ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(2)

——ꍏꇩꇭꍣꄈ꒜ꀉꒉꊰꏁꃢꌠꇩꏤꑭꊂꁧꎁ꒜ꈿꅉꇬꄉꅇꄜꌠ
(2007ꈓ10ꆨ15ꑍ)

ꃛꏢꄧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
  ꌕ、ꃹꅼꃅꈆꑪꃅꀻꎆꌠꉜꐨꃄꌬꇫꑟ

  ꀊꏀꃅꀻꎆꊬꌠꇬꐪꊛꄉꐊꑷꃅꊼꇅꌣꈚꐧꋦꋈꄻ、ꍏꇩꐛꐨꐧꋦꉪꏦꀻꎆꇬ,ꀋꎪꃅꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃄꌬꇬꑟ。

  ꈆꑪꃅꀻꎆꌠꉜꐨꆹ,ꄈꅿꌕꋊꍏꑷꏲꌋꁥꌠꀻꎆꃆꂮꉪꇐꀋꂿꑘꌠꐪꊛꌠꌋꆀꀻꎆꌠꉬ,ꋋꆹꂷꇻꌦꉪꏦꀻꎆꃆꂮꋧꃅꉜꐨꌋꆀꏡꁈꉉꈻꌠꏓꋧꄉꄛꑣꅐꇁꌠꉬ,ꋋꆹꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌋꆀꐯꅑꐯꊛꄷꀋꁧꉈꑴꃅꋊꐊꄉꁨꆹꌠꈆꑪꌧꇗꉬ,ꋋꆹꉪꇩꏤꎆꏣꐧꋦꀻꎆꌠꄐꇺꌐꏦꀋꂿꑘꌠꉬ,ꋋꆹꍏꇩꐛꐨꐧꋦꉪꏦꀻꎆꇬꀋꎪꃅꌭꈬꌠꌋꆀꃄꌬꇫꑟꌶꌠꀉꒉꀊꂾꌠꄐꇐꏤꁈꉪꇐꉬ。

  ꈆꑪꃅꀻꎆꌠꉜꐨꆹ,ꐧꋦꉪꏦꉘ꒜ꊬꌠꇬꇩꏤꀑꐱꐛꐨꇬꈴꄉ,ꉪꇩꏤꀻꎆꃅꐨꏓꈹ,ꇩꉈꀻꎆꌠꎖꋪꉜꄻꄉ,ꀊꏀꃅꀻꎆꌠꈉꐨꇬꄉꄐꂿꄷꄜꎼꇁꌠꉬ。ꃅꋊꀊꏀꊬꌠꃹꆹꇬ,ꉪꇩꏤꀻꎆꅉꇬꀊꏀꌠꋍꊭꃅꐙꌠꐛꐨꈨꅐꇁꀐ,ꀋꉬꀋꉆꌠꆏ:ꎆꏣꊋꃤꄇꇖꀕꃅꀉꇨꇁ,ꄚꋋꄮꇬꒃꅐꊋꃤꑟꐨꀑꐱꃅꇬꀊꀋꂥꑴꌦ,ꑴꌅꏀꀺꊋꃤꀊꀋꇨꑴꌦ,ꀊꉗꃅꏓꐛꌠꐛꉻꐮꄙꐨꌋꆀꆘꉾꃅꐙꌠꁦꎆꄟꆹꊇꅉꃅꄺꀱꎼꇁꀋꌐꑴꌦ;ꐧꋦꉪꏦꃷꎏꎆꏣꏦꉻꀑꐱꃅꄻꐛ,ꄚꋋꄮꇬꀻꎆꌠꇬꁧꏖꌠꏦꉻꉺꏦꃅꏢꑲꑠꄡꇗꐥꑴꌦ,ꄺꀱꈢꇓꀖꇬꀊꅼꃅꐮꄙꌠꌋꆀꌤꃆꈨꊝꇁ;ꏓꂱꐥꐨꀑꐱꃅꇬꊼꇅꌣꈚꅉꇬꑟ,ꄚꋋꄮꇬꊌꐨꁷꑣꐮꍣꐨꀉꒉꇁꌠꊇꅉꃅꈎꎼꇁꀋꌐꑴꌦ,ꇓꈓꇓꉈꌢꎭꊻꂷꌋꆀꊌꐨꀁꂥꌠꊻꂷꃷꁨꀉꑌꃅꐥꑴꌦ,ꋍꑞꋍꁆꏯꈲꁧꉜꈴꇲꈴꌠꊋꋠꐨꀊꅰꀉꒉꇁ;ꋮꄮꃅꀻꎆꌠꊌꐨꄇꇖꀕ,ꄚꋋꄮꇬꂿꑘꅉ꒜ꊋꁧ、ꂿꑘꁡꇤꀻꎆꀋꐳꌠꐛꐨꄺꀱꎼꀋꇁꑴꌦ,ꇓꈓꇓꉈ、ꃄꁕꀻꎆꐮꍣꐨꃛꀄꊭꌠꌋꆀꎆꏣꐧꋦꋮꄮꃅꀻꎆꌠꊥꎆꇬꂿꃆꊋꋠꑴꌦ;ꐧꋦꉪꏦꋯꁦꍔꍞꀋꆏꃅꀻꎆ、ꏦꈴꇩꏲꌠꄐꇐꏤꁈꏟꈯꃅꃄꌬꇫꑟ,ꄚꋋꄮꇬꋯꁦꏦꃤꄹꏦꋈꄻꌠꌋꆀꏓꂱꋍꏅꋯꁦꍔꐯꌠ、ꎆꏣꐧꋦꀻꎆꌠꈉꐨꐮꄉꀋꄐꑴꌦ,ꍔꍞꏦꉻꄺꀱꌠꑌꊛꄉꃹꅼꃄꄻꅐ;ꐧꋦꉪꏦꁱꀕꀊꅰꃅꌄꆣ,ꄚꋋꄮꇬꏓꂱꉌꊈꁱꀕꈉꇖꐨꋍꑍꋍ꒿ꃅꀉꇨꇁ,ꃰꊿꉪꇐꉪꏡꌠꄂꋦꐨ、ꌊꄻꐨ、ꐈꐳꐨ、ꐮꍣꐨꄇꇖꀕꃅꁦꎆꇁꄉ,ꐧꋦꉪꏦꂴꅑꌠꁱꀕꀻꎆꌠꀂꏽꈉꐨꀊꅰꀊꂥꌠꄜꅐꇁꀐ;ꐧꋦꍄꑐꊋꃤꄇꇖꀕꃅꁦꎆꇁ,ꄚꋋꄮꇬꐧꋦꐛꉻ、ꐧꋦꎀꍹꇶꏦ、ꐧꋦꈲꁧꐛꄟꀊꅼꃅꐛꐈꌠꅐꇁꄉ,ꐧꋦꋈꄻꌠꌋꆀꏱꄻꌠꇖꀨꀊꏀꌠꀉꑌꃅꊝꇁ;ꉇꉻꏭꁉꃑꌠꋍꑍꋍ꒿ꃅꍔꐯꇁ,ꄚꋋꄮꇬꇩꏹꐯꋓꅔꌠꋍꑍꉚꋍꑍꃅꃛꇁ,ꇩꏤꐞꄿꈧꌠꎆꏣꈆꑪꇮꇐꀂꏽꂴꎆꅑꇬꎷꌠꍄꊋꀊꉗꃅꐥꇬꎷꑴꌦ,ꋌꊂꌋꅜꉆꌠꌋꆀꌋꅜꀋꉆꌠꃨꆰꐨꀉꑌꃅꁦꎆꇁ,ꇩꈐꀻꎆꌠꌋꆀꉇꉻꏭꁉꃑꌠꉜꈴꇲꈴꌶꌠꇖꐨꀊꅰꃅꀉꂥꇁ。

