ꌌꀨꏾꃅꄉꎴꇱꏓꄻꅇꈄ
ꀨꏾꌠꏓꂱꈄꏍꍏꇩꇭꍣꄈꈨꏀꈄꏍꎭꆹꁱꂷꀒꋤꁱꂷꊉꃶꇓꁱꂷꉳꌒꇻꁱꂷꍨꑣꁱꂷꍌꋇꁱꂷ

ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ
ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜ

——ꍏꇩꇭꍣꄈꊯꈬꃢꌠꇩꏤꑭꊂꁧꎁ꒜ꀉꒉꈿꅉꇬꄉꅇꄜꌠ

(2017ꈓ10ꆨ18ꑍ)
ꑮꏣꀻ

  

【ꁱꂷꀉꒉꀄꊭꐨ ꀉꒉ ꐧꀠ ꀄꊭ】  ꍑꄻ
      
ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ
ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜ
  
ꐋꀨꊈ:

  ꀋꃋ,ꉢꊰꉆꈭꌠꍏꑷꊈꑼꉼꎁꃅꃀꀉꒉꈿꅉꏭꅇꄜꂿ。

  ꍏꇩꇭꍣꄈꊯꈬꃢꌠꇩꏤꑭꊂꁧꎁꃀꀉꒉꈿꌠꆹ,ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛꊬꌠ、ꍏꇩꐛꐨꐧꋦꉪꏦꃅꋊꀊꏀꋎꌠꇬꃹꌠꀋꉬꀋꉆꊬꌠꇬꈿꌠꃀꀉꒉꀋꂿꑘꐯꀋꂿꑘꌠꑠꋍꃢꉬ。

  ꃀꀉꒉꈿꌠꅇꀨꆏ:ꇬꂾꉪꐨꎺ,ꂿꃆꎺꈬꃅ,ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ,ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ,ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜꄉ,ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꀋꆏꃅꉈꈽꌠ。

  ꇬꂾꉪꐨꎺꑲꆀ,ꌤꃅꌊꑞꅉꑟꄎ。ꍏꇩꇭꍣꄈꊿꃤꇬꂾꉪꐨꌋꆀꂿꃆꆹ,ꍏꇩꏓꂱꎁꃅꌒꐪꏂ,ꍏꉸꊿꋅꎁꃅꀱꌄꆣꇁꌠꏂꌠꉬ。ꇬꂾꉪꐨꌋꆀꃅꎁꋋꏢꆹꍏꇩꇭꍣꄈꊿꋌꇱꊡꀮꌊꀋꆏꃅꀒꁨꆹꌠꊇꅉꇙꊋꉬ。ꄈꑭꊂꐋꀨꆏꀋꎪꃅꐥꍂꃅꏓꂱꌋꆀꐯꇯꌗꋏꌗꈻ、ꐯꇯꐥ、ꉌꂵꐮꐊꄉ,ꐥꍂꃅꏓꂱꐥꐨꉾꃪꌠꏭꉪꌠꌌꉈꈽꌠꁻꌐꃅꄉ,ꆏꇁꀋꉆꌠꉌꊈꐛꐪꌋꆀꆸꆏꉈꀋꎞꌠꉈꈽꄟꌌꄉ,ꐪꊛꄉꍏꉸꊿꋅꇰꀋꃀꃅꀱꌄꆣꇁꌠꉻꒉꁻꌐꇬꉜꄉꀬꅑꃅꀒꁨꆹꌶ。

  ꀋꃋꋋꄮꇬ,ꇩꈐꇩꉈꃅꒊꃅꇁꇬꊎꃹꅼꌼꇪꃅꐛꐈꇰ,ꉪꇩꏤꀻꎆꌠꄡꇗꄐꇐꊜꋽꄮꀋꂿꑘꊬꌠꇬꃹꎍ,ꊫꂫꁤꇅꀕꐯꁤꇅꀕ,ꋓꎭꌠꑌꊜꊋꐯꊜꊋ。ꄈꑭꊂꐋꀨꆏꀋꎪꃅꂥꅂꎴꉜ、ꌒꑍꎭꉪ,ꀬꃅꄺꀱ、ꀬꃅꏀꀺ,ꐥꍂꃅꎹꑇꀋꐛ、ꐥꍂꃅꆏꇨꀋꎍꃅ,ꇩꏤꑭꊂꊿꋅꈁꐥꌠꏓꂱꋯꑌꏃꂠꌌꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ,ꈏꇤꊋꇤꄉꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜꌶ。

  ꋍ、ꋌꃀꉬꈎꌤꃅꌠꌋꆀꐩꋊꐨꐥꃅꆴꄻꌠ

  ꃀꀉꒉꊰꉆꃢꌠꈿꊂꅑꅸꇁꉬꈎꌠꆹ,ꄈꌋꆀꇩꏤꀻꎆꈴꎁꇬꎃꀋꐚꐯꎃꀋꐚꌠꑠꉬꈎꉬ。ꋧꃅꎆꏣꀱꄓꇁꊋꀋꑌ、ꃅꄷꈨꇬꐯꀋꄮꌋꆀꇙꈧꑠꅐꀋꆏ、ꅉꆺꑭꊂꃅꐙꌠꌤꃆꁦꎆꇱꌠꉇꇷꋦꈭꏭꊝꇬ,ꉪꇩꏤꎆꏣꀻꎆꅉꀕꐛꐨꀊꏀꌠꇬꃹꑠꃹꅼꃅꐛꐈꈧꌠꏭꊝꇬ,ꉪꊇꆏꎍꐽꃅꀒꁨꆹꌠꌤꃅꀑꐱꅉ꒜ꉉꈌꌭꈬꄉ,ꊋꋠꐨꉜꄉꉀꆹ,ꏀꀺꁨꆹꄉ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꊌꐨꐩꋊꐨꐥꌠꊌꅜꀐ。

  ꃀꀉꒉꊰꉆꃢꌠꉌꊈꃄꌬꂿꄷ,ꄈꍏꑷꐊꈴꃀꏃꃢꈿ,ꂱꄷꃅꍔꃚꏲꉻꄺꀱꌋꆀꌅꊋꏭꆦ、ꐊꑷꃅꃹꅼꃅꄺꀱ、ꐊꑷꃅꏦꈴꇩꏲꌠꄹꎆ、“ꊯꌕꉬ”ꄐꎖꏤꄻ、ꐊꑷꃅꏦꇨꃅꄈꏱꄻꑠꌤꃆꀉꒉꀊꂾꌠꏤꇽꄐꁆ。ꉬꈎꅑꅸꇁꌠ,ꉪꊇꏓꇲꄉ“ꉬꑵꋍꉻ”ꏓꄜꄐꉻꄹꎆ、ꋮꄮꃅ“ꇖꑵꐊꑷ”ꌠꄐꇐꄐꉻꄹꎆ,“ꊰꑋꉬ”ꄐꎖꃅꊋꐛ,“ꊯꌕꉬ”ꄐꎖꁣꀋꐥꃅꃅ,ꄈꌋꆀꇩꏤꌤꑘꐊꑷꃅꐛꊂꀊꏀꌠꀹꄻ。

  ꎆꏣꋈꄻꌠꊌꐨꀉꒉꀊꂾꃅꐥ。ꀋꎪꀋꑴꃅꀻꎆꉪꉻꀊꏀꌠꌬ,ꏟꈯꃅꀻꎆꉜꐨꎃꊒ、ꀻꎆꃄꄟꏭꆦ,ꀻꎆꊇꁧꌋꆀꊌꐨꈲꁧꀋꆏꃅꉀꐕ。ꎆꏣꉀꎆꐳꐨꐧꀠꀊꂥꃅꐙꄉꇬꎷ,ꋧꃅꀋꉬꀋꉆꇩꏤꈧꌠꇬꂓꂴꐊꐺ,ꇩꈐꒃꅐꈁꉬꁌꐨꉬꊯꇖꃪꂡꂷꌠꇬꄉꉀꎆꅷꉆꊰꃪꂡꂷꇬꑟ,ꎍꐽꃅꋧꃅꉆꈉꑍꂷꂶꌠꇬꉆꎍ,ꋧꃅꎆꏣꉀꎆꅐꌞꐨꄩꉐꁧꋊꌕꊰꁧꐂ。ꇲꁵꁁꏯꐛꏦꃅꐙꌠꄺꀱꌠꃹꅼꃅꄹꎆ,ꎆꏣꐛꉻꀋꆏꃅꄻꃪ,ꃷꁨꎆꏣꑠꏀꄓꅐꑘꌄꆣꃅꀻꎆ,ꐳꈴꎸꈜ、ꄇꈜ、ꋒ、ꈜꀸ、ꃏꏸꐛꅉꑠꅉꀨꌬꇐꋈꄻꌠꐳꃅꄹꎆ。ꂿꑘꐛꏀꈴꌠꎍꐽꃅꄹꎆ,ꋚꂷꊪꏽꄐꊋꋍꃪꑍꄙꂡꏣꇬꑟ。ꇓꈓꏦꎫꐛꈴꐨꃅꈎꈓꌠꐽꏡꃅꉐꊮꌺꋍꊮꌺꑍꂷꉀꐕ,ꉆꄙꎖꃪꂿꑘꆹꏮꊻꂷꆹꇓꈓꏦꎫꀀꊿꐛ。ꃄꁕꀻꎆꌠꋮꄮꐨꀉꇨ,“ꋍꁕꋍꈜ”ꋈꄻ、ꀙꏢꄟꏢꉼꀙꋮꐊꃅꀻꎆ、ꍤꏦꎆꏣꋥꁕꀻꎆꊌꐨꈲꁧꄇꇖꀕ。ꏀꀺꈺꇙꀻꎆꄐꇐꀉꇨꃅꃄꌬ,ꏀꀺꉹꌠꇩꏤꋈꄻꊌꐨꀉꑌ,ꄟꇬꃅꈯꈥꈉꍉ、ꏪꇊꎿꉱꍤꎖꅍ、ꂿꃋꉜꑓꑳ、ꃷꈈꊿꄻꃅꏸ、ꂱꊪꊿꄻꃅꏸ、ꃏꏸꀉꒉꌠꑠꈆꑪꇮꇐꊌꐨꀉꒉꀊꂾꌠꐮꊂꈹꄻꅐꇁ。ꇂꉰ꒺ꅔꌺꋈꄻꌠꏣꀋꑌꃅꄹꎆ。ꁉꃑꉹꌠꎆꏣꏦꉻꀊꏀꌠꋍꁘꋍꁘꃅꄻꐛꒆ,ꉇꉻꃼꇇ、ꉇꉻꎆꇱ、ꉇꎆꊭꊎꌠꎍꐽꃅꋧꃅꇬꂴꐊꐺ。

  ꐊꑷꃅꃹꅼꃅꄺꀱꌠꂵꅐꐨꀉꒉꀊꂾꃅꐥ。ꐕꐳꄔꐽꃅꐊꑷꃅꃹꅼꃅꄺꀱꌠꄹꎆ,ꏟꈯꃅꋍꑞꋍꁁꏯꏦꉻꉺꏦꆐꅑꐨꋊꄻ。ꄺꀱꌠꐊꑷꃅꊋꄓ、ꀉꑌꈚꃅꂵꅐ、ꀊꅼꃅꄹꎆ,ꊋꏂꄉꄺꀱꑭꊂꐨ、ꉻꄜꐨ、ꋮꐊꐨꌌꀉꇨ,ꄺꀱꀊꐯꐨꌋꆀꀊꅼꐨꐪꊛꄉꀹꎆ,ꄺꀱꏡꁈꋍꄘꉬꉐꎖꐘꄻꅐꇁ,ꀋꂿꑘꁁꏯꌋꆀꀋꉬꀋꉆꈭꊭꇬꄺꀱꌠꂵꅐꐨꐥꃅꁨꎆꆹ,ꀋꉬꀋꉆꁁꏯꄺꀱꀨꄜꇶꏦꀑꐱꃅꄻꄉ。ꍏꇩꐛꐨꐧꋦꉪꏦꄹꏦꀊꅰꃅꄻꐛꒆ,ꇩꏤꏱꄻꉻꑫꌋꆀꏱꄻꄐꊋꐛꏀꈴꐨꄇꇖꀕꃅꉀꐕ,ꐧꋦꑭꊂꀻꎆꍄꑐꊋꃤꌋꆀꏀꀺꍄꑐꊋꃤꄇꇖꀕꃅꀉꇨꇁ。

  ꋯꁦꏦꏲꋈꄻꌠꑭꁘꀉꒉꀊꂾꃅꐕ。ꏣꀋꑌꃅꐧꋦꉪꏦꋯꁦꍔꍞꀻꎆ,ꐊꑷꃅꏦꈴꇩꏲꌠꄹꎆ,ꄈꁵꏲꂠꎻꌠ、ꏓꂱꑱꏲꃥꌋꄻ、ꏦꈴꇩꏲꊜꋽꃅꏓꋍꃱꃅꌠꄹꏦꋈꄻꌠꐊꑷꃅꊋꀥꇱ,ꄈꁵꏲꂠꎻꌠꏦꉻꉺꏦꀋꆏꃅꄻꐛꒆ,ꐧꋦꉪꏦꋯꁦꀋꆏꃅꀻꎆ,ꄈꈏꇓꋯꁦꌠꀊꅰꃅꀊꐯ,ꐧꋦꉪꏦꋮꒉꋯꁦꌠꐊꑷꃅꍔꃅ,ꇩꉂꊋꏓꋍꃱꃅꌠꈫꈈꃅꀻꎆ,ꊿꋅꑇꇐꌤꃅꌠꏀꀺꄹꎆ。ꈆꑪꃅꏦꃤꄻ、ꏦꇨꃅꏦꌬ、ꎃꊒꃅꏦꌬ、ꊿꈁꐥꌠꃅꏦꍬꌠꃹꅼꃅꄹꎆ,ꏦꏲꇩꏤ、ꏦꏲꍔꃚ、ꏦꏲꐧꋦꋈꄻꌠꐮꏯꊥꎆ,ꍏꇩꐛꐨꐧꋦꉪꏦꏦꏲꉻꑫꋍꑍꋍꉙꃅꄻꐛꒆ,ꐧꋦꑭꊂꏦꏲꉪꉻꄇꇖꀕꃅꀉꇨꇁ。ꇩꏤꍞꍤꏦꉻꄺꀱꉚꌠꃶꐚꊌꐨꈲꁧꐥ,ꏲꑘꏦꉻꄺꀱ、ꏦꌬꏦꉻꄺꀱ、ꌅꈌꌫꄻꌠꏢꑲꌋꆀꍞꍤꉻꑫꋈꄻꌠꇿꋌꐥꃅꌫꄻ。

  ꉪꇐꁱꀕꋈꄻꌠꁨꎆꐨꀉꒉꀊꂾꃅꐥ。ꄈꉪꐪꐛꉻꌤꃅꌠꏭꏲꂠꌠꊋꀥꇱ,ꄈꃤꌧꇗꏀꀺꌠꐊꑷꃅꄹꎆ,ꂷꇻꌦꉪꏦꆹꉪꐪꐛꉻꁁꏯꄐꂘꉆꈉꀊꅰꃅꊨꄅ,ꍏꇩꐛꐨꐧꋦꉪꏦꌋꆀꍏꇩꉪꐨꊽꉌꂵꃹꋒ,ꐧꋦꉪꏦꈯꄜꁌꐨꉜꐨꌋꆀꍏꉸꋊꃅꉾꌠꁱꀕꀊꐯꃅꍔꆙ,ꉹꁌꐨꉌꊈꌧꑳꋈꄻꌠꏟꈯꃅꃅ。ꋍꉻꁱꀕꁧꃤꃅꐨꀋꆏꃅꉀꐕ,ꁱꀕꋽꇐꁰꄻꌠꐪꊛꄉꌄꆣ,ꁱꀕꌤꑘꌋꆀꁱꀕꅐꑘꀻꎆꍅꁍꀕ,ꈄꏍꋈꄻꏲꂠꌫꄻꌠꀋꆏꃅꄻꐛꒆ,ꊿꈁꐥꌠꃅꈯꎟꌋꆀꋓꈿꈮꒆꄿꎟꌠꐊꑷꃅꀻꎆ。ꃚꏦꀋꉬꀋꉆꌠꀊꅰꃅꈳꌬꀕ,ꎃꊒꊋꃤꀊꅰꃅꊋꇨ,ꁱꀕꑴꑇꌠꄇꇖꀕꃅꅐꇁ,ꇩꏤꁱꀕꆓꊋꃤꌋꆀꍏꉸꁱꀕꑌꑲꐨꀉꒉꃅꉀꐕ,ꄈꑭꊂꐧꋦꑭꊂꉪꇐꀂꏽꋯꑌꋍꃱꃅꌠꀊꅰꃅꈫꈈ。

  ꏓꂱꐥꐨꀋꆏꃅꄻꃪ。ꃹꅼꃅꏓꂱꈯꄜꃅꄉꌠꀻꎆꉪꇐꌬ,ꏓꂱꏭꈲꁧꐥꌠꏁꁈꀉꑌꈨꌌꌫꄻꀐ,ꏓꂱꊌꅜꐨꄇꇖꀕꃅꀉꇨꇁ。ꎭꑆꇔꈢꇓꀖꌠꏤꇽꐨꐥꃅꁨꎆꌠꊌꅜ,ꌢꎭꊻꂷꃘꄙꎖꃪꎍꐽꃅꎭꑆꇔ,ꌢꎭꐨꉐꁧꋊꊰꊮꌺꑍꇬꄉꊰꌊꉐꁧꋊꇖꈋꐯꑟ。ꂘꇐꌤꑘꐊꑷꃅꀻꎆ,ꈪꄙꁮꐚꁁꏯꌋꆀꂿꑘꁡꇤꂘꑘꄇꇖꀕꃅꊋꀥꇱ。ꃅꑘꊌꃅꐨꐪꊛꄉꄻꃪ,ꇓꈓꏦꎫꃅꑘꊌꐨꀊꏀꃅꁦꎆꌠꃅꈎꈓꌠꐽꏡꃅꊿꋍꄘꌕꉐꃪꑻꈋꉐꐥ。ꇓꈓꇓꉈꀀꊿꊌꐨꐳꐨꆹꎆꏣꐳꐨꄩꐂ,ꊌꐨꐧꀠꊿꁥꌠꐪꊛꄉꍔꐯ。ꇓꈓꇓꉈꀀꊿꇬꉱꑷꌠꐧꋦꏦꀧꉻꑫꀑꐱꃅꋈꄻꄉ,ꏓꂱꒉꄚꇁꄿꌋꆀꆅꉁꆄꄻꁦꎴꑟꐨꀉꒉꃅꉀꐕ,ꏦꀧꐨꐥꌠꀀꑳꋈꄻꌠꄔꐽꃅꄹꎆ。ꐧꋦꏱꄻꉻꑫꀊꅰꃅꄻꐛꒆ,ꐧꋦꃅꇴꄉꉻꎍꐽꇬꎷ,ꇩꏤꋬꂻꌠꐊꑷꃅꊋꀥꇱ。

  ꒆꉻꌧꑳꋈꄻꌠꊌꐨꈲꁧꄇꇖꀕ。ꊋꇤꄉꒆꉻꌧꑳꋈꄻꌠꄹꎆ,ꄈꑭꊂꇩꏤꑭꊂꃅꀊꃴꀻꎆꉪꉻꌬꌠꑴꐚꐨꌋꆀꑴꇙꐨꄇꇖꀕꃅꀉꇨꇁ,ꒆꉻꋦꈭꀧꌋꃅꌠꏭꉜꀋꁨꌠꐛꐪꄇꇖꀕꃅꄺꀱ。ꒆꉻꌧꑳꄹꏦꉻꑫꐳꀥꇱꄉꄻꐛꇁ,ꀨꄜꄐꊋꐤꅉꄹꏦꋍꁘꋍꁘꃅꋈꄻꐛꒆ,ꇩꏤꋍꏅꈩꅉꏦꉻꌬꉚꌠꏣꀋꑌꃅꄹꎆ。ꐊꑷꃅꅐꀦꏎꏸꌠꇿꋌꐥꃅꄹꎆ,ꊋꀦꅐꀦꃸꅐꇨꐨꀉꒉꃅꀁꋌꊰ。ꀉꒉꀊꂾꌠꒆꉻꀧꌋꃅꌠꌋꆀꄺꀱꋉꃆꁣꀋꐥꃅꁨꎆ,ꌩꏪꉱꑷꐨꊛꄉꉀꐕ。ꒆꉻꋦꈭꏱꄻꌠꄇꇖꀕꃅꊋꀥꇱ,ꋦꈭꐛꐨꄻꃪ。ꃅꌗꐛꐈꇬꊝꌠꇩꏹꇷꃅꌠꄐꏁꄉ,ꅉꆺꑭꊂꒆꉻꌧꑳꋈꄻꌠꇬꀋꉬꀋꉆꌠꃅꈽꊿ、ꅐꌞꊿ、ꄐꏁꊿꐛꀐ。

  ꂽꀉꇨꂽꌄꆣꇁꌠꇬꐛꐪꀊꏀꌠꀹꄻ。ꍏꇩꉪꐨꂽꀉꇨꉪꐨꃅꇫꑟꌠꇬꉜꄉ,ꃅꒊꃅꇁꀊꏀꌠꇂꃴꂽꌤꄐꇐꌐꏦꏤꄻ,ꊋꈀꑌꃅꇤꄉꇩꐏꌠꌋꆀꂽꐛꏀꈴꌠꄹꎆ。ꇴꄠꂽꑭꊂꍔꍞꌤꃅꃀꈿ,ꉪꄈꉪꂽꋊꃅꀑꑊꁤꇅꀕꌠꌋꆀꃅꇏꉾꃪꌠꀱꐤꅉꐥꌋꆀꍔꆙꎼꇁ,ꏓꂱꂽꇬꍔꍞꒆꉻꌌꇿꋌꐥꃅꏱꄻ。ꇩꐏꌋꆀꂽꄺꀱꌠꐩꋊꃅꐙꌠꂵꅐꐨꐥꄉ,ꏮꊈꇬꏓꏲ、ꌉꁍꇬꌉꏲ、ꂽꑫꇬꂽꋈꄻꌠꏲꌠꐛꄟꀊꏀꌠꄻꐛ,ꏓꂱꂽꎀꍹꇶꏦꌋꆀꊋꃤꉻꑫꇝꂱꐨꐥꃅꀊꏀꃅꄺꀱꄉꌠꃅꇫꑟꀐ。ꊋꀥꇱꄉꂽꎟꂽꄜꌉꊭꌉꄐ,ꇿꋌꐥꃅꎿꇬꌅꈌꀧꌋꃅ、ꇶꌾꌠꏭꁏꑘꒃꀧꌋꃅ、ꃨꆰꉮꌸꌠꈭꋏ、ꇩꏹꄮꐽꌠꀧꌋꃅ、ꑸꄂꎿꈪꆳꂾꈴꌠꀧꌋꃅ、ꂄꃅꉪꏦꈭꋏꑠꂿꃆꀉꒉꀊꂾꌠꃄꄻ,ꇇꌭꉁꈾꐳꃅꀻꎆ,ꂽꌤꉈꈽꊭꄎꌠꁨꎆꐨꀉꒉꀊꂾꃅꃅꊊ。ꏓꂱꂽꆹꍏꇩꐛꐨꂽꇨꈝꃀꇬꑭꁘꄔꈬꃅꐕꎼꆹꀐ。

  ꇤꉪꄠꌤꃅꌠꁨꎆꐨꀊꏀꌠꐥ。ꐊꑷꌸꊒꃅ“ꋍꇩꑍꏦ”ꌐꏦꃄꌬ,ꏟꈯꃅꏦꃀꌋꆀꅉꀨꏦꃤꏤꁵꄉꌠꍏꑷꆏꑣꇤ、ꉪꂱꏭꐊꑷꃅꏱꄻꌅꈌꐥꌠꌭꇇꈐꊐꄉ,ꃹꅼꃅꅔꈐꌋꆀꇤꉪꃅꄷꎻꈴꇷꃅ,ꑣꇤ、ꉪꂱꌄꆣꎍꐽꄉꇬꎷ。ꍏꇩꋍꂷꌠꏥꏦꌋꆀ“ꈬꑍꉜꐊ”ꌠꌭꈬꇬꎷ,ꎿꋮꑍꄷꐮꃆꂮꄮꐽꃅꀻꎆꌠꄹꇙ,ꊋꀥꇱꄉꎿꋮꑍꄷꎆꏣꁱꀕꎻꈴꇷꃅ,ꎿꋮꑍꄷꏲꂠꊿꐩꋊꐨꐥꃅꐮꂿꌠꃅꇫꑟ。ꋭꋽꃅꄠꃪꐛꐨꐛꐈꌠꇬꊝ,ꏟꈯꃅ“ꄠꃪꄂꋦ”ꁷꐞꊋꃤꏭꆽꁏꌋꆀꏡꍅ,ꊋꑌꃅꄠꃪꎿꅔꑍꋮꄮꐽꑘꒃꌠꀧꌋꃅ。

  ꋍꑞꋍꁆꏯꃅꉇꉻꑌꑲꌠꄐꉻꃹꅼꃅꃅꅷꆹ。ꐊꑷꃅꍏꇩꐛꐨꇩꏤꀉꒉꌠꉇꉻꑌꑲꌠꄹꎆ,ꋍꑞꋍꁆꏯ、ꋍꑞꋍꊐꌠ、ꋍꑞꋍꈚꌠꉇꉻꑌꑲꄐꉻꄻꐛꄉ,ꉪꇩꏤꀻꎆꌠꎁꃅꉇꉻꇎꏦꉾꃪꌠꄺꂡꄉꀐ。ꐯꇯ“ꋍꁕꋍꈜ”ꄻꌠꇴꅇꍝꅇꃄꌬ,ꑸꍏꅉꃀꉁꈾꎆꇱꑴꉴꄕꊪꄉꀊꏀꃅꀞꄉꀐ,ꏦꍠꈝꃀꎆꀨꊐꄻꄉ,ꉘꃀꃢꌠ“ꋍꁕꋍꈜ”ꇩꏹꇷꃅꀑꋾꉉꎥꈉ、ꑸꄠꎆꏣꇷꃅꎀꍹꏲꂠꊿꑌꐚꃀꀋꉬꌠꈿꌠ、ꇩꏤꑍꊏꂷꏓꉻꏲꂠꊿꉴꍏꀑꋾꃀꈿꌠ、ꏂꏪꇩꏤꏲꂠꊿꑤꂱꐮꂿꌠ、ꑸꑠꀑꋾꃀꈿꌠꀞꄻꀐ。ꃰꊿꊫꂫꐮꐊꐙꌠꄻꄉ,ꅉꆺꑭꊂꏱꄻꉻꑫꄺꀱꌠꊥꎆꄷꄕꊪ。ꉪꇩꏤꇩꏹꇬꑌꑲꊋꃤ、ꇳꍝꊋꃤ、ꎵꄻꊋꃤꀒꁨꋍꁘꃅꉀꐕꄉ,ꋧꃅꇣꄧꄮꐽꌠꌋꆀꀻꎆꌠꎁꃅꑆꊋꀊꏀꌠꀉꒉꀊꂾꃅꅐꌞꀐ。

  ꐊꑷꃅꏦꇨꃅꄈꏱꄻꌠꊌꐨꄇꇖꀕ。ꐊꑷꃅꄈꁵꏲꂠꎻꌠꌋꆀꄈꋈꄻꌠꊋꀥꇱ,ꏟꈯꃅꄈꏲꂠꄈꏱꄻꇬꏯꄉꏱꊋꀋꑌꃅꐙꌠꄺꀱꎼꇁ。ꄈꑭꊂꃅꄈꏦꁌꒉꌠꄹꇙ,ꍔꍞꉪꐨ、ꃅꇴꄉꉻꉪꐨ、ꈯꄜꉪꐨ、ꉜꊱꉪꐨꀉꇨꃅꑌꇁ,ꏟꈯꃅꄈꍏꑷꋦꒉꐨꌋꆀꏓꋍꃱꃅꏲꂠꌠꀧꌋꃅ,ꄈꅿꍔꍞꍬꏦꌋꆀꍔꍞꇗꏦꏦꇨꃅꌬ,ꋍꊐꇈꋍꊐꃅꄈꏲꂠꄈꏱꄻꌠꍔꍞꃅꎁꃅꇫꑟ。ꏟꈯꃅꑊꈻꅍꉜ、ꃢꍬꈚꍬ、ꇭꀧꊼꇅꋌ、ꆅꌠꊼꇅꉃꄷꌠꇖꐨꌭꈬꇬꎷ,ꄈꅿꉹꁌꈳꏦꉙꂘꃄꄻꌠꌋꆀ“ꌕꇨꌕꃅ”ꌠꌐꄉꉙꂘꌠꃅ,“ꑍꌷꋍꄻ”ꌠꌶꄻꉙꂘꅉꀕꈴꄹꏦꈴꌠꄹꎆ,ꄈꑭꊂꉪꅉꑇꐨꀊꅰꃅꏟꈯꀕ、ꄈꐛꊈꀊꅰꃅꀉꇨ。ꃅꋊꀊꏀꊬꌠꇥꀯꉾꃪꌠꎕꏦꃄꌬ,ꊾꌋꊾꌬꐛꐨꃄꄟꄇꇖꀕꃅꆹꏮꃪꇁ。ꄈꅿꋈꄻꄹꏦꄺꀱꌠꃹꅼꃅꄹꎆ,ꄈꈏꇓꏦꇗꄹꏦꉻꑫꀋꆏꃅꄻꐛꒆ。ꍬꏦꄻꂴꄉ,ꊋꇤꄉꏓꂱꉹꁌꇫꉉꄜꃛꐯꃛꌠ、ꄈꌅꈌꌬꅉꃀꇬꀉꒉꐯꀉꒉꃅꃗꉮꌠꌤꃆꑓꅐꎑꌠꀞꄻ。ꍏꑷꏤꐪꉆꐘꄜꃑꅐꇁ,ꅱꈯꃅꇶꏦꉪꏦ、ꇛꌺꉪꏦ、ꈩꌒꃼꉪꏦꌋꆀꁦꎆꄀꃅꇏꋊꄻ,ꏟꈯꃅꐋꀋꌡꌅꈌꏭꁏ。ꏮꉜꑱꃀꂿꄐꄇꇖꀕ,ꍏꑷꌋꆀꌜꊐꌠꄈꊈꏮꉜꌠꉱꑷꈴꌠꃅꇫꑟ。ꍹꈔꌠꏭꁏꇬꏡꅉꀋꐥ、ꉱꑷꈴ、ꄝꀋꏆꌠꌭꈬꇬꎷ,ꀋꎪꀋꑴꃅ“ꆿꃀꅥ”、“ꑾꃅꏶ”、“ꀉꐩꈹ”,ꍹꈔꀋꀬꌠꑞꅉꁻꌐꀑꐱꃅꃅꇫꑟ,ꍹꈔꀋꉆꌠꉍꈄꀊꅰꎺꀊꅰꈬꇁ,ꍹꈔꀋꏾꌠꄹꇭꇬꊎꋈꇰ,ꍹꈔꌠꏭꁎꉈꈽꌠꍅꅸꏿꃅꐙꌠꄻꐛꄉꀐꄷꀋꁧꈫꈈꃅꀻꎆꇰ。

  ꉬꈎꅑꅸꇁꌠꊌꐨꆹꋍꑞꋍꁆꏯꃅ、ꀹꄻꐨꐥꃅꐙꌠꉬ,ꉬꈎꅑꅸꇁꌠꐛꐈꌠꆹꃹꅼꃅ、ꁧꀦꐨꐥꃅꐙꌠꉬ。ꉬꈎꅑꅸꇁꌠ,ꉪꊇꄈꆹꀋꇰꀋꉈꌠꍔꍞꀬꅑꐨꌋꆀꀉꇨꌠꃅꎁꆸꄜꄉ,ꉪꉻꀊꏀꉪꇐꀊꏀꄐꇐꀊꏀꈨꄜꅐꇁ,ꌐꏦꏱꁈꀉꒉꀊꂾꈨꏤꑣꅐꇁ,ꏁꁈꀉꒉꀊꂾꈨꏤꄻꅐꇁ,ꌤꃅꌠꀉꒉꀊꂾꈨꄹꎆ,ꀊꉗꏢꅑꅸꇁꌠꂥꀘꏾꇈꊌꂥꀋꀘꌠꊋꋠꌠꌤꃆꀉꑌꈨꂥꀘꄉꀐ,ꋌꃀꀞꄻꏾꇈꊌꀞꀋꄻꌠꌤꀉꒉꀊꂾꌠꀉꑌꈨꀞꐛꀐ,ꄈꌋꆀꇩꏤꌤꑘꄹꇙꌊꐩꋊꐨꐥꃅꐛꐈꀐ。ꐩꋊꐨꐥꃅꐛꐈꋋꈨꌠꆹ,ꄈꌋꆀꇩꏤꌤꑘꀻꎆꌠꇬꁧꏖꐨꀉꒉꀊꂾꇈꅼꎴꃅꐥ。

  ꉬꈎꅑꅸꇁꌠ,ꉪꊇꆹꄈꂾꎍꌠꀉꒉꀊꂾꃅꃨꆰꎟꎖꌠꌋꆀꄈꈏꇓꇬꐥꌠꑓꅐꎑꌠꌤꃆꊝꀬ,ꀉꇨꌠꉪꐨꑌꇐꌌꃅꇏꋊꎃꍬꏦꋊꎵ、ꍹꈔꌠꏭꁏꄷꅠꌠꏭꅓꄉ,ꄈꌋꆀꇩꏤꈏꇓꇬꐥꌠꉮꐴꀉꆈꌠꋊꑣꇧꎭꀐ,ꄈꈏꇓꍔꍞꐥꐨꃄꀑꃅꑊꀊꅰꃅꐛꏀꁏ,ꄈꈏꇓꍔꍞꒆꉻꄇꇖꀕꃅꄻꃪꇁ,ꄈꀹꄻꊋꃤ、ꏓꋧꊋꃤ、ꌉꈿꊋꃤꄇꇖꀕꃅꀉꇨꇁ,ꄈꋯꑌꋍꃱꃅꌠꀊꅰꃅꈫꈈꇁ,ꄈꌋꆀꉹꁌꐮꃆꂮꄇꇖꀕꃅꄻꃪꇁ,ꄈꆹꇝꂱꐨꐥꃅꄜꎟꌠꇬꄉꀊꅰꃅꀉꇨꇁ,ꀊꏀꀉꇨꌠꋥꊋꍅꁍꀕꌠꏀꄓꇁꄉ,ꄈꌋꆀꇩꏤꌤꑘꀻꎆꌠꎁꃅꀉꇨꌠꍔꍞꄉꀧꌠꇲꁵꀐ。

  ꋍꈭꐨ,ꀋꎪꃅꏸꐚꃅꉜꄉꌶꌠꆏ,ꉪꊇꌤꃅꇬꉈꑴꀋꇎꀋꂪꅉꀉꑌꃅꐥꑴꌦ,ꊋꋠꌠꌋꆀꋓꎭꌠꑌꀉꑌꃅꉪꂾꎍꑴꌦ。ꀋꉬꀋꉆꌠꆏ:ꀻꎆꌊꐮꆽꀋꏣꇎꀋꋒꌠꌤꃆꑓꅐꎑꈨꊌꌌꂥꀋꀘꑴꌦ,ꀻꎆꊇꁧꌋꆀꇿꋌꀊꀋꂥꑴꌦ,ꏀꀺꊋꃤꀉꇨꋒꃅꀋꐛ,ꐥꄜꎆꏣꑞꅉꉀꐕꄻꅐꑴꌦ,ꒆꉻꋦꈭꀧꌋꃅꌠꃣꇖꈜꎴ;ꉹꁌꐥꐨꁁꏯꀋꇎꀋꂪꅉꀉꑌꃅꐥꑴꌦ,ꎭꑆꇔꈢꇓꀖꌠꂿꃆꊋꋠꏢꅝ,ꇓꈓꇓꉈꃄꁕꀻꎆꐨꌋꆀꊌꐨꁷꄻꍣꐨꄡꇗꊼꇅꀉꒉ,ꉹꁌꃅꑘꊌ、ꉙꂘ、ꆅꉁꆄꄻ、ꀀꑳ、ꃀꌠꀨꎹꑠꁁꏯꊋꋠꅍꀁꑌꃅꀋꊝ;ꐧꋦꌧꑳꑞꅉꉀꐕꈇꑴꌦ;ꐧꋦꐮꄙꐨꌋꆀꌤꃆꐯꏍꐮꄅꏿ,ꐊꑷꃅꏦꈴꇩꏲꌠꂿꃆꄡꇗꀉꇖꑴꌦ,ꇩꏤꏱꄻꉻꑫꌋꆀꏱꄻꄐꊋꊋꀥꇱꄻꅐꑴꌦ;ꉪꐨꐛꄟꁁꏯꐮꉈꈽꌠꄡꇗꌼꇪꑴꌦ,ꇩꏤꋬꂻꌠꐛꐪꀊꏀꌠꊝ;ꄺꀱꇬꄐꇐꁆꇐꌋꆀꏱꁈꏡꁈꀉꒉꀊꂾꈨꀒꁨꋍꁘꃅꃄꌬꇫꑟꄻꅐ;ꄈꋈꄻꁁꏯꄡꇗꊋꁧꅉꀉꑌꃅꐥꑴꌦ。ꌤꃆꋋꈨ,ꀋꎪꃅꊋꇤꄉꌌꂥꀘꇧꎭꌶ。

  ꉬꈎꅑꅸꇁꌠꊌꐨꆹ,ꄈꍏꑷꀉꇨꃅꏲꂠꄉꊌꅜꌠꉬ,ꀊꅰꃅꄈꑭꊂꇩꏤꑭꊂꊿꋅꈁꐥꌠꏓꂱꃅꐯꇯꊋꇤꄉꊌꅜꌠꉬ。ꉢꍏꇭꍏꑷꎁꃅ,ꇩꏤꑭꊂꊿꋅꈁꐥꌠꏓꂱꏭ,ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀꋍꑞꋍꁆꏯꇩꉂꊿꂒꋦꌠꏭ,ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌꌋꆀꄠꃪꃺꑌꉈꑴꇩꉈꀀꌠꃺꑌꋍꏅꌠꏭ,ꍏꇩꐛꏀꈴꋈꄻꌠꇬꉈꇬꌋꆀꇇꀨꌠꇩꏤꈁꐥꌠꐋꀨꏭ,ꇬꀖꌌꀖꄉꈀꎭꀕ!

