ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

2010ꈎꇩꂱꎆꏣꌋꆀꐧꋦꀻꎆꎖꄎꃄꌬꐨꌋꆀ2011ꈎꇩꂱꎆꏣꌋꆀꐧꋦꀻꎆꎖꄎꄐꄉꌠꃆꂮꅇꄜ

——2011ꈎ3ꆪ5ꑍꊯꊪꈭꇩꏤꑭꊂꏓꂱꁧꎁ꒜ꀉꒉꇖꃢꌠꈿꅉꇬ

ꇩꏤꀻꎆꌋꆀꄺꀱꊈꑼꉼ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꁧꎁꊈ:

  ꇩꃷꑼꅇꃅꄉ,ꀋꃋ2010ꈎꇩꂱꎆꏣꌋꆀꐧꋦꀻꎆꎖꄎꄉꌠꃄꌬꐨꌋꆀ2011ꈎꇩꂱꎆꏣꌋꆀꐧꋦꀻꎆꎖꄎꄐꄉꌠꄜꌊꊯꊪꈭꇩꏤꑭꊂꏓꄊꃀꀉꒉꇖꃢꌠꈿꅉꇬꄉꍤꇖꎻ,ꄷꀋꁧꇩꏤꑭꊂꍔꑠꊈꑼꑌꉉꐨꄜꎼꇁꅊꇈ。

  ꋍ、2010ꈎꇩꂱꎆꏣꌋꆀꐧꋦꀻꎆꎖꄎꄉꌠꃄꌬꐨ

  ꀋꉊꄻꈎꆏ,ꉪꇩꏤꎆꏣꐧꋦꀻꎆꋦꈭꌼꇪꐯꌼꇪ,ꋍꑞꋍꉹꋌꐛꋌꐙꉮꌸꌠꌋꆀꀉꒉꀊꂾꃅꋓꎭꌠꃛꊸꐯꃛꊸ。ꍏꇩꇭꍣꄈꏟꈯꃅꏃꂠꌠꇂꃴꄉ,ꇩꏤꑭꊂꊿꋅꈁꐥꌠꏓꂱꃹꅼꃅꈆꑪꃅꀻꎆꌠꉜꐨꃅꈴꌬꈴ,ꊯꊪꈭꇩꏤꑭꊂꏓꄊꌕꃢꃀꈿꍤꇖꈌꁧꄉꌠꇩꂱꎆꏣꌋꆀꐧꋦꀻꎆꎖꄎꇬꈴꄉ,ꇩꏹꎆꒉꎆꇁꎒꐡꄜꎟꌠꏭꊝꌠꎖꄎꋍꋬꈭꌠꃄꌬꌋꆀꌭꈬꇬꎷ,ꇤꐳꃅꎆꏣꀻꎆꇶꏦꆹꏮꌠꄹꎆꄉ,ꎆꏣꐧꋦꀻꎆꆸꄟꉾꃪꌠꄻꈫꈈꄉꀐ。ꎖꄎꃄꌬꐛꐪꏓꄜꃅꇬꆏꉾꌠꉬ,“ꊯꊪꉬ”ꄐꎖꊨꄅꄉꌠꑞꅉꁻꌐꌋꆀꂿꃆꀋꉬꀋꉆꌠꆏꊋꐛꃅꃅꌐꀐ。

  (ꋍ)ꎆꏣꎍꐽꊼꇅꐳꃅꉀꎆꌠꏦꀧꄉ

  ꎆꏣꏮꈴꏓꄜꎍꐽ,ꊇꁧꅐꐨꄇꇖꀕꃅꄻꃪ。ꋋꈓꇬꇩꈐꒃꅐꈁꊌꁌꐨꆏ39.8ꃪꂡꂷ,10.3%ꉀꎆ,ꂴꄐꄉꌠꑞꅉꁻꌐꄩꉐꊮꌺ2.3ꂷꐂ。ꋍ、ꑍ、ꌕꉹꌠꅐꑘꐯꀋꌡꃅ4.3%、12.2%ꌋꆀ9.5%ꉀꎆ,ꂴꄐꄉꌠꑞꅉꁻꌐꄩꉐꊮꌺ0.3ꂷ、4ꂷꌋꆀ0.8ꂷꐂ。ꇮꑘꁦꎆꁌꐨꆏ16ꃪꂡꂷ,12.1%ꉀꎆ,ꂴꄐꄉꌠꑞꅉꁻꌐꄩꉐꊮꌺ4.1ꂷꐂ。ꊖꌋꄆꋌꐞꌗꎞꎭꑠꏮꈴꋊꄻꌠꌋꆀꏓꇱꋮꄮꌠꊋꀥꇱꄉ,ꎆꏣꐧꋦꀻꎆꌠ、ꀀꊿꐥꐨꉈꑴꉮꌸꃅꄷ、ꃅꈧꀉꒉꀊꂾꌠ、ꄮꈉꊨꊭꀋꂿꑘꊬꌠꈉꐨꏦꀧꄉꀐ。ꋋꈓꇬꇩꏤꏱꎆꊌꐨꆏ8.3ꃪꂡꂷ,21.3%ꉀꎆ,ꏱꎆꌬꁏꇔꌠꆏꌌꂴꄐꄉꌠꌡꉚꇬ500ꂡꂷꀁꋌꊰ。ꎆꃀꇲꁵꃷꁨꀑꐱꃅꄜꇐM2ꆏ19.7%ꉀꎆ,ꀊꏀꃅꁦꎆꌠꏓꂱꀙꎆꃀꎆꉛꌠ7.95ꃪꂡꂷ。ꎆꏂꑘꅐꐨꐪꊛꄉꉀꐕ,1—11ꆪꇬ,ꇩꏤꑭꊂꄉꈁꈋꉐꇮꑘꎆꏂꑘꍍꊱ3.88ꃪꂡꂷꃅꅜ,ꌌꐯꌡꉚꇬ49.4%ꉀꎆ。

  

  ꈏꇓꈉꐨꐪꊛꄉꍔꒉ,ꉀꎆꌠꈺꇙꊋꆏꋮꄮꌠꏭꉜꄉꎎꆹ。ꌬꈧꍔꒉꌠꋍꑞꋍꐘꏱꁈꆏꇿꋌꏣꀋꑌꌠꊌꅜ,ꌬꈧꈉꐨꊋꂫꆏꀒꁨꋍꁘꃅꃑꅐꇁ。ꐧꋦꌫꈨꌬꇐꏡꄜꃅꃷꌠꈁꉬꃷꁨꆏ156998ꂡꂷ,ꀒꄹꈎꄩ18.3%ꉀꎆ,ꂴꄐꄉꌠꑞꅉꁻꌐꄩꉐꊮꌺ3.3ꂷꐂ。ꇩꏤꑭꊂꑱꈐꌬꄆꌌꂿꑘꁡꇤꃷꒉꌠꅐꇐꆏ7718ꃪꇷꃷꄻ,1.3ꁧꉀꎆ。ꐕꍯ1806ꃪꇷꃷꄻ,32.4%ꉀꎆ。ꎆꇱꋭꋽꃅꉀꎆꌠꏦꀧꄉ,ꐛꉻꀒꁨꋍꁘꃅꄻꃪ。ꐧꋦꑭꊂꀋꇙꁨꎆꎆꇱꌠ278140ꂡꂷ,ꀒꄹꈎꄩ23.8%ꉀꎆ,ꂴꄐꄉꌠꑞꅉꁻꌐꄩꉐꊮꌺ3.8ꂷꐂ。ꑍꈓꀊꏀꃅꁦꎆꌠ4ꃪꂡꂷꎆꇱꌠꎖꄎꐛꒆꃅꃅꌐ。ꉹꁌꎆꇱꌠꊋꊡꌋꆀꄐꏁꌊꋬꂻꃅꀻꎆꌠꉜꐨꈍꑋꏢꄜꃑꃄꌬ,ꉹꁌꎆꇱꌠꎁꃅꍄꑐꊋꃤꀊꏀꌠꐥꀐ,2010ꈎꉹꁌꎆꇱꌠꇓꈓꀋꇙꎆꀨꎆꇱꌠꍆꐨꆏ51.1%ꇬꑟ,ꀒꄹꈎꄩꉐꊮꌺ3ꂷꉀꐕ。ꌬꈧ、ꎆꇱ、ꀊꌃꉇꅐꄉꎆꏣꉀꎆꌠꎁꃅꐯꀋꌡꃅꉐꊮꌺ3.9ꂷ、5.6ꂷꌋꆀ0.8ꂷꅐꌞꀐ。

  ꁌꏤꏓꇱꑟꐨꀑꐱꃅꇬꎍꐽ,ꃷꎏꐥꀹꀒꁨꋍꁘꃅꋊꍬꀐ。ꁌꏤꎍꐽꌠꌋꆀꉹꁌꐥꐨꄻꃪꌠꏁꁈꀉꑌꃅꃄꌬ,ꋚꂷ、ꌑꇌ、ꎸ、ꎬꐚꑠꀋꂿꑘꌠꃷꇏꊭꊐꌋꆀꃑꄻꌠꌤꃅꋒ;ꂿꑘꅐꇐꀊꏀꌠꏢꑲꀋꐥꌠꈴꈜꏱꁈꉹꑫꁦꎆ,ꄷꀋꁧꃄꌬꈍꈐꍔꒉꌊꁌꎴꄇꈜꈁꐥꌠꇬꑟ;ꉹꁌꊋꋠꌠꐥꐨꁥꁵꌠꌋꆀꎊꈬꁌꏤꐈꇙꌠꐮꇙꉺꏦꄻꃪ,ꁌꏤꉀꎆꄉꀀꊿꐥꐨꁧꏖꌠꊨꀁꇖ;ꁌꎴꐘꑘꈨꆏꄉꌋꆀꋊꐆꇧꎭ,ꁌꎴꎕꏦꌋꆀꁬꋌꆰꋌꁌꏤꈨꌌꀁꋌꊰꄉ,ꎆꏂꑘꌋꆀꉹꁌꆸꄜꐨꊨꀁꇖ;ꎆꏂꑘꁌꎴꃆꂮꐥꌠ、ꄆꊋꁌꏤ、ꂿꑘꅐꇐꁌꏤꑠꌐꐘꃅꋊꄻꌠꌋꆀꌧꇐꅐꌅ、ꅐꇐꀊꆠꌠꄻꃷꌠꏭꇇꇩꍈꌠꌐꐘꃄꄻꌠꊥꇫꍔꆙ,ꁌꏤꌋꆀꃷꎏꋦꈭꊱꁨꐥꌠꀹꄻ。ꋋꈓꇬꀀꊿꌬꈧꁌꏤꈁꉬꃅ3.3%ꉀꄓ,ꑞꅉꁻꌐꀑꐱꃅꃅꇫꑟ。

  (ꑍ)ꂿꑘꅉꃀꊋꀥꇱ

  ꋚꂷꑠꂿꑘꅐꇐꀋꉬꀋꉆꌠꎍꐽꃅꁦꎆ。ꃅꄷꄹꁆꀉꒉꀊꂾꃅꃅꇨ、ꈺꇨꉘꁮꑭꀁꑌ、ꀉꇨꃅꒉꅐꑠꉮꌸꁧꏖꌠꄘꑣꄉ,ꋋꈓꇬꋚꂷꒃꅐꃷꁨꆏ54641ꃪꄓ,ꀒꄹꈎꄩ1559ꃪꄓꁦꎆ,2.9%ꉀꎆ,ꐪꊛꄉ7ꈓꁦꎆꃅꅐꌠꃅꇫꑟꀐ。ꋌꇐꒃꅐꃷꁨꆏ3239ꃪꄓ,2.7%ꉀꎆ。ꆫꑘꒃꅐꏓꄜꎍꐽ,ꋋꈓꇬꎸꉹꌠꏓꇱꒃꅐꃷꁨꆏ7925ꃪꄓ,3.6%ꉀꎆ;ꒉꅐꇐꒃꅐꃷꁨꆏ5366ꃪꄓ,4.9%ꉀꎆ。ꃅꄷꄹꁆꃅꌗꇎꏦꀋꐥ、ꊪꏽꃅꊂꊨꒊꌠꑠꐊꊈꇱꁧꏖꄉ,ꌑꇌꒃꅐꃷꁨꆏ597ꃪꄓ,6.3%ꀁꋌꊰ;ꎬꐚꒃꅐꃷꁨꆏ12045ꃪꄓ,1.9ꀁꋌꊰ。

  ꂿꑘꀉꇨꂿꑘꈲꐥꌠꏱꁈꇿꋌꐥꃅꃄꌬ。ꋋꈓꍏꑷꏱꎆꌌ“ꌕꂿꑘ”ꁆꏯꇬꌬꐨꆏ8579.7ꂡꂷ,ꀒꄹꈎꄩ18.3%ꉀꎆ,ꄚꈐꏭ,ꌌꂿꑘꌋꆀꂿꑘꁡꇤꋈꄻꌠꇬꌬꌠꍏꑷꄐꌗꈐꏭꎆꇱꌠ1928ꂡꂷ,ꍏꑷꄐꌗꈐꏭꎆꇱꈁꐥꌠꇬꍆꐪ49%ꇬꑟ。ꋠꃅꀧꌋꃅꌤꃅꌠꀒꁨꋍꁘꃅꀥꇱ,ꇩꏤꑭꊂꃄꅉꋊꄻꌠ130ꎖꃪꉻꐊ,ꀊꏀꁦꎆꌠꋠꃅ30ꎖꃪꉻꐊ。ꇩꏤꑭꊂꀊꏀꃅꁦꎆꌠꄙꂡꏣꋚꂷꒃꅐꄐꊋꄐꎖꌠꐊꑷꃅꃄꌬ,ꌑꇌꒀꋌꎬꐚꅉꁍ、ꋦꁧꀧꌋꃅꋉꃆ、ꇙꀕꆅꄴꏮꉻꑫ、ꊪꉘꑘꇗꉾꋉꃆꀥꇱꀐ。ꊋꀥꇱꄉꐧꐭꈲꒉꉁꈾꋈꄻꌠ、ꂿꑘꏸꐕꈴꊥꎆꌠ、ꉐꀖꃱꀖꒃꅐꇲꁵꌠꏦꀧꑠꁆꏯꏱꁈꏤꄻꄷꀋꁧꌌꃄꌬꀐ。ꄐꎖꈐꏭꃨꆰꐨꐥꌠꒈꇉꃨꆰꋊꄻꈫꈈꌠꂿꃆꈁꉬꃅꌐ,ꑍꈭꌠꐭꉹꃨꆰꐨꐥꌠꒈꇉꃨꆰꋊꄻꈫꈈꌠꃄꇰ。ꂿꑘꅐꇐꋍꅝꃅꃷꌠꃷꎏ、ꋚꋌꄉꑳ、ꂿꑘꅐꇐꈻꅑꎊꈬꎞꈴꑠꏮꈴꅉꃀꉁꈾꈨꊋꁈꄏꄉꋈꄻꀐ。ꎭ、ꍮꌦꀁꂥꇊꀁꂥꌠꎴꃼꁌꏤꆏ50ꉻꏣꌠ2009ꈎꄩꐽꏡꃅꇬ3ꂷꌋꆀ6ꂷꉀꐕ,ꆖꂷ、ꊮꊫꂶꂷꀊꋨꇅꃅꎴꊐꌠꏱꁈꊼꇅꉾꃅꃅꌊꑞꅉꑟ,ꉸꃐꇲꁵꌠꊼꇅꇎꐯꇎ。ꋚꊪꒉꏿꌠꂿꑘꊿꏭ“ꇖꐘꁥꁵ”ꃄꌬꌠꄉꈁ1226ꂡꂷꇬꑟ。

  ꂿꑘꁡꇤꒃꅐꐥꐨꇎꏦꐪꊛꄉꄻꃪ。2010ꈎ,ꂿꑘꁡꇤꀀꊿꌋꆀꂿꑘꁡꇤꂘꃀꌶꌺ6186ꃪꑼꀆꐒꅝꇬꉮꀋꐥꌠꌤꃆꂥꀘꄉꀐ,ꂿꑘꁡꇤꉮꀋꐥꃅꀆꐒꅝꌠꁊꈴꐨ71.3%ꇬꑟ。ꂿꑘꁡꇤꄆꈄꏍꑟꈜꀊꏀꃅꁦꎆꌠ30ꃪꉻꆏ。ꑣꍔ、ꏱꄻꋂꋌꈜꑴꀋꐥꐨꆏꏡꃏꃅꇬ96%ꌋꆀ81%ꇬꑟ。ꀉꒉꐧꉹꑭꌗꋉꃆ1343ꈚꊋꁈꄏꄉꋈꄻ,ꇩꏤꑭꊂꌗꌬꌠꑱꈐꀊꏀꃅꁦꎆꌠ500ꃪꁯꐥ。ꂿꑘꁡꇤꑲꁘꇤꁘꄺꀱꌠ120ꃪꁯꐥ,ꎖꄎꑞꅉꁻꌐꃅꇫꑟ。ꀊꏀꃅꄻꄉꌠꃪꋂꄙꑣꂿꑘꑱꈐꎊꈬꃷꅉ10ꃪꑟ,ꂿꑘꁡꇤꐯꅑꐮꁠꄉꀰꏢꌠꈄꏍꇫꇬꃅꏓꐛꄉꀐ。 

  (ꌕ)ꎆꏣꐛꉻꋊꐽꌠꏣꀋꑌꃅꄹꎆ

  ꑴꌅꏀꀺꄐꊋꀉꇨꇱ。ꇩꏤꈆꑪꇮꇐꌐꐘ16ꂷꀉꒉꀊꂾꌠꌋꆀ973、863ꈯꌬꎖꄎꌠꁣꀋꐥꃄꌬ,ꎮꉰꇨꑼ、ꇩꏤꇂꂱꈆꑪꈯꄜꑠꈆꑪꋉꃆꀉꒉꀊꂾꌠꋉꐛꄷꀋꁧꎖꎴꌠꇬꈳꅐ,ꍏꈆꑼꌧꇐꏀꀺꋉꃆꌕꊭꌠꀑꐱꃅꃅꌐꀐ,ꃷꁨꄆꁱ、ꊁꋏꌠꐮꈴꈄꏍꑠꇩꏤꋉꃆꈯꄜ50ꂷ、ꇩꏤꋉꃆꎖꉚꑳ32ꂷ、ꎆꏂꑘꇬꄻꄉꌠꇩꏤꎖꉚꑳ56ꂷꉈꑴꀊꂥꃅꋊꑴꏢꒌꅐꑊꀻ、ꄉꈁꀉꒉꏓꋧꄆꈜ、ꁥꑟꈜꃏꏸꑠꀉꒉꀊꂾꌠꐘꑘꋈꄻꌠꁣꀋꃅꄹꎆ。ꃏꏸꀉꒉꉹꌠꎥꃪꄻꑣꌠꆹꐨꀊꏀꌠꊌꅝꀐ。ꇩꏤꊐꌠꎆꏂꑘꇮꇐꈯꄜ93ꁯꏚꍆꄉ,ꇩꏤꏀꀺꉹꌠꎖꉚꅉꎆꏂꑘ550ꁯꇬꑟ,ꏀꀺꉹꌠꎖꉚꅉꇓꈓ45ꂷ。ꑴꌅꃅꎥꃪꁧꀿꎼꇁꌠꑘꅐꐨꀊꂥꌠꌗꏢꏸ“ꄟꉸꋍꉸ”ꌗꏢꐳꐨꆏꐂꋧꃅꀨꇬꉆꎍ。

