ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(1)

——ꍏꇩꇭꍣꄈ꒜ꀉꒉꊰꏁꃢꌠꇩꏤꑭꊂꁧꎁ꒜ꈿꅉꇬꄉꅇꄜꌠ
(2007ꈓ10ꆨ15ꑍ)

ꃛꏢꄧ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ(1)
  ꐋꀨꊈ:

  ꀋꃋ,ꉢꊰꃘꃢꌠꍏꑷꊈꑼꉼꎁꃅ꒜ꀉꒉꈿꅉꏭꅇꄜꂿ。

  ꍏꇩꇭꍣꄈꊰꏁꃢꌠꇩꏤꑭꊂꁧꎁ꒜ꀉꒉꈿꌠꆹ,ꉪꇩꏤꄺꀱꀻꎆꀋꉬꀋꉆꊬꌠꇬꄉꈿꌠꀋꂿꑘꐯꀋꂿꑘꌠ꒜ꀉꒉꑠꃢꉬ。꒜ꀉꒉꈿꌠꄜꀨꆏ:ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꃹꅼꃅꈆꑪꃅꀻꎆꌠꉜꐨꃅꈴꌬꈴ,ꐪꊛꄉꉪꇐꁌꄝ,ꏟꈯꃅꄺꀱꁉꃑꌠꌭꈬ,ꈆꑪꃅꀻꎆꌠꄹꇙ,ꐧꋦꐮꄮꌠꊥꎆ,ꐊꑷꃅꊼꇅꌣꈚꐧꋦꋈꄻꌠꊋꐛꐨꀊꏀꌠꂵꊌꌠꎁꃅꉈꈽ。

  ꍏꇩꐛꐨꐧꋦꉪꏦꁈꁧꇰꀋ꒜ꌠꆹ,ꀋꃋꋋꄮꍏꇩꀻꎆꁨꆹꌠꁈꁧꉬ,ꄈꑭꊂꇩꏤꑭꊂꊿꋅꈁꐥꌠꏓꂱꋯꑌꉈꈽꌠꁈꁧꉬ。ꉪꇐꁌꄝꌠꆹꍏꇩꐛꐨꐧꋦꉪꏦꀻꎆꇬꏡꁈꁌꇐꈤꀉꇨꑵꉬ,ꄺꀱꁉꃑꌠꆹꍏꇩꐛꐨꐧꋦꉪꏦꀻꎆꌠꇘꊋꀉꇨꌠꉬ,ꈆꑪꃅꀻꎆ、ꐧꋦꐮꄮꌠꆹꍏꇩꐛꐨꐧꋦꉪꏦꀻꎆꌠꅉꀨꈉꐨꉬ,ꐊꑷꃅꊼꇅꌣꈚꐧꋦꋈꄻꌠꆹꅑꅸꑍꄙꆀꑍꊏꈎꑟꌠꄈꌋꆀꇩꏤꉈꈽꌠꑞꅉꁻꌐꉬ,ꋋꆹꇩꏤꑭꊂꊿꋅꈁꐥꌠꏓꂱꊇꅉꈲꏣꑞꅉꐛꅉꉬ。

  ꀋꃋꋋꄮꋧꃅꆹꇬꊎꀊꐯꃅꃹꅼꃅꐛꐈꇰ,ꀋꃋꋋꄮꍏꇩꑌꇬꊎꀊꐯꃅꃹꅼꃅꍬꄻꇰ。ꊜꋽꄮꆏꋌ꒜ꑠꐥꀋꋻ,ꊋꋠꐨꑌꋌ꒜ꑠꐥꀋꋻ,ꊜꋽꌠꆏꊋꋠꐨꒊꀋꋌ。ꄈꑭꊂꆏꈍꃅꑌꀋꎪꀋꑴꃅꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ,ꏓꂱꏃꂠꌊꐩꋊꄓꈌꀊꏀꌠꇬꄉꃅꅷꁧ,ꄐꇐꏤꁈꀋꂿꑘꌠꊜꋽꊬꌠꒃꋒ、ꌬꋒꃅꄉ,ꇯꍝꌠꎹꃶꐚꌠꃅ,ꋦꄉꀬꃅꁨꆹ,ꐪꊛꄉꐊꑷꃅꊼꇅꌣꈚꐧꋦꋈꄻ、ꐳꃅꐧꋦꉪꏦꐛꏀꈴꌠꄹꎆ,ꃅꋊꄻꁵꄉꌠꃅꎁꋍꉎꀋꐥꌠꃅꇫꑟ。

  ꋍ、ꋌ꒜ꉬꈎꌠꃅꐨ

  ꒜ꀉꒉꊰꃘꃢꌠꈿꊂꅑꅸꇁꌠꉬꈎꌠꆹꎃꐚꌠꉬꈎꀋꉬ。ꌼꇪꐛꐈꃛꇨꇬꎷꌠꇩꏹꋦꈭꌋꆀꃣꇖꊋꋠꇨꌠꄺꀱꀻꎆꂿꃆꂾꆏ,ꄈꆹꇩꏤꑭꊂꊿꋅꈁꐥꌠꏓꂱꏃꂠꌊ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꁈꁧꇰꀋ꒜ꌠꀊꂥꃅꐕꄉ,ꋍꑞꋍꑵꊋꋠꌠꌋꆀꐔꈔꌠꄩꊋꄉ,ꍏꇩꐛꐨꐧꋦꉪꏦꌤꑘꐛꐨꀊꏀꌠꀹꄻꎼꇁꀐ,ꂷꇻꌦꉪꏦꌌꍏꇩꐛꈴꌠꑞꅉꐛꅉꀊꏀꌠꄹꀺꎼꇁꀐ。

  ꒜ꀉꒉꊰꃘꃢꌠꈿꇬ“ꌕꑵꁧꎁ”ꉪꇐꀋꂿꑘꌠꄐꇺꉆꈉꏤꄻꄉ,ꐊꑷꃅꊼꇅꌣꈚꐧꋦꋈꄻꌠꄐꇐꏤꁈꏤꄻꄉꀐ。꒜ꀉꒉꊰꃘꃢꌠꉌꊈꃄꌬꈴꂿꄷꄉ,ꍏꑷꆏꐊꈴ꒜ꏃꃢꈿꇈ,ꂱꄷꄉꃹꅼꃅꏲꉻꄺꀱ、ꐧꋦꉪꏦꃷꎏꎆꏣꏦꉻꄻꃪ、ꊋꀥꇱꄉꄈꌅꈌꌬꊋꃤꋈꄻ、“ꊯꊪꉬ”ꄐꎖꏤꄻ、ꐧꋦꉪꏦꐮꄮꐧꋦꋈꄻꑠꃅꇴꄉꉻꀉꒉꌠꃆꂮꐥꌠꌤꃆꀉꒉꀊꂾꌠꌌꏤꄻꌋꆀꄐꇺ,ꈆꑪꃅꀻꎆꌠꉜꐨꑠꄐꇐꏤꁈꉪꇐꀉꒉꀊꂾꌠꄜꅐꇁꄷꀋꁧꌌꃅꈴꌬꈴꄉ,ꄈꌋꆀꇩꏤꌤꃅꌠꄹꇙꌊꊌꐨꀉꒉꀊꂾꀊꏀꌠꐥꀐ。

