ꍔꃚꌤꃅꅇꄜ
——2015ꈎ3ꆪ5ꑍꊰꑋꈭꇩꏤꑭꊂꏓꂱꁧꎁꃀꀉꒉꌕꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꍔꃚꌤꃅꃆꂮꅇꄜ，ꆍꑴꌠꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋍ、2014ꈎꌤꃅꐨꉪꀱ
ꋌꃀꋋꈓꆹ，ꉪꇩꏤꀻꎆꌠꂾꇩꏹꇩꈐꋦꈭꌼꇪꊋꋠ。ꋧꃅꎆꏣꀱꉀꄓꇀꊋ，ꎆꏣꏓꄜꀋꉬꀋꉆꌠꈴꐨꁷꐞ。ꇩꈐꎆꏣꀁꋌꊰꒉꌠꍅꊋꊛꄉꀉꒉ，ꀉꑌꄀꃅꊋꋠꌠꌋꆀꋓꎭꌠꐯꏍꐮꄅꎍ。ꐋꀨꑮꏣꀻꊝꎻꏹꃅꄉꌠꄈꍏꑷꏟꈯꃅꏃꂠꌠꇂꃴꄉ，ꇩꏤꑭꊂꊿꋅꈁꐥꌠꏓꂱꉌꂵꋍꂷꃅ，ꊋꋠꐨꇔꑣꈢꇓꀖ，ꋋꈓꌠꎆꏣꐧꋦꀻꎆꀋꉬꀋꉆꌠꁻꌐꂿꃆꃅꇫꑟ，ꐊꑷꃅꊼꇅꌣꈚꌠꐧꋦꋉꐛꌠꑭꁘꈫꈈꃅꐕꎼꆹꌦꀐ，ꐊꑷꃅꃹꅼꃅꄺꀱꄉꇬꂂꃅꀕꌠꃅꇫꑟ，ꐊꑷꃅꏦꈴꇩꏲꌠꈭꈜꀊꏀꌠꀹꄻ，ꐊꑷꃅꏦꇨꃅꄈꏲꌠꁨꎆꐨꀊꏀꌠꐥ。
ꋍꈓꅑꅸꇁꌠ，ꉪꇩꏤꎆꏣꐧꋦꀻꎆꐨꀑꐱꎍꐽ，ꎍꐽꃅꀒꁨꆹ。“ꎍꐽ”ꌠꀋꉬꀋꉆꌠꌐꁧꆏ，ꎆꏣꌬꈧꌠꋭꋽꅉꇬꎍ。ꉀꎆꐳꐨꎍꐽ，ꇩꈐꒃꅐꈁꊌꁌꐨ63.6 ꃪꂡꂷꇬꑟ， ꀒꄹꈎꄩ7.4％ꉀꎆ，ꋧꃅꀋꉬꀋꉆꌠꎆꏣꄜꇬꂴꇬꂾꐊꐺ。ꃅꑘꊌꐨꎍꐽ，ꇓꈓꏦꎫꃅꑘꊌꌠꊿꀊꏀꃅ1322ꃪꑻꁦꎆ，ꀋꉊꄻꈎꑍꀋꋌ。ꁌꏤꎍꐽ，ꀀꊿꌬꈧꁌꏤꁌꄓꐨ2％ꑟ。“ꀒꁨꆹ”ꌠꀑꐱꐛꋲꐨꆹ，ꀻꎆꌠꐮꄮꐨꌋꆀꐪꊛꉆꐨꀉꇨ。ꎆꏣꐛꉻꉾꃪꐨꀊꏀꌠꐥ，ꋚꂷꅐꐨ6.07ꂡꄓꑟ，ꌬꈧꌠꎆꏣꉀꎆꌠꏭꅐꌞꐨꉐꊮꌺ3ꂷꉀꎆ，51.2％ꇬꑟ，ꁧꃤꃅꑘꁦꎆꁌꐨꍆꐪ46.9％ꇬꄉꉀꐕꌊ48.2％ꇬꑟ，ꅐꑘꀊꏀꌠ、ꏀꄓꅐꑘꀰꏢꄟ、ꃼꇇꑘꀊꏀꌠꈁꏦꀋꆏꃅꁖꇁ。ꈪꄙꁮꐚꃅꄷꎆꏣꉀꎆꐳꐨꁰꅐꃅꄷꏭꀋꋌ。ꀻꎆꊇꁧꉀꐕꐨꀊꏀꌠꐥ，ꎂꀕꄉꉻꄐꌗꊌꐨ 8.6％ꉀꎆ，ꎥꃪꌋꆀꎖꉚꀻꎆꌫꎆꆹꇩꈐꒃꅐꈁꉬꁌꐨꍆꐪꄩ 2％ꐂ，ꄐꊋꃸꌬꇨꐨ 4.8％ꀁꋌꊰ，ꋋꈍꑋꈓꅑꅸꇁꌠꀉꒉꐯꀉꒉꃅꀁꋌꊰꌠ。ꏓꂱꐥꐨꄻꃪꐨꀊꏀꌠꐥ，ꇩꏤꑭꊂꀀꊿꊾꂷꌠꐽꏡꃅꇬꁆꄻꉆꌠꊌꐨꃶꐚꃅ 8％ꉀꎆ，ꐳꐨꎆꏣꉀꎆꌠꏭꀋꋌ；ꂿꑘꁡꇤꀀꊿꊾꂷꌠꐽꏡꃅꇬꁆꄻꉆꌠꊌꐨꃶꐚꃅ 9.2％ꉀꎆ，ꇓꈓꏦꎫꀀꊿꊌꐨꉀꎆꐨꏭꀋꋌꃅꐳ；ꂿꑘꁡꇤꌢꎭꊻꂷ1232ꃪꑻꊨꒊ；ꂿꑘꁡꇤꊻꂷ6600ꎖꃪꑻꀆꐒꅝꉮꀋꐥꌠꌤꃆꌌꂥꀘ；ꋯꉈꈩꆫꊿ1ꂡꑻꃢꇬꐂ。ꄺꀱꁉꃑꂵꅐꐨꀊꏀꌠꐥ，ꐊꑷꃅꃹꅼꃅꄺꀱꉻꑫꂿꃆꀋꂿꑘꌠꃄꌬꇬ，ꋋꈭꍔꃚꏲꑘꍤꄻꈌꁧꌤꐘ1/3ꊨꒊꌠꁻꌐꆹꏛꃅꀕꄉꃅꇫꑟ。ꊌꐨꋋꈨꆹꃶꐚꃅꈝꐮꃅꊌꌠꀋꉬ，ꋋꆹꇩꏤꑭꊂꊿꋅꈁꐥꌠꏓꂱꊋꌗꌋꆀꇵꂷꉬ，ꉪꊇꌳꈄꀬꅑꃅꀒꁨꆹꌠꉌꊋꋌꌌꀉꇨꀐ。
ꂴꋋꈓꆹ，ꊋꋠꐨꌋꆀꋓꎭꐨꆹꂴꉪꄉꌠꒊꀋꋌ。ꉪꊇꊋꋠꐨꉜꄉꀒꁨꆹ，ꀋꉬꀋꉆꌠꄚꊁꌤꑠꈨꃅꀐ。
ꋍꆏꇢꊭꋊꐽꌠꅉꃀꇬꄉꍜꐥꋊꐽꌠꃅꄉ，ꎆꏣꎍꐽꉀꎆꌠꄝꏦꀋꊰꎻ。ꎆꏣꀁꋌꊰꍅꊋꀥꇱꐨꊝꇬ，ꉪꊇꆏꉌꊋꀋꉬꀋꉆꌠꌭꈬ，ꉻꒉꎆꏣꏱꁈꌌꎍꐽ，ꀂꉗꊭꇬꇨꃅꌽꂳꏁꁈꀋꌬꃅ，ꉈꑴꐪꊛꄉꉻꒉꋊꐽꌠꉪꈜꌋꆀꃄꄟꏀꀺ，ꍜꐥꃅꋎꍅ，ꍄꑐꊋꃤꄖ、ꀋꇎꅉꅋꑣ、ꐥꄜꄻꀉꇨ。ꎆꏣꌫꄻꄐꋽꈐꀏꄩꑞꅉꋏꌫꄉ，ꀻꎆꌠꇬꐮꄙꐨꌋꆀꐛꉻꐨꐥꌠꌤꃆꒃꄉ，ꍜꐥꃅꁈꌬ，ꁻꌐꉜꄉ，ꊒꃅꊋꏂ。ꄺꀱꊥꎆꌠꏭꇙꊋꎹ，ꐛꉻꋊꄻꌠꏭꇇꀨꊋꎹ，ꉹꁌꐥꐨꈲꊌꌠꏭꊋꂫꎹ，ꃷꎏꈉꄻꌠꑌꍔꐯ，ꉈꑴꇿꋌꐥꃅꇲꁵꌠꑌꁦꎆ，ꊋꇤꄉꐛꉻꋊꄻꃪꇈꐳꃅꆹꎻ。
ꈲꁧꐥꃅꏣꀋꑌꌠꎆꏲꏱꁈꌋꆀꎍꐽꌠꎆꃀꏱꁈꌫꄻ。ꍜꐥꃅꇗꏸꊨꒊꌋꆀꇿꑌꁌꌌꀁꋌꊰꌠꃅ，ꎆꏂꑘꀄꊭꐭꌠꇗꏸꎳꄻꈲꁵꏲꁇꈍꈐꍔꐯ，“ꃼꇇꇗꏸꄺꀱꌊꁌꎆꇗꏸ”ꃅꉚꅉꍔꒉ。ꏱꎆꌬꐨꌌꐳ，ꏣꀋꑌꃅꊐꎆꃷꁨꀰꏢꐛꀕ。ꊝꈭꃅꎆꃀꏱꁈꌫꉂꌫꈾꌫꄻꄉ，ꍜꐥꃅꎆꊐꊭꄎꎆꍆꐪꌌꀁꋌꊰ、ꍜꐥꃅꉈꑴꎆꉛ、ꊐꎆꉚꎆꇔꊰꐯꀋꌡꃅꌌꀁꋌꊰꌠꏡꁈꌬꄉ，ꊋꀥꇱꄉꎆꏣꐧꋦꀻꎆꊋꁧꈧꌠꇬꄏꐓ，ꎆꏂꑘꀄꊭꐭꌠ、“ꌕꂿꑘ”ꎆꉛꐳꐨꆹꋍꑞꋍꑵꎆꉛꐽꏡꐳꐨꇬꂱꄷꃅꉐꊮꌺ4.2ꌋꆀ0.7ꂫꀋꋌ。ꋍꈭꐨ，ꎆꒉꎆꇁꍞꏲꌠꄻꐛꒆꄉ，ꏟꈯꃅꃄꁕꐨꐥꉻꑫꐨꐥꃅꐔꈔꉆꐨꀋꐥꎻꀐ。
ꑍꆏꃹꅼꃅꄺꀱꁉꃑ，ꎆꏣꐧꋦꀻꎆꍄꑐꊋꃤꄖꄑ。ꀻꎆꌠꐒꈄꌠꏦꉻꉺꏦꇊꑴꇬꉜꄉ，ꉪꊇꆏꐊꑷꃅꃹꅼꃅꄺꀱꌠꃅꄉ，ꃷꎏꍄꑐꊋꃤꃑꄻꄉꎆꏣꀁꋌꊰꒉꍅꊋꄘꄻꄉ，ꃷꅍꀉꇨꌠꈍꑋꑝꄉ，ꎆꏣ、ꍔꍞ、ꁱꀕ、ꐧꋦ、ꒆꉻꌧꑳꑠꏦꉻꄺꀱꌠꐊꑷꃅꄹꎆ。
ꏟꈯꃅꀋꂿꑘꃅꄺꀱꌠꄹꎆ。ꃹꅼꃅꏱꎆꇗꏸꏦꉻꄺꀱꌠꀑꐱꄐꉻꏤꄻꄷꀋꁧꃄꌬ，ꄐꌗꏲꂠꄹꏦꌋꆀꇗꏸꎳꄻꄹꏦꄺꀱꌠꁨꎆꐨꀋꂿꑘꃅꊌꅜ，ꌐꐘꆹꏮꁵꄻꐘꃆꀒꄹꈎꇬ1/3ꈋꉐꊨꒊ，ꎂꀕꆹꏮꁵꄻꌠꍆꐪꁦꎆ，ꃅꄷꍔꃚꐨꎝꃆꏲꂠꐨꌌꀥꇱ。ꎆꇱꇔꊰꌋꆀꉇꎆꀟꄻꁌꐨꇙꈧꐨꍔꒉ，ꉹꁌꀰꏢꑴꉴꃅꉚꅉꑭꁘꀊꏀꌠꐕꆹ，“ꃛꇤꐮꈴ”ꃅꉚꌠꃄꇬ，ꉇꎆꊭꊎ、ꄜꏂꀧꎆꌫꄻꈍꈐꍔꐯ。ꊋꀦ、ꈭꈜ、ꋦꈭꀧꌋꃅ、ꅇꈴꑠꁁꏯꁌꏤꄺꀱꌠꐳꀥꇱ。ꈆꑪꇮꇐꎆꀨꏲꂠ、ꎖꉚꌶꌺꎹ、ꑱꁯꊫꌐ、ꌤꏲꅉꌤꑘꌤꃅꅉꃀꌠꀨꎹꄜꏂꀧꄹꏦꑠꄺꀱꌠꃄꇬ。
ꐪꊛꄉꏲꑘꅧꊨꌅꈌꄝꃑ、ꃑꏲꐮꐊꌠꌌꄺꀱꌠꀋꂿꑘꌠꃅꄉ。ꇩꃷꑼꌤꃅꅉꈁꐥꌠꋋꈓꌠꏲꑘꍤꄻꈌꁧꑠꌤꆿꐘꃆ246ꐘꀜꋊꌋꆀꃑꀏꁵ，ꋓꐨꈋꇽꎕꏦꑟꌠꀮꄑꌠꐘꃆ29ꐘ、ꃅꑘꇎꏦꈌꁧꌠꌋꆀꏚꍆꌠꌤꆿꐘꃆ149ꐘꋊꐆꇧꎭ，ꉈꑴꋍꃢꎆꇱꐘꃆꍤꄻꈌꁧꎹꀨꄺꀱꄉ，ꍤꄻꈌꁧꈍꈐꀉꒉꃅꌌꊨꒊ。ꊋꇤꄉꃼꇇꌤꃆꄹꏦꄺꀱ，ꀊꏀꃅꁱꄀꄉꌠꃷꎏꀨꄜ1293ꃪꁯꑟ，ꄚꈐꏭꎆꏂꑘꀊꏀꃅꁱꄀꄉꌠ45.9%ꉀꎆ，ꀊꏀꌠꑘꀺꃅꐨꏓꐛ。ꎆꏣꐳꐨꄯꄉꐳꐨꊼꇅꀋꋌꉬꃅꐙ，ꃅꑘꀊꏀꃅꊌꌠꀁꋌꀋꊰꃅꀱꆽꃅꁦꎆꇁ，ꄺꀱꌠꊋꃤꀋꇰꀋꉈꌠꌋꆀꃷꎏꊋꂫꌐꀋꉆꌠꄛꑣꅐꇁꀐ。
ꁉꃑꌠꌌꄉꄺꀱꌠꊥꎆꀻꎆꌠꊥꎆ。ꎮꉰꄿꐨꃼꇇꃅꉚꅉꈍꈐꍔꐯ，ꀊꏀꃅꇨꄏ、ꄟꏢ、ꃛꏧꄿꐨꃼꇇꃅꉚꅉꄻꄉ。ꉇꅐꌠꎍꐽ，ꈏꃹꌠꁦꎆ，ꉇꅐꌠꆹꇩꏹꃷꎏꇬꍆꐨꃷꁨꐪꊛꄉꉀꐕ。ꃶꐚꃅꉇꄅꃼꇇꃅꊿꈛꎂꃅꎆꇱꌠ1196ꂡꂰꑼꌬꈧ，ꋧꃅꇣꄧꀨꇬꎍ。ꉇꉻꏭꈛꎂꃅ1029ꂡꂰꑼꎆꇱ，ꉇꎆꌫꄻꌠꌋꆀꋍꋓꃅꐯꋑꄉꁨꆹ。ꍏꇩꌋꆀꀘꄌ、ꏐꌧꄿꐨꃼꇇꃄꅉꑭꄑꄉꃄꌬ，ꍏꉴ、ꍏꉪꄿꐨꃼꇇꃄꅉꃶꐚꃅꐯꉇꌠꃅꌐ。ꎸꈜ、ꄆꊋ、ꇓꋌꐞꌗ、ꅇꈴꑠꈍꈐꇬꉇꉻꏭꇷꃅꌠꊌꐨꀋꂿꑘꌠꊌꅜ，ꍏꇩꉁꈾꑭꁘꀉꒉꃅꐕꄉꋧꃅꇬꉜꄉꀒꁨꆹ。
ꌕꆏꐛꉻꋊꄻꌠꊋꃤꁦꎆꇱ，ꀻꎆꊋꂫꁦꎆꃅꀉꇨꇁ。ꐛꉻꃅꐙꌠꐮꄙꐨꑓꅐꎑꌠꐛꄟꇬꄉ，ꉪꊇꆏꏣꀋꑌꃅꃄꄻ，ꄏꐓꋎꍅꄉ，ꀋꃋꋋꇅꇬꈉꐯꈉꌠꀊꅰꃅꀊꉗꃅꈲꌠꌤꀉꑌꃅꀞꄻ，ꎆꏣꐧꋦꀻꎆꌠꅉꃀꄻꈬ。
ꀋꆏꃅꂿꑘꅉꃀꄻꈫꈈ。ꂿꑘꀉꇨꇁꂿꑘꈲꏣꐥꂿꑘꌣꈚꇁꌠꏱꁈꊋꃤꁦꎆꇱ，ꋚꂷꅐꐨ“ꊯꊪꈎꊛꎆ”、ꂿꑘꊿꊌꐨ“ꉬꈎꊛꐳ”ꌠꃅꇫꑟ。ꂿꑘꏓꇱꒃꅐꄐꊋꎍꐽꃅꉀꐕ，ꂿꑘꈆꑪꇮꇐꌋꆀꏸꏧꈴꐨꑞꅉꐪꊛꄉꉀꐕ，ꈲꒉꋉꃆꀉꒉꀊꂾꌠꋈꄻꐨꐳ，ꒉꏏꊐꃅꊂ223ꃪꉻꐊꀊꏀꃅꁦꎆ，ꂿꑘꁡꇤꄇꈜ23ꃪꉻꆏꀊꏀꃅꋈꄻꋈꄻꀱ。ꀊꏀꃢꌠꋠꃅꀱꌩꊪꏜꏿꌠꑭꄑꄉꃄꄻ。ꂿꑘꁡꇤꃄꅉꌅꈌꊨꄻꁱꄉꊫꄳꃑꁵꌠꊱꁨꃅꃄꇰ，ꂿꑘꀊꏀꉹꌠꀰꏢꀨꄜꐳꃅꉀꄓꆹ。
ꊋꇤꄉꅐꑘꐛꉻꋊꄻ。ꊋꇤꄉꀊꏀꌠꉀꎆꅉꉗꄻ，ꁧꃤꃅꑘꐳꃅꀻꎆꌠꊥꎆ。ꊈꇙꐯꏑꈄꏍ、ꏓꐛꄆꈜ、ꀊꂥꏠꌠꉁꈾꄺꑣ、ꊋꀦꀊꏀꐕꍯꑠꄐꇐꃅꐙꌠꀊꏀꉹꌠꅐꑘꀻꎆꌠꊋꁈꄏ，ꐯꏑꈄꏍꎆꒉꎆꇁꉀꄓꆹ，ꄆꌅꃼꇇꑘ、ꎊꈴꐳꎭꑠꉹꑘꀊꏀꌠꐳꃅꉀꄓꆹ，“ꑘꀺꊿ”ꀉꑌꃅꅐꇁ，ꁱꀕꀹꄻꅐꑘꌄꆣꃅꀻꎆ。ꋍꈭꐨ，ꐪꊛꄉꅐꊋꁦꎆꌠꋊꑣ，ꇤꎸꅍ、ꇓꃀꑠꀋꂿꑘꌠꉹꑘ15ꑵꌠꊁꊰꅐꊋꇤꇧꎭꌠꃅꈎꂿꃆꏤꄮꇬꃅꌐ。ꈑꉒꏱꄻꊋꃤꁦꎆꇱ，ꃷꁨꄩꐂꄉꏂꌐꍯꌋꆀꍯꀉꆹꌠꌐꁧꇤꇧꎭꌠꃅꌐ。
