ꍔꃚꌤꃅꅇꄜ
——2016ꈓ3ꆪ5ꑍꊰꑋꈭꇩꏤꑭꊂꏓꂱꁧꎁꃀꀉꒉꇖꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꍔꃚꌤꃅꃆꂮꅇꄜ，ꆍꑴꌠꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋍ、2015ꈎꌤꃅꐨꉪꀱ
ꋌꃀꋋꈓꆹ，ꉪꇩꏤꀻꎆꌠꇬꀉꑌꄀꃅꊋꋠꌠꌋꆀꆼꇨꃅꋓꎭꌠꊝ。ꐋꀨꑮꏣꀻꊝꎻꏹꃅꄉꌠꄈꍏꑷꏟꈯꃅꏃꂠꌠꇂꃴꄉ，ꇩꏤꑭꊂꊿꋅꈁꐥꌠꏓꂱꉌꊋꀉꇨꌠꌋꆀꈄꐨꐋꀋꌡꌠꌌꄉ，ꈢꇓꀖꊋꋠꌠꑣ，ꏀꀺꁨꆹ，ꎆꏣꐧꋦꀻꎆꌠꎍꐽꃅꁨꆹ、ꎍꐽꃅꉾꆹ，ꋋꈓꇬꀋꉬꀋꉆꌠꑞꅉꁻꌐꂿꃆꃅꇫꑟ，ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꊌꐨꀊꏀꌠꀉꒉꀊꂾꌠꊌꅜ。
——ꎆꏣꀰꏢꌠꋭꋽꅉꇬꎍꇬꎷ。ꇩꈐꒃꅐꈁꉬꁌꐨ67.7ꃪꂡꂷꇬꑟ，6.9％ꉀꎆ，ꋧꃅꀋꉬꀋꉆꌠꎆꏣꄜꇬꂴꇬꂾꎍ。ꋚꂷꅐꐨ“ꊰꑋꈓꊛꎆ”ꌠꃅꇫꑟ，ꀀꊿꌬꈧꁌꏤꁌꄓꐨꊼꇅꀁꂥꅉꇬꎍ。ꈜꀕꇈꃅꑘꊌꃅꐨꀑꐱꃅꇬꎍꐽ，ꇓꈓꏦꎫꃅꑘꊌꌠꊿ1312ꃪꑻꀊꏀꃅꁦꎆ，ꁦꎆꃅꋋꈓꌠꄐꄉꑞꅉꁻꌐꃅꇫꑟꌠꆹ，ꎆꏣꀰꏢꌠꇬꄞꅐꐘꐛ。
——ꐛꉻꋊꄻꌠꏣꀋꑌꌠꁨꎆꐨꐥ。ꁧꃤꃅꑘꆹꇩꈐꒃꅐꈁꊌꁌꐨꇬꍆꐪꉀꐕꌊ50.5％ꇬꑟ，ꉘꃀꃢꌠ“ꇩꃅꈮꁁ”ꇬꍆ。ꌬꈧꌠꎆꏣꉀꎆꌠꇬꅐꌞꐨꆹ66.4％ꇬꑟ。ꇮꇐꀊꂥꌠꅐꑘꌋꆀꉁꈾꄺꂡꑘꐳꐨꎂꀕꇮꑘꄩꐂ。ꌗꂓꇩꈐꒃꅐꈁꉬꁌꐨꃹꐨ5.6％ꀁꋌꊰ。
——ꀻꎆꇙꊋꀊꏀꌠꐳꃅꉀꒆ。ꏀꀺꈺꇙꀻꎆꄐꇐꐪꊛꄉꄹꎆ，ꐮꈴꈄꏍꌋꆀꋍꑞꋍꉹꐳꀥꇱꄉꐮꐊꐙ，ꏀꄓꅐꑘꐳꃅꉀꎆ。ꉹꁌꑘꀺ、ꋍꏅꏀꀺꌠꍅꁍꀕꃅꀻꎆ，ꋋꈓꌠꀊꏀꃅꁱꄀꄉꌠꎆꏂꑘ21.6％ꉀꎆ，ꐽꏡꃅꋍꑍꌠꀊꏀꃅ1.2ꃪꁯꉀꎆ。ꇙꊋꀊꏀꌠꆹꃅꑘꊌꌠꎍꐽ、ꊐꐕꊥꎆꌠꏭꂿꄐꑓꅐꎑꌠꋊꇤꀐ，ꀋꃋꎆꏣꐧꋦꋌꄹꇙꌊꃹꅼꃅꆴꄻꇰ。
——ꏓꂱꐥꐨꀒꁨꋍꁘꃅꄻꃪ。ꇩꏤꑭꊂꀀꊿꊾꂷꌠꐽꏡꃅꇬꌫꄻꉆꌠꊌꐨꃶꐚꃅꇬ7.4％ꉀꎆ，ꐳꐨꎆꏣꏭꀋꋌ。ꀋꉊꄻꈎꈎꂫꇬꀀꊿꊭꊎꎆꋒꃷꁨ8.5％ꉀꎆ，ꀊꏀꃅ4ꃪꎖꂡꂷꁦꎆ。ꉈꑴꂿꑘꁡꇤꊻꂷ6434ꃪꑻꀆꐒꅝꉮꀋꐥꌠꌤꃆꂥꀘ。ꌢꎭꄏꐓꈢꇓꀖꌠꊋꀥꇱꄉ，ꂿꑘꁡꇤꌢꎭꊻꂷ1442ꃪꑻꊨꒊ。
ꈆꑪꇮꇐꁁꏯꏀꀺꊌꐨꈨꇩꏹꂴꅑꑞꅉꇬꑟ，ꌕꋊꋎꌠꉿꄆꇮꇐꁨꎆꐨꀉꒉꀊꂾꃅꊌꅜ，ꇩꄻC919ꃥꑌꃏꏸꀉꒉꉹꌠꊨꄻꐯꇯ，ꌗꏢꏸꇨꐯꇨꏠꌠꉈꑴꋧꃅꈁꐥꌠꄩꐂꌦ，ꄳꑿꀕꇊꀙꇙꒆꇗꌷꇐꅀꆅꉁꌷꇐꈁꁠꊌ。ꉪꇩꏤꀻꎆꌠꇬꊌꅜꌠꊌꐨꏭꆏ，ꇩꏤꑭꊂꊿꋅꈁꐥꌠꏓꂱꋌꎼꈐꄑꊋꄓꌋꆀꉌꊌꑊꒉꀐ！
ꋌꃀꋋꈓꉪꀱꇬꆹ，ꃅꊌꐨꈝꐮꌠꀋꉬ。ꃅꊌꐨꋋꈨꆹ，ꀊꅰꃅꌼꇪꆼꇨꌠꇩꏹꋦꈭꇬꄉꊌꅜꌠꉬ。ꀋꉊꄻꈎꋧꃅꎆꏣꉀꎆꐳꐨꆹ6ꈓꅑꅸꇁꌠꀁꂥꐯꀁꂥ，ꇩꏹꃼꇇꉀꎆꐳꐨꀊꅰꃅꀁꂥ，ꃷꇐꀉꒉꌠꁌꏤꀉꒉꃅꀁꋌꊰ，ꇩꏹꎆꒉꎆꇁꃷꎏꇙꈧꌠꀥꇱꄉ，ꉪꇩꏤꎆꏣꏭꈛꎂꃅꄜꎟꌋꆀꁧꏖ。ꃅꊌꐨꋋꈨꆹ，ꇩꈐꀊꅼꊐꌠꐮꄙꐨꄇꇖꀕꃅꑓꅐꎑꇁ、ꎆꏣꀁꋌꊰꌠꍅꊋꁦꎆꇱꌠꐛꐨꇬꄉꊌꅜꌠꉬ。“ꌕꊭꐮꄅ”ꌠꐛꊂꂾ，ꎆꏣꌤꃅꌠꑍꑵꊋꋠꄷꀋꁧꀉꑌꑵꃅꊋꋠꌠꌤꃆꀉꑌꃅꊝ，ꀊꎴꀁꎴꐮꐊ，ꈲꎹꉮꋊ，ꇿꋌꐥꃅꇫꊝ。ꃅꊌꐨꋋꈨꆹ，ꉪꇩꏤꎆꏣꉬꇮꃷꁨ60ꃪꂡꂷꇬꄩꐂꌠꅉꃀꃷꁨꀊꂥꌠꇬꄉꊌꅜꌠꉬ。ꀋꃋꇩꈐꒃꅐꈁꉬꁌꐨꆹꉀꎆꃷꁨꉐꊮꌺ1ꂷꉀꎆꄷꆏ，ꉀꎆꃷꁨ5ꈎꂾꉐꊮꌺ1.5ꂷ、10ꈎꂾꉐꊮꌺ2.5ꂷꌋꆀꐮꆌ。ꎆꏣꄉꈁꀊꅰꀉꒉꆏ，ꉀꎆꊋꋠꐨꑌꄚꐊꄉꁦꎆ。ꊋꋠꌋꆀꍅꊋꂾ，ꇩꏤꑭꊂꊿꋅꈁꐥꌠꏓꂱꆹꈁꄽꎬꅧꄉ，ꋍꁘꋍꁘꃅꈴꅐꇁꀐ。ꋋꆹꉈꑴꋍꃢꄛꑣꎼꇁꇬ，ꊋꋠꊜꊋꌠꑞꑌꍏꇩꀻꎆꁨꆹꌠꑭꁘꇬꄙꀋꄐꌠ！
ꋍꈓꅑꅸꇁꌠ，ꉪꊇꀋꉬꀋꉆꌠꄚꊁꌤꑠꈨꃅꀐ：
ꋍꆏꊋꇤꄉꎍꐽꃅꉀꎆꐛꉻꋊꐽꃨꆰꐨꄴꏮ，ꉻꒉꋊꐽꃄꄟꏀꀺ。ꐪꊛꄉꎆꏣꀁꋌꒉꌠꍅꊋꀥꇱꐨꊝꂿꄷ，ꉪꊇꆏꇢꊭꇬꋎꍅꅉꃀꀂꏽꄉ，ꍜꐥꃅꋎꍅꌋꆀꋌꉚꄉꋋꍅꌠꃅ。ꏣꀋꑌꌠꎆꏲꏱꁈꆹꊋꇱꈲꁧꐕꌠꇬꉜꄉꃅ，ꐛꉻꃅꐙꌠꇗꏸꊨꒊꈍꈐꍔꐯ，ꁊꈴꃅꁌꀁꋌꊰꌠꃅ，ꏱꎆꊭꊎꎆꀨꀰꏢꐛꀕ。ꃅꄷꍔꃚꎝꊫꌐꌌꊭꊎꎝꃆꆥꄻꌠ3.2ꃪꂡꂷꃑꄻ，ꇔꊰꀵꃤꌌꀁꋌꊰꌠ2000ꂡꂷꀋꇈꐥ，ꃅꄷꍔꃚꎝꌣꍅꊋꊨꑾꌙꀐ。ꎍꐽꉾꌠꎆꃀꏱꁈꆹꏯꏸꄉꄐꌠꇬꉜꄉꃅ，ꀉꑌꃢꃅꇔꊰꀁꋌꊰꊭꄎꎆꌌꀁꋌꊰ，ꊐꉛꍆꐪꏲꂠꌠꄺꀱ，ꎆꃀꏱꁈꉁꈾꏀꀺ，ꊋꀥꇱꄉꐥꄜꎆꏣꄏꐓ。ꇿꋌꐥꃅꎆꇱ，ꌐꐘꋈꄻꎆꀨꄻꄉ，ꊋꀥꇱꄉꈲꒉ、ꇓꈓꏦꎫꑲꆹꇣꆹꐛꅉꌋꆀꂿꑘꁡꇤꑲꎓꇣꐡꌠꄺꀱ、ꈯꄔꁮꐚꁆꏯꎸꈜꌋꆀꄇꈜꑠꊋꁧꅉꋈꄻ。ꌌꀨꇬꄉꌠꁁꏯꌬꈧꊥꎆꋉꃆꃄꌬ，ꇓꈓꇓꉈꀀꊿꈩꆫ、ꈄꏍꈴꃻꄻ、ꈴꌗꌬꈧꑠꐳꃅꉀꎆ。ꀋꉊꄻꈎꉈꑴꏣꀋꑌꃅꇴꀾꃷꎏ、ꉇꎆꃼꃷꃷꎏꐋꀋꌡꃅꇙꈧꑠꎆꒉꎆꇁꁁꏯꃨꆰꋓꎭꐨꀉꑌꑵꏭꊝꄉ，ꑭꊂꐨꃄꁕꃅꐙꌠꃨꆰꌠꇬꀋꅐꃅꄉ，ꇩꏤꎆꏣꎆꒉꎆꇁꉮꀋꐥꌠꀧꌋꃅꄉꀐ。
ꑍꆏꃷꎏꍄꑐꊋꃤꄕꄻꌠꇬꆼꒆꄉ，ꊋꀥꇱꄉꄺꀱꁉꃑ。ꉪꊇꆏ“ꒉꀉꒉꃅꃑꃅꊐ”ꌠꇨꃅꋣꌉꌠꀋꃅꀕ，ꐪꊛꄉꐛꉻꃅꐙꌠꄺꀱꌠꃅ。ꃹꅼꃅꏲꑘꅧꊨꌅꈌꄝꃑ、ꃑꏲꐮꐊꌠ、ꁧꃤꃅꄺꀱꌠꄻꃪ。ꏲꑘꍤꄻꈌꁧꌤꆿꐘꃆ311ꐘꀜꋊꌋꆀꃑꀏꁵ，ꃅꑘꇎꏦꏚꍆꊨꄅꌠꌋꆀꏚꍆꌤꃆ123ꐘꋊꐆꇧꎭ，ꉱꋃꃅꏲꑘꍤꄻꈌꁧꌤꆿꐘꃆꀋꉬꌠꆏꇧꎭꀐ。ꇬꎭꁱꄀꂾꍤꄻꈌꁧꌠ85％ꅧꊨ，ꐊꑷꃅꌕꊫꌐꏓꋍꏢꃅ、ꀰꏢꊫꌐꋍꏢꌐꂷꋍꂷꉬꌠꃄꌬ。ꊋꀥꇱꄉꌤꃅꇬꌤꃅꊂꍞꏲ，ꄉꉻꁧꃤꃅꈭꎁꄻꃪ。ꉹꁌꌋꆀꎆꏂꑘꌤꀞꇬꀊꅰꃅꈝꐮ，ꐧꋦꑭꊂꑘꀺꏀꀺꃅꏾꐨꋍꑍꋍꉙꃅꉀꄓꆹ。
ꏱꎆꇗꏸꎆꒉꎆꇁꑠꌌꀨꇬꄉꄺꀱꌠꃹꅼꃅꄹꎆ。ꍏꑷꆹꃅꄷꌐꐘꆹꏮꁵꄻꌠꐘꃆꌕꁧꋊꋍꁧꊨꒊ，ꎂꀕꃅꐙꌠꆹꏮꁵꄻꌠꄉꈁꁦꎆ。ꃼꇇꇗꏸꄺꀱꌊꁌꎆꇗꏸꃅꌠꎍꐽꃅꀕ，ꅐꀦꇗꏸꁌꏤꇬꈴꌗꎴꈍꈐꍔꐯ。ꎆꊭꊎꇔꊰꄩꑞꅉꀜꋊꇧꎭ，ꎆꊭꊎꄜꏂꀧꄹꏦꄹꌬ，ꏓꂱꀙꎆꃀꃅꋮꐂꁵꄻꉻꑫꋈꄻ。ꁌꏤꄺꀱꊋꃤꀥꇱ，ꍏꑷꍔꃚꁌꏤꏤꄻꐘꃆ80％ꊨꒊ，ꃅꄷꍔꃚꁌꏤꏤꄻꐘꃆꈮꁁꈋꉐꊨꒊ。ꇩꁨꎆꏂꑘ、ꂿꑘꁡꇤ、ꎆꊐꎆꇱ、ꒆꉻꌧꑳꑠꁁꏯꄺꀱꌠꊱꁨꃅꄹꎆ，ꐊꑷꃅꃹꅼꃅꄺꀱꌠꊌꐨꇬꊎꄇꇖꀕꃅꑓꅐꎑꇁꇰ。
ꁉꃑꌠꌌꄺꀱꌠꊥꎆꀻꎆꌠꊥꎆꇬꎷ。ꊋꇤꄉꉇꉻꃼꇇꃅꌠꄻꎍꐽ，ꉇꅐꇗꏸꈪꀵꃤꉺꏦꋊꄻ，ꈏꃹꉇꅐꈭꊭꇬꁌꎴꌠꋊꎵ，ꃼꇇꃅꇬꈝꐮꈴꌠꑟꐨꉀꐕ，ꉇꅐꐛꉻꏣꀋꑌꃅꐛꐈ。ꉇꄅꃼꇇꃅꊿꎆꇱꏢꑲꐨꏤꐘꈮꁁꊨꒊ，95％ꈋꉐꆏꄛꇰꇬꊎꄉꏲꂠ，ꃶꐚꃅꉇꎆ1263ꂡꂰꑼꌬꈧ，5.6％ꉀꎆ。ꎆꒉꎆꇁꀋꉬꑵꌠꉇꉻꏭꈛꎂꃅꎆꇱꌠ1180ꂡꂰꑼꐥ，14.7％ꉀꎆ。ꎮꉰꄿꐨꃼꇇꃄꅉꎖꋪꄹꌬ，ꀊꏀꃅꇨꄏ、ꄟꏢ、ꃛꏧꄿꐨꃼꇇꃄꅉꄻ。ꏓꂱꀙꎆꃀꇩꏹꎆꃀꎆꀨꎀꍹꇣꋲꎆꋊꌅꈌꎆꃀꊐꅉꇬꐉꃹ。ꑸꍏꅉꃀꌬꇐꎆꇱꑴꉴꑌꐚꃅꄺꄉ，ꏦꍠꈴꈜꎆꀨꎆꇱꀰꏢ。ꍏꇩꌋꆀꉴꇩ、ꍏꇩꌋꆀꀎꄊꆀꑸꄿꐨꃼꇇꃅꋯꏤꄯꒉꌋꆀꍏꇩ—ꄏꃀꄿꐨꃼꇇꃅꅉꊐꐕꋯꏤꄯꒉꁱꄉ。“ꋍꁕꋍꈜ”ꋈꄻꊌꐨꄇꇖꀕꃅꑓꅐꎑꇁ，ꇩꏹꅐꊋꇷꃅꑭꁘꐕꐳ，ꐳꈴꎸꈜ、ꉿꄆꑠꍏꇩꉁꈾꉇꅐꒉꌠꂵꅐꐨꐥꃅꁨꎆꆹ。
ꌕꆏꊈꐕꈲꎆꌠꇬꉜꄉ，ꅐꑘꏀꀺꊐꐕꌠꄹꇙ。ꏀꀺꈺꇙꀻꎆꄐꇐꐱꀨꌋꆀꉜꐨꏤꄻꃄꌬ，ꋍꏅꑘꀺ、ꋍꉻꏀꀺꏱꁈꏁꁈꄻꌊꌬ，“ꐮꈴꈄꏍ＋”ꃅꐨꎖꄎꌠꃅꇫꑟ，ꎆꏣꀻꎆꇙꊋꄻꀉꇨ。ꑘꀺꊿꀉꒉꁥꑘꀺꏀꀺꈜꇬꈴꆹ。ꂿꑘꄏꐓꏱꁈꄻꐛꒆ，ꂿꑘꀻꎆꃄꄟꐳꃅꆹꏮꌠꊥꎆ。ꇮꑘꉀꎆꐳꐨꀁꋌꊰ、ꎆꏂꑘꊌꐨꈲꁧꀁꋌꊰꌠꇬꉜꄉ，ꉪꊇꆏꋍꁁꏯꆏꏀꄓꅐꑘꉘꉚ，ꋍꁁꏯꆏꋊꃅꅐꑘꄺꀱꉀꐕ。《ꍏꇩꄺꑣ2025》ꑭꄑꃄꇬ，ꇩꏤꏀꄓꅐꑘꑘꀺꎆꇱꄐꈻꎆꀨ、ꐧꐭꎆꏂꑘꀻꎆꎆꀨꏓꄻꄉ，ꇩꏤꑴꌅꏀꀺꌡꀠꅉꍔꐯ。ꏣꀋꑌꃅꅏꊋꁦꎆꌠꋊꄻ，ꎆꏂꑘꐅꄻꏓꀱꌠꄹꎆ。ꋋꌕꈎꀋꇈꇬꊁꊰꌠꇤꎸꅍꏸꅏꊋ9000ꎖꃪꄓ、ꇓꃀ2.3ꂡꄓ、ꐽꀻꋤꇓ7600ꎖꃪꈄꁨ、ꄆꐞꑗ100ꎖꃪꄓꀜꋊꇧꎭ。ꒃꅐꃅꐙꌠ、ꐥꐨꃅꐙꌠꁧꃤꃅꑘꐳꃅꀻꎆ。ꏟꈯꃅꊋꏏꍍꊨꌠꌋꆀꋦꈭꀧꌋꃅꌠꒃꉇ，ꋍꑞꋍꐘꏢꑲꃅꐙꌠꌐꁧꁦꎆꃅꃅꇫꑟ。ꑴꌅꍍꋊꃅꌠꑞꅉꁻꌐꄛꇰ，ꇩꏹꃅꌗꐛꐈꐯꉇꌠꄹꇙꌊꊌꐨꏣꀋꑌꌠꊌꅜ。
ꇖꆏꀹꄻꀻꎆꈥꈉꇬꉜꄉ，ꃄꁕꋮꄮꃅꀻꎆꌋꆀꇓꈓꏦꎫꐛꈴꀊꏀꉹꌠꊥꎆ。ꐪꊛꄉꁭꅐ、ꈯꄔ、ꁮꐚ、ꑛꌋꈤꃅꄷ“ꀉꒉꇖꁕꌠ”ꋮꄮꃅꀻꎆꌠꄹꎆ，ꌌꀨꇬꄉ“ꋍꁕꋍꈜ”ꋈꄻ、ꏢꏸꏹꋯꐊꃅꀻꎆ、ꍤꏦꒊ꒜ꎆꏣꋥꁕꀻꎆ“ꄐꇐꀉꒉꌕꐘꌠ”ꄹꎆ，ꅉꃀꉁꈾ、ꅐꑘꄐꉻ、ꒆꉻꋦꈭꀧꑠꁁꏯꋉꃆꀉꒉꀊꂾꈨꃄꄻ。ꑭꊗꌋꆀꀒꋤꃅꄷꌜꇖꂷ、ꑟꏦꀻꎆꌠꊥꎆꏱꁈꏁꁈꃄꌬ。ꑱꁯꊫꌐꄹꏦꄺꀱꌠꄹꎆ，ꀀꌠꊫꌐꄹꏦꄻꅐꇁ，ꊋꀥꇱꄉꇓꈓꏦꎫꅉꃀꉁꈾꋈꄻ，ꀊꏀꉹꌠꇓꈓꏦꎫꐛꈴꌠꊌꐨꈲꁧꀊꏀꌠꊌꅜ。
