ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍔꃚꌤꃅꅇꄜ

——2011ꈎ3ꆪ5ꑍꊯꊪꈭꇩꏤꑭꊂꏓꂱꁧꎁꃀꀉꒉꇖꃢꌠꈿꅉꇬ

ꇩꃷꑼꊝꅿ ꊈꏦꀧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꁧꎁꊈ:

  ꀋꃋ,ꉢꇩꃷꑼꎁꃅ,ꃀꀉꒉꈿꅉꏭꍔꃚꌤꃅꅇꄜꂿ,ꁧꎁꊈꌌꍤꇖꅊꇈ,ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。

  ꋍ、ꀱ“ꊯꊪꉬ”ꊬꌠꇩꂱꎆꏣꌋꆀꐧꋦꀻꎆꐨꉪꏡ

  “ꊯꊪꉬ”ꊬꌠꆹꉪꇩꏤꀻꎆꆹꎁꇬꀊꅰꃅꎍꀋꐽꃅꐙꌠꉬꈎꉬ。ꑓꏮꇩꈐꇩꉈꌼꇪꌠꃅꒊꃅꇁꌋꆀꃨꆰꋓꎭꀉꒉꀊꂾꈧꌠꉜꄉ,ꍏꇩꇭꍣꄈꋯꑌꃅꇩꏤꑭꊂꊿꋅꈁꐥꌠꏓꂱꏃꂠꄉ,ꐊꑷꃅꄺꀱꁉꃑꌠꌋꆀꐛꏀꈴꋈꄻꌠꄹꎆꇈ,ꇩꏤꐛꑊꐩꋊꐨꐥꃅꐛꐈꀐ。

  ——ꋋꉬꈎꆹ,ꉪꇩꏤꐧꋦꒃꅐꊋꃤ、ꏓꇱꇩꊋꄇꇖꀕꃅꉀꎆꀐ。ꉪꊇꇿꋌꐥꃅꇩꏹꎆꒉꎆꇁꎒꐡꄜꎟꌠꊝꇈ,ꏦꀋꊰꃅꎆꏣꎍꐽꃅꊼꇅꐳꃅꀻꎆ,ꊋꐛꃅ“ꊯꊪꉬ”ꄐꎖꌠꀋꉬꀋꉆꌠꑞꅉꁻꌐꌋꆀꂿꃆꃅꌐ,ꇩꂱꎆꏣꀊꏀꃅꑠꊐꇬꑟꀐ。ꇩꈐꒃꅐꈁꊌꁌꐨ39.8ꃪꂡꂷꑟ,ꃅꈎꈓꐽꏡꃅ11.2%ꉀꎆ,ꏱꎆꊌꐨ3.16ꃪꂡꂷꇬꄉꁦꎆꅷ8.31ꃪꂡꂷꇬꑟ。ꊿꑌꃅꐚ、ꆪꎖꋉꃆ、ꊐꎆꌗꇐꏸꑠꂴꅑꈆꑪꇮꇐꀉꒉꀊꂾꃅꂵꅐ。ꇩꐏꌋꆀꂽꐛꏀꈴꋈꄻꌠꃅꐛꐨꀉꒉꀊꂾꃅꐥ。

  ——ꋋꉬꈎꆹ,ꋍꑞꋍꐘꐧꋦꌤꑘꐳꃅꀻꎆ、ꏓꂱꐥꐨꄇꇖꀕꃅꄻꃪꀐ。ꂘꑘ、ꈆꑪꇮꇐ、ꁱꀕ、ꁦꎴꆄꄻ、ꈯꒆꄿꎟꌤꑘꐊꑷꃅꀻꎆ。ꇓꈓꏦꎫꀊꏀꃅꃅꅍꁵꌠꊿ5771ꃪꑻꐥ,ꂿꑘꑘꁨꊋꃤꆹꏮꌠ4500ꃪꑻꐥ;ꇓꈓꏦꎫꀀꊿꊾꂷꐽꏡꃅꌬꉆꌠꊌꐨꌋꆀꂿꑘꁡꇤꀀꊿꊾꂷꐽꏡꃅꎆꌃꊌꌠꃅꈎꋍꈓꌠꐽꏡꃅꂱꄷꄉꇬꃶꐚꃅ9.7%ꌋꆀ8.9%ꉀꎆ;ꇓꈓꇓꉈꇬꐧꋦꏦꀧꉻꑫꉱꑷꐨ꒔ꁘ꒔ꁘꃅꄻꐛꒆ。

  ——ꋋꉬꈎꆹ,ꄺꀱꁉꃑꌠꀉꒉꀊꂾꃅꁨꎆꌠꊌꐨꐥꀐ。ꀧꄉꁁꏯꌋꆀꀋꉬꀋꉆꊨꊭꇬꄺꀱꌠꊌꐨꀊꏀꃅꂵꅐ,ꐧꋦꉪꏦꃷꎏꎆꏣꏦꉻꀊꅰꃅꄻꐛꒆ。ꀋꉊꄻꈎꉇꉻꃼꇇꈁꊌꃷꁨ2.79ꃪꂡꂷꂰꑼꑟ,ꁉꃑꉹꌠꎆꏣꑟꐨꐳꃅꉀꐕ。

  ——ꋋꉬꈎꆹ,ꉪꇩꏤꇩꏹꑋꅉꉆꈉꌋꆀꑌꑲꊋꃤꄇꇖꀕꃅꉀꐕꀐ。ꉪꊇꇩꏹꌤꃆꇬꀋꂿꑘꌠꋈꄻꐨꂿꄐꇤꅐꇁ,ꊋꑌꃅꇩꏤꌅꀨ、ꋬꂻꌠꌋꆀꀻꎆꌠꈲꁧꀧꌋꃅ,ꉇꉻꑌꑲꌠꑞꑌꁨꎆꐨꀉꒉꀊꂾꃅꐥ。ꉪꊇꊋꐛꃅꀙꏢꉪꒀꉼ、ꎮꉰꋧꃅꄉꀨꃀꌋꆀꇨꍏꑸꒀꉼꀞ,ꍏꉸꊿꋅꉐꈎꉌꉪꅉꃅꇫꑟꀐ。

  ꃅꐛꐨꁤꇅꀕꋋꈨꆹ,ꍏꇩꐛꐨꐧꋦꉪꏦꂱꎆꅑꐨꐥꌠꇎꋒꃅꉉꀽꀐ,ꄺꀱꁉꃑꌠꊋꃤꇰꀋ꒜ꌠꋊꄜꅐꇁꀐ,ꀉꒉꐯꀉꒉꃅꇩꏤꑭꊂꊿꋅꈁꐥꌠꏓꂱꉌꊋꑌꐨꌋꆀꉌꇿꐨꀉꒉꐯꀉꒉꃅꁦꎆ,ꍏꉸꊿꋅꏓꋧꊋꃤꌋꆀꉌꇱꉪꊋꃤꀉꇨꃅꁧꎁ,ꀋꎪꃅꋌꊂꉪꊇꐩꋊꀊꏀꈭꈜꇬꄉꀬꅑꃅꁨꉜꄉꂵꌠꊋꊡꌗꊡꇁꎂꀕ。

  ꉬꈎꅑꅸꇁꌠ,ꉪꊇꀋꉬꀋꉆꌠꌤꄚꊁꋋꈨꃅꀐ:

  (ꋍ)ꉻꒉꋊꐽꌠꊋꀥꇱꌋꆀꄻꃪ,ꎆꏣꎍꐽꊼꇅꐳꃅꀻꎆꌠꊥꎆ。ꉪꊇꋓꉪꁨꄉꉻꒉꋊꐽꌠꃅꍜ、ꀨꄉꌠꌋꆀꊋꃤꌭꇇꈐꊐꄉ,ꈬꐯꈬꃅꎆꏣꌤꃅꌠꑴꇙꌅꈌꌭꄉꇬꎷ。“ꊯꊪꉬ”ꊬꌠꇬ,ꎆꇱꉀꎆꐲꇨ、ꃼꇇꁨꍣꐨꀉꒉꇨ、ꎆꃀꏭꇙꐨꁦꎆꇨ,ꉈꑴꐛꉻꐨ、ꉈꃹꐨꃅꁌꏤꐕꑠꌤꃆꇬꉜꄉ,ꎃꊒꌠꏱꁈꏡꁈꏁꌬ,ꇿꋌꐥꃅꅿꁯꇙꇁꃅꐙꌠꌤꃆꐛꐈꌌꌤꐥꇁꌠꌤꃆꐛ、ꄹꁆꃅꐙꌠꌤꃆꐛꐈꌌꃅꇴꄉꉻꃅꐙꌠꌤꃆꐛꇁꌠꄴꏮ。ꋋꑍꈓ,ꉐꈎꂿꀋꋻꌠꇩꏹꎆꒉꎆꇁꎒꐡꎟꄜꌠꊝꇬ,ꉪꊇꇗꄃꃅꇫꊝ,ꈆꑪꃅꏤꇽ,ꁰꈘꃅꏣꀋꑌꌠꏱꎆꏱꁈ、ꄉꄐꏯꆙꌠꎆꃀꏱꁈꌫꄻ。ꏟꈯꃅꋍꋬꈭꌠꎖꄎꃄꌬ,ꄉꈁꀉꒉꃅꍔꃚꌬꐨꁦꎆꌠꌋꆀꐛꉻꐨꐥꃅꇗꏸꊨꌠꌫꄻ,ꀊꐯꈍꈐꃅꀨꄉꅐꑘꋊꐽꄐꎖꏀꄖꌠꌫꄻ,ꊋꀉꒉꃅꇤꄉꑴꌅꏀꀺꌠꌋꆀꊋꀥꇱꄉꈆꑪꇮꇐꌌꄙꌬꃅꄉꌠꄹꎆ,ꀉꒉꃅꐧꋦꏦꀧꑞꅉꉀꐕ。ꏟꈯꃅꈏꇓꈉꐨꍔꐯꌠꄐꇐꏤꁈꌐꏦꌬ,ꌬꈧꊋꊡꌠꏱꁈꏡꁈꋍꋬꈭꃅꏁꌬ,ꇓꈓꇓꉈꀀꊿꈜꀕꇈꊌꐨꀁꂥꌠꉹꁌꊌꐨꁦꎆ,ꌬꈧꄉꈁꐪꊛꄉꍔꐯ,ꐛꉻꀋꆏꃅꊐꐕ。ꑍꈓꀊꏀꃅꎆꃀ4ꃪꂡꂷꁦꎆꌠꎆꇱꎖꄎꌠꌫꄻ,ꄚꈐꏭ,ꀊꏀꃅꁦꎆꌠꍏꑷꎆꇱꌠ1.18ꃪꂡꂷꑟ。ꏦꀧꐨꐥꌠꀀꌒꋉꃆ、ꂿꑘꁡꇤꉹꁌꐥꐨꋉꃆꌋꆀꐧꋦꌤꑘꎆꇱꌠ43.7%ꍆ,ꑴꌅꏀꀺ、ꐛꉻꋊꐽ、ꊋꏏꍍꋊꌠꌋꆀꒆꉻꋈꄻꌠ15.3%ꍆ,ꅉꃀꉁꈾꀉꒉꀊꂾꌠꋈꄻꌠ23.6%ꍆ,ꉮꌸꊂꋈꀱꄻꀱꌠ14.8%ꍆ。ꍔꃚꎆꇱꄉꐧꋦꎆꇱꌠꄐꏁꈺꇙ,ꇩꈐꈉꐨꀉꒉꃅꁦꎆ,ꇿꋌꐥꃅꉇꉻꈉꅉꅋꑣ,ꊼꇅꀁꉘꏢꈐꃅꎆꏣꁦꎆꐨꐳꃅꀁꋌꊰꒉꌠꆹꏭꎼꇁ,ꋧꃅꇬꐋꀋꌡꃅꊋꋠꌠꄩꊋ、ꊋꑌꃅꉹꁌꐥꐨꏦꀧ、ꄻꃪꌠꏓꋍꃱꃅꌠꃅꇫꑟꄉ,ꉈꑴꀊꉗꃅꀻꎆꌠꅉꃀꌆꈬꃅꄉꀐ。

  (ꑍ)ꋍꇅꑌꄝꀋꏯꃅ“ꌕꂿ꒧”ꌤꃅꋒ,ꂿ꒧ꅉꃀꄻꈫꈈꌋꆀꊋꀥꇱ。ꍏꑷꏱꎆꄻ“ꌕꂿ꒧”ꇬꇱꌠꏓꌗꐯꇯꇬ3ꃪꂡꂷꀋꇈꑟ,ꃅꈎꈓꌠꐽꏡꁦꎆꐨ23%ꄩꎆ。ꉱꋃꃅꂿ꒧ꇗꏸꌋꆀ꒔ꑞ꒔ꑵꁌꎴꌠꇤꇧꎭꄉ,ꂿ꒧ꊿꋙꊪꇗꏸꏮꌠꐩꋊꄚꄉꌐꀐ,ꋍꈓꌠꂿ꒧ꊿꀵꃤꎆ1335ꂡꂷꈋꉐꊨꒊ。ꋙꊪꂿ꒧ꊿꀥꇱꄹꏦꌋꆀꋙꊪꃅꄷꈲꁧꀵꊒꉺꏦꄺꂡ,ꂿ꒧ꊿꃤꋙꊪꌠꇬꁥꇱꎆꃀꀋꉊꄻꈎ1226ꂡꂷꑟ。ꀋꉬꀋꉆꌠꋚꂷꅐꑫꁌꏤꀁꂥꐯꀁꂥꃅꎳꃼꌠꌋꆀꋋꇅꎴꊎꌠꃄꌬ,ꎭ、ꍮꌦꁌꏤꀁꂥꐯꀁꂥꌠ25%ꇬꄉꉀꐕꅷ40%ꇬꑟ。ꏦꇨꃅꋠꃅꀧꌋꃅ。ꊋꇤꄉꂿ꒧ꈆꑪꇮꇐꀻꎆꌠꄹꎆ。ꋚꂷꅐꐨꃷꁨꊛꄉꐩꋊꃅꀊꏀꀊꂥꅉꑟꇬꎷ,ꀋꉊꄻꈎ54641ꃪꄓꑟ,ꊛꄉ7ꈓꁦꎆꅐ。ꂿ꒧ꊿꊾꂷꌠꊌꐨ5919ꂷꑟ,ꊛꄉꊼꇅꐳꃅꉀꎆꌠꃅꇫꑟꀐ。ꂿ꒧ꁡꇤꏓꇱꄺꀱꌠꎍꐽꃅꄹꎆ,ꋍꏅꌩꁍꌅꈌꄹꏦꄺꀱ、ꇩꁨꑘꐷꄈꅉꏲꂠꏦꉻꄺꀱꌠꐊꑷꃅꄹꇙ。ꊋꀉꒉꃅꇤꄉꂿ꒧ꁡꇤꅉꃀꉁꈾꋈꄻꌠꐳꀥꇱ,ꒉꇉꒉꐧꉹꌠꌋꆀꀨꄉꌠꐭꉹꌠꒉꇉꉮꋊꄻꈬꌠ7356ꂷꃅꌐ,ꂿ꒧ꁡꇤꊻꂷ2.15ꂡꀆꐒꅝꋬꂻꌠꌤꃆꂥꀘ。ꂿꑘꊿꋍꑍꉚꋍꑍꃅꐥꌒꇁ,ꂿꑘꁡꇤꀻꎆꌠꃅꋊꀊꏀꊭꇬꑟꀐ。

  (ꌕ)ꊋꀉꇨꃅꇤꄉꎆꏣꐛꉻꋊꐽꄉꄹꎆ,ꎆꏣꉀꎆꊇꁧꌋꆀꈲꊌꐨꉀꐕ。ꋍꆏꐳꃅꅐꑘꐛꉻꋊꐽꌋꆀꑴꌅꏀꀺ。ꏣꀋꑌꃅꎆꏂ꒧ꇮꇐꄺꀱꌠꌋꆀꐅꄻꏓꀱꌠꄹꎆ,ꇮꑘꀊꅰꃅꉁꈾꄺꂡꑘꀑꐱꑟꐨꌋꆀꋓꅔꊋꃤꄇꇖꀕꃅꉀꐕ。ꄐꇐꏤꁈꐨꐥꌠꏀꄓꅐꑘꐳꃅꄓꎆꆹ。ꐳꃅꇩꏤꏀꀺꉻꑫꋈꄻ,ꌧꇐꏀꀺꋉꃆꌋꆀꇮꇐꏀꀺꋉꃆꌫꄻ,ꅐꑘꀻꎆꇬꃛꊸꃅꈉꄻꌠꂴꅑꇮꇐ、ꈯꄜꇮꇐꌋꆀꀋꉬꀋꉆꌠꉁꈾꇮꇐꈨꂵꅐ,ꈆꑪꎥꃪꈨꅐꑘꈴꌠꃅꅜ。ꁧꃤꃅꑘꐳꃅꀻꎆ,ꇩꈐꒃꅐꈁꊌꁌꐨꍆꐪꉐꊮꌺ2.5ꂷꉀꐕ。ꅉꃀꉁꈾꋈꄻꌠꄇꇖꀕꃅꐳꀥꇱ,ꉬꈎꇬꎸꈜꀊꏀ1.6ꃪꉻꆏꄻꐛ,ꀊꏀꃅꁦꎆꌠꄇꈜ63.9ꃪꉻꆏꐥ,ꄚꈐꏭꐳꈴꄇꈜ3.3ꃪꉻꆏꐊ,ꃏꏸꐛꅉꀊꏀꃅꄻ、ꍔꒉꃅꄺꀱꌠ33ꂷꐥ,ꀊꏀꃅꄻꌠꌋꆀꄻꀱꄻꈬꌠ1.7ꃪꉻꆏꐥ。ꑍꆏꏟꈯꃅꊋꏏꍍꋊ、ꒆꉻꋈꄻꌋꆀꋦꈭꀧꌋꃅꌠꄹꎆ。2020ꈎꉪꇩꏤꊸꑳꍍꌗꋊꃑꃅꐨꑞꅉꁻꌐꌋꆀꏱꁈꏡꁈꄜꅐꇁ,ꊋꏏꍍꋊꏓꇱꐨꐥꌠꌤꃅꄐꉻꏤꄻꄉꃄꌬ。ꊋꒉꃅꁦꎴꊋꀦꀻꎆ,ꀊꏀꃅꄆꃑꏸꃑꅓꃷꁨ4.45ꂡꐂꊅꁦꎆ,ꄚꈐꏭꒉꄆ9601ꂡꐂꊅ、ꉿꄆ384ꂡꐂꊅ。ꈢꆏꌠꐭꄔꄆꊤ7210ꃪꐂꊅꀜꋊꇧꎭ。ꊁꊰꌠꊖꌋ、ꎸꅍ、ꇓꃀ、ꌋꏸꌠꅏꄻꊋꃤꀜꋊꇧꎭ。ꌩꑘꀨꎍꒆꉻꋉꃆꋈꄻꌠꄹꎆ,ꌩꏪ2529ꃪꉻꐊꊪꄉ。ꏓꇱꄉꃄꐡꊖꑳꌠꏱꄻꃅꊂ23ꃪꐽꎏꉻꆏꐥ,ꊋꀥꇱꄉꀋꂿꑘꌠꒈꁕꒉꍍꆀꌠꄴꏮꌠꌋꆀꇮ꒧“ꌕꀜ”ꏱꄻ。ꊋꇤꄉꀱꏮꎆꏣꀻꎆ。ꉬꈎꌠꏓꌗꇬ,ꌗꂓꂷꇩꈐꒃꅐꈁꉬꁌꐨꊋꃹꌠ19.1%ꊨꒊ,ꐈꇐꀑꌗꈉꐨ、ꑍꀑꐊꑘꋊꃑꃷꁨꂱꄷ12.45%、14.29%ꊨꒊ。ꌕꆏꃄꁕꎆꏣꋮꄮꃅꀻꎆꌠꊥꎆ。ꃄꁕꀻꎆꀑꐱꄐꇐꏤꁈꃄꌬ,ꇩꏤꑭꊂꀨꄜꈲꊋꐛꅉꄐꎖꃄꌬꌠꃑꄻ,ꁮꐚꏭꀉꒉꃅꀖꁉꌠꀊꏀꃅꊰꈎꄐꇺꉉꐨꌋꆀꃄꁕꀻꎆꌠꋍꋬꈭꌠꏤꄻ,ꑭꊗꌋꆀꌧꍧꀒꋤꃅꄷ、ꑟꏦꑠꊿꋅꃅꄷꐱꐂꏿꃅꀻꎆꌠꊥꎆꏁꁈꀊꏀꌠꏤꄻꎼꇁ。ꈯꄔꁮꐚꃅꄷꌋꆀꑌꌋꈤꃅꄷꐳꃅꀻꎆ,ꎆꏣꎆꐳꐨꎕꏦꀋꉬꀋꉆꌠꇩꏤꑭꊂꐽꏡꃅꑞꅉꄩꐂ;ꁭꅐꃅꄷꎆꏣꐛꉻꀋꆏꃅꉾꇁ,ꑴꌅꏀꀺꌠꌋꆀꋓꅔꊋꃤ꒔ꁘ꒔ꁘꃅꉀꐕ;ꃅꄷꐮꇢꊭꇬꅉꀨꄉꉻꁧꃤꃅꐮꍣꐨꀄꊭꇁꇬꎷ,ꂱꄷꐋꀋꌡꐨꐥꌠꃄꁕꀻꎆꐛꐪꀑꐱꃅꄻꐛ。

  (ꇖ)ꀋꎪꀋꑴꃅꃹꅼꃅꄺꀱꁉꃑ,ꎆꏣꐧꋦꀻꎆꌠꈏꇓꍄꑐꊋꃤꀉꇨꇁ。ꏱꎆꆹꏮꁵꄻꄹꏦ꒔ꁘ꒔ꁘꃅꄻꐛꒆ,ꑤꊐꌠꅉꀨꎆꊋꏦꀧꉺꏦꀑꐱꃅꄻꐛ,ꁌꎆꇗꏸꐛꄟꆹꏮꌠꐊꑷꃅꃄꌬ,ꄻꐛꒀꒉꁌꏤꌋꆀꇗꏸꁌꄺꀱꌠꁣꀋꐥꃅꄹꎆ,ꅐꀦꇗꏸꄺꀱꌠꇬꊎꃅꉚ,ꈐꉈꎆꎆꏂ꒧ꇗꏸꄹꏦꐊꑷꃅꋍꃱꃅ。ꇩꁨꀉꒉꉹꌠꃼꇇꑘꑴꉴꇴꍆꄹꏦꄺꀱꌠꁣꀋꐥꃅꃅꌐ,ꏱꁈꃅꐙꌠꎆꒉꎆꇁꏲꉻꄺꀱꌠꏣꀋꑌꃅꄹꎆ;ꎍꐽꃅꃷꎏꃹꆹꇬꌦꇴꍆꌅꈌꁷꄻꌤꃆꂥꀘ,ꑘꀺꇴꀾꈧꌠ、ꇴꍆꈉꏤꎊꈬꌋꆀꎆꏓꊭꌠꁣꀋꐥꃅꄹꅐ,ꎝꌐꃷꎏꎍꐽꃅꀻꎆ;ꃹꅼꃅꄜꏂꀧꑘꄺꀱꁉꃑ;ꏓꂱꀙꎆꃀꐮꆦꍆꁧꄻꐛꉺꏦꄺꀱꌠꁣꀋꐥꃅꄹꎆ,ꉇꐂꃼꇇꃅꌠꏓꂱꀙꎆꃀꌊꌗꂫꇽꉚꌠꀋꆏꃅꍔꒉ。ꇩꁨꎆꏂ꒧ꇬꌦꄹꏦꇴꍆꄹꏦꄺꀱ、ꇩꁨꁨꇐꍞꏲꏦꉻꄺꀱꌠꁨꎆꐨꏣꀋꑌꃅꐥꀐ。ꒀꍔꏦꉻꄺꀱꌠꐳꃅꄹꎆ。ꐧꐭꎆꏂ꒧ꀻꎆꌠꌋꆀꉹꁌꈬꇬꎆꇱꌠꊥꎆꏱꁈꈧꌠꏤꄻꃄꌬ,ꉻꁨꏦꀋꉬꌠꎆꏣꀻꎆꋦꈭꀋꆏꃅꄻꃪ,ꁨꏦꀉꑌꌠꎆꏣꐯꇯꀻꎆ。