  ꎆꏣꊋꃤꀉꒉꃅꉀꐕ。ꎆꏣꎍꐽꐳꃅꀻꎆꇬꎷ,ꇩꈐꒃꅐꈁꊌꁌꐨꋍꈓꌠꐽꏡꃅꄉꇬꉐꁧꋊꊯꁧꈋꉐꉀꎆ,ꎆꏣꈲꁧꑓꀠꀕꃅꉀꐕ,ꏱꎆꊌꐨꋍꈓꋑꀋꋒꄇꇖꀕꃅꁦꎆ,ꎊꇐꁌꏤꀑꐱꃅꇬꎍꐽ。ꐧꋦꉪꏦꂿꑘꁡꇤꀊꏀꋈꄻꌠꏟꈯꃅꄹꎆ,ꃄꁕꀻꎆꋮꄮꐨꀉꇨꃅꁦꎆꇁ。ꏀꀺꉹꌠꇩꏤꋈꄻꌠꁨꎆꐨꉾꃅꐙ,ꑴꌅꏀꀺꄐꊋꊼꇅꀉꒉꃅꉀꐕ。ꊋꀦ、ꈭꈜ、ꅇꈴꌗꑠꅉ꒜ꉁꈾꌋꆀꋉꃆꀨꄉꋈꄻꌠꊌꐨꈲꁧꄇꇖꀕ。ꊿꑌꃅꃴꐚꌠꊋꐛꃅꃅꇫꑟ。ꊋꀦꅐꇐꏎꏸꌠꌋꆀꒆꉻꋦꈭꀧꌋꃅꌠꀊꏀꃅꀻꎆꐨꐥ。“ꊯꉬ”ꎖꄎꌠꊋꐛꃅꃅꌐ,“ꊯꊪꉬ”ꄐꎖꄉꌠꁣꀋꐥꃅꃅꅷꆹꇰ。

  ꄺꀱꁉꃑꌠꊌꐨꀉꒉꀊꂾꃅꂵꅐ。ꂿꑘꁡꇤꏓꇱꄺꀱꌠꋍꁘꋍꁘꃅꃹꅼ,ꂿꑘꇗꏸ、ꆫꑘꇗꏸ、ꐋꀋꌡꅐꇐꇗꏸꋋꈨꃅꇤꇧꎭꌐ,ꂿꑘꄏꐓꂿꑘꈲꁵꏱꁈꀋꆏꃅꊋꀥꇱ。ꇩꁨꁨꇐꏲꂠꏦꉻ、ꇩꁨꎆꏂꑘꌋꆀꎆꒉꎆꇁ、ꏱꎆꇗꏸ、ꎆꇱ、ꁌꏤ、ꈆꑪꇮꇐꁁꏯꑠꄺꀱꌠꊌꐨꀉꒉꀊꂾꃅꀻꎆ。ꉻꁨꏦꎆꏣꀋꉬꌠꀒꁨꋍꁘꃅꀻꎆ。ꃷꎏꉻꑫꀋꆏꃅꄻꐛꒆ,ꉻꒉꐽꋊꐪꊛꄉꄻꃪ,ꍔꃚꌅꊋꐳꃅꏭꄻꇰ。ꈏꃹꉇꅐꈁꉬꃷꁨꀉꒉꃅꁦꎆ,“ꉇꅐꁧ”ꌠꄐꇐꏤꁈꃄꌬꌠꑭꁘꏟꈯꃅꐕꎼꆹ,ꁉꃑꉹꌠꎆꏣꀊꏀꑠꊭꇬꃹꆹꀐ。

  ꏓꂱꐥꐨꄇꇖꀕꃅꄻꃪ。ꇓꈓꇓꉈꀀꊿꊌꐨꊼꇅꀉꒉꃅꁦꎆ,ꑱꁯꁨꇐꑌꉀꎆꌐ。ꇓꈓꇓꉈꀀꊿꐥꐨꀁꂥꇊꀁꂥꌠꏦꀧꄹꏦꀑꐱꃅꄻꐛ,ꌢꎭꊻꂷꅉꀨꐥꐨꌌꏦꀧꄉꀐ。ꀀꊿꌬꈧꐛꉻꃪꈴ,ꈚꋠꀀꈴꌬꌠꑠꑞꅉꀋꆏꃅꉀꐕ,ꊌꋭꌠꋍꏅꁧꃤꃅꌠꄇꇖꀕꃅꀉꇨꇁ。

  ꋯꁦꏦꄹꋈꄻꌠꀻꎆꐨꀊꏀꃅꐥ。ꍔꍞꏦꉻꄺꀱꌠꎍꐽꃅꄹꎆ。ꏓꂱꁧꎁ꒜ꀉꒉꈿꄹꏦ、ꍏꇩꇭꍣꄈꏲꂠꌠꄈꀉꑌꂷꃅꇷꃅꌠꌋꆀꍔꍞꋮꒉꄹꏦ、ꊿꋅꃄꁕꊨꏦꏲꄹꏦꀋꆏꃅꄻꃪ,ꅉꂫꊐꌠꋯꁦꍄꑐꊋꃤꀉꇨꇁ。ꃰꊿꌅꈌꌤꑘꁣꀋꐥꃅꀻꎆ。ꇩꉂꊋꏓꋍꃱꃅꌠꀻꎆꌊꀉꇨꇁ。ꍏꇩꐛꐨꐧꋦꉪꏦꏦꃤꉻꑫꀑꐱꃅꄻꐛ,ꏦꈴꇩꏲꅉꀨꄐꇐꏤꁈꇯꍝꃅꈴꌬꈴ。ꏲꑘꏱꄻꏦꉻ、ꏦꌬꏦꉻꄺꀱꌠꀋꆏꃅꃹꅼ。

