ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꏓꂱꃔꑼꀊꂥꇊꀊꂥꊐꌠꌤꃅꅇꄜ

——2011ꈎ3ꆪ11ꑍꊯꊪꈭꇩꏤꑭꊂꏓꂱꁧꎁꃀꀉꒉꇖꃢꀕꌠꈿꅉꇬ

ꏓꂱꃔꑼꀊꂥꇊꀊꂥꊐꌠꑼꍈ ꊆꎹꏯ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꁧꎁꊈ:

  ꀋꃋ,ꉢꏓꂱꃔꑼꀊꂥꇊꀊꂥꊐꌠꎁꃅꃀꀉꒉꈿꅉꏭꌤꃅꅇꄜ,ꌌꍤꇖꅊꇈ,ꄷꀋꁧꇩꏤꑭꊂꍔꑠꊈꑼꈧꌠꆏꉜꐨꄜꎼꇁꅊꇈ。

  2010ꈎ,ꏓꂱꃔꑼꀊꂥꇊꀊꂥꊐꌠꆏꐋꀨꃛꏢꄧꌌꊝꎻꏹꃅꄉꌠꄈꍏꑷꏟꈯꃅꏃꂠꌠꇂꃴꄉ,ꇩꏤꑭꊂꏓꂱꁧꎁꃀꀉꒉꈿꅉꌋꆀꋍꃤꅉꀕꌤꏲꊈꑼꉼꊋꑌꃅꍞꊟꌠꇂꃴꄉ,ꎔꎗꃅꄈꃤꃀꀉꒉꊰꏁꃢꌠꌋꆀꊰꏁꈭꌕꃢ、ꇖꃢ、ꉬꃢꍏꑷꊈꑼꐊꈴꃀꇬꉌꊈꌋꆀꊯꊪꈭꇩꏤꑭꊂꏓꄊꌕꃢꀕꌠꃀꈿꏤꐪꌫꄻ,ꃹꅼꃅꈆꑪꃅꀻꎆꌠꉜꐨꃄꄻ,ꏦꇨꃅꏦꃤꌋꆀꏦꃤꄻꁵꄉꌠꄉꅍꃅꎁꃄꄻ,ꈬꐯꈬꃅꐧꋦꐮꄙꐨꋊꎵ、ꐧꋦꏲꂠꏀꀺ、ꎃꊒꐙꎴꃅꏦꌬꌠꌤꃅꐨꀋꂿꑘꌕꐘꌠꇬꆼꒆꄉ,ꊋꀉꒉꃅꅐꄉꊋꀥꇱꄉꍤꇽ、ꃄꌬꌤꃅꌋꆀꑴꅉꋈꄻ,ꋍꑞꋍꑵꌤꃅꌠꊌꐨꀊꏀꃅꁨꎆꐨꐥꀐ。ꀋꉆꄻꈎ,ꏓꂱꃔꑼꀊꂥꇊꀊꂥꊐꌠꇬꆏꃣꈌ12086ꐘꊪꀞ,ꋋꊭꌡꍆꇬ6.99%ꀁꋌꒊ;10626ꐘꍤꀞꂫꇽ,ꍤꀞꄮꈉꏤꈐꍤꀞꂫꇽꐨꆏ98.31%ꇬꑟ。ꃅꄷꇬꏓꂱꃔꑼꋍꊐꋑꀋꋒꌠꇬꆏꃣꈌ11700263ꐘꊪꀞ,ꋋꊭꌡꍆꌠꆏ2.82%ꉀꐕ;ꍤꀞꂫꇽ、ꃄꌬꂫꇽꌠꆏ10999420ꐘꐥ,ꍤꀞꄮꈉꏤꈐꍤꀞꂫꇽꐨꆏ98.51%ꇬꑟ,ꍤꀞꂫꇽꌐꁧꃷꁨꆏ15053.43ꂡꂷꉬ。

  ꋍ、ꀊꂥꃅꎆꏣꐧꋦꀻꎆꌠꇬꏦꌬꈉꐨꇖꐨꉜꁨ,ꊋꇤꄉꎆꏣꐧꋦꉽꑌꉾꐲꑌꐳꃅꀻꎆꌠꎁꃅꁧꃤꃅ

  ꏓꂱꃔꑼꀊꂥꇊꀊꂥꊐꌠꆏꈍꄮꇬꑌꄐꇙꏦꌬꉪꉻꌭꈬꃅꄉꇬꎷ,ꃅꄷꏓꂱꃔꑼꋍꊐꋑꀋꋒꌠꇬꄐꌐꄉꍤꇽꌤꃅꌠꎆꏣꐧꋦꀻꎆꃅꇴꄉꉻꁧꃤꃅꌠꃸꈌꎹꊒꃅꄉ,ꊥꎆꄉꎆꏣꐧꋦꉽꑌꉾꐲꑌꐳꃅꀻꎆꌠꎁꃅꊋꑌꌠꏦꌬꏦꀧꐨꇲꁵ。

  ꊋꇤꄉꃣꈌꀊꏀꉹꌠꇬꌫꄻꉆꌠꏦꃤꌤꃆꏭꍤꄻꎥꃪꌋꆀꍞꊟꄐꌐ。ꇩꏹꎆꒉꎆꇁꎒꐡꌠꌋꆀꉻꒉꎆꏣꋦꈭꐛꐈꌠꇫꁧꏖꄉ,ꎆꏂꑘꈨꇬꇫꐥꀻꎆꌠꀂꏽꊋꋠꌠꐛꄟꊝꄉ,ꉼꏤꏟꃆꏈꑘꌋꆀꎆꏂꑘꑱꐢ、ꄀꇗꇱꄉꌌꌩꎴꌗꄻꌠꋍꑠꃣꈌꀉꑌꃅꃔꑼꇬꃹꇁ,ꏦꃤꌤꃆꌋꆀꐧꋦꌤꃆꐯꌼꐮꈄꎍ,ꋍꑞꋍꑵꈲꁧꐮꎟꄜꐨꀋꆏꃅꃛꇨꇁ。ꏓꂱꃔꑼꀊꂥꇊꀊꂥꊐꌠꆏꊋꀥꇱꄉꐛꐨꀊꏀꌠ、ꌤꃆꀊꏀꌠꏭꍤꄻꎥꃪ、ꂴꊂꃅꎆꒉꎆꇁꄡꃷꎊꈬ、ꉋꄅꃼꇇꃅꊿꎆꇱ、ꑘꃅꐯꀥ、ꈩꆫꏟꃆꏈꑘꋍꑠꁆꏯꏦꌬꉉꀽ20ꏢꌋꆀꄐꌐꐨꐥꌠꉜꐨ43ꏢꏤꄻꌊꄉ,ꃅꄷꏓꂱꃔꑼꋍꊐꋑꀋꋒꌠꏦꃤꇬꈴꄉꎆꉛꉼꏤ、ꎆꏂꑘꑱꐢ、ꇬꌦꌩꎴꌗꄻ、ꐘꃆꏮꏆꋍꑠꏟꃆꏈꑘꃣꈌꍤꇖꌠꇬꄐꌐ,ꋭꋽꃅꎆꏂꑘꇬꌤꃅꊿꇱꄻ、ꎝꌊꁈꀧꌋꃅꌠꋍꑠꌤꃆꂥꀘꀞꄻꇈ,ꃷꎏꃼꇇꐥꀹꀧꌋꃅ、ꃷꎏꋓꅔꉺꏦꎵꃪ、ꐧꋦꐮꄮꎍꐽꌠꊥꎆꌠꎁꃅꏣꀋꑌꌠꂿꄐꇤꅐꇁꀐ。ꎮꉰꋧꃅꄉꀨꃀ、ꇨꍏꑸꒀꉼꌋꆀꑸꍏꊾꄣꈯꒆꄿꎟꃀꋍꑠꀉꒉꀊꂾꃅꃅꈧꌠꎁꃅꏦꌬꏦꀧꐨꇲꁵꌠꉜꐨꏤꄻꄉ,ꌌꃅꄷꃔꑼꋭꋽꃅꄚꃆꂮꐥꌠꃣꈌꍤꀞꌠꇬꄐꌐ。ꐳꃅꏾꉰꒄꌠꀉꇨꃅꃄꇙ、ꇤꌡꊛꐏꀉꇨꃅꇏꅐꌠꋍꑠꀉꒉꀊꂾꌠꋌꐛꉮꌸꌠꇬꄉꅐꇁꌠꉮꌸꃆꂮꐥꌠꃣꈌꌌꄉꍤꇽꄐꌐꌠꃅ。ꉮꄙꉮꌸꈭꋏꌠꌋꆀꉮꌸꈭꐨꀱꉈꑴꋈꄻꀱꌠꎁꃅꏦꌬꏦꀧꐨꇲꁵ。ꇩꏤꃹꅼꃅꁮꐚꏭꁁꏯꀉꇨꃅꀖꁉꌠꄐꇐꏤꁈꃄꄻꌠꄐꁈꇬꈴꄉ,ꊋꀥꇱꄉꁮꐚꏭꁁꏯꃔꑼꌤꃅꌠꏭꄐꌐ。

  ꏣꀋꑌꃅꇤꐳꃅꎆꏣꀻꎆꄟꄺꀱꌠꎁꃅꏦꌬꏦꀧꐨꇲꁵ。ꏓꂱꃔꑼꀊꂥꇊꀊꂥꊐꌠꆏ《ꇤꐳꃅꎆꏣꀻꎆꄟꄺꀱꌠꎁꃅꏦꌬꏦꀧꐨꌋꆀꁧꃤꃅꐨꇲꁵꌠꃆꂮꉜꐨꈍꑋꏢ》ꏤꄻꄉ,ꋭꋽꃅꄚꃆꂮꐥꌠꃣꈌꍤꇖꌠꏭꇖꐨꄜꅐꇁꀐ。ꊋꀥꇱꄉꎆꒉꎆꇁꃣꈌꍤꇽꌠꏭꄐꌐ,ꃶꐚꃅꎆꒉꎆꇁꏲꉻꏦꊒꌠꎝꃆꌅꈌꀧꌋꃅ,ꑴꉴꎝꃆꐵꐺꌠꃅꐨꄴꏮ,ꉾꃪꃅꐙꌠꎆꒉꎆꇁꐥꀹꀧꌋꃅ,ꏓꂱꃔꑼꋍꊐꋑꀋꋒꃅꎆꏓꎆꊭ、ꎆꃀꊫꌐ、ꄜꏂꀧ、ꀾꊐꊫꌐ、ꄉꀧꋍꑠꎆꒉꎆꇁꏟꃆꏈꑘꃣꈌ578919ꐘꍤꀞꂫꇽ,ꋋꊭꌡꍆꆏ11.63%ꉀꐕ。ꎆꏣꐛꉻꋊꄻꌠꊥꎆꌠꇖꐨꇬꈴꄉ,ꀊꅰꃅꀋꃋꋋꄮꅐꑘꉻꑫꀻꎆꄻꐛꒆꌠꊥꎆꌠꉜꁨ,ꀊꅰꃅꐽꊯꋓꅔꌠꃷꎏꐥꀹꀧꌋꃅꌠꉜꁨ,ꀊꅰꃅꐯꊯꃅꃷꎏꀨꄜꏦꊒꌠꌅꈌꈲꁧꀧꌋꃅꌠꉜꁨ,ꏓꂱꃔꑼꋍꊐꋑꀋꋒꌠꃅꉼꏤꉹꌠꃣꈌ3239740ꐘꍤꀞꂫꇽ,ꋋꊭꌡꍆꆏ2.71%ꉀꐕ。ꏦꃤꇬꈴꄉꇤꐳꃅꎆꏣꀻꎆꄟꄺꀱꌠꇬꈲꁧꐥꌠꎆꏣꃅꈧꌠꌋꆀꎆꏣꃅꐨꊋꁈꄏ,ꎆꏂꑘꐅꄻꐯꇯ、ꄹꏦꄺꀱ、ꑱꐢ、ꄀꇗꇱꄉꌩꎴꌗꄻ、ꇴꍆꏮꏆꋍꑠꃣꈌ14694ꐘꍤꀞꂫꇽ,ꋋꊭꌡꍆꌠꆏ56.90%ꉀꐕ。ꋭꋽꃅꊾꄜꀀꑳ、ꐕꍯꃼꃷ、ꈩꆫꁧꃤꃅꌠꌋꆀꀉꁁꌬꈧꊿꌅꈌꈲꁧꏟꃆꏈꑘꃣꈌꍤꀞ,ꈒꇓꈉꐨꍔꐯꌠꊥꎆ。ꏦꃤꇬꈴꄉꇁꀦꀜꐆ、ꋦꈭꍍꆀꌠꑽꃤꐆꃅꐨꅓꀞ,ꒀꒉꍍꆀꉮꄻꀵꊒꃣꈌꍤꀞꏦꌬꉉꀽꏤꄻ,ꋦꈭꉻꈲꅇꎹꄹꏦꄺꑣꌠꎹꎥ,ꃅꄷꃔꑼꋦꈭꀧꌋꃅꃔꄜꄺꑣꌠꄹꇙ,ꏦꃤꇬꈴꄉꒆꉻꌧꑳꋈꄻꌠꊥꎆ,ꏓꂱꃔꑼꋍꊐꋑꀋꋒꌠꃅꐯꇯꋦꈭꍍꆀꉮꄻꀵꊒꋍꑠꃣꈌ12018ꐘꍤꀞꂫꇽ,ꋋꊭꌡꍆꌠꆏ2.83%ꉀꐕ。

