ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꏓꂱꍔꍞꋮꒉꃀꈿꅉꇩꏤꑭꊂꊈꑼꉼꅉꀕꌤꏲꊈꑼꉼꍔꑠꊯꊪꈭꌕꃢꃀꈿꊂꅑꅸꇁꌠꄜꑘꌤꃅꃆꂮꅇꄜ

——ꍔꑠꊯꊪꈭꇩꏤꑭꊂꊈꑼꉼꃀꇖꃢꌠꈿꅉꇬ
(2011ꈎ3ꆪ3ꑍ)

ꊆ ꍞ ꊠ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꊈꑼꊈ:

  ꉢꍏꇩꏓꂱꍔꍞꋮꒉꃀꈿꅉꇩꏤꑭꊂꊈꑼꉼꅉꀕꌤꏲꊈꑼꉼꎁꃅ,ꃀꀉꒉꈿꅉꏭꍔꑠꊯꊪꈭꌕꃢꃀꈿꊂꅑꅸꇁꌠꄜꑘꌤꃅꃆꂮꅇꄜꂿ,ꌌꍤꇖꅊꇈ。

  ꋍ

  ꍔꑠꊯꊪꈭꌕꃢꃀꈿꊂꅑꅸꇁꌠ,ꍔꑠꊈꑼ、ꍔꑠꇬꐊꌠꌤꃅꅉꌋꆀꌐꁨꊈꑼꉼꈧꌠꆏ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꀋꎪꃅꈯꄜꇬꆼꒆ、ꃅꇴꄉꉻꇬꁧꃤꃅꌠꌭꈬꇫꎷ,ꌌꀊꂥꌠꍔꍞꆼꎍꐨꌋꆀꐨꋊꂿꃆꃅꄉ,ꎔꎗꃅꄐꅍꌅꊋꍬꌬ,ꏣꀋꑌꃅꅇꉉꁈꌞ。ꋍꈓꅑꅸꇁꌠ,ꐯꇯꄜꑘ5678ꐘꄛꏮ。ꄚꈐꏭ,ꐊꈴꃀꈿꄮꇬꄜꑘ5430ꐘꄜ,ꃀꈿꌐꈭꐨꄜꑘ248ꐘꄜ。ꌌꍤꇖꇈ,5300ꐘꆏꌌꄜꑘꃅꄉ。ꄚꈐꏭ,ꊈꑼꄜꑘ4965ꐘꐥ,ꋯꁦꄉꀾꍏꑷꉆꂷꌠꌋꆀꇩꏤꑭꊂꇬꎭꆃꇬꄜꑘ285ꐘꐥ,ꏓꂱꉻꏑꄜꑘ3ꐘꐥ,ꁆꏯ、ꑦꊤꇬꄜꑘ44ꐘꐥ,ꌒꁨꊈꑼꉼꇬꄜꑘ3ꐘꐥ。ꄜꑘꋋꈨꆏꊈꑼꊈꀑꁮꐨꌋꆀꊋꇤꐨꃅꇫꐊ,ꏓꂱꉹꁌꉘꇉꐨꌋꆀꇖꐨꄛꑣꀐ,ꃅꋊꐋꀋꌡꐨꌋꆀꍔꑠꐋꀋꌡꐨꄛꑣꀐ。ꍏꇭꍏꑷ、ꇩꃷꑼꀊꂥꃅꇫꉜꁨꌋꆀꊪꀞꌤꃅꅉꎔꎗꃅꀞꄻꌠꇂꃴꄉ,ꋍꑞꋍꑵꁁꏯꃅꐯꇯꊋꇤꇈ,ꅑꅸ2011ꈎ2ꆪ20ꑋꑟꇬꆏ,ꄜꑘ5723ꐘꀞꄻꅇꀱꌐꀐ,ꌌꄜꑘꃅꄉꌠꈁꉬꃷꁨꇬ99.49%ꍆ。ꄚꈐꏭ,ꌌꀞꄻꂥꀘꄉꀐꌠꅀꌌꃄꌬꀐꌠꆏ27.18%ꍆ,ꌌꎖꄎꇬꇱꄉꀞꄻꂥꀘꂿꄷꌠꅀꌌꃄꄻꂿꄷꌠꆏ58.53%ꍆ,ꌌꉜꉚꂿꄷꌠꆏ14.29%ꍆ,ꐊꑷꃅ“ꊯꊪꉬ”ꄐꎖꊨꄅꄉꌠꁻꌐꂿꃆꃅꇫꑟꌠꌋꆀ“ꊯꑌꉬ”ꄐꎖꏤꄻꋒꂿꄷꌠꎁꃅ,ꎆꏣꐧꋦꀻꎆꌠꇬꊥꎆꌠꎁꃅꂿꄐꏣꀋꑌꌠꋊꇤꅐꇁꀐ。

