ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꉆ꒾ꌠ  ꄈꅿꍬꏦꍤꄻꌤꏲꅉ8

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꉆ꒾ꌠ ꄈꅿꍬꏦꍤꄻꌤꏲꅉ


  ꇖꊯꌕꏢꌠ ꄈꅿꍏꑷꍬꏦꍤꄻꊈꑼꉼꆹꄈꍏꑷꊈꑼꉼꏲꂠꌠꇂꃴꄉꌤꃅ。ꄈꅿꃅꄷꋍꊐꋑꀋꋒꌠꇬꍬꏦꍤꄻꊈꑼꉼꌋꆀꅉꂫꊐꌠꍬꏦꍤꄻꊈꑼꉼꆏꋋꊐꌠꇬꄈꅿꊈꑼꉼꌋꆀꉎꊐꌠꍬꏦꍤꄻꊈꑼꉼꑍꄀꃅꏲꂠꌠꇂꃴꄉꌤꃅ。

  ꄈꅿꍬꏦꍤꄻꊈꑼꉼꋍꊐꋑꀋꋒꌠꇬꋍꈭꃅꎁꆹꋋꊐꌠꇬꄈꅿꊈꑼꉼꌋꆀꐯꌟ。

  ꄈꅿꍏꑷꍬꏦꍤꄻꊈꑼꉼꐊꈴꃅ꒜ꈿꅉꇬ,ꅉꀕꌤꏲꊈꑼꉼꌋꆀꎻꏹ、ꃛꎻꏹꌊꄻ,ꄷꀋꁧꄜꌊꄈꅿꍏꑷꊈꑼꉼꇬꁳꈌꁧꎻ。ꄈꃅꄷꋍꊐꋑꀋꋒꌠꇬꍬꏦꍤꄻꊈꑼꉼꐊꈴꃅ꒜ꈿꅉꇬꄉ,ꅉꀕꌤꃅꊈꑼꉼꌋꆀꎻꏹ、ꃛꎻꏹꌊꄻ,ꄷꀋꁧꋋꊐꌠꇬꄈꊈꑼꉼꇬꁳꌌꉌꃹꈴꄉ,ꄜꌊꉎꊐꌠꄈꊈꑼꉼꁳꈌꁧꎻ。ꄈꅿꅉꂫꊐꌠꊈꑼꉼꍤꄻꊈꑼꉼꂷꄻꅀ,ꍬꏦꍤꄻꊈꑼꂷꄻꌠꆏ,ꋍꉎꊐꌠꄈꅿꎀꍹꁳꐛꐨꇬꉜꄉꐰꏤꎻ。ꄈꅿꊝꍝꀯꊈꑼꉼꌋꆀꍝꀯꊈꑼꉼꇬꆏꍬꏦꍤꄻꊈꑼꂷꇱꄉꌶ。

  ꄈꅿꍏꑷꍬꏦꍤꄻꊈꑼꉼꆏꌤꃅꈉꐨꇬꉜꄉ,ꄈꅿꍬꏦꍤꄻꊤꅀꍬꏦꍤꄻꑼꁆꌌꍏꑷꊐꌠꇬꄈꌋꆀꇩꏤꌤꏲꅉꇬꍆꉆ。ꍬꏦꍤꄻꊤꊤꍈꅀꍬꏦꍤꄻꑼꆏꌤꏲꅉꋌꈚꇬꄈꏲꂠꊥꇬꄉꈿꌠꄚꃆꂮꐥꌠꇬ꒜ꇬꈿꈽꉆ。ꊿꊇꌤꃅꇬꆹꌤꏲꅉꋌꈚꇬꄈꏲꂠꎀꍹꀋꎪꃅꇫꊋꁈꄏꌶ。

  ꇖꊯꇖꏢꌠ ꄈꅿꍬꏦꍤꄻꊈꑼꉼꋍꊐꋑꀋꋒꌠꇬꂿꃆꀋꉬꀋꉆꌠꆏ:ꄈꏦꌋꆀꀉꁁꄈꈏꇓꏦꇗꀧꌋꃅ,ꄈꅿꈛꏦ、ꌐꏦ、ꏱꁈꌋꆀꏤꐪꌫꄻꃆꂮꍤꄻ,ꄈꅿꊈꑼꉼꇇꀨꄉꊋꀥꇱꄉꄈꃅꇏꋈꄻꌠꌋꆀꍹꈔꏭꁏꌠꌤꊥꇫꄉꃅ。