  ꐋꀨꊈ!ꄺꀱꁉꃑꇬꂾꇬ,ꉪꊇꄈꆹꊨꏦꈝꃀꍬ、ꍏꇩꐛꐨꐧꋦꉪꏦꋈꄻꌠꇴꅇꍝꅇꇰꀋꃀꌠꄜꎼꇁꀐ。ꀊꋨꄮꇬꄑ,ꉪꊇꄈꆹꇩꏤꑭꊂꊿꋅꈁꐥꌠꏓꂱꋯꑌꏃꂠꌊꀋꆏꃅꉈꈽ,ꉪꇩꏤꎆꏣꊋꃤ、ꈆꑪꇮꇐꊋꃤ、ꇩꐏꊋꃤ、ꏓꇱꇩꊋꄹꇙꌊꋧꃅꇬꂴꐊꆹꀐ,ꉪꇩꏤꇩꏹꑋꅉꉆꈉꄹꇙꌊꋌꃀꑠꐥꀋꋻꃅꉀꐕꌠꃅꇫꑟꀐ,ꄈꀑꑊ、ꇩꏤꀑꑊ、ꏓꂱꀑꑊ、ꂽꀑꑊ、ꍏꉸꊿꋅꀑꑊꋌꃀꑠꐥꀋꋻꃅꐛꐈꌠꇫꅐꇁꀐ,ꍏꉸꊿꋅꀋꃋꇬꊎꀑꏀꑊꏀꃅꅡꊪꀕꃅꋧꃅꁭꅐꁁꏯꋥꇰ。

  ꀊꉗꃅꊋꇤꏡꇤꈭꐨ,ꍏꇩꐛꐨꐧꋦꉪꏦꆹꃅꋊꀊꏀꋎꌠꇬꃹꆹꀐ,ꋋꆹꉪꇩꏤꀻꎆꌠꐩꋊꉆꈉꀊꏀꌠꉬ。

  ꍏꇩꐛꐨꐧꋦꉪꏦꃅꋊꀊꏀꋎꌠꇬꃹꆹꌠꆹ,ꋌꃀꋎꌠꅑꅸꇁꌠꀊꉗꃅꎭꅗꅧꅗꌠꍏꉸꊿꋅꄓꇬꉆꀐꌠ、ꌣꈚꀐꌠꇬꄉꀉꇨꀐꌠꇰꀋꃀꃅꐚꄑꏿꌠꇬꃹꀐ,ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꊫꂫꁤꇅꀕꌠꉪꂾꎍꀐꄷꌠ;ꈆꑪꐧꋦꉪꏦꆹꃅꋊꑍꊏꋋꋏꌠꍏꇩꄉꀉꇨꌠꋥꊋꍅꁍꀕꌠꏀꄓꌠꄜꅐꇁꀐ,ꋧꃅꇣꄧꇬꍏꇩꐛꐨꐧꋦꉪꏦꇰꀋꃀꌠꁈꁧꀊꂥꐯꀊꂥꃅꐕꄉꀐꄷꌠ;ꍏꇩꐛꐨꐧꋦꉪꏦꈝꃀ、ꌧꇗ、ꄹꏦ、ꁱꀕꀋꆏꃅꀻꎆꌠꄜꅐꇁꀐ,ꀻꎆꇰꌠꇩꏤꐛꏀꈴꌠꉜꄉꆹꌠꈝꃀꍔꐯꄉꀐ,ꋧꃅꇣꄧꇬꋍꁁꏯꆏꐳꃅꀻꎆꑟꉂꉈꑴꋍꁁꏯꆏꂱꑱꄂꋦꐨꌭꈬꇬꎷꑟꉂꌠꇩꏤꌋꆀꊿꋅꀊꋨꈨꎁꃅꀊꏀꏃꌠꌋꉆꍬꉆꌠꈝꃀꁵꄻꀐ,ꃰꊿꌤꃆꂥꀘꌠꎁꃅꍏꇩꌧꐨꌋꆀꍏꇩꄐꉻꅐꌞꎼꇁꀐꄷꌠ。

  ꃅꋊꀊꏀꋋꋏꆏ,ꂴꊪꊂꊛ、ꂴꊛꊁꀺ、ꐩꋊꇎꏦꀊꏀꌠꇂꃴꄉꐪꊛꄉꍏꇩꐛꐨꐧꋦꉪꏦꇰꀋꃀꌠꊋꐛꌠꇑꅜꌠꃅꋊꉬ,ꐊꑷꃅꊼꇅꌣꈚꌠꐧꋦꋈꄻꐛꄉꇈ、ꐊꑷꃅꐧꋦꉪꏦꐛꏀꈴꇩꏤꐞꄿꌠꂫꋓꊋꐛꌠꃅꋊꉬ,ꇩꏤꑭꊂꊿꋅꈁꐥꌠꏓꂱꋯꑌꉈꈽ、ꀋꆏꃅꐥꐨꉾꃪꌠꀹꄻ、ꋍꁘꋍꁘꃅꏓꂱꈁꐥꌠꐯꇯꌣꈚꌠꃅꇫꑟꌠꃅꋊꉬ,ꍏꉸꌺꇖꈁꐥꌠꉌꊋꋍꏢꃅ、ꊋꇤꄉꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꃅꋊꉬ,ꉪꇩꏤꋍꑍꋍꉙꃅꋧꃅꈩꀜꅉꈯꄔꊫꒉ、ꀋꆏꃅꐧꇁꃰꊿꎁꃅꑆꊋꀊꅰꀉꒉꌠꅐꌞꌠꃅꋊꉬ。

  ꍏꇩꐛꐨꐧꋦꉪꏦꃅꋊꀊꏀꋎꌠꇬꃹꇬ,ꉪꇩꏤꐧꋦꐮꄙꐨꀋꉬꀋꉆꌠꆏꆹꏮꌊꏓꂱꋍꑍꋍꉙꃅꉀꎆꌠꐥꐨꉾꃪꌠꈉꐨꌋꆀꀻꎆꐮꆽꀋꏣꇎꀋꋒꌠꇢꊭꇬꐮꄙꐨꐛꀐ。ꉪꇩꏤꎍꐽꃅꊿꊯꎖꂡꋠꂊꈚꊸꌠꌤꃆꂥꀘꇧꎭꀐ,ꀑꐱꃅꇬꊼꇅꌣꈚꌠꃅꇫꑟꀐ,ꀊꉗꀋꐛꇬꆏꐊꑷꃅꊼꇅꌣꈚꌠꐧꋦꋈꄻꐛꌠꉬ,ꏓꂱꐥꐨꉾꃪꌠꈉꐨꋍꑍꋍꉙꃅꀊꐯꈭꇁꄻꅐꌠꆏ,ꐥꇐꁱꀕꐥꐨꏭꇖꐨꀊꅰꀊꂥꌠꄜꎼꇁꌠꀉꄂꀋꉬ,ꄷꀋꁧꋯꁦ、ꏦꏲ、ꀋꈐꀋꉈ、ꑗꉬ、ꋬꂻ、ꋦꈭꑠꁁꏯꌠꇬꇖꐨꑌꋍꑍꋍꉙꃅꉀꎆ。ꋍꈭꐨ,ꉪꇩꏤꐧꋦꒃꅐꊋꃤꑟꐨꀑꐱꃅꇬꄇꇖꀕꃅꉀꐕ,ꐧꋦꒃꅐꄐꊋꀉꑌꁁꏯꌠꆏꋧꃅꇬꂴꐊꆹ,ꌤꃆꀊꅰꃅꑓꅐꎑꌠꆏꀻꎆꐮꆽꀋꏣꇎꀋꋒꌠꉬ,ꋋꆹꏓꂱꋍꑍꋍꉙꃅꉀꎆꌠꐥꐨꉾꃪꌠꈉꐨꇬꇎꑟꌠꇬꏢꑲꌠꐊꊈꀋꉬꀋꉆꌠꐛꀐ。

  ꀋꎪꃅꌧꐚꌶꌠꆏ,ꉪꇩꏤꐧꋦꐮꄙꐨꀋꉬꀋꉆꌠꐛꐈꌠꆏꃅꇴꄉꉻꇬꃆꂮꐥꌠꐩꋊꐨꐥꃅꐛꐈꌠꉬ,ꄈꌋꆀꇩꏤꌤꃅꌠꏭꇖꐨꀊꏀꌠꀉꑌꃅꄜꎼꇁꀐ。ꉪꊇꆏꐪꊛꄉꀻꎆꌠꄹꇙꌠꅉꃀꀂꏽꄉ,ꊋꏂꄉꀻꎆꐮꆽꀋꏣꇎꀋꋒꌠꌤꃆꂥꀘꋒ,ꊋꀉꒉꃅꇤꄉꀻꎆꊇꁧꌋꆀꊌꐨꈲꁧꉀꐕ,ꀊꅰꉾꃅꏓꂱꁳꎆꏣ、ꍔꍞ、ꁱꀕ、ꐧꋦ、ꒆꉻꑠꁁꏯꇬꋍꑍꋍꉙꃅꉀꎆꌠꈉꐨꇬꑟꎻ,ꀊꅰꉾꃅꊿꐊꑷꃅꀻꎆ、ꐧꋦꐊꑷꃅꀻꎆꌠꄹꇙꌶ。

  ꀋꎪꃅꌧꐚꌶꌠꆏ,ꉪꇩꏤꐧꋦꐮꄙꐨꀋꉬꀋꉆꌠꐛꐈꇬ,ꉪꊇꉪꇩꏤꐧꋦꉪꏦꇬꈀꃹꎍꌠꐩꋊꊬꌠꏭꊨꇽꌠꇬꄺꀋꀱ,ꉪꇩꏤꄡꇗꄷꀋꁧꀊꉗꃅꐧꋦꉪꏦꉘꃀꊬꌠꇬꃸꎍꌠꅉꀨꇩꃆꇩꂮꐛꀋꐈ,ꉪꇩꏤꆹꋧꃅꇬꀻꎆꇰꌠꇩꏤꀉꒉꐯꀉꒉꂷꉬꌠꇩꏹꉆꈉꐛꀋꐈꌠꉬ。ꄈꑭꊂꆏꏟꈯꃅꐧꋦꉪꏦꉘꃀꊬꌠꅉꀨꇩꃆꇩꂮꋋꏢꒃꇇꈐꊐꄉ,ꏟꈯꃅꐧꋦꉪꏦꉘꃀꊬꌠꃶꐚꐛꐪꀉꒉꐯꀉꒉꋋꏢꇬꈴ,ꏟꈯꃅꄈꅿꅉꀨꈛꏦꄈꌋꆀꇩꏤꃤꀑꇬꑟ、ꏓꂱꐥꌒꄻꌒꑟꋋꏢꌭꈬ,ꇩꏤꑭꊂꊿꋅꈁꐥꌠꏓꂱꏃꂠꌋꆀꋯꑌꌊ,ꎆꏣꋈꄻꌠꌌꈯꄜꃅꄉ,ꅉꀨꏥꏦꇖꏢꌠꌭꈬꇬꎷ,ꄺꀱꁉꃑꌠꌭꈬꇬꎷ,ꊨꏦꊋꃤꉘꇉ,ꎬꅧꃅꑘꀺꄉ,ꉪꇩꏤꋈꄻꌊꌣꈚꋯꁦꌧꑳꐮꄮꎔꃨꌠꐧꋦꉪꏦꐛꏀꈴꌠꇩꏤꐞꄿꌠꐛꌠꎁꃅꉈꈽꌶ。

  ꐋꀨꊈ!ꍏꇩꐛꐨꐧꋦꉪꏦꃅꋊꀊꏀꋎꌠꇬꃹꆹꌠꆏ,ꍏꉸꏓꂱꇭꉼꇩꀻꎆꐩꋊꇬ、ꍏꉸꊿꋅꀻꎆꐩꋊꇬꈻꇐꀉꒉꀊꂾꃅꐥ,ꋧꃅꐧꋦꉪꏦꀻꎆꐩꋊꇬ、ꃰꊿꐧꋦꀻꎆꐩꋊꇬꑌꈻꇐꀉꒉꀊꂾꃅꐥꌠꉬ。ꄈꑭꊂꆏꉌꊋꀋꎪ、ꊋꇤꌤꃅꄉ,ꍏꇩꐛꐨꐧꋦꉪꏦꁳꐤꎴꊋꃤꀊꅰꀉꇨꌠꐥꇁꎻ!

  ꑍ、ꃅꋊꀊꏀꋎꌠꍏꇩꇭꍣꄈꐩꋊꂿꃆ

  ꋍꉐꈎꂾ,ꊰꆨꇝꂱꄇꍩꇫꇬꇄꌠꂿꇬꆏ,ꂷꇻꌦꆺꆀꉪꏦꌞꌌꍏꇩꑟꇁꀐ。ꍏꇩꂴꅑꌠꊿꆏꂷꇻꌦꆺꆀꉪꏦꃤꈆꑪꇗꊈꈐꏭꇬꍏꇩꌤꃆꂥꀘꌠꈝꃀꊌꂿꀐ。ꃅꋊꂴꈍꑋꋏꌠꊂꍏꇩꐧꋦꃛꊸꃅꉻꄑꅉꇬꄉ,ꍏꇩꏓꂱꌅꁵꏱꍅꌠꌋꆀꉇꉻꉄꌎꇁꌠꏭꆼꁏꌠꃛꊸꃅꉈꈽꅉꇬꄉ,ꂷꇻꌦꆺꆀꉪꏦꌌꍏꇩꇮꃅꊿꉻꄑꌠꌋꆀꐮꐊꌠꈴꎁꇬꄉ,ꋍꄘꈬꉐꑍꊏꋋꈓꇬꆏꍏꇩꇭꍣꄈꄻꐛꎼꇁꀐ。ꋌꉈꆏ,ꍏꇩꏓꂱꊿꋅꄂꋦ、ꏓꂱꁌꄝꌋꆀꇩꏤꌣꈚꐞꄿ、ꏓꂱꐥꌒꄻꌒꌠꎹꈹꉈꈽꌠꆏꈯꌬꐥꀐ,ꍏꇩꏓꂱꆏꉌꊈꀂꏽꇬꌠꇙꌠꇬꄉꆹꏮꌊꑴꇙꌠꐛꀐ。

  ꍏꉸꊿꋅꌧꑳꐩꋊꆏꉬꄙꎖꈎꐥ,ꏁꇅꁤꇅꁏꌠꍏꉸꌧꑳꀹꄻꄉꀐ,ꐧꇁꃰꊿꎁꃅꑆꊋꀉꇨꐯꀉꇨꌠꅐꌞꀐ,ꋧꃅꑭꊂꇰꀋꃀꌠꊿꋅꐛꀐ。ꑶꑳꌉꆳꅐꈭꐨ,ꍏꇩꆏꊰꇁꈐꐒꉇꉮꌠꆈꋧꋪꅉꇬꊐ,ꍏꇩꏓꂱꆏꌉꆳꀋꆏꃅꅐ、ꏱꅉꀜꐡ、ꉹꁌꐥꀨꐥꑭꀋꐥꌠꎬꅧꊋꋠꌠꈴꀐ。ꊿꋅꁳꀱꌄꆣꇁꎻꂿꄷꄉ,ꌻꇭꌺꄿꀋꃷꎵꌠꆏꊈꇨꈌꀋꊰ、ꂴꐚꊂꊛꃅ,ꀮꄑꉌꐡꁌꁨꌠꉈꈽꌠꃅꀐ,ꋍꑞꋍꑵꃅꈁꉚꌠꃅꀐ,ꄚꈍꃅꑌꍏꇩꀉꆹꌠꐧꋦꐛꊈꌋꆀꍏꇩꏓꂱꎬꅧꈧꊰꀕꌠꄺꀱꇧꎭꀋꄐ。

  ꍏꉸꊿꋅꇰꀋꃀꃅꀱꌄꆣꇁꌠꃅꅜꌠꆏꃅꋊꂴꈍꑋꋏꌠꊂꅑꅸꇁꌠꍏꉸꊿꋅꇰꀋꃀꐯꇰꀋꃀꌠꉪꐨꉬ。ꍏꇩꇭꍣꄈꄻꐛꄷꆏ,ꇷꁨꉪꏦꃅꇫꑟꌠꌌꄈꉪꅉꋍꉎꀋꐥꌠꌋꆀꁻꌐꄽꂫꋍꉎꀋꐥꌠꃅꄉ,ꑗꅒꉈꀋꎞꃅꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꐩꋊꃅꎁꆸꄜꄉ,ꏓꂱꋯꑌꏃꂠꌊꎬꅧꐯꎬꅧꃅꉈꈽꌠꃅꀐ,ꊋꌗꒈꍅꃪꍅꌠꐩꋊꉙꇐꉾꃪꌠꁰꄻꎼꇁꀐ。

  ꉪꊇꄈꃹꅼꃅꌧꐚꇬ,ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꂿꄷꇬꆏ,ꀋꎪꃅꍏꇩꏓꂱꀂꏾꇬꍅꎍꌠꄃꇩꉪꏦ、ꌅꁵꉪꏦ、ꇛꌺꎆꀨꉪꏦꁧꀉꒉꌕꂷꌠꁏꆷꇧꎭꄉ,ꊿꋅꄂꋦ、ꏓꂱꁌꄝ、ꇩꏤꏓꋍꃱꃅ、ꐧꋦꎍꐽꌠꃅꇫꑟꌶ。ꉪꊇꄈꏓꂱꋯꑌꏃꂠꌊꂿꑘꁡꇤꌌꇓꈓꇊ、ꇇꌭꌌꍔꌅꇑꅜꌠꎃꊒꌠꇝꂱꈝꃀꏢꎹꅜꀐ,ꑍꊏꉆꈓꌦꅐꐲꑷꃅꌉꈿꈭꐨ,ꋯꁦꀊꏀꉪꏦꇝꂱꌠꃅꌐꀐ,ꋍꄘꈬꉏꇖꊯꈬꈎꇬꆏꍏꉸꏓꂱꇭꉼꇩꄻꄉꀐ,ꍏꇩꈍꑋꄙꈎꌠꌅꁵꏱꍅꍔꍞꇬꄉꏓꂱꋯꁦꌠꇰꀋꃀꃅꐚꄑꏿꌠꇬꉜꄉꆹꌠꃅꇫꑟꀐ。

  ꉪꊇꄈꃹꅼꃅꌧꐚꇬ,ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꂿꄷꇬꆏ,ꀋꎪꃅꉪꇩꏤꃶꐚꐛꐪꇬꄐꊒꌠꐧꋦꄹꏦꂴꅑꌠꄻꐛꌶ。ꉪꊇꄈꏓꂱꋯꑌꏃꂠꌊꐧꋦꉪꏦꇝꂱꌠꃅꌐ,ꐧꋦꉪꏦꅉꀨꄹꏦꄻꐛꄉ,ꐧꋦꉪꏦꋈꄻꌠꄹꎆ,ꍏꉸꊿꋅꐩꋊꐥꊂꇬꀊꐯꈭꐯꀊꐯꈭꇈꃹꅼꌠꐧꋦꆴꐈꌠꃅꌐꀐ,ꀋꃋꋋꄮꍏꇩꈁꀻꎆꁨꆹꌠꎁꃅꊇꅉꍔꍞꇎꏦꌋꆀꄹꏦꅉꃀꄻꈬꄉꀐ,ꍏꉸꊿꋅꃅꋊꂴꈍꑋꋏꌠꇬꀋꆏꃅꀁꋌꊰꌠꇬꄉꊇꅉꃅꐛꐨꐛꊂꆹꏮ、ꐪꊛꄉꌄꆣꌣꈚꌠꏭꉜꄉꆹꌠꇰꀋꃀꃅꐚꄑꏿꌠꃅꇫꑟꀐ。

  ꉪꊇꄈꃹꅼꃅꌧꐚꇬ,ꍏꉸꊿꋅꇰꀋꃀꃅꀱꌄꆣꇁꌠꃅꇬꅜꂿꄷꇬꆏ,ꀋꎪꃅꃅꋊꒈꂃꇬꐊ、ꏓꂱꉪꐨꇬꄐꊒꄉ,ꄺꀱꁉꃑꀬ,ꄈꌋꆀꏓꂱꌤꑘꁳꈍꄮꑌꊋꇤꀒꁨꆹꌠꇘꊋꀉꒉꀉꇨꌠꇎꃅꑌꄉꎻꌶ。ꉪꊇꄈꏓꂱꋯꑌꏃꂠꌊꄺꀱꁉꃑꀊꏀꃅꇰꀋꃀꃅꀕꌠꃅ,ꇩꏤꌋꆀꊿꋅꀻꎆꌠꇬꏢꇋꌠꉪꇐꌋꆀꏦꉻꏢꇈꅍꈁꐥꌠꅥꁖꇧꎭ,ꍏꇩꐛꐨꐧꋦꉪꏦꈝꃀꀹꄻꎼꇁꄉ,ꍏꇩꁳꑭꁘꀊꐯꃅꐕꄉꃅꋊꇬꃹꆹꎻꀐ。

  ꈬꊰꃘꈓꅑꅸꇁꌠ,ꍏꉸꊿꋅꇰꀋꃀꃅꀱꌄꆣꇁꌠꐩꋊꃅꎁꃅꇫꑟꂿꄷꄉ,ꊋꁧꅀꊋꒉꄿꂿ,ꁣꀋꐥꃅꐙꅀꊋꋠꃅꐙꄿꂿ,ꉪꊇꄈꆏꇬꂾꉪꐨꄻꀋꀱ、ꀋꎪꀋꑴꃅꃅꇬꎷ,ꏓꂱꋯꑌꏃꂠꌊꊋꋠꌠꄙꇁꃪꃅꊝ,ꀉꒉꐯꀉꒉꃅꁮꑋ,ꈜꈪꊋꋠꌠꊝꀬ,ꆹꑽꌠꋊꍬꀬ,ꉜꎼꇁꇬꂵꑣꇧꎭꀋꄐꌠꌡꌠꊋꋠꌠꋍꐘꇈꋍꐘꃅꂵꑣꇧꎭꄉ,ꁱꐩꋊꄯꒉꁨꐞꌠꇬꄀꄉꌠꐧꇁꃰꊿꇫꉘꀋꇉꌠꋍꐘꇈꋍꐘꃅꀹꄻꄉꀐ。

  ꐋꀨꊈ!ꀃꑍꋋꄮ,ꉪꊇꆏꐩꋊꑞꊭꌠꑌꏭꀋꋌꃅꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꁻꌐꇬꀊꅰꃅꊫꆹ、ꀊꅰꃅꉌꊋꌋꆀꄐꊋꐥ。

  ꉏꆏꈴꇬꈬꊰꆏꈳꑌꈮꁁꀉꄂꌗ。ꍏꉸꊿꋅꇰꀋꃀꃅꀱꌄꆣꇁꌠꆏ,ꈍꃅꑌꈝꐮꃅ、ꍜꁮꉙꁯꍝꄷꆏꃅꇫꑟꄎꌠꀋꉬ。ꄈꑭꊂꆏꀋꎪꃅꀊꅰꃅꊋꋠ、ꀊꅰꃅꎬꅧꃅꊋꇤꌠꊭꄎꄉꌶ。

  ꉪꐨꇰꀋꃀꌠꃅꇫꑟꂿꄷꇬꆏ,ꀋꎪꃅꇰꀋꃀꃅꉈꈽꌶ。ꐧꋦꆹꐮꄙꅉꇬꄉꁨꆹꌠꉬ,ꐮꄙꐨꐥꄷꆏꉈꈽꌠꐥꇬꎷ。ꉪꊇꄈꆏꏓꂱꋯꑌꏃꂠꌊꇿꋌꐥꃅꋓꎭꀉꒉꀊꂾꌠꏭꊝ、ꃨꆰꐨꀉꒉꀊꂾꌠꄘꑣ、ꏢꇋꊋꃤꀉꒉꀊꂾꌠꇔꑣ、ꐮꄙꐨꀉꒉꀊꂾꌠꂥꀘꇧꎭꌶ,ꀋꎪꃅꐩꋊꐋꀋꌡꐨꀊꏀꌠꀉꑌꃅꐥꌠꇰꀋꃀꃅꉈꈽꌠꃅꌶ,ꌒꈲꀉꄂꉪꌠ、ꏣꑌꐵꑷꌠ、ꐮꄙꐨꋒꐵꌠꉪꇐꌋꆀꃅꐨꈁꐥꌠꃅꐯꇯꆹꑽꌠꉬꌠ。ꄈꑭꊂꆏꀊꅰꑴꐚꃅꄈꁵꏲꂠꎻꌠꌋꆀꉪꇩꏤꐧꋦꉪꏦꄹꏦꌭꈬꌶ,ꏟꈯꃅꄈꁵꏲꂠꎻꌠꌋꆀꉪꇩꏤꐧꋦꉪꏦꄹꏦꏭꊋꊨꊋꁧꎻꌠ、ꉪꎎꃅꎎꌠ、ꆹꑽꆹꀠꄷꌠꈁꉉꈁꃅꌠꏭꁏ;ꀊꅰꃅꑴꐚꃅꏓꂱꈲꏣꀧꌋꃅ,ꏟꈯꃅꏓꂱꈲꏣꉮꄻ、ꉹꁌꇬꐞꁧꌠꃅꐨꈁꐥꌠꏭꁏ;ꀊꅰꃅꑴꐚꃅꄺꀱꏀꀺꌠꃅꋊꒈꂃꇬꐊꈽꃅ,ꏟꈯꃅꆐꅑꐨꈁꐥꌠꋊꑣ;ꀊꅰꃅꑴꐚꃅꉪꇩꏤꌅꀨ、ꋬꂻ、ꀻꎆꈲꏣꀧꌋꃅ,ꏟꈯꃅꁍꇩꁷꐞ、ꊿꋅꋯꑌꌠꌋꆀꐧꋦꐮꄮꑘꒃꌠꇬꀜꐆꌠꃅꐨꈁꐥꌠꏭꁏ;ꀊꅰꃅꑴꐚꃅꃨꆰꐨ꒔ꑞ꒔ꑵꌠꏭꄴꏮ,ꏟꈯꃅꍔꍞ、ꎆꏣ、ꁱꀕ、ꐧꋦꑠꁆꏯꇬꌋꆀꋌꐛꁆꏯꇬꅐꇁꌠꊋꋠꐨꌋꆀꋓꎭꐨꈁꐥꌠꏭꋓꊋꌶ。ꄈꑭꊂꆏꋒꐯꋒꃅꋌꃢꇰꀋ꒜ꃅꉈꈽꌠꀊꉗꐨ、ꌼꇪꐨ、ꆼꇨꐨꌧꐚ,ꉈꈽꉌꊈꍔꆙ,ꉈꈽꄐꅍꉀꐕ,ꀋꆏꃅꇰꀋ꒜ꃅꉈꈽꌠꊋꐛꐨꀊꏀꌠꇑꅜꌶ。

  ꉪꐨꇰꀋ꒜ꌠꃅꇫꑟꇬ,ꀋꎪꃅꋉꃆꇰꀋ꒜ꌠꋈꄻꌶ。ꋉꃆꇰꀋ꒜ꋌꐘꆹꉪꊇꄈꇬꊎꃹꅼꃅꄹꎆꌠꄈꋈꄻꌠꋉꃆꇰꀋ꒜ꀊꏀꌠꉬ。ꐩꋊꆹꇬꊎꊩꀽꇈꐪꊛꄉꊩꀽꂯꄉ,ꍏꇩꇭꍣꄈꏲꂠꌠꀋꐥꑲꆏ,ꊿꋅꀱꌄꆣꇁꌠꆹꈤꉪꏿꌠꉫꎂꀕ。ꉪꊇꄈꆏꈍꄮꇬꑌꃅꋊꂴꅑꌠ、ꊿꋅꄙꄿꐛꇬꎷ,ꈍꄮꇬꑌꂷꇻꌦꉪꏦꌅꈌꌌꄈꐛꇬꎷꂿꄷꇬ,ꑴꅉꀋꎪꃅꀉꇨꇬꎷꌶ。ꄈꑭꊂꆏꀊꅰꃅꑴꐚꃅꄈꐛꊈꏥꏦꌬ,ꀬꅑꃅꌤꃆꏭꊝ,ꃷꅍꇷꄉꆅꅋꀖꀬ,ꄈꂴꅑꐨꌋꆀꀊꌃꐨꇬꉮꄻꌠꐊꊈꈁꐥꌠꃅꋊꑣ,ꄈꇭꀧꉾꃪꌠꇬꉮꄻꌠꆅꅋꈁꐥꌠꃅꋊꑣꇧꎭꌐ,ꀋꆏꃅꄈꍔꍞꏲꂠꊋꃤ、ꉪꇐꄐꏁꊋꃤ、ꉹꁌꊥꇫꊋꃤ、ꐧꋦꇳꍝꊋꃤꄻꀉꇨ,ꉪꄈꐥꍂꃅꐥꏡꊋꃤꍄꑐꌠꌋꆀꌉꈿꊋꃤꀉꇨꌠꐥꇬꎷꌠꄉꀧ。

  ꉪꐨꇰꀋ꒜ꌠꃅꇫꑟꂿꄷꇬ,ꀋꎪꃅꌤꑘꇰꀋ꒜ꌠꄹꎆꌶ。ꍏꇩꐛꐨꐧꋦꉪꏦꆹꄺꀱꁉꃑꊂꅑꅸꇁꌠꄈꌧꇗꌋꆀꃄꄻꐨꈁꐥꌠꅇꀨꉬ,ꄈꌋꆀꏓꂱꈁꄽꎬꅧꄉ、ꀉꇨꃅꃸꅐꄉꊌꅜꌠꊇꅉꊌꐨꉬ。ꍏꇩꐛꐨꐧꋦꉪꏦꈝꃀꆹꐧꋦꉪꏦꐛꏀꈴꌠꃅꇫꑟ、ꏓꂱꐥꐨꉾꃪꌠꀹꄻꌠꈝꃀꀋꍬꀋꉆꌠꉬ,ꍏꇩꐛꐨꐧꋦꉪꏦꌧꇗꉻꑫꆹꄈꌋꆀꏓꂱꄐꇺꄉꍏꉸꊿꋅꇰꀋ꒜ꃅꀱꌄꆣꇁꌠꃅꇫꑟꌠꌧꇗꎃꊒꌠꉬ,ꍏꇩꐛꐨꐧꋦꉪꏦꄹꏦꆹꀋꃋꋋꄮꍏꇩꀻꎆꁨꆹꌠꊇꅉꄹꏦꏦꀧꐨꉬ,ꍏꇩꐛꐨꐧꋦꉪꏦꁱꀕꆹꄈꑭꊂꇩꏤꑭꊂꊿꋅꈁꐥꌠꏓꂱꄖꄑꄉꀬꅑꃅꀒꁨꆹꌠꉌꊈꊋꃤꀉꇨꌠꉬ。ꄈꑭꊂꆏꀊꅰꃅꑴꐚꃅꈝꃀꑴꑇ、ꌧꇗꑴꑇ、ꄹꏦꑴꑇ、ꁱꀕꑴꑇꌠꉌꀉꇨꃅꑌꄉ,ꋍꎤꄃꐛꌠꈜꆹꇬꑌꄡꍬ,ꁈꁧꆥꄻꌠꑽꈜꑌꄡꍬꃅ,ꍔꍞꀋꇙꊋꃤꌭꈬꇬꎷ,ꃶꐚꃅꃅꄉꇩꏤꌄꆣꎻꌠꌭꈬ,ꈍꄮꇬꑌꍏꇩꐛꐨꐧꋦꉪꏦꌭꈬꌋꆀꀻꎆꇬꎷ。

  ꉈꈽꇰꀋ꒜ꌠ,ꋉꃆꇰꀋ꒜ꌠ,ꌤꑘꇰꀋ꒜ꌠ,ꉪꐨꇰꀋ꒜ꌠꆹ,ꑖꑟꃅꐮꑌꑲ、ꐮꇬꐊꈴ、ꐮꇬꂿꄐꐥ,ꄚꈐꏭꏤꄻꐨꂿꄐꐥꌠꆏꄈꋈꄻꌠꋉꃆꇰꀋ꒜ꀊꏀꌠꉬ。ꋉꃆꇰꀋ꒜ꌠꄹꎆꇬ,ꉈꈽꇰꀋ꒜ꌠ、ꌤꑘꇰꀋ꒜ꌠ、ꉪꐨꇰꀋ꒜ꌠꃄꄻꌠꇬꐊꄉꃅꄉ,ꄈꆏꋧꃅꃅꒊꃅꇁꃹꅼꃅꐛꐈꌠꐩꋊꈴꎁꇬꈍꄮꑌꃅꋊꂴꆽꐊꐺꇬꎷ,ꇩꈐꇩꉈꃨꆰꐨꌋꆀꍤꎖꐨ꒔ꑞ꒔ꑵꌠꏭꊝꌠꐩꋊꈴꎁꇬꈍꄮꑌꇩꏤꑭꊂꏓꂱꉈꊪꁋꐛꇬꎷ,ꍏꇩꐛꐨꐧꋦꉪꏦꌭꈬꌋꆀꀻꎆꌠꈴꎁꇬꈍꄮꑌꏲꂠꈯꄜꀉꇨꌠꐛꇬꎷꌠꄉꀧ。

  ꐋꀨꊈ!ꂿꃆꆹꆸꄜꐨꏭꇳꍝ,ꂿꃆꆹꃆꏂꊂꑋꇬꄐꏁ。ꉪꊇꆏꏓꂱꀉꇨꃅꉪꉘꇉꌠꇢꄡꏿ、ꐩꋊꌊꄻꌠꇬꉌꆐꅑꅍꄡꐥꃅꄉ,ꃅꋊꀊꏀꋎꌠꇬꍏꇩꐛꐨꐧꋦꉪꏦꇰꀋ꒜ꃅꃄꄻꅉꇬꄉ,ꄈꀉꇨꃅꏲꂠꌠꌋꆀꇨꊈꑌꃅꉈꈽꌠꌊ,ꍏꉸꌺꇖꋍꏅꌠꄖꄑꌌꀋꆏꃅꀒꁨꂵꄉ,ꉌꋧꊋꏓꃅꄉꍏꇩꉪꐨꋈꄻꌠꊋꃤꀉꇨꃅꏓꋧꎼꇁꌶ!