ꉬꆏꉹꁌꐥꌒꐨꁦꎆꇱꌠꇬꆼꒆꄉ，ꐧꋦꌤꑘꄺꀱꀻꎆꌠꄹꎆ。ꏱꎆꊋꋠꌠꇬꄉ，ꉹꁌꐥꐨꏦꀧꌠꐪꊛꄉꀥꇱ。ꏱꁈꀊꏀꌠꄻꅐꇁ，ꌶꅉꀊꂥꊐꌠꌶꅐꌶꌺꌋꆀꃅꑘꎹꃅꇬꊋꋠꌠꊿꁥꌠꃅꑘꑘꀺꌤꃆꀋꂿꑘꃅꂥꀘ。ꇓꈓꏦꎫꏦꀧꃅꐙꌠꋦꌒꋉꃆꀀꑳꀑꐱꃅ772ꃪꂷꋉꐛ，ꑲꁘꇣꁘꐛꅉꀀꑳꄺꀱꌠ601ꃪꂷꄺꀱꂠꀱꇬ，ꂿꑘꁡꇤꑲꎓꇣꐡꌠ432ꃪꁯꄺꀱꂠꀱ，ꀀꑳꊋꋠꌠꑶꋦꀉꑌꈨꑱꈐꀀꑳꊌꌠꉪꐨꇬꑟꀐ。ꐳꃅꌢꎭꃅꄷꋭꑘꉙꂘꊋꁧꌠꌶꅉꌷꀞꇎꏦꄻꃪ，ꃹꅼꃅꐧꐭꌶꅉꂘꃀꃅꅍꂓꄹꏦꄺꀱ，ꌌꀨꇬꄉꌠꌶꅉꀊꂥꊐꌠꌢꎭꃅꄷꂿꑘꁡꇤꌶꌺꎳꄻꌠꃷꁨꐯꌟꉜꇬ10.5％ꉀꎆ。ꐊꑷꃅꑤꊐꌠꉻꀞꆅꉚꅉꏓꇱꄺꀱꌠꃄꄻ，ꀀꊿꆄꁘꈺꁘꀉꒉꌠꄜꏂꀧꌠꀹꎆ，ꆄꁘꈺꁘꀉꒉꐯꀉꒉꌠꉃꄻꈭꋏꄹꏦꋈꄻ、ꊋꋠꌠꊿꄣꅐꌠꐥꐨꀥꁵꌠꌋꆀꀉꆈꃅꄣꅐꌠꊿꀨꎹꀥꁵꄹꏦꄺꑣꄉ。ꐥꐨꀁꂥꀧ、ꀨꎹꈲꏿ、ꎆꏂꑘꎞꆏꊿꅉꀨꃀꌠꀨꎹꎆꃀꑠꎕꏦꉀꐕ，ꌤꏲꅉꌤꑘꌤꃅꅉꃀꌠꀨꎹꄜꏂꀧꄹꏦꄺꀱꇈꃄꎆꄹꏦꄻꐛꒆꌠꃅ。ꊋꀥꇱꄉꅉꀨꄉꉻꁱꀕꁧꃤꃅꌠꋈꄻ。ꏓꂱꉹꁌꋍꏅꌠꀊꅰꃅꊌꐨꐥꃅꐙꀐ。
ꃘꆏꐧꋦꐮꄮꎍꐽꌠꊥꎆ，ꏦꈴꄉꏲꑘꏲꌠꌋꆀꏱꄻꄟꏀꀺꌠꄹꇙ。ꇩꃷꑼꄜꌊꇩꏤꑭꊂꏓꄊꎮꊈꉼꁳꍤꇖꎻꌠꏦꃤꇖꑘ11ꐘꐥ，ꏲꑘꏦꇗ8ꋐꏤꄻꄺꀱꀕ。ꏲꃆꄇꄜꋊꌠꐳꃅꄹꎆ，ꄆꌅꏲꃆꌋꆀꈄꏍꇬꄉꌤꀞꌠꁊꌬ。ꏱꁈꀉꒉꀊꂾꌠꃄꌬꍞꍤꃅꎁꅱꄻꉺꏦꄺꑣꄉ，ꌕꁁꏯꈋꍣꄤꎖꌠꃅ。ꋭꋽꃅꋌꐛꉮꌸꌠꌋꆀꉘꀋꇉꃅꋋꇅꃅꇫꅐꌠꌤꐘꊜꄻ。ꊋꀥꇱꄉꋬꂻꒃꅐꌠꍞꏲ，ꌤꅐꐨꈁꉬꃷꁨꌋꆀꌤꅐꐨꀉꒉꀊꂾꌠ、ꀋꂿꑘꌠꉹꑘꌤꅐꐨꃷꁨꐪꊛꄉꀁꋌꊰ。ꋠꇐꅝꒉꉮꀋꐥꌠꄺꑣꌡꀠꃅꐨꄹꎆ。ꀉꇨꃅꐧꋦꋬꂻꏓꇱꏱꄻ，ꏦꃤꇬꈴꄉꋍꑞꋍꉹꏦꐆꑽꃤꐆꌠꇇꇩꍈꌠꃅ，ꊋꑌꃅꄉꉻꋬꂻꌠꀧꌋꃅꄉꀐ。
ꉪꊇꆏꃹꅼꃅ“ꌕꏦꇨꌕꃶꐚ”ꌐꄝꉙꂘꌠꃅ，ꌦꀳꏿꄉꄈꍏꑷꏤꐪꉆꐘꌠꉌꊈꃄꌬꈴ，ꏟꈯꃅ“ꃅꇏꇖꑵ”ꄺꀱ，ꏦꇨꃅꇩꃷꑼ“ꃷꋪꏦꃤꏤꄉ”ꌠꃄꌬ。ꊋꀥꇱꄉꏲꑘꍞꍤꌋꆀꍤꌗꍞꊟ。ꊋꀉꒉꃅꅐꄉꄈꃅꇏꏲꑘꐙꎴꋈꄻꌠꌋꆀꍹꈔꌠꏭꁏꉇꈽꌠꄹꎆ，ꍹꈔꊾꈨꌌꄉꅓꀞꀐ。
ꉪꊇꆏꈣꒉꃅꍏꇩꏓꂱꏝꀪꏭꄙꌉꈿꌠꉈꑴꋧꃅꃔꑭꌦꏭꁏꌉꈿꊋꐛ70ꈎꈭꏝꐛꌠꎺꄅ，ꏓꋧꄉꉪꇩꏤꋧꃅꃔꑭꌦꏭꁏꌉꈿꌠꁰꅐꏭꌉꁍꀋꉬꀋꉆꌠꐩꋊꑋꅉꉆꈉꌋꆀꅐꌞꑆꊋꀉꒉꀊꂾꌠꄜꉺꀐ，ꍏꇩꏓꂱꆏꋧꃅꇩꏤꏓꂱꈧꌠꌋꆀꐯꇯꄉꄮꐽꌠꀧꌋꃅ、ꐯꇯꄉꑖꉬꌠꐏꁇꌠꀋꎪꌠꉪꉻꄛꑣꀐ！
ꋍꈓꅑꅸꇁꌠ，ꈁꉬꁁꏯꃅꉇꉻꏭꑌꑲꌠꊌꐨꇨꐯꇨꃅꐥ。ꑮꏣꀻꍗꑮꏤꇩꏤꏃꌋꂠꌋꉈꅐꄉꇩꏤꀉꑌꂷꇬꅲꇫ，ꏓꐊꇩꋍꋬꈭꃀꀉꇨꌠ、ꇩꏤꑍꊏꂷꏓꉻꏃꌋꂠꌋꃀꀉꇨꌠ、ꑸꄠꎆꏣꇨꃅꎀꍹꏃꌋꂠꌋꑌꐚꌠꀋꉬꌠꃀ、ꃅꌗꐛꐈꃀꀉꒉ、ꄏꑸꇷꃅꏃꌋꂠꌋꋍꋬꈭꃀ、ꋧꃅꎆꏣꈋꍣꃀꑠꀉꒉꀊꂾꃅꀕꌠꇬꃅꈽꆹ。ꊋꐛꃅꍏꃏꐮꇷꈋꍣꃀꀉꇨ、ꍏꉩꏃꌋꂠꌋꐮꏯꅇꉉꌠꀞꄻ，ꍏꇁꈋꍣꌠꑭꄑꃅ。ꀋꉬꀋꉆꌠꇩꏤꀉꒉꌠꌋꆀꐮꃆꂮꀒꁨꆹꐨꀊꏀꌠꐥꀐ，ꈭꇍꇩꏤꌋꆀꃶꐚꃅꇷꃅꌠꃹꅼꃅꄹꎆ，ꀻꎆꇰꌠꇩꏤꌋꆀꐮꉂꐮꅉꐮꇷꃅꌠꀋꆏꃅꀺꂵ，ꏓꐊꇩꑠꇩꏹꎀꍹꌋꆀꇩꏹꉺꏦꐮꑌꐯꑲꌠꐉꑷꃅꊋꀥꇱ，ꎆꏣꉇꉻꑌꑲ、ꃰꊿꁱꀕꐮꈴꌠꊌꐨꀉꇨꃅꐥ。ꍏꇩꆏꃅꎁꆽꎍꌠꇩꏤꀉꒉꂷꃅꄉꇬ，ꇩꏹꌋꆀꃅꄷꌤꃆꇬꀋꂿꑘꌠꊥꎆꐨꐥꌠꂿꄐꋊꇤꅐꇁꀐ。
ꁧꎁꊈ！
ꋌꃀꋋꈓꊌꅜꌠꊌꐨꆹ，ꐋꀨꑮꏣꀻꊝꎻꏹꃅꄉꌠꄈꍏꑷꃅꇴꄉꉻꏓꃬ、ꈆꑪꃅꁰꈘꃅꀕꄉꊌꌠꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꐯꇯꉌꋍꂷꃅꊋꇤ、ꀉꇨꃅꉈꈽꄉꊌꌠꉬ。ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꉻꏑꌋꆀꋍꑞꋍꁆꏯꊿꂒꋦꌠꏭ，ꇬꀖꌌꀖꄉꈀꎭꀕ！ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꎿꉈꀀꌠꃺꑌꏭ，ꇬꀖꌌꀖꄉꈀꎭꀕ！ꍏꇩꐛꏀꈴꋈꄻꌤꑘꉈꇬꑓꇬꌋꆀꊋꁈꄏꌠꇩꏤꈧꌠꍔꃚ、ꇩꏹꎀꍹꌋꆀꇩꏤꈧꌠꐋꀨꏭ，ꇬꀖꌌꀖꄉꈀꎭꀕ!
ꋒꐯꋒꃅꀋꉊꄻꈎꊌꐨꏚꍆꈭꐨ，ꉪꊇꏸꐚꃅꊌꂿꇬ，ꉪꇩꏤꀻꎆꅉꇬꉈꑴꊋꋠꐨꌋꆀꌤꃆꀉꑌꃅꐥꑴꌦ。ꅉꆺꑭꊂꃼꇇꉈꎞꑠꐊꊈꇱꁧꏖꄉ，ꀋꉊꄻꈎꉪꇩꏤꈏꃹꉇꅐꈁꉬꃷꁨꀁꋌꊰꌠꇫꅐ，ꂴꄐꄉꉀꎆꌠꑞꅉꁻꌐꊌꃅꇬꀋꑟ。ꎆꇱꉀꎆꊋꀋꑌ，ꉹꑘꈨꅐꊋꁦꎆꇨ，ꎆꏂꑘꄹꁆꒃꅐꀰꏢꌠꊋꋠ，ꃅꄷꌋꆀꉹꑘꆹꐨꁷꐞ，ꏱꎆꊌꐨꅐꐨꐮꄙꐨꑓꅐꎍ，ꎆꀨꃷꎏꅉꃀꐨꄹꏦꐛꀋꒆꑴꌦ，ꎆꒉꎆꇁꑠꁁꏯꐔꈔꉆꌠꉮꐴꇫꑌꑴꌦ。ꏓꂱꉹꁌꇫꉈꇬꌠꆅꉁꆄꄻ、ꂘꑘ、ꃀꌠꀨꎹ、ꋠꇐꁬꋌꉮꀋꐥ、ꊌꐨꁷꄻ、ꇓꈓꏲꂠꑠꁁꏯꌤꃆꊼꇅꀉꑌꃅꐥꑴꌦ，ꋦꈭꍍꆀꃅꒊꃅꇁꄡꇗꊋꋠꇨ，ꈑꉒꀉꆈꌠꂿꃅꃅꄷꈨꇬꅐꑭꀋꆏ。ꈜꀕꇈꌞꉌꂵꆅꌠꆏ，ꀋꉊꄻꈎ“ꄏꃓꍝꑟ”ꃥꑌꄇꇉꀱꆽꃅꒉꑖꌤꐘꌋꆀꄟꏢꇤꀉꒉꐯꀉꒉꃅꄔꉮꂨꁖꑠꌤꇫꅐꀐ，ꊻꂷꂷꊂꌸꌦꈔꌠꌋꆀꎆꋚꁮꑋꌠꀉꇨꐯꀉꇨ，ꑗꉘꆹꇯꍝꃅꀊꅼꌠꉬ，ꀋꎪꃅꎔꎗꃅꎺꄉꌶ。ꍔꃚꌤꃅꌠꉈꑴꀋꇎꀋꂪꅉꐥꑴꌦ，ꄺꀱꌠꌋꆀꏱꁈꏁꁈꈨꃄꌬꌊꑞꅉꇬꀋꑟ，ꇥꀯꀁꑌꄹꁆꃅꅍꀋꃅ、ꃅꑲꀋꌧ、ꃄꈌꄐꃅꀕ，ꋍꈨꁁꏯꇬꃅꇏꀋꎃꌠꌋꆀꍹꈔꌠꌤꃆꇫꋓꉪꀋꁨꀋꉆ。ꉪꊇꆏꀒꁨꋍꁘꃅꐒꊀꉪꉻꌋꆀꆹꄜꉪꉻꁦꎆꃅꑌꄉ，ꊋꀉꒉꐯꀉꒉꃅꇤꄉꌤꃆꋋꈨꂥꀘꌶ，ꈍꄮꑌꏓꂱꇫꉘꇉꌠꌌꄉꏲꂠꌠꃅꍜꃅꄉ，ꊋꇤꏡꇤꄉꋒꃅꍔꃚꌤꃅ，ꀋꎪꃅꏓꂱꏮꄀꄉꌠꇢꄡꏿ。
ꁧꎁꊈ！
2015ꈎꆹ“ꊰꑋꉬ”ꃅꌐꄹꈎꌠꉬ。ꋌꃀꋋꉬꈎꆹ，ꉪꇩꏤꀻꎆꊌꐨꋧꃅꀕꇫꂿ。ꄈꅿꃀꀉꒉꊰꉆꃢꌠꈿꊂꅑꅸꇁꌠ，ꐋꀨꑮꏣꀻꊝꎻꏹꃅꄉꌠꄈꍏꑷꏟꈯꃅꏃꂠꌠꇂꃴꄉ，ꐯꏍꌼꇪꌠꇩꏹꋦꈭꌋꆀꊋꋠꃣꇖꌠꇩꈐꄺꀱꀻꎆꎍꐽꌠꂿꃆꇬꉜꄉ，ꉪꊇꆏꊛꄉꀋꎪꃅꎍꐽꌠꇬꄉꁨꆹꌠꌤꃅꅉ꒜ꉉꈌꌭꈬꇬꎷ，ꃹꅼꃅꄺꀱꁉꃑ，ꀋꃋꋋꃀꈲ、ꋌꊂꀊꉗꃅꑌꈲꌠꄺꀱꀻꎆꏁꁈꑠꋬꈭꃄꌬ，“ꊰꑋꉬ”ꄐꎖꊨꄅꄉꌠꑞꅉꁻꌐꀋꉬꀋꉆꌠꂿꃆꐊꑷꃅꀕꇫꑟꀐ。ꋍꆏꎆꏣꐪꊛꄉꊼꇅꐳꃅꀻꎆ。ꇩꈐꒃꅐꈁꉬꁌꐨꃅꈎꈓꐽꏡꃅꇬ7.8%ꉀꎆ，ꎆꏣꈁꉬꃷꁨꎍꐽꃅꋧꃅꇣꄧꉆꈉꑍꂷꂶꌠꇬꎍ，ꅉꆺꑭꊂꃼꇇꎊꈬꇩꏤꀉꒉꌠꉘꃀꂶꌠꌋꆀꉈꉻꏭꎆꇱꇩꏤꀉꒉꌠꀋꉬꀋꉆꂶꌠꐛ。ꑍꆏꐛꉻꋊꄻꌠꌐꍝꐥꃅꁨꆹꐨꊌꅜ。ꁧꃤꃅꑘꆏꅐꑘꉘꃀꀉꒉꑵꌠꐛ，ꇮꑘꈴꌠꌋꆀꈴꌗꈴꌠꐮꉔꌠꀊꅰꃅꃹꅼ，ꂿꑘꏓꇱꒃꅐꄐꊋꄇꇖꀕꃅꁦꎆꇁ。ꌬꈧꌠꆏꎆꏣꉀꎆꌠꄙꄎꌠꊋꃤꀋꉬꀋꉆꌠꐛ，ꊻꂷꈮꁁꄩꐂꌠꆏꇓꈓꏦꎫꇬꀀꋦ。ꌗꂓꇩꈐꈁꉬꁌꐨꊋꃹꐨ18.2％ꀁꋌꊰ，ꀋꉬꀋꉆꌠꍍꆀꐥꇐꋊꃑꃷꁨ12％ꈋꉐꊨꒊ。ꌕꆏꅉꃀꌫꉂꌫꈾꑞꅉꐊꑷꃅꐕꆹ。ꎸꈜꀰꏢꆏꈉꆏ12.1ꃪꉻꆏꇬꑟ，ꄚꈐꏭꐳꈴꎸꈜꆏ1.9ꃪꉻꆏꄩꐂ，ꋧꃅꇣꄧꇬ60％ꈋꉐꍆ。ꐳꈴꄇꈜꍯꈴꉆꆏꈉ12ꃪꉻꆏꄩꐂ。ꒈꂪꒉꈻꒈꀑꎭꌠ、ꈯꄔꒉꈴꋉꃆꌌꒉꈴꀐ。ꅉꆺꑭꊂꇬꀉꒉꐯꀉꒉꌠꇖꋊꋎꌠꊈꇙꅇꈴꈄꏍꄻꐛ。ꇖꆏꈆꑪꇮꇐꏀꀺꌠꀉꒉꀊꂾꃅꂵꅐꐨꃅꇫꑟ。ꆃꌅꅇꈴ、ꍏꊉꌅꇙꈧ、ꊸꌗꀊꂥꎸꅍꐊꐳꈴꑠꅉꃀꎥꃪꌠꂴꆽꁧꀿꐨꐥꌠꊌꐨꈨꊌꅜ，ꊿꑌꃅꈯꈴ、ꆧꁨꌥꉩꋉꃆ、꒺ꅼꅉꍤꎖꑠꐘꃆꆏꋧꃅꇣꄧꂴꅑꌠꑞꅉꇬꑟ。ꉬꆏꏓꂱꐥꐨꑞꅉꄇꇖꀕꃅꉀꐕ。ꀀꊿꊌꐨꉀꎆꐨꆹꎆꏣꉀꎆꐨꏭꀋꋌꃅꐳ，ꇓꈓꇓꉈꊌꐨꐮꍣꐨꐪꊛꄉꃛꀄꊭꇁ。ꇓꈓꏦꎫꃅꑘꊌꌠꊻꂷꃷꁨꀊꏀꃅꁦꎆꌠ6400ꃪꑼꄩꐂ。ꇓꈓꏦꎫꏦꀧꃅꐙꌠꋦꌒꋉꃆꀀꑳ4013ꃪꂷꋈꄻ，ꉹꁌꂡꎖꉌꇿꑓꇿꃅꎞꌊꀀꑳꀊꏀꌠꇬꀀ。ꂿꑘꁡꇤꌢꎭꊻꂷ1ꂡꎖꀁꋌꊨ，ꂿꑘꁡꇤꀀꊿ3ꂡꎖꅝꒉꉮꀋꐥꌠꌤꃆꂥꀘ。ꃘꆏꐧꋦꀻꎆꊌꐨꄇꇖꀕꃅꉀꐕ。ꂘꑘꀋꈐꀋꉈꌠꌋꆀꊇꁧꄇꇖꀕꃅꉀꐕ。ꅉꀨꆅꉁꄜꏂꀧꌠꉱꑷꌠꃅꇫꑟ，ꅉꀨꃀꌠꀨꎹꄜꏂꀧꌠꇬꐊꈽꐨ80％ꇬꐂ。ꁱꀕꆓꍝꊋꊛꄉꉀꐕ。ꏦꃤꈴꇩꏲꌠꐊꑷꃅꄹꎆ。ꍏꇩꐛꐨꂽꌤꆴꄻꊌꐨꄇꇖꀕ。ꉬꈎꊋꇤꇈ，ꉪꇩꏤꎆꏣꊋꃤꃶꐚꌠ、ꈆꑪꇮꇐꊋꃤꃶꐚꌠ、ꇩꐏꊋꃤꃶꐚꌠ、ꇩꏹꑌꑲꊋꃤꉈꑴꀉꒉꑠꊐꇬꑞꌦꀐ。
“ꊰꑋꉬ”ꊬꌠꇬꁤꇅꀕꌠꊌꐨ，ꋒꐯꋒꃅꍏꇩꐛꐨꐧꋦꉪꏦꂱꎆꅑꐨꀋꇰꀋꉈꌠꄛꑣꅐꇁꀐ，ꏓꋧꄉꍏꇩꏓꂱꃤꌐꇁꈤꀋꉆꌠꁦꄻꊋꃤꋌꄜꎼꇁꀐ，ꀉꒉꐯꀉꒉꃅꍏꉸꊿꋅꊨꏦꉌꒊꐨꌋꆀꏓꋧꊋꃤꁦꎆꇱꀐ，ꀋꎪꃅꇩꏤꑭꊂꊿꋅꈁꐥꌠꏓꂱꊋꊡꄉ“ꉐꈎꑍꂷꌠ”ꉈꈽꑞꅉꁻꌐꃅꇫꑟꌠꎴꆹꏷꀊꏀꌠꇬꄉꌳꈄꀬꅑꃅꀒꁨꉜꄉꆹꌠꉬ！
ꑍ、“ꊯꌕꉬ”ꊬꌠꇬꀋꉬꀋꉆꌠꑞꅉꁻꌐꂿꃆꌋꆀꏁꁈꀉꒉꀊꂾꌠ
