ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꏓꂱꏦꍤꑼꀊꂥꇊꀊꂥꊐꌠꌤꃅꅇꄜ

——2011ꈎ3ꆪ11ꑍꊯꊪꈭꇩꏤꑭꊂꏓꂱꁧꎁ꒜ꀉꒉꇖꃢꌠꈿꅉꇬ

ꏓꂱꏦꍤꑼꀊꂥꇊꀊꂥꊐꌠꏦꍤꍈ ꊼꏧꂱ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꁧꎁꊈ:

  ꀋꃋ,ꉢꏓꂱꏦꍤꑼꀊꂥꇊꀊꂥꊐꌠꎁꃅ꒜ꀉꒉꈿꌠꏭꌤꃅꌠꅇꄜꂿ,ꆍꑴꌠꌌꍤꇖꅊꇈ,ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。

  ꀱ2010ꈎꌤꃅꌠꉪꏡ

  2010ꈎ,ꐋꀨꃛꏢꄧꌌꊝꎻꏹꃅꄉꌠꄈꍏꑷꎃꊒꃅꏃꂠ,ꇩꏤꑭꊂꏓꄊꌋꆀꋍꎮꊈꉼꊋꇨꃅꍞꊟꌠꇂꃴꄉ,ꏓꂱꏦꍤꑼꀊꂥꇊꀊꂥꊐꌠꆏꎔꃅꄈꅿꃀꀉꒉꊰꏁꈭꌋꆀꊯꊪꈭꇩꏤꑭꊂꏓꄊꃀꌕꃢꌠꉌꊈꌫꄻ,ꃹꅼꃅꈆꑪꃅꀻꎆꌠꉜꐨꌫꄻꇫꑟ,ꃛꏸꃅꎆꏣꐧꋦꀻꎆꃅꇴꄉꉻꇬꆼꒆꄉ,ꀋꎪꀋꑴꃅꏦꃀꌋꆀꏦꃤꁵꄻꄉꃅꎁꍬꌬ,ꏟꈯꀕꃅꐧꋦꐮꄙꌠꆣꄯ、ꐧꋦꏲꂠꏀꀺ、ꀋꈐꀋꉈꃅꐙꎴꃅꏦꌬꀨꄉꌕꐘꌤꃅꌠꄹꎆ,ꀉꒉꃅꏦꌬꃣꈌꀞꄻꌠꊋꃤꇱ,ꃹꅼꃅꏦꍤꄺꀱ,ꊋꀥꇱꄉꊿꁥꌠꂘꄻ,ꋍꑞꋍꐘꏦꍤꌤꃅꃅꊌꐨꀊꏀꃅꁨꎆ。

  ꋍ、ꋒꐯꋒꃅꏦꍤꌅꊋꂿꄐꇤꅐꇁ,ꎆꏣꐧꋦꀻꎆꌠꏦꀧ

  ꎆꏣꐧꋦꀻꎆꄐꄻꌠꃅꒊꃅꇁꀊꏀꌠꈉꐨꈴꄉ,ꀒꁨꋍꁘꃅꃅꇴꄉꉻꁧꃤꃅꌠꏡꁈꄻꃪ、ꃅꇫꑟ。

  ꏦꃤꇬꈴꄉꃷꎏꎆꏣꐥꀹꀧꌋꃅ。ꋋꈓꇬꐧꋦꉪꏦꃷꎏꎆꏣꐥꀹꀜꐆꑽꃤꃅꏭꐛꌠꈌꁧꒃꈢꌠꊿꐯꇯ37532ꑼꐥ,ꌌꉻꅇꎹꌠ50775ꑻꐥ,ꂱꄷꄉꇬꀒꄹꈎꄩ4.6%ꌋꆀ19.5%ꁦꎆ。ꑓꏮꏓꋍꃱꃅꋓꅔꊱꁨꐥꌠꇬꊥꎆꌠꃷꎏꉻꑫꏓꐛꌠꉜꄉ,ꀉꒉꃅꏦꃤꇬꀋꈴꃅꎆꏓ、ꎆꒉꎆꇁꀸꊏ、ꊛꃷꑠꀉꆈꃅꎆꏣꑽꃤꐆꌠꏭꇇꇩꍈꌠꊋꃤꇱ,ꏲꑘꏦꌬꌤꏲꅉꍞꊥꄉꏦꃤꇬꈴꄉꑽꃤꐆꎑꁠꏭꐛꌠꃣꈌ3448ꐘꏮꌞ;ꏣꀋꑌꃅꌧꇐꅐꇐꌅꈌꉄꌎꌠꌋꆀꃷꇐꀊꆠꄷꅠꄻꃷꌠꏭꇇꇩꍈꌐꐘꃅꈧꈽ,ꐯꇯꅐꇐꄺꂡꏓꋧꅉ、ꃷꁨꏓꁸꅉ、ꌅꈌꉄꌎꃣꈌꀉꑌꃅꅏꅉꀨꄉꏱꄻꌠꃅ,ꌧꇐꅐꇐꌅꈌꉄꌎ、ꃷꇐꄷꅠꄻꃷꑠꊿꑽꃤꐆꏭꐛꌠ5642ꑼꌌꅇꎹ,ꐯꌟꉜꇬ14.1%ꁦꎆ。

  ꃹꅼꃅꀋꉬꀋꉆꁁꏯꄉꅍꑽꃤꐆꍤꀞꌐꐘꌤꃅꌠꍔꂵ。ꃹꅼꃅꃼꇇꑘꃴꎆꋠꏱꄻꌠꌤꃅ,ꑲꅉꇤꂷꀖꁉ、ꅐꇐꌅꈌꐮꈴ、ꁬꋌꆰꋌꃷꈋꑠꁁꏯꇬ,ꌌꃣꈌꃅꍤꌋꌠꇩꏤꌤꃅꊿꃼꇇꑘꃴꎆꋠꑽꃤꐆꃆꂮꐥꌠꃣꈌ10533ꐘꐥ。ꃹꅼꃅꃅꋉꃆꋈꄻꁁꏯꌤꃆꑓꅐꎑꌐꐘꏱꄻ,ꌌꃤꈋꃅꍤꌋꌠꐘꑘꍤꄻꈌꁧ、ꊙꎷꇱꎷ、ꎊꈬꃻꄻꑠꊨꊭꇬꄉꅍꑽꃤꐆꌠꃣꈌ8584ꐘꐥ。ꄚꃆꂮꐥꌠꌤꏲꅉꌋꆀꐯꇯꄉꇩꏤꃄꅉꅐꀦꁁꏯꄮꈔꌤꃆꏱꄻꌤꃅꌠꍔꂵꄉ,ꌌꃣꈌꃅꍤꌋꌠꃄꅉꌋꆀꇑꅐꇐꅐꀦꍤꄻꈌꁧꅐꏆ、ꀖꁉꌬꈧ、ꃄꅉꎳꌬꀵꊒꑠꊨꊭꇬꄉꅍꑽꃤꐆꌠꃣꈌ1248ꐘꐥ。ꋋꈍꑋꈓꇬꂿꑘꃆꂮꐥꄉꅍꑽꃤꐆꌠꍤꀞ、ꊋꀦꅐꀦꌋꆀꒆꉻꋦꈭꇬꉮꄻꄉꅍꀜꐆꑽꃤꐆꍤꀞꌐꐘꌤꃅꌠꅉꃀꀂꏽꄉ,ꑌꐚꐛꄟꈴꉺꏦꄺꂡꄉ,ꐳꃅꏦꃤꇬꈴꄉꄚꃆꂮꐥꑽꃤꐆꌠꍤꀞ。

  ꏣꀋꑌꃅꌤꐘꋋꇅꃅꅐꀉꒉꀊꂾꌠꊝꈽ、ꂿꃆꀉꒉꀊꂾꌠꃅꌐ。ꏾꉰꒀꎽꀉꇨꃅꃄꇙ、ꇤꌡꍏꐎꀋꇰꀋꉈꃅꃄꐡꊖꑳꑠꋌꐛꉮꌸꌤꀉꒉꀊꂾꌠꅐꊂ,ꏦꍤꌤꏲꅉꏣꀋꑌꃅꉹꁌꉮꌸꌠꈭꋏꇇꀨ,ꏦꃤꇬꈴꄉꉮꌸꃅꄷꑘꒃꇬꁧꏖ、ꉮꌸꉹꁌꈲꁧꉄꌎꅓꑘꑽꃤꐆꌠꏭꇇꇩꍈ,ꋓꉪꁨꄉꉮꌸꈭꋏꎆꇣꋠ、ꇂꇎꌌꌬꑠꄉꅍꑽꃤꐆꌠꄐꄵꌋꆀꍤꀞ,ꊋꈀꑌꃅꇤꄉꉮꌸꈭꋏꌋꆀꉮꌸꊂꋈꄻꀱꌠꏦꀧ。ꎮꉮ、ꇨꄏꌋꆀꈭꇍꃅꄷꏦꍤꌤꏲꅉꐯꇯꏓꇙꉺꏦꄺꂡ,ꏣꀋꑌꃅꊋꇤꏃꀨꉼꌋꆀꑸꒀꉼ、ꑸꊹꒀꉼꋬꂻꀧꌋꃅꌤꃅꅉꊐꄉ,ꄚꃆꂮꐥꌠꌤꏲꅉꌋꆀꐯꇯꄉꀞꅉꌋꆀꋬꈭꌬꇐꋈꄻꅉꇬꐊꄉꄉꅍꑽꃤꐆꄐꄵꌠꃅꄉ,ꏃꀨꋬꂻ、ꑸꒀꋬꂻꌋꆀꐙꎴꉼꀞꌠꏦꀧ。

  ꃄꁕꋮꄮꃅꀻꎆꌠꏦꀧꌋꆀꁧꃤꃅ。ꏦꍤꌤꏲꅉꈁꐥꊐꌠꃅꁮꐚꁁꏯꀉꒉꃅꀖꁉ、ꑛꌋꈤꃅꄷꑠꇮꑘꅉꃀꀉꆹꌠꏀꄓ、ꈯꄔꃅꄷꄓꆹꌠꊥꎆ、ꁭꅐꃅꄷꊋꁈꄏꄉꂴꅑꄉꀻꎆꑠꃄꁕꀻꎆꄐꇐꏤꁈꃄꌬꌠꇬꆼꒆꄉ,ꂱꑱꃅꄷꃶꐚꐛꐨꏓꇯ,ꃹꅼꃅꎥꃪ,ꌤꃅꐨꄺꂡꀱꄉ,ꀊꅰꃅꊋꑌꃅꏦꌬꏦꀧꌠꇲꁵ。ꏓꂱꏦꍤꑼꀊꂥꇊꀊꂥꊐꌠꆹꋒꐯꋒꃅꏦꍤꌅꊋꇤꅐꇁꄉꌌꁮꐚꁁꏯꀉꒉꃅꀖꁉꄐꇐꏤꁈꃄꌬꌠꎁꁧꃤꃅꌠꉜꐨꏤꄻ,ꊋꇤꄉꁮꐚꁁꏯꃅꄷꎆꏣꐧꋦꀻꎆꌠꊥꎆ;ꊋꀥꇱꄉꏦꍤꑭꊗꇇꀨ、ꑝꏦꇇꀨꌤꃅꄹꎆꌠꉜꐨꏤꄻ,ꄐꊒꐮꇇꀨꉺꏦꄻꐛꒆ,ꃅꑘ、ꌧꊿ、ꎆꃀꑠꁁꏯꀉꒉꃅꄻꑭꊗ、ꑝꏦꏦꍤꌤꏲꅉꏭꊋꁈꄏꌠꊋꃤꇱ,ꑭꊗ、ꑝꏦꐱꐂꏿꃅꀻꎆꌋꆀꀊꉗꃅꑘꒃꋬꂻꌠꁧꃤꃅ。

