ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꌕ꒾ꌠ  ꄈꅿꍏꑷꎀꍹ3

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꌕ꒾ꌠ ꄈꅿꍏꑷꎀꍹ


  ꊰꉆꏢꌠ ꄈꅿꇩꏤꑭꊂꁧꎁ꒜ꀉꒉꈿꌠꆏꉬꈎꋍꈭꈿ,ꍏꑷꊈꑼꉼꁳꇳꍝꄉꈿꎻ。ꍏꑷꊈꑼꉼꉜꇬꄻꅐ,ꅀꌜꊐꌠꎀꍹꌕꁧꋊꋍꁧꈋꉐꌠꇖꂟꇬꆏ,ꇩꏤꑭꊂꁧꎁ꒜ꀉꒉꈿꌠꆹꏛꃅꈿꉆ;ꀋꄸꄷꐛꐨꐋꀋꌡꌠꀋꐥꑲꆏ,ꄯꊁꄉꈿꀋꉆ。

  ꇩꏤꑭꊂꁧꎁ꒜ꀉꒉꈿꌠꁧꎁꃷꁨꌋꆀꌊꄻꏡꁈꆏ,ꍏꑷꊈꑼꉼꁳꐰꏤꎻ。

  ꊯꈬꏢꌠ ꄈꅿꇩꏤꑭꊂꁧꎁ꒜ꀉꒉꈿꅉꇬꌅꅍꆏ:

  (ꋍ)ꍏꑷꊈꑼꉼꅇꄜꌠꅱꄻꌋꆀꌌꍤꄻ;

  (ꑍ)ꍏꑷꍬꏦꍤꄻꊈꑼꉼꅇꄜꌠꅱꄻꌋꆀꌌꍤꄻ;

  (ꌕ)ꄈꇬꌤꃆꀉꒉꀊꂾꌠꇕꄟꄷꀋꁧꌌꏤꄻ;

  (ꇖ)ꄈꏦꌌꄺꀱ;

  (ꉬ)ꍏꑷꊈꑼꉼꌊꄻ;

  (ꃘ)ꍏꑷꍬꏦꍤꄻꊈꑼꉼꌊꄻ。

  ꑍꊏꏢꌠ ꄈꅿꇩꏤꑭꊂꁧꎁ꒜ꈿꅉꇬꌅꅍꆏ:ꌤꃆꀉꒉꀊꂾꌠꌌꇕꄟ、ꐰꏤ;ꍏꑷꊈꑼꉼ、ꍏꑷꍬꏦꍤꄻꊈꑼꉼꇬꊿꄹꁆꆥꄻꌋꆀꁦꎆꌋꇬꇯ。ꆥꄻ、ꁦꎆꌋꇬꇯꌠꍏꑷꊈꑼꌋꆀꄐꇱꍏꑷꊈꑼꃷꁨꆹ,ꄈꅿꇩꏤꑭꊂꁧꎁ꒜ꀉꒉꈿꅉꇬꌊꄻꎼꇁꌠꍏꑷꊈꑼꌋꆀꄐꇱꍏꑷꊈꑼꂱꑱꈁꐥꃷꁨꇬꉬꁧꋊꋍꁧꄩꐂꀋꉆ。

  ꑍꊏꋋꏢꌠ ꄈꅿꍏꑷꊈꑼꉼꋍꈭꌠꃄꄮꆏꃅꐎꉬꈎꃅꄉ。ꀋꄸꄷꇩꏤꑭꊂꁧꎁ꒜ꀉꒉꈿꌠꏛꃅꈿꅀꄯꊁꄉꈿꇬꆏ,ꋍꃄꄮꑌꄚꐊꄉꄺꀱ。ꍏꑷꊈꑼꉼꊈꑼꌋꆀꄐꇱꊈꑼꆏꀋꎪꃅꄈꇬꃹꉬꈎꈋꉐꐥꀐꌠꉬꌶ。ꍏꑷꊈꑼꉼꊈꑼꌋꆀꄐꇱꊈꑼꃷꁨꆏ, ꇩꏤꑭꊂꁧꎁ꒜ꀉꒉꈿꅉꇬꁳꏤꄻꎻ。ꍏꑷꊈꑼꉼꇬꊈꑼꃷꁨꀋꇎꇁꇬꆏ,ꍏꑷꊈꑼꉼꇬꄐꇱꊈꑼꈧꌠꇬꀾꀉꑌꀁꑌꊌꐨꇬꉜꄉ꒾ꁨꃅꄻꇬꇯ。