  ꁱꀕꋈꄻꌠꐛꐨꀊꏀꌠꀺꄻ。ꐧꋦꉪꏦꈯꄜꁌꐨꉻꑫꋈꄻꌠꏟꈯꃅꄹꎆ,ꂷꇻꌦꉪꏦꌧꇗꎥꃪꌠꌋꆀꋈꄻꋉꃆꊌꐨꈲꁧꄇꇖꀕ。ꉪꇐꑌꇐꋈꄻꌠꀊꐯꃅꍔꂵ,ꐧꋦꑭꊂꌧꑳꑟꐨꀒꁨꋍꁘꃅꉀꐕ。ꁱꀕꏦꉻꄺꀱꌠꊌꐨꀋꂿꑘꃅꁨꎆ,ꁱꀕꌤꑘꌋꆀꁱꀕꅐꑘꐳꃅꀻꎆ,ꏓꂱꉌꊈꁱꀕꐥꐨꀊꅰꃅꀉꑌꇁ。ꉹꁌꑭꊂꃅꇭꀧꄜꎟꌠꌋꆀꋓꈿꈯꎟꌠꊌꐨꀊꏀꃅꐥ。

  ꐧꋦꋈꄻꌠꐊꑷꃅꍔꂵ。ꋍꑞꋍꊐꌠꂘꑘꐳꃅꀻꎆ,ꂿꑘꁡꇤꋕꋦꂘꑘꌶꁌꀋꁵꌠꐊꑷꃅꃅꇫꑟ。ꃅꑘꊌꄉꈁꋍꑍꋍ꒿ꃅꍔꐯꇁ。ꐧꋦꏦꀧꉻꑫꋈꄻꌠꀒꁨꋍꁘꃅꊋꀥꇱ。ꃏꄅꆅꄘꍅꌠꊋꐛꐨꀉꒉꃅꐥ,ꋍꏅꁦꎴꆄꄻꉻꑫꌋꆀꅉꀨꆅꉁꁧꃤꃅꌠꀋꆏꃅꄻꐛꒆ,ꏓꂱꇭꀧꂄꌠꑞꅉꀋꆏꃅꉀꐕ。ꐧꋦꏱꄻꌠꋍꁘꋍꁘꃅꄻꃪ,ꐧꋦꃅꇴꄉꉻꀉꒉꌠꎍꐽ,ꏓꂱꀀꌒꃅꏾ。

  ꇩꐏꌋꆀꂽꋈꄻꌠꐩꋊꃅꐙꌠꊌꐨꐥ。ꍏꇩꐛꐨꂽꌤꍬꄻꌠꐳꃅꄹꎆ,ꂽꁥꌠꃷꁨꑍꊏꃪꀁꋌꊨꌠꂿꃆꁣꀋꐥꃅꃅꌐ,ꂽꇬꇝꂱꈴ、ꐛꏀꈴ、ꑌꐚꈴꃅꋈꄻꌠꐊꑷꃅꊋꀥꇱ,ꃅꋊꀊꏀꑞꅉꀊꏀꌠꐩꋊꃅꎁꃄꌬꄐꊋꄇꇖꀕꃅꐕꀊꂥꀐ。

  ꇤꉪꌤꃅꌠꌋꆀꄠꃪꏭꌤꃅꌠꀒꁨꋍꁘꃅꊋꀥꇱ。ꑣꇤ、ꉪꂱꌄꆣꎍꐽꇬꎷ,ꅔ꒜ꌋꆀꎆꏣꃼꇇꐮꃆꂮꀊꅰꃅꐮꐞꀋꉆꇁ。꒺ꑍꋮꍔꄈꐮꎻꈴꌠꊋꐛꃅꇬꄉꃄꇰ,ꊿꐮꎻꈴꌠꌋꆀꎆꏣꁱꀕꐮꎻꈴꌠꑟꅉꀊꏀꌠꇬꑟ。ꇩꏤꁷꐞꏭꁏꏦꃤꏤꄻꄉ,ꏟꈯꃅꇩꏤꌅꀨꌋꆀꏲꄸꐛꒆꌠꐏꁇ。

  ꋍꁁꏯꋑꀋꋒꃅꉇꉻꑌꑲꌠꊌꐨꀉꒉꃅꁨꎆ。ꄂꋦꑴꌅꌠꄮꐽꉇꉻꑌꑲꏱꁈꌭꈬ,ꋍꑞꋍꐘꉇꉻꑌꑲꌤꃅꌠꏣꀋꑌꃅꍔꂵ,ꇩꏤꈧꌠꌋꆀꒈꇁꇷꃅꌠꀊꐯꃅꊋꀥꇱ,ꇩꏹꌤꃆꇬꋈꄻꐨꀋꂿꑘꌠꂿꄐꋊꇤꅐꇁꄉ,ꐊꑷꃅꊼꇅꌣꈚꐧꋦꋈꄻꌠꎁꃅꉾꃪꌠꇩꏹꋦꈭꅔꊊꄉꀐ。

  ꄈꅿꋈꄻꇬꇰꀋ꒜ꌠꋉꃆꀊꏀꌠꏟꈯꃅꄹꎆ。ꄈꅿꌅꈌꌬꊋꃤꋈꄻꌠꌋꆀꂴꅑꐨꋈꄻꌠꃹꅼꃅꃄꇰ。ꌧꇗꏀꀺꌠꌋꆀꌧꇗꂘꄻꌠꊌꐨꈲꁧꀉꇨꃅꐥ。ꇭꍣꄈꂴꅑꐨꐥꇬꎷꌠ꒿ꂘꃅꈧꌠꊌꐨꀉꒉꀊꂾꃅꐥ。ꄈꈏꇓꋯꁦꀋꆏꃅꍔꐯꇁ。ꏲꌋꁥꌠꌋꆀꇥꀯꁥꌠꂘꄻꌠꀊꅰꃅꇥꀯꂘꄻꁰꍋꌠꀻꎆꐨꀋꂿꑘꃅꐥ,ꌧꊿꌤꃅꌠꀒꁨꋍꁘꃅꊋꀥꇱ,ꇥꀯꊿꌤꄹꏦꄺꀱꌠꌋꆀꎀꍹꄹꏦꏀꀺꌠꀋꆏꃅꃹꅼ。ꄈꃅꇏꐙꎴꋈꄻꌠꌋꆀꍹꈔꏭꁏꈽꌠꊌꐨꈲꁧꄇꇖꀕ。

