ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(4)

——ꍏꇩꇭꍣꄈ꒜ꀉꒉꊰꏁꃢꌠꇩꏤꑭꊂꁧꎁ꒜ꈿꅉꇬꄉꅇꄜꌠ
(2007ꈓ10ꆨ15ꑍ)

ꃛꏢꄧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꏃ、ꐧꋦꉪꏦꁱꀕꀉꒉꃅꀻꎆꀉꒉꃅꌄꆣꌠꄹꆷꁨꆹ

  ꀋꃋꋋꄮꇬ,ꁱꀕꆹꀊꅰꀊꅰꃅꊿꋅꏓꋧꊋꃤꌋꆀꀹꄻꊋꃤꇁꀦꀋꉬꀋꉆꌠꐛꇁ、ꀊꅰꀊꅰꃅꏓꇱꇩꊋꋓꅔꌠꐊꊈꀋꉬꀋꉆꌠꐛꇁꀐ,ꉌꊈꁱꀕꐥꐨꇣꋲꇤꑞꃅꐙꌠꆹꀊꅰꀊꅰꃅꉪꇩꏤꏓꂱꇬꉌꃃꐯꉌꃃꌠꐛꇁꀐ。ꏟꈯꃅꐧꋦꉪꏦꂴꅑꁱꀕꀒꁨꆹꃅꍜꌭꈬ,ꐧꋦꉪꏦꁱꀕꋈꄻꌠꀉꇨꑠ꒞ꈴꄖꄑꌠꃅ,ꊿꋅꈁꐥꌠꃅꁱꀕꀹꄻꍄꑐꊋꃤꄖꄑꎼꇁ,ꇩꏤꁱꀕꆌꈏꊋꐕꀊꂥ,ꏓꂱꁱꀕꌅꈌꈲꁧꀊꅰꃪꃅꏦꀧ,ꐧꋦꁱꀕꐥꐨꀊꅰꃅꇣꋲꇤꑞꃅꐙꇁꎻ,ꏓꂱꎻꄟꈴꄟꀊꅰꃅꊋꑌꇈꄖꃅꐙꇁꎻ。

  (ꋍ)ꐧꋦꉪꏦꈯꄜꁌꐨꉻꑫꋈꄻ,ꐧꋦꉪꏦꉪꉻꐛꄟꁯꈻꊋꃤꌋꆀꏓꋧꊋꃤꀉꇨꇁ。ꐧꋦꉪꏦꈯꄜꁌꐨꉻꑫꆹꐧꋦꉪꏦꉪꉻꐛꄟꊇꅉꇬꄉꄜꋊꅐꇁꌠꉬ。ꂷꇻꌦꉪꏦꄐꇺꉆꈉꈫꈈꃅꄉꌶ,ꀋꄝꀋꏯꃅꂷꇻꌦꉪꏦꌌꍏꇩꃤꐛꌠꊌꐨꀊꏀꌠꌌꄈꑭꊂꉌꂵꇬꊐ、ꏓꂱꏭ꒿ꂘ,ꍏꇩꐛꐨꐧꋦꉪꏦꉪꅉꐮꐊꌠꌌꊋꃤꏓꋧ,ꇩꉂꉪꏦꌌꈯꄜꃅꄉꌠꊿꋅꉌꊈꌋꆀꄺꀱꏀꀺꌌꈯꄜꃅꄉꌠꃅꋊꉌꊈꌌꊋꄖꊋꄓ,ꐧꋦꉪꏦꂄꄸꉜꐨꌌꐥꀹꄐꂘ,ꄈꑭꊂꇩꏤꑭꊂꊿꋅꈁꐥꌠꏓꂱꃅꋯꑌꄉꊋꇤꌠꉪꇐꅉ꒜ꐮꐊꌠꄻꈫꈈ。ꊋꀉꒉꃅꌧꇗꏀꀺꌠꃅꅷꆹ,ꀋꃋꋋꄮꍏꇩꂷꇻꌦꉪꏦꇬꆏꊨꄅꃅꃅꉚꐛꐨ、ꊿꋅꐛꐨ、ꃅꋊꐛꐨꀋꆏꃅꄻꇬꇯ。ꍏꇩꐛꐨꐧꋦꉪꏦꌧꇗꉻꑫꄜꉺ꒞ꈴꌠꃅꈧꄉ,ꀋꃋꋋꄮꍏꇩꂷꇻꌦꉪꏦꉹꁌꈬꇬꌬꈴꌠꄹꇙ。ꂷꇻꌦꉪꏦꌧꇗꎥꃪꌠꌋꆀꋈꄻꌠꋉꃆꄹꅷꁨꆹ,ꃹꅼꃅꌧꇗꀉꒉꀊꂾꌠꌋꆀꃶꐚꃅꇫꐥꌠꌤꃆꉉꀽ,ꂷꇻꌦꉪꏦꌧꇗꌧ꒜ꀊꅰꃅꀊꏀꀈ꓂ꌠꌧꇗꌧ꒜ꁥꉘꉚꂘꄻꎼꇁ。ꃶꐚꃅꐧꋦꉪꏦꈯꄜꁌꐨꉻꑫꌌꇩꏤꑭꊂꏓꂱ꒿ꂘꌠꌋꆀꉌꊈꌧꑳꋈꄻꅉꇬꂴꊁꃅꇱꄉꃅꌐ,ꆹꏮꌊꏓꂱꑴꐚꃅꊂꈹꃅꏾꌠꐛꎻ。ꏣꀋꑌꃅꐧꋦꉪꏦꈯꄜꁌꐨꉻꑫꌌꐧꋦꉪꐪꄐꂘꇬꇿꋌꐥꌠꈭꈜꏢꎹꎥ,ꑴꁨꃅꉪꉻꐛꄟꌤꃅꋒ,ꋍꁁꏯꆏꍣꐨꉜꁨ、ꉌꂵꋲꑞꌠꅓꄎ,ꉈꋍꁁꏯꆏꊋꇨꃅꉪꇐꆹꑽꌠꌋꆀꍹꈔꌠꋍꑞꋍꑵꄘꑣꄎꌶ。ꍔꑪꐧꋦꈆꑪꌄꆣꀻꎆ,ꌷꑫꉻꑫ、ꌷꎥꉪꐨ、ꈆꑪꎥꃪꏡꁈꏀꀺꏀꄻꌠꄹꅷꁨꆹ,ꍔꑪꐧꋦꈆꑪꁁꏯꊋꊡꄉꄈꌋꆀꏓꂱꌤꑘꎁꃅꉪꇐꏓꅉꂿꄐꋊꇤꅐꇁ,ꉪꇩꏤꍔꑪꐧꋦꈆꑪꎥꃪꊌꐨꉾꃪꌠꌋꆀꌧꊿꉾꃪꌠꋧꃅꉜꄉꆹꌠꄹꆷꁨꆹ。

