ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꃘ꒾ꌠ  ꄈꅿꇥꀯ6

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꃘ꒾ꌠ ꄈꅿꇥꀯ


  ꌕꊯꌕꏢꌠ ꄈꅿꇥꀯꆹꄈꌤꑘꇬꈯꌬꉬ,ꏓꂱꋍꏅꌠꊩꌺꑌꉬ。ꄈꆹꑌꇐꌧꇐꐊꐙꏥꏦꇬꈴꄉꇥꀯꌋ,ꀋꎪꃅꄐꐨꉜꄉꊾꌬ,ꐮꉂꐯꏡꌠꇬꉜꄉꊾꌬꑠꏭꆼꁏ,ꊋꇤꄉꇥꀯꁥꌠꁳꇝꂱꈴ、ꀊꏀꈴ、ꌧꇐꈴ、ꌐꑘꈴꌠꃅꇫꑟ。

  ꄈꆹꇥꀯ꒿ꂘ、ꁰꍋ、ꌊꄻꌠꌋꆀꎖꉚꌠꇬꉜꁨ,ꈜꀕꇈꇥꀯꀊꏀꉾꃪꌠꁰꍋ、ꌊꄻꑠꉜꁨ。ꏣꀋꑌꃅꇥꀯꄹꏦꄺꀱꌠꄹꅷꀒꁨꆹ。

  ꄈꆹꌋꅪꇥꀯꌋꆀꀁꑌꊿꋅꇥꀯꁱꂘ、ꌊꄻꌠꇬꉜꁨ。

  ꌕꊯꇖꏢꌠ ꄈꋍꊐꋑꀋꋒꌠꇬꏲꌋꇥꀯꆏꀋꎪꃅꂴꅑꄉꄈꏦꋌꋐꌕꏢꌠꇬꐰꏤꄉꌠꄈꑼꋭꑘꈧꌠꃅꇫꑟꌶ,ꄷꀋꁧꀋꎪꃅꄚꊁꅉꀨꇎꏦꋋꈨꐥꌶ:

  (ꋍ)ꃅꎁꃅꇬꈉꌠꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌧꐨꐥꌶ,ꎔꃅ“ꌕꑵꁧꎁ”ꉪꇐꀋꂿꑘꌠꃅ,ꂴꅑꄉꈆꑪꃅꀻꎆꌠꉜꐨꃄꌬ,ꊋꇤꄉꂷꇻꌦꉪꏦꉆꈉ、ꉜꐨ、ꏡꁈꌬꄉꌤꃆꃶꐚꌠꎥꃪ、ꂥꀘ,ꏟꈯꃅꌷꌠꉉ、ꍔꍞꉉ、ꎃꊒꌠꉉꌠꃅꄉ,ꋍꑞꋍꑵꆳꇨꉏꇨꌠꏭꄙꎟꄎ。

  (ꑍ)ꇷꁨꉪꏦꎴꒉꌠꉪꅉꌋꆀꍏꇩꐛꐨꐧꋦꉪꏦꉪꉻꏟꈯꀕꌠꐥꄉ,ꏟꈯꃅꄈꅿꈛꏦꅉꀨꌋꆀꌐꏦ、ꏱꁈꋍꑞꋍꑵꑠꌫꄻ,ꎔꃅꄺꀱꁉꃑꉌꊋꑌ,ꐛꏀꈴꌤꑘꇬꑆꊋꅐꌞꄉ,ꐧꋦꉪꏦꋈꄻꅉꇬꄉꎭꅧꃅꑘꀺ,ꍔꏲꃅꐛꉜꐨꎃꊒꌠꑌ,ꃄꄻꅉꇬ、ꏓꂱ、ꐩꋊꇬꎖꉚꄎꌠꊌꐨꃶꐚꌠꃅꎼꇁꌶ。

  (ꌕ)ꏟꈯꃅꉪꇐꁌꄝ,ꑞꉬꌠꑞꃅꄉ,ꃅꋊꐊꄉꁨꆹ,ꄹꀖꏀꀺ,ꎔꃅꍤꄻꎥꃪꄉ,ꄈꅿꌐꏦ、ꏱꁈꌌꂱꑱꃅꄷ、ꂱꑱꌤꃅꅉꃶꐚꐛꐨꇬꌋꆀꏓꐯꇯꎼꇁꄎ,ꊌꐨꈲꁧꐥꃅꌤꃅ,ꅇꃶꐚꌠꉉ,ꌤꃶꐚꌠꀞ,ꈲꁧꃶꐚꌠꎹ,ꇶꏦꉪꏦꏭꁏ。