  ꊌꐨꉜꄉꈭꐨ,ꉈꑴꍝꐚꃅꅉꐚꌶꌠꆏ,ꉪꊇꌤꃅꌠꌋꆀꏓꂱꉘꇉꌠꇬꍣꐨꀉꒉꃅꐥꑴꌦ,ꀒꁨꆸꅉꇬꊋꋠꌠꌋꆀꌤꃆꑌꌐꀋꉆꃅꊝꇁꑴꌦ,ꑓꅐꎑꌠꆏ:ꎆꏣꉀꎆꅉꇬꅐꀦꋦꈭꃹꐨꀉꒉꇨ;ꇓꈓꇓꉈ、ꃄꁕ、ꎆꏣꐧꋦꀻꎆꌠꄡꇗꐮꆽꏣꃅꀋꐛ;ꂿꑘꎍꐽꃅꀻꎆꌠꌋꆀꂿꑘꊿꊛꄉꊌꐨꁦꎆꇬꊋꋠꐨꀉꒉꇨ;ꑘꃅꃅꅍꊌ、ꐧꋦꏦꀧ、ꊌꐨꁷꄻ、ꂘꑘꁦꎴꆄꄻ、ꀀꊿꀀꑳ、ꋬꂻꒃꅐ、ꏦꌬꌠꌋꆀꐧꋦꋬꂻꏲꂠꌠꁆꏯꑠꉹꁌꑴꅉꃆꂮꇬꑌꑲꎍꌠꌤꃆꄡꇗꊼꇅꀉꑌꃅꐥꑴꌦ,ꊌꐨꀁꂥꌠꉹꁌꄹꁆꐥꐨꊼꇅꊋꋠꑴꌦ;ꉪꇐꑌꇐꋈꄻꌠꌌꊋꀥꇱꄻꅐꑴꌦ;ꄈꅿꌅꈌꌬꊋꃤꆹꃅꒊꃅꇁꀊꏀꂿꃆꀊꏀꌠꌋꆀꐮꄉꄐꃅꐙꀋꌐꑴꌦ,ꄺꀱꀻꎆꎍꐽꇬꌤꃆꃶꐚꌠꀉꒉꀊꂾꑠꈨꇬꍤꄻꎥꃪꌠꃹꅼꃅꀋꐛ;ꅉꂫꊐꌠꄈꎀꍹꋍꈨꋋꈨꊋꁧꐯꀋꉜ;ꄈꑼꇥꀯꀁꑌꄹꁆꃅꇏꀋꎃꀋꊒ,ꇶꏦꉪꏦ、ꇛꌺꉪꏦꌤꃆꊼꇅꑓꅐꎑꎍ,꒬ꑷꂃꈿ、ꏣꑌꍹꈔꐛꐪꄡꇗꊼꇅꀉꆈꃅꐙ。ꉪꊇꆏꌤꃆꋋꈨꀉꇨꃅꉜꁨꄉ,ꐪꊛꄉꎔꎗꃅꌌꂥꀘꇧꎭꌶ。

  ꏓꄉꉉꎼꇁꇬꆏ,ꋋꉬꈎꆹ,ꄺꀱꁉꃑꌠꌋꆀꐊꑷꃅꊼꇅꌣꈚꐧꋦꋈꄻꌠꀉꒉꀊꂾꃅꀻꎆꐨꐥꌠꉬꈎꉬ,ꉪꇩꏤꏓꇱꇩꊋꀉꒉꃅꉀꐕꌠꌋꆀꏓꂱꀊꅰꃅꃶꐚꈲꁧꊌꌠꉬꈎꉬ,ꉪꇩꏤꇩꏹꉆꈉꌋꆀꑌꑲꐨꄇꇖꀕꃅꉀꐕꌠꉬꈎꉬ,ꄈꅿꀹꄻꊋꃤ、ꏓꋧꊋꃤ、ꌉꈿꊋꃤꄇꇖꀕꃅꀉꇨꇁꌠꌋꆀꄈꑭꊂꇩꏤꑭꊂꊿꋅꈁꐥꌠꏓꂱꀊꅰꃅꑖꑟꃅꐮꋯꑌꌠꉬꈎꉬ。ꃄꄻꅉꇬꄉꋒꐯꋒꃅꉜꅐꇁꌠꆏ,꒜ꀉꒉꊰꃘꃢꌠꌋꆀ꒜ꀉꒉꊰꃘꃢꌠꈿꊂꅑꅸꇁꌠꍏꑷꈁꏤꈀꄻꅐꇁꌠꋍꑞꋍꐘꀉꒉꀊꂾꌠꏱꁈꏤꁈꆹꉬꇮꃅꎃꊒꌐꌠꉬ。

  ꉬꈎꅑꅸꇁꌠꊌꐨꆹ,ꄈꑭꊂꇩꏤꑭꊂꊿꋅꈁꐥꌠꏓꂱꃅꐯꇯꉈꈽꄉꊌꅜꌠꉬ。ꉢꍏꇭꍏꑷꎁꃅ,ꇩꏤꑭꊂꊿꋅꈁꐥꌠꏓꂱꏭ,ꋯꁦꄈꀾꈁꐥꌠ、ꏓꂱꏓꉻꌋꆀꋍꑞꋍꁆꏯꇩꉂꂒꋦꊿꈧꌠꏭ, ꑣꇤꇣꋲꏱꅉꐎꃺꑌ、ꉪꂱꇣꋲꏱꅉꐎꃺꑌ、ꄠꃪꃺꑌꌋꆀꇩꉈꀀꌠꃺꑌꋍꏅꌠꏭ,ꍏꇩꐛꏀꈴꋈꄻꌠꇬꈀꉈꇬꌠꌋꆀꊋꁈꄏꌠꇩꏤꈁꐥꌠꐋꀨꊈꏭ,ꇬꀖꌌꀖꄉꈀꎭꀕꀐ!

  ꑍ、ꄺꀱꁉꃑꌠꇬꇰꀋ꒜ꐩꋊꈴꎁ

  ꉪꊇꆹꄺꀱꁉꃑꃅꐎꌕꊰꈎꈭꏝꐛꇁꂯꀐ。ꋍꄙꈬꉐꏃꊰꉆꈓ,ꉪꄈꆹꐩꋊꈻꇐꀉꒉꃅꐥꌠ꒜ꊯꊪꈭꌕꃢꐊꈴꃅꈿꄉ,ꄺꀱꁉꃑꌠꐩꋊꀊꏀꊬꌠꇬꄉꃅꀐ。ꀊꋨꄮꇬꅑꅸꇁꌠ,ꍏꇩꇭꍣꄈꊾꌋꆀꍏꇩꏓꂱꆹꀒꁨꉜꄉꆹꇬꎷꌠꁨꂵꉌꊈꌋꆀꒈꂃꒊꆱꄓꃅꄓꌠꏀꀺꌠꃄꄻꄉ,ꍏꉸꊿꋅꑴꇨꀋꆏ、ꊋꇨꁨꆹꀊꏀꌠꐩꋊ꒿ꇐꏂꀨꒉꇂꎔꌠꁱꎼꇁꀐ,ꍏꇩꏓꂱꐛꑊ、ꐧꋦꉪꏦꍏꇩꐛꑊ、ꍏꇩꇭꍣꄈꐛꑊꆹꐩꋊꐨꐥꃅꐛꐈꀐ。