  (ꑍ)ꐮꄮꁱꀕꋈꄻ,ꌧꑳꐥꀹꂘꄻ。ꐮꄮꁱꀕꆹꏓꂱꈁꐥꌠꃅꋯꑌꀻꎆꌠꉌꊈꈯꌬꀋꉬꀋꉆꌠꉬ。ꏣꀋꑌꃅꈨꏀꅏꄻ、ꅇ꒞ꄆꒌꄆꁱ、ꃆ꒜ꁱꇐꋽꇐꌤꑘꀻꎆꌶ,ꏟꈯꃅꎃꊒꌠꃅꍜꄐꇺ,ꐧꋦꐥꀹꎃꊒꌠꍔꆙꄉꃅ。ꇓꈓꇓꉈ、ꃄꁕꁱꀕꋮꄮꃅꀻꎆ,ꊋꇤꄉꂿꑘꁡꇤ、ꃅꋮꆹꏮ、ꇓꈓꇬꇮꃅꇁꊿꉌꊈꁱꀕꐥꐨꄻꇣꋲꇤꑞꃅꐙꇁꎻ。ꊋꀥꇱꄉꈄꏍꁱꀕꋈꄻ、ꏲꂠ,ꈄꏍꋦꁕꉾꃪꌠꄺꂡ。ꊋꀉꒉꃅꇩꉂꉪꏦ、ꋍꉻꉪꏦ、ꐧꋦꉪꏦꉪꇐꍔꆙ,ꅇꏤꁨꉪꇐꀉꇨꃅꑌꇁꌠꌌꀨꇬꄉ,ꊋꀥꇱꄉꐧꋦꋍꏅꑌꇐ、ꃅꑘꑌꇐ、ꑱꈐꂄꃅꑌꇐ、ꂱꑱꑌꇐꑲꇐꋈꄻ,ꑌꇐꌶꀠꂿꄐꎔꃅꋊꇤꅐꇁ,ꃰꊿꄐꂘꌌꑴꐚꃅꏦꃤꏤꄉꌠꃅꎁ、ꐧꋦꃅꎁ、ꑱꈐꃅꎁꃅ。ꉪꇐꍔꍞꌤꃅꌠꊋꀥꇱꌋꆀꄻꃪ,ꃰꊿꐮꉈꇬꌠꌋꆀꉌꂵꉪꇐꇬꄉꂘꑴꌠꉜꁨ,ꃄꄟꎃꊒꌠꈴꄉꊾꐊ。ꐧꋦꋍꑞꋍꁁꏯꌠꃅꄕꊪꌊꐯꇯꄉꀊꉘꌠꏀꉪꇐꑌꇐ꒿ꂘꌤꃅꄉ,ꀊꉘꌠꏀꁣꀋꐥꃅꉀꒆꌠꎁꃅꐧꋦꋦꈭꉾꃪꌠꄺꂡ。ꃹꅼꃅꉹꁌꃤꃅꐙꌠꉌꊈꌧꑳꋈꄻꃅꈧꌠꍔꂵꄉꃅ,ꐧꋦꃅꏾꃅꁧꃤꃅꉻꑫꄻꃪꇈ,ꌺꃰꌋꅪꐤꊰ、ꀎꋏꁌꒉꊂꋊꀨꎹ、ꐮꉂꐮꅉꐮꇇꀨꇇꄻ、ꑗꂿꑗꅔꀬꌠꐧꋦꐥꀹꐛ。ꈆꑪꉌꊈꍔꆙꄉꃅ,ꈆꑪꌧꇐꌌ꒞ꈴꂘꈴ。ꀊꐯꃅꃰꊿꃅꈯꒆꄿꎟꌠꍔꂵ。ꑍꄙꆀꉆꈓꉪꒀ꒜、ꊹꒀ꒜ꌋꆀꑍꄙꆀꊰꈎꋧꃅꄉꀨ꒜ꀞꋒ。