  ꀋꆏꃅꉇꉻꏭꁉꃑꌠꀊꐯꐨꌋꆀꃹꅼꐨꍔꐯ。ꈏꃹꉇꅐꈁꉬꃷꁨꋍꈓꐽꏡꃅ15.9%ꉀꎆ,ꐛꉻꀋꆏꃅꉾꃪꈴ。ꃼꇇꃅꌠꎂꍣꐨꀁꋌꒊ,2010ꈎꆏꂴꈒꌠꇂꃴ6.4%ꊨꒊ。ꉇꎆꈲꌬꐨꄇꇖꀕꃅꉀꐕ,ꎆꏂ꒧“ꉇꅐꁧ”ꌠꑭꁘꄇꇖꀕꃅꇤꐳ,ꉇꉻꏭꈛꎂꃅꎆꇱꌠꉬꇮꃅ2200ꂡꂰꑼꑟ,ꉇꉻꏭꋉꃆꀧꃅꌠꌋꆀꑘꃆꇷꃅꀰꏢꃷꁨ3352ꂡꂰꑼꑟ。ꏣꀋꑌꃅꋧꃅꎆꏣꏱꄻꉺꏦꄺꀱꌠꌋꆀꃄꁕꇷꃅꉺꏦꋈꄻꈽ,ꀉꑌꁁꏯ、ꑍꁁꏯꃼꇇꇷꃅꌠꐪꊛꄉꃹꅼꈴ。ꉇꉻꇇꀨꄉꈁꀋꆏꃅꍔꒉ。ꉇꉻꏭꁉꃑꌠꊋꑌꃅꎆꏣꀻꎆꌠꌋꆀꐛꉻꋊꄻꌠꇬꊥꎆꀐ,ꃅꅍꊌꌠꁦꎆꀐ,ꂴꅑꌠꇮꇐꌋꆀꏲꂠꎖꋪꌷꅜꀐ,ꀉꒉꐯꀉꒉꃅꉪꇩꏤꋧꃅꇬꑋꅉꉆꅉꉀꐕꀐ。

  (ꉬ)ꐳꃅꐧꋦꌤ꒧ꀻꎆ,ꃶꐚꃅꉹꁌꐥꐨꏦꀧꌋꆀꄻꃪ。ꈍꄮꑌꎆꏣꌋꆀꐧꋦꀻꎆꐮꄮꌠꌭꈬ,ꉹꁌꐥꐨꄻꃪꌠꇬꆼꒆꄉꀻꎆꇬꎹ。ꃅꅍꊌꌠꌌꎆꏣꐧꋦꀻꎆꌠꂴꆽꄉꇬꎷ。ꃅꑘꁱꂘꌠꌋꆀꃅꅍꊌꁧꃤꃅꌠꊋꀥꇱ,ꌶꅉꀊꂥꊐꌠꌶꅐꌠꌶꌺ、ꂿ꒧ꁡꇤꑘꃅꊋꃤꆹꏮꌠ、ꇓꈓꏦꎫꃅꅍꎹꊋꌠꃅꅍꊌꌠꊥꎆ,ꂽꇬꄉꎞꅐꇁꌠꃅꅍꊌꁆꄻꌤꃅꋒꌶ。《ꑘꃅꋯꏤꏦꃤ》ꌋꆀ《ꃅꅍꊌꊥꎆꏦꃤ》ꃄꌬ,ꁊꈴꃅꃄꎆꀁꂥꐯꀁꂥꌠꎕꏦꉀꐕ,ꐮꄮꑘꃅꐮꃆꂮꄻꐛꌠꄹꇙ。ꇓꈓꇓꉈꉱꑷꌠꐧꋦꏦꀧꉻꑫꋈꄻꌠꄇꇖꀕꃅꁨꎆ,ꇓꈓꏦꎫꇮꃅꊿꃀꌠꀨꎹꄜꏂꀧꌠꌜꊐꌠꏓꈴꇲꈴꅉꑟ,ꃀꌠꀨꎹꄜꏂꀧꃆꂮꌜꐂꆹꏮꊪꊛꏡꁈꃄꌬ,ꊛꄉ7ꈓꎆꏂ꒧ꎞꆏꊿꅉꀨꃀꌠꀨꎹꎆꊌꐨꉀꐕ,ꋍꈓꌠꐽꏡꃅ10%ꉀꎆ;ꀊꏀꉹꌠꂿ꒧ꁡꇤꐧꋦꃀꌠꀨꎹꄜꏂꀧꉚꅉꉱꑷꐨꑤ(ꏃ、ꐎ)24%ꇬꑟ。ꏣꀋꑌꎍꐽꃅꁬꋌꁦꎴꆄꄻꏦꉻꄺꀱ,ꐊꑷꃅꇓꈓꏦꎫꀀꊿꅉꀨꆅꉚꄜꏂꀧꄹꏦ、ꀊꏀꉹꌠꂿ꒧ꁡꇤꇷꃅꆅꉚꄹꏦꄻꄉ,ꇓꈓꇓꉈꀀꊿꈲꏣꊌꌠꊿ12.67ꂡꐥ。ꐥꐨꀁꂥꐯꀁꂥꏦꀧꄹꏦꌬꁊꈴ,ꇓꈓꇓꉈꐧꋦꈭꋏꇇꀨꉻꑫꀑꐱꃅꄺꂡꄉ,ꐧꋦꈲꁧ、ꂴꄉꀨꎹꐥꅉꁵꄻ、ꂄꃅꎔꏿꌠꌋꆀꊿꄣꌤꑘꀻꎆꐨꀊꏀꌠꐥ。ꇩꏤꑭꊂꐧꋦꏦꀧꎆꀨ7810ꂡꂷꏓꊭ,ꉬꈎꂾꄩ5800ꎖꂡꂷꁦꎆ。ꊋꀉꒉꃅꇤꄉꏦꀧꐨꐥꌠꀀꑳꋈꄻꌠꌋꆀꑲꆹꇣꆹꐛꅉꄺꀱꌠꃄꌬ。ꊋꋠꌠꑶꋦ1100ꃪꁯꑳꏀꀀꀐ。ꉪꊇꈁꃅꆏꀋꇁ、ꊋꇤꄉꏓꂱꋍꏅꁳꃀꇬꀨꎹꌠꐥ、ꆅꇬꉃꌠꐥ、ꀀꇬꑳꇤꐥꌶ。

  ꇩꏤꐧꎴꊭꇬꂘꑘꄺꀱꌠꌋꆀꀻꎆꎖꄎꐱꀨꏤꄻ、ꃄꌬ。ꉬꈎꇬꇩꏤꑭꊂꏱꎆꂘꑘꇬꌬꐨꏓꌗꎼꇁꇬ4.45ꃪꂡꂷꐥ,ꈎꐽꏡꃅꇬ22.4%ꉀꎆ。ꐊꑷꃅꇓꈓꇓꉈꁌꀋꈁꌠꋭꑘꂘꑘꃅꇫꑟ,ꌷꇬꈎꄐꀊꉘꈁꐥꌠꐯꇯ“ꎆꀋꃹ、ꁱꂷꌷ”ꄎꌐ。ꋭꑘꂘꑘꊬꌠꂘꃀꃅꐨꃄꎆꄹꏦꐊꑷꃅꃄꌬ。ꐧꊐꌠꃅꑘꂘꑘꆏꂿ꒧ꁡꇤꎆꏣꊋꋠꌠꑱꁯ、ꇓꈓꊌꐨꀁꑌꌠꑱꁯꌋꆀꂿ꒧ꌐ꒧ꃆꂮꌶꌺꏭꆏꌶꁌꀋꈁ。ꇩꏤꌶꅈꇇꀨꄹꏦꌬ,ꏱꎆꇱꌠ2006ꈎ18ꂡꂷꇬꄉꁦꎆꅷ2010ꈎ306ꂡꂷꇬꑟ,ꉱꑷꐨꌶꅉꀊꂥꊐꌠꇬꄉꍔꐯꅷꐧꊐꌠꃅꑘꌶꅉꌋꆀꎃꐚꐧꌷꂥꊐꌠꇬꑟ,ꐯꇯꌶꌺ2130ꃪꑹꇇꀨ,ꉈꑴꋭꑘꂘꇐꌶꅉꀀꄉꌷꌠꌶꌺ1200ꎖꃪꑹꏭꐥꐨꇇꀨ。ꐳꃅꂿ꒧ꁡꇤꐧꐭꌶꅉꑲꐡꑲꁘꌠꄻꌋꆀꃅꑘꂘꑘꅉꃀꌬꇐꋈꄻ,ꐊꑷꃅꀊꂥꊐꌠꂘꑘꊇꁧꌋꆀꑟꐨꉀꐕ,ꀉꇨꃅꌶꅉꀊꂥꏀꀺꄐꊋꁦꎆ。ꇩꏤꐧꎴꊬꌠꈆꑪꌋꆀꇮꇐꀻꎆꎖꄎꐱꀨꏤꄻꌊꌬ,ꍏꑷꏱꎆꈆꑪꇮꇐꇬꇱꌠ6197ꂡꂷꑟ,ꃅꈎꐽꏡꃅꇬ22.7%ꉀꎆ,ꊌꐨꀉꒉꀊꂾꑠꈨꐥꀐ。ꀉꇨꃅꅉꂫꊐꌠꆅꉚꁦꎴꁧꃤꃅꄐꊋꋈꄻꌠꊋꀥꇱ,ꇩꏤꏱꎆꌐꐘꎆꀨꄐꁆꌌ,ꑣꍔꁦꎴꆅꉚꅉ2.3ꃪꂷ、ꑤꆅꉚꅉ1500ꂷ、ꑤꍏꒀꁬꋌꅝꆅꉚꅉ500ꂷꌋꆀꑤꌋꅪꀉꑳꌺꈯꀧꅉ1000ꂷꄺꀱꌋꆀꀊꏀꃅꋈꄻꄉ,ꋥꁕꁦꎴꆄꄻꁧꃤꃅꈯꄜ2400ꂷꄻꄉꀐ。ꇩꏤꐧꎴꊬꌠꌧꊿꀻꎆꄐꎖꐱꀨꏤꄻꄉꃄꌬ。ꊻꂷꎖꄎꁻꌐꁟꑻꃅꀕꇫꑟ。ꁱꀕꏦꉻꄺꀱꌠꊌꐨꀋꂿ꒧ꃅꁨꎆ。ꄉꉻꁱꀕꁧꃤꃅꉻꑫꋈꄻꌠꄇꇖꀕꃅꐳꀥꇱ,ꁱꀕꅐꑘꀻꎆꍅꁍꀕ。ꋧꐈꌷꇐꐧꋦꈆꑪꌋꆀꈨꏀꄯꒉꅐ、ꅇꁊꄆꒌꄆꁱ、ꃆꃀꌷꇐꋽꇐꌄꆣꀻꎆ。ꇓꈓꇓꉈꄉꉻꈯꎟꌬꇐꋈꄻꐳꀥꇱ,ꉹꁌꃅꈯꎟꌠꃅꌐ。ꏦꄹꋈꄻꌠꐊꑷꃅꄹꎆ,“ꉬꉬ”ꏦꃤꁊꈴꌠꁟꑻꃅꃅꇫꑟ。ꐧꋦꏲꂠꌠꀥꇱꌋꆀꏀꀺ,ꐧꋦꐮꄮꎍꐽ。

  ꊉꍧꀉꒉꀊꂾꃅꃄꇙꑠꋌꐛꉮꌸꀉꆈꌠꏯꄘꑣꉇꈽꌠꊋꐛꐨꀉꒉꀊꂾꃅꐥ,ꊉꍧꉮꌸꊂꋈꀱꄺꀱꌕꈎꂿꃆꑍꈓꀑꐱꃅꃅꇫꑟ,ꒄꎽꀉꇨꃅꃄꇙꌠꌋꆀꍏꐏꀉꇨꃅꃄꐡꊖꑳꉮꌸꊂꋈꀱꄺꀱꌠꊱꁨꃅꄹꎆ。ꉮꌸꊋꋠꎟꋺꄉ,ꍏꇩꏓꂱꆹꀊꅰꃅꐛꒆ、ꊨꏦꉌꒊ、ꀉꇨꊋꑌ、ꍏꉸꊿꋅꎭꊝꇙꀋꋏ、ꑴꇨꉌꀋꊰꌠꇰꀋ꒜ꌠꉌꊈꆹꑞꑌꇫꊋꀋꄐꌠꉬ。

  ꉬꈎꅑꅸꇁꌠ,ꉪꊇꀋꆏꃅꃹꅼꃅꏲꑘꏲꂠꏦꉻꄺꀱ,ꐳꃅꍔꃚꌅꊋꆹꏮ,ꐊꑷꃅꀊꏀꈭꌠꍔꃚꏲꉻꄺꀱꌠꃅꇫꑟ,ꃹꅼꃅꏦꃤꇬꈴꄉꏲꑘꏦꏲꍔꃚꌋꆀꁧꃤꃅꉹꌠꍔꃚꋈꄻ,ꍔꃆꄇꄜꋊꌠꄹꎆ,ꏲꑘꅑꃤꎹꌠꀥꇱ,ꀋꆏꀋꏯꃅꍹꈔꌠꏭꉈꈽ,ꍔꃚꑴꑳꋈꄻꌠꏣꀋꑌꃅꀻꎆꆹ。

  ꋌꃀꉬꈎꆹ,ꉪꊇꑭꁘꋍꁘꍔꑭꐨꋍꐬꁮꃅꈴꅷꇁꌠ,ꍏꇩꏓꂱꑠꅹꃅꊨꏦꉜꒉꉆꀐꌠ!ꊌꐨꆹꈝꐮꃅꊌꅜꌠꀋꉬ。ꋋꆹꐋꀨꃛꏢꄧꊝꎻꏹꃅꄉꌠꄈꍏꑷꃅꇴꄉꉻꃅꏓꏲ、ꎃꊒꃅꏲꂠꄉꊌꌠ,ꄈꑭꊂꇩꏤꑭꊂꊿꋅꈁꐥꌠꏓꂱꐯꇯꊋꇤꒃꉇꄉꊌꌠ。ꄚꇬꄉ,ꉢꇩꃷꑼꎁꃅ,ꇩꏤꑭꊂꊿꋅꈁꐥꌠꏓꂱꏭ,ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀ꒔ꑞ꒔ꁆꏯꂒꋦꊿꏭ,ꉌꊨꈬꇱꃅꈀꎭꀕꀐ!ꑣꇤꇣꋲꏱꅉꐎꃺꑌ、ꉪꂱꇣꋲꏱꅉꐎꃺꑌ、ꄠꃪꃺꑌꌋꆀꎿꉈꃺꑌꏭ,ꇬꀖꄉꈀꎭꀕ!ꍏꇩꐛꏀꈴꋈꄻꌠꇬꉈꇬꌠꌋꆀꊋꄏꌠꇩꏤꈧꌠꍔꃚ、ꇩꏹꎀꍹꌋꆀꇩꏤꈧꌠꐋꀨꏭ,ꇬꀖꄉꈀꎭꀕ!

  ꉪꊇꏸꐚꃅꉜꇫꄉ,ꉪꇩꏤꀻꎆꇬꐮꐽꀋꏣꐯꋯꀋꄮ、ꊛꄉꆹꀋꉆꌠꌤꃆꄡꇗꑓꅐ。ꀋꉬꀋꉆꌠꆹ:ꎆꏣꉀꎆꅐꀦꋦꈭꏢꑲꌠꀥꇱꆹ,ꎆꇱꌠꌋꆀꌬꈧꌠꃆꂮꐮꆽꀋꏣ,ꊌꐨꁸꎷꍣꐨꊼꇅꀉꒉ,ꈆꑪꇮꇐꏀꀺꊋꃤꀊꀋꇨ,ꅐꑘꐛꉻꄉꀋꄐ,ꂿ꒧ꅉꃀꄡꇗꀁꁧ,ꇓꈓꇓꉈꃄꁕꀻꎆꐯꀋꄮ,ꃅꑍꊋꈁꉬꃷꁨꍄꊋꌋꆀꐛꉻꃅꐙꌠꐮꆽꄙꐨꋓꃅꐥ,ꈆꑪꃅꀻꎆꌠꏢꑲꌠꏦꉻꉺꏦꄉꇤꌠꄡꇗꊼꇅꀉꑌ,ꁧꃤꃅꑘꁦꎆꁌꐨꌋꆀꃅꅍꁵꍆꐨ、ꎥꃪꌠꌋꆀꎖꉚꀻꎆꌬꐨꌫꎆꇩꈐꒃꅐꈁꊌꁌꐨꍆꐨꆹ“ꊯꊪꉬ”ꄐꎖꑞꅉꁻꌐꃅꀋꌐ。ꉹꁌꄹꁆꀉꇨꄜꅐꇁꌠꌤꃆꊇꅉꃅꂥꀋꀘ,ꀋꉬꀋꉆꌠꆏ:ꉾꃪꌠꂘꑘ、ꆅꉁꆄꄻꄹꁆꅐꀦꈁꉬꃷꁨꀋꇎ、ꐛꅉꐽꀋꊱ;ꃷꇐꁌꏤꉀꄓꍄꊋꀉꒉꇁ,ꇓꈓꋍꈨꑳꁌꉀꄓꅼꇨ;ꏦꐆꃄꅉꎳꃼꎞꐆꌠꑠꇬꄉꅐꇁꌠꐧꋦꐮꄙꐨꀉꑌꆹ;ꋠꇐꁦꎴꌤꃆꊼꇅꑓꅐꎑꎍ,ꋍꈨꇬꄮꈔꐛꐨꀊꅼꇨ。ꉪꊇꀋꎪꃅꇩꏤꌋꆀꏓꂱꏭꀊꂥꃅꆽꎍꌠꉌꊈꇬꈴꄉ,ꎬꅧꌤꃪꃅꌤꃅꌠꌋꆀꆏꀋꃅꊋꇤꇬꎷꌠꇬꈴꄉ,ꐳꃅꌤꃆꋋꈨꂥꀘꄉ,ꏓꂱꁳꉌꃹꎻ。

  ꀱ“ꊯꊪꉬ”ꊬꌠꍔꃚꌤꃅꐨꉪꏡꇈ,ꉪꊇꀒꁨꋍꁘꃅꃹꅼꃅꉜꐨꌋꆀꉪꐨꄚꐰꑠꈍꑍꁁꏯꐥ。

  ꋍꆏꀋꎪꃅꈆꑪꃅꀻꎆꌠꌭꈬꇬꎷꌶ。ꉪꊈꊝꐨꀉꇨꃅ꒔ꑞ꒔ꑵꄩꊋꐛꌠꆹ,ꀻꎆꌠꉘꇉꌠꉬ;꒔ꑞ꒔ꁁꏯꊌꐨꌋꆀꀻꎆꐨꈀꊌꌠꆹ,ꀻꎆꌠꉘꇉꌠꉬ;ꀒꁨꆹꈝꃀꇬꋒꇁꌠꊋꋠꌠꌋꆀꌤꃆꂥꀘꇬ,ꄡꇗꀻꎆꌠꉘꇉꌠꉬ。ꉪꇩꏤꆹꀋꃋꄷꀋꁧꋌꊂꀊꉗꏢꇬꐧꋦꉪꏦꉘꃀꊬꌠꇬꎍꑴꌦꌠ,ꀋꎪꃅꎆꏣꋈꄻꌠꌌꈯꄜꃅꄉꇬꎷꌶ,ꈆꑪꃅꀻꎆꌠꌭꈬꇬꎷꌶ。ꊿꌌꀨꇬꄉ,ꉹꁌꐥꐨꏦꀧ、ꄻꃪꌠꌌꌤꈁꃅꌠꄓꈌꌋꆀꑞꅉꃅꄉ,ꀋꎪꀋꑴꃅꐯꇯꌣꈚꈝꃀꍬ,ꀻꎆꊌꐨꌌꏓꂱꈁꐥꌠꃅꈲꌐꎻ;ꏟꈯꃅꏓꇱꇲꈴꃅꄉ,ꇓꈓꇓꉈ、ꃄꁕꎆꏣꌋꆀꐧꋦꋮꄮꃅꀻꎆꌠꄹꎆ;ꐳꃅꎆꏣꀻꎆꄟꆹꏮ,ꊋꀉꒉꃅꑴꌅꏀꀺꌠꄹꎆ,ꅐꀦꏎꏸꌋꆀꋦꈭꀧꌋꃅꄉ,ꎆꏣꐧꋦꀻꎆꌠꌋꆀꊿꂷꅐꀦꋦꈭꐮꋮꄮꎻ,ꀻꎆꌠꐊꑷꐨ、ꋮꄮꐨꌋꆀꊛꄉꆹꉆꐨꐕꀊꂥ。

  ꑍꆏꀋꎪꃅꍔꃚꋊꐽꌠꌋꆀꃷꎏꉺꏦꋭꋽꃅꋍꃱꃅꌠꌭꈬꇬꎷ。ꃷꎏꉺꏦꄻꐛꒆ,ꉻꒉꋊꐽꇿꋌꐥꌠꆹ,ꐯꇯꐧꋦꉪꏦꃷꎏꎆꏣꏦꉻꀋꐥꀋꉆꌠꏓꇱꅍꀋꂿ꒧ꌠꉬ。ꃷꎏꂿꄐꊼꇅꀉꑌꅀꍔꃚꂿꄐꊼꇅꀉꑌꌠꆹ,ꀋꎪꃅꋌꉚꄉꋋꃅ。ꇩꏹꎆꒉꎆꇁꎒꐡꎟꄜꌠꊝꇬ,ꉪꊇꆏꉻꒉꋊꐽꌠꊋꀥꇱ、ꄻꃪ,ꋋꇅꃅꃷꎏꆽꀠꌠꋊꍬ,ꃷꎏꀋꍑꅉꅋꑣꄉ,ꎆꏣꄓꒉꊰꒉꌠꄴꏮ,ꃅꐨꑽꑌꇬꄉꊩꀽꇬꑠꆹꃶꐚꃅꎃꊒꌠ。ꉪꊇꀋꎪꃅꀋꆏꃅꐧꋦꉪꏦꃷꎏꎆꏣꄻꐛꒆ,ꋒꐯꋒꃅꅐꀦꁆꄻꇬꃷꎏꃤꄺꂡꃅꐙꌠꂿꄐꋊꇤꅐꇁ,ꎆꏣꈏꇓꍄꑐꊋꃤꀖꃑꎼꇁ,ꋍꈭꐨ,ꈆꑪꃅꉻꒉꋊꐽꇇꁈꌌꌬꄉ,ꎆꏣꀊꉗꃅꎍꐽꊼꇅꐳꃅꀻꎆꌠꄹꎆ。

