ꍔꃚꌤꃅꅇꄜ
——2019ꈎ3ꆪ5ꑍꊯꌕꈭꇩꏤꑭꊂꏓꂱꁧꎁꃀꀉꒉꑍꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꍔꃚꌤꃅꃆꂮꅇꄜ，ꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꑌꉜꐨꄜꎼꇁꅊꇈ。
ꋍ、2018ꈎꌤꃅꐨꉪꀱ
ꋌꃀꋋꈓꆹꐊꑷꃅꄈꅿꃀꀉꒉꊯꈬꃢꌠꉌꊈꃄꌬꌠꇫꇬꈒꌠꉬ，ꋋꈭꍔꃚꏦꈴꄉꅍꃅꋭꌠꃅꌠꉘꃀꈒꌠꉬ。ꉪꇩꏤꀻꎆꌠꂾꎍꌠꆏꀉꑌꈎꇬꀁꑌꃅꐥꌠꇩꈐꇩꉈꊋꋠꌼꇪꇨꌠꃅꒊꃅꇁꉬ，ꎆꏣꀊꏀꃅꀁꋌꊰꒉꌠꍅꊋꇫꅐꇁ。ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏲꂠꌠꇂꃴꄉ，ꇩꏤꑭꊂꊿꋅꈁꐥꌠꏓꂱꆏꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꂘꅍꃅꄉ，ꊋꇤꄉꀒꁨꆹ，ꈢꇓꀖꊋꋠꅍꑣ，ꋋꈓꌠꎆꏣꐧꋦꀻꎆꁻꌐꂿꃆꀋꉬꀋꉆꌠꃅꇫꑟ，ꐊꑷꃅꊼꇅꌣꈚꌠꐧꋦꋈꄻꐛꂫꋓꌠꁨꎆꐨꀊꏀꌠꀉꒉꀊꂾꌠꊌꅜ。
——ꎆꏣꒈꇁꌠꋭꋽꅉꇬꎍ。ꇩꈐꒃꅐꈁꉬꁌꐨ6.6％ꉀꎆ，ꈁꉬꃷꁨ90ꃪꂡꂷꂵꅐ。ꎆꏣꐳꐨꌋꆀꄆꌬ、ꎊꈬꎞꎭꑠꐥꇐꃷꁨꌐꁧꐮꊒꐯꄎ。ꀀꊿꌬꈧꁌꏤ2.1％ꉀꄓ。ꇩꏹꊌꌬꐨꀑꐱꃅꇬꐮꆽꏣ。ꇓꈓꏦꎫꀊꏀꃅꃅꑘꊌꌠꊿ1361ꃪꑻꁦꎆ、ꍤꄻꎼꇁꌠꃅꑘꀋꊌꐨꎍꐽꃅ5％ꀑꂪꇬꑞꅉꊼꇅꀁꂥꅉꇬꐕꄉ。ꊻꂷ14ꂡꑻꀋꇈꐥꌠꀻꎆꇰꌠꇩꏤꀉꒉꂷꆹ，ꊼꇅꃅꑘꊌꋒꌠꃅꇫꑟꀐ。
——ꎆꏣꐛꉻꀋꆏꃅꄻꃪ。ꌬꈧꌠꎆꏣꉀꎆꇬꈺꇙꌠꂿꄐꀒꁨꋍꁘꃅꉀꐕ。ꁧꃤꃅꑘꆹꎆꏣꉀꎆꏭꅐꌞꐨ60％ꇬꑟꆹ，ꇮꇐꀊꂥꌠꅐꑘ、ꉁꈾꄺꂡꑘꐳꀥꇱꆹꌠꄇꇖꀕꃅꎂꀕꇮꑘꏭꀋꋌ，ꂿꑘꉈꑴꋚꅗꒉꅗ。ꌗꂓꇩꈐꒃꅐꈁꉬꁌꐨꃸꌬꐨ3.1％ꀁꋌꊰ。ꊇꁧꌋꆀꊌꐨꈲꁧꐪꊛꄉꉀꐕ。
——ꀻꎆꇙꊋꀊꏀꌠꐥꐳ。ꍤꊉꇖꉸꌠꑠꀉꒉꀊꂾꌠꈆꑪꇮꇐꏀꀺꊌꐨꊛꄉꅐꇁ。ꀊꏀꌠꅐꑘꍄꑐꃅꀻꎆ，ꋊꃅꅐꑘꐳꃅꉹꏮꊐꐕ。ꋍꏅꑘꀺꋍꉻꏀꀺꌠꃹꅼꃅꄹꎆ，ꋍꑍꌠꐽꏡꃅꀊꏀꃅꄐꄻꌠꎆꏂꑘ1.8ꃪꁯꇬꐂ，ꃷꎏꀨꄜꈁꉬꃷꁨ1ꂡꁯꇬꐂ。ꇙꊋꀊꏀꌠꇬꊎꃹꅼꃅꒃꅐꐥꐨꐤꄟ、ꍏꇩꀻꎆꊋꂫꀊꏀꋈꄻꌠꏭꄺꀱꇰ。
——ꄺꀱꁉꃑꌠꂵꅐꐨꀊꏀꌠꊌꅜ。ꇩꃷꑼꌋꆀꃅꄷꍔꃚꏲꉻꄺꀱꌠꁣꀋꐥꃅꀕ。ꀋꂿꑘꁁꏯꄺꀱꌠꑭꁘꀊꏀꌠꐕꎼꆹ，ꃷꎏꃹꉆꀋꉾꁁꏯꃷꁨꋏꄹꏦꐊꑷꃅꀕ，ꏲꑘꅧꊨꌅꈌꄝꃑ、ꄝꏲꐮꐊ、ꁧꃤꃅꌠꄻꃪꌠꊋꀥꇱ，ꀰꏢꃼꇇꃅꋦꈭꇩꏹꂓꄀꅉꀉꒉꃅꉀꐕ。ꉇꉻꏭꁉꃑꌠꑞꁁꏯꑌꍔꐯ，ꐯꇯ“ꋍꁕꋍꈜ”ꋈꄻꌠꁨꎆꐨꀋꂿꑘꃅꊌꅜ。ꉘꃀꃢꌠꍏꇩꇩꏹꈏꃹꌠꀊꐯꈭꃅꄉꀨꌠꊋꐛꃅꀞꄻ，ꉰꇂꂱꑱꄿꐨꃅꃼꇇꃅꋒꃯꉜꅉꇬꄑꋈꄻ。ꎊꈬꈏꃹꉇꅐꈁꉬꃷꁨ30ꃪꂡꂷꇬꐂ，ꃶꐚꃅꉇꎆ1383ꂡꂰꑼꌬ、ꎍꐽꃅꀻꎆꇰꌠꇩꏤꂴꇬꂾꇬꉆꎍ。
——ꈢꇓꀖꀉꒉꌕꐘꌠꇫꄟꂄ。ꈔꉆꐨꀉꒉꀊꂾꌠꄴꏮꋊꄻ，ꉻꒉꋎꐽꐨꎍꐽꃅꐙꆹ，ꎆꒉꎆꇁꒈꇁꌠꀑꐱꃅꇬꎍꐽ。ꊒꌸꃅꎭꑆꇔꌠꊋꑌꃅꄹꎆ，ꂿꑘꁡꇤꌢꎭꊻꂷ1386ꃪꑻꀁꋌꊨꒊ，ꀀꅉꆦꌢꎭꄏꐓꄉꎞꀀꌠ280ꃪꑼꐥ。ꍍꆀꄴꏮꌠꌌꄉꊋꀥꇱ，ꋧꆺꌺꐥꇐ（PM2.5）ꐊꐨꐪꊛꄉꀁꋌꊰ，ꒆꉻꌧꑳꋈꄻꌠꊌꐨꄇꇖꀕꃅꐥ。
——ꏓꂱꐥꐨꐪꊛꄉꄻꌊꉾꃪ。ꀀꊿꊻꂷꐽꏡꃅꌌꌫꄻꉆꌠꊌꐨꃶꐚꃅꇬ6.5％ꉀꎆ。ꊿꊨꏦꑴꅉꊌꐨꇗꏸꎳꄻꅉꉀꐕ，ꌐꐘꇱꄉꈎꊨꇧꎭꌠ6ꐘꄻꄉ。ꅉꀨꃀꌠꀨꎹ、ꅉꀨꆅꉁꄜꏂꀧꑠꏦꀧꊋꃤꊋꀥꇱꄉ，ꋍꑞꋍꉹꌶꅉꑱꈐꊋꋠꌶꌺꎆꃀꇇꀨꌠꊿ1ꂡꑻꃢꀋꇈꐥ。ꑲꁘꇣꁘꐛꅉꀀꑳ620ꎖꃪꂷꄺꀱ，ꂿꑘꁡꇤꑳꇤꀋꈬꀋꈈꌠ190ꃪꁯꄺꀱ。ꇓꈓꇓꉈꀀꊿꐥꐨꑞꅉꀊꏀꃅꉀꐕꌦ。
ꉪꊇꈣꒉꃅꄺꀱꁉꃑ40ꈎꈭꏝꐛꌠꋨꏦ，ꃹꅼꃅꄺꀱꁉꃑꌠꃅꐨꊌꐨꇰꀋꃀꌠꌋꆀꎖꋪꁌꇐꈤꌠꏓꄻ，ꀋꎪꃅꃅꋊꀊꏀꋎꌠꇬꄺꀱꁉꃑꌠꃅꅷꐱꁍꌠꏟꈯꀕꌠꉌꊋꉉꋊꄛꇰ，ꇩꏤꑭꊂꊿꋅꈁꐥꌠꏓꂱꊋꊡꄉꊛꄉꉈꈽ，ꉈꑴꀊꏀꌠꐩꋊꌤꑘꇰꀋꃀꌠꋈꄻ。
ꀱꂴꋋꈓꉪꀱꇬ，ꊌꐨꈝꐮꃅꊌꅜꌠꀋꉬ。ꉪꊇꂾꎍꌠꆹꃹꅼꃅꐛꐈꌠꉇꉻꋦꈭꉬ。ꎆꏣꅉꆺꈴꌠꄙꇗꌭꈢꇁ，ꀉꑌꁁꏯꉪꏦꄙꎟꌠꊝ，ꇩꏹꎆꒉꎆꇁꃷꎏꇙꈧ，ꈜꀕꇈꍏꂰꃼꇇꐮꉅꐮꌎꄉꎆꏂꑘꈨꒃꅐꀰꏢ、ꃷꎏꂴꉪꄉꌠꑠꏭꁧꏖꐨꀋꉾꌠꐥꇁ。ꉪꊇꂾꎍꌠꆹꎆꏣꉹꏮꇬꉮꐪꄇꇖꀕꌠꀉꆈꃅꋓꎭꇁꌠꉬ。ꐮꄙꐨꀉꆹꀊꏀꌠꐯꏍꎍ，ꈭꊭꃅꐙꌠ、ꐛꏦꃅꐙꌠꌤꃆꐮꄅꎍ，ꎆꏣꒈꇁꎍꐽꌠꇬꐛꐈꌠꐥ、ꐛꐈꌠꇬꐒꐪꐥ。ꉪꊇꂾꎍꌠꆹꑍꑵꊋꋠꀉꑌꑵꃅꊋꋠꌠꌤꃆꁦꎆꇁꌠꌼꇪꌠꐛꐪꐛꊂꉬ。ꎍꐽꃅꉀꎆ、ꈔꉆꐨꄴꏮꑠꑞꅉꁻꌐꀉꑌꄀꃅꇫꑟ，ꎆꏣꐧꋦꀻꎆꑠꂿꃆꀉꑌꐘꃅꌐ，ꀋꃋꋋꇅꇬꌋꆀꀊꉗꀊꎴꑠꐮꃆꂮꐥꐨꀉꑌꑵꀞꄻꋒ，ꏱꁈꌊꄻꌠꌋꆀꌤꃅꄹꎆꌠꊋꋠꐨꄇꇖꀕꃅꀉꒉꃅꁦꎆꇁ。ꇩꏤꑭꊂꀏꄩꃅꐯꇯꊋꇤꇈ，ꉪꇩꏤꎆꏣꀻꎆꌠꅉꃀꃷꁨꀊꂥꌠꀂꏽꆏꀑꐱꃅꎍꐽ、ꎍꐽꌠꇬꄉꀒꁨꆹ，ꐧꋦꃅꇷꄉꉻꎍꐽꃅꐙꇬꎷ。ꋋꆹꉈꑴꋍꃢꉉꄜꎼꇁꇬ，ꍏꇩꇭꍣꄈꏲꂠꌠꇂꃴꆏ，ꍏꇩꏓꂱꆹꊋꋠꊜꊋꈍꃅꐙꌠꄩꊋꌠꀬꅑꌠꊋꌗ、ꀑꁮꐨꌋꆀꊋꃤꐥ，ꍏꇩꃤꀻꎆꆹꌠꆏꐂꈴꀋꄐꌠꄹꇭꀋꐥꄷꌠ。
ꋍꈓꅑꅸꇁꌠ，ꉪꊇꃹꅼꃅꐋꀨꑮꏣꀻꈯꄜꃅꄉꌠꄈꍏꑷꄐꇐꏤꁈꃄꌬ，ꀋꎪꃅꎍꐽꌠꇬꄉꀒꁨꆹꌠꌤꃅꀑꐱꅉꃀꉉꈌꌭꈬꇬꎷ，ꏓꈴꇲꈴꃅꎍꐽꃅꉀꎆ、ꄺꀱꌠꊥꎆ、ꐛꉻꋊꄻ、ꉹꁌꐥꐨꈲꁵ、ꈔꉆꐨꄴꏮ，ꊝꈭꃅꍏꂰꎆꏣꃼꇇꐮꃝꐮꌎꌠꊜꄻ，ꊋꇤꄉꃅꑘꊌꌠꄻꎍꐽ、ꎆꒉꎆꇁꄻꎍꐽ、ꉇꉻꃼꇇꑘꄻꎍꐽ、ꉇꎆꄻꎍꐽ、ꎆꇱꌠꄻꎍꐽ、ꂴꉪꄉꌠꄻꎍꐽ，ꀋꉬꀋꉆꌠꆏꄚꊁꌤꋋꈨꌠꃅꀐ。
ꋍꆏꉻꒉꋊꄻꌠꏀꀺꌋꆀꄻꐛꒆ，ꎆꏣꎍꐽꃅꒈꇁꇬꎷꎻ。ꑓꏮꐛꐨꀊꏀꌠꐛꐈꀊꏀꌠꉜꄉ，ꉪꊇꀋꎪꃅ“ꀆꐒꀉꒉꃅꌌꃄꅉꒉꊎ”ꃅꐙꌠꀉꇨꃅꌾꀖꌠꀋꃅ，ꉻꒉꏱꁈꐪꊛꐨꎍꐽꐨꄝꀋꊰꃅꄉꇬꎷ，ꇢꊭꇬꋊꄻꌠꅉꃀꀂꏽꄉꊋꀥꇱꄉꍝꏤ、ꊜꋽꄮꉜꄉꋊꄻ，ꑴꇙꃅꂴꋊꄻ、ꀋꋌꀋꉬꃅꋊꄻ。ꀋꎪꃅꏣꀋꑌꌠꎆꏲꏱꁈꌫꄻ，ꊋꇤꄉꇗꏸꊨꁌꀁꋌꊰ、ꀋꇎꀋꂪꅉꅋꐛꉻꋊꄻ。ꁌꎆꇗꏸꇗꏸꍆꐨꀁꋌꋊꄻ，ꇗꏸꎳꄻꈲꊌꌠꀄꊭꐭꎆꏂꑘꈍꈐꍔꐯ，ꎥꃪꀖꁉꏀꀺꌠꊋꊡꑠꇗꏸꎴꏱꁈꄻꅐꇁ。ꋋꈓꌠꎆꏂꑘꌋꆀꊿꑴꅉꎁꃅꇗꏸꊨꁌꀁꋌꊰꌠ1.3ꃪꂡꂷꀋꇈꇬꑟ。ꏱꎆꌫꄻꐛꏦꄻꃪ，ꏱꎆꄻꇬꐓꄉꌠꀰꏢꐛꀕ，ꀋꂿꑘꁁꏯꌫꄻꌠꌌꏦꀧꄉ。ꀋꎪꃅꊋꑌꌠꎆꃀꏱꁈꌬꇬꎷ，ꎆꒉꎆꇁꄐꇺꌊꐥꄜꎆꏣꇬꊋꁈꄏ。ꎆꏓꊋꋠꎆꏓꁌꇨꌠꌤꃆꇬꉜꄉ，ꂴꊁ4ꃢꊐꄻꊭꄎꎆꐪꌌꀁꋌꊰ，ꏡꁈꀉꑌꃅꏂꄉꉹꁌꀞꄻꌋꆀꀄꊭꐭꎆꏂꑘꎆꇮꎆꈉꌠꂥꀘ，ꎆꇱꀨꊰꉀꐕꆹꐨꀑꐱꃅꍅꄉꀐ。ꇇꈤꃅꇴꀾꃷꎏ、ꎝꃆꃷꎏꐋꀋꌡꃅꇙꈧꌠꏭꊝ，ꏓꂱꀙꎆꃀꀟꆦꐨꀑꐱꃅꎍꐽ，ꉇꎆꊭꊎꄉꌠꌌ3ꃪꂡꂰꑼꈋꉐꐕꄉ。
ꑍꆏꏟꈯꃅꈢꇓꀖꀉꒉꌕꐘꌠꃅꋒ，ꂿꃆꀋꂿꑘꌠꁨꎆꐨꏣꀋꑌꌠꊌꅜ。ꈢꇓꀖꀉꒉꌕꐘꌠꌕꈎꃅꐨꄐꉻꏤꄻꄷꀋꁧꊱꁨꃅꀕ。ꎍꐽꃅꐛꉻꐨꐥꌠꆷꄿꋊꅧꌠꄹꎆ，ꊝꈭꃅꎆꒉꎆꇁꁁꏯꐔꈔꉆꌠꋍꄻ，ꃅꄷꍔꃚꎝꃆꐔꈔꉆꌠꄴꏮꋎꍅ，ꑲꅉꇤꂷꃷꎏꋊꄻꉺꏦꄺꀱꐛꒆ。ꃹꅼꃅꊒꌸꃅꎭꑆꇔꌠꄹꎆ，ꌢꎭꄏꐓꊋꃤꀥꇱ，ꎆꀉꒉꃅꇱ，ꐧꋦꌢꎭꄏꐓꌠꄻꀉꇨ，ꌢꎭꃅꄷꊨꏦꀻꎆꄐꊋꎍꐽꃅꉀꐕ。ꐊꑷꃅꃅꑆꀊꃴ、ꒉꀊꃴ、ꃄꅉꁦꎴꌠꃅ。ꊋꃤꇁꀦꌋꆀꎞꎭꐛꉻꄻꃪ。ꊝꈭꃅꒈꀑꃅꄷ“ꊖꌋꄺꀱꐞꌗꃅ”“ꊖꌋꄺꀱꄆꃅ”ꌠꄹꎆ。ꐊꑷꃅꒉꏲꌋꄹꏦ、ꎿꏲꌋꄹꏦꋈꄻ。ꐈꑭꂿꑘꁬꋌꌫꄻꐨꑍꑵꐯꇯꀁꋌꊰꌠꃅꇫꑟ。ꊋꀥꇱꄉꒆꉻꋦꈭꀧꌋꃅꍞꊟꍤꄻꌠꃅ。ꏣꀋꑌꃅꃅꌗꐛꐈꌠꏭꊝ。
ꌕꆏꃹꅼꃅꇲꁵꁁꏯꐛꉻꃅꐙꌠꄺꀱ，ꐥꄜꎆꏣꍄꑐꊋꃤꀋꆏꃅꋊꃑ。“ꂵꅐ、ꄻꄉ、ꀁꋌꊰ”ꌠꊋꀥꇱ。ꇤꎸꅍ、ꊖꌋꉹꑘꃷꎏꈴꅐꊋꊨꎭꌠꄹꎆ。ꎍꐽꃅꎆꇱꃄꄟꌬ，ꄺꂡꑘꎆꇱ、ꉹꁌꎆꇱꐳꐨꄇꇖꀕꃅꀱꄓꇁ。ꀀꊿꌬꈧꊥꎆꏱꁈꄻꌊꌬ。ꐊꑷꃅ“ꐯꏑꈄꏍ＋”ꄹꎆ，ꇮꁈꀊꏀꌠꈁꏦꀊꏀꌠꌌꋊꃅꅐꑘꄺꀱ。ꃹꅼꃅꏲꑘꅧꊨꇗꏸꊨꌫꁌꊨꌠꄹꎆ。ꏲꑘꈌꁧꌠꌤꆿꐘꃆꈨꋊꐆꇧꎭ，“ꊫꌐꊫꄳꁷꐞ”ꄺꀱꌠꇩꏤꑭꊂꃅꀕ，ꎆꏂꑘꀞꄻꄮꈉꀉꒉꃅꀁꋌꊨ，ꇮꑘꒃꅐꈌꁧꊫꌐꑵꑫꌕꁧꋊꋍꁧꈋꉐꀁꋌꊨ。ꐊꑷꃅ“ꑍꏸꈴꌋ、ꋍꄇꄜꋊ”ꍞꏲꌠꃄꌬ。ꋍꑞꋍꑵꎆꏂꑘꃆꂮꐥꌠꁌꎴꌠꎵꄻꋊꍬ，ꊋꌬ、ꈄꏍꌬꌋꆀꎊꈬꎞꎭꀨꊰꀁꋌꊰꌠꄹꇙ。ꃹꅼꃅ“ꐯꏑꈄꏍ＋ꏲꃆꁧꃤꃅ”ꌠꃅ，ꃅꄷꈁꐥꌠꐛꄟꐋꀋꌡꌠꄺꀱꃄꄟꈨꎹꎥꌌꌬꇰ，ꎆꏂꑘꌋꆀꉹꁌꌤꀞꌒꐨꀋꆏꃅꉀꐕ。
ꇖꆏꃹꅼꃅꏀꀺꈻꏁꀻꎆꄐꇐꃄꌬ，ꏀꀺꄐꊋꌋꆀꑘꅐꐨꀒꁨꋍꁘꃅꉀꐕ。ꊋꀉꒉꃅꇤꄉꏀꀺꒆꉻꄻꃪ，ꋍꑞꋍꑵꏀꀺꀨꄜꏣꀋꑌꐨꄖꄑ。ꃹꅼꃅꈆꑪꇮꇐꏲꂠꏦꉻꄺꀱ，ꀋꉬꀋꉆꈯꄜꇮꇐꈢꇓꀖꌠꄹꎆ，ꊋꀥꇱꄉꀉꒉꀊꂾꌠꈆꑪꇮꇐꅉꃀꉁꈾ、ꈆꑪꇮꇐꏀꀺꈯꄜꑠꋈꄻ。ꎆꏂꑘꇮꇐꏀꀺꀨꄜꉆꈉꄻꀉꇨ，ꎥꃪꀖꁉꌫꎆꇱꌗꈎꄻꍆꁧꉀꐕꏱꁈꍔꐯꌊꎆꏂꑘꈁꐥꌠꇬꌬ。ꑍꀺꄏꐓꃹꅼꃅꀻꎆꌠꏱꁈꏁꁈꏤꄻ。ꇮꇐꉼꏤꄉꌠꃼꇇꐛꐨ30％ꈋꉐꉀꎆ。ꈆꑪꇮꇐꀻꎆꅐꌞꐨꉀꐕꌊ58.5％ꇬꑟ。