  ꌧꇐꅐꇐꌅꈌꏦꌬꌠꀧꌋꃅꊋꃤꁦꎆꇱ。ꃹꅼꃅꇩꏤꌧꇐꅐꇐꌅꈌꄐꇐꏤꁈꐱꀨꃄꄻ,ꊋꀥꇱꄉꌧꇐꅐꇐꌅꈌꏭꏦꌬꌠꀧꌋꃅ,ꄐꇐꏤꁈꃅꐙꌠꅐꑘꀊꏀꌠꉗꄻꌋꆀꀻꎆꌠꎁꃅꏦꌬꀧꌋꃅꌠꇲꁵ。ꊋꀥꇱꄉꂓꅑꌠꃷꇐꌐꉻ、ꂿꑘꅐꇐꅉꇗꌐꂷꌋꆀꀋꃋꋋꄮꁧꃤꃅꑘꃷꇐꌐꉻꏭꀧꌋꃅ,ꑴꌅꂓꁦꅐꇐꏓꐛꌋꆀꀻꎆꌠꊥꎆ。ꏦꃤꇬꈴꄉꋭꋽꃅꇂꇎꌠꏭꁏꌠꌋꆀꀋꋭꀋꋽꃅꋓꅔꌠꃣꈌꍤꀞ,ꌧꇐꅐꇐꌅꈌꌌꃄꈌꄐꃅꌫꄻꌠꄴꏢ,ꎃꊒꃅꋓꅔꌠꃷꎏꐥꀹꌋꆀꉹꁌꏦꊒꌠꌅꈌꈲꁧꀧꌋꃅ。ꃷꇐꌐꉻꌫꄻꌅꈌꏚꍆꌅꈌꁵꄻꌠꏲꑘꃣꈌ、ꋯꉈꁱꇐꁰꄻꌅꈌꏟꃆꏈꑘꌋꆀꈄꏍꈩꀠꁱꇐꁰꄻꌅꈌꏟꃆꏈꑘꋍꑠꃣꈌꍤꇽꄐꌐꉜꐨꏤꄻ,ꌧꇐꅐꇐꌅꈌꃰꊿꌤꃆꃣꈌꊐꏠꏲꄸꎕꏦꋊꄻ,ꏦꃤꌬꉆꐨꄻꐯꌟꃅꄉ,ꑴꌅꏀꀺꌠꊋꊡ、ꈆꑪꇮꇐꀻꎆꌠꄹꇙꌠꏦꏲꋦꈭꄹꇙꏓꐛꌠꊥꎆ。ꄚꃆꂮꐥꌠꌤꃅꅉꌋꆀꐯꇯꄉ《ꌧꇐꅐꇐꌅꈌꉄꌎꌠꅓꑘꃣꈌꀞꄻꌠꇬꏦꃤꌬꄉꄐꌠꌤꃆꃆꂮꉜꐨꈍꑋꈨ》ꏤꄻꄉ,ꏣꀋꑌꃅꌧꇐꅐꇐꌅꈌꉄꌎꌠꌋꆀꃷꇐꀊꆠꊈꄸꌠꄺꑣꃷꄻꌠꌐꄉꇇꇩꍈꌠꃅꈽ,ꏦꃤꇬꈴꄉꌧꇐꅐꇐꌅꈌꉄꌎꌠꅓꑘꃣꈌꍤꇽ。2010ꈎ,ꃔꑼꋍꊐꋑꀋꋒꌠꌧꇐꅐꇐꌅꈌꃣꈌ48051ꐘꍤꀞꂫꇽ,ꋋꊭꌡꍆꌠꆏ32.96%ꉀꐕ。ꊋꀥꇱꄉꌧꇐꅐꇐꌅꈌꏦꄹꄜꉺ,ꍏꇩꌧꇐꅐꇐꌅꈌꏦꌬꀧꌋꃅꐛꄟꇷꐎꄯꒉ、ꈎꈭꏝꅇꄜꌋꆀꃣꈌꊥꋦꌠꌌꄜꃑ,ꌧꇐꅐꇐꌅꈌꏦꌬꀧꌋꃅꈄꏍꍉꁉꄻꄉꌌꌬ,ꌧꇐꅐꇐꌅꈌꍤꇽꂿꐚꐨꉀꐕ,ꏦꌬꎃꊒꌠꏦꀧ。ꏓꂱꃔꑼꀊꂥꇊꀊꂥꊐꌠꆏꍏꇩꈆꑪꇮꇐꑠꉼꌋꆀꌧꇐꅐꇐꌅꈌꏦꌬꀧꌋꃅꇷꃅꌠꎺꁱꄯꒉꇬꂓꁱꇬꄀꄉ,“ꑍꑼ”ꑼꌧ、ꌧꃀꁨꌊꈆꑪꇮꇐꅱꄻꌠꇖꊪꄟꃀꃅꄉ,ꌧꇐꅐꇐꌅꈌꍤꇽꌠꎁꃅꀑꁮꊋꃤꌌꊋꁈꄏꌠꇲꁵ。

  ꊋꀥꇱꄉꉇꉻꃆꂮꐥꌠ、ꇤꉪꄠꃆꂮꐥꌠꃣꈌꍤꇽꌋꆀꉇꉻꃆꂮꌤꃅ。ꏦꃤꇬꈴꄉꉇꉻꃼꇇꃅꊿꎆꇱꌠ、ꃼꇇꃅꌠꋍꑠꏟꃆꏈꑘꍤꀞ,ꐽꊯꃅꃼꇇꃅꎆꇱꌠꋦꈭꀧꌋꃅ,ꃔꑼꋍꊐꋑꀋꋒꌠꃅꉇꉻꃆꂮꐥꌠꃼꇇꌤꃆ、ꎿꇬꌤꃆ、ꎿꇬꃼꇇꃣꈌ20258ꐘꍤꀞꂫꇽ,ꋋꊭꌡꍆꌠꆏ0.83%ꉀꐕ。ꊋꀥꇱꄉꇤꉪꄠꃆꂮꐥꌠꃣꈌꍤꇽꌠꌤꃅ,《ꄠꃪꉹꁌꃼꇇꌤꃆꃆꂮꐥꌠꃣꈌꍤꀞꇬꏦꃤꌬꄉꄐꌠꌤꃆꃆꂮꏤꐪ》ꋍꑠꏦꌬꉉꀽꏤꄻꄉ,ꏦꃤꇬꈴꄉꑣꇤꃺꑌ、ꉪꂱꃺꑌ、ꄠꃪꃺꑌꏦꊒꌠꌅꈌꈲꁧꀧꌋꃅ。ꉇꉻꌤꃆꌤꃅꌠꊋꀥꇱ,ꊋꐛꃅꑸꄠꏦꌬꄺꀱꈋꍣꃀꇖꃢꀕꌠꀞꄻ,ꎮꉰꇷꃅꎀꍹꇬꐊꌠꇩꏤꃔꑼꀊꂥꇊꀊꂥꊐꌠꇬꑼꍈꐮꑌꑲꉺꏦꄻꐛꒆ,“ꏂꄿꇖꇩ”ꏦꌬꐮꑌꑲꌠꑭꄑꃅ,ꉪꊇꇩꏤꌋꆀꇩꉈꏦꌬꐮꑌꑲ、ꇷꃅꌠꊥꎆꄉ,ꍏꇩꏦꌬꐨꉾꃪꌠꄺꑣ。

  ꑍ、ꏦꃤꇬꈴꄉꑽꃤꐆꌠꅓꀞ,ꋭꋽꃅꐮꄙꐨꋊꎵ,ꐧꋦꐮꄮꎍꐽꌠꊥꎆ

  ꏓꂱꃔꑼꀊꂥꇊꀊꂥꊐꌠꆏꈍꄮꇬꑌꐧꋦꐮꄮꎍꐽꌠꊥꎆꌠꌌꑞꅉꁻꌐꃅꄉ,ꃅꄷꏓꂱꃔꑼꋍꊐꋑꀋꋒꌠꏦꃤꇬꈴꄉꅓꑘꑽꃤꐆꌠꅓꀞꌠꇬꄐꌐꌋꆀꍞꊟꄉ,ꇿꋌꐥꃅꐮꄙꐨꏟꃆꏈꑘꋊꎵꇧꎭ。

  ꇨꏯꐮꐊꐙꌠꅓꑘꏱꁈꌫꄻ,ꏦꃤꇬꈴꄉꅓꑘꑽꃤꐆꌠꅓꀞ。ꏓꂱꃔꑼꀊꂥꇊꀊꂥꊐꌠꆏ《ꇨꏯꐮꐊꐙꌠꅓꑘꏱꁈꌫꄻꃆꂮꉜꐨꈍꑋꈨ》ꏤꄻꄉ,ꌌꏓꂱꃔꑼꋍꊐꋑꀋꋒꌠꄐꂘꄉꎃꊒꃅꏦꃤꏱꁈꒃꌫ,ꏦꃤꇬꈴꄉꑽꃤꏤꅓꃤꎖ。ꃔꑼꋍꊐꋑꀋꋒꌠꋋꈓꇬꋍꊐꇇꈴꍤꀞꌠꅓꑘꃣꈌ779641ꐘꍤꀞꂫꇽ,ꑽꃤꐆꊿ1006420ꑹꌌꍞꇽ,ꋋꊭꌡꍆꌠꆏꂱꑱꅉꄉꇬ1.68%ꌋꆀ0.98%ꉀꐕ。ꏦꃤꇬꈴꄉꏦꇨꃅꋯꈐꋯꉈꐮꐚꊋꃤꁷꐞ、ꈏꃹ、ꆼꁏꋍꑠꇩꏤꋬꂻꌠꇬꉮꄻꌠꑽꃤꐆꌠꅓꀞ,ꐪꊛꄉꃹꅼꃅꀉꆈꌠꅥꄷꅠꌠꋊꌠꌐꄉꉈꈽꌠꃅ,ꏦꃤꇬꈴꄉꏦꇨꃅꊿꌉ、ꊿꐒ、ꊿꇏꋍꑠꀉꆈꃅꉹꁌꋬꂻꐨꇬꁧꏖꌠꊋꃷꇱꑽꃤꐆꌠꌋꆀꈏꄻ、ꇑꑣ、ꊏꀸꋍꑠꀉꑌꃅꇫꅐꌠꎆꇑꋙꑣꑽꃤꐆꌠꅓꀞ,ꏦꃤꇬꈴꄉꏦꇨꃅꀊꉘꀉꑳꈩꅉꀊꉘꀉꑳ、ꐧꐭꌶꌺꏭꉮꄻꌠꌋꆀꌋꅪꀊꉘꀉꑳꊏꃻꑽꃤꐆꌠꅓꀞ,ꇿꋌꐥꃅꀉꆈꃅꅓꑘꑽꃤꐆꌠꀑꉀꄓꌠꐛꄟꅥꍅꌠꆏ,ꐧꋦꊌꐨꇿꋌꉾꃪꃅꐥꀐ,ꃔꑼꋍꊐꋑꀋꋒꌠꆏꄚꂴꉉꌠꃣꈌꋋꈨ265397ꐘꍤꀞꂫꇽ,ꑽꃤꐆꊿ370452ꑹꌌꍤꇽ,ꋋꊭꌡꍆꌠꆏꂱꑱꅉꄉꇬ0.70%ꌋꆀ1.24%ꀁꋌꊰ。ꏣꀋꑌꃅꍹꈔꁎꄻꉈꈽꌠꃅꈽ,ꏦꃤꇬꈴꄉꏦꇨꃅꃴꎆꋠꃴꎆꍈ、ꄉꅍꃅꄸꑽꃤꐆꌠꅓꀞ,ꃣꈌꋌꉹꌠ27751ꐘꍤꀞꂫꇽ,ꑽꃤꐆꊿ28652ꑹꌌꍤꇽ,ꋋꊭꌡꍆꌠꆏꂱꑱꅉꄉꇬ7.10%ꌋꆀ9.25%ꉀꐕ。ꏦꃤꇬꈴꄉꐮꈴꈄꏍꇬꈴꄉꅀꇇꌌꄆꅇꌌꄉꎲꃆꎲꂮꈴꌗꄺꑣ、ꐒꄻ、ꄜꁊꑷꐆꌠꅥꍅ,ꐧꋦꋦꈭꄻꁦꎴꃅꄉ。ꎆꃀꀊꆠꌠꄺꑣ、ꏦꃤꇬꀋꊒꃅꎆꏓꌠꌋꆀꇩꏤꎆꅐꄉꌠꎆꏂꑘꇬꄉꅍꑽꃤꐆꃣꈌꋍꑠꀞꄻꌠꃆꂮꏦꌬꉉꀽꏤꄻꄉ,ꏦꃤꇬꈴꄉꃔꀾꊫꌐꀊꆠ、ꎆꃀꀊꆠ、ꃼꇇꑘꃴꎆꍈꃴꎆꋠ、ꎆꃀꊫꌐꄡꃷꎊꈬꑽꃤꐆꌠꅥꍅꄉ,ꉾꃪꌠꃷꎏꎆꏣꐥꀹꀧꌋꃅ。《ꊨꏦꀱꑽꃤꉉꄜꇁꌠꌋꆀꑆꊋꐥꌠꀞꄻꌠꐘꄜꌤꃆꃆꂮꉜꐨꈍꑋꈨ》ꏤꄻꄉ,ꊨꏦꀱꑽꃤꉉꄜꇁꌠ、ꑆꊋꐥꌠꏚꍆꎕꏦ、ꊫꌐꍤꄻꈭꎁꌋꆀꏯꄉꅓꀞꐨꋊꍬ。《ꋒꐯꋒꃅꅓꑘꍤꇽꌅꊋꂿꄐꋊꇤꃹꅼꃅꐧꋦꐮꄙꐨꋊꎵꌠꃆꂮꄹꎆꌠꉜꐨꈍꑋꈨ》ꏤꄻꄉ,ꐧꋦꐮꄙꐨꋊꎵꌠꌌꅓꑘꍤꇽꌠꋍꑞꋍꑵꈭꊭꇬꇱꄉ。ꏣꀋꑌꃅꐧꋦꋬꂻꏓꇱꏱꄻꌠꌋꆀꋬꂻꑘꒃꀹꄻꌠꌤꃅꈽ,ꃹꅼꃅꀊꉘꌠꏀꏭꏦꌬꌠꄹꏦꄺꀱ,ꐧꋦꇬꄉꎇꎆꄉꀧꌋꃅ、ꒆꆹꀋꑟꌠꊿꀊꐎꃅꑽꃤꐆꌠꑽꐪꎺꁱꄉꌠꇤꇧꎭꌠꄹꏦꋍꑠꃄꄟꎹꎥ。ꏦꇨꃅꅓꃤꊨ、ꃑꄻꉚꌤꃅꌠꋊꍬ,ꅓꃤꊨ、ꃑꄻꉚꌠꐽꊯꎃꊒꌠꎥꃪ。ꏣꀋꑌꃅꊿꐋꀋꌡꌠꇇꀨꂘꄻꏲꂠꌠꃅꈽ,ꄚꃆꂮꐥꌠꌤꃅꅉꌋꆀꐯꇯꄉꌌꋥꁕꁳꄺꀱꎻꌠꋍꑠꌤꃅꌠꄹꎆ。

