ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꑍ꒾ꌠ  ꄈꅿꎀꍹꄹꏦ2

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꑍ꒾ꌠ ꄈꅿꎀꍹꄹꏦ


  ꊰꏢꌠ ꄈꆹꊨꏦꐱꀨꌋꆀꄈꏦꇬꈴꄉ,ꋯꁦꏓꁨꄹꏦꇬꍬꄉꊥꇫꌊꏓꋍꃱꃅꄉꌠꉻꄜꂷꉬ。ꄈꅿꋯꁦꏓꁨꄹꏦꏥꏦꅉꀨꆏ:

  (ꋍ)ꄈꑼꑴꅉꆏꄈꎀꍹꅇꃅ,ꀁꑌꌠꆏꀉꑌꌠꅇꃅ,ꎀꍹꐰꊐꌠꆏꎀꍹꉎꊐꌠꅇꃅ,ꄈꑭꊂꎀꍹꈁꐥꌠꌋꆀꄈꑼꈁꐥꌠꆏꄈꅿꇩꏤꑭꊂꁧꎁ꒜ꀉꒉꈿꅉꌋꆀꍏꑷꊈꑼꉼꅇꃅ。

  (ꑍ)ꄈꅿꏲꂠꌤꏲꅉꋍꊐꋑꀋꋒꌠꆏ,ꊿꊇꁆꌌꁧꎁꃅꌤꏲꅉꌋꆀꄈꎀꍹꀋꉬꅉꇬꄈꊤꉇꄉꈭꐨꆏ,ꐯꇯꌊꄻꅐꇁꌠꉬꌶ。

  (ꌕ)ꄈꅿꏲꂠꌤꏲꅉꀊꂥꇊꀊꂥꊐꌠꆏ,ꄈꅿꇩꏤꑭꊂꁧꎁ꒜ꀉꒉꈿꅉꌋꆀ꒜ꈿꅉꇬꄉꌊꄻꅐꇁꌠꍏꑷꊈꑼꉼꉬ。ꄈꃅꄷꇬꏲꂠꌤꏲꅉꋍꊐꋑꀋꋒꌠꆏ,ꄈꃅꄷꇬꁧꎁ꒜ꀉꒉꈿꅉꋍꊐꋑꀋꋒꌠꌋꆀꊿꊇ꒜ꈿꅉꇬꄉꌊꄻꅐꇁꌠꊈꑼꉼꉬ。ꄈꅿꊈꑼꉼꋍꊐꋑꀋꋒꌠꆏꂱꑱꊐꌠꇬꁧꎁ꒜ꀉꒉꈿꅉꇬꆽꎍꄉꄷꀋꁧꌤꃅꐨꅇꄜꌶ。

  (ꇖ)ꄈꅿꎀꍹꉎꊐꌠꆏꅉꀕꃅꎀꍹꐰꊐꌠꌋꆀꄈꑼꉹꁌꉜꐨꅲꇫꄉ,ꐳꃅꌤꃆꊿꊇꄜꅐꇁꌠꌌꂥꀘꌶ。ꄈꎀꍹꐰꊐꌠꆏꎀꍹꉎꊐꌠꏭꅺꇰꌋꆀꌤꃅꐨꅇꄜꇈ,ꉈꑴꄁꋦꃅꆽꎍꄉꂱꑱꃅꅍꈍꈐꌤꃆꑠꂥꀘꌶ。ꎀꍹꐰꉎꑍꊐꌠꇢꊭꇬꐛꐪꄜꐮꇰ、ꐮꊋꁈꄏꌋꆀꐮꍞꊟꌶ。ꄈꎀꍹꋍꊐꋑꀋꋒꌠꆏꏤꄻꄉꌠꇬꈴꄈꃆꄇꄜꋊꌠꃅ,ꄈꑼꁳꄈꈏꇓꇬꌤꃆꃆꂮꑠꀉꑌꃅꅉꐚꌋꆀꃅꈽꎻ。

