ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꏓꂱꍔꍞꋮꒉꃀꈿꅉꇩꏤꑭꊂꊈꑼꉼꅉꀕꌤꏲꊈꑼꉼꌤꃅꅇꄜ

——ꍔꑠꊯꊪꈭꇩꏤꑭꊂꊈꑼꉼꃀꇖꃢꌠꈿꅉꇬ
(2011ꈎ3ꆪ3ꑍ)

ꏦ ꏿ ꆀ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꊈꑼꊈ:

  ꉢꍏꇩꏓꂱꍔꍞꋮꒉꃀꈿꅉꊯꊪꈭꇩꏤꑭꊂꊈꑼꉼꅉꀕꌤꏲꊈꑼꉼꎁꃅ,ꃀꀉꒉꈿꅉꏭꌤꃅꐨꅇꄜꂿ,ꌌꍤꇖꅊꇈ。

  ꋍ、ꀱ2010ꈎꌤꃅꐨꉪꏡ

  2010ꈎꆹꉪꇩꏤꀻꎆꈴꎁꇬꐋꀋꌡꐯꐋꀋꌡꑠꈓꉬ。ꌼꇪꐈꐳꌠꇩꈐꇩꉈꋦꈭꊝꇬ,ꐋꀨꃛꏢꄧꌌꊝꎻꏹꃅꄉꌠꍏꇭꍏꑷꇩꏤꑭꊂꊿꋅꈁꐥꌠꏓꂱꃅꋯꑌꏃꂠꄉ,ꉌꊨꈬꇱ、ꇨꀖꊋꑣꄉ,ꏾꉰꒄꌡꀉꇨꃅꃄꇙꌠ、ꇤꌡꍏꐏꀋꇰꀋꉈꃅꃄꐡꊖꑳꑠꋌꐛꉮꌸꀉꒉꀊꂾꌠꄩꊋꀐ,ꊋꐛꃅꎮꉰꋧꃅꄉꀨꃀ、ꇨꍏꑸꒄꉼꀞꄻ,ꇿꋌꐥꃅꇩꏹꎆꒉꎆꇁꎒꐡꄜꎟꌠꊝꄉꊌꌠꊌꐨꈫꈈ、ꍔꐯ,ꎆꏣꐧꋦꀻꎆꆹꐨꉾꃪꃅꐙꇬꎷ,ꊋꐛꃅ“ꊯꊪꉬ”ꄐꎖꏤꄻꄉꌠꑞꅉꁻꌐꂿꃆꃅꌐꀐ,ꋋꆹꉪꇩꏤꐧꋦꉪꏦꄹꏦꉾꃪꐨꀉꒉꐯꀉꒉꌠꌋꆀꍏꉸꊿꋅꋯꑌꊋꇤꌠꀉꇨꌠꏓꋧꊋꃤꉜꅐꇁꀐ。

  ꋍꈓꅑꅸꇁꌠ,ꏓꂱꍔꑠꆹꇩꉂꉪꏦ、ꐧꋦꉪꏦꁈꁧꀊꂥꃅꐕꄉ,ꋯꑌꌠꌋꆀꋯꁦꌠꅇꀨꀉꒉꑍꏢꌠꌭꇇꈐꊐꄉ,ꐮꃆꂮꋮꄮ、ꊋꃤꏓꋧ、ꅇꉉꁈꌞ、ꃅꇴꄉꉻꁧꃤꃅꌠꂿꄐꀋꂿꑘꌠꋊꇤꅐꇁ,ꋍꑞꋍꑵꆳꎟꉐꄜꌠꏭꊝ,ꎆꏣꐧꋦꉽꑌꉾꐲꑌꐳꃅꌠꄹꇙ,ꈆꑪꃅ“ꊰꑋꉬ”ꄐꎖꌠꏤꄻ,ꎿꅔꑍꋮꃆꂮꄮꐽꃅꀻꎆꌠꊥꎆ,ꉪꇩꏤꉇꉻꏭꑌꑲꌠꍔꐯꌠꑆꊋꀉꒉꀊꂾꃅꅐꌞꂿꄷꄉ,ꏓꂱꍔꑠꌤꑘꀻꎆꌠꇬꐩꋊꀊꏀꀹꄻꄉꀐ。

  (ꋍ)、ꍏꇩꐛꐨꐧꋦꉪꏦꍔꍞꀻꎆꈝꃀꍬꌠꌭꈬꇬꎷꌠꆼꒆꄉ,ꉪꇐꌧꇗꋈꄻꌠꊋꀥꇱ

  ꍏꇩꐛꐨꐧꋦꉪꏦꍔꍞꀻꎆꈝꃀꆹ,ꏓꂱꍔꑠꇬꐊꌠꌤꃅꅉꐯꇯꌋꄉꌠꉬ,ꉈꑴꏓꂱꍔꑠꊋꀥꇱꄉꉪꇐꌧꇗꋈꄻ、ꌤꑘꀻꎆꌠꄹꎆꌠꍔꍞꅉꃀꑌꉬ。ꎮꊈꉼꆹꊋꀥꇱꄉꉪꇐꌧꇗꋈꄻꌠꌌꋍꑞꋍꑵꌤꃅꌠꀨꇬꄉꌠꌭꈬꇬꎷ,ꌶꄻꉹꌠꎀꍹꀹꄻꌠꑞꅉꁻꌐꇖꐨꇬꈴꄉ,ꅇꀨꊨꄅ、ꐊꇐꋲꑞ、ꃄꄟꀉꑌꃅꌶꄻꁱꂘꌠꌋꆀꅇꀨꉙꂘꃅꈧꑠꊥꇫꄉꃅ,ꍔꑠꊈꑼꋍꏅꌠꄐꏁꌌꃹꅼꃅꍏꇩꐛꐨꐧꋦꉪꏦꌧꇗꉻꑫꌋꆀꐧꋦꉪꏦꈯꄜꁌꐨꉻꑫꌶꄻ,ꍏꇭꍏꑷꏓꂱꍔꑠꃆꂮꀋꂿ꒧ꌠꌧꇗꌋꆀꌐꏦꏱꁈꌶꄻ,ꐋꀨꃛꏢꄧꏓꂱꍔꑠꄻ60ꈎꈭꏝꐛꌠꋨꏦꃀꀉꒉꈿꅉꇬꄉꉉꌠꀋꂿ꒧ꌠꅇꉉꉌꊈꌶꄻ,ꉪꇐꌧꐨꉀꐕ,ꀒꁨꋍꁘꃅꐮꐊꌠꉪꇐꍔꍞꅉꃀꈫꈈꀐ。ꋋꈓꇬꎮꊈꉼꌐꄉꌷꂘꌠꌕꃢ、ꇩꏤꑭꊂꍔꑠꊈꑼꌷꎥꁥꑍꃢꌋꆀꍔꑠꇥꀯꁱꂘꁥꃘꃢꀞꀐ,ꐯꇯꇩꏤꑭꊂꍔꑠꊈꑼ1700ꎖꑹꃢꌋꆀꋍꑞꋍꊐꌠꍔꑠꇥꀯ1600ꎖꑹꇫꐊꈽꀐ。

  ꇩꈐꇩꉈꃅꒊꃅꇁꌷꎥꌠꌋꆀꄜꉺꉙꂘꌠꊋꀥꇱ,ꏓꂱꍔꑠꇬꐊꌠꄈꀾꏓꉻꌋꆀꊿꋅꈁꐥꌠꋍꑞꋍꁆꏯꊿꂒꋦꌠꄐꏁꄉ,ꉪꇩꏤꇿꋌꐥꃅꇩꏹꎆꒉꎆꇁꎒꐡꄜꎟꌠꏭꊝꌠ、ꀉꒉꃅꋌꐛꉮꌸꌠꏭꊋꌠ、ꎮꉰꋧꃅꄉꀨꃀꌋꆀꇨꍏꑸꒀꉼꀞꊋꐛꑠꌤꐘꌋꆀꃅꈧꀉꒉꀊꂾꅉꇬꄉ,ꃹꅼꃅꍏꇩꇭꍣꄈꆹꍏꇩꐛꐨꐧꋦꉪꏦꌤꑘꏲꂠꈯꄜꀉꇨꌠꉬꌠꌧꐚ,ꋒꐯꋒꃅꐧꋦꉪꏦꄹꏦꊋꏓꄉꌤꀉꒉꌠꀞꄻꌠꀉꒉꃅꂱꅑꐨꊨꄅꄉ,ꃶꐚꃅꄈꌋꆀꇩꏤꃛꊸꐨꋍꑞꋍꑵꇬꊝ、ꄺꀱꀻꎆꑘꒃꌠꋍꑞꋍꐘꌤꃅꋒꌠꎁꃅꐯꇯꉪꐨꏓꋧ,ꀉꇨꃅꊋꃤꏓꇯ。

  ꉪꆏ《ꍏꇭꍏꑷꏓꂱꍔꑠꌤꃅꌠꊋꀥꇱꃆꂮꉜꐨ》ꃄꌬꐛꐪꏓꇯꍤꄻꌠꌋꆀꊋꀥꇱꄉꉪꇐꌧꇗꋈꄻꌠꍔꆙꌠꊜꋽꃅꏓꐯꇯꎼꇁ。ꍏꇭꍏꑷꈌꁧꄉ,ꇩꏤꑭꊂꍔꑠꆹꊋꃤꊥꇫꌊꌜꐎꏃ6ꂷꇬꄉꎹꎥꍤꄻꄉ,ꑋꇖꃀ13ꃢꈿ,ꃅꄷꈧꌠꇬꏣꀋꑌꃅꑴꅉꍤꄻꌠꌋꆀꍞꍤꌠꍔꂵ,《ꉜꐨ》ꉌꊈꊇꅉꌋꆀꌧꇗꏀꀺꀉꒉꀊꂾꌠꄹꇙ,ꍏꇭꍏꑷꃅꒊꃅꇁꀊꏀꌠꃆꂮꇂꃴꍔꑠꌤꃅꌠꀑꐱꄐꇺꌠꏭꃹꅼꃅꌧꐚꌋꆀꌭꈬ。ꉬꈎꅑꅸꇁꌠꃄꄻꅉꄉꊩꀽꇬ,《ꉜꐨ》ꃄꌬꇫꑟꌠꆹꍏꇩꇭꍣꄈꏓꂱꍔꑠꏭꏲꂠꌠꊋꀥꇱꌋꆀꄻꐛꒆ,ꍏꇩꐛꐨꐧꋦꉪꏦꋯꁦꍔꍞꋈꄻꌠꄹꎆ,“ꄈꊈꉜꁨ、ꍔꃚꊋꁈꄏ、ꍔꑠꑴꇙ、ꌤꏲꅉꐊꃅ、ꐧꋦꇫꉈꇬ”ꌠꏓꂱꍔꑠꌤꑘꀻꎆꌠꌄꆣꐛꐪꇬꀉꇨꃅꀻꎆꌠꏭ,ꂿꄐꀋꂿꑘꃅꋊꇤꅐꇁꀐ。ꏓꇯꍤꄻꌠꇬꈴꄉ,ꀒꁨꋍꁘꃅꈁꐥꊐꌠꍔꑠꎀꍹꌋꆀꍔꑠꊈꑼꋍꏅꌠꁧꀿꊋꃤꌋꆀꁨꆹꇘꊋꄕꊪꀐ,ꏟꈯꃅꍏꇩꇭꍣꄈꏲꂠꌠꄈꀉꑌꂷꃅꇷꃅꌠꌋꆀꍔꍞꋮꒉꄹꏦꌭꈬꇬꎷ、ꍏꇩꐛꐨꐧꋦꉪꏦꍔꍞꀻꎆꈝꃀꍬꌠꑴꐚꐨ、ꀋꎪꐨꀉꇨꃅꁦꎆꀐ。