  ꈆꑪꃅꀻꎆꌠꄹꇙꌠꇬꆼꒆꄉ,ꊈꑼꊈꆏꇤꐳꃅꎆꏣꀻꎆꄟꄺꀱ、ꇤꐳꃅꎆꏣꐛꉻꋊꄻ、ꉻꒉꋎꐽꌠꊋꀥꇱꌋꆀꄻꐛꒆ、ꎆꏣꎍꐽꁣꀋꐥꃅꏮꈴꎻꋍꑠꁁꏯꀂꏽ,ꄜꑘ2200ꎖꐘꄜꅐꇁꀐ。ꅺꌡꇬ,ꇩꏹꎆꒉꎆꇁꎓꐡꎟꄜꌠꊜꄻꊌꐨꌭꈬꌠꌋꆀꍔꒉꂿꄷ,ꄜꑘꆏꀒꁨꋍꁘꃅꎆꒉꎆꇁꉻꒉꋎꐽꌠꄻꐛꒆ、ꇤꐳꃅꎆꒉꎆꇁꎆꏂꑘꐧꐭꌠꇬꊋꁈꄏꌠꋬꈭꏱꁈꏤꄻꅐꇁ、“ꊸꎆ”ꎟꄜꌠꄴꏮ、ꇩꏤꉇꎆꊭꄎꏲꂠꌠꄻꐛꒆꋍꑠꉜꐨꋍꋬꈭꄜꅐꇁꀐ,ꍏꇩꏓꂱꑴꉴ、ꍏꇩꑴꉴꍞꊟꉼ、ꇩꏤꉇꎆꏲꂠꏳꋍꑠꌤꃅꅉꆏꏣꀋꑌꃅꌌꌫꄻꇈ,ꄚꃆꂮꐥꁁꏯꄺꀱꌠꇬꄹꎆꇈꊌꐨꄇꇖꀕꃅꐥꀐ。ꅐꑘꐛꉻꋊꄻꁁꏯꆏ,ꄜꑘꆏꀒꁨꋍꁘꃅꀋꂿꑘꌠꅐꑘꋊꄻꌠꌋꆀꄻꌄꆣꌠꄐꎖꃄꌬꇫꑟꌠꀂꏽꉜꐨꄜꅐꇁꀐ,ꇮꑘꌋꆀꈴꌗꈴꀯꌌꎔꎗꃅꎥꃪꇈ,ꄚꃆꂮꐥꌠꌤꃅꅉꌋꆀꐯꇯꄉꏦꇨꃅꃷꎏꇬꃹꇁꎻ、ꇤꐳꃅꊁꊰꅐꑘꄐꊋꀜꋊꇧꎭ、ꎆꏂꑘꐅꄻꏓꃬꐯꇯꌠꊥꎆꋍꑠꁁꏯꌤꃅꊋꃤꁦꎆꇱꄉ,ꄹꇙꄉ《ꇩꃷꑼꎆꏂꑘꐅꄻꏓꃬꐯꇯꌠꊥꎆꃆꂮꉪꐨ》ꌋꆀ《ꇩꃷꑼꀒꁨꋍꁘꃅꊋꀥꇱꄉꊁꊰꌠꅐꑘꄐꊋꀜꋊꇧꎭꌠꌤꃅꃆꂮꅇꇰ》ꏤꄻꅐꇁꀐ。ꄜꑘꇬꊋꇁꀦꀊꏀꌠ、ꌬꇐꀊꏀꌠ、ꎊꈴꈄꏍ、ꒆꇐꇮꇐꅐꑘꉗꄻꀻꎆꃆꂮꉜꐨꆏ,《ꇩꃷꑼꄐꇐꃅꐙꌠꅐꑘꀊꏀꌠꉗꄻꌋꆀꀻꎆꃆꂮꏤꐪ》ꇬꌋꆀꄚꃆꂮꐥꌠꏱꁈꏡꁈꇬꌌꄉꄛꑣꅐꇁꀐ。ꌋꀁꂥꈭꈜꎞꎭꉻꑫꀻꎆꌠꀂꏽꉜꐨꆏ,ꈭꈜꎞꎭꀯꌌꎔꎗꃅꎥꃪꌫꄻꇈ,ꌋꀁꂥꈭꈜꎞꎭꉻꑫꋈꄻꄐꌐꉪꐨꌋꆀꃅꉚꄐꉻꏤꄻꅐꇁꀐ,ꏣꀋꑌꃅꈭꈜꎞꎭꀻꎆꄟꆹꏮꌠꄹꎆ。“ꊰꑋꉬ”ꄐꎖꏤꄻꌠꇬꆼꒆꄉ,ꊈꑼꊈꆏꀋꃋꋋꄮꂿꑘꀻꎆ、ꂿꑘꁡꇤꅉꃀꌫꉂꌫꈾꋈꄻꌠꊋꀥꇱ、ꂿꑘꈆꑪꇮꇐꊌꐨꏭꆦꌠꊥꎆ、ꃹꅼꃅꇩꁨꌩꏪꄺꀱ、ꊋꏏꋉꇐꁊꄻ、ꃴꑊꎆꏣꀻꎆ、ꊋꏏꍍꋊꎴꈲꉺꏦꄺꑣ、ꇓꈓꈴꉻꄜꄐꎖꄻꐛꒆ、ꑟꏦꊋꁈꄐꄉꉇꎆꈻꎷꌌꄉꐋꀋꌡꌠꎆꏣꇣꋲꐎꀻꎆ、ꒊꆈꋈꄻꌊꉪꊇꇩꏤꑾꌋꈤꏭꉜꄉꉇꉻꏭꁉꃑꌠꋒꑊꁿꇓꐛꎻꄷꌠꋍꑠꄜꑘꄜꎼꇁꀐ,ꉜꐨꀉꑌꈨꆏꌌꄉ“ꊰꑋꉬ”ꄐꎖꇬꅀꌤꃅꅉ、ꉹꑘꀻꎆꄐꎖꇬꇱꄉꀐ。

