ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

2010ꈎꍏꑷꌋꆀꃅꄷꄐꌗꃄꌬꐨꌋꆀ2011ꈎꍏꑷꌋꆀꃅꄷꄐꌗꄐꄉꌠꃆꂮꅇꄜ

——2011ꈎ3ꆪ5ꑍꊯꊪꈭꇩꏤꑭꊂꏓꂱꁧꎁꃀꀉꒉꇖꃢꌠꈿꅉꇬ

ꎆ ꏲ ꀯ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꁧꎁꊈ:

  ꇩꃷꑼꉢꁳ,ꊯꊪꈭꇩꏤꑭꊂꏓꄊꇖꃢꌠꃀꀉꒉꈿꌠꏭ2010ꈎꍏꑷꌋꆀꃅꄷꄐꌗꃄꌬꐨꌋꆀ2011ꈎꍏꑷꌋꆀꃅꄷꄐꌗꄐꄉꌠꄜꎼꇁ,ꌌꍤꇖꅊꇈ,ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꌶ。

  ꋍ、2010ꈎꍏꑷꌋꆀꃅꄷꄐꌗꃄꌬꐨ

  2010ꈎꆹ,ꍏꇩꇭꍣꄈꏟꈯꃅꏲꂠꌠꇂꃴꄉ,ꇩꏤꑭꊂꊿꋅꈁꐥꌠꏓꂱꁨꆹ,ꇨꃅꒃꉇ,ꃅꄷꈁꐥꌠ、ꌤꃅꅉꈁꐥꌠꀋꎪꃅꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌭꈬꇬꎷꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꐊꑷꃅꍏꑷꄐꇐꏤꁈꄐꇺꌠꃄꌬ,ꎔꎗꃅꊯꊪꈭꇩꏤꑭꊂꏓꄊꃀꌕꃢꌠꃆꂮꐥꌠꏤꐪꃄꌬꇫꑟ,ꇩꂱꎆꏣꎍꐽꊼꇅꐳꃅꀻꎆ,ꐧꋦꐮꄮꎍꐽꇬꎷ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꊌꐨꀊꏀꌠꀉꒉꀊꂾꃅꐥ。ꋋꈨꅉꃀꇬꄉ,ꏱꎆꀻꎆꄺꀱꌠꎍꐽꃅꄹꎆ,ꄉꉻꏱꎆꄐꌗ、ꍔꃚꃤꃅꐙꌠꎆꀨꄐꌗ、ꇩꁨꎆꀨꀰꏢꄐꌗꌠꏓꐛꌠꍔꃚꄐꌗꉻꑫꇴꉻꀑꐱꃅꄻꄉꀐ,ꐧꋦꄜꏂꀧꎆꀨꄐꌗꌠꃅꉚꀐ,ꄐꌗꄉꌠꃅꇫꑟꐨꊼꇅꃪ。

  (ꋍ)ꄉꉻꏱꎆꄐꌗꃄꌬꃆꂮ

  ꇩꏤꑭꊂꏱꎆꊌꐨ83080.32ꂡꂷ,2009ꈎ(ꊁꐯꌟ)ꄩ21.3%ꉀꎆ。ꂴꄐꌗꄉꌠꍏꑷꄐꌗꎍꐽꋊꄻꎆꀨꄀꃹꌠ100ꂡꂷꇱꄉꇬ,ꊌꐨꈀꌬꌠꃅ83180.32ꂡꂷ。ꇩꏤꑭꊂꏱꎆꌬꐨ89575.38ꂡꂷ,17.4%ꉀꎆ。ꍏꑷꄐꌗꄉꌠꎍꐽꋊꄻꎆꀨ2248ꂡꂷꌋꆀꃅꄷꏱꎆꌗꏮꊂꈎꌠꇱꄉꌫꅐꌠ1356.94ꂡꂷꇱꄉꇬ,ꌬꐨꈁꉬꃅ93180.32ꂡꂷ。ꇩꏤꑭꊂꏱꎆꊌꐨꌋꆀꌬꐨꀑꐱꃅꐮꆽꏣꊁ,10000ꂡꂷꍣ。

  ꄚꈐꏭ:ꍏꑷꏱꎆꊌꐨ42470.52ꂡꂷ,ꄐꌗꄉꌠꃅꌐꌠ111.6%,18.3%ꉀꎆ。ꍏꑷꄐꌗꄉꌠꎍꐽꋊꄻꎆꀨꄀꇬꇯꌠ100ꂡꂷꇱꄉꇬ,ꈀꌬꌠꊌꐨꆏ42570.52ꂡꂷ。ꍏꑷꏱꎆꌫꅐꌠ48322.52ꂡꂷ,ꄐꌗꄉꌠꇬ103.6%ꃅꇫꑟ,10.3%ꉀꎆ。ꄚꈐꏭ:ꍏꑷꋋꊐꌠꌬꐨ15972.89ꂡꂷ,4.7%ꉀꎆ;ꍏꑷꀱꃅꄷꁵꌠꇗꏸꊌꐨꌋꆀꆹꏮꁵꌬꌠꌬꐨ32349.63ꂡꂷ,13.3%ꉀꎆ。ꍏꑷꄐꌗꄉꌠꎍꐽꋊꄻꎆꀨ2248ꂡꂷꇱꄉꇬ,ꌬꐨꈀꉬꃅ50570.52ꂡꂷ。ꊌꐨꌬꐨꀑꐱꃅꐮꆽꏣꊁ,ꌬꁏꇔꌠ8000ꂡꂷ,ꂴꄐꌗꄉꌠꇬ500ꂡꂷꀁꋌꒊ。2010ꈎꈎꂫꇬꍏꑷꏱꎆꇩꎝꋒꐨ67526.91ꂡꂷ,ꆼꋏꌊꃅꈎꄐꌗꄉꌠ71208.35ꂡꂷꈐꇬꄉ。

  ꃅꄷꋋꊐꌠꊌꐨ40609.8ꂡꂷ,ꍏꑷꀱꃅꄷꁵꌠꇗꏸꊌꐨꌋꆀꆹꏮꁵꌬꊌꐨ32349.63ꂡꂷꇱꄉꇬ,ꃅꄷꏱꎆꊌꐨꈀꉬꃅ72959.43ꂡꂷ,19.3%ꉀꎆ。ꃅꄷꏱꎆꌬꐨ73602.49ꂡꂷ,20.6%ꉀꎆ,ꂴꄹꈎꌗꏮꊂꈎꁵꎼꇁꌠꌬꐨ1356.94ꂡꂷꇱꄉꇬ,ꌬꐨꈀꉬꃅ74959.43ꂡꂷ。ꊌꐨꌬꐨꀑꐱꃅꐮꆽꏣꊁ,2000ꂡꂷꐮꍣ,ꇩꃷꑼꈌꁧꇈꎆꏲꀯꁳꃑꃅꄷꍔꃚꎝꉛꊫꌐꁵꌠꇬꄉꁥꇱ。 

  2010ꈎꍏꑷꏱꎆꄐꌗꄉꌠꃄꌬꐨꀋꉬꀋꉆꌠꆏ:

  1.ꍏꑷꏱꎆꊌꐨꄐꌗꄉꌠꃄꌬꌠꌋꆀꁦꎆꃅꎴꌠꌬꐨ

  2010ꈎꍏꑷꏱꎆꊌꐨꀑꐱꃅꇬꉀꎆꐳ,ꋋꆹꎆꏣꀻꎆ、ꎊꈬꁌꏤꉀꎆꌠꌋꆀ2009ꈎꏱꎆꊌꐨꃷꁨꊼꇅꀄꊭꌠꑠꒉꄸꃅꏓꇱꉜꅐꇁꌠ。ꍏꑷꏱꎆꊌꐨꂴꄐꌗꄉꌠꄩ4410ꂡꂷꁦꎆ,ꀋꉬꀋꉆꌠꆹꈎꀨꇬꊌꐨꄐꌗꄉꌠꆏꄚꃆꂮꐥꌠꎆꏣꄐꌗꄉꌠꑞꅉꃷꁨꌗꄉꌠ,ꃄꌬꄮꇬꑞꅉꃷꁨꄩꐂꌠꊼꇅꀉꑌ,ꋍꃅꄉꊌꐨꄐꌗꄉꌠꄩꎆ。2010ꈎꉇꉻꃼꇇꉇꅐꌠꈀꉬꃅ34.7%ꉀꎆ(ꄚꈐꏭꉇꅐꌠ38.7%ꉀꎆ),ꈎꀨꇬꄐꄉꌠ8%ꄩꎆ,ꈏꃹꌠꀂꏽꇗꏸꊌꌠꂴꄐꌗꄉꌠꄩ2865ꂡꂷꊌ;2010ꈎꐕꍯꈀꉬꃅ32.4%ꁦꎆꃅꃷ,ꌬꈧꇗꏸꌋꆀꐕꍯꃼꇗꏸꂴꄐꌗꄉꌠꄩ1285ꂡꂷꁦꎆꃅꊌ。ꋋꑍꐘꐯꇯꄉꇬꍏꑷꏱꎆꁦꎆꃅꊌꌠꇬ94.1%ꍆ。ꀉꁁꋍꑞꋍꑵꌠꊌꐨꆹꄐꌗꄉꌠꌋꆀꀑꐱꃅꐮꐽꏡ。

  ꍏꑷꏱꎆꊌꐨꐘꃆꀋꉬꀋꉆꌠ。ꇩꈐꁦꎆꇗꏸ15895.59ꂡꂷ,ꄐꌗꄉꌠꇬ103.6%ꃅꌐ,14.2%ꉀꎆ。ꇩꈐꌬꈧꇗꏸ6071.54ꂡꂷ,ꄐꌗꄉꌠꇬ115.8%ꃅꌐ,27.5%ꉀꎆ。ꈏꃹꌠꃷꇐꁌꎆꇗꏸ、ꌬꈧꇗꏸ10487.46ꂡꂷ;ꄐꌗꄉꌠꇬ130%ꃅꌐ,35.7%ꉀꎆ;ꎿꀸꇗꏸ2027.45ꂡꂷ,ꄐꌗꄉꌠꇬ128.3%ꃅꌐ,36.6%ꉀꎆ。ꉇꅐꃷꇐꁌꎆꇗꏸꀱꎼꇁꌠ、ꌬꈧꇗꏸ7327.31ꂡꂷ(ꎝꌗꇬꐮꄂꃅꄉꀞꇧꎭ),ꄐꌗꄉꌠꇬ103.6%ꃅꌐ,13%ꉀꎆ。ꎆꏂꑘꈁꊌꇗꏸ7794.25ꂡꂷ,ꄐꌗꄉꌠꇬ96.7%ꃅꌐ,2.3%ꉀꎆ。ꂱꑱꈁꊌꇗꏸ2902.85ꂡꂷ,ꄐꌗꄉꌠꇬ114.2%ꃅꌐ,22.6%ꉀꎆ。ꎝꌐꃼꇇꁱꍑꇗꏸ527.82ꂡꂷ,ꄐꌗꄉꌠꇬ102.3%ꃅꌐ,6.6%ꉀꎆ。ꍮꊪꃼꇗꏸ1792.03ꂡꂷ,ꄐꌗꄉꌠꇬ133.9%ꃅꌐ,54%ꉀꎆ。ꇗꏸꀋꉬꌠꊌꐨ1968.01ꂡꂷ,ꄐꌗꄉꌠꇬ94.8%ꃅꌐ,22.9%ꀁꋌꊰ。

  ꍏꑷꏱꎆꁦꎆꃅꊌꌠꊌꐨꌬꃆꂮ。ꄚꃆꂮꐥꌠꏦꃤꏦꇗꌋꆀꊯꊪꈭꇩꏤꑭꊂꏓꂱꁧꎁꃀꀉꒉꈿꅉꃀꌕꃢꌠꈿꇬꏤꐪꇖꐨꃆꂮꈴꄉ,ꍏꑷꏱꎆꁦꎆꃅꊌꌠ4410ꂡꂷꇬ,ꌌꃅꄷꇗꏸꊌꐨꇬꀱꁵꌠꌋꆀꎃꐚꃅꐙꌠꆹꏮꁵꄻꌠ650ꂡꂷꁦꎆ,ꃅꄷꄇꈜꄺꂡꌠꑠꇬꆹꏮꁵꄻꌠ242ꂡꂷꁦꎆꃅꁵ;ꂘꑘꌬꐨ260ꂡꂷꁦꎆ,ꈆꑪꇮꇐꌬꐨ56ꂡꂷꁦꎆ,ꄇꈜꋈꄻꌬꐨ454ꂡꂷꁦꎆ。ꀉꁁ2748ꂡꂷꆏ,ꌌꍏꑷꏱꎆꌬꁏꇔꌠ500ꂡꂷꇬꊐ,ꍏꑷꄐꌗꎍꐽꋊꄻꎆꀨ2248ꂡꂷꇬꁥꇱ,ꌌꋌꊂꃅꈎꄐꌗꅉꇬꌬꂿꄷ。2010ꈎꍏꑷꏱꎆꁦꎆꃅꊌꌠꄐꁆꌌꃄꌬꃆꂮꆹ,ꇩꃷꑼꆏꊯꊪꈭꇩꏤꑭꊂꏓꄊꎮꊈꉼꃀ18ꃢꌠꈿꅉꇬꏭꄛꇰꀐ。

  2.ꍏꑷꏱꎆꌬꐨꐘꃆꀋꉬꀋꉆꌠꃄꌬꃆꂮ

  ꍏꑷꏤꁈꏤꁵꄉꌠꈴꄉ,ꄷꀋꁧꇩꏤꑭꊂꏓꄊꍤꇖꈌꁧꇈ,2010ꈎꍏꑷꏱꎆꊋꒉꃅꂿꑘ、ꂘꑘ、ꁦꎴꆄꄻ、ꐧꋦꏦꀧꌠꌋꆀꃅꑘꁵꌠ、ꏦꀧꃅꐙꌠꀀꌒꋉꃆ、ꈆꑪꇮꇐ、ꋦꈭꌋꃅꌠꑠꁁꏯꎆꁦꎆꃅꇱ,ꀋꂿꑘꃅꌫꅐꌠ(ꍏꑷꋋꊐꌠꇬꌬꐨꌋꆀꍏꑷꀱꃅꄷꆹꏮꁵꌬꌠꌬꐨꄚꐊ)ꊼꇅꃪꃅꏦꀧꄉꀐ。

  (1)ꂘꑘꌬꐨ2547.34ꂡꂷ,ꄐꌗꄉꌠ117.9%ꃅꌐ,28.6%ꉀꎆ。ꄚꈐꏭ,ꍏꑷꋋꊐꌠꌬꐨ720.96ꂡꂷ,ꀱꃅꄷꆹꏮꁵꌬꌠ1826.38ꂡꂷ。ꂿꑘꁡꇤꋭꑘꉙꂘꎆꃀꏦꀧꉺꏦꄻꐛꒆ,ꌬꐨ731.08ꂡꂷ,ꇩꏤꑭꊂ1.3ꂡꑹꂿꑘꁡꇤꋭꑘꉙꂘꊬꌠꌶꌺꉬꇮꃅꌷꁌꌋꆀꌷꅍꄯꒉꀋꁵꌠꏱꁈꈲꊌ,ꈯꄔꁮꐚꁔꌠꇬꂿꑘꁡꇤꋭꑘꉙꂘꊬꌠꑱꈐꎆꏣꌢꎭꌠꌶꅉꀀꄉꌷꌠꌶꌺꐥꐨꁥꇱꎆꊌꌠ1228ꂡꑹꐥ。ꇓꈓꋭꑘꉙꂘꊬꌠꌶꌺꌶꁌꏆꇧꎭꌠ2900ꎖꃪꑹꐥ。ꂿꑘꁡꇤꋭꑘꉙꂘꃄꌬꊋꁧꌠꌶꅉꄺꀱꎖꄎꃅꇫꑟ。ꐊꑷꃅꂿꑘꁡꇤꋭꑘꉙꂘꎝꃆꍤꄻꄉꁵꄻꇧꎭ。ꎃꐚꇨꍏꑱꈐꎆꏣꌢꎭꌠꌶꌺꆏꌌꇩꏤꇫꁥꇱꌠꏱꁈꉻꑫꇬꇱꄉ,ꌶꅉꀊꂥꊐꌠꇩꏤꁥꇱꎆꊌꌠꎕꏦꐕꀊꂥ。ꊋꀥꇱꄉꃅꑘꉙꂘꅉꃀꊋꃤꋈꄻ,ꐧꊐꌠꃅꑘꌶꅉꑱꈐꎆꏣꌢꎭꌠꌶꌺꌋꆀꂿꑘꃆꂮꌷꌠꌶꌺꌷꁌꏆꇧꎭꌠ440ꃪꑹꐥ,ꐪꊛꄉꐧꊐꌠꃅꑘꌶꅉꇩꏤꇫꁥꇱꌠꎆꃀꁵꏱꁈꑠꃄꌬ,ꉬꇮꌬꐨ209.09ꂡꂷꑟ。ꀊꏀꈭꌠ“985ꋉꃆ”ꋈꄻꌠꇬꄉꃅ,“211ꋉꃆ”、ꌶꅉꀊꂥꊐꌠꀪꈈꉙꂘꊇꁧꌋꆀꉙꂘꄺꀱꋉꃆꑠꄹꎆ,ꉬꇮꌬꐨ606.63ꂡꂷꑟ。ꃅꄷꌶꅉꀊꂥꊐꌠꄺꀱꀻꎆꌠꊋꁈꄏꐨꊋꀉꒉꃅꇱ,ꌬꐨ200.67ꂡꂷꑟ。

  (2)ꈆꑪꇮꇐꌬꐨ1728.34ꂡꂷ,ꄐꌗꄉꌠꇬ105.8%ꃅꇫꑟ,14.3%ꉀꎆ。ꄚꈐꏭ,ꍏꑷꋋꊐꌠꌬꐨ1661.3ꂡꂷ,ꀱꃅꄷꆹꏮꁵꌬꌠ67.04ꂡꂷ。ꇩꏤꈆꑪꇮꇐꀉꒉꀊꂾꌠꌐꐘꃄꌬ,302ꂡꂷꌬ。ꇩꏤꋌꐛꈆꑪꎆꀨ、“973ꎖꄎ”、ꇩꏤꀨꄉꎖꃯꅉꋈꄻꃅꑠꅉꃀꎥꃪꌠꏭꊋꄏ,244.39ꂡꂷꌬ。ꊋꀥꇱꄉꂴꅑꇮꇐꎥꃪ、ꐧꋦꉻꈲꎥꃪꌋꆀꇮꇐꀋꉬꀋꉆꐯꌟꐮꐊꀉꒉꀊꂾꌠꎥꃪꀖꁉꑠꌫꄻꎥꃪ,904.13ꂡꂷꌬ。ꀨꎍꅐꑘꋊꐽꄖꄑꄐꎖꌠꃅ,ꎆꏂꑘꇮꇐꄺꀱꌋꆀꑴꌅꏀꀺꌠꊥꎆ,200ꂡꂷꌬ。ꃄꁕꈆꑪꇮꇐꏀꀺꉻꑫꋈꄻꌠꄹꆷ,ꅐꌷꎥꌬꋭꋽꃅꐮꐊꐙꌠꊥꎆ。

  (3)ꁱꀕꈯꎟꌋꆀꈨꏀꄜꉺꇬ316ꂡꂷꌬ,ꄐꌗꄉꌠꇬ100.5%ꃅꇫꑟ。ꄚꈐꏭ,ꍏꑷꋋꊐꌠꌬꐨ150.13ꂡꂷ,ꀱꃅꄷꆹꏮꁵꌬꌠ165.87ꂡꂷ。ꊋꀥꇱꄉꑣꍔꏓꇱꁱꀕꍉ、ꂿꑘꁡꇤꄯꒉꄉꑳ、ꂿꑘꁡꇤꄆꒌꃑꄻꑠꀨꎍꁱꀕꉹꁌꈲꋉꃆꋈꄻ,ꂿꑘꁡꇤꁱꀕꐥꐨꌌꀉꑌ,ꅉꂫꊐꌠꄉꉻꁱꀕꈯꎟꌬꇐꇎꏦꄻꃪ。ꇩꏤꑭꊂꃅꐧꋦꏯꁌꀋꈁꃅꁉꃑꌠꄉꉻꏂꀨꄉꑳ、ꎺꄅꑷꂿ1743ꂷꐥ。ꍸꐪꀉꒉꅉ、ꀨꎍꁱꎊꌋꆀꐥꇐꁱꀕꍸꇐꀋꉬꌠꀧꌋꃅꌤꃅꌠꊛꄉꀥꇱꃅ。ꈨꏀꄜꉺꄐꊋꌌꀉꇨ,ꁱꀕꏦꉻꄺꀱꌠꌌꃹꅼꈴꌠꊥꎆ。ꁱꀕꅐꑘꀻꎆꌠꄹꆷ。

