ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(3)

——ꍏꇩꇭꍣꄈ꒜ꀉꒉꊰꏁꃢꌠꇩꏤꑭꊂꁧꎁ꒜ꈿꅉꇬꄉꅇꄜꌠ
(2007ꈓ10ꆨ15ꑍ)

ꃛꏢꄧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꉬ、ꇩꂱꎆꏣꉽꑌꉾꐲꑌꐳꃅꀻꎆꌠꊥꎆ

  ꋌꊂꎆꏣꀻꎆꌠꑞꅉꁻꌐꃅꇫꑟꇬ,ꀋꉬꀋꉆꌠꆏꐳꃅꎆꏣꀻꎆꄟꆹꏮ、ꐧꋦꉪꏦꃷꎏꎆꏣꏦꉻꄻꐛꒆꁁꏯꊌꐨꀉꒉꃅꁨꎆꌶꌠꉬ。ꊋꀉꒉꃅꇤꄉꎆꏣꐛꉻꄐꇐꏤꁈꐨꃅꋊꄻꌠꄹꎆ,ꀊꅰꃅꋓꉪꁨꄉꑴꌅꏀꀺꊋꃤꐕꀊꂥ、ꊋꀦꏏꋦꈭꀧꐨꉀꐕ、ꎆꏣꉻꄜꊇꁧꌋꆀꇩꏹꋓꅔꊋꃤꐕꀊꂥꌶ。ꃹꅼꃅꐧꋦꉪꏦꃷꎏꎆꏣꈳꏦꌧꐚ,ꄹꏦꀂꏽꈴꄉꀊꅰꉾꃪꃅꃷꎏꆏꌬꇐꁆꄻꅉꇬꅉ꒜ꃅꐙꂿꄐꇤꅐꇁꄉ,ꈆꑪꃅꀻꎆꇬꈲꁧꐥꌠꉻꒉꋊꐽꉻꑫꐛꇁꎻ。

  (ꋍ)ꑴꌅꏀꀺꊋꃤꐕꀊꂥ,ꏀꀺꉹꌠꇩꏤꋈꄻ。ꋋꆹꇩꏤꀻꎆꌠꄐꇐꏤꁈꈯꄜꉬ,ꏓꇱꇩꊋꐕꀊꂥꌠꇬꀋꉬꀋꉆꌠꉬ。ꏟꈯꃅꍏꇩꐛꐨꑴꌅꏀꀺꈜꇭꍬꄉ,ꑴꌅꏀꀺꊋꃤꀉꇨꌠꌫꅷꐛꏀꈴꋈꄻꌠꋍꑞꋍꁁꏯꇬꃅꑟꌶ。ꎔꎗꃅꇩꏤꀊꉗꀊꎴꌠꈆꑪꌋꆀꇮꇐꀻꎆꄐꎖꐱꀨꃄꄻ,ꑴꌅꏀꀺꌠꇬꎆꀉꒉꃅꇱ,ꊋꇤꄉꎆꏣꐧꋦꀻꎆꅉꇬꏢꑳꎍꌠꇮꇐꀋꉬꀋꉆꈧꌠꀺꂵꅐꇁ。ꇤꐳꃅꇩꏤꏀꀺꉻꑫꋈꄻ,ꅉ꒜ꎥꃪ、ꂴꅑꇮꇐꎥꃪ、ꐧꋦꉻꈲꐨꇮꇐꎥꃪꌠꇬꊋꁈꄏ。ꇤꐳꃅꎆꏂꑘꌌꀨꄜꃅꄉ、ꃷꎏꌌꄐꌐꌠꃅꄉ、ꅐꌷꎥꃪꐮꐊꐙꌠꇮꇐꏀꀺꌠꉻꑫꄻꄉ,ꏀꀺꐊꊈꌌꎆꏂꑘꇬꉜꄉꏓꋧꌠꄐꌐꌋꆀꊋꁈꄏ,ꈆꑪꇮꇐꊌꐨꌌꃶꐚꐛꐨꒃꅐꊋꃤꐛꇁꌠꊥꎆ。ꃹꅼꃅꈆꑪꇮꇐꏱꄻꏦꉻꄺꀱ,ꈆꑪꇮꇐꌬꇐꁆꁵꌠꉾꄻꃪꇱ,ꇮꇐꏀꀺꌠꊋꊡꌠꌋꆀꈆꑪꇮꇐꊌꐨꅐꑘꐛꈴꌠꇬꏦꄹꏦꀧ、ꏱꁈꉻꑫ、ꊋꊐꌗꊐꉺꏦ、ꃷꎏꋦꈭꄻꐛꒆ。ꌧꇐꅐꇐꌅꈌꄐꇐꏤꁈꃄꌬ。ꋒꐯꋒꃅꇩꏹꈆꑪꇮꇐꅐꀦꌫꄻ。ꀒꁨꋍꁘꃅꏀꀺꊋꊡꌠꋦꈭꄺꑣꄉ,ꋧꃅꀨꏠꌠꈆꑪꌧ꒜ꌋꆀꈆꑪꇮꇐꂴꅑꌧꊿꂘꄻꎻꇁꇈ,ꀑꁮꏀꀺꌠꋓꅔꏿ、ꌧꊿꏀꀺꌠꀉꑌꃅꅐꇁꎻ。

  (ꑍ)ꇤꐳꃅꎆꏣꀻꎆꄟꆹꏮ,ꅐꑘꐛꉻꉾꄻꃪꇱꊐꐕꌠꄹꇙ。ꋋꆹꇩꂱꎆꏣꃅꇴꄉꉻꃛꊸꇈꀉꒉꀊꂾꌠꄐꇐꏤꁈꃆꂮꐥꌠꂿꃆꐘꉬ。ꏟꈯꃅꍏꇩꐛꐨꀊꏀꉹꌠꇮꑘꈴꈭꈜꇬꍬ,ꏟꈯꃅꇩꈐꈉꄻꈜꀕꇈꌬꈧꌠꇬꈉꄻꌠꍔꐯꌠꌐꏦꌭꈬ,ꎆꏣꉀꎆꌠꆏꀋꉬꀋꉆꌠꎆꇱ、ꉇꅐꈺꇙꉘꇉꌠꇬꄉꌬꈧ、ꎆꇱ、ꉇꅐꋮꄮꃅꈺꇙꌠꉘꇉꌠꇬꉜꄉꆹꏮꌠꊥꎆ,ꀋꉬꀋꉆꃅꅐꑘꑍꉹꌠꁳꈺꇙꌠꉘꇉꌠꇬꄉꅐꑘꋍꉹ、ꑍꉹ、ꌕꉹꌠꃅꋮꄮꃅꐯꇯꈺꇙꌠꉘꇉꌠꇬꉜꄉꆹꏮ,ꀋꉬꀋꉆꃅꐥꇐꇁꀦꁦꎆꃅꃸꄻꌠꉘꇉꌠꇬꄉꀋꉬꀋꉆꃅꈆꑪꇮꇐꀻꎆ、ꑘꃅꊿꊇꁧꉀꐕ、ꏲꂠꏀꀺꌠꉘꇉꌠꇬꉜꄉꆹꏮ。ꀋꃋꋋꄮꅐꑘꉻꑫꀻꎆꇬ,ꊋꀉꒉꃅꇤꄉꈴꌗꐛꈴꌠꌋꆀꇮꑘꐛꈴꌠꄻꐯꇯꌠꄹꎆ,ꇮꑘꁳꀉꒉꌠꇬꄉꀱꀉꇨꌠꐛꇁꌠꊥꎆ,ꌫꉂꌫꈾꄺꑣꑘꍄꑐ,ꊁꊰꌠꒃꅐꊋꃤꇤꇧꎭ;ꇮꇐꅐꑘꀉꇨꀊꏀꌠꉀꐕ,ꈴꌗ、ꒆꇐ、ꌬꇐꀊꏀ、ꃅꈬꐚꃅꃴꐚ、꒺ꇬꑠꅐꑘꀻꎆ;ꀋꃋꋋꄮꁧꃤꃅꑘꀻꎆꇬ,ꁧꃤꃅꑘꍆꁧꌋꆀꉾꐨꐕꀊꂥ;ꊋꀥꇱꄉꅉ꒜ꅐꑘꅉ꒜ꉁꈾꋈꄻ,ꇤꐳꃅꀋꃋꋋꄮꊋꀦꅐꑘꌋꆀꏓꇱꎞꎭꉻꑫꀻꎆ。ꅐꇐꊇꁧꌋꆀꋬꂻꐨꄉꀧ。ꊋꊡꄉꇩꏹꇬꋓꅔꊋꃤꐥꌠꎆꏂꑘꏓꉻꀉꒉꌠꀻꎆ。