  ꑍ、ꃹꅼꃅꃅꐧꋦꐮꄙꌠꆣꄯ、ꐧꋦꏲꂠꏀꀺ,ꐧꋦꐮꄮꑘꒃꀧꌋꃅ

  ꈌꁧꒃꈢ、ꅇꎹꑠꌤꃅꌠꊋꀥꇱ、ꄺꂡꀱ,ꏦꃤꇬꈴꄉꑽꃤꐆꌠꏭꇇꇩꍈꈭꐨ,ꐧꋦꐮꄙꆣꄯꌠꉜꁨ,ꐧꋦꏲꂠꄻꃪꌠꄹꇙ。

  ꏦꃤꇬꈴꄉꋍꑞꋍꉹꅓꑘꑽꃤꐆꌠꏭꇇꇩꍈ。ꋋꈓꇬꋍꑞꋍꉹꅓꑘꑽꃤꐆꏭꐛꌠꊿꐯꇯ916209ꑻꈌꁧꒃꈢ,ꐯꌟꉜꇬ2.6%ꀁꋌꒊ;ꌌꉻꅇꎹꌠꊿ1148409ꑻꐥ,ꐯꌟꉜꇬ1.2%ꉀꎆ。ꃹꅼꃅꃸꈴꌠꏭꁏ、ꁏꆷꌠꏭꁏ、ꁷꐞꌠꏭꁏꌠꍔꂵ,ꅱꈯꃅꇩꏤꋬꂻꇬꉮꄉꑽꃤꐆꌠꏭꇇꇩꍈ。ꏣꀋꑌꃅꌶꅉ、ꀉꑳꌺꂘꈩꅉꌋꆀꈭꇍꋬꂻꐥꀹꌐꐘꏱꄻꈽ,ꏦꇨꃅꀉꑳꌺꈩꂘꅉꇬꀉꑳꌋꆀꌶꅉꇬꂘꃀꌶꌺꀑꇬꋬꂻꌠꉮꄻꑽꃤꐆꌠꇇꇩꍈ。ꄚꃆꂮꐥꌠꌤꏲꅉꌋꆀꐯꇯꄉꆈꅥꄸꋊꌠꏭꌐꐘꃅꉈꈽꌠꌋꆀꅳꍩꃆꂮꐥꂨꁖꑽꃤꐆꌠꏭꇇꇩꍈ、ꎲꌩꄸꅥꑠꌐꐘꃅꈧꌠꍔꂵ,ꊋꇤꄉꀉꆈꃅꅓꑘꑽꃤꐆꏢꇋ,ꀉꇨꃅꏓꂱꉹꁌꋬꂻꐨꁦꎆ。ꏓꂱꏦꍤꑼꀊꂥꇊꀊꂥꊐꌠꆹꎮꉰꇷꃅꎀꍹꇩꊝꏦꍤꍈꃀꉆꃢꌠꈿꌠꀞꄻꄉ,ꊋꀥꇱꄉꇷꇋꉪꏦ、ꁷꐞꉪꏦ、ꅼꇨꉪꏦꌋꆀꇩꐂꄉꎀꍹꐥꃅꑽꃤꐆꌠꏭꇇꇩꍈꌠꇩꏹꇷꃅ。

  ꋓꉪꁨꄉꃣꈌꀞꌠꏓꇯꄉꐧꋦꐮꄙꌠꆣꄯꁨ。ꏦꇨꃅꀋꈐꀋꉈꃅꏦꌬꌭꈬꌠꇎꏦꇂꃴꄉ,ꉪꍆꐨꐥꃅ、ꑖꈈꃅ、ꌧꑳꃅ、ꋊꍬꐨꉾꃅꏦꌬꌠꄕꊪ,ꋓꉪꁨꄉꋍꑞꋍꁁꏯꈲꏣꑗꇖꌠꏓꄻꇲꄻ,ꀉꒉꐯꀉꒉꃅꐮꄙꌠꆣꄯ、ꐮꄮꌠꊥꎆ。ꎔꃅꇨꆓꐯꇯꌬꌠꅓꑘꏱꁈꃄꌬꄉ,ꊿꑽꃤꐆꏭꐛꄚꒃꈢꄻꀋꅐꌠꆏ,ꏦꃤꇬꈴꄉꊿꒃꀋꈢꌠ64195ꑻꐥ,ꐯꌟꉜꇬ20.7%ꁦꎆ;ꑽꃤꐆꐛꐨꀊꐎꌠ、ꅓꑘꏦꃤꇬꈴꄉꌌꅓꃤꇽꀞꄻꀋꅐꅀꅓꃤꇔꇧꎭꌠ,ꐰꏤꄉꇬꏭꅇꀋꎹꌠ29898ꑼꐥ,ꐯꌟꉜꇬ16.9%ꁦꎆ。ꅓꑘꄮꇱ、ꏦꄯꐯꊛꉺꏦꋈꄻꌠꄹꎆ,ꉹꁌꅇꎹꑗꇖꃣꈌꌋꆀꅓꑘꃣꈌꀊꐎꌠꆏ,ꏣꀋꑌꃅꌟꆈꄮꇱꐛ。ꊋꀥꇱꄉꈌꁧꄉꀋꒃ、ꇬꏭꅇꀋꎹ、ꅇꎹꀋꄙꑠꊨꊭꇬꇗꏦꇲꇱꌤꃅꄉ,ꃣꈌꀞꂫꇽꊿꐮꄮꌠꊥꎆ。

  ꏣꀋꑌꃅꐧꋦꏱꄻꏀꀺꌠꃅꈽ。ꄚꃆꂮꐥꌠꌤꏲꅉꐊꄉꇓꈓꇬꋂ、ꇓꈓꇓꉈꐯꊛꈌꑠꇬꋬꂻꀋꂿꑘꃅꄷꍤꄻꏱꄻꌠꊋꀥꇱ,ꐧꋦꋬꂻꄴꍅꉻꑫꄹꇙ。ꋥꁕꏦꃤꍞꊟꋊꎃꌠꋊꍬꌋꆀꊋꀥꇱ,ꅉꂫꊐꌠꎀꍹꇇꀨꄉꋥꁕꅓꃤꀵꊿꏭꋊꎃꂘꄻꈭꋏꌠꊋꀥꇱ。ꊿꒆꆹꀋꑟꇭꀧꉌꂵꐋꀋꌡꌠꄐꄻꌠꃣꈌꀞꄟꌋꆀꄹꏦꄻꐛꒆ,ꉙꂘ、ꉌꐡꉪꁊ、ꈭꋏꌠꀥꇱ,ꑽꃤꊼꇅꀊꐎꃅꐆꏭꐛꌠꊿꒆꆹꀋꑟꌠꏭꆏꏦꃤꇬꈴꄉꒃꀋꈢꌠ13080ꑹ、ꌌꅇꀋꎹꌠ3114ꑻꐥ,ꂱꄷꄉꐯꌟꉜꇬ10.1%ꌋꆀ1.8%ꁦꎆ。ꏦꃤꇬꈴꄉꐯꏑꈄꏍꇬꈴꄉꐮꃅꐯꑽꈴꌗꁊꃑ、ꄊꁉꑠꑽꃤꐆꌠꏭꇇꇩꍈ,ꈄꏍꋦꈭꊈꎴꈴ。ꏦꌬꃣꈌꀞꄮꇬꌋꅜꌠꐧꋦꏲꂠꌤꃆꇬꉜꄉ,ꐳꃅꄚꃆꂮꐥꌠꃅꄷꌋꆀꌤꏲꅉꏭꉮꐴꑌꌠꋊꑣ、ꄹꏦꄻꐛꒆꌠꏦꍤꇖꐨꄜꅐꇁꀐ。

  ꌕ、ꀉꒉꃅꄉꅍꌌꑽꃤꐆꌠꍤꀞꌋꆀꄐꄵꌠꊋꃤꇱ,ꍹꁏꎴꄖꌠꊥꎆ

  ꏦꇨꃅꄉꅍꌌꑽꃤꐆꌠꍤꀞ、ꏣꀋꑌꃅꄐꄵꌠꌌꉆꈉꀨꇬꄉ,ꋒꐯꋒꃅꏦꍤꌤꃅꅉꍹꁏꎴꄖꋈꄻꇬꌅꊋꂿꄐꇤꅐꇁ。

  ꏦꃤꇬꈴꄉꏦꇨꃅꎆꂁꋠꃴꎆꍈꑠꄉꅍꌌꑽꃤꐆꌠꍤꀞ。ꋋꈓꇬꌌꃣꈌꃅꄉꍤꄻꌠꋍꑞꋍꉹꇬꄉꅍꌌꑽꃤꐆꌠꃣꈌꐯꇯ32909ꐘꊿ44085ꑻꐥ,ꂱꄷꄉꐯꌟꉜꇬ1.4%ꌋꆀ6.1%ꁦꎆ。ꄚꈐꏭ,ꌌꃣꈌꃅꄉꍤꄻꌠꎆꂁꋠꃴꎆꍈꃣꈌꀉꒉꌠ18224ꐘꐊ,ꐯꌟꉜꇬ0.2%ꁦꎆ;ꑽꃤꐆꏭꐛꄉꌌꍤꀞꌠꑤꍲꊐꈋꉐꇩꏤꌤꃅꊿ2723ꑻꐊ(ꄜꊐꌠ188ꑻ、ꌜꀯꊐꌠ6ꑼꐊ),ꐯꌟꉜꇬ2%ꁦꎆ。ꀉꒉꃅꃴꎆꍈꑽꃤꐆꏭꐛꌠ3969ꑻꐥ,ꐯꌟꉜꇬ24.3%ꁦꎆ。ꈏꉈꄉꀋꎴꎆꈹꌠꉺꏦꄻꐛꒆ,ꄚꃆꂮꐥꌠꌤꏲꅉꐊꄉꄉꅍꌌꑽꃤꐆꏭꐛꄉꁈꐺꌠ1282ꑼꒃꅜ,ꀋꎴꎆꍍꇐꎆꏓꌗꇬ74ꂡꂷꈹꀱꌊꇁ。ꏟꈯꃅꏦꃤꇬꈴꄉꌧꑳꃅꃣꈌꀞꄻ,ꎃꊒꃅꏦꊒꊌꐨꌋꆀꏦꐆꄉꊌꌠ、ꌤꃅꆹꑽꌠꌋꆀꃅꅍꀋꃅꆹꑽꑠꄹꊨꏡꃏ,ꋓꉪꁨꄉꎆꏂꑘꎃꐚꃅꀰꏢꀻꎆꌠꀧꌋꃅ,ꋓꉪꁨꄉꃣꈌꐆꊿꏦꊒꌅꈌꈲꁧꃆꂮꐥꌠꏦꀧ;ꋓꉪꁨꄉꇩꏤ、ꋍꉻꎁꃅꎆꏣꁮꑋꌠꈭꋏꎼꇁ。ꃣꈌꀞꍤꌋꃅꈧꌠꋊꍬ,ꉌꂵꑘꊐꄉꄀꇗꇱꃅꐨꐥꌠꏁꁈꌬ,ꏦꇨꃅꐴꀖꊿꌋꆀꊪꊿꀧꌋꃅ、ꄉꅍꌌꑽꃤꐆꏭꐛꊿꅲꇫꇬꋍꃢꃅꃚꈻꒌꍑꌋꆀꄉꅍꌌꑽꃤꐆꏭꐛꊿꒃꈢꇬꄜꌊꉎꊐꌠꏦꍤꑼꁳꍤꄻꐰꏤꎻꌠꑠꄹꏦꃄꌬ,ꀒꁨꋍꁘꃅꃣꈌꀞꄻꊇꁧꉀꐕ。ꏓꂱꏦꍤꑼꀊꂥꇊꀊꂥꊐꌠꌋꆀꉪꂱꏦꍤꑼꏓꐊꄉꇩꏹꂁꎆꋠꏭꁏꃀꈿꌠꀞꄻ,ꇩꏤꌋꆀꃅꄷꂁꎆꋠꌠꏭꁏꌠꏲꉻ150ꎖꂷꌋꆀꐯꇯꄉꃹꅼꃅꍹꁏꌠꇩꏹꌦꃔꇷꃅꌠꎥꃪ。