ꅉꃀꌫꉂꌫꈾꋈꄻꌠꌋꆀꃄꁕꋮꄮꃅꀻꎆꌠꄹꎆ。ꏢꏠꏹꋯꐊꀻꎆ、ꍤꏦꎆꏣꋥꁕꋈꄻꌠꀻꎆꐨꀋꂿꑘꃅꐥ。ꎸꈜꀊꏀꃅꋈꄻꆏꈉ8427ꉻꆏꄻꐛꄉꌌꌫꄻ，ꐳꈴꎸꈜꌫꈴꐨ1.6ꃪꉻꆏꑟ，ꋧꃅꇬ60％ꈋꉐꍆ。ꐳꈴꄇꈜꍮꊪꈴꐨ11.2ꃪꉻꆏꑟ。ꒉꈜ、ꂱꉴ、ꁠꐤꋈꄻꌠꀒꁨꋍꁘꃅꊋꀥꇱ。ꂿꑘꁡꇤꄆꈄꏍꄺꀱꌠꑭꁘꄔꐽꃅꄹꎆ。ꈄꏍꌬꑱꁯ7.8ꂡꁯꇬꐂ。ꀉꑌꈎꃅꊋꇤꇈ，ꒈꂪꒉꈻꒈꀑꎭꌠꈯꄔꒉꈜꋍꊭꋉꃆꑌꐚꃅꌌꒉꈴꄉ，ꒉꈜꁨꁦꉹꁌꊻꂷꂡꃪꈲꏣꊌ。
ꏀꀺꈺꇙꀻꎆꄐꇐꌫꄻ。ꊋꇤꄉꈆꑪꇮꇐꊌꐨꆹꏮꌠꈴꈜꄻꐛ，ꍏꇨꋂꇩꏤꑴꌅꏀꀺꌡꀠꃅꉚꅉꏱꁈꃄꌬꈍꈐꍔꐯ，ꈆꑪꇮꇐꅐꀦꁉꃑꐯꇯꌬꌠꄹꎆ，ꈆꑪꇮꇐꃅꊿꏀꀺꍄꑐꊋꃤꀋꆏꃅꅸꁖꇁ。ꊐꐂꌗꏢ、ꆪꎖꋉꃆ、ꊿꄻꃅꏸꌬꈧꑠꈆꑪꇮꇐꀉꒉꀊꂾꌠꎥꃪꐘꃆꀊꏀꃅꂵꅐꐨꐥ，ꉪꇩꏤꑴꌅꎥꃪꄺꑣꌠꈜꌺꃥꑌꃏꏸꐚꃅꈯꇬꆹ。
ꇖꆏꉹꁌꐥꐨꏦꀧꈄꏍꎀꌤꎀꈬ，ꏓꂱꌒꐨꁦꎆꇱ。ꉪꊇꆏꊿꌌꀨꇬꄉꇬꎷ，ꀋꆏꃅꐪꊛꄉꉹꁌꐥꐨꇬꎆꇱꌠꁦꎆꇱ，ꅉꀨꀧ、ꄽꂫꑞꅉꌭ、ꉺꏦꄻ，ꏱꎆꊌꐨꐳꐨꀋꐳ、ꌬꐨꍅꊋꀉꒉꑴꇬ，ꄚꏱꎆꌌꉹꁌꐥꐨꇬꌬꌠꍆꐪꆏ70％ꈋꉐꑟ。
ꃅꅍꊌꌠꌋꆀꐧꋦꏦꀧꌠꌌꄉꊋꀥꇱ。ꃅꅍꊌꌠꊥꎆꏱꁈꄻꐛꒆ，ꑘꀺꄐꏁꎖꄎꌠꌌꅐꇁ，ꌶꅉꀊꂥꊐꌠꇬꌷꅐꌶꌺꃅꅍꊌꌠꎍꐽꃅꄉꈭꐨꊼꇅꉀꐕ。ꇓꈓꇓꉈꀀꊿꅉꀨꃀꌠꀨꎹꄜꏂꀧꄹꏦꏓꋍꃱꃅꄉ，ꎆꏂꑘꎞꆏꊿꅉꀨꃀꌠꀨꎹꎆꑞꅉꉈꑴ10％ꉀꐕ。ꀊꏀꃅꏦꀧꃅꐙꌠꑘꒃꀀꋦꋉꃆ740ꃪꂷꋈꇬ，ꀑꐱꃅ511ꃪꂷꋈꄻꐛ。ꐊꑷꃅꋋꇅꇬꈭꋏꇇꀨꄹꏦꄻꄉ，ꇓꈓꇓꉈꀁꂥꀧꎕꏦꂱꄷꃅ9.97%ꌋꆀ14.1%ꉀꐕ，ꄣꅐꂽ、ꇏꃅꀑꇬꁮꌠꇨꊨꏣꑟꌋꆀꂽꄻꇈꀱꇁꊿꀉꆹꑠꂴꄉꌌꈲꏿꌠꊜꀠꅲꇫꇲꄻꌠꌋꆀꐥꐨꇇꀨꁥꎆꎕꏦ20％ꈋꉐꉀꐕ。
ꐪꊛꄉꉙꂘꐽꊯꐨꊥꎆ。ꊋꀥꇱꄉꌢꎭꃅꄷꋭꑘꉙꂘꊋꁧꌠꌶꅉꋈꄻ，ꑱꈐꎆꏣꌢꎭꊋꋠꌠꌶꌺꎆꃀꇇꀨꑞꅉꉀꐕ，ꇩꏤꌶꄻꇇꀨꉚꎆꇇꀨꎕꏦꀊꐯꈭꃅꉀꐕ。ꐧꊐꌠꃅꑘꌶꅉꌶꁌꀋꈁꃅꇇꀨꎆꁥꇱꌠꏱꁈꍔꐯꌊꌕꈎꇬꑟꄉ。ꋭꑘꉙꂘꀋꎖꃅꈛꑌꅉꇬꄉꄯꒉꌷꌠꏱꁈꌫꄻ，ꌜ28ꂷꇬꆏꂿꑘꇮꃅꊿꐊꐺꌠꌺꇖꆏꇁꇫꑟꅉꄉꌶꅉꀊꂥꌠꇬꎖꉚꌠꇬꐊꄉꎖꉚꌠꃅꇫꑟꀐ。ꌢꎭꃅꄷꂿꑘꁡꇤꌶꌺꀋꂿꑘꌠꌶꅉꀊꂥꊐꌠꇬꌷꆹꌠꊻꂷꆏꊛꄉꑍꈓ10％ꈋꉐꉀꎆ。ꊋꇤꇈ，ꇩꏤꑭꊂꏱꎆꐨꐥꌠꉙꂘꌫꎆꌬꐨꆏꇩꈐꒃꅐꈁꉬꁌꐨꍆꐪꄩ4％ꐂ。
ꃹꅼꃅꆅꉁꁬꋌꁦꎴꆄꄻꄺꀱꀻꎆꌠꄹꎆ。ꇓꈓꇓꉈꀀꊿꆅꀉꇨꄜꏂꀧꃅꉚꅉꍔꐯꅷꌜꈧꌠꇬꑟꌐ，ꆄꈻꋋꇅꃅꊜꄻꈭꋏꇇꀨꄹꏦꀑꐱꃅꄻꄉ，ꉹꁌꈀꐥꌠꃅꆅꉁꄜꏂꀧꉱꑷꐨꆏ95％ꐂ。ꅉꂫꊐꌠꆅꉁꁦꎴꆄꄻꏲꉻꏓꇱꄺꀱꌠꃹꅼꈴ，ꑤꑣꋂꁧꃤꃅꈄꏍꀒꁨꋍꁘꃅꄻꐛꒆ。ꉻꄻꆅꉚꅉꄺꀱꃅꉚꑤꏃꆏ1300ꎖꂷꇬꑟ。
ꏣꀋꑌꃅꁱꀕꌤꑘꌋꆀꁱꀕꅐꑘꀻꎆ。ꁱꀕꉹꁌꈲꁵꐘꃆꀉꒉꀊꂾꌠꋈꄻꌠꄹꎆ，ꅇꁊꄆꁱ“ꋂꃅꐥꈴ”ꌠꋉꃆꌌ“ꑱꁯꈁꐥꃅꐥꈴ”ꌠꊐꐕ。ꁱꀕꋽꇐꅐꇐꅧꌃꄐꇐꃄꄻ，ꀋꃋꋋꄮꁱꀕꃷꎏꉻꑫꄻꐛꒆ。ꉹꁌꈯꎟꃅꈧꌠꍅꁍꀕꃅꃄꇰ，ꊋꐛꃅꇂꏢꌠꏀꉪꒀꉼꀞꄻ。
ꉬꆏꐧꋦꏱꄻꌠꏀꀺ，ꐮꄮꎍꐽꌠꊥꎆ。ꉪꊇꆏꋭꋽꃅꋌꐛꉮꌸꌠꌋꆀꉘꀋꇉꃅꌤꅐꌠꊝ，ꊱꁨꃅꐧꋦꐮꄙꐨꋊꄻ，ꉺꏦꋈꄻꐛꒆ，ꇁꀦꄴꏮꌠꊋꇨꇱ，ꏓꂱꀑꇬꋬꂻꌠꏦꀧ，ꐧꋦꐥꀹꉾꃪꌠꀧꌋꃅ。
ꀋꉊꄻꈎꒊꆈꇐꄆ、ꏢꇵꑠꃅꄷꇬꊼꇅꀉꇨꃅꃄꇙꄉ，ꉪꊇꋋꇅꃅꇿꋌꐥꃅꃄꇙꉮꌸꈭꋏꄉ，ꉮꌸꊂꋈꀱꄺꀱꌠꁣꀋꐥꃅꄹꎆ。ꏣꀋꑌꃅꃏꍏꇇꀨꄉꀆꀨꇁꆄꁮꃆꂮꄘꄻ，ꇿꋌꐥꃅꆄꁮꃆꂮꈏꃹꇁꌠꄴꍅ。ꊋꀥꇱꄉꋬꂻꒃꅐꌠꌤꃅ，ꌤꅐꀑꐱꃷꁨ、ꌤꅐꀉꒉꀊꂾꌠ、ꀋꂿꑘꉹꑘꌤꅐꌠꊛꄉꀁꋌꊰ。ꊋꇤꄉꋠꇐꍍꆀꌠꏱꄻ，ꋠꇐꁬꋌꆰꋌꉮꀋꐥꌠꃅꒊꃅꇁꀑꐱꎍꐽ。
ꉪꊇꆏꊋꀉꒉꃅꇤꄉꏦꈴꏲꑘꃅꌠꄹꎆ，ꇩꃷꑼꆏꇩꏤꑭꊂꏓꄊꎮꊈꉼꏭꉉꄉꋠꇐꉮꀋꐥꏦꃤꑠ15ꐘꏤꄻꄺꀱꄷꇖ，ꎆꏂꑘꈴꌗꀨꈴꋋꇅꌬꃷꋪꑠꏲꑘꏦꇗ38ꐘꏤꄻꄺꀱ。ꏲꃆꄇꄜꋊꌠꃹꅼꃅꄹꎆ，ꍔꃚꀋꂿꑘꌠꏤꁈꌋꆀꏱꁈꆏꇶꏦꀉꑌꑵꃅꌌꐧꋦꏭꀊꐯꈭꃅꉜꐨꅱꄻ。ꌕꃢꌠꇩꏤꑭꊂꎆꏣꁊꈴꃅꍤꄻꌠꃅꌐ。ꅇꎹꅇꅲꌤꃅꄹꏦꄺꀱ。ꏦꃤꇇꀨꈍꈐꀁꂥꀧꉹꁌꇬꄉꍔꐯꌊꊌꎆꀁꑌꌠꉹꁌꇬꑟ。ꊋꀥꇱꄉꇓꈓꇓꉈꋥꁕꋈꄻ，ꉹꑘꏓꈉꃼꇇꏓꈉꑠꐧꋦꎀꍹꇖꑵꌠꈛꎂꃅꁰꄻꄉꌠꃅꇫꑟ。ꏦꇨꃅꋍꑞꋍꑵꑽꃤꐆꐺꌠꅥꍅ，ꐧꋦꋬꂻꏓꇱꏱꄻꌠꀥꇱ，ꇩꏤꋬꂻꌋꆀꋍꏅꋬꂻꌠꀧꌋꃅꄉꀐ。
ꉪꊇꏦꇨꃅꄈꍏꑷꏤꐪꉆꏢꌠꉌꊈꃄꌬ，ꌃꈌꈬꃅ“ꃅꇏꇖꑵꌠ”ꋊꍬꎼꇁ。ꏦꇨꃅꇩꃷꑼ“ꏤꐪꌕꐘ”ꌠꃄꌬ，ꍔꃚꃤꃅꐙꌠꑳꂿꇤꂿ、ꌤꏲꅉꌤꑘꌤꃅꅉꌤꃅꊿꃷꁨ、“ꌕꉻ”ꌫꎆꇿꋌꐥꃅꋎꍅꄉ。ꏲꑘꍞꊟꌠꌋꆀꍤꌗꍞꊟꊋꃤꀉꒉꃅꇱ，ꄈꃅꇏꎴꏲꋈꄻꌠꌋꆀꍹꈔꏭꁎꉈꈽꌠꄹꎆ，ꏦꇨꃅꇗꐆꏦꐆꃣꈌꍤꀞ，ꍹꈔꊿꌌꅓꀞꄡꑟꈨꌌꅓꀞꀐ。
ꉪꊇꏟꈯꃅꀉꒉꀊꂾꏱꁈꏁꁈꃄꌬꌠꒃꉇ，ꎔꎗꃅꍞꍤꌠꃅ，ꌕꁁꏯꌠꁳꄤꎖꌋꆀꐧꋦꁳꈋꍣꎻ，ꎴꈲꉺꏦꋈꄻ，ꊋꑌꃅꋍꑞꋍꐘꌤꃅꌠꊥꎆꀐ。
ꋍꈓꅑꅸꇁꌠ，ꉇꉻꑌꑲꌤꃅꌠꊌꐨꀉꑌ。ꑮꏣꀻꍗꑮꏤꇩꏤꏲꌋꈧꌠꇩꏤꀉꑌꂷꅲꇫꁧ，ꇩꏤꑍꊏꂷꏓꉻꏲꌋꀑꋾꃀ、ꏂꊖꇩꏤꏲꌋꐮꂿꌠ、ꎮꉰꇷꃅꎀꍹꀑꋾꃀ、ꄏꑸꇷꃅꏲꌋꑭꊂꃀꈿꌠ、ꑸꉩꀑꋾꃀꈿꌠ、ꄊꊉꌦꉉꈻꅉꑠꀉꒉꀊꂾꌠꃅꈧꌠꇬꐊꄉꈿ。ꐛꒆꃅꑸꄠꎆꏣꎀꍹꑍꊏꑋꃢꌠꏲꌋꑌꀋꐚꃅꃀꈿꌠ、ꑸꍏꐮꉌꒊꇖꃢꌠꀑꋾꃀ、ꀨꉪꑸꍏꉉꈻꅉꀞꄻ。ꏣꀋꑌꃅꀉꑌꁁꏯꉺꏦꋈꄻꌠꌋꆀꇩꏹꏥꏦꏤꄻꌠꃅꈽ。ꇩꒉꉇꉻꑌꑲꌠꎍꐽꃅꀒꁨꆹ，ꈭꇍꉇꉻꑌꑲꌠꐛꐨꀊꏀꃅꐙꇁ，ꀻꎆꇰꌠꇩꏤꇷꃅꌠꁨꎆꐨꀊꏀꃅꐥ，ꎆꏣꉇꉻꑌꑲꌠꊌꐨꄇꇖꀕ。ꏦꍠꈝꃀꎆꏣꋥꁕꌋꆀꃅꋊ21ꋎꌠꎿꄩꏦꍠꈝꃀꋈꄻꌠꄹꎆ，ꑸꍏꅉꃀꉁꈾꎆꇱꑴꉴꋈꄻꌠꊭꄎ，ꏦꍠꈝꃀꎆꀨꄻꄉ。ꉪꊇꌋꆀꇩꏤꈧꌠꒈꇁꇷꃅꌠꀊꅰꃅꉾꃪꇁ，ꍏꇩꆹꇩꏹꀂꏽꆏꆽꎍꆸꄜꄐꌠꇩꏤꀉꒉꂷꉬꌠꉻꑊꋍꑍꉚꋍꑍꃅꄇꇖꀕꇁ。
ꁧꎁꊈ！
ꋍꈓꅑꅸꇁꌠꈁꊌꌠꊌꐨꆹ，ꐋꀨꑮꏣꀻꊝꎻꏹꃅꄉꌠꄈꍏꑷꃅꇴꄉꉻꏓꏲ、ꈆꑪꃅꁈꏤꌠꇬꄉꊌꅜꌠꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꃅꐯꇯꊋꇤꏡꇤ、ꀋꆏꃅꉈꈽꄉꊌꅜꌠꉬ。ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠꏭ、ꏓꂱꏓꉻꈁꐥꌠꌋꆀꋍꑞꋍꁆꏯꊿꂒꋦꌠꏭ，ꉌꊨꈬꇱꃅꈀꎭꀕ！ꑣꇤꇣꋲꏱꅉꐎꃺꑌ、ꉪꂱꇣꋲꏱꅉꐎꃺꑌ、ꄠꃪꃺꑌꌋꆀꎿꉈꀀꌠꃺꑌꏭ，ꉌꊨꈬꇱꃅꈀꎭꀕ！ꍏꇩꐛꏀꈴꋈꄻꌠꌤꑘꇬꉈꇬꌠꌋꆀꊋꄏꌠꇩꏤꈁꐥꌠꍔꃚ、ꇩꏹꎀꍹꌋꆀꇩꏤꈁꐥꌠꐋꀨꏭ，ꉌꊨꈬꇱꃅꈀꎭꀕ！
ꉪꊇꆏꊌꐨꑌꉜꄉ，ꀊꅰꃅꀒꁨꆹꌠꇬꊋꋠꌠꌋꆀꊝꐨꑌꉜꄉꌶ。ꎆꇱꉀꎆꊋꀋꑌ，ꌬꈧꊷꈌꀊꏀꌠꀊꀋꑌ，ꇩꏹꃷꎏꀉꒉꃅꄓꀋꆹ，ꎍꐽꃅꉀꎆꆹꌠꊋꋠꐨꀉꒉꇁ，ꋍꈨꁁꏯꄡꇗꐔꈔꉆꐨꐥꑴꌦ。ꇮꑘꅐꇐꁌꏤꀋꆏꃅꀁꋌꊰ，ꒃꅐꐊꇐꀨꊰꉀꎆꆹ，ꐭꀄꊭꎆꏂꑘꎆꏓꊋꋠꎆꏓꁌꇨꌤꃆꑓꅐꎑꎍ，ꎆꏂꑘꒃꅐꀰꏢꊋꋠꐨꁦꎆ。ꎆꏣꀻꎆꃄꄟꄡꇗꊼꇅꆘꉾꃅꐙ，ꏀꀺꊋꃤꀋꇎ，ꅏꊋꁦꎆꇨꌠꌤꃆꑓꅐꎑꎍ，ꂿꑘꅉꀨꀁꁧ。ꉹꁌꆹꆅꉁꆄꄻ、ꃀꌠꀨꎹ、ꀀꑳ、ꈭꈜ、ꂘꑘ、ꊌꐨꁷꄻ、ꋠꇐꉮꀋꐥ、ꐧꋦꋬꂻꏱꄻꑠꇬꉌꀋꃹꅉꀉꑌꈨꐥꑴꌦ。ꃅꄷꈨꇬꋦꈭꍍꆀꇨ，ꀉꒉꀊꂾꌠꋬꂻꌤꅐꌠꋍꇅꋋꇅꇫꅐꇁ。ꍔꃚꌤꃅꌊꀋꇎꀋꂪꅉꐥ，ꏱꁈꏡꁈꋍꈨꆹꃄꌬꑞꅉꀋꑟ。ꍔꃚꌤꃅꅉꌤꃅꊿꀁꑌꈨꃄꈌꄐꃅꃅ，ꍹꈔꌤꃆꈨꌞꉌꅗꑓꏢ，ꊿꄹꁆꇜꄻꂿꄐꀋꐥ，ꇜꄻꇜꌤꀋꃅ，ꀞꋭꌠꌤꀋꀞ。ꉪꊇꆏꊒꆽꀕꃅꌤꃆꊝ，ꐥꌒꄮꇬꃨꆰꌠꎺꌶ，ꑘꒃꄮꇬꌽꂰꌠꎺꌶ，ꃤꒃꆸꄜꀬ，ꐩꋊꂿꃆꄸꀋꄀ，ꏓꂱꊋꁠꎲꀋꋠ。
ꑍ、2015ꈎꌤꃅꌠꀑꐱꄐꐨ
