ꍔꃚꌤꃅꅇꄜ
——2014ꈎ3ꆪ5ꑍꊰꑋꈭꇩꏤꑭꊂꏓꂱꁧꎁꃀꀉꒉꑍꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꍔꃚꌤꃅꃆꂮꅇꄜ，ꆍꑴꌠꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋍ、2013ꈎꌤꃅꐨꉪꀱ
ꋌꃀꋋꈓꆹꋋꈭꍔꃚꏦꃤꈴꄉꃅꎁꃅꌠꉘꃀꈒꌠꉬ，ꂿꃆꊋꋠꇈꃣꁧꀉꇖ。ꋧꃅꎆꏣꀱꄓꇁꇬꊋꋠ、ꇩꈐꎆꏣꀁꋌꒉꌠꍅꊋꀉꒉ、ꋌꐛꉮꌸꀋꆏ、ꐮꄙꐨꐮꄅꎍꌠꃅꒊꃅꇁꌼꇪꌠꂾ，ꇩꏤꑭꊂꊿꋅꈁꐥꌠꏓꂱꆏꐋꀨꑮꏣꀻꊝꎻꏹꃅꄉꌠꄈꍏꑷꏃꂠꌠꇂꃴꄉ，ꒊꌋꃅꋓꎭꌠꏭꊝ，ꊋꇤꏡꇤꄉꈢꇓꀖꊋꋠꐨꇔꑣ，ꐛꒆꃅꋋꈓꌠꎆꏣꐧꋦꀻꎆꀋꉬꀋꉆꌠꄐꄉꌠꁻꌐꃅꇫꑟ，ꄺꀱꁉꃑꌋꆀꐧꋦꉪꏦꐛꏀꈴꋈꄻꌠꊌꐨꀉꒉꀊꂾꃅꐥꌠꈀꄸꑌꇫꂿ。
——ꎆꏣꃄꌬꐨꎍꐽꃅꃪꅉꉜꄉꆹ。ꇩꈐꒃꅐꈁꊌꁌꐨ56.9 ꃪꂡꂷꇬꑟ， ꀒꄹꈎꄩ7.7％ꉀꎆ。ꀀꊿꌬꈧꁌꏤꁌꄓꐨꋎꍅꌊ2.6％ꇬꐕꄉ。ꇓꈓꏦꎫꁱꄉꌠꃅꑘꀋꊌꐨ4.1％ꇬꐕꄉ。ꇓꈓꏦꎫꃅꑘꊌꌠꀊꏀꃅ1310ꃪꑻꁦꎆ，ꐩꋊꇬꀊꏀꃅꀊꂥꅉꑟ。ꈏꃹꉇꅐꈁꉬꎆꃀ4ꃪꂡꂰꑼꇬꑟ，ꉈꑴꀊꏀꊐꇬꑟ。
——ꀀꊿꊌꐨꌋꆀꎆꏣꊌꐨꈲꁧꊛꄉꉀꐕ。ꇓꈓꇓꉈꀀꊿꊾꂷꌠꐽꏡꃅꁆꄻꉆꌠꊌꐨꃶꐚꃅꇬ7％ꉀꎆ，ꂿꑘꁡꇤꀀꊿꊾꂷꌠꐽꏡꃅꀊꌃꊌꐨꃶꐚꃅꇬ 9.3％ꉀꎆ，ꂿꑘꁡꇤꌢꎭꊻꂷ1650ꃪꑻꊨꒊ，ꇓꈓꇓꉈꀀꊿꊌꐨꍣꐨꐪꊛꄉꊨꒊ。ꄉꈁꈋꉐꇮꑘꎆꏂꑘꍍꊱ12.2％ꉀꎆ。ꏱꎆꊌꐨ10.1％ꉀꎆ。
——ꐛꉻꋊꐽꇬꏣꀋꑌꌠꊌꐨꈲꁧꊌꅜ。ꋚꂷꅐꐨ1.2ꃪꂡꏣꄩꐂ，“ꊰꈎꊛꄉꉀꎆꌠ”ꃅꇫꑟ。ꁧꃤꃅꑘꁦꎆꁌꐨꍆꐪ46.1％ꇬꑟ，ꉘꃀꃢꌠꅐꑘꑍꑵꌠꄩꐂ。ꈯꄔꁮꐚꏯꃅꄷꒃꅐꈁꉬꁌꐨꍆꐪꊛꄉꉀꐕ，ꃄꁕꀻꎆꋮꄮꐨꉀꎆ。ꐧꋦꑭꊂꄆꌬꃷꁨ7.5％ꉀꎆ，ꎊꈬꎞꎭꃷꁨ9.9％ꉀꎆ，ꀋꉬꀋꉆꌠꎊꈬꃷꁨꌐꁧꌋꆀꎆꏣꉀꎆꐨꐮꄉꄐ。
——ꐧꋦꌤꑘꀻꎆꍅꁍꀕ。ꂘꑘ、ꈆꑪꇮꇐ、ꁱꀕ、ꁦꎴꆄꄻꑠꁁꏯꀻꎆꐨꀊꏀꌠꊌꅜ。ꎹꍏꊰꉸꃅꈯꐚꐺ，ꍤꊉꌕꉸꊋꐛꃅꅂꆧꁨꇬꃹꆹ，ꏪꇊꒉꉱꃹꅼꐨꉈꑴꋍꊐꐂ，ꋋꈨꉜꇬꍏꇩꏓꂱꆹꏀꀺꉹꌠꇩꏤꄻꐛꁻꌐꃅꇫꑟꄎꌠꄐꊋꐥꐯꐥ、ꀑꁮꐨꐥꐯꐥꌠꉬ。
ꋌꃀꋋꈓꆹ，ꊋꋠꐨꂴꉪꄉꌠꑍꀋꋌꑴꇬ，ꃅꌊꂴꉪꄉꌠꏭꀋꋌꃅꉾ。ꎆꏣꐧꋦꀻꎆꌠꆹꃷꁨꑌꍔꒉ，ꉈꑴꊇꁧꑌꉀꐕꄉ，ꋌꊂꎁꃅꅉꃀꌆꄻꄉꀐ。ꋋꆹꉪꊇꋌꈐꊟꊋꊡꌊꀒꁨꆹꄉ，ꀋꆏꃅꊌꐨꀊꏀꌠꃅꅐꇁꌠꉬ。
ꋍꈓꅑꅸꇁꌠ，ꉪꊇꆏꏟꈯꃅꎍꐽꃅꀒꁨꆹꌠꌤꃅꀑꐱꅉ꒜ꉜꐨꌭꈬꃅꄉ，ꎍꐽꃅꉀꎆ、ꐛꉻꋊꄻ、ꄺꀱꌠꊥꎆꌠꋍꃱꃅꄐꏤ，ꏟꈯꃅꉻꒉꏱꁈꆏꎍꐽ、ꉻꐭꏱꁈꆏꍄꑐ、ꐧꋦꏱꁈꆏꀏꊫꆹꌠꌭꈬ，ꉻꒉꋊꐽꌠꉪꈜꌋꆀꃄꄟꏀꀺ，ꏡꁈꀋꃋꋋꄮꑌꈲ、ꀊꅰꃅꀊꉗꃅꑌꈲꌠꑠꋬꈭꎹꌬꄉ，ꎍꐽꅉꇬꄉꂿꄐꐥ，ꎍꐽꅉꇬꄉꊇꁧꉀꐕ，ꎍꐽꅉꇬꄉꀒꁨꆹꇈ，ꋍꑞꋍꑵꌤꃅꌠꐛꊂꉾꃪꌠꃅꇫꑟꀐ。
ꋍꆏꊋꇤꄉꃹꅼꃅꄺꀱꁉꃑ，ꃷꎏꍄꑐꊋꃤꌋꆀꈏꒆꇙꊋꄕꊪ。ꇩꈐꇩꉈꋦꈭꐯꌼꐮꉔ、ꉻꒉꋊꐽꌊꄻꊋꋠꅉꇬꄉ，ꉪꊇꃹꅼꅉꇬꉜꄉꊋꇤ，ꄺꀱꁉꃑꌠꌌꀻꎆꌠꅉꀨꏱꁈꃅꄉ，ꃷꎏ“ꊌꀋꂿꌠꇇ”ꋌꁆꄝꃑ，ꍔꃚ“ꊌꂿꌠꇇ”ꋌꁆꌬꋒꄉ，ꎆꏣꎍꐽꃅꉀꎆꌠꊥꎆ。
ꉪꊇꆏꍔꃚꑴꅉꇬꄉꄺꀱ，ꐳꃅꌅꊋꆹꏮ、ꏲꑘꅧꊨꌅꈌꄝꃑꌠꌌꋋꈭꍔꃚꃭꉱꁉꌠꌤꀉꒉꉘꃀꐘꌠꃅꄉ。ꇩꃷꑼꏲꉻꄺꀱꌠꊱꁨꃅꀕ，ꁸꄉꏲꑘꍤꄻꈌꁧꑠꌤꃆ416ꐘꀜꋊꌋꆀꃑꀏꁵꀐ，ꍔꃚꍤꄻꈌꁧꄉꌠꎆꇱꐘꃆꎹꀨꄺꀱ，ꇬꎭꁱꄀꄹꏦꄺꀱꌠꄹꇙ。ꃅꄷꈁꐥꌠꏣꀋꑌꃅꍔꃚꌅꊋꆹꏮꌋꆀꏲꉻꄺꀱꌠꄹꎆ，ꀉꒉꃅꏲꑘꍤꄻꈌꁧꌤꃆꊨꒊ。“ꃼꇇꇗꏸꄺꀱꌊꁌꎆꇗꏸ”ꃅꉚꅉꍔꒉ，ꏲꑘꌤꑘꃅꐙꌠꁌꎴꌠ348ꐘꀜꋊꌋꆀꁌꀋꎴꇧꎭ，ꎆꏂꑘꀵꃤ1500ꎖꂡꂷꊨꑾꌙ。ꋋꈨꐯꇯꃷꎏꎁꃅꃤꇔ，ꎆꏂꑘꎁꃅꊋꇱ，ꇩꏤꑭꊂꀊꏀꃅꁱꄀꄉꌠꎆꏂꑘ27.6％ꉀꎆ，ꉹꁌꎆꇱꍆꐪꉀꐕꌊ63％ꇬꑟ。ꐊꑷꃅꎆꉛꇔꊰꏢꑲꄉꌠꃑꄻ，ꇩꏤꑭꊂꐧꐭꎆꏂꑘꇴꍆꏮꏆꑭꊂꃅꉚꌠꃅ。ꀋꇙꁨꎆꋍꃱꃅꁱꄀꌠꃄꇬ。ꏲꑘꅧꊨꌅꈌꄝꃑꑠꄺꀱꌠꆹ，ꀉꒉꐯꀉꒉꃅꃷꎏꍄꑐꊋꃤ、ꀻꎆꇙꊋꌋꆀꐧꋦꁧꀿꊋꃤꇬꄕꊪꀐ。ꉪꊇꁉꃑꌠꄹꇙꌊꃹꅼꅉꉜꄉꍔꐯꆹ。ꍏꇩꎮꉰꄿꐨꃼꇇꃅꉚꅉꄻ，ꃹꉆꂾꇩꂱꈲꐪꄻꏢꀋꄉꌠꃷꁨꋏꄯꒉꇬꇱꌠꏲꂠꈁꏦꎹꎥ。ꏦꍠꈴꈜꎆꏣꋥꁕꋈꄻ、ꃅꋊ21ꋏꎿꄩꏦꍠꈴꈜꄐꇐꉪꐨꄜꎼꇁ。ꍏꇩ—ꄏꃀꄿꐨꃼꇇꃅꅉꊐꐕꌠꃅ。ꏐꌧ、ꀘꄌꌋꆀꄿꐨꃼꇇꃅꏤꐪꁰꄻ。ꉇꉻꃼꇇꉀꎆꌠꎍꐽꌠꏱꁈꌬ，ꈜꀸ、ꆅꍤꎕꄻꑠꍞꏲꁧꃤꃅꌠꄻꃪ。ꊋꐛꃅꇨꃛ“ꋓꁏ”ꑠꃼꇇꐮꉅꐮꌎꀉꒉꀊꂾꌠꏭꊝ。ꐳꈴꎸꈜ、ꉿꄆꑠꇮꇐꉁꈾꇩꉈꅐꆹꌠꄹꇙ，ꉇꉻꎆꇱꌠꀉꒉꃅꁦꎆ，ꋯꉈꈩꆫꌠꊿꂡꑻꃢꀋꇈꐥ。ꁉꃑꌠꊛꄉꄹꎆ，ꀻꎆꈥꈉꀊꏀꌠꍔꒉꀐ。
ꑍꆏꉻꒉꋊꐽꉪꈜꌋꆀꃄꄟꏀꀺꄉ，ꎆꏣꃄꌬꐨꄉꄐꃅꐙꌠꏦꀧ。ꎆꏣꀏꒉꄩꇁꌠꃅꒊꃅꇁꊝꇬ，ꉪꊇꆏꏱꁈꀉꒉꃅꄻꀋꀱꃅ，ꎍꐽꃅꉀꎆ、ꃅꑘꊌꐨꀁꑌꐯꀁꑌꌠꏦꀧꌋꆀꁌꄓꐨꀉꒉꐯꀉꒉꌠꄴꏮꌠꊨꄅꄉ，ꎆꏣꄉꄐꃅꌬꈧꄷꑲꆏ，ꊋꏓꊋꋧꄉꏡꁈꆹꏮꐛꉻꋊꄻꌠꄝꀋꏯꌠꒃꄉ，ꉻꒉꏱꁈꌬꐨꀑꐱꃅꌭꀋꇙꀋꑐꃅꄉ，ꃷꎏꉌꊋꑌꐨꀉꇨ、ꐧꋦꎍꐽꎻ。
ꀋꉊꄻꈎꂴꈎꁂꌠ，ꉇꅐꐨꀉꒉꃅꇙꈧ，ꎆꏣꊛꄉꀁꋌꊰ，ꍏꑷꏱꎆꊌꐨꀉꑌꈎꀁꑌꃅꐥꌠꀁꋌꊰꌠꇫꅐꇁ，ꑴꉴꇢꊭꇬꐯꌟꑘꇔꊰꋍꃢꇬꐋꀋꌡꃅꉀꐕ，ꇩꏹꇬꍏꇩꎆꏣ“ꆽꍑꄉꊰꃅꅜ”ꉆꄷꌠꇫꅐ。ꐛꃆꐛꂮꋋꈨꇬꉜꄉ，ꉪꊇꆏꏟꈯꃅꏣꀋꑌꌠꏱꎆꏱꁈꌋꆀꎍꐽꌠꎆꃀꏱꁈꃄꌬ，ꀁꉘꃅꌾꀖꏁꁈꀋꌬ，ꌬꁏꇔꌠꍔꀋꒉ，ꎆꃀꁦꎆꃅꀋꃑ，ꄷꀋꁧꈲꁧꐥꃅꇲꁵꌠꁦꎆ，ꂁꑌꈉꐨꄝꃑ，ꇗꄃꃅꃷꎏꀁꉘꃅꇙꈧꌠꏭꊝ，ꎆꏣꌬꈧꇗꊒꄹꈐꄩꐱꀋꁧꌠꏦꀧ，ꃷꎏꁳ“ꑘꒃꁬꋌ”ꅝꎻꄉ，ꎆꏣꎍꐽꃅꉾꁁꏯꉜꄉꆹꌠꏡꁈꀋꉬꀋꉆꐘꐛ。ꀋꉊꄻꈎꏱꎆꌬꁏꇔꌠꋎꍅꌊꄐꌗꈍꈐꇬꄉ，ꐊꐯꎆꃀM2ꆹ13.6％ꉀꎆ，ꋎꍅꇖꐨꇬꄐꊒ。
ꈁꉬꃷꁨꏱꁈꎍꐽꌠꄉꀧꄉꈭꐨ，ꏣꀋꑌꃅꊐꄉꃷꁨꀰꏢꐛꀕ、ꁦꎆꃷꁨꌬꋒ。ꏱꎆꌬꐨꄻꃪ，ꌐꐘꆹꏮꎆꁵꌠꋊꇱꋎꍅ。ꍏꑷꄈꍔꌤꏲꅉꌋꆀꌤꑘꌤꃅꅉꎂꀕꃅꐙꌠꌫꎆ5％ꊨꒊ，ꃅꄷꈁꐥꌠꑌꎂꀕꃅꐙꌠꌫꎆꊨꒊ，ꊨꀱꎼꇁꌠꎆꃀꆏꌌꉹꁌꐥꐨꄻꃪ、ꎆꏣꀻꎆꌠꇬꌬ。ꎆꏂꑘꀄꊭꌠꏭꇗꏸꀁꑌꃅꎴꌠꈲꁧꁵ，ꎆꏂꑘ600ꎖꃪꁯꈲꊌ。ꍤꌗꌠꃅꄉ，ꇩꏤꑭꊂꍔꃚꃅꐙꌠꎝꃆꃆꂮꌥꉩ。ꊋꀥꇱꄉꎆꒉꎆꇁꍞꏲꌠꌋꆀꏮꇙꐨꏲꂠ，ꎆꒉꎆꇁꎍꐽꑘꒃꃅꌬꈧꌠꄉꀧ。
ꌕꆏꎆꏣꐛꉻꋊꄻꌠꉜꁨ，ꀻꎆꊇꁧꌋꆀꈲꁧꉀꐕ。ꀻꎆꌠꇬꋍꇈꌠꐛꉻꃅꐙꌠꌤꃆꇬꊝꄉ，ꉪꊇꆏꅱꈯꃅꊒꌸꃅꊋꅐ，ꃷꎏꇇꁈꌋꆀꍣꐨꈴꏱꁈꌬꄉ，ꐛꉻꄻꃪꌠꇬꄉꎍꐽꃅꉀꎆ，ꏀꀺꄹꇙꌠꇬꄉꉹꏮꌠꊥꎆ，ꊇꁧꉀꐕꅐꐨꉀꎆꊐꐕꌠꄹꇙ，ꀊꎴꀊꉗꃅꀻꎆꌠꎁꃅꈛꄻꋑꋉ。
ꂿꑘꅉꃀꄻꈫꈈꌋꆀꇬꏭꊋꀥꇱ。ꐛꏀꂿꑘꏓꇱꋬꈭꄺꀱꃅꉚꌠꄹꎆ，ꇶꏦꀉꑌꑵꃅꄉꄐꃅꄉꈁꀰꏢꀻꎆꌠꄏꐓ。ꐊꑷꃅꒈꇉꐭꉹꌠ1.5ꃪꂷꃨꆰꐨꋊꑣꄻꈫꈈ，ꀊꏀꃅꂿꑘꁡꇤꊿ6300ꃪꎖꑹꅝꒉꋬꂻꌤꃆꂥꀘꇧꎭ。ꊋꀥꇱꄉꒆꉻꀧꌋꃅꌋꆀꋈꄻ，ꇩꏤꑭꊂꌩꏪꉱꑷꐨꉀꐕꅷ21.6％ꇬꑟ。