  ꇮꇐꀊꂥꌠꅐꑘꀻꎆꌠꇤꐳ。ꋋꈓꌠꇮꇐꀊꂥꄺꑣꑘꁦꎆꁌꐨ16.6%ꉀꎆ,ꉐꊮꌺ8.9ꂷꉀꐕ。ꏓꐛꄆꈜ、ꄆꌅꑼꏧ、ꐭꉹꌗꏢꏸꉁꈾ、ꑴꄐꅇꈴꇇꌌꏸꑠꇮꇐꀊꂥꅐꇐꒃꅐꃷꁨꐯꀋꌡꃅ57.4%、30.1%、35%ꌋꆀ46.4%ꉀꎆ;ꆓꐘꃷꄻꊌꐨ1.3ꃪꂡꂷ,30%ꉀꎆ。ꇮꇐꃷꎏꐮꆦꃷꁨ3000ꂡꂷꂵꅐ。ꇤꐳꃅꄐꇐꏤꁈꐨꐥꌠꏀꄓꅐꑘꉘꉚꌋꆀꀻꎆꌠꐰꏤꄉꌌꄜꃑꃄꌬ,ꐛꏀꍏꒀꁬꋌꑠꇮꇐꀊꂥꅐꑘꈴꌐꐘ7ꐘꏣꀋꑌꃅꄹꎆ,ꇩꏤꇮꇐꀊꂥꅐꑘꅉꁍ18ꈚꀊꏀꃅꋈꄻꄉꀐ,ꑘꀺꎆꇱꎆꀨ13ꐘꄻꐛꄉꀐ。

  ꇮꑘꐛꉻꋊꐽꌠꊌꐨꀊꏀꃅꐥꀐ。ꀨꎍꉹꑘꋊꐽꄖꄑꍄꑐꄐꎖꌠꀒꁨꋍꁘꃅꃄꌬ,ꀨꎍꅐꑘꄖꄑꍄꑐꌋꆀꇮꇐꄺꑣꌐꐘꎆꀨ200ꂡꁆꄻꄉ,ꇮꇐꄺꑣꐘꑘ5051ꐘꏭꊋꁈꄐꀐ。ꎴꇤꎞꀀꌠꁣꀋꐥꃅꃅꌐ,ꉢꇤꌋꆀꁁꇤꏓꇱꊌꐨꃶꐚꐨꐥꀐ。ꇤꐳꃅꆅꉚꆄꄻꁬꋌꉹꑘꐛꉻꋊꐽꌠꏭꄐꇺꐨꐥꌠꐥꐨꄜꃑꄉꌌꃄꌬ。ꅐꊋꊁꊰꌠꇤꇧꎭꌠꂿꃆꐊꑷꃅꃅꌐ。ꄔꄆ、ꇤꏸ、ꎸꏸ、ꇓꃀ、ꐽꀻꀧꆀ、ꄯꒉꄻꑠꉹꑘꅐꊋꊁꊰꌠꐯꀋꌡꃅ1210ꃪꐂꊅ、931ꃪꄓ、4000ꃪꄓ、11619ꃪꄓ、1105ꃪꊐꈄꀉꒉꌠꌋꆀ472ꃪꄓꇤꇧꎭ,ꎖꄎꑞꅉꁻꌐꄩ210ꃪꐂꊅ、331ꃪꄓ、1500ꃪꄓ、6619ꃪꄓ、505ꃪꊐꈄꀉꒉꌠꌋꆀ419ꃪꄓꐂ。

  ꁧꃤꃅꑘꎍꐽꃅꀻꎆ。ꁧꃤꃅꑘꏓꇱꄺꀱꎖꉚꅉꇬꊎꃄꇰꀐ,ꁧꃤꃅꑘꀻꎆꌠꌌꌬꄉꎆꀨꄐꏁ,ꀨꎍꁁꏯꌋꆀꊋꁧꊨꊭꇤꐳꃅꀻꎆꌠꊋꁈꄏ,ꊋꏏꁧꃤꃅꑘꀻꎆꌠꉜꐨꄜꃑꃄꌬꀐ。2010ꈎ,ꁧꃤꃅꑘꃅꅍꊌꌠꊻꂷꆏꃅꅍꊌꏓꇱꊻꂷꇬꍆꐪꆏ34.8%ꇬꑟ,ꁧꃤꃅꑘꁦꎆꁌꐨꆏꇩꈐꒃꅐꈁꊌꁌꐨꍆꐪꆏ43%ꑟ。

  ꅉꃀꉁꈾꌋꆀꅉꃀꅐꑘꏦꀧꄐꊋꉀꐕ。ꇩꏤꑭꊂꎸꈜꀰꏢꑘꆏꈉ9.1ꃪꉻꆏ,4986ꉻꆏꁦꎆ;ꄇꈜꐕꍯꈴꈁꉬꆏꈉ398ꃪꉻꆏ,10.4ꃪꉻꆏꁦꎆ;ꅔꈐꒊꃀꀊꂥꊐꌠꇉꈴꆏꈉ1ꃪꉻꆏ,500ꉻꆏꁦꎆ,ꎿꋮꈴꀸꒉꀊꂥꇉꄈꅉ1774ꂷ,125ꂷꀊꏀꃅꁦꎆ;ꉹꁌꌬꎞꎭꃏꏸꐛꅉꃏꏸꈴꉆꌠ175ꂷ,ꀊꏀꃅ9ꂷꁦꎆ。ꁨꑟꈜꀊꎴꐨ995ꃪꉻꆏ,166ꉻꆏꁦꎆ;ꐮꈄꏍꐳꈴꐯꊛꅉ1.88ꂡꂷ,4924ꃪꂷꁦꎆ。ꊋꀦꀨꄉꌠꐘꑘ、ꊋꀦꐛꅉꌋꆀꊭꊎꉁꈾꋈꄻꌠꌌꊋꀥꇱꀐ。ꊖꌋꀀꅉꀉꒉꉹꌠ13ꂷꇬ11ꂷꅐꐨꆏꂡꄓꇬꑟ,ꁦꎴꊋꀦꐘꑘꈨꋈꄻꌊꅐꐨꅐꎻ,ꇓꋌꊭꊎꐘꑘꑍꊭꊬꌠꐳꃅꋈꄻ,ꁮꐚꏮꄆꄔꁭꅐꏮꎭꌠꋉꃆꒉꀑ、ꈯꄔ、ꒈꂪꈴꈜꈁꉬꌞꄻꄐꊋ7800ꃪꐂꊅꄩꐂ。ꋍꈓꌠꊖꌋꅐꐨꃷꁨ32.4ꂡꄓ,8.9%ꉀꎆ;ꇓꋌꅐꐨꃷꁨ2.03ꂡꄓ,7.1%ꉀꎆ;ꋧꐛꐞꌗꅐꐨꃷꁨ967.6ꂡꆀꃓꂰ,13.5%ꉀꎆ;ꄆꃑꃷꁨ42065ꂡꐂꊅꄮꈉꑟ,13.2%ꉀꎆ。

  ꃄꁕꀻꎆꌠꋮꄮꐨꀉꇨꇁ。ꃄꁕꀻꎆꌠꈁꉬꏓꄜꄐꇐꏤꁈꆏꅼꇬꉜꄉꄹꎆ,ꇩꏤꑭꊂꀨꄜꄐꊋꅉꄐꎖꌠꄛꇰꄉꃄꌬ。ꃹꅼꃅꁮꐚꁁꏯꀉꒉꃅꀖꁉꌠꄐꇐꏤꁈꉜꐨꀉꑌꌠꁣꀋꐥꃅꄻꅐꇁꄉꃄꌬ,ꑭꊗ、ꑟꏦꐱꐂꏿꃅꀻꎆꌠꌋꆀꀊꉗꀊꎴꃅꋬꂻꏱꄻꌠꄹꎆꌠꉉꐨ,ꉈꑴꐳꃅꌧꍧ、ꒊꆈ、ꇤꌡ、ꏾꉰꌜꇖꂷꌠꀒꋤꃅꈋꐳꃅꀻꎆꌠꉉꐨꄛꇰꄉꃄꌬ,ꍬꏿꒊꃀꑍꂡꌠꀊꏀꐛꅉꈌꁧꄉꀞꄻꀐ。ꀊꏀꃅꋈꄻꌠꁮꐚꁁꏯꀉꒉꃅꀖꁉꌠꀨꄉꌠꋉꃆ23ꐘꃅꇰ,ꎆꊐꈁꉬꄉꈁ6822ꂡꂷꑟ。ꑛꌋꈤꃅꈋꇮꑘꐛꉻꃪꈴꊐꐕꌠꌋꆀꐛꏀꁧꃤꃅꀻꎆꊋꁈꄏꌠꊋꇨꇱ,ꑛꌋꈤꊋꁈꄏꄉꐛꏀꂿꑘꋈꄻꌠꄐꇺꉉꐨꄹꏦꄻꅐꇁ,ꅐꀦꉹꌠꇓꈓꊛꄉꀻꎆꌠꏱꁈꉻꑫꀒꁨꋍꁘꃅꄻꐛꒆ。ꈯꄔꃅꈋꉀꄓꄉꊥꎆꄐꎖꌠꐊꑷꃅꃅꇫꑟ,“ꌕꅉꁍ、ꋍꏍꈌ”ꋈꄻꑭꁘꐳꇰ,ꈯꄔꃅꈋꇓꈓꈧꌠꊥꎆꄉꀻꎆꌠꄐꇺꉉꐨꌋꆀꊆꏦꇓꈓꈧꌠꊪꊛꅐꑘꆹꏮꌡꀠꐛꅉꄐꎖꌠꄻꅐꇁ,ꃶꉴꇓꈓꐛꅉꈧꌠ、ꍤꍗꄤꇓꈓꐛꅉꈧꌠ、ꍏꑼꇓꈓꐛꅉꈧꌠ、ꀤꑸꃛꎿꒆꉻꎆꏣꐛꅉ、ꄠꑼꇓꈓꐛꅉꁨꁻꏃꈻꂿꄐꀒꁨꋍꁘꃅꀉꇨꇁ。ꈯꄔꁮꐚꃅꈋꊪꊛꅐꑘꆹꏮꌤꃅꌠꊌꐨꀊꏀꃅꊌꅜ。ꁭꅐꃅꈋꅐꑘꐛꉻꊐꐕꌠꌋꆀꑴꌅꏀꀺꌠꏣꀋꑌꃅꄹꎆ,ꎸꍔꑠꎆꏣꐋꀋꌡꅉ、ꎮꉰꁌꄏꐛꅉꀊꏀꌠ、ꄟꏢꀘꉰꐛꅉꀊꏀꄺꀱꁉꃑꑭꁘꐳꃅꃄꇰ,ꍤꏦꌕꎏꍏꃅꈋꀻꎆꌠꄐꎖꄛꇰꃄꌬꌠꊥꎆ,ꇩꏤꑭꊂꎿꃀꎆꏣꀻꎆꃅꉚꅉꇬꄉꃄꇰꀐ。ꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷꌋꆀꌢꎭꃅꄷꊋꁈꄏꐨꀒꁨꋍꁘꃅꊋꇨꇱ。2010ꈎ,ꍏꑷꆏꑘꊋꌌꎝꎃꊐꎆꇱꌠ55ꂡꂷꌋꆀꀉꁁꈚꄉꌢꎭꄏꐓꎞꄻꃅꉚꎆꃀ20ꂡꂷꄐꏤꄉ,ꀉꁁꈚꄉꌢꎭꄏꐓꎞꀀꁧꌠꊻꂷ87ꃪꑻꐥ,ꄐꎖꑞꅉꁻꌐ11ꃪꑻꄩꐂ,ꉈꑴꆏꂿꑘꁡꇤꌢꎭꊻꂷ909ꎖꃪꑻꎭꇔꇧꎭ,ꀑꐱꃅꎖꄎꑞꅉꁻꌐꃅꌐꀐ。

  (ꇖ)ꊋꏏꋦꈭꀧꌋꃅꌠꌋꆀꃄꀑꃅꌗꐛꐈꌠꊌꐨꈲꁧꄇꇖꀕ

  ꊋꏏꍍꋊꑞꅉꁻꌐꀑꐱꃅꃅꌐ。2010ꈎ,ꌌꊋꏏꍍꋊꁆꏯꌬꌠꍏꑷꄐꌗꈐꎆꇱꌠ333ꂡꂷ,ꍏꑷꏱꎆꌐꐘꎆ518ꂡꂷ,ꂱꑱꅉꃅꄉꇬꂴꈓꌠꇬ1.4ꁧꌋꆀ73%ꉀꎆ。ꏣꀋꑌꃅꊋꏏꋉꃆꀨꄉꌠꊰꐘꄹꎆ,ꊋꏏꄐꊋ3310ꃪꄓꎕꏦꊖꌋꄻꐛ。ꊋꒉꃅꊋꏏꅐꇐꉹꁌꈲꐥꄎꌠꋉꃆꃄꌬ,ꈲꁧꀊꂥꌠꊋꏏꃅꌗꋊꄻꌠ3000ꃪꇷꀋꇈꄹꌬ、ꊋꏏꐕꍯ100ꎖꃪꇷ、ꈲꁧꀊꂥꌠꁨꄔꅐꇐ1.6ꂡꂷꄹꌬ。ꊋꀦꀊꏀꌠꐕꍯꌡꀠꄹꌬꃅꉚꌠꇬꊎꃄꌬꇰ。ꇩꏤ“ꇓꈓꇑꅏꅉ”ꌡꀠꐛꅉꋈꄻꌠꏣꀋꑌꃅꄹꎆ。ꇓꈓꍍꒉꑭꍷꀖꑘꂥꀘꉁꈾꋈꄻꌠꊋꁈꄏ,ꋋꈓꃅꇬꇓꈓꍍꒉꋍꑍꌠꂥꀘꄐꊋ1900ꃪꆀꃓꂰ、ꇓꈓꐥꐨꑭꍷꀖꑘꋍꑍꂥꀘꄐꊋ6.8ꃪꄓꀊꏀꃅꁦꎆꄎ;ꇓꈓꍍꒉꂥꀘꐨ、ꇓꈓꐥꐨꑭꍷꀖꑘꉮꀋꐥꂥꀘꐨꂱꑱꅉꄉꇬ76.9%ꌋꆀ72.5%ꇬꑟ,ꂴꈓꌠꄩꉐꊮꌺ1.6ꂷꌋꆀ1.2ꂷꉀꐕ。2010ꈎ,ꌗꂓꇩꈐꒃꅐꈁꉬꁌꐨꊋꀦꌬꈧꌠ4.01%ꀁꋌꒊ,ꑍꀑꐊꑘ、ꐈꇐꀑꈉꃷꁨꋊꃑꃷꁨꂱꑱꅉꄉꇬ1.32%ꌋꆀ3.08%ꀁꋌꊰ;ꃪꂷꇮꑘꉀꎆꁌꐨꒉꌬꃷꁨ9.6%ꀁꋌꒊ,ꇮꑘꐥꊈꀜꋊꏓꇱꌬꈧꐨꉐꊮꌺ2ꂷꉀꐕ。ꋌꃀꉬꈎꌠ,ꌗꂓꇩꈐꒃꅐꈁꉬꁌꐨꊋꀦꌬꈧꏓꌗꇬ19.06%ꀁꋌꊰ,ꑍꀑꐊꑘꌋꆀꐈꇐꀑꈉꃷꁨꋊꃑꃷꁨꂱꑱꅉꄉꇬ14.29%ꌋꆀ12.45%ꀁꋌꊰ,ꃪꂷꇮꑘꉀꎆꁌꐨꒉꌬꃷꁨ36.7%ꀁꋌꊰ,“ꊯꊪꉬ”ꄐꎖꑞꅉꁻꌐꀑꐱꅀꃷꁨꄩꐂꄉꃅꌐ。

  ꒆꉻꋦꈭꀧꌋꃅꌠꑭꁘꀊꏀꃅꐕꎼꒉ。ꋠꃅꀱꌩꊪ、ꆫꁍꀱꏜꊪꌠꊌꐨꀒꁨꋍꁘꃅꄻꈫꈈ,ꋧꐛꌩꏪꅐꀦꀧꌋꃅꋉꃆꋍꊭꊬꌠꋉꃆꐊꑷꃅꃅꌐ,ꍤꏦꉎꐕꌠ、ꉸꉼꉎꐧꐕꌠꐊꑷꃅꋧꐛꌩꏪꃷꇐꃅꄉꇼꄻꀋꎽꀐ,ꒆꇐꀉꑌꑵꃅꐙꌠꌌꀧꌋꃅꌋꆀꀱꐛꅉꐛꇁꎻ。2010ꈎ,ꇩꏤꑭꊂꌩꊪꃅꊂ592ꃪꉻꐊꀊꏀꃅꁦꎆ,ꅔꏂꀱꏜꊪꌠ666.7ꃪꉻꐊꃄꌬ,ꏓꇱꄉꃅꐡꊖꑳꏱꄻꃅꊂ4.2ꃪꀻꃓꉻꆏꐥ。ꇩꏤꑭꊂꒉꅐꀦꏓꇱꄐꎖꄛꇰꄉꃄꌬ,“ꒊꃀꌕꂡꎿꌕꂷ”、ꉸꉼꐧꉎꐕꌠ、ꌒꑤꒉꇉꊐꅉꌋꆀꉎꐕꌠ、ꀧꉰ、ꌕꉷꏦ、ꄉꏦꈈꒉꇉꊐꅉꌋꆀꉎꐕꌠꒉꈳꁕꀨꄉꍍꆀꏱꄻꌠꏣꀋꑌꃅꄹꎆ,ꄠꃛꈳꁕꒉꋦꈭꏓꇱꏱꄻꌠꈁꉬꏓꄜꄐꉻꐊꑷꃅꃄꌬ。 

  ꃄꀑꃅꌗꐛꐈꊝꌠꌤꃅꌠꀒꁨꋍꁘꃅꊋꀥꇱ。ꇩꏤꄐꉻꆏꈲꁧꐥꃅꃄꌬ,ꌋꀁꑌꇮꇐꏀꀺꌠꏣꀋꑌꃅꄹꎆ,ꌋꀁꑌꌜꐎꌋꆀꌋꀁꑌꇓꈓꃅꉚꅉꌤꃅꌠꁣꀋꐥꃅꃄꇰ。ꊋꐛꃅꐊꏑꇩꃄꀑꃅꌗꐛꐈꄟꏢꃀꈿꄉꅇꏤꉐꏤꌠꀞꄻ,ꏣꀋꑌꃅꈁꐥꁁꏯꃅꇩꏹꐯꎻꈴꌋꆀꇷꃅꍔꆙꄉꃅꌠꌋꆀꇫꐊꈽ。