  ꄺꀱꁉꃑꌠꆹꄈꃅꋊꀊꏀꋎꌠꇎꏦꇂꃴꄉꏓꂱꏃꂠꌌꀊꏀꌠꇰꀋ꒜ꌠꇝꂱꃅꌠ,ꑞꅉꁻꌐꆏꐧꋦꒃꅐꊋꃤꁌꄝꌋꆀꀻꎆ,ꇩꏤꐛꏀꈴꌠꃅꇫꑟ,ꍏꇩꏓꂱꁳꌣꈚꇁꎻ,ꇰꀋ꒜ꌠꍏꉸꊿꋅꄖꄑꍄꑐꇁꎻꂿꄷꌠꉬ;ꉪꇩꏤꐧꋦꉪꏦꄹꏦꑴꅉꌌꐛꒆꌠꌋꆀꀻꎆꌠꇬꄹꆷꁨꆹ,ꐧꋦꉪꏦꍄꑐꊋꃤꀊꏀꌠꐥꇁ,ꍏꇩꐛꐨꐧꋦꉪꏦꋈꄻꌠꌋꆀꀻꎆꇁꎻꂿꄷꌠꉬ;ꀋꃋꋋꄮꍏꇩꀻꎆꀒꁨꆹꌠꏃꂠꌠꇬꄉꄈꋈꄻꌠꊋꀥꇱꌋꆀꄺꀱꀻꎆ,ꄈꂴꅑꐨꐥꇬꎷꌋꆀꀻꎆꄉ,ꄈꈍꄮꑌꃅꋊꂴꆽꅑꆹꇬꎷꌠꄉꀧꄉꎻꂿꄷꌠꉬ。

  ꉪꊇꐥꋊꐥꍂꃅꎺꄉꌶ,ꄺꀱꁉꃑꌠꇰꀋ꒜ꌠꌤꑘꆹ,ꐋꀨ꒜꒾ꄏꈯꄜꃅꄉꌠꄈꅿꋍꋏꌠꍏꑷꏲꌋꁥꌠ꒜꒾ꄏꉪꇐꀹꄻꄉ,ꄈꑭꊂꇩꏤꑭꊂꊿꋅꈁꐥꌠꏓꂱꏃꂠꌌꍏꇩꀊꏀꋈꄻ、ꐧꋦꉪꏦꇝꂱꌋꆀꋈꄻꇰꀋ꒜ꌠꊌꐨꐥꌠꌋꆀꎬꅧꃅꐧꋦꉪꏦꋈꄻꈳꏦꎹꈹꄉꎖꋪꁌꇐꈤꌠꊌꌠꅉ꒜ꇬꄉꃅꌠ。ꋯꁦꉪꏦꀊꏀꇝꂱꌠꊋꐛ,ꐧꋦꉪꏦꅉꀨꄹꏦꋈꄻꐛꄉ,ꀋꃋꋋꄮꍏꇩꈀꀻꎆꁨꆹꌠꎁꃅꁧꀦꍔꍞꇎꏦꌋꆀꄹꏦꅉ꒜ꌆꄻꄉꀐ。

  ꉪꊇꐥꋊꐥꍂꃅꎺꄉꌶ,ꄺꀱꁉꃑꌠꇰꀋ꒜ꌠꌤꑘꆹ,ꐋꀨꄓꑦꀻꈯꄜꃅꄉꌠꄈꅿꑍꋏꌠꍏꑷꏲꌋꁥꌠꄈꑭꊂꇩꏤꑭꊂꊿꋅꈁꐥꌠꏓꂱꏃꂠꄉꀹꄻꄉꌠꉬ。ꊰꈎ“ꁱꀕꀉꒉꃅꇝꂱ”ꃅꄉꊋꋠꐨꂾ,ꄈꅿꑍꋏꌠꍏꑷꏲꌋꁥꌠꀋꎪꃅꉪꇐꁌꄝ、ꑞꉬꌠꑞꃅꄉ,ꀉꒉꀊꂾꌠꍔꍞꀬꐨꌋꆀꌧꇗꀬꐨꌌꄉ,ꈆꑪꃅꐋꀨ꒜꒾ꄏꌋꆀ꒜꒾ꄏꉪꇐꉉꈻ,ꉱꋃꃅ“ꊿꏠꉈꈽꌠꌌꐱꀨꃅꄉ”ꌠꑽꐪꌧꇗꌋꆀꃅꐨꆹꆹꑽꀐꄷ,ꄈꌋꆀꇩꏤꌤꃅꈯꄜꆹꏮꌊꎆꏣꋈꄻꀂꏽꇁ、ꄺꀱꁉꃑꌠꐩꋊꐨꐥꃅꁰꈘꎼꇁ,ꐧꋦꉪꏦꉘ꒜ꊬꌠꅉꀨꈛꏦꄻꄉ,ꊨꏦꈜꍬ、ꍏꇩꐛꐨꐧꋦꉪꏦꋈꄻꌠꃅꋊꉶꁱꄚꄉꄏꎼꆹ,ꄓꑦꀻꌧꇗꀹꄻꄉ,ꄈꑭꊂꇩꏤꑭꊂꊿꋅꈁꐥꌠꏓꂱꏃꂘꄉꄺꀱꁉꃑꌠꇰꀋ꒜ꌠꈜꇬꄉꑭꁘꍔꄉꀒꁨꂵꀐ。

  ꉪꊇꐥꋊꐥꍂꃅꎺꄉꌶ,ꄺꀱꁉꃑꌠꇰꀋ꒜ꌠꌤꑘꆹ,ꐋꀨꏦ꒾ꂱꈯꄜꃅꄉꌠꄈꅿꌕꋊꌠꍏꑷꏲꌋꁥꌠꄈꑭꊂꇩꏤꑭꊂꊿꋅꈁꐥꌠꏓꂱꏃꂠꄉꐪꊛ、ꀻꎆꄷꀋꁧꊋꐛꃅꄹꆷꅷꃅꋊꑍꊏꋋꋏꃹꌠꉬ。ꊯꌕꈭꇖꃢꐊꈴꃅ꒜ꈿꌠꅑꅸ꒜ꀉꒉꊰꃘꃢꈿꇬꑟꌠ,ꐩꋊꂿꃆꀉꒉꃅꆽꎍꌠꄈꅿꌕꋊꌠꍏꑷꏲꌋꁥꌠꆹ,ꄓꑦꀻꌧꇗꁈꁧꇰꀋ꒜ꌠꀊꂥꃅꐕꄉ,ꏟꈯꃅꄺꀱꁉꃑ、ꃅꋊꐊꄉꁨꆹꌠꌭꈬ,ꇩꈐꇩꉈꍔꍞꆲꉐ、ꎆꏣꐔꈔꉆꌠꊝꐨꆈꒉꀕꌠꑠꂾꆏ,ꄈꌋꆀꏓꂱꉘꇉꄉ,ꍏꇩꐛꐨꐧꋦꉪꏦꐏꁈ,ꐧꋦꉪꏦꃷꎏꎆꏣꏦꉻꀊꏀꌠꀹꄻ,ꐊꑷꃅꁉꃑꌠꐛꐨꀊꏀꌠꀹꄻ,ꄈꋈꄻꌠꇰꀋ꒜ꌠꋉꃆꀊꏀꌠꄹꎆ,“ꌕꑵꁧꎁ”ꉪꇐꀋꂿꑘꌠꀹꄻꄉ,ꐪꊛꄉꄺꀱꁉꃑꌠꆳꂾꈻꏁꌌꎃꊒꌠꃅꍜꉜꄉꒈꂃꒊꆱꀺꄉꀒꁨꆹꇬꎷ。