ꐳꃅꅐꑘꐛꉻꋊꄻ。ꁧꃤꃅꑘꀻꎆꌠꊋꊡ，ꄐꇐꏤꁈꐨꐥꌠꏀꄓꅐꑘꀻꎆꌠꄏꐓ，ꇙꊈꅇꈴꇖꋏꌠꑌꐚꃅꌌꃼꇇꑘꇬꌬ。ꏣꀋꑌꃅꉹꑘꅐꊋꄹꁆꁦꎆꇨꌠꐮꄙꐨꋊꎵ。ꊋꏏꍍꊨꌠꌋꆀꍍꆀꏱꄻꌠꄹꎆ，ꊋꀦꃸꅐꐨ3.7％ꀁꋌꊰ，ꑍꀑꐊꑘ、ꐈꇐꀑꈉꃷꁨꋊꃑꃷꁨꂱꑱꅉꃅ3.5％、2.9％ꀁꋌꊰ。
ꊋꀥꇱꄉꅉꃀꉁꈾꋈꄻ。ꒈꂪꒉꈻꒈꀑꎭꁭꅐꈴꈜꉘꃀꊬꌠꋉꃆꏛꃅꒉꈴ，ꈯꄔꈴꈜꉘꃀꊬꌠꀨꄜꋉꃆꏤꄮꈐꃅꃅꌐ。ꅉꃴꁠꐤꑠꇓꈓꅉꃀꉁꈾꋈꄻꌠꄹꎆ。ꇓꋌꐞꌗꌋꆀꄆꊋꌞꇱꈄꏍꍔꐯ。ꐈꇓꊋꀦꀋꉬꄆꃑꃷꁨꍆꐨ22.3％ꇬꑟ。ꊋꀥꇱꄉꂱꉴ、ꒉꇬꎞꎭ、ꈴꌗ、ꒀꍔꈄꏍꋈꄻ，ꎸꈜ、ꐳꈴꄇꈜꎞꎭꀰꏢꆏꈉꐯꇯ10ꃪꉻꆏꇬꐂ，ꄚꈐꏭꐳꈴꎸꈜꎞꎭꀰꏢꆏꈉ1.1ꃪꉻꆏꇬꑟ，ꋧꃅꃅꄉꇬꉘꃀꇬꉆꎍ。
ꏀꀺꄹꇙꀻꎆꌠꄹꎆ。ꐧꋦꑭꊂꎥꃪꀖꁉꌬꐨꆏꇩꈐꒃꅐꈁꉬꁌꐨꍆꁧꇬ2％ꁦꎆ。ꃹꅼꃅꈆꑪꇮꇐꏦꉻꄺꀱ，ꌧꇐ、ꇮꇐꏀꀺꑠꋉꃆꃄꌬ。ꊐꐂꌗꏢ、ꀑꁮꏸꐕꊿ、ꊐꐂꌼꇗꇱꍯꑠꀋꉬꀋꉆꇮꇐꑠꈨꀉꒉꀊꂾꃅꂵꅐꐨꃅꇫꑟ。
ꇖꆏꃶꐚꃅꉹꁌꐥꐨꏦꀧꌋꆀꄻꃪ，ꐧꋦꎃꊒꑗꐥꌠꊥꎆ。ꏱꎆꊌꐨꌬꐨꐮꄙꐨꊼꇅꀉꒉꌠꐛꐨꇂꃴꄉ，ꉪꊇꆏꀋꎪꀋꑴꃅꊋꇤꄉ，ꈍꄮꑌꉹꁌꐥꐨꄻꃪꌠꌌꌤꃅꌠꄓꈌꌋꆀꑞꈌꃅꄉ，ꄹꏦꋈꄻꌠꉜꁨ，ꉹꁌꐥꐨꑞꅉꌭꈬ，ꐧꋦꌤꑘꀻꎆꌠꄹꇙ。
ꉹꁌꅉꀨꐥꐨꏦꀧ。ꒉꌶꌺꃅꑘꎹꊥꎆꎖꄎꌠꃄꌬ，ꋋꈭꇬꌶꅉꀊꂥꊐꌠꌶꅐꌠꌶꌺꀉꑌꄹꁆꌠꃅꑘꊌꌠꃅꇫꑟ。ꂿꑘꁡꇤꑘꃅꊋꃤꆹꏮꄉꃅꑘꎹꁧꃤꃅꌠꌋꆀꃅꑘꁰꍋꌠꊋꀥꇱ，ꇓꈓꏦꎫꃅꑘꊌꊋꌠꊿꏭꃅꑘꎹꇇꀨꌠꃅ。ꃀꌠꀨꎹꄜꏂꀧ、ꐧꋦꈭꋏꇇꀨꄹꏦꋈꄻꌠꄹꎆ，ꇓꈓꇓꉈꐥꐨꀁꂥꀧꎕꏦꂱꑱꅉꃅ13.1％ꌋꆀ17.7％ꉀꐕ，ꎆꏂꑘꎞꆏꊿꅉꀨꃀꌠꀨꎹꎆꐪ10％ꉀꐕ。ꀊꏀꃅꏦꀧꐨꐥꌠꀀꌒꋉꃆ666ꃪꂷꋈꄻ，ꀑꐱꃅ544ꃪꂷꋉꐛꄉ，ꉹꁌꀀꑳꊋꋠꌠꄙꃪꁯꑳꏀꇬꀀꆹ。
ꂘꑘꀻꎆꌠꌋꆀꄺꀱꌠꄹꎆ。ꂘꑘꌢꎭꄏꐓꋉꃆꃄꇬ，ꂿꑘꁡꇤꋭꑘꂘꑘꊋꁧꌶꅉꄺꀱꎖꄎꌠꃄꌬ，ꌶꌺꈲꋌꄻꃪꎖꄎꌠꆏꀉꑳ3200ꃪꑹꈲꊌ。ꌢꎭꐯꌢꎭꃅꄷꏓꋧꐯꅑꎍꅉꑣꋂꂘꃀꏭꐥꐨꁥꎆꃑꁵ，ꌢꎭꃅꄷꂿꑘꁡꇤꌶꌺꒉꌶꅉꀨꎍꌠꇬꌷꆹꌠꊻꂷꀒꄹꈎꄩ8.5％ꉀꎆ。
ꃹꅼꃅꁬꋌꁦꎴꆄꄻꏦꉻꄺꀱ。ꅉꀨꆅꉁꄜꏂꀧꀑꐱꃅꉱꑷꌐꌠꃅꇫꑟ，ꇓꈓꇓꉈꀀꊿꅉꀨꆅꉁꄜꏂꀧꏱꎆꁥꇱꎕꏦꁦꎆꅷꊾꂷꌠꐽꏡꃅ280ꂷꇬꑟ。ꅉꀨꁬꋌꄹꏦꋂꁦꎴꆄꄻꅉ80％ꈋꉐꇬꉱꑷ。ꌜ28ꂷꆏꆄꒉꈺꒉꆅꉁꄜꏂꀧꌠꃅꉚ。ꆄꈻꃛꊸꈭꋏꇇꀨꃅꉚꌠꃄꇬ。ꐊꑷꃅꇩꏤꅉꀨꄉꉻꁦꎴꆄꄻꁧꃤꃅꐘꃆꃄꌬ，ꂿꑘꁡꇤꃴꑌꂾꍤꄻꁌꀋꁵꌠꆏꑱꈐ600ꃪꁯꈲꊌ。
ꁱꀕꌤꑘꌋꆀꁱꀕꅐꑘꉾꃪꃅꀻꎆꌠꊥꎆ。ꁱꀕꅧꌃꑠꈨꆷꅐꇁ，ꉻꈲꃅꐙꌠꁱꀕꉁꈾꌌꐧꋦꇬꄉꁌꀋꁵꃅꁉꃑꌠꍔꒉ。ꃹꅼꃅꁱꀕꏦꉻꄺꀱ，ꊋꀥꇱꄉꁱꀕꃷꎏꋈꄻ，ꁱꀕꅐꑘꁌꎆꐨ15％ꈋꉐꉀꎆ。ꉹꁌꃅꇭꀧꈯꎟꁧꃤꃅꉻꑫꄻꐛꒆ，ꏎꏸꄉꊰꑋꈭꇩꏤꑭꊂꈯꎟꃀꀞꊋꐛ。
ꉬꆏꐧꋦꏱꄻꄟꄻꎆ，ꐧꋦꐮꄮꑘꒃꌠꄉꀧ。ꋌꐛꉮꌸꑠꋍꑞꋍꑵꋋꇅꃅꇫꅐꌠꌤꆿꏭꊝꇬ，ꉪꊇꆏꊱꁨꊋꑌꃅ，ꏟꈯꃅꊿꌌꀨꇬꄉ、ꏦꃤꍬꏦꇗꈴ、ꈆꑪꃅꇫꊝ，ꇿꋌꐥꃅꑌꀞꄻ，ꉈꑴꀊꏀꌠꉺꏦꄻꐛꌠꎹꎥꄉ，ꐧꋦꏱꄻꐨꉀꐕ。
ꀋꉊꄻꈎ，ꉪꇩꏤꌧꍧꇑꎭꃄꇙ、ꇤꌡꂱꑤꍈꑤꃄꇙ、ꉿꇊꏦꌙꉷꏦꆐꏦꒊꃀꈳꁕꒈꅐ、ꒈꂪꁁꏯꊷꇨꃄꇨ、ꎿꋮꆳꆈꑠꀉꇨꃅꋌꐛꉮꌸꌠꇫꅐ，ꊿꅐꅑꋃꒉꇵꆅꑠꇫꅐꇁ。ꉪꊇꆏꊐꁸꄉꆽꎍ、ꐮꐊꐮꋯꄉꉮꌸꌠꄙꉮꌸꌠꈭꋏꌠꃛꊸꉺꏦꄻꐛꒆ，ꍏꑷꏓꇲꃅꇇꀨꄏꐓ，ꃅꄷꈛꑌꅉꇬꄉꋍꃱꃅꄐꇺ，ꄾꌦꋩꃅꏓꂱꉹꁌꀑꇬꁨꇐꋬꂻꌠꀧꌋꃅꀐ。
ꋬꂻꒃꅐꌋꆀꃷꎏꍞꏲꌠꊋꀥꇱ。ꄚꃆꂮꐥꌠꉺꏦꄻꐛꒆ，ꅱꈯꃅꋬꂻꌤꆿꀉꒉꀊꂾꌠꍤꀞꄷꀋꁧꄚꃆꂮꐥꌠꆽꎍꊿꏭꅑꑘꎹ，ꌤꆿꀉꒉꀊꂾꃅꅐꌠ16.9％ꀁꋌꊰ。ꋠꇐꁬꋌꍞꏲꏲꉻꏓꄻꀱ，ꃹꅼꃅꋠꇐꁬꋌꋬꂻꌐꐘꄺꂡꌠꃅ，ꀉꑳꅝꌠꇌꑍꃀꀕꊇꁧꌌꁬꋌꏲꂠꏡꁈꇬꈴꄉꏦꇨꃅꍞꏲ，ꊋꇤꄉꏓꂱꁳꋠꇬꉌꒊ、ꌬꇬꉌꇱꎻ。
ꏦꃤꇬꈴꄉꏲꑘꃅꌠꄹꎆ，ꇩꃷꑼꆏꏦꃤ34ꐘꌌꇩꏤꑭꊂꏓꄊꎮꊈꉼꁳꏤꄻꄺꀱꎻ，ꑘꁨꂘꉘꄹꏦꇖꑘꀜꋊꇧꎭꄷꄜꎼꇁ，ꏲꑘꏦꇗ47ꐘꏤꄻꄺꀱ。ꄯꒉꅇꅲꌠꌋꆀꉉꋊꏓꇙꌠꌤꃅꉻꑫꄻꐛꒆ，ꐧꋦꐮꄙꐨꄴꏮꌋꆀꋊꎵ。ꏦꃤꇬꈴꄉꋍꑞꋍꉹꏦꐆꑽꃤꃅꌠꏭꇇꇩꍈ。
ꐊꑷꃅꍏꑷꏤꐪꉆꐘꌠꉌꊈꃄꌬ，ꉹꁌꈛꏦꉙꂘꃄꄻꃅꈧꌠꃅ，ꏟꈯꃅ“ꃅꇏꇖꑵ”ꏭꁏ，ꏦꇨꃅ“ꃷꋪꏦꃤꏤꄉ”ꌠꃄꌬ。ꍏꑷꇩꏤꌤꏲꅉ“ꌕꉻ”ꌫꎆ35％ꊨꒊ，ꌜ31ꂷꋋꊐꌠꉻꃆꋨꏦꌫꎆ26％ꊨꒊ。ꎴꏲꋈꄻꌠꌋꆀꍹꈔꌠꏭꁏꌠꌤꃅꊋꀉꒉꃅꇱ，ꇗꐆꏦꐆꊿꑠꁥꌌꅓꀞ。
ꀋꉊꄻꈎꆹꉪꇩꏤꉇꉻꏭꑌꑲꌤꃅꀹꄻꌠꐛꊂꀊꏀꑠꈓꉬ。ꑮꏣꀻꍗꑮꏤꀊꏀꈭꌠꇩꏤꏲꌋꊿꆹꇩꏤꑍꊏꂷꉻꏑꅉꏲꌋꊿꀑꋾꃀ、ꑸꄠꎆꏣꇷꃅꎀꍹꏲꌋꊿꑌꀋꐚꃀꈿ、ꎮꉰꇷꃅꎀꍹꀑꋾꃀ、ꏢꍋꇩꏤꏲꌋꊿꐮꂿ、ꄏꑸꏲꌋꊿꃀꈧꌠꈿꑠꀉꒉꀊꂾꀉꑌꁁꏯꃅꃅꈧꅉꇬꐊꈽ，ꇩꏤꈨꇬꅲꇫꄉ，ꊌꐨꀉꒉꃅꐥꀐ。ꈭꇍꉇꉻꑌꑲꌤꃅꌠꀊꏀꑠꊭꇬꃹꆹ。ꎆꏣꉇꉻꑌꑲꌠꁨꎆꐨꀊꏀꌠꊌꅜ。ꀻꎆꇰꌠꇩꏤꌋꆀꐮꑌꑲꇷꃅꌠꂵꀊꏀꑠꊐꇬꃹꆹ，ꀋꉬꀋꉆꌠꇩꏤꀉꒉꌠꌋꆀꐮꃆꂮꆏꐮꇙꌠꇬꄉꎍꐽꃅꀻꎆ，ꀉꒉꀊꂾꌠꇩꏹꌋꆀꃅꄷꌤꃆꉈꑴꊷꈌꌤꃆꀂꏽꇩꏤꀉꒉꂿꄐꆽꎍꐨꋊꇤ。ꏟꈯꃅꇩꏤꏲꄸꌅꀨꌋꆀꎿꃀꌅꈌꈲꁧꀧꌋꃅ。ꉪꇩꏤꉇꉻꏭꑌꑲꊋꃤꀒꁨꋍꁘꃅꉀꐕ。
ꁧꎁꊈ！
ꋌꃀꋋꈓꌠꊌꐨꆹꈝꐮꃅꊌꅜꌠꀋꉬ。ꋋꆹꐋꀨꑮꏣꀻꊝꎻꏹꃅꄉꌠꄈꍏꑷꎃꊒꃅꏃꂠꌠꊌꐨꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꌠꊌꐨꉬ。ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀꋍꑞꋍꁆꏯꊿꂒꋦꌠꏭ，ꇬꀖꌌꀖꄉꈀꎭꀕ！ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꎿꉈꃺꑌꏭ，ꇬꀖꌌꀖꄉꈀꎭꀕ！ꍏꇩꐛꏀꈴꋈꄻꌤꑘꇬꉈꇬꌋꆀꄏꐓꌠꇩꏤꈁꐥꌠꍔꃚ、ꇩꏹꎀꍹꌋꆀꇩꏤꈁꐥꌠꐋꀨꏭ，ꇬꀖꌌꀖꄉꈀꎭꀕ！
ꋌꃀꋋꈓꍔꃚꌤꃅꌠꇬꈲꁧꐥꌠꉪꈜꌋꆀꃄꄟꆹ，ꋌꉈꃄꄻꌠꇬꐪꊛꅷꁧꇬꎷ、ꀋꆏꃅꎹꎥꌋꆀꄻꐛꒆꌶ。ꋍꈭꐨ，ꉪꊇꏸꐚꃅꌧꅜꇬ，ꁨꆹꈝꃀꇬꉈꑴꊋꋠꅍꌋꆀꌤꃆꀉꑌꃅꐥꑴꌦ。ꀋꉬꀋꉆꌠꆏ：ꎆꏣꎍꐽꃅꃪꅉꉜꄉꆹꌠꅉꃀꈫꈈꃅꀋꐛꑴꌦ，ꉀꎆꌠꈏꒆꇙꊋꌌꀉꇨꌶꑴꌦ。ꏱꎆ、ꎆꒉꎆꇁꑠꁁꏯꇬꃨꆰꐨꈨꂁꑌꑴꌦ，ꉹꑘꄹꁆꅐꊋꁦꎆꇨ，ꉻꒉꋊꐽꊋꋠꐨꁦꎆꇱ。ꂿꑘꅐꐨꁦꎆꂿꑘꊿꁦꎆꊌꌠꊋꋠꐨꀉꒉꇁ。ꃅꄷꋍꈨꇬꃅꌗ、ꀆꐒ、ꊖꆊꑠꀉꇨꃅꍍꆀ，ꊋꏏꍍꊨꂿꃆꀉꇨ。ꃅꑘꎹꐛꉻꃅꐙꌠꐮꄙꐨꊼꇅꀉꒉ。ꀀꑳ、ꋠꇐꁬꋌꉮꀋꐥ、ꆅꉁꆄꄻ、ꃀꌠꀨꎹ、ꂘꑘ、ꊌꐨꁆꁸ、ꃄꅉꃻꌬꐆꎞ、ꐧꋦꋬꂻꐥꀹꑠꁁꏯꉹꁌꇫꉌꀋꃹꌠꌤꃆꄡꇗꊼꇅꀉꑌ，ꒃꅐꋬꂻꌤꆿꀉꒉꀊꂾꌠꄡꇗꇫꅐꇁ。ꐧꋦꉌꒊꉻꑫꐛꀋꒆ。ꍹꈔꌤꃆꅐꇁꈝꐮꀉꑌꃅꇫꅐ，ꉻꃅꊿꐚꀋꎴꏲꀋꉔꐛꐨꄡꇗꇫꐥ。ꌤꃆꋋꈨ，ꋍꈨꆏꀻꎆꈴꎁꇬꄉꅐꇁꌠ，ꋍꈨꆏꌤꃅꀋꋒꄉꅐꇁꌠ。ꌤꃆꋋꈨꏭꆏ，ꍔꃚꆏꂴꊨꏦꑴꅉꅑꃤꎹ、ꏡꁈꏂꌶ。ꉹꁌꈁꉘꇉꌠꆏꉪꊇꁈꏂꌊꃅꌶ。ꏟꈯꃅꆽꎍꂿꃆꎺꄉ，ꎭꊝꉮꌸꉪꐨꀉꇨꇱ，ꃅꀬꏿꀬ，ꋍꍈꑌꐵꀋꑷꃅ，ꏟꈯꃅꇿꋌꐥꃅꌤꃆꂥꀘ，ꈍꃅꑌꏓꂱꉘꇉꐨꇬꇢꄡꏿꌶ。