  (ꉬ)ꄺꀱꁉꃑꌠꀒꁨꋍꁘꃅꃹꅼ

  ꀨꄉꁁꏯꌋꆀꀋꉬꀋꉆꊬꌠꇬꄺꀱꌠꂵꅐꐨꀊꏀꃅꐥ。ꂿꑘꁡꇤꄺꀱꁁꏯ,ꋍꉻꌩꏪꌅꐨꄹꏦꄺꀱꌠꐥꀹꐥꃅꃄꇰ,80%ꈋꉐꋍꉻꌩꏪꌅꐨꏤꄻꅷꑱꁯꇬꑟ,ꇩꁨꌠꌩꊪꇓꊪꅉꄺꀱꃅꉚꌠ、ꂿꑘꉐꆈꇽꅉꏲꂠꏦꉻꄺꀱꌠꎍꐽꃅꄹꎆ。ꎆꏂꑘꄺꀱꁁꏯ、ꍏꑷꎆꏂꑘꌋꆀꋍꇂꃴꎆꏂꑘꏦꉻꄺꀱꑟꐨ70%ꈋꉐꐂ,ꄏꌧꉼꐛꏦꈴꃅꉚꌠꍔꒉꌊ32ꁯꑟ。ꄆꊋ、ꒀꍔ、ꏃꍔꄉꉻꌬꈧꌤꑘꄺꀱꑠꊌꐨꀊꏀꃅꐥ。ꉻꁨꏦꀋꉬꌠꎆꏣꌋꆀꎆꏂꑘꐧꐭꀻꎆꌠꋬꈭꏱꁈꀉꑌꐘꊥꎆꌊꄛꇰꃄꌬ。ꏱꎆꇗꏸꏦꉻꄺꀱꁁꏯ,ꌜ27ꂷꇬꑤ970ꂷꆏꌜꎂꏲꑤꏱꎆꏲꂠꃄꄟꄺꀱꌠꃄꌬꀐ,ꇓꋌꐞꌗꅐꀦꇗꏸꄺꀱꑠꆏꁮꐚꁁꏯꄉꃅꉚ,ꈏꉈꎆꏂꑘꌋꆀꊨꏦꏓꋍꃱꃅꄉꇓꈓꀧꌋꃅꋈꄻꇗꏸꌋꆀꂘꑘꌫꁌꁥꇱꄹꏦꏓꄻꐯꇯ。ꎆꒉꎆꇁꏦꉻꄺꀱꁁꏯꆏ,ꇩꏤꀖꁉꑴꉴ、ꏱꁈꃅꐙꌠꎆꒉꎆꇁꏱꉻ、ꁨꎆꏲꂠꇬꌦꄺꀱꌠꎍꐽꃅꄹꎆ,ꍏꇩꂿꑘꑴꉴꊋꐛꃅꌌꃷꎏꇬꃹꆹꎻ,ꇴꍆꏤꁨꎊꈬꁣꀋꐥꃅꄹꌬꅐꇁ,ꎆꏂꑘꎝꁌꊫꌐꎍꐽꃅꀻꎆ,ꏓꂱꀙꀠꐨꏦꉻꄺꀱꄻꐛꌠꐪꊛꄉꄹꎆ,ꇩꉈꐂꄉꏓꂱꀙꌊꃼꇇꃅꌠꌗꄻꅉꍔꒉ。ꅐꀦꉹꌠꅐꇐꁌꏤꄺꀱꁁꏯ,ꇓꈓꒉꇲꁵꎆꀨꄇꄜꋊꄉꃅꉚꅉ、ꂿꑘꒉꁌꏤꏓꇱꄺꀱꃅꉚꅉꁣꀋꐥꃅꃄꇰ,ꊋꀦꌬꈧꏤꄉꃷꁨꄩꐂꌠꅐꇐꆏꅓꁵꄆꁌꏤꃄꌬ,ꂿꑘꌩꑘꒆꇐꎊꈬꄆꃑꈄꏍꅉꊐꄉꄆꁌꏮꌠꏓꄻꐯꇯꄉꃅ。ꐧꋦꌤꑘꄺꀱꁁꏯ,ꆅꉚꁬꋌꁦꎴꏦꉻꀨꄉꌠꉬꐘꄺꀱꌠꃹꅼꃅꄹꎆꄉꃅ,ꇩꏤꁬꋌꆰꋌꀑꐱꄹꏦ60%ꑟꌠꍔꃚꀞꅉꂫꊐꌠꆅꉚꆄꄻꅉꏲꉻꁳꃄꌬꎻ,ꉻꀞꆅꉚꅉꄺꀱꌠꇩꏤꃅꉚꅉꇓꈓ16ꂷꇬꌋꆀꌜꊐꌠꃅꉚꅉ37ꂷꇬꄉꏣꀋꑌꃅꎹꎥꄷꀋꁧꀋꆏꃅꃹꅼꃅꃅ,ꀒꁨꋍꁘꃅꐧꋦꎆꀨꊋꊡꌋꆀꄐꏁꌊꄉꆅꉚꆄꄻꏱꉻꀞꄻꌠꉉꐨꄻꅐꇁ。ꇩꏤꂘꑘꏦꉻꄺꀱꃅꉚꌠꐊꑷꃅꃄꇰ,ꋭꑘꂘꑘꌶꅉꂘꃀꊌꐨꈲꁧꃄꎆꄺꀱꌠꃹꅼꃅꃄꌬ。ꁱꀕꏦꉻꄺꀱꌠꐥꀹꐥꃅꄹꎆ,ꇩꁨꁱꀕꋽꇐꌶꅉꈧꌠꏮꌊꎆꏂꑘꃅꌠꏦꉻꄺꀱꌠꌜꊐꌠꃅꉚꅉꌋꆀꀰꏢꉹꌠꄯꒉꅏꅉꌤꃅꅉꆹꏮꌊꎆꏂꑘꃅꌠꏦꉻꄺꀱꌠꀑꐱꃅꃅꌐ。ꇩꏤꑭꊂꏓꇱꋬꈭꄺꀱꃅꉚꅉꏣꀋꑌꌠꊌꐨꈲꁧꊌꅜꀐ。

  ꁉꃑꉹꌠꎆꏣꀻꎆꑟꐨꀒꁨꋍꁘꃅꉀꐕ。ꃷꎏꀉꑌꑵꃅꐙꌠꄐꇐꏤꁈꌋꆀꊇꁧꌊꊋꐛꅜꄎꌠꄐꇐꏤꁈꃄꌬꌠꌭꈬ,ꊋꀥꇱꄉ“ꑍꀊꂥꋍꅐꀦ”ꅐꇐꉇꅐꌠꋏꆸ,ꇩꈐꌬꇐ、ꊐꄎꀊꂥꌠꅐꇐ、ꇮꇐꂴꅑꌠꌋꆀꌬꅍꀋꉬꀋꉆꌬꀋꇎꌠꈏꃹꇁꎻꌠꁦꎆꎻ,ꃼꇇꐮꆽꀋꏣꐨꄻꌊꃪꎻ。ꋋꈓꃅꇬꉇꉻꃼꇇꃅꌠꈏꃹꉇꅐꈁꉬꃷꁨ29727.6ꂡꂰꑼꑟ,34.7%ꉀꎆ,ꄚꈐꏭ,ꉇꅐꌠ31.3%ꉀꎆ,ꈏꃹꌠ38.7%ꉀꎆ;ꐮꍣꐨꂴꈓꌠꌡꉚꇬ6.4%ꀁꋌꒊ。ꀒꁨꋍꁘꃅꉇꎆꌬꈧꋒꌤꃅꌠꉉꐨꄻꅐꇁ,ꉇꎆꄐꏁꌊꄺꑣꑘꀉꇨꏠꌠ、ꇮꇐꀊꂥꌠꅐꑘ、ꐛꏀꁧꃤꃅꑘ、ꊋꀦꀊꏀꌠ、ꊋꏏꋦꈭꀧꌋꃅꅐꑘꌋꆀꈯꄔꁮꐚꃅꈋꇬꊐꎻ。ꋋꈓꃅꇬꉇꉻꃼꇇꎂꃅꎆꇱ(ꑴꉴ、ꎆꊫꌐ、ꄜꏂꀧꅉꄚꀋꐊ)ꌬꈧꌠ1057.4ꂡꂰꑼꑟ,17.4%ꉀꎆ。ꉇꄅꇩꏤꎆꉛꌊꌬꌠ205ꂡꂰꑼꑟ,57%ꉀꎆ。ꏣꀋꑌꃅ“ꉇꅐꁧ”ꄐꇐꏤꁈꃄꌬ,ꇩꉈꄉꎆꇱꌠꐘꑘꑠꈨꊌꐨꀊꏀꃅꊌꅜ。ꋋꈓꃅꇬꎆꒉꎆꇁꉹꌠꀋꉬꌠꉈꏭꄉꎂꃅꎆꇱꌠ590ꂡꂰꑼꑟ,36.3%ꉀꎆ。ꉇꉻꏭꋉꃆꊪꀧꌠꀰꏢꃷꁨ922ꂡꂰꑼꃅꌐ,18.7%ꉀꎆ。

  (ꃘ)ꏓꂱꐥꐨꌤꃅꏦꀧꌋꆀꄻꃪꌠꐊꑷꃅꊋꀥꇱ

  ꇓꈓꇓꉈꀀꊿꊌꐨꐪꊛꄉꁦꎆ。ꇓꈓꏦꎫꀀꊿꊾꂷꐽꏡꃅꇬꊌꐨꌫꄻꉆꌠꌋꆀꂿꑘꁡꇤꀀꊿꊾꂷꐽꏡꃅꇬꀊꌃꊌꐨꆏꂱꑱꅉꃅ19109ꂷꌋꆀ5919ꂷꑟ,1934ꂷꌋꆀ766ꂷꁦꎆ,ꁌꏤꐊꊈꈧꌠꇤꇧꎭꈭꐨ,ꂴꈓꌠꌡꉚꇬꃶꐚꃅꄉꇬ7.8%ꌋꆀ10.9%ꉀꎆ,ꂴꄐꏤꄉꌠꑞꅉꁻꌐꉐꊮꌺ1.8ꂷꌋꆀ4.9ꂷꄩꐂ。ꋋꆹ1998ꈓꅑꅸꇁꌠꇫꇬꃢꌠꂿꑘꊿꊌꐨꉀꎆꌠꇓꈓꀀꊿꏭꀋꋌꃅꐳ。

  ꃅꑘꊌꌠꎍꐽꃅꉀꎆ。ꏣꀋꑌꃅꃅꑘꊌꏱꁈꃄꌬꌠꊋꇨꇱ,ꅉꂫꊐꌠꄉꉻꃅꑘꊌꌠꐧꋦꏦꀧꁧꃤꃅꉁꈾꋈꄻꌠꊋꀥꇱ,ꈯꄔꁮꐚꃅꈋꆏꑤꊐꌠꁧꃤꃅꈯꄜ162ꂷꌋꆀꑣꊐꌠꁧꃤꃅꈯꄜ610ꂷꐥ。ꋋꈓꃅꇬꇓꈓꏦꎫꃅꑘꊌꀊꏀꃅꁦꎆꌠ1168ꃪꑼꐥꄉ,ꂴꄐꏤꄉꌠꑞꅉꁻꌐ268ꃪꑻꄩꐂ;ꇓꈓꏦꎫꃅꑘꀋꊌꐨꁰꄻꄉꌠ4.1%ꑟ,ꂴꄐꏤꄉꌠꑞꅉꁻꌐꃅꇫꑟ。

  ꐧꋦꏦꀧꑟꐨꀒꁨꋍꁘꃅꉀꐕ。ꅑ2010ꈎꈎꂫꑟꇬ,ꇓꈓꏦꎫꀑꐱꃅꃀꌠꀨꎹꄜꏂꀧꊿꃷꁨ25673ꃪꑼꑟ,ꎖꄎꑞꅉꁻꌐ1673ꃪꑼꄩꐂ;ꂿꑘꁡꇤꀊꏀꉹꌠꐧꋦꃀꌠꀨꎹꄜꏂꀧꃅꉚꅉꍔꒉꌊ24%ꌠꑤꇬꑟ。ꇓꈓꏦꎫꎆꏂꑘꌤꃅꇮꃅꊿꃀꌠꀨꎹꄜꏂꀧ、ꏮꐺꌠꃅꑘꊌꊿꅉꀨꆅꉚꆄꄻꏦꀧꃆꂮꆹꏮꊛꄉꃅꌠꏡꁈꁣꀋꐥꃅꃄꌬ。ꇓꈓꏦꎫꅉꀨꆅꉚꆄꄻꄜꏂꀧꅉꐊꌠꊿ43206ꃪꑻꐥ,ꂴꈓꌠꌡꉚꇬ3059ꃪꑼꁦꎆ;ꂿꑘꁡꇤꀊꏀꉹꌠꇷꃅꆅꉚꆄꄻꅉꐊꈽꌠꊿ8.35ꂡꂷꑟ,ꐊꈽꐨ96.3%ꇬꑟ,ꂴꈓꌠꌡꉚꇬꍔꒈꌊꉐꊮꌺ2.1ꂷꑟ。ꇓꈓꇓꉈꐥꐨꀁꂥꐯꀁꂥꏦꀧ、ꃅꑘꀋꊌꄜꏂꀧ、ꎆꏂꑘꎞꆏꊿꅉꀨꃀꌠꀨꎹꎆ、ꀨꇬꄉꇇꀨꈲꏿꌠꌋꆀꐥꐨꎆꁥꁵ、ꑱꈐꎆꏣꊋꋠꌠꌶꌺꏭꎆꁥꁵꑠꏦꀧꌋꆀꇇꀨꎕꏦꐕꀊꂥꀐ。ꉮꌸꊂꋈꀱꄺꀱꌤꃅꁣꀋꐥ,ꊉꍧꃄꇙꉮꌸꋈꀱꄺꀱꌠꌕꈎꂿꃆꑍꈓꆏꀑꐱꃅꀕꌐꌠꑞꅉꁻꌐꃅꇫꑟ,ꒄꌡ、ꍏꐏꃄꇙꉮꌸꊂꋈꀱꄺꀱꌠꐊꑷꃅꃄꇰ。

  ꏦꀧꐨꃅꐙꌠꀀꌒꋉꃆꄉꈁꀉꒉꃅꄹꎆ。ꀒꁨꋍꁘꃅꈯꄔꁮꐚꃅꄷꀊꏀꃅꋉꌠꁌꆓꊤꀀꑳꌋꆀꂿꑘꁡꇤꑲꎓꇣꐡꄺꂡꇬꍏꑷꇇꀨꎕꏦꉀꐕꀐ,ꇤꐳꃅꋍꏅꊣꄻꀀꑳꀻꎆ,ꄷꀋꁧꋋꈨꏓꌊꏦꀧꐨꐥꌠꀀꌒꋉꃆꋈꄻꄐꎖꇬꇱ。2010ꈎ,ꇩꏤꑭꊂꏦꀧꐨꀀꑳꌋꆀꑲꆹꇣꆹꅉꋈꀱꄺꀱꃄꇰꌠ590ꃪꂷ,ꄐꎖꑞꅉꁻꌐꄩ10ꃪꂷꐂ,ꄚꈐꏭ,ꏦꀧꐨꀀꑳ322ꃪꂷ,ꑲꆹꇣꆹꐛꅉ268ꃪꁯꄺꀱ;ꋋꈓꌠꀑꐱꃅ370ꂷꋉꐛ。

  ꐧꋦꋈꄻꌠꊋꀥꇱ。ꇩꏤꐧꀠꀊꎴꑠꇬꂘꑘꄺꀱꌋꆀꀻꎆꄐꎖꐱꀨ、ꌧꊿꀻꎆꄐꎖꐱꀨꄜꃑꃄꌬ。ꂿꑘꁡꇤꐧꐭꌶꅉꑲꇤ1325ꃪꐽꎏꂰꄺꀱꀐ,ꐧꊐꌠꃅꑘꌶꅉꑳꇤ212ꃪꐽꎏꂰꋈꄻ。ꇩꏤꑭꊂ“ꑍꅉꃀ”ꊻꂷꉱꑷꐨ100%ꇬꑟ,ꐧꌷꊬꌠꌕꈎꌠꊏꌷꐨꆏ94%;ꐧꌷꀊꂥꊐꌠꌷꇁꐨꆏ82.5%ꇬꑟ,ꉐꊮꌺ3.3ꂷꉀꎆ;ꂘꇐꀊꂥꊐꌠꌷꇁꐨꆏ26.5%,ꎃꐚꀪꍋꈆꌶꌺ661.8ꃪꎹ,ꎥꃪꌶꌺ53.8ꃪꑼꎹ。ꆅꉚꆄꄻꁦꎴꁧꃤꃅꉻꑫꋈꄻꌠꑌꁣꀋꐥ。ꑤꊐꌠꆅꉚꅉ891ꈚ、ꑣꍔꆅꉚꅉ1620ꈚ、ꋦꁕꁦꎴꁧꃤꃅꈯꄜ1228ꈚꌋꆀꉌꊈꆅꁦꎴꄴꏮꏲꉻ116ꂷꑠꈨꊋꁈꄏꄉꋈꄻꌋꆀꄺꂡꀱꀐ。ꊻꂷꋌꐛꉀꎆꐨ5‰ꅶꍯꑟ,ꎖꄎꑞꅉꁻꌐꃅꇫꑟꀐ,ꈎꂫꏓꇱꊻꂷ13.41ꂡꑼꑟ。ꅇꁊꄆꁱꋂꈀꐥꌠꃅꐥꌠꋉꃆ、ꑣꍔꏓꇱꁱꀕꍉꋈꄻ、ꑝꑟꋉꃆꌋꆀꁱꀕꅐꀦꈨꌗꇷꌬꋉꃆꎍꐽꃅꄹꎆ。ꇩꏤꏂꀨꄉꑳ、ꇩꏤꑫꈩꀜꅉꑠꁱꀕꋉꃆꀉꒉꑠꃅꌊꁣꀋꐥ,ꇩꏤꑭꊂꁌꀋꈁꃅꁉꃑꌠꋍꏅꏂꀨꄉꑳ、ꎺꄅꑳꌋꆀꇩꉂꉪꏦꉙꂘꅉ1743ꁯꇬꑟ。ꆫꈩꅉꀋꂿꑘꅉꃀꉁꈾꋈꄻꇨꀥꇱꀐ,ꉰꆆꇩꏹꈩꎿꅔꋈꄻꏣꀋꑌꃅꄹꎆ。ꋧꐈꌷꇐꐧꋦꈆꑪ、ꈨꏀꄯꒉꍑꅐ、ꁱꀕꋽꇐꌤꑘꑠꌄꆣꀻꎆ。ꎮꉰꋧꃅꄉꀦꃀꊋꐛꃅꈿꌐ,ꇩꏤꌋꆀꇩꏹꎀꍹ246ꂷꄚꐊꄉꄉꀦ,ꋋꆹꋧꃅꄉꀦꃀꈿꐩꋊꇬꇫꐊꄉꄉꀦꀉꑌꐯꀉꑌꈭꉬ。ꇨꍏꑸꒀꉼ、ꑸꆐꅑꊿꄜꎟꉼꊋꐛꃅꀞꄻ。ꉹꁌꈯꎟꌤꃅꌠꀊꏀꊭꇬꃹꆹꀐ,ꂿꑘꊿꈯꎟꇭꀧꂄꋉꃆ23ꃪꎖꂷꋉꐛꀐ。ꐧꋦꈲꁧꌤꑘꀻꎆꐳ,ꐧꋦꁧꃤꃅꏲꉻꀀꈤꃷꁨ312.3ꃪꋬꇬꑟ,4.3%ꉀꎆ。

  ꇩꏹꎆꏣꋦꈭꌼꇪꐛꐈꑭꀋꆏ、ꇩꈐꋌꐛꉮꌸꀉꑌꀉꒉꃅꅐꌠꐛꐪꇂꃴꄉ,ꇩꂱꎆꏣꎍꐽꊼꇅꐳꃅꀻꎆꄉ,ꀱꌊꉾꃅꐙꌠꀒꁨꋍꁘꃅꈫꈈ,ꃅꐛꐨꋋꈨꈝꐮꃅꅐꇁꌠꀋꉬ。ꋋꆹꄈꍏꑷꇩꃷꑼꃅꇴꄉꉻꋏꆸ、ꏟꈯꀕꃅꏲꂠꄉꃅꐛꌠꉬ,ꋋꆹꃅꄷꈁꐥꌠꌤꃅꅉꎔꎗꃅꍏꑷꌐꏦꏱꁈꃄꌬ、ꑖꑟꃅꇷꃅ、ꏟꈯꃅꌤꃅꄉꃅꐛꌠꉬ,ꋋꆹꇩꏤꑭꊂꊿꋅꈁꐥꌠꏓꂱꊋꋠꌠꊝꄉꁨꆹ,ꐯꇯꊋꇤꄉꃅꐛꌠꉬ。ꃅꐎꉬꈎꈏꇤꊋꇤꈭꐨ,“ꊯꊪꉬ”ꄐꎖ《ꐱꀨ》ꇬꏤꄉꌠꎆꏣꐧꋦꀻꎆꌐꁧꀋꉬꀋꉆꌠ22ꐘꌠꈐꇬ,ꏢꑲꃅꐙꌠꌐꁧ8ꐘꉬꇮꃅꀕꇫꑟ,ꂴꄐꐨꐥꌠꌐꁧ14ꐘꌠꆏꁧꃤꃅꑘꃅꅍꁵꌠꍆꁧ、ꁧꃤꃅꑘꁦꎆꐨꇩꈐꒃꅐꈁꊌꁌꐨꍆꁧꇬꌋꆀꎥꄻꌫꅐꌠꇩꈐꈁꊌꁌꐨꍆꁧꇬ3ꐘꀉꄂꃅꇬꀋꑟꉈꆏ,ꀉꁁꈧꌠꉬꇮꁣꀋꐥꃅꃅꇫꑟꀐ。

