ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꌤꃅꅇꄜ

——2011ꈎ3ꆪ10ꑋꊯꊪꈭꇩꏤꑭꊂꏓꂱꁧꎁ꒜ꀉꒉꇖꃢꌠꈿꅉꇬ

ꇩꏤꑭꊂꏓꂱꁧꎁ꒜ꀉꒉꈿꅉꀕꌤꏲꊈꑼꉼꊈꑼꍈ ꃷꀠꇩ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꁧꎁꊈ:

  ꉢꇩꏤꑭꊂꏓꄊꎮꊈꉼꎁꃅ,ꃀꀉꒉꈿꅉꏭꌤꃅꅇꄜ,ꌌꍤꇖꅊꇈ。

  2010ꈎꃅꐨꀋꉬꀋꉆꌠ

  2010ꈎꆹ,ꃹꅼꃅꌼꇪꐛꐈꌠꇩꈐꇩꉈꋦꈭꊝꇬ,ꐋꀨꃛꏢꄧꊝꎻꏹꃅꄉꌠꄈꍏꑷꆏꇩꏤꑭꊂꊿꋅꈁꐥꌠꏓꂱꋯꑌꃅꏃꂠꌊꄉ,ꋍꏅꉌꂵꋍꂷꃅ,ꏀꀺꀒꁨꂵꄉ,ꊋꐛꃅ“ꊯꊪꉬ”ꄐꎖꊨꄅꄉꌠꑞꅉꂿꃆꃅꌐꀐ,ꇿꋌꐥꃅꋧꃅꎆꒉꎆꇁꎒꐡꌠꊝꌠꊌꐨꄻꈫꈈꌋꆀꍔꐯꀐ,ꊋꇤꏡꇤꄉꏾꉰꒄꎽꀉꇨꃅꃄꇙꌠꌋꆀꇤꌡꍏꐏꀋꇰꀋꉈꃅꃄꐡꊖꑳꌠꋌꐛꉮꌸꀉꒉꀊꂾꑠꄩꊋꐛꀐ,ꊋꐛꃅꎮꉰꋧꃅꄉꀨꃀꌋꆀꇨꍏꑸꒀꉼꀞꄻꀐ,ꐧꋦꉪꏦꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠꌋꆀꒆꉻꌧꑳꋈꄻꌠꑌꎆꐨꀊꏀꌠꀉꒉꀊꂾꃅꐥꀐ,“ꊰꑋꉬ”ꊬꌠꎆꏣꐧꋦꀻꎆꌠꎁꃅꅉꃀꉾꃪꌠꌆꄻꄉꀐ。

  ꋌꃀꋋꈓꆹ,ꇩꏤꑭꊂꏓꄊꎮꊈꉼꆏꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꏟꈯꃅꄈꅿꏲꂠ、ꏓꂱꑱꏲꃥꌋꐛ、ꏦꈴꇩꏲꌠꋭꋽꃅꋍꃱꃅꌠꌭꈬꇬꎷ,ꊯꊪꈭꇩꏤꑭꊂꏓꄊꌕꃢꌠꃀꈿꉌꊈꇬꈴꄉ,ꄈꌋꆀꇩꏤꌤꃅꃅꇴꄉꉻꆼꒆꄉ,ꌤꆿꃶꐚꇿꋌꐥꌠꀉꑌꈨꃅꀐ。ꋍꈓꅑꅸꇁꌠ,ꐯꇯꃅꏦꃤꌋꆀꏦꃤꃆꂮꐥꌠꏤꐪ16ꏢꌌꍤꇖꉌꃹꈴ,ꇩꃷꑼ、ꏓꂱꃔꑼꀊꂥꇊꀊꂥꊐꌠ、ꏓꂱꏦꍤꑼꀊꂥꇊꀊꂥꊐꌠꌤꃅꅇꄜ13ꏢꅲꇈꍤꇖꀐ,ꏦꃤ6ꋐꃄꌬꃆꂮꍤꄻ,ꌐꄉꎥꃪꌠ2ꐘꌋꆀꌐꄉꅲꇫꌠ3ꃢꃅ,ꁧꎁꇖꑘ506ꐘꀞꄻ,ꉪꇩꏤꌋꆀꇩꉈꐯꇯꏤꄉꌠꏤꐪ、ꋯꏤꌠꌋꆀꋧꃅꉻꏤꇬꐊꌠ4ꐘꈌꁧꐮꃅꏤꄻꄉꀐ,ꉈꆏꇩꏤꌤꃅꅉꌤꃅꊿꋍꈨꄉꅍꁵꇔꀐ,ꏤꈉꈐꃅꍏꇩꐛꐨꐧꋦꉪꏦꏦꃤꉻꑫꏤꄻꐛ,ꍏꑷꏤꁈꀋꂿꑘꌠꄐꇺꎼꇁꌠꃄꌬꇫꑟꌠꄹꇙ,ꎆꏣꐧꋦꐊꑷꃅꋮꄮꊛꄉꀻꎆꉆꌠꎁꃅꑆꊋꀊꏀꌠꅐꌞꀐ。

  ꋍ、ꏟꈯꃅꏤꈉꈐꃅꍏꇩꐛꐨꐧꋦꉪꏦꏦꃤꉻꑫꏓꐛꌠꆼꒆꄉꏦꃤꏤꄻꌤꃅꌠꊋꀥꇱ

  ꄈꅿꊯꉬꈭꃀꀉꒉꈿꌠꉉꎼꇁꌠ2010ꈎꑟꇬꆏꍏꇩꐛꐨꐧꋦꉪꏦꏦꃤꉻꑫꏤꄻꐛꄉꌠꏦꃤꏤꄻꌤꃅꑞꅉꁻꌐꃅꇫꑟꂿꄷꄉ,ꀋꉊꄻꈎꉪꊋꇤꄉꍏꇩꐛꐨꐧꋦꉪꏦꏦꃤꉻꑫꇬꈯꌬꂿꄐꐥꌠꏦꃤꀋꉬꀋꉆꌠꑠꈨꏤꄻꌋꆀꄺꀱꄉꀐ,ꄚꃆꂮꐥꌠꍞꊟ、ꄐꇺꄉꐊꑷꃅꀋꃋꌬꌠꏦꃤꌌꏓꐯꇯꄉꎵꄻꌠꂿꃆꃅꌐꀐ。

  (ꋍ)ꏦꃤꀋꉬꀋꉆꑠꈨꏤꄻ、ꄺꀱꀐ。ꐧꋦꄜꏂꀧꏦꃤꄹꏦꏤꄻꐛꒆꃅꄉꌠꆹ,ꉹꁌꋍꏅꌠꃶꐚꈲꁧꃆꂮꐥꌠꌤꀉꒉꐘꉬ。ꎮꊈꉼꆏꐧꋦꎆꏂꑘꏦꃤꏤꄻꌤꃅꌠꉜꁨꐯꉜꁨ,ꂴꈭꌠꍤꉚꀐꌠꅉꃀꇬꄉ,ꋋꈭꆏꌕꃢꃅꌌꍤꇖꀱꀐ,ꄐꄉꌠꌌꀋꂿꑘꃅꄺꀱꀐ,ꏦꃤꇬꈴꄉꇩꏤꋈꄻꄉꌠꅉꀨꃀꌠꀨꎹ、ꅉꀨꆅꉁꆄꄻꌠꌋꆀꉻꃅꄣꌸ、ꃅꑘꀋꊌꌠ、ꒆꉘꌠꑠꐧꋦꄜꏂꀧꄹꏦꏤꄻꄉꀐ,ꄷꀋꁧꅉꀨꃀꌠꀨꎹꄜꏂꀧꃆꂮꆹꏮꐯꊛ,ꅉꀨꃀꌠꀨꎹꄜꏂꀧꎆꀨꏓꇱꊐꁸꌠꐕꀊꂥ,ꀊꏀꉹꌠꂿꑘꁡꇤꐧꋦꃀꌠꀨꎹꄜꏂꀧꄹꏦꌋꆀꀊꏀꉹꌠꂿꑘꁡꇤꇷꃅꆅꉚꆄꄻꄹꏦꑠꏭꏥꏦꃅꄉꏤꄻꄉ,ꏓꄊꎮꊈꉼꈁꐥꊐꌠꐧꋦꄜꏂꀧꅉꀨꎆꃀꍞꊟꌅꈌꀉꇨꇱꀐ。ꏦꃤꋌꋐꄜꃑꄉꌬꌠꆹ,ꐳꃅꇓꈓꇓꉈꀀꊿꏭꉱꑷꌐꌠꐧꋦꄜꏂꀧꉻꑫꋈꄻꌠꇬ,ꏓꂱꉹꁌꐯꇯꄺꀱꁉꃑꊌꐨꈲꏣꊌꌠꏦꀧꇬ,ꐧꋦꉪꏦꄮꐽꐧꋦꋈꄻꌠꄹꎆꌠꇬ,ꈻꇐꀋꂿꑘꐯꀋꂿꑘꃅꐥꌠꉬ。

  ꏓꄊꁧꎁꆹꇩꏤꌅꈌꌬꌠꌤꃅꅉꇬꐊꊿꉬ。ꁧꎁꂿꄐꋒꐯꋒꃅꋊꇤꎼꇁꂿꄷ,ꁧꎁꄜꎼꇁꌠꇖꑘꌋꆀꇖꐨꇬꈴꄉ,ꉪꆏꋋꇅꃅꁧꎁꏦꃤꄺꀱꌤꃆꃅꇬ,ꀊꐯꈭꃅꉜꐨꅲꇫꌠꅉꃀꇬꄉ,ꌐꄉꄯꒉꇬꈴꄉꇩꏤꑭꊂꁧꎁꉜꐨꅲꇫꀐ。ꄺꀱꄉꌠꁧꎁꏦꃤꆹ,2005ꈎꍏꑷꁱꐘꄯꒉ9ꉹꌠꌌꃄꌬꇫꑟꌠꃄꄻꎖꋪꏓꈹꇈ,ꀒꁨꋍꁘꃅꁧꎁꌅꈌꌋꆀꋭꑘꊨꄅꀐ,꒜ꈿꌐꊂꁧꎁꃅꈧꄟꌌꑭꋧꃅꄉꁆꄻꀐ,ꁧꎁꌅꊋꍬꌬꌠꏦꀧꏁꁈꀥꇱꀐ,ꀒꁨꋍꁘꃅꁧꎁꏦꃤꈴꄉꁧꎁꃅꎁꃅꌠꏦꀧꌠꇬꈲꏣꐥ,ꀊꅰꉾꃅꏓꂱꁧꎁꃀꀉꒉꈿꌠꄹꏦꐋꀋꌡꐨꌋꆀꉾꃪꐨꇤꅐꇁ。

  ꅉꂫꊐꌠꉹꁌꊨꏦꏲꌠꄹꏦꆹꉪꇩꏤꍔꍞꄹꏦꀋꂿ꒧ꐘꉬ。ꎮꊈꉼꄺꀱꄉꌠꋂꂱꊈꑼꉼꎀꍹꏦꃤꆹ,ꋂꊈꉼꌊꄻꌋꆀꆽꇔꈭꎁꄻꐛꒆꀐ,ꋯꁦꃅꏤꄻ、ꋯꁦꃅꏱꄻ、ꋯꁦꃅꍞꊟꄹꏦꄻꐛꒆꀐ,ꂿ꒧ꁡꇤꅉꂫꊐꌠꋯꁦꀻꎆ,ꂿ꒧ꉹꁌꋍꏅꌠꏣꀋꑌꐨ、ꑴꇙꐨꌋꆀꁧꀿꐨꄖꄑ,ꂿ꒧ꁡꇤꄺꀱꀻꎆꎍꐽꌠꊥꎆꌠꇬꂿꄐꀋꂿ꒧ꃅꋊꇤꅐꇁꌠꉬ。

  ꎮꊈꉼꆏꇩꏤꁵꊒꏦꃤꄺꀱꌠꆏ,ꀋꉬꀋꉆꌠꆏꇖꂟꈴꈜꑴꀋꐥ、ꀞꄻꈭꎁꄻꐛꒆ、ꁵꊒꈍꈐꑭꋧꃅꄉ、ꊫꌐꒃꃅꎁꊨꄅ、ꌫꎆꁵꌬꏦꀧꑠꁁꏯꄚꃆꂮꐥꌠꏦꃤꏤꐪꄻꐛꒆꀐ,ꋋꆹꇩꏤꌤꃅꅉꏦꃤꈴꄉꌅꊋꍬꌬꌠꊥꎆ,ꉻꊿ、ꏦꊿꌋꆀꀉꁁꎀꍹꅿꏦꊒꈲꁧꏦꀧ,ꐧꋦꎃꊒꑗꐥꌋꆀꐮꄮꎍꐽꌠꀧꌋꃅꌠꏭꈻꇐꀋꂿ꒧ꃅꐥꌠꉬ。

  ꅓꑘꏦꃤꆹꌌꑽꃤꐆ、ꅓꑘꅑꃤꌋꆀꅓꃤꏤꄻꌠꏦꃤꃅꄉꌠꆹ,ꍏꇩꐛꐨꐧꋦꉪꏦꏦꃤꉻꑫꇬꈯꌬꂿꄐꐥꌠꉬ,ꑽꃤꐆꌠꅓꀞ、ꏓꂱꀧꌋꃅ、ꐧꋦꐥꀹꀧꌋꃅ、ꇩꏤꋬꂻꏦꀧꑠꁁꏯꇬꂿꄐꀋꂿ꒧ꃅꐥꌠꉬ。1997ꈓ,ꇩꏤꑭꊂꏓꄊꆏꅓꑘꏦꃤꌌꐊꑷꃅꄺꀱꀐ。ꋍꈭꐨ,ꑽꊿꏭꅓꀞꌠꈉꐨꇬꈴꄉ,ꎮꊈꉼꂴꊁꃅꏤꐪ1ꏢꅓꑘꏦꃤꄺꀱꄐꄉꌠ7ꏢꉌꃹꈴꀐ。ꎮꊈꉼꉌꃹꈴꄉꌠꅓꑘꏦꃤꄺꀱꄐꄉꌠ(ꉆ)ꆏ,ꀒꁨꋍꁘꃅꇨꆍꐮꄉꄐꌠꅓꑘꏱꁈꃅꇫꑟ,ꎆꏣꃆꂮꐥꌠꊋꆓꏿꀋꉬꌠꑽꃤꐆꄉꌦꃤ13ꐘꋊꇧꎭꀐ,ꌦꃤꑽꃤꐆꌠꈁꉬꃷꁨꇬ19.1%ꍆ;ꌦꃤꄯꆏꌠꌋꆀꑞꅉꀋꐥꅓꃤꀵꌠꑽꊿꌌꅓꃤꊨ、ꃑꋒꃅꌠꏭꌌꏦꇨꃅꋊꍬꀐ,ꑽꃤꐆꀉꑌꐘꏓꐯꇯꄉꅓꃤꀵꌠꃄꌬꌠꏤꈉꌌꋊꄻꀐ,ꄅꄉꑽꃤꐆꌠꌋꆀꐧꋦꀉꆈꃅꐙꌠꎀꍹꑽꃤꐆꌠꑠꏭꅓꀞꐨꊋꀥꇱꀐ;ꉈꑴꏓꄊꁧꎁꇖꑘꌋꆀꇖꐨꈴꄉ,ꎧꑱꄉꍮꊪꇽꌠ、ꍮꊪꇽꐳꇨꌠ、ꑘꃅꃄꎆꁵꀋꅲꑠꉹꁌꈲꏣꏭꀉꒉꃅꉮꄻꌠꃅꐨꆏꏤꄻꌊꑽꃤꐆꌠꃅꄉ,ꄷꀋꁧꋠꇐꋬꂻꉮꄻ、ꁬꋌꃶꀋꐚꌠꄻꃷꌠꌋꆀꋦꈭꅐꀦꀛꐆꑠꁁꏯꑽꃤꐆꌠꏭꅓꀞꌠꆏꌌꑭꋧꃅꏤꄻꀐ,ꀒꁨꋍꁘꃅꅓꑘꏦꃤꌌꏓꂱꐥꐨꀧꌋꃅꌠꊋꀥꇱꄉ,ꉪꇩꏤꅓꃤꅓꀞꐛꉻꁳꀊꅰꋭꋽꄉꄐꎻꄉ,ꀊꅰꉾꃅꑽꊿꌌꅓꀞ,ꑽꊿꏭꉙꂘꄺꀱ,ꑽꃤꐆꌠꄴꏮꄉꊨꒊꌠꂿꄐꋊꇤꅐꇁ。

  ꎮꊈꉼꏤꄻꄉꌠꏓꂱꉉꁱꏦꃤꆹ,ꏓꂱꉉꁱꌤꃅꌠꀊꉗꃅꏓꊭꄉꌠꎖꋪꉾꌠ、ꃄꄟꉾꌠꉀꐕꌊꏦꃤꃅꄉ,ꏦꃤꀂꏽꈴꄉꏓꂱꉉꁱꄹꏦꄻꐛꒆꀐ,ꏓꂱꉉꁱꌠꌋꆀꀉꁁꏟꃆꏈꑘꂥꀘꉺꏦꐮꃆꂮꊨꄅꀐ,ꏓꂱꉉꁱꌤꃅꌠꊋꁈꄏꌋꆀꏦꀧꌠꊋꀥꇱꀐ,ꋒꐯꋒꃅꏓꂱꉉꁱꄹꏦꐋꀋꌡꐨꌋꆀꉾꃪꐨꇤꅐꇁ,ꀊꅰꉾꃅꃰꊿꇢꊭꏟꃆꏈꑘꂥꀘ、ꐧꋦꐮꄙꐨꂥꀘ、ꐮꄮꎍꐽꌠꊥꎆ。