  ꐛꃆꐛꂮꋋꈨꇬꄉꄜꋊꎼꇁꇬ,ꍏꇩꀊꏀꄻꐛꊂꅑꅸꇁꌠꈜꀕꇈꄺꀱꁉꃑꊂꅑꅸꇁꌠꀋꆏꃅꊋꇤꇈ,ꉪꇩꏤꆏꋧꃅꃅꇫꂿꌠꀻꎆꌠꊌꐨꊌꅜꀐ,ꒃꅐꊋꃤꇬꄉꅑꅸꒃꅐꐮꃆꂮꇬꑟꌠ、ꎆꏣꅉ꒜ꇬꄉꅑꅸꄩꇴꏦꉻꇬꑟꌠꐯꇯꈻꇐꈲꇐꀉꒉꀊꂾꃅꐛꐈꀐ,ꄚꉪꇩꏤꄡꇗꄷꀋꁧꀊꉗꃅꐧꋦꉪꏦꉘ꒜ꊬꌠꇬꎍꑴꌦꌠꇩꏤꀑꐱꐛꐨꐛꀋꐈꑴꌦ,ꏓꂱꋍꑍꋍ꒿ꃅꁦꎆꆹꌠꐥꇐꁱꀕꈉꐨꌋꆀꊁꊰꌠꐧꋦꒃꅐꇢꊭꐮꄙꌠꐧꋦꐮꄙꐨꀋꉬꀋꉆꌠꋋꏢꐛꀋꐈꑴꌦ。ꀋꃋꋋꇅꇬꉪꇩꏤꀻꎆꌠꐛꐨꋋꊭꆹ,ꐧꋦꉪꏦꉘ꒜ꊬꌠꇬꉬꌠꇩꏤꀑꐱꐛꐨꆏꃅꋊꀊꏀꊬꌠꇬꄉꑭꋧꃅꄜꅐꇁꌠꉬ。ꐧꋦꉪꏦꉗ꒜ꊬꌠꇩꏤꀑꐱꐛꐨꐝꉅꄷꊡꀱꌠꆹ,ꑴꑳꉜꄸ、ꊨꏦꊁꊰꏾꌠꀋꉬ,ꉈꑴꃶꐚꐛꐨꇬꀋꉜ、ꋋꇅꃅꃅꐛꑟꉂꌠꑌꀋꉬ,ꋋꆹꏟꈯꀕꃅꋌꌊꄺꀱꌠꄹꎆ、ꀻꎆꌠꏂꇫꌠꁧꀦꁢꊧꃅꄉꌠꉬ。ꉪꊇꀋꎪꃅꈍꄮꑌꍝꐚꃯꐚꃅꄉ,ꐧꋦꉪꏦꉘ꒜ꊬꌠꃶꐚꐨꀉꒉꐯꀉꒉꋋꂷꇬꈴꄉ,ꉪꇩꏤꐊꑷꃅꎆꏣꋧꃅꈴꌠꃅꈽꇬꊜꋽꄮꀊꏀꌠꊋꋠꐨꀊꏀꌠꌌꈆꑪꃅꎥꃪ,ꐊꑷꃅꇮꑘꐛꈴ、ꈴꌗꐛꈴ、ꇓꈓꏦꎫꐛꈴ、ꃷꎏꐛꈴ、ꇩꏹꐛꈴꌠꃹꅼꃅꀻꎆꆹꌠꃅꒊꃅꇁꀊꏀꌠꂿꃆꀊꏀꌠꌧꐚꂿꐚꌶ,ꃹꅼꃅꉪꇩꏤꀻꎆꆹꇬꈀꊝꌠꌤꃆꀊꏀꌠꐮꄙꐨꀊꏀꌠꋏꇇꈐꊐ,ꀊꅰꑴꐚꃅꈆꑪꃅꀻꎆꌠꈜꇬꍬ,ꊋꇤꄉꍏꇩꐛꐨꐧꋦꉪꏦꀊꅰꃅꀻꎆꌠꊫꂫꀹꄻ。