  (4)ꁦꎴꆄꄻꇬ1485.35ꂡꂷꌬ,ꄐꌗꄉꌠꇬ106.9%ꃅꇫꑟ,16.7%ꉀꎆ。ꄚꈐꏭ,ꍏꑷꋋꊐꌠꌬꐨ73.56ꂡꂷ,ꀱꃅꄷꆹꏮꁵꌬꌠ1411.79ꂡꂷ。ꏀꉹꌠꂿꑘꁡꇤꇷꃅꆅꉚꇬꐊꊿꃷꁨ8.35ꂡꑼꐥ,ꇓꈓꏦꎫꀀꊿꅉꀨꆅꉚꄜꏂꀧꇬꐊꊿꃷꁨ1.88ꂡꑼꐥ,ꏱꎆꁥꇱꎕꏦꊾꂷꌠꐽꏡꃅ120ꂷꑟ,ꍏꑷꏱꎆꐯꇯ560ꂡꂷꁥꇱ。ꄜꏂꀋꀧꌠꇩꁨꎆꏂꑘꑱꐢꌠꇬꎞꆏꊿꌋꆀꊋꋠꌠꎆꏂꑘꌤꃅꇮꃅꊿꇓꈓꏦꎫꌤꃅꇮꃅꊿꅉꀨꆅꉚꄜꏂꀧꇬꐊꌠꊋꄏ,63ꂡꂷꁥꇱ。ꀒꁨꋍꁘꃅꇓꈓꇓꉈꆅꉚꈭꋏꐨꉀꐕ,94ꂡꂷꁥꇱ。ꊋꀥꇱꄉꅉꂫꊐꌠꁦꎴꆄꄻꁧꃤꃅꉻꑫꋈꄻ,225ꂡꂷꌬ。60%ꌠꍔꃚꀞꄻꌠꅉꂫꊐꌠꁦꎴꆄꄻꏲꉻꆏꇩꏤꅉꀨꁬꋌꆰꋌꄹꏦꌬ,ꏦꉻꉺꏦꏓꇱꄺꀱꌠꄹꎆ。ꇓꈓꇓꉈꀀꊿꁌꀋꈁꃅ9ꑵꅉꀨꄉꉻꁦꎴꁧꃤꃅꌠꊋꄏ,ꄉꉻꁦꎴꁧꃤꃅꐘꃆꀉꒉꀊꂾꌠꃅ,ꐯꇯ295.69ꂡꂷꁥꇱ。ꉻꃅꆅꉚꅉꄺꀱꉚꌠꃅ。

  (5)ꐧꋦꏦꀧꌋꆀꃅꑘꁵꌠꇬ3784.99ꂡꂷꌬ,ꄐꌗꄉꌠꇬ105.7%ꃅꇫꑟ,14.8%ꉀꎆ。ꄚꈐꏭ,ꍏꑷꋋꊐꌠ428.25ꂡꂷꌬ,ꀱꃅꄷꆹꏮꁵꌬꌠ3356.74ꂡꂷ。ꇩꏤꑭꊂꏀꉹꌠꂿꑘꁡꇤꐧꋦꃀꌠꉘꉚꄜꏂꀧꉚꅉꉱꑷꐨ24%ꑟ,ꎆ120ꂡꂷꁥꇱ。ꎆꏂꑘꌤꃅꇮꃅꊿꅉꀨꃀꌠꀨꎹꉘꉚꄜꏂꀧꂱꑱꎆꐥꄉꌠꃅꉚꌠꃅ,ꊛꄉꎆꏂꑘꎞꆏꊿꅉꀨꃀꌠꉘꉚꎆꉀꐕ,ꅉꀨꃀꌠꉘꉚꎆꋍꆪꊾꂷꐽꏡꃅꎕꏦ1400ꂷꑟ。ꎆꏂꑘꌤꃅꇮꃅꊿꅉꀨꃀꌠꉘꉚꄜꏂꀧꎆꐯꇯ1561ꂡꂷꁥꇱ,ꇓꈓꇓꉈꐥꐨꀁꂥꀧꁥꇱꎕꏦꉀꐕ,ꐯꇯ633.01ꂡꂷꌬ。ꌌꂴꄉꀨꎹꌶꌠꊿꀨꎹꌋꆀꐥꐨꁥꇱꎕꏦꉀꐕ,215.62ꂡꂷꌬ。ꌺꍸꅩꍸꅉꀨꐥꐨꏦꀧꄹꏦꄻ。ꏟꈯꃅꉮꌸꅉꉹꁌꅉꀨꒃꅐꐥꐨꏦꀧ,ꄉꄐꃅꉮꌸꄉꂿꑘꊿꑳꐡꋈꀱꇬꍏꑷꁥꇱꎕꏦꉀꐕ,137.69ꂡꂷꌬ。ꇩꁨꎆꏂꑘꏱꁈꐨꃅꑱꐢꃆꂮꌤꃅꋒ,ꎆ71.15ꂡꂷꁥꇱ。ꀊꅰꏣꀋꑌꌠꃅꑘꁵꏱꁈꃄꌬꇫꑟ,ꏣꀋꑌꃅꃅꑘꎆꎃꊐꌠꌬ,ꎆꏂꑘꊋꊡꄉꊿꃅꅍꀋꊌꌠꌬ,ꌶꅉꀊꂥꅉꌶꅐꌠꁳꃅꑘꊌꌠꊥꎆ,ꀱꂱꑱꃅꄷꇁꌠꂿꑘꇮꃅꊿꑠꏯꃅꑘꐋꀋꌡꌠꂘꄻꎖꄎꌠꃅ。ꊋꀥꇱꄉꎆꀄꊭꃅꀦꉛꏱꎆꇔꊰꇱꌠꃅ,ꄏꐓꈍꈐꍔꐯ。

  (6)ꀀꑳꏦꀧꇬ1125.73ꂡꂷꌬ,ꄐꌗꄉꌠꇬ113.4%ꃅꇫꑟ,15%ꉀꎆ。ꄚꈐꏭ,ꍏꑷꋋꊐꌠ386.48ꂡꂷꌬ,ꀱꃅꄷꆹꏮꁵꌬꌠ739.25ꂡꂷ。ꊋꀥꇱꄉꏦꀧꐨꐥꌠꀀꌒꋉꃆꋈꄻ,ꇩꏤꑭꊂꏦꀧꐨꐥꀀꑳꌋꆀꑲꆹꇤꆹꐛꅉꀀꑳꄺꀱꌠ590ꃪꂷꋈꇰ,ꀑꐱꃅ370ꃪꂷꋉꐛ,ꇤꐳꃅꂿꑘꁡꇤꑳꐡꑳꁘꋈꄻꌋꆀꎆꆫꊿꀀꑳꋉꃆꋉꌠꄹꎆ,ꍏꑷꏱꎆꏦꀧꐨꐥꀀꌒꋉꃆ764.86ꂡꂷꌬ,38.9%ꉀꎆ。ꏲꑘꌤꑘꌤꃅꅉꌤꃅꇮꃅꊿꀀꑳꉻꊭꎆꑠ352.16ꂡꂷꌬ。

  (7)ꂿꑘꌩꑘꒉꑘꌤꃆ3879.66ꂡꂷꌬ,ꄐꌗꄉꌠꇬ102.7%ꃅꇫꑟ,10.5%ꉀꎆ。ꄚꈐꏭ,ꍏꑷꋋꊐꌠ387.89ꂡꂷꌬ,ꀱꃅꄷꆹꏮꁵꌬꌠ3491.77ꂡꂷꌬ。ꂿꑘꌬꇐꏓꇱꀥꇱꄟꉺꏦꋊꄻꌠꃅꇫꑟ,ꂿꑘꋦꇐꇗꂄꀥꇱꃅꅉꌋꆀꉹꑫꈍꈐꀒꁨꋍꁘꃅꍔꐯ,ꂿꑘꏸꐕꃻꄻꀥꇱꈍꈐꁦꎆꅷꀉꒉ12ꉹ180ꑵꐥ,ꐯꇯ1074.9ꂡꂷꀥꇱ。ꂿꑘꈆꑪꇮꇐꊌꐨꆹꏮꌋꆀꂴꅑꌬꍬꐥꂿꑘꇮꇐꌫꄻꌠꊥꎆ,ꂿꑘꊿꌐꑘꇷꃅꎀꍹꀻꎆꌠꄹꆷ,114ꂡꂷꌬ。ꂿꑘꏓꇱꀖꁉ192ꂡꂷꌬ,ꍯꃅꅐꐨꀁꂥ、ꎕꏦꀊꂥꃅꋈꄻꌠ2411.72ꃪꂡ,ꋚꂷꏓꇱꒃꅐꄐꊋ311.2ꃪꄓꁦꎆ。ꂿꑘꌩꑘꄜꏂꀧꀕꎆꀥꇱꇬꌬꌠ67.77ꂡꂷ,ꏓꎼꇁꇬꄜꏂꀧꊿ1.3ꂡꁯꃢꐥ。ꏱꎆꄏꐓꀖꁉꉺꏦꏀꀺ,ꌢꎭꃅꄷꉾꌠꅐꑘꀻꎆꌠꊋꄏ,ꎆ260ꂡꂷꁥꇱ,ꄏꐓꊿ3597ꃪꑼꇬꑟ。ꂿꑘꂿꑘꁡꇤꅉꃀꌬꇐꋈꄻꌠ1352ꂡꂷꌬ,ꋍꈭꀕꌠꃨꆰꌠꒉꇉꄻꈫꈈꌕꈎꄐꎖꂿꃆꃅꇫꑟ,ꑍꈭꀕꌠꀨꎍꃨꆰꒉꇉꀄꊭꌠꄻꈫꈈꌠꃅ,ꀊꏀꃅꑤ450ꂷꐭꉹꌠꍯꃅꈲꒉꀨꎍꑤꃅꋈꄻꌠꁦꎆꄉ,ꀉꒉꐧꀠꉹꌠꒉꊐꅉꊛꄉꒉꋬꈭꃅꏎꏸꐨꄺꀱꑠꀨꎍꋉꃆꌋꆀꂿꑘꁡꇤꄆꈄꏍꄺꀱꌠꄹꎆ。ꋂꊐꌠꉻꈲꌤꑘꋈꄻꌠꋍꌤꋍꇖꏱꎆꈁꁠꁵꏿꉚꅉꈍꈐꍔꐯꅷꌜ27ꂷꇬꑟ,102.67ꂡꂷꌬ,ꂿꑘꊿ5.3ꂡꑻꈲꊌ。ꍏꑷꏱꎆꌩꏪꒆꉻꈲꊌꀥꇱꎆꄏꐓꌠꇩꏤꊐꌠꉻꈲꌩꏪꍔꐯꅷ10.49ꂡꂿꑟ,75.81ꂡꂷꌬ。

  (8)ꇩꃅꀕꀑꃅꑊꑠꌤꃆꇬ370.04ꂡꂷꌬ,ꄐꌗꄉꌠꇬ110%ꃅꇫꑟ,51.4%ꉀꎆ,ꀋꉬꀋꉆꌠꆏꇑꎹꌅꈌꇑꅤꌅꈌꌫꎆꌋꆀꇑꅐꇐꌬꇐꀥꇱꁌꊌꐨꁦꎆꌠꊼꇅꀉꑌ,ꄚꃆꂮꏤꐪꇬꈴꌐꐘꆏꌌꇑꅐꇐꌬꇐꀖꁉꌋꆀꌫꄻꌠꇬꌬ。ꄚꈐꏭ,ꍏꑷꋋꊐꌠꌬꐨ176.39ꂡꂷ,ꀱꃅꄷꆹꏮꁵꌬꌠ193.65ꂡꂷ。ꃅꊈꌋꆀꇑꑘꃆꂮꐥꌠꌤꃆꀉꒉꀊꂾꌠꃅꌠꊋꄏ,ꀒꁨꋍꁘꃅꅉꃀꐨꐥꌠꍤꄻ、ꇑꅐꁧꋦꈭꏱꄻꌋꆀꇑꅐꇐꌬꇐꏎꏸꌋꆀꏓꇱꌬꑠꁁꏯꀥꇱꄉꃅ。

  (9)ꋦꈭꀧꌋꃅꇬ1443.1ꂡꂷꌬ,ꄐꌗꄉꌠꇬ102.1%ꃅꇫꑟ,25.3%ꉀꎆ。ꄚꈐꏭ,ꍏꑷꋋꊐꌠꌬꐨ69.48ꂡꂷ,ꀱꃅꄷꆹꏮꁵꌬꌠ1373.62ꂡꂷ。ꊋꏏꍍꋊꌠꄹꆷ,851.25ꂡꂷꌬ。ꀨꎍꊋꏏꐘꃆ1184ꂷꄏꐓ,ꎆꏂꑘ773ꁯꊋꏏꇮꇐꄺꀱꌠꊥꎆ,ꎆꏣꐞꀋꄿꃅꄷꎆꏂꑘ1689ꁯꅐꄐꊋꃤꀉꁘꊁꊰꌠꀜꋊꌠꊋꄏ。ꋦꈭꍤꎖꍉ532ꂷꌋꆀꋦꈭꍤꎖꏦꌬꏲꉻꎕꏦꈴꋈꄻꌠꄹꆷ,ꌕꒉꌕꎿꌋꆀꌙꉸꏦꒈꁕꒉꍍꆀꌠꏱꄻꑠꍍꋊꋉꃆꀉꒉꀊꂾꌠꃅ,ꇓꈓꏦꎫꍍꒉꋊꄻꌬꇐꉁꈾꋈꄻꌠ8.7ꃪꉻꆏꇬꊋꄏ。ꌜ8ꂷꁡꇤ4100ꂷꀋꇈꐥꌠꂿꑘꁡꇤꋦꈭꐯꅑꏱꄻꉚꌤꃅꌠꄹꎆ,ꂿꑘꁡꇤꐥꐨꋦꈭꄻꃪ。ꊋꏏꅐꇐꊿꈲꋉꃆꃄꌬꐨꍔꐯ,ꈲꁧꀊꂥꌗꃑꏸ3000ꃪꇷꀋꇈ、ꂷꇭꄔꅍꉾꌠ1.6ꂡꂷꌌꌬ。ꄉꉻꁁꏯꊋꏏꌋꆀꄐꊋꏀꌠꐕꍯꃅꉚꅉꇓꈓꍔꐯꅷ25ꂷꑟ,ꇓꈓ5ꂷꂱꑱꄐꊋꏀꌠꐕꍯꀥꇱꉚꌠꃅ。ꇤꐳꃅꄐꊋꊛꒆꉆꌠꀻꎆ,106.31ꂡꂷꌬ。ꏂꉘꁮꋉꃆꃅ,ꏣꀋꑌꃅꇨꃛꄆꃑꇩꈐꄉꈁꈴꌫꄻꌠꄹꎆ。ꒆꉻꊈꄐꊋ、ꆳꄆꑠꀻꎆꌠꊥꎆ,ꇓꈓ26ꂷ、ꑤ62ꂷꄐꊋꊛꒆꉆꌠꋈꄻꌫꄻꉚꌠꃅ。ꋠꃅꀱꌩꊪ、ꆫꁍꀱꏜꏿꌠꊌꐨꌌꈫꈈ,ꌩꑘꀨꎍꋉꃆꌋꆀꅔꏂꒆꉻꋈꄻꌠꄹ,468.06ꂡꂷꌬ。

  (10)ꈭꈜꎞꎭꌠꇬ2599.25ꂡꂷꌬ,ꄐꌗꄉꌠꇬ122.7%ꃅꇫꑟ,19.3%ꉀꎆ。ꄚꈐꏭ,ꍏꑷꋋꊐꌠ1489.58ꂡꂷꌬ,ꀱꃅꄷꆹꏮꁵꌬꌠ1109.67ꂡꂷꐥ。ꇩꌜꈜꀦꑠꄉꉻꈭꈜꅉꃀꌬꇐꋈꄻꌠꄹꎆ,ꂿꑘꁡꇤꄇꈜꄺꀱ、ꀊꏀꃅꋈꄻꌠ30ꃪꉻꆏꐥ,1512ꂡꂷꌬ。ꇓꈓꄉꉻꈭꈜꑠꄹꁆꇬꈲꐨꐥꌠꉹꑘꏯꇓꋌꁌꀥꇱ,187.11ꂡꌬ。ꍔꃚꎝꌣꑍꊐꌠꄇꈜꎆꎴꌠꋊꐆꇧꎭ,ꃅꄷꇬ260ꂡꂷꁥꇱ。ꎸꈜ、ꐱꈴꄇꈜ、ꃏꏸꐛꅉꑠꐘꃆꋈꄻꌠꄹꎆ,125ꂡꂷꌬ。

  (11)ꌬꇐꎹꄻꄆꊋꈴꌗꑠꌤꃆꇬ827.77ꂡꂷꌬ,ꄐꌗꄉꌠꇬ118.9%ꃅꇫꑟ,2.8%ꀁꋌꊰ。ꄚꈐꏭ,ꍏꑷꋋꊐꌠ 488.38ꂡꂷꌬ,ꀱꃅꄷꆹꏮꁵꌬꌠ339.39ꂡꂷ。ꌬꇐꎹꄻꄆꊋꈴꌗꑠꅉꃀꌬꇐꋈꄻꌠꄹꎆ,484ꂡꂷꌬ。ꎆꏂꑘꐧꐭꀻꎆꌠꊥꎆ,93.43ꂡꂷꌬ。

  (12)ꋚꒀꎊꈬꊭꊎꏲꂠꌤꃆꇬ793.24ꂡꂷꌬ,ꄐꌗꄉꌠꇬ73.6%ꃅꇫꑟ,28.2ꀁꋌꊰ,ꀋꉬꀋꉆꌠꆏꃶꐚꃅꌗꇽꎼꇁꇬꋚꒀꇔꊰꁌꑠꀥꇱꌠꊨꒊ。ꄚꈐꏭ,ꍏꑷꋋꊐꌠꇬ495.12ꂡꂷꌬ,ꀱꃅꄷꆹꏮꁵꌬꌠ298.12ꂡꂷ。ꋚꂷꎂꀥꇱꌠ151ꂡꂷꌬ。ꋚꂷꎳꃼꁌꀄꊭꐯꀄꊭꌠꉀꐕ,ꇔꊰꁌ109ꂡꂷꁥꇱ。ꊋꀥꇱꄉꋚꒀꌋꆀꇓꋌ、ꑊꐥꎸꑫꑠꀋꂿꑘꌠꎊꈬꊭꊎꉻꑫꋈꄻ,257.9ꂡꂷꌬ。

  (13)ꃼꇇꑘꁧꃤꃅꑘꑠꌤꃆꇬ802.85ꂡꂷꌬ,ꄐꌗꄉꌠꇬ94.2%ꃅꇫꑟ,29.9%ꉀꎆ,ꄐꌗꄉꌠꌋꆀꐮꍣꌠꀋꉬꀋꉆꌠꃶꐚꃅꌗꇽꌠꇓꋌ、ꌑꇌꑠꎊꈬꊭꊎꁌꊨꒊ。ꄚꈐꏭ,ꍏꑷꋋꊐꌠꇬ140.91ꂡꂷꌬ,ꀱꃅꄷꆹꏮꁵꌬꌠ661.94ꂡꂷꐥ。ꊛꄉꑶꈓꌬꄆꐕꍯꌌꂿꑘꁡꇤꃷꌋꆀꑶꈓꌬꄆ、ꐕꍯꆹꏀꆦꏱꁈꌬ,403.58ꂡꂷꁥꇱ。ꇩꏤꊭꊎꌠꌑꇌ、ꎬꐚ、ꎸꑠꀥꇱꌠ31.93ꂡꂷꌬ。ꂿꑘꁡꇤꐛꏀꏮꈴꁧꃤꃅꈄꏍꋉꃆꋈꄻꌠꄹꎆ,ꃼꇇꏮꈴꁧꃤꃅꑘꀻꎆꌠꊥꎆ,81ꂡꂷꌬ。