  ꎮꊈꉼꉈꑴꐕꍯꇉꇗꏸꏦꃤ、ꎊꈬꀋꉬꁱꀕꍸꇐꏦꃤ、ꉇꉻꃆꂮꐥꌠꉹꁌꐮꃆꂮꏦꃤꌬꋭꏦꃤ、ꇓꋌꋌꐛꐞꌗꁠꐤꀧꌋꃅꏦꃤꏤꄻꀐ,ꏲꑘꍤꌋꏦꃤ、ꒉꇈꊖꈬꏦꃤ、ꇩꏤꂁꇐꀧꌋꃅꏦꃤ、ꄐꄻꂽꇜꏦꃤꄺꀱꀐ,ꑣꇤꇣꋲꏱꅉꐎꅉꀨꏦꃤꁥꇱꋍꏢꏡꌠꏲ꒧ꇛꌺꀨꂶꌠꌊꄻꅐꇁꌠꏡꁈꄺꀱꄐꄉꌠꏤꐪꃆꂮꈌꁧꄉꀐ,ꄷꀋꁧꁥꇱꑍꏢꏡꌠꏦꃤꏤꄻꊈꑼꉼꌊꄻꅐꇁꌠꏡꁈꌋꆀꏤꇽꈭꎁꄺꀱꄐꄉꌠꆏꌌꏦꃤꈴꄉꌌꁱꄀꄉ。

  (ꑍ)ꄚꃆꂮꐥꌠꁁꏯꍞꊟꌋꆀꄐꇺꄉꐊꑷꃅꀋꃋꌬꌠꏦꇗꌌꏓꐯꇯꄉꎵꄻꌠꂿꃆꃅꌐ。ꏲꑘꏦꇗꌋꆀꃅꄷꃅꐙꌠꏦꇗꆹꍏꇩꐛꐨꐧꋦꉪꏦꏦꃤꉻꑫꀋꂿ꒧ꄹꁆꉬ,ꏦꃤꇿꋌꐥꃅꌫꄻꌠꄉꀧ,ꏦꃤꈴꄉꏲꑘꃅꌠꄹꎆ,ꇩꏤꌋꆀꃅꄷꌤꃆꏲꂠꇬꂿꄐꀋꂿ꒧ꃅꐥ。ꄚꀋꃋꌬꌠꏦꇗꑌꋍꈨꋋꈨꆏꐮꄉꄐꃅꀋꐛ、ꐮꋮꄮꃅꀋꐛ、ꋬꈭꃅꀋꐛꑴꌦ。ꑠꅹ,ꉪꊇ2009ꈎꀋꃋꌬꌠꏦꃤꌌꏓꐯꇯꄉꎵꄻꌤꃅꌐꌠꅉꃀꀂꏽꄉ,ꀋꉊꄻꈎꆏꊋꒉꃅꄚꃆꂮꐥꁁꏯꍞꊟꌋꆀꄐꇺꄉꀋꃋꌬꌠꏦꇗꌌꏓꐯꇯꄉꎵꄻꌠꌤꃅꀐ。ꇩꃷꑼꌋꆀꃅꄷꏓꄊꀉꇨꐯꀉꇨꃅꇫꉜꁨ,ꂱꑱꎵꄻꌠꈍꈐꇬꈴꄉ,ꐊꑷꃅꎵꄻꌠꅉꃀꀂꏽꄉꌌꉹꁸꄉꂥꀘꀐ。ꀋꉊꄻꈎꈎꂫꇬꑟꇬ,ꐯꇯꏲꑘꏦꄹ107ꐘ、ꃅꄷꌬꌠꏦꄹ1417ꐘꄺꀱ,ꏲꑘꏦꄹ7ꐘ、ꃅꄷꌬꌠꏦꄹ455ꐘꀜꋊꇧꎭ,ꐊꑷꃅꀋꃋꌌꌬꌠꏦꄹꌌꏓꐯꇯꄉꎵꄻꂿꃆꃅꌐꄉ,ꅑꅸ2010ꈎꑟꇬꍏꇩꐛꐨꐧꋦꉪꏦꏦꃤꉻꑫꏤꈉꈐꃅꏤꄻꐛꌠꏦꀧꄉꀐ。

  (ꌕ)ꏣꀋꑌꃅꈆꑪꃅꏦꄻ、ꋯꁦꃅꏦꄻꌠꄹꎆ。ꋍꆏꋒꐯꋒꃅꏓꄊꁧꎁꏦꄻꌤꃅꅉꇬꂿꄐꋊꇤ,ꏦꄻꐘꃆꉉꊪꅀꊨꄅꌠꉬꄿꂿ,ꉈꑴꏦꃤꄐꄉꌠꁰꄻꌋꆀꍤꇖꌠꉬꄿꂿ,ꐯꇯꎔꎗꃅꁧꎁꇖꑘꇬꄜꎼꇁꌠꄚꃆꂮꐥꌠꉜꐨꎥꃪꈺꌬ,ꄚꃆꂮꐥꌠꁧꎁꁨꌊꏦꄻꌤꃅꈽꇁ。ꑍꆏꉻꊿꊱꁨꐨꐥꃅꏦꄻꅉꇬꐊꈽꌠꍔꐯ,ꏦꃤꄐꄉꌠꉻꄜꉺꏦꌭꈬꌋꆀꄻꐛꒆ,ꏦꃤꄐꄉꌠꇬꏓꂱꉹꁌꁊꈴꃅꇫꉈꇬꌠꌤꃆꌋꌊꇎꈴꃅꉉꊪ,ꎔꎗꃅ꒔ꑞ꒔ꁁꏯꈜꀕꇈꅉꀨꊐꌠꉹꁌꉜꐨꅲꇫ,ꀋꆏꃅꏦꃤꄐꄉꌠꄻꐛꒆ。ꍯꇉꇗꏸꏦꃤꆹꏓꂱꉹꁌꁊꈴꃅꇫꉈꇬꌠꏦꃤꀋꂿ꒧ꑠꋐꉬ,ꄐꄉꌠꁱꇐꌌꉻꄜꈭꐨꋍꁮꆪꈐꀉꄂꃅ,꒔ꑞ꒔ꁁꏯꉜꐨ10ꃪꐘꎴꊊ,ꉪꊇꌌꎔꎗꃅꎵꄻꎥꑣꇈ,ꄷꀋꁧꇇꈤꃅꌌꐧꋦꏭꉜꐨꀱꁵ。ꉪꇩꏤꑌꌬꍯꁨꇬ87%ꅶꍯꆏꋊꃑꐨꐧꐭꃅꐙꌠꉬꌐ,ꄷꀋꁧꀉꑌꌠꆏꃄꎆꒃꏠꊐꋍꏅꌠꌌꌬꐺꌠꃶꐚꐛꐪꉪꏡꄉ,ꉪꊇꆹꊿꀉꑌꄹꁆꌠꉜꐨꇬꈴꄉ,ꄐꄉꌠꌌꀋꂿ꒧ꃅꄺꀱꀐ,ꉹꁌꈀꐥꌠꇗꏸꀵꃤꑌꁦꀋꎆ,ꉈꑴꊋꏏꋊꊨꊥꎆꌠꇬꑌꈲꏣꐥ。ꌕꆏꏦꄻꊂꎕꑣꃅꉚꌤꃅꌠꃅꀐ,ꈆꑪꇮꇐꀻꎆꏦꃤ、ꂿ꒧ꏸꏧꈴꊥꎆꏦꃤ、ꂿ꒧ꇮꁈꄹꁊꏦꃤ、ꋦꈭꀧꌋꃅꏦꃤꑠꈨꌊꄻꄉ,ꅇꀱꄯꒉꍤꎖ、ꋌꃅꄷꄉꍤꎥ、ꃣꈌꌡꀠꎥꑣꌠꃄꄟꀉꑌꑵꇬꈴꄉ,ꀋꉬꀋꉆꌠꆏꏦꃤꄹꏦ、ꏦꃤꏤꐪ、ꏦꃤꃄꌬꌠꌋꆀꐧꋦꏦꃤꏭꉌꃹꐨꑠꏭ,ꎥꑣ、ꉉꊪꌋꆀꈼꍣꌠꃅ,ꏦꄻꊂꎕꑣꌤꃅꌠꊱꁨꐨꐥꃅꃅꈧꌠꎁꃅꎖꋪꈲꁧꐥꌠꏓꊭꄉꀐ。

  ꑍ、ꏟꈯꃅꍏꑷꀉꒉꀊꂾꃅꏤꄻꄐꁆꄹꇙꌠꆽꒆꄉꊋꀥꇱꄉꍞꊟꌤꃅꌠꃄꌬꇫꑟ

  ꊋꐛꃅ“ꊯꊪꉬ”ꎖꄎꇬꊨꄅꄉꌠꁻꌐꂿꃆꃅꌐꂿꄷꄉ,ꉪꊇꆹꊋꇨꃅꎆꏣꌤꃅꌋꆀꉹꁌꐥꐨꏦꀧꄻꃪꌠꏭꍞꊟꌠꊋꀥꇱ,ꀋꆏꃅꍞꊟꌤꃅꃄꄟꏡꁈꄻꐛꒆ,ꏦꃤꇬꈴꄉꌐꄉꅲꇫꌠ3ꃢꃅꀐ,ꀒꁨꋍꁘꃅꍞꊟꇿꋌꊋꀥꇱꀐ。

  (ꋍ)ꎆꏣꀻꎆꃄꄟꆹꏮꄹꇙꌠꌊꀋꉬꀋꉆꌠꃅꄉ,ꊋꀥꇱꄉꎆꏣꌤꃅꌠꍞꊟ。ꀋꉊꄻꈎ,ꋻꅑꃄꄟꇬꈴꄉꄐꎖ、ꄐꌗꃄꌬꃆꂮꄛꇰꌋꆀꍏꑷꌗꂫꇽꌠꅇꄜ、ꍤꌗꌤꃅꅇꄜꅲꇫꍤꇖ,ꍏꑷꌗꂫꇽꌠꍤꇖꈌꁧꈭꐨ,ꉈꑴꇤꐳꃅꁧꃤꃅꑘꀻꎆ、ꁱꀕꅐꑘꀻꎆ、ꇩꏤꋚꂷꄝꀋꊰꑠꌤꃅꃆꂮꄛꇰꅲꇫꍤꇖꀐ,ꈆꑪꇮꁈꀻꎆꏦꃤ、ꂿ꒧ꇮꁈꄹꁊꏦꃤ、ꊋꀦꏎꏸꏦꃤ、ꁦꎴꒃꅐꊥꎆꏦꃤ,ꉈꑴꄠꃪꃺꑌꎆꊐꀧꌋꃅꏦꃤꑠꈨꃄꌬꐛꐪꍤꄻꀐ,ꄷꀋꁧꄉꀧꎆꇱꐘꃆꀉꒉꀊꂾꄹꁆꃄꌬꐛꐪꌌꊂꈹꄉꍤꎥꀐ。ꍤꇖꄮꇬꎮꊈꉼꐊꊿꊡꀱꇬ,ꋍꆏꎆꏣꏲꉻꄐꇐꏤꁈꐨꃅꋊꄻꌠꌌꇤꐳꃅꎆꏣꀻꎆꃄꄟꆹꏮꌠꀨꂵꃅꍜꃅꄉ,ꁧꃤꃅ꒧ꄹꇙꌊꀉꇨꃅꀻꎆꌠꌌꅐꑘꏲꉻꉾꃪꈴꊐꐕꌠꀋꂿ꒧ꅉꃅꄉ,ꏣꀋꑌꃅꄐꇐꏤꁈꐨꐥꌠꀊꏀꃅꅐꇁꌠꅐꑘꊋꁈꄏ,ꇤꐳꃅꎆꏣꉀꎆꅉꀊꏀꌠꉘꉚ,ꄷꀋꁧꑌꐚꃅꄐꊋꀉꇨꃅꃹ、ꍍꆀꐨꀉꇨꃅꐥꌠꅐꑘꉀꎆꐳꇨꌠꋎꍅ。ꑍꆏꑴꇙꏀꀺꊋꃤꊋꀥꇱꌠꌌꄉꄐꇐꏤꁈꅉꃀꐛꅉꃅꄉ,ꀋꉬꀋꉆꌠꆏꉪꇩꏤꃆꏂꊂꑋꀻꎆꌠꇬꁧꏖꌠꈆꑪꀉꒉꀊꂾꌠꌋꆀꇮꇐꀋꉬꀋꉆꌠꅸꁖ,ꊋꇤꄉꀊꏀꈭꌠꇩꏹꋓꅔꅉꇬꄉꇮꇐꀉꇨꀊꂥꅉꇑꍆꊌ。ꌕꆏꊋꇨꃅꂿ꒧ꋠꃅꈲꒉꋈꄻꌠꊋꀥꇱ,ꇤꐳꃅꂿ꒧ꈆꑪꇮꇐꊌꐨꆹꏮꌋꆀꄹꁊꁊꈴ,ꀋꆏꃅꂿ꒧ꇮꁈꅐꌞꐨꉀꐕ,ꀋꎪꃅꇩꏤꋚꂷꄝꀋꊰꌠꏦꀧ,ꂿ꒧ꐪꊛꄉꀻꎆꌠꌋꆀꂿ꒧ꊿꎍꐽꃅꊌꐨꉀꎆꌠꊥꎆ。

  (ꑍ)ꉹꁌꐥꐨꌤꃆꄹꇙꂥꀘꌠꌌꀋꉬꀋꉆꌠꃅꄉ,ꊋꀥꇱꄉꐧꋦꁊꈴꃅꇫꉜꁨꌠꉹꁌꐥꐨꌤꃆꀉꒉꀊꂾꌠꍞꊟ。ꇩꃷꑼꃹꅼꃅꆅꉁꁬꋌꁦꎴꏦꉻꄺꀱ、ꂿ꒧ꁡꇤ꒧ꃅꊋꃤꆹꏮꌋꆀꂿ꒧ꇮꃅꊿꌅꈌꈲꁧꏦꀧ、ꀁꑌꊿꋅꌋꆀꊿꋅꃅꄸꎆꏣꐧꋦꀻꎆ、ꊋꀥꇱꄉꈭꈜꋬꂻꏲꂠꑠꃆꂮꌤꃅꐛꐪꄛꇰꌠꅲꇫꍤꇖꀐ,ꌋꅪꌅꈌꈲꁧꏦꀧꏦꃤꃄꌬꃆꂮꍤꄻꀐ,ꉈꑴꏓꂱꃔꑼꀊꂥꇊꀊꂥꊐꌠꊿꌤꍤꇽꌤꃅꃆꂮꄛꇰ、ꏓꂱꏦꍤꑼꀊꂥꇊꀊꂥꊐꌠꃅꅍꀋꃅꌅꈌꇑꑣꏦꍤꌤꃅꃆꂮꄛꇰꌠꅲꇫꍤꇖꀐ。ꍤꇖꇬꎮꊈꉼꐊꊿꈧꌠꄐꎼꇁꇬ,ꋍꆏꃹꅼꃅꆅꉚꁦꎴꆄꄻꏦꉻꄺꀱ、ꂴꄉꉹꁌꅉꀨꆅꉚꁦꎴꆄꄻꈉꐨꇎꄻꌠꌌꉹꁌꐥꐨꏦꀧꌋꆀꄻꃪꌠꂿꃆꀋꉬꀋꉆꌠꃅꄉ,ꏣꀋꑌꃅꑘꒃꃅꆅꉚꄺꀱꈐꇬꅐꇁꌠꐛꐨꀊꏀꌤꃆꀊꏀꌠꂥꀘ,ꄺꀱꀋꉬꀋꉆꌠꁳꁣꀋꐥꃅꃄꌬꎻꌠꄉꀧ,ꏓꂱꉹꁌꋍꏅꌠꁳꆅꉚꄺꀱꄉꈲꏣꃶꐚꃅꊌꎻ。ꑍꆏꃶꐚꃅꂿ꒧ꇮꃅꊿꏦꊒꌠꌅꈌꈲꁧꀧꌋꃅ,ꊋꒉꃅꂿ꒧ꇮꃅꊿꃅꑘꇮꇐꁰꍋ,ꊋꋧꄉꂿ꒧ꇮꃅꊿꑘꃅꃄꎆ、ꑘꃅꇎꏦ、ꐧꋦꏦꀧ、ꋬꂻꒃꅐ、ꌺꇖꄯꒉꌷꑠꃶꐚꌤꃆꂥꀘ。ꌕꆏꐊꑷꃅꊿꋅꃅꄷꊨꏦꏲꏦꃤꌋꆀꍏꑷꋍꋬꈭꏱꁈꏁꁈ,ꈜꀕꇈꄚꃆꂮꐥꌠꊋꒉꃅꑭꊗꉈꑴꌜꇖꂷꇬꀒꋤꃅꄷꌋꆀꑝꏦꀻꎆꌠꊋꁈꄏꌠꏱꁈꀊꏀꃄꁈꀊꏀꌠꃄꌬꇫꑟ,ꊋꒉꃅꅉꃀꉁꈾꋈꄻ、ꂴꅑꅐ꒧ꀻꎆ、ꅉꀨꄉꉻꁧꃤꃅꑠꁆꏯꊋꁈꄏ,ꊋꇤꄉꊿꋅꃅꄷꊥꎆꄉꐱꐂꏿꃅꀻꎆꌠꃅꇫꑟ。ꇖꆏꌺꃰꌋꅪꐥꐯꊯꌠꅉꀨꇩꏤꏱꁈꃅꇫꑟ,ꏦꈴꄉꌋꅪꑘꃅꌅꈌꈲꁧ、ꁨꇐꌅꈌꈲꁧꌋꆀꂱꑱꊨꏦꌅꈌꏦꀧ,ꐳꃅꌋꅪꇮꃅꊿꑘꃅꈍꈐꏢꇈꌠꋊꄻ,ꂿ꒧ꁡꇤꌋꅪꃄꅉꀧꃅꌅꈌꈲꁧꉮꄻꌠꌤꃆꂥꀘ,ꏟꈯꀕꃅꌋꅪꀊꉘꊏꃷꑽꃤꐆꌠꏭꇇꇩꍈ。ꉬꆏꀒꁨꋍꁘꃅꊋꀥꇱꄉꈝꃀꈭꈜꋬꂻꌤꃅ,ꄹꏦꏁꁈꄻꐛꒆ,ꈭꈜꃨꆰꐨꐥꌠꋊꄻ,ꏦꇨꃅꏦꌬꌠꏲꂠ。ꈭꈜꎞꎭꌤꐘꀉꒉꀊꂾꃅꅐꌠꄴꏮ,ꏓꂱꉹꁌꀑꇬꎆꇐꋬꂻꌠꏦꀧ。ꃘꆏꀒꁨꋍꁘꃅꏓꂱꃔꑼ、ꏓꂱꏦꍤꑼꌤꃅꊿꁥꌠꊇꁧꌋꆀꄐꊋꋈꄻꌠꒃꉇꋒ,ꍤꇽꌋꆀꏦꍤꌤꃅꉺꏦꄻꐛꒆ,ꀋꆏꃅꏦꌬꌤꃅꃅꐛꐨꉀꐕ,ꀊꅰꉾꃅꏓꂱꉹꁌꏦꌬꈉꐨꇎꄻ,ꃶꐚꃅꐧꋦꎃꊒꑗꐥꌠꀧꌋꃅ。

