ꍔꃚꌤꃅꅇꄜ
——2020ꈎ5ꆪ22ꑍꊯꌕꈭꇩꏤꑭꊂꏓꂱꁧꎁꃀꀉꒉꌕꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꍔꃚꌤꃅꃆꂮꅇꄜꂿ，ꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋌꃢꏀꉹꌀꌡꆅꅋꋍ꒜ꆅꇵꆅꐯꇳꐨꆹ，ꍏꇩꀊꏀꄻꐛꊂꅑꅸꇁꌠꉪꇩꏤꁊꄻꐳꐨꐳꐯꐳ、ꇵꅽꑭꊂꀊꐯꀕꀊꐯ、ꄴꏮꋎꍅꌠꊋꋠꐨꀉꒉꐯꀉꒉꌠꋋꇅꃅꉘꀋꇉꃅꅐꇁꌠꋍꏅꁦꎴꆄꄻꌤꆿꀉꒉꀊꂾꌠꉬ。ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꇩꏤꑭꊂꀏꄩꌋꆀꏓꂱꉹꁌꋍꏅꎭꀋꐒꅧꀋꐒꃅꊋꇤꄷꀋꁧꀑꇬꁮꑋꄉ，ꇵꆅꐯꇳꐨꄴꏮꋎꍅꌠꊌꐨꀉꒉꀊꂾꃅꊌꅜꀐ。ꀋꃋꋋꇅꇬ，ꇵꆅꐯꇳꐨꂫꀋꇽꑴꌦ，ꀻꎆꂿꃆꊋꋠꇨ。ꊋꇤꄉꇵꆅꐯꇳꐨꇱꎼꁮꑋꌠꊨꌊꀁꂥꐯꀁꂥꌠꇬꄉ，ꊋꇤꄉꎼꈎꎆꏣꐧꋦꀻꎆꌠꑞꅉꁻꌐꂿꃆꃅꇫꑟꌶ。
ꋍ、2019ꈎꌋꆀꎼꈎꅑꅸꇁꌠꌤꃅꐨꉪꀱ
ꀋꉊꄻꈎ，ꉪꇩꏤꀻꎆꌠꊋꋠꐨꀉꑌꃅꊝ。ꋧꃅꎆꏣꉀꎆꌠꀁꂥ，ꇩꏹꎆꏣꃼꇇꐮꃝꐮꌎꌠꀊꅰꃅꃛ，ꇩꈐꎆꏣꀁꋌꊰꍅꊋꀉꒉ。ꐋꀨꑮꏣꀻꈯꄜꃅꄉꌠꄈꍏꑷꆏꇩꏤꑭꊂꊿꋅꈁꐥꌠꏓꂱꏃꂠꌊꇨꀖꊋꑣꄉ，ꋋꈓꌠꀋꉬꀋꉆꌠꑞꅉꁻꌐꂿꃆꃅꌐꄉ，ꐊꑷꃅꊼꇅꌣꈚꌠꐧꋦꋉꐛꌠꎁꃅꏤꇽꐨꐥꌠꅉꃀꌆꄻꄉ。
——ꎆꏣꒈꇁꌠꀑꐱꃅꎍꐽ。ꇩꈐꒃꅐꈁꉬꁌꐨ99.1ꃪꂡꂷꇬꑟ，6.1%ꉀꎆ。ꇓꈓꏦꎫꃅꑘꊌꌠꊿ1352ꃪꑻꀊꏀꃅꁦꎆ，ꍤꄻꇬꃅꑘꀋꊌꐨ5.3%ꈋꐯꎍ。ꀀꊿꌬꈧꁌꏤ2.9%ꉀꎆ。ꇩꏹꊌꐨꌬꐨꀑꐱꃅꐮꆽꏣ。
——ꎆꏣꐛꉻꌋꆀꋥꁕꄐꉻꐪꊛꄉꄻꃪ。ꐧꋦꌬꈧꅍꈘꆽꃅꃷꌠꈁꉬꃷꁨ40ꃪꂡꂷꄩꐂ，ꌬꈧꌠꐪꊛꄉꀋꉬꀋꉆꌠꈺꇙꂿꄐꋊꇤ。ꂴꅑꄺꂡꑘ、ꐛꏀꁧꃤꃅꑘꊼꇅꐳꃅꉀꎆ。ꋛꂷꅐꐨ1.33ꃪꂡꏣ。ꅉꀕꀀꋦꊻꂷꇓꈓꏦꎫꐛꈴꐨꉘꃀꃢꌠ60%ꄩꐂ，ꋥꁕꀉꒉꀊꂾꌠꄐꇐꏤꁈꃹꅼꃅꃄꌬ。
——ꀻꎆꇙꊋꀊꏀꌠꀋꆏꃅꀉꇨꇁ。ꈆꑪꇮꇐꏀꀺꌠꊌꐨꀋꂿꑘꑠꈨꊌꅜ。ꏀꄓꅐꑘꐪꊛꄉꀉꇨꇁ，ꋊꃅꅐꑘꐳꃅꊐꐕ。ꋍꏅꑘꀺꋍꉻꏀꀺꌠꃹꅼꃅꃅ，ꎆꏂꑘꃷꁨꋍꑍꌠꀊꌃꃅ1ꃪꁯꈋꉐꁦꎆ。
——ꄺꀱꁉꃑꌠꑭꁘꀋꂿꑘꃅꐕꎼꆹ。ꇲꁵꁁꏯꐛꉻꐨꐥꃅꄺꀱꌠꐪꊛꄉꃹꅼꆹ，ꀋꂿꑘꁁꏯꄺꀱꌠꂵꅐꐨꀊꏀꌠꐥ。ꇗꏸꊨꁌꊰꌠ2.36ꃪꂡꂷꐥ，ꂴꏤꄉꌠꄉꈁ2ꃪꂡꂷꀋꇈꌠꄩꐂ，ꄺꑣꑘꌋꆀꀄꊭꐭꎆꏂꑘꀉꑌꐯꀉꑌꃅꈲꊌ。ꍔꃚꏲꉻꄺꀱꂿꃆꃅꌐ。“ꄝꏲꃅ”ꄺꀱꌠꃹꅼꃅꄹꎆ。ꈆꑪꁧꀿꅍꄻꄉ。ꐯꇯ“ꋍꁕꋍꈜ”ꋈꄻꌠꊌꐨꀊꏀꌠꊌꅜ。ꇩꉈꃼꇇꃅꇁꌠꎆꇱꏦꃤꃄꌬꃷꋪꏤꄻꅐꇁ，ꎮꉰꄿꐨꃼꇇꃅꉚꅉꀊꏀꁔꌠꁦꎆꃅꄻꇱ。ꉇꉻꃼꇇꉇꎆꎍꐽꇬꎷ。
——ꈢꇓꀖꀉꒉꌕꐘꌠꁨꎆꐨꀋꉬꀋꉆꌠꊌꅜ。ꂿꑘꁡꇤꌢꎭꊻꂷ1109ꃪꑻꊨꒊ，ꌢꎭꅐꇁꐨꀁꋌꊰꌊ0.6%ꇬꑟ，ꎭꑆꇔꈢꇓꀖꌠꏤꇽꐨꐥꌠꊌꐨꊌꅜ。ꍍꆀꄴꏮꌠꐪꊛꄉꄹꎆ，ꀋꉬꀋꉆꌠꍍꆀꅍꋊꃑꃷꁨꐪꊛꄉꀁꋌꊰ，ꒆꉻꋦꈭꉻꄜꃅꄻꃪ。ꎆꒉꎆꇁꒈꇁꌠꀑꐱꃅꎍꐽ。
——ꉹꁌꐥꐨꀒꁨꋍꁘꃅꄻꃪ。ꀀꊿꊻꂷꐽꏡꃅꌌꌫꄻꉆꌠꊌꐨ3ꃪꂷꄩꐂ。ꅉꀨꃀꌠꀨꎹ、ꆅꉁꆅꄻ、ꀁꂥꀧꑠꏦꀧꑟꐨꉀꐕ。ꇓꈓꏦꎫꏦꀧꀀꑳꋈꄻꌠꌋꆀꂿꑘꁡꇤꑲꎓꇣꐡꌠꄺꀱꌠꃹꅼꃅꄹꎆ。ꋭꑘꂘꑘꊬꌠꌶꌺꐥꐨꇬꎆꇇꀨꌠꊿꃷꁨ40%ꀋꇈꁦꎆ，ꀊꂥꊐꃅꑘꉙꂘꌶꅉꇬꌶꌺꁦꎆꃅ100ꃪꑼꎹ。
ꉪꊇꈣꒉꃅꍏꉸꏓꂱꇭꉼꇩꄻ70ꈎꈭꏝꐛꌠꋨꏦ，ꀉꒉꐯꀉꒉꃅꇩꏤꑭꊂꊿꋅꈁꐥꌠꏓꂱꇩꉂꐨꄕꊪꄉ，ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꅜꌠꊋꃤꀉꒉꐯꀉꒉꌠꏓꋧꎼꇁꀐ。
ꉪꊇꆏꊋꀥꇱꄉꄈꃅꇏꐙꎴꌠꋈꄻ，ꏟꈯꃅ“ꇬꂾꉪꐨꎺꄉ、ꂿꃆꎺꈬꃅꄉ”ꌠꀨꄜꉙꂘꌠꃅ，ꏦꇨꃅꍏꑷꏤꐪꉆꐘꌠꉌꊈꃅꇫꑟ，ꐪꊛꄉ“ꃅꇏꇖꑵ”ꌠꄺꀱꄉ，ꅉꂫꊐꌠꎁꃅꃣꇖꊨ。
ꍏꇩꐛꐨꇩꏤꀉꒉꌠꉇꉻꑌꑲꊌꐨꀉꑌꐯꀉꑌ。ꊋꐛꃅꑍꈭꌠ“ꋍꁕꋍꈜ”ꇩꏹꇷꃅꀑꋾꉉꎥꈉꑠꀉꒉꀊꂾꌠꃥꌋꄻꉇꉻꑌꑲꌠꃅ，ꑮꏣꀻꍗꑮꏤꄈꌋꆀꇩꏤꏲꌋꈧꌠꇩꏤꀉꑌꂷꅲꇫꆹꄉ，ꇩꏤꑍꊏꂷꏓꉻꏲꌋꀑꋾꃀ、ꏂꏪꇩꏤꏲꌋꐮꂿꃀ、ꑸꑠꀑꋾꃀ、ꎮꉰꇷꃅꎀꍹꀑꋾꃀ、ꄏꑸꇷꃅꏲꌋꋬꈭꃀ、ꍏꉩꏲꌋꐮꂿꃀ、ꍏꏝꉴꏲꌋꐮꂿꃀꑠꃀꀉꒉꀊꂾꌠꈿꈽ。ꏣꀋꑌꃅꅉꆺꑭꊂꏱꄻꉻꑫꋈꄻꌠꌋꆀꄺꀱꌠꇬꐊꈽ，ꃰꊿꊫꂫꐮꐊꐙꌠꏓꄻꌠꄹꇙ。ꎆꏣꉇꉻꑌꑲ、ꃰꊿꁱꀕꐮꈴꌠꊌꐨꀉꇨꃅꐥ。ꍏꇩꆹꋧꃅꄮꐽꌠꌋꆀꀻꎆꌠꊥꎆꌠꎁꃅꑆꊋꀋꂿꑘꌠꅐꌞꀐ。
ꁧꎁꊈ！