  ꃅꐛꐪꊌꂿꈭꐨ,ꉪꊇꑌꏸꐚꃅꉪꇫꑟꌠꆏ,ꇩꈐꀻꎆꌠꄡꇗꐮꄙꐨꄞꅐꌠꌋꆀꌤꃆꈨꐥꑴꌦ。ꋍꆏꋚꂷꎍꐽꃅꁦꎆꌠꌋꆀꂿꑘꊿꐪꊛꄉꁦꎆꊌꌠꅉꃀꈫꈈꃅꀋꐛ。ꋠꃅ、ꋂꀋꐊꒉꑠꅐꀦꋏꆸꐨꀉꇨꇁ,ꈲꒉꅉꃀꉁꈾꄡꇗꀁꁧ,ꂿꑘꇮꇐꑞꅉꀑꐱꃅꇬꀊꀋꂥ,ꑘꅐꐨꀊꉗꀊꎴꃅꊼꇅꀄꊭ,ꂿꑘꊿꉇꅐꇮꃅꌠꄡꇗꄹꏦꃅꐙꌠꄙꇈꐨꐥ。ꑍꆏꎆꏣꐛꉻꋊꄻꂿꃆꀉꒉ。ꑴꌅꏀꀺꊋꃤꆏꊋꊡꉺꏦꐛꀋꒆ、ꈯꄜꇮꇐꌋꆀꌧꊿꀉꇨꀋꇎꑠꏢꑲꐨꐥ,ꏲꂠꋍꈨꋋꈨꆏꀋꉪꀋꏣꃅꎆꇱ、ꅐꊋꁦꎆꇨꌠꌤꃆꀒꁨꋍꁘꃅꅔꁖꇁ,ꅐꊋꊁꊰꌠꇤꇫꎭꌠꌤꃅꊋꋠꐨꀊꅰꀉꒉꇁ,ꁧꃤꃅꑘꀻꎆꐨꄡꇗꊁꊰꑴꌦ,ꇓꈓꇓꉈꃄꁕꀻꎆꐯꀋꏣ、ꐯꀋꄮꌠꌤꃆꄡꇗꄞꅐ。ꌕꆏꎊꈬꁌꏤꉀꄓꍅꊋꊼꇅꀉꒉ。ꎞꃹꐨꉀꄓꍅꊋꉀꐕ,ꃷꎏꏮꇙꐨꀊꐯꈭꃅꐙ,ꇙꎆꊜꋽꄮꎹꄉꀰꏢꌠꀊꅰꀉꑌꇁ,ꅐꀦ、ꃄꅉ、ꑘꃅꊋꃤꑠꐊꊈꀨꊰꉀꄓꌠꆹꁌꏤꉀꄓꄹꇙꌠꀊꎴꀊꉗꃅꐙꌠꐊꊈꐛ。ꀋꉊꄹꈎꎊꈬꁌꏤꉀꄓꏓꐛꌠꈐꇬ,70%ꅶꍯꆏꋠꇐꁌꏤꉀꄓꄉꇫꅐꇁꄉ,ꇓꈓꇓꉈꀀꊿꈜꀕꇈꊌꐨꐧꀠꀁꂥꌠꑱꈐꐥꐨꍅꊋꀊꅰꀉꒉꇁꀐ。ꇓꈓꀉꒉꐧꀠꃅꐙꌠꄹꁆꑳꇤꃄꅉꅐꑘꆏꁌꏤꀊꂥꇨ,ꀀꊿꃷꎏꇬꈴꄉꀀꑳꌤꃆꇬꊋꋠꐨꄡꇗꊼꇅꀉꒉꑴꌦ。ꇖꆏꅐꀦꋦꈭꏢꑲꀉꇨꈴ。ꊋꀧꅐꀦꃸꌬꈁꉬꃷꁨꊼꇅꀉꒉ、ꉀꎆꊼꇅꐳꃅꐙ,ꍍꆀꎊꈬꀋꉬꀋꉆꌠꍍꃑꃷꁨꀉꒉ。ꊋꏏꋊꃑꈲꎴꉺꏦꄻꀋꐛꑴꌦ,“ꑍꀊꂥ”ꉹꑘꉀꎆꌠꄡꇗꊼꇅꀊꂥ,ꊋꏏꋊꃑꌋꆀꃄꀑꃅꑊꐛꐈꌠꊝꌠꍅꊋꀊꅰꀉꒉꇁ,ꐪꊛꄉꀻꎆꉆꌠꊋꋠꐨꀉꒉꃅꊝꎍ。ꉬꆏꐧꋦꐮꄙꐨꀊꅰꀉꒉꇁ。ꊌꐨꁷꄻ、ꐧꋦꏦꀧ、ꄯꒉꌷ、ꆅꉚꆄꄻꑠꁆꏯꌋꆀꏓꂱꉹꁌꇖꐨꇬꍣꐨꊼꇅꀉꒉꑴꌦ,ꋠꇐꁬꋌꁦꎴ、ꃄꅉꃼꌬꎞꎭ、ꋬꂻꒃꅐꑠꁆꏯꉹꁌꈲꏣꉮꄻꌠꃅꇏꇫꅐꇬꎷ。ꋍꈭꐨ,ꋧꃅꇣꄧꎆꏣꀱꌄꆣꇬꊋꋠꐯꊋꋠ,ꇩꏤꄹꁆꎝꃆꀊꇖ,ꃅꅍꀋꊌꐨꀊꂥꇬꎷ,ꅉꆺꑭꊂꏮꇙꐨꊛꄉꁦꎆꇬꎷ,ꇩꏹꃷꎏꃷꇐꀉꒉꉹꌠꁌꏤꌋꆀꀋꉬꀋꉆꌠꎆꃀꆦꐨꊛꄉꅉꀋꐽꇬꎷ,ꑘꀋꒃꊨꀋꄅꌠꐊꊈꋋꈨꑌꇩꏹꌤꃅꌊꉾꌠꊋꋠꐨꁦꎆꇱꀐ。ꂴꉉꌠꌤꃆꋋꈨꆹ,ꉪꊇꀉꇨꃅꉜꁨꄉ,ꏁꁈꇿꋌꐥꌠꏁꌬꄉ,ꎔꎗꃅꌌꂥꀘꌶ。

  ꑍ、2011ꈎꎆꏣꐧꋦꀻꎆꌠꀑꐱꇖꐨꌋꆀꑞꅉꁻꌐꀋꉬꀋꉆꌠ

  ꎼꈎꎆꏣꐧꋦꀻꎆꌤꃅꌠꆏ,ꐊꑷꃅꄈꅿꃀꀉꒉꊰꏁꃢꌠꌋꆀꊰꏁꈭꌕꃢ、ꇖꃢ、ꉬꃢꐊꈴꃀꈿꉌꊈꃄꌬꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬ,ꎃꊒꃅꇩꈐꇩꉈꃅꒊꃅꇁꀊꏀꃅꐛꐈꌠꐛꐪꀊꏀꌠꌧꐚꄉ,ꈆꑪꃅꀻꎆꌠꌌꀨꄜꃅ,ꇤꐳꃅꎆꏣꀻꎆꄟꆹꏮꌠꌌꑟꀨꃅꄉ,ꏣꀋꑌꃅꐙꌠꏱꎆꏱꁈꌋꆀꎍꐽꌠꎆꃀꏱꁈꃄꌬ,ꉻꒉꋊꍅꄐꌐꐨ、ꍄꑐꐨ、ꇿꋌꐥꐨꀉꇨꎻ,ꇤꐳꃅꎆꀨꐛꉻꋊꄻꄹꎆ,ꊋꒉꃅꑴꌅꏀꀺꊋꀥꇱ,ꃶꐚꃅꊋꏏꍍꋊꌠꒃꉇꋒ,ꀋꆏꃅꄺꀱꁉꃑꌠꃹꅼ,ꊋꋧꄉꉹꁌꐥꐨꏦꀧꌋꆀꄻꃪ,ꇩꏹꎆꒉꎆꇁꃨꆰꐨꏭꊝꌠꃅꐛꐨꄻꈫꈈꌋꆀꍔꒉ,ꎆꏣꑘꒃꊼꇅꐳꃅꀻꎆꌠꄉꀧ,ꐧꋦꐮꄮꎍꐽꌠꊥꎆ。

  ꂴꉉꌠꀑꐱꇖꐨꇬꈴꄉ,ꈉꐨꌋꆀꅐꇁꉆꌠꉪꄉ,ꄷꀋꁧ“ꊰꑋꉬ”ꄐꎖ《ꐱꀨ》ꌋꆀꊪꊛꄉ2011ꈎꎆꏣꐧꋦꀻꎆꑞꅉꁻꌐꀋꉬꀋꉆꌠꄜꅐꇁ:

  ——ꎆꏣꎍꐽꃅꉀꎆꌠꄉꀧ。ꇩꈐꒃꅐꈁꊌꁌꐨ8%ꅶꍯꉀꎆ。ꀋꉬꀋꉆꌠꑠꉪ:ꋍꁆꏯ,ꃅꅍꊌꌠ、ꉹꁌꐥꐨꄻꃪꌠꁦꎆ,ꇩꏹꎆꒉꎆꇁꎒꐡꌠꏭꊝꌠꃅꐛꐨꈫꈈꌋꆀꍔꒉ,ꋭꋽꌠꎆꏣꁦꎆꐳꐨꌭꈬꄻꅐ。ꉈꑴꋍꁁꏯꆏ,8%ꅶꍯꉀꎆꌠꑞꅉꁻꌐꆏꀒꄹꈎꃶꐚꃅꉀꎆꐨꀋꂫ,ꀋꉬꀋꉆꌠꆏ꒔ꑞ꒔ꁆꏯꉌꊢꐨꌋꆀꌤꃅꀨꎍꌠꄐꏁꌊꇤꐳꃅꎆꏣꀻꎆꄟꆹꏮꌠꀂꏽꇁꂿꄷꄉ,ꎆꏣꉀꎆꐨꌋꆀꐛꉻꊇꁧꈲꁧꋍꃱꃅ,ꎆꏣꀻꎆꌋꆀꊻꂷꅐꀦꋦꈭꐮꋮꄮ,ꃶꐚꃅꀻꎆꈐꇬꆹꏮꌠꊥꎆ、ꆹꏮꈐꇬꀻꎆꌠꎹꂿꄷꌠ。ꄷꀋꁧꆏꉇꉻꋦꈭꐛꐈꌠꊼꇅꀉꑌ、ꅐꀦꋦꈭꏢꑲꐨꀉꇨ、ꒃꅐꐊꊈꀨꊰꉀꐕꌠꐛꐪꇂꃴꄉ,ꊇꁧꀊꂥ、ꈲꁧꀉꒉꌠ8%ꃅꇫꑟꂿꄷꇬ,ꊋꀉꒉꃅꇤꄻꅐꑴꌦ。ꉈꑴꆏ,8%ꅶꍯꉀꎆꌠꑞꅉꁻꌐꆹꇩꏤꑭꊂꃅꄉꉉꌠ,ꋋꆹꉘꇉꐨꄐꇺꐨꑞꅉꁻꌐꉬ,ꃅꄷꈀꐥꌠꆏꂱꑱꊨꏦꃶꐚꐨꇬꈴꄉ,ꈉꐨꌋꆀꃅꇫꑟꉆꌠꏓꐯꇯꄉ,ꈆꑪꃅꉀꎆꑞꅉꁻꌐꏤꄻ,ꑓꂨꄉꊂꈹꌠꌋꆀꐳꐨꌡꉚꀋꉆ,ꀊꅰꀕꃅꁦꎆꄀꀋꉆꌠꉬ。

  ——ꎆꏣꐛꉻꏀꈴ。ꀻꎆꎆꃀꌫꅐꌠꇩꈐꒃꅐꈁꊌꁌꐨꉀꐕꅷ1.85%ꇬꑟꌠꎥꃪꌠꌋꆀꃅꉚ;ꄐꇐꏤꁈꃅꐙꌠꏀꄓꅐ꒧ꉗꄻꄉꏣꀋꑌꃅꀻꎆ,ꁧꃤꃅꑘꇤꐳꃅꀻꎆ;ꇮꇐꄺꀱ、ꊁꊰꌠꇤꇧꎭ、ꏓꇱꄺꀱꌠꃅꐛꐨꀊꏀꌠꊌ;ꂓꌗꇩꈐꒃꅐꈁꊌꁌꐨꊋꃹꌠꀒꄹꈎꇂꃴ3.5%ꀁꋌꊰ,ꑍꀑꐈꌋꃑꋊꐨ3.5%ꅶꍯꀁꋌꊨꒊ,ꑍꀑꐈꑘ、ꐈꇐꀑꈉꃷꁨ、ꉢꄊꌋꆀꄊꀑꐈꇐꇖꐘꌠꀋꉬꀋꉆꃅꍍꆀꌠꃑꋊꌠꐯꇯꐽꏡꃅꇬ1.5%ꊨꒊ,ꒆꉻꋦꈭꋈꄻꌋꆀꋦꈭꏱꄻꌠꀒꁨꋍꁘꃅꀥꇱ;ꇓꈓꈴꐨꉀꐕꅷ48.3%ꇬꑟ。ꏓꇱꑞꅉꁻꌐꋋꏢꄜꎼꇁꌠꀋꉬꀋꉆꌠꉪꐨꆏ:ꇤꐳꃅꎆꏣꀻꎆꄟꆹꏮꌠꆹꋌꃀꌋꆀꋌꊂꑠꊭꇬꑟꀨꏢꉬ,ꀋꎪꃅꌌꎆꏣꐧꋦꀻꎆꈴꎁꌋꆀꏱꁕꈀꐥꌠꇬꁊꈴꃅ,“ꊰꑋꉬ”ꇬꂾꄹꈎꌠꇬꄉꑭꁘꏟꈯꃅꐕꎼꆹꄉ,ꀋꎪꃅꎆꏣꐛꉻꄐꇐꏤꁈꐨꋊꄻꌠꌌꀨꇬꄉꃅ,ꀒꁨꋍꁘꃅꀉꒉꃅꎥꃪꀖꁉꌠꇬꎆꇱ,ꊋꋧꄉꑴꌅꏀꀺꌠꄹꎆ,ꄐꇐꏤꁈꃅꐙꌠꏀꄓꅐ꒧ꉗꄻꀻꎆ,ꋊꃅꅐ꒧ꆹꏮꊐꐕꌠꀻꎆ,ꊋꒉꃅꇓꈓꇓꉈꃄꁕꋊꄻꀻꎆꐨꏓꇲ,ꏣꀋꑌꃅꎍꐽꃅꇓꈓꈴꄹꎆ,ꀉꇨꃅꊋꏏꋊꃑꌋꆀꒆꉻꋦꈭꀧꌋꃅ,ꉀꎆꌠꈆꑪꇮꇐꐊꊈꌋꆀꊇꁧꈲꁧꐕꀊꂥ,ꀻꎆꌠꋮꄮꐨꌋꆀꐪꊛꉆꐨꐕꀊꂥ。

  ——ꎊꈬꁌꏤꑞꅉꀑꐱꃅꎍꐽꌠꄉꀧ。ꀀꊿꌬꈧꁌꏤ4%ꅶꍯꉀꄓ。ꋌꃀ,ꉪꇩꏤꈁꉬꇲꁵꌠꈁꉬꈉꐨꀑꐱꃅꐮꆽꏣ,ꀉꑌꈫꁁꌠꅐꇐꇲꁵꇎꐯꇎ,ꈜꀕꇈꌠꆏꋛꂷꐪꊛꄉ7ꈓꀉꑌꃅꊌ、ꊭꄎꄉꌠꇎꐯꇎ,ꎊꈬꁌꏤꀑꐱꃅꎍꐽꌠꇬꈲꏣꐥ。ꄚ,ꀋꉊꄻꈎꊁꈎꁂꌠꌬꈧꁌꏤꊼꇅꐳꃅꉀꄓꆹ,ꎼꈎꂴꊬꌠꇬꁧꏖꐨꊼꇅꀉꒉꃅꐥ,ꋍꈭꐨꁌꏤꉀꄓꌠꐊꊈꄡꇗꊼꇅꀉꑌ:ꃅꆺꑭꊂꇙꈧꐨꀉꒉꃅꁦꎆ,ꇩꏹꃷꎏꃷꇐꀉꒉꌠꁌꏤꉀꄓꌠꆏꐪꊛꄉꈏꃹꃅꐙꌠꅐꂋꍅꊋꊼꇅꀉꒉꃅꐥ;ꇩꈐꎆꃀꊭꊎꃷꁨꄉꈁꊼꇅꀉꒉ,ꊋꀦ、ꌬꇐꇁꀦ、ꃄꅉ、ꑘꃅꊋꃤꑠꐊꊈꀨꊰ꒔ꁘ꒔ꁘꃅꉀꐕ,ꅐꀦꃅꐙꌠꅐꇐꁌꏤꌋꆀꋦꈭꀧꌋꃅꁌꎴꌠꄺꀱꌠꑌꏣꀋꑌꎍꐽꃅꄹꎆꌶ,ꑠꆹꁌꏤꉀꄓꌠꍅꊋꊼꇅꀉꒉꀐ。ꀀꊿꌬꈧꁌꏤꉀꄓꌠꊨꄅꌊ4%ꅶꍯꃅꄉꇬ,ꂴꉉꌠꁌꄓꐊꊈꌋꆀꉹꁌꀵꄜꊋꃤꑌꉪ,ꋍꈭꐨꁌꏤꄺꀱꃆꂮꑌꉪꇬꇯꄉꀐ。

  ——ꉹꁌꐥꐨꏦꀧꌋꆀꄻꃪ。ꇓꈓꀊꏀꃅꃅꅍꊌꌠꊻꂷ900ꃪꈋꉐꁦꎆ,ꇓꈓꃅꅍꀋꊌꌠꁱꄉꌠꆹꆼꋏꌊ4.6%ꇂꃴꄉ;ꊋꇤꄉꀀꊿꊌꐨꁦꎆꌠꌋꆀꎆꏣꀻꎆꌠꐮꐊ、ꑘꃅꁌꁦꎆꌠꌋꆀꑘꃅꒃꅐꐨꉀꐕꌠꋍꁘꃅꌠꃅꇫꑟ,ꇓꈓꀀꊿꊾꂷꐽꏡꃅꌬꉆꌠꊌꐨꌋꆀꂿ꒧ꁡꇤꀀꊿꊾꂷꐽꏡꃅꌃꊌꐨꃶꐚꃅꇬ8%ꈋꉐꉀꎆ;ꐧꋦꏦꀧꄹꏦꐪꊛꄉꐛꒆ,ꏦꀧꃅꐙꌠꀀꑳꋉꃆꋈꄻꄉꈁ1000ꃪꂷꀊꏀꃅꁦꎆ;ꊻꂷꋌꐛꃅꉀꎆꐨꋎꍅꌊ6.5‰ꈐꇬꐕꄉ。ꉹꁌꐥꐨꏦꀧꌋꆀꄻꃪꌠꆹꈆꑪꀻꎆ、ꐧꋦꐮꄮꊥꎆꌠꇖꐨꉬꎂꀕ,ꋋꆹꀋꆏꃅꏓꂱꉹꁌꐥꐨꀊꅰꐥꌒꌠꉘꇉꐨꀊꏀꌠꃛꊸꃅꈉꐨꉬ,ꋋꆹꇤꐳꃅꎆꏣꀻꎆꄟꆹꏮꌠꊇꅉꄒꈌꌋꆀꑞꈌꑌꉬ。ꎆꏣꀻꎆꌠꌋꆀꉹꁌꐥꐨꄻꃪꌠꈏꇓꋍꃱꃅ、ꇤꐳꃅꎆꏣꀻꎆꄟꆹꏮꌋꆀꉹꁌꐥꐨꏦꀧꌋꆀꄻꃪꌠꊜꋽꃅꏓꇱꇬꎷ,ꃅꅍꊌ、ꊌꐨꁷꄻ、ꐧꋦꏦꀧꑠꏓꂱꉹꁌꋍꏅꃶꐚꌠꇬꎑꁠꎍꌠꌤꃆꄻꉆꈉꀊꅰꀋꂿꑘꌠꇬꄉ,ꄹꏦꁆꄻꌠꄻꃪ,ꏦꉻꉺꏦꄻꐛꒆ,ꎆꇱꐨꀥꇱ,ꀋꎪꃅꊌꐨꇿꋌꀊꏀꌠꊌꅜ,ꄺꀱꀻꎆꊌꐨꁳꏓꂱꈁꐥꌠꃅꈲꊌꎻ。