  ꒜ꀉꒉꊰꃘꃢꌠꈿꊂꅑꅸꇁꌠ,ꉪꊇꆹꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ,ꇩꈐꇩꉈꃅꒊꃅꇁꀻꎆꐛꐈꌠꍬꄉ,ꄐꇐꏤꁈꊜꋽꄮꀋꂿꑘꌠꒃꉇ,ꇯꍝꌠꎹꃶꐚꌠꃅ、ꄹꀖꏀꀺꁨꆹꌠꉌꊈꍔꆙꄉ,ꏟꈯꃅꌧꇗꏀꀺꌠꌋꆀꃅꐨꏀꀺꌠꌭꈬ,ꊋꇤꄉꈆꑪꃅꀻꎆꌠꄹꇙ、ꐧꋦꐮꄮꌠꊥꎆ,ꐧꋦꉪꏦꃷꎏꎆꏣꏦꉻꄻꐛꒆ,ꐊꑷꃅꊼꇅꌣꈚꐧꋦꋈꄻꃅꐨꇬꄉꀋꎪꀋꑴꃅꄺꀱꁉꃑꇰꀋ꒜ꌠꌤꑘꐪꊛꄉꄹꆷꅸꁨꆹ。

  ꀊꏀꊬꌠꀊꅰꃅꄇꇖꀕꌠꐋꀋꌡꐨꆏꄺꀱꁉꃑꌠꉬ。ꂿꑘꁡꇤꄉꅑꅸꇓꈓꑟꌠ、ꎆꏣꁀꏯꄉꅑꅸꀉꁁꋍꑞꋍꁆꏯꑟꌠ,ꐊꑷꃅꄺꀱꌠꈴꎁꆹꄙꇁꄡꀋꉆꃅꍔꆙꄉꃅꀐ;꒺ꋮꅑꒉꋮꃅꋮꑟꌠ,ꁭꅐꁁꏯꄉꅑꅸꈯꄔꁮꐚꁁꏯꑟꌠ,ꉇꉻꏭꁉꃑꌠꄇꂿꆹꀋꎪꐯꀋꎪꃅꁉꄉꀐ。ꐩꋊꇬꐥꀋꋻꌠꀉꒉꃅꄺꀱꀉꒉꃅꁉꃑꋌꃢꆹ,ꀉꒉꐯꀉꒉꃅꏓꂱꂡꇁꃪꌠꏣꀋꑌꐨꄕꊪꎼꇁꄉ,ꉪꇩꏤꆹꀊꂥꃅꏓꋏꄉꌠꎖꄎꎆꏣꏦꉻꇬꄉꊋꑌꍅꁍꀕꌠꐧꋦꉪꏦꃷꎏꎆꏣꏦꉻꇬꑟꌠ、ꋍꎤꁁꋍꎤꃅꐙꌠꇬꄉꋍꑞꋍꁆꏯꃅꁉꃑꌠꇰꀋ꒜ꐩꋊꃅꆹꏮꌠꊋꐛꃅꃅꇫꑟꀐ。ꀃꑍꆏ,ꐛꏀꈴꌠꏭꉜꄉꃅ、ꋧꃅꏭꉜꄉꃅ、ꃆꏂꊂꑋꏭꉜꄉꃅꌠꐧꋦꉪꏦꍏꇩꆹꅡꊪꀕꃅꋧꃅꁭꅐꀉꁁꏭꋥꎍꀐ。

  ꀊꏀꊬꌠꀊꅰꃅꄇꇖꀕꃅꊌꐨꐥꌠꆏꐳꃅꀻꎆꌠꉬ。ꉪꊇꄈꆹꐛꏀꈴꋈꄻꌠꆏ“ꌕꁘꃅꈴ”ꌠꄐꇐꏤꁈꌫꄻ,ꏓꂱꏃꂠꄉꎬꅧꃅꉈꈽ,ꉪꇩꏤꄹꆷꌌꋧꃅꇣꄧꇬꑌꀁꑌꃅꐥꌠꐳꐨꐪꊛꄉꐳꃅꀻꎆꎼꇁ。ꉪꇩꏤꎆꏣꋍꃢꇬꎒꐡꇁꌐꄉꏽꌠꇬꄉꀻꎆꌊꈁꉬꃷꁨꋧꃅꇩꏤꇬꇖꂷꂶꌠꉆꎍ、ꈏꃹꉇꅐꈁꉬꃷꁨꋧꃅꇩꏤꇬꌕꂷꂶꌠꉆꎍ,ꏓꂱꐥꐨꋠꀋꂊꈚꀋꊸꌠꇬꄉꀻꎆꌊꀑꐱꃅꇬꊼꇅꌣꈚꌠꇬꑟ,ꂿꑘꁡꇤꌢꎭꊻꂷꑍꂡꉬꄙꎖꃪꇬꄉꊨꒊꅷꑍꄙꎖꃪꇬꑟ,ꍔꍞꋈꄻ、ꁱꀕꋈꄻ、ꐧꋦꋈꄻꌠꆹꋧꃅꃅꇫꂿꌠꊌꐨꐥꀐ。ꍏꇩꀻꎆꌠꆹ,ꍏꇩꏓꂱꄔꐽꃅꌣꈚꐥꌒꌠꄇꈜꍬꌠꀉꄂꀋꉬꃅ,ꉈꑴꋧꃅꎆꏣꀻꎆꌠꌋꆀꃰꊿꌧꑳꀻꎆꌠꎁꃅꑆꊋꀉꒉꀊꂾꃅꅐꌞꀐꌠꑌꉬ。