  ꌕ、ꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌋꆀꅉꀨꄐꁈ

  ꃀꀉꒉꊰꉆꃢꌠꈿꊂꅑꅸꇁꌠ,ꇩꈐꇩꉈꃅꒊꃅꇁꐛꐈꌠꌋꆀꉪꇩꏤꌤꑘ꒔ꑞ꒔ꐘꀻꎆꌠꐯꇯꉪꊇꏭꃅꋊꎥꅍꀉꒉꀊꂾꏢꄜꎼꇁꀐ,ꋋꆏꀋꎪꃅꌧꇗꌋꆀꃄꄻꐨꏓꐯꇯꌠꀂꏽꉻꑫꃅꃅꋊꀊꏀꋎꌠꇬꈍꃅꐙꌠꍏꇩꐛꐨꐧꋦꉪꏦꌭꈬꌋꆀꀻꎆ、ꈍꃅꍏꇩꐛꐨꐧꋦꉪꏦꌭꈬꌋꆀꀻꎆꌠꏭꅇꀱꌶꌠꉬ,ꃅꋊꀊꏀꋎꌠꇬꍏꇩꐛꐨꐧꋦꉪꏦꀑꐱꁻꌐ、ꀑꐱꂿꃆ、ꀑꐱꄐꉻ、ꄐꇐꄐꉻꌋꆀꀻꎆꃅꍜ、ꀻꎆꃄꄟ、ꀻꎆꇙꊋ、ꄐꇐꏤꊭ、ꉇꉻꇎꏦ、ꍔꍞꄉꀧꐨꑠꅉꀨꌤꃆꇫꐊ,ꄷꀋꁧꀊꏀꃅꃄꄻꌠꎆꏣ、ꍔꍞ、ꏦꏲ、ꈆꑪꇮꇐ、ꁱꀕ、ꂘ꒧、ꉹꁌꐥꐨ、ꊿꋅ、ꑇꇐ、ꐧꋦ、ꒆꉻꌧꑳ、ꇩꏤꋬꂻ、ꇩꐏꌋꆀꂽ、“ꋍꇩꑍꏦ”ꌋꆀꁍꇩꏓꋍꃱꃅ、ꊋꏓꋍꃱꃅ、ꉇꉻꑌꑲ、ꄈꋈꄻꑠ꒔ꑞ꒔ꁆꏯꇬꉜꄉꌧꇗꎥꃪꌠꌋꆀꏱꁈꄐꇺꌠꃅꅐꇁꄉ,ꌌꀊꅰꃅꉾꃅꍏꇩꐛꐨꐧꋦꉪꏦꌭꈬꌋꆀꀻꎆꌒꎻ。

  ꃅꋊꎥꅍꀉꒉꀊꂾꋋꏢꇬꆼꒆꄉ,ꉪꊇꄈꆏꂷꇻꌦꆺꆀꉪꏦ、ꃀꊱꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌌꄐꇺꅍꃅꄉꌠꌭꈬ,ꉪꇐꁌꄝ、ꑞꉬꌠꑞꃅꄉ、ꃅꋊꐊꄉꁨꆹ、ꀋꎪꌠꎹꃶꐚꌠꃅꌠꌭꈬ,ꏡꃏꐥꇐꀨꎍꉪꏦꌋꆀꐩꋊꐥꇐꀨꎍꉪꏦꌭꈬ,ꑖꑟꃅꃅꋊꇎꏦꌋꆀꃄꄻꇖꐨꀊꏀꌠꇬꐊꄉ,ꂾꅉꀊꏀꐯꀊꏀꌠꌊꇭꍣꄈꌅꈌꌌꈳꏦ、ꐧꋦꉪꏦꋈꄻꈳꏦ、ꃰꊿꐧꋦꀻꎆꈳꏦꏭꃹꅼꃅꌧꐚ,ꎬꅧꃅꌧꇗꎹꎥꌠꃅ,ꌧꇗꏀꀺꊌꐨꀉꒉꀊꂾꌠꊌꅜꄉ,ꃅꋊꀊꏀꋎꌠꍏꇩꐛꐨꐧꋦꉪꏦꉪꇐꏓꐛꀐ。

  ꃅꋊꀊꏀꋎꌠꇬꍏꇩꐛꐨꐧꋦꉪꏦꉪꇐꆹ,ꍏꇩꐛꐨꐧꋦꉪꏦꌭꈬꌋꆀꀻꎆ,ꀑꐱꂿꃆꆏꐧꋦꉪꏦꐛꏀꈴꌠꌋꆀꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꉬꌠꊨꄅ,ꐊꑷꃅꊼꇅꌣꈚꌠꐧꋦꋈꄻꐛꌠꅉꃀꇬꄉ,ꁸꑍꁘꃅꈴꄉꃅꋊꋋꋏꐧꇬꆏꌣꈚꐞꄿꋯꁦꌧꑳꐮꄮꎔꃨꌠꐧꋦꉪꏦꐛꏀꈴꇩꏤꀉꇨꌠꋈꄻꐛ;ꃅꋊꀊꏀꋎꌠꇬꉪꇩꏤꐧꋦꐮꄙꐨꀋꉬꀋꉆꌠꆹꏓꂱꋍꑍꋍꉙꃅꉀꎆꌠꐥꐨꐥꌒꌠꈉꐨꌋꆀꐮꆽꀋꏣꇎꀋꋒꌠꀻꎆꌠꐮꇢꊭꇬꐮꄙꐨꉬꌠꊨꄅꂿꄷꇬ,ꀋꎪꃅꏓꂱꈯꄜꃅꄉꌠꀻꎆꉪꇐꌭꈬ,ꀋꆏꃅꊿꐊꑷꃅꀻꎆ、ꏓꂱꋍꏅꌠꐯꇯꌣꈚꌠꊥꎆ;ꍏꇩꐛꐨꐧꋦꉪꏦꌤꑘꉻꄜꄐꉻꆹ“ꉬꑵꋍꉻ”ꉬ、ꄐꇐꄐꉻꆹ“ꇖꑵꐊꑷ”ꌠꉬꌠꊨꄅ,ꈝꃀꑴꑇ、ꌧꇗꑴꑇ、ꄹꏦꑴꑇ、ꁱꀕꑴꑇꌠꉌꀉꇨꃅꑌꌠꊡꀱ;ꐊꑷꃅꃹꅼꃅꄺꀱꌠꀑꐱꁻꌐꆹꍏꇩꐛꐨꐧꋦꉪꏦꄹꏦꄻꐛꒆꌋꆀꀻꎆ、ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꊨꄅ;ꐊꑷꃅꏦꈴꇩꏲꌠꄹꎆꌠꀑꐱꁻꌐꆹꍏꇩꐛꐨꐧꋦꉪꏦꏦꏲꉻꑫꋈꄻ、ꐧꋦꉪꏦꏦꏲꇩꏤꋈꄻꌠꊨꄅ;ꃅꒊꃅꇁꀊꏀꌠꇬꄈꃤꂽꀉꇨꌠꁻꌐꆹꄈꄐꇺꌠꅇꃅ、ꌉꊋꐛꄎ、ꃅꇏꉾꃪꌠꏓꂱꂽꁥꋈꄻꄉ,ꏓꂱꂽꋈꄻꌊꋧꃅꇬꉘꃀꏠꌠꂽꐛꌠꊨꄅ;ꍏꇩꐛꐨꇩꏤꀉꒉꌠꉇꉻꑌꑲꌠꆹꀊꏀꉹꌠꇩꏹꐮꃆꂮꄹꇙꄉꄻꐛ,ꃰꊿꊫꂫꐮꐊꐙꌠꄹꇙꄉꄻꐛꌠꊨꄅ;ꍏꇩꐛꐨꐧꋦꉪꏦꊇꅉꇊꊇꅉꌠꐛꄟꆏꍏꇩꇭꍣꄈꏲꂠꌠꉬ,ꍏꇩꐛꐨꐧꋦꉪꏦꄹꏦꂱꎆꅑꐯꂱꎆꅑꌠꆏꍏꇩꇭꍣꄈꏲꂠꌠꉬ,ꄈꆹꍔꍞꏲꂠꊋꃤꀊꂥꐯꀊꂥꌠꉬ,ꃅꋊꀊꏀꋎꌠꄈꋈꄻꌠꀑꐱꇖꐨꄜꎼꇁ,ꍔꍞꋈꄻꌠꄈꋈꄻꅉꇬꉆꈉꀋꂿꑘꌠꌌꄞꅐꃅꄉꌠꊨꄅ。

  ꃅꋊꀊꏀꋎꌠꇬꍏꇩꐛꐨꐧꋦꉪꏦꉪꇐꆹ,ꂷꇻꌦꆺꆀꉪꏦ、ꃀꊱꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꊪꊛꌋꆀꀻꎆꌠꉬ,ꂷꇻꌦꉪꏦꍏꇩꐛꈴꌠꊌꐨꀊꏀꐯꀊꏀꌠꉬ,ꄈꌋꆀꏓꂱꃄꄻꎖꋪꌋꆀꋍꉻꀑꁮꐨꐛꂫꉬ,ꍏꇩꐛꐨꐧꋦꉪꏦꌧꇗꉻꑫꇬꀋꂿꑘꈨꉬ,ꄈꑭꊂꇩꏤꑭꊂꏓꂱꍏꉸꊿꋅꇰꀋꃀꃅꀱꌄꆣꇁꌠꃅꇫꑟꂿꄷꉈꈽꌠꃅꐨꄐꌐꅍꉬ,ꀋꎪꃅꀊꉗꃅꌭꈬꇈꀋꆏꃅꌌꀻꎆꌶ。

  ꄈꑭꊂꆏꃹꅼꃅꃅꋊꀊꏀꋎꌠꇬꍏꇩꐛꐨꐧꋦꉪꏦꉪꇐꉌꊈꃶꐚꌠꌋꆀꐊꊈꀉꑌꌠꌧꐚꄉ,ꋍꑞꋍꐘꌤꃅꅉꇬꄉꐊꑷꃅꎃꊒꃅꌌꃄꌬꌶ。

  (ꋍ)ꄈꌤꃆꈁꐥꌠꏭꏲꂠꌠꌭꈬ。ꄈꍔꂽꏓꂱꌶꅉ,ꃄꇖꄹꊂꇬ,ꄈꆹꈁꐥꃅꏲꂠꌠꉬ。ꀋꎪꃅꍔꍞꉪꉻ、ꃅꇴꄉꉻꉪꉻ、ꈯꄜꉪꉻ、ꉜꊱꉪꉻꄻꀉꇨ,ꑴꐚꃅꄈꍏꑷꋦꒉꐨꌋꆀꏓꋧꋍꃱꃅꏲꂠꌠꀧꌋꃅ,ꑴꐚꃅꉪꇐꇬꍔꍞꇬꃅꇏꇬꃅꄈꍏꑷꌋꆀꀊꂥꃅꋍꃱꃅꐙꇬꎷ,ꄈꁵꏲꂠꎻꌠꌭꈬꇬꎷꌠꏦꉻꉺꏦꄻꐛꒆ,ꎍꐽꌠꇬꄉꁨꆹꌠꌤꃅꀑꐱꅉꃀꉉꈌꌭꈬꇬꎷ,ꇲꈴꃅ“ꉬꑵꋍꉻ”ꉻꄜꄐꉻꄹꎆ,ꋮꄮꃅ“ꇖꑵꐊꑷ”ꌠꄐꇐꄐꉻꄹꎆ,ꄈꆏꃅꍜꌭ、ꃅꇴꄉꉻꏂ、ꏱꁈꏤ、ꄺꀱꊥꎆꌠꊋꃤꌋꆀꀋꇙꊋꃤꉀꐕ,ꄈꈍꄮꑌꃅꇴꄉꉻꏓꏲ、ꋍꑞꋍꁁꏯꋮꄮꌠꄉꀧꄉꇬꎷꌶ。

  (ꑍ)ꏓꂱꈯꄜꃅꄉꌠꌭꈬ。ꏓꂱꆹꐩꋊꀹꄻꊿꉬ,ꄈꌋꆀꇩꏤꊫꂫꃰꇌꏤꇽꌠꊇꅉꊋꃤꉬ。ꀋꎪꃅꏓꂱꀨꄜꉆꈉꌭꈬ,ꋍꏅꎁꃅꄈꄻ、ꉹꁌꎁꃅꌅꈌꌬꌠꌭꈬ,ꉌꂵꋋꂷꃅꏓꂱꁧꎁꃅꌠꊇꅉꉪꅉꃄꄻ,ꄈꅿꉹꁌꈛꏦꃄꌬꌊꇩꏲꍔꄻꈀꃅꌠꇬꑟꄉ,ꏓꂱꐥꐨꉾꃪꌠꏭꉪꄻꌠꌌꉈꈽꌠꑞꅉꁻꌐꃅꄉ,ꏓꂱꉘꇉꄉꐩꋊꃅꐨꇰꀋꃀꌠꀹꄻꌶ。

  (ꌕ)ꐊꑷꃅꃹꅼꃅꄺꀱꌠꌭꈬ。ꐧꋦꉪꏦꀉꄂꍏꇩꈭꋏꄎ,ꄺꀱꁉꃑꌠꀉꄂꍏꇩꀻꎆ、ꐧꋦꉪꏦꀻꎆ、ꂷꇻꌦꉪꏦꀻꎆꄎ。ꀋꎪꃅꍏꇩꐛꐨꐧꋦꉪꏦꄹꏦꌭꈬꌋꆀꄻꐛꒆ,ꀋꆏꃅꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆ,ꏟꈯꃅꋋꄮꇬꄉꀋꄐꌠꉪꇐꉪꉻꌋꆀꏦꉻꉺꏦꆐꅑꌠꈁꉬꃅꀜꋊꇧꎭ,ꈲꐪꄃꐛꌠꇊꑴꐅꄻꄉ,ꃰꊿꌧꑳꈲꏣꐥꌠꊌꐨꈺꄻ,ꐊꑷꐛꒆ、ꈆꑪꏦꈴ、ꃄꌬꇿꋌꐥꌠꄹꏦꉻꑫꏓꄻ,ꋒꐯꋒꃅꉪꇩꏤꐧꋦꉪꏦꄹꏦꉾꃪꐨꋊꇤꌶ。

  (ꇖ)ꀻꎆꉪꉻꀊꏀꌠꌭꈬ。ꀻꎆꌠꆹꉪꇩꏤꌤꃆꈁꐥꌠꀞꄻꌠꅉꃀꌋꆀꊨꊭꉬ,ꀻꎆꌠꆹꀋꎪꃅꈆꑪꃅꀻꎆꌶ,ꀋꎪꃅꀋꎪꀋꑴꃅꏀꀺ、ꋮꄮ、ꀊꃴ、ꁉꃑ、ꐯꇯꁨꌬꌠꀻꎆꉪꉻꃄꌬꌶ。ꀋꎪꃅꉪꇩꏤꐧꋦꉪꏦꅉꀨꎆꏣꄹꏦꌋꆀꁷꄻꄹꏦꌭꈬꌋꆀꄻꐛꒆ,ꀋꇙꀋꑐꃅꉻꁨꏦꎆꏣꄻꈫꈈꌋꆀꀻꎆ,ꀋꇙꀋꑐꃅꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏ、ꄐꏁꄉ,ꃷꎏꁳꅐꀦꁆꇱꅉꇬꄉꏤꇽꐨꂿꄐꐥ,ꀊꅰꉾꃅꍔꃚꂿꄐꋊꇤ,ꀊꏀꉹꌠꇮꑘꈴ、ꈴꌗꈴ、ꇓꈓꏦꎫꐛꈴ、ꂿꑘꐛꏀꈴꌠꋓꃅꀻꎆꌠꄹꇙ,ꑴꇙꃅꎆꏣꋧꃅꈴꌠꈴꎁꐊꈽꃅꌋꆀꄹꇙ,ꀊꅰꀊꂥꃅꁉꃑꉹꌠꎆꏣꀻꎆ,ꀋꆏꃅꉪꇩꏤꎆꏣꀋꎪꊋꃤꌋꆀꏓꇱꇩꊋꄻꀉꒉꌶ。

  (ꉬ)ꏓꂱꑱꏲꃥꌋꄻꌠꌭꈬ。ꄈꁵꏲꂠꎻ、ꏓꂱꑱꏲꃥꌋꄻ、ꏦꈴꇩꏲꌠꌭꈬꌠꊜꋽꃅꏓꋍꃱꃅꌠꆹꐧꋦꉪꏦꍔꍞꀻꎆꌠꎂꀕꇖꐨꉬ。ꀋꎪꃅꍏꇩꐛꐨꐧꋦꉪꏦꍔꍞꀻꎆꈝꃀꌭꈬ,ꏓꂱꁧꎁꃀꀉꒉꈿꄹꏦ、ꍏꇩꇭꍣꄈꏃꂠꄉꄈꀉꑌꂷꃅꇷꃅꌠꌋꆀꍔꍞꋮꒉꄹꏦ、ꊿꋅꃄꁕꊨꏦꏲꄹꏦ、ꅉꂫꊐꌠꉹꁌꊨꏦꏲꄹꏦꌭꈬꌋꆀꄻꐛꒆ,ꀊꐯꇊꀊꐯꌠꇩꉂꊋꏓꋍꃱꃅꌠꄻꈫꈈꌋꆀꀻꎆ,ꐧꋦꉪꏦꋮꒉꋯꁦꀻꎆ,ꋯꁦꄹꏦꄻꐛꒆ,ꋯꁦꇶꏦꄻꀉꑌ,ꋯꁦꈴꈜꍔꐯ,ꏓꂱꑱꏲꃥꌋꄻꌠꃅꌊꇩꏤꍔꍞꐥꐨꌋꆀꐧꋦꐥꐨꇬꑟꌠꄉꀧꌶ。

  (ꃘ)ꐊꑷꃅꏦꈴꇩꏲꌠꌭꈬ。ꐊꑷꃅꏦꈴꇩꏲꌠꆹꍏꇩꐛꐨꐧꋦꉪꏦꊇꅉꇖꐨꌋꆀꀋꉬꀋꉆꌠꏦꀧꐨꉬ。ꀋꎪꃅꄈꁵꏲꂠꎻꌠꃅꌊꏦꈴꇩꏲꌠꈴꎁꈁꉬꌠꌋꆀꋍꑞꋍꁁꏯꌠꇬꑟ,ꀋꎪꀋꑴꃅꍏꇩꐛꐨꐧꋦꉪꏦꏦꏲꈝꃀꍬ,ꏦꃀꌌꈯꄜꃅꄉꌠꍏꇩꐛꐨꐧꋦꉪꏦꏦꃤꉻꑫꄻꐛꒆ,ꍏꇩꐛꐨꐧꋦꉪꏦꏦꏲꉻꑫꋈꄻ,ꐧꋦꉪꏦꏦꏲꇩꏤꋈꄻ,ꍏꇩꐛꐨꐧꋦꉪꏦꏦꏲꌧꇗꀻꎆ,ꏦꈴꇩꏲ、ꏦꈴꌅꈌꌬ、ꏦꈴꏲꑘꃅꌠꐯꇯꄹꎆꌠꌭꈬ,ꏦꏲꇩꏤ、ꏦꏲꍔꃚ、ꏦꏲꐧꋦꋍꉻꃅꋈꄻꌠꌭꈬ,ꏦꈴꇩꏲꌋꆀꑌꇐꌌꇩꏲꌠꐮꐊ,ꏦꈴꇩꏲꌋꆀꏦꇗꈴꄉꄈꏲꌠꊜꋽꃅꏓꋍꃱꃅ,ꃹꅼꃅꏦꌬꏦꉻꄺꀱ,ꊿꋅꑭꊂꏦꏲꌧꐨꌋꆀꑌꇐꊇꁧꉀꐕꌠꌭꈬꌶ。

  (ꏃ)ꐧꋦꉪꏦꈯꄜꁌꐨꉻꑫꌭꈬ。ꁱꀕꑴꑇꌠꆹꇩꏤꂷ、ꊿꋅꁯꀻꎆꌠꇬꅉꀨꐯꅉꀨ、ꃹꅼꐯꃹꅼ、ꀊꉗꐯꀊꉗꌠꊋꃤꉬ。ꀋꎪꃅꂷꇻꌦꉪꏦꌭꈬ,ꏟꈯꃅꇷꁨꉪꏦꉪꅉꎴꒉꌠꌋꆀꍏꇩꐛꐨꐧꋦꉪꏦꐯꇯꉪꐨꐥ,ꐧꋦꉪꏦꈯꄜꁌꐨꉜꐨꉘꉚꌋꆀꃄꄻ,ꀋꆏꃅꉪꐨꐛꉻꁁꏯꀨꎍꌅꈌꌋꆀꅇꉉꌅꈌꌭꇇꈐꊐ,ꍏꉸꋊꃅꁱꀕꉾꃪꌠꀹꄻꐨꐈꆦ、ꏀꀺꐨꀻꎆꌠꄹꇙ,ꇝꂱꁱꀕꊪꊛ,ꐧꋦꉪꏦꂴꅑꁱꀕꀻꎆ,ꊇꅉꎺꄉ、ꉇꇁꌠꏶꈻ、ꃆꏂꊂꑋꉜꄉꂵ,ꀊꅰꉾꃪꃅꍏꇩꉌꊈ、ꍏꇩꁌꐨ、ꍏꇩꊋꃤꋈꄻꄉ,ꏓꂱꎁꃅꉌꊈꄐꌐꌠꇲꁵꌶ。

  (ꉆ)ꏟꈯꃅꀻꎆꌠꇬꄉꉹꁌꐥꐨꏦꀧꌋꆀꄻꃪ。ꉹꁌꐥꐨꐥꌒꌠꁦꎆꇱꌠꆹꀻꎆꌠꁧꀦꑞꅉꉬ。ꀋꎪꃅꉹꁌꐥꐨꇬꈲꏣꐥꌠꀉꑌꃅꏂꇫ、ꉹꁌꐥꐨꇬꐒꊀꐨꀉꑌꃅꋊꑣ,ꀻꎆꌠꇬꄉꉹꁌꐥꐨꀋꇎꀋꂪꌠꅋꑣ、ꐧꋦꐥꊯꑗꐥꌠꊥꎆ,ꀉꑳꐥꇬꉘꉚꌠꐥ、ꌷꇬꉙꂘꌠꐥ、ꃅꇬꊌꐨꐥ、ꆅꇬꉃꌠꐥ、ꃀꇬꀨꎹꌠꐥ、ꀀꇬꀀꅉꐥ、ꊋꁧꌠꄏꐓꌠꐥꌠꀂꏽꀋꆏꃅꀊꏀꃅꀻꎆꌠꊌꅜ,ꃹꅼꃅꎭꑆꇔꈢꇓꀖꌠꍔꆙ,ꏓꂱꈁꐥꌠꃅꐯꇯꋈꄻꐯꇯꊌꃅꀻꎆꌠꇬꄉꀊꅰꀉꑌꃅꊌꅜꐨꐥꌠꄉꀧ,ꀋꆏꃅꊿꐊꑷꃅꀻꎆ、ꏓꂱꈁꐥꌠꃅꐯꇯꌣꈚꌠꊥꎆꌶ。ꋬꂻꌠꍏꇩꋈꄻ,ꐧꋦꏱꄻꌠꊋꀥꇱꌋꆀꏀꀺ,ꐧꋦꐮꄮꎍꐽꌠꀧꌋꃅ,ꇩꏤꎴꏲꑘꒃ、ꏓꂱꌒꀀꇿꋦꌠꄉꀧ。

  (ꈬ)ꊿꌋꆀꋌꐛꐮꄮꃅꇫꐥꌠꌭꈬ。ꒆꉻꌧꑳꋈꄻꌠꆹꍏꉸꊿꋅꀊꉗꃅꊛꄉꀻꎆꌠꄙꈎꏁꁈꉬ。ꀋꎪꃅꒉꆧꁧꃴꌠꆹꏂꁧꐎꁧꉬꌠꉪꉻꑌꈬꌋꆀꃄꄻ,ꌬꇐꅐꀦꏎꏸꌋꆀꋦꈭꀧꌋꃅꌠꅉꀨꇩꁈꌭꈬ,ꀑꇬꏭꁌꒉꌠꌟꃅꒆꉻꋦꈭꇬꉜꄻ,ꏓꇲꄉꁧꐙꒉꒉꌩꏪꁍꑗꎿꁬꋬꈭꃅꏱꄻ,ꏦꇨꐯꏦꇨꌠꒆꉻꋦꈭꀧꌋꃅꄹꏦꃄꌬ,ꀊꃴꃅꐙꌠꀻꎆꄟꌋꆀꐥꐨꐥꄟꏓꐛ,ꀋꎪꃅꒃꅐꀻꎆ、ꐥꐨꌣꈚ、ꒆꉻꉾꃪꌠꌧꑳꀻꎆꈝꃀꈴ,ꎔꃨꌠꍏꇩꋈꄻꄉ,ꏓꂱꎁꃅꒃꅐꐥꐨꋦꈭꉾꃪꌠꀹꄻ,ꋧꃅꑭꊂꒆꉻꋬꂻꌠꎁꃅꑆꊋꅐꌞꌶ。

  (ꊰ)ꉻꄜꇩꏤꋬꂻꉜꐨꌭꈬ。ꏓꇲꄉꀻꎆꌋꆀꋬꂻꌠꃅ,ꃨꆰꐨꉪꉻꄻꀉꇨ,ꌒꑍꎭꐨꉪꌠꃅꇫꑟꌠꆹ,ꉪꊇꄈꇩꏲꍔꄻꌠꏥꏦꀉꒉꀉꂿꐘꉬ。ꀋꎪꃅꇩꏤꈲꁧꄻꉎꄉꌠꌭꈬꇬꎷ,ꏓꂱꋬꂻꌠꌌꉪꃆꁢꊧꃅꄉ,ꍔꍞꋬꂻꌠꌌꊇꅉꃅꄉ,ꏓꇲꄉꉇꉻꋬꂻꌠꌋꆀꈏꇓꋬꂻꌠ、ꇩꏲꄸꋬꂻꌠꌋꆀꇩꂱꋬꂻꌠ、ꋊꃅꋬꂻꌠꌋꆀꋊꃅꀋꉬꌠꋬꂻꌠ、ꊨꏦꑴꅉꋬꂻꌠꌋꆀꋍꏅꐯꇯꋬꂻꌠꃅ,ꇩꏤꋬꂻꄹꏦꉻꑫꄻꐛꒆ,ꊋꀥꇱꄉꇩꏤꋬꂻꄐꊋꋈꄻ,ꏟꈯꃅꇩꏤꌅꀨ、ꋬꂻ、ꀻꎆꈲꁧꀧꌋꃅꌶ。

  (ꊯꊪ)ꄈꆏꏓꂱꂽꑼꏭꀋꎪꃅꏲꂠꌠꌭꈬ。ꄈꄐꇺꌠꅇꃅ、ꌉꊋꐛꄎ、ꃅꇏꉾꃪꌠꏓꂱꂽꑼꁥꋈꄻꌠꆹ,“ꋍꉐꈎꑍꂷ”ꉈꈽꌠꑞꅉꁻꌐꃅꇫꑟ、ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꄐꇐꄘꄏꅍꉬ。ꀋꎪꃅꐊꑷꃅꄈꆹꏓꂱꂽꑼꏲꂠꌠꊇꅉꏥꏦꌋꆀꄹꏦꈧꌠꃄꌬ,ꃅꋊꀊꏀꋎꌠꇬꄈꅿꂽꀉꇨꌠꉪꇐꆹꇩꐏꌋꆀꂽꑼꋈꄻꌠꇬꄐꏁꉆꈉꊨꄅ,ꍔꍞꈴꂽꑼꋈꄻ、ꄺꀱꄉꂽꑼꄻꀉꇨ、ꈆꑪꇮꇐꌌꂽꑼꄖꄑ、ꏦꃤꈴꄉꂽꑼꏲꌠꌭꈬꇬꎷ,ꀊꅰꃅꃶꐚꃅꌉꈿꌠꏭꉜꁨ,ꀊꅰꃅꏀꀺꅸꇙꌠꉜꁨ,ꀊꅰꃅꉻꑫꋈꄻꌠꉜꁨ,ꀊꅰꃅꅐꐨꀊꂥꌠꏓꋧꌠꉜꁨ,ꀊꅰꃅꂽꌋꆀꉹꁌꐯꈽꐮꉔꌠꉜꁨ,ꄈꃅꋊꀊꏀꋎꌠꂽꀉꇨꌠꑞꅉꁻꌐꃅꇫꑟꌶ。

  (ꊰꑋ)“ꋍꇩꑍꏦ”ꌭꈬꌠꌋꆀꁍꇩꏓꋍꃱꃅꌠꄹꎆ。ꑣꇤ、ꉪꂱꀊꉗꀊꎴꃅꌄꆣꎍꐽꌠꄝꀋꊰ,ꁍꇩꉬꇮꏓꋍꃱꃅꌠꃅꇫꑟꌠꆹ,ꍏꉸꊿꋅꇰꀋꃀꃅꀱꌄꆣꇁꌠꇖꐨꉫꎂꀕ。ꀋꎪꃅꍏꑷꆏꑣꇤ、ꉪꂱꏲꑘꇣꋲꏱꅉꐎꏭꐊꑷꃅꏱꄻꌅꈌꀧꌋꃅꌠꌋꆀꏲꑘꇣꋲꏱꅉꐎꀊꂥꃅꊨꏦꏲꌅꈌꏦꀧꌠꊜꋽꃅꏓꐯꇯꎼꇁꄉ,“ꋍꇩꑍꏦ”ꌐꏦꐛꀋꐈ、ꀋꇙꀋꑐꌠꄉꀧ,“ꋍꇩꑍꏦ”ꃄꄻꌠꉻꀋꐈ、ꑊꀋꐈꌠꄉꀧ。ꀋꎪꃅꍏꇩꋍꂷꉬꌠꏥꏦꌭꈬ,“ꈬꑍꉜꐊ”ꌠꌭꈬꇬꎷ,ꎿꋮꑍꄷꐮꃆꂮꄮꐽꃅꀻꎆꌠꄹꇙ,ꎿꋮꑍꄷꎆꏣꇷꃅꌠꌋꆀꁱꀕꎻꈴꌠꃹꅼꈴ,ꎿꋮꑍꄷꃺꑌꐯꇯꇩꏤꁷꐞꌠꈀꃅꌠꏭꆼꁏꌠꄹꇙ,ꐯꇯꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꎁꃅꉈꈽꌶ。

  (ꊯꌕ)ꃰꊿꊫꂫꐮꐊꐙꌠꄹꇙꌠꌭꈬ。ꍏꇩꏓꂱꉪꐨꌋꆀꇩꏤꈁꐥꌠꏓꂱꉪꐨꆹꐯꌟꌠꉬ,ꍏꇩꉪꐨꃅꇫꑟꌠꆹꄮꐽꌠꇩꏹꋦꈭꌋꆀꎍꐽꌠꇩꏹꐥꀹꐞꁧꀋꉆꌠꉬ。ꀋꎪꃅꇩꈐꇩꏹꃅꇴꄉꉻꀉꒉꑍꁁꏯꌠꏓꇲꄉ,ꈍꄮꑌꀋꎪꃅꄮꐽꀻꎆꈝꃀꇬꍬ、ꐯꈲꋓꊋꌠꁉꃑꄐꇐꇬꈴꄉꃅ,ꎃꊒꌠꈲꁧꉜꐨꌭꈬ,ꐮꐊ、ꏓꇱ、ꇷꃅ、ꐪꊛꉆꌠꋬꂻꉜꐨꀊꏀꌠꐥꄉ,ꁉꃑꏀꀺ、ꏆꄻꐯꈲꌠꀻꎆꊫꂫꏂꇫ,ꐮꄮꉈꑴꐯꀋꌡꌠ、ꏓꄻꐯꇯꌠꌧꑳꃅꐯꎻꈴꌠꊥꎆ,ꋌꐛꁌꒉ、ꀊꃴꀻꎆꌠꒆꉻꉻꑫꋈꄻ,ꈍꄮꑌꋧꃅꄮꐽꌠꋈꄻꊿ、ꅉꆺꑭꊂꀻꎆꌠꅐꌞꊿ、ꇩꏹꐥꀹꀧꌋꃅꊿꄻꇬꎷꌶ。

  (ꊯꇖ)ꐊꑷꃅꏦꇨꃅꄈꏱꄻꌠꌭꈬ。ꀬꅑꃅꑴꅉꇝꂱ,ꏦꇨꃅꄈꏲꂠꄈꏱꄻꌠꆹ,ꉪꊇꄈꋍꉎꀋꐥꃅꊨꄅꃱꉻꈴꌠꃅꇏꉬ。ꀋꎪꃅꄈꏦꌌꁧꀦꃅꄉꍬꌬ,ꄈꅿꍔꍞꋈꄻꌠꌌꀨꇬꐕꄉ,ꉪꇐꀂꏽꄈꋈꄻꌋꆀꄹꏦꀂꏽꄈꏱꄻꌠꋍꋓꃅꊋꇤꄉꃅ,ꏓꇲꄉꄈꅿꋍꑞꋍꐘꋈꄻꌠꄹꎆ,“ꀋꉬꀋꉆꁁꏯꀁꑌꈧꌠ”ꒃꉇ,“ꌕꇨꌕꃅ”ꌠꌭꈬ,ꋯꁦꏓꁨꄹꏦꌭꈬ,ꄈꈏꇓꍔꍞꐥꐨꅱꈯꃅꄉ,ꄈꅿꍬꏦꊒꆽꃅꄉ,ꄈꈏꇓꍞꊟꌠꌌꀉꇨ,ꏣꀋꑌꉾꃪꌠꄈꈏꇓꍔꍞꁱꀕꀻꎆ,ꐊꑷꃅꄈꈏꇓꍔꍞꒆꉻꌃꎴ,ꏟꈯꃅꋍꑞꋍꑵꃅꇏꀋꎃꀋꊒꌠꋊꍬ,ꋍꍈꑌꄝꀋꏆꌠꃅꐨꌌꄉꍹꈔꌠꅓꀞ,ꀋꆏꃅꄈꑴꅉꌃꎴ、ꑴꅉꄻꐛꒆ、ꑴꅉꏀꆦ、ꑴꅉꉀꐕꌠꄐꊋꀉꇨꇁꎻ,ꈍꄮꑌꄈꌋꆀꏓꂱꉹꁌꌦꅪꐮꑌꑲꌠꄉꀧꄉꇬꎷꌶ。

  ꄚꉎꋋꊯꇖꏢꌠꆹ,ꃅꋊꀊꏀꋎꌠꍏꇩꐛꐨꐧꋦꉪꏦꌭꈬꌠꌋꆀꀻꎆꌠꅉꀨꄐꁈꏓꐛꌠꉬ。ꄈꑭꊂꐋꀨꀋꎪꃅꐊꑷꃅꄈꅿꅉꀨꌧꇗ、ꅉꀨꈛꏦ、ꅉꀨꄐꁈꃄꌬꄉ,ꀊꅰꉾꃅꄈꌋꆀꏓꂱꌤꑘꀻꎆꌠꄐꏁꌶ。

  ꃄꄻꌠꆹꑞꅉꀋꐥ,ꌧꇗꏀꀺꌠꑌꑞꅉꀋꐥꌠꉬ。ꋧꃅꆹꀋꆏꃅꐛꐈꇬꎷ,ꍏꇩꑌꀋꆏꃅꐛꐈꌠꉬ,ꉪꊇꆏꀋꎪꃅꌧꇗꀂꏽꃅꋊꊂꈹꄐ,ꀋꆏꃅꈳꏦꌧꐚ,ꀋꆏꃅꌧꇗꏀꀺ、ꃄꄻꏀꀺ、ꄹꏦꏀꀺ、ꁱꀕꏀꀺꌠꌋꆀꀉꁁꋍꑞꋍꁁꏯꏀꀺꌠꄹꎆꌶ。

  ꐋꀨꊈ!ꃅꋊꆹꉪꇐꅿꅉꃀꉬ,ꃄꄻꌠꆹꌧꇗꅿꇁꀦꉬ。ꉪꊇꃅꋊꃚꋒꅲꇮ,ꀬꅑꃅꇗꊈꌭꈬ、ꆹꑽꌠꄺꀱꀐꄷꆏ,ꃅꋊꑍꊏꋋꋏꌠꍏꇩꃤꂷꇻꌦꉪꏦꆹꀋꎪꃅꀊꅰꃅꀉꇨ、ꀊꅰꃅꉉꉬꐨꐥꌠꇗꊈꊋꃤꍔꆙꅐꇁꄎꌠꉬ!