  (ꌕ)ꍏꉸꁱꀕꍔꆙ,ꍏꉸꊿꋅꉌꊈꐥꁍꐯꇯꐥꌠꋈꄻ。ꍏꉸꁱꀕꆹꍏꉸꊿꋅꐤꐥꆏꀋꇁ、ꋯꑌꊋꇤꅷꁨꆹꌠꇘꊋꑍꇁꈤꀋꉆꌠꉬ。ꐊꑷꃅꁍꇩꋊꃅꁱꀕꌧꈴ,ꂄꎔꌠꆏꌷ,ꄷꅠꌠꆏꋊ,ꇬꁳꀋꃋꋋꄮꐧꋦꌋꆀꐮꄉꄐ、ꀋꃋꋋꄮꌧꑳꌠꌋꆀꐮꋮꄮ,ꊿꋅꃆꂮꐊꇬꎷ,ꃅꋊꃆꂮꑌꄜꋊꅐꇁꄎꎻꌶ。ꊋꀥꇱꄉꍏꉸꁱꀕꋊꃅꍸꇈꌠꉾꃪꌠꌌ꒿ꂘ,ꀋꃋꋋꄮꈆꑪꇮꇐꇇꁈꌌꄉꊿꋅꁱꀕꌬꀦꀉꑌꃅꐥꌠꀖꁉꈲꌬ。ꊋꀥꇱꄉꊿꋅꈁꐥꌠꁱꀕꎹꈹꌠꌋꆀꀧꌋꃅꌠꃅ,ꐩꋊꍸꇐꌋꆀꐥꇐꀋꉬꌠꁱꀕꍸꇐꀧꌋꃅꌠꉜꁨ,ꁱꀕꏂꀨꏓꄻꌤꃅꋒ。ꊋꀥꇱꄉꇩꉈꏭꁱꀕꌌꐮꈴ,ꇩꉈꉾꃪꌠꌧꑳꊌꐨꊘꌬ,ꍏꉸꁱꀕꁳꋧꃅꑌꑲꊋꃤꀉꇨꇁꎻ。

  (ꇖ)ꁱꀕꏀꀺꌠꄹꎆ,ꁱꀕꀻꎆꍄꑐꊋꃤꀉꇨꇁ。ꃅꋊꄓꈌꀉꂥꅉꇬꄉꁱꀕꐊꇐꃄꄟ、ꏦꉻꉺꏦ、ꄜ꒞ꇇꁈꏀꀺꌠꄹꇙꅷꆹ,ꁱꀕꒃꅐꊋꃤꁌꄝꌋꆀꀻꎆꌠꆹ,ꁱꀕꌄꆣꇬꈜꀋꍬꀋꉆꏢꉬꌠ。ꏟꈯꃅꏓꂱꎁꃅꃅ、ꐧꋦꉪꏦꎁꃅꃅꌠꃅꍜꌋꆀꉏꃨꋓꃅꃨ、ꉐꁭꋓꃅꀥꌠꌐꏦꌭꈬꌶ,ꐛꐨꇬꊫ、ꐥꐨꇬꊫ、ꉹꁌꇬꊫ,ꈍꄮꑌꐧꋦꈲꁧꌌꀨꇬꄉ,ꎆꏣꈲꁧꌋꆀꐧꋦꈲꁧꐮꐊꐙꌠꃅꇫꑟ。ꏓꂱꉹꁌꌌꀨꄉꌠꌋꆀꀋꃋꐥꐨꉉꁱ、ꉹꁌꇫꉜꏾꅲꏾꌠꉌꊈꁱꀕꅐꇐꉾꃪꌠꀊꅰꀉꑌꃅꁰꄻꅐꇁ。ꃹꅼꃅꁱꀕꏦꉻꄺꀱ,ꉻꈲꐨꐥꌠꁱꀕꌤꑘꄏꐓ、ꁱꀕꅐꑘꀻꎆ、ꁱꀕꏀꀺꌠꊋꊡꌠꏱꁈꄻꐛꒆ,ꁱꀕꅐꇐꉾꃪꌠꅐ、ꌧꊿꅐ、ꈲꁧꅐꌠꇬꈲꐪꐥꌠꋦꀹꄻ。ꏟꈯꃅꉻꈲꐨꐥꌠꁱꀕꌤꑘꀻꎆꌠꌌꏓꂱꅉꀨꁱꀕꌅꈌꈲꁧꏦꀧꌠꈭꈜꀋꉬꀋꉆꌠꃅꄉ,ꎆꊐꊋꃤꌌꁦꎆꇱ,ꊋꀥꇱꄉꋥꁕꌋꆀꑣꋂꁱꀕꌬꇐꋈꄻ。ꊋꀉꒉꃅꁱꀕꅐꑘꀻꎆ,ꁱꀕꅐꑘꐘꃆꀉꒉꀊꂾꌠꌌꈻꏁꌠꄐꇐꏤꁈꌫꄻ,ꇤꐳꃅꁱꀕꅐꑘꅉ꒜ꄺꅉꌋꆀꃄꁕꃅꐙꌠꐋꀋꌡꁱꀕꅐꑘꈨꋈꄻ,ꁱꀕꅐꑘꈯꌬꎆꏂꑘꌋꆀꄐꇐꏤꁈꎆꊐꊿꉗꄻ,ꁱꀕꃷꎏꄻꌄꆣ,ꇩꏹꋓꅔꊋꃤꀉꇨꎻ。ꇮꇐꀊꂥꀊꏀꌠꌌꄉꁱꀕꒃꅐꏀꀺꌠꃄꄟꃅꄉ,ꁱꀕꑘꐛꄟꀊꏀꌠꉗꄻ,ꇤꐳꃅꌞꎭꇬꐳ、ꉱꑷꐨꀊꐯꌠꁱꀕ꒞ꈴꉻꑫꋈꄻ。ꇩꏤꂒꅉꁵꌠꄹꏦꄻꄉ,ꑆꊋꅐꌞꄞꅐꌠꁱꀕꌤꃅꊿꏭꀮꄑ。