  ꅇꎹꉉꋊꈺꑣꌠꊋꀥꇱ,ꐮꄙꐨꏟꃆꏈꑘꀉꑌꑵꃅꂥꀘꌠꉺꏦꋈꄻꌠꄹꎆ。ꏓꂱꃔꑼꀊꂥꇊꀊꂥꊐꌠꆏ《ꀒꁨꋍꁘꃅ“ꉉꋊꈺꑣꌠꄻꂴꄉ、ꉉꋊꈺꑣꍞꇽꌠꐯꇯꃅ”ꌠꌤꃅꏥꏦꌫꄻꃆꂮꉜꐨꈍꑋꈨ》ꏤꄻꄉ,ꃔꑼꋍꊐꋑꀋꋒꌠꇬꄐꌐꄉꀊꅰꃅꉾꃪꃅꉉꋊꈺꑣꇇꁈꌬꄉꐮꄙꐨꉉꋊꈺꑣ,ꊋꇤꄉꃣꈌꂫꇽꌤꃆꑍꈤꊿꐮꄮꌠꃅꇫꑟ。ꏦꊒꊨꏦꉌꃹꌠꏥꏦꌭꈬꇬꎷ,ꏦꃤꇬꈴꄉꌌꉉꋊꈺꑣꉆꌠ、ꃣꈌꃆꂮꇬꄉꉉꋊꈺꑣꄎꌠ、ꉉꋊꈺꑣꀞꄻꇿꋌꀊꅰꃅꉾꃪꌠꃣꈌꆏ,ꂴꆏꉉꋊꈺꑣꌠꃄꄟꌌꄉꏟꃆꏈꑘꂥꀘ,ꃔꑼꋍꊐꋑꀋꋒꌠꇬꋍꊐꇇꈴꍤꀞꌠꉹꁌꃼꇇꌤꃆꃣꈌꉉꋊꈺꑣꄉꅇꎹꐆꈪꐨꆏ65.29%ꇬꑟ,ꋋꊭꌡꍆꌠꆏꉐꊮꌺ3.31ꂷꉀꐕ。ꊋꋧꄉꃣꈌꋉꌠ、ꍤꇽꌠ、ꃄꌬꌠꈁꉬꈴꎁꇬꃅꐊꌠ,ꅓꑘ、ꉹꁌꌤꃆ、ꏲꑘ、ꃄꌬꌠꋍꑞꋍꑵꁁꏯꃅꉱꑷꌠꉉꋊꈺꑣ、ꋮꄮ、ꉉꄮꌤꃅꉺꏦꏓꄻ,ꅓꑘꃣꈌꀊꐎꌠꉉꄮꌤꃅꌠꊋꀥꇱ,ꅓꑘꇬꉹꁌꌤꃆꇫꐊꌠꃣꈌꉉꋊꈺꑣꊋꃤꁦꎆꇱ,ꏣꀋꑌꃅꃄꌬꃣꈌꉉꄮꌠꃅꐛ,ꄾꌦꋩꃅꉉꋊꈺꑣꌠꇬꈴꄉꐮꄙꐨꏟꃆꏈꑘꋊꎵꇧꎭ。ꉉꋊꈺꑣꌤꃅꌠꋊꍬꌠꉜꁨ,ꎃꊒꃅꉉꋊꈺꑣꍞꇽꌠꐮꃆꂮꂥꀘ,ꉉꋊꈺꑣꀋꋭꌠꌋꆀꉉꋊꈺꑣꀋꐛꌠꆏ,ꐳꃅꌌꏦꃤꇬꈴꄉꍞꇽ。ꊋꀥꇱꄉꅇꎹꌠꌋꆀꅇꎹꌠꀋꉬꌠꌌꐯꊛꌠꐮꄙꐨꏟꃆꏈꑘꂥꀘꉺꏦꋈꄻ,ꏓꂱꉉꋊꈺꑣꎀꍹ、ꐧꋦꏓꉻ、ꇑꌦ、ꌧꃀ、ꇢꆣꇽꏲꉻꂿꄐꋊꇤ,ꃔꑼꇬꄉꏓꂱꉉꋊꈺꑣꌤꃅꅉꄻꄉꌠꋍꑠꃄꄟꇬꈴꄉ,ꌢꆈꄐꏁꄉꐤꅉꇬ、ꈛꑌꅉꇬꄉꅇꎹꌠꀋꉬꌠꃄꄟꈴꄉꏟꃆꏈꑘꂥꀘ。ꏣꀋꑌꃅꏓꂱꉉꋊꈺꑣ、ꏲꑘꉉꋊꈻꑣ、ꏦꌬꉉꋊꈺꑣꌠꄻꐯꇯꄉꌠ“ꀊꐯꈭꃅꉉꋊꈺꑣ”ꌠꌤꃅꉻꑫꋈꄻꌠꄹꇙ,ꋋꌕꑵꐮꇢꊭꇬꈭꎁꐯꊛ、ꇿꋌꍝꊋꏚꍆ、ꏦꃤꄐꌐꋍꑠꁁꏯꋮꄮꃅꐮꐊꃅꌠꊋꀥꇱ,ꐯꇯꄉꐧꋦꐮꄙꐨꋊꎵ,ꐧꋦꐮꄮꎍꐽꌠꊥꎆ。

  ꏦꃤꇬꈴꄉꉹꁌꅇꎹꌅꈌꀧꌋꃅ,ꏲꑘꍤꇽꌠꌋꆀꇩꏤꀵꊒꌤꃅꑲꌧꐨꉀꐕ。ꃔꑼꋍꊐꋑꀋꋒꌠꃅꎔꎗꃅꏓꂱꃔꑼꀊꂥꇊꀊꂥꊐꌠꇬꏤꄻꄉꌠ《ꏦꃤꇬꈴꄉꏲꑘꅇꎹꌢꆈꅇꎹꌅꈌꀧꌋꃅꌠꃆꂮꉜꐨ》ꌫꄻ,ꏲꑘꅇꎹꈴꈜꎵꃪꁣꀋꐥꃅꄉ,ꐯꇯꄉꏲꑘꃣꈌ135679ꐘꊪꀞ,129806ꐘꍤꀞꂫꇽ,ꋋꊭꌡꍆꌠꆏꂱꑱꅉꄉꇬ6.77%ꌋꆀ7.70%ꉀꐕ。ꏓꋧꄉꏲꑘꑗꇖꃣꈌꌐꄉꍤꀱꃅꈧꌠꃅ,ꃣꈌꈋꍣꍤꄻ、ꉈꑴꌌꍤꄻꄻꀱꑽꌠꌌꄺꀱꋍꑠꌤꃅꌠꇬꈴꄉ,ꋭꋽꃅꏲꑘꑗꇖꃣꈌꈨꌌꀞꄻꀐ。ꎔꎗꃅꌌꄺꀱꄉꌠꇩꏤꀵꊒꏦꃤꌫꄻ,ꐳꃅꌤꃅꉜꐨꄻꅐꇁꇈ,ꌌꇩꏤꀵꊒꃣꈌꊪꀞ、ꍤꀞ、ꐰꏤ、ꈭꋏꌠꌋꆀꃄꌬꌠꋍꑠꌤꃅꌠꏭꐊꑷꃅꄐꇺꄉ,ꇩꏤꀵꊒꌤꃅꌠꐛꒆꃅꊱꁨꃅꃅꌠꄹꎆ。

  ꌕ、ꏣꀋꑌꃅꏓꂱꉹꁌꇫꉈꇬꌠꌋꆀꉘꇉꌠꊜꄻ,ꏦꃤꇬꈴꄉꏓꂱꌅꈌꈲꁧꀧꌋꃅ

  ꏓꂱꃔꑼꀊꂥꇊꀊꂥꊐꌠꆏꈍꄮꇬꑌꊿꌌꀨꇬꄉ、ꏓꂱꎁꃅꏦꌬꌠꉪꉻꌭꈬꃅꄉꇬꎷ,ꃅꄷꇬꏓꂱꃔꑼꋍꊐꋑꀋꋒꌠꇬꄐꌐꌋꆀꍞꊟꄉꎔꎗꃅꅇꎹꊋꃄꌬꊋꌠꌤꃆꂥꀘ,ꏣꀋꑌꃅꏓꂱꉹꁌꊨꏦꑴꅉꏦꊒꌠꌅꈌꈲꁧꀧꌋꃅꌠꏭꉈꇬꌠꌋꆀꉘꇉꌠꊜꄻ。

  ꏦꃤꇬꈴꄉꋭꋽꃅꉹꁌꐥꐨꇬꃆꂮꐥꌠꋍꑠꃣꈌꍤꀞ。ꀊꂥꃅꉹꁌꀀꑳ、ꃅꑘꎹꌠꋍꑠꌤꃆꏭꉇꇬꌠꇬꉜꁨ,ꏦꃤꇬꈴꄉꋭꋽꃅꑳꇤꃼꃷꌠ、ꑘꃅꏟꃆꏈꑘꋍꑠꃣꈌꀞꄻ。ꋭꋽꃅꃝꐨꑷꈓ、ꊿꈯꄿꁨꇐꐮꃆꂮꋊꐽ,ꌋꅪ、ꀉꑳ、ꃀꌠꏦꊒꌠꌅꈌꈲꁧꀧꌋꃅꌠꉜꁨ,ꃔꑼꋍꊐꋑꀋꋒꌠꃅꃝꇔ、ꉗꄻ、ꊪꊛꋍꑠꃝꐨꑷꈓꃣꈌ1428340ꐘꍤꀞꂫꇽ,ꋋꊭꌡꍆꌠꆏ3.45%ꉀꐕ;ꊿꈯꄿꉮꄻꀵꊒꃣꈌ779340ꐘꍤꀞꂫꇽ,ꋋꊭꌡꍆꌠꆏ22.71%ꉀꐕ。ꏦꃤꇬꈴꄉꋭꋽꃅꂿꑘꊿꇮꃅꇁꌠꃄꎆꄯꎝ、ꂿꑘꁡꇤꃄꅉꀧꃅꀰꏢ、ꏦꃤꇬꀋꈴꃅꄉꋠꃅꍆꌬꌠꋍꑠꃣꈌꍤꀞ,ꏣꀋꑌꃅꂿꑘꌬꇐꃶꀋꐚꌠꅥꍅꌐꐘꏱꄻꃅꈧꌠꇬꃅꈽ,ꃶꐚꃅꂿꑘꊿꏦꊒꌠꌅꈌꈲꁧꀧꌋꃅ,“ꌕꂿꑘ”ꇬꃆꂮꐥꌠꃣꈌ238913ꐘꍤꀞꂫꇽ,ꋋꊭꌡꍆꌠꆏ3.02%ꉀꐕ。ꏦꃤꇬꈴꄉꋠꇐꁬꋌꋬꂻꐨꉮꄻꌠ、ꃷꇐꃶꀋꐚꄷꅠꌠꄺꑣꃷꄻꑽꃤꐆꌠꌌꀉꆈꃅꅓꀞꄉ,ꉹꁌꀑꇬꁨꇐꋬꂻꌠꀧꌋꃅ。ꏓꂱꃔꑼꀊꂥꇊꀊꂥꊐꌠꆏ《ꀒꁨꋍꁘꃅꊋꀥꇱꄉꏓꂱꃔꑼꂽꏂꃆꂮꐥꌠꃣꈌꍤꇽꌤꃅꃆꂮꅇꇰ》ꄜꃑꄉ,ꌌꃔꑼꋍꊐꋑꀋꋒꌠꏭꄐꇺꄉꋭꋽꃅꂽꏂꇬꃆꂮꐥꌠꃣꈌꍤꀞꎻ,ꏦꃤꇬꈴꄉꇩꐏꈲꏣꌋꆀꂽꇜꂽꑼꑱꈐꊿꏦꊒꌠꌅꈌꈲꁧꀧꌋꃅ。

