ꏓꂱꃔꑼꀊꂥꇊꀊꂥꊐꌠꌤꃅꅇꄜ
——2020ꈎ5ꆪ25ꑍꊯꌕꈭꇩꏤꑭꊂꏓꂱꁧꎁꃀꀉꒉꌕꃢꌠꈿꅉꇬ
ꏓꂱꃔꑼꀊꂥꇊꀊꂥꊐꌠꑼꍈ ꍏ ꐃ
ꁧꎁꊈ：
ꉢꏓꂱꃔꑼꀊꂥꇊꀊꂥꊐꌠꎁꃅꃀꀉꒉꈿꅉꏭꌤꃅꅇꄜ，ꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꏀꌀꌡꆅꅋꋍꃀꆅꇵꆅꐯꇳꐨꇫꅐꇁꊂꅑꅸꇁꌠ，ꑮꏣꀻꊝꎻꏹꑭꄑꄉꄐꇺ、ꑭꄑꄉꄐꄻ，ꐋꀨꑮꏣꀻꌌꈯꄜꃅꄉꌠꄈꍏꑷꆏꄈꑭꊂꂽꑭꊂꇩꏤꑭꊂꊿꋅꈧꌠꏓꂱꃅꋯꑌꏃꂠꄉꋯꑌꆏꊋꒉ、ꀉꇨꃅꉈꈽꄉ，ꎬꅧꐯꅧꃅꊋꇤꇈ，ꃛꀙꐏꁇꉈꈽ、ꃶꉴꐏꁇꉈꈽꌠꆹꏤꇽꃅꐙꌠꉈꈽꊌꐨꊌꅜ，ꇵꆅꐯꇳꐨꄴꏮꋎꍅꌠꄐꇐꏤꁈꊌꐨꀉꒉꀊꂾꌠꊌꅜ，ꋍꃱꃅꄐꏤꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌤꃅꌠꇿꋌꏣꀋꑌꌠꊌꅜꌠꄹꎆ。ꊌꐨꀋꂿꑘꋋꈨꊌꅜꌠꆹ，ꀋꉬꀋꉆꌠꆏꐋꀨꑮꏣꀻꌌꈯꄜꃅꄉꌠꄈꍏꑷꏟꈯꃅꏃꂠꄉꊌꅜꌠꉬ，ꋒꐯꋒꃅꍏꇩꇭꍣꄈꏃꂠꌠꌋꆀꉪꇩꏤꐧꋦꉪꏦꄹꏦꉾꃪꐨꀉꒉꐯꀉꒉꌠꄛꑣꅐꇁꀐ，ꋧꃅꏭꍏꇩꊋꃤ、ꍏꇩꉌꊈ、ꍏꇩꑘꅐꐨꄛꑣꀐ。
ꏓꂱꃔꑼꀊꂥꇊꀊꂥꊐꌠꆏꏟꈯꃅꑮꏣꀻꊝꎻꏹꀋꂿꑘꌠꄐꌐꉌꊈꌋꆀꄈꍏꑷꁈꏤꄐꁆꌠꃅꈴꌬꈴ，ꍏꑷꍔꃔꊈꏲꂠꌠꇂꃴꄉ，ꎔꎗꃅꏦꃤꇬꈴꄉꄴꏮꋎꍅꌠꇖꐨꃄꌬꇫꑟ，ꀉꄂꃅꅀꄚꃆꂮꐥꌠꌤꃅꅉꌋꆀꐯꇯꄉꏦꃤꇬꈴꄉꇵꆅꐯꇳꐨꄴꏮꋎꍅꉮꄯꑽꃤꐆꌠꅓꀞ、ꇩꏤꃅꋮꀑꌋꆅꍤꆅꑲꉮꄯꑽꃤꐆꌠꅓꀞ、ꀱꇮꃅꀱꒃꅐꌠꏦꀧꑠꉜꐨꏤꄻ，“ꃘꑵꎍꐽ”“ꃘꑵꏦꀧ”ꌠꁧꃤꃅꏦꌬꏡꁈꄻꐛꒆ，ꇵꆅꃆꂮꐥꌠꑽꃤꐆꌠꅓꀞꌠꌋꆀꀱꇮꃅꀱꒃꅐꌠꁧꃤꃅꌠꊥꋦꑘꐘ57ꐘꄜꃑ，ꊋꇤꄉꇵꆅꄘꑣꌠꎁꃅꏃꎭ、ꃅꇴꄉꉻꎁꃅꁧꃤꃅ。ꃔꑼꋍꊐꋑꀋꋒꌠꆏꋍꃱꃅꄐꏤꄉꋒꃅꇵꆅꐯꇳꐨꄴꏮꋎꍅꌠꌋꆀꎍꐽꀧꌋꃅꑠꌤꃅ，ꋍꑞꋍꑵꇵꆅꃆꂮꐥꌠꃣꈌ2736ꐘꍤꀞꂫꇽ，ꇵꆅꃆꂮꐥꌠꏟꃆꏈꑘꁢꊧꇬꄉꄴꏮꋊꄻꌠꊥꎆ；ꏦꇨꃅꆅꉁꆄꄻꌤꃆꌤꃅꊿꇭꀧꋬꂻꐨꌋꆀꊿꐥꑊꒉꐨꇬꉮꄻꑽꃤꐆꌠꅓꀞ，ꇵꆅꄘꑣꌠꇬꃣꇖꀵꄉꁨꆹꌠ“ꎔꇁꃨꌠꌋꉜꄉꆹꌠꊿ”ꀧꌋꃅ；ꏟꈯꃅꋓꉪꁨꄉꌧꑳꃅꏦꌬꇬꎷ，ꏣꀋꑌꃅꐧꀠꀄꊭꐭꌠꎆꏂꑘꎁꃅꊋꋠꐨꋊꑣ；ꈜꎴꃅꌌꃣꈌꃅꄉ、ꈄꏍꇬꄉꌌꍤꇽ、ꑴꌧꃅꃄꌬꌠꌌꌬꄉꋋꇅꃅꏟꃆꏈꑘꏤꇽꐯꀥꐨꆏꇧꎭ。ꑴꌧꃔꑼꆏꇵꆅꐯꇳꐨꄴꏮꋎꍅꊬꌠꇬ“ꄐꅍꀉꇨꃅꅐꁖꇁ”，ꇩꏤꑭꊂꃔꑼꈄꏍꇬꄉ136ꃪꐘꌌꃣꈌꃅꄉ、ꃣꈌꀞꅉꁉꄉ25ꃪꃢꀞꄻ、59ꃪꃢꉉꀞ，ꄆꌅꈴꄉ446ꃪꃢꎭꇫꑟ，ꈄꏍꇬꄉ266ꃪꐘꍤꄻꋎꍅ，ꏦꌬꈄꏍꏶꃷꃼꇇꐛꐨꃷꁨ639ꂡꂷꇬꑟ，ꎆꃀꃷꁨ2045ꂡꂷꃄꌬꑞꅉꑟ。ꃔꑼꇥꏢꋍꏅꌠꈜꀕꇈꃛꀙꌋꆀꃶꉴꃔꑼꇬꇥꏢꆏꏟꈯꃅꄈꍏꑷꍝꅇꅇꃅꄉ，ꏣꀋꑌꃅꂱꑱꃅꄷꇵꆅꄘꑣꌠꉘꃀꊐꌠꇬꄉ，ꋍꃱꃅꄐꏤꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌤꃅꌠꎁꃅꏦꌬꁧꃤꃅꌠꌋꆀꏦꀧꌠꇲꁵꄉ，ꄈꏭꀋꎪꀋꑴ、ꇩꏤꏭꀋꎪꀋꑴ、ꏓꂱꏭꀋꎪꀋꑴ、ꏦꃤꏭꀋꎪꀋꑴꌠꍔꍞꑴꊈꄛꑣꀐ。
2019ꈎꌤꃅꐨꀋꉬꀋꉆꌠ
2019ꈎ，ꏓꂱꃔꑼꀊꂥꇊꀊꂥꊐꌠꆏꑮꏣꀻꃅꋊꀊꏀꌠꇬꍏꇩꐛꐨꐧꋦꉪꏦꉪꇐꌌꄐꌐꅍꃅꄉ，ꐋꀨꑮꏣꀻꌌꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꇩꏤꑭꊂꏓꄊꌋꆀꋍꎮꊈꉼꊋꑌꃅꍞꊟꌠꇂꃴꄉ，ꁦꎆꃅꀉꇨꃅ“ꇖꑵꉪꉻ”ꑌ、ꏟꈯꃅ“ꇖꑵꑴꑇ”、“ꑍꑵꀧꌋꃅ”ꌠꃅꇫꑟ，ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꃅꈴꌬꈴ，ꃹꅼꃅꑮꏣꀻꊝꎻꏹꍏꑷꍔꍞꏳꎮꊈꉼꄐꇺꄉꏓꂱꃔꑼꀊꂥꇊꀊꂥꊐꌠꄈꊤꌤꃅꅇꄜꌠꅱꄻꄮꇬꀋꂿꑘꃅꅇꉉꌠꉌꊈꃅꈴꌬꈴ，ꎔꎗꃅꊯꌕꈭꇩꏤꑭꊂꏓꄊꃀꑍꃢꀕꌠꈿꅉꏤꐪꃄꌬꇫꑟ，ꈬꐯꈬꃅ“ꊋꇤꄉꏓꂱꉹꁌꁳꏦꌬꃣꈌꋍꐘꋑꀋꋒꌠꇬꄉꀋꈐꀋꉈꑗꉬꌠꌋꅜ”ꌠꑞꅉꁻꌐꇬꆼꒆꄉ，ꀋꎪꃅꃅꇴꄉꉻꁧꃤꃅ、ꉹꁌꎁꃅꏦꌬ、ꀋꈐꀋꉈꃅꏦꌬꌠꌭꈬꃅꄉꇬꎷ，ꀋꎪꃅꏦꃀꏦꃤꄻꁵꄉꌠꄉꅍꃅꎁꃄꄻ，ꋍꑞꋍꐘꌤꃅꌠꄹꇙꌊꇿꋌꀊꏀꌠꊌꅜ，ꎆꏣꐧꋦꀻꎆꌠꎁꃅꊋꑌꌠꏦꌬꁧꃤꃅꌠꌋꆀꏦꀧꌠꇲꁵ。ꏓꂱꃔꑼꀊꂥꇊꀊꂥꊐꌠꆏꃣꈌ38498ꐘꊪꀞ，34481ꐘꍤꀞꂫꇽ，ꋋꊭꌡꍆꂱꑱꅉꄉꇬ10.7%ꌋꆀ8.2%ꉀꎆ，ꏦꌬꉉꀽ20ꐘꏤꄻ，ꄐꌐꐨꐥꌠꐘꑘ33ꏢꄜꃑ，ꊋꀥꇱꄉꇩꏤꑭꊂꃔꑼꍤꇽꌤꃅꌠꏭꍞꊟꄐꌐ；ꃅꄷꃔꑼꋍꊐꋑꀋꋒꌠꆏꃣꈌ3156.7ꃪꐘꊪꀞ，2902.2ꃪꐘꍤꀞꂫꇽ、ꃄꌬꂫꇽ，ꃣꈌꂫꇽꌐꁧꃷꁨꆏ6.6ꃪꂡꂷꇬꑟ，ꋋꊭꌡꍆꂱꑱꅉꄉꇬ12.7%、15.3%ꌋꆀ20.3%ꉀꎆ。
ꋍ、ꐊꑷꃅꉻꄜꇩꏤꋬꂻꉜꐨꃅꈴꌬꈴ，ꑞꅉꀊꅰꃅꀊꂥꌠꋬꂻꍏꇩꋈꄻꌠꄹꎆ
ꏟꈯꃅꇩꏤꋬꂻꌠꌋꆀꐧꋦꎍꐽꌠꀧꌋꃅ。ꋍꊐꍤꀞꅓꑘꃣꈌ129.7ꃪꐘꍤꀞꂫꇽ，ꑽꃤꐆꊿ166ꃪꑼꌌꍞꇽ。ꏦꃤꇬꈴꄉꏦꇨꃅꋍꑞꋍꑵꃹꈴꁏꆷꀜꐆꌠ、ꊋꆍꏿꇷꌾꌠ、ꊿꋅꁷꐞꐺꌠ、ꑇꇐꂘꃅꅼꇨꌠꑠꑽꃤꐆꌠꅓꀞ，ꏟꈯꃅꇩꏤꍔꍞꋬꂻꌠꌋꆀꏓꂱꁧꀦꈲꁧꐏꁇ。ꈍꄮꇬꑌꏦꇨꃅꐧꋦꋬꂻꉮꄻꑽꃤꐆꌠꏭꀊꂥꃅꆼꍅꐛꄟꄝꀋꊰꃅꄉꇬꎷ，ꀉꆈꃅꊋꆍꏿꑽꃤꐆꌠꃣꈌ4.9ꃪꐘ，ꀉꑌꃅꅐꌠꎆꋚꉄꌎꑽꃤꐆꌠꃣꈌ27.2ꃪꐘ，ꅳꍩꂨꁖꃆꂮꐥꌠ、ꎆꈩꎲꃆꃆꂮꐥꌠꑽꃤꐆꌠꃣꈌ6.5ꃪꐘꍤꀞꂫꇽ，ꀉꆈꃅꊋꆍꏿꑽꃤꐆꌠꃣꈌꊛꄉꊰꈎꀁꋌꊰꌠꐛꄟꇬꎍ，ꐧꋦꋬꂻꏱꄻꐨꎍꐽꊱꁨꃅꐙꇬꎷ。ꃹꅼꃅꅋꏢꉈꈽꌠꃄꄻ，ꅋꇐꑽꃤꐆꌠꃣꈌ8.6ꃪꐘꍤꀞꂫꇽ。ꃛꊸꊜꄻꏲꂠꀯꑠꌋꆀꐯꇯꄉꀉꇨꃅꏲꑘꏦꌬꌠꌋꆀꅓꑘꏦꌬꌠꄻꐯꊛ，ꏦꃤꇬꈴꄉꋬꂻꒃꅐꏦꐆꑽꃤꐆꌠꅓꀞ，ꏓꂱꉹꁌꀑꇬꁨꇐꋬꂻꌠꏦꀧ。ꏓꂱꏦꍤꑼꀊꂥꇊꀊꂥꊐꌠ、ꇬꉢꀯꌋꆀꐯꇯꄉꏢꍤꏭꈐꏿꏦꐆꑽꃤꐆꌠꅓꀞꉜꐨꄜꃑ，ꃶꐚꃅꏓꂱꏢꍤꇭꀧꋬꂻꐨꌋꆀꏦꌬꋦꒉꐨꀧꌋꃅ。ꏦꃤꇬꈴꄉꄉꉻꑌꍯꇑꌊꊾꈷ、ꌶꅉꀃꈈꁮꑭꄉꊿꑽꐪꀋꐥꌠꐡꌉ、ꁠꑌꍯꁠꑌꊿꌉꆳꇧꎭꑠꐛꊈꀋꂄꌠꃣꈌꀉꒉꀊꂾꈨꍤꀞ，ꑽꃤꀉꆈꐯꀉꆈꌠꑽꃤꐆꊿꏭꆏꏦꃤꇬꈴꄉꌌꍞꇽꇈꌌꌉꅓꃤꅓꄉ，ꋒꐯꋒꃅꑽꃤꅓꌠꇷꇋꂿꄐꋊꇤꅐꇁ。
ꃹꅼꃅꀉꆈꌠꌩꎳꀋꂄꌠꋊꑣꌠꌐꄉꉈꈽꌠꄹꎆ。ꏟꈯꃅꏦꃤꇬꈴꄉꏦꇨꃅꅓꀞꌠꌐꏦꌫꄻ，ꇩꏤꑭꊂꃔꑼꆏꀉꆈꌠꇬꃆꂮꐥꌠꑽꃤꐆꌠꃣꈌ12639ꐘꊿ83912ꑼꍤꀞꂫꇽ。ꏦꃤꇬꈴꄉꌜꑦꇬꃣꈌ、ꄗꎱꀻꐷꈭꇬꄉꊿꂿꄃꃣꈌꍤꀞ，ꑽꀨꌜꑦꇬ、ꄗꎱꀻꏭꆏꀋꎪꃅꍞꇽꄷꀋꁧꌌꌉꅓꃤꃄꌬꇈ，ꑗꉬꌠꁳꈍꃅꑌꃅꇫꑟꎻ。ꄚꃆꂮꐥꌠꌤꃅꅉꌋꆀꐯꇯꄉꄸꃅꄸꑽꊋꃤ、“ꅥꈜꎆꉛ”、ꏦꀋꊒꃅꉚꎆꃑꑠꅓꑘꃣꈌꀞꄻꉜꐨꏤꄻꅐꇁꇈ，ꏱꁈꏦꃤꊨꄅꅉꄻꊨꄅꃅꄉ，ꏟꈯꀕꃅꅥ、ꊒꌸꃅꅥꌠꏦꀧ。ꏟꈯꃅ“ꆫꁯꐷꈄꃮꀺ”，ꏦꇨꃅꉻꌤꃅꊿꀉꆈꌠꃆꂮꐥꀋꂄꌠꃆꂮꐥꏦꐆꑽꃤꐆꌠꅓꀞ。“ꎆꄃꌦꇽ”ꌠꃄꄻ，ꏓꇱꄉꁨꇐꅓꑘꍞꇽ、ꈹꏮ、ꏦꐆꄉꊌꌠꎳꄻꑠꇇꁈꌬꄉ，ꉱꋃꃅꄸꃅꄸꑽꊋꃤꎆꏣꅉ꒜ꑉꇧꎭ。ꌐꄉꉈꈽꌠꃄꄻꊂꅑꅸꇁꌠ，ꏦꃤꇬꈴꄉꄸꃅꀋꃷꎵꌠ“ꂤꏂꇂꇎꊿ”“ꈭꈜꇂꇎꊿ”“ꉐꀖꃱꀖꇂꇎꊿ”“ꁡꇤꇂꇎꊿ”ꈨꌌꅓꀞꇈ，ꐧꋦꃅꇏꄻꌃꎴꃅꄉꀐ。