  ꀊꏀꊬꌠꀊꅰꃅꅔꅐꌠꌐꂷꆏꃅꋊꐊꄉꀒꁨꆹꌠꉬ。ꉪꄈꏟꈯꃅꂷꇻꌦꉪꏦꃤꉪꇐꈛꏦꌭꈬ,ꀋꆏꃅꑞꆏꐧꋦꉪꏦꉬ、ꈍꃅꄉꐧꋦꉪꏦꋈꄻ,ꄈꈍꃅꐙꌠꋈꄻ、ꈍꃅꄉꄈꋈꄻ,ꈍꃅꐙꌠꀻꎆ、ꈍꃅꀻꎆꌠꌧꇗꀉꒉꀊꂾꌠꌋꆀꌤꃆꃶꐚꌠꑠꎹꎥꌋꆀꅇꀱ,ꀋꆏꃅꂷꇻꌦꉪꏦꍏꇩꐛꈴꌠꄹꎆ,ꄈꅿꅉꀨꌧꇗ、ꅉꀨꈛꏦ、ꅉꀨꐱꀨ、ꅉꀨꎖꋪꌭꈬꄷꀋꁧꀉꑌꇁꎻ。ꐧꋦꉪꏦꌋꆀꂷꇻꌦꉪꏦꆹꍏꇩꁍꑗꅉꊂꄉꍅꁍꀕꌠꅐꇁꇈ,ꏓꂱꀊꅰꃅꐥꌒꄻꌒꌠꋌꌌꇁꄉ,ꍏꉸꊿꋅꑭꁘꀉꒉꃅꐕꄉꃅꋊꀒꁨꆹꒈꂃꈹꂪꆹ、ꇰꀋ꒜ꃅꀱꌄꆣꇁꌠꊫꂫꁤꇅꀕꌠꊌꇁꎂꀕꀐ。

  ꐛꐨꃶꐚꌠꆹꀥꀋꌸꃅꉉꀽꄉꀐꌠꆏ,ꄺꀱꁉꃑꌠꆹꀋꃋꋋꄮꍏꇩꊫꂫꏤꇽꌠꀋꉬꀋꉆꃅꌊꄻꄉꌠꉬ,ꋋꆹꍏꇩꐛꐨꐧꋦꉪꏦꀻꎆ、ꍏꉸꊿꋅꇰꀋ꒜ꃅꀱꌄꆣꇁꌠꃅꇫꑟꌠꈜꀋꍬꀋꉆꏡꌠꉬ;ꐧꋦꉪꏦꑲꆀꍏꇩꈭꋏꄎ,ꄺꀱꁉꃑꌠꑲꆀꍏꇩꀻꎆ、ꐧꋦꉪꏦꀻꎆ、ꂷꇻꌦꉪꏦꀻꎆꄎ。

  ꄺꀱꁉꃑꌠꆹꌌꀊꏀꃅꇰꀋ꒜ꌠꇝꂱꃢꃅꄉꇬ,ꑴꀋꅑꁣꀋꐥꃅꐛꀋꄐ,ꋋꇅꃅꊋꐛꑌꀋꄐ。ꁧꀧꇊꁧꀦꌠꆏ,ꄺꀱꁉꃑꌠꆹꄈꉪꐨꏓꂱꉪꐨꇬꊒ、ꃅꋊꈳꏦꇬꊒ,ꃅꍜꌋꆀꄇꈜꆹꉬꇮꃅꎃꊒꌠ,ꇿꋌꌋꆀꊌꐨꆹꀋꐥꄷꀋꉆ,ꆏꇫꄉꌠꌋꆀꉈꎞꌠꆹꈜꀋꁮꌠꉬ。

  ꄺꀱꁉꃑꌠꐩꋊꈴꎁꇬ,ꉪꊇꄈꆹꏟꈯꃅꂷꇻꌦꉪꏦꅉꀨꇗꊈꌭꈬꌠꌋꆀꂷꇻꌦꉪꏦꍏꇩꐛꈴꄹꎆꌠꏓꐯꇯꎼꇁ,ꏟꈯꃅꏥꏦꅉꀨꇖꏢꌭꈬꌠꌋꆀꄺꀱꁉꃑꌭꈬꌠꏓꐯꇯꎼꇁ,ꏓꂱꇬꂾꀹꄻꉌꊈꁌꒉꌠꌋꆀꄈꅿꏲꂠꊋꀥꇱ、ꄻꐛꒆꌠꏓꐯꇯꎼꇁ,ꏟꈯꃅꐧꋦꉪꏦꅉꀨꄹꏦꌬꌠꌋꆀꃷꎏꎆꏣꀻꎆꌠꏓꐯꇯꎼꇁ,ꎆꏣꅉ꒜ꄺꀱꄹꆷꌠꌋꆀꄩꇴꏦꉻꄺꀱꄹꆷꌠꏓꐯꇯꎼꇁ,ꐧꋦꒃꅐꊋꃤꀻꎆꌠꌋꆀꊿꋅꈀꐥꌠꌧꑳꊇꁧꉀꐕꌠꏓꐯꇯꎼꇁ,ꅐꊌꐨꉀꐕꌠꌋꆀꐧꋦꐽꊯꊥꎆꌠꏓꐯꇯꎼꇁ,ꏟꈯꃅꄂꋦꑴꌅꌠꌋꆀꎆꏣꋧꃅꈴꌠꃅꈽꌠꏓꐯꇯꎼꇁ,ꄺꀱꀻꎆꌠꇬꊥꎆꌠꌋꆀꐧꋦꎍꐽꇬꎷꌠꏓꐯꇯꎼꇁ,ꍏꇩꐛꐨꐧꋦꉪꏦꇰꀋ꒜ꌠꌤꑘꄹꎆꌠꌋꆀꄈꋈꄻꌠꇰꀋ꒜ꌠꋉꃆꀊꏀꌠꄹꎆꌠꏓꐯꇯꎼꇁꄉ,ꉪꊇꊻꂷꊯꎖꂡꐥꌠꀻꎆꇰꌠꇩꏤꀉꒉꋋꂷꎭꑆꇔ、ꐳꃅꐛꏀꈴꌠꃅꇫꑟ、ꐧꋦꉪꏦꄻꈫꈈꌠꌋꆀꀻꎆꎖꋪꁌꇐꈤꌠꊌꀐ。

  ꄺꀱꁉꃑꊂꅑꅸꇁꌠꉪꊇꊌꐨꈁꐥꌠꌋꆀꀒꁨꆹꌠꁧꀦꁢꊧꆹ,ꏓꐯꇯꎼꇁꇬꆏ:ꍏꇩꐛꐨꐧꋦꉪꏦꄇꈜꀺꄉ,ꍏꇩꐛꐨꐧꋦꉪꏦꌧꇗꉻꑫꏓꐛꀐ。ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉꇬ,ꁧꀦꀋꉬꀋꉆꇊꀋꉬꀋꉆꌠꆏꀋꎪꃅꄇꈜꋋꏢꌋꆀꌧꇗꉻꑫꋋꏢꌭꈬꇬꎷꌶ。