  ꊋꀉꒉꃅꇤꃅꅍꀋꃅꌅꈌꉄꌎꌠꏦꍤꌤꃅꌠꊋꀥꇱ。ꎔꃅꇩꏤꑭꊂꏓꄊꎮꊈꉼꍤꇖꌠꃅꅍꀋꃅꌅꈌꉄꌎꌠꏦꍤꌤꃅꌐꐘꅇꄜꌠꉜꐨꃄꌬꇫꑟ,ꀉꒉꃅꃣꈌꀞꄻꌠꊋꃤꇱ,ꃣꈌꀞꄻꉺꏦꄻꐛꒆ,ꌌꃣꈌꃅꄉꍤꌋꌠꃅꅍꀋꃅꌅꈌꉄꌎꑽꃤꐆꌠꃣꈌ7349ꐘꊿ10227ꑼꐥ,ꂱꄷꄉꐯꌟꉜꇬ4.5%ꌋꆀ9.3%ꁦꎆ。ꄚꈐꏭ,ꌌꃣꈌꀉꒉꀊꂾꃅꄉꍤꌋꌠꃅꅍꀋꃅꌅꈌꉄꌎꃣꈌ3508ꐘꐥ,ꐯꌟꉜꇬ10.5%ꁦꎆ。ꄚꃆꂮꐥꌠꌤꏲꅉꌋꆀꐯꇯꄉꏲꑘꏦꌬꌋꆀꅓꑘꏦꌬꐯꊛꑠꌤꃅꉺꏦꄻꐛꒆ,ꊋꇤꄉꃅꅍꀋꃅꌅꈌꉄꌎꑽꃤꐆꌋꅜꊋ、ꃣꈌꃄꊋ、ꍤꄻꊫꌐꒂꊋ、ꀞꄻꊋꑠꌤꃆꂥꀘ。ꄈꍏꑷꀊꂥꃅꃅꅍꀋꃅꌅꈌꉄꌎꏭꁏꌠꌤꃅꌠꉜꁨ,ꍏꇭꍏꑷꌤꀞꄜ、ꇩꃷꑼꌤꀞꄜꆹꏓꂱꏦꍤꑼꀊꂥꇊꀊꂥꊐꌠꑠꌤꏲꅉꈬꂷꐮꐊꄉꏤꄻꄉꌠꀉꒉꃅꃅꅍꀋꃅꌅꈌꉄꌎꏦꐆꑽꃅꌠꏭꅓꀞꌋꆀꄐꄵꌤꃅꊋꃤꇱꃆꂮꁱꐘꏮꃑꀐ。ꀙꏢꄉꃅꅍꀋꃅꌅꈌꉄꌎꏦꐆꑽꃅꌠꏭꅓꀞꌋꆀꄐꄵꌠꀉꒉꃅꄉꀨꌠꀞꄻ,ꄷꀋꁧꊛꄉꌌꇩꏤꑭꊂꃅꄷꈧꌠꇬꏮꄉꀨꌠꃅꈧꇈ,ꇩꏤꌤꃅꊿ55.5ꃪꑹꇫꉜꆫꇁ。

  ꀊꅰꃅꄉꅍꌌꑽꃤꐆꄐꄵꌠꉜꁨ。ꃣꈌꀞꄻꌠꏓꇯꄉꑽꃤꐆꌠꎥꃪꌋꆀꊜꁈꎥꃪꌠꊋꀥꇱ,ꄚꃆꂮꐥꌠꌤꏲꅉꏭꄐꄵꇖꐨ55628ꐘꄜꎼꇁ,ꇩꏤꌤꃅꊿꏭꅇꈪꊐꉙꂘꌠ964ꃪꑻꃢꐥ。ꋉꃆꋈꄻꁁꏯꄉꅍꀋꃅꑽꃤꐆꄐꄵꌐꐘꌤꃅꌠꍔꂵ,ꍔꃚꄐꏁꄉꎆꇱꌠꋉꃆꋈꄻꐘꑘꀉꒉꀊꂾꌋꆀꉮꌸꊂꋈꄻꀱꐘꑘꌌꀨꄉ,ꋈꄻꌤꃅꅉꌋꆀꌄꏲꌠꌤꏲꅉꇇꀨꄉꐮꐊꄉꅍꀋꃅꑽꃤꐆꌠꄐꄵ。ꃴꎆꍈꑽꃤꐆꄉꉣꍤꅲꋬꈭꄻꐛꒆ,ꏓꂱꏦꍤꑼꀊꂥꇊꀊꂥꊐꌠꃴꎆꍈꑽꃤꐆꃆꂮꍤꅲꈯꄜꄻꐛ,ꇩꏤꑭꊂꈍꈐꃅꐯꏑꈄꏍꈴꄉꍤꅲꌠꃅꇫꑟꌠꄹꇙ,ꄉꅍꑽꃤꐆꄐꄵꈎꅇꄜꄹꏦꄺꂡ,ꐳꃅꄉꅍꑽꃤꐆꐛꄟꌋꆀꄐꄵꊜꁈꎥꃪꄉ,ꋍꈓꋑꀋꋒꏓꇱꄛꎭꌊꄈꊈ、ꏓꄊ、ꍔꃚꌋꆀꄚꃆꂮꐥꌠꌤꏲꅉꁳꉜꉚꎻ。

  ꇖ、ꐊꑷꃅꇨꈴꃅꅇꎹꃅꈧꌠꏦꃤꍞꊟ,ꏦꌬꏦꏲꇬꀋꈐꀋꉈꌠꊥꎆ

  《ꀒꁨꋍꁘꃅꊋꀥꇱꄉꅇꎹꃅꈧꌠꏦꃤꍞꊟꃆꂮꉜꐨ》ꏤꄻꌫꄻ,ꊋꇤꄉꏦꌬꏦꏲꇬꏓꂱꉹꁌꄜꐨꀉꑌꌤꃆꑓꅐꎑꌠꂥꀘ。

  ꇨꈴꃅꅓꑘꅇꎹꌠꍞꊟ。ꏟꈯꃅꑽꃤꐆꅓꀞꌠꌋꆀꃰꊿꌅꈌꏦꀧꌠꐯꇯꉜꁨ,ꀨꄉꊋꀥꇱꄉꃣꈌꀋꋉ、ꅓꃤꅥꇔꇨ、ꏦꐆꊫꌐꎹ、ꅓꃤꎖꐎꎕꆈꇨꑠꌤꃆꇬꍞꊟ。ꋍꆏꊋꀥꇱꄉꌌꃣꈌꃅꌠꍞꊟ。ꏓꂱꏦꍤꑼꀊꂥꇊꀊꂥꊐꌠꌋꆀꇬꉢꀯꐯꇯꄉ《ꅓꑘꃣꈌꍞꊟꃆꂮꐥꌠꌤꃆꃆꂮꏤꐪ》ꏤꄻꄉ,ꀒꁨꋍꁘꃅꏦꍤꌤꏲꅉꅓꑘꃣꈌꍞꊟꃅꎁꆽꎍꌠꌋꆀꈭꎁꊨꄅ,ꇬꉢꌤꏲꅉꌋꆀꏦꍤꌤꏲꅉꅓꑘꃣꈌꐛꐪꄜꐮꇰꑠꉺꏦꄺꂡ。ꌌꃣꈌꃅꄉꄡꑟꇈꌌꃣꈌꃅꀋꄉꌠꆏ,ꇬꉢꌤꏲꅉꏭꍞꊥꄉꌌꃣꈌꃅꄉꌠ31203ꐘꐥ;ꌌꃣꈌꃅꄉꄡꀋꑟꃅꌌꃣꈌꃅꄉꌠꆏ,ꍞꊥꄉꇤꇧꎭꌠꃣꈌ10702ꐘꐥ。ꑍꆏꊋꀥꇱꄉꍤꌋꍞꊟ。ꄚꃆꂮꐥꌠꌤꏲꅉꌋꆀꐮꐊꄉ《ꅓꑘꃣꈌꀞꄻꅉꇬꊫꌐꏦꀋꊒꌠꋊꑣꇧꎭꌤꃆꀉꑌꈨꃆꂮꏤꐪ》ꌋꆀ《ꌦꑘꃣꈌꀞꄻꅉꇬꊫꌐꍤꇽꊨꄅꌤꃆꀉꑌꈨꃆꂮꏤꐪ》ꃑꄻꇈ,ꏦꍤꌤꏲꅉꌬꋭꌠꏤꐪꑍꏢꌠꄐꌐꉜꐨꏤꄻꄉ,ꇨꈴꃅꍤꄻꊫꌐꎹꃅꈧꌠꍞꊟ,ꏦꃤꇬꈴꄉꐊꑷꃅꉇꉻꃅꊫꌐꏓꈹꌠꄉꀧ,ꇿꋌꐥꃅꃣꈌꀞꄻꊇꁧꉀꐕ。ꇬꉢꌋꆀꐯꇯ《ꍤꄻꒃꈢꊬꌠꇬꊿꑽꃤꐆꏭꐛꌠꅇꅲꃆꂮꏤꐪ》ꏤꄻꄉ,ꏦꍤꌤꏲꅉꑽꃤꐆꏭꐛꊿꀥꅇꌋꆀꇊꌦꉜꐨꅲꇫ、ꇊꌦꃅꑘꌅꈌꏦꀧꑠꉺꏦꄻꐛꒆ。ꍤꌋꃅꈧꅉꇬꏦꐆꐛꐨꇬꋊꍬꉜꐨꄜꎼꇁꌠ33836ꐘꃢꐥ。ꌕꆏꊋꀥꇱꄉꅓꑘꍤꇽꌠꍞꊟ。ꏣꀋꑌꃅꏓꂱꃔꑼꅓꃤꎖꋊꍬꈴꄺꀱꌠꊋꁈꄏ,ꌌꅇꎹꄮꇬꆏꏦꃤꇬꈴꄉꅓꃤꎖꇖꐨꄜꎼꇁ,ꅓꃤꎖꄇꄜꋊꀋꈐꀋꉈꌠꊥꎆ。ꊋꀥꇱꄉꄉꅍꑽꃤꐆꌠꃣꈌꍤꇽꌠꍞꊟ,ꋍꃢꍤꇽꇬꏦꍤꑼꑍꊐꌠꐯꇯꃅꍤꄻꌠꉺꏦꄻꐛ。ꉜꇬꃶꐚꃅꅓꑘꍤꇽꆹꑽꌠ5425ꐘꌌꅇꎹ。

