ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꋍ꒾ꌠ  ꄈꑼ1

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꋍ꒾ꌠ ꄈꑼ


  ꋍꏢꌠ ꈎꄜꊰꉆꈓꀐꌠꍏꇩꇮꃅꊿ、ꂿꑘꊿ、ꂽꑼ、ꌧꇐꐥꊿꌋꆀꀉꁁꐧꋦꏠꊐꇬꊿꂴꅑꌠ,ꄈꐱꀨꌋꆀꄈꏦꇬꉌꃹ,ꄈꎀꍹꂷꇬꐊꏾꄷꀋꁧꄚꄉꏣꀋꑌꃅꌤꃅ、ꄈꏤꐪꌬꌠꌋꆀꏤꈉꇬꈴꄉꄈꎆꏮꌠꆏ,ꍏꇩꇭꍣꄈꇬꃹꌠꇖꂟꉆ。

  ꑍꏢꌠ ꍏꇩꇭꍣꄈꄈꑼꆹꍏꇩꇮꃅꊿꏠꌠꇬꇷꁨꉪꏦꉪꇐꐥꌠꂴꅑꌠꂽꑼꉬ。

  ꍏꇩꇭꍣꄈꄈꑼꆹꀋꎪꃅꋍ꒜ꁨꀋꑌꉌꂵꄅꀋꑌꃅꏓꂱꁧꎁꃅꃅ,ꊨꏦꑞꁮꑋꇬꑌꀋꑴꃅ,ꐥꍂꃅꇷꁨꉪꏦꃅꇫꑟꂯꌠꎁꃅꑅꅐꊋꆜꌠꉬ。

  ꍏꇩꇭꍣꄈꄈꑼꆹꐥꍂꃅꑘꃅꏓꂱꇬꎃꐚꂷꉬꇬꎷ。ꏦꃤꌋꆀꏱꁈꏤꄻꄉꌠꈐꏭꊨꏦꈲꁧꌋꆀꌤꃅꌅꅍꉇꄉꈭꐨꆏ,ꇭꍣꄈꑼꈁꐥꌠꃅꊨꏦꈲꏣꌋꆀꌅꈌꐋꀋꌡꑠꈍꃅꐙꌠꑌꏂꇫꇖꂟꀋꉆ。

  ꌕꏢꌠ ꄈꑼꆹꀋꎪꃅꄚꊁꋭꑘꋋꈨꃅꌶ:

  (ꋍ)ꎔꎗꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌷ,ꈆꑪꃅꀻꎆꌠꉜꐨꌷ,ꄈꈛꏦ、ꌐꏦ、ꏱꁈꌋꆀꏤꐪꌷ,ꄈꅉꀨꌧꇐꌷ,ꈆꑪ、ꁱꀕ、ꏦꃤꌋꆀꃅꑘꌧꇐꌷ,ꊋꇤꄉꏓꂱꁧꎁꃅꌠꄐꊋꉀꐕ。

  (ꑍ)ꄈꈛꏦꅉꀨꌋꆀꋍꑞꋍꑵꌐꏦ、ꏱꁈꌫꄻ,ꂴꅑꄉꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꃅꈽ,ꉹꁌꏃꄉꎆꏣꀻꎆꌠꌋꆀꐧꋦꀻꎆꌠꎁꃅꎬꅧꃅꈒꇤꊋꇤ,ꒃꅐ、ꌤꃅ、ꌶꄻꇬꌋꆀꐧꋦꐥꐨꇬꂴꅑꌶꀠꂿꄐꃅꐙꌶ。