ꉬꆏꄺꀱꁉꃑꊋꃤꀥꇱ，ꀻꎆꇙꊋꐪꊛꄉꀉꇨꇁ。ꃹꅼꃅꇩꁨꀕꇐꇩꁨꎆꏂꑘꄺꀱ，ꇩꁨꎆꏂꑘꉾꃪꃅꏓꇱꀱ、ꊈꐕꈲꎆꌠꁨꎆꐨꀊꏀꌠꊌꅜ。ꉹꁌꀰꏢꎆꏂꑘꀻꎆꇬꊝꇁꌠꊋꋠꐨꌋꆀꌤꃆꇬꉜꄉ，ꊰꇮꇱꃅꏡꁈꏂꄉꇬꇇꀨꌊꐒꅍꋊꊋꋠꌠꑣ。ꏱꎆꇗꏸꏦꉻꄺꀱꌠꄹꎆ，ꃅꐨꊌꐨꄐꌗꏲꂠꄺꀱꌠꐊꑷꃅꀕ。ꎆꒉꎆꇁꍞꏲꏦꉻꄺꀱ，ꇔꊰꍆꁧ、ꀟꄻꁌꐨꃷꎏꈴꏓꐛꉺꏦꄻꐛꒆ。ꂿꑘꂿꑘꁡꇤ、ꐧꋦꌤꑘ、ꒆꉻꋦꈭꀧꌋꃅꑠꁁꏯꄺꀱꌠꀋꆏꃅꃹꅼꎻ。ꉇꉻꏭꁉꃑꃄꄟꀉꒉꀊꂾꈨꄻꅐꎼꇁ。ꐯꇯ“ꋍꁕꋍꈜ”ꋈꄻꏃꂠꊌꐨꐪꊛꄉꋊꃑ，ꈛꁧꇩꏤꌋꆀꇷꃅꉺꏦꀋꆏꃅꄻꐛꒆ，ꎆꏣꃼꇇꇷꃅꌋꆀꃰꊿꁱꀕꐮꈴꌠꐳꃅꄹꎆ。ꉇꉻꃼꇇꎍꐽꌠꏱꁈꄻꅐꇁ，ꎊꈬ꒺ꀸꇬꈴꌠꄮꈉꈮꁁꈋꉐꊨꒊ。ꃷꇐꄹꁆꈏꃹꎿꀸꇗꏸꀁꋌꊨ，ꎿꀸꇗꏸꈁꉬꑟꐨꆏ9.8％ꇬꄉꀁꋌꊰꌊ7.5％ꇬꑟ。ꀊꏀꃅꋯꐂꈄꏍꈴꃼꇇꃅꏓꇱꋒꃯꉜꅉꈨꋈꄻꄉ。ꄿꐨꃼꇇꃅꉚꅉꄺꀱꎖꋪꌌꌬ。ꀉꒉꃅꉇꎆꈏꃹꉆꎻꌠꀋꉾꁁꏯꃷꁨꋏꌠꋎꍅ，ꎆꒉꎆꇁ、ꐕꍯꑠꉹꑘꁉꃑꌠꍔꒉ，ꀉꒉꀊꂾꌠꉇꎆꐘꃆꈨꂥꀘ，ꀊꏀꃅꄻꄉꌠꉇꎆꎆꏂꑘ70％ꀋꇈꉀꎆ。
ꃘꆏꋍꃱꃅꇓꈓꇓꉈꃄꁕꀻꎆꌠꄐꏤ，ꐮꇙꐛꐪꉾꃪꌠꐳꃅꏓꐛ。ꂿꑘꁡꇤꄖꄑꌄꆣꌠꄐꇐꊋꑌꃅꃄꌬ，ꋚꒉꈁꉬꅐꐨꆏ1.3ꃪꂡꏣꈋꉐꇬꎍꇬꎷ。ꀊꏀꉹꌠꇓꈓꏦꎫꐛꈴꌠꀉꇨꃅꄹꎆ，1400ꃪꑻꀋꇈꐥꌠꂿꑘꆹꏮꊻꂷꆏꇓꈓꏦꎫꋦꀀꇁ。ꁮꐚꁁꏯꀖꁉ、ꑛꌋꈤꁁꏯꄖꄑꌄꆣ、ꈯꄔꃅꄷꉀꄓ、ꁰꅐꁁꏯꂴꅑꄉꀻꎆꌠꄹꎆ，ꄺꀱꏀꀺꃄꄟꈨꄻꅐꇁ。ꏢꏸꏹꋯꐊꀻꎆꌠꄇꇖꀕꃅꁨꎆꌠꊌꅜ，ꍤꏦꎆꏣꐛꁕꒆꉻꌌꂴꄉ、ꀊꃴꃅꀻꎆꌠꐛꐪꀋꆏꃅꄻꈫꈈ。ꒀꇤꀎꎿꈪꀉꒉꅉꄐꎖꋈꄻꌠꊇꅉꃅꐙꌠꑭꁘꐕꎼꆹ，ꇤꍗꀎꄇꋒꋉꐛꌊꍮꊪꈴ。ꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꄺꀱꀻꎆꊋꁈꄏꌠꊋꃤꊋꀥꇱ。ꐳꈴꎷꈜꎞꎭꌠꀰꏢꆏꈉ4100ꉻꆏ，ꐳꈴꄇꈜ6000ꎖꉻꆏ、ꂿꑘꁡꇤꄇꈜ30ꎖꃪꉻꆏꀊꏀꃅꋈꄻꋈꀱ。ꇓꈓꇓꉈꃄꁕꀻꎆꋮꄮꐨꐪꊛꄉꄻꀉꇨ。
ꏃꆏꀋꎪꃅꀻꎆꌠꇬꄉꉹꁌꐥꐨꏦꀧꌋꆀꄻꃪ，ꄺꀱꀻꎆꊌꐨꀊꅰꀉꑌꃅꀊꅰꐽꊯꃅꏓꂱꉹꁌꇬꈲꎻ。ꉇꉻꋦꈭꐛꐈꌠꃅꑘꊌꌠꏭꁧꏖꇁꌠꇬꉜꄉ，ꇇꈤꃅꑘꊌꌠꎍꐽꎻꌠꃄꄟꄻꅐꇁ。ꊋꀉꒉꃅꇤꄉꋭꑘꂘꑘꂘꃀꃄꎆꊌꐨꏱꁈꃅꇫꑟꌠꄹꇙ，ꊋꀥꇱꄉꑣꋂꄉꈁꀄꊭꌠꌶꅉꌋꆀꑣꍔꁠꌷꄹꏦꌶꅉꋈꄻ，ꌶꅉꀊꂥꊐꌠꂘꑘꈐꐛꊈꃅꀻꎆꌠꊥꎆ。ꎆꏂꑘꌤꃅꊿꅉꀨꃀꌠꀨꎹꄜꏂꀧꎆꀨꍏꑷꋊꄻꄹꏦꄻꄉ，ꎞꆏꊿꅉꀨꃀꌠꀨꎹꎆꉀꐕ，ꇓꈓꇓꉈꀀꊿꅉꃀꃀꌠꀨꎹꎆꀁꂥꇨꌠꎕꏦꆏꋍꆪꌠ70ꂷꇬꄉꉀꐕꌊ88ꂷꇬꑟ。ꐪꊛꄉꌌꂴꄉꀨꎹ、ꀁꂥꏦꀧꑠꎕꏦꉀꐕ，ꄣꊿ“ꑍꐘꀥꁵꎆ”ꊌꄻꌠꇎꏦꈁꐥꌠꊿꏭꃅꊌꈲꎻ。ꊋꀥꇱꄉꎞꆏꂽꑼꁧꃤꃅꏲꂠꌤꃅ，ꎞꆏꂽꑼꏦꊒꌅꈌꈲꁧꀧꌋꃅ。ꃹꅼꃅꆅꉁꆄꄻ、ꆅꉁꆄꄻꄜꏂꀧ、ꆅꉁꆄꄻꁬꋌꏓꇙꄉꄺꀱ。ꎍꐽꃅꊐꁸꄉꆅꉚꆅꉁꌠꄹꎆ。ꀀꊿꅉꀨꆅꉁꆄꄻꄜꏂꀧꇇꀨꎕꏦꌋꆀꆄꒉꈺꒉꄜꏂꀧꌗꋊꍆꁧꉀꐕ。ꐳꃅꁬꋌꀊꏀꌠꍤꄻꈌꁧꌠꄺꀱ，ꆄꇓꄙꁬꋌ17ꑵꁌꀉꒉꃅꀁꋌꊰꄷꀋꁧꌌꇩꏤꆅꉁꆄꄻꄜꏂꀧꎹꀨꇬꇱꄉ。ꐳꃅꁱꀕꉹꁌꈲꁵꋉꃆꄹꎆ，ꐪꊛꄉꊋꀥꇱꅉꂫꊐꌠꄉꉻꁱꀕꁧꃤꃅ。ꉹꁌꃅꈯꎟꌠꍅꁍꀕꃅꍔꆙ，ꈯꎟꊿꆏꇩꏹꋓꈽꀉꒉꌠꇬꉈꑴꊌꐨꉾꌠꐥꆹꇬꎷ。
ꉆꆏꏦꏲꍔꃚꋈꄻꌋꆀꏱꄻꏀꀺꌠꄹꎆ，ꐧꋦꐮꄮꎍꐽꌠꄝꀋꊰ。ꇩꏤꑭꊂꏓꄊꎮꊈꉼꁳꍤꇖꎻꌠꏦꃤꇖꑘ18ꐘꐥ，ꏤꄻꋊꀱꍬꀱꌠꏲꑘꏦꇗ37ꋐꐥ。ꍔꃚꏲꉻꄻꄉꌋꆀꌅꊋꁆꄻꌠꄺꀱꋊꍬ。ꃹꅼꃅꇩꃷꑼꀉꇨꃅꍞꍤꌠꃅ，ꄺꀱꀻꎆꏱꁈꌋꆀꄐꁆꃄꌬꇫꑟꌠꄹꇙ。ꍤꌗꍞꊟꂿꄐꋊꇤꅐꇁ。ꇓꈓꇓꉈꅉꂫꊐꌠꏱꄻꌠꄺꀱꄻꐛꒆ。ꄯꒉꁱꌊꅇꅲꌤꃅꃄꄟꏀꀺ。ꃛꊸꏲꂠꌠꄺꀱꌋꆀꊋꀥꇱ，ꇇꈤꃅꇿꋌꐥꃅꋌꐛꉮꌸꀉꒉꀊꂾꌠꏭꊜꄻ，ꒃꅐꅉꇬꌤꅐꌠꈁꉬꃷꁨꌋꆀꀉꒉꀊꂾꃅꌤꅐꌠꈁꉬꃷꁨꐪꊛꄉꀁꋌꒊ。ꊋꀥꇱꄉꋠꇐꁬꋌꉮꀋꐥꌠꍞꏲ，ꏦꇨꃅꍤꍫꍤꌜꇬꌦꑠꐛꀋꐛꆅꁿꋌꃣꈌꍤꀞ。ꇩꏤꋬꂻꉻꑫꄻꐛꒆ。ꐧꋦꋬꂻꐥꀹꏓꇱꏱꄻꌠꄻꀉꇨ，ꀋꂄꌠꌩꄷꅠꌠꋊꌐꐘꉈꈽꌠꃅ，ꏦꃤꇬꈴꄉꋍꑞꋍꉹꏦꐆꑽꃤꐆꌠꏭꇇꇩꍈ，ꋬꂻꍏꇩꋈꄻꌠꁨꎆꐨꀊꏀꌠꊌꅜ。
ꎔꎗꃅꄈꍏꑷꐊꑷꃅꏦꇨꃅꄈꏲꄐꇐꏤꁈꃅꈴꌬꈴ，ꊋꀥꇱꄉꄈꃅꇏꐙꎴꌠꋈꄻ。“ꑍꌷꋍꄻ”ꌶꄻꉙꂘꅉꀕꐛꐪꈴꄹꏦꄹꎆ。ꏦꇨꃅꍏꑷꏤꐪꉆꐘꌠꌋꆀꋍꃄꌬꏦꋧꉌꊈꃄꌬꇫꑟ，ꀋꎪꀋꑴꃅ“ꃅꇏꇖꑵ”ꌠꈎꍬ。ꋍꑞꋍꉹꏦꐆꇗꐆꃅꐨꍤꀞ，ꏦꇨꃅꊿꍹꈔꌠꏭꅓꀞ，ꍹꈔꌠꏭꁎꉈꈽꌠꍅꄉꃅꐙꌠꊋꐛꌠꊌꅜ。
ꋌꃀꋋꈓꌠ，ꍏꇩꐛꐨꐥꌠꇩꏤꀉꒉꉇꉻꑌꑲꌠꊌꐨꀊꏀꌠꊌꅜ。ꀨꀎꑸꍏꉉꎥꈉꈎꃀ、ꎮꉼꎀꍹꏾꄌꀑꋾꃀ、ꍏꃏꇷꃅꉉꎥꈉꀙꏢꀑꋾꃀꑠꀉꒉꀊꂾꌠꌋꋓꅉꉇꉻꑌꑲꃅꈧꌠꊋꐛꃅꀞꄻ。ꑮꏣꀻꍗꑮꏤꇩꏤꏲꌋꊿꇩꏤꀉꑌꈨꇬꅲꁧ，ꑸꄠꎆꏣꇷꃅꎀꍹꏲꌋꊿꑌꐚꃀꀋꉬꌠ、ꇩꏤꑍꊏꂷꉻꏑꁥꏲꌋꊿꀑꋾꃀ、ꏂꍋꇩꏤꏲꌋꊿꐮꂿ、ꑸꉩꀑꋾꃀ、ꄏꑸꇷꃅꏲꌋꊿꋬꈭꃀꑠꀉꒉꀊꂾꌠꃅꈧꈽ。ꇩꏤꀉꒉꀋꉬꀋꉆꌠꌋꆀꐮꃆꂮꀑꐱꃅꎍꐽ，ꈭꇍꇩꏤꌋꆀꐮꃆꂮꐊꑷꃅꀻꎆ，ꀻꎆꇰꌠꇩꏤꌋꆀꐮꋯꑌꇷꃅꇺꏣꀊꅰꃅꄻꈫꈈ。ꀊꏀꉹꌠꇩꏹꐮꃆꂮꏓꄻꌠꄹꇙ，ꃰꊿꀑꇬꐮꐊꐙꌠꏓꄻꌠꄹꇙ。ꀋꎪꀋꑴꃅꇩꏤꌅꀨ、ꋬꂻ、ꀻꎆꈲꁧꀧꌋꃅ。ꎆꏣꉇꉻꏭꑌꑲ、ꃰꊿꁱꀕꎻꈴꊌꐨꀉꑌ。ꍏꇩꆏꋧꃅꄮꐽꌋꆀꀻꎆꌠꊥꎆꏭ，ꋧꃅꃅꋋꂿꌠꅐꌞꀋꂿꑘꌠꃅꅐꇁꀐ。
ꁧꎁꊈ！
ꋌꃀꋋꈓꃅꊌꐨꆹ，ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꊌꐨꉬ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꈆꑪꃅꄐꌐꌠꊌꐨꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꌠꊌꐨꉬ。ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀꋍꑞꋍꁁꏯꂒꋦꌠꊿꏭ，ꇬꀖꄉꈀꎭꀕꀐ！ꑣꇤꏲꑘꇣꋲꏱꅉꐎꃺꑌ、ꀎꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꎿꉈꃺꑌꏭ，ꇬꀖꄉꈀꎭꀕꀐ！ꍏꇩꐛꏀꈴꋈꄻꌠꇬꉈꇬꌋꆀꊋꄏꌠꇩꏤꍔꃚ、ꇩꏹꎀꍹꈁꐥꌠꌋꆀꇩꏤꈁꐥꌠꐋꀨꏭ，ꇬꀖꄉꈀꎭꀕꀐ！
ꃆꃶꑖꎭꇁꉆꌠꉪꄉꑲꆀꑘꒃꈀꋠꄎ。ꋒꐯꋒꃅꃅꊌꐨꏚꍆꈭꐨ，ꏸꐚꃅꉪꇩꏤꀻꎆꌠꇬꊝꇁꌠꌤꃆꌋꆀꋓꎭꌠꉜꇫꑟꌶ。ꋧꃅꎆꏣꉀꎆꐳꐨꀋꐳ，ꀧꌋꃅꉪꏦ、ꋍꁁꏯꉪꏦꑌꌠꃛꇁ，ꇩꏹꃷꇐꀉꒉꌠꁌꏤꀉꒉꃅꇙꈧ，ꎍꀋꐽꊨꀋꄅꐊꊈꄇꇖꀕꃅꁦꎆ，ꉇꉻꇁꌠꐔꈔꉆꐨꉀꐕ。ꇩꈐꎆꏣꀁꋌꊰꍅꊋꀉꒉꇁ，ꌬꈧꐳꀥꇱꐨꀋꐳꇁ，ꇿꋌꐥꃅꎆꇱꉀꎆꇬꊋꀋꇎ。ꐥꄜꎆꏣꊋꋠꐨꊼꇅꀉꑌ，ꉹꁌꀰꏢꌠꌋꆀꀄꊭꐭꎆꏂꑘꎆꏓꊋꋠꎆꏓꁌꇨꃆꂮꇿꋌꐥꃅꋊꄻꀋꄉꌦ，ꀰꏢꃼꇇꋦꈭꌋꆀꃷꎏꀨꄜꉘꇉꐨꌋꆀꐮꍣꐨꀉꒉꃅꐥꑴꌦ。ꑴꌅꃅꏀꀺꄐꊋꀊꀋꇨ，ꀋꉬꀋꉆꌠꇮꁈꀋꇎꌠꌤꃆꄇꇖꀕ。ꃅꄷꋍꈨꏱꎆꊌꌬꌠꐮꄙꐨꑓꅐꎑꇁ。ꎆꒉꎆꇁꑠꁁꏮꐔꈔꉆꌠꉮꏣꀁꀋꑌ。ꌢꎭꅼꇨꃅꄷꎭꑆꇔꈢꇓꀖꊋꋠꐨꊼꇅꀉꑌ。ꒆꉻꀧꌋꃅꌠꌋꆀꍍꆀꉃꄻꂿꃆꄡꇗꀉꇖ。ꂘꑘ、ꆅꉁ、ꃀꌠꀨꎹ、ꀀꑳ、ꋠꇐꁬꋌꉮꀋꐥ、ꊌꐨꁷꄻꑠꁁꏯ，ꉹꁌꄸꀋꈴꅉꀉꑌꃅꐥꑴꌦ。ꀋꉊꄻꈎꇯꆏꋍꉻꐺꅉꇬꌤꅐꌠꌋꆀꒃꅐꅉꇬꀉꒉꀊꂾꃅꌤꅐꌠꀉꑌꈨꐥꀐ，ꑗꉘꀉꆈꐯꀉꆈꌠꉬ。ꍔꃚꌤꃅꌊꇬꀋꑟꅉꐥ，ꄺꀱꀻꎆꃄꄟꃅꌊꑞꅉꇬꀋꑟ，ꇷꏦꉪꏦ、ꇛꌺꉪꏦꄡꇗꑓꅐꎑ，ꍞꍤꍤꄻꍤꎖꌠꀉꑌꇨ、ꐪꈜꉜꁨꃶꐚꃅꐨꉜꀋꁨ，ꅉꂫꊐꌠꋌꎼꃣꇖꇨ。ꇥꀯꋍꈨꋋꈨꃅꅍꀋꃅ。ꋍꈨꁁꏯꍹꈔꌤꃆꄡꇗꀉꑌꃅꅐꑴꌦ。ꉪꊇꀋꎪꃅꊒꆽꀕꃅꌤꃆꌋꆀꋓꎭꌠꉜꄉ，ꀬꃅꀵꄜ，ꊋꇤꃅꎁꃅ，ꄾꌦꋩꃅꌤꃅꋒꄉ，ꈍꃅꑌꏓꂱꉘꇉꐨꏯꇢꄡꏿꌶ！
ꑍ、2019ꈎꎆꏣꐧꋦꀻꎆꀑꐱꇖꐨꌋꆀꏱꁈꌬꐨ