  (ꌕ)ꍞꊟꇿꋌꀉꇨꇱꌠꌌꈯꄜꃅꄉ,ꍞꊟꌤꃅꃄꄟꏡꁈꄻꐛꒆ。ꅲꇫꌋꆀꊪꅲꌠꆹꏓꄊ“ꋍꃚꑍꑼ”ꏭꍞꊟꌠꏦꃤꏤꄉꌠꇶꏦꉬ。ꀋꉊꄻꈎ,ꉪꊇꆏꏱꎆꄐꌗ、ꇩꏤꋚꂷꄝꀋꊰ、ꃹꅼꃅꁬꋌꁦꎴꆄꄻꏦꉻꄺꀱꑠꌋꌊꅲꇫꀨꎍꌠꃅꄉ,ꂴꄷꊤꁸꄉ꒜ꈿ、ꊤꏓꐯꇯꄉ꒜ꈿꌋꆀꊤꀉꒉꃅꏓꐯꇯꄉ꒜ꈿꌠꃄꄟꌬꄉ,ꌐꄉꅲꇫꌠ3ꃢꃅꀐ,ꄷꀋꁧꄆꁱ、ꈄꏍꑠꇢꈴꇬꈴꄉꀊꄶꇬꄉꄛꇰꅀꈛꎂꃅꁊꈴ,ꐧꋦꀊꐯꈭꃅꇫꉜꁨ。ꉉꄜꐨꏣꀋꑌꌠꇫꅐꇁꄉ,ꏓꄊꍞꊟꌤꃅꈐꇬꀉꇨꐘꐛ。ꎮꊈꉼꐊꊿ、ꄚꃆꂮꐥꌠꌐꁨꊈꑼꉼꌋꆀꌤꃅꊈꑼꉼꆏꂴꆽꎔꎗꃅꍤꎥ、ꉌꋧꃅꄐꏤ,ꎮꊈꉼꌤꃅꄜꆏꊋꀥꇱꄉꊥꇫꋮꄮꌋꆀꏓꇲꁆꄻ,ꇩꃷꑼꄚꃆꂮꐥꌠꌤꃅꅉꏲꌋꀋꉬꀋꉆꌠꇁꌊ꒜ꈿꅉꇬꄉꉜꐨꅲꇫ,ꑞꉬꌠꑞꃅꄉꅲꇫꌠꅇꀱ,ꉾꃅꐮꇙꌠꐛꊂꏓꐛꎼꇁ,ꌐꄉꅲꇫꌠꁣꀋꐥꃅꃅꌠꄉꀧꀐ。ꌐꄉꅲꇫꌠꆏꇩꃷꑼꌋꆀꄚꃆꂮꐥꌠꌤꃅꅉꌤꃅꄺꀱꉾꃪꌠꄹꇙꂿꄐꐥꀐ,ꏓꄊꍞꊟꌤꃅꌠꃄꄟꏡꁈꑌꀉꑌꑵꃅꐙꀐ。

  ꌐꄉꍤꄻꎥꃪꌠꆹꋋꈍꑋꈓꎮꊈꉼꊋꀥꇱꄉꍞꊟꌤꃅꌠꃄꄟꀋꂿ꒧ꌠꉬ。ꀋꉊꄻꈎ“ꊰꑋꉬ”ꄐꎖꐱꀨꁰꄻꌤꃆꃆꂮꃅ,ꉪꊇꆏꎥꃆ14ꏢꌋꄉ,ꄮꈉ4ꁮꆪꂷꌌꌐꄉꍤꎥꇈ,ꌧꇐꐥ、ꊇꁧꉾꌠꍤꎥꅇꄜꄯꒉꈨꐛ,ꋋꆹꍏꑷꄐꎖꐱꀨꏤꇽꌋꆀꎥꃪꁰꄻꌠꎁꃅꉜꐨꀋꂿ꒧ꌠꇲꁵꀐ,ꉈꑴꃀꀉꒉꋌꃢ“ꊰꑋꉬ”ꄐꎖꐱꀨꍤꄻꈌꁧꌠꎁꃅꄐꐨꄐꏤꄉꀐ。ꉪꊇꆏꉈꑴꍞꊟꏦꃤꌋꆀꄐꌗꏦꃤꉌꊈꇬꈴꄉ,ꂴ6ꆪꄮꇬꋋꄹꈎ1ꆪꅑ5ꆪꄐꌗꃄꌬꃆꂮꅲꇫꍤꇖꌠꃄꄟ,ꄺꀱꌊ8ꆪꄮꇬꌐꁨꃅꄐꌗꃄꌬꃆꂮꅇꄜꌠꅲꇫꍤꇖꌠꃅꄉ,ꀋꉬꀋꉆꌠꆏꂿ꒧、ꂘ꒧、ꈆꑪꇮꇐ、ꁱꀕ、ꁦꎴꆄꄻ、ꐧꋦꏦꀧꑠꌬꅐꎆꃀꀋꉬꀋꉆꌠꌌꑞꅉꑟꌠꌋꆀꌌꌬꌠꃆꂮ,ꍏꑷꏱꎆꃅꄷꏭꆹꏮꁵꌬꃆꂮꍤꎖꄉ,ꄐꌗꍞꊟꌠꃶꐚꇿꋌꀉꇨꇱꀐ。

  ꌕ、ꏟꈯꃅꎮꊈꉼꈯꄜꂿꃆꆼꒆꄉꀉꁁꅉꀕꃅꐙꌠꌤꃅꋒ

  (ꋍ)ꁧꎁꂿꄐꀒꁨꋍꁘꃅꋊꇤꅐꇁ。ꎮꊈꉼꆏꁧꎁꇖꑘꇖꐨꀞꄻꌠꌌꁧꎁꏦꈴꌤꃅꌠꊋꁈꄏꌋꆀꏦꀧꌠꊨꏦꀋꂿ꒧ꌠꃅꄉꇬꎷ。꒔ꑞ꒔ꁆꏯꐯꇯꈏꇤꊋꇤꈭꐨ,ꊯꊪꈭꇩꏤꑭꊂꏓꄊꃀꀉꒉꌕꃢꌠꍗꑮꄨꏮꌊꍤꇖꎻꌠꁧꎁꇖꑘ506ꐘꌠꆏ,ꉬꇮꃅꀞꄻꌐꀐ,ꄚꈐꏭ,ꇖꑘ71ꐘꇬꏦꃤꃆꂮꐥꌠ7ꐘꆏꎮꊈꉼꍤꇖꉌꃹꈴꄉꀐ,ꇖꑘ1ꐘꇬꏦꃤꄐꌗꄉꌠꃆꂮꐥꌠ1ꐘꆏꇬꊎꍤꇖꇰ,ꇖꑘ144ꐘꇬꏦꄻꐘꃆꃆꂮꐥꌠ41ꐘꆏꇤꃅꈎꏦꄻꎖꄎꅀꏦꄻꄐꎖꈐꇬꇱꄉꀐ。ꁧꎁꄜꎼꇁꌠꇖꐨ、ꀠꂘꐨꌋꆀꉜꐨ7590ꐘꐥ,ꄜꎼꇁꌠꌤꃆꂥꀘꄉꀐꅀꄐꎖꄉꌌꂥꀘꂿꄷꌠꆹ76.7%ꍆ。ꊋꀥꇱꄉꁧꎁꇖꐨꏭꊂꈹꄉꍞꀞ,ꏜꋦꅔꏂꒆꉻꀧꌋꃅꌋꆀꎆꆫꉹꁌꊌꐨꉀꎆ、ꑭꉰꇵꃅꄷꅝꒉꋬꂻꌋꆀꒆꉻꀀꇙꎞꊈꃅꉹꁌꐥꐨꌤꃆꑠꈨꂥꀘꌠꄹꇙꄉ,ꁧꎁꊈꇫꏚꍆꌠꊌꀐ。ꋍꈓꅑꅸꇁꌠ,ꁧꎁꁰꍋꀠ9ꃢꀞꄻꀐ,ꁧꎁ1900ꎖꑹꇫꐊꄉꌶꄻ,ꉈꑴꁧꎁ1800ꎖꑹꊥꇬꌊꌐꄉꍤꎥꌠꃅꈽ,ꁧꎁ500ꎖꑹꁨꌊꎮꊈꉼꌋꆀꌐꁨꊈꑼꉼ꒜ꈿꅉꇬꈿꈽ、ꎮꊈꉼꏦꌬꍤꄻꃅꈧꑠꇬꐊꈽ。ꊈꑼ꒜ꈿꈽꌠꌋꆀꃅꈧꌠꇬꐊꈽꌠꆏꂴꇯꆐꇎꈴꃅꄐꏤꄉ,꒜ꈿꄮꆏꏣꀋꑌꃅꅇꉉ,ꇎꈴꃅꏓꂱꉹꁌꇳꃚꄜꋊ,ꎮꊈꉼꌤꃅꊇꁧꉀꐕꌠꎁꃅꂿꄐꀋꂿ꒧ꌠꋊꇤꀐ。

  (ꑍ)ꉇꉻꏭꑌꑲꌠꏣꀋꑌꃅꍔꆙ。ꉪꊇꆹꇩꏤꉇꉻꑌꑲꌠꃅꇴꄉꉻꇬꁧꃤꃅꌠꌭꈬ,ꏓꄊꉇꉻꑌꑲꌠꏭꐋꀋꌡꐨꌋꆀꉾꃪꐨꋊꇤ,ꉇꄅꇩꏤꑴꉼꌋꆀꀉꑌꊭꊐꀉꑌꄅꑭꊂꀉꑌꈨꇬꈴꄉꐮꉂꐮꅉꃅꐮꎾꈴꌠꃅꈧ,ꇩꏤꐮꃆꂮꐊꈴꃅꀻꎆꌠꄹꇙꌠꎁꃅꏣꀋꑌꃅꑆꊋꅐꌞꀐ。ꂰꇩ、ꀒꇊꌦ、ꉴꇩꏤꋍꑠꑴꉼꌋꆀꉩꍏꑴꉼꌋꆀꉺꏦꐮꑌꑲꌠꎍꐽꃅꄹꎆ,ꃔꇩꇩꂱꑴꉼꌋꆀꄮꈉꏤꄉꐮꑌꑲꉺꏦꄕꊪꎼꇁꀐ,ꄚꃆꂮꐥꌠꇩꏤꑴꉼꌋꆀꐮꑌꑲꌠꐪꊛꐨꌋꆀꎍꐽꐨꌭꈬꄉꀐ。ꐪꊛꄉꇩꏤꈁꐥꌠꑴꉼꉻꏑ、ꄏꃀꇩꏤꈁꐥꌠꑴꉼꇢꊭꃀꀉꒉꈿ、ꑸꄠꑴꉼꉉꍣꅉ、ꑸꉩꑴꉼꐋꀨ꒜ꈿꌠꑠꇩꏹꌋꆀꃅꄷꑴꉼꎀꍹꇬꋈꄻꐨꐥꌠꂿꄐꋊꇤ。ꏣꀋꑌꃅꌕꃢꀕꌠꋧꃅꑴꍈꃀꀉꒉꈿꌠꊭꄎꌤꃅꌠꃅꈽ,ꃀꀉꒉꈿꅉꇬꄉꉻꏑꇩꄹꇙꌊꄙꈎꀻꎆꁻꌐꃅꇫꑟ,ꃰꊿꐯꇯꀻꎆꌠꊥꎆꌠꌤꃆꀉꒉꀊꂾꑠꇬꍏꇩꁁꏯꑌꈇꉆꈉꉉꈻꄉ,ꀻꎆꇰꌠꇩꏤꈁꐥꌠꑴꉼꏲꌋꀉꇨꃅꇫꉜꁨꀐꌠꀉꄂꀋꉬꃅ,ꉈꑴꃀꀉꒉꈿꌠꊌꐨꑌꐚꀕꌠꊌꌠꎁꃅꂿꄐꀋꂿ꒧ꌠꑌꋊꇤꀐ。ꉪꊇꉈꑴꃄꅉꑽꅉꀉꑌꑵꇬꄉ,ꉪꇩꏤꅉꀨꉪꐨꉉꈻꄉ,ꇩꏹꐧꋦꁳꃹꅼꃅꍏꇩꅉꀨꇩꏤꐛꐪꅉꐚꎻ,ꃹꅼꃅꍏꇩꈆꑪꃅꀻꎆꌠꌭꈬ、ꄮꐽꀻꎆꌠꈝꂾꈴꌠꏭꌧꐚꎻ。

  (ꌕ)ꊨꏦꑴꅉꋈꄻꌠꊋꀥꇱꀐ。ꎮꊈꉼꆹꈍꄮꑌꉪꇐꍔꍞꋈꄻꌠꌌꀨꇬꄉ,ꍔꍞꃅꍜꎃꊒꌠꌭꈬ,ꀋꆏꃅꄈꅿꏃꂠꌠꌭꈬꌠꑴꐚꐨꌋꆀꀋꎪꐨꊋꀥꇱ,ꐧꋦꉪꏦꄹꏦꌭꈬꌠꑴꐚꐨꌋꆀꀋꎪꐨꌭꈬ,ꍏꇩꐛꐨꐥꌠꐧꋦꉪꏦꍔꍞꀻꎆꈝꂾꌭꈬꌠꑴꐚꐨꌋꆀꀋꎪꐨꌭꈬ。ꎔꎗꃅꄈꅿꈛꏦꌐꏦꏱꁈꌋꆀꀉꒉꀊꂾꃅꏤꄻꄐꁆꃄꌬꑞꅉꑟ。ꌞꐯꌞꃅꏓꂱꉹꁌꌋꆀꐮꑌꑲ。ꎔꎗꃅꌐꄉꄜꂘꌠꀞꌊꉾꄉ,ꑌꐚꃅꄉꅍꃄꌬꊋꃤꉀꐕ。ꊋꀥꇱꄉꃅꄷꏓꄊꎮꊈꉼꌋꆀꐮꑌꑲ,ꃅꄷꏓꄊꏦꈴꄉꅍꃄꌬꌠꎖꋪꉾꃪꌠꌶꄻ,ꐯꇯꄉꐧꋦꉪꏦꋯꁦꏦꃤꄹꏦꋈꄻꌠꄹꇙ。ꌐꁨꊈꑼꉼꈧꌠꆹꌤꃅꃶꐚꐛꐨꇬꐊꄉ,ꂱꑱꉾꃪꐨꋊꇤꅐꇁ,ꃹꅼꃅꌐꄉꍤꎥꃄꄟꀉꑌꑵꃅꐙꑠꃅꈧꄉ,ꉜꐨꌋꆀꇖꐨꉾꌠꀉꑌꈨꄜꎼꇁꀐ,ꏓꄊꌤ꒧ꈬꆸꊇꁧꉀꐕ、ꄚꃆꂮꐥꌠꁆꏯꌤꃅꄺꀱꌠꄹꇙꌠꏭꂿꄐꀋꂿ꒧ꐯꀋꂿ꒧ꌠꋊꇤꀐ。ꇩꏤꑭꊂꏓꄊꌤꃅꅉꆹꏣꀋꑌꃅꂴꅑꌠꁦꄻꉾꃪꌠꅔꈽꌠꃅꄉ,ꊋꀥꇱꄉꇥꀯꊿꁥꂘꄻ,ꋍꉻꇖꊩꄟꃀꇇꀨꊿꌋꆀꁧꃤꃅꊿꁥꅿꂿꄐꀒꁨꋍꁘꃅꋊꇤꅐꇁꀐ。

  ꋌꃀꋋꈓꌠꇩꏤꑭꊂꏓꄊꎮꊈꉼꃅꊌꌠꊌꐨꆹ,ꐋꀨꃛꏢꄧꌌꊝꎻꏹꃅꄉꌠꄈꍏꑷꏃꂠꌠꇂꃴꄉ,ꇩꏤꑭꊂꏓꄊꁧꎁ、ꎮꊈꉼꇬꐊꊿ、ꌐꁨꊈꑼꉼꈧꌠꇬꐊꊿꌋꆀꇩꏤꑭꊂꏓꄊꌤꃅꅉꌤꃅꊿꎬꅧꃅꃅꑽꄉꊌꅝꌠꉬ,ꃅꄷꈁꐥꊐꌠꏓꄊꌋꆀꋍꎮꊈꉼꐯꇯꊋꇤꄉꊌꅜꌠꉬ,ꇩꃷꑼ、ꏓꂱꃔꑼꀊꂥꇊꀊꂥꊐꌠ、ꏓꂱꏦꍤꑼꀊꂥꇊꀊꂥꊐꌠꋮꄮꌤꃅꄉꊌꅜꌠꉬ,ꏓꂱꉹꁌꈁꐥꌠꊋꇨꃅꇫꊋꁈꄏꄉꊌꅜꌠꉬ。ꄚꄉ,ꉢꇩꏤꑭꊂꏓꄊꎮꊈꉼꁧꎁꃅꇬꀖꌌꀖꄉꈀꎭꀕꀐ!