  ꍏꉸꊿꋅꇰꀋ꒜ꃅꀱꐞꄿꇁꌠꆹꀋꎪꃅꍏꉸꁱꀕꌄꆣꀉꇨꇁꌠꇫꐊꇁꌠꉬ。ꋒꐯꋒꃅꏓꂱꆏꁱꀕꋈꄻꅉꇬꀨꄜꂿꄐꋊꇤꅐꇁ,ꁱꀕꌤꃅꊿꋍꏅꌠꏣꀋꑌꐨꄖꄑꎼꇁ,ꀊꅰꑴꐚ、ꀊꅰꑴꇙꃅꁱꀕꀉꒉꃅꀻꎆꀉꒉꃅꌄꆣꌠꄹꎆꇈ,ꍏꇩꐛꐨꐧꋦꉪꏦꇰꀋ꒜ꃅꃄꄻꅉꇬꄉꁱꀕꁧꀿ,ꏓꂱꁳꈀꄸꑌꁱꀕꀻꎆꊌꐨꊌꄻꎻ。

  ꉆ、ꇤꐳꃅꏓꂱꐥꐨꄻꃪꌠꌌꀨꄉꌠꐧꋦꋈꄻꌠꄹꎆ

  ꐧꋦꋈꄻꌠꌋꆀꏓꂱꐥꌒꄻꌒꋬꂻꈨꅪꌠꆹꐮꐞꀋꉆꌠ。ꀋꎪꃅꎆꏣꀻꎆꌠꅉ꒜ꇬꄉ,ꀊꅰꃅꐧꋦꋈꄻꌠꉜꁨ,ꊋꇤꄉꏓꂱꐥꐨꏦꀧꌋꆀꄻꃪ,ꐧꋦꏦꉻꄺꀱꌠꄹꎆ,ꋍꉻꁧꃤꃅꌠꍔꐯ,ꐧꋦꏱꄻꌠꄻꐛꒆ,ꐧꋦꐽꊯꑗꐥꌠꊥꎆ,ꊋꇤꄉꏓꂱꈁꐥꌠꁳꌶꆏꂘꌠꐥ、ꃄꆏꊌꅍꐥ、ꆄꆏꉃꅉꐥ、꒜ꆏꉘꌠꐥ、ꀀꆏꑳꇤꐥꎻ,ꐮꄮꐧꋦꋈꄻꌠꄹꇙ。