  (14)ꃄꇙꉮꌸꊂꋈꀱꄺꀱꌠꇬ794.34ꂡꂷꌬ,ꄐꌗꄉꌠꇬ101.8%ꃅꇫꑟ。ꄚꈐꏭ,ꍏꑷꋋꊐꌠ37.9ꂡꂷꌬ,ꀱꃅꄷꆹꏮꁵꌬꌠ756.44ꂡꂷ。ꊉꍧꃄꇙꉮꌸꊂꋈꀱꄺꀱꌕꈎꂿꃆꇬꑍꈓꀑꐱꃅꀕꇫꑟ。2008—2010ꈎ,ꊉꍧꃄꇙꉮꌸꊂꋈꀱꄺꀱꌠꌬꌠꏓꌗꎼꇁꇬ2330.88ꂡꂷ,ꍏꑷꇩꁨꎆꀨꀰꏢꄐꌗꑠꄐꁆꄉꌬꌠ655.82ꂡꂷꌋꆀꌗꇽꊁꈓꇱꌬꌠ46.57ꂡꂷꇱꇬꆏ,ꐯꇯ3033.27ꂡꂷ,ꌕꈎꍏꑷꏱꎆꃄꇙꉮꌸꊂꋈꀱꄺꀱꇬ3000ꂡꂷꇱꌠꄐꎖꁻꌐꃅꇫꑟ。(ꁥꇱꑴꉻ6ꇬꉜ)

  (15)ꇩꐏꇬ5182.27ꂡꂷꌬ,ꄐꌗꄉꌠꇬ99.8%ꃅꇫꑟ,7.3%ꉀꎆ。ꄐꌗꄉꌠꌋꆀꐮꍣꌠꀋꉬꀋꉆꌠꆏꃶꐚꃅꌗꇽꎼꇁꇬꂽꑼꎞꆏꌠꐥꅉꁵꄻꌠꎆꄐꌗꌠꇬꀋꑟ。ꄚꈐꏭ,ꍏꑷꋋꊐꌠꇬ5176.35ꂡꂷꌬ,ꀱꃅꄷꆹꏮꁵꌬꌠ5.92ꂡꂷ。ꂽꇜꂽꑼꐥꐨꄻꃪꌠꊋꄏ。ꊋꀥꇱꄉꈴꌗꈴꋈꄻ,ꄉꄐꃅꌬꉂꌬꈾꌬꇐꁦꎆ,ꂽꑼꃨꆰꉮꐪꈭꋏꏭꊝꄎꊋꃤꑠꉀꐕ。

  (16)ꄉꉻꋬꂻꌠꇬ1475.42ꂡꂷꌬ,ꄐꌗꄉꌠꇬ106.1%ꃅꇫꑟ,14.6%ꉀꎆ。ꄚꈐꏭ,ꍏꑷꋋꊐꌠꇬ875.2ꂡꂷ,ꀱꃅꄷꆹꏮꁵꌬꌠ600.22ꂡꂷ。ꍔꃔꌫꎆꏦꀧꏦꉻꄺꀱꌠꄹꎆ,ꀋꆏꃅꏦꀧꑟꐨꉀꐕ。ꉮꄵꉮꊨꌋꆀꉮꏭꊝꈭꋏꉻꑫꋈꄻꌠꀥꇱꀐ。

  (17)ꎂꀕꄉꉻꁧꃤꃅꌠꇬ992.7ꂡꂷꌬ,ꄐꌗꄉꌠꇬ97.8%ꃅꇫꑟ,8.3%ꀁꋌꊰ,ꀋꉬꀋꉆꌠꆏꌤꃅꅉꎃꐚꃅꀕꌠꏦꀧ,ꉈꑴꃅꄷꊋꄏꄉꑴꌅꃅꑘꎹꂽꇬꇁꌠꇥꀯꎞꆏꎆꇬꌬ。ꄚꈐꏭ,ꍏꑷꋋꊐꌠꇬ837.24ꂡꂷꌬ,ꀱꃅꄷꆹꏮꁵꌬꌠ155.46ꂡꂷ。

  (18)ꇩꎝꇔꊰꁵꌠꇬ1512.36ꂡꂷꌬ,ꄐꌗꄉꌠꇬ98.5%ꃅꇫꑟ,14.5%ꉀꎆ。

  ꄚꂴꋍꑞꋍꐘꌫꅐꐨꏓꄻꐯꇯꇬ,2010ꈎꍏꑷꏱꎆꌌꏓꂱꉹꁌꐥꐨꇬꌋꆀꈛꎂꃅꐮꃆꂮꐥꌠꂘꑘ、ꆄꄻꁦꎴ、ꐧꋦꏦꀧꌋꆀꃅꅍꁵ、ꀀꑳꏦꀧ、ꁱꀕꁁꏯꌬꌠꏓꂱꐥꐨꌫꅐꌠꏓꌗꐯꇯꇬ8898.54ꂡꂷꑟ,19.9%ꉀꎆ。ꂿꑘꈲꒉ、ꈭꈜꎞꎭꌋꆀꋦꈭꀧꌋꃅꑠꇬꌫꅐꌠꑌꏓꂱꐥꐨꌋꆀꑖꑟꃅꐮꃆꂮꐥ,ꍏꑷꏱꎆꀱꃅꄷꇗꏸꎴꊌꌠꁵꌠꌋꆀꎃꐚꌠꆹꏮꁵꄻꌠꑌꀉꑌꌠꆏꌌꏓꂱꐥꐨꌫꅐꌠꉬ。2010ꈎꍏꑷꏱꎆꌌ“ꌕꂿꑘ”ꇬꌬꌠꏓꌗꐯꇯꇬ8579.7ꂡꂷꑟ,18.3%ꉀꎆ。ꄚꈐꏭ:ꂿꑘꒃꅐꊋꁈꄏꅉꌬꌠ3427.3ꂡꂷꑟ,ꌌꂿꑘꊿꃤꋚꂷꇬꈛꎂꃅꀥꇱ、ꂿꑘꌬꇐꏓꇱꇬꀥꇱ、ꋚꇕꍔꂄꇬꀥꇱ、ꂿꑘꏸꐕꃻꄻꀥꇱꅉꌬꌠ1225.9ꂡꂷꑟ,ꂿꑘꁡꇤꂘꑘ、ꁦꎴꆄꄻꑠꐧꋦꌤꑘꀻꎆꇬꌬꌠ3350.3ꂡꂷꑟ,ꂿꑘꅐꇐꊭꊎꌫꁌꌋꆀꇔꊰꑠꇬꌬꌠ576.2ꂡꂷꑟ。ꉉꀽꌶꌠꆏ,ꏓꂱꐥꐨꌋꆀ“ꌕꂿꑘ”ꇬꌬꌠꆏꏡꄜꄐꌗꌠꐘꃆꀋꉬ,ꌌꍤꇖꌒꎻꂿꄷꄉ,ꏓꂱꐥꐨꌋꆀ“ꌕꂿꑘ”ꇬꃆꂮꐥꌠꌬꌠꐘꃆꇬꏓꇱꄉꄜꅐꇁꌠꆏ,ꑠꐛꅹꃅꋍꈨꋋꈨꆏꐯꏍꐮꄅꃅꐙꇁꌠꉬ。

  (ꑍ)ꍔꃚꐨꐥꎆꀨꄐꌗꃄꌬꐨ

  2010ꈎꍔꃚꐨꐥꎆꀨꊌꐨ35781.94ꂡꂷꑟ,ꇩꏤꑭꊂꍔꃚꐨꐥꎆꀨꌬꌠ32582.64ꂡꂷꑟ。

  ꍏꑷꍔꃚꐨꐥꎆꀨꊌꌠ3175.57ꂡꂷꑟ,ꄐꌗꄉꌠꇬ124.3%ꃅꇫꑟ。ꄚꈐꏭ:ꌒꑤꋉꃆꋈꄻꎆꀨꊌꌠ59.16ꂡꂷꑟ,ꎸꈜꋈꄻꎆꀨꊌꌠ616.92ꂡꂷꑟ,ꈴꀸꋈꄻꎆꀨꊌꌠ114.44ꂡꂷꑟ,ꉹꁌꑌꃏꏸꐛꅉꏲꂠꋈꄻꌫꁌꊌꌠ136.4ꂡꂷꑟ,ꊴꀾꉻꈲꎆꊌꌠ247.73ꂡꂷꑟ,ꒉꐧꉹꌠꒉꇉꉹꁌꎞꀉꁁꏀꊁꊬꌠꄏꐓꎆꀨꊌꌠ183.44ꂡꂷꑟ,ꍏꑷꂿꑘꁡꇤꈄꏍꎝꌣꎆꊌꌠ91.44ꂡꂷꑠ。2009ꈎꋒꇈꊌꐨ631.34ꂡꂷꄻꇬꇯꇬꆏ,2010ꈎꌫꄻꌠꍏꑷꍔꃚꐨꐥꎆꀨꈁꊌꌠꃷꁨꆏ3806.91ꂡꂷꑟ。ꍏꑷꍔꃚꐨꐥꎆꀨꌫꅐꌠ3016.75ꂡꂷꑟ,ꄐꌗꄉꌠꇬ94%ꃅꇫꑟ。ꄚꈐꏭ:ꍏꑷꋋꊐꇬꌫꅐꌠ2284.05ꂡꂷꑟ,ꌒꑤꋉꃆꋈꄻꇬꌫꅐꌠ69.89ꂡꂷ,ꎸꈜꋈꄻꌫꅐꌠ582ꂡꂷ,ꈴꀸꋈꄻꇬꌫꅐꌠ87.5ꂡꂷ,ꉹꁌꑌꃏꏸꐛꅉꏲꂠꋈꄻꇬꌫꅐꌠ46.76ꂡꂷ,ꊴꀾꉻꈲꎆꃀꌌꐧꋦꈲꁧ、ꈯꒆꄿꎟ、ꂘꑘꑠꐧꋦꉻꈲꌤꑘꌫꅐꌠ139.1ꂡꂷ,ꒉꐧꉹꒉꇉꉹꁌꎞꀉꁁꏀꊁꊬꌠꄏꐓꎆꀨꌫꅐꌠ0.45ꂡꂷ,ꍏꑷꂿꑘꈄꏍꎝꌣꎆꃀꌫꅐꌠ102.87ꂡꂷꑠ;ꀱꃅꄷꆹꏮꁵꌬꌠ732.7ꂡꂷꑟ,133.4ꂡꂷꁦꎆ,22.3%ꉀꎆ。ꍏꑷꍔꃚꐨꐥꎆꀨꋒꇈꏮꌊꊁꈎꌠꇱꄉꌬꌠ790.16ꂡꂷꑟ。

  ꃅꄷꍔꃚꐨꐥꎆꀨꋋꊐꇬꊌꌠ32606.37ꂡꂷꑟ,ꄐꌗꄉꌠꇬ201.9%ꃅꇫꑟ。ꄚꈐꏭ:ꇩꁨꃄꅉꌬꌅꈌꏆꌠꇬꊌꌠ29109.94ꂡꂷꑟ,ꄐꌗꄉꌠꇬ213.2%ꃅꇫꑟ,ꀋꉬꀋꉆꌠꆏꃄꅉꇲꁵꁦꎆ、ꃄꅉꁌꏤꉻꄜꑞꅉꉀꐕꌠꌋꆀꊌꄻꇬꏲꂠꌠꊋꀥꇱꑠꒉꄸꃅꅐꇁꌠꉬ。ꇓꈓꅉꃀꌬꇐꋬꈭꌫꁌꊌꌠ610.87ꂡꂷꑟ。ꊴꀾꉻꈲꎆꃀꊌꌠ243.64ꂡꂷꑟ。ꃅꄷꂘꑘꁥꇱꊌꌠ242.80ꂡꂷꑟ。ꍏꑷꍔꃚꐨꐥꎆꀨꀱꃅꄷꆹꏮꁵꄻꌠ723.7ꂡꂷꄻꇬꇯꇬꆏ,ꃅꄷꍔꃚꐨꐥꎆꀨꊌꌠꆏ33339.07ꂡꂷꑟ。ꃅꄷꍔꃚꐨꐥꎆꀨꌫꅐꌠ30298.59ꂡꂷꑟ,ꄐꌗꄉꌠꇬ175%ꃅꌐ。ꄚꈐꏭ:ꇩꁨꃄꅉꌫꄻꌅꈌꏆꌠꇬꊌꌠꄐꁆꌫꅐꌠ26975.79ꂡꂷꑟ,ꃄꅉꌬꐆꎞꀵꊒꑠꎆꀨꐨꐥꃅꌬꌠ13395.6ꂡꂷ、ꂿꑘꁡꇤꅉꃀꌬꇐꋈꄻꌠꌋꆀꂿꑘꊿꁥꇱꀥꇱꑠꇬꌫꅐꌠ2248.27ꂡꂷ、ꀀꑳꁌꆓꏦꀧꇬꌫꅐꌠ463.62ꂡꂷ、ꎆꏂꑘꑱꐢꅀꄹꏦꄺꀱꄉꃄꅉꏆꅐꊌꄉꌌꇮꃅꌤꃅꊿꃅꑘꁵꅉꌬꌠ3336.63ꂡꂷ、ꇓꈓꑲꅉꅐꇐꏲꂠꏦꃤꄚꃆꂮꐥꌠꏤꐪꇬꈴꄉꌌꇓꈓꋈꄻꅉꇬꌫꅐꌠ7531.67ꂡꂷꃅꇫꐊ。ꊴꀾꉻꈲꎆꃀꌫꅐꌠ288.19ꂡꂷ,ꌌꐧꋦꈲꁧ、ꈯꒆꄿꎟ、ꂘꑘꑠꐧꋦꉻꈲꌤꑘꇬꌬ。ꇓꈓꅉꃀꌬꇐꋬꈭꇬꌫꅐꌠ479.68ꂡꂷꑟ。ꃅꄷꂘꑘꁥꇱꌫꅐꌠ177.41ꂡꂷꑟ。ꃅꄷꍔꃚꐨꐥꎆꀨꊌꌠꌬꌠꄩꎆꄉꋒꇈꌠꏮꌊꊁꈎꇬꇱꄉꌫꄻ。

  (ꌕ)ꍏꑷꇩꁨꎆꀨꀰꏢꄐꌗꃄꌬꐨ

  2010ꈎꍏꑷꎆꏂꑘꇩꁨꎆꀨꈲꊌꌠ558.7ꂡꂷꎴꊊ,ꄐꌗꄉꌠꇬ132.7%ꃅꇫꑟ。ꄐꌗꄉꌠꄩꎆꌠꆏꀋꉬꀋꉆꌠꇩꁨꇴꊌꄻꌠꄻꇩꁨꀰꏢꄐꌗꅉꇱꄉꏲꂠ。2009ꈎꋒꇈꏮꎼꇁꄉꊌꌠ18.9ꂡꂷꄻꇬꇯꄉ,ꌫꄻꌠꈁꊌꃷꁨꆏ577.6ꂡꂷꑟ。ꍏꑷꇩꁨꎆꀨꀰꏢꌫꅐꌠ563.43ꂡꂷꑟ,ꄚꈐꏭ:ꇩꏤꑭꊂꐧꋦꏦꀧꎆꀨꀥꇱꌫꅐꌠ148.54ꂡꂷ,ꃄꇙꉮꌸꊂꀱꋈꄻꀱꇬꌫꅐꌠ9.32ꂡꂷ,ꇩꁨꎆꏣꌋꆀꅐꑘꐛꉻꋊꍬꇬꌫꅐꌠ179.5ꂡꂷ,ꍏꑷꎆꏂꑘꄺꀱꎭꇔꀥꇱꁥꇱꇬꌫꅐꌠ121.96ꂡꂷ,ꈆꑪꇮꇐꏀꀺꀉꒉꀊꂾꇬꌫꅐꌠ32ꂡꂷ,ꊋꏏꍍꋊꀉꒉꀊꂾꌠꇬꌫꅐꌠ30ꂡꂷ,ꉇꉻꎆꊐꌫꅐꌠ22.41ꂡꂷ,ꐧꋦꏦꀧꑠꇬꌫꅐꌠ4.7ꂡꂷ,ꋊꐽꌊꄉꉻꏱꎆꄐꌗꅉꇱꄉꌌꏓꂱꐥꐨꁁꏯꌬꄉꌫꅐꌠ10ꂡꂷ,ꑟꏦꒃꅐꋈꄻꀘꄨꅐꑘꀻꎆꎆꃀꌫꅐꌠ5ꂡꂷ。

  ꄚꂴꄐꌗꃄꌬꃆꂮꐥꌠꐛꐨꑭꋧꌠꆏ《ꍏꉸꏓꂱꇭꉼꇩ2010ꈎꇩꏤꑭꊂꃄꌬꐨ2011ꈎꇩꏤꑭꊂꄐꌗ(ꄐꄉꌠ)》ꇬꉜ。

  (ꇖ)ꏣꀋꑌꌠꏱꎆꏱꁈꃄꌬꐨ

  ꎔꃅꏣꀋꑌꌠꏱꎆꏱꁈꌫꄻ,ꇩꂱꎆꏣꐪꊛꄉꉻꒉꃅꋊꐽꌠꄐꐨꃅꍜꉜꄉꀻꎆꌠꊥꎆꄉ,ꀒꁨꋍꁘꃅꎆꏣꃅꒊꃅꇁꉾꃪꌠꈫꈈ。

  ꇓꈓꇓꉈꀀꊿꊌꐨꉀꐕ,ꀀꊿꌬꈧꈉꄻꌠꍔꐯ。ꂿꑘꊿꇬꀥꇱꌠꁦꎆ,ꂿꑘꅉꃀꌬꇐꌋꆀꂿꑘꏓꇱꒃꅐꄐꊋꋈꄻꌠꊋꀥꇱ,ꂿꑘꊿꁦꎆꊌꌠꊥꎆ。ꇓꈓꇓꉈꐥꐨꀁꂥꄉꀧꌠ、ꎆꏂꑘꎞꆏꊿꌋꆀꈲꁵꀨꎹꊿꑠꉹꁌꁥꌠꇬꏭꀥꇱꁥꇱꌠꑞꅉꉀꐕ,ꀀꊿꌬꈧꄐꊋꀉꇨꃅꁦꎆꇁ。ꐪꊛꄉꑱꈐꌬꄆꐕꍯꀏꁧꌠꌋꆀꑱꈐꌬꄆ、ꐕꍯꆹꏀꆦꑠꈐꊟꊋꊡꄉꌬꈧꌠꏱꁈꋬꈭꌠꌫꄻ。

  ꍔꃚꄉꉻꎆꇱꌠꄐꁆꌫꄻꋒ,ꎆꇱꐛꉻꄻꂄꈴ。ꏓꇲꈴꃅꄉꉻꏱꎆꄐꌗꎆꁵ、ꍔꃚꐨꐥꎆꀨꊌꌠ、ꇩꁨꎆꀨꀰꏢꊌꈲꑠꇬꈴꄉ,ꍏꑷꍔꃚꄉꉻꎆꇱꌫꅐꌠ10710ꂡꂷꑟ,ꀋꉬꀋꉆꌠꆏꌌꂿꑘꅉꀨꌬꇐꌋꆀꂿꑘꁡꇤꏓꂱꐥꐨꋉꃆ、ꂘꑘꁦꎴꆄꄻꑠꐧꋦꌤꑘ、ꏦꀧꐨꐥꀀꌒꋉꃆ、ꊋꏏꍍꋊꌋꆀꒆꉻꋈꄻ、ꑴꌅꏀꀺꌋꆀꐛꉻꋊꐽꑠꁁꏯꌫꄻ(ꁥꇱꑴꉻ9ꇬꉜ)。ꐪꊛꄉꃅꄷꍔꃚꎝꁌꁦꊫꌐ2000ꂡꂷꎃꃅꃑꄻ,ꂴꌌꉻꈲꐨꐥꌠꐘꃆꊛꋉꌠꌋꆀꂫꎴꅉꌬ。