  (ꑍ)“ꊰꑋꉬ”ꄐꎖꌠꁰꄻꌠꌋꆀꎆꏣꎍꐽꃅꊼꇅꐳꃅꀻꎆꇬꎷꌠꆼꒆꄉ,ꃹꅼꃅꋮꒉꏱꇖꌠꍔꂵ 

  ꏟꈯꃅꄈꌋꆀꇩꏤꈯꄜꌤꃅꌠꋮꒉꏱꇖꌠꆼꒆꄉ,ꏓꂱꍔꑠꉆꈉꊨꄅꄉꌠꄜꅐꇁꀐ,ꏓꂱꍔꑠꐋꀋꌡꌠꂱꎆꅑꐨꄜꎼꇁꀐ。ꎮꊈꉼꆏ“ꊰꑋꉬ”ꄐꎖꌠꁰꄻꄉꏡꁈꏁꁈꅐꌞꌠꌌꀨꄉꌤꃅꐘꃅꄉ,ꋯꁦꄈꀾꈁꐥꌠ、ꌐꁨꊈꑼꉼ、ꃅꄷꍔꑠꑠꊋꃤꏓꇲꄉ,ꅇꀨꌐꄉꎹꎥ、ꍤꎖꍤꆫ、ꃀꀉꒉꈿꅉꅇꉉ、ꊈꑼꄜꑘꑠꃄꄟꏁꌬꄉ,ꄐꎖꁰꄻꌠꀋꉬꀋꉆꊬꌠꌋꆀꊨꊭꀋꉬꀋꉆꅉꇬꄉ,ꏓꇱꃅꏱꇖꅇꉉꄉ,ꊌꐨꈲꁧꏣꀋꑌꃅꐥꀐ。ꇩꏤꑭꊂꍔꑠꃀꊯꊪꈭꌕꃢꌠꈿꄮꇬ,ꊈꑼꊈꆹ“ꊰꑋꉬ”ꄐꎖꏤꄻꅉꇬꆼꒆꄉꃹꅼꃅꇕꄟꇈ,ꄚꃆꂮꐥꌠꄜꑘꌋꆀꃀꀉꒉꈿꅉꅇꉉꌠ650ꎖꐘꏮꎼꇁ。ꃀꈿꊂꇩꈐꈉꐨꍔꐯ、ꈆꑪꇮꇐꏀꀺꊋꃤꀉꇨꃅꁦꎆ、ꃄꀑꃅꑊꐛꐈꌠꏭꊝꌠꌋꆀꒆꉻꌧꑳꋈꄻ、ꃄꁕꎆꀨꋮꄮꃅꀻꎆꌠꊥꎆ、ꎿꃀꎆꏣꀻꎆ、ꋮꄮꃅꇓꈓꈴꌠꌋꆀꂿꑘꁡꇤꀊꏀꋈꄻꌠꄹꎆ、ꁬꋌꁦꎴꆄꄻꏦꉻꄺꀱꌠꌋꆀꊌꐨꁷꎸꏦꉻꄺꀱꌠꄹꎆꑠꌐꄉꀋꂿ꒧ꌠ16ꏢꌠꇬꆼꒆꄉ,ꊥꇫꄉꎹꎥꍤꆫꌠꍔꂵꇈ,ꉜꐨꇖꐨꀋꂿꑘꈨꐛꀐ。ꅇꀨꌐꄉꏱꇖꃅꐙꌠꎮꊈꃀꌋꆀ“ꊋꇤꄉꈏꇓꈉꐨꍔꐯ,ꀻꎆꄟꆹꏮꌠꊥꎆ”ꌠꌐꄉꋮꒉꃀꈿꄉ,《ꇩꏤꑭꊂꍔꑠꄈꊤꇩꂱꎆꏣꌋꆀꐧꋦꀻꎆꌠꊰꑋꊭꉬꈎꃅꄐꎖꌠꁰꄻꃆꂮꇖꐨꀉꑌꈨ》ꌞꄜꇈ,ꍏꇭꍏꑷ、ꇩꃷꑼꀊꂥꃅꇫꉜꁨ。ꍏꇭꃀꊰꏁꈭꉬꃢꐊꈴꃅꈿꌐꈭꐨ,ꉪꊇꋋꇅꃅꎮꊈꉼꃀꈿꄉ,ꐊꈴꃀꈿꉌꊈꌶꄻꃄꌬꇈꐪꊛꄉꄐꎖꌠꁰꌠꏭꅇꉉꁈꌞꄉꄐꇺꀐ。

  ꏓꂱꍔꑠꆹ“ꊰꑋꉬ”ꄐꎖꌠꁰꄻꌠꏭꅇꉉꁈꌞꌠꈴꎁꇬ,ꋯꁦꍔꆙ、ꉪꏓꏢꋧ、ꈆꑪꃅꏤꇽꌠꄹꇙꌠꊋꐛꃅꃄꄻ,ꃅꐛꐨꀉꇨꐯꀉꇨꃅꐥꀐ。ꊈꑼꊈꄜꎼꇁꌠ“ꊰꑋꉬ”ꊬꌠꇬꐳꃅꎆꏣꀻꎆꃄꄟꆹꏮꌠꌌꑟꀨꏡꌠꃅꄉ、ꊋꒉꃅꎆꏣꐛꉻꋊꄻꌠꌌꐊꇐꀋꉬꀋꉆꌠꃅꄉꌠꑠꇖꐨꆹ,ꄐꎖꌠꁰꄻꌠꇬꉜꉚꅍꇲꁵꈲꁧꐥꀐ。ꊋꀥꇱꄉꄐꇐꏤꁈꃅꐙꌠꏀꄓꅐꑘꊥꇫꏲꂠ、ꏓꇲꄐꎖ、ꌧꊿꊋꁈꄏ、ꏦꉻꉺꏦꏀꀺꑠꃆꂮꇖꐨꀋꂿꑘꌠꆏ,ꇫꉜꁨꌋꆀꌌꌬꀐ;ꇊꃀꇴꃴꑊꁦꎴꊋꀦꐛꅉꋈꄻꌋꆀꑊꃴꇑꑘꀻꎆꑠꃆꂮꇖꐨꆹ,ꉪꇩꏤꊋꇁꀦꐛꉻꋊꄻꌋꆀꒆꉻꌧꑳꋈꄻꌠꇬꄹꇙꀐ;ꎭꄏꁁꅔꐛꃴꎆꏣꃄꁕꋈꄻꌠꊐꐕꌊꇩꏤꀻꎆꌠꄐꇐꏤꁈꃅꄉ,ꐳꃅꎿꋮꁮꐚꁁꏯꎆꏣꃄꁕꌋꆀꍏꑼꎆꏣꃄꁕꋈꄻ,ꒊꆈꋈꄻꌊꉪꇩꏤꑾꌋꈤꇬꉇꉻꏭꁉꃑꌠꐇꄬꀧꐛꑠꄚꃆꂮꐥꌠꇖꐨꆏ,ꇩꏤꃄꁕꀻꎆꄐꇐꏤꁈꄐꉻꄹꎆꐛꒆꌠꎁꃅꊫꌐꀋꂿꑘꌠꇲꁵꀐ;ꐳꃅꃀꌠꀨꎹꄜꏂꀧꉻꑫ、ꁧꃤꃅꉻꑫꌋꆀꃀꌠꅐꑘꀻꎆꉻꑫꋈꄻꃆꂮꆏ,ꏣꀋꑌꃅꈎꄜꀉꒉꈴꌠꏭꊝꌠꎁꃅꉜꐨꀋꂿꑘꌠꇲꁵꀐ;ꃅꋮꋈꄻꌠꌋꆀꃅꋮꐏꏲꌠꏦꉻꋊꎵꑠꃆꂮꉜꐨꆏ,ꄚꃆꂮꐥꌠꌤꃆꂥꀘꌠꇬꊥꎆꀐ;“ꁱꃆꌬꇐꇖꑵ”ꌠꑠꋊꃅꁱꀕꅐꑘꃆꂮꀧꌋꃅꌋꆀꀻꎆ,ꁰꄟꌌꐧꐭꌶꅉꃹꌠꄹꇙꑠꃆꂮꉜꐨꀋꂿꑘꌠꆏ,ꍏꇭꍏꑷ、ꇩꃷꑼꇫꉜꁨꌋꆀꐧꋦꀊꐯꈭꃅꇫꉈꇬꀐ。

  ꊋꀥꇱꄉꉻꒉꎆꏣꏭꌬꃆꂮꇬꑖꑟꃅꊂꈹꄉꉜꌋꆀꇘꄟꎥꃪ,ꎆꏣꎍꐽꊼꇅꐳꃅꀻꎆꇬꎷ、ꎆꏣꐛꉻꋊꄻꌋꆀꅐꂋꂴꄐꄉꌠꏲꂠꌠ,ꉻꒉꎆꏣꃅꒊꃅꇁꎥꃪꃀ、ꌐꄉꑋꇖꃀꌋꆀꎆꒉꎆꇁꏓꄉꌧꁈꌠꃀ12ꃢꈿꀐ。ꊈꑼꊈꆏꏦꉻꉺꏦꄻꐛꒆ,ꊋꀥꇱꄉꏱꎆꏱꁈ、ꎆꃀꏱꁈ、ꃄꁕꏱꁈ、ꅐꑘꏱꁈꌋꆀꋦꈭꏱꁈꋮꄮꐊꃅꄉ,ꉻꒉꋎꍅꉻꄜꏓꊋꄻꐛ,ꋎꍅꄐꌐꐨꐥ、ꍄꑐꐨꐥꌋꆀꇿꋌꐥꑠꉜꐨꇖꐨꄜꎼꇁꇈ,ꇩꏹꎆꒉꎆꇁꎒꐡꄜꎟꌠꇬꊝꌠꃅꐛꐨꈫꈈꌋꆀꍔꒉ、ꎆꏣꎍꐽꊼꇅꐳꃅꀻꎆꇬꎷꌠꎁꃅꉜꐨꈲꁧꐥꌠꇲꁵꀐ。