  ꈆꑪꃅꀻꎆꌠꉜꐨꆹ,ꄜꀨꏡꌠꆹꀻꎆꌠꉬ,ꈯꄜꆏꊿꌌꀨꇬꄉ,ꀑꐱꇖꐨꆏꐊꑷꋮꄮꐪꊛꄷꌠꉬ,ꁧꀦꏡꁈꆏꉜꈴꇲꈴ。

  ——ꀋꎪꃅꀻꎆꌠꌌꄈꌅꈌꌬꇩꏤꌄꆣꌠꂿꃆꀨꏢꌠꃅꄉꇬꎷ。ꀻꎆꌠꆏ,ꐊꑷꃅꊼꇅꌣꈚꐧꋦꋈꄻ、ꐳꃅꐧꋦꉪꏦꐛꏀꈴꌠꄹꎆꌠꇬ,ꈻꇐꈲꇐꏤꇽꏭꃅꐙꌠꐥ。ꏟꈯꀕꃅꎆꏣꋈꄻꌠꈯꄜꋋꂷꒃꉇꄉ,ꉌꋧꊋꏓꃅꋈꄻ、ꈁꉪꈀꈾꃅꀻꎆꌠꏂꇫꇬꎷ,ꀋꆏꃅꐧꋦꒃꅐꊋꃤꁌꄝꌋꆀꀻꎆ。ꀊꅰꃅꉾꃪꃅꈆꑪꂘꇐꌌꇩꏤꌄꆣꌠꄐꇐꏤꁈ、ꌧꊿꌌꇩꏤꀉꇨꇁꌠꄐꇐꏤꁈ、ꊛꄉꀻꎆꉆꌠꄐꇐꏤꁈꃄꌬ,ꊋꇤꄉꀻꎆꈳꏦꒃꇇꈐꊐ、ꀻꎆꉪꉻꏀꀺ、ꀻꎆꄟꆹꏮ、ꀻꎆꊋꋠꅍꂵꂥꀘ,ꀻꎆꊇꁧꌋꆀꈲꁧꐕꀊꂥ,ꉾꑌꉾꐳꑌꐳꃅꀻꎆꌠꃅꇫꑟꄉ,ꍏꇩꐛꐨꐧꋦꉪꏦꀻꎆꌠꎁꃅꅉ꒜ꈫꈈꌠꄻꐛꌶ。ꊋꇤꄉꊿꌌꀨꇬꄉ、ꐊꑷꋮꄮꐪꊛꄉꈆꑪꃅꀻꎆꉆꌠꃅꇫꑟ,ꋍꑞꋌꁁꏯꌤꑘꋭꋽꃅꏓꋍꃱꃅ、ꐧꋦꃰꊿꋯꑌꃯꉻꐮꄮꃅꀻꎆꌠꃅꇫꑟ,ꋧꃅꄮꐽꀧꌋꃅꌠꇬꈴꄉꊨꏦꀻꎆꌠꑌꃅ、ꉈꑴꊨꏦꀻꎆꌠꇬꈴꄉꋧꃅꄮꐽꀧꌋꃅꌠꄮꐽꃅꀻꎆꌠꃅꇫꑟ。

  ——ꀋꎪꃅꊿꌌꀨꇬꄉꌠꌭꈬ。ꍏꇩꐛꐨꐧꋦꉪꏦꌤꑘꀑꐱꐛꃆꄐꉻꇬꈴꄉ,ꋍ꒜ꁨꀋꑌꉌꂵꄅꀋꑌꃅꏓꂱꁧꃤꃅꌠꆹꄈꅿꁧꀦꉪꃆꁢꊧꉬ,ꄈꅿꈁꉈꈽꌠꌋꆀꌤꈁꃅꌠꆹꉬꇮꏓꂱꈲꏣꎁꃅꌠꉬ。ꈍꄮꑌꏓꂱꋍꏅꌠꊇꅉꈲꁧꃅꇫꑟꋒ、ꀧꌋꃅꋒ、ꀻꎆꋒꌠꌌꄈꌋꆀꇩꏤꌤꈁꃅꌠꄓꈌꌋꆀꑞꈌꃅꄉꌶ,ꏓꂱꀨꄜꉆꈉꁌꒉ,ꏓꂱꁧꀿꉌꊈꇤꅐꇁ,ꏓꂱꋍꑞꋌꐘꈲꁧꏦꀧ,ꐯꇯꌣꈚꌠꈝ꒜ꍬ,ꊿꐊꑷꃅꀻꎆꌠꊥꎆ,ꀻꎆꌠꆹꏓꂱꎁꃅꌠ、ꀻꎆꌠꆏꏓꂱꉘꇉꌠ、ꀻꎆꌠꊌꐨꆏꏓꂱꁳꐯꇯꈲꏣꊌꎻꌠꃅꇫꑟ。

