋊꇬ，ꆓꌠꇨꌠꋚꈁꃅꌠꆹꃰꊿꐯꇯꐥꌠꇗꅉꀋꉬ，ꂽꇤꌠꌉꌠꆹꋧꃅꎔꃨꌠꐥꇁꀋꄐ。ꄮꐽꌠꈁꌉꈿꌠꀋꈁ，ꀻꎆꌠꈁꌢꎭꌠꀋꈁ，ꇷꃅꌠꈁꄘꑣꌠꀋꈁ，ꀊꉗꃅꄮꐽꌠꋈꄻ、ꐯꇯꌄꆣꐮꄮꌠꋧꃅꄹꇙꌠꆹ，ꇩꏤꈁꐥꌠꏓꂱꐯꇯꉌꉪꐨꉬ。
ꉪꊇꉪꐨꆹ，ꇩꏹꐮꃆꂮꇬꆏꐥꊯꐮꉌꒊꌠꄕꊪ、ꐯꏆꐮꌷ、ꇷꃅꐯꇯꊌꌠꉌꊈꄕꊪ，ꐯꇯꇩꏹꀋꈐꀋꉈꑗꐥꌠꀧꌋꃅ。ꐥꊯꐮꉌꒊꌠꆹ，ꐊꏑꇩꏦꋪꂿꃆꌋꆀꏥꏦꇬꍬꌶ，ꇩꏤꆹꀉꒉꀄꊭ、ꊋꇨꊋꁧ、ꌢꎭꌣꈚꌠꀋꁸꃅꐯꇯꐥꊯꌐ，ꇩꏹꐮꃆꂮꋯꁦꈴꌠꄹꆷ，ꌅꀨꁌꒉ，ꐯꇯꋬꂻꌠꊌ，ꋧꃅꄮꐽꑘꒃꌠꀧꌋꃅ。ꐯꏆꐮꌷꌠꆹ，ꋧꃅꌧꑳꀉꑌꑵꃅꐙ、ꀻꎆꈝꃀꀉꑌꑵꃅꐙꌠꁌꒉꌠꉬ，ꇩꏤꈁꐥꌠꏓꂱꑴꌅꃅꐧꋦꄹꏦꌋꆀꀻꎆꈝꃀꌊꄻꌠꌅꈌꈲꁧꁌꒉꌋꆀꀧꌋꃅ，ꐮꇬꌶꄻ，ꂄꌷꄸꅋꄉ，ꃰꊿꌧꑳꀻꎆꌠꄹꇙ。ꇷꃅꐯꇯꊌꌠꆹ，ꃰꊿꀑꇬꐮꐊꌠꉪꐨꄕꊪꌠꉬ，ꊨꏦꇩꏤꈲꁧꎹꈹꄮꇬꌞꇩꏤꏭꋭꋽꃅꉈꇬꌠꉪꌶ，ꊨꏦꇩꏤꀻꎆꌠꎹꈹꌠꇬꄉꇩꏤꈁꐥꌠꐯꇯꀻꎆꌠꊥꎆ，ꀊꅰꃅꐥꊯꐮꆽꏣꌠꀊꏀꉹꌠꅉꆺꑭꊂꃅꀻꎆꐋꀨꃆꂮꃅꐙꌠꎹꄉ，ꎭꑌꐯꇯꎭꌒꑌꐯꇯꌒ，ꌅꈌꃅꎁꐯꇯꄜ，ꃰꊿꐯꇯꐥꌠꈲꁧꉀꎆꇁꎻ。
ꍏꇩꆹꐪꊛꄉꄮꐽ、ꀻꎆ、ꇷꃅ、ꐯꇯꊌꌠꁈꁧꐕꀊꂥꃅꄉ，ꀋꇙꀋꑐꃅꊋꇤꄉꋧꃅꄮꐽꌠꀧꌋꃅ、ꐯꇯꀻꎆꌠꊥꎆ。
ꍏꇩꆹꈍꄮꑌꀋꎪꃅꄮꐽꀻꎆꈝꃀꍬ，ꏟꈯꃅꄂꋦꑴꌅꌠꄮꐽꃅꉇꉻꑌꑲꏱꁈꈴꄉꃅ。ꉪꊇꆹꏟꈯꃅꇩꏤꌅꀨ、ꋬꂻ、ꀻꎆꈲꁧꀧꌋꃅ，ꈍꃅꑌꉇꇁꍅꊋꑞꑵꏭꑌꈌꀋꊰ。ꉪꊇꆹꌤꆿꑴꅉꂄꄸꉬꀋꉬꌠꇬꈴꄉꊨꏦꉆꈉꌋꆀꏱꁈꏤꄻꄉ，ꎃꊒꃅꏱꇺ，ꑗꐥꑗꅒ。ꍏꇩꆹꄮꐽꃅꇩꏹꐯꅒꅍꌋꆀꊷꈌꌤꃆꂥꀘ，ꉬꀋꉬꄷꆏꇇꌭꌌꊋꃷꇱꅀꇇꌭꌌꄉꐮꏯꇷꇋꌠꏭꁏ，ꀉꁁꇩꏤꇬꏦꊒꍔꌅꁏꆷꌠꏭꁏ，ꇷꌾꉪꏦꇶꏦꈁꐥꌠꏭꁏ。ꍏꇩꆹꋍꑞꋍꑵꊋꃷꇱꉪꏦꌋꆀꊋꃷꇱꍔꍞꇶꏦꏭꁏ，ꐥꋊꐥꍂꃅꌞꏯꇨꏗꌠꀋꃅ，ꐥꋊꐥꍂꃅꌞꏯꍔꍅꌠꀋꃅ。ꍏꇩꆹꏟꈯꃅꍏꇩꏓꂱꈲꁧꁳꇩꏤꈁꐥꌠꏓꂱꌋꆀꐯꇯꐥꌠꈲꁧꏓꐮꐊꎼꇁꇈ，ꀊꅰꃅꏣꀋꑌꌠꃅꇏꌌꄉꇩꏹꌤꃆꇬꐊꈽꄉ，ꇩꏤꀉꒉꂿꄐꆽꎍꐨꇤꅐꇁ，ꐯꇯꄉꅉꆺꑭꊂꃅꐙꌠꋓꎭꌠꏭꊝ。