  ꐛꉻꐨꐥꃅꇗꏸꊨꌠꏱꁈꌬꇫꑟ,ꎆꏂꑘꎆꇱꌠꌋꆀꇓꈓꀀꊿꌬꈧꌠꄐꏁ。ꁌꎆꇗꏸꏮꉹꄺꀱꌠꌋꆀꄻꐛꋌꇗꏸꌫꁌꄺꀱꃅꐛꌠꈫꈈ。ꎆꏂꑘꐭꉹꈲꁧꀄꊭꄹꁆꇬꈁꊌꇗꏸꒇꁵꏱꁈꌬ。1.6ꌜꈍꐯꍍꋊꃷꁨꐕꍯꌬꌠ7.5%ꇬꉜꄉꐕꍯꃻꄻꇗꏸꎴ。ꐪꊛꄉꋍꑞꋍꐘꇗꏸꌫꁌꊨꏆꏱꁈꌬ,ꏦꇨꃅꏲꑘꌤꑘꐨꐥꌠꁌꎴꌋꆀꍔꃚꐨꐥꎆꀨꐘꃆꍤꄻꈌꁧꌠꏲꂠ。

  (ꉬ)ꏱꎆꇗꏸꄺꀱꁨꎆꐨ

  ꆹꏮꁵꌬꐛꉻꄻꂄꈴ,ꎃꐚꐨꐥꃅꆹꏮꁵꌬꄉꈁꌋꆀꍆꐪꉀꐕ,ꌐꐘꆹꏮꁵꌬꐘꃆꏓꇱꌋꆀꋊꎵ。ꊿꋅꃅꄷꆹꏮꁵꌬꏡꁈꄻꃪ,ꒆꉻꄐꊋꅉꆹꏮꁵꌬꄹꏦꄻꐛꒆ,ꅐꀦꈤꑋꌠꇓꈓꆹꏮꁵꌬꄉꈁꋍꁘꋍꁘꃅꍔꐯꇁ。ꑤꊐꅉꀨꎆꊋꏦꀧꉺꏦꄻꐛꒆ,ꀉꇨꃅꅉꂫꊐꌠꍔꃚꄉꉻꁧꃤꃅꏦꀧꊋꃤꁦꎆꇁ。ꌜ27ꂷꑤ970ꂷꇬꌜꈛꎂꃅꑤꇬꏲꂠꄟꄺꀱꌠꃄꌬ,ꑣꍔ2.86ꃪꂷꇬꑣꍔꆏꑤꏲꂠꄟꄺꀱꌠꃄꌬ。ꄉꉻꏱꎆꄐꌗꌠꄻꐛꒆ,ꐊꑷꃅꍏꑷꌋꆀꃅꄷꍔꃚꐨꐥꎆꀨꄐꌗꌠꁰꄻ,ꐪꊛꄉꇩꁨꎆꀨꀰꏢꄐꌗꄹꏦꃅꉚꈍꈐꍔꐯ,ꐧꋦꄜꏂꀧꎆꀨꄐꌗꁰꄻꉚꌠꃅ。ꃹꅼꃅꌤꏲꅉꄐꌗ、ꇩꏤꄉꑳꏓꋧꄉꎴꁵ、ꍔꃚꃻꄻꑠꄐꌗꏲꂠꄹꏦꄺꀱ。ꎆꅐꀦꇗꏸꄺꀱꌠꐯꊛꄉꑟꏦꌋꆀꁮꐚꏭꃅꄷꄉꃅꉚ。ꈏꉈꎆꎆꏂꑘꌋꆀꊨꏦꇓꈓꀧꌋꃅꋈꄻꇗꏸ、ꂘꑘꌫꁌꀥꇱꄹꏦꏓꋍꃱꃅꀐ。ꏣꀋꑌꃅꊌꐨꁷꎸꄹꏦꄺꀱꌠꄹꇙ,ꋭꑘꂘꑘꌶꅉꊌꐨꃄꎆꏱꁈꐊꑷꃅꃄꌬꇫꑟ,ꄉꉻꁦꎴꆄꄻꌋꆀꅉꂫꊐꌠꁦꎴꆄꄻꌤꑘꌤꃅꅉꊌꐨꃄꎆꏱꁈꇤꐳꃅꃄꌬ。

  (ꃘ)ꇩꏤꑭꊂꏓꄊꄐꌗꏤꐪꃆꂮꐥꐨꃅꇫꑟ

  ꊯꊪꈭꇩꏤꑭꊂꏓꂱꁧꎁꃀꀉꒉꌕꃢꈿꅉꃆꂮꐥꌠꏤꐪ,ꉈꑴꊯꊪꈭꇩꏤꑭꊂꏓꄊꏱꎆꎆꏣꊈꑼꉼꍤꄻꉜꐨꇬꉜꄉ,ꏱꎆꉻꒉꋎꍅꌠꊋꀥꇱꌋꆀꄻꃪ,ꊋꇤꄉꏦꀧꌠꀨꄉꌫꅐ,ꄐꌗꁰꄻꌠꄻꃪ,ꏦꇨꌠꄐꌗꌠꃄꌬ,ꎆꐪꇗꏸꏦꉻꄺꀱꌠꄹꎆ,ꊋꀥꇱꄉꍔꃚꎝꃆꏲꂠ。ꃹꅼꃅꏱꎆꈆꑪꈴꅧꌤꈴꃅꏲꂠꌠꄹꎆ。ꄐꌗꏦꃤ、ꁱꄀꈅꏸꌦꏦꃤꄺꀱꌠꌋꆀꐕꍯꇉꇗꏸꏦꄻꌤꃅꌠꀋꂿꑘꃅꁨꎆꐨꐥ。ꀒꁨꋍꁘꃅꌤꈴꃅꄐꌗꁰꄻ,ꎃꄻꄐꌗꄉꈁꊨꒊ,ꈎꀨꄐꌗꑞꅉꑟꐨꊼꇅꉀꐕ。ꏣꀋꑌꃅꐘꑘꀉꒉꀊꂾꇬꄐꌗꌠꍤꄻꌠꍔꂵ,ꀉꇨꃅꐘꑘꌫꅐꄐꌗꌠꎃꊒꐨꌋꆀꈆꑪꐨꁦꎆ。ꈏꅐꃅꍏꑷꆹꏮꁵꌬꄐꌗꃷꁨꅇꇰ,ꃅꄷꄐꌗꁰꄻꌠꐛꒆꐨꄇꇖꃅꀉꇨꃅꁦꎆꇁ。ꄐꌗꃄꌬꌠꐽꏡꐨꌋꆀꅐꐨꉀꐕ,12ꆪꇬꇩꏤꑭꊂꏱꎆꌫꅐꐨꋋꈓꌫꅐꐨꍆꐪꆏ,2009ꈎ26.3%ꇬꄉꀁꋌꒊꅷ2010ꈎꑟꇬꆏ20.1%ꇬꑟ。ꊋꀥꇱꄉꃅꄷꍔꃚꊙꎆꅉꇬꌦꏲꂠꌠꑭꋧꃄꌬꄐꉻꏤꄻ,ꄚꃆꂮꐥꌠꏱꁈꄻꐛꒆ,ꊥꇫꄉꊙꎆꅉꇬꌦꎝꃆꋊꍬꎕꄻ。ꄐꌗꁰꄻ、ꃄꌬ、ꌗꂫꇽꌠꌋꆀꍞꊟꌠꐮꋮꄮ、ꐮꊥꎆꌠꉺꏦꀋꆏꃅꄻꐛꒆ。“ꐭꎆꂁꊐꅉ”ꌐꐘꏱꄻꌤꃅꌠꀋꆏꃅꃹꅼ。ꊥꇫꄉꂿꑘꀉꇨꂿꑘꈲꂿꑘꅐꇐꎆꌐꐘꋊꍬꌋꆀꍤꄻꌠꍔꂵꄉ,ꏲꂠꉺꏦꏀꁈꌋꆀꄻꃪꌠꊥꎆ。ꄐꌗꄇꄜꋊꌠꐊꑷꃅꄹꎆ,ꉇꉻꏭꄇꄜꋊꌠꍏꑷꏱꎆꄐꌗꑴꉻ2009ꈎꇬ4ꁬꌠꁦꎆꅸ2010ꈎꑟꇬꆏ12ꁬꑟ,ꌫꅐꄐꌗꑴꉻꌤꈴꌠꀨꊐꌠꐘꃆꇬꑟ。ꍏꑷꄐꌗꌤꏲꅉ74ꂷꌠꄇꄜꋊꃅꄐꌗ。ꃅꄷꄐꌗꄇꄜꋊꌠꁨꎆꐨꀊꏀꃅꐥ。ꊋꀥꇱꄉꌫꅐꎕꏦꉻꑫꋈꄻꑠꏱꎆꏲꂠꅉꃀꌤꃅ。ꀋꆏꃅꑣꍔꏱꎆꏲꂠꌠꐛꏦꈴ,ꍞꏲꊋꇱꐨꋍꁘꋍꁘꃅꀉꇨꃅꁦꎆꇁ。ꁣꀋꐥꃅꇩꏤꑭꊂꏓꄊꎮꊈꉼ2009ꈎꍏꑷꌗꂫꇽꌠꇬꅲꇫꌤꃅꌠꃅꌐ,ꈎꐧꇬꇩꏤꑭꊂꏓꄊꎮꊈꉼꏭꄐꌗꃄꌬꐨꅇꄜꇈ,ꍤꇖꉜꐨꃅꇫꑟꄉꄚꃆꂮꐥꌠꄺꀱꏡꁈꈴꄉꄚꃆꂮꐥꌠꇩꃷꑼꌌꊯꊪꈭꇩꏤꑭꊂꄉꄊꎮꊈꉼꏭꅇꄜ。

  2010ꈎꆹ“ꊯꊪꉬ”ꊁꄽꂫꈎꌠꉬ。ꀱꋌꃀꉬꈎꌠꉜꇬ,ꏱꎆꀻꎆꄺꀱꌠꐛꑊꀊꏀꌠꅐꇁ。

  ꏱꎆꊌꌬꄉꈁꀋꆏꃅꍔꐯ,ꌫꅐꐛꉻꀒꁨꋍꁘꃅꄻꂄꈴ。“ꊯꊪꉬ”ꊬꌠꇬ,ꇩꏤꑭꊂꄉꉻꏱꎆꈁꊌꌠ30.3ꃪꂡꂷꑟ,ꃅꈎꈒꌠꐽꏡꃅ21.3%ꉀꎆ;ꇩꏤꑭꊂꄉꉻꏱꎆꈁꊌꌠ31.9ꃪꂡꂷꑟ,ꃅꈎꈒꌠꐽꏡꃅ21.4%ꉀꎆ。ꇩꏤꑭꊂꏱꎆꌌꏓꂱꐥꐨꁁꏯꊐꌠꀉꒉꃅꁦꎆ,ꇓꈓꇓꉈꁌꏆꋭꑘꂘꑘꐊꑷꃅꃅꇫꑟ,ꇓꈓꇓꉈꀀꊿꅉꀨꆄꄻꏦꀧꑞꅉꄇꇖꀕꃅꉀꐕ,ꇓꈓꇓꉈꃅꉱꑷꌠꐧꋦꏦꀧꄹꏦꇶꏦꀑꐱꃅꏓꐛ,ꄉꉻꁱꀕꁧꃤꃅꉻꑫꋈꄻꌠꄇꇖꀕꇤꐳ。“ꊯꊪꉬ”ꊬꌠꇩꏤꑭꊂꄉꉻꏱꎆꌌꂘꑘ、ꁦꎴꆄꄻ、ꐧꋦꏦꀧꌋꆀꃅꅍꁵ、ꁱꀕꁁꏯꄉꌫꅐꌠ4.45ꃪꂡꂷ、1.49ꃪꂡꂷ、3.33ꃪꂡꂷꌋꆀ5600ꂡꂷꑟ,ꂱꄷꄉꇬ“ꊯꉬ”ꊬꌠꄩ1.6ꁧ、2.6ꁧ、1.3ꁧꌋꆀ1.4ꁧꉀꎆ。ꍏꑷꏱꎆꌌ“ꌕꂿꑘ”ꇬꌬꌠꐯꇯ3ꃪꂡꂷꀋꇈꐥ。

  ꏱꎆꇗꏸꏱꁈꀋꆏꃅꄻꃪ,ꏱꎆꉻꒉꋎꍅꌠꀒꁨꋍꁘꃅꊋꀥꇱ。ꇩꈐꇩꉈꎆꏣꃅꒊꃅꇁꇬꀻꎆꐛꐈꌠꇬꈴꄉ,ꂴꊁꃅꐽꈬꌠꏱꎆꏱꁈꌋꆀꏣꀋꑌꌠꏱꎆꏱꁈꌫꄻꇈ,ꎆꃀꏱꁈꅐꑘꏱꁈꑠꌋꆀꋮꄮꃅꐯꇯꄉ,ꐧꋦꉪꏦꃷꎏꎆꏣꇎꏦꇂꃴꄉꉻꒉꋎꍅꉻꑫꄻꐛꒆꇈ,ꇿꋌꐥꃅꇩꏹꎆꒉꎆꇁꎒꐡꌠꎟꄜꌠꊝꇈ,ꀊꉗꃅꐪꊛꄉꀻꎆꉆꌠꎁꃅꅉꃀꌆꄻꄉꀐ。

  ꏱꎆꇗꏸꄺꀱꌠꀋꆏꃅꃹꅼ,ꄉꉻꏱꎆꉻꑫꀒꁨꋍꁘꃅꄻꐛꒆ。ꏱꎆꆹꏮꁵꌬꄹꏦꋍꁘꋍꁘꃅꄻꐛꒆ,ꑤꊐꌠꎆꀨꎆꊋꏦꀧꉺꏦꀑꐱꃅꄻꐛ,ꍔꃚꄐꌗꉻꑫꇶꏦꀑꐱꃅꏓꐛ。ꂿꑘꇗꏸꉬꇮꇤꇧꎭ,ꁌꎆꇗꏸꉹꏮꄺꀱꌠꐊꑷꃅꃄꌬ,ꈏꎆꉇꎆꎆꏂꑘꇗꏸꄹꏦꐊꑷꃅꏓꋍꃱꃅ,ꌬꈧꇗꏸꄹꏦꐪꊛꄉꄻꐛꒆ,ꌬꉆꇓꋌꇗꏸꎆꄺꀱꌠꑴꀋꅑꃅꄹꎆ,ꅐꀦꇗꏸꄺꀱꌠꃅꉚꇰ,ꃅꄷꇗꏸꄺꀱꌠꎍꐽꃅꄹꎆ。

  ꏱꎆꏱꄻꌠꀋꆏꃅꀥꇱ,ꏱꄻꄐꐨꀒꁨꋍꁘꃅꐕꀊꂥ。ꏦꃤꈴꄉꎆꀱꎆꏢꌠꃹꅼꃅꄹꎆ,ꍔꃚꊌꌠꌬꌠꉹꁸꉻꑫꀋꆏꃅꄻꐛꒆ,ꄐꌗꁰꄻꌋꆀꃄꌬꏲꂠꌠꊋꀥꇱꀐ,ꄐꌗꄇꄜꋊꌤꃅꌠꐳꃅꄹꎆ,ꏱꎆꍞꊟꉺꏦꀋꆏꃅꄻꐛꒆ,ꎆꃆꈅꏹꄹꏦꀒꁨꋍꁘꃅꄻꐛꒆ,ꊼꇅꉾꃅꏱꎆꌅꊋꂿꄐꇤꅐꇁꌠꄉꀧꄉꀐ。

  ꄚꂴꉉꌠꊌꐨꈁꊌꌠꆹ,ꄈꍏꑷ、ꇩꃷꑼꃅꇴꄉꉻꌭꈬ、ꎃꊒꃅꏲꂠꄉꊌꌠ,ꃅꄷꈁꐥꌠ、ꌤꃅꅉꈁꐥꌠꐮꑌꑲꐮꐊꃅ、ꏟꈯꀕꃅꌤꃅꄉꊌꌠ,ꇩꏤꑭꊂꊿꋅꈁꐥꌠꏓꂱꋯꑌꄉꉈꈽ、ꐯꇯꊋꇤꄉꊌꌠ。ꋍꈭꐨ,ꉪꊇꏸꐚꃰꐚꌶꌠꆏ,ꏱꎆꒈꇁꌋꆀꏱꄻꌤꃅꇬꄡꇗꌤꆿꑓꅐꎑꈨꐥꑴꌦ,ꀋꉬꀋꉆꌠꆏ:ꑤꑣꅉꂫꊐꌠꏱꎆꋍꈨꄡꇗꊼꇅꊋꋠ,ꅉꀨꎆꊋꏦꀧꄐꐨꄡꇗꍔꒉꄻꅐꑴꌦ;ꎆꊋꌋꆀꌤꌅꐮꄉꄐꌠꏱꎆꏦꉻꄻꐛꒆꄻꅐꑴꌦ,ꃅꄷ、ꇓꈓꇓꉈꇢꊭꇬꅉꀨꋍꏅꁧꃤꃅꐯꌟꈴꌠꂿꃆꀉꇨꑴꌦ;ꎆꏣꀻꎆꌠꊥꎆꃄꄟꆹꏮꌠꏱꎆꇗꏸꏱꁈꐛꀋꒆꑴꌦ,ꏱꎆꊌꐨꁷꑣꋊꄻꂿꄐꀒꁨꋍꁘꃅꀥꇱꌶꑴꌦ;ꃅꄷꍔꃚꐨꎝꃆꃨꆰꌠꉜꀋꁨꀋꉆ;ꃄꅉꏆꅐꊌꐨꌬꐨꏲꂠꌠꀥꇱꄻꅐ;ꏱꎆꏲꂠꌠꄡꇗꊼꇅꊋꁧ,ꌬꅐꐳꐨꄡꇗꐽꀋꏣꑴꌦ,ꎆꃀꌬꈲꐪꉀꐕꄻꅐꑴꌦ。ꉪꊇꀉꒉꃅꌤꋋꈨꉜꁨꌶ,ꐪꊛꄉꏡꁈꇿꋌꐥꌠꌬꄉ,ꊋꇤꄉꂥꀘꇧꎭ。

  ꑍ、2011ꈎꍏꑷꌋꆀꃅꄷꄐꌗꄐꄉꌠ

  (ꋍ)ꀋꃋꋋꇅꉪꇩꏤꏱꎆꃅꒊꃅꇁ

  2011ꈎꆹꉪꇩꏤꀻꎆꂾꎍꌠꃅꒊꃅꇁꄡꇗꌼꇑꌼꀠꃅꐙꑴꌦ。ꋧꃅꎆꏣꄡꇗꀅꌳꃅꄓꇁ,ꄚꄓꇁꅉꃀꀋꈬꀋꈈ。ꉪꇩꏤꎆꏣꉾꃅꐙꆹꌠꄻꀋꀱ,ꄚꈁꊝꌠꐮꄙꐨꌋꆀꌤꆿꑌꀂꀋꑌ。ꏱꎆꈴꄉꉜꇬ,ꊌꌠꌬꌠꐮꄙꐨꄡꇗꊼꇅꑓꅐ。ꊌꐨꁆꏯꆏ,ꎆꏣꊛꄉꎍꐽꊼꇅꐳꃅꀻꎆꌠꆹꏱꎆꊌꐨꉀꎆꌠꅉꃀꌆꄻꄉꀐ,ꋍꈭꐨ,2010ꈎꊌꐨꅉꀨꃷꁨꊼꇅꀉꒉ,ꉈꑴꉇꉻꃼꇇꈏꃹꉇꅐꌠꊛꄉꐳꃅꉀꎆꆹꀋꄐ,ꐕꍯꃷꐪꃼꇇꋍꁘꋍꁘꃅꀁꋌꊰ,ꉈꑴꊨꏦꈁꊌꇗꏸꄺꀱꃄꌬ、ꁌꎆꇗꏸꌋꆀꀰꏢꇗꏸꎳꄻꑭꊂꋊꄻ、ꐪꊛꄉꎆꏂꑘꀄꊭꌠꈲꁧꀄꊭꌠꏭꈁꊌꇗꏸꈲꏿꏱꁈꃄꌬꑠꀕꑌ,ꊌꐨꈨꊨꒊꉆ。2011ꈎꏱꎆꊌꌠꁦꎆꐨꑌꀒꄹꈎꇬꄉꊼꇅꀁꋌꊰ。ꌬꐨꁆꏯꆏ,ꋍꏅꎆꇱꋈꄻꇰꌠꐘꃆꃅꌐ,ꊋꀥꇱꄉꂿꑘ、ꈲꒉꑠꅉꃀꄻꇐꋈꄻꌠꆏ,ꎆꇱꄉꈁꍈꄉꀧꄉꌶ。ꐳꃅꎆꏣꐛꉻꋊꄻꌋꆀꀻꎆꃄꄟꆹꏮ,ꂘꑘ、ꆄꄻꁬꋌꁦꎴꌋꆀꐧꋦꏦꀧꑠꀋꉬꀋꉆꁆꏯꄺꀱꌠꄹꎆ,ꃶꐚꃅꏓꂱꐥꐨꏦꀧꌋꆀꄻꉾ,ꎆꏣꂨꊈꍅꊋꏭꊝ,ꊌꐨꀁꑌꊿꁥꌠꏭꁥꇱꐨꍔꒉꑠꀕꆏ,ꀒꁨꋍꁘꃅꀉꒉꃅꏱꎆꎆꁵꈉꄉ,ꌬꐨꊋꋠꐨꀉꒉꐯꀉꒉ。

