ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꆈꌠꀑꐱꃆꂮ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꆈꌠ,ꀋꃋꊻꂷ657.2ꃪꐥ。ꀉꑌꌠꆏꒊꆈ、ꌧꍧ、ꇭꍏꌋꆀꇨꑭꍌꋇꊨꏦꏱꅉꐎꇬꀀ。ꍏꇩꂓꅑꌠꊾꄻꃅꏸꃑꅉꆿꁮꀒꎂꆏ,ꆈꌠꊨꏦꏱꅉꍏꍏꃚꐛꅉꉬ。

  ꆈꌠꊨꏦꅇꂷꉐꂷꁱꂷꑴꂷꐥ。ꆈꌠꆏꉴꊗꉙꑫꊗꂳꉙꋇꇬꅑꌠ,ꆈꌠꁱꂷꆹꃚꊨꁱꂷꉬ,ꃅꋊ13ꋊꋎꇬꏓꐛꌠ。

  ꆈꌠꊝꏫꑇꇑꆹꀋꉬꀋꉆꌠꆏꋌꐛꋌꐙꌠꉜꒉꌋꆀꀋꁌꀋꁧꉜꒉ。ꒊꆈꇭꍏꃅꄷꆈꌠꄹꁆꆏꄌꏫꌋꆀꃛꏫꇱꁧꏖꌠꉬ。

  ꆈꌠꐩꋊꀊꎴ。2000ꈎꂿ,ꆈꌠꁍꁈꆏꒊꆈꌋꆀꇤꇭꍏꉈꑴꀉꉷꏁꒉ、ꇂꊸꏦꒊꃀꅶꍯꇬꀀꀐ。ꉻꈎ8—10ꃅꋊꄮꇬ,ꆈꌠꌋꆀꀙꋇꀨꇬꎍꌠꇂꍋꇩꍔꌅꄻꄉꀐ。

  ꆈꌠꏂꀨꄯꒉꌐꀋꉆ,ꋧꐈꌷꇐ、 ꐩꋊꌷꇐ、ꃆꃀꁱꇐꑠꁁꏯꃅꐥꌐ。ꄚꈐꏭ《ꑾꌋꈤꆈꌠꄯꒉ》ꆹꆈꌠꐩꋊ、ꃅꀹꈨꑴꃆꂮꁱꌠꆈꌠꁱꂷꄯꒉꋐ,ꆈꌠꃤꀋꐊꅍꀋꐥꌠꄯꒉꉬ。ꐩꋊꇐꀳ《ꃀꇭ》ꆏꁍꁈꃅꃴꃄꄅꁉꃆꂮꁱꌠ。ꉉꈻꇐꀳꀊꎴꌠ《ꀊꏂꂷ》ꆹꆈꌠꌠꏀꑮꆜꐯꉂꃆꂮꁱꌠ,ꇐꀳꈁꉉꌠꆏꏓꂱꊋꒉꊋꁧꆍꌠꀋꏦ,ꊨꏦꄿꐨꌋꆀꐥꌒꃆꂮꊁꈹꌠꉉꈻꀐ。

  ꃅꈋꐯꀋꌡꅉꀀꌠꆈꌠꏓꂱꆹꃢꇓꃢꈜꐯꀋꌡꃅꐙ。ꀑꐱꃅꇬꆏꆃꎭꆈꌠꃤ、ꃴꃀꎭꃤ、ꉙꉷꃤꃅꐙꌠ。ꆃꎭꆈꌠꌺꃰꆏꌀꂥꊏꄉ,ꊿꌌ“ꄟꁍꌒ”ꄷꄹ。ꉈꑴꀍꄟꀉꆈꌀꄝꄻꄉꌠꅑ,ꌳꈄꊋꑌꏡꑌꃅꐙꌠꉬ。ꆃꎭꆈꌠꑮꆜꃤꌕꊨꂃꆹꂪꌦꌕꑵꌌꈪꌠ,ꋽꐯꋽ,ꀛꐂꑵꉙꇬꈝꐮ,ꋀꊈꀂꏾꅑꅍꆏꀊꅰꋽꐯꋽꌠꉬ。

  ꆈꌠꋠꅍꀋꉬꀋꉆꌠꆏꀀꃌ、ꈾꑠꑠ。ꆈꌠꎧꅝꇬꋍꈚꑌꄉ,ꆎꏮꇊꉢꁳꃅꅝꌠ,ꈎꏅꆪꆗꇬ,ꆈꌠꑮꆜꆏꎧꄣꄌꅐꇁ,ꅝꅍꈍꑍꏢꇤꇫꍣꄉ,ꊿꄹꃥꄚꈴꇁꌠꁳꅝꎽ。ꑠꆹꆈꌠꏓꂱꆹꉌꈯꑓꈜꃅꄹꃥꁌꒉꌠꉜꅐꇁꉆ。

  ꋍꈓꋑꀋꋒꂿꑘꈎꆪꃘꆪꑍꊏꇖꑍꆹꆈꌠꈣꒉꐯꈣꒉꌠꄔꊏꑍꉬ。ꋋꄹꉈꆏ,ꊿꄔꊏꌌꃆꄔꄀꄉ,ꑳꈫꑳꇋꌋꆀꐦꀞꑠꇬꏮꄉ,ꋍꈭꐨꃆꄔꀉꒉꇤꏦꄉ,ꑵꉙꑵꀛꐂꈩ,ꁡꇤꋋꂷꃅꋋꇱꉌꇿꑓꇿ、ꈩꌒꀛꌒ、ꀀꌒꑌꌒꋍꉎꀋꐥꌠꉬ。

  ꆈꌠꑮꑟꌠꑌꐋꀋꌡꃅꐙꌠ,ꆃꎭꆈꌠꉹꁌꆹꀋꃋꑌ“ꑮꃀꇑ”ꃅꀹꋻꅑꑠꐥꌦ。ꑮꃀꑮꇬ,ꌺꃰꄰꆏꃺꃶꀁꑳꃅꇁꌊꑮꃀꄰꇁ。ꑮꃀꄰꌋꅪꈧꌠꆏꂁꃭꉱꊂꆈꉆꄉ,ꑮꃀꋩꇁꌠꊿꏭꀆꐒꎭ,ꁍꂮꌎ。ꀋꄸꄷꑮꃀꋩꊿꈧꌠꇇꎇꑮꃀꀊꏀꃢꈜꂪꑲꆏ,ꑮꃀꄰꇫꀋꇊꀋꄡꀐ。ꋍꈭꐨꀁꑳꁳꑮꃀꀊꏀꀵꌊꅐꁧ,ꑮꃀꄰꆏꇫꊂꄉꈹꋒꃅ,ꑮꃀꀊꏀꀊꎴꃅꁧꀐꑲꆀ,ꇴꃅꉻꃅꌠꄚꄉꆏ。

  (ꄯꒉꁱꇐꆹꑸꇢꌭ、ꊉꁉꃏ、ꐕꍬꉰꏤꏓꄻꌠ《ꍏꉸꊿꋅꈁꐥꌠ》ꋐꌠꐒꌠ)
ꁰꒌ




  • 特别鸣谢
    中国民族语文翻译局彝文翻译室