ꍹꈔꑽꃤꐆꌠꅓꀞꀉꇨꃅꆼꍅꌠꐛꄟꄝꀋꊰ。ꎆꂁꋠꃴꎆꁵꋠ、ꄉꅍꀋꃅꑠꃣꈌ2.5ꃪꐘꊿ2.9ꃪꑼꍤꀞꂫꇽ，ꄚꈐꏭꌌꅇꎹꊿꇬꂴꆏꍏꑷꏲꌠꇥꀯꉬꌠ27ꑼꐊ。ꎃꊒꃅꄝꏯꌠꌋꆀꏦꇨꌠꐯꇯꌬꌠꅓꑘꏱꁈꄛꑣ，ꉟꊉꅿꑠꑴꇙꃅꑽꃤꉉꇁꌠꌌꅇꎹꊿꆏꏦꃤꇬꈴꄉꌌꏯꄉꀞꄻ，ꑠꒄꑠꀉꆈꃅꍹꈔꊿꏭꆏꌌꄉꐥꍂꃅꈢꄉꌠꌫꄻ。ꇩꏤꍞꊟꍤꄻꊈꑼꉼꑠꌋꆀꐯꇯꄉꇩꏤꍞꊟꍤꄻꌠꌋꆀꅓꑘꏦꌬꌠꐯꊛꉺꏦꄻꐛꒆ。ꏣꀋꑌꃅꋯꉈꆶꐺꑽꊿꈹꀋꎴꎆꋚꈪꌠꇬꐊꄉ，ꆶꉇꁧꌠꍹꈔꊿꀱꇩꈐꄉꌌꍤꀞꎻꌠꃣꈌ321ꐘꍤꀞꂫꇽ，ꏦꃤꇬꈴꄉꁉꑪꃖꑠꆹꏮꌊꇩꉈꁧꀐꌠꏦꐆꄉꊌꌠꎳꄻꇧꎭ，ꈍꃅꑌꍹꈔꊿꁳꑽꐆꏦꐵꐺ、ꅓꀞꌠꐵꐺꎻꀋꎽ。
ꃶꐚꃅꏓꂱꉹꁌꋬꂻꃅꐙꐨꀧꌋꃅ。ꏦꇨꃅꋠꇐꁬꋌꋬꂻꌠꇬꉮꄻꑽꃤꐆꌠꅓꀞ，ꏦꃤꇬꈴꄉꍤꎸꆅꁿꋌꃣꈌ、ꑦꀻꉻꀆꐒꎪꇬꊎꄉꌠꇌꎸꒃꅐꃷꄻꃣꈌꑠꃣꈌꀉꒉꀊꂾꌠꍤꀞ，ꏦꃤꇬꈴꄉꒉꈜꒀꒉꃷꄻꑠꑽꃤꐆꌠꃅꐨꅓꀞ，ꏓꂱꉹꁌꑱꀒꁳꇬꉐꆂꀂꏽꇬꋬꂻꌠꀧꌋꃅ。ꉼꀙ、ꎮꉰ、ꏦꌠꑠꃅꄷꃔꑼꆏꏦꃤꇬꈴꄉꌌꈌꀋꁧꃅꄉꌡꄻꁬꋌꈒꃹꇁꌠꃆꂮꐥꌠꅓꑘꃣꈌꀞꄻ，ꎃꊒꃅꑽꃤꐆꅀꑽꃤꀋꐆꌠꄹꊨꒃꌫꇇꈐꊐꄉꇈ，ꏦꌬꌠꁳꊋꑌꈭꐨꊷꆣꃅꑌꐙꎻ。ꊿꋅꁨꇐꏢꇔꉹꌠꄆꑠꈄꏍꊏꀸꌠꀉꇨꃅꇫꅐꌠꇬꉜꄉ，ꇬꉢꀯꑠꌋꆀꐯꇯꄉꄐꌐꉜꐨꄻꅐꇁꇈ，ꅓꀞꊋꃤꁦꎆꇱ。ꏦꇨꃅ“ꌶꅉꎆꄻꐮꉛ”ꑽꃤꐆꌠꅓꀞ，ꌶꌺꏦꊒꌠꌅꈌꈲꁧꀧꌋꃅ。ꀉꆈꃅꊋꆍꏿꄉꆅꉁꊿꎼꂷꊂꌸꑽꃤꐆꌠꅓꀞ，ꀙꏢꂱꉴꈁꉬꆅꉚꅉꆅꉁꊿꇇꆉꇧꎭꌠꌜꊉꀘꑠꑽꃤꐆꊿꈨꏭꏦꃤꇬꈴꄉꍞꇽꇈꄷꀋꁧꌌꌉꅓꃤꃄꌬꄉ，ꃶꐚꃅꆅꉁꊿꇭꀧꋬꂻꌠꌋꆀꏦꊒꌠꌅꈌꈲꁧꀧꌋꃅ，ꎃꐚꌠꆅꉁꐥꀹꀧꌋꃅ。ꀊꂥꅉꇬꄉꊵꑵꍞꀁꋌꎭꊵꑵꊰꀁꋌꇁꄉꀉꆈꃅꉹꁌꇷꇋꌠꋬꂻꌤꃆꇬꉜꄉ，ꏦꌬꏱꁈꏤꄻꅐꇁ，ꊋꀥꇱꄉꏦꃤꇬꈴꄉꅓꏲꌋꆀꇁꀦꇬꄉꄴꏮ，ꄇꄜꋊꄉꀊꂥꅉꇬꄉꊵꑵꍞꀁꋌꎭꇈꄉꉻꋬꂻꌠꇬꉮꄻꌠꃣꈌꈨꍞꇽꄉ，ꏓꂱꉹꁌꀂꏾꇬꉮꀋꐥꌠꐏꁇꀧꌋꃅ。
ꏦꃤꇬꈴꄉꐋꀋꌡꃅꅓꃤꇔꌠꏤꇽ。ꎔꎗꃅꑮꏣꀻꍗꑮꉈꃅꅓꃤꇔꅇꁵꌋꆀꇩꏤꑭꊂꏓꄊꎮꊈꉼꉈꃅꅓꃤꇔꏤꐪꃄꌬꇫꑟ，ꍏꇩꀊꏀꄻꐛ70ꈎꈭꏝꐛꄮꂾ，ꏦꃤꇬꈴꄉꏤꇽꄉꑽꃤꐆꊿ23593ꑻꌌꉈꃅꅓꃤꇔꇧꎭꄉ，ꄇꇖꀕꃅꄈꌋꆀꇩꏤꏦꃤꌌꋧꃅꑘꒃ、ꑌꇐꌌꊾꉌꒈꊭꌠꂄꏲꂄꄻꌠꍔꆙꀐ。
ꊋꀥꇱꄉꊿꌅꈌꏦꌬꌠꏦꀧ。ꀋꎪꃅꑞꉬꌠꑞꃅꄉ、ꑽꌠꐥꑲꆏꀋꎪꃅꌌꄺꀱꇬꎷ，ꃔꑼꋍꊐꋑꀋꋒꌠꃅꍤꇽꍞꊟꈭꎁꇬꈴꄉꅓꑘꃣꈌ1774ꐘꌌꉈꑴꍤꀞꀱꍞꇽꀱ，ꎭꄏꑠꃔꑼꆏꏦꃤꇬꈴꄉꍈꍞꍫꑠꀋꐯꃆꑘꃣꈌꀉꒉꀊꂾꌠꈎꍬ。ꇩꏤꀵꊒꃣꈌ1.8ꃪꐘꍤꀞꂫꇽ，ꀵꊒꇖꂟꊿꏦꊒꌠꌅꈌꈲꁧꏦꀧ。ꀋꎪꃅꑽꃤꅓꃤꏦꏤ、ꑽꃤꉌꋲꀕꌠꌌꑽꃤꀋꐥꌠꃅꄉ、ꊫꌐꌌꍜꇽꇬꎷ，ꏦꃤꇬꈴꄉꉻꅇꎹꃣꈌꅇꌸꊿ637ꑼꌋꆀꊨꏦꅇꎹꃣꈌꌌꅇꎹꊿ751ꑼꌌꑽꃤꀋꐥꄷꄛꇰ。ꎮꑭꃔꑼꆏꏦꃤꇬꈴꄉꃔꄠꑴꄛꇰꌊꑽꃤꀋꐥꌠꃅꄉꇈ，ꀋꐯꀞꑽꃆꑘꃣꈌꀉꒉꌠꇫꅐꇁꌠꋒꇧꎭꀐ。ꀋꎪꃅꄝꏯꌠꌋꆀꏦꇨꌠꄻꐯꇯꄉꌠꅓꑘꏱꁈꌭꈬꃅꄉꇬꎷ，ꏦꇨꄡꑟꌠꆏꏦꇨ，ꄝꏯꄡꑟꌠꆏꄝꏯ，ꅓꐨꑽꃤꐮꄉꄐꎻ。ꃹꅼꃅꍤꇽꌠꌌꈯꄜꃅꄉꌠꅓꑘꅇꎹꄹꏦꄺꀱꌠꄹꎆ，ꐊꑷꃅꎃꊒꃅꑽꐪꏚꍆꅓꃤꏚꍆꌠꏯꄉꅓꀞꌠꄹꏦꌌꌬ。ꌦꃔꀯꌋꆀꐯꇯꄉꅓꑘꃣꈌꑗꅒꊿꅔꀥꌠꈁꉬꃅꉱꑷꌠꌋꆀꏦꃤꇇꀨꑗꅒꊿꏤꃅꄹꏦꄹꎆ，ꑗꅒꊿꏦꃤꇬꈴꄉꄉꅍꃅꎁꃅꌠꏦꀧ。
ꑍ、ꀋꎪꀋꑴꃅꀻꎆꉪꉻꀊꏀꌠꃄꌬ，ꎆꏣꐧꋦꐪꊛꄉꁣꀋꐥꃅꀻꎆꌠꁧꃤꃅ
ꏦꏲꈴꌠꀰꏢꃼꇇꃅꋦꈭꄺꑣ。ꏦꏲꌠꆹꀰꏢꃼꇇꃅꋦꈭꉾꐯꉾꌠꉬ。ꃔꑼꋍꊐꋑꀋꋒꌠꋍꊐꍤꀞꃼꇇꌤꃆꃣꈌ453.7ꃪꐘꍤꀞꂫꇽ。ꊇꁧꀊꂥꃅꀻꎆꌠꁧꃤꃅꉜꐨꏤꄻ，ꇬꌦꏦꃤ、ꑱꐢꏦꃤꏦꌬꉉꀽꏤꄻꅐꇁ，ꉹꁌꃆꑘꃣꈌꍤꇽꌤꃅꃀꈿꇖꎁꀋꉬꀋꉆꌠꄜꃑ，ꏦꃤꌬꄉꄐꌠꌋꆀꍞꇽꎕꏦꏓꋍꃱꃅꄉ，ꏦꌬꂿꉆꐨꌋꆀꉘꇉꐨꁦꎆꃅꀉꇨꇁ。ꏦꃤꇬꈴꄉ“ꄝꃑꏲꂠꁧꃤꃅ”ꄺꀱꌠꇬꃆꂮꐥꌠꏲꑘꅇꎹꃣꈌꍤꀞ，ꏲꑘꌤꏲꅉꏦꃤꇬꈴꄉꏲꑘꏲꌠꍞꊟꌠꊋꁈꄏ，ꋍꊐꍤꀞꏲꑘꃣꈌ28.4ꃪꐘꍤꀞꂫꇽ，ꏦꏲꍔꃚꋈꄻꌠꇇꀨꄹꎆ，ꆓꋦꈭꀻꎆꉾꃪꈴ。ꋧꃅꑴꉴ2020ꈎꀰꏢꃼꇇꃅꋦꈭꅇꄜꇬꄛꑣꅐꇁꇬ，ꉪꇩꏤꀰꏢꃼꇇꃅꋦꈭꋧꃅꂴꊁꂓꄀꐨꀉꒉꃅꁦꎆ，“ꃄꌬꉼꏤ”“ꑱꐢꀞꄻ”“ꐧꐭꎆꇱꌠꀧꌋꃅ”ꑠꏦꌬꌠꌋꆀꐮꃆꂮꑖꑟꃅꐥꌠꇬꌐꁧꆏꄇꇖꀕꃅꉀꐕ，ꄚꈐꏭ“ꏦꌬꈭꎁꊇꁧ”ꆏꂴꅑꎍ，ꌌꈋꍣꌊꋋꁁꏯꇬ“ꅉꆺꑭꊂꉾꃪꌠꃄꄻꊿ”ꃅꄉ。
ꏦꃤꇬꈴꄉꐽꊯꃅꋍꑞꋍꑵꃷꎏꀨꄜꏦꊒꌠꌅꈌꈲꁧꀧꌋꃅ。ꀋꎪꃅꋍꑞꋍꑵꃷꎏꀨꄜꅇꎹꉆꈉ、ꏦꃤꌬꄉꄐ、ꏦꃤꃅꎁꐯꇯꐥꊯꌠꌭꈬꃅꄉꇬꎷ，ꇩꁨꎆꏂꑘꉹꁌꀰꏢꎆꏂꑘ、ꈏꎆꉇꎆ、ꀉꒉꐧꀠꀄꊭꐭꌠꎆꏂꑘꑞꉬꄿꂿ，ꌌꐯꌟꃅꉜ、ꏦꃤꇬꈴꄉꌌꀧꌋꃅ。ꀋꎪꃅꀻꎆꌠꉜꐨꌌꄉꉹꁌꀰꏢꎆꏂꑘꌋꆀꎆꏂꑘꌧꃀꋌ꒜ꀰꏢꌠꇬꀋꋊꀋꍬꌠꃅꐨꀞꄻ，ꏦꃤꇬꈴꄉꐩꋊꇬꏓꐛꄉꌠꁨꇐꌅꈌꃆꂮꐥꌠꀋꐯꆹꑽꃆꑘꃣꈌꍤꄻꊨꄅꄺꀱ，ꌠꍏꐧꑼꆏꉈꑴꆀꏳꀧꃣꈌꍤꀞꀱꍤꇽꀱ，ꀋꎪꃅꈁꉬꃅꑽꌐꑲꆏꈁꉬꃅꌌꋊꍬꄺꀱꌐ，ꄹꁆꑽꑲꆏ，ꄹꁆꌌꋊꍬꄺꀱ，ꑽꌌꇿꇬꑟꑲꆏꋊꍬꄺꀱꅷꇿꇬꑟꇬꎷ。ꍏꇩꀊꏀꄻꐛꊂꅑꅸꇁꌠꏦꌬꉉꀽꈁꐥꌠꃅꌌꍤꄻ，103ꐘꇤꇧꎭ，ꉹꁌꀰꏢꎆꏂꑘꏭꀋꐽꀋꊱꌠꏤꐪꈁꉬꃅꀜꋊꇧꎭꌐ。ꎕꏦꄩꐂꄉꁨꇐꍤꏢꑸꄉꏢꄉꌠꃅꀋꉆ，“ꊝꇮꃅꏢꊝꇮꃅꈎ”ꑠꄀꇗꇱꏡꁈꏀꀺꌌꌫꄻ，ꄾꌦꋩꃅꎆꏂꑘꀰꏢꌠꏭꁧꏖꐨꊨꎴ。ꏦꇨꃅꎆꏣꏟꃆꏈꑘꌋꆀꎆꏣꑽꃤꐆꌠ、ꉹꁌꃆꑘꃅꎁꌋꆀꅓꑘꅑꃤ、ꏦꊒꁨꇐꌋꆀꏦꐆꄉꊌꌠ、ꇬꌦꁨꇐꌋꆀꊾꄜꁨꇐ、ꎃꊒꃅꎆꏓꎆꊭꌠꌋꆀꏦꃤꇬꀋꈴꃅꎆꏓꎆꊭꌠꊨꄅ，ꌤꃶꐚꌠꊨꀋꄅ、ꊫꌐꀋꇎꌠꃣꈌꇬꌌꅇꎹꊿꏭꆏꏟꈯꃅꑽꃤꀋꐥꃅꃑꇧꎭ，ꎆꏂꑘꌧꃀꇭꀧꐥꐨꌋꆀꁨꇐꋬꂻꌠꀧꌋꃅ，ꏀꀺꑘꀺꄓꊋꄖꄑ。
ꊋꀥꇱꄉꌧꇐꅏꄻꌅꈌꏦꌬꀧꌋꃅ。ꌧꇐꅏꄻꌅꈌꀧꌋꃅꌠꆹꇫꀧꇙꊋꏀꀺꌠꅉꀨꏦꀧꌠꉬ，ꌧꇐꅏꄻꌅꈌꀧꌋꃅꌠꆹꏀꀺꌠꀧꌋꃅ、ꏀꀺꌠꊥꎆꌠꉬ。ꌐꈲ、ꃷꇐꌐꂷ、ꁰꄻꌅꈌꑠꌧꇐꅏꄻꌅꈌꃣꈌ41.8ꃪꐘꍤꀞꂫꇽ，ꏀꀺꅸꇙꀻꎆꌠꇬꁧꃤꃅ。ꏓꂱꃔꑼꀊꂥꇊꀊꂥꊐꌠꌧꇐꅏꄻꌅꈌꃔꄝꏦꃤꇬꈴꄉꀋꈐꀋꉈꑘꅐꃅꁧꀿ、ꌌꌬꉆꌠꀊꏀꉹꌠꌐꈲꑠꉎꅇꎹꃣꈌꍤꀞ，ꈆꑪꇮꇐꏀꀺꏦꏲꋦꈭꄻꉾꃪꌠꊥꎆ。ꀋꈐꀋꉈꃅꄆꌅꃼꇇꐽꈉꃄꈌꄐꃅꃷꎏꄐꄻꉆꈉꌫꄻ、ꀋꋭꀋꋽꃅꋓꅔꑠꃣꈌꍤꀞ，ꃷꎏꀋꈐꀋꉈꃅꋓꅔꌠꐥꀹꀧꌋꃅ。ꏣꀋꑌꃅꅓꁵꃅꐙꌠꁵꊒꄹꏦꌌꌫꄻ，ꌅꈌꉄꌎꏦꐆꀨꊰꁦꎆꇱ。ꃛꏧ、ꇨꄏꃔꑼꆏꋭꋽꃅꇨꄫꌋꆀꀻꇬ、ꉸꊉꌋꆀꌒꑟꋍꋬꈭꌐꈲꏟꃆꏈꑘꃣꈌꍤꀞ，ꌢꆈꁳꅉꆺꑭꊂꄮꇱꎻꌠꃅꇫꑟꌠꊥꎆ。ꋧꃅꌧꇐꅏꄻꌅꈌꎀꍹꆹꌐꄉꍏꇩꌧꇐꅏꄻꌅꈌꏦꌬꀧꌋꃅꑘꐘꍑꅐ。ꉪꇩꏤꆹꌧꇐꅏꄻꌅꈌꃣꈌꈜꀕꇈꌐꈲꃣꈌꍤꀞꐨꀉꑌꐯꀉꑌꌠꇩꏤꐛꀐ，ꉈꑴꍤꀞꀱꏮꀁꎴꐯꀁꎴꌠꇩꏤꇬꋍꂷꑌꉬ。