ꍏꇩꆹꈍꄮꑌꀋꎪꃅꐯꈲꐯꇯꊌꌠꁉꃑꄐꁈꌬ，ꇷꃅꃹꅼꈴꌠꇬꈴꄉꋧꃅꎆꏣꀉꇨꌠ、ꐪꊛꉆꌠ、ꐮꆽꏣꃅꉀꎆꌠꊥꎆ。ꍏꇩꆹꊋꇤꄉꒈꀑꒈꂪꐮꍣꐨꍕꐭꎻ，ꀻꎆꇰꌠꇩꏤꄏꐓꄉꑴꌅꀻꎆꄐꊋꀉꇨꎻ。ꍏꇩꆹꊋꀥꇱꄉꀋꉬꀋꉆꎆꏣꄜꉻꒉꎆꏣꏱꁈꌋꆀꐮꄮꄉ，ꋮꇖꌠꇬꈴꄉꋭꋽꃅꎆꏣꃼꇇꐮꄙꌠꂥꀘ。ꍏꇩꆏꌅꈌꌋꆀꃅꎁꐮꆽꏣꌠꌭꈬꃅꄉ，ꏣꀋꑌꃅꅉꆺꑭꊂꎆꏣꏱꄻꈽ，ꃼꇇꌋꆀꎆꇱꄿꐨꈴꃅꌒꈴꌠꄹꆷ，ꀧꌋꃅꉪꏦꇶꏦꋍꑞꋍꑵꌠꏭꁏ。
ꍏꇩꆏꄮꐽꃅꐮꐊꌠꏥꏦꉬꏢꌠꅉꃀꀂꏽꄉꐊꑷꃅꇩꏤꈁꐥꌠꌋꆀꉁꅉꃅꇷꃅꌠꌭꈬꃅꄉꇬꎷ。ꉪꊇꆏꐞꄿꇩꏤꈧꌠꌋꆀꐮꃆꂮꄻꃪ、ꀻꎆ，ꇷꃅꁁꏯꍔꐯ，ꋭꋽꃅꉜꐨꐯꀋꌡꌠꂥꀘ，ꀊꉗꃅꎍꐽꉾꃪꃅꀻꎆꌠꇩꏤꀉꒉꀊꏀꉹꌠꐮꃆꂮꄻꐛꌠꄹꆷ。ꉪꊇꆏꃷꇎꏭꂄꃅꐊ、ꃷꇎꌌꐋꃅꉜꌠꌭꈬꇬꎷ，ꃷꇎꌋꆀꐮꉂꐮꅉꌠꄻꈫꈈ，ꃹꅼꃅꐯꈲꌠꇷꃅ，ꊋꇤꄉꑴꑲꀻꎆꐨꀊꅰꉾꃪꃅꌌꈭꇍꇩꏤꈧꌠꇬꈲꏣꐥꎻ。ꉪꊇꆏꊋꀥꇱꄉꀻꎆꇯꌠꇩꏤꈧꌠꌋꆀꋯꑌꇷꃅ，ꐯꇯꄉꀻꎆꇯꌠꇩꏤꈧꌠꌅꈌꈲꁧꎃꊒꌠꀧꌋꃅ，ꀻꎆꇯꌠꇩꏤꈧꌠꊋꁈꄏꄉꇩꏹꌤꃆꈐꇬꁧꎁꃅꐙꌠꌋꆀꅇꉉꌅꈌꍔꒉ，ꈍꄮꑌꀻꎆꇯꌠꇩꏤꈧꌠꉌꊪꐋꀨꌋꆀꉌꇱꐋꀨꃅꇬꎷ。ꉪꊇꆹꀋꆏꃅꏣꀋꑌꃅꌤꃆꀊꐯꈭꃅꃅꈽ，ꐊꏑꇩ、ꑍꊏꇩꏓꉻ、ꎮꉰꇷꃅꎀꍹ、ꏂꏪꇩꏤꑠꊋꁈꄏꄉꏣꀋꑌꂿꄐꋊꇤ，ꇩꏹꐥꀹꌋꆀꇩꏹꉻꑫꀋꈐꀋꉈꃅꇗꊒꌠꃅꍜꉜꄉꀻꎆꆹꌠꄹꆷ。ꉪꊇꆏꏟꈯꃅꄉꉻꌋꆀꉇꉻꏭꑌꑲꌠꄹꎆ，ꉪꇩꏤꎿꉈꏦꊒꌅꈌꈲꁧꀧꌋꃅ。ꉪꊇꆏꇩꏤꈁꐥꌠꍔꄈ、ꍔꍞꎀꍹꌋꆀꉁꅉꃅꒈꇁꌠꃅ，ꊋꀥꇱꄉꏓꄊ、ꍔꑠ、ꃅꄷ、ꉹꁌꏓꉻꉇꉻꏭꒈꇁꌠꃅ，ꇩꏤꐮꃆꂮꀻꎆꌠꐧꋦꅉꃀꌆꈬꃅꄉ。
ꍏꇩꏓꂱꆹꄮꐽꌠꉁꅉ、ꀻꎆꌠꉘꇉ，ꇩꏤꈁꐥꌠꏓꂱꌋꆀꈜꋍꏢꃅꃰꊿꄮꐽꌠꌋꆀꀻꎆꌠꋍꉎꀋꐥꌠꌤꑘꎁꃅꀋꆏꃅꊋꇤꏾ。
ꊰꑋ、ꐊꑷꃅꄈꋈꄻꈆꑪꈴꌠꑟꐨꐕꀊꂥ
ꉪꄈꆹꋯꑌꃅꏓꂱꏃꂠꌊꐊꑷꃅꊼꇅꌣꈚꌠꐧꋦꋉꐛ、ꐧꋦꉪꏦꐛꏀꈴꌠꄹꎆ、ꍏꉸꊿꋅꇰꀋꃀꃅꀱꌄꆣꇁꌠꃅꇬꅜꌠꂿꃆꀉꒉꌠꆸꄜꎍ。ꄈꀉꇨꊋꑌ，ꄈꆹꏓꂱꌋꆀꌦꅪꐯꏡꎍꑲꆏ，ꇩꏤꆹꌄꆣꑘꒃꌠ，ꏓꂱꆹꐥꌒꄻꌒꌠ。ꃅꒊꃅꇁꀻꎆ、ꌤꑘꄹꀺ、ꃰꊿꉘꇉꌠꆹ，ꐯꇯꉪꊇꏯꄺꀱꏀꀺꉌꊈꌌꐊꑷꃅꄈꃤꋈꄻꀊꏀꌠꋉꃆꇰꀋꃀꌠꄹꎆ，ꐊꑷꃅꄈꃤꋈꄻꈆꑪꈴꌠꑟꐨꐕꀊꂥꌶꄷꌠ。