  ꉹꁌꐥꐨꏦꀧꌋꆀꄻꃪꌠꇬꆼꒆꄉ,ꊈꑼꊈꆏꏓꂱꉹꁌꁊꈴꃅꇫꉈꇬꑗꇬꌠꊌꐨꁷꄻ、ꀀꑳ、ꃅꑘꁵ、ꂘꑘ、ꆅꉁꀑꌋ、ꐧꋦꏦꀧꌠꌋꆀꉈꑴꈳꎆꅐꂋꌠꄴꏮ、ꎊꈬꁌꏤꄯꐽꋍꑠꁁꏯꀂꏽ,ꄜꑘ1700ꎖꐘꄜꅐꇁ。ꅺꌡꇬ,ꄹꇙꄉꊌꐨꁷꄻꄹꏦꄻꐛꒆꂿꄷ,ꊈꑼꄹꁆꌋꆀꋯꁦꄈꀾꍏꑷꆏꊌꐨꁷꄻꐛꉻꄻꃪ、ꊌꐨꀁꂥꌠꁥꉻꏭꄏꐓꊋꃤꁦꎆꇱ、ꊨꏦꈁꊌꇗꏸꄹꏦꄺꀱꋍꑠꄜꑘꄜꅐꇁ。ꇩꏤꑭꊂꍔꑠꆏꊯꊪꈭꌕꃢꃀꈿꊬꌠꇬꆏꀞꄻꋮꒉꃀꈿꄉ,ꇩꏤꀻꎆꄺꀱꊈꑼꉼꋍꑠꇬꀯꊈ9ꂷꇬꆼꎍꏲꂠꐋꀨꌋꆀꄜꑘꄜꊿꐯꇯꄉꌤꃆꀞꄻꏡꁈꋮꒉꇈ,ꐧꋦꇬꁧꏕꐨꀊꐮꀐ。ꄜꑘꇬꎆꏂꑘꇬꎞꆏꌠꊿꈧꌠꊌꐨꐮꍣꌠꌤꃆꂥꀘꃆꂮꇖꐨ,ꊛꄉꊂꈹꄉꀞꄻꌠꇬꈴꄉ,ꎆꏂꑘꎞꆏꌠꊿꅉꀨꃀꌠꀨꎹꎆꄹꇙꋊꄻ、ꋍꁘꋍꁘꃅꎃꐚꌠꋊꄻꉺꏦꄺꐛꌠꏭꂿꄐꏣꀋꑌꌠꋊꇤꅐꇁꀐ。ꏓꂱꉹꁌꅉꀨꀀꑳꈉꐨꏦꀧꌤꃆꇬꉜꄉ,ꄜꑘꇬꄜꅐꇁꌠꏦꀧꐨꐥꌠꀀꑳꋈꄻꊋꃤꁦꎆꇱ、ꏦꀧꐨꐥꌠꀀꑳꇕꄜꏱꁈꋊꄻ、ꀀꑳꁌꏤꎍꐽꌠꉻꒉꋎꐽꏱꁈꃄꌬꇫꑟꋍꑠꇖꐨꆏ,ꋒꐯꋒꃅ《ꀀꑳꏦꀧꏦꃤ(ꉜꐨꅱꄻꄯꒉ)》ꌋꆀꉈꑴꄚꃆꂮꐥꌠꏱꁈꇬꄉꄛꑣꅐꇁꀐ。ꃅꑘꁵꑘꀺꌠꊥꎆꌠꎁꃅ,ꄜꑘꇬꆏꂿꑘꇮꃅꊿꀱꉈꑴꂱꑱꃅꄷꄉꑘꀺꌠꇗꏸꎳꄻꏱꁈꄻꐛꒆ、ꌶꅉꀊꂥꊐꌠꇬꌶꌺꑘꀺꎆꒉꎆꇁꇫꄏꐓꉺꏦꄺꑣꋍꑠꉜꐨꄜꅐꇁꀐ,ꎆꌅꀯ、ꇩꏤꇗꏸꌤꃆꊝꏳꇬꆏꂿꑘꇮꃅꊿꇫꐊꌠꃅꑘꎹꊋꋠꌠꁥꉻꃅꑘꎹꌠꊥꎆꌠꌌꄉ,ꊁꊬꌠꃅꑘꎹꌠꇗꏸꏱꁈꇫꄏꐓꌠꊥꎆꌠꇬꀋꂿꑘꌠꃅꄉ。ꂘꑘꌤꑘꄺꀱꀻꎆꁁꏯ,ꂘꑘꐽꊯꌠꏦꀧ、ꋭꑘꂘꑘꐽꏡꃅꀻꎆꌠꇬꊥꎆ、ꌷꂾꉙꂘꌠꁊꈴꌋꆀꋊꍬ、ꋒꃅꇓꈓꄉꊋꃅꇁꌠꊿꌺꇖꉙꂘꌠꌤꃅ、ꌶꅉꀊꂥꊐꌠꉙꂘꌠꊇꁧꉀꐕꋍꑠꃆꂮꇬꄜꑘꆏ,ꂘꑘꀯꆏꋒꐯꋒꃅꇫꉜꁨ,《ꇩꏤꐧꀠꀊꉗꃅꂘꑘꄺꀱꌠꌋꆀꀻꎆꄐꎖꐱꀨ》ꏤꄻꌠꌋꆀꃄꌬꄮꇬꌌꎔꎗꃅꎥꃪꌫꄻꇈ,ꄷꀋꁧꏣꀋꑌꃅꇫꐊꌠꋬꈭꏱꁈꎥꃪꏤꄻꄉ,ꄚꃆꂮꐥꌠꌤꃅꌠꄹꇙ。ꆅꉁꀑꌋꌤꑘꀻꎆꌠꇬꆼꒆꄉ,ꄜꑘꆏꅉꂫꊐꌠꀑꌋꁧꃤꃅꌠꄻꐛꒆ、ꄉꉻꀑꌋꁧꃤꃅꉻꑫꄻꐛꒆ、ꇩꏤꀞꄻꌠꆅꉁꅉꄺꀱꌠꌋꆀꆅꉁꆅꄻꏦꀧꉱꑷꐨꍔꐯꌠꄹꎆꋍꑠꉜꐨꄜꅐꇁꄉ,ꀑꌋꀯꌌꎔꎗꃅꎥꃪ,ꃹꅼꃅꆅꉁꁬꋌꀑꌋꏦꉻꄺꀱꌠꄹꎆ,ꋍꑞꋍꑵꏱꁈꏡꁈꃄꌬꇫꑟ,ꉹꁌꆅꉚꆅꉁꁁꏯꇬꃶꐚꌠꌤꃆꀞꄻꂥꀘ,ꊾꊋꇁꀦꌋꆀꐧꋦꏦꀧꀯꌋꆀꐯꇯꄉꇤꐳꃅꇓꈓꇓꉈꀀꊿꉱꑷꌠꅉꀨꆅꉁꏦꀧꄹꏦꄺꑣ。ꋬꂻꃅꒃꅐꏦꀧꉻꑫꏓꄻ、ꊖꌋꅏꅉꎆꏂꑘꏃꌋꊿꏁꄉꃅꐬꇬꄉꊖꌋꅤꌠꄹꇙ、ꊋꀥꇱꄉꃅꑘꆅꄴꏮꉃꄻꋍꑠꀂꏽꄜꑘꆏ,ꇩꏤꋬꂻꍞꊟꊝꏳꌌꎔꎗꃅꀞꄻꇈ,ꉜꐨꀉꑌꈨꆏꌌ《ꇩꃷꑼꀒꁨꋍꁘꃅꊋꀥꇱꄉꎆꏂꑘꋬꂻꃅꒃꅐꌤꃅꃆꂮꅇꇰ》ꋍꑠꁱꐘꇬꌌꄛꑣꅐꇁ。ꄜꑘꇬꄜꅐꇁꌠꇤꐳꃅꍏꇩꌋꆀꁍꉙꇩꏤꎆꏣꃼꇇꐮꇷꃅꌠꁧꃤꃅꐽꄜꄺꑣꋍꑠꉜꐨꆏ,ꃼꇇꌤꃆꀯꌌꏣꀋꑌꃅꌫꄻꇈ,ꍏꁍꈋꍣꃀꈿꋍꑠꃄꄟꇬꈴꄉ,ꊋꀉꒉꃅꅐꄉꉪꂱꇤꋲꏱꅉꐎꍔꃚꍏꇩꌋꆀꁍꉙꇩꏤꎆꏣꃼꇇꐽꄜꋈꄻꌠꇬꊋꁈꄏ。