  ꌕꆏꀋꎪꃅꇩꈐꇩꉈꃅꇴꄉꉻꑍꂷꌠꐯꇯꇲꈴꇬꎷꌶ。ꎆꏣꅉꆺꈴꌠꃹꅼꃅꀻꎆꌠꌋꆀꉇꉻꏭꀖꁉꌠꀋꆏꃅꃹꅼꌠꇎꏦꇂꃴꄉ,ꉪꇩꏤꎆꏣꌋꆀꋧꃅꎆꏣꐮꑌꑲꌠꆹꋍꑍꉚꋍꑍꃅꐮꐞꀋꉆꇁ,ꐮꇙꌠꌋꆀꐮꉈꊪꌠꀋꆏꃅꀉꇨꇁ。ꉪꊇꀋꎪꃅꀒꁨ꒔ꁘꃅꑓꏮꋧꃅꉜꄉꌷ,ꄐꇐꏤꁈꉪꇐꀉꇨꌶ,ꇩꏹꃅꒊꃅꇁꀻꎆꐛꐈꌠꇬꄉꇎꋒꃅꀻꎆꊜꋽꄮꃬꇇꈐꊐ、ꋭꋽꃅꐔꈔꉆꌠꊋꋠꌠꊝ,ꇩꈐꇩꉈꃷꎏꑍꂷꌠ、ꅐꀦꑍꑵꌠꌬꋒ,ꏓꇱꇲꈴꃅꇩꈐꀻꎆꌠꌋꆀꉇꉻꁉꃑꌠꃆꂮꀞꄻꋒ,ꃶꐚꃅꈐꉈꐯꇯꇲꈴ、ꐽꏡꃅꀻꎆꌠꃅꇫꑟ。

  ꇖꆏꀋꎪꃅꄺꀱꁉꃑꌠꌌꎆꏣꐧꋦꀻꎆꌠꇬꅉꀨꇘꊋꃅꄉꇬꎷꌶ。ꄺꀱꁉꃑꌠꆹꇩꏤꀉꇨꐞꄿꏓꂱꐥꌒꄻꌒꌠꀋꍬꀋꉆꌠꈝꃀꉬ,ꀋꎪꃅꐧꋦꉪꏦꐛꏀꈴꋈꄻꌠꈴꎁꇬꃅꐊꈴꌐꌶ。ꉪꊇꆏꉌꊋꀊꅰꀉꒉꌠꌋꆀꀬꅑꐨꀊꅰꀉꒉꌠꌌꄉꄺꀱꌠꄹꎆ,ꄺꀱꏤꁈꈆꑪꃅꐙꐨꐕꀊꂥ,ꄺꀱꏡꁈꐮꄮꐨꀉꇨꇁꎻ,ꐊꑷꃅꎆꏣ、ꍔꍞ、ꁱꀕ、ꐧꋦꑠ꒔ꑞ꒔ꁆꏯꄺꀱꏀꀺꌠꄹꆷ,ꐴꀨꇬꄉꉺꏦꏦꉻꋍꇈꌠꇤꇧꎭ,ꀊꐯꃅꒃꅐꊋꃤꀻꎆꌋꆀꁌꄝ,ꐧꋦꐽꊯꑗꉬꊥꎆ。ꏓꂱꐥꐨꄻꃪꌠꌌꎃꊒꃅꄺꀱꀻꎆꎍꐽꃆꂮꀞꄻꌠꐮꐊꅉꃅꄉ,ꄺꀱꇨꐨ、ꀻꎆꐳꐨꌋꆀꐧꋦꇬꐓꉆꐨꏓꋍꃱꃅ,ꄺꀱꌠꌌꐮꄮꎍꐽꌠꊥꎆ,ꎆꏣꀀꌒꃅꏾ、ꐧꋦꑘꒃꊱꁨ、ꇩꏤꎴꏲꑘꒃꌠꏦꀧ。

  ꑍ、“ꊰꑋꉬ”ꊭꌠꀋꂿ꒧ꌠꁻꌐꌋꆀꂿꃆ

  《ꍏꇭꍏꑷꇩꂱꎆꏣꌋꆀꐧꋦꀻꎆꊰꑋꊭꌠꉬꈎꄐꎖꏤꄻꃆꂮꉪꐨ》ꇬꈴꄉ,ꉪꊇꆏ《ꇩꂱꎆꏣꌋꆀꐧꋦꀻꎆꊰꑋꊭꌠꉬꈎꄐꎖꐱꀨ(ꄐꄉꌠ)》ꁰꄻꄉ,ꄜꌊꃀꀉꒉꈿꅉꄉꍤꇖꎻ。

  “ꊰꑋꉬ”ꆹꐊꑷꃅꊼꇅꌣꈚꌠꐧꋦꋈꄻꇬꀋꉬꀋꉆꑠꊭꉬ,ꃹꅼꃅꄺꀱꁉꃑ、ꐳꃅꎆꏣꀻꎆꃄꄟꆹꏮꇬꈢꇓꀖꑠꊭꉬ。ꋧꃅꇬꄉꉜꇬ,ꋧꃅꀉꑌꑵꈴ、ꎆꏣꅉꆺꈴꌠꃹꅼꃅꀻꎆ,ꋮꄮ、ꀻꎆ、ꇷꃅꌠꄡꇗꀋꃋꋋꄮꃅꐨꉬ。ꋧꃅꎆꒉꎆꇁꎒꐡꁧꏖꌠꀊꅰꀊꎴꄉ,ꋧꃅꎆꏣꐛꉻꐳꃅꋊꐽ,ꋧꃅꎆꏣꄺꂡꉺꏦꀊꅰꃅꐛꐈ,ꈆꑪꇮꇐꏀꀺꌠꌋꆀꅐꑘꉹꏮꌠꈴꅐ,ꀻꎆꑌꃅꄉꌠꇩꏤꀊꅰꃅꀊꏀꃅꅐꌠꃷꎏꇩꏤꉺꄜꊋꃤꉀꆹꌠꇬꃹꆹꀐ。ꇩꈐꄉꉜꇬ,ꉪꇩꏤꀻꎆꌠꈲꐥꇎꏦꌋꆀꀊꉗꀊꎴꃅꐛꄟꉾꆹꌠꄻꀋꀱꑴꌦ,ꇮꑘꈴ、ꈄꏍꈴ、ꇓꈓꈴ、ꃷꎏꈴ、ꋧꃅꈴꌠꃹꅼꃅꀻꎆ,ꃷꎏꈉꐨꀉꒉꐯꀉꒉꃅꐥ,ꎆꃀꇲꄻꀉꑌ,ꈆꑪꇮꇐꌋꆀꂘꑘꑟꐨꉻꄜꃅꉀꐕ,ꑘꃅꊋꃤꊇꁧꅉꃀꌫꉂꌫꈾꋍꑍꋍꉙꃅꄻꐛꒆ,ꍔꃚꉻꒉꋊꐽꌠꌋꆀꊋꋠꐨꀉꒉꀊꂾꌠꏭꊝꌠꊋꃤꄇꇖꀕꃅꀉꇨꇁ,ꐧꋦꃅꇴꄉꉻꎍꐽꃅꄉꀧꄉ。ꏓꇱꄉꇩꈐꇩꉈꃅꒊꃅꇁꋊꇽꇬ,ꉪꇩꏤꀻꎆꌠꆹꄡꇗꃅꐨꀉꒉꃅꐥꀊꀋꉬꀋꉆꌠꄐꇐꏤꁈꊜꋽꄮꎍꑴꌦ。

  ꉪꊇꆏꍏꇩꐛꐨꐧꋦꉪꏦꁈꁧꇰꀋ꒜ꁬꌠꀊꂥꃅꐕꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꂘꅍꃅꄉ,ꃹꅼꃅꈆꑪꃅꀻꎆꉪꐨꐥꌠꃄꌬꑞꅉꑟꄉ,ꇩꈐꇩꉈꀊꏀꌠꃅꒊꃅꇁꀊꏀꌠꐛꐈꌠꄉꄐ,ꊿꋅꈁꐥꌠꏓꂱꐥꐨꀊꅰꉾꌠꉘꇉꐨꀊꏀꌠꈴꄉ,ꈆꑪꃅꀻꎆꌠꌌꀨꄜꃅꄉ,ꐳꃅꎆꏣꀻꎆꄟꆹꏮꌠꌌꈜꀦꃅꄉ,ꃹꅼꃅꄺꀱꁉꃑ,ꉹꁌꐥꐨꏦꀧꌋꆀꄺꀱ,ꋧꃅꎆꒉꎆꇁꎒꐡꌠꏭꊝꌠꊌꐨꈫꈈꌋꆀꍔꐯ,ꎆꏣꀊꉗꀊꎴꃅꎍꐽꊼꇅꐳꃅꀻꎆꌠꌋꆀꐧꋦꐮꄮꎍꐽꌠꄹꎆ,ꐊꑷꃅꊼꇅꌣꈚꌠꐧꋦꎁꃅꈻꇐꈲꇐꏤꐪꐨꐥꌠꅉꃀꌆꄻꄉ。

  ——ꉪꊇꆏꎆꏣꀻꎆꉈꑴꀊꏀꊐꑟꆹꌠꄹꇙ。ꋌꊂꉬꈎ,ꉪꇩꏤꎆꏣꉀꎆꄐꎖꌐꂷꆹꄇꇖꀕꃅꊇꁧꌋꆀꈲꁧꅉꃀꇬꄉꈎꃅꐽꏡꃅ7%ꐕꀊꂥ。2010ꈎꁌꏤꈴꄉꌗꏢꇬ,2015ꈎꇩꈐꒃꅐꈁꉬꁌꐪꆏ55ꃪꂡꂷꇬꐂ,ꐪꊛꄉꉻꒉꋊꐽꌠꊋꀥꇱꌋꆀꄻꃪ,ꁌꏤꈁꉬꑟꐨꀑꐱꎍꐽꌠꄉꀧꄉ,ꀁꎴꃅꋊꐽꌠꏱꁈꌋꆀꀊꎴꃅꀻꎆꌠꏱꁈꏓꐯꇯꄉ,ꏟꈯꃅꇓꈓꈉꐨꄐꇐꏤꁈꍔꐯꌠꃄꌬ,ꋒꐯꋒꃅꉪꇩꏤꈒꇓꈉꐨꊋꂫꀉꒉꐯꀉꒉꌠꏓꄻ,ꐳꃅꌬꈧ、ꎆꊐ、ꉇꅐꋮꄮꌠꌌꎆꏣꉀꎆꌠꈺꇙꌠꐛꐨꀊꏀꌠꐛꎻ。

  ——ꉪꊇꆏꐳꃅꎆꏣꀻꎆꄟꆹꏮꌋꆀꎆꏣꐛꉻꋊꄻꌶ。ꏟꈯꃅꍏꇩꐛꐨꀊꏀꉹꌠꇮꑘꈴꌠꈝꃀꍬꄉ,ꈄꏍꈴꌋꆀꇮꑘꈴꌠꀊꅰꐨꐥꌠꐮꉔꌠꄹꇙ,ꄺꂡꑘꄺꀱꉀꐕ,ꄐꇐꏤꁈꐨꃅꐙꌠꅐꑘꀊꏀꌠꉘꉚ。ꐳꃅꁧꃤꃅꑘꀻꎆ,ꁧꃤꃅꑘꁦꎆꁌꐨꆏꇩꈐꒃꅐꈁꉬꁌꐨꇢꊭꍆꁧꉐꊮꌺ4ꂷꉀꐕ。ꏣꀋꑌꃅꎍꐽꃅꇓꈓꈴꄹꎆ,ꇓꈓꈴꐨ47.5%ꇬꄉꉀꐕꌊ51.5%ꇬꑟ,ꇓꈓꈴꐛꃆꄐꉻꌋꆀꐛꄟꄻꐛꒆ,ꀋꆏꃅꇓꈓꈴꌠꊇꁧꌋꆀꑟꐨꉀꐕ。ꐪꊛꄉꊋꀥꇱꄉꅉꃀꉁꈾꋈꄻ,ꀒꁨꋍꁘꃅꎆꏣꐧꋦꀻꎆꅉꃀꌆꈬ。ꊋꀉꒉꃅꇤꄉꐛꏀꈴꂿ꒧ꀻꎆ,ꐳꃅꐧꋦꉪꏦꂿ꒧ꁡꇤꀊꏀꋈꄻ。ꃹꅼꃅꃄꁕꀻꎆꄐꇐꉻꄜꌋꆀꈯꄜꄐꊋꃄꁕꃄꌬ,꒔ꁘ꒔ꁘꃅꅉꀨꄉꉻꁧꃤꃅꐮꆌꈴꌠꃅꇫꑟ。ꇓꈓꇓꉈ、ꃄꁕꉾꃪꃅꐮꈴꌠꄹꆷ,ꋍꑍꌕꅐꑘꋮꄮꃅꀻꎆ。

  ——ꉪꊇꊋꒉꃅꐧꋦꌤ꒧ꀻꎆꌶ。ꀋꎪꃅꂘꑘꌌꂴꄉꀻꎆ,ꎍꐽꃅꉹꁌꑭꊂꃅꉙꂘꑟꐨꊐꐕ。ꑴꌅꏀꀺ、ꀨꎍꐱꐂ、ꀻꎆꄏꐓ、ꊂꏭꄐꏁꌠꌐꏦꌭꈬ,ꈆꑪꇮꇐꏀꀺꉻꑫꌋꆀꊋꁈꄏꌠꏱꁈꄻꐛꒆ,ꊋꇤꄉꈆꑪꇮꇐꀉꒉꀊꂾꌠꂵꅐꌠꄹꎆ。ꎥꃪꌠꌋꆀꃅꉚꌫꎆꌫꅐꌠꇩꈐꒃꅐꈁꊌꁌꐨ2.2%ꍆ,ꈆꑪꇮꇐꊌꐨꀊꅰꉾꃪꃅꆹꏮꌊꒃꅐꊋꃤꐛꇁꌠꊥꎆ。ꐛꏀꈴꋈꄻꈉꐨꇬꄐꄻ,ꊋꀥꇱꄉꌧꊿꁱꂘ,ꊋꇤꄉꄉꈁꀉꒉꌠꌧꊿꊇꁧꀊꂥꊿꁥꂘꐛ。ꀉꒉꃅꁱꀕꋈꄻꌠꊋꀥꇱ,ꁱꀕꄺꀱꀻꎆꄹꇙꌊꀊꏀꃅꐱꐂꌠꃅꇫꑟ,ꏓꂱꉹꁌꀋꆏꃅꉀꎆꌠꉌꊈꁱꀕꈉꐨꇬꇎꄻ。ꊋꒉꃅꈯꎟꌤꑘꀻꎆ。ꀒꁨꋍꁘꃅꃹꅼꃅꁬꋌꁦꎴꆄꄻꏦꉻꄺꀱ,ꅉꀨꆅꉁꁦꎴꆄꄻꄹꏦꄻꐛꒆ,ꐳꃅꈀꄸꑌꅉꀨꆅꉁꁦꎴꆄꄻꁧꃤꃅꌠꊌꌐꌠꑞꅉꁻꌐꃅꇫꑟ。ꐧꋦꏲꂠꏦꉻꉺꏦꏀꀺ,ꊋꀥꇱꄉꐧꋦꏲꂠꏦꃤ、ꏦꉻ、ꄐꊋꋈꄻ,ꐧꋦꁳꍄꑐꇈꐮꄮꎍꐽꎻ。

  ——ꉪꊇꏟꈯꀕꃅꅐꀦꏏꌬꌋꆀꋦꈭꀧꌋꃅꌠꄹꎆꌶ。ꏣꀋꑌꃅꃄꀑꃅꑊꐛꐈꌠꇬꊝ。ꅐꀦꏦꀨꄐꊋꉀꐕ,ꊋꀥꇱꄉꋠꃅꌋꃅ、ꋦꈭꌋꃅ,ꊋꀥꇱꄉꒆꉻꋈꄻꌋꆀꉮꄵꉮꊨꉻꑫꋈꄻ,ꐊꑷꃅꊛꄉꀻꎆꉆꌠꊋꃤꀉꇨꃅꁦꎆ。ꐈꇓꀋꉬꌠꊋꀦꆏꊋꀦꋍꃢꌬꈧꍆꐨꉀꐕꅷ11.4%ꇬꑟ,ꂓꌗꂷꇩꈐꒃꅐꈁꊌꁌꐨꊋꃹꌋꆀꑍꀑꐈꌋꋊꃑꌠꂱꄷꄉꇬ16%ꌋꆀ17%ꊨꒊ,ꍍꇐꀋꉬꀋꉆꌠꋊꃑꈁꉬꃷꁨ8%ꅑ10%ꊨꒊ,ꌩꏪꋦꑌꐨ6ꂡꆀꃓꂰꁦꎆ,ꌩꏪꉱꑷꐨ21.66%ꇬꑟ。ꃶꐚꃅꈲꒉꅉ꒜ꉁꈾꋈꄻꌠꊋꀥꇱ,ꒊꃀꀉꒉꌠꒈꌺ、ꎾꃝꌋꆀꒊꃀꐧꐭꌠꐨꄻꌠꄹꎆ,ꄇꇖꀕꃅꅉꀨꍯꃅꒉꊐ、ꒉꅐꀦꇿꋌꐥꃅꌬꌠꑞꅉꌋꆀꒈꂃꄴꏮꊋꃤꉀꐕ。

  ——ꉪꊇꐊꑷꃅꏓꂱꐥꐨꄻꃪ。ꀋꎪꃅꃅꅍꊌꌠꁦꎆꌠꌌꎆꏣꐧꋦꀻꎆꌠꑞꅉꁻꌐꉘꃀꏡꌠꃅꄉꇬꎷ,ꑘꃅꊿꈀꐥꌠꎁꃅꀋꈐꀋꉈꃅꃅꅍꊌꎻꌠꀹꄻ,ꉬꈎꇬꇓꈓꀊꏀꃅꃅꅍꁵꌠ4500ꃪꑻꁦꎆ。ꃅꐨꉜꄉꁸꌠꌌꀨꃅꄉ、ꁷꄻꄟꀉꑌꑵꐯꇯꐥꌠꁷꄻꄹꏦꌭꈬ、ꄻꐛꒆ,ꊋꇤꄉꀀꊿꊌꐨꁦꎆꌠꌋꆀꎆꏣꀻꎆꌠꋍꋓꃅ、ꑘꃅꃄꎆꁦꎆꌠꌋꆀꑘꃅꒃꅐꐨꉀꐕꌠꋍꋓꃅꌠꃅꇫꑟ,꒔ꁘ꒔ꁘꃅꀀꊿꊌꐨꇩꂱꊌꐨꁷꄻꈐꇬꍆꐨꉀꐕ,ꑘꃅꃄꎆꉘꃀꃢꌠꁷꄻꈐꇬꍆꐨꉀꐕ,ꐳꃅꊌꐨꁷꄟꇗꊒꌠꄻꐛ。ꇓꈓꀀꊿꊾꂷꐽꏡꃅꌬꉆꌠꊌꐨꌋꆀꂿ꒧ꁡꇤꀀꊿꊾꂷꐽꏡꃅꌃꊌꐨꋍꈐꌠꐽꏡꃅꃶꐚꃅꇬꉀꎆꌠ7%ꄩꎆ。ꌢꎭꄏꐓꎕꏦꉀꐕ,ꌢꎭꊻꂷꊨꒊ。ꐳꃅꐧꋦꏦꀧꄹꏦꄻꐛꒆ,ꀒꁨꋍꁘꃅꏦꀧꑞꅉꉀꐕ。ꇓꈓꇓꉈꅉꀨꃀꌠꀨꎹ、ꅉꀨꆅꉚꄹꏦꁊꑷꈴꌠꃅꇫꑟ,ꇓꈓꇓꉈꅉꀨꆅꉚꄜꏂꀧꌕꐘꀧꐨꉀꐕꄷꀋꁧꎍꐽꌶ,ꏱꁈꈋꈐꆅꉚꄜꏂꀧꎆꁵꄻꐨꉀꐕꅷ70%ꈋꉐꑟ,ꇩꏤꑭꊂꇓꈓꏦꀧꐨꐥꌠꀀꑳꁊꑷꐨ20%ꀑꂪꑟ。ꀋꎪꃅꎖꁨꒆꉘꇩꏤꏱꁈꅉꀨꌬ,꒔ꁘ꒔ꁘꃅꏱꁈꄻꐛꒆ,ꊻꂷꀊꉗꃅꐽꏡꃅꀻꎆꌠꊥꎆ,ꃰꊿꐽꏡꃅꄐꄉꇬꐥꍂ1ꈓꉀꐕ,74.5ꈎꇬꑟ。

  ——ꉪꊇꐊꑷꃅꃹꅼꃅꄺꀱꁉꃑꌶ。ꀊꅰꃅꄺꀱꄩꊐꌠꎕꑣꌋꆀꉻꄜꄐꎖꌠꉜꁨ,ꊋꒉꃅꏦꉻꄺꀱꌠꄹꎆ,ꏣꀋꑌꎍꐽꃅꍔꍞꏦꉻꄺꀱꌠꄹꎆ,ꐳꃅꁱꀕꏦꉻ、ꐧꋦꏦꉻꄺꀱꌠꄹꎆ,ꀋꆏꃅꐧꋦꉪꏦꃷꎏꎆꏣꏦꉻꄻꐛꒆꄉ,ꐧꋦꉪꏦꋯꁦꍔꐯ,ꐧꋦꉪꏦꏦꄹꄻꐛꒆ,ꄩꇴꏦꉻꁳꀊꅰꃅꎆꏣꅉ꒜ꀻꎆꐛꐈꌠꇬꄐꄻꇁꄉ,ꈆꑪꃅꀻꎆꌠꎁꃅꊋꑌꃅꏦꀧꌠꇲꁵ。ꅉꀨꎆꏣꄹꏦꌭꈬ、ꄻꐛꒆ,꒔ꑞ꒔ꑵꁨꏦꎆꏣꏦꃤꈴꄉꐯꌟꃅꒃꅐꐊꊈꃄꌬ、ꀋꈐꀋꉈꃅꃷꎏꋓꅔꈽ、ꐯꌟꃅꏦꃤꁳꀧꌋꃅꎻꌠꏦꉻꋦꈭꀹꄻ。ꐳꃅꏱꎆꇗꏸꎆꒉꎆꇁꏦꉻꄺꀱ,ꏣꀋꑌꃅꎆꏣꀻꎆꄟꆹꏮꌠꇬꈲꏣꐥꌠꏱꎆꇗꏸꏦꉻꀹꄻ,ꀉꑌꑵꃅꊥꇬ、ꇿꋌꐥꃅꁧꃤꃅ、ꋓꉪꁨꄉꍞꏲ、ꃨꆰꐨꋎꍅꉆꌠꀹꄻ。ꃹꅼꃅꅐꀦꐨꐥꌠꅐꇐꁌꏤꌋꆀꋦꈭꌋꃅꁌꎴꌠꄺꀱ,ꃷꎏꇲꈉꐮꃆꂮꄛꅐꄎꌠ、ꅐꀦꇮꃪꐨꌋꆀꋦꈭꉮꄻꀨꊰꅐꀦꐨꐥꌠꅐꇐꁌꐘꄻꐛꉺꏦꄻꐛꒆ。ꀊꅰꃅꏣꀋꑌꃅꑴꇙꃅꁉꃑꌠꄐꇐꏤꁈꃄꌬ,ꇩꏹꇷꃅꌠꌋꆀꋓꅔꌠꇨꐨꀊꏀꌠꉘꉚ,ꀒꁨꋍꁘꃅꐯꈲꐯꇯꊋꌠꁉꃑꐛꐪꀊꏀꌠꐛꇁ。

