ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

《ꍏꇩꇭꍣꄈꄈꏦ》  ꐱꀨ

(ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꇬꄹꁆꄺꀱꄉ,2007ꈓ10ꆨ21ꑍꉌꃹꈴꄉꌠ)

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  
ꐱꀨ


  ꍏꇩꇭꍣꄈꆹꍏꇩꇮꃅꊿꏠꌠꇬꂴꅑꁥꉬ,ꍏꇩꏓꂱꌋꆀꍏꉸꊿꋅꃤꂴꅑꁥꌠꑌꉬ,ꍏꇩꐛꐨꐧꋦꉪꏦꌤꑘꇬꏲꂠꈯꄜꉬ,ꍏꇩꂴꅑꌠꒃꅐꊋꃤꀻꎆꆹꈇꌠꇬꁧꎁ,ꍏꇩꂴꅑꌠꁱꀕꁨꀻꎆꆹꌠꃅꍜꇬꁧꎁ,ꍏꇩꏓꂱꀉꑌꇊꀉꑌꈧꌠꊇꅉꈲꁧꇬꁧꎁ。ꄈꅿꀊꂥꇊꀊꂥꌠꉪꅉꌋꆀꄽꂫꇊꄽꂫꇬꑞꅉꁻꌐꆹꇷꁨꉪꏦꃅꇫꑟꌠꉬ。

  ꍏꇩꇭꍣꄈꆹꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꊨꏦꃅꐨꇬꃅꍜꄐꅍꃅꄉꌠꉬ。

  ꂷꇻꌦꆺꆀꉪꏦꆹꃰꊿꐧꋦꐩꋊꀻꎆꌠꈳꏦꋌꇱꋊꄜꎼꇁꀐ,ꋍꅉꀨꇗꏦꆹꎃꊒꌠꉬ,ꐥꎴꊋꃤꀉꇨꃅꑌꌠꉬ。ꍏꇩꇭꍣꄈꊿꎹꈹꌠꇷꁨꉪꏦꉪꅉꀊꂥꇊꀊꂥꌠꆹ,ꐧꋦꉪꏦꐧꋦꋒꐯꋒꃅꀻꎆꌠꌋꆀꀉꇨꃅꐞꄿꌠꅉ꒜ꇬꄉꑲꆀꃅꇫꑟꄎꌠꉬ。ꐧꋦꉪꏦꄹꏦꀻꎆꌠꌋꆀꐛꒆꌠꆹꐩꋊꈭꎁꀊꉗꑠꊭꈴꁧꌶꌠꉬ。ꏟꈯꃅꂷꇻꌦꆺꆀꉪꏦꅉꀨꇗꏦꌭꈬꃅꄉ,ꍏꇩꏓꂱꊨꏦꉌꃹꃅꌋꄉꌠꍏꇩꐛꃆꐛꂮꇬꄐꊒꌠꈝ꒜ꍬꇬꎷ,ꍏꇩꃤꐧꋦꉪꏦꌤꑘꆹꈍꃅꑌꄽꂫꇬꆏꊋꐛꇀꎂꀕ。

  ꐋꀨ꒜꒾ꄏꀨꇬꄉꌠꍏꇩꇭꍣꄈꊾꆏ,ꂷꇻꌦꆺꆀꉪꏦꅉꀨꇗꏦꌌꍏꇩꇝꂱꇬꑭꋧꃅꃄꄻꌠꇬꐊꄉ,꒜꒾ꄏꉪꇐꀹꄻꎼꇁꀐ。꒜꒾ꄏꉪꇐꆹꂷꇻꌦꆺꆀꉪꏦꌌꍏꇩꄉꌫꄻꌋꆀꀻꎆꌠꉬ,ꋋꆹꃄꄻꅉꇬꄉꌌꊨꄅꄉꀐꌠꍏꇩꇝꂱꌋꆀꋈꄻꃆꂮꇬꌧꇗꏥꏦꎃꊒꌠꌋꆀꎖꋪꏓꄻꐯꇯꄉꌠꉬ,ꋋꆹꍏꇩꇭꍣꄈꋍꏅꀑꁮꐨꏓꐛꄉꌠꉬ。꒜꒾ꄏꉪꇐꄐꏁꌠꇂꃴꄉ,ꍏꇩꇭꍣꄈꆹꇩꏤꑭꊂꊿꋅꈁꐥꌠꏓꂱꃅꋌꏃꂠꌊ,ꀊꉗꀊꎴꃅꄃꇩꉪꏦ、ꌅꁵꉪꏦ、ꇜꌺꎆꀨꉪꏦꏭꆼꁏꄉꇝꂱꃅꉈꈽꇈ,ꋯꁦꉪꏦꀊꏀꇝꂱꌠꊋꐛꄉ,ꏓꂱꋯꁦꌅꈌꌬꄉꁮꐚꏭꆼꍅꌠꍏꉸꏓꂱꇭꉼꇩꂶꌠꄻꐛꀐ;ꇩꏤꄻꐛꊂꆏ,ꁣꀋꐥꃅꐧꋦꉪꏦꈴꄉꄺꀱꇈ,ꋯꁦꉪꏦꀊꏀꊬꌠꇬꄉꈳꅐꅷꐧꋦꉪꏦꇬꑟꌠꃅꇫꑟꄉ,ꐧꋦꉪꏦꅉꀨꄹꏦꄻꄉꇈ,ꐧꋦꉪꏦꎆꏣ、ꍔꍞꌋꆀꁱꀕꃅꌊꀻꎆꀐ。

  ꊯꊪꈭꌕꃢꌠꍏꑷꊈꑼꉼꐊꈴ꒜ꈿꊂꅑꅸꇁꌠ,ꐋꀨꄓꑦꀻꀨꇬꄉꌠꍏꇩꇭꍣꄈꊾꆏ,ꇩꏤꄻꐛꊂꊒꀋꊒꌠꑍꁁꏯꎖꋪꏓꈹꐯꇯ,ꉪꇐꁌꄝ,ꑞꉬꌠꑞꃅꄉ,ꄈꑭꊂꌤꃅꈯꄜꆹꏮꌊꎆꏣꋈꄻꌠꇬꆹ,ꄺꀱꁉꃑꌠꃄꌬ,ꐧꋦꉪꏦꌤꑘꀻꎆꌠꀊꏀꊭꀹꄻꎼꇁꀐ,ꋍꁘꋍꁘꃅꍏꇩꐛꐨꐧꋦꉪꏦꋈꄻꌠꈛꏦ、ꌐꏦ、ꏱꁈꄻꐛ,ꍏꇩꄉꐧꋦꉪꏦꋈꄻ、ꐧꋦꉪꏦꈫꈈꌠꌋꆀꀻꎆꌠꅉꀨꌤꃆꉉꊨꄅꄉ,ꄓꑦꀻꌧꇗꀹꄻꄉꀐ。ꄓꑦꀻꌧꇗꆹꂷꇻꌦꆺꆀꉪꏦꅉꀨꇗꏦꌌꀋꃋꋋꄮꍏꇩꃄꄻꌠꌋꆀꃅꋊꐛꐨꏓꐯꇯꌠꅐꇐꉬ,ꋋꆹ꒜꒾ꄏꉪꇐꐩꋊꀊꏀꌠꇎꏦꇂꃴꄉꊪꊛ、ꀻꎆꆹꌠꉬ,ꋋꆹꂷꇻꌦꉪꏦꌌꍏꇩꄉꀻꎆꌠꀊꏀꊭꉬ,ꋋꆹꀋꃋꋋꄮꍏꇩꃤꂷꇻꌦꉪꏦꉬ,ꍏꇩꇭꍣꄈꋍꏅꀑꁮꐨꏓꐛꄉꌠꉬ,ꋋꆹꉪꇩꏤꐧꋦꉪꏦꐛꏀꈴꌤꑘꄐꏁꌊꀋꆏꃅꁨꆹꇬꎷꌠꉬ。