  ꇖ、ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ,ꐊꑷꃅꐧꋦꉪꏦꐛꏀꈴꇩꏤꋈꄻꌠꈭꈜꀊꏀꌠꀹꄻ

  ꄺꀱꁉꃑꈭꐨ,ꉪꊇꄈꆹꉪꇩꏤꐧꋦꉪꏦꐛꏀꈴꋈꄻꌠꏭꄐꇐꄐꁆꎼꇁ,“ꌕꁘꃅꈴ”ꌠꄐꇐꁻꌐꄜꎼꇁꀐ。ꏓꂱꋠꂊꈚꊸꌠꌤꃆꂥꀘ、ꏓꂱꐥꐨꀑꐱꃅꇬꊼꇅꌣꈚꅉꇬꑟꌠꁻꌐꋋꑍꏢꆹꏛꏜꃅꄉꃅꇫꑟꀐ。ꅉꃀꋋꏢꀂꏽꄉ,ꉪꊇꄈꄜꎼꇁꇬ,ꄈꄻꋍꉐꈎꐛꄮꇬꆏꎆꏣꀊꅰꃅꀻꎆ、ꋯꁦꀊꅰꃅꐛꒆ、ꈆꑪꂘꑘꀊꅰꃅꀻꎆ、ꁱꀕꀊꅰꃅꌄꆣ、ꐧꋦꀊꅰꃅꐮꄮ、ꏓꂱꐥꐨꀊꅰꃅꐥꌒꌠꊼꇅꌣꈚꌠꐧꋦꂷꋈꄻꐛ,ꋍꈭꐨꉈꑴꌕꊰꈎꉈꈽꄉ,ꍏꇩꄻꐛꋍꉐꈎꐛꄮꇬꆏ,ꀑꐱꃅꐛꏀꈴꌠꃅꇫꑟꄉ,ꉪꇩꏤꋈꄻꌊꐧꋦꉪꏦꐛꏀꈴꇩꏤꐛꄷ。

  ꀋꃋꅑꅸꑍꄙꆀꑍꊏꈎꑟꇬꆏ,ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛꊬꌠꉬ。ꊰꃘꃢꃀꀉꒉꈿꌠ、ꊰꏁꃢꃀꀉꒉꈿꌠ、ꊰꉆꃢꃀꀉꒉꈿꌠꄜꎼꇁꌠꐊꑷꃅꊼꇅꌣꈚꌠꐧꋦꋈꄻꐛꌠꋍꑞꋍꐘꇖꐨꇬꈴꄉ,ꉪꇩꏤꐧꋦꐮꄙꐨꀋꉬꀋꉆꃅꐛꐈꌠꇬꆼꒆꄉ,ꏓꇲꄉꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻ、ꒆꉻꌧꑳꋈꄻꌠꄹꎆ,ꏟꈯꃅꈆꑪꂘꑘꌌꇩꏤꄖꄑꌄꆣꌠꄐꇐ、ꌧꊿꌌꇩꏤꋈꄻꀉꇨꌠꄐꇐ、ꀻꎆꈺꇙꏀꀺꌠꄐꇐ、ꑣꋂꄖꄑꌄꆣꌠꄐꇐ、ꃄꁕꋮꄮꃅꀻꎆꌠꄐꇐ、ꐪꊛꄉꀻꎆꉆꌠꄐꇐ、ꂽꌋꆀꉹꁌꐮꐊꄉꀻꎆꌠꄐꇐꃄꌬ,ꀋꉬꀋꉆꌠꒃꉇ、ꀋꇎꀋꂪꅉꅋꑣ、ꊋꁧꌠꇬꊋꀥꇱꌠꌌꀨꄉ,ꀊꅰꃅꏟꈯꃅꃨꆰꐨꀉꒉꀊꂾꌠ、ꊒꌸꃅꎭꑆꇔꌠ、ꍍꆀꉃꄻꌠꄴꏮꋊꎵꌠꈢꇓꀖꉈꈽꌠꃅꋒꄉ,ꐊꑷꃅꊼꇅꌣꈚꌠꐧꋦꋈꄻꐛꌠꁳꏓꂱꇫꏚꍆ、ꐩꋊꍤꎖꌠꇬꊪꄽꄎꎻ。

  ꊯꈬꃢꃀꀉꒉꈿꌠꇬꄉꅑꅸꑍꊏꃢꃀꀉꒉꈿꌠꇬꑟꌠꆹ,“ꋍꉐꈎꑍꂷ”ꉈꈽꁻꌐꐩꋊꐯꏑꊬꌠꉬ。ꉪꊇꆏꐊꑷꃅꊼꇅꌣꈚꌠꐧꋦꋈꄻꐛ、ꉐꈎꉈꈽꁻꌐꉘꃀꂶꌠꃅꇫꑟꌶ,ꉈꑴꄚꍬꄉꐊꑷꃅꐧꋦꉪꏦꐛꏀꈴꇩꏤꋈꄻꌠꈭꈜꀊꏀꌠꀹꄻꄉ,ꉐꈎꉈꈽꁻꌐꑍꂷꌠꇬꉜꄉꑌꂵꌶ。

  ꏓꇱꄉꇩꈐꇩꉈꃅꒊꃅꇁꌋꆀꉪꇩꏤꀻꎆꇎꏦꎥꃪꇬ,ꑍꄙꆀꑍꊏꈎꅑꃅꋊꋋꋏꐧꀠꊬꌠꇬꑟꌠꆏꁸꌊꑍꊭꃅꄉꄐꁆꉆ。

  ꋍꊭꊬꌠꆏ,ꑍꄙꆀꑍꊏꈎꅑꑍꄙꆀꌕꊯꉬꈎꑟꌠꉬ,ꐊꑷꃅꊼꇅꌣꈚꌠꐧꋦꋈꄻꐛꌠꅉꃀꀂꏽꄉ,ꉈꑴꊯꉬꈎꉈꈽꇈ,ꀑꐱꃅꐧꋦꉪꏦꐛꏀꈴꌠꃅꇫꑟ。ꀊꋨꄮꑟꇬꆏ,ꉪꇩꏤꎆꏣꊋꃤ、ꈆꑪꇮꇐꊋꃤꆹꀉꒉꃅꉀꐂꆹꄉ,ꏀꀺꉹꌠꇩꏤꇬꂴꅑꆹ;ꏓꂱꐥꊯꃅꐊꈽ、ꐥꊯꃅꀻꎆꌠꌅꈌꈲꁧꆹꋒꐯꋒꃅꏦꀧꄉ,ꏦꏲꇩꏤ、ꏦꏲꍔꃚ、ꏦꏲꐧꋦꆹꀑꐱꃅꄻꐛ,ꋍꑞꋍꁁꏯꄹꏦꀊꅰꃅꄻꐛꒆ,ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꀑꐱꃅꃅꇫꑟ;ꐧꋦꌧꑳꐨꆹꀊꂥꐨꀊꏀꌠꇬꑟ,ꇩꏤꁱꀕꆓꊋꃤꆹꄇꇖꀕꃅꀉꇨꇁ,ꍏꉸꁱꀕꑌꑲꐨꀊꅰꃅꀊꐯꈭꃅꃹꅼꇁ;ꏓꂱꐥꐨꀊꅰꃅꉾꇁ,ꊌꐨꐧꀠꃅꐙꌠꊿꈧꌠꍆꁧꄇꇖꀕꃅꉀꐕ,ꇓꈓꇓꉈꃄꁕꀻꎆꍣꐨꌋꆀꀀꊿꐥꐨꑟꐨꍣꐨꄇꇖꀕꃅꍕꒊ,ꅉꀨꄉꉻꁧꃤꃅꐽꏡꈴꌠꀑꐱꃅꃅꇫꑟ,ꏓꂱꈁꐥꌠꃅꐯꇯꌣꈚꌠꑭꁘꏟꈯꃅꐕꎼꆹ;ꀋꃋꋋꄮꐧꋦꏱꄻꐛꉻꀑꐱꃅꏓꐛ,ꐧꋦꍄꑐꇈꐮꄮꃅꐥ;ꒆꉻꋦꈭꊇꅉꇬꄉꉾꃅꆹꏮ,ꎔꃨꌠꍏꇩꑞꅉꁻꌐꆹꀑꐱꃅꃅꇫꑟ。

  ꑍꊭꊬꌠꆏ,ꑍꄙꆀꌕꊯꉬꈎꅑꅸꃅꋊꋋꋏꐧꀠꊬꌠꇬꑟꌠꉬ,ꀑꐱꃅꐛꏀꈴꌠꃅꇫꑟꌠꅉꃀꀂꏽꄉ,ꉈꑴꊯꉬꈎꉈꈽꄉ,ꉪꇩꏤꋈꄻꌊꌣꈚꋯꁦꌧꑳꐮꄮꎔꃨꌠꐧꋦꉪꏦꐛꏀꈴꌠꇩꏤꐞꄿꂷꐛ。ꀊꋨꄮꑟꇬꆏ,ꉪꇩꏤꐥꇐꌧꑳ、ꍔꍞꌧꑳ、ꉌꊈꌧꑳ、ꐧꋦꌧꑳ、ꒆꉻꌧꑳꆹꐊꑷꃅꉀꐕꌠꉬ,ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꃅꇫꑟꄉ,ꏓꇱꇩꊋꌋꆀꇩꏹꑌꑲꊋꃤꂴꅑꌠꇩꏤꐛ,ꏓꂱꈁꐥꌠꃅꐯꇯꌣꈚꌠꀑꐱꃅꃅꇫꑟꄉ,ꉪꇩꏤꏓꂱꆹꀊꅰꃅꐥꌒꄻꌒꌠꐥꐨꊌꄉ,ꍏꉸꊿꋅꆹꀊꅰꃅꇴꎇꆹꎅꄉꋧꃅꊿꋅꈬꇬꉆꆹꌠꉬ。

  ꐋꀨꊈ!ꐊꑷꃅꊼꇅꌣꈚꌠꐧꋦꋈꄻꐛꌠꇬꄉꅑꅸꀑꐱꃅꐛꏀꈴꌠꃅꇫꑟꌠꇬꑟ,ꉈꑴꐊꑷꃅꊼꇅꌣꈚꌠꐛꏀꈴꇩꏤꐞꄿꌠꋈꄻꐛꌠꇬꑟꌠꆹ,ꃅꋊꀊꏀꋎꌠꍏꇩꐛꐨꐧꋦꉪꏦꀻꎆꌠꄐꇐꄐꁆꌠꉬ。ꉪꊇꆏꍟꑌꐴꀋꄓꃅ、ꌦꀳꏿꄉ,ꊋꇤꄉꐧꋦꉪꏦꐛꏀꈴꈭꈜꀊꏀꌠꎔꃨꁬꁱꅐꇁꌶ!

  ꉬ、ꀻꎆꉪꉻꀊꏀꌠꃄꌬꄉ,ꐛꏀꈴꌠꎆꏣꉻꑫꋈꄻ

  “ꋍꉐꈎꑍꂷ”ꉈꈽꁻꌐꃅꇫꑟ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꇬꆹ,ꀋꆏꃅꏓꂱꐥꐨꑟꐨꉀꐕ,ꀋꎪꃅꀋꎪꀋꑴꃅꀻꎆꌠꌌꄈꌅꈌꌬꇩꏤꄖꄑꌄꆣꌠꂿꃆꉘꃀꏡꌠꃅꄉ,ꏟꈯꃅꐧꋦꒃꅐꊋꃤꁌꄝꌋꆀꀻꎆ,ꐧꋦꉪꏦꃷꎏꎆꏣꄺꀱꌐꍝꌭꈬ,ꎆꏣꐪꊛꄉꉾꃪꃅꀻꎆꌠꄹꇙꌶ。

  ꉪꇩꏤꎆꏣꆹꐳꐯꐳꃅꉀꎆꊬꌠꇬꄉꆹꏮꌊꊇꁧꀊꂥꃅꀻꎆꊬꌠꇬꆹꀐ,ꀻꎆꄟꆹꏮ、ꎆꏣꐛꉻꄻꃪ、ꉀꎆꇙꊋꏭꆦꌠꈢꇓꀖꊬꌠꇬꎍꇰ,ꐛꏀꈴꎆꏣꉻꑫꋈꄻꌠꆹꈢꈌꄩꐂꁧꌠꃛꊸꇖꐨꌋꆀꉪꇩꏤꀻꎆꌠꄐꇐꁻꌐꉬ。ꀋꎪꃅꊇꁧꀨꄉ、ꈲꁧꂴꄉꌠꌭꈬ,ꇲꁵꁁꏯꐛꉻꐨꐥꃅꄉꄺꀱꌠꌌꀨꇬꄉ,ꎆꏣꀻꎆꊇꁧꄺꀱ、ꑘꅐꐨꄺꀱ、ꇙꊋꄺꀱꌠꄹꇙ,ꐊꊈꈁꐥꌠꒃꅐꐨꉀꐕ,ꊋꇤꄉꐳꃅꐥꄜꎆꏣ、ꈆꑪꇮꇐꏀꀺ、ꀋꃋꋋꄮꎆꒉꎆꇁ、ꊾꊋꅐꀦꋮꐊꃅꀻꎆꌠꅐꑘꉻꑫꋈꄻ,ꊋꇤꄉꃷꎏꉺꏦꇿꋌꐥꃅ、ꉻꐭꀨꄜꍄꑐꊋꃤꐥ、ꉻꒉꋊꐽꑞꅉꐥꌠꎆꏣꏦꉻꋈꄻ,ꀋꆏꃅꉪꇩꏤꎆꏣꏀꀺꊋꃤꌋꆀꋓꅔꊋꃤꄻꀉꇨꇁꎻ。

  (ꋍ)ꇲꁵꁁꏯꐛꉻꐨꐥꃅꄉꄺꀱꌠꃹꅼꈴ。ꐛꏀꈴꌠꎆꏣꉻꑫꋈꄻꇬ,ꀋꎪꃅꎆꏣꀻꎆꌠꊋꇱꅉꄻꐥꄜꎆꏣꀂꏽꐕꄉ,ꇲꁵꉻꑫꊇꁧꉀꐕꌠꌌꀨꅸꃅꍜꃅꄉ,ꄇꇖꀕꃅꉪꇩꏤꎆꏣꊇꁧꂱꎆꅑꌠꀉꇨꇁꎻ。ꐳꃅꄺꂡꇩꏤꀉꇨꌠꋈꄻ,ꐳꃅꂴꅑꄺꑣꑘꀻꎆ,ꐯꏑꈄꏍ、ꃷꁨꊫꌐꀉꒉꌠ、ꊿꄻꀑꁮꄐꊋꌋꆀꐥꄜꎆꏣꃹꅼꃅꐮꐊꌠꄹꇙ,ꐧꀠꀊꂥꃅꌬꈧꌠ、ꏀꀺꄐꏁ、ꀊꃴꌋꀁꂥ、ꎆꏣꐯꇯꈲꊌꌠ、ꐛꏀꇲꁵꊛꏣ、ꊾꊋꅐꀦꁧꃤꃅꑠꁁꏯꀊꏀꃅꉀꒆꅉꉘꉚ、ꇙꊋꀊꏀꌠꐛꇁꎻ。ꋊꃅꅐꑘꄻꃪꊐꐕꌠꊋꁈꄏ,ꐳꃅꐛꏀꁧꃤꃅꑘꀻꎆ,ꇩꏹꎕꏦꇬꉜꄉꑟꐨꉀꐕ。ꉪꇩꏤꅐꑘꆹꅉꆺꑭꊂꁌꐨꊛꏣꐧꀠꀊꂥꌠꇬꉜꄉꆹꌠꊥꎆ,ꋧꃅꊐꌠꂴꅑꄺꑣꑘꁥꏓꀉꑌꈨꉘꉚ。ꊋꀥꇱꄉꈲꒉ、ꎸꈜ、ꄇꈜ、ꒉꇬꎞꎭ、ꃅꈯ、ꁠꐤ、ꄆꈄꏍ、ꈴꌗ、ꎊꈬꎞꎭꑠꅉꃀꉁꈾꈄꏍꋈꄻ。ꏟꈯꃅꅐꊋꊨꇧꎭ、ꊐꄉꌠꊨꇧꎭ、ꋎꐽꅍꊨꇧꎭ、ꀨꊰꊨꒊ、ꀋꇎꀋꂪꅉꅋꑣ,ꊭꊎꃷꁨꅐꀦꁆꄻꌠꄻꃪ,ꊈꂄꁦꎆꃅꇲꁵꌠꍔꐯ,ꇲꈉꇙꄟꐮꆽꏣꌠꃅꇫꑟ。ꎆꏂꑘꌧꃀꉌꊈꄕꊪꌋꆀꀧꌋꃅ,ꐧꋦꀨꄜꀉꑌꃅꏀꀺꑘꀺꌠꃅꇁꌠꊋꊡ。ꌧꇐꉹꌠ、ꇮꇐꄐꊋꉹꌠ、ꏀꀺꉹꌠꑘꃅꊿꀉꒉꁥꋈꄻ,ꑘꃅꌶꀠꉌꊈꌋꆀꇔꇷꉌꊈꍔꆙ,ꑘꃅꀑꑊꐥꌠꐧꋦꐥꀹꌋꆀꉾꉎꉾꎹꌠꃅꑘꋥꑣꃅꀹꋈꄻ。

  (ꑍ)ꐳꃅꏀꀺꉹꌠꇩꏤꋈꄻ。ꏀꀺꌠꆹꀻꎆꄐꏁꌠꇙꊋꂴꏡꌠ,ꐛꏀꈴꎆꏣꉻꑫꋈꄻꌠꄐꇐꄘꄏꅍꉬ。ꋧꃅꈆꑪꇮꇐꂴꅑꌠꇬꉜꄉ,ꅉꃀꎥꃪꌠꄻꀉꇨ,ꊫꂫꐨꐥꌠꅉꃀꎥꃪꌠ、ꄐꏁꐨꐥꌠꇬꀦꁧꀿꊌꐨꀉꒉꀊꂾꃅꂵꅐꌠꃅꇫꑟ。ꊋꀥꇱꄉꌬꈧꅉꃀꎥꃪ,ꇩꏤꈆꑪꇮꇐꐘꃆꀉꒉꀊꂾꌠꀹꎆ,ꊨꊭꐮꐊꇮꇐ、ꂴꅑꄐꏁꇮꇐ、ꐛꏀꋉꃆꇮꇐ、ꆼꁏꃅꐙꌠꇮꇐꏀꀺꌠꄻꀨꇬꄉ,ꈆꑪꇮꇐꐞꄿꇩꏤ、ꊇꁧꐞꄿꇩꏤ、ꃅꈯꐞꄿꇩꏤ、ꈄꏍꐞꄿꇩꏤ、ꈭꈜꐞꄿꇩꏤ、ꃷꂷꍏꇩ、ꀑꁮꐧꋦꋈꄻꌠꎁꃅꊋꑌꌠꄘꄏꅍꇲꁵ。ꊋꀥꇱꄉꇩꏤꏀꀺꉻꑫꋈꄻ,ꄐꇐꈆꑪꇮꇐꊋꃤꄻꀉꇨ。ꃹꅼꃅꈆꑪꇮꇐꏦꉻꄺꀱ,ꎆꏂꑘꌌꀨꄜꃅꄉ、ꃷꎏꌌꍝꄎꃅꄉ、ꒃꅐꌶꄻꎥꃪꌠꃹꅼꃅꐮꐊꌠꇮꇐꏀꀺꉻꑫꄻꐛ,ꊋꀥꇱꄉꐧꐭꎆꏂꑘꏀꀺꌠꄏꐓ,ꈆꑪꇮꇐꊌꐨꆹꏮꌠꊥꎆ。ꏀꀺꁱꀕꄕꊪ,ꌧꇐꅐꇐꌅꈌꀹꄻ、ꀧꌋꃅ、ꌬꈧꌠꀉꇨꈴ。ꇩꏹꌧꐨꇬꑟꌠꄐꇐꈆꑪꇮꇐꌧꊿ、ꈆꑪꇮꇐꌧꊿꂴꅑꌠ、ꌠꏀꈆꑪꇮꇐꌧꊿꌋꆀꏀꀺꌧꐨꀊꂥꌠꀉꒉꑠꁥꉘꉚꂘꄻꅐꇁ。

  (ꌕ)ꂿꑘꁡꇤꉀꄓꄐꇐꃄꌬ。ꂿꑘꂿꑘꁡꇤꂿꑘꊿꌤꃆꆹꇩꏤꎖꄎꏓꂱꐥꐨꇬꃆꂮꐥꌠꁧꀦꃅꐙꌠꌤꃆꉬ,ꀋꎪꃅꈍꄮꑌ“ꌕꂿꑘ”ꌤꃆꂥꀘꋒꌠꌌꄈꑭꊂꌤꃅꌠꇬꀋꂿꑘꌠꇬꀋꂿꑘꌠꃅꄉꌶ。ꂿꑘꂿꑘꁡꇤꌌꂴꄉꀻꎆꌠꌭꈬꄉ,ꅐꑘꌄꆣ、ꒆꉻꀀꌒ、ꃅꀹꌧꑳ、ꏱꄻꇿꋌꐥ、ꐥꐨꌣꈚꌠꀑꐱꇖꐨꇬꈴꄉ,ꇓꈓꇓꉈꐮꐊꄉꀻꎆꌠꏦꉻꉺꏦꌋꆀꏱꁈꉻꑫꋈꄻꐛꒆ,ꐳꃅꂿꑘꂿꑘꁡꇤꐛꏀꈴꌠꄹꎆ。ꂿꑘꁡꇤꅉꀨꀰꏢꄹꏦꄻꈫꈈꌋꆀꄻꐛꒆ,ꃹꅼꃅꂿꑘꁡꇤꃄꅉꄹꏦꄺꀱ,ꀧꃅꃄꅉ“ꌕꌅꈌ”ꁸꁆꄹꏦꄻꐛꒆ。ꃄꅉꀧꃅꐮꃆꂮꎍꐽꄷꀋꁧꀊꉗꃅꀋꐈꌠꄉꀧ,ꑍꈭꀕꌠꃄꅉꀧꃅꏤꈉꇫꑟꈭꐨꉈꑴꌕꊰꈎꁦꎆꇬꇯ。ꃹꅼꃅꂿꑘꁡꇤ꒔ꉻꁨꇐꌅꈌꄹꏦꄺꀱ,ꂿꑘꊿꁨꇐꌅꈌꈲꁧꏦꀧ,ꋍꉻꎆꏣꀉꒉꇁꎻ。ꇩꏤꋚꂷꉮꀋꐥꌠꄉꀧ,ꍏꇩꊿꋙꋠꍔꌺꏟꈯꀕꃅꌭꊨꏦꇇꈐꊐꄉ。ꐛꏀꈴꂿꑘꅐꑘꉻꑫ、ꒃꅐꉻꑫ、ꀰꏢꉻꑫꄻꐛ,ꂿꑘꄏꐓꀧꌋꃅꄹꏦꄻꐛꒆ,ꇶꏦꀉꑌꑵꃅꐙꌠꈁꏦꄉꄐꃅꀰꏢꌠꀻꎆ,ꀊꏀꉹꌠꂿꑘꀰꏢꀨꄜꉘꉚ,ꂿꑘꐧꋦꈴꁧꃤꃅꉻꑫꄻꐛꒆ,ꂿꑘꑱꁯꀄꊭꌠꌋꆀꐛꏀꂿꑘꀻꎆꌠꊜꋽꃅꐯꊛꌠꃅꇫꑟ。ꂿꑘꁡꇤꋍꑍꌕꅐꑘꐮꉔꄉꀻꎆꌠꊥꎆ,ꂿꑘꊿꃅꑘꎹꑘꀺꌠꄏꐓꌋꆀꊋꊡ,ꊌꐨꁦꎆꌠꈜꀺꀊꐯ。ꂿꑘꁡꇤꅉꂫꊐꌠꅉꃀꌤꃅꌠꊋꀥꇱ,ꊨꏦꏲ、ꏦꏲ、ꑌꇐꌌꏲꌠꐮꐊꐙꌠꂿꑘꁡꇤꏱꄻꉻꑫꄻꐛꒆ。ꂿꑘꌧ、ꂿꑘꁡꇤꉂ、ꂿꑘꊿꉂꌠ“ꌕꂿꑘ”ꌤꃅꊿꁥꉘꉚꂘꄻꅐꇁ。

  (ꇖ)ꃄꁕꋮꄮꃅꀻꎆꌠꄐꇐꃄꌬ。ꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷ、ꌢꎭꃅꄷꊋꁈꄏꄉꐳꃅꀻꎆꌠꊋꀉꒉꃅꇱ,ꃄꄟꀉꇨꈴꃅꄉꁮꐚꁆꏯꀉꒉꃅꀖꁉꌠꐛꊂꀊꏀꌠꐛꇁꌠꄹꎆ,ꐳꃅꑛꌋꈤꃅꄷꑠꇮꑘꀉꆹꐛꅉꃹꅼꃅꄺꀱꄉꉀꄓꌄꆣ,ꂱꎆꅑꌠꋊꇤꄉꈪꄙꃅꄷꉀꄓꌠꄹꇙ,ꏀꀺꄐꏁꄉꂴꅑꄉꁭꅐꃅꄷꉾꃪꃅꀻꎆꌠꃅꇫꑟ,ꀊꅰꃅꇿꋌꐥꌠꃄꁕꋮꄮꃅꀻꎆꌠꉺꏦꀊꏀꌠꄻꐛ。ꇓꈓꈧꌠꌌꀨꄜꃅꄉꀉꒉꐧꀠꀄꊭꌠꇓꈓꌋꆀꇓꈓꏦꎫꀄꊭꌠꋮꄮꃅꀻꎆꌠꇓꈓꏦꎫꐛꊂꋈꄻ,ꐳꃅꂿꑘꊻꂷꆹꏮꌊꇓꈓꊿꐛ。ꀙꏢꏓꈌꇓꈓꄐꊋꀋꉬꌠꎵꃪꌠꌌ“ꇌꅳꁖ”ꃅꄉꀙꏢꄟꏢꉼꀙꋮꐊꃅꀻꎆꌠꄹꇙ,ꑪꉢꑟꐎꌌꄓꈌꀊꂥꃅꄐꎖ、ꎕꏦꀊꂥꃅꋈꄻ。ꐯꇯꀉꇨꃅꀧꌋꃅꌠꒃꉇ、ꀉꒉꃅꀖꁉꌠꀋꃅꌠꌌꍝꄎꃅꄉꍤꏦꎆꏣꋥꁕꀻꎆꌠꄹꇙ。ꅐꀦꉹꌠꃅꄷꎆꏣꉹꏮꀻꎆꌠꄏꐓ。ꐳꃅꃅꋮꆹꏮꀻꎆ,ꃅꋮꆹꏮꈫꈈ、ꃅꋮꆹꏮꋬꂻꌠꄉꀧ。ꅔꎿꏓꇲꌠꌭꈬ,ꐳꃅꎿꃀꇩꏤꐞꄿꌠꋈꄻ。

  (ꉬ)ꐳꃅꐧꋦꉪꏦꃷꎏꎆꏣꏦꉻꄻꐛꒆ。ꎆꏣꏦꉻꄺꀱꌠꆹꀋꎪꃅꁨꇐꌅꈌꄹꏦꄻꐛꒆꌠꌋꆀꐊꊈꃷꎏꈴꃅꁆꄻꌠꌌꀨꄉ,ꁨꇐꌅꈌꇿꋌꐥꃅꊋꊡ、ꐊꊈꄿꐨꃅꏮꇙ、ꁌꏤꌋꐨꑺꂖ、ꋓꅔꐥꊯꊱꁨ、ꎆꏂꑘꉾꊋꄸꋊꌠꃅꇫꑟ。ꋍꑞꋍꉹꇩꁨꁨꇐꏲꂠꏦꉻꄻꐛꒆ,ꇩꁨꎆꀨꌅꈌꁵꄉꀰꏢꏦꉻꄺꀱ,ꐳꃅꇩꁨꎆꏣꄐꉻꄻꃪ、ꐛꉻꋊꄻ、ꄐꇐꃅꐙꌠꏓꇱꀱꌠꃅ,ꇩꁨꁨꇐꁌꀧꁌꎆꌠꊥꎆ,ꇩꁨꎆꀨꃅꀉꇨꃅꉾꃪꃅꀉꒉꌠꄹꇙ,ꇿꋌꐥꃅꇩꁨꁨꇐꁮꑋꌠꄴꏮ。ꃹꅼꃅꇩꁨꎆꏂꑘꄺꀱ,ꌼꐊꁨꏦꎆꏣꀻꎆ,ꅉꆺꑭꊂꋓꅔꊋꃤꐥꌠꋧꃅꀨꏠꌠꎆꏂꑘꉘꉚ。ꐊꑷꃅꃷꎏꇬꃹꆹꎻꌠꀋꃪꁁꏯꃷꁨꋏꄯꒉꄹꏦꃄꌬ,ꃷꎏꋍꃱꃅꌠꌋꆀꐥꊯꃅꋓꅔꌠꇬꈭꋍꈜꑲꌠꋍꑞꋍꑵꏤꐪꌋꆀꃄꄟꀜꋊꇧꎭ,ꉹꁌꀰꏢꎆꏂꑘꀻꎆꌠꄏꐓ,ꋍꑞꋍꉹꃷꎏꀨꄜꍄꑐꊋꃤꄖꄑ。ꃹꅼꃅꃼꇇꌤꃆꄹꏦꄺꀱ,ꏲꑘꐨꐥꃅꇂꇎꌠꂵꅐ,ꃷꎏꇂꇎꌠꄴꏮ,ꐳꃅꐊꊈꁌꏤꃷꎏꈴꌠꄺꀱ,ꁧꃤꃅꑘꈏꃹꉆꌠꏢꑲꐨꄝꃑ,ꃷꎏꍞꏲꏦꉻꄻꐛꒆ。ꉻꒉꋊꄻꌠꏀꀺꌋꆀꄻꐛꒆ,ꇩꏤꀻꎆꄐꎖꌠꄐꇐꍝꄎꂿꄐꋊꇤ,ꏱꎆ、ꎆꃀ、ꅐꑘ、ꃄꁕꑠꎆꏣꏱꁈꋮꄮꉺꏦꄻꐛꒆ。ꌬꈧꌠꊥꎆꌠꏦꉻꉺꏦꄻꐛꒆ,ꌬꈧꌠꆹꎆꏣꀻꎆꌠꏭꅉꃀꃅꐙꌠꂿꄐꄻꀉꇨ。ꃹꅼꃅꎆꇱꎆꏓꏦꉻꄺꀱ,ꎆꇱꌠꇲꁵꐛꉻꄻꃪꌠꏭꂿꄐꀋꉬꀋꉆꃅꐙꌠꋊꇤ。ꐳꃅꐛꏀꏱꎆꄹꏦꄻꐛ,ꌅꈌꃅꎁꊨꄅ、ꎆꊋꋮꄮ、ꃄꁕꐮꆽꏣꌠꍏꑷꌋꆀꃅꄷꏱꎆꐮꃆꂮꄻꐛ。ꋊꍬꈴꂿꉆ、ꎕꏦꑟꈆꑪ、ꏢꑲꐨꐥꊋꑌꃅꐙꌠꄐꌗꄹꏦꐊꑷꃅꄻꐛ,ꐊꑷꃅꃅꐨꇿꋌꏱꄻꌠꃄꌬ。ꃹꅼꃅꇗꏸꎴꄹꏦꄺꀱ,ꃅꄷꇗꏸꉻꑫꄻꐛꒆ。ꃹꅼꃅꎆꒉꎆꇁꏦꉻꄺꀱ,ꎆꒉꎆꇁꁧꃤꃅꐥꄜꎆꏣꊋꃤꄻꀉꇨ,ꈛꎂꃅꎆꏓꌠꍆꁧꉀꐕ,ꎆꀨꃷꎏꀉꑌꊐꃅꉾꃅꀻꎆꌠꊥꎆ。ꎆꃀꏱꁈꌋꆀꉻꒉꍤꋧꏱꁈꑍꄙꄿꋊꄻꈭꏦꄻꐛꒆ,ꃹꅼꃅꇔꊰꍆꁧꌋꆀꉇꎆꀟꄻꁌꐨꃷꎏꈴꌠꄺꀱ。ꎆꒉꎆꇁꍞꏲꉻꑫꄻꐛꒆ,ꉻꑫꃅꐙꌠꎆꒉꎆꇁꃨꆰꐨꇫꅐꀋꇁꌠꄽꂫꑞꅉꐏꄉ。

  (ꃘ)ꐊꑷꃅꁉꃑꌠꐛꊂꀊꏀꌠꏓꐛꌠꄹꇙ。ꁉꃑꇬꆹꀻꎆꇁ,ꋍꎤꇬꆹꊁꊰꁧ。ꍏꇩꁉꃑꌠꀃꈈꆹꈢꀋꄉꌠ,ꁉꅉꐮꅉꀉꄂꑟꇁꌠꉬ。“ꋍꁕꋍꈜ”ꋈꄻꌠꌌꀨꇬꄉ,ꊙꌊꇁꌠꌋꆀꉇꅐꁧꌠꐯꇯꉜꁨꌠꌭꈬ,ꐯꇯꇕꄟꐯꇯꋈꄻꐯꇯꈲꊌꌠꏥꏦꇬꍬꄉ,ꏀꀺꄐꊋꁉꃑꇷꃅꌠꊋꀥꇱ,ꅔꎿꈏꉈꏓꇙ、ꁭꅐꁮꐚꑍꋮꐮꇇꀨꌠꁉꃑꐛꉻꏓꐛ。ꉇꉻꏭꃼꇇꃅꌠꍔꀺ,ꃼꇇꃅꐛꄟꀊꏀꌠꈁꏦꀊꏀꌠꉗꄻ,ꃼꇇꃅꌠꇬꈴꄉꇩꏤꋈꄻꀉꇨꌠꄹꎆ。ꑞꅉꀊꂥꃅꃼꇇꃅꌠꌋꆀꎆꇱꌠꑴꌅꈴꃅꌒꈴꌠꏱꁈꃄꌬ,ꐊꑷꃅꃹꉆꂾꇩꂱꊌꐨꉈꑴꀋꍑꁁꏯꃷꁨꋏꄯꒉꃅꏱꄻꄹꏦꃄꌬ,ꀊꐯꈭꃅꃷꎏꃹꉆꌠꄝꃑ,ꁧꃤꃅꑘꉇꉻꏭꁉꃑꌠꍔꒉ,ꉇꉻꃼꇇꃅꊿꎆꇱꏦꊒꌅꈌꈲꁧꀧꌋꃅ。ꉪꇩꏤꈐꄉꁱꄀꄉꌠꎆꏂ꒧ꉬꀐꄷꆏ,ꐯꇯꋍꑵꃅꉜ、ꐥꊯꃅꇫꊝꌐ。ꃄꁕꁉꃑꄐꉻꄻꃪ,ꁮꐚꏭꁉꃑꊋꃤꀉꒉꃅꇱ。ꑴꌅꃅꄺꀱꌅꈌꀊꅰꃅꀉꒉꃅꄻꄿꐨꃼꇇꃅꉚꅉꁵ,ꄿꐨꃼꇇꃅꎿꀸꋈꄻꌠꎹꎥ。ꉇꉻꏭꎆꇱꄟꏀꀺ,ꇩꏹꅐꊋꇷꃅꌠꊥꎆ,ꋧꃅꑭꊂꉜꄉꃅꌠꃼꇇ、ꎆꏓꎆꊭ、ꒃꅐ、ꁧꃤꃅꈄꏍꏓꐛ,ꐳꃅꇩꏹꎆꏣꇷꃅꌠꌋꆀꋓꅔꌠꂱꎆꅑꐨꀊꏀꌠꉗꄻ。

  ꐋꀨꊈ!ꐧꋦꒃꅐꊋꃤꁌꄝꌠꌋꆀꀻꎆꌠꆹ,ꐧꋦꉪꏦꊇꅉꇖꐨꉬ。ꉪꊇꆹꐧꋦꑭꊂꀹꄻꊋꃤꌋꆀꀻꎆꍄꑐꊋꃤꄖꄑꄉ,ꊋꇤꄉꊇꁧꀊꅰꃅꀊꂥ、ꀊꅰꃅꇿꋌꐥ、ꀊꅰꃅꎃꊒ、ꀊꅰꃅꊛꄉꀻꎆꉆꌠꃅꇫꑟꌶ!