ꎆꒉꎆꇁꐔꈔꉆꐨꄴꏮꋊꑣꌠꇬꁧꃤꃅ。ꏦꌬꉉꀽꏤꄻꅐꇁ，ꏦꃤꇬꈴꄉꁌꁦꊫꌐꏤꃷꎊꈬꃷꎏ、ꈐꃆꃼꇇꈩꄻꑽꃤꐆꌠꅓꀞ。ꏓꂱꑴꉴ、ꑴꉴꄜꏂꀧꍞꊟꉼ、ꊫꌐꍞꊟꉼꌋꆀꐯꇯꄉꎆꒉꎆꇁꏟꃆꏈꑘꀉꑌꑵꃅꋊꑣꌠꄹꇙ，ꏦꃤꇬꈴꄉꎆꇱꊿ、ꎆꒉꎆꇁꌬꈧꊿꑠꋍꑞꋍꁆꏯꌢꆈꏦꊒꌠꌅꈌꈲꁧꀧꌋꃅ。ꈆꑪꇮꇐꏀꀺꀠꄻꄉꄷꀋꁧꁱꄀꄹꏦꄺꀱꃅꉚꌠꎁꃅꏦꌬꏦꀧꉜꐨꏤꄻ，ꎆꀨꃷꎏꅉꃀꃅꐙꌠꄹꏦꄺꀱꌠꇬꁧꃤꃅ。ꀙꏢ、ꎮꉰꑠꃔꑼꆏꊱꁨꃅ“eꊤꀧ”ꑠꐯꏑꈄꏍꇬꃆꂮꐥꌠꎆꒉꎆꇁꃣꈌꊒꌐꌤꃅꌠꄹꎆ，ꏦꃤꇬꈴꄉꎆꒉꎆꇁꐔꈔꉆꐨꃆꂮꐥꌠꃣꈌꀉꒉꀊꂾꌠꀞꄻꌠꃅꈽ。ꒊꆈꑠꃔꑼꆏꏦꃤꇬꈴꄉꋭꋽꃅ“ꃔꑸꐛꑊ”ꑠꏦꃤꇬꀋꈴꃅꎆꏓꎆꊭꃣꈌꍤꀞ，ꏣꀋꑌꃅꃣꈌꃆꂮꐥꌠꁨꇐꈹꏮꀞꄻ，ꊋꇤꄉꉹꁌꇇꀨꄉꁮꑋꌠꆽꈎꌌꀱꇁ。ꎮꉰꎆꒉꎆꇁꃔꑼꆏꁌꁦꊫꌐꏟꃆꏈꑘꀨꀠꍞꇽꉺꏦꏀꀺ，ꏣꀋꑌꃅꐧꐭꎆꇱꊿꏦꌬꀧꌋꃅꈝꃀꀊꏀꌠꎹꎥ。
ꎭꇔꈢꇓꀖꌠꁧꃤꃅ。ꑣꋂꄖꄑꌄꆣꁧꃤꃅꌠꏦꌬꏱꁈꑭꋧꃅꃄꌬꇫꑟ，ꏦꃤꇬꈴꄉꏦꇨꃅꂿꑘꃆꂮꐥꌠꀥꇱꌠꊏꀸꄜꏂꀧꌠꊏꀸꌠ、ꌢꎭꄏꐓꁁꏯꍹꈔꌠ、ꂿꑘꎆꃀꈱꄻꑠꉹꁌꈲꏣꉮꄻꑽꃤꐆꌠꅓꀞ。ꎭꑭ、ꃛꇂ、ꌧꍧ、ꆀꑤꑠꃅꄷꃔꑼꆏꋭꋽꃅꂿꑘꁡꇤꃄꅉꏭꆦ、ꌩꏪꌅꈌꏮꏆ、ꇴꍆꇷꃅꋍꑠꃣꈌꍤꀞ，ꂿꑘꁡꇤꀰꏢꀨꄜꏦꊒꌠꌅꈌꈲꁧꀧꌋꃅ，ꌢꎭꃅꄷꅐꑘꉀꄓꎻꌠꇬꇇꀨ。ꇭꍏ、ꑭꊗꌋꆀꇑꏦ、ꆀꑤꑠꃅꄷꃔꑼꆏꏣꀋꑌꃅꀀꅉꆦꄉꌢꎭꄏꐓꎞꀀꌤꃅꌠꇬꁧꃤꃅ，ꂿꑘꊿꋍꏅꌠꃄꅉꀧꃅꀰꏢꌅꈌ、ꑲꅉꃅꌫꄻꌅꈌꀧꌋꃅ，ꇿꋌꐥꃅꂿꑘꅐꇐꒃꅐꃷꄻꏟꃆꏈꑘꋊꑣꇧꎭꄉ，ꂿꑘꁡꇤꎆꏣꐧꋦꀻꎆꌠꊥꎆ。
ꃅꃴꒉꃴꃄꅉꁦꎴꌠꐏꁇꉈꈽꌠꇬꁧꃤꃅ。ꋍꊐꍤꀞꌠꋦꈭꅐꀦꃣꈌ26.8ꃪꐘꍤꀞꂫꇽ。ꏦꍤꌤꏲꅉꌋꆀꐧꋦꎀꍹꄜꎼꇁꌠꋦꈭꉻꈲꅇꎹꃣꈌ1953ꐘꍤꀞꂫꇽ，ꏦꇨꃅꌕꏾꎭꁧꏡꁨꉐꁦꀑꑠꒆꉻꋦꈭꀜꐆꌠꊿꈧꌠꏭꏦꃤꅑꃤꎹꄻ。ꉢꉻꃔꑼꆏꅉꃴꁠꐤꈴꄉꍤꏦꒊꃀꏭꏦꐆꄉꅋꐊꐥꇐꋊꃑꄉꋦꈭꍍꆀꌠꃣꈌꍤꀞꇈ，ꏦꐆꊿꁳꅓꑘꅑꃤꀵꎻꈭꐨ，ꉈꑴꒆꉻꋦꈭꄺꀱꐛꅉꐛꌠꋭꑘꑌꃄꄻꎻ。ꏦꌠꇂꏢ、ꇤꌡꇂꍏꄉꀊꏀꃅꋦꈭꅐꀦꃔꄝꄻꄉ，ꏓꋧꄉꇫꐊꌜꏱꁕꈐꋦꈭꅐꀦꃣꈌꏱꄻ，ꒆꉻꂴꄉ、ꉮꀋꐥꃅꀻꎆꌠꀧꌋꃅꏃꎭ。ꍤꏦꒊ꒜、ꉸꉼꒊ꒜ꑠꈳꁕꃆꂮꐥꌠꃔꑼꆏꏦꌬꐮꇇꀨꌠꊋꀥꇱ，ꄇꒉꒊ꒜ꒆꉻꀧꌋꃅꌠꌋꆀꉻꑫꏱꄻꌠꄹꎆ。
ꇲꁵꁁꏯꐛꉻꃅꐙꌠꄺꀱꌠꁧꃤꃅ。ꇩꏤꀻꎆꄺꀱꊈꑼꉼꑠꌋꆀꐯꇯꄉꐳꃅꃷꎏꀨꄜꎞꅐꄹꏦꄺꀱꄐꉻꄻꐛꒆ，ꎞꅐꀨꊰꀁꋌꊰ，ꒃꅐꐊꊈꏭꇙꌠꌋꆀꎆꏂꑘꉹꏮꊐꐕꌠꊥꎆ。ꋒꐯꋒꃅꑱꐢꄹꏦꃷꎏꀨꄜꉾꃪꌠꊋꐛꀉꁘꌠꀜꋊꌠꊥꎆ、ꃅꄷꎆꒉꎆꇁꐔꈔꉆꐨꋊꑣ、ꐧꋦꐮꄮꎍꐽꌠꀧꌋꃅꌠꇬꂿꄐꀋꂿ꒧ꌠꋊꇤꅐꇁ，ꋭꋽꃅꑱꐢꐅꀱꇱꀱꑠꃣꈌ4626ꐘꍤꀞꂫꇽ，ꎝꃆꌅꈌꇬꃆꂮꐥꌠꎆꃀ6788ꂡꂷꐥ，“ꂾꈠꎆꏂꑘ”ꎍꐽꊱꁨꃅꊨꄅꅐꁧꌠꄹꇙ，ꀻꎆꊫꂫꐥꌠꎆꏂꑘ482ꁯꁳꐅꀱꇱꀱꈭꐨꉈꑴꊋꋠꅉꇬꄉꈴꅐꇁꎼ，ꌤꃅꊿ10.8ꃪꑼꇇꀨꄉꎍꐽꃅꃅꅍꊌꌠꃅꈉꀧꄉ。ꄟꏢꃔꑼꆏꏦꃤꇬꈴꄉꇩꁨꎆꏂꑘꐅꀱꇱꀱꌼꉔꄺꀱꌠꊋꁈꄏ，ꇩꁨꎆꏂꑘꎝꃆꐔꈔꉆꐨꋊꑣꌠꊥꎆ。ꄫꉸꃔꑼꆏꑱꐢꐅꀱꇱꀱꈭꎁꇬꈴꄉꄫꇤꉻꏑꇇꀨꄉꁣꀋꐥꃅ“ꎝꃆꏮꇴꍆꃅ”ꌠꃅꇫꑟ，ꀋꇰꀋꉈꌠꎝꃆꃷꁨꐔꈔꉆꐨꋊꑣꇧꎭꄉ，ꎆꃀꃷꁨꀄꊭꌠꎝꌅꊿꌋꆀꎆꏂꑘꇮꃅꌤꃅꊿꋍꏅꌠꈲꁧꏦꀧꄉꀐ。ꉸꀙꃔꑼꆏꑳꇤꎆꏂꑘꑱꐡꄮꇱꈁꏦꎹꎥ，ꑳꇤꁨꇐꃷꎏꁣꀋꐥꃅꀻꎆꌠꊥꎆ。
ꃄꁕꋮꄮꃅꀻꎆꄐꇐꃄꄻꌠꇬꁧꃤꃅ。ꌐꁨꉜꐨꏤꄻꅐꇁ，ꑪꉢꑟꐎꄐꎖꋈꄻꌠꌋꆀꏀꀺꀻꎆꌠꇬꁧꃤꃅ。ꀙꏢ、ꄟꏢ、ꉼꀙꃔꑼꆏꋭꋽꃅꐘꃆꀉꒉꀊꂾꌠꇬꃆꂮꐥꌠꏟꃆꏈꑘꋊꑣꇧꎭ，ꏢꏠꏹꋯꐊꃅꀻꎆꌠꌋꆀꃅꋆꀎꒀꉼ、ꃅꋆꊾꄣꀎꒀꉼꊭꄎꀞꄻꌠꇬꁧꃤꃅ。ꎮꉰ、ꏦꌠ、ꍔꏦ、ꉢꉻꃔꑼꆏꏦꌬꇷꃅꑞꅉꉀꐕ，ꍤꏦꌕꎏꃄꁕꋍꉻꈴꀻꎆꌠꇬꁧꃤꃅ。ꆾꆀ、ꏹꆀ、ꉿꇊꏦꃔꑼꆏꀰꏢꃼꇇꏦꏲꋦꈭꄻꃪꈴꌠꇬꏓꌵ，ꃅꋊꀊꏀꌠꇬꑛꌋꈤꏭꐊꑷꃅꉀꄓꎻ、ꈁꉬꁁꏯꃅꉀꄓꎻꌠꇬꁧꃤꃅ。ꇨꄏꃔꑼꆏꊋꇤꄉꀋꈐꀋꉈꑘꅐꌠꏦꏲꋦꈭꄺꑣ，ꒀꇤꉪꎿꈪꃄꁕꀉꒉꌠꌋꆀꎸꍔꂴꃅꌶꀠꃄꁕꋈꄻꌠꎁꃅꀧꌋꃅꏃꎭ。
ꃷꁨꎆꏣꀻꎆꌠꇬꁧꃤꃅ。ꊋꀥꇱꄉꃷꁨꌅꈌꈲꁧꏦꌬꀧꌋꃅꇬ，ꃷꁨꀉꒉꌠꈲꌬ、ꃷꁨꎆꏣꀻꎆꌠꇬꈲꏣꐥ，ꉻꊿꑴꅉꂁꇐꀧꌋꃅꌠꇬꈲꏣꐥ。ꏦꌬꇬꆹꃷꁨꎆꏣꎁꃅꋓꅔꐧꊈ、ꁉꃑꅓꏆꌠꋦꈭꀹꄻꌶ。ꃔꑼꋍꊐꋑꀋꋒꊐꌠꆏꏦꃤꇬꈴꄉꋭꋽꃅꃼꇇꀊꏀꈁꏦꀊꏀꃅꑘꐛꄟꀊꏀꌠꇬꃆꂮꐥꌠꃣꈌꍤꀞ，ꃷꁨꎆꏣꉾꃪꃅꀻꎆꌠꏦꀧ，ꃷꁨꎆꏣꌋꆀꐥꄜꎆꏣꃹꅼꃅꐮꉔꌠꊥꎆ，ꎆꏣꊇꁧꀊꂥꃅꀻꎆꌠꎁꃅꇙꊋꀊꏀꌠꇲꁵ。ꊿꄻꑴꌧꄐꊋ、ꈄꏍꈩꅍꁱꇐꌅꈌꃣꈌꑠꀊꏀꉹꌠꃣꈌꈨꍤꀞ，ꊋꀥꇱꄉꃷꁨꅏꄻꌅꈌ、ꃷꁨꐊꇐꅐꇐꏭꀧꌋꃅ。ꃷꁨꋬꂻꌠꌋꆀꊾꄜꂁꇐꀧꌋꃅꌠꊋꃤꁦꎆꇱ，ꏦꇨꃅꉻꊿꂱꑱꈴꌗꏭꉄꌎꑽꃤꐆꌠꅓꀞ，ꏦꃤꇬꈴꄉꇇꌌꄆꅇꌫꄻꇬꋧꁧꃅꌬꊿꅇꈴꄯꒉꈴꌗꉜꀘ、ꈄꏍꉌꒊꐽꈉꃄꈌꄐꃅꊾꄜꏤꁨꈴꌗꎹꏑꃷꁨꌫꄻꑠꃣꈌꍤꀞ；ꊒꌸꃅ“ꅇꇰꄉꇤꇧꎭ”ꌠꏦꋪꌫꄻ，ꌞꊿꏭꎼꋉꃏꄀꌠꅇꂷꁊꃑꌠꈄꏍꐽꈉꏭꆏ，ꉮꌸꊿꇖꂟꐨꇬꈴꄉꅇꁵꄉꄚꃆꂮꐥꌠꈴꌗꌨꑻꇧꎭꎻ。
ꑞꅉꀊꅰꃅꀊꂥꃅꉇꉻꏭꁉꃑꌠꇬꁧꃤꃅ。ꋍꊐꍤꀞꉇꄅꉹꁌꃼꇇꌤꃆꃆꂮꐥꌠꃣꈌ1.7ꃪꐘ，ꎿꌤꎿꃼꇇꃣꈌ1.6ꃪꐘꍤꀞꂫꇽ。ꇩꉈꃼꇇꃅꊿꎆꇱꏦꃤꏦꌬꉉꀽꏤꄻ，ꏦꃤꇬꈴꄉꐽꊯꃅꇩꈐꇩꉈꎆꇱꊿꏦꊒꌠꌅꈌꈲꁧꀧꌋꃅ。“ꋍꁕꋍꈜ”ꋈꄻꌠꇬꁧꃤꃅꉜꐨ、ꎮꉰꄿꐨꃼꇇꃅꉚꅉꎿꀸꎑꌠꃄꁕꀊꏀꋈꄻꌠꇬꁧꃤꃅꌠꉜꐨꏤꄻꅐꇁ。ꄟꏢ、ꃛꀙ、ꇨꑭ、ꍬꏿ、ꌧꍧꑠꃔꑼꆏꏣꀋꑌꃅꄿꐨꃼꇇꃅꉚꅉꏦꌬꏦꀧꏁꁈꄻꐛꒆ。ꉰꇂꃔꑼꆏꄿꐨꃼꇇꎿꀸꏦꌬꁧꃤꃅꐽꈉꀹꄻꄉ，ꇩꈐꇩꉈꎆꇱꊿꎁꃅꁌꀋꁵꃅꏦꌬꏤꁨꈴꌗꎹꏑꁧꃤꃅꌠꇲꁵ。ꇂꏢꎿꌤꃔꑼꆏꐛꅉꂱꎆꅑꐨꇬꈴꄉ，ꏣꀋꑌꃅ꒺꒜ꎆꏣꀻꎆꌠꇬꁧꃤꃅ。ꏾꄌꎿꌤꃔꑼꆏꋭꋽꃅ“ꆀꆺꎭ”ꄇꇉꑸꄉꌠꃣꈌꋊꑣꇧꎭꄉ，ꌤꃆꇬꃆꂮꐥꌠꋍꑞꋍꁁꏯꀉꇨꃅꁮꑋꌠꋒꏆꇧꎭꇈ，ꉇꄅꇩꏤꌢꆈꆏꉈꃅꄇꇉꂓꄺꀱꌊ“ꁌꒉ”ꂓꄉ，ꍏꇩꏦꏲꌠꏭꇗꅉꃅ。
ꌕ、ꀋꎪꃅꉹꁌꎁꃅꏦꌬ、ꀋꈐꀋꉈꃅꏦꌬꇬꎷ，ꐧꋦꀋꈐꀋꉈꑗꉬꌠꀧꌋꃅ