  (ꌕ)ꇓꈓꇓꉈꉜꈴꇲꈴꃅꀻꎆ,ꐧꋦꉪꏦꂿꑘꁡꇤꀊꏀꌠꋈꄻꌠꄹꎆ。ꂿꑘ、ꂿꑘꁡꇤ、ꂿꑘꊿꌤꃆꀞꄻꋒꌠꆹ,ꐊꑷꃅꊼꇅꌣꈚꐧꋦꋈꄻꌠꃅꇴꄉꉻꀉꒉꌠꃆꂮꐥꌠꉬ,ꀋꎪꃅꈍꄮꇬꑌꌌꄈꑭꊂꌤꃅꌠꇬꀋꉬꀋꉆꅉꇬꀋꉬꀋꉆꌠꃅꄉꌶ。ꊋꀥꇱꄉꂿꑘꅉ꒜ꉆꈉꄻ,ꍏꇩꐛꐨꂿꑘꐛꏀꈴꌠꈝ꒜ꍬ,ꇮꑘꌌꂿꑘꇬꊥꎆ、ꇓꈓꌌꇓꉈꈻꏁꌠꇿꋌꀊꉗꃅꐥꌠꉺꏦꄻꄉ,ꇓꈓꇓꉈꎆꏣꐧꋦꀻꎆꐨꋍꏢꃅꐙꌠꐛꉻꀊꏀꌠꐛꇁꎻ。ꏟꈯꃅꐛꏀꂿꑘꀻꎆ、ꂿꑘꁡꇤꎆꏣꌄꆣꌠꌌꂿꃆꀨꇬꄉ,ꊋꀥꇱꄉꂿꑘꁡꇤꅉ꒜ꉁꈾꋈꄻ,ꂿꑘꁡꇤꃷꎏꌋꆀꂿꑘꁧꃤꃅꉻꑫꄻꐛꒆ。ꂿꑘꊋꁈꄏꂿꑘꈲꏣꁵꌠꏱꁈꊋꃤꁦꎆꇱ,ꏦꇨꃅꋠꃅꀧꌋꃅ,ꂿꑘꇬꎆꁦꎆꃅꇱ,ꂿꑘꈆꑪꇮꇐꀻꎆꌠꊥꎆ,ꂿꑘꏓꇱꒃꅐꊋꃤꀉꇨꃅꁦꎆꄉ,ꇩꏤꋚꂷꑘꀋꐥꎻꌠꄉꀧ。ꊋꀥꇱꄉꇙꀕꋦꁧꆄꄵꆄꏮ,ꂿꑘꅐꇐꊇꁧꉮꀋꐥꐨꑞꅉꉀꐕ。ꂿꑘꊿꁦꎆꃅꊌꌠꇬꊥꎆꌠꌌꈯꄜꃅꄉ,ꑣꍔꎆꏂꑘꀻꎆ,ꑤꁕꎆꏣꄻꀉꇨ,ꈭꈜꀉꑌꏢꃅꈴꄉꂿꑘꊿꆹꏮꌊꃅꅍꁵ。ꎭꄏꀖꁉꑞꅉꉀꐕ。ꃹꅼꃅꂿꑘꁡꇤꏓꇱꄺꀱ,ꂿꑘꁡꇤꎆꒉꎆꇁꏦꉻꄺꀱꌠꌋꆀꏀꀺꌠꄹꎆ,ꋍꉻꌩꏪꌅꈌꄹꏦꄺꀱ。ꏟꈯꃅꂿꑘꁡꇤꅉꀨꀰꏢꄹꏦꌭꈬ,ꃄꅉꀧꃅꐮꃆꂮꎍꐽꌋꆀꄻꐛꒆ,ꏦꃤꈴꊨꏦꉌꃹꁌꁵꌠꏥꏦꇬꈴꄉ,ꃄꅉꀧꃅꀰꏢꌅꈌꏮꈴꃷꎏꄻꐛꒆ,ꇎꏦꐥꀐꌠꃅꄷꆏꇶꏦꀉꑌꑵꃅꐙꌠꄉꈁꄉꄐꃅꀰꏢꌠꀻꎆꉆ。ꋍꉻꎆꏣꇿꋌꐥꃅꃅꇫꑟꌠꇶꏦꎹꈹ,ꂿꑘꊿꌐꑘꇷꃅꎀꍹꀻꎆ,ꂿꑘꅐꑘꈴꀰꏢꌠꌋꆀꀨꇬꄉꌠꎆꏂꑘꀻꎆꌠꇬꊋꁈꄏ。ꌧꇐꐥ、ꇮꇐꌧ、ꀰꏢꇮꌠꂿꑘꊿꀊꏀꉹꌠꂘꄻꄉ,ꂡꃪꌠꂿꑘꊿꂿꑘꁡꇤꀊꏀꋈꄻꌠꀨꄜꂿꄐꇤꅐꇁ。