  ꃘ、ꏓꂱꑱꏲꃥꌋꄻꌠꄹꏦꉻꑫꋈꄻꐛꒆ,ꐧꋦꉪꏦꋯꁦꍔꍞꀻꎆ

  ꉪꇩꏤꆹꇮꃅꊿꏠꌠꏲꂠꄉꌠ、ꇮꑘꂿ꒧ꏓꐊꌠꌌꅉꃀꃅꄉꌠꏓꂱꋯꁦꌅꈌꌬꌠꐧꋦꉪꏦꇩꏤꂷꉬ,ꇩꏤꌅꈌꈁꐥꌠꆹꏓꂱꃤꉬꌐ。ꉪꇩꏤꐧꋦꉪꏦꋯꁦꌠꆹꏓꂱꊇꅉꈲꏣꀧꌋꃅꌠꀊꐯꐯꀊꐯ、ꃶꐚꐯꃶꐚ、ꂿꄐꐥꐯꐥꌠꋯꁦꌠꉬ。ꐧꋦꉪꏦꋯꁦꍔꍞꀻꎆꇬꆏꏓꂱꉪꐨꄜꅐꇁ、ꏓꂱꌅꈌꈲꁧꏦꀧ、ꏓꂱꀹꄻꊋꃤꄖꄑꄉ,ꄹꏦꉻꑫꌊꏓꂱꑱꏲꃥꌋꄻꌠꄉꀧꌠꉬ。

  ꍏꇩꐛꐨꐧꋦꉪꏦꍔꍞꀻꎆꈝꃀꆹ,ꀋꉊꊂꋎꌠꅑꅸꇁꌠꍏꇩꏓꂱꀊꉗꃅꉈꈽꌠꐩꋊꇊꏹ、ꌧꇗꇊꏹ、ꃄꄻꇊꏹꇬꎂꀕꐛꐨꉬ,ꄈꊇꅉꐛꊈꌭꈬ、ꄈꊇꅉꉪꃆꁢꊧꃄꄻꌠꎂꀕꇖꐨꉬ。ꋧꃅꑭꊂꉱꋃꃅꐯꌟꌠꍔꍞꄹꏦꈁꏦꀋꐥ,ꍔꍞꄹꏦꆹꐧꋦꍔꍞꇎꏦꌋꆀꐩꋊꁱꀕꋊꃅꐋꀋꌡꌠꇬꐞꄉꉺꈻꃅꌌꏤꇽꀋꉆ,ꋍꑵꀉꄂꅇꃅꀋꉆ,ꀊꈫꈭꃅꉋꄅꇩꏤꍔꍞꄹꏦꈁꏦꄌꌊꌬꀋꉆ。ꀊꉗꃅꉪꇩꏤꐧꋦꉪꏦꋯꁦꍔꍞꌭꈬ、ꀋꆏꃅꌌꀻꎆꄉ,ꏣꀋꑌꃅꋭꋽꃅꍔꍞꏦꉻꄺꀱꌠꄹꎆ,ꐧꋦꉪꏦꋯꁦꍔꍞꄹꏦꈴ、ꋊꍬꈴ、ꈭꎁꈴꌠꄹꎆ,ꏓꂱꏦꃤꇬꍬꄉꈝꃀꌋꆀꇶꏦ꒔ꑞ꒔ꑵꌠꇬꈴꄉꇩꏤꌤꃆꏲꂠ,ꎆꏣꁱꀕꌤꑘꏲꂠ,ꐧꋦꌤꃆꏲꂠ,ꍔꍞꐛꊂꍄꑐꊋꑌ、ꑘꒃꋯꑌꃅꐙꌠꄻꈫꈈꌋꆀꀻꎆꌠꄉꀧꌶ。

  (ꋍ)ꄈꁵꏲꂠꎻꌠ、ꏓꂱꑱꏲꃥꌋꄻ、ꏦꈴꇩꏲꌠꊜꋽꃅꏓꋍꃱꃅꌠꌭꈬ。ꄈꁵꏲꂠꎻꌠꆹꏓꂱꑱꏲꃥꌋꄻꌠꌋꆀꏦꈴꇩꏲꌠꊇꅉꄉꀧꐨꉬ,ꏓꂱꑱꏲꃥꌋꄻꌠꆹꐧꋦꉪꏦꋯꁦꍔꍞꊇꅉꐛꄟꉬ,ꏦꈴꇩꏲꌠꆹꄈꏓꂱꋌꏃꂠꌌꇩꏤꏱꄻꌠꅉꀨꇶꏦꉬ,ꌕꑵꌠꆹꉪꇩꏤꐧꋦꉪꏦꋯꁦꍔꍞꇰꀋ꒜ꃅꃄꄻꌠꇬꄉꏓꋍꃱꃅ。ꉪꇩꏤꍔꍞꐥꐨꇬ,ꄈꆹꏲꂠꉆꈉꇬꉆꎍꌠꉬ,ꄈꐯꏑꄉ꒔ꃱꃅꏲꂠꌠꊋꀥꇱ,ꏓꄊ、ꍔꃚ、ꍔꑠꌋꆀꃔꑼ、ꏦꍤꑼꊋꁈꄏꄉꏦꃤꇬꈴꏦꋪꇬꈴꄉꄉꅍꌅꈌꃄꌬ、ꌤꃅꌠꍔꆙ、ꂿꄐꋊꇤ,ꋋꑍꁁꏯꆹꋍꃱꃅꐙꌠꉬ。ꄈꅿꏲꂠꄟꌋꆀꌅꈌꌌꄟꄻꃪꄉ,ꄈꏓꂱꋌꏲꂠꌌꇿꋌꐥꃅꇩꏤꏱꄻꌠꄉꀧ;ꏓꂱꊱꁨꃅꍔꍞꃅꈽꌠꍔꒉ,ꏓꂱꏦꃤꇬꈴꄉꋯꁦꃅꌊꄻ、ꋯꁦꃅꐮꇖ、ꋯꁦꃅꁈꏤ、ꋯꁦꃅꏱꄻ、ꋯꁦꃅꍞꊟꌠꄉꀧ;ꇩꏤꏦꄹꋍꃱꃅ、ꑊꒉ、ꋦꒉꌠꀧꌋꃅ,ꊋꀥꇱꄉꃰꊿꌅꈌꏦꏲꌠꏦꀧ,ꏓꂱꏦꃤꇬꈴꄉꌅꈌꌋꆀꑴꌅꐨꀊꐯꈭꃅꐥꌠꄉꀧ。ꅉꂫꊐꌠꍔꍞꌅꈌꄻꈫꈈ,ꅉꂫꊐꌠꋯꁦꄹꏦꄻꐛꒆ,ꏓꂱꐛꐪꅉꐚꌅꈌ、ꃅꈽꌅꈌ、ꉉꄜꌅꈌ、ꍞꊟꌅꈌꏦꀧ。ꏦꃤꇬꈴꄉꁈꏤꉺꏦꄻꐛꒆ,ꈆꑪꃅꁈꏤ、ꏟꈯꃅꃄꌬ、ꊋꑌꃅꍞꊟꌠꌅꈌꃄꌬꉺꏦꏓꄻ。ꏲꌋꇥꀯꈁꐥꊐꌠꆏꋯꁦꉪꉻꀉꇨꃅꑌ,ꋯꁦꃅꇏꍔꆙ,ꏓꂱꁳꍞꊟꎻ,ꏓꂱꊩꌺꄻꋒꌶ。

  (ꑍ)ꏓꂱꑱꏲꃥꌋꄻꌠꄹꏦꏦꀧꌠꊋꀥꇱ。ꏓꂱꁧꎁꃀꀉꒉꈿꌠꄹꏦꆹꄈꁵꏲꂠꎻꌠꌭꈬ、ꏓꂱꑱꏲꃥꌋꄻ、ꏦꈴꇩꏲꌠꊜꋽꃅꏓꋍꃱꃅꌠꊇꅉꍔꍞꄹꏦꄐꁆꄉꌠꉬ,ꀋꎪꃅꀊꉗꃅꌭꈬ、ꀋꆏꃅꄻꐛꒆꌶ。ꏓꂱꆹꏓꂱꁧꎁꃀꀉꒉꈿꌠꇬꈴꄉꇩꏤꌅꈌꌬꌠꇬꊋꁈꄏꌋꆀꄉꀧꌶ。ꏓꄊꌋꆀꋍꎮꊈꉼꏦꃤꏤꄻꌤꃅꅉꇬꂴꅑꄉꄐꇺꌠꂿꄐꋊꇤ,ꏓꄊꊥꇫꄹꏦꌋꆀꌤꃅꄹꏦꄻꐛꒆ,ꏓꄊꏦꃤꇬꈴꄉꏦꃤꏤꄻꌅꈌ、ꍞꊟꌅꈌ、ꏤꇽꌅꈌ、ꄉꅍꁵꇔꌅꈌꃄꌬꌠꇬꊋꁈꄏꌋꆀꄉꀧ,ꀊꅰꃅꉾꃅꏓꄊꁧꎁꂿꄐꋊꇤꄉ,ꈁꐥꊐꌠꏓꄊꌋꆀꋍꎮꊈꉼꁳꐊꑷꃅꏦꃀꏦꃤꁵꄻꄉꌠꃅꎁ꒔ꑞ꒔ꐘꌠꆸꄜꌠꌤꃅꌤꏲꅉꐛꎻ,ꏓꂱꉹꁌꌋꆀꑖꑟꃅꐮꑌꑲꌠꁧꎁꌤꏲꅉꐛꎻ。ꏓꄊꌐꁨꊈꑼꉼꄐꄻꄉꌠꄻꐛꒆ,ꏓꄊꎮꊈꉼꌋꆀꌐꁨꊈꑼꉼꇬꐊꊿꐛꉻꄻꃪ。

  (ꌕ)ꐧꋦꉪꏦꋮꒉꋯꁦꂿꄐꀋꂿ꒧ꌠꋊꇤ。ꌤꆿꆹꇕꄟꇿ,ꋍꏅꌤꃆꋍꏅꐮꇖꄉꃅꌠꆹ,ꏓꂱꋯꁦꌠꇗꅉꃶꐚꌠꉬ。ꋮꒉꋯꁦꌠꆹꄈꁵꏲꂠꎻꌠꃅꇫꑟꄟꀋꉬꀋꉆꌠꉬ,ꉪꇩꏤꐧꋦꉪꏦꋯꁦꍔꍞꇶꏦꐋꀋꌡꃅꐥꌠꌋꆀꂱꎆꅑꐨꐋꀋꌡꌠꉬ。ꋮꒉꋯꁦꌠꄹꆷꅸꀊꐯꈭ、ꀉꑌꊐ、ꄹꏦꈴꃅꀻꎆ,ꏓꇲꄉꍔꄈꋮꒉ、ꏓꄊꋮꒉ、ꍔꃚꋮꒉ、ꍔꑠꋮꒉ、ꏓꂱꏓꉻꋮꒉ、ꅉꂫꊐꌠꋮꒉꉈꑴꐧꋦꎀꍹꋮꒉꌠꄹꎆ。ꊋꀥꇱꄉꋮꒉꋯꁦꄹꏦꋈꄻ,ꐛꒆꃅꐙꌠꄹꏦꈭꎁꌋꆀꃄꄻꅉꐊꈽꃅꌠꏓꐛꄉ,ꏓꂱꎃꐚꍔꍞꐥꐨꇬꄉꀊꐯꈭꃅꐪꊛꄉꃹꅼꃅꇫꃅꈽꌠꌅꈌꄉꀧ。

  ꏓꂱꍔꑠꆹꍏꇩꐛꐨꐥꌠꄹꏦꄐꁆꄉꌠꉬ,ꐧꋦꉪꏦꋮꒉꋯꁦꌠꍬꈜꀋꉬꀋꉆꌠꌋꆀꌐꁨꋮꒉꏲꉻꉬ。ꏓꂱꍔꑠꌤꃅꇬꄈꌋꆀꇩꏤꈯꄜꂿꃆꇬꉜꄉ,ꋯꑌꌋꆀꋯꁦꅇꀨꀉꒉꑍꏢꌠꇬꆼꒆꄉ,ꋮꒉꋯꁦꌠꌌꍔꍞꋮꒉ、ꋯꁦꍞꊟ、ꍔꍞꏲꈽꇖꈿꌠꈭꎁꇬꃅꑟꈴ,ꋮꒉꏲꇖꐊꇐꌋꆀꇶꏦꄻꐛꒆ,ꊋꇤꄉꉜꐨꀊꅰꃅꐮꐊꇁ、ꋯꑌꌠꊥꎆ。ꏓꂱꍔꑠꋯꁦꍞꊟꌠꊋꀥꇱ,ꄈꌋꆀꇩꏤꌐꏦꏱꁈꀉꒉꀊꂾꌠꌋꆀꀋꉬꀋꉆꃅꁈꏤꄐꁆꌠꃄꌬꇫꑟꌠꌌꀨꇬꄉꍞꊟ。ꏓꂱꍔꑠꋍꑞꋍꁆꏯꌠꇬꁧꎁꐨꄻꀉꇨ,ꊋꀥꇱꄉꊈꑼꁥꌠꉗꄻ。

  (ꇖ)ꃹꅼꃅꏦꈴꇩꏲꌠꃄꄻ。ꐊꑷꃅꏦꈴꇩꏲꌠꆹꇩꏤꏱꄻꌠꃹꅼꃅꇝꂱꃢꉬ,ꀋꎪꃅꏦꏲꌠꌭꈬꇬꎷ,ꈆꑪꃅꏦꃤꏤꄻ、ꏦꇨꃅꏦꃤꌬ、ꎃꊒꃅꏦꌬ、ꉹꁌꋍꏅꌠꃅꏦꃤꇬꍬꌠꄹꎆꌶ。ꍏꑷꐊꑷꃅꏦꈴꇩꏲꌠꏲꂠꑦꊤꄻꐛꄉ,ꊋꀥꇱꄉꏦꏲꍏꇩꋈꄻꌠꏭꋍꃱꃅꏲꂠ。ꏦꃀꃄꌬꌠꌋꆀꍞꊟꌠꊋꀥꇱ,ꏦꃀꇬꄐꊒꐨꍤꄻꌤꃅꌠꄹꎆ,ꏦꃀꋦꒉꐨꀧꌋꃅ。ꈆꑪꃅꏦꃤꏤꄻ、ꋯꁦꃅꏦꃤꏤꄻ、ꏦꃤꇬꈴꄉꏦꃤꏤꄻꌠꄹꎆ,ꏦꃤꂄꌠꌊꀻꎆꌠꊥꎆ、ꏲꉔꌠꏦꀧ。ꏦꏲꍔꃚꋈꄻ,ꏦꃤꇬꈴꄉꏲꑘꏲꌠꄹꎆ,ꏦꇨꃅꎃꊒꃅꌧꑳꃅꏦꃤꌬꌠꋊꍬ。ꃹꅼꃅꏦꌬꏦꉻꏓꇱꁥꇱꌠꄺꀱ,ꐊꑷꃅꏦꌬꆽꎍꄹꏦꃅꇫꑟ,ꊋꇤꄉꏓꂱꉹꁌꁳꏦꌬꃣꈌꋍꏢꇬꋑꀋꋒꃅꎃꊒꑗꐥꌠꌌꉪꅜꎽ。ꉹꁌꈁꐥꌠꃅꏦꃤꌧꈴꌠꊋꃤꀉꒉꃅꇱ,ꐧꋦꉪꏦꏦꏲꁱꀕꋈꄻ,ꏦꃀꏦꃤꋍꉎꀋꐥ、ꏦꃤꂲꆽꊿꃅꐥꊯꌐꌠꏦꏲꉪꉻꑌ。ꈁꐥꊐꌠꄈꎀꍹꌋꆀꄈꑼꋍꏅꌠꂴꅑꄉꏦꃤꁌꒉꏦꃤꌷꏦꃤꍬꏦꃤꌬꌶ,ꎀꍹꌋꆀꊿꑴꅉꑞꂷꉬꂿꏦꃀꏦꃤꄩꐂꌠꌅꈌꐋꀋꌡꌠꐥꀋꉆ,ꈍꃅꑌꅇꂷꌊꏦꃤꎃꊐ、ꌅꈌꌊꏦꃤꆼꍅ、ꈲꏣꊂꈹꄉꏦꃤꀜꐆ、ꈲꏂꏦꐆꌠꃅꀋꉆ。

  (ꉬ)ꃹꅼꃅꏲꉻꌋꆀꏲꑘꏦꉻꄺꀱ。ꏓꇲꄉ꒔ꑞ꒔ꉹꌠꏲꉻꏓꄻꌠꉪꏡ,ꈆꑪꃅꄈꍔꌤꏲꅉꌋꆀꈏꇓꏲꉻꌅꈌꁆꄻ、ꃅꎁꊨꄅ。ꏓꇲꄉꋍꑞꋍꑵꏤꄻꄉꌠꌤꃅꊿꃷꁨꌬ,ꈆꑪꋭꋽꃅꐙꌠꏱꄻꏦꉻꏓꐛ,ꇩꏤꏲꉻꎀꍹꏦꃤꄻꐛꒆ。ꍔꃚꂿꄐꆹꏮ,ꃹꅼꃅꏲꑘꅧꊨꌅꈌꄝꃑ,ꍞꏲꄟꏀꀺ,ꍔꃚꉻꑇꐨꌋꆀꃄꌬꊋꃤꄻꀉꇨ,ꏓꂱꇫꉌꃹꌠꁧꃤꃅꉹꌠꍔꃚꋈꄻ。ꑴꌅꌅꈌꀊꅰꃅꀉꑌꃅꄻꌜꊐꌠꌋꆀꋍꈋꐯꍔꃚꁵ。ꌜꏃꑤꇬꌅꊋꐯꌟꄉꏽꌠꄈꍔꌤꏲꅉꇬꄉꏓꐯꇯꄉꄻꌠꅀꏓꐯꇯꄉꌤꀞꌠꎹꎥ。ꃹꅼꃅꌤꑘꌤꃅꅉꄺꀱ,ꉻꈲꐨꄻꀉꇨ,ꏲꑘꌤꑘꁷꐞ、ꌤꑘꎆꏂ꒧ꁷꐞ、ꏱꄻꀞꄻꌠꁷꐞꌠꄹꎆ。

  (ꃘ)ꇩꉂꊋꏓꋍꃱꃅꌠꄻꈫꈈꌋꆀꀻꎆ。ꊋꏓꋍꃱꃅꌠꆹꄈꌤꑘꊋꐛꄎꌠꁌꇐꈤꅍꀋꂿ꒧ꌠꉬ,ꀋꎪꃅꀊꉗꃅꌭꈬꌶ。ꇩꉂꉪꏦ、ꐧꋦꉪꏦꁈꁧꀊꂥꃅꐕꄉ,ꏟꈯꃅꀉꇨꃅꋯꑌꀉꇨꃅꐊꏑꌠꅇꀨꒃꌫꄉ,ꐮꐊꐙꐨꌋꆀꀉꑌꑵꃅꐙꐨꌭꈬ,ꉻꅧꃷꁨꀉꒉꐯꀉꒉꌠꎹꊊ,ꈯꄅꃰꈭꀉꒉꇊꀉꒉꌠꑴꁱꎼꇁ。ꀊꉗꃅꐯꇯꐥ、ꐮꇬꍞꊟ、ꇬꀖꌌꀖꐯꇯ、ꂄꄸꐮꐊꌠꌭꈬ,ꋯꁦꄈꀾꍏꇩꐛꐨꐧꋦꉪꏦꍔꍞꏲꈽꄈꇖꐨꇬꈴꄉꀊꅰꉾꃅꃅꎁꃅꌠꏭꊋꁈꄏ。ꐊꑷꃅꄈꅿꊿꋅꏱꁈꃄꌬ,ꃹꅼꃅꊿꋅꋯꑌꀻꎆꌠꉙꂘ,ꏟꈯꃅꍏꉸꊿꋅꐮꐊꌠꉪꉻꑌꋒ,ꊿꋅꈁꐥꌠꐮꑌꑲꐯꎻꈴꐮꐊꐯꏑꌠꊋꀥꇱ,ꊿꋅꈁꐥꌠꌧꑗꂶꂷꌡꃅꑖꑟꃅꐮꄌꌊꐺꌠꊥꎆꄉ,ꐯꇯꋯꑌꃅꉈꈽ、ꐯꇯꌄꆣꀻꎆ。ꐊꑷꃅꄈꅿꑇꇐꌤꃅꌠꅉꀨꌐꏦꌫꄻ,ꉪꇩꏤꑇꇐꍏꇩꐛꈴꌠꃅꍜꌭꈬ,ꏣꀋꑌꃅꑇꇐꄐꏁꌊꐧꋦꉪꏦꐧꋦꌋꆀꐮꄉꄐꎻ。ꊋꀥꇱꄉꄈꉈꌧꇐꐥꊿꌤꃅ,ꐧꋦꊿꏠꀊꏀꌠꇬꊿꂒꋦꌠꌤꃅꋒꄉ,ꋀꊇꍏꇩꐛꐨꐧꋦꉪꏦꌤꑘꇬꂿꄐꀋꂿ꒧ꌠꋊꇤ。ꐮꉂꐙꎴꌠꀊꏀꉹꌠꍔꃆꃼꇇꐮꃆꂮꏓꄻ,ꉻꁨꏦꎆꏣꀋꉬꌠꉾꃪꃅꀻꎆꌠꌋꆀꉻꁨꏦꎆꏣꀋꉬꌠꌤꃅꊿꉾꃪꃅꉀꒆꌠꊥꎆ。ꀊꐯꈭꃅꎿꉈꃺꑌꌋꆀꀱꇩꈐꇁꌠꉇꄅꀀꃺꑌꋯꑌꄉ,ꐯꇯꍏꉸꊿꋅꇰꀋ꒜ꃅꀱꌄꆣꇁꌠꇬꊋꇤ。

  ꐋꀨꊈ!ꍏꇩꐛꐨꐧꋦꉪꏦꍔꍞꄹꏦꆹꍏꇩꇭꍣꄈꌋꆀꍏꇩꏓꂱꀹꄻꐨꇰꀋ꒜ꌠꉬ。ꉪꊇꆹꉪꇩꏤꐧꋦꉪꏦꋯꁦꍔꍞꂱꎆꅑꐨꌋꆀꐋꀋꌡꐨꋒꐯꋒꃅꋊꇤꅐꇁꄉ,ꃰꊿꍔꍞꌧꑳꀻꎆꌠꎁꃅꍏꇩꀑꁮꐨꐊꈴꃅꅐꌞꌠꏭꉌꊋ、ꄐꊋꑌꋒꐯꑌꋒ!

  ꏃ、ꀋꎪꃅꁱꀕꑴꑇꄉ,ꐧꋦꉪꏦꁱꀕꌄꆣꌠꄹꇙ

  ꁱꀕꆹꇩꏤꂷ、ꊿꋅꁯꅿꒌꆠꉬ。ꁱꀕꉾꇁꆏꇩꏤꊫꂫꑌꉾꇁ,ꁱꀕꇨꆏꊿꋅꑌꇨꇁ。ꁱꀕꉌꊋꀊꂥꃅꀋꑌ,ꁱꀕꌄꆣꌠꀋꐥꑲꆏ,ꍏꉸꊿꋅꇰꀋꃀꃅꀱꌄꆣꇁꌠꀋꐥ。ꀋꎪꃅꍏꇩꐛꐨꐧꋦꉪꏦꁱꀕꀻꎆꈭꈜꍬꇬꎷ,ꊿꋅꑭꊂꁱꀕꏀꀺꁧꀿꌠꄓꊋꄖꄑꄉ,ꐧꋦꉪꏦꁱꀕꀉꇨꌠꇩꏤꋈꄻꌶ。

  ꍏꇩꐛꐨꐧꋦꉪꏦꁱꀕꆹ,ꍏꉸꊿꋅꉬꄙꎖꈎꌧꑳꐩꋊꇱꉗꄻꄉꌠꍏꉸꉾꃪꌠꋊꃅꐥꇈꌠꁱꀕꇬꄉꅐꇁꌠꉬ,ꏸꎵꌊꄈꏓꂱꏃꂠꄉꇝꂱ、ꋈꄻ、ꄺꀱꅉꇬꄉꁧꀿꄉꌠꇝꂱꁱꀕꌋꆀꐧꋦꉪꏦꄞꅐꌠꁱꀕꇬꇱꄉ,ꐴꁘꌊꍏꇩꐛꐨꐧꋦꉪꏦꇰꀋꃀꌠꃶꐚꃄꄻꅉꇬꊐꄉ。ꍏꇩꐛꐨꐧꋦꉪꏦꁱꀕꀻꎆꇬꆏ,ꂷꇻꌦꉪꏦꌌꄐꌐꅍꃅꄉ,ꍏꉸꁱꀕꑋꅉꉆꈉꐏꈬꃅꄉ,ꍏꇩꀋꃋꋋꄮꃶꐚꐛꐨꇬꉆꄉ,ꀋꃋꋋꄮꃅꋊꇎꏦꇬꐊꄉ,ꑓꏮꐛꏀꈴꌠꉜꄉ、ꑓꏮꋧꃅꉜꄉ、ꑓꏮꃆꏂꊂꑋꉜꄉꌠ,ꊿꋅꃤꈆꑪꌠꉹꁌꃤꐧꋦꉪꏦꁱꀕꀻꎆ,ꐧꋦꉪꏦꉌꊈꌧꑳꌠꌋꆀꐥꇐꌧꑳꌠꋮꄮꃅꀻꎆꌠꄹꇙꌠꉬ。ꀋꎪꃅꏓꂱꇬꁧꃤꃅ、ꐧꋦꉪꏦꇬꁧꃤꃅꇬꎷ,ꀋꎪꃅꉏꃨꋓꃅꃨ、ꉐꁭꋓꃅꀥꌠꃅꇬꎷ,ꀋꎪꃅꁧꀿꐨꐥꃅꐈꆦ、ꏀꀺꐨꐥꃅꀻꎆ,ꀋꆏꃅꍏꉸꁱꀕꀊꏀꃅꏁꇅꁤꇅꁏꌠꎵꄻꌶ。

  (ꋍ)ꏟꈯꀕꃅꉪꐪꐛꉻꌤꃅꌠꏲꂠꌅꈌꒃꇇꈐꊐꄉ。ꉪꐪꐛꉻꆏꁱꀕꁨꆹꌠꃅꍜꌋꆀꀻꎆꈭꈜꋌꏤꄻꄉ。ꀋꎪꃅꂷꇻꌦꉪꏦꍏꇩꈴꃅꋊꈴꉹꁌꈴꌠꄹꎆ,ꏓꋧꊋꃤꌋꆀꏃꂠꊋꃤꇧꒉꌠꐧꋦꉪꏦꉪꐪꐛꉻꋈꄻꇈ,ꏓꂱꋍꏅꌠꁳꉪꅉꑇꐨ、ꁌꐨꉪꐨ、ꑌꇐꉪꉻꀂꏽꇬꈬꐯꈬꃅꋯꑌꐮꐊꇁꎻ。ꊋꀥꇱꄉꌧꇗꌶꄻꄉ,ꃅꋊꀊꏀꋎꌠꍏꇩꐛꐨꐧꋦꉪꏦꉪꇐꄹꇙꌊꃹꅼꃅꊾꉌꂵꇬꃹꎻꌶ。ꃹꅼꃅꂷꇻꌦꉪꏦꌧꇗꎥꃪꌋꆀꋈꄻ,ꐳꃅꍏꇩꐛꐨꍔꑪꐧꋦꈆꑪꏓꄻ,ꊋꀥꇱꄉꍏꇩꐛꐨꌧꊿꏓꅉꀊꏀꉹꌠꋈꄻ。ꎃꊒꌠꈋꍣꍝꄎꌭꈬ,ꀊꂥꃅꄜꁊꇇꁈꋈꄻꌠꌋꆀꏀꀺꌠꉜꁨ,ꈨꏀꈋꍣꄜꁊꊋꃤ、ꄐꇺꊋꃤ、ꑌꑲꊋꃤ、ꉻꑇꊋꃤꉀꐕ。ꊋꀥꇱꄉꐯꏑꈄꏍꐊꇐꋈꄻ,ꈄꏍꏓꇱꏱꄻꉻꑫꄻꄉ,ꐝꍠꁤꇅꃅꐙꌠꈄꏍꈥꈉꋈꄻ。ꉪꐪꐛꉻꌤꃅꆼꎍꄹꏦꃄꌬꇫꑟ,ꊋꀥꇱꄉꍆꁍꋈꄻꌋꆀꏲꂠ,ꋓꉪꁨꄉꍔꍞꏥꏦꌤꃆ、ꉪꇐꌧꐚꌤꃆ、ꌷꇐꉜꐨꌤꃆꏡꃏ,ꉜꐨꊨꄅꃅꋍꑞꋍꑵꆹꑽꌠꉜꐨꏭꆼꁏꌋꆀꄘꑣ。

  (ꑍ)ꐧꋦꉪꏦꈯꄜꁌꐨꉜꐨꉗꄻꌋꆀꃄꄻ。ꐧꋦꉪꏦꈯꄜꁌꐨꉜꐨꆹꀋꃋꋋꄮꍏꇩꉌꊈꏓꋧꄉꄛꑣꅐꇁꌠꉬ,ꏓꂱꋍꏅꌠꐯꇯꃤꁌꐨꎹꈹꐨꏓꐛꄉꌠꉬ。ꊿꋅꀱꌄꆣꇁꌠꂿꃆꀉꒉꌠꊩꃅꌠꃅꋊꊿꀊꏀꌠꉘꉚꌠꌌꑓꉜꅉꃅꄉ,ꀉꇨꃅꉙꂘꄐꇺ、ꃄꄻꂘꐛ、ꄹꏦꏦꀧ,ꐧꋦꉪꏦꈯꄜꁌꐨꉜꐨꇩꏤꃰꊿꉙꂘ、ꉌꊈꌧꑳꁦꄻ、ꉌꊈꁱꀕꅐꇐꁰꄻꒃꅐꄜꁊꌠꇬꄐꏁꂿꄐꋊꇤ,ꐧꋦꉪꏦꈯꄜꁌꐨꉜꐨꌌꄉꐧꋦꀻꎆꌠꋍꑞꋍꁁꏯꇬꇱꄉ,ꐈꆦꌊꊿꈧꌠꉂꏣꐮꏚꍆꌠꌋꆀꃅꐨꋻꅑꌠꐛ。ꏓꂱꋍꏅꌠꃅꃄꄻ、ꇥꀯꂴꅑꄉꃅꇬꎷ,ꑱꈐꇬꄑꃄꄻ,ꀉꑳꇬꄉꒃꉇ。ꃹꅼꃅꍏꉸꉾꃪꌠꋊꃅꐥꇈꌠꁱꀕꇬꐊꌠꉪꇐꉪꉻ、ꃰꊿꁱꀕꉌꊈ、ꑌꇐꍬꏦꀖꌊꄉ,ꃅꋊꇖꐨꇬꐊꄉꊪꊛꏀꀺꇈ,ꍏꉸꁱꀕꁳꀋꑍꀋꈤꌠꁯꇐꌋꆀꃅꋊꋼꄟꁖꅐꇁꎻ。

  (ꌕ)ꊋꀥꇱꄉꉪꇐꑌꇐꋈꄻ。ꏓꂱꑇꇐꐥ,ꇩꏤꊋꃤꐥ,ꊿꋅꊫꂫꐥ。ꏓꂱꉪꇐꉪꐚꐨ、ꑌꇐꑞꅉ、ꌧꑳꌧꐨꉀꐕ,ꐧꋦꑭꊂꌧꑳꐨꉀꐕꌶ。ꀊꐯꈭꃅꉪꅉꉪꐨꉙꂘꌠꃅ,ꃹꅼꃅꍏꇩꐛꐨꐧꋦꉪꏦꌋꆀꍏꇩꉪꐨꄜꉺꉙꂘ,ꊿꋅꉌꊈꌋꆀꃅꋊꉌꊈꍔꆙ,ꊋꀥꇱꄉꇩꉂꉪꏦ、ꋍꉻꉪꏦ、ꐧꋦꉪꏦꉙꂘ,ꊿꈧꌠꄐꇺꌊꎃꊒꌠꐩꋊꉜꐨ、ꊿꋅꉜꐨ、ꇩꏤꉜꐨ、ꁱꀕꉜꐨꐥꎻ。ꃹꅼꃅꉻꊿꑌꇐꋈꄻꋉꃆꃄꄻ,ꐧꋦꄉꉻꑌꇐ、ꃅꑘꑌꇐ、ꑱꈐꑌꇐꉾꃪꌠ、ꊿꑴꅉꃅꇏꋈꄻꌠꄹꎆ,ꊿꈧꌠꊋꊡꌊꀍꉀꉜꄉꆹꂄꌠꉜꄉꃅ、ꃀꌠꁌꒉꇨꊨꉁꅉ、ꉌꂵꁍꇩꇱ、ꉌꂵꏓꂱꇱꎻ。ꉪꇐꍔꍞꌤꃅꌠꊋꀥꇱꌋꆀꄻꃪ,ꃹꅼꃅꉹꁌꃅꇫꐊꃅꌠꉌꊈꌧꑳꁦꄻꌠꃅꈧ。ꈆꑪꉌꊈꍔꆗ,ꈆꑪꌧꇐꁊꈴ,ꄹꆴꀺꆦ、ꃅꋊꃅꇏꀊꏀꌠꍔꆗꌠꃅ,ꍹꐛꊁꊰꌠꁱꀕꇫꐊꇬꈽꇁꌠꄘꑣ。ꀋꎪꏤꁨꋈꄻꌠꌋꆀꉌꇗꁧꃤꃅꄹꏦꈴꌠꄹꎆ,ꐧꋦꃅꎁꉪꉻ、ꏦꋪꉪꉻ、ꅐꌞꉪꉻꄻꀉꇨ。

  (ꇖ)ꐧꋦꉪꏦꁱꀕꋽꇐꌄꆣꀻꎆ。ꐧꋦꉪꏦꁱꀕꋽꇐꆹꏓꂱꃤꁱꀕꋽꇐꉬ,ꀋꎪꃅꏓꂱꈯꄜꃅꄉꌠꁰꄻꍝꄎꌭꈬ,ꃹꅼꃅꐥꐨꇬꃹꒉ、ꏓꂱꈬꇬꋦꑭꒃꄉꃅꋊꂾꈴꄿꌠꁱꀕꋽꇐꁧꀿꌶ。ꁱꀕꋽꇐꁰꄻꌄꆣꇬ,ꀋꎪꃅꉪꇐꌤꋽꀊꅼ、ꇮꋽꇮꅼ、ꄺꑣꌃꉾꌠꐮꐊꐙꇬꎷ,ꊋꀥꇱꄉꀋꃋꐛꐨꁱꃆꄻꇐꁰꄻ,ꀋꆏꃅꄈꏭꀭꄒꑵꌠ、ꁍꇩꏭꀭꄒꑵꌠ、ꏓꂱꏭꀭꄒꑵꌠ、ꌳꈄꏭꀭꄒꑵꌠꊋꏂꄉꁱꄉꌠꁱꇐꅧꌃꌠꂵꅐꇁꌶ。ꌷꇐꋯꁦ、ꋽꇐꋯꁦꌠꍔꆗ,ꁱꀕꋽꇐꇫꇬꁰꄻꌠꊋꃤꉀꐕ,ꁱꀕꋽꇐꏀꀺꌠꄹꇙ。ꎊꊈꉉꈻ、ꑌꇐꑲꇐꉉꈻ、ꃅꎁꉉꈻꌠꄕꊪ,ꄷꅠ、ꀉꁘ、ꉹꁌꊏꅰꌠꏭꄘꑣ。ꊋꀥꇱꄉꁱꀕꋽꇐꃅꊿꁥꌠꋈꄻ,ꑌꇐꇮꇐꐮꐊꐙꌠꂓꅑꌠꌧꃀꀉꒉꑠꁥꉙꂘꅐꇁ,ꌧꐨꑞꅉꀊꂥꌠꁰꄻꌧꊿꀉꒉꁥꉘꉚꅐꇁ。

  (ꉬ)ꁱꀕꌤꑘꌋꆀꁱꀕꅐꑘꀻꎆꌠꄹꇙ。ꏓꂱꐥꐨꉾꃪꃅꐤꏢꉨꌠꉘꇉꐨꀊꏀꌠꇎꈴꂿꄷꇬꆏ,ꀋꎪꃅꉌꊈꋠꇐꀉꑌꐯꀉꑌꃅꇲꁵꌶ。ꃹꅼꃅꁱꀕꏦꉻꄺꀱ,ꁱꀕꏲꂠꏦꉻꄻꐛꒆ,ꐳꃅꐧꋦꇿꋌꄻꀨꇬꐕꄉꌠ、ꐧꋦꇿꋌꌋꆀꎆꏣꇿꋌꐮꐊꐙꌠꏦꉻꉺꏦꏓꄻꌶ。ꄉꉻꁱꀕꁧꃤꃅꉻꑫꄻꐛꒆ,ꃹꅼꃅꁱꀕꏓꂱꈲꌠꋉꃆꃄꄻ,ꉹꁌꃅꇫꃅꈧꌠꁱꀕꃅꈧꌠꄻꀉꑌ。ꁱꀕꏂꀨꍸꇐꀧꌋꃅꌬꈧꌠꌋꆀꁱꀕꍸꇐꀧꌋꃅꊪꊛꌠꊋꀥꇱ。ꀋꃋꋋꄮꁱꀕꅐꑘꉻꑫꌋꆀꃷꎏꉻꑫꄻꐛꒆ,ꒃꅐꀰꏢꉺꏦꏀꀺ,ꁱꀕꎆꏣꏱꁈꄻꐛꒆ,ꀊꏀꉹꌠꁱꀕꃅꑘꐛꄟꉘꉚ。ꀊꐯꈭꃅꏓꂱꋍꏅꌠꃅꈯꎟꃅꈧꌠꃅ,ꐳꃅꈯꎟꀉꇨꌠꇩꏤꋈꄻꌠꄹꎆ,ꀙꏢꃅꋆꉪꒀꉼ、ꃅꋆꊿꄣꉪꒀꉼꊭꄎꀞꄻꋒ。ꊋꀥꇱꄉꍏꇩꌋꆀꉋꄅꃰꊿꁱꀕꐮꈴ,ꉪꌌꀨꇬꄉ、ꀉꁁꑌꏣꏑꇬꇯꃅ。ꇩꏹꄜꁊꄐꊋꋈꄻꌠꄹꎆ,ꍏꇩꁮꅉꉉꈻꋒ,ꇯꍝ、ꆺꄜ、ꐊꑷꃅꐙꌠꍏꇩꄻꌠꀦ,ꇩꏤꁱꀕꆓꊋꃤꉀꐕ。

  ꐋꀨꊈ!ꍏꇩꇭꍣꄈꆹꄻꐛꄉꄹꉇꄑ,ꍏꇩꄞꅐꌠꁱꀕꏣꀋꑌꃅꄐꏁꊿꌋꆀꃄꄻꊿꉬꈭꐨ,ꉈꑴꍏꉸꉾꃪꌠꋊꃅꐥꇈꌠꁱꀕꀋꎪꊪꊛꊿꌋꆀꍔꆙꊿꉬ。ꀋꃋꋋꄮꍏꇩꇭꍣꄈꊿꌋꆀꍏꇩꏓꂱꆹꀋꎪꃅꀊꏀꌠꁱꀕꂿꃆꆸꄜꄉꄡꑟꄷꀋꁧꆸꄜꄎꄉ,ꃄꄻꁧꀿꅉꇬꄉꁱꀕꁧꀿ,ꐩꋊꀻꎆꅉꇬꄉꁱꀕꀻꎆꌠꃅꇫꑟ!