  ꉈꑴꉪꊇꑌꏡꐚꃅꊌꂿꇬ,ꌤꃅꅉꇬꉈꑴꄺꀱꄻꅐꅉꀉꑌꈨꐥꑴꌦ。ꋍꆏꁧꎁꂿꄐꋊꇤꌠꁧꃤꃅꏦꀧꑞꅉꀒꁨꋍꁘꃅꉀꐕꄻꅐꑴꌦ,ꑍꆏꏦꃤꄺꀱꈜꀕꇈꋬꈭꈴꏦꄹꏤꄻꌠꆹꀒꁨꋍꁘꃅꊋꀥꇱꄉꒃꉇꄻꅐꑴꌦ,ꌕꆏꍞꊟꌤꃅꌠꀋꉬꀋꉆꅉꀒꁨꋍꁘꃅꌌꄞꅐꌶꑴꌦ。ꉪꊇꆹꀉꇨꃅꌤꃆꋋꈨꉜꁨ,ꆺꀋꒉꃅꁧꎁꉜꐨꅲꇫ,ꏁꁈꃅꊌꐨꐥꌠꈺꌬꄉꎔꎗꃅꌌꂥꀘꇧꎭ。

  ꍏꇩꐛꐨꐧꋦꉪꏦꏦꃤꉻꑫꏤꄻꐛꇁꌠꈻꇐꀉꒉꀊꂾꌠꌋꆀꅉꀨꎖꋪ

  2010ꈎꑟꇬꆏꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꄈꌋꆀꏓꂱꄸꉪꊇꁵꄉꌠꐩꋊꂿꃆꀉꒉꀊꂾꇈꆼꇨꌠꉬ。ꍏꇩꀊꏀꄻꐛꈭꐨꈜꀕꇈꄺꀱꁉꃑꊂꅑꅸꇁꌠꃅꐎ30ꎖꈎꅑꅸꇁꌠ,ꍏꇩꇭꍣꄈꎃꊒꃅꏲꂠꌠꇂꃴꄉ,꒔ꑞ꒔ꁆꏯꀋꆏꃅꏟꈯꃅꐯꇯꊋꇤꇈ,ꉪꇩꏤꏦꄻꌤꃅꌠꊌꐨꀉꒉꀊꂾꋧꃅꃅꇫꂿꌠꊌꀐ。1982ꈓꆏꀋꃋꌬꌠꏦꃀꉌꃹꈴꀐ,ꋍꈭꐨꆏꉇꉻꃅꒊꃅꇁꐛꐨꀻꎆꈉꐨꇬꈴꄉ,ꂴꊁꃅꏦꃀꄺꀱꄜꑘ4ꏢꉌꃹꈴꀐ。2010ꈎꈎꂫꑟꇬ,ꉪꇩꏤꆹꀋꃋꌬꌠꏦꃤꇿꋌꐥꌠ236ꐘ、ꏲꑘꏦꇗ690ꎖꐘ、ꃅꄷꃅꐙꌠꏦꇗ8600ꎖꐘꏤꄻꇈ,ꄷꀋꁧꐊꑷꃅꀋꃋꌬꌠꏦꃤꌋꆀꏲꑘꏦꇗ、ꃅꄷꃅꐙꌠꏦꇗꏓꇱꋊꑣꌠꌤꃅꀐ。ꀋꃋꋋꇅꆏ,ꐧꋦꐮꃆꂮ꒔ꑞ꒔ꁆꏯꇬꉱꑷꌐꌠꏦꃤꌤꃅꅉꐥꈴꀐ,ꏦꃤꌤꃅꅉ꒔ꑞ꒔ꂷꌠꇬꅉꀨꃅꐙꌠ、ꀋꉬꀋꉆꃅꐙꌠꏦꃤꆹꏤꄻꄉꀐ,ꄚꐊꌠꏲꑘꏦꃤꌋꆀꃅꄷꃅꐙꌠꏦꇗꊼꇅꐛꒆ,ꏦꃤꉻꑫꈏꇓꀑꐱꃅꈆꑪꐮꄮꏓꋍꃱꃅꐙ。ꍏꇩꇩꏤꐛꐪꌋꆀꃶꐚꐛꐪꇬꉜꄉ、ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꈉꐨꇬꄐꊒ、ꏓꇱꃅꄈꌋꆀꏓꂱꉪꐨꄛꑣꌠ,ꏦꃀꌌꀨꇬꄉ,ꏦꃀꃆꂮꐥꄉꏦꃤ、ꉹꁌꏦꃤꃼꇇꏦꃤꑠꏦꃤꌤꃅꅉꀉꑌꂷꌠꏦꃤꌌꈯꄜꃅꄉ,ꏦꃤ、ꏲꑘꏦꇗ、ꃅꄷꃅꐙꌠꏦꇗꑠꀉꑌꏠꊐꏦꃤꋊꍬꌠꇫꐊꌠꍏꇩꐛꐨꐧꋦꉪꏦꏦꃤꉻꑫꏓꐛꀐ,ꇩꏤꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠꌋꆀꒆꉻꋦꈭꋈꄻꌠ꒔ꑞ꒔ꁆꏯꌠꏦꃤꍬꅉꐥꌐꌠꃅꇫꑟꀐ,ꄈꅿꊯꉬꈭꃀꀉꒉꈿꅉꇬꄜꎼꇁꌠꅑꅸ2010ꈎꑟꇬꆏꍏꇩꐛꐨꐧꋦꉪꏦꏦꃤꉻꑫꏓꐛꌠꌤꃅꑞꅉꁻꌐꆏꏤꈉꈐꃅꃅꇫꑟꌐ。

  ꀋꉊꄻꈎꊁꊭꌠꅑꅸꇁꌠ,ꉪꊇꆹꍏꇩꐛꐨꐧꋦꉪꏦꏦꃤꉻꑫꇬꆼꒆꄉ,ꂴꊁꃅꑋꇖꃀꌕꂷꈿꄉ,ꄻꐛꌠꈴꎁꉪꀱ,ꈻꇐꀉꒉꀊꂾꌠꉉꍣ,ꀑꐱꅉꀨꎖꋪꏓꈹ,ꃅꒊꃅꇁꂿꃆꎥꃪ。꒔ꑞ꒔ꁆꏯꐯꇯꉜꇬ,ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꉪꇩꏤꐧꋦꉪꏦꋯꁦꏦꄹꋈꄻꐩꋊꇬꆏꈉꇓꌐꀋꂿꑘꂷꉬ,ꍏꇩꐛꐨꐧꋦꉪꏦꄹꏦ꒔ꁘ꒔ꁘꃅꐛꒆꇁꌠꌐꐪꀋꉬꀋꉆꌠꉬ,ꃶꐚꈻꇐꀉꒉꀊꂾꌠꌋꆀꐩꋊꈻꇐꀊꎴꃅꐥ。

  ꋍꏢꌠ,ꍏꇩꐛꐨꐧꋦꉪꏦꏦꃤꉻꑫꆹꍏꇩꐛꐨꐧꋦꉪꏦꐛꊈꌭꈬꇬꎷꌠꏦꄹꅉꃀꉬ。ꂷꇻꌦꉪꏦꅉꀨꇗꏦꌋꆀꍏꇩꀑꐱꃶꐚꐛꐨꏓꐯꇯꄉ,ꊨꏦꈝꃀꍬꄉ,ꍏꇩꐛꐨꐧꋦꉪꏦꋈꄻꌠꆹ,ꉪꊇꄈꐩꋊꎖꋪꏓꈹꄉꊌꌠꅉꀨꊨꄅꅇꉬ,ꉈꑴꉪꇩꏤꀻꎆꁨꎆꌠꈭꈜꎃꊒꌠꀉꄂꏡꌠꑌꉬ。ꀋꎪꃅꍏꇩꐛꐨꐧꋦꉪꏦꌭꈬꇬ,ꀋꉬꀋꉆꌠꆏꍔꍞꃅꍜꎃꊒꌠꌭꈬꄉ,ꇩꏤꁧꀦꄹꏦꃆꂮꑠꏥꏦꀉꒉꀊꂾꌠꇬꐮꃆꂮꐥꌠꌤꃆꀂꏽꀋꇙꀋꑐꌠꉬ。ꇘꑐꇬꆹ,ꐧꋦꉪꏦꐛꏀꈴꋈꄻꌠꉉꅉꇬꀋꐛꌠꀉꄂꀋꉬꃅ,ꊌꅜꀐꌠꀻꎆꊌꐨꑌꇫꈴꁧꌠ,ꄷꀋꁧꇩꏤꂯꈏꇓꇘꑐꌠꇬꃹꁧꉆꌠ。ꍏꇩꐛꐨꐧꋦꉪꏦꏦꃤꉻꑫꆹ,ꏦꃀꌋꆀꏦꃤꌌꇶꏦꃅꄉ,ꇩꏤꁧꀦꄹꏦꌋꆀꁧꀦꂿꃆꊨꄅꄉꀐ,ꍏꇩꇭꍣꄈꏲꂠꉆꈉꊨꄅꄉꀐ,ꂷꇻꌦꆺꆀꉪꏦ、ꃀꊱꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꇰꀋꃀꌠꄐꇺꉆꈉꊨꄅꄉꀐ,ꇮꃅꊿꏠꌠꏲꂠꌠ、ꇮꃅꊿꂿ꒧ꊿꏓꇱꌠꌌꅉꃀꃅꄉꌠꏓꂱꋯꁦꌅꈌꌬꌠꇩꄜꊨꄅꄉꀐ,ꏓꂱꁧꎁꃀꀉꒉꄹꏦꏲꄜꊨꄅꄉꀐ,ꇩꏤꌅꈌꑞꑌꏓꂱꃤꉬꌠ、ꉻꊿꏦꃤꈴꄉꌅꈌꌋꆀꑴꌅꐨꀊꐯꃅꐥꌠꊨꄅꄉꀐ,ꍏꇩꇭꍣꄈꏲꂠꌠꄈꀉꑌꃅꇷꃅꌠꌋꆀꍔꍞꋮꇖꄹꏦ、ꊿꋅꃄꁕꊨꏦꏲꄹꏦꉈꑴꅉꂫꊐꌠꉹꁌꊨꏦꏲꄹꏦꊨꄅꄉꀐ,ꉻꁨꏦꌌꀨꄜꃅꄉ、ꁨꏦꀉꑌꑵꐥꌠꎆꏣꐯꇯꀻꎆꌠꅉꀨꎆꏣꄹꏦꌋꆀꃅꐨꉜꄉꁸꌠꌌꀨꄜꃅꄉ、ꁷꄻꄟꀉꑌꑵꃅꐯꇯꐥꌠꁷꄻꄹꏦꊨꄅꄉꀐ。ꍏꇩꐛꐪꇬꉜꄉ,ꊨꄅꃅꉪꊇꆹꄈꀉꑌꃅꐮꆦꄉꏲꌠꀋꃅ,ꄐꇺꉪꇐꀉꑌꑵꃅꐙꌠꀋꃅ,“ꌕꌅꈌꐮꐞꄙ”ꌠꌋꆀꑍꑼꄹꏦꀋꃅ,ꆃꀠꄹꏦꀋꃅ,ꑴꅉꁨꏦꈴꌠꀋꃅꄷꄜ。ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꇩꄻꌄꆣ、ꎴꏲꑘꒃꌠꏦꄹꅉꃀꌆꈬꄉ,ꄹꏦꇬ、ꏦꃤꇬꄉꍏꇩꇭꍣꄈꆹꍏꇩꐛꐨꐧꋦꉪꏦꌤꑘꏲꂠꈯꄜꉬꇬꎷꌠꄉꀧ,ꇩꏤꌅꈌꈁꐥꌠꃅꏟꈯꃅꒃꏓꂱꇇꈐꊐꄉꇬꎷꌠꄉꀧ,ꊿꋅꄁꋦ、ꇩꏤꌅꀨꌋꆀꏱꁕꐛꒆꌠꄉꀧ,ꇩꏤꏓꋍꃱꃅ、ꐧꋦꑘꒃꌠꌋꆀꊿꋅꈁꐥꌠꀉꒉꃅꋯꑌꌠꄉꀧ,ꀋꎪꃅꄁꋦꑴꌅꌠꄮꐽꃅꉇꉻꏭꑌꑲꌠꏱꁈꌬ、ꄮꐽꃅꀻꎆꌠꈝꃀꍬꇬꎷꌠꄉꀧ,ꇩꏤꐥꍂꃅꍏꇩꐛꐨꐧꋦꉪꏦꃅꍜꎃꊒꌠꇬꍬꄉꊋꇤꄉꁨꆹꇬꎷꌠꄉꀧ。

  ꑍꏢꌠ,ꍏꇩꐛꐨꐧꋦꉪꏦꏦꃤꉻꑫꆹꍏꇩꐛꐨꐧꋦꉪꏦꏀꀺꃄꌬꌠꏦꄹꄞꅐꌠꉬ。ꄺꀱꁉꃑꌠꆹꉪꄈꇩꏤꑭꊂꊿꋅꈁꐥꌠꏓꂱꏃꂠꌊꏤꄻꄉꌠꀋꃋꋋꄮꍏꇩꊫꂫꇬꅑꎍꌠꌊꄻꐨꀋꉬꀋꉆꌠꉬ,ꉈꑴꍏꇩꐛꐨꐧꋦꉪꏦꌭꈬꌋꆀꀻꎆ、ꍏꉸꊿꋅꇰꀋꃀꃅꀱꌄꆣꌠꃅꇫꑟꌠꀋꈴꀋꉆꌠꈝꃀꑌꉬ,ꌄꆣꊋꃤꀊꏀꌠꄸꐧꋦꉪꏦꏀꀺꅉꇬꇱꀐ。ꃅꐎ30ꎖꈎꅑꅸꇁꌠ,ꉪꊇꈍꄮꑌꀋꎪꃅꎆꏣꋈꄻꌠꌌꈯꄜꃅꄉꇬꎷ,ꐊꑷꃅꄺꀱꁉꃑꌠꄹꎆ,ꀉꇨꃅꏓꐯꇯꄉꌠꄐꎖꎆꏣꏦꉻꇬꄉꌄꆣꊋꑌꌠꐧꋦꉪꏦꃷꎏꎆꏣꏦꉻꇬꑟ、ꋍꎤꁁꋍꎤꃅꐙꌠꇬꄉꐊꑷꃅꁉꃑꌠꇰꀋꃀꌠꐩꋊꆹꏮꅉꇬꑟꌠꃅꇫꑟꄉ,ꀉꇨꃅꏓꂱꉹꁌꋍꏅꌠꏣꀋꑌꐨꄕꊪꎼꇁꄉ,ꀉꇨꃅꐧꋦꒃꅐꊋꃤꁌꄝꌋꆀꀻꎆꀐ,ꉪꇩꏤꆹꋧꃅꇬꀁꑌꃅꐥꌠꐳꐨꌌꊛꄉꐳꃅꁨꉜꄉꀻꎆꇰ。ꉪꊇꆹꋋꇅꃅꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꃄꄻꎖꋪꉀꐕꌊꏦꃤꃅꄉꇈ,ꃅꋊꐊꄉꁨꆹ,ꄺꀱꁉꃑꅉꇬꅐꇁꌠꐛꐪꀊꏀꌠꌤꃆꀊꏀꌠꇬꈴꄉ,ꎆꏣꀻꎆꄟꆹꏮꌠꄹꇙ,ꏦꃤꇬꈴꄉꏲꌠꌋꆀꎃꊒꃅꏦꌬꌠꄹꇙ,ꉹꁌꐥꐨꏦꀧꌋꆀꄻꃪꌠꌌꀨꃅꄉꌠꐧꋦꋈꄻꌠꄹꇙ,ꐧꋦꉪꏦꁱꀕꀉꒉꃅꀻꎆꀉꇨꃅꌄꆣꌠꄹꇙ,ꊾꌋꆀꋌꐛꋌꐙꐮꄮꃅꐮꐊꑠꁆꏯꄉꄚꃆꂮꐥꌠꏦꃤꄹꏦꏤꄻꌋꆀꄻꐛꒆ,ꋒꐯꋒꃅꏦꃤꋊꍬ、ꄐꇺ、ꏦꀧꌠꌋꆀꊥꎆꂿꄐꋊꇤ。ꍏꇩꐛꐨꐧꋦꉪꏦꏦꃤꉻꑫꏓꐛꇬ,ꄹꏦꇬ、ꏦꃤꇬꄉꇩꏤꏦꀧꄉꀋꎪꃅꄺꀱꁉꃑꌠꃅꍜꎃꊒꌠꌭꈬꇬꎷꄉ,ꊋꇤꄉꌄꆣꊋꑌ、ꇿꋌꐥ、ꀊꅰꃅꁉꃑ、ꈆꑪꃅꀻꎆꌠꇬꈲꏣꐥꌠꏦꉻꉺꏦꄻꐛꄉ,ꉪꇩꏤꐧꋦꉪꏦꄹꏦꀋꆏꃅꊨꏦꀱꊨꏦꄻꐛꒆꌋꆀꀻꎆꎻ。