ꑍ、2014ꈎꌤꃅꐨꀑꐱꄐꇺ
2014ꈎ，ꉪꊇꊝꌠꃅꒊꃅꇁꄡꇗꐯꌼꐯꇪꎍ，ꈲꐥꇎꏦꌋꆀꈲꀋꐥꐊꊈꐯꇯꐥ。ꋧꃅꎆꏣꀱꄓꇁꇬꄡꇗꊨꀋꄅꐊꊈꐥꑴꌦ，ꇩꏤꋍꈨꋋꈨꉻꒉꏱꁈꋊꐽꌠꐛꐈꐨꐥ，ꏀꄓꎆꏣꄜꆏꊋꋠꐨꌋꆀꋓꎭꐨꀊꏀꌠꊝꇁꑴꌦ。ꅉꆺꑭꊂꎆꏣꐛꊂꃹꅼꃅꋊꐽ，ꇩꏹꋓꅔꐨꀊꅰꃅꀉꇨꆹ。ꉪꇩꏤꀻꎆꄘꄏꌠꐊꊈꇎꏦꑌꃹꅼꃅꐛꐈꇰ，ꀊꅼꃅꐮꄙꌠꄇꇖꀕ，ꐛꉻꋊꐽꊼꇅꊋꋠꊬꌠ、ꉀꎆꐳꐨꆥꄻꊬꌠꇬꎍ，ꁦꅂꄹꐂꀋꉬꀋꉆꇄꌠꇬꉬ，ꎆꏣꀁꋌꒉꌠꍅꊋꄡꇗꊼꇅꀉꒉꑴꌦ。ꋍꈭꐨꂿꐚꌶꌠꆏ，ꉪꇩꏤꀻꎆꌠꆹꄡꇗꂿꄐꀉꇨꃅꐥꉆꌠꄐꇐꏤꁈꊜꋽꄮꇬꎍꑴꌦ，ꇮꑘꈴ、ꇓꈓꐛꈴꌠꐪꊛꄉꄹꎆ，ꃄꁕꀻꎆꈭꏮꅉꀉꒉ，ꋌꉈꋍꊭꇬꎆꏣꉀꎆꐳꐨꐧꀠꀊꂥꌠꄉꀧꇬꅉꃀꌋꆀꇎꏦꐥ。ꉪꊇꆏꀋꎪꃅꐭꍅꉪꎴ，ꈲꎹꉮꋊꌶ，ꀋꎪꃅꏟꈯꀕꃅꀻꎆꑴꇙꌅꈌꒃꇇꈐꊐꄉꌶ。
ꎼꈎꍔꃚꌤꃅꌠꀑꐱꇖꐨꆏ：ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ，ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌌꄐꇺꅍꃅꄉ，ꐊꑷꃅꄈꅿꃀꀉꒉꊰꉆꃢꈿꌠꌋꆀꊰꉆꈭꑍꃢ、ꌕꃢꐊꈴꃀꈿꉌꊈꃄꌬꇫꑟ，ꐋꀨꑮꏣꀻꅇꀋꂿꑘꃅꈁꉉꌠꉌꊈꃄꌬ，ꎍꐽꌠꇬꄉꁨꆹꌠꌤꃅꀑꐱꅉꃀꉜꐨꌭꈬ，ꄺꀱꏀꀺꌠꌌꎆꏣꐧꋦꀻꎆꌠꈁꐥꁁꏯꈭꊭꈁꐥꌠꇬꌬꈴ，ꉻꒉꎆꏣꏱꁈꐪꊛꃅꐙꎍꐽꃅꐙꌠꄉꀧ，ꋊꐽꌠꂴꂿꐨꄐꌐꐨꀉꇨꇱ，ꐊꑷꃅꃹꅼꃅꄺꀱ，ꀋꆏꃅꁉꃑꌠꍔꒉ，ꏀꀺꄹꇙꌠꃄꌬ，ꏟꈯꃅꍏꇩꐛꐨꀊꏀꉹꌠꇮꑘꈴ、ꈴꌗꈴ、ꇓꈓꐛꈴ、ꂿꑘꐛꏀꈴꌠꄇꈜꍬ，ꐳꃅꃄꄟꆹꏮꐛꉻꋊꐽꊐꐕꌠꊥꎆ，ꊋꀥꇱꄉꅉꀨꄉꉻꁧꃤꃅꉻꑫꋈꄻ，ꊋꇤꄉꉹꁌꐥꐨꏦꀧꌋꆀꄻꃪ，ꃶꐚꃅꊇꁧꌋꆀꈲꁧꀻꎆꉀꐕ，ꊋꀉꒉꃅꇤꄉꐧꋦꉪꏦꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻ、ꒆꉻꌧꑳꋈꄻꌠꄹꎆ，ꎆꏣꐪꊛꄉꉾꃪꃅꀻꎆꌠꌋꆀꐧꋦꐮꄮꎍꐽꌠꃅꇫꑟ。
ꎼꈎꎆꏣꐧꋦꀻꎆꄐꄉꌠꁻꌐꀋꉬꀋꉆꌠꆏ：ꇩꈐꒃꅐꈁꉬꁌꐨ7.5％ꅶꍯꉀꎆ，ꀀꊿꌬꈧꁌꏤꁌꄓꐨꋎꍅꌊ3.5％ꅶꍯꇬꎍ，ꇓꈓꏦꎫꀊꏀꃅꃅꑘꊌꌠꊿ1000ꃪꑼꈋꉐꐥ，ꇓꈓꏦꎫꃅꑘꀋꊌꌠꁱꄀꐨꋎꍅꌊ4.6％ꈐꇬꄉ，ꇩꏹꊌꐨꌬꐨꀑꐱꃅꐮꆽꏣ，ꊋꇤꄉꀀꊿꊌꐨꉀꎆꌋꆀꎆꏣꀻꎆꌠꋍꁘꃅꐕꌠꃅꇫꑟ。ꊋꀥꇱꄉꉀꎆ、ꃅꑘꎹ、ꎊꈬꁌꏤ、ꇩꏹꊌꐨꌬꐨꑠꁻꌐꀋꉬꀋꉆꌠꏓꇲꐮꆽꏣꌶ。ꄚꇬꆏ，ꀋꉬꀋꉆꃅꁻꌐꑍꑵꌌꉉꀽꂿ。
ꎆꏣꉀꎆꌠꃆꂮ。ꉪꇩꏤꆹꄡꇗꀻꎆꇰꌠꇩꏤꂷꉬ，ꉈꑴꐧꋦꉪꏦꉘꃀꊬꌠꇬꎍꑴꌦ，ꀻꎆꌠꆹꉪꇩꏤꌤꃆꈁꐥꌠꂥꀘꌠꊨꊭꉬ，ꀋꎪꃅꏟꈯꃅꎆꏣꋈꄻꈯꄜꋋꏢꌭꈬ，ꋭꋽꃅꎆꏣꉀꎆꐳꐨꄉꀧ。ꎔꎗꃅꌌꐯꌟꉜ、ꀱꒊꀱꇁꃅꉪꎖꇈ，ꉀꎆꄐꄉꌠꑞꅉꁻꌐꆏꏤꄻꌊ7.5％ꅶꍯꃅꄉ，ꈉꇖꌠꌋꆀꃅꉆꌠꐯꇯꇲꄻꄉꀐ。ꋋꆹꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꌋꆀꐮꊪꊛ，ꃷꎏꉌꊋꑌꌠꌌꀉꇨꌠꇬꈲꏣꐥ，ꎆꏣꐛꉻꋊꄻꄻꃪꌠꇬꈲꏣꐥ。ꎍꐽꃅꉀꎆꌠꆹꃅꑘꊌꌠꄉꀧ，ꋋꆹꇓꈓꏦꎫꀊꏀꃅꃅꑘꊌꈉꇖꌠꇎꈴ，ꉈꑴꂿꑘꁡꇤꊋꃤꆹꏮꌊꇓꈓꄉꌤꃅꆿꃅꌠꎁꃅꈥꈉꊏꄉ，ꁧꀦꇬꆏꇓꈓꇓꉈꀀꊿꊌꐨꁦꎆ、ꏓꂱꐥꐨꄻꉾꌠꎁꃅꌠꉬ。ꎼꈎꎆꏣꉀꎆꌠꑞꅉꁻꌐꃅꇫꑟꂯꇬꐊꊈꏣꀋꑌꌠꀉꑌꃅꐥꑴꇬ，ꄚꎬꅧꃅꊋꇤꌶꌠꉬ。
ꁌꏤꑟꐨꃆꂮ。ꇓꈓꀀꊿꌬꈧꁌꏤꉀꎆꐨꋎꍅꌊ3.5％ꅶꍯꐕꄉꌠꆹ，ꀋꉊꄻꈎꁌꐕꂥꄓꌠꁧꏖꌠꌋꆀꎼꈎꀊꏀꃅꁌꐕꐊꊈꑌꉪꏢꀐꌠ，ꋋꑌꉪꊇꈳꎆꅐꂋꌠꋎꍅ、ꉹꁌꐥꐨꏦꀧꌠꀋꎪꐨꌋꆀꉌꊋꑌꌠꄜꅐꇁꀐ。ꉪꇩꏤꂿꑘꋍꈓꇀꅉꀕꊛꄉꅐꐨꁦꎆ，ꇮꑘꅐꇐꀑꐱꃅꄉꇬꇲꈉꌠꇬꇎꈴ，ꋛꂷꑠꎊꈬꅐꇐꊭꊐꌠꇎꃅꐥ，ꈏꃹꉇꅐꋊꄻꄐꐨꊼꇅꀉꇨ，ꎊꈬꁌꏤꈁꉬꑟꐨꀑꐱꎍꐽꌠꄉꀧꇬꇎꏦꉾꌠꀉꑌꃅꐥ。ꄚꎼꈎꁌꏤꄹꆷꉀꆹꌠꐊꊈꀉꑌ，ꉌꂵꀉꒉꀋꉆ，ꀋꎪꃅꎊꈬꁌꏤꋎꍅꌠꃅꋒꌶ，ꃶꐚꃅꉹꁌꐥꐨꏭꁧꏖꐨꀉꒉꌠꄴꏮ。
ꎼꈎꎆꏣꐧꋦꀻꎆꌠꑞꅉꁻꌐꂿꃆꃅꇫꑟꂯꇬ，ꄚꐰꏥꏦꌋꆀꏱꁈꌬꐨꒃꉇꋒꌶ。
ꋍ，ꃹꅼꃅꄺꀱꌠꇬꇙꊋꎹ。ꄺꀱꌠꆹꈲꁧꀉꒉꐯꀉꒉꌠꉬ。ꀋꃋꋋꇅꄺꀱꌠꆹꈢꇓꀖꊬꌠꌋꆀꃹꅼꅉꇬꃹꒉꀐ，ꀋꎪꃅꏟꈯꀕꃅꏓꂱꉹꁌꊫꁱꄉ，ꌳꈄꇇꇽꌠꉌꑣꐨ、ꉈꑴꎞꅉꀋꐥꃅꌉꈿꌠꊋꌗꑌꄉ，ꉪꇐꉪꉻꏢꑲꌠꅸꁖ，ꈲꁧꀋꇙꈴꌠꇊꑴꂵꅐꄉ，ꎆꏣꏦꉻꄺꀱꌠꌌꏃꈻꅍꃅꄉ，ꐊꑷꃅꃹꅼꃅꋍꑞꋍꁁꏯꄺꀱ。ꉹꁌꉘꇉꐯꉘꇉꌠꁁꏯꇬꄉꄺꀱ，ꎆꏣꐧꋦꀻꎆꇬꌤꃆꑓꅐꎑꐯꎑꌠꇬꄉꄺꀱ，ꐧꋦꋍꑞꋍꁁꏯꉜꐨꐮꐊꌠꊨꊭꇬꄉꄺꀱꄉ，ꃷꎏꁳꁆꄻꇬꏤꇽꐨꂿꄐꐥꌋꆀꀊꅰꉾꃪꃅꍔꃚꂿꄐꋊꇤꅐꇁ，ꏣꀋꑌꃅꐛꉻꋊꄻꌠꇬꈲꏣꐥꌠꄺꀱꌠꄹꎆ，ꃷꎏꀨꄜꍄꑐꊋꃤꌋꆀꐊꊈꁆꄻꉾꃪꌠꏢꇈꅍꇤꇧꎭꄉ，ꐧꋦꑭꊂꃅꊋꂫꀹꄻꌠꋒꐯꋒꃅꄝꃑꅐꇁ，ꎃꊒꑗꉬꄇꇖꀕꃅꄜꅐꎼꇁꄉ，ꏓꂱꋍꏅꁳꐯꇯꄺꀱꀻꎆꌠꊌꐨꐥꎻ。
ꑍ，ꎆꏣꃄꌬꌠꋭꋽꅉꇬꎍꌠꄉꀧ。ꉻꒉꋊꐽꏱꁈꇴꉻꄻꐛꒆ，ꎍꐽꃅꉀꎆꌠ、ꃅꑘꊌꌠꐰꑞꅉꑟꌠꋏꌫꄉꌋꆀꈳꎆꅐꂋꑞꅉꑟꌠꄴꏮ，ꐪꊛꄉꏣꀋꑌꌠꏱꎆꏱꁈꌋꆀꎆꃀꏱꁈꌫꄻ。ꎼꈎꄐꄉꇬꏱꎆꌬꁏꇔꌠ13500ꂡꂷꃅꄉ，ꀒꄹꈎꇬꄩ1500ꂡꂷꁦꎆ，ꄚꈐꏭꍏꑷꏱꎆꌬꁏꇔꌠ9500ꂡꂷ，ꍏꑷꃅꄷꎁꃅꃑꌠꎝ4000ꂡꂷ。ꏱꎆꌬꁏꇔꌠꌋꆀꇩꎝꄉꈁꆏꎆꏣꈁꉬꃷꁨꍔꒉꌠꐊꄉꊼꇅꁦꎆ，ꄚꌬꁏꇔꐨꎍꐽꌊ2.1％ꇬꎍ，ꏱꎆꏱꁈꐪꊛꐨꄜꅐꇁꀐ。ꎆꃀꏱꁈꆏꃛꀋꃛꄉꄐꌠꄉꀧ，ꐧꋦꈁꉬꇲꈉꌠꀑꐱꐮꆽꏣꌠꊥꎆ，ꎍꐽꌠꎆꃀꎆꒉꎆꇁꋦꈭꄺꂡ。ꉻꒉꃅꍤꄻꋓꉪꁨꄉꏱꄻꌠꊋꀥꇱ，ꎆꃀꉌꒊꎆꉛꌠꌋꆀꐧꋦꎆꏓꄉꈁꄉꄐꃅꉀꎆꌠꄐꏁ。ꎼꈎꐊꐯꎆꃀM2ꄐꄉꇬ13％ꅶꍯꉀꎆꃅꄉ。ꏱꎆ、ꎆꃀꌋꆀꅐꑘ、ꎆꇱꌠꑠꏱꁈꐊꃅꌠꊋꀥꇱ，ꏱꁈꊭꄎꄉꌠꃅꋒ，ꀋꆏꃅꊼꇅꄐꄻꐭꄻꄉ，ꍏꇩꎆꏣꄇꇉꋋꇷꈫꈈꃅꀊꎴꃅꈴꆹꌠꄉꀧ。
ꌕ，ꊋꇤꄉꊇꁧꉀꐕꅐꐨꉀꎆꌠꊐꐕ、ꊛꄉꉹꁌꐥꐨꄻꃪ。ꉪꊇꀻꎆꌠꎹꈹꌠꆹ，ꊇꁧꅐꐨꐕꀊꂥ、ꉹꏮꊐꐕ、ꏓꂱꐥꐨꄻꃪꃅꀻꎆꌠꄹꎆ。ꎍꐽꃅꉀꎆꄮꇬ，ꀻꎆꄹꇙꌠꆏꊋꒉꃅꐊꊈꎆꇱꌠꏮꌊꀊꅰꀉꑌꃅꏀꀺꉘꇉꌠꉜꄉꆹꏮ，ꊋꒉꃅꋊꃅꊼꇅꂱꎆꅑꌠꏮꌊꀊꅰꀉꑌꃅꏓꇱꋓꅔꂱꎆꅑꌠꉜꄉꏭꆦ，ꋧꃅꅐꑘꁷꃅꇬꐰꊐꌠꏮꌊꐧꊐꀊꂥꊐꌠꉜꄉꊐꐕ，ꇓꈓꇓꉈꃄꁕꐮꆽꀋꏣꌠꏮꌊꐽꊯꋮꄮꌠꉜꄉꒉ。ꃅꐛꐨꎖꉚꈋꍣꉻꑫꄻꐛꒆ，ꃶꐚꃅꋍꑞꋍꁁꏯꏣꀋꑌꐨꄐꏁꌊꐳꃅꃄꄟꆹꏮꐛꉻꋊꄻ、ꈆꑪꃅꀻꎆꌠꃅꇫꑟꌠꀂꏽꇁ，ꀋꆏꃅꃅꑘꊌꌋꆀꇓꈓꀀꊿꊌꐨꁦꎆ，ꀋꆏꃅꒆꉻꋦꈭꄻꃪꄉ，ꎆꏣꐧꋦꀻꎆꌠꁳꀊꅰꑘꅐ、ꀊꅰꎃꊒ、ꀊꅰꊛꄉꆹꉆꎻ。
ꌕ、2014ꈎꌤꃅꀋꉬꀋꉆꌠ
ꎼꈎꍔꃚꌤꃅꋒꂯꇬ，ꃹꅼꃅꄺꀱꌠꌌꇙꊋꀉꇨꌠꃅꄉ，ꐛꉻꋊꄻꌠꌌꊋꒉꃅꃅꌠꃅꄉ，ꏓꂱꐥꐨꄻꃪꌠꌌꑞꅉꁧꀦꃅꄉ，ꏓꇱꇲꈴ，ꀋꉬꀋꉆꌠꌌꀨꇬꄉ，ꀋꎪꃅꃶꐚꈲꁧꊌꎻ。
（ꋍ）ꀋꉬꀋꉆꁁꏯꄺꀱꌠꄹꆷꌊꀊꏀꃅꂵꅐꌠꊌꎻ。
ꄺꀱꌠꆹꎼꈎꍔꃚꌤꃅꌠꂿꃆꀨꎍꐘꌠꉬ。ꎆꏣꏦꉻꄺꀱꌠꌌꀋꂿꑘꌠꃅꄉ，ꐛꐪꏡꃏ，ꉹꁸꄉꄹꎆ，ꋍꈚꃅꆏꈁꉬꃅꇘꑐꌠꃄꁈꒃꉇꋒꄉ，ꊋꇤꄉꃶꐚꃅꁨꎆꌠꊌ，ꀊꅰꀉꑌꃅꄺꀱꍍ꒾ꄝꃑꌶ。