ꏀꉹꌀꌡꆅꅋꋍꃀꆅꇵꆅꐯꇳꐨꇫꅐꇁꈭꐨ，ꄈꍏꑷꆏꇵꆅꐯꇳꐨꄴꏮꋎꍅꌠꌌꀨꎍꌠꌤꀉꒉꐘꌠꃅꄉꒃꉇ，ꑮꏣꀻꊝꎻꏹꊨꏦꑭꄑꄉꇹꄣ、ꊨꏦꑭꄑꄉꄐꁆ，ꀋꎪꃅꏓꂱꀑꇬꋬꂻꌠꌋꆀꇭꀧꒉꄚꇁꄿꌠꌌꀨꇬꄉꇬꎷ。ꄈꍏꑷꏃꂠꌠꇂꃴꄉ，ꍏꑷꇵꆅꐯꇳꐨꊜꄻꌤꃅꌠꏲꌋꑦꊤꆏꐳꃅꎥꃪꄐꁆ，ꍏꑷꄐꇺꊤꆏꊋꀥꇱꄉꄐꌐꍞꇺ，ꇩꃷꑼꏓꐊꄴꏮꏓꋏꉺꏦꏓꇲꋮꄮ，ꃅꄷꈁꐥꌠꌤꏲꅉꈁꐥꌠꄉꅍꃅꎁꃄꄻꋒ，ꐧꋦꋍꑞꋍꁁꏯꈁꐥꌠꃅꊋꇤꄉꇫꊋꁈꄏ，ꇵꆅꐯꇳꐨꄴꏮꋎꍅꌠꏓꂱꃅꄓꃅ、ꏓꇱꄉꃅ、ꈛꄵꄉꃅꀐ。ꆅꉃꌤꃅꊿꋍꏅꌠꌳꈄꀬꅑꃅꀕ，ꏓꂱꁌꄝꂽꇜꂽꑼꌳꈄꀬꅑꃅꃣꇖꄜ，ꈆꑪꇮꇐꌤꃅꊿꐮꐊꄉꈢꇓꀖ，ꋥꁕꌤꃅꊿ、ꇬꉢꇥꏠ、ꅉꂫꊐꌠꇥꀯ、ꈨꏀꌤꃅꊿ、ꉌꇗꃅꊿꆏꏟꈯꃅꂱꑱꃅꎁꃅ，ꎊꈬꐳꌞ、ꋦꈭꁦꎴ、ꇵꆅꄘꑣꎊꈬꒃꅐꎞꎭꊿꎭꀋꐒꅧꀋꐒ，ꂡꃪꌠꎃꐚꑘꃅꊿꌙꈈꀕꃅꑆꊋꅐꌞ，ꃶꉴꏓꂱ、ꃛꀙꏓꂱꇨꌊꐚꇁꀋꉆ，ꐧꋦ꒔ꑞ꒔ꁆꏯꌋꆀꇤꀎꄠꃺꑌ、꒺ꉈꃺꑌꃅꎆꅐꋚꅐ。ꍏꉸꌺꇖꆹꆲꁏꉐꐙꃅꐮꐊ、ꐯꉚꐮꅲꐮꇇꀨꄉ，ꇵꆅꐯꇳꐨꄘꑣꌠꄈꉬꀕꌠꍤꍰꄻꄉꀐ。
ꇵꆅꐯꇳꐨꄴꏮꋎꍅꌠꇬ，ꉪꊇꆏꉌꊋꑌꈬ、ꆲꁏꉐꐙꃅꐮꐊ、ꈆꑪꃅꄴꏲ、ꊒꌸꃅꏱꁈꏂꌠꀑꐱꇖꐨꇬꈴꄉ，ꐳꃅꃶꐚꃅꑭꋧꃅꋍꑞꋍꐘꌤꃅ。ꐳꃅꃛꊸꇬꊝꌠꏁꁈꏁꌬ，ꏀꉹꌀꌡꆅꅋꋍꃀꆅꏭꆏꌌꋍꉹꌠꇵꆅꃅꏲꂠ，ꃅꄷꋍꈚꋑꀋꋒꃅꋋꇅꃅꉘꀋꇉꃅꅐꇁꌠꋍꏅꁦꎴꆄꄻꌤꆿꀉꒉꀊꂾꋍꊐꌠꃅꀕ。ꏟꈯꃅꃶꉴꌋꆀꃛꀙꐏꁇꌠꃅꊋꐛꄷꀋꁧꊌꐨꐰꏤꐨꐥꌠꊌꅜ，ꁰꈘꃅꏦꇨꃅꏱꋏꏁꁈꃄꌬ，ꇩꏤꑭꊂꊋꃤꃅꌌꇫꇇꀨ，ꆅꉁꆄꄻꊿ4ꃪꎖꑹꁆꌌꐳꃅꇫꇇꀨ，ꉻꎹꎭ、ꆺꎹꎭꑱꑼꌋꆀꃓꊸꑱꑼꋈꄻ，ꐳꃅꎴꌊꉃꌠꊿꆅꀀꈤꁦꎆꇱ，ꆅꉃꌬꇐꏦꀧꌠꌌꂴꐕꄉ，ꀋꆏꃅꆅꉃꄐꉻꄻꃪ，ꍏꑭꑳꐯꇯꌌꆅꉁꌠꃅ，“ꇖꏓꋧ”ꌠꃅꇬꎷ，ꊋꈁꑌꃅꇤꄉꊿꆅꈭꋏꄉ，ꄾꌦꋩꃅꉃꌒꐨꉀꐕ、ꆅꌦꐨꊨꒊ。ꇩꏤꑭꊂꃅꉌꈲꈎꏅꑬꆏꄮꌌꁦꎆ，ꌶꄮꄯꄉ、ꋭꋽꃅꀱꉈꑴꑘꃅ、ꐯꏍꄉꉇꅐ，ꋍꉻꃅꄴꏮꋍꉻꃅꋎꍅꌠꇬꎷ，ꀋꎪꃅ“ꇖꏜ”ꌠꃅ，ꏟꈯꃅꇵꆅꇁꀦꋎꍅ，ꇿꋌꐥꃅꇵꆅꐯꇳꐨꁭꁘꇁꌠꋎꍅ。ꊋꀥꇱꄉꁬꋌ、ꆅꁿꋌꌋꆀꎖꉚꋌꎥꃪꀖꁉ。ꐳꃅꆅꉁꌬꇐꒃꅐꌠꍔꒉ，ꄮꈉꀁꎴꊭꈐꃅꀉꒉꃅꉀꎆ，ꐥꐨꈉꄻꅐꇐꇲꁵꁌꏤꎍꐽꌠꒃꉇꋒ，ꈭꈜꈜꀦꈴꇬꁣꀋꐥꌠꌋꆀꊖꌋꄆꒀꐞꌗꇲꁵꌠꏦꀧ。ꇵꆅꐯꇳꐨꐛꐈꇁꌠꇬꉜꄉ，ꋭꋽꃅꅉꀕꃅꄴꏮꋎꍅꌠꄹꎆ。ꋯꉈꇵꆅꐯꇳꐨꁭꁘꐛꐪꇬꉜꄉ，ꐳꃅꉇꉻꈏꃹꇁꄴꏮꉻꑫꏓꄻꄉ，ꊋꀥꇱꄉꋯꉈꉪꇩꏤꉻꊿꏭꉈꇬꑗꇬ。ꏣꀋꑌꃅꇩꏹꇷꃅꌠꃅ，ꄇꄜꋊ、ꀋꂁꀋꁿ、ꃅꎁꆸꄜꌠꃅꇏꇬꈴꄉ，ꇇꈤꃅꇵꆅꐮꇳꐨꈴꌗꄛꇰ，ꑴꇙꃅꇵꆅꄴꏮꇮꇐꌋꆀꃄꄟꌌꐯꇯꌬ，ꐮꏯꇇꀨ、ꐯꇯꇵꆅꄙ。
ꉪꊇꊻꂷ14ꂡꐥꌠꀻꎆꇰꌠꇩꏤꑠꂷꌊꉉꇁꇬ，ꄮꈉꀁꎴꊭꈐꃅꇿꋌꐥꃅꇵꆅꐯꇳꐨꋎꍅꄉꄎ，ꏓꂱꅉꀨꐥꐨꏦꀧꄉꀐꌠꆹ，ꈝꐮꃅꀋꐛ、ꃅꇫꑟꇬꊋꋠꐯꊋꋠꌠꉬ。ꉪꊇꃹꐨꑌꀉꒉꐯꀉꒉ，ꋍꄮꐰꎆꏣꉀꎆꐨꀁꋌꊰ，ꒃꅐꐥꐨꐥꀹꇬꎟꄜꀐ，ꄚꀑꇬꆹꋍꉎꀋꐥꌠ，ꋋꆹꀋꎪꃅꇫꄙꌶꉈꑴꊋꌗꃹꇬꑌꁌꁨꌠꉬ。ꉪꊇꆏꏓꇲꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌠꄹꎆ，ꊜꋽꄮꄝꇬꀋꎭꃅꀱꉈꑴꑘꃅꀱꉈꑴꒃꅐꌠꄹꎆ，ꏱꁈꏁꁈ8ꁆꏯ90ꐘꄻꅐꇁ，ꎆꏂꑘꄏꐓꃅꈉꎍꐽꌠꃄꌬ，ꇗꏸꁌꄹꁆꊨꏆ，ꁌꎴꄇꈜꇬꈴꁌꈁꐥꌠꀋꎴꇧꎭ，ꊋꌬꀨꊰꊨꒊ，ꇔꊰꇱꎆꉛꌠꃑꄻ。ꈭꎁꇬꈴꄉꏛꏜꃅꃅꄷꍔꃚꎝꃆꑞꅉꐥꃷꁨꃑꎼꒉ。ꆫꃅꂿꏿꄮꇬꑋꈌꊪꏽꌠꇬꄉꀋꇤ。ꀋꆏꃅꎭꇔꈢꇓꀖꌠꄹꎆ。ꇇꀨꎆꃑꄻꂴꊐꌠꇬꄉꇵꆅꄘꑣꐺꌠꊿꌋꆀꊋꋠꌠꊿꁵ，ꁌꏤꋍꇅꇬꎆꁥꁵꌠꎕꏦ1ꁧꉀꐕ。ꏱꁈꋋꈨꆏꏓꂱꉹꁌꋍꏅꌠꁳꄚꄉꈲꏣꊌꎻ，ꋋꇅꃅꇿꋌꐥꃅꇲꁵꄉꀧꁌꏤꎍꐽꌠꌋꆀꀱꉈꑴꑘꃅꀱꉈꑴꒃꅐꌠꊥꎆꀐ，ꉪꇩꏤꎆꏣꏟꈯꀕꌠꌋꆀꊋꂫꀋꇰꀋꉈꌠꄛꑣꅐꇁꀐ。
ꁧꎁꊈ！
ꀋꉊꄻꈎꅑꅸꇁꌠꎆꏣꐧꋦꀻꎆꌠꌋꆀꎼꈎꇵꆅꐯꇳꐨꄴꏮꋎꍅꌠꊌꐨꐥꌠꆹ，ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꊌꐨꉬ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꈆꑪꃅꄐꌐꄉꌠꊌꐨꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꄉꊌꌠꉬ。ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀꋍꑞꋍꁆꏯꊿꂒꋦꌠꏭ，ꇬꀖꄉꈀꎭꀕ！ꑣꇤꏲꑘꇣꋲꏱꅉꐎꃺꑌ、ꀎꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꎿꉈꃺꑌꏭ，ꇬꀖꄉꈀꎭꀕ！ꍏꇩꐛꏀꈴꋈꄻꌠꌋꆀꇵꆅꐯꇳꐨꄘꑣꌠꏭꉈꇬꊋꁈꄏꌠꇩꏤꈁꐥꌠꍔꃚ、ꇩꏹꎀꍹꌋꆀꇩꏤꈁꐥꌠꐋꀨꏭ，ꇬꀖꄉꈀꎭꀕ！
ꊌꐨꏚꍆꈭꐨ，ꉪꊇꆏꏸꐚꃅꊝꇁꌠꊋꋠꐨꌋꆀꌤꃆꑌꉜꐚꌶ。ꅉꆺꑭꊂꇵꆅꐯꇳꐨꄜꎟꌠꊝꄉ，ꋧꃅꎆꏣꀉꇨꃅꉈꎞ，ꅐꑘꊛꏣꇲꁵꊛꏣꀰꏮꌠꇬꋍꇈ，ꇩꏹꃼꇇꎆꇱꌠꍕꒊ，ꃷꇐꀉꒉꌠꃷꎏꇙꈧ。ꇩꈐꌬꈧ、ꎆꇱ、ꉇꅐꌠꀁꋌꊰ，ꃅꑘꊌꍅꊋꄇꇖꀕꃅꀉꒉꇁ，ꎆꏂꑘꈜꀕꇈꉹꁌꀰꏢꎆꏂꑘ、ꐧꀠꀄꊭꐭꎆꏂꑘꊋꋠꌠꄇꇖꀕ，ꎆꒉꎆꇁꑠꁁꏯꃨꆰꐨꊼꇅꏓꋧꄉ，ꅉꂫꊐꌠꏱꎆꊌꐨꌬꐨꐮꄙꌠꀊꅰꃅꃛꇁ。ꍔꃚꌤꃅꀋꇎꀋꂪꅉꐥ，ꇶꏦꉪꏦ、ꇛꌺꉪꏦꄡꇗꊼꇅꑓꅐꎑ，ꇥꀯꀁꑌꑠꈨꆏꆼꎍꅍꀋꃅ、ꃅꅍꀋꃅ、ꃅꑲꀋꌧ、ꃄꈌꄐꃅꀕ。ꋍꈨꇬꍹꈔꌤꃆꀉꑌꃅꅐꇁ。ꇵꆅꐯꇳꐨꄴꏮꋎꍅꌠꇬ，ꋍꏅꁦꎴꆄꄻꃛꊸꊝꏲꂠꑠꁁꏯꊋꁧꈭꊭꀉꑌꃅꅔꁖꎼꇁ，ꉹꁌꃤꉈꑴꉜꐨꌋꆀꇖꐨꈧꌠꇫꉜꁨꄡꑟ。ꉪꊇꆏꀋꎪꃅꊋꇤꄉꌤꃅꐨꄺꀱ，ꃶꐚꃅꃅꎁꃅ，ꊋꇤꄉꏓꂱꉘꇉꐨꇢꄡꏿꌶ。