ꐧꋦꉪꏦꈯꄜꁌꐨꉜꐨꍔꆙ。ꇩꉂꉪꏦꁈꁧꐕꀊꂥꃅꄉ，ꏦꇨꃅꇩꏤꁈꁧꇩꏤꌐꉻꇩꏤꑵꉙꍍꋉꑽꃤꐆꌠꏭꅓꀞ，ꇩꏤꑊꀠꇐꑌꌋꉆꇬꏭꉄꌎꀋꉆꌠꄜꋊ。ꌳꈄꇏꃅꀑꇬꆺꌠꀧꌋꃅꉻꈲꅇꎹꃣꈌ22ꐘꍤꀞꂫꇽ，ꃓꍞꂰ、ꄏꋃꏐ、ꉸꏹꇨ、ꃆꅿꄔꌉꌳꈄꇏꃅꀑꇬꆺꌠꌅꈌꈲꁧꏭꉮꄻꌠꃅꐨꏭꆏ，ꏦꇨꃅꌌꏦꃤꅑꃤꎹ，ꉜꐨꊨꄅꃅꌳꈄꇏꃅꀑꇬꆺꌠꀑꑊꁤꇅꀕꌠꐏꁇ。《ꃅꋊꀊꏀꌠꇬꉻꊿꑌꇐꋈꄻꃄꌬꐱꀨ》ꃅꈴꌬꈴ，ꀋꎪꃅꐧꋦꉪꏦꈯꄜꁌꐨꉜꐨꌌꏦꌬꌤꃅꌠꇬꇱꄉ，ꏦꏲꊋꃤꌌꏓꂱꉹꁌꄐꂘꌊꂴꅑꄉꃅꂄꃪꌠꃅꇬꎷ。ꇩꏤꀻꎆꄺꀱꊈꑼꉼꑠꌋꆀꐯꇯꄉꏤꀋꁨꌌꃄꌬꊿꏭꅓꈪꊐꌠꉺꏦꄻꐛꒆ，ꀋꎪꏤꁨꌠꊋꊡ，ꏤꀋꁨꌠꏭꅓꈪꊐ。ꈄꏍꋍꏅꄐꏑꎆꈪꑠꃣꈌꍤꀞ，ꈄꏍꉻꈲꃅꐨꋊꍬ，ꊋꋠꌠꈭꋏꌢꎭꌠꄏꐓ、ꀋꎪꐮꄮꋊꃅꐥꌠꑌꇐꐏꄻꄉ。
ꐧꋦꀋꈐꀋꉈꌠꀧꌋꃅ。ꋍꊐꍤꀞꌠꉹꁌꃆꑘꃣꈌ939.3ꃪꐘꍤꀞꂫꇽ，ꄚꈐꏭꉙꂘ、ꃅꅍꃅ、ꆅꉁꆄꄻ、ꀀꑳ、ꌬꈧ、ꐧꋦꏦꀧꑠꉹꁌꐥꐨꁁꏯꃆꂮꐥꌠꃣꈌ144ꃪꐘꐊ。ꏦꇨꃅꊾꄣꉮꄻꑽꃤꐆꌠꅓꀞ，ꊾꄣꁳꅇꎹꌒꎻ，ꃶꐚꃅꊾꄣꏦꊒꌠꌅꈌꈲꁧꏦꀧ。ꏣꀋꑌꃅ“ꃄꎆꐏꁇ”ꃅꐨꃅꈽ，ꊋꀥꇱꄉꂿꑘꇮꃅꊿꃄꎆꄯꎝꃣꈌꍤꇽꃄꌬꌤꃅ，ꃄꎆꁵꀋꅲꑽꃤꐆꌠꏭꅓꀞꌠꊋꃤꁦꎆꇱ，ꂿꑘꇮꃅꊿꇇꀨꄉꃄꎆꁯꌠ106.6ꂡꂷꎹꈹꌌꇁ。ꏦꌬꈭꋏꇇꀨꎆ11.2ꂡꂷꃑꄻ，ꅇꎹꃆꂮꐥꌠꊋꋠꌠꉹꁌꇇꀨꄉꊋꋠꃅꐙꐨꇬꄉꑇꅐꇁꎻ。ꊿꐧꀯꌋꆀꐯꇯꄉꌋꅪꐥꊯꃅꃅꅍꃅꌠꊥꎆꌠꋊꍬꐨꐥꌠꁱꐘꄜꃑ，ꀋꈐꀋꉈꃅꃅꅍꃅꌠꄹꏦꋦꈭꄺꑣ。ꋭꋽꃅꌋꅪꇮꃅꊿꃴꑌꌠꇲꃅꇔ、ꌶꅐꌶꌺꃅꑘꎹꌠꃄꁕꉚꄸꌠꊝꌠꑠꃣꈌꍤꀞ，ꇓꈓꇓꉈꀀꊿꇭꀧꉮꄻꀵꊒꎕꏦꐯꌟꌠꃅꉚꌠꄹꎆ，ꏦꃤꇬꈴꄉꌅꈌꈲꁧꀋꈐꀋꉈ、ꊜꋽꄮꀋꈐꀋꉈ、ꏦꋪꀋꈐꀋꉈꌠꏦꀧ。
ꐮꄮꑱꈐꋈꄻꌠꊥꎆ。ꃹꅼꃅꑱꈐꌤꃆꍤꇽꌠꄺꀱ，ꇩꏤꑭꊂꃛꆃꌋꆀꐯꇯꄉꌋꅪꀊꉘꌅꈌꈲꁧꀧꌋꃅꉺꏦꄻꐛꒆ，ꀊꅰꃅꑱꈐꊿꑌꇐ、ꋬꂻ、ꉂꏣꀧꌋꃅꌠꉜꁨ。ꃝꐨꑱꈐꃣꈌ185ꃪꐘꍤꀞꂫꇽ，ꑱꈐꊋꃷꇱꌠꏭꁏꌠꊋꃤꁦꎆꇱ，ꐳꃅꊿꇭꀧꋬꂻꀧꌋꃅꅇꁵ2004ꁬꁱꃑ。ꉼꇂꑝꑣ、ꃛꀙꑪꇤ、ꇨꑭꒄꆀꑠꃅꄷꃔꑼꆏꊋꀥꇱꄉꃝꐨꑱꈐꏟꃆꏈꑘꉉꀞ，ꄾꌦꋩꃅꉂꐪꀜꀋꐡꑴꌦꌠꃌꒆꁳꀱꉈꑴꐮꉾꇁꎻ，ꀉꑳꁳꐛꒆꌠꑱꈐꊷꆣꀕꌠꊌꎻ；ꉂꐪꃶꐚꃅꀜꐡꀐꌠꃌꒆꁳꃝꇔꇧꎭꎻꄉ，ꑱꈐꉌꐒꇁꎭꌠꋒꇧꎭ。ꏦꇨꃅꃀꌠꇧꊋ、ꉮꄻ、ꀋꅲꀋꇭꑽꃤꐆꌠꅓꀞ，ꀨꎹꉘꉚꃣꈌ2.6ꃪꐘꍤꀞꂫꇽ，ꃀꌠꏦꊒꌠꌅꈌꈲꁧꀧꌋꃅ；ꑱꈐꌤꆿꃔꄝꊝꇮꃅꑱꈐꌤꃆꆼꈘ，ꋭꋽꃅꀨꎹ、ꉘꉚꏟꃆꏈꑘꋊꑣꇧꎭꄉ，ꍏꉸꊿꋅꃀꌠꁌꒉꃀꌠꀨꎹꌠꑌꇐꉾꃪꌠꁳꋍꋏꇈꋍꋏꃅꍸꐯꁳꎻ，ꑱꈐꋊꃅꐥꌠꃅꇏꐥꍂꃅꊛꄉꎻꌠꉜꁨ。
ꊿꒆꆹꀋꑟꌦꌠꁣꀋꐥꃅꉀꒆꌠꀧꌋꃅ。ꀊꉘꏦꌬꄹꏦꄻꐛꒆ，ꃰꇌꈭꃅꑌꄉꍤꇽꌠꃅꇬꎷ。ꇨꍏꐧꊐꌠꃔꑼꍰꉰꑴꏦꇜꆏꀉꂿꀋꏯꀊꉘꃅꑽꌠꏭꉈꇬꑓꇬꋀꊇꇇꀨꄉꈝꃀꎃꊒꌠꇬꍬꆹꎻ。ꊥꇬꄉꀊꉘꃔꄝꆫꌷꌠꇬꈴꄉ，ꀊꉘꌠꏀꁳꏦꌬꌠꃄꎖꉚ，ꏦꃤꌧꇐꌶꄻꎻ。ꏦꃤꇬꈴꄉꏦꇨꃅꀊꉘꇭꀧꉌꂵꉾꃪꌠꇬꉮꄻꑽꃤꐆꌠꅓꀞ，ꀊꉘꀉꑳꏭꍔꉅꍔꌎꌠꍌꍞꑿ、ꉼꇊꑠꑽꃤꀉꆈꐯꀉꆈꌠꑽꃤꐆꊿꁥꏭꆏ，ꏟꈯꀕꃅꏦꃤꇬꈴꄉꌌꌉꅓꃤꀵꅓꎻ。ꂱꍔꀯꑠꌋꆀꐯꇯꄉꉜꐨꏤꄻꅐꇁ，ꊋꀥꇱꄉꃶꐚꃅꊿꇫꀨꎹꌠꀋꐥꌠꀉꑳꏭꀧꌋꃅ，ꇭꍏꑠꃔꑼꆏꌐꄉꂿꑘꁡꇤꑳꐍꀉꑳꏦꊒꌠꌅꈌꈲꁧꀧꌋꃅꌠꁱꐘꏤꄻ，ꀉꑳꋍꂷꋑꀋꋒꌠꁳꐯꇯꏦꏲꌠꈨꑭꇂꃴꐥꎻ。ꊋꀥꇱꄉꌶꅉꇬꆼꍅꆹꆋꌠꄴꏮꀞꄻ，ꄚꃆꂮꐥꌠꃣꈌ4192ꐘꍤꀞꂫꇽ。ꂘꑘꀯꑠꌋꆀꐯꇯꄉꌶꅉꋬꂻꌤꆿꀞꄻꉺꏦꄻꐛꒆ，ꏦꃤꇬꈴꄉ“ꌶꅉꏇꑐ”ꃆꂮꐥꌠꑽꃤꐆꌠꃅꐨꅓꀞ。ꏣꀋꑌꃅꏦꌬꀧꌋꃅꌠꆏꏲꑘ、ꑱꈐ、ꌶꅉ、ꋥꁕꀧꌋꃅꌠꌋꆀꏓꇙꉺꏦꃅꉚꌠꄹꎆ，ꏦꏲꌠꌊꄉꀊꉘꀉꑳꀧꌋꃅꄉꁣꀋꐥꃅꉀꒆꎻ。
ꇩꐏꈲꁧꌋꆀꂽꑼꂽꑱꈐꊿꏦꊒꌠꌅꈌꈲꁧꀧꌋꃅ。ꐊꑷꃅꂽꇬꃆꂮꐥꌠꁌꈁꌠꆏꌠꌤꃅꌠꇬꁧꃤꃅꌠꃅꌐ，ꇩꏤꑭꊂꃔꑼꂴꅑꌤꃅꅉ5ꂷ、ꂴꅑꊿ15ꑻꆏꊿꐧꀯꌋꆀꍏꑷꏮꊈꍔꍞꌤꃅꀯ、ꊂꇲꏦꀧꀯꐯꇯꄉꌌꀭꄒ。ꏡꁈ15ꏢꎥꃪꏤꄻꅐꇁ，ꌐꁨꊋꃤꊥꇫꄉ，ꀊꃴꈴꈜꃄꌬ，ꋒꃅꂽꇬꃆꂮꐥꌠꁌꈁꌠꆏꌠꊁꋒꌤꆿꃄꄻꌠꎁꃅꏣꀋꑌꃅꏦꌬꁧꃤꃅꌠꇲꁵ。ꏦꇨꃅꂽꌤꌫꉂꌫꈾꀜꐆ、ꂽꉫꎴꃅꊾꊏꊾꋠꑠꑽꃤꐆꌠꅓꀞ，ꄚꃆꂮꐥꌠꃣꈌ484ꐘꍤꀞꂫꇽ。ꂽꌤꃔꑼꆏꎍꐽꃅꂽꌤꏲꑘꍤꇽꃅꉚꌠꄹꌬ，ꏦꃤꇬꈴꄉꂽꏂꂽꇜꂽꑼꏦꊒꌠꌅꈌꈲꁧꀧꌋꃅ。ꃛꇂ、ꍬꏿ、ꌧꍧꑠꃔꑼꆏꂽꌋꆀꃅꄷꃔꑼꐯꇯꃅꌠꉺꏦꄻꐛꒆ，ꎭꄏꆀꑴ、ꉼꇂꑠꑸꑠꃔꑼꆏꇝꂱꀉꆹꃅꄷꋊꃅꐥꌠꃅꇏꉾꃪꎖꋪꉾꃪꌠꍔꆙ，ꉌꂵꑘꊐꃅꈮꈜꃅꏦꃤꇬꈴꄉꋒꃅꂽꇬꃆꂮꐥꌠꌅꈌꀧꌋꃅꌠꌤꃅ，ꂽꌋꆀꍔꃚꂽꌋꆀꏓꂱꐮꋯꑌꌠꊥꎆ。
ꇤꉪꄠꃺꑌꌋꆀꎿꉈꃺꑌ、ꀱꇩꈐꇁꌠꉸꐇꇩꉈꀀꌠꇩꈐꇨꊨꊿꏦꊒꌠꌅꈌꈲꁧꀧꌋꃅ。ꇤꉪꄠꃆꂮꐥꌠꃣꈌ2.7ꃪꐘꍤꀞꂫꇽ，ꏦꌬꐮꇇꀨꇇꄻꃣꈌ9648ꐘꀞꄻ，ꇩꉈꀀꌠꃺꑌꇬꃆꂮꐥꌠꃣꈌ2475ꐘꍤꀞꂫꇽ。ꀑꐱꃅꅔꈐꌋꆀꑣꇤꉹꁌꃼꇇꌤꃆꏦꌬꐮꇇꀨꌠꈁꉬꃅꉱꑷꌠꃅꇫꑟ，ꅔꈐꌋꆀꉪꂱꏦꌬꐮꇇꀨꈄꏍꐽꈉꄻꐛꄉ。ꏦꌬꄠꃪꈲꌠꏁꁈ36ꏢꄻꅐꇁ，ꐽꊯꃅꄠꃪꃺꑌꄠꃪꎆꏂꑘꏦꊒꌠꌅꈌꈲꁧꀧꌋꃅ。ꏣꀋꑌꃅꇤꉪꄠꏦꃤꌶꌺꃅꉚꌠꎁꃅꇎꏦꀹꄻꄉ，ꇤꉪꄠꌠꏀꁍꇩꏦꌬꄹꏦꏭꌧꐚꂿꐚꐨꀒꁨꎆꎻ。
ꐧꋦꊿꇬꄐꇺꌊꄉꉻꉪꐨ、ꏦꋪꉪꐨꁦꎆꃅꀉꇨꇁ。ꀋꃋꋋꄮꐧꋦ，ꊿꈧꌠꌤꃅꐥꐨꄉꉻꈥꈉꇬꐞꀋꉆ，ꋊꍬꌠꋍꏅꈥꈉꃅꐨꆹꐧꋦꄓꊋꍅꁍꀕ、ꐮꄮꊱꁨꌠꅉ꒜ꉬ。ꄉꉻꈥꈉꇬꄉꅐꌠꃣꈌꍤꀞꌠꏭꆏ，ꏓꂱꃔꑼꆏꇩꏤꏦꃤꇗꅉꉂꏣꐯꇯꋓꃅ，ꉬꀋꉬꌠꊨꄅ，ꄸꌠꅓꉾꌠꀮ，ꊋꇤꄉꏦꃤꇿꋌꌋꆀꐧꋦꇿꋌꏓꋍꃱꃅꄉ。“ꀊꉘꋌꋖꂷꊂꌸꇈꊿꇊꄉꂱꑱꅉꁧꀋꄐꃅꀑꆸꀮꌦꌠꃣꈌ”ꍤꀞꇈ，ꇬꇈꊿꅑꃤꀋꀵꃅꍞꇽꄉ，ꑗꅒꃅꀬꌠꊋꊡ。“ꊿꆅꆅꉁꊿꋌꌌꀜꇈꀱꆽꃅꌠꇱꎼꂷꊂꌸꌠꃣꈌ”ꍤꀞꇈ，ꆅꉁꊿꋭꋽꃅꉇꄙꌠꃅꍞꇽꀱꄉ，ꀋꎪꃅ“ꌍꑻ”ꌠꏭꃅꀋꉆꄷꉉ。“ꊈꑠꊿꁥꊥꌋꆏꊿꁥꑃꇧꎭꌠꃣꈌꉘꃀꏡꌠ”ꍤꀞꇈ，ꁥꊤꈒꇓꇬꋭꋽꃅꏲꂠꌠꃅꐨꊋꁈꄏ，ꈄꏍꋥꁕꁳꏦꉈꃄꅉꐛꁧꀋꎽ。“ꊨꏦꋧꁧꃅꌩꁧꅂꄉꑸꂱꑣꇈꊰꇬꄚꌦꌠꃣꈌ”ꍤꀞꇈ，ꋂꊈꉼꋬꂻꏦꀧꋭꑘꇬꆽꀋꁏꌠꏚꍆꄉ，ꏦꍬꊿꁳꌞꊿꆹꑽꌠꎁꃅꑽꃤꀵꄜꀋꎽ。“ꈌꈻꌊꐻꇬꈩꄉꊰꒉꌤꌦꇈꊒꎆꎹꌠꃣꈌ”ꍤꀞꇈ，ꊨꏦꈔꀋꑴꌠꊿꁳꊨꏦꅑꃤꀵꎻ。“ꊾꈐꌠꆶꁧꇈꐂꒉꇬꊐꄉꒉꌤꌦꌠꃣꈌ”ꍤꀞꇈ，ꏦꃤꇬꈴꄉꇫꊂꈹꌠꉹꁌꅑꃤꀋꐥꃅꍞꇽꄉ，ꑗꅒꃅꀬꌠꎖꃨꅑꃅꋓꉪꁨꇨꌠꋭꑘꃅꄻꀋꅐꄷꄛꇰ。ꃣꈌꋍꋬꈭꍤꀞꌠꇬꈴꄉ，ꀊꉗꃅꉹꁌꇬꃸꆽꌠ“ꄏꅀꀋꄏ”“ꇬꅀꀋꇬ”“ꈹꅀꀋꈹ”“ꈭꋏꅀꈭꀋꋏ”“ꃅꅀꀋꃅ”“ꏲꅀꀋꏲ”ꑠꏦꃤꌋꆀꑌꇐꃨꆰꐨꎥꀺ，ꏟꈯꀕꃅ“ꈀꄸꏈꑐꄎꆏꈀꄸꇗꐥ”“ꈀꄸꉌꋦꆏꈀꄸꇗꐥ”“ꈀꄸꂷꊂꌸꆏꈀꄸꇗꐥ”ꑠ“ꌍꑻ”ꃄꄟꄴꏮꇈ，ꏦꌬꌠꁳꊋꃤꐥ、ꉬꀋꉬꌠꌧ、ꊷꆣꃅꐙꎻ；ꉹꁌꁳꊸꐨꐥ、ꍬꏦꍬꅍꐥ、ꏦꀧꅍꐥꎻ，ꄾꌦꋩꃅꏦꏲꍏꇩꉻꊿꉾꃪꌠꄻ。