  ꍏꑷꊈꑼꉼꐊꈴ꒜ꈿꌠꆏꍏꑷꍔꍞꏳꇬꁳꇳꍝꄉꈿꎻ,ꋍꈓꇬꀁꑌꐯꀁꑌꇬꑌꋍꃢꈿꌶ。ꍏꑷꍔꍞꏳꆏꍏꑷꊈꑼꉼꐊꈴ꒜ꈿꅉꏮꌤꃅꅇꄜ,ꇬꁳꍞꊟꎻ。

  ꇩꏤꑭꊂꁧꎁ꒜ꀉꒉꀋꈿꄮꇬꆏ,ꍏꑷꊈꑼꉼꆏꇩꏤꑭꊂꁧꎁ꒜ꀉꒉꈿꅉꇬꐰꏤꄉꌠꌬꄉ,ꄈꌤꃅꅍꈁꐥꌠꇬꏲꂠ,ꉇꉻꏭꆏꍏꇩꇭꍣꄈꁧꎁꃅ。

  ꑍꊏꑋꏢꌠ ꄈꍏꅿꑷꍔꍞꏳ、ꍏꑷꍔꍞꏳꅉꀕꌤꏲꊈꑼꉼꌋꆀꍏꑷꊈꑼꉼꊝꎻꏹꆏ,ꍏꑷꊈꑼꉼꐊꈴ꒜ꈿꄉꌊꄻ。ꍏꑷꊈꑼꉼꊝꎻꏹꆏꀋꎪꃅꍏꑷꍔꍞꏳꅉꀕꌤꏲꊈꑼꉼꊈꑼꈬꇬꄉꌊꄻꅐꇁꌶ。

  ꍏꑷꍔꍞꏳꌋꆀꋍꅉꀕꌤꏲꊈꑼꉼꆹꍏꑷꊈꑼꉼꐊꈴ꒜ꀋꈿꄮꇬꆏ,ꍏꑷꊈꑼꉼꌅꈌꌬ。

  ꍏꑷꎻꏹꍲꆹꍏꑷꍔꍞꏳꌋꆀꋍꅉꀕꌤꏲꊈꑼꉼꇬꌤꀞꅉꉬ;ꊿꄚꐊꌠꆏꍏꑷꍔꍞꏳꅉꀕꌤꏲꊈꑼꉼꁳꂓꄜꄉ,ꍏꑷꊈꑼꉼꐊꈴ꒜ꈿꅉꄉꉌꃹꈴꌶ。

  ꍏꑷꊈꑼꉼꊝꎻꏹꆏꍏꑷꍔꍞꏳ꒜ꈿꇬꌋꆀꍏꑷꍔꍞꏳꅉꀕꌤꏲꊈꑼꉼ꒜ꈿꇬꌄꇤꄉꇳꍝꌊꈿ,ꄷꀋꁧꍏꑷꎻꏹꍲꌤꃅꌠꊥꇺ。

  ꄈꅿꍏꑷꂽꌤꊈꑼꉼꇬꐊꊿꈧꌠꆏꍏꑷꊈꑼꉼꇬꁳꏤꄻꎻ。

  ꍏꑷꊈꑼꉼꋍꈭꋑꀋꋒꌠꇬꌊꄻꅐꇁꌠꍏꑷꏲꂠꅉꌋꆀꍏꑷꇬꏲꌋꈧꌠꆏ,ꊁꈭꌠꇩꏤꑭꊂꁧꎁ꒜ꀉꒉꈿꄮꇬ,ꐪꊛꄉꄈꑍ꒜ꑍꌤꆿꃅꌠꏱꇺ,ꏲꅷꊁꈭꌠꍏꑷꊈꑼꉼꇬꍏꑷꏲꂠꅉꌋꆀꍏꑷꇬꏲꌋꀊꏀꈧꌠꌊꄻꅐꇁꄮꑟ。

  ꑍꊎꌕꏢꌠ ꍏꇩꏓꂱꁌꄝꂽꇬꄈꎀꍹꆹ,ꍏꑷꊈꑼꉼꄐꌐꅉꈴꄉꌤꃅꌶ。ꍏꑷꂽꌤꊈꑼꉼꇬꍔꍞꌤꃅꅉꆏꍏꇩꏓꂱꁌꄝꂽꊝꍔꍞꀯꉬ,ꊝꍔꍞꀯꆹꌐꄉꂽꇬꄈꅿꌤꃅꌠꌋꆀꍔꍞꃆꂮꌤꃅꌠꇬꌄꇤ。ꂽꇬꄈꎀꍹꏦꉻꌋꆀꏱꅉꆹ,ꍏꑷꂽꌤꊈꑼꉼꁳꏤꄻꎻ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室