ꑍ、ꎼꈎꀻꎆꑞꅉꁻꌐꀋꉬꀋꉆꌠꌋꆀꊁꊬꌠꌤꃅꉻꄜꄐꁆ
ꎼꈎꍔꃚꌤꃅꋒꇬꆏ，ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ，ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꃅꈴꌬꈴ，ꏟꈯꃅꄈꅿꅉꀨꌧꇗ、ꅉꀨꈛꏦ、ꅉꀨꄐꁈꃄꌬ，“ꇖꑵꉪꉻ”ꀉꇨꃅꑌ、ꀋꎪꃅ“ꇖꑵꑴꑇ”ꉌꑌꄉ、“ꑍꑵꀧꌋꃅ”ꌠꃅꇫꑟ，ꏟꈯꃅꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꂿꃆꆼꒆꄉ，ꏓꇲꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌠꄹꎆ，ꇵꆅꐯꇳꐨꄴꏮꋎꍅꌠꅉꀕꃅꀕꌠꇎꏦꇂꃴꄉ，ꎍꐽꌠꇬꄉꀒꁨꆹꌠꌤꃅꀑꐱꅉꃀꉉꈌꌭꈬꇬꎷ，ꀻꎆꉪꉻꀊꏀꌠꌭꈬ，ꇲꁵꁁꏯꐛꉻꐨꐥꃅꄺꀱꌠꌌꀨꇬꄉꇬꎷ，ꏟꈯꃅꄺꀱꁉꃑꌠꌌꇘꊋꃅꄉꊇꁧꀊꂥꃅꀻꎆꌠꄹꇙꇬꎷ，ꏟꈯꃅꈢꇓꀖꀉꒉꌕꐘꌠꃅꋒ，“ꃘꎍꐽ”ꌤꃅꊋꃤꀉꒉꃅꇱ，ꀀꊿꃅꅍꊌꌠꄉꀧ、ꅉꀨꉹꁌꐥꐨꄉꀧ、ꃷꎏꀨꄜꄉꀧ、ꋚꂷꊋꀦꀋꈘꌠꄉꀧ、ꅐꑘꊛꏣꇲꁵꊛꏣꎍꐽꌠꄉꀧ、ꅉꂫꊐꌠꏮꈴꌠꄉꀧ，ꏟꈯꃅꈏꇓꈉꐨꍔꐯꌠꄐꇐꏤꁈꃄꌬ，ꎆꏣꀻꎆꌠꌋꆀꐧꋦꎍꐽꌠꃅꇴꄉꉻꀉꒉꌠꀧꌋꃅ，ꂫꋓꊋꐛꃅꎭꑆꇔꈢꇓꀖꌠꑞꅉꁻꌐꂿꃆꃅꌐꌠꄉꀧ，ꐊꑷꃅꊼꇅꌣꈚꌠꐧꋦꋉꐛ。
ꀋꃋꋋꇅꇬꌋꆀꋌꊂꋍꊭꇬ，ꉪꇩꏤꀻꎆꌠꇬꊝꇁꌠꈔꉆꐨꋓꎭꐨꆹꋌ꒜ꑠꐥꀋꋻ，ꄚꉪꊇꆏꐋꀋꌡꌠꍔꍞꌋꆀꄹꏦꂱꎆꅑꐨ、ꎆꏣꅉꃀꀉꇨꌠ、ꃷꎏꊋꂫꀋꇰꀋꉈꌠ，ꂡꃪꏓꂱꑘꋦꃣꑣꀑꁮꅺꐳꐨꐥ。ꊒꆽꃅꋓꎭ，ꀻꎆꌠꉌꊋꑌꈬꇬꎷ，ꀻꎆꇙꊋꀉꇨ，ꉪꇩꏤꀻꎆꇬꄐꇐꏤꁈꊜꋽꊭꀋꂿꑘꌠꀧꌋꃅꌋꆀꌬꋒꑲꆏ，ꀋꃋꋋꇅꇬꊋꋠꅍꆹꈍꃅꑌꈳꅐꄎ，ꍏꇩꀻꎆꌠꉘꇉꐨꆹꀉꇨꌠꉬ。
ꃅꒊꃅꇁꏓꇱꄉꎥꃪꍆꇽꌠꆹ，ꉪꊇꆏꇵꆅꐯꇳꐨꂴꇯꆐꉪꏢꄉꄐꄉꌠꁻꌐꌌꋭꋽꃅꋊꄻꀐ。ꎼꈎꆏꃅꑘꊌꌠꎍꐽꉹꁌꐥꐨꏦꀧꌠꌌꂴꄉ，ꏟꈯꃅꎭꑆꇔꈢꇓꀖꌠꃅꊋꐛ，ꊋꇤꄉꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꂿꃆꃅꇫꑟ；ꇓꈓꏦꎫꃅꅍꊌꊿ900ꃪꑻꈋꉐꀊꏀꃅꁦꎆ，ꇓꈓꏦꎫꍤꄻꇬꃅꅍꀋꊌꐨ6%ꀑꂪꐥ，ꇓꈓꏦꎫꁱꄀꄉꌠꃅꑘꀋꊌꐨ5.5%ꀑꂪꐥ；ꀀꊿꌬꈧꁌꏤꉀꄓꐨ3.5%ꀑꂪꐥ；ꈏꃹꉇꅐꌠꎍꐽꌠꊥꎆꊇꁧꉀꐕ，ꇩꏹꊌꐨꌬꐨꀑꐱꃅꇬꐮꆽꏣ；ꀀꊿꊌꐨꁦꎆꌠꌋꆀꎆꏣꉀꎆꌠꀑꐱꃅꐮꐊ；ꀋꃋꌬꌠꎕꏦꇂꃴꂿꑘꁡꇤꌢꎭꊻꂷꉬꇮꃅꎭꑆꇔ、ꌢꎭꑤꉬꇮꃅꌢꎭꀎꇓꇔꇧꎭꌐ；ꎆꒉꎆꇁꃨꆰꐨꀉꒉꀊꂾꌠꇿꋌꐥꃅꄴꋏ；ꌗꂓꇩꈐꒃꅐꈁꉬꁌꐨꊋꃹꌠꌋꆀꍍꆀꅍꀋꉬꀋꉆꌠꋊꃑꃷꁨꐪꊛꄉꀁꋌꊰ，ꊋꇤꄉ“ꊯꌕꉬ”ꄐꎖꑞꅉꁻꌐꂿꃆꃅꇫꑟꌶ。
ꉉꀽꄻꅐꌠꆏ，ꉪꊇꋋꈓꌠꎆꏣꁦꎆꐳꐨꑭꋧꁻꌐꄜꎼꀋꇁ，ꀋꉬꀋꉆꌠꆏꅉꆺꑭꊂꇵꆅꐯꇳꐨꌋꆀꎆꏣꃼꇇꃅꒊꃅꇁꊨꄅꀋꄐꐨꀉꒉꐯꀉꒉꐛꅹꃅ，ꉪꇩꏤꀻꎆꌠꆏꂴꉪꇬꀋꑟꌠꁧꏖꐨꈨꊝꎍ。ꑠꃅꃅꇬ，ꋍꑞꋍꁁꏯꄐꇺꄉꉌꊋꏓꋧꌊ“ꃘꎍꐽ”、“ꃘꏦꀧ”ꌠꒃꉇꋒꌠꇬꈲꐪꐥ。“ꃘꏦꀧ”ꌠꆹꎼꈎ“ꃘꎍꐽ”ꌤꃅꌠꇬꊋꏿꅉꉬ。“ꃘꏦꀧ”ꌠꃅꇫꑟꑲꆏ，ꎆꏣꅉꀨꀰꏢꌠꎍꐽꄎ；ꏦꀧꌠꌌꎍꐽꌠꊥꎆ、ꎍꐽꌠꇬꄉꁨꆹꌠꎹꑲꆏ，ꐊꑷꃅꊼꇅꌣꈚꌠꐧꋦꋉꐛꌠꎁꃅꅉꃀꌆꈬꄎ。ꉜꄉꌶꌠꆏ，ꃅꅍꊌꌠꏓꂱꐥꐨꀧꌋꃅꄉ、ꎭꑆꇔꌠꑞꅉꁻꌐꃅꇫꑟꌠꉬꄿꂿ，ꉈꑴꐔꈔꉆꐨꄴꏮꋊꑣꌠꉬꄿꂿ，ꐯꇯꎆꏣꉀꎆꄘꄏꌠꐥꌶ，ꎆꏣꒈꇁꎍꐽꌠꆹꃅꇴꄉꉻꃆꂮꐥꌠꉬ。ꄺꀱꁉꃑꏡꁈꌬꄉ，ꃅꅍꊌꌠꎍꐽ、ꉹꁌꐥꐨꏦꀧ、ꌬꈧꌠꊥꎆ，ꃷꎏꈺꇙ、ꎍꐽꃅꉀꎆ，ꇿꋌꐥꃅꎟꄜꌠꊝ、ꉾꃪꃅꀰꏮꌠꃅꇫꑟꌠꈜꏀꏢꈴꅐꇁꌶ。
ꏣꀋꑌꌠꏱꎆꏱꁈꆏꀊꅰꃅꏣꀋꑌꌠꂿꄐꐥꌶ。ꎼꈎꌫꁏꇔꐨꆏꌌ3.6%ꈋꉐꇬꈴꄉꄐꁆ，ꏱꎆꌫꁏꇔꄉꈁꆏꀋꉊꄻꈎꄩ1ꃪꂡꂷꁦꎆ，ꋍꈭꐨꇵꆅꄘꑣꌠꐋꀋꌡꇩꎝ1ꃪꂡꂷꃑꄻ。ꋋꆹꐋꀋꌡꊬꌠꃄꁈꐋꀋꌡꌠꉬ。ꄚꂴꉉꌠ2ꃪꂡꂷꌠꉬꇮꃅꆹꏮꌊꃅꄷꁵ，ꐋꀋꌡꃅꆹꏮꎆꁵꉺꏦꄻꐛꄉ，ꎆꀨꈛꎂꃅꏃꑤꅉꂫꊐꌠꇬꑟ、ꈛꎂꃅꎆꏂꑘꇬꈲꉹꁌꇬꈲ，ꀋꉬꀋꉆꌠꆏꌌꃅꑘꊌꌠꏦꀧ、ꅉꀨꉹꁌꐥꐨꏦꀧ、ꃷꎏꀨꄜꏦꀧꌠꇬꌬ，ꇗꏸꊨꁌꀁꋌꊰ、ꊤꊰꊨꇔꊰꀁꋌꊰ、ꌬꈧꌠꌋꆀꎆꇱꌠꍔꐯꑠꏭꊋꁈꄏꌠꑌꄚꐊ，ꄉꉻꏱꎆꐊꊈꄻꀉꇨ，ꈍꃅꑌꊏꄉꆹꇏꌊꌬꌠꃅꀋꉆ。ꊋꀉꒉꃅꇤꄉꏱꎆꌬꐨꐛꉻꄻꃪꌶ，ꅉꀨꉹꁌꐥꐨꌬꐨꆏꀍꉀꀉꄂꎆꀁꋌꀋꊨ，ꀋꉬꀋꉆꁁꏯꌬꐨꆏꃶꐚꃅꏦꀧꄉꌶ， ꎃꐚꌠꌬꐨꆏꀋꎪꃅꊨꒊꌶ，ꑷꂿꇤꂿꀊꏀꌠꋈꄻꀋꉆ，ꎆꁌꋙꀘꌠꃅꀋꉆ。ꍔꃚꋍꊐꋑꀋꋒꀋꎪꃅꃶꐚꃅꏎꏸꃅꐥꌶ，ꍏꑷꍔꃚꆏꂴꅑꄉꃅꌶ，ꍏꑷꋋꊐꌠꌬꐨꄐꁆꇬꆏꀁꋌꒊ，ꄚꈐꏭꈉꄻꃛꌠꀋꉬꀋꃅꀋꉆꃅꀋꐛꌠꌬꐨꆏ50%ꈋꉐꊨꒊ。ꋍꑞꋍꑵꁦꎆꌠꎆꃀ、ꏓꊭꌗꏮꎆꀨꎴꄡꑟꌠꆏꎴꌊꇁꌐ、ꌌꉈꑴꁆꄻꀱ。ꊋꀉꒉꃅꇤꄉꊇꁧꉀꐕꅐꐨꁦꎆ，ꋍꑞꋍꐘꌬꐨꆏꀋꎪꃅꌗꋧꏢꋧꃅꄉ，ꀋꎪꃅꎆꃀꋍꉐꋑꀋꋒꌌꌬꋭꅉꇬꌬ、ꃛꊸꅉꇬꌬꌶ，ꀋꎪꃅꃷꎏꀨꄜꌋꆀꏓꂱꉹꁌꁳꇯꍝꃅꇫꌌꉪꎻꌶ。