  ꃶꐚꃅꊋꀥꇱꄉꏦꌬꇬꉹꁌꁳꃅꌒꎻꌠꌤꃅ。“ꃣꈌꋈꅉꑗꇖꈨꂟꅉ”ꋈꄻꌠꊋꀥꇱꌋꆀꋊꍬ,ꀨꇬꆼꎍꐨꇔꅲ、ꁧꃤꃅꐨꅇꏤꒃ、ꌤꀞꄇꄜꋊ、ꌧꑳꃅꊩꏦ、ꃅꈉꆼꎍꃅꎁꋍꑠꄹꏦꄺꑣꐛꒆ,ꅇꎹꄐꏁ、ꍤꅲꍤꄻꁧꃤꃅꌠꄺꀱ,ꑗꇖꈨꂟꇁꌠꊩꏦꉁꈾꄻꃪꃅꄉ,ꉹꁌꎁꃅꉾꃪꌠꅇꎹꋦꈭꇲꁵ。ꊋꀥꇱꄉꃅꋮꈛꎴꌠꅀꈭꈜꈴꀋꌒꌠꃅꄷꏓꂱꃔꄜꋈꄻ,ꄚꃆꂮꐥꌠꃣꈌꊼꇅꏓꋧꄉꅏꅉꃅꈋꇬꄉꑘꃅꅔꀥ、ꎆꒉꎆꇁꋍꑠꌐꁨꋮꇖꅉꅀꍤꇽꅉꄻꄉ,ꇢꅉꎴꃅꃣꈌꋉ、“ꋍꈚꇬꄉ”ꁧꃤꃅꌠꋍꑠꏁꁈꁊꌬ,ꏣꀋꑌꃅꈄꏍꇬꄉꂴꄐꏤꄉꃣꈌꋉ、ꌞꎭꇫꑟ、ꃔꄜꇬꄉꍤꇽꋍꑠꃄꄟꎹꎥ,ꉹꁌꎁꃅꅇꎹꑗꇖꈨꂟꌒꌠꇲꁵ。《ꊋꀉꒉꃅꅐꄉꏮꐺꄉꍤꇽꏓꂱꉹꁌꁳꑗꇖꈨꂟꌒꎻꌠꁊꌬꃆꂮꉜꐨ》ꏤꄻꄉ,ꏮꐺꄉꍤꇽꌤꃅꌠꄹꏦꈴ、ꋊꍬꈴꌠꄹꎆ,ꀊꅰꃅꉾꃪꃅꃹꅼꃅꅉꃀꊐꌠꇬꄉ,ꉹꁌꇬꁧꃤꃅ。ꏓꂱꃔꑼꀊꂥꇊꀊꂥꊐꌠꏓꋍꃱꃅꄉꌠꇖꐨꇬꈴꄉ,ꇩꏤꑭꊂꀊꏀꃅꋈꄻꄉꌠꍤꇽꃔꄜ693ꂷꌋꆀꏓꂱꃔꄜ600ꎖꂷꆏꑴꏢꅍꀋꐥꌠꉁꈾꋈꄻꌠꃅꌐꄉ,ꄣꅐꌠꊿꁳꅇꎹꌒꎻꀐ。ꊋꀥꇱꄉꏦꌬꈭꋏꌠꌤꃅ,ꇯꍝꃅꊋꋠꐨꐥꌠꌢꆈꎁꃅꅇꎹꌫꁌ9656.47ꃪꂷꊨꏆꇧꎭ,ꋋꊭꌡꍆꌠꆏ41.51%ꁦꎆ。

  ꀊꂥꃅꅇꎹꑗꇖꈨꂟꃆꂮꐥꌠꌤꃆꂥꀘꌠꉜꁨ。ꅇꎹꑗꇖꈨꂟꃆꂮꐥꌠꃣꈌꂥꀘꌠꌌꉹꁌꇬꑌꑲ、ꉹꁌꉪꐨꅱꄻ、ꉹꁌꐒꃆꋊꑣꇧꎭꌠꀋꂿꑘꌠꈴꈜꃅꄉꇬꎷ,ꏦꃤꇬꈴꄉꉹꁌꑗꇖꈨꂟꌠꇬꄉꄛꑣꅐꇁꌠꌤꃆꂥꀘ。ꎔꎗꃅꋒꃅꏓꋧꄉꅇꎹꑗꇖꈨꂟꃣꈌꏓꁧꇧꎍꌠꌩꎴꌠꌤꃅ,ꏓꂱꃔꑼꀊꂥꇊꀊꂥꊐꌠꆏꋮꇖꄜꌋꆀꃣꈌꍤꄻꀱꌠꊤ12ꂷꁆꌌꄉ,ꑗꇖꈨꂟꌤꃆꊼꇅꑓꅐꎏꌠꃅꄷꃔꑼꇇꀨꄉꑗꇖꈨꂟꃣꈌꏓꁧꇧꎍꌠꌩꎴꎻꀐ。ꅇꎹꑗꇖꈨꂟꃣꈌꂫꇽꏡꁈꏤꄻꄉ,ꏲꌋꇥꀯꄮꈉꏤꄉꑗꇖꈨꂟꇁꌠꊩꏦ、ꏦꇜꃣꈌꌌꄉꀁꋌꅱꄻꒉ、ꏮꐺꄉꑗꇖꈨꂟꌠꊩꏦꋍꑠꃄꄟꌭꈬꃅꄉꌌꃅꇬꎷ,ꄾꌦꋩꃅꌤꃆꄻꅉꂫꊐꌠꇬꄉꂥꀘꋊꎵꇧꎭ。ꇇꋍꁆꆏꃣꈌꏓꁧꇧꎍꌠꋊꎵ,ꇇꋍꁆꆏꍤꇽꊇꁧꒃꉇ,ꋓꉪꁨꄉꇁꀦꇬꄉꅇꎹꑗꇖꈨꂟꌠꇬꃆꂮꐥꌠꃣꈌꊨꎴ,ꃔꑼꋍꊐꋑꀋꋒꌠꋋꈓꇬꑗꇖꈨꂟꇁꌠꊿ1066687ꑻꃢꊩꏦ,ꋋꊭꌡꍆꌠꆏ21.43%ꀁꋌꊰ。

  ꊋꇤꄉꃄꌬꊋꌠꌤꃆꀺꂵꂥꀘ。ꏓꋧꄉꃄꌬꃣꈌꏓꁧꇧꎍꌠꌩꎴꌠꃅꈧꊌꐨꌭꈬ,ꏣꀋꑌꃅꃄꌬꊋꌠꌤꃆꋊꎵꌠꀊꉘꃅꇿꋌꐥꌠꉺꏦꄺꑣꌠꄹꇙꂿꄷꄉ,ꏓꂱꃔꑼꀊꂥꇊꀊꂥꊐꌠꆏ《ꌌꃄꌬꎻꌠꊿꀊꂥꃅꌬꈧꌠꏢꑲꃆꂮꏤꐪꈍꑋꈨ》ꏤꄻꄉ,ꍏꑷꌋꆀꇩꏤꌤꏲꅉ19ꂷꌋꆀꐯꇯꄉ《ꃄꌬꏓꇙꉺꏦꄺꑣꌋꆀꄺꑣꐛꒆꌠꃆꂮꉜꐨꈍꑋꈨ》ꄜꃑꄉ,ꐧꋦꉌꒊꉻꑫꋈꄻꌠꄹꎆ,ꀑꐱꃅꃄꌬꊋꌠꌤꃆꏓꇱꏱꄻꌤꃅꐛꏦꏓꄻꐛꄉꀐ。ꀒꁨꋍꁘꃅꊋꀥꇱꄉꃄꌬꌤꃅꌠꋊꍬꈴꌠꋈꄻ,ꃄꌬꈴꌗꍤꅲꄹꏦꄻꐛꒆ,ꃄꌬꌅꈌꀂꏽꈏꇓꍞꊟꋏꆸꌠꄻꀉꇨꃅꄉ,ꀋꂿꑘꃅꏣꈩꄉꃄꌬꌠꋍꑠꌤꃆꂥꀘꇧꎭ。ꋒꐯꋒꃅꍞꊟꄉꃄꌬ、ꊐꐕꄉꃄꌬ、ꌐꄉꃄꌬꌠꋍꑠꃄꄟꇬꈴꄉ,ꀋꆏꃅꃄꌬꌠꊇꁧꌋꆀꇿꋌꉀꐕ。“ꃄꌬꃣꈌꏓꁧꇫꀋꎍꌠꂴꅑꌠꃔꑼ”ꄺꑣꃅꈧꌠꌋꆀꊋꁠꄉꃄꌬꌠꃣꈌꏓꋧꄉꌩꎳꌠꃅꈧꌠꃅ,ꊋꇤꄉꉾꃪꃅꃄꌬꊋꌠꌤꃆꋊꑣꌠꌤꃅꉺꏦꏓꐛꄉ。ꋍꈓꅑꅸꇁꌠ,ꃔꑼꋍꊐꋑꀋꋒꀊꏀꃅꎴꅜꌠꃣꈌ2508242ꐘꃄꌬꂫꇽ,ꋋꊭꌡꍆꌠꆏ2.54%ꉀꐕ;ꃄꌬꌐꁧꑞꅉꇬꑟꐨꆏ73.82%ꇬꑟ,ꋋꊭꌡꍆꌠꆏꉐꊮꌺ8.22ꂷꉀꐕ。

  ꇖ、ꐪꊛꄉꏦꌬꄺꀱꌠꄹꎆ,ꏦꌬꎃꊒꌠꀧꌋꃅ

  ꄈꍏꑷꏓꋍꃱꃅꄐꇺꌠꇬꈴꄉ,ꏓꂱꃔꑼꀊꂥꇊꀊꂥꊐꌠꆏꍏꇩꐛꐨꐧꋦꉪꏦꏦꌬꄹꏦꌭꈬꃅꄉꇬꎷ,ꃅꄷꇬꏓꂱꃔꑼꋍꊐꋑꀋꋒꌠꇬꄐꌐꄉꑖꑟꃅꏓꂱꉹꁌꁊꈴꃅꇫꉈꇬꌠ、ꏦꌬꎃꊒꌠꇬꁧꏖꇁꏭꐛꌠꌤꃆꄺꀱꌠꇬꄹꎆꌠꇬꆼꒆꄉ,ꀒꁨꋍꁘꃅꊋꀥꇱꄉꏦꌬꄇꄜꋊ、ꏦꌬꋯꁦ、ꏦꌬꍞꊟꋍꑠꄹꏦꋈꄻ。

  ꏦꌬꄇꄜꋊꌠꌋꆀꏦꌬꋯꁦꌠꄹꎆ。ꎔꎗꃅꏓꂱꃔꑼꀊꂥꇊꀊꂥꊐꌠꇬ《ꏦꌬꄇꄜꋊꌠꃆꂮꏤꐪꃘꐘ》ꌠꌫꄻꇫꑟ,ꀒꁨꋍꁘꃅꃣꈌꋉ、ꃔꄜꇬꄉꍤꀞ、ꃄꌬ、ꅱꊪ、ꁰꀕꄯꒉ、ꍤꀞꌤꃆꃘꁁꏯꀋꎪꃅꌌꄇꄜꋊꌶꌠꐊꇐ、ꈭꎁꌋꆀꏡꁈꊨꄅꄉ。ꏓꂱꃔꑼꀊꂥꇊꀊꂥꊐꌠꆏꇫꇬꃢꌠꏓꂱꃔꑼꌤꃅꌠꈎꈭꏝꅇꄜꌠꄜꃑ,ꐊꑷꃅꏲꃆꈄꏍꍉꄺꀱ,ꏦꌬꄇꄜꋊꌠꀊꐯꐨꌋꆀꃹꅼꐨꍔꐯ。ꉹꁌꃔꄜꇬꍤꀞꌠꅲꈽ、ꍞꇽꁰꀕꄯꒉꈄꏍꇬꄉꄜꃑ、ꅇꎹꄉꉣꄯꒉꍤꅲ、ꃔꄜꍤꀞꃅꈧꌠꃚꈢꒌꒃꋍꑠꄹꏦꄻꐛꒆ,ꏦꌬꄇꄜꋊꌠꊥꎆꌠꎁꃅꄹꏦꏦꀧꌠꇲꁵ。“ꏦꌬꄇꄜꋊꌡꀠꃔꑼ”100ꂷꌐꄉ,ꃅꄷꇬꃔꑼꈧꌠ“ꁤꇅꀕꃅꏦꌬ”ꌠꃅꐨꎖꋪꃄꄟꏓꈹꁊꌬ,ꏦꌬꄇꄜꋊꌠꋊꍬꈴꌠꄹꎆ。ꇩꏤꑭꊂꇬꄉ“ꏦꌬꄇꄜꋊꄜꉺꆪ”ꃅꈧꌠꃅ,ꋒꐯꋒꃅꐧꋦꇢꈴꄜꇬꈴꄉ,ꏓꂱꃔꑼꌤꃅꌠꄜꉺ,ꏦꌬꌤꃅꂿꐚꐨꁦꎆꇱ。ꀒꁨꋍꁘꃅꏓꂱꇫꐊꍤꀞꈽꊿꄹꏦꄻꐛꒆ,ꍤꇽꃅꈧꈽꌠꈍꈐꍔꐯ,ꏓꂱꇫꐊꍤꀞꈽꊿꋋꈓꃅꇬꍤꇽꈽꌠꃣꈌ912177ꐘꐥ,ꋋꊭꌡꍆꌠꆏ44.33%ꉀꐕ,ꇿꋌꐥꃅꏓꂱꉹꁌꏦꌬꈽ、ꏦꌬꍞꊟꌠꂿꄐꀋꂿꑘꌠꋊꇤꀐ。