  ꐧꋦꐮꄮꎍꐽꌠꊥꎆꌠꇬꆼꒆꄉ,ꊈꑼꊈꆏꊋꀥꇱꄉꋯꁧꏦꃤꄹꏦꌌꏱꄻꌠꋈꄻ、ꃹꅼꃅꏲꑘꏲꂠꏦꉻꄺꀱ、ꊿꋅꑇꇐꂘꃅꏱꁈꃄꌬꇫꑟ、ꅔꈐꌋꆀꇤꉪꄠꇬꐮꈴꇷꃅꋍꑠꁁꏯꀂꏽ,ꄜꑘ1100ꎖꐘꄜꅐꇁ。ꅺꌡꇬ,ꄜꑘꇬꄜꅐꇁꌠꃄꅉꏲꂠꏦꃤꌌꄺꑣꀱ、ꇓꈓꀀꑳꎞꐆꏲꂠꃷꋪꌌꄺꑣꀱ、ꏲꑘꀱꉈꑴꍤꇖꏦꃤꄻꐛꒆ、ꉌꊈꀑꌋꏦꃤꏤꄻ、ꃅꑘꆅꄴꏮꏦꃤꌌꄺꑣꀱ、ꐧꋦꈭꋏꏦꃤꏤꄻꋍꑠꉜꐨꆏ,ꌌꄉꇩꃷꑼꄚꃆꂮꐥꌠꏦꃤꏤꄻꌤꃅꎖꄎꇬꇱꄉꀐ。ꋭꋽꃅꐧꋦꊋꃷꇱꌤꐘꀞꄻ、ꀉꆈꄷꅠꊋꃤꌋꆀꌋꅪꀉꑳꐛꌊꃷꄻꑽꃤꐆꌠꏭꇇꇩꍈ、ꎆꏂꑘꉇꀕꃅꃄꎆꎝꄉꌠꃅꐨꏡꍅ、ꄆꅇꊏꀸꌠꇇꇩꍈ、ꎧꅝꈭꐨꍯꊪꇽꌠꏱꄻꊋꃤꁦꎆꇱꋍꑠꃆꂮꄜꑘꆏ,ꏓꂱꃔꑼꀊꂥꇊꀊꂥꂶꌠ、ꇬꉢꀯ、ꇩꏤꑭꊂꏓꄊꏦꃤꌤꃅꊈꑼꉼꋍꑠꇱꌌꎔꎗꃅꀞꄻꇈ,ꄜꑘꉜꐨꁳ《ꅓꑘꏦꃤꄺꀱꑘ(ꉆ)(ꄐꄉꌠ)》ꇬꌋꆀꄚꃆꂮꐥꌠꏦꃤꏦꇗꇬꄉꋒꐯꋒꃅꄛꑣꅐꇁꎻꀐ。ꄜꑘꇬꇩꏤꇿꋌꄐꅍꍞꊟꏦꃤꄹꏦꄺꑣ、ꏲꑘꍞꊟꏦꃤꄹꏦꄻꐛꒆꋍꑠꃆꂮꉜꐨꆏ,ꍏꑷꍬꏦꍤꄻꊈꑼꉼ 、 ꍞꊟꀯꌌꎔꎗꃅꎥꃪꀞꄻꇈ,ꌌꄺꀱꄉꌠ《ꍏꉸꏓꂱꇭꉼꇩꏲꑘꍞꊟꏦꃤ》ꇬꇱꄉꀐ,ꏲꑘꍞꊟꏦꃤꄹꏦꄻꐛꒆꌠꌋꆀꍹꁏꎴꄖꌤꃅꌠꊥꎆꌠꇬꂿꄐꏣꀋꑌꃅꇤꅐꇁꀐ。ꊋꀥꇱꄉꇓꈓꊿꋅꌤꃅꌠꇬꉜꄉꄜꅐꇁꌠꄜꑘꆏ,ꇩꏤꑭꊂꍔꑠꄜꑘꊈꑼꉼꆏꄚꃆꂮꐥꌠꌤꃅꅉꌋꆀꐯꇯꄉꍤꄻꎥꃪꌠꃅꄉ,ꌌꀋꂿꑘꃅꍞꊟꀞꄻꇈ,ꇩꏤꊿꋅꌤꃆꊈꑼꉼꆏꌌꍤꄻꎥꃪꅇꄜꇬꄚꃆꂮꐥꌠꉜꐨꇬꇱꄉ,ꀒꁨꋍꁘꃅꊋꀥꇱꄉꀁꑌꊿꋅꇙꈧꐺꌠꊻꂷꁧꃤꃅꏲꂠ,ꏣꀋꑌꃅꇓꈓꊿꋅꌤꃅꃷꋪꌌꄺꑣꀱꌠꄹꇙꀐ。ꊋꀥꇱꄉꌶꅉꀊꂥꊐꌠꌶꌺꑘꃅꁡꇤꋂꇬꇛꌺꉘꉚꌠꌋꆀꏲꂠꌠꀂꏽꄜꑘꆏ,ꍏꑷꎀꍹꀯꄚꃆꂮꐥꁆꏯꐊꄉ,ꎥꃪꄉꌶꅉꀊꂥꊐꌠꌶꌺꑘꃅꁡꇤꋂꇬꇛꌺꋊꍬꏲꂠꌠꄜꎼꇁꀐ、ꊱꁨꃅꇙꈧꐺꌠꉜꐨ,ꃶꐚꃅꌤꃅꄐꌐꌠꊋꀥꇱ。ꏦꇨꃅ“ꌕꂿꑘ”ꄉꅍꑽꃤꐆꌠꇇꇩꍈꃆꂮꄜꑘꆏ,ꏓꂱꏦꍤꑼꀊꂥꇊꀊꂥꂶꌠꆏꋒꐯꋒꃅꇫꉜꁨ,ꀒꁨꋍꁘꃅꂿꑘꃆꂮꐥꌠꄉꅍꑽꃤꐆꌠꍤꀞꌠꌋꆀꄴꏮꌠꊋꃤꁦꎆꇱꀐ。ꄜꑘꇬꄠꃪꏭꁱꀕꐮꈴꂓꁦꅐꇐꉗꄻꃆꂮꉜꐨꆏ,ꌌꄉ《ꁰꀕꀯꊋꀥꇱꄉꃅꒊꃅꇁꀊꏀꌠꇂꃴꄠꃪꏭꁰꀕꌤꃅꌠꄐꌐꃆꂮꉪꐨ》ꇬꇱꄉ,ꎿꋮꑍꁁꏭꁰꀕꐮꈴꌠꇬꄹꎆꌠꎁꃅꂿꄐꏣꀋꑌꌠꋊꇤꅐꇁꀐ。