ꄈꑭꊂꀋꎪꏟꈯꃅꎺꄉꌶ，ꐴꄻꏓꂱꈬꇬꊪꄉ、ꏓꂱꌒꐨꄻꑲꆀ，ꄈꈍꄮꑌꊋꀋꐛꄮꀋꐥꌠꇬꎍꄎ；ꀀꌒꎭꉨ、ꀬꅑꃅꁨꆹꑲꆀ，ꄈꈍꄮꑌꃅꋊꂴꅑꆹꄎꌠ。ꃅꒊꃅꇁꀊꏀꌠꇂꃴ，ꄈꆹꌅꈌꌬꎟꎖ、ꄺꀱꁉꃑꎟꎖ、ꃷꎏꎆꏣꎟꎖ、ꉇꉻꋦꈭꎟꎖꌠꀊꉗꃅꐙꌠ、ꌼꇪꌠ、ꊋꋠꌠꊝꇬ，ꉌꊈꏯꈩꇬꃨꆰ、ꄐꅍꀋꐥꇬꃨꆰ、ꉹꁌꇬꐞꁧꇬꃨꆰ、ꏣꈩꍹꈔꇬꃨꆰꌠꀊꅰꇨꃅꄻꄈꑭꊂꂾꐕꄉꀐ。ꀋꆏꃅꄈꃤꏲꂠꐨꌋꆀꌅꈌꌬꄐꐨꉀꐕ、ꍹꄙꐈꄵꌠꌋꆀꃨꆰꄘꑣꄐꊋꐕꀊꂥꌠꆹ，ꄈꏱꌅꉆꈉꈫꈈ、ꌅꈌꌬꂿꃆꃅꇬꅜꇬꀋꎪꃅꂥꀘꋒꌶꌠꎥꃆꀉꒉꀊꂾꌠꉬ。ꄈꑭꊂꆹꃛꊸꐨꌋꆀꆽꎍꐨꀉꇨꌶ，ꏟꈯꀕꃅꊋꀥꇱꄉꄈꃤꌅꈌꌬꄐꊋꋈꄻ、ꂴꅑꐨꌋꆀꐚꎴꐨꋈꄻꌠꈜꀦꋋꏢꒃꇇꈐꊐ，ꏟꈯꃅꉪꇐꁌꄝ、ꄺꀱꏀꀺ，ꏟꈯꃅꄈꆹꄈꏲ、ꏦꇨꃅꄈꏲꌶ，ꐊꑷꃅꄈꃤꉪꇐꋈꄻ、ꎀꍹꋈꄻ、ꃅꇏꋈꄻ、ꍹꁏꎴꄖꌠꋈꄻ、ꄹꏦꋈꄻꌠꊋꀥꇱ，ꑴꑳꌃꎴ、ꑴꑳꐛꒆ、ꑴꑳꏀꄻ、ꑴꑳꄐꊋꉀꐕꌠꊋꀥꇱ，ꌶꄻꉹꌠ、ꁧꃤꃅꉹꌠ、ꏀꀺꉹꌠꂷꇻꌦꉪꏦꌅꈌꌬꌠꄈꋈꄻ，ꄈꁳꈍꄮꑌꍏꇩꐛꐨꐧꋦꉪꏦꌤꑘꏲꂠꈯꄜꀉꇨꌠꐛꌠꏦꀧ。
（ꋍ）ꉪꅉꑇꐨꑌꈬꃅꄉ，ꇭꍣꄈꊿꉌꊈꎹꈹꌠꐏꈬꇬꎷ。ꂷꇻꌦꉪꏦꑇ，ꐧꋦꉪꏦꌋꆀꇷꁨꉪꏦꑇꌠꆹ，ꇭꍣꄈꊿꍔꍞꀑꇬꉬ，ꇭꍣꄈꊿꆹꑞꑌꎟꎖꄎꌠꉌꊈꈯꌬꉬ。ꉪꇐꌧꇗꋈꄻꁧꀦꋋꏢꒃꉇꋒꇬꆹ，ꂷꇻꌦꆺꆀꉪꏦ、ꃀꊱꄏꉪꇐ、ꍏꇩꐛꐨꐧꋦꉪꏦꌧꇗꉻꑫꌶꄻ，ꃹꅼꃅꈆꑪꃅꀻꎆꌠꉜꐨꃄꄻꌶꄻ，ꌶꄻꉹꌠꄈꎀꍹꋈꄻꌠꄹꎆ，ꄈꑼ、ꇥꀯꉙꂘꄐꏁꌊꀋꎪꀋꑴꃅꍏꇩꐛꐨꐧꋦꉪꏦꐯꇯꉌꉪꐨꎁꃅꈏꇤꊋꇤ。ꄈꊇꅉꉙꂘꈯꄜꋋꏢꒃꉇꋒ，ꄈꃤꐩꋊꌶꄻ，ꃹꅼꃅꄈꃤꐩꋊꌤꃆꑍꐘꏤꐪꏓꇱꎖꋪꑗꉘꌧꐚ，ꄈꃤꋊꃅꃅꇏꂶꄟꉾꃪꌠꄖꄑ，ꄈꑼ、ꇥꀯꉙꂘꄐꏁꄉꏟꈯꃅꎃꊒꌠꋧꃅꉜꐨ、ꌅꈌꉜꐨ、ꌤꑘꉜꐨꐥꎻ，ꍔꍞꉆꈉꉆꈬ，ꂄꌠꄸꌠꊨꄅ。ꑌꇐꋈꄻꅉꃀꋋꂷꒃꉇꋒ，ꄈꑼ、ꇥꀯꉙꂘꄐꏁꌊꂴꅑꄉꐧꋦꉪꏦꂄꄸꉜꐨꃄꄻ，ꄈꊇꅉꉉ、ꑌꇐꉜꁨ、ꂴꅑꄉꃅ，ꐧꋦꉪꏦꑌꇐꌶꀠꊿ、ꉌꒊꃅꇏꄐꏁꊿ、ꀋꈐꀋꉈꑗꉬꌠꀧꌋꃅꊿꄻ，ꃶꐚꃅꐨꌌꇭꍣꄈꊿꑌꇐꑲꇐꂄꌠꃅꇏꄜꋊꅐꇁ。
（ꑍ）ꊿꌌꀨꇬꄉ、ꏓꂱꎁꃅꌅꈌꌬꌠꌭꈬꇬꎷ，ꈍꄮꑌꄈꌋꆀꏓꂱꉹꁌꃆꂮꆹꃷꅍꆊꅿꐯꏡꎍꃅꐙꇬꎷ。ꏓꂱꎁꃅꃅꌠꆹꄈꃤꁧꀦꉪꃆꁢꊧꉬ，ꊿꌌꀨꇬꄉ、ꏓꂱꎁꃅꌅꈌꌬꌠꆹꄈꌅꈌꌬꐨꈁꐥꌠꍤꎖꎕꏦꀊꂥꇊꀊꂥꏡꌠꉬ。ꈍꄮꇬꑌꏓꂱꈲꁧꄻꀨꇬꄉ，ꈍꄮꑌꏓꂱꌋꆀꉌꋍꂷ、ꌗꋍꏢ、ꀑꇬꋍꂷꉬꇬꎷ，ꈍꄮꑌꏓꂱꊫꁱꄉꐩꋊꄹꆷꌊꂴꏭꉜꄉꆹꇬꎷ。