ꇖ、ꉹꁌꃅꌒꇿꋌꀊꂥꌠꐮꄙꐨꏟꃆꏈꑘꋊꑣꉺꏦꄺꑣ，ꏣꀋꑌꃅꐧꋦꏱꄻꌠꃅꈽ
ꐮꄙꐨꏟꃆꏈꑘꋊꑣꌠꆹꐧꋦꏱꄻꌠꇬꐊꇐꀋꂿꑘꌠꉬ。ꏓꂱꃔꑼꆹꐮꄙꐨꏟꃆꏈꑘꋊꑣ、ꉹꁌꇖꐨꀞꄻꌠꍤꇽꌤꏲꅉꉬ。ꀋꈐꀋꉈꑘꅐꃅꐮꄙꐨꋊꑣ、ꃆꏤꑘꆏꌠꆹ，ꏓꂱꃔꑼꐧꋦꏱꄻꈽꌠꃅꎁꀋꂿꑘꌠꉬ，ꉈꑴꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꇬꐊꇐꀋꂿꑘꌠꑌꉬ。
ꉹꁌꏟꃆꏈꑘꀞꄻꈴꈜꄻꁣꀋꐥꃅꄉ。ꌌꃣꈌꃅꄉꌠꎺꁱꄹꏦꄺꀱꊌꐨꄻꈫꈈꃅꄉ，ꃣꈌꌌꀊꄶꄉꇇꈤꃅꌌꃣꈌꃅꄉ、ꑴꑲꌅꄉꌌꃣꈌꃅꄉ、ꈄꏍꇬꄉꌌꃣꈌꃅꄉꌠꄹꎆ，ꏟꈯꃅꌌꃣꈌꃅꄉꇬꊋꋠꐨꀱꉈꑴꅐꇁꌠꄴꏮ。ꃔꑼꆏꀃꈈꁉꄉ，ꄚꄂꑫꍡꀋꉆ，ꀋꎪꃅꃅꋊꀊꏀꌠꇬ“ꃗꐇꎖꋪ”ꌭꈬꌋꆀꀻꎆ，ꄈꊈꏃꂠꌠꐧꋦꏱꄻꉻꑫꇬꃹꇁꌶ，ꏓꂱꉹꁌꌋꆀꐧꋦꎀꍹꉘꇉꄉꇿꋌꐥꃅꐮꄙꐨꏟꃆꏈꑘꋊꑣꇧꎭ。ꃅꄷꃔꑼꈧꌠꆏꅇꎹꌠꀋꉬꌠꏟꃆꏈꑘꀞꄻꉺꏦꄖꂴꄉ，ꊋꀥꇱꄉꏓꂱꉉꋊ、ꏲꑘꉉꋊ、ꏦꌬꉉꋊꌠꐮꏓꇙ，ꅇꎹꌠꀋꉬꌠꌋꆀꅇꎹꌠꄻꐯꊛ，ꋒꐯꋒꃅꏓꂱꃔꑼꉉꀞꐽꈉꈄꏍꇬꄉꏟꃆꏈꑘꋊꑣꄐꊋꋊꇤꇈ，ꏓꂱꈏꇓꇬꐮꄙꐨꁳꀊꅰꐳꃅꀊꅰꇿꋌꐥꃅꋊꑣꇧꎭꄎꎻ。ꒊꆈ、ꏾꉰ、ꆀꑤ、ꑟꏦꌋꆀꀘꄨꑠꃔꑼꆏꊿꋅꐛꐨꐥꌠꋊꑣꉺꏦꏀꀺ，ꊿꋅꈧꌠꉹꁌꏦꊒꌠꌅꈌꈲꁧꀧꌋꃅ，ꊿꋅꋯꑌꌠꊥꎆ。ꍔꏦꃔꑼꆏꁌꄬ、ꉢꏣꃄꄟꏓꈹꄹꌬ，ꏣꀋꑌꃅꐧꋦꏱꄻꐛꉻꀉꒉꌠꇬꃅꈽ，ꃶꐚꃅꐮꄙꐨꌌꅿꁮꇙꇁꐛꄟꇬꄉꂥꀘꇧꎭ、ꅉꂫꊐꌠꇬꄉꂥꀘꇧꎭ。
ꋍꈚꇬꄉꀉꑌꑵꃅꏟꃆꏈꑘꋊꑣꇧꎭꌠꌋꆀꅇꎹꁧꃤꃅꌠꉺꏦꄻꄉ。ꃣꈌꌼꇪꈝꐮꌠꁸꈴ、ꑾꌙꀉꇖꁷꐞ、ꐳꀋꐳꈛꐞꌠꄹꎆ，ꅇꎹꁧꃤꃅꈯꄜꇬꄉꉉꋊꈺꑣ、ꐳꃅꏤꇽ、ꐳꃅꍤꀞꌠꋍꈚꄉꏟꃆꏈꑘꋊꑣꇧꎭꌠꉺꏦꄻꄉ，ꀋꈐꀋꉈꑗꉬꌠꃅꇫꑟꌠꎁꃅꐳꐨꐕ。ꇩꏤꑭꊂꃔꑼꅇꎹꁧꃤꃅꈯꄜꆏꃣꈌ849.7ꃪꐘꋊꑣꇧꎭ，ꄚꈐꏭꌌꐳꃅꏤꇽꐳꃅꀞꄻꌠꃣꈌꐽꏡꍤꀞꈭꏮꆏꊼꇅꋍꊐꍤꀞꌠꉹꁌꃼꇇꌤꃆꃣꈌꏭꀋꋌꃅꃅꑍ49.2%ꀁꋌꃛꎴ。ꅇꎹꁧꃤꃅꈴꈜꄻꁣꀋꐥꃅꄉꇈ，ꈍꃅꑌꉹꁌꁳꅇꎹꅉꀋꊌꀋꎽ，ꈍꃅꑌꉹꁌꑗꇖꈨꂟꌠꏭꀋꅲꀋꇭꀋꉆ。ꅇꎹꁧꃤꃅꈯꄜꇬꄉꋍꈚꄉꀞꈴꌐ、ꋍꈄꇬꄉꀞꈴꌐ、ꋍꉹꇬꄉꀞꈴꌐꌠꅇꎹꁧꃤꃅꌠꇲꁵ，ꏦꑭ、ꃛꇂꑠꃅꄷꃔꑼꆏꑣꋂꋥꁕꇬꄉꑴꑲꎁꃅꅇꎹꁧꃤꃅꉁꈾꄻꄉꇈ，ꉹꁌꅇꎹꈽꌠꁳꀊꅰꃅꃅꌒꎻ。
ꃄꁕꐂꄉꌌꃣꈌꃅꄉꌠꅇꎹꁧꃤꃅꌠꄹꌬ。ꇩꏤꑭꊂꈍꈐꇬꄉꐊꑷꃅꃄꁕꐂꄉꌌꃣꈌꃅꄉꌠꅇꎹꁧꃤꃅꌠꄹꁊ，ꌢꆈꆏꈛꑌꅉꃔꑼꌋꄉꌌꃣꈌꃅꄉꌠꇖꐨꄛꏮꉆ，ꀱꒊꀱꇁꃅꎻꈴꀥꐺꌠꊨꀁꑌꇁ。ꏢꏠꏹ、ꍤꏦꌕꎏꃅꄷ、ꍗꏦꌕꎏꃅꄷꆏꂴꅑꄉꃄꁕꐂꄉꌌꃣꈌꃅꄉꌠꃄꁕꈐꄻꐮꈴꌠꃅꇫꑟ，ꇩꏤꑭꊂꐧꊐꌠ、ꅉꂫꊐꌠꃔꑼꌋꆀꎿꌤꃔꑼꆏꏱꁕꐂꄉꌌꃣꈌꃅꄉꌠꁧꃤꃅꌠꉱꑷꈴꌠꃅꇫꑟ，“ꀃꈈꁭꄉꅇꎹ”ꌠꈁꏦꀊꏀꌠꆏꇿꋌꐥꃅꉹꁌꀉꁁꃅꄷꄉꅇꎹꀋꌒꌠꌤꃆꂥꀘ。
ꇓꈓꇓꉈꅉꂫꊐꌠꇬꉆꄉꏟꃆꏈꑘꋊꑣꇧꎭ。ꋒꐯꋒꃅꇩꏤꑭꊂꏓꂱꃔꄝ10759ꂷꌠꂿꄐꋊꇤ，ꏣꀋꑌꃅꑤꏱꁕꅉꂫꊐꌠꏱꄻꈽ，ꐯꇯꄉꃣꈌ473.1ꃪꐘꉉꀞ、ꍤꀞꂫꇽ。ꑸꉢ、ꑪꃴ、ꆂꄉꑠꃅꄷꏓꂱꃔꄝꆏꏟꈯꃅꉹꁌꇁꌤꉉ、ꉹꁌꌤꃆꈛꎂꃅꉉ、ꏦꇜꇁꏦꉉꌠꃅꇬꎷ，ꐳꃅꐮꄙꐨꏟꃆꏈꑘꋊꑣꇧꎭ，ꑣꋂꄖꄑꌄꆣꇁꌠꇬꁧꃤꃅ。“ꃅꇱꄓꃔꄝ”“ꀥꄖꏦꇜ”ꒉꈫꃪꅂ，ꃹꅼꃅꃄꅉꇬ、ꉹꁌꀁꇬꃹꒉ，ꊋꇤꄉꇿꇬꏦꌬꈉꐨꐥꑲꆏ，ꏓꂱꃔꄝꏦꌬꁧꃤꃅꌠꆏꊂꈹꅷꇿꇬꑟꌠꃅꇫꑟ。
ꉬ、“ꀑꐱꃅꃄꌬꊋꋠꌠꂥꀘ”ꌠꊌꐨꄻꈫꈈꃅꄉ，ꃄꌬꌤꃅꌠꑞꅉꀊꂥꃅꏮꈴꌠꄝꀋꊰꃅꄉ
ꏤꄮꀋꎪꃅ“ꀑꐱꃅꃄꌬꊋꋠꌠꂥꀘ”ꌠꑞꅉꁻꌐꃅꇫꑟꈭꐨ，ꏓꂱꃔꑼꌦꇁꊵꑵꀵꄉꇬꄝꀋꎼ，ꀋꆏꃅ“ꀑꐱꃅꃄꌬꊋꋠꌠꂥꀘ”ꌠꊌꐨꄻꈫꈈꃅꄉ，ꃶꐚꃅꃄꌬꊋꋠꌠꂥꀘꌠꑞꅉꁻꌐꇬꉜꄉꁨꆹ。2019ꈎ，ꇩꏤꑭꊂꃔꑼꐯꇯꃄꌬꃣꈌ1041.4ꃪꐘꊪꀞ，954.7ꃪꐘꃄꌬꂫꇽ，ꃄꌬꇫꑟꌠꎆꃀꃷꁨ1.7ꃪꂡꂷꐥ，ꋋꊭꌡꍆꂱꑱꅉꄉꇬ17.4%、22.4%ꌋꆀ10.8%ꉀꎆ，ꋍꑞꋍꐘꃄꌬꌐꁧꎍꐽꅉꇬꄉꁨꆹ，ꍏꇩꐛꐨꃄꌬꄹꏦ、ꉺꏦꌋꆀꈁꏦꀊꅰꃅꄻꐛꒆ。
ꃹꅼꃅꏓꇱꏱꄻ、ꇁꀦꇬꄉꏱꄻ。ꎔꎗꃅꍏꑷꐊꑷꃅꏦꈴꇩꏲꊈꑼꉼ2019ꈎ“ꁱꐘ1ꉹꌠ”ꃄꌬꈴ，ꌤꏲꅉꐂꄉꋍꋬꈭꃅꍞꏲꌠꌋꆀꉻꏑꅓꈪꊐꌠꉺꏦꄻꐛꒆꌠꄹꇙ，ꏓꇱꄉꃄꌬꊋꋠꌠꐛꐪꍔꀺꄻꈫꈈ。ꉼꀙ、ꏦꑭ、ꉼꇂ、ꎮꑭꑠꃅꄷꆏꐊꑷꃅꏦꃤꇬꈴꄉꌜꏱꄻꊈꑼꉼꆏꃄꌬꇫꑟꌠꉜꐨꏤꄻ，ꃛꇂꌜꏓꂱꁧꎁꃀꀉꒉꅉꀕꌤꏲꊈꑼꉼꆏꌐꄉꁱꐘꁰꄻꅐꇁꄉ，ꃔꑼꊋꁈꄏꄉꃶꐚꃅꃄꌬꊋꋠꌠꂥꀘ。ꎔꎗꃅꁧꎁꍤꇖꉜꐨꃄꌬꇫꑟ，ꃄꌬꌤꃅꌠꉬꈎꀻꎆꐱꀨꏤꄻꃄꌬ，ꎴꈲꉺꏦꄻꐛꒆ，ꈢꇓꀖꊂꎕꏦꀁꋌꀋꊰ、ꊋꃤꀋꊨꌠꄉꀧ。ꑗꅒꊿꃄꌬꈽꌠꉜꐨꏤꄻ，ꋒꐯꋒꃅꌐꑘꊋꃤꂿꄐꋊꇤꅐꇁ。ꇩꏤꑭꊂꏓꄊꎮꊈꉼꄐꄻꌠꇬꈴꄉ，ꉹꁌꌤꃆꄀꇗꇱꃄꌬꏦꃤꏦꄻꌤꃅꌠꇬꐊꄉ，ꍏꇩꐛꐨꃄꌬꏦꃤꄹꏦꄻꐛꒆꌠꄹꇙ。
ꂄꃅꃄꌬ、ꌧꑳꃅꃄꌬꌠꄻꀉꇨꃅꄉ。ꀋꎪꃅꏦꃤꇬꈴꄉꏦꇨꃅꀋꈐꀋꉈꃅꏦꌬꇬꎷ，ꏟꈯꀕꃅꃄꌬꌠꐵꐺꄘꑣꌠꃅꐨꅥꍅ，ꅇꎹꊋꐛꌠꌢꆈꏦꊒꌠꌅꈌꈲꁧꏦꀧ。ꀉꇨꃅꂄꃅꌧꑳꃄꌬꌠꉜꐨꏤꄻ，ꍤꈢ、ꁌꏤꄺꀱꑠꏁꁈꄻꃪ，ꄾꌦꋩꃅꎆꏂꑘꎃꐚꃅꒃꅐꀰꏢꌠꏭꁧꏖꌠꀁꋌꊨ。ꎆꏣꊛꏣꋋꇅꇬꆼꈘꇈꄚꄡꇗꀻꎆꊋꂫꑌ、ꈭꋏꉃꄻꎼꇁꄎꌠꎆꏂꑘꏭꆏ，ꄐꇺꄉꄮꇱꊭꁸꄉꃄꄻ、ꐆꐯꇯꏓꄻꀱꑠꃄꄟꇬꈴꄉꃄꌬ。ꏤꁨꅓꈪꊐꊐꁸꄉꏲꂠꌠꌋꆀꏤꀋꁨꄻꐛꅉꐛꑠꉺꏦꄻꄉ，ꏤꀋꁨꅓꈪꊐꈭꎁꇎꏦꄻꏦꇨꃅꄉ，ꊒꌸꃅꏤꀋꁨꅓꈪꊐꌠꃄꄻ。ꏦꃤꇬꈴꄉꇇꈤꃅꏤꀋꁨꌠꊾꂓ208.3ꃪꑹꃢꌩꎳꀜꋊꇧꎭ，ꋋꊭꌡꍆ19.3%ꉀꎆ。ꃄꌬꌤꃅꉪꉻꆹꏮ，ꋌꃀꅓꈪꊐꌠꌌꀨꇬꄉꌠꇬꄉꄺꀱꌊꌌꅓꈪꊐꌠꌋꆀꊋꊡꌠꐯꇯꉜꁨꌠꃅꄉ，ꍔꏦꆀꀧ、ꃛꏧꆀꄓꑠꃔꑼꆏꑴꇙꃅꁨꉜꊋꊡꉺꏦꍬꌬꌠꄹꌬ，ꑴꇙꃅꍬꌬꐨꀉꒉꃅꉀꐕꌠꊥꎆ，ꏤꁨꌠꀮꄑꌠꐧꋦꃅꇏꄺꑣꄉꀐ。
ꊋꀉꒉꃅꅐꄉꉹꁌꇫꊂꉉꈌꀉꑌꌠꌤꃆꂥꀘ。ꉹꁌꐥꐨ、ꎆꒉꎆꇁ、ꉹꁌꀰꏢꌠꎆꏂꑘꎝꎆꄯꎝꑠꃆꂮꐥꌠꃣꈌꇬꉜꄉ，ꏓꋧꄉꌐꐘꃄꌬꃅꈧꌠꃅ。ꏓꋧꃄꌬꊬꌠꇬ，ꇩꏤꑭꊂꃔꑼꆏꉹꁌꐥꐨꇬꃆꂮꐥꌠꃣꈌ21ꃪꐘꃄꌬꂫꇽ，ꃄꌬꑞꅉꑟꌠꎆꃀꃷꁨ98ꂡꂷꐥ，ꏓꂱꉹꁌꁳꊌꐨꐥꃅꐙꐨꀊꅰꃅꀉꑌꇁꎻ。ꎆꒉꎆꇁꃆꂮꐥꌠꃣꈌ47ꃪꐘꃄꌬꂫꇽ，ꃄꌬꑞꅉꑟꌠꎆꃀꃷꁨ2000ꂡꂷꐥ。ꉹꁌꀰꏢꎆꏂ꒧ꎝꎆꄯꎝꌠꃣꈌ5870ꐘꃄꌬꂫꇽ，ꃄꌬꑞꅉꑟꌠꎆꃀꃷꁨ127ꂡꂷꐥ，ꃶꐚꃅꉹꁌꀰꏢꎆꏂ꒧、ꐧꐭꎆꏂ꒧ꏦꊒꌠꌅꈌꈲꁧꀧꌋꃅ。
ꃘ、ꏦꌬꏦꉻꄺꀱꌠꌋꆀꑴꌧꃔꑼꋈꄻꌠꃹꅼꈴ，ꀋꆏꃅꏦꌬꊇꁧ、ꑘꅐꐨꌋꆀꉻꑇꊋꃤꉀꐕ