  (ꌕ)ꏟꈯꃅꄈꌋꆀꏓꂱꈲꏣꌌꑞꑌꏭꀋꋌꃅꄉꇬꎷ,ꊨꏦꈲꏣꆏꄈꌋꆀꏓꂱꈲꏣꅇꃅ,ꎬꅉꂴꐊ,ꌑꅉꊁꐊ,ꊨꏦꃤꍅꄉꋍꏅꁧꎁꃅ,ꑆꊋꀉꑌꃅꅐꌞꌶ。

  (ꇖ)ꊨꏦꑴꐚꃅꄈꍬꏦꍬ,ꂴꅑꄉꇩꏤꏦꃤꏦꇗꇬꈴꄉꃅ,ꏦꇨꃅꇩꏤꂁꇐꂁꈬꃅꄉ,ꄈꏤꐪꃄꌬ,ꎀꍹꇬꅇꃅꄉꑞꃅꄷꆏꑞꃅ,ꏣꀋꑌꃅꄈꂿꃆꃅꇫꑟ。

  (ꉬ)ꄈꋯꑌꌠꌋꆀꋍꃱꃅꌠꀧꌋꃅ,ꄈꏭꀋꎪꀋꑴ,ꉉꌠꃅꌠꐮꐊ,ꏟꈯꃅꁥꁸꎀꍹꈁꐥꌠꌋꆀꐭꃅꐮꉻꏑꐺꌠꏭꁏ,ꑓꂿꆏꏧꑸꈞꆈꆏꊂꀠꑍꈌꅑꌠꌋꆀꈞꆈꄉꊾꏂꇫꌠꈁꐥꌠꏭꁏ。

  (ꃘ)ꇯꍝꃅꀠꂘꌋꆀꊨꏦꀱꊨꏦꀠꂘꌠꍔꆙꄉ,ꀬꅑꃅꌤꃅꐛꀋꒆꌠꌋꆀꃅꑽꌠꀖꍰ、ꋊꍬ,ꏟꈯꃅꏣꑌꍹꈔꌠꏭꉈꈽ。

  (ꏃ)ꑖꑟꃅꉹꁌꏭꑌꑲ,ꄈꉪꐨꌌꉹꁌꏭꄜꉺ,ꌤꆿꊝꇬꆏꉹꁌꏭꇕꄟ,ꉹꁌꉜꐨꌋꆀꇖꐨꆏꐳꃅꄜꌌꄈꏭꇰ,ꉹꁌꈲꏣꊌꋭꌠꀧꌋꃅ。

  (ꉆ)ꐧꋦꉪꏦꃅꇏꀊꏀꌠꍔꆙ,ꂴꅑꄉꐧꋦꉪꏦꂄꄸꉜꐨꉜꄉꃅ,ꇷꁨꉪꏦꑌꇐꄖꄑ,ꇩꏤꌋꆀꏓꂱꈲꏣꀧꌋꃅꂯꐛꅹ,ꊋꋠꐨꌋꆀꃨꆰꐨꐥꇬꏸꀋꏦꃅꐂꂴꉆꄉ,ꌳꈄꃅꉈꈽ,ꀑꇬꆺꑌꀋꏦ。

  ꇖꏢꌠ ꄈꑼꆏꌅꈌꄚꊁꑠꈨꐥ:

  (ꋍ)ꄈꃆꂮꐥꌠ꒜ꈿꈽ,ꄈꃆꂮꐥꌠꁱꐘꉜ,ꄈꁳ꒿ꂘ、ꁱꂘꎻ。

  (ꑍ)ꄈ꒜ꈿꅉꇬꌋꆀꄈꄯꒉꇬꄉ,ꄈꏱꁈꌤꃆꃆꂮꎥꃪꈽ。

  (ꌕ)ꄈꌤꃅꀂꏽꇬꉜꐨꌋꆀꄕꊪꅇꉉꎼꇁ。

  (ꇖ)ꄈ꒜ꈿꅉꇬꄉꁢꊧꐥꃅꄈꎀꍹꌋꆀꄈꑼꑞꂷꏭꑌꀠꂘꉆ,ꄈꏭꆽꎍꐨꐥꃅꄈꎀꍹꌋꆀꄈꑼꑞꂷꉬꂿꏦꃤꍬꏦꁎꐆꌠꌤꃶꐚꌠꌌꀖꍰ、ꀖꇰꉆ,ꄈꑼꍬꏦꁎꐆꌠꌌꑽꃤꁵꄷꇖꉆ,ꇥꀯꄉꅍꃅꀋꄐꌠꄉꅍꇔꅀꄉꅍꆦꄷꇖꉆ。