  (ꋍ)ꂘꑘꌌꂴꄉꀻꎆ,ꊾꊋꅐꀦꀉꇨꌠꇩꏤꋈꄻ。ꂘꑘꆹꊿꋅꄖꄑꌄꆣꇁꌠꅉ꒜ꉬ,꒿ꂘꐽꊯꌠꆹꐧꋦꐽꊯꌠꅉ꒜ꀋꂿꑘꌠꉬ。ꐊꑷꃅꄈꅿꂘꑘꌐꏦꃄꌬ,ꏟꈯꃅꊿ꒿ꂘꌠꌌꁢꊧꃅꄉ、ꑌꇐ꒿ꂘꌠꌌꂴꄉꌠꌭꈬ,ꊇꁧ꒿ꂘꌠꃄꌬ,ꂘꑘꐛꏀꈴꐨꉀꐕ,ꑌꇐꌧꇐꈯꄿꋽꇐꐊꑷꃅꀻꎆꌠꐧꋦꉪꏦꋈꄻꊿꌋꆀꊛꃅꊿꂘꄻ,ꋒꃅꏓꂱꉌꃹꌠꂘꑘꀞꄻꌶ。ꂘꑘꐛꉻꉾꄻꃪꇱ,ꋖꋦꂘꑘꐮꆽꏣꃅꀻꎆꌠꊥꎆ,ꇤꐳꃅꇨꍏꊬꌠ꒿ꂘꌠ꒞ꈴ,ꊋꀉꒉꃅꃅꑘ꒿ꂘꌠꀻꎆ,ꀊꂥꊐꌠ꒿ꂘꌠꊇꁧꐕꀊꂥ。ꌷꂾ꒿ꂘꌠꉜꁨ。ꂘꑘꉪꉻꏀꆦ,ꃹꅼꃅꂘꌷꐊꇐꃄꄟ、ꎖꉚꄉꌶꌺꎹꄹꏦ、ꊇꁧꎖꑞꄹꏦꑠꄺꀱ,ꐧꐭꌶꌺꌶꄻꃅꈩꃣꁧꊨꑾꌙ,ꌶꌺꏓꇱꊇꁧꉀꐕ。ꏟꈯꃅꂘꑘꉻꈲꐛꊈꌭꈬ,ꏱꎆꌌꂘꑘꇬꁦꎆꃅꇱ,ꂘꑘꇬꎆꎴꌠꋊꍬ,ꌢꎭꃅꄷ、ꊿꋅꃅꄷꂘꑘꄏꐓ,ꌶꌺꇇꀨꄹꏦꄻꐛꒆ,ꑱꈐꌢꎭꎆꏣꊋꋠꌠ、ꇓꈓꇬꇮꃅꇁꊿꌳꃈꅮꑠꐥꊯꃅꋖꋦꂘꑘꊌꌠꏦꀧ。ꊋꀥꇱꄉꂘ꒜ꁥꌠꉘꉚ,ꀋꉬꀋꉆꌠꂿꑘꁡꇤꂘ꒜ꊇꁧꐕꀊꂥ。ꐧꋦꊋꃤꂘꑘꀞꄻꌠꇬꈐꊟꊋꊡ。ꎴꇢꂘꑘꌠꌋꆀꐪꊛ꒿ꂘꌠꀻꎆ,ꊿꈁꐥꃅꌶꄻ、ꐥꍂꃅꌶꄻꌠꌶꄻꉹꌠꐧꋦꋈꄻ。

  (ꑍ)ꃅꅍꊌꌠꍔꐯꌠꀻꎆꄐꇐꏤꁈꃄꌬ,ꑘꀺꌠꌌꃅꅍꊌꌠꈺꇙꌠꊥꎆ。ꃅꅍꊌꌠꆹꏓꂱꐥꐨꁢꊧꉬ。ꏟꈯꃅꏣꀋꑌꌠꃅꅍꊌꌠꏱꁈꃄꌬ,ꍔꃚꄐꇺꌠꊋꀥꇱ,ꃷꎏꃅꅍꊌꉺꏦꄻꐛꒆ,ꃅꅍꊌꌠꄉꈁꍔꐯ,ꃅꅍꊌꌠꐛꉻꄻꃪ。ꑴꌅꑘꀺ、ꂱꑱꃅꑘꎹꌠꄏꐓꏱꁈꄻꐛꒆ,ꊋꀥꇱꄉꃅꅍꊌꌠꉪꉻ꒿ꂘꄉ,ꑘꃅꊿꀊꅰꀉꑌꃅꑘꀺꊿꐛ。ꑓꏮꑘꃅꊿꈁꐥꌠꏭꉜꄉꌠꃅꑘ꒿ꂘꁰꍋꄹꏦꄻꐛꒆ,ꊋꀥꇱꄉꂿꑘꁡꇤꑘꁨꊋꃤꁦꎆꌠꆹꏮꌊꃅꅍꊌꇁꌠꁰꍋ。ꋍꃱꃅꋊꍬꄉꌠꊾꊋꅐꀦꃷꎏꋈꄻꄉ,ꇓꈓꇓꉈꑘꃅꊿꐥꊯꃅꃅꅍꊌꌠꄹꏦꐛ。ꑓꏮꌢꎭꉹꁌꈁꐥꌠꏭꉜꄉꌠꃅꅍꊌꇇꀨꄹꏦꄻꐛꒆ,ꐳꃅꃅꅍꊌꌠꋍꂷꑌꀋꐥꌠꑱꈐꇇꀨꄉꃅꅍꊌꊋꌠꂥꀘ。ꏣꀋꑌꃅꋒꃅꌶꅉꀊꂥꊐꌠꌶꅐꌶꌺꃅꅍꊌꌤꃅꌠꃅ。ꑘꃅꐮꃆꂮꋊꍬ、ꋮꄮ,ꇩꏤꂿꑘꊿꇮꃅꌠꏭꏱꁈꄻꐛꒆ、ꃄꌬꇫꑟ,ꏦꃤꇬꈴꄉꑘꃅꊿꌅꈌꈲꁧꀧꌋꃅ。