  (ꉬ)ꄈꅿꊈꑼꉼꋍꊐꋑꀋꋒꌠꆏꋍꉻꃅꏲꂠꌠꌋꆀꂱꑱꃅꐨꁸꄉꆽꎍꃅꐮꐊꏲꌠꄹꏦꌬ。ꌤꃆꀉꒉꀊꂾꌠꆏꐯꇯꋍꉻꃅꏲꂠ、ꋯꁦꏓꁨ、ꄂꃅꎥꇖ、꒜ꈿꄉꐰꏤꌠꏥꏦꇬꈴꄉ,ꌌꄈꃤꊈꑼꉼꁳꋍꉻꃅꇕꄟꄉ,ꐰꏤꅐꇁꎼꌶ;ꊈꑼꉼꇬꊿꈧꌠꆏꋍꉻꃅꐰꏤꄉꌠꌋꆀꌤꁸꄉꃅꌠꇬꈴꄉ,ꋒꐯꋒꃅꊨꏦꆽꎍꃅꐨꃅꇫꑟꌶ。

  (ꃘ)ꄈꆹꊾꂷꏭꉜꒉꅼꇨꌠꆏꐛꄟꈍꃅꄉꅐꇁꌠꉬꄿꂿꇫꏢꇋꌠꉬ。ꄈꅿꏲꂠꊿꃅꈧꐤꄟꆏꄈꌋꆀꏓꂱꁳꍞꊟꎻꌠꄉꀧꄉ,ꋍꈭꐨꏲꂠꊿꄈꌋꆀꏓꂱꈲꐪꁧꎁꃅꌠꐤꒉꐨꑌꀧꌋꃅꌶ。

  ꊯꊪꏢꌠ ꄈꁧꎁ꒜ꀉꒉꈿꅉꋍꊐꋑꀋꋒꌠꇬꁧꎁꌋꆀꊈꑼꉼꌊꄻꅐꇁꌠꆹ,ꌊꄻꊿꉪꐨꇬꈴꄉꃅꌶ。ꌊꄻꇬꂓꀋꄀꃅꌋꌠꃄꄟꌬ。ꌋꂯꄐꄉꌠꆏꄈꎀꍹꌋꆀꌊꄻꊿꁳꋒꐯꋒꃅꌌꇕꄟꎻ。ꈛꎂꃅꌋꂯꄐꄉꌠꃷꁨꆏꌋꅐꄡꑟꌠꃷꁨꄩꎆꄉꍣꌋꏡꁈꌌꑌꐚꃅꌊꄻꉆ。ꂴꍣꌋꏡꁈꌌꌊꄻꉚꇈ,ꌋꂯꄐꄉꌠꂓꌊꄻꅐꇁꈭꐨꑲꆀ,ꑌꐚꃅꌊꄻꑌꉆ。ꌊꄻꊿꆹꌋꂯꄐꄉꌠꊿꃆꂮꅉꐚ、ꌋꂯꄐꄉꌠꊿꄺꀱꇧꎭꌠꇖꂟ、ꌋꂯꄐꄉꌠꈐꏭꑞꂷꀋꌋꌠꌋꆀꊿꀉꁁꌋꌠꌅꈌꐥ。ꎀꍹꌋꆀꊿꊨꏦꑞꂷꉬꄿꂿꃄꄟꋍꑞꋌꑵꇬꈴꄉꄀꇗꇱꄉꌊꄻꊿꁳꑞꂷꌋꅀꀋꌋꄷꀋꉆ。

  ꄈꅿꃅꄷꁧꎁ꒜ꀉꒉꈿꅉꋍꊐꋑꀋꋒꌠꌋꆀꅉꂫꊐꌠꇬꁧꎁ꒜ꀉꒉꈿꅉꌊꄻꇬ,ꀋꄸꄷꄈꏦꇬꏦꐆꌠꃆꂮꑠꇫꅐꇁꇬꆏ,ꄈꉎꊐꌠꄈꅿꊈꑼꉼꆏꌌꍤꄻꊨꄅꈭꐨ,ꌊꄻꄉꌠꀋꍝꄷꇨꎭꌠꌋꆀꏡꁈꄐꊒꌠꇬꈴꄉꐰꏤꅐꇁꄡꑟ,ꄷꀋꁧꄜꌊꉎꊐꌠꄈꅿꊈꑼꉼꁳꍤꄻꄉꈌꁧꎼꇁꇈ,ꑌꐚꃅꄛꇰꄉꃄꌬꌶ。