  (ꇖ)ꀉꇨꃅꇝꂱꌤꑘꃄꉈꑌ、ꍔꍞꆽꎍꐨꉪ,ꃄꄻꎖꋪꐥ,ꏲꂠꌤꃅꇬꊥꇫꄐꅍ、ꁱꀕꌧꇐꌋꆀꌐꑘꌧꇐꐥ。

  (ꉬ)ꎃꊒꃅꏓꂱꄻꁵꄉꌠꌅꈌꌬ、ꏦꃤꇬꈴꄉꌤꀞ,ꎃꐚꐙꎴ,ꉔꃅꏲꄉꏓꂱꎁꃅꃅ,ꊨꏦꂴꅑꄉꃅ,ꎬꅧꈪꑌꃅꐥ,ꑖꑟꃅꉹꁌꑌꑲ,ꏟꈯꃅꄈꅿꉹꁌꈛꏦꍬ,ꑴꐚꃅꄈꌋꆀꉹꁌꁳꀠꂘ、ꍞꊟꎻ,ꊋꀥꇱꄉꑌꇐꑲꇐꌶꄻ,ꑴꑳꁌꒉ、ꑴꑳꉪꐛ、ꑴꑳꋓꉪꁨ、ꑴꑳꊋꊡꌠꃅꇫꑟ,ꇛꌺꉪꏦꏭꁏ,ꈁꏾꃅꌅꅍꌬ,ꊨꏦꈲꏣꀉꄂꏂꇫꃅꇏꀋꉾꑠꏭꁏ。

  (ꃘ)ꏟꈯꃅꄈꅿꋯꁦꏓꁨꄹꏦꀧꌋꃅ,ꋯꁦꃅꇏꐥ,ꃅꇴꄉꉻꀉꒉꐛꉻꉜꐨꐥ,ꐋꀨꇬꋯꑌꄎ,ꐋꀨꊨꏦꌋꆀꉜꐨꐯꀋꐊꌠꑌꋯꑌꌊꐯꇯꄉꌤꃅꌠꑌꄚꐊ。

  ꌕꊯꉬꏢꌠ ꄈꑼꇥꀯꆹꃅꇮꄻꇮꃅꇥꀯꄈꑼꀋꉬꌠꌋꆀꐮꐊꄉꌤꃅꇮꌶ,ꊿꊇꉜꒉ,ꆺꀋꒉꃅꊿꊇꉾꃪꐨꌷꌶ。

  ꄈꎀꍹꋍꊐꋑꀋꋒꌠꆏꃅꇮꄻꇮꃅꄈꑼꀋꉬꌠꇥꀯꌧꇐꂿꇐꐥꑠꎹꈹꄉꌊꄻꌊꏲꂠꌤꃅꎻ,ꊿꊇꁳꀋꎪꃅꄉꅍꑌꐥꌅꈌꑌꐥꌠꇬꄉꀧꄉ,ꋒꐯꋒꃅꂿꄐꋊꇤꅐꇁ。

  ꌕꊰꃘꏢꌠ ꄈꅿꏲꌋꇥꀯꋍꊐꋑꀋꋒꌠ,ꋯꁦꐥꃅꌋꅐꇁꌠꉬꄿꂿ,ꉎꏲꂠꌤꃅꅉꇬꍝꁵꄉꌠꉬꄿꂿ,ꊿꊇꄉꅍꆹꐥꍂꃅꌬꌠꀋꉬ,ꐯꇯꇘꑐꅀꇔꇧꎭꑌꉆꌠꉬ。

  ꇥꀯꈎꄜꌋꆀꇭꀧꇷꄙꐨꐛꅹꃅꐪꊛꄉꌤꃅꀋꄐꀐꌠꆏ,ꇩꏤꏤꐪꇬꈴꄉꎞꆏ、ꐞꆏꄡꑟ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室