  ꉆ、ꏓꂱꐥꐨꏦꀧꌋꆀꄻꃪꌠꉀꐕ,ꐧꋦꏱꄻꌠꊋꀥꇱꌋꆀꏀꀺ

  ꄈꑭꊂꃅꀋꎪꃅ,ꑞꊿꎁꃅꌠꌤꃆꆹ,ꍔꄈꂷ、ꍔꌅꂷꐛꊈꎕꑣꌠꏂꎖꇓꉬꌠꎺꐚꃅꎺꄉꌶ。ꏓꂱꏃꂠꄉꐥꐨꉾꃪꌠꁧꀿꌠꆹ,ꉪꊇꄈꈍꄮꇬꑌꀋꎪꀋꑴꃅꉈꈽꇬꎷꌠꑞꅉꁻꌐꉬ。ꀋꎪꃅꈍꄮꇬꑌꏓꂱꈲꁧꄻꑋꅉꉆꈉꋍꉎꀋꐥꅉꇬꐕꄉꇈ,ꄺꀱꀻꎆꌠꊌꐨꁳꀊꅰꀉꑌꃅꀊꅰꐽꊯꃅꏓꂱꋍꏅꌠꃅꈲꄉ,ꏓꂱꋍꏅꌠꃅꐯꇯꌣꈚꇁꌠꃅꇫꑟꌠꇬꉜꄉꀋꆏꃅꀒꁨꆹꎻ。

  ꉹꁌꐥꐨꏦꀧꌋꆀꄻꃪꂿꄷꇬꏓꂱꀊꅰꃅꇫꉈꇬꀊꅰꃅꈛꎂꃅꐙꀊꅰꃅꇇꈤꃅꐙꌠꈲꁧꃆꂮꒃꌫꄉ,ꄾꌦꋩꃅꇫꃅꈭꐨ,ꉈꑴꊋꎖꄉꃤꀳ,ꌤꆿꋍꐘꋍꐘꃅꐮꊂꊛꄉꀞꄻ,ꋍꈓꋍꈓꃅꐮꊂꊛꄉꃅꌶ。ꊾꂷꈀꐥꌠꃅꃅꎁꃅꌐ、ꊿꋍꂷꈀꐥꌠꃅꈲꊌꇬꎷ,ꄽꂫꑞꅉꐏꈬꃅꄉ、ꀋꂿꑘꌠꄻꀨꇬꄉ、ꄹꏦꄻꐛꒆ、ꂴꉪꄐꄉꌠꄐꇺꇬꎷ,ꄉꉻꁧꃤꃅꉻꑫꄻꐛꒆ,ꉹꁌꅉꀨꐥꐨꏦꀧ,ꀋꆏꃅꏓꂱꋍꑍꋍꉙꃅꉀꎆꇁꌠꐥꐨꉾꃪꌠꈉꐨꇬꇎꈴ,ꀋꆏꃅꐧꋦꐽꊯꑗꉬꌠꊥꎆ,ꇿꋌꐥꃅꐧꋦꏱꄻ、ꐧꋦꐥꀹꉾꃪꌠꏓꐛꇈ,ꏓꂱꁳꊌꐨꐥꎻꃅꐙꐨ、ꐥꌒꃅꐙꐨ、ꋬꂻꃅꐙꐨꀊꅰꃅꐥꋒ、ꀊꅰꃅꏦꀧ、ꀊꅰꃅꐪꊛꉆꎻ。

  (ꋍ)ꂴꄉꂘꑘꌤꑘꀻꎆ。ꂘꑘꀉꇨꌠꇩꏤꋈꄻꌠꆹꍏꉸꊿꋅꇰꀋꃀꃅꀱꌄꆣꇁꌠꅉꃀꋉꃆꉬ,ꀋꎪꃅꂘꑘꌤꑘꄻꂴꑋꅉꉆꈉꇬꐕꄉ,ꃹꅼꃅꂘꑘꄺꀱ,ꐳꃅꂘꑘꐛꏀꈴ,ꏓꂱꇫꄸꈴꌠꂘꑘꀞꄻꋒꌶ。ꐊꑷꃅꄈꅿꂘꑘꌐꏦꃄꌬꇫꑟ,ꑌꇐꄖꊿꉙꂘꌠꊇꅉꂿꃆꃄꄻꇫꑟ,ꊇꁧꉙꂘꌠꀻꎆ,ꂘꑘꐽꊯꌠꄹꎆ,ꑌꇐꀑꁮꐨꈯꎟꋽꎔꌠꐊꑷꃅꀻꎆꌠꐧꋦꉪꏦꋈꄻꊿꌋꆀꐴꉆꊿꉘꉚꌶ。ꇓꈓꇓꉈꋭꑘꂘꑘꋍꉻꃅꐙꈴꄉꀻꎆꌠꄹꇙ,ꀊꂥꃅꂿꑘꁡꇤꋭꑘꂘꑘꉜꁨ,ꌷꂾꉙꂘ、ꐛꋲꉙꂘꌋꆀꈄꏍꉙꂘꌠꀞꄻꋒ,ꐧꊐꂥꌷꊬꌠꉙꂘꌠꁊꈴ,ꊋꇤꄉꀉꑳꂷꈁꐥꌠꃅꐥꊯꃅꉾꃅꉙꂘꌠꊌꎻ。ꃅꑘꉙꂘꌠꌋꆀꁰꍋꉻꑫꄻꐛꒆꄉ,ꃹꅼꃅꒃꅐꉙꂘꌠꄻꐮꉔ、ꌶꅉꎆꏂꑘꐮꇷꃅ。ꐳꃅꒉꌶꅉꋍꉎꀋꐥꌠꌋꆀꌷꑫꋍꉎꀋꐥꌠꋈꄻ,ꀊꂥꊐꌠꉙꂘꌠꈏꐊꊈꀻꎆꌠꃅꇫꑟ。ꌶꌺꇬꎆꋚꇇꀨꄹꏦꄻꐛꒆ,ꇓꈓꇓꉈꀊꏀꃅꁦꎆꌠꑘꁨꊋꃤꀉꑌꌠꁳꐧꊐꂥꌷꊬꌠꇬꉙꂘ、ꀊꅰꀉꑌꃅꌶꅉꀊꂥꊐꌠꇬꉙꂘꌠꊌꎻ。ꐧꋦꊋꃤꂘꑘꀞꄻꌠꇬꊋꁈꄏꌋꆀꋊꍬ。ꊋꀥꇱꄉꂘꃀꑌꇐꀹꇐꋈꄻ,ꊇꁧꀉꇨꌠꂘꃀꁥꁱꂘ,ꐧꋦꑭꊂꃅꂘꃀꁌꒉꂘꑘꉜꁨꌠꄕꊪ。ꐪꊛꄉꉙꂘꌠꀞꄻꋒ,ꐳꃅꌶꄻꉹꌠꐧꋦꋈꄻ,ꊋꀉꒉꃅꇤꄉꇩꂱꊇꁧꉀꐕ。

  (ꑍ)ꃅꅍꊌꊇꁧꌋꆀꏓꂱꊌꐨꑞꅉꉀꐕ。ꃅꅍꊌꌠꆹꉹꁌꐥꐨꀉꒉꐯꀉꒉꌠꉬ。ꀋꎪꃅꃅꅍꊌꌠꄻꂴꄉꌠꄐꇐꌋꆀꏣꀋꑌꃅꃅꅍꊌꌠꏱꁈꌭꈬ,ꊇꁧꀊꅰꀉꇨꌠꌋꆀꄾꌦꋩꃅꃅꅍꊌꌠꃅꇫꑟ。ꄉꈁꀉꒉꃅꃅꑘꇮꇐꄐꊋꁱꂘꌠꃅ,ꐛꉻꃅꐙꌠꃅꅍꎹꐮꄙꐨꂥꀘꌠꉜꁨ,ꑘꀺꌠꌊꃅꅍꊌꌠꈺꇙꌠꊋꊡ。ꐊꑷꃅꄉꉻꃅꅍꊌꁧꃤꃅꌠꇲꁵ,ꌶꅉꀊꂥꊐꌠꌶꅐꌶꌺꑠꌠꏀꊿꁥꌠ、ꂿꑘꊿꊋꃅꌠꈴꈜꀉꑌꃅꃅꅍꊌꑘꀺꌠꊥꎆ。ꑘꁨꊋꃤ、ꌧꊿꐧꋦꐛꐨꐥꃅꇙꈧꌠꇬꏢꇈꌠꏦꉻꉺꏦꆐꅑꐨꋊꑣꇈ,ꊾꂷꈀꐥꌠꃅꐯꇯꎬꅧꃅꑘꁨꌠꇬꈴꄉꊨꏦꑴꅉꀻꎆꌠꃅꇫꑟꌠꊜꋽꄮꐥꎻ。ꍔꃚ、ꇪꉼ、ꎆꏂꑘꐯꇯꃅꈽꌠꋮꒉꋮꄮꉺꏦꄻꐛꒆ,ꐮꄮꃅꑘꁨꌠꐮꃆꂮꏓꄻ。ꃅꐨꉜꄉꁷꄻꌠꏥꏦꌭꈬ,ꐊꊈꉜꄉꁷꄻꌠꏦꉻꉺꏦꄻꐛꒆ,ꊌꐨꁷꄻꌠꀊꅰꃅꇗꊒ、ꀊꅰꃅꊱꁨꌠꊥꎆ。ꈪꑌꏦꍬꌣꈚꇁꌠꊋꊡ,ꊌꐨꐧꀠꃅꐙꌠꊿꁥꌠꍔꒉ,ꊿꊌꐨꀁꂥꈧꌠꊌꐨꁦꎆꇱ,ꊌꐨꀊꂥꇨꌠꋊꄻ,ꏦꀋꊒꃅꊌꌠꏢꇧꎭ。ꀋꎪꃅꎆꏣꉀꎆꈭꐨꀀꊿꊌꐨꑌꋍꋓꃅꉀꎆꌠꃅꇫꑟ、ꑘꁨꒃꅐꐨꉀꎆꈭꐨꑘꁨꃄꁌꑌꋍꋓꃅꉀꎆꌠꃅꇫꑟꌠꌭꈬ。ꀀꊿꑘꁨꊌꐨꌋꆀꁨꇐꃅꐙꌠꊌꐨꇀꅉꍔꐯ。ꍔꃚꀱꁷꄻꌠꋊꐽꌅꊋꃄꌬꋒꄉ,ꐳꃅꅉꀨꄉꉻꁧꃤꃅꌠꐽꏡꈴꌠꄹꎆ,ꊌꐨꁷꄻꐮꍣꐨꍕꒊ。

  (ꌕ)ꊋꀥꇱꄉꐧꋦꏦꀧꉻꑫꋈꄻ。ꄉꀧꑞꅉꑟ、ꈄꎀꌤ、ꉺꏦꄻꌠꇖꐨꇬꈴꄉ,ꐊꑷꃅꉹꁌꈁꐥꌠꃅꉱꑷ、ꇓꈓꇓꉈꏓꇲ、ꌅꈌꃅꎁꊨꄅ、ꏦꀧꄉꄐ、ꐪꊛꉆꌠꀉꑌꊐꃅꐙꌠꐧꋦꏦꀧꉻꑫꄻꄉ。ꐊꑷꃅꉹꁌꈁꐥꌠꃅꄜꏂꀧꈽꌠꎖꄎꃄꌬ。ꇓꈓꏦꎫꌤꃅꊿꅉꀨꃀꌠꀨꎹꄜꏂꀧꌠꌋꆀꇓꈓꇓꉈꀀꊿꅉꀨꃀꌠꀨꎹꄜꏂꀧꄹꏦꄻꐛꒆ,ꐳꃅꃀꌠꀨꎹꄜꏂꀧꌠꇩꏤꑭꊂꃅꏓꇲꌠꃅꇫꑟ。ꋍꃱꃅꐙꌠꇓꈓꇓꉈꀀꊿꅉꀨꆅꉁꆄꄻꄜꏂꀧꄹꏦꌋꆀꆅꒉꈺꒉꄜꏂꀧꄹꏦꄻꐛꒆ。ꃅꅍꀋꊌꌠ、ꇮꃅꂷꊂꌸꌠꄜꏂꀧꄹꏦꄻꐛꒆ。ꇩꏤꑭꊂꏓꋍꃱꃅꌠꐧꋦꄜꏂꀧꄉꉻꁧꃤꃅꐽꈉꄻꄉ。ꇓꈓꇓꉈꐧꋦꈭꋏꇇꀨꉻꑫꏓꇲ,ꐥꐨꀁꂥꐯꀁꂥꌠꏦꀧꄹꏦꄻꐛꒆ。ꌺꃰꌋꅪꐥꊯꌠꅉꀨꇩꁈꌭꈬ,ꌋꅪꀉꑳꏦꊒꌅꈌꈲꁧꏦꀧ。ꐧꋦꈭꋏꇇꀨ、ꐧꋦꈲꁵ、ꂄꃅꎔꏿꌤꑘ、ꈲꁵꁆꄻꑠꄹꏦꄻꐛꒆ,ꂿꑘꁡꇤꑳꐍꀉꑳꌋꆀꌋꅪ、ꃀꌠꉈꇬꁧꃤꃅꉻꑫꄻꐛꒆ。ꊾꄣꌤꑘꀻꎆ,ꊋꀥꇱꄉꄣꌠꉖꄻꌒꌠꁧꃤꃅ。ꑳꇤꆹꌌꀀꌠ、ꌌꃼꇇꃅꌠꀋꉬꌠꌭꈬꇬꎷ,ꐳꃅꀨꄜꀉꑌꑵꃅꇲꁵ、ꈴꈜꀉꑌꏢꃅꏦꀧ、ꊤꃼꐯꇯꋓꃅꀕꌠꀀꑳꄹꏦꄻꄉ,ꏓꂱꈁꐥꌠꃅꀀꇬꀀꑳꐥꎻ。

  (ꇖ)ꏟꈯꃅꎭꑆꇔꈢꇓꀖꌠꃅꊋꐛ。ꌢꎭꊻꂷꌋꆀꌢꎭꃅꄷꆏꇩꏤꑭꊂꌋꆀꋍꋓꃅꄉꐊꑷꃅꊼꇅꌣꈚꌠꐧꋦꇬꃹꇁꌠꆹꉪꊇꄈꇗꄃꃅꃅꐮꄉꌠꉬ。ꄈꑭꊂꇩꏤꑭꊂꐧꋦꊋꃤꃅꄕꊪꌊꄉ,ꊒꌸꃅꌢꎭꄏꐓ、ꊒꌸꃅꎭꑆꇔꇬꎷ,ꍏꑷꏓꇲꄉꌜꆏꈁꉬꌄꇤꏃꑤꆏꃅꇫꑟꌠꒃꉇꌠꌤꃅꉺꏦꌭꈬꃅꄉ,ꄈꍔꏲꌋꀨꂶꌠꈁꉬꃅꌄꇤꌠꆽꎍꄹꏦꄻꀉꇨꃅꄉ,ꀉꒉꃅꌢꎭꄏꐓꌠꐛꄟꌭꈬ,ꌢꎭꄏꐓꌠꆏꉌꊋꄏ、ꀑꁮꄏꌠꌋꆀꄻꐯꇯꄉꃅꌠꉜꁨ,ꃹꅼꃅꁭꅐꁮꐚꃅꄷꌢꎭꄏꐓꐊꃅꌠꃅ,ꀋꉬꀋꉆꃅꀊꅼꃅꌢꎭꃅꄷꎭꑆꇔꂿꃆꃅꊋꐛ,ꄉꀧꄉꅑꅸꑍꄙꆀꑍꊏꈎꑟꇬꆏꉪꇩꏤꀋꃋꌌꌬꌠꎕꏦꇂꃴꂿꑘꁡꇤꌢꎭꊻꂷꎭꑆꇔꌠꃅꇫꑟ,ꌢꎭꑤꉬꇮꃅꌢꎭꀎꇓꇔꇧꎭꌐ,ꃄꁕꃅꐙꌠꉻꄜꃅꌢꎭꌠꂥꀘ,ꃶꐚꃅꌢꎭꌠꎭꑆꇔ、ꇯꍝꃅꎭꑆꇔꇧꎭꌠꃅꇫꑟ。

  (ꉬ)ꉾꃪꍏꇩꄐꇐꃄꄻ。ꏓꂱꒉꄚꇁꄿꌠꆹꊿꋅꌄꆣꐞꄿꌠꌋꆀꇩꏤꌣꈚꐞꄿꌠꌐꂷꀋꉬꀋꉆꌠꉬ。ꇩꂱꋬꂻꏱꁈꄻꐛꒆ,ꏓꂱꉹꁌꎁꃅꐊꑷꃅꈭꏮꈴꃅꋬꂻꁧꃤꃅꌠꇲꁵ。ꃹꅼꃅꉃꄻꁬꋌꁦꎴꆄꄻꏦꉻꄺꀱ,ꐊꑷꃅꍏꇩꐛꐨꅉꀨꆅꉁꁦꎴꆄꄻꄹꏦ、ꆅꉁꏦꀧꄹꏦꌋꆀꊈꂄꇿꋌꀉꇨꌠꆅꉁꁦꎴꆄꄻꉻꑫꄻꄉ,ꀋꃋꋋꄮꆅꉚꅉꏲꂠꄹꏦꄻꐛꒆ。ꊋꀥꇱꄉꅉꂫꊐꌠꆅꉁꁦꎴꆄꄻꁧꃤꃅꉻꑫꌋꆀꌧꈴꑱꌜꁥꌠꋈꄻ。ꐊꑷꃅꁬꋌꌌꆅꉁꌠꉗꄻꌠꇤꇧꎭ,ꁬꋌꇲꁵꏦꀧꄹꏦꄻꐛꒆ。ꀋꎪꃅꄴꏮꌠꌌꀨꇬꄉ,ꃹꅼꃅꇩꉂꁦꎴꆄꄻꉻꄑꌠꃅ,ꒉꄚꇁꄿꌧꑳꌠꐥꐨꐤꄟꄕꊪ,ꆅꒉꈺꒉꌠꄴꏮꋎꍅ。ꋠꇐꉮꀋꐥꌠꄐꇐꃄꌬꄉ,ꏓꂱꁳꋠꇬꉌꒊꎻ。ꍏꑭꑳꐯꇯꀋꉬꀋꉆꌠꌭꈬ,ꍏꑱꁬꋌꌤꑘꊪꊛꀻꎆ。ꐧꋦꆅꉚꅉꀞꄻꌠꊋꁈꄏ,ꋬꂻꅐꑘꀻꎆ。ꒆꉘꏱꁈꌋꆀꄚꃆꂮꐥꌠꎆꏣꐧꋦꏱꁈꋬꈭꃅꊪꊛꌠꊥꎆ,ꊋꀥꇱꄉꊻꂷꀻꎆꄐꇐꎥꃪ。ꏣꀋꑌꃅꊻꂷꃀꌠꐛꈴꇁꌠꏭꊜꄻ,ꃀꌠꀨꎹ、ꃀꌠꁌꒉ、ꃀꌠꉁꅉꏱꁈꉻꑫꌋꆀꐧꋦꋦꈭꏓꄻ,ꉃꄻꀨꎹꄻꐯꇯꌠꄹꎆ,ꐳꃅꃀꌠꌤꑘꌋꆀꅐꑘꀻꎆ。

  (ꃘ)ꐯꇯꋈꄻꐯꇯꏲꂠꐯꇯꈲꊌꌠꐧꋦꏱꄻꐛꄟꄺꑣ。ꊋꀥꇱꄉꐧꋦꏱꄻꄹꏦꋈꄻ,ꄈꊈꏃꂠ、ꍔꃚꌄꇤ、ꐧꋦꋮꐊ、ꋍꏅꃅꈽ、ꏦꏲꏦꀧꌠꐧꋦꏦꏲꏦꉻꄻꐛꒆ,ꐧꋦꏱꄻꌠꐧꋦꈴ、ꏦꏲꈴ、ꀑꁮꈴ、ꌐꑘꈴꌠꑞꅉꉀꐕ。ꊋꀥꇱꄉꐧꋦꐮꄙꐨꄴꏮꌋꆀꋊꎵꌠꉺꏦꄻꐛꒆ,ꎃꊒꃅꏓꂱꈏꇓꐮꄙꐨꂥꀘ。ꉌꂵꇬꋬꂻꀻꎆꉪꉻꑌ,ꀑꇬꉎꀋꐥ、ꋬꂻꀨꇬꄉꌠꉪꇐꍔꆙ,ꄉꉻꋬꂻꉻꑫꄻꐛꒆ,ꋬꂻꒃꅐꃅꎁꄹꏦꄻꐛꒆ,ꏟꈯꃅꋬꂻꃆꂮꌤꀉꒉꀊꂾꃅꅐꌠꏡꍅ,ꉮꄵꉮꊨꉮꌸꈭꋏꄐꊋꉀꐕ。ꐳꃅꐧꋦꋬꂻꏱꄻꄴꏮꉻꑫꋈꄻ,ꏦꃤꇬꈴꄉꎲꃅꄊꁉꅋꃷꅋꅝꐧꋦꀉꆈꊏꀸꑠꏦꐆꑽꃤꃅꌠꇇꇩꍈꌋꆀꅓꀞ,ꏓꂱꊿꈯꄿꌅꈌ、ꁨꇐꌅꈌ、ꀑꑊꌋꃅꌅꈌꀧꌋꃅ。ꊋꀥꇱꄉꐧꋦꉌꇗꁧꃤꃅꉻꑫꋈꄻ,ꑴꑲꉜꁨꑴꑳꑇ、ꉪꍆꑘꒃ、ꏣꀋꑌꃅꉀꆹꌠꐧꋦꉪꄟꉘꉚ。ꊋꀥꇱꄉꐧꋦꏱꄻꉻꑫꋈꄻ,ꐧꋦꏱꄻꀋꉬꀋꉆꌠꆏꅉꂫꊐꌠꇬꉜꄉꎎꒉꌠꄹꇙ,ꐧꋦꎀꍹꂿꄐꋊꇤ,ꍔꃚꏱꄻꌠꌋꆀꐧꋦꋊꄻꌠ、ꀀꊿꊨꏦꏱꄻꌠꉾꃪꃅꐮꇙꌠꃅꇫꑟ。

  (ꏃ)ꇿꋌꐥꃅꇩꏤꋬꂻꌠꀧꌋꃅ。ꇩꏤꋬꂻꌠꆹꇩꈬꇩꈈꌠꈑꇓꀋꂿꑘꌠꉬ,ꇩꏤꋬꂻꀧꌋꃅꌠꆹꇩꏤꑭꊂꊿꋅꈁꐥꌠꏓꂱꁧꀦꈲꁧꐤꅉꉬ。ꇩꏤꋬꂻꄐꇐꌋꆀꇩꏤꋬꂻꏱꁈꄻꐛꒆꄉ,ꏟꈯꃅꇩꏤꍔꍞꋬꂻꌠꀧꌋꃅ,ꏓꇲꄉꋍꑞꋍꐘꋬꂻꌤꃅꌠꄹꎆ。ꇩꏤꋬꂻꉻꑫꄻꐛꒆ,ꊋꀥꇱꄉꇩꏤꋬꂻꏦꏲꌠꏦꀧ,ꋬꂻꃨꆰꐨꄴꏮꌋꆀꄘꑣꄐꊋꉀꐕ。ꀉꇨꃅꋍꑞꋍꑵꁏꆷꀜꐆꌠꐊꈽꃅꈧꌠ、ꊋꃷꇱꇷꌾꃅꈧꌠ、ꊿꋅꁷꐞꃅꈧꌠ、ꑇꇐꎖꃨꅑꃅꃅꈧꌠꄴꏮꌋꆀꌌꏟꈯꃅꇇꇩꍈ。ꇩꏤꋬꂻꂘꑘꊋꀥꇱ,ꄈꑭꊂꇩꏤꑭꊂꏓꂱꃅꇩꏤꋬꂻꉪꐨꀉꇨꇁ,ꐧꋦꑭꊂꄹꇙꄉꇩꏤꋬꂻꀧꌋꃅꌠꏓꊋꀉꇨꌠꏓꐛ。

  ꐋꀨꊈ!ꄈꅿꌤꈀꃅꌠꃅꀋꎪꃅꏓꂱꋍꏅꇊꋍꏅꌠꁧꀦꈲꁧꌌꎕꏦꀊꂥꇊꀊꂥꌠꃅꄉꌶ。ꉪꊇꆏꏟꈯꃅꏓꂱꉹꁌꌤꀄꊭꌠꌌꊨꏦꌤꀉꒉꌠꃅꄉ,ꏓꂱꉹꁌꉈꇬꌠꌤꆿꇬꄉꃅꅷꁧ,ꏓꂱꉹꁌꁳꇫꉌꃹꎻꌠꌤꆿꇬꄉꃅꅷꁧ,ꏓꂱꏃꂠꌊꄉꀋꆏꃅꐥꐨꉾꃪꌠꋈꄻꌶ。

  ꈬ、ꐳꃅꒆꉻꌧꑳꏦꉻꄺꀱ,ꎔꃨꌠꍏꇩꋈꄻ

  ꊿꌋꆀꋌꐛꆹꀑꇬꐮꐊꐙꌠꉬ,ꃰꊿꆹꀋꎪꃅꋌꐛꉜꁨ、ꋌꐛꏭꄐ、ꋌꐛꀧꌋꃅꌶ。ꃰꊿꆹꋌꐛꈳꏦꈴꇬꑲꆀ,ꇿꋌꐥꃅꋌꐛꀖꁉꈲꌬꇬꈜꈪꍬꌠꄴꏮꄎꌠꉬ,ꃰꊿꋌꐛꇬꉮꄻꌠꆹꄽꂫꇬꆏꃰꊿꊨꏦꏭꉮꄻꌠꉬ,ꋋꆹꄘꑣꀋꄐꌠꈳꏦꉬ。

  ꉪꊇꋈꄻꂿꄷꌠꐛꏀꈴꌠꆹꊿꌋꆀꋌꐛꐮꄮꃅꐯꈽꇫꐥꌠꐛꏀꈴꌠꉬ,ꀊꅰꀉꑌꃅꐥꇐꁨꇐꌋꆀꉌꊈꁨꇐꀹꄻꄉꏓꂱꋍꑍꋍꉙꃅꉀꎆꇁꌠꐥꐨꉾꃪꌠꈉꐨꇬꇎꋒꈭꐨ,ꉈꑴꀊꅰꀉꑌꃅꒆꉻꅐꇐꊈꂄꌠꇲꁵꄉꏓꂱꋍꑍꋍꉙꃅꉀꎆꌠꒆꉻꋦꈭꋽꎔꌠꈉꐨꇬꇎꋒꌶ。ꀋꎪꃅꏎꏸꌠꄻꂴꄉ、ꀧꌋꃅꌠꄻꂴꄉ、ꋌꐛꀱꐛꅉꐛꇁꌠꄻꀨꇬꄉꌠꌐꏦꌭꈬ,ꅐꀦꏎꏸꌠꌋꆀꋦꈭꀧꌋꃅꌠꈥꈉꐛꄟ、ꅐꑘꐛꉻ、ꒃꅐꃄꄟ、ꐤꄟꄺꄟꑠꏓꐛ,ꌙꈈ、ꐮꄮ、ꎔꃨꌠꀱꉈꑴꋌꐛꁵ。

  (ꋍ)ꀊꃴꀻꎆꌠꄹꎆ。ꐳꃅꀊꃴꒃꅐꌋꆀꌬꈧꌠꏦꃤꄹꏦꌋꆀꏱꁈꍝꄎꄻꐛ,ꀊꃴꌋꀁꂥꌠꀰꏮꃅꀻꎆꌠꎆꏣꉻꑫꋈꄻꐛꒆ。ꃷꎏꍝꄎꌠꀊꃴꇮꇐꏀꀺꉻꑫꏓꄻ,ꎆꒉꎆꇁꀊꃴꌠꀻꎆ,ꊋꏏꋦꈭꌋꃅꌠꅐꑘ、ꁦꎴꒃꅐꅐꑘ、ꁦꎴꊋꀦꅐꑘꄻꀉꇨ。ꊋꀦꒃꅐꌋꆀꌬꈧꄺꀱꌠꄹꎆ,ꁦꎴꌋꀁꂥ、ꋬꂻꇿꋌꀊꂥꌠꊋꀦꉻꑫꏓꄻ。ꅐꀦꐊꑷꃅꏎꏸꌋꆀꀰꏮꃅꌌꌬꌠꄹꎆ,ꇩꏤꒉꏎꏸꃄꄻꌠꃅ,ꊋꀦꃹꐨ、ꎊꈬꃹꐨꊨꀁꂥ,ꒃꅐꉻꑫꌋꆀꐥꐨꉻꑫꀰꏮꃅꐯꊛꌠꃅꇫꑟ。ꏎꏸꄉꄐ、ꀊꃴꌋꀁꂥꌠꐥꐨꐤꄟꄕꊪ,ꎆꁌꋙꀘꌋꆀꌬꈧꀋꋭꀋꋽꌠꏭꁏ,ꏎꏸꉹꌠꌤꏲꅉ、ꀊꃴꑱꈐ、ꀊꃴꌶꅉ、ꀊꃴꋥꁕꌋꆀꀊꃴꉇꅐꌠꑠꃅꌠꁦꄻ。

  (ꑍ)ꊋꏂꄉꑓꅐꎑꌠꋦꈭꌤꃆꂥꀘ。ꀋꎪꃅꉹꁌꋍꏅꃅꐯꇯꏱꄻ、ꇁꀦꇬꄉꄴꏮꏱꄻꌠꌭꈬ,ꊛꄉꃅꌗꍍꆀꌠꄴꏮꏱꄻꌠꃄꌬ,ꃅꃴꀕꇉꀕꌠꀧꌋꃅꇫꑟ。ꐳꃅꒉꍍꆀꄴꏮ,ꒉꈳꁕꋦꈭꌋꆀꎿꆸꈈꐛꁕꏓꇱꏱꄻꌠꃄꌬ。ꀉꇨꃅꃄꅉꍍꆀꏲꂠꋏꌫꌠꌋꆀꀱꐛꅉꐛꎻꌠꃅ,ꊋꀥꇱꄉꂿꑘꑊꊧꍍꆀꌠꄴꏮꏱꄻ,ꂿꑘꁡꇤꊿꀀꋦꈭꏱꄻꌠꃅ。ꊋꀥꇱꄉꈯꊈꀉꀜꌋꆀꑶꌩꀖꑘꋊꄻ。ꍍꆀꋊꃑꎕꏦꉀꐕ,ꍍꆀꋊꃑꊿꃅꎁꄻꀉꇨ,ꋦꈭꉌꒊꐨꈋꍣ、ꈴꌗꌌꄀꇗꇱꄉꀖꅐ、ꏦꇨꃅꅓꀞꌠꄹꏦꑠꄻꐛꒆ。ꍔꃚꌌꀨꇬꄉ、ꎆꏂꑘꌌꀨꄜꃅꄉ、ꐧꋦꎀꍹꌋꆀꉹꁌꋍꏅꐯꇯꃅꇫꐊꈽꃅꌠꋦꈭꏱꄻꉻꑫꏓꄻ。ꏣꀋꑌꃅꋧꃅꑭꊂꋦꈭꏱꄻꌠꇬꃅꈽ,ꍍꆀꋊꃑꃅꂿꄷꉉꄉꌠꃅꑞꅉꑟ。

  (ꌕ)ꊋꀉꒉꃅꇤꄉꒆꉻꉻꑫꀧꌋꃅ。ꀋꂿꑘꌠꒆꉻꑭꊂꀧꌋꃅꌠꌋꆀꋉꃆꀉꒉꀊꂾꌠꀱꐛꅉꐛꌠꃄꄻ,ꒆꉻꋬꂻꁠꇓꉻꑫꄻꃪ,ꒆꉻꈳꁕꌋꆀꒆꇐꀉꑌꑵꃅꐙꌠꀧꌋꃅꈄꏍꏓꄻ,ꒆꉻꑭꊂꊇꁧꌋꆀꎍꐽꐨꐕꀊꂥ。ꒆꉻꀧꌋꃅꑟꅪ、ꀊꉗꀊꎴꌠꅉꀨꁍꑗ、ꇓꈓꏦꎫꀖꁉꃅꋮꋏꌫꑟꌕꏢꁷꇽꌤꃅꌠꃅꇫꑟꌐ。ꇩꏤꃄꅉꃴꆧꈴꌠꃅꈧꌠꃅ,ꃅꈣꂤꏂꅔꐛ、ꇓꃀꂤꏂꅔꐛ、ꃄꐡꊖꑳꑠꏓꇱꏱꄻꌠꄹꎆ,ꀉꇨꃅꒉꊩꀧꌋꃅꌋꆀꀱꐛꅉꐛꌠꃅ,ꊋꀥꇱꄉꅉꊈꉮꌸꌠꄴꏮꏱꄻ。ꋌꐛꌩꏪꀧꌋꃅꄹꏦꄻꐛꒆ,ꋠꃅꀱꌩꊪꀱꏜꏿꌠꍔꐯ。ꏦꇨꃅꋠꃅꀧꌋꃅ,ꋠꃅꆦꃅꃄꍫꃅꉚꅉꍔꐯ,ꋠꃅꅔꏂꌩꏪꒊꃀꎾꃚꌗꊏꐥꊩꄹꏦꄻꐛꒆ,ꃷꎏꈴ、ꀉꑌꑵꃅꐙꈴꌠꒆꉻꁥꇱꉺꏦꄻꐛ。

  (ꇖ)ꒆꉻꋦꈭꍞꏲꏦꉻꄺꀱ。ꒆꉻꌧꑳꋈꄻꌠꀑꐱꄐꎖꌋꆀꊥꇫꏲꂠꌠꊋꀥꇱ,ꇩꁨꋌꐛꅐꀦꁨꇐꏲꂠꌋꆀꋌꐛꒆꉻꍞꏲꏲꉻꄻꐛ,ꒆꉻꋦꈭꏲꂠꄹꏦꄻꐛꒆ,ꋍꃱꃅꋍꏅꁨꌠꋌꐛꅐꀦꁨꇐꁨꊿꃅꎁꃄꌬ,ꋍꃱꃅꇩꏤꃄꅉꈥꈉꈁꐥꌠꌫꅉꏱꏢꌋꆀꒆꉻꀧꌋꃅꀱꐛꅉꐛꌠꃅꎁꃄꌬ,ꋍꃱꃅꇓꈓꇓꉈꋍꑞꋍꑵꍍꆀꋊꃑꌠꌋꆀꏲꑘꏦꌬꃅꎁꃄꌬ。ꇩꏤꃄꅉꈥꈉꀖꁉꀧꌋꃅꄹꏦꏓꄻꄉ,ꀨꄜꄐꊋꐤꅉꋍꋬꈭꃅꐙꌠꏱꁈꄻꐛꒆ,ꇩꏤꋍꏅꈩꅉꌌꀨꄜꃅꄉꌠꋌꐛꀧꌋꃅꃄꅉꉻꑫꄻꐛ。ꏟꈯꃅꒆꉻꋦꈭꀜꐆꌠꏢꇋꌋꆀꅓꀞ。

  ꐋꀨꊈ!ꒆꉻꌧꑳꋈꄻꌠꑆꊋꆹꀋꃋꋋꄮꐥ、ꈲꏣꆹꄙꇁꃪꈎꃅꐥꌠ。ꉪꊇꆏꏟꈯꃅꐧꋦꉪꏦꒆꉻꌧꑳꉜꐨꐥꄉ,ꊿꌋꆀꋌꐛꐮꄮꃅꀻꎆꌠꐛꏀꈴꋈꄻꐛꐪꀊꏀꌠꏓꐛꌠꄹꇙꄉ,ꒆꉻꋦꈭꀧꌋꃅꌠꎁꃅꉪꊇꊿꋋꋏꊋꃤꇤꅐꇁꌶ。

  ꊰ、ꀋꎪꃅꍏꇩꐛꐨꂽꇨꌠꈝꃀꍬ,ꐊꑷꃅꇩꐏꌋꆀꂽꐛꏀꈴꌠꄹꎆ

  ꇩꐏꌋꆀꂽꋈꄻꌠꆹꐩꋊꄓꈌꀊꏀꅉꇬꉆꎍꇰ。ꑓꏮꇩꏤꋬꂻꋦꈭꃹꅼꃅꐛꐈꌠꇬꉜꄉ,ꑓꏮꇩꇨꂽꇨꌠꃅꋊꇖꐨꇬꉜꄉ,ꀋꎪꃅꐊꑷꃅꃅꋊꀊꏀꋎꌠꄈꅿꂽꇨꉪꇐꃄꌬ,ꃅꒊꃅꇁꀊꏀꌠꇂꃴꂽꌤꄐꇐꌐꏦꃄꌬ,ꇧꒉꌠꐛꏀꈴꌠꅔꂽ、ꎿꂽ、ꃅꈯꂽ、ꄔꉈꂽꌋꆀꄐꇐꇇꀨꂽꋈꄻ,ꀉꇨꇿꋌꀊꂥꌠꌉꁕꇷꃅꌉꈿꇹꄣꏲꉻꄻꐛ,ꍏꇩꐛꐨꐛꏀꌠꌉꈿꉻꑫꏓꄻ,ꄈꌋꆀꏓꂱꏮꁵꌠꃅꋊꀊꏀꋎꌠꂿꃆꆸꄜꌶ。