  (ꌕ)ꃹꅼꃅꊌꐨꁷꄻꄹꏦꄺꀱ,ꇓꈓꇓꉈꀀꊿꊌꐨꁦꎆꇁ。ꋭꋽꌠꊌꐨꁷꄻꄹꏦꆹꐧꋦꐽꊯꌠꄛꑣꐨꀋꂿꑘꌠꉬ。ꏟꈯꃅꃅꐨꈴꄉꁷꄻꌠꌌꀨꄜꃅꄉ、ꁷꄻꃄꄟꀉꑌꑵꃅꐯꇯꐥꌠꁷꄻꄹꏦꌭꈬꌋꆀꄻꐛꒆ,ꑘꃅ、ꎆꀨ、ꇮꇐ、ꏱꄻꋍꑠꒃꅐꐊꊈꆏꑆꊋꅐꌞꅉꈴꄉꁷꄻꈽꌠꄹꏦꄻꐛꒆ,ꇬꂾꃢꌠꁷꄻꌠꌋꆀꉈꑴꁷꄻꀱꌠꐯꇯꊌꐨꈲꁧꌋꆀꐽꊯꌠꐮꃆꂮꀞꄻꋒꃅꄉ,ꉈꑴꁷꄻꀱꇬꀊꅰꃅꐽꊯꌠꉜꁨꌶ。ꋍꁘꋍꁘꃅꀀꊿꊌꐨꇩꂱꊌꐨꁷꄻꅉꇬꍆꐪꉀꐕ,ꑘꃅꃄꎆꇬꂾꃢꌠꁷꄻꅉꇬꍆꐪꉀꐕ。ꊋꇤꄉꊿꊌꐨꀁꂥꌠꊌꐨꉀꐕ,ꋍꁘꋍꁘꃅꌢꎭꄏꐓꎕꏦꌋꆀꃄꎆꀁꂥꇊꀁꂥꌠꎕꏦꉀꐕ,ꎆꏂꑘꌤꃅꇮꃅꊿꃄꎆꎃꐚꃅꉀꎆꌠꉺꏦꌋꆀꃄꎆꁵꏦꀧꉺꏦꄻꄉ。ꇎꏦꀹꄻꄉꉹꁌꀊꅰꃅꀉꑌꌠꁳꁨꇐꃅꐙꌠꊌꐨꊌꎻ。ꏦꊒꊌꐨꀧꌋꃅ,ꊌꐨꀊꂥꇨꌠꋊꐽ,ꏦꀋꊒꌠꊌꐨꎳꏢꇧꎭ。ꆹꏮꁵꄻꌠꍔꐯ,ꀉꇨꃅꇗꏸꎳꄻꋊꐽ,ꀰꏢꇂꇎꌠꅥꁖ,ꊜꋽꄮꐽꊯꌠꀹꄻ,ꁷꄻꐥꀹꋊꐽ,ꋍꁘꋍꁘꃅꊌꐨꁷꄻꇬꐮꍣꐨꍔꒉꆹꌠꈎꍬ。