  ꇨꈴꃅꅓꀞꃄꌬꌠꌋꆀꏦꑳꏲꂠꃅꈧꌠꍞꊟ。ꏦꏲꏲꑘꌤꏲꅉꌋꆀꐯꇯꄉꃹꅼꃅꇩꏤꑭꊂꏦꑳꇬꌤꅐꐴꑌꌠꍤꄻꈴ、ꋬꂻꃅꍞꏲꌐꐘꃅꈧꌠꊥꎆꌠꍔꂵ,ꀨꄉ“ꏦꀀꊋꏗꌋ”ꌤꃆꍤꄻꂥꀘ,ꀉꆈꃅꏦꑳꍞꏲꐥꀹꀜꐆꄉꑽꃤꐆꊿꒃꈢꄉꌠ87ꑼꌌꏦꃤꇬꈴꄉꅓꑘꅑꁧꎹ。ꍞꏲꅉꐮꈄꏍꄉꌠꍞꍅꌠꄹꎆ,ꏦꎴꍤꄻ、ꏮꆫꍤꄻꑠꌤꃅꉺꏦꄻꐛꒆꌋꆀꃅꇫꑟ。ꊋꀥꇱꄉꅓꀞꄺꀱꃄꌬꌠꍞꊟ,ꅓꊨ、ꃑꉚ、ꋍꇅꇬꌌꉇꄉꃄꌬꀋꋭꌠ10813ꑻꄺꀱꎼꇁ。ꄉꀧꌊꉇꄉꆅꉚꁧꌠꌐꐘꍤꄻꃅꈧꌠꍔꂵ,ꄉꀧꌊꉇꄉꆅꉚꌠꇎꏦꀋꐥ、ꈭꎁꀋꈴꅀꏲꑆꂠꑆꐺꌠꊿ555ꑻꄺꀱꎼꇁ。ꀉꒉꃅꀊꉗꃅꏦꎴꄉꌌꀋꀞꌠꃣꈌꋊꄻꊋꃤꇱ,ꏦꃤꇬꈴꄉꒃꈢꃅꑍꁦꎆꌠ525ꑻꃢꄺꀱꎼꇁ。

  ꇨꈴꃅꉹꁌꌤꑘꍤꇽꌋꆀꏲꑘꅇꎹꌠꍞꊟ。《ꃰꊿꌤꃆꏲꑘꍤꄻꌤꃅꃆꂮꊋꀥꇱꌋꆀꄺꀱꌠꐰꏤ》ꄉꌠꏤꄻꃄꌬ,ꏟꈯꃅꏦꃤꇬꈴꄉꍞꊟ、ꈯꄔꉆꄉꍞꊟꑠꏥꏦꌬ,ꉜꐨꇬꃶꐚꃅꆹꑽꌠꃰꊿꌤꃆꏲꑘꍤꇽꄙꅇꎹꌠ12139ꐘꄜꎼꇁ。ꏟꈯꃅꄙꅇꎹꌠꌋꆀꅇꎹꆏꌠꐯꇯꉜꁨꄉ,ꉜꐨꇬꍤꇽꌊꎃꊒꌠ44021ꐘꌌꅇꎹ,ꉌꊫꑌꃅꌟꆈꏭꍤꇽꉌꃹꆏꅇꀋꎹꌠꌤꃅꋒ。ꇩꏤꌋꆀꐧꋦꄉꉻꈲꁧꃆꂮꐥꌠꃣꈌꆏ,ꍞꊥꄉꌌꅇꎹꌠ33183ꐘꐥ,ꊋꁈꄏꄉꌌꅇꎹꌠ21382ꐘꐥ,ꇩꁨꁨꇐꌋꆀꄉꉻꈲꁧꉮꄻꌠꄴꏮ。

  ꇨꈴꃅꏦꌬꌤꃅꊿꃅꅍꀋꃅꌠꍞꊟ。ꏓꂱꃔꑼꀊꂥꇊꀊꂥꊐꌠꑠꌤꏲꅉꌋꆀꐯꇯꄉ《ꏦꌬꌤꃅꊿꅇꎹꃅꈧꅉꇬꃅꅍꀋꃅꌠꃅꐨꇬꊋꀥꇱꄉꏦꃤꍞꊟꃆꂮꏤꐪꀉꑌꈨ》ꏤꄻꄉ,ꊨꄅꃅꏦꌬꌤꃅꊿꏦꐆꈲꏂꑠꃅꅍꀋꃅꃅꐨ12ꑵꌠꆏ,ꍤꎖꅉꈴꄉꏦꐆꌠꃶꐚꐛꐪꊨꄅ、ꏦꐆꌠꄺꀱꉜꐨꄜꅐꇁ、ꃣꈌꀞꄻꊿꆦꌠꇖꐨꄜꑠꏁꁈꇬꈴꄉꍞꊟꉆ。ꅱꈯꃅꏦꌬꌅꈌꌌꏦꐆꈲꏂꌠꃅꇏꅓꀞ,ꏦꌬꌤꃅꊿꑽꃤꐆꏭꐛꌠ2721ꑼꍤꀞ。

  ꉬ、ꏟꈯꃅꏦꌬꏓꂱꎁꃅꃅꌠꉪꃆꁢꊧꌬ,ꏓꂱꉹꁌꌅꈌꈲꁧꀧꌋꃅ

  ꏦꍤꌅꊋꇬꉆꄉꉹꁌꌤꃅꌠꊋꀥꇱꌋꆀꄻꎆ,ꊋꇤꄉꉹꁌꊫꁱ、ꉹꁌꉘꇉ、ꉹꁌꁧꃤꃅꇫꑟ。

  ꉹꁌꑌꑲꌋꆀꁧꃤꃄꅉꀹꄻ。ꊋꀥꇱꄉꊩꏦꅉꋈꄻ,ꉹꁌꐥꐨꁧꃤꃅꊸꈌꄆꅇꌋꆀꇩꏤꑭꊂꃅꋍꃱꃅꐙꌠꅇꀖꄆꅇꆏ12309ꄹꌬ,“ꋍꈚꃅꐙ”ꌠꊪꀞꈯꄜꌋꆀꈄꏍꇬꄉꍤꅲꅉꄹꌬ,ꀒꁨꋍꁘꃅꉹꁌꅇꎹꈭꈴꁌꈴ。ꃹꅼꃅꌧꑳꃅꊩꏦꅉꀹꄻꃅꈧꌠꍔꂵ,“ꉹꁌꈬꃹꈴ、ꀋꈐꀋꉈꃅꏦꌬ、ꇗꏦꇲꇱ、ꐮꄮꊥꎆ”ꌠꍈꍈꀣꌤꃅꄟꈁꏦꄹꎆ。ꏦꊋꀁꋌꎥꌠꄹꎆ,ꏦꍤꌤꃅꑞꅉꍔꎴꄉ,ꑣꍔ、ꋥꁕꇬꄉꍤꄻꅉꁆꄻꄉꎹꈹꌠꄺꂡ,ꏭꀱꄉꍤꄻꌠꍔꂵ,ꃅꅈꇬꄉꉹꁌꅇꎹꌠꊪꀞ、ꏦꃤꁧꃤꃅꌠꇲꁵ、ꐮꄙꐮꏈꌠꆣꄯ。

  ꏦꃤꇬꈴꄉꀉꆈꃅꏓꂱꐥꐨꇬꉮꄻꑽꃤꐆꌠꅓꀞ。ꅱꈯꃅꇑꄻ、ꇑꑣ、ꈏꈱꌠꌬꄉꄆꈴꌗꈄꏍꃄꌬꄉꊏꀸ、ꋠꇐꅋꐊꉮꐥꌠꌋꆀꂿꑘꁬꋌ、ꑭꐎ、ꋚꇕꀉꁘꀊꆠꄻꃷꑠꉹꁌꌅꈌꈲꁧꇬꇑꉮꄻꑽꃤꐆꌠꏭꇇꇩꍈ,ꏦꇨꃅꃄꅉꎳꌬꄉꎞꐆ、ꐧꋦꏦꀧ、ꑘꃅꃅꅍꊌ、ꆅꉚꁦꎴ、ꌶꌺꎹꎖꑠꏓꂱꐥꐨꁁꏯꄉꅍꑽꃤꐆꌠꍤꀞ。ꃰꊿꌅꈌꁌꒉꌋꆀꏦꀧꌠꏦꃀꏥꏦꃄꌬ,ꌌꃣꈌꃅꍤꌋꌠꏦꀋꊒꃅꒃꈢ、ꋪꒃꉮꄻ、ꌊꄻꀜꐆꃆꂮꐥꑠꌅꈌꉄꌎꑽꃤꐆꌠꇩꏤꌤꏲꅉꌤꃅꊿ524ꑻꐥ。ꏦꃤꇬꈴꄉꐯꇯꌤꆿꀉꒉꀊꂾꌠꍤꄻ,ꏦꇨꃅꄔꉮ、ꇑꅤꑠꇬꄉꌤꅐꌠꊂꆈꄉꅍꑽꃤꐆꏭꐛꌠꇩꏤꌤꃅꊿ1037ꑼꍤꀞ,ꏓꂱꏦꍤꑼꀊꂥꇊꀊꂥꊐꌠꈛꎂꃅꌤꆿꀉꒉꀊꂾꌠ9ꐘꍤꄻꈽ。

  ꊋꀥꇱꄉꉹꁌꐋꀋꌡꉻꁥꌋꆀꉹꁌꊋꋠꐨꐥꌠꏭꏦꌬꀧꌋꃅ。ꀊꂥꃅꂽꃆꂮꐥꌠꃣꈌꌋꆀꑣꇤꃆꂮ、ꉪꂱꃆꂮ、ꄠꃪꃆꂮ、ꉇꄅꉸꐇꃺꑌꃆꂮꐥꌠꃣꈌꉜꁨ,ꐮꈴꐊꃅꉺꏦꄻꐛꒆ,ꃶꐚꃅꇩꐏ、ꂽꇬ、ꃶꏢꂽꇬꈲꁧꌋꆀꂽꃆꂽꌺꏦꊒꌅꈌꈲꁧꀧꌋꃅ,ꑣꇤꃺꑌ、ꉪꂱꃺꑌ、ꄠꃪꃺꑌ、ꉇꄅꉸꐇꃺꑌꀱꇁꌠꃆꌺꏦꊒꌅꈌꈲꁧꀧꌋꃅ。ꅱꈯꃅꊿꄣꌋꆀꂿꑘꁡꇤꇬꃀꌠ、ꌋꅪ、ꀊꉘꑳꐍꇤꉚꌠꉮꄻꑽꃤꐆꌠꏭꇇꇩꍈ,ꄚꃆꂮꐥꌠꌤꏲꅉꐯꇯꄉ《ꏦꃤꇬꈴꄉꌋꅪꀊꉘꊏꃷꑽꃤꐆꌠꅓꀞꃆꂮꉜꐨ》ꏤꄻꄉ,ꊿꌋꅪꀊꉘꊏꃷꑽꃤꐆꏭꐛꌠ4422ꑼꌌꅇꎹ。ꂿꑘꁡꇤꇮꃅꊿꃄꎆꄯꁯꑠꃣꈌꆏ,ꅇꎹꌠꊋꁈꄏꄉꌤꃅꌠꍔꂵ。ꅓꑘꉮꌸꊿꌅꈌꈲꁧꀧꌋꃅꌠꉜꁨ,ꅓꑘꉮꌸꊿꈭꋏꇇꀨꌤꃅꌠꄹꎆꄉ,ꐥꐨꃶꐚꃅꊋꋠꐨꐥꌠꉮꌸꊿꅀꋍꏣꃀꏣꑟꊿ6280ꑹꌌꈭꋏꇇꀨꄉꇲꁵ。