  (ꌕ)ꉹꁌꐥꐨꏦꀧꌠꌋꆀꄻꃪꌠꆼꒆꄉ,ꏣꀋꑌꃅꄈꌋꆀꍔꃚꇇꀨꄉꉹꁌꐒꋊꎭꇔ

  ꉹꁌꐥꐨꃆꂮꆹꀋꂿꑘꌠꎆꏣꌤꃆ、ꐧꋦꌤꃆꀉꄂꀋꉬꃅ,ꉈꑴꀉꒉꀊꂾꌠꍔꍞꌤꃆꑌꉬ。ꉪꊇꆏꊿꌌꀨꇬꄉ、ꌤꃅꇬꉹꁌꎁꃅꀕꌠꉪꉻꑌꄉ,ꍔꑠꊈꑼꊋꊡꄐꏁꄉꃹꅼꃅꃶꐚꅉꇬꒉ、ꃹꅼꃅꅉꂫꊐꌠꒉ、ꃹꅼꃅꉹꁌꈬꇬꒉ,ꉹꁌꈲꌠꌤꀞ、ꉹꁌꌣꈚꏓꂱꐥꌒꌠꏱꁈꌞꅐꌠꌭꈬꇬꎷ。ꐳꃅꏦꀧꐨꐥꌠꀀꑳꋉꃆꋈꄻ、ꋭꑘꂘꑘꐽꏡꃅꀻꎆꌠꄹꎆ、ꋠꇐꊇꁧꌋꆀꋬꂻꃆꂮꂥꀘ、ꇓꈓꇓꉈꆅꉚꆄꄻꄜꏂꀧꄹꏦꏓꇲꌋꆀꂿꑘꁡꇤꁦꎴꆄꄻꌧꊿꁱꂘꌋꆀꋬꈭꏱꁈꑠꉹꁌꐥꐨꀨꎍꌠꌤꃆꇬꆼꒆꄉ,ꎥꃪꍤꆫꌠꌋꆀꋮꒉꏱꇖꌠꍔꂵ。ꄜꎼꇁꌠꀀꑳꏦꀧꏦꃤꏦꇗꌋꆀꏦꉻꉺꏦꄻꐛꒆ,ꊇꁧꉾꌠꂘꑘ、ꆅꉂꀦꋭꋽꃅꁆꁵꄉꐯꇯꈲꌠꄹꇙ,ꋠꇐꉮꀋꐥꉌꒊꉻꑫꌋꆀꆽꎍꉻꑫꄻꐛꒆ,ꋬꂻꒃꅐꌠꌋꆀꃅꑘꉮꌸꌠꄴꏮ,ꂿꑘꇮꃅꌠ、ꊾꄣꅐꌠꎞꆏꇮꃅꊿꌋꆀꇩꏤꎆꏂꑘꄹꏦꄺꀱꇮꃅꊿꌅꈌꈲꁧꏦꊒꀧꌋꃅꌠꑠꉜꐨꇖꐨꆹ,ꇫꉜꁨꌋꆀꌌꌬꀐ。ꋍꑞꋍꁆꏯꊈꑼꊥꇫꌊꃅꋮꃅꄷꉹꁌꌢꎭꌢꁧꌠꒃꅐꐥꐨꃆꂮꍤꆫꄉ,ꂘꑘ、ꈆꑪꇮꇐ、ꁬꋌꁦꎴꆄꄻ“ꌕꑵꀁꋌꌞ”ꃅꈧꌠꌋꆀꀑꁮꎭꄏ、ꅐꑘꎭꄏꌋꆀꈆꑪꇮꇐꎭꄏꌠꄹꇙꌠꏓꇯꄉ,ꉹꁌꇇꀨꄉꎭꇔꈚꇁꎻ。

  ꑓꏮꑾꌋꈤꃅꄷꃅꇨꌠꌋꆀꌜꋍꈨꋋꈨꒉꉮꌸ、ꏾꉰꒄꌡꀉꇨꃅꃄꇙꌠꌋꆀꇤꌡꍏꐏꀋꇰꀋꉈꃅꃄꐡꊖꑳꌠꑠꋌꐛꉮꌸꀉꒉꀊꂾꌠꇬꉜꄉ,ꍔꑠꈁꐥꊐꌠꎀꍹꌋꆀꍔꑠꊈꑼꋍꏅꌠꃛꊸꃅꀕ,ꊋꈀꉬꃅꇤꉮꄙꉮꈭꋏꌠꉈꈽ。ꋍꈨꆏꇤꇁꉮꌸꃅꄷꊐꄉ,ꐂꇁꂴꄉꊋꇤꈭꋏꇇꀨꌠꃅ;ꋍꈨꆏꃅꇏꂄꃅꄉꎆꅐ,ꂱꑱꐤꅉꌤꃅꅉꌋꆀꁆꏯꉹꁌꊥꇫꌊꎆꆳꎊꈬꅐ;ꋍꈨꆏꃹꅼꃅꒉꌊꉮꌸꃅꄷꍤꄻꎥꃪꄉ,ꉮꌸꊂꋈꄻꀱꌠꎁꃅꈬꉩꑳꉩꄉꏁꁈꌞ;ꃆꃀꋽꇐꁁꏯ、ꆅꉚꁦꎴꁁꏯꌋꆀꁱꑴꌧꃀꏣꀋꑌꃅꑖꉬꄜꈧ、ꑖꉬꆅꉚꌋꆀꑖꉬꃷꄉ,ꉮꌸꃅꄷꉹꁌꎁꃅꉂꐪꌞꄉ,ꐯꇯꄉꍏꉸꊿꋅꋯꑌꐊꃅ、ꃨꆰꄏꊋꋠꇇꀨ、ꉌꇬꇇꀨꌠꉌꐡꑵꃚꂢꀐ。

  ꏓꂱꍔꑠꄯꒉꁱꌊꅇꅲꇁꌠꌤꃅꌊꉾꌠꉜꁨ,ꊋꀥꇱꄉꊷꈌ、ꊋꋠꌠ、ꏍꈌꌤꃆꈴꌗꏓꎴꎥꃪꌋꆀꄺꂡꄜꌞ,ꐧꋦꃆꂮꉹꁌꉪꐨꈴꌗ92ꃢꁰꄜ,ꉹꁌꐥꐨꉹꌠꄜꑘ1700ꎖꐘꄜꎼꇁ,ꊈꑼꌋꆀꉹꁌꄯꒉꁱꌊꅇꅲꇁꌠ42000ꎖꐘꃢꊪꀞ、ꀞꄻ,ꄈꌋꆀꍔꃚꇇꀨꄉꐧꋦꃆꂮꉹꁌꉪꐨ、ꐮꄙꐮꏈꌠꋒꇔ、ꐧꋦꐮꄮꑘꒃꀧꌋꃅꌠꎁꃅꂿꄐꏣꀋꑌꃅꋊꇤꅐꇁꀐ。

  (ꇖ)ꊿꋅꋯꑌꌋꆀꑇꇐꐮꄮꊥꎆꌠꆼꒆꄉ,ꎔꎗꃅꊿꋅꑇꇐꏱꁈꃄꌬ

  ꊿꋅ、ꑇꇐꌤꃅꋒꌠꆹꊿꋅꋯꑌ、ꐧꋦꑘꒃ、ꇩꏤꏓꋍꃱꃅꌠꐮꃆꂮꐥ。ꉪꊇꆏꏟꈯꀕꃅꊿꋅꈁꐥꌠꐯꇯꋯꑌꊋꇤ、ꐯꇯꌄꆣꀻꎆꌠꈯꄜꒃꄉ,ꍔꑠꊈꑼꋍꏅꌠꊥꇫꄉꎔꎗꃅꍏꑷꑭꊗꌤꃅꑋꇖꃀꉬꃢꈿꌠ、ꍏꑷꑟꏦꌤꃅꑋꇖꃀꈿꌠꌋꆀꁮꐚꁁꏯꀉꒉꃅꀖꁉꌤꃅꃀꈿꌠꉌꊈꌶꌬ,ꃹꅼꃅꑭꊗꌤꃅꌠꌋꆀꑟꏦꌤꃅꌠꆹꄈꌋꆀꇩꏤꌤꃅꃅꇴꄉꉻꇬꐋꀋꌡꄐꇐꏤꁈꉆꈉꀋꂿꑘꃅꐥꌠꌧꐚ,ꃹꅼꃅꁮꐚꁁꏯꀉꒉꃅꀖꁉꌠꄐꇐꏤꁈꀋꂿꑘꐨꌋꆀꃛꊸꐨꃄꌬꌠꅼꃅꌧꐚ,ꃹꅼꃅꃅꒊꃅꇁꀊꏀꌠꇂꃴꊿꋅꌤꃅꌠꀊꅰꃅꀋꂿꑘꐨꐥꌠꌧꐚ,ꑴꐚꃅꄈꅿꊿꋅꌧꇗꌋꆀꏱꁈꌌꇬꇉꊐ、ꃄꄻꌠꄐꏁ、ꌤꃅꌠꄹꇙ。

  “‘ꊰꑋꉬ’ꄐꎖꏤꄻꋒꌠꒃꉇ,ꐳꃅꊿꋅꃅꄷꎆꏣꐧꋦꀻꎆ”ꌠꇖꃆꀉꒉꀊꂾꋌꐘꒃꄉ,ꃹꅼꃅꊿꋅꃅꄷꃅꋮꆹꏮꑣꋂꌋꆀꌢꎭꊋꋠꂿꑘꆫꑘꑱꁯꍤꄻꎥꃪꄉ,ꐳꃅꐯꅑꎍꌠꊿꋅꌢꎭꊋꋠꃅꄷꎭꇔꈚꇁ,ꃹꅼꃅꉹꁌꌣꈚꃅꋮꈫꈈꌠꄐꇐꏤꁈꃄꌬꌋꆀꇓꈓꈴꆹꎁꇬꊨꏦꏱꅉꍏꀻꎆꄹꇙꑠꇖꐨꀋꂿꑘꌠꄜꎼꇁꄉ,ꊿꋅꃅꄷꏱꁈꄻꐛꒆꌠꎁꃅꈲꏣꐥꌠꉜꉚꌠꇲꁵꀐ。ꊿꋅꌤꃅꏱꁕꐛꃆꀊꏀꌤꃆꀊꏀꌠꆼꒆꄉ,ꇓꈓꄉꊋꃅꃼꇇꃅꌠꀁꑌꊿꋅꉹꁌꁧꃤꃅꌠꏲꂠ、ꊿꋅꃅꄷꏦꇜꌋꆀꏦꍤꏦꇜꌤꃅꊿꁥꌠꀋꇎꀋꂪꅉꌌꌐꄉꍤꄻꎥꃪꌠꃅ,ꏣꀋꑌꃅ《ꇓꈓꊿꋅꌤꃅꃷꋪ》ꄺꀱꌤꃅꌠꄹꇙ。“ꑇꇐꌶꅉꂘꑘꌋꆀꑇꇐꌧꊿꉘꉚꃆꂮ”ꊥꇫꄉꎥꃪꉉꈻ,《ꑇꇐꌤꃆꃷꋪ》ꃄꌬꉬꈎꅑꅸꇁꌠꃄꌬꃆꂮꌌꋯꁦꍞꊟꌠꃄꌬꇫꑟ,《ꃷꋪ》ꋬꈭꇗꏦꄻꐛꒆ、ꏦꌬꀨꄜꌋꆀꏦꌬꉺꏦꄻꐛꒆꑠꀋꂿꑘꇖꐨꄜꎼꇁꄉ,ꇫꉜꁨꌋꆀꌌꌬꀐ。ꊈꑼꊥꇫꌊꍤꆫꍤꎖ、ꅲꇫꉜꄻ、ꀁꑌꊿꋅꋩꑍꌋꆀꑇꇐꋩꑍꃅꈧꅉꇬꃅꈽꌠꇬꈴꄉ,ꑇꇐꏓꉻꏲꊿ、ꊿꋅꁧꎁꊿꂒꋦꌠꌋꆀꀁꑌꊿꋅꉹꁌꐮꑌꑲꌠꊋꀥꇱ。ꀁꑌꊿꋅꁆꏯꌋꆀꑇꇐꁆꏯꊈꑼꑴꇙꃅꃹꅼꃅꀁꑌꊿꋅꉹꁌꌋꆀꑇꇐꑇꌠꉹꁌꏭꄈꅿꊿꋅꑇꇐꌋꆀꏱꁈꄜꉺꉉꈻꌠꃅꇈ,ꊿꋅꋯꑌꌋꆀꑇꇐꐮꄮꌠꎁꃅꑆꊋꅐꌞ。ꍏꇩꑇꇐꁆꏯꄮꐽꊈꑼꉼꑇꇐꏓꉻꀉꒉꉬꂷꊥꇫꌊ,ꐯꇯꄉꎮꉰꋧꃅꄉꀨꃀꊋꐛꃅꀞꄻꌠꎁꃅꌒꀘ,ꐧꋦꑌꑲꐨꉾꃪꃅꐥꀐ。