  (ꉬ)ꊨꇽꌅꈌ、ꌊꄻꌅꈌꐥ,ꌠꇫꌊꄻꌅꈌꐥ。

  (ꃘ)ꄈꎀꍹꇬꄈꑼꌌꄈꍬꏦꉜꄉꑽꃤꁵꅀꌌꍜꇠꌠꐮꇖꏤꄻꄮꇬ,ꋍꊨꏦꄚꐊꄉ꒜ꈿꈽꅀꉉꇔꌅꈌꐥ,ꀉꁁꄈꑼꈧꌠꑌꋍꎁꃅꅇꊪꌬ、ꉉꀥꉆ。

  (ꏃ)ꄈꏤꐪꌋꆀꏱꁈꇬꉜꐨꐯꀋꌡꌠꐥꑲꆏ,ꀋꎪꃅꃄꌬꈭꐨꑲꆀ,ꀀꉜꐨꊏꄉꄷꉉꀽꉆ,ꄷꀋꁧꊨꏦꉜꐨꌌꄈꎀꍹꉎꊐꌠꅑꅸꍏꑷꇬꑟꌠꏭꉉꄜꉆ。

  (ꉆ)ꄈꎀꍹꉎꊐꌠꇬꅑꍏꑷꇬꑟꌠꏭꑗꇖ、ꇖꂟꌋꆀꅇꎹꉆ,ꄷꀋꁧꎀꍹꄚꃆꂮꐥꈧꌠꏭꆽꎍꃅꄉꅇꏮꄷꇖꉆ。

  ꄈꎀꍹꑞꊐꉬꄿꂿꅑꅸꍏꑷꇬꑟꌠꐯꇯꄈꑼꄚꂴꉉꌠꌅꈌꋋꈨꇑꀋꉆ。

  ꉬꏢꌠ ꄈꑼꊪꇬꇯꇬ,ꀋꎪꃅꄈꍝꀯꇬꈴꄉ,ꋍꂷꋍꂷꃅꃹꌠꏥꏦꌭꈬꌶ。

  ꊿꄈꇬꃹꂿꄷꇖꂟꌠꆏ,ꄈꇬꃹꉌꃹꄯꒉꁱꌶ,ꄈꑼꑌꐚꑍꂷꁳꇢꈴꊿꄻꎻ,ꍝꀯ꒜ꀉꒉꈿꅉꉌꃹꈴꇈꉎꊐꌠꄈꎀꍹꈌꁧꇇꈴꌶ,ꄷꀋꁧꄐꄻꄮꐥꄉꍤꎖꈭꐨꑲꆀ,ꄈꑼꑌꐚꌠꐛꉆ。

  ꇢꈴꊿꆏꎔꃅꇖꂟꊿꂶꌠꉪꇐ、ꑌꇐ、ꐥꐨꌋꆀꌤꃅꐨꅱꄻꌶ,ꋍꏭꄈꐱꀨꌋꆀꄈꏦꉉꀽꌶ,ꄈꑼꇎꏦ、ꋭꑘꌋꆀꌅꈌꉉꀽꇈ,ꆽꎍꃅꄈꎀꍹꏭꄛꇰꌶ。

  ꄈꍜꀯꊈꑼꉼꆏ,ꊿꄈꇬꃹꂿꄷꇖꂟꌠꏭ,ꋓꉪꁨꄉꄈꈐꉈꉹꁌꄚꃆꂮꐥꌠꄷꉜꐨꅲꇈ,ꌌꏦꇨꃅꍤꎖꄉ,ꉜꎼꇁꇬꇎꏦꇬꑟꃅꐙꈭꐨꑲꆀꄜꌊꍝꀯ꒜ꀉꒉꈿꅉꄉꇕꄟ。