ꈍꄮꑌꄈꃤꂴꅑꐨꌋꆀꐚꎴꐨꆼꒆꄉ，ꄈꑭꊂꃅꃹꅼꃅꏓꂱꎁꃅꌤꃅꐙꎴꌠꌌꐊꇐꀋꉬꀋꉆꌠꃅꄉꌠꄈꃤꉹꁌꈳꏦꉙꂘꃄꄻꃅꈧꌠꍔꆙ，ꊋꇤꄉꏓꂱꉹꁌꇫꉜꁨꌠꌤꃆꑓꅐꎑꌠꂥꀘ，ꃅꒊꃅꇁꀊꏀꌠꇂꃴꉹꁌꌤꃅꋒꌠꄐꊋꉀꐕ。ꄈꑼꇥꀯꈛꎂꃅꉹꁌꑌꑲꄹꏦꄻꐛꒆ。ꏓꂱꎁꃅꌅꈌꌬ、ꏓꂱꈉꐨꃅ、ꏓꂱꎁꃅꁈꏂꌠꌭꈬꇬꎷ，ꏓꂱꃅꐨꇰꀋꃀꌠꇬꄉꀑꁮꊋꃤꎹꌬ。ꃶꐚꃅꃅꄉꏓꂱꌣꈚꎻ、ꃶꐚꃅꃅꄉꇩꏤꌄꆣꎻ，ꀬꅑꃅꄹꀺ，ꀬꅑꃅꃅ，ꏓꂱꉌꃹꑓꐛꌠꌤꉾꃪꃶꐚꌠꀉꑌꃅꃅ。ꏟꈯꃅꎬꅧꃅꉈꈽ、ꈪꑌꏎꏸ，ꉌꑣꄉꉉꁱꃅꇏꃀꈿꃅꇏꄻꃪ，ꊋꇤꄉꀉꁘꐵꑷꁭꁘꂃꈿꑠꃅꇏꀋꉾꀋꃪꌠꏱꄻ，ꀋꎪꃅꇶꏦꉪꏦ、ꇛꌺꉪꏦꋊꑣ，ꄈꃅꇏꉾꃪꌠꌌꄈꉌꂵꏓꂱꉌꂵꏓꋍꃱꃅ、ꍔꍞꃅꇏꏓꂱꃅꇏꉾꃪꌠꏃꇙ。ꇬꉼ、ꇭꏾꄨ、ꌋꅪꐊꏑꉼꑠꏓꂱꏓꉻꊋꁈꄏꄉꋒꐯꋒꃅꑌꏣꑳꏡꂿꄐꇤꅐꇁ，ꀊꅰꃅꉹꁌꉉꐨꄜꅐꇁ，ꉹꁌꏦꊒꌅꈌꈲꁧꀧꌋꃅ。
（ꌕ）ꏣꀋꑌꃅꄈꈏꇓꋯꁦꀻꎆ，ꄈꃤꀹꄻꍄꑐꊋꃤꀉꇨꇁ。ꄈꈏꇓꋯꁦꆹꄈꃤꀑꇬꉬ。ꋯꁦꏓꁨꄹꏦꌭꈬ，ꄈꈏꇓꋯꁦꄹꏦꉻꑫꄻꐛꒆ，ꄈꈏꇓꋯꁦꌌꏓꂱꋯꁦꏃꇙ。ꄈꑼꀨꄜꉆꈉꏦꀧ，ꄈꑼꋯꁦꌅꈌꈲꁧꏦꀧꄹꏦꄻꐛꒆ，ꀠꂘꌠꌋꆀꑴꑳꀠꂘꌠꍔꆙ，ꄈꈏꇓꋯꁦꐥꊯꌠꐋꀨꐮꃆꂮ、ꋯꁦꃅꇕꄟꌠꍔꍞꐥꀹ、ꋯꁦꍞꊟꄹꏦꋦꈭꄻꐛ，ꄈꑼꅉꐚꌅꈌ、ꐊꈽꌅꈌ、ꌊꄻꌅꈌ、ꍞꊟꌅꈌꃅꇫꑟ。ꄈꃤꁧꎁꃀꀉꒉꈿꄹꏦꄻꐛꒆ，ꇮꃅꊿ、ꂿꑘꊿꁧꎁꍆꐪꉀꐕ，ꄈꃤꁧꎁꃀꀉꒉꈿꁧꎁꃅꎁꃄꄮꄹꏦꃅꇫꑟ、ꄻꐛꒆ，ꑣꍔꄈꁧꎁꃀꋍꈓꋍꃢꈿꌠꄹꏦꃅꌶ，ꃹꅼꃅꑣ（ꏃ、ꐎ）ꄈꁧꎁꃀꈿꅉꀕꃅꄹꏦꃅꉚ，ꄈꁧꎁꃀꈿꁧꎁꄜꑘꄜꄹꏦꃄꌬ。ꄈꈏꇓꌊꄻꄹꏦꄻꐛꒆ，ꃷꁨꐮꍣꄉꂓꄜ、ꃷꁨꐮꍣꄉꌊꄻꌠꌌꐛꏦꈴ，ꋒꐯꋒꃅꌊꄻꊿꉌꊈꄛꑣꌠꈴꎁꌋꆀꋦꈭꄻꐛ。ꐊꈴꊈꑼꉼꏤꇽꌠꌋꆀꍞꊟꌠꂿꄐꀉꇨꇁꎻ，ꐊꈴꊈꑼꉼꌤꇖꏥꏦꌋꆀꏤꇽꈴꎁꄻꐛꒆ，ꃅꄷꄈꊈꌤꃆꀉꒉꀊꂾꌠꌋꆀꇥꀯꀋꉬꀋꉆꌠꌌꌬꌠꇕꄟꏤꄻꇬꀾꊐꏤꇽꄹꏦꄻꐛꒆ。ꄈꈏꇓꅉꂫꊐꌠꋯꁦꍔꐯ，ꄈꑼꏤꄮꁨꃅꅉꂫꊐꌠꄈꎀꍹꏲꌋꁥꌠꉉꍣꑠꄹꏦꄻꐛꒆ，ꄈꑼꅉꂫꊐꌠꄈꊈꃀꈿꌠꅲꈽ、ꄈꁧꎁꃀꈿꁧꎁꋋꊐꌠꄈꊈꄚꃆꂮꐥꌠꃀꈿꅉꐊꈽꑠꃄꄟꄹꌬꄉ，ꄈꈏꇓꐥꐨꏥꏦꐨꌋꆀꂿꉆꐨꀉꇨꎻ。