ꎼꈎꆹꍏꇩꀊꏀꋈꄻ70ꈎꈭꏝꐛꈒꌠꉬ，ꐊꑷꃅꊼꇅꌣꈚꌠꐧꋦꄻꐛ、ꋍꉐꈎꉘꃀꊬꌠꉈꈽꁻꌐꃅꇫꑟꌠꀋꉬꀋꉆꈒꌠꉬ。ꍔꃚꌤꃅꉾꂯꇬ，ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꂘꅍꃅꄉ，ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢꌠ、ꌕꃢꌠꐊꈴꃀꈿꉌꊈꃄꌬ，ꏓꈴꇲꈴꃅ“ꉬꑵꋍꉻ”ꀑꐱꄐꉻꄹꎆ，ꋮꄮꃅ“ꇖꑵꐊꑷꌠ”ꄐꇐꄐꉻꄹꎆ，ꀋꎪꃅꎍꐽꅉꇬꄉꁨꆹꌤꃅꀑꐱꅉꃀꉉꈌꌭꈬ，ꀋꎪꃅꀻꎆꉪꉻꀊꏀꌠꌭꈬ，ꀋꎪꃅꊇꁧꀊꂥꃅꀻꎆꌠꄹꇙꇬꎷ，ꀋꎪꃅꇲꁵꁁꏯꐛꉻꃅꄺꀱꌠꌌꀨꇬꄉꇬꎷ，ꀋꎪꃅꃹꅼꃅꃷꎏꈴꌠꄺꀱ、ꑟꐨꀊꂥꃅꁉꃑꌠꍔꐯꇬꎷ，ꐳꃅꐛꏀꈴꎆꏣꉻꑫꋈꄻ，ꐪꊛꄉꈢꇓꀖꀉꒉꌕꐘꌠꃅꋒ，ꊋꇤꄉꉻꐭꀨꄜꍄꑐꊋꃤꄖꄑ，ꉻꒉꋊꄻꌠꏀꀺꌋꆀꄻꐛꒆ，ꏓꈴꇲꈴꃅꎍꐽꃅꉀꎆ、ꄺꀱꌠꊥꎆ、ꐛꉻꋊꄻ、ꉹꁌꐥꐨꈲꁵ、ꈔꉆꐨꄴꏮ、ꎍꐽꌠꏦꀧꌠꌤꃅꐨꄹꎆ，ꎆꏣꒈꇁꌊꋭꋽꅉꇬꐕꄉꇬꎷ，ꀒꁨꋍꁘꃅꃅꑘꎍꐽ、ꎆꒉꎆꇁꎍꐽ、ꉇꉻꃼꇇꎍꐽ、ꉇꎆꎍꐽ、ꇱꎆꎍꐽ、ꂴꉪꄉꌠꎍꐽ，ꃷꎏꉌꊋꄖꄑ，ꏓꂱꉹꁌꊌꅜꐨ、ꐥꌒꐨ、ꋬꂻꐨꉀꐕ，ꎆꏣꐪꊛꄉꉾꃪꃅꀻꎆꌋꆀꐧꋦꃅꇷꄉꉻꀉꒉꌠꎍꐽꃅꄉꇬꎷ，ꐊꑷꃅꊼꇅꌣꈚꌠꐧꋦꄻꐛꂫꍅꌠꎁꃅꅉꃀꀋꉬꀋꉆꌠꄻꄉ，ꃅꊌꐨꉾꃪꌠꌌꍏꉸꏓꂱꇭꉼꇩꋈꄻ70ꈎꈭꏝꐛꌠꋨꏦ。
ꇩꈐꇩꉈꃅꒊꃅꇁꏓꇱꄉꎥꃪꇬ，ꀋꃋꎼꈎꉪꇩꏤꀻꎆꌠꇬꊝꇁꌠꋦꈭꀊꅰꃅꌼꇪꀊꅰꃅꊋꋠ，ꂴꉪꇫꑟꉆꌠꌋꆀꂴꉪꇫꑟꀋꉆꌠꈔꉆꐨꋓꎭꐨꀊꅰꃅꀉꑌꀊꅰꃅꀉꒉ，ꊭꋒꄎꋒꃅꇨꃅꋋꈨꌠꏭꊝꌶ。ꊋꋠꌠꏭꉜꄡꄸ，ꉌꊋꇘꑐꀋꉆ，ꊋꃤꄝꏯꀋꉆ。ꉪꇩꏤꀻꎆꌠꄡꇗꊜꋽꄮꀋꂿꑘꑠꊭꇬꃹꎍꑴꌦ，ꇎꋒꌠꀻꎆꐨ、ꀉꒉꀊꂾꌠꊋꂫꌋꆀꀋꆏꃅꁖꇁꌠꏀꀺꍄꑐꊋꃤꐥ，ꏓꂱꉹꁌꐥꐨꐥꌒꌠꎹꈹꏾꐨꃛꐯꃛ。ꉪꊇꆏꋍꑞꋍꑵꊋꋠꋓꎭꌠꏭꄘꊋꄎꌠꉌꊈꌋꆀꄐꅍꀉꇨꌠꐥ，ꎆꏣꀊꉗꃅꉽꄟꉜꄉꆹꌠꄻꀋꀱꉈꑴꄺꀱꌠꑌꇫꅐꀋꇁ。
ꎼꈎꎆꏣꐧꋦꀻꎆꌠꊌꐨꄐꄉꌠꁻꌐꀋꉬꀋꉆꌠꆏ：ꇩꈐꒃꅐꈁꊌꁌꐨ6％—6.5％ꉀꎆ；ꇓꈓꏦꎫꃅꑘꊌꌠꊿ1100ꃪꑼꈋꉐꀊꏀꃅꁦꎆ，ꇓꈓꏦꎫꍤꄻꎼꇁꇬꃅꑘꀋꊌꐨ5.5％ꀑꂪꐥ，ꇓꈓꏦꎫꁱꄀꄉꌠꃅꑘꀋꊌꐨ4.5％ꈍꈐꎍ；ꀀꊿꌬꈧꁌꏤ3％ꀑꂪꉀꄓ；ꇩꏹꊌꌬꐨꀑꐱꃅꐮꆽꏣ，ꈏꃹꉇꅐꌠꎍꐽꅉꇬꄉꊇꁧꉀꐕ；ꉻꒉꋎꐽꐨꀑꐱꃅꎍꐽ，ꎆꒉꎆꇁꏱꎆꐔꈔꉆꌠꇿꋌꐥꃅꄴꏮꋎꍅꄉ；ꂿꑘꁡꇤꌢꎭꊻꂷ1000ꃪꈋꉐꀁꋌꒊ，ꀀꊿꊌꐨꉀꎆꌠꌋꆀꎆꏣꉀꎆꌠꀑꐱꃅꐮꐊ；ꒆꉻꋦꈭꀒꁨꋍꁘꃅꄻꃪ，ꌗꂓꇩꈐꒃꅐꈁꊌꁌꐨꊋꃹꐨ3％ꀑꂪꀁꋌꊰ，ꀋꉬꀋꉆꌠꍍꆀꋊꃑꃷꁨꐪꊛꄉꀁꋌꊰ。ꄚꉎꉉꌠꊌꐨꄐꄉꌠꁻꌐꀋꉬꀋꉆꌠꆏ，ꊇꁧꀊꂥꃅꀻꎆꌠꄹꇙꌠꇖꐨꄛꑣꅐꇁ，ꉪꇩꏤꀻꎆꃶꐚꐛꐨꇬꄉꄐ，ꐊꑷꃅꊼꇅꌣꈚꌠꐧꋦꄻꐛꌠꁻꌐꌋꆀꐯꊛ，ꋋꆹꏣꀋꑌꋭꋽꌠꉬ。ꁻꌐꋋꈨꃅꇫꑟꇬ，ꎬꅧꃅꊋꇤꏡꇤꄻꅐ。
ꎃꊒꃅꉻꒉꏱꁈꌬꐨꒃꇇꈐꊐꄉ，ꐪꊛꄉꏣꀋꑌꌠꏱꎆꏱꁈꌋꆀꎍꐽꌠꎆꃀꏱꁈꃄꌬ，ꃅꑘꊌꌠꄻꂴꄉꌠꏱꁈꃄꌬ，ꊋꀥꇱꄉꏱꁈꋮꄮꃅꀕ，ꎆꏣꒈꇁꌠꏦꀧꌊꋭꋽꅉꇬꐕꄉ，ꎆꏣꐪꊛꄉꉾꃪꃅꀻꎆꌠꊥꎆ。
ꏣꀋꑌꌠꏱꎆꏱꁈꆏꊋꇤꄉꉀꐕꌶ。ꎼꈎꌫꁏꇔꐨꆏ2.8％ꃅꄐꁆꄉ，ꀋꉊꄻꈎꄐꌗꌠꇬꉐꊮꌺ0.2ꂷꁦꎆ；ꏱꎆꌫꁏꇔꌠꆏ2.76ꃪꂡꂷ，ꄚꈐꏭꍏꑷꏱꎆꌫꁏꇔꌠꆏ1.83ꃪꂡꂷ，ꃅꄷꏱꎆꌫꁏꇔꌠꆏ9300ꂡꂷ。ꄉꄐꃅꌫꁏꇔꐨꉀꐕ，ꏓꇱꄉꏱꎆꊌꌬ、ꌐꐘꎝꃆꊫꌐꃑꄻꑠꐊꊈꉪꏢ，ꉈꑴꆏꋌꊂꇫꅐꇁꉆꌠꐔꈔꉆꐨꏭꊝꌠꏱꁈꈥꈉꊏꄉꌶꌠꑌꉪꏢꀐ。ꎼꈎꏱꎆꌬꐨ23ꃪꂡꂷꄩꐂ，6.5％ꉀꎆ。ꍏꑷꃅꄷꏭꐮꆽꏣꃅꆹꏮꁵꄻꌠ10.9％ꉀꎆ。ꑤꊐꌠꅉꀨꎆꊋꏦꀧꉺꏦꄺꀱꐛꒆ，ꌢꎭꃅꄷꏱꎆꌫꄻꍅꊋꊨꄻ，ꈍꃅꑌꅉꀨꉹꁌꐥꐨꏦꀧꌠꇬꌤꃆꅐꇁꎻꀋꉆ。
ꎍꐽꌠꎆꃀꏱꁈꆏꏯꏸꄉꄐꌶ。ꐊꐯꎆꃀM２ꌋꆀꐧꋦꎆꏓꄉꈁꉀꎆꐳꐨꆏꇩꈐꒃꅐꈁꊌꁌꐨꀑꐱꉀꎆꐳꐨꌋꆀꐮꄉꄐꌶ，ꀊꅰꉾꃪꃅꎆꏣꒈꇁꌠꄻꋭꋽꅉꇬꐕꄉꇬꎷꌠꈉꐨꇬꇎꈴꎻ。ꃶꐚꃅꃄꌬꅉꇬꆏ，ꎆꃀꇲꁵꀃꈈꀉꒉꁬꌠꐏꋒꃅꄉ，“ꀆꐒꀉꒉꃅꌌꃄꅉꒉꊎ”ꌠꀋꃅ，ꉈꑴꆏꋭꋽꃅꎆꃀꏱꁈꌬꅍꀉꑌꑵꌠꌬꄉ，ꎆꃀꏱꁈꊪꈴꈴꈜꎵꄻ，ꇙꐺꐨꇗꊒꇎꋒꃅꄉꇬꎷ，ꇿꋌꐥꃅꐥꄜꎆꏣꈜꀕꇈꉹꁌꀰꏢꌠꌋꆀꀄꊭꐭꎆꏂꑘꎆꏓꊋꎆꏓꁌꇨꌠꌤꃆꋊꄻ，ꎆꒉꎆꇁꐔꈔꉆꐨꄴꏮꋊꄻ。ꃹꅼꃅꇔꊰꍆꁧꃷꎏꈴꌠꄺꀱ，ꃶꐚꇔꊰꑟꐨꀁꋌꊰ。ꉇꎆꀟꄻꁌꐨꉺꏦꄻꐛꒆ，ꏓꂱꀙꎆꃀꉇꎆꀟꄻꁌꐨꋭꋽꐮꆽꏣꌠꀂꏽꄉꌌꀑꐱꃅꎍꐽꄉꇬꎷ。
ꃅꑘꊌꌠꌌꂴꄉꏱꁈꆏꐊꑷꃅꊋꇤꌶ。ꃅꑘꊌꌠꆹꉹꁌꐥꐨꊇꅉ、ꁨꇐꇁꀦꉬ。ꀋꃋꎼꈎꆏꉘꃀꃢꌠꃅꑘꊌꌠꌌꂴꄉꌠꏱꁈꄻꉻꒉꏱꁈꀂꏽꐕꄉ，ꋋꆹꋍꑟꋋꁁꏯꃅꑘꊌꌠꏭꉜꁨ、ꃅꑘꊌꌠꊋꁈꄏꌠꍝꄎꌠꄻꀉꇨꄷꌠ。ꀋꃋꋋꄮꌋꆀꋌꊂꋍꊭꇬ，ꉪꇩꏤꃅꑘꊌꈁꉬꃷꁨꍅꊋꊨꀋꒊ、ꐛꉻꐨꐥꌠꐮꄙꐨꄇꇖꀕ，ꁧꏖꐊꊈꀊꏀꌠꁦꎆꇰꑴꌦ，ꀋꎪꃅꃅꑘꊌꌠꄻꀊꅰꃅꑓꅐꎑꅉꇬꐕꄉꌶ。ꎍꐽꃅꉀꎆꌠꆹꀋꉬꀋꉆꌠꆏꃅꑘꊌꌠꏦꀧ。ꎼꈎꇓꈓꏦꎫꀊꏀꃅꁦꎆꌠꃅꑘꊌꌠꆏꂴꄐꄉꌠꁻꌐꅉꃀꃅꇫꑟꌠꀂꏽꄉ，ꄾꌦꋩꃅꋋꈍꑋꈓꃤꃶꐚꃅꃅꑘꊌꌠꄉꈁꇬꑟꇬꆏ，ꇓꈓꏦꎫꑘꃅꊋꃤꃅꑘꊌꌠꑌꏦꀧ，ꉈꑴꂿꑘꑘꃅꊋꃤꀉꑌꌠꆹꏮꃅꅍꃅꌠꎁꃅꈥꈉꑌꊏꎼꇁ。ꃅꑘꊌꌠꎍꐽ、ꊌꐨꁦꎆꄷꆏ，ꉪꊇꆏꀊꅰꃅꊋꑌ。
ꐪꊛꄉꇲꁵꁁꏯꐛꉻꐨꐥꃅꄺꀱꌠꌌꀨꇬꄉꇬꎷ，“ꈫꈈ、ꀉꇨ、ꉀꐕ、ꈴꒉ”ꁱꂷꉆꂷꌠꀂꏽꄉꊋꇤꌶ。ꀊꅰꀉꑌꃅꄺꀱꌠꏡꁈꏁꌬ，ꀊꅰꀉꑌꃅꃷꎏꈴ、ꏦꏲꈴꌠꇇꁈꌫꄻꄉ，“ꌕꊨꋍꍅꋍꅋ”ꊌꐨꄻꈫꈈ，ꉻꐭꀨꄜꍄꑐꊋꃤꄻꀉꇨ，ꅐꑘꊛꏣꑟꐨꉀꐕ，ꇩꂱꎆꏣꀰꏮꌠꄻꈴꒉꃅꄉ，ꎆꏣꊇꁧꀊꂥꃅꀻꎆꌠꄹꇙ。
ꐪꊛꄉꈢꇓꀖꀉꒉꌕꐘꌠꃅꋒ，ꊒꌸꃅꊋꇤ、ꀋꎪꃅꃶꐚꇿꋌꎹꌶ。ꀉꒉꀊꂾꃅꐔꈔꉆꌠꄴꏮꋊꎵꇬꆏꂫꑟꉪꏣꄻꀉꇨꃅꄉ，ꐛꉻꐨꐥꃅꆷꄿꊨꄉ，ꎆꒉꎆꇁꃷꎏꐛꀋꐛꃅꑘꀋꒃꌠꄴꏮ，ꊝꈭꃅꃅꄷꍔꃚꎝꃆꐔꈔꉆꌠꋊꄻ，ꈏꃹꇁꌠꐔꈔꉆꐨꄴꏮꋎꍅ。ꊒꌸꃅꎭꑆꇔꇬꆏꀋꃋꌌꌬꌠꎕꏦꌭꈬꃅꄉꇬꎷ，ꌢꎭꅼꇨꃅꄷꌋꆀꐋꀋꌡꌢꎭꁥꌠꇬꉜꄉ，ꈢꇓꀖꊋꃤꊋꀥꇱ，ꎭꑆꇔꊇꁧꉀꐕ。ꍍꆀꄴꏲꇬꆏꃅꑆꃴꇉꀕꌠꌋꃅꊋꐛꑠꀋꂿꑘꂿꃆꇬꉜꄉ，ꏓꈴꇲꈴꃅ、ꈏꇷꉇꇷꃅꉃꄻꄉ，ꒆꉻꋦꈭꊇꁧꁳꐪꊛꄉꄻꃪꎻ。
ꎼꈎꍔꃚꌤꃅꋒꇬꆏ，ꄚꊁꐮꃆꂮꋋꈨꌠꋓꉪꁨꄉꒃꉇꋒꌶ。ꋍꆏꇩꈐꌋꆀꇩꏹꐮꃆꂮꏓꇲꋒ，ꉌꏓꊋꋧꄉꊨꏦꌤꀞꋒꌶ。ꉪꇩꏤꆏꄡꇗꐧꋦꉪꏦꇬꂾꊬꌠꇬꃹꎍꄷꀋꁧꀊꉗꃅꇫꃹꎍ，ꄡꇗꋧꃅꀉꒉꇊꀉꒉꌠꀻꎆꇰꌠꇩꏤꉬ。ꀻꎆꌠꆹꉪꇩꏤꌤꃆꈁꐥꌠꂥꀘꌠꅉꃀꌋꆀꀋꉬꀋꉆꌠꉬ，ꀋꎪꃅꈬꐯꈬꃅꌦꎆꏣꋈꄻꈯꄜꋋꏢꇬꀵꄉ，ꀋꇙꀋꑐꃅꀻꎆꆏꇗꅉꀉꇨꌠ、ꀻꎆꆏꈆꑪꃅꀻꎆꌋꆀꊇꁧꀊꂥꃅꀻꎆꌠꄐꇐꉪꇐꉬꄡꑟꌠꌭꈬꃅꄉꇬꎷ，ꀋꆏꃅꐧꋦꒃꅐꊋꃤꁌꄝꌋꆀꀻꎆꌶ。ꇩꏹꃅꒊꃅꇁꌼꇪꐛꐈꇬꎷꌠꇬꄉ，ꉪꊇꆏꄐꇐꏤꊋꄝꀋꊰ，ꏤꄻꄉꌠꁻꌐꌋꆀꄐꇺꌠꇬꈴꄉꌤꃅꐨꄹꎆ，ꀊꅰꉾꃪꃅꇩꏹꇩꈐꃷꎏꑍꂷꅐꀦꑍꑵꌠꌬꄉ，ꋓꎭꌠꏭꊝꀬ，ꃨꆰꌠꏮꌊꊜꋽꄮꐛꑲꌧ，ꀻꎆꑴꇙꌅꈌꒃꌫꈬꌶ。ꑍꆏꎍꐽꃅꉀꎆꌠꌋꆀꐔꈔꉆꌠꄴꏮꌠꐮꃆꂮꄻꐮꆽꏣꃅꄉ，ꎆꏣꐪꊛꄉꉾꃅꀻꎆꌠꄉꀧꌶ。ꀊꉗꃅꏓꊭꄉꌠꐔꈔꉆꌠꃨꆰꐨꀉꑌꌠꆏꀋꎪꃅꋊꎵꇧꎭꌶ，ꄚꈳꏦꇬꍬ，ꏡꁈꋭꋽꃅꌬ，ꀋꎪ、ꋏꌫꉆ、ꊱꁨꃅ、ꄉꄐꌠꇖꐨꇬꈴꄉ，ꀻꎆꌠꇬꄉꋍꁘꋍꁘꃅꋊꎵ，ꈍꃅꑌꋬꈭꃅꐙꌠ、ꃄꁕꃅꐙꌠꐔꈔꉆꌠꇫꅐꇁꌠꋒꏆꌶ。ꀋꃋꋋꄮꎆꏣꀁꋌꊰꌠꍅꊋꀉꒉꇁꌠꐛꐪꇂꃴ，ꏱꁈꌋꆀꌤꃅꃄꄟꏤꄻꇬꆏꂴꄐꄉꌠꎍꐽ、ꎍꐽꃅꉀꎆ、ꐛꉻꋊꄻꌠꇬꈲꏣꐥꌶ，ꐔꈔꉆꐨꄴꏮꋎꍅꇬꆏꃅꐨꌋꆀꊋꃤꒃꌫꋒꌶ，ꃛꋏꐨꄅꇱꀉꒉꇁꌠꄴꏮ，ꈍꃅꑌꎆꏣꒈꇁꌠꁳꉔꋭꋽꅉꉈꏭꅐꁧꎻꀋꉆ。ꋍꈭꐨ，ꉈꑴꆏꑓꂾꅉꇬꀉꄂꉪꄉ，ꀊꉗꃅꀻꎆꌠꇬꃗꉮꌠꏭꀁꉘꃅꋣꌉꌠꏱꁈꏁꌬꄉ，ꐔꈔꉆꌠꃨꆰꐨꀊꏀꌠꁳꇫꅐꇁꎻꑌꀋꉆ。ꌕꆏꍔꃚꌋꆀꃷꎏꐮꃆꂮꂥꀘꋒ，ꄺꀱꁉꃑꌠꇬꊫꁱꄉꃷꎏꀨꄜꍄꑐꊋꃤꄖꄑꌶ。ꃷꎏꀨꄜꍄꑐꊋꃤꐥꄷꆏ，ꈒꇓꀻꎆꇙꊋꀉꇨ、ꎆꏣꀁꋌꊰꍅꊋꄙꄉꄎ。ꊋꀉꒉꃅꇤꄉꄺꀱꁉꃑꌠꄹꎆ，ꐳꃅꋍꃱꃅꁉꃑ、ꋓꅔꊱꁨꌠꀋꃋꋋꄮꃷꎏꉻꑫꋈꄻꄉ，ꃷꎏꃹꉆꐨꍔꐯ，ꊋꀥꇱꄉꎃꊒꃅꍞꏲ，ꏦꏲꈴ、ꇩꏹꈴ、ꃅꌒꌠꀰꏢꃼꇇꃅꋦꈭꄻꄉ，ꋍꑞꋍꑵꃷꎏꀨꄜꁳꀊꅰꃅꍄꑐꎻꌶ。ꊇꅉꇬꄉꉉꇬꆏ，ꃷꎏꍄꑐꊋꃤꌋꆀꐧꋦꁦꄻꊋꃤꆹꂡꃪꌠꏓꂱꏣꀋꑌꐨꋊꇤꎼꇁꌠꇬꅐꇁꌠꉬ。ꏓꂱꈯꄜꃅꄉꌠꀻꎆꉪꇐꌭꈬ，ꄾꌦꋩꃅꃅ、ꊋꎖꄉꃤꀳ，ꃶꐚꃅꅉꀨꉹꁌꐥꐨꏦꀧ，ꉹꁌꐥꐨꀋꉬꀋꉆꌠꌤꃆꂥꀘꌠꄹꇙ，ꐧꋦꐽꊯꑗꉬꌠꊥꎆꄉ，ꏓꂱꁳꐥꌒꄻꌒꎻꌶ。ꍏꇩꏓꂱꆹꌳꉔꀑꁮ，ꏀꀺꁦꄻꊋꂫꈤꇁꀋꉆꌠꐥ，ꋒꐯꋒꃅꋊꃑꎼꇁꄷꆏ，ꍏꇩꃤꀻꎆꌠꆹꀋꎪꃅꀊꅰꃅꈥꈉꀊꐯꌠꐥꇁꌠꉬ。
ꌕ、2019ꈎꍔꃚꌤꃅꂿꃆ
ꎼꈎꎆꏣꐧꋦꀻꎆꂿꃆꀉꇖ、ꋓꎭꐨꀉꑌ、ꇖꂟꐨꀊꂥ。ꉪꊇꆏꀋꂿꑘꌠꌌꀨꄉ、ꀋꉬꀋꉆꌠꒃꉇꄉ，ꏟꈯꃅꋍꑞꋍꐘꌤꃅꋒꌶ。
（ꋍ）ꐪꊛꄉꉻꒉꋎꍅꌠꏀꀺꌋꆀꄻꐛꒆ，ꎆꏣꒈꇁꌊꋭꋽꅉꇬꎍꌠꄉꀧ。ꃷꎏꈴꄺꀱꌠꉪꈜꌋꆀꏡꁈꌌꀻꎆꊋꌠꋊꑣ，ꉻꒉꏱꁈꌋꀰꏮꄮꋊꐽꂿꄐꋊꇤꋒ，ꏱꎆ、ꎆꃀ、ꃅꑘꊌꏱꁈꉁꈾꄻꀉꑌꌋꆀꌌꋭꋽꃅꌫꄻ，ꋎꍅꌠꂴꂿꐨ、ꄐꌐꐨꌋꆀꇿꋌꐥꐨꁦꎆꇁ，ꎆꏣꎍꐽꃅꒈꇁꌠꎁꃅꇎꏦꀹꄻꌶ。