  ——ꀋꎪꃅꐊꑷꋮꃅꄮꐪꊛꄉꀻꎆꉆꌠꌭꈬ。ꍏꇩꐛꐨꐧꋦꉪꏦꌤꑘꀑꐱꐛꃆꄐꉻꇬꈴꄉ,ꐊꑷꃅꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠꄹꎆ,ꐛꏀꈴꋈꄻꊨꊭꈁꐥꌠ、ꋍꑞꋌꁆꏯꃅꐮꋮꄮꌠꊥꎆ,ꒃꅐꐮꃆꂮꌋꆀꒃꅐꊋꃤ、ꄩꇴꏦꉻꌋꆀꎆꏣꅉ꒜ꐮꋮꄮꌠꊥꎆ。ꏟꈯꃅꒃꅐꀻꎆ、ꐥꐨꌣꈚ、ꒆꉻꉾꃪꌠꌧꑳꀻꎆꌠꈝ꒜ꍬ,ꅐꀦꏎꏸꃅꐙꌠ、ꋥꁕꉾꃪꃅꐙꌠꐧꋦꋈꄻ,ꐳꐨꌋꆀꐛꉻꊇꁧꈲꁧꏓꐊꐙꌠ、ꎆꏣꀻꎆꌠꌋꆀꊻꂷꅐꀦꋥꁕꐮꋮꄮꌠꃅꇫꑟꄉ,ꏓꂱꁳꒆꉻꋦꈭꉾꃪꌠꇬꐥꎻ,ꎆꏣꐧꋦꐥꍂꃅꊛꄉꀻꎆꌠꃅꇫꑟ。

  ——ꀋꎪꃅꉜꈴꇲꈴꌠꌭꈬ。ꍏꇩꐛꐨꐧꋦꉪꏦꌤꑘꐮꃆꂮꀉꒉꀊꂾꌠꎃꊒꃅꌧꐚꌠꌋꆀꋭꋽꃅꀞꄻꌠꂥꀘꌶ,ꇓꈓꇓꉈꀻꎆ、ꃄꁕꀻꎆ、ꎆꏣꐧꋦꀻꎆ、ꊿꌋꆀꋌꐛꋌꐙꐮꋮꄮꃅꀻꎆ、ꇩꈐꀻꎆꌠꌋꆀꉇꉻꏭꁉꃑꌠꉜꈴꇲꈴ,ꍏꑷꌋꆀꃅꄷꐮꃆꂮꉜꈴꇲꈴ,ꊨꏦꈲꁧꌋꆀꋍꉻꈲꁧ、ꄹꁆꈲꁧꌋꆀꉻꄜꈲꁧ、ꀋꃋꋋꇅꈲꁧꌋꆀꃆꏂꊂꑋꈲꁧꑠꉜꈴꇲꈴꄉ,ꋒꐯꋒꃅꋍꑞꋌꁁꏯꏣꀋꑌꐨꄕꊪꎼꇁ。ꇩꈐꇩꏹꄉꉻꀉꒉꑍꂷꌠꉜꈴꇲꈴ,ꑓꏮꋧꃅꉜꄉ,ꄐꇐꏤꁈꉪꏡꌠꊋꀥꇱ,ꇩꏹꃅꒊꃅꇁꀻꎆꐛꐈꌠꇬꈴꄉꀻꎆꌠꊜꋽꄮꒃꉇ、ꃨꆰꊋꋠꌠꏭꊝꇮꃅꊝꄉ,ꇩꏹꋦꈭꉾꃪꌠꄺꂡ。ꃅꇴꄉꉻꃅꏓꏲ、ꉜꈴꇲꈴꃅꄐꎖꌠꑌꃅ,ꉈꑴꃅꇴꄉꉻꐯꅑꇙꌠꌤꆿꀋꉬꀋꉆꌠ、ꉹꁌꈲꏣꌋꆀꐮꃆꂮꐥꌠꌤꃆꑓꅐꎑꑠꑌꒃꉇꌶ,ꊋꇤꄉꄹꎆ、ꀋꉬꀋꉆꌠꂵꅐ。

