ꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꌤꃅꅇꄜ
——2020ꈎ5ꆪ25ꑍꊯꌕꈭꇩꏤꑭꊂꏓꂱ ꁧꎁ꒜ꀉꒉꌕꃢꌠꈿꅉꇬ
ꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꊈꑼꍈ ꆀꍉꎼ
ꁧꎁꊈ:
ꇩꏤꑭꊂꏓꄊꎮꊈꉼꉡꁠꅑꄉ,ꃀꀉꒉꈿꅉꏭꌤꃅꅇꄜ,ꌌꍤꇖꅊꇈ。
ꊯꌕꈭꇩꏤꑭꊂꏓꄊꃀꑍꃢꌠꈿꊂꅑꅸꇁꌠꌤꃅꐨꀋꉬꀋꉆꌠ
ꊯꌕꈭꇩꏤꑭꊂꏓꄊꃀꑍꃢꌠꈿꊂꅑꅸꇁꌠꋍꈓꎖꌠꆹ，ꉪꇩꏤꐩꋊꇬꊋꋠꐯꊋꋠ、ꎃꀋꐚꐯꎃꀋꐚꌠꉬ。ꐋꀨꑮꏣꀻꈯꄜꃅꄉꌠꄈꍏꑷꇰꀋꃀꃅꉈꈽ、ꋉꃆꇰꀋꃀꌠ、ꌤꑘꇰꀋꃀꌠ、ꉪꐨꇰꀋꃀꌠꏓꏲꄉ,ꀬꅑꃅꃅꋊꒈꂃꂴꆽꐊ、ꀵꄜꃅꐨꃅ,ꇿꋌꐥꃅꋓꎭꀉꒉꀊꂾꌠꏭꊜꄻ、ꃨꆰꐨꀉꒉꀊꂾꌠꄘꑣ、ꌤꃆꀉꒉꀊꂾꌠꂥꀘꇧꎭ,ꄈꌋꆀꇩꏤꋍꑞꋍꐘꌤꑘꄹꇙꌊꁨꎆꐨꀊꏀꌠꀉꒉꀊꂾꌠꊌꅜ。ꉘꀋꇉꃅꅐꇁꌠꏀꉹꌀꌡꆅꅋꋍꃀꆅꌠꇵꆅꅐꇁꈭꐨ,ꐋꀨꑮꏣꀻꌌꈯꄜꃅꄉꌠꄈꍏꑷꆏꇵꆅꄴꏮꋎꍅꌠꌌꌤꀨꐘꌠꃅꄉꒃꉇ,ꑮꏣꀻꊝꎻꏹꊨꏦꑭꄑꄉꇹꄣ、ꊨꏦꑭꄑꄉꄐꁆ,ꏓꂱꉹꁌꀑꇬꋬꂻꌠꌋꆀꇭꀧꈯꄿꋬꂻꌠꄻꀨꇬꄉꇬꎷ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꏃꂠꌊꏓꂱꋍꏅꃅꇵꆅꄴꏮꋎꍅꌠꏓꂱꋍꏅꃅꄓꄴꏮ、ꉻꄜꃅꄴꏮ、ꈜꄵꄉꄴꏮꌠꃅꋒ，ꎭꀋꐒꅧꀋꐒꃅꊋꇤꈭꐨ，ꃶꉴꐏꁇ、ꃛꀙꐏꁇꌠꊌꐨꀉꒉꀊꂾꌠꊌꅜ。ꋋꆹꉈꑴꋍꃢꃅꑮꏣꀻꃅꋊꀊꏀꍏꇩꐛꐨꐧꋦꉪꏦꉪꇐꌌꀉꇨꃅꏃꈻꌠꄛꑣꅐꇁꀐ,ꐋꀨꑮꏣꀻꈯꄜꃅꄉꌠꄈꍏꑷꊁꄉꁈꏂꁈꇭ、ꀬꅑꇨꊋꑌ、ꏃꈴꍜꐥ、ꈜꍜꏀꅍꏀꄉꀒꁨꆹꌠꏃꂠꄐꊋꋍꉎꀋꐥꌠꄻꊿꀦꀐ,ꍏꇩꇭꍣꄈꏃꂠꌠꌋꆀꍏꇩꐛꐨꐧꋦꉪꏦꄹꏦꂱꎆꅑꐨꑓꀠꀕꃅꄛꑣꅐꇁꀐ,ꍏꉸꌺꇖꑴꇨꈌꀋꊰ,ꊋꋠꐨꈁꐥꌠꄩꊋꀬꇈꉈꑴꊋꋠꐨꈍꃅꐙꌠꑌꇱꎼꈌꀋꊰ,ꎬꅧꊋꋠꌠꇬꄉꉀꒆ、ꎬꅧꊋꋠꌠꇬꄉꊋꇤꌠꌳꈄꊋꌗꄇꇖꀕꃅꄛꑣꅐꇁꀐ。
ꇵꆅꇫꅐꇁꊂꅑꅸꇁꌠ,ꇩꏤꑭꊂꏓꄊꎮꊈꉼꆏꏟꈯꃅꄈꍏꑷꏤꁈꄐꉻꃅꈴꌬꈴ，ꐳꃅꃄꄻ、ꏦꃤꈴꄉꄉꅍꃅꎁꃅ,ꐊꑷꃅꇈꐥꇙꀕꏦꀋꈴꃅꃼꇇꃅꌠꌋꆀꌌꋠꌠꏢꇋꌠꃆꂮꏤꐪꏤꄻꅐꇁ,ꄉꉻꁦꎴꆄꄻꋬꂻꃨꆰꐨꄴꏮ,ꐧꋦꌧꑳꀻꎆꌠꊥꎆ。ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꇖꐨꇬꄉꄐ,ꄉꉻꁦꎴꆄꄻꁁꏯꐛꐨꀊꏀꌤꃆꀊꏀꌠꇬꈴꄉ,ꄉꉻꁦꎴꆄꄻꏦꏲꏦꀧꉻꑫꊋꀥꇱꌠꏦꃤꏤꄻꏦꃤꄺꀱꌤꃅꌠꄐꁆ,ꏓꂱꀑꇬꋬꂻꐏꁇꌠꎁꃅꏦꏲꐏꈜꄻꈫꈄ。ꐧꋦꇫꉈꇬꌠꏭꅇꏮ,ꑴꇙꃅꇵꆅꄴꏮꋎꍅꏦꃤꄜꉺꉉꋊ,ꇵꆅꄴꏮꋎꍅꌠꌋꆀꎆꏣꐧꋦꀻꎆꌠꎁꃅꏦꃤꊋꁈꄏꌠꇲꁵ。
ꋍꈓꎖꅑꅸꇁꌠ,ꎮꊈꉼꆏꎔꎗꃅꏦꄻꌅꈌ、ꍞꊟꌅꈌ、ꏤꇽꌅꈌ、ꁵꇔꌅꈌꃄꌬ,ꐯꇯꏦꃤꄐꄉꌠ、ꏤꐪꄐꄉꌠ48ꐘꌌꍤꇖ,34ꐘꌌꉌꃹꈴ,ꄚꈐꏭꏦꃤꏤꄻꌠ5ꐘ,ꏦꃤꌌꄺꀱꌠ17ꐘ,ꄚꃆꂮꐥꌠꏦꃤꌤꃆꌋꆀꌤꃆꀉꒉꀊꂾꌠꏤꐪꏤꄻꅐꇁꌠ12ꐘ；ꅇꄜ39ꐘꅱꄻꍤꇖ,ꏦꃤ6ꋐꃄꌬꐛꐨꍤꄻ,ꌐꄝꃅꅲꇫꌠ3ꃢꃅ、ꌐꄝꃅꍤꎥꌠ7ꐘꃅ,ꏤꐪ1ꐘꏤꄻꅐꇁ；ꐰꏤꄉꑍꁁꏯꏤꐪ5ꐘꈌꁧ；ꄉꅍꁵꇔꃣꈌ38ꐘꍤꇖꉌꃹꈴ,ꏦꃤꈴꄉꇩꏤꌤꏲꅉꌤꃅꊿꄉꅍꁵꇔꌠ282ꑹꃢꐥ,ꋍꑞꋍꐘꌤꃅꌠꁨꎆꐨꀊꏀꇿꋌꀊꏀꌠꊌꅜꀐ。
ꋍ、ꏦꃀꌌꄉꇩꏲꍔꄻꌠ꒔ꑞ꒔ꁆꏯꇬꐊꑷꃅꃄꌬꌠꄉꀧ
ꏦꃀꆹꇩꏤꁧꀦꏦꃤꉬ,ꄈꌋꆀꏓꂱꉪꐨꏓꋧꃅꄛꑣꅐꇁꌠꉬ。ꏦꃤꈴꄉꇩꏲꇬꂴꆏꏦꃀꈴꄉꇩꏲꌠꌭꈬꌶ,ꏦꃤꈴꄉꌅꈌꌬꇬꂴꆏꏦꃀꈴꄉꌅꈌꌬꌠꌭꈬꌶ。
ꍏꇩꀊꏀꄻ70ꈎꈭꏝꐛꄮꇬ,ꄈꍏꑷꏃꂠꌠꇂꃴꄉ,ꏦꃀꇬꏤꄻꄉꌠꇬꈴꄉ,ꎮꊈꉼꆏꇩꏤꑆꊋꊫꌐꌋꆀꇩꏤꂒꉻꁵꄻꌠꏤꐪꏤꄻꅐꇁ,ꑮꏣꀻꍗꑮꆏꍗꑮꅇꁵꂓꁱ，ꇩꏤꂒꉻꀊꂥꐯꀊꂥꌠꄻꍏꇩꀊꏀꋈꄻꌠꌋꆀꀻꎆꌠꎁꃅꑆꊋꀉꇨꃅꅐꌞꌠꄞꅐꊿ36ꑼꌋꆀꍏꇩꌋꆀꉇꄅꇩꏤꎻꈴꇷꃅꊥꎆꌠꎁꃅꑆꊋꀉꇨꃅꅐꌞꌠꋧꃅꉂꐋ6ꑼꁵ。ꋋꆹꀋꃋꌬꌠꏦꃀꃄꌬꊂꅑꅸꇁꌠꉘꃀꃢꌠꏓꋧꄉꇩꏤꑆꊋꌐꂷꃑꁵꌠꉬ。ꅓꑘꅓꑽꃤꐆꊿꋍꈨꏭꉈꃅꅓꃤꇔꌠꃆꂮꏤꐪꏤꄻꅐꇁ,ꑮꏣꀻꍗꑮꆏꉈꃅꅓꃤꇔꅇꁵꂓꁱꄜꃑ。ꏦꇨꃅꏦꏤꈭꎁꇬꈴꄉ,ꉈꃅꅓꑘꅓꑽꃤꐆꌠꈬꑵꐯꇯ23593ꑻꌠꅓꃤꇔꇧꎭ,ꋋꆹꏦꃀꏤꄻꄉꌠꉈꃅꅓꃤꇔꄹꏦꇬꉈꑴꋍꃢꃅꀉꒉꀊꂾꃅꃄꄻꃢꉬ。