《ꍏꇭꍏꑷꇩꂱꎆꏣꌋꆀꐧꋦꀻꎆꉬꈎꎖꄎꊯꌕꃢꌠꏤꄻꃆꂮꇖꐨ》ꇬꈴꄉ，ꇩꃷꑼꆏ《ꇩꂱꎆꏣꌋꆀꐧꋦꀻꎆꉬꈎꎖꄎꊯꌕꃢꌠꐱꀨ（ꄐꄉꌠ）》ꏓꄻꄉ，ꄛꏮꌊꃀꀉꒉꈿꅉꁳꍤꄻꀐ。
《ꐱꀨꄐꄉꌠ》ꆏꏟꈯꃅꐊꑷꃅꊼꇅꌣꈚꌠꐧꋦꄻꐛꌠꉈꈽꑞꅉꁻꌐꇬꆼꒆꄉ，ꀻꎆꐮꆽꀋꏣ、ꐮꀋꄮ、ꊛꄉꀻꎆꀋꉆꌠꑠꑓꅐꎑꌠꌤꃆꇬꉜꄉ，ꈫꈈꃅꏀꀺ、ꋮꄮ、ꀊꃴ、ꁉꃑ、ꐯꇯꊌꌠꀻꎆꉪꉻꉌꑌꌋꆀꃄꌬꈴꌠꊡꀱ，ꋌꊂꉬꈎꎆꏣꐧꋦꀻꎆꌠꀋꉬꀋꉆꌠꑞꅉꁻꌐꂿꃆꊨꄅꄉꀐ，ꀻꎆꌠꇬꄘꄏꌠꏱꁈꀉꒉꀊꂾꌠ、ꋉꃆꀉꒉꀊꂾꌠꌋꆀꐘꃆꀉꒉꀊꂾꌠꑠꋬꈭꄜꅐꇁꀐ，ꄚꊁꃘꁁꏯꏭꀋꂿꑘꌠꄻꑓꅐꎑꃅꄉꀐ。
——ꎆꏣꐳꐨꐧꀠꀊꂥꃅꉀꎆꌠꄝꀋꊰꃅꄉꇬꎷ，ꅐꑘꄹꇙꌊꑞꅉꐧꀠꀊꂥꌠꇬꉜꄉꆹ。ꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꃅꇫꑟ，ꅑꅸ2020ꈎꑟꇬꆏꇩꈐꒃꅐꈁꉬꁌꐨꌋꆀꇓꈓꇓꉈꀀꊿꐽꏡꊌꐨꆏ2010ꈎꄩꋍꁊꀱ，“ꊯꌕꉬ”ꊬꌠꇬꎆꏣꃅꈎꈓꐽꏡꉀꎆꌐꂫꑞꅉꆏ6.5%ꈋꉐꉬ。ꐳꃅꅐꑘꐛꉻꄻꉾꊐꐕꌠꄹꎆ，ꇮꇐꑞꅉꀊꂥ、ꈻꏁꄐꊋꀉꇨꌠꋉꃆꀉꒉꀊꂾꑠꈨꃄꄻ。ꅑꅸ2020ꈎꑟꇬꆏ，ꂴꅐꌠꄺꑣꑘ、ꀋꃋꋋꄮꁧꃤꃅꑘ、ꄐꇐꃅꐙꌠꏀꄓꅐꑘꍆꁧꆏꀉꒉꃅꉀꐕ，ꈁꐥꌠꑘꁨꒃꅐꐨꆏꊻꂷꐽꏡꃅꇬ8.7ꃪꂷꇬꄉꉀꐕꅷ12ꃪꂷꈋꉐꑟ。ꀊꋨꄮꇬꆏ，ꉪꇩꏤꎆꏣꈁꉬꃷꁨꆏ90ꃪꂡꂷꄩꐂ，ꀻꎆꌠꊇꁧꌋꆀꇿꋌꆏꄇꇖꀕꃅꄻꉾꃪ。ꉪꊇꌟꃅꊻꂷꀉꑌꀻꎆꇰꌠꇩꏤꂷꃅꄉꇬ，ꋋꆹꊌꐨꋍꉎꀋꐥꃅꊌꀐꌠꉬ。
——ꏀꀺꈻꏁꂿꄐꄻꀉꇨꃅꄉ，ꀻꎆꌠꎁꃅꀉꇨꌠꇙꊋꄻꇬꇯ。ꏀꀺꌠꆹꈻꏁꀻꎆꌠꇙꊋꉘꃀꏡꌠꉬ，ꀋꎪꃅꄻꇩꏤꀻꎆꃅꇴꄉꉻꇬꑋꅉꉆꈉꈯꄜꇬꐕꄉ。ꃹꅼꃅꏀꀺꈺꇙꀻꎆꄐꇐꃄꄻꌶ。ꀊꏀꌠꇩꏤꈆꑪꇮꇐꐘꃆꀉꒉꀊꂾꑠꈨꃄꄻꇬ，ꑞꅉꀊꂥꌠꇩꏤꈆꑪꎥꃪꌠꌋꆀꇮꇐꏀꀺꌠꈯꄜꈨꋈꄻ，ꇩꏹꋓꅔꊋꃤꐥꌠꏀꀺꉹꌠꈜꏁꎆꏂꑘꈨꉘꉚꀉꇨ，ꐊꑷꃅꏀꀺꄺꀱꃅꉚꅉꈨꋈꄻ。ꐪꊛꄉꋍꏅꑘꀺ、ꋍꉻꏀꀺꌠꄹꇙ。ꃷꁨꀉꒉ、ꃅꄂꌗꏢ、ꎊꇐꏓꇱꈄꏍꌌꀊꐯꃅꌬꈧꌠꊥꎆ。ꐳꃅꊇꁧꌌꇩꏤꄻꀉꇨ、ꄺꑣꌠꌌꇩꏤꄻꀉꇨꌠ、ꌧꇐꅏꄻꌅꈌꌌꇩꏤꄻꀉꇨꌠꋈꄻ。ꅑꅸ2020ꈎꑟꇬꆏ，ꅔꈿꄉꅉꃀꎥꃪ、ꌫꄻꎥꃪꌠꌋꆀꄐꇐꂴꅑꁁꏯꇬꀉꒉꀊꂾꃅꂵꅐꌠꊌꅜ，ꐧꋦꑭꊂꃅꎥꃪꀖꁉꌫꎆꀕꇱꀉꇨꐨꆏ2.5%ꇬꑟ，ꈆꑪꇮꇐꀻꎆꌠꆹꎆꏣꉀꎆꌠꏭꑆꊋꅐꌞꐨꆏ60%ꇬꑟ，ꏀꀺꉹꌠꇩꏤꌋꆀꌧꊿꇩꏤꀉꇨꈬꇬꃹꆹ。
——ꀊꏀꉹꌠꇓꈓꏦꎫꐛꈴꌋꆀꂿ꒧ꐛꏀꈴꌠꄹꎆ，ꇓꈓꇓꉈꃄꁕꋮꄮꃅꀻꎆꌠꊥꎆ。ꇓꈓꇓꉈꐮꍣꐨꃛꀄꊭꇁꌠꆹ，ꎆꏣꐛꉻꋊꄻꌠꀋꂿ꒧ꅉꑌꉬ，ꉈꑴꀻꎆꊋꂫꋊꃑꌠꊨꊭꑌꉬ。ꃹꅼꃅꊿꌊꈯꄜꃅꄉꌠꀊꏀꉹꌠꇓꈓꏦꎫꐛꈴꌠꄹꎆ，1ꂡꀑꂪꐥꌠꂿ꒧ꆹꏮꊻꂷꌋꆀꀉꁁꅉꀕꀀꋦꊻꂷꇓꈓꏦꎫꄉꑱꐴꒃꌠꃅꇫꑟ，ꊿ1ꂡꀋꇈꀀꌠꑲꁘꇣꁘꐛꅉꌋꆀꇓꈓꇬꋂꄺꀱꌠꃅꌐ，ꊿ1ꂡꀋꇈꄐꏁꌌꈯꄔꁮꐚꁆꏯꃅꄷꄉꈛꑌꅉꀀꋦꄉꇓꈓꏦꎫꐛꈴꎻ。ꅑꅸ2020ꈎꑟꇬꆏ，ꅉꀕꀀꋦꊻꂷꇓꈓꏦꎫꐛꈴꐨꆏ60％ꇬꑟ、ꑱꐴꊻꂷꇓꈓꏦꎫꐛꈴꐨꆏ45％ꇬꑟ。ꈲꒉ、ꂿꑘꏸꐕ、ꀋꃋꋋꄮꊪꏽꑘꑠꋉꃆꈨꃄꄻ，ꂿ꒧ꄉꈁꄉꄐꃅꀰꏢꌋꆀꃄꁕꈴꃅꄐꇺ、ꎕꏦꈴꒃꅐ、ꐧꋦꈴꁧꃤꃅꌠꄹꇙ。ꅑꅸ2020ꈎꑟꇬꆏ，ꋚꂷꑠꂿꑘꅐꇐꀋꉬꀋꉆꌠꇲꁵꌠꌋꆀꊇꁧꊈꂂꌠꌌꇿꋌꐥꃅꏦꀧꄉ，ꂿ꒧ꐛꏀꈴꑞꅉꄇꇖꀕꃅꉀꐕ，ꂿꑘꁡꇤꀊꏀꌠꋈꄻꌠꊌꐨꀊꏀꌠꊌꅜ。ꃄꁕꀻꎆꀑꐱꄐꇐꌌꅉꃀꃅꄉ，“ꄐꇐꀉꒉꌕꑵꌠ”ꌌꄐꏁꅍꃅꄉ，ꎿꋮꄇꒉꋮꈴꈜꋮꎆꏣꋥꁕꌌꀨꃅꄉꌠꀏꄩꏭꇂꃴꏯꎆꏣꀨꄿꁕꏓꐛ，ꁨꁻꈻꇙꊋꃤꀉꇨꌠꇓꈓꈨꌋꆀꉀꎆꊧꑠꈨꉘꉚ。ꊋꀥꇱꄉꅉꀨꉁꈾꀉꒉꀊꂾꌠꋈꄻ，ꐳꈴꎸꈜꈳꌬꆏꈉ3ꃪꉻꆏꈋꉐꑟ、ꇓꈓꀉꒉꌠ80％ꈋꉐꉱꑷ，ꐳꈴꄇꈜꍮꊪꈴꉆꌠꆏꈉꆏ3ꃪꉻꆏꀊꏀꃅꋈꄻꀱ，ꇓꈓꇓꉈꐳꏣꈄꏍꉱꑷꈴꌠꃅꇫꑟ。
——ꀊꃴꒃꅐꐥꐨꐤꄟꏓꐛꌠꄹꇙ，ꐳꃅꒆꉻꋦꈭꄺꀱꉾꃅꄉ。ꀻꎆꅉꇬꄉꀧꌋꃅ、ꀧꌋꃅꅉꇬꄉꀻꎆꌠꌭꈬꇬꎷ，ꐪꊛꄉꒆꉻꌧꑳꋈꄻꌠꄹꎆ。ꃹꅼꃅꃅꌗ、ꀆꐒ、ꊖꆊꍍꆀꄴꏮꃄꄻꎖꄎꌠꃅ，ꒆꉻꈥꈉꀧꌋꃅꑟꅪꁸꏤꄉ，ꁧꒉꌩꁍꑗꎾꃝꒆꉻꋉꃆꄹꎆ，ꊋꀥꇱꄉꒆꉻꀧꌋꃅꌋꆀꄺꀱꐛꅉꐛ。ꋌꊂꉬꈎꌠ，ꌗꂓꇩꈐꒃꅐꈁꉬꁌꐨꒉꌬꃷꁨ、ꄐꊋꃹꐨ、ꑍꀑꐊꌋꋊꃑꃷꁨꂱꑱꅉꇬꄉ23％、15％、18％ꀁꋌꊰ，ꌩꏪꉱꑷꐨꆏ23.04％ꇬꑟ，ꊋꀦꀖꁉꌬꈧꐨꀉꒉꃅꉀꐕ，ꒆꉻꋦꈭꊇꁧꀑꐱꃅꄺꀱꉾꇁ。ꈜꀕꇈꃅꌗꈑꉒꄺꂡꌠꄇꇖꀕꃅꀻꎆꆹ，ꄃꊐꌠꌋꆀꋍꈋꉐꇓꈓꃅꌗꊇꁧꉾꃪꃅꑍꃷꁨꍆꐨꆏ80％ꄩꐂꄉ。ꉪꊇꆏꑠꃅꃅꇬꎷꄉ，ꃅꈯꃴꇉꀕ、ꃄꅉꃴꇁꆧꈤꁏ、ꀆꐒꐙꎴꀕꌠꎔꃨꌠꍏꇩꋈꄻ。
——ꃹꅼꃅꄺꀱꁉꃑ，ꀻꎆꏦꉻꀊꏀꌠꋈꄻ。ꀻꎆꌠꆹꊇꅉꇬꄺꀱꁉꃑꌠꉘꇉ。ꀋꎪꃅꐊꑷꃅꃹꅼꃅꄺꀱ，ꅉꀨꎆꏣꄹꏦꌭꈬꇬꎷꌋꆀꄻꐛꒆ，ꀋꃋꋋꄮꁨꇐꌅꈌꄹꏦꋈꄻ，ꀋꃋꋋꄮꃷꎏꉻꑫꄻꐛꒆ，ꃷꎏꁳꅐꇐꇱꄻꅉꇬꏤꄻꐨꐥꌠꂿꄐꐥꎻꌋꆀꀊꅰꉾꃪꃅꍔꃚꂿꄐꋊꇤꎻ，ꐳꃅꎆꏣꀻꎆꅉꀕꐛꄟꀊꏀꈻꏁꌠꏦꉻꉺꏦꌋꆀꀻꎆꄟꏓꐛ。“ꋍꁕꋍꈜ”ꋈꄻꌠꁨꎆꐨꀉꒉꀊꂾꌠꊌꅜ，ꇩꏹꒃꅐꄐꊋꇷꃅꌠꂵꅐꐨꀊꏀꌠꃅꇫꑟ。ꉇꉻꏭꃼꇇꆏꉾꃪꃅꈏꃹꉾꃪꃅꉇꅐꌠꇬꉜꄉꏭꆦ，ꁧꃤꃅꃼꇇꍆꐨꄇꇖꀕꃅꉀꎆꆹ，ꃼꇇꇩꏤꀉꒉꌠꇬꄉꃼꇇꇩꏤꀉꇨꌠꇬꉜꄉꆹ。ꐊꑷꃅꈏꃹꎻꂾꇩꂱꊌꐨꌌꀋꃪꁁꏯꇱꌠꃷꁨꋏꄯꒉꏲꂠꄹꏦꃄꌬ，ꋍꁘꋍꁘꃅꎕꏦꀊꂥꌠꄿꐨꃼꇇꃅꅉꈄꏍꏓꄻ。ꀑꐱꃅꁉꃑꉹꌠꎆꏣꏦꉻꀊꏀꌠꐛꊂꏓꐛꎻ。
——ꐪꊛꄉꉹꁌꐥꐨꈲꁧꁦꎆꇱ，ꏓꂱꈁꐥꌠꁳꀻꎆꊌꐨꇬꈲꊌꎻ。ꏓꂱꌌꈯꄜꃅꄉꌠꀻꎆꉪꇐꑌꇬꎷ，ꊋꇤꄉꉹꁌꐥꐨꅉꀨꏦꀧꌠꀋꇎꀋꂪꅉꅋꑣꐯꊯ，ꐯꇯꌣꈚꌠꃅꍜꇬꉜꄉꄔꐽꃅꀒꁨꆹ。ꏟꈯꀕꃅꎭꇔꈢꇓꀖꌠꃅꊋꐛ，ꉪꇩꏤꀋꃋꌌꌬꌠꎕꏦꇂꃴꂿꑘꁡꇤꌢꎭꊻꂷꎭꇔꌠꃅꇫꑟ，ꌢꎭꑤꉬꇮꃅꌢꎭꀎꇓꇔꇧꎭꌐ，ꃄꁕꋍꁕꃅꌢꎭꌠꂥꀘꇧꎭ。ꇩꏤꅉꀨꄉꉻꁧꃤꃅꐘꃆꃷꁨꋏꄯꒉꄻꐛ。ꀊꅰꃅꀋꈐꀋꉈꀊꅰꃅꊛꎆꉆꌠꐧꋦꏦꀧꄹꏦꋈꄻꐛꒆ。ꋭꑘꂘꑘꌶꅉꎕꏦꈴ、ꇨꍏꊬꌠꂘꑘꁊꈴ、ꋧꃅꀨꏠꌠꒉꌶꅉꌋꆀꀨꏠꌠꌷꑫꋈꄻꑠꋉꃆꋈꄻ，ꑘꃅꈎꄜꊻꂷꐽꏡꃅꇬꉙꂘꊌꌠꃅꈎꄜꆏ10.23ꈎꇬꄉꉀꐕꌊ10.8ꈎꇬꑟ。ꇓꈓꏦꎫꀊꏀꃅꃅꅍꊌꌠꊿ5000ꃪꑼꈋꉐꁦꎆꌠꃅꇫꑟ。ꊌꐨꁷꄻꄹꏦꄻꃪ，ꊌꐨꐮꍣꐨꃛꀄꊭꇁ，ꊌꐨꐧꀠꌠꊻꂷꍆꐪꉀꐕ。ꀀꑳꏦꀧꉻꑫꄻꃪ，ꇓꈓꏦꎫꑲꁘꇣꆹꌠ2000ꃪꂷꄺꀱ。ꋬꂻꍏꇩꋈꄻꌠꄹꎆ，ꊾꂷꌠꂴꉘꇉꌠꐥꍂꈎꄜ1ꈓꉀꐕ。ꏣꀋꑌꃅꊻꂷꃀꌠꐛꈴꌠꏭꊝ。ꀋꃋꋋꄮꄉꉻꁱꀕꁧꃤꃅꉻꑫꄺꑣ，ꉻꊿꑌꇐꂘꑴ、ꍏꉸꁱꀕꊪꊛꑠꋉꃆꃄꄻ。ꉪꊇꆏꏓꂱꐥꇐꐥꐨꁳꀊꅰꃅꌣꈚꇁꎻꇈ，ꉈꑴꏓꂱꉌꊈꐥꐨꁳꑌꀊꅰꃅꀉꑌꎻꌠꉬ。
ꋒꃅ“ꊯꌕꉬ”ꊬꌠꎆꏣꐧꋦꀻꎆꌠꌤꃅ，ꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꃅꇫꑟꂿꄷꇬ，ꀋꎪꃅꊋꇤꄉꌕꏢꒃꇇꈐꊐꄉꌶ。ꋍꆏꏟꈯꀕꃅꀻꎆꂿꃆꀨꋋꏢꌠꄝꀋꏯꃅꒃꌫꄉ。ꀻꎆꌠꆏꇗꅉꀉꇨꌠꉬ，ꉪꇩꏤꌤꃆꈁꐥꌠꂥꀘꇬꀋꉬꀋꉆꌠꉬ。ꋌꊂꉬꈎꌠꆏ“ꊌꐨꐧꀠꌠꉙꐬ”ꇬꐂꌠꀋꂿꑘꊭꉬ，ꋍꑞꋍꑵꐮꄙꐨꌋꆀꐔꈔꉆꌠꄇꇖꀕꃅꁦꎆꇁ。ꀻꎆꌠꆹꒈꃚꉜꄉꇉꇳꌠꌡ，ꀒꁨꀋꆹꆏꉈꎞꌠꉬ。ꀋꎪꃅꀋꇙꀋꑐꃅꎆꏣꋈꄻꌠꌌꈯꄜꃅꄉꇬꎷ，ꈆꑪꃅꀻꎆꌠꄹꇙ，ꋭꋽꃅꃨꆰꋓꎭꌠꊝꄉ，ꍏꇩꎆꏣꇉꀉꒉꋋꇷꁳꒈꂃꄡꄉꀒꁨꆹꎻ。ꑍꆏꊋꀉꒉꃅꅐꄉꐛꉻꐨꐥꌠꄺꀱꌠꄹꎆ。ꀋꃋꋋꄮꀻꎆꅉꇬꏓꇱꃷꁨꌤꃆꌋꆀꐛꉻꐨꐥꌠꌤꃆꐯꇯꐥ，ꐛꉻꐨꐥꌠꌤꃆꀊꅰꃅꑓꅐꎑꇁ，ꄺꀱꌠꏡꁈꌌꐛꉻꋊꄻꌠꄹꎆꌶ。ꄉꄐꃅꏓꇱꈉꐨꍔꒉꈭꐨ，ꀉꇨꃅꇲꁵꁁꏯꐛꉻꐨꐥꌠꄺꀱꌠꒃꉇꋒ，ꊨꁈꃅꇈ，ꇱꁈꑌꃅ，ꂿꄐꀋꐥꌠꌋꆀꀁꂥꇲꁵꌠꊨꒊ，ꂿꄐꐥꌠꌋꆀꐧꀠꀊꂥꇲꁵꌠꍔꒉ，ꄉꉻꅐꇐꌋꆀꄉꉻꁧꃤꃅꇲꁵꌠꁦꎆꎻ，ꇲꁵꌋꆀꈉꄻꋯꐊꃅꎆꏣꀻꎆꌠꊥꎆꎻ，ꈁꉬꐊꊈꒃꅐꐨꉀꐕ，ꀋꆏꃅꐧꋦꒃꅐꊋꃤꁌꄝꌋꆀꀻꎆ。ꌕꆏꀊꏀꀉꆹꀻꎆꇙꊋꊪꊛꏭꆦꌠꐳꀥꇱ。ꎆꏣꀻꎆꌠꆏꇙꊋꏀꆹꌠꋍꋏꇈꋍꋏꃅꐮꆦꌠꈭꎁꐥꇁꎂꀕ，ꋊꃅꇙꊋꇨꌠꐈꀋꄿꌠꐛꄮꑟꇬꆏ，ꇙꊋꀊꏀꌠꄓꄉꋊꃅꇙꊋꌌꉹꏮꄉ，“ꋓꈺꇙꅍ”ꀊꏀꌠꐛꑲꆀ，ꎆꏣꄹꇙꌊꊛꄉꉀꎆ、ꐂꀊꏀꊐꇬꃹꆹꄎꌠ。ꀋꃋꋋꇅꇬꉪꇩꏤꀻꎆꌠꆹꑠꃅꐙꌠꀋꉬꀋꉆꊭꇬꃹꎍ，ꀋꎪꃅꇙꊋꀊꏀꌠꉗꄻꀉꒉꄉ，ꐳꃅꎆꏣꀊꏀꌠꀻꎆꌶ。ꇮꇐꀊꏀꌠ、ꅐꑘꀊꏀꌠ、ꃅꑘꀊꏀꌠꐳꃅꉀꒆꌠꄹꇙꄉ，ꏦꉻꉺꏦꏀꀺꌠꌌꎆꏣꀻꎆꌠꊥꎆꊌ，ꐯꇯꊌꌠꐽꈉꋈꄻ，ꇮꇐꀊꂥꌠꅐꑘ、ꀋꃋꋋꄮꁧꃤꃅꑘꑠꏀꄓꅐꑘꈨꃅꌊꀉꒉꄉ，ꇙꊋꇨꌠꈺꇙꅍꀊꏀꌠꄺꂡ。ꈴꌗꈄꏍꑠꀋꃋꋋꄮꇮꇐꌬꄉ，ꒃꅐ、ꏲꂠꌋꆀꀰꏢꈁꏦꆴꄻꌠꄹꇙ，ꅐꑘꊛꏣ、ꇲꁵꊛꏣ、ꁌꐨꊛꏣꎵꄻꀱ，ꋊꃅꇙꊋꄺꀱꊐꐕꄉ，ꋌꁳꌄꆣꊋꃤꀊꏀꌠꐥꇁꎻ。