  ꌕꏢꌠ,ꍏꇩꐛꐨꐧꋦꉪꏦꏦꃤꉻꑫꆹꍏꇩꐛꐨꐧꋦꉪꏦꌄꆣꐞꄿꌠꏦꃤꏦꀧꅍꉬ。ꐛꏀꈴꌠꃅꇫꑟꌠꆹ,ꍏꇩꊿꋍꋏꇈꋍꋏꌠꉌꉪꐨꎔꃨꌠꌋꆀꉈꈽꁻꌐꀋꎪꀋꑴꌠꉬ。ꄺꀱꁉꃑꊂꃅꐎ30ꎖꈎꅑꅸꇁꌠ,ꉪꊇꍏꇩꐛꐨꐧꋦꉪꏦꈝꃀꀹꄻꅐꇁꄉ,ꍏꇩꐛꐨꐧꋦꉪꏦꌧꇗꉻꑫꏓꐛꀐ,ꋋꆹꉪꊇꃅꊌꐨꌋꆀꀻꎆꐨꊌꅜꌠꁢꊧꁧꀦꉬ。ꉪꊇꆏꈍꄮꑌꍏꇩꐛꐨꐧꋦꉪꏦꁈꁧꇰꀋ꒜ꁬꌠꀊꂥꃅꐕꄉ,ꃨꆰꐨꑞꑌꀋꏦ,ꁧꏖꐨꑞꑌꀋꅲꃅ,ꉌꊢꑓꊢꃅꋈꄻꌠꃅ,ꀋꎪꀋꑴꃅꀻꎆꌠꏂ,2020ꈎꑟꄮꇬꐊꑷꃅꊼꇅꌣꈚꌠꐧꋦꋈꄻꐛꌠꉈꈽꁻꌐꃅꇫꑟ,ꃅꋊꋋꋏꐧꀠꊬꌠꑟꇬꀑꐱꃅꐛꏀꈴꌠꃅꇫꑟꂿꄷ。ꉪꊇꊌꅜꌠꀻꎆꊌꐨꆏꏦꃤꄹꏦꇫꏦꀧꌠꌋꆀꐮꐞꀋꉆ,ꉪꊇꊋꇤꄉꀊꅰꎔꃨꌠꊫꂫꀹꄻꌠꑌꏦꄹꇫꏦꀧꌠꌋꆀꐮꐞꀋꉆꌠꉬ。ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꇩꏤꌤꑘ꒔ꑞ꒔ꐘꀻꎆꌠꌌꏦꄹꈴꌠꈝꃀꇬꃹꆹꄉ,ꄹꏦꀂꏽ、ꏦꃤꀂꏽꇬꄉꇩꏤꀻꎆꇢꊭꇬꁧꀦꐨ、ꐊꑷꐨ、ꎍꐽꐨꌋꆀꀊꉗꐨꐥꌠꌤꃆꂥꀘꇧꎭꀐ,ꐧꋦꉪꏦꃷꎏꎆꏣꏦꉻꀋꆏꃅꄻꐛꒆ、ꐧꋦꉪꏦꋯꁦꍔꍞꃹꅼꃅꀻꎆ、ꐧꋦꉪꏦꁱꀕꄞꅐꌠꋍꑍꋍꉙꃅꌄꆣ、ꏣꀋꑌꃅꐧꋦꉪꏦꐮꄮꐧꋦꋈꄻꌠꎁꃅ,ꁌꐨꉜꐨ、ꀻꎆꃅꍜꌋꆀꈝꃀꁧꀦꑠꊨꄅꀨꄅꃅꏤꄻꎼꇁꀐ,ꌣꈚꋯꁦꌧꑳꐮꄮꌠꐧꋦꉪꏦꐛꏀꈴꌠꇩꏤꋈꄻ、ꍏꉸꊿꋅꇰꀋ꒜ꃅꀱꉀꎆꌠꎁꃅꏦꄹꅉꃀꏟꈯꀕꃅꌆꄻꄉꀐ。

  ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꍏꇩꇭꍣꄈꏓꂱꉹꁌꋍꏅꌠꏃꂠꌊꐧꋦꉪꏦꋯꁦꀻꎆ、ꐧꋦꉪꏦꏦꄹꄻꐛꒆꅉꇬꊌꅜꌠꃅꊌꐨꀉꒉꀊꂾꌠꉬ。ꐋꀨꃀꊱꄏꌌꈯꄜꃅꄉꌠꄈꅿꍏꑷꏲꌋꋍꉻꋍꋏꋎꌠꆏ,ꇩꏤꑭꊂꊿꋅꈁꐥꌠꏓꂱꏃꂠꄉꀊꉗꃅꌉꈿꉇꈽꄉ,ꍏꉸꏓꂱꇭꉼꇩꄻꐛꀐ,ꄷꀋꁧ《ꐮꐊꐱꀨ》ꌋꆀꍏꇩꀊꏀꏦꃀꉘꃀꋐꌠꏤꄻꄉꀐ,ꇩꏤꄹꏦꁧꀦꏤꄻꎼꇁꄉ,ꐧꋦꉪꏦꋯꁦꄹꏦꋈꄻꌠꌋꆀꍏꇩꐛꐨꐧꋦꉪꏦꏦꃤꉻꑫꏓꐛꌠꎁꃅꍔꍞꇎꏦꁧꀦꌋꆀꄹꏦꅉꃀꌆꄻꄉꀐ。ꐋꀨꄓꑦꀻꌌꈯꄜꃅꄉꌠꄈꅿꍏꑷꏲꌋꋍꉻꑍꋏꋎꌠꆏ,ꃹꅼꃅ“ꁱꀕꀉꒉꃅꇝꂱ”ꑗꉘꏓꈹꇈ,ꄈꌋꆀꇩꏤꌤꃅꀨꄉꌠꆹꏮꌊꎆꏣꋈꄻꀂꏽꇁ、ꄺꀱꁉꃑꐩꋊꃅꐙꌠꏤꐪꃄꌬꈭꐨ,ꊋꀥꇱꄉꐧꋦꉪꏦꏦꄹꋈꄻꌠꌌꌐꏦꀋꎪꀋꑴꌠꃅꄉꏤꄻꄉ,ꀋꎪꃅꐧꋦꉪꏦꋯꁦꁳꄹꏦꈴ、ꏦꃤꈴꎻ,ꄹꏦꌋꆀꏦꃤꋌꑵꁳꏲꂠꊿꄺꀱꒉꄸꃅꄺꀱꄡꎽ,ꏲꂠꊿꉪꐨꌋꆀꋓꉪꁨꐨꄺꀱꒉꄸꃅꄺꀱꄡꎽꄷꊡꀱ,ꏦꍬꌠꏦꐥ,ꏦꐥꆏꏦꍬ,ꏦꌬꆏꏦꇨ,ꏦꐆꆏꅓꁵꌠꃅꇫꑟꄉ,ꐧꋦꉪꏦꋯꁦꏦꄹꋈꄻꌠꉘꁇꁉꃅꀻꎆꌠꀊꏀꊬꌠꀹꄻꎼꇁꀐ。ꐋꀨꏦꊱꂱꌌꈯꄜꃅꄉꌠꄈꅿꍏꑷꏲꌋꋍꉻꌕꋏꋎꌠꆏ,ꄈꑭꊂꇩꏤꑭꊂꊿꋅꈁꐥꌠꏓꂱꏃꂠꄉꄺꀱꁉꃑꇰꀋ꒜ꌠꌤꑘꊋꐛꃅꄹꆷꌊꃅꋊ21ꋏꌠꇬꃹꆹ,ꀋꆏꃅꍏꇩꐛꐨꐧꋦꉪꏦꋯꁦꏦꄹꋈꄻꌠꉪꇐꀉꇨꃅꀻꎆꀐ,ꉘꃀꃢꌠꏦꃤꇬꈴꄉꇩꏤꏱꄻꌠꌌꄈꏓꂱꏃꂠꄉꇩꏤꏱꄻꌠꅉꀨꌐꏦꏁꁈꃅꄉꏤꄻꎼꇁꄉ,ꐧꋦꉪꏦꏦꏲꇩꏤꋈꄻꌠꌌꐧꋦꉪꏦꐛꏀꈴꋈꄻꌠꐊꇐꀋꂿ꒧ꌠꃅꄉ,ꄷꀋꁧꊨꄅꃅ2010ꈎꑟꇬꍏꇩꐛꐨꐧꋦꉪꏦꏦꃤꉻꑫꏓꐛꌠꏦꄻꌤꃅꑞꅉꄜꎼꇁꄉ,ꐧꋦꉪꏦꋯꁦꏦꄹꋈꄻꌠꀊꏀꊬꌠꀹꄻꎼꇁꀐ。ꄈꅿꊰꃘꃢꃀꀉꒉꈿꊂꅑꅸꇁꌠ,ꐋꀨꃛꏢꄧꌌꊝꎼꏹꃅꄉꌠꄈꍏꑷꂴꊛꊁꁉ、ꃅꋊꐊꄉꁨꆹ,ꐊꑷꃅꊼꇅꌣꈚꌠꐧꋦꋈꄻꌠꇬꀋꎪꀋꑴꃅꄺꀱꁉꃑꌤꑘꇰꀋ꒜ꌠꌌꐪꊛꄉꄹꆷꌊꀒꁨꆹ,ꈆꑪꃅꀻꎆꌠꉜꐨꄷꄐꇐꏤꁈꐨꐥꌠꉪꇐꀉꒉꀊꂾꌠꌋꆀꐧꋦꉪꏦꐮꄮꐧꋦꋈꄻꌠꄐꇐꏤꁈꐨꐥꌠꂿꃆꀉꒉꀊꂾꌠꄜꎼꇁ,ꐊꑷꃅꏦꃤꇬꈴꄉꇩꏤꏱꄻꌠꅉꀨꌐꏦꏁꁈꃄꌬ,ꐧꋦꉪꏦꋯꁦꍔꍞꀋꉬꀋꉆꐯꀋꉬꀋꉆꌠꆹꀋꎪꃅꄈꅿꏃꂠ、ꏓꂱꑱꏲꃥꌋꐛ、ꏦꃤꇬꈴꄉꇩꏤꏱꄻꌠꌌꋭꋽꃅꏓꋍꃱꃅꄉꌠꌭꈬꇬꎷꄉ,ꐧꋦꉪꏦꋯꁦꏦꄹꋈꄻꌠꐛꐪꀊꏀꀹꄻꎼꇁꀐ。

  ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,꒔ꑞ꒔ꁁꏯꀊꉗꃅꐮꐊꄉꊋꇤꏡꇤꌠꄽꂫꊌꐨꉬ。ꇩꏤꑭꊂꏓꄊꌋꆀꋍꅉꀕꌤꏲꊈꑼꉼꆏꎔꎗꃅꏦꃀꌋꆀꏦꃤꄻꇬꁳꄉꌠꌅꊋꍬꌬ,ꀋꆏꃅꏦꄻꌤꃅꌠꄺꀱꌊꃪ,ꊋꇤꄉꏦꄻꊇꁧꐕꀊꂥ,ꍏꇩꐛꐨꐧꋦꉪꏦꏦꃤꏓꐛꌠꎁꃅꌤꃆꇿꋌꐥꌠꑠꀉꑌꈨꃅꀐ。ꇩꃷꑼꎆꏣꐧꋦꀻꎆꌠꌋꆀꏦꃤꃄꌬꈉꐨꇬꌋꆀꐮꄉꄐꂿꄷ,ꏦꃤꈴꄉꋋꇅꃅꏲꑘꏦꇗꏤꄻ,ꃅꄷꏓꄊꌋꆀꋍꎮꊈꉼꆏꂱꑱꃅꄷꐛꐨꇬꈴꄉ,ꏦꃤꈴꄉꃅꄷꃅꐙꌠꏦꇗꀉꑌꈨꏤꄻꎼꇁꀐ,ꍏꇩꐛꐨꐧꋦꉪꏦꏦꃤꉻꑫꏓꐛꌠꎁꃅꑆꊋꀋꂿꑘꃅꅐꌞꀐ。ꃅꄷꏓꂱꍔꃚꈁꐥꊐꌠ,ꏓꂱꃔꑼꌋꆀꏓꂱꏦꍤꑼꈁꐥꊐꌠꌋꆀꂽꉈꑴꄚꃆꂮꐥꌠꁁꏯꆏ,ꏓꂱꉹꁌꋍꏅꌠꌋꆀꌧꃀꌷꊿꈧꌠꊋꀉꒉꃅꁈꄏ、ꏣꀋꑌꃅꏦꃤꏤꄻꈽꄉ,ꍏꇩꐛꐨꐧꋦꉪꏦꏦꃤꉻꑫꏓꐛꌠꎁꃅꌧꐨꌋꆀꊋꃤꅐꌞꀐ。

  ꄺꀱꁉꃑ30ꎖꈎꅑꅸꇁꌠ,ꄈꍏꑷꏲꂠꌠꇂꃴꄉ,ꉪꊇꆏꊋꐛꃅꈝꃀꍏꇩꐛꐨꐊꌠꏦꃤꏤꄻꌠꑠꏢꈴꅐꇁꀐ。ꉪꊇꆏꄈꅿꏲꂠ、ꏓꂱꑱꏲꃥꌋꐛ、ꏦꈴꇩꏲꌠꋭꋽꃅꋍꃱꃅꌠꌭꈬꇬꎷ,ꏟꈯꃅꄈꌋꆀꇩꏤꌤꃅꃅꇴꄉꉻꆼꒆꄉ,ꎖꁨꐥ、ꌐꁨꐥ、ꊱꁨꐥꃅꏦꃤꏤꄻꌠꌤꃅ,ꃅꐎꈍꑌꊰꈎꀉꄂꃅꍏꇩꐛꐨꐧꋦꉪꏦꏦꃤꉻꑫꏓꐛꎼꇁꀐ,ꏦꃤꏤꄻꂿꃆꀉꇖꌠꆹꋧꃅꑠꀋꐥꌠ,ꊋꋠꐨꄘꑣꌠꋌꃀꑠꐥꀋꋻꌠ,ꊌꐨꈝꐮꃅꊌꌠꀋꉬ,ꎖꋪꆹꁌꇐꈤꐯꁌꇐꈤꌠꉬ。ꄚꈐꏭꎖꋪꀋꉬꀋꉆꌠꆏꑠꉬꏢꐥ。

  ꋍꆏ,ꄈꅿꏲꂠꌠꌭꈬꇬꎷ。ꄈꅿꏲꂠꌠꆹꏓꂱꑱꏲꃥꌋꐛꌠꌋꆀꏦꈴꇩꏲꌠꅉꀨꄉꀧꅍꉬ,ꉈꑴꊋꀥꇱꄉꋯꁦꏦꄹꋈꄻ、ꏦꃤꏤꄻꌤꃅꋒꌠꅉꀨꏦꀧꅍꑌꉬ。ꍏꇩꇭꍣꄈꆹꏓꂱꋍꏅꌠꅉꀨꈲꁧꎁꃅꌠ,ꄈꏤꄻꄉꌠꏱꁈꌐꏦꀉꒉꀊꂾꌠ,ꄜꎼꇁꌠꏦꃤꏤꄻꇖꐨꆹ,ꄈꑭꊂꇩꏤꑭꊂꋍꏅꌧꐨꏓꋧꄉꀐꌠ,ꉹꁌꋍꏅꌠꉪꐨꐮꐊꌠꄜꅐꇁꀐ。ꄈꅿꏲꂠꌠꌭꈬꇬꎷꌠꆹꉹꁌꋍꏅꈲꏣꇬꌋꆀꃶꐚꃅꐮꐊꌐꌠ。ꏦꃤꏤꄻꌤꃅꇬ,ꉪꊇꆏꈍꄮꑌꄈꅿꏲꂠꌠꌭꈬꇬꎷ,ꄈꅿꉜꐨꁳꏦꃤꏤꄻꈭꎁꇬꈴꄉꌌꇩꏤꉪꇐꐛ,ꌌꐧꋦꑭꊂꃅꐯꇯꄚꈴꄉꃅꌠꃅꇏꍬꏦꌋꆀꎕꏦꐛ,ꄹꏦꇬꄉ、ꏦꃤꇬꄉꄈꅿꈳꏦꌐꏦꏱꁈꃄꌬꇫꑟꌠꏦꀧ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꁣꀋꐥꃅꃅꌠꏦꀧ。ꉪꊇꆏꄈꌋꆀꇩꏤꈯꄜꂿꃆꇬꏟꈯꃅꆼꒆꄉꏓꇱꄐꎖꄉꏦꃤꏤꄻꌠꌤꃅ,ꈆꑪꃅꏦꄻꄐꎖꌠꌋꆀꏦꄻꎖꄎꌠꏤꄻ,ꏣꀋꑌꃅꏦꃤꏤꄻꐘꃆꀋꂿꑘꌠꄹꎆ,ꄈꌋꆀꇩꏤꏤꁈꄐꁆꀋꂿꑘꌠꃄꌬꇫꑟꌠꏦꀧ。ꏦꃤꏤꄻꇬꊝꇁꌠꊋꋠꌤꃆꀉꒉꀊꂾꌠꆹ,ꋋꇅꃅꄈꍏꑷꏭꄛꇰ。ꈍꃅꄿꂿ,ꉪꊇꏦꃤꏦꇗꈁꐥꌠꃅꄈꅿꏲꂠꌠꇂꃴꄉꏤꄻꄉꌠꉬ,ꉪꊇꏤꄻꄉꌠꏦꃤꏦꇗꈁꐥꌠꃅꄈꅿꏲꂠꌠꊋꀥꇱꌠꌋꆀꄻꃪꌠꇬꈲꏣꐥ,ꄈꅿꌅꈌꌬꑌꈉꉆꈉꄻꈫꈈꌠꌋꆀꄻꐛꒆꌠꇬꈲꏣꐥ,ꄈꁳꏓꂱꏃꂠꎻꄉꇿꋌꐥꃅꇩꏤꏱꄻꌠꇬꄉꀧꌠꈲꏣꐥꌶ。