ꄈꅿꊯꈬꈭꇖꃢꐊꈴꃀꈿꉌꊈꃅꈴꌬꈴ，ꎮꊈꉼꆏꇩꃷꑼꑣꇤꏲꑘꇣꋲꏱꅉꐎꇩꏤꋬꂻꀧꌋꃅꃆꂮꅇꄜꌠꌌꅱꄻꍤꇖꀐ，ꏦꃀꌋꆀꑣꇤꅉꀨꏦꃤꇬꄚꃆꂮꐥꌠꏤꐪꇬꈴꄉ《ꇩꏤꑭꊂꏓꂱꁧꎁꃀꀉꒉꈿꅉꑣꇤꏲꑘꇣꋲꏱꅉꐎꇩꏤꋬꂻꀧꌋꃅꌠꏦꃤꄹꏦꌋꆀꃄꌬꉺꏦꄻꐛꄻꐛꒆꌠꃆꂮꏤꐪ（ꄐꄉꌠ）》ꎥꃪꄐꁱꄷꀋꁧꌌꍤꇖꀐ，ꐰꏤꄉꄜꌊꋌꃢꃀꀉꒉꈿꅉꁳꍤꇖꎻ。ꋋꆹꃅꒊꃅꇁꀊꏀꌠꇂꃴ“ꋍꇩꑍꏦ”ꄹꏦꉻꑫꌭꈬ、ꏦꃤꈴꄉꑣꇤꏱꄻ、ꏦꃀꌋꆀꅉꀨꏦꃤꇬꊨꄅꄉꌠꇣꋲꏱꅉꐎꏦꃀꏤꄻꄉꌠꐥꀹꀧꌋꃅꌠꌭꈬꌋꆀꄻꐛꒆꌠꏁꁈꀋꂿꑘꐘꉬ，ꑣꇤꃺꑌꇫꐊꌠꍏꇩꏓꂱꈁꐥꌠꁧꀦꈲꁧꌋꆀꐮꄉꄐꌠꉬ。ꅇꑇꌠꆏꁧꎁꈧꌠꐯꇯꃅꊋꇤꇈ，ꈍꃅꑌꁣꀋꐥꃅꏦꄻꂿꃆꀋꂿꑘꋌꐘꃅꇫꑟꄎ，ꇩꏤꌅꀨ、ꋬꂻ、ꀻꎆꈲꁧꀧꌋꃅ，ꑣꇤꁳꀊꉗꃅꌄꆣꎍꐽꎻꌠꎁꃅ，ꀊꅰꊋꑌꌠꏦꏲꏦꀧꅍꇲꁵꄎꌠꉬ。
ꏦꃤꇬꈴꄉꏦꃀꄐꊒꐨꍤꄻ、ꅺꇰꁱꄀꍤꄻꌠꃅ。ꏦꃀꄐꊒꐨꍤꄻꌤꃅꄹꎆꃆꂮꃄꌬꉜꐨꏤꄻ,ꋭꋽꃅꈀꄸꑌꇫꉈꇬꌠꏦꃀꇬꃆꂮꐥꌠꌤꃆꏭꅇꀱ,ꏦꃤꇬꈴꄉꏦꃀꐆꏦꃤꐆꌠꋊꍬꃅꐙꌠꁱꐘꄺꀱ, ꃶꐚꃅꏦꃀꇬꍬꄉꃅꌋꆀꌌꃄꌬꎻꌠꄉꀧ。ꏦꇗ、ꏦꌬꉉꀽꅺꇰꁱꄀꍤꄻꏦꉻꉺꏦꄻꐛꒆ,ꋍꃱꃅꐙꌠꇩꏤꑭꊂꅺꇰꁱꄀꍤꄻꈴꌗꐽꈉꄻꐛ,ꇫꇬꃅꇩꏤꏦꃤꏦꇗꃷꁨꊐꈄꄻꐛ。ꊛꄉ3ꈎꅺꇰꁱꄀꍤꄻꌤꃅꃆꂮꅇꄜꌠꅱꄻꍤꇖ,ꄷꀋꁧꌌꐧꋦꏭꄇꄜꋊ。2019ꈎꄜꌞꌊꅺꇰꁱꄀꄉꌠꏲꑘꏦꇗ、ꃅꄷꌬꌠꏦꇗ、ꏦꌬꉉꀽꌠ1995ꐘ，ꄜꌞꌊꅺꇰꁱꄀꄉꌠꇣꋲꏱꅉꐎꂱꑱꃅꄷꌬꌠꏦꃤ33ꐘ，ꉻꊿ、ꎀꍹꄜꎼꇁꌠꍤꄻꇖꐨ138ꐘꎥꃪꀞꄻ。ꌌꍤꄻꈭꐨ，ꍞꊥꄉꏤꄻꌤꃅꅉꁳꏦꃀꏦꃤꏤꐪꌋꆀꉌꊈꇬꐮꄙ、ꐮꀋꊒ、ꐮꄉꀋꄐꌠꋊꍬꃅꐙꌠꁱꐘ506ꐘꄺꀱꎼꇁ,ꇩꏤꏦꃤꄹꏦꋍꃱꃅꐙ、ꑊꒉꐨꌋꆀꋦꒉꐨꀧꌋꃅꀐ。
ꏦꃀꄜꉺꉙꂘꌠꃅ。ꏦꃀꅇꏤꒃꇗꏦꃅꌠ6ꃢꊥꇫ,ꊿꄉꅍꁵꄉꌠ18ꑼꅇꏤꒃꌠꃅ,ꊈꑼꍈꃀꈿꅉꐊꊿꆏꊥꇺꄉꃅꄷꀋꁧꅇꏤꒃꌠꇬꍞꊟ,ꇩꏤꌤꃅꊿꏦꃀꉪꉻꁦꎆꃅꀉꇨꇁꀐ。“ꏦꃀꉌꊈꍔꆙ,ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆ”ꌠꌌꅇꀨꃅꄉ,ꇩꏤꏦꃀꋩꑍꃘꃢꀕꌠꑋꇖꃀꈿ,ꋍꊐꋑꀋꋒꃅꄷꋍꈚꋑꀋꋒꌠꏃꂠꄉꀉꑌꑵꃅꐙꌠꏦꃀꄜꉺꌠꃅ。ꉪꂱꇣꋲꏱꅉꐎꅉꀨꏦꃤꃄꌬ20ꈎꈭꏝꐛꌠꎺꄅꑋꇖꃀꈿ,“ꋍꇩꑍꏦ”ꌐꏦꌋꆀꏦꃀ、ꅉꀨꏦꃤꄜꉺꌋꆀꃄꌬꇫꑟꌠꄹꇙ。
ꑍ、ꀋꆏꃅꍏꇩꐛꐨꐧꋦꉪꏦꏦꃤꉻꑫꄻꐛꒆ
ꐊꑷꃅꏦꈴꇩꏲꌠꇬꆼꒆꄉ,ꏤꄻꄺꀱꀜꋊꉉꀽꌠꐯꇯꃅꌠꌭꈬꇬꎷ,ꊇꁧꌋꆀꑘꅐꐨꐯꇯꉜꁨꌠꌭꈬꇬꎷ,ꊋꀥꇱꄉꀋꉬꀋꉆꁁꏯꏦꄻ,ꀋꆏꃅꈆꑪꃅꏦꄻ、ꋯꁦꃅꏦꄻ、ꏦꃤꈴꄉꏦꄻꌠꌧꐨꉀꐕ。
ꐊꑷꃅꃹꅼꃅꄺꀱꌠꇬꐊꃅꌋꆀꊥꎆ,ꀉꒉꀊꂾꃅꄺꀱꌠꁳꏦꃤꁢꊧꐥꎻꌠꏦꀧ。ꉇꉻꃼꇇꃅꊿꎆꇱꏦꃤꉌꃹꈴꈭꐨꆏ,ꋉꃆꄻꇐꏦꃤ、ꄔꐏꄔꄵꏦꃤ、ꄆꌅꂓꁱꏦꃤ、ꇓꈓꇓꉈꄐꎖꏦꃤ、ꍯꇉꇗꏸꏦꃤ、ꃷꇐꌐꂷꏦꃤ、ꎃꀋꊒꃅꋓꅔꌠꏭꁏꏦꃤ、ꏲꑘꈌꁧꏦꃤꌌꉬꇮꇱꃅꄺꀱꄉ,ꄚꃆꂮꐥꌠꏦꃤꐯꊛꌠꃅꌐ；ꄠꃪꃺꑌꎆꇱꀧꌋꃅꏦꃤꄺꀱ,ꄺꀱꊌꐨꈲꐪꋍꋓꃅꄻꄠꃪꃺꑌꁵꌠꄉꀧ。ꇓꈓꄺꀱꋈꄻꌠꇗꏸꏦꃤ、ꏤꐪꇗꏸꏦꃤ、ꉇꅐꏱꄻꏦꃤꄐꄉꌠꍤꇖꄉ,ꌅꈌꄻꇩꃷꑼꁵꄉꄿꐨꃼꇇꃅꉚꅉꇬꋋꇅꇬꄚꃆꂮꐥꌠꏦꃤꏤꄻꄉꌠꇬꌬꄉꄐꌠꃆꂮꏤꐪꋊꄻ、ꌅꈌꄻꉪꂱꇣꋲꏱꅉꐎꁵꄉꉿꏿꈜꀸꉪꂱꁁꏯꈜꀸꌋꆀꄚꃆꂮꐥꌠꍔꎆꃄꁕꏭꏱꄻꃄꌬꌠꏤꐪꏤꄻꅐꇁ,ꃅꋊꌋꆀꄺꀱꌠꏦꏲꈉꐨꏭꅇꀱ。ꌅꈌꄻꇩꃷꑼꁵꄉꉰꇂꄿꐨꃼꇇꃅꉚꅉꇬꋋꇅꇬꌬꉆꌠꃄꅉꏲꂠꏦꃤ、ꇗꂷꏦꃤ、ꉰꇂꃼꇇꃅꏦꃤꇬꄚꃆꂮꐥꌠꏤꐪꋊꄻ,ꉰꇂꄿꐨꃼꇇꃅꉚꅉꌋꆀꍏꇩꐛꐨꄿꐨꃼꇇꈴꀸꋈꄻꌠꊋꁈꄏ。ꁌꁦꊫꌐꏦꃤꄺꀱꇬꇖꃢꍤꄻꌠꃅꋺ,ꋍꁘꑌꀋꇙꃅꄺꀱꌠꄹꎆ、ꎆꇱꊿꌅꈌꈲꁧꀧꌋꃅ、ꊋꀥꇱꄉꍞꏲꌠꃅꍜꐏꋒꃅꄉ,ꁱꄀꄹꏦꑠꄺꀱꊌꐨꏚꍆ,ꎆꀨꃷꎏꄺꀱꌠꌋꆀꁣꀋꐥꃅꀻꎆꌠꎁꃅꏦꏲꏦꀧꅍꇲꁵ。
ꀻꎆꉪꉻꀊꏀꌠꃅꈴꌬꈴ,ꊇꁧꀊꂥꌠꏦꄻꌠꌌꄉꊇꁧꀊꂥꃅꀻꎆꌠꄹꇙ。ꅐꀦꇗꏸꏦꃤꏤꄻ,ꈯꊈꀉꀜꋦꈭꍍꆀꄴꏮꏦꃤ、ꌩꏪꏦꃤꄺꀱ,ꒆꉻꄻꂴꄉ、ꉮꀋꐥꃅꀻꎆ、ꊿꌋꆀꋌꐛꋌꐙꐮꄮꃅꐮꐊꌠꉪꉻꀉꑌꁁꏯꃅ、ꏠꊐꀉꑌꊐꃅꌌꏦꄻꇬꇱ。ꍤꏦꀧꌋꃅꏦꃤꄐꄉꌠꄐꁱꄷꀋꁧꍤꇖ,“ꐯꇯꀉꒉꃅꀧꌋꃅꌠꒃꉇ,ꀉꒉꃅꀖꁉꌠꀋꃅ”ꌠꉪꉻꃅꈴꌬꈴ,ꏦꃤꇇꌭ、ꏦꏲꊋꃤꌌꄉꍤꏦꒊ꒜ꀧꌋꃅ。ꁰꄻꌅꈌꏦꃤꄺꀱꑘꄐꄉꌠꍤꇖ,ꌅꈌꉄꌎꃅꐨꏭꇇꇩꍈꌠꊋꃤꁦꎆꇱ,ꊋꀥꇱꄉꌧꇐꅐꇐꌅꈌꀧꌋꃅ。ꃄꅉꏲꂠꏦꃤ、ꇓꈓꑳꇤꁨꇐꏲꂠꏦꃤꄺꀱ,ꂿꑘꊿꈲꁧꆏꇱꁈꀉꄂꃅꊨꁈꀋꃅꌠꄽꂫꑞꅉꉆꈉꌋꆀꏦꃤꄺꀱꃅꍜꌭꈬꇬꎷ,ꃄꅉꅐꀦꄻꍄꑐ、ꂿꑘꊿꁨꇐꃅꐙꌠꊌꐨꁦꎆꇱ、ꊋꀥꇱꄉꋠꃅꀧꌋꃅ、ꇓꈓꇓꉈꐮꉔꀻꎆꊥꎆꌠꎁꃅꄹꏦꏦꀧꅍꇲꁵ。