  ꃹꅼꃅꈆꑪꃅꀻꎆꌠꉜꐨꃄꌬꇫꑟꇬ,ꉪꊇꏭꇖꂟꌠꆏꈍꄮꑌ“ꈯꄜꋍꂷ、ꁧꀦꑍꏢ”ꌠꈛꏦꁧꀦꌭꈬꌶ。ꄈꅿꈛꏦꁧꀦꆹꄈꌋꆀꇩꏤꀑꇬꉬ,ꋋꆹꈆꑪꃅꀻꎆꌠꃅꇫꑟꌠꍔꍞꏦꀧꅍꉬ。ꎆꏣꋈꄻꌠꌌꈯꄜꃅꄉꌠꆹꇩꏤꄖꄑꌄꆣꌠꀋꂿꑘꐘꉬ,ꉪꄈ、ꉪꇩꏤꌣꈚꐞꄿꌠꌋꆀꎴꏲꑘꒃꌠꊇꅉꈉꐨꑌꉬ;ꅉꀨꏥꏦꇖꏢꌠꆹꇩꏤꋈꄻꌠꅉꀨꉬ,ꉪꄈ、ꉪꇩꏤꇫꋦꀻꎆꌠꍔꍞꅉ꒜ꑌꉬ;ꄺꀱꁉꃑꌠꆹꇩꏤꀉꇨꇁꌠꈝꂾꉬ,ꉪꄈ、ꉪꇩꏤꀻꎆꌠꊋꃤꇁꀦꉬ。ꏟꈯꃅꎆꏣꋈꄻꌠꌌꈯꄜꃅꄉꌠꌋꆀꅉꀨꏥꏦꇖꏢꌠ、ꄺꀱꁉꃑꌠꁧꀦꋋꑍꏢꌌꍏꇩꐛꐨꐧꋦꉪꏦꀻꎆꌠꇰꀋ꒜ꃅꃄꄻꅉꇬꄉꏓꋍꃱꃅꎻ,ꈍꄮꇬꑌꇫꇙꇫꑐꀋꉆ。

  ꃹꅼꃅꈆꑪꃅꀻꎆꌠꉜꐨꃄꌬꇫꑟꇬ,ꉪꊇꏭꇖꂟꌠꆏꏣꀋꑌꃅꐧꋦꉪꏦꐮꄮꐧꋦꋈꄻ。ꐧꋦꐮꄮꌠꆹꍏꇩꐛꐨꐧꋦꉪꏦꊇꅉꐛꊈꉬ。ꈆꑪꃅꀻꎆꌠꌋꆀꐧꋦꐮꄮꌠꆹꈏꇓꋍꃱꃅꐙꌠꉬ。ꈆꑪꃅꀻꎆꌠꀋꐥꑲꆏꐧꋦꐮꄮꌠꑌꀋꐥ,ꐧꋦꐮꄮꌠꀋꐥꇬꑌꈆꑪꃅꀻꎆꌠꃅꇫꑟꊋ。ꐧꋦꉪꏦꐮꄮꐧꋦꄺꑣꌠꆹꍏꇩꐛꐨꐧꋦꉪꏦꌤꑘꈴꎁꈁꉬꌠꇬꐊꈴꌐꌠꐩꋊꂿꃆꀊꎴꐘꉬ,ꋋꆹꀻꎆꌠꅉ꒜ꀂꏽꄉꎃꊒꃅꐧꋦꇬꋍꑞꋍꑵꐮꄙꌠꀞꄻꌠꐩꋊꈳꎂꌋꆀꐧꋦꐛꐨꉬ。ꀻꎆꌠꇬꈴꄉꐧꋦꐥꇐꁨꇐꁦꎆꇱ、ꀋꆏꃅꏓꂱꐥꐨꄻꃪꌶ,ꉈꑴꀻꎆꌠꇬꈴꄉꐧꋦꎃꊒꑗꐥꌠꏦꀧ、ꀋꆏꃅꐧꋦꐮꄮꌠꊥꎆꌶ。ꐧꋦꎃꊒꑗꐥꌠꃅꇫꑟꌠꆹꍏꇩꇭꍣꄈꊿꉉꅷꇁꇬꎷꌠꉬ,ꋋꆹꍏꇩꐛꐨꐧꋦꉪꏦꀻꎆꌠꂿꃆꀉꒉꀊꂾꌠꉬ。ꋯꁦꏦꏲ、ꎃꊒꑗꐥ、ꀋꎪꐮꄮ、ꉓꀌꅩꍅꌠ、ꑘꒃ꒾ꁨ、ꊾꌋꆀꋌꐛꋌꐙꄮꃅꐮꐊꌠꀑꐱꇖꐨꌋꆀꐯꇯꋈꄻ、ꐯꇯꈲꐥꌠꏥꏦꇬꈴꄉ,ꊋꇤꄉꏓꂱꀊꅰꃅꇫꉈꇬꌠ、ꀊꅰꃅꈛꎂꌠ、ꀊꅰꃅꀋꃋꐛꐨꐥꌠꈲꁧꃆꂮꂥꀘ,ꊋꇤꄉꏓꂱꋍꏅꌠꑞꄐꆏꑞꃅ、ꑞꊌꋭꌠꑞꊌꇈꄮꃅꐮꐊꌠꐛꐨꐛꇁꎻꄉ,ꀻꎆꌠꎁꃅꐧꋦꋦꈭꉾꃪꌠꇲꄻ。