（ꇖ）ꃹꅼꃅꇥꀯꊿꌤꄹꏦꄺꀱ，ꊇꁧꀊꂥꌠꌅꈌꌬꌠꀉꇨꌠꊿꁥꂘꄻ。ꍏꇩꐛꐨꐧꋦꉪꏦꀻꎆꌠꌭꈬꇬꎷꂿꄷꇬ，ꀋꉬꀋꉆꌠꆏꍔꍞꑌꈬ、ꄐꊋꀉꇨ、ꃅꇏꉾꃪ、ꊋꇤꊵꑵꐛꌠꌅꈌꌬꌠꀉꇨꌠꊿꁥꂘꄻꌠꇬꅑꎍ。ꄈꆏꇥꀯꏲꌠꏥꏦꌭꈬ，ꃄꇖꄹꊂꇬ、ꄐꅍꀉꄂꉜꄉꎹꌬꌠꌭꈬ，ꑌꇐꌧꇐꐮꐊꐙ、ꑌꇐꌌꀨꇬꄉꌠꌭꈬ，ꃶꐚꃅꐨꉜꁨ、ꉹꁌꇫꏚꍆꌠꌭꈬ，ꃹꅼꃅꇥꀯꊿꌤꄹꏦꄺꀱꄉ，ꋍꑞꋋꁁꏯꄞꅐꌠꇥꀯꁳꋒꐯꋒꃅꇫꅐꇁ、ꑞꄐꆏꑞꃅ、ꑞꌧꆏꑞꃅꎻ。ꐊꑷꃅꊨꄅꃅꋯꁦ、ꄇꄜꋊ、ꋓꅔ、ꉾꌠꌋꌠꌐꏦꃄꌬ，ꇥꀯꌤꃅꋯꁦꍔꐯ，ꋯꁦꊇꁧꐕꀊꂥ，ꋓꅔꐨꐥꃅꇥꀯꌊꄻꃄꄟꄻꐛꒆ，ꊾꌋꊾꌬꌠꉻꑇꐨꐕꀊꂥ，ꀋꎪꀋꑴꌠꊿꄝꐜꀋꎽ，ꊾꈱꊾꏅꌠꊿꄝꈲꊌꀋꎽ。ꇥꀯꎖꑞꉉꍣꉺꏦꄻꐛꒆ，ꏲꌋꇥꀯꏱꄻꊌꐨꎃꊒꌠꑌꌠꊥꎆ。ꇥꀯꏲꂠꏦꉻꄻꐛꒆ，ꏦꇨꃅꇥꀯꏲꂠꍞꊟ，ꊋꀥꇱꄉꄈꍔꏲꌋꀨꂶꌠ、ꃅꈉꀋꉬꀋꉆꌠꇬꇥꀯꁰꍋꌊꌬ，ꉻꃅꊿꄹꏦꄻꐛꒆ。ꏲꌋꁥꌠꁆꄻꌠꌋꆀꇥꀯꁥꌠꐛꉻꄻꃪ，ꅉꂫꊐꌠꇬꄉꇥꀯꁰꍋꌊꌬꌠꉜꁨ，ꐧꋦꌧꊿꄞꅐꌠꁳꄈꍔꇥꀯꁥꌠꇬꃹꇁꌠꈝꃀꍔꐯ。ꇩꁨꎆꏂꑘꌋꆀꌤꑘꌤꃅꅉꊿꌤꄹꏦꄺꀱꌠꄹꎆ。ꇥꀯꁰꍋꌠꀥꇱꌋꆀꄻꃪꄉ，ꇥꀯꊇꁧꌋꆀꄐꅍꉀꐕ。ꊋꀥꇱꄉꇥꀯꈎꄜꀊꏀꉾꃪꌠꉘꉚꌊꌬ，ꌋꅪꇥꀯꌋꆀꀁꑌꊿꋅꇥꀯꉘꉚꌊꌬꌠꉜꁨ，ꇥꀯꈎꄜꀊꏀꌠꈐꊟꊋꊡꌊꅉꂫꊐꌠꇬꌋꆀꎬꅧꃅꄷꄉꄜꎟꁧꎻ。ꐊꑷꃅꇥꀯꎞꆏꐞꆏꌠꌤꃅꋒꌶ。
（ꉬ）ꏟꈯꃅꄈꌧꊿꏲꌠꏥꏦꌬꄉ，ꋍꑞꋋꁁꏯꌧꊿꉾꃪꌠꏓꌊꄈꌋꆀꇩꏤꌤꑘꇬꌤꃅꇁ。ꀊꐯꃅꌧꊿꊙꈜꀺ，ꀊꐯꃅꋧꃅꊾꇨꎹꌠꆹ，ꄈꌋꆀꏓꂱꌤꑘꀻꎆꌠꄉꀧꌠꁧꀦꏡꁈꉬ。ꑘꃅꌠꁌꒉ、ꌧꇐꁌꒉ、ꌧꊿꁌꒉ、ꀹꄻꌠꁌꒉꌶ，ꐳꃅꌧꊿꌌꂴꄉꀻꎆꌠꄐꇐꏤꁈꄐꉻꀋꉬꀋꉆꌠꄻꄉ，ꄉꈁꀉꒉ、ꊇꁧꉾꃪꌠꌧꊿꁥꉗꄻꎼꇁꄉ，ꉪꇩꏤꌧꊿꐥꇩꏤꀉꒉꌠꇬꄉꄹꆷꅸꌧꊿꐥꇩꏤꀉꇨꌠꇬꃹꆹ。ꋍꃱꃅꄐꏤꄉꋍꑞꋍꑵꌧꊿꁥꌠꉗꄻꌠꄹꎆ，ꌧꊿꋉꃆꀉꒉꀊꂾꌠꌫꄻꄉ，ꊋꀥꇱꄉꏀꀺꑘꀺꌧꊿꉘꉚꌠꄏꐓ，ꌬꍩꐥꌠꌧꊿꉘꉚꌠꉜꁨ，ꌧꊿꄐꏁꌌꈆꑪꎥꃪꒃꅐꅉꂴꊐꌠꇬꉜꄉꆹ。ꋒꐯꋒꃅꇩꈐꇩꉈꌧꊿꅐꀦꀖꁉꄉꌬ，ꏣꀋꑌꃅꎿꉈꌧꊿꊙꈏꃹꌠꌋꆀꌫꄻꌠꃅꋒꌶ。ꐳꃅꌧꊿꀻꎆꏦꉻꉺꏦꄺꀱꌋꆀꏱꁈꏀꀺ，ꇩꏤꂒꉻꁵꄹꏦꄺꄉ，ꌧꊿꀹꄻꍄꑐꊋꃤꄖꄑ、ꇩꏹꐮꋓꅔꐨꐥꌠꌧꊿꄹꏦꂱꎆꅑꌠꐥꇁꎻꄉ，ꊿꈀꄸꑌꌧꊿꐛꇁꉆ、ꊿꈀꄸꑌꋍꌧꐨꇤꎼꇁꌠꍄꑐꌠꐛꐪꐛꊂꀹꄻꎼꇁ。