ꏓꂱꐥꌒꄻꌒꌠꉪꐨꌌꉈꈽꁻꌐꃅꄉ,ꐳꃅꉹꁌꐥꐨꁁꏯꏦꄻꌠꃅ。ꅉꀨꆅꉁꁦꎴꆄꄻꌋꆀꋬꂻꊥꎆꏦꃤꏤꄻ,ꈁꉬꁁꏯꈁꉬꀰꏮꃅꏓꂱꇭꀧꉾꃪꌠꀧꌋꃅꌠꎁꃅꏦꃤꏦꀧꅍꇲꁵꀐ。ꁬꋌꏲꂠꏦꃤꄺꀱ,ꏓꂱꉹꁌꇫꉉꄜꌠꁬꋌꃶꀋꐚꌠ、ꀉꁘꌠ、ꁬꋌꁌꀉꒉ、ꁬꋌꀋꇎꑠꌤꃆꂥꀘꌠꄹꇙ。ꆅꁿꋌꏲꂠꏦꃤꏤꄻ,ꆅꁿꋌꎥꃪꀖꁉ、ꒃꅐ、ꏮꈴ、ꁬꋌꊐꌠꎁꃅ“ꋬꂻꎤꁉ”ꑠꋬꄻꇬꇯꄉ。ꏀꉹꌀꌡꆅꅋꋍꃀꆅꇵꆅꄴꏮꋎꍅꌤꃅꌠꎖꋪꏓꈹ,ꄉꉻꁦꎴꆄꄻꏦꏲꏦꀧꉻꑫꊋꀥꇱꌠꇖꐨꇬꈴꄉ,ꌐꐘꏦꄻꏦꃤꄺꀱꎖꄎꃄꌬ,ꌤꃅꌐꃅꁥꌠꄻꐛ,ꏦꄻꏦꃤꄺꀱꐘꃆ30ꐘꌌꏓꇲꁆꄻ,ꅔꈿꄉꃅꐎ1ꈓꅑ2ꈓꌌꄉꏦꄻꂿꃆꀉꑌꄹꁆꌠꃅꌐ。ꇙꀕꆄꄵꏦꃤꄺꀱꄐꄉꌠꍤꇖ,ꇙꀕꆅꁧꆅꀦꇵꆅꏭꍞꎖꌗꋏꌠꊋꀥꇱ。ꒆꇐꋬꂻꏦꃤꄐꄉꌠꄐꁱꄷꀋꁧꍤꇖ,ꊋꇤꄉꒆꇐꃨꆰꐨꄴꏮ、ꒆꇐꇮꇐꀻꎆꌠꊥꎆ、ꇩꏤꒆꇐꋬꂻꉻꑫꇬꄘꄏꌠꏦꃤꏤꄻ。
ꇩꏤꄹꏦꌋꆀꇩꏤꏱꄻꉻꑫꋈꄻꌠꇬꆼꒆꄉ,ꊋꀥꇱꄉꍞꊟꍤꄻ、ꏦꌬ、ꐧꋦꏱꄻ、ꇩꏤꋬꂻꑠꁁꏯꏦꄻꌠꃅ。ꃹꅼꃅꇩꏤꍞꊟꍤꄻꏦꉻꄺꀱ,ꇩꏤꍞꊟꍤꄻꊈꑼꉼꍞꊟꍤꄻꏦꇗꏤꄻꌠꃆꂮꏤꐪꏤꄻꅐꇁ,ꉻꌤꃅꊿꏲꃆꅓꀞꏦꃤꄐꄉꌠꍤꇖ。ꋥꁕꋊꄻꏦꃤꏤꄻ,ꊿꒆꆹꀋꑟꌦꌠꀧꌋꃅꏦꃤ、ꊿꒆꆹꀋꑟꌦꌠꑽꃤꐆꌠꄴꏮꏦꃤꄺꀱꄐꄉꌠꍤꇖꄉ,ꄚꃆꂮꐥꌠꎴꊐꏦꃤꏤꐪꌋꆀꄹꏦꏤꐪꇤꇧꎭ,ꀊꅰꉾꃪꃅꃅꋊꀊꏀꌠꐧꋦꏱꄻꇖꐨꇬꄉꄐ。ꏦꇜꏦꃤ、ꏦꍤꇛꌺꏦꃤꄺꀱꄉ,ꌅꈌꁵꄉꉹꁌꃆꑘꅇꎹꈭꎁꌼꇪꄉꁸꈴꄺꀱꃅꉚꌤꃅꌠꃆꂮꏤꐪꏤꄻꅐꇁ,ꏦꌬꏦꉻꄺꀱꊌꐨꈫꈈꌋꆀꃹꅼꈴ。ꂁꂷꏦꃤꏤꄻ,ꄉꉣꏦꃤꄺꀱꄐꄉꌠꍤꇖ,ꄚꃆꂮꐥꌠꁁꏯꄺꂡꌠꏦꃤꄹꏦꄻꐛꒆ。
ꀋꃋꋌꃢꃀꀉꒉꈿꅉꁳꍤꇖꎻꌠꉹꁌꏦꃤꀋꃀꄐꄉꌠꆹ,ꉪꇩꏤꏦꏲꋈꄻꌠꌐꂷꊌꐨꀉꒉꐘꉬ。ꋋꈭꎮꊈꉼꆏꂴꈭꌠꌤꃅꌠꅉꃀꇬꄉꐳꃅꉹꁌꏦꃤꄯꒉꁰꄻꌤꃅꌠꄹꎆ,2018ꈓ8ꆪꆏꉻꄜꃅꁸꄉꁰꄻꄐꄉꌠꍤꇖ,ꋍꈭꐨꁸꌊꊭꈉꃅꄉꀉꑌꃢꃅꍤꇖ,ꄷꀋꁧꉹꁌꏦꃤꀋꃀꄐꄉꌠꋌꋐꃅꌌꍤꇖ，ꂴꊁꃅ7ꃢꄇꄜꋊꄉꉜꐨꇕꅲꇈ,ꋍꑞꋍꁆꏯꉜꐨ90ꃪꎖꏢꎹꈹꇬꇯ。ꀱꇊꀱꃅꄺꀱ、ꃅꌤꑽꌤꇈ,ꀋꃋꋋꇅꇬꉬꇮꃅ7ꁬ1260ꏢꏓꄻꄉꌠꉹꁌꏦꃤꀋꃀꄐꄉꌠꐛꀐ。ꇫꅇꑇꌠꆏꁧꎁꈁꐥꌠꎔꃅꍤꇖꈭꐨ,ꀋꎪꃅꍏꇩꐛꐨꐊꌠ、ꃅꋊꎃꃅꌠꉌꊈꄜꅐꇁ、ꏓꂱꉪꐨꄜꅐꇁ、ꉹꁌꃆꑘꌅꈌꈲꁧ、ꐧꋦꀋꈐꀋꉈꑗꉬꌠꀧꌋꃅꌠꉹꁌꏦꃤꀋꃀꋐꏤꄻꅐꇁꄎꌠꉬ。
ꋌꃀꋋꈓꎖꌠꏦꄻꌤꃅꌠꆏꉪꊇꏭꀋꂿꑘꃅꉙꂘꀐ,ꋋꆏ:ꍏꇩꐛꐨꐧꋦꉪꏦꆹꃅꋊꀊꏀꋎꌠꇬꃹꆹ,ꏦꄻꌤꃅꌠꆏꀋꎪꃅꄈꌋꆀꇩꏤꌤꑘꀻꎆꇖꐨꀊꏀꌠꇬꄉꄐ,ꈍꄮꇬꑌꏓꂱꌌꈯꄜꃅꄉ，ꄈꅿꉪꐨꁳꏦꏤꈭꎁꇬꈴꄉꇩꏤꉪꐨꐛꎻꌠꄉꀧꌶ，ꐳꃅꄺꀱꁉꃑꎖꋪꀊꏀꌠꊌꐨꀊꏀꌠꄛꑣꅐꇁ,ꀋꎪꃅꏦꄻꏤꇽꌠꌋꆀꄺꀱꏤꇽꌠꐯꊛ、ꏓꋍꃱꃅꌠꌭꈬ,ꏦꃤꐳꐨ、ꉻꑫꐨ、ꄐꌐꐨ、ꇿꋌꐥꐨꄻꀉꇨꇁ,ꀋꆏꃅꍏꇩꐛꐨꐧꋦꉪꏦꏦꃤꉻꑫꄻꐛꒆꌶ。
ꌕ、ꏦꏤꃅꎁꇬꈴꄉꀉꒉꀊꂾꃅꄺꀱꀻꎆꂿꃆꇬꆼꒆꄉꍞꊟꌤꃅꌠꄹꎆ
ꎃꊒꃅꍞꊟ、ꇿꋌꐥꃅꍞꊟꌠꌭꈬꇬꎷ,ꏲꑘꌅꈌ、ꍞꊟꍤꄻꌅꈌ、ꍤꇽꌅꈌ、ꏦꍤꌅꈌꏦꃤꇬꈴꄉꎃꊒꃅꃄꌬꌠꇬꏓꌵꄉ,ꉹꁌꇫꅑꁠꎍꌠꃛꊸꌤꆿꊋꋠꌠꉜꁨ,ꄺꀱꀻꎆꊌꐨꁳꀊꅰꀉꑌꃅꀊꅰꐽꏡꃅꏓꂱꈧꌠꇬꈲꏣꐥꎻ,ꀊꅰꉾꃅꎆꏣꐧꋦꀻꎆꌠꌋꆀꄺꀱꈢꇓꀖꌠꂿꃆꇬꊋꁈꄏ。
ꏦꃤꈴꄉꎖꄎꌠꌋꆀꄐꌗꍞꊟꌠꌤꃅ。ꇩꂱꎆꏣꌋꆀꐧꋦꀻꎆꎖꄎꃄꌬꐨ、ꄐꌗꃄꌬꐨꅇꄜꌠꅱꄻꍤꇖ, ꌐꁧꀋꉬꀋꉆꌠ、ꂿꃆꀋꉬꀋꉆꌠꌋꆀꎆꀨꌫꄻꌠꃅꐨꇿꋌꉀꐕꑠꃅꇫꑟꌠꇬꆼꒆꄉꉜꐨꇖꐨ300ꎖꏢꄜꎼꇁ,ꈢꇓꀖꀉꒉꌕꐘꌠꊋꁈꄏꌠꌋꆀ“ꃘꎍꐽ”ꌠꌤꃅꋒ。2018ꈓꍏꑷꄐꌗꃄꌬꌠꌋꆀꀉꁁꏱꎆꊌꐨꌬꐨꍤꌗꌤꃅꅇꄜ、ꍤꌗꍤꄻꅐꇁꌠꌤꃆꋊꄻꐛꐨꅇꄜꅱꄻꍤꇖ,ꄚꃆꂮꐥꌠꌤꏲꅉꍞꊥꄉꏦꇨꃅꏦꃤꏦꇗꃄꌬ、ꃹꅼꃅꌤꃆꋊꄻ。
ꏓꄊꄐꌗꍤꄻꍞꊟꀋꉬꀋꉆꌠꆏꌫꎆꄐꌗꌠꌋꆀꏱꁈꏭꍔꀺꌠꄹꎆ,ꊋꀥꇱꄉꇩꁨꁨꇐꏲꂠꍞꊟꌠꆹ,ꄈꍏꑷꄻꏓꄊꁵꌠꃅꎁꀋꂿꑘꑍꐘꉬ。ꎮꊈꉼꆏ“ꈁꉬꈍꈐꍤꄻ、ꈁꉬꈴꎁꃅꍞꏲ”ꌠꇖꐨꇬꈴꄉ,ꀒꁨꋍꁘꃅꊋꀥꇱꄉꈁꐥꊐꌠꏓꄊꎮꊈꉼꆏꍤꌗꅐꇁꌠꌤꃆꑓꅐꎑꌠꋊꄻꐛꐨꏭꍞꊟꌠꃆꂮꉜꐨꏤꄻ,ꄈꍏꑷꁈꏤꄐꁆꌠꆏꄐꌗꏓꁱꌋꆀꄐꌗꃄꌬꌠꇬꃅꈴꌬꈴꌠꄹꇙ。ꏱꎆꏱꁈꃄꌬ、ꌤꏲꅉꄐꌗꃄꌬ、ꆹꏮꁵꄻꀁꋌꉜ、ꃅꄷꍔꃚꎝꊫꌐꃑꄻꌫꄻ、ꍍꆀꄴꏮꏱꁈꏁꁈꌋꆀꏱꎆꎆꃀꁆꄻꐛꐨꑠꀋꂿꑘꅉꏓꌵꄉ,ꊛꄉꊂꈹꄉꍞꊟ,ꐯꇯꌐꄝꃅꍤꎥꌠ25ꃢꊥꇬ,ꌤꃅꅇꄜꌠ35ꃢꅱꄻ,ꌐꄉꍤꇖꌠ4ꃢꃅ,ꌐꐘꎆꃀ9ꐘꍤꄻ,ꀒꁨꋍꁘꃅꊋꀥꇱꄉꏱꎆꎆꃀꌫꄻꃅꐨꇿꋌꌋꆀꏱꁈꃄꌬꇿꋌꍤꄻꍞꊟꀐ。ꃅꄷꏓꄊꄐꌗꍤꄻꍞꊟꀋꉬꀋꉆꌠꆏꌫꎆꄐꌗꌋꆀꏱꁈꇬꉜꄉꍔꀺꌠꄺꀱꏁꁈꃅꈴꌬꈴꌠꄹꇙ,ꌜ(ꐎ、ꏃ)ꈁꐥꌠꃅꐯꇯꃄꌬꉜꐨꏤꄻꄉꀐ。ꐊꑷꃅꋊꍬ、ꄇꄜꋊꂿꈴꉆ、ꍞꊟꊋꑌꌠꑞꅉꁻꌐꇬꈴꄉ,ꇩꁨꁨꇐꏲꂠꍞꊟꉬꈎꄐꎖꌠꏤꄻ,2018ꈓꇩꁨꁨꇐꏲꂠꐛꐨꏓꇱꅇꄜꌠꌋꆀꇩꏤꑭꊂꏲꑘꌤꑘꃅꐙꌠꇩꁨꁨꇐꏲꂠꐛꐨꌐꐘꅇꄜꌠꍤꇖ,ꇩꁨꁨꇐꏲꂠꍞꊟꌠꃹꅼꈴ、ꊇꁧꉀꐕꇿꋌꁦꎆꇱꌠꄹꎆ。ꃅꄷꄹꇙꄉꇩꁨꁨꇐꏲꂠꃆꂮꅇꄜꄹꏦꎇꈻꌊꐎꄻꄉꌠꏃꌋꆀꊨꏦꏱꅉꍏꇬꑟꆹꎻ。