  (ꇖ)ꇤꐳꃅꇓꈓꇓꉈꀀꊿꃅꇫꐊꌠꐧꋦꏦꀧꉻꑫꋈꄻꄉ,ꏓꂱꅉꀨꐥꐨꏦꀧ。ꐧꋦꏦꀧꌠꆹꐧꋦꑘꒃꌠꄉꀧꅍꀋꂿꑘꌠꉬ。ꐧꋦꄜꏂꀧ、ꐧꋦꈭꋏꇇꀨ、ꐧꋦꈲꁵꌠꌌꅉ꒜ꃅꄉ,ꀑꐱ꒜ꌠꀨꎹ、ꀑꐱꆅꉃ、ꐥꐨꀁꂥꇊꀁꂥꌠꏦꀧꄹꏦꌌꀨꇬꄉ,ꂄꃅꈲꏿꌤꑘ、ꃼꇇꑘꄜꏂꀧꌠꌌꁥꇱꌠꃅꄉ,ꇤꐳꃅꐧꋦꏦꀧꉻꑫꄻꐛꒆ。ꎆꏂꑘ、ꌤꃅꅉ、ꌤꑘꌤꃅꅉꀑꐱ꒜ꌠꀨꎹꄜꏂꀧꄹꏦꄺꀱꌠꊥꎆ,ꂿꑘꁡꇤ꒜ꌠꀨꎹꄜꏂꀧꄹꏦꋈꄻꌠꎹꎥ。ꐊꑷꃅꇓꈓꏦꎫꌤꃅꇮꃅꊿꀑꐱꆅꉃꄜꏂꀧ、ꇓꈓꏦꎫꀀꊿꀑꐱꆅꉃꄜꏂꀧ、ꀊꏀꉹꌠꂿꑘꁡꇤꇷꃅꆅꉃꄹꏦꋈꄻꌠꄹꎆ。ꇓꈓꇓꉈꀀꊿꐥꐨꀁꂥꇊꀁꂥꌠꏦꀧꄹꏦꄻꐛꒆ,ꋍꁘꋍꁘꃅꏦꀧꐨꉀꐕ。ꃅꅍꀋꊌꌠ、ꌤꃅꇮꃅꄉꂷꊂꌸꌠ、ꒆꉘꄜꏂꀧꌠꄹꏦꄻꐛꒆ。ꉜꈴꇲꈴꏠꊐꉀꐕ,ꇩꏤꑭꊂꋍꃱꃅꌠꐧꋦꄜꏂꀧꃆꂮꆹꏮꊛꃅꏡꁈꏤꄻ。ꃄꄟꀉꑌꑵꃅꏂꄉꐧꋦꏦꀧꎆꀨꏓꀉꑌꃅꄉ,ꊋꀥꇱꄉꎆꀨꍞꊟꏱꄻ,ꁌꀧꁌꎆꌠꃅꇫꑟ。ꐧꋦꈭꋏꇇꀨꉻꑫꄻꐛꒆ。ꂴꄉꀨꎹꃅꅍꁵꌠꌤꃅꋒꌶ。ꊿꂂꑌꇐꉪꏦꉌꊈꍔꆙꄉ,ꊾꄣꌤꑘꀻꎆ。ꊋꀥꇱꄉ꒜ꌠꈎꆹꌠꌤꃅ。ꀉꇨꃅꉮꄵꉮꒊꌠꌤꃅ。ꁌꆓꃅꀀꑳꊤꄹꏦꄻꐛꒆ,ꇤꐳꃅꇓꈓꊌꐨꀁꂥꌠꑱꈐꀀꑳꊋꋠꌠꂥꀘ。

  (ꉬ)ꀑꐱꆅꉃꁦꎴꄹꏦꋈꄻꄉ,ꊿꈁꐥꌠꇭꀧꂄꐨꉀꐕ。ꇭꀧꂄꌠꆹꊿꐊꑷꃅꀻꎆꌠꅉ꒜ꉬ,ꄙꇁꃪꁯꃅꐥꌒꄻꌒꌠꌋꆀꐮꃆꂮꐥ。ꏟꈯꃅꄉꉻꆅꉃꁦꎴꌠꉻꈲꊇꅉꌭꈬ,ꏟꈯꃅꄴꏮꌠꌌꀨꇬꄉ、ꂿꑘꁡꇤꌌꀋꂿꑘꃅꄉ、ꍏꇩꇩꉈꆅꉃꄟꐯꇯꌌꀉꇨꃅꄉꌠꌭꈬ,ꏲꑘꌤꑘꁸꄉ、ꏲꌠꀞꌠꁸꄉ、ꆅꉃꌠꁬꋌꃷꌠꁸꄉ、ꎆꍍꃅꐙꌠꌋꆀꎆꀋꍍꃅꐙꌠꁸꄉꌠꃄꌬ,ꍔꃚꃅꎁꌋꆀꎆꇱꐨꄻꀉꇨꃅꄉ,ꇩꂱꇭꀧꂄꌠꏱꁈꄻꐛꒆ,ꐧꋦꇬꃅꈐꊟꊋꊡꌊꇫꐊꃅꈽ,ꇓꈓꇓꉈꀀꊿꃅꇫꐊꌠꄉꉻꁦꎴꁧꃤꃅꉻꑫ、ꆅꉃꁧꃤꃅꉻꑫ、ꆅꉃꏦꀧꉻꑫ、ꁬꋌꇲꁵꏦꀧꉻꑫꋈꄻꄉꇈ,ꉹꁌꎁꃅꋬꂻꌠ、ꇿꋌꐥꌠ、ꃅꈝꐮꌠ、ꁌꆓꌠꆅꉃꁦꎴꁧꃤꃅꌠꇲꁵ。ꆅꃆꆅꂮꀉꒉꀊꂾꌠꄴꏮꋎꍅꌠꌋꆀꄉꉻꁦꎴꆄꄻꌤꉘꀋꇉꃅꅐꇁꌠꏭꊝꀞꄐꐨꉀꐕ。ꊋꀥꇱꄉꂿꑘꁡꇤꌕꊐꌠꁦꎴꆄꄻꁧꃤꃅꈄꏍꌋꆀꇓꈓꋥꁕꁦꎴꆄꄻꁧꃤꃅꉻꑫꋈꄻ,ꃹꅼꃅꉻꀞꆅꉃꅉꄺꀱ。ꇩꏤꅉꀨꁬꋌꆰꋌꄹꏦꋈꄻꄉ,ꉹꁌꀑꐱꃅꌬꌠꁬꋌꄉꀧꄉ。ꊋꀥꇱꄉꆅꉁꆄꄻꑌꇐꃅꇏ꒿ꂘ,ꆅꉃꁧꃤꃅꌠꊇꁧꉀꐕ。ꀋꎪꃅꋠꇐꁬꋌꉮꀋꐥꌠꏦꀧꄉꌶ。ꏟꈯꃅꎖꁨꒆꉘꌠꇩꏤꏱꁈꅉꀨꌭꈬ,ꒆꉘꑟꐨꀁꂥꌠꄝꀋꇙ,ꒆꅐꊻꂷꊇꁧꉀꐕ。ꇩꉂꁦꎴꃅꈧꌠꍔꆙꄉ,꒜ꌺꁦꎴꆄꄻꌤꑘꀻꎆ。