（ꃘ）ꅉꂫꊐꌠꄈꎀꍹꋈꄻꌤꃅꐨꏀꀺ，ꄈꌅꈌꌬꌠꎀꍹꅉꃀꌆꈬ。ꄈꅉꂫꊐꌠꎀꍹꆹꋯꑌꃅꉹꁌꏃꂠꌌꄈꃤꌧꇗꌋꆀꈛꏦꌐꏦꏱꁈꌬ、ꄈꃤꂿꃆꃅꇫꑟꌠꌉꈿꁿꇓꉬ。ꄈꋈꄻꌤꃅꃅꎁꄹꏦꃅꇫꑟ，ꂿꑘꁡꇤ、ꇓꈓꋥꁕꄈꎀꍹꋈꄻꌠꀉꇨꈴ，ꉻꁨꏦꀋꉬꌠꎆꏣꎀꍹ、ꐧꋦꎀꍹꄈꋈꄻꌤꃅꌠꊋꀥꇱ，ꐊꑷꃅꋍꑟꋋꁁꏯꅉꂫꊐꌠꄈꎀꍹꋈꄻꌤꃅꐨꄹꎆ，ꄈꎀꍹꌋꆀꄈꃤꌤꃅꉱꑷꐨꍔꐯ，ꋒꐯꋒꃅꀻꎆꌠꄹꆷ、ꉹꁌꎁꃅ、ꊿꉌꏓꋍꏢꃅ、ꐮꄮꌠꊥꎆꌠꂿꄐꋊꇤꅐꇁ，ꄈꃤꅉꂫꊐꌠꎀꍹꋈꄻꌌꀉꁁꋍꑞꋍꑵꅉꂫꊐꌠꎀꍹꋈꄻꌠꈺꇙ。ꄈꃤꅉꂫꊐꌠꎀꍹꉻꑫꄻꐛꒆ，ꊋꀥꇱꄉꅉꂫꊐꌠꄈꎀꍹꂴꅑꊿꁥꌠꂘꄻ，ꊋꀥꇱꄉꇓꈓꇓꉈꅉꂫꊐꌠꄈꎀꍹꌬꇐꇁꀦꏓꇱꄻꇱ，ꌫꎆꏦꀧꄹꏦꎍꐽꌠꄻꄉ。ꉹꁌꎁꃅ、ꉹꁌꏭꌤꃅꌠꌌꂿꃆꀋꉬꀋꉆꌠꃅꄉ，ꊋꀥꇱꄉꅉꂫꊐꌠꁧꃤꃅꉹꌠꄈꎀꍹꋈꄻ。ꄈꊇꅉꀉꇨ、ꊇꁧꉀꐕꌠꌌꀋꂿꑘꌠꃅꄉ，ꄈꑼꁥꌠꉙꂘꏲꂠꌠꀥꇱꌋꆀꄻꃪ，ꄈꑼꂱꑱꃅꈉꇬꄉꂴꀺꉾꅔꌠꎴꈲꉺꏦꄻꐛꒆ，ꄈꑼꋍꏅꌠꂴꅑꌶꀠꂿꄐꋊꇤꎼꇁꌠꄹꆷ。ꏦꇨꃅꄈꈐꎀꍹꐥꐨꃅ，ꄈꑼꄈꊇꅉꏤꈉꐥꃅꎥꃪ、ꋯꁦꃅꈋꍣꑠꄹꏦꄻꐛꒆ。ꏭꇙꐺꌠꄈꑼꏭꉙꂘ、ꏲꂠ、ꁧꃤꃅꌠꄻꃪ。ꄈꑼꀻꎆꇬꇯꌠꊇꁧꉀꐕ，ꌠꏀꇮꃅꊿ、ꂿꑘꊿ、ꌧꇐꐥꊿꇢꊭꇬꄈꑼꀻꎆꇬꇯꌠꉜꁨ。ꄈꑼꈏꃹꉇꅐꉆꌠꉺꏦꄻꐛꒆ，ꄈꑼꁥꌠꐛꉻꄻꃪ。
（ꏃ）ꀋꎪꀋꑴꃅꍹꈔꌠꏭꁏꄉ，ꐥꋊꐥꍂꃅꇭꍣꄈꊿꃅꎃꐙꎴꌠꍔꍞꐛꊈꐥꇬꎷꎻ。ꍹꈔꌠꏭꁏ、ꐙꎴꍔꍞꋈꄻꌠꆹ，ꄈꌭꈬꅷꇁꇬꎷꌠꊨꄅꃱꉻꌠꍔꍞꉆꈉ，ꏓꂱꇫꉜꁨꌠꀉꒉꀊꂾꌠꍔꍞꌤꃆꉬ。ꌤꃆꋋꏢꂥꀘꀋꋒꑲꆏ，ꄈꏯꉮꐪꃚꐯꃚꇁ，ꄷꀋꁧꄈꈔꇩꈔꇁꌠ。ꍹꁏꎴꄖꌠꀋꆏꃅꒃꉇꌶ，ꍹꄙꐈꄵꌠꏭꅉꀕꃅꋓꉪꁨꇬꎷꌶ。ꏟꈯꃅꍏꇩꐛꐨꍹꁏꎴꄖꌠꈝꃀꍬꇬꎷ，ꏟꈯꃅꈏꇷꉇꇷꐯꇯꉃ、ꏓꇱꏱꄻ、ꅓꄵꐯꇯꃅ、ꄴꏮꌐꏦꉜꁨ，ꐊꑷꃅꍹꈔꅓꀞꌠꌋꆀꄴꏮꉻꑫꋈꄻꌠꄹꎆ，ꇥꀯꐙꎴ、ꍔꃚꐙꎴ、ꍔꍞꊨꄅꌠꃅꇫꑟ。ꊋꀥꇱꄉꍹꁏꎴꄖꌠꉙꂘꌋꆀꐙꎴꁱꀕꋈꄻ。ꏲꌋꇥꀯꈁꐥꊐꌠꈜꀕꇈꇥꀯꀊꂥꊐꌠꁳꀋꎪꃅꑴꐚꃅꐙꎴꎕꏦꇬꍬꎻꌶ，ꏦꇨꃅꏲꌋꇥꀯꌤꃆꀉꒉꀊꂾꌠꄛꇰꄹꏦꃄꌬ，ꋋꆏꇨꃅꑴꏢꄷꌠꉬ，ꉈꑴꊋꀥꇱꄉꏣꃀꏣꑟꌋꆀꂱꑱꈭꇍꌤꃅꊿꏭꉙꂘꌠꌋꆀꏢꑲꌠꑌꉬ，ꈍꃅꑌꌅꈌꐋꀋꌡꌠꌬꀋꉆ。