  ——ꉪꊇꀋꆏꃅꊋꀥꇱꄉꍔꃚꑴꅉꄺꀱꋈꄻꌶ。ꍔꃚꃤꌅꈌꈁꐥꌠꆹꏓꂱꄸꇬꁳꌠ,ꏓꂱꌌꆽꎍꄉ,ꏓꂱꎁꃅꈲꁧꏂ,ꏓꂱꁳꍞꊟꎽ;ꀋꎪꃅꀊꐯꈭꃅꎆꏣꄕꊪ、ꊥꇬꌊꏦꃤꈴꄉꇩꏤꌋꆀꐧꋦꌤꃆꏲꂠ,ꎆꏣꌋꆀꁱꀕꌤꑘꏲꂠ;ꀋꎪꃅꏦꈴꇩꏲꅉꀨꄐꉻꌬ,ꊋꀥꇱꄉꉹꁌꈲꁧꀧꌋꃅꌠꏦꄹꋈꄻ,ꏦꈴꑘꏲꌠꄹꎆ;ꀋꎪꃅꈆꑪꋯꁦꏤꁈꌬ,ꏤꇽ、ꃄꌬ、ꍞꊟꌠꐮꏢꑲꇈꐮꋮꄮꌠꃄꌬꉺꏦꄻꐛꒆꄉ,ꌅꈌꌌꎃꊒꃅꃄꌬꎻ;ꀋꎪꃅꄹꏦꀂꏽꄉꌅꈌꏓꋧꇨꇈꇫꏢꑲꀋꄐꃅꐙꌠꄺꀱ,ꏟꈯꃅꍹꈔꌠꄴꏮ、ꅓꀞ;ꀋꎪꃅꏓꂱꃤꋯꁦꌅꈌꌋꆀꏦꊒꌅꈌꈲꁧꏦꀧ,ꐧꋦꀋꈐꀋꉈꑗꉬꌠꀧꌋꃅ。ꈍꃅꄿꂿ,ꋌꊂꉬꈎꊋꇤꈭꐨ,“ꊰꑋꉬ”ꄐꎖꌠ꒔ꑞ꒔ꐘꑞꅉꁻꌐꃅꇫꑟ,ꉪꇩꏤꏓꇱꇩꊋꀊꅰꀉꒉꃅꉀꐕ,ꏓꂱꐥꐨꀊꅰꃅꄻꃪꇁ,ꇩꏤꐛꑊꀊꅰꀉꒉꃅꐛꐈꐨꐥꇁꎻ。

  ꌕ、2011ꈎꌤꃅꐨ

  2011ꈎꆹ,“ꊰꑋꉬ”ꃄꇬꄹꈎꉬ,ꀋꃋꎼꈎꌤꃅꋒꇬ“ꊰꑋꉬ”꒔ꑞ꒔ꐘꁻꌐꂿꃆꃅꇫꑟꇬꀋꂿ꒧ꐯꀋꂿ꒧。ꋌꃀꈒꌠ,ꉪꊇ꒔ꑞ꒔ꐘꌤꃅꌊꊌꐨꀉꒉꐯꀉꒉꃅꐥꀐ。ꇩꈐꒃꅐꈁꉬꁌꐨ10.3%ꉀꎆ,ꀀꊿꌬꈧꁌꏤꉀꎆꌠꋎꍅ3.3%ꇬꄉ,ꇓꈓꀊꏀꃅ1168ꃪꑻꁦꎆꃅꃅꅍꊌ,ꇩꏹꊌꐨꌬꐨꊼꇅꀱꉾꇁ。ꋋꆹꎼꈎꌤꃅꌊꉾꌠꎁꃅꅉꃀꉾꃪꌠꌆꄻꄉꀐ。

  ꎼꈎꆹ,ꉪꇩꏤꀻꎆꌠꂾꎍꌠꃅꒊꃅꇁꆹꄡꇗꌼꇪꐯꌼꇪꃅꐙꑴꌦ。ꋧꃅꎆꏣꆹꐪꊛꄉꀅꌳꀅꌳꃅꀱꐛꀕꇁ,ꄚꀱꐛꀕꇁꌠꅉꃀꀋꈬ。ꎆꏣꐞꄿꉺꌠꎆꏣꉀꎆꊋꀋꑌ,ꃅꅍꀋꊌꐨꄡꇗꀊꂥꅉꇬꎍꀁꋍꀋꇁꇬꎷ,ꇩꏤꋍꈨꋋꈨꇬꌅꀨꎝꃆꎒꐡꉮꐴꄡꇗꀜꋊꇫꎭꀋꌐꑴꌦ,ꎆꏣꐞꄿꉺꌠꀋꉬꀋꉆꌠꀒꁨꋍꁘꃅꄝꏯꎆꃀꏱꁈꄹꌬ,ꅉꆺꑭꊂꒈꇁꐨꀉꇨꃅꁦꎆꇁ,ꇩꏹꃷꇐꀉꑌꌠꁌꏤꌋꆀꎆꃀꁌꀠꐨꀉꇨꃅꐛꐈꇁ,ꏀꄓꃷꎏꁨꇐꀱꆱꌋꆀꎊꈬꁌꄓꍄꊋꀉꒉꇁ,ꀧꌋꃅꉪꏦꐪꊛꄉꉀꄓꇁ,ꇩꏹꃷꎏꋓꅔꌠꀊꅰꃅꃛꊸꇁ,ꑘꀋꒃꊨꀋꄅꌠꐊꊈꄡꇗꊼꇅꀉꑌ。ꉪꇩꏤꈲꏣꎆꏣꃄꌬꅉꇬꀊꎴꌤꃆꌋꆀꀁꎴꌤꃆꑠꈨꐮꀱꏍꏿꎍ,ꏦꉻꐨꐮꄙꌠꌋꆀꉺꏦꐨꌤꃆꐮꄅꎍꄉ,ꉻꒉꋊꐽꌠꊋꋠꐨꀊꅰꃅꊋꋠꇁꀐ。ꉪꊇꆹꎃꊒꃅꃅꒊꃅꇁꍞꇽ,ꉪꐛꏢꐙꃅꄉꇬꎷ,ꃨꆰꉪꐨꀥꇱꑌ,ꃨꆰꐨꏭꊝꌠꄐꏤꋒꃅꄉ。

  ꎼꈎꇩꂱꎆꏣꌋꆀꐧꋦꀻꎆꄐꄉꌠꑞꅉꁻꌐꀋꉬꀋꉆꌠꆏ:ꇩꈐꒃꅐꈁꉬꁌꐨ8%ꀑꂪꉀꎆ;ꎆꏣꐛꉻꀒꁨꋍꁘꃅꉾꃪꈴ;ꀀꊿꌬꈧꁌꏤꈁꉬꑞꅉꉀꎆꐨꋎꍅꌊ4%ꀑꂪꃅꄉ;ꇓꈓꀊꏀꃅꃅꅍꊌꌠ900ꃪꑻꈋꉐꑟ,ꇓꈓꃅꅍꀋꊌꐨꁱꄀꄉꌠꆏꋎꍅꌊ4.6%ꈍꈐꄉ;ꇩꏹꊌꐨꌬꐨꊛꄉꄻꃪꇁ。ꏓꇱꃅꉪꏡꇬꆏ,ꎆꏣꀻꎆꄟꀰꏮꌠꎁꃅꋦꈭꉾꃪꌠꁦꄻ,ꋍꑞꋍꁁꏯꈻꌐꌊꌤꃅꊋꇱꅉꌌꐳꃅꎆꏣꏦꉻꋊꐽ、ꀻꎆꊇꁧꌋꆀꊌꐨꉀꐕꌠꇬꄉ,ꌌꁦꎆꃅꀕꃅꅍꊌ、ꏓꂱꐥꐨꄻꃪ、ꐧꋦꐮꄮꌠꊥꎆꌠꇬꅞꄉ。

  ꄚꂴꈁꉉꌠꑞꅉꁻꌐꋋꈨꃅꇫꑟꇬ,ꉻꒉꎆꏣꏱꁈꁳꐪꊛꐨꐥ、ꎍꐽꐨꐥꌠꄉꀧꄉ,ꄐꊒꐨꐥ、ꋭꋽꐨꐥ、ꇿꋌꐨꐥꃅꉀꐕ,ꎆꏣꎍꐽꊼꇅꐳꃅꀻꎆꆹꇬꎷ、ꎆꏣꐛꉻꋊꐽ、ꈳꎆꅐꂋꇁꌠꏲꂠꃆꂮꂥꀘꌊꉾꃪꃅꄉ,ꀊꏀꃅꎊꈬꁌꏤꈁꉬꑞꅉꄻꎍꐽꌠꉜꁨ,ꎆꏣꀉꒉꃅꇙꈽꑠꇫꅐꇁꂵꌠꄴꏮ。

  ꐪꊛꄉꏱꎆꏱꁈꏣꀋꑌꌠꃄꌬ。ꏱꎆꌬꁏꇔꌠꌋꆀꇩꎝꄉꈁꄉꄐꌠꄝꄡꊰ。ꎼꈎꄐꄉꁆꄻꌠꏱꎆꌬꁏꇔꌠ9000ꂡꂷꃅꄉ,ꄚꈐꏭꍏꑷꏱꎆꌬꁏꇔꌠ7000ꂡꂷ,ꊛꄉꃅꄷꎁꃅ2000ꂡꂷꎝꃑꌠꌌꃅꄷꄏꌗꅉꇬꇱ,ꌬꁏꇔꄉꈁꀒꄹꈎꄐꌗꄉꌠꇬ1500ꂡꂷꊨꒊ,ꌬꁏꇔꐨꀁꋌꊰꌊ2%ꀋꇈꃅꄉ。ꊋꇤꄉꏱꎆꌬꐨꐛꉻꃪꈴ,“ꌕꂿꑘ”、ꐞꀋꄿꃅꈋ、ꉹꁌꐥꐨ、ꐧꋦꌤꑘ、ꐛꉻꋊꐽ、ꈆꑪꇮꇐꏀꀺꑠꀋꉬꀋꉆꃅꌬꐨꁦꎆ;ꎂꀕꌬꐨꊨꒊ,ꏦꇨꃅꄈꍔꌤꃅꅉꌤꀞꑷꂿꑠꋈꄻꌠꋎꍅ,ꇩꉈ(ꅔꉈ)ꁧꌫꎆ、ꐕꍯꃻꄻꌠꌋꆀꃄꄻꌫꎆ、ꉻꃆꋨꏦꌫꎆꑠꌬꐨꆏꏥꏦꇬꆏꋍꂷꑋꁧꀋꎆ,ꃶꐚꃅꏲꑘꎆꀨꊨꒊ。ꐪꊛꄉꐛꉻꐨꐥꌠꇗꏸꊨꌠꃅ。ꏦꃤꇬꈴꄉꇗꏸꎴꏲꌠꊋꀥꇱ。ꃅꄷꍔꃚꃤꃅꐙꌠꎝꃆꌌꐊꑷꃅꍤꌗ,ꎖꈌꐯꌟꃅꍞꏲꌠꌫꄻ,ꋊꍬꏦꈴꌠꃅꄷꍔꃚꎝꉛꎆꊙꉺꏦꎥꃪꄉꄺꂡ。

  ꎍꐽꌠꎆꃀꏱꁈꌫꄻ。ꄉꄐꌠꐧꋦꎆꊙꄉꈁꄝꏦꀋꊰ,ꀊꐯꈭꃅꄉꇬꎆꃀꉀꎆꌠꑞꅉꌐꂷꆏ16%ꃅꄉ。ꉻꒉꉪꑌꏡꑌꌠꏱꁈꇶꏦꄻꐛꒆ,ꏓꇱꄉꁌꏤꌋꆀꃷꁨꌬꅍꌫꄻ,ꎆꃀꏱꁈꇿꋌꐥꐨꉀꐕ。ꈛꎂꎆꊙꍆꁧꐕꀊꂥ,ꇴꀾ、ꎝꌐ、ꅐꑘꎆꀨꑠꎆꊙꌬꅍꂿꄐꇤꅐꇁ,ꀊꅰꉾꃅꀉꑌꑵꈴꄉꎆꊙꈉꐨꇬꄉꄐꎻ。ꊋꇤꄉꎆꊐꎆꉛꐛꉻꉾꃪꈴ,ꃼꇇꑘꑴꉴꏃꈻꌊꀋꉬꀋꉆꁁꏯꌋꆀꊋꁧꅉꇬꏭꎆꊐꎆꉛꊋꁈꄏꌠꍔꒉ,ꏦꇨꃅ“ꑍꀊꂥ”ꉹꑘꌋꆀꅐꐨꁦꎆꇨꌠꉹꑘꎆꉛꌠꋎꍅ。ꀒꁨꋍꁘꃅꏓꂱꀘꎆꃀꌋꆀꉇꎆꐮꀠꁌꐨꏓꐛꉺꏦꄻꐛꒆ。ꏟꈯꃅꅔꉈꎆꀨꏭꇙꌠꐏꍅꄉ,“ꊸꎆ”ꈏꃹꇁꌠꄴꏮ。ꁨꇐꊭꊐꄉꌠꇬꎆꇱꌠꌋꆀꃨꆰꏱꄻꌠꊋꀥꇱ,ꎆꇱꈲꁧꉀꐕ。

  ꎼꈎꆏ,ꀋꉬꀋꉆꃅꄚꊂꌤꈍꑍꁁꏯꃅꋒꌶ。

  (ꋍ)ꎊꈬꁌꏤꈁꉬꑞꅉꀑꐱꃅꎍꐽꇬꎷ

  ꀋꃋꋋꇅꇬ,ꎊꈬꁌꏤꊼꇅꉀꄓꐲꇨ,ꈳꎆꅐꂋꇁꉆꐨꀉꒉ,ꌤꋋꏢꉹꁌꐥꐨꎑꁠ、ꃅꇴꄉꉻꃆꂮꐥ、ꎍꐽꌠꁧꏖꌠꉬ。ꎊꈬꁌꏤꈁꉬꑞꅉꑠꉻꒉꋊꐽꌠꂿꃆꀋꂿ꒧ꌠꃅꄉ,ꋒꐯꋒꃅꉪꇩꏤꀋꉬꀋꉆꇮꑘꅐꇐꀑꐱꃅꇬꇲꌠꈉꌠꒊꀋꋌ,ꋚꂷꊭꊎꄉꌠꇎꃅꐥ,ꉇꎆꊭꊐꄉꌠꊼꇅꀉꑌꌠꇎꏦꑠꐥ,ꊋꇤꄉꈏꃹꇁꐨ、ꐛꉻꐨꃅꈳꎆꅐꂋꐊꊈꁧꏖꅍꀋꉾꑠꇤꇧꎭ,ꐊꊈꀨꊰꉀꄓꌠꍅꇧꎭ,ꎃꊒꃅꃷꎏꅐꇁꉆꐨꄐꇺ,ꏟꈯꀕꃅꁌꏤꉀꄓꆹꌠꋎꍅꄉ。ꎆꏣꌋꆀꏦꃤꇇꁈꌌꀨꄉ,ꉈꑴꏲꑘꇇꁈꇱꄉ,ꐊꑷꃅꁌꏤꋊꄻꋎꍅꌋꆀꍞꏲꌠꊋꀥꇱ。ꋍꆏꇿꋌꐥꃅꃷꎏꏭꇙꐨꏱꄻ,ꎊꈬꁌꏤꉀꄓꐳꌠꎆꃀꇎꏦꋎꍅꄉ。ꍔꃚꃷꇐꌋꆀꁧꃤꃅꁌꏤꋊꄻꏲꂠꌠꊜꋽꄮ、ꐳꐨꌋꆀꄐꐨꒃꉇ。ꑍꆏꊋꀉꒉꃅꇤꄉꒃꅐꀻꎆ,ꂿꑘꅐꇐꀋꉬꀋꉆꌠ、ꅉꀨꐥꐨꈉꄻꅐꇐ、ꒃꅐꌬꇐꀋꉬꀋꉆꌠꑠꒃꅐꌠꌋꆀꇲꄻꌠꏦꀧꄉ。“ꋚꊐꅍ”ꌜꍈꃅꎁꆽꎍꌠꌋꆀ“ꋂꄮꊐꅍ”ꏃꍈꃅꎁꆽꎍꌠꃅꇫꑟ。ꌕꆏꂿꑘꅐꇐꏮꈴꉻꑫꋈꄻꌠꊋꀥꇱ,ꏣꀋꑌꃅ“ꂿꑘꃷꎏꐯꊛ”ꌠꍔꂵ,ꂿꑘꅐꇐꀊꏀꌠꎞꎭꇬ“ꑴꀋꐥꈴꈜ”ꄻꄉ。ꃷꇐꀋꉬꀋꉆꌠꊭꊎꄹꏦꌋꆀꂿꑘꅐꇐꀋꉬꀋꉆꌠꋋꇅꇬꌬꌠꊭꊎꄹꏦꄻꐛꒆ,ꇩꏤꊭꊎꌠꊐꄉꅐꁧꌠꋊꐽꊜꋽꄮꒃꉇꄉ,ꈏꃹꉇꅐꋊꐽꌠꃅꋒ,ꃷꎏꋎꐽꄐꐨꀉꇨꎻ。ꇖꆏꁌꏤꍞꏲꌠꊋꀥꇱ,ꃷꎏꐥꀹꀧꌋꃅ。ꈜꀕꇈꁌꏤꏦꌬꌠꊋꀥꇱꄉ,ꉇꀕꃅꈰꏅꄉꃷꌠ、ꐮꈻꐯꎷꄉꁌꏤꉀꄓꌠ、ꐮꐊꄉꁌꏤꐕꑠꏦꃤꀋꊒꃅꐨꏦꇨꃅꍤꀞ。ꉬꆏꁥꇱꄹꏦꄻꐛꒆ,ꐧꋦꈭꋏꌠꌋꆀꏦꀧꎕꏦꌌꁌꏤꉀꄓꐯꅑꌠꐊꄉꄺꀱꌠꐊꇙꉺꏦꄻꐛꒆ,ꀋꎪꃅꎊꈬꁌꏤꉀꄓꒉꄸꃅꉹꁌꊌꐨꀁꂥꌠꎃꐚꐥꐨꇬꁧꏖꀋꉆ。

  (ꑍ)ꀒꁨꋍꁘꃅꈏꇓꈉꐨꈜꀕꇈꀀꊿꌬꈧꈉꄻꌠꍔꐯ

  ꈏꇓꈉꐨꆹꉪꇩꏤꎆꏣꀻꎆꌠꄐꇐꏤꁈꌐꏦꀊꉗꌠꌋꆀꅉꀨꉆꅉꉬ,ꉈꑴꎆꏣꐽꏡꃅꀻꎆꌠꁧꀦꈭꈴꌋꆀꈏꇓꈉꐨꇬꊥꎆꌠꑌꉬ。

  ꏣꀋꑌꃅꌬꈧꈉꐨꍔꒉ。ꐪꊛꄉꍔꃚꌌꌬꈧꌠꌫꅐꌠꄻꉾꌠꌋꆀꍔꒉꇬꌬꌠꁦꎆ,ꇓꈓꏦꎫꀀꊿꊌꐨꀁꑌꌠꌋꆀꂿ꒧ꊿꏭꁥꇱꌠꁦꎆ。ꐪꊛꄉꑱꈐꄆꉂꄆꈾꌌꂿ꒧ꁡꇤꃷꒉꌠꌋꆀꀊꏀꌌꀉꆹꆦꌠꏱꁈꃄꌬ。ꂿ꒧ꁡꇤꌋꆀꐧꐭꇓꈓꃼꇇꏮꈴ、ꁱꀕꈯꎟ、ꈩꆫ、ꏣꐯꈄꏍꑠꅉꃀꄻꇐꋈꄻꌠꊋꀥꇱ。

  ꊋꀉꒉꃅꇤꄉꁱꀕꌬꈧ、ꈩꆫꌬꈧꌠꌋꆀꃀꌠꀨꎹꌬꈧꌠꊥꎆ。ꂿ꒧ꁡꇤꃼꇇꑘꐯꊛꄉꀰꏢꌠꌋꆀꋍꃱꃅꁆꎭꌠꄹꇙ,ꇓꈓꏦꎫꃼꇇꑘꈄꏍꅉꄐꉻꉾꃪꈴ,ꏣꀋꑌꃅꄆꌅꃼꇇ、ꈄꏍꃻꄻꅉ、ꅉꇗꈴꌗꑠꀊꏀꉹꌠꁧꃤꃅꑘꐛꄟꀻꎆ。ꊋꀉꒉꃅꇤꄉꃷꎏꐥꀹꋊꄻ、ꋊꍬꐛꏦꈴ,ꃶꐚꃅꌬꈧꊿꌅꈌꈲꁧꀧꌋꃅ。ꃹꅼꃅꌧꇐꅐꇐꌅꈌꇬꉄꌎꌠꌋꆀꃷꇐꀊꆠꄻꃷꌠꏭꇇꇩꍈꌠꌐꄉꏱꄻꌠꃅ。

  ꊋꀉꒉꃅꇤꄉꎆꇱꐛꉻꉾꃪꈴ。ꎔꎗꃅꇩꃷꑼꉹꁌꊋꊡꄉꄐꏁꌊꎆꇱꌠꀊꏀ36ꏢꌠꃆꂮꃅꇫꑟ,ꃛꊸꃅꄇꄜꋊꂿꈴꌠꃷꎏꃹꉆꎕꏦꌋꆀꊋꁈꄏꏱꁈꏤꄻ,ꃶꐚꃅꃷꎏꃹꉆꌠꄝꏯꐯ,ꇯꍝꃅ꒔ꑞ꒔ꑵꂿꉆꌠꌋꆀꂿꀋꉆꌠꁾꇓꀜꐆꇧꎭ,ꉹꁌꎆꀨꊋꊡꌋꆀꄐꏁꌊꅉꃀꅐꑘꌋꆀꅉ꒜ꉁꈾ、ꏃꍔꉻꌬꌤꑘ、ꐧꋦꌤꑘ、ꎆꒉꎆꇁꁧꃤꃅꁆꏯꇬꇱ,ꑴꃅꎆꏂ꒧ꄹꇙꊋꀥꇱꄉꑴꌅꏀꀺꌋꆀꆹꏮꊐꐕ,ꉹꁌꎆꀨꊋꊡꌋꆀꄐꏁꌊꄺꀱꐯꇯꌋꆀꇩꁨꎆꏂ꒧ꄺꀱꌠꇬꃅꈽ,ꊋꀥꇱꄉꉹꁌꎆꇱꌠꁧꃤꃅ、ꄐꇺꌠꌋꆀꋊꍬꏦꈴꌠꏲꂠ,ꐧꋦꎆꇱꎍꐽꃅꉀꎆꌠꌋꆀꐛꉻꉾꃪꈴꌠꊥꎆ。ꋒꐯꋒꃅꍔꃚꎆꇱꐛꉻꋊꄻꌠꄐꏁꂿꄐꋊꇤ,ꂴꆏꀋꉬꀋꉆꃅꇬꊎꋉꌠ、ꊛꄉꋉꌠꐘꑘꇬꎆꃀꈉꐨꄉꀧ,ꊱꁨꐥꃅ“ꊰꑋꉬ”ꄐꎖꌠꐘꑘꀉꒉꀊꂾꃅꋈꄻꌠꃄꇬ。ꃄꈌꄐꃅꎆꇱꌠꌋꆀꋈꀱꄺꀱꌠꄴꏮ。ꏦꇨꃅꎆꇱꐘꑘꇬꃄꅉꌬꌠ、ꊋꏏ、ꋦꈭꀧꌋꃅ、ꋬꂻꑠꈏꃹꉆꎕꏦꃄꌬ,ꎆꇱꊇꁧꌋꆀꈲꁧꉀꐕ。