  (ꇖ)ꊋꀥꇱꄉꊋꀦꅐꀦꏎꏸꌠꌋꆀꒆꉻꋦꈭꀧꌋꃅ,ꐪꊛꄉꀻꎆꉆꌠꊋꃤꀉꇨꃅꁦꎆ。ꏟꈯꃅꅐꀦꏎꏸꌠꌋꆀꋦꈭꀧꌋꃅꌠꅉꀨꇩꁈꌭꈬꌠꆹ,ꏓꂱꉹꁌꊇꅉꈲꁧꌋꆀꍏꉸꊿꋅꇫꐥꀻꎆꌠꇬꃆꂮꐥ。ꀋꎪꃅꅐꀦꏎꏸꃅꐙ、ꋦꈭꐮꄮꃅꐙꌠꐧꋦꋈꄻꌠꌌꄉꇮꑘꈴ、ꐛꏀꈴꀻꎆꌠꄐꇐꏤꁈꑓꅐꎑꌠꑋꅉꉆꈉꇬꐕꄉ,ꃅꌊꌤꃅꅉꋍꂷꋑꀋꋒ、ꑱꈐꋍꁯꋑꀋꋒꌠꇬꑟꌶ。ꊋꀦꅐꀦꏎꏸꌠꌋꆀꒆꉻꋦꈭꀧꌋꃅꌠꇬꈲꐪꐥꌠꏦꃤꌋꆀꏱꁈꄻꐛꒆ,ꇤꐳꃅꐪꊛꄉꀻꎆꉆꌠꏦꉻꉺꏦꄻꐛꌶ。ꊋꀦꏎꏸꍍꆀꊨꒊꌠꌤꃅꃅꎁꄹꏦꌬꇫꑟ。ꏎꏸ、ꎃꊐ、ꀰꄉꌬꌠꂴꅑꌬꌒꌠꇮꇐꌌꀖꁉꌋꆀꆷꌬ,ꁦꎴꌠꊋꀦꌋꆀꀱꉈꑴꐥꉆꌠꊋꀦꀻꎆ,ꃄꅉꌋꆀꒉꅐꀦꀧꌋꃅ,ꈆꑪꋭꋽꌠꊋꀦꅐꀦꌬꉻꑫꋈꄻꄉ,ꊋꀦꅐꀦꌬꌠꅐꐨꉀꐕ。ꋦꈭꀧꌋꃅꌠꅐꑘꀻꎆ。ꊋꀦꏎꏸꋦꈭꀧꌋꃅꌠꇬꎆꁦꎆꃅꇱ,ꀋꂿꑘꃅꀆꐒ、ꃅꌗ、ꃄꅉꃅꆊꋍꑠꇬꍍꆀꐨꄴꏮꌠꊋꀥꇱ,ꇓꈓꇓꉈꊿꀀꅉꋦꈭꄻꃪ。ꊋꀥꇱꄉꈲꒉ、ꌩꑘ、ꅔꏂꋈꄻ,ꒆꉻꄻꌊꀱꉈꑴꐛꅉꐛꇁꌠꇬꊥꎆ。ꊋꀥꇱꄉꂿꃋꐛꁏꐛꐈꇁꌠꇬꊝꌠꊋꃤꋈꄻꄉ,ꅉꆺꇬꂿꃋꀧꌋꃅꌠꎁꃅꑆꊋꀊꏀꌠꅐꌞ。

  (ꉬ)ꃄꁕꋮꄮꃅꀻꎆꌠꇬꄹꇙ,ꇩꏤꃄꅉꀖꁉꐛꉻꉾꄻꃪꇱ。ꃄꁕꀻꎆꐮꍣꐨꊨꒊꇬ,ꀋꎪꃅꅉꀨꄉꉻꁧꃤꃅꌠꐽꏡꈴꃅꇫꑟꌠꉜꁨ,ꒃꅐꐊꊈꃄꁕꐂꄉꋭꋽꃅꈳꇙꌠꄐꏁ。ꐪꊛꄉꃄꁕꀻꎆꇬꀑꐱꄐꇐꏤꁈꃄꌬ,ꃹꅼꃅꁮꐚꁁꏯꃅꄷꀉꇨꃅꀖꁉꌠꄹꎆ,ꐊꑷꃅꑛꌋꈤꃅꄷꋍꑠꇬꇮꑘꀉꆹꌠꐛꅉꄖꄑꌄꆣꇁ,ꊋꀉꒉꃅꇤꄉꈯꄔꃅꄷꆽꄓꇁꌠꊥꎆ,ꏣꀋꑌꃅꁭꅐꏭꃅꄷꂴꅑꄉꀻꎆꌠꇬꊋꁈꄏ。ꊋꀥꇱꄉꇩꏤꃄꅉꄐꎖ,ꀨꄜꄐꊋꁕꐛꇁꎻꌠꈉꐨꇬꈴꄉ,ꃄꁕꏱꁈꄻꐛꒆ,ꎆꏣꐛꃆꄐꉻꋊꄻ。ꃷꎏꎆꏣꈳꏦꇬꍬꄉ,ꏲꑘꃄꁕꄹꊨꇬꐂꄉ,ꈺꇙꊋꃤꀉꇨ、ꑌꋒꑲꋒꌠꎆꏣꏮꈭꌋꆀꎆꏣꃄꁕꀉꑌꃅꐛꇁ。ꐘꃆꀉꒉꀊꂾꌠꄐꄻꇬꆏꋒꐯꋒꃅꈯꄔꁮꐚꃅꄷꀻꎆꇬꊋꁈꄏꌠꎔꃅꉪꇫꑟꌶ,ꊋꊡꄉꁭꅐꃅꄷꁳꈯꄔꁮꐚꃅꄷꈺꇙ、ꇇꀨꄉꀻꎆꎻ。ꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷ、ꌢꎭꌢꁧꃅꄷꏭꀻꎆꊋꁈꄏꌠꊋꀉꒉꃅꇱ。ꅐꀦꈤꌐꀐꌠꃅꄷꇇꀨꄉꎆꏣꉹꏮꌠꃅꇫꑟ。ꀊꅰꃅꉾꃪꃅꎆꏣꇣꋲꐎ、ꎮꉰꁌꄏꑟꐎ、ꄟꏢꀘꉰꑟꐎꆏꄺꀱꁉꃑꌠꌋꆀꑴꌅꏀꀺꌠꇬꂿꄐꀋꂿꑘꌠꇤꅐꇁ。ꍏꇩꐛꐨꇓꈓꏦꎫꐛꈴꌠꈭꈜꇬꍬ,ꇓꈓꇓꉈꉜꈴꇲꈴ、ꄐꉻꋭꋽ、ꃄꅉꏎꏸ、ꄐꊋꐛꒆ、ꒉꌠꐭꈻꏃꌠꏥꏦꇬꈴꄉ,ꇓꈓꀉꒉꐧꀠꀄꊭꌠꌋꆀꏦꎫꁡꇤꀄꊭꌠꋮꄮꃅꀻꎆꌠꊥꎆ。ꏓꇱꐕꄎꊋꃤꄻꀉꇨꇁꌠꌌꀨꇬꄉ,ꇓꈓꀉꒉꐯꀉꒉꌠꌌꎑꁠꅉꃅꄉ,ꁻ꒞ꂿꄐꀉꒉꌠꇓꈓꁥꐛꄉ,ꎆꏣꉀꎆꊧꀊꏀꌠꉗꄻ。