ꄉꈁꀊꅰꀉꒉꃅꇗꏸꊨꌠꃄꌬ。ꈲꈴꐨꃅꇗꏸꊨꌠꌋꆀꐛꉻꃅꐙꌠꇗꏸꊨꌠꐯꇯꃅꌠꃄꌬ，ꀋꂿꑘꌠꄺꑣꑘꌋꆀꀄꊭꐭꎆꏂꑘꇗꏸꀵꃤꊨꀁꑌ。ꃹꅼꃅꁌꎆꇗꏸꄺꀱ，ꄺꑣꑘꑠꉹꑘꀋꃋꌬꌠꇗꏸꎴꐨ16％ꇬꄉꊨꅸ13％ꇬꑟ，ꈭꈴꎞꎭꑘꋈꄻꑘꑠꉹꑘꀋꃋꌬꌠꇗꏸꎴꐨ10％ꇬꄉꊨꅸ9％ꇬꑟ，ꀋꉬꀋꉆꉹꑘꇗꏸꁯꌠꄇꇖꀕꃅꀁꋌꊰꌠꏦꀧꄉ；6％ꏠꌠꇗꏸꎴꐨꌌꀋꐈꃅꄉ，ꄚꒃꅐ、ꐥꐨꏭꁧꃤꃅꑘꇗꏸꎴꌠꈎꊐꑠꋍꋬꈭꃅꐙꌠꏁꁈꌬꇈ，ꉹꑘꈁꐥꌠꇗꏸꁯꌠꀁꋌꀉꄂꊨꁧꀋꎆꃅꄉ，ꐪꊛꄉꇗꏸꎴꐨꌕꏠꌠꏓꑍꏠꃅꌠ、ꇗꏸꄹꏦꄻꈝꐮꌠꇬꉜꄉꆹꌠꄹꎆ。ꈎꀨꇬꄻꅐꇁꌠꀄꊭꐭꎆꏂꑘꁊꈲꐨꐥꌠꇗꏸꊨꒊꏱꁈꃅꇫꑟꋒꌶ。ꋌꃢꇗꏸꊨꄻꌠꆹ，“ꒉꃑꉛꉘ”、ꀻꎆꊋꂫꄻꀉꇨꌠꉜꄉꄷꀋꁧꏱꎆꐪꊛꉆꌠꉪꄉꃅꌠ，ꋋꆹꎆꏂꑘꀵꃤꊨꑾꌙ、ꃷꎏꍄꑐꊋꃤꄖꄑꌠꏁꁈꀉꒉꀊꂾꌠꉬ，ꇗꏸꎳꄻꄹꏦꄻꐛꒆ、ꊌꐨꁷꄻꐛꉻꄻꃪꌠꀋꂿꑘꃅꄺꀱꌠꉬ，ꉻꒉꏱꁈꎍꐽꃅꉀꎆ、ꃅꑘꊌꌠꏦꀧ、ꐛꉻꋊꐽꌠꀉꒉꀊꂾꃅꀕꌠꉬ。
ꎆꏂꑘꐧꋦꏦꀧꎆꏮꃣꁧꊨꀁꑌꌠꄇꇖꀕ。ꇓꈓꏦꎫꇮꃅꊿꅉꀨꃀꌠꀨꎹꄜꏂꀧꌤꃅꅉꎆꏮꍆꐪꀁꋌꊨ，ꃅꄷꈁꐥꌠꃅꀁꋌꊨꌊ16％ꇬꑟꉆ。ꀋꃋꎴꏮꃄꄟꎍꐽ，ꃅꄷꈁꐥꌠꃅꎳꄻꏦꉻꄺꀱꈭꎁꇬꀄꊭꐭꎆꏂꑘꃶꐚꃅꎆꏮꃣꁧꁦꎆꌠꃄꄟꌬꀋꉆ，ꂱꑱꋧꁧꃅꂴꆽꎝꁯꌠꏓꄉꏓꏮꌠꃅꀋꉆ。ꐪꊛꄉꋍꊭꇬꃅꅍꀋꊌꌠꌋꆀꌤꃅꄉꄣꅐꌠꊨꀁꑌꌠꄜꏂꀧꁌꐨꏱꁈꃄꌬ。ꎼꈎꀋꎪꃅꎆꏂꑘꈜꀕꇈꀄꊭꐭꎆꏂꑘꐧꋦꏦꀧꏮꎆꀵꃤꊇꅉꃅꀁꋌꊰꎻ。ꐳꃅꃀꌠꀨꎹꄜꏂꀧꌜꊐꌠꏓꈴꇲꈴꃅꄺꀱꌠꄹꎆ，ꐪꊛꄉꎆꏂꑘꇮꃅꊿꅉꀨꃀꌠꀨꎹꄜꏂꀧꎆꃀꍏꑷꐼꄻꍆꐪꉀꐕ、ꇩꁨꎆꀨꄹꁆꌌꐧꋦꏦꀧꎆꃀꇬꇱꌠꁸꏮ。ꉪꊇꆏꎆꏂꑘꎆꏮꀵꃤꑌꊨꒊ，ꉈꑴꌤꃅꊿꐧꋦꏦꀧꈲꁵꌠꇬꁧꀋꏖ、ꃀꌠꀨꎹꎆꋭꋽꃅꉀꎆꄷꀋꁧꏤꈉꈐꃅꇎꋒꃅꃑꄻꃅꄉ，ꐧꋦꏦꀧꎆꀨꊛꄉꊌ、ꎆꏂꑘꌋꆀꌤꃅꊿꐯꇯꈲꊌꎻꀐ。
ꇗꏸꊨꁌꊰꌠꃅꇫꑟꌠꏦꀧ。ꇗꏸꊨꁌꊰꌠꈛꎂꃅꃷꎏꀨꄜꆄꅉꌋꆀꊋꋠꅉꇬꅥꍅ，ꋋꆹꎃꊒꇈꈲꁧꐥꌠꏱꁈꉬ。ꋋꈓꌠꎆꏂꑘꇗꏸꎳꄻꌠꌋꆀꐧꋦꏦꀧꎆꏮꌠꀵꃤ2ꃪꂡꂷꀋꇈꊨꑾꌙ。ꋋꆹꈁꐥꊐꌠꏱꎆꏭꍅꊋꀉꒉꐯꀉꒉꃅꐥꇁ。ꎆꏂꑘꀵꃤꊨꑾꌙꌠꄏꐓꂿꄷ，ꈁꐥꊐꌠꍔꃚꆏꏎꏸꄉꐥ，ꁈꏂꁈꇭꌊꎆꏓꎆꄻꌶ。ꍏꑷꏱꎆꏎꏸꌬꄉ，ꏤꄻꄉꌠꇩꁨꎆꒉꎆꇁꏲꉻꌋꆀꍏꑷꃤꎆꏂꑘꏮꉎꁵꍍꊱꁦꎆ，ꎃꐚꃅꐙꌠꌫꎆ5％ꈋꉐꊨꍅ，“ꌕꉻ”ꌫꎆꉈꑴ3％ꀑꂪꊨꍅ，ꀊꉗꃅꊐꐕꄉꌠꎆꉇꎴꌊꇁꌐ。ꃅꄷꍔꃚꑌꑴꇙꃅꊋꂫꀖ，ꊋꀉꒉꃅꇤꄉꌫꄻꐛꉻꄻꃪ，ꈜꀉꑌꏢꃅꎹꄉꋍꑞꋍꑵꎆꀨꌋꆀꁨꇐꌫꄻ。ꉪꊇꆏꃶꐚꃅꃷꎏꀨꄜꈜꀕꇈꀄꊭꐭꎆꏂꑘꁳꇗꏸꊨꁌꊰꐨꄇꇖꀕꃅꐥꇁꎻ，ꏟꈯꃅꎆꏂꑘꌋꆀꐧꋦꏭꈌꁧꄉꌠꃅꇫꑟ，ꊋꋠꐨꈍꑋꐥꑌꀋꎪꃅꌤꀉꒉꋌꐘꀞꐛꀞꋒꌶ。
ꊋꇤꄉꎆꏂꑘꎆꏓꊋꎆꏓꁌꇨꌠꌤꃆꋊꄻ。ꎆꃀꉚꄻꇱꃑꌠꉺꏦꄺꀱꐛꒆ，ꊜꋽꃅꊐꄻꊭꄎꎆꐪ、ꇔꊰꍆꐪꑠꃷꁨꌋꆀꁌꏤꇇꁈꌬꄉ，ꎆꒉꎆꇁꏲꉻꄐꏁꄉꉌꒊꉚꄻꇱꃑꌠꍔꐯ、ꎆꉛꀨꊰꊨꀁꑌ，ꊒꌸꇿꋌꐥꃅꐥꄜꎆꏣꄏꐓ，ꎆꀨꁳꈥꃅꏮꅀꂿꄐꀋꐥꎻꀋꉆ。ꐧꐭꑴꉴꄐꍝꄉꅉꂫꇔꊰꊨꀁꑌꌠꇬꊋꀥꇱ，ꃑꅐꒉꌠꎆꃀꉬꇮꌌꑴꃅꎆꏂꑘꌋꆀꀄꊭꐭꎆꏂꑘꎆꉛꌠꇬꌬ。ꃼꇇꑴꉴꀉꒉꉹꌠꈜꀉꑌꏢꃅꄉꎆꀨꀥꇱꌠꇬꊋꁈꄏ，ꉌꒊꎆꉛꇱꃑꊋꃤꀉꇨꇁ，ꄺꑣꑘꀊꉗꐧꀠꃅꎆꉛꌠꌋꆀꉌꒊꎆꉛꁦꎆꇱꌠꊋꊡ。ꎼꈎꇩꁨꃼꇇꑘꀉꒉꉹꌠꀄꊭꐭꎆꏂꑘꉚꎆ30％ꈋꉐꉀꎆ。ꑴꉴꌋꆀꇢꈴꁧꃤꃅꎳꎆꋊꄻꏦꈴ。ꎆꒉꎆꇁꏲꉻꈒꇓꎕꑟꏲꉻꄻꐛꒆ，ꊋꀥꇱꄉꈲꈴꎆꒉꎆꇁꁧꃤꃅꌠꊋꊡ，ꃶꐚꃅꐧꐭꀄꊭꎆꏂꑘꎆꏓꊋꐨꄇꇖꀕꃅꄻꃪꄉ，ꏓꇱꎆꏓꀨꊰꁳꀋꎪꃅꄇꇖꀕꃅꀁꋌꊰꎻ。
ꇿꋌꐥꃅꃅꄷꍔꃚꎝꌐꂿꄐꋊꇤꅐꇁ。ꎼꈎꄐꁆꄉꇬꃅꄷꌐꐘꎝꌐ2.15ꃪꂡꂷꃅꄉ，ꀋꉊꄻꈎꄩ8000ꂡꂷꁦꎆ，ꀋꉬꀋꉆꌠꐘꃆꋈꄻꌠꎁꃅꎆꃀꇲꁵꊋꁈꄏ，ꉈꑴꀊꅰꉾꃪꃅꃅꄷꍔꃚꎝꃆꐔꈔꉆꐨꄴꏮꇔꑣꌠꎁꃅꇎꏦꀹꄻ。ꋭꋽꃅꌐꐘꎝꌐꌫꄻꈍꈐꍔꐯ。ꐪꊛꄉꃅꄷꍔꃚꎝꌐꆥꄻꃷꁨꈨꃑꌬ，ꃅꄷꇔꊰꀵꃤꊨꑾꌙ。ꃷꎏꈴꏦꏲꈳꄟꈴꌠꊋꊡꄉ，ꋭꋽꃅꎆꏓꐽꈉꎝꃆꏤꄮꑟꌠꌤꃆꂥꀘ，ꋉꃆ“ꀋꐕꀋꁁꌠ”ꃅꀋꉆ。
ꏡꁈꀉꑌꑵꃅꏁꌬꄉꃅꑘꊌꌠꎍꐽꌋꆀꍔꐯ。ꏟꈯꃅꌶꅉꀊꂥꊐꌠꌷꅐꌶꌺ、ꎞꆏꂽ、ꂿꑘꇮꃅꊿꑠꀋꉬꀋꉆꁥꌠꃅꑘꊌꌠꌤꃅꋒ，ꊋꀥꇱꄉꇓꈓꏦꎫꋍꑞꋍꑵꃅꑘꊌꊋꊿꃅꑘꊌꎻꌠꇬꇇꀨꄏꐓ。ꂿꑘꁡꇤꌢꎭꊻꂷ、ꇓꈓꏦꎫꃅꅍꀋꊌꁱꄀꈎꁂꐛꌠꈋꉐꊿꎹꌬꌠꋍꑞꋍꉹꌠꎆꏂꑘꆏ，ꌕꈎꈋꈐꃅꃷꁨꏤꄻꄉꇗꏸꁌꈎꊨ。ꊋꀥꇱꄉꋭꋽꃅꃅꑘꊌ、ꀊꏀꃅꃅꑘꊌꌠꐛꄟꏭꊋꁈꄏ。ꏟꈯꃅꃅꑘꎹꌠꇬꌺꃰꌋꅪꌋꆀꐥꀦꇬꉜꄸꌠꏭꄴꏮꌋꆀꋊꍬ。ꃅꑘꇮꁈꉀꐕꌠꃅ，ꃅꅍꀋꊌꄜꏂꀧꎆꀨꋒꄉꌠꇬ1000ꂡꂷꌌ，ꌤꃅꊿꇮꇐꉀꐕꌋꆀꃅꈉꆹꏮꃅꑘꆹꏮꁰꍋꊿ1500ꃪꑻꃢꈋꉐꇬꌬ。ꇮꇐꐥꇮꃅꊿꃅꑘꀻꎆꉺꏦꌋꆀꏱꁈꄻꐛꒆ。ꐳꃅꀋꃋꋋꄮꃅꑘꉙꂘꌠꀻꎆꇬ，ꀋꃋꋋꄮꃅꑘꊌꍅꊋꏭꑌꋊꄻ，ꉈꑴꇮꁈꀊꂥꌠꌧꊿꀋꇎꌠꂥꀘꌠꃄꄟꀋꉬꀋꉆꌠꑌꉬ。ꃅꑘꌶꅉꀊꂥꌠꎕꑟꌶꌺꎹꏡꁈꄺꀱꐛꒆ，ꋋꄹꈎꌶꅐꇁꌠꇨꍏꌶꌺꌋꆀꎞꆏꂽꑼ、ꃅꅍꀋꊌꌠꌤꃅꊿ、ꂿꑘꊿꇮꃅꌠꑠꀉꑌꃅꊋꊡꌊꇫꎕꑟꇁ，ꎼꈎꄉꈁꀉꒉꃅꍔꐯꄉꌶꌺ100ꃪꑻꎹ。ꀊꂥꊐꌠꃅꑘꌶꅉꈁꁠꇇꀨꎆꉱꑷꐨꍔꐯ、ꇇꀨꎕꏦꉀꐕ，ꐳꃅꌷꐨꊫꌐꄯꒉꌋꆀꃅꑘꇮꁈꑠꏠꊐꊫꌐꄯꒉꄻꐮꐊꐯꊛ。ꀊꂥꊐꌠꃅꑘꌶꅉꌶꅉꀞꄻꏦꉻꄺꀱ，ꊋꀥꇱꄉꂘꃀꁥꌠꉘꉚ，ꌶꅉꀞꄻꊇꁧꉀꐕ。ꎃꐚꀪꈈꌶꅉꀊꂥꈨꄐꏁꄉꆹꏮꌊꌬꉹꌠꄊꑪꐛ。ꍏꑷꏱꎆꀉꒉꃅꁦꎆꌊꀊꂥꊐꌠꃅꑘꌶꅉꇬꇱ，ꃅꄷꏱꎆꑌꊋꀥꇱꄉꇫꄏꐓ。ꐧꊐꌠꃅꑘꉙꂘꇩꏤꈁꁠꎆꐤꄻꄉ。ꎆꏂꑘꌋꆀꐧꋦꊋꃤꃅꑘꂘꑘꀞꄻꌠꏭꊋꁈꄏ，ꐳꃅꅐꂘꐮꐊꃶꐚꃅꁰꍋꅉꋈꄻ。ꉪꊇꆏꀋꃋꋋꄮꃅꑘꂘꑘꀉꒉꃅꄺꀱꀉꒉꃅꀻꎆꌠꇬꈴ，ꐳꃅꇩꏤꀻꎆꇬꈉꊸꌠꋍꑞꋍꑵꇮꇐꇮꁈꐥꊿꉘꉚꄉ，ꀊꅰꀉꑌꌠꌠꏀꁳꇮꅍꑵꌌꊿꐥꐨꁌꐨꃅꇫꑟ，ꉹꑘꌕꉐꃘꊰꑵꌠꇬꌧꊿꌐꀋꉆ、ꃅꏸꌟꃅꏷꌬꀕꎻ。
（ꑍ）ꃷꎏꀨꄜꍄꑐꌤꃶꐚꌠꃅꄖꄑꎼꇁ，ꊋꏂꄉꀰꏢꃼꇇꋦꈭꄻꃪ。ꉪꇩꏤꃷꎏꀨꄜꂡꃅꐥ，ꄷꀋꁧꀋꆏꃅꁦꎆꇁꑴꌦ。ꃷꎏꀨꄜꃤꍄꑐꐨꌭꈬ、ꐕꎼꆹꌠꆏ，ꎆꏣꎍꐽꃅꉀꎆꌠꀋꉬꀋꉆꅉꉬ。ꃹꅼꃅ“ꃑꏲꃅ”ꌠꄺꀱ，ꄹꏦꃅꐙꌠꃼꇇꀨꊰꍅꀁꂥ，ꊋꀉꇨꃅꇤꄉꀻꎆꆓꋦꈭꋈꄻꉾꌶ。
ꈝꐮꃅꈌꁧꌠꉾꃪꃅꁧꃤꃅꎆꇱꌒꌠꌌꑘꄖ。ꃷꎏꇱꄻꅐꀦꆹꑘꅐꐯꑘꅐꌠꇶꏦꉬ。ꀒꁨꋍꁘꃅꃷꎏꃹꉆꀋꃪꁁꏯꃷꁨꋏꄯꒉꊨꀁꑌ，“ꏢꄉꌠꀋꉬꆏꈏꃹꎻꌠ”ꁊꈴꃅꌬꌠꄹꇙꌶ。ꍔꃚꆏꏟꈯꃅꏲꀋꋭꌠꌤꆿꐘꃆꏮꃷꎏꁵ，ꀉꒉꐯꀉꒉꃅꅐꀦꏭꈛꎂꃅꁆꄻꌠꊨꒊ，ꈌꁧꌠꌤꆿꐘꃆꊨꋭꌠꄾꌦꋩꃅꊨꄉ，ꃶꐚꃅꈌꁧꄻꅐꌠꆏꈭꎁꌋꆀꊨꊭꌌꈝꐮꄉ，ꎆꏂꑘꁳꄮꈉꀉꑌꃅꌌꃷꎏꀥ、ꊋꀁꑌꃅꈌꁧꌠꀥꎻꌶ。ꎼꈎ，ꎆꏂꑘꀰꏢꈌꁧꌤꆿꐘꃆꈁꐥꌠꃅ“ꊫꌐꊫꄳꁷꐞ”ꃅꄺꀱ，ꎆꏂꑘꁳꀊꅰꃅꀰꏢꊫꄳꒃꊊꌒꄷꀋꁧꐳꃅꎃꐚꃅꀰꏢꎻ，ꏟꈯꃅ“ꃹꉆꀰꏢꀋꉆ”ꐨꇔꑣꇧꎭ；ꇩꏤꑭꊂꃅꋉꃆꋈꄻꐘꃆꈌꁧꄹꏦꄺꀱꄉ，ꈌꁧꈭꎁꃅꀉꒉꃅꃛꀁꎴꎻꌶ。ꐪꊛꄉꌐꈲꍤꄻꌋꆀꃷꇐꌐꂷꁱꄀꄮꈉꍅꀁꎴ。ꈄꏍꇬꄉꈌꁧꌠꌋꆀꁧꃤꃅꌠꃅ，ꐳꃅꇩꏤꑭꊂꋍꃱꃅꈄꏍꇬꈴꏲꃆꁧꃤꃅꌠꐽꈉꄻꐛ，ꐳꃅꈄꏍꋍꂷꇬꄉꀞꈴ、ꀉꁁꃅꄷꇬꄉꀞꉆꌠꃅꇫꑟꄉ，ꌤꆿꐘꃆꀊꅰꀉꑌꐯꀋꂿꃅꀞꄻꎻ，ꃶꐚꃅꀞꄻꅉꇬꄉꀞꄻꅐꌠꆏ“ꋍꈚꊪꀞ、ꄮꏤꀞꌐ”“ꋍꃢꈋꉐꀋꀥ”ꃅꎻꌶ。ꊛꄉ“ꊫꌐꊨꉹꁌꀞꌒ”ꄺꀱꌠꃅ，ꊫꌐꊪꄳꀉꑌꃅꈁꄉꎆꏂꑘꌋꆀꉹꁌꁳꀱꒊꀱꇁꃅꀥꎻꀋꉆ。ꏲꃆꁧꃤꃅꌠꏭ“ꂄꄸꉉ”ꌠꄹꏦꄻꄉ，ꁧꃤꃅꃅꐨꆹꎆꏂꑘꌋꆀꉹꁌꁳꇽꏤꎻ。ꍔꃚꌤꃅꅉꆏꁧꃤꃅꋒꌠꆹꂱꑱꃅꎁꉬ，ꁧꃤꃅꀋꋒꑲꆏꃅꎁꀋꃅꀐꌠꉬ。
ꎃꊒꍞꏲꌠꌌꐽꏡꃅꋓꅔꌠꊥꎆ。ꐽꏡꃅꋓꅔꌠꆹꃷꎏꎆꏣꈯꄜꉬ，ꎃꊒꃅꍞꏲꌠꆹꐽꏡꃅꋓꅔꌠꏦꀧꌠꉬ。ꐽꏡꃅꋓꅔꌠꍤꄻꈌꁧꌋꆀꎃꊒꃅꍞꏲꄹꏦꄺꀱꐛꒆ，ꐳꃅꃷꎏꏓꋍꃱꃅꌋꆀꐽꏡꃅꋓꅔꌠꏭꄘꄻꌠꋍꑞꋍꑵꏤꐪꌋꆀꃄꄟꋊꄻꇧꎭꌶ。ꍔꅧꃅꌒꎻ。ꏦꋪꀊꅰꈝꐮꂿꐚꆏ，ꍞꏲꀊꅰꃅꊋꑌꈲꁧꐥ。ꇩꏤꊐꌠꆹꀋꉬꀋꉆꌠꋍꃱꃅꌠꍞꏲꏦꋪꌋꆀꎕꏦꏤꄻ，ꃅꄷꍔꃚꆏꀋꉬꀋꉆꌠꊋꃤꄻꎃꊒꍞꏲꌠꀂꏽꐕꄉꌶ。“ꑍꏸꈴꌋ、ꋍꄇꄜꋊ”ꌠꌤꏲꅉꐂꐮꐊꄉꍞꏲꌠꄹꇙ，ꉌꒊꍞꏲꌠꌋꆀ“ꐯꏑꈄꏍ＋ꍞꏲ”ꄺꀱꌠꃅ，ꋦꈬꀧꌋꃅ、ꄔꌉ、ꇗꏸꌤꃆ、ꃷꎏꍞꏲꑠꏦꌬꄟꄻꃪ，ꏦꐆꌠꆏꏦꈴꀉꆈꃅꅓꀞ、ꏦꍬꌠꆏꌤꀋꐥꆏꇬꄡꉉ。ꃹꅼꃅꏓꇱꏲꑘꏦꌬꌠꄺꀱ，ꏲꑘꅓꁵꌤꋊꄻꍬꄻ，ꏟꈯꃅꀉꑌꁁꏯꃅꍤꄻ、ꀱꉈꑴꍤꄻꌠꏱꄻ。ꍞꏲꊿꏭꑌꇨꃅꍞꏲ、ꏦꄻꄉ，ꈍꃅꑌꌊꄻꄉꏦꌬ、ꆸꉈꄉꏦꌬꌠꃅꀋꉆ，ꈍꃅꑌꎆꏂꑘꌋꆀꉹꁌꁳꃄꊋꎻꀋꉆ。ꏦꃤꇬꈴꄉꃷꇐꀊꆠꀉꁘꌠꄻꄉꃷꌠꑠꏦꐆꃅꇏꏭ，ꀉꆈꃅꏦꐆꌠꁳꀵꀋꄐꌠꀵꎻ。ꅇꏤꀋꁨꌠꏓꄉꅓꀞꉺꏦꄻꐛꒆ，ꋍꑞꋍꑵꃷꎏꀨꄜꏦꍬꏤꁨꃅꀰꏢꌠꊥꎆ。ꎃꊒꃅꍞꏲꌠꌌꐽꏡꌠꏲꅐꇁ、ꑘꅐꌠꏲꅐꇁ、ꍄꑐꊋꃤꏲꅐꇁ。