ꃹꅼꃅꏲꑘꏦꉻꄺꀱꌠꄹꎆ。ꀒꁨꋍꁘꃅꏲꑘꅧꊨꌅꈌꄝꃑ，ꋋꆹꍔꃚꊨꏦꑴꅉꄺꀱꌠꉬ。ꎼꈎꆏꉈꑴꇤꇧꎭꌠꌋꆀꏲꑘꍤꄻꈌꁧꌠꃑꐰꁵꌠꌤ200ꐘꈋꉐꐥ。ꃹꅼꃅꎆꇱꍤꄻꈌꁧꄹꏦꄺꀱ，ꂴꎍꐨꍤꄻꈌꁧꌠꇤꇧꎭꅀꅧꊨꄉ，ꋒꐯꋒꃅꎆꏂꑘꎆꇱꑴꌅꌅꈌꃅꇫꑟ，ꎆꇱꑘꀺꈝꐮꈴꌠꄹꎆ。ꇯꍝꃅꀞꄻꈉꌠꏲꑘꍤꄻꈌꁧꌠꌤꐘꆏ，ꌅꈌꃷꁨꋏꄯꒉꄹꏦꀞꄻꌶ，ꉬꇮꃅꌌꐧꋦꏭꄇꄜꋊ。ꃷꁨꋏꄯꒉꈋꉈꆏ，ꉬꇮꍤꄻꈌꁧꀋꉆ。ꐊꑷꃅꏲꑘꀋꉬꌠꍤꄻꈌꁧꌤꐘꋊꎵ。ꀑꐱꃅꌜꏃꑤꍔꃚꏲꉻꄺꀱꌠꃅꌐ，ꐪꊛꄉꌤꑘꌤꃅꅉꄺꀱꌠꄹꎆ。ꇩꏤꑭꊂꇬꄉꇬꎭꁱꄀꄹꏦꄺꀱꌠꃄꄻ，ꏮꁵꏚꍆꁱꄀꄹꏦꃅꇫꑟ，ꂴꊫꌐꐥꊁꃅꌠꄺꀱꌊꂴꃅꄉꊁꊫꌐꐥꎻ，ꎆꏂꑘꈎꎕꄻꌠꄹꏦꄺꀱꌊꈎꄛꇰꌠꉻꄜꄹꏦꃅꄉ，ꃷꎏꀨꄜꁳꀋꆏꃅꍄꑐꊋꃤꀊꏀꌠꂵꅐꇁꎻ。
ꌤꃅꇬꌤꃅꊂꍞꏲꌠꊋꀥꇱ。ꄝꃑꏱꄻꋓꃅꌠꌭꈬ，ꌤꏲꅉꅶꍯꐰꉎꐮꐊꃅꌠꏱꄻꉺꏦꄻꐛ，ꃅꎁꌋꆀꌅꈌꋓꃅꃑꐰꁵ、ꄝꃑꍄꑐꌠꌋꆀꍞꏲꌠꋓꃅꃅꑞꅉꑟꌠꃅꇫꑟ。ꋍꈚꃅꍤꄻꈌꁧ、ꌍꑓꋍꂷꇬꌤꀞꌠꄹꌬ，ꏓꋍꃱꃅꃷꎏꍞꏲꌠꎹꎥꃄꌬ。ꐳꃅꐧꋦꉌꒊꉻꑫꋈꄻ，ꍔꃚꈴꌗꐯꇯꌬꌠꄹꎆ，ꋧꐛꊿ、ꏦꊿꐮꐊꌠꎂꂷꌬꌠꄹꇙ，ꃷꎏꋓꅔꏥꏦꀋꈴꌋꆀꌬꈧꊿꌅꈌꈲꁧꉮꄻꌠꎆꏂꑘꆏꂁꂓꄹꏦꄻꄉ，ꅇꏤꀋꁨꊿꁳꋍꁘꑌꈴꒉꊋꄉ，ꅇꏤꁨꊿꁳꇿꑌꈴꒉꉆꎻ。
ꏱꎆꇗꏸꏦꉻꄺꀱꌠꌤꀨꎍꋌꐘꒃꉇꋒꌶ。ꐊꑷꃅꋊꍬ、ꄇꄜꋊꂿꉆꌠꄐꌗꄹꏦꃄꌬ。ꊋꇤꄉꍔꃚꃅꐙꌠꊌꐨꈁꐥꌠꉬꇮꌌꄐꌗꌠꇬꇱꄉ，ꈁꉬꈍꈐꄐꌗꏱꄻꌠꃄꌬ。ꈁꐥꊐꌠꍔꃚꄐꌗꌠꌋꆀꌗꂫꇽꌠꉬꇮꌌꐧꋦꏭꄇꄜꋊ，ꌤꏲꅉꄐꌗꌠꆏꋍꁘꋍꁘꃅꄇꄜꋊꌊꅉꀨꌬꐨꌋꆀꐘꃆꌬꐨꇬꑟ，ꏱꎆꈁꐥꌠꎆꁆꁵꌠ“ꌕꉻ”ꌫꎆꉬꇮꄇꄜꋊꌶ，ꈨꑭꏱꎆꄺꂡꄉ，ꉹꁌꁳꉜꐝꉅ、ꍞꊟꄎꎻ。ꎃꐚꐨꆹꏮꎆꁵꌠꍆꁧꐕꀊꂥꄉ，ꌐꐘꃅꆹꏮꎆꁵꌠꐘꃆꆏꌕꁧꋊꋍꁧꊨꒊꌶ，ꋌꊂꉈꑴꀒꁨꋍꁘꃅꊨꒊꑴꌦ。ꇗꏸꎴꄹꏦꄺꀱꌠꄹꎆ，“ꃼꇇꇗꏸꄺꀱꌊꁌꎆꇗꏸ”ꃅꉚꅉꍔꒉꅷꎸꈜꎞꎭ、ꒀꍔꁧꃤꃅ、ꄆꑠꉹꑘꇬꑟ，ꁌꋊꇗꏸꄻ，ꌬꈧꇗꏸ、ꅐꀦꇗꏸꄺꀱꌠꄹꇙ，ꀀꑳꅐꇐꇗꏸ、ꋦꈭꀧꌋꃅꇗꏸꏦꄻꃆꂮꌤꃅꋒ。ꀒꁨꋍꁘꃅꎆꏂ꒧ꀄꊭꌠꇗꏸꈲꁵꅉꍔꆙ，ꎆꏂ꒧ꃣꁧꊨꒊ。ꏟꈯꃅꍏꑷꌋꆀꃅꄷꌤꌅꌋꆀꌫꅐꆼꎍꐨꋊꍬꌠꎥꃪ，ꋍꁘꋍꁘꃅꍏꑷꌋꆀꃅꄷꊌꐨꁷꑣꌠꎵꃪ，ꋌꃀꐥꌠꎆꊋꐛꉻꀑꐱꃅꎍꐽꌠꌭꈬ。ꃅꄷꍔꃚꎝꁯꎆꏓꉺꏦꎕꏦꐊꌠꄻꐛ，ꃅꄷꍔꃚꃅꐙꌠꎝꃆꌌꄐꌗꅉꇬꇱꄉꏱꄻ，ꍔꃚꏓꇱꎆꃆꅇꄜꄹꏦꄹꌬ，ꎝꃆꃨꆰꐨꄴꏮꌋꆀꋊꑣ。
ꃹꅼꃅꎆꒉꎆꇁꏦꉻꄺꀱ。ꐪꊛꄉꇔꊰꍆꁧꃷꎏꈴꌠꄹꎆ，ꎆꒉꎆꇁꏲꉻꇔꊰꑴꌅꃅꁌꏤꏤꄻꌅꈌꍔꒉ。ꏓꂱꀙꎆꃀꀟꄻꁌꐨꋭꋽꎍꐽꌠꀂꏽꀑꐱꃅꎍꐽꌠꌭꈬ，ꀟꄻꁌꐨꑍꄷꇘꑐꉆꅉꍔꒉ，ꏓꂱꀙꎆꃀꎆꀨꐘꃆꀟꆦꉆꌠꄹꎆ。ꎍꐽꃅꉹꁌꎆꀨꌊꐧꀠꀄꊭꉹꌠꑴꉴꑠꎆꒉꎆꇁꏲꉻꄻꐛꌠꄹꎆ，ꉹꁌꎆꀨꄐꇺꌊꇴꇱ、ꎆꒉꎆꇁꏲꉻꇬꎆꇱꉈꑴꎆꊙꇢꈴꁧꃤꃅꏲꉻꇬꊐ。ꎆꊭꊎꄜꏂꀧꄹꏦꄻꐛ，ꎆꒉꎆꇁꏲꉻꃨꆰꐨꀞꄻꉺꏦꄻꐛꒆ。ꏱꁈꃅꐙꌠꎆꒉꎆꇁꏲꉻꄺꀱꌠꃄꌬ。ꐳꃅꎆꀨꃷꎏꏠꊐꀉꑌꌠꀻꎆ，ꇴꀾꃑꄻꁱꄀꄹꏦꄺꀱꌠꄹꎆ，ꎕꏦꐥꃅꎝꃆꊫꄳꃷꎏꀻꎆ。ꏣꀋꑌꃅꂿ꒧ꄜꏂꀧꀻꎆ，ꀋꇰꀋꉈꃅꉮꌸꌠꄜꏂꀧꄹꏦꄻꐛꌠꎹꎥ。ꇿꑌꈲꌠꎆꒉꎆꇁꀻꎆ。ꐯꏑꈄꏍꎆꒉꎆꇁꉾꃪꃅꀻꎆꌠꊥꎆ，ꎆꒉꎆꇁꍞꏲꋮꄮꉺꏦꄻꐛꒆ，ꑖꑟꃅꉇꐂꎆꀨꒈꇁꌠꍞꎖ，ꉻꑫꃅꐙꌠꌋꆀꎆꒉꎆꇁꃨꆰꐨꇫꀋꅐꌠꋮꑟꌭꈬ。ꎆꒉꎆꇁꄻꒊꄝꂷꐛꄉ，ꀊꅰꉾꃪꃅꎆꏂ꒧ꀄꊭꌠ、“ꌕꂿ꒧”ꑠꃶꐚꎆꏣꏓꄜꇬꌩꁧꒈꎭꎻ。
ꁨꏦꎆꏣꍄꑐꊋꃤ꒔ꑞ꒔ꉹꌠꀉꇨꇱ。ꅉꀨꎆꏣꄹꏦꌭꈬꌋꆀꄻꐛꒆ。ꇩꁨꎆꏣꄐꉻꌋꆀꐛꉻꄻꃪ，ꐳꃅꐮꉔꁨꏦꎆꏣꀻꎆ，ꐛꏀꈴꎆꏂ꒧ꄹꏦꌋꆀꇬꌦꏦꊿꏱꄻꐛꉻꋈꄻꐛꒆ。ꇩꁨꁨꇐꏲꂠꏦꉻꄻꐛꒆ，ꎃꊒꃅꇩꁨꎆꏂ꒧ꐯꀋꌡꌠꄐꊋꊨꄅ，ꇩꁨꎆꀨꇬꌦꀞꄻꌠꇬꎆꇱꉚꌠꄹꎆ。ꇩꁨꎆꀨꀰꏢꄐꌗꌠꄻꐛꒆ，ꍏꑷꎆꏂ꒧ꇩꁨꎆꀨꈲꊌꌠꏮꄉꉻꏱꎆꁵꌠꍆꁧꉀꐕ。ꇩꁨꎆꀨꀋꉬꌠꍏꑷꎆꏂꑘꎆꇱꐘꃆꐊꈽꏡꁈꏤꄻ，ꎆꒉꎆꇁ、ꇓꋌ、ꄆꊋ、ꎸꈜ、ꄆꑠ、ꅐꀦꀖꁉ、ꉻꌬꌤꑘꑠꁁꏯ，ꇩꁨꎆꀨꀋꉬꌠꏭꎆꇱꐘꃆꈨꆷꅐꇁ。ꉻꁨꏦꀋꉬꌠꎆꏂꑘꐋꀋꌡꃅꈌꁧꄉꀰꏢꁁꏯꃹꌠꑭꋧꏡꁈꏤꄻ。ꎸꈜꎆꇱꎆꏓꏦꉻꄺꀱꌠꃄꌬ，ꀊꅰꃅꀉꑌꁁꏯꇬꋓꅔꃅꐙꌠꃅꑘꄝꃑ，ꉹꁌꎆꀨꀉꇨꃅꌬꈧꅉꇲꁵ。ꅐꌅꀧꌋꃅꄹꏦꄻꐛꒆ，ꉻꁨꏦꎆꏣꁨꇐꌅꈌꉄꌎꀋꉆ，ꉻꁨꏦꎆꏣꀋꉬꌠꁨꇐꑌꐯꌟꃅꉄꌎꀋꉆ。
（ꑍ）ꀊꂥꃅꉇꉻꏭꁉꃑꌠꐛꊂꀊꏀꌠꀹꄻ。
ꄺꀱꌋꆀꁉꃑꌠꐮꐊꄉꐥ、ꐮꇬꊥꎆ。ꁉꃑꉹꌠꎆꏣꏦꉻꀊꏀꌠꏓꄻ，ꉇꉻꏭꁉꃑꌠꀊꏀꈭꌠꄹꇙ，ꇩꏹꃷꎏꎿꒉꒊꃀꇬꄉꒈꂃꒊꆱꄡ，ꄀꇗꇱꄉꃹꅼꃅꏠꊐꄺꀱꌋꆀꐛꉻꋊꄻ，ꐳꃅꇩꏹꋓꅔꂱꎆꅑꀊꏀꌠꉗꄻ。
ꇿꀕꑌꑴꇙꃅꁉꃑꌠꍔꒉ。ꀋꎪꃅꏣꀋꑌꈲꁧꐥꃅꉇꎆꌬ，ꁧꃤꃅꑘꍔꒉꃅꁉꃑꌠꄹꇙ，ꈏꉈꎆꀨꎆꏂ꒧ꐯꌟꃅꉜ、ꐥꊯꃅꋓꅔꌠꃼꇇꃅꋦꈭꀹꄻꄉ，ꍏꇩꁳꐪꊛꄉꉇꉻꃼꇇꃅꊿꎆꇱꌠꂴꅑꅉꐛꎻ。ꍏꇩꎮꉰꄿꐨꃼꇇꃅꉚꅉꋈꄻꋒ、ꏲꂠꋒꌶ，ꌡꄻꉆꍔꐯꉆꌠꏦꉻꉺꏦꄻꐛ，ꄷꀋꁧꃅꉚꅉꀊꏀꌠꀉꑌꃅꃅ。ꈏꇓꅔꃀꂱꋮꁉꃑꌠꍔꆙꄉ，ꃅꈋꀊꐯꌠꁳꀉꇨꃅꉇꉻꏭꁉꃑꅉꐛꎻ。
ꄐꇐꏤꁈꀊꂥꅉꇬꄉꉇꅐꊐꐕꌠꌋꆀꃼꇇꃅꐮꆽꏣꃅꀻꎆꌠꄹꇙ。ꎼꈎꈏꃹꉇꅐꈁꉬꃷꁨꄐꌗꇬ7.5％ꅶꍯꉀꎆꃅꄉ。ꉇꅐꏱꁈꄻꑘꒃꌋꆀꄻꐛꒆ，ꐳꃅꈜꀸꈴꌒꈴꃅꄺꀱ，ꃅꋮꐂꄉꄆꌅꃼꇇꃅꉚꅉꍔꒉ。ꈏꃹꌠꄕꊪꏱꁈꃄꌬ，ꇩꈐꀋꇎꀋꂪꌠꅐꇐꁦꎆꃅꌌꈏꃹ。ꄺꑣꃼꇇꆹꏮꊐꐕꌠꄐꇺ，ꎆꏂ꒧ꊨꏦꂓꁨꌠꌋꆀꇩꏹꀰꏢꃷꄻꈄꏍꀹꄻꌠꊋꁈꄏ，ꁧꃤꃅꃼꇇꀻꎆꌋꆀꁧꃤꃅꉇꀧꌠꊪꊛ，ꍏꇩꄺꑣꌠꇩꏹꑘꁸꅉꇬꉆꈉꊐꐕ。ꅇꈴ、ꎸꈜ、ꄆꍉꑠꉁꈾꀉꒉꋍꋬꈭꃅꐙꌠꌌꉇꅐꌠꊋꊡ，ꍏꇩꉁꈾꋧꃅꑭꊂꃅꈨꈴꎻ。
ꉇꅐꁧꅉꇬꄉꋓꅔꊋꃤꊐꐕ。ꉇꉻꏭꎆꇱꌠꏲꂠꄟꄺꀱꌠꄹꎆ，ꁱꇬꊎꄉꄹꏦꌌꀨꃅꄉꌠꃄꌬ，ꍤꄻꈌꁧꌅꈌꀉꒉꃅꃑꀁꋌꎭ。ꎆꒉꎆꇁ、ꏦꃤ、ꅿꌧꑠꁧꃤꃅꏦꀧꌠꄻꐛꒆ，ꉇꅐꁧꐥꀹꋊꍬ，ꅐꇐꉇꅐ、ꋉꃆꀧꃅꌠꌋꆀꑘꃅꇷꃅꌠꊥꎆ。ꏟꈯꃅꏦꍠꈴꈜꎆꏣꋥꁕ、ꃅꋊ21ꋏꌠꎿꄩꏦꍠꈴꈜꄐꎖꄉꋈꄻ，ꃀꍏꑴꂳ、ꍏꀠꎆꏣꍬꈜꋈꄻꌠꄹꎆ，ꄘꄏꐘꃆꀉꒉꀊꂾꈨꆷꅐꇁ，ꐳꃅꅉꃀꉁꈾꐮꎼꐮꈴ，ꇩꏹꎆꏣꇮꇐꇷꃅꅉꀊꏀꌠꀹꄻ。
ꀉꑌꁆꏯꑍꁆꏯꌋꆀꃄꁕꁉꃑꇷꃅꌠꏓꈴꇲꈴ。ꁧꃤꃅꃼꇇꋯꏤ、ꍔꃚꃻꄻꋯꏤ、ꈴꌗꇮꇐꋯꏤꑠꉉꁱꌠꄹꇙ，ꐳꃅꋦꈭꀧꌋꃅ、ꄆꌅꃼꇇꑠꇖꀨꀊꏀꌠꉉꁱ。ꏣꀋꑌꃅꎕꏦꀊꂥꌠꄿꐨꃼꇇꃅꅉꋈꄻꅉꐊꈽ，ꍏꂰ、ꍏꉩꎆꇱꋯꏤꉉꁱꌠꄹꎆ，ꐳꃅꉴꇩ、ꀎꄊꆀꑸ、ꉰꊅꇷꃅꊈꑼꉼꑠꌋꆀꄿꐨꃼꇇꃅꅉꈴꎁꉉꁱ。ꀋꎪꃅꃼꇇꌋꆀꎆꇱꄿꐨꈴꈝꐮꈴꌠꄹꇙ，ꇩꏤꈁꐥꌠꌋꆀꐯꈲꐯꇯꊋꌠꃅꇫꑟ，ꉇꉻꏭꁉꃑꌠꌋꆀꄺꀱꁉꃑꌠꉾꃪꃅꐮꇙꌠꐛꊂꀊꏀꌠꐛꇁ。
（ꌕ）ꈏꇓꈉꐨꎆꏣꈻꌠꈻꅍꂿꄐꀉꇨꈴ。
ꈏꇓꈉꐨꍔꒉꌠꆹꎆꏣꉀꎆꌠꇙꊋꉬ，ꀉꇨꃅꐛꉻꋊꍬꌠꑌꉬ。ꌬꈧꅉꃀꂿꄐꌋꆀꎆꇱꌠꊨꊭꂿꄐꋊꇤꋒ，ꃄꁕꎆꏣꄘꄏꅉꀊꏀꌠꀹꄻ，ꈉꐨꁆꏯꄉꏱꁈꌬ，ꇲꁵꁆꏯꄉꊋꅐ，ꈏꇓꈉꐨꍔꒉꌠꎴꈲꉺꏦꏓꄻ。