ꏟꈯꃅꋒꃅꌐꐘꌤꃅꌠꍞꊟ。ꇩꃷꑼꆅꉁꌧꃀꊿꁥꌠꏲꂠꌋꆀꑘꌌꆅꉁꌧꃀꏦꃤꃄꌬ、ꌷꂾꉙꂘꌤꑘꄺꀱꌋꆀꀻꎆ、ꐧꋦꈭꋏꇇꀨꌤꃅꌠꄹꎆ、ꂿꑘꁡꇤꅐꑘꀻꎆ、ꂿꑘꁡꇤꋍꉻꁨꇐꌅꈌꄹꏦꄺꀱ、ꁱꀕꅐꑘꀻꎆ、ꐳꃅꉇꉻꃼꇇꉹꏮꊐꐕ、ꇗꏸꊨꁌꊰ、ꏱꎆꒆꉻꋦꈭꀧꌋꃅꎆꀨꁷꄻꌋꆀꌬꈧ、2018ꈓꌋꆀ2019ꈎꋦꈭꐛꐨꌋꆀꋦꈭꀧꌋꃅꁻꌐꃅꌐꃆꂮꑠꌐꐘꌤꃅꅇꄜꌠ11ꐘꅱꄻꍤꇖ,ꏓꂱꉹꁌꑴꅉꈲꏣꇬꑌꑲꎍꌠꌤꃆꑓꅐꎑꌠꂥꀘꌠꄹꇙ,ꇲꁵꁁꏯꐛꉻꐨꐥꃅꄺꀱꌠꌋꆀꎆꏣꊇꁧꀊꂥꃅꀻꎆꌠꇇꀨ。ꎭꑆꇔꈢꇓꀖ、ꊿꋅꃅꄷꃅꋮꌄꆣꉹꁌꌣꈚꃅꈧ、ꉻꑫꃅꐙꌠꎆꒉꎆꇁꐔꈔꉆꐨꄴꏮꋊꑣ、ꊻꂷꈎꄜꀉꆹꈴꌠꊜꄻ、ꃀꌠꀨꎹꄜꏂꀧꎆꀨꏲꂠꌋꆀꄺꀱ、ꇩꏤꋬꂻꏦꃤꃄꌬ、ꍞꊟꍤꄻꏦꉻꄺꀱꌠꌋꆀꍞꊟꍤꄻꏦꃤꃄꌬꑠꌐꄉꍤꎥꌠ7ꐘꍔꆙꄉꃅ,ꌤꃅꌠꊋꀥꇱꌋꆀꄻꃪꌠꇖꐨꄜꎼꇁ。
ꊋꀥꇱꄉꏦꌬꌤꃅꌠꍞꊟ。ꊛꄉ2018ꈓꏓꂱꃔꑼ“ꃄꌬꊋꋠꌠ”ꌤꃅꐛꐨꃆꂮꅇꄜꌠꅱꄻꍤꇖꈭꐨ,2019ꈎꊋꀥꇱꄉꊂꈹꄉꍞꊟ,ꌐꄉꎮꊈꉼꇬꐊꊿꍤꇖꉜꐨꀞꄻꐛꐨꅇꄜꌠꅱꄻꍤꇖ,ꀑꐱꃅ“ꃄꌬꊋꋠꌠ”ꂥꀘꇧꎭꌠꊌꐨꌆꈬ。ꊋꀥꇱꄉꅓꑘꍤꇽꌤꃅꃆꂮꅇꄜꌠꅱꄻꍤꇖ,ꍤꇽꌠꌌꈯꄜꃅꄉꌠꅓꑘꅇꎹꄹꏦꄺꀱꌠꊥꎆ。ꉻꈲꅇꎹꏦꍤꌤꃅꐛꐪꅇꄜꌠꅱꄻꍤꇖꄷꀋꁧꌐꄝꅲꇫꌠꃅ,ꏦꍤꌤꏲꅉꄹꇙꌊꋒꃅꇩꏤꌋꆀꐧꋦꄉꉻꈲꁧꀧꌋꃅꌠꏦꏤꃅꎁꍬꌬꎻ。
ꏦꃤꏤꐪꇬꈴꄉꏦꌬꍤꄻꌠꃅ。ꏦꌬꍤꄻꌤꃅꉺꏦꌋꆀꃄꄟꏡꁈꄻꐛꒆ,ꋍꏢꋍꏢꃅꏦꃤꏤꐪꇬꉜꄉꍤꄻꌠꃅ,ꄚꃆꂮꐥꁆꏯꆏꏦꇨꃅꏦꃤꄹꏦꌋꆀꏦꏤꃅꎁꃄꌬꌠꄹꇙ。ꐧꐭꎆꏂꑘꊥꎆꏦꃤ、ꒉꍍꆀꄴꏮꏦꃤ、ꀊꂥꊐꌠꂘꑘꏦꃤ、ꃅꅍꊌꊥꎆꏦꃤ、ꀱꒆꉆꌠꊋꀦꏦꃤ、ꉛꑘꏦꃤꑠꏦꃤ6ꋐꃄꌬꃆꂮꍤꄻ,ꐧꐭꎆꏂꑘꊥꎆꏦꃤ、ꒉꍍꆀꄴꏮꏦꃤꏦꌬꍤꄻꅇꄜꍤꇖꌠꇬꐊꄉꌐꄝꃅꅱꄻꌠ2ꃢꃅ。ꒉꍍꆀꄴꏮꏦꃤꑠꏦꌬꍤꄻ4ꐘꌠꇬ,ꌕꁁꏯꌠꄤꎖꌠꇫꃹꇁꄉ,ꍤꄻꌠꈆꑪꐨ、ꊿꉜꐚꐨ、ꋦꒉꐨꉀꐕ。ꏣꀋꑌꃅꏦꃤꃄꌬꃆꂮꈋꍣꌠꇶꏦꀊꏀꏡꁈꀊꏀꌠꎹꎥ,ꐧꐭꎆꏂꑘꊥꎆꏦꃤ、ꎆꏂꑘꑱꐢꏦꃤ、ꅐꇐꊇꁧꏦꃤꏦꄻꊂꄤꎖꌠꃅ,ꏦꄻꁈꏤ、ꄹꏦꄐꎖ、ꏦꃤꃄꌬꌋꆀꇿꋌꅇꏮꌠꈭꏦꈴꌠꏓꐛ,ꏦꄻꌋꆀꍞꊟꌤꃅꊇꁧꉀꐕ。
ꇖ、ꐊꑷꃅꊋꀥꇱꄉꁧꎁꏦꈴꃅꎁꃅꌠꌤꃅꄹꏦꉺꏦꋈꄻ
ꇩꏤꑭꊂꏓꄊꁧꎁꆹꇩꏤꌅꈌꌤꏲꅉꀊꂥꇊꀊꂥꌠꇬꐊꊿꉬ。ꁧꎁꃤꌅꈌꁌꒉꌠꆹꏓꂱꃤꌅꈌꁌꒉꌠꉬ；ꁧꎂꏦꃤꈴꄉꃅꎁꃅꌠꏦꀧꌠꆹꏓꂱꑱꏲꃥꌋꐛꌠꌅꈌꈲꁧꏦꀧꌠꉬ。ꑠꅹ,ꎮꊈꉼꆏꇩꏤꑭꊂꏓꄊꁧꎁꌤꃅꌠꊋꀥꇱꌋꆀꄻꃪꌠꃆꂮꏁꁈ35ꐘꏤꄻꄉꀐ,ꀊꅰꉾꃪꃅꁧꎁꏦꃤꈴꄉꃅꎁꃅꌠꊋꁈꄏꌋꆀꏦꀧ。
ꎔꎗꃅꁧꎁꇖꑘꌋꆀꇖꐨꀞꄻꋒ。ꊯꌕꈭꇩꏤꑭꊂꏓꄊꃀꑍꃢꌠꈿꄮꇬꁧꎁꄜꎼꇁꌠꇖꑘꌋꆀꇖꐨꆏ,ꇩꏤꑭꊂꏓꄊꌐꁨꊈꑼꉼꆏꏦꃤꇬꈴꄉꍤꇖ,ꄚꃆꂮꐥꌠꊪꀞꌤꃅꅉꆏꄽꂫꐛꐨꌋꆀꈴꎁꐯꇯꌌꀋꉬꀋꉆꌠꃅꄉ,“ꌐꋉꄉ”ꐮꑌꑲ,“ꐮꃀꄉ”ꐮꈴ,ꐳꃅꁧꎁꌋꆀꂴꌋꌠꌤꃅꅉꏭꀞꄻꐛꐨꌋꆀꄽꂫꐛꐨꄛꇰ。ꍗꑮꄨꏮꌊꍤꇖꎻꌠꁧꎁꇖꑘ491ꐘꌠꉬꇮꃅꀞꄻꌐꀐ,ꄚꈐꏭꇖꑘ27ꐘꇬꃆꂮꐥꌠꏦꄻꐘꃆ12ꐘꌌꍤꇖꄉꉌꃹꈴꀐ,ꇖꑘ56ꐘꇬꃆꂮꐥꌠꏦꄻꐘꃆ9ꐘꆏꄜꌊꍤꇖꀐ,ꇖꑘ191ꐘꇬꃆꂮꐥꌠꏦꄻꐘꃆ65ꐘꆏꌌꏦꄻꄐꎖꅀꎖꄎꌠꇬꇱꄉꀐ。ꇖꐨ8160ꐘꆏꏮꌊꊪꀞꌤꃅꅉ193ꁯꁳꀞꄻꎻꄷꀋꁧꁧꎁꏭꅇꀱ,ꈀꄜꎼꇁꌠꌤꃆꌌꂥꀘꀐꌠꅀꎖꄎꄉꋍꁘꋍꁘꃅꂥꀘꂿꄷꌠꆏꇖꐨꈁꉬꃷꁨꇬ71.3%ꍆ。ꊨꄻꄉꌠꀋꂿꑘꃅꍞꀞꌠꇖꐨ22ꐘꌠꆏ,ꁧꎁꇖꐨ276ꐘꌠꇬꃆꂮꐥ,ꌐꁨꊈꑼꉼ7ꂷꁳꌄꇤꄉꍞꀞ,ꃶꐚꌤꃆꑠꈨꄹꇙꄉꂥꀘꇧꎭꀐ。ꎔꎗꃅꃀꈿꌐꊬꌠꇬꁧꎁꄜꎼꇁꌠꉜꐨꇖꐨ560ꐘꀞꄻ,ꄚꈐꏭꁧꎁꈛꎂꃅꄜꎼꇁꌠ210ꐘ,ꊈꑼꍈꃀꈿꅉꇬꐊꊿꏮꎼꇁꌠ63ꐘꐥ,ꎮꊈꉼꊈꑼꏮꁵꌠ10ꐘ,ꎮꊈꉼꃀꈿꊬꌠꇬꁧꎁꄜꎼꇁꌠ277ꐘꐊ。
ꁧꎁꏦꄻꌤꃅꌠꇬꂿꄐꋊꇤꅐꇁ。ꁧꎁꇖꑘꇖꐨꇬꈴꄉꏦꄻꐘꃆꎥꃪꏤꄻ,ꁧꎁꁨꌊꈛꎂꃅꏦꃤꄐꄉꌠꍤꎥ、ꄐꁱ、ꉉꊪ、ꄤꎖꑠꌤꃅꌠꇬꐊꈽꇁ。ꏓꇱꃅꐙ、ꅉꃀꃅꐙꌠꀋꂿꑘꌠꏦꃤꄐꄉꌠꍑꃑꁧꎁꈁꐥꌠꁵꄉꉜꐨꇕꅲ,ꌐꑘꐨꀉꇨꌠꏦꃤꄐꄉꌠꍑꃑꄚꃆꂮꐥꌠꌐꑘꅀꄚꁁꏯꇬꁧꎁꁳꉜꐨꇕꅲꎻ。