ꎍꐽꌠꎆꃀꏱꁈꆹꀊꅰꃅꍄꑐꄉꄐꌶ。ꏓꇱꄉꎕꏦꀁꋌꊰꇔꊰꀁꋌꊰꌠ、ꊛꄉꎆꉛꑠꇇꁈꃄꌬ，ꐊꐯꎆꃀꇲꁵꃷꁨꌋꆀꐧꋦꎆꏓꄉꈁꉀꎆꐳꐨꄐꏂꌊꄇꇖꀕꃅꀋꉊꄻꈎꂫꀋꋌ。ꏓꂱꀙꎆꃀꉇꎆꀟꄻꁌꐨꄉꄐꃅꐮꆽꏣꌠꑟꐨꇬꄉꀑꐱꃅꎍꐽꌠꄉꀧ。ꈛꎂꃅꐥꄜꎆꏣꇬꑟꌠꎆꃀꏱꁈꌬꅍꏀꀺ，ꎆꏂꑘꈝꐮꃅꎆꉛꊌꄎꌠꄹꇙꄉ，ꇔꊰꍆꁧꊛꄉꀁꋌꒉꌠꄹꇙ。
ꃅꑘꊌꌠꌌꂴꄉꌠꏱꁈꆏꐊꑷꃅꄻꀉꇨꌶ。ꏱꎆ、ꎆꃀꌋꆀꎆꇱꑠꏱꁈꆏꊋꋧꌊꃅꅍꊌꌠꎍꐽꌠꇬꊋꁈꄏꌶ。ꊋꇤꄉꀋꃋꐥꌠꃅꅍꊌꌠꌌꎍꐽ，ꏣꀋꑌꃅꀊꏀꃅꃅꅍꊌꌠꌌꁦꎆ，ꊿꃅꅍꀋꊌꌠꀱꃅꅍꊌꌠꊥꎆ。ꃅꄷꈁꐥꌠꆏꃅꅍꊌꏭꏢꑲꌠꀋꋭꀋꋽꌠꋊꎵꇧꎭꌶ，ꃅꅍꊌꌠꊥꎆꌠꏡꁈꐥꄡꑟꌠꌌꐥꌶ，ꃅꈉꍔꐯꌠꏡꁈꌬꉆꌠꌌꌬꌶ。
ꎭꑆꇔꌠꆹꐊꑷꃅꊼꇅꌣꈚꌠꐧꋦꋉꐛꇬꀋꎪꃅꃅꌐꌶꌠꂿꃆꀉꇨꌠꉬ，ꀋꃋꌬꌠꎭꑆꇔꎕꏦꌭꈬꇬꎷ，ꎭꄏꎆꇱꐨꁦꎆ，ꀉꇨꃅꌢꎭꄏꐓꏁꁈꃄꌬꇫꑟ，ꇫꋒꇈꌠꌢꎭꊻꂷꉬꇮꃅꎭꑆꇔꌠꄉꀧ，ꉈꑴꀱꌢꎭꁧꌠꊻꂷꍞꎖꇇꀨꉺꏦꄻꐛꒆꌋꆀꃄꌬꋒ，ꎭꑆꇔꊌꐨꄻꈫꈈꌶ。ꃅꑆꀊꃴ、ꒉꀊꃴ、ꃄꅉꁦꎴꌠꐏꁇꌠꃅꋒ，ꍍꆀꄴꏮꈢꇓꀖꌠꋍꊭꇬꑞꅉꁻꌐꃅꇫꑟꌶ。ꊋꀥꇱꄉꎆꒉꎆꇁꑠꁁꏯꐔꈔꐨꀉꒉꀊꂾꌠꄴꏮꋎꍅ，ꏟꈯꃅꉻꑫꃅꐙꌠꐔꈔꋍꐮꒉꀋꉆꌠꇫꅐꄡꇁꌠꐏꄉ。
ꎼꈎꆹ5ꁮꆪꀋꇈꇫꈴꒉꀐ，ꊁꊭꌠꆏꅉꀕꃅꐙꌠꇵꆅꐯꇳꐨꄴꏮꋎꍅꌠꋍꍈꑌꄝꀋꏯ，ꐳꃅꎆꏣꐧꋦꀻꎆꌠꋍꑞꋍꐘꌤꃅꌠꒃꉇꋒꌶ。ꄻꅐꇁꌠꏱꁈꆏꊋꃤꄝꏦꀋꊰꇈꐪꊛꉆꐨꑌꉪꏡꄉ，ꃅꒊꃅꇁꐛꐈꌠꇬꈴꄉꉈꑴꄻꐛꒆꉆꑴꌦ，ꉪꊇꆹꎼꈎꋋꈓꑞꅉꁻꌐꂿꃆꃅꌐꌠꉌꊋꑌꄐꊋꐥ。
ꌕ、ꉻꒉꏱꁈꃄꌬꌠꊋꃤꁦꎆꇱ，ꊋꇤꄉꎆꏂꑘꎍꐽꃅꅍꊌꌠꏦꀧꌠꃅ
ꃅꅍꊌꌠꌋꆀꉹꁌꐥꐨꏦꀧꌠꆹ，ꀋꎪꃅꃷꎏꀨꄜꂡꈋꉐꌠꎼꎍꐽꃅꄉ，ꄾꌦꋩꃅꎆꏂꑘꈜꀕꇈꐧꀠꀄꊭꐭꎆꏂꑘ、ꑱꄂꇮꃅꃼꇇꃅꊿꇇꀨꄉꊋꋠꐨꈳꅐꎻꌶ。
ꇗꏸꊨꁌꊰꌠꊋꀉꒉꃅꇱ。ꋍꊭꃅꐙꌠꏱꁈꄻꀉꇨꌠ，ꌌꄹꏦꃅꐙꌠꄐꁆꌠꌋꆀꏓꐯꇯꄉꃅ，ꒉꃑꉛꉘꄉ，ꃷꎏꀨꄜꇇꀨꄉꊋꋠꌠꑣꄉꀻꎆꎻ。ꐪꊛꄉꀋꉊꄻꈎꄻꅐꇁꌠꁌꎆꇗꏸꇗꏸꍆꐪꌋꆀꎆꏂꑘꃀꌠꀨꎹꄜꏂꀧꁌꍆꁧꀁꋌꊰꌠꏱꁈꃄꌬ，ꀊꏀꃅꇗꏸꊨꁌꊰꌠ5000ꂡꂷꀋꇈꁦꎆ。ꂴꊬꌠꄻꅐꇁꌠ6ꆪꂾꇫꑟꌠꇗꏸꊨꁌꊰꌠꏱꁈꆹ，ꐧꀠꀄꊭꐭꎆꏂꑘꃀꌠꀨꎹ、ꃅꅍꀋꊌꌋꆀꇮꃅꂷꊂꌸꄜꏂꀧꌤꃅꅉꏭꁌꀋꎴ，ꄉꈁꀄꊭꌠꇗꏸꏮꊿꁌꎆꇗꏸꊨꇔꇧꎭ，ꄉꉻꈭꈜꎞꎭ、ꋠꇐꅝꒉꀀꅉ、ꈩꆫꈩꀜ、ꁱꀕꈯꎟꑠꁧꃤꃅꁌꎆꇗꏸꀋꎴ，ꂱꉴꀻꎆꎆꀨ、ꎿꀸꋈꄻꁌꊨꏆꑠꄚꐊ，ꃄꌬꏤꈉꆏꉬꇮꃅꄯꅷꎼꈎꈎꂫꇬꑟꄉ。ꀄꊭꐭꎆꏂꑘ、ꑱꄂꇮꃅꃼꇇꑱꁯꈁꊌꇗꏸꏮꌠꆏꈁꉬꃅꄯꅷꑎꄹꈎꑟ。ꄐꌗꄉꇬꋋꈓꃅꎆꏂꑘꎁꃅꀊꏀꁦꎆꃅꀵꃤꊨꒊꌠ2.5ꃪꂡꂷꄩꐂ。ꏟꈯꃅꇗꏸꊨꁌꊰꌠꏱꁈꄻꌊꎆꏂꑘꇬꑟꌶ，ꁧꐙꌩꏪꊏꄉꆏ，ꃆꏂꊂꑋꊌꅍꐥꇁ。
ꎆꏂꑘꒃꅐꀰꏢꀨꊰꊨꒊꌠꄹꇙ。ꇮꃅꃼꇇꑘꄆꁌ5%ꀁꋌꊰꌠꏱꁈꄯꅷꎼꈎꈎꂫꇬꑟ。ꐳꏣꈄꏍꌋꆀꌐꌬꑟꐽꏡꌫꎆ15%ꀁꋌꊰ。ꇩꁨꑳꇤꊣꎆꊨꏆ，ꋍꑞꋍꑵꁨꌋꊋꊡꌊꑲꊤꁌꊨꏆꅀꄯꄉꎴ，ꄷꀋꁧꏱꁈꇫꊋꁈꄏ。ꏟꈯꃅꎆꏂꑘꃆꂮꐥꌠꏦꐆꄉꁌꎴꌠꋊꍬ。
ꎍꐽꌠꎆꏂꑘꎆꒉꎆꇁꌌꇫꊋꁈꄏꌠꄻꀉꇨ。ꐧꀠꀄꊭꐭꎆꏂꑘꎆꉛꄯꎴꄉꀨꊰꌣꇔꊰꁵꌠꏱꁈꉈꑴꄯꅷꑎꄹꈎ3ꆪꂫꇬꑟ，ꁊꈲꉹꌠꀄꊭꐭꎆꏂꑘꎆꉛꌠꄾꌦꋩꃅꄯꊁꄉ，ꀉꁁꊋꋠꌠꎆꏂꑘꎆꉛꌠꋮꒉꄉꃅꑍꄯꊁꄉ。ꎖꉚꊋꊡꉺꏦꄻꐛꒆ，ꑴꉴꊋꊡꄉꉛꀬ、ꉛꏾ、ꉛꄎꎻ，ꀉꒉꃅꀄꊭꐭꎆꏂꑘꉌꒊꎆꉛꌠ、ꉘꃀꃢꌠꎆꉛꌠ、ꀨꊰꀋꌣꃅꊛꄉꎆꉛꌠꁦꎆ，ꎆꒉꎆꇁꈆꑪꇮꇐꌋꆀꃷꁨꊫꌐꀉꒉꌠꌌꁧꃤꃅꀨꊰꀁꋌꊰ，ꁧꃤꃅꌸꊒꐨꉀꐕ。ꀉꒉꃅꍔꃚꃤꃅꐙꌠꎆꏓꌠꄉꀧꉱꑷꐨꍔꐯꄷꀋꁧꄇꇖꀕꃅꁌꎴꐨꀁꋌꊰ。ꀉꒉꉹꌠꃼꇇꑘꑴꉴꁊꈲꉹꌠꀄꊭꐭꎆꏂꑘꎆꉛꉀꎆꐳꐨꆏ40%ꂫꀋꋌ。ꎆꏂꑘꃆꂮꐥꌠꉌꒊꈴꌗꐯꇯꌬꌠꊥꎆ。ꎆꏂꑘꊋꁈꄏꄉꎝꊫꌐꎆꏓꌠꍔꒉ。ꊋꀥꇱꄉꍞꏲ，ꎆꃀ“ꈥꏮ”ꄉꈲꁧꎹꌠꄴꏮ，ꉇꉈꃅꎝꃆꂾꁈꌠꏭꇇꇩꍈ。ꎆꒉꎆꇁꏲꉻꌋꆀꎆꉛꎆꏂꑘꐯꇯꐥꐯꇯꈲ，ꑴꉴꊋꊡꌊꋭꋽꃅꈲꁧꏆ。ꃷꎏꀨꄜꄉꀧꂿꄷꇬꆏ，ꀋꎪꃅꐧꀠꀄꊭꐭꎆꏂꑘꎆꉛꌠꊌꅝꉆꐨꄇꇖꀕꃅꉀꐕꎻꌶ，ꀋꎪꃅꏓꇱꄉꎆꏓꌠꀨꊰꄇꇖꀕꃅꀁꋌꊰꎻꌶ。
ꁈꏂꁈꇭꄉꃅꅍꊌꌠꎍꐽꌋꆀꍔꐯ。ꊋꀥꇱꄉꀋꉬꀋꉆꌠꉹꑘ、ꀋꉬꀋꉆꌠꉹꁌꋍꏅꌠꃅꅍꊌꌠꊋꁈꄏ。ꎼꈎꌶꅉꀊꂥꅉꇬꄉꌶꅐꌠꌶꌺ874ꃪꑼꇬꑟ，ꃷꎏꈴꐧꋦꈴꌠꃅꑘꊌꌠꊥꎆꄉ，ꌶꅉꀊꂥꊐꌠꌋꆀꏱꅉꇂꃴꍔꃚꆏꐯꇯꀋꆏꃅꃅꑘꊌꌠꁧꃤꃅꌠꇲꁵꌶ，ꅉꂫꊐꌠꁧꃤꃅꐘꃆꊙꎷꌠꍔꐯ。ꂽꄻꄉꀱꇁꄉꃅꑘꁵꌠꌋꆀꃅꅍꊌꌠꏦꀧꌠꃅꋒ。ꂿꑘꇮꃅꊿꌤꃅꅉꇬꄉꐥꊯꃅꃅꅍꊌꌠꁧꃤꃅꏱꁈꃄꌬ。ꊾꄣ、ꃅꑘꋍꍈꑌꀋꊌꌠꑱꈐꑠꊋꋠꊿꁥꇇꀨꄉꃅꅍꊌꎻ。ꉪꇩꏤꆹꈘꆽꈘꄧꃅꇮꃅꌠꑌꄚꐊꌠꋭꋽꃅꃅꅍꊌꌠꊿꃷꁨꂡꎖꐥ，ꎼꈎꊌꐨꀁꂥꌠꊿꏭꐧꋦꄜꏂꀧꁌꊨꏦꉌꃹꃅꁌꄯꄉꏮꌠꏱꁈꃄꌬ，ꃅꅍꊌꌠꃆꂮꐥꌠꏲꑘꌤꑘꃅꐙꌠꁌꎴꌠꆏꉬꇮꃅꇤꇧꎭꌐ，ꄉꄐꃅꇙꐺꄉꃷꄻꌠꀰꏢꅉꄐꄻ。ꁱꂘꌌꃅꈉꎍꐽꃅꈉꍔꀺꌠꏭꇇꀨ，ꊋꀥꇱꄉꃷꎏꏭꉜꄉꇮꇐꁰꍋ，ꃄꄻꌌꁰꍋꎃꊐꌠꊋꊡꄉ，ꒃꅐꐨꐥꌠꃶꐚꁱꂘꅉꄉꐯꇯꋈꄻꐯꇯꈲꊌꌠꃅ，ꎼꈎꑎꄹꈎꋋꑍꈓꌠꃅꑘꇮꇐꄐꐨꁰꍋꌠꊿ3500ꃪꑹꃢꈋꉐꐥ，ꀊꂥꊐꃅꑘꉙꂘꌶꅉꌶꌺꁦꎆꃅ200ꃪꑼꎹꄉ，ꑘꃅꊿꀉꑌꌠꁳꇮꅍꐥ、ꃅꅍꊌꌒꎻꌶ。