  (ꌕ)ꂿ꒧ꅉ꒜ꉆꈉꃅꈫꈈꌋꆀꊋꀥꇱ

  ꀋꎪꃅ“ꌕꂿ꒧”ꌤꃅꌠꌌꀋꂿ꒧ꐯꀋꂿ꒧ꅉꇬꄉ,ꇮ꒧ꈴ、ꇓꈓꏦꎫꈴꌠꃹꅼꃅꀻꎆꌠꇬꋍꋓꃅꂿ꒧ꐛꏀꈴꌠꄹꎆ,ꂿ꒧ꁡꇤꃅꒊꃅꇁꉾꃪꌠꈫꈈꌋꆀꀻꎆ。

  ꂿ꒧ꅐꇐꇲꁵꌠꄉꀧ,ꈜꀉꑌꃅꈴꄉꂿ꒧ꊿꊌꐨꁦꎆ。ꋚꂷꄝꀋꊰꌠꏦꀧꌠꌌꀋꉬꀋꉆꌠꑞꅉꁻꌐꃅꄉ,ꋍꍈꑌꄝꀋꏯꃅꂿ꒧ꒃꅐꒃꉇꋒ。ꋚꂷꊪꏽꃅꊂꎍꐽ,ꅐꇐꂱꎆꅑꅉꇬꊋꁈꄏꌠꌑꇌ、ꒀꒉ、ꎬꐚꑠꅐꇐꀉꒉꌠꊪꅐꇁ。ꊋꀉꒉꃅꇤꄉꎆꆫꑘ、ꉛꑘ、ꌩꑘꀻꎆ。ꃶꐚꃅꀊꏀꈭꌠ“ꋂꄮꊐꅍ”ꋉꃆꋈꄻꌠꒃꉇꋒ,ꇓꈓꀉꒉꐧꀠꌠꇓꈓꈛꑌꅉꇬꀑꐱꉐꀖꊩꅉꃅꊂꐥꌠꌋꆀꀊꋒꀊꏀꋠꇐꇲꁵꊋꃤꐥ。ꂿ꒧ꈆꑪꇮꇐꄙꌬꀉꇨꇁ,ꂿ꒧ꋦꁧꊪꑘꀉꇨꃅꀻꎆ,ꄉꈁꀉꒉꃅꅐꇐꀊꂥꌠꋈꄻꌠꃅ。ꐪꊛꄉꋚꂷꎴꃼꁌꀁꂥꀧꌠꏱꁈꌫꄻ,ꎼꈎꎭꎳꃼꁌꀁꂥꌠꆏ50ꉻꏣꌠꎆꃀ5ꂷꅑ7ꂷꉀꐕ,ꍮꌦꎳꃼꁌꀁꂥꌠ50ꉻꏣꌠꐕꌊ9ꂷꅑ23ꂷꃅꄉ。ꊋꀉꒉꃅꂿ꒧ꁡꇤꂿ꒧ꅐꇐꀋꉬꌠꀻꎆ,ꑤꁕꎆꏣꃅꀉꇨ,ꂿ꒧ꊿꃅꑘꇮꇐꌋꆀꌤꑘꂷ、ꊌꐨꀺꌠꊋꃤꉀꐕ,ꂿ꒧ꊿꂱꑱꃅꄷꀀꅉꈭꇍꄉꆹꏮꃅꅍꃅꌠꊥꎆ。ꌢꎭꁈꄏꎕꏦꉀꐕ,ꌢꎭꁈꄏꀖꁉꐨꇬꊋꀉꒉꃅꇱ。

  ꈲꒉꀉꇨꃅꄻ,ꐊꑷꃅꂿ꒧ꂿ꒧ꁡꇤꅉ꒜ꉁꈾꋈꄻꌠꊋꀥꇱ。ꀋꉬꀋꉆꌠꆏꊋꀥꇱꄉꋠꇐꈲꒉꋈꄻ、ꐧꐭꒊꃀꏱꄻ、ꒈꇉꀄꊭꌠꌋꆀꒉꇊꅍꎒꐡꉆꌠꆐꅑꌠꄻꑣꌠꌋꆀꃄꐡꃄꊈꉮꌸꌠꄴꏮꐏꄻ。ꒉꎵꊎꉁꈾꄻꐛꒆ,ꒉꏏꒉꊎꌠꀻꎆ,ꒊꃀꒉꈜꄻꈫꈈ,ꋍꇈꋊꎵꌠꃅꋒ,ꒈꇉꉮꐴꑌꌠꋊꑣꇧꎭ,ꒈꅐꃪꂪꐏꄻꐨꍔꐯ。ꈍꑍꈎꊋꇤꄉ,ꐊꑷꃅꒈꅐꄴꏮꃅꇨꄴꏮ、ꉮꄵꉮꊨꊋꃤꉀꐕ。ꂿ꒧ꁡꇤꃄꅉꀖꁉꄺꂡꌠꄹꎆ,ꄉꈁꀉꒉꃅꃅꇨꃅꆓꐯꇯꃱꃅꎕꏦꀊꂥꌠꋠꁍꋈꄻ,ꐳꃅꇩꏤꑭꊂꃅꋚꂷꄙꂡꏣꀊꏀꁦꎆꃅꊪꅐꄎꌠꋈꄻ。ꊋꀥꇱꄉꂿ꒧ꁡꇤꒉꄆꈜꌗꑳꋈꄻ,ꊋꀉꒉꃅꂿ꒧ꁡꇤꒃꅐꐥꐨꇎꏦꄻꃪ,ꊋꇤꄉꂿ꒧ꊿꉾꃪꌠꀀꁍꋈꄻ。

  ꊋꀉꒉꃅꌌ“ꌕꂿ꒧”ꇬꇱ,ꂿ꒧ꀉꇨꂿ꒧ꈲꌠꏱꁈꄻꐛꒆ。ꏱꎆꌬꅐꌠꀋꉬꀋꉆꌠꌌꂿ꒧ꂿ꒧ꁡꇤꇬꇱ,ꌌꂿ꒧ꂿ꒧ꁡꇤꇬꌬꌠꈁꉬꃷꁨ、ꁦꎆꃷꁨꐯꇯꉀꐕꌠꄉꀧ;ꄐꌗꈐꇬꀋꇙꁨꇐꎆꇱꀋꉬꀋꉆꌠꆏꌌꂿ꒧ꂿ꒧ꁡꇤꅉꃀꉁꈾꋈꄻꌠꇬꌬ,ꈁꉬꃷꁨꌋꆀꍆꐪꀒꁨꋍꁘꃅꉀꐕꌠꄉꀧ;ꃄꅉꏆꃷꄉꊌꌠꈲꐨꀋꉬꀋꉆꌠꆏꂿ꒧ꃄꅉꀖꁉ、ꋠꁍꈲꒉꌋꆀꂿ꒧ꁡꇤꅉ꒜ꉁꈾꋈꄻꌠꇬꇱ,ꇎꃅꋊꅐ、ꌫꅉꏤꄉꌬꌠꄉꀧ。ꎼꈎꍏꑷꏱꎆꌌ“ꌕꂿ꒧”ꇬꇱꌠꄐꁆꌊ9884.5ꂡꂷꃅꄉ,ꀒꄹꈎꄩ1304.8ꂡꂷꁦꎆ。ꐪꊛꄉꂿ꒧ꊿꏭꒃꅐꁥꇱꌠꁦꎆꇱ,ꀊꏀꃅꁦꎆꌠꂿ꒧ꁥꇱꎆꀋꉬꀋꉆꌠꌌꀨꅐꅉ、ꅐꑫꀋꂿ꒧ꌠ、ꌐꑘꑱꁯꀉꒉ、ꂿ꒧ꊿꌐꑘꇷꃅꎀꍹꉚꄉꎎ。ꍏꑷꏱꎆꃤꌌꋚꂷ、ꒀꒉ、ꃮꀠꄀꅐꁧꌠꀉꒉꌠꑤꏭꎂꀕꃅꐙꌠꆹꏮꁵꌬꌠꎆꁦꎆꇱ,ꈁꁠꁵꊋꊡꁥꄟꄉꈁꌋꆀꈍꈐꍔꒉ。ꎆꒉꎆꇁꏲꉻꄐꏁꌊꂿ꒧ꎆꉛꌠꇬꎑꁠꌠꁦꎆꃅꇱ,ꂿ꒧ꎆꉛꎑꁠꌠꁦꎆꃷꁨꍆꐪꆹꀒꄹꈎꇂꃴꀋꊰꌠꄉꀧ。ꏱꁈꃅꐙꌠꎆꒉꎆꇁ“ꌕꂿ꒧”ꏭꊋꁈꄏꌠꊋꃤꁦꎆꇱ。ꏱꁈꐨꐥꌠꂿ꒧ꄜꏂꀧꄹꏦꋈꄻꐛꒆ,ꂿ꒧ꀱꄜꏂꀧꌠꌋꆀꃨꆰꐨꀉꇨꌠꁷꄻꉺꏦꋉꐛ。

  ꃹꅼꃅꂿ꒧ꁡꇤꄺꀱ,ꂿ꒧ꁡꇤꀻꎆꍄꑐꊋꃤꀥꇱ。ꂿ꒧ꁡꇤꅉꀨꀰꏢꄹꏦꄝꀋꊰꌋꆀꄻꐛꒆ,ꋠꃅ、ꌩꏪ、ꅔꏁꑠꉱꑷꌐꌠꑱꈐꀧꃅꀰꏢꄹꏦꋈꄻꐛꒆ。ꊱꁨꃅꂿꑘꁡꇤꃄꅉꏲꂠꄹꏦꄺꀱꌠꄹꎆ。ꋠꃅꌋꃅꁵꊒꉺꏦꎹꈹꄻꐛ。ꐪꊛꄉꂿ꒧ꁡꇤꏓꇱꄺꀱꌠꄹꎆ。ꐊꑷꃅꋂꊐꌠꉻꈲꌤꑘꋈꄻꁁꏯꋍꌤꋍꇖꌠꏱꎆꈁꁠꁵꁥꇱꎆꁵꌠꃄꌬ,ꀉꒉꃅꈁꁠꁵꁥꇱꎆꁵꄉꈁꁦꎆ。ꐳꃅꂿ꒧ꊿꌐꑘꇷꃅꎀꍹꌋꆀꂿ꒧ꐧꋦꈴꁧꃤꃅꉻꑫꀻꎆ,ꂿ꒧ꎀꍹꈴꑟꐨꉀꐕ。ꈎꂫꂾ,ꇩꏤꑭꊂꇬꄉꁊꈴꃅꑣꍔꅀꃄꁕꃅꐙꌠꂿ꒧ꇮꇐꄹꌬ、ꇘꇙꋦꁧꆅꁿꄴꏮꋎꍅ、ꂿ꒧ꅐꇐꊇꁧꍞꏲꑠꄉꉻꁧꃤꃅꌠꏱꉻꋈꄻꐛꒆ。

  ꍏꇩꊿ13ꂡꌠꋚꋠꃆꂮꂥꀘꌠꆹꈍꄮꑌꌤꀉꒉꌠꉬ,ꈍꄮꑌꉜꀋꁨꀋꉆ。ꉪꊇꆹꌤꋌꐘꀞꋒꌠꉌꊋꑌ,ꀞꋒꊋꃤꑌꐥ。

  (ꇖ)ꐳꃅꎆꏣꐛꉻꄐꇐꃅꐙꌠꋊꄻꌠꄹꎆ

  ꋋꆹꎆꏣꀻꎆꃄꄟꆹꏮꌠꀨꂵꃅꍜꉬ。ꎆꏣꄾꌦꋩꐳꃅꈏꇓꉀꎆ、ꏀꀺꅸꈹꈝꃀꇬꃹꆹꌠꄹꆷ。

  ꅐ꒧ꐛꉻꃪꈴꌠꋊꄻ。ꐳꃅꐛꏀꅐꑘꉻꑫꋈꄻ,ꅐ꒧ꉹꏮꊐꐕꌠꄹꆷ。ꋍꆏꄺꂡꑘꊐꐕꌠꄺꀱ。ꎆꏂ꒧ꇮꇐꄺꀱꌠꊋꃤꁦꎆꇱ,ꅐꇐꀊꏀꌠꀖꁉꊋꃤꌋꆀꅐꇐꂒꋦꌠꀹꄻꊋꃤꌌꀨꄉꀥꇱ,ꊋꀦꅐꀦꏓꇱꌫꄻꑟꐨ、ꇮꇐꇮꑴꑭꊂꏓꐛꑟꐨꉀꐕ,ꅐꇐꊇꁧ、ꇮꇐꐊꇐꌋꆀꁥꇱꁌꐨꉀꐕ。ꉹꑘꎆꏂ꒧ꀋꉬꀋꉆꌠꃅꄷꐂꄉꄻꇱꏓꇱꀱꌠꄹꆷ。ꅐꇐꊋꃤꊁꊰꌠꎞꅐꉺꏦꌋꆀꋬꈭꃅꐙꌠꏱꁈꄻꐛꒆ。ꑍꆏꐳꃅꄐꇐꐨꐥꌠꀊꏀꉹꌠꅐꑘꉘꉚꀻꎆ。ꏣꀋꑌꃅꀊꏀꋎꌠꈴꌗꇮꇐꅐꑘꀻꎆ,ꐛꊋꀊꂥꌠꏣꐯꈴꌗꈄꏍꋈꄻ,ꐳꃅ“ꌕꈄꏍꏓꇱ”ꌠꃅꇫꑟ,ꎊꈴꈄꏍꌶꀠꌫꄻꌠꊥꎆ。ꊋꀉꒉꃅꊋꏏꋦꈭꌋꃅ、ꊋꀦꀊꏀ、ꒆꇐ、ꀊꂥꏠꌠꉁꈾꄻꂠ、ꌬꇐꀊꏀ、ꊋꀦꀊꏀꐕꍯꑠꅐ꒧ꀻꎆꌠꄹꆷ。ꐳꃅꎕꏦꏤꄻꌠꒃꉇ,ꏱꁈꄻꐛꒆ,ꊋꀥꇱꄉꏀꀺꊋꃤꋈꄻ,ꈆꑪꇮꇐꉹꌠꎆꏂ꒧ꐧꐭꂿꄐꋊꇤ,ꄐꇐꃅꐙꌠꀊꏀꉹꌠꅐ꒧ꁣꀋꐥꃅꀻꎆꌠꊥꎆ,ꐳꃅꒃꅐꄐꊋꌋꆀꈯꄜꋓꅔꊋꃤꏓꐛꇁꎻ。ꌕꆏꊋꀉꒉꃅꁧꃤꃅꑘꀻꎆ。ꐳꃅꒃꅐꃅꐙꌠꁧꃤꃅꑘꃅꀻꎆ,ꏣꀋꑌꃅꐥꐨꐨꐥꌠꁧꃤꃅꑘꀻꎆ。ꊋꀉꒉꃅꆓꎊꅐ꒧ꀻꎆꌋꆀꊐꐕ。ꊋꇤꄉꁧꃤꃅꑘꇬꈲꐪꐥꌠꃷꎏꋦꈭꄺꂡ,ꐳꃅꁧꃤꃅꑘꀻꎆꌠꇬꊥꎆꌠꏱꁈꉻꑫꄻꐛꒆ。ꐳꃅꊋꊡꉹꌠꁧꃤꃅꑘꄆꌬ、ꒉꌬ、ꌗꌬ、ꊸꌬꌠꇮꑘꌋꆀꀑꐱꃅꁌꐯꒈꌠꃅꇫꑟ。ꇖꆏꊋꀥꇱꄉꐛꏀꊋꀦꅐ꒧ꌋꆀꏓꇱꎞꎭꉻꑫꋈꄻ。ꏣꀋꑌꃅꊋꀦꒃꅐꌠꌋꆀꌫꄻꃄꄟꆴꐈꌠꄹꆷ,ꊋꀦꌬꐨꉀꐕ。ꋊꃅꐥꌠꊋꀦꁦꎴꌫꄻꌠꄹꎆ,ꊋꀥꇱꄉꑴꇙꄆꈄꏍꋈꄻ,ꊋꀉꒉꃅꁦꎴꊋꀦꀻꎆ。ꏓꇲꃅꀻꎆ、ꐳꃅꈴꌒ、ꋬꂻ、ꁌꈝꐮ、ꑘꅐꐨꀊꂥꌠꏓꇱꎞꎭꉻꑫꋈꄻ。ꀋꎪꃅꅔꎿꇲꈴꇬꎷ,ꎿꃀꎆꏣꀻꎆꌠꄹꎆ。

  ꃄꁕꋯꁦꃅꀻꎆꌠꊥꎆ。ꐊꑷꃅꃄꁕꀻꎆꄐꎖꌠꃅꇫꑟ。ꀋꎪꃅꁮꐚꏭꀉꇨꃅꀖꁉꌠꄐꇐꃄꌬꌠꌌꃄꁕꀻꎆꌠꀑꐱꄐꇐꅿꂴꉆꈉꇬꀨꄉꇬꎷ,ꎔꎗꃅꁮꐚꏭꀉꇨꃅꀖꁉꀊꏀꊰꈎꌠꏱꁈꏁꁈꌋꆀꑭꊗ、ꑟꏦꑠꃅꄷꐱꐂꏽꃅꀻꎆꌠꊥꎆꌠ꒔ꑞ꒔ꐘꃄꁈꃄꌬꇫꑟ。ꐊꑷꃅꑌꌋꈤꃅꄷꑠꇮꑘꅉꁍꀉꆹꌠꉀꄖꌄꆣ,ꐪꊛꄉꅐꀦꉹꌠꇓꈓꉹꏮꌠꄹꎆ。ꊋꀉꒉꃅꈯꄔꃅꄷꄓꆹꌠꊥꎆ,ꀒꁨꋍꁘꃅꁭꅐꊛꁮꐚꄖꃄꁕꑋꅉꉆꈉꂱꎆꅑꌠꋊꇤ。ꏣꀋꑌꃅꁭꅐꃅꄷꂴꄉꀻꎆꌠꊋꁈꄏ,ꏦꉻꉺꏦꏀꀺꌠꌋꆀꀻꎆꄟꆹꏮꀂꏽꇩꏤꑭꊂꂴꆽꐊ。ꀊꅰꃅꉾꃅꎸꍔꑠꎆꏣꇣꋲꐎ、ꎮꉰꁌꄏꑟꐎ、ꄟꏢꀙꉰꑟꐎꄺꀱꁉꃑꌠꇬꂴꅑꂴꃅꉚꌠꂿꄐꋊꇤ。ꇝꂱꀉꆹꃅꄷ、ꊿꋅꃅꄷ、ꃅꋮꃅꄷꀻꎆꌠꊋꀉꒉꃅꇱꄉꊋꁈꄏ,2011-2020ꈎꍏꇩꂿ꒧ꁡꇤꌢꎭꁈꄏꀖꁉꐱꀨꄜꃑꃄꌬ,ꏓꀀꐯꅑꐋꀋꌡꊋꋠꃅꄷꌢꎭꁈꄏꀖꁉꈢꇓꀖꋉꃆꇬꄉꃅ,ꐳꃅꌢꎭꃅꄷꎭꇔꇮꐛꑭꁘꍔ。

  ꏣꀋꑌꃅꎍꐽꃅꇓꈓꈴꌠꄹꎆ。ꀋꎪꃅꍏꇩꐛꐨꇓꈓꏦꎫꈴꈝꃀꍬꈬꇬꎷ,ꇓꈓꀻꎆꈳꏦꍬꄻꇬꎷ,ꇓꈓꏦꎫꁣꀋꐥꃅꀻꎆꌠꊥꎆ。ꈆꑪꃅꄐꎖꌠꌭꈬꇬꎷ,ꏦꇨꃅꏲꂠ。ꊋꀥꇱꄉꇓꈓꅉꃀꉁꈾꌋꆀꄉꉻꁧꃤꃅꉁꈾꋈꄻ,ꇓꈓꏦꎫꏓꇱꊪꊎꄐꊋꀉꇨꎻ,ꏲꂠꌋꆀꁧꃤꃅꑟꐨꉀꐕ。ꃅꄷꐛꐨꈴꄉꃅ,ꋍꁘꋍꁘꃅꁸꄉꄹꎆ,ꎍꐽꌠꑘꃅꃆꂮꐥꄷꀋꁧꇓꈓꏦꎫꇬꈍꑋꈓꀀꀐꌠꂿꑘꇮꃅꊿꆏ,ꋍꁘꋍꁘꃅꏮꄻꌊꇓꈓꏦꎫꀀꊿꐛꎻ。ꇓꈓꇬꀀꊿꃅꌠꇎꏦꀋꐥꑴꌦꌠꂿꑘꇮꃅꊿꆏ,ꊿꊇꑘꃅꌠꃅꁌꁵꐨ、ꀉꑳꁱꂷꌷꌠ、ꄉꉻꆅꉚꆄꄻ、ꀀꑳꊤꉛ、ꐧꋦꏦꀧꑠꁆꏯꃶꐚꌤꃆꂥꀘꋒꌶ。ꋒꐯꋒꃅꂿꑘꊿꇓꈓꇁꌠꌋꆀꂱꑱꃅꄷꋒꇈꌠꌤꃆꀂꏽꑴꌅꄉꌊꄻꌠꌅꈌꁌꒉꄣꅼꄉ,ꏟꈯꃅꂿꑘꊿꃄꅉꀧꃅꌠ、ꑲꅉꇤꂷꏦꊒꌅꈌꈲꁧꑠꀧꌋꃅꄉꌶ。ꇓꈓꈴꌠꆏꂿꑘꐛꏀꈴꌠꌋꆀꂿꑘꁡꇤꀊꏀꋈꄻꌠꐯꊥꎆꎻ,ꋋꆹꀋꎪꃅꌭꈬꌶꌠꎃꊒꌠꃅꍜꉬ。