ꊇꅉꇬꄉꉉꇬꆏ，ꀻꎆꊋꃤꈤꀋꉆꌠꆹꏓꂱꉹꁌꈬꇬꑌꎍ。ꑘꃅꊋꃤ9ꂡꎖ、ꌶꅉꀊꂥꊐꌠꌷꋺꌠꌋꆀꌐꑘꇮꇐꐥꌧꊿ1ꂡꎖꌠꆹ，ꉪꊇꃤꌬꇐꇁꀦꌋꆀꂱꎆꅑꐨꀉꒉꐯꀉꒉꌠꉬ。ꇙꊋꏀꆹꌠꏭꆦꌠꃅꇫꑟ，ꀻꎆꌠꄹꇙꌊꏮꀊꅰꀉꑌꃅꊾꊋꌧꊿꌬꇐꇁꀦꌋꆀꏀꀺꌠꉘꇉꌠꆹ，ꋍꄲꋍꄲꃅꆅꌠꇫꐊꌠꋊꄻꈴꎁꏢꑌꉬ，ꉘꇉꅍꐥꌠꊐꐕꈴꎁꏢꑌꉬ。ꈛꈌꋌꈚꈳꅐꄷꆏ，ꍏꇩꎆꏣꆏꃆꄔꈬꇬꄉꄓꇁ、ꉈꑴꏁꇅꁤꇅꄑꌠꀹꄻꅐꇁꄎꌠꉬ。
ꏮꋌꊂꉬꈎꉜꇬ，ꉪꊇꊊꎂꀕꌠꉌꊋꇎꃅꑌ。ꏤꄮꈐꃅꐊꑷꃅꊼꇅꌣꈚꌠꐧꋦꋈꄻꐛꌠꑞꅉꁻꌐꃅꇫꑟ，ꏓꂱꐥꐨꆹꀊꅰꃅꉾꃪꇁꄎ，ꍏꇩꐛꐨꐧꋦꉪꏦꌤꑘꊫꂫꀋꎪꃅꀊꅰꃅꁤꇅꀕꇁꄎꌠꉬ！
ꌕ、2016ꈓꌤꃅꀋꂿꑘꌠ
ꎼꈎꆹꐊꑷꃅꊼꇅꌣꈚꌠꐧꋦꄻꐛꌠꂫꋓꊬꌠꃄꇬꄹꈎꉬ，ꉈꑴꐛꉻꐨꐥꌠꄺꀱꄹꎆꌠꈢꇓꀖꈓꑌꉬ。ꍔꃚꌤꃅꋒꇬꆹ，ꀋꎪꃅꍏꇩꐛꐨꐧꋦꉪꏦꁈꁧꇰꀋꃀꌠꌌꀊꂥꃅꐕꄉ，ꐊꑷꃅꄈꅿꃀꀉꒉꊰꉆꃢꌠꌋꆀꊰꉆꈭꌕꃢꌠ、ꇖꃢꌠ、ꉬꃢꌠꐊꈴꃀꈿꉌꊈꃄꌬꈴ，ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌌꄐꌐꅍꃅꄉ，ꃹꅼꃅꑮꏣꀻꊝꎻꏹꉉꅇꀋꂿꑘꈧꌠꉌꊈꃄꌬꈴ，“ꉬꑵꋍꉻ”ꀑꐱꄐꉻꌋꆀ“ꇖꑵꐊꑷ”ꌠꄐꇐꄐꉻꇬꈴꄉ，ꄺꀱꁉꃑꌠꌭꈬꇬꎷ，ꀻꎆꉪꉻꀊꏀꌠꌌꀻꎆꏃꂠꌠꌭꈬꇬꎷ，ꎍꐽꇬꄉꀻꎆꌠꎹꌠꌤꃅꅉꀨꉜꐨꌭꈬꇬꎷ，ꎆꏣꀻꎆꎃꐚꐛꄟꀊꏀꌠꇬꄉꄐ，ꉻꒉꏱꁈꆏꎍꐽꌶ、ꅐꑘꏱꁈꆏꀋꎪꌶ、ꉻꐭꏱꁈꆏꌬꌒꌶ、ꄺꀱꏱꁈꆏꃶꐚꌶ、ꐧꋦꏱꁈꆏꉹꁌꊫꁱꌶꌠꀑꐱꉪꈜꃄꄻ，ꎍꐽꃅꁦꎆꌋꆀꐛꉻꋊꐽꌠꐮꆽꏣꌠꒃꌫꋒ，ꎆꏣꇙꈧꌠꏦꀧꌊꇗꊒꈍꈐꇬꄉꇬꎷ，ꊋꇤꄉꇲꁵꁁꏯꐛꉻꐨꐥꃅꄺꀱꌠꊋꀥꇱ，ꐳꃅꀻꎆꇙꊋꀊꏀꌠꉗꄻ，ꋊꃅꐯꌟꉜꂱꎆꅑꐨꄺꀱꉀꐕ，ꅐꊋꇤꇧꎭ、ꊐꄉꌠꇤꇧꎭ、ꋎꐽꅍꇤꇧꎭ、ꀨꊰꊨꒊ、ꀋꇎꀋꂪꅉꅋꑣꌠꒃꉇꋒ，ꊋꀥꇱꄉꉹꁌꐥꐨꏦꀧ，ꃶꐚꃅꃨꆰꐨꄴꏮꋏꌫ，ꊋꇤꄉ“ꊯꌕꉬ”ꊬꌠꎆꏣꐧꋦꀻꎆꉾꃅꃅꅷꁧꎻ。
ꎼꈎꀻꎆꌠꂴꄐꄉꌠꑞꅉꁻꌐꀋꉬꀋꉆꌠꆏ：ꇩꈐꒃꅐꈁꉬꁌꐨ6.5％—7％ꉀꎆ，ꀀꊿꌬꈧꁌꏤꄓꐨ3％ꀑꂪꑟ，ꇓꈓꏦꎫꃅꅍꊌꊿꀊꏀꃅ1000ꃪꑼꈋꉐꁦꎆ，ꇓꈓꏦꎫꁱꄀꄉꌠꃅꅍꀋꊌꌠ4.5％ꈐꃅꄉ，ꈏꃹꉇꅐꌠꎍꐽꃪꇁ，ꇩꏹꊌꌠꌬꌠꀑꐱꃅꐮꆽꏣ，ꇓꈓꀀꊿꊌꐨꉀꎆꌠꌋꆀꎆꏣꉀꎆꌠꀑꐱꃅꐮꐊ。ꌗꂓꇩꈐꒃꅐꈁꊌꁌꐨꊋꀦꃸꅐꐨꀁꋌꊰꅷ3.4％ꈋꉐꑟ，ꍍꆀꅍꀋꉬꀋꉆꌠꋊꃑꌠꐪꊛꄉꊨꀁꑌ。
ꎆꏣꉀꎆꂴꄐꄉꌠꑞꅉꁻꌐ6.5％—7％ꌠꆏ，ꐊꑷꃅꊼꇅꌣꈚꌠꐧꋦꄻꐛꌠꑞꅉꁻꌐꌋꆀꐯꊛꌠꉪꇫꑟꀐ，ꐛꉻꐨꐥꃅꄺꀱꌠꄹꎆꈉꐨꉪꇫꑟꀐ，ꃷꎏꂴꄐꐨꎍꐽꌋꆀꄐꇺꌠꇬꈲꏣꑌꐥ。ꎍꐽꃅꉀꎆꀋꉬꀋꉆꌠꆹꃅꅍꊌꌠꏦꀧ、ꉹꁌꐥꐨꈲꏣꁵ，6.5％—7％ꉬꌠꉀꎆꐳꐨꐥꑲꆏꊼꇅꇎꈴꃅꃅꅍꊌꌠꃅꇫꑟꄎ。
ꏓꇱꄉ꒔ꑞ꒔ꁁꏯꐛꐪꎥꃪꇬ，ꎼꈎꉪꇩꏤꂾꎍꇁꌠꊋꋠꐨꆹꀊꅰꃅꀉꑌꀊꅰꃅꀉꒉ、ꋓꎭꐨꀊꅰꃅꀉꇨ，ꉪꊇꆹꇎꈴꃅꇨꃅꉈꈽꌠꄐꏤꄉꌶ。ꋧꃅꇬꈴꄉꉜꇬ，ꇩꏹꎆꏣꃹꅼꃅꋊꄻ、ꀱꄓꇁꌠꊋꃤꀋꐥ，ꋧꃅꃼꇇꉀꎆꐨꀁꂥ，ꎆꒉꎆꇁꌋꆀꃷꇐꀉꒉꈧꌠꃷꎏꇙꈧꑘꒃꀋꉆ，ꃅꋮꍔꍞꃨꆰꐨꉀꎆ，ꉇꉻꋦꈭꑘꀋꒃꊨꀋꄅꌠꐊꊈꁦꎆꄉ，ꉪꇩꏤꀻꎆꌠꏭꁧꏖꐨꀄꊭꃅꀋꐥ。ꇩꈐꈴꄉꉜꇬ，ꀊꉗꃅꏓꊭꄉꌠꐮꄙꐨꌋꆀꃨꆰꐨꀒꁨꋍꁘꃅꅔꅐꇁ，ꎆꏣꉀꎆꐳꐨꄺꀱ、ꐛꉻꋊꄻꊋꋠꐨꅐꇁ、ꇙꊋꏀꆹꐮꆦꐯꏍꎍ，ꎆꏣꀁꋌꊰꌠꍅꊋꀉꒉꇁ。ꄚꊋꋠꐨꌋꆀꋓꎭꌠꆹꇫꏦꅍꀋꐥ。ꍏꇩꃤꀻꎆꌠꆹꊇꅉꇯꆐꋓꎭꌠꏭꊝꌠꇬꄉꀒꁨꉜꄉꆹꇬꎷꌠꉬ，ꊋꋠꐨꇔꑣꇧꎭꀋꉆꅍꀋꐥ。ꀉꑌꈎꐳꃅꀻꎆꈭꐨ，ꉪꇩꏤꐥꇐꅉꃀꀉꇨ，ꎆꏣꍕꎇꐨꇨ、ꊋꂫꇎꈴ、ꀰꏮꉆꐨꀉꒉ，ꄺꀱꁉꃑꌠꇬꀋꆏꃅꇙꊋꀊꏀꌠꄻꄚꇱ，ꉻꒉꋊꄻꌠꎖꋪꀉꑌꃅꏓꊭꄉꀐ。ꈜꀕꇈꉪꊇꆹꍏꇩꇭꍣꄈꏟꈯꃅꏃꂠꌠꌋꆀꍏꇩꐛꐨꐧꋦꉪꏦꄹꏦꐥ，ꍏꇩꏓꂱꑘꋦꃣꑣꀑꁮꅺꐳ。ꉪꊇꈀꄸꑌꉌꋍꂷꃅ，ꐯꇯꊋꋠꐨꄘꑣꑲꆏ，ꉪꊇꆏꀋꎪꃅꎼꈎꎆꏣꐧꋦꀻꎆꑞꅉꁻꌐꃅꇫꑟꄎꌠꉬ。
ꎼꈎꀋꉬꀋꉆꌠꆏꉆꁁꏯꌤꃅꌊꉾꌶ。
（ꋍ）ꉻꒉꎆꏣꏱꁈꎍꐽꌋꆀꄻꐛꒆ，ꎆꏣꇙꈧꌠꏦꀧꇗꊒꈍꈐꅞꄉ。ꉪꊇꉻꒉꋊꄻꌠꆹꉈꑴꏀꀺꇇꁈꌋꆀꏱꁈꊭꊎꄉꑴꌦ，ꀋꃋꋋꇅꇬꈴꄉ、ꄐꊒꐨꐥꃅꇇꋏ，ꎆꏣꀁꋌꊰꌠꍅꊋꄙꄉ，ꉈꑴꈜꎴꅉꇬꉜꄉ、ꊁꊝꊜꁈꊏꄉ、ꁈꏂꁈꊭꄉ。ꐪꊛꄉꏣꀋꑌꌠꏱꎆꏱꁈꌋꆀꎍꐽꌠꎆꃀꏱꁈꃄꌬ，ꉻꒉꋊꄻꃄꄟꏀꀺ，ꊋꀥꇱꄉꈍꈐꋊꄻ、ꍜꏤꋊꄻ、ꊜꋽꄮꈴꄉꋊꄻ，ꋍꃱꃅꄐꏤꄉꏱꎆ、ꎆꃀꏱꁈꌋꆀꅐꑘ、ꎆꇱ、ꁌꏤꑠꏱꁈꌬꅍꌫꄻꄉ，ꐛꉻꐨꄺꀱꈜꀕꇈꇲꁵꁁꏯꐛꉻꐨꄺꀱꌠꏡꁈꌬꄉ，ꎆꏣꀻꎆꌠꎁꃅꋦꈭꉾꃪꌠꁦꄻ。
ꏣꀋꑌꌠꏱꎆꏱꁈꆹꊋꀉꒉꃅꀥꇱꌶ。ꎼꈎꏱꎆꌬꁏꇔꌠ2.18ꃪꂡꂷꁆꄻꏭꄐꄉ，ꀋꉊꄻꈎꄩ5600ꂡꂷꁦꎆ，ꌬꁏꇔꐨꉀꎆꌊ3％ꇬꑟ。ꄚꈐꏭ，ꍏꑷꏱꎆꌬꁏꇔꌠ1.4ꃪꂡꂷ，ꃅꄷꏱꎆꌬꁏꇔꌠ7800ꂡꂷ。ꃅꄷꌐꐘꎝꃆꊫꌐ4000ꂡꂷꁆꄻꄉ，ꐪꊛꄉꃅꄷꍔꃚꆥꀠꎝꃆꊫꌐꃑꌬ。ꉪꇩꏤꏱꎆꌬꁏꇔꐨꌋꆀꍔꃚꎝꃆꐨꆹꋧꃅꎆꏣꄜꀋꉬꀋꉆꌠꇬꊼꇅꀁꂥꃅꐙ，ꑠꃅꁆꄻꌠꆹꄻꅐꌠꉬ、ꌬꉆꌠꉬ，ꉈꑴꉰꀋꐥꌠꑌꉬ。
ꊼꇅꄉꄐꃅꏱꎆꌫꁏꇔꌠꍔꒉ，ꀋꉬꀋꉆꌠꆏꌌꇗꏸꊨꌬꁌꒊꌠꇬꌬ，ꀒꁨꋍꁘꃅꎆꏂ꒧ꀵꃤꊨꒊ。ꎼꈎꆏꏁꁈꌕꐘꏁꌬꂿꄷ。ꋍꆏꐊꑷꃅꃼꇇꇗꏸꄺꀱꌊꁌꎆꇗꏸꃅꌠꃅ，5ꆪ1ꑍꄑ，ꃅꉚꅉꑭꊂꍔꐯꌊꋈꄻꑘ、ꑳꇤꁨꇐꅐꑘ、ꎆꒉꎆꇁꑘ、ꐥꐨꁧꃤꃅꑘꇬꑟ，ꄷꀋꁧꎆꏂꑘꀊꏀꃅꁦꎆꌠꀋꇙꄉꎆꇬꐊꌠꁌꎆꇗꏸꈁꐥꃅꌌꄂꈎꌠꈍꈐꇬꇱꄉ，ꉹꑘꈁꐥꌠꇗꏸꀵꃤꊨꀉꄂꊨꁧꀋꎆꌠꏦꀧꄉ。ꑍꆏꏦꀋꈴꃅꀞꄻꄉꌠꍔꃚꐨꎆꀨꀜꋊꇧꎭ，ꍔꃚꐨꎆꀨꑠꈨꀋꎴꆘꅝꌋꆀꏓꄻꐯꇯ，ꈲꒉꋈꄻꎆꀨꑠꀋꎴꈍꈐꍔꒉ。ꌕꆏꏲꑘꌤꑘꐨꁌꎴꌠ18ꐘꀋꎴꈍꈐꆏ，ꀄꊭꐭꎆꏂ꒧ꇬꄉꍔꐯꅷꎆꏂ꒧ꌋꆀꊿꊨꏦꈁꐥꌠꇬꑟ。ꄚꉎꉉꌠꏱꁈꌬꌠꆹ，ꎼꈎꆏꄺꀱꂾꏭꀋꋌꃅꎆꏂ꒧ꌋꆀꊿꊨꏦꀵꃤ5000ꎖꂡꂷꀑꂪꊨꒊ。ꋍꈭꐨ，ꄉꄐꃅꄻꅐꌠꏱꎆꌫꎆꌋꆀꍔꃚꎆꇱꌠꁦꎆꇱ，ꊋꀥꇱꄉꉹꁌꐥꐨꑠꊋꁧꈭꊭꏭꊋꁈꄏ。ꏱꎆꌬꅐꃄꄟꏀꀺ，ꏱꎆꌬꅐꐛꉻꄻꉾꃪꈴ，ꏦꀧꄡꑟꌠꆏꀋꎪꃅꏦꀧꄉ，ꊨꄡꑟꌠꆏꀋꎪꃅꊨꀁꋌꎭ。
ꐳꃅꏱꎆꇗꏸꏦꉻꄺꀱ。ꍏꑷꌋꆀꃅꄷꌤꃆꌅꈌꌋꆀꌬꐨꃅꎁꁷꄻꄺꀱꌠꄹꎆ，ꇗꊒꃅꁌꎆꇗꏸꍏꑷꌋꆀꃅꄷꁷꌬꍆꁧꏤꐛ。ꌌꃅꄷꊌꐨꃅꄉꄐꌠꇗꏸꑫꉹꆏꁸꀁꋌꃅꄷꁵ，ꇗꏸꏲꃆꏲꂠꌅꈌꑞꅉꁆꏯꌅꈌꊼꇅꄉꄐꃅꄝꃅꄷꁵ。ꀒꁨꋍꁘꃅꍏꑷꌐꐘꆹꏮꁵꄻꄉꈁꍅꊨ，ꎼꈎꎃꐚꃅꐙꌠꆹꏮꁵꄻꄉꈁ12.2％ꉀꎆ。ꐊꑷꃅꅐꀦꇗꏸꁌꏤꈴꄉꌗꎴꄺꀱꌠꄹꌬ。ꏦꃤꇬꈴꇗꏸꎳꏲ。ꍬꏦꈴꌠꃅꄷꍔꃚꎝꉛꎆꊙꎆꏓꉺꏦꄻꐛ，ꏱꎆꃶꐚꊋꃤꀉꇨ、ꎝꃆꃨꆰꐨꊼꇅꀁꂥꌠꆏ，ꏦꏤꈭꎁꇬꈴꄉꄐꃅꎝꃆꏢꑲꃷꁨꁦꎆ。ꍔꃚꋍꊐꋑꀋꋒꌠꆹꏟꈯꃅꏎꏸꃅꐥꄡꑟ，ꎆꃀꋍꈨꋑꀋꋒꌌꊨꄅꃅꌬ、ꃶꐚꃅꌫꅉꇬꌬ。
ꎍꐽꌠꎆꃀꏱꁈꆹꄉꄐꃅꋌꉚꄉꋋꃅ。ꎼꈎꐊꐯꎆꃀM2ꂴꉘꇉꄉꌠ13％ꀑꂪꉀꎆ，ꐧꋦꎆꊙꄉꈁꋒꃷꁨ13％ꀑꂪꉀꎆ。ꃷꎏꃄꌬ、ꇔꊰꍆꁧ、ꊭꄎꎆꍆꁧ、ꉈꑴꎆꉛꑠꄇꄜꋊꌠꋍꑞꋍꑵꎆꃀꏱꁈꌬꅍꋍꃱꃅꄐꏤꄉꌬ，ꇙꈧꐨꇗꊒꇎꋒꇬꎷ，ꊪꈴꉺꏦꎵꃪ，ꐧꋦꎆꊙꎆꀨꀁꋌꒊ，ꊋꀥꇱꄉꐥꄜꎆꏣꏭꈜꀕꇈꀄꊭꐭꉹꌠꎆꏂꑘ、“ꌕꂿꑘ”ꑠꊋꁈꄏ。
ꃹꅼꃅꎆꒉꎆꇁꏦꉻꄺꀱ。ꐳꃅꐛꏀꎆꒉꎆꇁꍞꏲꏦꉻꄺꀱꐛꒆ，ꎆꒉꎆꇁꁧꃤꃅꐥꄜꎆꏣꅐꐨꉀꐕ，ꎆꒉꎆꇁꃨꆰꐨꍞꏲꉱꑷꈴꌠꃅꇫꑟ。ꃹꅼꃅꇔꊰꍆꁧꃷꎏꈴꐨꄺꀱ。ꐪꊛꄉꏓꂱꀙꎆꃀꉇꎆꀟꄻꁌꐨꃷꎏꈴꐨꉺꏦꐛꌠꄻꐛꒆ，ꏦꀋꊰꃅꏓꂱꀙꎆꃀꉇꎆꀟꄻꁌꐨꋭꋽꐮꆽꏣꌠꑞꅉꀑꐱꃅꎍꐽꎻ。ꃹꅼꃅꇩꁨꃼꇇꑘꑴꉴꌋꆀꁉꃑꐨ、ꏱꁈꐨꎆꒉꎆꇁꏲꉻꄺꀱ，ꉹꁌꀰꏢꑴꉴꀻꎆ，ꇱꎆꉚꎆꐊꃅꃅꉚꅉꀹꄻ。ꇴꍆ、ꎝꃆꊫꌐꃷꎏꄺꀱꌋꆀꏦꏲꈴꋈꄻꌠꄹꇙ，ꏠꊐꀉꑌꎆꀨꃷꎏꉾꃪꃅꀻꎆꌠꊥꎆ，ꈛꎂꃅꎆꊙꎆꏓꌠꍆꁧꉀꐕ。ꄉꄐꃅ“ꎸꇤꈴ”ꀹꄻꄉꃅ。ꀋꇰꀋꇊꃅꉮꌸꌠꄜꏂꀧꄹꏦꄻꐛ。ꐮꈴꈄꏍꎆꒉꎆꇁꀻꎆꌠꋊꍬ。ꊋꇤꄉꈲꁧ꒞ꈴꎆꒉꎆꇁꌋꆀꀊꃴꎆꒉꎆꇁꀻꎆ。ꊋꀥꇱꄉꈁꉬꉉꈌꉇꎝꉻꒉꑭꋧꃅꏱꄻ。ꏟꈯꃅꄹꏦꈄꁨꋏꄉ，ꎆꒉꎆꇁꐥꀹꏱꄻꋊꍬ，ꅱꈯꃅꎆꒉꎆꇁꀸꊏ、ꏦꃤꀋꈴꃅꎆꏓꌠꌋꆀꎆꃀꊫꌐꄡꃷꎊꈬꁁꏯꏦꐆꑽꃤꐆꌠꏭꇇꇩꍈ，ꉻꑫꐨꃄꁕꐨꃨꆰꄡꅐꌠꅏꈌꏟꈯꃅꋍꄉ。
（ꑍ）ꊋꀥꇱꄉꇲꁵꁁꏯꐛꉻꐨꄺꀱ，ꐪꊛꉀꎆꇙꊋꀕꇨꇱ。ꌌꀨꄉꁁꏯꐮꄙꐨꌋꆀꌤꃆꑓꅐꎑꌠꂥꀘꌠꇬꆼꒆꄉ，ꐳꃅꏦꉻꉺꏦꈭꋍꈜꇈꅍꀜꋊ，ꇲꁵꁁꏯꐛꉻꐨꄺꀱꇲꁵꉻꑫꊇꁧꌋꆀꊌꐨꉀꐕꄉ，ꀒꁨꋍꁘꃅꃷꎏꍄꑐꊋꃤꌋꆀꐧꋦꁦꄻꊋꃤꄖꄑ。