  ——ꇩꏹꊌꐨꌬꐨꐛꐪꄻꃪ。ꎊꇐꉇꅐꆹꏮꊐꐕꌠꊥꎆ,ꁧꃤꃅꃼꇇꀻꎆꌠꇤꐳ,ꏣꀋꑌꃅꈏꃹꍔꒉ,ꈏꃹꉇꅐꃼꇇꏓꇱꃷꁨ10%ꅶꍯꉀꎆ;ꉇꎆꌌꌬꄉꉀꎆꌠꏦꀧ,ꐛꉻꀒꁨꋍꁘꃅꃪꈴ;ꉇꉻꏭꎆꇱꌠꎍꐽꃅꍔꒉ。ꎼꈎꋧꃅꎆꏣꋦꈭꄡꇗꃛꊸꌼꇪꑴꌦ,ꇶꏦꋍꑞꋍꑵꃅꐙꌠꀧꌋꃅꉪꏦꅐꇁ,ꇩꏹꃷꎏꅔꈿꌠꀊꅰꃅꃛꊸꇁꑴꇬ,ꄚꉪꇩꏤꇩꏹꎆꏣꁸꃅꈐꏭꄉꇬꊼꇅꂱꎆꅑꐨꐥꌠꋊꇤꅐꇁ,ꉇꅐꌠꌋꆀꈏꃹꌠꐯꇯꉜꁨ、ꉇꎆꊙꈻꌠꌋꆀꉇꉻꏭꎆꇱꌠꐯꇯꉜꁨꌠꌭꈬꇬꎷ,ꇤꐳꃅꉇꉻꃼꇇꃅꌠꇶꏦꌋꆀꉇꉻꏭꎆꇱꌠꇶꏦꆹꏮꑲꆏ,ꉇꉻꈉꐨꎍꐽꃅꉀꎆꌠꐪꊛꄉꏦꀧ,ꄷꀋꁧꀒꁨꋍꁘꃅꇩꏹꊌꐨꌬꐨꐛꐪꄻꃪꄎ。

  ꌕ、2011ꈎꎆꏣꐧꋦꀻꎆꇬꂿꃆꌋꆀꏁꁈꀋꉬꀋꉆꌠ

  ꎼꈎꆏ“ꊰꑋꉬ”ꄐꎖꃄꌬꌠꇫꇬꈓꌠꉬ,ꎆꏣꐧꋦꀻꎆꌤꃅꌠꋍꑞꋍꐘꃅꋒꇬꆏ,ꀋꂿꑘꌠꄐꇐꏤꁈꊜꋽꄮꐪꊛꄉꒃꉇꌋꆀꌬꋒ,ꊌꐨꐋꀋꌡꃅꉾꌠꌌꍏꇩꇭꍣꄈꄻ90ꈎꈭꏝꐛꌠꏭꋨꏦꌠꏭꆏ,ꈻꇐꀋꂿꑘꐯꀋꂿꑘꃅꐥꌠꉬ。ꐪꊛꄉꉻꒉꋊꐽꌠꀥꇱꌋꆀꄻꃪꄉ,ꀊꅰꏣꀋꑌꎍꐽꃅꎆꏣꎍꐽꊼꇅꐳꃅꀻꎆꌠꏦꀧ、ꎆꏣꐛꉻꋊꐽ、ꏱꄻꅐꂋꂴꄐꄉꌠꐯꃆꂮꐥꌠꀞꄻꋒ,ꎊꈬꁌꏤꎍꐽꌠꑟꐨꉻꒉꋊꐽꌠꂿꃆꀨꇬꄉ。ꐪꊛꄉꏱꎆꏱꁈꏣꀋꑌꌠꃄꌬ,ꄷꀋꁧꏱꁈꊋꑌꐨꀂꏽꇬꐭꃅꋊꐽ。ꋭꋽꃅꏱꎆꌬꎖꌠꌋꆀꇩꎝꄉꈁꊨꒊ,ꎼꈎꏱꎆꌬꎖꌠꆏ9000ꂡꂷꁆꄻꂿꄷꄉ,ꌌꀒꄹꈓꄐꌗꌠꌋꆀꐯꌡꉚꇬ1500ꂡꂷꀁꋌꊰ,ꄚꈐꏭꍏꑷꏱꎆꌬꎖꌠꆏ7000ꂡꂷ,ꃅꄷꎁꃅꎝ2000ꂡꂷꄷꀋꁧꌌꃅꄷꄐꌗꈏꇬꇱꇁ,ꌬꎖꐨꀁꋌꊰꌊ2%ꅶꍯꇬꑟ。ꎍꐽꊋꑌꌠꎆꃀꏱꁈꃄꌬ,ꎼꈎꎆꃀꇲꁵꃷꁨꀑꐱꄜꇐM2ꂴꄐꄉꇬ16%ꉀꎆ,ꐧꋦꎆꏓꄉꈁꋭꋽꌠꏦꀧꄉ。ꏱꁈꃄꌬꌠꊋꑌꐨ、ꐳꐨꌋꆀꀨꎍꌠꒃꇇꈐꊐꋒꌶ,ꏱꁈꇢꊭꇬꋮꄮꐮꐊꊋꀥꇱ,ꀁꉘꃅꋊꐽꏱꁈꌋꆀꀉꉘꃅꀻꎆꏱꁈꌌꏓꇲꃅꉪꏡ,ꊋꋧꄉꀋꃋꋋꄮꀻꎆꅉꇬꌤꃆꑓꅐꎑꌠꂥꀘꇧꎭꄉ,ꎆꏣꊼꇅꀉꒉꃅꃯꇙꌠꇫꅐꇁꌠꋎꍅꇈ,ꉇꑴꃶꐚꃅꃹꅼꃅꐯꄙꐨꂥꀘꌋꆀꃨꆰꐨꐴꑭꑌꌠꋊꎵꌶ,ꀻꎆꌠꋮꄮꐨ、ꐪꊛꉆꐨꌋꆀꈏꇓꇙꊋꀥꇱꌶ。2011ꈎꆏꄚꐰꈬꁁꏯꌤꃅꌠꌌꀨꄉꃅꋒ:

  (ꋍ)ꁌꏤꋎꍅꍞꏲꌠꌌꀉꇨ,ꎊꈬꁌꏤꀑꐱꑟꐨꎍꐽꄉ。(1)ꃷꎏꇲꄻꌠꏦꀧ。ꏟꈯꃅ“ꋚꊐꅍ”ꌜꍈꆹꎍꄹꏦꌋꆀ“ꋂꄮꊐꅍ”ꏃꍈꆹꎍꄹꏦꃄꌬꇫꑟ。ꀋꂿꑘꌠꃷꇐꊭꊎꄹꏦꌋꆀꀋꉬꀋꉆꂿꑘꅐꇐꋍꇅꇬꎴꊎꄹꏦꄻꐛꒆ,ꉾꃪꃅꊐꀖꊜꋽꄮꒃꄉ,ꈏꃹꉇꅐꋊꄻꋒꌶ。ꂿꑘꅐꇐꏮꈴꈜꀹꄻꄉ,“ꂿꑘꃷꎏꐯꊛ”ꌠꀥꇱ,ꇓꈓꂿꑘꃼꇇꃷꎏꃷꅉꁌꌋꆀꁌꆓꃅꃷꆹꅉꁌꀁꋌꊰꌋꆀꋊꍬ,ꈯꌬꋍꅝꃅꃷꀕꎏꊐꐕꄺꀱꌋꆀꒉꉹꌠꋚꂷꎞꅉ、ꉐꀖꋍꅝꃅꃷꀕꎏ、ꋥꁕꋂꄮꃷꅉ、ꈻꏣꎊꈬꎞꎭꋈꄻꌠꊋꁈꄏ。(2)ꋎꍅꄐꌐꐨꐥꌠꌌꀉꇨ。ꊋꀥꇱꄉꇙꈧꃅꐙꌠꏲꂠ。ꀋꂿꑘꌠꂿꑘꁥꑘꅐꇐꃷꎏꍤꎖꏛꃅꈪꊐꉻꑫꋈꄻꐛꒆ,ꀨꄉꃷꇐꃷꎏꌋꆀꁌꏤꋎꍅꄐꉻꄻꐛꒆ。ꍔꃚꃷꇐꌋꆀꁧꃤꃅꁌꏤꏲꂠꌠꊜꋽꄮ、ꃅꐨꌋꆀꊋꃤꋊꐽꌠꒃꋒ。ꏦꈴꁌꏤꎆꀨꋊꐽꌠꋈꄻꐛꒆ。(3)ꁌꏤꍞꏲꌠꌌꀉꇨ。ꊋꀥꇱꄉꂿꑘꅐꇐꄡꈉꎊꈬꃷꎏꍞꏲ,ꂿꑘꅐꇐꄆꌅꃼꇇꃷꎏꋊꄻ,ꈲꏂꇨꌠꏢꑲ。ꏦꇨꃅꋚꂷꎳꃼꇎꏦꍤꄻ,ꂿꑘꅐꇐꀰꏢꌋꆀꃹꅼꃅꄺꂡꐥꀹꋊꍬ。ꎔꃅ《ꁌꏤꏦꐆꐨꏲꑘꅓꁵꏤꐪ》ꌋꆀ《ꁌꏤꇂꇎꏭꁏꏤꐪ》ꌫꄻ,ꏦꇨꃅꎆꍍꋚꏓ、ꁌꏤꐕ、ꃄꈌꄐꃅꁌꐕ、ꐯꉇꄉꁌꐕꃅꏦꐆꐨꑠꍤꀞ。(4)ꁥꇱꄹꏦꄻꐛꒆ。ꊛꄉꌌꂴꄉꀨꎹꌠ、ꇓꈓꇓꉈꐥꐨꀁꂥꀧꌠ、ꂿꑘꁡꇤꉬꀧꇲꄻꌠꁌꏤꋍꇅꇬꁥꇱꌠꃑꁵꌠꃅ。ꇨꊨꐨꇬꈴꄉ,ꌶꅉꒉꐧꌠꇬꑱꈐꎆꏣꊋꋠꌶꌺꌋꆀꌶꌺꋙꋠꅉꁥꇱꌠꁦꎆ。ꇤꐳꃅꐥꐨꀁꂥꐯꀁꂥꌠꏦꀧ、ꃅꅍꀋꊌꄜꏂꀧꎕꏦꌋꆀꎊꈬꁌꏤꐕꆹꌠꐮꐊꌠꐉꇙꉺꏦꋈꄻꐛꒆꄉ,ꊿꊌꐨꀁꂥꁥꌠꅉꀨꐥꐨꏦꀧ。(5)ꁌꏤꋦꈭꄻꃪ。ꏱꄻꌋꆀꁌꎴꌠꋍꑞꋌꐘꏤꐪꃄꌬꇫꑟ,ꊛꄉꄉꀋꄐꃅꁌꎴꌠꐘꃆꋊꐆꇧꎭ,ꁌꎴꎕꏦꊼꇅꀊꂥꌠꌌꀁꋌꊰ,ꃄꈌꄐꃅꁌꎴ、ꎕꏦꄩꐂꁌꎴꌋꆀꐛꐈꄉꁌꎴꌠꏢꑲ。(6)ꉉꍣꄐꂘꌠꀥꇱ。ꎃꊒꃅꁌꏤꃅꒊꃅꇁꄛꇰ,ꁌꏤꏱꁈꉉꀽ,ꅱꈯꃅꌤꆿꈰꏅ、ꈴꌗꀊꆠꌠꁊꌠꃄꈌꄐꃅꃄꐺꌠꍤꀞ。

  (ꑍ)ꈏꇓꈉꐨꈜꀕꇈꌬꈧꈉꐨꍔꒉꌠꄐꇐꏤꁈꌭꈬꇬꎷ,ꎆꏣꎍꐽꊼꇅꐳꃅꀻꎆꌠꏦꀧ。(1)ꀒꁨꋍꁘꃅꀀꊿꌬꈧꈉꐨꌌꁦꎆ。ꋍꈓꌠꐧꋦꌬꈧꎊꇐꏡꄜꃅꃷꌠꏓꇱꃷꁨꂴꄐꄉꇬ16%ꉀꎆ。ꊌꐨꁆꁸꋊꄻꄐꐨꀥꇱ,ꍔꃚꌬꐨꌌꌬꈧꄻꃪꌋꆀꍔꒉꌠꇬꌬꌠꍆꐪꁦꎆ,ꇓꈓꉹꁌꊌꐨꀁꂥꌠꌋꆀꂿꑘꊿꏭꁥꁵꌠꁦꎆ。ꐪꊛꄉ“ꑱꈐꄆꌬꇐꂿꑘꁡꇤꃹ”ꌠꌋꆀ“ꀉꆹꀊꏀꀠ”ꌠꏱꁈꃄꌬ,ꊋꏏꌋꆀꊋꀦꀊꏀꐕꍯꌬꈧꌠꊥꎆꌠꈲꁵꏱꁈꃅꑞꅉꑟ,ꊋꏏꅐꇐꄹꆷꑭꊂꍔꒉ。ꏣꀋꑌꃅꄆꌅꃼꇇꑠꀊꏀꉹꌠꌬꈧꑘꐛꄟꀻꎆ,ꁱꀕ、ꈩꆫ、ꈯꀧꑠꌬꈧꌠꊥꎆ。ꂿꑘꁡꇤꃼꇇꑘꐯꅑꄉꀰꏢꌠꌋꆀꋍꃱꃅꁆꌞꌠꄹꇙ,ꇓꈓꃼꇇꑘꈄꏍꐛꅉꐛꃆꄐꉻꃪꈴ。ꃷꎏꐥꀹꋊꄻꌋꆀꋊꍬ,ꌬꈧꊿꏦꊒꌠꌅꈌꈲꁧꀧꌋꃅ。(2)ꐛꉻꃪꈴꌠꇎꏦꇂꃴꄉꎆꇱꄉꈁꋭꋽꌠꏦꀧ。2011ꈎꐧꋦꑭꊂꀋꇙꁨꎆꎆꇱꂴꄐꄉꇬ18%ꉀꎆ。ꋒꐯꋒꃅꍔꃚꎆꇱꌠꐛꉻꋊꐽꌠꏭꄐꏁꂿꄐꐥꌠꋊꇤꅐꇁ。ꍏꑷꄐꌗꈐꏭꎆꇱꌠ3826ꂡꂷꁆꄻꂿꄷꄉ,ꀒꄹꈎꄩ100ꂡꂷꊨꒊ,ꋉꇯ、ꊛꄉꋉꌠꐘꑘꀨꎍꌠꎆꀨꈉꐨꌌꂴꄉꀧꄉ,ꊱꁨꐥꃅ“ꊰꑋꉬ”ꄐꎖꀉꒉꀊꂾꐘꑘꋈꄻꌠꃄꇰ。ꍏꑷꄐꌗꈏꎆꇱꌠꆏꀋꉬꀋꉆꌠꌌꏦꀧꐨꐥꌠꀀꌒꋉꃆꇬꊋꄏꌠ,ꈲꒉꉁꈾ,ꂿꑘꁡꇤꅉꃀꉁꈾ,ꂘꑘꁦꎴꆄꄻꅉꃀꉁꈾ,ꑴꌅꏀꀺ、ꊋꏏꍍꋊꌋꆀꒆꉻꋦꈭꀧꌋꃅ,ꈯꄔꁮꐚꁁꏯꃅꄷꈜꀕꇈꑭꊗꌋꆀꇖꌜꀒꋤꃅꄷ、ꑟꏦꑠꎆꏣꐧꋦꀻꎆꌠꇬꌬ。ꎔꃅꇩꃷꑼꉹꁌꎆꇱꀻꎆꌠꄐꏁꌋꆀꊋꊡꃆꂮꏱꁈꃄꌬꇫꑟ,ꊛꄉꃛꊸꃅꏡꁈꋍꋬꈭꃅꐙꌠꏤꄻ,ꐧꋦꎆꇱꎍꐽꃅꉀꎆꌋꆀꐛꉻꄻꃪꈴꌠꊥꎆ。ꏟꈯꃅꑵꁸꄐꇺ、ꀧꐥꍅꐥꌠꃅ,ꀋꎪꃅ“ꑍꀊꂥ”ꌠꌋꆀꅐꌊꁦꎆꇨꁁꏯꃄꈌꄐꃅꋉꐮꄅꀱꌠꋎꍅ,ꎆꇱꊇꁧꌋꆀꈲꁧꉀꐕ。(3)ꎆꏣꃄꌬꐨꋊꄻꋒ。ꊖꌋꅐꎞꇬꐮꑌꑲꌶꌠꀥꇱ,ꄆꊋꈉꄻꁁꏯꏲꂠꌠꌌꀉꇨ,ꋌꌬꇐ、ꄻꐛꋌ、ꋧꐛꐞꌗꈁꉬꃷꁨꆽꏣꌋꆀꃛꊸꌠꄀꄻꌠꃅꋒꄉ,ꀨꄉꎊꈬꎞꎭꌠꄉꀧ。