ꀋꈐꀋꉈꌠꌋꆀꑘꅐꐨꆹꏓꂱꃔꑼꀋꐈꃅꎹꈹꌠꁌꐨꉬ。ꑓꋪꂾꅉꆺꑭꊂꈍꈐꇬꃣꈌꈜꀕꇈꉹꁌꃼꇇꌤꃆꃣꈌꐪꊛꄉꊼꇅꐳꃅꉀꎆꆸꄟꊝꇬ，ꍏꇩꃔꑼꆏꊨꏦꃤꂥꀘꄐꉻꇲꁵꌶ。ꉪꊇꆹꀋꆏꃅꏓꁱꌤꃅꊿꁦꎆꇱꌠꈝꃀꑌꍬꀋꉆ，ꀊꅰꃅꌌꃣꈌꃅꄉꌠꇬꏢꑲ、ꌋꄉꌌꃣꈌꃅꄉ、ꉹꁌꅇꎹꇖꂟꌠꃅꀋꅲꌠꈝꃀꇬꑌꍬꀋꉆ，ꀋꎪꃅꃹꅼꃅꏦꌬꄺꀱ、ꑴꌧꃔꑼꋈꄻꌠꉘꇉꄉ，ꐳꃅꍤꇽꉻꑫꌋꆀꍤꇽꄐꊋꐛꏀꈴꌠꄹꎆꌶ。
ꃹꅼꃅꏦꌬꏦꉻꏓꇱꇱꄻꄺꀱ。ꍔꃔꈍꈐꇬꐊꑷꃅꃹꅼꃅꄺꀱꌠꃄꄻꌠꉜꐨꃄꌬꇫꑟ，ꏓꂱꃔꑼꉬꈎꋍꃢꃅꄉꌠꉬꃢꀕꌠꄺꀱꐱꀨꄜꃑ，ꋍꑞꋍꐘꄺꀱꉻꑫꏓꐛ、ꋯꐊꑘꅐꌠꊥꎆ。ꀊꏀꃅꄺꀱꄉꌠꏓꂱꃔꑼꎀꍹꏦꃤꌋꆀꏦꇜꏦꃤꃄꌬꇫꑟ，ꇱꄻꉺꏦꄻꐛꒆ，ꍏꇩꐛꐨꐧꋦꉪꏦꏦꌬꄹꏦꂱꎆꅑꐨꆹꏮꌊꏱꄻꂿꄐꃅ。ꏓꂱꍤꇽꈽꊿꏦꃤꃄꌬꇫꑟ，ꍤꇽꈽꈍꈐꍔꒉ，ꇩꏤꑭꊂꍤꇽꈽꊿꃣꈌ340.7ꃪꐘꍤꀞꈽ。ꇩꏤꑭꊂꏓꄊꎮꊈꉼꌅꈌꄻꁵꄉꌠꇬꈴꄉ，ꌜ15ꂷꇓꈓ20ꂷꇬꄉꉹꁌꃆꑘꅇꎹꈭꎁꌼꇪꌠꈝꐮꌠꁸꈴꄺꀱꃅꉚꌠꃅ，ꄹꏦꏀꀺꌠꇬꈴꄉꏦꌬꑘꅐꐨꄖꄑ，ꉹꁌꀉꑌꑵꃅꐙꌠ、ꑘꅐꌠ、ꃅꌒꌠꏟꃆꏈꑘꀞꄻꈉꐨꇬꇎꈴ。
ꐊꑷꃅꏦꌬꃅꎁꄹꏦꃄꌬꇫꑟ。ꊱꁨꃅꌅꈌꄝꃑ、ꈆꑪꃅꌅꈌꇱꄻ、ꋊꍬꄉꌅꈌꌫꄻ、ꏦꇨꃅꌅꈌꑞꅉꐥꌠꍤꇽꌅꊋꏮꈴꉻꑫꄻꐛꒆꃅꄉ，ꍤꇽꌅꊋꌋꆀꃅꎁꃷꁨꋏꄯꒉꏤꄻꄉ，ꑼꄝꍈ、ꍤꇽꎀꍹ、ꏦꇜꃤꌅꈌꑞꅉꌋꆀꃅꎁꊨꄅꄉ，ꑼꄝꍈꍤꇽꍞꊟꏲꂠꃅꎁꍅꂂꃅꄉ，ꌅꈌꐥꑲꆏꀋꎪꃅꃅꎁꑌꐥꌶ、ꌅꈌꌬꑲꆏꀋꎪꃅꅑꃤꑌꀵꄜꌶ、ꃅꅍꀋꃅꑲꆏꀋꎪꃅꌌꅑꎹꌶ、ꃄꈌꄐꃅꌅꈌꌬꑲꆏꀋꎪꃅꌌꑽꃤꎹꌶꌠꃅꇫꑟ。ꋒꐯꋒꃅꏦꌬꉉꀽ、ꄐꇺꃅꐙꌠꃣꈌꑘꐘꂿꄐꋊꇤ，ꃣꈌꐯꌟꉹꌠꌋꆀꃣꈌꐮꃆꂮꐥꌠꆏꄀꇗꇱꄉꌌꍤꎷꌠꉺꏦꄹꌬ，ꍤꇽꊈꑼꉼꌤꃅꉺꏦꄻꐛꒆ，ꍜꇽꎕꏦꏓꋍꃱꃅꄉꌠꊥꎆ。ꃹꅼꃅꏦꇜꃷꁨꄹꏦꄺꀱ，ꊋꀥꇱꄉꏦꇜꌊꄻꌠꌤꃅ，ꏦꇜꊿꃷꁨꌜꊐꌠꋍꃱꃅꄐꏤ、ꇘꄟꋊꐽꌠꌋꆀꐮꈴꎞꅐꌠꉺꏦꄻꐛꒆ，ꃹꌠꐥꆏꅐꌠꐥ、ꉾꌠꊋꄸꌠꊰꌠꃅꇫꑟ。ꎭꑭ、ꇊꃀꇴ、ꍬꏿꑠꃅꄷꆏꄉꅍꃅꋭꌠꃅꌠꏦꀧꏱꁈꑭꋧꃅꃄꌬꇫꑟ，ꏦꇜꊋꊡꄉꀋꈐꀋꉈꃅꃣꈌꀞ、ꎃꊒꃅꏦꌬꎻ。
ꐯꏑꈄꏍꏦꌬꈁꏦꀊꏀꌠꎹꎥ。ꀙꏢ、ꉴꍏ、ꇨꍏꐯꏑꈄꏍꃔꑼ“ꏃꂠ”ꂿꄐꋊꇤ，“ꈄꏍꇬꃣꈌꈄꏍꇬꄉꍤꀞ”ꌠꄹꌬ，ꈄꏍꇬꄉꅇꎹꌠꏦꋪꄻꐛꒆꇈ，ꉹꁌꁳꈄꏍꇬꄉꅇꎹꃅꌒꌠꊌꐥꎻ。ꐊꑷꃅ“ꍏꇩꇙꊈꊇꃔꑼ”ꄹꌬ，ꄆꌅꅇꎹꁧꃤꃅꌠꇙꊈꊧꇬꉜꄉꀻꎆꌠꄹꇙ，ꋧꃅꊈꇙꄆꌅꅇꎹꀻꎆꆸꄟꏃꂠꎻ。“ꎂꁊꎊꁠ”ꑠꃆꂮꐥꌠꃣꈌꍤꀞ，ꈄꏍꈥꈉꃅꐨꎕꏦꌅꈌꈲꁧꄹꊨꌋꆀꃅꎁꊨꄅ，“ꂁꄉꈴꃷꁨꌩ”ꑠꐯꏑꈄꏍꏦꐆꃣꈌꍤꀞ，ꈄꏍꈥꈉꏱꄻꏦꏲꈴꌠꊥꎆ。ꃴꍔꄉꋧꃅꇣꄧꐯꏑꈄꏍꏦꏲꉉꎥꌠꀞꄻ，ꃹꅼꃅꐯꏑꈄꏍꏦꌬꇩꏹꇷꃅ，ꈄꏍꈥꈉꊫꂫꏓꐊꄜꏓꄻꌠꄹꇙ。
ꃷꁨꃷꌐꀉꒉꌠ、ꁕꈚꊛꏣꑠꇮꇐꃹꅼꃅꌌꌬꌠꄹꇙ。ꃹꅼꃅꏦꌬꃷꁨꃷꌐꀉꒉꌠꌫꄻ，ꌐꄝꅇꄜ806ꁬꃅꌐ，ꀊꂥꅉꇬꄉꎊꇐꍞꀁꋌꎭꌠꏱꄻ、ꌋꅪꀊꉘꌅꈌꈲꁧꀧꌋꃅꑠꎁꃅꉜꉚꅍꇲꁵ。ꇩꏤꑭꊂꏓꋍꃱꃅꏦꌬꁕꈚꊛꏣꐽꈉꄻꄉ，ꈄꏍꇬꄉꊫꌐꊭꊎꄟꏀꀺ，ꄆꌅꊫꌐꒃꇬꊋꋠ、ꊫꌐꊭꊎꇬꊋꋠ、ꊫꌐꏚꍆꇬꊋꋠꌠꌤꃆꂥꀘꌠꄹꇙ。ꃄꌬꅉꇬꄉꁕꈚꊛꏣꑴꌧꏤꐪꄯꒉꇮꇐꌫꄻꄉ，ꃄꌬꋊꍬꈴꐨꉀꐕ。ꃔꄝꇬꄉꍤꀞꌠꐭꃚꏡꃏ、ꄯꒉꁱꂷꑴꌧꃅꆹꑽꌠꄺꀱ、“ꃔꑠ”ꑴꌧꃅꄹꎭꑠꌫꄻꌠꄹꌬꄉ，ꏦꇜꃣꈌꀞꄻ、ꉹꁌꅇꎹꌠꎁꃅꑴꌧꇇꀨꌠꇲꁵ。
ꃹꅼꃅꈨꑭꏦꌬ。ꅑꅸꎼꈎ4ꆪꇬꑟꇬ，ꍏꇩꍜꇽꄯꒉꈄꏍꇬꄉꄯꒉ9195ꃪꁬꄛꇰ，ꍏꇩꍤꇽꈴꎁꈴꌗꄇꄜꋊꈄꏍꆏꌢꆈꏭꃣꈌ2900ꃪꐘꌌꄇꄜꋊ，ꈴꌗ15ꂡꐘꌌꄇꄜꋊꇈ，ꀋꈐꀋꉈꑗꉬꌠꁳꍐꄉꉜꄎꎻ。ꍏꇩꃔꄝꇬꄉꍤꀞꄇꄜꋊꈄꏍꆏꈛꎂꃅꃣꈌ696ꃪꐘꌌꁊꄻ，ꇬꉚꌠꃷꁨ237ꂡꑹꃢꐥ，ꈄꏍꇬꄉꃔꄝꍤꀞꌠꅲꈽꌠꆏꉹꁌꏦꁌꒉꏦꌷꏦꍬꏦꌬꌠꐽꈉꀊꏀꌠꐛ。ꀉꑌꈎꌌꃄꄻꈭꐨ，ꁉꃑꇘꄟꂿꉆꉹꁌꃅꌒꌠꈨꑭꏦꌬꉺꏦꀊꅰꃅꐛꒆꐛꄟꎍꒃꃅꐙꇁ，ꐧꋦꉪꏦꏦꏲꌧꑳꐨꋌꎼꀉꑌꇁꌋꆀꀻꎆꀐ。
ꏦꌬꄺꀱꌠꌋꆀꑴꌧꃔꑼꆹꌌꄉꏓꂱꃔꑼꍤꇽꉻꑫꌋꆀꍤꇽꄐꊋꐛꏀꈴꌠ“ꍯꊪꏮꇉꑍꂷ、ꉌꊭꅏꀕꑍꁆ”ꌠꃅꄉꇬ，ꊋꑌꃅꍤꇽꊇꁧꇿꋌꋌꎼꉀꐕꀐ。2019ꈎ，ꇩꏤꑭꊂꃔꑼꏦꇜꊻꂷꐽꏡꃅꇬꃣꈌ228ꐘꀞꄻ，ꋋꊭꌡꍆ13.4%ꉀꎆ；ꋍꑞꋍꉹꃣꈌꋍꊐꍤꀞꈭꐨꌢꆈꍞꇽꌠꉌꃹꄉꅇꎹꆏꐨ89.2%ꇬꑟ，ꑍꊐꍤꀞꈭꐨ98.2%ꇬꑟ；ꅇꎹꃆꂮꐥꌠꄯꒉꅇꎸꈁꉬꃷꁨ、ꅇꎹꃆꂮꐥꌠꀙꏢꄉꅇꅲꇁꌠꋋꊭꌡꍆ13.3%ꌋꆀ40%ꀁꋌꊰ；ꐯꏑꈄꏍꃔꑼꃣꈌꍤꀞꐽꏡꈭꏓꆏ42ꑍ，ꋊꏦꈁꏦꇂꃴ57.1%ꃛꀁꎴ。
ꏃ、ꀋꎪꃅꇝꂱꈴ、ꑌꐚꈴ、ꌐꑘꈴ、ꃅꑘꈴꌠꃅꍜꌭꈬꃅꄉꇬꎷ，ꊋꀉꒉꃅꅐꄉꊋꀥꇱꄉꏓꂱꃔꑼꊿꁥꌠꋈꄻ
ꈍꄮꇬꑌꄈꅿꍔꍞꋈꄻꌠꄻꀨꇬꐕꄉꇬꎷ。ꃹꅼꃅꑮꏣꀻꃅꋊꀊꏀꌠꇬꍏꇩꐛꐨꐧꋦꉪꏦꉪꇐꌶꄻꃄꌬ，ꃶꐚꃅꄻꀂꏾꇬꊐꄉ、ꌌꃅꐨꇬꄐꌐ、ꌌꌤꃅꌠꄹꇙ，ꈬꐯꈬꃅꄈꏦꌬꌤꃅꌠꏭꀋꎪꃅꏃꂠꌠꌭꈬꃅꄉꇬꎷ。ꏟꈯꃅ“ꇬꂾꉪꐨꎺꄉ、ꂿꃆꎺꈬꃅꄉ”ꌠꀨꄜꉙꂘꌠꃄꄻ，ꃹꅼꃅꉪꇐꍔꍞꌌꋌꎳꎻ，ꇥꏢꋍꏅꌠꏃꂠꌊꇬꂾꂿꃆꎺꈬꃅꄉ、ꀋꎪꃅꃅꎁꃄꄻꊪꃅ。ꎔꎗꃅ《ꍏꇩꇭꍣꄈꍔꃔꌤꃅꃷꋪ》ꃄꌬꇫꑟ，ꄈꏃꂠꌠꃄꌬꌊꃔꑼꌤꃅꌠꋍꑞꋍꑵꁁꏯꌋꆀꈁꉬꈴꎁꇬꑟ。ꀋꎪꃅꄈꋈꄻꌠꒃꉇꌠꌌꄉꊿꁥꌠꋈꄻꌠꏃꂠꍤꇽꌠꊥꎆ，ꊋꇤꄉꄈꍏꑷꇫꉈꀋꇬꌠ、ꏓꂱꉹꁌꇫꉌꃹꌠꌶꀠꌤꏲꅉꀹꄻꌶ。ꎔꎗꃅꍏꑷꁳꏮꉜꎻ，ꏟꈯꃅꌤꃆꒃꉇꋊꄻ。ꃹꅼꃅꊝꀙꉸꏭꌶꄻꃅꈧꌠꃅ，ꇩꏤꑭꊂꃔꑼꆏꅿꏿꏮꑠꃅꋊꀊꏀꌠꇬꏓꂱꎁꃅꏦꌬ、ꀋꈐꀋꉈꃅꏦꌬꌠꂴꅑꊥꋦꑠꁥꇫꅐꇁ，ꋍꉻ532ꂷ、ꊿ661ꑼꆏꍏꑷꄚꃆꂮꐥꌠꌤꏲꅉꌌꀮꄑ，ꀙꏢꃔꑼꌚꒄꎴ、ꆃꆀꃔꑼꄤꑸ、ꉿꇊꏦꃔꑼꌜꀧ、ꎮꉰꃔꑼꊝꀙꉸ、ꃛꏧꃔꑼꉸꍞꆀꆏ“ꎔꇁꃨꌠꉈꈽꊿ”ꂒꉻꄻꇬꁳꄉ，ꋀꊇꆏꀋꎪꀋꑴꄷꀋꁧꀑꇬꌊꄉꏓꂱꏦꇜꇬꂾꉪꐨꉉꀽꀐ。
ꀋꆏꃅꊋꀥꇱꄉꏦꌬꄐꊋꋈꄻ。ꇥꏢ61.5ꃪꑹꃢꁰꍋ。ꏦꏲꌧꊿꉘꉚꉺꏦꏀꀺ，ꃹꅼꃅꌶꅉꀊꂥꊐꌠꌋꆀꇷꃅ，ꏣꀋꑌꃅꍏꇩꍔꃔꃶꐚꌤꃆꄇꄤꇬꄉꌐꄉꄜꂘꌠꃅꈽ，ꏦꌬꃄꄻꌠꌋꆀꂘꑘꈆꑪꎥꃪꌠꑖꑟꃅꄻꐯꇯꎼꇁꌠꊥꎆ。ꏦꇜ851ꑼꌋꁆꌌꉇꄅꃆꂮꐥꌠꁱꂘꐮꈴꌠꃅꈽ，ꌐꑘꈴꌠꉇꄅꃆꂮꐥꌠꏦꌬꌧꊿꉘꉚ。ꊋꀥꇱꄉꅉꂫꊐꌠꅉꃀꋈꄻ，ꅉꂫꊐꌠꌤꃅꇎꏦꄻꌊꉾꃪ，ꇝꂱꀉꆹꃅꄷ、ꊿꋅꃅꄷ、ꃅꋯꆹꏮꃅꄷ、ꌢꎭꌢꁧꃅꄷꃔꑼꋈꄻꌠꌋꆀꌧꊿꉘꉚꌠꊋꁈꄏꊋꃤꁦꎆꇱ。ꑍꉙꌧꌠꏦꇜ1345ꑻꉘꉚ，ꇊꃀꇴ、ꑭꊗ、ꏾꉰ、ꑟꏦꑠꃔꑼꆏꏣꀋꑌꃅ“ꑍ꒿ꏦꃤꁱꀕꍑꅐꋉꃆ”ꃅꈽ，ꀊꅰꉾꃪꃅꊿꋅꃅꄷꉹꁌꏦꌬꈉꐨꇬꇎꈴ。