  ꃹꅼꃅꈆꑪꃅꀻꎆꌠꉜꐨꃄꌬꇫꑟꇬ,ꉪꊇꏭꇖꂟꌠꆏꐪꊛꄉꃹꅼꃅꄺꀱꁉꃑ。ꄺꀱꏀꀺꌠꉌꊈꃄꌬꅷꇩꏲꍔꄻꌠꊨꊭꈁꐥꅉꑟ,ꋍꍈꑋꀋꇙꃅꏟꈯꃅꄺꀱꌠꃅꍜꍬꇬꎷ,ꄺꀱꏤꁈꈆꑪꃅꐙꐨꉀꐕ,ꄺꀱꏁꁈꋮꄮꃅꐙꐨꀉꇨꌶ。ꐧꋦꉪꏦꃷꎏꎆꏣꏦꉻꄻꐛꒆ,ꋍꑞꋍꁁꏯꏦꉻꄺꀱꏀꀺꌠꄹꎆ,ꇤꐳꃅꀋꂿꑘꁁꏯꌋꆀꀋꉬꀋꉆꌠꊨꊭꇬꄺꀱꌠꑭꁘꐕ,ꐊꑷꃅꁉꃑꌠꑟꐨꉀꐕ,ꊋꇤꄉꉓꀌꅩꍅꃅꐙꌠ、ꅐꑘꐨꀉꇨꌠ、ꀊꅰꃅꁉꃑꌠ、ꈆꑪꃅꀻꎆꌠꇬꈲꏣꐥꌠꏦꉻꉺꏦꄺꑣꄉ,ꍏꇩꐛꐨꐧꋦꉪꏦꀻꎆꌠꎁꃅꇘꊋꀉꇨꌠꌋꆀꏦꉻꏦꀧꅍꐥꎻꌶ。ꏟꈯꃅꏓꂱꐥꐨꄻꃪꌠꌌꎃꊒꃅꄺꀱꀻꎆꎍꐽꌠꐮꃆꂮꀞꄻꌠꏓꇱꅉꃅꄉ,ꄺꀱꌠꁳꈍꄮꑌꏓꂱꇫꉌꃹꇬ、ꇫꊋꁈꄏꇬꎷꎻ。

  ꃹꅼꃅꈆꑪꃅꀻꎆꌠꉜꐨꃄꌬꇫꑟꇬ,ꉪꊇꏭꇖꂟꌠꆏꃶꐚꃅꄈꋈꄻꌠꊋꀥꇱꌋꆀꄺꀱꌠꃅ。ꄈꌅꈌꌬꄉꇩꏤꄖꄑꌄꆣꌠꂿꃆꃅꌐꌠꉆꈉꀊꂥꅉꇬꉆꄉ,ꄈꌅꈌꌬꌠꊋꃤꉀꐕ、ꄈꂴꅑꐨꄝꏦꀋꊰꌋꆀꀻꎆꌠꆹ,ꌌꄉꈆꑪꃅꀻꎆꌠꏲꂠ、ꐧꋦꐮꄮꌠꊥꎆꌠꀂꏽꄉꉜꅐꇁ,ꌌꄉꍏꇩꈜꏁꄉꀻꎆꁨꆹ、ꀊꅰꃅꉾꃪꃅꏓꂱꋍꏅꌠꁧꀦꈲꁧꎁꃅꌠꌋꆀꃅꇫꑟꌠꀂꏽꄉꊨꄅꇈ,ꄈꅿꌤꃅꌠꌋꆀꄈꅿꋈꄻꌠꀊꅰꃅꈆꑪꃅꀻꎆꌠꇖꐨꇬꄉꄐꎻ,ꈆꑪꃅꀻꎆꌠꎁꃅꈬꈈꌠꍔꍞꌋꆀꎀꍹꏦꀧꌠꇲꁵꌶ。

  ꄈꑭꊂꐋꀨꊈꃅꐊꑷꃅꈆꑪꃅꀻꎆꌠꉜꐨꇬꈆꑪꐊꊈꌋꆀꉌꊈꃶꐚꌠꌧꋒꃅꄉ,ꈆꑪꃅꀻꎆꌠꉜꐨꃄꌬꇫꑟꌠꑴꐚꐨꌋꆀꀋꎪꐨꀉꇨꃅꁦꎆꇱ,ꊋꇤꄉꈆꑪꃅꀻꎆꌠꉜꐨꄉꀋꄐꀋꊒꌠꉪꇐꉪꉻꄺꀱ,ꊋꇤꄉꈆꑪꃅꀻꎆꌠꉜꐨꇬꁧꏖꌠꌋꆀꏢꑲꌠꌤꃆꑓꅐꎑꌠꂥꀘ,ꐧꋦꑭꊂꃅꀻꎆꌠꏣꀋꑌꐨꄐꌐꈻꌊꈆꑪꃅꀻꎆꌠꀂꏽꇁ,ꈆꑪꃅꀻꎆꌠꉜꐨꌫꄻꌊꎆꏣꐧꋦꋍꑞꋍꁁꏯꇬꃅꑟꈴꌐꌶ。

  ꇖ、ꐊꑷꃅꊼꇅꌣꈚꐧꋦꋈꄻꇬꉈꈽꌠꑞꅉꁻꌐꃅꇫꑟꇬꇖꐨꀊꏀꌠ

  ꉪꊇꆏ꒜ꀉꒉꊰꃘꃢꌠꏤꄉꌠꐊꑷꃅꊼꇅꌣꈚꐧꋦꋈꄻꌠꑞꅉꁻꌐꇬꉜꄉꑭꁘꏟꈯꀕꃅꐕꎼꆹꀐ,ꋌꊂꑌꐪꊛꄉꊋꇤꄉꉈꈽꇈ,ꑍꄙꆀꑍꊏꈎꑟꇬꆏꐊꑷꃅꊼꇅꌣꈚꐧꋦꄻꐛꌠꑞꅉꁻꌐꃅꇫꑟꌠꏦꀧꌶ。