ꉪꇩꏤꆹꋧꃅꇣꄧꇬꀻꎆꇰꌠꇩꏤꀉꒉꇊꀉꒉꂶꌠꉬ，ꐧꋦꉪꏦꉘꃀꊬꌠꇬꎍꑴꌦꄷꀋꁧꋌꊂꀊꉗꏢꇬꄚꃹꎍꑴꌦꌠ，ꀻꎆꌠꆹꇗꅉꀉꇨꌠ，ꋋꆹꌤꃆꈁꐥꌠꂥꀘꌠꅉꃀꌋꆀꊨꊭꉬ。ꋍꑞꋍꑵꐮꄙꐨꌋꆀꐔꈔꉆꐨꋊꄻꇧꎭ，“ꐧꊐꌠꊌꎆꑍꉙꅉ”ꄩꐂꈳꅐ，ꐛꏀꈴꌠꃅꇫꑟꌠꆹ，ꊇꅉꇬꆏꐯꇯꀻꎆꌠꉘꇉꄻꅐ，ꀻꎆꌠꆏꀋꎪꃅꋭꋽꌠꉀꎆꐳꐨꐥꌶ。ꋍꈭꐨ，ꉪꇩꏤꎆꏣꀻꎆꌠꐛꐨꀊꏀꌠꇬꃹꆹ，ꇬꊎꁦꅂꄹꐂꈜꀸꇬꃹꎍ，ꏦꉻꉺꏦꀋꍑꅉꌋꆀꐛꉻꃅꐙꌠꐮꄙꐨꆹ“ꈜꇈꆿꃀ”ꐛ，ꃹꅼꃅꎆꏣꐛꉻꄺꀱꌋꆀꋊꄻꌠꀋꃅꑲꆏꎍꐽꃅꀻꎆꌠꃅꇫꑟꀋꄐ。ꉪꊇꀋꎪꃅꀋꇙꀋꑐꃅꎆꏣꋈꄻꌠꌌꈯꄟꃅꄉꌠꌭꈬꇬꎷ，ꃶꐚꃅꀻꎆꌠꌅꈌꌬꇩꏤꌄꆣꂿꃆꀨꎍꋌꐘꒃꉇꋒꌶ。ꀋꎪꃅꄺꀱꌠꉘꇉꄉꈆꑪꃅꀻꎆꄹꇙꌠꄝꏯꇁꄡꎽ，ꐳꃅꎆꏣꀻꎆꃄꄟꆹꏮ，ꊇꁧꐥꅐꐨꐥꃅꐪꊛꄉꀻꎆꉆꌠꃅꇫꑟ。
ꀋꃋꋋꇅꇬ，ꋧꃅꎆꏣꆹꃹꅼꃅꄺꀱꌠꇬꎍ，ꀱꄓꇁꌠꇙꊋꀋꇎ，ꃅꈋꍔꍞꐮꑌꑲꐨꁦꎆꇱ，ꏤꀋꁨꐊꊈꁦꎆꄉ，ꄹꇙꉀꎆ、ꃅꅍꁵꌠꁦꎆꇱ、ꐛꉻꋊꄻꌠꆹꇩꏹꐧꋦꉜꐨꐮꐊꌠꐛꀐ。ꉪꇩꏤꎆꏣꀁꋌꊰꒉꍅꊋꉈꑴꀉꒉꇰꑴꌦ，ꀻꎆꄮꇬꃹꅼꊐꌠꐮꄙꌠꑓꀠꀕꃅꇫꅐꇁ，ꎼꈎꉪꊝꌠꊋꋠꌠꀋꉊꄻꈎꒊꀋꋌꏭꐛ。ꋍꈭꐨ，ꉪꇩꏤꀻꎆꌠꆹꄡꇗꇨꃅꃅꄎꌠꄐꇐꀋꂿꑘꌠꊜꋽꄮꊬꌠꇬꎍ，ꊋꂫ、ꃄꄻꉆꌠꌋꆀꏭꄻꉆꅉꀉꒉꐯꀉꒉꃅꐥ。ꀊꏀꉹꌠꇮꑘꈴ、ꈴꌗꈴ、ꇓꈓꏦꎫꐛꈴ、ꂿꑘꐛꏀꈴꌠꊛꄉꄹꎆ，ꀻꎆꅉꃀꋍꑍꉚꋍꑍꃅꀉꇨꊋꑌ，ꄺꀱꈲꊌꌠꇬꊎꀖꃑꅐꇁ，ꉻꒉꋊꄻꌠꎖꋪꉾꐯꉾꌠꏓꊭꄉꀐ。ꉪꊇꆏꀋꎪꃅꉌꐒꉪꐨꇨꃅꑌ，ꈍꃅꑌꊋꐛꇁꌠꉪꉻꐥꄉ，ꏟꈯꀕꃅꀻꎆꌠꑴꇙꌅꈌꒃꌫꄉꌶ。
ꀊꏀꈒꌠꆹꐊꑷꃹꅼꃅꄺꀱꌠꀋꉬꀋꉆꈒꌠꉬ，ꐊꑷꃅꏦꈴꇩꏲꄹꎆꌠꇫꇬꈒꌠꑌꉬ，ꉈꑴꉀꎆꎍꐽꐛꉻꋊꄻꀋꉬꀋꉆꈓꌠꑌꉬ。ꍔꃚꌤꃅꌠꀑꐱꇖꐨꆏ：ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ，ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌌꄐꇺꅍꃅꄉ，ꐊꑷꃅꄈꅿꊰꉆꃢꃀꀉꒉꈿꌠꌋꆀꊰꉆꈭꌕꃢ、ꇖꃢꐊꈴꃀꈿꌠꉌꊈꃄꌬꈴ，ꑮꏣꀻꊝꎻꏹꉉꅇꀋꂿꑘꈧꌠꉌꊈꃄꌬꈴ，“ꐊꑷꃅꇖꏢꌠ”ꄐꇐꄐꇺꌠꇬꈴꄉ，ꑴꇙꃅꎆꏣꀻꎆꐛꄟꀊꏀꌠꄐꊒꌋꆀꄐꏁ，ꎍꐽꃅꀒꁨꆹꌠꌤꃅꀑꐱꅉꃀꉉꈌꌭꈬꇬꎷ，ꎆꏣꌫꄻꌊꋭꋽꌠꇢꊭꇬꐕꄉꇬꎷ，ꊋꇤꄉꎆꏣꀻꎆꊇꁧꌋꆀꈲꁧꉀꐕ，ꃄꄟꆹꏮꐛꉻꋊꄻꌠꌌꀊꅰꀋꂿꑘꌠꉆꈉꇬꐕꄉ，ꏟꈯꃅꄺꀱꈢꇓꀖꌠꒃꉇ，ꏀꀺꄹꇙꌠꑓꅐꎑ，ꐔꈔꄴꋏꌠꊋꇨꇱ，ꊋꀥꇱꄉꉹꁌꐥꐨꏦꀧ，ꄺꀱꀻꎆꎍꐽꌠꐮꃆꂮꂥꀘꋒ，ꐊꑷꃅꐧꋦꉪꏦꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻ、ꒆꉻꌧꑳꋈꄻꌠꄹꎆꄉ，ꎆꏣꎍꐽꉾꃪꃅꀻꎆꌠꌋꆀꐧꋦꐮꄮꎍꐽꌠꊥꎆ。
ꉪꊇꆏꀑꐱꇖꐨꒃꌫꋒꌶ，ꑓꏮꎆꏣꇬꐳꐯꐳꃅꉀꎆꌠꌋꆀꐧꀠꀊꂥꊐꌠꑟꐨꉜꄉꆹꌠ“ꑍꁻꌐ”ꇬꉜꄉ，ꎍꐽꏱꁈꎍꐽꄐꄉꌠꌋꆀꄺꀱꊥꎆꐛꉻꋊꄻ“ꑍꐊꐙ”ꌠꌭꈬꇬꎷ，ꋍꏅꑘꀺ、ꈀꄸꑌꏀꀺꌠꌋꆀꄉꉻꅐꇐꁦꎆ、ꄉꉻꁧꃤꃅ“ꑍꈻꏁ”ꌠꄺꑣꄉ，ꀻꎆꐳꐨꋊꄻꆹꐨꀁꋌꀋꊨ、ꃷꁨꀉꑌꊇꁧꀊꅰꉾꃪꌠꄹꇙꄉ，ꍏꇩꎆꏣꊇꁧꉀꐕꈲꁧꁦꎆꌠꊐꐕꌠꃅꇫꑟ。
ꎼꈎꎆꏣꐧꋦꀻꎆꄐꄉꑞꅉꁻꌐꀋꉬꀋꉆꌠꆏ：ꇩꈐꒃꅐꈁꊌꁌꐨ7％ꀑꂪꉀꎆ，ꀀꊿꌬꈧꁌꏤꉀꄓꌠ3％ꀑꂪꑟ，ꇓꈓꏦꎫꃅꅍꁵꀊꏀꃅꁦꎆꌠꊿ1000ꃪꑻꈋꉐ，ꇓꈓꏦꎫꃅꑘꀋꊌꐨꁱꄉꌠ4.5％ꈋꈐꄉ，ꈏꃹꉇꅐ6％ꀑꂪꉀꎆ，ꇩꏹꊌꌬꐨꀑꐱꃅꐮꆽꏣ，ꀀꊿꊌꐨꉀꎆꌠꌋꆀꎆꏣꀻꎆꌠꐮꐊꐙꎻ。ꄐꊋꃹꐨ3.1％ꈋꉐꀁꋌꊰ，ꀋꉬꀋꉆꌠꍍꆀꅍꋊꃑꐨꐪꊛꄉꊨꒊ。
ꎆꏣꉀꎆꄐꄉꇬ7％ꀑꂪꄉꌠꆏ，ꈉꐨꌋꆀꇫꑟꏭꐛꌠꉪꏢꀐꌠ，ꐊꑷꃅꊼꇅꌣꈚꐧꋦꋉꐛꌠꑞꅉꁻꌐꌋꆀꐮꊪꊛꄎ，ꎆꏣꈁꉬꃷꁨꍔꒉꌠꌋꆀꐛꉻꊐꐕꇖꐨꌋꆀꐮꄉꄐ，ꀻꎆꈳꏦꇬꄐꊒ，ꋌꐛꃶꐚꌠꇬꄐꊒ。ꐳꐨꋍꃅꐙꌠꌌꊼꇅꀊꎴꑠꊭꃅꀻꎆꅷꁧꇬꆏ，ꐛꏀꈴꃅꇫꑟꇬꐥꇐꅉꃀꀊꅰꇎꄻꃅꐥꇁꄎ。ꎍꐽꃅꉀꎆꌠꆏꃅꅍꁵꏦꀧꌠꎁꃅꌠ，ꁧꃤꃅꑘꍆꁧꉀꐕ、ꎆꏂꑘꀄꊭꐭꉹꌠꁦꎆꇁꌠꌋꆀꎆꏣꏓꄜꃷꁨꀊꅰꃅꀉꒉꇁꄉ，ꐳꐨ7％ꀑꂪꆏꃅꇫꑟꄎꄉꃅꅍꆏꊼꇅꎹꁵꄎꌐꌠꉬ。ꃅꄷꈧꌠꆏꃶꐚꐛꐨꇬꈴꄉ，ꏣꀋꑌꁨꆹ、ꊋꂫꅤꀖꄉ，ꊋꇤꄉꊌꐨꀊꅰꉾꃪꌠꎹꅜꄎꌶ。
ꎼꈎꍔꃚꌤꃅꋒꇬ，ꄚꐰꋋꌕꍈꒃꉇꋒꌶ。
ꋍ，ꉻꒉꎆꏣꏱꁈꎍꐽꌋꆀꄻꃪ。ꐪꊛꄉꏣꀋꑌꌠꏱꎆꏱꁈꌋꆀꎍꐽꉾꃪꌠꎆꃀꏱꁈꃄꌬ，ꀊꅰꃅꂴꋊꍬꀄꊭꃅꋊꍬꌠꉜꁨ，ꀊꅰꃅꍜꐥꃅꋊꄻꌠꉜꁨ，ꉀꎆꃷꁨꌬꋒ，ꊭꊎꃷꁨꀰꏢꋒ，ꀋꉬꀋꉆꌠꊋꁧꅉꊋꄏ。ꉻꐭꍄꑐꊋꃤꌌꉻꒉꎍꐽꌠꄘꄏ，ꇲꁵꏀꀺꌠꌌꈉꐨꍔꒉꌠꏃꇙ，ꐛꉻꋊꄻꌠꌌꈁꉬꃷꁨꐮꆽꏣꌠꊥꎆꄉ，ꎆꏣꌫꄻꌊꋭꋽꅉꇬꄉꌶ。
ꏣꀋꑌꌠꏱꎆꏱꁈꆏꊋꇱꄉꈲꁧꁦꎆꎻ。ꎼꈎꏱꎆꌫꁌꇔꌠꄐꁆꌌ1.62ꃪꂡꂷꃅꄉ，ꀋꉊꄻꈎꄩ2700ꂡꂷꁦꎆ，ꌫꁌꇔꐨꀋꉊꄻꈎ2.1％ꇬꄉꉀꐕꌊ2.3％ꇬꑟ。ꄚꈐꏭ，ꍏꑷꏱꎆꌫꁌꇔꌠ1.12ꃪꂡꂷ，1700ꂡꂷꁦꎆ；ꃅꄷꏱꎆꌫꁌꇔꐨ5000ꂡꂷ，1000ꂡꂷꁦꎆ。ꎝꃆꏲꂠꌠꌋꆀꎍꐽꃅꉀꎆꌠꐮꃆꂮꂥꀘꋒ，ꃅꄷꍔꃚꎝꁭꎆꏓꉺꏦꏀꀺꌋꆀꄻꐛꒆ。ꋭꋽꃅꌐꐘꎝꊫꌐꃑꌬ，ꇎꏦꇬꄐꊒꌠꇬꊎꋈꄻꌠꐘꃆꊛꄉꎆꏓꄻꄎꌠꏦꀧ，ꐔꈔꉮꐴꄴꏮꌋꆀꋊꄻ。ꏱꎆꌬꐨꐛꉻꄻꃪꈴ，ꊋꇤꄉꎆꃀꊭꊎꄉꌠꀰꏢꋒ，ꌫꄻꅐꐨꉀꐕ。ꐪꊛꄉꐛꉻꃅꐙꌠꇗꏸꊨꌠꌋꆀꁊꈴꃅꌫꎆꀁꋌꒊꌠꃄꌬ，ꀒꁨꋍꁘꃅꎆꏂꑘꈜꀕꇈꀄꊭꐭꌠꎆꏂꑘꀵꃤꊨꒊ。
ꎍꐽꉾꃪꌠꎆꃀꏱꁈꆏꏯꏸꄉꄐꃅꄉꌶ。ꐊꐯꎆꃀM2ꄐꄉꇬ12％ꀑꂪꉀꎆ，ꃶꐚꃅꈧꄮꇬ，ꎆꏣꀻꎆꈉꐨꇬꈴꄉ，ꊼꇅꀊꂥꑌꉆ。ꉻꒉꉌꋧꃅꏲꂠꌠꀥꇱꌋꆀꄻꃪ，ꊝꈭꃅꃷꎏꀰꏢ、ꇔꊰ、ꊭꊎꎆꄐꏤꎆꀨꇔꊰ、ꉈꑴꉚꎆꑠꄇꄜꋊꌠꎆꃀꏱꁈꌫꉂꌫꈾꌬꄉ，ꎆꃀꎆꇱꎆꉛꌠꌋꆀꐧꋦꎆꏓꎆꊭꄉꈁꎍꐽꃅꉀꎆꎻ。ꐳꃅꎆꃀꏮꌬ，ꎆꇱꎆꉛꐛꉻꄻꃪꈴ，ꈛꎂꃅꎆꏓꎆꊭꍆꐪꉀꐕ，ꐧꋦꎆꏓꎆꊭꎆꀨꀁꋌꊰꄉ，ꀊꅰꀉꑌꌠꎆꒉꎆꇁꁳꎆꏣꐥꄜꇬꃹꆹꎻ。
ꑍ，ꎍꐽꉀꎆꌠꌋꆀꐛꉻꋊꄻꌠꐮꆽꏣꄉꎻ。ꉪꇩꏤꀻꎆꌠ“ꌕꊭꐮꄅ”ꐮꄙꌠꊝ，ꅐꀦꋦꈭꏢꑲꌠꀊꅰꃅꀉꒉꇁ，ꑘꃅꊋꃤꑠꐊꊈꎆꀨꉀꎆ，ꀉꇨꃅꎆꇱ、ꀉꇨꃅꃸꄻ、ꃷꁨꍔꐯꉜꁨꇨꌠꀻꎆꃄꄟꊛꄉꃅꅷꁦꊋꄉ，ꀋꎪꃅꎆꏣꎍꐽꉀꎆꌠꇬꄉꐛꉻꄻꃪꌶ。ꐳꐨꑌꌌꎍꐽꄉ，ꎆꏣꁳꎍꐽꃅꌫꄻ，ꀀꊿꃅꅍꊌꌋꆀꊌꐨꐪꊛꄉꁦꎆ，ꐛꉻꋊꄻꃄꄟꆹꏮꌠꎁꃅꇎꏦꈲꁧꐥꌠꀹꄻ；ꉈꑴꐛꉻꑌꋊꄻꄉ，ꎍꐽꃅꉀꎆꌠꅉꃀꄻꈫꈈꌶ。ꎥꃪꀖꁉꎆꁦꎆꃅꇱ，ꈁꉬꐊꊈꒃꅐꐨꉀꐕ，ꊋꀥꇱꄉꊇꁧ、ꎕꏦꌋꆀꅐꇐꂓꅑꌠꋈꄻ，ꁧꃤꃅꑘꌋꆀꄐꇐꃅꐙꌠꏀꄓꅐꑘꍆꐨꉀꐕ、ꑟꐨꊐꐕꌠꊥꎆ，ꎆꏣꀻꎆꈥꈉꐛꊂꄻꃪꈴ，ꐳꃅꀊꏀꌠꉀꎆꅉꌋꆀꉀꎆꊧꉘꉚ，ꀻꎆꌠꇬꄉꊐꐕ，ꊐꐕꌠꇬꄉꀻꎆꌠꃅꇫꑟꌶ。
ꌕ，ꎆꏣꐧꋦꀻꎆꇙꊋꀊꏀꌠꉘꉚꌋꆀꊥꆷ。ꀋꃋꋋꇅꎆꏣꉀꎆꌠꋊꃅꐥꌠꇙꊋꀁꋌꊰꇁ，ꀋꎪꃅꐛꉻꃅꐙꌠꄺꀱꊋꃤꀉꒉꃅꇱ，ꐳꃅꏀꀺꄹꇙꀻꎆꄐꇐꃄꌬ，ꋊꃅꐥꌠꈺꄙꅍꄺꀱ，ꈺꄙꅍꀊꏀꌠꄺꑣ。ꋍꁁꏯꆏ，ꄉꉻꅐꇐꌋꆀꁧꃤꃅꇲꁵꌠꁦꎆꇱꌶ，ꍔꃚꂘꑘ、ꁦꎴꆄꄻꑠꏯꎆꀉꒉꃅꇱ，ꐧꋦꇫꃅꈽꌠꊋꊡ，ꇲꁵꅐꐨꉀꐕ。ꋋꆹꀋꇎꅉꇬꅋꑣ、ꉹꁌꐥꐨꈲꊌꑌꄐ，ꉈꑴꈉꐨꍔꐯ、ꀻꎆꊥꎆꌠꇬꑌꈲꏣꐥ。ꉈꋍꁁꏯꆏ，ꋍꏅꑘꀺ、ꈀꄸꑌꏀꀺꌠꄹꇙꌶ。ꋋꆹꃅꑘꊌꌠꍔꐯ、ꀀꊿꊌꐨꉀꎆꑌꉆ，ꉈꑴꐧꋦꀏꄉꄩꇙꐺꌠꌋꆀꎃꊒꑗꉬꊥꎆꌠꇬꑌꈲꏣꐥ。ꉪꇩꏤꆹꊻꂷ13ꂡ、ꑘꁨꊋꃤꅐꀦ9ꂡꐥ，ꏓꂱꈪꑌꇈꀑꁮ，ꀹꄻꊋꃤꌐꀋꉆꃅꐥ，ꃷꎏꄙꀕꃪꀕꂷꃅꍄꑐꎼꇁꇬꆹ，ꀋꎪꃅꏓꋧꌊꀻꎆꌠꇙꊋꀉꒉꐯꀉꒉꌠꐛꌠ，ꀋꎪꃅꎆꏣꀁꋌꊰꒉꍅꊋꄘꄉꄎꄉ，ꍏꇩꎆꏣꁳꈍꃅꑌꍅꁍꀕꆹꄎꌠ。ꍔꃚꆏꀬꅑꃅꑴꅉꄺꀱꌶ，ꃷꎏꌋꆀꐧꋦꏭꈥꈉꇎꃅꊏꄉ，ꀋꈐꀋꉈꃅꋓꅔꌠꎁꃅꃄꅉꄺꅉꋈꄻ。ꑴꅉꌋꆀꎆꏂꑘꆏꀬꅑꃅꑘꀺꏀꀺꌶ，ꐧꋦꑭꊂꃅꀊꅼꃅꑘꀺꏀꀺꁱꀕꉘꉚ，ꃰꊿꁳꄉꁨꇐꁧꀿꅉꇬꄉ，ꀊꅰꉾꃪꃅꉌꊈꎹꈹꌠꌋꆀꑴꅉꁌꐨꃅꇫꑟꎻ。ꎼꈎꆹ“ꊰꑋꉬ”ꃅꌐꈒꌠ，ꉪꊇꆏ“ꊰꑋꉬ”ꎆꏣꐧꋦꀻꎆꁻꌐꂿꃆꃅꇫꑟꈭꐨ，ꄺꀱꌠꉌꊈ、ꏀꀺꌠꉪꉻꌋꆀꈆꑪꌠꏡꁈꌌ，“ꊯꌕꉬ”ꄐꎖꐱꀨꏤꄻꌤꃅꋒꄉ，ꋌꊂꉬꈎꌠꀻꎆꌐꉻꏂꋒꇫꋒꌶ。