  ꑍꆏ,ꍏꇩꐛꐨꐧꋦꉪꏦꌧꇗꉻꑫꌌꄐꇺꅍꃅꄉꌠꌭꈬꇬꎷ。ꎃꊒꌠꄐꇺꉪꇐꌭꈬꇬꎷꌠꆹ,ꋯꁦꏦꄹꋈꄻꌠꊋꀥꇱ、ꏦꄻꌤꃅꌊꃪꌠꅉꀨꇎꏦꉬ。ꍏꇩꐛꐨꐧꋦꉪꏦꌧꇗꉻꑫꆹꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠꌋꆀꈆꑪꃅꀻꎆꌠꉜꐨꑠꄐꇐꏤꁈꉪꇐꀉꒉꀊꂾꌠꄚꇬꐊꌠꈆꑪꌧꇐꉻꑫꉬ,ꂷꇻꌦꉪꏦꍏꇩꈴꌠꊌꐨꀊꏀꇊꀊꏀꌠꉬ,ꉪꊇꄈꍔꍞꌋꆀꉌꊈꁨꇐꁌꇐꈤꐯꁌꇐꈤꌠꉬ,ꇩꏤꑭꊂꊿꋅꈁꐥꌠꏓꂱꋯꑌꉈꈽꌠꐯꇯꉪꇐꅉꃀꉬ,ꈍꄮꑌꀊꉗꃅꌭꈬꌶꌠꄐꇺꉪꇐꉬ,ꉪꊇꌤꈁꐥꌠꃄꌬꌠꅉꀨꄐꌐꅍꉬ。ꏦꄻꌤꃅꇬ,ꉪꊇꆏꈍꄮꑌꍏꇩꐛꐨꐧꋦꉪꏦꌧꇗꉻꑫꌌꄐꇺꅍꃅꄉꇬꎷ ,ꄷꀋꁧꋋꈨꌌꉪꇐꉜꐨꏓꋍꃱꃅꏦꄻꉪꈜꊨꄅꌠꃅꄉ。ꏦꄻꌠꄐꇺꉪꇐꀂꏽꇬꆏ,ꉪꊇꈍꄮꑌꅉꀨꄹꏦꌭꈬꇬꎷꌠꇖꐘꌠꌭꈬꇬꎷꌠꌌꄺꀱꁉꃑꌭꈬꇬꎷꌠꏓꐯꇯꎼꇁ,ꐧꋦꉪꏦꅉꀨꏥꏦꌌꃷꎏꎆꏣꀻꎆꌠꏓꐯꇯꎼꇁ,ꎆꏣꅉꃀꐈꄻꌠꄹꇙꌠꌌꄩꇴꏲꉻꄺꀱꌠꄹꇙꌠꏓꐯꇯꎼꇁꇬꎷ,ꈲꁧꉀꐕꌠꌌꐧꋦꐽꊯꌠꊥꎆꌠꏓꐯꇯꎼꇁ,ꄺꀱꀻꎆꌠꊥꎆꌠꌌꐧꋦꎍꐽꇬꎷꌠꏓꐯꇯꎼꇁ,ꄂꋦꑴꌅꌠꌌꎆꏣꋧꃅꈴꌠꇬꐊꈽꌠꏓꐯꇯꎼꇁ,ꉪꊇꏤꄻꄉꌠꏦꃤꏦꇗꆹꐧꋦꉪꏦꄹꏦꄻꈬꌠꌋꆀꄻꐛꒆꌠꇬꈲꏣꐥ,ꐧꋦꒃꅐꊋꃤꁌꄝꌠꌋꆀꀻꎆꌠꇬꈲꏣꐥ,ꐧꋦꉪꏦꄹꏦꉾꃪꐨꋊꇤꎼꇁꌠꇬꈲꏣꐥꌠꄉꀧꄉ。

  ꌕꆏ,ꀋꎪꃅꍏꇩꇩꏤꐛꐨꌋꆀꃶꐚꐛꐨꇬꉜꄉꃅꇬꎷ。ꀋꎪꃅꉪꇩꏤꐛꐨꌋꆀꃶꐚꐛꐨꇬꉜꄉꃅꇬꎷꌠꆹ,ꊋꀥꇱꄉꋯꁦꏦꄹꋈꄻ、ꏦꃤꏤꄻꌊꉾꌠꌤꃅꇬꃶꐚꈉꐨꉬ。ꏦꃤꏤꄻꌤꃅꇬ,ꉪꊇꆏꈍꄮꑌꉪꇩꏤꐛꐨꌋꆀꃶꐚꐛꐨꇬꈴꄉꃅ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꇰꀋꃀꌠꃅꐨꑽꑌꌌꏦꃤꏤꄻꌠꅉꃀꃅꄉ,ꏟꈯꃅꎆꏣꋈꄻꌠꈯꄜꂿꃆꇬꆼꒆꄉ,ꏟꈯꃅꐊꑷꃅꊼꇅꌣꈚꌠꐧꋦꋈꄻꌠꉈꈽꁻꌐꇬꇬꆼꒆꄉ,ꏟꈯꃅꈆꑪꃅꀻꎆꌠꄹꇙꌠꌋꆀꐧꋦꄮꐽꃅꊥꎆꌠꏦꃤꏤꄻꌤꃅꌠꆼꒆꄉꃅ。ꎃꊒꃅꄺꀱꀻꎆꎍꐽꌠꃆꂮꒃꇇꈐꊐꄉ,ꋭꋽꃅꏦꃤꎍꐽꐨꌋꆀꃅꑽꐈꇙꐨꐮꃆꂮꀞꄻꋒ,ꋭꋽꃅꏦꃤꂴꂿꐨꌋꆀꃄꌬꉆꐨꐮꃆꂮꀞꄻꋒ,ꏦꃤꏤꄻꈭꎁꇬꌋꆀꄺꀱꁉꃑ、ꐧꋦꉪꏦꐛꏀꈴꋈꄻꈭꎁꇬꐮꄉꄐꌠꏦꀧ。ꃅꐨꎖꋪꊼꇅꐛꀕꌠ、ꋍꑞꋍꁆꏯꉜꐨꑌꊼꇅꐮꐊꌠꆏ,ꏤꄻꌊꊼꇅꑭꋧꃅꄉ,ꏦꃤꌬꉆꐨꀉꇨꎻ。ꃅꐨꎖꋪꊼꇅꐛꀋꒆꌠꄚꃄꌬꇬꏦꃤꌌꊼꇅꋊꍬꄻꅐꌠꆏ,ꂴꀑꐱꃅꌌꏤꄻꄉ,ꌌꃅꐨꇬꄐꇺꌠꎁꃅꋊꍬꌋꆀꏦꀧꅍꐥꎻ,ꄷꀋꁧꃹꅼꃅꄺꀱꌠꎁꃅꈥꈉꈨꊏꄉ,ꇎꏦꐛꒆꄮꇬꆏꄺꀱꁥꇱꎻ。ꄺꀱꁉꃑꇬꊝꇁꌠꐛꐪꀊꏀꌤꃆꀊꏀꈨꆏ,ꏦꃤꌌꏤꄻꇎꏦꀋꐥꌦꌠꆏ,ꂴꏦꃤꏤꄻꌠꏲꑘꏦꇗꌋꆀꃅꄷꃅꐙꌠꏦꇗꇬꈴꄉꀞ,ꂴꃅꂴꎖ,ꎖꋪꐥ、ꇎꏦꐛꒆꄮꇬꆏꌌꏤꄻꀱ。ꉪꊇꆏꇩꉈꏦꃤꏤꄻꎖꋪꌶꄻꌠꋓꉪꁨ,ꄚꈐꏭꉪꇬꈲꏣꐥꌠꆏꌶꄻ,ꀉꒆꅉꃅꇬꉚꄉꃅ。ꇩꏤꈧꌠꏦꃤꉻꑫꑌꐯꀋꌡ,ꉪꊇꆏꁮꐚꏭꇩꏤꋍꈨꏦꃤꉻꑫꌌꍏꇩꐛꐨꐧꋦꉪꏦꏦꃤꉻꑫꇬꉜꄉꀋꌬ,ꇩꉈꏦꃤꉻꑫꇬꏦꃤꋍꈨꆏ,ꉪꇩꏤꐛꐨꌋꆀꃅꐨꇬꄉꀋꄐꌠꆏ,ꉪꆏꇬꀋꌬ;ꏦꃤꇩꉈꏦꃤꉻꑫꇬꀋꐥꌠ,ꄚꉪꇩꏤꀋꃋꐥꐨꇬꈉꌠꆏ,ꉪꊇꋋꇅꃅꏤꄻꇬꇯ。

  ꇖꆏ,ꀋꎪꃅꊿꌌꀨꇬꄉ、ꉹꁌꎁꃅꏦꄻꌠꌭꈬꇬꎷ。ꊿꌌꀨꇬꄉ、ꉹꁌꎁꃅꏦꄹꌠꌭꈬꇬꎷꌠꆹ,ꊋꀥꇱꄉꋯꁦꏦꃤꋈꄻ、ꏦꃤꏤꄻꌤꃅꋒꌠꅉꀨꁻꌐꉬ。ꏦꃤꏤꄻꌤꃅꇬ,ꉪꊇꈍꄮꑌꃅꌊꋒ、ꌋꃅꋒ、ꀻꎆꋒꌠꌌꉹꁌꋍꏅꌠꅉꀨꈲꏣꄓꈌꌋꆀꑞꈌꃅꄉꇬꎷ,ꏦꃤꏤꄻꇬꉬꂿꏦꃤꋊꍬꇬꉬꂿꈍꄮꑌꊿꌌꀨꇬꄉ,ꏓꂱꀨꄜꉆꈉꁌꒉ,ꏓꂱꏀꀺꉌꊈꁌꒉ,ꏓꂱꃅꐨꏀꀺꅉꇬꌧꐨꑠꌶꄻ,ꏓꂱꃤꀻꎆꈉꐨꇬꄉꇙꊋꊌꅜ。ꎃꊒꃅꉹꁌꋍꏅꌠꅉꀨꈲꁧ、ꀋꃋꋋꊭꇬꉹꁌꐮꐊꈲꁧ、ꉹꁌꐯꀋꌡꌠꐋꀋꌡꈲꁧꐮꃆꂮꒃꇇꈐꊐꄉ,ꎃꊒꃅꐯꀋꌡꁁꏯꉹꁌꅿꈲꐪꉉꄜꌋꆀꏓꇲ,ꊋꒉꃅꏓꂱꇫꉈꇬꐯꉈꇬꈛꎂꐯꈛꎂꇯꍝꐯꇯꍝꌠꈲꐪꌤꃆꂥꀘ。ꎃꊒꃅꌅꈌꌋꆀꌅꈌꈲꁧ、ꌅꈌꌋꆀꆽꎍꐨꃆꂮꂥꀘ,ꏲꑘꌤꃅꅉ、ꍤꇽꌤꃅꅉ、ꏦꌬꌤꃅꅉꏭꑌꌅꈌꄻꅐꌠꄻꇬꁳꄉ,ꉈꑴꌅꈌꃄꌬꌠꌌꊋꀥꇱꄉꋊꍬ、ꏢꑲꌋꆀꍞꊟꌠꉜꁨ,ꑌꐚꃅꉻꊿ、ꏦꊿꌋꆀꀉꁁꎀꍹꅿꏦꄻꌅꈌꈲꁧꌋꃅ。ꀋꎪꃅꉹꁌꈜꇬꍬ,ꃹꅼꃅꈆꑪꃅꏦꄻ、ꋯꁦꃅꏦꄻꌠꄹꎆ,ꋒꐯꋒꃅꏓꄊꁧꎁꏦꄻꌠꇬꂿꄐꋊꇤ,ꀋꆏꃅꉻꊿꏦꄻꌠꏭꊱꁨꃅꃅꈽꌠꍔꒉ,ꏦꃤꏦꇗꄐꄉꌠꌋꆀꏦꄻꑋꇖꃀꈿ、ꉉꊪꃀꈿ、ꅲꊪꃀꈿꑠꀉꑌꑵꌠꇶꏦꄜꃑꌠꇬꈴꄉ,ꀊꐯꈭꃅꋍꑞꋍꁁꏯꉜꐨꈜꀕꇈꅉꂫꊐꌠꉹꁌꉉꐨꅱꄻ,ꑌꐚꃅꀊꐯꉪꑌ、ꉪꐨꏓꊭꐮꐊꌠꃅꇫꑟ,ꉪꊇꏤꄻꄉꏦꃤꏦꇗꋒꐯꃅꏓꂱꉹꁌꐮꐊꉪꐨꄜꎼꇁꎻ。

  ꉬꆏ,ꀋꎪꃅꐧꋦꉪꏦꏦꄹꏓꋍꃱꃅꌠꌭꈬ。ꐧꋦꉪꏦꏦꄹꏓꋍꃱꃅꌠꌭꈬꌠꆹ,ꊋꀥꇱꄉꋯꁦꏦꄹꋈꄻ、ꏦꄻꌤꃅꃅꋒꌠꈏꇓꇖꐨꉬ。ꉪꇩꏤꆹꋍꃱꃅꐙꌠꊿꋅꀉꑌꌠꄹꏦꋍꑵꀉꄂꌬꌠꇩꏤꂷꉬ。ꐧꋦꉪꏦꏦꄹꏓꋍꃱꃅꌠꆹ,ꇩꏤꋍꃱꃅ、ꊿꋅꋯꑌ、ꐧꋦꎍꐽꌠꌋꃅꌠꉬ,ꐛꏀꃷꎏꉻꑫꅉꃀꋍꃱꃅꌠꄻꐛ。ꋍꈭꐨ,ꉪꇩꏤꃄꁕꀊꐮ,ꃅꄷꈀꐥꌠꎅꏣ、ꁰꀕ、ꐧꋦꀻꎆꌠꐮꆽꀋꏣꐯꀋꏣ,ꇩꏤꆏꉈꑴꃹꅼꃅꐈꆴꌠꇬꎍꑴꌦ。ꇩꏤꐛꐪꅉꀨꋋꏢꆏ,ꇩꏤꋍꃱꃅꐙꇈꉈꑴꊐꁸꄉꏦꄻꌠꉺꏥꏤꄻꀐ。ꉪꊇꈍꄮꑌꀋꎪꃅꏦꃀꌌꇩꏤꁧꀦꏦꃤꃅꄉꌠꉆꈉꐤꒉꈌꑌꌠꀧꌋꃅꌠꌭꈬꇬꎷ,ꏦꇨꃅꏦꃤꇬꏤꄉꌠꌅꈌꈍꈐ、ꏦꃤꏤꄉꌠꈭꎁꇬꈴꄉꏦꄻꌤꃅꌠꍔꆗ,ꏦꃤꏦꇗꏤꄻꈭꐨ,ꀋꃋꌬꌠꏦꃤꏦꇗꌌꏓꐯꇯꄉꎵꄻ,ꄷꀋꁧꊋꀥꇱꄉꋊꍬꃅꐙꌠꁱꐘꁱꄀꄉꌠꍤꄻꄉ,ꏦꃤ、ꏲꑘꏦꄹ、ꃅꄷꐨꐥꌠꏦꄹꁳꏦꃀꌋꆀꐮꄡꄙꎻꌠꄉꀧ,ꏲꑘꏦꄹꁳꏦꃤꌋꆀꐮꄡꄙꎻꌠꄉꀧ,ꃅꄷꐨꐥꌠꏦꄹꁳꏦꃤ、ꏲꑘꏦꄹꌋꆀꐮꄡꄙꎻꌠꄉꀧ,ꏦꃤꏦꄹꏤꄻꌠꇢꊭꋮꄮꃅꐯꊛ、ꐮꇬꀋꄙꌠꄉꀧ,ꐧꋦꉪꏦꏦꄹꅿꋍꃱꃅꐙꌠꏦꀧꀐ。

  ꁧꎁꊈ,ꏦꃤꅿꀑꇬꊋꃤꆹꃄꌬꅉꇬꎍ。ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꀑꐱꃅꇬꏦꐥꏦꍬꌠꌤꃆꂥꀘꀐ,ꃆꂮꋋꈨꇂꃴꄉ,ꏦꐥꆏꏦꌬ、ꏦꌬꆏꏦꇨ、ꏦꐆꆏꅑꎹꌠꌤꃆꆏꀊꅰꃄꑓꅐꎑ、ꀊꅰꃅꃛꊸꃅꐙꇁ,ꋋꑌꏓꂱꉹꁌꁊꈴꃅꇫꉜꁨ、꒔ꑞ꒔ꁁꏯꀉꇨꃅꉉꄜꌠꌤꃆꉬ。ꑠꅹ,ꉪꊇꐪꊛꄉꏦꄻꌤꃅꌠꇬꊋꀥꇱꈭꐨ,ꏣꀋꑌꌠꇿꋌꐥꌠꏁꁈꌌꌬꄉ,ꑌꐚꃅꏦꃀꌋꆀꏦꃤꇿꋌꐥꃅꃄꌬꌠꏦꀧ。ꋍꆏꏦꃀꌋꆀꏦꃤꐤꒉꈌꑌꐨꌋꆀꑊꒉꐨꌋꃅ。ꇩꏤꌤꃅꅉꈁꐥꌠꌋꆀꇇꌭꊋꃤ、ꍔꄈꈁꐥꌠꌋꆀꐧꋦꏓꉻꈁꐥꌠ、ꎆꏂ꒧ꌤꑘꎀꍹꈁꐥꌠꐯꇯꀋꎪꃅꏦꃀꌋꆀꏦꃤꇬꍬꄡꑟ,ꎀꍹꈁꐥꌠꅀꊿꑞꂷꉬꄿꂿꐯꇯꏦꃀꌋꆀꏦꃤꄩꐂꌠꌅꈌꐋꀋꌡꌠꃅꀋꉆ,ꏦꃀꌋꆀꏦꃤꇬꐆꌠꃅꈧꈁꐥꌠꐯꇯꀋꎪꃅꅑꎹꌶ。ꑍꆏꀋꎪꃅꏦꃤꈴꄉꏲꑘꏲꌠꌋꆀꀋꈐꀋꉈꃅꏦꌬꌠꌭꈬ。ꇩꏤꏲ꒧ꌤꃅꅉꆏꏦꇨꃅꏦꃤꇬꏤꄉꌠꌅꈌꑞꅉꈍꈐꌋꆀꈭꎁꇬꈴꄉꌤꀞ,ꇤꐳꃅꏦꏲꍔꃚꋈꄻ。ꇩꏤꍤꇽꌤꃅꅉ、ꏦꍤꌤꃅꅉꆏꏦꃤꈴꄉꄂꃅꀋꈐꀋꉈꃅꍤꇽꌅꈌ、ꏦꍤꌅꈌꃄꌬ,ꐧꋦꀋꈐꀋꉈꎃꊒꑗꐥꌠꌋꃅ。ꌕꆏꐧꋦꑭꊂꅿꏦꃤꉪꐨꌋꆀꏦꏲꉪꉻꀥꇱ。ꈁꐥꊐꌠꏲꌋꇥꀯꌋꆀꇩꏤꌤꃅꅉꇬꌤꃅꊿꈧꌠꁳꂴꅑꄉꏦꃀꌋꆀꏦꃤꍬꄻꎻ,ꏦꃤꌬꄉꐥꐨꇬꃶꐚꌤꃆꂥꀘꇮ,ꏓꂱꉹꁌꋍꏅꌠꁳꏦꃤꈭꎁꈴꄉꈲꐪꇖꂟ、ꏟꃆꏈꑘꂥꀘ,ꏦꃤꇇꌭꌊꊨꏦꏦꊒꌅꈌꈲꐪꌋꃅꌠꅉꐚꎻ。ꇩꏤꑭꊂꏓꄊꌋꆀꋍꎮꊈꉼꆏꏦꃤꈴꄉꏦꃀꍞꊟꌋꆀꏦꃤꃄꌬꌠꀋꂿ꒧ꌠꌅꊋꃄꌬꌶ,ꃅꄷꈁꐥꊐꌠꏓꄊꌋꆀꋍꎮꊈꉼꆏꏦꃤꈴꄉꏦꃀ、ꏦꃤ、ꏲꑘꏦꄹꌌꂱꑱꏲꑘꏱꁕꈐꇬꍬꌬꌋꆀꃄꌬꌠꌅꊋꀋꂿ꒧ꌠꄉꀧꌶ,ꇩꏤꌤꃅꅉꈧꌠꏓꂱꄻꁵꄉꌠꌅꈌꃶꐚꃅꌌꏓꂱꎁꃅꈲꐪꏂꌠꄉꀧ。