ꊋꀥꇱꄉꎮꊈꉼꌋꆀꁧꎁꐮꑌꑲ。ꎮꊈꉼꇬꐊꊿꁧꎁꇬꑌꑲꌠꉺꏦꄻꐛꒆ,ꌐꁨꊈꑼꉼ、ꌤꃅꊈꑼꉼꌋꆀꁧꎁꊋꀥꇱꄉꐮꑌꑲꌠꄹꇙ。ꎮꊈꉼꇬꐊꊿꆏꇶꏦꀉꑌꑵꇬꈴꄉꁧꎁꏭꑌꑲ,ꐛꃆꐛꂮꉉꄜ、ꉜꐨꅱꄻꌠꈴꈜꎵꃪꁣꀋꐥꃅꄉ,ꀊꅰꉾꃪꃅꅉꂫꊐꌠꃆꂮꐝꉅ,ꏓꂱꇳꃚꉉꄜ。ꁧꎁꆏꎮꊈꉼ、ꌐꁨꊈꑼꉼꌤꃅꌠꇬꐊꈽꌠꉺꏦꄻꐛꄻꐛꒆ,ꁧꎁ74ꑻꃢꊥꇫꌊꏦꌬꍤꄻꈽ,ꁧꎁ73ꑻꃢꁨꌊꄐꌗꍤꄻꍞꊟꌠꇬꐊꈽꇁ，ꁧꎁ298ꑼꃢꁨꌊꎮꊈꉼꃀꈿꌠꇬꐊꈽꇁ,ꁧꎁꈿꈽꇁꌠꑋꇖꃀ5ꃢꈿ。
ꑖꑟꃅꁧꎁꌋꆀꏓꂱꉹꁌꐮꑌꑲ。ꃅꄷꏓꄊꄹꇙꄉꇩꏤꑭꊂꏓꄊꁧꎁꊥꇬꌊꈛꑌꅉꇬꁧꎁꑌꑲꍉ、ꁧꎁꑱꈐꌋꆀꅉꂫꊐꌠꏦꄻꑌꑲꅉꇬꐊꈽꆹ。ꃅꄷꈁꐥꊐꌠꏓꄊꆏꁧꎁꑌꑲꍉꌋꆀꁧꎁꑱꁯ22.8ꃪꂷꄻꄉꀐ,ꁧꎁꌅꊋꍬꃅꌠꎁꃅꅉꂫꊐꌠꇬꉆꄉ、ꉹꁌꇬꊫ、ꇓꈓꇓꉈꃅꉱꑷꌐꌠꌤꃅꐽꈉꋈꄻꄉꀐ。ꁧꎁꋍꏅꌠꆹꃄꄟꀉꑌꑵꇬꈴꄉ,ꉹꁌꉜꐨꇖꐨꅱꄻꌋꆀꄛꑣ,ꉎꃆꂮꄜꐰꑟ、ꐰꃆꂮꄜꉎꇰꌠꂿꄐꀋꂿꑘꌠꋊꇤꀐ。
ꁧꎁꁧꃤꃅꏦꀧꌤꃅꑟꐨꉀꐕ。ꁧꎁ1830ꑹꊥꇬꌊꌐꄝꍤꎥ、ꍤꎖꌋꆀꍤꆫꌠꃅꄉ,ꍤꎥꅇꄜꄯꒉ91ꁬꏓꐛ。ꀋꎪꃅꁰꍋꅐꀦꌌꅉꂫꊐꌠꁧꎁꏭꉜꄉꎎ,ꋋꈓꌠꁧꎁ1900ꎖꑹꃢꏓꋧꄉꁰꍋꈽ,ꊯꌕꈭꊂꅑꅸꇁꌠꏓꐯꇯꄉꁧꎁ3200ꎖꑹꃢꁰꍋ,ꀑꐱꃅꅉꂫꊐꌠꁧꎁꄉꅍꃅꎁꃅꌠꌶꄻꉱꑷꌐꌠꃅꇫꑟ。ꏓꇲꄉꁧꎁ1254ꑻꃢꄐꁆꌊ“ꋍꃚꋍꊈꑍꑼ”ꁧꎁꑌꑲꃅꈧꌠꇬꐊꈽꆹ。ꊋꀥꇱꄉꁧꎁꂱꑱꐤꅉꌤꃅꅉꌋꆀꐮꈴ,ꁧꎁꃅꎁꍬꌬꌠꎁꃅꇎꏦꉾꃪꌠꀹꄻ。
ꇵꆅꄴꏮꋎꍅꋌꃢꇬ,ꇩꏤꑭꊂꏓꄊꁧꎁꌋꆀꃅꄷꏓꄊꁧꎁꆏꏣꀋꑌꃅꄈꍏꑷꅇꁵꌠꅇꃅ,ꄈꊈ、ꍔꃚꈁꐥꊐꌠꏲꂠꊥꇫꌠꇂꃴꄉ,ꇵꆅꄘꑣꅉꇬꄉ,ꈆꑪꎥꃪꈢꇓꀖꌠꇬꐊꈽ,ꎊꈬꇲꁵꌠꏦꀧ,ꅔꈿꏿꄉꎆꄔꋚꄔ,ꑴꇙꃅꅇꉉꁈꌞ,ꋍꑞꋍꁁꏯ、ꂱꑱꊨꏦꉆꈉꇬꄉꏣꀋꑌꃅꂿꄐꋊꇤ,ꃶꐚꃅꐨꌊꏓꂱꁧꎁꃅ、ꏓꂱꎁꃅ、ꏓꂱꁧꃤꃅꌠꁤꇅꀕꌠꂿꃆꃄꄻꀐ。
ꉬ、ꄈꌋꆀꇩꏤꉇꉻꑌꑲꌠꃅꇴꄉꉻꆼꒆꄉꉇꉻꌤꃅ
ꐊꑷꃅꑮꏣꀻꉇꉻꑌꑲꉪꇐꃄꌬ,ꏓꄊꇩꏤꉇꉻꑌꑲꌠꇬꌅꊋꂿꄐꋊꇤ,ꀒꁨꋍꁘꃅꏓꄊꉇꉻꏭꌤꃅꌠꑴꇙꐨ、ꄐꌐꐨ、ꏓꇲꐨꄻꀉꇨ。ꐯꇯꇩꏤ36ꂷꌋꆀꇩꏤꈁꐥꌠꑴꉼꏓꐊꌠꇬꄉꇁꌠꄨꊤ53ꂷꁆꍏꇩꅲꇫꇁꌠꋨꏦ,ꄨꊤ65ꂷꁆꌌꇩꏤ60ꂷꌋꆀꃅꄷꑴꉼꎀꍹ1ꂷꇬꅲꇫꒉ。
ꇩꏤꊥꃀꉇꉻꑌꑲꊌꐨꌋꆀꉜꐊꐨꐮꐊꌠꌌꂿꃆꀨꇬꄉ,ꊋꀥꇱꄉꇩꏤꑭꊂꏓꄊꌋꆀꇩꏤꈁꐥꌠꑴꉼꉾꃅꐮꎻꈴ。ꇩꏤꀉꒉꌠꐮꃆꂮꀻꎆ、ꊋꀥꇱꄉꈭꇍꇩꏤꌋꆀꃷꇎꐮꄮꉁꅉ、ꃹꅼꃅꀻꎆꇰꌠꇩꏤꌋꆀꋯꑌꇷꃅꑠꉇꉻꑌꑲꌤꃅꌐꏦꀉꒉꀊꂾꌠꃆꂮꇬꆼꒆꄉ,ꃹꅼꃅ꒔ꑞ꒔ꁁꏯꃶꐚꃅꇷꃅꌠꎁꃅꏦꃤꌋꆀꏱꁈꏦꀧꌠꇲꁵ。ꏣꀋꑌꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꄜꇰ,ꍏꇩꈝꃀ、ꍏꇩꌧꇗ、ꍏꇩꄹꏦ、ꍏꇩꁱꀕꌋꆀꇩꏲꍔꄻꃄꄻꌠꉉꄜꉉꀽ,ꋧꃅꁳꀊꅰꀉꑌꃅꍏꇩꅉꐚ,ꍏꇩꇭꍣꄈꅉꐚ,ꍏꇩꐛꐨꐧꋦꉪꏦꅉꐚꎻ。ꑍꈭꌠ“ꋍꁕꋍꈜ”ꇩꏹꇷꃅꀑꋾꉉꎥꈉ、ꑍꈭꌠꍏꇩꇩꏹꈏꃹꀊꐯꈭꃅꄉꀨꃀꑠꀋꉬꀋꉆꌠꉇꉻꑌꑲꃅꈧꅉꇬꐊꄉ,ꃹꅼꃅꄚꃆꂮꐥꌠꇩꏤꑴꉼꌋꆀꐮꈴꇷꃅ。ꏦꄻꏲꉻꁁꏯꈴꄉꄚꃆꂮꐥꌠꇩꏤꉪꎿꉈꈲꁧꌋꆀꊿꋬꂻꀧꌋꃅꌠꇤꅷꄉ,ꇩꏤꉇꉻꏭꁉꃑꌠꄐꇐꏤꁈꇬꊋꇱ。
ꉇꄅꇩꏤꑴꉼꑍꁁꏯꉺꏦꃅꐙꃅꐮꑌꑲꌠꊋꀥꇱ,ꏣꀋꑌꃅꀉꑌꁁꏯꑴꉼꌋꆀꐮꑌꑲꌠꃅꈽ。ꐯꇯꍏꇩꇩꏤꑭꊂꏓꄊꌋꆀꊉꇊꌦꑴꉼꇷꃅꊈꑼꉼꃀꉬꃢꌠꈿꌠꀞꄻ,ꃔꇩ、ꏝꀪ、ꀠꑭꑠꇩꏤꑴꉼꌋꆀꉺꏦꐯꎻꈴꌠꃅ。ꀊꏀꃅꑍꁁꏯꐮꉂꑦꊤ4ꂷꄻꄉ,ꇩꏤꑭꊂꏓꄊꌋꆀꉇꄅꇩꏤꑴꉼꇢꊭꇬꐮꉂꎀꍹꏓꐯꇯꇬ129ꂷꇬꑟ,ꉪꇩꏤꌋꆀꄚꃆꂮꐥꌠꇩꏤꎁꃅꃹꅼꃅꅲꇫ、ꉂꐪꁦꎆꇱꌠꎁꃅꊋꃤꄻꇱꄉꀐ。ꄨꁆꌌꇩꏤꈁꐥꌠꑴꉼꏓꐊ140ꈭꌠꌋꆀ141ꈭꌠꃀꀉꒉꌠ、ꇩꏤꑍꊏꂷꏓꉻꑴꍈꃀ、28ꈭꌠꑸꄠꑴꉼꉉꎥꃀ、ꇖꈭꌠꉩꑸꇩꏤꑴꍈꃀ、ꌕꃢꌠꇩꏤꃘꂷꌠꑴꍈꃀ、ꏂꏪꇩꏤꑴꉼꉉꎥꅉ、ꌕꈭꌠꊛꄉꀻꎆꉆꌠꋧꃅꑴꉼꉉꎥꈉ、ꑴꉼꋧꃅꃼꇇꃀꀉꒉꈿꅉꄐꇺꊈꑼꉼ、ꑸꄠꑴꑼꋦꈭꌋꃅꀻꎆꃀꀉꒉꌠ、ꇂꏹꑴꑼꃀꀉꒉꈿꌠꑠꃀꈿꅉꇬꈿꈽ,ꀉꑌꁁꏯꃅꈴꄉꋮꄮꌠꊋꀥꇱ。ꀻꎆꇰꌠꇩꏤꑴꑼꎥꇖꁥ、ꃏꍏꃔꇩ꒿ꇩꏤꑴꑼꎥꇖꁥ、ꂳꄆꑴꑼꎥꇖꁥꀞꄻ,ꇩꏤ14ꂷꃤꑴꑼ74ꑻꍏꇩꄉꐮꈴꌶꄻꇁ,ꇩꏲꍔꄻꎖꋪꐮꈴꐯꑌꑲꌠꊋꀥꇱ。
ꃹꅼꃅꏦꄻꐮꈴ。ꋒꐯꋒꃅꄚꃆꂮꐥꌠꇩꏤꏦꃤꌋꆀꐮꈴꇷꃅꉺꏦꌬꋒ,ꊋꀥꇱꄉꏦꄻꌧꇗ、ꄹꏦꌋꆀꃄꄻꁁꏯꐮꈴ。ꏦꄻꇮꇐꋊꍬ、ꃄꁕꋮꐊꄉꏦꄻꌠꌋꆀꉹꁌꏦꃤꀋꃀ、ꌐꈲ、ꊿꒆꆹꀋꑟꌦꌠꀧꌋꃅ、ꏲꑘꅓꀞ、ꋦꈭꀧꌋꃅꑠꏦꄻꌤꃅꌠꇬꆼꒆꄉ,ꄚꃆꂮꐥꌠꇩꏤꌋꆀꐯꇯꄉꌐꄝꍤꎥꌠꃅ。ꑴꇙꃅꉪꇩꏤꏓꂱꁧꎁꃀꀉꒉꈿꄹꏦꄜꉺ,ꏦꃀ、ꇩꉈꃼꇇꃅꇁꌠꎆꇱꏦꃤꉇꉻꏭꄜꉺꉉꀽꌠꃅꋒ,ꉪꇩꏤꎆꋌꑽꃤꐆꌠꇇꇩꍈ、ꌧꇐꅐꇐꅏꄻꌅꈌꌋꆀꒆꉻꋦꈭꀧꌋꃅ、ꀉꒉꃅꉇꉻꏭꁉꃑꑠꁁꏯꏦꄻꊌꐨꋋꈨꉉꄜ。