  ꋍꈭꐨ,ꄜꑘꇬꆏꉈꑴꉮꌸꊂꋈꀱꄺꀱꌠꃅꋒ、ꀊꏀꊬꌠꉹꁌꌤꃅꋒ、ꐧꋦꉪꏦꈯꄜꁌꐨꉻꑫꋈꄻꌠꊋꀥꇱ、ꍔꃚꌅꊋꆹꏮ、ꂿꑘꁡꇤꍔꌅꋈꄻꌠꊋꀥꇱ、ꎮꉮꋧꃅꄉꀨꃀꀞꋒ、ꄉꉻꉇꉻꎻꈴꌠꇩꏤꆓꊋꃤꉀꐕꌠꉜꐨꌋꆀꇖꐨꑠꄜꎼꇁꀐ,ꄚꃆꂮꐥꌠꌤꃅꌠꇬꄹꇙꌠꌋꆀꄻꎆꌠꇬꏣꀋꑌꌠꂿꄐꋊꇤꅐꇁꀐ。ꏓꇱꃅꐙꌠ、ꃅꇴꄉꉻꃅꐙꌠ、ꂴꂿꐨꊼꇅꀉꇨꃅꐙꌠꄜꑘꄹꁆꆏ,ꄚꃆꂮꐥꌠꌤꃅꅉꀊꉗꀊꎴꌠꄐꎖꌋꆀꉻꒉꏤꇽꌠꎁꃅꀋꂿꑘꌠꉜꄻꅍꇲꁵꀐ。ꍏꇭꍏꑷ、ꇩꃷꑼꀊꂥꃅꏓꂱꍔꑠꄜꑘꌤꃅꌠꉜꁨꐯꉜꁨ,ꍏꑷꏲꌋꐋꀨꀉꑌꑹꁰꇽꎼꇁꄉ,ꊋꑌꃅꄜꑘꀞꄻꃅꇫꑟꌠꄹꇙꀐ。ꊪꀞꌤꃅꅉꈁꐥꌠꄈꌋꆀꇩꏤꌤꑘꀻꎆꄹꎆꌠꀊꂥꅉꇬꈴꄉ,ꍔꑠꄜꑘꀞꄻꌠꌋꆀꂱꑱꌤꃅꅉꌤꃅꌠꊥꎆꌠꐮꐊꄉ,ꀒꁨꋍꁘꃅꊥꇬꏲꂠꌠꊋꀥꇱ,ꌤꃅꉺꏦꄻꐛꒆ,ꀞꄻꇶꏦꏀꀺ,ꀞꄻꃄꌬꇫꑟꌠꉜꁨ。ꌤꃅꅉꀉꑌꌠꀞꄻꂿꍤꄻꎥꃪ、ꀞꄻꈴꎁꇬꐮꇖꐮꄟꌋꆀꀞꄻꊂꍞꊟꍤꄻꌠꊋꀥꇱꀐ,ꆽꎍꊿꀋꉬꀋꉆꌠꑭꄑꄉꄐꇺꄷꀋꁧꂴꅑꄉꄜꑘꀋꉬꀋꉆꌠꀞꄻ、ꄜꑘꊈꑼꌋꆀꄈꀾ、ꏓꉻꅲꇫꄉ,ꀊꐯꈭꃅꉜꐨꊩꅲ,ꏣꀋꑌꃅꀞꄻꌠꄹꇙꄉ,ꊈꑼꈧꌠꌅꊋꍬꌬꊌꐨꃶꐚꃅꉜꅐꇁꎻ。ꄚꇬꆏ,ꉢꇩꏤꑭꊂꍔꑠꎮꊈꉼꎁꃅ,ꊪꀞꌤꃅꅉꈁꐥꌠꏭꇬꀖꄉꈀꎭꀕ!