ꇖ、ꄺꀱꌠꊫꁱꄉꃷꎏꀨꄜꍄꑐꊋꃤꄖꄑ，ꀻꎆꇙꊋꀊꏀꌠꄻꀉꇨ
ꊋꋠꌠꋓꎭꐨꀊꅰꀉꒉꆏ，ꀊꅰꃹꅼꃅꄺꀱ，ꏦꉻꉺꏦꋍꇈꅍꀜꋊ，ꈏꒆꀻꎆꇙꊋꄕꊪꌶ。
ꃹꅼꃅ“ꄝꏲꃅ”ꌠꄺꀱ。ꅉꀕꃅꇵꆅꐯꇳꐨꄴꏮꋎꍅꌠꇂꃴꄉ，ꏁꁈꋊꄻ、ꇇꈴꀞꄻꐨꅧꊨ，ꐊꑷꃅꀱꑘꃅꀱꒃꅐ、ꀱꃼꇇꃅꀱꃅꑘꃅꌠꊥꎆ。ꁧꃤꃅꌠꌤꆿꀊꅰꀉꑌꌠꌌꈄꏍꇬꄉꀞꄻꌠꄹꇙ，ꎆꏂꑘꀞꄻꇬꈴꎁꉬꇮꃅꈄꏍꇬꄉꀞꄻꌠꃅꇫꑟ。ꀄꊭꐭꎆꏂꑘ、ꑱꄂꇮꃅꃼꇇꁯꁱꄀꀰꏢꅉꏢꑲꌠꄝꏯꄉ，ꋍꑞꋍꉹꑘꀺꊿꁱꄀꀰꏢ、ꐳꃅꄏꐓꏱꁈꈲꊌꌠꈝꐮꎻ。ꒉꐧꀄꊭꎆꏂꑘꐮꄮꃅꀻꎆꌠꊋꁈꄏ。ꐧꋦꉌꒊꉻꑫꄻꐛꒆ。ꎃꊒꃅꍞꏲꌠꌌꐽꏡꃅꋓꅔꌠꀧꌋꃅ，ꐪꊛꄉꃷꎏꈴ、ꏦꏲꈴ、ꇩꏹꃅꐙꌠꀰꏢꃼꇇꃅꋦꈭꄺꑣ。
ꐊꊈꃷꎏꈴꁆꇱꄺꀱꌠꄹꎆ。ꐧꀠꀄꊭꌠꑴꉴꎆꀨꁥꇱꌋꆀꏱꄻꐛꒆꌠꄹꇙ，ꀊꅰꉾꃪꃅꐧꀠꀄꊭꐭꎆꏂꑘꏭꁧꃤꃅ。ꑘꀺꉹꌠꄺꀱꄷꀋꁧꁱꄀꄹꏦꃅꉚꅉꄻ，ꀉꑌꊐꃅꐙꌠꎆꀨꃷꎏꀻꎆ。ꄜꏂꀧꏦꀧꄐꐨꄻꀉꇨ。ꌜꊐꌠꍔꃚꁳꋈꄻꌬꃅꏭꑴꌅꌅꈌꀊꅰꀉꒉꃅꐥꎻ。ꌧꊿꇙꈧꌠꊥꎆ，ꇮꇐꌋꆀꃷꁨꊫꌐꃷꎏꉗꄻ，ꋍꑞꋍꉹꐊꊈꊋꂫꌾꇙ。
ꇩꁨꁨꇐꇩꁨꎆꏂꑘꄺꀱꊌꐨꉀꐕ。ꇩꁨꎆꏂꑘꄺꀱꌠꌕꈎꃅꐨꃄꌬ。ꀋꃋꋋꄮꎆꏂꑘꄹꏦꋈꄻꐛꒆ，ꇩꁨꁨꇐꍞꏲꏦꉻꄻꐛꒆ，ꃹꅼꃅꌼꉔꁨꏦꄺꀱ。ꀑꐱꃅꂱꑱꅉꄉꐧꋦꌅꊋꀞꄻꌠꌋꆀꐩꋊꇬꋒꇈꌠꌤꃆꂥꀘꌠꃅꌐ。ꇩꁨꎆꏂꑘꆏꀨꄜꀨꑘꇬꉜꄉ，ꃷꎏꈴꃅꀰꏢꌠꉺꏦꄻꐛꒆ，ꈯꄜꋓꅔꊋꃤꉀꐕ。
ꉹꁌꀰꏢꎆꏣꀻꎆꋦꈭꄻꃪ。ꉹꁌꀰꏢꌠꎆꏂꑘꐥꊯꃅꒃꅐꐊꊈꌋꆀꏱꁈꊋꁈꄏꌠꊌꅜꌠꏦꀧ，ꎆꏂꑘꊇꅉꌋꆀꐮꁠꎍꌠꀋꋭꀋꋽꌠꏤꐪꀜꋊꇧꎭ。ꄮꈉꏤꄉꍔꃚꏲꉻ、ꇩꁨꎆꏂꑘꆏꉹꁌꀰꏢꌠꌋꆀꐧꀠꀄꊭꎆꏂꑘꎆꃀꁯꌠꌣꌐꌠꂿꃆꃅꌐ。ꐮꉂꐙꎴꌠꏲꑘꃼꇇꐮꃆꂮꏓꄻ，ꉻꁨꏦꀋꉬꌠꎆꏣꁣꀋꐥꃅꀻꎆꌠꊥꎆ。
ꄻꑣꑘꊐꐕꌠꌋꆀꏀꄓꅐꑘꀻꎆꌠꄹꇙ。ꄺꑣꑘꊇꁧꀊꂥꃅꀻꎆꌠꊋꁈꄏ。ꄻꑣꑘꐧꀠꀊꉗꃅꎆꉛꌠꀉꒉꃅꁦꎆ。ꇮꑘꐯꏑꈄꏍꀻꎆ，ꀑꁮꐨꄺꑣꌠꄹꎆ，ꏀꄓꅐꑘꁥꌠꉘꉚ。ꎥꃑꄐꄻ、ꐛꏀꎊꈴ、ꍤꄻꎕꑣꏚꍆꑠꒃꅐꉹꌠꁧꃤꃅꑘꌠꀻꎆ。ꈄꏍꈴꎊꈬꃼ、ꈄꏍꇬꄉꁧꃤꃅꑠꉹꑘꐛꄟꀊꏀꌠꇵꆅꄘꑣꇬꂿꄐꀋꂿ꒧ꌠꋊꇤꅐꇁꀐ，ꐪꊛꄉꊋꁈꄏꏱꁈꏤꄻꅐꇁ，ꐊꑷꃅ“ꐯꏑꈄꏍ+”ꌠꄹꎆ，ꃷꁨꎆꏣꂱꎆꅑꐨꀊꏀꌠꄺꑣ。
ꈆꑪꇮꇐꏀꀺꄘꄏꄐꊋꉀꐕ。ꎍꐽꃅꅉꃀꎥꃪꌠꌋꆀꌬꌠꅉꃀꎥꃪꌠꊋꁈꄏ，ꎆꏂ꒧ꄐꏁꌊꎥꃪꀖꁉꌠꇬꎆꁦꎆꃅꇱ，ꅐꌷꎥꐮꐊꏀꀺꌠꊥꎆ。ꐳꃅꇩꏤꋒꃯꅉꋈꄻ，ꇩꏤꀋꂿꑘꌠꋒꃯꅉꉻꑫꏓꇱꀱ，ꐧꋦꎥꃪꀖꁉꏲꉻꀻꎆ，ꊋꀥꇱꄉꀋꉬꀋꉆꌠꈯꄜꇮꇐꈢꇓꀖ。ꉹꁌꐥꐨꈆꑪꇮꇐꀻꎆ。ꃹꅼꃅꇩꏹꈆꑪꇮꇐꇷꃅ。ꊋꀥꇱꄉꌧꇐꅐꇐꌅꈌꀧꌋꃅ。ꈆꑪꇮꇐꊌꐨꆹꏮꉻꏦꄺꀱ，ꏀꀺꊛꏣꁣꀋꐥ，ꏀꀺꊋꊡ、ꃅꈔꌠꏭꏆꌠꈆꑪꎥꃪꋦꈭꄻ。ꐘꃆꀋꉬꀋꉆꌠꈢꇓꀖꌠ“ꊪꄉꂴꅑꄉꃅꌠ”ꃄꌬ，ꈀꄸꃅꄎꆏꈀꄸꁳꃅꎻ。
ꃹꅼꃅꋍꏅꑘꀺꋍꉻꏀꀺꌠꄹꎆ。ꑘꀺꎆꇱꌠꌋꆀꇴꍆꌅꈌꎆꇱꌠꀻꎆ，ꑘꀺꄉꀧꎆꉛꌠꁦꎆꇱ。ꃹꅼꃅꀊꏀꈭꌠꐊꑷꃅꏀꀺꄺꀱꌠꃅꉚ，ꑍꀺꌶꀠꅉꁍꈨꀊꏀꃅꄻꄉ，ꅓꏆꍤꋧꄉꍞꏲꌠꌭꈬꇬꎷ，ꐽꈉꎆꏣ、ꐯꇯꈲꊌꌠꎆꏣꀻꎆ，ꀊꅰꀉꒉꃅꐧꋦꀹꄻꊋꃤꄖꄑ。
ꉬ、ꈏꇓꈉꐨꍔꒉꌠꄐꇐꏤꁈꃄꌬ，ꎆꏣꀻꎆꃄꄟꄹꇙꌊꐳꃅꆹꏮ
ꉪꇩꏤꈏꇓꈉꐨꊋꂫꀉꒉꃅꑌ，ꃹꅼꃅꇲꁵꁁꏯꐛꉻꐨꐥꌠꄺꀱ，ꉹꁌꐥꐨꍝꄎꌠꄻꂴꄉ，ꌬꈧꄖꄑꌠꌋꆀꎆꇱꍔꐯꌠꇿꋌꐥꃅꄻꐯꇯ、ꐮꇬꊥꎆꎻꌶ。
ꌬꈧꌠꀱꉈꑴꉀꐕꌠꄹꇙ。ꃅꅍꊌꌠꎍꐽꁦꎆꊌꌠꊥꎆꉹꁌꐥꐨꏦꀧꌠꃅꄉ，ꀀꊿꌬꈧꉪꐨꌋꆀꄐꐨꉀꐕ。ꋙꋠꅉ、ꃼꇇꃄꅉ、ꁱꀕ、ꈩꆫ、ꑱꏲꑠꐥꐨꁧꃤꃅꑘꀱꐛꀕꃅꀻꎆꌠꇬꊋꁈꄏ，ꈄꏍꈐꈄꏍꉈꐮꉔꌠꄹꇙ。ꐕꍯꌬꈧꌠꊥꎆ，ꊋꇤꄉꍮꊪꄈꊋꌠꌤꃆꂥꀘ。ꃀꌠꀨꎹ、ꁠꉘꁧꃤꃅꌠꀻꎆ。ꀉꒉꃅꒉꄚꇁꄿꌠꅐꑘꀻꎆ。ꈛꎼꏦꈜꄺꀱꊐꐕ。ꈄꏍꈴꃼꇇꃅ、ꐳꎭꌠꂿꑘꁡꇤꃹꌠꇬꊋꁈꄏ，ꂿꑘꁡꇤꌬꈧꌠꍔꐯ。ꏡꁈꀉꑌꃅꏂꄉꌬꈧꌠꍔꐯꄉ，ꉹꁌꀉꑌꑵꃅꈉꄻꌠꇬꄉꄐꌶ。
ꇿꋌꐥꃅꎆꇱꌠꍔꐯ。ꎼꈎꆏꃅꄷꍔꃚꌐꐘꎝꃆꊫꌐ3.75ꃪꂡꂷꄐꁆꄉ，ꀋꉊꄻꈎꄩ1.6ꃪꂡꂷꁦꎆ，ꌐꐘꎝꃆꊫꌐꌌꄉꐘꃆꎆꀨꃅꌬꉆꌠꍆꁧꉀꐕ，ꍏꑷꄐꌗꈐꎆꇱꌠ6000ꂡꂷꄐꁆꄉ。ꀋꉬꀋꉆꌠꆏꌬꈧꊥꎆꄉꉹꁌꈲꊌꎻꌠꉈꑴꐛꉻꋊꄻꊋꂫꁦꎆꇱꌠ“ꑍꀊꏀꋍꀋꂿꑘ”ꋈꄻꌠꄏꐓ，ꀋꉬꀋꉆꌠꆏ：ꊋꀥꇱꄉꀊꏀꉹꌠꅉꃀꉁꈾꋈꄻ，ꀊꏀꋎꌠꈴꌗꈄꏍꀻꎆ，5Gꌬꈧꌠꍔꐯ，ꃷꁨꊫꌐꈯꄜꋈꄻ，ꄆꊐꅉ、ꄆꆥꅉꑠꉁꈾꁦꎆꇱ，ꊋꀦꀊꏀꌠꐕꍯꄹꌬ，ꌬꈧꈉꐨꀊꏀꌠꄖꄑ、ꅐꑘꊐꐕꌠꊋꄏ。ꊋꀥꇱꄉꀊꏀꉹꌠꇓꈓꏦꎫꐛꈴꌠꋈꄻ，ꊋꀉꒉꃅꇤꄉꑤꇓꈓꄉꉻꉁꈾꌋꆀꁧꃤꃅꄐꊋꉀꐕꄉ，ꂿꑘꊿꋍꑍꋍꉙꃅꉀꎆꌠꑤꇓꈓꄉꃅꅍꊌꑱꋦꌠꈉꐨꇬꄉꄐꎻ。ꀊꏀꃅꇓꈓꏦꎫꀀꁕꀉꆹꅉ3.9ꃪꂷꋈꀱꃅꇬ，ꁠꐤꈄꏍꄺꀱ、ꄆꅂꊐꇱꄻꌠꑠꊋꁈꄏ，ꑲꇬꄉꃀꌠꀨꎹ、ꋚꋠ、ꁦꎴꄉꀧꑠꀉꑌꑵꃅꐙꌠꋥꁕꁧꃤꃅꌠꀻꎆ。ꈭꈜ、ꈲꒉꑠꋉꃆꀉꒉꀊꂾꌠꋈꄻꌠꊋꀥꇱ。ꇩꏤꎸꈜꋈꄻꎆꀨ1000ꂡꂷꁦꎆ。ꃷꎏꈴꎆꇱꎆꏓꉺꏦꄻꐛꒆ，ꉹꁌꀰꏢꎆꏂꑘꐥꊯꃅꇫꐊꈽꌠꊋꁈꄏ。ꐘꃆꂄꌠꌋ，ꌤꆿꄝꇫꋒꄡꇊꃅ，ꎆꊐꌠꁳꐪꊛꄉꈲꁧꋊꇤꎻꌶ。