  (ꑍ)ꏱꎆꄐꌗꁰꄻꌠꌋꆀꏱꎆꌤꃅꌠꏓꉻꇖꂟꐨ

  ꍏꑷꏤꇽꄐꁆꌠꈴꄉ,ꈁꊝꌠꎆꏣꏱꎆꃅꒊꃅꇁꐊꄉ,2011ꈎꏱꎆꄐꌗꁱꄻꌠꌋꆀꏱꎆꌤꃅꄐꇺꉪꇐꆏ:ꐊꑷꃅꄈꅿꊰꏁꃢꃀꀉꒉꈿꌠꌋꆀꊰꏁꈭꉬꃢꐊꈴꃀꈿꉌꊈꌫꄻꇫꑟ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꌫꄻꇫꑟ,ꏟꈯꃅꈆꑪꃅꀻꎆꌠꄜꀨꌋꆀꐳꃅꎆꏣꀻꎆꃄꄟꆹꏮꌠꈜꀦꆼꒆꄉ,ꐪꊛꄉꏣꀋꑌꌠꏱꎆꏱꁈꃄꌬ,ꏱꎆꇗꏸꄹꏦꄺꀱꌠꃹꅼꈴ,ꇩꂱꊌꐨꁷꑣꐛꉻꋊꄻꌠꄹꎆ,ꏱꎆꌬꐨꐛꉻꃪꈴ,“ꌕꂿꑘ”、ꂘꑘ、ꆅꉚꁦꎴ、ꐧꋦꏦꀧꌋꆀꃅꅍꊌ、ꏦꀧꐨꀀꌒꋉꃆ、ꊋꀦꏎꏸꋦꈭꌋꃅꌋꆀꊼꇅꐞꀋꄿꃅꈋꏭꄏꐓꐨꍔꒉ,ꃶꐚꃅꏓꂱꐥꐨꏦꀧꌋꆀꄻꉾ,ꎆꏣꉀꎆ、ꐛꉻꋊꄻ、ꃄꁕꋮꄮꌋꆀꇓꈓꇓꉈꏓꄻꇲꄻꀻꎆꌠꄹꇙ。ꏦꃤꈴꄉꎆꀱꎆꏢꌋꆀꇲꄻꏓꄻ、ꁦꎆꊌꏏꄉꌬꌠꌐꏦꌭꈬ,ꈆꑪꃅꏱꎆꏱꄻꌠꀥꇱ,ꏦꇨꃅꎂꀕꃅꐙꌠꌬꐨꋎꍅ,ꏱꎆꎆꃀꌫꄻꈲꁧꐕꀊꂥ,ꎆꏣꎍꐽꐳꃅꀻꎆꌋꆀꐧꋦꐮꄮꃅꀻꎆꌠꊥꎆ。

  ꄐꇺꉪꇐꋋꏢꈴꄉ,2011ꈎꐪꊛꄉꏣꀋꑌꌠꏱꎆꏱꁈꌫꄻ,ꀋꉬꀋꉆꌠꆏꄚꐰꈍꑍꁁꏯꇬꉬ:

  ꋍꆏꇓꈓꇓꉈꀀꊿꊌꐨꐕꀊꂥ,ꀀꊿꌬꈧꈉꐨꍔꒉ。ꇩꂱꊌꐨꁷꑣꐛꉻꋊꄻ,ꏱꎆꁥꇱꄉꈁꁦꎆ,ꇓꈓꇓꉈꊌꐨꀁꑌꊿꁥꌠꅉꀨꊌꐨꈲꊌꌠꏱꁈꋍꑞꋍꐘꄻꐛꒆ,ꊋꇤꄉꃅꅍꊌꐨꍔꒉ,ꎆꏂꑘꌤꃅꊿꃄꎆꎂꀕꁦꎆꉺꏦꀞꄻꐛꒆꌠꊋꁈꄏ,ꎆꏂꑘꇬꎞꆏꊿꅉꀨꃀꌠꀨꎹꎆꌋꆀꇓꈓꇓꉈꀀꊿꐥꐨꀁꂥꐯꀁꂥꏦꀧꎕꏦꐕꀊꂥ,ꋭꑘꂘꑘꌶꅉ、ꋍꏅꁦꎴꌋꆀꅉꂫꊐꌠꆄꄻꁦꎴꌤꑘꌤꃅꅉꃅꐨꇿꋌꃄꎆꏱꁈꑠꌫꄻꇫꑟ。ꑱꈐꌬꌠꏸꐕꂿꑘꁡꇤꃷꒉꌠꌋꆀꀉꆹꀊꏀꆦꌠꑠꌬꈧꐨꍔꒉꈲꏣꐥꌠꏱꎆꇗꏸꏱꁈꄻꐛꒆ。

  ꑍꆏꊋꇤꄉꎆꇱꐛꉻꄻꉾꃪꈴ,ꎆꏣꐧꋦꀻꎆꊋꁧꊨꊭꇬꊋꀥꇱ。ꍏꑷꅉꀨꋈꄻꎆꇱꀋꉬꀋꉆꌠꆏꌌꏦꀧꐨꀀꌒꋉꃆ、ꈲꒉꀨꄉꌠꂿꑘꅉꃀꄻꇐ、ꂘꑘꁦꎴꅉꃀꄻꇐꋈꄻ、ꊋꏏꍍꊨꌋꆀꒆꉻꋦꈭꌋꃅ、ꑟꏦ、ꑭꊗꌋꆀꇖꌜꀒꋤꃅꈋꎆꏣꐧꋦꀻꎆ、ꑴꌅꏀꀺꌋꆀꄐꇐꐨꀊꏀꌠꅐꑘꀻꎆꑠꁁꏯꇬꌬ,ꂴꀋꉬꀋꉆꃅꋈꇰꌠ、ꊛꄉꋉꌠꐘꃆꇬꎆꃀꈉꌠꄉꀧ,ꊱꁨꐥꃅ“ꊰꑋꉬ”ꄐꎖꌠꐘꃆꀉꒉꌠꋈꄻꇰ。ꋍꈭꐨ,ꀒꁨꋍꁘꃅꉹꁌꎆꇱꌠꊋꊡꌋꆀꄐꇺꌊꑴꀋꅑꃅꀻꎆ。

  ꌕꆏꇗꏸꎴꏱꁈꋊꄻꐛꒆ,ꎆꏂꑘꀻꎆꌠꊥꎆꌋꆀꀀꊿꌬꈧꌠꄐꇺ。ꐪꊛꄉꇗꏸꄹꏦꄺꀱꌋꆀꄻꐛꒆ,ꏲꑘꌤꑘꃅꐙꌠꎆꎴꌋꆀꍔꃚꃅꐙꌠꎆꀨꎵꄻꋊꍬ,ꀊꅰꉾꃅꇗꏸꎴꋊꄻꎆꏣꌋꆀꊌꐨꁷꑣꂿꄐꇤꅐꇁ,ꐳꃅꎆꏣꀻꎆꃄꄟꆹꏮꌠꊥꎆ。ꁌꎆꇗꏸꄺꀱꃅꉚꌠꍔꂵ,ꌬꈧꇗꏸꄹꏦꃅꐛꒆ,ꂴꊂꃅꁸꄉꊨꏦꈁꊌꇗꏸꄹꏦꄺꀱꌠꃄꌬ,ꅐꀦꇗꏸꄺꀱꌠꄹꎆ。ꐪꊛꄉꄹꁆꎆꏂꑘꀄꊭꌠꏭꈁꊌꇗꏸꈲꁵꏱꁈꃄꌬ,ꎆꏂꑘꐧꐭꌠꀻꎆꌠꊋꁈꄏ。ꊋꏏꍍꊨ、ꋦꈭꀧꌋꃅꌋꆀꃅꅍꊌꁦꎆꌠꇬꈲꏣꐥꌠꈲꁵꏱꁈꌫꄻ。

  ꇖꆏꀒꁨꋍꁘꃅꏱꎆꌬꐨꐛꉻꄻꉾꈴ,ꉹꁌꐥꐨꏦꀧꌋꆀꄻꉾ。“ꌕꂿꑘ”、ꐞꀋꄿꃅꈋ、ꐧꋦꌤꑘ、ꐛꉻꋊꄻ、ꈆꑪꇮꇐꏀꀺꑠꀋꉬꀋꉆꃅꌬꐨꁦꎆ,ꉹꁌꐥꐨꄻꉾꌋꆀꐧꋦꌤꑘꋍꑞꋍꐘꀻꎆꌠꊥꎆꄉ,ꉹꁌꁳꀊꅰꀉꑌꃅꂿꉆꌠ、ꇫꎍꌠꃶꐚꈲꐪꊌꎻ。ꊋꀉꒉꃅꇤꄉꒄꌡ、ꍏꐎꉮꌸꊂꋈꀱꄺꀱꌠꊋꁈꄏ。ꎂꀕꃅꌬꐨꍅꒊꄉ,ꃶꐚꃅꏲꑘꀨꊰꊨꒊꎻ。

  ꉬꆏꊋꀉꒉꃅꇤꄉꎆꏣꐛꉻꋊꄻꌋꆀꃄꁕꋮꄮꃅꀻꎆꌠꊋꁈꄏ,ꎆꏣꀻꎆꃄꄟꆹꏮꌠꄹꇙ。ꈆꑪꇮꇐꏀꀺꌠꊋꁈꄏꐨꍔꒉ,ꈆꑪꇮꇐꊌꐨꆹꏮꌠꄹꎆ。ꄐꇐꃅꐙꌠꅐꑘꀊꏀꌠꀻꎆꌠꊥꎆ,ꎆꏂꑘꐧꐭꌠꌋꆀꁧꃤꃅꑘꀻꎆꌠꊋꁈꄏ,ꏣꀋꑌꃅꅐꑘꐛꉻꋊꄻ、ꎆꏂꑘꄻꇱꏓꇱꀱꌋꆀꇮꇐꄺꀱꌠꄹꎆ。ꎸꇺꎸꂷꊨꊭꈘꆽꌠꌋꆀꂴꅑꌫꉂꌫꈾꈏꃹꌠ,ꂴꅑꇮꇐꊙꌊꇁꌠꊋꊡꌋꆀꍔꒉ。ꊋꀉꒉꃅꇤꄉꊋꏏꍍꊨꌠꊋꁈꄏ,ꐳꃅꒆꉻꋦꈭꁥꁵꉺꏦꋈꄻ,ꐊꑷꃅꅔꏂꒆꉻꀧꌋꃅꁥꇱꈁꁠꏿꉺꏦꀞꄻ。ꍏꑷꃅꄷꏭꎂꀕꆹꏮꎆꁵꌠꁦꎆ,ꇩꂱꍆꁍꀉꆹꃅꈋ、ꊿꋅꃅꈋ、ꃅꋮꆹꏮꃅꈋꌋꆀꌢꎭꃅꈋꄏꐓꌠꊋꇨꇱ,ꃄꁕꋮꄮꃅꀻꎆꌠꄚꃆꂮꐥꌠꏱꎆꇗꏸꏱꁈꊥꎆꌠꃄꌬ。

  2011ꈎꆏꎆꏣꎍꐽꃅꊼꇅꐳꃅꀻꎆꊥꎆꌠꅉꃀꄩꄉ,ꎆꊋꏓꋧꄉꉹꁌꐥꐨꏦꀧꌋꆀꄻꉾꌠꌤꀉꒉꈍꑍꐘꀞ:ꋍꆏꐊꑷꃅꇩꏤꀊꉗꀊꎴꂘꑘꄺꀱꌠꌋꆀꀻꎆꄐꎖꐱꀨꇖꂟꌠꃄꌬꇫꑟ,ꂘꑘꎆꇱꐨꍔꒉ,ꂘꑘꎆꃀꌫꄻꐳꐨꐕꀊꂥ;ꑍꆏꊋꀉꒉꃅꇤꄉꆅꉚꁬꋌꏦꉻꄺꀱꌠꊋꁈꄏ,ꆅꉚꁧꃤꃅꌋꆀꏦꀧꄐꐨꐕꀊꂥ;ꌕꆏꏦꀧꐨꀀꌒꋉꃆꎆꇱꐨꍔꒉ,ꋍꏅꊤꀀꑳ、ꁌꆓꀀꑳꋈꄻꌋꆀꂿꑘꁡꇤꑳꎓꇤꐡꌋꆀꋍꑞꋍꑵꑲꆹꇤꆹꄺꀱꌠꄹꎆ;ꇖꆏꐳꃅꇓꈓꇓꉈꀀꊿꃅꐥꌠꐧꋦꏦꀧꉻꑫꀞꄻꌠꊋꁈꄏ,ꀒꁨꋍꁘꃅꀊꏀꉹꌠꂿꑘꁡꇤꃀꌠꀨꎹꄜꏂꀧꃅꉚꅉꍔꒉ,ꄷꀋꁧꃅꉚꃄꁕꇓꈓꊌꅍꀋꐥꌠꀀꊿꌌꏦꀧꇬꇱꄉ;ꉬꆏꂿꑘꂿꑘꁡꇤꅉꃀꄻꇐꋈꄻꌠꊋꀥꇱ,ꊋꀉꒉꃅꇤꄉꁍꑗꈲꒉꋈꄻꌠ、ꐧꐭꒊꃀꒉꌺꄺꂡꌠ、ꒉꇉꀄꊭꌠꃨꆰꐴꑭꑌꌠꄻꈫꈈ、ꒈꇷꃪꇷꐛꉮꐪꄴꏮꄺꂡꑠꄹꎆ,ꃶꐚꃅꂿꑘꁡꇤꐥꐨꇎꏦꄻꉾ;ꃘꆏꊋꏏꍍꊨꌋꆀꈆꑪꇮꇐꏀꀺꌠꊋꁈꄏ,ꎆꏣꐛꉻꋊꄻꌋꆀꀻꎆꃄꄟꆹꏮꌠꊥꎆ。

  (ꌕ)2011ꈎꋍꏅꏱꎆꄐꌗꄐꁆꃆꂮ

  ꍏꑷꎆꏣꌤꃅꃀꈿꅉꏤꄻꌠ2011ꈎꎆꏣꀻꎆꄐꄉꌠꃷꁨ、ꎆꏣꐧꋦꏱꁈꌋꆀꏱꎆꄐꌗꁰꄻꌠꏓꄜꇖꂟꌠꈴꄉ,2011ꈎꄉꉻꏱꎆꄐꌗꃷꁨꀋꉬꀋꉆꌠꆏ:ꍏꑷꏱꎆꊌꐨꆏ45860ꂡꂷ,2010ꈎꃄꌬꃷꁨ(ꐰꐯꌟ)8%ꉀꎆ。ꍏꑷꄐꌗꎍꐽꋊꄻꎆꀨꇬꄉ1500ꂡꂷꄀꇱ。ꏓꇱꊌꐨꈁꉬꃷꁨ47360ꂡꂷ。ꍏꑷꏱꎆꌬꐨꈁꉬꃷꁨ54360ꂡꂷ,12.5%ꉀꎆ。ꄚꈐꏭ,ꍏꑷꋋꊐꌠꌬꐨ17050ꂡꂷ,6.7%ꉀꎆ;ꍏꑷꆏꃅꄷꏭꇗꏸꎴꏮꀱꌠꌋꆀꆹꏮꁵꄻꌠ37310ꂡꂷ,15.3%ꉀꎆ。ꍏꑷꏱꎆꊌꐨꌬꐨꈁꉬꃷꁨꐮꄂ,ꌬꁏꇔꌠ7000ꂡꂷꐥ,2011ꈎꄐꌗꄉꌠꇬ1500ꂡꂷꊨꒊ。ꍏꑷꏱꎆꇩꎝꋒꌠꃷꁨꏤꄉꇬ77708.35ꂡꂷ。

  ꃅꄷꄐꌗꌠꈴꄉꀑꐱꁆꄻꄉꌠꃆꂮꆏ,ꍏꑷꏱꎆꇱꎃꃅꁰꄻꌠꃅꄷꂱꑱꊐꌠꊌꐨꆏ43860ꂡꂷ,8%ꉀꎆ,ꉈꑴꍏꑷꃅꄷꏭꇗꏸꎴꀱꁵꌠꌋꆀꆹꏮꁵꄻꄉꊌꐨꆏ37310ꂡꂷ,ꃅꄷꏱꎆꊌꐨꏓꇱꌠ81170ꂡꂷ,ꃅꄷꏱꎆꌬꐨ83170ꂡꂷ,ꊌꐨꌬꐨꐮꄂꇬ,ꍣꐨꃷꁨꆏ2000ꂡꂷ,ꇩꃷꑼꉌꃹꄉꎆꏲꀯꁳꎃꃅꄉꃅꄷꍔꃚꎝꊫꌐꁥꇱꌠꃑꄻ,ꄷꀋꁧꌌꌜꊐꄐꌗꌠꇱꄉꏱꄻ。ꃅꄷꏱꎆꊌꐨꌬꐨꁆꄻꌠꆏꋋꊐꌠꏓꂱꁧꎁꃀꀉꒉꈿꅉꈌꁧꄐꌗꌠꉬꐮꃅꄉ。

  ꍏꑷꄐꌗꌋꆀꃅꄷꄐꌗꁆꄻꏓꇱꇬ,ꇩꏤꑭꊂꏱꎆꊌꐨ89720ꂡꂷ,8%ꉀꎆ,ꍏꑷꄐꌗꎍꐽꋊꄻꎆꀨꇬꄉꄀꇱꌠ1500ꂡꂷ,ꁆꄻꉆꌠꊌꐨꈁꉬꃷꁨꆏ91220ꂡꂷ;ꇩꏤꑭꊂꏱꎆꌬꐨ100220ꂡꂷ,11.9%ꉀꎆ。ꇩꏤꑭꊂꏱꎆꊌꐨꌬꐨꍣꐨꃷꁨ9000ꂡꂷ,GDPꍆꐪꆏ2010ꈎꇬ2.5%ꇬꄉꀁꋌꊰꌊ2%ꅶꍯꎍ。ꑠꃅꁆꄻꌠꆹ,ꎆꒉꎆꇁꎒꐡꌠꊌꐨꏭꎟꑣꇬꊝꌠꈫꈈꌋꆀꀻꎆꌠ、ꎆꏣꎍꐽꐳꃅꀻꎆꇬꈉꌠꉪꏡꀐ,ꉈꑴꏱꎆꊛꄉꀻꎆꉆꃅꇖꌠꑌꄜꅐꇁꀐ。

