ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꏃ꒾ꌠ  ꄈꅿꍬꏦ7

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꏃ꒾ꌠ ꄈꅿꍬꏦ


  ꌕꊰꏁꏢꌠ ꄈꅿꍬꏦꆹꄈꎀꍹꋍꊐꋑꀋꋒꌠꌋꆀꄈꑼꈁꐥꌠꀋꎪꃅꇫꍬꇫꈴꌶꌠꏥꏦꏤꐪꉬ,ꋋꆹꄈꋯꑌꋍꃱꃅ、ꄈꂿꃆꃅꇫꑟꌠꄉꀧꅍꉬ。ꄈꎀꍹꆏꄈꅿꍬꏦꌌꀋꎪꃅꏦꇨꃅꌬꌋꆀꇫꀧꌋꃅꌶ,ꇭꍣꄈꑼꆏꀋꎪꃅꑴꐚꃅꄈꅿꍬꏦꇬꍬꌶ。

  ꌕꊰꉆꏢꌠ ꄈꎀꍹꄈꑼꍬꏦꇬꁎꆽꐺꌠꏭꆏ,ꀒꅓꊂꈪꊐ、ꆅꉁꊿꈭꋏꌠꉌꊈꇬꈴꄉ,ꃅꑽꏿꑽꐨꌋꆀꑽꐪꀊꐎꀉꆈꇬꉜꄉ,ꌌꀠꂘꅀꍬꏦꇬꈴꄉꅓꁵꄡꑟ。

  ꄈꑼꀉꆈꃅꅓꑘꏦꃤꀛꐆꐺꌠꆏꀋꎪꃅꌌꄈꐴꇇꉈꋊꇧꎭꌶ。

  ꄈꈏꇓꆏꏦꇨꃅꄈꏦꌋꆀꇩꏤꏦꃤꇬꀋꊒꌠꇇꁈꌌꄈꑼꏭꄉꌠꏢꇋ,ꏦꇨꃅꈠꁏꇇꇩꍈꌠꌋꆀꍍꋉꆐꄀꌠꏢꇋ。ꎀꍹꅀꊿꏭꏤꄻꄉꋋꈨꀋꈴꌠꆏꀋꎪꃅꄈꅿꍬꏦꌋꆀꇩꏤꏦꃤꇬꈴꄉꇬꏭꅑꑘꎹꌶ。

  ꌕꊯꈬꏢꌠ ꄈꅿꍬꏦꇬꑽꃤꁵꌠꆹꉬꑵꐥ:ꅇꊪꈎ、ꏦꇨꃅꅇꊪꈎ、ꄈꈐꌅꈌꇔꇧꎭ、ꄈꂒꉻꊏꇬꄀꄉꉜꉚ、ꄈꐴꇇꉈꋊꇧꎭ。

  ꄈꂒꉻꊏꇬꄀꄉꉜꉚꌠꆹꀊꎴꐯꀊꎴꇬꑌꑍꈓꈋꉐꐂꀋꉆ。ꄈꑼꄈꂒꉻꊏꇬꄀꄉꉜꉚꄮꇬꆏꏤꇽꌅꈌ、ꌊꄻꌅꈌꌋꆀꌌꌊꄻꌠꌅꈌꀋꐥ。ꄈꑼꄈꂒꉻꊏꇬꄀꄉꉜꉚꈭꐨ,ꃶꐚꃅꑽꐪꄺꀱꑲꆏ,ꋍꄈꑼꌅꈌꀱꐛꅉꐛꄡꑟ;ꑽꐪꌭꄉꄺꀱꀋꅲꌠꆏ,ꄈꐴꇇꉈꋊꇧꎭꄡꑟ。

  ꄈꐴꇇꉈꋊꇧꎭꌠꆹꄈꈏꇓꀉꇨꐯꀉꇨꃅꌌꑽꃤꁵꑵꌠꉬ。ꄈꎀꍹꋍꊐꋑꀋꋒꄈꐴꇇꉈꋊꇧꎭꂿꄷꌠꐰꏤꅀꈌꁧꄮꇬꆏ,ꐊꑷꃅꋋꈨꃆꂮꐥꌠꌬꇐꌋꆀꉜꐨꈧꌠꌌꎥꃪꋒꃅꄉꇈ,ꉪꑌꏡꑌꃅꃅꄡꑟ。

  ꇖꊰꏢꌠ ꄈꑼꌌꍬꏦꇬꈴꄉꑽꃤꁵꌠꆏ,ꀋꎪꃅꌌꍝꀯ꒜ꀉꒉꈿꅉꇬꄉꇕꄟꐰꏤꇈ,ꄜꌊꄈꅿꅉꂫꊐꌠꊈꑼꉼꁳꈌꁧꎻꌶ;ꀋꄸꄷꌤꃆꊼꇅꀉꒉꅀꌼꇪꌠ,ꀋꉬꀐꇬꄈꑼꌌꄈꐴꇇꉈꋊꇧꎭꃅꀞꇬꆏ,ꐛꐨꐯꀋꌡꌠꇬꉜꄉ,ꄜꌊꑤꊐꌠꅀꑤꈋꉐꊐꌠꄈꅿꍬꏦꍤꄻꊈꑼꉼꁳꍤꄻꈌꁧꎻꄡꑟ。ꐛꐨꐋꀋꌡꃆꂮꐥꇬꆏ,ꑤꊐꌠꌋꆀꑤꊐꌠꈋꉐꄈꅿꊈꑼꉼꌋꆀꍬꏦꍤꄻꊈꑼꉼꆏꈛꎂꃅꄈꑼꌌꍬꏦꇬꈴꄉꑽꃤꁵꌠꐰꏤꌅꈌꐥ。