ꏲꑘꅧꌃꌅꈌꄝꃑ、ꄝꏲꏓꇱ、ꁧꃤꃅꄻꉾꃪꈴꄺꀱꌠꀊꅼꅉꏭꉜꄉꀻꎆꌠꄹꇙ。ꉹꁌꉜꒉꌠꉪꐨ，ꏲꑘꅧꌃꈝꂾꍬꄉ，ꃶꐚꃅꍔꃚꂿꄐꏭꆦ、ꊌꐨꄐꊋꉀꐕ。ꐪꊛꄉꀉꇨꃅꏲꑘꍤꄻꈌꁧꌤꐘꊨꒊ，ꌅꈌꄝꃑꋍꋓꃅꀋꐛ、ꋮꄮꃅꀋꐛ、ꃅꑞꅉꀋꑟꌠꌤꃆꂥꀘꌠꉜꁨ，ꃑꄻꀏꁵꍤꄻꈌꁧꌤꐘꆏ，ꃅꄷꁳꊪꄉꄎ、ꏲꌊꉾꄎꎻ。ꃹꅼꃅꃼꇇꌤꑘꄹꏦꄺꀱ，ꊪꄳꊫꌐꁷꐞꃅꉚꌠꃅ。ꐊꑷꃅꃅꄷꍔꃚꌅꈌꌋꆀꆽꎍꐨꃷꁨꋏꄯꒉꌌꄜꀦ，ꃅꄷꄹꁆꇬꄉꃷꎏꃹꉆꀋꃪꁁꏯꃷꁨꋏꄯꒉꄹꏦꃄꌬꉚ。ꏲꑘꌤꑘꐨꁌꎴ、ꍔꃚꁌꏤꀕꄻꅀꁌꏤꄐꌐꀰꏢꁧꃤꃅꐨꁌꎴ、ꍔꃚꐨꎆꀨ、ꇩꏤꃅꑘꇎꏦꆏ，ꎹꀨꃷꁨꋏꄯꒉꏲꂠꌠꃄꌬ。ꐳꃅꋍꃱꃅꁉꃑ、ꋓꅔꐥꀹꐥꌠꃷꎏꉻꑫꋈꄻ，ꃅꄷꀧꌋꃅꌠꐅꄻ。ꃹꅼꃅꁌꏤꄺꀱ，ꊋꀥꇱꄉꁌꏤꍞꏲ。ꀻꎆꇬꈭꋍꈜꇈꌠꏲꑘꏦꇗꌋꆀꏦꐛꈴꌠꁱꐘꄺꀱꌋꆀꀜꋊꇧꎭ。ꌤꃅꄮꇬꌤꃅꈭꐨꍞꏲꃄꄟꏀꀺ，ꐊꑷꃅ“ꑍꑵꈁꏾꃅꈻ、ꋍꑵꄇꄜꋊ”ꇬꍞꏲꌠꄹꌬ，ꈁꏾꃅꄉꍤꄻꊜꀠꈻꅐ，ꈁꏾꃅꄉꏦꌬꍤꄻꊿꌋꁆ，ꇇꈤꃅꍤꀞꄽꂫꐛꐪꄜꉺ。ꏓꇱꏲꑘꏦꌬꄺꀱꌠꄹꎆ，ꎆꏂ꒧ꏤꁨꈴꌗꋍꃱꃅꏓꇱ、ꏦꈴꄉꄛꇰ、ꉻꏑꄉꀞꅓ、ꐧꋦꍞꊟꌠꃄꌬ。ꊋꇤꄉ“ꐮꈴꈄꏍ+ꏲꃆꁧꃤꃅ”ꌠꄹꌬ，ꌤꃅꅉꇢꊭꃷꁨꇷꌬꌠꃅꇫꑟ，ꀀꊿꌋꆀꎆꏂ꒧ꁳꀁꑌꃅꀥ、ꌤꀞꌒ、ꌞꉌꂵꌉꃅꀋꐛꎻ。ꏦꆀꏦꄹꑋꇨꋧꇨꌠꊨꄻ，ꃅꐨꏦꃤꀋꊒꌠꍞꊟꍤꄻꄉ，ꏓꂱꉹꁌꁳꀊꅰꐽꏡꃅꊜꋽꌠꌋꆀꀊꅰꀉꒉꌠꁦꄻꈥꈉꊌꎻ。
ꋒꐯꋒꃅꐧꋦꑭꊂꑘꀺꏀꀺꊋꂫꄝꃑ。ꊋꇤꄉꀻꎆꏀꀺꆷꇙꌠꄐꇐꃄꌬ，ꈆꑪꇮꇐꌋꆀꎆꏣꃹꅼꃅꌼꉔꌠꊥꎆ，ꐥꄜꎆꏣꉻꄜꊇꁧꌋꆀꋓꅔꊋꃤꉀꐕ。ꋍꆏꎆꏂ꒧ꏀꀺꀨꄜꑌꈉꉆꈉꊋꀥꇱ。ꎆꏂ꒧ꎥꃪꀖꁉꌬꁌꏓꌗꈎꊨꌠꌋꆀꐳꀥꇱꄉꆹꋊꌠꏱꁈꃅꇫꑟ，ꀊꂥꀊꏀꇮꇐꎆꏂ꒧、ꈆꑪꇮꇐꎆꏂ꒧ꃹꀿꅍꑠꇗꏸꎴꈲꁵꏱꁈꄻꐛꒆ。ꉹꑘꂴꅑꎆꏂ꒧ꑞꅉꀊꂥꎥꃪꀖꁉꏲꉻꋈꄻꌠꊋꁈꄏ。ꐳꃅꇩꏤꑴꌅꏀꀺꌡꀠꅉꃅꉚꏱꁈꄹꁊꌊꇩꏤꑭꊂꑟ，ꉈꑴꇩꏤꑴꌅꏀꀺꌡꀠꅉ、ꀊꂥꀊꏀꃅꄷꑠꈨꋈꄻ。ꑍꆏꋍꏅꑘꀺ、ꋍꉻꏀꀺꌋꆀ“ꐮꈴꈄꏍ+”ꋍꏅꀑꁮꐨꏓꊭꋍꏅꊋꃤꏓꇱꌠꃷꁨꁧꇱꊌꐨꋊꇤ。ꋍꏅꁦꄻ、ꋍꏅꀧꃅ、ꋍꏅꄏꐓ、ꋍꏅꏓꊭꐽꈉꋈꄻ，ꒉꐧꐭꎆꏂ꒧、ꒉꌶꅉ、ꈆꑪꎥꃪꏲꉻ、ꁦꄻꊿꀉꑌꁁꏯꋮꐊꌠꀊꏀꉹꌠꑘꀺꏀꀺꉺꏦꏓꄻ。“ꑍꑵꁦꄻ”ꌡꀠꅉꁍꑠꈨꋈꄻ，ꑘꀺꏀꀺꁧꃤꃅꑘꉘꉚ，ꄟꏂ、ꑘꀺ、ꅐꑘꑠꎆꇱꌠꋊꍬꀻꎆ。ꁸꌬꎆꏣꀻꎆꌠꊋꁈꄏ，ꌬꀦꌬꈧꊌꐨꉀꐕ，ꊿꀊꅰꀉꑌꃅꇫꐊꈽꃅꄉ、ꌣꈚꎼꇁꎻ。ꀊꅰꃅꏣꀋꑌ、ꀊꅰꃅꁉꃑ、ꀊꅰꃅꊌꐨꐥꌠꌧꊿꈻꃹꏱꁈꃄꌬ。ꊋꀥꇱꄉꌧꇐꅏꄻꌅꈌꀧꌋꃅꌋꆀꌬꈧ，ꏦꈴꄉꏟꈯꃅꌧꇐꅏꄻꌅꈌꉄꌎꌋꆀꈱꄻꈱꃷꃅꐨꑠꇇꇩꍈ。ꌕꆏꃹꅼꃅꈆꑪꇮꇐꏲꂠꏦꉻꄺꀱ。ꒉꌶꅉꌋꆀꈆꑪꎥꃪꑼꌙꑴꌅꀕꈌꍔꒉ，ꈆꑪꎥꃪꏲꂠꇬꇗꏦꀉꑌꇨꌠꋊꐆꇧꎭ。ꈆꑪꇮꇐꊌꐨꏭꆦꏱꁈꏁꁈꃄꌬꌠꊋꁈꄏ，ꇴꍆꌅꈌꄡꃷꎊꈬꌅꈌꇗꏸꎴꈲꁵꏱꁈꌋꆀꍍꊱꁸꈁꁠꁵꏡꁈꄻꐛꒆ，ꈆꑪꎥꃪꊿꑘꀺꏀꀺꌠꊋꊡ。ꊋꇤꄉꁱꀕꏀꀺꌠꍔꆙ，ꏀꀺꅉꀉꑌꃅꄺꑣꄉ，ꌞꂴꅑꄉꃅꀬ、ꊋꀋꐛꌠꅑꄡꀵꌠꐛꐪꉾꃪꌠꁦꄻ，ꋒꐯꋒꃅꎆꏂ꒧ꌧꃀꉌꊈꌾꃑ，ꐧꋦꑭꊂꑘꀺꏀꀺꏣꀋꑌꐨꄖꄑꄉ，ꏓꌊꀻꎆꄹꇙꌠꊋꃤꀉꒉꐯꀉꒉꌠꐛ。
ꊋꇤꄉꒃꅐꄐꊋꁦꎆꇨꌠꋊꑣꌋꆀꀨꊰꊨꒊꊌꐨꉀꎆꌠꃅ。ꀋꉬꀋꉆꌠꆏꇤꎸꅍ、ꊖꌋꑠꊋꋠꉹꑘꒃꅐꄐꊋꇤꇧꎭꌠꒃꉇꋒꃅꄉ。ꃷꎏꎒꐡ、ꎆꏂ꒧ꀨꄜ、ꃅꄷꊥꇬ、ꍏꑷꊋꁈꄏꌠꌭꈬꇬꎷ，ꎆꏣ、ꏦꃤ、ꇮꇐ、ꋦꈭꀧꌋꃅ、ꊇꁧ、ꋬꂻꇇꁈꑠꌬꈧꄉ，ꏟꈯꃅꒃꅐꄐꊋꀊꏀꃅꁦꎆꇁꌠꋎꍅ，ꀋꎪꃅꒃꅐꄐꊋꊁꊰꌠꀜꋊꇧꎭ，ꊱꁨꃅꒃꅐꄐꊋꁦꎆꇨꌠꎞꅐꁧꎻ。ꐅꄻꏓꀱ、ꎝꃆꏓꄻꀱꅀꑱꐢꌗꏢꉱꋃꃅꏁꁈꑠꌬꄉ，ꏣꀋꑌꎍꐽꃅ“ꎆꏂ꒧ꇙꑐꀋꄐꌠ”ꀞꄻ。ꏱꎆ、ꎆꒉꎆꇁꑠꊋꁈꄏꏱꁈꄻꐛꒆ，ꍏꑷꏱꎆꌐꐘꈁꁠꁵꁥꁵꎆꀨ1000ꂡꂷꄐꄻꄉ，ꀋꉬꀋꉆꌠꆏꌌꌤꃅꊿꁸꈴꃅꑘꁵꅉꇬꌬ。ꏓꇱꏁꁈꏁꌬꄉ，ꎆꏂ꒧ꇇꀨꄉꃼꇇ、ꎊꈬꎞꎭ、ꎆꃆ、ꄐꊋꌬꑠꀨꊰꊨꒊ，ꀋꎪꃅꎆꏂ꒧ꃆꂮꐥꌠꃄꈌꄐꃅꁌꎴꌠꏢꇋ，ꏦꐆꃅꐨꏭꏦꇨꃅꀞꅓ。
ꊋꇤꄉꅐꇐꌋꆀꁧꃤꃅꇲꁵꌠꄺꀱꉾꃅꄉ。ꑓꅐꎑꄉꌕꁁꏯꒃꉇꋒꌶ。ꋍꆏꌬꈧꐥꇐꊇꁧꉀꐕ。ꊇꁧꉮꀋꐥꎕꏦꌋꆀꋧꃅꎕꏦꈻꊛꌠꐳꀥꇱ，ꃷꇐꊇꁧꅓꀞꐨꀵꄻꄹꏦꋈꄻ。ꎆꏂ꒧ꊋꊡꄉꑴꊈꈴꏤꐛꄺꂡ、ꍕꎇꐨꐥꃅꒃꅐꌠꍔꆙ，ꉾꉎꉾꎹꌠꇮꃅꇔꇷꉌꊈꉘꉚ，ꅐꑫꉀꎆ、ꊇꁧꉀꐕ、ꂓꁨꅍꁦꄻ。ꑍꆏꄺꑣꑘꊐꐕꌠꊥꎆ。ꃹꅼꃅ“ꍏꇩꄺꑣ+ꐮꈴꈄꏍ”ꄹꎆ，ꇩꏤꊐꌠꄺꑣꑘꏀꀺꐽꈉꑠꈨꋈꄻ，ꀑꁮꄐꊋꄺꑣꌡꀠꐘꃆꈨꃄꌬ，ꇮꑘꌌꅉꃀꊋꀥꇱ、ꀊꃴꄺꑣ、ꀊꂥꊙꌠꉁꈾꋉꃆꀉꒉꀊꂾꑠꇇꄀꄉꃅ，ꇮꁈꄺꀱꊐꐕꋉꃆꀉꒉꀊꂾꌠꊥꇬꃄꌬ。ꌕꆏꐳꃅꐛꏀꁧꃤꃅꑘꀻꎆ。ꀊꏀꈭꌠꇩꏤꁧꃤꃅꑘꏓꇱꄺꀱꃅꉚꌠꇬꄉꃅꎼꆹ，ꇮꇐꀊꂥꁧꃤꃅꑘꏀꀺꋉꃆꃄꌬ，ꊋꇤꄉꃷꂷꏀꀺꅐꑘꀻꎆ。ꃷꎏꃹꉆꌠꄝꏯ，ꒃꅐꐨꁧꃤꃅꑘꌐꑘꈴ、ꐥꐨꃅꐙꌠꁧꃤꃅꑘꑭꋧꈴꑞꅉꉀꐕ。ꁨꑭꈄꏍꇓꈓꑠꈨꋈꄻ，ꏲꑘꋂ5ꃪꂷꁨꑭꌤꑟꁊꈴꌠꄹꎆ，ꇓꈓꇓꉈꀀꊿꀊꅰꀉꑌꃅꃷꂷꈴꐥꐨꊌꅜꎻ。
ꊋꇤꄉꇩꁨꎆꏂ꒧ꄺꀱꌠꄹꎆ。ꎼꈎꑎꉔꑍꈓꌠꆹ，ꄺꀱꌠꌊꀻꎆꌠꊥꎆ，ꏟꈯꀕꃅꇩꁨꎆꏂ꒧ꊇꁧꐕꊌꐨꉀꎆꈢꇓꀖꉈꈽꌠꃅꌊꉾꃅꄉꌶ。ꇩꁨꎆꏂ꒧ꈜꀕꇈꍏꑷꎆꏂꑘꐛꉻꋊꄻꌠꄹꇙ，ꋍꈨꏀꀺꀻꎆ，ꋍꈨꏓꄻꋊꍬꐯꇯꀱ，ꋍꈨꌊꄻꎞꅐꇧꎭ。ꇴꍆꌅꈌꀉꑌꑵꈴꄺꀱꌠꄹꎆ，ꎆꏂ꒧ꄏꌧꉼꄉꅍꌅꈌ、ꃷꎏꈴꀰꏢꊿꊙꌋ、ꃅꑘꏢꅿꊿꄹꏦ、ꌼꉔꈁꁨꏦ、ꌤꃅꊿꇴꁨꃅꀕꉚꑠꃄꄻ。ꃹꅼꃅꎆꏂ꒧ꊾꌬꄹꏦꄺꀱ，ꃷꎏꈴꌊꌬꃄꄟꌋꆀꐮꄉꄐꌠꀊꂥꊐꌠꌧꊿꌋꆀꎆꏂ꒧ꀰꏢꏲꂠꊿꃄꎆꄹꏦꎹꎥꋈꄻ。ꐳꃅꇩꁨꎆꀨꎆꇱ、ꀰꏢꇬꌦꄺꀱꏓꄻ。ꎆꀨꏲꌠꌌꀨꃅꄉꇩꁨꁨꇐꍞꏲꏲꉻꄉꅍꏭꆦꌠꄹꎆ，ꇩꁨꁨꇐꁮꑋꌠꄴꏮ，ꇩꁨꁨꇐꁌꀧꉀꎆꌠꃅꇫꑟ。ꇩꁨꎆꏂ꒧ꄺꀱꑴꌅꀕꈌꀊꅰꀉꑌꃅꄻꃅꄷꁵ。ꐳꃅꇩꁨꎆꏂ꒧ꐧꋦꃅꅍꃅꌠꇔꑣꇧꎭ，ꐩꋊꇬꇫꐥꇈꌠꌤꃆꂥꀘꄉ，ꇩꁨꎆꏂ꒧ꁳꃣꁧꊨꒊꇭꀧꒉꄚꄉ，ꈯꄜꋓꅔꊋꃤꊋꀥꇱꇁꎻ。
ꀊꅰꉾꃪꃅꉻꁨꏦꀋꉬꌠꎆꏣꍄꑐꊋꃤꄖꄑ。ꀉꇨꃅꄆꊋ、ꄆꑠ、ꈭꈜ、ꇓꋌ、ꋌꐛꐞꌗ、ꇓꈓꏲꃆꉻꌬꑠꁁꏯꇬꃷꎏꃹꉆꌠꄝꏯ，ꋍꇈꅍꅔꀋꅐꌠ꒔ꑞ꒔ꑵꑠꀜꋊꇧꎭ，ꉹꁌꀰꏢꎆꏂ꒧ꊋꊡꄉꎆꇱꌠꍔꒉ、ꇩꁨꎆꏂ꒧ꄺꀱꌠꇬꐊꈽ。ꐘꃆꍤꄻꈌꁧ、ꎆꊙꎆꏓꁧꃤꃅ、ꏱꎆꇗꏸꏱꁈ、ꃄꅉꌬꈧꑠꁆꏯꐯꌟꃅꉜꄻ。ꏦꈴꄉꐽꊯꃅꈁꁨꏦ꒔ꑞ꒔ꑵꎆꏣꁨꇐꌅꈌꀧꌋꃅ，ꏟꈯꃅꉻꁨꏦꀋꉬꌠꎆꏂ꒧ꌋꆀꉻꁨꏦꀋꉬꌠꎆꏣꊿꏦꊒꌅꈌꈲꁧꉄꌎꌠꃅꐨꍤꀞ，ꀋꈐꀋꉈ、ꎃꊒ、ꂿꈴꉆ、ꑘꒃꌠꏦꏲꋦꈭꁦꄻ，ꀊꏀꉹꌠꏲꑘꃼꇇꃆꂮꋈꄻ，ꎆꏂ꒧꒔ꑞ꒔ꉹꂱꑱꇨꐨꍔꆙ、ꐯꇯꀻꎆꌠꊥꎆ。
（ꌕ）ꃹꅼꃅꇩꈐꈉꐨꊋꂫꅤꀖ，ꈥꈉꀊꅰꀉꒉꌠꀹꄻꀻꎆ。ꄉꄐꃅꈉꐨꈁꉬꃷꁨꍔꒉ，ꏣꀋꑌꃅꄺꀱꈉꐨꐛꉻꋊꄻ，ꇲꁵꈉꐨꇿꋌꐥꃅꊪꊛ、ꎆꇱꌬꈧꊜꋽꃅꏓꇱ、ꇓꈓꇓꉈꃄꁕꋮꄮꃅꀻꎆꌠꊥꎆ，ꎆꏣꀻꎆꌠꏭꎍꐽꇈꀊꉗꃅꐛꌠꈏꇓꈉꐨꄘꄏꐨꄻꐛ。
ꌬꈧꄉꎆꏣꉀꎆꐨꈺꇙꌠꅉꃀꂿꄐꊋꇨꇱ。ꌬꈧꊐꐕꆸꄟꇬꄉꄐ，ꏱꁈꏢꑲꐨꀜꋊ，ꌬꈧꋦꈭꄻꉾꃪꈴ，ꌬꈧꊿꌅꈌꈲꁧꀧꌋꃅ。ꃀꌠꀨꎹ、ꋬꂻ、ꑱꏲ、ꉙꂘꁰꍋ、ꁱꀕꈯꎟꑠꁧꃤꃅꌬꈧꀻꎆꌠꊋꁈꄏ。ꈄꏍꈴꌗ、ꀑꁮꀁꇬꌬꇐ、ꑴꊈꐛꏀꑠꌬꈧꀊꏀꃅꅐꇁꌠꍔꒉ。ꈄꏍꇬꈄꏍꉈꋮꄮꃅꐮꈺꇙ、ꐽꏡꃅꋓꅔꌠꊥꎆ，ꐥꄜꃼꇇꑘꏀꀺꉹꏮꌠꄹꇙ。ꎊꈬꎞꎭꁆꌞꈄꏍꄻꐛꒆ，ꐳꎭꑘꉾꃅꀻꎆꌠꊥꎆ。ꑍꊙꇇꈴꐕꍯꃷꎏꌌꍄꑐ，ꊋꇤꄉꄆꇙꐕꍯꀨꄉꌠꊋꀦꀊꏀꐕꍯꀻꎆꌋꆀꄹꌬ，ꐳꃅꇓꈓꍮꊪꄈꅉꌋꆀꄆꊐꉁꈾꋈꄻ。ꇩꏤꑭꊂꌬꈧꎆꒉꎆꇁꇬꌦꃅꉚꌠꃅ，ꎆꒉꎆꇁꏲꉻꌬꈧꉌꒊꎆꉛꅐꇐꏀꀺꌠꊋꊡ。ꌬꈧꐥꇐꄹꁆꈏꃹꈜꀸꇗꏸꊨꒊ，ꁦꎆꃅꇗꏸꀋꏮꎊꈬꃼꃷꅉꀞꄻ。ꃄꎆꒃꄉꑬꆏꄹꏦꃅꑞꅉꑟ，ꊋꀥꇱꄉꈩꆫꈭꈜ、ꈩꆫꅉꈩꆫꈉ、ꑴꏀꍯꍆꅉꑠꉁꈾꋈꄻ，ꈩꆫꃷꎏꐥꀹꍬꏦꈴ，ꇬꊎꅐꇁꌠꉹꁌꋍꏅꈩꆫꄮꐰꋨꏦ。
ꇿꋌꐥꃅꎆꇱꌠꎍꐽꃅꉀꎆꀊꉗꃅꐛꉻꋊꄻꌠꏭꂿꄐꀋꉬꀋꉆꌠꋊꇤ。ꉪꇩꏤꅉꀨꉁꈾꌋꆀꉹꁌꐥꐨꁁꏯꇬꀋꇎꀋꂪꅉꀉꑌꈨꐥ，ꅐꑘꄺꀱꊐꐕꌠꈉꐯꈉꃅꎍ，ꇿꋌꐥꃅꎆꇱꌠꆹꄡꇗꈥꈉꀉꒉꐯꀉꒉꃅꐥ。ꎼꈎꆹꇇꄀꄉ“ꊯꌕꉬ”ꄐꎖꐘꃆꀉꒉꀊꂾꑠꈨꃅ。ꎸꈜꎆꇱꌠ8000ꂡꂷꈋꉐ、ꄇꈜꎆꇱꌠ1.65ꃪꂡꂷꃅꌐ，ꉈꑴꈲꒉꋉꃆꀉꒉꀊꂾꌠ20ꐘꇇꄀꄉꃅ，ꒉꄆꉿꄆ、ꄆꍑꀊꂥꐯꀊꂥꄆꌞ、ꀑꁮꄆꈄꏍ、ꒀꋌꐞꌗꁠꐤꈄꏍ、ꇓꈓꍬꈜꈭꈜꃅꐘꃆꀉꒉꀊꂾꑠꋈꄻ。ꍏꑷꄐꌗꈍꈐꎆꇱꌠ5000ꂡꂷꄐꄻꄉ。ꃹꅼꃅꎆꊙꎆꇱꏦꉻꄺꀱ，ꐪꊛꄉꃷꎏꈴꌠꃄꄟꌊꌐꐘꋈꄻꎆꀨꊙꏓ，ꃅꄷꎆꊙꎆꏓꐽꈉꉹꏮꐛꏦꄺꀱꄉꃷꎏꈴꎆꊙꎆꏓꌠꄹꇙ，ꅉꀨꉁꈾꃅꁨꇐꁌꁦꊫꌐꈴꌠꎹꎥ，ꍔꃚꌋꆀꐧꋦꎆꀨꇷꃅꈁꏦꄻꐛꒆ，ꈻꏁꎆꀨ1800ꂡꂷꌠꌬꌊꉾ，ꏦꈴꄉꏟꈯꃅꋯꏤꄉꌠꍬꌬ，ꋒꐯꋒꃅꐧꋦꎆꀨꐊꈽꏾꐨꄖꄑ。