ꌕ、ꄺꀱꁉꃑꌠꏟꈯꃅꄹꇙꌌꃹꅼꆹ
ꄺꀱꁉꃑꌠꆹꀻꎆꄹꇙꌠꊋꐛꉁꈾꉬ，ꀋꎪꃅꎆꏣꏦꉻꄺꀱꌌꀨꄉꐊꑷꃅꃹꅼꃅꄺꀱ，ꋍꃱꃅꄐꏤ，ꃶꐚꃅꒃꉇ，ꃅꇴꄉꉻꐨꐥꃅꄺꀱꌠꇬꄉꂵꅐꐨꀊꏀꌠꊌꅜꄉ，ꀻꎆꄐꊋꀊꏀꌠꌌꀉꇨ。
ꊋꀥꇱꄉꏲꑘꅧꊨꌅꈌꄝꃑ、ꃑꏲꐮꐊꄉꄺꀱꌠꃅ。ꎼꈎꆏꉈꑴꏲꑘꍤꄻꈌꁧꌤꐘꈨꇤꇧꎭꌋꆀꃑꀁꋌꎭ，ꏲꑘꀋꉬꌠꍤꄻꈌꁧꌠꉬꇮꃅꇤꇧꎭ，ꏲꑘꍤꄻꈌꁧꐛꏦꈴꌠꏲꂠꄹꏦꄺꑣ，ꃹꅼꃅꃼꇇꌤꃆꄹꏦꄺꀱ，ꀒꁨꋍꁘꃅꎆꀨꁱꄀꄉꌠꌌꈝꐮ，ꋍꁘꋍꁘꃅ“ꊫꄳꌕꑵꏓꋍꑵꃅ”ꌠꃅꇫꑟ，ꇢꈴꁧꃤꃅꌠꎵꄻꋊꍬ。ꃷꎏꃹꉆꀋꉾꁁꏯꃷꁨꋏꄯꒉꏤꄻ，ꌜꊐꌠꍔꃚꌅꊋꃷꁨꋏꄯꒉ、ꆽꎍꃷꁨꋏꄯꒉꄛꇰ，ꃶꐚꃅꏦꃤꌅꈌꁵꀋꄉꌠꃅꀋꉆ、ꏦꏤꃅꎁꀋꎪꃅꃅꌠꃅꇫꑟ。ꃅꄷꍔꃚꆏꌅꈌꃑꃷꎏꌋꆀꐧꋦꁵꄡꑟ，ꉱꋃꃅꃑ、ꊏꄡꄉ，ꄩꊐꌠꃑꀏꁵꌠꍤꄻꈌꁧꌤꐘꏭꆏ，ꊪꄎ、ꏲꌊꃪꌶ。ꌤꅐꄮꌤꅐꈭꐨꍞꏲꌠꊋꀥꇱ，ꎆꏂꑘꌋꆀꐧꋦꁧꃤꃅꌠꉻꑫꂷꃅꀕꌠꄻꐛꒆ，ꐧꋦꉌꒊꉻꑫꋈꄻꌠꄹꎆ，ꇩꏤꑭꊂꋍꃱꃅꌠꐧꋦꉌꒊꎃꊐꃷꂷꄹꏦꌋꆀꉌꒊꈴꌗꐯꇯꈲꊌꐮꆦꐽꈉꋈꄻ，ꏦꃤꈴꄉꎆꏂꑘꌋꆀꑴꅉꈴꌗꋬꂻꌠꀧꌋꃅ。ꌧꇗꀉꒉꌠꌌꈝꐮ，ꌅꈌꐥꇬꈁꏾꃅꌬꀋꉆ。ꍔꃚꈁꐥꊐꌠꃅꐯꇯꏲꑘꅧꊨꌅꈌꄝꃑ、ꌅꊋꆹꏮꌠꊋꑌꃅꄹꎆꌠꉺꏦꋈꄻꄉ，ꎆꏂꑘꄝꏯ，ꑘꀺꌠꎁꃅꃅꌒꐨꇲꁵ，ꐽꏡꃅꋓꈿꌠꋦꈭꄻꄉꌶ。ꏲꑘꍤꄻꈌꁧꌤꐘꈁꐥꌠꃅꐯꇯꈭꎁꄻꈝꐮꃅꄉ，ꏤꈉꊨꄅ，ꍔꃚꌅꈌ“ꊨꁈ”ꌌꄉ，ꃷꎏꍄꑐꊋꃤ“ꁧꏦ”ꀠꊊ。
ꀉꑌꊐꃅꎆꇱꎆꊙꄹꏦꄺꀱ。ꍔꃚꍤꄻꈌꁧꎆꇱꐘꃆꈍꈐꀊꐯꃅꊨꒊ，ꍤꄻꈌꁧꌅꈐꃑꀏꎭ。ꎆꇱꐘꃆꂴꄉꍤꄻꈌꁧꌠꀉꒉꃅꊨꒊ，ꐘꃆꍤꄻꈌꁧꈄꏍꇬꄉꋓꄉꀞꄻꌠꃄꌬ。ꉹꁌꈬꇬꎆꇱꃷꎏꃹꆹꌠꀊꐯꃅꄝꏯ，ꐧꋦꎆꀨꄕꊪꄉꇴꍆꌅꈌꎆꇱꎆꀨꄻꄉꌠꊋꊡ。ꍔꃚꆏꎆꇱꇇꀨ、ꎆꀨꄻꇬꇯ、ꎆꀨꄻꄉꑠꏡꁈꌬꄉ，ꐧꋦꎆꀨꎆꇱꐘꃆꀋꂿꑘꌠꄐꏁ。ꎸꈜꀻꎆꎆꀨꌬꋒꌠꌌꒃꌫꅍꃅꄉ，ꃹꅼꃅꎸꈜꎆꇱꎆꊙꌠꄺꀱ。ꅉꃀꉁꈾ、ꉻꌬꌤꑘꑠꁁꏯ，ꏣꀋꑌꃅꍔꃚꌋꆀꐧꋦꎆꀨꇷꃅꈁꏦꄹꌬ。
ꊜꋽꄮꒃꄉꁌꏤꄺꀱꌠꐳꃅꄹꎆ。ꄺꀱꃅꍜꆹꃷꎏꅐꀦꇱꄻꌠꇬꏤꇽꐨꐥꌠꂿꄐꋊꇤꎼꇁ，ꀊꐯꃅꍔꃚꁌꏤꏤꄻꉹꑫꌋꆀꐘꃆꊨꒊ，ꋓꅔꇎꏦꐥꌠꃷꇐꌋꆀꁧꃤꃅꁌꏤꆏꏥꏦꃅꇬꐯꇯꄝꃑꌐ。ꁬꋌꀉꑌꈮꁁꌠꁌꏤꍔꃚꏤꄻꌠꇤꇧꎭ，ꅉꀨꄉꉻꁧꃤꃅꁌꎴꁌꏤꏤꄻꌅꈌꈨꃑꀏꎭ。ꌞꇱꄆꁌꄺꀱꃅꉚꌠꍔꐯ，ꂿꑘꒉꁌꄺꀱꌠꄹꎆ，ꊋꏏꋦꈭꀧꌋꃅꁌꏤꏱꁈꄻꐛꒆ。ꅐꀦꃅꐙꌠꅐꇐꁌꏤꄻꐛꒆ，ꐊꑷꃅꀀꊿꋍꊐꋍꊐꃅꐙꌠꁌꏤꄹꏦꃄꌬ。ꋍꈭꐨꀋꎪꃅꊋꀥꇱꄉꁌꏤꍞꏲ，ꃷꎏꐥꀹꋊꍬ，ꊌꐨꀁꂥꌠꉹꁌꅉꀨꐥꐨꏦꀧ。
ꎆꐪꇗꏸꏦꉻꄺꀱꄹꇙꌠꁨꎆꐨꀊꏀꌠꊌꅜ。ꐊꑷꃅꋊꍬ、ꄇꄜꋊꂿꉆꌠꄐꌗꏲꂠꄹꏦꃄꌬ，ꏦꏤꂁꇐꃆꂮꐥꌠꈴꌗꉇꄉꈭꐨ，ꍏꑷꌋꆀꃅꄷꌤꏲꅉꈁꐥꌠꄐꌗꌗꂫꇽꌠꐯꇯꄇꄜꋊ，ꐊꑷꃅꐧꋦꁳꍞꊟꎻ。ꇩꁨꎆꀨꀰꏢꄐꌗꌠꇬꎃꐚꄉꉻꄐꌗꌠꁆꄻꇬꇯꌠꍆꁧꉀꐕ。ꐧꊬꌠꏱꎆꄐꎖꏲꂠꌠꄹꌬ。ꏱꎆꊭꊎꎆꀨꀰꏢꐛꀕꇿꋌꐥꏡꁈꏤꄻ。ꅔꈿꄉꐊꑷꃅ“ꀰꏢꇗꏸꄻꀱꌊꁌꎆꇗꏸꃅꌠ”ꃅꌐ，ꌬꈧꇗꏸꏱꁈꄻꐛꒆ，ꅐꀦꇗꏸꁌꏤꇬꈴꄉꎳꄻꌠꈍꈐꍔꒉ。ꇗꏸꎳꏲꏦꃤꄜꌊꄺꀱ。ꆹꏮꁵꄻꄹꏦꄺꀱ，ꍏꑷꌋꆀꃅꄷꇬꌤꃆꌅꈌꌋꆀꌬꐨꆽꎍꐨꄻꐛꒆ，ꋭꋽꃅꍏꑷꌋꆀꃅꄷꊌꐨꁷꑣꌠꋊꐽ。
ꏦꃤꇬꈴꄉꐧꐭꉹꌠꑴꉴꑠꎆꒉꎆꇁꏲꉻꄖꄑꌠꄹꇙ，ꋍꁯꐛꒆꑲꆏ，ꋍꁯꈌꁧ，ꃷꁨꏤꈐꀋꐥ。ꃹꅼꃅꂿꑘꁡꇤꉌꒊꎹꄺꀱ，ꑤꁕꇬꏦꊿꉆꈉꄻꎍꐽ。ꋒꃅꀖꁉꃅꐙꌠ、ꏱꁈꃅꐙꌠꎆꒉꎆꇁꁦꎆꃅꄉꉻꅐꇐꁵꄻꅉꇬꂿꄐꋊꇤꅐꇁ。ꎆꊭꄜꏂꀧꄹꏦꄻꄉ。ꇔꊰꍆꁧꃷꎏꈴꄺꀱꌠꄹꎆ，ꍏꑷꑴꉴꇔꊰꍆꁧꐼꋏꇶꏦꄻꐛꒆ。ꏓꂱꀙꎆꃀꉇꎆꀟꄻꁌꐨꋭꋽꐮꆽꏣꌠꑞꅉꇬꎍꌠꄝꏦꀋꊰ，ꏓꂱꀙꎆꃀꉇꎆꀟꄻꁌꐨꑍꁁꏯꇙꈧꍕꎇꐨꀉꇨꎻ。ꎍꐽꃅꏓꂱꀙꎆꀨꐘꃆꀟꆦꉆꌠꃅꇫꑟ，ꏓꂱꀙꎆꃀꇩꏹꌫꄻꌠꍔꒉ，ꐳꃅꏓꂱꀙꎆꃀꋮꐂꁵꄻꉻꑫꋈꄻ，ꏓꂱꀙꎆꃀꋧꃅꇣꄧꃅꍤꌗꁧꃤꃅꉻꑫꄻꐛꒆ，ꊨꏦꎆꇱꊿꋮꉈꎆꇱꃅꉚꌠꃅ，ꄮꈉꄉꄐꄮꆏ“ꎸꇤꐮꈴ”ꃅꉚꌠꃄꇬ。ꊋꀥꇱꄉꀉꑌꊐꄀꃅꐙꌠꎆꀨꃷꎏꉻꑫꋈꄻ，ꇴꍆꊫꌐꃑꄻꁱꄀꄉꄹꏦꄺꀱꌠꃅ，ꐧꐭꎆꏂꑘꇬꁧꃤꃅꌠꃄꁕꃅꐙꌠꇴꍆꌅꈌꃷꎏꀻꎆ，ꇴꍆꌅꈌꀉꑌꃅꏓꄉꎆꊙꌠꃅꌠꉚ，ꉌꒊꎆꉛꁨꇐꁌꁦꊫꌐꈴꌠꄹꎆ，ꎆꏂꑘꎝꊫꌐꃑꄻꄉꈁꍔꐯ，ꎆꒉꎆꇁꁥꒆꎊꈬꃷꎏꀻꎆ。ꀉꒉꃅꉮꌸꄜꏂꀧꌠ、ꊨꏦꇗꏸꎴꊛꄅꉹꌠꃼꇇꑘꃀꌠꀨꎹꄜꏂꀧꌠꌫꄻ。ꎆꒉꎆꇁꍞꏲꌠꏀꀺ，ꎆꒉꎆꇁꐔꈔꃨꆰꐨꄴꏮꌋꆀꋊꎵ。ꊋꇤꄉꎆꒉꎆꇁꁊꈴꃅꈲꌠꀻꎆ，ꃷꎏꀨꄜꈁꐥꌠꁳꐯꇯꄉꎆꒉꎆꇁꁧꃤꃅꌠꈲꁧꊌꎻ。
ꃹꅼꃅꇩꁨꎆꏂꑘꇩꏤꎆꀨꄺꀱ。ꊒꐯꊒꃅꇩꁨꎆꏂꑘꐯꀋꌡꌠꇬꄐꊋꄹꊨꊨꄅ，ꉹꑫꁸꄉꄺꀱꌠꄹꎆ。ꐳꃅꇩꁨꎆꀨꎆꇱꇪꌦ、ꀰꏢꇪꌦꃅꉚꌠꃅ，ꃷꎏꈴꌠꀰꏢꐽꈉꄺꑣ，ꇩꁨꎆꀨꀰꏢꑘꅐꐨꉀꐕ。ꊱꁨꃅꇩꁨꎆꏂꑘꐮꉔꁨꏦꄺꀱꌠꌫꄻ，ꎆꇱꐘꃆꇩꁨꌠꀋꉬꌠꎆꀨꈻꌊꇴꍆꇬꐊꇁꌠꊋꊡꌋꆀꋊꍬ。ꐳꃅꄆꊋ、ꇓꋌꐞꌗꑠꏦꉻꄺꀱ。ꈭꈜꀉꑌꏢꃅꎆꏂꑘꐧꋦꀞꌠꃣꁧꌋꆀꐩꋊꇬꋒꇈꌠꌤꃆꂥꀘ，ꇮꃅꊿꏦꊒꌅꈌꈲꁧꏦꀧ。ꀋꃋꋋꄮꎆꏂꑘꄹꏦꄻꐛꒆ，ꎆꏂꑘꀰꏢꊿꊋꊡꏢꑲꉺꏦꄺꀱꌋꆀꄻꐛꒆ。ꊋꀥꇱꄉꇩꁨꁨꇐꍞꏲ，ꇩꁨꁨꇐꁮꑋꌠꄴꏮ。ꃶꐚꃅꇩꁨꎆꏂꑘꀰꏢꊌꐨꈲꁧꉀꐕ。
ꉻꁨꏦꀋꉬꌠꎆꏣꆹꉪꇩꏤꎆꏣꇬꐊꌠꀋꉬꀋꉆꈨꉬ。ꀋꎪꀋꑴꃅꉻꁨꏦꀋꉬꌠꎆꏣꀻꎆꌠꇬꊋꊡ、ꊋꁈꄏ、ꄐꇺ，ꎆꏂꑘꌧꃀꄐꅍꋊꇤꌠꉜꁨ，ꐊꑷꃅꉹꁌꀰꏢꎆꏣꀻꎆꊥꎆꌠꏱꁈꏁꁈꃄꌬ，ꋍꑞꋍꑵꁨꏦꎆꏣꍄꑐꊋꃤꁦꎆꇱ，ꋍꑞꋍꑵꎆꏂꑘꏦꊿꁨꇐꌅꈌꁳꏦꈴꄉꇫꀧꌋꃅꎻ。
ꐪꊛꄉꈆꑪꇮꇐ、ꂘꑘ、ꁱꀕ、ꁬꋌꆰꋌꁦꎴꆄꄻ、ꃀꌠꀨꎹꄜꏂꀧ、ꌤꑘꌤꃅꅉ、ꀀꑳꉻꊭꎆꑠꁁꏯꄺꀱꌠꄹꎆꌶ。ꀻꎆꇬꄺꀱꌠꏯꇙꊋꇱꈇ，ꉹꁌꆹꄺꀱꊌꐨꈲꁧꐥꌠꉘꇉ，ꉪꊇꆏꊋꇤꄉꀻꎆꌠꎁꃅꊋꇱ、ꏓꂱꁳꈲꁧꊌꎻꌠꄺꀱꎖꉚꅇꀱꄯꒉꁬꏮꎼꇁꌶ。
ꁉꃑꌠꑌꄺꀱꌠꉬ。ꀋꎪꃅꀊꏀꈭꌠꑞꅉꀊꂥꃅꉇꉻꏭꁉꃑꌠꃄꌬ，ꐳꃅꁉꃑꉹꌠꎆꏣꏦꉻꀊꏀꌠꄺꑣꌶ，ꑴꇙꃅꁉꃑꌠꌌꑴꇙꃅꀻꎆ、ꑴꇙꃅꇩꏹꋓꈿꌠꊌꅜꎽ。
ꉇꉻꃼꇇꉹꏮꊐꐕꌠꄹꇙ。ꉇꅐꇗꏸꀱꁵꀵꄜꉺꏦꄻꃪ，2015ꈎꄑꁦꎆꈧꌠꆏꍏꑷꏱꎆꁳꐯꇯꃅꀵꄜꄉ，ꃅꄷꌋꆀꎆꏂꑘꁳ“ꑘꒃꁬꋌ”ꊌꋠꎻ。
ꈏꃹꉇꅐꈭꊭꁌꎴꌠꎵꄻꋊꍬ，ꎆꎴꐘꃆꃷꁨꋏꄯꒉꄻꄉꄷꀋꁧꄇꄜꋊ。ꉇꉻꃼꇇꋓꅔꂱꎆꅑꐨꀊꏀꌠꉘꉚꏱꁈꏡꁈꃄꌬ，ꄺꑣꃼꇇꉹꏮꌠꊥꎆ，ꉇꉻꃼꇇꏓꇱꁧꃤꃅꐽꈉꌋꆀꃷꎏꌊꃻꄻꃼꇇꀻꎆ，ꋯꐂꄆꌅꃼꇇꏓꇱꍔꐯ，ꁧꃤꃅꉇꀧꌶꀠꇓꈓꃷꁨꁦꎆꇱ，ꁧꃤꃅꃼꇇꍆꐪꉀꐕ。ꀊꅰꃅꏣꀋꑌꌠꈏꃹꏱꁈꃄꌬ，ꂴꅑꇮꇐ、ꀋꉬꀋꉆꌠꉁꈾ、ꀋꂿꑘꌠꎸꇺꎸꂷꑠꈏꃹꌠꍔꐯ。
ꀊꅰꏣꀋꑌꃅꇿꋌꐥꃅꉇꎆꌌꌬ。ꉋꄅꃼꇇꃅꊿꎆꇱꅐꑘꄐꌐꎹꀨꄺꀱ，ꀋꉬꀋꉆꌠꆏꁧꃤꃅꑘꌋꆀꎂꀕꄺꑣꑘꁉꃑꌠꍔꒉ，ꇩꉈꃼꇇꃅꊿꎆꇱꏢꇋꉹꌠꈮꁁꊨꒊ。ꐊꑷꃅꁊꈴꃅꁱꄀ、ꑞꅉꐥꃅꍤꄻꈌꁧꌠꏲꂠꄹꏦꄹꌬ，ꊋꊡꉹꌠꐘꃆꍤꎖꈌꁧꌅꈌꀉꐯꃅꃑꀏꁵ，ꏣꀋꑌꃅꃹꉆꂾꇩꂱꈲꊌꌠꇬꆏꀋꉾꃷꁨꋏꄯꒉꄻꇬꇯꌠꏲꂠꄹꏦꎹꎥ。ꇩꉈꃼꇇꃅꊿꎆꇱꌠꇬꃆꂮꐥꌠꏦꃤꄺꀱ，ꇩꉈꃼꇇꃅꊿꎆꇱꍞꏲꉻꑫꄻꃪ，ꎍꐽꐽꊯꂿꉆꉘꇉꉆꌠꃼꇇꀰꏢꋦꈭꄺꑣ。
