ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꉬ꒾ꌠ  ꄈꅿꅉꂫꊐꌠꎀꍹ5

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꉬ꒾ꌠ ꄈꅿꅉꂫꊐꌠꎀꍹ


  ꑍꊎꈬꏢꌠ ꎆꏂꑘ、ꂿꑘꁡꇤ、ꌤꏲꅉ、ꌶꅉ、ꈆꑪꎥꃪꑼꌙ、ꏦꎫꋥꁕ、ꐧꋦꎀꍹ、ꏓꂱꁌꄝꂽꇬꆃꄐꌋꆀꀉꁁꅉꂫꊐꌠꇬꌤꃅꅉ,ꄈꑼꑌꐚꌠꌕꑻꈋꉐꐥꌠꉬꑲꆏ,ꉬꇮꃅꄈꅿꅉꂫꊐꌠꎀꍹꄻꄡꑟ。

  ꄈꅿꅉꂫꊐꌠꎀꍹꆏ,ꌤꃅꈉꐨꇬꌋꆀꄈꑼꃷꁨꇬꉜꄉ,ꌌꉎꊐꌠꎀꍹꁳꈌꁧꄉ,ꏡꃏꄉꄈꅿꅉꂫꊐꌠꊈꑼꉼ、ꊝꍝꀯꊈꑼꉼ、ꍝꀯꊈꑼꉼꄻ。ꅉꂫꊐꌠꊈꑼꉼꆏꄈꑼ꒜ꀉꒉꈿꅉꇬꅀꁧꎁ꒜ꀉꒉꈿꅉꇬꄉꌊꄻꅐꇁ,ꊝꍝꀯꊈꑼꉼꌋꆀꍝꀯꊈꑼꉼꆏꄈꑼ꒜ꀉꒉꈿꅉꇬꄉꌊꄻꅐꇁ,ꊈꑼꌋꂯꄐꄉꌠꂓꄜꎼꇁꌠꆏꀊꐯꈭꃅꄈꑼꌋꆀꉹꁌꉜꐨꅱꄻꌶ。

  ꌕꊰꏢꌠ ꄈꅿꅉꂫꊐꌠꊈꑼꉼꆏꋍꈭꃄꄮꆏꌕꈎꅑꉬꈎꉬ,ꊝꍝꀯꊈꑼꉼ、ꍝꀯꊈꑼꉼꋍꈭꃄꄮꆏꑍꈓꅀꌕꈎꉬ。ꅉꂫꊐꌠꊈꑼꉼ、ꊝꍝꀯꊈꑼꉼ、ꍝꀯꊈꑼꉼꇬꌊꄻꅐꇁꌠꎻꏹ、ꃛꎻꏹꆏ,ꄜꌊꄈꎀꍹꉎꊐꌠꁳꈌꁧꎻꄡꑟ。

  ꌕꊰꋋꏢꌠ ꄈꅿꅉꂫꊐꌠꎀꍹꆹꄈꐧꋦꅉꂫꊐꌠꇬꎀꍹꇬꉈꈽꉺꇓꉬ,ꋋꆹꄈꌤꃅꌠꌋꆀꌉꈿꊋꃤꈁꐥꌠꅉ꒜ꉬ。ꋍꅉꀨꂿꃆꆏ:

  (ꋍ)ꄈꅿꈛꏦ、ꌐꏦꌋꆀꏱꁈꄜꉺ、ꃄꌬ,ꄈꍏꑷ、ꉎꊐꌠꎀꍹꌋꆀꂱꑱꊐꌠꎀꍹꏤꐪꄜꉺ、ꃄꌬꄉ,ꋒꐯꋒꃅꄈꑼꂴꅑꌶꀠꂿꄐꇤꅐꇁ,ꄈꈐꉈꇥꀯꌋꆀꉹꁌꏭꋯꑌ、ꊥꇬꄉ,ꊋꇤꄉꂱꑱꌤꃅꅉꇬꂿꃆꈁꐥꌠꃅꇫꑟ。