  (ꃘ)ꅉꀨꎆꏣꄹꏦꄻꃪ,ꀋꃋꋋꄮꃷꎏꉻꑫꄻꐛꒆ。ꋍꏅꁨꏦꌌꀨꄜꃅꄉ、ꁨꏦꀉꑌꑵꃅꐙꌠꎆꏣꐯꇯꀻꎆꌠꅉꀨꎆꏣꄹꏦꌭꈬꌋꆀꄻꐛꒆ,ꋍꍈꑋꀋꎞꀋꇙꃅꋍꏅꁨꏦꎆꏣꄻꈫꈈꌋꆀꀻꎆ,ꋍꍈꑋꀋꎞꀋꇙꃅꋍꏅꁨꏦꀋꉬꌠꎆꏣꊋꊡ、ꊋꁈꄏ、ꈜꏁꄉꀻꎆ,ꏟꈯꃅꐥꊯꃅꁨꇐꌅꈌꀧꌋꃅꄉ,ꋍꑞꋍꑵꁨꏦꎆꏣꐽꊯꃅꋓꅔ、ꐮꇬꊥꎆꌠꐛꄟꀊꏀꌠꐛꇁ。ꃹꅼꃅꇩꁨꎆꏂꑘꇬꌦꄹꏦꇴꍆꄹꏦꄺꀱ,ꀋꃋꋋꄮꎆꏂꑘꄹꏦꄻꐛꒆ,ꇩꁨꎆꏣꄐꉻꌋꆀꐛꉻꄻꃪ,ꇩꁨꎆꏣꍄꑐꊋꃤ、ꋏꆸꊋꃤ、ꑌꑲꊋꃤꀉꇨꃅꁦꎆꇁ。ꃹꅼꃅꇂꇎꉹꑘꄺꀱ,ꋓꅔꉺꏦꈺꌬ,ꍔꃚꇫꍞꏲꌠꌋꆀꐧꋦꍞꊟꌠꊋꀥꇱ。ꇤꐳꃅꇩꁨꎆꀨꀰꏢꄐꌗꄹꏦꋈꄻ。ꋍꑞꋍꑵꇩꁨꁨꇐꏱꄻꏦꉻꌋꆀꄹꏦꄻꐛꒆ。ꋍꉻꎆꏂꑘꄺꀱꌠꄹꎆ,ꇶꏦꀉꑌꑵꃅꐙꌠꋍꉻꎆꏣ、ꇷꃅꎆꏣꀻꎆ。ꀋꈐꀋꉈꃅꈏꃹꎻꌠꄹꎆ,ꎆꀨꏓꌬꇎꏦꄻꃪ,ꏦꉻꇊꑴꅍꋊꑣꇧꎭ,ꑱꄂ、ꑴꃅꎆꏣꌋꆀꐧꐭꎆꏂꑘꀻꎆꌠꊥꎆ。ꀋꃋꋋꄮꁨꇐꌅꈌꄹꏦꌌꅉ꒜ꃅꄉ,ꌼꉔꁨꏦꎆꏣꀻꎆ。ꇤꐳꃅꏓꋍꃱꃅꁉꃑ꒾ꁨꃅꋓꅔꌠꀋꃋꋋꄮꃷꎏꉻꑫꄻꐛꎻ,ꋍꑞꋍꑵꒃꅐꐊꊈꃷꎏꀻꎆ,ꃷꎏꇲꈉꐮꃆꂮ、ꅐꀦꇮꃪꐨ、ꋦꈭꉮꀨꊰꉜꅐꇁꉆꌠꒃꅐꐊꊈꌋꆀꅐꀦꁌꏤꏓꐛꉺꏦꄻꐛꒆ,ꉹꑘꑠꉼꌋꆀꃷꎏꇢꈴꎀꍹꋊꍬꀻꎆ,ꐧꋦꉌꒊꉻꑫꄻꐛꒆ。

  (ꏃ)ꃹꅼꃅꏱꎆꇗꏸ、ꎆꒉꎆꇁꋍꑠꏦꉻꄺꀱ,ꉻꒉꋊꐽꉻꑫꄻꐛꒆ。ꅉꀨꄉꉻꁧꃤꃅꌠꐽꏡꈴꌠꌋꆀꀨꄜꄐꊋꁕꋈꄻꌠꄹꎆꌠꇬꆼꒆꄉ,ꄉꉻꏱꎆꉻꑫꄻꐛꒆ。ꃹꅼꃅꄐꌗꄹꏦꄺꀱ,ꄐꌗꏱꄻꌠꄻꀉꇨꃅꄉ,ꍏꑷꌋꆀꃅꄷꎆꊋꌋꆀꌤꃆꌅꈌꐮꄉꄐꌠꏦꉻꄻꐛꒆ,ꇤꐳꃅꋍꃱꃅꋊꍬꂿꈴꃅꐙꌠꏱꎆꆹꏮꁵꄻꄹꏦꄻꐛꄉ,ꎃꐚꃅꐙꌠꆹꏮꁵꄻꄉꈁꌋꆀꍆꁧꐕꀊꂥ,ꄉꉻꁧꃤꃅꁁꏯꇬꎆꁦꎆꃅꇱ。ꌜꈍꐮꏱꎆꏦꉻꄻꐛꒆ,ꅉꂫꊐꌠꍔꃚꄉꉻꁧꃤꃅꇲꁵꊋꃤꀉꇨꃅꁦꎆꇁ。ꈆꑪꃅꀻꎆꌠꇬꈲꁧꐥꌠꏱꎆꇗꏸꄹꏦꌬ,ꅐꀦꁌꁵꄉꌬꌠꄹꏦꌋꆀꒆꉻꋦꈭꎆꁵꉺꏦꄻꐛꒆ。ꎆꒉꎆꇁꏦꉻꄺꀱꌠꄹꎆ,ꋍꑞꋍꑵꎆꒉꎆꇁꃷꎏꀻꎆꄉ,ꁨꏦꀉꑌꑵꃅꐙꌠꌋꆀꀰꏢꇶꏦꀉꑌꑵꃅꐙ、ꐛꉻꋭꋽ、ꄐꊋꐛꒆ、ꑘꅐꋬꂻꌠꀋꃋꋋꄮꎆꒉꎆꇁꉻꑫꐛ。ꑴꉴꑘ、ꁌꁦꑘ、ꄜꏂꀧꑘꋓꅔꊋꃤꐕꀊꂥ。ꎆꀨꃷꎏꐛꉻꄻꃪ,ꈭꈜꀉꑌꏢꃅꈴꄉꈛꎂꃅꎆꀨꏓꌬꌠꍆꁧꉀꐕ。ꎆꒉꎆꇁꍞꏲꌠꊋꀥꇱꌋꆀꄺꀱ,ꎆꒉꎆꇁꃨꆰꐨꐥꌠꄴꏮꌋꆀꋊꑣ。ꏓꂱꀙꎆ꒜ꉇꎆꀟꁌꐛꐨꉺꏦꄻꐛꒆ,ꋍꁘꋍꁘꃅꎆꀨꐘꃆꌌꐮꀠꉆꌠꃅꇫꑟ。ꃹꅼꃅꎆꇱꏦꉻꄺꀱ,ꃷꎏꃹꉆꄹꏦꄻꐛꒆꌋꆀꄻꏦꇨꃅꄉ。ꇩꏤꄐꎖꉻꑫꄻꐛꒆ。ꇩꏤꀻꎆꄐꎖ、ꎖꄎ、ꅐꑘꏱꁈꆏꉻꒉꋊꐽꌠꇬꄉꄐꌐꂿꄐꇤꅐꇁ,ꏓꇱꃅꏱꎆ、ꎆ꒜ꏱꁈꌫꄻꄉ,ꉻꒉꋊꐽꑞꅉꐕꀊꂥ。