  ꉎꊐꌠꄈꎀꍹꆏꊿꄈꇬꃹꂿꄷꇖꂟꂶꌠꄈꃹꃆꂮꈌꁧꂾ,ꊿꁆꌊꋍꏭꅇꉉꄉ,ꀒꁨꋍꁘꃅꅱꄻ,ꄷꀋꁧꇫꇇꀨꄉꄈꇬꌧꐨꐕꀊꂥꎻ。

  ꐛꐨꐋꀋꌡꃅꐙꄮꇬꆏ,ꄈꍏꑷꌋꆀꌜ、ꊨꏦꏱꅉꐎ、ꎂꏲꏃꊈꑼꉼꆏꈛꎂꃅꄈꑼꊪꇬꇯꉆ。

  ꃘꏢꌠ ꄐꄻꄈꑼꆏꀋꎪꃅꄈꁈꁧꏭꉜꄉꄈꇬꃹꏤꅇꄜ。ꏤꅇꆏ:ꉢꉌꊨꈬꇱꃅꍏꇩꇭꍣꄈꇬꃹꏾ,ꄈꐱꀨꉌꃹ,ꄈꏦꍬꄉꃅ,ꄈꑼꋭꑘꃅꇫꑟ,ꄈꏤꄻꄉꌠꃄꌬ,ꏟꈯꃅꄈꍬꏦꍬ,ꄈꂁꇐꂁꈬꃅꄉ,ꄈꏭꀋꎪꀋꑴ,ꏣꀋꑌꃅꌤꃅ,ꐥꍂꃅꇷꁨꉪꏦꎁꃅꈏꇤꊋꇤ,ꈍꄮꑌꄈꌋꆀꏓꂱꎁꃅꑞꈔꑌꀋꑴꂿꄷꄐꄉ,ꐥꍂꃅꄈꏭꀋꁏ。

  ꏃꏢꌠ ꄐꄻꄈꑼꄐꄻꄮꆹꋍꈓ。ꄈꎀꍹꆏꄐꄻꄈꑼꏭꎔꃅ꒿ꂘ、ꍤꎖꌶ。

  ꄐꄻꄈꑼꋭꑘꆏꄈꑼꑌꐚꌠꌋꆀꐯꌟ。ꄐꄻꄈꑼꌅꈌꆏ,ꊨꇽꌅꈌ、ꌟꌋꌅꈌꌋꆀꌠꁳꌋꎻꌠꌅꈌꀋꐥꈭꐨ,ꄈꑼꑌꐚꌠꌋꆀꐯꌟ。

  ꄐꄻꄈꑼꄐꄻꄮꇎꄮꇬꆏ,ꄈꍝꀯꆏꋋꇅꃅꊿꋋꂷꌌꄈꑼꑌꐚꂷꄻꉆꅀꄻꀋꉆꌠꇕꄟꄡꑟ。ꎔꃅꄈꑼꋭꑘꍬꌬ,ꄈꑼꇎꏦꇫꑟꀐꌠꆏ,ꏤꈉꈴꄉꏮꌊꄈꑼꑌꐚꌠꐛꄡꑟ;ꐪꊛꄉꍤꎖ、꒿ꂘꄻꅐꑴꌦꌠꆏ,ꄐꄻꄮꈉꄯꊁꄉꉆ,ꄚꃅꐎꋍꈓꉎꐂꀋꉆ;ꄈꑼꋭꑘꀋꃅ,ꄈꑼꇎꏦꇬꀋꑟꌠꆏ,ꄐꄻꄈꑼꂓꂶꌠꇔꇧꎭꄡꑟ。ꄐꄻꄈꑼꏮꌊꑌꐚꄈꑼꐛꅀꄐꄻꄮꈉꄯꊁꄉ,ꅀꄐꄻꄈꑼꂓꂶꌠꇔꇧꎭꌠꆏ,ꐯꇯꌌꍝꀯ꒜ꀉꒉꈿꄉꇕꄟꉌꃹꈴꎻꑲꆀꌌꉎꊐꌠꄈꎀꍹꁳꈌꁧꎻꄡꑟ。