ꇩꏤꑭꊂꏓꄊꑭꊗꁧꎁꄨ3ꂷꏓꁆꌌꄚꃆꂮꐥꌠꇩꏤꌋꆀꃅꄷꅲꇫꒉ,ꉪꇩꏤꊿꋅꑇꇐꂘꃅꏱꁈꌋꆀꊿꋅꃄꁕꊨꏦꏲꏱꁈꄜꉺꉉꀽ,ꊿꋅꊨꏦꏲꃅꄷꎆꏣꐧꋦꀻꎆꊌꐨꉉꄜ。ꅉꂫꊐꌠꇩꏤꑭꊂꏓꄊꁧꎁ27ꑼꌋꆀꃅꄷꏓꄊꁧꎁꊥꇫꌊꇩꏤꑭꊂꏓꄊꉇꉻꏭꑌꑲꃅꈧꌠꇬꐊꈽꄉ,ꑭꄑꄉꊨꏦꄉꅍꃅꎁꃅꌠꁮꅉꌧꁇ,ꇩꏹꐧꋦꏭꍏꇩꏓꂱꑱꏲꃥꌋꄻꌠꃅꐪꑽꑌꊽꉌꐡꌠꄛꑣꀐ。
ꃘ、ꏟꈯꃅꄈꅿꏃꂠ、ꏓꂱꑱꏲꃥꌋꄻ、ꏦꈴꇩꏲꌠꁴꋭꋽꃅꋍꃱꃅꎻꌠꌭꈬꌠꇬꆼꒆꄉꑴꅉꋈꄻꌠꊋꀥꇱ
ꏟꈯꃅꄈꅿꏃꂠ、ꏓꂱꑱꏲꃥꌋꄻ、ꏦꈴꇩꏲꌠꁳꋭꋽꃅꋍꃱꃅꎻꌠꌭꈬꆹꌠ,ꐧꋦꉪꏦꍔꍞꀻꎆꌠꎂꀕꇖꐨꉬ，ꏓꂱꁧꎁꃀꀉꒉꈿꄹꏦꅿꎂꀕꇖꐨꉬ,ꉈꑴꊋꀥꇱꄉꏓꄊꄈꅿꋈꄻꌠꌋꆀꑴꅉꋈꄻꌠꂿꃆꀋꂿꑘꌠꑌꉬ。
ꄈꍏꑷꋦꒉꐨꌋꆀꏓꋧꋍꃱꃅꏃꂠꌠꀧꌋꃅ,ꄈꅿꏃꂠꌠꃅꌊꏓꄊꌤꃅꋍꑞꋌꁁꏯꇬꑟꌠꄉꀧ。ꎔꎗꃅ“ꇬꂾꉪꐨꎺꄉ、ꂿꃆꎺꈬꃅꄉ”ꌠꀨꄜꉙꂘꌠꃅ,ꌧꇗꂘꄻꌠꊋꀥꇱ,ꏓꂱꁧꃤꃅ、ꄈꅿꐩꋊꂿꃆꃅꇫꑟꌠꎁꃅꀋꆏꃅꉈꈽꌠꂿꃆꆽꎍꐨꃅꎁꐨꀉꇨꃅꑌ。ꌅꊋꍬꌬꄐꅍꌋꆀꌤꃅꑟꐨꐕꀊꂥꌠꇬꆼꒆꄉ,ꌐꄝꉉꂘꌠ6ꃢꀞꄻ。ꑮꏣꀻꊝꎻꏹꏓꂱꁧꎁꃀꀉꒉꈿꄹꏦꌭꈬꌋꆀꄻꐛꒆꌠꉪꇐꀋꂿꑘꌠꐮꈴꃀꑍꃢꀕꌠꈿ,ꃹꅼꃅꏓꂱꁧꎁꃀꀉꒉꈿꄹꏦꈆꑪꈏꐊꊈꌋꆀꃅꋊꀊꏀꋎꌠꏓꄊꌤꃅꌠꃄꄻꇖꐨꐝꉅꌋꆀꒃꌫ。ꏓꄊꄹꏦꌧꇗꎥꃪꃀꈭꆦꌤꃅꌠꃅꌐ,ꐊꑷꃅꊋꀥꇱꄉꏓꄊꌧꇗꌋꆀꃄꄻꌠꎥꃪ。
ꉹꁌꋍꏅꌠꏓꄊꌤꃅꌠꏭꊱꁨꃅꇫꐊꃅꈽꌠꍔꒉ,ꇶꏦꀉꑌꑵꌠꇬꈴꄉꉹꁌꉜꐨꅲ,ꃶꐚꃅꏓꂱꎁꃅꌅꈌꌬ、ꏓꂱꎁꃅꄉꅍꃄꌬꌠꃅꇫꑟ。ꃹꅼꃅꍏꑷꏤꐪꉆꐘꌠꌋꆀꌫꄻꏦꋧꉌꊈꃅꈴꌬꈴ,ꊋꇤꄉꇶꏦꉪꏦ、ꇛꌺꉪꏦꏢꇋ,ꏓꇲꃅꍤꎥꃅꈧꄐꁆ,ꐳꃅꏓꂱꉹꁌꈁꉪꌠꈁꉘꇉꌠꈁꃅꏾꌠꅉꐚꌋꆀꄛꑣ。ꎮꊈꉼ、ꌐꁨꊈꑼꉼꍤꎥꌠ300ꃢꀋꇈꌌꍔꆙꄉꃅ。ꅉꂫꊐꌠꏦꄻꑌꑲꅉꉹꁌꎁꃅꉪ、ꉹꁌꀑꁮꐨꏓꋧꌠ“ꎂꈴꍯ”ꂿꄐꋊꇤꅐꇁ,ꅉꂫꊐꌠꉹꁌꏦꄻꌠꇬꐊꈽꌠꈴꎁꇬꃅꈽꌠꊋꁈꄏ,ꀊꈫꈭꃅꉜꐨꇖꐨꏓꄻꉉꄜ。ꄯꒉꁱꌊꅇꅲꇁꌠꌤꃅꌠꊋꀥꇱꌋꆀꄻꃪ,ꇩꏤꑭꊂꏓꄊꌤꏲꅉꈄꏍꇬꄉꄯꒉꁱꌊꅇꅲꇁꌠꐽꈉꄻꄉ,ꄯꒉꁱꌊꅇꅲꇁꌠ8ꃪꀋꇈꐘꃢꀞꄻ,ꄚꈐꏭꁧꎁꁵꌠ178ꐘ,ꏦꃤꈴꄉꇇꈤꃅꉹꁌꇖꐨꋭꋽꌠꂥꀘꌠꄹꇙ。
ꇩꏤꑭꊂꏓꄊꌋꆀꋍꎮꊈꉼꆏꇩꏤꏦꄻꌤꏲꅉꃅꄉꇬ,ꂴꅑꄉꏦꃀꏦꃤꍬ、ꏦꃤꈴꄉꃅꎁꃅ、ꏦꃤꈴꄉꌤꀞ。ꏦꇨꃅꏦꄻꏦꃤ、ꍞꊟꏦꃤꌋꆀꎮꊈꉼꌤꇖꏦꋪꃄꌬ,ꋍꃢꋑꀋꋒꃀꈿ、ꇖꎁꋍꐘꋑꀋꋒ、ꇖꑘꋍꐘꋑꀋꋒꌠꐯꇯꏦꃤꏤꄻꄉꌠꌋꆀꏦꏤꈭꎁꇬꄐꊒꌠꄉꀧ。ꀋꎪꃅꋍꉻꃅꄉꅍꌅꈌꃄꌬ、ꋍꉻꃅꌤꃆꏤꄻꇬꎷ,ꋭꋽꃅꐊꈴꃀꈿ、ꊤꁸꄉꍤꇖꌋꆀꊤꏓꄉꍤꇖꌠꄐꁆ,ꋯꁦꍔꆙ,ꉪꏓꉻꈲ，ꉜꐨꐮꐊꌠꏓꐛ,ꋯꁦꏓꁨꄹꏦꌌꃅꎁꃅꌠꈴꎁꇬꃅꏣꈴꌐ。ꏦꏤꃅꎁꍬꌬꌠꀊꂥꅉꄉꃀꈿꃅꇏꃀꈿꍬꏦꏦꇨꃅꄉ,ꎮꊈꉼꃀꈿꈽꐨꆏ97%ꈋꉐꇬꎍꇬꎷ,ꏤꇽꌤꐘꈁꐥꌠꃅꊿꈁꐥꌠꃅꐯꇯꏤꇽꅍꇬꈴꄉ,ꏓꂱꄻꁵꄉꌠꌅꈌꌌꎃꊒꇿꋌꐥꃅꃄꌬꎻꌠꄉꀧ。
ꇩꏤꑭꊂꏓꄊꌐꁨꊈꑼꉼꈧꌠꆏꎔꎗꃅꏦꏤꄉꅍꃅꎁꃄꄻ,ꄚꃆꂮꐥꌠꇖꑘꎥꃪ、ꏤꄻ、ꍤꇖ,ꎮꊈꉼꇇꀨꄉꏦꃤꏤꄻ、ꍞꊟ、ꁧꎁ、ꉇꉻꏭꌤꃅꑠꁁꏯꂿꄐꀋꂿꑘꌠꋊꇤꅐꇁꀐ。ꐊꑷꃅꊋꀥꇱꄉꇩꏤꑭꊂꏓꄊꌤꏲꅉꍔꍞ、ꉪꇐ、ꎀꍹ、ꃅꇏ、ꍬꏦꋈꄻ,ꈏꇓꏮꉜꌠꑍꃢꍔꆙꄉꃅ,ꊋꀥꇱꄉꏢꀦꂘꀨꌋꆀꎴꏲꃨꆰꐨꄴꏮꋎꋏ,ꇖꊩꄟꃀꇇꀨꐨꌋꆀꁧꃤꃅꏦꀧꑟꐨꉀꐕ,ꄈꍏꑷꁳꉌꒊꎻ、ꏓꂱꉹꁌꁳꇫꉌꃹꎻꌠꌶꀠꌤꃅꅉꄺꑣ。
ꏓꄊꈨꏀꈋꍣꌤꃅꌠꄻꃪꌋꆀꊋꀥꇱ,ꃹꅼꃅꏦꄻ、ꍞꊟꌤꃅꈁꉬꈴꎁꄛꇰ,ꁧꎁꄉꅍꃅꎁꃅꌠꃅꇏꄛꑣ,ꃅꄷꏓꄊꌤꃅꏀꀺꃄꄻꌠꄜꉺ,ꇩꏤꁧꀦꍔꍞꄹꏦꁳꃹꅼꃅꊽꉌꂵꇬꃹꆹꎻꌠꄹꇙ。ꏓꄊꈨꏀꈋꍣꄜꉺꃄꄟꏀꀺ,ꐳꃅꍏꇩꏓꄊꊗꍞꌋꆀꍏꇩꏓꄊꈄꏍꄺꀱ,“ꀨꈁꈄꏍꊈꑠꈴꌗ”ꐮꉔꀻꎆꌠꄹꎆ。ꇩꏤꑭꊂꏓꄊꉇꉻꌤꃆꊈꑼꉼꅇꉉꊿꉺꏦꄻꄉ,ꐳꃅꉪꇩꏤꈯꄜꈲꁧꇬꃆꂮꐥꌠꌤꃆꀋꂿꑘꌠꀂꏽꉆꈉ、ꉪꐨꉉꀽ。ꎮꊈꉼꏦꄹꌤꃅꊈꑼꉼꅇꉉꊿꉺꏦꄻꄉ,ꏓꂱꉹꁌꏭꄚꃆꂮꐥꌠꏦꃤꌤꃆꐛꐨꅇꏮ。
ꃅꄷꏓꄊꎮꊈꉼꄻ40ꈎꈭꏝꐛꌠꎺꄅꑋꇖꃀ、ꌜꊐꌠꏓꄊꏦꄻꌤꃅꏮꈴꃀ、25ꃢꌠꇩꏤꑭꊂꃅꄷꏦꄻꌤꃅꑋꇖꃀꈿꄉ,ꎔꎗꃅꑮꏣꀻꊝꎻꏹꀋꂿꑘꃅꄐꌐꉌꊈꌶꄻꃄꌬ,ꊋꀥꇱꄉꌤꃅꐮꑌꑲ,ꌤꃅꎖꋪꌌꐮꈴ,ꌤꃅꏓꊋꏓꐛ,ꐯꇯꃅꋊꀊꏀꋎꌠꏓꄊꌤꃅꌊꉾꃪꌶ。
ꁧꎁꊈ!