  ꄈꅿꁧꎁ꒜ꀉꒉꈿꅉꋍꊐꋑꀋꋒꌠꁧꎁꆏꃄꄮꏤꐥꄹꏦꌫꄻ。

  ꊰꑋꏢꌠ ꄈꅿꍏꑷꌋꆀꃅꄷꋍꊐꋑꀋꋒꌠꇬꊈꑼꉼꆏꄻꅐꄮꇬꆏꁧꎁꇴꌊ꒜ꈿꄉ,ꌤꃆꀉꒉꀊꂾꌠꐳꃅꂥꀘꌶꌠꇕꄟꐰꏤꉆ。ꁧꎁ꒜ꈿꌠꁧꎁꃷꁨꌋꆀꁧꎁꌊꄻꏡꁈꆏ,ꁧꎁ꒜ꈿꌠꇳꍝꌠꊈꑼꉼꁳꐰꏤꎻ。

  ꊯꌕꏢꌠ ꄈꅿꎀꍹꀊꏀꌠꄻ,ꅀꄈꅿꎀꍹꂴꐥꌠꐆꇧꎭꂿꄷꇬꆏ,ꀋꎪꃅꉎꊐꌠꄈꎀꍹꁳꐰꏤꎻ。

  ꄈꅿꃅꄷꁧꎁ꒜ꀉꒉꈿꅉꋍꊐꋑꀋꋒꌠꌋꆀꅉꂫꊐꌠꁧꎁ꒜ꀉꒉꈿꅉ꒜ꀋꈿꄮꇬ,ꉎꊐꌠꄈꎀꍹꉜꇬꄻꅐꇬꆏ,ꐰꊐꌠꄈꎀꍹꏲꌋꄀꆦꅀꌐꄉꁆꇬꇯꉆ。

  ꄈꅿꍏꑷꌋꆀꃅꄷꋍꊐꋑꀋꋒꌠꇬꊈꑼꉼꆏꁧꎁꌤꏲꅉꁆꄻꉆ。

  ꄈꅿꍏꑷꌋꆀꌜ、ꊨꏦꏱꅉꐎ、ꎂꏲꏃꊈꑼꉼꆏꏮꆫꄹꏦꌫꄻ。

  ꊯꇖꏢꌠ ꄈꅿꋍꊐꋑꀋꋒꌠꇬꏲꂠꌤꏲꅉꆏ,ꐰꊐꌠꎀꍹꃆꂮꐥꌠꌤꀉꒉꀊꂾꑠꐰꏤꄮꇬ,ꑍ꒜ꑍꎃꐚꃅꇬꆏ,ꐰꊐꌠꎀꍹꉜꐨꅲꇫꌶ。ꐰꊐꌠꎀꍹꁳꁣꀋꐥꃅꊿꊇꌅꅍꌬꎻꌠꄉꀧꌶ。ꌤꃆꐰꊐꌠꎀꍹꁳꀞꄻꄡꑟꌠꆏ,ꀋꄸꄷꐛꐨꐋꀋꌡꌠꀋꐥꑲꆏ,ꉎꊐꌠꏲꂠꌤꏲꅉꆹꇫꈌꄀꇇꏿꌠꄡꃅ。

  ꊯꉬꏢꌠ ꇩꏤꑭꊂꇬꃆꂮꐥꌠꏱꁈꃆꂮꌤꃆꀉꒉꀊꂾꌠꆏ,ꄈꍏꑷꀉꄂꇫꐰꏤꌅꈌꐥ,ꌤꃅꅉꈧꌠ、ꃅꄷꈧꌠꄈꎀꍹꆹꉜꐨꌌꍏꑷꏭꉉꉆ,ꄚꊨꏦꈁꏾꃅꐰꏤꌋꆀꉇꉻꏭꉜꐨꄜꃑꀋꉆ。

  ꄈꅿꐰꊐꌠꎀꍹꆏꀋꎪꃅꏟꈯꃅꉎꊐꌠꎀꍹꐰꏤꄉꌠꇬꈴꄉꃄꌬꌶ。ꀋꄸꄷꐰꊐꌠꎀꍹꉜꇬ,ꉎꊐꌠꎀꍹꐰꏤꄉꌠꂱꑱꃅꄷ、ꂱꑱꌤꃅꅉꃶꐚꐛꐨꌋꆀꐮꄉꀋꄐꇬꆏ,ꄺꀱꄷꌠꇖꉆ;ꀋꄸꄷꉎꊐꌠꎀꍹꆹꂴꐰꏤꄉꌠꌬꇬꎷꄷꑲꆏ,ꐰꊐꌠꎀꍹꆏꀋꎪꃅꄚꍬꄉꃅꌶ,ꄷꀋꁧꄇꄜꋊꄉꉜꐨꐯꀋꌡꌠꄜꃑꀋꉆ,ꄚꀱꉎꊐꌠꄩꎀꍹꊐꌠꏭꄛꇰꌅꈌꐥ。