  ꊋꀥꇱꄉꊋꏏꋦꈭꀧꌋꃅꌠꌋꆀꒆꉻꋈꄻ,ꏣꀋꑌꃅꃄꀑꃅꑊꐛꐈꌠꇬꊝꄎ。ꑓꅐꎑꃅꇮꑘ、ꑲꋉꇤꄉ、ꈭꈜꎞꎭ、ꄉꉻꏲꉻꑠꁆꏯꊋꏏꌠꒃꉇꋒꌶ。ꐪꊛꄉꀨꄉꊋꏏꋉꃆꃄꌬ。ꊋꀉꒉꃅꇮꑘꊋꏏꌠꃅ,ꊋꏏꇮꇐꄹꁊꌬ,ꊋꏏꉁꈾꌌꌬ,ꊋꀦꌬꈲꐨꉀꐕ。ꊋꒉꃅꑲꋉꇤꄉꊋꏏꄺꀱꌠꇬꎆꇱ,ꏣꀋꑌꃅꀊꏀꃅꋈꄻꌠꑲꋉꇤꄉꌠꊋꏏꌠꄹꎆ。ꊋꒉꃅꈭꏮꎆꏣꀻꎆ。ꌋꀁꑌꇓꈓꃅꉚꅉꄹꎆ。ꊋꀥꇱꄉꃄꀑꃅꑊꐛꐈꌠꀊꅰꃅꀋꇰꀋꉈꃅꃄꀑꃅꑊꌤꅐꌠꏭꊝꄎꌠꄐꊋꋈꄻ。ꑳꈐꊸꌗꋊꃑꌠꌋꆀꊋꏏꍍꋊꏓꌗꍞꊟꍤꌋꄹꏦꄻꐛꒆ。ꐳꃅꇓꈓꏦꎫꍍꆀꒉꈜꄻꌠ、ꑭꍷꀖꑘꋊꎵꉁꈾꄐꎖꌋꆀꋈꄻ,ꍍꒉꋊꎵꄉꌌꉈꌬꌠꄹꌬ。ꊋꀥꇱꄉꐈꇐꌬꇐꋦꈭꏲꂠ。ꊖꌋꏦꄉꄆꃑꅉꑦꋊꇧꎭꌠꌤꃅ。ꃹꅼꃅꈑꋧꍍꆀꌠꄴꏮꏱꄻ,ꊋꀥꇱꄉꎿꃀꍍꆀꌠꏱꄻ。ꐳꃅꒉꈳꁕꒉꍍꆀꀨꄉꏱꄻ、ꃄꀑꃅꌗꍍꆀꌠꏱꄻ、ꃅꈋꀨꄉꌠꎸꑫꍍꆀꇨꌠꏱꄻꌠꌋꆀꂿꑘꁡꇤꋦꈭꏓꇱꋊꍬꌠꏱꄻ,ꂿꑘꁡꇤꑊꀧꍍꆀꅉꋏꆸ。ꐪꊛꄉꒆꉻꀉꒉꀊꂾꌠꋈꄻꀱꌠꋉꃆꃄꌬ,ꊋꀥꇱꄉꀋꂿ꒧ꌠꒆꉻꂿꄐꐎꀧꌋꃅꌋꆀꏲꂠ,ꋧꐛꌩꏪꅐꀦꀧꌋꃅꌠꋉꃆꑍꊭꊬꌠꃄꌬ,ꅔꏂꒆꉻꀧꌋꃅꇁꌠꁥꇱꈁꁠꁵꌠꏱꁈꃅꇫꑟ,ꋠꃅꀱꌩꊪꏜꏿ、ꅔꏂꀱꏜꊪꌠꊌꐨꑠꄻꈫꈈ,ꊋꒉꃅꌩꊪꇓꊪꌠꃅ,ꊋꀥꇱꄉꒉꊩꐛꅉꀧꌋꃅꌠꌋꆀꀱꂴꐛꅉꐛꎻ,ꃅꏁꐛꈴꌠ、ꇓꃀꐛꈴꌠꏓꇱꏱꄻꌠꄹꎆ。ꉮꄙꉮꊨꃛꊸꃅꊝꌠꄐꉻꄻꐛꒆ,ꐳꃅꁧꐡꇈꒉꃄꊈꉮꌸꈝꐮꅉꍤꄻꍤꎖ、ꍞꌋꄐꌋ、ꃛꊸꌠꄴꏮꊜꄻꌠꏦꉻꑠꋈꄻ。

  (ꉬ)ꊋꒉꃅꈆꑪꂘꑘꌊꇩꏤꄖꄑꌠꄐꇐꏤꁈꌋꆀꌧꊿꌊꇩꏤꀉꇨꎻꌠꄐꇐꏤꁈꃄꌬ

  ꈆꑪꇮꇐꇐ、ꂘꑘꌋꆀꌧꊿꆹꇩꏤꀻꎆꌠꅉꃀꌋꆀꁧꀦꉬ,ꀋꎪꃅꈍꄮꑌꌌꀋꂿ꒧ꌠꄐꇐꏤꁈꉆꈉꇬꄉ。

  ꂘꑘꀻꎆꌠꌌꂴꄉꇬꎷꌠꌭꈬꌶ。ꉙꂘꌤꑘꈆꑪꃅꀻꎆꌠꄹꇙ,ꏓꂱꈧꌠꁳꀊꅰꃅꊼꇅꀉꑌ、ꀊꅰꃅꊼꇅꎃꊒ、ꀊꅰꃅꊇꁧꊼꇅꀊꂥꌠꉙꂘꅍꐥꎻ。2012ꈓꏱꎆꃅꐙꌠꂘꑘꌫꎆꌫꅐꌠꇩꏤꒃꅐꈁꉬꁌꐨꇬꍆꐪ4%ꍆ。ꐳꃅꌷꂾꉙꂘꌠꀻꎆ。ꇩꏤꀞꌠꉹꁌꀞꌠꐯꇯꄉꃅ,ꌷꂾꉙꂘꌠꅐꀦꁦꎆꎻ,ꃛꊸꃅ“ꀉꉘꌶꅉꃹꒉꊋ”ꌠꌤꃆꂥꀘ。ꋭꑘꉙꂘꐽꏡꃅꀻꎆꌠꊥꎆ。ꊋꀥꇱꄉꋭꑘꉙꂘꊬꌠꌶꅉꎕꏦꈴꌠꋈꄻ,ꄉꉻꅐꀦꁷꄻꌠꆏꎎꌌꂿꑘꁡꇤꌋꆀꇓꈓꊋꁧꌶꅉꈧꌠꇬꊐ。ꇀꅉꍔꃚꌋꆀꇩꏤꀞꌠꌶꅉꌌꀨꄉ,ꏟꈯꃅꂿꑘꊿꇓꈓꄉꌤꎹꃅꇁꌠꀉꑳꈧꌠꐽꏡꃅꋭꑘꉙꂘꎻꌠꏦꀧꄉꌶ。ꊿꋅꃅꄷꂘꑘꀻꎆꌠꊋꁈꄏ,“ꑍꉙ”ꂘꌷꌤꃅꋒ。ꐊꑷꃅꊇꁧꉙꂘꌠꄹꎆ。ꐳꃅꂘꑘꄺꀱ,ꏟꈯꃅꍏꑦꑪꌶꌺꌷꃤꀉꇖꇨꌠꊨꒊ,ꋓꉪꁨꄉꀉꑳꈧꌠꄂꃅꉪꏡ、ꃄꄻꏀꀺꄐꊋꄐꏁꌋꆀꂘꄻ。ꍏꑦꑪꌶꌺꋍꑍꌠꄮꈉꋍꂷꌶꅉꇬꄉꈯꎟꃅꈧꌠꏦꀧꄉꌶ。ꊋꒉꃅꃅꑘꉙꂘꌠꀻꎆ。ꇨꍏꊬꌠꌶꅉꌋꆀꌶꅉꀊꂥꊐꌠꆏꐛꐨꐊꀞꅐꇁꌠꄐꏁ,ꂘꑘꊇꁧꉀꐕ,ꌶꌺꃅꑘꎹꁵꑘꀺꄐꊋꀉꇨꎻ。ꊋꀥꇱꄉꀨꄉꌠꌷꃆꋈꄻ,ꐳꃅꋧꃅꌶꅉꀊꂥꀉꇨꏠꌠꋈꄻꅐꇁ。ꐋꀋꌡꌠꂘꑘꀻꎆꌠꊋꁈꄏ。ꇩꏤꌷꃆꇇꀨꄹꏦꃄꌬꌋꆀꄻꐛꒆ,ꂘꑘꑞꊭꌠꇬꉬꂿ,ꐯꇯꏟꈯꃅꀉꑳꋍꂷꋑꀋꋒꃅꑱꈐꎆꏣꊋꋠꄉꄯꒉꀘꀋꄐꑠꇧꅐꇁꄡꎽꌠꏦꀧꄉꌶ。

  ꐊꑷꃅꊋꀥꇱꄉꌧꊿꌤꃅ。ꀊꂥꊐꌠꌋꆀꇮꇐꀊꂥꀉꇨꌠꌧꊿꌌꀨꃅꄉ,ꐳꃅꀊꏀꉹꌠꈆꑪꇮꇐꌧꊿꌋꆀꃛꊸꃅꈉꌠꌧꊿꀉꇨꑠꁥꁱꂘꅐꇁꌶ。ꊋꒉꃅꌧꊿꀖꁉꌠꇬꎆꇱ,ꌧꊿꋉꃆꀉꒉꀊꂾꌠꄹꎆ。ꃹꅼꃅꊿꌋꊿꌬꄹꏦꄺꀱ,ꊋꇤꄉꐥꊯꄇꄜꋊꌠ、ꋓꅔꄉꉾꌠꌋꌠꄹꏦꌋꆀꐧꋦꋦꈭꄻꐛ,ꌧꊿꉾꃪꌠꊋꊡꄉꉀꅐꇁꎻ,ꈁꌧꈁꄐꌠꇤꌐꌠꐛꐨꉾꃪꌠꀹꄻ。

  ꊋꒉꃅꈆꑪꇮꇐꏀꀺꌠꄹꎆ。ꐳꃅꇩꏤꈆꑪꇮꇐꌐꐘꀉꒉꀊꂾꌠꃄꌬ,ꈯꄜꊨꊭꇮꁈꋍꁥꂵꅐ。ꀉꒉꀊꂾꌠꏓꐛꏀꀺꊋꃤꐕꀊꂥ。ꊋꀥꇱꄉꅉꃀꎥꃪ、ꂴꅑꇮꇐꎥꃪ,ꇬꀦꏀꀺꊋꃤꀉꇨꇁ。ꎆꏂꑘꀨꄉꏃꂠꌠꇮꁈꎥꃪꏀꀺꌠꏦꉻꉺꏦꄻꐛꌠꄹꇙ。ꎆꏂꑘꐯꇯꎆꀨꅐꌊꊨꊭꐮꐊꐨꐥꌠꇮꁈꎥꃪꁧꀿꌠꍔꆙꌠꊋꊡꄉ,ꐯꇯꃨꆰꐨꆹꄜ、ꐯꇯꊌꐨꇬꈲꊌ,ꇩꏤꄐꇐꃅꍜꇬꊒꌠꐘꑘ,ꍔꃚꆏꏱꁈꌋꆀꎆꀨꀂꏽꄉꇬꊋꁈꄏꌶ。ꃹꅼꃅꈆꑪꇮꇐꏲꂠꏦꉻꄺꀱ,ꈆꑪꅐꀦꉾꃪꈴꁆꄻꌠ、ꇿꋌꀊꂥꃅꌌꌬꌠꌋꆀꁉꃑꐯꇯꈲꌠꊥꎆ。ꈆꑪꎥꃪꑼꌙ、ꀉꂥꊐꌠꌶꅉꌋꆀꈆꑪꇮꇐꊿꋍꏅꌠꄕꊪꌊꇶꏦꀉꑌꑵꌠꃅꎆꏂꑘꇯꇷꃅ。ꏱꎆꈆꑪꇮꇐꏭꎆꊐꌠꎍꐽꃅꁦꎆꌠꏦꀧꄉ,ꈆꑪꎥꃪꌫꎆꌌꈲꌬꐨꉀꐕ。ꀋꇙꀋꑐꃅꇩꏤꌧꇐꅐꇐꌅꈌꄐꇐꃄꌬꄉ,ꌧꇐꅐꇐꌅꈌꁧꀿ、ꌫꄻ、ꀧꌋꃅ、ꏱꄻꌠꄐꊋꊐꐕ,ꐧꋦꑭꊂꏀꀺꍄꑐꊋꃤꄖꋊꎼꇁ。

  (ꃘ)ꐧꋦꋈꄻꌠꊋꀥꇱꌠꌋꆀꉹꁌꐥꐨꄻꃪꌠꏦꀧ

  ꎆꏣꀊꅰꃅꀻꎆꆏ,ꀊꅰꃅꊋꀥꇱꄉꐧꋦꋈꄻꌠꌋꆀꉹꁌꐥꐨꄻꃪꌠꏦꀧꌠꉜꁨ。

  ꁈꏂꁈꇭꄉꃅꅍꊌꌠꌌꍔꒉ。ꐪꊛꄉꃅꅍꊌꏱꁈꀊꅰꃅꏣꀋꑌꌠꃄꌬ。ꎼꈎꍏꑷꏱꎆꆏ423ꂡꂷꌌ,ꃅꅍꊌꄏꐔꇇꀨꌠꌋꆀꊥꎆꌠꇬꌬ。ꉪꇩꏤꑘꃅꊋꃤꐛꉻꐋꀋꌡꌠꇬꊒꄉ,ꊋꒉꃅꑘꃅꏓꋧꉹꌠꅐꑘ、ꁧꃤꃅꑘ、ꐭꉹꌠꀄꊭꉹꌠꎆꏂꑘꌋꆀꏀꀺꉹꌠꈆꑪꇮꇐꎆꏂꑘꀻꎆ,ꊋꇤꄉꃅꅍꊌꊐꏡꐯꀋꌡꌠꈉꇖꌠꇬꇎꎻ。ꐪꊛꄉꌶꅉꀊꂥꅉꇬꌶꅐꌠꌶꌺꃅꅍꊌꌠꌌꀨꇬꄉ,ꀨꎍꌠꊿꁥꃅꅍꊌꌤꃅꌠꃅꋒ。ꃅꑘꇮꇐꄐꊋꁱꂘꌠꊋꀥꇱ,ꑴꌅꑘꀺꌠꊋꊡ。ꄉꉻꃅꅍꊌꁧꃤꃅꌠꊋꀥꇱ,ꊾꊋꅐꀦꃷꎏꋍꃱꏦꐛꋭꋽꃅꌠꄻꐛꒆ。ꐳꃅꃅꅍꊌꈴꌗꈄꏍꋈꄻꄉ,ꇩꏤꑭꊂꐯꑋꑳꐯꈴꌠꃅꇫꑟ。ꑘꃅꏦꀧꍞꍤꏦꌬꌠꊋꀥꇱ,ꑘꃅꐯꏈꌠꀞꄻꉺꏦꄻꃪ,ꏦꃤꈴꄉꑘꃅꊿꌅꈌꈲꁧꀧꌋꃅ,ꑘꃅꃆꂮꐮꄮꌠꋈꄻꐛ。

  ꋭꋽꃅꊌꐨꁆꁸꃆꂮꋊꄻ。ꋋꆏꀊꉗꃅꐥꌠꂿꃆꐘꑌꉬ,ꉈꀋꃋꋋꄮꌤꃅꃛꊸꌠꑌꉬ。ꎼꈎꆏꌕꁆꏯꏂꁇꌌꀨꃅꄉꌬ:ꋍꆏꊋꋧꄉꇓꈓꇓꉈꊌꐨꀁꂥꌠꊿꁥꌠꅉꀨꊌꐨꌌꉀꐕ。ꎍꐽꃅꌤꃅꊿꃄꎆꀁꂥꐯꀁꂥꌠ、ꎆꏂꑘꇬꎞꆏꊿꈧꌠꅉꀨꃀꌠꀨꎹꎆꌋꆀꇓꈓꇓꉈꀀꊿꐥꐨꀁꂥꐯꀁꂥꌠꏦꀧꎕꏦꉀꐕ。ꇮꃅꊿꃄꎆꑌꐚꉀꎆꉺꏦꋈꄻꐛꒆ,ꏦꇨꃅꃄꎆꀁꂥꐯꀁꂥꌠꄹꏦꃄꌬ。ꑍꆏꊌꐨꁆꁸꋊꄻꊋꃤꁦꎆꃅꇱꄉꃹꅼꃅꃅ。ꊨꏦꊌꐨꇗꏸꃄꁌꈁꊌꌫꁌꈎꄻꎕꏦꌌꉀꐕ,ꋭꋽꃅꇗꏸꍆꐨꐛꉻꋊꄻ,ꃶꐚꃅꊌꐨꐧꀠꀁꂥꌠꊿꇗꏸꀵꄜꌠꊨꑾꌙ。ꇿꋌꐥꌠꊌꐨꀊꂥꇨꌠꋊꐽ,ꊋꀥꇱꄉꊌꐨꀉꂥꇨꌠꉹꑘꃄꎆꈁꉬꃷꁨꌋꆀꃄꎆꑟꐨꏭꑍꄀꃅꋊꐽ,ꏦꇨꃅꇩꁨꎆꏂꑘ、ꎆꒉꎆꇁꏱꉻꇬꏲꌋꀊꂥꌠꊿꃄꎆꏲꂠꌠꋊꍬ。ꌕꆏꊋꀉꒉꃅꊌꐨꁆꁸꐥꀹꋊꐽꌋꆀꋊꍬ。ꏟꈯꃅꊌꐨꏦꀋꊒꌠꇇꇩꍈꏢꇧꎭ。ꐳꃅꊌꐨꁆꁸꍞꎖꐥꀹꄻꐛ。ꐪꊛꄉꀋꆏꃅꊋꇤꌠꇬꈴꄉ,ꐳꃅꊌꐨꁆꁸꐮꍣꐨꍔꒉꌠꆸꄟꆹꏮꎼꇁ。ꊋꇤꄉꏓꂱꉹꁌꁳꀉꑌꃅꄺꀱꁉꃑꀻꎆꌠꊌꐨꈲꏣꊌꎻ。

  ꐳꃅꇓꈓꇓꉈꀀꊿꇬꉱꈴꌠꐧꋦꏦꀧꉻꑫꄻꐛꒆ。ꂿꑘꁡꇤꀊꏀꉹꌠꐧꋦꃀꌠꀨꎹꄜꏂꀧꎖꉚꅉꍔꒉꌊꇩꏤꑭꊂꑤ40%ꇬꑟ。ꇓꈓꀀꊿꃀꌠꀨꎹꄜꏂꀧꉚꅉꄹꎆ,ꋍꉻꎆꏂꑘꇬꎞꆏꊿꈧꌠꃀꌠꀨꎹꏦꀧꌠꐩꋊꋒꇈꌠꌤꃆꂥꀘ,ꎆꏂꑘꇬꎞꆏꊿꅉꀨꃀꌠꀨꎹꎆꎂꀕꋊꄻꉺꏦꄻꐛ。ꏣꀋꑌꃅꌤꃅꅉꌋꆀꌤꑘꌤꃅꅉꇬꃀꌠꀨꎹꄜꏂꀧꄹꏦꄺꀱꌠꄹꎆ。ꇩꁨꎆꏂꑘꇬꏓꉻꎆꏂ꒧“ꑘꃅꄉꂷꊂꌸꌠꀉꆹꌠ”ꊿꈧꌠꌌꑘꃅꄉꂷꊂꌸꄜꏂꀧꄹꏦꇬꇱꇁ。ꇓꈓꇓꉈꐥꐨꀁꂥꇊꀁꂥꌠꏦꀧꌠꄹꏦꄻꃪ。ꐪꊛꄉꈝꃀꀉꑌꃅꈴꄉꐧꋦꏦꀧꎆꀨꁦꎆ。ꊾꍸꀉꑳꉘꉚ、ꉙꂘꌠꌋꆀꄣꀐꌠꊾꍸꀉꑳꀱꌒꇁꎻꌠꑠꌌꏱꎆꏦꀧꈍꈐꇱꇁ。ꐪꊛꄉꊾꄣꐧꋦꏦꀧꉻꑫꌋꆀꁧꃤꃅꉻꑫꋈꄻꌠꄹꎆ。ꃼꇇꑘꄜꏂꀧꌠꊋꁈꄏꄉꐧꋦꏦꀧꉹꑫꇬꂿꄐꄻꐛꒆ。ꊋꀉꇨꃅꐧꋦꏦꀧꏲꂠꈴꌗꈴꌠꄹꎆ。ꐳꃅꉌꂄꃅꌤꑘꀻꎆ。

  ꀋꎪꀋꑴꃅꑲꅉꇤꂷꁨꇐꃷꎏꋊꐽꌠꃅꋒ。ꐳꃅꑲꅉꇤꂷꁨꇐꃷꎏꋊꐽꌠꎴꃪꉺꏦꄻꐛꒆ,ꇓꈓꇬꊌꐨꐧꀠꀁꂥꌠꑱꁯꀀꑳꊋꋠꌠꌌꀨꄉꂥꀘꇧꎭ,ꃶꐚꃅꑲꅉꇤꂷꁨꇐꃷꎏꁌꏤꌌꎍꐽꃅꄉ,ꀀꊿꀀꑳꈉꇖꋭꋽꌠꇬꇎꎼ。ꋍꆏꀒꁨꋍꁘꃅꏦꀧꐨꐥꌠꀀꑳꋈꄻꌠꄉꈁꍔꒉ。ꎼꈎꉈꑴꋈꄻꌠꏦꀧꐨꐥꌠꀀꑳ、ꑲꁘꇤꆹꐛꅉꀀꑳꄺꀱꌠꆏꐯꇯ1000ꃪꂷ,ꂿꑘꁡꇤꑲꎓꇤꐡꌠꄺꀱꌠ150ꃪꁯ。ꀋꂿꑘꃅꄉꉻꊤꄻꌠꀀꑳꀻꎆ。ꍏꑷꏱꎆꄐꌗꄉꇬ7ꁥꇱꎆꃀ1030ꂡꂷꄐꏤꄉ,ꀒꄹꈎꄩ265ꂡꂷꉀꎆ。ꍔꃚꋍꊐꋑꀋꋒꌠꃅꈭꈜꀉꑌꏢꃅꎆꃀꏓꊭ,ꀊꐯꈭꃅꎆꇱꌠꁦꎆ。ꃛꊸꃅꏦꀧꃅꐙꌠꀀꑳꌫꄻ、ꀰꏢ、ꎞꅐꋍꑠꏲꂠꄹꏦꄺꑣ,ꂿꐚꐨꉀꐕ,ꐧꋦꇫꍞꊟꌠꊋꀥꇱ,ꄉꀧꄉꇎꏦꇬꄉꄐꌠꑱꁯꁳꈲꁧꊌꎻ。ꑍꆏꀒꁨꋍꁘꃅꑲꅉꇤꂷꁨꇐꃷꎏꋊꐽꏱꁈꃄꌬꇫꑟꌋꆀꄻꐛꒆ,ꏟꈯꃅꇓꈓꄹꁆꇬꀀꑳꁌꏤꉀꎆꐲꇨꆹꌠꋎꍅ。ꈎꈭꏝꀀꑳꋈꄻꎖꄎꏤꄻꄷꀋꁧꌌꐧꋦꏭꄛꇰ,ꋈꄻꌬꃅꀊꏀꃅꁦꎆꇱꌠꎖꄎꇬ,ꐚꀕꃅꏦꀧꃅꐙꌠꀀꑳꇤꇬꇯ,ꏦꀧꄡꑟꌠꉬꇮꃅꏦꀧꌶ。ꀋꂿꑘꃅꐧꐭꉹꌠꋬꈭꎃꐚꃷꇐꀀꑳꋈꄻꌠꁦꎆ。ꀀꑳꊤꄻꃷꎏꋊꍬꀻꎆ。ꏦꇨꃅꐮꍣꐨꐥꌠꀀꑳꉌꒊꉚꎆꃑꄻ、ꇗꏸꎳꄻꏱꁈꃄꌬꇫꑟ,ꑳꇤꃄꅉꁨꇐꄚꃆꂮꐥꌠꇗꏸꎴꏱꁈꋊꄻꐛꒆ,ꊋꀥꇱꄉꇗꏸꎴꌠꏲꂠ,ꇿꋌꐥꃅꊜꋽꄮꎹꐨꐥꃅꑳꃼꎆꊐꈧꌠꋏꆸ。ꊋꀥꇱꄉꑲꅉꇤꂷꁨꇐꃷꎏꍞꊟꎕꑣꌠꌋꆀꃷꎏꃅꐨꍞꊟꏲꂠ,ꏟꈯꃅꋍꑞꋍꑵꏦꃤꐆꏦꁏꌠꃅꐨꍤꀞ。ꌕꆏꎖꑣꅑꑘꎹꉺꏦꄺꑣꐛꒆ。ꀀꑳꁌꏤꎍꐽꌠꌋꆀꀀꑳꏦꀧꌤꃅꌠꆏꌜꊐꌠꏓꂱꍔꃚꈁꉬꃅꆼꎍꌄꇤ,ꏃꑤꏓꂱꍔꃚꆏꈛꎂꃅꆼꎍꌄꇤ。ꄚꃆꂮꐥꌠꌤꃅꅉꆏꐳꃅꏮꄉꍤꄻꌠ、ꉉꍣꌠ、ꄡꄉꐯꉇꌠꌋꆀꅑꑘꎹꌠꄹꏦꄻꐛꒆ,ꀀꑳꁌꏤꎍꐽ、ꏦꀧꃅꐙꌠꀀꑳꋈꄻꌤꃅꌠꄹꎆꌠꀂꏽꊋꀋꇤꄉ,ꐧꋦꀻꎆꌠꌋꆀꎍꐽꌠꏭꁣꏖꌠꆏ,ꌌꅑꑘꎹꄻꌶ。