ꇩꏤꑭꊂꏓꄊꎮꊈꉼꌤꃅꊌꐨꆹ,ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ,ꇩꏤꑭꊂꏓꄊꁧꎁ、ꎮꊈꉼꇬꐊꊿ、ꌐꁨꊈꑼꉼꈧꌠꇬꐊꊿꌋꆀꇩꏤꑭꊂꏓꄊꌤꃅꅉꌤꃅꊿꄉꅍꃅꎁꃅ、ꎬꅧꃅꌤꃅꄉꊌꅜꌠꉬ,ꇩꃷꑼ、ꇩꏤꍞꊟꍤꄻꊈꑼꉼ、ꏓꂱꃔꑼꀊꂥꇊꀊꂥꊐꌠ、ꏓꂱꏦꍤꑼꀊꂥꇊꀊꂥꊐꌠꌋꆀꃅꄷꈁꐥꊐꌠꏓꄊꌋꆀꋍꎮꊈꉼꑖꑟꃅꐮꐊꈽ、ꊋꇤꏡꇤꄉꐊꃅꌠꄽꂫꊌꐨꉬ,ꇩꏤꑭꊂꊿꋅꈁꐥꌠꏓꂱꋒꐯꋒꃅꇫꉌꒊ、ꀉꇨꃅꊋꁈꄏꄉꊌꅜꌠꉬ。ꄚꇬꄉ,ꉢꇩꏤꑭꊂꏓꄊꎮꊈꉼꎁꃅꄸꈐꃅꈀꎭꀕꀐ！
ꎮꊈꉼꌤꃅꌠꇬꐮꍣꐨꌋꆀꀋꇎꀋꂪꅉꈨꐥꑴꌦ,ꀋꉬꀋꉆꌠꆏ:ꏦꄻꌤꃅꌠꇬꀨꎍꂿꄐꋊꇤꀋꇎ,ꏦꄻꊇꁧꀒꁨꋍꁘꃅꉀꐕꄻꅐ；ꍞꊟꌤꃅꌠꄻꐛꒆꄻꅐ,ꍞꊟꃶꐚꇿꋌꀒꁨꋍꁘꃅꀉꇨꇁꄻꅐ；ꁧꎁꏦꃤꈴꄉꃅꎁꃅꌠꇬꁧꃤꃅꌠꌤꃅꑟꐨꉀꐕꄻꅐ,ꄚꃆꂮꐥꌠꉺꏦꏁꁈꀒꁨꋍꁘꃅꑭꋧꃅꃅꇫꑟꄻꅐ;ꏓꄊꎀꍹꄹꏦꌋꆀꌤꇖꏦꋪꀒꁨꋍꁘꃅꄻꐛꒆꄻꅐ,ꌤꏲꅉꌤꃅꑘꅐꐨꀒꁨꋍꁘꃅꉀꐕꄻꅐ。ꎮꊈꉼꆏꆺꀋꒉꃅꁧꎁꌋꆀꋍꑞꋍꁁꏯꉜꐨꇖꐨꅱꄻ,ꀋꆏꃅꋍꑞꋍꐘꌤꃅꌠꊋꀥꇱꌋꆀꄻꃪꌶ。
ꁧꎁꊈ!
ꄈꅿꊯꈬꈭꇖꃢꐊꈴꃀꈿꉻꑫꆏꉪꇩꏤꇩꏤꄹꏦꌋꆀꇩꏤꏱꄻꉻꑫꊌꐨꀉꒉꐯꀉꒉꌠꌋꆀꄇꇖꀕꃅꂱꎆꅑꌠꏓꈹꄉ,ꃅꋊꀊꏀꋎꌠꍏꇩꐛꐨꐧꋦꉪꏦꄹꏦꌭꈬꌋꆀꄻꐛꒆ、ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꏭꋾꊐꄐꄻꌋꆀꐊꑷꃅꄐꁆ。ꏓꂱꁧꎁꃀꀉꒉꈿꄹꏦꆹꍏꇩꐛꐨꐧꋦꉪꏦꄹꏦꇬꀋꂿꑘꌠꄹꁆꉬ,ꇩꏤꏱꄻꉻꑫꌋꆀꏱꄻꄐꊋꄘꄏꌠꁧꀦꍔꍞꄹꏦꉬ。ꍏꇩꀊꏀꄻ70ꈎꐛꊂꅑꅸꇁꌠ,ꍏꇩꏓꂱꆏꇩꏤꐳꃅꀻꎆꐛꐈꌠꇬꄉ,ꀊꅰꀊꅰꃅꅉꐚꇁꌠꆏ,ꏓꂱꁧꎁꃀꀉꒉꈿꄹꏦꉾꃪꐨꀉꒉꐯꀉꒉꌠꌋꆀꀑꇬꊋꃤꀉꇨꐯꀉꇨꃅꐥ。ꉪꊇꆏꈍꄮꇬꑌꏓꂱꁧꎁ꒜ꀉꒉꈿꄹꏦꌭꈬꌋꆀꄻꐛꒆꇬꎷ,ꀋꆏꃅꏓꂱꁧꎁ꒜ꀉꒉꈿꄹꏦꃄꄻꐛꐨ、ꃅꋊꐛꋲꐨꀉꑌꃅꁦꎆꇁ,ꄹꏦꂱꎆꅑꐨꆹꏮꌊꇩꏤꏱꄻꇿꋌꐛ,ꏓꂱꁧꎁ꒜ꀉꒉꈿꄹꏦꇬꈴꄉꇩꏤꌋꆀꊿꋅꊫꂫꃰꇌꏟꈯꀕꃅꌭꏓꂱꇇꈐꊐ。
ꋌꊂꋍꊭꇬꂿꃆꀋꉬꀋꉆꌠ
2020ꈎ,ꉪꊇꄈꆹꏓꂱꏃꂠꌊꉐꈎꉈꈽꁻꌐꇬꂾꂶꌠꃅꇫꑟꂿꄷꌠꉬ。ꀋꃋꋋꇅꇬ,ꉇꉻꋦꈭꌼꇪꇨ,ꇩꈐꄺꀱꀻꎆꎍꐽꌠꂿꃆꊋꋠꐯꊋꋠ,ꏓꄊꌤꃅꌠꆹꐛꐪꀊꏀꇖꐨꀊꏀꌠꀉꑌꈨꊝ。ꎮꊈꉼꆏꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ,ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ,ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꃄꌬ,“ꇖꑵꉪꉻ”ꀉꇨꇁ、“ꇖꑵꑴꑇ”ꌠꌭꈬ、“ꑍꑵꀧꌋꃅ”ꌠꃅꇫꑟ,ꄈꅿꏃꂠ、ꏓꂱꑱꏲꃥꌋꄻ、ꏦꈴꇩꏲꌠꌌꋭꋽꃅꏓꋍꃱꃅꌠꌭꈬꇬꎷ,ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꇬꆼꒆꄉ,ꏓꇲꃅ“ꉬꑵꋍꉻ”ꀑꐱꄐꉻꄹꎆꌠꇬꆼꒆꄉ、ꋮꄮꃅ“ꇖꑵꐊꑷ”ꄐꇐꄐꉻꄹꎆꌠꇬꇇꀨ,ꎭꑆꇔꈢꇓꀖꁻꌐꂿꃆꃛꄉꂫꋓ、ꐊꑷꃅꊼꇅꌣꈚꌠꐧꋦꋉꐛꌠꇬꆼꒆꄉ，ꏓꇲꃅꇵꆅꄴꏮꋎꍅꌠꌋꆀꎆꏣꐧꋦꀻꎆꌤꃅꌠꄹꎆ，ꎍꐽꌠꇬꄉꁨꆹꌠꌤꃅꀑꐱꅉꃀꉉꈌꌭꈬꇬꎷ,ꏦꃤꇬꈴꄉꃅꎁꃅꋒ,ꏓꄊꌤꃅꌠꀋꆏꃅꊌꐨꀊꏀꀻꎆꐨꀊꏀꌠꊌꅜꌠꄹꇙ。
ꎼꈎꅑꅸꇁꌠ,ꄈꍏꑷꀑꐱꄐꇺꌠꇬꈴꄉ,ꎮꊈꉼꋍꑞꋍꐘꌤꃅꌠꊱꁨꐥꃅꄹꎆ。ꊁꁘꌠꌤꃅꄐꁆꀋꉬꀋꉆꌠꆏ:
(ꋍ)ꏦꃀꐊꑷꃅꃄꌬꌠꄉꀧ。ꏦꃀꉉꀽꈭꎁꉺꏦꃅꇫꑟ。ꏦꃀꇬꄐꊒꐨꍤꄻꌤꃅꌠꄹꎆ。ꊋꀥꇱꄉꅺꇰꁱꄀꍤꄻꄹꏦꌋꆀꄐꊋꋈꄻ,ꏦꇨꃅ《ꏦꇗ、ꏦꌬꉉꀽꅺꇰꁱꄀꍤꄻꌤꃅꏡꁈ》ꃄꌬ，ꅺꇰꁱꄀꍤꄻꈴꌗꐽꈉꄐꊋꄻꐛꒆ,ꊋꀥꇱꄉꑴꇙꃅꍤꄻꌋꆀꌐꐘꃅꍤꄻ。ꏦꃀꄜꉺꉙꂘꌠꃅꋒ,ꏦꃀꅇꏤꒃꌋꆀꇩꏤꏦꃀꋩꑍꃄꄻꌠꊥꇫꋒ。ꏦꃤꈴꄉꑣꇤꏲꉪꂱꏲꌠꌭꈬꇬꎷ,ꏦꃀꌋꆀꅉꀨꏦꃤꏤꄻꄉꌠꏦꃀꄹꏦꐥꀹꀧꌋꃅ,ꇩꏤꑭꊂꏓꄊꎮꊈꉼꅉꀨꏦꃤꉉꀽꄹꏦꄻꐛꒆ,ꇩꏤꁁꏯꈴꄉꑣꇤꇣꋲꏱꅉꐎꇩꏤꋬꂻꀧꌋꃅꌠꏦꃤꄹꏦꌋꆀꃄꌬꉺꏦꄻꐛꒆ，ꐳꃅꄚꃆꂮꐥꌠꏦꄻꌠꄹꎆ。ꄠꃪꏭꌤꃅꌠꏱꁈꀉꒉꀊꂾꌠꌭꈬ，ꍏꇩꋍꂷꌠꏥꏦꌭꈬ,ꀋꎪꃅ“ꄠꃪꄂꋦ”ꌠꁷꐞꊋꃤꏭꁏꌋꆀꏢꑲꄉ,“ꈬꑍꉜꐊ”ꅉꃀꀂꏽꄉꎿꋮꑍꄷꐮꃆꂮꄮꐽꃅꀻꎆꌠꄹꇙ。