  ꄈꅿꎀꍹꋍꊐꋑꀋꋒꌠꇬꉜꅍꄯꒉꌋꆀꀉꁁꄜꉺꅍꆹ,ꀋꎪꃅꄈꅿꈛꏦ、ꌐꏦ、ꏱꁈꌋꆀꏤꐪꄜꉺꌶ。

  ꊰꃘꏢꌠ ꄈꎀꍹꌤꃆꇕꄟꐰꏤꄮꇬꆏ,ꀋꎪꃅꀁꑌꌠꆏꀉꑌꌠꅇꃅꌠꏥꏦꌬ。ꌤꃆꀋꂿꑘꌠꐰꏤꇬꆏ,ꊨꇽꄉꃅꌶ。ꊿꀁꑌꈨꉜꐨꐯꀋꌡꌠꆹ,ꎔꎗꃅꌌꉪꏡꄡꑟ。ꀋꄸꄷꌤꃆꀉꒉꀊꂾꌠꀂꏽꐮꇖꅒꄉ,ꑍꁁꏯꊿꃷꁨꐯꀋꇊꑍꃅꐙꇬꆏ,ꐛꐨꃛꊸꐨꐥꌠꆏꀋꎪꃅꊿꀉꑌꌠꉜꐨꇬꈴꄉꃅꌠꉇꄉꈭꐨ,ꊼꇅꄯꇫꄉꑲꆀꐰꏤ,ꀒꁨꋍꁘꃅꍤꄻꎥꃪ,ꉜꐨꉉꐮꇰꄉ,ꌌꊁꃢꌠꇬꄉꊨꇽꀱꄡꑟ;ꐛꃆꐛꂮꐋꀋꌡꐨꐤꄮꇬꆏ,ꐮꇖꅒꌠꌤꃆꄜꌊꉎꊐꌠꎀꍹꇰꄉ,ꍞꇽꇧꎭꄷꇖꉆ。

  ꄈꑼꑴꅉꄈꎀꍹꁧꎁꃅꄉꉜꐨꀋꉬꀋꉆꌠꉉꄜꇬ,ꀋꄸꄷꄈꎀꍹꐰꏤꄉꌠꈐꐂꆹꑲꆏ,ꀋꎪꃅꌌꋍꐉꅉꄈꎀꍹꁳꇕꄟꄉꐰꏤꎻ,ꅀꌌꉎꊐꌠꄈꎀꍹꏭꅱꄻꌶ。ꄈꑼꑞꂷꉬꄿꂿ,ꄉꅍꀄꊭꀉꒉꄿꂿ,ꐯꇯꊨꏦꋧꁧꃅꌤꃆꀉꒉꀊꂾꌠꐰꏤꀋꉆ;ꀋꄸꄷꐛꐨꃛꊸꌠꊝꇁꄉ,ꊨꏦꁳꀋꎪꃅꐰꏤꎻꄻꅐꇬꑌ,ꃅꄉꈭꐨꆏꐳꃅꄈꎀꍹꏭꄛꇰꌶ。ꏲꂠꊿꑞꂷꉬꄿꂿꊨꏦꆹꇏꏿꈁꏾꃅꐺꌠꌋꆀꊨꏦꄓꄈꎀꍹꄩꍅꄉꃅꀋꉆ。

  ꊰꏁꏢꌠ ꄈꅿꍏꑷ、ꃅꄷꌋꆀꅉꂫꊐꌠꎀꍹꆏ,ꐯꇯꀋꎪꃅꄈꋈꄻꌠꉜꁨꌶ,ꅉꀕꃅꄈꅿꄜꉺꌤꃅ、꒿ꂘꌤꃅ、ꎀꍹꌤꃅ、ꍬꏦꍤꄻꌤꃅ、ꉹꁌꌤꃅ、ꏓꋍꃱꃅꌤꃅꁁꏯꑠꌌꇕꄟ、ꍤꄻ,ꋓꉪꁨꄉꄈꈐꄈꉈꉪꇐꍔꍞꐛꐪꎥꃪ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室