  (ꉬ)ꍏꉸꊿꋅꇰꀋ꒜ꃅꀱꏀꄓꇁꌠꉌꏓꊋꋧꌠꆼꒆꄉ,ꃶꐚꃅꋯꑌꐮꑌꑲꌠꊋꀥꇱ

  ꉪꊇꆏꋒꐯꋒꃅꏓꂱꍔꑠꀊꐯꃅꐮꑌꑲꌠꂱꎆꅑꐨꋊꇤ,ꑣꇤꃺꑌ、ꉪꂱꃺꑌ、ꄠꃪꃺꑌꌋꆀꎿꉈꉸꊿꃺꑌꌋꆀꐮꑌꑲꌠꍔꐯ。ꏣꀋꑌꃅꑋꇖ꒜、ꐛꐪꄜꈴ꒜、ꍤꄻꄨꑠꃅꈧꌠꊥꇫꄉ,ꇤꉪꊈꑼꇇꀨꄉꐛꐪꅉꐚꏲꑘꊨꄅ、ꆽꎍꄉꅍꃄꌬ。“ꍏꇩꎆꏣꀻꎆꃄꄟꆹꏮ·ꊜꋽꄮꌋꆀꋓꎭꐨ”ꎥꇖ꒜ꈿꑠꇬꈴꄉ,ꉪꂱꁱꀕꅐꑘꀻꎆꌠꌐꄉꍤꎥꌠꃅ,ꅔꈐꎆꏣꋈꄻꌋꆀꇤꉪꎆꏣꆹꏮꊐꐕꌠꎁꃅꁈꏂꁈꇭ。ꀊꂥꃅꇤꉪꊈꑼꑣꇤ、ꉪꂱꎆꏣ、ꍔꍞꌋꆀꐧꋦꌤꃆꇬꂿꄐꋊꇤꌠꉜꁨ,ꑣꇤꍏꉸꏓꇱꃼꇇꉼꄻ110ꈎꈭꏝꐛꌠꋨꏦ꒜ꈿꈽ,ꑣꇤꐮꉁꅉꋮꄮ꒜ꈿ、ꉪꂱꏓꇱꃼꇇꉼꋍꑠꀞꄻꄉꌠꃅꈧꌠꇬꐊꄉ,ꀒꁨꋍꁘꃅꊋꀥꇱꄉꇤꉪꀋꂿ꒧ꌠꍔꍞꏓꉻ、ꐧꋦꏓꉻꌋꆀꁧꎁꊿꂒꋦꌠꌋꆀꐮꑌꑲ,ꇩꉂꇤꉂ、ꇩꉂꉪꉂꊋꃤꀉꇨꇁꌠꀻꎆ。

  ꄠꃪꄚꃆꂮꐥꌠꄈꀾꌋꆀꄈꀾꀋꐊꊿꂒꋦꌠꏓꐛꄉꌠ“ꄠꃪꉹꁌꉪꐪꁧꎁꑌꑲꅲꇫꄨ”ꁨꌊꀙꏢꅲꇫꇁ,ꉘꃀꃢꌠꍔꑠꊈꑼꐮꉂꑌꑲ꒜ꂒꉻꃅꄉꄨꏓꄻꄉꄠꃪꄉꐮꑌꑲꌠꃅꁧꄉ,ꍔꑠꊈꑼꌋꆀꄠꃪꉹꁌꉪꐨꁧꎁꐮꑌꑲꌠꈭꈜꀊꏀꌠꎹꈹꄉꀐ。ꋒꐯꋒꃅꉼꇊꁱꀕ、ꁱꀕꐩꋊꌬꇐ、ꏢꈈꑫꉙꃚ、ꑴꁱꋽꇐ、ꑇꇐꐮꈴꌠꌋꆀꉸꁌꉌꊈꑠꋒꇢꈻꏣꂿꄐꇤꅐꇁꄉ,ꍏꉸꁱꀕꌌꐮꈴꌠꆹꍏꉸꌺꇖꐮꋯꑌꌠꌋꆀꍏꉸꊿꋅꃅꏚꍆꌠꊥꎆꀐ。ꋒꐯꋒꃅꎮꉰꋧꃅꄉꀨꃀ、ꇨꍏꑸꒀꉼꌋꆀ꒔ꑞ꒔ꑵꎿꑍꋮꐮꈴꇷꃅꅉꑠꇬꈴꄉ,ꏣꀋꑌꃅꄠꃪꏭꑌꑲꇷꃅꌠꃅꈧ,ꉂꏣꄻꅼ、ꉜꐮꐮꐊꌠꍔꐯ。

  ꊋꐛꃅ“ꎿꉈꃺꑌꁨꌊꇩꏤꑭꊂꍔꑠꐊꈴ꒜ꈿꈽ10ꈎꈭꏝꐛ”ꎺꄅꃅꈧꌠꀞꄻ,ꎔꎗꃅꎿꉈꃺꑌꋯꑌꄉꂿꄐꇤꅐꇁꌠꎖꋪꏓꇯ。ꎿꉈꃺꑌꁧꎁꊿꂒꋦꌠꁨꌊꇩꏤꑭꊂꍔꑠꊯꊪꈭꌕꃢ꒜ꈿꈽꇁ,ꎿꉈꃺꑌꇬꌧꃀꌧꌺꊥꇫꌊ“ꊰꑋꉬ”ꄐꎖꌠꎁꃅꅇꉉꁈꌞ。ꊋꀥꇱꄉꎿꉈꌋꆀꐧꋦꏓꉻꌋꆀꐮꑌꑲꒈꇁ,ꀨꄉꀊꏀꋎꌠꎿꉈꃺꑌꏭꑌꑲꉂꏣꎹꌠꃅ,ꏣꀋꑌꃅꀁꑌꊿꋅꎿꉈꃺꑌꌤꃅꈧ,ꀋꆏꃅꏓꂱꍔꑠꎿꉈꌤꃅꌠꀊꏀꌠꀹꄻ。

  (ꃘ)ꉪꇩꏤꀻꎆꌠꎁꃅꉇꉻꋦꈭꉾꃪꌠꀹꄻꌠꆽꒆꄉ,ꏣꀋꑌꃅꉇꉻꏭꑌꑲꇷꃅꌠꀹꄻ

  ꏓꂱꍔꑠꆹꉪꇩꏤꏓꂱꌋꆀꋧꃅꇩꏤꈁꐥꌠꏓꂱꉂꏣꊥꎆꌠꋒꇢꀋꂿꑘꌠꉬ。ꎮꊈꉼꆹꏟꈯꃅꇩꏤꉻꄜꉇꉻꑌꑲꌠꌐꏦꌭꈬꇬꎷꄉ,ꇩꏤꑭꊂꍔꑠꌋꆀꉇꄅꇩꏤꄚꃆꂮꐥꌠꏲꉻꌋꆀꎀꍹꏭꑌꑲꒈꇁꌠꍔꒉ,ꎔꎗꃅꀊꂥꊐꌠꐮꅲꇫꌠꊥꇫ,ꎆꏣꃼꇇ、ꊋꀦ、ꈆꑪꇮꇐ、ꁱꀕꑠꀋꂿ꒧ꁁꏯꃅꊌꐨꐥꃅꇷꃅꌠꄹꇙ,ꉪꇩꏤꌋꆀꄚꃆꂮꐥꌠꇩꏤꇬꍔꍞꐮꉌꒊ、ꋊꃅꐮꉁꅉꌠꃹꅼꈴ。ꊋꐛꃅ“ꃅꒊꃅꇁꀊꏀ、ꉪꉻꀊꏀ、ꋓꐨꀊꏀ——ꇷꃅꐯꇯꈲꊌꈝꂾꎹꈹ”ꌠꌌꅇꀨꃅꄉꌠ“ꃅꋊ21ꋏꉉꍣꅉ”2010ꈎ꒜ꈿꌠꀞꄻ,ꇩꏤꍗꑮꃛꏢꄧꉌꌒꋩꅇꄯꒉꃑꌌꇁ,ꋧꃅꇩꏤꀉꑌꂷꇬꄉꇁꌠꂓꅑꌠꍔꍞꌧꃀ、ꌐꌷꌧꃀꌧꌺꌋꆀꎆꏂ꒧ꁆꏯꊿꂒꋦꌠꆹ,ꅉꆺꃅꄺꂡ、ꃄꀑꃅꑊꐛꐈꌠꏭꊝꌋꆀꍏꇩꌋꆀꋧꃅꐮꃆꂮꃅꋮꇖꅇꀨꀉꒉꀊꂾꌠꆼꒆꄉ,ꃹꅼꃅꋮꒉꐮꑌꑲꄉ,ꉜꐨꐯꌟꀋꂿ꒧ꌠꀉꑌꈨꄻꐛꄉꀐ。ꃀꈿꅉꆏꉪꇩꏤꄮꐽꀻꎆꉪꉻꌋꆀꏱꁈꑭꋧꃅꉉꀽꌠꇬꈴꄉ,ꋧꃅꏭꍏꇩꆏꐪꊛꄉꋧꃅꇩꏤꈧꌠꌋꆀꊋꀥꇱꄉꐮꉾꇷꃅ、ꐯꇯꀻꎆꊜꋽꄮꊌꎻ、ꐯꇯꋓꎭꌠꊝꄎꌠꉆꈉꊨꄅꃱꉻꃅꉉꄜꀐ。“ꃅꋊ21ꋏꌠꉉꍣꅉ”ꆏꏓꂱꍔꑠꀉꑌꁁꏯꃅꑌꑲ、ꊋꀥꇱꄉꇩꏹꑌꑲꇷꃅꌠꀋꂿꑘꅉꐛꀐ。ꎮꉰꋧꃅꄉꀨꃀꊋꐛꃅꀞꄻꌠꊜꋽꄮꀉꒉꀊꂾꌠꈴꄉ,ꏣꀋꑌꃅꏓꂱꍔꑠꋍꏅꉇꉻꌧꇗꎥꃪꌋꆀꃄꄻꌠꄹꎆ。《ꋍꏅꉇꉻꑌꑲꋍꄮꐰꋍꋐꅐꌠ》ꀞꄻ,ꋍꏅꉇꉻꑌꑲꉻꏑꍤꎥꌠꃅ,ꇩꏤꑭꊂꌜꐎꏃꈧꌠꍔꑠꉇꉻꌤꃅꌠꑌꑲꃀꈿ,ꋍꏅꉇꉻꑌꑲꌐꄉꅇꄜꌠꀞꄻ,ꏐꌧꆃꀠꑴꉻꏐꍏꑦꊤꋧꃅꄉꀨꍏꇩꅲꇫꄨꁨꌊꑭꊗꅲꇫꆹ,ꉇꉻꌤꃆꉇꅐꅲꇫꌠꌋꆀꅲꇫꅱꄻꃅꈧꌠꇬꑭꊗꃆꂮꑠꉪꇩꏤꈯꄜꈲꏣꃆꂮꌌꉇꄅꇩꏤꋍꑞꋍꁆꏯꊿꂒꋦꌠꌋꆀꐮꑌꑲꅇꉉꐮꇰꌠꊋꀥꇱꄉ,ꋧꃅꁳꇯꍝꃶꐚꌠꍏꇩꌧꋒꌠꊥꎆ,ꀒꁨꋍꁘꃅꐮꅉꐚꇁ、ꐮꉪꄅꌠꋊꇤꇧꎭ、ꉪꑽꌠꋊꄻꇧꎭ。