  (ꉆ)ꉇꉻꏭꁉꃑꌠꀊꐯꐨꌋꆀꀊꅼꐨꀹꄻ,ꁉꃑꉹꌠꎆꏣꑞꅉꐕꀊꂥ。ꏟꈯꃅꉇꉻꏭꁉꃑꌠꅉꀨꇩꁈꌭꈬ,“ꊙꈏꃹꇁ”ꌠꌋꆀ“ꉇꅐꁧ”ꌠꀊꅰꉾꃪꃅꄻꐯꇯꎼꇁ,ꁉꃑꁁꏯꍔꐯ,ꁉꃑꐛꉻꉾꄻꃪꇱ,ꁉꃑꊇꁧꐕꀊꂥ,ꈏꉈꐯꇯꇙ、ꐯꈲꋓꊋ、ꋬꂻꇿꋌꇨꌠꁉꃑꉹꌠꎆꏣꉻꑫꄻꐛꒆꄉ,ꎆꏣꋧꃅꈴꌠꇎꏦꇂꃴꄉꇩꏹꎆꏣꇷꃅꌠꌋꆀꋓꅔꂱꎆꅑꐨꀊꏀꌠꐛꎻ。ꃹꅼꃅ꒺ꋮꁉꃑ,ꇤꐳꃅꅔ꒜ꁉꃑ,ꃅꋮꁉꃑꌠꊐꐕ,ꉇꉻꏭꁉꃑꌠꌋꆀꈏꇓꇬꁉꃑꌠꐮꇬꊥꎆꌠꃅꇫꑟ。ꇤꐳꃅꉇꉻꃼꇇꉀꎆꇶꏦꆹꏮ,ꊇꁧꌌꊋꌠꇬꄉ,ꈏꃹꉇꅐꐛꉻꋊꄻ,ꄺꑣꃼꇇꃄꄟꆹꏮꊐꐕꌠꊥꎆ,ꊋꀉꒉꃅꅐꄉꁧꃤꃅꌠꃼꇇꀻꎆ。ꉇꎆꌫꄻꇶꏦꏀꀺ,ꉇꎆꌫꄻꐛꉻꄻꃪ,ꉇꎆꌫꄻꌠꆏꑴꌅꏀꀺ、ꅐꑘꊐꐕ、ꃄꁕꋮꄮꃅꀻꎆꁁꏯꑠꇬꄉꏣꀋꑌꐨꂿꄐꇤꅐꇁ。ꉇꉻꏭꎆꇱꌠꌋꆀꇷꃅꇶꏦꏀꀺ,ꎆꏂꑘꎥꃪꀖꁉ、ꒃꅐ、ꃷꄻꁁꏯꑠꇩꏹꈴꀰꏢꍔꂵꌠꇬꊋꁈꄏ,ꇤꐳꃅꉪꊇꇩꏤꇩꐂꇬꌦꌋꆀꇩꏹꂓꅑꅐꇐꉗꄻ。ꏣꀋꑌꃅꇩꏹꊋꀦꅐꀦꐯꈲꇷꃅꌠꍔꂵ。ꄿꐨꃼꇇꃄꅉꄐꇐꏤꁈꃄꌬ,ꊋꀥꇱꄉꑍꁁꏯꀉꑌꁁꏯꃅꎆꏣꃼꇇꇷꃅ。ꏓꇱꏡꁈꏁꌬꄉꇩꏹꊌꌬꀑꐱꃅꐮꆽꏣꌠꊥꎆ。ꇩꏹꎆꏣꐔꈔꉆꌠꄴꏮꌠꉜꁨ。

  ꇩꂱꎆꏣꉽꑌꉾꐲꑌꐳꃅꀻꎆꌠꃅꇫꑟꇬ,ꀋꎪꃅꀒꁨꋍꁘꃅꉪꊇꇩꏤꎆꏣꊋꃤꀉꇨꇁꄉ,ꐧꋦꉪꏦꃷꎏꎆꏣꉘꁇꁉꉀꄓꊋꃤꐥꌠꋍꏅꋋꂿꉆꎂꀕ。

  ꃘ、ꀋꎪꀋꑴꃅꐧꋦꉪꏦꋯꁦꍔꍞꀻꎆ

  ꏓꂱꋯꁦꆹꐧꋦꉪꏦꀑꇬꉬ。ꐧꋦꉪꏦꋯꁦꍔꍞꀻꎆꌠꆹꉪꊇꄈꈍꄮꑌꄝꇬꀋꎭꃅꉈꈽꌠꑞꅉꁻꌐꉬ。ꄺꀱꁉꃑꊂꅑꅸꇁꌠ,ꉪꊇꏣꀋꑌꃅꎍꐽꄉꄐꃅꍔꍞꏦꉻꄺꀱꌠꄹꎆ,ꉪꊇꇩꏤꐧꋦꉪꏦꋯꁦꍔꍞꆏꀊꅰꃅꀉꇨꃅꐙꌠꐥꎴꊋꃤꄜꅐꇁꀐ。ꍔꍞꏦꉻꄺꀱꌠꆹꉪꊇꇩꏤꐊꑷꃅꄺꀱꌠꇬꀋꉬꀋꉆꌠꇬꋍꈨꃅꄉꇬ,ꀋꎪꃅꎆꏣꐧꋦꀻꎆꌠꇬꐊꄉꀋꆏꃅꃹꅼꃅꃅ,ꏓꂱꉹꁌꍔꍞꃅꈽꌠꏣꀋꑌꐨꀋꆏꃅꐕꀊꂥꌠꌋꆀꐮꄉꄐꌶ。ꏟꈯꃅꍏꇩꐛꐨꐧꋦꉪꏦꍔꍞꀻꎆꈝ꒜ꍬꇬꎷ,ꏟꈯꃅꄈꁳꏃꂠ、ꏓꂱꁳꑱꏲꃥꌋꐛ、ꏦꈴꇩꏲꌠꋭꋽꃅꏓꋍꃱꃅꌠꌭꈬ,ꏟꈯꃅꏓꂱꁧꎁ꒜ꀉꒉꈿꌠꄹꏦ、ꍏꇩꇭꍣꄈꏃꂠꌠꄈꀉꑌꂷꃅꐮꇷꃅꌠꌋꆀꍔꍞꋮꒉꄹꏦ、ꊿꋅꃄꁕꊨꏦꏲꌠꄹꏦꌋꆀꅉꂫꊐꌠꉹꁌꊨꏦꏲꌠꄹꏦꌭꈬꌋꆀꄻꐛꒆ,ꀋꆏꃅꐧꋦꉪꏦꍔꍞꄹꏦꑴꅉꄻꐛꒆꌠꌋꆀꀻꎆꌠꄹꎆ。

  ꃹꅼꃅꍔꍞꄹꏦꄺꀱ,ꀋꎪꃅꏟꈯꃅꍔꍞꃅꍜꎃꊒꌠꌭꈬ,ꏓꂱꑱꏲꃥꌋꐛꌠꄉꀧꄉꌌꁧꀦꃅꄉ,ꄈꌋꆀꇩꏤꍄꑐꊋꃤꊋꀥꇱ、ꏓꂱꏣꀋꑌꐨꄖꄑꌠꌌꑞꅉꁻꌐꃅꄉ,ꐧꋦꉪꏦꋯꁦꍔꐯ,ꐧꋦꉪꏦꏦꏲꇩꏤꋈꄻꇈ,ꐧꋦꉪꏦꍔꍞꌧꑳꀻꎆ。ꏟꈯꃅꄈꃅꇴꄉꉻꃅꏓꏲ、ꋍꑞꋍꁁꏯꋮꄮꌠꏲꂠꈯꄜꂿꄐꌭꈬ,ꄈꈆꑪꃅꌅꈌꌬ、ꋯꁦꃅꌅꈌꌬ、ꏦꈴꄉꌅꈌꌬꌠꑞꅉꐕꀊꂥꇈ,ꄈꏓꂱꏃꂠꄉꇿꋌꐥꃅꇩꏤꏱꄻꌠꄉꀧ;ꏟꈯꃅꇩꏤꌅꈌꈀꉬꃅꏓꂱꃤꉬꌐꌠꌭꈬ,ꈁꐥꊐꌠ、ꈁꐥꁁꏯꇬꉻꊿ꒾ꁨꃅꍔꍞꃅꈽꌠꍔꐯ,ꀊꐯꈭꃅꏓꂱꄖꄑ、ꊥꇫꌊꏦꃤꈴꄉꇩꏤꌤꃆꌋꆀꐧꋦꌤꃆꏱꄻ、ꎆꏣꌋꆀꁱꀕꌤꑘꏱꄻ;ꏟꈯꃅꏦꈴꇩꏲꌠꁧꀦꄐꁈꌭꈬ,ꉌꂵꇬꐧꋦꉪꏦꏦꏲꉪꇐꑌ,ꇩꏤꋍꑞꋍꑵꌤꃅꌠꁳꏦꃤꌌꏲꈴꎻꌠꃅꇫꑟ,ꉻꊿꏦꊒꌅꈌꈲꁧꏦꀧ;ꏟꈯꃅꐧꋦꉪꏦꍔꍞꄹꏦꐋꀋꌡꐨꌋꆀꂱꎆꅑꐨꌭꈬ,ꐧꋦꉪꏦꋯꁦꍔꍞꄹꏦꈴ、ꋊꍬꈴ、ꈭꎁꈴꎻꌠꄹꎆꄉ,ꄈꌋꆀꇩꏤꎴꏲꑘꒃꌠꎁꃅꍔꍞꌋꆀꏦꃤꄹꏦꏦꀧꅍꇲꁵ。