  ꍏꑷꄐꌗꎍꐽꋊꄻꎆꀨꃆꂮ。2010ꈎꂫꇬꑟꌠꋒꌠꆏ2368.13ꂡꂷ,2011ꈎꄐꌗꄀꌊꌬꌠ1500ꂡꂷ,868.13ꂡꂷꋒ。

  1.ꍏꑷꏱꎆꀋꉬꀋꉆꌠꊌꐨꐘꃆꁆꄻꃆꂮ

  ꇩꈐꁌꎆꇗꏸ17570ꂡꂷ,10.5%ꉀꎆ。ꇩꈐꌬꈧꇗꏸ6500ꂡꂷ,7.1%ꉀꎆ。ꈏꃹꎊꈬꁌꎆꇗꏸ、ꌬꈧꇗꏸ11220ꂡꂷ,7%ꉀꎆ。ꈜꀸꇗꏸ2170ꂡꂷ,7%ꉀꎆ。ꎆꏂꑘꈁꊌꇗꏸ8380ꂡꂷ,7.5%ꉀꎆ。ꊨꏦꈁꊌꇗꏸ3120ꂡꂷ,7.5%ꉀꎆ。ꁌꁦꊫꌐꃼꇇꃨꍑꇗꏸ550ꂡꂷ,4.2%ꉀꎆ。ꉇꅐꇗꏸꈪꌠ8005ꂡꂷ,9.2%ꉀꎆ,ꊼꇅꏱꎆꊌꐨꊨꄻ。ꐕꍯꃻꄻꇗꏸ1927ꂡꂷ,7.5%ꉀꎆ。ꇗꏸꀋꉬꌠꊌꐨ2080ꂡꂷ,5.7%ꉀꎆ。

  2.ꍏꑷꏱꎆꌬꅐꐘꑘꀋꉬꀋꉆꌠꄐꁆꃆꂮ

  ꀒꁨꋍꁘꃅꏱꎆꌬꅐꐛꉻꄻꃪꈴ,ꂴꆽ“ꌕꂿꑘ”ꀥꇱ、ꉹꁌꐥꐨꄻꃪ、ꐧꋦꌤꑘꀻꎆ、ꎆꏣꐛꉻꄺꀱꊥꎆ、ꃹꅼꃅꄺꀱꑠꁆꏯꇬꌬꅐꌠꏦꀧ。ꍏꑷꏱꎆꌬꅐꐘꑘꀋꉬꀋꉆꌠ(ꍏꑷꋋꊐꌠꌬꅐꌠꌋꆀꍏꑷꀱꃅꄷꆹꏮꁵꌬꌠꑌꇫꐊ)ꄐꁆꌊꄚꐰꋋꈨꃅꄉ:

  (1)ꂘꑘꇬꌬꅐꌠ2963.57ꂡꂷ,16.3%ꉀꎆ。ꄚꈐꏭ,ꍏꑷꋋꊐꌠꌬꅐꌠꆏ786.45ꂡꂷ,ꀱꃅꄷꆹꏮꁵꌬꌠꆏ2177.12ꂡꂷ。ꀨꄉꈯꄔꁮꐚꃅꄷꌋꆀꊿꋅꃅꄷꂿꑘꁡꇤꌷꂾꂘꄻꀻꎆꌠꊋꁈꄏ,ꁥꇱꎆ30ꂡꂷꄐꁆ。ꂿꑘꁡꇤꋭꑘꂘꑘꎆꏦꀧꉺꏦꄻꐛꒆ,ꂿꑘꁡꇤꐧꐭꌶꅉꉻꌬꎆꃀꌬꌠꌶꌺꉬꇮꃅꎆꐪꉀꐕ,ꊛꄉꇓꈓꇓꉈꋭꑘꂘꑘꊬꌠꌶꌺꌶꁌꏆꏱꁈꌬ,ꇓꈓꇮꃅꊿꀉꑳꐥꊯꃅꋭꑘꂘꑘꃅꌤꂥꀘ,ꐯꇯ921.24ꂡꂷꄐꁆ。ꐪꊛꄉꂿꑘꁡꇤꋭꑘꂘꑘꊋꁧꌠꌶꅉꄺꀱꎖꄎꑠꃄꌬꄉ,ꎆꃀ165.14ꂡꂷꄐꁆ。ꃅꑘꌶꅉꐧꊐꌠꑱꈐꎆꏣꊋꋠꌠꌶꌺꌋꆀꂿꑘꇬꑌꑲꌠꌐꑘꌶꌺꌷꁌꏆꏱꁈꃅꇫꑟ,ꊋꀥꇱꄉꃅꑘꂘꑘꅉꃀꄐꊋꋈꄻ,ꎆꃀ134ꂡꂷꄐꁆ。ꎃꐚꇨꍏ、ꎃꐚꌶꅉꀪꈈꌶꅉꀊꂥꇊꀊꂥꊐꌠ、ꀊꂥꊐꌠꌋꆀꐧꊐꌠꌶꅉꑱꈐꎆꏣꊋꋠꌠꌶꌺꁥꇱꏱꁈꉻꑫꄻꐛꒆ,ꁥꇱꎆ271ꂡꂷꄐꁆ。“985ꋉꃆ”、“211ꋉꃆ”ꑠꃄꌬ,ꇤꐳꃅꒉꌶꅉꂴꅑꌠꌋꆀꈆꑪꂴꅑꌠꋈꄻ,ꂱꎆꅑꌠꌷꇐꏀꀺꅉꋈꄻ,ꎆꃀ717.25ꂡꂷꄐꁆ。ꃅꄷꌶꅉꀊꂥꊐꌠꌶꌺꎆꁵꐨꉀꎆꌠꊋꁈꄏꄉ,ꃅꄷꌶꅉꀊꂥꊐꌠꀻꎆꄺꀱꄹꇙ,ꎆꃀ200ꂡꂷꄐꁆ。ꐋꀋꌡꂘꑘ、ꊿꋅꃅꄷꂘꑘꀻꎆꌠꊥꎆ。

  (2)ꈆꑪꇮꇐꌬꅐꌠ1944.03ꂡꂷ,12.5%ꉀꎆ。ꄚꈐꏭ,ꍏꑷꋋꊐꌠꌬꅐꌠ1901.59ꂡꂷ,ꀱꃅꄷꆹꏮꁵꌬꌠ42.54ꂡꂷ。ꇤꐳꃅꇩꏤꈆꑪꇮꇐꀉꒉꀊꂾꌠꌐꑘꃄꌬ,435ꂡꂷꄐꁆ,44%ꉀꎆ。ꇩꏤꋌꐛꈆꑪꎆꀨꇬꎆꁦꎆꃅꇱꄉ,ꇩꏤꀨꄉꃅꉚꑳꌋꆀꅉꃀꈆꑪꏲꉻꈆꑪꎥꃪꄐꊋꋈꄻꌠꄹꇙ,ꅉꃀꎥꃪꎆ257.19ꂡꂷꄐꁆ。ꀨꄉꂴꅑꇮꇐꎥꃪ、ꐧꋦꉻꈲꎥꃪꌋꆀꀉꒉꀊꂾꌠꐮꐊꐨꐥꌠꊨꊭꇮꇐꎥꃪꀖꁉꌠꊋꁈꄏ,ꌫꄻꎥꃪꎆꃀ990.63ꂡꂷꄐꁆ。ꀉꒉꀊꂾꌠꈆꑪꎥꃪꉁꈾꑴꌅꃅꎥꄻꃅꉚꌠꍔꐯ。ꊋꒉꃅꏲꂠꏀꀺꄐꊋꋈꄻꌠꄐꏁꊋꁈꄏ,ꈆꑪꇮꇐꃅꐛꐨꀋꃋꒃꅐꊋꃤꇬꉜꄉꆹꏮꌠꄹꇙ。

  (3)ꁱꀕꈯꎟꌋꆀꈨꏀꄜꁊꌠꇬꌬꅐꌠ374.43ꂡꂷ,18.5%ꉀꐕ。ꄚꈐꏭ,ꍏꑷꋋꊐꌠꌬꅐꌠ188.4ꂡꂷ,ꀱꃅꄷꆹꏮꁵꌬꌠ186.03ꂡꂷ。ꂴꆽꂿꑘꁡꇤꌋꆀꅉꂫꊐꌠꉹꁌꈲꏣꇬꑌꑲꐨꐥꌠꁱꀕꋈꄻꐘꑘꊋꁈꄏ。ꐥꇐꇇꊂꄉꑳ、ꎺꄅꑳꑠꉻꈲꐨꐥꌠꁱꀕꉁꈾꁌꀋꁵꃅꁉꃑꌠꏦꀧ。ꊋꒉꃅꇩꏤꀨꎍꁱꀕꍸꇐꌋꆀꍸꇐꐛꅉꀉꒉꌠꀧꌋꃅ。ꏣꀋꑌꃅꁱꀕꏦꉻꄺꀱꌋꆀꁱꀕꌤꑘ、ꅐꑘꀻꎆꌠꄹꇙ。ꊋꀥꇱꄉꈨꏀꇢꈴꇩꏹꁊꈴꄐꊋꋈꄻ。

  (4)ꆅꉁꁦꎴꆄꄻꇬꌬꅐꌠ1727.58ꂡꂷ,16.3%ꉀꎆ。ꄚꈐꏭ,ꍏꑷꋋꊐꌠꌬꅐꌠ63.56ꂡꂷ,ꀱꃅꄷꆹꏮꁵꌬꌠ1664.02ꂡꂷ。2009ꈎꄐꁆꌠ1273.21ꂡꂷꌋꆀ2010ꈎꄐꁆꌠ1485.35ꂡꂷꐯꇯꄉ,ꍏꑷꏱꎆꃹꅼꃅꁬꋌꁦꎴꆄꄻꏦꉻꄺꀱꌠꊋꁈꄏꌠꌕꈎꁦꎆꃅꎆꇱꎖꄎꌠꃅꇫꑟ。ꇓꈓꏦꎫꇮꃅꌤꃅꊿꅉꀨꆅꉁꆄꄻꄜꏂꀧ、ꇓꈓꏦꎫꀀꊿꅉꀨꆅꉁꆄꄻꄜꏂꀧꌋꆀꀊꏀꉹꌠꂿꑘꁡꇤꇷꃅꆅꉁꆄꄻꄜꏂꀧꈽꐨꉀꐕꌊ90%ꈍꉐꐕꄉ,ꀊꏀꉹꌠꂿꑘꁡꇤꇷꃅꆅꉁꆄꄻꌋꆀꇓꈓꏦꎫꀀꊿꅉꀨꆅꉁꆄꄻꄜꏂꀧꌠꏱꎆꁥꁵꎕꏦꊾꂷꐽꏡꃅ120ꂷꇬꄉꉀꐕꅷ200ꂷꃅꄉ,ꍏꑷꏱꎆ760ꂡꂷꄐꁆ,35.7%ꉀꎆ。ꍔꃚꀞꄻꌠꅉꂫꊐꌠꆅꉁꁦꎴꏲꉻꊋꁈꄏꄉꐊꑷꃅꇩꏤꅉꀨꁬꋌꄹꏦꃄꌬ,ꅉꂫꊐꌠꆅꉁꁦꎴꏲꉻꏓꇱꄺꀱꄹꇙ。ꇓꈓꇓꉈꀀꊿꊾꂷꐽꏡꃅꅉꀨꄉꉻꁦꎴꆄꄻꁧꃤꃅꌠꎆꃀꎕꏦ15ꂷꇬꄉꉀꐕꌊ25ꂷꃅꄉ,ꐪꊛꄉꀉꒉꀊꂾꌠꄉꉻꁦꎴꆄꄻꁧꃤꃅꐘꑘꃄꌬꌠꊋꁈꄏ。ꉻꄻꆅꉚꆄꄻꅉꄺꀱꉚꌠꄹꇙ。ꊋꀥꇱꄉꇓꈓꇓꉈꆅꉁꆄꄻꌠꈭꋏꁥꇱ,80ꂡꂷꄐꁆ。

  (5)ꐧꋦꏦꀧꌋꆀꃅꅍꁵꌠꌬꅐꌠ4414.34ꂡꂷ,16.6%ꉀꎆ。ꄚꈐꏭ,ꍏꑷꋋꊐꌠꌬꅐꌠꆏ484.79ꂡꂷ,ꀱꃅꄷꆹꏮꁵꌬꌠꆏ3929.55ꂡꂷ。ꀊꏀꉹꌠꂿꑘꁡꇤꐧꋦꃀꌠꀨꎹꄜꏂꀧꃅꉚꌠꊋꁈꄏꄉꇩꏤꑭꊂꇬꑤ24%ꇬꄉꍔꐯꅷ40%ꇬꑟꄉ,ꄷꀋꁧꇓꈓꏦꎫꇬꎆꀋꊌꌠꀀꊿꌌꃀꌠꀨꎹꄜꏂꀧꈐꇬꇱꄉ,ꁥꁵꎆ131ꂡꂷꄐꁆ。ꇩꏤꑭꊂꇓꈓꇓꉈꀁꂥꀧꌠ、ꂿꑘꁡꇤꉬꀧꑱꁯꑠꉹꁌꊋꋠꌠ8600ꎖꑻꆏꋍꃢꃅꐥꐨꁥꁵꎆꃑꁵꄉ,ꎆꃀ104ꂡꂷꄐꁆ。ꎆꏂꑘꎞꆏꀐꌠꊾꂷꋍꆪꐽꏡꃅꅉꀨꃀꌠꀨꎹꎆꆏ140ꂷꉀꎆ,ꎆꏂꑘꌤꃅꊿꅉꀨꃀꌠꀨꎹꄜꏂꀧꌜꊐꏓꇲꄹꏦꄻꐛꒆ,ꋭꋽꃅꄜꏂꀧꇬꀋꐊꌠꎆꏂꑘꎞꆏꀐꌠꊿꈧꌠꅉꀨꃀꌠꀨꎹꄜꏂꀧꌤꃆꂥꀘ,ꎆꏂꑘꌤꃅꊿꅉꀨꃀꌠꀨꎹꄜꏂꀧꌠꁥꁵꎆ1796ꂡꂷꄐꁆ,15.1%ꉀꎆ。ꇓꈓꇓꉈꀁꂥꐯꀁꂥꌠꐥꐨꏦꀧꎕꏦꉀꐕ,ꍏꑷꏱꎆꉬꇮꃅꁥꁵꎆ749ꂡꂷꄐꁆ,18.3%ꉀꎆ。ꂴꄉꈲꁵꊿꑠꅲꇫꇲꎆꌋꆀꐥꐨꁥꁵꎕꏦꄺꀱꄉ,ꁥꁵꎆ257.7ꂡꂷꄐꁆ,19.5%ꉀꎆ。ꄉꄐꃅꊾꍸꅉꀨꐥꐨꁥꁵꎕꏦꉀꐕꄉ,36ꂡꂷꄐꁆ。ꋌꐛꉮꌸꐥꐨꈭꋏꁥꇱꎆ106.5ꂡꂷꄐꁆ。ꐪꊛꄉꇩꁨꎆꏂꑘꏱꁈꈴꄉꈢꇧꎭꑱꐢꂫꇽꌤꃅꋒꃅꄉ,ꁥꁵꎆ60ꂡꂷꄐꁆ。ꑘꀺꏱꁈꄏꐓꈍꈐꊋꄏꌠꍔꐯ,ꃅꅍꎹꌠꁥꇱꇇꄻ、ꃅꑘꇮꇐꄐꊋꁱꂘꌋꆀꑘꀺꁱꂘꑠꃅꋒꃅꄉ。

  (6)ꀀꑳꏦꀧꌬꅐꌠ1292.66ꂡꂷ,14.8%ꉀꎆ。ꄚꈐꏭ,ꍏꑷꋋꊐꌠꌬꅐꌠ291.63ꂡꂷ,ꀱꃅꄷꆹꏮꁵꌬꌠ1001.03ꂡꂷ。ꀉꇨꃅꈁꐥꊐꌠꏱꎆꎆꊐ、ꏣꀋꑌꃅꐧꋦꎆꃀꈻꎷꇬꇯꌠꇬꈴꄉ,ꇤꐳꃅꄉꉻꊤꀀꑳꌋꆀꁌꈝꐮꊤꑳꋈꄻ,ꇓꈓ、ꇮꃅꇑꇐꅐꇐꐛꅉ、ꌩꋥꁕ、ꑘꃅꁕ、ꊖꌋꐛꅉꑠꊿꀀꅉꄺꀱ,ꉈꑴꆏꂿꑘꁡꇤꀀꑳꎒꐡꌠꄺꀱꌋꆀꎆꆫꊿꀀꑳꋉꃆꄹꎆꄉ,ꍏꑷꏱꎆꆏꏦꀧꐨꐥꌠꀀꑳꋉꃆꇬꌬꌠ1030ꂡꂷꄐꁆ,34.7%ꉀꎆ。ꏲꑘꌤꑘꌤꃅꅉꇮꃅꊿꉻꊭꎆꑠꇬꌬꌠ262.66ꂡꂷꄐꁆ。

  (7)ꂿꑘꌤꑘꒉꑘꌤꃆꇬꌬꅐꌠ4588.83ꂡꂷ,18.3%ꉀꎆ。ꄚꈐꏭ,ꍏꑷꋋꊐꌠꌬꅐꌠꆏ424.19ꂡꂷ,ꀱꃅꄷꆹꏮꁵꌬꌠꆏ4164.64ꂡꂷ。ꀉꇨꃅꈲꒉꌌꀨꄉꌠꂿꑘꂿꑘꁡꇤꅉꃀꉁꈾꋈꄻ,ꊋꒉꃅꐧꀠꀄꊭꌠꒊꃀꒈꌺꄺꂡ、ꀄꊭꉹꌠꒉꇉꃨꆰꐨꐥꌠꄻꈫꈈꌋꆀꒈꂃꒊꆱꃅꊈꉮꌸꐏꄻꌠꊋꁈꄏ,ꀄꊭꉹꌠꁍꑗꈲꒉꀨꄉꌠꑤꋈꄻꌋꆀꇩꏤꀆꐒꃄꅉꄻꈬꀨꄉꋈꄻꋉꃆꃄꌬꈍꈐꍔꐯ,ꀉꒉꐧꀠꉹꌠꒉꊎꁕꊛꄉꋬꈭꒉꏏꄺꀱꌠꋈꄻꌋꆀꂿꑘꁡꇤꄆꈄꏍꄺꀱꑠꄹꇙꄉ,ꎆꃀ1575.4ꂡꂷꄐꁆ。ꂿꑘꎊꈬꏓꇱꁥꁵꌠ860ꂡꂷꄐꁆ,20.1%ꉀꎆ。ꋚ ꇕꉾꃪꌠꁥꁵꄹꏦꄻꐛꒆ,ꁥꁵꎕꏦꉀꎆꄉ,ꎆꃀ220ꂡꂷꄐꁆ。ꂿꑘꌬꇐꃻꄻꁥꁵꄉꈁꁦꎆꃅ,175ꂡꂷꄐꁆ。ꐛꏀꂿꑘꋈꄻꌋꆀꂴꅑꋲꐊꅐꑘꀻꎆꌠꄹꇙꄉ,ꎆꃀ90ꂡꂷꄐꁆ。ꋚꒉꀉꇨꃅꅏꅉꌌꀨꄉ,ꇤꐳꃅꇩꏤꑭꊂꀊꏀꃅꋛꂷꄙꂡꏣꁦꎆꌠꒃꅐꊋꃤꋈꄻ,ꊋꀥꇱꄉꋚꀁꑌꃅꅏꅉꄺꀱ,ꎕꏦꀊꂥꌠꁍꑗꋈꄻꄹꎆ,ꂿꑘꅐꑘꈴꄉꀰꏢꌠꊥꎆ,ꂿꑘꏓꇱꒃꅐꊋꃤꉀꐕꄉ,ꂿꑘꏓꇱꀖꁉꎆ230ꂡꂷꄐꁆ,19.8%ꉀꐕ。ꅔꏂꒆꉻꌋꃅꁥꁵꈁꁠꁵꉺꏦꄻꐛꄉ,ꎆꃀ136.6ꂡꂷꄐꁆ。ꐯꅑꐮꁠꐋꀋꌡꃅꐙꌠꌢꎭꃅꄷꊋꁈꄏꄉꌢꎭꄏꐓꈢꇓꀖꌠꃄꌬ,ꌢꎭꃅꄷꋲꐊꂱꎆꅑꌠꅐꑘꀻꎆꄉ,ꎆꃀ306ꂡꂷꄐꁆ,17.7%ꉀꎆ。ꂿꑘꄜꏂꀧꁌꁥꁵꏱꁈꄻꐛꒆ,ꎆꃀ94.06ꂡꂷꄐꁆ。ꐊꑷꃅꋂꊐꌠꉻꈲꌤꑘꋈꄻꌠꌤꋍꏢꌌꋍꏢꃅꇖꌠꏱꎆꈁꁠꁥꁵꌠꃄꌬ,ꈁꁠꁥꁵꎆꃀ160ꂡꂷꄐꁆ,55.8%ꉀꎆ。ꐊꑷꃅꂿꑘꁡꇤꋭꑘꂘꑘꎝꁭꌠꋊꄻꇧꎭ,ꐪꊛꄉꀉꁁꉻꈲꃅꐙꌠꑣꋂꎝꁭꌠꋊꄻꇧꎭꃅꉚꌠꃄꌬ。