  2011ꈎꂿꃆꀋꉬꀋꉆꌠ

  2011ꈎꆹ“ꊰꑋꉬ”ꊬꌠꇬꂾꈒꌠꉬ,ꉪꊇꆏꍏꇩꇭꍣꄈꄻꐛ90ꈎꈭꏝꐛꌠꋨꏦꂿꄷ。ꇩꏤꑭꊂꏓꄊꎮꊈꉼꌤꃅꌠꀑꐱꇖꐨꆏ:ꐊꑷꃅꄈꅿꃀꀉꒉꊰꏁꃢ、ꊰꏁꈭꉬꃢꐊꈴ꒜ꈿꌠꌋꆀꊯꊪꈭꇩꏤꑭꊂꏓꄊꇖꃢ꒜ꈿꌠꉌꊈꃄꌬ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿ꒧ꌠꌌꄐꌐꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꄈꅿꏲꂠ、ꏓꂱꑱꏲꃥꌊꐛ、ꏦꈴꇩꏲꌠꌌꊜꋽꃅꏓꋍꃱꃅꃄꌬꇫꑟꄉ,ꏟꈯꀕꃅꄈꌋꆀꇩꏤꌤꃅꃅꇴꄉꉻꀉꒉꌠꆽꒆꄉꏦꃤꈴꄉꌅꈌꃄꌬ,ꋒꐯꋒꃅꁧꎁꂿꄐꋊꇤ,ꑖꑟꃅꏓꂱꉹꁌꑌꑲ,ꄓꈌꀊꏀꌠꇬꄉꀒꁨꋍꁘꃅꏦꄻꌤꃅꌠꊋꀥꇱꌋꆀꄺꀱ,ꀋꆏꃅꍏꇩꐛꐨꐧꋦꉪꏦꏦꃤꉻꑫꏓꐛꒆ,ꃅꒊꃅꇁꀊꏀꌠꇂꃴꄉꀒꁨꋍꁘꃅꍞꊟꌤꃅꌠꊋꀥꇱꌋꆀꄺꀱ,ꍏꑷꀉꒉꀊꂾꌠꍞꇽꄐꁆꌠꃄꌬꇫꑟꌠꄹꇙ,ꊋꇤꄉꏓꄊꌤꃅꌠꐛꐪꀊꏀꀹꄻ,“ꊰꑋꉬ”ꊬꌠꎆꏣꐧꋦꀻꎆꌠꉾꃅꃄꇰꌠꌋꆀꐮꄮꎍꐽꌠꎁꃅꑆꊋꀊꏀꌠꅐꌞ。

  ꋍ、ꄓꈌꀊꏀꌠꇬꐪꊛꄉꏦꄻꌤꃅꌠꊋꀥꇱ

  ꍏꇩꐛꐨꐧꋦꉪꏦꏦꃤꉻꑫꏓꐛꌠꆹ,ꉪꇩꏤꏦꄻꌤꃅꌠꆏꄓꈌꀊꏀꈚꇬꉆꀐꌠꌐꂷꉬꀐ。ꐧꋦꃄꄻꌠꆹꏦꃤꅉꃀꉬꌠ,ꏦꃤꆹꃄꄻꎖꋪꏓꈹꌠꉬ。ꐧꋦꃄꄻꌠꐥꍂꃅꌐꄮꀋꐥ,ꏦꄻꌤꃅꌠꑌꀋꆏꃅꄹꎆꌶ。ꍏꇩꐛꐨꐧꋦꉪꏦꋈꄻꌠꆹꀊꉗꀊꎴꌠꐩꋊꂿꃆꐘꉬ,ꍏꇩꐛꐨꐧꋦꉪꏦꏦꃤꉻꑫꃄꄻꐛꒆꌠꑌꀊꉗꀊꎴꌠꐩꋊꂿꃆꐘꉬ,ꀋꎪꃅꍏꇩꐛꐨꐧꋦꉪꏦꃄꄻꌠꐊꄉꀻꎆꇈꀻꎆꌶ。ꀊꅰꃅꍏꇩꐛꐨꐧꋦꉪꏦꏦꃤꉻꑫꊇꅉꑌꆏꎍꌠ、ꋍꎤꌠ、ꀋꇙꌠꀋꉬꃅ,ꄚꋋꆹꇘꄟꌠ、ꁉꃑꌠ、ꀻꎆꌠꉬ。ꉈꑴꊌꂿꌶꌠꆏ,ꉪꊇꅿꏦꃤꉻꑫꄡꇗꐛꀕꀐꑴꇬ,ꄚꋍꑴꅉꀋꇎꀋꂪꅉꀋꐥꌠꀋꉬ,ꄚꈐꏭꀋꃋꌬꌠꏦꃤꑠꈨꄺꀱꈇꌠꌤꃆꈨꑌꐥꑴꌦ,ꋍꋬꈭꌠꏦꇗꄹꁆꑌꌌꃛꊸꃅꏤꄻꈇꌠꌤꃆꐥꑴꌦ,ꉈꑴꏦꃤꋍꏢꋋꏢꄻꅐꀋꇁꌦꌠꌤꃆꑌꐥꑴꌦ,ꋋꆹꀋꉬꀋꉆꌠꆏꏦꄻꇎꏦꇫꀋꑟꑴꌦ、꒔ꑞ꒔ꁆꏯꐛꐨꐯꀋꐊꑴꌦꐛꅹꃅ,ꃄꄻꅉꇬꄉꐪꊛꄉꎹꎥ、ꎖꋪꏓꊭꄻꅐ。ꈍꃅꄿꂿ,ꇩꈐꇩꉈꃅꒊꃅꇁꀊꏀꃅꐛꐈꌠ,ꄺꀱꁉꃑꃄꄻꀊꏀꌠ,ꎆꏣꐧꋦꀻꎆꌠꇬꂿꃆꀊꏀꌠ,ꏓꂱꉹꁌꉘꇉꐨꀊꏀꌠꆏ,ꀋꆏꃅꏦꄻꌤꃅꌠꏭꌷꃆꀊꏀꇖꐨꀊꏀꌠꄜꅐꇁ。ꏦꄻꂿꃆꆏꄡꇗꊋꋠꇈꃣꇖꃅꐙ,ꏦꄻꌤꃅꌠꆏꀥꇱꀉꄂꉆꄝꏯꀋꉆ。ꋌꊂꋍꊭꌠꇬꆏ,ꀊꅰꃅꀉꑌꌠꊋꌗꌌꏦꃤꄺꀱꄻꃪꌠꀂꏽꇁ,ꌌꏦꃤꋍꋬꈭꌠꏦꇗꏤꄻꌠꀂꏽꇁꌶ,ꋍꈭꐨꉈꑴꏦꃤꀊꏀꈨꏤꄻꄉ,ꍏꇩꐛꐨꐧꋦꉪꏦꏦꃤꉻꑫꄹꆷꌊꃅꋊꐊꄉꁨꆹꌠꌋꆀꀻꎆꄻꃪꎻ。ꇩꏤꑭꊂꏓꄊꌋꆀꋍꎮꊈꉼꆏꋒꐯꋒꃅꀊꂥꇊꀊꂥꊐꌠꇩꏤꌅꈌꌤꏲꅉꃤꂿꄐꋊꇤꅐꇁꄉ,ꏦꃤꈴꄉꇩꏤꏦꄻꌅꈌꃄꌬ,ꊋꀥꇱꄉꏦꄻꌤꃅꌠꏭꊥꇫꋮꄮꌠꃅ,ꄚꃆꂮꐥꌠꁆꏯꍞꊟꄉꎔꎗꃅꏦꄻꅉꇬꃆꂮꐥꌠꌤꃆꀉꒉꀊꂾꌠꎥꃪꂥꀘꄉ,ꏦꄻꌤꃅꉺꏦꄻꃪ,ꊋꀥꇱꄉꏦꄻꌤꃅꏲꉻꌋꆀꌤꃅꊿꁥꋈꄻꌠꃅ,ꄓꈌꀊꏀꌠꇬꄉꀋꆏꃅꏦꄻꌤꃅꐛꊂꀊꏀꌠꀹꄻꅐꇁꌶ。

  ꎼꈎꎮꊈꉼꏦꄻꌤꃅꌠꆏ,ꍏꇩꐛꐨꐧꋦꉪꏦꏦꃤꉻꑫꄻꃪꌠꀑꐱꇖꐨꇬꈴꄉ,ꏟꈯꃅꎆꏣꐧꋦꀻꎆꌠꌋꆀꐮꄉꀋꄐꌠꏦꃤꄺꀱ,ꋋꇅꃅꈆꑪꃅꀻꎆꌠꄹꇙꌠ、ꐧꋦꐮꄮꌠꊥꎆꌠꏭꈻꇐꀋꂿ꒧ꃅꐥꌠꏦꃤꏤꄻꌶ。ꋍꆏꄐꌗꏦꃤ、ꃅꑘꆅꄴꏮꏦꃤ、ꅓꑘꅇꎹꏦꃤ、ꉹꁌꏟꃆꏈꑘꅇꎹꏦꃤ、ꃅꄷꎀꍹꏦꃤ、ꂽꄻꏦꃤꑠꄺꀱ。ꑍꆏꉌꊈꁦꎴꏦꃤ、ꏲꑘꄀꇗꇱꏦꃤ、ꉇꅐꈏꃹꏲꂠꏦꃤꑠꏤꄻ。ꌕꆏꄚꃆꂮꐥꌠꁆꏯꍞꊟꄉꐳꃅꏦꃤꋍꋬꈭꌠꏦꇗꏤꄻꌋꆀꄺꀱ,ꏦꃤ、ꏦꇗꎵꄻꊁꊭꌤꃅꌠꃅꋒ,ꀋꉬꀋꉆꌠꆏꏓꂱꃔꑼꀊꂥꇊꀊꂥꊐꌠ、ꏓꂱꏦꍤꑼꀊꂥꇊꀊꂥꊐꌠꍞꊟꌋꆀꄐꇺꄉꐊꑷꃅꀋꃋꌬꌠꏦꌬꉉꀽꌠꏭꏓꋧꄉꄻꌠꂿꃆꃅꌐ。

  ꃹꅼꃅꈆꑪꃅꏦꄻ、ꋯꁦꃅꏦꄻꌠꄹꎆ。ꏦꄻꈭꐨꄤꎖꌠꌌꏦꄻꌤꃅꌠꀥꇱꌋꆀꄻꎆꌠꏁꁈꀊꏀꐘꃅꄉꌶ,ꃅꉚꌠꎖꋪꏓꈹꌠꅉꃀꀂꏽꄉꊱꁨꐥꃅꍔꆙ,ꇶꏦꀉꑌꑵꌠꇬꈴꄉ,ꏦꃤꄹꏦꈆꑪꐨꐥꌠ、ꏦꃤꏤꐪꃄꌬꉆꐨꐥꌠ、ꏦꃤꍬꌬꇬꇿꋌꐨꐥꌠꑠꏭꀋꈐꀋꉈꃅꈋꍣꌠꃅꅐꇁ,ꏦꃤꄺꀱꄻꐛꒆꌠ、ꏦꄻꌤꃅꄻꃪꌠꎁꃅꁢꊧꇲꁵꀐ。ꏓꄊꁧꎁꏦꄻꌠꇬꃅꈽꌠꌤꃅꉺꏦꄻꃪꄉ,ꁧꎁꇖꑘꇖꐨꀞꄻꌠꌋꆀꏦꃤꏤꄻꄺꀱꌠꏓꐯꇯꎼꇁ,ꁧꎁꁨꌊꎮꊈꉼꃅꈧꌠꇬꃅꈽꇁꌠꌋꆀꏦꃤꄐꄉꌠꁰꄻꌠꌋꆀꍤꇖꌠꊇꁧꉀꐕꌠꏓꐯꇯꎼꇁ,ꎔꎗꃅꁧꎁꄜꅐꇁꌠꉜꐨꌋꆀꇖꐨꎥꃪꈺꌬ,ꋒꐯꋒꃅꏓꄊꁧꎁꏦꄻꌤꃅꅉꇬꂿꄐꋊꇤꅐꇁ。ꏣꀋꑌꃅꉻꊿꊱꁨꐥꃅꏦꄻꌠꇬꃅꈽꌠꈝꃀꌋꆀꇶꏦꎹꎥ,ꀊꐯꈭꃅꐧꋦ꒔ꑞ꒔ꁁꏯꈜꀕꇈꅉꂫꊐꌠꉹꁌꉜꐨꅲ,ꎔꎗꃅꌧꃀꌷꊿꇖꐨꅲ,ꉹꁌꉜꐨꌌꌬꌠꏮꀱꉺꏦꄻꐛꒆ,ꏣꀋꑌꃅꐧꋦꇫꉜꁨꌠꇬꅇꀱꃄꄻ,ꈆꑪꃅꏦꄻ、ꋯꁦꃅꏦꄻꌠꄹꎆꁆꏯꑭꁘꀊꏀꌠꐕꎼꆹ。

  ꑍ、ꃅꒊꃅꇁꀊꏀꌠꇂꃴꄉꐪꊛꄉꍞꊟꌤꃅꌠꀥꇱ

  “ꊯꊪꉬ”ꊬꌠꋋꉬꈎꇬꆏ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꆏꊌꐨꀊꏀꀋꇰꀋꉈꌠꊌꅜꀐ,ꉪꇩꏤꎆꏣꊋꃤ、ꏓꇱꇩꊋ、ꏓꂱꐥꐨꑟꐨꆏꐘꊐꀊꏀꊐꌠꇬꃹꆹꌠꆏ,ꉪꇩꏤꌤꑘ꒔ꑞ꒔ꐘꌠꆏꄓꈌꀊꏀꈚꇬꉆꎍꀐꌠꌐꂷꉬꌠ。ꄈꅿꊰꏁꈭꉬꃢꐊꈴꃀꆏ,ꃹꅼꃅꋌꊂꋍꊭꌠꇬꇩꏹꇩꈐꃅꒊꃅꇁꌌꎥꃪꄉ,ꉪꇩꏤꀻꎆꌠꄡꇗꀉꇨꃅꃅꅐꇁꉆꌠꀋꂿ꒧ꌠꄐꇐꏤꁈꊜꋽꄮꊬꌠꇬꎍꑴꌦꌠꏤꇽꐨꀉꒉꀊꂾꌠꃅꅐꇁ,ꋌꊂꉬꈎꇬꎆꏣꐧꋦꀻꎆꌠꄐꇺꉪꇐ、ꏓꄜꉪꇐ、ꁸꌐꂿꃆꌋꆀꃅꁈꀉꒉꀊꂾꌠꊨꄅꄉꀐ,ꈆꑪꃅꀻꎆꌠꌌꅇꀨꃅꄉ,ꇤꐳꃅꎆꏣꀻꎆꃄꄟꆹꏮꌠꌌꀨꑟꃅꄉ,ꈆꑪꃅꀻꎆꌠꄹꇙꀂꏽꀊꏀꄇꇖꀕꃅꀻꎆꌠꊌꅜ,ꎆꏣꀻꎆꃄꄟꆹꏮꌠꄹꇙꀂꏽꁨꆹꃶꐚꐨꐥꌠꊌꅜꌶꌠꊡꀱꄉ,ꋋꆏꃅꒊꃅꇁꀊꏀꌠꇂꃴꄉꏓꄊꍞꊟꌤꃅꌠꃅꋒꌠꏭꇖꐨꀊꏀꀊꅰꃅꀊꂥꌠꄛꅐꇁꀐ。