  ꑍ

  ꋍꈓꅑꅸꇁꌠ,ꎮꊈꉼꎔꎗꃅꃛꏢꄧꊝꎻꏹꏓꂱꍔꑠꄻ60ꈎꈭꏝꐛꌠꋩꈽꃀꀉꒉꃅꈿꅉꇬꄉꀋꂿꑘꃅꉉꌠꉌꊈꃄꌬꇬꑟ,“ꈯꄜꆹꒆ、ꃅꇴꄉꉻꁧꃤꃅ、ꊇꁧꉀꐕ、ꇿꋌꉉꇖ”ꌠꄜꑘꌤꃅꌐꏦꇬꈴꄉ,ꊥꇬꏲꂠꌠꊋꀥꇱ,ꏓꇲꋮꄮꌠꉜꁨ,ꀋꆏꃅꄹꀹꏀꀺ,ꉻꄜꊇꁧꉀꐕꌠꄹꇙ、ꄹꏦꋈꄻꌠꄹꎆ、ꏦꉻꉺꏦꄻꐛꒆꁆꏯꄇꇖꀕꃅꑌꎆꐨꐥꀐ。

  ——ꇩꏤꑭꊂꍔꑠꄜꑘꌤꃅꑋꇖꃀꃘꃢꌠꈿ,ꊋꇤꄉꄜꑘꌤꃅꐛꉻꀊꏀꌠꀹꄻ。2010ꈎ8ꆪꇬ,ꇩꏤꑭꊂꍔꑠꆹꄜꑘꌤꃅꑋꇖꃀꃘꃢꌠꈿꀐ,ꏦꏿꆀꍗꑮꆏꅇꂷꉉ。ꃀꈿꌠꆹꎖꋪꏓꈹ、ꃅꒊꃅꇁꎥꃪꌠꅉꃀꇬꄉ,ꀒꁨꋍꁘꃅꄜꑘꌤꃅꌠꆹꏓꂱꍔꑠꃅꇴꄉꉻꈻꇐꐥꌠꀋꂿꑘꌠꌤꐘꉬꌠꊡꀱꀐ,ꄜꑘꌤꃅꇬꈆꑪꈴꐨꉀꐕꌠꉪꈜꊨꄅꄉꀐ,ꐊꑷꃅꄜꑘꌤꃅꇬꈆꑪꈴꐨꉀꐕꌠꀂꏽ,ꃅꇴꄉꉻꁧꃤꃅꇬꎷꌠꈆꑪꏥꏦꄜꎼꇁꀐ,ꊋꋧꄉꈆꑪꃅꀻꎆꌠꇬꁧꃤꃅ;ꀋꎪꃅꊇꁧꌌꀻꎆꌠꎹꌠꈆꑪꃅꍜꄐꇺꌠꃅꇬꎷ,ꀋꆏꃅꄜꑘꌤꃅꌠꇿꋌꉀꐕ;ꐮꄮꐊꐙꌠꈆꑪꉺꏦꄻꐛꒆ,ꃶꐚꃅꉻꄜꏓꇱꊋꃤꏓꐛ;ꃅꋊꐊꄉꁨꆹꌠꈆꑪꉌꊈꄖꄑ,ꏟꈯꃅꄜꑘꌤꃅꇬꏀꀺꌠꋍꑠꇖꐨꇖꐘꌠꄹꎆ,ꃅꒊꃅꇁꀊꏀꌠꇬꏓꂱꍔꑠꌤꑘꀻꎆꌠꄹꎆ、ꄜꑘꌤꃅꇬꐛꐨꀊꏀꌠꀹꄻꌠꇬꄐꌐꈻꇐꀋꂿꑘꃅꐥ。

  ——《ꍏꇩꏓꂱꍔꍞꋮꒉꃀꇩꏤꑭꊂꊈꑼꉼꄜꑘꌤꃅꃷꋪ》ꌌꄺꑣꀱ,ꊋꇤꄉꍔꑠꌅꊋꍬꌬꌠꄹꏦꋈꄻꌠꄹꎆ。ꇩꏤꑭꊂꍔꑠꆏꃷꋪꄺꑣꀱꌠꌌꀋꉬꀋꉆꌠꌤꃅꐘꃅꄉ,ꃹꅼꃅꍤꄻꎥꃪ,ꋒꐯꋒꃅꋯꁦꍔꆗ,ꀊꐯꃅꉜꐨꊩꅱ,ꀱꇊꀱꃅꌌꎥꃪꄺꑣꀱ。ꌌꄺꑣꀱꄉꌠꃷꋪꆏꄜꑘꌤꃅꌧꇗꌋꆀꃄꄻꀻꎆꌠꊌꐨꀊꏀꌠꏓꐯꇯꄉ,ꀒꁨꋍꁘꃅꄜꑘꍤꄻꌌꄜꑘꃅꄉꌠꎕꏦꌋꆀꄜꑘꌊꄻꌠꎕꏦꋊꍬꄉꀐ,ꊋꀥꇱꄉꄈꀾ、ꁆꏯꌋꆀꌐꁨꊈꑼꉼꄜꑘꌤꃅ、ꊋꀥꇱꄉꄜꑘꀞꄻꌋꆀꍞꊟꀞꄻ、ꄜꑘꌤꃅꌠꌊꄻꀭꄒꋍꑠꐋꇐꊨꄅꄉꀐ,ꍏꇭꍏꑷꊋꀥꇱꄉꏓꂱꍔꑠꌤꃅꃆꂮꉌꊈꀊꏀꇖꐨꀊꏀꌠꌋꆀꇩꏤꑭꊂꍔꑠꄜꑘꌤꃅꇬꈆꑪꈴꐨꉀꐕꃆꂮꌧꐨꀊꏀꉪꈜꀊꏀꌠꉜꅐꇁꀐ,ꊋꀥꇱꄉꏓꂱꍔꑠꌅꊋꍬꌬꌠꄹꏦꋈꄻ、ꄜꑘꌤꃅꇬꈆꑪꃅꀻꎆꌠꄹꇙꌠꎁꃅꊋꑌꃅꏦꀧꌠꇲꁵꀐ。