ꄺꀱꌠꌌꎆꏂꑘꁌꎴꌠꃆꂮꐥꌠꍅꀁꑌꌠꄹꇙ。ꃹꅼꃅꄆꊋꃷꎏꈴꌠꄺꀱ，ꄆꁌꁥꇱꎆꎴꌠꋊꍬ，ꄺꂡꑘꄆꌬꎆꀨꀁꋌꊰ，ꎃꐚꇮꃅꃼꇇꑘꐽꏡꄆꁌꉈꑴ10％ꀁꋌꊰ。ꃹꅼꃅꁌꎴꈝꃀꄹꏦꄺꀱ，ꈜꈴꋒꈴꁌꀁꋌꊰꌠꄹꇙ，ꄹꃥꎊꈬꎞꎭꐕꍯꇬꇗꀋꊒꃅꍤꄻꈌꁧꌋꆀꃄꈌꄐꃅꎆꎴ、ꃄꈌꄐꃅꌌꎆꀵꌠꏱꄻ。ꑍꈓꈋꈐꃅꇩꏤꑭꊂꐳꈴꄇꈜꌜꋯꁌꎴꅉꇤꇧꎭꌐꄉꏽ，ꍮꊪꇬꀋꆏꃅꐳꃅꁌꎴꌠꃅꇫꑟ，ꆼꑐꌠꊨꒊ、ꉹꁌꁳꈴꌒꎻ。ꎷꈜ、ꎿꀸꈨꁌꎴꌠꇤꇧꎭꅀꁌꀁꋌꊨꄉꎴ。ꌐꐘꃅꄉꇢꈴꁧꃤꃅꁌꎴꌠꏱꄻ。ꐪꊛꄉꏲꑘꌤꑘꉹꌠꁌꎴꌠꋊꄻ。ꐳꃅꁌꎴꃷꁨꋏꄯꒉ“ꈄꏍꁬ”ꌠꋈꄻ，ꁌꎴꐨꄇꄜꋊꄉ，ꃄꈌꄐꃅꎆꎴꌠꁳꆸꅉꀋꊌꎻ。
（ꌕ）ꏀꀺꏃꂠꀻꎆꌠꌭꈬ，ꇙꊋꀊꏀꌠꉗꄻꀉꒉꌠꉘꉚ。ꉪꇩꏤꊾꊋꌧꊿꅐꀦꀉꑌ、ꇩꈐꃷꎏꀉꒉꐯꀉꒉꑠꏓꇱꂴꅑꐨꋊꇤ，ꈆꑪꇮꇐꎥꃪꀖꁉꌋꆀꅐꑘꈴꌫꄻꉺꏦꄺꀱꏀꀺ，ꊋꀉꒉꃅꇤꄉꌐꑘꉌꊈꉘꉚ，ꇙꊋꀊꏀꀉꆹꐯꊛꄉꏭꆦꌠꊥꎆ。
ꋊꃅꐥꌠꅐꑘꄺꀱꉀꐕꌠꄹꇙ。ꄺꂡꑘꊇꁧꀊꂥꃅꀻꎆꌠꄹꇙꌠꇬꆼꒆꄉ，ꇮꑘꅉꃀꌋꆀꇮꇐꏀꀺꄐꊋꄻꀉꇨ，ꂴꅑꌠꄺꂡꑘꌋꆀꀋꃋꋋꄮꁧꃤꃅꑘꐮꉔꄉꀻꎆꌠꊥꎆ，ꐳꃅꄺꂡꀉꇨꌠꇩꏤꋈꄻ。ꇮꑘꐯꏑꈄꏍꐽꈉꋈꄻ，“ꀑꊋ＋”ꃄꄻ，ꄺꂡꑘꉹꏮꊐꐕꌠꎁꃅꊋꃤꁵ。ꎆꏂꑘꄏꐓꄉꐳꃅꇮꇐꄺꀱꌋꆀꉁꈾꏀꆦ，ꀋꇙꁨꇐꐳꃅꆹꋊꈲꁵꏱꁈꍔꐯꌊꄺꂡꑘꁁꏯꃅꉱꑷꌐ。ꊇꁧꅉꃀꄘꄏꌠꄻꀉꇨ，ꎕꏦꌋꆀꇩꏹꂴꅑꑟꐨꐯꊛꌠꄹꎆ，ꅐꇐꌋꆀꁧꃤꃅꊇꁧꊐꐕꄉ，ꇩꈐꇩꉈꌬꊿꀉꑌꌠꁳꍏꇩꄺꂡꌠ、ꍏꇩꁧꃤꃅꌠꌊꌬꇁꎻ。
ꏀꄓꅐꑘꐳꃅꀻꎆꌠꊥꎆ。ꃹꅼꃅꃷꁨꊫꌐꀉꒉꌠ、ꊿꄻꀑꊋꑠꎥꃪꀖꁉꌊꌫꄻ，ꀊꏀꋎꌠꈴꌗꇮꇐ、ꀊꂥꊐꌠꉁꈾ、ꒆꇐꁬꋌ、ꊋꀦꀊꏀꐕꍯ、ꌬꇐꀊꏀꑠꏀꄓꅐꑘꈨꉘꉚ，ꃷꁨꎆꏣꄻꀉꒉ。ꅓꏆꉪꋧꍞꏲꌠꌭꈬ，ꃄꄟꀊꏀꈁꏦꀊꏀꌠꀻꎆꌠꊋꁈꄏ，ꐽꈉꎆꏣ、ꐯꇯꈲꊌꌠꎆꏣꉾꃪꃅꉀꎆꌠꊥꎆ。ꐳꃅꋍꑞꋍꉹꑘꋍꑞꋍꁁꏯꇬꄉ“ꐯꏑꈄꏍ＋”ꄹꎆ。ꐪꊛꄉꈄꏍꐳꐨꐕꁌꀁꋌꊨꌠꄹꇙ。ꇓꈓꄙꍌꐳꏣꈄꏍꑱꈐꃹꌶꀠꃅꌠꃅ，ꈜꎴꃅꂘꑘ、ꈜꎴꆅꉁꈄꏍꄺꀱꊐꐕ，ꇙꊈꈄꏍꅓꍔꊐꐕꌠꄹꎆꄉ，ꌬꌠꁳꃶꐚꃅꈄꏍꐳꐨꀊꅰꃅꐳꀊꅰꃅꎍꐽꎻ。ꎼꈎꐧꐭꎆꏂꑘꐳꏣꈄꏍꐽꏡꌫꁌꉈꑴ15％ꀁꋌꊰ，ꇙꊈꈄꏍꈴꃷꁨꐽꏡꌫꁌꉈꑴ20％ꈋꉐꀁꋌꊰ，ꇩꏤꑭꊂꄉ“ꌐꂷꌌꄉꈄꏍꆦ”ꌠꃅ，ꋬꈭꃅꄐꄻꌠꋊꍬꄉ，ꁌꊰꌠꃶꐚ、ꌬꈧꊿꁳꐝꉅꊨꄅꎻ。
ꈆꑪꇮꇐꄘꄏꄐꊋꉀꐕ。ꊋꀥꇱꄉꅉꃀꎥꃪꌋꆀꌫꄻꅉꃀꎥꃪꌠꊋꁈꄏ，ꇬꀦꏀꀺꌠꄻꀉꇨ，ꊋꀥꇱꄉꇮꇐꈯꄜꀋꉬꀋꉆꌠꈢꇓꀖ。ꐳꃅꇩꏤꋒꃯꉜꅉꄐꇺ，ꇩꏤꀋꂿꑘꌠꋒꃯꉜꅉꉻꑫꏓꄻꀱ。ꀉꒉꀊꂾꌠꈆꑪꇮꇐꐘꃆꊥꇫꏲꂠꌠꄻꐛꒆ。ꎆꏂꑘꌌꀨꄜꃅꄉꌠꅐꇐꌷꇐꎥꃪꅉꋍꃱꃅꌠꏀꀺꉺꏦꄻꐛꒆ，ꎆꏂꑘꂴꅑꄉꀉꒉꀊꂾꌠꈆꑪꇮꇐꐘꃆꃅꌠꊋꁈꄏ。ꐳꃅꈆꑪꇮꇐꏀꀺꅐꀦꁉꃑꐯꇯꈲꊌꐽꈉꋈꄻ，ꐧꐭꎆꏂꑘꇮꇐꏀꀺꁧꃤꃅꌠꄻꀉꇨ。ꇩꏹꏀꀺꇷꃅꌠꍔꐯ。ꐊꑷꃅꊋꀥꇱꄉꌧꇐꅐꇐꌅꈌꀧꌋꃅ，ꌧꇐꅐꇐꌅꈌꉄꌎꌠꀵꅓꐨꐥꃅꀵꊒꄹꏦꄻꐛꒆ，ꁧꀿꁦꄻꌋꆀꏭꆦꌫꄻꌠꊥꎆ。ꈆꑪꇮꇐꏀꀺꊇꅉꆹꊿꁦꄻꐨꐥꃅꃅꈧꌠꉬ。ꋒꐯꋒꃅꈆꑪꎥꃪꊿꏭꁌꒉꌋꆀꉌꒊꄉ，ꊿꎆꋚꁸꄻꌅꈌꌋꆀꇮꇐꈴꈭꈜꏤꇽꌅꈌꀊꅰꀉꒉꃅꄻꏀꀺꊿꁥꌠꌋꆀꂴꅑꌧꊿꁵꄉꌶ。ꀒꁨꋍꁘꃅꅉꃀꎥꃪꐘꃆꅶꍯꌫꎆꍆꐪꉀꐕ，ꐘꃆꌫꎆꌫꄻ“ꀧꈘꄹꏦ”ꄺꀱꌠꃅꉚ，ꈆꑫꍆꐪꏢꑲꌠꄻꀋꄉ，ꈆꑪꎥꃪꊿꁥꌠꊨꏦꁳꑴꌅꃅꌫꎆꌫꄻꌠꏤꇽꎻ。ꈆꑪꇮꇐꊌꐨꈼꍣꉺꏦꄻꐛꒆ。ꈆꑪꇮꇐꏦꉻꄺꀱꃄꄟꃅꌊꈲꁧꐥꌠꀂꏽꄉꊋꇤ，ꈍꃅꑌꄺꀱꏱꁈꁳꈂꀸꇬꀉꄂꉉ、ꁱꄯꒉꇬꀉꄂꄀꄉꎻꀋꉆ。ꊋꇤꃣꇖꋊꑣꄉ，ꈆꑪꎥꃪꊿꁳꉌꂵꋦꄉꌶꄻ、ꏀꀺꂵꅐꐨꐥꎻ。ꊋꀥꇱꄉꈆꑪꎥꃪꀺꇗꌋꆀꌶꄻꃅꇏꂘꄻ，ꌷꇐꀋꉾꌠꅒꄻ，ꃅꇏꊎꌾꌠꏡꄻ。ꉪꇩꏤꆹꋧꃅꇣꄧꄉꈁꀉꒉꐯꀉꒉꌠꈆꑪꇮꇐꌧꊿꁥꐥ，ꈆꑪꎥꃪꒆꉻꉾꃪꌠꄺꄉꑲꆏ，ꀋꎪꃅꋍꑞꋍꑵꌧꊿꋓꃅꅐ、ꏀꀺꊌꐨꀋꈘꇁꄎꌠꉬ。
ꀒꁨꋍꁘꃅꋍꏅꑘꀺꋍꉻꏀꀺꌠꈻꌊꃹꅼꆹ。ꐧꋦꀨꄜꀊꅰꀉꑌꌠꊋꊡꄉꏀꀺꑘꀺ，ꎆꏣꐧꋦꀻꎆꅉꍔꐯ，ꊋꀥꇱꄉꐊꑷꃅꁧꃤꃅ，ꑍꀺꌶꀠꃄꅉꏃꂠꂿꄐꋊꇤ。ꁊꈲꐨꊋꁈꄏꌠꄻꀉꇨ，ꄉꈁꀄꊭꌠꇗꏸꏮꊿꁌꎆꇗꏸꇬꄑꎳꄻꅉꃅꆪꃷꄻꐨ3ꃪꂷꇬꄉꉀꐕꅷ10ꃪꂷꑟꌠꑠꇗꏸꎴꈲꁵꏱꁈꃄꌬꋒ。ꎆꒉꎆꇁꊋꁈꄏꉺꏦꄺꀱꐛꒆ，ꈆꑪꇮꇐꏀꀺꅉꋈꄻꄷꀋꁧꁱꄀꄹꏦꃅꉚ，ꑍꀺꎆꒉꎆꇁꎝꃆꊫꌐꃑꄻꌠꊋꊡ，ꌧꇐꅐꇐꌅꈌꄇꄉꎆꏓꌠꍔꐯ，ꑘꀺꎆꇱꀻꎆꌠꊋꁈꄏ。ꌧꊿꉘꉚ、ꌫꄻ、ꈋꍣꉺꏦꄺꀱꐛꒆ，ꀱꇩꈐꇁꌠꌷꏷꊿꌋꆀꇩꉈꀀꌠꌧꊿꁧꃤꃅꌠꄻꃪ。ꃷꎏꈉꄻꌠꏯꉜꌠꌋꆀꃰꊿꁱꀕꉌꊈꍔꆙꌠꏓꐮꐊꎼꇁꄉ，ꌧꊿꋍꑞꋍꉹꌠꊙꉔꌬꉔꑲꆏ，ꍏꇩꏀꀺꆹꀋꎪꃅꀊꅰꉾꃪꃅꀻꎆꇁꄉ，ꃰꊿꌧꑳꀻꎆꌠꎁꃅꅐꌞꅐꋭꌠꃅꅐꇁꄎꌠꉬ。
（ꇖ）ꇩꈐꃷꎏꀉꒉꀉꇨꌠꏓꐛꌠꊥꎆ，ꐪꊛꄉꈐꈉꊋꂫꋊꃑ。ꋒꐯꋒꃅꌬꈧꅉꃀꂿꄐ、ꎆꇱꌠꂿꄐꀋꉬꀋꉆꌠꋊꇤ，ꇩꈐꇿꋌꐥꌠꈉꐨꁳꎍꐽꄉ，ꎆꏣꎍꐽꃅꒈꇁꌠꎁꃅꊋꇤꄉꄘꄏꎻ。
ꌬꈧꎍꐽꃅꉀꎆꌠꊥꎆ。ꏡꁈꀉꑌꑵꃅꏂꄉꇓꈓꇓꉈꀀꊿꊌꎆꉀꐕꌠꊥꎆ，ꌬꈧꄐꊋꄻꀉꇨ。ꀊꏀꃅꄺꀱꄉꌠꊨꏦꊌꐨꇗꏸꏦꃤꃄꌬꋒꄉ，ꇗꏸꊨꌠꏱꁈꇬꊒꌠꇗꏸꏮꊿ8000ꃪꑻꈲꊌꋭꌠꈲꊌ。ꌬꈧꈉꐨꐛꐈꐨꀊꏀꌠꇬꈴꄉ，ꈝꂾꀉꑌꏢꃅꅐꇐꉾꃪꌠꌋꆀꁧꃤꃄꄻꌠꁦꎆ，ꐳꃅꉹꁌꎆꀨꃹꆹꇬꋍꄙꅉꋊꑣ。ꉪꇩꏤ60ꈎꈋꉐꑟꌠꊻꂷ2.5ꂡꑻꐥꀐ。ꊋꀉꒉꃅꇤꄉꃀꌠꀨꎹꈜꀕꇈꋥꁕꃀꌠꀨꎹꁧꃤꃅꑘꀻꎆ，ꋥꁕꇬꄉꂵꆧꀨꎹ、ꆅꉁ、ꋙꍈꒉꄎꑠꁧꃤꃅꌠꇲꁵꌠꏲꉻꏭꇗꏸꁌꊨꒊꇗꏸꁌꀋꎴ、ꎆꀨꄏꐓ、ꒉꄆꐞꌗꊸꁌꏤꈲꁵꑠꄏꐓꌠꄻꇬꁳ，ꀊꏀꃅꋉꄉꌠꀀꅉꇬꋥꁕꃀꌠꀨꎹꁧꃤꃅꉁꈾꇱꄻꄉꄡꑟ，ꊋꀥꇱꄉꂿꑘꁡꇤꃀꌠꀨꎹꁧꃤꃅꉁꈾꋈꄻ，ꉃꄻꀨꎹꐮꐊꌠꏱꁈꄺꀱꐛꒆ，ꀊꉗꃅꀨꎹꄜꏂꀧꄹꏦꃅꉚꅉꍔꐯ，ꃀꌠꁳꃀꄮꐥꌒ，ꊁꇁꌠꁳꃆꎸꊂꑋꏯꉘꇉꉆꇁꎻ。ꀉꑳꌺꀨꎹꌠꆹꄙꁯꃪꁯꃅꃆꂮꐥ。ꐊꑷꃅꀉꑳꑍꂷꒅꉘꏱꁈꌬꊂꐛꃆꐛꂮꀊꏀꌠꇬꉜꄉ，ꐳꃅꇶꏦꀉꑌꑵꃅꀉꑳꌺꀨꎹꁧꃤꃅꌠꀻꎆ，ꐧꋦꊋꃤꀉꑳꌺꀨꎹꁧꃤꃅꅉꀞꄻꌠꊋꁈꄏ，ꊋꀥꇱꄉꀊꉘꋬꂻꌠꏦꀧ。ꑱꏲꁧꃤꃅꑘꊈꐕꅓꍔꌠꊥꎆ。ꋋꁕꃅꈩꆫꌠꀻꎆ，ꈩꆫꅐꑘꄻꀉꒉꇁ。ꐕꍯꌫꈨꎍꐽ，ꐪꊛꄉꊋꀦꀊꏀꐕꍯꃻꄻꈲꁵꏱꁈꃄꌬ，ꄆꊐ、ꏿꊐꑠꉁꈾꋈꄻꌠꄹꇙ。ꌬꈧꃄꄟꀊꏀꈁꏦꀊꏀꌠꀻꎆ，ꈄꏍꈴꅀꈄꏍꀋꈴꃅꌬꈧꌠꐮꐊꀻꎆꌠꊥꎆ，ꌬꈧꉀꎆꅉꀊꏀꌠꉘꉚ。ꑘꃅꁡꇤꐮꈴꈄꏍꄻꐛꒆ，ꈄꏍꈴꃼꇇꃅꌠꌋꆀꐳꎭꀻꎆꌠꊋꁈꄏ。ꊋꀥꇱꄉꌬꈧꊿꌅꈌꈲꁧꀧꌋꃅ，ꉹꁌꁳꉌꒊꃅꌬꈧ、ꌬꈧꌒꎻ。
ꋭꋽꃅꇿꋌꐥꃅꎆꇱꌠꍔꒉ。ꏟꈯꃅꇩꏤꀻꎆꄐꇐꇬꆼꒆꄉ，ꐳꃅꄉꐘꃆꀋꂿꑘꈨꃅ。ꎷꈜꎆ8000ꂡꂷꇱꌠ、ꄇꈜꒉꇬꎞꎭꎆ1.8ꃪꂡꂷꇱꌠꃅꌐ，ꉈꑴꀋꂿꑘꌠꈲꒉꋉꃆꈨꋈꇬ，ꐳꃅꍧꊗꎷꈜꄐꎖꋈꄻ，ꊋꀊꒉꃅꇤꄉꇓꈓꇢꊭꇬꈭꈜ、ꎊꈬꎞꎭ、ꇓꈓꏲꃆ、ꉮꌸꄴꏮ、ꉹꁌꌬꌠꌋꆀꌬꈴꃅꐚꌠꑠꅉꃀꉁꈾꇬꎆꇱ，ꊋꀥꇱꄉꀊꏀꋎꌠꈴꌗꅉꃀꉁꈾꋈꄻ。ꎼꈎꍏꑷꄐꌗꈐꇬꎆꇱꄐꁆꌠ5776ꂡꂷꐥ，ꀋꉊꄻꈎꄩ400ꂡꂷꉀꎆ。ꐘꃆꎆꏓꄟꏀꀺ，ꄉꄐꃅꅉꃀꉁꈾꑠꐘꃆꎆꀨꍆꁧꀁꋌꊨꒊ，ꁉꃑꃅꐙꌠꎆꏓꌬꅍꌬꋒ，ꉹꁌꈬꇬꎆꀨꀊꅰꃅꀉꑌꃅꈻꎷꌊꀋꉬꀋꉆꁁꏯꐘꃆꋈꄻꈽꇁ。ꉹꁌꎆꇱꌠꄎꐔꏱꁈꃅꇫꑟ，ꊱꁨꃅꍔꃚꌋꆀꐧꋦꎆꀨꇷꃅꌠꄹꎆ。ꃄꊙꄹꏦꄺꀱꐛꒆ。ꍔꃚꆏꂴꅑꄉꏤꁨꏤꅉꈴꌶ，ꈍꃅꑌ“ꇜꏀꎝꆹꀋꏲ”ꌠꃅꀋꉆ，ꎆꏂꑘꎝꄉꌠꈎꂫꂾꈮꁁꈋꉐꊒꌐꌶ，ꈍꃅꑌꀊꏀꃅꎝꄉꌠꁦꎆꇬꇯꀋꉆ。
（ꉬ）ꐊꑷꃅꊼꇅꌣꈚꌠꐧꋦꋉꐛꌠꂿꃆꑞꅉꉜꄉ，ꏟꈯꃅꎭꑆꇔꈢꇓꀖꌠꌋꆀꑣꋂꌄꆣꎻꌠꄹꎆ。ꏟꈯꃅꂿꑘꂿꑘꁡꇤꌌꂴꄉꀻꎆꇬꎷ，ꊋꀥꇱꄉꎭꑆꇔꈢꇓꀖꌠꌋꆀꑣꋂꌄꆣꎻꌠꏓꈴꇲꈴꃅꐯꊛꎼꇁ，ꏤꄮꑟꇬꆏꎭꑆꇔꈢꇓꀖꁻꌐ、ꂿꑘꊿꐥꐨꐊꑷꃅꊼꇅꌣꈚꌠꃅꇫꑟꌠꄉꀧ。
ꊒꌸꃅꎭꑆꇔꈢꇓꀖꌠꃅꋒ。ꀋꂿꑘꌠ“ꑍꑵꀋꐒꌕꑵꏦꀧ”ꃅꇫꑟꇬꌤꃆꑓꅐꎑꌠꂥꀘ，“ꌕꐎꌕꍏ”ꑠꌢꎭꅼꇨꃅꄷꎭꑆꇔꈢꇓꀖꌠꊋꀥꇱ，ꊋꀥꇱꄉꅉꃀꉁꈾꋈꄻ，ꐋꀋꌡꌢꎭꊻꂷꏭꏦꀧꏁꁈꃅꇫꑟ。ꎭꑆꇔꌣꈚꇁꌠꆹꅐꑘꄘꄏꌠꐞꀋꉆꌠꉬ，ꊋꀉꒉꃅꇤꌊꌢꎭꃅꄷꐛꋲꂱꎆꅑꅐꑘꀻꎆꄏꐓꌶ。ꌢꎭꃅꄷꌷꀋꌐꌠꋏꆸꄉꌷꌐꎻꌠꌐꐘꍔꆙꄉꃅ、ꀋꌷꇧꎭꐨꄇꇖꀕꃅꀁꋌꊰ，ꐪꊛꄉꌶꅉꀊꂥꊐꌠꌐꄉꂿꑘꁡꇤꌋꆀꌢꎭꃅꄷꌶꌺꎹꄻꌠꊻꂷꃷꁨꁦꎆꇱ，ꉙꂘꌠꊿꋊꌢꎭꅷꁧꇬꎷꌠꇽꊇꅉꇬꄉꏱꄻꏱꁈꋋꏢꌬꋒ。ꀑꐱꃅ“ꊯꌕꉬ”ꎞꀉꁁꃅꄷꏀꄉꌢꎭꄏꐓꎖꄎꋈꄻꂿꃆꃅꌐ，ꊁꊛꄉꄏꐓꌠꏭꊋꀥꇱ。ꀎꇓꇔꑤꌋꆀꎭꑆꇔꊻꂷꄏꐓꏱꁈꆏꄮꈉꊭꌬꄉ，ꎭꑆꇔꊻꂷꋏꈬꌶ。ꍤꎖꍞꊟꌠꄻꐛꒆ，ꍏꑷꎭꑆꇔꈢꇓꀖꌐꄉꏮꆫꊌꐨꌬꋒ。ꀊꅰꃅꎭꑆꇔꈢꇓꀖꀋꉬꀋꉆꊬꌠꇬꑟꆹꆏ，ꀊꅰꃅꋍꑞꋍꐘꌤꃅꌠꒃꋒꉇꋒꌶ，ꎭꑆꇔꌠꇿꋌꐥ、ꊛꄉꀻꎆꉆ、ꐩꋊꍤꎖꌠꇬꊪꄽꄎꌠꄉꀧ。