  (ꌕ)ꀒꁨꋍꁘꃅ“ꌕꂿꑘ”ꌤꃅꋒ,ꂿꑘꂿꑘꁡꇤꀻꎆꌋꆀꂿꑘꊿꁦꎆꊌꌠꅉꃀꄻꈫꈈ。(1)ꋚꂷꎍꐽꃅꁦꎆꊌꌠꊥꎆ,ꄾꌦꋩꃅ8ꈓꋚꊊꌠꃅꇬꅜ。ꐊꑷꃅꋚꂷꌋꆀꂿꑘꒃꅐꀻꎆꌠꋍꑞꋌꐘꏡꁈꊥꎆꌠꌌꀉꇨ,ꇩꏤꑭꊂꋚꂷꎍꐽꃅꁦꎆꊌꌠꃅ,ꋚꅐꑤꀉꒉꌠꈁꁠꏿꏱꁈꄻꐛꒆ,ꃹꅼꃅꅐꐨꀊꂥꌠꃅ,“ꋍꌤꋍꇖ”ꈁꁠꏿꁥꇱꎆꁦꎆ,ꋒꐯꋒꃅꈁꐥꊐꌠꍔꃚꂿꑘꉜꁨꋚꂷꒃꉇꌋꆀꂿꑘꊿꑘꃅꋙꊪꌠꏣꀋꑌꐨꄖꄑꄉ,ꋋꈓꌠꂿꑘꋚꊊꌠꃅꇫꑟ。2011ꈎ,ꄾꌦꋩꃅꋚꂷ5ꂡꄓꈋꉐꊌꌠꀧꄉ;ꌑꇌ、ꒀꋌ、ꎬꐚ、ꋠꎸ、ꒉꅐꇐꅐꇐꂱꄷꃅ680ꃪꄓ、3250ꃪꄓ、12500ꃪꄓ、8000ꃪꄓ、5430ꃪꄓꊌꃅꄉ,ꀒꄹꈎꄩ13.9%、0.3%、3.8%、0.9%ꌋꆀ1.2%ꉀꎆ。(2)ꊋꀥꇱꄉꈲꒉꌌꀨꄉꌠꂿꑘꌋꆀꂿꑘꁡꇤꅉꃀꌬꇐꋈꄻ。ꎔꃅꄈꅿꊰꏁꈭꉬꃢꐊꈴꃀꈿꌋꆀꍏꑷ1ꉸꁱꐘꉌꊈꃄꌬꇫꑟ,ꈲꒉꄺꀱꀻꎆꌠꏱꁈꀉꒉꀊꂾꌠꏤꄻ。ꇤꐳꃅꒊꃀꒈꌺꏱꄻ、ꒉꇉꐡꈔꇁꌠꄻꈫꈈ,ꊋꀥꇱꒉꅐꃪꅐꃅꊈꉮꌸꌠꄴꏮ、ꒉꊐꅉꋈꄻꌋꆀꑾꌋꈤꑠꃅꄷꀨꄉꒉꀦꋉꃆꋈꄻ。ꇤꐳꃅꒉꊐꅉꊛꄉꋬꈭꃅꋉꌋꆀꒉꏏꄺꀱꌠꃅ,ꐊꑷꃅꊋꀥꇱꄉꍯꃅꈲꒉꈯꌬꌋꆀꍯꃅꋉꃆꋈꄻ。ꍯꃅꎕꏦꀊꂥꌠꌋꆀꒉꅐꀦꁆꄻꋉꃆꋈꄻꌠꄹꎆ。ꊛꄉꂿꑘꁡꇤꃄꅉꏱꄻꌤꃅ。ꂿꑘꁡꇤꒃꅐꐥꐨꇎꏦꄻꃪ。2011ꈎ,ꂿꑘꁡꇤꄐꄉꊿ6000ꃪꑹꅝꒉꉮꀋꐥꃆꂮꂥꀘꌦꂿꄷ,ꂿꑘꁡꇤꅝꒉꉮꀋꐥꁊꈴꐨ77%ꇬꑟ;ꏣꀋꑌꃅꂿꑘꁡꇤꍹꌗꀻꎆ,ꅔꈽꄉꈎꂫꇬꂿꑘꁡꇤꍹꌗꑷꋦꃷꁨ4325ꃪꁯꑟ,ꀒꄹꈎꄩ325ꃪꁯꁦꎆ;ꀊꏀꈭꌠꂿꑘꁡꇤꄆꈄꄺꀱꌠꃄꌬ,ꐳꃅꄆꀋꐥꃅꄷꄆꊋꋈꄻ;ꐪꊛꄉꂿꑘꁡꇤꄇꈜꋈꄻꌠꊋꁈꄏ;ꂿꑘꁡꇤꑲꎓꇣꐡꌠꄺꀱꊋꃤꁦꎆꇱ,ꎼꈎ150ꃪꁯꈍꉐꄐꄉ;ꏮꀀꎆꆫꊿꀀꅉꋉꃆꋉꋒ。(3)ꂿꑘꏓꇱꒃꅐꊋꃤꉀꐕ。ꏦꇨꃅꋠꃅꀧꌋꃅ,ꋙꊪꃅꊂꄝꀋꊰ,ꊋꇤꄉꋚꅐꐨꉀꎆ。ꐳꃅꇩꏤꑭꊂꋚꂷꄙꂠꏡꊪꅐꊋꃤꁦꎆꌠꄐꎖꃄꌬ,ꑌꌋꈤꃅꄷꍯꌋꆀꀀꃆꊪꏽꊋꃤꉀꐕꌠꇇꀨ。ꊋꀥꇱꄉꎬꐚꅏꅉ、ꅔꃅꂿꑘꅏꅉ、ꑟꏦꌑꇌꃪꌠꌋꆀꉸꉷꉰ、ꍤꏦꈳꁕꌑꇌꊩꅉꋈꄻ。ꊋꋧꄉꍤꏦꈳꁕꊮꊫꂶꂷ、ꉸꉷꉰꒀꋌꍑꉸꌜꌋꆀꑌꌋꈤꌋꆀꇊꃀꇴꆖꂷꊩꅉꋈꄻ。ꇓꈓꀉꒉꌠꇇꀨꄉꉐꀖꊪꏽꅉꋈꄻ。ꃮꀠ、ꑍꊰꇌꎕꏦꈴꄉꈁꉘꉚꅉꌋꆀꎇꃀꍅꑓ、ꒉꃴꅐꇐꍔꂄꌠꉘꉚꉻꑫꋈꄻꌠꊋꁈꄏ。ꏣꀋꑌꃅꉁꈾꂿꑘꀻꎆ。ꂿꑘꈆꑪꎥꃪꌬꈴꎆꇱꌠꉀꎆ。ꂿꑘꋚꁧꁮꉮꌐꑘꈴꄴꏮꌠꄹꎆ,ꏓꇱꇙꀕꆅꁮꀉꆈꌠꄴꏮ。ꂿꑘꅐꇐꊇꁧꉮꀋꐥꌠꍞꏲꊋꀥꇱ。ꊋꀥꇱꄉꉛꈹꉛꀺꋈꄻ。(4)ꊋꇤꄉꂿꑘꊿꊛꄉꁦꎆꊌꌠꊥꎆ。ꋚꂷꅐꑫꀋꉬꀋꉆꌠꎳꃼꁌꏤꀁꂥꑞꅉꉀꐕ,ꋚꏀꌌꃷꇬꄑ,ꎭ50ꉻꏣꌠ5ꇬꄉ7ꂷꉀꐕ,ꍯ50ꉻꏣꌠꐕꌊ9ꇬꄉ23ꂷꉀꐕ。ꐪꊛꄉꂿꑘꁥꇱꎆꄉꈁꍔꐯ,ꁥꇱꎕꏦꉀꐕ。ꑭꐎ、ꍯꒀꃅꂿꑘꌬꇐꁌꏤꉀꎆꌠꌋꆀꂿꑘꌬꇐꏓꇱꁥꁵꌠꐮꎑꁠꌠꇙꐈꉆꃅꋊꄻꌠꉺꏦꃅꇫꑟ。ꊋꒉꃅꂿꑘꊿꌐꑘꇷꃅꎹ、ꂿꑘꁡꇤꐧꋦꈴꁧꃤꃅꎀꍹꌋꆀꂿꑘꅐꑘꈴꂴꅑꎆꏂꑘꄏꐓ,ꏣꀋꑌꃅꉾꃪꇣꋲꌠꂿꑘ、ꂿꑘꅐꇐꄻꇱꌠꀻꎆ。ꑤꁕꎆꏣꀉꇨꇁ。ꊋꀥꇱꄉꂿꑘꇮꃅꊿꃅꑘꇮꇐꁱꂘ、ꃅꅍꊌꄐꇺꁧꃤꃅꌠꌋꆀꌅꈌꈲꁧꀧꌋꃅ。

  (ꇖ)ꐳꃅꅐꑘꐛꉻꋊꄻ,ꊋꋧꄉꈯꄜꋓꅔꊋꃤꉀꐕ。(1)ꊋꒉꃅꑴꌅꏀꀺꌠꌋꆀꄐꇐꃅꐙꌠꏀꄓꅐꑘꀻꎆꌠꄹꎆ。ꑴꌅꏀꀺꊋꃤꋈꄻꄐꎖꌋꆀꇩꏤꈆꑪꇮꇐꅉꃀꉁꈾꀋꂿꑘꌠꐧꎴꊬꌠꄐꎖꎥꃪꏤꄻ。ꃹꅼꃅꌧꇐꏀꀺꋉꃆ、ꇮꇐꏀꀺꋉꃆꌋꆀꈆꑪꇮꇐꅉꃀꉁꈾꀋꂿꑘꋈꄻꌠꄹꎆ,ꐳꃅꈆꑪꇮꇐꌐꐘꀋꂿꑘꌠꃄꌬ,ꇩꏤꏀꀺꉹꌠꇓꈓꃅꉚꌶꀠꄹꎆ。ꄐꇐꃅꐙꌠꏀꄓꅐꑘꀻꎆꄐꎖꌠꌋꆀꋬꈭꏱꁈꐳꃅꏤꄻ,ꅐꑘꀻꎆꌐꐘꎆꀨꄻꄉ,ꅐꑘꀺꇱꎖꄎꃄꌬꄉꈁꍔꐯ,ꅐꑘꀻꎆꄐꇺꎹꀨꌋꆀꀋꂿꑘꌠꏀꄓꅐꑘꉹꑘꎕꏦꌧꃪꏤꄻ。ꏣꐳꍏꇩ、ꒀꌗꏢ、ꎊꈴꏍ、ꏓꐛꄆꈴ、ꐽꀻꉜꅍ、ꈥꈉꅉꃀꉁꈾ、ꈛꌺꃏꏸꌋꆀꌬꈴꌠꃏꏸꅐꑘꈴꑠꅐꑘꏀꀺꀻꎆꋉꃆ,ꉈꑴꉹꁌꋬꂻ、ꈴꌗꊿꈲꑠꀋꂿꑘꌠꌬꈴꌶꀠꋉꃆꊥꇫꄉꃄꌬ。ꇩꏤꈴꌗꈴꌠꃅꉚꌶꀠꄹꎆ。(2)ꏣꀋꑌꃅꋊꃅꅐꑘꄺꀱ、ꉀꐕ。ꐪꊛꄉꅐꑘꀋꂿꑘꌠꋊꄻ、ꄖꄑꄐꎖꃄꌬ。ꅐꑘꐛꉻꀊꏀꌠꋊꄻꄐꇺꎹꀨꄜꃑꄉꃄꌬ。ꊋꒉꃅꎆꏂꑘꇮꇐꄺꀱꌠꇇꀨ。ꏣꀋꑌꃅꎸꅍ、ꏃꉸ、ꑊꐊꎸꑫ、ꇉꄻꑠꅐꑘꀋꂿꑘꌠꒃꅐꊋꃤꐛꉻꋊꄻꌠꄹꎆ。ꐳꃅꉁꈾꄺꂡ、ꐕꍯꏀꀮꏀꂷ、ꑾꌙꇮꑘ、ꋩꍹꑠꉹꑘꐛꏀꅐꑘꏓꐥꌠꋈꄻ。ꋠꇐꇮꑘꐛꉻꋊꄻꌠꌋꆀꅐꑘꊐꐕꌠꄹꎆ,ꊋꀥꇱꄉꋠꇐꉮꀋꐥꌠꍞꎖꊋꃤꋈꄻ,ꋠꇐꉮꀋꐥꌠꏦꀧꊋꃤꉀꐕ。ꎆꏂꑘꏓꇱꄻꇱꌠꄐꇺ,ꅐꑘꏓꋧꐨꉀꐕ。ꊁꊰꅐꊋꎞꋊꌠꏱꁈꉻꑫꄻꐛꒆ,ꐪꊛꄉꏦꈴꄔꄆ、ꇤꏸ、ꎸꏸ、ꇓꃀ、ꄯꒉꏬ、ꑽꏃꐽꀻꑠꉹꑘꊁꊰꌠꅐꊋꀜꋊꇧꎭ,ꊸꄆꏓꅐꌠꌌꌋꏦꇤꄸꀄꊭꌠꆦꌠꇬꄉꃅꉚ。ꐳꃅꎆꏂꑘꐧꐭꌠꄉꉻꁧꃤꃅꅉꃀꉁꈾꋈꄻ,ꎆꏓꈝꃀꍔꐯ,ꎆꏂꑘꐧꐭꌠꀻꎆꋦꈭꉾꃪꌠꄻꄉ。(3)ꁧꃤꃅꑘꐳꃅꀻꎆꌠꊥꎆ。ꐪꊛꄉꁧꃤꃅꏓꇱꄺꀱꉚꌠꄹꎆ,ꒃꅐꐨꐥꌠꁧꃤꃅꑘꏓꋧꀻꎆꌶꀠꃅꄷꋈꄻ,ꐥꐨꃅꐙꌠꁧꃤꃅꑘꀻꎆꄟꏀꀺ。ꀨꄉꀻꎆꌠꑓꏮꂿꑘꁡꇤꁧꃤꃅꑘꇬꉜ,ꇤꐳꀻꎆꌠꌋꆀꐛꏀꈴꁦꄻꑘꑖꑟꃅꐮꃆꂮꐥꌠꇮꇐꀊꂥꌠꁧꃤꃅ,ꏣꀋꑌꃅꏀꄓꁧꃤꃅꑘꀻꎆ。ꁧꃤꃅꑘꎆꏂꑘꎆꊙꈭꈜꀹꄻ,ꇤꐳꃅꊋꊡꉹꁧꃤꃅꑘꄆꌬ、ꒉꌬ、ꌗꌬ、ꊸꌬꌠꌋꆀꇮꑘꁌꏤꀑꐱꃅꐮꌠꃄꌬ。ꏣꀋꑌꃅꇩꏹꈩꆫꋈꄻ。2011ꈎ,ꇓꈓꏦꎫꎹꐎꁧꃤꃅꌬꇐꄐꅉ18.5ꃪꂷꑟ,2.2%ꉀꎆ。ꇤꐳꃅꈴꌗꅇꈴꌬꇐꋈꄻ,ꇩꏤꑭꊂꁨꑟꈜ1095ꃪꉻꆏꐥ,100ꃪꉻꆏꁦꎆ;ꈄꏍꐯꊛꈌ2.23ꂡꂷꐥ,3500ꃪꂷꁦꎆ。(4)ꊋꀥꇱꄉꐛꏀꈴꊋꇁꀦꅐꑘꌋꆀꏓꇱꎞꎭꉻꑫꋈꄻ。ꏣꀋꑌꃅꊋꇁꀦꒃꅐꌋꆀꌫꄻꄟꐈꆦꌠꄹꇙ,ꎆꏣꊇꎴꋬꂻꑘꒃꌠꐛꏀꐛꊋꇁꀦꒃꅐꉻꑫꄻ。ꇤꐳꃅꌋꇑꎆꏂꑘꄻꇱꏓꇱꀱ,ꊱꁨꐥꃅꀉꒉꉹꌠꊖꌋꅉꁍꌋꆀꀉꒉꐧꀠꉹꌠꐛꏀꈴꌋꇑꋈꄻ。ꊋꀥꇱꄉꀉꒉꉹꌠꋌꌗꅉꁍꋈꄻ,ꏷꄻꇮꑘꄐꃆꊧꉻꃪꈴ。ꊋꒉꃅꊛꒆꉆꌠꊋꇁꀦꀻꎆ,ꊋꇁꀦꀊꏀꀖꁉꌬꈧꌠꊥꎆ。2011ꈎ,ꌋꅐꇐꃷꁨꄐꄉ4.9%ꉀꎆ,ꋌꀑꐱꃅꀋꃋꐥꌠꑞꅉꑟ,ꋧꐛꌗ10.1%ꉀꎆ;ꄆꃑꃷꁨ8%ꉀꎆ,ꄚꈐꏭ,ꒉꄆ、ꉿꄆꂱꄷꃅꇬ6.1%ꌋꆀ13.3%ꉀꎆ,ꄷꀋꁧꈄꏍꅍꊋꄆꃑꊐꏸꄉꈁ45%ꉀꎆ。ꇤꐳꃅꈭꈜꈌꀋꂿꑘꌠꌋꆀꏓꇱꈭꈜꏍꈌꋈꄻ,ꀨꄉꃥꑌꌐꈜꎸꈜ、ꁮꐚꏭꈜꀦꎸꈜ、ꇩꏤꐳꈴꄇꈜ、ꇩꌜꈜꀦꄇꈜ、ꍤꏦꈜꀦꇉꈜ、ꅔꈐꈴꒉꀊꂥꊐꇉꈜꌋꆀꈯꄔꁮꐚꏭꎿꀸ、ꈯꄔꁮꐚꏭꈛꐞꌺꃏꏸꐛꅉ、ꁮꐚꏭꈜꀦꃏꏸꐛꅉꋈꄻꌠꊋꁈꄏ,ꈜꂾꀨꎹꌋꃅꌠꊋꀥꇱ。2011ꈎ,ꇩꏤꑭꊂꎸꈜꀰꏢꆏꈉ、ꄇꈜꍯꈴꈁꐥꆏꈉꄐꅉ9.9ꃪꉻꆏꌋꆀ410ꃪꉻꆏꑟ,8.8%ꌋꆀ3%ꉀꎆ,ꄚꈐꏭꐳꈜꎸꈜ、ꐳꈜꄇꈜꇬꍯꈴꆏꈉꆏ1.3ꃪꉻꆏꌋꆀ8.3ꃪꉻꆏꐥ,ꂱꄷꄉꇬ4700ꉻꆏꌋꆀ9000ꉻꆏꐥ;ꅔꈐꒉꈴꅉꀊꂥꊐꌠꇉꈜꆏꈉ10400ꉻꆏꑟ,400ꉻꆏꁦꎆ;ꃅꈯꈜꈴꃏꏸꐛꅉ181ꂷꐥ,6ꂷꁦꎆ。

  (ꉬ)ꃄꁕꀻꎆꄉꍈꂄꈴ,ꀻꎆꌠꋮꄮꐨꌋꆀꇓꈓꈴꑞꅉꉀꐕ。(1)ꐪꊛꄉꃄꁕꀻꎆꏓꉻꄐꇐꏤꁈꃄꌬ。ꏟꈯꃅꃹꅼꃅꁮꐚꁁꏯꀉꒉꃅꀖꁉꄐꇐꏤꁈꃄꌬꌠꃄꁕꀻꎆꏓꉻꄐꇐꏤꁈꉆꈉꂴꄉ,ꁮꐚꁁꏯꀉꒉꃅꀖꁉꊰꈎꌠꀨꄉꂿꃆꌋꆀꏱꁈꃄꌬ,ꁮꐚꁁꏯꀉꒉꃅꀖꁉ“ꊰꑋꉬ”ꄐꎖꌠꏤꄻ,ꁮꐚꁁꏯꃅꄷꊋꊡꉹꅐꑘꎹꀨꄜꃑ,ꀉꒉꃅꅉꃀꌬꇐꌋꆀꒆꉻꋦꈭꋈꄻꌠꊋꁈꄏꊋꃤꇱ,ꐛꐨꐥꂱꎆꅑꅐꑘꀻꎆꌠꊥꎆ,ꇤꐳꃅꇩꏤꀨꄉꁉꃑꎖꉚꅉꋈꄻ,ꑭꊗꌋꆀꇖꌜꀒꋤꃅꄷꉈꑴꑟꏦꐱꐂꏽꃅꀻꎆꌠꇬꊥꎆꋍꑞꋍꑵꏱꁈꌬꇫꑟꋒ,ꁮꐚꁁꏯꃅꄷꒆꉻꌧꑳꃅꀦꋉꃆꌋꆀꃄꄻ。ꑛꌋꈤꏭꐛꏀꈴꅐꑘꉻꑫꄻꐛꒆ,ꑛꌋꈤꃅꄷ“ꊰꑋꉬ”ꏀꄖꄐꎖꌠꁰꄻ,ꊥꇫꄉꍏꊉꃅꄷꇷꃅꄐꎖꐱꀨꌋꆀꒉꐭꑭꉢꆀꌩꁍꒆꉻꀧꌋꃅꌠꎆꏣꉹꏮꄐꎖꌠꃄꌬ,ꅐꀦꉹꇓꈓꐪꊛꄉꀻꎆꉆꃅꉚꌠꍔꂵ。ꃹꅼꃅꈯꄔꃅꄷꉀꄓꄐꎖꌠꃄꌬ,ꃅꋊꀊꏀꊬꌠꈯꄔꃅꄷꉀꄓꌠꏱꁈꏡꁈꎥꃪꏤꄻ,ꏣꀋꑌꃅꁭꅐꏮꊪꁮꐚꏮꊛꅉꂴꎆꅑꌠꇤꅐꇁ,ꀒꁨꋍꁘꃅꀉꇨꃅꈯꄔꃅꄷꇓꈓꉹꁥꌋꆀꍤꏦꐧꊐꌠꎆꏣꁕꁨꑭꄹꇙꂿꄐꁦꎆꇁꎻ。ꏣꀋꑌꃅꁭꅐꏭꃅꈋꏦꉻꉺꏦꏀꀺꌋꆀꀻꎆꃄꄟꆹꏮꌠꊋꁈꄏ,ꐪꊛꄉꂴꅑꄉꀻꎆ,ꀒꁨꋍꁘꃅꀉꒉꃅꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷꌋꆀꌢꎭꃅꄷꄏꐓꊋꀥꇱ。ꃹꅼꃅꃅꋮꆹꏮꉀꄓꉹꁌꌣꈚꌠꍔꂵ,ꏓꋧꐯꅑꐋꀋꌡꃅꊋꋠꃅꄷꌣꎭꄏꐓꀖꁉꈢꇓꀖꋉꃆꃄꇰ,ꑘꊋꌌꎝꎃꊐꌋꆀꀉꁁꃅꄷꌟꎭꄏꐓꌠꌤꃅꋒ。(2)ꀨꄜꄐꊋꅉꋈꄻꌠꄹꇙ。ꐊꑷꃅꇩꏤꑭꊂꀨꄜꄐꊋꅉꄐꎖꌠꃅꇫꑟ,ꌤꃅꉹꁸꄉꃄꁕꏱꁈꄐꂘ,ꊋꀥꇱꄉꇩꏤꌐꐘꄐꎖ、ꃄꁕꄐꎖꌋꆀꇩꏤꑭꊂꀨꄜꄐꊋꅉꄐꎖꌠꊪꊛ,ꃅꐨꅐꐨꍤꎖꈋꍣꉻꑫꀞꄻꐛꒆ。ꇤꐳꃅꌜꊐꀨꄜꄐꊋꅉꄐꎖꁰꄻ。(3)ꏣꀋꑌꎍꐽꃅꇓꈓꈴꌠꄹꎆ。ꇓꈓꈴꈯꒆꃅꀻꎆꄐꎖꃄꌬꌠꁰꄻ,ꎃꊒꃅꒉꐧꐭꇓꈓꌋꆀꇓꈓꀄꊭꌠꄐꊋꉆꈉ、ꅐꑘꄐꉻ、ꀖꁉꄹꊨꏤꄻ。ꋍꈭꐨꃅꅍꊌ、ꂘꑘ、ꐧꋦꏦꀧ、ꆄꄻꆅꉚ、ꏦꀧꐨꐥꌠꀀꑳꑠꁁꏯꋒꐯꋒꃅꂿꑘꇮꃅꊿꇓꈓꃹꇁꈉꄻꌠꉪꏡꌶ,ꊱꁨꐥꃅꇎꏦꇬꊒꌠꂿꑘꊿꆹꏮꌊꇓꈓꀀꌠꄹꎆ。