ꏦꇨꃅꌅꈌꌫꄻꐨꋊꍬ，ꊋꀥꇱꄉꏲꌋꇥꀯꈜꀕꇈꏲꌋꇥꀯꀋꉬꀋꉆꌠꌅꈌꌫꄻꌠꍞꊟ。ꃹꅼꃅꀋꂿꑘꁁꏯꌋꆀꀋꉬꀋꉆꅉꇬꄺꀱ，ꍹꈔꌠꏭꁏꌠꏦꃤꄹꏦꄻꐛꒆ，ꎴꏲꃨꆰꐨꐏꁇꋎꍅ，ꈲꁧꐮꄙꌠꄴꏮ，ꀊꅰꃅꈆꑪꇬꈴꇿꋌꐥꃅꍹꈔꌠꏭꄴꏮ。ꊋꀥꇱꄉꍹꈔꌠꏭꁏꌠꇩꏹꇷꃅ。ꏦꇨꃅꄈꃅꇏꐙꎴꋈꄻꃅꎁꄹꏦꌬ。ꍬꏦꍤꄻꍞꊟꍤꄻꏦꉻꄻꐛꒆ，ꁆꍆꏲꉻꆏꋍꃱꃅꏲꂠꌠꄻꐛꒆ，ꀊꅰꉾꃪꃅꏮꆫꄹꏦꍞꊟꂿꄐꋊꇤꎼꇁ。ꈍꄮꑌꏟꈯꀕꃅꍹꈔꅓꀞꌠꃅꇬꎷ，ꀋꎪꃅꃣꈌꀉꒉꀊꂾꌠꍤꀞ，ꊋꇤꄉꉹꁌꈭꇍꄉꅐꇁꌠꍹꈔꌠꌤꃆꂥꀘꌶ。ꊿꑞꂷꀂꏽꎍꄿꂿ，ꌅꈌꀄꊭꀉꒉ、ꑋꅉꀊꂥꀁꂥꌠꉬꄿꂿ，ꄈꏦꇩꏦꇬꐆꀐꄷꆏ，ꐯꇯꇨꅓꀋꎝꌠꉬ。
（ꉆ）ꄈꃤꍬꏦꌌꌬꋒ，ꑴꐚꃅꄈꃤꏓꋧꋍꃱꃅꌠꀧꌋꃅ。ꄈꃤꏓꋧꋍꃱꃅꌠꆹꄈꊋꃤꉬ，ꋋꆹꎆꏣꐧꋦꀻꎆ、ꊿꋅꋯꑌꁨꎆ、ꇩꏤꎴꏲꑘꒃꌠꃅꇫꑟꌠꄉꀧꁧꀦꉬ。ꄈꊝꇁꌠꃅꒊꃅꇁꀊꅰꌼꇪꑲꆏ，ꆽꎍꌠꂿꃆꀊꅰꃅꊋꋠ，ꀊꅰꃅꊋꀥꇱꄉꄈꃤꍬꏦꋈꄻꌶ，ꀊꅰꃅꄈꃤꏓꋧꋍꃱꃅꌠꀧꌋꃅꌶ。ꈁꐥꊐꌠꄈꎀꍹꌋꆀꄈꑼ、ꇥꀯꋍꏅꌠꈜꀕꇈꏲꌋꇥꀯꀋꉬꀋꉆꌠꆏꀋꎪꃅꑴꐚꃅꄈꏦꍬꌶ，ꑴꐚꃅꄈꎀꍹꏥꏦꌋꆀꄈꈐꍔꍞꐥꐨꎕꏦꇬꈴꄉꌤꀞ，ꊿꈀꄸꂷꑌꎀꍹꄩꐱꆹꀋꉆ。ꀋꎪꃅꍏꑷꌅꈌꋦꒉꐨꀧꌋꃅ，ꉪꇐꀂꏽꍔꍞꀂꏽꃅꐨꀂꏽꐯꇯꄈꍏꑷꌋꆀꐮꐊꋒꐯꋒꃅꄉꌶ，ꀋꎪꃅꄈꃤꌧꇗꌋꆀꈛꏦꌐꏦꏱꁈꌬ，ꍏꑷꏲꑘꅇꁵꌠꁣꀋꐥꌠꄉꀧ，ꈍꃅꑌ“ꄩꏱꁈꐥꆏ，ꀏꊜꁈꐥ”ꃅꎻꀋꉆ，ꈍꃅꑌꅇꁵꌠꀋꍬ、ꏢꄉꌠꀋꆏꌠꐥꀋꉆ。ꊋꀥꇱꄉꍞꊟꍤꄻ，ꏟꈯꀕꃅꄈꃤꍬꏦꈜꀕꇈꍔꍞꍬꏦꇬꍬ，ꍬꏦꇬꀋꈴꌠꃅꐨꌌꀋꎪꃅꎔꃅꂥꀘꌶ，ꃶꐚꃅꍬꏦꂾꆹꈀꄸꑌꐥꊯ、ꍬꏦꍬꇬꌅꈌꐋꀋꌡꌠꀋꐥ、ꍬꏦꌬꇬꐋꀋꌡꌠꀋꐥꌠꃅꇫꑟꄉ，ꄈꑭꊂꀏꄩꃅꑭꁘꐮꐊ、ꊋꇤꁨꆹꌠꊋꃤꀉꇨꌠꐛꇁꎻ。
ꐋꀨꊈ！ꍏꇩꐛꐨꐧꋦꉪꏦꈝꃀꇬꄉꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꆹ，ꌻꇭꌺꄿꌠ、ꇝꂱꎁꃅꀑꇬꁮꌠꀒꋏꀋꃷꎵꌠꉪꐨꌋꆀꉘꇉꐨꉬ。ꀊꉗꃅꉌꇨꎭꀋꐒꃅꈁꇲꈁꄿꉈꈽꅉꇬꄉ，ꉪꄈꆹꅱꈯꃅꏓꂱꊫꁱ，ꁮꑋꐨꀉꒉꐯꀉꒉꃅꐥꀐ，ꉬꐮꉼꈴꉬꉎꉌꐡꌠꎔꃨꌠꐩꋊꇐꀳꇐꏢꁱꎼꇁꀐ，ꀱꀋꉆꃅꀋꉊꊁꋎꌠꈭꐨꍏꇩꈐꐒꉈꎭ、ꌢꎭꊋꁧꌠꉈꁒꑓꊰꐛꐨꐛꊂꄚꄉꌐꀐ，ꀱꀋꉆꃅꍏꉸꊿꋅꀋꆏꃅꀻꎆꀉꇨꆹ、ꇰꀋꃀꃅꀱꌄꆣꇁꌠꐩꋊꀹꄻꄉꀐ，ꌧꑳꐩꋊꉬꄙꈎꎖꐥꌠꍏꉸꊿꋅꆏꐛꐪꀊꏀꏃꃅꋧꃅꊿꋅꈐꏭꉆꎍ。