  ꎼꈎꎮꊈꉼꃤꍞꊟꌤꃅꌠꆏ,ꏟꈯꀕꃅꃀꀉꒉꋌꃢꈌꁧꄉꌠ“ꊰꑋꉬ”ꄐꎖꐱꀨꃄꌬꌠꇬꆼꒆꄉ,ꍞꊟꏦꃤꏤꐪꇬꈴꄉ,ꐪꊛꄉꌤꃅꍞꊟꌋꆀꏦꃤꍞꊟꌠꊋꀥꇱ,ꏓꇱꃅꍞꊟꇶꏦꀉꑌꑵꃅꐙꌠꌌꌬꄉ,ꍞꊟꐊꇐꀂꏽꇬꀊꅰꃅꃅꇴꄉꉻꇬꆽꒆꈬ、ꀊꅰꃅꉹꁌꐥꐨꇬꊫꄉ,ꏓꄊꍞꊟꌤꃅꌠꁳꇿꋌꃶꐚꀕꌠꀊꅰꀉꑌꃅꊌꅜꎻ。ꋍꆏꎖꄎ、ꄐꌗꃄꌬꐛꐪꅇꄜꌋꆀꍏꑷꌗꂫꇽꌋꆀꍤꌗꌤꃅꅇꄜꅱꄻꍤꇖ,2010ꈎꍏꑷꌗꂫꇽꌠꏭꍤꄻꈌꁧ,ꀋꉬꀋꉆꌠꆏꏣꀋꑌꌠꏱꎆꏱꁈꌋꆀꎍꐽꊋꑌꌠꎆꃀꏱꁈꃄꌬꐛꐪꏭꍤꄻ,ꁌꏤꎍꐽꄉꌠꌋꆀꇓꈓꄹꁆꇬꑲꇤꁌꏤꉀꄓꐳꇨꌠꋎꍅꌠꌤꃅꐛꐪꏭꍤꄻ,ꄷꀋꁧꃅꄷꍔꃚꎝꃆꃨꆰꐨꄴꏮꌠꌋꆀꑤꊐꌠꅉꀨꎆꊋꏦꀧꉺꏦꄻꐛꒆꌠꌤꃆꌌꌐꄉꍤꄻꎥꃪꌠꃅ,ꍏꑷꉻꒉꋊꐽꌠꏱꁈꌋꆀꀨꎍꌠꁁꏯꄺꀱꌠꏁꁈꃄꌬꇫꑟꌠꄹꇙ,ꎆꏣꎍꐽꌠꊼꇅꐳꃅꀻꎆꌠꊥꎆ。ꑍꆏꇩꃷꑼꇤꐳꃅꎆꏣꀻꎆꃄꄟꆹꏭ、ꋦꈭꀧꌋꃅ、ꋍꏅꌩꏪꌅꈌꄹꏦꄺꀱ、ꈩꆫꑘꀻꎆꑠꌤꃅꐛꐪꃆꂮꅇꄜꅱꄻꍤꇖ,ꂿ꒧ꁡꇤꃄꅉꀧꃅꏦꃤꃄꌬꐛꐪꍤꄻ,ꊿꋅꃅꄷꎆꏣꐧꋦꀻꎆꌠꊥꎆꑠꌤꃆꌌꌐꄉꍤꄻꎥꃪꌠꃅ,ꄚꃆꂮꐥꌠꁆꏯꍞꊥꄉꈆꑪꃅꀻꎆꌠꉜꐨꃅꌊꐘꄜꌠꏁꁈꀂꏽꑟ,ꃄꌬꌊꃶꐚꌤꃅꅉꇬꑟꆹ。ꌕꆏꇩꃷꑼꏦꀧꐨꐥꌠꀀꑳꋈꄻꌠ、ꇩꏤꐧꀠꀊꉗꃅꂘꑘꄺꀱꌋꆀꀻꎆꄐꎖꐱꀨꃄꌬꌠ、ꃆꄔꄵꌉꌤꃅꌠꑠꌐꐘꌤꃅꃆꂮꅇꄜꅱꄻꍤꇖ,ꋠꇐꉮꀋꐥꏦꃤ、ꑘꃅꋯꏤꏦꃤ、ꊿꃀꌠꌅꈌꈲꁧꏦꀧꏦꃤꑠꏦꃤꃄꌬꌠꐛꐪꏭꍤꄻ,ꄚꃆꂮꐥꌠꁆꏯꍞꊥꄉꃶꐚꃅꉹꁌꇫꉈꇬꌠꀀꑳꏦꀧꌠ、ꌳꃈꅮꁱꂷꌷꌠ、ꃅꅍꊌꌠꌋꆀꑘꃅꌅꈌꈲꁧꀧꌋꃅꌠꑠꌤꃆꂥꀘ。ꇖꆏꂱꑱꅉꃅꏓꂱꃔꑼꀊꂥꇊꀊꂥꊐꌠ、ꏓꂱꏦꍤꑼꀊꂥꇊꀊꂥꊐꌠꊋꀥꇱꄉꅉꂫꊐꌠꋈꄻꌠꌤꃅꐛꐪꅇꄜꅱꄻꍤꇖ,ꅉꂫꊐꌠꏦꌬꄐꊋꋈꄻꌠꇬꏢꑲꎍꌠꌤꃆꑓꅐꎑꌠꂥꀘꌠꄹꇙ,ꊋꀥꇱꄉꏦꌬꊿꁥꌠꏲꂠꌋꆀꄐꊋꋈꄻ,ꀋꈐꀋꉈꃅꏦꌬꌠꊥꎆ。ꉬꆏꇩꃷꑼ“ꉬꉬ”ꏦꃤꁊꈴꌤꃅꐛꐪꃆꂮꅇꄜꅲꄻꍤꇖꄉ,“ꃘꉬ”ꏦꃤꁊꈴꍔꆙꌠꃆꂮꏤꐪꏤꄻꅐ,ꏦꃤꁊꈴꀋꉬꀋꉆꌠꊨꄅ,ꏦꃤꁊꈴꃶꐚꇿꋌꊋꀥꇱ,ꑴꐚꃅꏦꃤꌷꏦꃤꍬꏦꃤꌬꌠꐧꋦꃅꇏꉾꃪꌠꏓꐛꌠꄹꇙ。ꋭꋽꃅꊌꐨꁆꁸꌠꃆꂮꋊꄻꌠꆏ,ꏓꂱꉹꁌꌋꆀꏓꄊꁧꎁꁊꈴꃅꇫꉜꁨꌠꌤꃆꉬ,ꎆꏣꀻꎆꃄꄟꆹꏮꌠꄹꇙꇬꀋꎪꃅꂥꀘꄻꅐꌠꌤꃆꑌꉬ。ꋋꆏꇩꂱꊌꐨꇫꇬꃢꌠꁆꁸꌠꌋꆀꉈꑴꁆꁸꌠꇬꎑꁠꎍꌠ,ꂿꃆꀉꒉꊋꋠꐘꉬꇈ,ꌤꃅꃛꊸꐘꑌꉬ。ꎮꊈꉼꆏꅇꀨꋋꏢꇬꆼꒆꄉ,

  ꊋꀥꇱꄉꀀꊿꊌꐨꇩꂱꊌꐨꁆꁸꅉꇬꍆꐪꉀꐕ,꒧ꃅꊌꎆꉘꃀꃢꌠꁆꁸꅉꇬꍆꐪꉀꐕ,ꁆꁸꐥꀹꋊꍬꈴ,ꇗꏸꎴꋊꄻꂿꄐꊋꀥꇱ,ꊌꐨꐮꍣꍔꒉꆹꌠꌤꃆꑠꀰꏮ,ꊋꀥꇱꄉꌐꄉꍤꎥ。ꇎꏦꇎꈴꄮꇬꆏ,ꇩꃷꑼꌐꐘꌤꃅꅇꄜꅲꇫꍤꇖꌠꁆꄻ。ꉪꊇꉈꑴꏦꀧꐨꀀꑳꋈꄻ、ꏱꎆꌗꇽ、ꂘꑘꄺꀱ、ꃔꑼꌋꆀꏦꍤꑼꅉꂫꊐꌠꋈꄻꌠꌤꃆꑠꌊꄻꄉ,“ꋍꃚꑍꑼ”ꄚꃆꂮꐥꌠꅇꄜꍤꇖꌠꇬꈴꄉ,ꐪꊛꄉꏦꈴꄉꌐꄉꅲꇫꌠꃅ,ꄚꃆꂮꐥꌠꁆꏯꌤꃅꄺꀱꌠꄹꇙ。

  ꌕ、ꁧꎁꂿꄐꋊꇤ、ꉇꉻꏭꑌꑲꌠꃅ、ꊋꀥꇱꄉꊨꏦꑴꅉꋈꄻꑠꁆꏯꀻꎆꐨꀊꏀꌠꊌ

  ꄺꀱꈭꐨꁧꎁꏦꃤꃄꌬꃅꈧꌠꌊꊜꋽꄮꃅꄉ,ꏓꂱꁧꎁꃀꀉꒉꈿꄹꏦꌭꈬꌋꆀꄻꐛꒆꌠꇬꈴꄉ,ꁧꎁꀨꄜꑋꅉꉆꅉꉜꁨꌠꌭꈬ,ꁧꎁꁧꃤꃅꌠꉪꇐꌭꈬ,ꊋꇤꄉꁧꎁꌤꃅꑞꅉꉀꐕ。ꎔꎗꃅꋌꃢꁧꎁꃀꀉꒉꈿꄮꇬꁧꎁꄜꎼꇁꌠꇖꑘꇖꐨꀞꄻ,ꀒꁨꋍꁘꃅꀞꄻꊇꁧꉀꐕ,ꁧꎁꌐꄉꍤꎥꌋꆀꏓꄉꍤꉚꌠꃶꐚꇿꋌꀥꇱ,ꁧꎁꑦꊤꃅꈧꃄꄟꄻꐛꒆ,ꁧꎁꄉꅍꃄꌬꌶꄻꌠꃅꌊꉾꃅꄉ,ꁧꎁꁨꌊꎮꊈꉼꌋꆀꌐꁨꊈꑼꉼꃅꈧꅉꇬꐊꇁꄉ,ꀊꅰꉾꃪꃅꁧꎁꇩꏤꌤꃆꏲꂠꈽꌠꂿꄐꋊꇤ。

  ꉇꄅꇩꏤꑴꉼꌋꆀꄮꈉꏤꄉꐮꑌꑲꉺꏦꄻꈫꈈꌋꆀꄻꐛꒆꌠꌌꀋꉬꀋꉆꅉꃅꄉ,ꁊꈴꃅꉇꄅꇩꏤꑴꉼꌋꆀꐮꉂꐮꅉꃅꐮꑌꑲꌠꃅ,ꏣꀋꑌꃅꇩꏹꌋꆀꃅꄷꑴꉼꎀꍹꃅꈧꌠꇬꐊꈽ,ꋒꐯꋒꃅꏓꄊꉇꉻꏭꑌꑲꌠꍔꍞꐮꉌꒊꌠꊥꎆ、ꏓꂱꉂꏣꃹꅼꈴ、ꑌꐚꊌꐨꐥꃅꇷꃅꌠꄹꇙ、ꇩꏤꐮꃆꂮꀻꎆꌠꊥꎆꁆꏯꂿꄐꐋꀋꌡꌠꋊꇤ,ꉪꇩꏤꀻꎆꄐꇐꏤꁈꊜꋽꄮꀋꂿ꒧ꌠꀧꌋꃅꌠꎁꃅꀊꏀꃅꑆꊋꅐꌞꀐ。

  ꍔꍞꃅꍜꎃꊒꌠꌌꈯꄜꃅꄉꌠꌭꈬ,ꀒꁨꋍꁘꃅꊋꀥꇱꄉꎮꊈꉼꊨꏦꑴꅉꋈꄻ,ꀋꎪꀋꑴꃅꄈꅿꏲꂠꌠꌭꈬ,ꀋꎪꀋꑴꃅꐧꋦꉪꏦꄹꏦꌭꈬ,ꀋꎪꀋꑴꃅꍏꇩꐛꐨꐧꋦꉪꏦꍔꍞꀻꎆꈝꂾꌭꈬꌶ。ꎀꍹꄹꏦꌋꆀꌤꃅꄹꏦꄻꐛꒆ,ꊋꀥꇱꄉꄉꅍꃄꌬꊋꃤꋈꄻ,ꎔꎗꃅꌐꄉꉉꂘꌠꀞꌊꉾꃅꄉ,ꃹꅼꃅꍤꄻꎥꃪꌠꃅ,ꑖꑟꃅꏓꂱꉹꁌꌋꆀꐮꑌꑲ。ꋒꐯꋒꃅꌐꁨꊈꑼꉼꈧꌠꌧꊿꀉꑌ、ꌧꇐꏓꋧ、ꎖꋪꀉꑌꃅꐥꌠꐛꋲꐨꌋꆀꉾꃪꐨꋊꇤ,ꀒꁨꋍꁘꃅꎮꊈꉼꌤꃅꌠꈬꆸꊇꁧꌋꆀꑞꅉꉀꐕ。ꀊꐯꈭꃅꍏꇩꐛꐨꐧꋦꉪꏦꏦꃤꉻꑫꏓꐛꌠꈻꇐꀉꒉꀊꂾꌠꌋꆀꅉꀨꎖꋪꄜꉺ,ꄜꉺꄜꈴꌤꑘꊋꀥꇱꌋꆀꄺꀱ,ꏓꄊꌤꃅꌠꂿꈴꐨꊋꀥꇱ,ꑴꐚꃅꁧꎁꌋꆀꏓꂱꉹꁌꁳꍞꊟꎻ。ꊋꀥꇱꄉꃅꄷꏓꄊꎮꊈꉼꌋꆀꐮꑌꑲ,ꃅꄷꏓꄊꌤꃅꃄꄟꉾꃪꎖꋪꉾꃪꌠꌶꄻ,ꐯꇯꄉꐧꋦꉪꏦꋯꁦꏦꃤꄹꏦꋈꄻꌠꄹꇙ。ꇩꏤꑭꊂꏓꄊꌤꃅꅉꆹꃹꅼꃅꂴꅑꌠꁦꄻꉾꃪꌠꅔꈿꃅꈧꌠꄹꎆ,ꐊꑷꃅꌤꃅꅉꇥꀯꁥꌠꊇꁧꄐꊋꉀꐕ,ꁧꃤꃅꏦꀧꌠꃅꌊꉾ,ꇖꊩꄟꃀꇇꀨꊿꃅꌊꉾꃅꄉ。

  ꁧꎁꊈ,ꊯꊪꈭꇩꏤꑭꊂꏓꄊꌕꃢꌠ꒜ꈿꅉꌊꄻꏦꃤꄺꀱꃆꂮꏤꐪꆹ,ꇓꈓꇓꉈꐯꌟꌠꊻꂷꍆꐪꇬꈴꄉꏓꄊꁧꎁꌊꄻꌠꃅ,ꀊꅰꃅꉾꃪꃅꊿꐥꐥꊯ、ꃅꄷꐥꊯ、ꊿꋅꐥꊯꌠꏥꏦꄛꑣꀐ。ꎼꈎ,ꇩꏤꑭꊂꑤꑣꏓꄊꈭꆦꌊꄻꌤꃅꌠꆹꐮꊂꈹꄉꃅꈧꀐ,ꋋꆹꄺꀱꄉꈭꐨꌊꄻꏦꃤꈴꄉꃅꌠꑤꑣꏓꄊꈭꆦꌊꄻꇬꂾꃢꌠꉬ,ꁧꎁꃷꁨꁆꄻ、ꌊꄻꌤꃅꊥꇬꑠꁆꏯꐛꐈꐨꀊꏀꌠꐥꀐ,ꈭꆦꌊꄻꌤꃅꌠꃅꌊꉾꌠꏭꇖꂟꐨꀊꏀꈨꄜꎼꇁꀐ。ꇩꏤꑭꊂꏓꄊꎮꊈꉼꎔꎗꃅꍤꄻꎥꃪꌠꅉ꒜ꇬꄉ,ꂱꑱꅉꃅꇩꏤꑭꊂꑤꑣꏓꄊꈭꆦꌊꄻꌤꑘꃆꂮꉜꐨꌋꆀꁧꎁꃷꁨꁆꄻꃆꂮꄐꌐꉜꐨꄜꎼꇁꀐ。ꉪꊇꆹꀋꎪꃅꄈꍏꑷꋍꃱꃅꁆꄻꌠꃄꌬꈴ,ꄈꅿꏲꂠꌠꌭꈬ、ꏓꂱꑱꏲꃥꌋꃅ、ꏦꈴꇩꏲꊜꋽꃅꏓꋍꃱꃅ,ꋒꐯꋒꃅꋯꁦꍔꆙ,ꏟꈯꃅꏦꈴꄉꌤꀞ,ꑤꑣꏓꄊꈭꆦꌊꄻꌤꃅꌠꁣꀋꐥꃅꃅꈧꌠꄉꀧ,ꂴꅑꄉꏦꃀꌋꆀꏦꃤꍬꌬ、ꑖꑟꃅꉹꁌꏭꑌꑲ、ꊋꇤꄉꏓꂱꁧꃤꃅ、ꉹꁌꇫꉌꒊꌠꊿꄞꅐꌠꌋꌊꇩꏤꌅꈌꌤꃅꅉꇬꐊꊿꃅ,ꏓꂱꁧꎁꃀꀉꒉꈿꄹꏦꌭꈬꌋꆀꄻꐛꒆ、ꐧꋦꉪꏦꋯꁦꍔꍞꀻꎆꌠꎁꃅꎀꍹꏦꀧꏟꈯꃅꐙꌠꇲꁵ。

  ꁧꎁꊈ,ꐩꋊꄻꉪꁵꌠꂿꃆꀑꑊꁤꇅꀕꇈꊋꋠꐯꊋꋠꌠꆹ,ꏓꂱꉪꊇꏭꉘꇈꐨꅼꐯꅼꃅꐥ。ꉪꊇꆹꏟꈯꀕꃅꋯꑌꌊꐋꀨꃛꏢꄧꌌꊝꎻꏹꃅꄉꌠꄈꍏꑷꈭꇍꄉ,ꍏꇩꐛꐨꐧꋦꉪꏦꁧꁈꇰꀋ꒜ꌠꀊꂥꃅꐕꄉ,ꃹꅼꃅꈆꑪꃅꀻꎆꌠꉜꐨꃄꌬꑞꅉꑟ,ꊋꈁꑌꃅꇤꄉ,ꉌꇨꁨꂵ,ꏟꈯꌤꃅ,ꊌꐨꉾꃪꌠꌌꍏꇩꇭꍣꄈꄻꐛ90ꈎꈭꏝꐛꌠꋨꏦ,“ꊰꑋꉬ”ꊬꌠꎆꏣꐧꋦꀻꎆꉾꃪꃅꌐꀺꌠꃅꇫꑟꌠꎁꃅ,ꐊꑷꃅꊼꇅꌣꈚꌠꐧꋦꋈꄻꌠꊌꐨꀊꏀꌠꅔꈽꊊꌠꎁꃅꊋꇤꏡꇤ!
ꁰꒌ




  • 特别鸣谢
    中国民族语文翻译局彝文翻译室