  ꍔꑠꇣꋲꐋꀋꌡꃅꑌꑲꅉꂿꄐꋊꇤꌠꉜꁨ,ꏣꀋꑌꃅꀉꑌꁁꏯꃅꐮꑌꑲꌠꇬꐊꈽ,ꍏꇩꇷꃅ、ꁉꃑ、ꋯꁦ、ꀻꎆꌠꐛꑊꌌꊿꀦ。ꍏꇩꎆꏣꐧꋦꅿꌧꉼꌋꆀꉩꃀꎆꏣꐧꋦꊈꑼꉼꌋꆀꇷꃅꄉ,ꊋꐛꃅꍏꉩꋍꈚꑌꄉꃀꈿꌠꃀꏃꃢ、ꉆꃢꌠꈿꄉ,ꒉꅐꀦꌫꄻ、ꀊꉘꀧꌋꃅ、ꃅꑘꊌꌋꆀꊿꎞꀉꁁꀀꁧꌠꌤꃆꑠꀂꏽꌧꐨꐯꌟꌠꊌꅜ。ꍏꇩꑇꇐꁆꏯꄮꐽꊈꑼꉼꆏꊋꐛꃅꑸꍏꑇꇐꄮꐽꃀ2010ꈎꋋꈓꃄꌬꊈꑼꉼꃀꈿꌠꊪꀞꄉ,ꏣꀋꑌꃅꌧꑳꐯꀋꌡꌠꅇꉉꐮꇰꌠꌋꆀꑇꇐꐂꄉꐮꅉꐚ、ꐮꑌꑲꄉ,ꏣꀋꑌꌠꊌꐨꊌꅜꀐ。

  (ꏃ)ꏓꂱꍔꑠꌤꃅꈆꑪꈴꑟꐨꉀꐕꌠꆼꒆꄉ,ꊋꒉꃅꅉꀕꃅꐙꌠꌤꃅꏀꀺꌠꄹꎆ

  ꏀꀺꌠꆹꌤꃅꄹꎆ、ꌤꑘꀻꎆꌠꇙꊋꇁꀦꉬ。ꎮꊈꉼꆏꄺꀱꂠꀱꀬ、ꏀꀺꀬꌠꉪꉻꑌꄉ,ꑓꏮꊋꀥꇱꄉꄹꏦꈴ、ꐛꏦꈴ、ꈭꎁꑌꑲꌠꋈꄻ,ꅉꀕꃅꐙꌠꌤꃅꌠꇬꏀꀺ,ꈁꉬꌤꃅꑟꐨꉀꐕꌠꄹꇙ。ꃘꃢꌠꄜꑘꌤꃅꑋꇖꃀꈿꄉ,ꄜꑘꌤꃅꎖꋪꐮꈴꌠꏓꊭ,ꄜꑘꌤꃅꃷꋪꄺꀱ,ꄜꑘꌋꌠꌋꆀꀞꄻꊨꊭꊋꇨꇱ,ꊋꒉꃅꄜꑘꄇꄜꋊꐨꊋꇨꇱꄉ,ꄜꑘꌤꃅꋮꄮꐮꐊꌠꈆꑪꉺꏦꄻꐛꒆ,ꊋꑌꃅꃅꒊꃅꇁꀊꏀꌠꇂꃴꄜꑘꌤꃅꌠꊌꐨꈲꁧꉀꐕꀐ。ꌐꄉꍤꎥꌠꌋꆀꍤꆫꍤꉚꌤꃅꌠꄻꃪ,ꊋꀥꇱꄉꄜꑘꌋꄉꌠꎥꃪꉉꊪꌠꃅ,ꊿꁥꌠꈁꉬꃅꃪꈴꌠꇬꉜꁨ,ꊈꑼꇫꐊꈽꐨꍔꒉ,ꏓꇱꄉꀉꑌꑵꃅꎥꃪꌠꏡꁈꌌꌬꄉ,ꏱꁈꇖꐨꄐꌐꐨꌋꆀꃶꐚꈲꁧꊌꐨꀉꇨꇁꎻ。ꄈꀾꏓꉻ、ꌐꁨꊈꑼꉼꌋꆀꃅꄷꍔꑠꋮꄮꐮꇙꌠꊋꀥꇱ,ꊋꀥꇱꄉꈴꌗꀨꄉꌠꉹꁸꄉꏓꄻ、ꏓꇱꎥꃪꌠꌋꆀꏓꄻꄉꌞꄜ,ꄈꌋꆀꍔꃚꇇꀨꄉꐧꋦꐮꆽꄙꌠꋊꑣ、ꐮꄮꎍꐽꌤꃅꌠꊌꐨꊥꎆꌠꉀꐕꀐ。ꁱꀕꐩꋊꌬꇐꀉꒉꀊꂾꌠꅉꃀꋉꃆꋈꄻꌠꄹꎆ,ꍏꇩꍔꑠꁱꀕꐩꋊꄈꅉꋈꄻꌠꁣꀋꐥꃅꀻꎆ,ꁱꀕꐩꋊꌬꇐꌤꃅꈴꌗꈴꌠꆹꎁꐳꃅꃅ,ꑴꅉ“ꃅꋺ、ꑴꅉꂿꋺ、ꑴꅉꈨꋺ”ꐩꋊꌬꇐꏓꄻꌤꃅꌠꃶꐚꃅꄹꎆ,ꊋꀥꇱꄉꋯꁦꄈꀾꁱꀕꐩꋊꌬꇐꌤꃅꌠꌋꆀꐮꑌꑲ,ꊋꒉꃅꊿꋅꃅꈋꁱꀕꐩꋊꌬꇐꌤꃅꊋꁈꄏꌠꇬꊋꇱ,ꁱꀕꐩꋊꌬꇐꄻꇬꊎꄉꊿꀦ、ꊿꋯꑌꊿꉙꂘ、ꋌꃀꉜꋌꊂꅉꐚꎻꌠꂿꄐꀋꂿꑘꌠꌌꀒꁨꋍꁘꃅꋊꇤ。ꃶꐚꃅꈨꏀꄜꉺꌤꃅꌠꄻꃪ,ꏓꇲꄉ“ꃀꑍꂷ”ꌠꏓꋧꄉꄜꉺꌠꌋꆀꑍꃀꑍꅇꄜꌠꃅꋒ,ꊋꀥꇱꄉꉇꉻꏭꄜꉺ,ꏓꇱꄉꀉꑌꑵꃅꄜꁊꇶꏦꃄꌬ,ꈁꉬꁁꏯ、ꀉꑌꈚꇬꃅꄉꄈꀉꑌꂷꇷꃅꌠꌋꆀꏓꂱꍔꑠꌤꑘꄜꉺ,ꀒꁨꋍꁘꃅꏓꂱꍔꑠꇩꈐꇩꉈꑌꑲꌠꍔꒉꄉꀐ。

  ꊈꑼꊈ,ꋌꃀꋋꈓꉪꊇꊌꐨꊌꅜꌠꆹ,ꐋꀨꃛꏢꄧꌌꊝꎻꏹꃅꄉꌠꍏꇭꍏꑷꎃꊒꃅꏲꂠ、ꉜꁨꉈꇬꐛꅹꉬ,ꄈꊈꍔꃚꈁꐥꊐꌠꌋꆀꐧꋦꋍꑞꋍꁆꏯꉌꈯꑓꈜꃅꇇꀨ、ꊋꒉꃅꄏꐓꌠꐛꅹꉬ,ꏓꂱꍔꑠꇫꐊꌠꌤꃅꅉꈧꌠ、ꎀꍹꈁꐥꊐꌠꌋꆀꍔꑠꊈꑼꈁꐥꌠꃅꋯꑌꐊꃅ、ꊋꇤꄉꉈꈽꌠꐛꅹꉬ。ꄚꇬꄉ,ꉢꇩꏤꑭꊂꍔꑠꎮꊈꉼꎁꃅꄸꈐꇬꄉꆍꏯꈀꎭꀕ!

  ꋍꈓꅑꅸꇁꌠꍄꑐꃄꄻꌠꏓꊭꇬ,ꉪꊇꅼꐯꅼꃅꅉꐚꌠꆏ,ꏓꂱꍔꑠꌤꑘꊛꄉꀻꎆꌠꄹꇙꇬ,ꀋꎪꃅꏟꈯꃅꍔꍞꉪꐨꑌꌶ,ꋒꐯꋒꃅꏓꂱꍔꑠꆏꍏꇩꇭꍣꄈꏲꂠꌠꄈꀉꑌꂷꃅꇷꃅꌠꌋꆀꍔꍞꋮꒉꌠꀋꂿꑘꏲꉻꌧꋒꄉ,ꀋꂿꑘꌠꍔꍞꆽꎍꄉ,ꀊꐯꈭꃅꍔꍞꁧꏖꐨꐥ,ꊋꇤꄉꌼꇪꌠꃅꒊꃅꇁꇂꃴꄉꏸꐚꃱꐚꃅꄉ,ꉬꀋꉬꀉꒉꀊꂾꌠꂾꉆꈉꀋꎪꏟꈯꃅꉆꄉ,ꐧꋦꃹꅼꃅꐛꐈꅉꇬꎃꊒꃅꃅꍜꌭꈬꇬꎷ,ꑴꐚꃅꍏꇩꇭꍣꄈꏲꂠꌠꌭꈬꇬꎷ,ꀋꎪꀋꑴꃅꍏꇩꐛꐨꐧꋦꉪꏦꍔꍞꀻꎆꈴꈜꍬꌶ。ꀋꎪꃅꏟꈯꃅꃅꇴꄉꉻꉪꐨꑌꌶ,ꋒꐯꋒꃅꈯꄜꆽꒆ、ꃅꇴꄉꉻꁧꃤꃅꌠꆏꏓꂱꍔꑠꌅꊋꍬꌬꌠꏥꏦꀋꂿꑘꌠꌧꋒꄉ,ꈍꄮꑌꄈꌋꆀꇩꏤꈯꄜꌤꃅꅇꃅꁧꃤꃅꄉ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꇬꆼꒆꄉꌤꏂꌤꇭ,ꏟꈯꃅꈆꑪꃅꀻꎆꌠꁧꃤꃅ、ꐧꋦꐮꄮꊥꎆꌤꃅ,ꊋꇤꄉꐊꑷꃅꊼꇅꌣꈚꌠꐧꋦꋈꄻꌠꇬꌤꃅꐛ,ꀒꁨꋍꁘꃅꏓꂱꍔꑠꐋꀋꌡꂱꎆꅑꌠꌋꆀꂿꄐꀋꂿꑘꌠꋊꇤꅐꇁ。ꀋꎪꃅꏟꈯꃅꉹꁌꉪꐨꑌꄉ,ꏓꂱꉘꇉꌠꇬꄉꄐꄎꌠꆏꏓꂱꍔꑠꀻꎆꌠꇙꊋꉬ,ꈍꄮꑌꏓꂱꎺ、ꉌꉪꉹꁌꎁꃅꉪ,ꐊꑷꃅꉹꁌꉪꐨ、ꉹꁌꉘꇉꐨ、ꉹꁌꉌꐒꐨꉉꄜ,ꏣꀋꑌꃅꄈꌋꆀꍔꃚꇇꀨꄉꋭꋽꃅꋍꑞꋍꁁꏯꈲꏣꐮꃆꂮꂥꀘꄉ,ꏓꂱꉹꁌꋍꏅꌠꁳꐯꇯꄺꀱꀻꎆꊌꐨꊌꅜꎻ。ꀋꎪꃅꏟꈯꃅꌅꊋꍬꌬꉪꐨꑌꄉ,ꋒꐯꋒꃅꏓꂱꍔꑠꆏꉪꇩꏤꍔꍞꏦꉻꏓꐛꄹꁆꇬꀋꂿꑘꌠꌧꋒꌠꉬ,ꄈꌋꆀꍔꃚꈆꑪꋯꁦꃅꏤꇽꀋꉬꀋꉆꊨꊭꉬ,ꉻꊿꋍꏅꌠꐥꀹꐥꃅꍔꍞꐊꈽꍔꒉꌠꈴꈜꀋꂿꑘꌠꉬ,ꍔꍞꋮꒉ、ꋯꁦꍞꊟ、ꏲꈽꇖꈽꌅꊋꍬꌬꌠꌌꐩꋊꂿꃆꀉꒉꀊꂾꌠꃅꄉ,ꏣꀋꑌꃅꍔꍞꂱꎆꅑ、ꎀꍹꂱꎆꅑ、ꀑꊋꂱꎆꅑꌠꌋꆀꈴꈜꂱꎆꅑꌠꋊꇤ,ꎆꏣꎍꐽꊼꇅꐳꃅꀻꎆꌠꌋꆀꐧꋦꐮꄮꎍꐽꊥꎆꌠꎁꃅꃶꐚꐯꃶꐚꌠꑆꊋꅐꌞ。ꀋꎪꃅꏟꈯꃅꊈꑼꉪꐨꑌꄉ,ꋒꐯꋒꃅꏓꂱꍔꑠꂿꄐꆏꊈꑼꋊꇤ、ꍄꑐꊋꃤꄜꅐꇁꌠꇬꊈꑼꉜ、ꌤꑘꀻꎆꌠꊈꑼꉘꇉꌠꌧꋒꄉ,ꃶꐚꃅꊈꑼꋯꁦꌅꈌꈲꁧꀧꌋꃅ,ꊈꑼꇫꇬꀹꄻꉌꊈꁌꒉ,ꊈꑼꋍꏅꌠꊇꁧꉀꐕ,ꊈꑼꋍꏅꌠꊋꁈꄏꇇꀨꄉꃹꅼꃅꃶꐚꅉꒉ、ꆹꌊꅉꂫꊐꌠꑟ、ꒉꌊꉹꁌꄷꑟꌠꃅꄉ,ꂱꑱꃅꎁꌤꃅꋒꈭꐨꊈꑼꃅꎁꆽꎍꌠꍬꌬꋒ,ꑆꊋꅐꌞꇩꏤꁵ、ꏓꂱꁧꃤꃅꌠꃄꄻꅉꇬꄉꄐꐪꃄꌬ、ꑆꊋꄻꑘꃅꐛ。