ꃹꅼꃅꀊꏀꉹꌠꇓꈓꏦꎫꐛꈴꌠꄹꎆ。ꈯꄜꇓꈓꌋꆀꇓꈓꈨꏓꇱꈺꇙꌠꂿꄐꋊꇤ，ꅐꑘꉗꄻ、ꃅꅍꊌꌠꁦꎆꇱ。ꀋꎪꃅꑳꆹꌌꀀꌠ、ꌌꎆꎹꌠꀋꉬꌠꉆꈉꌭꈬꇬꎷ，ꇓꈓꉜꄉꏱꁈꌬ，ꑳꇤꁨꇐꃷꎏꎍꐽꉾꃪꃅꀻꎆꌠꊥꎆ。ꉹꁌꈲꌠ、ꇊꑴꀋꅑꌠꉁꈾꄻꐛꒆꄉ，ꇓꈓꁳꀊꅰꃅꃅꌒꀀꌒꌠꐛꎻ。
ꐳꃅꃄꁕꀻꎆꄐꇐꃅꇫꑟ。ꐪꊛꄉꁮꐚꁁꏯꀉꒉꃅꀖꁉ、ꑛꌋꈤꐊꑷꃅꄖꄑꌄꆣ、ꈯꄔꃅꄷꉀꄓ、ꁭꅐꁆꏯꌌꂴꄉꀻꎆꌠꄹꇙ。ꃹꅼꃅꏢꏸꏹꋮꄮꃅꀻꎆ、ꒀꇤꀎꎿꈪꀉꒉꃄꁕꋈꄻ、ꍤꏦꌕꎐꃅꄷꋍꃱꃅꀻꎆꌠꄹꎆ。ꍤꏦꒊꃀꎆꏣꋥꁕꐯꇯꀉꒉꃅꀧꌋꃅꌠꒃꉇꌠꄹꎆ。ꉸꉼꒊ꒜ꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆꌠꄐꎖꐱꀨꁰꄻ。ꍰꒄꃅꄷꑍꇓꈓꎆꏣꈭꊂꋈꄻꌠꄹꇙ。ꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꐳꃅꀻꎆꌠꊥꎆ。ꎿꃀꎆꏣꀻꎆ。
ꃛꀙꀻꎆꌠꊋꁈꄏꏱꁈꋍꋬꈭꌠꃄꌬꋒ，ꃅꅍꊌꌠꄉꀧ、ꉹꁌꐥꐨꄉꀧ、ꏮꈴꌠꄉꀧꌠꊋꁈꄏꄉ，ꎆꏣꐧꋦꐥꀹꐊꑷꃅꀱꐛꅉꐛꌠꊥꎆ。
ꒆꉻꋦꈭꏱꄻꇿꋌꐥꐨꉀꐕ。ꏦꃤꈴꄉ、ꈆꑪ、ꊒꌸꃅꍍꆀꅍꋊꄻꌠꄻꂴꄉ。ꃹꅼꃅꀋꂿꑘꃅꄷꃅꌗꍍꆀꏱꄻꈢꇓꀖ。ꍍꒉ、ꑭꍷꀖꑘꋊꄻꉁꈾꋈꄻꌠꊋꀥꇱ，ꐥꐨꑭꍷꀖꑘꉹꁸꌠꄹꎆ。ꐳꃅꊻꂷꏓꋧꅉꃨꆰꐨꐥꌠꐈꇐꅐꇐꒃꅐꎆꏂꑘꎞꑣꄺꀱ。ꊋꏏꋦꈭꀧꌋꃅꌠꅐꑘꄻꀉꇨ。ꏦꇨꃅꏦꃤꇬꀋꈴꃅꇈꐥꇙꀕꈹꌉ、ꃷꄻ、ꋠꌠꌌꅓꀞ。ꀋꉬꀋꉆꌠꒆꉻꋦꈭꉻꑫꀧꌋꃅꌠꌋꆀꋉꃆꀉꒉꀊꂾꌠꄻꌊꀱꐛꅉꐛꌠꃄꄻ，ꒆꉻꌧꑳꋈꄻꌠꊥꎆ。
ꊋꀦꋬꂻꌠꏦꀧ。ꊖꌋꌃꎴꇿꋌꀊꂥꃅꌬꌠꄹꇙ，ꀱꒆꉆꌠꊋꀦꀻꎆ，ꇓꋌ、ꋌꐛꐞꌗ、ꄆꊋꒃꅐꇲꃷꉻꑫꄻꐛꒆ，ꊋꀦꊭꊎꄐꊋꉀꐕ。
ꃘ、ꎭꑆꇔꈢꇓꀖꌠꑞꅉꁻꌐꃅꇫꑟꌠꄉꀧ，ꂿꑘꁦꎆꊌꂿꑘꊿꊌꐨꁦꎆꌠꊥꎆ
ꎭꑆꇔꈢꇓꀖꌠꌋꆀꑣꋂꄖꄑꌄꆣꌠꃄꁈꃅꇫꑟ，ꂿꑘꅐꇐꀋꂿꑘꌠꇲꁵꌠꏦꀧ，ꂿꑘꊿꐥꐨꐛꐨꉀꐕ。
ꏟꈯꃅꎭꑆꇔꈢꇓꀖꌠꃅꊋꐛ。ꊋꀉꒉꃅꇤꄉꌢꎭꑤꌋꆀꌢꎭꋂꊁꊰꇈꌠꈢꇓꀖ，ꉈꏭꇮꃅꑘꃅꁧꌠꏭ，ꃅꅍꊌꃅꄷꄉꃅꈉꎍꐽꃅꃅꅍꊌꎻ。ꌬꈧꌠꌌꌢꎭꄏꐓꌠꃅꐨꍔꆙ，ꌢꎭꄏꐓꅐꑘꀱꐛꅉꐛꌠꀻꎆꌠꊋꁈꄏ。ꀀꅉꆦꄉꌢꎭꄏꐓꊁꊛꇱꄏꐓꌠꊋꀥꇱ。ꃹꅼꃅꁭꅐꁮꐚꌢꎭꄏꐓꐮꐊꃅꌠꌋꆀꍏꑷꌤꃅꅉꏤꄉꌢꎭꄏꐓꌠꃅ。ꀉꇨꃅꐋꀋꌡꌠꌢꎭꊻꂷꄉꀧꑞꅉꑟꌠꃅ。ꎭꑆꇔꈢꇓꀖꌠꍤꈴꌠꃅꋒ。ꐪꊛꄉꎭꑆꇔꌠꑤꏭꀋꉬꀋꉆꌠꄏꐓꏱꁈꌬ。ꊛꄉꎭꑆꇔꌋꆀꑣꋂꄖꄑꌄꆣꌠꇿꋌꐥꃅꐯꊛꌠꄹꎆ，ꊋꈀꑌꃅꇤꄉꉹꁌꎭꑆꇔꌠꁳꌣꈚꆹꎻ。
ꊋꇤꄉꂿꑘꒃꅐꌠꒃꉇꋒ。ꋚꂷꊪꏽꃅꊂꌋꆀꅐꐨꄻꎍꐽꃅꄉ，ꊪꏽꀱꃷꁨꉀꐕ，ꍯꎳꃼꁌꏤꀄꊭꐯꀄꊭꌠꉀꐕ，ꋚꅐꑤꀉꒉꌠꈁꁠꁵꌠꁦꎆꇱ，ꊋꀉꒉꃅꇤꄉꆅꁮꉮꀉꒉꀊꂾꌠꄴꏮ。ꆖꂷꑠꒀꋌꒃꅐꌠꊋꁈꄏ。ꏦꐆꇗꐆꄉꋠꃅꇑꍆꌠꃅꐨꌌꅓꀞ，ꀊꏀꃅꎕꏦꀊꂥꌠꋠꃅ8000ꃪꂿꋈꄻ。ꇗꂄꌠꉗꄻꁊꌬ。ꂿꑘꏸꐕꁥꇱꏱꁈꄻꐛꒆ。ꃹꅼꃅꂿꑘꁡꇤꄺꀱ。ꃏꍏꃤꃮꆅꑠꆅꃆꆅꂮꄴꏮꋎꍅꌠꊋꀥꇱ，ꃮꉘꒃꅐꌠꀱꐛꅉꐛꎻ，ꑱꈐꎇꃀꍅꑓꃮꃬꌋꆀꒉꐥꅐꇐꉗꄻꌠꀻꎆ。ꂿꑘꅐꇐꐮꈴꉻꑫꄻꐛꒆ。“ꋚꁀꎼ”ꌜꍈꆽꎍꄹꏦꌋꆀ“ꋂꄮꆿꂷ”ꏃꍈꆽꎍꄹꏦꍅꋒꃅꄉꇬꎷ。ꍏꇩꊿ14ꂡꌠꋚꒉ，ꉪꊇꆹꀋꎪꃅꏟꈯꀕꃅꄌꊨꏦꇇꈐꊐꄉꄎ。
ꂿꑘꊿꃅꅍꊌꊌꐨꁦꎆꌠꈝꃀꍔꐯ。ꂿꑘꊿꈛꑌꅉꄉꃅꅍꊌꑘꀺꌠꊋꁈꄏ，ꋍꑍꌕꅐꑘꏓꇱꃅꀻꎆꌠꊥꎆ，ꊋꃅꄉꈭꋏꎆꋚꀠꄉꈁꍔꒉ，ꀱꉈꇁꌠꂿꑘꇮꃅꊿꁳꊋꃅꄎ、ꊌꐨꊌꎻ。ꊋꀥꇱꄉꂿꑘꊿꃅꑘꇮꇐꄐꊋꁰꍋ。ꏦꃤꇬꈴꄉꉱꋃꃅꂿꑘꊿꇮꃅꌠꃄꎆꁯꌠꌤꃆꂥꀘ。ꄉꈁꄉꄐꃅꀰꏢꀨꄜꄏꐓ，ꂿꑘꑶꋦꐧꋦꈴꁧꃤꃅꌠꊋꀥꇱ。ꂿꑘꅐꇐꃹꅼꃅꇱꄻꌠꊋꁈꄏ。ꑣꋂꅐꑘꀻꎆꌬꃅꏦꀧꏱꁈꄻꐛꒆ。ꋍꉻꎆꏣꊋꃤꄻꀉꇨ。ꌐꐘꎝꊫꌐꎆꇱꌠꁦꎆ，ꐛꏀꂿꑘꉁꈾ、ꅝꒉꉮꀋꐥꌠꋉꃆꌋꆀꊿꀀꋦꈭꏱꄻꌠꊋꁈꄏ，ꐪꊛꄉꂿꑘꊿꒃꅐꐥꐨꇎꏦꄻꃪ。
ꏃ、ꑟꐨꀊꅰꀊꂥꃅꉇꉻꏭꁉꃑꌠꄹꎆ，ꉇꉻꃼꇇꉇꎆꅉꀨꃅꌊꈫꈈ
ꉇꉻꋦꈭꐛꐈꌠꊝꇬ，ꀋꎪꀋꑴꃅꉇꉻꏭꁉꃑꌠꍔꒉ，ꒃꅐꊛꏣꇲꁵꊛꏣꌌꎍꐽ，ꁉꃑꌠꌌꄺꀱꌠꊥꎆꀻꎆꌠꊥꎆꌶ。
ꉇꉻꃼꇇꀑꐱꃅꎍꐽꌠꊥꎆ。ꎆꏂꑘꏤꃼꊫꌐꁦꎆꃅꈉꎍꐽꃅꑘꊌꌠꏦꀧꌠꊋꁈꄏꌠꇬꆼꒆꄉ，ꊋꀥꇱꄉꎆꉛꎆꇱ，ꉇꅐꉌꒊꄜꏂꀧꉱꑷꐨꍔꐯ，ꈏꃹꉇꅐꎕꏦꑟꀨꊰꍅꀁꂥꃅꄉ，ꉇꅐꅐꇐꏭꆦꌊꈏꇓꃷꄻꌠꊋꁈꄏ。ꐳꃅꃅꋮꐂꄆꃼꇇꑠꃅꑘꐛꄟꀊꏀꌠꌌꀻꎆ，ꇩꏹꎊꈬꎞꎭꄐꊋꉀꐕ。ꀊꏀꈭꌠꁧꃤꃅꌊꃼꇇꏀꀺꀻꎆꃅꉚꅉꄹꎆ。ꌕꈭꀕꌠꈏꃹꄉꀨ꒜ꊭꄎꋒ，ꏣꀋꑌꃅꈏꃹꌠꍔꒉ，ꑟꐨꀊꅰꀊꂥꋧꃅꏭꉜꄉꃅꌠꃷꎏꀉꒉꌠꀻꎆ。