ꐳꃅꉇꅐꁧꌠꄐꇐꃄꌬ。ꎆꏂꑘꊋꊡꌊꋯꉈꅉꃀꉁꈾꋈꄻꌋꆀꅐꊋꇷꃅꈽ，ꎸꈜ、ꄆꊋ、ꅇꈴ、ꋉꃆꏢꏧꉈꑴꐕꍯ、ꃏꏸ、ꄆꌅꑠꍏꇩꉁꈾꋧꃅꏭꉜꄉꆹꌠꄹꇙ，ꎸꏸꎸꄻ、ꋈꄻꌬꇐꑠꅐꑘꉇꉻꏭꎆꇱꌠꊥꎆ。ꁱꄀꄉꄹꏦꌌꀨꃅꄉꌠꉇꉻꎆꇱꏲꂠꄟꃄꌬ。ꉇꅐꉌꒊꄜꏂꀧꄉꈁꍔꐯ，ꀉꒉꉹꌠꋬꈭꃅꐙꌠꉁꈾꉇꅐꎆꏓꎆꊙꌠꏭꀧꋭꌠꄾꌦꋩꃅꀧꄉ。ꉇꎆꊭꊎꌫꄻꈭꈜꍔꐯ，ꎆꒉꎆꇁ、ꈴꌗ、ꏦꃤ、ꅿꌧꀧꌋꃅꁧꃤꃅꌠꄻꐛꒆ。ꐔꈔꃨꆰꐨꄴꏮꌠꉜꁨ，ꎿꉇꌅꈌꈲꁧꏦꀧꄐꊋꉀꐕ。ꍏꇩꎆꏂꑘꁳꅐꒉꄎ、ꅐꒉꐽꄉ，ꇩꏹꋓꅔꅉꇬꄉꊈꇨꎸꑌ、ꀻꎆꀉꒉꇁꎻ。
ꋍꑞꋍꁁꏯꃅꉇꉻꏭꁉꃑꌠꐛꊂꀊꏀꌠꄻꐛ。ꏦꍠꈝꃀꎆꏣꃄꁕꌋꆀꃅꋊ21ꋏꎿꇬꏦꍠꈝꃀꇷꃅꋈꄻꌠꄹꎆ。ꐳꃅꐮꇙꐮꈴ、ꈴꀸꀉꒉꌠꌋꆀꇩꏹꎊꈴꈝꃀꀊꐯꌠꋈꄻ。ꍏꇩꀠꏢꌦꄣ、ꃀꏦꆿꇩꍏꇩꑴꄗꂳꄆꑠꎆꏣꈳꁕꄺꑣ。ꅔꈐꌋꆀꃅꋮꁉꃑꌠꍔꒉ，ꎆꏣꇮꇐꀖꁉꃅꄷꏀꀺꃅꀻꎆꌠꊥꎆ，ꃅꋮꎆꏣꇷꃅꃅꄷ、ꋯꐂꎆꏣꇷꃅꃅꄷꀻꎆꑞꅉꉀꐕ。ꏣꀋꑌꃅꎮꉰꌋꆀꇨꄏ、ꄟꏢ、ꃛꏧꄿꐨꃼꇇꃅꉚꅉꋈꄻꌠꄹꇙ，ꇩꏤꑭꊂꄉꎖꋪꐛꒆꌠꄹꌬ，ꂱꂯꐛꐨꐥꌠꄺꀱꁉꃑꀊꂥꅉꏓꐛ。
ꀉꑌꁁꏯꑍꁁꏯꌋꆀꃄꁕꁉꃑꇷꃅꌠꏓꇲ。ꀉꑌꁁꏯꃼꇇꏦꉻꀧꌋꃅ，ꈴꌗꇮꇐꋯꏤꌫꅉꍔꐯꌠꄹꇙ，ꏣꀋꑌꃅꋦꈭꅐꇐ、ꍔꃚꃻꄻꑠꇩꏹꐯꉇꌠꃅꈽ。ꐳꃅꄿꐨꃼꇇꃅꅉꄐꇐꃄꌬ，ꏛꏜꃅꍏꉴ、ꍏꀎꄿꐨꃼꇇꃅꋯꏤꏤꁱ，ꐳꃅꍏꏝꉴꄿꐨꃼꇇꃅꅉꐯꉇꌠꃅ，ꎿꈪꇷꃅꉼ、ꑴꌝꆀꑠꄿꐨꃼꇇꃅꅉꐯꉇꌠꄹꎆ，ꄾꌦꋩꃅꍏꇩ-ꄏꃀꄿꐨꃼꇇꃅꅉꊐꐕꐯꉇꈽꌠꌋꆀꃄꁕꐊꑷꌠꎆꐋꃆꂮꋯꏤꐯꉇꌠꃅꊋꐛ，ꑸꄠꄿꐨꃼꇇꃅꅉꋈꄻ。ꍏꂰ、ꍏꉩꎆꇱꋯꏤꐯꉇꌠꄹꎆ。ꍏꇩꆏꆽꎍꐨꐥ、ꊪꃅꀬꌠꇩꏤꉬ，ꉪꊇꆹꐮꏯꈲꐯꇯꊌꌠꀻꎆꉪꉻꃄꄻꊿ、ꋧꃅꎆꏣꉻꑫꋈꄻꊿ、ꎆꏣꋧꃅꈴꌠꄹꇙꊿꄻꏾ。
ꇖ、ꎆꏣꎍꐽꃅꉀꎆꌠꌋꆀꐛꉻ
ꄻꉾꃪꈴꌠꄹꇙꋮꄮꎍꐽꉀꎆꌋꆀꐛꉻꋊꄻꌠꆹꐯꎏꐮꁠꎍꌠꉬ。ꉪꊇꆏꊋꈀꑌꃅꇤꄉꎆꏣꁳꋭꋽꅉꄉꑌꌫꄻꎻ，ꉈꑴꏣꀋꑌꃅꎆꏣꉹꏮꊐꐕ、ꎍꐽꃅꈴꌊꀉꎴꃅꁧꌠꊥꎆꎻꌠꑌꉬ。
ꐳꃅꌬꈧꉀꎆꅉꉘꉚ。ꋍꏅꌬꈧꌠꊋꊡ，“ꌕꉻ”ꌬꈧꌠꋎꍅ。ꃀꌠꀨꎹꑱꏲꋬꂻꌬꈧꌠꊥꎆ，ꈴꌗꌬꈧꌠꀉꒉꇁꎻ，ꈩꆫꈩꆏꌬꈧꌠꉀꐕ，ꑊꃴꌬꈧꌠꄹꇙ，ꀀꑳꌬꈧꌠꌌꎍꐽ，ꂘꑘꁱꀕꈯꎟꌬꈧꌠꍔꒉ。ꐊꑷꃅ“ꌕꈄꏍ”ꐮꉔꌠꄹꎆ，ꐳꃅꇨꐂꈄꏍꋈꄻ，ꀉꒉꃅꐳꏣꈄꏍꐳꐨꉀꐕ，ꎊꈴꐳꎭꌠꀻꎆ，ꐯꏍꈄꌌꎞꄜꃅꄉꌠ、ꈄꏍꇬꄉꐮꈴꌠꅐꏀꌠꌬꈧꌠꍄꑐ。ꌬꈧꅍꊇꁧꋬꂻꍞꏲ、ꐪꎹꀦꎹ、ꏮꌊꉈꑴꇁꌠꄹꏦꄻꐛꒆ，ꏦꇨꃅꀊꆠꊈꄸꌠꄻꃷꌠꃅꐨꍤꀞ，ꌬꈧꊿꏦꊒꌅꈌꈲꁧꀧꌋꃅ。ꌬꈧꌠꒈꏾꏓꋧꌊꒊꃀꀉꒉꌠꐛꄉ，ꉹꁌꂡꃪꌠꊋꂫꁳꎆꏣꉀꎆꌠꈺꇙꌠꊋꇨꌠꇙꊋꐛꎻ。
ꄉꉻꅐꇐꇿꋌꐥꃅꎆꇱꌠꁦꎆꇱ。“ꊰꑋꉬ”ꄐꎖꀋꉬꀋꉆꌠꋈꄻꂿꃆꃅꌐꌠꄉꀧ，ꋉꃆꀉꒉꀊꂾꌠꀊꏀꈨꌫꄻꌠꃄꇬ。ꀋꉬꀋꉆꌠꆏ：ꇓꈓꑲꆹꇣꆹꐛꅉꌋꆀꑳꐡꇁꉆꌠꋈꄻꀱ、ꇓꈓꅉꃴꌞꎭꁠꐤꈄꏍꑠꉹꁌꐥꐨꐘꃆ，ꈯꄔꁮꐚꁁꏯꎸꈜꌋꆀꄇꈜ、ꇩꈐꒊꃀꈴꈜꑠꈭꈜꐘꃆꀉꒉꌠ，ꈲꒉ、ꎕꏦꀊꂥꌠꁍꑗꑠꂿꑘꐘꃆ，ꈴꌗ、ꄆꊋ、ꇓꋌꐞꌗꑠꈄꏍꐘꃆꀉꒉꀊꂾꌠ，ꁦꎴꊋꀦꌋꆀꇓꋌꐞꌗꇑꇐꅐꀦꏦꀧꐘꃆ，ꋊꃅꐥꌠꅐꑘꇮꇐꄺꀱꑠꐘꃆ， ꊋꏏꋦꈭꀧꌋꃅꌋꆀꒆꉻꋈꄻꐘꃆ。ꎼꈎꍏꑷꄐꌗꈍꈐꎆꇱꌠꁦꎆꌊ4776ꂡꂷꇬꑟ，ꄚꍔꃚꆏ“ꄂꈩꑫ”ꀋꑵ，ꋒꐯꋒꃅꉹꁌꎆꇱꄓꊋꄖꄑꌶ，ꐧꋦꎆꀨꄐꇺꌊꀉꑌꁁꏯꇬꇱ。ꎸꈜꆏ8000ꂡꈋꉐꂷꎆꇱꊋꃤꁦꎆꌠꌭꈬ，ꀊꏀꃅꌌꌬꌠꈝꃀ8000ꉻꆏꈋꉐꐥ，ꀑꐱꃅꐳꈴꄇꈜꄆꌅꍮꊪꀋꆏꃅꁌꎴꌠꇩꏤꑭꊂꃅꈄꏍꏓꇱꌠꃅꇫꑟ，ꈭꈜꁳꃶꐚꃅꀻꎆꌠꂴꆹꇜꐛꎻ。ꀉꒉꀊꂾꌠꈲꒉꋉꃆꌌꃅꀐꌠꐘꃆ57ꐘꐳꃅꋈꄻꇰ，ꎼꈎꉈꑴꐘꃆ27ꐘꃄꇬꌦ，ꇬꊎꋈꄻꇰꌠꀉꒉꀊꂾꌠꋉꃆꎆꇱꄉꈁ8000ꂡꂷꇬꐂ。ꑲꆹꇣꆹꐛꅉꄺꀱ、ꎸꈜ、ꈲꒉꑠꎆꇱꌠꀉꑌꁁꏯꃅꀕ，ꀋꉬꀋꉆꌠꆏꈯꄔꁮꐚꁁꏯꃅꄷꉜꄉꎎꄉ，ꈏꈉꐨꀉꒉꀊꂾꌠꀊꅰꃅꋊꃑꎼꇁꀐ。
ꐳꃅꂿꑘꐛꏀꈴꌠꄹꎆ。“ꌕꂿꑘ”ꀨꎍꌠꇬꀨꎌꅉꀋꇙꌠꌭꈬ，ꐳꃅꂿꑘꀻꎆꃄꄟꄺꀱ，ꂿꑘꀊꅰꀉꇨ、ꂿꑘꊿꀊꅰꌣꈚ、ꂿꑘꁡꇤꀊꅰꎔꃨꎻ。
ꎼꈎꋚꂷꅐꐨꆏꎍꐽꌊ5.5ꂡꄓꈋꉐꇬꄉ，ꋚꂷꉮꀋꐥꌋꆀꂿꑘꅐꇐꀋꉬꀋꉆꌠꇲꁵꌠꏦꀧ。ꋠꃅꑟꅪꈬꃅꐏ，ꐊꑷꃅꅉꀨꁍꑗꁸꏤꌤꃅꌠꍔꆙ，ꋠꃅꊇꁧꀧꌋꃅꌋꆀꉀꐕꃅꐨꌫꄻ，ꃄꅉꏱꄻꌠꄹꎆ，ꃄꅉꀁꆓꌠꆏ1333ꃪꉻꐊꁦꎆꇱ，ꊋꀥꇱꄉꂿꑘꁍꑗꈲꒉꅉꀨꋈꄻ，ꊋꇤꄉꀆꐒꏎꏸꂿꑘꀻꎆ。ꐳꃅꇮꇐꀊꏀꌠ、ꇗꁧꀊꏀꌠ、ꂿꑘꏸꐕꀊꏀꌠꎥꃪꀖꁉꄹꌬ。ꂿꑘꊿꄐꇺꌊꃷꎏꊪꉘꐛꉻꋊꄻꌠꉜꋒ，ꂿꑘꅐꇐꄺꑣꈜꀕꇈꀨꅐꃅꄷꋚꂷꐤꅉꄉꐈꆦꌠꊋꁈꄏ，ꋙꊪꌠꄺꀱꌊꎆꋚꊪꁧꊪꌠꃅꉚꌠꍔꆙ。ꏓꇱꄉꂿꑘꁬꋌꎇꃀꍅꑓꁬꋌꋓꑘꑠꌤꃆꏱꄻ，ꐊꑷꃅꂿꑘꅐꇐꊇꁧꌋꆀꋠꇐꉮꀋꐥꑟꐨꉀꐕ。
ꂿꑘꁡꇤꀊꏀꌠꋈꄻꌠꆏꂿꑘꊿꋍꏅꌠꇬꈲꏣꐥꌶ。ꊋꀥꇱꄉꂿꑘꁡꇤꅝꒉꌋꆀꈝꃀꋈꄻꌠꌌꑓꅐꎑ，ꎼꈎꉈꑴꂿꑘꁡꇤꊿ6000ꃪꑹꅝꒉꉮꀋꐥꌤꃆꂥꀘ，ꂿꑘꁡꇤꄇꈜ20ꃪꉻꆏꀊꏀꃅꋉꋈꄻꀱ，ꐊꑷꃅꁮꐚꏭꃅꋮꆹꏮꈬꉘꃅꈋꋹꋒꄺꀱꂿꃆꃅꌐ。ꄾꌦꋩꃅꄽꂫ20ꎖꃪꄆꀋꐥꊿꁳꄆꌬꉆꌐꎻ。ꑶꌩꀖꑘ、ꍍꒉꌌꀨꃅꄉꊋꀥꇱꄉꋦꈭꏱꄻ，ꎔꃨꀀꌒꋦꌒꑘꃅꁡꇤꋈꄻ。ꈴꈜꀉꑌꏢꃅꂿꑘꊿꁦꎆꊌꌠꊥꎆ，ꇓꈓꇓꉈꀀꊿꊌꐨꍢꅉꊨꒊꐛꐨꌭꈬꇬꎷ。ꐪꊛꄉꌢꎭꄏꐓꈢꇓꀖꌠꃅꉾ，ꃹꅼꃅꏓꋧꐯꅑꌢꎭꐯꌢꎭꃅꄷꌢꎭꄏꐓꌠꀖꁉꌠꄹꎆ，ꎃꊒꃅꌢꎭꄏꐓ、ꎃꊒꃅꎭꇔꌠꌫꄻ。ꈍꃅꊋꋠꑌ，ꎼꈎꉈꑴꂿꑘꁡꇤꌢꎭꊿ1000ꃪꑹꈋꉐꊨꒊ。
ꂿꑘꐛꏀꈴꌠꄹꎆꇬ，ꄺꀱꌠꆹꊨꊭꉬ。ꑱꈐꀰꏢꎍꐽꌠꅉꃀꇬꄉ，ꊪꉘꑱꃀ、ꑱꈐꆫꃅꐛꅉ、ꂿꑘꊿꇷꃅꎹ、ꅐꑘꈴꀊꋾꎆꏂꑘꑠꀰꏢꀨꄜꀊꏀꉹꌠꀻꎆꌠꊋꁈꄏ，ꃅꑘꂿꑘꊿꀊꏀꉹꌠꂘꄻ，ꇶꏦꀉꑌꑵꃅꄉꄐꃅꄉꈁꀰꏢꌠꄹꎆ。ꃄꅉꌅꈌꏚꍆꁱꄉꊫꌐꃑꄻꌠꌤꃅꋒ，ꋓꉪꁨꄉꂿꑘꁡꇤꃄꅉꎳꃼ、ꋍꉻꀰꏢꃅꐙꌠꋈꄻꌬꃅꃷꎏꃹ、ꑲꅉꃅꄹꏦ、ꋍꉻꁨꇐꌅꈌꄹꏦꑠꄺꀱꃅꉚꌠꍔꆙ，ꄺꀱꅉꇬ，ꋠꃅꃷꁨꊨꀋꒊ、ꊇꁧꀁꋌꀋꊰ、ꂿꑘꊿꈲꁧꏦꀧꄉꌠꄉꀧ。ꇲꃷꎹ、ꃅꏀꀖ、ꊪꑘ、ꇩꁨꌩꐷꄈꅉꌩꋦꃅꄷꑠꄺꀱꌠꃹꅼꎻ，ꂿꑘꁡꇤꄺꀱꃅꉚꅉꌋꆀꐛꏀꂿꑘꌡꀠꃄꁕꀞꄻꋒꌶ。ꋛꂷꎳꃼꁌꏤꀁꂥꐯꀁꂥꌠꌋꆀꋋꇅꇬꎴꊎꏱꁈꄻꐛꒆ，ꂿꑘꅐꇐꑞꅉꁌꏤꁥꁵꏡꁈꄻꃪ。ꂿꑘꎑꁠꎆꀨꏓꇲꄉꋊꍬꐯꇯꌠꌋꆀꏲꂠꌠꊋꀥꇱ。ꏱꎆꈍꃅꊋꋠꄿꂿ，ꂿꑘꈲꁵꏱꁈꀥꇱꀉꄂꉆꄝꊰꀋꉆ，ꂿꑘꄏꐓꎆꀨꁦꎆꀉꄂꉆꊨꒊꀋꉆ。
ꀊꏀꉹꌠꇓꈓꏦꎫꐛꈴꌠꄹꎆꌠꂵꅐꐨꀊꏀꌠꊌꅜ。ꇓꈓꏦꎫꐛꈴꌠꆹꇓꈓꇓꉈꐮꍣꐨꂥꀘꌠꊇꅉꈴꈜꉬ，ꈏꇓꈉꄻꀉꒉꐯꀉꒉꌠꑌꉬ。ꀋꎪꃅꊿꌌꈯꄜꃅꄉ，ꊿ1ꂡꌕꏢꌤꃆꂥꀘꌠꌌꊋꇤꅉꃅꄉꌠꌭꈬꇬꎷ，ꇓꈓꏦꎫꐛꈴꌠꐛꏀꈴꄘꄏꂿꄐꋊꇤꅐꇁꋒꌶ。
ꊋꀥꇱꄉꇓꈓꏦꎫꑲꆹꇣꆹꐛꅉꌋꆀꇓꈓꇓꉈꑳꀋꈬꀋꈈꌠꄺꀱ。ꎼꈎꏦꀧꐨꐥꀀꌒꋉꃆꀊꏀꃅ740ꃪꂷꄐꁆ，ꄚꈐꏭꑲꆹꇣꆹꐛꅉꄺꀱꌠ580ꃪꂷ，110ꃪꂷꁦꎆ，ꇓꈓꑳꀋꈬꀋꈈꄺꀱꌠꌌꑲꆹꇣꆹꐛꅉꄺꀱꌠꏱꁈꈍꈐꇬꇱꄉ。ꂿꑘꁡꇤꑳꀋꈬꀋꈈꌠꄺꀱꌠ366ꃪꁯꐥ，100ꃪꁯꁦꎆ，ꋍꃱꃅꄐꏤꄉꂿꑘꁡꇤꑳꃄꇙꉮꄙꄺꀱꌠꄹꎆ。ꀀꑳꏦꀧꌠꆏꋍꁘꋍꁘꃅꐥꇐꏦꀧꌋꆀꎆꃀꁥꁵꌠꋍꋓꃅꃄꌬ，ꊭꊎꑳꈨꆹꏮꌊꉻꊤꑳꌋꆀꎞꀀꑳꃅꄉ。ꀀꑳꊋꋠꐯꊋꋠꌠꀁꂥꀧꑱꈐꏭꆏ，ꇬꏭꀀꑳꈭꋏꇇꀨ。ꀋꎪꃅꉹꁸꄉꄐꇺ，ꐛꐪꉜꄉꏱꁈꌬꌠꌭꈬꇬꎷ，ꃅꄷꍔꃚꀨꄜꆽꎍꐨꃅꇫꑟ，ꀀꊿꊨꏦꀀꑳꌋꆀꄻꃪꃅꐙꌠꀀꑳꈉꐨꏭꊋꁈꄏ，ꑳꇤꁨꇐꃷꎏꎍꐽꋬꂻꃅꀻꎆꌠꊥꎆ。