ꌬꈧꌠꌌꈏꇓꈉꐨꍔꒉꌠꊋꇱꅉꀋꉬꀋꉆꌠꃅꄉ。ꀀꊿꊌꐨꉀꐕꌠꇬꈴꄉꌬꈧꊋꃤꁦꎆꇱ，ꌬꈧꏱꁈꄻꐛꒆ，ꌫꈨꊷꈌꉗꄻ。 ꁧꃤꃅꌬꈧꌠꍔꒉ，ꐧꋦꊋꃤꊋꁈꄏꄉꁧꃤꃅꏲꉻ꒔ꑞ꒔ꉹꌠꀞꄻ，ꃀꌠꀨꎹ、ꒉꄚꇁꄿ、ꈩꆫ、ꁱꀕꑠꁧꃤꃅꌠꌌꀨꇬꄉꀻꎆ，ꃄꎆꁵꄉꑬꆏꄹꏦꃅꇫꑟ。ꈴꌗꌬꈧꌠꊥꎆ，“ꐳꏣꈄꏍꍏꇩ”ꄐꁈꃄꌬ，ꐳꃅꇖꋏꌠꇙꊈꅇꈴꀻꎆ，ꇓꈓꉐꍌꁨꑭꌤꑟꋉꃆꌋꆀꐳꏣꈄꏍꑣꋂꋉꃆꄹꎆ，ꀉꇨꃅꐯꏑꈄꏍꐳꐨꉀꐕ，ꇩꏤꑭꊂꇬꃅ“ꌕꈄꏍꏓꇱ”ꌠꄹꌬ，ꄆꌅꃼꇇꏀꀺꀻꎆꌠꊋꊡ。ꈄꏍꋬꂻꌠꀧꌋꃅ。ꃹꅼꃅꒈꇁꏦꉻꄺꀱ，ꇩꏤꑭꊂꃅꃷꎏꏓꋍꃱꃅꌠꇬꋍꇈꌠꋍꑞꋍꑵꈴꀸꈿꌬꅉꌩꎳꇧꎭ，ꒈꇁꀨꊰꊨꒊ，ꎊꈬꎞꎭꁆꌞ、ꐳꌞꑘꌋꆀꈄꏍꈴꎊꈬꃼꀻꎆꌠꊥꎆ。ꋒꐯꋒꃅꊻꂷꊯꎖꂡꊋꂫꀉꇨꃅꋊꇤꅐꇁ。
ꎆꇱꌠꌌꎆꏣꉀꎆꌠꄻꑘꒃꌠꊨꊭꃅꄉ。ꐳꃅꎆꇱꎆꏓꏦꉻꄺꀱ，ꎆꇱꀨꄜꀉꑌꈴꌠꄹꎆ，ꉈꑴꉹꁌꎆꇱꉚꐘꃆꈨꆷꅐꎼꇀꌦ，ꎆꇱꐛꉻꄻꃪ，ꀋꇙꁨꎆꎆꇱꌠꋭꋽꃅꉀꎆꌠꄉꀧꄉꇬꎷ。ꍏꑷꄐꌗꈐꎆꇱꌠꄐꄉꇬꁦꎆꅷ4576ꂡꂷꃅꄉ，ꎆꀋꉬꀋꉆꌠꌌꏦꀧꉹꌠꀀꌒꋉꃆ、ꂿꑘ、ꈲꒉꀉꒉꀊꂾꌠ、ꈯꄔꁮꐚꁁꏯꎸꈜ、ꊋꏏꋦꀧ、ꐧꋦꌤꑘꑠꁁꏯꇬꊐ，ꍔꃚꎆꇱꌠ“ꇖꒀꄙꏣꍠ”ꌠꏃꇙꂿꄐꋊꇤꋒꌶ。
ꀊꏀꌠꃄꁕꎆꏣꋥꁕꉘꉚꌠꌌꀻꎆꄹꇙꌠꄐꇐꏤꁈꄘꄏꅍꃅꄉꌶ。ꃹꅼꃅꃄꁕꀻꎆꉻꄜꄐꇐꏤꁈꃄꌬ，ꁮꐚꁁꏯꀉꒉꃅꀖꁉꄹꎆꌠꄻꂴꄉ，ꐊꑷꃅꑛꌋꈤꃅꄷꑠꇮꑘꀉꆹꐛꅉꄖꄑ，ꊋꀉꒉꃅꇤꄉꈯꄔꃅꄷꉀꄓꌠꊥꎆ，ꏣꀋꑌꃅꁭꅐꃅꄷꎆꏣꂴꐊꄉꉹꏮꊐꐕꌠꄏꐓ，ꊋꀥꇱꄉꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷ、ꌢꎭꃅꄷꄏꐓ。ꃄꁕꀻꎆꐛꊂꀊꏀꌠꏂꇫ，ꁭꅐꄉꁮꐚꏭꉜꄉꃅ、ꎿꋮꄉꅔꈐꏭꉜꄉꃅ，ꆈꒉꒊꃀꁨꁦꌋꆀꅔꇬꈝꃀꈭꈜꍬꄉ，ꊐꄳꃅꀻꎆꌠꄹꎆ。ꏂꅪꒉꈜꊫꁱꄉ，ꍤꏦꎆꏣꋥꁕꋈꄻ。ꎿꅔꀨꄉꌠꈜꀸꌌꄘꄏꅉꃅꄉ，ꎿꋮꌋꆀꐮꊪꊛꌠꑾꌋꈤꈯꄔꒈꂪꏭ、ꑛꌋꈤ、ꈌꄸꉻꑠꎆꏣꄘꄏꅉꏓꐛꄉꌶ。ꍤꏦꒊꃀꌕꎏꃅꄷꎆꏣꋍꉻꈴꌠꄹꎆ，ꃹꅼꃅꍗꏦꒊꃀꌕꎏꃄꁕꎆꏣꇷꃅ，ꊋꀥꇱꄉꀨꉰꎿꉈꑴꀙꏢꄟꏢꉼꀙꃅꄷꐮꐊꄉꀻꎆ。ꍣꐨꈴꎆꏣꏱꁈꃄꌬ，ꅐꑘꆹꏮꌠꄹꇙ，ꃄꁕꐂꄉꈭꈜꀉꒉꌠꀉꒉꃅꐮꈴꌠꀻꎆ，ꀊꏀꌠꃄꁕꎆꏣꇨꃅꉀꎆꅉꐛ。
ꎿꃀꆹꉪꊇꁌꇐꈤꌠꀊꃴꌠꇩꁨꃄꅉꉬ。ꏟꈯꃅꅔꎿꏓꇲ，ꐊꑷꃅꎿꃀꄐꇐꏤꁈꃄꌬ，ꎿꃀꎆꏣꀻꎆ，ꎿꃀꋦꈭꀧꌋꃅ，ꏟꈯꀕꃅꇩꏤꎿꃀꌅꈌꈲꁧꐏꁇ，ꊋꀉꒉꃅꇤꄉꎿꃀꇩꏤꀉꇨꌠꋈꄻ。
（ꇖ）ꂿꑘꐛꏀꈴꌠꌋꆀꂿꑘꁡꇤꄺꀱꀻꎆꌠꄹꎆ。
ꂿꑘꆹꈏꇓꈉꐨꍔꒉꐛꉻꋊꄻꌠꀋꂿꑘꁁꏯꉬ，ꀊꅰꃅꋧꃅꃰꊿꋬꂻꑘꒃꌠꅐꑘꑌꉬ。ꏟꈯꃅ“ꌕꂿꑘ”ꌤꃆꂥꀘꋒꌠꌌꈁꉬꌤꃅꌠꀨꇊꀨꇬꄉ，ꇩꏤꋛꂷꉮꀋꐥꏦꀧꌠꌋꆀꂿꑘꊿꊌꐨꁦꎆꊥꎆꌠꌌꈯꄜꃅꄉ，ꂿꑘꐛꏀꈴꌠꄹꎆ。ꋠꃅꑟꅪꈬꃅꐏꁇꄉ，ꋠꃅꊇꁧꉀꐕ，ꂿꑘꏓꇱꒃꅐꄐꊋꊋꇨꇱ，ꋚꁧꀑꐱꃅꑴꃅꑴꋠ、ꋚꂷꀋꎪꃅꉮꅍꀋꐥꌠꏤꀧ，ꍏꇩꊿ13ꂡꌠꋙꋠꇓꍔꏟꈯꀕꃅꄌꊨꏦꇇꇬꊐꄉꌶ。
ꂿꑘꄏꐓꀧꌋꃅꏱꁈꊋꇨꇱ。ꎭ、ꍯꎳꃼꁌꏤꀁꂥꐯꀁꂥꌠꉀꐕ，ꐪꊛꄉꀀꃆ、ꊮꊫꂶꂷ、ꎬꐚꊼꇅꎳꃼꊭꊎꏱꁈꃄꌬ。ꂿꑘꅐꇐꁻꌐꁌꏤꄹꏦꄻꐛꌠꎹꎥ，ꃷꎏꁌꏤꀁꂥꇧꄮꆏꒃꅐꊿꏭꁥꁵ，ꀊꂥꇧꄮꆏꊌꐨꀁꂥꌬꈧꊿꏭꁥꁵ。ꂿꑘꁥꁵꀊꏀꃅꁦꎆꌠꆏꌌꋛꂷꑠꂿꑘꅐꇐꀋꂿꑘꌠ、ꀊꏀꉹꌠꂿꑘꀰꏢꀨꄜ、ꀨꅐꅉꇬꉜꄉꎎꎽ。ꋛꂷꒀꋌꃮꑠꒃꅐꀉꒉꑤꏭꈁꁠꁵꁥꁵꌠꁦꎆꎻ，ꇌꎸꍶꑿꎸꒃꅐꌠꊋꁈꄏ。ꃅꊨꃄꑣꃄꐽꇬꅐꐨꁦꎆꌠꂿꄐꋊꇤꎼꇁ，ꎼꈎ1ꂡꂿꌌꃅꉚ。ꂿꑘꃆꂮꐥꌠꎆꀨꏓꇲꏓꄻ。ꎆꊋꈍꃅꀋꇎꄿꂿ，ꄡꇗꂿꑘꎆꇱꌠꆏꁦꎆꌶꀁꋌꊨꒊꀋꉆꌠꏦꀧ。
ꂿꑘꂿꑘꁡꇤꀻꎆꅉꃀꌆꈬ。ꇩꏤꊋꏓꊋꋧꄉꈲꒉꋉꃆꀉꒉꀊꂾꑠꈨꋈꄻ，ꎼꈎꄐꄉꇬꍏꑷꄐꌗꈐꄐꁆꌊꈲꒉꇬꎆꇱꌠ700ꎖꂡꂷꃅꄉ，ꒉꋊꒉꈻ、ꈯꌬꒉꀦ、ꒊꃀꎾꃝꄺꂡ、ꈲꁧꀊꂥꃅꒉꏏꒉꊐꑠꀨꄉꐘꃆꄏꐓ。ꃅꄷꆏꊋꀥꇱꄉꈲꒉꐧꀠꐭꉹꌠꋉꃆꋈꄻ，ꒉꌬ“ꄽꂫꋍꉻꆏ”ꌤꃆꂥꀘꋒ。ꐳꃅꋠꃅꃅꇨꃅꆓꃅꋚꊊꑠꈨꄻꐛ，ꐳꃅꇗꑫꉾꃪꀋꉬꀋꉆꑠꈨꉘꉚ，ꑘꅐꌠꂿꑘꌫꉂꌫꈾꀊꏀꉹꌠꑠꈨꎥꃪꀖꁉꌊꌬ。ꂿꑘꁡꇤꒉꄆꈜꌗꈴꌗꑠꅉꃀꉁꈾꄻꐛꒆ，ꂿꑘꁡꇤꑲꎓꇣꐡꌠ260ꃪꁯꋈꄻꀱ，ꂿꑘꁡꇤꄇꈜ20ꃪꉻꆏꋈꀱꄺꀱ。ꀉꇨꃅꂿꑘꁡꇤꀁꇬꋒꇈꌠꀉꑳ、ꌋꅪ、ꃀꌠꌋꆀ“ꇬꈣꋂ”ꌤꃆꉜꁨ。ꎼꈎꉈꑴꂿꑘꁡꇤꊻꂷ6000ꃪꑼꅝꒉꉮꀋꐥꌠꌤꃆꂥꀘ。ꎼꈎꑎꉔꄹꈎꑍꈓꌠꊋꇤꄉ，ꂿꑘꁡꇤꀀꊿꈁꐥꌠꁳꀆꐒꎔꌠꅝꄎꎻ。
ꏣꀋꑌꃅꂿꑘꁡꇤꄺꀱꌠꄹꎆ。ꂿꑘꁡꇤꅉꀨꀰꏢꄹꏦꌭꈬꌋꆀꄻꐛꒆꄉ，ꂿꑘꊿꁨꇐꌅꈌꈲꁧꀊꅰꀉꑌꃅꊌꎻ。ꂿꑘꁡꇤꃄꅉꀧꃅꃆꂮꀊꉗꃅꐛꀋꐈꌠꄉꀧ，ꏟꈯꀕꃅꃄꅉꀧꃅꀰꏢꌅꈌꌋꆀꂿꑘꁡꇤꋍꉻꋈꄻꌬꃅꌫꄻꌅꈌꁱꄉꊫꄳꃑꌤꃅꋒ，ꀧꃅꀰꏢꌅꈌꊱꁨꃅꏭꆦꌠꄐꇺ，ꉪꐚꃅꄉꄐꃅꂿꑘꁡꇤꃄꅉꄹꏦꄺꀱꌠꃅꉚ。ꑱꈐꀰꏢꅉꃀꃅꐙꌠꉆꈉꌭꈬ，ꌐꑘꑱꁯꀉꒉꌠ、ꑱꈐꋚꐷꄈꅉ、ꂿꑘꇷꃅꎹ、ꂿꑘꎆꏂꑘꑠꂿꑘꀰꏢꀨꄜꀊꏀꉹꌠꉘꉚ，ꇶꏦꀉꑌꑵꃅꄉꈁꄉꄐꃅꀰꏢꌠꀻꎆ。ꀊꏀꉹꌠꃅꑘꂿꑘꊿꉘꉚ。ꋍꉻꌩꏪꌅꈌꄹꏦꄺꀱꌠꄻꐛꒆ。ꐳꃅꇩꁨꂿꑘꆫꑘꌩꑘꄺꀱ。ꂿꑘꐧꋦꈴꁧꃤꃅꉻꑫꄻꐛꒆ，ꇲꃷꇷꃅꎹꏓꇱꄺꀱꃅꉚꅉꄹꎆ。ꂿꑘꁡꇤꄺꀱꌠꆏꃶꐚꌠꇬꈴꄉ，ꃅꉚꅉꂴꃅꎻ，ꃶꐚꃅꂿꑘꊿꉪꐨꁌꒉ，ꏟꈯꃅꂿꑘꊿꏦꊒꌅꈌꈲꁧꀧꌋꃅ。
ꌢꎭꄏꐓꀖꁉꈁꏦꏀꀺ。ꐳꃅꏓꋧꐯꅑꎍꌠꐋꀋꌡꃅꌢꎭꃅꄷꃄꁕꀻꎆꌠꌋꆀꌢꎭꄏꐓꈢꇓꀖꌠꄹꎆ。ꇩꏤꊋꀉꒉꃅꇤꄉꃄꁕꐂꅉꀨꉁꈾꋈꄻꀉꒉꀊꂾꌠꌋꆀꎆꏣꐊꃅꌠꊋꄏ，ꊋꀥꇱꄉꒆꉻꀧꌋꃅꌠꌋꆀꅉꀨꄉꉻꁧꃤꃅ。ꃅꄷꆏꌢꎭꄏꐓꅐꀦꋊꍬꐯꇯꀱꌠꄻꃪ，ꊒꌸꃅꌢꎭꄏꐓꌠꃄꌬ，ꌢꎭꄏꐓꅷꁡꇤꑟꑱꁯꑟꌠꏤꀧ。ꐧꋦꊋꃤꄐꏁꌊꌢꎭꄏꐓꌤꑘꇬꐊꈽ。ꎼꈎꉈꑴꂿꑘꁡꇤꌢꎭꊻꂷ1000ꃪꑼꈋꉐꀁꋌꊨꒊꎻ。ꉪꊇꆏꐪꊛꄉꌢꎭꏭꉈꈽ，ꈍꃅꑌꌢꎭꌠꁳꋍꋏꇊꋍꋏꃅꎭꅷꁧꀋꉆ。
（ꉬ）ꊿꌌꈯꄜꃅꄉꌠꇓꈓꏦꎫꐛꈴꀊꏀꉹꌠꄹꎆ。
ꇓꈓꏦꎫꐛꈴꌠꆹꐛꏀꈴꌠꀋꈴꀋꉆꌠꈛꏢꉬ，ꋋꆹꇓꈓꇓꉈꑍꑵꐛꉻꀜꋊꇬꀋꂿꑘꌠꊫꁱꅉꉬ。ꇓꈓꇓꉈꀻꎆꋍꉻꈴꏦꉻꉺꏦꄻꐛꒆ，ꏟꈯꃅꊿꌌꀨꇬꄉ、ꇖꈴꋓꃅ、ꄐꉻꄻꃪ、ꒆꉻꌧꑳ、ꁱꀕꊪꊛꇓꈓꏦꎫꐛꈴꀊꏀꉹꌠꈝꃀꍬ，ꀻꎆꈳꏦꍬ，ꏣꀋꑌꃅꎍꐽꃅꄹꎆ，ꊋꇤꄉꊇꁧꉀꐕ。ꋌꊂꋍꊭꇬ，ꌐꄉꀋꃋꐥꌠ“ꌕꐘ1ꂡꊿ”ꌤꃆꂥꀘꋒꌶ，ꂿꑘꆹꏮꊻꂷ1ꂡꀋꇈꇓꈓꏦꎫꇬꀀꇁꎻꌠꊥꎆ，ꊿ1ꂡꀋꇈꀀꑳꇓꈓꏦꎫꁁꑳꐛꅉꌋꆀꇓꈓꇬꋂꄺꀱ，ꊿ1ꂡꀋꇈꄐꏁꌊꈯꄔꁮꐚꃅꄷꈛꑌꅉꇬꄉꇓꈓꏦꎫꐛꈴꅉꇬꋉꀀꎻ。
ꊱꁨꃅꂿꑘꊻꂷꆹꏮꌊꇓꈓꀀꊿꐛꌠꄹꎆ。ꑱꁯꊫꌐꄹꏦꄺꀱꌠꄹꎆ，ꇓꈓꒉꐧꐭꌠꍣꐨꐥꃅꑱꈿꏱꁈꃄꌬ。ꄐꊋꐥ、ꉪꐨꇬꈴꄷꀋꁧꀊꉗꃅꇓꈓꏦꎫꌤꎹꃅꃼꇇꃅꌠꂿꑘꇮꃅꊿꌋꆀꋍꑱꈐꊿꁳꋍꁘꋍꁘꃅꆹꏮꌊꇓꈓꏦꎫꀀꊿꐛꎻ。ꑱꀋꈿꌦꌠꂿꑘꊻꂷꆹꏮꌠꆏ，ꀀꅉꊫꌐꄹꏦꄻꐛꄉꌶ。ꀊꅰꃅꀉꑌꌠꇓꈓꄉꌤꎹꃅꊿꐊꇁꌠꀉꑳꁳꇓꈓꏦꎫꇬꇱꄉꄯꒉꌷꎻ、ꀉꁁꃅꄷꄉꌷꐕꌠꃅꇫꑟ，ꂿꑘꇮꃅꊿꃅꑘꇮꁈꉀꐕꎖꄎꌠꃄꌬ。ꎍꐽꃅꇓꈓꏦꎫꅉꀨꄉꉻꁧꃤꃅꅉꀕꀀꊻꂷꉱꑷꌐꌠꄹꎆꄉ，ꂿꑘꀀꊿꁳꇓꈓꐛꏀꌧꑳꐯꇯꋈꄻꐯꇯꈲꊌꎻ。