ꏣꀋꑌꃅꉇꎆꌬ。ꉇꎆꈏꃹꉆꎻꌠꀋꃪꁁꏯꃷꁨꋏꄯꒉꀉꒉꃅꊨꒊ，ꋯꐂꁧꃤꃅꃼꇇꃅꀋꃪꁁꏯꃷꁨꋏꄯꒉꏤꄻꅐꇁ。ꃹꅼꃅꎆꏣꇣꋲꏱꅉꐎꄺꀱꁉꃑ。ꄿꐨꃼꇇꃅꉚꅉꁳꀊꅰꃅꀉꒉꌠꄺꀱꁉꃑꑴꌅꌅꈌꐥꎻ，ꈯꄔꁮꐚꁆꏯꃅꄷꄿꐨꃼꇇꃅꉚꅉ、ꏓꇱꄉꇗꏸꀧꅉꁦꎆꃅꄻꄉ，ꁧꃤꃅꑘꍔꒉꃅꁉꃑꏓꇱꃅꉚꅉꁦꎆ。ꐳꃅꉰꆆꄿꐨꃼꇇꃅꎿꀸꋈꄻ。ꈏꉈꎆꎆꏂꑘꋍꉹꃅꐙ、ꐽꊯꃅꋓꅔꌠꃷꎏꋦꈭꄺꂡ。
ꊇꁧꀊꂥꃅꐯꇯ“ꋍꁕꋍꈜ”ꋈꄻ。ꐯꇯꇕꄟꐯꇯꋈꄻꐯꇯꈲꊌꌠꌭꈬꇬꎷ，ꃷꎏꏥꏦꌋꆀꇩꏹꌬꈴꏦꋪꍬꌬ，ꎆꏂꑘꀨꄜꂿꄐꋊꇤ，ꐯꈲꇷꃅꌠꍔꆙ。ꉇꉻꎆꇱꌠꄐꏁꌌꁣꀋꐥꃅꀻꎆ。
ꃼꇇꌋꆀꎆꇱꄿꐨꈴꈝꐮꈴꌠꄹꇙ。ꀋꎪꃅꀉꑌꁁꏯꃼꇇꃅꏦꉻꀧꌋꃅ，ꏣꀋꑌꃅꋧꃅꃼꇇꎀꍹꄺꀱꌠꐊꈽ。ꃄꁕꐊꑷꃅꎆꏣꐋꀨꃆꂮꐥꌠꋯꏤꏤꁱꌠꄹꇙ，ꍏꏝꉴꑠꄿꐨꃼꇇꐯꉇꌠꄹꎆ。ꐯꇯꍏꂰꉘ꒜ꊬꌠꎆꏣꃼꇇꋯꏤꌠꃅꇫꑟ。ꍏꇩꆏꊋꇤꄉꇩꏤꈀꐥꌠꌋꆀꎆꏣꃼꇇꇷꃅꌠꊋꀥꇱ，ꐯꈲꋓꊋꌠꃅꇫꑟ。
ꉆ、ꉹꁌꐥꐨꏦꀧꌋꆀꄻꃪꌠꆼꒆꄉ，ꐧꋦꌤꑘꄺꀱꀻꎆꌠꄹꇙ
ꊋꋠꌠꊝꇬ，ꅉꀨꉹꁌꐥꐨꄽꂫꑞꅉꆹꏟꈯꃅꋏꈬꌶ，ꉹꁌꇫꉈꇬꌠꌤꆿꆏꊋꇤꄉꀞꄻꋒꌶ。
ꋍꏅꁦꎴꆄꄻꉻꑫꋈꄻꌠꊋꀥꇱ。ꀑꇬꌌꋍꉎꀋꐥꌠꃅꄉ，ꆄꈻꄴꏮꋎꍅꏦꉻꄺꀱ，ꊋꀥꇱꄉꇵꆅꄴꏮꄐꊋꋈꄻ，ꇵꆅꈛꎂꃅꄛꇰꌠꌋꆀꌗꋏꉻꑫꄻꐛꒆ，ꋋꇅꃅꇵꆅꐯꇳꐨꈴꌗꌌꄇꄜꋊꂿꉆꄉꄜꃑꌠꌭꈬꇬꎷ。ꇵꆅꏭꄘꑣꐋꀋꌡꌠꇩꎝꌬꋒ，ꆅꁿꋌ、ꁬꋌꌋꆀꐳꃅꎖꉚꌠꇮꇐꎥꃪꀖꁉꌠꇬꎆꀉꒉꃅꇱ，ꇵꆅꄴꏮꉃꄻꉁꈾꁦꎆ，ꇙꐺꋒꃯꉜꑳꁦꎆ，ꀉꇨꃅꃛꊸꌠꇬꊝꌠꌬꇐꏦꀧ，ꀉꇨꃅꅉꂫꊐꌠꁦꎴꆄꄻꇵꆅꄴꏮ。ꐳꃅꋍꏅꁦꎴꆄꄻꌧꊿꁥꁱꂘ。ꃹꅼꃅꇩꏤꉂꁦꎴꃅꌠꍔꂵ。ꁦꎴꇭꀧꉾꃪꌧꇐꁊꈴ，ꉾꃪꌧꑳꌠꐤꄟꄖꄑ。ꇵꆅꄴꏮꋎꍅꌠꄐꊋꀉꒉꃅꉀꐕ，ꏟꈯꃅꇵꆅꐯꇳꐨꀱꉈꄓꇁꌠꄴꏮ，ꏟꈯꃅꏓꂱꇭꀧꉾꃪꐨꀧꌋꃅ。
ꅉꀨꆅꉁꁧꃤꃅꐨꉀꐕ。ꀀꊿꆅꉁꄜꏂꀧꇬꊾꂷꌠꐽꏡꃅꏱꎆꁥꁵꎕꏦ30ꂷꁦꎆ，ꆅꉚꅉꌫꎆꌜꐂꄉꈛꎂꃅꌗꂫꇽꌠꃅꉚ。ꇵꆅꐯꇳꐨꇱꁧꏖꌠꆅꉁꏲꉻꏭꊋꁈꄏ。ꃹꅼꃅꉻꀞꑱꑼꏓꇱꄺꀱ。“ꐯꏑꈄꏍ＋ꆅꉁꉾꃪ”ꌠꀻꎆ。ꃄꁕꆅꉁꈯꄜꋈꄻ。ꇓꈓꇓꉈꋥꁕꆅꉁꁧꃤꃅꄐꊋꉀꐕ。ꊐꁸꄉꆅꉚꌠꄹꎆ。ꍏꑱꁬꋌꌄꆣꃅꀻꎆꌠꊥꎆ，ꍏꑭꑳꐮꐊꌠꊋꀥꇱ。ꉃꌠꆅꌠꐮꄮꃆꂮꃄꄻ。ꏦꇨꃅꋠꇐꁬꋌꍞꏲꄉ，ꉮꀋꐥꎻꌠꄉꀧ。
ꂘꑘꐽꊯꃅꀻꎆꌠꌋꆀꊇꁧꉀꐕꌠꄹꇙ。ꑌꇐꌌꊿꂘꄻꌠꃅꇬꎷ。ꊱꁨꃅꐧꐭꌶꅉꉙꂘꂘꌷꌠꌋꆀꐧꀠꀊꂥꊐꌠꎖꑣꌤꃅꌠꊥꇬ。ꊋꀥꇱꄉꑣꍔꁠꀀꄹꏦꌶꅉ、ꑣꋂꄉꈁꀄꊭꌠꌶꅉꌋꆀꑤꍰꇓꈓꌶꅉꋈꄻ。ꇫꐊꇁꌠꌳꃈꅮꋭꑘꂘꑘꌶꄻꏱꁈꄻꐛꒆ。ꐋꀋꌡꂘꑘ、ꐪꊛꂘꑘꀞꋒ，ꉹꁌꀞꄉꌠꂘꑘꊋꁈꄏꌋꆀꋊꍬ。ꈲꈴꌠꌷꂾꂘꑘꀻꎆ，ꉹꁌꀞꄉꌠꀊꉘꈩꂘꅉꇇꀨ。ꒉꌶꅉꂘꑘꈏꐊꐨꀻꎆꌠꄹꇙ，ꒉꌶꅉꀨꏠꌠꌋꆀꌷꑫꀨꏠꌠꋈꄻꌠꄹꎆ。ꈯꄔꁮꐚꏯꒉꌶꅉꀻꎆꌠꊋꁈꄏ。ꒉꌶꅉꂿꑘꁡꇤꌋꆀꌢꎭꃅꄷꉜꄉꌶꌺꎹꌠꄉꈁꍔꒉ。ꃅꑘꂘꑘꀻꎆ。ꊋꀥꇱꄉꂘꃀꁥꌠꉘꉚ。ꂘꑘꈴꌗꈴꌠꄹꎆ。ꂘꑘꎆꇱꌠꌌꎍꐽ，ꎆꊐꐛꉻꄻꃪꄉ，ꇓꈓꇓꉈ、ꃄꁕ、ꌶꅉꇢꊭꍣꐨꍕꒊꄉ，ꂘꑘꌬꇐꇁꀦꁳꑱꈐꌋꆀꀉꑳꈀꐥꌠꃅꈲꊌꎻꄉ，ꋀꊇꁳꀊꅰꃅꊫꂫꁤꇅꀕꌠꐥꇁꎻꌶ。
ꅉꀨꉹꁌꐥꐨꏦꀧꌠꊋꃤꁦꎆꇱ。ꎞꑬꆏꊿꅉꀨꃀꌠꀨꎹꎆꉀꐕ，ꇓꈓꇓꉈꀀꊿꅉꀨꃀꌠꀨꎹꎆꎕꏦꀄꊭꐯꀄꊭꐨꉀꐕ。ꎆꏂꑘꇮꃅꌤꃅꊿꅉꀨꃀꌠꀨꎹꄜꏂꀧꎆꀨꌜꊐꌠꋍꃱꃅꎴꄻꋍꃱꃅꌬꌠꃅꇫꑟ，ꍏꑷꋊꄻꍆꐪꉀꐕ。ꇩꏤꑭꊂꊻꂷ3ꂡꀋꇈꃀꌠꀨꎹꎆꋠ，ꀋꎪꃅꏤꄮꇬꈴꄉꃷꁨꇎꃅꃑꁵꌠꄉꀧ。ꎞꆏꂽꑼꈲꁵꏱꁈꃄꌬꇫꑟ。ꉻꃆꃅꄉꀑꇬꁮꌠꊿꉈꇬꇲꄻꌠꃅꋒ。ꃅꑘꀋꊌꄜꏂꀧꏦꀧꈍꈐꍔꐯ，ꄜꏂꀧꐊꈽꌠ1ꈓꀋꐛꌠꂿꑘꊿꇮꃅꌠꑠꃅꅍꀋꊌꈧꌠꃅꌌꅉꀕꃅꀀꌠꏦꀧꌠꇬꇱꄉ。ꐧꋦꈭꋏꇇꀨꄹꏦꄻꐛꒆ。ꐥꐨꀁꂥꀧꏦꀧꈍꈐꍔꐯ，ꇓꈓꇓꉈꊋꋠꌠꑱꁯꏭꏦꀧꄡꑟꌠꆏꄾꌦꋩꃅꏦꀧꄉ，ꇎꏦꇬꄉꄐꌠꇓꈓꏦꎫꃅꅍꀋꊌꌠꌋꆀꀱꂱꑱꃅꄷꇁꌠꊿꆏꐳꃅꌌꐥꐨꀁꂥꀧꌠꇬꇱꄉ。ꊿꉮꌸꆄꈻꄢꅐꒉꄸꃅꋍꇅꇬꊋꋠꐨꐥꌠꆏ，ꐯꇯꌌꈭꋏꇇꀨꌠꃅꌶ。ꃶꐚꃅꉹꁌꊋꋠꈁꐥꌠꅉꀨꐥꐨꏦꀧꄉ，ꉹꁌꐥꐨꏦꀧꌠꆹꈍꃅꑌꊿꃅꅍꀋꊌꌠꀊꅰꀉꑌꃅꇇꀨꌊꉈꑴꃅꅍꊌꑘꀺꀬꎻꌶ。
ꉹꁌꉌꊈꁱꀕꐥꐨꄻꀉꑌ。ꐧꋦꉪꏦꈯꄜꁌꐨꉜꐨꉗꄻꌋꆀꃄꄻ，ꍔꑪꐧꋦꈆꑪ、ꈨꏀꅏꄻ、ꅇꁊꄆꒌꄆꁱꑠꌤꑘꀻꎆ。ꊋꀥꇱꄉꁱꀕꏂꀨꍸꇐꀧꌋꃅꄉꌫꄻꌋꆀꐥꇐꁱꀕꍸꇐꀋꉬꌠꊪꊛ。ꊋꀥꇱꄉꄉꉻꁱꀕꁧꃤꃅ，ꀙꏢꃅꋆꀎꒀꉼ、ꃅꋆꊾꄣꀎꒀꉼꊭꄎ，ꉹꁌꈁꐥꌠꇭꀧꄜꎟꌠꌋꆀꄯꒉꀘꌠꄕꊪꄉ，ꐧꋦꑭꊂꃅꊋꃤꍅꁍꀕ、ꀻꎆꆹꉾꃪꆹꎻ。
ꐧꋦꏱꄻꌠꊋꀥꇱꌋꆀꏀꀺ。ꋥꁕꏲꂠꌠꌋꆀꁧꃤꃅꉺꏦꄻꐛꒆ。ꊋꀥꇱꄉꑣꋂꏱꄻ。ꐧꋦꎀꍹ、ꂄꃅꐮꇇꀨ、ꉌꇗꁧꃤꃅ、ꉌꂄꌤꑘꑠꐛꒆꃅꀻꎆꌠꊋꁈꄏ。ꌋꅪ、ꀊꉘ、ꃀꌠ、ꊾꄣꌠꏦꊒꌅꈌꈲꁧꏦꀧ。ꄯꒉꁱꌊꅇꅲꇁꌠꄹꏦꄻꐛꒆ，ꊋꀥꇱꄉꏦꃤꇇꀨ，ꐳꃅꉹꁌꇗꊒꃅꑗꇖꌠꂥꀘ，ꊝꈭꃅꃆꑘꃣꈌꉉꄮ。ꏃꈭꌠꇩꏤꑭꊂꊻꂷꍤꈴꌠꃅ。ꊋꀥꇱꄉꇩꏤꋬꂻꄐꊋꋈꄻ。ꐧꋦꋬꂻꏱꄻꄴꏮꋎꍅꉻꑫꄻꐛꒆ，ꏦꃤꇬꈴꄉꋍꑞꋍꉹꑽꃤꐆꌠꌌꇇꇩꍈ，ꑞꅉꀊꅰꀊꂥꌠꋬꂻꍏꇩꋈꄻ。
ꋬꂻꃅꒃꅐꌠꃅꎁꄻꀉꇨ。ꊋꀥꇱꄉꒈꅐꃪꂨ、ꃄꐔꅑ、ꃄꇙꑠꉮꃆꄙ，ꃅꀑꃅꑊꁧꃤꃅꋒ，ꃛꊸꊜꄻꏲꂠ、ꈭꋏꇇꀨꌠꌋꆀꉮꄵꉮꊨꄐꊋꉀꐕ。ꋬꂻꒃꅐꌐꄉꏱꄻꌠꃅꐨꃄꌬ。ꏟꈯꃅꌤꀉꒉꀊꂾꃅꅐꇁꂵꌠꏡꍅ。