  ꃶꐚꃅꏦꌬꎃꊒꌠꀧꌋꃅ。ꍤꇽꏲꂠꌠꏀꀺꌠꌋꆀꊋꀥꇱꌠꆹ,ꏦꌬꎃꊒꌠꀧꌋꃅ、ꏦꌬꑲꌧꐨꉀꐕꌠꇇꁈꀋꂿ꒧ꌠꉬ。ꏓꂱꃔꑼꀊꂥꇊꀊꂥꊐꌠꆏꍤꇽꏲꂠꌤꀞꅉꄻꐛꄉ,ꊋꀥꇱꄉꍤꇽꈭꎁꌋꆀꃣꈌꀞꄻꊇꁧꑘꅐꐨꏭꏲꂠꍞꊟ。ꐊꑷꃅꅓꃤꎕꑣꋊꍬꈴꌠꄺꀱꌠꄹꌬ,ꅓꃤꎕꑣꈭꎁꇗꏦꏤꄻꄉ,ꐛꊈꏤꄉꎥꃪꌠꌋꆀꃷꁨꏤꄉꎥꃪꌠꄻꐯꇯꄉꌠꅓꃤꎕꑣꏡꁈꏤꄻꄉ,ꏦꇜꎕꇽꌠꌅꈌꋊꍬ,ꅓꃤꎕꑣꐽꊯꎃꊒꌠꊥꎆ。ꅓꑘꊫꄲꄻꏦꄻꐛꒆ,ꍏꑷꍔꃔꌤꏲꅉꌋꆀꐮꐊꄉ《ꌉꅓꃤꀵꅓꌠꃣꈌꀞꄻꇬꊫꄲꍤꄻꊨꇽꌠꃆꂮꏤꐪꈍꑋꈨ》ꌋꆀ《ꅓꑘꃣꈌꀞꄻꇬꏦꃤꇬꀋꊒꌠꊫꄲꋊꇤꇧꎭꌠꃆꂮꏤꐪꈍꑋꈨ》ꏤꄻꄉ,ꅓꑘꃣꈌꈜꀕꇈꌉꅓꃤꀵꅓꌠꃣꈌꊩꀽꌐꏦꄻꏦꇨꃅꄉ,ꅥꇤꏖꄁꈌꏢꉐꇋꋍꑠꏦꃤꇬꀋꊒꌠꇇꁈꌌꄉꊌꅜꌠꅇꌸꊿꈌꄜꅇꆏꌌꃣꈌꏤꄻꌠꊫꄲꃅꀋꉆꄷꊨꄅꃅꏤꄻꄉ,ꅓꑘꃣꈌꍤꇽꊇꁧꄉꀧ。ꉹꁌꌤꃆ、ꏲꑘꅇꎹꄹꏦꄺꀱꌠꄹꎆ,ꃷꁨꀀꊭꌠꃣꈌꇤꐳꃅꌌꏤꇽꌠꌋꆀꏲꑘꅇꎹꈭꎁꄻꈝꀋꐯꃅꄉꌠꃅꉚꌠꃅ,ꃣꈌꊋꋠꌠꌌꅧꌃꃅꍤꀞ、ꃣꈌꈝꀋꐯꌠꌌꐳꃅꀞꄻꂫꇽꌠꃅꇫꑟ。《ꃣꈌꌡꀠꄐꌐꌤꃅꃆꂮꏤꐪ》ꏤꄻꄉ,ꐳꃅꃣꈌꊥꋦꌡꀠꌌꄜꃑ,ꊋꀥꇱꄉꃣꈌꊋꋠꌼꇪꌠꏭꍤꇽꄐꌐ。ꀱꍤꀱꌤꃅꌠꊋꀥꇱ,ꃔꑼꋍꊐꋑꀋꋒꍤꀱꌠꃣꈌ46214ꐘꍤꀞꂫꇽ,ꂴꍤꇽꄉꌠꇯꍝꃅꍤꇽꑽꌠꅀꀉꁁꏦꃤꇬꏤꄉꌠꁢꊧꒉꄸꃅꌌꍤꇽꀱꌠꃣꈌ11729ꐘꐥ,ꏤꇽꍝꐨꐥꀐꌠꇬ0.17%ꍆ。

  ꀒꁨ꒔ꁘꃅꊋꀥꇱꄉꅉꂫꊐꌠꅉꃀꌤꃅ。ꏟꈯꀕꃅꄈꊈꏃꂠꌠꌋꆀꏓꄊꍞꊟ、ꍔꃚꊋꁈꄏꌠꇬꉘꇉꄉ,ꎔꎗꃅꍔꃔꌤꃅꊿꃷꁨꏤꄻꁆꄻꌤꃅꌠꇬꃅꈽ,ꏣꀋꑌꃅꏦꇜꎹꌬꉘꉚꏦꉻꌋꆀꏦꌬꎖꉚꄺꀱꌠꄹꎆ,ꃶꐚꃅꃅꄷꃔꑼꈨꇬꏦꇜꈎꆪꀋꑟꃅꃅꈉꐞꄉꅍꐞꌠꌤꂮꂥꀘ,ꅉꂫꊐꌠꃣꈌꀉꑌꌤꃅꊿꀁꑌꌠꐮꄙꐨꄯꑣ。ꍔꃔꌫꎆꏦꀧꏦꉻꄺꀱꌠꄹꎆ,ꇫꇬꃅꃔꑼꌫꎆꏦꀧꄹꏦꉻꑫꄻꐛꄉ。ꊋꀥꇱꄉꃔꑼꈴꌗꈴꌠꋈꄻ,ꇇꄀꄉꏓꂱꃔꑼꄆꌅꏲꃆꐘꃆꋈꄻ。ꃔꄜꋈꄻꎕꏦꌌꄺꀱ,ꀒꁨꋍꁘꃅꅉꂫꊐꌠꏦꌬꇎꏦꄻꃪ。ꏓꂱꃔꑼꑭꊗꇇꀨ、ꑟꏦꇇꀨꌠꄐꌐꉜꐨꏤꄻꄉ,ꐊꑷꃅꌧꊿ、ꃅꑘ、ꐥꇐꌌꇇꀨꌤꃅꌠꊋꀥꇱ。

  ꉬ、ꏟꈯꃅꃔꑼꌤꃅꊿꁥꌠꋈꄻꌠꇬꈭꊭꀋꉬꀋꉆꌠꒃꌫꄉ,ꀒꁨꋍꁘꃅꏦꌬꄐꊋꌋꆀꌧꐨꉀꐕ

  ꌤꃅꊿꁥꌠꋈꄻꌠꆹꈍꄮꇬꑌꏓꂱꃔꑼꌤꃅꌠꇬꁢꊧꉬ。ꏓꂱꉹꁌꄜꎼꇁꌠꏦꇜꌤꃅꌠꇬꌋꆀꃅꇏꀂꏽꇫꐥꌠꌤꃆꇬꉜꄉ,ꏓꂱꃔꑼꀊꂥꇊꀊꂥꊐꌠꆏꃅꄷꇬꏓꂱꃔꑼꋍꊐꋑꀋꋒꌠꇬꄐꌐꄉꃹꅼꃅꄞꅐꌠꄻꉾꃪꌠꅔꃅꌠꃅꈧꌠꌋꆀ“ꏓꂱꏦꇜꏓꂱꎁꃅ”ꌠꅇꀨꃄꄻꌠꃅꈧꌠꃅ,ꊋꀥꇱꄉꄐꊋ、ꃅꇏ、ꐙꎴꋈꄻꌠꀂꏽꊋꃤꀉꇨꃅꇱꄻ,ꊋꇤꄉꃔꑼꌤꃅꊿꁥꌠꉻꄜꊇꁧꉀꐕ。

  ꊋꋧꄉꏦꌬꄐꊋꉀꐕ。ꊥꇫꄉꌤꃅꊿꈁꐥꌠꏭꁰꍋꌠꃅ,ꏦꇜꎃꊒꃅꏦꃤꌬꉆꌠꌌꌬꑲꌧ、ꐧꋦꐮꄙꐨꉉꋊꈺꑣꇧꎭꑲꌧꌠꄐꊋꉀꐕ。ꏓꂱꃔꑼꀊꂥꇊꀊꂥꊐꌠꆏꐧꀠꊐꌠ、ꅉꂫꊐꌠꃔꑼꑼꍈ3622ꑻꌌꏭꆦꄉꁰꍋꌠꃅꌐꇈ,ꃔꑼꑼꍈꌅꊋꌫꄻꄐꊋꉀꐕꀐ。ꇩꏤꑭꊂꀊꂥ、ꐧꀠꊐꌠꃔꑼꅓꑘꏱꁈꇨꏯꐮꐊꐙꌠꃄꌬꌠꊿꄙꑹꐮꐊꄉꁰꍋꌠꀞꄻꄉ,ꅓꑘꍤꇽꏦꇜꅓꑘꏱꁈꌫꄻꌠꄐꊋꉀꐕꀐ。ꃄꌬꊿ3ꃪꎖꑹꌋꆀꇩꏤꀵꊒꌤꃅꊿ2ꄙꑹꀋꇈꌌꄉꁰꍋꄉ,ꋀꊇꌤꃆꂥꀘ、ꏦꃤꌬꉆꌠꌊꌬꑲꌧꌠꄐꊋꉀꐕ。ꏓꂱꃔꑼꀊꂥꊐꌠꆏꃔꄜꄜꍈ8899ꑹꌌꏭꆦꄉꁰꍋ,ꋍꈭꐨꊋꀥꇱꄉꏦꇜꏭꃅꅍꃅꂾꁰꍋ、ꄉꅍꉀꐕꇬꁰꍋꌠꌋꆀꌐꄉꁰꍋꌠꃅ。ꊿꋅꃅꄷꃔꑼꑍꉙꌧꌠꏦꇜꉘꉚꌠꄹꎆ,ꑟꏦ、ꏾꉰ、ꇊꃀꇴꋍꑠꃅꄷꃔꑼꇇꀨꄉꑍꉙꌧꌠꏦꇜꁰꍋꂘꅍꄯꒉꁰꄻ,ꁭꅐ、ꁮꐚꁁꏯꃔꑼꇢꊭꇬꇥꀯꄉꅍꁵꄉꐮꆦꄉꌶꄻꎻꌠꋍꑠꌤꃅꌠꃅ,ꁮꐚꏭꁁꏯꃔꑼꌤꃅꊿꊇꁧꉀꐕꌠꇬꊋꁈꄏ。ꐰꉎꊐꌠꃔꑼꇢꊭꇬꇥꀯꄉꅍꁵꄉꄜꎟꎻꌠꄹꏦꌫꄻ,ꅉꂫꊐꌠꌤꃅꌠꋒꌥꌠꇥꀯꉾꃪꌠꉘꉚ。ꃔꑼꋍꊐꋑꀋꋒꌠꃅꊥꇬꄉꃅꈉꌶꀠ、ꃣꈌꀞꉔꌠꌊꄻꃅꈧꌠꃅꄉ,ꏦꇜꏭꊋꊡꄉꊋꀥꇱꄉꌶꄻꃄꄻꎻ,ꊋꇤꄉꏦꌬꄐꊋꌧꐨꉀꐕ。

  ꊋꀉꒉꃅꅐꄉꏦꌬꃅꇏꄻꃪ。ꃹꅼꃅꉹꁌꉜꐨꂘꑴꌠꃅ,ꀒꁨꋍꁘꃅꏦꇜꏓꂱꃔꑼꏓꂱꐛꐨꐥꌠꏭꌧꄻꌠꌋꆀꃄꄻꌠꃹꅼꈴꎻ,ꑴꐚꃅꉹꁌꈭꈜꇬꍬꄻ。ꉹꁌꉪꐨꏓꊭꉺꏦꄻꐛꒆ,ꉹꁌꉪꐨꑌꑲꈭꈜꎵꄻ,ꏦꇜꋥꁕꇬꃹꆹ、ꎆꏂ꒧ꇬꃹꆹ、ꌶꅉꇬꃹꆹ、ꂿ꒧ꁡꇤꃹꆹꋍꑠꃅꈧꌠꊥꇬꄉꃅ,ꇇꈤꃅꉹꁌꉜꐨꉪꐨꅱꄻ,ꏓꂱꉹꁌꌋꆀꑖꑟꃅꐮꑌꑲ。ꎃꊒ、ꐙꎴ、ꏓꂱꎁꃅꌠꏦꌬꈯꄜꁌꏤꉜꐨꉘꉚꌠꌌꀋꂿ꒧ꌠꃅꄉ,ꊋꀥꇱꄉꏦꇜꄉꅍꃅꇏꋈꄻ。《ꏦꇜꄉꅍꃅꇏꀑꐱꎕꏦ》ꌋꆀ《ꏦꇜꃅꐨꋊꍬꄉꌠ》ꌌꄺꀱ,《ꏓꂱꃔꑼꌧꑳꅇꂷꀑꐱꃅꋊꍬꄉꌠ》ꏤꄻ,ꏦꇜꄐꌐꄉꏦꌬꃅꇏꄺꀱ。ꋒꐯꋒꃅꂴꅑꊥꋦꌠꌡꀠꂿꄐꋊꇤ,“ꉹꁌꇫꉌꒊꌠꏦꇜꉾꃪꌠ”ꍰꑸꀻ、“ꃅꋊꂴꅑꌠ”ꇩꏤꑭꊂꏦꇜꉾꃪꌠꇊꏣꀺ、ꀬꅑꃅꊿꀋꂄꌠꏭꉈꈽꄉꀑꑊꁤꇅꀕꃅꀑꇬꁮꌠꇩꏤꑭꊂꏦꌬꏢꍤꌶꀠꍏꏃꑟꏤꊈꋍꑠꂴꅑꊥꋦꌠꄜꉺꌶꄻ。ꀋꉆꄻꈎ,ꇩꏤꑭꊂꃔꑼꋍꊐꋑꀋꋒꌠꃅꐯꇯꋍꉻ19060ꂷ、ꊿ47298ꑼꆏꑆꊋꐥꄉꌌꈁꁠꏿ。ꄚꈐꏭ,ꋍꉻ344ꂷ、ꊿ489ꑹꆏꍏꑷꄚꃆꂮꐥꌠꌤꃅꅉꇱꌌꀮꄑꈁꁠꏿ。