  ꋍꈭꐨ,ꉪꊇꉈꑴꉜꄉꌶꌠꆏ,ꄈꌋꆀꏓꂱꇖꐨꌋꆀꐯꌟꉚꇬ,ꏓꂱꍔꑠꃅꋭꌠꃅꎁꌋꆀꐯꌟꉚꇬ,ꍔꑠꊈꑼꋍꏅꉘꇉꐨꌋꆀꐯꌟꉚꇬ,ꉪꊇꌤꃅꌠꄡꇗꀋꇎꀋꂪꅉꈨꐥꑴꌦ。ꀋꉬꀋꉆꌠꆏ:ꈍꃅꄉꊋꐛꌠꎖꋪꌬꈧꄉꄹꇙꌊꃅꄷꈧꌠꇬꍔꑠꌤꃅꋮꄮꀻꎆꌠꏓꊭ,ꈍꃅꄉꀒꁨꋍꁘꃅꊋꀥꇱꄉꋯꁦꍞꊟ,ꈍꃅꄉꍔꑠꁆꏯꂿꄐꋊꇤꌠꉺꏦꄻꐛꒆ,ꈍꃅꄉꀊꅰꃅꉾꃅꍔꑠꊈꑼꀨꄜꂿꄐꋊꇤꑠ。ꌤꃆꋋꈨꆏ,ꉪꊇꀋꎪꃅꀉꇨꃅꇫꉜꁨꄉ,ꎔꎗꃅꌌꎥꃪ,ꃶꐚꃅꌌꂥꀘꌶ。

  ꑍ、2011ꈎꌤꃅꐨꄐꇺ

  2011ꈎꆹꍏꇩꇭꍣꄈꄻ90ꈎꈭꏝꐛꌠꉬ,ꉈꑴ“ꊰꑋꉬ”ꊬꌠꇫꇬꈎꌠꑌꉬ。ꀋꃋꋋꇅꆏ,ꉪꇩꏤꎆꏣꐧꋦꀻꎆꌠꆹꀋꎪꃅꏟꈯꀕꃅꒃꉇꄷꀋꁧꊌꐨꀉꒉꃅꊌꉆꌠꄐꇐꏤꁈꊜꋽꄮꀋꂿꑘꊬꌠꇬꎌꇰ。ꏓꂱꍔꑠꆏꃶꐚꃅꊜꋽꄮꉪꐨꀉꇨꇱꌶ,ꊜꋽꄮꒃꉇꄉ、ꊜꋽꄮꌬꋒꄉꇈ,ꉈꑴꊜꋽꄮꉜꁨ、ꊜꋽꄮꀧꌋꃅꌶ,ꀊꅰꉾꃅꋍꑞꋍꁥꄈꀾꏓꉻ、ꊿꋅꈁꐥꌠꋍꑞꋍꁆꏯꊿꂒꋦꌠꃤꏣꀋꑌꐨ、ꑴꇙꐨꄕꊪꎼꇁ,ꐊꑷꃅꋍꑞꋍꁁꏯꌤꃅꌠꀋꎪꀋꑴꃅꏤꄉꀐꌠꉈꈽꑞꅉꁻꌐꏭꉜꄉꁨꆹꌠꄹꎆ。ꀊꏀꈒꌠꇬ,ꏓꂱꍔꑠꆏꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃅꈴꌬꈴ,ꃹꅼꃅꍏꇭꍏꑷꊰꏁꈭꉬꃢꌠꐊꈴꃀꌋꆀꍏꑷꎆꏣꌤꃅꃀꈿꉌꊈꃅꈴꌬꈴ,ꐪꊛꄉꀋꂿꑘꌠꄐꇐꏤꁈꊜꋽꊬꌠꒃꉇꌋꆀꌬꋒ,ꏟꈯꃅꄈꌋꆀꇩꏤꈯꄜꌤꃅꌠꆼꒆꄉ,ꈆꑪꃅꀻꎆꌠꄹꇙꌠꌋꆀꐳꃅꎆꏣꀻꎆꃄꄟꆹꏮꌠꌌꌅꊋꍬꌬꂿꃆꇫꇬꏢꌠꃅꄉ,ꐧꋦꐮꄮꎍꐽꌠꊥꎆꌠꌌꇔꇧꎭꀋꉆꌠꃅꎁꃅꄉ,ꍔꑠꌤꃅꈆꑪꈴꌠꑟꐨꉀꐕꌠꌌꑴꅉꋈꄻꌠꑞꅉꁻꌐꃅꄉ,ꉌꊋꋍꏢꃅꍔꍞꋮꒉꌠꃅꋒ,ꏣꀋꑌꋭꋽꃅꋯꁦꍞꊟꌠꄹꎆ,ꏟꈯꃅꇿꋌꐥꃅꏲꈽꇖꈽꌠꍔꆙ,“ꊰꑋꉬ”ꊬꌠꇫꇬꉾꃪꌠꃅꇬꅜ,ꐊꑷꃅꊼꇅꌣꈚꌠꐧꋦꋈꄻꌠꀊꏀꃅꃅꐛꌠꅔꈽꌠꎁꃅꑆꊋꏣꀋꑌꌠꅐꌞ。

  (ꋍ)ꊋꀥꇱꄉꂘꑘꄐꏁ,ꀒꁨꋍꁘꃅꍏꇩꐛꐨꐧꋦꉪꏦꍔꍞꀻꎆꈝꃀꈴꌠꉪꇐꍔꍞꅉꃀꄻꈫꈈ

  ꍏꇩꐛꐨꐧꋦꉪꏦꍔꍞꀻꎆꈝꃀꆏ,ꃄꄻꅉꇬꄉꊩꀽꎼꇁꌠꎃꊒꌠꈝꃀꉬ、ꀋꎪꃅꈴꌠꈝꃀꉬ,ꑞꄮꉬꄿꂿ、ꐛꐪꈍꃅꐙꌠꇂꃴꉬꄿꂿꆽꎎꌋꆀꇘꑐꀋꉆꌠꉬ。ꌶꄻꉹꌠꎀꍹꋈꄻꌠꄹꎆꌠꌋꆀꊋꀥꇱꄉꉪꇐꌧꇗꋈꄻꌠꏓꐯꇯꎼꇁ,ꃹꅼꃅꍏꇩꐛꐨꐧꋦꉪꏦꌧꇗꉻꑫꌋꆀꐧꋦꉪꏦꈯꄜꁌꐨꉻꑫꌶꄻꉙꂘꌠꃅꈧ,ꉌꋧꃅꎮꊈꉼꌷꂘꌠꌋꆀꀙꏢꐥꌠꊈꑼꌶꄻꅇꄜꌠꃀꊥꇫꄉꈿꄉ,ꎔꎗꃅꍔꑠꊈꑼꌶꄻꎥꇖꁥꀞꄉ,ꃶꐚꃅꉪꇐꌋꆀꃄꄻꌠꏓꋍꃱꃅꌊꍏꇭꍏꑷꃤꏤꇽꄐꇺꀉꒉꀊꂾꌠꀂꏽꇬꇁ。ꍏꇩꇭꍣꄈꄻ90ꈎꈭꏝꐛꎺꄅꌠꌌꊜꋽꄮꃅꄉ,ꄈꍏꇩꇝꂱ、ꋈꄻ、ꄺꀱꌠꏃꂠꇬꊌꐨꀋꇰꀋꉈꌠꌋꆀꐩꋊꎖꋪꌶꄻꄜꉺ,ꍔꑠꊈꑼꋍꏅꌠꄐꏁꌊꋒꐯꋒꃅꍏꇩꇭꍣꄈꀋꐥꆏꍏꇩꀊꏀꀋꐥ,ꍏꇩꐛꐨꐧꋦꉪꏦꀋꐥꌠꌧꐚꄉ,ꑴꐚꃅꍏꇩꇭꍣꄈꏃꂠꌠꌭꈬꇬꎷ,ꀋꎪꀋꑴꃅꍏꇩꐛꐨꐧꋦꉪꏦꍔꍞꀻꎆꈝꃀꍬ。ꍏꇭꍏꑷꄐꇺꇖꐨꇬꈴꄉ,ꍏꉸꄖꄑꍄꑐ、ꊿꋅꀱꌄꆣꇁꌠꌌꐊꇐꀋꉬꀋꉆꌠꃅꄉ,ꑟꉰꇝꂱ100ꈎꈭꏝꐛꌠꎺꄅꃀꀉꒉꈿ,ꌵꏢꃀꌋꆀꇩꏹꌷꃆꎥꇖꃀꈿꌠꇬꈴꄉ,《ꑟꉰꇝꂱꂿꋺꐊꋺ》ꌠꎺꄅꄯꒉꍑꅐ,ꄆꒌ、ꄯꒉꄆꁱꍑꄻꑠꃅꈧ,ꀱꃅꋊꈍꑋꋏꅑꅸꇁꌠꍏꇩꏓꂱꊿꋅꄂꋦ、ꏓꂱꁌꄝ、ꇩꏤꌣꈚꐞꄿꌠꅔꊊꂿꄷꄉꄝꀋꏯꃅꉈꈽꌠꈴꎁꉪꏡ,ꄈꀾꏓꉻꋍꑞꋍꁥ、ꊿꋅꈁꐥꌠꋍꑞꋍꁁꏯꂒꋦꊿꄐꏁꌊꃹꅼꃅꏓꂱꍔꑠꌋꆀꄈꀉꑌꂷꃅꇷꃅꌠꄹꏦꇬꄉꅐꇁꌠꐩꋊꀻꎆꎂꀕꐨꌧꐚ,ꀊꅰꑴꐚꃅꇩꉂꉪꏦꌋꆀꐧꋦꉪꏦꁈꁧꀊꂥꃅꐕꄉ,ꀋꆏꃅꀉꐯꃅꇩꉂꊋꏓꋍꃱꃅꌠꈫꈈꀉꇨꇁ。