  (8)ꇩꁨꃄꅉꅐꀦꃅꑊꑠꌤꃆꇬꌬꅐꌠ454.89ꂡꂷ,22.9%ꉀꎆ,ꁦꎆꄟꊼꇅꀊꂥꌠꀋꉬꀋꉆꌠꆏꇑꇐꎹꌅꈌꇑꇐꅤꌅꈌꃄꌬꁌꌋꆀꇑꇐꅐꀦꁵꄻꁌꊌꐨꀉꑌꃅꁦꎆꏭꐛꄉ,ꄚꃆꂮꐥꌠꏤꐪꇬꈴꄉꌐꄉꌌꇑꇐꅐꀦꀖꁉꌋꆀꈲꌬꅉꇬꌬ。ꄚꈐꏭ,ꍏꑷꋋꊐꌠꌬꅐꌠ167.48ꂡꂷ,ꀱꃅꄷꆹꏮꁵꌬꌠ287.41ꂡꂷ。ꊋꀥꇱꄉꇑꇐꅐꀦꎹꎖ、ꇑꅏꅉꃄꊈꋦꈭꄻꐛꅉꐛꌋꆀꇑꇐꅐꀦꏎꌬꌋꆀꏓꇱꈲꌬ,ꎿꁕꃄꌬꍞꏲꌋꆀꀧꌋꃅꑠꌤꃅꌠꊋꁈꄏ。

  (9)ꊋꏏꋦꈭꀧꌋꃅꌠꇬꌬꅐꌠ1591.85ꂡꂷ,10.3%ꉀꎆ。ꄚꈐꏭ,ꍏꑷꋋꊐꌠꌬꅐꌠ74.37ꂡꂷ,ꀱꃅꄷꆹꏮꁵꌬꌠ1517.48ꂡꂷ。ꊋꀥꇱꄉꀨꎍꊋꏏꋉꃆꋈꄻ,ꁦꎴꒃꅐ、ꊋꏏꇮꇐꄺꀱ、ꊋꏏꅐꑘꀻꎆꌠꊥꎆ,ꐪꊛꄉꅐꊋꊁꊰꌠꇤꇧꎭꌠꊋꁈꄏ,ꑲꋉꊋꏏꌠꄹꎆ,ꀒꁨꋍꁘꃅꊋꏏꅐꇐꉹꁌꈲꌠꋉꃆꀉꇨꃅꃄꌬ,ꊋꏏꌋꆀꊋꀦꀊꏀꌠꐕꍯꃼꌠꁥꁵꈍꈐꍔꒉ,ꊋꀥꇱꄉꎸꅍꀉꇖꍍꆀꏱꄻꌋꆀꀨꄉꃅꄷ、ꀨꄉꒈꁕꒆꉻꏓꇱꏱꄻ,ꂿꑘꁡꇤꋦꈭꏓꇱꋊꄻꄹꎆ,ꊋꏏꍍꋊꇬꌬꌠꎆꃀ945ꂡꂷꄐꁆ。ꏂꉘꁮꋉꃆꃄꌬꌠꊋꁈꄏ,ꊋꀥꇱꄉꒆꇐꊋꀦꏓꇱꈲꌬ,ꀱꉈꑴꅐꉆꌠꊋꀦꋈꄻꌬꉚꌠꄹꇙ,ꎆꏂꑘꒃꅐꀰꏮꈴ、ꎊꈬꀱꉈꑴꄻꌋꆀꈲꌬꌠꊋꊡꄉ,122ꂡꂷꄐꁆ。ꋧꐛꌩꏪꅐꀦꌋꃅꑍꊭꌠꋉꃆꃄꌬꌠꄹꇙ,ꎆꃀ140.84ꂡꂷꄐꁆ,1.2ꁧꉀꎆ。ꀉꒉꀊꂾꒆꉻꄻꐛꋉꃆꃄꌬꌠꊋꊡ,ꋠꃅꀱꌩꊪꌠꃅꐛꐨꄻꈫꈈ,327ꂡꂷꄐꁆ。ꀋꉬꀋꉆꌠꊋꀦ、ꅐꀦ、ꌫꉂꌫꈾꈏꃹꌠꊋꊡ,ꏦꇨꃅ“ꑍꀊꂥꋍꅐꀦ”ꅐꇐꉇꅐꌠꋎꍅ。ꀨꎍꏱꁕꌋꀁꑌꇮꇐꎥꃪꍔꐯꌠꊥꎆ,《ꃅꑊꐛꐈꌠꇬꊝꌠꇩꏤꄐꉻ》ꃄꌬꌠꊋꄏ。

  (10)ꈭꈜꎞꎭꌠꇬꌬꅐꌠ2866.91ꂡꂷ,10.3%ꉀꎆ。ꄚꈐꏭ,ꍏꑷꋋꊐꌠꌬꅐꌠ400.24ꂡꂷ,ꀱꃅꄷꆹꏮꁵꌬꌠ2466.67ꂡꂷ。ꂿꑘꁡꇤꄇꈜ、ꇩꌜꈴꑟꑠꄉꉻꈭꈜꅉꃀꉁꈾꋈꄻꄹꎆꄉ,1966.4ꂡꂷꄐꁆ。ꐪꊛꄉꇓꈓꄉꉻꈭꈜ、ꂿꑘꁡꇤꃥꌞꑠꉻꈲꐨꐥꌠꉹꑘꈨꄷꒀꁌꁥꁵꄉ,296.47ꂡꂷꄐꁆ。ꃅꄷꊋꄏꄉꍔꃚꎝꌣꑍꊐꄇꈜꈳꁌꎴꌠꐆꇧꎭ,ꁥꁵꎆ260ꂡꂷꄐꁆ。

  (11)ꅐꀦꎹꎖꄆꊋꈴꌗꑠꌤꃆꇬꌬꅐꌠ744.86ꂡꂷ,10%ꀁꋌꊰ,ꀋꉬꀋꉆꌠꆏꄚꃆꂮꐥꌠꅉꃀꋈꄻꌬꅐꌠꀁꋌꊨ。ꄚꈐꏭ,ꍏꑷꋋꊐꌠꑴꅉꌬꅐꌠ410.88ꂡꂷ,ꀱꃅꄷꆹꏮꁵꌬꌠ333.98ꂡꂷ。ꅐꀦꎹꎖꄆꊋꈴꌗꑠꅉꃀꉁꈾꋈꄻꄹꎆꄉ,ꎆꃀ381ꂡꂷꄐꁆ。ꌐꐘꎆꃀ35ꂡꂷꄐꁆꌊ,ꄐꇐꏤꁈꃅꐙꌠꏀꄓꅐꑘꇮꇐꎥꁉꌋꆀꃅꉚꑠꌤꃅꌠꊋꄏ。ꋍꑞꋍꉹꐧꐭꎆꏂꑘꀻꎆꌠꊥꎆ,ꌐꐘꎆꃀ103.44ꂡꂷꄐꁆ。

  (12)ꋚꋌꎊꈬꊭꊎꌤꃆꇬꌬꅐꌠ1130.5ꂡꂷ,23.9%ꉀꎆ。ꄚꈐꏭ,ꍏꑷꋋꊐꌠꌬꅐꌠꆏ796.28ꂡꂷ,ꀱꃅꄷꆹꏮꁵꌬꌠꆏ334.22ꂡꂷ。ꋛꂷꀉꇨꃅꅏꅉꋛꂷꃨꆰꎆꀨꃅꄷꋍꋬꈭꌠꇤꇧꎭ,ꍏꑷꏱꎆꁥꁵꄉꈁꁦꎆꃅ,ꋛꂷꃨꆰꎆꀨ293ꂡꂷꄐꁆ。ꎍꐽꃅꎭ、ꍮꌦꀁꂥꐯꀁꂥꃅꎴꃼꁌꏤꉀꐕꌠꊋꄏ,ꋚꋌ、ꇓꋌ、ꑊꐥꎸꑫꑠꀋꉬꀋꉆꎊꈬꊭꊎꌠꁦꎆꃅꄉ,703.87ꂡꂷꄐꁆ。

  (13)ꃼꇇꑘꁧꃤꃅꑘꑠꌤꃆꇬꌬꅐꌠ706.14ꂡꂷ,3.3%ꉀꎆ。ꄚꈐꏭ,ꍏꑷꋋꊐꌠꌬꅐꌠ24.66ꂡꂷ,ꀱꃅꄷꆹꏮꁵꌬꌠ681.48ꂡꂷ。ꑱꈐꌬꄆꌞꀁꋌꎭꌠꌋꆀꀉꆹꌌꀊꏀꀠꌠꏱꁈꄻꐛꒆ,ꁥꁵꎆ426ꂡꂷꄐꁆ。ꐪꊛꄉꂿꑘꁡꇤꐛꏀꒈꇁꁧꃤꃅꈄꏍꋉꃆꋈꄻ,ꃼꇇꒈꇁꁧꃤꃅꑘꀻꎆꌠꊥꎆ,ꎆꃀ94ꂡꂷꄐꁆ。

  (14)ꇩꐏꇬꌬꅐꌠ5835.91ꂡꂷ,12.6%ꉀꎆ。ꄚꈐꏭ,ꍏꑷꋋꊐꌠꌬꅐꌠ5829.56ꂡꂷ,ꀱꃅꄷꆹꏮꁵꌬꌠ6.35ꂡꂷ。ꀋꉬꀋꉆꌠꆏꌌꂽꁥꌠꐛꏀꈴꋈꄻꌠꊋꄏꌋꆀꂽꁥꌠꂽꇜꂽꑼꐥꐨꈲꏣꄻꃪꌠꇬꌬ。

  (15)ꄉꉻꋬꂻꌫꅐꌠ1617.32ꂡꂷ,9.6%ꉀꎆ。ꄚꈐꏭ,ꍏꑷꋋꊐꌠꌫꅐꌠ1024.53ꂡꂷ,ꀱꃅꄷꆹꏮꁵꄻꌠ592.79ꂡꂷ。ꐪꊛꄉꍔꃔꌫꎆꏦꀧꉻꑫꄺꀱ,ꅉꂫꊐꌠꍔꃔꏲꉻꉁꈾꇱꄟꌋꆀꃣꈌꀞꄻꊋꃤꉀꐕ。

  (16)ꎃꐚꄉꉻꁧꃤꃅꌫꅐꌠ1118.84ꂡꂷ,4.3%ꉀꐕ。ꏦꇨꃅꎃꐚꃅꌫꅐꌠꆼꋏꄉ,ꉇꅔꅐꁧꌠꌫꎆ、ꐕꍯꃼꌠꌋꆀꎞꈴꁌ、ꉻꃆꋨꏦꁌꑠꌫꎆꌫꅐꌠꌕꐘꆹ2009ꆼꋏꄉꈭꐨꄐꏤꄉꌠꄉꈁꇬꐂꀋꁧ。ꄚꈐꏭ,ꍏꑷꋋꊐꌠꌫꅐꌠ876.85ꂡꂷ,ꀱꃅꄷꆹꏮꁵꌬꌠ241.99ꂡꂷ。

  (17)ꇩꎝꇔꊰꁵꄉꌫꅐꌠ1839.84ꂡꂷ,21.7%ꉀꎆ。

  ꄚꉎꌫꅐꈧꌠꏓꇱꇬ,2011ꈎꍏꑷꏱꎆꌌꏓꂱꉹꁌꐥꐨꌋꆀꈛꎂꃅꐮꃆꂮꐥꌠꂘꑘ、ꆅꉁꁦꎴ、ꐧꋦꏦꀧꌋꆀꃅꅍꊌ、ꀀꑳꏦꀧ、ꁱꀕꑠꁆꏯꄐꁆꄉꌬꌠꆹ10509.92ꂡꂷ,18.1%ꉀꎆ。ꂿꑘꈲꒉ、ꈭꈜꎞꎭꌋꆀꋦꈭꀧꌋꃅꑠꇬꌬꈧꌠꑌꉹꁌꐥꐨꌋꆀꑗꑞꃅꐮꃆꂮꐥ,ꍏꑷꏱꎆꃅꄷꇗꏸꎳꎆꀱꁵꌠꌋꆀꎃꐚꃅꆹꏮꄉꁵꄻꌠꆹꀉꑌꌠꆏꌌꉹꁌꐥꐨꏦꀧꌋꆀꄻꃪꅉꇬꌬꂿꄷ,ꉹꁌꐥꐨꌬꈧꄉꌫꅐꌠꆹꍏꑷꏱꎆꌫꅐꅉꇬ2/3ꅶꍯꍆ。ꍏꑷꏱꎆꌌ“ꌕꂿꑘ”ꇬꌫꅐꌠꆹꏓꇱꇬ9884.5ꂡꂷꄐꁆꄉ,15.2%ꉀꎆ。ꄚꈐꏭ:ꂿꑘꒃꅐꌫꅐꏭꊋꁈꄏꌠ3938.7ꂡꂷ,ꂿꑘꊿꏭꋛꂷꈛꎂꃅꁥꇱ、ꂿꑘꌫꎆꏓꇱꁥꇱ、ꇗꂄꌠꁥꇱ、ꂿꑘꏸꐕꃼꌠꎆꇱꌫꅐꌠ1406ꂡꂷ,ꂿꑘꁡꇤꂘꑘ、ꁦꎴꑠꐧꋦꌤꑘꀻꎆꌫꅐꌠꊥꎆꌠ3963.6ꂡꂷ,ꂿꑘꅐꇐꊭꄎꌫꁌꌋꆀꇔꊰꑠꇬꌫꅐꌠ576.2ꂡꂷ。ꍏꑷꅉꃀꋈꄻꎆꇱꄐꁆꌠꏓꇱꇬ3826ꂡꂷ。

  3.ꍏꑷꃅꄷꇗꏸꀱꁵꌠꌋꆀꆹꏮꄉꀱꁵꄉꌫꅐꌠꄐꁆꐨ

  ꀒꁨꋍꁘꃅꆹꏮꄉꁵꄻꌠꐛꉻꄻꉾꃪ,2011ꈎꍏꑷꃅꄷꏭꇗꏸꎳꎆꀱꁵꌠꌋꆀꆹꏮꄉꁵꄻꌠ37310ꂡꂷꌫꅐ,15.3%ꉀꎆ。ꄚꈐꏭ:ꇗꏸꎳꎆꀱꁵꌠ5067.99ꂡꂷ,1.4%ꉀꎆ;ꎃꐚꃅꆹꏮꄉꁵꄻꌠ17336.77ꂡꂷ,18.5%ꉀꎆ;ꌐꐘꃅꆹꏮꄉꁵꄻꌠ14905.24ꂡꂷ,17.1%ꉀꎆ。ꎃꐚꃅꆹꏮꄉꁵꄻꅉꇬ,ꐽꏡꃅꆹꏮꄉꁵꄻꌠ6609.11ꂡꂷꄐꁆꄉ,21.2%ꉀꎆ。ꄚꈐꏭ:ꑤꊐꌠꅉꀨꎆꊋꏦꀧꉻꑫꈁꁠꎆꁥꇱꎆꀨ775ꂡꂷꄐꁆ,ꅉꂫꊐꌠꍔꃚꅉꀨꄉꉻꁧꃤꃅꊋꃤꇲꁵꌠꀉꇨꇱ;ꎆꀨ300ꂡꂷꄐꁆꄉ,ꌕꒉꇁꀦꑠꇬꒆꉻꊋꃤꐛꅉꏭꏱꎆꏦꀧꊋꃤꉀꐕ。ꊿꋅꃅꄷꆹꏮꄉꁵꄻꌠ370ꂡꂷꄐꁆꄉ,ꑭꊗ、ꑟꏦꑠꀁꑌꊿꋅꃅꄷꐱꐂꏿꃅꀻꎆꌠꏭꊋꁈꄏ。ꐪꊛꄉꅐꀦꌬꌐꌠꇓꈓꆹꏮꄉꁵꄻꄹꏦꃄꌬꄉ,ꎆꀨ135ꂡꂷꄐꁆ。ꄻꐛꋌꇗꏸꎴꌠꄺꀱꆹꏮꄉꁵꄻꌠ581ꂡꂷꄐꁆꄉ。

  (ꇖ)ꍔꃚꃅꐙꌠꎆꀨꄐꌗꁆꄻꐨ

  2011ꈎꍏꑷꍔꃚꃅꐙꌠꎆꀨꄐꌗꊌꐨ2826.27ꂡꂷ,11%ꀁꋌꊰ。ꄚꈐꏭ:ꎷꈜꋈꄻꎆꀨꊌꐨ648ꂡꂷ,ꎿꀸꋈꄻꁌꊌꐨ123.93ꂡꂷ,ꉹꁌꌬꌠꃏꏸꐛꅉꏱꄻꋈꄻꁌꊌꐨ147.32ꂡꂷ,ꊴꀾꉻꈲꎆꊌꐨ261.5ꂡꂷ,ꀉꒉꐧꀠꉹꌠꒈꇉꉹꁌꎞꎭꊂꊬꌠꇬꊋꁈꄏꎆꀨꊌꐨ198.11ꂡꂷ,ꍏꑷꂿꑘꈄꏍꌢꎆꊌꐨ96.01ꂡꂷꑠ。ꂴꈒꌠꂫꌗꆹꏮꊌꐨ790.16ꂡꂷꄸꇬꇯꇬꆏ,ꌌꁆꄻꉆꌠꍏꑷꍔꃚꃅꐙꌠꎆꀨꊌꐨꈁꉬꃷꁨꆹ3616.43ꂡꂷ,19.9%ꉀꎆ。ꄚꈐꏭ:ꍏꑷꋋꊐꌠꌫꅐꌠ2384.93ꂡꂷꐥ,4.4%ꉀꎆ,ꎷꈜꋈꄻꌫꅐꌠ682.92ꂡꂷ,ꎿꀸꋈꄻꌫꅐꌠ101.71ꂡꂷ,ꉹꁌꌬꌠꃏꏸꐛꅉꏱꄻꋈꄻꌫꅐꌠ87.77ꂡꂷ,ꊴꀾꉻꈲꎆꌌꐧꋦꉈꇬꈲꊌ、ꈯꎟ、ꂘꑘꑠꐧꋦꉻꈲꌤꑘꇬꌫꅐꌠ244.02ꂡꂷ,ꀉꒉꐧꀠꉹꌠꒈꇉꉹꁌꎞꎭꊂꊬꌠꇬꊋꁈꄏꎆꀨꌫꅐꌠ0.47ꂡꂷ,ꍏꑷꂿꑘꈄꏍꌢꎆꌫꅐꌠ105.95ꂡꂷꑠꄚꇬꐊ;ꃅꄷꆹꏮꄉꁵꄻꌠ1231.5ꂡꂷꐥ,68.1%ꉀꎆ。