ꄺꀱꌠꏡꁈꌌꇓꈓꏦꎫꐛꈴꌠꊋꋠꌤꃆꂥꀘ。ꐳꃅꑱꁯꊫꌐꄹꏦꄺꀱꌠꌫꄻ，ꊿꑱꐥꑭꀀꇙꏱꁈꄝꃑꌠꃅꇫꑟ。ꇓꈓꏦꎫꇬꄉꃅꅍꊌꇈꇬꀀꄉꀐꌠꄚꀀꋦꊫꌐꀋꊌꑴꌦꌠꉇꇁꊿꏭꆏ，ꊿꀀꊫꌐꌌꁢꊧꃅꄉꅉꀨꄉꉻꁧꃤꃅꌠꇲꁵ，ꊿꀀꊫꌐꁌꎴꌠꇤꇧꎭ。ꏱꎆꆹꏮꁵꄻꑠꇓꈓꀀꊿꐛꈴꌠꌋꆀꐮꅑꁠꉺꏦꄻꐛ，ꋭꋽꃅꂿꑘꇮꃅꊿꇓꈓꀀꊿꐛꈴꌠꀨꊰꀵꄜ。ꋊꍬꈴꀉꑌꑵꃅꐪꊛꉆꌠꇓꈓꋈꄻꎆꏓꎆꊙꉺꏦꄻꐛ。ꀋꎪꃅꏎꏸꃅꃄꅉꌬ，ꊝꈭꃅꇓꈓꇓꉈꏓꋍꃱꃅꌠꋈꄻꃄꅉꃷꎏꄻꐛ，ꇓꈓꇓꉈꋈꄻꃄꅉꌬꌠꁦꎆꊨꒊꌠꐯꊛꇺꄉꁵꉚꌠꄻꐛꒆꌋꆀꍔꐯ。ꊋꀥꇱꄉꎆꀨꌋꆀꏱꁈꌌꊋꁈꄏ，ꀊꏀꉹꌠꇓꈓꏦꎫꐛꈴꏓꇱꃅꉚꅉꍔꐯꌶ。
ꇓꈓꏦꎫꄐꎖꋈꄻꏲꂠꑟꐨꊐꐕ。ꇓꈓꈨꄐꎖꌠꏤꄻꃄꌬꄉ，ꊱꁨꃅꅉꃀꉁꈾꌋꆀꅉꀨꄉꉻꁧꃤꃅꌠꇓꈓꂷꇬꐯꌟꈴꌠꄹꎆ。ꏃꄻꎕꏦꄻꐛꒆ，ꍔꀉꒉꐯꀉꒉꌠꌅꈌꂿꄐꁦꎆꇱꌠꃅꉚꅉꍔꆙ，ꇓꈓꀉꒉꇊꀉꒉꌠꇬꊻꂷꄉꈁꋎꍅ，ꄃꊐꌠꏃ、ꑤꇓꈓꌋꆀꈯꄜꍔꅐꑘꌋꆀꊻꂷꊪꊎꄐꊋꊐꐕ，ꂿ꒧ꊿꂱꑱꈭꇍꁳꇓꈓꏦꎫꐛꈴꎻ。ꀑꁮꇓꈓꀻꎆ，ꐩꋊ、ꃄꁕꁱꀕꊪꊛꌋꆀꀧꌋꃅ。ꊋꀥꇱꄉꇓꈓꒉꇲꐞꌗꇲꄆꇲ、ꄉꉻꈭꈜꌋꆀꒈꅐꒉꉮꄴꏮꌫꉂꌫꈾꑠꋈꄻ。ꏟꈯꃅꍍꆀꌠ、ꐯꋋꎍꌠꑠꇓꈓꆅꐨꏱꄻꄉ，ꈜꈴꀊꅰꃅꌒ、ꋦꈭꀊꅰꃅꀀꌒꎻ。
ꃄꁕꀻꎆꌠꈥꈉꀊꏀꌠꍔꐯ。ꋍꃱꃅꄐꏤꄉ“ꅉꁕꀉꒉꇖꈚ”ꌋꆀ“ꄘꄏꅉꌕꂷ”ꄐꇐꏓꐯꇯꄉꌠꃄꌬ。ꁮꐚꃅꄷꄉꏓꇱꈭꈜ、ꊋꀦ、ꈲꒉ、ꒆꉻ、ꉹꁌꐥꐨꑠꐘꃆꀉꒉꀊꂾꑠꈨꋈꄻ，ꐊꑷꃅꑌꌋꈤꃅꄷꑠꇬꇮ꒧ꐛꅉꀉꆹꌠꄖꄑꌠꏱꁈꏁꁈꃄꌬꇫꑟꋒ，ꐳꃅꈯꄔꃅꄷꏓꇱꈭꈜꏍꈌꌋꆀꈄꏍꋈꄻ，ꁭꅐꃅꄷꂴꅑꄉꀻꎆꌠꄏꐓ，ꊋꀉꇨꃅꇝꂱꀉꆹꃅꄷ、ꀁꑌꊿꋅꃅꄷ、ꃅꋮꆸꈈ、ꌢꎭꃅꄷꏭꊋꁈꄏ，ꐮꍣꐨꐥꌠꃄꁕꀻꎆꏱꁈꄻꐛꒆ。“ꋍꁕꋍꈜ”ꋈꄻꌠꌋꆀꃄꁕꀖꁉꌠꏓꐯꇯꎼꇁ，ꊋꀥꇱꄉꑸꉩꅔꃀꋒꀊꏀꌠ、ꅔꃀꎿꇬꈜꀸꐛꅉꋈꄻ。ꏢꏠꏹꐮꐊꄉꀻꎆꌠꄹꎆ，ꈭꈜꋍꉻꈴ、ꒆꉻꋦꈭꀧꌋꃅ、ꅐꑘꊐꐕꆹꏮꑠꁆꏯꂴꅑꄉꂵꅐꐨꊌꅜ。ꍤꏦꎆꏣꐛꅉꋈꄻꌠꄹꎆ，ꊱꁨꃅꒉꈜꀋꉬꀋꉆꌠꏱꄻ、ꒊꃀꂱꋮꇉꇳꈌꈜꀸꑠꐘꃆꀉꒉꀊꂾꌠꋈꄻꇬ，ꏓꇱꆺꄜꃅꐙꌠꈴꈜꀉꒉꌠꄻꐛ，ꅐꑘꆹꏮꃅꀦꉚꅉꋈꄻ，ꅐ꒧ꄐꇺꌊꁭꅐꄉꁮꐚꉜꋍꊐꋍꊐꃅꆹꏮꆹ。ꐳꃅꌬꇐꇁꀦꈤꇁꉹꌠꇓꈓꉹꏮꊐꐕ。ꊋꀥꇱꄉꈪꄙꁮꐚꃅꄷꀖꁉꅉꀋꂿꑘꌠꋈꄻ，ꍗꏦꌕꎏꃅꄷꃄꁕꇷꃅꌠꌌꃹꅼꈴ。
ꉪꇩꏤꆹꎿꃀꇩꏤꀉꒉꂷꉬ，ꎿꃀꌉꇐꄐꁈꏤꄻꃄꌬ，ꎿꃀꎆꏣꀻꎆ，ꎿꃀꒆꉻꋦꈭꀧꌋꃅ，ꎿꃀꈆꑪꇮꇐꑞꅉꉀꐕ，ꎿꃀꏓꇱꏲꂠꌠꌌꇨꈴ，ꊋꀥꇱꄉꎿꄩꊋꃤꋈꄻ，ꏟꈯꃅꇩꏤꎿꃀꌅꈌꈲꁧꀧꌋꃅ，ꋭꋽꃅꎿꄩꏟꃆꏈꑘꀞꄻꋒ，ꏣꀋꑌꃅꑍꁁꏯꌋꆀꀉꑌꁁꏯꎿꃀꇷꃅꌠꍔꀺ，ꎿꃀꇩꏤꀉꇨꌠꑞꅉꁻꌐꉜꄉꆹ。
ꅐꑘꐛꉻꐧꀠꀊꂥꄻꅉꉜꄉꆹꌠꄹꇙ。ꄺꂡꑘꆏꉪꊇꂱꎆꅑꌠꉬꅐꑘꈾ。“ꍏꇩꄺꂡ2025”ꃄꌬ，ꀋꎪꃅꏀꀺꈺꇙ、ꀑꊋꉹꏮ、ꅉꃀꇨꈴ、ꃴꑊꀻꎆꌠꌭꈬꇬꎷ，ꐳꃅꄺꂡꇩꏤꀉꒉꌠꇬꄉꄺꂡꇩꏤꀉꇨꌠꇬꃹꆹ。ꏱꎆꇔꊰꇱ、ꐳꃅꆹꋊꆹꌗꑠꏁꁈꏁꌬ，ꋊꃅꅐꑘꇮꇐꄺꀱꌠꄹꇙ。ꏦꀧꌠꐥꋎꍅꌠꐥꎻ，ꅐꊋꎖꃨꅑꌠꋊꄻ，ꎆꏂꑘꏓꄻꐯꇯꌠꊋꁈꄏ，ꃷꎏꋓꅔꅉꇬꄉꉾꊋꄸꋊꎻ。ꇮꑘꈴꌠꌋꆀꈴꌗꈴꌠꅼꃅꐊꐙꌠꊥꎆ，ꈄꏍꈴ、ꃷꂷꈴ、ꀑꊋꈴꑠꇮꇐꀖꁉꌬꈧ，ꊋꇤꄉꀋꉬꀋꉆꁁꏯꑠꈨꇬꄉꊜꋽꄮꎹꄉ、ꂵꅐꅍꊌꅜꌶ。
ꏀꄓꅐꑘꌋꆀꏀꄓꑘꉻꆹꋓꅔꀊꂥꅉꉬ。ꄩꏠꌠꉁꈾ、ꈴꌗꈄꏍ、ꏓꋧꄆꈜ、ꊋꀦꀊꏀꌠ、ꌫꉂꌫꈾꀊꏀꌠ、ꒆꇐꆅꉁꆄꄻꁬꋌ、ꃅꈯꇙꃑꏸ、ꐞꌗꏮꏸꑠꐘꑘꀉꒉꀊꂾꌠꃄꌬꄉ，ꏀꄓꅐꑘꑠꈨꉘꉚꌊꀨꎍꅐꑘꐛꎻ。“ꐯꏍꈄ＋”ꃅꐨꎖꄎꏤꄻ，ꇙꊈꐯꏍꈄ、ꃅꄂꌗꏢ、ꃷꁨꀉꒉꌠ、ꎊꏓꈄꏍꑠꌋꆀꐛꏀꄺꂡꑘꐮꐊꐙꌠꄹꇙ，ꄆꌅꃼꇇꌤꃆ、ꇮꑘꐯꏍꈄꌠꌋꆀꐯꏍꈄꎆꒉꎆꇁꀻꎆꌠꊥꎆ，ꐯꏍꈄꎆꏂꑘꄐꏁꌊꇩꏹꃷꎏꍔꐯꎻ。ꇩꏤꆏꏀꄓꅐꑘꑘꀺꎆꇱꄐꏁꎆꀨ400ꂡꂷꐥꄉꀐ，ꎆꀨꀊꅰꀉꑌꌠꏓꇱꏓꊭꄉ，ꑘꀺꏀꀺꌠꎁꃅꊋꇱꌗꊐ。
ꁧꃤꃅꑘꃅꑘꊌꐨꀉꒉ，ꀻꎆꊫꂫꀊꐯ。ꃹꅼꃅꁧꃤꃅꑘꄺꀱꁉꃑ，ꏱꎆꇗꏸ、ꃄꅉ、ꁌꏤꑠꄏꐓꏱꁈꌋꆀꃄꎆꊌꄉꑬꆏꑠꄹꏦꃅꇫꑟ，ꊋꀉꒉꃅꇤꄉꈩꆫ、ꇭꀧꉾꃪ、ꃀꌠꀨꎹ、ꁧꀿꄐꄻꑠꐥꐨꌋꆀꒃꅐꁧꃤꃅꑘꀻꎆ。ꃹꅼꃅꏮꈴꏦꉻꄺꀱ，ꊋꀥꇱꄉꀉꒉꉹꌠꂿꑘꅐꇐꋍꅝꃅꃷ、ꊸꑳꇬꊐꌠꌋꆀꈻꏣꎊꈴꑠꐛꏀꎊꈴꉁꈾꋈꄻ，ꊋꇤꄉꀉꒉꃅꏮꈴꎆꀨꀁꋌꊰ。
ꏦꉻꏀꀺꌠꌌꈆꑪꇮꇐꏀꀺꌠꄹꇙ。ꏀꀺꀹꄻꇬꀋꉬꀋꉆꌠꆏꊿꉬ。ꐳꃅꈆꑪꇮꇐꊌꐨꌬꈧꂥꀘꌠꌋꆀꊌꐨꈲꁧꏲꂠꄺꀱ，ꇴꍆꌅꈌꌋꆀꍍꎆꁸꊋꊡꑠꏱꁈꃄꌬꈍꈐꍔꒉ，ꈆꑪꇮꇐꊌꐨꆹꏮ、ꄉꅍꁧꀿꏦꃤꄹꏦꄻꐛꒆꄉ，ꏀꀺꌧꊿꁳꊌꐨꈲꁧꊌꅜꎻ。ꈆꑪꎥꃪꊿꇙꏮꏱꁈꊥꎆꌠꏤꄻ，ꈆꑪꇮꇐꉉꍣ、ꃅꅍꂓꏤꄻꌠꌋꆀꇩꏤꈁꁠꄹꏦꄺꀱ，ꈆꑪꎥꃪꅉꉹꁸꄉꄺꀱꌠꄹꎆ。ꇩꉈꊇꁧꀊꂥꃅꌠꌧꊿꌋꆀꀑꊋꊙꈏꃹꇁ。ꃹꅼꃅꌧꇐꅐꇐꌅꈌꄐꇐꃅꐨꎖꄎꌠꃄꌬ，ꏦꈴꌅꈌꉄꌎꐺꌠꏭꇇꇩꍈ，ꃶꐚꃅꁧꀿꌠꏭꀧꌋꃅꄉ，ꏀꀺꌩꁦꌠꁳꇪꇇꄵꋓꀕ、ꏽꏾꆈꄅꀕꎻ。
ꎆꏂꑘꆏꇮꇐꏀꀺꌠꀨꄜꉬ。ꎆꏂꑘꎥꃪꀖꁉꌫꎆꄅꌗꄉꈎꋊ、ꇮꇐꀊꂥꀊꏀꌠꎆꏂꑘꄏꐓꑠꁊꈲꃅꐙꌠꏱꁈꃄꌬꇫꑟꌋꆀꄻꐛꒆ，ꎆꏂꑘꊋꊡꄉꏀꀺꎆꇱꌠꁦꎆꎻ。ꎆꏂꑘꊋꁈꄏꄉꀊꅰꀉꑌꃅꈆꑪꇮꇐꐘꑘꀉꒉꀊꂾꌠꃄꌬ、ꈆꑪꎥꃪꐽꈉꋈꄻꌠꇬꐊꈽꎻ，ꎆꏂꑘꀨꄉꌠꅐꌷꎥꌠꐯꇯꏀꀺꌠꄹꎆ。ꊋꀉꒉꃅꉹꁌꃅꏀꀺꌠꈥꈉꀻꎆ，ꇩꏤꑴꌅꏀꀺꌶꀠꐛꅉꁦꎆꃅꄻꄉ，ꇩꏤꀊꂥꀊꏀꐛꅉꀞꋒ，ꏓꋧꏀꀺꐊꊈꏃꂠꂿꄐꋊꇤ。ꎆꏂꑘꐧꐭꀄꊭꌠꌤꃅꁌꁨ，ꄹꀺꃅꄩꑌ、ꋍꄲꏃꎭꌶ，“ꎃꀕ”ꏀꀺꌠꁳꀻꎆꅷꃅꀹꐛ、ꇿꑌꐥꈴꎻ。
ꏀꀺꅐꐨꉀꐕꌠꀋꉬꀋꉆꌠꆏꈆꑪꇮꇐꅐꀦꁆꄻꃪꈴꌶ。ꍏꑷꏱꎆꈆꑪꇮꇐꎖꄎꏲꂠꃄꄟꄺꀱ，ꄇꄜꋊꋍꃱꃅꌠꇩꏤꈆꑪꇮꇐꏲꂠꐽꈉꄻꐛ。ꍔꃚꆏꅉꃀꎥꃪ、ꂴꅑꇮꇐꌋꆀꀋꉬꀋꉆꌠꐮꐊꐨꐥꌠꇮꇐꀉꒉꀊꂾꌠꎥꃪꌠꌌꀨꄉꊋꁈꄏ，ꇬꂾꏀꀺꌠꊋꊡ，ꐳꃅꇩꏤꈆꑪꇮꇐꐘꃆꀉꒉꀊꂾꌠꃄꌬ，ꐊꑷꃅꈆꑪꎥꃪꅉꃀꉁꈾꀉꒉꀊꂾꌠꌋꆀꈆꑪꎥꃪꎖꅍꀉꒉꉹꌠꐧꋦꏭꉜꄉꁉꃑ。ꄙꇁꃪꂡꌠꏓꂱꉹꁌꀑꁮꊋꃤꋊꇤꎼꇁꇬꆏ，ꈍꃅꑌꉹꁌꋍꏅꃅꏀꀺꌠꒈꂃꇫꅐꇁꄎꌠꉬ。
ꉬ、ꐪꊛꄉꉹꁌꐥꐨꄻꃪꌠꌋꆀꐧꋦꋈꄻꌠꄹꎆ
ꇩꄻꏱꁈꆹ，ꉹꁌꌣꈚꇁꎻꌠꀉꄂ。ꉹꁌꐥꐨꈲꁧꊌꌠꁦꎆꎻꌠꌌꁻꌐꃅꄉ，ꐳꃅꐧꋦꌤꑘꀻꎆ，ꊌꐨꁆꁸꄹꏦꄺꀱꄻꃪ，ꁈꏂꁈꇭꄉꀀꊿꊌꐨꁦꎆꎻ，ꐧꋦꐽꊯꑗꉬꌠꌋꆀꐮꄮꃅꀻꎆꌠꊥꎆ。
ꊋꇤꄉꑘꀺꃅꅍꊌꌠꊥꎆ。ꀋꎪꃅꃅꅍꊌꌠꌌꂴꄉ，ꑘꀺꌠꌌꃅꅍꊌꌠꈺꇙ。ꎼꈎꌶꅉꀊꂥꌶꅐꌠꌶꌺ749ꃪꑼꐥ，ꐩꋊꃅꇬꀊꂥꇊꀊꂥ。ꊋꀥꇱꄉꃅꅍꊌꌠꄐꂘꌋꆀꑘꀺꌠꂘꑴ，ꌶꅉꀊꂥꊐꌠꌶꌺꃅꑘꊌꎖꄎꊥꎆꌠꃅꇫꑟ，ꅉꂫꊐꌠꇬꄉꃅꑘꃅꒉꌠꊋꊡ。ꒉꌶꌺꑘꀺꄐꏁꎖꄎꌠꃄꌬꋒ，ꏀꄓꅐꑘꇬꄉꑘꀺꆹꌠꄏꐓ。ꐛꉻꋊꄻ、ꅏꊋꁦꎆꇨꌠꋊꎵꅉꇬꃅꑘꀋꊌꌠꊿꁳꀱꉈꑴꃅꑘꊌꇁꎻꌠꌤꃅꋒ。ꂿꑘꁡꇤꑘꃅꊋꃤꆹꏮ、ꇓꈓꏦꎫꌢꎭꊿ、ꎞꆏꂽꑼꃅꅍꊌꌠꏓꇲ，ꂿꑘꊿꇮꃅꌠꃅꑘꇮꇐꉀꐕꎖꄎꌠꃄꌬ，ꃅꑘꀋꊌꄜꏂꀧꎆꏂꑘꃅꑘꉆꈉꎍꐽꌠꇬꊋꁈꄏꌠꏱꁈꃅꑞꅉꑟꌋꆀꄻꃪ。ꐊꑷꃅꂿꑘꊿꇮꃅꌠꃄꎆꄯꎝꌤꃆꏱꄻ，ꑘꃅꍞꊟꌠꌋꆀꐯꀥꐮꏈꌠꀞꄻꉺꏦꄻꐛꒆ，ꏦꃤꁳꑘꃅꊿꌅꈌꈲꁧꐏꁇꌋꐛꎻ。
ꊋꀥꇱꄉꐧꋦꏦꀧꌠꌋꆀꀀꊿꊌꐨꁦꎆꌠꃅ。ꎆꏂꑘꎞꆏꊿꅉꀨꃀꌠꀨꎹꎆꎕꏦ10％ꉀꐕ。ꇓꈓꇓꉈꀀꊿꅉꀨꃀꌠꀨꎹꎆꎕꏦꋍꃱꃅ55ꂷꇬꄉꉀꐕꅷ70ꂷꇬꑟ。ꇓꈓꏦꎫꌤꃅꊿꅉꀨꃀꌠꀨꎹꎆꇩꏤꑭꊂꃅꏓꇲꌠꄹꎆ。ꃅꅍꀋꊌꄜꏂꀧ、ꑘꃅꂷꊂꌸꄜꏂꀧꑠꎆꏮꃷꁨꀁꋌꊨꒊ。ꃄꎆꀁꂥꇊꀁꂥꎕꏦꋊꐽꉺꏦꄻꐛꒆ。ꌤꏲꅉꌤꑘꌤꃅꅉꃀꌠꀨꎹꄜꏂꀧꄹꏦꄺꀱꏁꁈꃄꌬꇫꑟ，ꋍꋓꃅꃄꎆꄹꏦꄻꐛꒆ，ꅉꂫꊐꌠꌤꃅꊿꏭꏱꁈꈴꄉꈲꏣꁵ。ꑤꇂꃴꊐꌠꌤꏲꅉꉻꌤꃅꊿꄉꅍꌋꆀꄉꅍꏠꊐꐯꇯꌬꌠꄹꏦꄻꐛ。ꊋꀥꇱꄉꆄꒉꈺꒉꌠꉃꄻꇇꀨ，ꐊꑷꃅꋋꇅꇬꇇꀨꄹꏦꃄꌬ，ꊋꋠꅍꀉꒉꀊꂾꌠꊝꌠꉹꁌꁳꇇꀨꅉꎹꊊꄎ、ꇇꀨꅍꐳꃅꊌꄎꎻ。ꊋꋠꌠꀊꉘ、ꈎꄜꀉꒉꌠꌋꆀꑘꃅꀋꄐꌠꃀꌠ、ꀋꇰꀋꇊꌢꎭꇨꌠꊾꄣꊋꋠꐯꊋꋠꁥꌠꏭꆏ，ꈲꁵꏦꀧꄹꏦꌋꆀꁧꃤꃅꉻꑫꄻꐛꒆ。ꐪꊛꄉꇓꈓꇓꉈꀁꂥꀧꑟꐨꉀꐕ，ꂴꄉꀨꎹꊜꀠꅲꇫꇲꄻꌠꌋꆀꐥꐨꀥꇱꎕꏦꉀꐕ。ꃄꎆꌋꆀꏦꀧꎕꏦꉀꐕꌠꑠꏱꁈꈲꊌꐨꀊꐯ，ꍔꃚꈁꐥꊐꌠꆏꀋꎪꃅꃅꑞꅉꑟꌶ。ꉹꁌꎭꐨꆹ，ꇩꏤꌤꃆꀋꉬꀋꉆꌠꉬ，ꉪꊇꆏꊋꈀꑌꃅꇤꄉ，ꏟꈯꃅꉹꁌꐥꐨꄽꂫꑞꅉꌭꈬꌶ。