  ꏦꃤꇬꈴꄉꋭꋽꃅꉹꁌꈲꁧꃆꂮꐥꌠꄯꒉꁱꅲꇫꅇꎹꌠꌤꃆꂥꀘ。ꅇꎹꑗꇖ、ꏦꍤꃆꂮꐥꄯꒉꁱꅲꇫꅇꎹꌤꃅꄹꏦꄻꐛꒆ,ꃣꈌꌌꐰꏭꅲ、ꏤꄮꁨꃅꏭꅲ、ꐯꇯꅇꎹꇁꌠꊩꏦꑠꃅꈧ,ꉹꁌꄯꒉꁱꅇꎹꅲꇫꇁꌠꐯꇯ439750ꐘꃢꀞꄻ。ꏦꍤꃆꂮꐥꌠꄯꒉꁱꅇꎹꅲꇫꇁꌠꏓꎍꌠꃣꈌ3959ꐘꌠꀊꂥꉜꁨ、ꄐꋭꃅꆣꄯ。ꏓꂱꏦꍤꑼꀊꂥꇊꀊꂥꊐꌠꌤꃅꊿ8ꂷꁆꌊꌜꊨꏦꏱꅉꐎ、ꏃ16ꂷꇬꄉꍞꍤꌠꃅꀐ。ꎔꃅꄺꀱꊂꇩꏤꀵꊒꏦꃤꌫꄻ,《ꏓꂱꏦꍤꑼꇩꏤꀵꊒꌤꃅꏤꐪ》ꏤꄻ,ꏦꃤꇬꈴꄉꑴꐚꃅꀵꊒꋭꑘꍬꌬ,ꊋꀥꇱꄉꀵꊒꃣꈌꏦꃤꍞꊟ,ꃶꐚꃅꀵꊒꅇꇖꂟꊿꃤꏦꊒꌅꈌꈲꁧꏦꀧ。

  ꃘ、ꊋꀥꇱꄉꏦꍤꌤꃅꊿꂘꄻꌋꆀꈏꇓꍞꊟꏢꑲ,ꑴꅉꀋꈐꀋꉈꐙꎴꏦꌬꌧꐨꉀꐕ

  ꃶꐚꃅꏦꍤꌤꃅꊿꉙꂘ、ꏲꂠꌋꆀꍞꊟꌠꊋꀥꇱ,ꊋꇤꄉꌤꃅꊿꁥꌠꉻꄜꊇꁧꉀꐕ,ꑴꅉꀋꈐꀋꉈꐙꎴꏦꌬꌠꏦꀧ。

  ꊋꀥꇱꄉꉪꇐꍔꍞꋈꄻꌋꆀꃅꑘꃅꇏꋈꄻ。ꃹꅼꃅꐧꋦꉪꏦꈯꄜꁌꐨꉻꑫꌋꆀꐧꋦꉪꏦꏦꏲꄹꏦꉪꉻꉙꂘ,ꂴꀺꉾꅔꌠꃅꈧ,ꏦꍤꊿꉪꇐꑇꇐꀋꎪ、ꏦꌬꉪꇐꎃꊒꃅꄐꂘ。ꃹꅼꃅ“ꏦꍤꃅꑘꑌꇐꏤꒃ、ꀋꈐꀋꉈꐙꎴꏦꌬꌠꊥꎆ”ꌠꅇꀨꃄꄻꌠꃅꈧꌠꍔꂵ,ꏦꇜꃅꑘꃅꐨꌌꅉꀨꃅꋊꍬꌋꆀꏦꍤꌤꏲꅉꌧꑳꅇꉉꇗꏦꏤꄻ,ꍈꍈꀧ、ꅿꀘ、ꑘꀧꏐ、ꊆꏃꏣ、ꄗꒀ、ꍈꏣꑴꇪꑾꏤꄞꅐꉹꌠꌌꀮꄑꄛꉻ,ꏦꇜꄜꏤꄹꏦꄺꂡ,ꊋꒉꃅꀋꎪꀋꑴ、ꀋꈐꀋꉈ、ꐙꎴ、ꌧꑳꌠꏦꍤꃅꑘꃅꇏꍔꆙ。

  ꊋꇨꇱꄉꏦꌬꄐꊋꋈꄻ。ꏲꌋꇥꀯꌋꆀꏦꌬꃣꈌꀞꌠꏦꇜꌌꀨꄉꐊꈴꃅꁰꍋꌠꄹꎆ,ꏦꍤꊿꌌꁰꍋꌠꐯꇯ11.9ꃪꑻꃢꐥ。ꏓꂱꏦꍤꑼꀊꂥꇊꀊꂥꊐꌠꏦꍤꑼꅉꂫꊐꌠꏦꍤꍈꁊꑷꃅꁰꍋꌠꃅꌐ,ꌜꊐꌠꏦꍤꑼꃅꑘꌤꏲꅉꏲꌋꌌꁊꑷꃅꁰꍋꈴꌠꍔꂵ。ꇨꈴꃅꅉꃀꊐꌠꉙꂘꁰꍋꌤꃅ,ꏃꊐꌠꏦꍤꑼꁊꑷꃅꅉꃀꊐꌠꏦꍤꊿꁰꍋ、ꌜꊐꌠꏦꍤꑼꀨꄉꅉꃀꊐꌠꈯꌬꁰꍋꉺꏦꄺꂡ,ꎴꈜꂘꑴꁰꍋꌠꍔꂵ。ꄉꈁꀉꒉꃅꌤꃅꉆꈉꇬꂽꁱꂘꌠꄹꎆ,ꀊꐯꃅꉻꅇꎹ、ꍤꌋꍞꊟ、ꃅꅍꀋꃅꌅꈌꉄꌎꁏꑠꌤꏲꅉꃅꑘꋓꅔꃅꈧꌠꍔꂵ。ꊋꒉꃅꁮꐚꁁꏯꃅꄷꏦꍤꉙꂘꁰꍋꌋꆀꌧꊿꉘꉚꊋꁈꄏꌠꊋꃤꇱ。

  ꏦꌬꋊꍬꈴꌋꆀꈏꇓꍞꊟꏢꑲꉺꏦꋈꄻꌠꊋꇨꇱ。ꐊꑷꃅꏦꌬꃣꈌꌠꊨꊭꈴꎁꌋꆀꋧꏦꉻꏓꋊꍬ,ꉘꃀꃢꌠꏦꍤꌤꃅꅉꏦꌬꌤꏲꅉꀨꋊꍬꌠꄜꃑ。ꃣꈌꌡꀠꄐꂘꄹꏦꄺꂡ,ꏓꂱꏦꍤꑼꀊꂥꇊꀊꂥꊐꌠꄇꄜꋊꄉꁊꈴꄐꌐꈻꇐꐥꌠꃣꈌꌡꀠꈨꄛꉻ,ꏦꍤꌤꏲꅉꏓꋍꃱꃅꏦꌬꌠꄐꂘ。ꃣꈌꉉꍣꉺꏦꄺꂡ,ꏦꍤꃆꂮꐥꄯꒉꁱꅇꎹꅲꇫꌠꃣꈌꌌꀨꄉ,ꐊꑷꃅꈁꐥꉹꌠꃣꈌ42229ꐘꉉꍣ,ꋋꈨꇬꃶꐚꃅꑽꌠ163ꐘꏦꃤꇬꈴꄉꄺꀱꎼꇁ,ꏦꌬꑽꌠꏦꍤꊿ91ꑼꌌꏦꇨꃅꐨꅑꑘꎹ。ꏦꃆꍞꊟꄹꏦꄻꐛꒆ,ꊋꒉꌠꌌꏦꌬꃅꐨ、ꏦꃅꇏꏦꍬꏦꍞꊟꊋꃤꇱ,ꏓꂱꏦꍤꑼꀊꂥꇊꀊꂥꊐꌠꌜꏃꏦꍤꌤꏲꅉ10ꂷꇬꄉꌐꄉꍞꍤꌠꃅꀐ,ꌜ6ꂷꇬꏦꍤꑼꄹꁆꌌꐯꏍꄉꍞꍤꌠꃅꀐ。

  ꑌꐚꃅꍬꏦꃅꇏꌋꆀꍹꁏꐙꎴꋈꄻꌠꒃꉇ。《ꏦꍤꌤꏲꅉꏲꌋꇥꀯꐙꎴꏦꌬꌠꈍꑋꏢꏤꐪ》ꏤꄻ。ꏦꇨꃅꏦꍤꌤꃅꊿꉇꉻꏭꑌꑲꌠꃅꐨꋊꍬ。ꏤꐪꇬꀋꈴꃅꏢꍰꌬꌠꌤꃆꌐꐘꏱꄻ。ꑸꍅꋍꆏꎆꃀꎊꈬꌐꐘꍤꄻꍔꂵꌠꅉꃀꀂꏽꄉ,ꀒꁨꋍꁘꃅꑸꍅꋍꆏꎆꃀꎊꈬꏲꂠꄹꏦꄻꐛꒆ。ꋓꉪꁨꄉꑴꅉꌋꁏꊥꋦꌠꌌꌗꋏꄉꉙꂘꌠꏭꌬ,ꏓꂱꏦꍤꑼꀊꂥꇊꀊꂥꊐꌠꃹꅼꃅꏦꍤꌤꃅꊿꇗꐆꏦꐆꌠ40ꑹꌌꃣꈌꌡꀠꃅꄉꎥꃪ,ꏦꍤꌤꏲꅉꑴꅉꍹꁏꐙꎴꉙꂘꀨꇰꄷꀋꁧꌌꃅꄷꈧꌠꇬꄉꏮꀦꌠꀞꄻ。ꏦꇨꃅꏲꌋꇥꀯꃅꑘꉉꐙꎴꅇꄜ、ꏮꆫꑠꄹꏦꄹꏦꃄꌬꇫꑟ。ꏓꂱꏦꍤꑼꀊꂥꇊꀊꂥꊐꌠꏦꍤꍈ11ꑹꃅꑘꉉꐙꎴꅇꄜꅲꇫꌋꆀꉉꈻ,ꌜꊐꌠꏦꍤꑼ3ꂷꇬꏲꌋꁥꌠꌌꏮꆫꄷꀋꁧꀱꍤꅲꌠꃅ。“ꐋꀋꌡꌅꈌꉪꇐꁏ、ꊋꇨꏗꃅꇏꁏ”ꌐꐘꉙꂘꌠꃅ,ꏦꇨꃅꇗꐆꏦꐆꌠꏦꍤꌤꃅꊿ267ꑼꍤꀞ,ꄚꈐꏭ38ꑼꌌꅓꑘꅑꁧꎹ。