  ꊋꇤꄉꏦꌬꐙꎴꌠꊥꎆ。ꃔꑼꋍꊐꋑꀋꋒꌠꆏꏲꌋꇥꀯꇬꄉꏓꋧꄉꄈꊇꁧꄈꃅꇏꄈꍬꏦꉙꂘꌠꃅ,ꏦꇜꌋꆀꏦꌬꏢꍤꇬꄉꏓꋧꄉꅇꈪꊐꉙꂘꌠꃅ,ꍹꄙꐈꄵꉪꉻꁦꎆꇱ。“ꋍꃅꈉꑍꃅꎁ”ꌭꈬ,ꍤꇽꊈꑼꉼ、ꑼꍈ、ꄜꍈ、ꍔꍞꌤꃅꌠꌋꆀꍬꏦꍤꄻꍞꊟꏲꉻꌅꐨꄐꊋꋊꇤ,ꊋꀥꇱꄉꏦꌬꃣꈌꀞꌠꏭꌋꆀꏦꇜꊿꁥꌠꏭꏲꂠꍞꊠ。ꏓꂱꃔꑼꀊꂥꇊꀊꂥꊐꌠꇬꆏ《ꏓꂱꃔꑼꏦꌬꌠꏮꄉꍤꄻꌤꃅꌠꋋꇅꇬꌬꌠꏤꐪ》ꏤꄻꄉ,ꏦꌬꌠꏮꄉꍤꄻꌠꄹꏦꄻꐛꒆ,ꂴꊂꃅꏮꄉꍤꄻꊤ8ꂷꁆꌌꄉ,ꃅꄷꃔꑼꄹꁆꏭꏦꌬꌠꏮꄉꍤꄻꌠꃅ,ꌤꃆꌋꅜꌠꆏꇇꈤꃅꌌꋊꄻꇈꉜꐨꄜꎼꇁ。ꇩꏤꑭꊂꀊꂥꊐꌠꏓꂱꃔꑼ26ꂷ、ꐧꊐꌠꏓꂱꃔꑼ246ꂷꇬꆏꏦꌬꌠꏮꄉꍤꄻꌠꄹꏦꋈꄻꄉ,ꐯꇯꏓꂱꃔꑼꐰꊐꌠ1803ꂷꏭꏦꌬꌠꏮꄉꍤꄻꌠꃅꀐ。ꁊꈴꃅꐙꎴꃅꏲꑘꏲꌠꍞꍤꊿꄹꏦꄺꑣꄉ,ꃔꑼꋍꊐꋑꀋꋒꌠꃅꐯꇯꐙꎴꃅꏲꑘꏲꌠꍞꍤꊿ30623ꑹꄉꅍꁵꄉ,ꐙꎴꃅꏲꑘꏲꌠꍞꍤꊿꆏꊼꇅꉾꃪꃅꉘꃀꊐꌠꍤꇽꌠꏭꈛꎂꃅꍞꊟꌠꂿꄐꋊꇤꀐ。ꏟꈯꃅ“ꉬꑵꃅꀋꉆ”ꌠꏤꐪꃄꌬꇫꑟ,ꃣꈌꍤꀞꊋꃤꁦꎆꇱ。ꍬꏦꀋꈴꃅꄉꁌꎴ、ꍬꏦꀋꈴꃅꄉꃣꈌꃆꂮꐥꌠꎆꋚꏲꂠ、ꍬꏦꀋꈴꃅꄉꏦꌬꄀꇗꇱꏁꁈꌫꄻꌠꋍꑠꌤꃆꏭꌐꄉꏱꄻꃅꈧꌠꃅ,ꐳꃅꇫꐥꌠꌤꃆꌋꅜꌋꆀꌌꄺꀱ。ꐴꀖꐪꊂꍤꄻꉺꏦꄻꐛꒆ,ꀊꂥꊐꌠꏓꂱꃔꑼꉬꇮꃅꏓꂱꃔꑼꀊꂥꇊꀊꂥꊐꌠꌋꆀꈄꏍꐮꈴꄉꌠꇗꐆꏦꐆꐴꀖꈄꏍꐛꅉꀹꄻꄉ。ꍹꁏꎴꄖꌤꃅꏀꀺꌠꄹꎆ,ꏓꂱꃔꑼꀊꂥꇊꀊꂥꊐꌠꆏ《ꃌꒆꌺꇖꇑꌦꃅꑘꃅꐺꌠꃔꑼꏲꌋꇥꀯꌋꆀꍤꇽꃄꌬꃅꈉꇬꏦꇜꏭꄉꅍꃄꄮꇬꑴꏆꌠꃆꂮꏤꐪ》ꌌꄜꃑꌫꄻ,《ꍤꇽꌤꃅꄮꇬꃔꑼꈏꇓꇬꊿꃣꈌꀞꄻꌠꏭꃸꆽꌠꄴꏮꃆꂮꏤꐪꈍꑋꈨ》ꏤꄻꄉ,ꊋꇤꄉꄹꏦꉺꏦꇬꄉꏦꌬꐙꎴꌠꊥꎆ。2010ꈎ,ꇩꏤꑭꊂꃔꑼꆏꐯꇯꇗꐆꏦꐆꊿ783ꑼꌌꍤꀞ,ꋋꊭꌡꍆꌠꆏ1.51%ꀁꋌꊰ。ꄚꈐꏭ,ꌌꏲꑘꍬꏦꅓꃤꁵꌠꊾꆏ540ꑹꐥ,ꎆꂁꋠ、ꃴꎆꁵꋠ、ꈲꏂꏦꐆꄉꌌꅓꑘꅑꃤꎹꌠꊾꆏ113ꑹꐥ,ꋋꊭꌡꍆꌠꆏꂱꑱꅉꄉꇬ4.09%ꌋꆀ17.52%ꀁꋌꊰ。

  ꃘ、ꀊꅰꃅꌌꍞꊟꎻꌠꉜꁨ,ꍞꊟꏢꑲꉺꏦꋈꄻꌠꄻꀉꇨꃅꄉ

  ꍞꊟꏢꑲꌠꄻꀉꇨꃅꄉꌠꆹ,ꏓꂱꃔꑼꎃꊒꃅꄉꅍꃅꎁꃄꄻ、ꏦꌬꎃꊒꌠꃅꇫꑟꌠꇬꏦꀧꅍꀋꂿꑘꌠꉬ。ꏓꂱꃔꑼꀊꂥꇊꀊꂥꊐꌠꆏꃅꄷꏓꂱꃔꑼꋍꊐꋑꀋꋒꌠꇬꄐꌐꄉꀒꁨꋍꁘꃅꑴꇙꃅꍞꊟꎻꌠꉪꉻꁦꎆꇱ,ꏣꀋꑌꃅꍞꊟꏢꑲꉺꏦꄻꐛꒆ,ꊋꇤꄉꏦꌬꎃꊒꐙꎴꌠꊥꎆ,ꀋꆏꃅꏦꌬꄉꉻꉌꒊꊋꃤꉀꐕ。

  ꑴꇙꃅꏓꄊꁳꍞꊟꎻ。ꀋꉆꄻꈎ“ꃀꑍꂷꌠ”ꈿꌐꈭꐨ,ꏓꂱꃔꑼꀊꂥꇊꀊꂥꊐꌠꆏꎔꎗꃅꇩꏤꑭꊂꏓꄊꁧꎁꄜꎼꇁꌠꍤꇖꉜꐨ99ꐘꌌꎵꃪꀨꊱꄉ,ꋍꏢꋍꏢꃅꌌꄺꀱꃄꄻꇬꑟ。ꀊꂥꃅꏓꄊꁧꎁꇖꐨꀞꄻꌤꃅꌠꉜꁨ,ꏮꀞꌠ、ꍞꊟꄉꀞꄻꌠ、ꀱꉈꑴꇰꌠꉺꏦꄻꐛꒆ,ꋭꋽꃅꇩꏤꑭꊂꏓꄊꁧꎁꇖꐨꌋꆀꀉꁁꌤꃆ796ꐘꀞꄻ。ꇩꏤꑭꊂꏓꄊꁧꎁꌋꆀꑍꃀꑍꐮꑌꑲꌠꉺꏦꄻꐛꒆ,ꏓꂱꃔꑼꀊꂥꇊꀊꂥꊐꌠꆏꑭꄑꅲꇫ、ꊩꏦꌋꆀꀉꁁꊵꑵꇶꏦꇬꈴꄉꁧꎁꌋꆀꐮꊫꁱꐮꈴ、ꉜꐨꅱꄻꌠ882ꑼꃢꐥ。ꊋꀥꇱꄉꌐꐘꅇꄜꌠꌤꃅ,ꏓꂱꃔꑼꉹꁌꌤꃆꍤꇽꌤꃅꌠꌌꄉꇩꏤꑭꊂꏓꄊꎮꊈꉼꏭꌐꄝꃅꅇꄜ,ꃀꈿꅈꍤꇖꌠꉜꐨꇬꈴꄉꐳꃅꊋꀥꇱꄉꉹꁌꌤꃆꍤꇽꌤꃅꌠꑭꋧꏁꁈꄜꎼꇁꇈꄷꀋꁧꌌꃄꌬ。

  ꎔꎗꃅꏓꂱꍔꑠꌋꆀꋯꁦꄈꀾ、ꇬꎭꆃ、ꄈꀾꀋꐥꌠꊿꂒꋦꌠꁳꋯꁦꃅꍞꊟꎻ。ꀊꂥꃅꍔꑠꊈꑼꄜꑘꀞꄻꌠꉜꁨ,ꐳꃅꇩꏤꑭꊂꍔꑠꊈꑼꏭꃔꑼꌤꃅꐨꄛꇰ,ꏓꂱꃔꑼꀊꂥꇊꀊꂥꊐꌠꀋꉆꄻꈎꆏꇩꏤꑭꊂꍔꑠꊈꑼꄜꑘꌋꆀꀉꁁꌤꃆ130ꐘꌌꀞꄻ,ꑋꇖꃀꈿ、ꑭꄑꅲꇫ、ꊩꏦ、ꁨꌊꉜꆫꍤꄻꇁꌠꋍꑠꇶꏦꀉꑌꑵꇬꈴꄉꇩꏤꑭꊂꍔꑠꊈꑼꌋꆀꐮꊫꁱ、ꉜꐨꅱꄻꌠ309ꑹꃢꐥ。ꀒꁨꋍꁘꃅꋯꁦꄈꀾ、ꇬꎭꆃ、ꄈꀾꀋꐥꌠꊿꂒꋦꌠꌋꆀꐮꈴꋮꄮꉺꏦꄻꐛꒆꃅ,ꑍꃀꑍꐮꎼꈴꌠꊋꀥꇱ,ꉌꊢꃅꉜꐨꇖꐨꅱꄻ。

  ꏦꃤꇬꈴꄉꏦꍤꌤꃅꅉꁳꏦꃤꍞꊟꎻ。ꏓꂱꃔꑼꀊꂥꇊꀊꂥꊐꌠꌋꆀꏓꂱꏦꍤꑼꀊꂥꇊꀊꂥꊐꌠꌤꃅꐮꈴꉺꏦꄻꐛꒆꃅꄉ,ꐯꇯꄉꏦꍤꌤꃅꅉꉹꁌꌤꃆ、ꏲꑘꅇꎹꌠꌋꆀꃄꌬꌤꃅꌠꏭꏦꃤꍞꊟꌠꇬꃆꂮꐥꌠꏤꐪꄻꐛꒆ,ꎔꎗꃅꏦꍤꌤꃅꅉꄜꎼꇁꌠꏦꍤꇖꐨꊜꄻ,ꏦꍤꌤꃅꅉꏦꃤꈴꄉꏦꃤꍞꊟꌠꃅꎁꃄꄻꌠꇬꊋꁈꄏ、ꃅꈽ,ꀋꉆꄻꈎ,ꃔꑼꋍꊐꋑꀋꋒꌠꃅꐯꇯꏦꍤꌤꃅꅉꏤꇽꍝꀐꌠꏭꄜꎼꇁꌠꄙꅇꎹꃣꈌ9749ꐘꍤꀞꂫꇽ,ꄚꈐꏭ,ꌌꂴꍞꇽꄉꌠꃅꄉꌠ3056ꐘꐥ,ꍞꇽꀱꌠ1928ꐘꐥ,ꀱꉈꁵꄉꍤꀞꀱꎻꌠ721ꐘꐥ,ꉉꋊꈺꑣ、ꅇꎹꐆꈪꋍꑠꃄꄟꇬꈴꄉꍤꀞꂫꇽꌠ4044ꐘꐥ。

  ꏣꀋꑌꃅꐧꋦꋍꑞꋍꁆꏯꁳꍞꊟꎻ。ꏓꂱꃔꑼꀊꂥꇊꀊꂥꊐꌠꆏꇩꏤꑭꊂꏓꄊꁧꎁ、ꍔꑠꊈꑼ、ꋯꁦꄈꀾꈧꌠ、ꇬꎭꆃ、ꄈꀾꀋꐥꌠꊿꂒꋦꌠꉈꑴꌧꃀꌧꌺ、ꇑꌦꌋꆀꅉꂫꊐꌠꉹꁌꇬꄉꉈꃅꁨꌊꅱꄻꌠꃅꇁꌠꊿ40ꑽꌋꆀꉈꃅꏤꄉꌌꍞꊟꌠꃅꇁꌠꊿ60ꑽꁨꌊꄉ,ꉌꒊꃅꋀꊇꃤꉜꐨꇖꐨꅱꄻ。ꇩꏤꑭꊂꇑꌦꑠꉼꌋꆀꈴꌗꐮꈴꄹꏦꄺꑣꄉ,ꐳꃅꇑꌦꑠꉼꇬꄜꎼꇁꌠꌤꃆꎥꃪꂥꀘꄉ,ꇑꌦꏦꃤꇬꈴꄉꃅꎁꃄꄻꌠꏦꀧ。ꏓꂱꃔꑼꈨꏀꈋꍣꌠꁳꍞꊟꎻꌠꌤꃅꉜꐨꏤꄻꄉ,ꀊꂥꃅꈄꏍꍣꃆꍣꂮꉜꁨ,ꏓꂱꃔꑼꀊꂥꇊꀊꂥꊐꌠꇬꉹꁌꉪꐨꄯꒉꊐꅍꇬꄉꈄꏍꈩꊿꊏꇬꄀꄉꌠꅇꂷ5685ꁬꎴꅜ,ꎔꎗꃅꌌꎵꃪꏡꃏꇈ,ꌌꌡꉚꅍꃅꄉꌤꃅꌠꄺꀱ。