  (ꃘ)ꀋꆏꃅꊋꏏꍍꋊꌠꄹꎆ,ꒆꉻꌧꑳꋈꄻꌠꊋꀥꇱ。(1)ꏦꇨꃅꑞꅉꁻꌐꃅꎁꃅꇫꑟ。“ꊰꑋꉬ”ꊋꏏꍍꊨꃅꈋꑞꅉꁻꌐꁷꇽ,ꊋꏏꍍꋊꏓꌗꌠꍤꎖꏡꁈꃅꐛꒆ。ꊥꇬꄉꌜꊐꌠꍔꃚ“ꊯꊪꉬ”ꊋꏏꍍꊨꑞꅉꁻꌐꃅꐛꐨꌌꍤꎖ,ꈁꁠꏿꋍꃚꅿꏡꁈꃅꇫꑟ。(2)ꐳꃅꋉꃆꀋꉬꀋꉆꌠꋈꄻ。ꀋꉬꀋꉆꌠꊋꏏꄺꀱꋉꃆ、ꊋꏏꅐꇐꉹꁌꈲꏣꐥꌠꋉꃆꃄꌬ。ꊋꏏꍍꊨꐛꊈꐮꌠꌠꌋꆀꇮꇐꊨꊭꎥꃪꌠꊋꀥꇱ,ꀉꒉꀊꂾꌠꊋꏏꋦꈭꌋꃅꇮꇐꅐ꒧ꈴꌡꀠꌋꆀꆷꌬꌠꃅꋒ。ꇓꈓꏦꎫꍍꒉ、ꑶꌩꀖꑘꂥꀘꄻꇐꋈꄻꌠꄹꎆ,ꊖꌋꏦꌠꄆꍣꑦꇔꌠꃄꇰ,ꍍꆀꄺꂡꄻꇐꌬꐨꐕꀊꂥ。2011ꈎ,ꇓꈓꍍꒉꂥꀘꐨ、ꇓꈓꐥꐨꑶꌩꀖꑘꉮꀋꐥꂥꀘꐨ80%ꌋꆀ74%ꑟ,ꐯꀋꌡꃅꀒꄹꈎꄩꉐꊮꌺ3.1ꌋꆀ1.5ꂷꐕꀊꂥ。(3)ꊋꏏꍍꊨꏲꂠꌠꊋꀥꇱ。ꊋꀉꒉꃅꃹꌠꉹꑘꊋꃹꐨꑞꅉꏤꄻꌠꎕꏦꌋꆀꂪꇬꊋꌬꅐꇐꇿꋌꎕꏦꏤꄻꌊꌫꄻ。ꏦꇨꃅꎆꇱꐘꃆꊋꏏꄣꎖꍤꄻꄹꏦꍬꌬ。ꊋꃹꃷꁨꈁꉬꋎꍅꌋꆀꊋꏏꃷꁨꃼꃷꃅꉚꌠꍔꂵ。ꀨꄉꊋꃹꎆꏂ꒧ꊋꏏꏲꂠꌠꒃꉇ,ꊥꇬꄉꎆꏂ꒧ꃪꁯꊋꏏꌊꀁꑌꃅꐨꌋꆀꑴꀋꐥꈴꈜꋉꃆꃅꐨꍔꂵ。ꏦꇨꃅꀊꏀꃅꋈꄻꌠꋉꃆꊋꏏꎕꏦꍬꌬ,ꐳꃅꒉꀑꊸꈻꃅꄷꆏꋉꃆꊋꏏꄺꀱꌋꆀꃷꁨꎖꄉꊸꇲꌠꄺꀱꌠꐥ,ꊛꄉꊋꀦꐛꉆꌠꋉꃆꌫꄻꄉꈁꍔꐯ。ꋯꏤꄉꊋꀦꏲꂠ、ꊋꏏꄆꃑꄀꄻ、ꄆꊋꈉꇖꏡꁮꈴꄉꏲꂠ、ꄐꊋꇿꋌꌐꂷ、ꊋꏏꅐꇐꊫꌐꌋꆀꍔꃚꃻꄻꑠꊋꏏꉺꏦꃄꌬꐨꍔꒉ。ꊋꏏꏱꄻꄐꐨꋈꄻꌋꆀꏦꌬꍞꊟꍤꄻꌠꊋꀥꇱ。(4)ꊋꀉꒉꃅꇤꄉꀱꏮꎆꏣꀻꎆ。ꀱꏮꎆꏣꀻꎆꊋꊡꌠꏱꁈꏁꁈꄻꐛꒆꌋꆀꃅꇫꑟ,ꀱꏮꎆꏣꃅꉚꌡꀠꃹꅼꈴ。ꐳꃅꑶꌩꀖꑘꀉꒉꌠꏓꇱꌫꄻ,ꎿꒉꅔꒉꐛꌠꄹꎆ。“ꇓꈓꇑꅐꇐ”ꌡꀠꅉꁍꋈꄻꌠꒃꉇꋒ,ꄺꑣꅐ꒧ꈴꌠꌋꆀꋚꃅꅉꒉꍷꀖꑘꅐꀦꈴꃅꌫꄻꌠꄹꇙ。ꐊꑷꃅꁦꎴꃅꒃꅐꌠꆷꌬ。2011ꈎ,ꎆꃀꃪꂷꇮ꒧ꁦꎆꁌꐨꒉꌬꐨ7%ꀁꋌꊰ,ꇮ꒧ꑶꌩꀖꑘꎊꈬꇤꇧꎭꌠꏓꇱꌬꐨꉐꊮꌺ1ꂷꉀꐕ。(5)ꒆꉻꋦꈭꀧꌋꃅꌠꊋꀥꇱ。ꒉꈳꅉꀋꉬꀋꉆꌠꒊꃀꒈꌺ、ꎾꃝꍍꆀꌠꄴꏮꌠꍔꒉ,ꉈꑴꀋꉬꀋꉆꃅꈋꏂꑫꍍꆀꏱꄻꌠꌋꆀꂿ꒧ꁡꇤꋦꈭꏓꇱꏱꄻꌠꍔꒉ,ꂿꑘꁡꇤꑶꌩꀖꑘꏓꏡꂥꀘꉻꑫꋈꄻ,ꂿ꒧ꁡꇤꍍꆀꃅꊂꋎꍅꄉ。ꎿꃝꍍꆀꏱꄻꌠꊋꀥꇱ。ꋧꐛꌩꏪꅐꀦꀧꌋꃅꑍꊭꋉꃆꃄꌬ,ꇤꐳꃅꏾꊗꈬꉘꒆꉻꋬꂻꁿꅍꋈꄻ,ꐪꊛꄉꏡꏠꂤꏂꇓꃀꇁꀦ、ꉞꒀꃅꈋꃄꁏꇓꎓꂤꏂꐛꌠꏓꇱꏱꄻ、ꀋꉬꀋꉆꁿꇐꌩꉻꑫꋈꄻꋉꃆꄹꎆ,ꊖꅪꈬꉘꃅꈋ、ꏾꆀꎭꐻꃆꇁꄿꒉꇁꀦꉘꉚꅉꒆꉻꋦꈭꀧꌋꃅꌋꆀꏓꇱꏱꄻꌠꃄꇰ。ꆫꁍꀱꏜꏿꋉꃆꃅꌊꉾ,ꒉꇁꀦꀋꉬꀋꉆꇲꁵꃅꈋꒆꉻꀧꌋꃅꋈꄻꌠꊋꁈꄏ。ꒆꉻꁥꁵꉺꏦꀞꄻꐛꒆ,ꒆꉻꀋꉬꀋꉆꄐꐨꃅꈋꁥꁵꃅꉚꌠꄹꎆ,ꌕꒊꃀꒉꀦꇩꏤꒆꉻꀧꌋꃅꏓꇱꃅꉚꅉꏓꄜꄐꁈꁱꏤꅐꇁ。ꒈꇷꃪꇷꏓꇱꏱꄻꌠꊋꀥꇱ。ꃄꁕꀋꉬꀋꉆꅉꃄꊈꉮꌸꏱꄻꐨꍔꒉ。(6)ꏣꀋꑌꃅꃄꀑꃅꌗꐛꐈꌠꊝ。ꊸꑳꌗꊨꋎꍅꃅꐨꑞꅉꁻꌐꃅꇫꑟ。2011ꈎ,ꀊꏀꃅꌩꏪꃅꊂ600ꃪꉻꐊꊪꏽꄉ,ꌩꏪꊖꑗꒉꑌꃷꁨꁦꎆ,ꌋꈬꄐꐨꊋꀥꇱ。ꊸꑳꌗꊨꃑꌠꏓꌗꌋꆀꎖꌗꉻꑫꀞꄻꄉ。ꌋꀁꑌꌠꃅꉚꌠꍔꒉ。ꇩꏹꇷꃅꄉꃄꀑꃅꌗꐛꐈꌠꏭꊝꌠꊋꀥꇱ。

  (ꏃ)ꊋꇤꄉꉹꁌꐥꐨꏦꀧꌋꆀꄻꉾ,ꅉꀨꋍꏅꁧꃤꃅꉻꑫꌋꆀꐧꋦꏱꄻꉺꏦꀞꄻꐛꒆ。(1)ꀊꅰꏣꀋꑌꌠꃅꅍꊌꏱꁈꌫꄻꇬꎷ。ꃅꅍꊌꊥꎆꌠꌌꎆꏣꐧꋦꀻꎆꌠꀨꇬꄉ,ꊋꀉꒉꃅꇤꄉꑘꃅꏓꋧꉹꑘ、ꀄꊭꌠꎆꏂ꒧、ꐛꏀꈴꁧꃤꃅꑘꌋꆀꑱꈐꁧꃤꃅꑘꀻꎆ,ꑴꌅꏀꀺꌋꆀꑴꑳꃅꅍꎹꌠꊋꊡ。ꊋꇤꄉꒉꌶꅉꌷꅐꇁꌠꌶꌺ、ꂿ꒧ꁡꇤꑘꃅꊋꃤꆹꏮ、ꇓꈓꏦꎫꃅꅍꊌꊋꋠꊿ、ꂽꄻꀱꇁꌠꃅꅍꊌꌤꃅꌠꃅꋒ。ꐪꊛꄉꅉꂫꊐꌠꃅꅍꊌꌋꆀꐧꋦꏦꀧꁧꃤꃅꄻꇐꋈꄻꌠꊋꀥꇱ,ꏓꋍꃱꌠꋭꋽꌠꊿꊋꅐꀦꃷꎏꄻꐛꒆ,ꃅꅍꁰꍋꌠꇨꈴ。ꑘꃅꇖꅔꌠꂥꀘꉺꏦꄻꐛꒆ。(2)ꋭꋽꃅꊌꐨꁷꑣꃆꂮꋊꄻ。ꊌꐨꁷꄻꄺꀱꄐꉻꎥꃪꏤꄻ,ꇩꂱꊌꐨꁷꄻꄉꍈꋊꄻ,ꊌꐨꁷꄻꍣꐨꊨꒊ。ꎆꏂ꒧ꃄꎆꑗꑟꉀꎆꉺꏦꋈꄻꐛꒆ,ꎍꐽꃅꃄꎆꋍꉻꋮꒉꃅꄹꎆ,꒔ꁘ꒔ꁘꃅꃄꎆꎕꏦꀁꂥꐯꀁꂥꌠꐕꀊꂥ,ꏟꈯꃅꌤꃅꊿꃄꎆꀊꅰꃅꂿ꒧ꊋꃅꊿꃄꎆꄯꎝꌠꄴꏮ。꒔ꁘ꒔ꁘꃅꁸꄉꊨꏦꊌꐨꇗꏸꄹꏦꄺꀱ,ꄉꄐꃅꃄꎆꊌꐨꇗꏸꊨꇧꎭꎕꏦꐕꀊꂥ,ꊌꐨꐧꀠꀁꂥꌠꊿꇗꏸꏮꌠꊨꒊ,ꊌꐨꀊꂥꉹꌠꃄꎆꈁꉬꃷꁨꌋꆀꃄꎆꑞꅉꑍꄀꋎꐽꏱꁈꄻꐛꒆ。ꊌꐨꁷꄻꈭꎁꋊꐽꌋꆀꋊꍬ。(3)ꀋꎪꃅꐧꋦꏦꉻꌤꃅꌠꃅꌊꉾ。ꃀꌠꀨꎹ、ꆅꉚꆄꄻꄜꏂꀧꐮꃆꂮꏮꀱꊪꊛꏡꁈꃄꌬꑞꅉꑟ,ꐧꋦꄜꏂꀧꏓꇱꏠꊐꐕꀊꂥ。ꏂꎆꑘꎞꑭꆏꊿꅉꀨꃀꌠꀨꎹꎆ、ꇓꈓꇓꉈꀀꊿꀁꂥꄉꀧꎕꏦꑖꑟꋊꐽꉺꏦꋈꄻꐛꒆ。ꏣꀋꑌꃅꌤꃅꅉꌋꆀꌤꑘꌤꃅꅉꃀꌠꀨꎹꄜꏂꀧꄹꏦꄺꀱꌠꄹꎆ,ꂿ꒧ꁡꇤꀊꏀꉹꌠꐧꋦꃀꌠꀨꎹꄜꏂꀧꃅꉚꅉꍔꐯ。2011ꈎ,ꇓꈓꏦꎫꃀꌠꀨꎹ、ꆅꉚꆄꄻ、ꌤꃅꅍꀋꊌꇧꎭꌠꌋꆀꌤꃅꄉꂷꊂꌸꌠꄜꏂꀧꐊꌠꊿꃷꁨꈧꌠꂱꑱꅉꁦꎆꌊ827ꃪꑻ、794ꃪꑻ、124ꃪꑻꌋꆀ827ꃪꑻꑟ。ꇤꐳꃅꐧꋦꈭꋏꇇꀨ、ꐧꋦꈲꐪꌤꑘꀻꎆ,ꊾꍸꀉꑳꀨꎹꅉ、ꊿꄣꅐꀱꌒꅉꌋꆀꃀꌠꀨꎹꁧꃤꃅꌫꉂꌫꈾꀻꎆꋈꄻ。2011ꈎ,ꄙꑻꃀꌠꀨꎹꀀꈤꃷꁨ20ꋬꐥ,9.9%ꉀꎆ;ꊾꄣꅐꁧꃤꃅꌫꉂꌫꈾ3230ꂷꑟ,8.6%ꉀꎆ。(4)ꇤꐳꃅꀀꑳꏦꀧꉻꑫꋈꄻꌠꄹꎆ。ꏦꀧꐨꐥꌠꀀꌒꋉꃆꋈꄻꊋꃤꀉꒉꃅꇱ,ꋍꏅꊤꌬꀀꑳꑠꏦꀧꐨꐥꌠꀀꑳꋈꄻꌠꄹꎆ,ꇤꐳꃅꇓꈓ、ꇮꃅꇑꇵꅉ、ꌩꋦꅉ、ꃅꏀꀖꅉꑠꏼꑳꄺꂡ,ꎍꐽꃅꍔꃚꎆꇱꉺꏦꌋꆀꐧꋦꎆꊒꁵꄉꀧꉺꏦꋈꄻ,ꃄꅉꇲꁵꌋꆀꋈꄻꄐꎖꌠꂴꄉꄐꁆ,ꐧꋦꎆꌌꋍꏅꊤꌬꀀꑳꋈꄻꈽꌠꌋꆀꀰꏢꌠꊋꊡ。ꐪꊛꄉꃷꇐꀀꑳꇿꋌꐥꃅꇲꁵꌠꁦꎆ,ꀊꂥꐧꐭꉹꌠ、ꁌꏤꐧꌠꀁꂥꌠꀀꑳꍆꐪꐕꀊꂥ,ꀀꑳꊤꌬꃷꎏꋊꍬꀻꎆ。ꀒꁨ꒔ꁘꃅꑲꅉꅐꇐꋎꍅꏱꁈꃄꌬꌋꆀꄻꐛꒆ,ꎆꇱꊜꋽꐨꋎꍅꄉ,ꑲꁌꐲꇨꃅꉀꎆꌠꋎꍅꄉ。ꇩꏤꃆꂮꄉꄐꌠꀀꑳꇲꁵꌋꆀꏱꁈꉻꑫꄻꐛꒆ,ꇿꋌꐥꃅꀀꑳꇲꄻꌠꌋꆀꈉꌠꀊꉗꀊꎴꉺꏦꋊꍬꌠꄻꐛꒆ。(5)ꂘꑘꀋꉬꀋꉆꁁꏯꏲꂠꋈꄻꌠꊋꇨꇱ。ꐊꑷꃅꇩꏤꐧꀠꀊꎴꊬꌠꂘꑘꄺꀱꌋꆀꀻꎆꄐꎖꐱꀨꃄꌬ。ꇤꐳꃅꂿꑘꁡꇤꐧꋦꌶꅉꊋꆓꌶꅉꄺꀱ,ꐪꊛꄉꈯꄔꁮꐚꁆꏯꂿ꒧ꁡꇤꐧꊐꌠꌶꅉꀀꑳꄺꀱꋉꃆ、ꇩꏤꑭꊂꐧꐭꌶꅉꀀꑳꋬꂻꋉꃆꌋꆀꃅ꒧ꂘꇐꅉ꒜ꄐꊋꋈꄻꌠꄹꎆ。ꊋꒉꃅꂿ꒧ꁡꇤꌷꃆꉙꂘꌠꀻꎆ,ꇣꋲꂘꑘꉜꁨ,ꐧꌷꀊꂥꊐꌠꌋꆀꃅꑘꂘꇐꄻꐛꒆ,ꊿꋅꌶꅉꋈꄻꌋꆀꊿꋅꃅꄷ“ꉙꑍꑵ”ꂘꌠꊋꁈꄏ。ꃅꋮꆹꏮꎬꅧꃅꄷꂿ꒧ꁡꇤꌶꅉꂘꃀꀀꑳꋈꄻꌠꄹꎆ。ꀊꂥꊐꌠꂘꇐꊇꁧꉀꐕ,ꇤꐳꃅꉾꐯꉾꌠꌶꅉꀊꂥꊐꌠꌋꆀꉾꐯꉾꌠꌷꑫꋈꄻ。ꎔꃅꎆꏣꊋꋠꑱꈐꀉꑳꁱꂷꌷꌠꌤꃆꂥꀘ。2011ꈎ,ꐧꌷꀊꂥꊐꌠꂘꇐꌶꅉꌷꐨꄐꄉꌠꇬ84%ꇬꑟ,ꎃꐚꌶꅉꀊꂥꌠꌶꌺꀪꍋꈆ675ꃪꑻꎹ,ꎥꃪꌶꌺ56ꃪꑻꎹ。(6)ꆅꉚꆄꄻꁦꎴꌤꑘꀻꎆꌠꄹꎆ。ꅉꂫꊐꌠꌌꀨꄉꌠꆅꉚꆄꄻꁦꎴꁧꃤꃅꋈꄻꌠꊋꀥꇱ,ꑞꆅꑌꉜꄎꌠꑱꌜꉘꉚꅉꃀꐘꃆꃄꌬ,ꁦꎴꍞꊟꉻꑫ、ꂿ꒧ꁡꇤꃛꊸꈭꋏꉻꑫ、ꉌꊈꁦꎴꄴꏮꉻꑫꋈꄻ。ꊋꀥꇱꄉꌋꅪꀉꑳꈯꀧꌤꃅꌠꊋꀥꇱ,ꐪꊛꄉꌋꅪꇬꏢꉞ、ꀉꆂꉞꁌꀋꁵꃅꍤꄻꌋꆀꈭꋏꏦꀧꃅꉚ。ꊋꀉꒉꃅꇤꌊꂿ꒧ꁡꇤꀊꅰꃅꈯꄔꁮꐚꁆꏯꃅꋮꆹꏮꆅꉚꆄꄻꌫꉂꌫꈾꎆꇱ。2011ꈎ,ꊾꂷꐽꏡꃅꋍꏅꁦꎴꁧꃤꃅꎆꌬꌠꎕꏦ15ꂷꇬꄉꉀꐕꌊ25ꂷꑟ,ꀊꏀꉹꌠꂿ꒧ꁡꇤꇷꃅꆅꉚꆄꄻ、ꇓꈓꏦꎫꀀꊿꅉꀨꆅꉚꆄꄻꄜꏂꀧꏱꎆꀥꋍꇱꎕꏦꋍꈓꊾꂷꐽꏡꃅ120ꂷꇬꄉꉀꐕꌊ200ꂷꃅꄉ。ꊿꄙꑻꌠꆅꉚꀀꈤꃷꁨ3.42ꋬꇬꑟꌠꉜꄉꂵ,5.6%ꉀꐕ。ꊻꂷꌋꆀꎖꁨꒆꉘꁧꃤꃅꉻꑫꄻꐛꒆ。(7)ꊋꀉꒉꃅꇤꌊꁱꀕꌤꑘꌋꆀꁱꀕꅐ꒧ꀻꎆ。ꇤꐳꃅꇓꈓꇓꉈꋍꏅꁱꀕꁧꃤꃅꉻꑫꋈꄻꉱꑷ。ꏣꀋꑌꃅꁱꀕꉹꁌꈲꁵꋉꃆꄹꎆ,ꇤꐳꃅꀨꄉꁱꀕꌫꉂꌫꈾꋈꄻ。ꍔꑪꐧꋦꈆꑪꌄꆣꀻꎆ,ꅇꁊꄆꒌꄆꁱ、ꈨꏀꅏꄻꑠꁁꏯꀉꒉꀊꂾꁱꀕꐘꃆꌋꆀꅐꇐꏀꀺꌠꄹꎆ。ꁱꀕꅐꇐꅉꁍꋊꍬꀻꎆ,ꁱꀕꍸꇐꌋꆀꋌꐛꋌꐙꍸꇐꀧꌋꃅꌠꊋꀥꇱ,ꀒꁨꋍꁘꃅꋽꇐꑴꁱꄈꅉ、ꄯꒉꄉꅉ、ꁱꀕꇨ(ꍉ)、ꏂꀨꄉꑳ、ꎺꄅꄉꑳ、ꈆꑪꇮꇐꄉꑳꁌꀋꈁꃅꁉꃑꌠꄹꎆ。ꊋꇨꃅꈩꆫꅉꃀꌫꉂꌫꈾꋈꄻ,ꇝꂱꀉꆹꅉꈩꆫꑍꊭꌠꄐꎖꃄꌬꌠꃅ。ꐊꑷꃅꋍꏅꈯꎟꌤꑘꀻꎆ。2011ꈎ,ꃅꃴꅇꁊ、ꄆꁱꊻꂷꉱꑷꐨꂴꄐꄉꌠꆏꂱꑱꅉꆏ96.71%、97.43%ꇬꑟ;ꇩꈐꈩꆫꊿꃷꁨ23.1ꂡꑹꃢ,7.4%ꉀꎆ。(8)ꐧꋦꏲꂠꏀꀺ。ꋥꁕꏲꂠꌬꀦꏓꄻꐯꇯ,ꀒꁨꋍꁘꃅꉹꁌꈲꁧꅇꎹꇖꂟꉉꄜꈴꈜꎵꃪꄉ,ꏣꀋꑌꃅꋍꉻꐨꐥꌠꃣꈌ꒔ꑞ꒔ꉹꄴꏮꌋꆀꋭꋽꃅꀞꄻ,ꐧꋦꋬꂻꏓꇱꏲꂠꌠꊋꀥꇱ,ꋠꇐꁬꋌꋬꂻꍞꊟꏲꂠꌠꊋꀥꇱ,ꏟꈯꃅꋬꂻꃣꈌꀋꇰꀋꉈꀉꒉꌠꇫꅐꇁꄡꎽ。(9)ꐪꊛꄉꉮꌸꊂꋉꀱꄺꀱꌠꃅꌊꉾꃅꄉ。ꐊꈴꃅꊉꍧꉮꌸꊂꋉꀱꄺꀱꂿꃆꃅꌐ,ꏟꈯꃅꒄꎽ、ꍏꐏꉮꌸꊂꋉꀱꄺꀱꌤꑘꄹꎆ。