ꂘꑘꁳꐽꊯꃅꀻꎆꎻꌠꌋꆀꊇꁧꉀꐕꌠꊥꎆ。ꂘꑘꆹꀃꑍꋋꄮꌤꑘ、ꃆꏂꊂꑋꉘꇉꐨꉬ。ꀋꎪꃅꃅꇏꄻꊿꉙꂘꌠꌭꈬ，ꌶꌺꐧꋦꆽꎍꐨ、ꏀꀺꉌꊈ、ꃄꄻꄐꊋꌌꀉꇨ，ꍏꇩꐛꐨꐧꋦꉪꏦꋈꄻꊿꌋꆀꎃꉆꊿꉘꉚꌶ。ꃹꅼꃅꌜꊐꌠꍔꃚꂘꑘꏓꇲꄺꀱꌠ、ꌶꅉꀊꂥꊐꌠꏓꇱꄺꀱꌠꃅꌋꆀꎖꉚꌶꌺꎹꄹꏦꄺꀱꌠꃅ。ꐳꃅꋭꑘꉙꂘꌶꅉꎕꏦꈴꌠꋈꄻ，ꊋꁧꌶꅉꌋꆀꁠꌷꄹꏦꌶꅉꅉꀨꌶꅉꀞꇎꏦꄺꀱꌊꉾ。ꂿꑘꊿꇮꃅꌠꋀꐊꄉꎞꇁꌠꌳꃈꅮꎞꀀꇓꈓꄉꋭꑘꉙꂘꊌꌠꏱꁈꃄꌬꇫꑟ，ꊂꊛꄉꌷꊐꐕꌷꆹꌠꏱꁈꄻꐛꒆ。ꐊꑷꃅꐛꏀꃅꑘꂘꑴꉻꑫꋈꄻꌠꄹꎆ。ꃅꄷꈨꀪꈈꌶꅉꀊꂥꌠꄐꏁꌊꌬꍩꐥꃅꐙꌠꉜꄉꆹꏮ，ꌐꋉꄉꇇꀨꌠꑠꃄꄟꈴꄉꈯꄔꁮꐚꃅꄷꌶꅉꀊꂥꊐꌠꂘꑘꀻꎆꌠꊋꁈꄏ，ꐪꊛꄉꈯꄔꁮꐚꃅꄷꌋꆀꊻꂷꀉꑌꌠꌜꌶꅉꀊꂥꊐꌠꎖꌠꎖꊊꐨꉀꐕ，ꋧꃅꇣꄧꄊꑪꀨꏠꌠꌋꆀꌷꑫꀨꏠꌠꋈꄻ。ꐋꀋꌡꉙꂘꌠ、ꌷꂾꉙꂘ、ꊛꄉꉙꂘꌠꌋꆀꊿꋅꃅꄷꋍꑞꋍꉹꉙꂘꌠꊋꀥꇱ。ꉹꁌꀞꂘꑘꐛꒆꃅꀻꎆꌠꊥꎆ。ꊋꀥꇱꄉꂘꃀꁥꌠꋈꄻ。ꃶꐚꃅꂘꑘꌤꑘꀞꋒꂿꄷꄉ，ꉪꊇꆏꎆꊐꌠꏦꀧ，ꎆꃀꋍꉐꋑꀋꋒꃅꌬꋒ。ꂿꑘꁡꇤꌋꆀꌢꎭꃅꄷꌶꌺꐰꉎꇙꈴꌠꈝꃀꄻꑴꀋꐥꎻ，ꊿꋍꂷꋑꀋꋒꃅꐯꇯꂘꑘꇬꈴꄉꊨꏦꑴꅉꎭꈓꄺꀱꌠꊜꋽꄮꊌꄎꎻ。
ꐳꃅꅉꀨꆅꉁꁦꎴꆄꄻꄹꏦꄻꐛꒆ。ꇓꈓꇓꉈꀀꊿꅉꀨꆅꉁꄜꏂꀧꌠꄻꐛꒆ，ꏱꎆꀥꇱꎕꏦꆏꊾꂷꌠꋍꈓꌠ320ꂷꇬꄉꉀꐕꌊ380ꂷꇬꑟ，ꀑꐱꃅꀀꊿꆅꉁꆄꄻꌬꁌꌜꈐꇬꈛꎂꃅꌗꏢꉆꌠꃅꇫꑟ，ꎍꐽꃅꎞꆏꊿꆅꉁꆄꄻꌬꁌꌜꐂꄉꈛꎂꃅꌗꏢꌠꄹꎆ。ꐊꑷꃅꇓꈓꇓꉈꀀꊿꆄꒉꈺꒉꌠꄜꏂꀧꄹꏦꃄꌬ。ꃹꅼꃅꅉꂫꊐꌠꁦꎴꆄꄻꏲꉻꏓꇱꄺꀱ，ꊋꀥꇱꄉꆅꉁꊿꑞꑌꇮꌠꄹꏦꋈꄻ，ꏠꁸꄉꆅꉃꉻꑫꄻꐛꒆ。ꐊꑷꃅꑤꊐꌠꉻꀞꆅꉚꅉꏓꇱꄺꀱꌠꄹꌬ，ꄃꊐꈋꉐꉬꌠꇓꈓ100ꂷꇬꄉꉻꄻꆅꉚꅉꄺꀱꉚꌠꃅ，ꁬꋌꌊꆅꉚꎃꊐꌠꀜꋊ，ꁬꋌꁌꀊꂥꌠꌌꀁꋌꊰꇁ，ꋭꋽꃅꆅꉃꁧꃤꃅꁌꏤꋊꄻ，ꆅꉃꄉꀧꁵꄻꑠꃄꄟꇬꈴꄉꌫꁌꄤꐽ，ꊋꇤꄉꉹꁌꀵꃤꊨꑾꌙ。ꆅꉁꊿꅉꂫꊐꌠꇬꀉꑌꈚꃅꃅꑘꃅꒉꌠꊋꊡ，ꐧꋦꆅꉚꅉꀞꄻꌠꀻꎆ。ꌜꊐꌠꃹꅼꃅꆅꉁꄺꀱꏓꇱꃅꉚꅉꍔꆙ。ꐳꃅꆅꉁꏟꃆꏈꑘꄴꏮꉉꁱꉺꏦꄻꐛ。ꊾꂷꐽꏡꅉꀨꄉꉻꁦꎴꁧꃤꃅꌫꎆꁥꇱꎕꏦ35ꂷꇬꄉꉀꐕꌊ40ꂷꇬꑟ，ꃷꁨꁦꎆꌠꆏꉬꇮꃅꌌꂿ꒧ꁡꇤꆅꉁꌠꅉꀨꄉꉻꁦꎴꆄꄻꁧꃤꃅꌠꇬꌬꁵꌐ，ꂿꑘꊿꈍꑋꂡꌠꂱꑱꈛꑌꅉꇬꄉꆅꉚꆄꄻꌒꎻ。ꊋꀥꇱꄉꆄꈻꀉꒉꀊꂾꌠꄴꋏ。ꏣꀋꑌꃅꍏꑳꁬꋌꌋꆀꊿꋅꆅꉁꁬꋌꌤꑘꀻꎆ。ꎖꁨꒆꉘꁧꃤꃅꏱꄻꄺꀱꌠꄹꎆ。ꇭꀧꂄꌠꆹꉹꁌꅉꀨꇖꐨꉬ，ꉪꊇꆏꀋꆏꃅꆅꉁꁦꎴꆄꄻꑟꐨꐕꀊꂥ，ꋬꂻꍏꇩꄻꐛꌶ。
ꏓꂱꉹꁌꁳꁱꀕꀻꎆꊌꐨꇬꈲꁧꀊꅰꀉꑌꃅꀊꅰꉾꃪꃅꊌꎻ。ꁱꀕꆹꊿꋅꉌꊈꀑꇬꌋꆀꁧꀿꇁꀦꉬ。ꐧꋦꉪꏦꈯꄜꁌꐨꉜꐨꃄꌬ，ꍏꉸꋊꃅꐥꌠꉾꃪꌠꁱꀕꍔꆙꌶ。ꋧꐈꐧꋦꈆꑪꌄꆣꃅꀻꎆ，ꁱꇐꋽꇐ、ꈨꏀꅏꄻ、ꅇꁊꄆꒌꄆꁱ、ꄉꉣꄯꒉꑠꌤꑘꀻꎆ，ꁱꀕꍸꇐ、ꐥꇐꀋꉬꌠꁱꀕꍸꇐꀧꌋꃅꌠꉜꁨ。ꁱꇐꋽꇐꉾꃪꌠꀊꅰꀉꑌꃅꇲꁵ，ꈀꄸꑌꄯꒉꉜꀘꌠꄖꄑ，ꌶꄻꉹꌠꐧꋦꋈꄻ，ꇩꂱꊇꁧꉀꐕ。ꃹꅼꃅꁱꀕꏦꉻꄺꀱ，ꋍꁘꋍꁘꃅꅉꀨꄉꉻꁱꀕꁧꃤꃅꎕꏦꈴꐽꏡꈴꌠꄹꎆ，ꄉꉻꁱꀕꉁꈾꁌꀋꁵꃅꁉꃑꅉꍔꒉ，ꅉꂫꊐꌠꏓꇱꐨꐥꌠꁱꀕꁧꃤꃅꈯꄜꂿꄐꋊꇤꅐꇁ，ꋊꃅꐥꌠꇢꈴꄜꌋꆀꏀꄓꇢꈴꄜꏓꐊꐙꃅꀻꎆꌠꊥꎆ。ꇩꈐꇩꉈꃰꊿꁱꀕꐮꈴꌠꍔꀺ，ꊋꀥꇱꄉꇩꏹꄜꁊꄐꊋꋈꄻ。ꉹꁌꋍꏅꃅꇭꀧꁱꎟ、ꎟꋓꈯꎟꌋꆀꈯꎟꅐꑘꀻꎆ，2022ꈓꃅꋆꄮꐰꉪꒀꉼꇖꀞꌤꃅꋒ。
ꐧꋦꏱꄻꌠꊋꀥꇱꌋꆀꏀꀺ。ꃹꅼꃅꐧꋦꎀꍹꏲꂠꄹꏦꄺꀱ，ꐳꃅꉹꑘꑠꉼ、ꃼꇇꉻꏑꌋꆀꏲꑘꌤꏲꅉꐮꐞꎻ。ꉹꁌꉻꏑꎀꍹꏦꃤꇬꈴꄉꐧꋦꏱꄻꌠꇬꐊꈽꌠꄏꐓ，ꌐꑘꐧꋦꌤꃅ、ꉌꇗꁧꃤꃅꌠꌋꆀꂄꃅꌤꑘꀻꎆ。ꐧꋦꊋꃤꃀꌠꀨꎹꉁꈾꀞꄻꌠꊋꊡ，ꋥꁕꌋꆀꀀꑳꇬꄉꃀꌠꀨꎹꌠꀻꎆ。ꂿ꒧ꁡꇤꑳꐍꀊꉘ、ꌋꅪ、ꃀꌠꎁꃅꀨꎹꉈꇬꁧꃤꃅꌠꇲꁵ，ꊿꒆꆹꀋꑟꑴꌦꌠꐧꋦꀧꌋꃅꄹꏦꄻꐛ，ꏟꈯꃅꌋꅪꀊꉘꌅꈌꈲꁧꏦꀧ。ꋍꏅꉘꀋꇉꃅꋋꇅꃅꅐꇁꌠꌤꆿꄴꏮꀞꄻꌠꌋꆀꉮꄵꉮꈭꋏꉮꊨꄐꊋꉀꐕ。ꃄꇙ、ꃅꑊ、ꎖꑴ、ꃄꊈꌤꃅꋒ。ꃹꅼꃅꏦꏲꄜꉺꉙꂘꌠꍔꆙ，ꊋꀥꇱꄉꏓꂱꉉꁱꌤꃅ，ꏦꃤꇇꀨꄹꏦꄻꐛꒆ，ꏤꁈꀉꒉꀊꂾꌠꐧꋦꑘꒃꃨꆰꐨꄤꎖꉺꏦꃄꌬꇫꑟ，ꇿꋌꐥꃅꐧꋦꐮꄙꐨꄴꏮꌋꆀꋊꎵ。ꉎꅇꅲꌠꌌꏦꏲꍬꏦꇬꇱ，ꇇꄀꄉꉹꁌꇖꐨꇗꊒꌠꀞꄻ。ꃹꅼꃅꋬꂻꍏꇩꋈꄻ，ꆺꄜꃅꐙꌠꐧꋦꋬꂻꏱꄻꄴꋏꉻꑫꄻꐛꒆ，ꏦꃤꇬꈴꄉꊋꆍꏿꇷꌾꌠ、ꎲꇐꄊꁉꅋꇐ、ꎎꂘꑇꇐ、ꂁꃷꂁꃼꑠꑽꃤꃅꑽꃤꐆꌠꃅꐨꏭꅓꀞ，ꈄꏍꈥꈉꀻꎆꌋꆀꋊꍬ，ꇩꏤꋬꂻꌋꆀꄉꉻꋬꂻꌠꄉꀧ。ꊿꀑꇬꆹꁌꇐꈤꐯꁌꈤꌠꉬ，ꀊꅰꏟꈯꌠꃄꁈꌊꌬꄉ，ꐛꒆꃅꋬꂻꃅꒃꅐꌠꌌꀉꇨꈴ，ꈴꎁꇬꃅꋠꇐꁬꋌꉮꀋꐥꌠꏦꀧ。
ꊋꏏꍍꊨꌠꌋꆀꋦꈭꏱꄻꌠꈢꇓꀖꋒ。ꋦꈭꍍꆀꌠꆹꉹꁌꐥꐨꇬꆐꅑꌠ、ꉹꁌꉌꂵꆅꌠꉬ，ꎸꅍꇇꁈꌌꏱꄻꌶ。ꎼꈎ，ꑍꀑꐊꌋꃑꄻꇨꐨꆏ3.1％ꈋꉐꀁꋌꊰꌶ，ꐈꇐꀑꈉꐨ、ꉢꄊꃑꄻꃷꁨꆏꐯꇯ2％ꀑꂪꊨꒊꌶ，ꑍꀑꐊꑘ、ꄊꀑꏓꐊꐥꇐꃑꄻꌠꆏꂱꄷꃅ3％ꀑꂪꌋꆀ5％ꀑꂪꊨꒊꌶ。ꃹꅼꃅꃅꌗꍍꆀꄴꏮꃅꐨꎖꄎꌠꃄꌬ，ꃄꁕꐯꏑꐮꐊꄉꄴꏮꌠꃄꌬ，ꊋꀥꇱꄉꊖꌋꁦꎴꈲꁧꀊꂥꌠꌬꌠꃅ，ꊖꌋꏦꄉꄆꃑꅉꋊꃑꐨꀄꊭꐯꀄꊭꃅꄺꀱꌠꄹꇙ，ꃄꁕꀋꉬꀋꉆꅉꇬꊖꌋꌬꈧꈉꐨꋍꍈꑌꉀꀋꎆꌠꊥꎆ。ꊋꀦꀊꏀꐕꍯꄹꌬ，ꏸꐕꇙꊋꍯꂪꌗꏱꄻ，ꇓꋌꌬꇐꎕꏦꌋꆀꊇꁧꉀꐕ，ꃄꁕꀋꉬꀋꉆꌠꇓꈓꀋꉬꀋꉆꌠꇬꐊꑷꃅꇩꏤꉬꎕꏦꍮꊪꌬꐕꒀꊵꒀꇲꁵ。2005ꈎꈎꂫꂾꁱꄀꄉꌌꌬꌠꏂꌐꍯꎼꈎꋋꈨꃅꀜꋊꇧꎭꌐ。ꏣꀋꑌꃅꃄꀑꃅꌗꐛꐈꌠꏭꊝ，ꌋꃑꄻꌅꈌꃼꇇꃅꉚꅉꍔꒉ。ꒉꍍꆀꌠꄴꏮꃅꐨꎖꄎꌠꃄꌬ，ꊋꀥꇱꄉꆂꒉꎿꉻꎿꃀꍍꆀ、ꒉꍍꆀꇁꀦꌋꆀꂿ꒧ꉇꇷꇁꀦꍍꆀꌠꏱꄻ，ꒉꇁꀦꇬꄉꅑꅸꒉꁉꈢꅍꇬꑟꌠꈴꎁꇬꃅꍞꏲꈴꌠꃄꌬ。ꊋꀥꇱꄉꊖꆊꍍꆀꌠꄴꄻ。ꋦꈭꍍꆀꌕꁆꏯꌠꁳꏱꄻꌠꄹꌬ。ꋦꈭꀧꌋꃅꏦꃤꏤꄻꌤꃅꌠꃅꋒ。ꉪꊇꆏꀋꎪꃅꏦꇨꃅꋦꈭꏦꌬ，ꆈꄉꃑꄻꌠꏭꊋꑌꃅꅥꍅ，ꋌꁳꃹꐨꀉꒉꐯꀉꒉꌠꃹꎻ；ꏣꊐꄝꃑꌠꏭꏦꇨꃅꆽꎍꐨꎹ，ꋌꁳꊌꄡꑟꌠꅓꀞꐨꊌꎻ。
ꊋꀦꒃꅐꌠꌋꆀꌬꈧꇝꂱꌠꆹ，ꀻꎆꌠꌋꆀꉹꁌꐥꐨꃆꂮꐥ。ꊋꇤꄉꃅꆳꌊꄆꃑ、ꇨꃛꌊꄆꃑ、ꐥꇐꊇꅉꊋꃤꀻꎆ，ꏣꀋꑌꃅꒉꄆꀻꎆ，ꋬꂻꃅꉿꄆꀻꎆ，ꇓꄅꐞꌗ、ꊖꌋꄅꐞꌗꀖꁉꌫꄻ。ꊋꀦꌬꈧꈁꉬꃷꁨꋎꍅ，ꊋꀥꇱꄉꇮ꒧、ꈭꈜ、ꋉꇐꑠꀋꉬꀋꉆꅉꇬꊋꀦꏎꏸ。ꏣꀋꑌꃅꀰꏮꎆꏣꀻꎆ，ꊋꀉꒉꃅꅐꄉꇮ꒧ꀉꀜꌋꆀꐥꐨꑭꍷꀖꑘꅐꀦꐨꐥꃅꌫꄻꌠꄹꎆ。ꉪꇩꏤꊋꏏꋦꈭꀧꌋꃅꃷꎏꊋꂫꀉꇨꃅꑌ，ꊋꏏꋦꈭꀧꌋꃅꅐꑘꄺꑣꌊꅐꏀꌠꈯꌬꅐꑘꐛꌶ。
ꌩꏪꏜꅔ、ꒊꃀꒉꊩꆹꋌꐛꋌꐙꄻꃰꊿꁵꄉꌠꁨꇐꃴꍚꀕꌠꉬ，ꀋꎪꃅꇫꁌꒉꄣꅼꌶ。ꒆꉻꋉꃆꀉꒉꀊꂾꌠꋈꄻꌠꄹꎆ，ꒆꉻꂿꄐꃄꁕꀋꉬꀋꉆꅉꍔꀺ，ꒆꉻꌧꑳꂴꃅꀦꉚꅉꀞꋒ，ꇩꃅꒊꃀꏓꇱꏱꄻꃅꉚꅉꃄꄻ，ꈳꁕꉎꐰꐕꌠꀑꂪꊒꁵꉺꏦꃅꉚꅉꍔꒉ，ꒊꃀꌕꂡꌠꒉꇁꀦꀧꌋꃅꋒ。ꋌꐛꌩꏪꀧꌋꃅꅉꍔꒉ，ꊱꁨꃅꋌꐛꌩꏪꃼꇇꐨꐥꃅꌩꇽꌠꆏꇧꎭ。ꎼꈎꀊꏀꃅꋠꃅꌌꌩꊪꏜꊪꌠ66.7ꃪꉻꐊꐥ，ꌩꏪ600ꃪꉻꐊꊪꅐꇁ。ꒆꉻꋦꈭꀧꌋꃅꇬꀋꉬꀋꉆꌠꆏꃄꄻꇬꅑꎍ、ꊋꐛꌠꆏꀋꎪꃅꃅꇬꎷꌠꇬꅑꎍꌠꉬ，ꉪꊇꆏꀋꎪꃅꏟꈯꀕꃅꌦꀳꏿꌶ，ꀋꎪꃅꃅꐛꃴꍚꀕꇬꎷ、ꒉꐛꐙꎴꀕꇬꎷ、ꀋꆏꃅꐪꊛꄉꀻꎆꇬꎷꌠꃅꇫꑟꌶ。
ꃘ、ꃶꐚꃅꍔꃚꑴꅉꋈꄻꌠꊋꀥꇱ
ꉪꊇꆏꐊꑷꃅꏦꈴꇩꏲꌠꄹꎆ，ꐳꃅꏦꏲꍔꃚ、ꏀꀺꍔꃚ、ꐙꎴꍔꃚꌋꆀꁧꃤꃅꉹꌠꍔꃚꋈꄻ，ꍔꃚꃄꌬꊋꃤꌋꆀꉻꑇꊋꃤꄻꀉꇨ，ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꊥꎆ。