  (ꋍ)ꏓꂱꋯꁦꍔꐯ,ꏓꂱꑱꏲꃥꌋꐛꌠꄉꀧ。ꏓꂱꑱꏲꃥꌋꐛꌠꆹꐧꋦꉪꏦꋯꁦꍔꍞꇬꊇꁧꌋꆀꈯꄜꉬ。ꋯꁦꄹꏦꄻꐛꒆꄉ,ꋯꁦꇶꏦꀉꑌꑵꃅꄻ,ꋯꁦꈭꈜꀊꐯꃅꀹꄻ,ꏦꃤꇬꈴꄉꋯꁦꃅꌊꄻ、ꋯꁦꃅꏤꇽ、ꋯꁦꃅꏱꄻ、ꋯꁦꃅꍞꊟꌠꃄꌬꇈ,ꏓꂱꃤꌤꃆꅉꐚꌅꈌ、ꃅꈽꌅꈌ、ꉉꄜꌅꈌ、ꍞꊟꌅꈌꏦꀧ。ꏓꂱꁧꎁ꒜ꀉꒉꈿꅉꏦꃤꈴꄉꌅꊋꃄꌬꌠꇬꊋꁈꄏ,ꄈꃤꉪꐨꁳꏦꃤꇬꏤꄉꌠꈭꎁꇬꈴꄉꇩꏤꉪꅉꐛꎻꌠꃅꇮ;ꏓꄊꁧꎁꁳꏦꃤꈴꄉꌅꈌꃄꌬꌠꏦꀧꄉ,ꏓꄊꁧꎁꁳꏓꂱꌋꆀꑖꑟꃅꐮꑌꐯꑲ,ꋍꁘꋍꁘꃅꇓꈓꇓꉈꊻꂷꍆꐪꐯꌟꌠꇬꉜꄉꏓꂱꁧꎁꌊꄻꄷꇖ;ꊋꀥꇱꄉꏓꄊꅉꀕꌤꏲꊈꑼꉼꄹꏦꋈꄻ,ꏓꐊꊿꌧꇐꐛꉻꌋꆀꈎꄜꐛꉻꉾꄻꉾꇱ。ꏓꂱꍔꑠꏭꊋꁈꄏꄉꋯꑌꌠꌋꆀꋯꁦꌠꄜꀨꀉꒉꑍꐘꌠꆼꒆꄉꌅꊋꃄꌬꎻ,ꍔꍞꋮꒉ、ꋯꁦꍞꊟ、ꏲꈽꇖꈽꌠꄹꏦꋈꄻꌠꄹꎆ;ꍔꍞꋮꒉꌠꌌꏤꇽꈭꎁꇬꇱꄉ,ꋯꁦꍞꊟꉺꏦꄻꐛꒆ,ꏲꈽꇖꈽꌠꃶꐚꇿꋌꐕꀊꂥ;ꍔꑠꑴꅉꋈꄻꌠꊋꀥꇱꄉ,ꐮꃆꂮꋮꄮ、ꊋꃤꏓꋧ、ꅇꉉꁈꌞ、ꃅꇴꄉꉻꁧꃤꃅꌠꂿꄐꀋꂿꑘꌠꇤꅐꇁ。ꏟꈯꃅꊿꋅꈁꐥꌠꉬꇮꃅꐥꊯꌠꌭꈬ,ꊿꋅꊨꏦꏲꃅꄷꏦꃤꇬꈴꄉꊨꏦꌅꌠꌅꈌꃄꌬꌠꏦꀧ。ꏤꇽꇬꈆꑪꈴ、ꋯꁦꈴꌠꄹꎆ,ꏤꇽꈴꌗꌋꆀꀑꁮꊋꃤꌌꇫꊋꁈꄏꉻꑫꄻꐛꒆ,ꏤꇽꇬꂿꐚꐨꌋꆀꉹꁌꇫꃅꈽꐨꀉꇨꇁ,ꉹꁌꈲꁧꌋꆀꐮꃆꂮꐥꌠꏦꃤꏦꇗꌋꆀꄉꉻꏱꁈꏤꄻꇬꏥꏦꃅꇬꄇꄜꋊꄉꉹꁌꉜꐨꅲꌶ。ꊋꀥꇱꄉꉻꊿꉪꉻꂘꑴ,ꉌꂵꇬꐧꋦꉪꏦꋯꁦꏦꏲ、ꄿꐨꐥꊯ、ꎃꊒꑗꐥꌠꉪꇐꑌ。ꇪꉼ、ꌠꏀꄨ、ꌋꅪꏓꉻꋍꑠꏓꂱꏓꉻꆏꏦꃤꌋꆀꂱꑱꏦꋪꇬꈴꄉꌤꃅꌠꊋꁈꄏ,ꐧꋦꏱꄻꌠꌋꆀꄉꉻꁧꃤꃅꌠꃅꈽ, ꉹꁌꏦꊒꌅꈌꈲꁧꀧꌋꃅ。