ꂿꑘꈜꀕꇈꋚꂷꒃꅐꌠꒃꉇꋒ。ꍏꇩꊿ14ꂡꀋꇈꐥꌠꋙꋠꍔꌺ，ꀋꎪꃅꄌꊨꏦꇇꇬꊐꄉꌶ。ꋚꂷꅐꐨꎍꐽ，ꑵꑫꐛꉻꄻꃪꌶ。ꊋꀥꇱꄉꂿꑘꃄꅉꈲꒉꋈꄻ，ꎕꏦꀊꂥꌠꂿꑘꋠꃅ8000ꃪꂿꈋꉐꀊꏀꃅꁦꎆ。ꃮꑠꎇꃀꍅꑓꒃꅐꌠꎍꐽ，ꃏꍏꃮꆅꑠꆄꄵꈻꏮꌠꃅꋒ。ꐳꃅꂿꑘꈆꑪꇮꇐꄺꀱꏀꀺ，ꊋꀉꒉꃅꇤꄉꀋꃋꋋꄮꊪꑘꀻꎆ，ꊋꀥꇱꄉꄞꅐꌬꍩꐥꌠꇮꇐꄹꌬ，ꅉꇗꌐꂷꂿꑘꅐꇐꀧꌋꃅꋉꃆꃅ，ꂿꑘꈀꉬꏸꏧꌬꈴꌠꄹꎆ。ꑱꈐꂿꑘꋚꐷꄈꅉ、ꂿꑘꊿꇷꃅꎹꑠꀊꏀꉹꌠꀰꏢꀨꄜꉗꄻ，ꊋꀥꇱꄉꑱꁯꀄꊭꌠꏭꉜꄉꐧꋦꈴꁧꃤꃅ，ꇶꏦꀉꑌꑵꃅꄉꈁꃅꀰꏢꌠꀻꎆ。ꀨꅐꃅꄷꄏꐓꌊꂿꑘꅐꇐꉾꃪꃅꄺꂡꌠꀻꎆ。ꀱꉈꑘꃅꁡꇤꄉꑘꀺꏀꀺꇁꌠꊋꁈꄏ，ꋍꑍꌕꅐꑘꐮꉔꄉꀻꎆꌠꄹꇙ，ꑤꁕꎆꏣꀉꒉꇁꎻ。ꊋꃅꊌꐨꆹꂿꑘꊿꊌꐨꁦꎆꌠꇬꀉꒉꐘꉬ。ꂿꑘꊿꇮꃅꌠꃤꃄꎆꁯꌠꌤꃆꊇꅉꇬꄉꂥꀘꇧꎭ，ꐳꃅꌐꁨꏲꑘꏦꇗꏤꄻ，ꎬꅧꌋꆀꇵꂷꅧꇗꀕꃅꊋꃅꌠꂿꑘꊿꇮꃅꌠꁳꏤꄮꈐꃅꊌꋭꌠꃄꎆꒃꊌꎻꌠꏦꀧ。
ꏟꈯꃅꑣꋂꋈꄻꌠꄹꎆ。ꈆꑪꃅꁰꄻꌋꆀꋈꄻꎖꄎꌠꃅ，ꊋꀉꒉꃅꇤꄉꒃꅐꐥꐨꇎꏦꄻꃪ。ꐳꃅꂿꑘꁡꇤꅝꒉꉮꀋꐥꈫꈈꉀꐕꋉꃆꃄꌬ，ꎼꈎꑎꄻꈎꋋꑍꈓꆏꀆꐒꅝꊋꋠꊻꂷꅝꒉꉮꀋꐥꌤꃆꂥꀘꋒ，ꂿꑘꁡꇤꊻꂷ6000ꃪꑼꀀꈥꇲꄻꏦꀧꑟꐨꉀꐕꌶ。ꀊꏀꈭꌠꂿꑘꁡꇤꄆꈄꊐꐕꄺꀱꌠꃅꌐ。ꂿꑘꁡꇤꄇꈜ20ꃪꉻꆏꀊꏀꃅꋈꄻꄺꀱ。ꐪꊛꄉꂿꑘꁡꇤꑲꎓꇣꐡꌠꄺꀱꌠꄹꎆ。ꐛꐨꉜꄉꂿꑘꁡꇤꊿꀀꋦꈭꏱꄻꌠꃅ，“ꅊꁧꒈꅉꄺꀱ”、ꑶꌩꀖꑘꍍꒉꏱꄻꌠꄹꎆ，ꎔꃨꌠꑣꋂꋈꄻ。
ꐊꑷꃅꃹꅼꃅꂿꑘꁡꇤꄺꀱ。ꂿꑘꁡꇤꃄꅉꎳꃼ、ꋍꉻꃅꀰꏢꉹꌠꋈꄻꌬꃅꃷꎏꃹ、ꑲꅉꃅꄹꏦꄺꀱꃅꉚꊌꐨꄹꌬ。ꃹꅼꃅꋍꉻꁨꇐꌅꈌ、ꋍꉻꌩꏪꌅꈌ、ꇩꁨꌩꁍꐛꅉ、ꃅꏀꀖ、ꇲꃷꎹꑠꄺꀱꌠꃅ。ꂿꑘꄏꐓꀧꌋꃅꉻꑫꄺꀱꐛꒆ，ꋚꂷꁌꏤꃷꎏꈴꇁꉺꏦꄻꐛꒆ，ꏱꁈꃅꐙꌠꂿꑘꄜꏂꀧꄺꀱꉚꅉꍔꒉ，ꂿꑘꁡꇤꎆꒉꎆꇁꁧꃤꃅꌠꏀꀺꌋꆀꊋꀥꇱ。ꐪꊛꄉꃹꅼꃅꂿꑘꁡꇤꄺꀱ，ꑣꋂꀉꑌꃅꀑꆴꑊꐈꍅꁍꀕꇁꎂꀕ。
（ꃘ）ꃄꁕꋮꄮꃅꀻꎆꌠꊥꎆ，ꀊꏀꉹꌠꇓꈓꏦꎫꐛꈴꌠꊇꁧꉀꐕ。ꀻꎆꐮꆽꀋꏣꌠꇎꀋꋒꌠꌤꃆꂥꀘꌠꇬꆼꒆꄉ，ꄚꃆꂮꐥꌠꉺꏦꌋꆀꏱꁈꄺꀱꐛꒆ，ꀑꐱꄉꉻꁧꃤꃅꐽꏡꈴꌠꊥꎆ，ꃄꁕꉾꌠꐯꅋ、ꇓꈓꇓꉈꐮꐊꀻꎆꌠꄹꇙ。
ꃄꁕꀻꎆꐛꉻꄻꃪ。ꁮꐚꏯꀖꁉꁉꃑꀊꏀꌠꏱꁈꏁꁈꏤꄻ，ꁮꐚꏯꃅꄷꎆꏂꑘꈁꊌꇗꏸꈲꁵꑠꏱꁈꄮꈉꇫꑟꈭꐨꐪꊛꄉꃄꌬ。ꑛꌋꈤꐊꑷꃅꌄꆣ、ꈯꄔꃅꄷꉀꄓ、ꁰꅐꁆꏯꂴꅑꄉꀻꎆꊥꎆꌠꄺꀱꏀꀺꏁꁈꃅꇫꑟꌋꆀꄻꐛꒆ。ꏢꏸꏹꋮꄮꃅꀻꎆꇬꀋꉬꀋꉆꅉꆏꀙꏢꏓꈌꇓꈓꂿꄐꀋꉬꌠꎵꃪ、ꎕꏦꀊꂥꃅꑪꉢꑟꐎꋈꄻ。ꒀꇤꀎꎿꈪꀉꒉꅉꀻꎆꎖꄎꐱꀨꃅꇫꑟ，ꏦꋪꐯꊛꌠꊥꎆ，ꐊꊈꏭꇙꌠꌋꆀꊿꐮꎼꐮꈴꌒꌠꄹꇙ。ꍤꏦꌕꎏꃅꄷꋍꃱꃅꀻꎆꌠꉀꐕꌊꇩꏤꄐꇐꃅꄉ，ꀻꎆꎖꄎꐱꀨꁰꄻꃄꌬ。ꍤꏦꎆꏣꐛꁕꀻꎆꇬꆹꏟꈯꃅꉎꐕꌠꐧꐕꌠꐰꐕꌠꋮꄮꐊꃅꇬꎷ，ꊋꀥꇱꄉꒆꉻꀧꌋꃅꄺꀱꌋꆀꏓꇱꈭꈜꎞꎭꉻꑫꋈꄻ，ꊇꁧꀊꂥꃅꀻꎆꌠꎆꏣꐛꁕꄺꑣ。ꅐꀦꉹꌠꃅꄷꎆꏣꉹꏮꌠꏭꊋꁈꄏ。ꐳꃅꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷ、ꌢꎭꃅꄷꀻꎆꊋꁧꅉꅋꑣ。ꊋꀉꒉꃅꇤꄉꀊꃴꎆꏣꀻꎆ，ꎿꃀꋦꈭꀧꌋꃅ，ꎿꃀꀉꇨꌠꇩꏤꋈꄻ。
ꃹꅼꃅꀊꏀꉹꌠꇓꈓꏦꎫꐛꈴꌠꄹꎆ。ꈯꄔꇓꈓꌌꇓꈓꈨꀻꎆꌠꈻꏁꇬꎷ。ꂿꑘꊻꂷꆹꏮꑱꈿꌠꒃꉇꋒ，ꇓꈓꏦꎫꅉꀨꄉꉻꁧꃤꃅꌠꅉꀕꀀꊻꂷꇬꉱꑷꈴꌠꄹꇙ。ꀊꅰꉾꃪꃅꉹꁌꀀꑳꌤꃆꂥꀘ，ꇓꈓꀨꄜꆼꎍꌠꃅꇫꑟ，ꀀꑳꃷꎏꉻꑫꌋꆀꏦꀧꉻꑫꄺꀱꐛꒆ，ꑲꅉꇤꂷꃷꎏꎍꐽꉾꃪꃅꀻꎆ。ꐪꊛꄉꏦꀧꃅꐙꌠꀀꑳꋈꄻꌠꌋꆀꇓꈓꏦꎫꑲꁘꇤꇁꐛꅉꄺꀱꌠꄹꎆ，ꊋꋠꊿꁥꌠꀑꐱꀀꑳꈉꄻꌠꏦꀧꄉ。ꐪꊛꄉꅉꃴꏓꇱꈴꈜꋈꄻꌠꄹꎆ。ꇓꈓꏦꎫꀀꁕꀉꆹꌠꃷꁨꀉꑌꃅꊂꀉꒉ，ꊋꀉꒉꃅꇤꄉꄺꀱꊐꐕ，ꒉꄆꈜꐞꌗꑠꋦꈭꉁꈾꏀꆦ，ꄆꅂꊐꄻꇬꇯꌠꌋꆀꑴꀋꅑꋦꈭꋈꄻꌠꇬꊋꁈꄏ，ꉹꁌꃼꌒꃷꎏ、ꎊꈬꃼꌒꅉ、ꈛꎼꏦꈜ、ꐕꍯꄈꅉꑠꐥꐨꁧꃤꃅꉁꈾꄻꐛꒆꌶ。ꀊꏀꉹꌠꇓꈓꏦꎫꐛꈴꇬꇿꇬꑌꊿꌌꈯꄜꃅꄉ，ꆓꃅꏱꄻ、ꉾꃅꑭꋧꃅꁧꃤꃅꑟꐨꉀꐕꄉ，ꇓꈓꁳꀊꅰꃅꀀꌒꑌꌒ，ꀊꅰꃅꅔꆙꀕꌠꌋꆀꊿꐥꐥꐨꉈꇬꃅꐙꎻꌶ。
（ꏃ）ꊋꀥꇱꄉꍍꆀꄴꏮꌋꆀꒆꉻꋈꄻ，ꊋꀉꒉꃅꇤꄉꀊꃴꌠꀻꎆꌠꄹꇙ。ꀊꃴꌠꀻꎆꌠꆹꐛꏀꈴꎆꏣꉻꑫꏓꄻꌠꎂꀕꇖꐨꉬ，ꍍꆀꌤꃆꂥꀘꌠꁧꀦꏁꁈꉬ。ꄚꃆꂮꐥꌠꄹꏦꄺꀱꐛꒆ，ꋮꄮꃅꊇꁧꀊꂥꃅꀻꎆꌠꌋꆀꒆꉻꋦꈭꀧꌋꃅꌠꄹꇙꌶ。
ꐪꊛꄉꍍꆀꄴꏮꌠꄹꎆ。ꈫꈈꃅꃅꑆꃴꇉꀕꌠꀧꌋꃅꊌꐨꍔꐯ，ꎼꈎꑍꀑꐈꑘ、ꄊꀑꐊꐥꇐꋊꃑꃷꁨ3％ꀁꋌꊰ，ꀋꉬꀋꉆꃅꄷꈑꋧꐥꇐ（PM2.5）ꐊꐨꐪꊛꄉꀁꋌꊰ。ꐪꊛꄉꏢꏸꏹꌋꆀꈭꇍ、ꍤꏦꌕꎏꃅꄷ、ꃏꊉꐦꀞꃅꌗꍍꆀꏱꄻꈢꇓꀖꌠꃅ，ꊋꀥꇱꄉꇮꑘ、ꐞꌋ、ꏸꐕꇙꊋꍯꍍꆀꀉꒉꌕꑵꌠꏱꄻ。ꒈꀑꃅꄷꁦꎴꊸꎹꌠꌤꃅꋒ，ꉹꁌꊷꆣꀕꃅꃅꋆꈳꅐꌠꄉꀧ。ꀉꇨꃅꒉ、ꊖꆊꍍꆀꌠꄴꏮꏱꄻ，ꎼꈎꐈꇐꀑꈉꃷꁨ、ꉢꄊꋊꃑꐨ2％ꀁꋌꊰ。ꐳꃅꒉꀉꆈꍹꅿꌠꏱꄻ，ꂿꑘꁁꏯꇁꌠꍍꆀꌠꄴꏮꏱꄻ，ꀋꉬꀋꉆꈳꁕꌋꆀꎿꋮꈛꑌꅉꎿꁕꏓꇱꄉꏱꄻꌠꄹꎆ。ꊋꀥꇱꄉꇴꄜꀜꋊꎊꈬꌋꆀꇓꈓꀉꀜꀊꇁꉹꁸꌠꃅ，ꃷꁨꊨ、ꅐꀦꃅꐙ、ꉮꀋꐥꈴꌠꊥꎆ。ꊋꀥꇱꄉꍍꆀꄴꏮꏱꄻꀉꒉꀊꂾꌠꈆꑪꇮꇐꈢꇓꀖꌠꃅ。ꎆꏂꑘꆏꍍꆀꄴꏮꀨꄜꃅꄉꇬ，ꀋꎪꃅꏦꈴꋦꈭꀧꌋꃅꌠꃅꎁꃅꌶ。ꋦꈭꏱꄻꃄꄟꄺꀱꏀꀺ，ꎆꏂꑘꏭꏦꃤꍬꏦꇗꈴꄉꍞꏲ，ꉈꑴꏦꊒꌠꑗꇖꌠꉜꁨ、ꇇꀨꊋꄏꄐꂘꌠꊋꀥꇱ，ꎕꏦꑟꋊꄻꌶꌠꏭꄉꄐꃅꈳꅐꊭꄻꇬꁳ，ꀞꄻꏡꁈꈝꐮꇯꅝ、ꈢꇧꎭꆏꌐꌠꐵꇧꎭꌶ。ꎆꏂꑘꆹꈏꇓꇙꊋꌋꆀꉇꉻꍅꊋꐥꑲꆏ，ꍍꆀꄴꏮꏱꄻꌠꆹꀋꎪꃅꊌꐨꈲꁧꀊꅰꀉꒉꃅꊌꅜꄎꌠꉬ。
ꀊꃴꋦꈭꀧꌋꃅꌠꅐꑘꄻꀉꇨ。ꊧꀨꇬꄉꏱꄻꇬꎷ，ꐳꃅꄔꄆ、ꇤꎸꅍꉹꑘꀁꂥꃅꋊꃑꌠꄺꀱ，ꀉꇨꃅꍍꆀꉹꑘꎕꏦꑟꃅꋊꃑꄺꀱꌠꃄꌬ。ꊋꇁꀦꐛꉻꋊꄻꉾ。ꊖꌋꁦꎴꃅꐙꌠꌫꄻꌠꄹꎆ。ꋌꐛꐞꌗꅐꇲꊐꃷꉻꑫꋈꄻꐛꒆ。ꊋꀉꒉꃅꇤꄉꊋꀦꉈꑴꒆꇁꉆꌠꀻꎆ，ꐳꃅꃅꆳ、ꁨꑭ、ꒉꄆꋊꃬꌤꃆꂥꀘ。ꇓꈓꒉꍍꆀꁠꐤꌋꆀꀞꄻꉁꈾꋈꄻꌠꇬꊋꀥꇱ。ꅐꀦꏎꏸꏓꋧꌠꌋꆀꀰꏮꃅꌫꄻꌠꊥꎆ，ꀊꃴꋉꃆ、ꀊꃴꐳꎭꄞꇙꌠꄹꌬ。ꋦꈭꎆꏣꏱꁈꄺꀱꐛꒆ，ꍍꋊꌅꈌꃷꄻꄹꏦꄻꐛꒆ，ꐳꃅꀊꃴꎆꒉꎆꇁꀻꎆ，ꌐꑘꈴꌠꋦꈭꀧꌋꃅꈯꌬꎆꏂꑘꈨꉗꄻ，ꀊꃴꀻꎆꄐꊋꊐꐕ。
ꒆꉻꉻꑫꀧꌋꃅꄻꀱꐛꅉꐛꌠꊋꀥꇱ。ꉘꃅꀆꐒꌩꏪꍯꃅ꒺ꉻꅔꏂꒆꉻꀧꌋꃅꄻꀱꐛꅉꐛꌠꋉꃆꃅꉚꅉꄹꎆ，ꐪꊛꄉꇩꁨꃄꅉꀊꃴꈴꌠꒃꉇꋒ，ꊋꀥꇱꄉꃅꈣꂤꏂꐛ、ꇓꊈꂤꏂꀞꐛ、ꃅꐡꊖꑳꌠꏱꄻ。ꊋꀥꇱꄉꒆꇐꀉꑌꑵꃅꐙꌠꀧꌋꃅ。ꐪꊛꄉꋠꃅꀱꌩꊪꏜꏿꒉꊩꐛꌠꃅ。ꃹꅼꃅꇩꏤꋍꏅꈩꅉꏦꉻꄺꀱ。ꒆꉻꁵꊒꉺꏦꋈꄻꐛꒆ。ꀊꃴꀻꎆꌠꈀꄸꑌꃅꎁꐥ，ꃄꆏꁌꇐꈤ、ꀋꆏꃅꀕꆏꃅꐛ。ꉪꊇꆏꐯꇯꈒꇤꊋꇤꄉ，ꏓꂱꉹꁌꁳꎔꃨꀀꌒꋦꌒꅉꊌꎻꌶ。
（ꉆ）ꃹꅼꃅꀋꂿꑘꁁꏯꄺꀱ，ꐳꃅꃷꎏꉺꏦꄻꐛꒆ。ꐮꄙꐨꑓꅐꎑꌋꆀꀋꉬꀋꉆꊨꊭꇬꉜꄉ，ꄚꃆꂮꐥꌠꄺꀱꃹꅼꈴꌠꄹꇙ，ꊇꁧꀊꂥꃅꀻꎆꌠꌋꆀꐮꄉꄐꌠꏦꉻꉺꏦꄻꐛꒆ，ꃷꎏꍄꑐꊋꃤꌋꆀꐧꋦꁦꄻꊋꃤꋒꐯꋒꃅꋊꃑꎼꇁꌶ。
ꐳꃅꇩꏤꎆꀨꇩꁨꎆꏂꑘꄺꀱ。ꇩꁨꁨꇐꍞꏲꌠꊋꀥꇱꌋꆀꄻꐛꒆ，ꇩꁨꎆꀨꎆꇱ、ꇬꌦꀰꏢꄺꀱꃅꉚꅉꄹꎆ，ꇩꁨꁨꇐꁌꀧꁌꎆꌠꊥꎆ。ꏣꀋꑌꊝꈭꃅꐮꉔꁨꏦꄺꀱꌠꄹꎆ。ꇬꌦꏱꄻꐛꉻꄻꐛꒆ，ꃷꎏꈴꀰꏢꉺꏦꄻꐛꒆ，ꃅꑘꏱꄻꊿꑠꄹꏦꄻꄉ。ꏦꈴ“ꂾꈠꎆꏂꑘ”ꀞꄻ。ꃹꅼꃅꄆꊋ、ꇓꋌꐞꌗ、ꎷꈜꑠꁁꏯꄺꀱ，ꋌꐛꇂꇎꉹꑘꆏꉹꑘꐯꀋꌡꌠꐛꐨꇬꈴꄉꈄꎞꁸꃅꌠꃅ，ꋓꅔꃅꐙꌠꃅꑘꐊꑷꃅꄹꌊꃷꎏꉜꄉꆹꌶ。ꇩꁨꎆꏂꑘꆏꄺꀱꏀꀺ、ꈯꇨꇭꀧꒉꄚꌠꇬꈴꄉ，ꀋꆏꃅꀻꎆꍄꑐꊋꃤꌋꆀꈯꄜꋓꅔꊋꃤꄻꀉꇨꌶ。
ꊋꀉꒉꃅꇤꄉꉹꁌꀰꏢꎆꏣꀻꎆꋦꈭꄻꃪ。“ꑍꑵꀋꇙꀋꑐ”ꌠꌭꈬ，ꉻꁨꏦꀋꉬꌠꎆꏣꀻꎆꏱꁈꏁꁈꊡꀮ、ꄏꐓ、ꄐꇺ。ꋓꅔꊒꀕꃅꌠꏥꏦꇬꈴꄉ，ꐊꊈꊌꅜ、ꈏꃹꉆꌠꈌꁧ、ꀰꏢꏮꈴ、ꍔꃚꃻꄻꌋꆀꊙꎹꊙꊌꑠꁆꏯꇬ，ꁨꏦꎆꏂꑘꋍꑞꋍꉹꏭꐽꏡꃅꉜꄻ。ꐮꉂꐙꎴꀊꏀꉹꌠꍔꃚꃼꇇꃅꊿꐮꃆꂮꄺꑣ，ꍔꃚꎆꏂꑘꐮꈴꉺꏦꄻꐛꒆ，ꎆꏂꑘꌧꃀꉌꊈꄖꄑ，ꉹꁌꀰꏢꎆꏣꀻꎆꊐꐕꌠꊥꎆ。ꅐꇐꌅꈌꀧꌋꃅꌠꀋꎪꃅꀋꇙꀋꑐꌶ，ꌅꈌꉄꌎꃅꐨꆏꏦꃤꇬꈴꄉꅓꀞ，ꇽꑽꋉꑽꌠꃣꈌꆏꑽꌠꀋꎪꃅꍬꄻꌶ。ꊋꇤꄉꃼꇇꃅꋦꈭꉾꃪꌠꄺꄉ，ꎆꏂꑘꌧꃀꁳꉌꂵꑘꒃꃅꀰꏢ、ꉌꒊꃅꎆꏂꑘꀞꄻꎻꌶ。