  ꁬꋌꁦꎴꆄꄻꌤꑘꄺꀱꀻꎆꌠꄹꎆ。ꎼꈎꆹꁬꋌꁦꎴꆄꄻꄺꀱꌕꈎꄐꉻꃄꄻꌠꈢꇓꀖꈒꌠꉬ,ꋍꑞꋍꑵꁻꌐꂿꃆꃅꇫꑟꌠꏦꀧꌶ。ꋍꆏꅉꂫꊐꌠꇬꄉꐊꑷꃅꇩꏤꅉꀨꁬꋌꆰꋌꄹꏦꃄꄻ。ꅉꀨꁬꋌꆰꋌꏦꀧꇲꁵꉻꑫꄺꑣꐛꒆ,ꊋꀥꇱꄉꁬꋌꆰꋌꅐꇐꍞꊟꏲꂠ,ꋬꂻꃅꁬꋌꆰꋌꌫꄻꌠꏦꀧ,ꃶꐚꃅꁬꋌꆰꋌꁌꏤꀁꋌꍅ。ꑍꆏꇩꏤꀞꄻꌠꆅꉁꅉꄺꀱꃅꉚꅉꒃꉇꋒ。ꃅꄷꈧꌠꇬꊋꊡꄉꆅꉁꅉꏲꂠꏦꉻ、ꆅꉁꆄꄻꁧꃤꃅꁌꏤꏓꐛꉺꏦꌋꆀꍞꊟꏲꂠꉺꏦꋍꑠꁁꏯꉌꂵꀉꒉꃅꌥꉩꎻ。ꆅꉁꆄꄻꏟꃆꏈꑘꉉꋊꈺꑣꀞꄻꉺꏦꄺꑣꐛꒆ,ꆅꉁꆅꉚꌠꐯꃆꂮꉾꃪꃅꐙꎻ。ꌕꆏꅉꀨꆅꉁꆄꄻꏦꀧꑞꅉꉀꐕ。ꎍꐽꃅꇓꈓꏦꎫꌤꃅꇮꃅꊿ、ꀀꊿꆅꉁꆅꉚꄜꏂꀧꈽꐨꌋꆀꂿꑘꁡꇤꀊꏀꉹꌠꇷꃅꆅꉁꆅꉚꈽꐨꉀꐕ。ꎼꈎꆏꂿꑘꁡꇤꀊꏀꉹꌠꇷꃅꆅꉁꆅꉚꌠꌋꆀꇓꈓꏦꎫꀀꊿꆅꉁꆅꉚꄜꏂꀧꌠꏱꎆꁥꇱꎕꏦꉀꐕꌊ200ꂷꇬꑟꃅꄉ。ꇖꆏꂿꑘꁡꇤꁦꎴꆄꄻꁧꃤꃅꈄꏍꌕꊐꌠꌋꆀꇓꈓꋥꁕꁦꎴꆄꄻꁧꃤꃅꏲꉻꋈꄻꂿꃆꃅꌐ。ꎼꈎꇩꏤꑭꊂꊿꂷꐽꏡꃅꇬꅉꀨꄉꉻꁦꎴꆄꄻꁧꃤꃅꌠꌫꎆꎕꏦꉀꐕꅷ25ꂷꇬꑟ。ꇵꆅ、ꆅꏡꎴꌠ、ꃅꑘꆅ、ꃅꄷꆅꌋꆀꃶꆅꂿꆅꌠꄴꏮꋎꍅꌠꌋꆀꋊꍬꏲꂠꌠꊋꀥꇱ。ꊋꀥꇱꄉꌋꅪꀊꉘꇭꀧꌋꃅꌤꃅ,ꐪꊛꄉꌋꅪꏭꁌꀋꎴꃅꇬꏢꉟ、ꀉꆂꉟꍤꄻꌠꌋꆀꉃꄻꌠꏦꀧꃅꉚꅉꄹꎆ。ꎔꎗꃅꋒꃅꉟꊪꆅꄴꏮꌠꌤꃅ。ꊋꀉꒉꃅꅐꄉꍏꇩꆅꉁꁬꋌꌋꆀꊿꋅꆅꉁꁬꋌꌤꑘꀻꎆ,ꋍꑞꋍꑵꊋꁈꄏꏱꁈꃄꌬꇫꑟ。ꉬꆏꊋꊡꄉꐧꋦꎆꀨꌌꆅꉁꆅꉚꌤꃅꅉꀞꄻꎻ。ꐧꋦꎆꀨꌋꆀꉇꎆꌌꄉꆅꉁꆅꉚꌤꃅꅉꀞꄻꌠꃅꎻꈍꈐꄝꃑꀊꐯꃅꄉ。ꆅꉁꊿꀉꑌꈚꃅꃅꑘꃅꌠꄹꏦꄺꑣꐛꒆꌋꆀꄹꎆ,ꊋꊡꄉꆅꉁꊿꁳꋍꑞꋍꑵꆅꉁꆅꉚꌤꃅꅉꇢꊭꇬꋭꋽꃅꒈꇁꎻꌋꆀꅉꂫꊐꌠꇬꄉꆅꉂꅉꀞꄻꎻ,ꏓꂱꉹꁌꎁꃅꃅꌒꄻꌒꌠꆅꉁꁦꎴꆄꄻꁧꃤꃅꌠꇲꁵ。

  ꐊꑷꃅꊻꂷꌋꆀꎖꁨꒆꉘꌠꌤꃅꋒ。ꐪꊛꄉꒅꉘꑞꅉꀁꂥꌠꄻꎍꐽꃅꄉ。ꋒꃅꊻꂷꏭꇙꐺꌠꎖꁨꒆꉘꁧꃤꃅꏲꂠꌠꌤꃅ。ꊋꀥꇱꄉꒅꉘꆐꅑꌠꇬꈌꄀꇇꐛ,ꀒꁨꋍꁘꃅꁌꀋꎴꃅꃴꑌꂾꉾꃅꒅꉘꌠꍤꄻꃅꉚꅉꍔꐯ,ꋒꃅꃴꑌꌠꌋꅪꌋꆀꀉꑳꀿꏅꋬꂻꏦꀧꌠꌤꃅ。ꂿꑘꁡꇤꌋꅪꆅꉁꅉꀀꄉꀉꑳꒆꐨꆏ95%ꈋꉐꑟ。ꀊꏀꈭꌠꌋꅪꀊꉘꀻꎆꐱꀨꃄꌬ,ꃶꐚꃅꌋꅪꌋꆀꊿꒆꆹꀋꑟꌦꌠꌅꈌꈲꁧꀧꌋꃅ。ꐳꃅꃀꌠꐧꋦꁧꃤꃅꉻꑫꄺꑣꐛꒆ,ꊋꀥꇱꄉꄉꉻꈲꃅꐙꌠꃀꌠꀨꎹꁧꃤꃅꉁꈾꋈꄻ。

  ꊋꀥꇱꄉꐧꋦꏲꂠꏀꀺ。ꍔꃚꐧꋦꏲꂠꄉꅍꊋꀥꇱ,ꀊꐯꈭꃅꉹꁌꄕꊪꌋꆀꊥꇬꌊꏦꈴꄉꐧꋦꏲꂠꃅꈽ,ꐧꋦꎀꍹꂿꄐꏣꀋꑌꌠꋊꇤ,ꐧꋦꏲꂠꐛꇴꐛꉻꄻꐛꒆ。ꇓꈓꇓꉈꋥꁕꌊꊐꄜꃅꄉ,ꀀꊿꈉꐨꌊꌐꍝꃅꄉ,ꊻꂷ、ꃅꅍꊌ、ꐧꋦꄜꏂꀧ、ꂱꍔ、ꁦꎴꆄꄻ、ꁱꀕꃅꐧꋦꏲꂠꄉꅍꄐꊋꌋꆀꁧꃤꃅꌬꀦꑠꏓꄻꐯꇯꄉ,ꍔꃚꏲꑘꏲꂠꌠꌋꆀꅉꂫꊐꌠꉹꁌꊨꏦꏲꌠꃅꊌꐨꐥꃅꈻꊛꐯꇯꌠꌋꆀꉾꃪꃅꐮꈺꇙꌠꃅꇫꑟ。ꐳꃅꉹꁌꌅꈌꈲꁧꀧꌋꃅꉺꏦ、ꏲ꒧ꏤꇽꃨꆰꐨꇴꎖꌠꌋꆀꑽꐪꄺꀱꉺꏦꋈꄻꐛꒆ,ꅇꎹꅲꇫ、ꏓꂱꃆꑘꉉꁱ、ꏲꑘꋊꄻ、ꏦꌬꉉꋊꈺꑣꌤ꒧ꊋꀥꇱ,ꐧꋦꐛꐪꉹꁌꉪꐨꄜꋊꈴꈜꀹꄻꍔꐯ,ꑌꐚꃅꃄꈌꄐꃅꋠꃅꍆ、ꏦꀋꊒꃅꑳꐆꃅꌤꃆꉹꁌꇫꉜꁨꐯꉜꁨꌠꂥꀘ。ꄉꉻꋬꂻꉻꑫꊋꀥꇱꌋꆀꄻꐛꒆ。ꌤꆿꋋꇅꃅꅐꇁꌠꏭꃛꊝꊸꊝꌠꏦꉻꄻꐛꒆ,ꐧꋦꑭꊂꃨꆰꐨꏲꂠꌠꌋꆀꃨꆰꐨꄙꌠꊋꃤꉀꐕ。ꈴꌗꋬꂻꌋꆀꂁꇐꌤ꒧ꊋꀥꇱ,ꈴꌗꈄꏍꏲꂠꌠꄻꐛꒆ。ꊋꀥꇱꄉꐧꋦꋬꂻꏓꇱꏱꄻ,ꏦꐆꑽꃤꐆꃅꈧ꒔ꑞ꒔ꉹꑠꏟꈯꃅꄴꏮ、ꏦꈴꄉꅥꍅ。ꎆꏂ꒧ꋬꂻꒃꅐꌠꌋꆀꅐꇐꊇꁧꀨꄜꆽꎍꐨꃅꇫꑟ,ꀋꎪꃅꋬꂻꒃꅐꃣꈌꀋꇯꀋꉈꀉꒉꌠꋎꍅ。ꋠꇐꉮꀋꐥꌠꍞꏲꏦꉻꉺꏦꄻꐛꒆ,ꏦꃤꄹꏦꄻꐛꒆ,ꌐꏦꌭꈬ,ꍞꎖꇴꎖ、ꍤꎖꍤꄻꉻꑫꄻꐛꒆ,ꃅꄸꍔꃚꍞꏲꆽꎍꐨꊋꀥꇱ,ꊋꀥꇱꄉꍞꏲꏦꌬ,ꐊꈴꃅꋠꇐꋬꂻꏦꀧꑟꐨꉀꐕ。

  ꈁꐥꊐꌠꍔꃚꀋꎪꃅꐧꋦꏲꂠꌋꆀꄉꉻꁧꃤꃅꌠꌌꑋꅉꉆꅉꀊꅰꃅꀋꂿ꒧ꅉꇬꄉ,ꃶꐚꃅꏓꂱꉹꁌꇫꉈꇬꐯꉈꇬꈛꎂꐯꈛꎂꃶꐚꐯꃶꐚꌠꈲꁧꌤꃆꂥꀘꄉ。

  (ꏃ)ꊋꀉꇨꃅꁱꀕꋈꄻꌠꊋꀥꇱ

  ꁱꀕꆏꊿꋅꌋꆀꇩꏤꇬꑌꑲꐨꀊꅰꃹꅼ、ꀊꅰꀊꎴꃅꐥ。ꀊꅰꉾꃅꏓꂱꉹꁌꀉꑌꊐꃅꐙꀉꑌꑵꃅꐙꌠꁱꀕꈉꐨꇬꇎꈴꌶ,ꁱꀕꆏꐧꋦꄐꏁ、ꏓꂱꉙꂘ、ꀻꎆꄹꇙꌠꂿꄐꋊꇤꌶ,ꊿꋅꏓꋧꊋꃤꌋꆀꀹꄻꊋꃤꀉꇨꇁ,ꊋꀥꇱꄉꉻꊿꑌꇐꋈꄻ,ꐧꋦꑭꊂꇬꃅꍏꇩꐛꐨꐧꋦꉪꏦꐯꇯꊫꂫꉪꐨꌋꆀꉌꑇꐨꐥꎻ,ꐳꃅꍏꉸꋊꃅꑌꇐꊪꊛꋈꄻ、ꐧꋦꉪꏦꉌꊈꌧꑳꇖꐨꇬꊒ、ꐧꋦꉪꏦꃷꎏꎆꏣꑌꇐꌋꆀꃅꐨꑽꑌꋊꍬꌠꇬꄐꊒ。ꊋꀥꇱꄉꉌꒊꉻꑫꋈꄻ,ꄚꃆꂮꐥꌠꄹꏦꌋꆀꏦꃤꉻꑫꋈꄻ。ꄉꉻꁱꀕꅐꇐꇲꁵꌠꌋꆀꁧꃤꃅꄐꅍꀉꇨꎻ,ꊋꒉꌠꈯꄔꁮꐚꃅꈋꌋꆀꇓꈓꇓꉈꅉꂫꊐꌠꁱꀕꅉꃀꉁꈾꋈꄻꌠꊋꀥꇱ,ꐪꊛꄉꁱꀕꏓꂱꈲꌠꋉꃆꃄꌬ。ꉻꈲꐨꐥꌠꁱꀕꌤꑘꄏꐓ,ꊋꀥꇱꄉꁱꀕꍸꇐꀧꌋꃅ、ꌌꌬꌋꆀꊪꊛ。ꀒꁨꋍꁘꃅꋧꐈꌷꇐꐧꋦꈆꑪꌄꆣ。ꈨꏀꄯꒉꅐ、ꅇꁊꄆꒌ、ꁱꀕꋽꇐ、ꄉꉣꌤꑘꀻꎆ。ꐮꈴꈄꏍꌬꌠꌋꆀꏲꂠꌠꊋꀥꇱ。ꃹꅼꃅꁱꀕꏦꉻꄺꀱ,ꏣꀋꑌꃅꀰꏢꃅꐙꌠꁱꀕꌤꃅꅉꏭꀱꌊꎆꏂꑘꐛꌠꄹꎆ。ꊋꀉꇨꃅꁱꀕꅐꑘꀻꎆ,ꁱꀕꑘꀊꏀꐨꐥꌠꉘꉚ,ꁱꀕꅐꑘꄹꇙꌊꇩꂱꎆꏣꈯꌬꃅꐙꌠꅐꑘꐛ。ꊋꀉꇨꃅꉹꁌꃅꇭꀧꂂꃅꈧꌠꍔꆙ,ꉹꁌꈯꎟꌋꆀꋓꈿꈯꎟꌠꋮꄮꃅꀻꎆꌠꊥꎆ。ꊋꀥꇱꄉꉈꏭꁱꀕꈯꎟꐮꑌꑲꌋꆀꇷꃅ,ꀋꆏꃅꍏꉸꁱꀕꇩꏹꑌꑲꊋꃤꍔꐯ。ꀉꑌꉾꃪꌠꍏꉸꁱꀕꁳꀱꉈꑴꌄꆣꇁꎻ。

  (ꉆ)ꃹꅼꃅꀋꉬꀋꉆꁁꏯꄺꀱꄹꎆ

  ꐪꊛꄉꇩꁨꎆꏣꄐꇐꏤꁈꃅꐙꌠꋊꐽꄹꎆ,ꇩꁨꎆꀨꉇꅐꌠꐥꈏꃹꌠꐥ、ꋭꋽꃅꇙꈧꉺꏦꄻꐛꒆ。ꇩꁨꎆꒉꎆꇁꁨꇐ、ꀰꏢꃅꐙꌠꀋꉬꌠꁨꇐꌋꆀꋌꐛꅐꀦꁨꇐꍞꏲꏦꉻꄻꐛꒆ,ꊋꀥꇱꄉꇩꉈꇩꁨꀕꇐꍞꏲ。ꐪꊛꄉꉻꁨꏦꎆꏣꀋꉬꌠꀻꎆꌠꇬꊋꊐꌗꊐ、ꊋꁈꄏ、ꄐꏁ。ꏱꎆꌋꆀꌤꌅꈌꐮꐊꐙꌠꏱꎆꇗꏸꏦꉻꄻꐛꒆ,ꌐꐘꆹꏮꁵꄻꐘꑘꎵꄻꌋꆀꏓꐯꇯ,ꎂꀕꃅꐙꌠꆹꏮꁵꄻꌠꁦꎆꇱ,ꑤꊐꌠꅉꃀꎆꊋꏦꀧꉺꏦꄻꐛꒆ。ꒃꅐꐨꁧꃤꃅꑘꁆꏯꈨꇬꄉꁌꎆꇗꏸꄺꀱꌠꃅꉚ,ꅐꀦꇗꏸꄺꀱꌠꄹꎆ。ꃹꅼꃅꄐꌗꏲꂠꄹꏦꄺꀱ,ꐊꑷꃅꍔꃚꐨꎆꀨꄐꌗꌠꏓꄻ,ꇩꁨꎆꀨꀰꏢꄐꌗꈍꈐꍔꐯ,ꐧꋦꄜꏂꀧꎆꀨꄐꌗꌠꏓꄻꉚ。ꐪꊛꄉꃹꅼꃅꎆꒉꎆꇁꎆꏂꑘꄺꀱ,ꐳꃅꀋꃅꋋꄮꎆꒉꎆꇁꎆꏂꑘꄹꏦꋈꄻ。ꐳꃅꂿꑘꁡꇤꎆꒉꎆꇁꏦꉻꀊꏀꉹꌠꉘꉚ。ꐪꊛꄉꊋꇨꃅꎆꒉꎆꇁꃷꎏꀻꎆ,ꎆꒉꎆꇁꏀꀺꌠꊋꊡ。ꊌꐨꇎꊰꃷꎏꈴꄺꀱꌠꄹꎆ。ꏓꂱꀙꌌꇩꉈꃼꇇꃅꌋꆀꎆꇱꅉꌬꈧꌠꍔꒉ。ꏓꂱꀙꎆꀨꐘꇂꃴꄉꆥꄻꉆꌠꌤꑘꄹꎆ。ꎆꒉꎆꇁꍞꏲꌠꊋꀥꇱꌋꆀꄻꉾ,ꋬꈭꐨꐥꌠꎆꒉꎆꇁꃨꆰꐨꄴꏮꂴꄜꉻꑫꌋꆀꀞꄻꉺꏦꋈꄻꐛꒆ。ꄻꐛꋌ、ꋌꐛꌗꁌꏤꒆꐛꉺꏦꌋꆀꄆꁌꋍꑞꋍꉹꁌꏤꀕꄻꉺꏦꄻꐛꒆ。ꀆꐒꁌꏤꄺꀱꌠꄹꎆ。ꍍꋊꌅꈌꁌꁵꄉꌬꈧꌋꆀꃼꇇꃅꀕꉚꌠꄐꇺꉜꐨꎥꃪꏤꄻ。ꁌꏤꄺꀱꇬꆹꇎꈴꃅꏓꂱꉹꁌꈜꀕꇈꉹꁌꊌꐨꀁꂥꈧꌠꇬꄽꊋꃤꉪꏡꄉꌶ。ꏲꑘꌤꑘꁸꑍꄷꄉ、ꌤꑘꎆꏂꑘꁸꑍꄷꄉ、ꏲꂠꀞꄻꁸꑍꄷꄉꀰꏢꃅꐙꌠꌋꆀꀰꏢꃅꀋꐛꌠꁸꑍꄷꄉꌠꇖꐨꇬꈴꄉ,ꏣꀋꑌꃅꑘꒃꋭꋽꃅꉹꁸꄉꌤꑘꌤꃅꅉꄺꀱꌠꄹꎆ。

  (ꈬ)ꀒꁨꋍꁘꃅꉇꉻꏭꁉꃑꑞꅉꉀꐕ

  ꍏꇩꀻꎆꌠꋧꃅꌋꆀꐮꐞꀋꉆ。ꏣꀋꑌꃅꐯꈲꐯꒇꌠꀉꑌꁁꏯꃼꇇꃆꂮꀻꎆ,ꀋꆏꃅꁉꃑꁁꏯꌋꆀꈥꈉꀊꏀꌠꀹꄻꌶ。ꐪꊛꄉꄏꉳꀉꑌꃢꃅꐯꉇꌠꄹꇙ,ꋍꑞꋍꑵꃅꐙꌠꃼꇇꀧꌋꃅꉪꏦꏭꁏ,ꇩꏹꎆꏣꐥꀹꁳꀊꅰꀋꈐꀋꉈ、ꇗꅉꊒ、ꐯꇯꈲꊌꌠꃅꍜꉜꄉꀻꎆꎻꌠꊥꎆ。

  ꃶꐚꃅꉇꉻꃼꇇꀻꎆꄟꆹꏮ。ꊋꀉꒉꃅꇤꄉꐛꉻꄻꉾꃪꈴꌠꌋꆀꈲꁧꉀꐕꌠꅉꃀꇬꄉ,ꉇꉻꏭꃼꇇꃅꌠꁳꎍꐽꃅꉀꎆꎻꌠꏦꀧ。ꎂꀕꃅꃼꇇꃅꌠꉬꄿꂿꉈꑴꄻꇱꃼꇇꃅꌠꉇꅐꁧꌠꉬꄿꂿ,ꐯꇯꐪꊛꄉꑘꃅꊋꃤꅐꀦꉾꃪꐨꋊꇤꅐꇁ,ꐯꇯꊋꀦꅐꀦꃹꐨꊨꒊ,ꐯꇯꐯꅑꅐꑘꀊꂥꅉꇬꉜꄉꀻꎆ,ꐯꇯꊇꁧ、ꏠꊐꌋꆀꁥꇱꁌꐨꉀꐕꌶ。ꏣꀋꑌꃅꑴꌅꅐꇐꂓꅑꌠꉇꅐꌠꍔꐯ。ꊋꀉꒉꃅꇤꄉꁧꃤꃅꃼꇇꃅꌠꌋꆀꁧꃤꃅꉇꄅꀧꃅꌠꀻꎆ,ꀋꆏꃅꁧꃤꃅꃼꇇꃅꌠꍆꐪꐕꀊꂥ。ꀋꎪꃅꃼꇇꈏꃹꌠꌋꆀꉇꅐꌠꐯꇯꉜꁨꌠꌭꈬ,ꂴꎆꅑꌠꇮꇐꌫꉂꌬꈽ、ꎸꇺꎸꂷꀋꉬꀋꉆꌠꌋꆀꊋꀦꅐꀦꌬꇐꈏꃹꌠꍔꐯ,ꐞꀋꄿꐯꐞꀋꄿꌠꇩꏤꌋꆀꎂꍣꇁꀦꇩꀋꉬꀋꉆꌠꇬꄉꈏꃹꌠꁦꎆꇱ,ꋍꁘꋍꁘꃅꃼꇇꐮꆽꀋꏣꌠꐛꄟꄺꀱꌊꉾ,ꋭꋽꃅꃼꇇꀂꏽꐯꉄꌎꌠꂥꀘꇧꎭ。