  ꏟꈯꃅꅉꂫꊐꌠꅉꀨꋈꄻꌠꄹꎆ。ꐊꑷꃅꅉꂫꊐꌠꏦꍤꑼꏦꌬꋊꍬꈴ、ꊿꁥꌠꌐꑘꈴ、ꏲꂠꈆꑪꈴ、ꐛꏀꈴꏦꀧꋈꄻꌠꄐꎖꌋꆀꃅꇫꑟ。ꄚꃆꂮꌤꏲꅉꌋꆀꐯꇯꄉꄹꏦꇬꄉꅉꂫꊐꌠꏦꇜꏛꃅꌤꃅꉆꈉꎞꁧꃅꑘꎞꁧꌠꌤꃆꂥꀘ,ꍔꃔꇥꏢꎹꌬꉘꉚꉺꏦꄺꀱꃅꉚꌤꃅꌠꃅꇫꑟ,ꃅꑘꈯꌬꊿꌋꁆꌌꅉꂫꊐꌠꇬꆹꄀꄜꎟꒉ,ꀒꁨꋍꁘꃅꅉꂫꊐꌠꃣꈌꀞꊋꃤꀋꇎ、ꌧꊿꀋꇎꑠꊋꋠꐨꂥꀘ。ꏟꈯꃅꏲꌋꇥꀯꅉꂫꊐꌠꑌꑲꃅꑘꌤꃅꅉꄐꈌꊒꃅꄐꂘꑠꄹꏦꌬ。ꍔꃔꌫꎆꏦꀧꏦꉻꄺꀱꌠꃅꇫꑟ,ꄚꃆꂮꐥꌠꌤꏲꅉꌋꆀꐯꇯꄉꏃꑤꊐꌠꏦꍤꑼꉻꎆꏦꀧꎕꏦꑠꋬꈭꄹꏦꄻꐛꒆ。ꍏꑷꏱꎆꏭꆦꁵꌬꌋꆀꁥꇱꎆꇱꌠꁦꎆꀐ,ꊋꒉꃅꈯꄔꁮꐚꁁꏯꌋꆀꌢꎭꊋꋠꃅꄷꀊꅰꃅꇝꂱꀉꆹꃅꄷ、ꊿꋅꃅꄷ、ꃄꋯꆹꏮꃅꄷꏦꍤꌤꏲꅉꊋꁈꄏꊋꃤꇱ。

  ꏃ、ꑴꐚꃅꍞꊟꎻ,ꏦꍤꌅꈌꏦꃤꇬꈴꄉꎃꊒꃅꃄꌬꌠꏦꀧ

  ꈫꈈꃅꍞꊟꊿꆏꀊꅰꃅꍞꊟꉪꉻꉪꐨꑌ,ꑴꐚꃅꍞꊟꎻꌠꏦꉻꌋꆀꏡꁈꄻꐛꒆ、ꃅꇫꑟ,ꏓꂱꄻꁵꄉꌠꏦꍤꌅꈌꃶꐚꃅꌌꏓꂱꈲꇬꌬꌠꏦꀧ。

  ꑴꐚꃅꏓꄊꁳꍞꊟꎻ。ꊯꊪꈭꇩꏤꑭꊂꏓꄊꃀꌕꃢꈿꌐꊂ,ꏓꂱꏦꍤꑼꀊꂥꇊꀊꂥꊐꌠꐊꑷꃅꍤꇖꉜꐨꎵꃪꈴ,ꋍꏢꋍꏢꃅꋊꄻꏡꁈꎥꃪ。ꇩꏤꑭꊂꏓꂱꇖꂟꅉꇬꉜꄉ,ꀋꃋꌬꌠꏦꌬꉉꀽꌠꏓꋧꄉꎵꄻꌠꂿꃆꃅꌐ,63ꐘꇤꇧꎭꄷꄛꇰ。ꏟꈯꃅꅉꀕꃅꑴꇙꃅꏓꄊꎮꊈꉼꏭꌤꃅꐨꀋꉬꀋꉆꅇꄜ,ꏣꀋꑌꃅꏓꄊꎮꊈꉼꐊꄉꌐꄝꍤꄻꎥꃪꌋꆀꏦꌬꍤꄻꌠꃅꈽ。ꏓꂱꏦꍤꑼꀊꂥꇊꀊꂥꊐꌠꇩꏤꑭꊂꏓꄊꎮꊈꉼꏭꌐꄝꃅꃅꅍꀋꃅꌅꈌꉄꌎꏦꍤꌤꃅꄺꀱꃆꂮꅇꄜꀐ。ꌜ、ꊨꏦꏱꅉꐎ、ꈛꎂꏲꌠꏃꏓꄊꎮꊈꉼ22ꂷꆏꊋꀥꇱꄉꏦꍤꌤꏲꅉꅇꎹꍞꊟꌤꃅꃆꂮꏤꇽꌋꆀꐰꏤ,ꏦꍤꌤꏲꅉꎔꃅꌶꌬꌠꃅꇫꑟ。ꏓꂱꁧꎁꌋꆀꅉꀕꃅꐮꑌꑲꌠꊋꇨꇱ。ꏦꍤꌤꃅꐛꐨꄛꇰ,ꑴꇙꃅꇬꀖꑖꈈꃅꉜꐨꅲꇫ。ꏓꂱꏦꍤꑼꀊꂥꇊꀊꂥꊐꌠꇩꏤꑭꊂꏓꂱꁧꎁꑌꑲꌐꌬꈄꏍꌋꆀꌐꌬꄆꅇꀹꄻꈴꄉ,ꏦꌠ、ꇨꄏꏦꍤꌤꃅꅉꋮꄮꄉꑣꇤ、ꉪꂱꇩꏤꑭꊂꏓꂱꁧꎁꄹꁆꍤꆫꃆꂮꐥꌠꌤꃅꋒ。ꇩꏤꑭꊂꏓꂱꁧꎁꄜꅐꇁꌠꇖꑘ、ꇖꐨ79ꐘꉬꇮꀞꌐꀐ。

  ꑴꐚꃅꋯꁦꍞꊟꎻ。ꑴꇙꃅꍔꑠꏭꏦꍤꌤꃅꐛꐪꄛꇰ,ꍔꑠꊈꑼꁨꌊꑋꇖ꒜ꈿ、ꍤꆫ、ꌐꄝꍤꎥ。ꋯꁦꄈꀾꈁꐥꌠ、ꇪꎭꆃꌋꆀꄈꀾꀋꐥꊿꂒꋦꌠꌋꆀꐮꑌꑲꌠꉺꏦꄻꐛꒆ,ꑌꑲꌤꃅꄹꏦꈴ、ꍬꏦꈴꌠꄹꎆ。ꏓꂱꏦꍤꑼꀊꂥꇊꀊꂥꊐꌠꅉꀕꃅꋯꁦꄈꀾꈁꐥꌠ、ꇩꏤꑭꊂꇪꎭꆃꌋꆀꄈꀾꀋꐥꊿꂒꋦꌠꏦꍤꌤꑘꏭꉜꐨ、ꇖꐨꅲꇫꄷꀋꁧꌌꏦꍤꈁꐥꊐꌠꌤꏲꅉꏭꄛꇰꈴ。ꃶꐚꃅꐋꀋꌡꃅꁨꄉꌠꏦꍤꊿꃤꍤꅲ、ꍞꊟꂿꄐꇤꅐꇁ。ꇩꏤꑭꊂꍔꑠꊈꑼꄜꎼꇁꌠꄜꑘ21ꐘꌠꉬꇮꃅꀞꄻꌐ。

  ꑴꐚꃅꐧꋦꁳꍞꊟꎻ。ꏓꂱꍞꊟꊿꄹꏦꆹ7ꈓꃅꉚꇈ,ꌌꇩꏤꑭꊂꏦꍤꌤꏲꅉꇬꐊꑷꃅꄹꌬꈴ。ꏓꂱꏦꍤꑼꀊꂥꇊꀊꂥꊐꌠ《ꏓꂱꍞꊟꊿꄹꏦꃄꌬꃆꂮꏤꐪ》ꏤꄻꄉ,ꏓꂱꍞꊟꊿꌊꄻꇶꏦꄺꀱ,ꍞꊟꈍꈐꍔꐯ,ꍞꊟꊌꐨꀉꇨꃅꁦꎆ。ꃹꅼꃅꏦꃆꄇꄜꋊ,ꁨꑭꏦꃆꄹꌬ,ꄇꄜꋊꃅꍤꄻ、ꃣꈌꈴꌗꍤꅲꄹꏦꑠꄻꐛꒆꌋꆀꃅꇫꑟ,ꏦꍤꌤꃅꌠꂿꈴꐨꉀꐕ。ꏓꂱꏦꍤꑼꀊꂥꇊꀊꂥꊐꌠꇬꂾꃢꌠꏦꍤꁉꑍꃑꑍꃅꈧꌠꀞꄻ,ꌶꅉꀊꂥ、ꋥꁕ、ꇢꈴꇬꄉꉹꁌꁧꎁꁨꌊꆫꃨꇁ,ꄷꀋꁧꏦꇜꌋꆀꑓꊒꀕꃅꐮꈴ。ꏦꍤꌤꏲꅉꈨꏀꄜꃑꄹꏦꄻꐛꒆ,ꋓꉪꁨꄉꉹꁌꉜꐨꌋꆀꇖꐨꅲꇫ,ꇇꈤꃅꌤꃆꐧꋦꇫꉜꁨꌠꅇꀱ。

  ꁧꎁꊈ,ꉪꊇꍝꐚꃅꌧꐚꌠꆏ,ꏦꍤꌤꑘꆹꄡꇗꌤꃆꑓꅐꎑꌠꀉꑌꃅꐥꑴꌦ:ꋍꆏꏦꃤꍞꊟꌅꊋꀊꅰꃅꋒꃅ、ꇿꋌꐥꃅꇤꅐꇁꀋꇎꑴꌦ,ꏓꂱꉹꁌꇨꈴꃅꏦꃤꍞꊟ、ꀋꈐꀋꉈꑗꉬꀧꌋꃅꌠꇖꂟꐨꌋꆀꐮꍣꐨꄡꇗꀉꒉꃅꐥꑴꌦ。ꏦꍤꌤꏲꅉꎆꏣꐧꋦꀻꎆꁧꃤꃅ、ꏓꂱꉹꁌꁧꃤꃅꌠꌧꐚꐨꌋꆀꊋꃤꆹꀒꁨꋍꁘꃅꉀꐕꄻꅐꑴꌦ。ꑍꆏꏦꍤꊿꁥꌠꉻꄜꊇꁧꆹꃅꒊꃅꇁꀻꎆꌠꈉꐨꇬꄉꄐꃅꀋꐛꑴꌦ,ꏦꍤꊿꄹꁆꆹꏦꌬꌧꐨꀊꂥꃅꀋꐛ,ꉹꁌꉪꉻꀁꂥ,ꐧꋦꐮꄙꆣꄯꀋꇮ,ꄡꇗꋻꅑꃅꃣꈌꀞꆸꎃꃅꃣꈌꀞ、ꇰꇗꌬꃅꏦꌬ,ꃣꈌꀞꄻꇬꋍꈨꋋꈨꊇꁧꀊꂥꃅꀋꐛ、ꇿꋌꀋꐥ。ꌕꆏꊨꏦꑴꅉꍞꊟꏡꍅꌋꆀꍹꁏꎴꄖꋈꄻꌠꆹꄡꇗꊋꀥꇱꄻꅐꑴꌦ,ꏦꍤꊿꄹꏦꏦꐆꌤꃆꇫꅐꇁꇬꎷ,ꋍꈨꋋꈨꆏꏦꌬꍬꏦꀋꈴ、ꌧꑳꃅꀋꐛ、ꀋꈐꀋꉈꃅꀋꐛ、ꐙꎴꃅꀋꐛ,ꌅꈌꌌꊨꏦꈲꏂ、ꃄꈌꄐꃅꌅꈌꄉꅍꌬꄷꀋꁧꎆꇢꏦꐆ,ꀉꆈꃅꏦꍤꌤꏲꅉꏦꌬꉻꑇꐨꇬꉮꄻ。ꇖꆏꅉꂫꊐꌠꅉꃀꋈꄻꊋꃤꉈꑴꀉꒉꃅꇱꄻꅐꑴꌦ,ꅉꂫꊐꌠꏦꍤꑼꋍꈨꏲꂠ、ꏦꀧꉺꏦꐛꀋꒆ,ꋍꈨꋋꈨꆏꃣꈌꀉꑌꊿꀁꑌ、ꏦꇜꁰꈘ、ꊇꁧꀊꂥꌠꏦꃤꌐꑘꌧꊿꀋꇎꌠꌤꃆꑠꊝꎍ。ꋋꈨꆏꉪꊇꀉꇨꃅꇫꉜꁨ,ꊋꇤꄉꂥꀘꂿ。