  ꁧꎁꊈ,ꀋꃋꋋꇅꇬ,ꍏꇩꐛꐨꐧꋦꉪꏦꏦꃤꉻꑫꆹꏓꐛꄉꀐ,ꇩꏤꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꉈꑴꒆꉻꌧꑳꋈꄻꌠꋍꑞꋍꑵꁁꏯꃅꏦꃤꌌꍬꌬꉆꌠꃅꇫꑟꄉꀐ,ꏓꂱꃔꑼꌤꃅꌠꊋꀥꇱꌋꆀꄻꎆ,ꐊꑷꃅꃔꑼꊿꁥꌠꊇꁧꉀꐕ,ꃶꐚꃅꏦꃀꌋꆀꏦꃤꌌꇿꋌꐥꃅꌫꄻꌠꇬꏦꀧꌠꆏ,ꀊꅰꃅꀋꉬꀋꉆ、ꀊꅰꃅꂴꅐꃅꐙꀐ。ꑓꏮꃅꒊꃅꇁꀊꏀꌠꏭꉜꇬ,ꉪꊇꍝꐚꃯꐚꃅꌧꐚꌠꆏ,ꏓꂱꃔꑼꌤꃅꌠꇬꉈꑴꌤꃆꌋꆀꊋꋠꐨꀉꑌꃅꐥꑴꌦ:ꋍꆏꍤꇽꌤꃅꌠꉈꑴꎆꏣꐧꋦꀻꎆꌠꇖꐨꇬꄉꄐꃅꐙꀋꌐꑴꌦ,ꈜꀕꇈꐛꃆꐛꂮꀊꏀꌠ、ꌤꃆꀊꏀꌠꏭꌧꐚ、ꎥꃪꌋꆀꒃꌫꐨꃹꅼꃅꀋꐛꑴꌦ,ꏦꌬꊜꄻꏁꁈꉈꑴꄻꉾꃪꄻꅐꑴꌦ,ꃣꈌꋍꈨꅇꎹꊋ、ꃄꌬꊋꌠꌤꃆꉈꑴꌌꂥꀋꀘꑴꌦ,ꅇꎹꑗꇖꈨꂟꃆꂮꐥꌠꌤꃆꉈꑴꑓꅐꎏꑴꌦ。ꑍꆏꏦꌬꄺꀱꏁꁈꋍꈨꃄꌬꌊꑞꅉꇬꀋꑟꑴꌦ,ꈏꇓ、ꉇꉻꍞꊟꏢꑲꉺꏦꄻꐛꀋꒆꑴꌦ,ꍞꇽꊇꁧꌋꆀꑘꅐꐨꀒꁨꋍꁘꃅꉀꐕꄺꅐꑴꌦ。ꌕꆏꏦꇜꏦꌬꄐꊋꀉꀋꇨ,ꐧꋦꐮꄙꐨꉉꋊꈺꑣ、ꌼꇪꀞꊋꌠꃣꈌꀞꄻꑲꌧꐨꀊꀋꂥ。ꇖꆏꏦꇜꄹꁆꉹꁌꉪꉻꊼꇅꀋꄿꃅꐙ,ꏦꌬꃅꇏꌧꑳꃅꀋꐛ、ꃅꐨꋊꍬꃅꀋꐛ、ꌤꃅꇬꑭꋧꃅꀋꐛ,ꉹꁌꇫꉌꀋꃹꐨꊼꇅꀉꒉꃅꐙ。

  ꉬꆏꏦꇜꀁꑌꄹꁆꏦꌬꎃꊒꃅꀋꐛ、ꐙꎴꃅꀋꐛ,ꃣꈌꌌꄉꊨꏦꈲꐪꎹ,ꈲꏂꄸꂁ,ꎆꇢꏦꐆꄉ,ꀉꆈꃅꏦꌬꄉꉻꉌꒊꊋꃤꇬꉮꄻ。ꋍꈭꐨ,ꃔꑼꋍꈨꇬꆏꄡꇗꃣꈌꀉꑌꊿꀁꑌ、ꏦꇜꊐꈘ、ꌧꊿꁮꑋ、ꌫꎆꀋꇎꋍꑠꊋꋠꐨꇫꐥꑴꌦ。ꑠꅹ,ꉪꊇꆏꊨꏦꉆꈉꇬꉆꄉ,ꏣꀋꑌꃅꄚꃆꂮꐥꁁꏯꊋꁈꄏꇁꌠꅔꈿꄉ,ꄾꌦꋩꃅꊋꀉꒉꐯꀉꒉꃅꇤꄉꌤꃆꌋꆀꊋꋠꐨꋋꈨꂥꀘꇧꎭ。 

  2011ꈎꆹ,“ꊰꑋꉬ”ꊬꌠꑭꄑꃄꇬꈒꌠꉬ。ꏓꂱꃔꑼꀊꂥꇊꀊꂥꊐꌠꆏꎔꎗꃅꄈꅿꃀꀉꒉꊰꏁꃢꌠꌋꆀꊰꏂꈭꌕꃢ、ꇖꃢ、ꉬꃢꐊꈴꃀꈿꉌꊈꃄꌬ,ꎃꊒꃅꇩꈐꇩꉈꃅꒊꃅꇁꀊꏀꃅꐛꐈꌠꐋꀋꌠꐨꀊꏀꌠꒃꌫꇇꈐꊐꄉ,ꏟꈯꀕꃅꈆꑪꃅꀻꎆꌠꅇꀨꋋꏢꒃꌫꄉ,ꈬꐯꈬꃅꇤꐳꃅꎆꏣꀻꎆꃄꄟꆹꏮꌠꈜꀦꋋꏢꇬꆼꒆꄉ,ꏦꌬꃣꈌꀞꌠꀋꉬꀋꉆꋋꏢꄻꂴꄉ,ꌤꃅꊿꁥꌠꋈꄻꌠꁧꀦꋋꏢꄻꀉꇨꃅꄉ,ꃹꅼꃅꀋꉬꀋꉆꌠꌤꃅꐨꌕꐘꌠꄹꎆ,ꏦꃤꇬꈴꄉꄁꋦꎃꊒꃅꍞꇽꌅꈌꌫꄻ,ꎃꊒꑘꅐꐨꀊꂥꋦꒉꌠꐧꋦꉪꏦꏦꌬꄹꏦꋈꄻ,ꍏꇩꐛꐨꐧꋦꉪꏦꏦꃤꉻꑫꄻꐛꒆ,ꐧꋦꐽꊯꑗꐥꌠꀧꌋꃅ,ꐧꋦꐮꄮꎍꐽꌠꊥꎆꌠꎁꃅꊋꇤꄉꌤꃅ。

  ꋍꆏꎆꏣꀊꉗꃅꎍꐽꃅꊼꇅꐳꃅꀻꎆꇬꎷꌠꎁꃅꏦꌬꏦꀧꌠꉀꁵ。ꑓꏮꇤꐳꃅꎆꏣꀻꎆꌠꃄꄟꆹꏮꌠꊥꎆꌠꇬꉜꄉ,ꋒꐯꋒꃅꍞꇽꌅꊋꂿꄐꋊꇤ:ꋍꆏꎆꏣꐧꋦꀻꎆꈉꐨꇬꈴꄉ,ꐳꃅꏦꌬꏱꁈꄻꐛꒆ,ꊋꀥꇱꄉꏦꌬꌠꉉꀽ,ꍞꊟꄐꌐꌠꄻꀉꇨꃅꄉ,ꉺꒉꎆꏣꏱꁈꌫꄻꇫꑟꌠꎁꃅꏦꌬꏦꀧꌠꉀꁵ。ꑍꆏꏦꃤꇬꈴꄉꎆꒉꎆꇁꏟꃆꏈꑘꃣꈌꍤꄻ,ꋭꋽꃅꇩꏹꎆꒉꎆꇁꎒꐡꎟꄜꌠꇬꊜꄻꌠꋍꋬꈭꎖꄎꌋꆀ“ꊰꑋꉬ”ꎆꊐꐘꃆꇬꃆꂮꐥꌠꃣꈌꂥꀘ,ꎆꒉꎆꇁꋬꂻꌠꀧꌋꃅꌠꎁꃅꏦꌬꏦꀧꌠꇲꁵ。ꌕꆏꏦꃤꇬꈴꄉꎆꏂꑘꄹꏦꄺꀱ、ꑱꐢꋍꑠꃣꈌꍤꀞ,ꊁꊰꌠ、ꅐꐨꊋꃤꁦꎆꇨꌠꀜꋊꌠꊥꎆ,ꅐꑘꉹꏮꊐꐕꌠꃅꇫꑟꌠꄹꇙ,ꉈꑴꎆꏂꑘꏓꐆꐯꇯꋍꑠꄹꏦꑌꌌꌫꄻꄉ,ꅐꑘꋊꄻꌠꇖꐨꇬꄉꄐꌠꄚꋋꇅꇬꊋꋠꅍꊝꌠꎆꏂꑘꇇꀨꄉꀱꉈꑴꐛꀕꇁꎻ,ꎆꏣꐛꉻꄐꇐꏤꁈꃅꐙꄉꌌꋊꄻꌠꊥꎆꌠꎁꃅꏦꌬꏦꀧꐨꇲꁵ。ꇖꆏꏦꃤꇬꈴꄉꋍꑞꋍꑵꎆꊐꏟꃆꏈꑘꃣꈌꍤꀞ,ꇩꏤꎆꏣꀻꎆꌠꃅꍜꇬꄉꄐꌠ、ꎆꏣꐛꉻꋊꄻꌠꇬꈲꏣꐥꌠꎆꀨꊐꄻꌠꌋꆀꏮꈴꃅꐨꇬꊋꁈꄏꌋꆀꀧꌋꃅ,ꏦꇨꃅꇩꁨꁨꇐꀞꄻꈭꎁꏦꊒꐨꍤꄻ,ꏦꃤꇬꈴꄉꐧꐭꌠꎆꊐꊿꌋꆀꎆꏂꑘꇬꌤꃅꊿꃤꏦꊒꌠꌅꈌꈲꁧꀧꌋꃅ,ꐽꊯꃅꇩꏤꎆꅐꎆꏂꑘ、ꉹꁌꀰꏢꎆꏂꑘꌋꆀꉋꄅꃼꇇꃅꊿꎆꊐꎆꏂꑘꃤꏦꊒꌠꌅꈌꈲꁧꀧꌋꃅ,ꎆꊐꃅꐨꋊꍬꌠꎁꃅꏦꌬꏦꀧꐨꇲꁵ。ꉬꆏꏦꃤꇬꈴꄉꋍꑞꋍꑵꋦꈭꀧꌋꃅꌠꏟꃆꏈꑘꃣꈌꍤꀞ,ꊋꏏꍍꋊꌠꌋꆀꀰꏮꎆꏣꀻꎆꌠꊥꎆ,ꅐꀦꏎꏸꉹꌠ、ꋦꈭꐮꉂꉹꌠꐧꋦꋈꄻꌠꎁꃅꏦꌬꏦꀧꐨꇲꁵ。ꃘꆏꐪꊛꄉꌧꇐꅐꇐꌅꈌꏦꌬꀧꌋꃅꌠꊋꃤꁦꎆꇱ,ꈆꑪꇮꇐꁨꎆꌠꌋꆀꏀꀺꌠꄹꇙꌠꎁꃅꏦꌬꏦꀧꐨꇲꁵ。

  ꑍꆏꊋꇤꄉꐧꋦꐮꄮꎍꐽꌠꀧꌋꃅ。ꈬꐯꈬꃅꏓꂱꉹꁌꇫꉈꇬꌠꄉꉻꋬꂻ、ꌅꈌꈲꁧꏦꀧ、ꐽꊯꑗꉬꌠꋍꑠꌤꃆꒃꌫꄉ,ꐊꑷꃅꍤꇽꌅꊋꂿꄐꋊꇤꅐꇁ,ꐧꋦꏲꂠꌠꊋꀥꇱꌋꆀꏀꀺ,ꐧꋦꐮꄮꎍꐽꌠꀧꌋꃅ。ꏦꃤꇬꈴꄉꇩꏤꋬꂻꌠꌋꆀꐧꋦꎍꐽꌠꇬꉮꄻꌠꀉꆈꃅꅓꑘꑽꃤꐆꌠꌌꏦꇨꃅꅓꀞ,ꏦꃤꇬꈴꄉꀉꇨꃅꎆꏣꐥꀹꀜꐆꌠ、ꀉꇨꃅꉹꁌꈲꁧꇬꉮꄻꌠꎆꏣꑽꃤꐆꌠꌋꆀꇩꏤꌤꃅꊿꄉꅍꑽꃤꐆꌠꌌꏦꇨꃅꅓꀞ。ꎔꎗꃅ《ꅓꑘꏦꃤꄺꀱꑘ(ꉆ)》ꌌꃄꌬ,ꎃꊒꃅꏯꇨꐮꐊꐙꌠꅓꑘꏱꁈꌫꄻ,ꀋꎪꃅꑽꃤꐆꌠꏭꅓꀞꌠꌋꆀꊿꌅꈌꏦꀧꌠꐯꇯꉜꁨꌠꌭꈬꃅꄉꇬꎷ,ꌌꌉꅓꃤꀵꅓꎻꌠꏦꇨꃅꋎꍅꌋꆀꋓꉪꁨꄉꃄꌬ,ꎔꎗꃅꏦꃤꇬꀋꊒꌠꊫꄲꋊꑣꇧꎭꌠꏤꐪꃄꌬꇫꑟ,ꃶꐚꃅꃣꈌꍤꇽꆹꑽꆽꀠꌠꄴꏮꄉꇫꅐꇁꄡꎽ。ꎃꊒꃅ“ꉉꋊꈺꑣꌠꄻꂴꄉ,ꉉꋊꈺꑣꍞꇽꌠꐮꐊꐙ”ꌠꏥꏦꌧꄻꅉꐚꌋꆀꒃꌫꇇꈐꊐꄉ,ꀊꅰꃅꇿꋌꐥꃅꉉꋊꈺꑣꌠꌋꆀꍞꇽꌠꂿꄐꋊꇤꅐꇁ,ꏦꌬꉉꋊꈺꑣꉺꏦꏀꀺꌋꆀꄻꃪ,ꋭꋽꃅꋍꑞꋍꑵꉹꁌꌤꃆ、ꏲꑘꃣꈌꍤꀞ,ꊋꇤꄉꐮꀋꐊꅉꊨꄅꐯꀥꐨꆏꇧꎭ、ꃣꈌꀞꌐꌤꃆꑍꈤꌠꃅꇫꑟ。ꅇꎹꌠꌋꆀꅇꎹꌠꀋꉬꌠꌌꐮꊪꊛꌠꐮꄙꐨꏟꃆꏈꑘꀞꄻꉺꏦꄻꐛꒆ,“ꀊꐯꈭꃅꉉꋊꈺꑣ”ꌠꌤꃅꉻꑫꄻꐛꒆꌠꊥꎆ,ꐧꋦꐮꄙꐨꋊꎵꇧꎭꌠꄹꎆ。