ꃹꅼꃅꏱꎆꇗꏸꎆꒉꎆꇁꏦꉻꄺꀱ。ꄐꌗꄇꄜꋊꄺꀱꌠꊋꀥꇱ，ꐊꑷꃅꄐꌗꃅꊌꐨꏲꂠꌠꃅ。ꃹꅼꃅꍏꑷꌋꆀꃅꄷꏱꎆꌤꃆꌅꈌꌋꆀꌬꐨꆼꎍꐨꁷꄻꌠꄺꀱ，ꍏꑷꌋꆀꃅꄷꊌꐨꁷꄻꄺꀱꌠꄹꎆ。ꆹꏮꁵꄻꄹꏦꄻꐛꒆ。ꃅꄷꇗꏸꉻꑫꄻꐛꒆ，ꎍꐽꃅꑳꇤꁨꇐꇗꏸꏦꃤꄻꌠꄹꎆ。ꃅꄷꍔꃚꎝꉛꎆꏓꉺꏦꋊꍬ。ꐥꄜꎆꏣꁧꃤꃅꌠꌌꄐꇺꅍꃅꄉ，ꎆꒉꎆꇁꉻꑫꐛꉻꄺꀱꉾ，ꉹꁌꀰꏢꑴꉴꌋꆀꋥꁕꑴꉴꀻꎆ。ꎆꀨꃷꎏꅉꀨꄹꏦꄺꀱꐛꒆ，ꀉꑌꏠꊐꌠꎆꀨꃷꎏꉾꃪꎍꐽꃅꀻꎆꌠꊥꎆ，ꈜꎁꃅꎆꏓꈜꀕꇈꇴꍆꌅꈌꎆꏓꍆꁧꉀꐕ。ꄜꏂꀧꑘꐔꈔꉆꐨꄉꀧꄐꊋꄻꀉꇨꃅꄉ。ꊋꀥꇱꄉꎆꒉꎆꇁꍞꎖꌗꋏꌋꆀꋊꎵꀞꄻ。ꉪꇩꏤꏱꎆꎆꒉꎆꇁꉻꑫꀑꐱꃅꎍꐽ，ꌬꉆꌠꏱꁈꌬꅍꀉꑌ，ꉪꊇꆹꉻꑫꃅꐙꌠꐔꈔꉆꐨꇫꀋꅐꌠꂫꑟꐏꈬꃅꄉꄎ。
（ꈬ）ꋍꁁꏯꋑꀋꋒꃅꉇꉻꁉꃑꌠꄹꇙ，ꇩꏹꎆꏣꇷꃅꌠꌋꆀꋓꅔꂱꎆꅑꀊꏀꌠꉗꄻ。ꀒꁨꋍꁘꃅꁉꃑꁁꏯꀹꎆ、ꁉꃑꄐꉻꄻꃪ，ꐪꊛꄉꃷꇐꌋꆀꐊꊈꇙꐺꉹꌠꁉꃑ，ꀊꅰꃅꏦꋪꑠꄹꏦꉹꌠꁉꃑꌠꉜꁨ，ꑞꅉꀊꂥꌠꁉꃑꌠꌌꄺꀱꐊꑷꃅꃹꅼꈴꌠꈺꇙ。
ꉇꉻꃼꇇꎍꐽꅉꇬꄉꊇꁧꉀꐕꌠꊥꎆ。ꉇꅐꃷꎏꀉꑌꑵꃅꐙꌠꄹꇙ。ꉇꅐꉌꒊꄜꏂꀧꉱꑷꐨꍔꐯ。ꋮꐂꄆꈴꃼꇇꃅꑠꃅꑘꀊꏀꌠꄏꐓꏱꁈꄺꀱꐛꒆ。ꁧꃤꃅꃼꇇꏀꀺꀻꎆꌠꄹꇙ，ꇱꄻꃼꇇꄐꏁꌊꉹꏮꊐꐕ、ꈯꄔꁮꐚꏯꉜꄉꆹꏮ，ꏓꇱꄉꇗꏸꀧꅉꂿꄐꋊꇤꋒ。ꈏꃹꐛꉻꄻꃪ，ꏣꀋꑌꃅꈏꃹꌠꍔꐯ。ꑍꈭꌠꍏꇩꇩꏹꈏꃹꐨꀊꐯꈭꃅꄉꀨꌠꀞꄻꋒ。ꐳꃅꎿꀸꈴꌒꌠꑞꅉꊐꐕ。
ꉇꎆꊙꎷꊋꃤꊋꀥꇱ。ꀒꁨꋍꁘꃅꃷꎏꇬꃹꇁꌠꃑꀉꐯꃅꄉ，ꉇꎆꈏꃹꉆꌠꀋꃪꁁꏯꃷꁨꋏꄯꒉꅧꊨ，ꀊꅰꀉꑌꁁꏯꁳꉇꎆꄂꃅꀰꏢꎻꉆ。ꎆꒉꎆꇁꑠꉹꑘꄺꀱꁉꃑꃄꄟꃅꇫꑟ，ꎝꌐꃷꎏꁉꃑꏱꁈꄻꐛꒆ。ꐳꃅꇩꏹꌬꈴꎆꏣꃼꇇꏦꋪꌋꆀꐯꊛ，ꏱꁈꂿꉆꐨꌋꆀꃄꌬꐮꐊꐨꉀꐕ，ꈏꉈꎆꇱꎆꏂꑘꐯꌟꃅꉜꄻ、ꐽꏡꃅꋓꅔꌠꎃꊒꃷꎏꋦꈭꄻꄉ。ꇩꉈꃼꇇꃅꊿꏦꊒꌅꈌꈲꁧꀧꌋꃅꌠꊋꀥꇱ。ꄿꐨꃼꇇꃅꉚꅉꁳꀊꅰꃅꀉꒉꌠꄺꀱꏀꀺꑴꌅꌅꈌꐥꎻ，ꎮꉰꄿꐨꃼꇇꃅꉚꅉꀊꏀꁔꌠꁦꎆꃅꄻꇱꄉ，ꉰꇂꄿꐨꃼꇇꃅꉚꅉꋈꄻꌠꄹꎆ、ꍏꇩꐛꐨꄿꐨꃼꇇꇉꍆꈌꋈꄻꌠꎹꎥ。ꇩꏤꊐꌠꎆꏣꀖꁉꅉ、ꀊꂥꀊꏀꅉ、ꀊꏀꅉꇬꄿꐨꃼꇇꃅꉚꅉꄚꃆꂮꐥꌠꄺꀱꃅꉚꅉꍔꆙꄉꃅꌠꏭꊋꁈꄏ，ꁻꃑꈺꇙꂿꄐꀥꇱ，ꄺꀱꁉꃑꀊꂥꅉꀊꏀꌠꄺꂡ。ꍏꇩꎆꇱꋦꈭꀋꎪꃅꀊꅰꃅꉾꇁꌠꉬ，ꇩꏤꈁꐥꌠꎆꏂꑘꍏꇩꄉꀻꎆꊜꋽꄮꀋꎪꃅꀊꅰꃅꀉꑌꇁꌠꉬ。
ꐯꇯ“ꋍꁕꋍꈜ”ꋈꄻꌠꄹꇙ。ꐯꇯꋮꇖꐯꇯꋈꄻꐯꇯꈲꊌꌠꌭꈬ，ꃷꎏꏥꏦꌋꆀꇩꏹꌬꈴꏦꋪꍬꄉ，ꎆꏂꑘꀨꄜꂿꄐꋊꇤꅐꇁ，ꅉꃀꉂꈽꐯꏑꐮꈴꌠꄹꇙ，ꇩꏹꅐꊋꇷꃅꌠꊋꀥꇱ，ꌕꁁꏯꌠꃷꎏꇷꃅꌠꀹꎆ。ꑍꈭꌠ“ꋍꁕꋍꈜ”ꇩꏹꇷꃅꀑꋾꉉꎥꈉꀞꋒ。ꉇꉻꎆꇱꇷꃅꌠꉾꃪꊱꁨꃅꀻꎆꌠꄹꇙ。
ꃼꇇꌋꆀꎆꇱꄿꐨꈴꃅꌒꈴꌠꊥꎆ。ꍏꇩꏟꈯꃅꎆꏣꅉꆺꈴꌋꆀꄿꐨꃼꇇꀧꌋꃅ，ꏣꀋꑌꃅꋧꃅꃼꇇꎀꍹꄺꀱꌠꇬꐊꈽ。ꐳꃅꎕꏦꀊꂥꄿꐨꃼꇇꃄꅉꈄꏍꏓꄻ，ꃄꁕꐊꈴꎆꏣꐋꀨꐮꃆꂮꏤꐪ、ꍏꏝꉴꄿꐨꃼꇇꃅꅉ、ꍏꉩꎆꇱꏤꐪꐯꉇꌠꄹꎆ，ꐪꊛꄉꍏꂰꎆꏣꃼꇇꃅꌠꋮꇖ。ꍏꇩꆹꐯꈲꇷꃅ、ꐯꇯꊋꐛꀻꎆꌠꌬ，ꐥꊯꃅꋮꒉꌠꇬꈴꄉꃼꇇꐯꀥꐨꀞꄻꌠꉌꃹꅷꇁꇬꎷ。ꉪꊇꆏꅇꏤꒃꄉꌠꎔꎗꃅꃄꌬ，ꊨꏦꏦꊒꌅꈌꈲꁧꏭꏟꈯꃅꀧꌋꃅ。
（ꊰ）ꐳꃅꐧꋦꌤꑘꀻꎆ，ꀊꅰꉾꃅꉹꁌꐥꐨꏦꀧꌋꆀꄻꃪ。ꎼꈎꏱꎆꊌꌬꐮꆽꏣꍅꊋꁦꎆꃅꐥꇁ，ꄚꅉꀨꉹꁌꐥꐨꎆꇱꌠꆹꁦꎆꀉꄂꆹꊨꒊꀋꇁꃅꄉ。ꐧꋦꊋꃤꅉꀨꄉꉻꁧꃤꃅꌠꀋꉬꌠꇬꁦꎆꃅꇲꁵꌠꊋꁈꄏ，ꉹꁌꈉꐨꏠꊐꀉꑌ、ꐛꄟꀉꑌꃅꐙꌠꇬꇎꄻ。
ꂘ꒧ꀊꅰꃅꐽꊯꀊꅰꃅꊇꁧꂄꌠꀻꎆ。ꃹꅼꃅꂘꑘꂘꌷꌠꄺꀱ。ꇓꈓꇓꉈꋭꑘꂘ꒧ꋍꃱꃅꀻꎆꌠꄹꎆ，ꐳꃅꑘꃅꁡꇤꌶꅉꀞꄻꇎꏦꄻꃪ，ꊋꀥꇱꄉꑣꋂꂘꃀꁥꌠꁰꄻ，ꐳꃅꇓꈓꏦꎫꌶꅉ“ꋍꁥꌠꇬꊿꀉꑌꇨ”ꌠꌤꃆꂥꀘ，ꇓꈓꇬꑘꃅꇁꊿꌺꇖꄚꐊꇁꌠꂘ꒧ꏦꀧ，“ꐯꏑꈄꏍ＋ꂘ꒧”ꀻꎆ，ꅐꀦꉾꃪꌠꐯꇯꌬꌠꊥꎆ。ꈴꈜꀉꑌꃅꄉꌷꂾꂘ꒧ꇲꁵꌠꍔꒉ，ꉻꀞꌠꅀꉹꁌꀞꌠꀉꑳꈩꂘꅉꉬꄿꂿ，ꋬꂻꎕꏦꇬꄐꊒ、ꁌꋭꋽꃅꎴ、ꀿꃀꉌꒊꀐꄷꆏ，ꍔꃚꆹꇫꄏꐓꌐ。ꇨꍏꊬꌠꇬꂘ꒧ꁊꈴꌠꄹꎆ，ꊿꋅꂘ꒧、ꐋꀋꌡꂘ꒧、ꐪꊛꂘ꒧ꀞꄻꋒ，ꏦꈴꉹꁌꀞꄻꌠꂘꑘꀻꎆ。ꐪꊛꄉꋭꑘꂘ꒧ꂘꃀꃄꎆꊌꐨꃅꇫꑟꌠꒃꉇꋒ。ꒉꌶꅉꀨꏠꌠꌋꆀꌷꑫꀨꏠꌠꋈꄻꌠꄹꎆ。ꈯꄔꁮꐚꃅꄷꄏꐓꌊꐋꀋꌡꌠ、ꑟꐨꀊꂥꌠꄊꑪꋈꄻ。ꎼꈎꎆꊋꀋꄿꃅꐙꑴꇬ，ꇩꏤꏱꎆꉹꌠꂘ꒧ꌫꎆꆹꇩꈐꒃꅐꈁꉬꁌꐨꇬꍆꁧꐪꊛꄉꋏꌫꌌ4％ꈋꉐꐕꄉ，ꍏꑷꏱꎆꂘ꒧ꌫꎆꄐꁆꌠꆹ1ꃪꂡꂷꇬꐂꇁ。ꉪꊇꆏꃶꐚꃅꁌꇐꈤꌠꎆꀨꌬꋒ，ꊋꇤꏡꇤꄉꏓꂱꄸꈴꌠꂘꑘꀞꄻꋒꄉ，ꃆꎸꊂꑋꉘꇉꐨꄖꐓꌶ。
ꅉꀨꆅꉁꁦꎴꁧꃤꃅꌠꏦꀧ。ꐪꊛꄉꇓꈓꇓꉈꀀꊿꅉꀨꆅꉁꏦꀧꌠꌋꆀꆄꒉꈺꒉꄜꏂꀧꏦꀧꑟꐨꉀꐕ，ꀀꊿꆅꉁꏦꀧꌠꐽꏡꃅꇬꊾꂷꌠꏱꎆꀥꇱꎕꏦ30ꂷꁦꎆꇬꇯ，ꈫꁁꆏꌌꆄꒉꈺꒉꄜꏂꀧꌠꇬꌬ。ꆄꒉꈺꒉꄜꏂꀧꎆꁵꎕꏦꊨꒊꄷꀋꁧꏓꋍꃱꃅꀕ，ꎆꌗꋊꍆꁧ50％ꇬꄉꉀꐕꌊ60％ꇬꑟ，ꀒꁨꋍꁘꃅꆄꒉꈺꒉꊌꊿ、ꌢꎭꉹꁌꆅꉃꀵꃤꊨꒊ。ꊋꀥꇱꄉꆄꒉꈺꒉꌠꄴꏮꉃꄻ。ꉪꇩꏤꆹꆄꇓꆅꌠꊿꑱꁯꄙꇁꃪꃅꐥ，ꆄꇓꆅꄴꏮꉃꄻꌠꃅꄉ，ꆄꌋꆄꄵ、ꏛꃅꉜꏛꃅꉃꌋꆀꈆꑪꇮꇐꈢꇓꀖꌠꄹꎆ，ꊋꇤꄉꉹꁌꐥꐨꇬꆄꅉꉃꄻ。ꑍꃀꑍꏣꅑꆅꑠꄴꏮꉃꄻꌠꃅꋒ，ꌦꍑꊋꀊꂥ、ꎬꐚꍂꆅꑠꆅꉚꇬꌬꌠꁬꋌꀊꅰꀉꑌꃅꌌꆅꀧꎆꌗꋊꅉꇬꇱꄉ。ꐳꃅꀊꉘꁬꋌꎥꃪꀖꁉ。ꊋꀥꇱꄉꀊꅰꀋꐥꌠꆅꌬꁬꋌꏦꀧ。ꃹꅼꃅꆅꀧꎆꁵꄟꄺꀱ，ꆅꀧꎆꁵꐛꉻꄻꃪ。ꐳꃅꌜꇬꐂꄉꌞꃅꄷꄉꆅꉚꌠꈛꎂꃅꎆꌗꏱꁈꃄꌬꐛꒆ，ꐳꃅꌞꃅꄷꄉꆅꉚꌠꊿꆅꁳꆅꉚꅉꏤꄉꌠꈁꐥꌠꇬꃅꈁꌌꄉꆅꉚ、ꋋꇅꃅꎆꌗꉆꎻ，ꃶꐚꃅꄁꐺꊻꂷꌋꆀꇫꐊꎞꀀꌠꃀꌠꆅꉚꆄꄻꌒꎻ。ꁬꋌꆰꋌꏓꋧꄉꃻꄻꌋꆀꌫꄻꉺꏦꄻꐛꒆ。ꃹꅼꃅꉻꄻꆅꉚꅉꏓꇱꄺꀱ。ꐧꋦꆅꉚꅉꀞꄻꌠꊥꎆ。“ꐯꏑꈄꏍ＋ꆅꉁꆄꄻ”ꌠꀻꎆ，ꐳꃅꈜꎴꆅꉁꁧꃤꃅꉻꑫꄻꐛ，ꊋꀥꇱꄉꅉꂫꊐꌠꆅꉁꁦꎴꏲꉻꄐꊋꋈꄻꌋꆀꆅꉃꊿꉘꉚ，ꏠꁸꄉꆅꉃꌠꌋꆀꑱꈐꆅꉃꊿꁱꏤꁧꃤꃅꊇꁧꊐꐕ。ꀋꎪꃅꄴꏮꌠꌌꀨꇬꄉ，ꀊꏀꃅꁦꎆꅉꀨꄉꉻꁦꎴꁧꃤꃅꏱꎆꀥꇱꌫꎆꆹꉬꇮꃅꌌꋂꌋꆀꋥꁕꇬꌬꄉ，ꀋꎪꃅꅉꂫꊐꌠꉹꁌꁳꈲꊌꎻ。ꇵꆅ、ꃅꄷꆅ、ꀊꉘꌠꏀꑓꈹꄴꏮꌠꒃꉇꋒ。ꒆꉘꋬꈭꃅꌠꏱꁈꄻꐛꒆ，ꊋꀥꇱꄉꌋꅪꀉꑳꈯꀧꁧꃤꃅ。ꍏꑳꁬꋌꌤꑘꊪꊛꏀꀺꀻꎆꌠꏭꊋꁈꄏ。ꊋꀥꇱꄉꇭꀧꒉꄚꇁꄿꌠꉙꂘꌋꆀꇭꀧꒉꄚꇁꄿꌠꏲꂠ。ꁬꋌꆅꁿꋌꀑꇬꋬꂻꌠꌋꆀꐮꃆꂮꐥ，ꀋꎪꃅꌌꍞꏲꈴꄻꅐ，ꏦꐆꊿꆏꌌꀉꇨꃅꅓꀞ，ꄉꅍꀋꃅꃅꎁꀋꃅꌠꆏꏦꇨꃅꌌꍤꀞ，ꏟꈯꃅꏓꂱꉹꁌꀑꇬꐛꒆꌠꐏꈜꐏꂂꃅꄉꌶ。
ꐧꋦꏦꀧꄹꏦꌋꆀꏱꁈꄻꐛꒆ。ꀉꑌꏠꊐꃅꃀꌠꀨꎹꏦꀧꉻꑫꋈꄻꌠꄹꎆ。ꐪꊛꄉꎞꆏꊿꅉꀨꃀꌠꀨꎹꎆꉀꐕ。ꎞꆏꂽꑼꈲꊌꏦꀧꌠꃅꇫꑟ，ꎞꆏꂽꑼꅉꀨꃀꌠꀨꎹ、ꅉꀨꆅꉁꄜꏂꀧꐯꊛꏱꁈꄻꐛꒆ。ꋭꋽꃅꇓꈓꇓꉈꐥꐨꀁꂥꏦꀧ、ꌐꐘꈭꋏꇇꀨꑠꎕꏦꉀꐕ，ꊋꀥꇱꄉꊋꋠꅉꀊꉘꏦꀧ。ꊋꀥꇱꄉꇓꈓꏦꎫꌤꃅꊿꌢꎭꌠꎭꃤꇔ。ꊾꄣꄴꏮꌋꆀꆅꌠꌒꈴꁧꃤꃅꑟꐨꊐꐕ。ꉪꊇꆏꄾꌦꋩꃅꉹꁌꎁꃅꃛꊸꈭꋏꊋꋠꐨꎵꃪ、ꈺꄮꊸꁵꄉ，ꅉꀨꉹꁌꀁꂥꐥꐨꏟꈯꃅꋎꈬꌶ。
ꏓꂱꉹꁌꉌꊈꁱꀕꐥꐨꀉꑌꎻ。ꐧꋦꉪꏦꈯꄜꁌꐨꉜꐨꉗꄻꌋꆀꌫꄻ，ꀊꐯꈭꃅꉹꁌꃅꐙꌠꉌꊈꌧꑳꀹꄻꃅꈧꌠꍔꆙ，ꊋꇤꄉꉈꈽꉌꊈ、ꈆꑪꉌꊈ、ꑘꁨꌶꀠꉌꊈ、ꇔꇷꉌꊈꍔꆙ，ꉀꆹꂄꆹꌠꊋꃤꀉꇨꌠꏓꇱ。ꐳꃅꍏꇩꐛꐨꍔꑪꐧꋦꈆꑪꏓꄻ。ꊋꀥꇱꄉꐯꏑꈄꏍꐊꇐꋈꄻ。ꁱꀕꋽꇐꁰꄻꌊꌄꆣ，ꈨꏀꅏꄻ、ꅇꁊꄆꒌꌋꆀꄉꉣꄯꒉꑠꌤꑘꀻꎆ。ꁱꀕꏂꀨꍸꇐꀧꌋꃅꌫꄻꌠꌋꆀꐥꇐꀋꉬꌠꁱꀕꍸꇐꊪꊛꌠꊋꀥꇱ。ꁱꀕꌤꑘꌋꆀꁱꀕꅐꑘꄺꀱꀻꎆꌠꄹꇙ，ꅉꂫꊐꌠꄉꉻꁱꀕꁧꃤꃅꄐꊋꊐꐕ。ꉹꁌꈁꐥꌠꃅꉜꀘꌠꄖꄑꄉ，ꌶꄻꉹꌠꐧꋦꋈꄻꌠꄹꎆ。ꃹꅼꃅꍏꇩꌋꆀꉇꄅꃰꊿꁱꀕꌌꐮꈴ。ꀊꐯꈭꃅꉹꁌꃅꇭꀧꈯꎟꌠꃅ。ꏟꈯꃅ2020ꈎꀎꒀꉼ、ꊾꄣꀎꒀꉼꊭꄎꌤꃅꋒ，ꉌꋧꊋꏓꄉꀙꏢꃅꋆꀎꒀꉼ、ꃅꋆꊾꄣꀎꒀꉼꀞꄻꌠꄐꏤ，ꏃꈭꀕꌠꋧꃅꂽꑼꈯꎟ꒜ꀞꋒ。ꏓꂱꉹꁌꇭꀧꉌꂵꂄꑲꆏ，ꐧꋦꊋꃤꍅꁍꀕ，ꇩꏤꌄꆣꐞꄿ。
ꐧꋦꏱꄻꌠꊋꀥꇱꌋꆀꏀꀺ。ꐧꋦꏱꄻꌠꀋꉬꀋꉆꌠꅉꂫꊐꌠꏭꉜꄉꎎꌠꄹꇙ，ꐧꋦꄮꐽꌠ“ꃗꐇꎖꋪ”ꊥꎆꄹꌬ，ꇓꈓꇓꉈꋥꁕꏱꄻꐛꉻꀊꏀꌠꄺꑣ。ꐧꋦꎀꍹ、ꊿꂂꇇꀨ、ꉌꇗꁧꃤꃅꌠꌋꆀꂄꃅꌤꑘꐛꒆꃅꀻꎆꌠꄐꇺꄏꐓ。ꐧꋦꏤꁨꉻꑫꄻꐛꒆ。ꌋꅪ、ꀊꉘ、ꃀꌠ、ꊾꄣꏦꊒꌅꈌꈲꁧꏦꀧ。ꄯꒉꁱꌊꅇꅲꇁꌠꌤꃅꌠꄻꃪ，ꏦꃤꈴꇇꈤꃅꉹꁌꇖꐨꋭꋽꌠꀞꄻ。ꊋꀥꇱꄉꐧꋦꉌꇗꁧꃤꃅ。ꇩꏤꃛꊸꏭꊝꉻꑫꄻꐛꒆ，ꉮꄵꉮꊨꉮꈭꋏꄐꊋꉀꐕ。ꋬꂻꃅꒃꅐꌠꊋꀥꇱ，ꌤꆿꀉꒉꀊꂾꌠꇫꅐꇁꌠꏭꄴꏮꋎꍅ。ꃄꇙ、ꃅꑊ、ꒉꐈꐪ、ꅉꊈ、ꎖꑴꑠꌤꃅꋒ。ꄉꉻꏦꃤꁧꃤꃅꉻꑫꄻꐛꒆ，ꃹꅼꃅꏦꃤꁊꈴꄜꉺꉙꂘ。ꊋꀥꇱꄉꇩꏤꋬꂻꄐꊋꋈꄻ。ꐊꈴꃅꐙꌠꐧꋦꋬꂻꏱꄻꄴꋏꉻꑫꄻꐛꒆ，ꃹꅼꃅꀋꂄꌠꌩꄷꅠꌠꋊꌠꌐꄉꉈꈽꌠꄹꎆ，ꏦꈴꄉꈐꇑꀸꎲꄊꁉꅋꇐꑠꏦꐆꑽꃤꃅꌠꅓꀞ，ꏦꀋꊒꃅꎆꏓ、ꊛꃷꑠꎆꏣꑽꃤꐆꌠꌌꇇꇩꍈ，ꉻꊿꑴꅉꈴꌗꇑꉮꑠꌤꃆꑓꅐꎑꌠꏱꄻ，ꏟꈯꃅꏓꂱꉹꁌꐥꐨꋬꂻꌠꉜꄻꋒꌶ。