ꈯꄔꁮꐚꃅꄷꇓꈓꏦꎫꐛꈴꀊꏀꉹꌠꏭꊋꁈꄏꌠꀥꇱ。ꅐꑘꀻꎆꌠꌋꆀꊻꂷꏓꋧꌠꄐꊋꉀꐕ，ꂿꑘꆹꏮꊻꂷꈛꑌꅉꇬꄉꑘꃅꌠꊥꎆ。ꐳꃅꈭꈜ、ꈲꒉ、ꊋꀦ、ꇓꈓꏲꃆꑠꅉꃀꉁꈾꋈꄻꌠꄹꎆ，ꈯꄔꁮꐚꃅꄷꇓꈓꈧꌠꌋꆀꇓꈓꏦꎫꀻꎆꊋꂫꑌꐨꀉꇨꇱ。ꁭꅐꃅꄷꇓꈓꏦꎫꐛꉻꄻꃪ，ꀒꁨꋍꁘꃅꇓꈓꏦꎫꐛꈴꊇꁧꌋꆀꑟꐨꊐꐕ。
ꊋꀥꇱꄉꇓꈓꏦꎫꐛꈴꏲꂠꏀꀺꌋꆀꉺꏦꋈꄻ。ꄉꈁꀊꅰꀉꒉꃅꄉꑲꆹꇣꆹꐛꅉꄺꀱ，ꈍꃅꑌꋍꁁꏯꆏꑷꂿꎆꇌꀕ，ꋍꁁꏯꆏꑲꆹꇣꆹꐮꄅꎍꀋꉆ。ꇩꏤꇓꈓꏦꎫꐛꈴꀊꏀꉹꌠꄐꎖꄉꌠꌌꄐꇺꅍꃅꄉ，ꄚꃆꂮꐥꌠꄐꎖꄉꌠꏓꇲꃅꐯꊛꌠꃅꋒꌶ。ꇓꈓꏦꎫꋈꄻꌬꃅꅐꐨꉀꐕ，ꄉꉻꈭꈜꌌꂴꄉꀻꎆ，ꐩꋊꁱꀕꌋꆀꋌꐛꆫꉜꅉꀧꌋꃅ，ꇓꈓꀊꄙꀊꉐꃅꐯꌟꌐꌠꄡꋉꄡꄻ。ꇓꈓꏦꎫꀄꊭꌠꌋꆀꁡꇤꄐꎖꏲꂠꌠꀥꇱ。ꂿꑘꆹꏮꊻꂷꇓꈓꀀꊿꐛꈴꌠꀨꊰꁸꀵ、ꀉꑌꑵꈴꃅꇓꈓꏦꎫꋈꄻꇬꎆꊐꎆꏓꑠꉺꏦꎹꎥꄻꐛ。ꋈꄻꌋꆀꏲꂠꐨꉀꐕꌠꇬꈴꄉ，ꉪꊇꇓꈓꁳꊨꏦꐛꐨꐥ、ꃅꑘꃅꌒꀀꌒ，ꀊꅰꃅꍄꑐꊋꃤꇎꋒꎻ。
（ꃘ）ꏀꀺꌠꌌꎆꏣꐛꉻꄻꃪꊐꐕꌠꇬꄘꄏꌋꆀꄐꏁ。
ꏀꀺꌠꆏꎆꏣꐛꉻꋊꄻꃪꌠꇬꀦꇙꊋꉬ。ꏀꀺꌠꌌꇩꏤꀻꎆꃅꇴꄉꉻꈯꄜꉆꈉꇬꐕꄉ，ꈆꑪꇮꇐꌋꆀꎆꏣꐧꋦꀻꎆꑖꑟꃅꏓꐊꌠꊥꎆ，ꉪꇩꏤꅐꑘꅉꆺꑭꊂꁌꐨꐯꅑꀊꂥꌠꏭꉜꄉꊐꐂꌠꄹꇙ。
ꐳꃅꈆꑪꇮꇐꏦꉻꄺꀱ。ꎆꏂꑘꇮꇐꏀꀺꅉꇬꈯꀨꉆꈉꌌꀉꇨ，ꎆꏂꑘꎥꃪꏲꉻꄻꌠꊋꊡ，ꂴꅑꄉꒃꅐꌶꄻꎥꃪꐮꐊꏀꀺꐯꏑꐮꐊꌠꄺꑣ。ꐊꑷꃅꎆꏂꑘꎥꃪꀖꁉꌬꁌꌗꇱꈎꇧꎭꑠꎂꀕꈲꐨꐥꌠꏁꁈꃅꑞꅉꑟ。ꇩꏤꑴꌅꏀꀺꌡꀠꃅꄷꇴꍆꌅꈌꊡꀮꌠ、ꈆꑪꇮꇐꊌꐨꀞꄻꌅꈌꊌꐨꌅꈌꄺꀱꌠꑠꃅꉚꏱꁈ，ꍔꒉꌊꀊꅰꀉꑌꌠꈆꑪꇮꇐꅉꁍꌋꆀꈆꑪꇮꇐꂘꑘꌤꃅꅉꇬꑟ。ꍔꃚꆏꅉꃀꎥꃪ、ꂴꅑꇮꇐ、ꐧꋦꉻꈲꇮꇐ、ꐯꌟꐨꐥꌠꀋꉬꀋꉆꌠꇮꇐꀉꒉꀊꂾꌠꏭꎆꇱꌠꊋꀥꇱ，ꄉꉻꈆꑪꇮꇐꁧꃤꃅꐽꈉꄻꐛꒆ，ꈆꑪꇮꇐꌐꐘꀉꒉꀊꂾꌠꃄꌬꉺꏦꄻꃪ。ꈆꑪꎥꃪꐘꃆꌋꆀꎆꀨꏲꂠꌠꄻꃪꌋꆀꀥꇱ，ꇩꏤꏀꀺꍤꄻꌠꌋꆀꈆꑪꇮꇐꅇꄜꄹꏦꃄꌬ，ꈆꑪꎥꃪꊿꎆꏂꑘꀞꄻꌠꊋꊡ。ꊋꀥꇱꄉꌧꇐꅐꇐꌅꈌꀧꌋꃅꌋꆀꌫꄻ，ꈆꑪꁊꈴꌤꃅꌋꆀꈆꑪꉌꊈꋈꄻꌠꉜꁨ。ꃹꅼꃅꌧꊿꀻꎆꄐꎖꌠꃄꌬ，ꌧꊿꋉꃆꀉꒉꀊꂾꌠꏓꇲꏓꄻ，ꎥꃪꀖꁉꊿꃄꎆꌋꆀꃷꎏꃅꊌꐨꐮꃆꂮꐥꌠꉺꏦꄻꐛꌠꏭꊋꊡ，ꌧꊿꁳꅐꌞꌠꌋꆀꊌꐨꐮꄉꄐꎻ，ꋍꑞꋍꉹꌧꊿꁳꅔꅐꇁꄉ、ꂱꑱꌧꐨꇤꌊ、ꋍꌫꅉꌬꎻ。
ꅐꑘꐛꉻꋊꄻꌠꆏꄺꀱꌠꊫꁱ，ꁨꆹꉈꎞꐮꐊꃅꌶ。ꁨꆹꇬ，ꀊꅰꃅꏣꀋꑌꂿꄐꐥ。ꒃꅐꃅꐙꌠꁧꃤꃅꑘꌌꂴꄉꀻꎆ，ꁧꃤꃅꑘꏓꇱꃅꄺꀱꃅꉚꅉꌋꆀꌡꀠꋈꄻꌠꄹꎆ，ꁱꀕꁧꀿꉪꐨꉈꑴꄐꄻꁧꃤꃅꌠꌋꆀꄚꃆꂮꐥꌠꅐꑘꐮꐊꐯꈽꄉꀻꎆꌠꊥꎆ，ꐳꃅꄜꏂꀧ、ꃼꇇꌤꃆ、ꈆꑪꇮꇐꑠꁧꃤꃅꑘꀻꎆ。 ꈴꌗꈴꌋꆀꇮꑘꈴꌠꃹꅼꃅꐮꐊꌠꊥꎆ，ꎆꏂꑘꐳꃅꇮꇐꄺꀱ、ꀋꎪꃅꏲꂠꐨꉀꐕꌠꄹꇙ，ꉁꈾꐳꃅꆹꋊꑠꏱꁈꄻꃪ，ꋊꃅꅐꑘꋓꅔꊋꃤꌌꀉꇨ。ꏀꄓꅐꑘꑘꀺꏀꀺꐽꈉꄻꄉ，ꀊꏀꋎꌠꇙꊈꅇꈴ、ꏓꋧꄆꈜ、ꃷꁨꀉꒉ、ꂴꅑꄺꑣ、ꊋꀦꀊꏀ、ꌬꇐꀊꏀꑠꁁꏯꇬꂴꅑꌠꇬꈹꐂ，ꃆꏂꊂꑋꅐꑘꀻꎆꌠꄐꏁ。ꉈꎞꇬ，ꀊꅰꃅꑴꇙꊱꁨ。ꃷꎏꋓꅔꌠꈴꄉꇨꊋꁘꋊꌠꌭꈬꇬꎷ，ꎆꏂꑘꐅꄻꏓꀱꌠꊋꊡ。ꅏꊋꁦꎆꇨꌠꉹꑘꏭꆏ，ꋦꈭꌋꃅ、ꄐꊋꃸꄻ、ꇮꇐꑠꎕꏦꌌꇨꈴ，ꋍꑞꋍꑵꈲꁵꏱꁈꎵꄻ，ꊐꃷꁨꈨꌬ，ꏟꈯꃅꀊꏀꃅꅐꌠꃷꁨꁦꎆꇱꌠꋏꌫ。ꎼꈎꆏꇤꎸꅍ2700ꃪꄓ、ꇓꃀ4200ꃪꄓ、ꐽꀻꋤꇓ3500ꃪꎕꏦꈄꁨꑠꊁꊰꅏꊋꀜꋊ，“ꊰꑋꉬ”ꀜꋊꂿꃆꋍꈓꏛꃅꃅꌐꌠꄉꀧ，ꃶꐚꃅꍅꎼꒉꄉ，ꈍꃅꑌꀱꉈꑴꄓꇁꄡꎽ。
（ꏃ）ꊋꀥꇱꄉꂘꑘ、ꁦꎴꆄꄻ、ꁱꀕꑠꐧꋦꋈꄻ。
ꐧꋦꌤꑘꌄꆣꀻꎆꌠꆹꐧꋦꀋꈐꀋꉈꌠꊥꎆ、ꏓꂱꈲꐪꁦꎆꇱꌠꇿꋌꐥꌠꈝ꒜ꉬ。ꃹꅼꃅꐧꋦꏦꉻꄺꀱ，ꀊꅰꀉꒉꃅꎆꇱꌋꆀꀊꅰꃅꊋꑌꌠꏡꁈꌌꄉ，ꎆꏣꐧꋦꋮꄮꃅꀻꎆꌠꄹꇙ。
ꂘꑘꌤꑘꂴꄉꀻꎆ、ꀋꈐꀋꉈꃅꀻꎆꌠꊥꎆ。 ꐪꊛꄉꂘꑘꌬꇐꇁꀦꌌꈯꄔꁮꐚꁁꏯꌋꆀꂿꑘꁡꇤꏭꎎꌠꊋꀉꒉꃅꇱ，ꋭꑘꂘꑘꐮꆽꏣꃅꀻꎆꌠꊥꎆ。ꐊꑷꃅꌢꎭꃅꄷꋭꑘꂘꑘꊋꁧꌠꌶꅉꌶꅉꀞꇎꏦꄻꃪ。ꌢꎭꃅꄷꂿꑘꁡꇤꌶꌺꀨꎍꌠꒉꌶꅉꈧꌠꇬꌷꌠꊿꃷꁨꉈꑴ10％ꈋꉐꉀꎆꄉ，ꂿꑘꁡꇤꌺꇖꀊꅰꀉꑌꌠꁳꌷꐕꊜꋽꄮꐥꎻ。ꊋꀥꇱꄉꂿꑘꁡꇤꈜꀕꇈꃅꋮꆸꈈꌢꎭꃅꄷꂘ꒜ꁥꌠꁱꂘ，ꊈꂄꂘꑘꅐꀦꉱꑷꐨꍔꒉ，ꌢꎭꃅꄷꂿꑘꁡꇤꀊꉘꈲꋌꐛꐨꄻꃪ。ꌷꂾꂘꑘꀻꎆ。ꐋꀋꌡꂘꑘꉀꐕꄐꎖꌫꄻ。ꐪꊛꄉꍏꑷꏱꎆꂘꑘꇬꎆꇱꌠꁦꎆ，ꌫꄻꅐꐨꉀꐕꄷꀋꁧꊋꀥꇱꄉꍞꊟ。ꂘꑘꏓꇱꄺꀱꌠꃹꅼꈴ，ꏣꀋꑌꃅꋭꋽꃅꌶꎖꌶꌺꎹꄹꏦꄺꀱ，ꌜꊐꌠꍔꃚꂘꑘꋍꃱꃅꄐꏤꌅꈌꌋꆀꌶꅉꀊꂥꊐꌠꌶꅉꀞꑴꌅꌅꈌꍔꒉ，ꉹꁌꀞꄻꂘꑘꀻꎆꌠꏭꊋꊡ。ꐳꃅꃅꅍꊌꌠꌌꄐꌐꅍꃅꄉꌠꀋꃋꋋꄮꃅꑘꂘꑘꉻꑫꏓꄻ。ꉪꊇꆏꊂꋊꎁꃅꂘꑘꉾꃪꌠꇲꁵꄉ，ꊋꇤꄉꀉꑳꂷꈁꐥꌠꃅꀋꈐꀋꉈꌠꀻꎆꊜꋽꄮꊌꎻ。
ꆅꉁꆄꄻꃆꂮꄺꀱꌠꁨꏭꃹꄉꀻꎆꌠꄹꇙ。ꋍꏅꃅꅉꀨꆅꉚꄜꏂꀧꌠꄻꈫꈈ，ꄺꀱꌠꇬꈴꄉꇓꈓꇓꉈꀀꊿꅉꀨꆅꉚꄜꏂꀧꄹꏦꋊꍬꐯꇯꀱ。ꍔꃚ、ꌤꃅꅉꌋꆀꊨꏦꑴꅉꄉꄐꃅꀵꄜꌠꅉꀨꆅꉚꄜꏂꀧꎆꏓꉺꏦꄻꐛꒆ，ꇓꈓꇓꉈꀀꊿꅉꀨꆅꉚꄜꏂꀧꏱꎆꁥꁵꎕꏦꉀꐕꌊꊾꂷꌠꐽꏡꃅ320ꂷꇬꑟ。ꇩꏤꑭꊂꃅꄉꇓꈓꇓꉈꀀꊿꆄꒉꈺꒉꄜꏂꀧꌠꄹꌬ。ꇓꈓꇓꉈꆅꉚꇇꀨ、ꆄꈻꃛꊸꄮꇇꀨꌠꊋꀥꇱ。ꑤꊐꌠꉻꄻꆅꉚꅉꏓꇱꄺꀱꃅꉚꅉꍔꒉꌊꑤ1000ꂷꇬꑟ，ꂿꑘꁡꇤꊻꂷ5ꂡꑹꇬꉱꑷ。ꇓꈓꉻꄻꆅꉚꅉꏓꇱꄺꀱꃅꉚꅉꍔꒉ。ꁬꋌꃷꊿꆅꁵꄉꎆꎹꌠꀜꐆꇧꎭ，ꆅꉚꁬꋌꁌꏤ꓂ꃪ，ꐧꋦꎆꀨꆅꉚꅉꀞꌠꉺꏦꏀꀺ。ꅉꀨꁬꋌꄹꏦꌋꆀꅉꂫꊐꌠꁦꎴꆄꄻꏲꉻꏮꈴꉺꏦꀊꏀꌠꄻꈫꈈꄻꐛꒆ。ꊐꁸꄉꆄꇠꆅꉁꉻꑫꄻꐛꒆ，ꌧꒆꑱꌜꉘꉚꌠꊋꀥꇱ，ꆅꉚꑱꏂꀉꑌꈚꄉꆅꉚꆄꄻꌠꄹꎆ，ꉹꁌꁳꈛꑌꅉꄉꊈꂄꆄꄻꁧꃤꃅꈲꊌꄎꎻ。ꆅꉁꌠꆅꉚꌠꐮꃆꂮꐮꄮꌠꋈꄻ。ꇵꆅꀉꒉꌠ、ꏣꅑꆅꌋꆀꃅꑘꆅ、ꃅꄷꆅꉃꄻꄐꊋꉀꐕ，ꊾꂷꌠꐽꏡꃅꅉꀨꄉꉻꁦꎴꆄꄻꁧꃤꃅꎆꁥꁵꎕꏦꁦꎆꌊ35ꂷꇬꑟ。ꍏꒀꆄꄻꁬꋌꌋꆀꊿꋅꆄꄻꁬꋌꌤꑘꀻꎆꌠꄏꐓ。ꎖꁨꒆꉘꅉꀨꇩꁈꀋꇙꀋꑐꌠꌭꈬꇬꎷ，ꋍꁆꏯꆏꄂꒆꌳꃈꅮꉬꌠꃌꒆꆏꀉꑳꑍꂷꒆꉘꉆꌠꏱꁈꃅꇫꑟ。ꏓꂱꁳꇭꀧꉌꂵꂄꃪꌋꆀꑱꈐꐥꌒꎻꂿꄷꄉ，ꉪꊇꆏꀋꎪꀋꑴꃅꆅꉁꆄꄻꃆꂮꄺꀱꌠꄹꎆꄉ，ꍏꇩꃤꏡꁈꌌꋧꃅꃅꊋꋠꌠꌤꀉꒉꋌꐘꂥꀘꋒꌶ。
ꁱꀕꆹꊿꋅꈬꏣꑳꏡꉬ。ꐧꋦꉪꏦꈯꄜꁌꐨꉪꉻꉗꄻꌋꆀꃄꄻ，ꉻꊿꑌꇐꌋꆀꉌꊈꌧꑳꋈꄻꌠꀥꇱ。ꐪꊛꄉꃹꅼꃅꁱꀕꏦꉻꄺꀱ，ꁱꀕꎆꏣꏱꁈꄻꃪ，ꁱꀕꉻꄜꊋꃤꌋꆀꋓꅔꊋꃤꀉꇨꆹ。ꅉꀨꋍꏅꁱꀕꁧꃤꃅꎕꏦꈴꐽꏡꈴꌠꊥꎆ，ꁱꀕꋽꇐ、ꈨꏀꍑꅐ、ꅇꁊꄆꒌꄆꁱ、ꄉꉣꑠꌤꑘꀻꎆ，ꋧꇐꐧꋦꈆꑪꌄꆣꀻꎆ，ꉹꁌꃅꉜꀘꌠꄕꊪ。ꁱꀕꅐꑘꀻꎆꑞꅉꉀꐕ，ꁱꀕꃷꎏꉗꄻꌋꆀꋊꄻ。ꋊꃅꁱꀕꉾꃪꌠꊪꊛꌋꆀꍔꆙ，ꌧꃆꁱꇐꏂꀨꍸꇐꀧꌋꃅꌠꉜꁨ。ꐳꃅꁱꀕꉇꅐꁧꎻ，ꁱꀕꃼꇇꀻꎆ，ꊋꀥꇱꄉꇩꏹꄜꁊꄐꊋꋈꄻ，ꇩꏤꁱꀕꆓꍝꊋꃤꉀꐕ。ꉹꁌꃅꇭꀧꄜꎟ、ꈯꎟꋓꈿꌋꆀꈯꎟꅐꑘꀻꎆ。ꉪꇩꏤꆏꐩꋊꀊꎴꌧꑳꌠꇩꏤꀉꆹꂷꉬ，ꉈꑴꀋꎪꃅꄻꌊꐛꏀꁱꀕꀉꇨꌠꇩꏤꂷꐛꄎꌠꉬ。