ꌦꀳꏿꄉꃅꇏꋊꍬꍬꏦꋊꄻ。ꏦꇨꃅꍏꑷꏤꐪꉆꐘꌠꌋꆀꋍꃄꌬꑭꋧꉌꊈꃄꌬ，ꃶꐚꃅꅉꂫꊐꌠꇬꃸꆽꌠꇶꏦꉪꏦ、ꇛꌺꉪꏦꌤꃆꂥꀘ。ꄻꅇꀨꉙꂘꌠꇬꇱꄉꃹꅼꃅꑓꅐꌠꌤꃆꏓꋧꄉꏱꄻ，ꃶꐚꃅ“ꂷꇭꇂꃴꆈꁉꀕ”ꌠꌤꃆꂥꀘ。ꏦꇨꃅ“ꉆꈉꋍꈚꃅꎁꑍꑵ”ꌠꃅꇫꑟꄉ，ꃅꎁꀋꃅꌠꆏꀋꎪꃅꅑꎹꌠꌌꅉꀕꐛꄟꐛꎻ。ꏟꈯꃅꅅꃅꈂꀸꈐꉜꄉꇬꎷ，ꋍꍈꑋꀋꋰꀋꏆꃅꄉꅱꈯꃅꏦꌬꍹꈔꌠꅓꀞ，ꏟꈯꃅꋍꏅꉮꊿꌩꎳꇧꎭ。ꏓꂱꃔꑼꀊꂥꇊꀊꂥꊐꌠꆏꂱꑱꑼꇬꄹꐆꏦꐆꌠꇥꏢ11ꑻꌌꍤꀞ，ꃔꑼꋍꊐꋑꀋꋒꌠꆏꍤꇽꃄꌬꌅꈌꌌꈲꌬꄉꄹꐆꏦꐆꌠꇥꏢ1374ꑼꌌꍤꀞ，ꄚꈐꏭ115ꑹꌌꅓꑘꑽꃤꎹꄻ。ꏦꐆꄉꃣꈌꅲꐺ、ꄉꅍꃅꐵꑴꌠꇬꀋꈴ、ꅇꎹꇢꈴꊿꄻ、ꂓꂁꄉꏣꑟꐋꀨꎃꃅꑠꏦꌬꐙꎴꌠꇬꁧꏖꌠꌤꃆꑓꅐꌠꇬꉜꄉ，ꃹꅼꃅꊨꏦꍤꄻꊨꏦꄺꀱ，ꐊꑷꃅꉱꋃꃅꋊꄻ。ꃹꅼꃅꏢꀦꂘꀨꉙꂘꌠꃄꄻ，ꄹꐆꏦꐆꃣꈌꌌꀋꉾꀋꃪꁁꏯꂘꅍꌬꇐꃅꄉ，ꃹꅼꃅꑗꉘꏓꈹ，ꋍꏲꌧꆏꊰꏱꈴ，ꐛꀋꒆꅉꋍꑕ，ꉺꏦꄻꐛꒆ，ꃅꇏꐙꎴꊋꌗꎃꊒꌠꏦꌬꋦꈭꄺꑣ。
ꉆ、ꑴꐚꃅꍞꊟꎻ，ꏓꂱꃔꑼꌤꃅꌠꊋꀥꇱꌋꆀꄻꃪ
ꏦꃤꇬꈴꄉꏓꄊꁳꍞꊟꎻ，ꎔꎗꃅꊯꌕꈭꇩꏤꑭꊂꏓꄊꃀꑍꃢꀕꌠꈿꅉꇬꏤꐪꌋꆀꁧꎁꄜꎼꇁꌠꉜꐨꇖꐨꃄꌬꇫꑟ，ꋍꐘꋍꐘꃅꌌꄉꑭꋧꃅꁸꃅ，ꊋꀥꇱꄉꊂꈹꄉꍞꀞ。ꎔꎗꃅꇩꏤꑭꊂꏓꄊꎮꊈꉼꃄꌬꊋꋠꌠꂥꀘꃆꂮꌐꐘꅇꄜꍤꇖꉜꐨꃄꌬꇫꑟ，ꄷꀋꁧꌐꄉꃄꌬꇫꑟꃆꂮꅇꄜ。ꇩꏤꑭꊂꏓꄊꎮꊈꉼꏭꌐꄉꅓꑘꍤꇽꌤꃅꃆꂮꅇꄜ，ꍤꇖꉜꐨꇬꈴꄉ，ꃅꋊꀊꏀꌠꇬꅓꑘꍤꇽꌤꃅꌠꀻꎆꌠꄹꎆ。ꎔꎗꃅꁧꎁꇖꐨ355ꐘꀞꄻ，ꑍꃀꑍꇖꐨ395ꐘꀞꄻ，ꈁꉬꈴꎁꑖꑟꃅꐮꈴ，ꋒꐯꋒꃅꁧꎁꉜꐨꌌꌬ。ꇩꏤꑭꊂꏓꄊꁧꎁꁨꌊꃔꑼꍤꆫ、ꃀꈿꈽ、ꃔꄝꇬꄉꍤꀞꌠꅲꈽꑠꃅꈧꌠꊿ1492ꑻꃢꐥ，ꌐꄉꁧꎁꁨꌊꐯꇯꄉꍤꏦꒊ꒜、ꉸꉼꒊ꒜ꈳꁕꒆꉻꋦꈭꏦꌬꀧꌋꃅꍤꎥꌠꃅ。ꎔꎗꃅꋯꁦꍞꊟꎻ，ꍔꑠꄜꑘ173ꐘꀞꄻ，ꇩꏤꑭꊂꍔꑠꊈꑼ180ꑹꃢꅲꇫꋨꏦ；ꊋꀥꇱꄉꋯꁦꄈꀾ、ꇬꎭꆃꌋꆀꄈꀾꀋꐊꊿꂒꋦꌠꌋꆀꐮꈴ，ꀊꐯꈭꃅꉜꐨꅱꄻ。ꃹꅼꃅꍞꊟꍤꄻꏦꃤꌬꈴ，ꑴꐚꃅꍞꊟꍤꄻꌤꏲꅉꁳꃔꑼꌤꃅꊿꏭꍞꊟꎻ。ꏦꃤꇬꈴꄉꏦꍤꌤꏲꅉꁳꅇꎹꍞꊟꎻ，ꎃꊒꃅꄙꅇꎹꃣꈌꍤꀞ，ꎔꎗꃅꏦꍤꇖꐨꀞꄻ。ꀊꐯꈭꃅꐧꋦꁳꍞꊟꎻ，ꏣꀋꑌꃅꉈꃅꏤꄉꌠꍞꊟꊿ、ꉈꃅꁨꌊꅱꇖꊿ、ꌐꑘꌧ꒜ꌷꊿꍤꄻꎥꃪꑋꇖ、ꍤꇽꊈꑼꉼꃀꈿꈽꑠꃅꈧꌠꃄꄻ。ꊋꀥꇱꄉꈨꏀꇢꈴꄜꌋꆀꐮꇙ，ꃹꅼꃅꈁꉬꇢꈴꄜꈛꎂꃅꁊꃑꃅꈧꌠꃄꄻ，ꑴꇙꃅꈋꍣꍞꊟꎻ。
ꁧꎁꊈ，ꏓꂱꃔꑼꌤꃅꌠꀻꎆꁨꆹꌠꆹ，ꊇꅉꆏꐋꀨꑮꏣꀻꌌꈯꄜꃅꄉꌠꄈꍏꑷꏟꈯꃅꏃꂠꐛꅹꉬ，ꊇꅉꆏꑮꏣꀻꃅꋊꀊꏀꌠꇬꍏꇩꐛꐨꐧꋦꉪꏦꉪꇐꈆꑪꃅꄐꌐꐛꅹꉬ。ꏓꂱꃔꑼꌤꃅꊌꐨꊌꅜꌠꆹ，ꇩꏤꑭꊂꏓꄊꌋꆀꋍꎮꊈꉼꊋꑌꃅꍞꊟ，ꇩꃷꑼꊋꀉꒉꃅꅐꄉꊋꁈꄏ，ꇩꏤꑭꊂꍔꑠꋯꁦꃅꍞꊟ，ꇩꏤꍞꊟꍤꄻꊈꑼꉼ、ꏓꂱꏦꍤꑼꀊꂥꇊꀊꂥꊐꌠꍞꊟ，ꋯꁦꄈꀾꈧꌠ、ꇬꎭꆃ、ꏓꂱꏓꉻ、ꄈꀾꀋꐊꌠꊿꂒꋦꌠꋯꁦꃅꍞꊟ，ꃅꄷꋍꊐꋑꀋꋒꌠꄈꍔꌤꏲꅉ、ꇩꏤꑭꊂꏓꄊꁧꎁ、ꇩꏤꑭꊂꍔꑠꊈꑼ、ꐧꋦꋍꑞꋍꁁꏯꌋꆀꏓꂱꉹꁌꋍꏅꌠꉈꇬꊋꁈꄏꇇꀨꄉꊌꌠꉬ。ꄚꇬꄉ，ꉢꏓꂱꃔꑼꀊꂥꇊꀊꂥꊐꌠꎁꃅꄸꈐꃅꈀꎭꀕ!
ꉪꊇꏸꐚꃅꌧꐚꇬ，ꏓꂱꃔꑼꌤꃅꌠꇬꌤꃆꀉꑌꈨꐥꑴꌦ：ꋍꆏꏦꌬꉪꉻ、ꏦꌬꄐꊋꆹꃅꋊꀊꏀꇖꐨꌋꆀꌌꐯꌟꉜꇬꐮꍣꐨꀉꒉꃅꐥꑴꌦ，ꃨꆰꐨꋓꎭꌠꏭꊜꄻ、ꊇꁧꀊꂥꃅꀻꎆꌠꇬꁧꃤꃅꑠꁁꏯꊋꃤꉈꑴꊋꀥꇱꄻꅐꑴꌦ。ꑍꆏꎆꏣꐧꋦꀻꎆꌠꇬꄉꋌꌌꏦꌬꌠꀂꏽꇁꌠꐛꐪꀊꏀꌤꃆꀊꏀꌠꎥꃪꀋꇎꄉ，ꃣꈌꍞꇽꎕꏦꏓꋍꃱꃅꀋꐛꌠꌤꃆꈨꇫꅐꇁ。ꌕꆏꏦꌬꏦꉻꏓꇱꇱꄻꄺꀱꌠꃅꑞꅉꀋꑟꌠꐛꐨꇫꐥ，ꍤꇽꏲꂠꄹꏦꌋꆀꍤꇽꌅꈌꏮꈴꍞꊟꏢꑲꉺꏦꄻꐛꒆꃅꀋꄉꑴꌦ。ꇖꆏꌧꇐꅏꄻꌅꈌ、ꐯꏑꈄꏍ、ꉇꉻꃆꂮꐥꌠꑠꁁꏯꊇꁧꀊꂥꌠꌐꑘꈴꌠꍤꇽꌧꊿꀋꇎ，ꌧꊿꉘꉚꉺꏦꄺꀱꄻꅐꑴꌦ。ꉬꆏꏦꌬꃅꇏꀋꎃꀋꊒ、ꏦꌬꍹꈔꌠꌤꃆꋍꇅꋋꇅꇬꇫꅐꇁꑴꌦ，ꇥꏢꋍꈨꋋꈨꆏꃣꈌꌊꄉꊨꏦꈲꏂ、ꌅꈌꌌꄉꎆ꒜ꀠꄷꀋꁧꀉꆈꀋꂄꊋꃤ“ꀧꌋꃅꆫꁯ”ꄻ，ꄈꃅꇏꐙꎴꋈꄻꌠꌋꆀꍹꈔꌠꏭꁏꉈꈽꌠꂿꃆꄡꇗꃣꇖꊋꋠꑴꌦ。ꃘꆏꃔꑼꈨꇬꊾꌋꆀꃣꈌꐮꄙꐨꑓꅐ、ꃣꈌꀞꄻꍅꊋꀉꒉ，ꃅꋮꆹꏮꃅꄷꅉꂫꊐꌠꃔꑼꈨꇬꊿꎷꊋ、ꊿꇫꐥꀋꅲꌠꌤꃆꑓꅐꃅꐙ。ꌤꃆꋋꈨꏭꆏ，ꉪꊇꆏꄈꏃꂠꌠꇂꃴꄉꏁꁈꊋꑌꌠꏁꌬꄉ，ꃶꐚꃅꌌꂥꀘꇧꎭꂿ。
ꋌꊂꊬꌠꇬꌤꃅꌠꄐꄻꐨ
ꎼꈎꆹꐊꑷꃅꊼꇅꌣꈚꌠꐧꋦꋉꐛꌠꌋꆀ“ꊯꌕꉬ”ꄐꎖꂫꍅꈒꌠꉬ，ꉈꑴꎭꑆꇔꈢꇓꀖꌠꃛꄉꃄꄻꂫꋓꈒꌠꑌꉬ。ꏀꉹꌀꌡꆅꅋꋍ꒜ꆅꇵꆅꐯꇳꐨꆹꉪꇩꏤꎆꏣꐧꋦꀻꎆꌠꏭꄜꎟꐨꋌ꒜ꑠꐥꀋꋻꌠꋌꎼꇫꅐꇁꄉ，ꇩꈐꇩꉈꃅꒊꃅꇁꏭꋌꃀꑠꐥꀋꋻꌠꁧꏖꐨꀉꒉꀊꂾꌠꋌꎼꇫꅐꇁ，ꉪꇩꏤꀻꎆꌠꇬꊝꇁꌠꊋꋠꐨꑌꋌ꒜ꑠꐥꀋꋻ，ꏦꌬꌤꃅꌠꇬꊝꇁꌠꊋꋠꐨꑌꋌ꒜ꑠꐥꀋꋻ，ꂿꃆꃣꁧꀉꇖꐯꀉꇖ。ꏓꂱꃔꑼꆏꑮꏣꀻꃅꋊꀊꏀꌠꇬꍏꇩꐛꐨꐧꋦꉪꏦꉪꇐꌌꄐꌐꅍꃅꄉꇬꎷ，ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꌠꌋꆀꍏꑷꍔꃔꌤꃅꃀꈿꌠꉌꊈꃅꈴꌬꈴ，ꃹꅼꃅꑮꏣꀻꊝꎻꏹꄐꇺꌠꍏꑷꍔꍞꏳꎮꊈꉼꃀꈿꄉꏓꂱꃔꑼꀊꂥꇊꀊꂥꊐꌠꄈꊤꌤꃅꅇꄜꅱꄻꄮꇬꀋꂿꑘꃅꅇꉉꌠꉌꊈꌶꄻꃄꌬ，ꎔꎗꃅꃀꀉꒉꋌꃢꏤꐪꃄꌬꇫꑟ，ꉌꂵꇬꍏꉸꊿꋅꇰꀋꃀꃅꀱꌄꆣꇁꌠꄐꇐꏤꁈꃅꇴꄉꉻꌋꆀꋧꃅꉐꈎꇫꐥꀋꋻꌠꀉꒉꃅꐛꐈꐨꑌꄉ，ꄈꏦꌬꌤꃅꌠꏭꀋꎪꃅꏃꂠꌠꌭꈬꃅꄉꇬꎷ，ꀋꎪꃅꏓꂱꌌꈯꄜꃅꄉꇬꎷ，ꎍꐽꌠꇬꄉꁨꆹꌠꌤꃅꉻꄜꅉꃀꉉꈌꌭꈬꃅꄉꇬꎷ，ꐔꈔꉆꐨꐈꆦꌊꊜꋽꌠꐛꑲꌧ，ꋒꐯꋒꃅꃅꎁꃄꄻ，ꏦꃤꇬꈴꄉꎆꏣꀻꎆꌠꌋꆀꐧꋦꎍꐽꌠꃅꇴꄉꉻꀉꒉꌠꀧꌋꃅ，ꋍꃱꃅꄐꏤꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌤꃅꌠꄹꎆ，ꃛꌉꏿꂫꋓꎭꇔꈢꇓꀖꌠꑞꅉꁻꌐꂿꃆꃅꌐꌠꄉꀧ，ꐊꑷꃅꊼꇅꌣꈚꌠꐧꋦꋉꐛꌠꎁꃅꊋꑌꌠꏦꌬꁧꃤꃅꌠꌋꆀꏦꀧꌠꇲꁵ。
ꋍꆏꊋꇤꄉꅉꀕꐛꐪꈴꇵꆅꐯꇳꐨꄴꏮꋎꍅꌠꌋꆀꐊꑷꃅꎆꏣꐧꋦꐥꀹꀱꐛꅉꐛꌠꁧꃤꃅꏦꀧ。ꅉꀕꐛꐪꈴꇵꆅꐯꇳꐨꄴꏮꋎꍅꌠꇬꄉꋒꃅꏦꌬꊜꄻ，ꏦꃤꇬꈴꄉꏓꂱꀑꇬꋬꂻꌠꌋꆀꇭꀧꋬꂻꌠꏦꀧ，ꋒꐯꋒꃅꏦꌬꊥꎆꌠꀻꎆ、ꂴꄐꄉꌠꎍꐽ、ꉹꁌꐥꐨꏦꀧꌠꂿꄐꋊꇤ，ꏦꃤꇬꈴꄉꇩꏤꎆꏂ꒧ꈲꊌꏱꁈꇿꋌꐥꃅꃄꌬꇫꑟꌠꏦꀧ，ꊒꌸꃅꁧꃤꃅꋒꃅ“ꃘꑵꎍꐽ”ꌠꌤꃅ、“ꃘꀧ”ꌠꂿꃆꃅꇫꑟ。ꅇꎹꀋꉬꌠꏟꃆꏈꑘꂥꀘꉺꏦꄻꂴꄉꇬꎷ，ꉉꋊ、ꃄꌬꄮꇱꑠꌫꄻꌠꃄꄟꉜꁨ，ꋭꋽꃅꇵꆅꐯꇳꐨꇬꄉꅐꇁꌠꐮꄙꐨꏟꃆꏈꑘꋊꑣꇧꎭ，ꏦꏲꌠꈭꈜꇬꄉꅉꀕꐛꄟꈴꌠꇵꆅꐯꇳꐨꄴꏮꋎꍅꌠꏦꀧ。ꏦꃤꇬꈴꄉꎃꊒꃅꇫꄙꀋꄐꌠꊋꃤꏦꋪꌫꄻ，ꋭꋽꃅꌢꆈꈲꁧꐼꄻ，ꋍꑞꋍꁆꏯꄐꏁꄉꐯꇯꐔꈔꉆꐨꀵꄜ、ꐯꇯꊋꋧꊋꋠꑣ。ꏟꈯꃅꂄꃅꌧꑳꃅꃄꌬꌠꉪꉻꌭꈬꃅꄉꇬꎷ，ꏟꈯꃅꎕꏦꐂꄉꏢꄉ、ꃄꈌꄐꃅꍤꈢꌠꏢꑲ，ꇿꋌꐥꃅ“ꊝꇮꃅꏢ”ꌠꏁꁈꌫꄻ，ꄾꌦꋩꃅꎆꏂꑘꁨꇐꀰꏢꁌꐨꄝꀋꊰꃅꄉꇬꎷ。ꑱꐢꏓꄻꀱ、ꄮꇱꑠꈭꎁꇬꈴꄉꎆꏂꑘꇇꀨꄉꎒꐡꌠꋊꑣꇧꎭ、ꊋꋠꐨꇔꑣꄉꀱꇫꐥꇁꎻ。ꋒꐯꋒꃅꏦꌬꇇꁈꌬꄉ，ꄾꌦꋩꃅꊋꇤꄉꎆꏂꑘꈜꀕꇈꐧꀠꀄꊭꐭꌠꎆꏂꑘꇫꐥꄎꌠꄉꀧ，ꃅꅍꃅꌠꏦꀧꌋꆀꊥꎆ。ꏦꃤꇬꈴꄉꋭꋽꃅꎆꇱꌬꈧ、ꀊꏀꉹꌠꅉꃀꋈꄻꑠꁁꏯꏟꃆꏈꑘꋊꑣꇧꎭ，ꈏꇓꈉꐨꍔꒉꌠꄐꇐꏤꁈꃄꌬꌠꎁꃅꏦꏲꋦꈭꉾꃪꌠꄻꄉ。ꏦꃤꇬꈴꄉꌂꑘꃅꎝꐵꎝꀜꋊꌠꃅꐨꅥꍅ。ꏦꃤꇬꈴꄉꀋꈐꀋꉈꑘꅐꐨꀊꂥꃅꋍꑞꋍꉹꉇꄅꃆꂮꐥꌠꃣꈌꍤꀞ，ꉇꉻꏭꁉꃑꌠꌋꆀꐯꇯ“ꋍꁕꋍꈜ”ꋈꄻꌠꊇꁧꀊꂥꃅꀻꎆꌠꁧꃤꃅ，ꉰꇂꑴꌅꃼꇇꃄꅉꎿꀸꋈꄻꌠꊋꁈꄏ。ꃹꅼꃅꇩꏹꏦꌬꐮꈴꇷꃅ，ꅉꆺꑭꊂꃅꇵꆅꄴꏮꏦꏲꇷꃅꌠꄹꇙ，ꃰꊿꊫꂫꏓꐊꄜꋈꄻꌠꁧꃤꃅ。ꍏꇩꃔꑼꆹꏦꇨꃅꇩꏹꏦꃤꌋꆀꈀꄸꑌꏚꍆꌠꇩꏹꐮꃆꂮꅉꀨꏥꏦꍬꌬ，ꏟꈯꃅꉪꇩꏤꏦꌬꌅꀨꌋꆀꇩꏤꋬꂻꌠꀧꌋꃅ。