  ——ꄜꑘꌤꃅꌠꃄꌬꇫꑟꌠꆹꏓꂱꍔꑠꃅꇴꄉꉻꈻꇐꐥꌠꌤꃅꇖꐨꐘꉬ,ꊋꇤꄉꋒꃅꄜꑘꌤꃅꌠꉻꄜꏓꇱꊋꃤꏓꐛ。ꋒꐯꋒꃅꋯꁦꄈꀾꍏꑷ、ꇩꏤꑭꊂꇬꎭꆃꌋꆀꍔꑠꌐꁨꊈꑼꉼꂱꎆꅑꐨꋊꇤ,ꀋꉬꀋꉆꃅꌌꍞꊟꀞꄻꌠꄜꑘꌊꄻꋮꒉꃀꈿꀐ,ꄜꑘ110ꏢꀋꉬꀋꉆꌠꃅꄉꍞꊟꀞꄻꌠꎥꃪꏤꄻꀐ。ꄐꇐꐨꃅꐙꌠꅐꑘꀊꏀ、ꂱꉴꑘꀻꎆ、ꃅꑘꉙꂘꌠꄺꀱꌋꆀꀻꎆ、ꀊꉘꌠꏀꈄꏍꋬꂻꏦꃤꄻ、ꂿꑘꁡꇤꀁꇬꐥꌠꀊꉘꉜꁨꋍꑠꁆꏯꀂꏽꄜꑘꇬꉜꄉ,ꇩꏤꑭꊂꍔꑠꌤꀞꄜꌋꆀꄜꑘꊈꑼꉼꌋꆀꄜꑘꄜꊿ、ꊪꀞꌤꃅꅉꐯꇯꄉꊥꇬꌊꍤꆫ、ꍤꎥ、ꀞꄻꋮꒉꃀ25ꃢꈿ,ꐯꇯꄉꄜꑘꀞꄻꃄꌬꇫꑟꌠꄹꇙ。ꋍꈭꐨ,ꊪꀞꌤꃅꅉꆏꑋꇖꃀꈿꉈꑴꄜꑘꄜꊿꁨꌊꊪꀞꌤꃅꅉꅱꇬ,ꀋꉬꀋꉆꌠꄜꑘꀞꄻꌠꃅꈽꌠꇶꏦꋍꑠꇬꈴꄉ,ꐮꈴꌠꊋꀥꇱ,ꉜꐨꐮꐊꐨꁦꎆꇱ,ꀊꐯꈭꃅꃅꈽ、ꐯꇯꀞꄻ、ꉻꄜꃅꄹꎆ、ꐮꄮꐊꐙꌠꄜꑘꌤꃅꉺꏦꏓꐛꌠꄹꇙ。

  ——ꁧꃤꃅꌤꃅꌠꊋꀥꇱꌋꆀꄺꀱ,ꊋꇤꄉꄜꑘꂱꎆꅑꐨꌋꆀꂿꄐꋊꇤ。ꇩꏤꄚꃆꂮꐥꌠꀯꊇꁨꌊꌤꃅꃆꂮꄛꇰ、ꄜꑘꎹꈹꄯꒉꌋꆀꉜꉚꄜꃆꌋ、ꄈꀾꄜꑘꌤꃅꑋꇖꃀꈿ、ꊈꑼꄹꁆꊥꇬꌊꍤꄻꉜꆫꋍꑠꃄꄟꇬꈴꄉ,ꊈꑼꋍꏅꌠꌋꆀꃅꈽꌤꃅꅉꈁꐥꌠꄐꏁꌌꊇꁧꀉꇨꇁꌠꉪꐨꑌꄉ,ꋋꇅꃅꄈꌋꆀꇩꏤꈯꄜꌤꃅꅉꌋꆀꎆꏣꐧꋦꀻꎆꌠꇬꃆꂮꀊꏀꌤꃆꀊꏀꌠꇬꆼꒆꄉꄜꑘꄛꏮ。ꄜꑘꇬꉜꐨꀋꂿꑘꌠꌋꆀꇖꐨꏭꆏ,《ꀋꂿꑘꌠꄜꑘꐒꁱꏓꄻꌠ》ꇬꈴꄉꋋꇅꃅꌌꍏꑷꌋꆀꄚꃆꂮꐥꌠꌤꃅꅉꏭꄛꑣ,ꋋꈓꌠꐯꇯ85ꁬꄜꎭ。ꋍꈭꐨ,ꏣꀋꑌꃅꄜꉺꈭꈜꀺꐯ,ꐮꈴꈄꏍꇬꄉꄜꑘꄹꁆꋍꁬꃅꌌꄇꄜꋊꌠꌋꆀꀞꄻꅇꏮꐨꊋꀉꒉꃅꇱꌠꇬꈴꄉ,ꄜꑘꊈꑼꉼꆽꎍꊿꌋꆀꈄꏍꈩꊿꈄꏍꇫꄉꐮꑌꑲ,《ꏓꂱꉪꐨꅉꐚ——ꍔꑠꄜꑘꌋꆀꀞꄻꅇꀱꁱꇐꌋꏑ》(2010ꈎꆱ)ꌋꆀ《ꇩꏤꌤꃆꉹꁌꐥꐨꉪꉂ——ꍔꑠꄜꑘꁮꅉ(ꋍꋬꈭ)》(ꇖꋐꌠ)ꏓꄻꅏꄻꌠꋍꑠꃄꄟꇬꈴꄉ,ꐧꋦꋍꑞꋍꁆꏯꇬꄜꑘꌤꃅꌠꇬꐝꉅꐨꁦꎆꇱꄉ,ꄜꑘꁳꄈꁧꃤꃅꌠꌋꆀꇩꏤꃅꇴꄉꉻꇬꂿꄐꀊꅰꀉꒉꃅꋊꇤꅐꇁꎻ。

  ꌕ

  2011ꈎꆹ,ꍏꇩꇭꍣꄈꄻꐛ90ꈎꈭꏝꐛꈓꌠꉬ,ꉈꑴ“ꊰꑋꉬ”ꄐꎖꃄꇬꈒꌠꑌꉬ。ꀊꏀꋋꈓꇬ,ꐊꑷꃅꍏꇭꃀꀉꒉꊰꏁꃢꌠꌋꆀꊰꏁꈭꌕꃢ、ꇖꃢ、ꉬꃢꐊꈴꃀꈿꉌꊈꃄꌬꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꌐꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇫꑟ,ꎃꊒꃅꇩꈐꇩꉈꃅꒊꃅꇁꀊꏀꃅꐛꐈꇁꌠꀊꏀꐋꀋꌡꃅꐙꇁꌠꅉꐚꌶ,ꈆꑪꃅꀻꎆꌠꌌꄜꀨꃅꄉ,ꇤꐳꃅꎆꏣꀻꎆꄟꆹꏮꌠꌌꈜꀦꃅꄉ,ꉹꁌꐥꐨꉜꁨ、ꌅꊋꏓꂱꎁꃅꃅꌠꌌꄜꑘꌤꃅꌠꇬꄓꈌꌋꆀꑞꈌꃅꄉ,ꀋꆏꃅꄜꑘꌤꃅꌠꈆꑪꈴꐨꉀꐕ,“ꊰꑋꉬ”ꄐꎖꌠꎁꃅꋒꃅꃄꇬ、ꋒꃅꑭꁘꐕꌠꎁꃅꏣꀋꑌꃅꑆꊋꅐꌞ。