ꀊꏀꌠꈭꃀꈜꂾꇬ，ꉪꊇꃅꎁꀊꅰꃅꀉꒉ、ꃣꁧꀊꅰꃅꀉꇖ，ꀋꎪꃅꀊꅰꃅꏟꈯꀕꌠꉜꐨ、ꀊꅰꃅꀉꇨꌠꊋꇤꄉ，ꊛꄉꐛꏀꈴꋈꄻꌠꄹꎆ、ꁍꇩꏓꋍꃱꃅꌐ、ꋧꃅꄮꐽꌠꀧꌋꃅꌠꌋꆀꐯꇯꀻꎆꌠꊥꎆꌠꐩꋊꂿꃆꀉꒉꋋꌕꏢꌠꃅꇫꑟ。
ꏓꂱꉌꒊꌠꌋꆀꏮꄀꌠꂾ，ꐩꋊꇎꏦꌋꆀꎖꉚꀊꏀꌠꂾ，ꄈꑭꊂꆏꀋꎪꃅꎭꊝꉮꌸꉪꐨꀉꇨꃅꑌꄉ，ꑖꑟꀕꋓꉪꁨꃅ，ꄉꄡꒉꉌꄡꊸꃅ，ꈍꄮꑌꀂꏾꏸꐚꃱꐚꃅꄉꇬꎷꌶ；ꀋꎪꃅꏀꀺꉪꉻꀉꇨꃅꑌꄉ，ꏟꈯꃅꇗꊈꌬ，ꆹꑽꌠꄺꀱꄉ，ꈍꄮꑌꊋꇤꊵꑵꐛꌠꉌꊈꐛꄟꐥꄉꇬꎷꌶ；ꀋꎪꃅꉪꅉꑞꅉꉪꉻꀉꇨꃅꑌꄉ，ꉹꁌꉌꒊ，ꉹꁌꊫꁱꄉ，ꈍꄮꑌꏓꂱꌌꉌꂵꈐꀊꂥꇊꀊꂥꅉꇬꊐꄉꇬꎷꌶ；ꀋꎪꃅꂿꃆꃅꉪꉻꀉꇨꃅꑌꄉ，ꇯꍝꌠꎹꃶꐚꌠꃅ，ꎬꅧꃅꉈꈽ，ꈍꄮꑌꇭꍣꄈꊿꍔꍞꑴꊈꐥꇬꎷꌶ。
ꍏꇩꐛꐨꐧꋦꉪꏦꌤꑘꆹꊂꏭꉜꄉꃅꌠꌤꑘꉬ，ꌠꏀꉌꊋꑌꌠꁳꋍꋏꇈꋍꋏꃅꊛꄉꉈꈽꅷꁧꌶ。ꄈꑭꊂꃅꐯꇯꌠꏀꉜꁨ、ꌠꏀꉈꇬ、ꌠꏀꉁꅉꌶ，ꌠꏀꉪꐨꅲ，ꌠꏀꉀꒆꌠꏭꈐꊟꊋꊡ，ꌠꏀꑘꀺꌠꏭꄏꐓꌶ。ꌠꏀꋍꏅꌠꆏꏣꀋꑌꃅꄈꃤꇳꍝꌠꍬ，ꎃꊒꌠꋧꃅꉜꐨ、ꊿꐥꉜꐨ、ꁌꐨꉜꐨꐥꄉ，ꐥꋊꐥꍂꃅꉪꊇꇰꀋꃀꌠꁍꇩꉁꅉ，ꐥꋊꐥꍂꃅꉪꊇꇰꀋꃀꌠꏓꂱꉁꅉ，ꐥꍂꃅꉪꊇꇰꀋꃀꌠꍏꉸꊿꋅꉁꅉ，ꍏꇩꐛꐨꐧꋦꉪꏦꇰꀋꃀꌠꌤꑘꃄꄻꅉꇬꄉ，ꌠꏀꆗꃅꋍꑍꁳꏁꇅꁤꇅꁏꎻ。
ꍏꇩꐛꐨꐧꋦꉪꏦꌤꑘꆹꍏꉸꌺꇖꈁꐥꌠꉌꂵꋍꂷꃅ、ꋯꑌꊋꇤꌶ。ꋯꑌꌠꆹꃅꇴꄉꉻꀉꒉꌠꉬ，ꋯꑌꌠꆹꊋꃤꉬ。ꄈꑭꊂꐋꀨꆏꏟꈯꀕꃅꄈꊇꅉꌌꋯꑌꌠꄉꀧ，ꌤꑘꐯꐊꌠꌌꋯꑌꌠꊥꎆ，ꑴꐚꃅꄈꑭꊂꋯꑌꋍꃱꃅꌠꀧꌋꃅ，ꇩꏤꑭꊂꊿꋅꈁꐥꌠꏓꂱꀉꒉꃅꐮꋯꑌꌠꈫꈈ，ꎿꈐꎿꉈꍏꉸꌺꇖꀊꅰꃅꐮꋯꑌꌠꀥꇱ，ꍏꇩꏓꂱꌋꆀꋧꃅꇩꏤꈁꐥꌠꏓꂱꀊꅰꃅꐮꋯꑌꌠꊥꎆ。
ꉪꊇꁳꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ，ꀊꅰꃅꅱꈯꃅꋯꑌꌊꄈꍏꑷꈭꇍꄉ，ꐊꑷꃅꊼꇅꌣꈚꌠꐧꋦꋈꄻꌠꎁꃅꉈꈽ，ꀋꆏꃅꍏꇩꐛꐨꐧꋦꉪꏦꊋꐛꐨꀊꏀꌠꃅꇬꅜ，ꐯꇯꍏꇩꏓꂱꌋꆀꍏꉸꊿꋅꀊꅰꃅꐥꌒꄻꌒꎔꇁꃨꌠꃆꏂꊂꑋꋈꄻꎻ！