  ꉪꊇꀋꎪꃅꇩꈐꇩꉈꃅꒊꃅꇁꀊꏀꃅꐛꐈꇁꌠꇬꄐꄻ,ꊿꋅꈁꐥꌠꏓꂱꀊꅰꃅꐥꌒꇁꌠꀊꏀꃅꉘꇉꐨꇬꈴꄉ,ꐧꋦꀻꎆꆹꐨꌋꆀꈳꏦꌧꋒꃅꄉ,ꏟꈯꃅꍏꇩꐛꐨꐧꋦꉪꏦꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠꅉꀨꑞꅉꁻꌐꌋꆀꅉꀨꏱꁈꏓꐛꌠꅉꀨꐱꀨꌭꈬ,꒜ꀉꒉꊰꃘꃢꌠꇬꏤꄻꄉꌠꐊꑷꃅꊼꇅꌣꈚꐧꋦꋈꄻꌠꑞꅉꁻꌐꅉ꒜ꀂꏽꄉꉪꇩꏤꀻꎆꌠꀂꏽꀊꏀꃅꇖꐨꀊꅰꃅꀊꂥꌠꄜꅐꇁ。

  ——ꀻꎆꋮꄮꐨꀉꇨꇁ,ꊋꇤꄉꎆꏣꉽꑌꉾꐲꑌꐳꃅꀻꎆꌠꃅꇫꑟ。ꀻꎆꄟꆹꏮꄉꊌꐨꀉꒉꃅꁨꎆ,ꐛꉻꄻꃪ、ꈲꐨꉀꐕ、ꃹꐨꊨꒊ、ꋦꈭꀧꌋꃅꌠꅉ꒜ꀂꏽꄉ,ꊾꂷꐽꏡꃅꇬꇩꈐꒃꅐꈀꁌꐨꑍꄙꆀꑍꊏꈎꑟꇬꆏꑍꄙꈎꄩꑍ꒞ꀱꌠꃅꇫꑟ。ꐧꋦꉪꏦꃷꎏꎆꏣꏦꉻꀊꅰꃅꄻꐛꒆ。ꑴꌅꏀꀺꊋꃤꄇꇖꀕꃅꉀꐕ,ꈆꑪꇮꇐꀻꎆꌠꆹꎆꏣꉀꎆꌠꏭꅐꌞꐨꀉꒉꃅꉀꎆꄉ,ꏀꀺꉹꌠꇩꏤꇬꐊꆹ。ꀀꊿꌬꈧꐨꎍꐽꃅꉀꐕꄉ,ꌬꈧ、ꎆꇱ、ꉇꅐꌠꋮꄮꈺꇙꌠꉀꎆꐛꐪꐛꇁ。ꇓꈓꇓꉈ、ꃄꁕꋮꄮꐮꇙꀻꎆꉺꏦꌋꆀꀨꄜꄐꊋꐤꅉꐛꃆꄐꉻꀑꐱꃅꏓꐛ。ꐧꋦꉪꏦꂿꑘꁡꇤꀊꏀꋈꄻꌠꀉꒉꃅꁨꆹꐨꃅꊌ。ꇓꈓꊻꂷꍆꁧꄇꇖꀕꃅꁦꎆ。

  ——ꐧꋦꉪꏦꋯꁦꍔꐯ,ꀊꅰꃅꉾꃪꃅꏓꂱꌅꈌꈲꁧꌋꆀꐧꋦꎃꊒꑗꐥꌠꏦꀧ。ꉻꊿꍔꍞꃅꈽꌠ꒾ꁨꃅꍔꐯ。ꏦꃤꇬꈴꄉꇩꏲꌠꅉꀨꄐꁈꃹꅼꃅꃅꇫꑟ,ꐧꋦꑭꊂꏦꄹꉪꉻꀒꁨꋍꁘꃅꀉꇨꇁ,ꏦꏲꍔꃚꋈꄻꌠꃅꐛꐨꀊꏀꃅꐥ。ꅉꂫꊐꌠꋯꁦꄹꏦꀊꅰꃅꄻꐛꒆ。ꍔꃚꀑꐱꄉꉻꁧꃤꃅꌠꇲꁵꊋꃤꄇꇖꀕꃅꁦꎆꇁ。

  ——ꊋꀥꇱꄉꁱꀕꋈꄻ,ꊿꋅꈁꐥꌠꌧꑳꊇꁧꄇꇖꀕꃅꉀꐕ。ꐧꋦꉪꏦꈯꄜꁌꐨꉻꑫꃹꅼꃅꊽꉌꂵꇬꃹ,ꉪꇐꑌꇐꃅꇏꉾꃪꌠꀒꁨꋍꁘꃅꍔꆙ。ꐧꋦꑭꊂꃅꉱꑷꌠꄉꉻꁱꀕꁧꃤꃅꉻꑫꀑꐱꃅꄻꐛ,ꁱꀕꅐꑘꇩꂱꎆꏣꍆꐨꄇꇖꀕꃅꉀꐕ、ꇩꏹꋓꅔꊋꃤꄇꇖꀕꃅꁦꎆꇁ,ꏓꂱꈉꄻꌠꇬꄉꄐꌠꁱꀕꅐꇐꀊꅰꃅꀉꑌꇁ。