ꃹꅼꃅꀊꏀꉹꌠꇓꈓꏦꎫꐛꈴꌠꄹꎆ。ꇓꈓꏦꎫꐛꈴꌠꆹꐛꏀꈴꌠꈴꌶꈛꏢꉬ，ꉪꇩꏤꈐꈉꊋꂫꌋꆀꀻꎆꌠꇙꊋꀉꒉꐯꀉꒉꌠꉬ。ꎼꈎꀋꉬꀋꉆꌠꆏꌤꑘꌕꐘꒃꉇꌊꉾꃅꄉ。ꋍꆏꐳꃅꂿ꒧ꏭꆦꊻꂷꇓꈓꀀꊿꐛꈴ。ꃹꅼꃅꑱꐴꄹꏦꄺꀱ，ꇓꈓꏦꎫꑱꐴꒃꇎꏦꄝꏯ，“ꊿꃄꅉꎆꃀ”ꐯꅑꎍꏱꁈꋈꄻꐛꒆ。ꀊꏀꉹꌠꇓꈓꏦꎫꐛꈴꏓꇱꃅꉚꑭꊂꍔꒉ。ꀀꋦꊫꌐꆹꌬꉆꐨꀉꒉꐯꀉꒉꃅꐥ，ꐳꀥꇱꄉꑱꐴꀋꒃꑴꌦꌠꇓꈓꏦꎫꅉꀕꋦꀀꊻꂷꇬꉱꑷꄉ，ꋀꊇꁳꏦꈴꄉꋦꀀꅉꋭꑘꂘꑘ、ꃅꅍꊌ、ꆅꉁꑠꅉꀨꄉꉻꁧꃤꃅꌠꊌꎻ。ꈯꄔꁮꐚꁆꏯꃅꄷꐧꐭꇓꈓꌋꆀꇓꈓꏦꎫꀄꊭꌠꀻꎆ，ꂿ꒧ꊿꇮꃅꌠꀊꅰꀉꑌꃅꈛꑌꃅꀕꅍꊌꃅꑘꀺꎻ，ꋀꊇꁳꎆꎹꀁꇬꀨꎹꑍꑵꐯꇯꃅꉆꎻ。ꑍꆏꇓꈓꏦꎫꏦꀧꐨꋦꀀꋉꃆꋈꄻꌋꆀꑳꇤꃄꅉꅐꑘꃷꎏꉾꃅꀻꎆꌠꄹꎆ。ꎼꈎꑲꁘꇣꁘꃅꄷꀀꑳ600ꃪꂷꄺꀱ，ꑲꁘꇣꁘꄺꀱꌊꎆꃀꈴꎞꀀꌠꍆꐪꉀꐕ。ꀀꊿꀀꑳꇗꊒꌬꈧꌠꇗꏸꎴ、ꉌꒊꎆꉛꊋꁈꄏꏱꁈꄻꐛꒆ，ꀀꑳꀋꎪꃅꈉꐨꌋꆀꄻꉾꐨꈉꐨꇬꄉꄐ，ꇓꈓꉜꏱꁈꌬꄉꑳꇤꁨꇐꊭꊎꐨꋊꑣ，ꑲꅉꇤꂷꃷꎏꎍꐽꌠꊥꎆ。ꊤꃼꐯꇯꃅꌠꀀꑳꄹꏦꋈꄻ，ꇎꏦꇬꄉꄐꌠꉇꇁꊻꂷ꒔ꁘ꒔ꁘꃅꌌꉻꊤꑳꇲꁵꑭꊂꇬꇱ。ꌕꆏꊋꀥꇱꄉꇓꈓꄐꎖꋈꄻꏲꂠ。ꇓꈓꄐꎖꌠꈆꑪꐨ、ꂴꂿꐨ、ꋦꒉꐨ、ꄇꄜꋊꐨꀥꇱ，“ꄐꎖꀉꑌꑵꏓꋍꃱꃅ”ꌠꊥꎆ。ꇇꄀꄉꇓꈓꅉꃴꏓꇱꁠꐤꈴꈜ2000ꉻꆏꈋꉐꋈꄻ。ꏣꀋꑌꃅꀊꃴꋉꃆꌋꆀꋉꃆꌬꇐꄹꌬ，ꊋꇤꄉꎸꅍꐛꉻꌋꆀꄻꇱꉹꌠꋉꃆꀻꎆ，ꐳꃅꎕꏦꈴꌠꋈꄻ，ꋈꄻꇮꇐꑞꅉꌋꆀꊇꁧꉀꐕ。ꇓꈓꏲꂠꏦꉻꏀꀺꌠꄹꎆ，ꀑꁮꇓꈓꄺꑣ，ꄉꉻꈭꈜꈄꏍꄻꐛꒆ，ꈭꈜꋍꇈꑠꌤꃆꑓꅐꎑꌠꏱꄻ，ꊿꋦꀕꈭꄻꉾ，ꏓꂱꉹꁌꁳꇫꐥꌊꀊꅰꃅꉌꇱ、ꀊꅰꃅꉌꂵꀋꎭ、ꀊꅰꃅꉌꌒꎻ。
ꃄꁕꀻꎆꐛꄟꄻꉾꃪꈴ。ꃹꅼꃅ“ꋍꁕꋍꈜ”ꋈꄻꌠꄹꎆ，ꏢꏸꏹꋮꐊꃅꀻꎆꄐꎖꐱꀨꃅꑞꅉꑟ，ꐳꃅꍤꏦꒊꃀꎆꏣꋥꁕꀻꎆ。ꁮꐚꏭꀉꒉꃅꀖꁉ“ꊯꌕꉬ”ꄐꎖꌫꄻꌠꏤꄻ，ꀊꏀꈭꌠꑛꌋꈤꃅꄷꑠꇮꑘꅉꁍꀉꆹꌠꄖꄑꌄꆣꄐꇐꌫꄻ，ꈯꄔꃅꄷꄓꆹꊥꎆꌠꀊꏀꊰꈎꄐꎖꏤꄻꅐꇁ，ꁭꅐꃅꄷꏦꉻꏀꀺ、ꅔꎿꋍꃱꃅꄐꏤꑠꀂꏽꂴꅑꂵꅐꌠꊋꁈꄏ。ꅐꀦꉹꌠꃅꄷꎆꏣꉹꏮꊐꐕꌠꊥꎆ。ꊋꁈꄏꄉꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꑠꌌꀻꎆ。ꇩꏤ꒺꒜ꄐꇐꏤꄻꌋꆀꃄꌬ，ꇩꏤꎿꃀꌅꈌꈲꁧꀧꌋꃅ，꒺꒜ꒆꉻꋦꈭꀧꌋꃅ，ꀊꃴꎆꏣꈥꈉꍔꀺ，ꎿꃀꇨꌠꇩꏤꋈꄻ。
（ꇖ）ꐳꃅꐛꏀꂿꑘꀻꎆ，ꂿꑘꊿꊛꄉꁦꎆꊌꌠꊥꎆ。ꊛꄉꋍꍈꑌꄝꀋꏯꃅ“ꌕꂿꑘ”ꌤꃅꌠꒃꉇꌊꉾ，ꂿꑘꄻꀉꇨꂿꑘꁡꇤꒇꏣꁵꂿꑘꊿꌣꈚꇁꎻꌠꏱꁈꄻꐛꒆ，ꃹꅼꃅꂿꑘꁡꇤꄺꀱ，ꂿꑘꊿꃅꑘꊌꁦꎆꎴꈝꃀꀹꄻ，ꊋꇤꄉꂿꑘꊇꁧ、ꅐꐨꌋꆀꋓꅔꊋꃤꉀꐕ。
ꐳꃅꂿꑘꐛꉻꋊꐽ。ꋚꂷꑠꊛꄉꁦꎆꊌ，ꎊꈬꁌꏤꎍꐽ、ꉹꁌꐥꐨꄻꃪꌠꎁꃅꀉꇨꃅꇲꁵꌠꏦꀧꀐ，ꄚꊭꊎꄉꌠꀉꒉꃅꁦꎆ、ꃷꎏꁌꏤꀁꋌꊰꃅꌤꃆꑠꑌꊝꑴꌦ。ꂿꑘꅐꇐꁌꏤꏓꐛꉺꏦꄻꐛꒆ，ꂿꑘꊿꄐꇺꌊꃷꎏꈉꐨꉜꄉꊪꏽꐛꉻꋊꐽ，ꄉꄐꃅꀀꃆꊪꌠꃅꊂꁆꊨ。“ꃷꎏꁌꏤꀕꄻ、ꁌꏤꀥꇱꁷꐞ”ꌠꏥꏦꇬꈴꄉ，ꏣꀋꑌꄉꄐꃅꀀꃆꎴꊭꄹꏦꄺꀱꌠꄹꎆ，ꂿꑘꊿꇗꊒꊌꐨꏦꀧ。ꏡꁈꀉꑌꑵꃅꏂꄉꋚꂷꊭꊎꌠꃆꂮꂥꀘ，ꀉꇨꃅꂿꑘꅐꇐꌤꋽꌠꄺꑣꌠꏭꊋꁈꄏ，ꎇꃀꆫꑘꀻꎆ，ꂿꑘꅐꑘꊛꏣꌌꁨꎆ；ꋠꃅꀱꌩꊪꏜꏿꀊꏀꈭꌠꄐꉻꏤꄻ，ꎼꈎꋠꃅꀱꌩꊪꏜꏿꌠ1500ꃪꂿꈋꉐꐥ，ꌤꋌꐘꆹꋍꃢꃅꌠꈲꁧꀉꑌꑵꊌ，ꀋꎪꃅꒃꉇꋒꌶ。ꏣꀋꑌꃅꇶꏦꀉꑌꑵꂿꑘꄉꈁꋭꋽꃅꀰꏢꌠꀻꎆ，ꑱꈐꋚꐷꄈꅉ、ꌐꑘꑱ꒜、ꂿꑘꊿꇷꃅꎹꑠꀊꏀꉹꌠꀰꏢꀨꄜꏭꊋꁈꄏꌠꏱꁈꄻꐛꒆ，ꀊꏀꉹꌠꃅꑘꂿꑘꊿꉘꉚ，ꂿꑘꑶꋦꏦꃤꇬꈴꄉꊨꏦꉌꃹꃅꁌꁵꀧꃅꃄꅉꏭꆦꌠꊋꊡ，ꃄꅉꍆꇴꇷꃅ、ꐮꐊꃅꅀꃄꅉꊂꎭꏱꄻꌠꃅ。ꃹꅼꃅꂿꑘꁡꇤꋍꉻꁨꇐꌅꈌ、ꃅꏀꀖ、ꋍꉻꌩꏪꌅꈌ、ꇩꁨꌩꐷꄈꅉ、ꁍꑗꈲꒉ、ꇲꃷꎹꃅꑠꄺꀱ。
ꂿꑘꅉꃀꈯꌬꄻꀉꇨ。ꐊꑷꃅꀊꉗꀊꎴꌠꅉꃀꋠꁍꁷꇽꇈꐋꀋꌡꃅꀧꌋꃅꌠꃅꐛ，ꊋꀥꇱꄉꎕꏦꀊꂥꌠꋠꁍꋈꄻ，ꅼꊨꃄꅉ1.5ꂡꂿꁦꎆ，ꂿꄐꀉꇨꀆꐒꏎꏸꒉꊐꃅꊂ2000ꃪꂿꀊꏀꃅꁦꎆ。ꋠꃅꆦꃅꃄꍫꄹꏦꃅꉚꅉꎹꎥ。ꊋꀥꇱꄉꂿꑘꇮꇐꏀꀺꇈꄹꌬ，ꃹꅼꃅꋚꒉꉮꀋꐥꅐꐨꀊꂥꂿꄐꀉꇨꌠꎹꄻ，ꐈꑭꂿꑘꁬꋌꁧꀋꎆꌠꃄꄻꌠꌫꄻ。ꏱꎆꄻꂿꑘꇬꇱꌠꏦꀧ，ꇩꏤꑭꊂꂿꑘꎆꊐꎆꉛꄉꀧꉻꑫꋈꄻ，ꂿꑘꄜꏂꀧꄹꏦꌋꆀꂿꑘꁡꇤꎆꒉꎆꇁꁧꃤꃅꌠꄻꐛꒆ，ꎆꀨꀉꑌꃅꌌꂿꑘꐛꏀꈴꇬꋈꄻꌠꇬꄐꇺ。
ꂿꑘꁡꇤꄉꉻꉁꈾꌋꆀꁧꃤꃅꌠꄻꃪ。ꂿꑘꁡꇤꅉꃀꌬꇐꋈꄻꊋꃤꀉꒉꃅꇱ，ꀊꏀꃅꋉꋈꄻꀱꌠꂿꑘꁡꇤꄇꈜ20ꃪꉻꆏꐥ，ꎕꏦꑟꌠꑣꍔꌋꆀꏲꑘꋂꆹꐳꃅꄇꈜꄻꇫꑟꈴ、ꃥꑌꍯꄻꇫꑟꈴ。ꐳꃅꀊꏀꈭꌠꂿꑘꁡꇤꄆꈄꄺꀱꊐꐕ，ꑍꈓꈐꃅꂿꑘꁡꇤꑘꒃꉈꊪꌠꄆꁵꁧꃤꃅꌠꌋꆀꐦꀞꃅꄷꏸꈻꒉꐬꄆꈴꌠꉬꇮꉱꑷꌐꌠꃅꇫꑟ。ꅝꒉꉮꀋꐥꌠꄻꈬꉀꐕꋉꃆꌫꄻ。ꄆꌅꃼꇇꌤꃆꂿꑘꁡꇤꃹꌠꄹꇙ。ꂿꑘꁡꇤꊿꀀꋦꈭꏱꄻ，ꎔꃨꀀꌒꌠꁡꇤꋈꄻ。
ꎭꇔꈢꇓꀖꋉꃆꃄꄻ。ꎼꈎꌢꎭꊻꂷ1000ꃪꑻꈋꉐꂿꑘꁡꇤꎭꇔꂿꃆꃅꇫꑟ，ꄚꈐꏭꎞꀉꁁꃅꄷꀀꄉꎭꇔꊿ200ꃪꑻꈋꉐꐥ，ꐪꊛꄉꌢꎭꂿꑘꑱꁯꑲꎓꇣꐡꌠꋈꄻꀱꌠꄹꎆ。ꍏꑷꏱꎆꌢꎭꊋꄏꎆꀨ43.4％ꁦꎆ。ꌢꎭꑤꇬꂿꑘꎑꁠꎆꀨꋊꍬꐯꇯꀱꌠꄹꎆ。ꏟꈯꃅꊒꌸꃅꌢꎭꄏꐓꄉꎭꇔ，ꊾꌋꆀꃅꄷꉜꄉꏱꁈꌫꄻ。ꀉꇨꃅꐋꀋꌡꌠꅐꑘꉘꉚ，ꌤꃅꑘꀺꌠꊋꁈꄏ。ꈝ꒜ꁌ、ꀆꐒꐥ、ꄆꐥ、ꈄꏍꐥꌠꑠꌤꃆꀞꄻꌊꉾ，ꏓꀀꋦꁕꌢꎭꇨꌠꃅꄷꌋꆀꌢꎭꊻꂷꀻꎆꄐꅍꀉꇨꆹꎻ。ꇩꏤꉹꁌꈲꊌꌠꏱꁈꌋꆀꉹꁌꐥꐨꋉꃆꋍꑞꋍꑵꑠꌢꎭꃅꄷꏭꉜꄉꎎ。ꃹꅼꃅꀕꄷꏤꄉꌢꎭꊋꄏ、ꁭꅐꁮꐚꏓꐊꃅꌢꎭꊋꄏꌠꍔꆙ，ꐧꋦꊋꃤꎭꇔꈢꇓꀖꋌꐘꐊꄉꃅꌠꏭꊋꁈꄏ。ꌢꎭꊋꄏꎭꇔꌠꆹꎪꀋꉆꌠꂿꃆꉬ，ꍔꃚꋍꊐꋑꀋꋒꂽꏤꒃꄯꒉꄻꄉꀐ，ꀋꎪꃅꄮꈉꈴꄉꊇꁧꃷꁨꐯꇯꄉꀧꄉꃅꌐꌶ。
（ꉬ）ꀊꏀꈭꌠꑞꅉꀊꂥꃅꉇꉻꏭꁉꃑꌠꄹꎆ，ꊋꇤꄉꇷꃅꋓꊋꌠꃅꇫꑟ。ꋧꃅꎆꏣꇷꃅꌋꆀꋓꅔꐛꐪꃹꅼꃅꐛꐈꌠꊜꄮꆏ，ꇩꈐꎆꏣꊇꁧꉀꐕꈲꁧꁦꎆꌠꈉꊸꐨꍬꄉ，ꀋꇙꀋꑐꃅꉇꉻꏭꁉꃑꌠꍔꐯ，ꁉꃑꅉꇬꀊꏀꇙꊋꁳꇨꃅꀻꎆꎻ、ꄺꀱꇬꀊꏀꇙꊋꄻꇬꇯ、ꋓꅔꇬꂱꎆꅑꌠꄻꇬꇯ。
ꀉꇨꃅ“ꋍꁕꋍꈜ”ꋈꄻꌠꄹꎆ。ꇩꈐꃄꁕꀖꁉꀕꃑꌠꌋꆀꋧꃅꎆꏣꇷꃅꌠꋍꃱꃅꄐꏤ，ꐯꇯꄉꅔꄩꎆꏣꈴꇉꌋꆀꎿꄩꇷꃅꀋꉬꀋꉆꅉꄺꂡ，ꐯꏑꐮꈴ、ꎆꏣꃼꇇꇷꃅ、ꃰꊿꁱꀕꐮꈴꃅꑠꄹꇙ。ꈛꁧꀉꒉꃅꀺꐮꈴꇷꃅꉺꏦꏓꄻ，ꋧꃅꎊꈬꎞꎭꈜꀉꒉꃅꀺꐮꈴꌠꋈꄻ。ꃅꋮꎆꏣꇷꃅꃄꁕ、ꋯꐂꎆꏣꇷꃅꃄꁕ、ꋯꉈꎆꏣꃼꇇꇷꃅꃄꁕꑠꋈꄻꌠꄹꎆ。ꏟꈯꃅꐯꇯꇕꄟꐯꇯꋈꄻꐯꇯꈲꊌꌠꌭꈬꇬꎷ，“ꋍꁕꋍꈜ”ꁳꄮꐽꉂꐪꇺꏣ、ꐯꇯꌄꆣꌠꈝꃀꐛꎻ。
ꇩꏹꅐꊋꇷꃅꌠꍔꐯ。ꀋꎪꃅꎆꏂꑘꌌꀋꉬꀋꉆꃅꄉ、ꍔꃚꄹꇙ、ꃷꎏꈴꃅꀰꏢꇬꎷ，ꌡꀠꋉꃆꀋꉬꀋꉆꈨꃄꄻ。ꎆꐪꇗꏸꎆꒉꎆꇁꊋꁈꄏꏱꁈꃅꇫꑟꇈꄻꐛꒆ，ꏓꂱꀙꎆ꒜ꎿꉈꇷꃅꎆꀨꏓꄻꄉ，ꉾꃅꑍꁁꏯꅏꊋꇷꃅꎆꀨꌬ。ꉁꈾ、ꇮꇐ、ꎕꏦ、ꁧꃤꃅꉇꅐꁧꌠꑠꄹꇙ，ꍏꇩꄺꑣꀉꇨꂓꁨꅍꃅꐛ。
ꉇꉻꃼꇇꏀꀺꀻꎆꌠꄹꎆ。ꉇꉻꈉꐨꊛꄉꀁꋌꊰꌠꊋꋠꐨꊜꄮꇬ，ꏡꁈꀉꑌꃅꏂꄉ，ꈏꃹꉇꅐꀁꋌꊰꒉꐨꏢꇋ。ꋍꆏꐳꃅꏱꁈꃅꇫꑟꇈꄻꐛꒆ。ꉇꅐꇗꏸꈪꐨꐛꉻꄻꃪ，ꋋꇅꃅꇎꃅꇗꏸꈪꌠꄉꀧ，ꇨꃅꇗꏸꈪꊏꀸꌠꇇꇩꍈ。ꀂꉗꊭꇬꉇꅐꉌꒊꄜꏂꀧꄉꈁꁦꎆꇱ，ꉁꈾꋬꈭꃅꉇꅐꎆꊙꄜꏂꀧꀕꄎꌠꆏꀧꌠꃅꇫꑟ。ꑍꆏꃼꇇꑘꈁꏦꏀꀺꌠꇬꊋꊡ。ꋯꉈꐂꄆꌅꃼꇇꌤꃆꃅꉚꅉꍔꐯ，ꎆꏂꑘꄏꐓꄉꉇꅐꀕꇐ“ꎿꉈꊸꑳ”ꈨꋈꄻ，ꉇꉻꃼꇇꏓꇱꁧꃤꃅꌠꎆꏂꑘꀻꎆꌠꊥꎆ。ꌕꆏꃼꇇꐛꉻꄻꃪꈴ。ꁧꃤꃅꌠꃼꇇꏀꀺꀻꎆꃅꉚꅉꍔꆙ，ꁧꃤꃅꌠꉇꀧꃅꉚꅉꇓꈓꁦꎆꇱ，ꐳꃅꁱꀕꉇꉻꃼꇇꀻꎆ。ꀒꁨꋍꁘꃅꎿꀸꐋꀋꌡꃅꍞꏲꃄꁕꋊꍬꐯꇯꀱ，ꄺꑣꃼꇇꈯꄔꁮꐚꁁꏯꉜꄉꆹꏮ、ꅐꑘꊛꏣꐧꀠꀊꂥꏠꌠꇬꉜꄉꁨꎆꌠꊥꎆ。ꇖꆏꃼꇇꃅꌒꐨꄹꎆ。ꐊꑷꃅꇩꏹꃼꇇ“ꏡꄂꌍꑓ”ꄹꌬ。ꉇꅐꃷꇐꎖꉚꐨꀁꋌꊰ。ꉬꆏꀊꅰꃅꏣꀋꑌꌠꈏꃹꏱꁈꃄꌬ。ꂴꅑꇮꇐꉁꈾ、ꀋꉬꀋꉆꌠꄺꉂꄺꈾꌋꆀꇮꃪꌠꊋꀦꇬꀦꌬꇐꌌꈏꃹꌠꍔꒉ。
ꉇꎆꈲꌬꐨꉀꐕ。ꐪꊛꄉꎆꇱꉆꌠꄝꃑ，ꁧꃤꃅꑘꌋꆀꎃꐚꄺꑣꑘꁉꃑꌠꍔꒉ，ꉋꄅꃼꇇꃅꊿꎆꇱꎆꏂ꒧ꈭꎁꏤꄻꌠꄻꈝꐮꃅꄉ，ꎆꊙꎆꎹꊋꃤꀉꒉꃅꇱ。ꅔꈐꌋꆀꃅꋮꆸꈈꁉꃑꈁꏦꏀꀺ，ꉇꉻꏭꉜꉹꌠꅐꑘꏓꇱꀊꏀꈨꀹꄻ，ꉇꎆꈻꎷꌌꀊꅰꀉꑌꃅꌌꈯꄔꁮꐚꁆꏯꃅꄷꎆꇱ。ꄿꐨꃼꇇꃅꉚꅉꍔꒉ。ꀖꁉꅉꏦꉻꉺꏦꏀꀺ。ꉪꊇꆹꀊꅰꃅꀋꈐꀋꉈ、ꀊꅰꃅꄇꄜꋊ、ꀊꅰꃅꂴꉘꇉꐨꐥꌠꎆꇱꋦꈭꀹꄻꂯ，ꍏꇩꆹꈍꄮꑌꁯꈻꊋꃤꀉꇨꃅꐥꌠꉋꄅꃼꇇꃅꊿꎆꇱꅉꉬꑴꌦ。