  (ꃘ)ꐧꋦꏲꂠꌠꄻꐛꒆ,ꐧꋦꑘꒃꋯꑌꌠꀧꌋꃅ。ꐧꋦꎍꐽꌠꆹꏓꂱꉹꁌꉪꐨꐮꐊꌠꉬ,ꄺꀱꀻꎆꌠꇎꏦꀋꂿꑘꌠꉬ。ꄈꊈꏲꂠ、ꍔꃚꆼꎍ、ꐧꋦꇫꐊ、ꋍꏅꇫꃅꈽꌠꐧꋦꏱꄻꐛꉻꋈꄻꐛꒆ,ꅉꂫꊐꌠꐧꋦꏱꄻꏦꉻꋈꄻꐛꒆ。ꄾꌦꋩꐧꋦꁧꀿꊋꃤꄕꊪ,ꄾꌦꋩꐮꄮꌠꐊꊈꁦꎆꇱ,ꄾꌦꋩꐯꀋꄮꌠꐊꊈꊨꀁꑌ。ꋭꋽꃅꏓꂱꈒꇓꐮꄙꐨꀞꄻ,ꄯꒉꁱꌊꇁꌠꅲꇫꇁꌠꄹꏦꄻꐛꒆ,ꄈꌋꆀꍔꃚꏱꇺꌠꉹꁌꌅꈌꈲꁧꀧꌋꃅꉺꏦꄻꐛꒆ。ꐧꋦꎀꍹꋈꄻꌠꌋꆀꏱꄻꌠꉜꁨ。ꊋꀥꇱꄉꊿꏮꐺꈧꌠꏭꁧꃤꃅꌋꆀꏲꂠ。ꏟꈯꃅꋬꂻꃅꀻꎆꌠꌭꈬ,ꀉꇨꃅꋬꂻꃅꒃꅐꌠꏲꂠꌋꆀꍞꊟ,ꇿꋌꐥꃅꋬꀋꂻꌤꆿꃣꈌꀉꒉꀊꂾꃅꅐꌠꋎꍅ。ꌤꉘꀋꇉꃅꇫꅐꇁꌠꇬꊝꌠꏲꂠꉺꏦꄻꐛꒆ。ꐧꋦꋬꂻꏱꄻꌠꇬꄴꏮꉻꑫꋈꄻꐛꒆ,ꊋꀥꇱꄉꐧꋦꋬꂻꏓꇱꏱꄻꌠꃅ,ꃹꅼꃅꑘꒃꌠꀹꄻꌠꃅꈧ,ꇓꈓꇓꉈꋥꁕꏢꍤꌤꃅꐨꄺꀱꌋꆀꊋꀥꇱ,ꏦꃤꇬꈴꄉꏦꐆꑽꃤꃅꌠꏭꄴꏮꌋꆀꇇꇩꍈꄉ,ꏓꂱꀑꇬꁨꇐꋬꂻꌠꏦꀧ。ꇩꏤꋬꂻꄐꇐꏤꁈꄻꃪ,ꇩꏤꋬꂻꏦꉻꋈꄻꐛꒆ,ꋍꑞꋍꑵꁷꐞꇁꌠ、ꈒꃹꇁꌠ、ꁎꆽꇁꌠꏭꀉꇨꃅꋓꉪꁨꌋꆀꏟꈯꃅꄴꏮ,ꀋꎪꃅꇩꏤꋬꂻꌠꀧꌋꃅꄉꌶ。

  ꐮꄮꌠꐧꋦꆹꐧꋦꑭꊂꃅꐯꇯꋈꄻꌠꉘꇉ。ꉪꊇꆏꅱꈯꃅꏓꂱꉘꇉꄉ,ꏣꀋꑌꐨꃆꂮꈁꐥꌠꃅꄕꊪꄉ,ꊋꇤꄉꐧꋦꐮꄮꌠꈀꄸꑌꆼꎍ、ꐮꄮꌠꐧꋦꈀꄸꑌꐯꇯꈲꌠꊽꉌꐡꌠꐛꐨꐥꇁꎻ。
ꁰꒌ




  • 特别鸣谢
    中国民族语文翻译局彝文翻译室