ꀋꎪꃅꏦꃀꇬꈴꄉꏲꂠ，ꏦꃤꇬꈴꄉꌅꈌꌌ，ꍔꃚꌤꃅꌠꐊꑷꃅꌌꏦꏲꍬꈜꇬꇱꄉ。ꏦꃀꆹꉪꊇꊇꅉꃅꈧꏥꏦꉬ，ꍔꃚꈀꐥꊐꌠꌋꆀꌤꃅꊿꆏꀋꎪꃅꏦꇨꃅꍬꌬꌶ。ꏦꃤꁌꒉꏦꃤꌷꏦꃤꍬꏦꃤꌬꌶ，ꏦꃤꈴꄉꐊꑷꃅꃅꎁꃅ，ꏲꑘꃅꐨꈀꐥꌠꃅꐯꇯꏦꃤꁢꊧꐥꌐ，ꍔꃚꌤꏲꅉꈀꐥꌠꃅꐯꇯꏦꃤꉈꌅꈌꐥꀋꉆ。ꃹꅼꃅꏲꑘꏦꌬꏦꉻꄺꀱ，ꏦꇨꃅꎃꊒꌧꑳꃅꏦꌬꌠꋊꍬ，ꐳꃅꏓꇱꃅꏦꌬꌠꄹꎆ，ꐊꑷꃅꏲꑘꏦꌬꆽꎍꄹꏦꃄꌬꇫꑟ。ꏦꐆꇗꐆꌠꃅꐨꈁꐥꌠꏭꆏꅑꁧꎹꌶꌠꉬ，ꏦꌬꀋꎃꀋꊒꀋꀺꀋꑳꌠꐛꐨꈁꐥꌠꆏꀋꎪꃅꌌꄺꀱꌶꌠꉬ。
ꀋꎪꃅꏀꀺꏱꄻ，ꀉꇨꃅꁧꃤꃅ，ꊋꇤꄉꍔꃚꂿꄐꉀꐕ。ꅉꀨꄉꉻꁧꃤꃅꌠꇲꁵꇬꄾꌦꋩꃅꁧꃤꃅꌠꃻꄻꄟꌬ，ꌕꁆꏯꌠꁳꇲꁵꉆꌠꌤꃆꐨꃅꐙꌠꏱꄻꁧꃤꃅꌠꆏꏮꃷꎏꅀꐧꋦꁳꀞꄻꎻ。ꏟꈯꃅꍔꃚꋮꒉꌠꃅ，ꏣꀋꑌꃅꁈꏤꌠꈆꑪꈴꋯꁦꈴꌠꄹꎆ，ꀑꁮꊋꏓꂿꄐꋊꇤꌠꉜꁨ。ꐊꑷꃅꍔꃆꄇꄜꋊꌠꃄꌬ，ꄆꌅꍔꃆꌋꆀꈄꏍꇬꈴꄉꌤꀞꌠꄹꎆ。ꍔꃚꈁꐥꊐꌠꆏꑴꐚꃅꋋꊐꌠꏓꄊꉈꑴꋍꎮꊈꉼꁳꍞꊟꎻ，ꏓꂱꍔꑠꁳꋯꁦꃅꍞꊟꎻ，ꎔꎗꃅꏓꄊꁧꎁ、ꍔꑠꊈꑼ、ꋯꁦꄈꀾ、ꇬꎭꆃ、ꄈꀾꀋꐊꊿꌋꆀꈁꐥꌠꏓꂱꏓꉻꉜꐨꅲ。ꉪꊇꌤꃅꌠꈁꐥꌠꃅꐊꑷꃅꏓꂱꁳꍞꊟꎻꄉ，ꋒꐯꋒꃅꏓꂱꉪꐨꄛꑣꌠ。
ꀋꎪꃅꏦꃤꇬꈴꄉꌅꈌꌬ，ꈪꑌꌠꄖꄑꁋꀘꌠꏱꄻ，ꃹꅼꃅꄈꃅꇏꎴꏲꋈꄻꌠꌋꆀꍹꈔꌠꏭꁏꌤꃅꌠꄹꎆ。ꎔꎗꃅꄈꍏꑷꏤꐪꉆꐘꌠꉌꊈꃄꌬꇫꑟ，ꀋꆏꃅ“ꃅꇏꇖꑵꌠ”ꋊꍬ，ꐪꊛꄉꏦꇨꃅꇩꃷꑼ“ꏤꐪꌕꐘ”ꌠꃄꌬ。ꍹꈔꐛꐨꐛꄟꐯꌟꏡꌠꆏꌅꈌꊤꎹꌠꉬ，ꌅꈌꊨꒊꌠꌌꎴꏲꀉꇨꌠꃅꄉ，ꏟꈯꀕꃅꄹꏦꉻꈫꄻꈬ，ꏟꈯꃅꊤꎹꈥꈉꅥꇧꎭ，ꊋꇤꄉꍹꈔꇀꅉꀜꋊꇧꎭ。ꊋꀥꇱꄉꏲꑘꍞꍤ，ꍤꌗꍞꊟꂿꄐꋊꇤ，ꄉꉻꎆꀨ、ꄉꉻꅐꀦ、ꇩꁨꁨꎆꏭꏦꇨꃅꍞꏲ。ꈍꄮꑌꍹꈔꏭꀉꇨꃅꆼꁏꄟꌭꈬꇬꎷ，ꍹꈔꌠꊿꏭꀋꋰꀋꏆ、ꏦꇨꃅꍤꀞ。ꍤꈔꌠꃅꐨꏭꆏ，ꏲꂠꌤꏲꅉꇬꐥꌠꉬꄿꂿ，ꉹꁌꈭꇍꅐꌠꉬꄿꂿ，ꐯꇯꀋꎪꃅꏦꇨꃅꌌꅓꀞꌶ。
ꀋꎪꃅꑴꇙꃅꃅꐨꐥ，ꏟꈯꃅꒃꉇꇫꑟ，ꃶꐚꃅꉹꁌꎁꃅꉔꏲꌠꃅꇫꑟ。ꎆꏣꀻꎆꌠꐛꄟꀊꏀꃅꐙꇬꆏ，ꉌꊈꐛꑊꑌꐛꄟꀊꏀꐨꐥꌶ。ꉻꃅꊿꋍꏅꌠꈜꀕꇈꏲꌋꇥꀯꆏꈍꄮꑌꏓꂱꎁꃅꀻꎆꌠꏂꈲꁧꌌꁦꎆꌠꌌꆽꎍꐨꀉꒉꇊꀉꒉꌠꃅꄉ，ꈍꄮꑌꐛꏀꈴꋈꄻꂿꃆꄻꆼꁠꈢꄉ，ꈍꄮꑌꉹꁌꊷꈻꉌꐒꉌꌒꌠꄻꉌꂵꈏꊐꄉꌶ。ꍔꃚꈁꐥꊐꌠꆏꃶꐚꃅꃅꎁꃅ，ꏟꈯꃅꃅꈴꌬꈴꌠꒃꉇ，ꁧꀿꐨꐥꃅꌤꃅ。ꏲꑘꊌꐨꍤꎖꈋꍣꉺꏦꄻꃪ，ꃶꐚꊌꐨꄞꅐꌠꏭꆏꊋꒉꃅꀮꄑꌶ，ꌤꃅꇬꄐꀕꌠꏭꆏꇴꌊꉉꅲꊋꊐꌶ，ꇜꄻꌤꀋꃅ、ꐵꑷꏲꄯꌠꏭꆏꄇꄜꋊꄉꌌꅔꁖ、ꏟꈯꃅꌌꃅꎁꅑꃤꎹꌶ。
ꁧꎁꊈ！
ꉪꇩꏤꆹꋍꃱꃅꌠꊿꋅꀉꑌꌠꇩꏤꂷꉬ，ꐥꊯꋯꑌꐮꇇꀨꐮꄮꌠꐧꋦꉪꏦꊿꋅꐮꃆꂮꄻꈫꈈꌋꆀꀻꎆꌠꆏ，ꇩꏤꑭꊂꊿꋅꈁꐥꌠꏓꂱꊧꀨꈲꁧꌋꆀꐯꇯꆽꎍꐨꉬ。ꊿꋅꃄꁕꊨꏦꏲꄹꏦꌭꈬꇬꎷꌋꆀꄻꐛꒆ，ꐞꀋꄿꌠꊿꋅꃅꄷꊋꄏꌠꊋꀉꒉꃅꇱ，ꊻꂷꊼꇅꀁꑌꌠꊿꋅꄏꐓꀻꎆ，ꃅꋮꌄꆣꉹꁌꌣꈚꃅꐨꄹꎆ，ꀁꑌꊿꋅꉾꃪꌠꋊꃅꁱꀕꌋꆀꐋꀋꌡꋂꍔꀧꌋꃅꌋꆀꀻꎆ，ꊿꋅꈁꐥꌠꐮꎼꐮꈴꐮꐊꌠꊥꎆ。ꑭꊗꊨꏦꏱꅉꐎꄻ50ꈎꈭꏝꐛꌠꌋꆀꑟꏦꊉꃷꇙꊨꏦꏱꅉꐎꄻ60ꈎꈭꏝꐛꌠꋨꏦꃅꈧꌠꊥꇫꋒꌶ。ꊿꋅꈁꐥꌠꏓꂱꐮꉂꃅꐮꐊ、ꂄꄸꐮꄏꐥ、ꐮꄮꃅꀻꎆꑲꆏ，ꍏꉸꊿꋅꑱꈐꀉꒉꁯꌠꆏꀋꎪꃅꀊꅰꃅꌄꆣꌣꈚꐞꄿ、ꋬꂻꈨꅪꇁꎂꀕ！
ꉪꊇꆏꐊꑷꃅꄈꅿꑇꇐꌤꃅꅉꀨꌐꏦꌬꈴ，ꑇꇐꐮꃆꂮꐮꄮꌠꊥꎆ，ꑇꇐꁁꏯꏦꊒꌅꈌꈲꁧꀧꌋꃅ，ꑇꇐꁆꏯꊿꂒꋦꌠꌋꆀꉹꁌꑇꇐꑇꌠꁳꎆꏣꐧꋦꀻꎆꌠꇬꏣꀋꑌꂿꄐꋊꇤꅐꇁꎻ。
ꉪꊇꆏꀊꅰꉾꃪꃅꎿꉈꀀꃺꑌꌋꆀꎿꉈꄉꀱꇁꌠꑱꈐꊿꁳꁍꇩꐛꏀꈴꋈꄻ、ꁍꇩꄮꐽꋍꃱꃅꌠꊥꎆ、ꍏꇩꌋꆀꀉꁁꇩꏤꎻꈴꇷꃅꌠꇬꐋꀋꌡꂿꄐꋊꇤꅐꇁꄉ，ꎿꈐꎿꉈꍏꉸꌺꇖꉌꂵꋍꈜꎍꌠꊋꃤꁳꀋꆏꃅꀉꇨꇁꎻ。
ꁧꎁꊈ！
ꈫꈈꌠꇩꏤꐏꇐꌋꆀꀉꇨꌠꂽꋈꄻꌠꆹ，ꇩꏤꌅꀨ、ꋬꂻꌠꌋꆀꀻꎆꈲꁧꀧꌋꃅꌠꁧꀦꏦꀧꌠꉬ。ꏟꈯꀕꃅꄈꃅꒊꃅꇁꀊꏀꌠꇂꃴꂽꄻꀉꇨꇁꌠꑞꅉꁻꌐꆼꒆꄉ，ꄈꆹꂽꇬꀋꎪꃅꏲꂠꌠꅉꀨꏥꏦꌭꈬꇬꎷ，ꇲꈴꃅꋍꑞꋍꑵꁁꏯꂽꌤꐮꉈꈽꌠꊭꋒꄎꋒ，ꃅꋮꐏꁇꎿꒉꐏꁇꃅꈯꐏꁇꌠꋬꂻꎍꐽꃅꄉꇬꎷ。ꐊꑷꃅꊋꀥꇱꄉꐛꏀꊁꇲꌤꃅꌠꋈꄻ，ꇩꏤꐏꇐꈆꑪꎥꃪꌠꌋꆀꇮꇐꀊꂥꀊꏀꌠꇇꌭꉁꈾꋈꄻꊋꃤꀉꒉꃅꇱ，ꇩꏤꐏꇐꈆꑪꇮꇐꇮꑘꀻꎆ。ꃹꅼꃅꇩꏤꐏꇐꌋꆀꂽꄺꀱ，ꇩꏤꐏꇐꌋꆀꂽꋈꄻꏦꏲꈴꑞꅉꉀꐕ。ꊋꀥꇱꄉꐛꏀꈴꌠꃶꍋꏢꍤꊋꃤꋈꄻ。ꉹꁌꃅꇩꏤꐏꁇꌠꉪꐨꑌꐨꀉꇨꎻ，ꇩꐏꄖꄑꌠꌋꆀꊁꄐꊋꃤꋈꄻꌠꄹꎆ。ꇩꏤꐏꇐꋈꄻꌠꌋꆀꎆꏣꋈꄻꌠꋮꄮꃅꀻꎆꌠꌭꈬꇬꎷ，ꂽꌋꆀꉹꁌꐮꐊꃹꅼꃅꀻꎆꌠꊥꎆ。ꍔꃚꈁꐥꊐꌠꆏꈍꄮꑌꐯꌟꃅꇩꏤꐏꁇꌠꌋꆀꂽꋈꄻꌠꉈꇬꌋꆀꊋꄏꇬꎷ，ꀋꎪꀋꑴꃅꂽꍔꃚꂽꉹꁌꐮꋯꑌꌠꄻꈫꈈꌋꆀꊥꎆ。
ꁧꎁꊈ！
ꉪꊇꆏꀋꎪꀋꑴꃅ“ꋍꇩꑍꏦ”、“ꇤꊿꇤꏲ”、“ꉪꊿꉪꏲ”、ꀊꂥꃅꊨꏦꏲꌠꌐꏦꌬꇬꎷ，ꏦꇨꃅꏦꃀꌋꆀꅉꀨꏦꃤꈴꄉꌤꀞ。ꊋꈀꑌꃅꇤꌊꑣꇤ、ꉪꂱꇣꋲꏱꅉꐎꏲꑘꏲꌋꌋꆀꍔꃚꏦꃤꈴꄉꌤꏲꌠꊋꄏ，ꎆꏣꀻꎆ，ꉹꁌꐥꐨꄻꃪ，ꋯꁦꌠꄹꎆ，ꐮꄮꌠꊥꎆ。ꁍꇩꅔꃀꌋꆀꇤꉪꋍꑞꋍꁁꏯꐮꈴꇷꃅꌠꊋꀥꇱ，ꐪꊛꄉꑣꇤ、ꉪꂱꇩꏤꄺꀱꁉꃑꌠꌋꆀꐛꏀꈴꋈꄻꌠꇬꐋꀋꌡꌠꂿꄐꋊꇤꅐꇁ。ꉪꊇꀋꎪꃅꑇꌠꆏ，ꍏꑷꍔꃚꀒꇬꂪꌐꃅꊋꀉꒉꃅꄏꐓꄉ，ꀋꆏꃅꇤꉪꑴꑳꋓꅔꊋꃤꉀꐕꌠꐥꇬꆏ，ꑣꇤ、ꉪꂱꆏꀋꎪꃅꀊꉗꃅꌄꆣꑘꒃꃅꐙꇬꎷꄎꌠꉬ。
ꉪꊇꆏꄠꃪꏭꌤꃅꇬꀉꒉꌠꏱꁈꌐꏦꌭꈬꇬꎷ，ꎿꅔꑍꋮ“ꈬꑍꌧꐊ”ꌭꈬꇬꎷ、“ꄠꃪꄂꋦ”ꌠꏭꁏꌠꍔꍞꅉꃀꄻꈫꈈ，ꎿꅔꑍꋮꐮꃆꂮꄮꐽꀻꎆꌠꎃꊒꃅꍜꌭꈬꇬꎷ。ꊋꇤꄉꎿꅔꑍꋮꋮꒉꅇꉉꌠꄹꎆ，ꎆꏣꐯꈲꐮꐊꃅꌠꄹꇙ，ꊋꀥꇱꄉꅉꂫꊐꌠꌋꆀꌠꏀꀊꉘꐮꎼꐮꈴꎻ。ꏦꃤꈴꄉꄠꃪꃺꑌꌅꈌꈲꁧꀧꌋꃅ，ꉹꁌꀊꅰꀉꑌꌠꁳꎿꅔꑍꋮꐮꃆꂮꄮꐽꀻꎆꊌꐨꈲꏣꊌꎻ。ꉪꊇꆏꎿꅔꑍꋮꃺꑌꀋꆏꃅꐮꅉꐚꐮꉌꒊꌠꁦꎆꇁꌠꉘꇉ，ꃷꅍꆊꅿꀊꅰꃅꐮꄟꎍ，ꉌꃀꇢꅉꈻꇁꋍꈜꅞ，ꁍꇩꄮꐽꋍꃱꃅꌠꎁꃅꊋꃤꅐꌞ。ꉪꊇꀋꎪꃅꑇꌠꆏ，ꎿꋮꑍꄷꐮꃆꂮꄮꐽꃅꀻꎆꌠꆏꇊꀋꄐꌠ、ꏮꀋꄐꌠꐩꋊꒈꂃꉬ。
ꁧꎁꊈ！
ꉪꊇꆏꐪꊛꄉꄮꐽꀻꎆꇷꃅꋓꊋꌠꁈꁧꀊꂥꃅꐕꄉ，ꇩꈐꇩꉈꃅꇴꄉꉻꀉꒉꋋꑍꂷꉜꈴꇲꈴ，ꈍꄮꑌꀋꎪꀋꑴꃅꄮꐽꀻꎆꈝꃀꍬ，ꈍꄮꑌꀋꎪꀋꑴꃅꐯꈲꋓꊋꌠꁉꃑꄐꇐꌬꇬꎷ，ꏟꈯꃅꇩꏤꌅꀨꋬꂻꀻꎆꈲꏣꀧꌋꃅ，ꉪꇩꏤꉻꊿꌋꆀꏦꊿꎿꉈꏦꊒꌅꈌꈲꁧꀧꌋꃅ，ꇷꃅꋓꊋꌠꌌꈯꄜꃅꄉꌠꀊꏀꉹꌠꇩꏹꐮꃆꂮꋈꄻꌠꄹꇙ。ꃹꅼꃅꇩꏤꀉꒉꌠꏭꄐꇐꈴꄉꐯꉇꌠꌋꆀꌤꃶꐚꌠꇷꃅ，ꁣꀋꐥꎍꐽꌠꇩꏤꀉꒉꌠꐮꃆꂮꇶꏦꄻꄉ。ꐊꑷꃅꈭꇍꉇꉻꑌꑲꌠꄹꎆ，ꈭꇍꊫꂫꃰꇌꐮꐊꐥꌠꄺꂡ。ꊋꀥꇱꄉꀻꎆꇰꌠꇩꏤꌋꆀꐮꋯꑌꐮꇷꃅ，ꐯꇯꈲꁧꀧꌋꃅ。ꏣꀋꑌꃅꇩꏹꀉꑌꁁꏯꌤꆿꃅꈽ，ꇩꏹꉻꑫꌋꆀꐥꀹꄹꇙꌊꀊꅰꃅꑗꐥꇗꐥꌠꃅꍜꉜꄉꀻꎆ。ꋧꃅꃔꑭꌦꏭꄙꌉꌋꆀꍏꇩꏓꂱꏝꀪꏭꄙꌉꊋꐛ70ꈎꈭꏝꐛꌠꎺꄅꃅꈧꌠꇬꃆꂮꐥꌠꀞꋒ，ꇩꏹꐧꋦꌋꆀꐯꇯꋧꃅꑍꃢꌉꈿꊋꐛꌠꊌꐨꌋꆀꇩꏹꀋꈐꀋꉈꇗꐥꑗꐥꌠꀧꌋꃅ。ꉪꊇꆏꋧꃅꇩꏤꈁꐥꌠꌋꆀꐮꐊꐯꈽꄉ，ꀊꅰꀊꉗꃅꄮꐽꌠꀧꌋꃅ，ꀊꅰꌄꆣꌠꋧꃅꋈꄻꏾ。
ꁧꎁꊈ！
ꃅꋊꆹꐩꋊꊜꋽꄮꄻꍏꇩꀻꎆꌄꆣꌠꇬꁵꄉꀐ。ꉪꊇꁳꏟꈯꃅꋯꑌꌊꐋꀨꑮꏣꀻꊝꎻꏹꃅꄉꌠꄈꍏꑷꈭꇍꄉ，ꍏꇩꐛꐨꐧꋦꉪꏦꇰꀋꃀꌠꁈꁧꀊꂥꃅꐕꄉ，ꉌꏓꊋꋧ，ꄹꀺꏀꀺ，ꊋꇤꄉꎼꈎꎆꏣꐧꋦꀻꎆꑞꅉꁻꌐꂿꃆꃅꇫꑟꄉ，“ꋍꉐꈎꑍꂷ”ꌠꉈꈽꁻꌐꃅꇫꑟ、ꌣꈚꐞꄿꋯꁦꌧꑳꐮꄮꌠꐧꋦꉪꏦꐛꏀꈴꇩꏤꋉꐛ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꑆꊋꀊꏀꌠꀊꅰꀉꒉꃅꅐꌞꎼꇁꎻ！