  2011ꈎꏦꍤꌤꑘꁆꄻ

  2011ꈎ,ꏦꍤꌤꏲꅉꆹꐊꑷꃅꄈꅿꃀꀉꒉꈿꊰꏁꃢ、ꃀꊰꏁꈭꉬꃢꐊꈴꃅꈿꌠꌋꆀꋌꃢꇩꏤꑭꊂꏓꄊ꒜ꈿꉌꊈꌫꄻ,ꏟꈯꃅꈯꄜꆼꒆ、ꃅꇴꄉꉻꁧꃤꃅ,ꊿꌌꀨꇬꄉ、ꉹꁌꎁꃅꏦꌬ,ꃶꐚꃅꏦꃀꌋꆀꏦꃤꄻꁵꄉꌠꆽꎍꄉꅍꃄꌬ,ꀋꂿ꒧ꌤꑘꌕꐘꌌꃹꅼꈴꌠꌌꊋꌭꅉꃅꄉ,ꀋꆏꃅꇨꈴꃅꏦꃤꍞꊟ、ꇨꈴꃅꊨꏦꑴꅉꍞꊟ、ꇨꈴꃅꊿꁥꌠꂘꄻꄉ,“ꊰꑋꉬ”ꊬꌠꎆꏣꐧꋦꀻꎆꉾꃪꃅꌐꁌꌠꎁꃅꏦꌬꏦꀧꌠꇲꁵ。

  ꋍ、ꀊꅰꃅꋓꉪꁨꄉꎆꏣꐧꋦꀻꎆꌠꁧꃤꃅ。ꏟꈯꀕꃅꈆꑪꃅꀻꎆꌠꄜꀨꋋꏢꌋꆀꇤꐳꃅꎆꏣꀻꎆꇶꏦꆹꏮꌠꑟꀨꋋꏢꆼꒆꄉ,ꏦꍤꌤꃅꁧꃤꃅꌠꃅꇴꄉꉻꇬꇇꄀꅉ、ꏓꇱꅉꎹꈹꄉ,ꃶꐚꃅꇇꇩꍈ、ꀧꌋꃅ、ꍞꊟ、ꉙꂘ、ꄐꄵꌠꌅꊋꂿꄐꇤꅐꇁ。ꀉꒉꃅꀉꆈꃅꎆꏣꑽꃤꐆꌠꅓꀞꌠꊋꃤꇱ,ꃷꎏꎆꏣꐥꀹꀧꌋꃅ,ꐽꊯꃅꃷꎏꀨꄜꏦꊒꌅꈌꈲꁧꀧꌋꃅ。ꏦꃤꇬꈴꄉꂿ꒧ꊿꌅꈌꈲꁧꇬꉮꄻ、ꂿ꒧ꀻꎆꌠꉮꄻ、ꂿ꒧ꁡꇤꑘꒃꌠꁧꏖꑽꃤꐆꌠꅓꀞ,ꐧꋦꉪꏦꂿ꒧ꁡꇤꀊꏀꋈꄻꌠꏦꀧ。ꌧꇐꅐꇐꌅꈌꏦꌬꀧꌋꃅꌠꊋꀥꇱ,ꏀꀺꉹꌠꇩꏤꋈꄻꌠꊥꎆ。ꏦꃤꇬꈴꄉꋦꈭꀉꒉꀊꂾꃅꍍꆀꌠꌋꆀꒆꉻꅐꀦꀜꐆꑽꃤꐆꌠꅓꀞ,ꒆꉻꌧꑳꋈꄻꌋꆀꑊꃴꎆꏣꀻꎆꌠꏦꀧ。ꍏꇩꐛꐨꐧꋦꉪꏦꏦꃤꉻꑫꄻꐛꀐꌠꃅꒊꃅꇁꀊꏀꌠꈉꐨꈴꄉ,ꏟꈯꃅꏦꐥꀋꎪꌬ、ꏦꌬꀋꎪꇨ、ꏦꐆꀋꎪꅓ。ꃶꐚꃅꇩꏤꏦꃤꏓꋍꃱꃅꄉꎃꊒꃅꃄꌬꌠꀧꌋꃅ,ꎆꏣꐧꋦꀻꎆꌠꎁꃅꏦꏲꋦꈭꉾꌠꄻ。

  ꑍ、ꀊꅰꃅꋓꉪꁨꄉꐧꋦꐮꄮꑘꒃꌠꀧꌋꃅ。ꏦꃤꇬꈴꄉꅱꈯꃅꏱꁕꈏꉈꁮꐚꊋꃤ꒔ꑞ꒔ꑵꃅꈏꃹꇁꄉꁏꆷꀜꐆꃅꈧꌠꏭꇇꇩꍈ,ꃶꐚꃅꇩꏤꋬꂻꀧꌋꃅ。ꏦꃤꇬꈴꄉꏦꇨꃅꀉꆈꃅꅓꑘꑽꃤꐆꌠꏭꇇꇩꍈ,ꏣꀋꑌꃅꋬꂻꀋꂿ꒧ꃅꄷꌋꆀꋬꂻꌤꃆꑓꅐꎑꏓꋧꄉꏱꄻꌠꃅꈽ。ꃹꅼꃅꌤꃅꀋꂿ꒧ꌤꑘꌕꐘꌠꄹꎆ,ꃣꈌꀞꄻꌠꉪꉻꌋꆀꃄꄟꋊꑣꇧꎭ,ꊋꇤꄉꉹꁌꅇꎹꉉꄜꉺꏦ、ꏦꌬꃣꈌꀞꃨꆰꐨꄤꎖꄐꌋꉺꏦ、ꏯꇨꐮꐊꌠꅑꑘꏱꁈꃄꌬꌠꌤꃅꉺꏦ、ꐧꋦꄙꆣꄯꉺꏦꄺꂡ。ꏣꀋꑌꃅꃅꒊꃅꇁꀊꏀꌠꇂꃴꏦꍤꌤꏲꅉꐧꋦꏲꂠꏀꀺꈽꌠꃄꄟꌋꆀꈭꈜꎹꈹ,ꐧꋦꏲꂠꈆꑪꈴꌧꐨꉀꐕꌠꊥꎆ,ꐧꋦꐮꄮꑘꒃꇬꁧꏖꌠꌤꃆꀨꀦꐨ、ꊇꅉꐨ、ꅉꃀꐨꐥꌠꂥꀘꌠꊥꎆ。

  ꌕ、ꀊꅰꃅꋓꉪꁨꄉꍹꁏꎴꄖꋈꄻꌠꄹꎆ。ꏦꃤꇬꈴꄉꏦꇨꃅꏲꂠꌤꏲꅉꌋꆀꏲꌋꇥꀯꇬꄉꅐꇁꌠꎆꂁꋠꃴꎆꍈ、ꏲꄸꃅꎁꀋꃅꑽꃤꐆꃣꈌ,ꀋꂿ꒧ꁁꏯꌋꆀꈭꎁꊨꇬꄉꅍꑽꃤꐆꌠꃣꈌ,ꆽꎍꌤꀉꒉꀊꂾꌠꌋꆀꉹꁌꁥꉻꐨꃆꂮꐥꌠꃅꅍꀋꃅꊂꆈꍹꈔꑽꃤꐆꌠꃣꈌ,ꅉꂫꊐꌠꍔꍞꌅꈌꎀꍹꌋꆀꀋꂿ꒧ꌠꉆꈉꇬꄉꅐꇁꌠꌅꈌꌌꊨꏦꈲꏂ、ꃄꈌꄐꃅꄉꅍꌅꈌꌬꑽꃤꐆꃣꈌ,ꃣꈌꀞꄉꊨꏦꈲꏂ、ꎆꇢꏦꐆꌋꆀꄸꃅꊋꃤꎁꃅ“ꀧꌋꃅꆫꁯ”ꄻꐺꑠꑽꃤꐆꃣꈌꍤꀞ。ꏦꇨꃅꃼꇇꑘꃴꎆꍈꃣꈌꍤꀞ,ꐪꊛꄉꀉꒉꃅꃴꎆꍈꑽꃤꐆꌠꏭꇇꇩꍈꌠꊋꃤꇱ。ꎔꃅꄈꍏꑷꌋꆀꇩꏤꑭꊂꏓꄊꇖꂟꐨꃄꌬꇫꑟ,ꀒꁨꋍꁘꃅꃅꅍꀋꃅꌅꈌꉄꌎꏦꍤꌤꃅꌠꊋꀥꇱꌋꆀꄺꂡꀱ。ꊋꀥꇱꄉꀊꏀꏲꄸ、ꀊꏀꉹꃣꈌꏦꃤꏱꁈꎥꃪ,ꏦꃤꇬꈴꄉꑽꃤꐆꌠꏭꇇꇩꍈ,ꆹꑽꌠꈭꋏ,ꑽꃤꀋꐥꌠꀧꌋꃅ,ꄺꀱꌠꊋꁈꄏ。ꏦꃤꄹꏦꄜꉺ、ꌗꋏꉙꂘ、ꏦꍤꇖꐨꌤꃅꌠꊋꀥꇱ,ꄉꅍꑽꃤꐆꌠꅐꈝꐮꀉꑌꃅꅐꌠꏲꄸꍤꄻꎥꃪ、ꃨꆰꐨꌗꋏꂴꄜꄹꏦꄺꂡ,ꄉꅍꑽꃤꐆꄐꄵꈎꅇꄜꄹꏦꃅꇫꑟ,ꇬꀦꇬꄉꄉꅍꑽꃤꐆꌠꄐꄵꌋꆀꊨꒊ。

  ꇖ、ꀊꅰꃅꋓꉪꁨꄉꏓꂱꉹꁌꌅꈌꈲꁧꀧꌋꃅ。ꏟꈯꃅꏦꐥꀋꎪꌬ、ꏦꌬꀋꎪꇨ、ꏦꐆꀋꎪꅓ,ꊋꀥꇱꄉꅇꎹꃅꈧꌠꏭꏦꃤꍞꊟ,ꃶꐚꃅꇩꏤꏦꃤꏓꋍꃱꃅꄉꎃꊒꃅꃄꌬꌠꀧꌋꃅ。ꊋꒉꃅꊋꃤꀋꂄ、ꅳꍬꂨꁖ、“ꑍꇑꋍꈐ”、ꌋꅪꀊꉘꊏꃷ、ꏦꀋꊒꎆꏓ、ꀊꆠꃷꇐꄻꃆꂮꐥꑠꑽꃤꐆꅓꀞꌠꊋꃤꇱ。ꏓꂱꉹꁌꀑꇬꁨꇐꋬꂻꌠꏦꀧ。ꀉꆈꃅꏓꂱꉹꁌꎆꏣꌅꈌꈲꁧ、ꇭꀧꌅꈌꈲꁧ、ꋯꁦꌅꈌꈲꁧꇬꉮꄻꌠꃣꈌꌌꄉꅍꑽꃤꐆꌠꀨꄉꍤꀞ,ꏦꇨꃅꂿꑘꈲꁵꌠꁥꇱ、ꃄꅉꁵꊒ、ꎭꄏꉮꋏ、ꎞꀀꁆꄻꑠꌐꐘꎆꃀꍆꑣꌠꃣꈌ,ꇜꆈꐮꈻꐯꎷ、ꀙꑫꍅꆋꃣꈌ,ꅉꂫꊐꌠꌊꄻꌠꇬꉄꌎ、ꀜꐆ、ꃅꈧꌠꃣꈌ,ꉈꑴꋠꇐꁬꋌꊇꁧ、ꋬꂻꒃꅐ、ꃄꅉꎳꌬꀀꎞꑋꇙ、ꋦꈭꀧꌋꃅꑠꁆꏯꀉꆈꃅꉹꁌꑴꅉꈲꁧꇬꉮꄻꌠꃣꈌꍤꀞ。ꏦꍤꃆꂮꐥꄯꒉꁱꅲꇫꅇꎹꌤꃅꌠꉜꁨ,ꏦꃤꇬꈴꄉꋭꋽꃅꉹꁌꏚꍆꃅꅇꎹꑗꇖꌠꂥꀘ,ꉹꁌꄐꂘꌊꏦꃤꇬꈴꄉꉪꅉꅇꎹꑗꇖꌠꄜꎻ。ꏣꀋꑌꃅꃣꈌꌌꀁꋌꅲ、ꏦꃤꌌꀁꋌꂘ、ꏭꀱꄉꍤꄻꑠꇶꏦꌬ,ꊋꀥꇱꄉꉹꁌꌤꃅ,ꉹꁌꃅꌒꉹꁌꈲꁧꐥꌠꏡꁈꄻꃪ、ꃅꇫꑟ。