  (ꑍ)ꅉꂫꊐꌠꋯꁦꀻꎆ,ꏓꂱꁳꀊꅰꀉꑌꀊꅰꃶꐚꌠꋯꁦꌅꈌꊌꎻꌠꏦꀧ。ꏓꂱꏦꃤꈴꄉꈛꎂꃅꋯꁦꌅꈌꌬ,ꅉꂫꊐꌠꄉꉻꌤꃆꌋꆀꉻꈲꌤꑘꏱꄻ,ꊨꏦꀱꊨꏦꏱꄻ、ꊨꏦꁧꃤꃅ、ꊨꏦꂘꑴ、ꊨꏦꍞꊟꌠꃅ,ꇥꀯꏭꋯꁦꍞꊟꌠꃄꌬꌠꆹ,ꏓꂱꑱꏲꃥꌋꐛꌠꇬꇿꋌꐥꐯꐥ、ꀊꐯꐯꀊꐯꌠꈭꈜꏢꉬ,ꀋꎪꃅꌌꄉꐧꋦꉪꏦꋯꁦꍔꍞꀻꎆꌠꇬꅉ꒜ꃅꐙꌠꋉꃆꄻꑘꀋꂿꑘꌠꃅꄉꄹꎆꌶ。ꅉꂫꊐꌠꄈꎀꍹꏃꂠꌠꍄꑐꊋꃤꀉꇨꃅꐥꌠꅉꂫꊐꌠꉹꁌꊨꏦꏲꌠꉺꏦꄻꐛꒆ,ꅉꂫꊐꌠꉹꁌꊨꏦꏲꈍꈐꍔꐯ,ꋯꁦꏱꄻꄹꏦꄻꐛꒆ,ꇓꈓꇓꉈꋥꁕꋈꄻꌊ꒾ꁨꃅꏲꂠ、ꁧꃤꃅꌠꐛꒆ、ꌧꑳꐮꄮꌠꐧꋦꐥꐨꐮꐊꏓꉻꐛ。ꀋꎪꀋꑴꃅꇮꃅꊿꏠꌠꉘꇉꄉ,ꇮꃅꊿꁧꎁ꒜ꀉꒉꈿꌠꌌꁧꀦꇶꏦꃅꄉꌠꎆꏂꑘꌤꑘꌤꃅꅉꋯꁦꃅꏱꄻꄹꏦꄻꐛꒆ,ꇮꃅꅉꌤꃆꄇꄜꋊꌠꄹꎆ,ꇮꃅꊿꏲꂠꈽꌠꏭꊋꁈꄏ,ꇮꃅꊿꏦꊒꌅꈌꈲꁧꀧꌋꃅ。ꃹꅼꃅꑣꍔꏲꉻꄺꀱ,ꊋꀥꇱꄉꅉꂫꊐꌠꍔꌅꋈꄻ,ꏲꃆꄇꄜꋊ、ꋂꃆꄇꄜꋊꌠꋍꑠꄹꏦꄻꐛꒆ,ꍔꃚꏲꑘꏲꂠꌠꌋꆀꅉꂫꊐꌠꉹꁌꊨꏦꏲꇿꋌꐥꃅꐮꊛꌠꌋꆀꉾꃪꃅꐮꇙꌠꃅꇫꑟ。ꐧꋦꎀꍹꆏꉹꁌꇫꃅꈽꌠꍔꐯ、ꉹꁌꇖꐨꄛꑣꁁꏯꂿꄐꏣꀋꑌꌠꋊꇤꅐꇁꄉ,ꐧꋦꊨꏦꏲꌠꂿꄐꀉꇨꇁ。

  (ꌕ)ꐊꑷꃅꏦꈴꇩꏲꌠꅉꀨꄐꁈꃄꌬꇫꑟ,ꇤꐳꃅꐧꋦꉪꏦꏦꏲꇩꏤꋈꄻ。ꏦꈴꇩꏲꌠꆹꐧꋦꉪꏦꋯꁦꍔꍞꇬꅉꀨꇖꐨꉬ。ꏟꈯꃅꈆꑪꃅꏦꃤꏤꄻ、ꋯꁦꃅꏦꃤꏤꄻꌠꌭꈬ,ꍏꇩꐛꐨꐧꋦꉪꏦꏦꃤꉻꑫꄻꐛꒆ。ꊋꀥꇱꄉꏦ꒜ꌋꆀꏦꃤꃄꌬ,ꏟꈯꃅꉻꊿꆹꏦꃤꂾꐥꊯꌐꌠꌭꈬ,ꐧꋦꎃꊒꑗꐥꌠꀧꌋꃅ,ꐧꋦꉪꏦꏦꄹꋍꃱꃅꐙ、ꀑꑊ、ꋦꒉꌠꀧꌋꃅ。ꏦꃤꈴꄉꏱꄻꌠꄹꎆ。ꃹꅼꃅꏦꌬꏦꉻꄺꀱ,ꉾꄻꃪꇱꃅꏦꌬꌅꈌꁵꄻ,ꏦꌬꃅꇏꋊꍬ,ꐧꋦꉪꏦꏦꌬꄹꏦꎃꊒꀞꐳꋦꒉꌠꋈꄻꄉ,ꍤꇽꌤꃅꅉ、ꍤꄻꌤꃅꅉꏦꃤꈴꄉꄜꋦꎃꊒꃅꍤꇽꌅꈌ、ꍤꄻꌅꈌꌬꌠꄉꀧ。ꊋꀥꇱꄉꍔꃔꌤꃅꊿꁥꌠꂘꄻ,ꏦꇨ、ꎃꊒ、ꌧꑳꃅꏦꃤꌬꌠꃅꇫꑟ。ꃹꅼꃅꏦꄹꌌꄜꉺ꒿ꂘꌠꍔꆙꄉꃅ,ꏦꏲꉌꊈꍔꆙ,ꑴꐚꃅꏦꌷꏦꍬꏦꌬꌠꐧꋦꐥꀹꐥꇁ。ꃰꊿꌅꈌꁌꒉꌋꆀꏦꀧ,ꏦꃤꈴꄉꐧꇁꃰꊿꃅꐯꇯꐥꊯꃅꃅꈽ、ꐥꊯꃅꀻꎆꌠꌅꈌꄉꀧ。ꈁꐥꊐꌠꄈꎀꍹꌋꆀꄈꑼꈁꐥꌠꃅꑴꐚꃅꏦ꒜ꌋꆀꏦꃤꏤꄉꌠꈍꈐꇬꄉꃅꈧ,ꂴꅑꄉꏦ꒜ꌋꆀꏦꃤꋦꒉꐨꀧꌋꃅ。

  (ꇖ)ꇩꉂꏓꋍꃱꃅꀂꏽꄻꀉꇨ,ꋯꑌꈁꉆꌠꊋꃤꃅꋯꑌꐯꇯꎼꇁ。ꄈꍔꐮꃆꂮ、ꊿꋅꐮꃆꂮ、ꑇꇐꐮꃆꂮ、ꏠꊐꐮꃆꂮ、꒺ꈐ꒺ꉈꃺꑌꐮꃆꂮꇬꐮꄮꌠꊥꎆꇬ,ꀊꅰꃅꐮꋯꑌꇁ、ꊋꋧꊋꏓꌠꇬꀉꁁꇫꎃꊐꀋꉆꌠꂿꄐꐥ。ꐮꐊꐥꎴ、ꐮꇬꍞꊟ、ꉌꂵꐯꇯ、ꂄꄸꐮꐊꌠꌐꏦꃅꈴꌬꈴꌶ,ꊋꀥꇱꄉꋯꁦꄈꀾꌋꆀꐯꇯꌤꃅ,ꋯꁦꄈꀾꌋꆀꄈꀾꀋꐊꌠꊿꂒꋦꌠꊋꁈꄏꄉꏲꈽꇖꈽ、ꋯꁦꍞꊟꌠꌅꊋꃄꌬꎻ,ꄈꉈꇥꀯꉾꃪꌠꀉꑌꃅꌊꄻ、ꊙꎭꌊꏲꂠꄉꅍꁵ。ꊿꋅꈁꐥꌠꃅꐯꇯꋯꑌꊋꇤ、ꐯꇯꌄꆣꀻꎆꌠꅇꀨꋌꐘꏟꈯꀕꃅꌭꄉ,ꀁꑌꊿꋅꏦꊒꌅꈌꈲꁧꏦꀧ,ꐥꊯꋯꑌꐮꇇꀨꐮꄮꌠꐧꋦꉪꏦꊿꋅꐮꃆꂮꄻꈫꈈꌋꆀꀻꎆ。ꐊꑷꃅꄈꅿꑇꇐꌤꃅꅉꀨꌐꏦꃄꌬ,ꑇꇐꁁꏯꊿꂒꋦꌠꌋꆀꑇꇐꑇꊿꉹꁌꁳꎆꏣꐧꋦꀻꎆꌠꊥꎆꌠꇬꄉꏣꀋꑌꂿꄐꋊꇤꅐꇁꎻ。ꐧꋦꏠꊐꀊꏀꌠꇬꊿꂒꋦꌠꊋꊡꄉꏣꀋꑌꃅꊋꇤꍏꇩꐛꐨꐧꋦꉪꏦꋈꄻꅉꇬꊐꇁꎻ。꒺ꉈꃺꑌ、ꇩꉈꄉꀱꇁꌠꑱꈐꊿꁍꇩꐛꏀꈴꋈꄻꌠꌋꆀꄮꐽꃅꏓꋍꃱꃅꌠꌤꑘꀉꒉꀊꂾꌠꉈꇬ、ꃅꈽꌠꊋꁈꄏ。