  ꍏꇩꐛꐨꐧꋦꉪꏦꄇꈜꆹ,ꍏꇩꇭꍣꄈꏲꂠꇂꃴꄉ,ꇩꏤꀑꐱꐛꐨꉜꄉ,ꎆꏣꋈꄻꌠꌌꈯꄜꃅꄉ,ꏟꈯꃅꏥꏦꅉꀨꇖꏢꌠꌭꈬ,ꏟꈯꃅꄺꀱꁉꃑꌠꌭꈬ,ꐧꋦꒃꅐꊋꃤꁌꄝꌋꆀꀻꎆ,ꐧꋦꉪꏦꄹꏦꌌꈫꈈꌋꆀꄻꐛꒆ,ꐧꋦꉪꏦꃷꎏꎆꏣ、ꐧꋦꉪꏦꋯꁦꍔꍞ、ꐧꋦꉪꏦꁱꀕꂴꅑꌠ、ꐧꋦꉪꏦꐮꄮꐧꋦꋈꄻꇈ,ꀉꇨꋯꁦꌧꑳꐮꄮꌠꐧꋦꉪꏦꐛꏀꈴꌠꇩꏤꋈꄻ。ꍏꇩꐛꐨꐧꋦꉪꏦꄇꈜꑠꃅꉬꇮꃅꎃꊒ、ꑠꃅꍏꇩꏃꂠꌊꀻꎆꁨꆹꄎꌠꆹ,ꀋꉬꀋꉆꌠꆏꉪꊇꆹꏟꈯꃅꈆꑪꐧꋦꉪꏦꅉꀨꏥꏦꌭꈬꐛꅹ,ꉈꆏꉪꇩꏤꃶꐚꐛꐨꌋꆀꃅꋊꐛꐨꇬꈴꄉꊨꄅꃅꍏꇩꐛꐨꄻꋌꁳ。ꀋꃋꋋꄮꍏꇩꆹ,ꏟꈯꃅꍏꇩꐛꐨꐧꋦꉪꏦꄇꈜꌭꈬꌠꆏ,ꇯꍝꃅꏟꈯꃅꐧꋦꉪꏦꌭꈬꌠꉬ。

  ꍏꇩꐛꐨꐧꋦꉪꏦꌧꇗꉻꑫꆏ,ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠꌋꆀꈆꑪꃅꀻꎆꌠꉜꐨꑠꀉꒉꀉꂿꌠꄐꇐꏤꁈꉪꇐꄚꈐꏭꐊꌠꈆꑪꌧꇗꉻꑫꉬ。ꌧꇗꉻꑫꋋꏢꆏ,ꏟꈯꃅꂷꇻꌦꆺꆀꉪꏦ、꒜꒾ꄏꉪꇐꌭꈬꌠꌋꆀꀻꎆꌠ,ꍏꇩꇭꍣꄈꊿꈍꑋꋏꃅꏓꂱꋌꏃꄉꀋꆏꃅꎹꎥꃄꄻꌠꀑꁮꐨꌋꆀꉌꊋꌌꏓꐛꌠ,ꋋꆹꂷꇻꌦꉪꏦꍏꇩꐛꈴꌠꊌꐨꀊꏀꐯꀊꏀꌠꉬ,ꋋꆹꄈꁌꇐꈤꐯꁌꇐꈤꌠꍔꍞꌋꆀꉌꊈꁨꇐꉬ,ꋋꆹꇩꏤꑭꊂꊿꋅꈁꐥꌠꏓꂱꋯꑌꄉꉈꈽꌠꉪꇐꐮꐊꌠꅉ꒜ꉬ。ꍏꇩꐛꐨꐧꋦꉪꏦꌧꇗꉻꑫꆹꀋꆏꃅꀻꎆꌠꁉꃑꌠꌧꇗꉻꑫꉬ。《ꇭꍣꄈꄜꅇ》ꄜꃑꊂꋍꉐꃘꊰꈎꀋꇈꐛꌠꃄꄻꌠꇬꄉꉉꀽꎼꇁꇬ,ꂷꇻꌦꉪꏦꆹꂱꑱꇩꏤꐛꐪꌋꆀꏓꐯꇯꎼꇁ、ꃅꋊꀻꎆꌠꌋꆀꐮꐊꄉꁨꆹ、ꏓꂱꉹꁌꌋꆀꎬꎭꐯꇯꎭꌑꌒꐯꇯꌒꑲꆀ,ꐥꎴꊋꃤ、ꀹꄻꊋꃤ、ꏓꇱꊋꃤꀉꇨꌠꄖꄑꅐꇁꄎ。ꀋꃋꋋꄮꍏꇩꆹ,ꏟꈯꃅꍏꇩꐛꐨꐧꋦꉪꏦꌧꇗꉻꑫꌭꈬꌠꆏ,ꃶꐚꃅꏟꈯꃅꂷꇻꌦꉪꏦꌭꈬꌠꉬ。

  ꃄꄻꌠꆹꐥꍂꃅꑞꅉꈚꀋꐥ,ꏀꀺꌠꆹꐥꍂꃅꑞꅉꈚꀋꐥ。ꄈꑭꊂꐋꀨꊈꆏꄈꎬꅧꃅꀹꄻꌠꍏꇩꐛꐨꐧꋦꉪꏦꈝ꒜ꌋꆀꍏꇩꐛꐨꐧꋦꉪꏦꌧꇗꉻꑫꌌꀊꅰꃅꁌꒉ、ꀊꉗꃅꌭꈬ、ꀋꆏꃅꀻꎆ,ꏟꈯꃅꉪꇐꁌꄝ、ꑞꉬꌠꑞꃅꄉ、ꃅꋊꐊꄉꁨꆹꇬꎷ,ꀬꃅꄺꀱ、ꀬꃅꏀꀺ,ꐥꍂꃅꇰꇗꀋꌬ、ꐥꍂꃅꀋꆏ,ꃧꆰꌠꑞꑌꀋꏦ,ꃸꆽꌠꑞꑌꀋꑴꃅꄉ,ꍏꇩꐛꐨꐧꋦꉪꏦꈝ꒜ꈳꅉꐮꅉꑟꇁꎻ,ꀋꃋꋋꄮꍏꇩꂷꇻꌦꉪꏦꁳꀊꅰꃅꇗꊈꁨꑭꏁꇅꁤꇅꁏꌠꁨꌬꇁꎻ。

  
【1】【2】【3】【4】【5】【6】
ꁰꒌ




  • 特别鸣谢
    中国民族语文翻译局彝文翻译室