ꑍꆏꊋꇤꄉꑞꅉꀊꅰꃅꀊꂥꌠꋬꂻꍏꇩꋈꄻꌠꁧꃤꃅ。ꅱꈯꃅꐮꐚꊋꃤꈏꃹꇁ、ꀜꐆ、ꁏꆷ、ꁷꐞꃅꈧꌠꅥꍅ。ꏦꃤꇬꈴꄉꅉꀕꐛꐪꈴꇵꆅꐯꇳꐨꄴꏮꋎꍅꌠꇬꁧꏖꌠꋍꑞꋍꑵꑽꃤꐆꌠꅓꀞ，ꏟꈯꃅꇩꏤꋬꂻ、ꒆꇐꋬꂻ、ꒆꉻꋬꂻ、ꄉꉻꀑꌋꋬꂻꌠꌋꆀꐧꋦꎍꐽꌠꀧꌋꃅ。ꏦꌬꌅꊋꇬꉆꄉꄉꉻꀑꌋꉻꑫꄻꐛꒆꌠꄹꇙ，ꄉꉻꀑꌋꏦꏲꏦꀧꌠꄻꀉꇨꌋꆀꄻꐛꒆ。ꏦꃤꇬꈴꄉꄉꅍꑽꃤꐆꌠꅓꀞ，ꋍꉻꁧꃤꃅꄉꍹꈔꀋꀬ、ꍹꈔꀋꉆ、ꍹꈔꀋꏾꌠꄹꎆ。ꏦꇨꃅꄉꉻꋬꂻ、ꉹꁌꐥꐨꏦꀧꑠꁁꏯꑽꃤꐆꌠꅓꀞ，ꊋꀥꇱꄉꑽꃤꐆꌤꃆꀊꏀꉹꌠꎥꃪꊜꄻ。ꀉꇨꃅꃰꊿꌅꈌꏦꌬꌠꏦꀧ，ꏦꃤꈴꄉꑗꅒꊿꃅꑘꃅꌠꌅꈌꏦꀧ。ꃹꅼꃅꀉꆈꌠꌩꎳꀋꂄꌠꋊꑣꌐꐘꉈꈽꌠꃄꄻ，ꏦꃤꇬꈴꄉꀋꈐꀋꉈꑘꅐꃅꀉꆈꌠꇬꃆꂮꐥꌠꀋꂄꌠꇬꃆꂮꐥꌠꑽꃤꐆꃣꈌꍤꀞ，ꃣꈌꋍꐘꋑꀋꋒꐯꇯꌌꏦꃤꌋꆀꐩꋊꇬꍤꎖꈴꅐꄎꎻ，ꏓꂱꉹꁌꁳꋬꂻꃅꐙꐨꀊꅰꃅꀉꑌꃅꊌꅜꎻ。
ꌕꆏꊋꇤꄉꎆꏣꊇꁧꀊꂥꃅꀻꎆꌠꁧꃤꃅ。ꃛꌉꏿꂫꋓꎭꇔꈢꇓꀖꌠꌋꆀꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꂿꃆꇬꈬꃅꆼꒆꄉꏦꌬꏱꁈꄻꐛꒆ。ꏦꇨꃅ“ꌕꂿ”ꁁꏯꋍꑞꋍꉹꑽꃤꐆꌠꅓꀞ，ꃹꅼꃅꏦꏲꎭꄏ，ꀉꇨꃅꌬꈧꎭꇔ、ꃅꅍꁵꎭꇔ、ꅐꑘꎭꇔꌠꏦꌬꏦꀧ，ꊋꀥꇱꄉꎆꒉꎆꇁ、ꋦꈭꅐꀦꑠꃣꈌꍤꇽ，ꋒꃅꈢꇓꀖꀉꒉꌕꐘꌠꃄꄻꌠꎁꃅꊋꑌꌠꏦꌬꁧꃤꃅꌠꇲꁵ。ꀙꏢ、ꎮꉰꑠꃅꄷꃔꑼꃄꄟꄹꁊ，ꏣꀋꑌꃅꀊꅰꃅꎍꐽꀋꈐꀋꉈꂿꉆ、ꂴꉘꇉꄉꉆꌠꏦꏲꈴꌠꀰꏢꃼꇇꋦꈭꄺꂡ。ꊋꀥꇱꄉꁨꇐꌅꈌꌋꆀꌧꇐꅏꄻꌅꈌꏦꌬꀧꌋꃅ，ꃼꇇꑘꂁꇐꀧꌋꃅ。ꊋꀥꇱꄉꃷꁨꃷꌐꌅꈌꈲꁧꌋꆀꊨꏦꈴꌗꋬꂻꌠꀧꌋꃅ，ꏦꇨꃅꉻꊿꑴꅉꈴꌗꀖꅔꅐ、ꃻꀱꃷꀱꑠꑽꃤꐆꌠꅓꀞ，ꃷꁨꃷꂷꎆꏣꉾꃪꃅꀻꎆꌠꁧꃤꃅ。ꏦꌬꁧꃤꃅꏱꁈꏁꁈꄻꐛꒆ，ꏢꏠꏹꐮꄮꃅꀻꎆ、ꒀꇤꉪꄊꊅꐎꋈꄻ、ꍤꏦꒊꃀꎆꏣꐛꁕꀻꎆ、ꍤꏦꒊꃀꌕꎏꃄꁕꋍꉻꈴꀻꎆ、ꉸꉼꒊ꒜ꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆ、ꁮꐚꏭꁁꏯꀉꇨꃅꀖꁉ、ꑗꌋꈤꏭꐊꑷꃅꌄꆣꎻ、ꈯꄔꃅꄷꉀꄓꆹ、ꍰꒄꃅꄷꇓꈓꑍꂷꌠꎆꏣꈭꋈꄻꑠꎁꃅꑞꅉꀊꂥꌠꏦꌬꁧꃤꃅꌠꇲꁵ。
ꇖꆏꊋꇤꄉꉹꁌꐥꐨꏦꌬꏦꀧꌠꊋꀥꇱ。ꎔꎗꃅꌌꍤꇖꇈꉌꃹꈴꄉꌠꉹꁌꏦꃤꀋꃀꃄꌬꈴ，ꐊꑷꃅꉹꁌꌤꃆꏦꌬꉉꀽꎵꃪ，ꀊꏀꌠꇱꄻꏦꌬꉉꀽꏤꄻ，ꊋꀥꇱꄉꌶꄻꁰꍋ，ꉹꁌꏦꌬꄐꊋꌋꆀꌧꐨꉀꐕ，ꏦꃤꇬꈴꄉꉹꁌꌤꃆꀨꄜꏦꊒꌠꌅꈌꈲꁧꀧꌋꃅ，ꉹꁌꌤꃆꐮꃆꂮꋊꄻ，ꐧꋦꌋꆀꎆꏣꐥꀹꀧꌋꃅ。ꀋꎪꃅꐧꋦꉪꏦꈯꄜꁌꐨꉜꐨꇖꐨꄻꏦꌬꍤꇽꌠꇬꇱꄉ，“ꈀꄸꏦꌬꆏꈀꄸꏦꁊ”ꌠꇖꐨꃄꌬꇫꑟ，ꃅꇏꃅꀹꎃꊒꌠꍔꆙ。ꃄꌬꌤꃅꌠꆹꈍꄮꇬꑌꈝꂾꇬꐺꇬꎷ，ꃶꐚꃅꃄꌬꊋꋠꌠꂥꀘꌠꎴꈲꉺꏦꄻꐛꒆ，ꀉꇨꃅꀋꈐꀋꉈꐛꏦꈴꌧꑳꃅꃄꌬ。ꏣꀋꑌꃅꇓꈓꐛꁕꐧꋦꏱꄻꌠꃅꈽ，ꏓꂱꃔꄝꂿꄐꋊꇤ，ꏦꏲꑣꋂꋈꄻꌠꁧꃤꃅ。ꏦꃤꇬꈴꄉꇩꐏꈲꁧꀧꌋꃅ，ꂽꑼꂽꑱꈐꊿꎞꆏꂽꑼꏦꊒꌠꌅꈌꈲꁧꀧꌋꃅ。ꀋꎪꃅꏓꂱꇖꐨꌌꌗꋏꅍꇫꇬꑵꌠꃅꄉꇬꎷ，ꀋꆏꃅꉹꁌꇫꉜꁨꌠꊋꋠꅉꋍꇈꅉꆄꅉꌤꃆꂥꀘ。ꊋꀥꇱꄉꌋꅪꀊꉘ、ꃀꌠ、ꊾꄣꑠꏦꌬꀧꌋꃅ。ꏟꈯꃅꏦꃤꇬꈴꄉꃅꑘꎹꌠꇬꃄꁕ、ꅩꃰꑠꉜꄸꌠꄺꀱ，ꏟꈯꃅꏦꃤꇬꈴꄉꏦꃤꏤꄻꄉꌠꇬꀋꊒꃅꏀꉹꌀꌡꆅꅋꋍ꒜ꆅꊌꌠꑘꃅꉼꏤꐮꃆꂮꀜꋊꇧꎭꌠꃅꐨꄺꀱ，ꏦꃤꇬꈴꄉꂿꑘꇮꃅꊿꃄꎆꄯꎝꌠꌤꃆꏱꄻ，ꑘꃅꊿꀋꈐꀋꉈꃅꃅꑘꊌꌠꌅꈌꈲꁧꀧꌋꃅ。
ꉬꆏꊋꇤꄉꍤꇽꉻꑫꌋꆀꍤꇽꄐꊋꐛꏀꈴꌠꄹꎆ。ꎔꎗꃅꏓꂱꃔꑼꄈꅿꊯꈬꈭꇖꃢꐊꈴꃀꈿꉌꊈꃄꌬꇫꑟꌠꉜꐨꃄꌬ，ꏦꌬꏱꄻꉻꑫꌋꆀꏱꄻꄐꊋꐛꏀꈴꌠꊥꎆꂿꄐꉀꐕ。ꊋꀥꇱꄉꄺꀱ“ꀱꉇꉜ”，ꄺꀱꊌꐨꄻꈫꈈꃅꄉ，ꎔꎗꃅꃹꅼꃅꏦꌬꃅꎁꄹꏦꏓꇱꀕꄻꄺꀱꉜꐨꃄꌬꇫꑟ，ꊋꀥꇱꄉꐰꏭꄐꌐ，ꄺꀱꇿꋌꉀꐕ。ꃹꅼꃅꉹꁌꃆꑘꅇꎹꈭꎁꌼꇪꌠꈝꐮꌠꁸꈴꌠꄺꀱ。ꏲꑘꅇꎹꃣꈌꀞꄻꅉꇬꄉꍤꀞꌠꈭꎁꄻꉾꃪ。ꐊꑷꃅꋍꈚꄉꀉꑌꑵꃅꏟꃆꏈꑘꋊꑣꌠꌋꆀꅇꎹꁧꃤꃅꌠꃶꐚꇿꋌꉀꐕ。ꐛꐨꀊꏀꌠꎥꃪꌤꃆꀊꏀꌠꂥꀘ，ꍞꇽꎕꏦꏓꋍꃱꃅꐙꌠꄹꎆ。ꃹꅼꃅꏦꌬꄇꄜꋊ。ꇵꆅꐯꇳꊬꌠꇬꑴꌧꃔꑼꋈꄻꌬꈧꊌꐨꄻꈫꈈꍔꀺ，ꐯꏑꈄꏍꏦꌬꈁꏦꄻꐛꒆ。
ꃘꆏꊋꇤꄉꀋꎪꌃꎴꊪꃅꌠꃔꑼꊿꀉꇨꁥꂘꄻ。ꊋꀥꇱꄉꏓꂱꃔꑼꄈꅿꍔꍞꋈꄻ，ꅇꀨꉙꂘꊌꐨꄻꈫꈈꃹꅼꈴ，ꀉꇨꃅꌧꊿꉘꉚꌋꆀꊿꁥꌠꏲꂠ，ꍔꍞꀉꇨꌠ、ꃅꑘꀉꇨꌠ、ꃅꎁꀉꇨꌠ、ꍬꏦꀉꇨꌠ、ꃅꇏꀉꇨꌠꊇꁧꀊꂥꌠꊿꁥꋨꄻ。ꀉꇨꃅꅉꂫꊐꌠꅉꃀꋈꄻ，ꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷ、ꌢꎭꃅꄷꃔꑼꀻꎆꌠꇬꊋꁈꄏ。ꎔꎗꃅꋒꃅꏮꉜꄺꀱꃅꇫꑟꌠꒃꉇ。ꑴꐚꃅꏓꄊꍞꊟ、ꋯꁦꍞꊟꌋꆀꋍꑞꋍꁁꏯꍞꊟꌠꅇꃅ。ꐊꑷꃅꏦꇨꃅꄈꏲꌠꀨꄜꃅꎁꄻꈫꈈꃅꄉ，ꏟꈯꃅꇶꏦꉪꏦ、ꇛꌺꉪꏦꀜꋊꇧꎭ，ꏦꇨꃅꉇꉻꌋꆀꈏꉻꊿꏦꌬꌠꇬꈌꄀꇇꏿꅲꐺꌠꄴꏮꌠ“ꏤꐪꌕꏢ”ꌠꑠꎸꅍꌟꃅꐙꌠꏤꐪꏢꅇꃄꌬ，ꀏꐱꄉꈩꄻꌠꁳꈥꈉꀋꐥꎻ，ꏦꌬꍹꈔꌠꁳꂁꅉꀋꊌꎻ，ꏟꈯꃅ“ꃣꈌꌌꑌꇐꉉꀽ、ꃣꈌꌌꍬꏦꉉꀽ、ꃣꈌꌌꏦꃤꉉꀽ”ꌠꌗꋏꉙꂘꌠꃅ，ꋍꍈꑋꀋꋰꀋꏆꌠꃄꄟꌌꄉꏦꇨꃅꏦꌬꍹꈔꌠꅓꀞ，“ꏦꇨ”ꌠꀨꄜꅉꃀꉉꈌꀊꉗꃅꌭꈬꃅꄉꇬꎷ，ꐙꎴꃅꏦꌬꌠꌌꄉꀋꈐꀋꉈꃅꏦꌬꌠꄉꀧ。ꉈꈽꉌꊈꍔꆙ，ꉈꈽꄐꅍꁦꎆꃅꀉꇨꇁ，ꏦꌬꊪꃅꌠꌌꄉꐮꄙꐨꏟꃆꏈꑘꋊꎵꇧꎭ，ꀋꈐꀋꉈꃅꏦꌬꌠꌌꄉꎃꊒꑗꉬꌠꃅꇫꑟ。
ꁧꎁꊈ，ꎼꈎꏓꂱꃔꑼꌤꃅꌠꃅꋒꂿꄷꇬꆹ，ꃅꎁꀉꒉꀊꂾ，ꂿꃆꁤꇅꀕꌠꉬ。ꉪꊇꆏꀊꅰꃅꑖꑟꃅꋯꑌꌊꐋꀨꑮꏣꀻꌌꈯꄜꃅꄉꌠꄈꍏꑷꈭꇍꄉ，ꑮꏣꀻꃅꋊꀊꏀꌠꇬꍏꇩꐛꐨꐧꋦꉪꏦꉪꇐꌌꄐꌐꅍꃅꄉ，ꀋꎪꃅꏦꃀꏦꃤꄻꁵꄉꌠꃅꎁꃄꄻ，ꉌꊋꏟꈯꃅꄉ，ꊋꋠꌠꉜꄉꀒꁨꆹ，ꀂꏾꈎꄉꃄꄻ，“ꋍꉐꈎꑍꃢ”ꌠꉈꈽꑞꅉꁻꌐꃅꇫꑟ、ꍏꉸꊿꋅꇰꀋ꒜ꃅꀱꌄꆣꇁꌠꍏꇩꉪꐨꃅꇫꑟꌠꎁꃅꑆꊋꀊꏀꌠꀊꅰꃅꀉꒉꌠꅐꌞ!
（ꑝꉸꎹꀙꏢ6ꆪ1ꑍꈨꇁꇬ）