  ꊯꌕꈭꇖꃢꌠꍏꑷꊈꑼꉼꐊꈴ꒜ꈿꊂꅑꅸꇁꌠ,ꐋꀨꏦ꒾ꂱꀨꇬꄉꌠꍏꇩꇭꍣꄈꊾꆏ,ꍏꇩꐛꐨꐧꋦꉪꏦꋈꄻꌠꃄꄻꅉꇬꄉ,ꃹꅼꃅꑞꆏꐧꋦꉪꏦꉬ、ꈍꃅꄉꍏꇩꐛꐨꐧꋦꉪꏦꋈꄻꌠꌋꆀꄈꈍꃅꐙꂷꋈꄻ、ꈍꃅꄈꋈꄻꂯꌠꌧꐚꂿꐚꄉ,ꄈꏲꇩꏲꎖꋪꀊꏀꁌꇐꈤꑠꈨꏓꊭꎼꇁꇈ,“ꌕꑵꁧꎁ”ꉪꇐꀋꂿꑘꌠꐛꀐ。“ꌕꑵꁧꎁ”ꉪꇐꀋꂿꑘꌠꆹꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꇬꊪꊛ、ꀻꎆꆹꌠꉬ,ꀋꃋꋋꄮꋧꃅꇣꄧꌋꆀꍏꇩꀻꎆꐛꐈꆹꄉꄈꌋꆀꇩꏤꌤꃅꅉꏭꇖꐨꀊꏀꌠꄜꋊꅐꇁꀐ,ꋋꆹꄈꋈꄻꌠꇬꊋꀥꇱꌠꌋꆀꄻꃪꌠ、ꉪꇩꏤꐧꋦꉪꏦꑴꅉꇬꄻꐛꒆ、ꀻꎆꌠꄹꎆꅉꇬꌧꇗꇇꌭꀉꇨꐯꀉꇨꌠꉬ,ꋋꆹꍏꇩꇭꍣꄈꋍꏅꀑꁮꐨꏓꐛꄉꌠꉬ,ꋋꆹꄈꀋꎪꃅꀊꉗꃅꌭꈬꌶꌠꄐꇺꉪꇐꉬ。ꈍꄮꑌ“ꌕꑵꁧꎁ”ꃅꇫꑟꌶꌠꆹ,ꉪꊇꄈꃤꄈꋦꁧꀦ、ꍔꏲꅉꀨ、ꊋꃤꅐꀦꉬ。

  ꒜ꀉꒉꊰꃘꃢꌠꈿꊂꅑꅸꇁꌠ,ꄈꍏꑷꆹꏟꈯꃅꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꂘꅍꃅꇬꎷ,ꀻꎆꈉꐨꀊꏀꌠꈴꄉ,ꄈꑭꊂꀑꁮꐨꏓꄻꄉ,ꊿꌌꀨꇬꄉ、ꐊꑷꃅꋮꄮꃅꀻꎆꉆꌠꈆꑪꃅꀻꎆꌠꉜꐨꄜꅐꇁꀐ。ꈆꑪꃅꀻꎆꌠꉜꐨꆹ,ꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌋꆀꋍꐴꃅꐯꊛꇈꃅꋊꐊꄉꁨꆹꌠꈆꑪꌧꇗꉬ,ꋋꆹꉪꇩꏤꎆꏣꐧꋦꀻꎆꌠꄐꇺꌐꏦꀋꂿꑘꌠꉬ,ꍏꇩꐛꐨꐧꋦꉪꏦꀻꎆꌠꀋꎪꃅꌭꈬꌋꆀꃅꈴꌬꈴꌶꌠꄐꇐꏤꁈꉪꇐꀉꒉꀊꂾꌠꉬ。

  ꄺꀱꁉꃑꊂꅑꅸꇁꌠꉪꊇꊌꐨꌋꆀꀻꎆꐨꈁꐥꌠꁧꀦꁢꊧꆹ,ꏓꈹꐯꇯꎼꇁꇬ:ꍏꇩꐛꐨꐧꋦꉪꏦꈝ꒜ꀹꄻꅐꇁꇈ,ꍏꇩꐛꐨꐧꋦꉪꏦꌧꇗꉻꑫꐛꀐ。ꄈꑭꊂꐋꀨꊈꃅꄈꎭꅗꅧꅗꃅꀹꄻꅐꇁꌠꈝ꒜ꋋꏢꌋꆀꌧꇗꉻꑫꋌꐘꀊꅰꃅꁌꒉ、ꀊꉗꃅꌭꈬꌋꆀꀋꆏꃅꀻꎆꄉ,ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ,ꐛꏀꈴꋈꄻꌠꄹꎆ、ꁍꇩꏓꋍꃱꃅꌐ、ꋧꃅꄮꐽꀧꌋꃅꌠꌋꆀꐯꇯꀻꎆꌠꊥꎆꌠꐩꋊꂿꃆꀉꒉꋋꌕꐘꃅꇫꑟꌠꎁꃅꉈꈽ。

  ꉪꇩꏤꆹꀋꃋꄷꀋꁧꀊꉗꃅꐧꋦꉪꏦꉘ꒜ꊬꌠꇬꎍꑴꌦ。ꋋꆹꎆꏣꁱꀕꊁꊰꌠꍏꇩꐧꋦꉪꏦꐛꏀꈴꋈꄻꌠꐩꋊꐂꆹꀋꉆꑠꊭꉬ,ꃅꐎꉏꎖꈎꈁꄻꅐꌠꉬ。ꉪꇩꏤꐧꋦꉪꏦꋈꄻꇬ,ꀋꎪꃅꉪꇩꏤꐛꃆꐛꂮꇬꉜꄉ,ꍏꇩꐛꐨꐧꋦꉪꏦꈝ꒜ꍬꌶ。ꀋꃋꋋꊭꇬ,ꉪꇩꏤꐧꋦꇬꐮꄙꐨꀋꉬꀋꉆꌠꆏꏓꂱꋍꑍꋍ꒿ꃅꐥꇐꁱꀕꈉꐨꁦꎆꇁꌠꌋꆀꐧꋦꒃꅐꊁꊰꌠꇢꊭꇬꐮꄙꐨꏡꌠꉬ。ꇩꈐꇬꒉꄸꌋꆀꇩꉈꇬꁧꏖꐛꅹ,ꊿꏠꐮꉈꈽꌠꋍꈨꈐꇬꀊꉗꃅꐥꁧꑴꌦ,ꇎꏦꊵꑵꈨꐤꄮꇬꆏꀊꅰꃅꃛꇨꇁꇬꑌꉆ,ꄚꋋꆹꐮꄙꐨꀨꏡꌠꀋꉬꀐ。ꉪꇩꏤꐧꋦꉪꏦꋈꄻꌠꂿꃆꊧꀨꆹ,ꀒꁨꋍꁘꃅꒃꅐꊋꃤꁌꄝ,ꒃꅐꊋꃤꀻꎆ,ꋍꁘꋍꁘꃅꐧꋦꉪꏦꐛꏀꈴꌠꃅꇫꑟ,ꄷꀋꁧꋋꏢꐛꅹꃅ,ꒃꅐꐮꃆꂮꌋꆀꄩꇴꏦꉻꇬꒃꅐꊋꃤꀻꎆꌠꇬꀋꊒꁆꏯꌋꆀꊨꊭꇬꄺꀱꌠꉬ。ꀋꎪꃅꉻꁨꏦꌬꌠꌌꀨꃅꄉ、ꎆꏣꁨꏦꀉꑌꑵꃅꐯꇯꀻꎆꌠꅉꀨꎆꏦꄹꏦꌭꈬ、ꄻꐛꒆ,ꀋꎪꃅꃅꐨꉜꄉꁸꌠꌌꀨꃅꄉ、ꁷꄟꀉꑌꑵꃅꐯꇯꌬꌠꁷꎸꄹꏦꌭꈬ、ꄻꐛꒆ,ꈓꊟꊋꊡꄉꃅꄷꋍꈨꌋꆀꊿꋍꈨꁳꂴꌣꈚꇁꎻ,ꋍꁘꋍꁘꃅꌢꎭꌠꀋꐥꇁ,ꐯꇯꌣꈚꇁꎻ,ꒃꅐꀻꎆꌠꌋꆀꐧꋦꁨꇐꁦꎆꇁꌠꅉ꒜ꀂꏽꄉꀋꆏꃅꏓꂱꋍꑍꋍ꒿ꃅꉀꎆꆹꌠꐥꇐꁱꀕꈉꐨꇬꇎꈴ,ꃰꊿꐊꑷꃅꀻꎆꌠꊥꎆ。ꀻꎆꌠꆹꉪꊇꄈꋋꂷꌅꈌꌬꇩꏤꀉꇨꇁꌠꌤꃆꀨꎍꐘꌠꉬ。ꋍꑞꋍꑵꌤꃅꌠꈁꉬꃅꐧꋦꉪꏦꐧꋦꇬꒃꅐꊋꃤꀻꎆꌠꇬꈲꐪꐥ,ꐧꋦꉪꏦꇩꏤꏓꇱꇩꊋꀉꇨꇁꌠꇬꈲꐪꐥ,ꏓꂱꐥꐨꐕꀊꂥꌠꇬꈲꐪꐥ,ꋋꈨꌌꑭꄑꈉꌋꆀꎖꉚꌐꏦꃅꄉ,ꑘꃅꁌꒉ、ꌧꇐꁌꒉ、ꌧꊿꁌꒉ、ꀹꄻꁌꒉ,ꀻꎆꌠꌌꏓꂱꎁꃅ、ꀻꎆꌠꏓꂱꉘꇉ,ꀻꎆꌠꊌꐨꆏꏓꂱꐯꇯꈲꌠꃅꇫꑟ。ꐂꃅꋊꀊꏀꋎꌠꃹꇬ,ꉪꇩꏤꆹꐊꑷꃅꊼꇅꌣꈚꐧꋦꋈꄻ、ꇤꐳꃅꐧꋦꉪꏦꐛꏀꈴꌠꄹꎆꌊꀻꎆꑞꅉꀊꏀꊭꇬꃹꆹꀐ。ꀋꎪꃅꍏꇩꐛꐨꐧꋦꉪꏦꌤꑘꏓꄜꐛꃆꄐꉻꇬꈴꄉ,ꐊꑷꃅꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠꄹꎆ。ꃅꋊꀊꏀꊬꌠꇬ,ꎆꏣꌋꆀꐧꋦꀻꎆꌠꄐꇐꏤꁈꑞꅉꁻꌐꆏ,ꀑꐱꃅꊼꇅꌣꈚꅉꑞꌠꌌꈫꈈ、ꀻꎆꄉ,ꄈꄻꋍꉐꈎꐛꄮꇬꆏ,ꈲꐪꐥꅷꊻꂷꊯꎖꂡꇬꑟꆹꌠꑞꅉꀊꅰꃅꀊꂥꌠꊼꇅꌣꈚꐧꋦꄻꐛ;ꇩꏤꄻꋍꉐꈎꐛꄮꇬꆏ,ꐽꏡꃅꇬꊾꂷꌠꇩꈐꒃꅐꈁꊌꁌꐨꇩꏤꐞꄿꐧꊐꌠꑞꅉꑟꄉ,ꀑꐱꃅꐛꏀꈴꌠꃅꇫꑟ。

  ꍏꇩꇭꍣꄈꐧꋦꉪꏦꉘ꒜ꊬꌠꇬꅉꀨꈛꏦꆏ:ꇩꏤꑭꊂꊿꋅꈁꐥꌠꏓꂱꏃꂠ、ꋯꑌꌊꄉ,ꎆꏣꋈꄻꌠꌌꈯꄜꃅꄉ,ꏟꈯꃅꅉꀨꏥꏦꇖꐘꌠꌭꈬ,ꏟꈯꃅꄺꀱꁉꃑꇬꎷ,ꊨꏦꊋꃤꉘꇉ,ꎬꅧꃅꑘꀹꄻ,ꉪꇩꏤꋈꄻꌊꌣꈚꐞꄿꋯꁦꌧꑳꐮꄮꌠꐧꋦꉪꏦꐛꏀꈴꌠꇩꏤꂷꐛꇁꌠꎁꃅꑅꅐꊋꆜ。

  ꍏꇩꇭꍣꄈꐧꋦꉪꏦꌤꑘꏲꂠꇬ,ꀋꎪꃅꎆꏣꋈꄻꌠꌌꈯꄜꃅꌠꌭꈬꇬꎷ,ꀉꁁꋍꑞꋍꑵꌤꈀꃅꌠꃅꈯꄜꋋꏢꇬꐊ、ꋋꏢꎁꃅꃅꌶ。ꊜꋽꄮꒃꄉ,ꇤꐳꃅꀻꎆ,ꈆꑪꂘꑘꌌꇩꏤꄖꄑꌄꆣꌠꄐꇐꏤꁈ、ꌧꊿꌌꇩꏤꀉꇨꇁꌠꄐꇐꏤꁈꌋꆀꐪꊛꄉꀻꎆꉆꌠꄐꇐꏤꁈꌫꄻ,ꋒꐯꋒꃅꈆꑪꇮꇐꌌꒃꅐꊋꃤꀨꐘꌠꃅꄉꌠꂿꄐꇤꅐꇁ,ꈆꑪꇮꇐꀻꎆꌠꉘꇉꄉ,ꑘꁨꊿꊇꁧꐕꀊꂥꇈ,ꇩꂱꎆꏣꉽꑌꉾꐲꑌꐳꃅꀻꎆꌠꊥꎆ。

  ꏟꈯꃅꐧꋦꉪꏦꈝ꒜ꍬꌠꌭꈬ、ꏟꈯꃅꏓꂱꋯꁦꌅꈌꌬꄉꁮꐚꏭꍅꌠꌭꈬ、ꏟꈯꃅꍏꇩꇭꍣꄈꏃꂠꌠꌭꈬ、ꏟꈯꃅꂷꇻꌦꆺꆀꉪꏦ꒜꒾ꄏꉪꇐꅉꀨꏥꏦꋋꇖꐘꌭꈬꌠꆹ,ꉪꊇꃤꇩꋦꁧꀦꉬ。ꐧꋦꉪꏦꐛꏀꈴꋈꄻꌠꈴꎁꋋꂷꇬꃅ,ꀋꎪꃅꏟꈯꃅꅉꀨꏥꏦꇖꐘꌠꌭꈬ,ꁨꇐꐥꏠꌠꄿꐨꈴꌠꏭꆼꁏꌶ。

  ꏟꈯꃅꄺꀱꁉꃑꌠꌭꈬꌠꆹ,ꉪꊇꃤꇩꏤꀉꇨꇁꌠꇬꀋꍬꀋꉆꌠꈝ꒜ꉬ。ꁧꀦꇬꄉꎆꏣꏦꉻꒃꅐꊋꃤꀻꎆꌠꇬꈭꑴꈜꑲꌠꄹꏦꄺꀱ,ꐧꋦꉪꏦꃷꎏꎆꏣꏦꉻꌭꈬ、ꄻꐛꒆ;ꋋꏢꇬꌋꆀꐮꄉꄐꃅꄉ,ꍔꍞꏦꉻꄺꀱꌠꌋꆀꀉꁁꁁꏯꇬꄺꀱꌶ。ꏟꈯꃅꉇꉻꏭꁉꃑꌠꅉꀨꇩꁈꌬ,ꐧꋦꃰꊿꈀꁧꀿꄉꌠꌧꑳꊌꐨꈁꐥꌠꎹꈹ、ꌶꌬ。ꄺꀱꁉꃑꌠꆹꉌꂵꀉꒉꃅꎹꎥ,ꀬꅑꃅꀹꄻ,ꄺꀱꏤꇽꌠꇬꈆꑪꐨꉀꐕ,ꄺꀱꏁꁈꇬꋮꄮꐨꐥꌠꀉꇨꇁ,ꃄꄻꅉꇬꄉꈭꏀꈜꏀꀹꄻꅐꇁ。

  ꍏꇩꇭꍣꄈꏓꂱꋌꏃꂠꌊꐧꋦꉪꏦꃷꎏꎆꏣꀻꎆ。ꀋꇙꀋꑐꃅꉻꁨꏦꎆꏣꄻꈫꈈ、ꀻꎆ,ꀋꇙꀋꑐꃅꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏ、ꄐꏁ。ꃷꎏꁳꌬꇐꁆꄻꌠꇬꅉ꒜ꃅꐙꌠꂿꄐꇤꅐꇁꎻ,ꉻꒉꋊꐽꉻꑫꄺꂡꐛꒆ。ꇓꈓꇓꉈꀻꎆ、ꃄꁕꀻꎆ、ꎆꏣꐧꋦꀻꎆ、ꊾꌋꆀꋌꐛꋌꐙꐮꄮꃅꀻꎆ、ꇩꈐꀻꎆꌠꌋꆀꉇꉻꁉꃑꌠꉜꈴꇲꈴ,ꎆꏣꐛꉻꋊꍬ,ꎆꏣꀻꎆꄟꆹꏮ。ꐧꋦꉪꏦꂿꑘꁡꇤꀊꏀꋈꄻ,ꀊꏀꉹꌠꇮꑘꈴꌠꈝ꒜ꍬ,ꏀꀺꉹꌠꇩꏤꋈꄻ,ꌬꇐꏎꏸꉹꌠ、ꋦꈭꉁꄮꉹꌠꐧꋦꋈꄻ。

  ꍏꇩꇭꍣꄈꏓꂱꋌꏃꂠꌊꐧꋦꉪꏦꋯꁦꍔꍞꀻꎆ。ꏟꈯꃅꄈꁳꏲꂠ、ꏓꂱꑱꏲꃥꌋꐛ、ꏦꈴꇩꏲꌠꊜꋽꃅꏓꋍꃱꃅꄉ,ꍏꇩꐛꐨꐧꋦꉪꏦꍔꍞꀻꎆꌠꈝ꒜ꍬ,ꐧꋦꉪꏦꋯꁦꍔꐯ,ꐧꋦꉪꏦꄹꏦꄻꐛꒆ,ꐧꋦꉪꏦꏦꏲꇩꏤꋈꄻ,ꏓꂱꋯꁦꌅꈌꌬꄉꁮꐚꏭꍅꌠꄻꈫꈈ,ꐧꋦꉪꏦꍔꍞꌧꑳꋈꄻ。ꏟꈯꃅꏓꂱꁧꎁ꒜ꀉꒉꈿꌠꄹꏦ、ꍏꇩꇭꍣꄈꏲꂠꄉꌠꄈꀉꑌꂷꃅꇷꃅꌠꌋꆀꍔꍞꋮꒉꄹꏦ、ꊿꋅꃄꁕꊨꏦꏲꄹꏦꌋꆀꅉꂫꊐꌠꉹꁌꊨꏦꏲꄹꏦꌭꈬ、ꄻꐛꒆ。ꇯꍝꃅꏓꂱꇩꏤꌤꃆꌋꆀꐧꋦꌤꃆꏲꂠ、ꎆꏣꌋꆀꁱꀕꌤꑘꏲꂠꌠꌅꈌꈲꁧꏦꀧ。ꃰꊿꌅꈌꁌꒉꌋꆀꏦꀧ。ꀊꐯꃅꅇꉉꈜꁌ,ꋯꁦꌊꄻ、ꋯꁦꃅꏤꇽ、ꋯꁦꃅꏲꂠ、ꋯꁦꃅꍞꊟꌠꄹꏦꌋꆀꈭꎁꄻꐛꒆ。ꊋꀥꇱꄉꇩꏤꏦꃤꏤꄻꌠꌋꆀꏦꃤꌫꄻꌠꌤꃅꄉ,ꇩꏤꋍꑞꋍꑵꌤꃅꌠꋍꁘꋍꁘꃅꏦꃤꄹꏦꈭꈜꇬꍬꆹꎻ。

  ꍏꇩꇭꍣꄈꆹꏓꂱꋌꏃꂠꌊꐧꋦꉪꏦꂴꅑꁱꀕꀻꎆ。ꐧꋦꉪꏦꉌꊈꌧꑳꋈꄻ,ꏦꈴꇩꏲꌠꌋꆀꑌꇐꌌꇩꏲꌠꏓꐯꇯꄉ,ꊿꋅꈁꐥꌠꉪꇐꃅꇏꊇꁧꌋꆀꈆꑪꁱꀕꌧꐨꐕꀊꂥꇈ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꎁꃅꀉꇨꌠꉪꇐꄉꀧꅍ、ꉌꊈꇘꊋꌋꆀꀑꁮꊋꃤꊋꁈꄏꌠꇲꁵ。ꏟꈯꃅꂷꇻꌦꉪꏦꌌꄐꇺꉪꇐꃅꄉ,ꍏꇩꐛꐨꐧꋦꉪꏦꐮꐊꉪꇐꑌ,ꇩꉂꉪꏦꌌꈯꄜꃅꄉꌠꊿꋅꉌꊈꌋꆀꄺꀱꏀꀺꌠꌌꈯꄜꃅꄉꌠꃅꋊꉌꊈꍔꆙ,ꐧꋦꉪꏦꂄꄸꉜꐨꄕꊪ,ꊿꋅꑴꑲꁌꒉ、ꑴꑇꌋꆀꑴꇨꉌꊈꀉꇨꄉ,ꎆꀨꉪꏦꌋꆀꌅꁵꉪꏦꉪꇐꍹꈔꑠꈏꃹꇁꌠꄘꑣ,ꐧꋦꇬꄷꅠꋍꑞꋍꑵꑠꌩꎳꇧꎭ,ꊋꇤꄉꉪꇩꏤꏓꂱꁳꊫꂫꉪꅉꐥ、ꑌꇐꑲꇐꐥ、ꁱꀕꌧꇐꐥ、ꍬꏦꐥꌠꏓꂱꐛꎻ。ꄈꑼꏭꆏꉈꑴꇷꁨꉪꏦꉪꇐꎳꒉꌠꌌꂘꑴꌶ。ꊋꀉꒉꃅꇤꄉꂘꑘ、ꈆꑪ、ꁱꀕꌤꑘꀻꎆ,ꊿꋅꋊꃅꐥꌠꁱꀕꂴꅑꌠꍔꆙ,ꐧꋦꉪꏦꁱꀕꌌꌄꆣ、ꀻꎆ。

  ꍏꇩꇭꍣꄈꆹꏓꂱꋌꏃꂠꌊꐧꋦꉪꏦꐧꋦꐮꄮꌠꋈꄻ。ꋯꁦꍔꍞ、ꐽꊯꑗꉬ、ꀋꎪꉁꄮ、ꌄꆣꍅꑐ、ꑘꒃ꒾ꁨ、ꊾꌋꆀꋌꐛꋌꐙꐮꄮꃅꐯꇯꋦꌠꈁꉬꈉꐨꌋꆀꐯꇯꋈꄻ、ꐯꇯꈲꊌꌠꏥꏦꇬꈴꄉ,ꏓꂱꐥꐨꄻꃪꌠꌌꀨꄉ,ꏓꂱꀊꅰꃅꇫꉈꇬꌠ、ꀊꅰꃅꈛꎂꌠ、ꀊꅰꃅꀋꃋꈉꐨꐥꌠꈲꁧꃆꂮꂥꀘꋒ,ꊋꇤꄉꏓꂱꋍꏅꌠꑞꄐꆏꑟꃅ、ꑞꊌꋭꌠꑞꊌꇈꐮꄮꃅꐮꐊꌠꐛꐨꐛꇁ。ꁮꐚꉪꐮꄙꌠꌋꆀꏓꂱꈏꇓꐮꄙꌠꊇꅉꇬꐯꀋꌡꃅꐮꄙꋋꑍꉹꏦꇨꃅꊨꄅ、ꎃꊒꃅꂥꀘ。ꐧꋦꋬꂻꏓꇱꏱꄻꌠꊋꀥꇱ,ꏦꃤꈴꄉꅱꈯꃅꋍꑞꋍꑵꇩꏤꋬꂻꌋꆀꈲꁧꇬꉮꄻꌠ、ꐧꋦꑘꒃꌋꆀꎆꏣꀻꎆꇬꉮꄻꌠꑽꃤꐆꐺꌠꌋꆀꑽꃤꐆꌠꌌꇇꇩꍈꄉ,ꐧꋦꀊꉗꃅꑘꒃꌠꄝꏦꀋꊰꇬꎷ。

  ꍏꇩꇭꍣꄈꆹꏟꈯꃅꄉꏓꂱꁌꄝꂽꌋꆀꀉꁁꏓꂱꇇꌭꊋꃤꇬꏲꂠ,ꊋꀥꇱꄉꏓꂱꁌꄝꂽꋈꄻ,ꃶꐚꃅꏓꂱꁌꄝꂽꁳꃅꋊꀊꏀꊬꌠꇬꂽꐩꋊꄻꁵꌠꂿꃆꃅꌠꄉꀧ,ꋒꐯꋒꏓꂱꁌꄝꂽꆏꇩꏤꐏꈬꁇꈬ、ꁍꇩꀧꌋꃅꌠꌋꆀꐧꋦꉪꏦꐛꏀꈴꋈꄻꅉꇬꄉꂿꄐꇤꅐꇁ。

  ꍏꇩꇭꍣꄈꆹꐥꊯꋯꑌꐮꇇꀨꐮꄮꌠꐧꋦꉪꏦꊿꋅꐮꃆꂮꀧꌋꃅꌋꆀꀻꎆ,ꏣꀋꑌꃅꀁꑌꊿꋅꇥꀯꁱꂘ、ꌊꌬ,ꀁꑌꊿꋅꃅꄷꇬꇇꀨꄉꎆꏣ、ꁱꀕꌋꆀꐧꋦꌤꑘꀻꎆꄉ,ꊿꋅꈁꐥꌠꃅꐯꇯꋯꑌꃅꉈꈽ、ꐯꇯꌄꆣꀻꎆꌠꃅꇫꑟ。ꐊꑷꃅꄈꅿꑇꇐꌤꃅꅉꀨꌐꏦꌫꄻ,ꑇꇐꑇꌠꉹꁌꋯꑌꌊꎆꏣꐧꋦꀻꎆꌠꎁꃅꑆꊋꅐꌞꇁꎻ。

  ꍏꇩꇭꍣꄈꆹꇩꏤꑭꊂꊿꋅꈁꐥꌠꇮꃅꊿ、ꂿꑘꊿ、ꌧꇐꐥꊿꃅꋯꑌꐮꐊꄉ,ꋯꁦꄈꀾꈁꐥꌠ、ꊿꄈꀾꀋꐊꂒꋦꌠ、ꊿꋅꈁꐥꌠꇬꇩꉂꊋꃤꃅꋯꑌꐮꐊꄉ,ꀒꁨꋍꁘꃅꐧꋦꉪꏦꑘꃅꊿꈁꐥꌠ、ꐧꋦꉪꏦꌤꑘꋈꄻꌠ、ꐧꋦꉪꏦꉌꃹꌠꇩꉂꊿ、ꁍꇩꊋꏓꋍꃱꃅꇬꉌꃹꌠꇩꉂꊿꑠꏓꐯꇯꄉꌠꀊꐯꇊꀊꐯꃅꇩꉂꊋꏓꋍꃱꃅꌠꄻꌊꀻꎆ、ꀉꇨꇁ。ꀋꆏꃅꇩꏤꑭꊂꏓꂱꑣꇤꇣꋲꏱꅉꐎꃺꑌ、ꉪꂱꇣꋲꏱꅉꐎꃺꑌ、ꄠꃪꃺꑌꌋꆀ꒺ꉈꃺꑌꃅꇫꐊꄉꐮꋯꑌꌠꊋꀥꇱ。“ꇩꏤꋍꂷ、ꄹꏦꑍꑵ”ꌬꌠꌐꏦꇬꈴꄉ,ꑣꇤ、ꉪꂱꀊꉗꃅꌄꆣꑘꒃꌠꊥꎆ,ꁍꇩꏓꋍꃱꃅꌠꌤꑘꀉꒉꋌꐘꃅꇫꑟ。

  ꍏꇩꇭꍣꄈꆹꏟꈯꃅꄂꋦꑴꌅꌠꉇꉻꑌꑲꏱꁈꌬ,ꏟꈯꃅꄮꐽꀻꎆꌠꈝ꒜ꍬ,ꏟꈯꃅꐯꈲꋓꊋꌠꁉꃑꄐꇐꏤꁈꌬ,ꇩꈐꇩꉈꃅꇴꄉꉻꀉꒉꑍꈚꃅꇲꈴꄉ,ꏣꀋꑌꃅꉇꉻꑌꑲꌠꀻꎆ,ꊋꇤꄉꉪꇩꏤꄺꀱꁉꃑꌠꌋꆀꐛꏀꈴꋈꄻꌠꎁꃅꈲꁧꐥꌠꇩꏹꋦꈭꅔꄻ。ꇩꏹꌤꃆꀂꏽꇬ,ꉪꇩꏤꄂꋦꌠꌋꆀꑴꌅꌠꇬꀧꌋꃅꄉ,ꌅꈌꇂꇎꉪꏦꌋꆀꇨꌅꍔꍞꏭꁏ,ꋧꃅꄮꐽꌠꀧꌋꃅ,ꃰꊿꀻꎆꌠꊥꎆ,ꊋꇤꄉꀊꉗꃅꄮꐽ、ꐯꇯꌄꆣꌠꐮꄮꋧꃅꋈꄻꌠꄹꇙ。ꐮꇬꌅꐨꉜꁨꌠꌋꆀꏱꁕꐛꒆꌠꁌꒉ、ꐯꀋꉅꀋꌎ、ꐮꈏꇓꏲꑘꇬꀋꊢꀋꂖ、ꐥꊯꐯꈲ、ꄮꐽꃅꐮꐊꌠꏥꏦꉬꏢꌠꅉ꒜ꀂꏽꄉ,ꉪꇩꏤꌋꆀꋧꃅꇩꏤꈁꐥꌠꇢꊭꇬꐮꑌꑲꐨꌌꀻꎆ。ꀋꆏꃅꉪꇩꏤꌋꆀꈭꇍꇩꏤꈧꌠꐮꉂꐮꅉꌠꌌꀻꎆ,ꊋꀥꇱꄉꇩꏤꀻꎆꆸꇰꄉꈧꌠꏭꋯꑌ、ꇷꃅ。ꄂꋦꑴꌅ、ꐮꐥꊯꌐ、ꐮꁌꒉ、ꐮꈏꇓꏲꑘꇬꀋꊢꀋꂖꌠꏥꏦꇬꈴꄉ,ꉪꄈꌋꆀꇩꏤꈁꐥꌠꇬꇭꍣꄈ、ꀉꁁꍔꄈꐮꑌꑲꃆꂮꌌꀻꎆ。

  ꍏꇩꇭꍣꄈꆹꇩꏤꑭꊂꊿꋅꈁꐥꌠꏓꂱꃅꏃꂠꌊꐧꋦꉪꏦꐛꏀꈴꑞꅉꌐꂷꇰꀋ꒜ꋋꂷꃅꇫꑟꂿꄷꇬ,ꀋꎪꃅꄈꅿꅉꀨꈛꏦꇬꆼꒆꄉ,ꄈꅿꌅꈌꌬꊋꃤꋈꄻꌠꌋꆀꂴꅑꐨꋈꄻꌠꊋꀥꇱ,ꄺꀱꏀꀺꉌꊈꌌꐊꑷꃅꄈꋈꄻꋉꃆꇰꀋ꒜ꀊꏀꌠꄹꎆ。ꏟꈯꃅꋍꉻꎁꃅꄈꄻ、ꋍꏅꎁꃅꏱꌅ,ꏟꈯꃅꄈꆏꄈꏲꂠ、ꏦꇨꃅꄈꏱꄻꇬꎷ,ꄈꋊꃅꃅꇏꌋꆀꃅꇏꂶꄟꉾꃪꌠꍔꆙ,ꀋꆏꃅꄈꅿꏲꂠꄐꐨꌋꆀꌅꈌꌬꇮꐨꉀꐕ,ꍹꄙꐈꄵꌠꌋꆀꆽꀠꇁꉆꌠꇬꄘꑣꊋꃤꉀꐕ,ꀋꆏꃅꄈꅿꊿꏠꅉ꒜ꌌꀉꇨꌋꆀꄈꅿꉹꁌꅉ꒜ꌌꍔꐯ,ꀋꆏꃅꄈꅿꀹꄻꊋꃤ、ꏓꋧꊋꃤ、ꌉꈿꊋꃤꉀꐕꄉ,ꉪꄈꁳꈍꄮꑌꃅꋊꂲꆽꉆꇬꎷꄉ,ꇩꏤꑭꊂꏓꂱꏃꂠꌊꍏꇩꐛꐨꐧꋦꉪꏦꈝ꒜ꇬꍬꄉꀋꆏꃅꀒꁨꆹꌠꇬꈯꄜꀉꇨꑠꂷꐛꇁ。ꄈꋈꄻꇬꀋꎪꃅꄚꊁꇖꐨꅉꀨꇖꐘꃅꇫꑟꌶ:

  ꋍꆏ,ꏟꈯꃅꄈꅿꅉꀨꈛꏦꌭꈬ。ꄈꑭꊂꃅꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠꌋꆀꄈꅿꅉꀨꈛꏦꌌꄉꉪꇐꏓꋍꃱꃅ,ꃅꐨꏓꋍꃱꃅ,ꃹꅼꃅꈆꑪꃅꀻꎆꌠꉜꐨꃅꇫꑟ,ꄷꀋꁧꋍꍈꑌꀋꇙꀋꑐꃅꃅꅷꁧꇬꎷ。ꀋꎪꃅꄺꀱꁉꃑꌠꌋꆀꅉꀨꏥꏦꇖꐘꌠꏓꋍꃱꃅꎼꇁ,ꐊꑷꃅꄈꅿꅉꀨꈛꏦꌫꄻ,ꐊꑷꃅꄈꐧꋦꉪꏦꉘ꒜ꊬꌠꇬꅉꀨꐱꀨꃄꌬ,“ꃼ”ꏯꌋꆀꑳꏯꎎꌠꑽꃤꈁꉬꌠꏭꁏ,ꑳꏯꎎꌠꋓꉪꁨꄉ,ꄚꀋꉬꀋꉆꌠꆏ“ꃼ”ꏯꎎꌠꄴꏮ。ꊋꀥꇱꄉꈁꐥꊐꌠꇬꏲꌋꁥꌠꂘꄻ,ꄺꀱꁉꃑꌠꇬꌋꆀꐧꋦꉪꏦꐛꏀꈴꋈꄻꅉꇬꃅꐨꄞꅐꃅꐥꌠ、ꉹꁌꇫꉌꒊꌠꇥꀯꑠꌋꌊꌬ,ꐧꋦꉪꏦꌤꑘꎃꉆꊿꄙꇁꃪꃅꂘꄻ、ꁰꍋꎼꇁꄉ,ꎀꍹꇬꈴꄉꄈꅿꅉꀨꌧꇗ、ꅉꀨꈛꏦ、ꅉꀨꐱꀨ、ꅉꀨꎖꋪꌫꄻꇫꑟꌠꇬꏦꀧ。

  ꑍꆏ,ꏟꈯꃅꉪꇐꁌꄝ,ꑞꉬꌠꑞꃅꄉ,ꃅꋊꐊꄉꁨꆹꇬꎷ。ꄈꅿꉪꇐꈛꏦꆹꑞꑌꐛꐨꇬꈴꄉ,ꌧꇗꌌꐛꐨꇬꑌꑲ,ꑞꉬꌠꑞꃅꄉ,ꃄꄻꅉꇬꄉꇗꊈꎖꉚ、ꇗꊈꌌꀻꎆ。ꄈꑭꊂꃅꀋꎪꃅꉪꇐꈛꏦꋋꏢꌭꈬꇬꎷ,ꇯꍝꌠꎹꀋꎪꌠꃅꌠꉌꊈꍔꆙ,ꏣꀋꑌꃅꎹꎥ,ꉌꂵꀉꒉꃅꎖꉚ,ꄹꀖꏀꀺ,ꁧꀿꐨꐥꃅꌤꃅ,ꀋꆏꃅꐛꃆꐛꂮꀊꏀꌠꎥꃪ,ꎖꋪꀊꏀꌠꏓꈹ,ꌤꃆꀊꏀꑠꂥꀘ,ꃄꄻꅉꇬꄉꂷꇻꌦꉪꏦꄻꋲꑌ、ꄻꀻꎆ,ꂷꇻꌦꉪꏦꍏꇩꐛꈴꌠꄹꎆ。

  ꌕꆏ,ꏟꈯꃅꋍ꒜ꁨꀋꑌꉌꂵꄅꀋꑌꃅꏓꂱꎁꃅꃅ。ꄈꆹꇮꃅꊿꏠꌠꌋꆀꏓꂱꉹꁌꋍꏅꌠꈲꁧꉇꄉꈭꐨꆏ,ꊨꏦꈲꁧꐋꀋꌡꑠꀋꐥ。ꄈꆹꈍꄮꑌꉹꁌꈲꁧꌌꀨꇬꄉꇬꎷ,ꉹꁌꌋꆀꎬꑌꐯꇯꎭꌑꑌꐯꇯꌒ,ꎔꃅꉹꁌꌋꆀꋍꉎꀋꐥꃅꐮꑌꑲꇬꎷ,ꏟꈯꃅꌅꈌꉹꁌꎁꃅꌬ、ꉌꂵꉹꁌꎁꃅꉪ、ꈲꏣꉹꁌꎁꃅꏂꇬꎷ,ꄈꑼꑞꂷꉬꂿꉹꁌꌋꆀꐮꐞꀋꉆ,ꉹꁌꄩꍅꆹꀋꉆꌠꉬ。ꄈꆹꊨꏦꌤꃅꅉꇬꄉꉹꁌꈛꏦꌫꄻ,ꑞꑌꉹꁌꁧꎁꃅ,ꑞꑌꉹꁌꉘꇉ,ꉹꁌꈬꇬꄉꇁ,ꀱꉹꁌꈬꇬꒉ,ꄈꉪꐨꎃꊒꌠꀱꌊꉹꁌꑴꐚꃅꇫꃅꌠꐛꇁꎻ。ꉪꊇꄈꍔꍞꂱꎆꅑꐨꀉꒉꇊꀉꒉꌠꆏꑖꑟꃅꉹꁌꌋꆀꐮꑌꑲ,ꄈꌅꈌꌬꊂꀉꒉꃅꆽꀠꇁꉆꌠꑌꉹꁌꇬꐞꁧꌠꉬ。ꄈꃅꇏꌤꃆ、ꄈꌋꆀꏓꂱꉹꁌꐯꑌꑲꌤꃆꆹꄈꋦꅀꈔꂯꌠꌤꃆꉬ。ꄈꀋꎪꃅꐴꇱꁧꏲ、ꏓꇱꏱꄻ、ꅓꄵꐯꇯꃅ、ꄴꏮꌠꉜꁨꌠꌐꏦꌭꈬ,ꍹꈔꌠꅓꀞꌠꌋꆀꄴꏮꌠꉻꑫꄻꐛꒆ,ꀋꎪꀋꑴꃅꍹꈔꌠꏭꁏ,ꊋꀥꇱꄉꄈꃅꇏꋈꄻ、ꐙꎴꃅꏲꌠꋈꄻꌶ。