  (ꉬ)ꇤꐳꃅꏲꑘꏱꄻꏦꉻꄺꀱ,ꁧꃤꃅꉹꌠꍔꃚꋈꄻ。ꏲꑘꏱꄻꏦꉻꄺꀱꌠꆹꃹꅼꃅꄺꀱꌠꀋꉬꀋꉆꊭꉬ。ꇤꐳꃅꏲꑘꏱꄻꏦꉻꄺꀱꀑꐱꄐꉻꏤꄻꎼꇁ,ꊋꇤꄉꌅꊋꆹꏮ、ꐮꃆꂮ꓂ꃪ、ꐛꉻꉾꄻꃪꇱ、ꈲꁧꐕꀊꂥꄉ,ꌅꈌꃅꎁꐮꐊ、ꑘꁸꄐꊒ、ꏤꁈꋭꋽ、ꃄꌬꁣꀋꐥ、ꍞꊟꊋꑌꌠꏲꑘꏱꄻꏦꉻꐛ。ꍔꃚꌅꈌꃅꎁꉻꑫꄻꐛꒆ,ꄉꉻꁧꃤꃅꉻꑫꄻꃪ,ꄆꌅꏲꃆꄹꆷꄉ꒞ꌬ,ꐧꋦꏱꄻꌠꌋꆀꄉꉻꁧꃤꃅꌠꊋꀥꇱ。ꇤꐳꃅꍔꃚꌋꆀꎆꏂꑘꁸꄉ、ꍔꃚꌋꆀꎆꇱꁁꏯꁸꄉ、ꍔꃚꌋꆀꌤꑘꌤꃅꅉꁸꄉ、ꍔꃚꌋꆀꃷꎏꇢꈴꎀꍹꁸꄉꌠꊥꎆ,ꏲꑘꃅꇏꋊꍬ,ꊋꀥꇱꄉꏲꑘꏦꌬꌤꏲꅉꋈꄻ,ꏲꑘꍤꄻꈌꁧꌠꊨꀁꑌꌠꌋꆀꋊꍬꌠꃅ,ꉻꐭꎆꏣꒈꇁꌠꇬꍔꃚꇫꈌꄀꇇꏿꌠꊨꀁꑌꇁ。ꈛꎂꃅꏲꂠꌠꌤꏲꅉꌋꆀꃅꄷꍔꃚꐮꃆꂮꋊꍬ。ꌤꃅꅉꏓꇱꄻꇱꊋꃤꀉꇨꃅꇱꄉ,ꌅꊋꋭꋽꃅꏓꋍꃱꃅꌠꌤꏲꅉꀉꒉꌠꏦꉻꎥꃪꃄꌬ,ꌤꏲꅉꇢꊭꇬꋮꄮꐊꃅꉺꏦꄻꐛꒆ。ꌤꋯꋮꄮꌠꌤꃅꅉꌋꆀꋍꌤꀞꅉꋍꑞꋍꑵꌠꅧꊨ、ꋊꍬꎼꇁ,ꏲꑘꇬꏲꊐꂠꊐꊨꀁꑌ,ꏲꑘꀨꊰꊨꀁꑌ,ꊋꇤꄉꌤꃅꅉꐮꄅꐛ、ꌅꈌꃅꎁꐯꏍꎍ、ꏲꌠꀉꑌꇨꌠꌤꃆꂥꀘꇧꎭ。ꄈꊈ、ꍔꃚꌋꆀꏓꄊ、ꍔꑠꌤꃅꅉꄻꄉꌠꌌꉜꈴꇲꈴꃅꄺꂡ,ꏲꌋꃷꁨꊨꀁꑌ,ꌤꃅꊿꃷꁨꏦꇨꃅꋎꍅ。ꇤꐳꃅꌤꑘꌤꃅꅉꐘꁸꄉꄺꀱꌠꄹꆷꅸꁨꆹ。

  (ꃘ)ꏢꑲꌠꌋꆀꍞꊟꌠꉺꏦꄻꃪ,ꏓꂱꁵꄻꄉꌠꌅꈌꈍꄮꑌꏓꂱꎁꃅꈲꁧꏂꌠꄉꀧ。ꌅꈌꎃꊒꃅꃄꌬꌠꄉꀧꄉ,ꀋꎪꃅꌅꈌꌌꈨꑭꇂꃴꄇꄜꋊꃅꌬꌶ。ꏟꈯꃅꄹꏦꌌꌅꈌꏲ、ꌤꏲ、ꊾꏲꌠꌭꈬ,ꏤꇽꌅꈌ、ꃄꌬꌅꈌ、ꍞꊟꌅꈌꋍꁁꏯꆏꐮꏢꑲꉈꋍꁁꏯꆏꐯꋮꄮꃅꐙꌠꌅꈌꐛꉻꌋꆀꃄꌬꉺꏦꄻꐛꒆ。ꎀꍹꏦꄹꌋꆀꈭꎁꃄꏦꄻꐛꒆ,ꇩꏤꌤꏲꅉꏦꃤꏤꄉꌠꌅꈌꑞꅉꌋꆀꈭꎁꈴꄉꌅꈌꌬ、ꃅꎁꃅꌠꄉꀧ。ꄇꄜꋊꌤꀞꌠꄹꏦꋍꑞꋍꑵꄻꃪ,ꍔꃚꌤꃅꇬꂿꈴꉆꐨꌋꆀꉻꑇꊋꃤꐕꀊꂥ。ꊋꒉꌠꆏꊋꀥꇱꄉꏲꌋꇥꀯꈜꀕꇈꃅꏲꂠꇥꀯꀋꉬꀋꉆꌠ、ꊿꎆ꒜ꎊꈬꏱꌬ、ꉆꈉꀋꉬꀋꉆꌠꇬꍞꊟ,ꅲꇔ、ꅑꎹ、ꎆꏣꃅꎁꍤꌗ、ꅑꐥꄉꅍꇔ、ꄉꅍꇔꇧꎭꌠꄹꏦꑠꄻꐛꒆ。ꄈꈐꍞꊟꃷꋪꃅꇫꑟ,ꊋꀥꇱꄉꋯꁦꍞꊟ,ꈋꍣꍞꊟꂿꄐꎔꃅꋊꇤꅐꇁꄉ,ꍞꊟꏓꊋꌋꆀꇿꋌꀉꇨꎻ。

  ꐧꋦꉪꏦꀊꅰꃅꀻꎆꆹꇬꆏ,ꋯꁦꑌꀊꅰꃅꀻꎆꆹꌠ。ꍏꇩꐛꐨꐧꋦꉪꏦꀻꎆꆹꌠꐩꋊꈴꎁꇬ,ꍏꇩꇭꍣꄈꊿꌋꆀꍏꇩꏓꂱꆹꀋꎪꃅꀋꆏꃅꐥꎴꊋꃤꀉꇨꃅꐥꌠꐧꋦꉪꏦꋯꁦꍔꍞꋌꌌꀻꎆꆹꄎꌠꉬ。
ꁰꒌ




  • 特别鸣谢
    中国民族语文翻译局彝文翻译室