  ꌕꆏꃶꐚꃅꏓꂱꉹꁌꏦꊒꌠꌅꈌꈲꁧꀧꌋꃅ。ꀒꁨꋍꁘꃅꃣꈌꈨꇬꅇꎹꊋꋠ、ꃄꌬꊋꌠꌤꃆꂥꀘꇧꎭꌠꌌꀋꂿꑘꌠꃅꄉ,ꑞꅉꀊꐯꐯꀊꐯꃅꏓꂱꉹꁌꋍꑍꋍꉙꃅꁦꎆꇁꌠꏦꌬꈉꇖꐨꇎꃅꄻꇬꁳ。ꏦꃤꇬꈴꄉꎃꊒꃅꃅꅍꎹ、ꂘꑘ、ꆅꉁꆄꄻ、ꀀꑳ、ꌬꈧ、ꐧꋦꏦꀧꌠꌋꆀꃝꐨꑱꈐꋍꑠꉹꁌꐥꐨꇬꃆꂮꐥꌠꃣꈌꍤꀞ,ꃶꐚꃅꉹꁌꏦꊒꌠꌅꈌꈲꁧꀧꌋꃅ。ꏦꌬꌠꉹꁌꁳꃅꌒꎻꌠꉹꁌꇬꈲꐪꐥꌠꏁꁈꄻꐛꒆ,ꊋꀥꇱꄉꃣꈌꋈꅉꅱꄻꑗꇖꈨꂟꅉꋈꄻ,ꏮꐺꄉꍤꇽꌠꃄꄟꁊꌬ,ꏦꌬꈭꋏꇇꀨꌤꃅꌠꊋꀥꇱ,ꏦꃤꇬꈴꄉꏲꑘꅇꎹꌠꌋꆀꇩꏤꀵꊒꌠꃣꈌꊪꀞ,ꊋꋧꄉꃣꈌꋍꈨꅇꎹꊋꋠꌠꌤꃆꂥꀘꇧꎭ。ꎔꎗꃅꋒꃅꅇꎹꑗꇖꈨꂟꌠꇬꃆꂮꐥꌠꌤꃅ,ꇿꋌꐥꃅꉹꁌꑗꇖꈨꂟꌠꇬꄉꄛꑣꅐꇁꌠꋭꋽꃅꑗꇖꈨꂟꌠꂥꀘꇧꎭ。ꃣꈌꃅꎁꅑꃤꍤꀞꌠꄻꀉꇨꃅꄉ,ꍤꇽꊇꁧꉀꐕ,ꇁꀦꇬꄉꑗꇖꈨꂟꌠꃣꈌꄴꏮꌋꆀꊨꎴ。ꃄꌬꌠꋒꏆꌠꏭꁏꌠꌐꄉꃅꌠꃅꐨꃅ,ꏦꇨꃅꄉꃄꌬꌠꇬꄘꑣꌠꃅꐨꅓꀞ,ꋒꐯꋒꃅꃄꌬꏓꇙꉺꏦꂿꄐꋊꇤꅐꇁ,ꄹꏦꂱꎆꅑꐨꉘꇉꄉ,ꃄꌬꊋꋠꌠꌤꃆꂥꀘꇧꎭꌠꄹꇙ。

  ꇖꆏꀊꅰꃅꈆꑪꃅꐙꌠꏦꌬꏦꉻꌋꆀꌤꃅꉺꏦꄻꐛꒆ。ꏦꌬꎃꊒꌠꄉꀧꌠꌌꁻꌐꃅꄉ,ꏦꌬꄇꄜꋊꌠꌋꆀꍞꊟꏢꑲꌠꄻꐛꒆꌠꃅꇫꑟꌠꌌꀋꂿꑘꌠꃅꄉ,ꏦꃤꇬꈴꄉꊱꁨꐥꃅꏦꌬꄺꀱꌠꄹꎆ。ꏣꀋꑌꃅꏤꇽꄯꒉꈄꏍꃹ、ꃣꈌꈴꌗꍤꅲ、ꅇꎹꄉꉣꄯꒉꍤꀘꋍꑠꌤꃅꌠꄹꎆ,ꏦꌬꄇꄜꋊꌠꊋꃤꁦꎆꇱ,ꄇꄜꋊꌠꌌꎃꊒꌠꊥꎆ。ꃶꐚꃅꋒꃅꄻꅐꇁꀐꌠꏦꌬꄺꀱꏁꁈꌬꈴꃅꌌꌬꌠꒃꉇ,ꀋꉬꀋꉆꌠꆏꅓꃤꎕꇽꋊꍬꈴꌠꃹꅼꃅꄺꀱꌠꉬ,ꌉꅓꃤꀱꉈꑴꎕꑣꀱꌠꈭꎁꄻꐛꒆ,ꈆꑪꃅꐙꌠꐛꒆꃅꐙꌠꍤꇽꏲꂠꉻꑫꄺꑣꄉ,ꄹꏦꌌꄉꎃꊒꌠꄉꀧ。ꍤꇽꍞꊟꑽꌠꄺꀱꉺꏦꀊꏀꌠꏓꄻꌠꌌꀋꂿꑘꌠꃅꄉ,ꊋꀥꇱꄉꃔꑼꈏꇓꇬꍞꊟ,ꉇꉻꁳꍞꊟꎻꌠꄹꏦꉺꏦꄻꐛꒆ。

  ꉬꆏꐊꑷꃅꃔꑼꊿꁥꌠꊇꁧꉀꐕ。ꉾꃪꌠꏦꇜꃅꑘꑌꇐꉘꉚꌠꌋꆀꏦꌬꄐꊋꉀꐕꌠꌌꀋꂿꑘꌠꃅꄉ,ꃶꐚꃅꊋꀥꇱꄉꃔꑼꊿꁥꌠꋈꄻ。ꃹꅼꃅ“ꋊꃅꐥꌠꍸꇐꍔꆙ、ꉌꑇꐨꀋꎪꃅꐙ、ꉹꁌꎁꃅꏦꌬ”ꌠꅇꀨꉙꂘꃄꄻꃅꈧꌠꃅ,ꎃꊒ、ꐙꎴ、ꉹꁌꎁꃅꃅꌠꏦꌬꈯꄜꁌꐨꉜꐨꍔꆙ,ꏦꇜꃅꑘꑌꇐꉾꃪꌠꑌꇁꌠꊋꀥꇱ,ꉹꁌꉪꉻꄻꀉꇨꃅꄉ,ꉹꁌꇬꉂꐪꁦꎆꇱ,ꏦꌬꃅꇏꄺꀱ,ꏦꌬꃅꐨꋊꍬ。ꊋꀥꇱꄉꏦꌬꄐꊋꋈꄻ,ꊋꋧꄉꏦꇜꏦꃤꌬꉆꌠꌌꌬ、ꐮꄙꐨꋊꎵ、ꉹꁌꏭꉙꂘꌠꌤꃅꄐꊋꌋꆀꌧꐨꉀꐕ。ꏦꌬꐙꎴꉙꂘꌠꄻꀉꇨꃅꄉ,ꍹꁏꎴꄖꄹꏦꏀꀺꌠꄹꇙ,ꏦꌬꏮꐺꄉꍤꄻ、ꏲꑘꐙꎴꍞꊟꍤꄻ、ꈄꏍꈴꄉꐴꀖꌠꊪꀞ、ꍬꏦꆼꁏꌠꐪꈜꍤꎖꋍꑠꌤꃅꉺꏦꄻꐛꒆ,ꏦꇨꃅꏓꂱꃔꑼꀊꂥꇊꀊꂥꊐꌠ“ꉬꑵꏢꄉꃅꀋꉆ”ꌠꋍꑠꄹꏦꃄꌬꇫꑟ,ꀊꅰꃅꀉꒉꌠꊋꃤꌊꄉꇗꐆꏦꐆꌠꃅꐨꍤꀞ,ꏦꌬꎃꊒꐙꎴꌠꄉꀧ。

  ꃘꆏꀊꅰꃅꊋꀥꇱꄉꏓꂱꃔꑼꅉꂫꊐꌠꅉꃀꌤꃅꌠꉜꁨ。ꃶꐚꇿꋌꐥꌠꏁꁈꏁꌬꄉꅉꂫꊐꌠꅉꃀꌤꃅꊋꁧꌠꐛꊂꄺꀱꌠꆹ,ꎼꈎꌋꆀꋌꊂꊼꇅꀊꉗꑠꊭꈏꇬꏓꂱꃔꑼꌤꃅꌠꀋꂿꑘꅉꉬ。ꉻꒉꃅꄐꇺ、ꉹꑫꁸꄉꄐꇺꌠꉺꏦꄻꐛꒆ,ꏓꂱꃔꑼꀊꂥꇊꀊꂥꊐꌠꆏꐰꊐꌠꃔꑼꏭꍞꊟꄐꇺꌠꊋꀥꇱ。ꐪꊛꄉꌤꃅꊿꌊꄻꏡꁈꄺꀱꌠꌋꆀꏦꌬꎖꉚꐨꄺꀱꌠꄹꇙ,ꏦꇜꇁꀦꌋꆀꈭꈜꍔꐯ,ꏦꇜꃷꁨꏓꁱꎕꏦꌋꆀꏦꇜꄉꅍꂴꊂꊱꁨꃅꄺꀱꌠꃅꌐ,ꊋꀥꇱꄉꈯꄔꁮꐚꊿꋅꃅꄷꈜꀕꇈꑭꊗ、ꑟꏦꋍꑠꃅꄷꑍꉙꌬꌠꏦꇜꁥꌠꋈꄻ,ꋍꁘꋍꁘꃅꏦꇜꃪꌠꌊꄻꄹꏦꌋꆀꅉꂫꊐꌠꇥꏢꉀꒆꌠꇬꈲꏣꐥꌠꌊꌬꉺꏦꄺꑣꄷꀋꁧꄻꐛꒆꃅꄉ,ꀒꁨꋍꁘꃅꅉꂫꊐꌠꃔꑼꋍꈨꇬꃣꈌꀉꑌꊿꀁꑌ、ꏦꇜꊐꈘ、ꌧꊿꁮꑋꋍꑠꌤꃆꂥꀘꇧꎭ。ꃔꑼꌫꎆꉹꑫꁸꄉꏦꀧꌠꏡꁈꃄꄻꇫꑟ,ꄉꉻꌫꎆꎃꐚꃅꉀꎆꌠꉺꏦꄺꑣꄉ,ꀒꁨꋍꁘꃅꅉꂫꊐꌠꃔꑼꌫꎆꏦꀧꐛꄟꄻꉾꃪ。ꇤꐳꃅꌤꃅꃣꈌꀞꈴꌗꈴꌠꋈꄻ。ꊿꌌꀨꇬꄉ,ꏦꇜꈯꄿꉌꊈꋬꂻꌠꇬꉈꇬꑗꇬꇬꎷ,ꐮꄮꌠꌤꃅꋦꈭꄺꑣꄉ。

  ꁧꎁꊈ,ꑴꐚꃅꏓꄊꌋꆀꋍꎮꊈꉼꁳꍞꊟꎻꌠꆹꏓꂱꃔꑼꌤꃅꌠꀋꆏꃅꀻꎆꌠꌋꆀꁗꎆꌠꇬꀋꂿꑘꌠꄉꀧꅍꉬ。ꏓꂱꃔꑼꀊꂥꇊꀊꂥꊐꌠꆏꎔꎗꃅꃀꀉꒉꋌꃢꏤꐪꃄꄻꇫꑟ,ꎔꎗꃅꋒꃅꌐꐘꌤꃅꅇꄜ、ꏦꌬꉉꀽꁱꄀ、ꁧꎁꇖꐨꀞꄻꋍꑠꌤꃅ,ꏓꂱꃔꑼꎃꊒꃅꏦꃀꏦꃤꃄꌬꇫꑟꌠꇬꄉꀧ。ꋍꈭꐨ,ꀊꅰꃅꑴꐚꃅꍔꑠꁳꋯꁦꃅꍞꊟꎻ、ꏦꍤꌤꏲꅉꁳꏦꃤꍞꊟꎻꉈꑴꐧꋦꋍꑞꋍꁆꏯꁳꑌꍞꊟꎻ,ꍞꊟꌠꌌꄉꐙꎴꌠꊥꎆ、ꎃꊒꌠꄉꀧ。

  ꁧꎁꊈ,ꑓꏮꃅꒊꃅꇁꀊꏀꌠꇂꃴꀻꎆꌠꊜꋽꄮꌋꆀꊝꎭꌠꉜꇬ,ꏓꂱꃔꑼꆏꐋꀨꃛꏢꄧꌌꊝꎻꏹꃅꄉꌠꄈꍏꑷꏃꂠꌠꇂꃴꄉ,ꍏꇩꐛꐨꐧꋦꉪꏦꁈꁧꇰꀋꃀꁬꌠꀊꂥꃅꐕꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬ,ꏦꇨꃅꏦꃀꌋꆀꏦꃤꄻꁵꄉꌠꄉꅍꃅꎁꃄꄻ,ꐊꑷꃅꏦꃤꇬꈴꄉꇩꏤꏱꄻꌠꅉꀨꏱꁈꄐꉻꃄꌬꇫꑟ、ꇤꐳꃅꐧꋦꉪꏦꏦꏲꇩꏤꋈꄻ、ꐊꑷꃅꊼꇅꌣꈚꌠꐧꋦꋈꄻꌠꀊꏀꃅꊋꐛꌠꇑꅜꌠꎁꃅꑆꊋꀊꏀꌠꀊꅰꃅꀉꒉꌠꃄꄻꅐꌞ!
ꁰꒌ




  • 特别鸣谢
    中国民族语文翻译局彝文翻译室