ꐧꋦꏱꄻꏀꀺꌠꄹꎆ。ꏦꏲꄟꌫꄻꌠꉜꁨ，ꈯꀨꀉꑌꑵꃅꐯꇯꄉꏱꄻꌠꃄꌬ。ꋂꃆꄇꄜꋊ、ꀀꃆꄇꄜꋊꌋꆀꋯꁦꃅꏲꂠꌠꄹꏦꄻꐛꒆ，ꐧꋦꎀꍹꋍꏅꁧꃤꃅꌠꌋꆀꐧꋦꏱꄻꌠꇬꂿꄐꀊꅰꉾꃅꋊꇤꅐꇁ。ꊋꀥꇱꄉꈉꄮꊷꄮꌬꌠꏲꂠ，ꋍꏅꋬꂻꌋꆀꉮꄙꉮꌸꈭꋏꉮꊨꌠꄐꅍꉀꐕ，ꃄꇙ、ꃅꑊ、ꎖꑴꑠꌤꃅꌠꃅꋒ。ꄯꒉꁱꌊꅱꄻꌤꃅꄹꏦꄺꀱ，ꋋꇅꃅꈛꑌꅉꇬꄉꐮꄙꐨꋊꑣ。ꏲꑘꇕꀱꌤꃅꌠꀥꇱ。ꃹꅼꃅꏦꃤꁊꈴꂘꑴꌠꍔꆙ，ꏦꃤꇇꀨꌠꀥꇱ。ꐧꋦꋬꂻꏓꇱꏱꄻꌠꀥꇱ，ꏟꈯꃅꊋꃷꇱꄉꇷꉮꑽꃤꃅꐺꌠꏭꇇꇩꍈ，ꇩꏤꋬꂻꌠꀧꌋꃅ，ꐧꋦꐥꀹꉾꌠꐥꄉ，ꐯꇯꋬꂻꌠꍏꇩꋈꄻ。
（ꉆ）ꏓꇲꄉꉹꁌꐥꐨꏦꀧꌋꆀꄻꃪꌠꌤꃅꋒꌶ。
ꉹꁌꆹꇩꏤꐴꀨꉬ，ꐴꀨꈬꆏꇩꏤꑘꒃꄎ。ꍔꃚꌤꃅꌠꁧꀦꁻꌐꆏ，ꉹꁌꈁꐥꌠꃅꐥꌒꄻꌒꎻꌠꉬ。ꏟꈯꃅꉺꏦꋈꄻ、ꍣꌠꀥꇱ、ꄽꂫꑞꅉꀖꎼꇁꇬꎷ，ꉹꁌꅉꀨꐥꐨꏦꀧ，ꀋꆏꃅꉹꁌꐥꐨꐛꐨꌋꆀꊇꁧꉀꐕꌶ。
ꃅꑘꊌꌠꆹꉹꁌꐥꐨꅉꀨꉬ。ꏟꈯꃅꃅꑘꊌꌠꂴꄉꌠꄐꇐꏤꁈꌋꆀꀊꅰꃅꏣꀋꑌꌠꃅꑘꊌꌠꏱꁈꃄꌬ，ꃅꑘꊌꑘꀺꋦꈭꄻꃪ，ꏀꀺꌠꌌꑘꀺꌠꏃꂠ，ꑘꀺꌠꌌꃅꑘꊌꌠꈺꇙ。ꎼꈎꌶꅉꀊꂥꊐꌠꌶꅐꌠꌶꌺ727ꃪꑼꇬꑟ，ꀊꅰꀉꑌꌠꃅꑘꊌꌠꃅꈉꀖꁉꎼꇁꌶ，ꀋꆏꃅꄉꃅꑘꊌꑘꀺꌠꇬꁧꃤꃅꌠꃄꌬ，ꒉꌶꌺꃅꑘꊌꌠꑘꀺꌠꍆꁧꉀꐕ。ꇓꈓꃅꑘꎹꊋꌠꊿꏭꇇꀨꊋꀉꒉꃅꇱ，“ꃅꑘꀋꊌꌠ”ꑱꈐꈍꃅꑌꊿꋍꂷꃅꑘꊌꎻꌠꄉꀧ，ꅏꊋꊁꊰꀜꋊꌤꃅꊿꃅꑘꁵꌋꆀꉈꑴꃅꑘꊌꌠꌤꃅꋒꌶ。 ꑘꃅꁡꇤꑘꃅꊋꃤꆹꏮꌠ、ꎞꆏꂽꑼꑠꃅꑘꊌꌠꌤꃅꌠꋍꃱꃅꄐꏤꄉꃅ。ꊋꇤꄉꀊꅰꃅꋒꐯꋒꌠ、ꀊꅰꃅꊈꂄꌠꃅꑘꊌꌠꃅꇫꑟꄉ，ꑘꁨꊿꐥꐨꁳꀊꅰꃅꀑꑊꐥ、ꀊꅰꃅꐤꒉꎻ。
ꊌꐨꆹꉹꁌꐥꐨꇁꀦꉬ。ꃹꅼꃅꊌꐨꁸꁵꏦꉻꄺꀱꌶ，ꊋꇤꄉꊌꐨꍢꅉꍕꐭ。ꎆꏂꑘꌤꃅꊿꃄꎆꏤꐪꌋꆀꎃꐚꃅꉀꎆꌠꉺꏦꄻꐛꒆ，ꃄꎆꊌꇬꋍꉻꃅꋮꇖꌠꄹꎆ，ꐮꄮꌠꑘꁨꐮꃆꂮꄻꐛ。ꇩꁨꎆꏂꑘꏲꌋꊿꃄꎆꏲꂠꌠꀥꇱꌋꆀꄻꃪ。ꌤꑘꌤꃅꅉꃄꎆꊌꄹꏦꄺꀱ，ꌤꑘꌤꃅꅉꇬꋍꁘꋍꁘꃅꃅꐨꈲꁧꃄꎆꄹꌬ，ꆅꉚꌤꃅꊿꑠꉹꑘꐋꀋꌡꐨꇬꄉꄐꌠꃄꎆꄹꏦꄻꐛꒆ，ꃅꋮꆹꏮꎬꅧꅉꁥꎆꉀꎆꉺꏦꄻꐛꒆ。ꈜꀉꑌꏢꃅꏂꄉꊌꐨꀁꑌꃅꊌꊿꊌꐨꁦꎆꎻ，ꀋꆏꃅꊌꐨꐧꀠꃅꊌꊿꍆꁧꍔꒉ。ꇓꈓꇓꉈꀀꊿꊌꐨꆏꎆꏣꐊꄉꉀꎆꄉ，ꏓꂱꉹꁌꋍꏅꌠꁳꈀꄸꑌꈲꐪꊌꌠꌌꉪꅜꎻ。
ꐧꋦꏦꀧꌠꆏꉹꁌꐥꐨꅉꃀꉬ。ꀋꉬꀋꉆꌠꆏꐧꋦꇇꀨꄹꏦꄺꀱꌠꄹꎆ，ꐪꊛꄉꇓꈓꇓꉈꀁꂥꀧꑟꐨꉀꐕ，ꐊꑷꃅꊼꇅꇬꇇꀨꄹꏦꃄꌬ，ꐋꀋꌡꃅꊋꋠꌠꉹꁌꅉꃀꐥꐨꇬꏦꀧꌠꇲꁵ，ꊿꈧꌠꁳꃅꑘꀹꄻꉈꈽꇬꊁꉈꇬꅍꀋꐥꎻ。ꋍꃱꃅꌠꇓꈓꇓꉈꀀꊿꅉꀨꃀꌠꀨꎹꄜꏂꀧꄹꏦꄻꐛ，ꌤꃅꇮꃅꊿꃀꌠꀨꎹꄜꏂꀧꌋꆀꐯꊛꏡꁈꄻꐛꒆ，ꌤꏲꅉꌤꑘꌤꃅꅉꃀꌠꀨꎹꄜꏂꀧꄹꏦꄺꀱꌠꃄꌬ，ꎆꏂꑘꃅꈎꎆ、ꃅꑘꃅꈎꎆꌋꆀꃼꇇꑘꄜꏂꀧꀻꎆꌠꏭꈐꊟꊋꊡ。ꃅꑘꀋꊌꄜꏂꀧꌋꆀꇮꃅꂷꊂꌸꄜꏂꀧꄹꏦꄻꐛꒆ。ꐧꋦꇇꀨꌋꆀꎕꏦꏦꀧꐨꆹꎊꈬꁌꏤꑟꐨꊛꇺꐊꃅꌠꉺꏦꃅꇫꑟ。ꃀꌠꌤꑘꀻꎆ，ꌋꅪꌅꈌꈲꁧꏦꀧ，ꀊꉘꌠꏀꀻꎆꌠꉈꇬ，ꊋꀥꇱꄉꊿꒆꆹꀋꑟꌠꀧꌋꃅꌋꆀꑱꈐꊋꋠꎍꌠꏦꀧ，ꊾꄣꌠꅉꀨꄉꉻꁧꃤꃅꌠꌋꆀꄣꅐꄴꏮꌠꃅꋒ，ꂄꃅꌤꑘꀻꎆꌠꇬꊋꁈꄏ。ꊿꊋꋠꎍꌠꁳꋍꂷꋑꀋꋒꃅꐧꋦꇫꉈꇬꀨꎹꌠꊌꎻꌶ。
ꀀꑳꏦꀧꉺꏦꄻꐛꒆ。ꏓꂱꉬꇮꃅꀀꇬꀀꅉꐥꌠꌌꁻꌐꃅꄉ，ꀋꎪꃅꉹꁸꄉꄐꇺ、ꁘꁸꄉꃄꌬ、ꊐꁸꄉꆽꎍꎻꇬꎷ，ꏦꀧꐨꀀꌒꋉꃆꋈꄻꌠꊋꇨꇱ，ꎼꈎꀊꏀꃅ700ꃪꂷꈋꉐꋈꇬ，ꄚꈐꏭꋍꑞꋍꉹꌠꑲꆹꇣꆹꐛꅉ470ꃪꂷꈋꉐꐥ，ꉁꈾꇱꄻꄉꋈꄻꌠꊋꀥꇱ。ꇓꈓꀉꒉꌠꏦꀧꀀꑳꍆꁧꐕꀊꂥ。ꉻꊤꀀꑳꌋꆀꁌꆓꊤꑳꏓꐯꇯꄉꌫꄻꌠꄹꎆ。ꏱꁈꐨꀀꑳꎆꇱꎆꏓꉺꏦꌋꆀꌬꅍꏀꀺ，ꃷꎏꈴꌠꃄꌬꄟꌬꄉ，ꏦꀧꀀꑳꋈꄻꌠꎁꃅꀊꉗꃅꎍꐽ、ꎆꀨꄉꄐꌠꌌꇫꊋꄏ。ꈁꐥꊐꌠꍔꃚꆏꏱꎆꇱꐨꁦꎆ，ꋈꄻꊇꁧꉀꐕ，ꐽꊯꃅꁆꁸꌠꄉꀧ，ꃹꉆꎞꅐꉺꏦꄻꐛꒆ，ꎼꈎꈍꈐꃅꀑꐱꃅꏦꀧꀀꑳ480ꃪꂷꋉꐛꄉ，ꇵꆹꎇꄉꀊꉗꏢꇁꉚꀐꌠꀀꑳꊋꋠꌠꉹꁌꁳꏛꃅꑳꏀꇤꏀꀀꆹꎻ。ꐯꀋꌡꌠꇓꈓꃆꂮꇬꉜꄉꉹꁸꄉꋊꄻ，ꐧꀠꀄꊭꉹꌠꃷꇐꑳꇤꌋꆀꁨꇐꌅꈌꐯꇯꁨꌠꀀꑳꇲꁵꌠꁦꎆꇱ，ꊝꎹꈲꏂꎆꇱꐨꈉꄻꌠꍅꄉ，ꑳꇤꁨꇐꃷꎏꐪꊛꄉꉾꃪꃅꀻꎆꌠꊥꎆ。
ꊿꀑꇬꂿꃅꑟ，ꋬꂻꃅꒃꅐꈻꑟꋋꏢꈍꄮꇬꉬꄿꂿꏟꈯꃅꈻꄉꇬꎷ。ꏦꇨꃅꋬꂻꒃꅐꏦꃤꏦꇗꃄꌬ，ꐊꑷꃅꋬꂻꃅꒃꅐꃅꎁꄹꏦꃅꇫꑟ，ꏟꈯꃅꋬꂻꌤꆿꀋꇰꀋꉈꃅꑠꅐꌠꋎꍅ。ꊋꀉꒉꃅꏂꄉꃷꎏꐥꀹꋊꍬ，ꐪꊛꄉꌐꄉꏱꄻꌠꃅ，ꀉꇨꃅꀊꆠꄷꅠꈱꌠꄻꃷꌠꃅꐨꏯꇇꇩꍈ。ꒃꅐꄺꑣꅑꐮꈴꌬꈧꅉꑟꌠꈁꈴꈭꎁꍞꏲꉺꏦ、ꐧꋦꐯꇯꏱꄻꄹꏦꌋꆀꐪꎹꀦꎹꉆꌠꉻꑫꄻꐛ，ꍏꑷꅑꃅꄷꈛꎂꃅꅉꂫꊐꑟꌠꋠꇐꁬꋌꉮꀋꐥꍞꏲꏦꉻꄻꐛꒆ。ꏦꇨꃅꏦꃤꏦꇗꌋꆀꎕꏦꌬ，ꏦꇨꐯꏦꇨꃅꍞꏲ、ꀉꇨꐯꀉꇨꃅꅓꀞ、ꅱꐆꐯꅱꐆꃅꅑꎹꌠꌌ，ꏟꈯꃅꋠꄜꇬꍍꆀꇁꌠꏱꄻ，ꃶꐚꃅ“ꉐꆂꇬꉮꀋꐥ”ꌠꏦꀧ。
（ꈬ）ꊋꇤꄉꒆꉻꌧꑳꀀꁍꎔꃨꌠꋈꄻ。
ꒆꉻꌧꑳꋈꄻꌠꆹꏓꂱꐥꐨꇬꎑꁠꎍ，ꊿꋅꃆꏂꊂꑋꇬꃆꂮꐥ。ꃅꉒꈑꋧꐊꅉꍔꐯꄉ，ꋦꈭꍍꆀꐮꄙꐨꑓꅐꎑ，ꋋꆹꋌꐛꆘꉾꃅꀻꎆꃄꄟꏭꂷꇭꀊꅪꌠꅢꄉꌠꉬ。ꀋꎪꃅꊋꀥꇱꄉꒆꉻꋦꈭꀧꌋꃅ，ꉌꑣꄉꏡꁈꀉꇨꌠꌌꂿꃆꀉꇨꌠꃅꌐꌶ。
ꇵꊫꋏꄉꍍꆀꄴꏮꏱꄻꌠꇨꃅꃅ。ꃅꉒꈑꋧꐊꌠꅐꇬꎷꌠꇓꈓꀉꒉꐯꀉꒉꌠꌋꆀꃄꁕꌌꀋꉬꀋꉆꅉꃅꄉ，ꋧꃀꌤꀄꊭꌠ（PM2.5）ꌋꆀꏶꃹꉆꌠꋧꃀ（PM10）ꏱꄻꌠꌌꂵꅐꈌꃅꄉ，ꅐꑘꐛꉻ、ꊋꀦꈲꐪ、ꂪꌗꃑꇧꎭꌠꌋꆀꈑꋧꈑꃀꄓꑠꊨꊭꀋꉬꀋꉆꌠꒃꉇꄉ，ꍔꃚ、ꎆꏂꑘ、ꉹꁌꋍꏅꐯꇯꇫꐊꈽꃅꌠꉺꏦꀊꏀꌠꄻꐛꒆ，ꃄꁕꐯꇯꄴꏮꐯꇯꋎꍅꌠꃄꌬ，ꃹꅼꃅꃅꌗꍍꆀꉃꄻꃄꄻꎖꄎꄉꌠꌫꄻ。ꎼꈎꆏꊖꌋꏦꇤꄸꀄꊭꌠ5ꃪꇷꀜꋊꇧꎭ，ꊖꌋꏦꄆꍣꑘꐞꄺꀱꌠ1500ꃪꐂꊅ、ꑩꋊꄺꀱꌠ13ꂡꐂꊅ、ꈑꋧꋊꇧꎭꄺꀱꌠ18ꂡꐂꊅ，ꍮꊪꀉꁘꌠꌋꆀꍮꊪꀉꆹꌠ600ꃪꇷꀜꋊꇧꎭ，ꊋꀦꀊꏀꌠꐕꍯꄹꌬ，ꇩꏤꑭꊂꇬꄉꇩꏤꇖꎕꏦꍮꊪꌬꊵꒀꇲꁵ。ꁦꎴꒉꃄꄻꎖꄎꌠꃄꌬ，ꊋꀥꇱꄉꅝꒉꇁꀦꀧꌋꃅ，ꈳꁕꀋꉬꀋꉆꅉꍍꆀꄺꂡꌠꄹꎆ。ꊖꆊꄻꐛꅉꐛꌠꋉꃆꃄꄻ。ꂿꑘꁁꏯꍍꆀꌠꄺꂡ，ꂿꑘꁡꇤꎔꃨꌠꋈꄻ。ꉪꊇꆏꌢꎭꌠꏭꉈꈽꌠꌟꃅ，ꏟꈯꃅꍍꆀꌠꏭꉈꈽꌶ。
ꊋꀦꒃꅐꌋꆀꌬꈧꃄꄟꄺꀱꌠꄹꇙ。ꊋꏏꍍꊨꌠꇬꊋꃤꀉꒉꃅꇱ，ꊋꀦꌬꈧꈁꉬꃷꁨꋎꍅ，ꎼꈎꆏꊋꀦꌬꈧꇨꐨꆹ39％ꈋꉐꌌꀁꋌꊰ，ꑍꀑꐊꑘ、ꐈꇐꀑꌗꈉꃷꁨꃑꇧꎭꃷꁨꆏꐯꇯ2％ꊨꒊꌶ。ꐈꇓꀋꉬꌠꊋꇁꀦꌌꄆꃑꌠꍆꐨꐕꀊꂥ，ꀑꁮꄆꈄꏍꌋꆀꁊꁸꃅꐙꌠꊋꀦꀻꎆ，ꆳꊋ、ꉘꁮꊋ、ꒆꇐꊇꁧꊋꃤꀻꎆꌠꊋꊡ，ꒉꄆ、ꉿꄆꐘꃆꈨꋈꇬ。ꋌꐛꐞꌗ、ꊖꌋꈭꄀꌗ、ꃪꄅꇓꌗꍤꎷꅤꀖꌋꆀꌌꌬꌠꊋꀥꇱ。ꅐꀦꃅꐙꌠꅐꇐꁌꏤꄺꀱꌠꄹꎆ，ꀀꊿꒉꌬ、ꌗꌬꊐꐥꁌꏤꄹꏦꋈꄻꐛꒆ。ꋈꄻꄐꐨꉀꐕ、ꊋꏏꅐꇐꉹꁌꈲꊌꋉꃆꃄꌬ，ꁦꎴꒃꅐ、ꀊꃴꌋꀁꂥꇮꇐꌋꆀꎆꏣꀰꏮꌠꀻꎆ，ꃅꌗꐛꐈꏭꊝꌠꄐꊋꉀꐕ。ꒉꏏ、ꌬꇐꏎꏸꌋꆀꊋꀦꏓꇱꄉꌬꌠꄻꀉꇨ。ꐳꃅꊋꏏꋦꈭꌋꃅꇮꇐꌋꆀꅐꇐꀖꁉꄉꌬ，ꊋꏏꋦꈭꌋꃅꅐꑘꄺꂡꌊꉘꁇꁉꌠꎹꄓꈧꌺꅐꑘꐛ。
ꒆꉻꀧꌋꃅꌠꌋꆀꋈꄻꌠꄹꎆ。ꐪꊛꄉꋠꃅꀱꌩꊪꏜꏿꌠꃅ，ꎼꈎ500ꃪꂿꄐꏤꄉ。ꆫꁍꀱꏜꏿ、ꋧꐛꌩꏪꀧꌋꃅ、ꂤꏂꄴꏮꂤꏂꏱꄻ、ꒉꇈꊖꈬ、ꇓꊈꂤꏂꀞꐛꌠꏱꄻ、ꒉꊩꀱꐛꅉꐛꑠꒆꉻꋉꃆꀉꒉꌠꃄꄻ。ꊋꀥꇱꄉꒊꃀꌔꂿꌠꇁꀦꃅꄷꒆꉻꀧꌋꃅ。ꀨꄜꂿꄐꐛꅉꄹꏦꃅꇫꑟ，ꃄꁕꐂ、ꒈꁕꐂꒆꉻꁵꊒꉺꏦꄻꐛꌠꄹꇙ。ꒆꉻꀧꌋꃅꑆꊋꆹꀋꃋꋋꄮꅐ、ꈲꐪꆹꄙꈎꃅꐥꌠꉬ。ꈁꐥꊐꌠꍔꃚꌋꆀꐧꋦꑭꊂꃅꐯꇯꀒꁨꋍꁘꃅꏣꀋꑌꃅꃄꄻꄉ，ꐯꇯꉪꊇꇫꉘꇉꄉꐥꌠꑱꈐꀧꌋꃅꌊꉾꃪꌶ。