  (ꑍ)ꄈꑼꊥꇬꄉꎔꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌷ,ꈆꑪꃅꀻꎆꌠꉜꐨꌷ,ꄈꈛꏦ、ꌐꏦ、ꏱꁈꌋꆀꏤꐪꌷ,ꄈꅿꌧꇐꅉꀨꌷ,ꈆꑪ、ꁱꀕꌋꆀꃅꑘꌧꇐꌷ。

  (ꌕ)ꄈꑼꏭ꒿ꂘ、ꏲꂠ、ꍞꊟꌋꆀꁧꃤꃅ,ꄈꑼꊇꁧꀌꉀꐕ,ꄈꊈꀉꇨꃅꑌꇁꎻ,ꏦꇨꃅꄈꅿꎀꍹꐥꐨꃅ,ꀠꂘꌋꊨꏦꀱꊨꏦꀠꂘꌠꃅ,ꄈꅿꍬꏦꌫꄻꌋꆀꇫꀧꌋꃅ,ꄈꑼꏭꍞꊟꄉꏟꈯꃅꋭꑘꃅꇫꑟꎻ,ꄈꑼꌅꈌꈲꁧꏦꀧꄉꄝꌠꁳꇑꑣꄡꎽ。ꄈꑼꏮꐺꌠꏭꏲꂠꌠꊋꀥꇱꌋꆀꄻꃪ。

  (ꇖ)ꑖꑟꃅꉹꁌꑌꑲ,ꅉꀕꃅꉹꁌꄈꑼ、ꄈꌤꃅꅉꇬꏭꀠꂘꌠꌋꆀꉜꐨꅲꇫ,ꉹꁌꐥꄡꑟꌠꌅꐨꈲꁧꌋꆀꈲꏣꀧꌋꃅ,ꉹꁌꉪꇐꍔꍞꌤꃅꋒꌶ。

  (ꉬ)ꋒꐯꋒꃅꄈꑼꌋꆀꉹꁌꏣꀋꑌꐨꀹꄻꐨꋊꇤꅐꇁ,ꊿꊇꇢꊭꇬꊿꌧꅍꄐꅍꐥꑠꌋꅜ、ꁱꂘ、ꌋꁵꎼꇁ,ꊿꊇꏭꍞꊟ、ꊋꁈꄏꄉꄺꀱꁉꃑꌋꆀꐧꋦꉪꏦꐛꏀꈴꋈꄻꅉꇬꄉꊨꏦꌧꐨꂿꄐꐨꅐꌞꎻ。

  (ꃘ)ꏣꀋꑌꃅꄈꇬꃹꂿꄷꇖꂟꌠꏭ꒿ꂘ、ꁱꍋ,ꅉꀕꃅꄈꑼꀻꎆꇬꇯꌠꃅꋒꃅꄉ,ꒃꅐ、ꌤꃅꅉꂴꊐꌠꇬꌋꆀꌠꏀꈬꇬꄈꑼꀻꎆꌠꉜꂄꌶ。

  (ꏃ)ꄈꑼꇥꀯꌋꆀꀉꁁꌤꃅꊿꈁꐥꌠꏭꍞꊟꄉ,ꏦꇨꃅꇩꏤꏦꃤꌋꆀꌤꃅꏦꇬꍬ,ꏦꇨꃅꇩꏤꏱꎆꎆꏣꏦꇗꌋꆀꊿꌤꄹꏦꇬꍬ,ꇩꏤ、ꋍꉻꌋꆀꉹꁌꈲꏣꇑꍆꀋꉆ。

  (ꉆ)ꄈꑼꌋꆀꉹꁌ꒿ꂘꄉꊨꏦꑴꐚꃅꃅꇏꀋꉾꌠꏭꄘꑣ,ꏟꈯꃅꋍꑞꋍꑵꏦꃤꐆꑽꃤꃅꌠꏭꉈꈽ。

  ꌕꊰꑋꏢꌠ ꏦꎫ、ꑣ、ꍔꇬꄈꅿꅉꂫꊐꌠꊈꑼꉼꌋꆀꋂ、ꋥꁕꇬꄈꎀꍹꆏ,ꂱꑱꃅꄷꌤꃅꌠꇬꏲꂠ,ꏲꑘꎀꍹ、ꎆꏣꎀꍹꌋꆀꉹꁌꊨꏦꏲꌠꎀꍹꑠꋒꐯꋒꃅꌅꈌꌬꌠꇬꄉꀧ、ꊋꁈꄏ。