ꐳꃅꄿꐨꃼꇇꃅꅉꄐꇐꃄꌬ。ꏣꀋꑌꃅꃄꁕꐊꑷꃅꐙꌠꎆꏣꃅꐋꐮꃆꂮꏤꐪꋮꇖꁱꏤ，ꐳꃅꍏꏝꉴꄿꐨꃼꇇꃅꅉꑠꌌꐯꉇ，ꍏꂰ、ꍏꉩꎆꇱꋯꏤꌌꐯꉇꌠꄹꎆ，ꑸꄠꄿꐨꃼꇇꃅꅉꏓꐊꄐꇐꎥꃪꌠꊋꀥꇱ。ꉪꊇꆹꄚꃆꂮꐥꌠ꒔ꑞ꒔ꁆꏯꌋꆀꐮꐊꄉ，ꃼꇇꃅꎆꇱꌠꄿꐨꈴꌠꄹꎆ，ꐯꇯꄉꐮꆽꏣ、ꋓꊋ、ꅔꆙꌠꇩꏹꎆꏣꃼꇇꉻꑫꄻꐛ。
（ꃘ）ꋦꈭꏱꄻꊋꃤꀉꒉꃅꇱ，ꀊꃴꀻꎆꌠꀊꏀꃅꂵꅐꐨꊌꅜꌠꄹꇙ。ꍍꆀꌠꏱꄻ、ꋦꈭꀧꌋꃅꌠꆹ，ꏓꂱꉹꁌꋬꂻꌠꌋꆀꐪꊛꄉꀻꎆꉆꌠꃆꂮꐥ，ꀋꎪꃅꊋꇤꄉꄹꎆ，ꉌꑣꄉꎆꏣꀻꎆꌠꌋꆀꋦꈭꄻꃪꌠꐯꇯꊋꐛꌠꈝꃀꏢꈴꅐꇀꄻꅐ。
ꀉꇨꃅꃅꌗꈑꉒꌋꆀꀆꐒꍍꆀꌠꏱꄻ。ꎼꈎꐈꇐꀑꌋꈉꃷꁨ、ꉢꄊꋊꃑꃷꁨꆹꂱꄷꃅ2％ꀁꋌꒊ，ꑍꀑꐈꑘ、ꄊꀑꐈꇐꋊꃑꃷꁨꂱꄷꃅ3％ꀁꋌꒊ，ꌌꀨꄉꃅꄷꈑꋧꌺ（PM2.5）ꐊꐨꐪꊛꄉꀁꋌꊰ。ꊋꇤꄉꊖꌋꏦꄉꋊꃑꅐꇁꌠꌋꆀꏸꐕꇙꊋꍯꋊꃑꌠꊨꒊꌠꒃꉇꋒ。ꊖꌋꁦꎴꑘꅐꃅꈲꌬꌠꊋꀥꇱ，ꊖꌋꈘꆽꌫꄻꌠꊨꒊ，ꄆꌊꊖꌋꎃꊐ、ꐞꌗꌊꊖꌋꎃꊐꌠꄹꎆ。ꐊꑷꃅꊖꌋꏦꄉꄆꃑꅉꀁꂥꃅꋊꃑꌠꌋꆀꊋꏏꄺꀱꌠꃄꌬ。ꐳꃅꄀꇗꇱꎕꏦꇬꄐꀋꊒꌠꊖꌋꏦꒉꈾꄷꇉꀜꋊ。ꁦꎆꃅꋌꐛꐞꌗꇲꁵ，ꃅꆳꄐꊋ、ꈨꑭꄐꊋ、ꒆꇐꊇꁧꄐꊋꑠꀻꎆꄏꐓꏱꁈꄻꐛꒆ，ꁦꎴꊋꀦꍆꁧꉀꐕ。ꋙꏜꅐꀦꈴꃅꏓꇱꈲꌬꌠꊋꊡ，ꈛꎂꃅꐗꇧꎭꌠꏢꑲ。ꐊꑷꃅꐕꍯꇬꌬꌠꏦꋌꇩꉬꎕꏦꄹꎆ，ꌐꂷꀊꏂꄀꄉꌠꐕꍯꌋꆀꐕꍯꀉꆹꀉꁘꌠ380ꃪꇷꀜꋊꇧꎭ。ꀋꉬꀋꉆꃄꁕꇬꃅꌗꍍꆀꌠꐯꇯꄵꐯꇯꋏꌠꃄꌬ。ꐊꑷꃅꇓꈓꏦꎫꍍꒉꋊꄻꉁꈾꋈꄻꌋꆀꄺꀱꌠꄹꎆ，ꂿ꒧ꃄꅉꐛꑊꇬꅐꇁꌠꍍꆀꌠꌋꆀꒉꈳꁕꋦꈭꏓꇱꏱꄻꌠꊋꀥꇱ。ꊋꇤꄉꇮ꒧ꍍꆀꇁꀦꏱꄻ，ꍍꆀꋊꃑꅐꇁꌠꎆꏂ꒧ꌌꐊꑷꃅꀋꆏꃅꍞꎖꌠꃅ。ꋦꈭꀧꌋꃅꍞꍤꌠꌌꀉꇨ，ꀭꅓꊨꄅꌠꃅꇫꑟ。ꀊꏀꃅꏤꄻꀱꄉꌠꋦꈭꀧꌋꃅꏦꃤꀋꎪꃅꏦꇨꃅꃄꌬ，ꁦꎆꃅꋊꃑꂁꄉꋊꃑꌠꆏꀋꎪꃅꏦꃤꈴꌌꏦꇨꃅꇇꇩꍈ，ꏣꊐꄝꃑꊿꆏꀋꎪꃅꏦꃤꈴꄉꌌꀉꆈꃅꅑꎹ。
ꊋꇤꄉꊋꏏꋦꈭꀧꌋꃅꅐꑘꀻꎆ。ꀊꃴꋦꈭꀧꌋꃅꎕꏦꁊꑷꅉꍔꒉ。ꄏꐓꏱꁈꄻꐛꒆ，ꊋꏏꋦꈭꀧꌋꃅꌠꂴꅑꇮꇐꉁꈾꄹꌬꌠꊋꁈꄏ，ꀊꐯꈭꃅꋯꏤꄯꒉꊋꀦꏱꄻꌠꌋꆀꋦꈭꍍꆀꌠꌕꁆꏯꌠꏱꄻꌠꍔꆙꄉꃅ，ꑳꇤꊋꏏꄺꀱꊋꃤꀉꒉꃅꇱ，ꐳꃅꋊꃅꐥꌠꄺꑣꑘꍍꆀꐨꀋꐥꃅꄺꀱ。ꉹꁌꑭꊂꃅꊋꏏ、ꒉꏏꃅꐨꍔꆙꄉꃅ，ꑶꌩꀖꑘꉹꁸꄉꋊꄻꌠꄹꎆ，ꀱꒆꉆꌠꅐꀦꉈꎴꈲꌬꈄꏍꄻꐛꒆ，ꊋꏏꋦꈭꀧꌋꃅꅐꑘꉗꄻꌊꉪꇩꏤꀻꎆꌠꈯꌬꅐꑘꀉꒉꐘꐛ。
ꊋꀥꇱꄉꒆꉻꋬꂻꇊꑴꋈꄻ。ꒆꉻꀧꌋꃅꁵꊒꉺꏦꄻꐛꒆ。ꋌꐛꌩꏪꃼꇇꃅꏭꃅꇽꌠꆏꇧꎭ，ꀊꏀꈭꌠꏜꁍꒆꉻꀧꌋꃅꁥꇱꈁꁠꁵꏱꁈꃄꌬ。ꅉꃴꒉꎕꏦꐂꅣꄻꅉꏓꇱꏱꄻꉚꅉꄹꎆ，ꒉꊩꑠꒆꉻꀧꌋꃅꌠꌋꆀꀱꐛꅉꐛꌠꋉꃆꌫꄻ。ꐪꊛꄉꃅꈣꂤꏂꅔꐛꈴ、ꇓꃀꂤꏂꅔꐛꈴꌠꌋꆀꃄꐡꊖꑳꌠꏱꄻ。ꋦꈭꀧꌋꃅꌠ，ꊿꋍꂷꋑꀋꋒꆽꎍꐨꐥ。ꐧꋦꇬꐊꊿꋍꂷꋑꀋꋒꉉꄻꀋꅐꃅꃅꐨꃅꄉ，ꎔꃨꌠꍏꇩꋈꄻꌠꎁꃅꊋꃤꅐꌞ。
（ꏃ）ꃶꐚꃅꉹꁌꐥꐨꄻꃪꌠꏦꀧ，ꊋꀥꇱꄉꐧꋦꋈꄻ。ꏲꑘꃅꌠꆏ，ꉹꁌꐥꐨꌌꀨꄉ。ꉪꊇꆏꉪꇊꎺꇊꃅ、ꄻꉌꂵꇬꊐꄉ，ꀊꅰꃅꉹꁌꐥꐨꈲꏣꏂ，ꀊꅰꃅꉹꁌꐥꐨꐒꏣꁌꄉ。ꏱꎆꊌꐨꉀꎆꌠꀋꐳꑴꇬ，ꄚꀞꄻꉹꁌꁵꄡꑟꌠꃶꐚꌠꌤꆏꋍꐘꑌꄝꇫꊰꇈꀋꉆ。
ꊋꇤꄉꃅꅍꊌꑘꀺꌠꍔꒉ。ꀊꅰꃅꏣꀋꑌꌠꃅꅍꊌꏱꁈꃄꌬ，ꑘꀺꌠꌊꃅꅍꊌꌠꈻꏁꌠꊋꊡ。ꎼꈎꒉꌶꅉꇬꌶꅐꌠꌶꌺꆹꀉꑌꌊ765ꃪꑻꇬꑟ，ꃅꅍꊌꌠꊥꎆꄐꎖꌋꆀꑘꀺꄐꏁꄐꎖꃄꌬꇫꑟꋒ，ꍬꏦꀉꑌꃅꃅꅍꊌꑘꀺꌠꊥꎆ。ꃅꅍꀋꊌꄜꏂꀧꎆꀨꂫꋒꎆꌬꋒꃅꄉ，ꃅꅍꊌꎆꀨꄉꈁꁦꎆꇱ，ꎆꏂ꒧ꃅꅍꀋꊌꌤꃅꊿꇮꇐꄐꊋꁰꍋꌋꆀꃅꅍꊌꀱꌠꌤꃅꋒ，ꇓꈓꏦꎫꃅꅍꊌꊋꊿꎁꃅꄏꐓꇇꀨꌠꇲꁵ。ꂿ꒧ꊿꇮꃅꌠ2100ꃪꑹꃢꈋꉐꃅꑘꇮꇐꊐꐕꁱꂘꌠꂿꃆꃅꌐ。ꊋꀥꇱꄉꑺꂖꃅꃅꅍꊌ、ꃅꅍꊌꐛꄟꀊꏀꌠꏭꄏꐓ。ꏟꈯꃅꎞꆏꂽꑼꃅꑘꁵꌠꌋꆀꃅꅍꊌꑘꀺꌤꃅꋒ。
ꊇꁧꀊꅰꃅꉾꀊꅰꃅꀋꈐꀋꉈꌠꂘ꒧ꀻꎆ。ꂘ꒧ꆹꇩꏤꊫꂫꃰꇌ、ꏓꂱꃤꉘꇉꐨꄚꎑꄚꁠꐺ。ꋍꏅꂘ꒧ꎆꇱꌠꆏꀉꇨꃅꈯꄔꁮꐚꁆꏯꃅꄷꌋꆀꃅꋮꆸꈈ、ꌢꎭꃅꄷꏭꉜꄉꎎꌠꊋꃤꁦꎆꃅꇱ。ꇓꈓꇓꉈꋭꑘꂘ꒧ꌫꎆꏦꀧꉺꏦꏓꋍꃱꃅ，ꌶꅉꊋꁧꌠꌋꆀꁠꌷꄹꏦꌶꅉꀞꄻꇎꏦꄻꃪ。ꀊꐯꃅꈲꌠꀊꉘꈩꂘꅉꀻꎆꌠꄏꐓ。ꐋꀋꌡꂘ꒧ꀞꄻꋒ。ꐳꃅꐛꏀꃅꑘꂘ꒧ꉻꑫꋈꄻꐛꒆ，ꉹꁸꄉꐧꀠꏠꌠꃅꑘꂘ꒧ꌶꎆꀋꎴꌠꄹꎆ。ꌢꎭꑱꈐꌶꌺꌌꂴꅑꄉꎃꐚꇨꍏꌶꎆꀋꎴ。ꑣꋂꂘꃀꊌꐨꉀꐕꏱꁈꃅꇫꑟ。ꐳꃅꈜꎴꃅꉙꂘꌠꄹꎆ，ꂘ꒧ꊇꁧꂄꅐꀦꁊꑷꅉꍔꒉ。ꒉꌶꅉꂘ꒧ꑟꐨꌋꆀꏀꀺꄐꊋꊐꐕ，ꇎꏦꐥꌠꎃꐚꀪꈈꒉꌶꅉꌫꄻꌠꏭꉜꄉꉹꏮꌠꄹꇙ。ꐪꊛꄉꒉꌶꅉꌢꎭꃅꄷꂿ꒧ꁡꇤꏭꉜꄉꌶꅉꎹꄻꌠꄉꈁꍔꒉ，ꂿ꒧ꊿꇮꃅꌠꐊꇁꌠꌺꇖꀊꄶꇬꄯꒉꌷꌋꆀꌷꊐꐕꌶꎖꌠꏱꁈꃅꇫꑟꌋꆀꄻꐛꒆ。ꉹꁌꀞꄻꂘ꒧ꀻꎆꌠꄏꐓꌋꆀꋊꍬ。ꂘꑘꆹꌶꌺꑌꇐꌧꇐꈯꎟꋽꇐꐊꑷꃅꀻꎆꌠꊥꎆ，ꅱꈯꃅꋍꑞꋍꑵꊇꁧꏀꀺꉹꌠꌧꊿꉘꉚꌶ。ꑱꈐꇬꄉꌶꅉꇬꑟ、ꍔꃚꇬꄉꐧꋦꇬꑟꌠ，ꐯꇯꀉꑳꊈꎁꃅꋬꂻꄚꄿ、ꉀꒆꌧꅍꐥꌠꆽꎍꌠꆹꄜꄉ，ꐯꇯꃆꏂꊂꑋꉘꇉꐨꄏꐓ。
ꐮꄮꃅꆅꉁ、ꆄꀧ、ꁬꋌꏓꇱꃅꄺꀱꌠꄹꎆ。ꄚꄿꌠꆹꐥꌒꌠꀨꀦꉬ。ꎼꈎꆹꆅꀉꒉꌠꄜꏂꀧꁊꑷꈴꌠꃅꇫꑟꇬ，ꍔꃚꆹꎆꁦꎆꃅꇱꄉ，ꆅꀙꌠꆅꊿꀊꅰꀉꑌꃅꀵꃤꊨꒊꎻ。ꍏꑷꏱꎆꄐꁆꄉꌠꇓꈓꇓꉈꆅꉁꇇꀨꁥꇱꎆꃀ160ꂡꂷꐥ，9.6％ꉀꎆ。ꇓꈓꇓꉈꀀꊿꅉꀨꆅꀧꄹꏦꏓꇱ，ꏱꎆꁥꇱꌠꊿꋍꂷꌠꋍꈓꇬ380ꂷꇬꄉꉀꐕꅷ420ꂷꇬꑟ。ꆅꉃꎆꁵꄟꄺꀱ，ꐳꃅꅉꀨꆅꉁꄜꏂꀧꇩꏤꑭꊂꈄꏍꐮꈴꌠꌋꆀꌞꃅꄷꆅꉚꌠꎆꌗꏢꌠꄹꎆ。ꉻꋉꆅꉚꅉꏓꇱꄺꀱꉚꅉꇓꈓꈍꈐꍔꒉ，ꐮꄮꃅꆅꉁꁧꃤꃅꁌꏤ、ꁬꋌꐮꈴꑠꄺꀱꌠꄹꎆ。ꃹꅼꃅꁬꋌꆅꉃꉁꈾꍤꄻꈌꁧꄹꏦꄺꀱ。ꐳꃅꆅꉚꊿꑞꑌꌧꌠ、ꀊꉘꆅꉚꊿꉘꂘ。ꄃꏃ70％ꀑꂪꌠꇬꄉꏠꊐꁸꄉꆅꉃꉚꅉꍔꆙꄉꃅ。ꅉꀨꋍꏅꁦꎴꆄꄻꁧꃤꃅꌫꎆꏱꎆꁥꇱꌠꊾꂷꌠ40ꂷꇬꄉꉀꐕꅷ45ꂷꇬꑟ，ꆅꉃꌬꇐꇁꀦꅉꂫꊐꌠꌋꆀꂿ꒧ꁡꇤꏭꉜꄉꒉꌠꊥꎆ。ꐧꋦꆅꉚꅉꀞꄻꌠꊋꊡ。ꍏꑳꁬꋌ、ꊿꋅꁬꋌꌤꑘꀻꎆ。ꆅꉃꉹꑘꐛꄟꇬꄐꊒꌠꊿꌤꃄꎆꄹꏦꋈꄻꐛꒆ，ꆅꉚꊿꏣꀋꑌꐨꀧꌋꃅꌋꆀꄖꄑ。ꐮꄮꌠꉃꆅꃆꂮꋈꄻ。ꃌꒆꋒꌠꀉꑳꑍꂷꒆꉘꉆꌠꁆꇱꏱꁈꄻꐛꒆ。ꏓꂱꒉꄚꎻꂿꄷꃅ，ꐳꃅꋍꃱꃅꋦꒉꃅꐙꌠꋠꇐꁬꋌꉮꀋꐥꌠꍞꏲꏦꉻꄻꐛꒆ，ꂿ꒧ꋠꃅꇬꄉꋠꄜꇬꑟꌠ、ꎆꏂꑘꇬꄉꆅꉚꅉꇬꑟꌠꐏꄻꅉꋍꈚꋑꀋꋒꐏꄻꋒꄉ，ꏓꂱꉹꁌꁳꋠꇐꅝꒉꁬꋌꉮꀋꐥꌠꏭꉌꒊꎻ。
ꐧꋦꏦꀧꌠꋬꂻꈄꏍꏍꋒꏍꈬꃅꄉ。ꐪꊛꄉꎞꆏꊿꅉꀨꃀꌠꀨꎹꎆꎕꏦꉀꐕ。ꃅꄷ꒔ꑞ꒔ꈚꇬꆏꃶꐚꃅꆽꎍꐨꆹꄜꄉ，ꃀꌠꀨꎹꎆꏤꈉꇬꈴꄉꃷꁨꇎꃅꃑꁵꌠꄉꀧ。ꇩꁨꁨꇐꄹꁆꆹꏮꌊꐧꋦꏦꀧꎆꀨꇬꇱꌠꏡꁈꏤꄻ。ꃀꌠꀨꎹꁧꃤꃅꑘꏓꇱꄺꀱꉚꅉꍔꆙꄉꃅ，ꇶꏦꀉꑌꑵꃅꐙꌠꉃꉘꏓꇱꌠꄹꎆ。ꋍꇅꌺꇬꈭꋏꌠ、ꊿꌢꎭꐯꌢꎭꌠꈭꋏꇇꀨꇲꁵꑠꄹꏦꃄꌬꇫꑟ，ꋭꋽꃅꈭꋏꇇꀨꇲꉘꎕꏦꐰꏤ，ꌤꃅꉺꏦꄻꐛꒆ。ꇓꈓꇓꉈꀁꂥꏦꀧꌠꊾꂷꌠꁥꇱꎕꏦꆏꂱꄷꃅ5％ꌋꆀ8％ꉀꐕ。ꐳꃅꇓꈓꇓꉈꐧꋦꈭꋏꇇꀨꉻꑫꄻꐛꒆꄉ，ꉹꁌꊋꋠꌠꃛꊸꌠꊝꇬꇇꀨꌠꐥ、ꊋꋠꐨꊝꇬꄏꐓꌠꐥꎻ，ꐧꋦꑭꊂꉈꇬꑭꑌꌋꆀꊷꇅꀕꃅꐙꎻ。
ꁱꀕꄺꀱꀻꎆꌠꄹꎆ。ꍏꇩꉪꐨꌋꆀꍏꇩꐛꐨꐧꋦꉪꏦꌊꉜꐊꐨꏓꊭ、ꊋꃤꏓꋧ，ꐧꋦꉪꏦꈯꄜꁌꇐꉜꐨꉗꄻꌋꆀꌫꄻ，ꊋꀥꇱꄉꇩꉂꉪꏦꉙꂘ。ꍔꑪꐧꋦꈆꑪꏀꀺꋉꃆꃄꌬ，ꁱꀕꋽꇐ、ꈨꏀꅏꄻ、ꅇꁊꄆꒌꄆꁱ、ꄉꉣꄯꒉꑠꌤꑘꀻꎆ。ꍏꇩꐛꐨꐧꋦꉪꏦꀊꏀꉹꌠꌧꊿꏓꊐꅉꋈꄻ。ꌧꃆꁱꇐꏂꀨꍸꇐꌋꆀꐥꇐꀋꉬꌠꁱꀕꍸꇐꀧꌋꃅꌫꄻꌠꊋꀥꇱ。ꃹꅼꃅꉹꁌꇫꐊꌠꉌꊈꌧꑳꀹꄻꌠꃅꈧ。ꉹꁌꃅꄯꒉꀘꌠꄖꄑ，ꈆꑪꌧꇐꌌꁊꈴꄉ，ꈆꑪꉌꊈꄖꄑ，ꇩꂱꊇꁧꌋꆀꐧꋦꌧꑳꐨꉀꐕ。ꋊꃅꐥꌠꇢꈴꄜꌋꆀꏀꄓꇢꈴꄜꏓꇱꃅꀻꎆꌠꊥꎆ。ꈄꏍꁱꀕꐛꒆꉮꀋꐥꌠꉗꄻ。ꃹꅼꃅꍏꇩꌋꆀꉋꄅꃰꊿꁱꀕꌌꐮꈴ，ꊋꀥꇱꄉꇩꏹꄜꁊꄐꊋꋈꄻ。ꃹꅼꃅꁱꀕꏦꉻꄺꀱ，ꋍꏅꁱꀕꅐꀦꇓꈓꇓꉈꅉꂫꊐꌠꏭꉜꄉꎎꌠꄐꇺ，ꁱꀕꅐꑘꏀꀺꀻꎆꌠꄹꇙ，ꁱꀕꃷꎏꌄꆣ，ꊋꀥꇱꄉꁱꀕꃷꎏꏲꂠ。ꃷꂷꅇꁊꄆꁱꑱꁯꃅꁊꑷꈴꌠꄹꎆ。ꀙꏢꃅꋆꀎꒀꉼꌋꆀꃅꋆꊾꄣꀎꒀꉼꊭꄎꌤꃅꋒ，ꉹꁌꑭꊂꃅꈯꎟꌠꃄꄟꀊꏀꌠꄖꄑ。