ꁧꎁꊈ！
ꍔꃚꌤꃅꌊꉾꇬꆹ，ꀋꎪꃅꊋꀥꇱꄉꊨꏦꑴꅉꄺꀱꉙꂘꌶ。ꈁꐥꊐꌠꍔꃚꆏꀋꎪꃅꏦꃀꌋꆀꏦꃤꁵꄉꌠꃅꎁꍬꌬꌶ，ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꇖꂟꅉꇬꈴꄉ，ꐳꃅꏦꏲꍔꃚ、ꏀꀺꍔꃚ、ꐙꎴꍔꃚꋈꄻ，ꍔꃚꃄꌬꊋꃤꌋꆀꉻꑇꊋꃤꌌꀉꇨ，ꊋꇤꄉꏓꂱꎁꃅꊈꂄꂿꄐꀉꇨꃅꁧꃤꃅꌠꇲꁵ。ꃹꅼꃅꏦꍬꄉꇩꏲꌠꅉꀨꄐꁈꌬ，ꍔꃚꌤꃅꌠꌌꐛꒆꃅꏦꏲꈜꇬꇱꄉ，ꏦꏲꉪꐨꌋꆀꏦꏲꃄꄟꌌꃅꎁꃅ。ꊋꀥꇱꄉꍔꃚꏦꄹꌤꃅ，ꏲꑘꏦꌬꏦꉻꄺꀱ。ꍔꃚꏲꂠꉪꐨꌋꆀꃄꄟꏀꀺ，ꁈꏤ、ꃄꌬ、ꍞꊠꉺꏦꄻꐛꒆ，ꍔꃚꆏꐧꋦꏭꃻꄻꁧꃤꃅꌠꄺꀱꌠꄹꎆ。ꉻꃆꊿꁥꌠꁱꂘꌠꊋꀥꇱ，ꐊꑷꃅꉻꃆꊿꊇꁧꉀꐕ。ꉻꃆꊿꈁꐥꌠꐯꇯꏓꂱꈲꁧꌌꀨꇬꐕꄉ，ꐙꎴꉻꌤꃅ，ꊋꇤꏡꇤꂱꑱꃅꎁꃅꄉ，ꇯꍝꃅꏓꂱꋍꏅꊩꌺꃅꋒꌶ。
ꈁꐥꊐꌠꍔꃚꆏꀋꎪꃅꏟꈯꃅꏎꏸꌠꃄꌬ，ꁋꀘꌠꏭꁏ，ꏟꈯꃅꏎꏸꄉꐥꇬꎷ。ꏟꈯꃅ“ꃷꋪꏦꃤꏤꄉ”ꌠꃄꌬ：ꍔꃚꃤꑳꀊꏀꃅꋉꌋꆀꌌꋈꀱꀋꉆ，ꏱꎆꋠꌠꊿꈁꉬꃷꁨꆹꊨꒊꀉꄂꉆꁦꎆꀋꉆ，“ꌕꉻ”ꌫꎆꊨꒊꀉꄂꉆꁦꎆꀋꉆ。ꉻꃆꍯꄹꏦꄺꀱꌠꃄꇬ。ꏲꑘꍞꍤꌠꊋꀥꇱ，ꉹꑘꃅꇏꀋꎃꌠꄺꀱ。ꍤꌗꌋꆀꍤꌗꊌꐨꉻꇰꇨꐨꊋꀥꇱ。ꀋꃋꎼꈎꆏꃄꅉꏆꅐꎆꊌꌬꌋꆀꋠꃅꀧꌋꃅꃆꂮꐊꑷꃅꌌꍤꌗ。ꃹꅼꃅꍹꁏꎴꄖꄹꏦꋈꄻꌠꄹꎆ，ꏟꈯꃅꍹꈔꃣꈌꍤꀞ，ꍹꈔꊿꆹꈀꄸꉬꄿꂿꏦꃤꇬꈴꄉꏦꇨꃅꅓ、ꄝꇫꀋꏆꌠꉬ。
ꈁꐥꊐꌠꍔꃚꆹꑴꐚꃅꋋꊐꌠꏓꄊꌋꆀꋍꎮꊈꉼꁳꍞꊟꎻ，ꏓꂱꍔꑠꁳꋯꁦꃅꍞꊟꎻ，ꎔꎗꃅꏓꄊꁧꎁ、ꋯꁦꄈꀾ、ꇬꎭꆃ、ꄈꀾꀋꐊꌠꊿꌋꆀꈁꐥꌠꏓꂱꏓꉻꉜꐨꅲ。ꏲꃆꄇꄜꋊꌠꊋꀥꇱ，ꈨꏀꅇꉉꌠꄹꏦꄻꐛꒆ，ꐳꃅꐧꋦꉈꇬꌠꅇꏮ。ꉪꊇꆹꏓꂱꍔꃚꉬ，ꈁꃅꌠꌤꆹꐯꇯꋒꐯꋒꃅꏓꂱꉪꐨꇬꈴꄉ，ꐊꑷꃅꏓꂱꁳꍞꊟꎻ。
ꁧꎁꊈ！
ꉪꇩꏤꆹꋍꃱꃅꌠꊿꋅꀉꑌꌠꇩꏤꂷꉬ，ꊿꋅꑞꁯꉬꄿꂿꍏꉸꊿꋅꐥꊯꌠꇬꋍꁯꉬꇬꎷꌠꉬ。ꐊꑷꎃꊒꃅꄈꃤꊿꋅꏱꁈꃄꌬ，ꏟꈯꃅꊿꋅꃄꁕꊨꏦꏲꄹꏦꌬꄷꀋꁧꄻꐛꒆ，ꊿꋅꋯꑌꁨꆹ、ꐯꇯꌄꆣꀻꎆꌠꊥꎆ。ꎔꎗꃅꍏꑷꀁꑌꊿꋅꌋꆀꊿꋅꃅꄷꀻꎆꊋꁈꄏꌠꏱꁈꏁꁈꃅꇫꑟ。ꊻꂷꊼꇅꀁꑌꌠꊿꋅꀻꎆꌠꄏꐓ，ꐪꊛꄉꃅꋮꌄꆣꉹꁌꌣꈚꌠꃅꇬꎷ。ꀁꑌꊿꋅꋊꃅꁱꀕꉾꃪꌠꀧꌋꃅꌋꆀꀻꎆ。ꍏꉸꊿꋅꀉꒉꋋꁯꇬꊿꋅꈀꐥꌠꌺꇖꐮꄮꃅꐥ、ꉌꋧꊋꋓ、ꐮꄮꃅꀻꎆ、ꉌ꒜ꋍꂷꑌ，ꀋꎪꃅꀊꅰꃅꌣꈚꐥꌒꋬꂻꈨꅪ、ꌄꆣꐞꄿꇁꌠꉬ。
ꐊꑷꃅꄈꃤꑇꇐꂘꃅꌤꃅꅉꀨꌐꏦꃅꇫꑟ，ꑇꇐꂘꃅꃆꂮꐮꄮꌠꊥꎆ，ꑇꇐꂘꃅꑭꊂꊿꌋꆀꑇꇐꂘꃅꑇꉹꁌꎆꏣꐧꋦꀻꎆꊥꎆꇬꏣꀋꑌꂿꄐꋊꇤꅐꇁ。
ꉇꄅꀀꌠꍏꇩꊿꌋꆀꀱꁍꇩꇁꌠꃺꑌꏭꋯꑌꄉ，ꇩꉈꃺꑌꁍꇩꐛꏀꈴꋈꄻꌠꇬꐊꈽꇁ、ꁍꇩꄮꐽꋍꃱꃅꌠꊥꎆ、ꍏꇩꌋꆀꉋꄅꇩꏤꃰꊿꁱꀕꐮꈴꐋꀋꌡꂿꄐꄹꎆꌠꋊꇤꅐꇁ，ꎿꈐꎿꉈꍏꉸꌺꇖꏓꋧꊋꃤꀋꆏꃅꎼꀉꇨꆹ。
ꁧꎁꊈ！
ꋌꃀꋋꈓꆹ，ꇩꐏꌋꆀꂽꏂꋈꄻꏟꈯꃅꄹꎆ，ꂽꏂꌋꆀꃶꏢꂽꏂꀊꏀꌠꉻꑊꌋꆀꌉꈿꊋꃤꄛꅐꇁ。ꀊꏀꋋꈓꇬ，ꏟꈯꃅꄈꃅꒊꃅꇁꀊꏀꌠꇂꃴꂽꇨꁻꌐꇬꆼꒆꄉ，ꐊꑷꃅꂽꏂꇝꂱꈴꐛꏀꈴꑌꐚꈴꌠꋈꄻ，ꀋꆏꃅꂽꏂꈴꌗꈴꌠꇎꏦꇂꃴꊋꌌꇷꌋꆀꃶꐚꃅꌉꈿꄐꅍꉀꐕ。ꋍꃱꃅꂱꑱꁁꏯꂱꑱꏲꄸꂽꌤꉈꈽꄐꏤꄉꌠꄹꎆ，ꉪꇐꍔꍞꋈꄻꌠꊋꀥꇱꌋꆀꄺꀱ，ꐳꃅꐊꑷꃅꐛꏀꌠꊂꇲꑭꁘꋈꄻ，ꇩꐏꈆꑪꎥꃪꌋꆀꇮꇐꀊꂥꀊꏀꌠꇇꌭꇇꂿꀻꎆꌠꊋꀥꇱ。ꏦꍬꂽꏲ、ꏦꇨꃅꂽꏲꌠꃅ。ꃹꅼꃅꇩꐏꌋꆀꂽꏂꄺꀱꌠꃅ，ꊋꀥꇱꄉꂽꌤꄐꇐꏤꁈꄐꂘ，ꐛꏀꂽꌤꊋꃤꉻꑫꄻꐛꒆ。ꇩꐏꄕꊪꌋꆀꄐꄻꊋꃤꋈꄻꌠꊋꀥꇱ，ꊋꀥꇱꄉꑍꃀꑍꌉꊭꌉꄐꌋꆀꃅꋮꐏꎿꐏꃅꈯꐏꌠꏲꂠꋎꍅ。ꂽꌋꆀꏓꂱꐮꐊꃹꅼꃅꀻꎆꆹꌠꄹꎆ。ꐳꃅꐛꏀꈴꏢꍤꂽꏂꊋꃤꋈꄻ。ꏟꈯꃅꃨꆰꐨꉮꃆꈭꋏ、ꇶꌾꌠꁏꎍꐽꌠꀧꌋꃅ、ꄮꐽꀧꌋꃅꇈꐏꁇꌠꌋꆀꋋꇅꃅꇫꅐꇁꌠꌤꆿꀞꄻꋍꑠꂿꃆꃅꌐ，ꏣꀋꑌꃅꇩꏤꎆꏣꋈꄻꌠꃅꈽꌋꆀꇇꀨ。ꈁꐥꊐꌠꍔꃚꆏꋌꃀꌟꃅꇩꐏꌠꌋꆀꂽꏂꋈꄻꌠꉈꇬꊋꁈꄏ，ꒉꉛꉂꐪꑖꑟꀕꌠꌟꃅ，ꂽꌋꆀꍔꃚꂽꌋꆀꏓꂱꐮꋯꑌꌠꇓꆈꀋ꒜ꌟꃅꈫꈈꌶ。
ꁧꎁꊈ！
ꉪꊇꆏꀋꎪꀋꑴꃅ“ꋍꇩꑍꏦ”ꌐꏦꌫꄻꇬꎷ，ꐊꑷꃅꎃꊒꃅꁧꀦꏦꃤꌫꄻꇫꑟ，ꑣꇤ、ꉪꂱꀊꉗꃅꌄꆣꎍꐽꇬꎷꎻ。ꑣꇤꏲꑘꇣꋲꏱꅉꐎ、ꉪꂱꏲꑘꇣꋲꏱꅉꐎꏲꑘꇛꌺꌋꆀꍔꃚꏦꃤꇬꈴꄉꏲꑘꃄꌬꌠꊋꁈꄏ，ꊋꀉꒉꃅꅐꄉꎆꏣꀻꎆ、ꈲꁧꐥꃅꉹꁌꐥꐨꄻꃪ、ꏦꃤꇬꈴꄉꋯꁦꄹꎆ、ꐧꋦꐮꄮꌠꀧꌋꃅ。ꀒꁨꋍꁘꃅꅔꈐꌋꆀꇤꉪꐮꇷꃅꌠꍔꐯ，ꇤꉪꑴꅉꋓꅔꊋꃤꉀꐕꌠꊥꎆ。ꇩꏤꐊꑷꃅꃹꅼꃅꄺꀱꌠꌋꆀꐛꏀꈴꋈꄻꈴꎁꇬ，ꑣꇤ、ꉪꂱꆏꀋꎪꃅꀊꅰꃅꉾꃅꀻꎆꌠꃅꇫꑟꄎꌠꉬ。
ꉪꊇꆏꐊꑷꃅꄠꃪꏭꌤꃅꌠꏱꁈꌐꏦꀉꒉꀊꂾꌠꃄꌬ，ꀋꎪꃅ“ꈬꑍꐮꐊꉜꐨ”ꌭꈬꃅꄉꇬꎷ，ꍏꇩꋍꂷꉬꌠꈭꏦꀧꌋꃅ，ꎿꅔꑍꁁꏯꍔꍞꐮꉌꒊꌠꌌꀒꁨꋍꁘꃅꈫꈈ，ꎆꏣꐮꉔꃅꌠꊥꎆ，ꐮꈴꐮꇷꃅꌠꄹꇙ，ꋮꒉꐯꉇꌠꃅ，“ꎿꅔꑍꁁꏭꋍꁯꃅꐮꉂ”ꌠꉪꉻꀋꄝ，ꃷꅍꆊꅿꉂꐪꀧꌋꃅ，ꃺꑌꉌꊋꏓꐯꇯ，ꍏꉸꊿꋅꋦꁍꉾꃪꌠꋈꄻ、ꁍꇩꄮꐽꏓꋍꃱꃅꌠꌤꑘꀉꒉꀊꂾꌠꎁꃅꊋꃤꅐꌞ。ꉪꊇꆏꑍꁁꏯꌠꀊꅰꃅꐮꎼꐮꈴꐯꊩꐮꁱ，ꀊꅰꐮꎼꐮꈴꀊꅰꐮꉂꐮꅉꇁꇈ，ꎿꅔꑍꁁꏯꐮꃆꂮꄮꐽꃅꀻꎆꌠꁳꇬꇈꇬꄡꀋꄐ、ꀱꈪꀋꉆꌠꐩꋊꒈꂃꐛꎻꑟꉂ。
ꁧꎁꊈ！
ꎼꈎꆹꄮꐽꐯꇯꐥꌠꏥꏦꉬꐘꌠꄜꅐꇁꃘꊰꈎꈭꏝꐛꀐꌠꉬ。ꍏꇩꏓꂱꆹꄮꐽꌠꉂ、ꀻꎆꏾ，ꉪꇩꏤꐛꏀꈴꋈꄻꌠꆹꀊꉗꃅꎍꐽꌠꇩꏹꋦꈭꈉꄻ。ꉪꊇꆏꐪꊛꄉꄮꐽ、ꀻꎆ、ꇷꃅ、ꐯꇯꊋꐛꌠꁈꁧꀊꂥꃅꐕꄉ，ꀋꎪꃅꈍꄮꇬꑌꄮꐽꀻꎆꌠꈭꈜꇬꍬꇬꎷ，ꀋꎪꃅꈍꄮꇬꑌꐯꇯꈲꐯꇯꊋꐛꌠꁉꃑꄐꇐꃄꄻꇬꎷ。ꏟꈯꃅꇩꏤꌅꀨ、ꋬꂻ、ꀻꎆꈲꁧꀧꌋꃅ，ꃶꐚꃅꉪꊇꇩꏤꉻꊿꌋꆀꏦꊿꎿꉈꏦꊒꌅꈌꈲꁧꀧꌋꃅ。ꐊꑷꃅꈭꀕꇍꀕꉇꉻꑌꑲꌠꄹꎆ，ꃷꇎꉂꐪꌭꈬ，ꃹꅼꃅꐯꈲꌠꇷꃅ。ꑍꃢꐯꌉꊋꐛꐨꌋꆀꌉꊂꇩꏹꐥꀹꀧꌋꃅ，ꈍꃅꑌꐩꋊꉈꑴꎞꌠꍯꊪꀋꏀ。ꊋꀥꇱꄉꀻꎆꇰꌠꇩꏤꌋꆀꋯꑌꇷꃅ，ꋒꃅꀻꎆꇰꌠꇩꏤꐮꐊꌠꈲꁧꀧꌋꃅ。ꃹꅼꃅꇩꏤꀉꒉꈧꌠꌋꆀꄐꇐꏤꁈꐮꏯꅇꉉꌋꆀꃶꐚꃅꐮꇷꃅ，ꀊꉗꃅꎍꐽꐛꒆꃅꀻꎆꌠꇩꏤꀉꒉꌠꌋꆀꐮꑌꑲꐨꋈꄻꌠꄹꇙ。ꋒꃅꑸꄠꎆꏣꐮꇷꃅꎀꍹꏃꂠꊿꑌꐚꃅꈿꌠꀋꉬꌠꃀꀞꄻ。ꍏꇩꆹꆼꎍꐨꐥꌠꇩꏤꀉꒉꑠꂷꉬ，ꉪꊇꆏꏣꀋꑌꃅꇩꏹꀉꑌꁁꏯꌤꃆꃅꈽ，ꅉꆺꃅꐙꌠꌤꃆꌋꆀꃛꊸꌤꃆꂥꀘꌠꎁꃅꋈꄻꃅꐙꌠꂿꄐꇤꅐꇁ，ꃶꐚꃅꇩꏹꎃꊒꑗꐥꌠꏭꀧꌋꃅ，ꇩꏹꐥꀹꄹꇙꌊꄉꀊꅰꃅꀋꈐꀋꉈꋭꋽꌠꃅꍜꇬꉜꄉꀻꎆꆹ。ꍏꇩꆏꋧꃅꇣꄧꇩꏤꈧꌠꌋꆀꐮꐊꄉ，ꃰꊿꀊꉗꃅꄮꐽꌠꄹꎆ，ꐯꇯꀻꎆꌄꆣꌠꃅꇫꑟꀕꉂ。
ꁧꎁꊈ！
ꏓꂱꃣꇖꊂꁠꀳ，ꉈꈽꄉꃆꏂꊂꑋꀹꄻ。ꉪꊇꁳꑖꑟꃅꋯꑌꌊꐋꀨꑮꏣꀻꊝꎻꏹꃅꄉꌠꄈꍏꑷꈭꇍꄉ，ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ，ꉌꋧꊋꏓ，ꄹꀖꏀꀺ，ꏟꈯꃅꌤꃅ，ꐊꑷꃅꊼꇅꌣꈚꌠꐧꋦꄻꐛ、ꌣꈚꐞꄿꋯꁦꌧꑳꐮꄮꌠꐧꋦꉪꏦꐛꏀꈴꇩꏤꄻꐛ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꊋꇤꄉꉈꈽ！
