ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(5)

——ꍏꇩꇭꍣꄈ꒜ꀉꒉꊰꏁꃢꌠꇩꏤꑭꊂꁧꎁ꒜ꈿꅉꇬꄉꅇꄜꌠ
(2007ꈓ10ꆨ15ꑍ)

ꃛꏢꄧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꈬ、ꇩꐏꌠꌋꆀꂽꐛꏀꈴꋈꄻꐛꐨꀊꏀꌠꀹꄻ

  ꇩꐏꌠꌋꆀꂽꋈꄻꌠꆹ,ꍏꇩꐛꐨꐧꋦꉪꏦꌤꑘꉻꄜꐛꃆꄉꉻꇬꉆꈉꀋꂿꑘꌠꇬꎍꌠꉬ。ꀋꎪꃅꇩꏤꋬꂻꌠꌋꆀꀻꎆꌠꄐꇐꏤꁈꃅꇴꄉꉻꀊꂥꅉꇬꉆꄉ,ꎆꏣꋈꄻꌠꌋꆀꇩꐏꋈꄻꌠꉜꈴꇲꈴꃅꄐꏤ,ꐊꑷꃅꊼꇅꌣꈚꐧꋦꋈꄻꈴꎁꇬꄉꇩꏤꌣꈚꇁꌠꌋꆀꂽꀉꇨꇁꌠꐊꐙꃅꃅꇫꑟ。

  ꐊꑷꃅꄈꌋꆀꏓꂱꁵꄻꄉꌠꃅꋊꀊꏀꌠꇬꀊꏀꊬꌠꇬꂽꐩꋊꂿꃆꃅ,ꀋꎪꃅꏟꈯꃅ꒜꒾ꄏꂽꌤꉪꇐ、ꄓꑦꀻꀊꏀꊬꌠꂽꋈꄻꉪꇐ、ꏦ꒾ꂱꇩꐏꌠꌋꆀꂽꋈꄻꉪꇐꌌꄐꇺꅍꃅꄉ,ꈆꑪꃅꀻꎆꌠꉜꐨꌌꇩꐏꌠꌋꆀꂽꋈꄻꌠꀋꂿꑘꌠꄐꇺꌐꏦꃅꄉ,ꀊꏀꊬꌠꂽꌤꄐꇐꏤꁈꌐꏦꃅꈴꌬꈴ,ꇤꐳꃅꍏꇩꐛꐨꂽꌤꄺꀱ,ꂽꌤꌌꉈꈽꌠꄐꋒꏤꋒꃅꄉ,ꂽꆏꋬꂻꌠꇬꇷꇋꇁꌠꀉꑌꑵꃅꐙꌠꏭꊝꄎꌠ、ꀉꑌꑵꃅꐙꌠꂽꌤꂿꃆꃅꊋꐛꄎꌠꊋꃤꐕꀊꂥ,ꏟꈯꃅꇩꏤꌅꀨ、ꋬꂻ、ꏲꄸꐛꒆꌠꀧꌋꃅ,ꋧꃅꄮꐽꌠꀧꌋꃅꌠꎁꃅꊋꃤꅐꌞ。

  ꂽꇝꂱꈴ、ꐛꏀꈴ、ꑌꐚꈴꌠꋈꄻꌠꆹꋍꃱꃅꐙꌠꉻꄜꉬ,ꀋꎪꃅꐊꑷꃅꊋꀥꇱ、ꋮꄮꃅꄹꎆꌶ。ꈍꄮꑌꏟꈯꃅꄈꂽꏭꈍꃅꑌꏲꂠꌠꅉꀨꏥꏦꌋꆀꏓꂱꂽꉪꃆꁢꊧꌭꈬ,ꃹꅼꃅꂽꐩꋊꂿꃆ、ꉪꅉꑇꐨ、ꌉꈿꉌꊈꌋꆀꐧꋦꉪꏦꂒꅉꂄꄸꉜꐨꌌ꒿ꂘ,ꊋꀉꒉꃅꄈꅇꍝꎼꇁꌠꅇꃅ、ꏓꂱꁧꃤꃅ、ꌳꈄꌉꉔꌠꋊꃅꃅꇏꉾꃪꌠꍔꆙ。ꏟꈯꃅꈆꑪꇮꇐꌌꇨꂽꄻꌠꌭꈬ,ꈴꌗꈴꂽꋈꄻ、ꈴꌗꈴꌉꈿꇬꌉꊋꌠꄐꇐꏤꁈꑞꅉꁻꌐꇬꈴꄉ,ꐳꃅꏸꏧꈴꌠꌋꆀꈴꌗꈴꄅꇱꃅꀻꎆ,ꏣꀋꑌꃅꈴꌗꈴꌠꇎꏦꇂꃴꂽꌤꁰꍋꌠꍔꂵ,ꐳꃅꊇꁧꀉꂥꌠꂽꌤꌧꊿꀊꏀꉹꌠꀉꒉꑠꁥꂘꄻ,ꇯꍝꃅꌉꈿꊋꃤꏓꐛꇀꄟꆹꏮ。ꏟꈯꃅꏦꈴꂽꏲ、ꏦꇨꃅꂽꏲꌠꌭꈬ,ꂽꌤꇗꏦꄻꐛꒆ,ꊋꀥꇱꄉꈆꑪꈴꄉꏱꄻ。

  ꋧꃅꂽꌤꀻꎆꌠꐛꄟꀊꏀꌠꌋꆀꉪꇩꏤꀻꎆꌠꀊꏀꃅꈉꄻꌠꇬꄉꄐꃅ,ꂽꌤꌧꇗ、ꂽꌤꇮꇐ、ꂽꌤꎀꍹ、ꂽꌤꏱꄻꏀꀺꌠꄹꎆ。ꂽꇬꏦꉻꃷꁨꏤꄻꌠꌋꆀꏱꁈꄹꏦꄺꀱꌠꋊꄻ,ꋍꁘꋍꁘꃅꍏꇩꐛꐨꑌꐊꉈꑴꀋꃋꋋꄮꂽꌤꋈꄻꈳꏦꇬꈆꑪꃅꊥꇬꌠꃄꄟ、ꄹꏦꄐꄻꌠꌋꆀꀰꄟꏡꄟꇬꑌꄉꄐꃅꑠꋬꈭꄻꐛꇁ。ꇩꐏꈆꑪꇮꇐꇮꑘꏦꉻꌋꆀꇇꌭꇇꂿꎹꃼꏦꉻꋊꄻꄺꀱ,ꇇꌭꇇꂿꎥꄻꌠꑴꌅꏀꀺꊋꃤꌋꆀꊇꁧꅐꐨꐕꀊꂥ。ꂽꌋꆀꏓꂱꐮꐊꃅ、ꇇꌭꇇꂿꂽꌬꌠꌌꏓꂱꌬꌠꇱꄉꈆꑪꎥꃪꒃꅐꉻꑫ、ꂽꇬꌧꊿꂘꄻꉻꑫꌋꆀꂽꇬꏦꀧꉻꑫꋈꄻꐛꒆ,ꏟꈯꃅꈪꑌꃅꂽꋈꄻꇈꍏꇩꐛꐨꂽꌋꆀꏓꂱꐮꐊꐮꉔꃅꐙꌠꀻꎆꈝ꒜ꏢꈳꅐꇁ。ꃹꅼꃅꐩꋊꀊꏀꌠꇎꏦꇂꃴꂽꋉꂽꏲꌠꐋꀋꌡꌠꈳꏦꌋꆀꏓꂱꌉꈿꄐꇐꏤꁈꎥꃪ,ꂽꌤꈆꑪꃅꌊꌄꆣꌋꆀꀻꎆ。

  ꏓꂱꃅꇩꐏꉪꉻꑌꌠꀉꇨꇁ,ꊋꀥꇱꄉꇩꐏꄕꊪꋈꄻ,ꂴꄐꄻꂽꌋꆀꂱꀘꋈꄻꊇꁧꐕꀉꂥ。ꊋꀥꇱꄉꏓꂱꃶꍋꏠꍤꂽꋈꄻꄉ,ꀊꅰꃅꉾꃅꇩꏤꋬꂻꌠꌋꆀꐧꋦꑘꒃꌠꀧꌋꃅ、ꏓꂱꀀꌒꃅꏾꏦꀧꌠꃅꎁꆽꎍꌠꂿꃆꃅ。ꏟꈯꃅꂽꁌꒉꂽꑱꈐꊿꀨꎹ、ꍔꃚꁌꒉꏓꂱꉁꅉꌠꌭꈬ,ꂽꌋꆀꍔꃚꂽꌋꆀꏓꂱꋯꑌꌠꄻꈫꈈ。ꈁꐥꊐꌠꄈꎀꍹ、ꍔꃚꌋꆀꏓꂱꉹꁌꃅꋌ꒜ꌟꃅꇩꐏꌠꌋꆀꂽꋈꄻꌠꊋꁈꄏ,ꂽꆏꐪꊛꄉꎆꏣꐧꋦꀻꎆꌠꎁꃅꑆꊋꅐꌞꌶ。

  ꊰ、“ꋍꇩꑍꏦ”ꃄꄻꌠꌋꆀꁍꇩꄮꐽꃅꏓꋍꃱꃅꌠꌤꑘꀉꒉꌠꄹꎆ

  ꑣꇤ、ꉪꂱꀱꁍꇩꈿꇁꈭꐨ,“ꋍꇩꑍꏦ”ꃄꄻꌠꋍꑍꋍ꒿ꃅꀉꑌꇁ。“ꋍꇩꑍꏦ”ꆹ꒜ꅉꎃꊒꌠꉬ,ꐥꎴꊋꃤꀉꇨꃅꐥ。“ꋍꇩꑍꏦ”ꇬꈴꄉꁍꇩꄮꐽꃅꏓꋍꃱꃅꌠꃅꇫꑟꌠꆹ,ꍏꉸꊿꋅꊇꅉꈲꐪꇬꄐꊒ。

  ꑣꇤ、ꉪꂱꀊꉗꃅꌄꆣꎍꐽꇬꎷꌠꆹꄈꃅꒊꃅꇁꀊꏀꌠꇂꃴꄉꇩꏲꍔꄻꌠꂾꎍꌠꇖꀨꀉꒉꀊꂾꐘꉬ。ꉪꊇꆏꀋꎪꀋꑴꃅ“ꋍꇩꑍꏦ”、“ꑣꇤꊿꑣꇤꏲ”、“ꉪꂱꊿꉪꂱꏲ”、ꀊꂥꃅꊨꏦꏲꌠꌐꏦꌬ,ꏦꇨꃅꇣꋲꏱꅉꐎꅉ꒜ꏦꃤꇬꈴꄉꌤꀞ;ꊋꈁꐥꃅꇤꄉꇣꋲꏱꅉꐎꍔꃚꊋꁈꄏꄉꏦꃤꈴꄉꏱꄻꌅꈌꌬꎻ,ꊋꇤꄉꎆꏣꀻꎆ、ꏓꂱꐥꐨꄻꃪ,ꋯꁦꄹꎆ;ꑣꇤ、ꉪꂱꊿꂒꋦꌠꈁꐥꏠꌠꊋꊡꄉꁍꇩꉂꑣꇤꉂ、ꁍꇩꉂꉪꂱꉂꌠꁈꁧꇂꃴꄉꉌꋧꊋꋓ,ꐧꋦꐮꄮꌠꊥꎆ;ꊋꀥꇱꄉꅔ꒜ꌋꆀꑣꇤ、ꉪꂱꐮꈴꇷꃅ,ꂴꎆꅑꌠꌌꐮꇬꅋ、ꐯꇯꀻꎆꌠꃅꇫꑟ;ꏣꀋꑌꃅꑣꇤ、ꉪꂱꉇꉻꏭꑌꑲꌠꇬꊋꁈꄏ,ꏟꈯꀕꃅꉇꉻꊋꃤꑣꇤ、ꉪꂱꌤꃆꇬꈌꄀꇇꏿꇁꌠꏭꁏ。ꑣꇤꃺꑌ、ꉪꂱꃺꑌꆹꑣꇤ、ꉪꂱꏲꂠꌌꉾꄎ、ꋈꄻꌌꉾꄎꌠꌧꐨꄐꐨꐥꐯꐥꌠ,ꑣꇤ、ꉪꂱꆹꋌ꒜ꄷꀋꁧꋌꊂꑌꐪꊛꄉꇩꏤꐛꏀꈴꋈꄻꌠꎁꃅꀋꂿꑘꌠꂿꄐꇤꅐꇁꄎꌠꉬ,ꇰꀋ꒜ꌠꁍꇩꆹꐥꍂꃅꑣꇤ、ꉪꂱꌄꆣꎍꐽꌠꊂꆈꁌꈬꉈꊪꁋꏟꈯꀕꃅꌠꉬ。

  ꄠꃪꌤꃆꂥꀘ、ꁍꇩꏓꋍꃱꃅꌐꌠꃅꇫꑟꌠꆹ,ꍏꉸꌺꇖꋍꏅꌠꐯꇯꉌꉪꅉꉬ。ꉪꊇꆏ“ꄮꐽꋍꃱꃅ、ꋍꇩꑍꏦ”ꌠꌐꏦꌋꆀꀋꃋꋋꊭ꒺ꑍꋮꐮꃆꂮꀻꎆ、ꁍꇩꄮꐽꋍꃱꃅꌠꈴꎁꄹꎆꌠꇬꉉꐨꉆꏢꌠꇬꍬꄉ,ꏟꈯꃅꍏꇩꋍꂷꉬꌠꏥꏦꆹꈍꃅꑌꇙꀋꑐꌠ,ꅔꈿꄉꄮꐽꃅꏓꋍꃱꃅꌠꉜꄉꊋꇤꌠꆹꈍꃅꑌꄝꇧꀋꎭ,ꄠꃪꏓꂱꏭꉘꇉꎍꌠꌐꏦꃄꌬꇫꑟꌠꆹꈍꃅꑌꄻꀋꀱ,“ꄠꃪꄂꋦ”ꁷꐞꃅꈧꌠꏭꁏꌠꆹꈍꃅꑌꇬꀋꏆꌠꉬ,ꏟꈯꀕꃅ꒺ꑍꋮꃆꂮꄮꐽꃅꀻꎆꌠꄜꀨꈫꈈꃅꌭꇇꈐꊐꄉ,ꃶꐚꃅ꒺ꑍꋮꃺꑌꎁꃅꐥꌒꏂ、ꄠ꒺ꃅꄷꎁꃅꄮꐽꏂꄉ,ꇩꏤꏲꌅꌋꆀꏲꄸꐛꒆꌠꀧꌋꃅ,ꍏꉸꊿꋅꊇꅉꈲꁧꀧꌋꃅ。

  ꏟꈯꃅꍏꇩꋍꂷꌠꌐꏦꌭꈬꌠꆹ,꒺ꑍꋮꐮꃆꂮꐥꌠꄮꐽꃅꀻꎆꌠꍔꍞꅉ꒜ꉬ。꒺ꑍꋮꏓꋍꃱꃅꀋꌐꑴꌦꇬ,ꄚꅔ꒜ꌋꆀꄠꃪꐯꇯꍏꇩꋍꂷꃤꉬꌠꌤꃶꐚꌠꆹꐥꅷꇁꇬꄺꀱꀋꋻ。ꍏꇩꆹ꒺ꑍꋮꃺꑌꐯꇯꃤꑱꈐꋍꂷꌠꋦꁍꉬ,꒺ꑍꋮꃺꑌꆹꐮꐊꄉꉾꃅꉪꊇꐯꇯꃤꉬꌠꑱꈐꋦꁍꋋꂷꀧꌋꃅꋒ、ꋈꄻꋒꄡꑟ。ꄠꃪꍔꄈꑞꂷꉬꄿꂿ,꒺ꑍꋮꆹꍏꇩꋍꂷꉬꌠꏚꍆꄷꆏ,ꉪꊇꆹꋀꊇꌋꆀꐯꇯꐮꈴꅇꉉ、ꋮꒉꐯꉇꌠꉌꃹ,ꌤꃆꑞꑌꉉꉆ。ꉪꊇꑌꐚꃅꑗꇖꈨꂽ,ꍏꇩꋍꂷꉬꌠꏥꏦꅉ꒜ꀂꏽꄉ,ꑌꐚꃅ꒺ꑍꋮꁮꐚꏭꃅꐮꊝꄟꄚꄉꆏꇧꎭꌠꋮꒉꄉ,ꄮꐽꃅꋯꏤꌠꉉꐛꄉ,꒺ꑍꋮꃆꂮꄮꐽꃅꀻꎆꌠꇶꏦꄻꐛꄉ,꒺ꑍꋮꃆꂮꄮꐽꃅꀻꎆꌠꐛꐪꀊꏀꌠꀹꄻ。

  ꊯꌕꂡꅔ꒜ꃺꑌꌋꆀꑍꄘꌕꉐꃪꄠꃪꃺꑌꆹꃷꅍꆊꅿꐮꐞꀋꉆꌠꀑꇬꋍꂷꉬꌠ。ꄠꃪꃺꑌꇬꈲꐪꐥꌠꌤꆿꉬꀐꄷꆏ,ꄠꃪꄮꐽꀧꌋꃅꌠꇬꈲꐪꐥꌠꌤꆿꉬꀐꄷꆏ,ꁍꇩꄮꐽꃅꏓꋍꃱꃅꌠꊥꎆꌠꇬꈲꐪꐥꌠꌤꆿꉬꀐꄷꆏ,ꉪꊇꐯꇯꊋꈀꑌꃅꇤꄉꀞꋒꌠꉬ。ꉪꊇꄠꃪꃺꑌꏭꉪꈴ、ꉌꒊ、ꉈꇬ,ꋌꊂꐪꊛꄉꄠꃪꃺꑌꋍꏅꈲꐪꐥꌠꏱꁈꏁꁈꃄꌬꌋꆀꋒꃅꃅ,ꏦꃤꈴꄉꄠꃪꃺꑌꎃꊒꌠꌅꈌꈲꁧꀧꌋꃅ,꒺ꇉꋧꁮꐚꏭꌋꆀꀉꁁꄠꃪꃼꇇꃅꊿꎆꇱꇁꌠꊼꇅꏓꋧꃅꐙꌠꃅꄷꎆꏣꀻꎆꌠꊋꁈꄏ。꒺ꑍꋮꃺꑌꊋꀥꇱꄉꐮꎻꈴ,ꎆꏣꁱꀕꐮꈴꌠꁁꏯꍔꐯ、ꏠꊐꉀꐕꌠꊥꎆ,ꈛꎂꃅ“ꌕꈴ”ꌠꄹꇙꄉ,ꑍꄷꀊꅰꃅꐮꉂꐮꅉ、ꇷꃅꌠꀊꅰꃅꃹꅼꎻꄉ,ꍏꉸꊿꋅꇰꀋ꒜ꃅꀱꌄꆣꇁꌠꎁꃅꐯꇯꊋꇤ。

  ꀋꃋꋋꇅꇬ,“ꄠꃪꄂꋦ”ꁷꐞꊋꃤꃛꐯꃛꃅꁷꐞꌠꃅꐺ,ꀉꆈꃅ꒺ꑍꋮꐮꃆꂮꄮꐽꀻꎆꌠꇬꉮꄻꐺ。꒺ꑍꋮꃺꑌꐯꇯ“ꄠꃪꄂꋦ”ꁷꐞꃅꐺꌠꇬꁎꏢꌶ。ꍏꇩꌅꀨꌋꆀꏲꄸꐛꒆꌠꄝꁷꇽꀋꉆ。ꍏꇩꌅꀨꌋꆀꏲꄸꐛꒆꌠꇬꎑꁠꌠꌤꃆꑞꉬꂿ,ꀋꎪꃅꄠꃪꃺꑌꑌꇫꐊꌠꍏꇩꏓꂱꋍꏅꌠꁳꐯꇯꏤꄻꎻ。ꉪꊇꆏꀉꒉꐯꀉꒉꃅꇬꀖꌌꀖꄉ、ꊋꀉꒉꐯꀉꒉꃅꇤꄉ꒺ꑍꋮꄮꐽꋍꃱꃅꌠꃅꇫꑟꑟꉂ,ꈍꃅꑌꊿꑞꂷꂒꅉꑞꏢꃄꄟꑞꑵꃅꄠꃪꄝꁍꇩꈐꏭꄉꁷꇽꎼꁧꀋꎽ。

  ꒺ꑍꋮꏓꋍꃱꃅꌠꆹꍏꉸꊿꋅꈴꅷꇰꀋ꒜ꃅꀱꌄꆣꇁꌠꇬꐩꋊꋌꐛꋍꃅꐙꎂꀕꌠꉬ。꒺ꈐ꒺ꉈꍏꉸꌺꇖꃅꑖꑟꃅꐮꋯꑌ、ꐯꇯꉈꈽꑲꆏ,ꁍꇩꏓꋍꃱꃅꌐꌠꀋꎪꃅꃅꇫꑟꄎꌠꉬ。
ꁰꒌ




  • 特别鸣谢
    中国民族语文翻译局彝文翻译室