  ꇖꆏ,ꏟꈯꃅꋯꁦꏓꁨꄹꏦꌬꌭꈬ。ꋯꁦꏓꁨꄹꏦꆹꋯꁦꀂꏽꄉꏓꁨꌠꌋꆀꏓꁨꄐꇺꌠꇂꃴꄉꋯꁦꌠꏓꐯꇯꄉꌠꉬ。ꋋꆹꄈꎀꍹꄹꏦꅉꀨꑌꉬ,ꉈꑴꉹꁌꈛꏦꌌꄈꐥꐨꇬꄉꌬꌠꑌꉬ。ꀋꎪꃅꋒꐯꋒꃅꄈꈏꇓꋯꁦꍔꆙꄉ,ꄈꑼꋯꁦꌅꈌꏦꀧ,ꄈꎀꍹꋍꊐꋑꀋꋒꌠꌋꆀꄈꑼꋍꏅꌠꏣꀋꑌꐨꀹꄻꐨꇤꅐꇁ。ꀋꎪꃅꏓꁨꌠꎃꊒꃅꌬꄉ,ꄈꑭꊂꋯꑌꋍꃱꃅꌠꌋꆀꃅꐨꋍꏢꃅꐙꌠꄉꀧ,ꄈꅿꐰꏤꄉꌠꇤꐳꃅꊌꐨꐥꃅꌫꄻꎻꌠꄉꀧ。ꎀꍹꃆꂮꌋꆀꍬꏦꃆꂮꇬꊋꀥꇱ,ꄈꍬꏦꂳꆽꆏꈀꄸꑌꐥꊯꌠꉬ。ꊋꀥꇱꄉꄈꅿꏲꂠꌤꏲꅉꌋꆀꄈꑼꏲꌋꇥꀯꇬꍞꊟ,ꀋꆏꃅꄈꈒꇓꍞꊟꄹꏦꄻꐛꒆ。ꄈꆹꊨꏦꍔꍞꐥꐨꇬꄉꎃꊒꃅꀠꂘꌠꌋꆀꊨꏦꀱꊨꏦꀠꂘꌠꃅ,ꏥꏦꀂꏽꆏꉪꇐꉈꈽꌠꃅ,ꇗꊈꌭꈬ,ꑽꐪꄺꀱ。ꊋꇤꄉꏓꁨꑌꐥꋯꁦꑌꐥ,ꍬꏦꑌꐥꄿꐨꑌꐥ,ꉌꊈꏓꋍꃱꃅꌠꑌꐥꇈꉈꑴꊨꏦꉌꃅꑓꌒꃅꑌꐙꌠꉌꐡꍄꑐꌠꍔꍞꐛꐪꐥꇁꎻ。

  ꄈꅿꏲꂠꌠꆹꊋꒉꌠꆏꍔꍞ、ꉪꇐꌋꆀꎀꍹꃆꂮꇬꏲꂠꌠꉬ。ꄈꆏꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꈉꐨꇬꄉꄐꄉ,ꀋꎪꃅꈆꑪꃅꌅꈌꌌ、ꋯꁦꃅꌅꈌꌌ、ꏦꈴꄉꌅꈌꌌ,ꄈꅿꏲꂠꌠꊋꀥꇱ、ꄻꐛꒆ。ꄈꆏꀋꎪꃅꃅꇴꄉꉻꀉꒉꌠꏓꌭ、ꋍꑞꋍꁁꏯꃅꋮꄮꌠꏥꏦꇬꈴꄉ,ꋍꑞꋍꑵꎀꍹꐮꒉꊐꌠꇬꏲꂠꈯꄜꂿꄐꇤꅐꇁꌶ。ꄈꆹꀋꎪꃅꊋꏓꋧꄉꎆꏣꋈꄻꌠꀂꏽꏲꂠ,ꋍꑞꋍꁁꏯꊋꃤꊥꇬ、ꋮꄮꐯꇯ,ꉌꂵꋍꂷꃅꊋꃤꋍꏢꃅ,ꎆꏣꋈꄻꌠꇬꆼꒆꄉꌤꃅ,ꎆꏣꐧꋦꐊꑷꃅꀻꎆꌠꇬꊥꎆ。ꄈꆏꀋꎪꃅꋯꁦꃅꈆꑪꃅꏤꇽꌠꃅ,ꈛꏦ、ꌐꏦ、ꏱꁈꎃꊒꌠꏤꄻ、ꃄꌬ,ꋒꃅꄈꅿꎀꍹꌤꌋꆀꄜꉺ꒿ꂘꌤꃅꋒ,ꄈꑼꈁꐥꌠꂴꅑꌶꀠꂿꄐꇤꅐꇁꎻ。ꄈꆹꀋꎪꃅꏦ꒜ꌋꆀꏦꃤꈍꈐꇬꄉꃅ。ꄈꆹꀋꎪꃅꇩꏤꏦꃤꏤꄻ、ꏦꌬ、ꏲꑘꌤꏲꅉ,ꎆꏣ、ꁱꀕꎀꍹꇬꌋꆀꏓꂱꏓꉻꎀꍹꇬꏣꀋꑌꑴꇙꃅ、ꄂꋦꆽꎍꃅ、ꋮꄮꋍꏢꃅꌤꃅꌠꇬꄉꀧ。ꄈꆹꀋꎪꃅꊋꀥꇱꄉꇬꉼ、ꇷꁨꉪꏦꌠꏀꄨ、ꌋꅪꐊꏑꉼꉹꁌꎀꍹꑠꏲꂠꄉ,ꋒꐯꋒꃅꊿꊇꂿꄐꇤꅐꇁ。ꄈꆹꀋꎪꃅꃅꒊꃅꇁꀻꎆꌠꌋꆀꐛꃆꐛꂮꐛꐈꌠꇬꄉꄐ,ꏲꂠꏦꉻꄻꐛꒆ,ꏲꄟꂠꄟꄺꀱ,ꌅꈌꌬꌠꊋꃤꀉꇨꇁꌶ。ꇭꍣꄈꑼꆹꀋꎪꃅꄈꉈꉹꁌꌋꆀꑖꑟꃅꐯꑌꑲꐯꐊꄉ,ꐯꇯꍏꇩꐛꐨꐧꋦꉪꏦꋈꄻꌠꎁꃅꑅꅐꊋꆜꌶ。

  
ꐱꀨ
ꋍ꒾ꌠ  ꄈꑼ
ꑍ꒾ꌠ  ꄈꅿꎀꍹꄹꏦ
ꌕ꒾ꌠ  ꄈꅿꍏꑷꎀꍹ
ꇖ꒾ꌠ  ꄈꅿꃅꄷꎀꍹ
ꉬ꒾ꌠ  ꄈꅿꅉꂫꊐꌠꎀꍹ
ꃘ꒾ꌠ  ꄈꅿꇥꀯ
ꏃ꒾ꌠ  ꄈꅿꍬꏦ
ꉆ꒾ꌠ  ꄈꅿꍬꏦꍤꄻꌤꏲꅉ
ꈬ꒾ꌠ  ꄈꊤ
ꊰ꒾ꌠ  ꄈꌋꆀꇷꁨꉪꏦꌠꏀꄨꐮꃆꂮ
ꊯꊪ꒾ꌠ  ꄈꌐꉻꄈꁈꁧ

ꁰꒌ




  • 特别鸣谢
    中国民族语文翻译局彝文翻译室