ꐧꋦꏱꄻꌠꊋꀥꇱꌋꆀꏀꀺ。ꅉꂫꊐꌠꅉꃀꌤꃅꋒꄉ，ꇓꈓꇓꉈꋥꁕꋈꄻꌠꄹꎆ，ꅉꂫꊐꌠꋯꁦꋮꒉꌠꊥꎆ。ꇪꉼ、ꇭꏾꄨ、ꌋꅪꐊꏑꉼꑠꏓꉻꎀꍹꐧꋦꏱꄻꇬꐊꈽꌠꊋꁈꄏ。ꉹꑘꑠꉼꃼꇇꏓꉼꌋꆀꏲꑘꌤꏲꅉꐮꐞꄺꀱꌠꐳꀥꇱ，ꏦꃤꇬꈴꄉꐧꋦꎀꍹꋊꍬꀻꎆ，ꌐꑘꐧꋦꌤꃅ、ꉌꇗꁧꃤꃅꌠꌋꆀꂄꃅꌤꑘꀻꎆꌠꊋꁈꄏ。ꊋꀥꇱꄉꐧꋦꉌꒊꉻꑫꋈꄻ。ꃶꐚꃅꌋꅪ、ꀊꉘ、ꊾꄣꌅꈌꈲꁧꏦꀧ，ꊋꀥꇱꄉꂿ꒧ꁡꇤꑳꐍꀊꉘꌋꆀꌋꅪ、ꃀꌠꏭꉈꇬꁧꃤꃅ。ꃹꅼꃅꏦꌬꏦꉻꄺꀱ，ꏦꏲꄜꁊꉙꂘꌠꍔꆙꄉꃅ，“ꏃꉬ”ꏦꃤꁊꌬꄐꎖꌠꃄꌬꌠꃄꇬ。ꏦꃤꇇꀨꌠꌋꆀꋥꁕꄺꀱꌤꃅꋒ。ꇩꏤꈄꏍꉮꀋꐥꏦꀧꉻꑫꄻꐛꒆ。ꐧꋦꋬꂻꏱꄻꏓꇱꉺꏦꏀꀺ，ꈴꌗꈴꌠꌌꄏꐓꅍꃅꄉꐳꃅꐧꋦꋬꂻꏱꄻꄴꏮꋏꌫꉻꑫꋈꄻꌠꄹꎆ，ꏦꃤꇬꈴꄉꏦꃤꐆꑽꃤꐆꃅꐨꅓꀞ，ꏦꇨꃅꊋꆍꏿꇶꌾꌠꃅꌠꇇꇩꍈ，ꏓꂱꉹꁌꋬꂻꉪꉻꄻꀉꇨ。ꄯꒉꁱꌊꉎꅇꅲꌤꃅꐨꄻꃪ，ꀉꑌꁁꏯꃅꉉꋊꌠꉺꏦꄻꐛꒆ，ꇿꋌꐥꃅꐮꄙꐨꏟꃆꏈꑘꀞꄻ，ꐧꋦꋬꂻꈨꅪꌠꊥꎆ。
ꀑꇬꑞꑌꁌꀋꋌ，ꋬꂻꑞꑌꒊꀋꋌ。ꀋꎪꃅꋬꂻꒃꅐꌠꌋꆀꋍꏅꋬꂻꌠꒃꉇꋒꇬꎷ，ꊋꀥꇱꄉꋬꂻꅉꃀꉁꈾꌋꆀꉮꄵꉮꊨꄐꊋꋈꄻ，ꍞꎖꌗꋏꃛꊸꏭꊝꌠꉺꏦꄻꐛꒆ，ꃅꑊꁧꃤꃅꑟꐨꉀꐕ，ꃄꇙ、ꎖꑲ、ꅉꊈꑠꌤꃅꋒ。ꋬꂻꒃꅐꆽꎍꐨ、ꏱꄻꄹꏦꌋꆀꄤꎖꉺꏦꄻꐛꒆꌋꆀꃅꇫꑟ，ꄈꍔꐯꇯꆽꎍ、ꃅꈉꂷꑍꑵꆽꎍꃅ，ꊋꀥꇱꄉꄉꅍꀋꃅꌠꅑꃤꎹ，ꏦꇨꃅꏦꌬꌠꍞꏲ，ꋬꀋꂻꌤꆿꀉꒉꀊꂾꃅꅐꌠꏟꈯꃅꏢꑲ，ꃶꐚꃅꏓꂱꀑꇬꎆꋚꋬꂻꌠꏦꀧ。
（ꉆ）ꊋꀥꇱꄉꍔꃚꑴꅉꋈꄻ，ꏲꑘꏱꄻꄐꊋꌋꆀꁧꃤꃅꑟꐨꉀꐕ。ꀋꎪꃅꂿꃆꀉꒉꌠꆹꄜ。ꀉꇨꃅꊋꋠꌼꇪꌠꄺꀱꀻꎆꂿꃆꏭꊝꇬ，ꍔꃚꈁꐥꊐꌠꆏꃹꅼꃅꀻꎆꉪꉻꀊꏀꌠꃄꌬꇫꑟꄉ，ꐊꑷꃅꊼꇅꌣꈚꌠꐧꋦꄻꐛꌠꂿꃆꆹꄜꄉ，ꉹꁌꈁꐒꊀꐨꄻꉌꂵꇬꊐꄉ，ꏓꂱꄸꈴꌠꏦꏲꍔꃚ、ꏀꀺꍔꃚ、ꐙꎴꍔꃚꌋꆀꁧꃤꃅꉹꌠꍔꃚꋈꄻ。
ꀋꎪꃅꏦꃤꇬꈴꄉꄉꅍꃅ，ꍔꃚꃅꈧꌠꐊꑷꃅꌌꏦꏲꅉꇬꇱꄉ。ꍔꃚꈁꐥꊐꌠꌋꆀꋍꌤꃅꊿꆏꂴꅑꏦꇨꃅꏦꃀꌋꆀꏦꃤꇬꍬ，ꑴꐚꃅꏦꏲꉪꉻꌋꆀꏦꏲꃄꄟꌬꄉꌤꃅꌠꄹꎆ，ꏦꃤꏤꄉꌠꃅꎁꆏꀋꎪꃅꃄꄻꅐ，ꏦꃤꏤꁵꀋꄉꌠꆏꃅꀋꉆ。ꏣꀋꑌꃅꍔꃚꏦꃤꅲꇫꄹꏦꄹꌬ。ꃹꅼꃅꍔꃆꄇꄜꋊꌠꄹꎆ，ꋒꐯꋒꃅꋊꃅꐥꌠꇢꈴꄜ、ꏀꄓꇢꈴꄜꂿꄐꋊꇤ，ꈄꏍꐽꈉꌬꂂꃅꄉ，ꇇꈤꃅꐧꋦꇫꉌꇬꌠꃄꄻꄉ，ꉹꁌꁳꍔꃚꑞꃅ、ꈍꃅꃅꌠꊨꄅꎻ。ꍔꃚꈁꐥꊐꌠꆏꏦꃤꇬꈴꄉꋋꊐꌠꏓꄊꌋꆀꋍꎮꊈꉼꁳꍞꊟꎽ，ꑴꐚꃅꏓꂱꍔꑠꁳꋯꁦꃅꍞꊟꎽ，ꐧꋦꌋꆀꈋꍣꍞꊟꌠꅇꃅ，ꌅꈌꌌꈨꑭꇂꃴꄉꃄꌬ。
ꀋꎪꃅꐙꎴꃅꄉꅍꃅ，ꃹꅼꃅꍹꁏꎴꄖꌠꄹꎆ。ꎔꎗꃅꄈꃅꇏꐙꎴꋈꄻꀨꄜꆽꎍꐨꃅꇫꑟ，ꏦꇨꃅ꒔ꑞ꒔ꑵꏦꄙꄉꇗꐆꌠꃅꐨꏱꄻ。ꊋꀥꇱꄉꏲꑘꍞꍤ，ꍤꌗꌠꁊꑷꈴꌠꄹꎆ。ꌅꈌꊨꌅꈌꏢ、ꍞꏲꌠꏀꀺꑠꏁꁈꇬꈴꄉꎹꊤꈥꈉꊨꒊ，ꍹꈔꌠꅐꇁꅉꋊꇧꎭ。ꄈꃅꇏꐙꎴꋈꄻꌠꅉꂫꊐꌠꇬꉜꄉꎇꈻꌠꄹꇙ，ꀉꇨꃅꉹꁌꈲꏣꉮꄻꌠꃅꇏꀋꉾꌠꄺꀱ，ꀋꇙꀋꑐꃅꍹꈔꌠꅓꀞ。
ꀋꎪꃅꋥꑣꃅꄉꅍꃅ，ꃄꌬꊋꃤꌋꆀꉻꑇꊋꃤꉀꐕ。ꍔꃚꌤꃅꊿꆏꏟꈯꃅꃅꎁꄹꏦꍬ、ꀋꎪꃅꋍꉻꎁꃅ，ꑴꇙꃅꌤꃅ，ꂄꏂꂄꃅ。ꃹꅼꃅ“ꌕꏦꇨꌕꃶꐚ”ꌠꃄꄻ，ꍔꍞꉪꐨ、ꃅꇴꄉꉻꉪꐨ、ꈯꄜꉪꐨ、ꉜꊯꉪꐨꀥꇱ，ꊋꀥꇱꄉꃅꇏꌋꆀꄐꊋꋈꄻ，ꊇꁧꀊꂥꌐꑘꈴꃅꐙꌠꉻꃆꌤꃅꊿꁥꉗꄻ。ꌤꃅꆽꎍꄹꏦꄻꐛꒆꄷꀋꁧꏦꇨꃅꃄꌬ，ꏱꁈꌋꆀꂿꃆ꒔ꑞ꒔ꐘꌠꀋꎪꀋꑴꃅꃅꇫꑟꌠꄉꀧ。ꍞꍤꅑꎹꉺꏦꄻꐛꒆ，ꏦꇨꃅꄉꅍꀋꏲꐵꑷꃅꏲꉌꀋꇱꃅꏲꌠꃅꐨꄺꂡ，ꈍꃅꄿꂿꑋꅉꉆꈉꍆꄉꌤꀋꃅꌠꐥꀋꉆ。ꄖꄑꉺꏦꌋꆀꑽꐪꄺꀱꉆꌠꉺꏦꄻꐛꒆ，ꄺꀱꏀꀺꊿꏭꄏꐓꊋꊡ，ꇥꀯꋍꏅꌠꁳꌤꃅꏾ、ꌤꃅꀬ、ꌤꃅꐛꄎꎽ。ꍏꇩꄺꀱꁉꃑ30ꎖꈎꃅꊌꐨꀉꇨꌠꆹ，ꇥꀯꉹꁌꋍꏅꌠꃅꅐꎼꇁꌠꉬ。
ꀏꄩꐮꐊꐙꆏꊋꐛꑟꃅ。ꉪꊇꆹꋒꐯꋒꃅꍏꑷꌋꆀꃅꄷꏣꀋꑌꐨꑍꏢꌠꋊꇤꌶ。ꃶꐚꃅꒃꉇꀋꎪꃅꌤꃅꊌꐨꄇꇖꀕꌠꃅꄷꏭꆏ，ꋈꄻꎆꃀꄐꁆ、ꋈꄻꃄꅉꌬꌠꀊꏀꃅꁦꎆ、ꏱꎆꉹꑘꎆꃀꏓꊭꌫꄻꑠꁆꏯꇬꄉ，ꈁꁠꁵꊋꁈꄏꊋꃤꀉꒉꃅꇱ。꒔ꑞ꒔ꈚꌠꃶꐚꐛꐨꇬꉜꄉꌤꃅꑘꀺꌠꊋꊡ，ꐯꋑꄉꀻꎆꌠꐛꊂꑺꂖꌠꐛꇁ。
ꁧꎁꊈ！
ꍏꉸꊿꋅꆹꑱꈐꀉꒉꁯꉬ，ꊿꋅꈁꐥꌠꐮꄮꃅꐥ、ꉌꋧꊋꋓ、ꐮꄮꃅꀻꎆꌠꊥꎆꌠꆹ，ꊿꋅꈁꐥꌠꏓꂱꁧꀦꈲꁧꌋꆀꐯꇯꃅꎁꉬ。ꍏꇩꐛꐨꈴꊿꋅꌤꃆꀞꄻꌠꎃꊒꈝꃀꍬꇬꎷ，ꊿꋅꃄꁕꊨꏦꏲꄹꏦꌭꈬꌋꆀꄻꐛꒆ，ꏦꇨꃅꄈꅿꊿꋅꏱꁈꃄꌬ，ꃹꅼꃅꊿꋅꋯꑌꀻꎆꌠꃅ，ꊿꋅꈁꐥꌠꏓꐮꐊꌠꐧꋦꐛꉻꌋꆀꋥꁕꋦꈭꄻꐛꌠꄹꇙ，ꊿꋅꈁꐥꌠꐮꑌꐯꑲꐮꎼꐮꈴꌠꊥꎆ。ꊿꋅꃅꄷꀻꎆꇬꊥꎆꌠꍣꐨꈴꊋꁈꄏꏱꁈꃅꇫꑟ，ꌐꄉꐯꇇꀨꐮꄏꐔꌠꊋꀥꇱꄉꃅ，ꀁꑌꊿꋅꋊꃅꉾꃪꌠꁱꀕꌋꆀꋂꍔꐋꀋꌡꌠꀧꌋꃅꌋꆀꀻꎆ，ꊋꀥꇱꄉꊻꂷꊼꇅꀁꑌꌠꊿꋅꀻꎆꌠꏭꄏꐓ，ꊋꇤꄉꃅꋮꄻꌄꆣꉹꁌꄖꌣꈚꌠꃅꐨꃄꌬꄉ，ꇩꏤꑭꊂꊿꋅꈁꐥꌠꏓꂱꐯꇯꐊꑷꃅꊼꇅꌣꈚꌠꐧꋦꉜꄉꆹꎻ。
ꉪꊇꆏꐊꑷꃅꄈꅿꑇꇐꂘꃅꌤꃅꅉꀨꌐꏦꃄꌬꇫꑟ，ꏦꃤꈴꄉꑇꇐꂘꃅꌤꃆꏲꂠꌠꌭꈬꇬꎷ，ꑇꇐꂘꃅꐮꃆꂮꐮꄮꌠꊥꎆ，ꑇꇐꂘꃅꁆꏯꊿꂒꋦꈧꌠꌋꆀꑇꇐꑇꌠꉹꁌꆏꎆꏣꐧꋦꀻꎆꌠꊥꎆꌠꇬꏣꀋꑌꌠꂿꄐꋊꇤ。
ꉪꊇꆏꎔꎗꃅꇩꉈꀀꌠꊿꌤꃆꏱꁈꃅꇫꑟ，ꏦꃤꈴꄉꎿꉈꃺꑌꌋꆀꀱꁍꇩꇁꌠꇩꈐꏣꑟꏦꊒꌅꈌꈲꁧꀧꌋꃅ，ꋒꐯꋒꃅꋀꊇꂱꎆꅑꐨꐋꀋꌡꌠꌋꆀꂿꄐꀋꂿꑘꌠꋊꇤ，ꀋꆏꃅꎿꈐꎿꉈꍏꉸꌺꇖꊋꋧꊋꃤꌌꀉꇨ。
ꁧꎁꊈ！
ꋌꃀꋋꈓꆹ，ꇩꐏꌋꆀꂽꁥꌠꋈꄻꌠꇿꋌꄇꇖꀕꌠꊌꅜ。ꃅꈎꀊꏀꋋꈓꆏ，ꏟꈯꀕꃅꄈꃅꒊꃅꇁꀊꏀꌠꇬꄉꂽꄻꀉꇨꃅꄉꌠꑞꅉꁻꌐꃅꇫꑟꌠꇬꆼꒆꄉ，ꃹꅼꃅꍔꍞꈴꂽꋈꄻꌠ、ꂽꄺꀱꀉꇨꌠ、ꏦꈴꄉꂽꏱꄻꌠꄹꎆ，ꐊꑷꃅꂽꁥꌠꇝꂱꈴꐛꏀꈴꑌꐚꈴꋈꄻꌠꊋꀥꇱ，ꀋꎪꃅꇩꏤꋬꂻꌠꀧꌋꃅ。ꄈꂽꁥꌠꏭꀋꎪꃅꏃꂠꌠꁧꀦꏥꏦꌋꆀꄹꏦꌭꈬꇬꎷ，ꇴꄠꂽꈁꐥꌠꍔꍞꌤꃅꃀꈿꉌꊈꃄꌬꇫꑟ。ꋍꃱꃅꄉꋍꑞꋍꁆꏯꂽꌤꉈꈽꄐꏤꌠꄹꎆ，ꑖꈈꃅꑍ꒜ꑍꌉꊭꌉꄐꌠꌋꆀꃅꋮꐏꎿꐏꃅꈯꐏꌠꏲꂠꋎꍅꌠꊥꇫ。ꊋꀥꇱꄉꊂꇲꏦꀧꌋꆀꉁꈾꀻꎆ。ꄔꐽꃅꏲꌋꄐꇺꏦꉻꄺꀱꌠꄹꎆ，ꂽꁥꌠꄉꈁꐛꉻꌋꆀꏱꁈꄹꏦꑠꄺꀱꌠꍔꆙꄉꃅꌠꄐꇺ。ꂽꁥꌠꋈꄻꇬꏦꏲꈴꑞꅉꉀꐕ。ꐛꏀꈴꂽꉂꂽꈾꏢꍤꂽꁥꌠꋈꄻ。ꊋꀥꇱꄉꉹꁌꃅꇩꐏꉙꂘꌋꆀꇩꐏꌠꄕꊪꌠꃅ。ꀋꉬꀋꉆꁁꏯꂽꑼꉹꁌꏓꐮꐊꌠꃹꅼꃅꀻꎆꌠꄹꇙ，ꀋꂿꑘꌠꅉꃀꉁꈾꋈꄻꅉꇬꇩꐏꈉꄻꐨꉪꏢꋒꌶ。ꇩꐏꈆꑪꇮꇐꇮꑘꀻꎆ。ꍔꃚꈁꐥꊐꌠꆏꊋꀉꒉꃅꇤꄉꇩꐏꌋꆀꂽꁥꌠꋈꄻꌠꊋꁈꄏꄉ，ꃅꋊꀊꏀꋋꊭꇬꉛꒉꌟꃅꉂꏣꃹꅼꌠꂽꌋꆀꍔꃚꂽꌋꆀꏓꂱꋯꑌꃯꉻꈝꃀꏢꈴꅐꇁ。
ꁧꎁꊈ！
ꉪꊇꆏꐊꑷꃅꀋꎪꃅ“ꋍꇩꑍꏦ”、“ꇤꊿꇤꏲ”、“ꉪꊿꉪꏲ”、ꀊꂥꃅꊨꏦꏲꌠꌐꏦꃄꌬ，ꏦꇨꃅꏦꃀꌋꆀꅉꀨꏦꃤꈴꄉꌤꀞ，ꊋꈀꑌꃅꇤꄉꑣꇤ、ꉪꂱꏲꑘꇣꋲꏱꅉꐎꏲꑘꇛꌺꌋꆀꍔꃚꏦꃤꇬꈴꄉꏲꂠꌠꊋꁈꄏ。ꇤꉪꂱꎆꅑꐋꀋꌡꌠꋊꇤ，ꇤꉪꇩꏤꎆꏣꀻꎆꌠꌋꆀꉇꉻꏭꁉꃑꌠꇬꉆꈉꌋꆀꂿꄐꉀꐕ。ꃹꅼꃅꅔꈐꌋꆀꇤꉪꇷꃅ，ꇤꉪꊨꏦꋓꅔꊋꃤꉀꐕꌠꊥꎆ。ꉪꊇꇬꑅꌠꆏ，ꑣꇤ、ꉪꂱꆹꀋꎪꃅꀊꉗꃅꌄꆣꎍꐽꇬꎷꌠ。
ꉪꊇꆏꐪꊛꄉꄠꃪꏭꌤꃅꏲꃆꀉꒉꌐꏦꌭꈬꇬꎷ，“ꈬꑍꐮꐊꉜꐨ”ꍔꍞꅉꃀꌭꈬꇬꎷ，ꏟꈯꃅ“ꄠꃪꄂꋦ”ꁷꐞꌠꃅꈧꌠꏭꁏ，ꇩꏤꌅꀨꌋꆀꏲꄸꐛꒆꌠꀧꌋꃅ，ꎿꋮꑍꄷꐮꃆꂮꄮꐽꃅꀻꎆꌋꆀꄠꎿꑘꒃꌠꀧꌋꃅ。ꎿꋮꑍꄷꎆꏣꐮꉔꀻꎆꌠꄹꎆ。ꎿꋮꑍꄷꁱꀕꂘꑘ、ꈆꑪꇮꇐꑠꁁꏯꌌꐮꈴꌠꊥꎆ，ꊋꀥꇱꄉꎿꋮꑍꄷꅉꂫꊐꌠꌋꆀꌠꏀꐮꈴꌠꃅ。ꉪꊇꆏ“ꎿꋮꑍꄷꋍꁯꉬ”ꌠꉪꉻꑌꄉ，ꄠꃪꃺꑌꐊꄉꐯꇯꊿꋅꇗꅉꀉꒉꌠꆹꄜ，ꐯꇯꀻꎆꊜꋽꄮꊌ，ꇇꐯꌫꄉꎿꋮꑍꄷꀑꇬꋍꂷꃅꐥꎻ。
ꁧꎁꊈ！
ꉪꊇꆏꐪꊛꄉꄮꐽ、ꀻꎆ、ꇷꃅ、ꋓꊋꌠꁈꁧꀊꂥꃅꐕꄉ，ꍏꇩꐛꐨꇩꏤꀉꒉꌠꉇꉻꑌꑲꉪꐨꃄꄻ，ꇩꏤꌅꀨ、ꋬꂻ、ꀻꎆꈲꁧꀧꌋꃅ。ꉪꇩꏤꄉꇩꏤꑍꊏꂷꉻꏑꏲꌋꊿꀑꋾꃀꈿꄻꌠꃅꋒ，ꋧꃅꎆꏣꏀꀺꉀꎆꌠꄹꇙ，ꅉꆺꃅꎆꏣꎆꒉꎆꇁꏱꄻꌠꄻꐛꒆ。ꊋꀥꇱꄉꇩꏤꀉꒉꌠꀋꉬꀋꉆꈧꌠꌋꆀꋮꄮꇷꃅ，ꊈꂄꃅꐮꇙ、ꇷꃅꋓꊋꌠꇩꏤꀉꒉꌠꐮꃆꂮꋈꄻ。ꉌꒊꈲꁵꌠꈭꇍꉇꉻꑌꑲꌠꉪꉻꑌꄉ，ꃅꄷꇩꏤꌋꆀꀊꉗꃅꄮꐽꃅꐮꐊ、ꐮꐊꐯꈽꄉꀻꎆ。ꃅꎁꌋꆀꀑꇬꋍꂷꃅꐥꌠꄺꂡ。ꃹꅼꃅꒈꂪꏭꀱꒈꂪꏭꇷꃅ、ꐮꐊꄉꀻꎆꌠꊥꎆ，ꀻꎆꇰꌠꇩꏤꎃꊒꏦꊒꌅꈌꈲꁧꀧꌋꃅ。ꋈꄻꐨꐥꃅꋧꃅꃅꐙꌠꌋꆀꊷꈌꌤꃆꂥꀘꈽ。ꐳꃅꎿꉈꈲꁧꀧꌋꃅꄐꊋꋈꄻ，ꃶꐚꃅꉪꇩꏤꉻꊿꌋꆀꏦꊿꋬꂻꌠꀧꌋꃅ。ꍏꇩꆏꇩꏹꐧꋦꌋꆀꐮꐊꄉ，ꃰꊿꄮꐽꌋꆀꀻꎆꌤꑘꎁꃅꊋꇤꏡꇤꂿ！
ꁧꎁꊈ！
ꉈꈽꑲꆀꊫꂫꃰꇌꐥꄎ。ꉪꊇꁳꀊꅰꃅꑖꑟꃅꋯꑌꌊꐋꀨꑮꏣꀻꊝꎻꏹꃅꄉꌠꄈꍏꑷꈭꇍꄉ，ꉌꏓꊋꋧ，ꊋꇤꄉꀒꁨꆹ，ꊋꇤꄉꎼꈎꎆꏣꐧꋦꀻꎆꑞꅉꁻꌐꂿꃆꃅꇫꑟ，ꐊꑷꃅꊼꇅꌣꈚꌠꐧꋦꋉꐛꌠꂫꋓꊬꌠꉾꃅꀹꄻꌠꄉꀧ，ꌣꈚꋯꁦꌧꑳꐮꄮꌠꐧꋦꉪꏦꐛꏀꈴꇩꏤꋉꐛ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꑆꊋꀊꏀꃅꅐꌞ！