ꁧꎁꊈ！
ꂿꃆꊋꋠꀉꇖꌠꂾꆏ，ꍔꃚꈁꐥꊐꌠꆏꑴꐚꃅꉪꇐꀂꏽꍔꍞꀂꏽꃅꐨꀂꏽꆹꐋꀨꑮꏣꀻꈯꄜꃅꄉꌠꄈꍏꑷꌋꆀꀊꂥꃅꏓꋍꃱꃅꄉꇬꎷ，ꏓꂱꈯꄜꃅꄉꌠꀻꎆꉪꇐꃄꄻ，ꐊꑷꃅꏦꇨꃅꄈꏱꄻꌠꇖꐨꃅꇫꑟ，ꀋꎪꃅꏦꃤꈴꄉꏲꑘꏲ，ꏦꏲꍔꃚꋈꄻ，ꀋꎪꃅꍔꃆꄇꄜꋊ，ꏱꄻꄐꊋꉀꐕ。ꏦꃤꇬꈴꄉꋋꊐꌠꏓꄊꌋꆀꋍꎮꊈꉼꁳꍞꊟꎻ，ꑴꐚꃅꏓꂱꍔꑠꁳꋯꁦꃅꍞꊟꎻ，ꑴꇙꃅꐧꋦꌋꆀꈋꍣꌠꁳꍞꊟꎻꌶ。ꍤꌗꍞꊟꌠꄻꀉꇨ。ꇪꉼ、ꇭꏾꄨ、ꌋꅪꐊꏑꉼꑠꁥꏓꎀꍹꂿꄐꋊꇤꋒ。ꍔꃚꌤꃅꊿꆏꑴꐚꃅꏦꃤ、ꍞꊟꍤꄻꌠꌋꆀꏓꂱꁳꍞꊟꎻꌶ。ꊋꀥꇱꄉꐙꎴꍔꃚꋈꄻ，ꏟꈯꃅꍹꈔꌠꌌꅓꀞ。
ꍔꃚꈁꐥꊐꌠꆏꈍꄮꑌꏟꈯꃅꑞꉬꌠꑞꃅꄉ，ꏟꈯꃅꐧꋦꉪꏦꉘ꒜ꊬꌠꅉꀨꇩꃆꇩꂮꋋꏢꒃꇇꈐꊐꄉ，ꉇꉻꈳꏦꇬꍬ，ꑞꑌꃶꐚꐛꐨꇬꈴꄉ，ꂱꑱꐤꅉꇬꄉꊨꏦꌤꀞꄻꋒꌶ。ꊋꀉꒉꃅꇤꄉ“ꃅꇏꇖꑵ”ꌠꋊꍬ，ꇶꏦꉪꏦ、ꇛꌺꉪꏦꊋꇤꄉꏢꇋ，ꅉꂫꊐꌠꇥꀯꋍꏅꌤꑘꀹꄻꍔꒉꌠꑭꇇꆹꇶꏦꉪꏦꏢꑲꌠꇬꄉꇔꅐꇁ，ꊪꃅꊿꎁꃅꊪꃅꎻ，ꃅꎁꃅꌠꁳꃅꋒꌶ。ꏟꈯꀕꃅꏓꂱꉹꁌꊫꁱ，ꅉꂫꊐꌠꇫꇬꀹꄻꉌꊈꁌꒉ，ꊋꀊꅰꀉꒉꃅꌌꄺꀱꁉꃑꌠꄹꎆ，ꐧꋦꍄꑐꊋꃤꄖꄑ，ꉹꁌꂡꃪꌠꉹꁌꀑꁭꐨꌋꆀꊋꃤꏓꋧꌠꆹ，ꉪꊇꊋꋠꅍꈁꐥꌠꄩꊋꌠꊋꌗꉬ。ꇥꀯꋍꏅꌠꆏꊋꋠꌠꀋꐵ、ꃶꐚꃅꌤꃅ，ꉌꋧꊋꏓꄉꀻꎆꌠꒃꉇ、ꉹꁌꐥꐨꄉꀧꄡꑟ。ꉪꊇꆹꈍꄮꑌꏓꂱꉹꁌꌋꆀꌑꑌꐯꇯꌒꎬꑌꐯꇯꎭ、ꈒꇤꊋꇤꄉꃅꅷꆹꑲꆏ，ꍏꇩꏓꂱꐥꌒꄻꌒꎹꌠꉪꐨꆹꀋꎪꃅꃅꇫꑟꄎꌠꉬ。
ꎼꈎꆏ“ꊯꇖꉬ”ꄐꎖꌠꁰꄻꋒꄉ，ꉐꈎꉈꈽꁻꌐꑍꂷꌠꈭꈜꀊꏀꌠꀹꄻꌠꎁꃅꌐꉻꄐꏤꌶ。
ꁧꎁꊈ！
ꉪꊇꆏꊿꋅꃄꁕꊨꏦꏲꄹꏦꌭꈬꌋꆀꄻꐛꒆ，ꀁꑌꊿꋅꌋꆀꊿꋅꃅꄷꐳꃅꀻꎆꌠꊋꁈꄏ，ꍏꉸꊿꋅꏓꐊꄜꉪꐨꄻꈫꈈꌶ。ꐊꑷꃅꄈꅿꑇꇐꌤꃅꅉꀨꌐꏦꌫꄻ，ꑇꇐꁆꏯꊿꂒꋦꌠꌋꆀꑇꇐꑇꌠꉹꁌꆹꎆꏣꐧꋦꀻꎆꊥꎆꌠꇬꂿꄐꏣꀋꑌꌠꋊꇤꅐꇁ。ꎿꉈꃺꑌꆹꁍꇩꇫꉈꇬꌠꉬ，ꋧꃅꐮꈴꌠꇢꈴꅍꀋꉬꀋꉆꌠꉬ，ꇩꉈꃺꑌꑱꈐꊿꃤꂱꎆꅑꐨꐋꀋꌡꌠꋊꇤꋒꄉ，ꀋꆏꃅꍏꉸꌺꇖꏓꋧꊋꃤꄻꀉꇨ，ꉪꐨꋍꏢꃅꐯꇯꏁꇅꁤꇅꌠꀹꄻꌶ。
ꀋꉊꄻꈎꅑꅸꇁꌠ，ꇩꐏꌠꌋꆀꂽꋈꄻꌠꀋꂿꑘꃅꀻꎆꌠꊌꅜ，ꏓꂱꂽꆏꇵꆅꐯꇳꐨꄴꏮꋎꍅꌠꇬꄉꄈꄐꇺꌠꅇꃅ、ꅇꁵꈨꆏꃅ、ꀬꅑꃅꃣꇖꄜꌠꃅꇏꉾꃪꌠꄛꑣꀐ。ꃹꅼꃅꑮꏣꀻꂽꇨꉪꇐꃅꈴꌬꈴ，ꃹꅼꃅꃅꋊꀊꏀꋎꌠꂽꌤꄐꇐꌐꏦꃄꌬ，ꏟꈯꃅꍔꍞꌌꂽꋈꄻ、ꄺꀱꌌꂽꄻꀉꇨ、ꈆꑪꇮꇐꌌꂽꄻꀉꇨ、ꌧꊿꌌꂽꄻꀉꇨ、ꏦꃤꈴꄉꂽꏱꄻꌶ。ꄈꏓꂱꂽꏭꀋꎪꃅꏲꂠꌠꌭꈬꇬꎷ，ꏦꇨꃅꏮꊈꍗꑮꃅꎁꆽꎍꄹꏦꃅꇫꑟ。ꊋꈁꑌꃅꇤꄉꂽꁱꌉꄐ，ꀋꎪꃅꇩꏤꌅꀨ、ꋬꂻ、ꀻꎆꈲꁧꀧꌋꃅ。ꂽꋈꄻꀻꎆ“ꊯꌕꉬ”ꄐꎖꈢꇓꀖꌠꃅꇫꑟꋒ，ꂽꋈꄻ“ꊯꇖꉬ”ꄐꎖꌠꁰꄻ。ꃹꅼꃅꇩꐏꌋꆀꂽꄺꀱ，ꊁꊭꊁꄐꌠꌋꆀꉁꈾꏦꀧꄐꊋꉀꐕ，ꇩꐏꈆꑪꇮꇐꏀꀺꀻꎆꌠꄹꇙ。ꇩꐏꄕꊪꉻꑫꄻꐛꒆ，ꈍꄮꑌꂽꌋꆀꍔꃚꂽꌋꆀꏓꂱꐮꋯꑌꌊꇓꆈꀋ꒜ꌟꃅꈫꈈꎻ。
ꉪꊇꆏꐊꑷꃅꎃꊒꃅ“ꋍꇩꑍꏦ”、“ꇤꊿꇤꏲ”、“ꀎꊿꀎꏲ”、ꀊꂥꃅꊨꏦꏲꌠꌐꏦꃄꌬ，ꏲꑘꇣꋲꏱꅉꐎꇩꏤꋬꂻꀧꌋꃅꌠꏦꃤꄹꏦꌋꆀꃄꌬꉺꏦꋈꄻꐛꒆ，ꇣꋲꏱꅉꐎꍔꃚꏦꄹꃅꎁꃅꇫꑟ。ꇤꀎꎆꏣꀻꎆ、ꉹꁌꐥꐨꄻꃪꌠꊋꁈꄏ，ꀊꅰꉾꃪꃅꇩꏤꀻꎆꃅꇴꄉꉻꇬꃹꄉ，ꑣꇤ、ꀎꂱꁳꀊꉗꃅꌄꆣꎍꐽꇬꎷꎻ。
ꉪꊇꆏꄠꃪꏭꌤꃅꌠꏱꁈꀉꒉꌐꏦꌭꈬꇬꎷ，ꀋꎪꃅꍏꇩꋍꂷꉬꌠꏥꏦꌬ，“ꈬꑍꉜꐊ”ꌠꅉꃀꇬꄉꎿꋮꑍꁁꏯꐮꃆꂮꄮꐽꃅꀻꎆꌠꄹꇙꌶ。ꏟꈯꃅ“ꄠꃪꄂꋦ”ꁷꐞꈴꐨꆼꁏꌋꆀꏡꍅꌶ。ꎿꋮꑍꁁꏯꐮꈴꇷꃅꌠꊥꎆ、ꃹꅼꃅꎿꋮꑍꁁꏯꏓꇱꀻꎆ、ꄠꃪꃺꑌꈲꊌꌠꏦꀧꌠꄹꏦꄐꁆꌠꌋꆀꏱꁈꏁꁈꄻꐛꒆ，ꄠꃪꃺꑌꋍꏅꌠꌋꆀꐮꋯꑌꄉ“ꄠꃪꄂꋦ”ꌠꏭꁏ、ꏓꋍꃱꃅꌠꊥꎆ，ꉪꊇꆹꀋꎪꃅꊿꋅꀱꌄꆣꇁꌠꃆꏂꊂꑋꉾꃪꌠꀹꄻꎼꇁꄎꌠꉬ。
ꋍꏅꁦꎴꆄꄻꎒꐡꌠꏭꊝ、ꎆꏣꀉꇨꃅꉈꎞꑠꅉꆺꑭꊂꃅꋓꎭꌠꏭꆏ，ꇩꏤꈁꐥꌠꐮꐊꄉꀒꁨꆹꄡꑟ。ꍏꇩꆹꇩꏤꈁꐥꌠꌋꆀꐯꇯꊋꀥꇱꄉꇵꆅꄴꏮꇷꃅ，ꋧꃅꎆꏣꎍꐽꌠꊥꎆ，ꅉꆺꑭꊂꏱꄻꌠꄹꎆ，ꐊꏑꇩꌌꈯꄜꃅꄉꌠꇩꏹꉻꑫꌋꆀꇩꏹꏦꃤꌌꅉꃀꃅꄉꌠꇩꏹꐥꀹꀧꌋꃅ，ꃰꊿꊫꂫꐮꐊꐙꌠꏓꄻꌠꄹꇙ。ꍏꇩꆹꀋꎪꀋꑴꃅꄮꐽꀻꎆꌠꈝꃀꍬ，ꁉꃑꌠꍔꒉꌠꇬꄉꃹꅼꃅꇩꏤꈁꐥꌠꌋꆀꉁꅉꃅꇷꃅ，ꍏꇩꆹꈍꄮꑌꋧꃅꄮꐽꑘꒃꌠꌋꆀꀻꎆꌄꆣꌠꊥꎆꌠꊋꃤꀋꉬꀋꉆꌠꉬ。
ꁧꎁꊈ！
ꍏꉸꊿꋅꆹꈍꄮꑌꊋꋠꐨꐥꌠꀋꏦ，ꀋꃋꋋꄮꍏꇩꏓꂱꆹꋓꎭꌠꑞꄩꑌꊋꄎꌠꉌꊋꀉꇨꐨꌋꆀꄐꊋꐥ。ꉪꊇꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ，ꊋꋠꌠꉜꄉꀒꁨꆹ，ꋦꄉꏀꀺꇬꎷ，ꏓꇲꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌠꄹꎆ，ꊋꇤꄉꋋꈓꌠꑞꅉꁻꌐꂿꃆꃅꇫꑟꄉ，ꉪꇩꏤꋈꄻꌊꌣꈚꐞꄿꋯꁦꌧꑳꐮꄮꎔꃨꌠꐧꋦꉪꏦꐛꏀꈴꌠꇩꏤꀉꇨꂷꐛ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꀋꆏꃅꉈꈽꌶ！
（ꑝꉸꎹꀙꏢ5ꆪ29ꑍꈨꇁꇬ）