  ꋧꃅꂽꌤꇝꂱꀊꏀꌠꀻꎆꆹꐨꌋꆀꇩꏤꋬꂻꈉꐨꇬꄉꄐ,ꋈꄻꊇꁧꌋꆀꊌꐨꈲꁧꉀꐕ,ꑍꄙꆀꑍꊏꈎꑟꇬꆏꀑꐱꃅꏠꐕꌬꈴꌠꃅꇫꑟꌠꏦꀧꄉ,ꈴꌗꈴꋈꄻꌠꁨꎆꐨꀉꇨꃅꊌꅜ,ꄐꇐꄐꊋꀉꒉꃅꉀꐕ。ꇩꏤꐛꏀꈴꈴꎁꌋꆀꐮꐊꐙ,ꐊꑷꃅꂽꌤꌧꇗꐛꏀꈴ、ꂽꎀꍹꐛꄟꐛꏀꈴ、ꂽꌤꌤꃅꊿꐛꏀꈴ、ꇇꌭꇇꂿꐛꏀꈴꌠꄹꎆ,ꄾꌦꋩꃅꑍꄙꆀꌕꊯꉬꈎꑟꇬꆏꀑꐱꃅꇩꐏꌋꆀꂽꐛꏀꈴꌠꃅꇫꑟ,ꃅꋊꋋꋏꐧꀠꊬꌠꑟꇬꆏꏓꂱꂽꐊꑷꃅꋈꄻꌊꋧꃅꋍꉎꀋꐥꌠꂽꏠꌠꐛꎻ。

  ꂽꇬꄈꋈꄻꌠꊋꀥꇱ,“ꇝꂱꋊꃅꃅꇏꊪꊛ、ꂽꇨꇁꌠꂿꃆꀉꇖꌠꆸꄜ”ꌠꅇꀨꉙꂘꌠꃅ,ꂽꑼꂒꉻꉻꑫꋈꄻꌠꄹꎆ,ꉪꇐꐥ、ꄐꅍꐥ、ꊈꇨꑌ、ꑌꇐꂄꌠꃅꋊꀊꏀꌠꇝꂱꂽꑼꉗꄻ,ꐥꍂꃅꏓꂱꂽꑼꐛꊈ、ꉪꃆꁢꊧ、ꐛꑊꄝꏦꀋꊰꇬꎷ。ꐪꊛꄉꃹꅼꃅꇩꐏꌋꆀꂽꄺꀱ,ꃹꅼꃅꂽꇜꃅꑘꈴꄹꏦ、ꁱꇐꌤꃅꊿꄹꏦꑠꏱꁈꄹꏦꀉꒉꀊꂾꌠꄺꀱ,ꂽꌤꏲꂠꄺꀱꌠꄹꎆ,ꍏꇩꐛꐨꐧꋦꉪꏦꂽꌤꄹꏦꄻꐛꒆꌋꆀꀻꎆ。ꈆꑪꇮꇐꆹꌉꈿꊋꃤꈯꄜꉬꌠꉪꇐꐥ,ꀉꒉꀊꂾꌠꇮꇐꏀꀺ、ꑴꌅꏀꀺꌠꄹꎆ,ꊋꀥꇱꄉꂽꌤꌧꊿꉗꄻꉻꑫꋈꄻ,ꏀꀺꉹꌠꏓꂱꂽꋈꄻ。ꐊꑷꃅꏦꇨꃅꂽꏱꄻ,ꂽꏱꄻꄟꊇꅉꃅꄺꀱꌠꄹꇙꄉ,ꇩꐏꌋꆀꂽꋈꄻꏦꏲꈴꐨꉀꐕ。

  ꂽꆹꄐꄉꌉꈿꂿꄷꌠ,ꌤꈁꐥꌠꃅꐯꇯꀋꎪꃅꌉꈿꊋꃤꎕꏦꌭꈬ,ꌉꈿꄎ、ꌉꊋꄎꌠꇬꉜꄉꃅꌶ。ꏟꈯꃅꄐꇐꋍꑞꋍꁆꏯꂽꌤꉈꈽꌠꄐꏤꋒꃅꄉ,ꏓꇲꄉꋊꃅꋬꂻꁁꏯꌋꆀꀊꏀꉹꌠꋬꂻꁁꏯꂽꌤꉈꈽꄐꏤꌠꄹꎆ,ꀊꏀꉹꌠꌉꈿꊋꃤꌋꆀꏦꀧꊋꃤꀻꎆ,ꃶꐚꃅꌉꈿꌠꌡꃅꂽꌤꁰꍋꌠꃅ,ꊋꀥꇱꄉꂽꌤꊋꃤꌬ,ꐳꃅꂽꌤꀑꁮꊋꃤꐥꈴꌠꀻꎆ,ꈄꏍꈴꌗꉻꑫꇬꈴꄉꇷꃅꌉꈿꄐꊋ、ꋋꁕꃅꌉꈿꄐꊋꉀꐕ,ꇿꋌꐥꃅꐛꐨꄺꂡ、ꃨꆰꐨꏱꄻꋏꆸ、ꌉꆳꌠꋎꍅ、ꌉꆳꇬꌉꊋꌠꃅ。

  ꀋꎪꃅꇩꏤꌣꈚꌠꌋꆀꂽꇨꌠꐮꐊꐙꌠꌭꈬ,ꋍꃱꃅꏃꂠ、ꄩꊐꌠꄐꄻ、ꄺꀱꏀꀺꌠꌋꆀꀉꒉꀊꂾꌠꐘꃆꃄꌬꇫꑟꌠꊋꀥꇱꄉ,ꃹꅼꃅꇩꐏꈆꑪꇮꇐꇮꑘꄺꀱ,ꂽꑼꏓꂱꐮꐊꐙꄉꃹꅼꃅꀻꎆꌠꐛꐪꏓꐛ,ꋍꉻꃅꐙꈴꌠꇩꏤꄐꇐꉻꑫꌋꆀꄐꊋꏓꄻ。ꇩꐏꄕꊪꉻꑫꄻꐛꒆ,ꇧꒉꈫꈈꌠꐛꏀꃅꋮꎿꇬꃅꈯꐏꁇꌠꋈꄻ。ꎞꆏꂽꑼꏲꂠꏦꀧꏲꉻꊥꇫꋈꄻ,ꂽꌋꆀꂽꑱꈐꊿꏦꊒꌅꈌꈲꁧꄉꀧꄉ,ꂽꄻꌠꁳꐧꋦꑭꊂꃅꇫꁌꒉꌠꃅꑘꐛꎻ。ꃹꅼꃅꃶꏢꂽꄺꀱ,ꐛꏀꈴꌠꃶꏢꂽꋈꄻ。
ꐋꀨꊈ!ꉪꊇꂽꆹꏓꂱꂽꉬ,ꉪꊇꇩꐏꌠꆹꉹꁌꋍꏅꃅꇩꐏꌠꉬ。ꉪꊇꆏꊋꀥꇱꄉꉹꁌꋍꏅꃅꇩꐏꌠꉙꂘ,ꂽꌋꆀꍔꃚꂽꌋꆀꏓꂱꈫꈈꃅꐮꋯꑌꃯꉻꄉ,ꍏꇩꉪꐨꂽꇨꉪꐨꃅꇫꑟꌠꎁꃅꊋꃤꀉꇨꌠꏓꋧ!

  ꊯꊪ、ꀋꎪꃅ“ꋍꇩꑍꏦ”ꌬ,ꁍꇩꏓꋍꃱꃅꌠꄹꎆ

  ꑣꇤ、ꉪꂱꀱꁍꇩꈿꇁꈭꐨ,“ꋍꇩꑍꏦ”ꃄꄻꌠꋧꃅꃅꇫꏚꍆꌠꊌꐨꐥꀐ。ꃶꐚꌤꃆꇬꊩꀽꎼꇁꇬ,“ꋍꇩꑍꏦ”ꆹꐩꋊꇬꋒꇈꌠꑣꇤ、ꉪꂱꌤꃆꂥꀘꌠꄐꉻꉾꐯꉾꌠꉬ,ꉈꑴꑣꇤ、ꉪꂱꀱꁍꇩꈿꇁꈭꐨꀊꉗꃅꌄꆣꎍꐽꇬꎷꎻꌠꄹꏦꉾꐯꉾꌠꑌꉬ。

  ꑣꇤ、ꉪꂱꁳꀊꉗꃅꌄꆣꎍꐽꇬꎷꎻꌠꆹ,ꀋꎪꃅꐊꑷꃅꎃꊒꃅ“ꋍꇩꑍꏦ”、“ꇤꊿꇤꏲ”、“ꉪꊿꉪꏲ”、ꀉꇨꃅꊨꏦꏲꌠꌐꏦꃄꌬ,ꏦꇨꃅꏦꃀꌋꆀꅉꀨꏦꃤꈴꄉꌤꀞ,ꅉꀨꏦꃤꃄꌬꌠꌋꆀꐮꃆꂮꐥꌠꄹꏦꌋꆀꉺꏦꄻꐛꒆ。ꇣꋲꏲꑘꏱꅉꐎꍔꃚꌋꆀꏲꑘꏲꇜꏭꊋꁈꄏꄉꏦꈴꄉꏲꂠ、ꏣꀋꑌꃅꌤꃅ,ꑣꇤ、ꉪꂱꈁꐥꁆꏯꊿꂒꋦꌠꋯꑌꏃꂠꌊꉌꊋꋍꏢꃅꀻꎆꌠꏂ、ꐮꄮꌠꊥꎆ,ꉹꁌꐥꐨꏦꀧꌋꆀꄺꀱꌊꃪ,ꊱꁨꃅꋯꁦꌠꄹꎆ,ꐧꋦꎍꐽꌠꀧꌋꃅ,ꇩꏤꌅꀨ、ꋬꂻ、ꀻꎆꈲꁧꀧꌋꃅꌠꏦꄹꃅꎁꍬꌬꌶ。

  ꑣꇤ、ꉪꂱꀻꎆꌠꆹꅔꈐꀻꎆꌠꌋꆀꑖꑟꃅꐯꅑꎍꌠꉬ。ꑣꇤ、ꉪꂱꊋꁈꄏꌊꇩꏤꀻꎆꃅꇴꄉꉻꇬꐊꄉꃅ,ꒀꇤꉪꎿꈪꀉꒉꃄꁕꋈꄻ、ꒀꇤꉪꇷꃅ、ꍗꏦꒊꃀꌕꎏꁕꇷꃅꌠꑠꌌꀨꇬꄉ,ꐊꑷꃅꅔꈐꌋꆀꑣꇤ、ꉪꂱꐯꈲꇷꃅꌠꄹꎆ,ꑣꇤ、ꉪꂱꀀꊿꅔꈐꄉꀻꎆꌒꌠꏱꁈꏁꁈꏤꄻꐛꒆꌶ。

  ꉪꊇꆏꀋꎪꃅꇩꉂꊿꌌꀨꄜꃅꄉꌠ“ꇤꊿꇤꏲ”、“ꉪꊿꉪꏲ”ꌠꌭꈬ,ꇩꉂꇤꉂꉪꉂꊋꃤꀻꎆꌊꀉꒉ,ꑣꇤ、ꉪꂱꃺꑌꇩꏤꉪꐨꌋꆀꇩꉂꉌꊈꀉꇨꇁꄉ,ꑣꇤ、ꉪꂱꃺꑌꌋꆀꁍꇩꏓꂱꐯꇯꊿꋅꀱꌄꆣꇁꌠꐩꋊꃅꎁꆸꄜ、ꐯꇯꁍꇩꌄꆣꌣꈚꐞꄿꌠꇰꀋꃀꃅꀑꑊꁤꇅꀕꌠꊌꅜꎻ。

  ꄠꃪꌤꃆꂥꀘ、ꁍꇩꈁꉬꃅꏓꋍꃱꃅꌠꃅꇫꑟꌠꆹ,ꍏꉸꌺꇖꈁꐥꌠꐯꇯꉪꐨꉬ,ꍏꉸꊿꋅꁧꀦꈲꏣꐤꅉꉬ。ꀋꎪꃅꐪꊛꄉ“ꄮꐽꋍꃱꃅ、ꋍꇩꑍꏦ”ꌐꏦꌭꈬ,ꎿꋮꑍꄷꐮꃆꂮꄮꐽꀻꎆꌠꄹꇙ,ꁍꇩꄮꐽꋍꃱꃅꌠꈴꎁꄹꎆ。

  ꍏꇩꋍꂷꉬꌠꏥꏦꆹꎿꋮꑍꄷꐮꃆꂮꍔꍞꅉꃀꉬ。ꍏꇩꋍꂷꉬꌠꏥꏦꄛꑣꌠ“ꈬꑍꉜꐊ”ꌠꆹꎿꋮꑍꄷꐮꃆꂮꁧꀦꐛꊈꊨꄅꄉꀐ,ꋋꆹꎿꋮꑍꄷꐮꃆꂮꄮꐽꀻꎆꌠꏦꀧꌠꊨꊭꉬ。“ꈬꑍꉜꐊ”ꌠꐩꋊꌤꃶꐚꌠꏚꍆ,ꎿꋮꑍꄷꐯꇯꍏꇩꋍꂷꉬꌠꏚꍆꇬꆏ,ꎿꋮꑍꁁꏯꆏꐮꏯꅇꉉꄎ,ꎿꋮꑍꄷꃺꑌꇫꉈꇬꌠꌤꃆꋮꒉꄉꂥꀘꄎ,ꄠꃪꍔꄈꌋꆀꏓꉻꈁꐥꌠꃅꐯꇯꅔꃀꐮꑌꑲꌠꑌꈭꋍꈜꇈꅍꀋꐥꇁꌠꉬ。

  ꎿꋮꑍꄷꃺꑌꆹꊫꂫꐮꐊꌠꐮꃷꅍꆊꅪꉬꌠꃺꃶꀁꑳꉬ,ꌦꅪꐮꉔꌠꊿꋍꁯꉬ。ꉪꊇ“ꎿꋮꑍꄷꊿꋍꁯ”ꌠꉪꉻꑌꇬꎷ,ꄠꃪꀋꃋꐥꌠꐧꋦꄹꏦꌋꆀꄠꃪꃺꑌꐥꐨꐤꄟꁌꒉ,ꄠꃪꃺꑌꌋꆀꐮꐊꄉꂴꅔꃀꀻꎆꊜꋽꄮꊌꌠꉌꃹ。ꉪꊇꆏꎿꋮꑍꄷꎆꏣꁱꀕꐮꎻꈴꇷꃅꌠꍔꒉ,ꐯꈲꐮꄻꌠꃅꇫꑟ,ꋍꁘꋍꁘꃅꄠꃪꃺꑌꁳꅔꃀꄉꄯꒉꌶꄻ、ꑘꀺ、ꃅꑘꊌ、ꐤꄻꌠꎁꃅꅔꃀꃺꑌꌋꆀꐯꌟꌠꈲꐪꇲꁵ,ꄠꃪꃺꑌꁳꀉꇨꃅꐥꌒꎻ。ꉪꊇꆏꎿꋮꑍꄷꃺꑌꐯꇯꍏꉸꁱꀕꍔꆙꌠꄹꇙ,ꉌꂵꐯꇯꐮꐊꌠꊥꎆ。

  ꉪꊇꏟꈯꃅꇩꏤꌅꀨꌋꆀꏲꄸꐛꒆꌠꀧꌋꃅ,ꈍꃅꑌꇩꏤꁷꐞꌠꐩꋊꎭꐨꁳꀱꇫꅐꇁꀋꎽ。ꁍꇩꁷꐞꈁꃅꈧꌠꐯꇯꀋꎪꃅꍏꇩꊿꈁꐥꌠꃅꏟꈯꃅꇫꆼꁏꇁꌠꉬ。ꉪꊇꆹꀋꎪꃅꌠꉪꐨ、ꋒꐯꋒꌠꑇꐨ、ꇎꐯꇎꌠꄐꊋꐥꄉꇶꏦꑞꑵꌌꄉ“ꄠꃪꄁꋦ”ꁷꐞꏂꇫꇁꌠꏭꑌꈔꋏꇧꎭꄎꌠ。ꉪꊇꆹꀋꎪꃅꊿꑞꂷꉬꄿꂿ、ꎀꍹꑞꂷꉬꄿꂿ、ꍔꄈꑞꂷꉬꄿꂿ、ꈍꄮꇬꉬꄿꂿ、ꇶꏦꑞꑵꃅꄉ、ꍏꇩꏲꄸꑞꂷꁳꍏꇩꇬꄉꁷꐞꎼꁧꀋꎽꌠꉬ!

  ꐋꀨꊈ!ꍏꉸꊿꋅꇰꀋꃀꃅꀱꌄꆣꇁꌠꃅꇫꑟꌠꆹ,ꍏꇩꊿꈁꐥꌠꃅꐯꇯꉪꐨꉬ。ꉪꊇꏟꈯꃅꑇꌠꆏ,ꇤꉪꄠꃺꑌꇫꐊꌠꍏꉸꌺꇖꈁꐥꌠꃅꐩꋊꆸꄟꐊꄉ、ꐯꇯꊿꋅꃅꐨꀉꒉꌠꆸꄜ,ꊿꋅꊫꂫꏟꈯꀕꃅꋏꊨꏦꇇꈐꊐꄉꄷꑲꆏ,ꀋꎪꃅꐯꇯꍏꉸꊿꋅꇰꀋꃀꃅꀱꌄꆣꇁꌠꃆꏂꊂꑋꎔꇁꃨꌠꀹꄻꄎꌠꉬ!

  ꊰꑋ、ꀋꎪꃅꄮꐽꀻꎆꌠꈝꃀꍬ,ꃰꊿꊫꂫꐮꐊꐙꌠꋈꄻꌠꄹꇙ

  ꍏꇩꇭꍣꄈꆹꍏꇩꏓꂱꎁꃅꐥꌒꏂꌠꍔꄈꉬ,ꉈꑴꃰꊿꀻꎆꌤꑘꎁꃅꉈꈽꌠꍔꄈꑌꉬ。ꍏꇩꇭꍣꄈꈍꄮꑌꃰꊿꎁꃅꀊꏀꌠꀊꅰꃅꀉꒉꌠꑆꊋꅐꌞꌠꌌꊨꏦꂿꃆꃅꄉꇬꎷ。

  ꍏꇩꆏꀊꂥꃅꄮꐽ、ꀻꎆ、ꇷꃅ、ꐯꇯꊋꌠꁈꁧꐕꄉ,ꀋꎪꃅꋧꃅꄮꐽꀧꌋꃅ、ꐯꇯꀻꎆꌠꊥꎆꌠꉇꉻꏱꁈꉪꃆꁢꊧꍬꌬ,ꀋꎪꀋꑴꃅꄮꐽꃅꐮꐊꌠꏥꏦꉬꐘꌠꅉꃀꀂꏽꄉꇩꏤꈁꐥꌠꌋꆀꉁꅉꃅꇷꃅꌠꀻꎆ,ꐮꇬꁌꒉ、ꎃꊒꑗꐥ、ꇷꃅꐯꇯꊋꌠꀊꏀꉹꌠꇩꏹꐮꃆꂮꄹꇙ。

  ꋧꃅꆹꀉꒉꃅꀻꎆꀉꒉꃅꐛꐈꀉꒉꃅꋊꄻꑠꊭꇬꎌꇰ,ꄮꐽꌋꆀꀻꎆꌠꆹꄡꇗꃅꋊꅇꀨꉬ。ꋧꃅꀉꑌꑵꃅꐙ、ꎆꏣꅉꆺꈴ、ꐧꋦꈴꌗꈴ、ꁱꀕꀉꑌꑵꃅꐙꌠꃹꅼꃅꀻꎆ,ꅉꆺꑭꊂꏱꄻꉻꑫꌋꆀꇩꏹꐥꀹꐛꐈꌠꐳꃅꄹꎆ,ꇩꏤꈁꐥꌠꐮꑌꑲꌠꌋꆀꐮꊫꁱꐥꌠꋍꑍꋍꉙꃅꃹꅼꇁ,ꇩꏹꊋꃤꐯꌟꉚꇬꀊꅰꃅꐮꆽꏣꇁ,ꄮꐽꀻꎆꆸꄟꆽꈎꎼꇁꀋꄐ。ꋍꈭꐨ,ꋧꃅꊝꇁꌠꎍꀋꐽꃅꐙꌠꊨꀋꄅꃅꐙꌠꑓꅐꎑꇁ,ꋧꃅꎆꏣꉀꎆꇙꊋꀋꇎ,ꌢꎭꌣꈚꑍꄷꐞꌠꋍꑍꋍꉙꃅꃛꇁ,ꃅꄷꇬꃛꊸꌠꌤꆿꅐꀋꆏ,ꇷꌾꉪꏦ、ꈄꏍꋬꂻ、ꇵꆅꀉꒉꀊꂾꌠ、ꃄꀑꃅꌗꐛꐈꑠꋊꃅꋬꂻꀋꉬꌠꇷꇋꌠꊛꄉꁭꁘꇰ,ꃰꊿꆹꐯꇯꋓꎭꌶꌠꀉꑌꃅꊝꇁ。

  ꉪꊇꇫꐥꌠꋧꃅꆹꉘꇉꐨꌐꀋꉆ,ꉈꑴꋓꎭꐨꑌꌐꀋꉆ。ꉪꊇꆹꀋꃋꋋꇅꌼꇪꌠꐛꅹꃅꉪꐨꇤꇧꎭꀋꉆ,ꉪꅉꀊꎴꒉꄸꃅꎹꈹꌠꇤꇧꎭꀋꉆ。ꇩꏤꑞꂷꑌꄂꃅꃰꊿꊝꇁꌠꋍꑞꋍꑵꋓꎭꐨꏭꊝꀋꄐꌠꉬ,ꉈꑴꇩꏤꑞꂷꑌꀱꉈꎞꌊꊨꏦꈢꎿꅔꀉꄂꂷꇬꊐꄉꀋꉆꌠꉬ。

  ꉪꊇꇳꉔꌠꆏ,ꇩꏤꈁꐥꌠꏓꂱꉌꊋꋍꏢꃅ,ꃰꊿꊫꂫꐮꐊꐙꌠꄻꐛ,ꀊꉗꃅꄮꐽ、ꇿꑌꋬꂻ、ꐯꇯꌄꆣ、ꁉꃑꐯꏆ、ꁦꎴꎔꃨꌠꋧꃅꋈꄻ。ꐮꇬꁌꒉ、ꐥꊯꃅꋮꒉꌶ,ꏟꈯꃅꈁꉐꏍꉪꐨꌋꆀꊋꃷꇱꍔꍞꇤꇧꎭ,ꐮꏯꅇꉉꌠꃅꐮꄙꌠꄡꃅ、ꐋꎹꌠꃅꐮꏯꅇꏤꀋꒃꌠꇩꏤꌋꆀꇩꏤꐮꎻꈴꌠꈝꃀꀊꏀꌠꍬ。ꐮꏯꅇꉉꄉꐮꏞꏈꌠꂥꀘ、ꋮꒉꌠꌌꉜꐨꐯꀋꐊꌠꋊꑣꇬꎷ,ꏓꇲꄉꋊꃅꌋꆀꋊꃅꀋꉬꌠꋬꂻꇷꇋꌠꏭꊝ,ꇷꌾꉪꏦꇶꏦꈁꐥꌠꏭꁏ。ꆲꁏꉐꐙꃅꐮꐊ,ꃼꇇꌋꆀꎆꇱꄿꐨꈴꃅꌒꈴꌠꊥꎆ,ꎆꏣꅉꆺꈴꌠꆏꀊꅰꁉꃑ、ꐯꏆ、ꁊꈲ、ꐮꆽꏣ、ꐯꇯꊋꌠꏯꉜꄉꀻꎆꌠꄹꇙ。ꋧꃅꌧꑳꀉꑌꑵꃅꐙꌠꁌꒉ,ꌧꑳꐮꎻꈴꌠꆏꌧꑳꐯꀋꊒꄩꐂꌠ、ꌧꑳꐮꌶꄻꌠꌧꑳꐮꄙꌠꄩꐂꌠ、ꌧꑳꐯꇯꐥꌠꌧꑳꂱꎆꅑꌠꄩꐂꎻ。ꋦꈭꉾꃪꌠꌭꈬ,ꇷꃅꄉꃄꀑꃅꌗꐛꐈꌠꏭꊝ,ꃰꊿꇫꐥꌠꅉꆺꀀꁍꀧꌋꃅꋒꌶ。

  ꍏꇩꆏꀋꎪꃅꄂꋦꑴꌅꌠꄮꐽꉇꉻꑌꑲꏱꁈꍬꌬ,ꇩꏤꈁꐥꌠꏓꂱꑴꌅꄉꀻꎆꈝꃀꌊꄻꌠꌅꈌꈲꁧꁌꒉ,ꇩꏹꎃꊒꑗꉬꌠꀧꌋꃅ,ꊨꏦꉪꐨꄀꇗꇱꌊꌞꊿꁵꌠꏭꁏ,ꌞꇩꏤꈏꇓꏲꃆꇬꁁꀕꉈꌠꏭꁏ,ꊋꇨꌠꌊꊋꁧꌠꏭꏗꌠꏭꁏ。ꍏꇩꆏꈍꃅꑌꌞꇩꏤꈲꏣꉮꄻꌠꌌꊨꏦꀻꎆꌠꀋꃅ,ꉈꑴꆏꊨꏦꎃꊒꌅꈌꈲꁧꇤꇧꎭꌠꑌꀋꃅꌠꉬ,ꊿꑞꂷꉬꄿꂿꍏꇩꁳꊨꏦꈲꏣꉮꄻꂿꉂꌠꎭꐨꉪꂯꉪꌋꀋꌸ。ꍏꇩꆹꐏꄙꃅꐙꌠꇩꐏꏱꁈꍬꌬ。ꍏꇩꀻꎆꌠꆹꇩꏤꑞꂷꏭꑌꇷꇋꅍꀋꐥꌠꉬ。ꍏꇩꀻꎆꅷꑞꈚꇬꑟꄷꇬꑌ,ꐥꍂꃅꊋꀋꏗ,ꐥꍂꃅꍔꒉꌠꀋꃅ。

  ꍏꇩꆹꏣꀋꑌꃅꅉꆺꑭꊂꐋꎹꌠꃆꂮꀻꎆ,ꇩꏤꈁꐥꌠꌋꆀꈲꏣꐯꏑꅉꍔꒉ,ꇩꏤꀉꒉꈧꌠꐮꄮꌋꆀꇷꃅꌠꄹꎆ,ꉻꄜꎍꐽ、ꐽꏡꃅꀻꎆꌠꇩꏤꀉꒉꌠꐮꃆꂮꇶꏦꋉꐛ,ꉁꅉꉌꒊꈲꊌꋒꏆꉪꉻꌋꆀꂄꃅꃷꇎꊝ、ꃷꇎꌌꐋꃅꌠꈭꇍꉇꉻꑌꑲꌐꏦꇬꈴꄉꃹꅼꃅꈭꇍꇩꏤꌋꆀꐮꑌꑲ,ꑗꉬꈲꊌꎃꊒꌠꉜꐨꌋꆀꃶꐚꃅꉁꅉꉌꒊꉪꉻꌊꄉꊋꀥꇱꄉꀻꎆꇰꌠꇩꏤꌋꆀꐮꋯꑌꐮꇷꃅꇬꎷ。ꊋꀥꇱꄉꇩꏤꈁꐥꌠꍔꄈ、ꍔꍞꎀꍹꌋꆀꐮꑌꑲꇷꃅ,ꏓꄊ、ꍔꑠ、ꂽ、ꃅꄷ、ꏓꂱꏓꉻꑠꉇꉻꏭꑌꑲꌠꄹꎆ。

  ꍏꇩꆏꉇꉻꏭꁉꃑꌠꅉꀨꇩꁈꌭꈬ,ꏟꈯꃅꇩꃅꁉꃑꄉꋈꄻꌠꌭꈬ,ꏣꀋꑌꃅ“ꋍꁕꋍꈜ”ꇩꏹꇷꃅꌠꊥꎆ,ꊋꇤꄉꏱꁈꐮꈴ、ꉁꈾꑌꑲꐮꈴ、ꃼꇇꁣꀋꐥꃅꐮꈴ、ꎆꏓꎆꊭꐮꈴ、ꉹꁌꉌꃀꐮꐊꌠꃅꇫꑟ,ꇩꏹꇷꃅꐽꈉꀊꏀꌠꄻꐛ,ꐯꇯꀻꎆꇙꊋꀊꏀꌠꁦꎆꇱ。ꀻꎆꇰꌠꇩꏤꈜꀕꇈꐞꀋꄿꐯꐞꀋꄿꌠꇩꏤꏭꇇꀨꊋꃤꀉꒉꃅꇱ,ꒈꂪꒈꀑꀻꎆꍣꐨꍕꒊꌠꊥꎆ。ꍏꇩꆏꀉꑌꁁꏯꃅꃼꇇꃅꌠꏦꉻꊋꁈꄏ,ꄿꐨꃼꇇꃅꅉꋈꄻꌠꊥꎆ,ꁉꃑꉹꌠꋧꃅꎆꏣꋈꄻꌠꄹꇙ。

  ꍏꇩꆏꐯꇯꇕꄟꐯꇯꋈꄻꐯꇯꈲꊌꌠꅉꆺꑭꊂꏱꄻꉜꐨꌭꈬꇬꎷ,ꇩꏹꐮꃆꂮꋯꁦꈴꌠꄕꊪ,ꇩꏤꐭꒉꀋꐥ、ꊋꇨꊋꁧꌠꀋꐥ、ꌢꎭꌣꈚꌠꀋꐥꃅꐯꇯꐥꊯꌠꌭꈬ,ꐊꏑꇩꏣꀋꑌꂿꄐꋊꇤꌠꊋꁈꄏ,ꀻꎆꇰꌠꇩꏤꇩꏹꌤꃆꇬꁧꎁꐨꌋꆀꅇꉉꌅꈌꍔꒉꌠꊋꁈꄏ。ꍏꇩꆏꐪꊛꄉꇩꏤꀉꒉꌠꆽꎍꐨꂿꄐꋊꇤ,ꏣꀋꑌꃅꅉꆺꑭꊂꏱꄻꉻꑫꄺꀱꌠꌋꆀꋈꄻꌠꇬꐊꈽꃅ,ꀋꆏꃅꍏꇩꀑꁮꐨꌋꆀꊋꃤꅐꌞ。

  ꐋꀨꊈ!ꋧꃅꊫꂫꆹꇩꏤꈁꐥꌠꏓꂱꇇꈐꑌ,ꃰꊿꊫꂫꆹꇩꏤꈁꐥꌠꏓꂱꁳꌊꄻꎻꌠꉬ。ꍏꇩꏓꂱꆏꇩꏤꈁꐥꌠꏓꂱꌋꆀꐮꐊꄉ,ꃰꊿꊫꂫꐮꐊꐙꌠꋈꄻꌠꄹꇙ,ꐯꇯꄉꃰꊿꃆꏂꊂꑋꎔꇁꃨꌠꋈꄻꏾ!

  ꊯꌕ、ꀋꎪꀋꑴꃅꐊꑷꃅꏦꇨꃅꄈꏱꄻ,ꀋꆏꃅꄈꌅꈌꌬꊋꃤꌋꆀꏲꂠꐨꉀꐕ

  ꍏꇩꐛꐨꐧꋦꉪꏦꆹꃅꋊꀊꏀꋎꌠꇬꃹꆹ,ꉪꊇꄈꆏꀋꎪꃅꐛꐨꀊꏀꃅꐨꀊꏀꌠꐥꌶ。ꎷꋩꇬꆹꀋꎪꃅꊨꏦꀉꇨꌶ。ꄈꆏꋯꑌꃅꏓꂱꏃꂠꌊꇰꀋꃀꃅꉈꈽ、ꇰꀋꃀꌠꌤꑘꄹꎆ、ꇰꀋꃀꌠꉪꐨꃅꇫꑟꌠꃅꇬ,ꀋꎪꃅꀋꇙꀋꑐꃅꄈꁵꏲꂠꎻꌠꌭꈬꌋꆀꄻꐛꒆ,ꀋꇙꀋꑐꃅꄈꋈꄻꌊꀊꅰꃅꀉꇨꊋꑌꇁꌶ。

  ꐊꑷꃅꏦꇨꃅꄈꏱꄻꌠꆹꐥꍂꃅꈝꃀꇬꐺꌠꉬ。ꍔꄈꂷ,ꍔꌅꂷ,ꋍꊫꂫꃰꇌꆹꃰꊿꇫꉌꃹꉌꀋꃹꌠꇬꅑꎍꌠꉬ。ꏓꂱꉹꁌꑞꏯꆼꁏ、ꑞꏯꌁꑷꆏ,ꉪꊇꆏꏟꈯꃅꑞꏭꄴꏮꌋꆀꄺꀱꌶ。ꄈꑭꊂꃅꏸꐚꃅꌧꐚꌶꌠꆏ,ꉪꊇꄈꆹꌅꈌꌌꋦꈭꌼꇪꌠꊝ,ꄈꅿꂴꅑꐨꇬꁧꏖ、ꄈꅿꊈꎴꐨꁳꊋꁧꎻꌠꐊꊈꑌꌼꇪꃅꐙꌠꉬ,ꄈꈏꇓꇬꐥꌠꉪꇐꐙꀋꎴ、ꎀꍹꐙꀋꎴ、ꃅꇏꐙꀋꎴꑠꑓꅐꎑꌠꌤꃆꊇꅉꃅꂥꀘꇧꀋꎭꑴꌦ。ꃹꅼꃅꄈꊝꇁꌠꌅꈌꌌꌠꎟꎖ、ꄺꀱꁉꃑꌠꎟꎖ、ꃷꎏꎆꏣꎟꎖ、ꉇꉻꋦꈭꎟꎖꌠꀊꉗꀊꎴꃅꐙꐨꌋꆀꌼꇪꃅꐙꐨꌧꐚꌶ,ꃹꅼꃅꄈꊝꇁꌠꉌꊈꐵꑷꃱꑿꌠꃨꆰꐨ、ꄐꊋꀋꇎꌠꃨꆰꐨ、ꉹꁌꇬꐞꌠꃨꆰꐨ、ꏣꑌꍹꈔꌠꃨꆰꐨꃛꃅꐙꌠꌋꆀꆼꇨꃅꐙꌠꌧꐚꌶ,ꌤꃆꍝꄎꌠꌭꈬ,ꄐꇐꏤꊋꄝꀋꊰ,ꐊꑷꃅꏦꇨꃅꄈꏱꄻꌠꃹꅼꅉꉜꄉꀻꎆꌠꄹꇙ。

  ꃅꋊꀊꏀꋎꌠꄈꋈꄻꌠꀑꐱꇖꐨꆏ:ꄈꐊꑷꃅꏲꂠꌠꌭꈬꌋꆀꊋꀥꇱ,ꄈꀱꄈꏲ、ꐊꑷꃅꏦꇨꃅꄈꏱꄻꇬꎷ,ꊋꀥꇱꄉꄈꀊꉗꀊꎴꃅꌅꈌꌌꄐꊋꋈꄻ、ꂴꅑꐨꌋꆀꊈꎴꐨꋈꄻꌠꌌꀨꑟꃅꄉ,ꄈꅿꍔꍞꋈꄻꌠꌌꏓꏲꄉ,ꉪꇐꉪꉻꏟꈯꀕꌠꉪꃆꁢꊧꌌꅉꃀꃅꄉ,ꄈꑭꊂꏣꀋꑌꐨ、ꑴꇙꐨ、ꁧꀿꐨꄖꄑꌠꌌꊋꇱꅉꃅꄉ,ꐊꑷꃅꄈꅿꍔꍞꋈꄻ、ꉪꇐꋈꄻ、ꎀꍹꋈꄻ、ꃅꇏꋈꄻ、ꍬꏦꋈꄻꌠꄹꇙ,ꄹꏦꋈꄻꌠꄻꈐꏭꇱꄉ,ꃹꅼꃅꍹꈔꌠꏭꁎꉈꈽꌠꄹꎆ,ꀋꆏꃅꄈꋈꄻꊇꁧꉀꐕ,ꄈꋈꄻꌊꈍꄮꑌꃅꋊꇬꂴꅑꐺ、ꏓꂱꄸꈐꃅꇫꀧꌋꃅ、ꊨꏦꑴꅉꄺꀱꀬ、ꋍꑞꋍꑵꆳꉐꄜꎟꌠꄙꄎ、ꊋꌗꍅꁍꀕꌠꂷꇻꌦꉪꏦꌅꈌꌌꌠꄈꐛꎻ。