ꁧꎁꊈ！
ꃅꒊꃅꇁꌋꆀꂿꃆꀊꏀꌠꆹ，ꍔꃚꌤꃅꌠꏭꇖꐨꀊꅰꃅꀊꂥꌠꀊꏀꌠꄜꎼꇁꀐ。ꍔꃚꈁꐥꊐꌠꆏꏟꈯꃅ“ꇖꑵꉪꉻ”ꑌꈬ，ꀋꎪꃅ“ꇖꑵꑴꑇ”，ꏟꈯꃅ“ꑍꑵꀧꌋꃅ”ꌠꃅꇫꑟ，ꉉꄻꀋꅐꃅꉪꇐꀂꏽꍔꍞꀂꏽꃅꐨꀂꏽꐋꀨꑮꏣꀻꈯꄜꃅꄉꌠꄈꍏꑷꌋꆀꀊꂥꃅꐮꐊꐙꇬꎷ，ꐊꑷꃅꏦꇨꃅꄈꏲꌠꇖꐨꃅꇫꑟ，ꊨꏦꀱꊨꏦꏭꇝꂱꀬ，ꃹꅼꃅꏲꑘꅧꊨꌅꈌꄝꃑꌠꄹꎆ，ꐳꃅꌅꊋꆹꏮ、ꑘꅐꐨꉀꐕ，ꍔꃚꉻꑇꐨꌋꆀꃄꌬꊋꃤꄻꀉꇨ，ꀊꅰꉾꃪꃅꏓꂱꐥꌒꄻꌒꌠꏭꀊꏀꃅꉘꇉꐨꇬꇎꄻꌶ。
ꏦꍬꄉꐊꑷꃅꄉꅍꃅꇬꎷ。ꃹꅼꃅꐊꑷꃅꏦꃤꇬꈴꄉꇩꏲꌠꅉꀨꄐꁈꌫꄻ，ꏦꇨꃅꏦꃀꏦꃤꇬꍬ，ꍔꃚꃅꈧꌠꉬꇮꃅꌌꏦꏲꈴꈜꇬꃹ。ꍔꃚꈁꐥꊐꌠꆏꏦꃤꈴꄉꋋꊐꌠꏓꄊꌋꆀꋍꎮꊈꉼꁳꍞꊟꎽ，ꑴꐚꃅꏓꂱꍔꑠꁳꋯꁦꍞꊟꎽ，ꑴꇙꃅꐧꋦꌋꆀꈋꍣꌠꁳꍞꊟꎽ，ꌅꈌꁳꈨꑭꇂꃴꄉꌬꎻ。ꍔꃚꃅꌠꆏ，ꐯꇯꏓꂱꇫꉘꇉꌠꉬꄡꑟ。ꈆꑪ、ꋯꁦ、ꏦꍬꄉꁈꏤꌠꌭꈬ，ꎔꎗꃅꏓꄊꁧꎁ、ꍔꑠꊈꑼꉜꐨꅲ，ꋯꁦꄈꀾ、ꇬꎭꆃ、ꄈꀾꀋꐊꊿꂒꋦꌠꌋꆀꏓꂱꏓꉻꈁꐥꌠꉜꐨꅲ，ꐧꋦꋍꏅꌋꆀꎆꏂ꒧ꉜꐨꅲꄉ，ꏱꁈ꒔ꑞ꒔ꐘꌠꅉꀨꇩꏤꐛꐪꌋꆀꉇꉻꃶꐚꐛꐨꇬꄐꊒꄉ，ꀊꅰꃅꊾꑘꒃ、ꀊꅰꃅꉹꁌꉪꅉꌸꎻꌶ。ꐊꑷꃅꍔꃆꄇꄜꋊꌠꄹꎆ。ꇬꉼ、ꇭꏾꄨ、ꌋꅪꐊꏑꉼꑠꏓꉻꎀꍹꀊꅰꉾꃅꂿꄐꋊꇤꅐꇁꌠꊋꁈꄏ。ꐊꑷꃅꏲꑘꏦꌬꆽꎍꄹꏦꌋꆀꅑꑘꎹꄹꏦꃅꇫꑟ，ꏦꐆꇗꐆꌠꃅꐨꈁꐥꌠꃅꐯꇯꌌꅱꐆꃅꄺꀱꍤꀞꌶ，ꏦꌬꌊꎃꊒꃅꀋꐛꌧꑳꃅꀋꐛꌠꐛꐨꈁꐥꌠꃅꐯꇯꏟꈯꃅꌌꏱꄻꌶ，ꏲꑘꃄꄟꀋꉾꌠꊿꈁꐥꌠꏭꆏꐯꇯꏟꈯꃅꅑꃤꎹꌶ。
ꃹꅼꃅꄈꃅꇏꐙꎴꋈꄻꌠꄹꎆ。ꏟꈯꃅ“ꇬꂾꉪꐨꎺꄉ、ꂿꃆꎺꈬꃅꄉ”ꌠꀨꄜꉙꂘꌠꍔꆙ。ꎔꎗꃅꍏꑷꏤꐪꉆꐘꌠꌋꆀꃄꌬꃷꋪꉌꊈꃄꌬꇫꑟ，ꌦꀳꏿꃅ“ꃅꇏꇖꑵ”ꄺꏲ。ꊋꀥꇱꄉꐙꎴꍔꃚꋈꄻ，ꋍꉻꃅꍹꈔꀋꀬ、ꍹꈔꀋꉆ、ꍹꈔꀋꏾꌠꄹꎆ。ꀉꇨꃅꍤꌗꍞꊟ。ꍔꃚꌤꃅꊿꆏꑴꐚꃅꏦꃤꁳꍞꊟ、ꍞꍤꁳꍞꊟꌋꆀꏓꂱꁳꍞꊟꌠꃅꌶ。ꃅꐛꐨꎖꑞꇬꄽꂫꆏꐛꂫꉜꌠꉬ。ꍔꃚꈁꐥꊐꌠꆏꏟꈯꃅꇶꏦꉪꏦ、ꇛꌺꉪꏦꈁꐥꌠꏭꆼꁏꌋꆀꏱꄻꄉ，ꇥꀯꁳꁱꐘꁦꌺꂫ꒜ꈿꀋꃷ꓂、ꉉꍣꌠꋨꏦꍤꄻꌠꋨꏦ、ꄯꒉꌬꇐꉎꄜꑴꉻꈬꇬꄉꁌꇔꅐꇁꄉ，ꉌꊋꌌꃶꐚꌤꃆꀞꄻꌠꇬꌬꇁꎻꌶ。ꍞꊟꍤꄻꎖꉚꌤꆿꐘꃆꊨꑣꌋꆀꋊꍬ，“ꐯꏑꈄꏍ＋ꍞꍤ”ꌠꃄꌬ。ꃀꈿꌠꌋꆀꁱꐘꃑꄻꌠꃷꁨꊨꒊ，ꎼꈎꇩꃷꑼꌋꆀꋍꌤꏲꅉꆏꂴꅑꄉꀉꇨꃅꃀꈿꅧꊨ、ꏟꈯꃅꁱꐘꌕꁧꋊꋍꁧꈋꉐꊨꑣꇧꎭꌶ。
ꃶꐚꃅꀉꇨꃅꆽꎍꐨꆹꄜ。ꍏꇩꄺꀱꀻꎆꌠꊌꐨꀉꇨꃅꐥꌠꆹ，ꇥꀯꉹꁌꋍꏅꌠꎬꅧꃅꑘꀺ、ꈏꇤꊋꇤꄉꃅꅐꇁꌠꉬ。“ꋍꉐꈎꑍꊭꌠ”ꉇꈾꁻꌐꃅꇫꑟ，ꍏꇩꏓꂱꐥꌒꌋꆀꎹꈹꐨꃅꐛꂿꄷꇬ，ꄡꇗꀊꉗꃅꄝꀋꏯꃅꊋꇤꄻꅐꑴꌦ。ꊒꆽꀕꃅꏲꑘꃅ，ꃅꌠꉉꌠꏭꀋꋌ。ꍔꃚꈁꐥꊐꌠꌋꆀꋍꌤꃅꊿꆏꇯꍝꌠꎹꃶꐚꌠꃅ、ꀍꏻꃅꉔꌠꀋꃅ，ꄺꀱꀻꎆꌠꄹꇙꌠꊌꐨꌌꅇꉉ，ꌤꃅꑘꀺꌠꃶꐚꃅꐨꌌꅇꄜ。ꄖꄑꏢꑲꉺꏦꌋꆀꃅꎁꃅꅑꑘꀋꎹꉺꏦꄻꐛꒆ，ꇥꀯꌤꃅꏾ、ꌤꃅꀬ、ꌤꃅꐛꄎꌠꋦꈭꀹꄻ。ꀊꅰꉾꃪꃅꍏꑷꌋꆀꃅꄷꏣꀋꑌꐨꑍꏢꌠꋊꇤ，ꅉꂫꊐꌠꌋꆀꉹꁌꂴꀹꄻꉌꊈꉜꁨ，ꃅꄷꉌꂵꀉꒉꃅꎹꎥꌠꎁꃅꊋꊡ、ꈥꈉꇎꃅꊏꄉ。ꇥꀯꋍꏅꌠꆏꏟꈯꀕꌠꌤꑘꃄꉌꌋꆀꀻꎆꉌꑌꄉ，ꌤꃅꇬꊋꋠꐨꄡꐵ、ꋭꑘꃅꇬꆽꎍꐨꄡꇔ，ꀂꏾꈎꄉꊋꇤꌤꃅ、ꃶꐚꐛꐪꇬꉜꄉꀹꄻꐨꐥꃅꀕ，ꊋꇤꄉꏓꂱꏭꇢꀋꏿꌠꃅꐨꀊꏀꌠꃅꅐ，ꍏꇩꀻꎆꇬꏁꇅꁤꇅꁏꀊꏀꌠꃅꅐꇁꌶ。
ꁧꎁꊈ！ꉪꊇꆏꊿꋅꃄꁕꊨꏦꏲꄹꏦꌭꈬꌋꆀꄻꐛꒆ，ꐊꑷꃅꄈꅿꊿꋅꏱꁈꌫꄻ，ꃹꅼꃅꊿꋅꋯꑌꀻꎆꌠꉙꂘ，ꍏꉸꊿꋅꏓꐊꄜꉪꉻꄻꈬ，ꊿꋅꈁꐥꌠꐮꄮꃅꐥ、ꉌꋧꊋꋓ、ꄮꐽꀻꎆꌠꊥꎆꌶ。ꊋꀥꇱꄉꊿꋅꃅꄷꌋꆀꊻꂷꊼꇅꀁꑌꌠꊿꋅꀻꎆꌠꏭꊋꁈꄏ，ꃹꅼꃅꃅꋮꌄꆣꏓꂱꌣꈚꌠꃅ，ꉌꋧꊋꏓꄉꊿꋅ56ꁯꌠꐮꐊꄉꋯꑌꃅꉈꈽ、ꐯꇯꌄꆣꀻꎆꌠꋦꁍꎔꃨꌠꋈꄻ。
ꉪꊇꆏꐊꑷꃅꄈꃤꑇꇐꌤꃅꀑꐱꌐꏦꌫꄻ，ꉪꇩꏤꑇꇐꍏꇩꃤꃅꐙꌠꌐꍜꌭꈬ，ꏦꃤꇬꈴꄉꑇꇐꌤꃆꏱꄻ，ꑇꇐꁆꏯꊿꂒꋦꌠꌋꆀꑇꇐꑇꉹꁌꎆꏣꐧꋦꀻꎆꌠꊥꎆꅉꇬꂿꄐꏣꀋꑌꌠꋊꇤꅐꇁꌶ。
ꉪꊇꆏꎔꎗꃅꇩꉈꀀꊿꌤꃆꏱꁈꃅꇫꑟ，ꎿꉈꃺꑌꌋꆀꀱꁍꇩꇁꌠꃺꑌꏦꊒꌅꈌꈲꁧꏦꀧ，ꁧꃤꃅꌠꊋꀥꇱꌋꆀꄻꃪ，ꋀꊇꃤꂱꎆꅑꐨꐋꀋꌡꌠꌋꆀꂿꄐꀋꂿꑘꌠꋊꇤꅐꇁ，ꎿꈐꎿꉈꍏꉸꌺꇖꈁꉪꐨꃰꇌꈭꀉꒉꐯꀉꒉꂶꌠꑴꄻꋒ，ꐯꇯꏁꇅꁨꇅꌠꀹꄻꌠꊋꃤꀉꇨꌠꏓꐯꇯꎼꇁꌶ。
ꁧꎁꊈ！
ꋌꃀꋋꈓꌠꆹ，ꇩꐏꌋꆀꂽꋈꄻꌠꏟꈯꃅꄹꎆ，ꂽꇨꌤꑘꐛꐨꀊꏀꃅꐨꀊꏀꌠꀉꑌꈨꇫꅐꇁ。ꀊꏀꋋꈓꇬꆏ，ꐪꊛꄉꄈꃅꋊꀊꏀꋎꌠꂽꇨꁻꌐꌌꏃꂠꄉ，ꈫꈈꃅꑮꏣꀻꂽꇨꉪꇐꌌꇩꐏꌋꆀꂽꋈꄻꌠꇬꄐꂘꉆꈉꄻꄉ，ꃹꅼꃅꍔꍞꌌꂽꋈꄻ、ꄺꀱꄉꂽꀉꇨꇁ、ꈆꑪꇮꇐꌌꂽꄖꄑ、ꏦꃤꈴꄉꂽꏱꄻꌠꄹꎆꌶ。ꏟꈯꃅꄈꀋꎪꃅꂽꁥꌠꏃꂠꌠꏥꏦꁧꀦꌋꆀꄹꏦꌭꈬ，ꐊꑷꃅꃹꅼꃅꏮꊈꍗꑮꃅꎁꆽꎍꄹꏦꃅꇫꑟ。ꃅꋊꀊꏀꋎꌠꂽꌤꄐꇐꌐꏦꃅꇫꑟ，ꃶꐚꃅꌉꈿꃅꂽꁰꍋꐨꉀꐕ，ꀋꎪꃅꇩꏤꌅꀨ、ꋦꈬ、ꀻꎆꌠꈲꁧꀧꌋꃅ。ꐪꊛꄉꃹꅼꃅꇩꐏꌋꆀꂽꄺꀱ，ꍏꇩꐛꐨꐧꋦꉪꏦꂽꌤꏱꁈꄹꏦꉻꑫꋈꄻꐛꒆ。ꇩꐏꉙꂘ、ꇩꐏꄕꊪꉻꑫꋈꄻꌠꇬꊋꀥꇱꌋꆀꄻꐛꒆ，ꉹꁌꈁꐥꌠꇩꐏꉪꉻꄻꀉꇨ。ꃹꅼꃅꂽꌋꆀꏓꂱꐯꈽꀻꎆꄐꇐꃄꌬ，ꐳꃅꇩꐏꈆꑪꇮꇐꏀꀺꑭꁘꀊꏀꌠꐕ。ꍔꃚꈁꐥꊐꌠꆏꊋꀉꒉꃅꇤꄉꇩꐏꌋꆀꂽꋈꄻꌠꉈꇬꊋꁈꄏ，ꃹꅼꃅ“ꑍꉌꃹ”ꌠꃅꄉ，ꂽꌋꆀꍔꃚꂽꌋꆀꏓꂱꋯꑌꌠꌩꁧꁦꌠꁳꐴꄖꏾꅑ、ꃴꍚꀕꇬꎷꎻꌶ。
ꁧꎁꊈ！
ꉪꊇꆏꐪꊛꄉꐊꑷꃅꎃꊒꃅ“ꋍꇩꑍꏦ”、“ꇤꊿꇤꏲ”、“ꀎꊿꀎꏲ”、ꀊꂥꃅꊨꏦꏲꌠꌐꏦꃅꇫꑟ，ꏦꇨꃅꏦꃀꌋꆀꅉꀨꏦꃤꇬꈴꄉꌤꀞꌶ。ꊋꈁꑌꃅꇤꄉꑣꇤ、ꀎꂱꏲꑘꇣꋲꏱꅉꐎꍔꃚꌋꆀꏲꑘꇛꌺꏦꃤꈴꄉꏲꂠꌠꊋꁈꄏ。ꇤꀎꐯꇯ“ꋍꁕꋍꈜ”ꋈꄻꌋꆀꒄꇤꀎꎿꈪꀉꒉꅉꋈꄻꌠꊜꋽꄮꒃꉇꌠꊋꁈꄏ，ꀊꅰꉾꃪꃅꊨꏦꑴꅉꊋꂫꋊꇤ，ꐊꑷꃅꅔꈐꌋꆀꐯꈲꇷꃅꌠꎼꃹꅼ。ꉪꊇꉌꒊꌠꆏ，ꑣꇤ、ꀎꂱꀋꎪꃅꁍꇩꅔꈐꌋꆀꐯꇯꀻꎆꐯꇯꉀꆹ、ꀋꎪꃅꐯꇯꀊꉗꃅꌄꆣꎍꐽꇁꄎꌠꉬ。
ꉪꊇꆏꀋꎪꃅꄠꃪꏭꌤꃅꌠꏱꁈꌐꏦꀉꒉꌠꌭꈬꌶ。ꐊꑷꃅꑮꏣꀻꊝꎻꏹ《ꄠꃪꃺꑌꏭꇰꌠꄯꒉ》ꄜꃑ40ꈎꈭꏝꐛꎺꄅꃀꈿꅉꇬꉉꅇꀋꉬꀋꉆꌠꉌꊈꃄꌬꇫꑟ，ꏟꈯꃅꍏꇩꋍꂷꏥꏦꌋꆀ“ꈬꑍꉜꐊ”ꌠꌭꈬ，ꎿꋮꑍꄷꄮꐽꃅꀻꎆꌠꄹꇙ、ꁍꇩꄮꐽꋍꃱꃅꌠꈴꎁꄹꇙꌶ。ꏟꈯꃅ“ꄠꃪꄂꋦ”ꁷꐞꏭꉪꌠꌋꆀꃅꐨꏭꁏꌋꆀꏢꇋ，ꏟꈯꃅꇩꏤꌅꀨꌋꆀꏲꄷꐛꒆꌠꐏꁇ。ꃹꅼꃅꎿꋮꑍꄷꐯꈽꀻꎆ，ꐪꊛꄉꎿꋮꑍꄷꎆꏣꁱꀕꐮꈴꇷꃅꌠꍔꐯ。ꎿꋮꑍꄷꃺꑌꋍꐴꉬ、ꀑꇬꐮꁠꎍ，ꈀꄸꑌꐮꐊꄉꐯꇯꍏꇩꊿꈁꉬꃅꊫꂫꁤꇅꀕꌠꀹꄻꄡꑟ。
ꁧꎁꊈ！
ꀋꃋꋋꄮꋧꃅꇣꄧꆹꉐꈎꇫꅐꀋꋻꌠꐛꁏꐛꐨꀉꒉꌠꊝ。ꉪꊇꆏꀋꎪꀋꑴꃅꄮꐽꀻꎆꈝꃀꍬ、ꐯꈲꋓꊋꌠꁉꃑꄐꇐꇬꈴꄉꃅ，ꀋꎪꃅꀉꑌꁆꏯꉪꏦꌋꆀꉻꏑꇩꈯꄜꃅꄉꌠꋧꃅꉻꑫꀧꌋꃅ。ꏣꀋꑌꃅꅉꆺꏱꄻꉻꑫꄺꀱꐛꒆꌠꃅꈽ，ꀋꎪꃅꁉꃑꉹꌠꋧꃅꎆꏣꀧꌋꃅ，ꃰꊿꀑꇬꐮꐊꐙꌠꏓꄻꌠꄹꇙ。ꊋꀥꇱꄉꇩꏤꀉꒉꈧꌠꌋꆀꐮꈴꐯꉇ、ꋮꄮꇷꃅ，ꃹꅼꃅꈭꇍꇩꏤꌋꆀꐮꃆꂮꄻꃪ，ꀻꎆꇰꌠꇩꏤꌋꆀꐯꈲꇷꃅꌠꍔꀺ。ꏣꀋꑌꃅꋭꋽꃅꅉꆺꃅꋓꎭꌠꊜꄻꌋꆀꃅꄷꌤꆿꃛꊸꌠꂥꀘꌠꎁꃅꍏꇩꃤꋈꄻꐨꐥꌠꄐꉻꀊꅰꀉꑌꃅꇲꁵ。ꍏꇩꆏꇩꏤꈁꐥꌠꌋꆀꐯꇯꇷꃅ、ꆲꁏꉐꐙꃅꐮꐊꄉ，ꋧꃅꀊꉗꃅꄮꐽꌠꌋꆀꐯꇯꀻꎆꌠꊥꎆꌠꎁꃅꑆꊋꅐꌞꀊꏀꌠꃄꅐꏾ。
ꁧꎁꊈ！
ꉈꈽꆏꐩꋊꁦꄻ，ꊋꇤꆏꊫꂫꐥꇁ。ꉪꊇꆏꀊꅰꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꀊꂥꃅꍏꇩꐛꐨꐧꋦꉪꏦꉪꇐꇰꀋꃀꌠꁈꁧꐕꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꌌꄐꂘꅍꃅꄉ，ꊋꋠꃅꀒꁨꆹ、ꏀꀺꁨꆹ，ꎆꏣꐧꋦꀻꎆꊌꐨꉾꃪꌠꌌꍏꉸꏓꂱꇭꉼꇩꋈꄻ70ꈎꈭꏝꐛꌠꋨꏦ，ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ、ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜ，ꉪꇩꏤꋈꄻꌊꌣꈚꐞꄿꋯꁦꌧꑳꐮꄮꎔꃨꌠꐧꋦꉪꏦꐛꏀꈴꇩꏤꀉꇨꌠꐛꎻ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꀋꆏꃅꉈꈽꌶ！
由国家民委提供，中国民族语文翻译局翻译