  (ꑍ)ꅇꀨꈜꀦꇬꆼꒆꋒꃅꄉ,ꏣꀋꑌꃅ“ꊰꑋꉬ”ꄐꎖꃄꌬꌠꎁꃅꁈꌞꊋꅐ

  ꈆꑪꃅꀻꎆꌠꅇꀨꒃꇇꈐꊐꄉ,ꐳꃅꎆꏣꀻꎆꃄꄟꈜꀦꆹꏮꌠꒃꉇꄉ,ꏓꂱꍔꑠꎆꏣꐧꋦꀻꎆꁧꃤꃅꌠꊋꏿꅉꊨꄅꄉꀐ。“ꊰꑋꉬ”ꄐꎖꌠꑞꅉꁻꌐꌋꆀꎼꈎꀨꄉꌤꃅꌠꌌꋭꋽꃅꏓꐯꇯꎼꇁ,ꎃꊒꃅꋧꃅꎆꏣꀻꎆꌠꀊꉗꃅꌠꆸꄟꌋꆀꉪꇩꏤꎆꏣꀻꎆꌠꋍꊭꌠꐛꄟꒃꇇꈐꊐꄉ,ꉻꒉꋊꐽꌠꈆꑪꐨꌋꆀꂴꂿꉆꐨꉀꐕꌠꆼꒆꄉ,ꎆꏣꎍꐽꊼꇅꐳꃅꀻꎆꎻꇬꎷ、ꎆꏣꐛꉻꋊꐽꌠꌋꆀꅐꂋꉪꄉꌠꏱꄻꌠꐮꃆꂮꀞꄻꋒ,ꇩꏹꎆꒉꎆꇁꎒꐡꄜꎟꌠꏭꊝꌠꊌꐨꑠꃆꂮꈫꈈꌋꆀꍔꒉ,ꋋꇅꃅꋭꋽꃅꉻꒉꎆꏣꃅꒊꃅꇁꎥꃪꃀ、ꌐꄉꑋꇖꃀꈿꄉ,ꅔꈽꄉꃶꐚꂿꄐꐥꌠꉜꐨꇖꐨꈨꏓꐛ。“ꐳꃅꎆꏣꐛꉻꄐꇐꏤꁈꃅꐙꌠꋊꐽ,ꎆꏣꎍꐽꊼꇅꐳꃅꀻꎆꌠꊥꎆ”ꌠꌌꇖꃆꃅꄉ,ꌐꄉꏱꇖꐨꐥꌠꎮꊈꉼꃀꈿ,ꈁꐥꌠꋯꁦꄈꀾꌋꆀꄈꀾꀋꐊꊿꂒꋦꌠꌋꆀꌐꊈꉼꑠꊥꇫꄉ,ꐛꏀꂿꑘꀻꎆꌠꄹꎆ、ꋚꂷꄝꀋꊰꌠꏦꀧ、ꊋꀥꇱꄉꂿꑘꁡꇤꈲꒉꅉꃀꉁꈾꋈꄻ、ꈆꑪꇮꇐꏀꀺꌠꌋꆀꅐꑘꐛꉻꊐꐕꌠꄹꇙ、ꄐꇐꏤꁈꃅꐙꌠꏀꄓꌠꅐꑘꀻꎆ、ꊋꏏꍍꋊꌠꌋꆀꃄꀑꃅꌗꐛꐈꌠꏭꊝꌠꇨꈴ、ꐧꐭꎆꏂꑘꀻꎆꌠꎁꃅꎆꒉꎆꇁꋦꈭꉾꃪꌠꄻꄉ、ꍏꇩꐛꐨꇓꈓꈴꈝꃀꍬ、ꇩꏹꎆꏣꇷꃅꈥꈉꀺꐯꑠꏓꇱꐨꐥ、ꄐꇐꏤꁈꐨꐥ、ꊫꂫꃰꇌꐨꐥꌠꌤꃆ,ꌌꃹꅼꃅꍤꄻꎥꃪꍤꆫꌠꃅ,ꄈꌋꆀꍔꃚꈆꑪꃅꏤꇽꌠꎁꃅꌡꉚꌠꇲꁵ。ꐪꊛꄉꉹꁌꐥꐨꄻꃪꌠꉜꁨꌋꆀꊥꎆ,ꐧꋦꏱꄻꌠꊋꀥꇱꌋꆀꏀꀺ、ꐧꋦꏱꄻꈆꑪꈴꌠꑟꐨꉀꐕꌠꆼꒆꄉ,ꋒꐯꋒꃅꃅꅍꊌꌠꊥꎆ,ꊌꐨꁷꄻꄹꏦꄺꀱꌠꄹꎆ,ꎊꈬꁌꏤꈁꉬꑟꐨꀑꐱꃅꎍꐽꎻꇬꎷ,ꊋꀥꇱꄉꐧꋦꏦꀧꉻꑫꀋꄿꊨꊭꋈꄻ,ꐳꃅꇓꈓꇓꉈꇬꉱꈴꌠꋍꏅꁱꀕꁧꃤꃅꉻꑫꋈꄻ,ꋭꋽꃅꄉꉻꂘꑘꅐꀦꁆꄻ,ꃹꅼꃅꁬꋌꁦꎴꆄꄻꏦꉻꀨꄉꌠꄺꀱ,ꐳꃅꀀꑳꏦꀧꉻꑫꋈꄻꑠꌤꃆꀉꒉꀊꂾꌠꆏ,ꐛꐪꃶꐚꌠꍤꆫ、ꅇꂷꇯꍝꌠꉉ、ꊜꁈꃶꐚꌠꌬ,ꊋꇤꄉꎆꏣꐧꋦꐊꑷꋮꄮꃅꐪꊛꄉꀻꎆꉆꌠꊥꎆ。

  (ꌕ)ꐋꀋꌡꌠꂱꎆꅑꐨꋊꇤ,ꃶꐚꃅꃅꒊꃅꇁꀊꏀꌠꇂꃴꄉꉹꁌꌤꃅꌠꊋꀥꇱ

  ꍔꑠꊈꑼꆏꋍꑞꋍꁆꏯꇬꄉꇁ、ꉹꁌꋍꑞꋍꁆꏯꇬꑌꑲ,ꏓꂱꍔꑠꆏꉹꁌꌤꃅꍔꆙꇬꂱꎆꅑꐨꐋꀋꌡꃅꐥ。ꎔꎗꃅꍔꑠꈁꐥꊐꌠꊥꇫꄉꉹꁌꌤꃅꍔꂵꌠꎖꋪꉾꌠꃄꄟꉾꌠꏓꈹ,ꈝꃀꀊꏀꌠꊐꄜꀊꏀꌠꎹꎥ,ꋍꁘꋍꁘꃅꍔꑠꎀꍹ、ꍔꑠꊈꑼꌋꆀꁆꏯꉹꁌꑌꑲꌠꌤꃅꉺꏦꄻꃪꌶ。ꈴꌗꏓꎴ、ꄜꌞꌋꆀꀱꑟꇁꌠꈝꃀꑴꀋꐥ,ꏣꀋꑌꃅꐮꈴꈄꏍꌌꌬꄉꐧꋦꐛꐪꉹꁌꉪꐨꏓꎴꌠꃄꄟꀊꏀꌠꎹꎥ,ꐳꃅꊨꄅꃅꃅꇴꄉꉻꐨꐥ、ꌐꁮꐨꐥ、ꎎꄟꐨꐥꌠꌤꃆꒃꇇꈐꊐꄉ,ꊋꇤꄉꑖꑟꃅꏓꂱꉹꁌꇬꑌꑲ、ꉹꁌꉜꐨꑗꎹꌠꄛꑣꌠꈝꃀꀋꂿꑘꌠꐛꎻ,ꄈꌋꆀꍔꃚꈋꍣꐛꐪꏓꋧꌋꆀꎥꃪꉺꏦꀋꂿꑘꁁꏯꐛꎻꌶ。ꃹꅼꃅꍏꑷꉬꃢꌠꑭꊗꌤꃅꑋꇖꃀ、ꍏꑷꑟꏦꌤꃅꑋꇖꃀꌋꆀꁮꐚꁁꏯꀉꒉꃅꀖꁉꌠꌤꃅꃀꈿꉌꊈꃄꌬꇫꑟꄉ,ꀊꅰꃅꀁꑌꊿꋅꎆꏣꐧꋦꀻꎆꌠꌋꆀꒆꉻꋦꈭꀧꌋꃅꌠꇬꉜꁨ,ꇓꈓꊿꋅꌤꃅꌠꌋꆀꊻꂷꊼꇅꀁꑌꌠꊿꋅꄏꐓꄉꎆꏣꐧꋦꀻꎆꌤꃅꌠꃅꋒꌠꆸꇇꀨ,ꃅꋮꌄꆣꉹꁌꌣꈚꌠꄹꇙꄉꃹꅼꃅꃅ,ꃶꆀꎭꑠꏓꋧꐯꅑꌠꌢꎭꃅꄷꉹꁌꌌꀨꄉꇇꀨꄏꐓꌶ,ꀒꁨꋍꁘꃅꊿꋅꃄꁕꊨꏦꏲꌠꄹꏦꃄꌬꇫꑟꌠꄹꇙ。ꋒꐯꋒꃅꍏꇩꑇꇐꁆꏯꄮꐽꊈꑼꉼꌋꆀꀁꑌꊿꋅꁆꏯ、ꑇꇐꁆꏯꍔꑠꊈꑼꂿꄐꏣꀋꑌꌠꋊꇤꅐꇁ,ꊋꇤꄉꍔꑠꊿꋅꃅꄷꉹꁌꌤꃅꌠꌋꆀꑇꇐꑇꌠꉹꁌꌤꃅꍔꆙꌠꐛꊂꀊꏀꌠꀹꄻꅐꇁ。