(ꑍ)ꀋꉬꀋꉆꁁꏯꏦꄻꌠꊋꀥꇱ。ꎼꈎꏦꄻꌤꃅꂿꃆꀉꇖꐯꀉꇖ,ꊇꁧꌋꆀꑘꅐꐨꐮꃆꂮꒃꉇꋒ,ꀊꅰꉾꃅꏓꄊꏦꄻꌤꃅꌠꇬꀨꎍꂿꄐꋊꇤ，ꑭꋧꈴꐨ、ꊒꌸꐨ、ꄐꊒꐨꉀꐕꌠꇬꉜꄉꊋꇤ,ꋍꐘꄻꆏꋍꐘꃅꇫꑟꌠꄉꀧ。ꊇꁧꀊꂥꃅꀻꎆꌠꄹꇙꌠꇬꆼꒆꄉ,ꍤꏦꀧꌋꃅꏦꃤ、ꑣꋂꄖꄑꌄꆣꊥꎆꏦꃤ、ꏤꃷꎊꈬꏦꃤ、ꉰꇂꄿꐨꃼꇇꃅꌠꈜꀸꏦꃤꏤꄻ，ꌐꈲꏦꃤꑠꄺꀱ。ꉹꁌꐥꐨꏦꀧꄹꏦꄻꐛꒆꌠꇬꆼꒆꄉ,ꄉꉻꁦꎴꆄꄻꁁꏯꏦꄻꌠꌌꑓꅐꎑꃅꄉ,ꇙꀕꆄꄵꆄꏮꏦꃤ、ꇈꐥꇙꀕꀧꌋꃅꏦꃤ、ꇵꆅꄴꏮꏦꃤ、ꇩꏤꃅꋮꁦꎴꆅꍤꏦꃤ、ꉘꀋꇉꃅꌤꅐꌠꊜꄻꏦꃤ、ꃅꑘꂘꑘꏦꃤꄺꀱ，ꐧꋦꈭꋏꇇꀨꏦꃤ、ꎞꆏꂽꑼꏦꀧꏦꃤꑠꏤꄻ。ꇩꏤꋬꂻꌋꆀꐧꋦꏱꄻꌠꇬꆼꒆꄉ,ꒆꇐꋬꂻꏦꃤ、ꊨꏦꈴꌗꀧꌋꃅꏦꃤ、ꃷꁨꊫꌐꋬꂻꏦꃤꏤꄻ，ꅓꑘꏦꃤꄺꀱꄐꄉꌠ（ꊯꊪ）ꉌꃹꈴ，ꏲꑘꅓꀞꏦꃤ、ꏲꑘꇕꀱꏦꃤ、ꋬꂻꏱꄻꅓꀞꏦꃤ、ꏓꂱꃶꍋꏢꍤꏦꃤꑠꄺꀱ。ꐳꃅꉪꇩꏤꏦꃤꏱꁕꉈꌬꉆꌠꏦꃤꉻꑫꋈꄻꌠꇬꆼꒆꄉ,ꉇꅐꏱꍅꏦꃤꏤꄻ，ꎆꋌꁏꏦꃤ、ꏓꂱꑴꉴꏦꃤ、ꃼꇇꑘꑴꉴꏦꃤ、ꄜꏂꀧꏦꃤꑠꄺꀱ。ꏓꂱꑱꏲꃥꌋꄻꌠꄹꏦꉻꑫꄻꐛꒆꌠꇬꆼꒆꄉ,ꇩꏤꑭꊂꏓꄊꎀꍹꏦꃤꌋꆀꌤꇖꏥꏦ、ꌊꄻꏦꃤ、ꇩꏤꁈꁧꏦꃤꑠꄺꀱ。ꉹꁌꏦꃤꀋꃀꄜꉺꌋꆀꃄꌬꌠꌤꃅꋒ。ꉈꑴꐊꑷꃅꃹꅼꃅꄺꀱꌠꈉꐨꇬꈴꄉ,ꌅꈌꁵꄻꐰꏤꌋꆀꄺꀱꐰꏤꑠꄚꃆꂮꐥꌠꏦꄻꌤꃅꋒ,ꄈꍏꑷꏤꄻꄉꌠꏦꄻꂿꃆ、ꎆꏣꐧꋦꀻꎆꃅꇴꄉꉻꃆꂮꐥꌠꏦꄻꂿꃆꐛꒆꃅꃅꌐꌠꄉꀧ。
(ꌕ)ꏦꃤꇬꈴꄉꍞꊟꌤꃅꋒ。ꍞꊟꄹꏦꉺꏦꄻꐛꒆ,ꄈꍏꑷꁈꏤꄐꁆꌠꃅꇫꑟꌠꄉꀧ,ꏦꃀꏦꃤꇿꋌꐥꃅꌫꄻꌠꄉꀧ。ꄈꌋꆀꇩꏤꌤꃅꄐꁆꀉꒉꀊꂾꌠꇬꏓꌵꄉ,ꂴꍞꊟꐘꃆ29ꐘꄐꁆꄉꀐ。ꐊꑷꃅꊼꇅꌣꈚꌠꐧꋦꋉꐛꌠꇬꆼꒆꄉ,ꈢꇓꀖꀉꒉꌕꐘꌠꃅꋒ,“ꃘꎍꐽ”ꌠꌤꃅꋒ,“ꃘꏦꀧ”ꌠꂿꃆꃅꇫꑟ，ꏀꀺꄹꇙꀻꎆꄐꉻꃅꇫꑟꃆꂮꑠꌤꃅꅇꄜ16ꏢꅱꄻꍤꇖ，ꀒꁨꋍꁘꃅꊋꀥꇱꄉꄐꌗꌗꂫꇽꌠꍤꄻꍞꊟꌋꆀꇩꁨꁨꇐꏱꄻꍞꊟ。ꎮꊈꉼꄚꃆꂮꐥꌠꏤꐪꌋꆀꇈꐥꇙꀕꀧꌋꃅꏦꃤ、ꊖꆊꍍꆀꄴꏮꏦꃤ、ꂄꃅꎔꏿꏦꃤ、ꎃꀋꊒꃅꋓꅔꌠꏭꁏꏦꃤ、ꄉꉻꁱꀕꁧꃤꃅꏦꀧꏦꃤ、ꂿꑘꏸꏧꈴꊥꎆꏦꃤꑠꏦꃤ6ꋐꃄꌬꃆꂮꍤꄻ。ꊖꆊꍍꆀꄴꏲꏱꄻ、ꍤꎖꍤꅐꇁꌠꌤꃆꑓꅐꎑꌠꄺꀱꐛꐨꇬꆼꒆꄉꌐꄝꅲꇫꌠꃅ。“ꊯꇖꉬ”ꄐꎖꐱꀨꁰꄻ、ꊿꋅꋯꑌꀻꎆꀹꄻꌤꃅ、ꐧꋦꄜꏂꀧꄹꏦꄺꀱꑠꇬꆼꒆꄉ,ꌐꄝꍤꎥꌠ5ꐘꃅ。ꎼꈎ,ꉪꇩꏤꆹꐊꑷꃅꊼꇅꌣꈚꌠꐧꋦꋉꐛꌠꂫꋓ、ꃛꄉꎭꑆꇔꈢꇓꀖꌠꌤꑘꇰꀋ꒜ꌠꃅꌠꆹ,ꀋꎪꃅꁱꍏꉸꊿꋅ、ꃰꊿꐩꋊꁤꇅꀕꌠꐩꋊꄯꒉꇬꄀꄉꎂꀕ。ꎮꊈꉼꆏꏟꈯꀕꃅꀉꒉꀊꂾꌠꄐꇐꏤꁈꄐꉻꋋꏢꆼꒆꄉꍞꊟꌤꃅ,ꉐꈎꉈꈽꁻꌐꉘꃀꂶꌠꏤꈉꈐꃅꑆꊋꅐꌞꄡꑟꌠꃅꇫꑟ。
(ꇖ)ꁧꎁꏦꃤꇬꈴꄉꃅꎁꃅꌠꊋꁈꄏ。ꁧꎁꑌꑲꉺꏦꄻꐛꒆ,ꇩꏤꑭꊂꏓꄊꁧꎁꌤꃅꌠꊋꀥꇱꌋꆀꄻꃪꌠꃆꂮꏁꁈꑭꋧꌠꃅꇫꑟ,ꑖꑟꃅꎮꊈꉼꌋꆀꁧꎁ、ꁧꎁꌋꆀꏓꂱꉹꁌꐮꑌꑲ。ꊋꀥꇱꄉꁧꎁꑴꅉꋈꄻ,ꀋꆏꃅꉪꇐꍔꍞꑞꅉꌋꆀꃅꎁꃄꄻꌠꄾꌦꋩꃅꃅꌠꊋꃤꉀꐕ。ꁧꎁꇖꑘꇖꐨꄜꎼꇁ、ꀞꄻ、ꅇꏮꌠꈭꊭꇬꌤꃅꌠꃅꇫꑟ,ꁧꎁꇖꐨꅇꀱꌠꂥꀘꉺꏦꄻꐛꒆ，ꊂꈹꄉꍞꊟꀞꄻꌠꒃꋒꉇꋒ。ꁧꎁꆏꎮꊈꉼ、ꌐꁨꊈꑼꉼꌤꃅꈽꌠꍔꒉꄷꀋꁧꄺꀱꌊꉾ,ꎔꎗꃅꁧꎁꄜꎼꇁꌠꉜꐨꇖꐨꅱꄻꌋꆀꈺꌬ。ꏓꇲꄉꁧꎁꍤꆫ、ꍤꎥꑠꌤꃅꋒ,ꁧꎁꌶꄻꁰꍋꌠꄐꊒꐨꇿꋌꐥꐨꀉꇨꇁ。ꐳꃅꌅꊋꍬꌬꈴꌗꈴꐽꈉꋈꄻ。
(ꉬ)ꏣꀋꑌꃅꉇꉻꌤꃅꌠꍔꆙ。ꋒꐯꋒꃅꏓꄊꉇꉻꏭꑌꑲꁁꏯꐋꀋꌡꂱꎆꅑꐨꋊꇤꅐꇁ,ꄈꌋꆀꇩꏤꉇꉻꑌꑲꃅꇴꄉꉻꁧꃤꃅ。ꊋꀥꇱꄉꀊꂥꊐꌠꐮꑌꑲ,ꌐꁨꊈꑼꉼ、ꐮꉂꑦꊤ、ꌤꃅꏲꉻꉇꉻꏭꑌꑲꌠꇬꂿꄐꋊꇤ。ꎍꐽꃅꉺꏦꐮꈴꌠꄹꎆ,ꏣꀋꑌꃅꑴꉼꀉꑌꁆꏯꇷꃅꌠꇬꐊꈽ，ꄉꉻꁦꎴꆄꄻꁁꏯꏦꄻꐮꈴꌠꊋꀥꇱ，ꇩꏤꐮꃆꂮꀻꎆꌠꌋꆀꋍꑞꋍꁆꏯꃶꐚꃅꇷꃅꌠꊥꎆ。
(ꃘ)ꊋꀥꇱꄉꎮꊈꉼꑴꅉꋈꄻ。“ꇬꂾꉪꐨꎺꄉ、ꃅꎁꂿꃆꎺꈬꃅꄉ”ꌠꀨꄜꉙꂘꊌꐨꄻꈫꈈꌋꆀꃹꅼꈴ,ꃹꅼꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌶꄻꃄꌬ。ꎔꎗꃅꍏꑷꏤꐪꉆꐘꌠꌋꆀꃄꌬꏦꋧꉌꊈꃅꈴꌬꈴ,ꌤꃅꃅꇏꄻꃪ,ꑖꑟꃅꉹꁌꑌꑲ,ꃹꅼꃅꍤꄻꎥꃪꌠꃅ。ꌤꇖꈭꎁꌋꆀꌤꃅꉺꏦꄻꐛꒆ。ꊋꀥꇱꄉꏓꂱꁧꎁꃀꀉꒉꈿꄹꏦꌧꇗꎥꃪ,ꏓꄊꈨꏀꈋꍣꌤꃅꌠꄻꃪ。ꋒꐯꋒꃅꌐꁨꊈꑼꉼꂿꄐꋊꇤ,ꃶꐚꃅꊋꀥꇱꄉꇩꏤꑭꊂꏓꄊꌤꏲꅉꋈꄻ。ꄈꍏꑷꏱꁈꌐꏦꀉꒉꀊꂾꌠꌋꆀꁈꏤꄐꁆꌠꃄꌬꇫꑟꌠꇬꆼꒆꄉ,ꊋꀥꇱꄉꃅꄷꏓꄊꌋꆀꐮꑌꑲ,ꏓꄊꌤꃅꌠꉻꄜꃶꐚꇿꋌꄻꀉꇨꇁ。
ꁧꎁꊈ!
ꐊꑷꃅꊼꇅꌣꈚꌠꐧꋦꋉꐛꌠꊋꐛꂯꄉ,ꊿꋅꀱꌄꆣꇁꌠꊫꂫꁤꇅꀕꌠꆹꊿꋌꎼꊋꇤꏡꇤ。ꉪꊇꆏꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ,ꊋꏓꉌꋍꏢ、ꋦꄉꁨꆹ,ꈊꅔꎸꅒ、ꉘꇉꌠꇢꀋꏿ,ꍏꇩꐛꐨꐧꋦꉪꏦꄹꏦꌭꈬꌋꆀꄻꐛꒆ、ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆ,“ꋍꉐꈎꑍꂷ”ꌠꉈꈽꁻꌐꃅꇫꑟ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꊋꇤꄉꉈꈽ!
（ꑝꉸꎹꀙꏢ5ꆪ31ꑍꈨꇁꇬ）
