ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꐛꐨꐧꋦꉪꏦꁈꁧꇰꀋ꒜ꌠ ꀊꂥꃅꐕꄉꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(6)

——ꍏꇩꇭꍣꄈ꒜ꀉꒉꊰꏁꃢꌠꇩꏤꑭꊂꁧꎁ꒜ꈿꅉꇬꄉꅇꄜꌠ
(2007ꈓ10ꆨ15ꑍ)

ꃛꏢꄧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꊯꊪ、ꈍꄮꑌꀋꎪꃅꄮꐽꀻꎆꈝ꒜ꍬꇬꎷ

  ꀋꃋꋋꇅꋧꃅꆏꀉꒉꃅꄺꀱꀉꒉꃅꐽꋊꊭꇬꎍ。ꄮꐽꌠꌋꆀꀻꎆꌠꆹꄡꇗꃅꋊꄜꀨꉬ,ꄮꐽꌠꎹ、ꀻꎆꌠꏂ、ꇷꃅꌠꊥꎆꌠꆏꇊꀋꉆꄡꀋꉆꌠꃅꋊꒈꂃꒊꆱꐛꀐ。ꋧꃅꀉꑌꑵꃅꐙꌠꆹꆹꏮꀋꉆꀐꌠ,ꎆꏣꋧꃅꈴꌠꃹꅼꃅꀻꎆ,ꈆꑪꇮꇐꏀꆦꌠꐳꃅꄹꎆ,ꋧꃅꌋꆀꃄꁕꇷꃅꌠꌄꆣꉘꁇꁉ,ꇩꏤꌋꆀꇩꏤꐮꉘꇉꐥꌠꋍꑍꋍ꒿ꃅꐮꐞꀋꉆꇁ,ꇩꏹꊋꃤꐯꋑꌠꋧꃅꄮꐽꀧꌋꃅꌠꇬꈲꐪꐥꌠꃅꍜꉜꄉꀻꎆꇰ,ꇩꏹꃅꒊꃅꇁꀑꐱꃅꎍꐽ。

  ꄚꋋꄮꇬ,ꋧꃅꆹꄡꇗꑘꀋꒃꑴꌦ。ꊋꆍꉪꏦꌋꆀꊋꏗꍔꍞꄡꇗꐥꑴꌦ,ꋍꈨꋋꈨꇬꐮꏯꄉꌠꌋꆀꊷꈌꌤꃆꀑꄔꂪꄓ,ꋧꃅꎆꏣꐽꀋꏣꌠꀊꅰꃛꇁ,ꒈꂪꒈꀑꍣꐨꀊꅰꀉꒉꇁ,ꋊꃅꋬꂻꇷꇋꌠꌋꆀꋊꃅꀋꉬꌠꋬꂻꇷꇋꌠꐯꏍꎍ,ꋧꃅꄮꐽꌠꌋꆀꀻꎆꌠꂾꆏꊋꋠꐨꌋꆀꊝꐨꀉꑌꃅꐥ。

  ꐯꇯꀻꎆꊜꋽꄮꌬ,ꐯꇯꋍꑞꋍꑵꊝꐨꊝ,ꃰꊿꄮꐽꌠꌋꆀꀻꎆꌠꌤꑘꋍꉎꀋꐥꌠꄹꎆꌠꆹ,ꇩꏤꈁꐥꌠꏓꂱꊇꅉꈲꏣꇬꃆꂮꐥꌠ,ꋋꆏꇩꏤꈁꐥꌠꏓꂱꐯꇯꉪꐨꑌꉬ。ꉪꊇꄹꇬꆹ,ꇩꏤꈁꐥꌠꏓꂱꃅꐯꇯꈏꇤꊋꇤ,ꀊꉗꀊꎴꃅꄮꐽ、ꐯꇯꌄꆣꌠꐮꄮꋧꃅꋈꄻꌠꄹꇙꄷꌠꉬ。ꑠꅹ,ꐊꏑꇩꏦ꒜ꏦꃤꉪꃆꁢꊧꌋꆀꏥꏦꇬꈴꄉ,ꇩꏹꏦꃤꌋꆀꐯꇯꉌꃹꈴꌠꇩꏹꐮꃆꂮꃄꏦꍬꋒꃅꄉ,ꇩꏹꐮꃆꂮꈐꇬꋯꁦ、ꐮꄮ、ꇷꃅ、ꋓꊋꌠꉌꊈꍔꆙꄡꑟ。ꍔꍞꀂꏽꆏꐮꇬꉜꁨ、ꐥꊯꃅꋮꇖ,ꐯꇯꄉꇩꏹꐮꃆꂮꋯꁦꈴꌠꄹꎆ;ꎆꏣꀂꏽꆏꐯꇯꇷꃅ、ꂱꎆꅑꌠꌌꐯꅋꐮꑣ,ꐯꇯꎆꏣꋧꃅꈴꌠꄹꎆꌊꐯꏡ、ꈲꈴ、ꐯꇯꈲꌠꇬꉜꄉꀻꎆ;ꁱꀕꀂꏽꆏꐮꌷꐮꄻ、ꌡꎹꋲꊏ,ꋧꃅꀉꑌꑵꃅꐙꌠꉜꁨ,ꐯꇯꄉꃰꊿꌧꑳꌄꆣꀻꎆꌠꊥꎆ;ꋬꂻꀂꏽꆏꐮꇬꉌꒊ、ꇷꃅꌠꊋꀥꇱ,ꏟꈯꃅꌉꈿꇇꁈꀋꉬꃅꄮꐽꌠꃄꄟꌌꇩꏹꀥꏈꌠꂥꀘ,ꐯꇯꄉꋧꃅꄮꐽꎍꐽꌠꀧꌋꃅ;ꋦꈭꀧꌋꃅꀂꏽꆏꐮꇬꇇꀨ、ꊋꏓꄉꄹꎆ,ꐯꇯꄉꃰꊿꇫꉘꇉꐥꌠꅉꆺꑱꈐꋦꁍꋋꂷꀧꌋꃅ。

  ꀋꃋꋋꄮꍏꇩꌋꆀꋧꃅꇬꐮꃆꂮꆹꐩꋊꐨꐛꐈꌠꅐꀐ,ꍏꇩꊫꂫꃰꇌꆏꋍꑍꋍ꒿ꃅꋧꃅꊫꂫꃰꇌꌋꆀꐮꑌꑲꎍ。ꇩꏹꆲꉐꈍꃅꐈꁏꄿꂿ,ꍏꇩꍔꃚꌋꆀꏓꂱꆹꐯꇯꄮꐽ、ꀻꎆ、ꇷꃅꌠꁈꁧꀊꂥꃅꐕꄉ,ꄂꋦꑴꌅꌠꄮꐽꃅꉇꉻꑌꑲꏱꁈꌬꇬꎷ,ꇩꏤꌅꀨ、ꋬꂻ、ꀻꎆꈲꐪꀧꌋꃅ,ꋧꃅꄮꐽꀧꌋꃅ、ꐯꇯꀻꎆꌠꊥꎆꌠꉇꉻꑌꑲꏱꁈꉪꃆꁢꊧꏤꐪꍬꇬꎷ。

  ꍏꇩꈍꄮꑌꀋꎪꃅꄮꐽꀻꎆꌠꈝ꒜ꍬꇬꎷ。ꋋꆹꍏꇩꍔꃚꌋꆀꏓꂱꃅꋊꀻꎆꐨꌋꆀꊨꏦꈲꁧꇬꈴꄉꏤꄻꅐꇁꌠꄐꇐꏤꁈꉬ。ꍏꉸꊿꋅꆹꄮꐽꉌꃹꌠꊿꋅꉬ,ꍏꇩꆹꈍꄮꑌꋧꃅꄮꐽꀧꌋꃅꌠꀋꎪꀋꑴꌠꊋꃤꉬ。ꉪꊇꆏꏟꈯꃅꍏꇩꏓꂱꈲꁧꌋꆀꇩꏤꈁꐥꌠꏓꂱꈲꁧꏓꐯꇯꎼꇁ,ꇗꅉꎃꊒꌠꌭ,ꑖꐥꑗꅒꇬꎷ。ꉪꊇꏟꈯꃅꇩꏤꀉꒉꀄꊭ、ꊋꇨꊋꁧ、ꌢꎭꌣꈚꌠꀋꍣꃅꋍꏢꃅꐽꊯꃅꉜꇬꎷ,ꇩꏤꈁꐥꌠꏓꂱꑴꌅꃅꀻꎆꈝ꒜ꌊꄉꍬꌠꌅꈌꉜꁨ,ꀉꁁꇩꏤꈏꇓꌤꆿꈌꀋꄀꇇꀋꏿ,ꊨꏦꉪꐨꄀꇗꇱꌊꌠꀋꁵ。ꍏꇩꆏꊋꇤꄉꇩꏹꀥꏈꌠꌋꆀꊷꈌꌤꃆꌌꄮꐽꃅꂥꀘꄉ,ꇩꏹꌋꆀꃅꄷꋬꂻꇷꃅꌠꄹꇙ,ꇶꌾꉪꏦꇶꏦꈁꐥꌠꏭꁏ。ꍏꇩꆏꄴꏮꌠꇩꐏꏱꁈꌬ,ꂽꉂꂽꈾꋓꅔꌠꀋꃅ,ꇩꏤꈁꐥꌠꏭꂽꌤꌌꌟꇷꌠꇋꌠꀋꃅ。ꍏꇩꆏꊋꆍꉪꏦꌋꆀꊋꏗꍔꍞꇶꏦꈁꐥꌠꏭꁏ,ꐥꋊꐥꍂꃅꇨꏗꏿꌠꀋꃅ,ꐥꋊꐥꍂꃅꍔꍆꌠꀋꃅ。

  ꍏꇩꆹꈍꄮꑌꀋꎪꃅꐯꈲꋓꊋꌠꁉꃑꄐꇐꏤꁈꌬꇬꎷ。ꉪꊇꆹꐪꊛꄉꊨꏦꀻꎆꌠꌌꃅꄷꌋꆀꋧꃅꐯꇯꀻꎆꌠꊥꎆ,ꋍꑞꋍꁆꏯꈲꏣꐯꏑꈌꍔꒉ,ꂱꑱꇩꏤꀻꎆꌠꃅꇫꑟꈭꐨꀉꁁꈜꀕꇈꀻꎆꇰꌠꇩꏤꈧꌠꎃꊒꌠꃆꂮꑌꉈꇬꌶ。ꉪꊇꆹꐪꊛꄉꌬꈴꌠꇩꏹꃼꇇꃅꏥꏦꇬꉜꄉ,ꃷꎏꃹꉆꌠꍔꒉ,ꏦꃤꈴꄉꇷꃅꌠꌅꈌꈲꁧꀧꌋꃅ。ꉪꊇꆏꇩꏹꐧꋦꃅꀻꎆꇰꌠꇩꏤꇇꀨꄉꑴꌅꀻꎆꊋꃤꀉꇨ、ꉹꁌꐥꐨꄻꃪꌠꊋꁈꄏꄉ,ꒈꂪꒈꀑꍣꐨꀄꊭꇁꎻꌠꉌꃹ。ꉪꊇꆏꇩꏹꃼꇇꌋꆀꎆꒉꎆꇁꏦꉻꄻꐛꒆꌠꊋꁈꄏ,ꃼꇇꌋꆀꎆꊐꑴꌅꈴꃅꌒꈴꌠꄹꎆ,ꋮꇖꇷꃅꌠꈴꄉꄐꊒꃅꃼꇇꃅꇬꏟꃆꏈꑘꑠꀞꄻꌠꉌꃹ。ꍏꇩꆹꀋꎪꃅꌠꊿꉮꀂꈲ、ꃷꇎꐚꃅꊝꌠꌤꑠꀋꃅ。

  ꍏꇩꏟꈯꃅꄮꐽꃅꐮꐊꌠꏥꏦꉬꏢꌠꌭꈬꌠꅉ꒜ꀂꏽꄉꇩꏤꈁꐥꌠꌋꆀꉁꅉꃅꇷꃅꌠꀻꎆ。ꉪꊇꆏꐪꊛꄉꇩꏤꐞꄿꌠꌋꆀꄐꇐꏤꁈꃅꅇꐮꈴꌠꊋꀥꇱꄉ,ꀊꅰꃅꐮꉌꒊ,ꃹꅼꃅꇷꃅ,ꄉꄐꋭꋽꃅꉜꐨꐯꀋꐊꌠꂥꀘ,ꐮꇢꊭꇬꀊꉗꀊꎴꃅꎍꐽꋬꂻꃅꀻꎆꌠꄹꇙ。ꉪꊇꆹꐪꊛꄉꂄꃅꃷꇎꐊ、ꃷꇎꌌꐋꃅꌠꈭꇍꉇꉻꐮꑌꑲꌠꌐꏦꌬ,ꈭꇍꇩꏤꈧꌠꌋꆀꐮꉂꐮꅉꃶꐚꃅꇷꃅꌠꊋꀥꇱ,ꏣꀋꑌꃅꃄꁕꇷꃅꌠꍔꆙ,ꐯꇯꄮꐽꑘꒃ、ꐥꊯꐯꑅ、ꇷꃅꋓꊋꌠꃄꁕꋦꈭꀹꄻ。ꉪꊇꆹꉈꑴꐪꊛꄉꀻꎆꇰꌠꇩꏤꈧꌠꌋꆀꋯꑌꇷꃅꌠꊋꀥꇱ,ꋊꃅꉂꐪꀊꅰꃅꃹꅼꇁ,ꃶꐚꃅꇷꃅꌠꍔꌠꒉ,ꄾꌦꋩꃅꇇꀨꄎꌠꇇꀨ,ꀻꎆꇰꌠꇩꏤꋭꋽꌠꇖꐨꌋꆀꐯꇯꈲꏣꐥꌠꀧꌋꃅꎂꀕ。ꉪꊇꆹꉈꑴꐪꊛꄉꌤꃆꀉꑌꁁꏯꑠꇬꃅꈽꆹ,ꐮꄉꄐꌠꇩꏹꋭꑘꃅꄡꑟꌠꃅ,ꋈꄻꐨꐥꌠꂿꄐꋊꇤꅐꇁ,ꇩꏹꐥꀹꁳꀊꅰꃅꎃꊒꋭꋽꌠꁆꏯꉜꄉꀻꎆꌠꄹꇙꎂꀕ。ꉪꊇꆹꉈꑴꐪꊛꄉꏣꀋꑌꃅꇩꏤꈁꐥꌠꍔꄈꌋꆀꍔꍞꎀꍹꐮꎻꈴꇷꃅꌠꍔꆙ,ꏓꄊ、ꍔꑠ、ꂽ、ꃅꄷ、ꉹꁌꏓꉻꑠꉈꄅꏭꑌꑲꌠꊋꀥꇱ,ꍏꇩꏓꂱꌋꆀꇩꏤꈁꐥꌠꏓꂱꐮꅲꐯꇫꌠꌋꆀꐮꉂꐮꅉꌠꀊꅰꃅꁨꎆꆹꎂꀕ。

  ꍏꇩꀻꎆꌠꆹꋧꃅꐞꀋꉆ,ꋧꃅꌄꆣꑘꒃꌠꑌꍏꇩꐞꀋꉆꌠ。ꍏꇩꏓꂱꆹꉈꑴꐪꊛꄉꇩꏤꈁꐥꌠꏓꂱꌋꆀꐮꐊꄉ,ꃰꊿꉌꉪꅉꉾꃪꌠꃅꇫꑟꂿꄷꄉꀋꆏꃅꈒꇤꊋꇤꎂꀕ。

  ꊰꑋ、ꄺꀱꏀꀺꉌꊈꌌꐊꑷꃅꄈꋈꄻꇬꇰꀋ꒜ꌠꋉꃆꀊꏀꌠꄹꆷꁨꆹ

  ꍏꇩꐛꐨꐧꋦꉪꏦꌤꑘꆹꄺꀱꏀꀺꌠꌤꑘꉬ。ꄈꆹꃅꋊꂴꆽꉆꄉꏓꂱꏃꂠꌊꀋꆏꃅꌤꑘꀻꎆꌠꐛꐨꀊꏀꀹꄻ,ꀋꎪꃅꄺꀱꏀꀺꉌꊈꌌꊨꏦꑴꅉꄺꂡꌠꊋꀥꇱ,ꈍꄮꑌꍏꇩꐛꐨꐧꋦꉪꏦꌤꑘꏃꂠꈯꄜꀉꇨꂷꐛꌶ。

  ꉪꊇꄈꋈꄻꉆꊰꃘꈓꐛꀐ,ꇩꏤꑭꊂꌅꈌꌬꉬꊰꉆꈓꌠꇬ,ꄈꑼꏃꄙꎖꃪꑼꐥ,ꄈꅿꂘꑴꌠꌋꆀꏲꂠꌠꂿꃆꆹꋌ꒜ꑞꊭꇬꑌꏭꀋꋌꃅꀊꅰꃅꃣꇖ。ꄈꏃꂠꌠꄺꀱꁉꃑꌠꆹꄈꄚꄉꍄꑐꊋꃤꀉꇨꃅꉀꒆꌠꀉꄂꀋꉬꃅ,ꉈꑴꄈꄚꄉꋌ꒜ꐥꀋꋻꌠꇖꃆꀊꏀꊝꐨꀊꏀꑠꀉꑌꃅꋒꇁ。ꋧꃅꃆꂮ、ꇩꏤꃆꂮ、ꄈꃆꂮꀻꎆꐛꐈꄉ,ꄺꀱꏀꀺꉌꊈꌌꄈꋈꄻꊋꀥꇱꌠꆹꀋꉬꀋꉆꐯꀋꀋꉬꀋꉆꇈꉈꑴꃛꊸꐯꃛꊸꌠꑌꄚꅐꇁꀐ。ꀋꎪꃅꄈꅿꌅꈌꌬꊋꃤꋈꄻꌠꌋꆀꂴꅑꐨꋈꄻꌠꌌꈜꀦꃅꄉ,ꏟꈯꃅꄈꆹꄈꏲ、ꅲꈯꃅꄈꏲꌠꌭꈬ,ꏓꂱꎁꃅ、ꃶꐚꌠꃅ、ꐙꎴꌠꇖꐨꃄꌬ,ꉪꐨꀋꎪꌠꌌꀋꉬꀋꉆꌠꃅꄉꉪꇐꂘꄻꌠꊋꀥꇱ,ꊇꁧꀊꂥꌠꄈꑼ、ꇥꀯꁥꌠꂘꄻꌠꌌꀋꉬꀋꉆꌠꃅꄉꎀꍹꋈꄻꌠꊋꀥꇱ,ꄈꌋꆀꏓꂱꉹꁌꃷꅍꆊꅿꃅꐮꑌꐯꑲꌠꏦꀧꌠꌌꀋꉬꀋꉆꌠꃅꄉꃅꇏꋈꄻꌠꊋꀥꇱ,ꋯꁦꏓꇱꄹꏦꄻꐛꒆꌠꌌꀋꉬꀋꉆꌠꃅꄉꄹꏦꋈꄻꌠꊋꀥꇱ,ꍹꈔꀞꅓꌠꌋꆀꄴꏮꉻꑫꄻꐛꒆꌠꌌꀋꉬꀋꉆꌠꃅꄉꍹꁏꎴꄖꋈꄻꌠꊋꀥꇱꄉ,ꄈꁳꈍꄮꑌꋍꉻꎁꃅꄈꄻ、ꋍꏅꎁꃅꏱꌅ,ꇯꍝꌠꎹꃶꐚꌠꃅ、ꄺꀱꏀꀺ,ꎬꅧꃅꉈꈽ、ꃅꎃꐙꎴ,ꍄꑐꊋꃤꐥ、ꋯꑌꐮꄮꌠꂷꇻꌦꉪꏦꌅꈌꌬꄈꂷꐛꎻ。

  (ꋍ)ꃹꅼꃅꍏꇩꐛꐨꐧꋦꉪꏦꌧꇗꉻꑫꃄꌬꌶꄻ,ꊋꇤꄉꂷꇻꌦꉪꏦꍏꇩꐛꈴꀊꏀꌠꊌꐨꌌꄈꑭꊂꉌꊐꎼꇁ。ꉪꇐꌧꇗꋈꄻꌠꆹꄈꅿꁧꀦꋈꄻꌠꉬ,ꄈꅿꌧꇗꏀꀺꌠꌌꋍꑞꋍꁆꏯꏀꀺꌠꄐꏁ。ꌶꄻꉹꌠꍔꄈꋈꄻꌠꇖꐨꇬꈴꄉ,ꄺꀱꁉꃑꌠꌋꆀꐛꏀꈴꋈꄻꌠꃅꐪꑽꑌꉌꐡꐨꇬꋒꐯꋒꃅꐮꐊꄉ,ꃹꅼꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌶꄻ,ꄈꑭꊂꃹꅼꃅꈆꑪꃅꀻꎆꌠꉜꐨꌶꄻꃄꄻꌠꍔꆙꌠꃅ,ꏟꈯꃅꀻꎆꇰꌠꂷꇻꌦꉪꏦꌌꉇꉻꋧꃅꌋꆀꈏꉻꋧꃅꄺꂡꀱꌠꄐꏁꌠꌭꈬ,ꀒꁨꋍꁘꃅꇭꍣꄈꌅꈌꌬꈳꏦ、ꐧꋦꉪꏦꋈꄻꈳꏦ、ꃰꊿꐧꋦꀻꎆꈳꏦꌭꇇꈐꊐꄉ,ꈆꑪꌧꇗꌌꃶꐚꌤꃆꎥꃪꌠꌋꆀꂥꀘꌠꄐꅍꐕꀊꂥ。ꄈꑼ、ꇥꀯꉌꉪꅉꂘꑴꌠꌋꆀꉪꇐꑌꇐꋈꄻꌠꊋꀥꇱꄉ,ꄈꑼ、ꇥꀯꋍꏅꌠꁳꐧꋦꉪꏦꈯꄜꁌꐨꉻꑫꃄꄻꌠꌶꀠꐛꎻ,ꇷꁨꉪꏦꉌꉪꅉꀊꎴꌠꌋꆀꍏꇩꐛꐨꐧꋦꉪꏦꐯꇯꉌꉪꅉꀋꎪꑇꊿ、ꈆꑪꃅꀻꎆꌠꉜꐨꀋꎪꃄꌬꊿ、ꐧꋦꉪꏦꂄꄸꉜꐨꑴꐚꃄꄻꊿ、ꏣꀋꑌꌠꐧꋦꐮꄮꊥꎆꊿꐛꌶ。

  (ꑍ)ꐪꊛꄉꄈꅿꌅꈌꌬꊋꃤꋈꄻꌠꊋꀥꇱ,ꊋꇤꄉꏱꌋꁥꌠꊇꁧꀊꂥꌠꂘꄻ。ꄈꅿꌅꈌꌬꊋꃤꋈꄻꌠꆹꄈꋈꄻꌠꌋꆀꍏꇩꐛꐨꐧꋦꉪꏦꌤꑘꃅꇴꄉꉻꇬꐮꃆꂮꐥꌠꉬ,ꀋꎪꃅꏲꂠꌧꐨꌋꆀꌅꈌꌬꊋꃤꐕꀊꂥꌠꌌꈁꐥꊐꌠꏱꌋꁥꌠꂘꄻꌠꈯꄔꐊꇐꃅꄉꒃꋒꉇꋒꌶ。ꈆꑪꃅꌅꈌꌬ、ꋯꁦꃅꌅꈌꌬ、ꏦꈴꄉꌅꈌꌬꌠꇖꐨꇬꈴꄉ,ꏲꌋꁥꌠꉪꇐꃅꇏꄻꃪ,ꏲꌋꇥꀯꌅꈌꌬꊋꃤꐕꀊꂥ,ꏃꂠꄟꌋꆀꏱꌅꄟꄻꃪꇁ,ꏃꂠꏦꉻꄻꐛꒆ,ꃅꄷꄈꊈꏲꌋꁥꌠꁸꇱꄺꀱꈭꐨꌤꃅꉺꏦꄻꃪ,ꈁꐥꊐꌠꏲꌋꁥꌠꂘꄻꌊꀋꎪꃅꄈꅿꌧꇗꌋꆀꈛꏦꌐꏦꏱꁈꃄꌬ、ꈆꑪꃅꀻꎆꌠꏃꂠꇮꌠꏲꌋꀉꇨꁥꐛꌶ。ꊋꀥꇱꄉꏲꌋꁥꌠꌅꈌꌬꊋꃤꋈꄻꌠꌌꄈꑭꊂꏭꄖꄑ、ꈺꇙꄉ,ꄈꅿꌤꈁꃅꌠꆹꈍꄮꑌꃅꋊꇖꐨꌋꆀꏓꂱꉘꇉꐨꇬꄐꊒꇬꎷꎻꌶ。

  (ꌕ)ꏣꀋꑌꃅꄈꈐꋯꁦꋈꄻꌠꄹꎆ,ꄈꅿꋯꑌꋍꃱꃅꀉꇨꇁꌠꇬꉜꄉꊋꇤ。ꄈꈐꋯꁦꌠꆹꄈꅿꏀꀺꍄꑐꊋꃤꀉꇨꇁ、ꄈꋯꑌꋍꃱꃅꌠꈫꈈꌠꇬꏦꀧꅍꀋꂿꑘꌠꉬ。ꄈꈐꋯꁦꍔꐯꌠꌌꄉꏓꂱꋯꁦꌠꄖꄑ,ꄈꈐꐮꄮꃅꐥꌠꌌꄉꐧꋦꐮꄮꃅꐥꌠꊥꎆꌶ。ꄈꑼꀨꄜꉆꈉꁌꒉ,ꄈꑼꋯꁦꌅꈌꏦꀧ,ꄈꃆꄈꂮꄇꄜꋊꌠꄹꎆ,ꄈꈐꋯꁦꇕꄟꋦꈭꄺꑣ。ꄈꅿꁧꎁ꒜ꀉꒉꈿꄹꏦꄻꐛꒆ,ꄈꅿꁧꎁ꒜ꀉꒉꈿꌠꁧꎁꃄꄮꄹꏦꃄꌬ,ꑤ(ꏃ、ꐎ)ꋍꈨꌋꌊꄈꅿꁧꎁ꒜ꀉꒉꈿꅉꀕꃅꃅꌠꄹꏦꌌꌫꄻꉚ。ꄈꅿꃅꄷꈁꐥꊐꌠꐊꈴꊈꑼꉼꌋꆀꎮꊈꉼꌤꃅꉺꏦꄻꐛꒆ,ꐊꈴꊈꑼꉼꌤꃆꀉꒉꀊꂾꌠꏭꏤꇽꌠꂿꄐꇤꅐꇁ。ꏦꇨꃅꋯꁦꏓꁨꄹꏦꌬ,ꋍꉻꃅꏲꂠꌠꌋꆀꂱꑱꁸꄉꏱꇺꌠꐯꇯꃅꌠꄹꏦꄻꐛꒆ,ꊿꋍꂷꅀꊿꀁꑌꄹꁆꀉꄂꌌꇂꇎꏲꐺꌠꏭꁏ、ꄴꏮ。ꃅꄷꄈꊈꌤꃆꀉꒉꀊꂾꑠꇕꄟꐰꏤꇬꌋꆀꇥꀯꀋꉬꀋꉆꑠꌬꇬꀾꌌꁰꈘꌠꄹꏦꌌꌬ。ꍏꑷꍔꍞꏳꆏꍏꑷꊈꑼꉼꐊꈴꃅ꒜ꈿꅉꏭ、ꃅꄷꄈꊈꈁꐥꊐꌠꎮꊈꉼꆏꊈꑼꉼꐊꈴꃅ꒜ꈿꅉꏭꏤꄮꐥꃅꌤꃅꃆꂮꌌꅇꄜꄷꀋꁧꇬꁳꍞꊟꎻꌠꄹꏦꋈꄻꐛꒆ。ꄈꈐꌊꄻꌠꄹꏦꄺꀱ,ꄐꌋꊿꂒꄜꄹꏦꌋꆀꌊꄻꃄꄟꄺꀱꐛꒆ。ꅉꂫꊐꌠꄈꎀꍹꇬꏲꌋꁥꌠꆏꄈꑼꌋꆀꉹꁌꈧꌠꁳꄇꄜꋊꄉꌋꁵꌠꌋꆀꉎꊐꌠꄈꎀꍹꌋꁵꌠꏡꁈꐯꇯꃅꌠꌌꍔꐯꃅꌬ,ꋍꁘꋍꁘꃅꅉꂫꊐꌠꄈꎀꍹꇬꏲꌋꁥꌠꌌꈛꎂꃅꌊꄻꌠꈍꈐꍔꐯ,ꄈꈐꅉꂫꊐꌠꋯꁦꃅꇫꑟꌠꃄꄟꀉꑌꑵꃅꍔꐯꌠꎹꎥ。ꄈꑭꊂꐋꀨꈧꌠꆏꏟꈯꀕꃅꄈꃤꏓꁨꋍꃱꃅꏲꂠꌠꀧꌋꃅꌶ,ꑴꐚꃅꄈꃤꍔꍞꍬꏦꇬꍬ,ꈍꄮꑌꄈꍏꑷꌋꆀꐮꐊꋍꏢꃅꇬꎷ,ꏟꈯꀕꃅꍏꑷꋦꒉꐨꀧꌋꃅ,ꃶꐚꃅꏲꅇꁣꀋꐥꃅꌬꌠꄉꀧꌶ。

  (ꇖ)ꀋꆏꃅꇥꀯꊿꌤꄹꏦꄺꀱꌠꃹꅼꃅꃅ,ꊇꁧꀊꂥꌠꇥꀯꁥꌋꆀꌧꊿꁥꂘꄻꅐꇁꌠꇬꉜꄉꊋꇤ。ꏟꈯꃅꄈꇥꀯꏲꂠꏥꏦꌬ,ꏟꈯꃅꋯꁦ、ꄇꄜꋊ、ꋓꅔ、ꉾꌠꌊꌬꄉ,ꇥꀯꌊꌬꌠꈆꑪꉺꏦꐛꎻ。ꇥꀯꌊꌬꌠꂒꄜꄹꏦꋊꍬ,ꈆꑪꃅꀻꎆꌠꉜꐨꌋꆀꎃꊒꌠꏲꂂꉜꐨꀂꏽꇖꐨꄛꑣꅐꇁꉆꌠꇥꀯꍤꎖꉻꑫꄻꐛꒆ,ꄇꄜꋊꄉꌊꄻꌠ、ꋓꅔꃅꈉꊌꌠ、ꃷꁨꍣꄉꌊꄻꌠꏡꁈꄻꐛꒆ。ꇥꀯꌤꃅꇬꋯꁦꍔꐯꄉ,ꋯꁦꃅꌋꁵꌠ、ꋯꁦꃅꌌꎖꉚꌠꈆꑪꃅꐙꐨꌋꆀꃶꐚꃅꐙꐨꀉꇨꇁꎻ。ꊋꀥꇱꄉꇥꀯꌊꌬꌠꌤꃅꈴꎁꇬꃅꍞꊟꌐ。ꏲꌋꇥꀯꄉꅍꃄꄮ、ꑴꄉ、ꐮꈴꄹꏦꄻꐛꒆ,ꉻꃅꊿꄹꏦꄻꐛꒆ。ꇥꀯꑍꈚꁵꏲꂠꌠꏦꉻꄻꐛꒆ。ꇩꁨꎆꏂꑘꌋꆀꌤꑘꌤꃅꅉꇬꊿꌤꄹꏦꄺꀱꌠꄹꎆ,ꇩꁨꎆꏂꑘꐋꀋꌡꐨꇬꄉꄐꌠꏲꌋꏲꂠꏡꁈꄻꐛꒆ。

  ꎃꊒꌠꊾꌬꄐꇺꐨꌭꈬ,ꌧꇐꑌꇐꐮꐊꐙ、ꃶꐚꌠꃅꇫꄉꐨꇬꉜ、ꉹꁌꇫꉌꃹꌠꏥꏦꇬꈴꄉꇥꀯꌊꄻ,ꊿꌊꊾꌬꌠꄉꉻꉌꃹꐨꐕꀊꂥ。ꇥꀯꀊꏀꄞꅐꌠꂘꄻꌊꌬꌠꊋꃤꁦꎆꇱ,ꇥꀯꀊꏀꌠꊋꊡꄉꅉꂫꊐꌠꇬꌋꆀꌢꎭꃅꄷꇬꄉꄜꎟꉀꒆꎻ,ꇥꀯꀊꏀꌠꂷꇻꌦꉪꏦꌧꇗꌧꐨꌋꆀꍔꍞꊇꁧꐕꀊꂥ。ꌋꅪꇥꀯ、ꀁꑌꊿꋅꇥꀯꂘꄻꌊꌬꌠꉜꁨ。ꀊꅰꃅꀊꉗꃅꇎꏦꎬꅧ、ꌤꃅꇬꊋꋠꌠꃅꄷꄉꊋꇤꄉꌤꃅꌠꇥꀯꈧꌠꏭꉜꁨ,ꋓꉪꁨꄉꅉꂫꊐꌠꇬꌋꆀꅉꂫꌤꃅꒃꅐꅉꇬꄉꇥꀯꄞꅐꌠꌋꌊꈁꐥꊐꌠꄈꍔꏲꂠꌤꏲꅉꇬꇱꇁ。ꐪꊛꄉꄇ꒜ꃅꇥꀯꁱꂘ,ꋒꐯꋒꃅꄈꌶꅉ、ꏲꑘꌶꅉ、ꇥꀯꌶꅉꂿꄐꇤꅐꇁꇈ,ꇥꀯꊇꁧꀉꒉꃅꉀꐕ。ꐊꑷꃅꐞꆏꎞꆏꀐꌠꇥꀯꌤꃅꋒ。ꑘꃅꌠꁌꒉ、ꌧꇐꁌꒉ、ꌧꊿꁌꒉ、ꀹꄻꌠꁌꒉꌠꌐꏦꌬ,ꏟꈯꃅꄈꌧꊿꏲꌠꏥꏦꌭꈬ,ꀊꂥꊐꌠꌧꊿꌋꆀꇮꇐꀉꇨꃅꐥꌠꌧꊿꌌꀨꇬꄉꌠꋍꑞꋍꑵꌧꊿꁥꂘꄻꌠꉜꈴꇲꈴꃅꒃꋒꉇꋒ。ꌧꊿꌤꃅꏦꉻꉺꏦꏀꀺ,ꋍꑞꋍꑵꌧꊿꀹꄻꊋꃤꌋꆀꑘꀺꏾꐨꋊꇤꅐꇁ,ꌧꊿꋍꋏꇁꋍꋏꊛ、ꑞꄐꌠꑞꃅꌠꐛꐪꀊꏀꀹꄻ。

  (ꉬ)ꐊꑷꃅꂴꅑꐨ꒿ꂘꌠꃅꊌꐨꄻꈫꈈꌋꆀꃅꀻꎆ,ꊋꀥꇱꄉꅉꂫꊐꌠꄈꎀꍹꋈꄻꌠꇬꉜꄉꊋꇤ。ꂴꅑꐨꆹꂷꇻꌦꉪꏦꍔꄈꃤꀑꇬꇬꎏ、ꊋꃤꁢꊧꉬ,ꄙꀕꃪꀕꊇꁧꀊꂥꌠꄈꑼꉘꇉꄉꄛꑣꅐꇁꌠꉬ。ꏟꈯꀕꃅꋒꃅꄈꑼꈧꌠꂘꄻꌠꋉꃆꄉꈁꋌꐘꒃꉇ,ꏟꈯꃅꀋꆏꃅꄈꑼꊇꁧꐕꀊꂥ。ꎔꎗꃅꄈꏦꌷꄈꏦꍬ,ꄈꑼꉪꉻꀉꇨꇁ,ꄈꑼꏤꄮꐥꃅꄈꊈꎥꃪꌠꄹꏦꄻꄉ,ꄈꑼꉹꁌꁧꃤꃅꌠꈭꈜꍔꐯ,ꄈꑼꉹꁌꇬꑌꑲꌠꌋꆀꉹꁌꇬꁧꃤꃅꌠꌤꃅꉻꑫꄻꄉ,ꄈꑼꌌꅉꀕꃅ꒿ꂘ、ꐥꍂꃅꂴꅑꐨꐥꌠꎴꃪꉺꏦꄻꐛꒆꇈ,ꄈꑼꁳꃶꐚꃅꉪꃆꁢꊧꎺꈬ、ꉌꂵꉹꁌꄷꄉꇬꎷꌠꂴꅑꊿꐛꎻ。ꒈꇁꐺꌠꄈꑼꏲꂠꌠꇬꊋꀥꇱꌋꆀꄺꀱ,ꊋꀥꇱꄉꇓꈓꇬꄉꇮꃅꇁꊿꈬꇬꄈꑼꌤꃅ,ꇓꈓꇓꉈꐮꐊꐙꌠꄈꑼꏮꐺꌠꏲꂠꉺꏦꋈꄻꐛꒆ。ꄈꑼꄈꇬꃹꌠꊇꁧꉀꐕ,ꄈꑼꁥꌠꐛꉻꄻꉾꃪ,ꋋꇅꃅꄈꑼꎕꏦꇬꀋꑟꌠꌌꀞꅓꇧꎭ。

  ꄈꅿꅉꂫꊐꌠꎀꍹꆹꄈꌅꈌꌬꌠꎀꍹꅉ꒜ꉬ。ꄈꋈꄻꌤꃅꃅꎁꄹꏦꃄꌬꇫꑟ,ꐊꑷꃅꂿꑘꁡꇤ、ꎆꏂꑘ、ꇓꈓꋥꁕꌋꆀꇩꏤꌤꃅꅉ、ꌶꅉ、ꐧꋦꎀꍹꀊꏀꑠꇬꅉꂫꊐꌠꄈꅿꎀꍹꋈꄻꌠꄹꎆ,ꄈꎀꍹꐛꅉꄻꌊꉾꃪꃅꄉ,ꎀꍹꉱꑷꐨꍔꀉꐯꃅꄉ,ꃄꄟꈩꄟꏀꀺ,ꋒꐯꋒꃅꅉꂫꊐꌠꄈꎀꍹꄹꇙꀻꎆ、ꉹꁌꁧꃤꃅ、ꊾꉌꏓꊭ、ꐮꄮꊥꎆꌠꂿꄐꇤꅐꇁ。ꄈꅿꅉꂫꊐꌠꎀꍹꋈꄻꌠꌌꄉꀉꁁꋍꑞꋍꑵꅉꂫꊐꌠꎀꍹꋈꄻꌠꈺꇙꀒꁨꆹ。ꄈꅿꅉꂫꊐꌠꎀꍹꌋꆀꄈꑼꈯꄔꇬꄉꃹꅼꃅꂴꅐꌠꃅꉾꃪꌠꋓꌠꃅ。ꇓꈓꇓꉈꄈꅿꅉꂫꊐꌠꎀꍹꇬꐮꇇꀨꇇꄻꌠꉺꏦꋈꄻꐛꒆ。ꇩꏤꑭꊂꂿꑘꇤꄉꇿꑌꄈꑼꇥꀯꀋꃋꋋꄮꈜꎴ꒿ꂘꌠꃅ。ꄈꈐꇬꊋꊡ、ꉈꇬ、ꇇꀨꉺꏦꄻꐛꒆ,ꅉꂫꊐꌠꇥꀯ、ꄈꑼ꒜ꌠꌠ、ꄈꑼꐥꐨꊋꋠꌠꉈꇬ、ꀨꎹ。ꅱꈯꃅꅉꂫꊐꌠꎀꍹꌫꎆꏦꀧꌠꌋꆀꈩꎟꅉꑠꌤꃆꌌꂥꀘꌠꉜꁨ。

  (ꃘ)ꏟꈯꃅꄈꅿꃅꇏꄻꃪ,ꊋꀥꇱꄉꍹꁏꎴꄖꋈꄻꌠꇬꉜꄉꊋꇤ。ꉾꃪꌠꄈꃅꇏꆹꄈꉌꉹꁌꉌꏓꐯꇯꌠꊋꃤꀉꒉꀊꂾꌠꉬ。ꏟꈯꃅꏓꂱꆹꐩꋊꋈꄻꌠꉬꌠꐩꋊꐥꇐꀨꎍꉪꏦꉜꐨꐥꇬꎷ,ꏟꈯꃅꋍ꒜ꁨꀋꑌꉌꂵꄅꀋꑌꃅꏓꂱꁧꃤꃅꇬꎷ,ꏟꈯꃅꉹꁌꈜꈴꇬꎷ,ꑖꈈꃅꉹꁌꉉꅇꅲ,ꇯꍝꃅꉹꁌꉪꐨꄜ,ꉌꊨꈬꇱꃅꉹꁌꊋꋠꐨꉈꇬ,ꉹꁌꎁꃅꌤꆿꉾꃪꌠ、ꌤꆿꃶꐚꌠꀉꑌꃅꀞ,ꌅꈌꆹꉹꁌꎁꃅꌬ、ꉌꂵꆹꉹꁌꎁꃅꉪ、ꈲꐪꆹꉹꁌꎁꃅꏂꌠꃅꇫꑟ。ꇯꍝꌠꎹꃶꐚꌠꃅꌠꃅꇏꌌꋍꑞꋍꁁꏯꌤꃅꌠꇬꄹꆷꁨꆹ,ꅉ꒜ꌆꌠ、ꀊꉗꃅꈲꌠꌤꑠꀉꑌꃅꃅ。ꊋꀥꇱꄉꍤꄻꎥꃪ,ꌷꀹꌋꆀꁱꀹꄻꃪ,꒜ꈿꌠꌋꆀꁱꐘꄯꒉꅧꊨ,ꇶꏦꉪꏦ、ꇛꌺꉪꏦꏭꁏ,ꈥꄻꈱꃅꌠꏭꁏ。ꈪꑌꇔꍣꃅꏎꏸ、ꈪꑌꇔꍣꃅꌤꑘꈁꐥꌠꀞꌠꄖꄑ,꒬ꑷꂃꈿꌠꏭꁏ。ꄈꑭꊂꐋꀨꈜꀕꇈꏲꌋꇥꀯꈧꌠꆏꄈꐛꊈꉉ、ꑌꇐꑲꇐꌐꏸ、ꂴꅑꂿꄐꐥꌶ。ꃹꅼꃅꄈꃅꇏꄈꍬꏦ꒿ꂘꌠꍔꆙꄉꃅ,ꏣꀋꑌꃅꀠꂘꌠꌋꆀꊨꏦꀱꊨꏦꀠꂘꌠꃅꇈ,ꏲꌋꇥꀯꁳꑴꐚꃅꄈꏦꇩꏦꍬ,ꋊꃅꍸꇈꌠꑌꇐꑲꇐꉾꃪꌠꊪꊛ,ꃅꇏꀊꏀꌠꑌꇐꎃꊒꌠꍔꆙꇈ,ꄈꃅꇏꉾꃪꌠꌌꏲꑘꃅꇏꊥꎆꉹꁌꃅꇏꏃꈻꎻ。

  ꍏꇩꇭꍣꄈꐛꊈꌋꆀꉪꃆꁢꊧꆹ,ꄈꌋꆀꋍꑞꋍꑵꏣꑌꍹꈔꌠꃅꇏꆹꀆꐒꃆꄔꌟꃅꐯꈽꀋꉆꌠꋌꏤꄉꀐ。ꏟꈯꃅꍹꈔꌠꅓꀞꌠꌋꆀꇿꋌꐥꃅꍹꈔꌠꄴꏮꌠꆹ,ꃰꊿꉌꂵꇬꇯꅀꇬꀋꇱꌠꌋꆀꄈꋋꂷꋦꅀꈔꌠꃆꂮꐥꌠꉬ,ꋋꆹꄈꀋꎪꃅꅉꀕꃅꋒꃅꒃꉇꌶꌠꍔꍞꂿꃆꀉꒉꀊꂾꌠꉬ。ꄈꑭꊂꐋꀨꈁꐥꌠꃅꀋꎪꃅꋒꐯꋒꃅꍹꈔꌠꏭꁏꄉꉈꈽꌠꆹꀊꉗꀊꎴꃅꐙꌠ、ꌼꀖꃅꐙꌠ、ꊋꋠꃅꐙꌠꐝꉅꌶ,ꍹꁏꎴꄖꋈꄻꌠꌌꄉꀊꅰꃅꑓꅐꎑꅉꇬꐕꄉ,ꊨꄅꀨꄅꃅꍹꈔꌠꏭꁏ。ꏟꈯꃅꐴꇰꁧꇯꏲ、ꏓꇰꏱꄻ、ꅓꀞꄴꏮꐯꇯꃅ、ꄴꏮꌠꉜꁨꌠꌐꏦꌭꈬ,ꏟꈯꃅꅓꀞꌋꆀꍹꈔꄴꏮꉻꑫꋈꄻ,ꅱꈯꃅꍹꈔꌠꅓꀞꄮꇬꆏ,ꀊꅰꃅꐴꀨꇬꄉꏱꄻꌠꉜꁨ,ꀊꅰꃅꄴꏮꌠꉜꁨ,ꀊꅰꃅꄹꏦꋈꄻꌠꉜꁨ,ꇁꀦꇬꄉꍹꈔꄴꏮꌤꃅꈍꈐꍔꐯꌶ。ꏦꇨꃅꄈꃅꇏꐙꎴꃅꏲꌠꋈꄻꌠꃅꎁꄹꏦꌬ。ꏟꈯꃅꃹꅼꃅꄺꀱꌠꌋꆀꏦꉻꏀꀺꌠꌭꈬ,ꊋꀥꇱꄉꐙꎴꃅꏲꌠꁱꀕꋈꄻꄉ,ꍹꄙꐈꄵ꒿ꂘꌠꎴꈲꉺꏦ、ꍹꁏꎴꄖꌠꄹꏦꉻꑫ、ꌅꈌꌫꄻꍤꄻꋎꍅꌠꉺꏦꐛꎻ。ꍬꏦꍤꄻꍞꊟꍤꌋꌠꁆꍆꌤꃅꅉꋍꃱꃅꏲꂠꌠꄻꐛꒆ,ꏮꆫꄹꏦꄻꐛꒆ。ꊋꀥꇱꄉꏲꌋꇥꀯꐙꎴꑴꏢꌤꃅ,ꄈꑼꇥꀯꍹꄙꐈꄵꊋꃤꐕꀊꂥ。ꏟꈯꀕꃅꉹꁌꈲꁧꇬꉮꐺꌠꃅꇏꀋꉾꀋꃪꌠꈎꍬ,ꇯꍝꃅꉹꁌꀉꑌꃅꇫꉜꐨꐥꌠꌤꃆꂥꀘ。ꏟꈯꀕꃅꄹꐆꏦꐆꌠꃣꈌꀞꄻ,ꍹꈔꊿꈍꃅꐙꌠꉬꄿꂿ,ꐯꇯꀋꎪꃅꏦꃤꇬꈴꄉꌌꏟꈯꃅꅓꀞ,ꋍꍈꑌꄝꇬꏆꀋꉆ!

  ꐋꀨꊈ!ꉪꊇꄈꆹꄻꐛꄹꉇꄑꌳꈄꀬꅑꃅꍏꇩꏓꂱꏃꂠꄉꐥꐨꐥꌒꄻꌒꌠꋈꄻ、ꍏꉸꊿꋅꇰꀋ꒜ꃅꀱꌄꆣꇁꌠꃅꇫꑟꌠꐩꋊꂿꃆꇤꆽꎍꄉꀐꌠ。ꐩꋊꂿꃆꋋꏢꃅꇫꑟꂿꄷꐛꅹ,ꋍꋏꇈꋍꋏꌠꍏꇩꇭꍣꄈꊾꆹꂴꐚꊂꊛ,ꇝꂱꀒꋏꀒꆹꊈꀑꇬꁌꇐꈤꌠꀋꃷ꓂ꃅꄚꈿꁮꀐ。ꀋꃋꋋꄮꍏꇩꇭꍣꄈꊾꆹꀋꎪꃅꐪꊛꄉꐩꋊꂿꃆꋌꐘꃅꋒꌶ。ꉪꊇꄈꆹꇩꏤꑭꊂꊿꋅꈁꐥꌠꏓꂱꏃꂠꌌꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꃄꇰ,ꋋꆹꍏꇩꀊꏀꄻꐛꊂꉪꇩꏤꐧꋦꉪꏦꋈꄻꌤꑘꇰꀋ꒜ꌠꇬꐪꊛꌠꌋꆀꀻꎆꌠꉬ,ꋋꆹꀋꉊꊂꅑꅸꇁꌠꍏꇩꏓꂱꊿꋅꄁꋦꌠꅔꈿ、ꇩꏤꌣꈚꐞꄿꌤꑘꇰꀋ꒜ꌠꃅꇫꑟꌠꇬꐪꊛꌠꌋꆀꀻꎆꌠꉬ。ꀋꃋꀱꇁꋌ꒜ꉪꇬꆏ,ꉪꊇꆹꆽꎍꌠꂿꃆꆏꋍꉎꀋꐥꇈꀑꑊꁤꇅꀕꌠꉬ。ꉪꇁꋌꊂꄀꇬꆏ,ꉪꊇꆹꇫꄉꐛꏀꈴꋈꄻꌠꄹꆷꀒꁨꆹ、ꁍꇩꏓꋍꃱꃅꌠꃅꇫꑟ、ꋧꃅꄮꐽꀧꌋꃅꌠꌋꆀꐯꇯꀻꎆꌠꊥꎆꌠꐩꋊꂿꃆꀉꒉꋋꌕꐘꃅꇫꑟꌠꇬꉌꊋꑓꊋꇎꃅꄉꑌꀐ。

  ꄈꑭꊂꐋꀨꀋꎪꃅꏸꐚꃅꉪꇫꑟꌶꌠꆏ,ꐊꑷꃅꊼꇅꌣꈚꐧꋦꋈꄻꌠꑞꅉꁻꌐꃅꇫꑟꇬꉈꑴꊯꎖꈎꊛꄉꉈꈽꄻꅐꑴꌦ,ꀑꐱꃅꐛꏀꈴꌠꃅꇫꑟꇬꉈꑴꈍꑋꊰꈎꊛꄉꉈꈽꌶꑴꌦ,ꐧꋦꉪꏦꄹꏦꌭꈬꌋꆀꀻꎆꇬꆹꊿꈍꑋꋏ、ꊯꎖꋊꄷꀋꁧꈍꑋꊏꋊꏟꈯꃅꀋꆏꃅꊋꇤꄉꉈꈽꄻꅐꑴꌦ。ꉈꈽꄷꆏꊋꋠꅍꃨꆰꐨꑌꐥꇁꌠ。ꉪꊇꆏꀋꎪꃅꀀꌒꎭꉨ、ꉌꐒꉪꐨꁦꎆꑌꄉ,ꈍꄮꇬꑌꂷꇻꌦꉪꏦꏭ、ꍏꇩꐛꐨꐧꋦꉪꏦꏭ、ꍏꉸꊿꋅꇰꀋ꒜ꃅꀱꌄꆣꇁꌠꃅꇫꑟꌠꏭꉌꊋꀋꎪꌠꑌꈬꇬꎷ;ꀋꎪꃅꉌꒉꇨꊸꌠꋓꉪꁨ、ꎬꅧꃅꉈꈽ,ꐧꋦꉪꏦꉘ꒜ꊬꌠꀑꐱꇩꏤꐛꃆꐛꂮꎺꐚꃅꄉ,ꄈꌋꆀꏓꂱꌤꑘꎁꃅꄝꀋꏯꃅꊋꇤ;ꀋꎪꃅꉌꊢꄉꌶ、ꀂꏾꈎꄉꃅ,ꀋꆏꃅꃅꐨ、ꏓꂱ、ꐩꋊꁳꍤꐓꎖꐓꌠꑆꊋꃅꅐꇁ;ꀋꎪꃅꋯꑌꌠꊋꀥꇱ、ꃅꇴꄉꉻꀉꐯꈭꃅꉪ,ꑴꐚꃅꄈꑭꊂꋯꑌꏓꋍꃱꃅꌠꀧꌋꃅ,ꄈꌋꆀꏓꂱꉹꁌꆹꃷꅍꆊꅿꌟꃅꐯꅑꎍꌠꄝꀋꊰꇬꎷ,ꇩꏤꑭꊂꊿꋅꈁꐥꌠꏓꂱꀉꒉꃅꐮꋯꑌꌠꌌꈫꈈ,꒺ꈐ꒺ꉈꍏꉸꌺꇖꀉꒉꃅꐮꋯꑌꌠꊋꀥꇱ,ꍏꇩꏓꂱꌋꆀꋧꃅꇩꏤꈁꐥꌠꏓꂱꀉꒉꃅꐮꋯꑌꌠꊥꎆ,ꊋꋠꏢꅝꅍꈁꐥꌠꄩꊋ、ꄈꌋꆀꏓꂱꌤꑘꄹꆷꅸꀊꏀꌠꀊꅰꀉꒉꃅꊋꐛꌠꃅꅜꌠꎁꃅꊋꃤꀉꒉꌠꇲꁵ。

  ꉪꊇꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ,ꀊꅰꃅꏟꈯꃅꋯꑌꌊꄈꍏꑷꈭꇍꄉ,ꉹꁌꋍꏅꌠꐯꇯꉌꂵꋍꂷꃅ,ꀹꄻꀒꁨꂵ,ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅ、ꏓꂱꐥꐨꐥꌒꄻꌒꌠꐩꋊꄯꒉꀊꏀꁬꁰꄻꌠꎁꃅꊋꇤꏡꇤꄉꉈꈽ!

  (ꏓꂱꈄꏍꄯꒉ)
ꁰꒌ




  • 特别鸣谢
    中国民族语文翻译局彝文翻译室