  ꉇꉻꏭꎆꇱꌠꄹꆷꌠꌋꆀꉇꎆꌌꌬꌠꋮꄮꃅꀻꎆ。ꐳꃅ“ꉇꅐꁧ”ꌠꄐꇐꏤꁈꃄꌬꇫꑟ,ꄚꃆꂮꐥꌠꊋꁈꄏꏱꁈꄻꐛꒆ,ꍤꄻꈌꁧꇇꈴꌠꈵꐮꈴ,ꇎꏦꄉꄐꌠꎆꏂ꒧ꌋꆀꂱꑱꅔꃀꉈꄉꎆꇱꌠꎁꃅꃅꌒꎻ。ꎆꏂꑘꏣꀋꑌꃅꐥꀹꐥꃅꇩꉈꄉꀰꏢꌠꊋꊡ。ꉇꉻꎆꇱꌠꏭꉻꒉꃅꄐꇺꌠꊋꀥꇱ,ꎆꇱꌠꊥꎆꌠꌋꆀꀧꌋꃅꉺꏦꄻꐛꒆ,ꎆꇱꐔꈔꉆꐨꄴꏮ。ꀋꎪꃅꏣꀋꑌꃅꇿꋌꐥꃅꉇꎆꌫꄻꌠꌐꏦꌭꈬꇬꎷ,ꇮꇐꂱꎆꅑꌠꌋꆀꌧꊿꌧꐨꅐꀦꊙꈏꃹꇁꌠꉜꁨ,ꇩꐂꇬꌦꊋꊡꄉꍏꇩꄉꎥꃪꀖꁉꈯꄜꄺꑣꎻ,ꃶꐚꃅꉇꉻꌫꄻꌠꀑꐱꑟꐨꌋꆀꏓꇱꈲꁧꉀꐕ。ꐳꃅꉇꉻꃼꇇꃅꊿꎆꇱꅐꑘꎹꀨꋊꍬꄺꀱ,ꉇꎆꌌꇮꇐꀊꂥꀊꏀ、ꊋꀦꏎꏸꋦꈭꀧꌋꃅ、ꐛꏀꁧꃤꃅꑘꑠꁁꏯꇬꌋꆀꈯꄔꁮꐚꃅꄷꇬꊐꌠꊋꊡ。

  (ꊰ)ꏲꃆꐙꎴꋈꄻꌠꌋꆀꍹꈔꏭꁏꌠꌤꃅ

  ꐙꎴꌠꍔꃚꋈꄻꌠꆹꀊꉗꃅꃅꌶꇈꉈꑴꃛꊸꌠꂿꃆꐘꉬ,ꏓꂱꃤꑖꑟꀕꌠꉘꇉꐨꉬ。ꐳꃅꍹꈔꏭꁏꎴꄖꋈꄻꅉꇬꑓꅐꎏꌠꌤꃆꀞꄻ,ꏟꈯꃅꍹꈔꅓꀞꌠꌋꆀꄴꏮꌠꉻꑫꋈꄻ,ꃣꈌꀉꒉꀊꂾꌠꍤꀞꌠꌌꄉꍹꈔꏭꁏꌠꃅꐨꀋꂿ꒧ꌠꃅꄉ,ꋍꈭꐨꀊꅰꃅꄹꏦꋈꄻꌠꉜꁨꌶ。ꋍꆏꎔꎗꃅꍔꃚꌤꃅꊿꌅꈌꈴꄉꈲꁧꏂꌠꌋꆀꄉꅍꃅꄸꌅꈌꇑꑣꌠꌤꃆꏱꄻ。ꋉꃆꋈꄻ、ꃄꅉꌫꄻꌅꈌꏆꅐꌠꌋꆀꇑꅐꇐꅐꀦꀖꁉ、ꇩꁨꅐꇐꌅꈌꃼꇇꃅ、ꍔꃚꌊꃼꋍꑠꀋꂿ꒧ꌠꁁꏯꇬꐥꌠꌤꃆꇬꉜꄉ,ꏦꐆꇗꐆꃣꈌꍤꀞꌤꃅꌠꊋꃤꁦꎆꇱ,ꏟꈯꃅꍹꈔꊿꅓꀞ。ꑍꆏꃶꐚꃅꊋꀥꇱꄉꐙꎴꑴꏢ,ꎔꎗꃅ《ꏲꃆꐙꎴꍬꏦ》ꌫꄻꃄꌬꇫꑟ,ꏲꌋꇥꀯꊌꐨ、ꑳꇤꁨꇐ、ꎆꇱꌠꌋꆀꑱꈐꊿꌺꇖꃅꑘꃅ、ꎞꊈꇩ(ꅔ)ꉈꀀꋦꁧꌠꋍꑠꃆꂮꏤꄮꁨꃅꄛꇰꌠꄹꏦꃄꌬꇫꑟ,ꉉꄻꀋꅐꃅꌌꍞꊟꎻ。ꊋꀥꇱꄉꍤꌗꌠꌋꆀꍞꊟꌠꌤꃅ。ꏲ꒧ꌤꏲꅉꏲꌋꇥꀯꌋꆀꇩꁨꎆꏂꑘ、ꌤ꒧ꌤꃅꅉꇬꊥꇺꊿꏭꍞꊟꌠꊋꃤꁦꎆꇱ。ꌕꆏꏟꈯꃅꎆꁌꋙꀘꌠꌋꆀꇶꏦꉪꏦꏭꆼꁏ。꒜ꈿꌠ、ꁱꐘꅧꊨ,꒔ꑞ꒔ꑵꎕꏦꑟ、ꋓꉚꌡꉚ、ꀭꄒꌠꌋꆀꈌꍣꃀ、ꋩꈽꋍꑠꃅꈧꌠꍤꄻꋊꍬ,ꌫꎆꀂꏽꈴꄉꌌꏟꈯꃅꋎꍅ。ꉻꌬꍯꇱꄻꏲꂠꌠꋊꍬꄷꀋꁧꏣꀋꑌꃅꉻꃆꌬꍯꄹꏦꄺꀱꌠꄹꎆ。ꐳꃅꏱꎆꄐꌗꄇꄜꋊꌠꃄꄻ,ꏓꂱꁳꍔꃚꎆꃀꈍꑋꌬꀐ,ꌤꑞꈨꀞꄻꀐꌠꅉꐚꎻ。ꍔꃚꋍꊐꋑꀋꋒꌠꃅꊋꇤꄉꏓꂱꎁꃅꌤꀞꌶ;ꉻꃆꃅꊿꋍꂷꋑꀋꋒꃅꐯꇯꇯꍝꃅꏓꂱꊩꌺꐛꌶ。

  ꁧꎁꊈ!

  ꊿꋅꈁꐥꌠꀉꇨꃅꐮꋯꑌꌠꈫꈈꌠꌋꆀꀻꎆꌠꆹ,ꇩꏤꎴꏲꑘꒃ、ꌄꆣꐞꄿꌠꁧꀦꏦꀧꅍꉬ,ꊿꋅꈁꐥꌠꏓꂱꃤꁧꀦꈲꏣꄚꅑꎍꌠꉬ。ꊿꋅꃄꁕꊨꏦꏲꌠꄹꏦꌭꈬꌋꆀꄻꐛꒆ,ꐊꑷꃅꍏꑷꀁꑌꊿꋅꌋꆀꊿꋅꃅꄷꀻꎆꌠꏭꊋꁈꄏꌠꏱꁈꏁꁈꃄꌬꇫꑟꌶ。ꊻꂷꊼꇅꀁꑌꌠꊿꋅꀻꎆꌠꏭꊋꁈꄏ、ꃅꋮꌄꆣꉹꁌꌣꈚꃅꈧꄹꎆꌠꌋꆀꀁꑌꊿꋅꌤꑘꀻꎆꉬꈎꄐꎖꌠꏤꄻꃄꌬ。ꉪꊇꊿꋅꈁꐥꌠꃅꋯꑌꁨꂵꄉ,ꐯꇯꍏꉸꊿꋅꌄꆣꀻꎆꌠꐩꋊꀊꏀꌠꁰꄻ!

  ꐊꑷꃅꄈꅿꑇꇐꌤꃅꅉꀨꌐꏦꌌꌬꈴꃅꌬ,ꃹꅼꃅ《ꑇꇐꌤꃅꃷꋪ》ꃄꌬꇫꑟ,ꑇꇐꁁꏯꊿꂒꋦꌠꌋꆀꑇꇐꑇꊿꎆꏣꀻꎆꌠꊥꎆ、ꐧꋦꐮꄮꌠꇬꂿꄐꏣꀋꑌꌠꋊꇤꅐꇁ。

  ꐪꊛꄉꇩꉈꃺꑌꌤꃆꌤꃅꌠꊋꀥꇱ,ꎿꉈꃺꑌꏦꊒꌠꌅꈌꈲꁧꀧꌋꃅ,ꀱꇁꌠꇩꉈꃺꑌꌋꆀꇩꉈꃺꑌꑱꈐꊿꃤꏦꊒꌠꌅꈌꈲꁧꀧꌋꃅ,ꋒꐯꋒꃅꋀꊇꁍꇩꋍꃱꃅꌠꌋꆀꊿꋅꌄꆣꌠꇬꊥꎆꂿꄐꐋꀋꌡꌠꋊꇤꅐꇁ。

  ꁧꎁꊈ!

  ꇩꐏꈫꈈꌠꋈꄻ,ꏓꂱꂽꀉꇨꌠꋈꄻꌠꆹ,ꇩꏤꌅꀨ、ꋬꂻ、ꀻꎆꈲꁧꀧꌋꃅꌠꌋꆀꐊꑷꃅꊼꇅꌣꈚꌠꐧꋦꋈꄻꌠꏦꀧꅍꀋꉬꀋꉆꌠꉬ。ꈬꐯꈬꃅꄈꌋꆀꇩꏤꌤꃅꃅꇴꄉꉻꀉꒉꌠꇬꆼꒆꄉ,ꑓꏮꇿꋌꐥꃅꃅꋊꀊꏀꌠꀊꏀꊬꌠꇬꉪꊇꂽꐩꋊꂿꃆꃄꄻꌠꇬꉜꄉ,ꐊꑷꃅꊋꀥꇱꄉꂽꇝꂱꈴꐛꏀꈴꎃꐚꈴꌠꋈꄻ,ꀋꆏꃅꈴꌗꈴꌠꇎꏦꇂꃴꋍꈨꇬꌉꈿꌠꌉꊋꐛꄎꌠꄐꊋꌌꈯꄜꃅꄉꌠꂽꌤꀉꑌꑵꃅꐙꌠꂿꃆꃅꇫꑟꄎꌠꊋꃤꉀꐕ。ꉪꇐꍔꍞꋈꄻꌠꄻꂴꄉꌠꌭꈬ。ꏣꀋꑌꃅꈴꌗꈴꇎꏦꇂꃴꂽꌤꁰꍋꌠꃅ。ꐳꃅꐊꑷꃅꀋꃋꋋꄮꊁꊭꊁꄐꃆꂮꋈꄻꌠꑭꁘꐕ。ꂽꌋꆀꉹꁌꐮꉔꄉꀻꎆꌠꄹꇙ,ꊋꀥꇱꄉꇩꐏꈆꑪꎥꃪꌠꌋꆀꇇꌭꇇꂿꌫꉂꌫꈾꋈꄻ。ꏣꀋꑌꃅꎍꐽꃅꇩꐏꌠꌋꆀꂽꄺꀱꌠꄹꎆ。ꀋꎪꃅꏦꃤꇬꈴꄉꂽꏱꄻ、ꏦꇨꃅꂽꏱꄻꇬꎷ。ꀋꎪꃅꃨꆰꉮꌸꌠꈭꋏꋍꑠꃛꊸꊋꋠꃨꆰꐨꐥꌠꂿꃆꃅꌐ。ꇇꌭꏢꍤꊋꃤꐛꏀꈴꌠꌋꆀꊁꊭꊁꄐꊋꃤꋈꄻ,ꃱꌬ、ꋋꇅꃅꇫꅐꇁꌠꌤꆿꀞꄻꌋꆀꇶꌾꌠꁏꑘꒃꌠꀧꌋꃅꌠꊋꃤꁦꎆꇱ。ꊋꀥꇱꄉꇩꐏꄕꊪꌠꋈꄻ,ꂽꌋꆀꍔꃚꂽꌋꆀꏓꂱꐮꋯꑌꌠꌭꈬꌋꆀꀻꎆ。

  ꁧꎁꊈ!

  ꉪꊇꆏꀋꎪꀋꑴꃅ“ꋍꇩꑍꏦ”、“ꑣꇤꊿꑣꇤꏲ”、“ꉪꂱꊿꉪꂱꏲ”、ꀊꂥꃅꊨꏦꀱꊨꏦꏲꌠꌐꏦꃄꌬꇬꎷ,ꊋꇤꄉꑣꇤ、ꉪꂱꇣꋲꏱꅉꐎꑍꂷꌠꎆꏣꀻꎆ,ꉹꁌꐥꐨꄻꉾꌠꊋꁈꄏ。ꑣꇤꋧꃅꎆꒉꎆꇁ、ꃼꇇ、ꄇꇉꎞꎭꈯꄜꑋꅉꉆꈉꄻꈫꈈꌠꌋꆀꉀꐕꌠꊋꁈꄏ。ꉪꂱꌌꋧꃅꈩꆫꑬꆏꈯꄜꋈꄻꌠꊋꁈꄏ,ꎆꏣꄉꄐꃅꀉꑌꑵꃅꐙꃅꀻꎆꌠꊥꎆ。ꋒꐯꋒꃅꑣꇤ、ꉪꂱꆹꇩꏤꉻꄜꀻꎆꄐꇐꇬꂿꄐꐋꀋꌡꌠꋊꇤ。ꀒꁨꋍꁘꃅꅔꃀꌋꆀꇤꉪꐮꇷꃅꌠꉺꏦꈴꐨꉀꐕ,ꇨꍏꑣꇤꉪꂱꃹꅼꃅꃄꁕꐮꇷꃅꌠꊋꁈꄏ,ꐯꈲꐯꇯꍍꌠꃅꇫꑟ。ꍏꉸꊿꋅꇰꀋꃀꃅꀱꌄꆣꇁꌠꐩꋊꈴꎁꇬꄉ,ꁍꇩꅔꃀꏓꂱꆏꇤꉪꃺꑌꌋꆀꐮꐊꄉꇇꄻꐮꃬꄉꀒꁨꉜꄉꆹꇬꎷ,ꐯꇯꁍꇩꇰꀋꃀꌠꀑꑊꌋꆀꂓꌗꊌꄉꐥ!

  ꉪꊇꆏꃅꒊꃅꇁꀊꏀꌠꇬꄉꎿꋮꑍꁁꏯꐮꃆꂮꀻꎆ、ꁍꇩꄮꐽꏓꋍꃱꃅꌠꊥꎆꌠꏱꁈꌐꏦꀉꒉꀊꂾꌠꌋꆀꋍꑞꋍꑵꏱꁈꌭꈬꃅꄉꇬꎷ。ꐪꊛꄉꎿꋮꑍꁁꏯꐮꋯꌠꄹꎆ,ꏣꀋꑌꃅꎿꋮꑍꁁꏯꎆꏣꇷꃅꇶꏦꋯꏤꄉꌠꃅꇫꑟ,ꊋꀥꇱꄉꅐꑘꇷꃅ,ꐳꃅꏀꄓꅐꑘ、ꎆꒉꎆꇁꋍꑠꐛꏀꁧꃤꃅꑘꇷꃅꌠꀻꎆ,ꇎꏦꐥꀐꌠꅔꃀꎆꏂꑘꄠꃪꄉꎆꇱꌠꇬꊋꁈꄏ。ꎿꋮꁮꐚꏭꁁꏯꎆꏣꃄꁕꊋꁈꄏꄉꎿꋮꑍꁁꏯꐮꈴꇷꃅꅉꇬꂴꃄꄻꂴꃅꉚꌠꂿꄐꋊꇤꌠꄹꎆ。ꃹꅼꃅꎿꋮꑍꁁꏯꐧꋦꋍꑞꋍꁁꏯꐮꈴꌠꃄꄻ,ꏣꀋꑌꃅꎿꋮꑍꁁꏯꁱꀕꂘꑘꇷꃅꌠꍔꀺ。ꎿꋮꑍꁁꏯꍔꍞꐮꉌꒊꐨꁦꎆꇱ,ꎿꋮꑍꁁꏯꐮꃆꂮꄮꐽꃅꀻꎆꌠꍔꍞꅉꃀꄻꈫꈈ,ꐯꇯꎿꋮꑍꁁꏯꐮꃆꂮꄮꐽꃅꀻꎆꌠꐛꉻꉾꃪꌠꀧꌋꃅ。ꉪꊇꀋꎪꃅꑇꌠꆏ,ꎿꈐꎿꉈꍏꉸꌺꇖꋍꏅꌠꐪꊛꄉꐯꇯꊋꇤꄉꉈꈽꑲꆏ,ꁍꇩꄮꐽꃅꏓꋍꃱꃅꌠꌤꑘꇰꀋꃀꌠꆏꀋꎪꃅꃅꇫꑟꄎꌠꉬ!

  ꁧꎁꊈ!

  ꉪꊇꆏꐪꊛꄉꄮꐽ、ꀻꎆ、ꇷꃅꌠꁈꁧꀊꂥꃅꐕꄉ,ꄂꋦꑴꌅꌠꄮꐽꉇꉻꑌꑲꏱꁈꌭꈬꃅꄉꇬꎷ,ꀋꎪꃅꄮꐽꀻꎆꌠꈝꂾꇬꍬꇬꎷ,ꀋꎪꃅꐯꈲꐯꇯꍍꌠꁉꃑꄐꇐꃄꌬꇬꎷ,ꀋꎪꃅꀊꉗꃅꄮꐽ、ꐯꇯꌄꆣꌠꐮꄮꋧꃅꋈꄻꌠꄹꇙꇬꎷ,ꉪꇩꏤꐛꏀꈴꋈꄻꌠꎁꃅꀊꅰꃅꈲꁧꐥꌠꉇꉻꋦꈭꌋꆀꇎꏦꀹꄻ。

  ꉪꊇꆏꀋꎪꃅꇩꏤꀉꒉꀋꉬꀋꉆꌠꌋꆀꐮꃆꂮꁣꀋꐥꎍꐽꃅꀻꎆꇬꎷ。ꏣꀋꑌꃅꐮꏯꅇꉉꇷꃅꌠꄹꎆ,ꐯꇯꃤꈲꁧꌋꆀꇷꃅꅉꃀꍔꐯ。“ꂄꃅꃷꇎꊝ,ꃷꇎꐋꃅꄉ”ꌠꈭꇍꉇꉻꑌꑲꌐꏦꌭꈬꃅꄉꇬꎷ,ꈭꇍꇩꏤꌋꆀꃷꇎꐮꉾꇷꃅꃆꂮꃹꅼꈴ,ꃄꁕꌋꆀꃄꁕꊼꇅꄸꌠꇷꃅꈴꎁꄹꎆ。ꇩꏤꀻꎆꇰꈧꌠꌋꆀꐯꇯꋊꃅꉾꃪꌠꇷꃅꃆꂮꁦꎆꇁ,ꀒꁨꋍꁘꃅꇷꃅꊌꐨꃅꇫꑟꌋꆀꍔꐯ,ꇷꃅꃄꄟꏀꀺꌠꌋꆀꉺꏦꋈꄻꌠꄹꎆ,ꏣꀋꑌꃅꀉꑌꁁꏯꃅꉇꉻꑌꑲꌠꃅ,ꇩꏤꑍꊏꂷꏓꉻꀑꋾꃀꋍꑠꌌꀋꂿꑘꌠꐽꄜꃅꄉ,ꉻꒉꎆꏣꏱꁈꋮꄮꌠꊋꀥꇱ,ꇩꏹꎆꏣꎆꒉꎆꇁꉻꑫꄺꀱꌠꄹꇙ,ꋧꃅꎆꏣꀉꇨꃅ、ꐪꊛꉆ、ꐮꆽꏣꃅꉀꎆꌠꊥꎆ,ꊷꈌꌤꃆꌋꆀꅉꆺꃅꐥꌠꌤꃆꀞꄻꌠꇬꋈꄻꃅꐙꌠꂿꄐꋊꇤꌠꄹꇙ,ꃅꄡꑟꌠꇩꏹꆽꎍꑘꌋꆀꋭꑘꃄꄻ。ꍏꇩꍔꃚꌋꆀꏓꂱꆹꇩꏹꐧꋦꌋꆀꐮꐊꄉ,ꐯꇯꃨꆰꐨꊋꋠꐨꊜꑣ,ꐯꇯꀻꎆꌠꊜꋽꄮꊌꄉ,ꃰꊿꄮꐽꌠꌋꆀꀻꎆꌠꋍꉎꀋꐥꃅꁌꐥꌠꌤꑘꎁꃅꑆꊋꀊꏀꌠꅐꌞꏾ!

  ꁧꎁꊈ!

  ꀱꇁꋌꃀꉪꏡꇬ,ꉪꊇꆹꐋꀋꌡꌠꏁꇅꁤꇅꁏꌠꊌꐨꀹꄻꅐꇁꀐ;ꑓꏮꃆꏂꊂꑋꉜꇬ,ꉪꊇꆏꇩꏤꊫꂫꉔꀍꅩꍅꄓꇁꌠꈏꊋꉌꊋꀉꇨꃅꄉꑌ!ꉪꊇꁳꐋꀨꃛꏢꄧꊝꎻꏹꃅꄉꌠꄈꍏꑷꏃꂠꌠꇂꃴꄉ,ꈬꐯꈬꃅꐩꋊꊜꋽꄮꒂꌬꄉ,ꀬꅑꃅ꒔ꑞ꒔ꑵꊝꎭꌠꊝ,ꀹꄻꀒꁨꆹ,ꋯꑌꃅꉈꈽ,ꏟꈯꃅꌤꃅ,ꊋꇤꄉ“ꊰꑋꉬ”ꊬꌠꇬꂂꃅꇬ,ꍏꇩꐛꐨꐧꋦꉪꏦꌤꑘꇰꀋ꒜ꌠꐪꊛꄉꄹꆷꅷꀒꁨꉜꄉꆹ! 
ꁰꒌ




  • 特别鸣谢
    中国民族语文翻译局彝文翻译室