  ꉬ、ꀊꅰꃅꋓꉪꁨꄉꐧꋦꐥꊯꑗꉬꀧꌋꃅ。ꏟꈯꃅꏦꃤꇬꈴꄉꍞꊟ、ꋊꍬꍞꊟ,ꍞꊟꏡꁈꄺꀱ,ꍞꊟꊇꁧꉀꐕ,ꀉꇨꃅꍞꊟꅐꐨꁦꎆ。ꊋꀥꇱꄉꅓꑘꌌꃣꈌꃅꄉꌠꍞꊟ,ꏲꑘꏦꌬꌋꆀꅓꑘꏦꌬꐯꊛꉺꏦꃄꌬꇫꑟ,ꃶꐚꃅꑽꐥꅓꀋꎹ、ꀵꃤꌌꅓꃤꎃꊒꑠꌤꃆꄺꀱ。ꊋꀥꇱꄉꅓꃤꅥꇔꇨꑠꏦꐆꄉꍤꌋꃅꐨꍞꊟ,ꀦꑣ、ꑸꄉ、ꋍꆏꄉꑠꊋꆍꏿꄉꍤꌋꏡꁈꌬꌠꇬꍞꊟꉺꏦꄻꐛꒆ。ꅓꃤꎖꇖꐨꌤꃅꌠꋊꍬ,ꇨꈴꃅꅓꑘꍤꇽꈜꀕꇈꅓꃤꎖꐎꎕꆈꃅꌠꇬꍞꊟ。ꊋꀥꇱꄉꉹꁌꌤꃆꍤꇽ、ꏲꑘꅇꎹꌠꍞꊟ,ꏣꀋꑌꃅꄚꃆꂮꐥꌠꏦꌬꄺꀱꌠꄹꎆ,ꋭꋽꃅꉹꁌꌤꃆꀞꄻꌠꏦꃤꍞꊟꃅꉚꌤꃅꌠꍔꂵ,ꊋꀥꇱꄉꅓꀞꃄꌬꌠꌋꆀꍞꏲꃅꈧꌠꍞꊟ,ꏦꃤꇬꈴꄉꏦꇨꃅ“ꏦꀀꊋꏗꌋ”ꏭꇇꇩꍈ,ꏦꉈꃄꌬꌠꏦꍤꌤꃅꌠꋊꍬ,ꇨꈴꃅꋥꁕꏦꃤꍞꊟꌠꋊꎃ。ꊋꀥꇱꄉꅇꎹꇬꃅꅍꀋꃅꑽꃤꐆꌠꍞꊟ,ꏦꇨꃅꏦꌬꌤꃅꊿꎆꇢꏦꐆꑠꑽꃤꐆꌠꍤꀞ,ꏦꌬꀋꈐꀋꉈꌠꀧꌋꃅ。

  ꃘ、ꀊꅰꃅꋓꉪꁨꄉꑴꅉꀋꈐꀋꉈꐙꎴꃅꏦꌬ。ꐊꑷꃅꏦꇜꃅꑘꃅꇏꋊꍬ、ꏦꍤꌤꏲꅉꏦꌬꌤꃅꀑꐱꃅꋊꍬꌋꆀꏦꍤꌤꏲꅉꌧꑳꅇꌬꏦꇗꌬꇫꑟ,ꃶꐚꃅꏦꇨ、ꋊꍬ、ꀋꈐꀋꉈ、ꌧꑳꃅꏦꌬꃅꇫꑟ。ꀨꇬꄉꑴꅉꏦꌬꃣꈌꀞꌠꍞꊟꏢꑲꌠꒃꉇꋒ,ꇨꈴꃅꀨꄉꌠꏦꌬꉆꈉ、ꏦꌬꊨꊭ、ꏦꌬꊿꇬꍞꊟ,ꇨꈴꃅꉎꊐꌠꏦꍤꑼꐰꊐꌠꏦꍤꑼꏭꍞꊟ,ꏦꃤꇬꈴꄉꇬꉢꌤꏲꅉ、ꏓꂱꃔꑼꁳꅇꎹꅉꇬꏢꑲꎻ,ꏦꍤꃄꈌꄐꃅꌅꈌꌬꌠꄴꏮ。ꃣꈌꏓꋧꄉꏲꂠꌠꄹꌬ,ꋍꃱꃅꃣꈌꊪꀞ、ꈭꎁꐊꈴꃅꏲꂠ、ꇘꄟꍞꊟ、ꏓꇱꎕꑣꌠꏦꌬꃣꈌꀞꌠꏲꂠꍞꊟꉺꏦꄹꌬ。ꊋꀥꇱꄉꃣꈌꍤꎖꌤꃅ,ꊋꒉꃅꏦꌬꑽꃅꎁꆽꎍꅑꁧꎹ。ꏦꌬꌋꆀꊿꁥꌠꇬꄡꇗꌤꃆꑓꅐꎑꌠꐥ,ꀊꅰꃅꌋꐚꇬꎷ,ꏟꈯꃅꏦꇨꃅꏦꏲ,“ꋰꄉ”ꌠꃅꇏꑌꄉꏦꇨꃅꏦꍤꌤꃅꊿꇗꐆꏦꐆꌠꃣꈌꍤꀞ。ꃹꅼꃅꏦꃆꄇꄜꋊ,ꀒꁨꋍꁘꃅꌅꈌꈲꁧꋭꑘꉉꄜ、ꏦꍤꌤꃅꄯꒉꇗꅉꉉ、ꏦꍤꌤꃅꄛꇰ、ꏦꍤꀖꁉꑠꄹꏦꃅꇫꑟ,ꏦꍤꌅꈌꌌꁨꑭꇂꃴꏭꌬꌠꄉꀧ。

  ꏃ、ꀊꅰꃅꋓꉪꁨꄉꊿꁥꌠꂘꄻꌋꆀꅉꂫꊐꌠꅉꃀꋈꄻꌠꊋꀥꇱ。ꏟꈯꀕꃅ“ꋊꐥꌠꍔꆙ、ꀋꎪꃅꉜꐨꐥ、ꏦꌬꉹꁌꎁꃅ”ꌠꌌꀨꄜꃅꉙꂘꃄꄻꌠꍔꂵ,ꀋꆏꃅꃹꅼꃅꍏꇩꐛꐨꐧꋦꉪꏦꌧꇗꉻꑫꌋꆀꍏꇩꐛꐨꏦꃤꉻꑫꌶꄻꌋꆀꌧꐚ,ꊋꇤꄉꉪꇐꉜꐨ、ꉪꃆꁢꊧꉪꐨ、ꏦꌬꃣꈌꀞꄻꑠꁆꏯꌤꃆꑓꅐꎑꌠꐥꌠꂥꀘ。ꊋꀥꇱꄉꏲꌋꁥꌠꂘꄻ,ꄈꊈꐊꄉꈁꐥꊐꌠꏦꍤꑼꏲꌋꁥꌠꌊꄻꋒ。ꄉꈁꀉꒉꃅꉙꂘꁰꍋꌠꄹꎆ,ꀨꄉꊋꒉꃅꅉꂫꊐꌠꏦꍤꊿꈧꌠꁱꂘꌠꊋꃤꇱ,ꎃꊒꃅꏦꃤꌋꆀꏱꁈꃄꌬ、ꉹꁌꌤꃅꋒ、ꐯꄙꐮꏈꌠꆣꄯ、ꐧꋦꐮꄮꑘꒃꌠꀧꌋꃅꌠꄐꊋꉀꐕ。ꇩꏤꑭꊂꏓꄊꎮꊈꉼꏓꂱꏦꍤꑼꅉꂫꊐꌠꋈꄻꌐꐘꅇꄜꌠꅲꇫꌋꆀꍤꇖꌠꌌꊜꋽꄮꒃꄉ,ꊋꀥꇱꄉꅉꂫꊐꌠꏦꍤꊿꁥꌠꏲꂠꌋꆀꄐꊋꂘꄻ,ꀋꈐꀋꉈꐙꎴꃅꏦꌬꌠꊥꎆ。ꃹꅼꃅꈆꑪꇮꇐꌌꏦꍤꇨꄖꌠꄐꇐꏤꁈꃄꌬ,ꊋꀥꇱꄉꅉꃀꌬꇐ、ꈆꑪꇮꇐꌫꉂꌫꈾꌋꆀꈴꌗꈴꌠꋈꄻ。ꀒꋤꃅꄷꇇꀨ、ꑝꏦꃅꄷꇇꀨꌠꌤꃅꋒ,ꈯꄔꁮꐚꁁꏯꌋꆀꌢꎭꃅꄷ、ꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷꅉꂫꊐꌠꏦꍤꑼꋈꄻꌠꉜꁨ,ꀒꁨꋍꁘꃅꃣꈌꀉꑌꊿꀁꑌ、ꏦꇜꐯꊛꀋꄐ、ꌐꑘꌧꊿꀋꇎꑠꌤꃆꂥꀘ,ꅉꂫꊐꌠꏦꍤꌤꃅꌋꆀꊿꁥꌠꂘꄻꌧꐨꉀꐕ。

  ꁧꎁꊈ,ꃅꈎꀊꏀꈒꌠꇬ,ꇩꏤꑭꊂꏦꍤꌤꏲꅉꆏꑖꑟꃅꋯꑌꌊꐋꀨꃛꏢꄧꌌꊝꎼꏹꃅꄉꌠꄉꍏꑷꈭꇍꄉ,ꍏꇩꐛꐨꐧꋦꉪꏦꁈꁧꇰꀋꃀꁬꌠꀊꂥꃅꐕꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꂘꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꏟꈯꃅꄈꅿꏃꂠ、ꏓꂱꑱꏲꃥꌋꐛ、ꏦꃤꇬꈴꄉꇩꏲꌠꑖꑟꃅꏓꋍꃱꃅꄉ,ꐊꑷꃅꑴꐚꃅꍞꊟꎻ,ꀊꅰꃅꑅꅐꊋꆜꄉꋍꑞꋍꐘꏦꍤꌤꃅꋒꄉ,ꐊꑷꃅꊼꇅꌣꈚꌠꐧꋦꋈꄻꃅꐛꐨꀊꏀꃅꐥꌠꎁꃅꀉꅰꃅꑆꊋꀉꒉꃅꅐꌞꂿ!
ꁰꒌ




  • 特别鸣谢
    中国民族语文翻译局彝文翻译室