  ꄈꍏꑷꊈꑼꉼꌋꆀꃅꄷꋍꊐꋑꀋꋒꌠꇬꊈꑼꉼꇬꊈꑼ、ꄐꇱꊈꑼꈧꌠ,ꌌꄈꈏꇓꄉꅍꇔ、ꄈꂒꉻꊏꇬꄀꄉꉜꉚꌠꅀꄈꐴꇇꉈꋊꇧꎭꑽꃤꁵꌠꆏ,ꀋꎪꃅꊨꏦꐥꅉꊈꑼꉼ꒜ꐊꈴꃅꈿꇬꊿꌕꁧꋊꑍꁧꈋꉐꀉꑌꈮꁁꌠꁳꇫꐊꄉꐰꏤꎻ。ꃅꒊꃅꇁꐋꀋꌡꐨꐥꇬ,ꂴꆏꍏꑷꍔꍞꏳꌋꆀꃅꄷꋍꊐꋑꀋꋒꌠꊈꑼꉼꇬꎮꃷꊈꑼꉼꈧꌠꁳꐰꏤꎼꇁꇈ,ꊁꊈꑼꉼꐊꈴꃅ꒜ꈿꄮꇬꑲꆀꏚꍆꄉꈌꁧꎻꉆ。ꃅꄷꋍꊐꋑꀋꋒꌠꇬꊈꑼꉼꊈꑼꌋꆀꊁꄐꇱꊈꑼꌌꄚꂴꉉꈧꌠꇬꈴꄉꑽꃤꁵꌠꆏ,ꀋꎪꃅꌌꉎꊐꌠꄈꅿꊈꑼꉼꇬꁳꈌꁧꎻꌶ。

  ꍏꑷꊈꑼꉼꊈꑼ、ꄐꇱꊈꑼꀉꆈꃅꅓꑘꑽꃤꐆꌠꆏ,ꍏꑷꍔꍞꏳꁳꐰꏤꄉꋍꄈꐴꇇꉈꋊꇧꎭꎻ;ꃅꄷꋍꊐꋑꀋꋒꌠꇬꊈꑼꉼꊈꑼ、ꄐꇱꊈꑼꀉꆈꃅꅓꑘꑽꃤꐆꌠꆏ,ꋋꊐꌠꊈꑼꉼꎮꃷꊈꑼꉼꁳꐰꏤꄉꋍꄈꐴꇇꉈꋊꇧꎭꎻ。

  ꇖꊰꋋꏢꌠ ꄈꎀꍹꄈꑼꌌꑽꃤꅓꁵꂿꄷꐰꏤꇬ,ꑞꉬꌠꑞꃅꄉꑽꐪꈧꌠꍤꄻꄡꑟ。ꄯꒉꑽꃤꅓꁵꌠꑽꐪꁱꄉꈧꌠꌋꆀꑽꃤꅓꁵꏤꐪꆏꀋꎪꃅꄻꋍꑴꅉꀨꄉ,ꋍꑴꅉꉉꀽꌠꌋꆀꀥꑣꌠꇬꅲꌶ。ꀋꄸꄷꋍꑴꅉꑽꃤꅓꁵꏤꐪꉌꀋꃹꑲꆏ,ꅇꎹꉆ,ꄚꇬꄈꎀꍹꆏꀋꎪꃅꏲꂠꄉꀞꄻꅀꐳꃅꏭꎭꎼꁧ,ꍅꇫꄉꀋꉆ。ꇯꍝꃅꉜꐨꆹꑽꌠꏟꈯꃅꌭꄉꇬꎷꌠꌋꆀꇗꅉꀋꐥꃅꇖꂟꐺꌠꆏ,ꌌꀠꂘꌶ。

  ꇖꊰꑋꏢꌠ ꄈꎀꍹꀋꄸꄷꄈꍬꏦꀧꌋꃅꁁꏯꃅꅍꀋꃅꇧꎭꌠꆏ,ꀋꎪꃅꇬꏭꅑꁧꎹꌶ。

  ꄈꎀꍹꀉꆈꃅꄈꍬꏦꇬꆼꁏꄉꑽꃤꐥꇈ、ꊨꏦꑴꅉꇬꋊꍬꀋꄐꈧꌠꆏ,ꉎꊐꌠꄈꊈꑼꉼꁳꌌꍤꎖꊨꄅꈭꐨ,ꐛꃆꐛꂮꀊꐎꀉꆈꐨꇬꉜꄉ,ꌌꄺꂡꀱꅀꐆꇧꎭꌠꐰꏤꄉ,ꄷꀋꁧꄜꌊꉈꑴꉎꋍꊐꌠꄈꊈꑼꉼꁳꍤꄻꈌꁧꄉ,ꑌꐚꃅꌌꄛꇰꄉꍜꌬꎻ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室