  ——ꎔꎗꃅꇩꏤꑭꊂꍔꑠꃘꃢꌠꄜꑘꌤꃅꑋꇖꃀꈿꌠꉌꊈꌋꆀꄜꑘꌤꃅꃷꋪꃄꌬꇫꑟ。ꊜꋽꄮꆏꎥꇖꁥ、ꁰꍋꁥꀞꄻ,ꃶꐚꃅꊋꀥꇱꄉꄐꌐ,ꃀꈿꉌꊈꌶꄻꃄꌬꃅꈧꌠꃹꅼꃅꃅꌠꄹꇙ。ꋒꃅꃷꋪꌶꄻ、ꄜꉺ、ꃄꌬꃅꈧꌠꊥꇬ,ꇫꐊꌠꌫꄻꑭꋧꏥꏦꏤꄻ,ꄜꑘꌤꃅꌠꄹꏦꈴ、ꋊꍬꈴ、ꈭꎁꈴꌠꌋꆀꈴꌗꈴꋈꄻꌠꄹꎆ。

  ——ꂱꎆꅑꐨꋊꇤꌠꉜꁨ,ꄜꑘꊇꁧꏟꈯꃅꒃꉇ。ꀋꎪꃅꄜꑘꊇꁧꉀꐕꌠꌌꀋꂿꑘꌠꅉꃀꃅꐙꌠꌤꐘꃅꄉ,ꋒꐯꋒꃅꍔꑠꊈꑼ、 ꄈꀾ、ꏓꉻꌋꆀꌐꁨꊈꑼꉼꂱꎆꅑꐨꋊꇤꅐꇁ,ꃹꅼꃅꍤꄻꎥꃪ,ꋋꇅꃅꉹꁌꉪꐨꄛꑣ,ꀊꅰꃅꉪꐨꀊꂥ、ꇖꃆꌋꊒ、ꎥꃪꋒ、ꇖꐨꃶꐚꌠꄜꑘꀉꑌꃅꏓꐛ。ꀒꁨꋍꁘꃅꊋꀥꇱꄉꃀꈿꌐꊬꌠꇬꄜꑘꎹꈹꌠꌤꃅ,ꄜꑘꄐꊒꐨꌋꆀꋋꄮꇿꋌꐥꐨꁧꎆꇱ。

  ——ꍞꊟꀞꄻꊋꃤꁦꎆꇱ,ꀞꄻꇿꋌꁦꎆꇱ。ꃅꒊꃅꇁꀊꏀꌠꇬꄜꑘꍞꊟꀞꄻꌤꃅꌠꐋꀋꌡꐨꅉꌋꆀꈳꏦꎥꃪ,ꍞꊟꀞꄻꇶꏦꄻꀉꑌꃅꄉꇁ,ꍞꊟꀞꄻꉺꏦꄻꐛꒆ,ꄈꀾ、ꏓꉻ、ꁆꏯꌋꆀꌐꁨꊈꑼꉼꄜꑘꍞꊟꀞꄻꊋꃤꁦꎆꇱ,ꊋꀥꇱꄉꌤꃆꉉꄜꌼꇪ、ꀞꄻꊋꋠꐨꊼꇅꀉꒉꌠꄜꑘꆏꊂꈹꄉꀞꄻ。ꊪꀞꌤꃅꅉꇬꀋꉬꀋꉆꃅꌌꀞꄻꌠꄻꂴꄉꌠꄹꇙ,ꐮꈴꋮꇖꌠꊋꀥꇱ,ꀞꄻꇶꏦꄻꀉꑌꑵꃅꄉ,ꀞꄻꊇꁧꇬꄉꀧ。

  ——ꌤꃅꃄꄟꏀꀺ,ꁧꃤꃅꌠꉾꃪꐨꉀꐕ。ꄜꑘꐪꊂꎹꈹꌠꈭꈜꀹꄻꀊꐯꃅꄉ,ꄈꀾ、ꏓꉻꌋꆀꌐꁨꊈꑼꉼꊫꁱꄉꁆꏯꄜꑘꌤꃅꌠꃄꄟꎹꎥꌠꃅ,ꏓꇱꃅꐙꌠ、ꃅꇴꄉꉻꃅꐙꌠ、ꂴꂿꐨꐥꌠꄜꑘꀞꄻꌠꏡꁈꄺꀱ。ꇤꐳꃅꈴꌗꈴꋈꄻꌠꄹꎆ,ꋍꁘꋍꁘꃅꄜꑘꌤꃅꌠꄇꄜꋊꈴꌠꄹꇙ,ꀋꆏꃅꌤꃅꊇꁧꌋꆀꉾꃪꐨꉀꐕ。

  ꊈꑼꊈ:

  ꄜꑘꆹꏓꂱꍔꑠꌅꊋꍬꌬꌠꀋꂿꑘꌠꃄꄟꉬ,ꄜꑘꌤꃅꋒꌠ,ꆽꎍꐨꀉꒉ,ꂿꃆꁤꇅꀕꌠꉬ。ꉪꊇꁳꏟꈯꀕꃅꋯꑌꌊꐋꀨꃛꏢꄧꌌꊝꎻꏹꃅꄉꌠꍏꇭꍏꑷꈭꇍꄉ,ꑌꇐꋍꏢꉌꂵꋍꂷꃅ,ꊛꄉꊋꇤ,ꏓꂱꍔꑠꌤꑘꀻꎆꌠꌋꆀꍏꇩꐛꐨꐧꋦꉪꏦꋈꄻꌠꎁꃅꀊꏀꌠꀊꅰꃅꀉꒉꌠꑆꊋꅐꌞꎻ!
ꁰꒌ




  • 特别鸣谢
    中国民族语文翻译局彝文翻译室