  ꇩꁨꎆꏂꑘꌋꆀꋍꏅꎆꏂꑘꇬꄈꅿꅉꂫꊐꌠꎀꍹꆏ,ꍔꍞꈯꄜꂿꄐꋊꇤꅐꇁ,ꎆꏂꑘꒃꅐꀰꏢꌠꇬꆼꒆꄉꌤꑘꀹꄻ。ꄈꌋꆀꇩꏤꌐꏦ、ꏱꁈꌌꂱꑱꎆꏂꑘꇬꃄꌬꌠꄉꀧ、ꍞꊟ;ꇷꄏꉼ、ꄏꌧꉼ、ꌤꍞꉼꌋꆀꏠꅿ(ꍣꍈ)ꏦꃤꈴꄉꌅꈌꌬꌠꊋꁈꄏ;ꋍ꒜ꁨꀋꑌꉌꂵꄅꀋꑌꃅꇮꃅꌤꃅꊿꋍꏅꌠꉘꇉꄉ,ꇮꃅꌤꃅꊿꁧꎁ꒜ꀉꒉꈿꅉꇬꌤꃅꌠꄏꐓ;ꎆꏂꑘꌤꃆꀉꒉꀊꂾꌠꏤꇽꌠꇬꐊꈽ;ꊋꀥꇱꄉꄈꎀꍹꑴꅉꋈꄻ,ꉪꇐꍔꍞꌤꃅꌠ、ꉌꊈꌧꑳꋈꄻꌠꌋꆀꇪꉼ、ꌠꏀꄨꉹꁌꎀꍹꑠꏲꂠ。

  ꉻꁨꏦꀋꉬꌠꎆꏣꎀꍹꇬꄈꅿꅉꂫꊐꌠꎀꍹꆏ,ꄈꅿꌐꏦꏱꁈꌬ,ꎆꏂꑘꄐꂘꌋꆀꍞꊟꌊꇩꏤꏦꃤꏦꇗꍬ,ꇪꉼ、ꌠꏀꄨꉹꁌꎀꍹꑠꏲꂠ,ꌤꃅꇮꃅꊿꉹꁌꏭꋯꑌꃯꉻꄉ,ꋍꑞꋌꁆꏯꇬꏦꊒꌅꈌꈲꁧꀧꌋꃅ,ꎆꏂꑘꉾꃪꃅꀻꎆꆹꌠꊥꎆ。

  ꏲꑘꏲꌋꃅꎁꄹꏦꌬꌠꌤꑘꌤꃅꅉꇬꄈꅿꅉꂫꊐꌠꎀꍹꆏ,ꍔꍞꈯꄜꂿꄐꇤꅐꇁ。ꄈꊈꏃꂠꌠꇂꃴꄉꏲꑘꏲꌋꃅꎁꄹꏦꌬꌠꌤꑘꌤꃅꅉꇬꄈꅿꅉꂫꊐꌠꎀꍹꆏ,ꌤꃆꀉꒉꀊꂾꌠꃆꂮꇕꄟ、ꐰꏤꌶ,ꋍꈭꐨꏲꑘꏲꌋꁳꋒꐯꋒꃅꂱꑱꌅꈌꌬꎻꌠꑌꄉꀧ。

  ꄈꌋꆀꇩꏤꌤꏲꅉꈁꐥꊐꌠꇬꄈꅿꅉꂫꊐꌠꎀꍹꆏ,ꏲꑘꇬꏲꌋꇇꀨꄉꂿꃆꃅꇫꑟ,ꌤꃅꌊꀊꅰꃅꃪꇁꎻ,ꏲꑘꏲꌋꑌꇫꐊꌠꄈꑼꈁꐥꌠꇬꍞꊟ,ꂱꑱꌤꃅꅉꈚꌠꇬꃅꑘꌤꆏꀋꏲ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室