  (ꉆ)ꄺꀱꈢꇓꀖꐨꊋꀥꇱ,ꎆꏣꐧꋦꀻꎆꌠꇙꊋꌋꆀꍄꑐꊋꃤꇨꀥꇱ。(1)ꉻꁨꄹꏦꌊꀨꃅꄉ、ꁨꏦꀉꑌꑵꎆꏣꐯꇯꀻꎆꌠꅉꃀꎆꏣꄹꏦꌭꈬꌋꆀꄻꐛꒆ。ꐪꊛꄉꇩꁨꎆꏣꄐꇐꏤꁈꐨꐥꃅꋊꄻꌠꄹꎆ,ꇩꁨꎆꃀꈏꃹꉇꅐꐨꐥ、ꋭꋽꃅꇙꐺꌠꉺꏦꄻꐛꒆ,ꋧꃅꋓꂅꊋꃤꐥꌠꇪꌦꀉꒉ、ꎆꏂ꒧ꉻꏑꀉꒉꌠꉘꉚ。ꃹꅼꃅꄆꊋ、ꇓꋌ、ꋂꑘꃅꉹꑘꋍꑠꄺꀱ。ꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏꌋꆀꄐꏁ,ꁨꏦꎆꏣ꒔ꑞ꒔ꑵꏦꈴꐽꊯꃅꒃꅐꐊꊈꌬꈧ、ꀋꈐꀋꉈꃅꃷꎏꋓꂅꅉꇬꐊ、ꐯꌟꃅꏦꃤꁳꇫꀧꌋꃅꎻꌠꉺꏦꋦꈭꁦꄻ。(2)ꏣꀋꑌꃅꑘꒃꋭꋽꃅꌬꀦꐨꅐꇐꁌꏤꌋꆀꋦꈭꀧꌋꃅꁌꎴꄺꀱꌠꄹꎆ。ꐳꃅꄻꐛꋌꁌꏤꃷꎏꈴꄺꀱꌠꄹꎆ。ꋧꐛꐞꌗꁌꏤꏓꐛꏦꉻꄺꀱꌋꆀꄻꐛꒆ,ꋌꐛꌗꌋꆀꎃꊐꉆꌬꀦꁌꏤꌡꍆꐮꃆꂮꎵꄻꄉ。ꊜꋽꅉꎹꄉꀀꊿꊐꐥꄆꁌꏤꃄꌬ,ꒉꄆ、ꉿꄆ、ꉈꑴꒆꐛꉆꌬꀦꁌꏤꏓꐛꏦꉻꄻꐛꒆ。ꀆꐒꁌꏤꄺꀱꌠꄹꎆ。ꀒꁨꋍꁘꃅꍍꋊꌅꈌꁌꏤꐥꃅꌬꈧꌋꆀꃼꇇꃅꃅꉚꌠꄹꇙ。(3)ꇤꐳꃅꆅꉚꁬꋌꏦꉻꄺꀱ。ꃹꅼꃅꉬꐘꀋꂿ꒧ꃅꄺꀱꌠꄹꎆ,ꀑꐱꃅꌕꈎꌤꃅꂿꃆꀋꂿ꒧ꌠꃅꌐ。2011ꈎꇓꈓꏦꎫꌤꃅꊿꌋꆀꇓꈓꀀꊿꆅꉚꄜꏂꀧꇬꐊꆹꐨ、ꂿ꒧ꇷꃅꀊꏀꇬꐊꆹꐨ90%ꈋꉐꐛꇬꎷ。ꍔꃚꀞꄉꌠꅉꂫꊐꌠꆅꉚꁦꎴꏲꉻꇬꄉꐊꈴꃅꅉꃀꁬꋌꌬꇐꄹꏦꃄꌬ,ꅉꃀꁬꋌꌬꇐꃻꄻꏦꉻꋈꄻꋊꍬꈴ,ꅉꂫꊐꌠꆅꉚꁦꎴꏲꉻꏓꇱꄺꀱꌠꄹꎆ,ꊒꁵꏦꉻꀊꉗꃅꌬꉆꇈꑘꒃꌠꋈꄻ。ꉻꀞꆅꉚꅉꄺꀱꃅꉚꌠꒃꉇꋒ。ꐧꋦꎆꀨꆅꉚꆄꄻꏲꉻꀞꄻꌠꏱꁈꃄꌬꊋꊡꌋꆀꄐꏁ。(4)ꃹꅼꃅꏱꎆꇗꏸ、ꎆꒉꎆꇁ、ꎆꇱꏦꉻꄺꀱ。ꏱꎆꆹꏮꁵꄻꄹꏦꄻꐛꒆ,ꎃꐚꐨꆹꏮꁵꄻꄉꈁꌋꆀꍆꐨꁦꎆ,ꑤꊐꌠꅉꃀꎆꊋꏦꀧꉺꏦꄻꐛꒆ。ꃹꅼꃅꄐꌗꏲꂠꄹꏦꄺꀱ,ꏣꀋꑌꃅꄐꌗꄇꄜꋊꌠꄹꎆ。ꌬꀦꇗꏸꄺꀱꃄꌬꑭꊂꍔꒉ。ꒃꅐꐨꁧꃤꃅꑘꄺꀱꌊꁌꎆꇗꏸꎴꄺꀱꃅꉚꌠꃄꌬ。ꎆꀨꃷꎏꉻꑫꀉꑌꊐꃅꐙꌠꄻꐛꒆ,ꇤꐳꃅꎆꊫꌐ、ꄮꈉꎊꈬꃷꎏꀻꎆ,ꈛꎂꎆꌬꎆꈴꍆꐨꉀꐕ。ꏣꀋꑌꃅꂿ꒧ꁡꇤꀊꏀꉹꌠꎆꒉꎆꇁꏲꉻꉘꉚ。ꀒꁨꋍꁘꃅꏓꂱꀙꎆꃀꁌꐨꏓꐛꏦꉻꄻꐛꒆ。ꇤꐳꃅꍔꃚꎆꇱꃷꋪ、ꎆꏂ꒧ꎆꇱꐘꃆꍤꄻꈌꁧꌋꆀꁱꄀꅺꇰꏲꂠꃷꋪꏤꄻ。(5)ꐪꊛꄉꂿ꒧ꁡꇤꏓꇱꄺꀱꌠꄹꎆ。ꂿ꒧ꁡꇤꃄꅉꎹꃷꋪꎥꃪꏤꄻ。ꃹꅼꃅꋍꉻꌩꏪꌅꈌꄹꏦꄺꀱ,ꐪꊛꄉꇩꁨꌩꏪꌩꋦꅉꄺꀱꃅꉚꌠꃅ。ꏣꀋꑌꃅꏓꇱꋬꈭꄺꀱꃅꉚꌠꄹꎆ。

  (ꈬ)ꏟꈯꃅꐯꈲꐯꇯꊋꐛꌠꁉꃑꐨꄐꇐꏤꁈꃄꌬ,ꋧꃅꎆꏣꇷꃅꈥꊂꀹꄻ。(1)ꉇꉻꏭꃼꇇꃅꏓꏦꄻꉾꃪꈴ。ꏟꈯꃅꃷꎏꀉꑌꑵꃅꐙꈴꄐꇐꏤꁈꃄꌬ,ꋊꃅꐥꇈꌠꃷꎏꄻꈫꈈ,ꊋꇨꃅꃷꎏꀊꏀꃅꅐꇁꌠꀹꄻ,ꉇꉻꈉꐨꎍꐽꌋꆀꀹꄻ。ꇤꐳꃅꁥꄻꃼꇇꉹꏮꊐꐕ,ꋬꈭꃅꐙꌠꉁꈾ、ꁱꀕ、ꆓꐘꃅꊋꂫꊼꇅꀉꒉꌠꃷꇐꌋꆀꁧꃤꃅꉇꅐꌠꊋꁈꄏ,ꊋꇨꃅꁧꃤꃅꀧꉇꁵꌠꀻꎆ,ꐪꊛꄉ“ꑍꀊꂥꋍꌬꀦ”ꅐꇐꉇꅐꌠꋏꆸ。ꈏꃹꊥꎆꏱꁈꄻꐛꒆ,ꇮꁈꉁꈾꂴꅑꌠ、ꏀꀮꏀꂷꀋꂿ꒧ꌠ、ꊋꀦꌬꇐꅐꀦꌋꆀꊋꏏꋦꈭꀧꌋꃅꅐꇐꈏꃹꌠꍔꒉ。ꀉꑌꁁꏯꑍꁁꏯꎆꏣꃼꇇꐮꃆꂮꊋꀥꇱꌋꆀꄻꉾ,ꋭꋽꃅꃼꇇꃅꐮꃜꎭꌠꏭꊝ。(2)ꉇꎆꌬꈧꌠꊇꁧꌋꆀꑞꅉꉀꐕ。ꉇꉻꃼꇇꃅꊿꎆꇱꅐꑘꄐꌐꐱꀨꌋꆀꈯꄔꁮꐚꃅꄷꉇꄅꃼꇇꃅꊿꎆꇱꊋꇨꅐꑘꐱꀧꄺꀱꄜꃑ,ꉇꉻꎆꀨꌌꄺꂡꑘꀊꂥꊙꌠꇬ、ꇮꁈꀊꂥꅐꑘ、ꀋꃋꋋꄮꁧꃤꃅꑘ、ꊋꏏꋦꈭꀧꌋꃅꑠꑭꊂꌋꆀꈯꄔꁮꐚꏮꎆꇱꌠꊋꊡ,ꉇꉻꎆꀨꊋꊡꄉꃄꄟꀉꑌꑵꃅꇩꈐꎆꏂ꒧ꏓꀱꄺꀱꌋꆀꏓꇱꄺꀱꌠꇬꐊꆹꎻ。ꏣꀋꑌꃅꎍꐽꃅꁧꃤꃅꑭꊂꉇꉻꏭꉜꄉꁉꃑꌠꍔꒉ。ꀒꁨꋍꁘꃅꐛꈌꈁꉬꉇꎝꏲꂠꌠꄻꐛꒆ。(3)ꃹꅼꃅ“ꉇꅐꁧ”ꌠꄐꇐꏤꁈꃄꌬ。ꎆꏂ꒧ꊋꁈꄏꄉ“ꉇꅐꁧ”ꌠꏱꎆꇗꏸ、ꎆꒉꎆꇁ、ꄜꏂꀧꏱꁈꄻꐛꒆ。ꏓꂱꀙꃄꁕꉇꅐꃼꇇꃅꌋꆀꎆꇱꈐꇬꌬꌠꍔꒉ。ꅔꉈꃨꆰꐨꄴꏮꉺꏦꄻꐛꒆ。ꐪꊛꄉꅔꉈꊋꀧ、ꇑꇐꅐꀦꌋꆀꂿ꒧ꇷꃅꌠꄹꇙ。ꉇꉻꏭꎆꏣꇇꀨꌠꌤꃅꋒ。

  ꊋꀥꇱꄉꅔꈐꌋꆀꑣꇤ、ꉪꂱꐮꈴꇷꃅ,ꐪꊛꄉꀊꅰꑖꑟꃅꎆꏣꃼꇇꃅꌠꐮꃆꂮꄐꁆꃄꌬ。ꑣꇤꊋꁈꄏꄉꇩꏹꎆꒉꎆꇁ、ꃼꇇꃅ、ꎿꇉꎞꎭꈯꄜꑌꈉꄻꈫꈈꌋꆀꊐꐕ,ꎆꒉꎆꇁꃅꆺꑭꊂꁧꏖꐨꀉꇨꎻ。ꉪꂱꊋꁈꄏꄉꋧꃅꇣꄧꈩꆫꑬꆏꈯꄜꋈꄻ,ꎆꏣꄉꄐꃅꀉꑌꑵꃅꀻꎆꌠꊥꎆ。ꃹꅼꃅꇨꄏꑣꇤꉪꂱꇷꃅꄉ,ꃄꁕꎆꏣꀻꎆꌠꊥꎆ。ꃹꅼꃅꎿꋮꑍꁁꏯꎆꏣꇷꃅ,ꎿꋮꑍꁁꏯꌠꎆꏣꇷꃅꐛꉻꋮꇖꄉ,ꑍꁁꏯꎆꇱꌠꊥꎆ,ꊋꀥꇱꄉꏀꄓꅐ꒧、ꎆꒉꎆꇁꑠꐛꏀꁧꃤꃅꑘꌋꆀꁱꀕ、ꂘ꒧ꑠꏲꂠꐮꈴꇷꃅ。ꋒꐯꋒꃅꎿꋮꁮꐚꎆꏣꃄꁕꄷꐮꈴꇷꃅꈐꇬꂴꅑꄉꃅꉚꌠꂿꄐꋊꇤ。

  ꁧꎁꊈ,2011ꈎꎆꏣꐧꋦꀻꎆꌠ꒔ꑞ꒔ꐘꌤꃅꋒꌠꆹ,ꂿꃆꆼꇨ,ꃅꎁꐨꀉꒉꌠꉬ。ꉪꊇꆏꑖꑟꃅꋯꑌꌊꐋꀨꃛꏢꄧꊝꎼꏹꃅꄉꌠꄈꍏꑷꈭꇍꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿ꒧ꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꑴꌅꃅꇩꏤꑭꊂꏓꄊꁳꄐꇺꌋꆀꍞꊟꎻ,ꑖꑟꃅꇩꏤꑭꊂꍔꑠꉜꐨꌋꆀꇖꐨꅲꄉ,ꊋꑇꊋꆗ,ꉌꑣꁨꂵ,ꇨꃅꌤꃅꄉ,ꁣꀋꐥꃅꎆꏣꐧꋦꀻꎆꌠꑞꅉꌐꂷꃅꇫꑟ,“ꊰꑋꉬ”ꇬꂿꉾꃅꇬꂿꄷꄉꈏꇤꊋꇤ!
ꁰꒌ




  • 特别鸣谢
    中国民族语文翻译局彝文翻译室