  ——ꇤꐳꃅꐧꋦꌤꑘꀻꎆ,ꐊꑷꃅꏓꂱꐥꐨꄻꃪ。ꀋꃋꋋꄮꇩꂱ꒿ꂘꉻꑫꀊꅰꃅꄻꐛꒆ,ꐥꍂ꒿ꂘꉻꑫꀑꐱꃅꄻꐛ,ꉹꁌꃅꌌ꒿ꂘꐨꌋꆀꌧꊿꏀꀺꁱꂘꐨꄇꇖꀕꃅꐕꀊꂥ。ꐧꋦꃅꅍꊌꐨꀊꅰꃅꀉꑌ。ꇓꈓꇓꉈꀀꊿꃅꉱꑷꌠꐧꋦꏦꀧꉻꑫꀑꐱꃅꄻꄉ,ꊿꋍꂷꋑꀋꋒꀑꐱꃅꐥꐨꏦꀧꄉ。ꋭꋽ꒾ꁨꌠꃅꊌꐨꁷꎸꐛꄟꀑꐱꃅꄻꐛ,ꊌꐨꐧꀠꏠꌠꃷꁨꀉꑌꃅꍆ,ꌢꎭꇨꌠꐛꐨꀑꐱꃅꋊꑣꇧꎭ。ꈀꄸꑌꀑꐱꃅꆅꉚꁦꎴꁧꃤꊌ。ꐧꋦꏱꄻꉻꑫꀊꅰꃅꄺꑣꐛꒆ。

  ——ꒆꉻꌧꑳꋈꄻ,ꀑꐱꃅꊋꀦꅐꇐꏎꏸꌠꌋꆀꒆꉻꋦꈭꀧꌋꃅꌠꅐꑘꐛꉻ、ꉀꎆꄟ、ꌬꈧꐛꄟꄻꐛ。ꀰꏮꎆꏣꄉꈁꊼꇅꀉꒉꌠꐛꄉ,ꀱꉈꑴꅐꇁꉆꌠꊋꀦꍆꐨꄇꇖꀕꃅꐕꀊꂥ。ꍍꇐꃑꅐꀋꉬꀋꉆꌠꆹꌌꇿꋌꐥꃅꋎꍅꄉ,ꒆꉻꋦꈭꊇꁧꆹꄻꃪꀐ。ꒆꉻꌧꑳꉪꉻꆏꐧꋦꑭꊂꃅꈫꈈꃅꉌꂵꇬꑌꋒꌐ。

  ꅑꅸꑍꄙꆀꑍꊏꈎꑟꇈꐊꑷꃅꊼꇅꌣꈚꐧꋦꋈꄻꌠꑞꅉꁻꌐꃅꇫꑟꄮꇬꆏ,ꉪꊇꐩꋊꀊꎴꌠꌧꑳꇩꏤꀉꆹꌠꌋꆀꀻꎆꇰꌠꐧꋦꉪꏦꇩꏤꀉꒉꋋꂷꆹ,ꇮꑘꈴꌠꀑꐱꃅꃅꇫꑟ、ꏓꇱꇩꊋꄇꇖꀕꃅꁦꎆ、ꇩꈐꃷꎏꉻꄜꄉꈁꉆꈉꆏꋧꃅꂴꉆꌠꇩꏤꐛ,ꏓꂱꌣꈚꐨ꒞ꈴꃅꉀꐕ、ꐥꐨꊇꁧꄇꇖꀕꃅꄻꃪ、ꒆꉻꋦꈭꉾꃪꌠꇩꏤꂷꐛ,ꏓꂱꀊꅰꃅꋒꃅꋯꁦꌅꈌꈲꁧꐥ、ꀊꅰꃅꌧꑳꊇꁧꀊꂥꃅꐥꌠꌋꆀꉌꊈꉪꐨꐥꌠꇩꏤꂷꐛ,ꋍꑞꋍꁁꏯꄹꏦꀊꅰꃅꄻꐛꒆ、ꐧꋦꀊꅰꃅꌄꆣꍄꑐꇈꉈꑴꑘꒃꋯꑌꌠꇩꏤꂷꐛ,ꉇꉻꏭꀊꅰꃅꁉꃑ、ꀊꅰꃅꉂꑟꅑꌠ、ꐧꇁꃰꊿꌧꑳꎁꃅꑆꊋꀊꅰꃅꀉꒉꃅꅐꌞꄎꌠꇩꏤꂷꐛ。

  ꋌꊂꉬꈎꌠꆹꐊꑷꃅꊼꇅꌣꈚꐧꋦꋈꄻꌠꀋꉬꀋꉆꊬꌠꉬ。ꉪꊇꆏꀋꎪꃅꉌꊋꑌꄉ,ꀂꏾꈎꄉꎬꅧꃅꃅ,ꐊꑷꃅꊻꂷꊰꎖꂡꌠꃅꈲꌠꑞꅉꀊꅰꃅꀊꂥꌠꊼꇅꌣꈚꐧꋦꄻꐛꌠꎁꃅꀊꅰꃅꈫꈈꌠꅉ꒜ꌆꄻ。
ꁰꒌ




  • 特别鸣谢
    中国民族语文翻译局彝文翻译室