  (ꇖ)ꁍꇩꏓꋍꃱꃅꌠꌋꆀꊿꋅꀱꌄꆣꇁꌠꄹꎆꌠꉜꄉꃅ,ꊋꇤꄉꑣꇤꃺꑌ、ꉪꂱꃺꑌ、ꄠꃪꃺꑌꌋꆀꎿꉈꃺꑌꐮꋯꑌꐮꑌꑲꌠꃹꅼꈴ

  ꁍꇩꏓꋍꃱꃅ、ꊿꋅꀱꌄꆣꇁꌠꆏ,ꅔꃀꃺꑌꊋꇤꏡꇤꄻꅐꇈ,ꇤꉪꄠꃺꑌꌋꆀꎿꉇꃺꑌꉌꊋꋍꏢꃅꊋꇤꄻꅐꌠꉬ。ꀋꎪꀋꑴꃅ“ꋍꇩꑍꏦ”、“ꇤꊿꇤꏲ”、“ꉪꊿꉪꏲ”、ꀊꂥꃅꊨꏦꏲꌠꌐꏦꃄꌬ,ꊋꈀꑌꃅꇤꄉꑣꇤꇣꋲꏱꅉꐎ、ꉪꂱꇣꋲꏱꅉꐎꍔꃚꏦꃤꈴꄉꏲꑘꏲꌠꊋꁈꄏ,ꇤꉪꌋꆀꅔꈐꈜꀕꇈꍗꌕꎏꃅꄷꎆꏣꇷꃅꌠꊥꎆ,ꇤꉪꊈꑼꁈꄏꊋꊡꄉꑣꇤ、ꉪꂱꎆꏣ、ꍔꍞꌋꆀꐧꋦꌤꆿꃅꇬꏣꀋꑌꂿꄐꋊꇤꅐꇁꄉ,ꇤꉪꀊꉗꃅꌄꆣꑘꒃꌋꆀꇩꏤꎆꏣꐧꋦꀻꎆꊥꎆꌠꎁꃅꑆꊋꀉꑌꃅꅐꌞꎻ。ꇤꉪꋍꑞꋍꁆꏯꊿꂒꋦꌠꌋꆀꐮꑌꑲꌠꈴꈜꍔꒉ,ꊋꀥꇱꄉꇤꉪꍔꍞꏓꉻ、ꐧꋦꏓꉻꌋꆀꁧꎁꊿꂒꋦꌠꌋꆀꐮꑌꑲ,ꇤꉪꀊꉘꌠꏀꏭꌤꃅꊋꃤꊋꀥꇱ,ꀋꆏꃅꇩꉂꇤꉂ、ꇩꉂꉪꉂꊋꃤꀻꎆꀉꒉꇁ。“ꄮꐽꋍꃱꃅ、ꋍꇩꑍꏦ”ꌐꏦꌭꈬꇬꎷ,,ꏟꈯꀕꃅꎿꋮꑍꁁꏯꐮꃆꂮꄮꐽꀻꎆꌠꄜꀨꌭꈬ,ꏣꀋꑌꃅꍔꑠꊈꑼꌋꆀꄠꃪꉹꁌꉪꐨꁧꎁꃹꅼꃅꐮꑌꑲꌠꄹꇙ,ꄠꃪꎿꅔꈏꇓꄚꃆꂮꐥꌠꄈꀾꏓꉻ、ꐧꋦꎀꍹ、꒔ꑞ꒔ꁁꏯꊿꂒꋦꌠꌋꆀꅉꂫꊐꌠꉹꁌꋍꏅꌠꌋꆀꐮꑌꑲꌠꍔꒉ,ꏟꈯꃅꇿꋌꐥꌠꄠꃪꏓꂱꃆꂮꌤꃅꌊꉾꃪꄉ,ꏣꀋꑌꃅꎿꋮꑍꁁꏯꎆꏣꇷꃅꇶꏦꏤꐪꃅꑞꅉꑟ,ꎿꇉꁮꐚꏮꎆꏣꃅꄷꂴꃅꉚꌠꂿꄐꋒꐯꋒꃅꋊꇤꌠꊥꎆ,ꀒꁨꋍꁘꃅꎿꋮꑍꁁꏯꎆꏣꃼꇇ、ꁱꀕꐮꑌꑲꇷꃅꌠꍔꐯ。ꎔꎗꃅꉇꋦꃺꑌꌤꃆꌤꃅꌐꏦꃄꌬ,ꑖꑟꃅꉇꋦꃺꑌꀱꇁꌠꑱꈐꊿꌋꆀꐮꑌꑲ,ꐊꇐꋲꑞꌠꉇꋦꃺꑌꐮꑌꑲꃅꈧꌠꊥꇫꄉꃅ,ꎿꉈꍏꇩꊿꌤꃅꋒ,ꏣꀋꑌꃅꉇꄅꌷꏷꊿꇩꏤꁧꃤꃅꌠꎁꃅꇎꏦꈝꐮꌠꀹꄻ。

  (ꉬ)ꊋꏓꄉꋧꃅꇩꏤꈁꐥꌠꇬꏓꂱꌋꆀꐮꉂꐮꅉꐨꀊꅰꃅꀉꇨꇁ,ꀋꆏꃅꉇꉻꏭꉁꅉꃅꐮꑌꑲꌠꃹꅼꈴ

  ꏓꂱꍔꑠꉇꉻꏭꉁꅉꃅꐮꑌꑲꌠꆹ,ꇩꏤꐛꒌꌍꑓꀋꂿ꒧ꌠꌋꆀꋍꏅꉇꉻꑌꑲꌠꃅꈉꀋꂿ꒧ꌠꉬ。ꇩꏤꉇꉻꑌꑲꌤꃅꌠꀑꐱꄐꇺꌠꇬꈴꄉꀊꂥꊐꌠꐮꅲꇫꆹꌠꃅꈧ,ꋊꃅꐮꉁꅉꌠꃹꅼꈴ,ꄚꃆꂮꐥꌠꇩꏤꇬꍔꍞꐮꉌꒊꌠꊋꀥꇱ,ꎆꏣꃼꇇꑠꀋꂿ꒧ꁁꏯꃶꐚꃅꇷꃅꌠꄹꇙ。ꍔꑠꌐꁨꊈꑼꉼꈁꐥꌠꌋꆀꄚꃆꂮꐥꌠꇩꏤꏲꉻꇢꊭꐮꒈꇁꇷꃅꌠꄹꇙ,ꉇꄅꇩꏤꑴꉼ、ꌧꊿꀋꂿ꒧ꁥ、ꀨꎍꇢꈴ、ꂒꋦꂓꅑꊿꌋꆀꐮꑌꑲꌠꊋꀥꇱ,ꀋꆏꃅꏓꂱꍔꑠꋍꏅꉇꉻꑌꑲꑌꃄꄻꌠꌌꃹꅼꈴ。ꍏꇩꎆꏣꐧꋦꅿꌧꉼꌋꆀꇩꏹꑠꉼꉈꑴꄚꐊꌠꎀꍹꌋꆀꉻꏑꇩꄚꃆꂮꐥꌠꏱꉻꐮꉁꅉꃅꇷꃅꌠꊋꁈꄏ,ꍏꉩꈭꏮꁱꄜ꒜ꈿꌠꋈꄻꃅꐙꌠꂿꄐꋊꇤꌊꉾ,ꍏꇩꑇꇐꁆꏯꄮꐽꊈꑼꉼꌋꆀꋧꃅꐨꐥ、ꃅꄷꐨꐥꌠꑇꇐꐂꌠꄮꐽꎀꍹꌋꆀꐮꑌꑲꌠꊋꁈꄏ,ꀒꁨꋍꁘꃅꑍꁁꏯꐮꑌꑲꌠꉺꏦꄻꐛꒆ。ꉇꉻꏭꄜꉺꌤꃅꌠꊋꀥꇱ,ꇩꏹꐧꋦꉪꇩꏤꍔꍞꄹꏦ、ꍔꄈꄹꏦꌋꆀꏓꂱꍔꑠꃆꂮꑠꅉꐚꌠꀉꇨꇁ,ꇩꏹꐧꋦꄚꃆꂮꐥꁆꏯꉪꇩꏤꏭꉪꐚꌋꆀꊋꁈꄏꌠꅔꈿ。

  (ꃘ)ꌅꊋꃄꌬꊋꃤꉀꐕꌠꌌꄞꅐꃅꄉ,ꊋꇤꄉꏓꂱꍔꑠꊨꏦꑴꅉꋈꄻꌠꊋꀥꇱ

  ꏓꂱꍔꑠꊨꏦꑴꅉꋈꄻꑞꅉꆹ,ꌅꊋꃄꌬꃅꊌꌠꌋꆀꐮꃆꂮꐥ,ꋮꒉꏱꇖꊇꁧꇬꁧꏖꎍ。ꎔꎗꃅꏓꈹ、ꋒꐯꋒꃅ《ꍏꇭꍏꑷꊋꀥꇱꄉꏓꂱꍔꑠꌤꃅꌠꃆꂮꉜꐨ》ꌫꄻꄉꃅꈧꌠꃅꊌꐨꏓꈹꍤꄻ,ꍔꍞꋮꒉ、ꋯꁦꍞꊟ、ꏲꈽꇖꈽꄹꏦꈴꍬꏦꈴꈭꎁꈴꋈꄻꌠꄹꎆ,ꄜꑘ、ꍤꆫ、ꌐꄉꍤꎥ、ꃀꀉꒉꈿꇬꅇꉉ、ꐧꋦꐛꐪꉹꁌꉪꐨꈴꌗ、ꁱꀕꐩꋊꌬꇐꑠꌤꃅꌠꄺꀱꐛꒆ。ꏟꈯꃅꏓꂱꍔꑠꌧꇗꋈꄻꋉꃆꄹꎆ,ꍏꇩꏓꂱꍔꑠꌧꇗꎥꃪꉼꊋꁈꄏꄉꇖꃆꀉꒉꀊꂾꌠꎥꃪꌋꆀꊋꀥꇱꄉꂘꑘꁰꍋ,ꏓꂱꍔꑠꌧꇗꉻꑫꋈꄻ ꐛꒆꌠꌋꆀꄜꉺꁊꈴꁆꏯꑭꁘꀊꏀꌠꐕꎼꆹ。ꈁꐥꊐꌠꍔꑠꌋꆀꍔꑠꎀꍹꌋꆀꄈꍔꌤꃅꅉ、ꍔꑠꐊꈽꌠꄈꀾꈧꌠꏓꉻꇢꊭꐮꑌꑲꇷꃅꌠꊋꀥꇱ,ꍔꑠꌐꁨꊈꑼꉼꑌꑲꁆꏯ、ꊈꑼꌤꃅꉺꏦꄻꉾꃪꈴ,ꍔꑠꎀꍹꏓꇱꋮꄮ、ꈴꌗꐮꈴ、ꀏꄩꐮꈺꇙ、ꈏꉈꐮꑌꑲꌠꏓꇱꊋꃤꏓꐛ。ꊈꑼꌅꊋꃄꌬꊋꃤꊋꀥꇱ,ꃅꊌꐨꄤꎖ、ꍞꍤꃅꑞꅉꑟꑠꌤꃅꉺꏦꄻꐛꒆ,ꌅꊌꃅꐛꐨꉀꐕ,ꍔꑠꌤꃅꅉꄉꐪꊛꄉꃹꅼꃅꂴꅑꀺꉾꃪꅔꃅꈧꌠꃅ,ꌤꃅꅉꇥꀯꊿꁥꌠꊇꁧꌋꆀꊈꑼꌅꊋꃄꌬꁧꃤꃅꊋꃤꉀꐕ。

  ꊈꑼꊈ!

  ꑭꄑꅉꀊꏀꌠꈝꃀꀊꏀꌠꀹꄻ,ꑞꅉꁻꌐꀊꏀꌠꂿꃆꀊꏀꌠꊌ。ꉪꊇꆹꀊꅰꃅꑖꑟꃅꋯꑌꌊꐋꀨꃛꏢꄧꌌꊝꎻꏹꃅꄉꌠꍏꇭꍏꑷꈭꇍꄉ,ꍏꇩꐛꐨꐧꋦꉪꏦꁧꁈꇰꀋ꒜ꌠꀊꂥꃅꐕꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿ꒧ꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꑞꅉꑟ,ꊛꄉꈏꇤꊋꇤ、ꉌꏓꋍꂷꊋꏓꋍꃱꃅ、ꋦꄉꀒꁨꉜꄉꂵ,“ꊰꑋꉬ”ꄐꎖꌠꌋꆀꐊꑷꃅꊼꇅꌣꈚꌠꐧꋦꋈꄻꌠꉺꒉꑞꅉꁻꌐꃅꇫꑟꌠꎁꃅ,ꐧꋦꉪꏦꐛꏀꈴꋈꄻꌠꄹꎆ、ꍏꉸꊿꋅꇰꀋ꒜ꃅꏀꄖꌠꃅꇫꑟꌠꎁꃅ,ꑆꊋꅐꌞꀊꏀꌠꀊꅰꀉꒉꌠꃅꅐꇁ!
ꁰꒌ




  • 特别鸣谢
    中国民族语文翻译局彝文翻译室