  ꄐꄻꄈꑼꄐꄻꄮꆏ,ꍝꀯ꒜ꀉꒉꈿꉌꃹꈴꄉꌌꄐꄻꄈꑼꃅꄹꉇꄑꌗ。ꄈꑼꄈꃹꃅꈎꆏ,ꄐꄻꄮꈉꇎꇈꏮꌊꑌꐚꄈꑼꄻꄹꉇꄑꌗ。

  ꉆꏢꌠ ꄈꑼꋍꂷꋑꀋꋒ,ꄉꅍꌅꈌꐭꒉꀋꍣꃅ,ꈁꉬꃅꄻꄈꍝꀯꂷ、ꑦꊤꂷꅀꀉꁁꋲꏤꎀꍹꑠꇬꇱꄉ,ꄈꎀꍹꐥꐨꐊꈽ,ꄈꈏꉈꉹꁌꇫꍞꊟꌠꅲꌶ。ꄈꑼꏲꌋꇥꀯꈧꌠꑌꄡꇗꀋꎪꃅꄈꊈ、ꄈꊤꋯꁦꐥꐨ꒜ꈿꈽꌶ。ꄈꎀꍹꐥꐨꀋꐊ、ꄈꈏꉈꉹꁌꇫꍞꊟꀋꎽꌠꄈꑼꐋꀋꌡꑠꀋꐥꉆ。

  ꈬꏢꌠ ꄈꑼꆏꄈꇬꄉꎞꁧꌠꊨꏦꌅꐨꐥ。ꄈꑼꄈꇬꄉꎞꁧꂿꄷꇖꂟꌠꆏ,ꍝꀯ꒜ꀉꒉꈿꄉꇕꄟꈭꐨꑲꆀꂓꋊꌠꄛꇰ,ꄷꀋꁧꄜꌊꉎꊐꌠꄈꎀꍹꅺꇰꄡꑟ。

  ꄈꑼꇝꂱꉪꇐꑌꄸ,ꄈꑼꋭꑘꀋꃅ,ꄈꑼꇎꏦꇬꀋꑟꌠꆏ,ꄈꍝꀯꇬꏭ꒿ꂘ,ꏤꈉꄻꇬꁳꄉꄺꀱꎻꄡꑟ;ꌌ꒿ꂘꈭꐨꄡꇗꄻꀋꀱꌠꆏ,ꎞꄈꉈꅐꁧꄷꇬꉇꄡꑟ。ꄈꑼꏭꄈꇬꄉꎞꁧꄷꉉꌠꆏ,ꌌꍝꀯ꒜ꀉꒉꈿꅉꄉꇕꄟꏤꄻ,ꄷꀋꁧꄜꌊꉎꊐꌠꄈꎀꍹꇰꄉꈌꁧꎻꄡꑟ。ꀋꄸꄷꄈꑼꋍꏭꄈꇬꄉꎞꁧꄷꇬꉇꇈꄡꇗꎞꁧꀋꅲꌠꆏ,ꄜꌊꍝꀯ꒜ꀉꒉꈿꅉꄉꇕꄟꄉ,ꋍꂓꋊꇧꎭꄷꐰꏤꄉꑲꆀ,ꄜꌊꉎꊐꌠꄈꎀꍹꁳꈌꁧꎻꄡꑟ。

  ꄈꑼꀋꄸꄷꁢꊧꎃꊒꌠꀋꐥꃅ,ꐪꊛꄉꃘꁮꆪꄈꎀꍹꐥꐨꇬꐊꈽꀋꇁ,ꅀꄈꎆꀋꏮ,ꅀꄈꁸꇬꁳꃅꎻꌠꌤꀋꃅꌠꆏ,ꌌꋧꁧꃅꄈꇬꐞꁧꌠꃅꄉ。ꍝꀯ꒜ꀉꒉꈿꅉꇬꄉꐰꏤꄉꄈꑼꑠꃅꐙꌠꂓꋊꇧꎭ,ꄷꀋꁧꄜꌊꄈꎀꍹꉎꊐꌠꁳꈌꁧꎻꄡꑟ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室