  ꍏꑷꏱꎆꁧꎁꃅꄉꄻꌠꃅꄷꃅꐙꌠꎆꀨꑴꅉꊐꌠꊌꐨ22995.47ꂡꂷꐥ,29.5%ꀁꋌꊰ,ꀋꉬꀋꉆꌠꆏꃄꅉꃆꂮꐥꌠꍔꃚꃅꐙꌠꎆꀨꊌꐨꀁꋌꒊꏭꐛ。ꄚꈐꏭ:ꇩꁨꃄꅉꌬꌅꈌꏮꏆꊌꐨ19753.41ꂡꂷ,ꇓꈓꅉꃀꉁꈾꋬꈭꁥꇱꁌꊌꐨ446.67ꂡꂷ,ꊴꀾꉻꈲꊌꐨ261.5ꂡꂷ,ꃅꄷꂘꑘꁥꇱꊌꐨ274.13ꂡꂷ。ꍏꑷꍔꃚꃅꐙꌠꎆꀨꃅꄷꆹꏮꄉꁵꄻꌠ1231.5ꂡꂷꄸꇬꇯꇬꆏ,ꃅꄷꍔꃚꃅꐙꌠꎆꀨꊌꐨꆹ24226.97ꂡꂷꐥ。ꃅꄷꍔꃚꃅꐙꌠꎆꀨꌫꅐꌠ24226.97ꂡꂷꐥ,20%ꀁꋌꊰ。ꄚꈐꏭ:ꇩꁨꃄꅉꌬꌅꈌꏮꏆꌠꊌꐨꄐꁆꄉꌠꃄꅉꎴꎞꎭꁥꇱꌬꎆꃅꐙꌠꌫꅐ、ꇓꈓꋈꄻꑠꌫꅐꌠ20339.57ꂡꂷ;ꊴꀾꉻꈲꎆꌌꐧꋦꐥꌒꈲꊌ、ꈯꎟ、ꂘꑘꑠꐧꋦꉻꈲꌤꑘꇬꌫꅐꌠ351.4ꂡꂷ;ꇓꈓꅉꃀꉁꈾꋬꈭꁥꇱꁌꄐꁆꄉꌫꅐꌠ446.67ꂡꂷ;ꃅꄷꂘꑘꁥꇱꄐꁆꄉꌫꅐꌠ274.13ꂡꂷ。

  ꍏꑷꌋꆀꃅꄷꍔꃚꃅꐙꌠꎆꀨꊌꌬꌠꏓꇱꇬ,ꇩꏤꑭꊂꍔꃚꃅꐙꌠꎆꀨꊌꐨ25821.74ꂡꂷ,27.8%ꀁꋌꊰ,ꀒꄹꈎꌠꂫꌗꆹꏮꊌꐨ790.16ꂡꂷꄸꇬꇯꇬꆏ,ꇩꏤꑭꊂꍔꃚꃅꐙꌠꎆꀨꊌꐨꄐꁆꉆꌠꈁꉬꃷꁨꆹ26611.9ꂡꂷ;ꇩꏤꑭꊂꍔꃚꃅꐙꌠꎆꀨꌫꅐꌠ26611.9ꂡꂷꐥ,18.3%ꀁꋌꊰ。

  (ꉬ)ꍏꑷꇩꁨꎆꀨꀰꏢꄐꌗꁆꄻꐨ

  2011ꈎ,ꍏꑷꇩꁨꎆꀨꀰꏢꄐꌗꏓꄻꈐꇬꂴꅉꃀꇬꄉ,ꀊꏀꃅꂘꑘꀯ、ꍏꇩꇩꏹꃼꇇꃅꊥꎆꊈꑼꉼꇬꐊꌠꎆꏂꑘ,ꂿꑘꀯ、ꁱꀕꀯ、ꇩꏤꅇꁊꄆꒌꄆꁱꊝꏳꇬꐊꌠꎆꏂꑘ,ꍏꇩꅏꄻꏹꄨꇬꌦꉈꑴꍏꇩꉇꉻꁱꀕꏹꄨꇬꌦꄻꄉꇈ,ꋭꋽꃅꍏꑷꎆꏂꑘꎆꀨꈲꊌꎳꄻꍆꁧꉀꐕ。ꍏꑷꎆꏂꑘꇩꁨꎆꀨꀰꏢꄐꌗꊌꐨ844.39ꂡꂷ,51.1%ꉀꐕ。ꀒꄹꈎꌠꂫꌗꆹꏮꊌꐨ14.17ꂡꂷꇱꇬꆏ,ꄐꁆꉆꌠꄐꌗꌫꅐꌠ858.56ꂡꂷ。ꀋꉬꀋꉆꌠꆏꌌꑠꇬꌬ:ꇩꁨꎆꀨꌋꆀꅐꑘꐛꉻꋊꍬꌫꅐꌠ495.5ꂡꂷ,ꍏꑷꎆꏂꑘꄺꀱꊋꋠꁥꇱꁥꇱꌫꅐꌠ30.5ꂡꂷ,ꈆꑪꇮꇐꀉꒉꀊꂾꌠꇬꌫꅐꌠ35ꂡꂷ,ꀉꒉꀊꂾꃅꊋꏏꍍꋊꌫꅐꌠ35ꂡꂷ,ꉇꉻꎆꇱꌫꅐꌠ30ꂡꂷ,ꋬꂻꒃꅐꏦꀧꊋꃤꋈꄻꌫꅐꌠ10ꂡꂷ,ꄸꐯꇯꄉꄺꀱꌫꅐꌠ80ꂡꂷ,ꏀꄓꅐꑘꑠꀻꎆꌠꇬꌫꅐꌠ45ꂡꂷ,ꇩꏤꑭꊂꐧꋦꏦꀧꎆꀨꌬꐨꀥꇱꌠ50ꂡꂷ,ꐧꋦꏦꀧꑠꇬꌬꌠ5ꂡꂷ,ꋊꍬꌊꄉꉻꏱꎆꄐꌗꄉꌌꉹꁌꐥꐨꁆꏯꌫꅐꌠ40ꂡꂷ。ꇩꁨꎆꀨꀰꏢꄐꌗꄹꏦꀋꆏꃅꐛꒆꅉꇬꐊꄉ,ꋌꊂꆏꋍꁘꋍꁘꃅꐧꋦꄉꀧꑠꉹꁌꐥꐨꁆꏯꎆꇱꌠꁦꎆꇱꂿꄷ。ꋍꈭꐨ,ꏣꀋꑌꃅꃅꄷꐳꃅꇩꁨꎆꀨꀰꏢꄐꌗꌠꏓꄻꉚꌠꄹꎆ。

  ꄚꉎꄐꌗꁆꄻꃆꂮꐛꐪꑭꋧꌠꆏ《ꍏꉸꏓꂱꇭꉼꇩ2010ꈎꇩꏤꑭꊂꄐꌗꃄꌬꐛꐪ2011ꈎꇩꏤꑭꊂꄐꌗ(ꄐꄉꌠ)》ꇬꉜ。

  ꌕ、ꏦꃤꍬꄉꎆꏲ,ꊋꀥꇱꄉꏱꄻ,ꐛꒆꃅ2011ꈎꄐꌗꌠꃅꌐ

  (ꋍ)ꏱꎆꉻꒉꋎꍅꌠꊋꀥꇱꌋꆀꄻꐛꒆ,ꎆꏣꐧꋦꉽꑌꉾꐲꑌꐳꃅꀻꎆꌠꊥꎆ。ꎆꏣꒈꇁꐛꐪꍞꎖꎥꃪꌠꊋꀥꇱ,ꑖꑟꃅꏱꎆꏱꁈꏣꀋꑌꃅꃄꌬꐛꐪꊂꈹꄉ,ꋭꋽꃅꄚꃆꂮꐥꌠꏱꎆꏁꁈꋊꍬꌋꆀꄻꐛꒆꄉ,ꏱꎆꏱꁈꎆꃀ、ꅐꑘꑠꏱꁈꋊꍬꏓꇱꌠꀉꇨꇱ。ꎊꈬꁌꀑꐱꑞꅉꌌꉆꈉꀊꅰꃅꄞꅐꅉꇬꄉ,ꊋꇤꄉꋚꋌ、ꉐꀖ、ꌑꇌꑠꅉꀨꐥꐨꈉꅍꀋꉬꀋꉆꌠꒃꅐꌠꊋꁈꄏ,ꑭꐎ、ꊖꌋ、ꄻꐛꋌꑠꇲꁵꌠꄻꑘꒃ,ꃷꇐꀋꉬꀋꉆꌠꌌꈏꃹꌠꌋꆀꊭꄎꄉꌠꎊꈬꃑꁵꑠꉾꃅꃅ,ꃷꎏꇲꁵꐯꏡꌠꌋꆀꎊꈬꁌꅉꀨꃅꎍꐽꌠꊥꎆ,ꊌꐨꀁꂥꌠꉹꁌꅉꀨꐥꐨꏦꀧ。

  (ꑍ)ꐳꃅꏱꎆꇗꏸꏦꉻꄺꀱ,ꏣꀋꑌꃅꎆꀨꀻꎆꄟꇬꈲꏣꐥꌠꏱꎆꇗꏸꏦꉻꉺꏦꋈꄻ。ꍔꃚꇢꊭꇬꎆꊋꌋꆀꌤꌅꈌꐮꐊꌠꏱꎆꏦꉻꄻꐛꒆ。ꏱꎆꆹꏮꄉꁵꄻꄹꏦꄻꐛꒆꄉ,ꆹꏮꄉꁵꄻꎆꀨꌬꈧꈲꏣꉀꐕ。ꌜꊐꌠꈋꐯꏱꎆꏦꉻꄻꐛꒆ,ꑤꊐꌠꅉꀨꎆꊋꏦꀧꉺꏦꃆꂮꐥꌠꌤꃅꌠꉾꃅꃅ。ꌜꈛꎂꃅꏲꌠꑤꌋꆀꑣꏱꎆꑤꏲꌠꏱꎆꏱꄻꄟꄺꀱꌠꄹꎆ。ꄉꉻꏱꎆꄐꌗꌠꄻꐛꒆ,ꍔꃚꃅꐙꌠꎆꀨꄐꌗꌠꑭꋧꃅꃅ,ꇩꁨꎆꀨꀱꏡꄐꌗꌠꃄꌬꑞꅉꍔꒉꇈꄚꃆꂮꐥꌠꏱꁈꏁꁈꄻꐛꒆ,ꐪꊛꄉꇩꏤꑭꊂꐧꋦꄜꏂꀧꄐꌗꌠꏓꄻꉚ。ꐊꑷꃅꄐꌗꉇꎆꀨꋊꇫꎭ,ꍔꃚꃅꐙꌠꊌꐨꋋꈨꃅꌌꄐꌗꏱꄻꅉꇬꇱꌐ。ꃹꅼꃅꌤꃅꅉꄐꌗ、ꇩꎆꄉꑳꏓꇱꄉꎴꁵ、ꍔꃚꃻꄻꑠꄐꌗꏱꄻꄹꏦꄺꀱꌠꄹꎆ。ꄐꌗꊌꐨꇿꋌꏱꄻꄹꏦꋈꄻꐛꒆ。ꍔꃚꌗꏢꄺꀱꄹꎆꌠꎥꃪ,ꍔꃚꎆꁨꇐꎆꁯꑴꉻꏓꄻꌠꎹꎥ。ꒃꅐꃅꐙꌠꁧꃤꃅꑘꈨꇬꁌꁦꎆꇗꏸꌬꌠꄺꀱꉚꅉꃅꉚ,ꃼꇇꃅꇗꏸꌌꄚꐊꄉꋊꒊ,ꄹꏦꇬꈴꄉꋍꁘꋍꁘꃅꎊꈬꌋꆀꑘꃅꇗꏸꏱꁈꐯꀋꐊꌠꌤꃆꂥꀘ。ꌬꈧꇗꏸꄹꏦꄻꐛꒆ,ꋦꈭꍍꅫꌠꅐꇁꈝꐮ、ꅐꀦꀉꇨꃅꃹꌠꅐꇐꄹꁆꌋꆀꌬꈧꅐꇐꉾꃪꐯꉾꃪꌠꄹꁆꌌꌬꈧꇗꏸꎳꅉꇬꇱꄉ。ꑴꅉꊌꐨꇗꏸꄹꏦꄻꐛꒆ,ꑴꅉꊌꐨꇗꏸꌤꃅꊌꎆꌬꈧꁌꋊꇫꎭꎕꏦꉀꐕ,ꋭꋽꃅꇗꏸꍆꁧꐛꉻꋊꍬ,ꊌꐨꐧꀞꀁꂥꌠꊿꇗꏸꀵꃤꊨꒊ,ꊌꐨꀊꂥꌠꋊꍬꌠꏭꊋꀥꇱ。ꀒꁨꋍꁘꃅꅐꀦꇗꏸꄺꀱꌠꄹꎆ。“ꇗꏸꄻꎃꊒꁌꎴꊨꄅ”ꌠꏥꏦꇬꈴꄉ,ꍔꃚꇬꇗꏸꀋꉬꌠꊌꐨꎴꇫꎭ,ꇗꏸꎳꎆꏱꎆꊌꐨꇬꍆꁧꉀꐕ。

  (ꌕ)ꏱꎆꈆꑪꈴꑭꋧꈴꃅꏱꄻꌠꊋꀥꇱ,ꊋꇤꄉꏱꎆꎆꀨꊌꐨꈲꁧꉀꐕ。ꊋꀥꇱꄉꏱꎆꏦꄹꉻꑫꋈꄻ,ꐳꃅꄐꌗꏦꃤ、ꑴꅉꊌꐨꇗꏸꏦꃤꄺꀱꌠꌋꆀꁌꁦꎆꇗꏸꏦꄻ。ꀒꁨꋍꁘꃅꄐꌗꏓꄻꈴꎁꋊꍬ,ꄐꌗꏓꄻꐊꇐꑭꋧꈴ,ꃶꐚꃅꁧꎁꃅꄐꌗꄉꈁꊨꒊ,ꐪꊛꄉꄐꌗꌠꈎꀨꇬꃅꇫꑟꐨꉀꐕ,ꏦꇨꃅꌤꃅꅉꄐꌗꌠꏱꄻ。ꄐꌗꏓꄻꌠꌋꆀꄐꌗꃄꌬ、ꋒꌠꂫꌗꆹꏮꎆꀨꏱꄻꌠꌋꆀꏲꑘꌤꑘꌤꃅꅉꁨꎆꏱꄻꌠꊜꋽꃅꏓꇱꎼꇁ。ꀉꇨꃅꄐꌗꃄꌬꌠꏱꄻ,ꄐꌗꃄꌬꌠꇨꊸꐨ、ꐯꏡꐨꌋꆀꇿꋌꐥꐨꉀꐕ。ꏱꎆꎆꀨꏲꂠꄹꏦꄻꐛꒆ,ꏦꇨꃅꏱꎆꍞꊟ,ꍔꃚꃅꐙꌠꎆꀨꌋꆀꏱꎆꒈꇁꈴꎁꋋꈨꇬꃅꁊꑷꌠꍞꊟꉺꏦꄻꐛꒆ,ꏟꈯꃅꎆꀨꋬꂻꌠꀧꌋꃅ。ꐪꊛꄉꏱꎆꇗꏸꏱꁈꀉꒉꃅꃄꌬꐛꐪꌐꐘꃅꍤꄻꌠꍔꆙ。ꏣꀋꑌꃅꏱꎆꄐꌗꊌꐨꇿꋌꏱꄻꉚꅉꄹꎆ。ꐳꃅꄐꌗꄇꄜꋊꌠꄹꎆ,ꀒꁨꋍꁘꃅꄐꌗꄇꄜꋊꐊꇐꌌꑭꋧ,ꅉꂫꊐꌠꏱꎆꌤꃅꅉꌋꆀꄚꃆꂮꐥꌠꌤꃅꅉꐧꋦꏭꉹꁌꐥꐨꀋꉬꀋꉆꌠꌬꈧꐛꐪꄇꄜꋊꌠꄹꎆ,ꏟꈯꃅꏲꑘꌫꎆꌫꅐꌠꄇꄜꋊꃆꂮꐥꌠꌤꃅ。ꐪꊛꄉ“ꐭꎆꂁꊐꅉ”ꌐꐘꏱꄻꌠꄹꎆ,ꃶꐚꃅꂿꑘꀉꇨꇱꂿꑘꈲꁵꎆꀨꌋꆀꉹꁌꐥꐨꎆꀨꍞꊟꍤꎖꌤꃅꌠꒃꉇꋒꌶ。ꊋꀥꇱꄉꏱꎆꏱꄻꌤꃅꅉꃀꌋꆀꅉꂫꊐꌠꋈꄻ。ꃅꄷꍔꃚꃅꐙꌠꎝꊈꏱꄻꌠꀉꇨꇱ,ꊋꇤꄉꏱꎆꃨꆰꐨꄴꏮ。ꏟꈯꃅꎆꏓꅉꇬꌦꎝꃆꉉꈌꐊꌠꒈꇁꄟꍞꊟꄹꏦꋈꄻꄉ,ꎆꏓꅉꇬꌦꎝꃆꏱꄻꌠꋊꍬ。ꐳꃅꃅꄷꍔꃚꃅꐙꌠꎝꃆꏱꄻꄉꈁꋎꍅꌠꌋꆀꃨꆰꌗꋏꉺꏦꋈꄻ,ꃅꄷꍔꃚꎝꁯꄉꎆꏓꌠꋊꍬꈴꌠꊥꎆ。

  (ꇖ)ꀋꎪꃅꈪꑌꏎꏸꌠꌭꈬ,ꁦꎆꊌꏏꄉꌬꌠꒃꉇꋒ。ꊌꐨꃅꒊꃅꇁꍞꊟꌠꀉꇨꇱꄉ,ꏦꃤꈴꄉꇗꏸꎴꏱꄻꌠꊋꀥꇱ,ꏟꈯꃅꌅꈌꐂꄉꇗꏸꊨꒊꌠꏢꇈꌋꆀꄺꀱ,ꊌꐨꇗꏸꀋꉬꌠꏱꄻꌠꀉꇨꇱ,ꏦꇨꃅꃔꀾꌬꇬꏦꐆꄉꑽꃤꃅꌠꇇꇩꍈ,ꊋꇤꄉꏦꃤꍬꄉꎴꏲ、ꎴꋭꌠꎴꌐꌠꃅꇫꑟ,ꏱꎆꊌꐨꄐꌗꌠꃅꌐꌠꄉꀧ。ꎃꐚꃅꌬꈧꌠꋎꍅꄉ,ꇩꉈ(ꅔꉈ)ꅐꁧꌠꌬꈧꁌ、ꐕꍯꃼꌠꌋꆀꌬꁌ、ꉻꃆꋨꏦꁌꑠꌬꈧꏥꏦꇬꉀꐕꅍꀋꐥꎻ,ꏦꇨꃅꄈꍔꌤꃅꅉꌤꀞꑳꑠꋈꄻꌠꋎꍅ,ꎕꏦꇬꐂꄉꌤꃅꑳꄺꑣꀋꉆ,ꊋꇤꄉꏲꑘꃅꌠꎆꀨꊨꒊ。“ꑍꑵꀋꉬꀋꉆ”ꏡꌠꎺꄉ,ꐙꎴꃅꐥꌠꄐꏤꄉꌠꉪꇐꑌꄉ,ꏱꎆꍬꏦꏦꇨꃅꌬ,ꀋꎪꃅꁧꈿꆿꈿꌠꏭꁏ。

  ꁧꎁꊈ,2011ꈎꄐꌗꌤꃅꇫꑟꌠꆹꈻꇐꀉꒉꃅꐥ。ꉪꊇꆏꐋꀨꃛꏢꄧꊝꎻꏹꃅꄉꌠꄈꍏꑷꏃꂠꌠꇂꃴꄉ,ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ,ꀋꎪꃅꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꉜꐨꃅꌫꇫꑟꄉ,ꑴꐚꃅꇩꏤꑭꊂꏓꄊꁳꍞꊟꎻ,ꑖꑣꃅꇩꏤꑭꊂꍔꑠꉉꐨꌋꆀꇖꐨꅲꄉ,ꄹꀖꁨꎆ,ꀋꎪꃅꌤꃅ,ꐛꒆꃅꄐꌗꌤꃅꇫꑟꌠꏦꀧ,ꐊꑷꃅ2011ꈎꎆꏣꐧꋦꀻꎆꌠꋍꑞꋍꐘꑞꅉꁻꌐꃅꇫꑟꌠꎁꃅꏣꀋꑌꃅꑆꊋꅐꌞ!
ꁰꒌ




  • 特别鸣谢
    中国民族语文翻译局彝文翻译室