  (ꋍ)ꄈꅿꍔꍞꋈꄻꌠꌌꀨꇬꄉ。ꉜꐨꊨꄅꃅꍔꍞꉉꌠꆹꉪꊇꄈꂷꇻꌦꉪꏦꍔꄈꃅꄉꌠꇬꁧꀦꇖꐨꉬ。ꄈꅿꍔꍞꋈꄻꌠꆹꄈꁧꀦꃅꐙꌠꋈꄻꌠꉬ,ꄈꅿꋈꄻꌠꃅꍜꌋꆀꇿꋌꏤꇽꌠꉬ。ꄈꑭꊂꃅꍏꑷꅇꃅꌠꄉꀧ,ꄈꍏꑷꋦꒉꐨꌋꆀꏓꋧꋍꃱꃅꏲꂠꌠꌭꈬꃅꄉꌠꆹ,ꄈꅿꍔꍞꋈꄻꌠꀨꎍꂿꃆꉬ。ꄈꑭꊂꆏꀋꎪꃅꄈꅿꍔꍞꈛꏦꍬ,ꏦꇨꃅꍔꍞꍬꏦꌋꆀꍔꍞꏥꏦꍬꄻ,ꍔꍞꉆꈉ、ꍔꍞꃅꍜ、ꍔꍞꏥꏦ、ꍔꍞꈭꈜꀂꏽꇬꆏꄈꍏꑷꌋꆀꀊꂥꃅꐮꐊꐙꌶ。ꄈꏦꁌꒉꄣꅼ,ꏦꇨꃅꃅꒊꃅꇁꀊꏀꌠꇂꃴꄈꈏꇓꍔꍞꐥꐨꎕꏦꈍꑋꏢꌠꃄꌬ,ꄈꈏꇓꍔꍞꐥꐨꇬꍔꍞꃅꐙꐨ、ꃅꋊꃅꐙꐨ、ꏥꏦꃅꐙꐨ、ꉈꈽꃅꐙꐨꄻꀉꇨ,ꑴꐚꃅꃷꇐꐮꀠꏥꏦꄈꈏꇓꐥꐨꏭꉮꄻꇁꌠꄘꑣ,ꃅꇏꐙꎴꊋꌗꎃꊒꌠꍔꍞꒆꉻꉾꃪꌠꋈꄻ。ꋯꁦꏓꁨꄹꏦꇬꋍꑞꋍꐘꄹꏦꄻꐛꒆꌋꆀꃄꌬꇫꑟ,ꋯꁦꅉꃀꀂꏽꄉꏓꁨꌠꌋꆀꏓꁨꄐꏁꌠꇂꃴꋯꁦꌠꐯꇯꃅꌠꌭꈬꃅꄉ,ꋒꐯꋒꃅꋯꁦꌠꑌꍔꆙ,ꉈꑴꏓꁨꋍꃱꃅꌠꑌꃅꇮꌶ。ꀋꎪꀋꑴ、ꃅꇏꎃꊒ、ꑞꉬꌠꑞꃅꄉ、ꃅꎃꐙꎴꑠꁌꐨꉜꐨꍔꆙ,ꏟꈯꃅꊨꏦꉪꏦ、ꁗꏒꉪꏦ、ꄿꐨꉪꏦ、ꂱꑱꐤꅉꈐꉪꏦ、ꊿꂂꉪꏦꄴꏮꌋꆀꆼꁏ,ꏟꈯꃅꁥꏓꉪꏦ、ꈭꇍꐊꁱꀕ、ꇉꇳꈌꁱꀕꏭꄴꏮꌋꆀꆼꁏ,ꏟꈯꃅꑍꑊꅑꌠꃅ、ꑍꑊꊿꄻꌠꏭꆼꁏ。ꄈꑭꊂꐋꀨꀊꅰꃅꀊꂥꊐꌠꇥꀯꆏꊋꀥꇱꄉꄈꐛꊈꄜꎟ,ꀋꆏꃅꍔꍞꉪꐛꐨꌋꆀꍔꍞꄐꊋꉀꐕ,ꄈꏭꀋꎪꃅꉌꇱ、ꄈꎁꃅꐒꁸ、ꄈꎁꃅꂿꃆꃅꎁꃅ、ꉹꁌꎁꃅꌒꐨꄻꌠꌌꊇꅉꍔꍞꆸꄜꌠꃅꄉ,ꐥꍂꃅꇭꍣꄈꊿꍔꍞꑴꊈꑌꇬꎷꌶ。

  (ꑍ)ꃅꋊꀊꏀꋎꌠꇬꍏꇩꐛꐨꐧꋦꉪꏦꉪꇐꌌꄈꑭꊂꉙꂘ。ꉪꇐꋈꄻꌠꆹꄈꅿꅉꃀꋈꄻꌠꉬ。ꇝꂱꉪꅉꂿꃋꂦꀋꋌ。ꇷꁨꉪꏦꉪꅉꀉꒉꌠꌋꆀꍏꇩꐛꐨꐧꋦꉪꏦꐯꇯꉪꅉꆹ,ꍏꇩꇭꍣꄈꊿꉌꊈꈯꌬꌋꆀꍔꍞꒌꆠꉬ,ꉈꑴꄈꋯꑌꋍꃱꃅꌠꉪꇐꅉꃀꄝꀋꊰꌠꑌꉬ。ꉪꇐꉪꉻꀋꎪꌠꌌꄈꅿꉪꇐꋈꄻꌠꀨꎍꂿꃆꃅꄉ,ꄈꑭꊂꉙꂘꄐꏁꌌꄈꅿꉪꃆꁢꊧꎺꈬꃅꎺꄉ,ꇭꍣꄈꊿꉌꊈꇴꊨꆽꄉ,ꋧꃅꉜꐨ、ꐥꐨꉜꐨ、ꁌꐨꉜꐨ“ꏓꇱꁉꈢꅍ”ꌤꃆꋋꏢꂥꀘꋒ,ꑴꐚꃅꇷꁨꉪꏦꉪꅉꀉꒉꌠꌋꆀꍏꇩꐛꐨꐧꋦꉪꏦꋍꏅꉪꅉꏭꀋꎪꃅꑇꊿꌋꆀꉌꇱꃅꃄꄻꊿꄻꌶ。ꂷꇻꌦꉪꏦꌷꀹꍔꆙ,“ꑍꌷꋍꄻ”ꌶꄻꉙꂘꌠꅉꀕꐛꄟꈴꄹꏦꈴꌠꄹꎆ,ꑤꍲꊐꌠꈋꉐꏲꌋꇥꀯꌌꀨꇬꄉꇈ,ꄈꑭꊂꃅ“ꇬꂾꉪꐨꎺꄉ、ꂿꃆꎺꈬ”ꄷꌠꅇꀨꉙꂘꌠꃅ,ꄈꅿꏀꀺꌧꇐꌶꄻꄉ,ꄈꑭꊂꀊꅰꑴꐚꃅꃅꋊꀊꏀꋎꌠꄈꅿꐩꋊꂿꃆꃅꇫꑟꌠꎁꃅꀋꆏꃅꉈꈽꌠꄹꇙ。

  (ꌕ)ꊇꁧꀊꂥꌐꑘꈴꌠꇥꀯꊿꁥꉗꄻ。ꄈꅿꇥꀯꆹꄈꌋꆀꇩꏤꌤꑘꇬꈯꌬꊋꃤꉬ。ꄈꇥꀯꏭꏲꂠꌠꏥꏦꌭꈬꃅꄉ,ꑌꇐꌧꇐꐮꐊꐙ、ꑌꇐꌌꀨꇬꄉꌠꌭꈬꃅꄉ,ꃅꇕꄹꊂ、ꄐꅍꀉꄂꉜꄉꌬꌠꌭꈬꃅꄉ,ꌤꑘꌌꀨꇬꄉ、ꃅꇏꎃꊒꌠꌭꈬꃅꄉ,ꇥꀯꉾꌠꎕꏦꌫꄻꌊꑞꅉꇬꑟ。ꎃꊒꃅꊾꌋꊾꌬꍝꄎꌭꈬꃅꄉ,ꊾꌋꊾꌬꐥꀹꄺꀱ,ꍔꍞꎕꏦꄻꂴꄉ,ꉌꂵꇬ“ꇖꑵꉪꉻ”ꌋꆀ“ꇖꑵꑴꑇ”ꌠꑌꈬ、ꏟꈯꃅꄈꍏꑷꋦꒉꐨꀧꌋꃅ、ꐊꑷꃅꄈꅿꌧꇗꌋꆀꈛꏦꌐꏦꏱꁈꃄꌬ、ꀋꎪꁦꎴꃅꃅꎁꆸꄜꌠꇥꀯꉀꐕꌊꀨꇬꄉꌬ,ꋍꑞꋍꊐꏲꌋꁥꌠꄞꅐꌠꌋꀉꇨꌠꇱ。ꌐꑘꄐꊋ、ꌐꑘꉌꊈꉘꉚꌠꉜꁨ,ꇥꀯꁥꌠꃅꋊꀊꏀꋎꌠꍏꇩꐛꐨꐧꋦꉪꏦꀻꎆꇖꐨꇬꄉꄐꌠꄐꊋꄻꀉꇨ。ꊋꀉꒉꃅꇤꄉꌠꏀꇥꀯꎹꈹꊭꄎ,ꅉꂫꊐꌠꌋꆀꊋꋠꎬꅧꃅꄷꌠꏀꇥꀯꉘꉚꄜꎟꌠꉜꁨ,ꆏꇁꈤꀋꉆꃅꃄꄻꄜꎟꋺꌠꌠꏀꇥꀯꄞꅐꌠꌊꄻꌊꌬ。ꏓꇲꄉꌋꅪꇥꀯ、ꀁꑌꊿꋅꇥꀯꌋꆀꄈꉈꇥꀯꉘꉚꌊꄻꌤꃅꋒ。ꎔꎗꃅꎞꆏꇥꀯꌤꃅꋒ。ꏦꇨꃅꏲꌠꌋꆀꁌꒉꄣꅼꌠꄻꐯꇯꃅ、ꊡꀮꌠꌋꆀꏢꑲꌠꐯꇯꋓꃅꀕꌠꌭꈬꃅꄉ,ꇥꀯꍤꎖꈋꍣꉺꏦꄻꐛꒆ,ꊡꀮꉺꏦꌋꆀꑽꏆꑽꈎꉺꏦꋈꄻ,ꉜꐨꊨꄅꃅꃅꀬꏿꀬ、ꀋꎪꃅꌤꃅ、ꊨꏦꈲꁧꀋꏂꌠꇥꀯꀊꋨꈨꎁꃅꊋꄏꊋꊡ。ꄈꎀꍹꋍꊐꋑꀋꋒꌠꆏꅉꂫꊐꌠꇥꀯꉈꇬꑗꇬ,ꑴꇙꃅꋀꊇꎁꃅꐒꋊꊋꑣꌶ。

  ꌧꊿꆹꊿꋅꌄꆣꇁ、ꇩꏹꋓꅔꊋꐛꌠꑴꇙꌠꄐꇐꅐꀦꉬ。ꄈꌧꊿꏲꌠꏥꏦꌭꈬꃅꄉ,ꋧꃅꀑꁮꅺꐳꌠꏓꊭꌊꌫꄻ,ꐳꃅꌧꊿꀉꇨꌠꇩꏤꋈꄻꌶ。ꀊꅰꃅꏣꀋꑌ、ꀊꅰꃅꁉꃑ、ꀊꅰꃅꇿꋌꐥꌠꌧꊿꏱꁈꃄꌬ,ꌧꊿꉜꐚ、ꌧꊿꁌꒉ、ꌧꊿꌬꀬ、ꌧꊿꁨꏾ、ꌧꊿꎹꇮꃅꄉ,ꄈꈏꇓꌋꆀꄈꉈ、ꇩꈐꌋꆀꇩꉈꋍꑞꋍꁆꏯꌧꊿꄞꅐꌠꏓꋧꌊꄈꌋꆀꏓꂱꇰꀋꃀꃅꉈꈽꌠꇬꇁ,ꌧꊿꄐꇺꌊꃅꋮꆹꏮꌢꎭꃅꄷ、ꃅꋮꊿꋅꃅꄷ、ꇝꂱꀉꆹꃅꄷꌋꆀꅉꂫꊐꌠꇬꆹꌠꊋꊡ,ꊋꇤꄉꈀꄸꑌꌧꊿꐛꏾ、ꈀꄸꑌꊋꇤꄉꌧꊿꐛ、ꈀꄸꑌꌧꊿꐛꉆ、ꈀꄸꑌꋍꌧꇐꀖꌬꌠꐛꄟꉾꃪꌠꏓꐛꄉ,ꋍꑞꋍꑵꌧꊿꁧꀿꄓꊋꁳꅔꈿꄉꄓꅐꇁ、ꀑꁮꅺꐳꐨꁳꋒꐯꋒꃅꐮꊂꈹꄉꇫꅐꇁꎻꌶ。

  (ꇖ)ꊋꀥꇱꄉꅉꂫꊐꌠꎀꍹꋈꄻ。ꄈꅿꅉꂫꊐꌠꎀꍹꆹꄈꅿꈛꏦꌐꏦꏱꁈꌋꆀꏤꁈꄐꉻꃄꌬꇫꑟꌠꅉꃀꉬ。ꎀꍹꊋꃤꉀꐕꌠꌌꀨꇬꄉ,ꍔꍞꂿꄐꄻꂴꄉ,ꎆꏂꑘ、ꂿꑘꁡꇤ、ꌤꏲꅉ、ꌶꅉ、ꈆꑪꎥꃪꅉ、ꏦꎫꋥꁕ、ꐧꋦꎀꍹꑠꅉꂫꊐꌠꄈꎀꍹꋈꄻꌊꄈꅿꉪꐨꄜꉺ、ꄈꅿꏤꐪꃄꌬ、ꅉꂫꊐꌠꏱꄻꌠꏲꂠ、ꉹꁌꋯꑌꇳꍝ、ꄺꀱꀻꎆꄹꇙꌠꉈꈽꁾꇓꀉꇨꌠꐛꎻ。ꄈꍝꀯꆏꈛꎂꃅꄈꑼꉙꂘ、ꄈꑼꏲꂠ、ꄈꑼꍞꊟꌋꆀꉹꁌꊥꇫ、ꉹꁌꄜꉺ、ꉹꁌꏓꋧ、ꉹꁌꏭꁧꃤꃅꌠꃅꎁꆸꄜꋒꄉ,ꄈꑼꋍꏅꌠꄐꏁꌊꂴꅑꌶꀠꂿꄐꋊꇤꌶ。“ꌕꃀꋍꈉ”ꄹꏦꌭꈬꃅꄉ,ꄈꅿꅉꂫꊐꌠꎀꍹꄐꄻꌠꌋꆀꐥꐨꃄꄟꏀꀺꌠꄹꎆ,ꊋꀥꇱꄉꅉꂫꊐꌠꄈꎀꍹꂱꅑꊿꁥꌠꉗꄻ,ꅉꂫꊐꌠꄈꎀꍹꉱꑷꐨꍔꒉ,ꊋꇤꄉꅉꂫꊐꌠꄈꎀꍹꊋꁧ、ꐥꌠꀋꌡ、ꄻꏢꁮꐕꄉꌠꌤꃆꈨꂥꀘꌶ。ꄈꈏꇓꅉꂫꊐꌠꋯꁦꍔꒉ,ꄈꃆꄇꄜꋊꌠꄹꎆ,ꄈꑼꄈꈏꇓꌤꃆꃅꈽ、ꄈꎀꍹꌋꆀꇥꀯꍞꊟ、ꉎꊐꌠꄈꎀꍹꏭꉜꐨꌋꆀꇖꐨꄜꎼꇁꌠꈭꈜꄻꈳꐥꃅꄉ。ꅐꑘꇮꃅꊿ、ꌠꏀꂿꑘꊿ、ꌧꇐꀊꂥꊿꁥꌠꌋꆀꉻꁨꏦꀋꉬꌠꎆꏣꎀꍹ、ꐧꋦꎀꍹꇬꄉꄈꑼꀻꎆꌠꉜꁨ。ꊋꀥꇱꄉꄈꈏꇓꊡꀮꉈꇬꇇꀨꊋꄏꌠꃅ。ꄈꑼꉙꂘꏲꂠꄐꌐꐨꌋꆀꇿꋌꐥꐨꀉꇨꇁꎻ,ꋭꋽꊱꁨꃅꄈꑼꇎꏦꀋꑟꌠꎀꍹꀞꄻꌤꃅꌠꍔꆙ。

  (ꉬ)ꌦꀳꏿꀋꆏꃅꄉꃅꇏꍬꏦꋊꍬ。ꉪꊇꄈꆏꏓꂱꈬꇬꄉꇁꌠ、ꏓꂱꈬꇬꃹ、ꏓꂱꁧꃤꃅꌠꉬ,ꉹꁌꐞꁧꄷꆏ,ꐥꏡꊋꃤꀋꐥꆘꅝꇁꌠꉬ。ꊋꀥꇱꄉꃅꇏꋈꄻ,ꀋꎪꃅꏟꈯꃅꄈꌋꆀꏓꂱꉹꁌꃷꅍꆊꅪꐮꑌꑲꇬꎷꌠꆼꒆꄉꌶ,ꉹꁌꉪꉻꌋꆀꉹꁌꉂꐪꄻꀉꇨ,ꀋꆏꃅꄈꌅꈌꌌꌠꉹꁌꅉꃀꀊꅼꃅꌆꄻ。ꉹꁌꉉꄜꃛꌠꌤꃆꉬꄷꆏꐯꇯꅱꈯꃅꎔꎗꃅꇫꊝ,ꉹꁌꈲꏣꉮꄻꌠꃅꐨꉬꄷꆏꐯꇯꏟꈯꃅꈎꍬ。ꄩꃅꀏꀨꇬꎷ,ꍏꑷꏤꐪꉆꐘꌠꉌꊈꊌꐨꃅꇫꑟꌠꄻꈫꈈꍔꐯ,ꐪꊛꄉ“ꃅꇏꇖꑵ”ꌠꃆꂮꏱꄻ,ꏟꈯꃅꐋꀋꌡꌅꈌꉪꇐꌋꆀꐋꀋꌡꌅꈌꐛꄟꏭꁏ。ꀋꉬꀋꉆꌠꆏꍔꍞꍬꏦꌋꆀꎀꍹꍬꏦꄻꀉꇨꃅꄉ,ꐙꎴꍬꏦ、ꉹꁌꍬꏦ、ꌤꃅꍬꏦ、ꐥꐨꍬꏦꈺꇙꌊꏦꇨꎼꇁ。ꀠꂘꌋꆀꊨꏦꀱꊨꏦꀠꂘꌠꍔꆙꇬꎷ,ꂴꅓꊂꂘ、ꆅꉁꄉꊿꈭꋏꇬꎷ,ꍞꊟꍬꏦꃄꌬꌠ“ꐛꄟꇖꑵ”ꌠꌌꌬꄉ,ꏛꏜꃅꒃꉇꐭꃅꒃꉇ、ꐭꍅꒉꐛꆹꄡꎽ。ꇥꀯꏲꂠꌅꈐꐥꌠꄈꎀꍹꇫꄉꄐꌠꍬꏦꅓꀞꌠꌅꈐꄻꇬꁳꄉ,ꍞꊟꍬꏦꃄꌬꅑꎹꌠꄻꀉꇨꃅꄉ。ꊋꀥꇱꄉꍬꏦꉙꂘ,ꍬꏦꃄꌬꌠꄻꀉꇨꃅꄉ,ꄈꑼ、ꇥꀯꁳꁌꑌꇫꁌꒉꏦꑌꇫꏦꌠꅉꐚ、ꇧꏦꉌꂵꑌ、ꄽꂫꑞꅉꌭꈬ,ꍞꊟꌋꆀꏢꑲꎻꌠꋦꈭꇬꄉꌤꃅꐤꄻꌠꇬꄐꎻ。

  (ꃘ)ꍹꈔꏭꁎꉈꈽꌠꄩꍅꅸꏿꃅꐙꌠꊋꐛꐨꇑꅜ。ꏓꂱꉹꁌꆏꍹꈔꐛꄟꌂꐯꌂ,ꍹꈔꌠꆹꉪꊇꄈꈁꊝꌠꇷꇋꀉꒉꐯꀉꒉꌠꉬ。ꍹꈔꏭꁏꌠꐥꍂꃅꇬꊎꃄꇰꌠꌭꈬꌋꆀꌦꀳꏿꃅꃅ,ꃹꅼꃅꈏꇷꉇꇷꃅꉃꄻ,ꇥꀯꐙꎴꊒꆽꀕ、ꍔꃚꐙꎴ、ꍔꍞꐝꍠꀕꌠꄉꀧꑲꆀ,ꐩꋊꀱꏮꐨꇬꐂꄉ,ꄈꌋꆀꇩꏤꎴꏲꑘꒃꌠꄉꀧꄎ。ꀋꃋꋋꇅꇬ,ꍹꈔꏭꁎꉈꈽꌠꃅꒊꃅꇁꄡꇗꊋꋠꌼꇪ,ꍅꅸꏿꃅꐙꌠꄻꈫꈈ、ꍅꅸꏿꃅꐙꌠꊋꐛꐨꇑꅜꌠꉌꊋꆏꀋꎪꃅꇓꆈꀋ꒜ꌟꃅꈬ。ꐛꀋꉆꅉꀋꐥ、ꈁꉬꉱꑷꌐ、ꀋꋰꀋꏆꌠꌭꈬꇬꎷ,ꅱꈯꃅꏢꇋ、ꀉꇨꃅꆼꍅ、ꀊꉗꃅꇷꇋꌠꄝꀋꊰꃅꄉꇬꎷ,ꃴꎆꋠꃴꎆꁵꌠꐯꇯꍤꄻꇬꎷ,ꏟꈯꃅꄈꈏꇓꈲꁧꉻꏑꁥꏓꐛꌠꄴꏮ。ꏃꑤꄈꊈꇬꏮꄉꍤꄻꌠꄹꏦꄻꄉ,ꉹꁌꏢꁮꍹꈔꌤꃆꏱꄻꊋꃤꀉꒉꃅꇱ。ꍹꈔꊿꆶꌊꇿꇬꑟꁧꄿꂿ,ꐯꇯꒃꈢ、ꏦꃤꌊꀞꄻꌶ。ꍹꈔꌠꏭꁏꌠꇩꏤꏦꄻꌠꄹꎆ,ꍬꏦꍤꄻꍞꍤꉻꑫꉱꑷꌠꍤꆗꐴꀖꐽꈉꋈꄻ。ꍹꈔꀋꀬꐨꄻꀉꇨꃅꄉ,ꍹꈔꀋꉆꌠꉍꈄꎺꈬꃅꄉ,ꍹꈔꀋꏾꌠꑴꐚꐨꀉꇨꇁꎻ,ꀋꆏꃅꊋꇤꄉ꒺ꂱꒉꐚ、ꏲꃆꐙꎴꌠꊌꀐ。

  (ꏃ)ꄈꌋꆀꇩꏤꍞꊟꉻꑫꄻꐛꒆ。ꄈꊨꏦꑴꅉꌃꎴꄐꊋꄻꀉꇨꇬ,ꁧꀦꆏꄈꅿꊨꏦꍞꊟꌋꆀꉹꁌꍞꊟꌠꄻꀉꇨꃅꄉꌶ。ꊋꀥꇱꄉꌅꈌꌫꄻꌠꇬꏢꑲꌋꆀꍞꊟ,ꏓꂱꁳꌅꈌꍞꊟꎻ,ꌅꈌꁳꈨꑭꇂꃴꄉꌫꄻꎻ,ꌅꈌꈢꄹꏦꈐꊐꄉꌶ。ꉎꄉꐰꑟꌠꎀꍹꍞꊟꌠꃅꀉꇨꇁ,ꐰꄉꉎꑟꌠꋯꁦꍞꊟꌠꄻꃪ,ꋍꊐꌠꐮꍞꊟꌠꂿꄐꋊꇤꅐꇁ,ꊋꀥꇱꄉꄈꑼꏲꌋꇥꀯꏭꑍ꒜ꑍꏲꂠꍞꊟ。ꃹꅼꃅꍔꍞꏮꉜ,ꌤꃆꌋꅜꄉ、ꋌꇷꇙꀋꋏꇬꎷꌠꏓꐛ,ꏮꉜꏮꍤꌠꐰꉎꐮꐊꃅꌠꍞꊟꈄꏍꄻꐛ。ꃹꅼꃅꇩꏤꍞꍤꏦꉻꄺꀱ,ꃅꉚꌤꃅꌠꌌꇩꏤꑭꊂꃅꃅ,ꇩꏤ、ꌜ、ꏃ、ꑤꍞꍤꊈꑼꉼꊥꇫꋈꄻꄉ,ꄈꅿꍬꏦꍤꄻꌤꏲꅉꐊꄉꐯꇯꌤꀞ,ꄉꉻꌅꈌꃄꌬꌠꉻꌤꃅꊿꈁꐥꌠꏭꍞꍤꉱꑷꌐꌠꃅꇫꑟ。ꇩꏤꍞꍤꏦꃤꏤꄻ,ꏦꃤꈴꄉꍞꍤꊈꑼꉼꃅꎁꌅꈐꌋꆀꍤꄻꇇꁈꄻꁵ,ꄻꋍꈚꎼꄉꌌꍤꄻꌠꌌ“ꑍꑵꏤꄉ”ꃅꌠꏁꁈꎃꊐ。ꍤꌗꏲꂠꏦꉻꄺꀱ,ꏓꌗꏦꉻꋈꄻꐛꒆ。ꄈꏓꋍꃱꃅꄐꇺ、ꐊꑷꃅꉱꑷ、ꋦꒉꑘꅐꌠꍞꊟꉻꑫꏓꄻ,ꄈꈏꇓꍞꊟꌠꌌꇩꏤꌤꏲꅉꍞꊟ、ꋯꁦꍞꊟ、ꏦꌬꍞꊟ、ꉹꁌꍞꊟ、ꈋꍣꍞꊟꌋꆀꐮꐊꎼꇁ,ꍞꊟꏓꊋꄻꀉꇨ。

  (ꉆ)ꐊꑷꃅꌅꈌꌬꄐꅍꄻꀉꇨ。ꊿꊯꌕꂡꎖꌠꐧꋦꉪꏦꇩꏤꀉꒉꂷꏲꂠꇬ,ꉪꊇꄈꆏꍔꍞꀉꇨꈭꐨ,ꉈꑴꄐꅍꑌꀉꇨꌶ。ꌶꄻꄐꅍꄻꀉꇨ,ꄈꑭꊂꃅꌶꄻꇮ、ꃄꄻꀬꌠꐥꀹꀊꅼꌠꄺꑣ,ꂷꇻꌦꉪꏦꌶꄻꉹꌠꍔꄈꋈꄻ,ꌶꄻꇩꏤꀉꒉꌠꋈꄻꌠꄹꇙ。ꍔꍞꏃꂠꄐꅍꄻꀉꇨ,ꀋꎪꃅꄐꇐꉪꏣ、ꏀꀺꉪꏣ、ꏡꃏꉪꏣ、ꏦꏲꉪꏣ、ꂫꑟꉪꏣꐥꇬꎷ,ꄈꅿꈛꏦꌐꏦꏱꁈꈆꑪꃅꏤꄻꌋꆀꏟꈯꃅꃄꌬ,ꄈꃅꇴꄉꉻꏓꏲ、ꋍꑞꋍꁆꏯꋮꄮꌠꃅꑞꅉꑟ。ꄺꀱꏀꀺꄐꅍꄻꀉꇨ,ꋦꄉꏀꀺꌠꉌꊈꉻꑊꐥꇬꎷ,ꃶꐚꐛꐨꈴꄉꁧꀿꐨꐥꃅꌤꃅꌠꄹꇙꑲꌧ,ꐯꏑꈄꏍꇮꇐꌋꆀꈴꌗꈴꇇꁈꌬꄉꌤꃅꑲꌧ。ꈆꑪꀻꎆꌠꄐꅍꄻꀉꇨ,ꀊꏀꃅꀻꎆꌠꉪꉻꃄꌬꑲꌧ,ꀋꆏꃅꐛꊂꀊꏀꌠꀹꄻꀻꎆ。ꏦꃤꈴꄉꌅꈌꌬꄐꅍꄻꀉꇨ,ꐳꃅꄈꁵꏲꂠꎻꌠꌋꆀꄈꋈꄻꋍꑞꋍꁆꏯꉱꑷꌠꄈꈏꇓꏦꇗꄹꏦꉻꑫꏓꐛ,ꇩꏤꍔꌅꌤꏲꅉꏭꏲꂠꌠꊋꀥꇱꌋꆀꄻꃪ。ꉹꁌꌤꃅꄐꅍꄻꀉꇨ,ꉹꁌꌤꃅꏦꉻꉺꏦꌋꆀꃄꄟꏡꁈꏀꀺ,ꇪꉼ、ꌠꏀꄨ、ꌋꅪꐊꏑꉼꑠꁥꏓꎀꍹꄹꇙꌊꍔꍞꐨ、ꂴꅑꐨ、ꉹꁌꐨꄻꀉꇨꇁꎻ,ꉹꁌꏭꑌꑲꌠꇢꈴꂿꄐꋊꇤꅐꇁ,ꏓꂱꉹꁌꋍꏅꌠꊥꇫꄕꊪꌊꀋꎪꀋꑴꃅꄈꊂꈹ。ꃅꇫꑟꌠꄐꅍꏟꈯꃅꒃꉇꌠꄻꀉꇨ,ꅇꀋꎪꌠꉉ、ꌤꃶꐚꌠꃅ、ꏡꁈꃶꐚꌠꏂ、ꃶꐚꈲꁧꎹꈹꇬꎷ,ꃅꆗꆳꅸꏭꃅꀕꌠꌋꆀꀊꉗꃅꑆꊋꅐꌞꌠꊜꋽꃅꌌꐮꐊꎼꇁ,ꈢꇓꀖꊋꋠꌠꇔꑣꀬꃅ,ꎸꇺꋯꌠꉌꊈꌌꄉꋍꑞꋍꐘꌤꃅꋒꃅꑭꋧꃅꉾꌶ。ꆽꀠꉆꐨꄩꊋꌠꄐꅍꄻꀉꇨꇁꎻ,ꋍꑞꋍꁆꏯꆽꀠꉆꐨꄴꏮꋏꌫꉺꏦꄻꐛꒆ,ꋍꑞꋍꑵꐮꄙꐨꌼꇪꌠꀞꄻꉔ,ꁨꆹꈝꃀꇬꋍꑞꋍꑵꊋꋠꊜꊋꌠꄩꊋꀬ,ꏟꈯꀕꃅꌤꃅꑴꇙꌅꈌꒃꌫꄉ。

  ꐋꀨꊈ!ꌤꑘꇰꀋꃀꌠꆹꀋꎪꃅꄈꀉꇨꌠꁳꏲꂠꎻꌶ。ꉪꊇꄈꆏꊨꏦꋈꄻꋒ、ꋈꄻꀉꇨ,ꄈꈍꄮꑌꏓꂱꌋꆀꉪꌊꋍꈚꑟ、ꃅꌊꋍꈚꑟꌠꄉꀧꄉꄷꆏ,ꀋꎪꃅꍏꇩꏓꂱꇰꀋꃀꌠꉪꐨꊐꄉꌠꄇꇉꏃꂠꌊꒈꂃꒊꆱꄡꄉꀒꁨꆹ,ꊋꐛꃅꆹꌊꁤꇅꀕꌠꅶꁉꑟꄎꌠꉬ!

  ꐋꀨꊈ!ꍏꉸꊿꋅꆹꈁꄽꎬꅧꋺ、ꈌꊰꇁꀋꉆꇰꀋꃀꌠꊿꋅꁯꉬ,ꍏꇩꏓꂱꆹꌳꉔꀬꅑ、ꑴꇨꉌꀋꊰꌠꇰꀋꃀꌠꏓꂱꉬ,ꍏꇩꇭꍣꄈꆹꉈꈽꀬ、ꊋꐛꀬꌠꇰꀋꃀꌠꍔꄈꉬ。ꐩꋊꏮꇉꀋꆏꃅꀒꁨꉜꄉꆹ,ꐥꋊꒈꂃꈤꇁꑖꀋꉬ。ꐩꋊꆏꊿꀋꎪꌠ、ꀒꁨꂵꊿ、ꉇꄙꊿꏭꀉꄂꉜꄻꌠꉬ,ꀒꉭꊂꉫꌠ、ꐵꑷꃱꑿꌠ、ꇨꌠꏦꊿꏭꇁꀋꉚꌠꉬ。ꄈꑭꊂꀋꎪꃅꎬꅧꃅꉈꈽ、ꄉꄡꒉꉌꄡꊸꌠꃅꇏꐥꇬꎷ,ꃅꑍꃅꉖꊾꇁꀋꉚ、ꈊꎸꃅꇑꅔꄉꃅꇫꑟꌠꉌꊈꑌꄉ,ꊋꇤꄉꃅꋊꀊꏀꋎꌠꎴꆹꏷꈜꈴꋒꌶ。ꄈꑭꊂꀋꎪꃅꑴꐚꃅꄈꅿꋯꑌꋍꃱꃅꌠꀧꌋꃅ,ꄈꌋꆀꏓꂱꉹꁌꃷꅍꆊꅪꐮꑌꑲꄉꇬꎷ,ꇩꏤꑭꊂꊿꋅꈁꐥꌠꏓꂱꀉꒉꃅꐮꋯꑌꌠꄻꈫꈈ,ꊋꀥꇱꄉ꒺ꈐ꒺ꉈꍏꉸꌺꇖꀉꒉꃅꐮꋯꑌ,ꋯꑌꉆꌠꊋꃤꈁꐥꌠꃅꋯꑌꄉ,ꉌꊋꋍꏢꃅꊋꇤꄉꍏꉸꊿꋅꇰꀋꃀꃅꀱꌄꆣꇁꌠꊫꂫꁤꇅꀕꌠꇬꉜꄉꆹꌶ。

  ꌠꏀꌄꆣꆏꇩꏤꌄꆣꇁ,ꌠꏀꀉꇨꆏꇩꏤꀉꇨꇁ。ꌠꏀꋎꌠꉪꐨꐥ、ꄐꅍꐥ、ꆸꄜꄎꑲꆏ,ꇩꏤꆏꊫꂫꐥ,ꊿꋅꆏꉘꇉꐨꐥꌠꉬ。ꍏꇩꉪꐨꆹꐩꋊꃤ、ꀋꃋꐛꐨꃤꉬ,ꉈꑴꃆꏂꊂꑋꃤꑌꉬꌠ;ꉪꊇꋋꋏꃤꉬꌠ,ꀊꅰꃅꌠꏀꋎꌠꃤꉬꌠ。ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꄽꂫꆏꋍꋏꇈꋍꋏꌠꌠꏀꊪꊛꄉꉈꈽꌠꇬꄉꐛꐈꌊꃶꐚꌠꐛꌠꉬ。ꄈꑭꊂꆏꌠꏀꉈꇬꌋꆀꀨꎹꌶ,ꋀꊇꊿꐥꄞꅐꌠꃅꇫꑟꌠꎁꃅꃄꅉꑽꅉꄴꋉ。ꌠꏀꋍꏅꌠꆏꉪꅉꉪꉻꑌꈬ,ꉪꅉꀊꐯꃅ,ꐰꄔꉎꀋꎪꃅ,ꃅꋊꇬꃅꀬꏿꀬꌠꊿꄻ,ꍏꇩꉪꐨꃅꇫꑟꌠꃶꐚꃄꄻꅉꇬꄉꏀꑍꉪꐨꄝꐚꎻ,ꏓꂱꈲꁧꎁꃅꀋꆏꃅꉈꈽꌠꇬꄉꑆꊋꅐꌞꌶ!

  ꐧꋦꉾꃪꌠꋈꄻꌠꆹ,ꉹꁌꋍꏅꎁꃅꌠ。ꈬꉐꃘꊰꎖꃪꐽꎏꉻꆏꐥꌠꃄꅉꀊꐯꌠꇬꉆꄉ,ꉬꄙꎖꈎꍏꉸꊿꋅꀊꉗꃅꄉꉈꈽꏓꊭꎼꇁꌠꁱꀕꈲꋌꏶꅝꄉ,ꊿꊯꌕꂡꎖꐥꌠꍏꇩꏓꂱꏓꐛꌠꊋꃤꀉꇨꌠꆹ,ꉪꊇꍏꇩꐛꐨꐧꋦꉪꏦꈝꃀꍬꇬ,ꃅꋊꃄꅉꑽꅉꋍꉎꀋꐥꃅꀊꐯꌠꐥ,ꐩꋊꈏꐊꇐꀊꅼꐯꀊꅼꌠꐥ,ꁨꆹꏤꊋꀉꇨꐯꀉꇨꌠꐥ。ꄈꑭꊂꇩꏤꑭꊂꊿꋅꈁꐥꌠꏓꂱꆏꑖꑟꃅꋯꑌꌊꄈꍏꑷꈭꇍꄉ,ꍏꇩꐛꐨꐧꋦꉪꏦꁈꁧꇰꀋꃀꌠꀊꂥꃅꐕꄉ,ꋦꄉꏀꀺ,ꀂꏾꈎꄉꌤꃅꄉ,ꐛꏀꈴꋈꄻꌠꄹꎆ、ꁍꇩꏓꋍꃱꃅꌠꃅꊋꐛ、ꋧꃅꄮꐽꌠꀧꌋꃅꌋꆀꐯꇯꀻꎆꌠꊥꎆꌠꐩꋊꂿꃆꀉꒉꌕꐘꌠꃅꇫꑟꌠꎁꃅ,ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ、ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟ、ꏓꂱꐥꐨꉾꃪꌠꉪꌠꃅꇫꑟꌠꎁꃅꐪꊛꄉꉈꈽꌶ!
ꁰꒌ




  • 特别鸣谢
    中国民族语文翻译局彝文翻译室