  ꋍꊐꋑꀋꋒꌠꇬꍬꏦꍤꄻꊈꑼꉼꆏꅉꀕꃅꄈꑼꏭꍬꏦꍬꐨ꒿ꂘ,ꄈꍬꏦꀧꌋꃅꌠꃆꂮꐰꏤꅐꇁ;ꄈꑼꏲꌋꇥꀯꌅꈌꌫꄻꅉꇬꍞꊟ;ꄈꅿꎀꍹꌋꆀꄈꑼꄈꍬꏦꌋꆀꀉꁁꄈꈏꇓꏦꇗꐆꊼꇅꀉꒉꀊꂾꃆꂮꐥꌠꅀꌼꇪꌠꃣꈌꑠꍤꄻ、ꀞꄻ,ꃣꈌꋋꈨꇬꄈꑼꌌꑽꃤꅓꁵꅀꇔꇧꎭꌠꐰꏤ;ꄈꑼꅇꎹꌋꆀꑗꇖꇁꌠꊪꀞ;ꄈꑼꌅꈌꈲꁧꏦꀧꄉ。

  ꋍꊐꋑꀋꋒꌠꇬꍬꏦꍤꄻꊈꑼꉼꆏꀊꅰꃅꃣꈌꀋꂿꑘꐨꐥꌠꌋꆀꌼꇪꌠꀞꄻꇬꌤꃆꌋꆀꀞꄻꐨ,ꌌꋋꊐꌠꇬꄈꊈꑼꉼꏭꄛꇰꌶ。ꄈꅿꃅꄷꋍꊐꋑꀋꋒꌠꍬꏦꍤꄻꊈꑼꉼꌋꆀꅉꂫꊐꌠꍬꏦꍤꄻꊈꑼꉼꆹꋍꋓꃅꌌꉎꊐꌠꍬꏦꍤꄻꊈꑼꉼꏭꄛꇰꌶ。

  ꋍꊐꋑꀋꋒꌠꇬꍬꏦꍤꄻꊈꑼꉼꆏꂱꑱꊐꌠꇬꄈꊈꑼꉼꇬꊈꑼꄈꍬꏦꇬꏦꐆꌠꌋꅜꇬꆏ,ꂴꌌꍤꀱꊨꄅꄉ,ꀋꄸꄷꌌꃆꑘꐘꃅꍤꄻꄻꅐꌠꆏ,ꄜꌊꋋꊐꇬꄈꊈꑼꉼꁳꈌꁧꎻ,ꎮꃷꊈꑼꇬꃆꂮꐥꌠꆏ,ꄜꌊꋋꊐꄈꊈꑼꉼꇬꇰꈭꐨ,ꄜꌊꉎꊐꌠꍬꏦꍤꄻꊈꑼꉼꁳꈌꁧꎻ。

  ꇖꊯꉬꏢꌠ ꉎꊐꌠꍬꏦꍤꄻꊈꑼꉼꆏꐰꊐꌠꍬꏦꍤꄻꊈꑼꉼꌤꃅꌠꇬꍤꄻꌅꈌꐥ,ꄷꀋꁧꐰꊐꌠꍬꏦꍤꄻꊈꑼꉼꃣꈌꐰꏤꄉꀐꌠꇬꈌꁧꅀꄺꀱꌠꌅꈌꐥ。ꀋꄸꄷꐰꊐꌠꍬꏦꍤꄻꊈꑼꉼꐰꏤꄉꌠꌌꄺꀱꂿꄷꇬꆏ,ꋋꊐꌠꇬꄈꅿꊈꑼꉼꈌꁧꄉꀐꇬ,ꑠꃅꄺꀱꄉꋋꈨꀋꎪꃅꌌꉎꊐꌠꇬꄈꅿꊈꑼꉼꁳꈌꁧꎻꌶ。

  ꄈꅿꃅꄷꋍꊐꋑꀋꋒꌠꇬꍬꏦꍤꄻꊈꑼꉼꌋꆀꅉꂫꊐꌠꇬꍬꏦꍤꄻꊈꑼꉼꀋꄸꄷꄈꊈꑼꉼꋋꊐꌠꇬꃣꈌꀞꄻꏤꇽꌠꇬꉜꐨꐯꀋꌡꌠꐥꑲꆏ,ꌌꍬꏦꍤꄻꊈꑼꉼꉎꊐꌠꏭꇖꄉꉈꑴꍤꀱꉆ;ꀋꄸꄷꋋꊐꇬꄈꅿꊈꑼꉼꅀꋍꊈꑼꈨꄈꅿꍬꏦꐆꌠꃆꂮꐥꇬ,ꋋꊐꌠꄈꅿꊈꑼꉼꇫꀞꀋꄻꅀꌌꎃꊒꃅꀞꀋꄻꄮꇬꆏ,ꉎꊐꌠꍬꏦꍤꄻꊈꑼꉼꏭꅇꇰꄉ,ꇫꇇꀨꄉꀞꄻꎻꄷꇖꌠꌅꈌꐥ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室